1

¹ Uiwy­riaꞌin tawa Wiripu piaria mesup atipo­ꞌoro miwan ehowawi. Uito ti Pauru iꞌewyte uhaꞌyru Timoteu toĩneꞌen mesuwe uiwywo. Miꞌi kuekatu toꞌe hap ipoꞌoro wy. Uruto ti Tupana mipo­ꞌoro Aipo­typot koro Iesui eropat haria sese uruto. Mesuwat einãpin hamuat hap atipo­ꞌoro ehowawi yne Tupana mẽpytꞌin tawa Wiripu piaria muꞌe hamo. Iꞌewyte eiꞌakag koꞌi kape iꞌewyte aiꞌa­pykok haria kape yne Aipo­typot Iesui mohey haria kape atipo­ꞌoro mesuwat uimiwan are."

² Pyno meiũpepyi uruhẽtup Tupana pe ehowawi — Uruꞌywot etum o Esaꞌyru mohey haria pe tawa Wiripu totiaria pe woꞌo­kyꞌe hap iꞌewyte woꞌo­wese hap Uruka­ꞌiwat Urupo­typot Iesui mõtypot hamuat hap uruhẽtup. Etiꞌa­tu­poi­tyro miꞌiria egyiꞌat hamo urutoꞌe."

³ Tupana karãpe arewa­nẽtup aiwy­riaꞌin tawa Wiripu piaria kape miꞌi hawyi uimo­wepit kahato. Arehum ewawi are Tupana pe ehowawi are."

⁴ Pywo uiwy­riaꞌin karãpe ahẽtup Tupana pe eipoi­tyro hamuat hap miꞌi turan uiwepit kahato hap wywo ahẽtup ehupi are."

⁵ Katu­pono uimo­wepit kahato eipe katu­pono saꞌa­wyꞌi mesup te uipo­wyro kahato haria eipe. Miꞌi pote arehum kahato Tupana kape ehupi katu­pono Tupana potpap nug hap uianuat powyro haria eipe."

⁶ Saꞌa­wyꞌi wato­mohey Iesui hawyi Tupana mieha­kye­raꞌat hanuaria wato­py­huꞌat. Toha­ꞌa­wynug aheha­kye­raꞌat hap hawyi yt aiꞌatoiat hin i e. Yne eꞌat pe haꞌa­wy­tepyi mesup te mũki­ꞌite aheha­kye­raꞌat kuap hat Iesui topy­huꞌat. Poꞌog poꞌog yne eꞌat pe aimoe­saika kahato tewaku hap nug hamo. Aheha­kye­raꞌat kahato haꞌa­wyte mesup te Haꞌyru taꞌaipok Aipo­typot no hap kape mesuwat yi kape taꞌaipok hap kape aheha­kye­raꞌat hamuat wuatꞌi eꞌat piat hap kape. Yt uheso hin i are. Topy­huꞌat kahato aipyꞌa pe Iesui wuatꞌi eꞌat pe. Ipotpap kahato aiwa­nẽtup hawe aimoe­waku kahato hamo. Yne eꞌat pe miꞌi hap koꞌi wyti waku wato­mohey e.

"

⁷ Uiwa­nẽtup hawe iꞌewyte uipyꞌa pe waku kahato eipe. Waku miꞌi tã areꞌe katu­pono uikai kahato eipe Iesui potpap nug haria uito ewy eipe pote are. Eweimohey kahato Iesui ehay uito ewy pote uiwa­nẽtup hawe waku kahato eipe are. Karãpe iraniaꞌin tiꞌa­tu­mohit eipe Iesui ehay moherep ehepiat pote yt eiwe­mõti hin i. Yt eiwepyk hin i iꞌatu­mi­ky­ryꞌi kahato pytkai maꞌato poꞌog eweiꞌa­tu­muꞌe. — Waku wato­mohey Iesui ehay pakup waku watoꞌe ahewa­nĩ­kaptia pe yt kat i aiwe­mõti hap wywo are. Waku wati­ꞌa­tu­muꞌe miitꞌin katu­pono Tupana aiꞌairo tehay moherep hamo. — Tupana urunug ehay Esaꞌyru etiat moherep haria areꞌe at kaꞌap Tupana pe. Saꞌa­wyꞌi Tupana ahytpok kahato tehay wakuat Iesui etiat hytpok hamo miitꞌin me. Maꞌato koran uipyhik taꞌyn sura­raꞌin woꞌo­pyhyp hawe maꞌato miꞌi pytkai ahytpok te sehay wakuat Iesui etiat meiũpe woꞌo­pyhik hawe.

"

⁸ Woro­ho­ꞌo­kyꞌe kahato eipe. Tupana tikuap yt uheso i hap. Aikotã aikotã Aipo­typot Iesui eikyꞌe hap ewy uito woro­ho­ꞌo­kyꞌe haty uipyꞌa piat wywo woro­ho­ꞌo­kyꞌe."

⁹ Miꞌi tã areꞌe Tupana pe — Uruꞌywot etum no esaika hap emohey haria pe tawa Wiripu piaria pe iꞌatu­wo­ꞌo­kyꞌe hamuat hap poꞌog poꞌog yne eꞌat pe areꞌe Tupana pe ehupi. Atiky­ꞌesat yne miꞌiria ehay yne pywuat kuap haria wo hap poꞌog poꞌog saꞌa­wy­ꞌiwuat kai. Taꞌi atiky­ꞌesat kahato miꞌiria ikuap kat som waku kat som yt naku i hap kuap hamo ewanẽtup hap ok tã."

¹⁰ Etum iꞌatuepe esaika hap poꞌog wakuat airo hamo. Miꞌi tã etunug pote eꞌewy tukup­teꞌen yt kat i saꞌag nug hap iꞌatukai. Miꞌi tupono Esaꞌyru taꞌaipok Morekuat no mesuwat yi kape turan uwe waku uwe yt e hamo Wiripu piaria emohey haria yt teꞌe­ru­we­mõti hin i miꞌi hap eꞌat pe."

¹¹ Tupana etunug o miꞌiria waku nug hanuaria wo are. Etunug miꞌiria iꞌatuieĩ­neꞌen hap tote wakuat eiam mo kahato are. Atiky­ꞌesat miꞌiria aikotã Esaꞌyru Iesui ewaku hap ewy tukup­teꞌen. Ewaku hap ewywuat wo etiꞌa­tunug miꞌiria. Tupana miꞌi etunug mote emõtypot haria wo kahato tukup­teꞌen miꞌiria are. Waku kahato En iꞌatuꞌe aru ewawi iraniaꞌin areꞌe Tupana pe. Pyno mio tã ahẽtup mesuwe ehetiano Tupana pe.

"

¹² Uheywytꞌin uheinytꞌin atiky­ꞌesat eweikuap uhetiat morekuat uipyhik taꞌyn woꞌo­pyhik hawe areĩneꞌen maꞌato miꞌi pytkai sehay wakuat Iesui etiat yt taꞌa­tu­pyhyp hin i. Yt taꞌa­tu­pyhyp kuap i ihay maꞌato uipyhik hawe areĩneꞌen pote poꞌog ikuap haria teꞌe­ro­py­huꞌat."

¹³ Miꞌi pote koitywy morekuat esurara sem iꞌyat wato piaria sehay Iesui etiat kuap haria wo raꞌyn tukup­teꞌen. Iꞌewyte iraniaꞌin mesu­wa­rote woꞌo­pyhyp haria uikuap taꞌyn. — Taꞌi Pauru morekuat tipyhyp taꞌyn katu­pono Iesui tutunug Topo­rekuat no iꞌatuꞌe."

¹⁴ Miꞌi hawyi iraniaꞌin Iesui mohey haria yt teꞌe­ro­kenꞌẽ hin i aikotã saꞌa­wy­ꞌiwuat ewy. — Pauru toĩneꞌen woꞌo­pyhik hawe iꞌewyte aito waku watoĩ­neꞌen iꞌewywuat iꞌatuꞌe. Miꞌi hawyi yt teꞌe­ru­we­mõti hin i Aika­ꞌiwat Iesui ehay moherep hamo. Poꞌog poꞌog hesaika rakaria tukup­teꞌen mio imohey haria wo poꞌog poꞌog saꞌa­wy­ꞌiwuat kai. Iꞌatuehay pirik — Iesui ti Morekuat iꞌatuꞌe yt uwe pupi i teꞌe­ro­kenꞌẽ taꞌa­tu­henoi."

¹⁵ Taꞌa­tu­mo­herep kahato taꞌa­tuehay wo Aipo­typot etiat. Iraniaꞌin Tupana mohey hap kaipyi iꞌewyte uikyꞌe pote taꞌa­tu­muꞌe miitꞌin poꞌog saꞌa­wy­ꞌiwuat kai. Iraniaꞌin ihaꞌy­wywi uhetiat pote taꞌa­tu­ꞌa­tu­muꞌe miitꞌin poꞌog saꞌa­wyꞌiwuat kai. Iraniaꞌin yt uikyꞌe i pote uimohit teran taꞌa­tuehay wo. Miꞌi hawyi taꞌa­tu­ky­ꞌesat miitꞌin muꞌe hap poꞌog uikawiat hap."

¹⁶ Maꞌato iꞌatu kahato uikyꞌe haria. Miꞌiria tikuap taꞌyn Tupana miꞌairo uito hap. Taꞌa­tukuap Tupana uipo­ꞌoro tehay wakuat moheg miitꞌin wanẽtup hawiat miitꞌin pyꞌa piat tehay pywuat kuap hamo. Miꞌi pote uikyꞌe haria miꞌiria."

¹⁷ Maꞌato toĩ iraniaꞌin taꞌa­tu­mo­herep sehay wakuat Iesui etiat wen maꞌato yt kat i Iesui kyꞌe hap iꞌatuete. Iꞌatuehay se kahato wen maꞌato teꞌe­ru­we­mo­wato hap yn taꞌa­tukat taꞌa­tu­wa­nẽtup hawe. Yt Iesui mõtypot haria hin i miꞌiria taꞌa­tu­pyꞌa pe. Miꞌi tã watunug mote meiũran Pauru emiitꞌin yt uwe i iꞌatuꞌe raꞌyn taꞌa­tu­wa­nẽtup hawe. Pauru mimu­ꞌeria yne aipo pe hawyi haty kahato topy­huꞌat Pauru ete woꞌo­pyhik hawe teꞌe­roꞌe taꞌa­tu­wa­nẽtup hawe uimohit reran haype. Miꞌi pote Iesui ete taꞌa­tu­muꞌe miitꞌin taꞌa­tuehay se wywo uipo­hari teran haype."

¹⁸ Karãpe taꞌa­tu­mo­herep Iesui Aipo­rekuat nuat yt taꞌa­tu­mohey i pytkai miꞌi hawyi uimo­wepit kahato hap toĩneꞌen katu­pono iꞌatuehay kaipyi miitꞌin Iesui kuap haria tukup­teꞌen. Pyno yt arewa­nẽtup hin i sio miꞌiria Iesui kyꞌe hap mywo taꞌa­tu­muꞌe miitꞌin sio teꞌe­ru­we­mo­wato hap mywo taꞌa­tu­muꞌe miitꞌin. Yt atikuap i kat hamo miitꞌin taꞌa­tu­ꞌa­tu­muꞌe maꞌato miitꞌin taꞌa­tu­muꞌe Iesui etiat hap pote uimo­wepit hap topy­huꞌat yt atikuap pytkai i kan hamo taꞌa­tu­muꞌe hap are."

¹⁹ Pyno waku ewehẽtup o Ahetu­pana kape — Etihep o Pauru woꞌo­pyhik hap wyi eweiꞌe o are. Mio tã eweiꞌe pote atikuap arẽtem aru mesu­wepyi more­kuaria woꞌo­pyhik hap kaipyi are. Taꞌi atikuap aru Aipo­typot Iesui tipo­ꞌoro Topãꞌãu uihep mesu­wepyi hamo uiꞌa­pypok hamo are."

²⁰ Yt karãpe i atoiat teran Aika­ꞌiwat potpap nug hap uhepiat uipotpap nug hap. Uiku­ꞌuro hap kape Tupana mowepit hap yn uiwa­nẽtup hap yne eꞌat pe atiky­ꞌesat. Iꞌewyte mesuwe uipyhik hawe atimõ­typot teran Tupana maꞌato poꞌog mesuwe atiky­ꞌesat iraniaꞌin kai. Yt kat i uiwe­mõti hap atiky­ꞌesat maꞌato areĩneꞌen neran miitꞌin pupiat yt uikenꞌẽ i hap wywo. Atimõ­typot teran Aipo­typot mesuwe. Aipo­typot Iesui mõtypot hano areĩneꞌen neran uipyꞌa pyi uiwa­nẽtup hap kaipyi uhehay kaipyi. Yne uiminug koꞌi kaipyi atiky­ꞌesat imõtypot hap uheĩneꞌen hap turan. Iꞌewyte uiku­ꞌuro turan imõtypot hano areĩneꞌen neran are."

²¹ Pyno ahenoi ehepe kat hamo areĩneꞌen mesuwat yi tote. Aipo­typot Iesui mõtypot hamo yn areĩneꞌen uito. Miꞌi eropat hamo yn areĩneꞌen. Uiku­ꞌuro hawyi poꞌog atikuap Iesui mesu­wa­rotiat kai. Miꞌi tupono waku poꞌog areĩneꞌen uiku­ꞌuro hawyi."

²² Miꞌi pote atiꞌairo teran uiku­ꞌuro hap. Miꞌi hawyi areto Iesui kape kat pote areĩneꞌen neran iwywo maꞌato miꞌi pytkai yt woro­ho­ꞌo­ꞌatoiat reran i eipe katu­pono uiku­ꞌuro hawyi yt uwe i uito mesuwe eimuꞌe hanuat yt naku i. Miꞌi pote yt areto teran i. Poꞌog waku areĩneꞌen motꞌi mesu­wa­rote miitꞌin miat Iesui etiat muꞌe hamo are."

²³ Maꞌato areto teran Aipo­typot kape atipy kape. Atoiat reran uheĩneꞌen hap mesuwe katu­pono poꞌog waku itote. Pyno poꞌog waku uiku­ꞌuro are maꞌato — Miꞌi e hap yt ereꞌe i mio tã e. Wãiꞌe uiwa­nẽtup hawe areꞌe."

²⁴ Poꞌog waku ereĩneꞌen mesuwe e uiwa­nẽtup hawe. Waku poꞌog ereĩneꞌen Iesui mohey haria powyro hamo e uiwa­nẽtup hap. Ereĩneꞌen no mesuwat yi tote e uhepe."

²⁵ Pyno areĩneꞌen hap atikuap taꞌyn. Arepy­huꞌat eipy­ꞌa­setpiat hamo eimotag hamo imohey hap etiat eimo­wepit hamo are. Miꞌi hamo arepy­huꞌat mesuwat yi tote eipy­ꞌa­setpe."

²⁶ Meiũran aru areĩneꞌen eiwywo i raꞌyn. Miꞌi hap eꞌat pe ti aru waku pe watoĩ­neꞌen. Miꞌi hap eꞌat pe aru areĩneꞌen eipy­ꞌa­setpe. Miꞌi hap eꞌat pe ti aru watu­wehum kahato Aipo­typot Iesui ete tutunug muꞌap ehowawi hawyi are.

"

²⁷ Karãpe wati­mo­herep sehay wakuat Aipo­typot etiat miitꞌin me miꞌi turan waku aiweꞌeg wo o aikotã aikotã watoĩ­neꞌen iꞌatu­py­ꞌa­setpiat turan. Waku iweꞌeg kahato rakaria ewy watoĩ­neꞌen. Yt naku i wati­ꞌa­tu­muꞌe miitꞌin yt naku i nug haria aito pote. Aimi­mu­ꞌeria yt tiky­ꞌesat i ahehay Iesui etiat taꞌa­tu­puẽti yt naku i nug haria aito pote. Yt teke i iꞌatue­waure kaꞌa pe wakuat Iesui etiat aheĩneꞌen hap yt ikahu i pote are. Atiky­ꞌesat kahato wakuaria wo o eweikup­teꞌen sio areĩneꞌen eipy­ꞌa­setpe sio yt. Waku eweikup­teꞌen wakuat nug haria wo o itote yt uiwywuat pytkai i. Miꞌi hawyi yt areĩneꞌen i eipy­ꞌa­setpe pytkai sehay wakuat atikuap aru iraniaꞌin wẽ pyi ehetiat eiminug koꞌi piat hap wyti aru hap atikuap. — Taꞌi yt taꞌa­tu­ꞌatoiat hin i te Iesui mohey hap iꞌatuꞌe aru uhepe. Toꞌo­ꞌe­wy­ꞌewy wẽtup miit piit ewy iꞌatu­potpap e hap aru atikuap wy ehetiat. Taꞌi sura­raꞌin ewy tuꞌuka kahato saꞌag ete e hap aru atikuap wy. Iꞌewyte taꞌa­tu­ky­ꞌesat yne miitꞌin Iesui ehay wakuat mohey haria iꞌatuꞌe aru uhepe meiũpe yt heremo i areĩneꞌen eipy­ꞌa­setpe pytkai are."

²⁸ Yt erahaꞌat teiꞌo yi kape ewanĩ­kaptia pupi. Eweikup­teꞌen wanĩ­kaptia pyꞌa­setpe pote surara ewywuat ereĩneꞌen yt kat i eha yi kape. Miꞌi hawyi meremo taꞌa­tukuap — Taꞌi miꞌiria ti Tupana mowato haria iꞌatuꞌe. Miꞌiria poꞌog urukai iꞌatuꞌe taꞌa­tu­wa­nẽtup hawe teꞌe­ro­kenꞌẽ haype. Iꞌewyte eipe ti eweikuap taꞌyn Tupana toĩneꞌen eiwywo eipo­wyro hamo. Eweikuap taꞌyn Iesui eheha­kye­raꞌat hat sese topy­huꞌat.

"

²⁹ Are pãi waku kahato Tupana ainug Tosa­ꞌyru mohey hano. Waku kahato are. Waku wy Aipo­typot Iesui eropat hamo are. Iꞌewyte waku waho­ꞌopot miitꞌin miky­ryꞌi hap ete imohey hat aito pote."

³⁰ Pyno ahoꞌopot kahato mesuwe woꞌo­pyhik hawe aikotã surara tuꞌuka hap turan ewy. Pyno eweikup­teꞌen o uiꞌewy ahiag wuꞌuka hap surara ewywuat eiwu­ꞌuka kahato itote ahiag akit hamuat tawa Wiripu tote aikotã eweiꞌa­kasa uito hap ewy. Aikotã saꞌa­wyꞌiwuat hap ewy miꞌi hap ewy waku eweikup­teꞌen uhaipe­piaria eweikup­teꞌen surara ewywuat. Yt atoiat hin i te mesuwe ahiag wywuat wuꞌuka hap. Areĩneꞌen woꞌo­pyhyp hawe pytkai atuꞌuka atuꞌuka te. Taꞌi miꞌi hap eweikuap taꞌyn kat pote yne ikuap are.

"

2

¹ Uiwy­riaꞌin ahẽtup ehepe eikyꞌe hap wywo waku eweikup­teꞌen eweiwa­nẽtup Iesui etiat wẽtup miit piit ewy hap yn iꞌewyte Iesui kyꞌe hap ete wẽtup miit piit ewy yn waku eweikup­teꞌen ahẽtup. Miꞌi tã ewetunug mote uimo­wepit haria wo eweikup­teꞌen. Miꞌi tã eweikup­teꞌen mote uimo­wepit hap sese topy­huꞌat."

² Miꞌi hap ti ahẽtup ehepe katu­pono Aipo­typot Iesui mohey hap kaipyi wati­puẽti raꞌyn awemo­wepit sese hap. Miꞌi hawyi Ipãꞌãu topy­huꞌat raꞌyn ahepe. Miꞌi hawyi wato­ꞌoehay iwywo miꞌi hawyi iraniaꞌin Iesui mohey haria kape woꞌo­wese hap topy­huꞌat woꞌo­kyꞌe haria wo watu­kup­teꞌen. Miꞌi pote ahẽtup ehepe wẽtup miit piit ewy yn eweikup­teꞌen Iesui wywo hap. Miꞌi tã ewetunug mote uimo­wepit kahato eipe."

³ Uiwy­riaꞌin yt naku i yt ehegyiꞌat i rakaria ewy eweikup­teꞌen. Yt ewetunug teiꞌo — Uito poꞌog eiꞌe hamuat hap neꞌi are. Yt ewetunug neiꞌo — Uito poꞌog e hano. Poꞌog waku watoĩ­neꞌen kurin hano kahato iraniaꞌin mõtypot hamo. Yt eweiꞌe teiꞌo eipyꞌa pe — Uito poꞌog mekewat miit kai yt eweiꞌe teiꞌo eiwo­ꞌope e."

⁴ Yt erewa­nẽtup kaꞌap teiꞌo eimi­ky­ꞌesat nug hap kape eimi­ky­ꞌesat koꞌi ete. Poꞌog waku watu­wa­nẽtup at kaꞌap iraniaꞌin miky­ꞌesat nug hap ete."

⁵ Poꞌog waku aiwa­nẽtup hap Aika­ꞌiwat Iesui wanẽtup hap ewy katu­pono tuwe­mohit kahato ihaky­ꞌeꞌi kahato miit emiit no topy­huꞌat."

⁶ Tupana wo toĩneꞌen Iesui pytkai tuwe­mohit. Saꞌa­wyꞌiwuat eꞌyianmete toĩneꞌen Tupana wo. Miꞌi pytkai tuwe­mohit. Tut ahowawi hawyi yt toꞌe i — Arenug Uito mesuwe Tupana wo yt e i Tupana raꞌyn pytkai."

⁷ Miꞌi hawyi tuwepyi totoiat yne mekewat tuweTu­pana hap koꞌi hawyi tuwe­mohit miitꞌin eropat hano. Tuwenug miit no miit sese wo topy­huꞌat. Aipiit ewy kahato topy­huꞌat."

⁸ Iesui yt tuwe­mo­wato hin i maꞌato karãpe Tupana toꞌe — Atiky­ꞌesat ekuꞌuro hap miitꞌin ehakye­raꞌat hamo miꞌi hawyi toiwesat — Waku Papai e yt tomi­ky­ꞌesat ewywuat pytkai i. Maꞌato — Atiky­ꞌesat ekuꞌuro hap ariaꞌyp posak ete e Tupana hawyi — Atunug aru Papai e Iesui."

⁹ Tutunug Toꞌywot miky­ꞌesat ewy miꞌi pote Tupana timo­wato kahato Iesui. Miꞌi hawyi iꞌewyte Iesui set toimo­wato. Miꞌi pote poꞌog yne set kai topy­huꞌat."

¹⁰ Meiũran aru yne yne tuwe­pỹ­ꞌã­tutuk Uhaꞌyru kape e ti Tupana. Atipy piaria yne teꞌe­ru­we­pỹ­ꞌã­tutuk e Uhaꞌyru mõtypot hamo iꞌewyte yne yi totiaria teꞌe­ru­we­pỹ­ꞌã­tutuk imõtypot hamo iꞌewyte yne yi ywytꞌok­py­piaria teꞌe­ru­we­pỹ­ꞌã­tutuk Uhaꞌyru mõtypot hamo e ti Tupana."

¹¹ Miꞌi hap eꞌat pe yne yne toꞌe — Pywo ti pywo ti Iesui Tupana Mipo­ꞌoro Aipo­rekuat nuat Aika­ꞌiwat koro wuat iꞌatuꞌe aru torania. Tuwe­mohit kahato saꞌa­wyꞌi Iesui miꞌi pote ti aru Tupana timo­wato kahato Aika­ꞌiwat. Mekewat eꞌat pe yne yne — Tupana iꞌatuꞌe Emipo­ꞌoro Aipo­rekuat nuat Aika­ꞌiwat sese hap uruikuap taꞌyn iꞌatuꞌe. Uruimõ­typot kahato En iꞌatuꞌe. Uruꞌywot sese En iꞌatuꞌe aru. Maꞌato aito aikotã Iesui tuwe­mohit waku watu­we­mohit ewy are."

¹² Uheka­tu­wy­riaꞌin uimi­ky­ꞌeria kahato eipe. Saꞌa­wyꞌi areĩneꞌen eipy­ꞌa­setpe eimuꞌe hamo. Mekewat eꞌat pe woro­ho­ꞌo­nãpin kahato kat som kat som Tupana tiky­ꞌesat ewetunug hap. Miꞌi hap eꞌat pe waku pe eweikup­teꞌen. Einãpin hap ewetunug yne maꞌato mesup yt areĩneꞌen i eipy­ꞌa­setpe katu­pono morekuat woꞌo­pyhik hawe areĩneꞌen miꞌi pote yt uwe i uito eipy­ꞌa­setpe. Miꞌi pytkai ti atiky­ꞌesat kahato eweikup­teꞌen uhehay upi. Yt uwe i uito itote pytkai ewetunug o einãpin hap koꞌi are maꞌato poꞌog poꞌog saꞌa­wyꞌiwuat kai uiꞌe hap ewy atiky­ꞌesat kahato ewetunug wakuat nug hap koꞌi. Waku eweikenꞌẽ yt naku i nug hap pupi Aikotã aityry hap ewy eikenꞌẽ hap. Waku watunug Tupana miky­ꞌesat koꞌi yn Tupana miha­kye­raꞌat aito pote. Waku watoĩ­neꞌen Tupana miha­kye­raꞌat koꞌi wo wato­py­huꞌat. Miꞌi hawyi karãpe miitꞌin teꞌe­ra­ꞌa­kasa aiminug wakuat kape hawyi — Pywo iꞌatuꞌe miꞌiria ti Tupana miha­kye­raꞌat koꞌi wo iꞌatuꞌe."

¹³ Are pãi Tupana tiky­ꞌesat kahato watunug tomi­ky­ꞌesat ewywuat hap. Miꞌi pote ainãpin at kaꞌap aiwa­nẽtup hawe kat som kat som waku watunug hap. Karãpe aiwẽ pyi yt watunug neran i imiky­ꞌesat koꞌi miꞌi hawyi perupꞌi popuo aimuꞌe aiwa­nẽtup hawe — Etunug o etunug o e. Miꞌi hawyi meiũran — Waku Uhyt waku Mimi watoꞌe Tupana pe katu­pono toiky­ꞌesat kahato tehay upiat watuwat hap."

¹⁴ Karãpeĩ watu­we­potpap Tupana miky­ꞌesat nug hap ete waku watuwat sese imiky­ꞌesat hap upi. Yt naku i watoꞌe — Emiky­ꞌesat koꞌi yt atiky­ꞌesat i yt naku i watoꞌe. Iꞌewyte yt naku i watu­ꞌuka miitꞌin ete are. Karãpe watunug Tupana miky­ꞌesat turan yt naku i watoꞌe tope — Yt atiky­ꞌesat i emiky­ꞌesat nug hap koꞌi yt naku i watoꞌe. Yt naku i watu­ꞌuka Tupana miky­ꞌesat ete aipyꞌa pe aiwa­nẽtup hawe are."

¹⁵ Maꞌato yne miꞌi tã imiky­ꞌesat ewy watunug mote Tupana mẽpytꞌin wakuaria wo wato­py­huꞌat yt kat i saꞌag nug haria wo are. Aikotã aimẽpyt kurin kat yt tutunug kuap i saꞌag hap ewy wato­py­huꞌat waku kape yn aiwa­nẽtup hap. Koitywy watoĩ­neꞌen yt naku i nug haria pyꞌa­setpe iꞌewyte teꞌe­ru­wa­nẽtup at kaꞌap saꞌag nug hap ete yn. Miꞌiria tukup­teꞌen aikotã iꞌypyryp we wãtym sese turan wuat ewy yt naku i nug haria yn miꞌiria pote. Maꞌato waku aito Iesui mohey haria waikiru koꞌi ewywuat wato­py­huꞌat aikotã waikiru wãtym sese turan hẽtyhot rakaria ewy aikotã waikiru koꞌi aimuꞌe wãtym muo aikope muꞌap toĩneꞌen aikope waku ahewyry. Miꞌi hap ewy waku wati­mo­herep hoꞌo­wasat rakaria pe muꞌap Tupana kapiat."

¹⁶ Katu­pono wati­mo­herep kahato miitꞌin me muꞌap Tupana kapiat aikotã waikiru hẽtyhot wãtym muo hap ewy wato­py­huꞌat. Meiũran Aipo­typot Iesui putꞌokꞌe mesuwat yi tote yne aiminug moherep hamo sio waku sio yt e hamo. Miꞌi hap eꞌat pe uimo­wepit haria wo eipe katu­pono miꞌi hap eꞌat pe wuatꞌi ehamo — Miꞌiria ti uhemiit sese. Miꞌiria ti uhehay moherep haria sese e aru Iesui ehepiat. Mio tã toꞌe hawyi uimo­wepit kahato hap topy­huꞌat katu­pono eipe uimi­mu­ꞌeria sese pote. Taꞌi arehum kahato itote katu­pono yt eweipun hin i einãpin uhepiat hap. Miꞌi hawyi Tupana tuwehum kahato topotpap nug haria ete."

¹⁷ Koitywy sura­raꞌin uipyhyp taꞌyn mesuwe. Yt taꞌa­tu­ky­ꞌesat i poꞌog woro­ho­ꞌo­muꞌe hap maꞌato uiꞌauka pote uiꞌauka are maꞌato miꞌi pytkai yt karãpe i woro­ho­ꞌo­ꞌatoiat eimuꞌe hap ete katu­pono atiky­ꞌesat yne eipe Iesui mohey haria wo hap. Uhuu okpun eika­wiano pote uiku­ꞌuro Tupana mowepit hap topy­huꞌat are."

¹⁸ Uiwy­riaꞌin woro­ho­ꞌo­mo­wepit reran kahato uheĩneꞌen ne turan iꞌewyte uiku­ꞌuro hap turan. Uiꞌauka pote meremo areĩneꞌen Aika­ꞌiwat yatype iꞌewyte meremo uimo­wepit hap sese topy­huꞌat. Uiꞌauka pote waku eiwe­mo­wepit wy atiky­ꞌesat katu­pono uiꞌauka pote areĩneꞌen uimo­wepit hat yatype are.

"

¹⁹ Uiwy­riaꞌin atipo­ꞌoro teran aiwy Timoteu ehowawi katu­pono atiky­ꞌesat kahato atikuap teran aikotã eweikup­teꞌen hap sio waku sio yt hap kuap hamo katu­pono miꞌi atikuap hawyi uimo­wepit kahato hap topy­huꞌat. Miꞌi pote atipo­ꞌoro teran uhaꞌyru Timoteu ehowawi. Miꞌi pote ahẽtup Aipo­typot Iesui kape — Etipo­ꞌoro Timoteu aiwy­riaꞌin tawa Wiripu piaria kape are at kaꞌap ahẽtup. Miꞌi hawyi atimohey kahato Aika­ꞌiwat Iesui tipo­ꞌoro meremo Timoteu ehewawiat hap. Meiũran ti aru taꞌaipok hawyi uimo­wepit kahato hap topy­huꞌat imienoi."

²⁰ Timoteu uiꞌe­wywuat eikyꞌe kahato hat are. Miꞌi aikotã woro­ho­ꞌo­kyꞌe hap ewy eikyꞌe. Miꞌi hawyi yt uwe i uhemiit Timoteu ewy eikyꞌe hat. Timoteu woro­ho­ꞌo­kyꞌe kahato e hat pãi."

²¹ Iraniaꞌin teꞌe­ru­wa­nẽtup at kaꞌap taꞌa­tu­mi­ky­ꞌesat nug hap kape yn. Miꞌi kape yn teꞌe­ru­wa­nẽtup. Kat som kat som Aipo­typot Iesui tiky­ꞌesat Tupana wanẽtup hap yt iꞌatu­wa­nẽtup hap ewy hin i."

²² Maꞌato aipo­wyro kahato Timoteu. Yt iraniaꞌin ewywuat hin i katu­pono miꞌi ipotpap at Aipo­typot ehay wakuat moherep miitꞌin kapiat hap ete yn ipotpap. Miꞌi hap kaipyi eweikuap kahato Timoteu Tupana eropat hat sese hap. Uiꞌe­wywuat kahato toĩneꞌen Timoteu. Taꞌi urupotpap Iesui ehay moherep hap ete uruto­ꞌo­ꞌewy kahato urupotpap aikotã aiꞌywot tosa­ꞌyru wywuat ipotpap hap ewy urupotpap uito Timoteu wywo."

²³ Meiũran aru atiky­ꞌesat kahato atipo­ꞌoro uhaꞌyru Timoteu ehowawi. Meiũran karãpe atikuap kat som more­kuaria tunug uhepe sio wakuap sio yt. Miꞌi hawyi atipo­ꞌoro ehowawi Timoteu henoi ehepiat hamo."

²⁴ Uito iꞌewyte areto teran ehowawi miꞌi pote areꞌe at kaꞌap — Uruka­ꞌiwat woro­mohey kahato En are. Miꞌi pote ahẽtup ewawi uihep o mesuwat woꞌo­pyhik hap wyi katu­pono areto teran meremo tapyꞌyia Wiripu piaria kape are Uika­ꞌiwat pe.

"

²⁵ Saꞌa­wyꞌi eweipo­ꞌoro uhowawi ehemiit mehĩ Epawu­titu uipo­wyro hamo mesuwe. Miꞌi ti uheropat kahato hat toĩneꞌen mesuwe. Aikotã surara typy ok takaria ewy urutu­kup­teꞌen mesuwe ahiag moma hamo. Waku kahato atipuẽti eipot­po­ꞌoro mehĩ Epawu­titu. Koitywy miꞌi atipo­ꞌoro i raꞌyn ehowawi."

²⁶ Toto teran kahato ehowawi katu­pono ihay teran i raꞌyn eiwywo ihatꞌat kahato eiky­ꞌewi. Gaꞌatpo iꞌahu kahato mesuwe mehĩ Epawu­titu. Miꞌi hap eweikuap hawyi haty kahato iwanẽtup hawe katu­pono eweikuap hawyi eiꞌarot hap yt toiky­ꞌesat i maꞌato."

²⁷ Taꞌi aheropat kahato hat Epawu­titu porap ikuꞌuro mesuwe porap ahu tiꞌauka maꞌato yt pytkai i katu­pono Tupana hatyꞌu kahato topyꞌa pe. Miꞌi hawyi meremo toimoe­hãite katu­pono Tupana yt tiky­ꞌesat i uiꞌarot neꞌi hap. Miꞌi hawyi ikyꞌe hap iꞌewyte uikyꞌe hap wywo toimoe­hãite uhyt Epawu­titu hawyi uimo­wepit hap topy­huꞌat."

²⁸ Miꞌi pote atipo­ꞌoro teran kahato ehowawi ihãite i raꞌyn pote eimo­wepit hamo atipo­ꞌoro. Pyno eiwepit i raꞌyn hawyi poꞌog naꞌyn uimo­wepit uito wy are. Miꞌi hawyi yt kat i uiꞌarot hap."

²⁹ Putꞌokꞌe itote hawyi — Ereke mehĩ eweiꞌe o eiwepit hap wywo. Ereke ro eweiꞌe o aikotã aheykeꞌet aheywyt iꞌewyte aheinyt kape hap ewy waku eweiꞌe katu­pono miꞌi Aika­ꞌiwat mohey kahato hat. — Waku kahato epotpap eminug naꞌyn Tupana kapiat hap eweiꞌe Epawu­titu pe eiwepit hap wywo. Eweimõ­typot ro miꞌi miit are. Waku eweimõ­typot yne Iesui mohey haria Epawu­titu ewywuaria katu­pono Aipo­typot eropat kahato haria miꞌiria."

³⁰ Uipo­wyro turan porap ikuꞌuro aiwy Epawu­titu. Aipo­typot Iesui potpap nug hap ete porap ikuꞌuro ahemiit eimi­po­ꞌoro katu­pono uipo­wyro teran eipe maꞌato yt uwe i eipe uipo­wyro hanuaria mesuwe pote. Miꞌi hawyi eipot­po­ꞌoro mehĩ Epawu­titu topy­huꞌat ehaipepiat eipotpap nug hamo uipo­wyro hamuat. Miꞌi turan porap ikuꞌuro wen maꞌato aiwepit kahato Tupana timoe­hãite raꞌyn hawyi.

"

3

¹ Pyno ahenoi kurin hawyi toran naꞌyn uimiwan. Uheywytꞌin uheinytꞌin atiky­ꞌesat kahato Aika­ꞌiwat Iesui eimo­wepit kahato hap. Miꞌi eimo­wepit hamuat ahẽtup tope. Saꞌa­wyꞌi woro­ho­ꞌo­nãpin uimiwan me — Toꞌiro eiwe­mo­wepit katu­pono Iesui miky­ꞌeria kahato eipe are raꞌyn ehepe saꞌa­wyꞌi. Miꞌi uiꞌe hap areꞌe i ehepe aikotã areꞌe saꞌa­wyꞌi ehepe areꞌe i raꞌyn eiwe­mo­wepit ro are. Yt aremõti hin i aikotã saꞌa­wyꞌi uimiwan me areꞌe typuo i typuo i ahenoi eiwe­mo­wepit ro e hap ete katu­pono atiky­ꞌesat kahato einãpin uhepiat hap topy­huꞌat kahato eiwa­nẽtup hawe. Miꞌi hawyi yt uwe i eimaꞌat kuap einãpin wẽtup etiat hamo. Yt pywo rakat i etiat hap yt uwe i einãpin kuap.

"

² Eiweꞌeg wo kahato o saꞌag nug haria pupi katu­pono ehãꞌãg aru saꞌag nug hamo are. Eiweꞌeg wo o wẽtup muꞌap moherep haria pupi. Eiweꞌeg wo o yt eiwe­musin ãpy sokpe tek hep i pote yt kat i eheha­kye­raꞌat hap e haria pupi. Miꞌiria pupi eweikenꞌẽ kahato aikotã awahuru sem pupi wato­kenꞌẽ hap ewy katu­pono eimaꞌat reran saꞌag nug hap etiat haype. Yt naku i kahato miꞌiria."

³ Aito yt miꞌiria mohey haria hin i katu­pono Tupana Pãꞌãu sese aipiit pe Aipo­typot Iesui mimoieĩ­neꞌen aito pote waku kahato Iesui waku kahato Iesui e haria aito. Maꞌato iraniaꞌin ahemusin ãpy sokpe tek hap ete yn miꞌiria iꞌatuehay. Yt wati­ꞌa­tu­mohey hin i miꞌiria katu­pono wẽtup kawiat aito Iesui mohey haria. Wẽtup ywania ewy yn wato­py­huꞌat katu­pono Tupana titek taꞌyn aiminug saꞌag sio toĩ ahemusin ãpy sokpe sio yt. Pyno Tupana mieha­kye­raꞌat koꞌi raꞌyn aito katu­pono imohey haria aito pote."

⁴ Uito ti Pauru Iuteu sese uito. Taꞌi uito uiꞌy­wãꞌĩ 8 eꞌat hawyi taꞌa­tutek uhemusin ãpy sokpe uruꞌy­wania Iuteu eko ewywuat. Atunug yne uiꞌy­wania eko koꞌi maꞌato miꞌi koꞌi yt uheha­kye­raꞌat hin i. Miꞌi pote atikuap kahato uipyꞌa pe aiminug aheko koꞌi yt aheha­kye­raꞌat kuap i maꞌato tukup­teꞌen eipy­ꞌa­setpe — Watunug Iuteuria eko hawyi aheha­kye­raꞌat Tupana e haria. Miꞌi pywo pote uito poꞌog Tupana mieha­kye­raꞌat miꞌiria kai katu­pono atunug yne miꞌi koꞌi maꞌato yt pywo hin i are."

⁵ Uity uiꞌywot ti Isareu ywania sese miꞌiria. Iꞌewyte Epereu pusu kuap haria uiꞌy­wotꞌin. Taꞌi Epereu pusu ahepap kahato. Miꞌi pote Epereu sese uito. Uhaꞌa­seꞌi sese saꞌa­wy­ꞌiwuat Aparãu emiariru Pesamĩ e hap het rakat. Uipiit Iuteuria piit sese. Uimotag hap turan atiꞌa­tu­muꞌe kahato urueko nug hap ete. Miꞌi hawyi yt karãpe i atiꞌa­parap urueko nug hap ete. Uitag hawyi areĩneꞌen kahato Tupana mõtypot piaria uruꞌy­wania woꞌo­muꞌe haria akag koro wo."

⁶ Miꞌi turan atunug yne yne iꞌatu­wo­ꞌo­nãpin hap koꞌi Tupana wãiꞌe hap koꞌi pãi. Miꞌi hawyi areĩneꞌen poꞌog iraniaꞌin kai iꞌatu­ꞌakag wo yne uhesaika hap wywo. Atiꞌa­tu­sa­tyꞌi satyꞌi kahato Iesui mohey haria saꞌa­wyꞌi. Atunug yne uruꞌy­wania miky­ꞌesat ewy. Yt kat i urueko etiat iꞌaparap hap atunug. Yne uruꞌy­wania wãiꞌe hap atunug yne urueꞌa­seꞌi urunãpin saꞌa­wy­ꞌiwuat hap atunug yne. Iꞌewyte yne urunãpin hap atunug. Yne miꞌi koꞌi nug hap aimoe­waku kuap Tupana wanẽtup hawe pote waku pe areĩneꞌen mekewat eꞌat pe maꞌato yt pytkai i. Yt uinug waku hin i Tupana wanẽtup hawe mekewat eꞌat pe. Yt atikuap hin i Tupana miꞌi turan."

⁷ Saꞌa­wyꞌi arewa­nẽtup aremoe­waku kuap uhesaika hap wywo. Taꞌi uipiit esaika hamo aremoe­waku kuap are. Miꞌi hawyi ahãꞌãg kahato Tupana mowepit hamo maꞌato uhewaku hap yt putꞌokꞌe i. Miꞌi turan yt atikuap hin i Tupana katu­pono Tupana yn uimoewaku kuap hat. Miꞌi hawyi atimohey Iesui hawyi Tupana uinug waku. Miꞌi pote koitywy Iesui kape yn areto uimo­waku hamo. Yt areꞌe hin i koitywy — Uiwepe aremoe­waku kuap yt areꞌe i. Miꞌi e hap atipugha raꞌyn yt kat hamo i pote."

⁸ Iꞌatu kahato uiwa­nẽtup hawe saꞌa­wyꞌi. Miꞌi atunug mote waku raꞌyn areĩneꞌen Tupana wanẽtup hawe uiꞌe hap. Atunug uheko hawyi waku pe areĩneꞌen Tupana wanẽtup hawe uiꞌe hap saꞌa­wyꞌi. Miꞌi hap ewywuat saꞌa­wy­ꞌiwuat uiwa­nẽtup hap atipun yne raꞌyn aikotã watipun iun aiꞌyat pyi hap ewy katu­pono koitywy atipuẽti poꞌog wakuat wuatꞌi kawiat rakat. Koitywy Iesui kuap hano areĩneꞌen. Atipuẽti Iesui poꞌog waku. Miꞌi Uika­ꞌiwat no raꞌyn. Miꞌi yn naꞌyn atiky­ꞌesat uiwa­nẽtup hawe. Miꞌi yn uimoe­waku hat. Huu yn naꞌyn uimo­hãpyk kuap Tupana wanẽtup hawe. Miꞌi pote koitywy atipun yne saꞌa­wy­ꞌiwuat uiwa­nẽtup hap koꞌi saꞌa­wy­ꞌiwuat uiꞌe hap koꞌi saꞌa­wy­ꞌiwuat uiwe­moe­waku hap hawyi Aika­ꞌiwat yn uimoe­waku hat are. Tupana yn naꞌyn uheha­kye­raꞌat kuap hat koitywy are yn naꞌyn. Koitywy saꞌa­wy­ꞌiwuat uiꞌe hap koꞌi atipun yne katu­pono atimohey Aheha­kye­raꞌat hat Aipo­typot yn. Iesui yn atiky­ꞌesat uiwa­nẽtup hawe are."

⁹ Koitywy atikuap taꞌyn uito yt naku i rakat. Atikuap taꞌyn yt karãpe i atipuẽti uheha­kye­raꞌat hap uhewaku hap kaipyi. Katu­pono yt arewaku kuap i uito are. Yt karãpe i atikyiꞌat kuap uheha­kye­raꞌat hap uiminug wakuap saꞌup mo. Tupana ainãpin hap koꞌi koitywy atimohey Iesui. Miꞌi hawyi wẽtup miit piit ewy wato­py­huꞌat. Miꞌi hawyi Iesui ewaku hap topy­huꞌat uiano yt uiat pytkai i maꞌato Iesui wano. Miꞌi yn waku koitywy Tupana uimoe­waku raꞌyn atimohey Haꞌyru hawyi."

¹⁰ Atikuap taꞌyn Iesui maꞌato atikuap teran poꞌog. Atiky­ꞌesat poꞌog poꞌog Uipo­rekuat no aikotã Iesui toĩneꞌen mesu­wa­rote hap ewy areĩneꞌen neran. Karãpe ikuꞌuro aika­wiano hoꞌopot hap turan toiky­ꞌesat uhepiat hoꞌopot hap wẽtup miit yn uruto pote. Ahupit reran Iesui wywo hoꞌopot hap iꞌewyte atikuap teran uipiit pe hesaika hap. Arẽtem neran guꞌuro pyi iwywo wẽtup piit yn urutu­kup­teꞌen pote."

¹¹ Areĩneꞌen neran i raꞌyn iwywo uiku­ꞌuro hawyi. Areĩneꞌen i iwywo hap yn ahekatup. Miꞌi hap atimohey kahato."

¹² Uito wakuat Iesui ewywuat yt areꞌe hin i. Uito wakuat Tupana ewywuat yt areꞌe i. Uiwa­nẽtup hawe yt putꞌokꞌe hin i te Iesui wanẽtup hap wakuat hap ewywuat. Yt uitag i te Tupana mohey hap ete. Miꞌi ewywuat areĩneꞌen neran kahato Aipo­typot Iesui ewywuat. Areĩneꞌen neran aikotã weput haria teꞌe­ru­weput yne taꞌa­tue­saika hap wywo mekewat morekuat miium sat hamo — En poꞌog weput kuap hat e hap sat hamo. Miꞌi hap ewy atimohey teran Aipo­typot Iesui yne uhesaika hap wywo aikotã seput poꞌog hat ewy Iesui po pyi atat teran raꞌyn mekewat — Uito poꞌog e hap. Uito iꞌewyte seput hat ewy katu­pono Iesui uhekyi raꞌyn tuwe­wawi."

¹³ Uiwy­riaꞌin mekewat miium aikotã seput hat tiky­ꞌesat hap ewy. Yt uipo pe i te maꞌato areĩneꞌen seput re hat ewy. Miꞌi hawyi areput kahato. Miꞌi hap kape yn arewa­nẽtup. Yt arahaꞌat hin i uhewat­ꞌymo uiwa­nẽtup hap. Seput kahuro hap kape yn arahaꞌat. Iesui wanẽtup hap ewywuat sat hamo yn areput."

¹⁴ Yt poriꞌok poriꞌok yt areput hin i. Hãpyk kahato areput atiky­ꞌesat kahato — Waku kahato ereput uhyt e hap yn atiky­ꞌesat Aipo­typot e hap. Atiky­ꞌesat Tupana tum uhepe mekewat seput haria eꞌamãtap ewy mekewat uipainug hap ewy. Atiky­ꞌesat kahato Tupana toꞌe uhepe areput kahu hawyi — Toꞌiro atipy kape kat pote Uimi­po­ꞌoro Uhaꞌyru mohey kahato hat en. Itote atum epe uimiium wuatꞌi eꞌat piat e hap atiky­ꞌesat. Miꞌi pote seput sese hat ewy areĩneꞌen Iesui wanẽtup hap ewywuat kape areput."

¹⁵ Atiky­ꞌesat eipe uiꞌe­wywuat eiwa­nẽtup hawe. Waku wato­py­huꞌat seput sese haria ewy. Waku yne ahesaika hap wywo wato­mohey Tupana mimotag koꞌi aito pote. Waku miꞌi tã watunug. Waku haty wo wato­mohey. Eweimohey ran neꞌi pote Tupana timo­herep aru ehepiat yt tomohey i hap."

¹⁶ Karãpe wati­ꞌa­parap miꞌi hap aru Tupana timo­herep ahepe aiminug saꞌag hap koꞌi. Waku wateput aimikuap ewy Iesui miky­ꞌesat hap ok tã. Miꞌi turan Tupana aipo­wyro tesaika hamo seput poꞌog saꞌa­wy­ꞌiwuat kawiat haria wo."

¹⁷ Karãpeĩ urutu­kup­teꞌen eipy­ꞌa­setpe urutu­kup­teꞌen Iesui mohey haria kahato. Uheywytꞌin uheinytꞌin aikotã atimohey kahato Iesui miꞌi hap ewy waku eweikup­teꞌen. Karãpe toĩneꞌen eipy­ꞌa­setpe imohey kahato uiꞌe­wywuat hat waku ewehe­haꞌat miꞌi kape. Miꞌi hawyi ewetunug iminug ewy. Miꞌi iãꞌãg haria wo eweikup­teꞌen."

¹⁸ Iꞌatu kahato aria kapiat haria katu­pono Iesui ewanĩ­kaptia kahato miꞌiria katu­pono teꞌe­ru­we­ky­ryꞌi kahato Aipo­typot kuꞌuro ariaꞌyp posak etiat taꞌa­tue­ka­wiano pote. Aikotã saꞌa­wyꞌi areꞌe hap ewy areꞌe i — Miꞌiria aria kape tuwat are uiwak popuo."

¹⁹ Aikotã saꞌa­wyꞌi areꞌe hap areꞌe i — Iꞌatueiam sese ti aru aria are katu­pono iꞌatue­tu­pana sese iꞌatu­mi­ky­ꞌesat koꞌi miꞌu kape yn iꞌatu­wa­nẽtup hap mesu­wa­rotiat kape yn iꞌatu­wa­nẽtup hap. Taꞌa­tuekat hap kape yn iꞌatu­wa­nẽtup hap. Miꞌi hawyi yt naku i kahato taꞌa­tunug maꞌato taꞌa­tunug hawyi yt teꞌe­ru­we­mõti hin i inug te turan. — Waku nug haria uruto iꞌatuꞌe maꞌato iꞌatueiam ti aru aria kawiat."

²⁰ Maꞌato aito atipy kapiaria ahetama sese atipy pe. Miꞌi kaipyi aru tut Aheha­kye­raꞌat hat. — Hẽ eriot ro meremo meikowo watoꞌe motꞌi Aika­ꞌiwat Aipo­typot Iesui pe."

²¹ Tut hawyi aipiit mesu­wa­rotiat tutunug towat topiit ewy. Miꞌi hawyi yne aipiit Iesui ewy topy­huꞌat wuatꞌi eꞌat pe. Aipiit iwat piit ewy ikahu kahato. Miꞌi tã aru ainug tesaika hap wywo. Hesaika kahato Iesui miꞌi nug hamo katu­pono mekewat eꞌat pe topy­huꞌat yne yne Porekuat no poꞌog hesaika torania kai. Miꞌi tesaika hap wywo aimo­pakup aipiit. Pakup tutunug towat ewy are.

"

4

¹ Mehĩꞌin manaꞌin aiku­ꞌuro hap kape waku wato­mohey o are. Uimi­ky­ꞌeria kahato eipe. Woro­ho­ꞌo­kyꞌe eipe. Uhehatꞌat kahato eiky­ꞌewi. Uimo­wepit haria eipe. Arehum kahato ehowawi. Uheinytꞌin uheywytꞌin yt uimõti te hin i. Atikuap aikotã eweikup­teꞌen wẽtup miit ewy Aika­ꞌiwat wywo."

² Miꞌi hawyi mana Ewotia mana Sintiki ahẽtup ehowawi eipe Aika­ꞌiwat mohey haria pote eweikup­teꞌen woꞌo­kyꞌe haria woꞌo­wese haria kahato. Waku wẽtup ehay ewy aikotã eiky­pyꞌyt ewy eweikup­teꞌen Iesui mohey haria eipe pote. Aito Iesui mohey haria pote yt naku i watu­kup­teꞌen yt woꞌo­kyꞌe i haria wo yt naku i are."

³ Saꞌa­wyꞌi eipotpap kahato uiwywo manaꞌin. Saꞌa­wyꞌi mehĩ Kementi wywo watuwat iraniaꞌin aipo­wyro haria wywo sehay wakuat Iesui etiat sytpok hamo. Miꞌiria set yne toĩneꞌen Tupana miwan atipy piat ete mekewat miwan ete uwe aru toĩneꞌen wuatꞌi eꞌat pe e hap tote. Pywo pe ti manaꞌin saꞌa­wyꞌi eipotpap kahato uiwywo. Miꞌi pote atiky­ꞌesat kahato waure­ꞌe­weiꞌe o eiwu­ꞌuka hap ete are. Atiky­ꞌesat kahato eiwo­ꞌo­wese hap taꞌyn aikotã saꞌa­wyꞌi eiwo­ꞌo­kyꞌe hap ewy raꞌyn atiky­ꞌesat uheinytꞌin are. Miꞌi pote ahẽtup eiꞌa­pykok hanuat pe — Uhyt areꞌe etiꞌa­tunug no uheinytꞌin woꞌo­kyꞌe haria wo raꞌyn are. Mehĩ areꞌe uipo­wyro en tawa Wiripu piaria nãpin hamo. Pyno mehĩ waku ereꞌe mana Ewotia iꞌewyte mana Sintiki pe — Yt eiwuꞌuka poꞌog neiꞌo ehehay wo ereꞌe o iꞌatuepe are eiꞌa­pykok hat pe manaꞌin.

"

⁴ Pyno uiwy­riaꞌin woꞌo­mo­wepit haria ewywuaria wo o eweikup­teꞌen. Wuatꞌi eꞌat pe waku — Tupana urumo­wepit hat kahato En waku watoꞌe at kaꞌap. Tupana urumo­wepit hat kahato En waku watoꞌe Tupana pe are."

⁵ Iꞌewyte ti waku yt ipyꞌahak takaria wo i watu­kup­teꞌen e. Waku yne miitꞌin wesat hano watoĩ­neꞌen. Yt eweiwaure teiꞌo Aika­ꞌiwat ut hamuat hap eꞌat katu­pono taꞌaipok irane Aiꞌakag koro are. Miꞌi pote waku wakuaria ewy watu­kup­teꞌen wuatꞌi eꞌat pe."

⁶ Pyno yt eiwa­nẽtup koꞌi koꞌi i ran o. Poꞌog waku wahẽtup Tupana kape aipo­wyro hamuat hap. Waku watoꞌe Tupana pe — Etum o uruepe uruwat yt kat i rakat. Uruikuap kahato raꞌyn egyiꞌat hap Tupana waku uruhẽtup. Miꞌi pote urutu­wehum kahato ewawi urupyꞌa pyi Tupana waku watoꞌe Tupana pe."

⁷ Miꞌi tã watunug pote yt kat i hin i aiwa­nẽtup koꞌi koꞌi hap atunik kahato. Aiwa­nẽtup hawe woꞌo­wese hap yn topy­huꞌat. Tupana ainug waku pe kahato aiwa­nẽtup hawe yt miitꞌin mikuap ok tã i tutum ahepe aipe­rupꞌi kahato hap. Towese hap ewy tutum ahepe. Miꞌi pote toihep ahesoꞌok hap koꞌi. Miꞌi hawyi aiwa­nẽtup hap Iesui wanẽtup hap ewy wẽtup miit ewy kahato raꞌyn ainug. Aipo­typot timoma raꞌyn aiwa­nẽtup hap aipyꞌa piat yt naku i nug hap iꞌewyte aiwa­nẽtup saꞌag hawiat.

"

⁸ Kurin poꞌog ahenoi hawyi waku. Uheywytꞌin uheinytꞌin wati­pyhyp aiwa­nẽtup hap yt naku i hap. Miꞌi hawyi wẽtup kape yn aiwa­nẽtup hap. Wakuat kape yn watu­wa­nẽtup aikotã miitꞌin miat wakuat rakat ewy aiwa­nẽtup hap aikotã pywuat wanẽtup hat ewy aikotã miitꞌin mimõ­typot kahato hap wanẽtup hap ewy aikotã hãpyk kahato rakat ewy waku watu­wa­nẽtup. Waku ihainia hary­poria weꞌeg nakaria ewy watu­wa­nẽtup. Waku iwese kahato rakat ewy aiwa­nẽtup hap. Miꞌi hawyi — Meimuẽ­waria wyti waku kahato rakaria iꞌatuꞌe hap ewy waku aiwa­nẽtup hap. Kat e hap kat e hap poꞌog poꞌog waku miꞌi ewywuat waku watu­wa­nẽtup. Kat e hap kat e hap ete Tupana — Waku e pyno miꞌi hap ete waku watu­wa­nẽtup at kaꞌap."

⁹ Iꞌewyte atiky­ꞌesat kahato ehewyry uhepiat einãpin hap nug haria wo. Atiky­ꞌesat uimi­po­ꞌoro einãpin hamuat eweikyꞌe kahato hap. Saꞌa­wyꞌi ti areĩneꞌen eitokpe turan wakuat yn atunug ehepuo. Waku ewetunug aikotã uheko eweiꞌa­kasa hap ewy wakuap nug hap ete. Miꞌi tã ewetunug mote woꞌo­kyꞌe hap eiwo­ꞌopiat hap eweipuẽti Tupana miky­ꞌesat ewy. Miꞌi hawyi ti aru eipe­rupꞌi hap topy­huꞌat aikai are.

"

¹⁰ Mio ti putꞌokꞌe eimiium uipo­wyro hamuat hap. Miꞌi hap ti uimo­wepit kahato. Miꞌi hawyi uipyꞌa perupꞌi kahato Uika­ꞌiwat ete. — Waku kahato En are Iesui pe. Mio tã are emiium uhepiat uimo­ꞌok­pi­pokꞌi poꞌog poꞌog hap ete katu­pono uikyꞌe hap moherep kahato hap eimiium. Saꞌa­wyꞌi ti uipo­wyro teran kahato eipe wen maꞌato miꞌi re muꞌap yt eweipuẽti i uikyꞌe ehepiat hap moherep hamo."

¹¹ Saꞌa­wyꞌi te ti yt kat i sẽtup uiꞌe hap. Yt ahenoi i iraniaꞌin me yt kat i uiat e hap katu­pono koitywy atikuap taꞌyn uiwepit sio uhekat iwato hap etiat sio kurin uiat uiwepit hap atikuap."

¹² Atikuap kahato seha­ky­ꞌeꞌi hap etiat iꞌewyte atikuap kahato sekat hap etiat. Saꞌa­wyꞌi meimuẽwat yt atikuap i yt kurin i maꞌato koitywy atikuap taꞌyn uhesyꞌat pytkai uiwepit iꞌewyte uiꞌok pote uiwepit. Uhekat kurin hawyi arehum iꞌewyte iwato uhekat pote arehum ne. Koitywy ahepap taꞌyn wehum hap."

¹³ Maꞌato yt uiwe­kaipyi i tut uhesaika hap maꞌato Aipo­typot Iesui kaipyi atipuẽti. Miꞌi ti kat e hap kat e hap etiat — Uimoe­saika hap wuatꞌi etiat kuap hap ete uimo­wa­tetup are Tupana pe. Iꞌewyte waku kahato eipe miꞌi e hap ti ereꞌe Tupana pe."

¹⁴ Maꞌato waku eiminug ewetum uhepe. Taꞌi uhepiat hoꞌopot hap toĩneꞌen mesuwe. Uimo­so­ꞌopot kahato mesuwe woꞌo­pyhik hawe. Miꞌi turan eimi­po­ꞌoro putꞌokꞌe uhete. Miꞌi hawyi arehum kahato eimiium uhepiat ete."

¹⁵ Eheꞌyi Masẽ­tunia pe mio iꞌatu kahato Iesui mohey haria tukup­teꞌen. Haꞌa­wyte areto raꞌyn iꞌatue­wawi sehay Iesui etiat wakuat moherep hamo wuatꞌi tawa pe kat e hap kat e hap upi. Mio koitywy ahokꞌiwat yne tawa pe Iesui mohey haria teꞌe­ru­wa­ꞌa­tunug tuereto maꞌato yt kat i te taꞌa­tu­po­ꞌoro uhowawi taꞌa­tumiium koꞌi. Maꞌato eipe Iesui mohey haria tawa Wiripu piaria ewetum kahato raꞌyn uhepe. Eweipatꞌok kahato uhepe ehekat koꞌi."

¹⁶ Saꞌa­wyꞌi areto tawa Tesa­ro­nika kape. Itote yt uhekat hin i maꞌato miꞌi turan uipo­wyro hap eweipo­ꞌoro poꞌoro kahato uhowawi kat uimi­ky­ꞌesat koꞌi saꞌa­wyꞌi eweipo­ꞌoro."

¹⁷ Yt ahẽtup hin i eimiium wuat iꞌewyte yt atiky­ꞌesat i eheka­reꞌen uiwa­nẽtup hawiat hap pytkai eweipo­ꞌoro. Yt eimiium kape hin i arahaꞌat. Yt ehekat hin i uheha pe. Eikyꞌe hap yn uheha pe uhepiat hap wen maꞌato eimiium uimo­wepit kahato katu­pono miꞌi kaipyi atikuap uikyꞌe ehepiat hap. Miꞌi kaipyi atikuap eipe Tupana kyꞌe kahato haria hap. Miꞌi eimiium koꞌi yne topy­huꞌat atipy pe rakanuat ehegyiꞌat hap toimo­herep hamuat itote emipo­ꞌoro koꞌi."

¹⁸ Mehĩ Epawu­titu tum yne eimiium eimi­po­ꞌoro koꞌi uhepe. Ikahu kahato uipuẽti eimiium aikotã saꞌa­wyꞌi nagnia tiwuk mohag hy ikamhig se rakat Tupana mõtypot hamo. Miꞌi hap ewy atipuẽti eimiium ikamhig se kahato eimiium Tupana mowepit kahato hap. — Waku kahato e Tupana eimiium me. Koitywy areĩneꞌen hekat rakat ewy raꞌyn ewetum iwato uhepiat pote. Ewetum iwato pote uipo sakpo ewetum uhepe."

¹⁹ Tupana tum aru yne yt kat i aikawiat rakat ahepe. Taꞌi Uhetu­pana tum aru wuatꞌi yt kat i eiwat rakat tekat iwato kahato hap kaipyi. Aikotã tekat iwato kahato atipy pe hap ewy te tutum ehepe. Taꞌi hegyiꞌat kahato aru ahepe katu­pono Haꞌyru Aipo­typot Iesui ikuꞌuro aika­wiano haype. Miꞌi pote toĩ yne aipo pe imiium koꞌi.

"

²⁰ Miꞌi tupono toꞌiro watu­wehum Aika­ꞌiwat Tupana kape. Toꞌiro wati­mõ­typot Miꞌi yn mesu­wepyi mũki­ꞌite eꞌihotꞌok wuatꞌi eꞌat pe waku miꞌi tã pãi."

²¹ Miꞌi tupono kuekatu atipo­ꞌoro torania Tupana eropat haria kape Tupana emiitꞌin kape mekewat Aipo­typot Iesui emiitꞌin koꞌi kape iꞌewyte Iesui mohey haria uheywytꞌin uheinytꞌin torania kape atipo­ꞌoro kuekatu hap are."

²² Morekuat Sesara emiitꞌin sura­raꞌin iꞌewyte kuekatu ipoꞌoro ehowawi. Iꞌatu kahato mesuwe Iesui mohey haria. Miꞌiria iꞌewyte kuekatu ipoꞌoro ehowawi.

"

²³ Pyno ahẽtup Tupana pe — Etiꞌa­tu­kyꞌe kahato emohey haria tawa Wiripu piaria are ahẽtup. Egyiꞌat kahato hap kaipyi etiꞌa­tu­poi­tyro miꞌiria ewaku hap ok tã are yn Aipo­typot Aika­ꞌiwat Iesui pe eika­wiano hamo ahẽtup. Tupana Pãꞌãu eiam mo eipiit koꞌi hap yn ahẽtup Tupana pe at kaꞌap eika­wiano haype. Morekuat Sesa woꞌo­pyhyp hawe areĩneꞌen mesup. Uimiwan Iesui etiat atipo­ꞌoro ehewowi tawa Wiripu piaria Iesui mohey haria pe. Toran naꞌyn uimiwan.

Uito Iesui potpo­ꞌoro Pauru."