1

¹ Uiwy­riaꞌin tawa Ewesu piaria koitywy atipo­ꞌoro uimiwan ehowawi. Mesuwat miwan nug hat ti uito Pauru. Eipe ti Tupana saꞌy­ruꞌin Tupana saki­ꞌytꞌin koitywy eipe Aika­ꞌiwat Iesui mohey potꞌi haria ti eipe. Saꞌa­wyꞌi Tupana uiꞌairo hawyi uinug tosa­ꞌyru wo Aipo­typot Iesui potpo­ꞌoro wo tomi­ky­ꞌesat ewy uiꞌairo."

² Pyno mio tã ahẽtup ehowawi Aiꞌywot Tupana kaipyi iꞌewyte Aika­ꞌiwat Iesui kaipyi — Etum o ewese hap tawa Ewesu piaria pe emohey haria pe are iꞌewyte etiꞌa­tu­poi­tyro kahato miꞌiria are ahẽtup Tupana pe iꞌewyte Iesui pe ehowawi uiwy­riaꞌin are.

"

³ Taꞌi Aika­ꞌiwat Iesui iꞌewyte Toꞌywot Tupana aiꞌa­tu­poi­tyro poityro kahato raꞌyn. — Waku kahato En watoꞌe Tupana pe iꞌewyte Aika­ꞌiwat Iesui pe watoꞌe — Waku kahato En Tupana watoꞌe aito Iesui mohey haria. Taꞌi atipy kaipyi putꞌokꞌe ahete aipoi­tyro kahato hap. Aheha­kye­raꞌat hap tutum naꞌyn ahepe. Wuatꞌi eꞌat piat aimoieĩ­neꞌen Tupana kapiat hap tutum ahepe towa­nuaria aito pote are."

⁴ Taꞌi saꞌa­wyꞌi mesuwat yi nug hap eꞌyianmete Tupana aiꞌairo Tosa­ꞌyru emiit no. Taꞌi aheꞌyian­mete aiꞌairo temiitꞌin no are. Miꞌi hawyi toꞌe — Uhaꞌyru mohey haria wo aru miꞌiria hap atiꞌa­tukuap e. Miꞌi pote ti atunug aru hãpyk miꞌiria uiꞌe­wy­wuaria wo raꞌyn e. Yt kat i saꞌag nug haria wo atiꞌa­tunug miꞌiria e. Pyno yt uwe i te aito turan aiꞌairo Tosa­ꞌyru emiit no. Aikyꞌe haype yn aiꞌairo mesuwat yi yt kat i te hap eꞌat pe turan aiꞌairo."

⁵ Taꞌi atunug aru Uhaꞌyru mohey haria yne uhaꞌy­ruꞌin uhaki­ꞌytꞌin no e. Atum aru Uhaꞌyru iꞌatuepe Iꞌatu­ka­ꞌiwat no e ahetiat. Atunug aru miꞌiria uimẽ­pytꞌin no uimi­ky­ꞌesat ewywuat uimo­wepit hamuat e Tupana ahowawi saꞌa­wyꞌi yt uwe i te mesu­wa­rotiat turan."

⁶ Pyno toꞌiro watu­wehum Tupana kape — Egyiꞌat hap yt uwe ewywuat hin i waku watoꞌe. Poꞌog poꞌog torania kai ewese hap waku watoꞌe. Urukyꞌe hap moherep hamuat etum Esaꞌyru uruepe. Wẽtup yn Esaꞌyru pytkai etum neꞌen neꞌi uruepe yt kat saꞌup mo i etum uruepe urutoꞌe waku watoꞌe. Miꞌi ti Esaꞌyru Emikyꞌe kahato etum naꞌyn uruepe urueha­kye­raꞌat hamuat. Waku kahato En Tupana urutoꞌe ewawi."

⁷ Taꞌi Emipo­ꞌoro Urupo­rekuat no ikuꞌuro hawyi uruminug saꞌag po pyi urutu­wẽtem naꞌyn iꞌewyte uruminug saꞌag haꞌa­wy­tewuat etiꞌa­tu­waure waure raꞌyn En. Waku kahato En. En ni poꞌog poꞌog torania kai hegyiꞌat rakat urutoꞌe ewawi Tupana urutoꞌe. Esaꞌyru suu ti urukyiꞌat ewanuat hap urutoꞌe."

⁸ Etum neꞌen neꞌi yne yne iwato kahato sakpo emiium etum yne yne. Waku kahato En urutoꞌe. Ewese kahato uruto yt uruwese i pytkai urutoꞌe. Eweꞌeg hap ok tã egyiꞌat hap ok tã urukyꞌe hap urutoꞌe. Urutu­wehum kahato ewawi Tupana katu­pono koitywy etunug naꞌyn ereꞌe saꞌa­wy­ꞌiwuat hap emiky­ꞌesat ok tã urutoꞌe ewawi."

⁹ Saꞌa­wyꞌi emiky­ꞌesat ewy ereꞌe ewepe — Atum aru Uhaꞌyru pe wuatꞌi ywania ere. Atum neꞌen neꞌi aru Uhaꞌyru wuatꞌi miitꞌin me Iꞌatu­po­rekuat no. Uimo­wepit hap ewy atum aru ereꞌe saꞌa­wyꞌi ewepe ewanẽtup hawe yt kat i miitꞌin te turan. Tupana uruikuap teran kat pote urukyꞌe kahato hap. Miꞌi tã yt uruikuap hin i te wen maꞌato urukyꞌe hap miꞌi uruikuap taꞌyn. Waku kahato En urutoꞌe epe Tupana.

"

¹⁰ Mio tã e saꞌa­wyꞌi Tupana — Putꞌokꞌe uheꞌat aru hawyi atunug sese ti Uhaꞌyru wuatꞌi Porekuat no e tuwepe iꞌewyte yne atipy piaria Porekuat no iꞌewyte yne yi totiaria Porekuat no e tuwepe. Uhaꞌyru suu wo atiꞌa­tu­mo­wehik sok torania yi totiaria atipy piaria uhowawi e. Miꞌi hawyi wẽtup piit ewy yn naꞌyn wato­py­huꞌat wuatꞌi uiminug koꞌi uikai tukup­teꞌen e tuwepe Tupana wuatꞌi tominug koꞌi pe tukup­teꞌen yianmete turan."

¹¹ Yne tomi­ky­ꞌesat ewy Tupana saꞌa­wyꞌi aiꞌairo raꞌyn tomi­ky­ꞌesat ewy. Miꞌi hawyi ainug tosa­ki­ꞌytꞌin no tosa­ꞌy­ruꞌin no Aheykeꞌet Aikywyt Iesui ewywuat ainug wẽtup miit mẽpytꞌin koꞌi ewywuat ainug naꞌyn aito wati­mohey Iesui hawyi. Tomi­ky­ꞌesat ewy tutum aru ahepe topo­watꞌyp yne yne. Hekat kahato rakaria wo wato­py­huꞌat wuatꞌi eꞌat pe aikotã toꞌe saꞌa­wy­ꞌiwuat hap ewy raꞌyn tutum ahepe."

¹² Pyno toꞌiro watu­wehum Tupana kape katu­pono aito ti iraniaꞌin eꞌyianmiat imohey haria iraniaꞌin eꞌyianmiat watunug Iesui Aipo­rekuat no. Waku kahato watoꞌe aiwo­ꞌope miꞌi hap ete maꞌato meiũran aru iꞌatu kahato ahaipe­piaria Iesui mohey haria tukup­teꞌen kahato Tupana mõtypot wuatꞌi eꞌat piaria. Waku kahato are.

"

¹³ Pyno mesup taꞌyn uruꞌe­wy­wuaria raꞌyn Tupana ehay pywuat rakat Iesui etiat uruwẽ pyi hawyi mekewat sehay Eheha­kye­raꞌat hat moherep hap topy­huꞌat. Miꞌi e hap etikuap hawyi Aika­ꞌiwat Iesui mohey haria sok eweikup­teꞌen. Waku kahato are. Miꞌi hawyi ti aru Tupana tum naꞌyn Topãꞌãu ahepe toꞌe hap ewy tutum. Miꞌi hawyi mesup — Miꞌiria ti uianuaria e ehepe. Tutunug toset ehepe — Miꞌiria wyti uiat e wuatꞌi miitꞌin me Tupana Pãꞌãu."

¹⁴ Tupana tum naꞌyn Topãꞌãu ahepe. Miꞌi tutum mote mesup watikuap iꞌewyte tutum aru ahepe kat e hap kat e hap — Atum aru uimẽ­pytꞌin me e hap koꞌi ewy. Tutum naꞌyn yne saꞌup yne aiminug saꞌag hep hamuat Tosa­ꞌyru suu. Miꞌi pote watikuap taꞌyn mesup yt kat i saꞌag toipuẽti aikai. Watoĩ­neꞌen iwywo turan tuwehum ahowawi yt kat i aikai yt naku i pote yt kat i aipitpit hap. — Waku kahato En Tupana watoꞌe aru wuatꞌi eꞌat pe. Waku En waku En katu­pono uruhep ahiag po pywiat hat En urutoꞌe aru wuatꞌi eꞌat pe aru.

"

¹⁵ Gaꞌatpo atikuap ehetiat sehay — Koitywy tawa Ewesu piaria Aipo­typot Iesui mohey kahato haria tukup­teꞌen. Poꞌog imohey haria mio saꞌa­wy­ꞌiwuat kai iꞌatuꞌe uruepe. Iꞌewyte Tupana emiitꞌin kyꞌe kahato haria tukup­teꞌen miꞌiria iꞌatuꞌe ehepiat pe."

¹⁶ Mio tã iꞌatuꞌe hap atikuap hawyi arehum kahato at kaꞌap mesuwe — Uhetu­pana are waku kahato En katu­pono mesup tawa Ewesu piaria Esaꞌyru mohey kahato haria tukup­teꞌen naꞌyn mesup iꞌewyte woꞌo­kyꞌe haria tukup­teꞌen are at kaꞌap Tupana pe."

¹⁷ — Uruꞌywot koro En ni Urupo­typot Iesui eTupana are. Etum no Epãꞌãu poꞌog tawa Ewesu piaria pe ekuap poꞌog poꞌog mono areꞌe Tupana pe. Uwe En sese hap kuap hamuat atiky­ꞌesat. Epãꞌãu kaipyi iweꞌeg kahato rakaria wo tukup­teꞌen hap atiky­ꞌesat are. Etiꞌa­tu­moẽ­tyhot ro iꞌatu­wa­nẽtup hap are. Etihep yt iꞌatue­ha­pytig i hap miꞌi hawyi heremo iꞌatu­wa­nẽtup hawe etum Esaꞌyru mohey hap Tupana are."

¹⁸ Tupana areꞌe etum no Esaꞌyru mohey haria tapyꞌyia Ewesu piaria pe ewanẽtup hap kuap hamo hap are. Etum no iꞌatuepe ewanẽtup kuap hap kat hamo etiꞌa­tu­ꞌairo miꞌiria emiitꞌin no are. Etimo­herep to iꞌatuepe emiky­ꞌesat koꞌi nug neran hap koꞌi are. Etimo­herep iꞌatuepe aikotã aru tukup­teꞌen atipy pe esaꞌy­ruꞌin wo esaki­ꞌytꞌin wo hap are. Etimo­herep iꞌatuepe kat som atipy pe are. Etimo­herep iꞌatuepe aikotã aru atipy pe emõtypot haria tukup­teꞌen hap are. Etimo­herep iꞌatuepe aikotã aru ewaku hap ewywuaria tukup­teꞌen hap are. Tupana ewaku hap ekahu hap ewato hap etimo­herep emiitꞌin me tawa Ewesu piaria pe are at kaꞌap ehetiano uiwy­riaꞌin."

¹⁹ Tupana areꞌe etimo­herep emiitꞌin me esaika hap kuap hap are. Esaika hap iwato kahato uruewawi Esaꞌyru mohey haria pe aikotã karãpe saꞌa­wyꞌi etihep Esaꞌyru guꞌuro pyi hap ewy esaika hap. Tupana etimo­herep miꞌi tã esaika hap Esaꞌyru mohey haria pe are."

²⁰ Tupana esaika hap iwato kahato uruete are aikotã saꞌa­wyꞌi etihep Uruka­ꞌiwat guꞌuro pyi hap ewy esaika are. Miꞌi hawyi — Eraꞌapyk o meiũpe uipo sese kai ere itote Esaꞌyru pe. Eraꞌapyk to mesuwe atipy pe ere. Miꞌi hawyi topy­huꞌat eꞌe hap ewy esaika sese hap ewywuat topy­huꞌat. Esaika kahato hap ewy etimo­herep uruepe Esaꞌyru mohey haria pe are Tupana pe at kaꞌap.

"

²¹ Aiꞌakag Iesui topy­huꞌat Wuatꞌi Akag wo. Toĩneꞌen ni Morekuat Koro wo are. Aiꞌakag wo toĩneꞌen maꞌato iꞌewyte Wuatꞌi Akag wo atipy pe toĩneꞌen. More­kuaria Porekuat no topy­huꞌat Iesui are. Tuꞌi­saria Porekuat no topy­huꞌat. Surara Akag Koro wo topy­huꞌat. Iesui set poꞌog Tupana mimõ­typot no wuatꞌi miitꞌin set kai. Poꞌog poꞌog wuatꞌi kai Aika­ꞌiwat mesuwat iꞌewyte wuatꞌi eꞌat pe."

²² Katu­pono Tupana tunug yne yne Iesui py ywytꞌok­pype. Aika­ꞌiwat wuatꞌi okpe tote toĩneꞌen. Miꞌi hawyi iꞌewyte aito imohey haria Akag Koro wo topy­huꞌat Iesui Tupana miky­ꞌesat ewy."

²³ Pyno yne aito Iesui mohey haria wato­py­huꞌat Iesui wywo wẽtup piit ewy yn. Iwywo watoĩ­neꞌen wẽtup ok miit ewy. Iesui piit no watoĩ­neꞌen mesup mesuwat yi tote are. Atipy pe iꞌewyte watoĩ­neꞌen iraniaꞌin imohey haria wẽtup piit ewy yn watoĩ­neꞌen aito. Imohey haria ipiit ewywuat wato­py­huꞌat. Aikope Aikope Atipy pe mesuwat yi tote yne tote Aipo­typot Iesui toĩneꞌen Morekuat Koro wo.

"

2

¹ Haꞌa­wyte kahato yt uwe i eimuꞌe hat Iesui etiat turan yt Iesui mohey haria i eipe turan miꞌi hap eꞌat pe yt eweikuap hin i Tupana etiat aikotã ikuꞌuro rakaria yt tikuap hin i ahehay hap ewy mekewat eꞌat pe. Saꞌa­wyꞌi yt eweikuap hin i Tupana ehay are."

² Miꞌi hawyi mekewat eꞌat pe yt ewetunug hin i yne yne Tupana wãiꞌe hap koꞌi e hap. Saꞌa­wyꞌi imohey hap eꞌyianmete ti ewetunug miitꞌin minug saꞌag koꞌi yne yne mekewat eꞌat pe. Mekewat eꞌat pe wẽtup eika­ꞌiwat toĩneꞌen miꞌi ti ahiag. Miꞌi heso rakat kape — Uruetu­pana en eweiꞌe ahiag me. Emiky­ꞌesat ewy atunug neran eweiꞌe mekewat mãꞌãu saꞌag me. Uruetu­pana uruetu­pana eweiꞌe at kaꞌap mekewat yt nakuaria i nug haria porekuat kape mekewat ahiag me."

³ Pyno saꞌa­wyꞌi yne aito wato­py­huꞌat ahiag emiit no yt nakuaria i ewy. Saꞌa­wyꞌi aimi­ky­ꞌesat saꞌag he wati­puẽti. Mekewat eꞌat pe aiminug aipiit miky­ꞌesat saꞌag koꞌi kape yn poꞌog poꞌog ahepap wãiꞌe Tupana pytkai watunug saꞌag neꞌi. — Miꞌi tã ewetunug mote woro­ho­ꞌo­ꞌa­piheg neꞌi eipe e Tupana ahepe pytkai watunug yne yne yt imiky­ꞌesat i koꞌi."

⁴ Maꞌato saꞌag watunug tuete pytkai aikyꞌe kahato te Tupana. Yt tuwepyk hin i katu­pono haty aikyꞌe hap tuete."

⁵ Towese hap kaipyi aheha­kye­raꞌat Tupana. Aikotã ikuꞌuro rakat yt ihay i hap ewy yt ahehay hin i Tupana kape mekewat eꞌat pe. Taꞌi yt ahehay kuap i. Karãpe Tupana ihay ahowawi turan mekewat eꞌat pe yt wati­wesat kuap i kat pote ikuꞌuro rakaria ewy watoĩ­neꞌen Tupana ewawi pote. Maꞌato miꞌi pytkai aiwy­ꞌinug tuwe­wawi Aipo­typot Iesui ehay upi."

⁶ Miꞌi hawyi aimoieĩ­neꞌen Tosa­ꞌyru suu wo. Miꞌi hawyi Tupana ainug Aipo­typot Iesui emiit no wẽtup piit ewy watoĩ­neꞌen iwywo. Miꞌi hawyi karãpe Iesui tuwẽtem guꞌuro pyi miꞌi hap iꞌewyte watu­wẽtem guꞌuro pyi hap ewy wẽtup puꞌi yn aito wato­mohey hawyi."

⁷ Miꞌi hawyi Tupana toꞌe Tosa­ꞌyru pe — Eraꞌapyk to mesuwe uikai atipy pe wuatꞌi Porekuat no e Tosa­ꞌyru pe. Miꞌi tote hap ewy aito iꞌewyte watoĩ­neꞌen iwywo more­kuaria wo are. Miꞌi hap ewy watoĩ­neꞌen iwywo katu­pono aito wẽtup ok miit ewy iwywo. Pyno mesup toimo­herep taꞌyn towese hap ahepe wuatꞌi eꞌat pe. Miꞌi pote — Egyiꞌat kahato watoꞌe Tupana pe. Yt uwe i poꞌog ekai iwese rakat watoꞌe."

⁸ Maꞌato yt aiminug wakuap kaipyi hin i Tupana aheha­kye­raꞌat. Taꞌi yt hin i uiwy­riaꞌin. Ahewaku hap yt putꞌokꞌe hin i Tupana wat hewaku hap ewy are. Aikyꞌe hap kaipyi towese hap kaipyi tutum aheha­kye­raꞌat hap ahepe. Wati­mohey Iesui hawyi tutum ahepe wuatꞌi eꞌat piat aheĩneꞌen hap yt kat i watunug pytkai tutum. Pywo pe ti tuwe­kaipyi tutum wato­mohey Iesui hawyi are."

⁹ Pyno yt naku i watoꞌe — Uito ti wakuat pote Tupana uheha­kye­raꞌat yt naku i watoꞌe katu­pono iꞌaparap haria watoĩ­neꞌen Tupana wanẽtup hawe miꞌi tupono yt watu­we­ha­kye­raꞌat kuap i.

"

¹⁰ Saꞌa­wyꞌi Tupana topo wo ainug. Koitywy Haꞌyru mohey haria wato­py­huꞌat wẽtup ywania ewy yn naꞌyn wato­py­huꞌat. Ainug hap eꞌyianmete Tupana toꞌe — Meiũran aru atipo­wyro kahato uimi­ky­ꞌesat nug neran haria e. Wakuaria sok ewy aru atunug miꞌiria e saꞌa­wyꞌi tuwepe."

¹¹ Maꞌato haꞌa­wyte eipe tawa Ewesu piaria yt kurin i eweikuap Tupana etiat katu­pono wẽtup ywania eipe. Saꞌa­wyꞌi sese ahaꞌa­seꞌi pot Aparãu emiari­ruꞌin yn Tupana ywania tukup­teꞌen mekewat eꞌat pe. Mekewat weꞌahit sokpe tek haria miꞌiria yn saꞌa­wyꞌi Tupana ehay kuap haria tukup­teꞌen. Maꞌato eipe wẽtup ywania eweikup­teꞌen saꞌa­wyꞌi yt Aparãu emiariru koꞌi hin i eipe. Nimo urupusu puo uruhetꞌok eipe ti yt weꞌahit sokpe tek haria i urutoꞌe."

¹² Katu­pono saꞌa­wy­ꞌite eipe yt Tupana mohey haria ywania hin i eipe maꞌato wẽtup ywania eweikup­teꞌen. Miꞌi hap eꞌat pe yt kat hin i eweikuap Tupana Mipo­ꞌoro Aipo­rekuat etiat katu­pono saꞌa­wyꞌi Tupana tiꞌairo Aparãu emiari­ruꞌin koꞌi yn temiitꞌin no saꞌa­wyꞌi. Yt eiꞌairo hin i saꞌa­wyꞌi. — Aparãu emiariru emiariru atiꞌa­tu­poi­tyro e Tupana. Atunug esaꞌy­ruꞌin esaki­ꞌytꞌin uiꞌy­wania wo e. Maꞌato ehepe yt mio tã e hin i saꞌa­wyꞌi. Yt kat i Tupana eipyꞌa pe saꞌa­wyꞌi miꞌi pote yt uwe i eipe — Areĩneꞌen aru wuatꞌi eꞌat pe e haria are."

¹³ Maꞌato mesup ti yt pya hin i raꞌyn eweikup­teꞌen Tupana kai Tupana Saꞌyru wuaria eipe pote. Saꞌa­wy­ꞌite ti pya kahato eweikup­teꞌen Tupana kai maꞌato mesup Iesui suu eimo­wo­ꞌosat kahato raꞌyn Tupana ete."

¹⁴ Koran eipe yt pya hin i Tupana kai katu­pono Iesui tunug naꞌyn ni Tupana wywuat aiwo­ꞌo­wese wese hap."

¹⁵ Aika­ꞌiwat ikuꞌuro ariaꞌyp posak ete hawyi woꞌo­wese hap tutunug eiꞌy­wania wywuat hamo iꞌewyte uruꞌy­wania wywuat hamo."

¹⁶ Miꞌi hawyi Haꞌyru mohey haria wẽtup ywania ewy raꞌyn wato­py­huꞌat. Wẽtup piit ewy yn. Iesui mohey haria aito pote yt kat i poꞌog aiwo­ꞌo­py­ꞌahak hap yt kat i aiwu­ꞌuka hap aiwo­ꞌope. Iꞌewyte yt kat i poꞌog Tupana wywuat hap aiwu­ꞌuka hap are."

¹⁷ Tupana tipo­ꞌoro Tosa­ꞌyru Aika­ꞌiwat no. Putꞌok­toꞌe hawyi aiꞌa­tu­muꞌe kahato hamuat. Iraniaꞌin ywania pya kahato tukup­teꞌen Tupana kuap hap kai. Uruꞌy­wania Iuteu ywania poꞌog yt pya i maꞌato torania aito wẽtup sok yn saꞌa­wyꞌi watu­kup­teꞌen pya kahato Tupana kai. Miꞌi hap eꞌat pe Iesui timo­herep ahepe muꞌap Toꞌywot kapiat hap."

¹⁸ Mekewat muꞌap ti ahera­ꞌaipok Tupana kapiat hap Aipo­typot Iesui kawiat katu­pono tutum naꞌyn Topãꞌãu ahepe. Miꞌi hawyi uruto Iuteuria iꞌewyte eipe yt Iuteuria i Tupana Pãꞌãu wẽtup takat eiam aito. Miꞌi pote mesup waku watuwat Tupana kape uruto Iuteuria iꞌewyte eipe wẽtup ywania waku wateke Aiꞌywot Tupana ehamo mesup Iesui aimo­wo­ꞌosat Tupana wywuat pote."

¹⁹ Saꞌa­wyꞌi areto eimuꞌe hamuat hap eꞌat pe eipe yt Tupana mẽpytꞌin hin i. Yt eweikuap hin i mekewat eꞌat pe Tupana sese yt kuap i haria eipe maꞌato mesup Tupana etawa piaria ewy raꞌyn eweikup­teꞌen. Mio Tupana saꞌy­ruꞌin no saki­ꞌytꞌin no raꞌyn eweikup­teꞌen. Koran Tupana yat piaria wo raꞌyn eweikup­teꞌen imẽpytꞌin no eipe mesup."

²⁰ Mio Tupana yat nug hat ewy watu­kup­teꞌen. Aikotã aiꞌyat watunug nu kawiat hawyi toĩneꞌen motꞌi hap ewy. Miꞌi hap ewy Tupana tunug toꞌyat mesup maꞌato miitꞌin kawiat. Toha­ꞌa­wynug toꞌyat nug hap hamuat ewy toĩneꞌen mesup. Waku yne hawyi totopag Tosa­ꞌyru mohey haria nu ewywuat toꞌyat iheg nakat pe hamuat are."

²¹ Maꞌato mekewat nu wato yne aiꞌy­wyt­ꞌok­pype aimoe­saika hap miꞌi nu ewywuat ti Aika­ꞌiwat Iesui. Miꞌi hawyi wato­mohey Iesui hawyi ainug toꞌyat motag hamo. Miꞌi hawyi meiũran Tupana yat ikahu rakano wato­py­huꞌat hap ewy are."

²² Koitywy Tupana toĩneꞌen toꞌyat pe katu­pono Ipãꞌãu toĩneꞌen aipyꞌa pe pote. Miꞌi hawyi aito imohey haria yne yne aito wato­py­huꞌat aiwo­ꞌo­pype wẽtup yat ikahu rakat ewywuat Tupana eiam sese aitoria yne are.

"

3

¹ Mesup ti uito Pauru woꞌo­pyhik hawe areĩneꞌen katu­pono more­kuaria yt tiky­ꞌesat i poꞌog miitꞌin muꞌe uhepiat hap Iesui etiat hamo. Miꞌi pote uipyhyp mesuwe woꞌo­pyhik hawe. Yt taꞌa­tu­ky­ꞌesat i iraniaꞌin ywania ikuap Iesui hap. Miꞌi pote uipyhik mesuwe wen maꞌato yt uipyhik kuap i meiũwat woꞌo­pyhik hawe katu­pono mesuwe ahẽtup Tupana kape eipo­wyro hap at kaꞌap. Iꞌewyte arepotpap kahato miwan nug hap ete mesuwe uimi­po­ꞌoro einãpin hamuat hap ete."

² Uiwa­nẽtup hawe Iesui mipyhyp areĩneꞌen toiky­ꞌesat pote are. Waku kahato Tupana hegyiꞌat kahato. Uipo­wyro kahato mesuwe woꞌo­pyhik saꞌag hawe topotpap nug hap ete."

³ Katu­pono mesuwe koitywy Tupana timo­herep kahato uhepe saꞌa­wy­ꞌiwuat yt uwe mikuap i sehay toimo­herep uhepe aikotã wẽtup ywania ipakup imohey haria tutunug hap. Taꞌi ipakup takaria tutunug mesup wuatꞌi ywania kawiat. Aikotã toꞌy­wania pakup tutunug mesup hap toimo­herep mesuwe uipyhyp hawe uhepe. Waku kahato Tupana yt uwe i ipyhyp kuap are.

"

⁴ Miꞌi koꞌi atiwan mesup ehowawi yt iwato i wen uimiwan mesuwe maꞌato mesup uimiwan hit ete waku eiwe­muꞌe kahato are at kaꞌap. Miꞌi hawyi eweikuap uiꞌewy Tupana mienoi migꞌi wuat sehay miꞌi Aipo­typot ywania pakup etiat."

⁵ Saꞌa­wy­ꞌi­wuaria yt uwe i ikuap mesuwat sehay migꞌi wuat Tupana — Atunug aru e hap. Tupana yn ikuap. Iꞌewyte ihay moherep haria saꞌa­wy­ꞌi­wuaria yt ikuap i maꞌato mesup Tupana Pãꞌãu timo­herep taꞌyn uruepe tehay moherep haria pe uruto Iesui potpo­ꞌo­roria 12 ok takaria pe toimo­herep tehay migꞌi wuat Topãꞌãu wo."

⁶ Koran Tupana Pãꞌãu toꞌe ahepe — Saꞌa­wyꞌi iraniaꞌin ywania yt uikuap hin i maꞌato mesup atipo­ꞌoro uhehay wakuat wuatꞌi ywania ewawi aikotã areꞌe saꞌa­wyꞌi miwan me. Atunug aru e hap ewy mesup atunug naꞌyn e. Koran atunug naꞌyn Iraniaꞌin ywania Porekuat no raꞌyn Uhaꞌyru e. Miꞌi imohey haria sok wẽtup piit ewywuat yn naꞌyn teꞌe­ro­py­huꞌat aru e. Aikotã saꞌa­wyꞌi atipoi­tyro Iuteu ywania atiꞌa­tu­poi­tyro mesup yne yne ywania aikotã areꞌe saꞌa­wyꞌi uiꞌe hap ewy atunug mesup e Tupana uhepe. Saꞌa­wyꞌi migꞌi wo sese yt uwe mikuap mo i mesuwat uiꞌe hap are maꞌato koitywy atimo­herep miꞌi uiꞌe hap yne miitꞌin me uimiwan kaipyi uhehay kaipyi e Tupana ahepe."

⁷ Uito Pauru saꞌa­wyꞌi Aipo­typot Iesui uinug topot­po­ꞌoro wo tehay sytpok hamo tehay moherep hamo miitꞌin me wuatꞌi ywania piat hamo uinug. Miꞌi hap atunug kahato uito maꞌato yt uhesaika hap upi i katu­pono Ipãꞌãu tum uhepe tesaika hap sehay wakuat moherep miitꞌin miat hamo."

⁸ Uhewaku hap yt putꞌokꞌe hin i Aipo­typot eropat hamo are. Taꞌi uito ti poꞌog kurin kano areĩneꞌen poꞌog yi kape torania Iesui mohey haria kai areĩneꞌen uito maꞌato miꞌi pytkai Tupana uiꞌairo iraniaꞌin ywania muꞌe hamo tehay ikahu rakat ete uhewaku hap yt putꞌokꞌe hin i heropat hamo pytkai are. Yt naku i uito pytkai towese kahato hap mywo uiꞌairo katu­pono yt poꞌog hin i uito. Koitywy atimõꞌẽ kahato iraniaꞌin ywania pe. Tupana ekareꞌen mõꞌẽ hat ewywuat areĩneꞌen uito aikotã wuatꞌi eꞌat piat hekat rakat tomõꞌẽ hap ewy areĩneꞌen. Aika­ꞌiwat Iesui ekat iwato kahato aikotã poꞌog poꞌog wuatꞌi kai toĩneꞌen poꞌog poꞌog Miꞌi ekat mõꞌẽ hat ewy areĩneꞌen uito Pauru."

⁹ Saꞌa­wy­ꞌi­tewuat migꞌi wuat Tupana mimo­herep aikotã toiky­ꞌesat yne ywania towanuat hap toimo­herep mesup uiwẽ pyi. Tupana ti wuatꞌi wuatꞌi nug hat maꞌato kat hamo ainug saꞌa­wyꞌi yt tohenoi i. Miꞌi kape miitꞌin saꞌa­wy­ꞌiwuat teꞌe­ru­wa­nẽtup kahato maꞌato yt taꞌa­tukuap kuap i. Maꞌato koitywy toimo­herep taꞌyn miꞌi e hap ahepe."

¹⁰ Koitywy koran mesuwat eꞌat pe Aiꞌakag Iesui timo­herep kahato toweꞌeg kahato hap mo ahepe iꞌewyte yne atipy piaria pe. Koitywy atipy piaria Surara Akag wo toĩneꞌen Iesui iꞌewyte Tupana etawa piaria atipy piaria tikuap taꞌyn Tupana weꞌeg kahato hap koꞌi katu­pono ahowawi Iesui mohey haria kape teꞌe­ra­haꞌat kahato hawyi teꞌe­roꞌe toꞌope — Pywo ti Tupana iweꞌeg poꞌog torania kai katu­pono yne ywania toiꞌa­tue­ha­kye­raꞌat kuap iꞌatuꞌe."

¹¹ Wuatꞌi eꞌyianmete Tupana tunug toweꞌeg hap upi yne tomi­ky­ꞌesat upi. Mio tã e — Atiꞌa­tue­ha­kye­raꞌat yne ywania yne miitꞌin e. Uimi­po­ꞌoro Iꞌatu­po­rekuat nuat po wo Uhaꞌyru minug upi atiꞌa­tue­ha­kye­raꞌat wuatꞌi ywania e Tupana saꞌa­wyꞌi yt kat i te mesuwat yi turan yianmete mio tã e tuwepe migꞌi wo. Miꞌi hap toimo­herep taꞌyn uhepe mesuwe uipyhik hawe."

¹² Miꞌi pote mesup yt wato­kenꞌẽ hin i Tupana kapiat ahehay hamo. Yt kat i aiwe­mõti hap ahehay iwywuat hamo katu­pono koitywy Haꞌyru upi imohey hap upi watuwat kahato Tupana kape aikotã wẽtup piit ewy yn watoĩ­neꞌen Haꞌyru wywo Aheykeꞌet Aikywyt wywo.

"

¹³ Uiwy­riaꞌin tawa Ewesu piaria more­kuaria uipyhik mesuwe iheg me mesup yt taꞌa­tu­ky­ꞌesat i woro­ho­ꞌo­muꞌe poꞌog hap wote. Uhatyꞌi hatyꞌi kahato mesuwe. Ahoꞌopot kahato wen maꞌato waku ahoꞌopot eimuꞌe hap ete are. Pywo ti rat yt paaꞌe­weiꞌe teiꞌo are uipyhik neꞌi hap upi kat pote meiũpe areĩneꞌen Aiꞌywot atipy piat Tupana ehamo are."

¹⁴ Miꞌi tã ahẽtup mesuwe at kaꞌap — Uruꞌywot atipy piat arepỹ­ꞌã­tutuk ewawi mesuwe katu­pono wuatꞌi ywania ehakye­raꞌat kuap hat En are."

¹⁵ Wuatꞌi ywania mesuwat yi totiat nug hat En are iꞌewyte yne ywania atipy piaria nug hat En are."

¹⁶ Wuatꞌi wuatꞌi mimõ­typot En are. Yt uwe i poꞌog ekai are. Miꞌi pote ahẽtup ekawiano etum no emohey haria pe tawa Ewesu piaria pe Epãꞌãu wakuat iꞌatu­moe­saika hamuat hap ahẽtup epe. Atiky­ꞌesat kahato iꞌatu­wa­nẽtup hap hesaika rakat ewy emohey hap ete."

¹⁷ — Etunug no Emipo­ꞌoro Iesui kawiat eꞌyat sese itote. Ereĩneꞌen itote emohey haria pyꞌa­setpe. Atiky­ꞌesat iꞌatu­sapo yi pe iheg me ariaꞌyp wato gaꞌapy piat hap ewy. Atiky­ꞌesat miꞌiria iheg me woꞌo­kyꞌe hawe iꞌewyte ekyꞌe hawe hap atiky­ꞌesat are."

¹⁸ Ahẽtup kahato ti ewawi Tupana. Atiky­ꞌesat kahato ti itotiaria tikuap Esaꞌyru piat taꞌa­tu­kyꞌe hap are. Atiky­ꞌesat yne urutoria Esaꞌyru moheg haria ikuap haria. Etum no esaika hap iꞌatuepe kat kupitu kat kupitu Esaꞌyru piat iꞌatu­kyꞌe hap kuap hamo are katu­pono iwato kahato Esaꞌyru piat urukyꞌe hap iꞌywop kahato hap ewy iꞌanam kahato hap ewy. Miꞌi hap kuap hamo atiky­ꞌesat taꞌa­tukuap taꞌa­tu­kyꞌe hap Esaꞌyru piat hap atiky­ꞌesat Tupana are."

¹⁹ Yt karãpe i uruikuap yne kat kupitu kat kupitu urukyꞌe hap Iesui piat hap maꞌato ahẽtup kahato ewawi Tupana etimo­herep emohey haria pe tawa Ewesu piaria pe aikotã aikotã Esaꞌyru taꞌa­tu­kyꞌe hap ahẽtup epe are. Miꞌi hap taꞌa­tukuap hawyi teꞌe­ro­py­huꞌat eiam sese wo raꞌyn Tupana are iꞌewyte ereĩneꞌen no iꞌatu­wywo kahato are ahẽtup Tupana pe mỹꞌã­tutuk pepyi mesuwe woꞌo­pyhik hawe.

"

²⁰ Taꞌi uiwy­riaꞌin Ahetu­pana hepap kahato aimiẽtup ium hamo poꞌog poꞌog iwato tutum kuap aimiẽtup koꞌi kai are. Yt karãpe i teke aiwa­nẽtup hawe kat kupitu kat kupitu hegyiꞌat hap are. Tutum poꞌog poꞌog kuap ahepiat hẽtup kuap hamo kai katu­pono Ipãꞌãu hesaika aikai ahepiat hẽtup hamo Tupana pe are."

²¹ — Uruetu­pana uruimõ­typot kahato En urutoꞌe. Emipo­ꞌoro Urupo­rekuat nuat mohey haria sese uruto. Taꞌi urutu­wehum kahato ewawi wuatꞌi eꞌat pe aru urutoꞌe ewawi Tupana waku raꞌyn urutoꞌe.

"

4

¹ — Uimi­mu­ꞌeria tawa Ewesu piaria mesup uito Pauru areĩneꞌen meiũpe woꞌo­pyhik hawe. Wanĩ­kaptia uipyhyp taꞌyn Aika­ꞌiwat potpap nug hap pyhyp hamo uipyhik wen maꞌato miꞌi pytkai woro­ho­ꞌo­muꞌe te uimiwan myi uiwy­riaꞌin. Saꞌa­wyꞌi Tupana aiꞌairo temiitꞌin no tomõ­typot hamo. Miꞌi pote areꞌe ehepe — Toꞌiro wati­mõ­typot Aiꞌairo hat haty wo are. Aikotã aimẽ­pytꞌin hãpyk takaria ewy aimo­wepit taꞌa­tu­potpap wakuat nug hap ete aimi­ky­ꞌesat nug hap ete miꞌi hap ewy waku wati­mo­wepit Aiꞌywot atipy piat wakuat nug hap kaipyi."

² Yt naku i watoꞌe aiwa­nẽtup hawe — Uito poꞌog iraniaꞌin imohey haria kai yt naku i watoꞌe. Pyno toꞌiro watoĩ­neꞌen hãpyk kahato rakaria wo. Waku watu­we­potpap Aika­ꞌiwat kape aipe­rupꞌi wywo yt kat i aipy­ꞌahak hap mywo waku are. Waku wati­mo­herep iraniaꞌin miitꞌin kyꞌe hap yne aiminug koꞌi ete are. Waku wati­ꞌa­tu­kyꞌe iraniaꞌin yt iꞌatu­wese i pytkai."

³ Waku watoĩ­neꞌen yt kat i aiwu­ꞌuka hap mywo katu­pono Tupana Pãꞌãu tiky­ꞌesat aiwo­ꞌo­wese kahato hap are. Miꞌi pote waku watuwat Ipãꞌãu upi. Waku wẽtup mẽpytꞌin koꞌi wẽtup piit ewy wato­py­huꞌat Iesui wywo."

⁴ Katu­pono aito Aika­ꞌiwat piit aga koꞌi ewywuat are. Iꞌewyte Aipãꞌãu Tupana miium Aika­ꞌiwat Iesui wanuat e. Miꞌi pote aito imohey haria wẽtup pãꞌãu wẽtup piit ewywuat wato­py­huꞌat mesuwe aito imohey haria. Aito ti wẽtup piit imohey haria aito pote aiwo­ꞌo­ꞌe­wy­ꞌewy katu­pono Iesui wywo watu­kup­teꞌen. — Mũki­ꞌite ti aru watoĩ­neꞌen wuatꞌi eꞌat pe e haria sok aito watoꞌe."

⁵ Wẽtup yn Aika­ꞌiwat. Aito aity­pyꞌi kahato wen maꞌato wẽtup yn Aika­ꞌiwat pote wẽtup yn aimi­mohey wẽtup set upi yn ahetꞌok hap. Miꞌi pote wẽtup piit ewy yn watoĩ­neꞌen."

⁶ Wẽtup yn ni Aiꞌywot Atipy piat. Miꞌi ti Tupana wuatꞌi miitꞌin nug hat. Miꞌi ti Aiꞌakag Koro wo toĩneꞌen e. Wẽtup yn Ahetu­pana. Tupana ti toĩneꞌen ahepuo ipotpap nug hamo. Miꞌi pote aito wato­py­huꞌat ipiit ewy miitꞌin sem kahato aito pytkai."

⁷ Miꞌi hawyi wẽtup ok pe wẽtup ok pe tomohey haria pe toimõꞌẽ tomi­sepap koꞌi nug hap tomi­ky­ꞌesat ewy. Toiꞌa­tu­mõꞌẽ ahepuo tomi­sepap nug hap ipotpap koꞌi nug hamuat. Aipo­typot Iesui miky­ꞌesat ewy Tupana tiꞌa­tu­mõꞌẽ tomi­sepap koꞌi ahepe."

⁸ Miꞌi tutunug aikotã toꞌe saꞌa­wyꞌi morekuat Tawi miwan me e hap ewy — Meiũran ti aru Tupana Mipo­ꞌoro topy­huꞌat wuatꞌi Porekuat Koro wo e. Miꞌi Miit tiꞌakit yne tewa­nĩ­kaptia hawyi taꞌam aru atipy kape e. Miꞌi tote pyi toimõꞌẽ aru tesaika hap tomi­sepap koꞌi nug hamuat temiitꞌin me mesuwe e morekuat Tawi saꞌa­wyꞌi tomiwan me tuwepy hawe 68.18 hawe."

⁹ Pyno ti taꞌam e miwan me maꞌato taꞌam hap tohenoi pote iꞌewyte tohenoi tut hamuat yi ywytꞌok­pype topot­ꞌapyk hap iꞌewyte ti tohenoi yt toꞌe i pytkai."

¹⁰ Mekewat taꞌapyk hap tohenoi iꞌewyte mekewat yi ywytꞌok­pypiat toto hap tohenoi morekuat Tawi miwan me. — Pyno mekewat toto poꞌog yi ywytꞌok­pype iꞌewyte mesup taꞌam naꞌyn poꞌog atipy kape poꞌog taꞌam naꞌyn torania kai. Ywaiti hap tote taꞌapyk taꞌyn Morekuat no. Iesui toto raꞌyn waikiru apy tote iꞌewyte toĩneꞌen Morekuat no aipy­ꞌa­setpe."

¹¹ Koitywy toimõꞌẽ kahato ahepuo tomi­sepap koꞌi topotpap nug hamuat aikotã toꞌe miwan me hap ewy — Wẽtup ok pe wẽtup ok pe tomi­ꞌai­roria pe tutum tesaika hap tehay moherep hamo wẽtup ywania pe wẽtup tama totiaria pe e. Wẽtup ok pe wẽtup ok pe tutum tesaika hap Tupana ehay sese moherep miitꞌin miat hamo e. Wẽtup ok pe wẽtup ok pe tutum tesaika hap tehay sytpok kahato hamo miitꞌin sem miat hamo hap tutum e. Wẽtup ok pe wẽtup ok pe ti tutum tesaika hap temiit tohũria apykok hamuat hap tutum e. Wẽtup ok pe wẽtup ok pe ti tutum tesaika hap temiitꞌin atupo­wyro hamuat hap tutum e. Wẽtup ok pe wẽtup ok pe tutum tesaika hap yne miitꞌin atumuꞌe hap kuap kahato hamuat hap tutum."

¹² Wẽtup ok pe wẽtup ok pe tutum tesaika hap tomi­sepap koꞌi yt uwe minug kuap i nug hamuat hap tutum e. Pyno yt toꞌo­ꞌe­wy­ꞌewy hin i toimõꞌẽ tesaika hap tomi­sepap nug hamuat koꞌi tominug kuap hap ewywuat nug hamuat hap koꞌi are. Taꞌi toimõꞌẽ kahato ahepe tomiium koꞌi are. Yt toꞌo­ꞌe­wy­ꞌewy hin i tutum. Ewat emikuap uiat uimikuap Tupana miium koꞌi aimi­sepap koꞌi yt toꞌo­ꞌewy hin i are. Tomohey haria moweꞌeg hamo tutum tesaika hap ahepe topotpap nug kuap hamo tutum e. Tupana tiky­ꞌesat kahato aito tomi­po­ꞌoro koꞌi Tosa­ꞌyru Iesui ewywuat e. Miꞌi pote aimoe­saika Tosa­ꞌyru Pãꞌãu wo topotpap nug hamuat."

¹³ Iꞌewyte Tupana tiky­ꞌesat aito Aika­ꞌiwat Iesui ewywuat aito torania iwywo wẽtup piit ewy hap toiky­ꞌesat e."

¹⁴ Yt toiky­ꞌesat i wẽtup ok wẽtup ok mienoi saꞌag upi wato­py­huꞌat hap kat pote toiky­ꞌesat Tosa­ꞌyru mienoi upi yn wato­py­huꞌat hap. Imohey haty wuat hap toiky­ꞌesat. Iꞌatu kahato aimuꞌe iweꞌeg kahato rakaria aimuꞌe kuap kahato haria maꞌato yt pywo pe i yt Iesui mienoi upi i haria aimuꞌe maꞌato ahekat kyꞌewi yn aimuꞌe haria e. Miꞌiria ehay upi wato­py­huꞌat hawyi iꞌatue­wa­miri pe wato­py­huꞌat hap ewy aikotã wasere owa kape wato teran ihyemyiꞌa wato sakpo teran maꞌato yt wato kuap i ipoityꞌi pote hap ewy katu­pono miꞌiria teꞌe­ru­wa­nẽtup at kaꞌap aima­ꞌatꞌi maꞌatꞌi hap ete iꞌatuehay wẽtup upi. Yt eweimohey teiꞌo miꞌiria yne miitꞌin miat aimuꞌe hap are. Yt naku i wato­py­huꞌat hira­karia ewy aimikuap ete are. Hira­karia imohey yne yne miitꞌin ehay sio pywo sio yt hap taꞌa­tu­mohey. Waku wato­mohey aimuꞌe hat Iesui e hap ewy aimuꞌe pote. Waku wati­moheg aimi­mohey Iesui aipyꞌa pe aiwa­nẽtup hawe e. Tupana wywo wẽtup piit ewy watu­kup­teꞌen. Miꞌi hawyi aiꞌy­wania uruꞌy­wania wẽtup ywania ewy yn naꞌyn ainug e. Koitywy Tupana ywania raꞌyn aito. Saꞌa­wyꞌi Iuteu ywania eiꞌy­wania tukup­teꞌen toꞌope toꞌope toꞌoe­wa­nĩkap mo teꞌe­ro­py­huꞌat. Mekewat eꞌat pe toĩneꞌen eipyhyp hap ewywuat Iuteu etawa kapiat eweiwat hamo. Maꞌato mekewat eipyhyp hap Tupana kapiat hap Iesui tiꞌa­porok yne raꞌyn topy wo."

¹⁵ Iuteu eko iꞌewyte wãiꞌi­ꞌa­tuꞌe hap koꞌi yt Tupana miwan ewy i toimo­weityk miꞌi hawyi towano tutunug mote Iuteu ywania iꞌatu­py­ꞌahak kahato ehete kat pote yt iꞌatueko yt ewy i raꞌyn aheko pote iꞌatu­wo­ꞌo­nãpin hap koꞌi iꞌatu­wo­ꞌoewãi hap koꞌi. Miꞌi pote iꞌatu­py­ꞌahak — Wãi wãiꞌi­ꞌa­tuꞌe maꞌato yt eweiwat i wãiꞌi­ꞌa­tuꞌe hap upi hawyi woꞌoe­wa­nĩ­kaptia wo eweikup­teꞌen.

Typy ywania eweikup­teꞌen saꞌa­wyꞌi. Miꞌi hawyi putꞌokꞌe Aika­ꞌiwat Iesui hawyi toiꞌa­tu­kaykay yne miitꞌin tuwe­wawi yne ywania. Miꞌi hawyi tutunug yne miitꞌin Tupana ywania wo. Koitywy ipatꞌok yne ywania Iuteu ywania eiꞌy­wania iraniaꞌin ywania tukup­teꞌen Iesui mohey haria. Miꞌi hawyi watu­kup­teꞌen mesup yne yne raꞌyn wẽtup piit ewy Iesui wywo woꞌo­wese rakaria raꞌyn wato­py­huꞌat."

¹⁶ Saꞌa­wyꞌi aito wuꞌuka yne ywania wywuat haria aito wuatꞌi ewanĩ­kaptia wo watu­kup­teꞌen. Pya kahato watu­kup­teꞌen Tupana kai aito torania.

Aipiit ete ipoity ahaga koꞌi maꞌato wẽtup piit yn watoĩ­neꞌen aito wẽtup piit yn aito. Yt tuweran hin i maꞌato ahaga koꞌi. Toꞌosat kahato ahaga koꞌi. Miꞌi hawyi aipiit iheg aipiit wẽtup yn. Aipuꞌi aikag koꞌi ahaga toꞌosat toꞌoete kahato. Karãpe watunug Aiꞌakag Iesui miky­ꞌesat ewy hawyi wato­py­huꞌat aikotã haga koꞌi ewy ipiit ewy. Miꞌi hawyi wahe­wyry aikotã ihãite rakat ewy. Karãpe aito Iesui mohey haria wato­ꞌo­kyꞌe yne yne aiwo­ꞌope miꞌi hawyi wato­ꞌo­po­wyro miꞌi hawyi wato­py­huꞌat aito Iesui piit ihãite rakat ewy."

¹⁷ Pyno woro­ho­ꞌo­muꞌe teran Aika­ꞌiwat Iesui ehay ete. Eweꞌeg wo o eiminug saꞌag koꞌi eimi­ky­ꞌesat saꞌa­wyꞌi eheko saꞌa­wy­ꞌiwuat pupi are. Yt imohey i te turan wuat saꞌag nug hap ete yt aiweꞌeg hin i saꞌa­wy­ꞌiwuat aiminug saꞌag koꞌi kai — Eweiꞌatoiat ro miꞌi koꞌi e Tupana pytkai. Uiwy­riaꞌin yt naku i watu­wa­nẽtup poꞌog aikotã yt imohey i haria wanẽtup hap ewy neꞌi katu­pono miꞌiria yt naku i nug hap yn iꞌatu­wa­nẽtup hawe. — Uito poꞌog poꞌog torania kai iꞌatuꞌe taꞌa­tu­wa­nẽtup hawe. Yt paaꞌi­ꞌa­tuꞌe hin i taꞌa­tu­minug yt naku i hawyi. Miꞌi tã iꞌewyte aito saꞌa­wyꞌi maꞌato mesup waku watu­we­nãpin miꞌi e hap pun hamuat e."

¹⁸ Yt karãpe i teꞌe­ru­wa­nẽtup Iesui ewawi miꞌiria. Iꞌatu­wa­nẽtup hap hoꞌo­wasat kahato hap ewy aikotã miitꞌin iꞌypyryp we hoꞌo­wasat hap ewy tukup­teꞌen. Katu­pono iraniaꞌin yt imohey i haria yt karãpe i Tupana mohey haria. — Miꞌi pote yt karãpe i areĩneꞌen Iꞌatu­ꞌywot no e Tupana iꞌatuepe. Yt teꞌe­ru­wa­nẽtup hin i uhehay kape e. Iꞌatue­waure kaꞌa yt uikuap i hap e. Taꞌa­tu­ky­ꞌesat kahato wẽtup muꞌap e. Yt kat i uikuap hap taꞌa­tu­ky­ꞌesat e. — Yt urumuꞌe teiꞌo yt uimuꞌe teiꞌo iꞌatuꞌe yn at kaꞌap uhepe e. Taꞌa­tunug saꞌag sese sakpo yt uimi­ky­ꞌesat ewy i are e Tupana saꞌa­wyꞌi miꞌiria piat pe."

¹⁹ Karãpe taꞌa­tunug saꞌag wemõti hap ewy miꞌi hawyi yt teꞌe­ru­we­mõti hin i. — Yt naku i miꞌi tã eweikup­teꞌen e Tupana pytkai yt paaꞌi­ꞌa­tuꞌe hin i. Teꞌe­ru­wepyi taꞌa­tupiit miky­ꞌesat saꞌag hap ok tã yn taꞌa­tunug neran yt naku i. Taꞌa­tue­waire hap kape yn teꞌe­ru­we­wa­nẽtup taꞌa­tu­pyꞌa pe. Yt teꞌe­ru­wewãi teran hin i yne saꞌag nug hap ete. Taꞌa­tueko saꞌag nug hap kape yn teꞌe­ru­we­potpap miitꞌin ehamo taꞌa­tunug. Aikotã aikotã miitꞌin mõti hap ewy yn taꞌa­tunug wuatꞌi ehamo maꞌato yt teꞌe­ru­we­mõti hin i pytkai."

²⁰ Maꞌato Aipo­typot Iesui — Yt eweikup­teꞌen neiꞌo miꞌiria ewywuat e. Waku eweikup­teꞌen uiꞌe­wywuat e Aimuꞌe Hat Koro ahepe."

²¹ Uiwy­riaꞌin pywo ti waku watoĩ­neꞌen Aika­ꞌiwat Iesui ewy are. Waku watikuap kahato ieĩneꞌen hap etiat iꞌewyte sehay etiat aimuꞌe hap etiat hãpyk kahato rakat ewywuat. Waku wati­ꞌa­tunug yne Aiꞌakag minug ewywuat aikotã aimuꞌe Iesui hap ewy. Maꞌato yt naku i watunug mote watikuap taꞌyn yt imimu­ꞌeria i aito hap watikuap."

²² Pyno waku watoiat aiwẽ piat saꞌag nug hap ete aheko yt naku i nug hap saꞌag saꞌa­wy­ꞌiwuat. Waku yne wati­pugha aiminug saꞌag koꞌi saꞌa­wy­ꞌiwuat aiminug koꞌi are kat pote saꞌa­wyꞌi aiwa­nẽtup saꞌag hap yn watunug neran. Yne aimi­ky­ꞌesat saꞌag koi aimaꞌat hap ewywuat topy­huꞌat. Maꞌato yt watoiat i aiminug saꞌag saꞌa­wy­ꞌiwuat miꞌi pote aheko ewy topy­huꞌat ahete. Miꞌi hawyi aiwe­maꞌat hap yn topy­huꞌat iheg me aiwa­nẽtup hap hawyi heso heso rakaria wo wato­py­huꞌat wemaꞌat haria ewywuat wo watoĩ­neꞌen."

²³ Waku watoꞌe Tupana pe — Uinug o ipakup takat wo waku watoꞌe. Uinug o waku wanẽtup hano iꞌewyte uinug o waku kapiat wanẽtup hat wo waku watoꞌe. Areĩneꞌen neran ipakup takano areĩneꞌen neran uiwa­nẽtup hawe uipyꞌa pe waku watoꞌe Tupana pe. Miꞌi yn waku katu­pono Tupana yn aihep kuap i aheko saꞌag nug at kaꞌap hap po pyi e."

²⁴ Aikotã watopag ahesokpe aipiit pe ipakup takat hawyi aikahu hap ewy raꞌyn topy­huꞌat. Miꞌi hap ewy waku watopag ahete Tupana aimo­kahu hap ewywuat aipainug hap ewywuat. Tupana wanẽtup hap ewy waku watopag aiwa­nẽtup hawe. Tupana wanẽtup hap watopag aiwa­nẽtup hawe hawyi ipakup takaria ewywuat sokpe pakup we ahewyry hap ewy Tupana wanẽtup hawe. Waku watu­we­painug Tupana ehay wo. Waku watunug yne Tupana tunug hãpyk hap ewy. Waku yt kat hin i miitꞌin maꞌat hap aikai. Waku hãpyk Tupana ewy wahe­wyry mesu­wa­ro­tiaria pyꞌa­setpe. Miꞌi watunug mote watopag ahesokpe pakup ewywuaria aipainug hap ewy wato­py­huꞌat hap yt aipuꞌi ete i maꞌato aipyꞌa pe aipainug kahato hap toĩneꞌen hap ewy."

²⁵ Aito ti Aimi­mohey Iesui piit ewywuat wato­py­huꞌat yne aito haga ewy. Pyno yt naku i aheso aiwo­ꞌope aikotã saꞌa­wyꞌi watunug hap ewy. Waku wati­pugha aiwo­ꞌope aheso heso hap aikotã watipun ahesokpe hiotꞌe rakat ewy. Koitywy waku pywuat sehay yn aiwo­ꞌope ahehay are. Miꞌi watunug mote aipainug hap aipyꞌa piat aiwa­nẽtup hawiat ikahu kahato Tupana ehamo."

²⁶ Karãpe aipy­ꞌahak putꞌokꞌe wẽtup ok etiat hap yt naku i wati­po­wyro mekewat aipy­ꞌahak hap are. Waku aipohep mekewat aipy­ꞌahak hap toĩneꞌen ahete turan. Waku meremo aipohep mekewat aipy­ꞌahak motꞌi hap ete. Waku meremo watu­we­mo­pe­rupꞌi aipy­ꞌahak hap ete. Yt naku i wato­py­huꞌat typy eꞌat aipy­ꞌahak hap wywo. Waku waure wo wato­py­huꞌat at minꞌe hap eꞌyianmete."

²⁷ Karãpe ahãꞌãg ahiag yt naku i nug hap ete miꞌi pote waku yt ahehay upi i are."

²⁸ Saꞌa­wyꞌi wate­roꞌok iraniaꞌin ekat maꞌato koitywy waku watoiat mekewat ahesokpe nem hap ewy are. Yt naku i Iesui mohey hat sero­ꞌokꞌe hano topy­huꞌat. Waku mesup ipakup we watoĩ­neꞌen motpap nug haria wo waku watoĩ­neꞌen. Waku aheꞌat hakup wywo aipotpap at. Miꞌi hawyi aipotpap hap saꞌup wywo waku ahekat. Yt naku i miitꞌin maꞌatꞌi maꞌatꞌi hano aipotpap are. Waku watikat ahekat iwato hawyi ahegyiꞌat hap wywo hatek takaria powyro hanuaria watu­kup­teꞌen. Miꞌi hawyi satek haria poi haria wo wato­py­huꞌat aiko wato kaipyi. Miꞌi hap watunug mote ahegyiꞌat hap topy­huꞌat ahete aipainug hap ikahu rakat ewy topy­huꞌat mesuwe Tupana wanẽtup hawe."

²⁹ Waku ahehay hẽꞌẽ rakat ewy are. Waku iwese kahato rakat ewy watoĩ­neꞌen. Waku iraniaꞌin mowepit ahehay kuap hanuaria watikuap are. Miꞌi tã watunug mote pywo iꞌatuꞌe hamo ahehay kuap haria. Miꞌi hawyi ahehay kuap haria poityro hat ewy wato­py­huꞌat. Yt naku i wato­pot­kuasa ahehay wo. Yt naku i wati­poepyk ahehay wo are.

"

³⁰ Karãpeĩ saꞌa­wyꞌi wato­py­huꞌat Tupana Pãꞌãu eiam mo miꞌi hap eꞌat pe Tupana toꞌe ahepe — Wuatꞌi eꞌat pe aru ereĩneꞌen uianuat uhemiit no e ahepe. Uimie­ha­kye­raꞌat wuaria eipe e ahepe. Pywo yt uheso hin i uiꞌe hap e ahepe Tupana. Pyno uhehay moheg hamuat atum Uipãꞌãu ehowawi e ahepe saꞌa­wyꞌi. Mesup Uipãꞌãu toꞌe ehepe — Woro­ho­ꞌonug eipe uhemiit sese nuaria e. Worokuap kahato eipe mesup e ahepe Tupana. Uheiam mo Uipãꞌãu eiam mo eweikup­teꞌen e mesup ahepe. Miꞌi pote yt naku i wati­mo­ꞌarot neꞌi Tupana Pãꞌãu aiminug saꞌag wo are."

³¹ Wati­mo­ꞌarot kahato Tupana Pãꞌãu karãpe aipy­ꞌahak iraniaꞌin ete pote. Miꞌi pote waku watoiat mekewat yt naku i haiug nakaria are. Yt naku i watu­wehum hary­poria kape ihainia kape ipiit kyꞌesat hap wywo ahewaire teran hap wywo. Miꞌi watunug mote Tupana Pãꞌãu aipiit pe iꞌarot kahato hap ewy are. Yt naku i wato­pot­wesat ahehay pirik hap wywo ahehay saꞌag wywo. Yt naku i marakꞌa wo watoĩ­neꞌen. Miꞌi tã watoĩ­neꞌen mote miꞌi tã watunug mote Tupana Pãꞌãu moꞌarot hat watoĩ­neꞌen."

³² Maꞌato waku watoĩ­neꞌen iwese kahato rakaria wo. Waku aiwo­ꞌo­wese hap ahehay perupꞌi popuo. Waku meremo wati­waure aimaꞌat hat aikotã Aika­ꞌiwat waure wo tomaꞌat hap aiminug saꞌag kai toĩneꞌen hap ewy. Waku watu­kup­teꞌen waure wo yne yne aimaꞌat hap koꞌi kai are. Uito ti Pauru. Woro­ho­ꞌo­nãpin kahato waku iwese kahato rakaria wo Iesui ewywuat eweikup­teꞌen are.

"

5

¹ Pyno aito Tupana saꞌy­ruꞌin haki­ꞌytꞌin wato­py­huꞌat miꞌi pote waku wahãꞌãg kahato Aiꞌywot Tupana waku nug hap ewywuat nug hamo Aiꞌywot mõtypot hamuat Aiꞌywot pote."

² Aikotã Aipo­typot Iesui aikyꞌe kahato saꞌa­wyꞌi aikyꞌe kahato te. Aikyꞌe kahato hawyi aikyꞌe hap upi ikuꞌuro. Tutum naꞌyn heĩneꞌen hap aika­wiano hap aikotã saꞌa­wy­ꞌi­wuaria tum taꞌa­tu­hũria aria pe Tupana mowepit hamo. Miꞌi hap ewy ikuꞌuro ariaꞌyp posak ete aikyꞌe kahato haype. Aikyꞌe sese hat Iesui pote ikuꞌuro aiꞌa­piheg hap u hamo. Miꞌi pote aikotã aikyꞌe hap ewy waku wati­kyꞌe iraniaꞌin aiku­ꞌuro hap kape.

"

³ Pyno koitywy aito Tupana ywania sese koꞌi aito miꞌi pote waku iweꞌeg kahato rakaria wo waku watoĩ­neꞌen are. Waku iharyꞌi rakaria wo watoĩ­neꞌen iꞌewyte heꞌaito kahato rakaria wo waku watoĩ­neꞌen. Yt naku i aheĩneꞌen hap totiaria iꞌatuehay saꞌag ahete sio iweꞌeg sio yt iꞌatuꞌe hap ete sio tuwa­nẽtup saꞌag sio yt iꞌatuꞌe hap ete. Miꞌi pote waku hãpyk kahato watoĩ­neꞌen hary­poria wywo ihainia wywo iweꞌeg nakat ewywuat powyro hap are. Miꞌi pote miitꞌin yt uwe i ahete iꞌatuehay saꞌag sio aiweꞌeg sio yt iꞌatuꞌe hap ete. Waku yt naku i yt iꞌatuꞌe hin i ahepe. Yt naku i aito Iesui mohey haria yt hegyiꞌat i rakano wato­py­huꞌat are. Yt naku i wati­ky­ꞌesat saꞌag iraniaꞌin ekat aipyꞌa pe aheha wo. Yt naku i watu­wa­nẽtup at kaꞌap uruwat e hap kape. Waku poꞌog watikat ahegyiꞌat hap iraniaꞌin hatek takaria powyro hap are."

⁴ Koitywy aito Iesui mohey haria miꞌi pote waku watoiat yne saꞌa­wy­ꞌiwuat ahehay saꞌag hap koꞌi yt iweꞌeg i rakat ewywuat. Waku watoiat yne ahehay saꞌag miitꞌin muat ahehay saꞌag hap koꞌi miitꞌin wemõti hap koꞌi. Waku watoiat yne sehay saꞌag. Koitywy poꞌog waku sehay aiwẽ pyi Tupana kapiat aiwehum hap."

⁵ Pyno uiwy­riaꞌin waku aiweꞌeg wo katu­pono pywo ti yt uwe hin i ti aru yt nakuat i wanẽtup saꞌag haria tukup­teꞌen aru atipy pe aikope Aipo­typot Iesui toĩneꞌen Morekuat no hap tote are. Yt uwe i itote atipy pe uiano yn mo e haria yt hegyiꞌat i rakaria. Eweꞌeg wo o miꞌi pupi katu­pono yt ahegyiꞌat i hap yt naku i sese Tupana wanẽtup hawe aikotã iraniaꞌin tupa­naria mõtypot haria yt naku i nug hap ewywuat minug mõtypot hap ewy yt ahegyiꞌat i hap are. Yt uwe i aru atipy pe wuatꞌi hary­poria wywuat ieĩneꞌen haria wuatꞌi ihainia wywuat ieĩneꞌen haria yt uwe i itote katu­pono aito Aipo­typot Iesui emiit."

⁶ Miꞌi tupono waku aiweꞌeg wo miꞌi koꞌi saꞌag nug hap pupi katu­pono iꞌatu kahato ahãꞌãg haria iꞌatuehay se ahãꞌãg neran yt naku i nug hamo. Yt teꞌe­ro­kenꞌẽ hin i miꞌi saꞌag nug hamo. Miꞌiria aimaꞌat kuap kahato. Waku aiweꞌeg wo are. Iꞌatu iraniaꞌin — Atunug yne Tupana wãiꞌe hap e haria. Aiweꞌeg wo o miꞌi ewywuat aheĩneꞌen pote katu­pono Tupana ipyꞌahak kahato yt tomi­ky­ꞌesat i nug haria ete. Toiꞌa­tu­ꞌa­piheg miꞌiria."

⁷ Pyno yt naku i watuwat iꞌatuehay upi are. Yt naku i watunug saꞌag miꞌiria ewy are. Yt naku i miꞌiria watunug aiwy sese wo."

⁸ Pyno miꞌi koꞌi saꞌag nug haria ewy yne saꞌa­wyꞌi aito nimo. Yt watikuap hin i Tupana mekewat eꞌat pe. Nimo hoꞌo­wasat iꞌypyryp we rakaria ewywuaria watoĩ­neꞌen maꞌato mio Aika­ꞌiwat eropat haria wato­py­huꞌat. Miꞌi pote koitywy watoĩ­neꞌen muꞌap upi hẽtyhot puo ikohye­wyry rakat ewy yt wataꞌat kuap i raꞌyn. Waku watunug wakuat yn wuatꞌi ehamo Tupana ehamo. Waku watunug waku hap yn aikotã Tupana kuap haria ewy."

⁹ At ipotpap kahato aimikoi ete miꞌi pote aimikoi ihãite kahato. Miꞌi hawyi hewo kahato kat kat ywa. Aheꞌuꞌi raꞌyn aimiꞌu raꞌyn at motpap hap kaipyi. Miꞌi hap ewywuat kahato karãpe Tupana Pãꞌãu putꞌokꞌe ahete turan ahehãite hap toĩneꞌen aipãꞌãu me. Miꞌi hawyi pywo e haria wo woto­py­huꞌat waku nug haria wo wato­py­huꞌat hãpyk nug haria wo wato­py­huꞌat aimikoi ihãite kahato hap ewy are."

¹⁰ Pyno waku watikat kat som Aika­ꞌiwat tiky­ꞌesat hap. Miꞌi hawyi waku watunug imiky­ꞌesat ewy imowepit hamuat aikotã aimikoi hewo kahato aimo­wepit hap ewy."

¹¹ Yt naku i nug haria hepap kahato saꞌag nug hap ete wãtym nuran aikotã aikotã hap yt naku i nug hap ete yt kat i Tupana mõtypot hap iꞌatu­minug ete pote. Aikotã yt naku i nug haria iꞌypyryp we taꞌa­tunug saꞌag miꞌi hap ewy yt naku i nug haria. Waku wãiwa­toꞌe iꞌatuepe — Yt Tupana miky­ꞌesat ewy hin i ewetunug watoꞌe iꞌatuepe. Yt naku i watuwat iꞌatu­minug hap upi. Yt naku i wato­py­huꞌat miꞌiria ewy are."

¹² Miꞌiria inug saꞌag kahato migꞌi wo watu­we­mõti hap ewy. Yt areꞌe kuap i aiwo­ꞌope iꞌatu­minug saꞌag koꞌi ete katu­pono aiwe­mõti hap sese topy­huꞌat. Yt miit ewy i taꞌa­tunug saꞌag iꞌypyryp we are."

¹³ Maꞌato meiũran yne iꞌatu­minug saꞌag migꞌi wuat tuwe­mo­herep wuatꞌi ehamo. Tupana timo­herep iꞌatu­minug saꞌag koꞌi wuatꞌi ehamo. Miꞌi toimo­herep hawyi watikuap taꞌyn iꞌatu­minug saꞌag koꞌi. Heremo kahato toĩneꞌen hẽtyhot rakat hap ewy toĩneꞌen heremo are."

¹⁴ Iꞌypyryp sese pote yt kat i heremo maꞌato hẽtyhot putꞌokꞌe hawyi heremo kahato raꞌyn miꞌi hap ewy miitꞌin minug saꞌag. Karãpe watunug saꞌag waku Tupana pe watoꞌe — Atiꞌa­parap kahato ti Tupana watoꞌe. Miꞌi pote atoiat raꞌyn saꞌag waku watoꞌe aipyꞌa pe. Miꞌi watunug pote Iesui aimo­mehit raꞌyn hawyi toimo­herep ahepe muꞌap hãpyk takat aipo­re­ra­ꞌaipok Tupana kapiat hap. Miꞌi pote toꞌe wepy hawe — Erehymut ro eket hawyi erehymut ro ekuꞌuro hap kaipyi miꞌi hawyi Eipo­typot Iesui eimo­mehit raꞌyn e ahepe aiminug saꞌag koꞌi aiket hap ewywuat aiku­ꞌuro hap ewy pote."

¹⁵ Waku aiweꞌeg wo yt naku i nug hap pupi. Waku wati­katꞌi katꞌi kahato waku hãpyk nug hamo. Pyno waku aiweꞌeg wo kahato watoĩ­neꞌen mesu­wa­rote. Yt naku i yt aiweꞌeg wo i watoĩ­neꞌen mesuwe miitꞌin ehamo."

¹⁶ Koitywy saꞌag nug haria sok tukup­teꞌen mesuwe miꞌi pote waku watu­we­potpap poꞌog waku nug hap ete saꞌa­wy­ꞌiwuat kai. Karãpe watikuap hatek takaria ete pote waku wati­po­wyro meremo. Waku wati­ꞌa­tu­muꞌe yt Iesui kuap i te haria."

¹⁷ Waku watikuap Tupana miky­ꞌesat. Watikuap hawyi waku watunug haty wo. Yt naku i wato­py­huꞌat yt Tupana miky­ꞌesat yt kuap i te haria ewywuat yt iweꞌeg i rakaria ewywuat."

¹⁸ Miꞌi tupono yt naku i aimo­pẽꞌã mahy wo maꞌato mahy u hat meiũran topy­huꞌat toieĩneꞌen hap pun hat. Mahy kape yn tuwa­nẽtup hap pote yt miit ewy i aru topy­huꞌat. Miitꞌin miky­ryꞌi wo yne yt naku i nug hano are. Waku watoꞌe Tupana Pãꞌãu me — Uimo­wepit ro En aikotã mahy iraniaꞌin mowepit hap ewywuat waku uimo­wepiit waku watoꞌe Tupana Pãꞌãu me. Waku poꞌog aito Tupana Pãꞌãu eiam mo mahy eiam kai. Tupana Pãꞌãu aimo­wepit kuap kahato maꞌato mahy yt kahato i.

"

¹⁹ Eiwo­ꞌo­muꞌe ro morekuat Tawi wepy hap koꞌi ete saꞌa­wy­ꞌiwuat koꞌi ete. Waku wati­mõ­typot Tupana wepy hap wywo. Waku watu­wepy Tupana Pãꞌãu kaipyi aiwehum hap wywo. Waku wepy nug haria wo watu­kup­teꞌen Aika­ꞌiwat mõtypot hap koꞌi wywo watoĩ­neꞌen."

²⁰ Karãpe putꞌokꞌe ahete sio waku sio yt hap waku watoꞌe Tupana pe — Waku kahato En Tupana. Arehum kahato ewawi Emipo­ꞌoro ete emiium ete katu­pono Esaꞌyru Iesui mohey hat uito waku watoꞌe.

"

²¹ Pyno Aipo­typot mõtypot haria aito pote iꞌewyte waku wato­ꞌo­mõ­typot katu­pono hemiitꞌin aito pote are. Pyno manaꞌin etimõ­typot ro eꞌaito. Etunug no imiky­ꞌesat ewy are."

²² Miꞌi tã etunug hawyi Tupana mõtypot hat ereĩneꞌen."

²³ Katu­pono eꞌaito topy­huꞌat eꞌakag wo Tupana wanẽtup hawe aikotã aikotã aipo­typot Iesui Aiꞌakag wo topy­huꞌat hap ewy."

²⁴ Miꞌi hap ewy waku manaꞌin waku eweipy­huꞌat eꞌaito eropat hano wo imiky­ꞌesat nug hamuat aikotã wato­py­huꞌat Iesui eropat haria ewy. Aiꞌakag sese Iesui. Imohey haria torania Akag wo topy­huꞌat wuatꞌi eꞌat pe. Imohey haria torania ipiit no topy­huꞌat miꞌi hawyi Aiꞌakag wanẽtup hap watunug ipiit aito pote."

²⁵ Mehĩꞌin etikyꞌe kahato eharyꞌi aikotã saꞌa­wyꞌi Aiꞌakag Iesui tiꞌa­tu­kyꞌe kahato aito temiitꞌin tomohey haria hap ewy. Etikyꞌe kahato eharyꞌi aikotã Iesui tum ahepe toieĩneꞌen hap aheha­kye­raꞌat hamuat miꞌi tã aikyꞌe. Miꞌi tã waku etikyꞌe eharyꞌi ekuꞌuro hap kape Iesui ewy."

²⁶ Miꞌi hawyi tomohey haria yne tutum Toꞌywot po pe — Ewano mesup e tope. Atiꞌa­tu­muꞌe raꞌyn miꞌiria ehay nug hamo e. Miꞌi pote wei haria ewy tukup­teꞌen yt iꞌatu­pitpit hin i e."

²⁷ Miꞌi pote aito imohey haria yne wato­py­huꞌat iharyꞌi ewywuat maꞌato aikyiꞌat eꞌyianmete ainug ikahu kahato rakat ewy iweꞌeg kahato rakat ewy. Yt karãpe i iꞌaparap hat ewy ainug tehay wo. Ihay yꞌy ewywuat aikoho hap maꞌato ihay ainug ihãite kahato rakat ewywuat ipe ikahu rakat ewy ipiit kahu rakat ewywuat teha­ryꞌi ewy ainug. Aipiit yt ipitpit hin i hap ewy ainug imohey haria yt kat i saꞌag ahete aiwei tehay wo hawyi."

²⁸ Uhytꞌiꞌin mehĩꞌin etikyꞌe ro eharyꞌi ewekyꞌe hap ewy katu­pono uwe uwe tikyꞌe teha­ryꞌi tuwe­kyꞌe iꞌewyte uwe uwe tipo­wyro teha­ryꞌi tuwe­po­wyro are."

²⁹ Aito ahesyꞌat hawyi watu­wepoi iꞌewyte haty aipiit ete hawyi meremo watikat mohag haty monik hamo. Miꞌi hap ewy waku etikyꞌe eharyꞌi erekyꞌe hap ewy. Yt naku i aipiit ete aipy­ꞌahak. Yt naku i miꞌi tã watunug aiwete. Wati­po­wyro kahato aipiit. Pywo ti miꞌi hap ewy Aiꞌakag Iesui tiꞌa­tu­kyꞌe tomohey haria. Waku etikyꞌe eharyꞌi Iesui kyꞌe hap ok tã."

³⁰ Pyno aito imohey haria torania. Aika­ꞌiwat Iesui piit aga koꞌi ewy wato­py­huꞌat."

³¹ Saꞌa­wyꞌi Tupana toꞌe miwan me — Waku etikyꞌe eharyꞌi poꞌog torania miitꞌin kai miꞌi pote waku etoiat eꞌywot ety hawyi waku eharyꞌi wywo kahato ereĩneꞌen wẽtup piit ewy yn naꞌyn e Tupana saꞌa­wyꞌi miwan me."

³² Pyno mio tã toꞌe Tupana miwan me — Karãpe ihainia iharyꞌi toꞌo­kyiꞌat hap hawyi topy­huꞌat wẽtup piit kawiat yn naꞌyn topy­huꞌat typy ok miit pytkai e. Niatpo hap tohenoi mesuwe maꞌato wato­mohey Iesui hawyi aito yne wato­py­huꞌat Iesui eharyꞌi ewywuat. Miꞌi iãꞌãkap tohenoi ihay saꞌa­wy­ꞌiwuat pe."

³³ Ihainiaꞌin etikyꞌe kahato o eharyꞌi aikotã ewekyꞌe hap ewy e. Manaꞌin etimõ­typot kahato o eꞌaito e Tupana ahepe are.

"

6

¹ Hira­karia kurumꞌin koꞌi pĩꞌãꞌin koꞌi Iesui mohey haria eipe pote ewetunug no eꞌywot ety e hap ewy. Etunug eꞌywot ety piat epoꞌoro hap pote waku rakaria wo hãpyk takaria wo ereĩneꞌen wuatꞌi wanẽtup hawe."

² Katu­pono mio tã e Tupana saꞌa­wyꞌi saꞌy­ruꞌin me saki­ꞌytꞌin me — Etimõ­typot ro eꞌywot ety pote woro­poi­tyro aru eipe e. Pywo etimõ­typot eꞌywot ety pote ti aru ereĩneꞌen motꞌi mesuwat yi tote e iꞌewyte eweikup­teꞌen waku pe kahato mesuwe at kaꞌap e Tupana saꞌa­wyꞌi ahepe."

³ Pyno waku wati­mõ­typot aity aiꞌywot iꞌe hap ewy katu­pono Tupana piat ainãpin hap wẽtup yn watunug hawyi Tupana toꞌe — Koitywy ereĩneꞌen waku pe motꞌi aru e."

⁴ Aiꞌy­wotꞌin koꞌi eiweꞌeg wo o emẽpytꞌin nãpin hap ete. Waku etiꞌa­tu­ꞌa­piheg wen maꞌato iꞌatu­kyꞌe hap wywo yn o waku etiꞌa­tu­ꞌa­piheg. Yt eweiꞌa­tu­mo­py­ꞌahak teiꞌo maꞌato etiꞌa­tu­nãpin Aipo­typot Iesui piat ainãpin hap ewy are.

"

⁵ Uiwy­riaꞌin miit emiit eweiwat ro eika­ꞌiwat mesu­wa­rotiat ehay upi eipe­rupꞌi popuo imõtypot popuo yt kat i eheso hap popuo. Waku watu­wehum howawi aipyꞌa pyi. Waku wate­ropat kahato aika­ꞌiwat mesu­wa­rotiat aikotã Aika­ꞌiwat Iesui eropat hap ewy."

⁶ Waku wate­ropat kahato haipe kai aikotã heĩneꞌen turanuat ewy. Waku imowepit hap wywo wate­ropat. Karãpe wate­ropat aika­ꞌiwat mesu­wa­rotiat waku watoꞌe aipyꞌa pyi — Tupana woro­mõ­typot teran mesuwat uipotpap ete katu­pono areĩneꞌen Esaꞌyru eropat hat waku watoꞌe Tupana pe aheka­raiwa mesu­wa­rotiat potpap nug hap turan."

⁷ Waku aika­ꞌiwat mesu­wa­rotiat wate­ropat aiwepit hap popuo. Waku haty wo watunug imiky­ꞌesat ewy. Waku aika­ꞌiwat mesu­wa­rotiat potpap ete wati­mo­wepit Aika­ꞌiwat atipy piat. Yt naku i aika­ꞌiwat mesu­wa­rotiat mowepit hap kape yn watu­wa­nẽtup hap. Waku Aika­ꞌiwat atipy piat mowepit hap wy aiwa­nẽtup hawe wate­ropat aika­ꞌiwat mesu­wa­rotiat turan."

⁸ Waku aiwa­tetup hap aipotpap saꞌup ium hap sese toĩneꞌen atipy pe hap kape. Yt naku i mesu­wa­rotiat kape yn aheha katu­pono meiũran ti aru Tupana tum aipotpap wakuat saꞌup ahepe. Tutum aru wuatꞌi miitꞌin me sio miitꞌin akag sio miit emiit Tupana tum wakuat saꞌup watunug yne imõtypot hap wywo pote.

"

⁹ Mehĩꞌin manaꞌin eweikup­teꞌen miit akag wuat mesu­wa­rote pote waku etiꞌa­tu­po­wyro kahato o emiitꞌin emipo­ꞌo­roria koꞌi. Yt eweiꞌe teiꞌo ehemiitꞌin me — Yt ewetunug i uimi­ky­ꞌesat ewy pote woro­ho­ꞌo­ꞌa­piheg yt eweiꞌe i katu­pono emiitꞌin Kaꞌiwat sese toĩneꞌen atipy pe. Yt etiꞌa­tu­mohit emiitꞌin mesuwe katu­pono meiũran ti aru Aiꞌakag sese timo­herep wuatꞌi pe aiminug wakuat koꞌi sio aiminug saꞌag koꞌi. Mekewat eꞌat pe heremo yne aiminug koꞌi sio miit eropat hat watoĩ­neꞌen sio miit akag wo watoĩ­neꞌen are.

"

¹⁰ Pyno Uito Pauru. Waku raꞌyn uimiwan. Ahenoi hit hawyi toran naꞌyn are. Pywo uiwy­riaꞌin Aika­ꞌiwat Iesui aimoe­saika kahato hat toĩneꞌen. Miꞌi pote — Urumoe­saika ro emohey hap ete waku watoꞌe Iesui pe. Waku wato­py­huꞌat wẽtup miit ewy aiwa­nẽtup hawe Mehĩ waku watoꞌe Iesui pe. Uinug o hesaika kahato rakat waku nug hap ete waku watoꞌe Aipo­typot pe."

¹¹ Iesui mohey haria aito pote watoĩ­neꞌen sura­raꞌin ewywuat ahiag akit hanuaria. Waku watopag aipiit pe surara esokpe ewywuat Tupana miium. Waku watat yne Tupana miium wuꞌuka hamuat. Miꞌi hawyi putꞌokꞌe ahewa­nĩkap ahiag hawyi aimaꞌat hamo hawyi waku watu­ꞌuka mekewat ahiag mupiat Tupana miium ahiag akit hamuat hap wywo. Yt naku i ahesaika hap wywo aipiit esaika hap wywo watu­ꞌuka ahiag wywo katu­pono poꞌog poꞌog hesaika aikai. Katu­pono aito yt watu­ꞌuka i miitꞌin wywo maꞌato ahiag wywo watu­ꞌuka."

¹² Katu­pono ahiag ahewa­nĩkap sese topy­huꞌat. Ahiag esura­raꞌin wywo watu­ꞌuka mãꞌãu saꞌag kawiat. Ahiag emiit koꞌi atipy piaria ewywuat Ahiagnia tukup­teꞌen mesuwat yi tote miitꞌin yt naku i nug haria akag wo. Yt heremo i mãꞌãu saꞌag wen maꞌato hesaika kahato miitꞌin powyro yt naku i nug hamo. Yt naku i nug haria akag wo tukup­teꞌen miꞌiria."

¹³ Mekewat atipy kaipy­wiaria ahewa­nĩ­kaptia kahato miꞌiria iꞌewyte yne imohey haria ewanĩ­kaptia ahiagnia. Miꞌi pote waku watuwat Tupana miium koꞌi wywo aipiit piat ahiag sopo hamuat mãꞌãu saꞌag koꞌi sopo hamo. Waku watopag koran Tupana miium koꞌi wuꞌuka hap ekareꞌen hawyi waku watopag yianmete yne aipiit pe Tupana miium mekewat sura­raꞌin wat ewywuat. Miꞌi wywo yn watu­ꞌuka kuap ahiag wywo aimoma teran hap eꞌat turan. Mekewat eꞌat pe tuꞌuka tuꞌuka kahato ahete at kaꞌap. Maꞌato miꞌi pytkai yt aiꞌakit kuap i katu­pono Tupana miium ahiag sopo hap poꞌog hesaika. Miꞌi pote wato­py­huꞌat ahiag okpe tote."

¹⁴ Pyno waku watoĩ­neꞌen sura­raꞌin ewywuat ahewa­nĩkap ekatup hamo. Waku aipiit ete aiꞌauka hap pupiat sokpe sura­raꞌin wat ewywuat. Waku wahẽtup Tupana kape ahesokpe ahiag akit hamuat. Waku saꞌa­wyꞌi watopag aiwa­nẽtup hawe pywuat sehay yn Tupana ehay aikotã sura­raꞌin topag iweꞌok kytyt hap iheg nakat ewywuat. Miꞌi hamo ahiag poryꞌa ewywuat yt teke kuap i aipyꞌa pe. Miꞌi wo wati­sopo kuap ahiag miat aiꞌauka hap koꞌi pupi. Waku wahẽtup Tupana pe — Uinug no hãpyk kahato rakano waku watoꞌe aikotã sura­raꞌin topag sokpe iheg nakat sumu wato pupiat ewy. Miꞌi hap ewy waku watopag Tupana miium aimo­hãpyk hamuat."

¹⁵ Topy ete sura­raꞌin topag iheg nakat sura­raꞌin py sokpe. Miꞌi wywo teꞌe­ru­weput kuap kahato tuꞌuka hamo. Miꞌi hap ewy waku watopag aipy sokpe ewywuat Tupana miium tehay ereto wuatꞌi miitꞌin kapiat hamuat hap mekewat sehay wakuat woꞌo­wese hap Tupana wywuat hap ete."

¹⁶ Sura­raꞌin topag taꞌa­tupo ete iheg nakat moryꞌa aria kawiat pupiat. Moryꞌa pupiat sura­raꞌin topag toꞌoꞌog me hap ewy. Miꞌi ewy Tupana miium ahepiat tomohey hamuat waku aipo pe yne eꞌat pe ahiag poryꞌa sem sopo hamo. Waku wato­mohey at kaꞌap aiku­ꞌuro hap kape. Mekewat saꞌag nug hat ahiag ahewa­nĩkap kahato. Miꞌi aiꞌa­wa­ꞌawa surara ewy ihay saꞌag moryꞌa ewy aiꞌa­wa­ꞌawa surara poryꞌa wuat hap ewy maꞌato yt putꞌokꞌe i ahete katu­pono sura­raꞌin ewy aheꞌog iheg nakat aipo pe Iesui mohey pote yt putꞌok­ꞌi­ꞌa­tuꞌe i ahete."

¹⁷ Sura­raꞌin topag iꞌatu­ꞌakag ete sura­raꞌin akag wepainug hap iheg nakat. Miꞌi ewywuat Tupana tum neran ahepe. Miꞌi ti aheĩneꞌen wuatꞌi eꞌat pianuat tutum. Sura­raꞌin po sese kai toĩneꞌen kyse wuꞌuka hap iwatoꞌin nakat typy kai hãi hyk kahato rakat. Miꞌi hap ewy Tupana Pãꞌãu tum ahepe Tupana ehay ahiag wywuat wuꞌuka hamo ahiag atek tek hamo."

¹⁸ Karãpe watu­ꞌuka ahiag wywo waku watoꞌe meremo — Tupana uipo­wyro ahiag akit hamo yne eꞌat pe wakuat nug hamo waku watoꞌe. Aikope aikope areĩneꞌen waku uhewyry Tupana Pãꞌãu upi waku watoꞌe Tupana pe. Etipo­wyro o emiitꞌin eweꞌeg wo o ahiag mupi waku watoꞌe. Yt urutuwat reran i ahiag ehay upi. Iꞌewyte iraniaꞌin Iesui mohey haria upi waku uruhẽtup wy. Yt uruiky­ꞌesat i ahiag ehay upi urutuwat hap. Yt karãpe i uruꞌatoiat emohey hap waku watoꞌe Tupana pe.

"

¹⁹ Uito ti Pauru atiky­ꞌesat ewehẽtup o Tupana pe uipo­wyro hamuat. Karãpe ewehẽtup iraniaꞌin powyro hamo yt uiwaure teiꞌo eipe. — Etunug o Pauru ewẽ wo ehay moherep hamo wuatꞌi miitꞌin me eweiꞌe ro uika­wiano. Karãpe toimo­herep ehay wakuat turan etum o tope iweꞌeg kahato hap iꞌewyte ikuap kahato hamuat hap ewat ewywuat hap eweiꞌe o. — Ehay pywuat yt uwe i mikuap saꞌa­wyꞌi miwan miat hamo etimoe­saika Pauru Iesui etiat moherep hamo eweiꞌe yt kat i miitꞌin kenꞌẽ hap wywo waku eweiꞌe Tupana pe uipo­wyro hamo.

"

²⁰ Mesu­wa­rote more­kuaria koro koꞌi tipo­ꞌoro kahato taꞌa­tue­miitꞌin iraniaꞌin etawa kape taꞌa­tuehay moherep hamuat. Taꞌa­tuehay ereto hamo taꞌa­tu­po­ꞌoro wẽtup ok taꞌa­tuemiit poꞌog taꞌa­tu­mi­mohey. Miꞌi hap ewy kahato uito Pauru. Miꞌi hap ewy kahato areĩneꞌen. Uipo­rekuat Tupana mipo­ꞌoro areĩneꞌen tehay moherep hamuat iraniaꞌin ywania kape. Miꞌi ehay moherep hamo uiꞌairo. Maꞌato miꞌi pytkai koitywy areĩneꞌen woꞌo­pyhik hawe. Mesup yt uhewyry kuap i Tupana ehay sytpok hamo. Pyno waku ewehẽtup o Tupana pe mesuwat woꞌo­pyhik hawiat uipo­wyro hamo are. Ewehẽtup o yt kat i uiwe­mõti hap Tupana ehay moherep hamuat mesuwe katu­pono atiky­ꞌesat sura­raꞌin sem muꞌe hano areĩneꞌen mesup are.

"

²¹ Pyno Aika­ꞌiwat emiit sese Tikiku e hap het rakat atipo­ꞌoro ehowawi. Uhehay wywo atipo­ꞌoro aikotã aikotã areĩneꞌen mesuwe hap enoi hamo. Tikiku waku kahato atipuẽti. Miꞌi ti Tupana ehay yt iꞌatoiat hin i aheywyt sese aikywyt miit sese miꞌi."

²² Miꞌi pote atipo­ꞌoro Tikiku ehowawi katu­pono atiky­ꞌesat tohenoi ehepe aikotã urutu­kup­teꞌen hap enoi hamo. Miꞌi hap eweikuap hawyi eiwepit kahato. Taꞌi eimoe­saika aru eipyꞌa pe aimi­mohey Iesui mohey hap ete aiwo­ꞌo­kyꞌe hap ete are."

²³ — Uruꞌywot Tupana Uruka­ꞌiwat koro Iesui ahẽtup ewawi. Etunug o emohey haria tawa Ewesu piaria woꞌo­kyꞌe haria wo. Etunug o miꞌiria woꞌo­wese haria wo emohey sese haria wo are."

²⁴ Tupana ereĩneꞌen hegyiꞌat kahato rakano emohey haria pe katu­pono Esaꞌyru Uruka­ꞌiwat Koro Iesui kyꞌe kahato haria miꞌiria are. Etiꞌa­tu­kyꞌe teꞌen neꞌi miꞌiria katu­pono Emipo­ꞌoro Urupo­rekuat kyꞌe wuatꞌi eꞌat piat haria miꞌiria areꞌe at kaꞌap Tupana pe mesuwe woꞌo­pyhik hawe. Woro­ho­ꞌo­kyꞌe eipe are.

Uito ti IESUI potpo­ꞌoro PAURU."