1

¹ Uito ti meiũ Pauru Tupana Mipo­ꞌoro wuatꞌi miitꞌin muꞌe hamuat ti uito are. Aipo­typot Iesui mipo­ꞌoro sese uito are. Iꞌewyte Aiꞌywot Tupana mihymut guꞌuro pywiat Iesui mipo­ꞌoro uito are. Yt karãpe i miitꞌin mesu­wa­ro­tiaria uiꞌairo Tupana mipo­ꞌoro Aipo­rekuat nuat ehay moherep hamo. Yt miitꞌin miꞌairo hin i uito. Iꞌewyte yt Iesui potpo­ꞌo­roria miꞌairo hin i uito maꞌato Tupana mipo­ꞌoro uito are."

² Miꞌi tupono mesup atipo­ꞌoro uimiwan uheywytꞌin Iesui mohey haria tawa Karata piaria kape. Maꞌato yt uito yn i maꞌato torania meiũpiaria Iesui mohey haria ipoꞌoro mesuwat taꞌa­tue­kue­katu ehowawi uruwy­riaꞌin are."

³ Koitywy mio tã areꞌe Tupana pe ehepiat — Uiꞌywot pyno koitywy etiꞌa­tu­po­wyro ro tawa Karata piaria Esaꞌyru mohey haria are. Atiky­ꞌesat kahato miꞌiria egyiꞌat hap ok tã sese kuap haria hap atiky­ꞌesat are. Atiky­ꞌesat etimo­herep iꞌatuepe aikotã iwato hap iꞌatu­kyꞌe hap epiat hap atiky­ꞌesat etimo­herep itotiaria pe ahẽtup. Tupana are etiꞌa­tunug itotiaria yt wanẽtup koꞌi koꞌi haria wo i are maꞌato woꞌo­wese kahato rakaria wo etiꞌa­tunug miꞌiria are. Miꞌi tã are yn ahẽtup mesuwe Aiꞌywot Tupana pe iꞌewyte Aipo­typot Iesui pe ehepiat uiwy­riaꞌin."

⁴ Iesui tiky­ꞌesat kahato ti miitꞌin ehakye­raꞌat hap. Toiky­ꞌesat kahato iꞌatu­minug saꞌag kaipywiat teꞌe­ra­ꞌaipok hap. Miꞌi hamo tuweium ariaꞌyp posak ete Toꞌywot miky­ꞌesat ewy. Miꞌi hamo Tupana tum Tosa­ꞌyru aiꞌa­piheg hap u hamo aiminug saꞌag koꞌi hep hamo."

⁵ Miꞌi tupono mesup — Waku kahato En Tupana watoꞌe at kaꞌap mesup te mũki­ꞌite wuatꞌi eꞌat pe. Woro­mõ­typot kahato En Tupana waku watoꞌe mesup are.

"

⁶ Taꞌi arewa­nẽtup kahato eiminug saꞌag koꞌi kape. Kat hamo ten eweiꞌatoiat wakuap sehay Aika­ꞌiwat Iesui kaipywiat hegyiꞌat kahato hap. Pywo apo eipohep taꞌyn Aipo­typot aikyꞌe hat mohey hap ete wẽtup sehay saꞌag kyꞌewi — Toꞌiro watu­we­ha­kye­raꞌat aiminug waku hap saꞌup upi eweiꞌe apo. Taꞌi miꞌi e hap yt naku i watoꞌe katu­pono Iesui upi yn aheha­kye­raꞌat kuap are. Maꞌato eipe wẽtup sehay upi raꞌyn eweiwat yt sehay wakuat Iesui mienoi upi hin i sehay upi eweiwat are. Yt naku i pãi are."

⁷ — Taꞌi poꞌog ipakup sehay aimi­mohey kahu eweiꞌe. Hẽ eweiꞌe neꞌi ti mesup eiwo­ꞌope maꞌato yt hin i. Iesui mimo­herep yn ni sehay pakup sese toĩneꞌen are. Wẽtup yn ni toĩneꞌen sehay pakup sehay pywuat are mekewat saꞌa­wy­ꞌiwuat pywiat sese uimienoi ehowawiat hap yn sehay pakup Tupana wẽ pywiat. Miꞌi yn sehay pywuat sese aheha­kye­raꞌat kuap hap sehay are. Ipakup sehay iꞌatuꞌe iraniaꞌin ehepe maꞌato heso rakaria sok miꞌiria are. Taꞌi Iesui ehay peroꞌok teran wẽtup sehay nem nakat kape teran neꞌi miꞌiria are. Yt Aipo­typot Iesui ete hin i iꞌatu­mienoi maꞌato iꞌatueko koꞌi nug hap ete yn iꞌatuehay."

⁸ Haꞌa­wyte Iesui etiat yn mekewat pywuat sese sehay etiat yn uruhenoi ehepe. Ahenoi ehepe miꞌi ti sehay pakup wakuap sese rakat are. Yt naku i watoiat Iesui etiat aimuꞌe hap wẽtup sehay kapiat hamo are. Uito iꞌewyte maꞌato mesup ahenoi wẽtup sehay yt saꞌa­wy­ꞌiwuat uimienoi yt ewy i pote waku Tupana uipo­ꞌoro aria kape neꞌi are. Iꞌewyte sio Wẽtup Ok putꞌokꞌe atipy kaipyi — Uito Tupana mipo­ꞌoro e hat pytkai wẽtup sehay toimo­herep yt Iesui mienoi yt saꞌa­wy­ꞌiwuat urumienoi ewywuat i pote — Tupana epoꞌoro aria kape waku eweiꞌe mekewat atipy piat uito e haria pe are. Katu­pono meiũran ti aru mesuwat yi tote tõꞌẽ atipy kaipywiat Tupana ehay moherep haria ewywuat koꞌi maꞌato yt Iesui e hap yt ewywuat i moherep haria. Miꞌi haria pe waku watoꞌe — Tupana yt mikyꞌesat ewy i eimiꞌenoi waku eweꞌeg wo katupono Tupana miꞌapihag wo aru ereineꞌen yt Iesui e hap ewywuat etimoherep pote waku watoꞌe miꞌiria pe. Yt naku i Tupana eipo­ꞌoro aria kape waku watoꞌe wẽtup sehay wywuat õꞌẽ haria pe yt Iesui e hap ewywuat i haria pe. Pyno wyti waku Iesui ehay etiat aiwo­ꞌo­muꞌe hap yn poꞌog waku uiwy­riaꞌin iꞌatueso atueso hap koꞌi kai are."

⁹ Pyno areꞌe i miꞌi hap ehepe uwe uwe wẽtup sehay neꞌi imoherep yt Iesui mienoi wakuat ewywuat i waku miꞌi hat Tupana tipo­ꞌoro aria wato kape sese watoꞌe. Waku miꞌi miit topy­huꞌat Tupana mikuasa wuatꞌi eꞌat pianuat are."

¹⁰ Taꞌi yt taꞌa­tu­ky­ꞌesat i ahehay Iesui etiat pytkai waku miꞌi etiat yn wahenoi poꞌog are. Waku ti Tupana mowepit hap yn watunug are. Miꞌi hap yn uito poꞌog atiky­ꞌesat are. Yt miitꞌin mowepit hap i ti atunug neran. Waku ti Tupana kaipywiat — En waku e hap poꞌog waku miitꞌin kaipywiat — Waku en e hap kai are. Maꞌato uito atunug miitꞌin wo mowepit hap yn mote ti rẽ iraniaꞌin yt karãmuo i uhatyꞌi hatyꞌi. Pyno iraniaꞌin uhatyꞌi hatyꞌi pytkai uito ti Aipo­typot sese mowepit reran kahato hat uito are. Yt atimo­wepit teran i miitꞌin Tupana e hap wywo. Poꞌog waku atimo­wepit Tupana are. Maꞌato miitꞌin miky­ꞌesat ewywuat neꞌi ahenoi pote Aika­ꞌiwat miky­ꞌesat ewy yt ahenoi kuap i are. — Urumuꞌe ro urumi­ky­ꞌesat ewy e haria mowepit haria wo watu­kup­teꞌen pote yt Iesui eropat haria wo hin i watu­kup­teꞌen katu­pono yt wahenoi kuap i imiky­ꞌesat wy."

¹¹ Pyno ti atimoheg neran uhehay eiwa­nẽtup hawe uiwy­riaꞌin. Pywo ti mekewat sehay wakuat sese uimienoi saꞌa­wy­ꞌiwuat ehowawiat miꞌi sehay yt miitꞌin wanẽtup hap kaipywiat i uimi­mo­herep ehepiat are."

¹² Taꞌi yt miitꞌin miium uhepiat i ti yt miitꞌin mienoi uhepiat i iꞌewyte yt miitꞌin mimo­herep uhepiat i maꞌato mekewat Aipo­typot Iesui mimo­herep uhepiat ahenoi are. Yt atikuap hin turan i Iesui tomo­herep tehay wakuap sese uhepe towẽ pyi sese uimuꞌe are."

¹³ Taꞌi eweikuap aikotã saꞌa­wyꞌi yt atikuap hin i Iesui etiat. Eweikuap kahato uito aikotã wẽtup seko upiat myhuꞌat hat kahato areĩneꞌen saꞌa­wyꞌi mesu­wa­rote. Miꞌi Iuteu ywania eko wo uhowapy raꞌyn nyti miꞌi turan. Saꞌa­wyꞌi te Iuteuria kaipyi atikuap Tupana ehay. Taꞌi saꞌa­wyꞌi uito Tupana emiitꞌin sese Iesui mohey haria moma teran hano areĩneꞌen. Taꞌi eweikuap aikotã saꞌa­wyꞌi Iesui potmu­ꞌeria satyꞌi satyꞌi hat areĩneꞌen saꞌag poꞌog tora­niaꞌin kai hap eweikuap taꞌyn. Yt nakuat i kahato uito. Saꞌa­wyꞌi Iesui mohey haria atuꞌuka hat uito areĩneꞌen are. Atiꞌa­tu­ꞌuka saꞌag miꞌiria uito are."

¹⁴ Saꞌa­wyꞌi uiwe­motag hamo te poꞌog iraniaꞌin uiꞌy­wania kai Iuteuria eko hit koꞌi yne yne atiꞌa­tu­ky­ꞌesat iꞌewyte atiꞌa­tunug yne uito. Uiwe­motag tuwyria apyꞌi aremoe­hapap urueꞌa­se­ꞌiꞌin eko ete yne eꞌat pe. Haty wo atiꞌa­tunug yne yne urueko koꞌi poꞌog poꞌog torania kai."

¹⁵ Maꞌato wẽtup eꞌat pe Tupana tomi­ky­ꞌesat ewy uiꞌairo temiit no hawyi uikyꞌe kahato tuwe­kaipyi tuwe­wawi. Yt kat i atunug wakuat pytkai i uiꞌairo maꞌato uikyꞌe haype. Uikyꞌe tewa­nĩkap muat uheĩneꞌen pytkai uiꞌairo topot­po­ꞌoro wo. Miꞌi hawyi toꞌe uhepe — Taꞌi Pauru worokuap en haꞌa­wyte ety ymyẽ piat re ereĩneꞌen turan worokuap. Miꞌi turan woro­ꞌairo uimi­po­ꞌoro wo e Tupana uhepe. Uikyꞌe yt kan hamo i uikaykay tuwe­wawi tuwepyi hap ewy are. Miꞌi hap eweikuap."

¹⁶ Miꞌi hawyi sake wẽtup eꞌat pe Tupana tuwe­mo­herep Tosa­ꞌyru sese Iesui uhowawi uipyꞌa pe. Atikuap Haꞌyru hawyi toꞌe uhepe — Pauru woro­ꞌairo en uhehay enoi miitꞌin yt Iuteu ywania piat hamo i e uhepe. Miꞌi hawyi yt uwe pe i — Uimuꞌe ro are. Katu­pono saꞌa­wyꞌi Tupana yn uimuꞌe hat toĩneꞌen. Yt wẽtup ok miit pe i are — Waku apo areĩneꞌen ehay sytpok hamo yt are hin i. Yt uwe pe i mio tã are."

¹⁷ Iꞌewyte Iesui eꞌyiannote wuaria motpo­ꞌoria yt uimuꞌe hin i katu­pono yt areto i tawa Ieru­sarẽi kape. Maꞌato Iesui tuwe­mo­herep uhowawi hawyi mekewat eꞌat pe ti areto pya kahato uiweran hap kape mekewat yi wato yahig Arapia e hap kape areto. Ikaipyi ti araꞌaipok tawa Tamaku kape i raꞌyn."

¹⁸ Miꞌi tote ti areĩneꞌen motꞌi myeꞌym iꞌaman motpe areĩneꞌen tawa Tamaku piaria pyꞌa­setpe. Miꞌi hawyi areto tawa wato Ieru­sarẽi kape Iesui potmuꞌe Peteru kapiat uiꞌa­kasa hamo. Itote areĩneꞌen 15 eꞌat iwywo ikuap hamo."

¹⁹ Miꞌi tote ti Aika­ꞌiwat Iesui ywyt sese wẽtup ok araꞌa­kasa Tiaku e hap het rakat. Maꞌato miꞌi hawyi yt uwe i atiꞌa­tukuap itote Iesui potpo­ꞌo­roria torania. Peteru hawyi Tiaku atikuap hawyi miꞌiria yatype areꞌi­neꞌen 15 eꞌat hawyi areto e tawa Ieru­sarẽi pyi."

²⁰ Uiwyiaꞌin miꞌiria ti yt uimuꞌe haria i are. Yt uheso hin i maꞌato ahenoi ehepe Tupana ehamo areꞌe — Tupana yn uiꞌairo topot­po­ꞌoro wo. Yt Iesui potmu­ꞌeria miꞌairo i uito are. Yt uikuap hin i miꞌiria saꞌa­wyꞌi."

²¹ Areĩneꞌen tawa Ieru­sarẽi piat hawyi areto yi Siria kape hawyi yi Sirisia kape."

²² Miꞌi turan mekewat eꞌat pe yi Iuteu piaria tama Ieru­sarẽi piaria Iesui mohey haria yt uikuap hin i katu­pono yt karãpe i uhewyry iꞌatue­wawi. Miꞌi pote uhowa ete yt uikuap hin i."

²³ Maꞌato itotiaria uikuap uhehay ete yn. Miꞌi hawyi teꞌe­roꞌe toꞌope itote — Taꞌi koitywy ti saꞌa­wy­ꞌiwuat aiꞌa­tu­sa­tyꞌi satyꞌi hat raꞌyn meiũ Aika­ꞌiwat Iesui powyro hamo raꞌyn topy­huꞌat iꞌatuꞌe toꞌope uhepiat pe. Pyno ti koitywy yt aimoma teran hin i raꞌyn katu­pono topot­muꞌe kahato raꞌyn Iesui mohey hap ete iꞌatuꞌe toꞌope uhepiat pe."

²⁴ Miꞌi hawyi ti miꞌiria teꞌe­ru­wehum kahato raꞌyn Tupana ete — Waku kahato ti En Tupana iꞌatuꞌe itote uhepiat pe Tupana pe Iesui mohey haria yi Iuteu piaria mekewat tawa Ieru­sarẽi piaria teꞌe­roꞌe.

"

2

¹ Miꞌi hawyi yi Siria yi Sirisia pe areĩneꞌen motꞌi kahato. 14 iꞌaman mot hap ewy 14 anu hap ewy areĩneꞌen itote hawyi areto i tawa wato Ieru­sarẽi kape. Uiwy Panãpe wywo areto iꞌewyte atioto uiwy uhyt Titu uiwywo."

² Areto turan Tupana toꞌe uhepe — Pauru atiky­ꞌesat ereto tawa Ieru­sarẽi kape mesup e uhepe pote areto i e hap ewy. Putꞌok­ꞌare raꞌyn itote hawyi areto raꞌyn Iesui potmu­ꞌeria yianmiaria kape hawyi miꞌiria pe ahenoi henoi kat e hap kat e hap ahenoi yne sehay wakuat Iesui etiat Tupana ehay kat e kat e hap koꞌi ahenoi mesuwat yi tote iraniaꞌin me yt uruꞌy­wania i pe uiꞌe hap atimo­herep yne yne uhehay wakuat areꞌe itote. Iesui mohey haria akagnia puo yn maꞌato migꞌi wo pyi ahenoi katu­pono taꞌa­tukuap teran sio pywo uhehay sio wẽtup sehay ahenoi iraniaꞌin me sio Iesui etiat. Iꞌatuehay ewywuat ahenoi hap sio yt taꞌa­tukuap teran itote tawa Ieru­sarẽi piaria. Katu­pono uikuap hamo yn ahenoi wakuat sio yt hap moherep hamo. Aikotã ahenoi sehay wakuat yt Iuteuria i piat hap ewywuat e hap ahenoi itote iꞌatuepe. Taꞌa­tu­ky­ꞌesat kahato uimienoi pywo kahato iꞌatu­mienoi Iesui etiat hap taꞌa­tu­ky­ꞌesat. Ahenoi yne hawyi — Waku kahato ehenoi miitꞌin me Pauru iꞌatuꞌe aikotã miit ihyha rakat teput kuap kahato rakat ewywuat en iꞌatuꞌe uhepe. Uiwy­riaꞌin are miꞌi hap ewy atiky­ꞌesat Aipo­typot Iesui toꞌe uhepe aru — Waku rakat ewy ereput Pauru e hap atiky­ꞌesat kahato. Yt naku i toꞌe uhepe — Yt kan hamo i emienoi miitꞌin me Pauru toꞌe hap yt atiky­ꞌesat hin i are."

³ Mekewat eꞌat pe ahenoi uiꞌe hap iraniaꞌin miat hap eꞌat pe uiwy mehĩ Titu toĩneꞌen uiwywo itote Iesui potmu­ꞌeria 12 ok takaria pyꞌa­setpe. Wẽtup ywania Titu toĩneꞌen mekewat Kereku ywania yt Iuteu ywania i maꞌato. Miꞌi ete yt kat iꞌatuꞌe hin i Iuteuria Iesui mohey haria akag koꞌi — Yt naku i en eꞌahit sokpe toĩneꞌen ne. Yt uruꞌy­wania ewy i e hap yt iꞌatuꞌe i. Yt naku i eko yt iꞌatuꞌe i. Waku uruto ewy etunug no iꞌewyte yt iꞌatuꞌe i aiwy Titu pe. Waku kahato atipuẽti itote."

⁴ Maꞌato miꞌi hawyi ahenoi kahu turan putꞌok­ꞌi­ꞌa­tuꞌe itote wẽtup miitꞌin koꞌi Iesui mohey ran haria heso heso rakaria henoi haria. Miꞌi hawyi urupy­ꞌa­setpe tukup­teꞌen miꞌiria yt naku i e hap kat hanuaria neꞌi. Yt uruikuap i iꞌõꞌẽ hap miitꞌin sem itote pote. Miꞌi hawyi teꞌe­ra­haꞌat kahato Titu kape urupy­ꞌa­setpiat kape yt Iuteu ywania i hap kape. Miꞌi hawyi — Wãiꞌi­ꞌa­tuꞌe taꞌa­tu­wa­nẽtup hawe yt iꞌatueko ewywuat i urutunug itote pote. Miꞌi hawyi taꞌa­tuehay wo taꞌa­tu­ky­ꞌesat kahato urutunug taꞌa­tueko nug hap ewywuat katu­pono taꞌa­tu­ky­ꞌesat taꞌa­tuehay upiat urutu­kup­teꞌen hap wẽtup sehay saꞌag upi — Uruto poꞌog waku Tupana wanẽtup hawe iraniaꞌin ywania Iesui mohey haria kai katu­pono Iuteu eko ewywuat urueko e hap upi hap kyꞌewi."

⁵ Maꞌato ti miꞌiria eko wãiꞌe hap upi yt urutuwat teran hin i pãi — Yt urueko koꞌi nug hap kaipyi hin i aimoe­waku hap urutoꞌe itote mekewat miitꞌin koꞌi pe. Iesui mohey hap kaipyi yn aimoe­waku hap tut e Tupana ahepe. Pywuat wakuat sehay Iesui kaipywiat upi yn urutuwat teran urutoꞌe iꞌatuepe. Katu­pono uruiky­ꞌesat kahato Aika­ꞌiwat Iesui minug upi aheha­kye­raꞌat hap yt kat saꞌup i rakat urutoꞌe itote. Tupana miium yn ni aimoe­waku urutoꞌe. Taꞌi yt aheko nug hap upi i Iuteu eko nug hap upi aimoe­waku Tupana urutoꞌe yn itote. Taꞌi yt urutuwat hin i Pete­ruꞌin ehay wẽtup upi. Iesui mohey haria akag koꞌi pytkai yt pywo pe i iꞌatuehay urutoꞌe eika­wiano urumi­po­wyro koꞌi eipe Karata ywania wẽtup eko nug hanuaria pote."

⁶ Taꞌi mekewat eꞌat pe iꞌatu kahato miitꞌin akag koꞌi Iesui mohey haria akag koꞌi tawa wato Ieru­sarẽi miaria uruiꞌa­tu­puẽti itote miitꞌin akag koꞌi ahyt iꞌatu­mi­ꞌai­roria koꞌi. Miꞌiria aiꞌakag koꞌi iꞌatuꞌe uruepe katu­pono miꞌiria poꞌog wakuat iraniaꞌin kai iꞌatuꞌe uruepe maꞌato uiwa­nẽtup hawe Tupana yt aiꞌairo i aikahu hap upi aimikuap upi miitꞌin mikyꞌe kahato aito e hap upi yt aiꞌairo i maꞌato tuwepyi aiꞌairo tomi­ky­ꞌesat ewy. Maꞌato miꞌiria teꞌe­ru­we­mo­wato kahato itote toꞌope teꞌe­ru­wehay upi Pete­ruꞌin. Miꞌi tote areĩneꞌen Titu wywo iꞌatu­py­ꞌa­setpe wen maꞌato yt kat i urumuꞌe hat itote. Yt kat iꞌatuꞌe hin i uruepe. Miꞌi hawyi — Uruiky­ꞌesat etiꞌa­tu­muꞌe iraniaꞌin ywania urueko nug hap yt iꞌatuꞌe i uhepe uruepe. — Pyno waku wẽtup sehay ehenoi ro yt Iuteuria i pe yt iꞌatuꞌe hin i uhepe iꞌewyte Titu pe."

⁷ Maꞌato miꞌi tã teꞌe­roꞌe tawa Ieru­sarẽi miaria Iesui mohey haria akag koꞌi toꞌope uruetiat — Pywo waku ti uhyt Pauru topy­huꞌat Tupana miꞌairo yne iraniaꞌin ywania muꞌe hamo meimuẽwat yt Iuteu ywania i muꞌe hamuat waku iꞌatuꞌe toꞌope uhepiat pe. Maꞌato waku uhyt Peteru ti uruꞌy­wania Iuteuria ywania muꞌe hamuat topy­huꞌat Tupana miꞌairo iꞌatuꞌe toꞌope itote torania Iesui emiitꞌin akag koꞌi mekewat 12 ok takaria. Maꞌato — Waku etiꞌa­tu­muꞌe iraniaꞌin ywania aheko ewy Pauru yt iꞌatuꞌe hin i uhepe itote yt iꞌatuꞌe i pãi."

⁸ Taꞌi itotiaria tikuap kahato aikotã Tupana Pãꞌãu toĩneꞌen kahato uhetiat hap iraniaꞌin ywania muꞌe Iesui etiat hap taꞌa­tukuap maꞌato iꞌewyte taꞌa­tukuap kahato aikotã Ipãꞌãu toĩneꞌen kahato Peteru kai uruꞌy­wania Iuteu ywania muꞌe Iesui etiat hamuat hap taꞌa­tukuap kahato. Miꞌi pote — Taꞌi aiꞌy­wania Iesui mohey haria muꞌe kahato hat sese Peteru iꞌatuꞌe maꞌato Pauru iꞌewyte te Tupana Pãꞌãu ipotpap kahato ipiit pyi iraniaꞌin ywania muꞌe hamo Iesui mohey haria apykok hamo iꞌatuꞌe Ieru­sarẽi miaria imohey haria akag koꞌi."

⁹ Itote Ieru­sarẽi me atikuap myeꞌym ok miit poꞌog Iesui mohey haria akag koꞌi myeꞌym Tupana mõtypot yat apyꞌyha ewy iheg nakaria ewywuat koꞌi miꞌiria. Wẽtup ok mekewat Iesui ywyt sese aiwy mehĩ Tiaku wẽtup ok Iesui potmuꞌe sese aiwy mehĩ Peteru wẽtup ok Iesui potmuꞌe sese aiwy mehĩ Iuwãu. Miꞌiria poꞌog miitꞌin mimõ­typot koꞌi itote atikuap. Miꞌiria tikuap kahato Tupana Pãꞌãu miꞌai­roria kahato aiwy Panãpe iꞌewyte uito hap iraniaꞌin ywania muꞌe hamuat hap yt Iuteuria muꞌe hamuat hap taꞌa­tukuap. Taꞌa­tukuap taꞌyn hawyi teꞌe­roꞌe mehĩ Panãpe pe iꞌewyte uhepe — Koitywy ti pyno uruiꞌa­tu­ꞌairo eipe wẽtup eko rakaria muꞌe hamo iꞌatuꞌe. Maꞌato aheko ewywuaria Iuteu ywania kape wemurui ãpy sokpe tek haria kape waku uruto urutuwat iꞌatu­muꞌe hamo iꞌatuꞌe uhepe iꞌewyte Panãpe pe. Miꞌi hawyi teꞌe­ru­we­ponug iꞌatupo sese koꞌi uiꞌakag note iꞌewyte uhyt Panãpe akag note miꞌi hawyi mio tã iꞌatuꞌe — Pyno Tupana etiꞌa­tu­po­ꞌoro ro Panãpe iꞌewyte Pauru wuatꞌi ywania muꞌe hamo iꞌatuꞌe. Miꞌiria ti iꞌewyte urumi­ꞌairo koꞌi wuatꞌi ywania muꞌe Esaꞌyru sese etiat hamo iꞌatuꞌe. Miꞌi hawyi waku iꞌatuꞌe uruepe teꞌe­ru­wehum haype Tiaku Peteru Iuwãu."

¹⁰ Miꞌi hawyi teꞌe­roꞌe uruepe — Waku eweiꞌa­tu­muꞌe Iesui ehay ete wuatꞌi ywania iꞌatuꞌe katu­pono miꞌi nug kuap hap Tupana tum naꞌyn ehepe iꞌatuꞌe uruepe. Waku kahato iꞌatuꞌe. Eweiꞌa­tu­muꞌe turan yt waure­ꞌe­weiꞌe teiꞌo ihaky­ꞌeꞌi rakaria poi miꞌu wuat hap ete pyi iꞌatuꞌe uruepe. Eweiꞌa­tu­po­wyro ro meimuẽ­wuaria hatek takaria iꞌewyte eweiꞌa­tu­muꞌe miꞌiria Iesui etiat turan iꞌatuꞌe uruepe itote tawa Ieru­sarẽi me. Mio tã iꞌatuꞌe uruepe hawyi — Taꞌi uruwy­riaꞌin miꞌi hap ewy yn urutunug teran haꞌa­wy­tepyi mesup te raꞌyn urutoꞌe haty wo urupyꞌa pyi Tiaku Peteru Iuwãu me urutoꞌe ainãpin hawyi.

"

¹¹ Wẽtup eꞌat pe maꞌato aiꞌakag Peteru hewyry uruewawi tawa Atiokia kape mekewat wẽtup ywania Iesui mohey haria kapiat taꞌa­kasa hamo toto. Miꞌi tote mekewat eꞌat pe urutunug ienuk wato kahato hap. Waku kahato itote watenuk wẽtup miit ewy uruto iraniaꞌin ywania Peteru wywo waku yne. Maꞌato urutenuk turan putꞌokꞌe itote uhyt Tiaku mipo­ꞌo­roria Iuteu ywania sese tawa Ieru­sarẽi kaipywiat. Tuwe­mo­herep hawyi aiwy Peteru yt tenuk teran i poꞌog uruwywo yt Iuteuria i ywania koꞌi aito pote. Toiky­ꞌesat Tiaku mipo­ꞌoro koꞌi wywo yn tenuk hap toꞌy­wania wywo yn tenuk teran aikotã Iuteu ywania eko ewy tenuk itote. Taꞌi Iuteu ywania yt teꞌe­renuk hin i wẽtup ywania wywo — Tupana yt tiky­ꞌesat i watenuk yt naku i nug haria wywo iꞌatuꞌe toꞌope taꞌa­tueko ewy. Miꞌi pote Peteru toto iraniaꞌin totepyi toꞌy­wania wywuat tenuk hamo. Yt Iesui ewy hin i tutunug itote. Miꞌi tã neꞌi tutunug hawyi meremo uipoĩꞌãm iꞌatu­py­ꞌa­setpe Peteru ewãi hamo. — Taꞌi yt uiwese i raꞌyn eete Peteru are haty wo. Taꞌi yt nakuap no i ewy etunug mesup are itote typyꞌi tok pe. Kat pote etoiat iraniaꞌin ywania Iesui mohey haria wẽtup ywania upi. — Uito poꞌog miꞌiria kai Iuteu uito pote eꞌe hap saꞌag hap wywo are."

¹² Kat poteĩ pyno yt erenuk teran i raꞌyn yt Iuteuria i wẽtup ywania wywo. Kat pote Tiaku mipo­ꞌo­roria wywo eꞌywania Iuteuria wywo yn erenuk meiũpe are. Kat pote erekenꞌẽ kahato Iuteuria ywania eko mõtypot haria pupi are. Yt naku i miꞌi tã etunug Peteru are."

¹³ Miꞌi tã are pote torania Iesui mohey haria taꞌa­tu­ꞌa­tunug typy sehay upiat ewy teꞌe­ru­wa­ꞌa­tunug itote. Ipatꞌok Peteru wywo ipatꞌok uiwywo. Iꞌewyte aiwy Panãpe toto Peteru eko ewywuat raꞌyn. Iꞌewyte torania iraniaꞌin Iuteuria tuwat Peteru enuk hap kape iraniaꞌin ywania enuk hap kaipyi. Yt naku i kahato topy­huꞌat itote. Yt woꞌo­wese hap ewy hin i taꞌa­tunug itote."

¹⁴ Miꞌi pote areꞌe raꞌyn Peteru pe typyꞌi ehamo haty wo — Mehĩ Peteru kat pote yt ewyry i Iesui piat aimuꞌe hap ewy are. Kat hamoĩ etiky­ꞌesat Iuteuria eko ewy meiũpe. En ni Iuteu ywania sese maꞌato koitywy erenuk kahato uruwywo yt Iuteu ywania i wywo yt Iuteu ywania eko ewy hin i erenuk meiũpe are. Taꞌi koitywy erenuk kahato urupy­ꞌa­setpe. Erenuk taꞌyn mesup yne ehamo mehĩ are. En ni Iuteu ywania uito ewy wen Peteru maꞌato eko ti yt Iuteuria eko ewy hin i tuereto ereĩneꞌen are. Pyno kat poteĩ etiky­ꞌesat iraniaꞌin meiũpiaria Iuteu eko ewy hap ewy mesup uhyt are Peteru pe. Kat poteĩ iꞌatu­ꞌewy ereĩneꞌen saꞌa­wyꞌi maꞌato mesup te etiꞌa­tu­mo­ꞌa­kagꞌaia moꞌa­kagꞌaia kahato iraniaꞌin Iuteuria eko ete are. Iuteuria eko ewy sese yt etiꞌa­tunug hin i te areꞌe Peteru pe."

¹⁵ — Taꞌi aito Iuteuria ywania aiꞌy­wãꞌĩ kaipyi are. Aheko saꞌa­wy­ꞌiwuat kaipyi watikuap aiꞌy­wania ehay — Iraniaꞌin ywania ti yt naku i nug haria iꞌatuꞌe aiꞌy­wotꞌin aityꞌin ahepe."

¹⁶ Maꞌato koitywy watikuap taꞌyn wẽtup eko mio tã e — Aheko nug hap kaipyi neꞌi yt tut i aheha­kye­raꞌat hap e hap watikuap. Taꞌi yt Iuteuria i eko nug hap kaipyi hin i toĩneꞌen aheha­kye­raꞌat hap e. Taꞌi Tupana wanẽtup hawe ahewaku hap yt tut i aiꞌy­wania eko nug hap kaipyi neꞌi hap watikuap mesup Iesui e hap ewy. Taꞌi mekewat wãiꞌe hap watunug yne pytkai yt ahewaku kuap i e Tupana mesup are. Mesup Uhaꞌyru Iesui mohey hap kaipyi yn ni woro­ho­ꞌo­mo­hãpyk kuap e Tupana ahepe mesup are. Koitywy ti wato­mohey raꞌyn Iesui Tupana Mipo­ꞌoro Aipo­rekuat nuat aito imohey kahato haria are. Koitywy watikuap taꞌyn yt uwe i tuwe­ha­kye­raꞌat kuap teko waku nug hap kaipyi neꞌi hap watikuap Peteru are. Watikuap taꞌyn aikotã Aika­ꞌiwat Iesui yn aheha­kye­raꞌat kuap hat topy­huꞌat hap watikuap Peteru are."

¹⁷ Koitywy watikuap wẽtup muꞌap yn toĩneꞌen Tupana kape. Miꞌi yn toĩneꞌen Tupana kapiat are. Miꞌi muꞌap ti Aiwy Iesui mohey hap ti are. Uwe uwe yt toto i hupi miꞌi haria ti yt nakuat i nug hanuaria wo Tupana wanẽtup hawe tukup­teꞌen are. Miꞌiria tunug kahato taꞌa­tueko wakuap pytkai hoꞌo­wasat rakaria wo tukup­teꞌen Tupana pe sio Iuteu ywania sio wẽtup ywania are Peturu pe itote. Taꞌi Aika­ꞌiwat tut yt aipatꞌok patꞌok hamo i tut are maꞌato aikotã hũria tukup­teꞌen toꞌo­pype pype hap ewy ainug hamuat tut are. Wẽtup ywania yn ainug hamo tut Iesui uiwy areꞌe Peteru pe itote."

¹⁸ Iesui mohey hap kaipyi yn ni aheha­kye­raꞌat hap toĩneꞌen uhyt are. Waku kahato watunug yne Tupana piat ainãpin saꞌa­wy­ꞌiwuat hap koꞌi wen maꞌato miꞌi koꞌi nug hamo yt watu­we­ha­kye­raꞌat kuap i mehĩ are. Maꞌato wato­mohey aheko aheha­kye­raꞌat kuap pote hoꞌo­wasat rakaria sese wo i raꞌyn watoĩ­neꞌen uhyt are."

¹⁹ Peteru etikuap apo kat pote yt watu­we­ha­kye­raꞌat kuap i mekewat Tupana woꞌo­nãpin hap nug yne hap kaipyi. Taꞌi Tupana tiky­ꞌesat kahato tepiat ainãpin hap nug hap yne yne hap toiky­ꞌesat kahato maꞌato wahãꞌãg pytkai wati­ꞌa­parap kahato tuereto yne yne imiky­ꞌesat nug hap ete yt wati­ꞌa­parap teran hin i pytkai. — Waku atunug yne imiky­ꞌesat watoꞌe wen maꞌato wati­ꞌa­parap aparap imiky­ꞌesat ewywuat nug hap ete. Miꞌi pote yt watu­we­ha­kye­raꞌat kuap i aiwe­kaipyi yne Tupana miky­ꞌesat nug hap upi wahãꞌãg kahato pytkai are. Taꞌi wati­ꞌa­parap aparap hawyi hoꞌo­wasat rakaria wo watu­kup­teꞌen aiwa­nẽtup hawe aipyꞌa pe are. Wati­ꞌa­parap kahato tuereto imiky­ꞌesat nug hap ete areꞌe saꞌa­wyꞌi itote Iesui potmuꞌe Peteru pe wuatꞌi Iuteu ywania ehamo iꞌatu­py­ꞌa­setpe mekewat ienuk hap eꞌat pe turan. Miꞌi pote yt aheha­kye­raꞌat kuap i mekewat wãiꞌe hap yt uwe i nug yne kuap pote are. Miꞌi pote uheha yt mekewat wãiꞌe hap kape hin i uheha­kye­raꞌat hap kyꞌewi maꞌato Tupana Saꞌyru kape yn uheha are Pete­ruꞌin me."

²⁰ — Uito yt atunug i te emiky­ꞌesat ewy aiꞌe hamo are. Tupana miky­ꞌesat ewy atunug neran kahato wen maꞌato uhesaika hap yt toĩneꞌen i te uipiit pe inug hamuat watoꞌe hap watikuap are. Miꞌi pote Iesui kape waku wato­kosap hesaika hap sat hamo are. Yt tuwe­mi­ky­ꞌesat ewy i ikuꞌuro ariaꞌyp posak ete Iesui maꞌato Tupana miky­ꞌesat ewy ikuꞌuro ariaꞌyp posak ete watoꞌe are. Miꞌi hap ewy atunug neran wen. Koitywy uipytꞌat teran kahato Iesui Pãꞌãu wo. Miꞌi pote koitywy uimi­ky­ꞌesat koꞌi hokpap yne raꞌyn. Uika­ꞌiwat Iesui miky­ꞌesat koꞌi nug hamo yn naꞌyn areĩneꞌen koitywy are. Mesup ti koitywy Tupana Saꞌyru mohey hano yn areĩneꞌen. Koitywy wẽtup ok uikyꞌe hat mõtypot hamo yn naꞌyn areĩneꞌen watoꞌe."

²¹ Taꞌi Tupana ti hegyiꞌat kahato ahepe tuwe­kaipyi aikyꞌe are. Maꞌato watu­we­kyiꞌat kuap aheha­kye­raꞌat hap aheko nug hap saꞌup mo pote yt kat hamo i Iesui ikuꞌuro ariaꞌyp posak ete ahaꞌup mo aheha­kye­raꞌat hamo are Pete­ruꞌin me tawa Atiokia pe ienuk hap eꞌat pe. Yt naku i so watoꞌe neꞌi Tupana pe are. Taꞌi yt naku i Tupana egyiꞌat hap Tupana wese hap pun haria wo wato­py­huꞌat are itote yne pe.

"

3

¹ Tawa Karata piaria Iesui mohey haria woro­ho­ꞌo­nãpin neran eipe. Kat pote eweiꞌe mesup eiwo­ꞌope — Toꞌiro watu­we­ha­kye­raꞌat aiminug wakuat nug hap upi eweiꞌe. Yt iweꞌeg hin i rakaria ewy apo eipe are. Uweĩ eimuꞌe miꞌi tã itote are. Uweĩ eimaꞌat miꞌi e hap upi. Haꞌa­wyte woro­ho­ꞌo­muꞌe kahato kat hamo Iesui ikuꞌuro hap ete itote at kaꞌap. Miꞌi uimi­mo­herep uhehay saꞌa­wyꞌi heremo kahato ehewaure kaꞌa pe. Miꞌi hawyi Iesui mohey haria wo eweikup­teꞌen itote. Waku kahato mekewat eꞌat pe are. Miꞌi hawyi Tupana tum naꞌyn ehepe Topãꞌãu wakuat eweimohey Haꞌyru hawyi."

² Pyno woro­ho­ꞌo­ꞌapo mesup — Kat hap upi Tupana eipytꞌat nug Topãꞌãu wakuat no are sio toꞌy­wãꞌĩ pywiat re wakuap nug haria eipe pote sio Tosa­ꞌyru mohey uimienoi kaipywiat pote are. Taꞌi eweikuap taꞌyn Tosa­ꞌyru mohey raꞌyn hawyi eipytꞌat nug Tupana Topãꞌãu wo hap eweikuap are."

³ Pyno kat pote mesup wẽtup sehay upi eweiwat are. Eiꞌakag heg kahato apo. Saꞌa­wyꞌi Tupana Pãꞌãu kaipyi yn naꞌyn eweiky­ꞌesat eimoe­saika hamuat. Pyno kat pote koitywy ehewaku hap moherep hap kaipyi eweiky­ꞌesat eimoe­saika hamuat. Kat pote eweikyiꞌat teran Tupana miium ehewaku nug hap saꞌup hap upi are. Yt iweꞌeg i haria ewy kahato eipe are."

⁴ Saꞌa­wyꞌi Iesui mohey haria eipe turan miitꞌin mimo­weu­kaꞌi koꞌi wo yn eweikup­teꞌen Aparãu ewywuat koꞌi wo raꞌyn imohey hap kaipyi. Aikotã Aparãu mohãpyk hap ewy te raꞌyn are."

⁵ Pywo tig Tupana tum Topãꞌãu hawyi Topãꞌãu wo aimoe­saika wakuap nug hamuat sio sehay wakuat Iesui etiat wati­mohey hawyi. Imohey hawuo watunug miatpo kahato hap koꞌi yt miitꞌin minug kuap i koꞌi."

⁶ Aikotã miwan me tohenoi Aparãu etiat — Toimohey ti pywuat sese e. Pywo ti imohey pywo piat hap kaipyi ti Tupana toꞌe — Hãpyk kahato en uhepe e Aparãu me."

⁷ Miꞌi hap ewy ti pywo eweikuap taꞌyn mekewat Aparãu Emiari­ruria imohey haria kahato wo sok taꞌyn hap."

⁸ Mio tã e saꞌa­wy­ꞌiwuat miwan me tomohey hap kaipy­wiaria pe yn — Uimohey kahato hap ti einug wakuaria wo e hap wẽtup ywaniaria pe. Mio tã e hap tohenoi yianmete Aparãu me. Mio tã e Aparãu — Pywuat sehay ahenoi epe. Ekaipywiat ti aru Wuatꞌi Ywania Ehakye­raꞌat hanuat tuwe­mo­herep aru e Tupana Aparãu me."

⁹ Pyno koitywy aitoria yne ywania Tupana mimo­hãpyk koꞌi. Aikotã Aparãu mohãpyk hap ewy raꞌyn tomohey pywo piat potiat koꞌi."

¹⁰ Maꞌato uwe uwe toꞌe topyꞌa pe — Taꞌi atunug yne kahato Tupana woꞌo­nãpin hap koꞌi miꞌi pote Tupana mieha­kye­raꞌat wuat areĩneꞌen e hat Tupana miꞌa­piheg wo topy­huꞌat. Katu­pono mio tã e Tupana saꞌa­wyꞌi — Yt torania i ewetunug einãpin uhepiat hap koꞌi pote uimi­ꞌa­piheg wo eweikup­teꞌen e."

¹¹ Uimohey kahato haria yn uimi­mo­hãpyk wuaria tukup­teꞌen. Miꞌiria yn ni uiꞌya­typiat gupteꞌen hanuaria e Tupana saꞌa­wyꞌi. Mio tã e hap kaipyi watikuap taꞌyn saꞌa­wy­ꞌiwuat Tupana woꞌo­nãpin hap nug yne hap kaipyi yt aimo­hãpyk kuap i are."

¹² Iraniaꞌin ti wẽtup woꞌo­nãpin haria. Miꞌiria ti — Toꞌiro watuwat Tupana piat ainãpin hap koꞌi nug yne aiwe­ha­kye­raꞌat hamo iꞌatuꞌe. Miꞌi nug hap upi watu­we­ha­kye­raꞌat aito iꞌatuꞌe. Maꞌato miꞌiria yt iꞌatu­weꞌeg hin i katu­pono Tupana toꞌe miwan me — Uimohey haria yn uimi­mo­hãpyk wuaria tukup­teꞌen e. Miꞌiria yn uiꞌya­typiat gupteꞌen hanuaria e Tupana saꞌa­wyꞌi ahepe. Miꞌi pote aiminug wakuap koꞌi aheha­kye­raꞌat hamo wato­mohey pote yt wato­mohey i aheha­kye­raꞌat hamuat Iesui ikuꞌuro hap. Miꞌi pote Tupana toꞌe saꞌa­wyꞌi — Eweiꞌa­parap wẽtup woꞌo­nãpin uhepiat hap ete pote aru uimi­ꞌa­piheg wo eweikup­teꞌen e. Ewetunug torania sese wuatꞌi eꞌat pe pote yn waku kahato ereĩneꞌen uiwa­nẽtup hawe e Tupana saꞌa­wyꞌi. Maꞌato yt uwe i uimi­ky­ꞌesat ewy kahato inug haria eweikup­teꞌen e Tupana ahepe."

¹³ Taꞌi Tupana tikuap kahato aipyꞌa piat iꞌaparap hap koꞌi. Miꞌi kaipyi ariaꞌyp posak kape Tupana tipo­ꞌoro Tosa­ꞌyru aiꞌa­piheg hap u hamo. Tosa­ꞌyru suu wo toihep tokuasa hap pya raꞌyn aikai. — Uwe ariaꞌyp ete tomo­satꞌe pe ikuꞌuro miꞌi uikuasa topy­huꞌat e Tupana saꞌa­wyꞌi miitꞌin me. Pyno koitywy Tupana pyꞌahak hap yt kat i ahete aika­wianuat ikuꞌuro raꞌyn ariaꞌyp ete pote. Miꞌi hawyi ikai toĩneꞌen naꞌyn iwese hap."

¹⁴ Saꞌa­wyꞌi Aparãu Tupana timo­waku kahato mekewat tomohey kahato hap kaipyi tegyiꞌat hap kaipyi toipoi­tyro. Miꞌi hap ewy koitywy aito i raꞌyn watoĩ­neꞌen wuatꞌi ywania Tupana mipoi­tyro koꞌi raꞌyn watu­kup­teꞌen. Mekewat tomi­poi­tyro sese tomi­po­ꞌoro Aipo­typot Iesui piat aikyiꞌat hap wato­mohey hap kaipyi aimo­hãpyk kuap. Mio koitywy mio tã e Tupana — Koitywy atum Uhaꞌyru mohey haria pe Uipãꞌãu e. Yt kat saꞌup mo i atum iꞌatuepe kat pote Uhaꞌyru upiaria miꞌiria pote e."

¹⁵ Uhytꞌiꞌin manaꞌin karãpeĩ watoꞌe aiwo­ꞌope — Atunug aru uiꞌe hap epiat. Iꞌewyte waku en waku etunug kuap eꞌe hap uhepiat aiwo­ꞌo­ꞌe­wy­ꞌewy watoꞌe aiwo­ꞌopiat hawyi waku yne aiꞌe aiwo­ꞌopiat hap watunug. Yt naku i eipohep atunug aru aiꞌe aiwo­ꞌopiat hap ete watoꞌe. Iꞌewyte yt naku i watunug wẽtup sehay wo atunug aru aiꞌe rokirẽ hawyi watoꞌe."

¹⁶ Miꞌi hap ewy ti saꞌa­wyꞌi Tupana toꞌe Aparãu me — Meiũran ti aru Wẽtup Ok Emiariru kaipyi atipoi­tynug yi totiaria torania. Yt uheso i aru atunug uiꞌe hap ewy e. Tepiat Tupana e hap Aparãu timohey kahato. Tupana yt toꞌe i — Emẽpytꞌin kaipyi aru atipoi­tyro torania yi totiaria yt e i maꞌato — Wẽtup Ok Emiariru kaipyi atipoi­tyro wuatꞌi ywania e Iesui wuanuat etiat pe tohenoi. Aparãu Emiariru Emiariru piat pe yianmete Aipo­rekuat nuat tomi­po­ꞌoro tohenoi mio tã e."

¹⁷ Pywo yt ipohep hin i atunug aru toꞌe hap kai ete. Pyno atunug aru toꞌe hap Tupana tunug naꞌyn. Pyno yt uwe i Tupana ewãi kuap — Atunug aru e hap ete maꞌato tutunug iꞌewyte tomi­ky­ꞌesat ewy tuwe­kai­pywiat aru toꞌe Aparãu miat hap tutunug naꞌyn. 430 anu hap ete tutum naꞌyn woꞌo­nãpin hap aseꞌi Musei pe. Maꞌato yt tutunug kuap i saꞌa­wy­ꞌiwuat Aparãu miat — Atipoi­tyro aru Emiariru mohey haria iꞌatue­ha­kye­raꞌat hamo e hap."

¹⁸ — Watunug Musei pywiat torania Tupana woꞌo­nãpin hap pote aipoi­tyro hap aheha­kye­raꞌat hap topy­huꞌat maꞌato yt pywo pytkai i eweiꞌe are katu­pono 430 anu turan aseꞌi Musei eꞌyianmete toĩneꞌen kahu raꞌyn Tupana aipoi­tyro hap. Saꞌa­wyꞌi pyi te Tupana toꞌe Aparãu me — Wẽtup esaꞌyru kaipyi aru wuatꞌi atipoi­tyro e. Miꞌi hap tutunug mesup."

¹⁹ Kat hamo som pyno tutum ahepe ainãpin hap koꞌi. Pyno woro­ho­ꞌo­wesat. Taꞌi aiminug saꞌag moherep hamuat tutum ahepe. Miꞌi hap ewy mesup tutum ahepe Aparãu Emiariru Iesui putꞌokꞌe yianmete wuat hap — Atunug aru toꞌe hap. Yt tutunug i te turan Tupana ainãpin atipy kaipywiat tomi­po­ꞌoro wẽ pyi. Miꞌi e hap Musei tiwan ainãpin hamuat."

²⁰ Maꞌato saꞌa­wyꞌi Aparãu me tuwewi sese tohenoi towẽ kaipyi sese — Meiũran aru atipoi­tyro torania ywania esaipepiat emẽpyt kaipywiat no e tope tehay pywo piat nug hamo. Yt tomi­po­ꞌoro wẽtup ok atipy piat wẽ pyi i mio tã e Aparãu me maꞌato tuweran toto tehay moherep hamo Tupana sese."

²¹ Tupana tinãpin kahato Musei saꞌa­wyꞌi wẽtup ahaꞌa­seꞌi tehay wo wen maꞌato yt Aparãu piat tehay moma hamo i maꞌato ahewaku hamo ihay Musei pe maꞌato aipyhyp aiminug saꞌag nug pupiat hamo yn yt wato­mohey i te pytkai. Miꞌi pote pyno atunug aru Musei piat uinãpin hap hawyi waku pe areĩneꞌen Tupana wanẽtup hawe watoꞌe pote yt aimo­hãpyk kuap i Tupana katu­pono yt watunug yne i pote. Katu­pono yt putꞌok­wa­toꞌe i torania nug hamo."

²² Taꞌi saꞌa­wyꞌi Tupana toꞌe tomiwan me — Yt naku hin i miitꞌin e. Yt uwe i kahato uimienoi kuap teran haria meikope e. Yt uwe i uiwe­nãpin hap uimiium nug yne haria itote e Tupana saꞌa­wyꞌi miitꞌin me. Miꞌi pote paawa­toꞌe Tupana miꞌa­tu­ꞌa­piheg wuaria aito watoꞌe haype. Miꞌi hawyi pyno wẽtup muꞌap yn waku watoꞌe. Koitywy Aipo­typot Iesui mohey hap yn waku aheha­kye­raꞌat hamo watoꞌe. Aikotã Aparãu me toꞌe — Atipoi­tyro aru wuatꞌi ywania mekewat ewatꞌypmuat esaipepiat mohey sese haria e ahepe. Koitywy toĩneꞌen watoꞌe meimẽ. Koitywy imipoi­tyro koꞌi raꞌyn watu­kup­teꞌen. Katu­pono imipo­ꞌoro Aipo­typot Iesui mohey haria raꞌyn aito pote watoꞌe."

²³ Saꞌa­wy­ꞌiwuat yt wato­mohey kuap i wahe­katup kahato karãmuo tomohey hap wen. Wahãꞌãg hãꞌãg kahato wãiꞌe Tupana hap nug yne hamo maꞌato yt watunug kuap i. Miꞌi pote mipyhik koꞌi ewy watu­kup­teꞌen Tupana miꞌa­piheg koꞌi wo iheg miat koꞌi wo hap ewy."

²⁴ Ahenoi hãꞌãkap wuo miꞌi e hap ete. Saꞌa­wyꞌi Tupana ehay ainãpin hap koꞌi tukup­teꞌen woꞌo­muꞌe sese hat ewy wãi wãiꞌe hamo. Miꞌi hap eꞌat pe wahe­katup aimuꞌe pywuat sese hanuat Iesui eꞌyianmete wuat hamuat. Putꞌokꞌe raꞌyn Aheha­kye­raꞌat hat Iesui hawyi Tupana aimo­hãpyk Tosa­ꞌyru Iesui mohey hap upi."

²⁵ Pyno mesup koitywy Tupana aimo­hãpyk Tosa­ꞌyru mohey sese hap upi yn naꞌyn. Yt saꞌa­wy­ꞌi­tewuat ainãpin hap upi i maꞌato wato­mohey sese Iesui hawyi pywo raꞌyn watoꞌe."

²⁶ Tupana mẽpytꞌin no watu­kup­teꞌen wẽtup miit pakup ewy Aika­ꞌiwat Iesui mohey hap kaipyi watoꞌe."

²⁷ Aito miitꞌin aiwo­ꞌo­ꞌewy wẽtup miit yn watoĩ­neꞌen. Wẽtup miit set wywo wato­py­huꞌat Iesui mohey hat set wywo watoĩ­neꞌen mio. Aiwe­setꞌok hawyi aikotã Iesui ewy raꞌyn watoĩ­neꞌen."

²⁸ Aito miitꞌin yt aiwo­ꞌo­ꞌewy hin i watu­kup­teꞌen iraniaꞌin Iuteu ywania e hap koꞌi iraniaꞌin yt Iuteu ywania i iraniaꞌin ihainiaꞌin hary­po­riaꞌin iraniaꞌin gaꞌi­waria iraniaꞌin miit emiitꞌin. Maꞌato miꞌi pytkai watoĩ­neꞌen Iesui mohey hap kaipyi wẽtup piit ewywuaria yn imohey haria sok aito pote are."

²⁹ — Atipoi­tyro aru Wẽtup Takat Emiariru e Tupana saꞌa­wyꞌi yianmete Aparãu me. Koitywy Iesui topy­huꞌat Aipo­rekuat no raꞌyn. Miꞌi hap kaipyi koitywy Tupana wanẽtup turan Aparãu Emiari­ruꞌin wo raꞌyn wato­py­huꞌat katu­pono Iesui toĩneꞌen aiwywo pote Tupana miꞌa­tu­poi­tyro koꞌi sok aito Tupana e Aparãu miat hap ewy topy­huꞌat ahepe koitywy.

"

4

¹ Pyno ahenoi poꞌog wẽtup i hãꞌãkap wuo ehepe. Ahetama pe kue aihire te turan aiꞌywot ikuꞌuro pote ipowatꞌyp aiwanuat totoiat iheg me toĩneꞌen yt taꞌatuium i te ahepe. Maꞌato airan hap putꞌokꞌe raꞌyn hawyi iheg myi taꞌa­tue­nõtem naꞌyn miꞌi te ium iꞌatuꞌe ahepe aiꞌywot powatꞌyp ikuꞌuro rakat miky­ꞌesat miwan miat aiꞌywot toꞌe hap ewy."

² Maꞌato aiwe­motag hamo te yt kat i ipowatꞌyp aikai. Iraniaꞌin emiit no yn watu­kup­teꞌen pote aiꞌywot powatꞌyp iwato toĩneꞌen pytkai. Miꞌi tã ahetama pe watunug."

³ Karãpe atunug yne teran Tupana woꞌo­nãpin hap uheha­kye­raꞌat hamo aiꞌe pote watoĩ­neꞌen aikotã wãiꞌe hat po pe. Aikotã aihire te turan aiꞌywot ikuꞌuro rakat powatꞌyp iheg me kahato toĩneꞌen rakat hap ewywuat watoĩ­neꞌen mesuwe."

⁴ Putꞌokꞌe raꞌyn heꞌat tomi­ky­ꞌesat ewy raꞌyn topy­huꞌat hawyi Tupana tipo­ꞌoro Tosa­ꞌyru hary­poria kaipywiat torania tehay woꞌo­nãpin hap nug hamuat raꞌyn. Putꞌok­toꞌe hawyi yt wẽtup i Toꞌywot woꞌo­nãpin hap toiꞌa­parap. Tutunug yne imiky­ꞌesat ok tã."

⁵ Koitywy Iesui ainug Toꞌywot saꞌy­ruꞌin Toꞌywot saki­ꞌytꞌin koꞌi wo. Koitywy watunug neran ainãpin hap ok tã katu­pono imẽpytꞌin pakup koꞌi watoĩ­neꞌen pote. Aikotã waku ehay uinãpin hap atunug watoꞌe at i at i Tupana kape."

⁶ Miꞌi hawyi tutum Tosa­ꞌyru Pãꞌãu wakuat — Uimẽ­pytꞌin wo eweikup­teꞌen toꞌe ahepiat hap. Putꞌokꞌe hawyi Papai watoꞌe at kaꞌap Tupana kape aipyꞌa pe."

⁷ Tupana yat eropat haria ewy nimo watoĩ­neꞌen. Koitywy haꞌy­ruꞌin haki­ꞌytꞌin no sese wo ainug naꞌyn. Koitywy Aiꞌywot powatꞌyp yn naꞌyn aikai pãi haꞌy­ruꞌin sese haki­ꞌytꞌin kahato wo aito."

⁸ Saꞌa­wyꞌi yt eweikuap i Tupana sese pywuat turan eweikup­teꞌen Tupana ran koꞌi mohey haria tupa­naria eropat haria eipe eweikup­teꞌen."

⁹ Maꞌato koitywy wyti Tupana sese kuap haria raꞌyn eweikup­teꞌen. Iꞌewyte Tupana sese mikuap koꞌi eipe are. Kat hamo ten pyno koran eweiꞌaipok teran mekewat saꞌa­wy­ꞌiwuat eipyhyp hap ewywuat kape saꞌa­wy­ꞌiwuat eipyhyp hat eika­ꞌiwat kape. Ehetu­pana ran yt kat etiat i kuap haria kape."

¹⁰ Uimo­kenꞌẽ kahato haria eipe tawa Karata piaria katu­pono — Watunug Iuteuria eko koꞌi ewy yne pote watu­we­ha­kye­raꞌat kuap e haria eipe. Iuteuria eko koꞌi wati­ꞌa­tu­mõ­typot hãpyk hawyi watu­we­ha­kye­raꞌat kuap eweiꞌe. Waku kahato aimi­mõ­typot no Iuteuria eꞌat koꞌi waty koꞌi anu koꞌi yne aiwe­ha­kye­raꞌat hamo eweiꞌe."

¹¹ Miꞌi pote uimo­ꞌa­kagꞌaia kahato haria eipe are mio tã eweiꞌe pote. Yt naku i rat pãi katu­pono eimuꞌe saꞌa­wy­ꞌi­tewuat Iesui etiat uhepiat hap eweiwaure kahato hap. Miꞌi hawyi yt kat hamo i eimuꞌe saꞌa­wy­ꞌiwuat hap topy­huꞌat ehepe."

¹² Uito meimuẽwat seko koꞌi uheha­kye­raꞌat hap atiwaure yne rokirẽ ahẽtup kahato Iesui kape yn uheha­kye­raꞌat hap. Miꞌi hawyi atipuẽti Tupana Iesui mohey hap upi waku kahato. Pyno mesup atiky­ꞌesat kahato eipe uito ewywuat. Yt eweimohey teiꞌo eheko nug hap muꞌap Tupana kuap hamuat katu­pono Iesui yn muꞌap Tupana kape are. Atiky­ꞌesat kahato eipe uiꞌe­wywuat imohey haria hap atiky­ꞌesat eweikup­teꞌen hamuat pãi. Iuteuria ywania mẽpyt sese uito meiũ pãi. Uiꞌywot ti Iuteu sese pãi. Uiꞌy­wania eko koꞌi ewy atunug kahato saꞌa­wyꞌi uheha­kye­raꞌat hap kyꞌewi Tupana kuap hamo wen maꞌato yt atipuẽti i miꞌi muꞌap atunug yne urueko ewywuat pytkai pãi. Miꞌi hawyi Iesui Uheha­kye­raꞌat hano topy­huꞌat hawyi waku kahato Tupana topy­huꞌat yt pya hin i uikai topy­huꞌat. Pyno atiky­ꞌesat eipe uhepiat Iesui mohey hap ewywuaria ro eweikup­teꞌen. Saꞌa­wyꞌi areĩneꞌen eipy­ꞌa­setpe turan eheko ewywuat atunug. Yt urueko koꞌi i atunug uito Iuteu uito pytkai. Eipe ewy atunug itote. Pyno mesup ewetunug uito ewy eweikup­teꞌen yi Karata ywania. Waku eheko wakuat ewywuat ewetunug aikotã saꞌa­wyꞌi atunug eipy­ꞌa­setpe are. Maꞌato mio uheko Iuteu eko upi eweikat Tupana piat eheha­kye­raꞌat hap aikotã uimotag hap eꞌat pe ewywuat ewetunug neran. Yt eiweꞌeg hin i mio tã ewetunug pote. Saꞌa­wyꞌi uimohey haria eweikup­teꞌen. Kat pote mesup uhehay mohit hanuaria eweikup­teꞌen."

¹³ Saꞌa­wyꞌi uiꞌahu kahato itote eipy­ꞌa­setpe areĩneꞌen turan miꞌi pote yt areto kuap i wẽtup tawa kape. Uiꞌahu eipy­ꞌa­setpe wywo woro­ho­ꞌo­ꞌo­muꞌe."

¹⁴ Miꞌi turan tig yt eweiwaure i uhehay. Yt karãpe i — Motoro eweiꞌe uhepe. Uiꞌahu hap upi yt eiwe­ky­ryꞌi hin i. Waku kahato waku kahato eweiꞌe yn uimi­muꞌe pe. — Ereke ro mehĩ ereke ro mimi eweiꞌe yn uhepe. Aikotã uito atipy kaipywiat sut hat ewy uinug Iesui putꞌokꞌe turanuat ewy. — Ereke ro eweiꞌe hap ewy yn. Eimi­mõ­typot no kahato areĩneꞌen saꞌa­wyꞌi itote."

¹⁵ Miꞌi turan uhehay wo woro­ho­ꞌo­mo­wepit kahato. Kat poteĩ koitywy yt iwepit rakaria wo i raꞌyn eweikup­teꞌen. Saꞌa­wyꞌi uheha ahu hap yt ikahu i pytkai uikyꞌe eipe. — Urutum neran urueha wakuat eweiꞌe uikyꞌe haype."

¹⁶ Maꞌato koitywy eweikup­teꞌen yt uikyꞌe i poꞌog haria ewy eweikup­teꞌen katu­pono yt uiwẽ pohep teran i eimuꞌe pywuat sehay wuat hap ete pyi pote. Miꞌi pote ehewa­nĩkap ewy areĩneꞌen mesup."

¹⁷ Koitywy eimuꞌe haria wẽtup seko kaipyi eikyꞌe wen maꞌato eimaꞌat reran haype. Woro­ho­ꞌo­kyꞌe iꞌatuꞌe maꞌato ehero­poꞌok uipo pywiat reran haype neꞌi. Eiky­ꞌesat taꞌa­tu­kyꞌe ehepiat poꞌog uikyꞌe hap kawiat haria wo eweikup­teꞌen."

¹⁸ Atiky­ꞌesat wuatꞌi eꞌat pe miitꞌin eiꞌa­tu­kyꞌe haria wo sio areĩneꞌen itote sio yt. Wuatꞌi miitꞌin eikyꞌe hap atiky­ꞌesat aikotã uito woro­ho­ꞌo­kyꞌe hap ewy are atiky­ꞌesat wen maꞌato yt atiky­ꞌesat i eikyꞌe ran hap neꞌi eimaꞌat sehay wo hap neꞌi."

¹⁹ Uimẽ­pytꞌin eipe pote haty kahato uhete. Woro­ho­ꞌo­kyꞌe hap aikotã aity tuwe­mẽpyt turanuat hap ewy. Uhehatꞌat kahato eiky­ꞌewi are. Eiꞌa­tu­muꞌe hap kaipywiat hãpyk takaria wo teran woro­ho­ꞌonug aikotã Iesui hãpyk takat topy­huꞌat hap ewywuaria wo teran haype. Atiky­ꞌesat kahato Iesui iꞌywãꞌĩ eipyꞌa pe i hap. Miꞌi pote Tupana kape ahẽtup haty wo — Etunug emẽpytꞌin no miꞌiria are Tupana pe. Haty kahato uipyꞌa pe aikotã aity ete haty imẽpyt wemo­herep hap eꞌat pe hap ewy ahẽtup eika­wiano. Eweimo­herep taꞌyn hawyi waku raꞌyn uhetiat. Haty hap tokosap taꞌyn aikotã aity tehatꞌat tomẽpyt egyiꞌat turan hap ewy."

²⁰ Uipopap kahato eimo­wa­nẽtup pyreꞌi uhepiat Tupana ehay wuat hamo. Miꞌi pote areto teran ehowawi maꞌato yt aikotã kuap hin i areto woꞌo­pyhik hawe areĩneꞌen mote."

²¹ Uhehatꞌat kahato sio ehehaĩte Iesui mohey hap ete sio yt hap kuap hamo aikotã aity ewy woro­ho­ꞌo­kyꞌe."

²² Saꞌa­wyꞌi te ti urueꞌa­seꞌi Aparãu toĩneꞌen typy ok saꞌyru ywot no e miwan me. Wẽtup haꞌyru iharyꞌi sese mana Sara kawiat maꞌato wẽtup haꞌyru hemiit wẽtup ywania kawiat mana Ãka kawiat."

²³ Temiit kawiat haꞌyru ti topuꞌi kaipywiat wemo­herep."

²⁴ Pyno ahenoi teran miꞌi hap sehay iãꞌãkap wuo ehepe Aparãu saꞌy­ruꞌin etiat typy ok etiat ihary­ꞌiꞌin typy ok hap kaipywiat hap. Pyno Aparãu eharyꞌi toĩneꞌen typy ok hap kaipywiat. Pyno Aparãu eharyꞌi toĩneꞌen typy ok aikotã typy ok kapiat Tupana ihay hap e. Tohenoi kahato tehay woꞌo­nãpin hap Musei pe yityꞌok Sinai e hap tote — Uwe uwe inug yne teran Tupana ehay wãiꞌe hap teha­kye­raꞌat hamo haria ti tukup­teꞌen Aparãu saꞌyru temiit kawiat ewy mana Ãka kawiat ewy."

²⁵ Iraniaꞌin teꞌe­re­mohey saꞌag. — Atunug yne teran uheha­kye­raꞌat hamuat iꞌatuꞌe. Mio tã e haria mana Ãka mẽpyt Isameu ewywuat wẽtup ok Aparãu eharyꞌi temiit kawiat ewywuat haria. Mio tã e haria tawa Ieru­sarẽi miaria. Uwe uwe toto miꞌiria ehay upi miꞌiria teꞌe­ro­py­huꞌat — Atunug yne teran Tupana woꞌo­nãpin hap e hap emiit no tukup­teꞌen."

²⁶ Maꞌato toĩneꞌen wẽtup tawa Ieru­sarẽi ne. Miꞌi tawa atipy kaipywiat sut hat mesuwiat ewywuat re wen. Miꞌi pe watu­kup­teꞌen mio aitoria Aparãu eharyꞌi sese mẽpyt Isaki ewywuaria wẽtup sehay upiat gupteꞌen haria. Katu­pono Iesui mohey hap yn aheha­kye­raꞌat e haria."

²⁷ Saꞌa­wyꞌi te ti Tupana toꞌe miwan me — Eiwe­mo­wepit ro yt karãpiat i imẽpyt rakaria e. Eiwe­mo­wepit ro yt karãpiat i hãꞌãg mẽpyt saty hãꞌãg haria katu­pono heꞌaito miꞌatoiat ti aru poꞌog imẽpytꞌin nakano topy­huꞌat heꞌaito kahato rakat mẽpytꞌin kai."

²⁸ Miꞌi tupono uiwy­riaꞌin aito ti watu­kup­teꞌen Tupana saꞌy­ruꞌin wo Tupana saki­ꞌytꞌin no toꞌe Tupana Aparãu me hap ewy Isaki piat — Atum ti aru e hap ewy."

²⁹ Mekewat haꞌyru piit esaika hap kaipywiat wyti Isameu e hap het rakat tuwe­ky­ryꞌi kahato Tupana Pãꞌãu esaika hap kaipywiat ete Isaki ete. Miꞌi hap ewy kahato te koran topy­huꞌat. Katu­pono miit esaika hap kaipy­wiaria toꞌo­ky­ryꞌi kahato te Tupana Pãꞌãu esaika hap kaipywiat ete."

³⁰ Saꞌa­wyꞌi mana Sara toꞌe teꞌaito Aparãu me Tupana Pãꞌãu kaipyi — Etipo­ꞌoro ro eharyꞌi emiit kawiat imẽpyt wywo pya aiꞌya­ty­pepyi katu­pono yt naku i ti aru eꞌyi epowatꞌyp koꞌi topy­huꞌat esaꞌyru ran po pe neꞌi pote. Esaꞌyru sese po pe yn waku epowatꞌyp eꞌyi epoityro hap topy­huꞌat e teꞌaito pe. Miꞌi hawyi Aparãu tipo­ꞌoro teha­ryꞌi ran imẽpyt wywo wẽtup hy kape."

³¹ Miꞌi tupono uiwy­riaꞌin teropat hat kawiat Aparãu mẽpyt yt ewywuaria i raꞌyn aito maꞌato pywo sese iharyꞌi sese kawiat imẽpyt ewywuaria aito are. Isaki saipepiat sese Iesui pãi miꞌi upiaria aito are.

"

5

¹ Koitywy Aika­ꞌiwat Iesui tum naꞌyn ahepe tesaika hap wakuap koꞌi nug yne hamuat. Miꞌi tupono yt kat hamo i raꞌyn wata­ꞌaipok Iuteuria eko koꞌi ewywuat nug yne aheha­kye­raꞌat hap kyꞌewi. Yt kat hamo i poꞌog watu­we­potpap haꞌup nug howoity rakat kyiꞌat hamo hap ewy neꞌi pãi. Ahesaika hap yt putꞌokꞌe hin i waku nug hamo Iesui ewywuat hamo. Maꞌato Iesui Pãꞌãu esaika hap aipiit pe pote yn waku nug hap koꞌi tuwẽtem aipytꞌat hap kaipyi."

² Uito Pauru miꞌi tupono ewetum no ehewaure kaꞌa uhepe. Uruꞌy­wania Iuteuria mio tã iꞌatuꞌe — Aiwe­ꞌahit ãpy sokpe tek hap kaipyi aheha­kye­raꞌat iꞌatuꞌe saꞌag. Wati­mohey miꞌi pote Iesui atoiat haria wo watoĩ­neꞌen katu­pono Iesui yn aheha­kye­raꞌat kuap. Iesui mohey hap kaipyi yn nyti Tupana aimoe­waku. Kat hamo pyno Iuteuria eko nug hap aimo­waku eweiꞌe."

³ — Toꞌiro ihainiaꞌin ahit sokpe ãpy tek hap watunug Iuteuria eko ewy watunug eweiꞌe. Miꞌi watunug mote waku pe watoĩ­neꞌen Tupana pe e haria wo neꞌi eipe are. Uiwy­riaꞌin iꞌatu kahato Iuteuria eko miꞌi maꞌato yt ewetunug yne hin i te. Yt eiminug i koꞌi topy­huꞌat re iꞌatu kahato te. Eiwe­ꞌahit ãpy sokpe tek hap ewetunug iꞌewyte irania Iuteuria eko ewetunug neran. Maꞌato yt naku i wẽtup seko yn ewetunug are. Waku torania ewetunug are. Maꞌato yt uwe i mesuwat yi tote inug kuap torania. Miꞌi pote seko nug hap neꞌi yt aimo­hãpyk kuap hin i Tupana wanẽtup hawe."

⁴ Maꞌato eipe — Watunug yne meimuẽwat koꞌi potiat neꞌi Tupana aheha­kye­raꞌat eweiꞌe wen miꞌi pote pya kahato eweikup­teꞌen Aika­ꞌiwat sese kai katu­pono saꞌa­wyꞌi Iesui yn aheha­kye­raꞌat kuap e haria raꞌyn eipe. Imohey hap pun haria wo eweikup­teꞌen mio. Miꞌi pote Tupana egyiꞌat hap pun haria wo eweikup­teꞌen."

⁵ Maꞌato uruto yt eiperia ewy hin i katu­pono uruto ti Iesui mohey hap kaipyi ti aheha­kye­raꞌat kuap e haria uruto. Miꞌi hap kaipyi yn uruimohey."

⁶ Maꞌato Aika­ꞌiwat Iesui aheha­kye­raꞌat teran haype Tupana yt tuwa­nẽtup hin i mekewat seko aiwe­musin ãpy sokpe tek hap kape neꞌi. Maꞌato toieha­kye­raꞌat kuap miitꞌin yne sio hemusin ãpy sokpe tek hap toĩ sio yt sio Iuteuria sio yt miꞌiria i waku yne. Toimo­hãpyk kuap wuatꞌi ywania katu­pono kat seko kat seko kape neꞌi yt ihaꞌat hin i maꞌato tehaꞌat tomohey hap sese kape yn. Tokyꞌe ahepiat hap aikawiat toĩneꞌen sio yt wati­kyꞌe i hap kape yn taꞌa­kasa."

⁷ Saꞌa­wyꞌi imohey kahato haria eipe. Uwe uwe itote eimaꞌat saꞌag saꞌag wẽtup muꞌap upi. Katu­pono koitywy eipe yt pywuat sehay upi hin i raꞌyn eweikup­teꞌen saꞌa­wyꞌi waku pe eweikup­teꞌen pytkai."

⁸ Tupana ti yt eimaꞌat hat hin i pãi. Kat pote mesup eiwe­morem hamo eweimohan kahato Iuteuria eko katu­pono miꞌi aipun hat neꞌi aiꞌahit ãpy sokpe hep hap. Mekewat Iuteuria eko yt aikaykay hãpyk hat eko ewy hin i yt imienoi koꞌi ewy hin i."

⁹ Pyno aimiꞌu toꞌoran me toĩneꞌen nem nakat ipyp kurin kat. Miꞌi hawyi aimiꞌu wakuat nem naꞌyn topy­huꞌat toimonem tuwe­wawi. Miꞌi hap ewy kahato toĩneꞌen aipy­ꞌa­setpe wẽtup aimi­mohey yt pywuat i rakat. Meiũran aimi­mohey wakuat monem hat wywo wato­py­huꞌat are."

¹⁰ Miꞌi ewy wẽtup seko enoi hat toĩneꞌen eito­ꞌoran me. Miꞌi ti eiwa­nẽtup hap moeha­ma­naꞌi raꞌyn. Yt atikuap i miꞌi hat set Tupana ikuap. Miꞌi tupono toĩneꞌen imiꞌa­piheg wo aru. Atikuap ti maꞌato meiũran eweiꞌaipok Iesui mohey hap mohan hamo. Meiũran uhepiat imohey hap ewy wẽtup sok yn aru aito Iesui wywo watoĩ­neꞌen."

¹¹ Uiwy­riaꞌin uito arepot­muꞌe kahato Iesui kuꞌuro ariaꞌyp posak etiat hap ete. Miꞌi eweimohey pote toĩneꞌen eheĩneꞌen pakup i hap are. Maꞌato miꞌi hap ete toꞌo­ky­ryꞌi kahato. Yt karãpe i arepot­muꞌe wen — Eremusin ãpy sokpe tek eheha­kye­raꞌat hamo pote waku yt karãpe i areꞌe ehepe. Mio tã ahenoi pote yt toꞌo­ky­ryꞌi hin i katu­pono Iuteuria taꞌa­tu­mi­ky­ꞌesat ewywuat pote."

¹² Ahemusin sokpe ãpy tek hawyi aheha­kye­raꞌat iꞌatuꞌe eimoe­ha­ma­naꞌi haria. Pyno waku miꞌi haria teꞌe­ru­we­sa­ꞌahep yne hawyi aikai tukup­teꞌen pya miꞌiria tuwe­sa­ꞌahep taꞌa­tueko sese nug yne haria pote waku."

¹³ Uiwy­riaꞌin Tupana tum ahepe tesaika hap wakuap nug hamo aimi­ky­ꞌesat ok tã nuat hamuat nug hamo. Maꞌato yt naku i — Uimi­ky­ꞌesat ewywuat yn aru atunug watoꞌe neꞌi pote yt naku i pãi are. Katu­pono uiꞌairo raꞌyn tomi­ky­ꞌesat nug hamuat tupono waku watoꞌe. Yt naku i aimi­ky­ꞌesat yn watunug. Katu­pono towat tomi­ky­ꞌesat nug hamo aiꞌairo aiwo­ꞌo­po­wyro woꞌo­kyꞌe hamuat etiat hap."

¹⁴ Mio tã e ti Tupana Musei miwan me — Eweiꞌa­tu­kyꞌe ro miitꞌin aikotã eweikyꞌe hap ok tã e. Miꞌi tupono karãpe wato­ꞌo­po­wyro aiwo­ꞌo­kyꞌe hap ete pote Tupana miky­ꞌesat nug haria wo aito wato­py­huꞌat."

¹⁵ Maꞌato karãpe wati­kuasa iraniaꞌin wahenoi aiwẽ pyi aheso hap yt iꞌe hap ewy i wato­maꞌat neꞌi wẽtup ok pote aikotã miat haiwot rakaria ewywuat wato­py­huꞌat. Miitꞌin u hat ewywuat watoĩ­neꞌen. Eiweꞌeg wo o miꞌi tã nug hap pupi are."

¹⁶ Miꞌi tupono uiwy­riaꞌin atiky­ꞌesat Tupana Pãꞌãu miky­ꞌesat nug haria wo eweikup­teꞌen hap Tupana miky­ꞌesat ewywuaria wo eweikup­teꞌen. Yt atiky­ꞌesat i eiwa­nẽtup hap kaipywiat neꞌi nug haria wo eweikup­teꞌen. Eimi­ky­ꞌesat sese neꞌi nug haria wo hap yt atiky­ꞌesat i."

¹⁷ Miꞌi turan aiwat aimi­ky­ꞌesat neꞌi yt Tupana miky­ꞌesat ewy hin i. Aimi­ky­ꞌesat poꞌog neꞌi watunug mote yt watunug kuap i Tupana miky­ꞌesat ewy."

¹⁸ Pyno Tupana Pãꞌãu miky­ꞌesat ewy raꞌyn watunug hawyi atunug neran Musei mienoi uheha­kye­raꞌat hamo yt watoꞌe kuap i."

¹⁹ Maꞌato mekewat aimi­ky­ꞌesat ewy watunug neran mote yne hary­po­riaꞌin wywo watoĩ­neꞌen neꞌi. Iꞌewyte watu­wa­nẽtup saꞌag hap he neꞌi. Iꞌewyte aiminug saꞌag yn watunug kuap."

²⁰ Tupana saꞌag wati­mõ­typot kahato pote wato­pot­kuasa wanĩkap mo watoĩ­neꞌen. Sehay uka uka hano watoĩ­neꞌen. Ihaꞌy­wywi rakano watoĩ­neꞌen. Ipyꞌahak takano watoĩ­neꞌen. Eikai poꞌog uruto urutu­kup­teꞌen e haria wo woꞌo­patꞌok patꞌok haria wo watoĩ­neꞌen."

²¹ Yt wato­pot­ꞌoksat i. Imopẽꞌã rakaria wo watoĩ­neꞌen pote woꞌoe­roꞌok woꞌoe­roꞌok haria ewywuat gupteꞌen haria ewy watoĩ­neꞌen. Miꞌi pote eiweꞌeg wo o katu­pono miꞌi tã neꞌi nug haria yt tuwe­hytꞌok kuap i Tupana Morekuat no topy­huꞌat hap eꞌat pe yt tuwe­hytꞌok kuap i hetama pe."

²² Maꞌato Tupana Pãꞌãu miky­ꞌesat ewywuat watunug hawyi woꞌo­kyꞌe haria wo watoĩ­neꞌen. Woꞌo­mo­wepit haria wo watoĩ­neꞌen. Woꞌokuap haria kahato wo watoĩ­neꞌen. Miit perupꞌi wo watoĩ­neꞌen. Woꞌo­wese haria wo watoĩ­neꞌen. Aiwo­ꞌopiat aiꞌe hap nug haria wo watoĩ­neꞌen."

²³ Yt wemo­wato haria wo i watoĩ­neꞌen. Wewãi kuap kahato haria wo wato­py­huꞌat. Karãpe miꞌi tã e hap ewy watunug hawyi yt kat i ahewãi Musei mienoi kaipywiat hap tuwẽtem aipiit pyi e. Miꞌi pote iperupꞌi rakano watoĩ­neꞌen e. Watu­we­nãpin kahu kahato pote miꞌi hap yn tuwẽtem Tupana Pãꞌãu kaipyi aipiit pyi. Miꞌi tã e hap yne. Miꞌi wãiꞌe hap mopo­ꞌinik hap yt kat i toĩneꞌen e."

²⁴ Pywo pe ti Aipo­rekuat Iesui po pe raꞌyn wato­py­huꞌat pote mekewat aiwa­nẽtup hap aimi­ky­ꞌesat saꞌag koꞌi topap yne raꞌyn. Miꞌi hawyi yt iheg muo hin i aiminug saꞌag koꞌi tukup­teꞌen. Katu­pono Iesui wano raꞌyn wato­py­huꞌat pote."

²⁵ Nimo yt imohey i te turan aimuꞌe kahato Tupana Pãꞌãu Iesui mohey ahepiat hamo. Koitywy poꞌog naꞌyn Tupana Pãꞌãu aimuꞌe Tupana miky­ꞌesat ewywuat nug hamo."

²⁶ Toꞌiro wati­pywo koitywy aimuꞌe hap imiky­ꞌesat nug hamo yt kat i aheha sio pywo sio yt aiꞌe hap pun neꞌi wywo aiwo­ꞌoehay sat hap koꞌi wywo.

"

6

¹ Uiwy­riaꞌin Karãpe wẽtup ok yt naku i iꞌaparap hap inug miꞌi pote waku wẽtup ok toto Tupana Pãꞌãu sehay wywo iꞌaparap hat nãpin perupꞌi wuat hamo. Miꞌi hat wyti waku kahato inug maꞌato waku miꞌi rokirẽ tuweꞌeg wo raꞌyn toĩneꞌen tepiat iꞌaparap hap pupi iraniaꞌin nãpin rokirẽ."

² Meiũran wẽtup ok i iꞌaparap miꞌi hawyi waku wati­po­wyro imoesaika hamo. Miꞌi tã aiminug kaipyi ti Iesui e hap nug haria aito pote."

³ Maꞌato uwe — Uito yt arepot­po­wyro teran i poꞌog uiwato e hat yt kan hamo hin i atimohey uito Iesui e. Mio tã e hat tuwe­maꞌat kahato neꞌi."

⁴ Waku watu­wa­nẽtup kahato aiminug sio waku sio yt e hap kape. Waku pote aimo­wepit hap toĩneꞌen. Maꞌato uito poꞌog atunug ikahu aiꞌe hap neꞌi ti aimo­wepit hap akit hamo topy­huꞌat."

⁵ Waku aiwo­ꞌo­ꞌe­wy­ꞌewy ipotpap takaria wo watoĩ­neꞌen."

⁶ Waku ti aiwo­ꞌo­muꞌe haria pe wati­mõꞌẽ ahekat."

⁷ Yt naku i watu­we­maꞌat. Yt wati­maꞌat kuap hin i Tupana. Kat iãꞌỹi watikoi pote ti miꞌi ti raꞌyn imoẽtyt."

⁸ Miꞌi hap ewy ti aimi­ky­ꞌesat yn nug mote yt nakuaria i wo watu­kup­teꞌen Tupana pe. Miꞌi turan naꞌyn aiku­ꞌuro hawyi yt kat i aheĩneꞌen Tupana wywuat hap. Maꞌato Tupana Pãꞌãu wo wepit hamo watoĩ­neꞌen pote tutum tesaika hap aheĩneꞌen towywuat wuatꞌi eꞌat piat hamuat."

⁹ Yt naku i eipo sero neꞌi wakuap nug hap ete katu­pono meiũran Tupana tum hamuat ipotpap kahato rakaria pe. Miꞌi turan aiwat ahepe tutum wy aikotã ipirik kahu raꞌyn hawyi aimo­wepit raꞌyn hap ewy. Miꞌi hap ewy ti Tupana tum wakuap nug hap etiat yt ipo sero i rakaria i pe haꞌup tutum are."

¹⁰ Pyno ti waku watikat aikotã iraniaꞌin powyro hamuat. Waku ti yne watunug wakuap torania miitꞌin me. Maꞌato ti Iesui mohey haria ti waku poꞌog wati­ꞌa­tu­po­wyro wakuap no. Uiwy­riaꞌin ewehe­haꞌat ro uipo wuat uimiwan iwatoꞌin kahato rakat kape."

¹¹ Uimiwan mesuwe atunug uipo wo. Iwato kahato uimiwan katu­pono yt heremo kahato i yt uheha­pytig i pote."

¹² Eimuꞌe haria ipakup takaria teꞌe­ru­we­mo­wato kahato itote — Uruto poꞌog woꞌo­muꞌe haria torania kai iꞌatuꞌe haria. Wemusin ãpy sokpe tek hap ti waku e haria aipiit etiat yn woꞌo­muꞌe haria miꞌiria. Iro pote miitꞌin toꞌo­ky­ryꞌi kahato aimi­mohey ariaꞌyp posak etiat aheha­kye­raꞌat hamo e hap ete. Miꞌi haype yt teꞌe­re­pot­muꞌe i miꞌi ete. Yt taꞌa­tu­ky­ꞌesat i miitꞌin woꞌo­ky­ryꞌi taꞌa­tuetiat hap haype."

¹³ Pyno Iuteuria woꞌo­nãpin hap ewy watunug wemusin ãpy sokpe tek hap aheha­kye­raꞌat iꞌatuꞌe yt taꞌa­tu­henoi yne hin i Iuteuria eko pytkai. Taꞌa­tu­ky­ꞌesat taꞌa­tu­mi­ky­ꞌesat nug hanuaria wo yne eipe haype."

¹⁴ Maꞌato Iesui ikuꞌuro ahetiano are pote yt iꞌatu­wese hin i. Yt taꞌa­tu­kyꞌe i Iesui haype. Miꞌiria yt ikyꞌesat hin i uheĩneꞌen hap ewy tukup­teꞌen hap. Iꞌewyte uito yt atiky­ꞌesat i iꞌatu­ꞌe­wywuat areĩneꞌen hap wy katu­pono teꞌe­ru­we­mo­wato haype neꞌi pote."

¹⁵ Mekewat hemusin ãpy sokpe sio yt rakaria kape sio Iuteuria eko nug yne haria sio yt hap kape teꞌe­ru­wa­nẽtup. Miꞌi haria ti yt kat no i Iesui pe. Maꞌato ti tokai­pywiat miit ipakup sio yt hap kape yn ni ihaꞌat Iesui. Imopakup hap toĩneꞌen sio yt hap kape yn tehaꞌat. Yt kat i imopakup hap toipuẽti pote toimo­pakup i."

¹⁶ Miꞌi hap yn ahẽtup Tupana pe — Erehay moeha­ky­ꞌeꞌi ro Uiꞌywot iꞌatue­ha­ky­ꞌeꞌi hap etiano ipakup takaria upi inug hamo are. Etihep o iꞌatue­ha­ma­naꞌi hap are ehupiat pe. Iꞌewyte torania Tupana emiitꞌin etiano."

¹⁷ Yt atiky­ꞌesat i poꞌog sehay aiwo­ꞌo­ꞌa­tu­ꞌuka hap wemusin ãpy sokpe tek hap ete katu­pono ipoity kahato uipekyt pekyt uipiit ete. Uito Iesui emiit sese e hap moherep hap upi uipekyt pekyt. Uipe timo­herep kahato Iesui ewywuat areineꞌen uipekyt pekyt uiꞌauka teran haria tunug Iesui mohey hap moherep hap uipe."

¹⁸ Uiwy­riaꞌin mio tã are Aika­ꞌiwat pe ehupi — Iesui egyiꞌat ro aiwy­riaꞌin Karata piaria pe are Aika­ꞌiwat pe are ehupi.

Uito Pauru pyno toran uimiwan."