1

¹ Uito ti Puaru are. Uiwy­riaꞌin Iesui mohey haria tawa Kurintiu piaria yi Akaia piaria. Eiperia ti Tupana mimo­waku koꞌi raꞌyn tewaku hap wuat koꞌi. Uito ti Iesui potpo­ꞌoro Pauru e hap het rakat are. Saꞌa­wyꞌi Tupana toꞌe uhepe — Woro­ꞌairo en Uhaꞌyru moherep miitꞌin muat hamuat e. Koitywy atipo­ꞌoro ehowawi uimiwan aikope aikope eiwa­ꞌa­tunug Tupana mõtypot hamo are. Iꞌewyte toĩneꞌen meiũpe aheywyt aikywyt sese Timoteu are. Miꞌi ti uipo­wyro mesuwat uhehay wan hap ete."

² Mio tã are Tupana pe — Etiꞌa­tu­poi­tyro kahato o emohey haria Esaꞌyru mohey haria tawa Kurintiu piaria are. Ereĩneꞌen o egyiꞌat kahato rakat iꞌatuepiat hat wo. Etunug o miꞌiria woꞌo­wese haria wo. Tupana are En ni Uruꞌywot sese are. Emipo­ꞌoro Urupo­rekuat nuat ti Iesui Esaꞌyru set upi wyti ahẽtup."

³ Urutu­wehum ewawi Tupana. Waku kahato En Tupana katu­pono etipo­ꞌoro raꞌyn Iesui uruewawi. Koitywy emẽpytꞌin sese uruto are. Waku kahato En Uruꞌywot. Uruho­ꞌopot turan uruka­wiano kahato hat En. Urueha­ky­ꞌeꞌi kahato wuatꞌi eꞌat pe are."

⁴ Uruetu­pana are karãpe urusatek turan Uruꞌywot kahato ereĩneꞌen haty hap etimonik kahato hamo. Uruho­ꞌopot turan iꞌewyte urunãpin urukyꞌe hap wywo. Waku kahato Tupana katu­pono karãpe uruwy­riaꞌin hatek hap putꞌokꞌe miꞌi turan uruiꞌa­tu­nãpin kuap iꞌatu­kyꞌe hap wywo. Aikotã urunãpin hoꞌopot turan miꞌi hap ewy urutunug aikotã urumo­wepit ehay wo hap ewy urutoꞌe ewawi Tupana are."

⁵ Aipo­typot Iesui tikuap kahato hoꞌopot hap koꞌi poꞌog torania kai toikuap are. Uruto urutu­kup­teꞌen iwywo wẽtup miit ewy yn uruho­ꞌopot kahato wy. Miꞌi turan uruka­wiano kahato hat pote toikuap kahato hoꞌopot hap pote. Yt wẽtup i yt toikuap i. Torania toikuap kat pote tohãꞌãg yne raꞌyn. Miꞌi pote toha­tyꞌu kuap yne aikyꞌe haype."

⁶ Koitywy mesu­wa­ro­tiaria urusa­tyꞌi satyꞌi kahato raꞌyn mesuwe katu­pono uruhenoi raꞌyn Iesui etiat wãiꞌi­ꞌa­tuꞌe pytkai. Miꞌi pote koitywy Tupana mieha­kye­raꞌat koꞌi wo eweikup­teꞌen. Uruꞌa­piheg kahato pote eipo­wyro haria wo urutu­kup­teꞌen mote are. Maꞌato urusa­tyꞌi satyꞌi hap kaipyi eipo­wyro haria urutu­kup­teꞌen."

⁷ Maꞌato urusa­tyꞌi satyꞌi turan Tupana uruka­wiano urusa­tyꞌi satyꞌi hap ok tã. Miꞌi pote poꞌog hesaika rakaria wo uruto­py­huꞌat eipo­wyro hamuat ehepiat hoꞌopot hap ete. Miꞌi hawyi karãpe ehatyꞌi hatyꞌi Iesui mohey haria eipe pote miꞌi hawyi uruepiat hoꞌopot hap kape eiwa­tetup yn naꞌyn. Miꞌi hawyi — Waku waho­ꞌopot aimuꞌe haria ewy eweiꞌe eiwe­wawi. Miꞌi hawyi wẽtup miit piit ewy yn hoꞌopot haria wo watoĩ­neꞌen are. Miꞌi pote watikuap yne hoꞌopot hap koꞌi are. Miꞌi hawyi wahupit kuap yne are. Miꞌi hawyi yt uwe i aito imohey hap atoiat haria ahatyꞌi hatyꞌi kahato pytkai."

⁸ Uiwy­riaꞌin tawa Kurintiu piaria wẽtup yn wyti aimi­mohey. Miꞌi pote atimo­herep teran ehepe aikotã saꞌa­wyꞌi waho­ꞌopot eheꞌyi Asia totiat hap. Atiky­ꞌesat eweikuap miꞌi hap ete. Katu­pono karãpe eweho­ꞌopot turan mono erakue eweiꞌe yn naꞌyn. Taꞌi uruho­ꞌopot kahato itote aikotã ahak puat ipotyi rakat wahupit hap ewy yt wahupit kuap i. Miꞌi hap ewy yt uruhupit kuap i poꞌog eheꞌyi Asia tote uruho­ꞌopot hap. — Taꞌi aiku­ꞌuro raꞌyn keĩ mesup pãi urutoꞌe yn uruto­ꞌope itote."

⁹ Yi Asia piaria uruꞌauka irane mesup sio mũki­ꞌite urutoꞌe yn uruwa­nẽtup hawe itote. — Pyno yt watu­we­ha­kye­raꞌat kuap i aiku­ꞌuro hap po pyi urutoꞌe yn itote uruto­ꞌope. Taꞌi Tupana yn keĩ aihep kuap aiꞌauka teran haria po pyi urutoꞌe itote uruwo­ꞌope. Tupana yn aihep kuap aiꞌauka hanuaria po pyi urutoꞌe saꞌa­wyꞌi eheꞌyi Asia tote urutuwat Iesui ehay moherep hamuat turan."

¹⁰ Maꞌato yt uruꞌauka kuap i ehetama piaria katu­pono Tupana urueha­kye­raꞌat uruewa­nĩ­kaptia po pyi itote urumo­ha­ky­ꞌeꞌi moha­ky­ꞌeꞌi turan. Iꞌewyte urutu­we­ha­kye­raꞌat uruꞌauka irane turan yne eꞌat pe."

¹¹ Uiwy­riaꞌin tawa Kurintiu piaria ewehẽtup o Tupana kape urupo­wyro Iesui ehay moherep hamo. Miꞌi tã ewetunug mote Tupana urupo­wyro emiẽtup ok tã. Miꞌi hawyi waku pe urutu­kup­teꞌen urupoi­tyro emiẽtup ok tã hawyi aru eweikuap taꞌyn Tupana piat urupoi­tyro hap. Miꞌi hawyi eiwepit kahato hap topy­huꞌat katu­pono Tupana tum naꞌyn eimiẽtup hap ok tã. — Etipoi­tyro Pauruꞌin eweiꞌe ro Tupana pe uruka­wiano.

"

¹² Yt karãpe i uruiꞌa­tu­maꞌat eipe tawa Kurintiu piaria. Poꞌog hãpyk torania kai hap ewy urutu­kup­teꞌen eipy­ꞌa­setpe. Tupana mõtypot hap yn urutunug itote. Yt uruweꞌeg hap kaipyi i urupotpap ehehamo maꞌato Tupana urumo­weꞌeg hap kaipyi uruimõ­typot Tupana miitꞌin pyꞌa­setpe. Yt uruhepap hap kaipyi i maꞌato Tupana tum uruepe tegyiꞌat hap tomi­sepap nug kuap hamo hawyi hesaika hap wywo uruimo­herep wakuat itote saꞌa­wyꞌi. Miꞌi pote uruminug ete Tupana urupo­wyro hap kaipyi uruimõ­typot Tupana itote saꞌa­wyꞌi. Miꞌi hawyi miitꞌin teꞌe­ru­wehum kahato Tupana kape. Yt uruewawi i maꞌato Tupana kape yn teꞌe­ru­wehum uruminug wakuat upi. Miꞌi hawyi Tupana kape teꞌe­ru­wehum hawyi urumo­wepit kahato kat pote uruminug kaipyi Tupana mõtypot hamo urutu­kup­teꞌen mote.

"

¹³ Iꞌewyte yt eimaꞌat hap i uruipo­ꞌoro miwan ehowawi are. Urumiwan uruehay ewy ti raꞌyn waku pe yn toĩneꞌen. Yt uruiwan i typy sehay ehowawi. Yt kat i ehekat kyꞌewi uruipo­ꞌoro urumiwan ehowawi hap. Taꞌi heremo kahato urumiwan wuatꞌi mikuap kahato hap ewy. Yt kat i wẽtup sehay ipuo toĩneꞌen urumiwan me. Yt kat i eimaꞌat hap urumiwan me toĩneꞌen. Miꞌi pote heremo yne uimiwan are."

¹⁴ Koitywy urumohey ran are kat pote yt urukuap kahato i te pote. Miꞌi pote urumohit tuereto ehehay wo. Atiky­ꞌesat kahato urukuap sese hap. Waku watu­wekuap aiwo­ꞌo­ꞌe­wy­ꞌewy hawyi aiwo­ꞌo­mo­wepit hap toĩneꞌen are. Karãpe mekewat eꞌat pe putꞌokꞌe mekewat Aipo­typot Iesui toĩneꞌen mesu­wa­rote Morekuat Koro wo hap eꞌat pe uimo­wepit kahato haria eweipy­huꞌat are. Katu­pono — Miꞌiria uipot­mu­ꞌeria sese uimiekyi koꞌi tawa Kurintiu kaipy­wiaria are aru Iesui pe. Taꞌi woro­ho­ꞌo­mo­herep eipe Iesui kape hut hap eꞌat pe are. Miꞌi hap eꞌat pe aru waku — Taꞌi Pauru ti urumuꞌe hat saꞌa­wy­ꞌiwuat waku eweiꞌe mekewat eꞌat pe Aika­ꞌiwat pe are. Miꞌi hap ewy urutu­kup­teꞌen itote woꞌo­mo­wepit hanuaria wo.

"

¹⁵ Saꞌa­wyꞌi eipap kahato uhehay upi miꞌi pote — Araꞌaipok i raꞌyn iꞌatu­muꞌe hamo pãi are uipyꞌa pyi. Saꞌa­wyꞌi — Areto i raꞌyn tawa Kurintiu piaria kape are."

¹⁶ Miꞌi hawyi areto i raꞌyn yi Masẽ­tunia piaria kape. Miꞌi kaipyi ariot i raꞌyn tawa Kurintiu kape i areꞌe uiwepe saꞌa­wyꞌi. Atiꞌa­tu­muꞌe areto hamo iꞌewyte iꞌatu­mo­wepit hamo areto i raꞌyn tawa Kurintiu piaria kape. Miꞌi hawyi areꞌe arewa­nẽtup — Waku urupo­wyro yi Iuteu ywania hatek takaria uruekat wywo areꞌe uiwepe. Waku Kurintiu piaria uipo­wyro muꞌap upi mekewat Iuteu kapiat uito hap saꞌup ete tawa Kurintiu piaria pe are arewa­nẽtup hawe."

¹⁷ Miꞌi uiꞌe hap ete ahenoi yne saꞌa­wyꞌi ehepe uimiwan me uiwy­riaꞌin. — Areto ehowawi are uimiwan me. Maꞌato yt areto hin i ehowawi uiꞌe hap ewy hawyi — Kat pote som yt tut i ahowawi eweiꞌe eiwo­ꞌope. Aimaꞌat i maꞌat i teran haype neꞌi eweiꞌe uhepiat pe. Pauru ti heso apo ahepe eweiꞌe eiwo­ꞌope are. Yt tutunug i toꞌe hap ewy apoꞌe­weiꞌe ewoꞌope uhetiat."

¹⁸ Uiwy­riaꞌin yt naku i mio tã eweiꞌe neꞌi kat pote uito atunug yne uiꞌe hap ewywuat koꞌi uito are. Taꞌi urutunug aru uruꞌe hap ewy katu­pono urutu­kup­teꞌen neran Tupana ewywuat pywuat rakaria urutoꞌe uruwo­ꞌope.

"

¹⁹ Saꞌa­wyꞌi mehĩ Sira mehĩ Timoteu iꞌewyte uito urutuwat ehowawi eimuꞌe hamo. Miꞌi hawyi itote uruiꞌa­tu­muꞌe kahato aikotã Tupana tipo­ꞌoro Tosa­ꞌyru hap etiano. Tupana mõtypot haria wo yn uruiꞌa­tu­muꞌe eipe. Yt kat i urueso hap wywo uruiꞌa­tu­muꞌe eipe. Miꞌi hap eꞌat pe urutunug aru urutoꞌe pote urutunug uruꞌe hap ewy. Yt typy sehay wywo hin i uruiꞌa­tu­muꞌe saꞌa­wyꞌi eipe Iesui etiat uruhenoi raꞌyn."

²⁰ Saꞌa­wyꞌi sese Tupana henoi yianmete miwan me yne Tosa­ꞌyru etiat aikotã aru tutunug hap etiat tohenoi miwan me. Miꞌi hawyi toipo­ꞌoro raꞌyn Tosa­ꞌyru Aipo­rekuat nuat. Putꞌokꞌe hawyi — Papai e atunug neran yne eꞌe hap ewywuat e. Eꞌe hap koꞌi yne atunug aru e. Eꞌe hap ewywuat hap atunug neran e. Miꞌi hawyi Iesui tunug yne Toꞌywot e hap — Atunug aru toꞌe hawyi tutunug yne. Miꞌi pote karãpe urutoꞌe — Urutunug aru urutoꞌe hawyi urutunug uruꞌe hap ewy. Aikotã Aika­ꞌiwat ewy Tupana miky­ꞌesat ewy urutunug neran uruꞌe hap ewy. — Taꞌi yt urutunug i aru miꞌi tã urutoꞌe miꞌi pote yt urutunug i uruꞌe hap ewy Tupana Saꞌyru e hap ewy. Miꞌi tã urutunug neran Tupana mõtypot hamo."

²¹ Koitywy Tupana ainug Tosa­ꞌyru ewywuaria ahehay wuat. Tehay moherep hamo wẽtup piit ewy watoĩ­neꞌen Haꞌyru wywo. Katu­pono aito wato­mohey Aipo­typot Iesui. Tupana aimoe­saika Tosa­ꞌyru Pãꞌãu wo hawyi Haꞌyru ewy wato­py­huꞌat."

²² Aikotã watiwan ahet aheka­reꞌen ete ahet — Mesuwuat ri uiat e hap. Miꞌi hap ewy wyti wato­mohey Haꞌyru raꞌyn hawyi Tupana tum Tosa­ꞌyru Pãꞌãu ahepe hawyi Ipãꞌãu set topy­huꞌat ahete. Mio tã e — Tupana wanuat miꞌi miit e hamuat wuatꞌi miitꞌin me hap ewywuat. Yt karãpe i hawyi wẽtup ok wano miꞌi hat topy­huꞌat e hamo hap ewy."

²³ Taꞌi yt uheso i are. Tupana tikuap yt heso i rakat uito. — Tupana are etomo­herep yt uheso i hap are uiwy­riaꞌin Kurintiu piaria pe Tupana are. Saꞌa­wyꞌi areto aru ehowawi wen maꞌato yt areto i. Eweikuap apo kat pote yt areto i pyno ahenoi ehepe. Aikotã aiꞌywot yt aiꞌa­piheg teran i hap ewy ti areĩneꞌen pytkai yt areto i eiꞌa­piheg hamo."

²⁴ Kat pote Eika­ꞌiwat sese yt uruto i. Miꞌi hawyi areꞌe uiwa­nẽtup hawe — Pyno yt kat hamo i areto are. Kat pote poꞌog waku eweikup­teꞌen Eika­ꞌiwat sese po pe hawyi yt areto i eiꞌa­piheg hamo are Uito ti Pauru.

"

2

¹ Uiwy­riaꞌin woro­ho­ꞌo­kyꞌe kahato eipe. Miꞌi pote yt areto i ehowawi maꞌato areto pote woro­ho­ꞌo­mohit hawyi eiꞌarot hap topy­huꞌat. Saꞌa­wyꞌi areto ehowawi hawyi woro­ho­ꞌo­mohit kahato eipe. Miꞌi hawyi paaꞌe­weiꞌe kahato. Miꞌi hawyi areꞌe uiwa­nẽtup hawe — Koitywy yt atunug neran i poꞌog are uiwepe."

² Woro­ho­ꞌo­mohit eipe hawyi uwe apo uimo­wepit haria. Woro­ho­ꞌo­mohit hawyi paaꞌe­weiꞌe. Miꞌi hawyi yt uwe i raꞌyn uimo­wepit hanuaria miꞌi rẽ. Miꞌi hawyi yt naku i areto mesup katu­pono woro­ho­ꞌo­mohit eipe hawyi woro­ho­ꞌo­mo­ꞌarot kahato eipe. Miꞌi hawyi yt woꞌo­mo­wepit haria wo i watoĩ­neꞌen."

³ Miꞌi pote atipo­ꞌoro miwan ehowawi. Pyno eweimo­hãpyk eiminug saꞌag koꞌi. Miꞌi hawyi areto kuap ehowawi are uimiwan me. Katu­pono areto turan ewetunug saꞌag ne miꞌi hawyi yt kat i uimo­wepit ehepiat hap. Miꞌi pote atipo­ꞌoro miwan ehowawi uheꞌyian­mete katu­pono woro­ho­ꞌo­mohey eipe. Atikuap ewetunug uhepiat einãpin hap koꞌi hamuat. Pywo ti rat yt karãpe i uiwepit yt eiwepit i pote."

⁴ Mekewat uimiwan saꞌa­wy­ꞌiwuat pe woro­ho­ꞌo­nãpin haty wo — Eiminug saꞌag eweitoiat ro. Arewak kahato popuo atiwan miꞌi miwan ehowawi. Yt atiky­ꞌesat i uimiwan me eimõ­py­ꞌahak hap katu­pono woro­ho­ꞌo­kyꞌe kahato eipe poꞌog torania kai. Miꞌi pote haty kahato upyꞌa pe iꞌewyte uiwa­nẽtup hawe woro­ho­ꞌo­nãpin eiminug saꞌag etiat turan."

⁵ Saꞌa­wy­ꞌiwuat urumiwan me woro­ho­ꞌo­nãpin. Mekewat eipy­ꞌa­setpiat Iesui mohey hat toꞌywot eharyꞌi wywuat waire nug hat. Miꞌi hawyi eiwe­mõti kahato toĩneꞌen eiwy ok eipy­ꞌa­setpiat iꞌaparap turan wuat woro­ho­ꞌo­nãpin mote. Iꞌewyte uito aremõti miꞌi hap ete are. Maꞌato yt eiꞌewy i pote yt uhehamo i pote miꞌi pote yt woro­ho­ꞌo­mohit teran i poꞌog miꞌi hap ete neꞌi. Maꞌato atunug poꞌog pote poꞌog eiꞌarot kat pote poꞌog woro­ho­ꞌo­mohit pote."

⁶ Miꞌi hawyi eiwe­mõti te kahato iꞌewyte miꞌi miit tuwe­mõti ti te. Pyno waku aipo hep taꞌyn iꞌapiheg hap ete."

⁷ Pyno waku waure wo raꞌyn watoĩ­neꞌen. Pyno waku watunug aiwy sese wo raꞌyn. Maꞌato yt pote meiũran iꞌarot sese hap topy­huꞌat aikotã iꞌauka hap ewy."

⁸ Pyno ahẽtup uipyꞌa pe ehupi uiwy­riaꞌin eweiꞌe i ro tope — Uruikyꞌe kahato en uhyt mimi eweiꞌe i ro iꞌaparap hat pe kat pote totoiat raꞌyn tominug saꞌag pote."

⁹ Saꞌa­wy­ꞌiwuat uimiwan me areꞌe — Eweiꞌa­piheg no eipy­ꞌa­setpiat mekewat toꞌywot eharyꞌi wywuat saꞌag nug hat. Miꞌi tã are ehepe saꞌa­wyꞌi ehãꞌãg hamo sio uhehay upi eweikup­teꞌen sio yt hap kuap hamo."

¹⁰ Koitywy waku waure wo eweikup­teꞌen iminug saꞌag kai. Waure wo eweikup­teꞌen pote iꞌewyte uito waure wo areĩneꞌen. Miꞌi hawyi waku waure wo watoꞌe Aika­ꞌiwat Iesui e. Miꞌi hawyi iꞌewyte Aika­ꞌiwat toĩneꞌen waure wo raꞌyn. Miꞌi hawyi aiwo­ꞌo­kyꞌe hap sese toĩneꞌen i raꞌyn."

¹¹ Waure wo watoĩ­neꞌen hawyi aikotã wẽtup ok miit ewy yn aiwo­ꞌope watoĩ­neꞌen. Miꞌi hawyi ahiag yt aimaꞌat kuap i. Iꞌewyte yt aipatꞌok patꞌok kuap i kat pote ahiag inug neran aipatꞌok patꞌok hap. Toiky­ꞌesat kahato aiwo­ꞌo­sytpok hap yn."

¹² Saꞌa­wyꞌi areto tawa Turati kape mekewat sehay wakuat moherep hamo. Aikotã Tupana tipo­ꞌoro Tosa­ꞌyru Eipo­rekuat nuat sehay wakuat moherep hamuat. Taꞌi Ahiag uipyhyp teran wen maꞌato Tupana tunug muꞌap tehay wakuat moherep hamo. Weꞌo­kenhyp hap ewy itote maꞌato Tupana tiꞌo­ken­hypꞌok taꞌyn uhepe tehay enoi hamo."

¹³ Itote turan atikat kahato aheywyt Titu katu­pono atikuap teran iwẽ pyi aikotã aikotã eweikup­teꞌen hap koꞌi. Atikat at kaꞌap maꞌato yt atipuẽti i hawyi uiꞌarot kahato areĩneꞌen itote. — Kat pote yt tut i Titu are yn uiwepe. Miꞌi hawyi areꞌe itotiaria pe — Pyno areto raꞌyn yi Masẽ­tunia kape are miꞌi hawyi areto raꞌyn.

"

¹⁴ Koitywy areꞌe Tupana pe — Uhetu­pana arehum kahato ewawi are. Waku puo uruiky­ꞌesat karãpe urutuwat aikowo aikowo Esaꞌyru moherep hamo are. Miꞌi turan urupo­wyro kahato miꞌi nug hamuat are. Miitꞌin uipyhyp pytkai arehum ewawi Tupana kat pote uinug surara ewy poꞌog uhewa­nĩkap koꞌi kawiat hesaika rakano ehay wakuat moherep wuatꞌi miitꞌin piat hamo are. Wãi iꞌatuꞌe pytkai taꞌa­tukuap ehay wakuat hawyi — Waku kahato miꞌi iatuꞌe aikotã mohag ikamhig se rakat ewy ehay iatuꞌe are. — Waku kahato En Tupana are."

¹⁵ Pywo ti rat uiwy­riaꞌin Tupana mowepit hat sese Aika­ꞌiwat Iesui. Miꞌi hap ewy Tupana mowepit haria aito kat pote Iesui eiam wato­py­huꞌat mesu­wa­rote. Aika­ꞌiwat ikamhig sese rakat ewy toĩneꞌen aipiit pe hawyi yne ikuap ikamhig sese hap upi Tupana aikuap. Iꞌewyte iraniaꞌin yt imohey i te haria hoꞌo­wasat rakaria ikuap ikamhig se aipiit piat hap upi hap ewy."

¹⁶ Iraniaꞌin ahehay Iesui etiat taꞌa­tukuap hawyi maꞌato yt taꞌa­tu­mohey i miꞌi pote — Yt naku i iꞌatuꞌe katu­pono ahehay taꞌa­tukuap hawyi — Pywo iꞌatuꞌe teꞌe­ru­wepe — Uruku­ꞌuro hawyi Tupana uruꞌa­piheg uruku­ꞌuro hap kape iꞌatuꞌe teꞌe­ru­wepe. Miꞌi pote uruehay yt ikamhig se i rakat ewy pãi. Yt taꞌa­tu­mohey i pote ikuꞌuro rakat nem hap ewy topy­huꞌat uruehay upi are. Maꞌato iraniaꞌin imohey haria pe ahehay Iesui etiat hawyi — Waku kahato aikotã ikamhig se hap ewy topy­huꞌat. Urutu­kup­teꞌen wuatꞌi eꞌat pe iꞌatuꞌe uruehay taꞌa­tukuap hawyi are. Miꞌi pote aiwat aiweꞌeg hap yt puꞌokꞌe i iraniaꞌin muꞌe Aika­ꞌiwat etiat hamo yt taꞌa­tu­ky­ꞌesat i pote. Waku Tupana piat aimo­weꞌeg hap kaipyi yn wati­ꞌa­tu­muꞌe iraniaꞌin tawa koꞌi."

¹⁷ Tukup­teꞌen Tupana ehay moherep haria maꞌato yt pywo pe i rakaria. Yt Tupana kyꞌe hap wywuat sese haria i aimuꞌe maꞌato ahekat kyꞌewi neꞌi — Mio tã e Tupana iꞌatuꞌe maꞌato yt miꞌi tã e hin i pytkai taꞌa­tu­ꞌywyk neꞌi. Maꞌato ahehay mio tã watoꞌe — Tupana tipo­ꞌoro raꞌyn Tosa­ꞌyru aheha­kye­raꞌat hamo watoꞌe. Miꞌi pote waku watunug Iesui Aipo­rekuat no watoꞌe aipyꞌa pyi watoꞌe. Uruka­ꞌiwat mowepit hamo yn uruiꞌa­tu­muꞌe miitꞌin koꞌi.

Mesuwat miwan nug hat ri Pauru.

"

3

¹ Tukup­teꞌen iraniaꞌin Iesui mohey haria mipo­ꞌoro koꞌi. Miꞌiria po pe miwan taꞌa­tue­reko taꞌa­tu­po­ꞌoro haria miium — Waku kahato miꞌi miit urumi­po­ꞌoro eimuꞌe hamo iꞌatuꞌe mekewat miwan note wen maꞌato uito ti yt iraniaꞌin mipo­ꞌoro hin i katu­pono yt uwe mipo­ꞌoro i uito are. Maꞌato uruto Tupana mipo­ꞌoro eimuꞌe hamo iꞌatuꞌe katu­pono miwan ete — Uruto waku poꞌog waku eimuꞌe hamo e mesuwat miwan me iꞌatuꞌe ahepe. Eiwa­tetup o mesuwat miwan kape hawyi eweikuap uruto poꞌog eimuꞌe e hamuat hap iꞌatuꞌe ahepe. Maꞌato uito ti Pauru are. Tupana yn uipo­ꞌoro ehowawi saꞌa­wyꞌi. Yt karãpe i aterut wẽtup ywania kaipyi miwan — Poꞌog waku eimuꞌe hamo e hat iraniaꞌin miitꞌin minug koꞌi. Maꞌato iraniaꞌin yt uruꞌewy hin i."

² Yt uiky­ꞌesat i eikaipyi — Pauruꞌin Tupana mipo­ꞌoro aimuꞌe hamo e hap. Eweikuap kat pote. Pyno ahenoi ehepe koitywy eweikup­teꞌen Iesui mohey haria uruepiat eimuꞌe hap kaipyi. Koitywy urukuap taꞌyn Aika­ꞌiwat ewy raꞌyn uruto. Miꞌi hawyi eipe wy Aika­ꞌiwat ewywuat eweikup­teꞌen katu­pono uruimotag eipe hap ewy uruiꞌa­tu­muꞌe eipe. Miꞌi hawyi karãpe teꞌe­ra­haꞌat uruewawi miꞌi hawyi taꞌa­tukuap Tupana mipo­ꞌoro koꞌi sese uruto hap. Miꞌi pote eipe miwan ewy eweikup­teꞌen — Pauruꞌin Tupana mipo­ꞌoro e hamo. Maꞌato mesuwat miwan yt popera pe i maꞌato toĩneꞌen eipyꞌa pe eiwa­nẽtup hawe yne miitꞌin imowẽpap hap ewy. Miꞌi hawyi mesuwat miwan ewywuat eiminug wakuat kapiat teꞌe­ra­haꞌat hawyi eimoehay moehay hap ewy. Taꞌi miꞌiria Tupana mipo­ꞌoro koꞌi Pauruꞌin potmu­ꞌeria miꞌiria iꞌatuꞌe."

³ — Taꞌi eipe waku urumuꞌe hamo miwan ewy eweikup­teꞌen iꞌatuꞌe. Aikotã miwan saꞌa­wy­ꞌiwuat timo­herep kahato yne Aipo­typot Iesui etiat. Miꞌi hap ewy eweimo­herep miitꞌin me Tupana mipo­ꞌoro Eipo­typot Iesui etiat. Yt aipo wuat minug popera etiat pyi i. Yt miwan nu etiat kawiat pyi i. Maꞌato wẽtup miwan ewywuat Tupana Pãꞌãu kaipywiat miwan eiwa­nẽtup hap eipyꞌa pywiat kaipywiat wo. Miꞌi hawyi wuatꞌi miitꞌin timo­wẽpap kuap. Katu­pono aiminug koꞌi wakuat ihay Aipo­typot moherep hat ete yn. Katu­pono aiminug wakuat timo­herep kahato Iesui topy­huꞌat Aika­ꞌiwat no hap etiat miwan ewy."

⁴ Pyno pywo ti uruikuap kahato Tupana uruꞌairo tehay moherep hamuat. Tupana toꞌe uruepe — Eipe uimi­ꞌairo uhehay moherep miitꞌin muat hamuat e."

⁵ Tupana miꞌairo uruto tehay moherep hamuat. Miꞌi pytkai yt karãpe i urutoꞌe — Uruto poꞌog Tupana uruꞌairo yt urutoꞌe i. Iꞌewyte — Uruto poꞌog imohey haria iraniaꞌin kai pote Tupana uruꞌairo hap yt urutoꞌe hin i. Yt miꞌi tã ahehay hin i katu­pono uruesaika hap Tupana ehay moherep hamuat yt tut i uruesaika hap kaipyi. Maꞌato Tupana urumoe­saika tesaika hap kaipyi tomi­ky­ꞌesat nug hamuat. Tupana Pãꞌãu tum tesaika hap uruepe. Yt uruwe­kaipyi hin i tut uruesaika hap."

⁶ Tupana Pãꞌãu wakuat yn aimo­weꞌeg kuap tehay wakuat moherep hamuat. Saꞌa­wy­ꞌiwuat sehay wãiꞌe hap koꞌi Tupana henoi Iuteuria kape. Waku kahato miꞌiria maꞌato yt aimo­hãpyk kuap i Tupana wanẽtup hawe. Katu­pono yt watunug kuap i yne miꞌi koꞌi. Maꞌato sehay pakup Iesui etiat wo Tupana Pãꞌãu aimoieĩ­neꞌen kuap. Iraniaꞌin iwẽpap kuap kahato Tupana ehay. Maꞌato yt taꞌa­tu­hẽtup i Tupana Pãꞌãu me — Uimuꞌe ro kat som ereꞌe mesuwe hap kuap hamo yt iꞌatuꞌe i. Teꞌe­ru­wa­nẽtup mesuwat miwan Tupana etiat — Atimo­wẽpap kuap hawyi aheha­kye­raꞌat raꞌyn iꞌatuꞌe yn. Tupana miwan etiat aheha­kye­raꞌat kuap iꞌatuꞌe toꞌope. Miꞌi hawyi taꞌa­tu­mo­wẽpap kahato ahut ewy yt taꞌa­tukuap i taꞌa­tu­pyꞌa pe pytkai. Miꞌi hawyi ikuꞌuro rakat ewy tukup­teꞌen Tupana ehay ete. Kat pote sehay yn taꞌa­tukuap pote. Maꞌato Tupana Pãꞌãu wakuat yt aimuꞌe i miꞌi hap ewy neꞌi. Katu­pono Tupana Pãꞌãu aimuꞌe aipyꞌa pe aiwa­nẽtup hawe aimuꞌe kahato tehay ete. Miꞌi hawyi aimoieĩ­neꞌen weꞌeg tehay wo miwan kaipyi."

⁷ Saꞌa­wyꞌi Tupana tunug tehay nu ete sehay wakuat kahato. Miꞌi hawyi aseꞌi Musei terut mekewat miwan Isareu ywania kape. Miꞌi hawyi aseꞌi Musei ewa hẽtyhot kahato tut turan toterut mekewat miwan turan. Maꞌato yt hẽtyhot motꞌi i howa wẽtup ewaty hap ewy yn. Saꞌa­wyꞌi hẽtyhot kahato miitꞌin yt teꞌe­ra­haꞌat kuap i. Miꞌi hawyi yne eꞌat pe hẽtyhot yi kape teꞌen teꞌen. Saꞌa­wyꞌi Tupana tum tomiwan miat Isareu ywania piat turan — Pyno miꞌi miwan e hap ewetunug mote waku pe eweikup­teꞌen Tupana wanẽtup hawe iꞌatuꞌe. Miꞌi hawyi — Urutunug aru iꞌatuꞌe. Maꞌato yt taꞌa­tunug i hap yn topy­huꞌat. — Pyno eipe Tupana miꞌa­piheg koꞌi wo eweikup­teꞌen e Musei."

⁸ Koitywy Tupana Pãꞌãu toꞌe ehepe — Eweimohey Uhaꞌyru pote woro­ho­ꞌoe­ha­kye­raꞌat e. Miꞌi e hap poꞌog ikahu saꞌa­wy­ꞌiwuat nu totiat hap kai."

⁹ Saꞌa­wy­ꞌiwuat ainãpin hap aiꞌa­piheg hap topy­huꞌat. Miꞌi koꞌi — Ewetunug e hap koꞌi waku yne wen maꞌato yt aimo­hãpyk kuap i ainãpin hamo waku pytkai. Yt watunug i te hap hawyi aiꞌauka hap topy­huꞌat. Maꞌato koitywy — Woro­ho­ꞌo­mo­hãpyk eipe e Tupana. Atum ehepe Uipãꞌãu ehepe poꞌog ikahu saꞌa­wy­ꞌiwuat kai e."

¹⁰ Saꞌa­wy­ꞌiwuat aimuꞌe hap ikahu maꞌato mesuwat aimuꞌe hap ipakup takat poꞌog ikahu saꞌa­wy­ꞌiwuat kai waku sese hap ewy. Yt kat i poꞌog wakuat ikai. Miꞌi hawyi mekewat saꞌa­wy­ꞌiwuat ipotꞌi sehay woꞌo­nãpin hap waku te wen maꞌato wati­ky­ꞌesat poꞌog ipakup i miꞌi pote poꞌog waku."

¹¹ Ainãpin saꞌa­wy­ꞌiwuat hap Musei ewa hẽtyhot hap ewy topy­huꞌat. Yne eꞌat pe yt hẽtyhot i yi kape teꞌen teꞌen hap ewy saꞌa­wy­ꞌiwuat. Maꞌato Tupana ehay pakup topy­huꞌat yne eꞌat pe hẽtyhot poꞌog poꞌog kat pote Tupana ehay pakup pote."

¹² Tupana ehay pakup Iesui etiat wato­mohey kahato katu­pono yt karãpe i yi kape poꞌog poꞌog neꞌi. Miꞌi pote wahenoi Tupana ehay yne miitꞌin me yt kat i aiwe­mõti popuo."

¹³ Saꞌa­wyꞌi Musei tuwe­mõti kahato kat pote Tupana ẽtyhot hap howa etiat ikahuro poꞌog poꞌog yne eꞌat pe. Toto hap ete tuwe­mõti. Miꞌi hawyi tuwewa suwy sokpe wo. Yt toiky­ꞌesat i miitꞌin teꞌe­ra­haꞌat hasep hepap mo ariãty hap kape. Miꞌi hawyi Iuteuria Isareu ywania yt teꞌe­ra­ꞌa­kasa i Tupana ẽtyhot hap howa etiat. Yt teꞌe­ra­ꞌa­kasa kuap i hasep hap kape sokpe iꞌãuka hap pote."

¹⁴ Miꞌi hawyi Iuteuria ywania tukup­teꞌen mesup te. Taꞌa­tu­mo­herep kahato Tupana ehay Musei miwan saꞌa­wy­ꞌiwuat maꞌato yt taꞌa­tukuap pytkai i yt heremo i hap ewy pote. Katu­pono Musei tiwan Iesui etiat Tupana Mipo­ꞌoro Aipo­rekuat nuat etiat hut hap eꞌyianmete. Iuteuria timohey Iesui hawyi heremo taꞌa­tukuap uwe etiat Musei tiwan hap. Mesup te maꞌato yt taꞌa­tu­mohey i te Iesui raꞌyn hap."

¹⁵ Miꞌi hawyi karãpe taꞌa­tu­mo­wẽpap Musei miwan yt heremo hin i. Musei aimuꞌe hap watunug mote Tupana ahehakyꞌeraꞌat kuap iꞌatuꞌe toꞌope maꞌato miꞌi e hap iꞌatue­sokpe ewy toĩneꞌen iꞌatuewa ete hap ewy. Yt iꞌatue­ha­pytig i hap ewy. Sokpe iꞌatuewa suwy hap ewy pote yt heremo i ahehakyꞌeraꞌat hap Iesui mikyiat yt kat saꞌup i hap. Iesui yn Musei minãpin yne nug hat pote miꞌi yn ahehakyꞌeraꞌat kuap hat."

¹⁶ Maꞌato mesup karãpe wẽtup ok Iuteu ywania tuwe­morem Tupana Mipo­ꞌoro Iꞌatu­po­rekuat nuat Iesui kape imohey hamo miꞌi hat meremo uwe ete Musei tiwan hap toikuap taꞌyn. Miꞌi hawyi iꞌatuewa etiat sokpe ewywuat yt kat i hawyi heremo kahato iꞌatu­wa­nẽtup hawe."

¹⁷ Tupana Pãꞌãu aimuꞌe kahato. Tomiwan ete toimo­herep kahato Tupana ahepe. Tomiwan myi toimo­herep kahato Tosa­ꞌyru e hap. Miꞌi hawyi yt uwe i aimaꞌat kuap Tupana ehay ete. Saꞌa­wyꞌi miwan yt watikuap kuap i kat pote yt kat i Tupana Pãꞌãu aipiit pe pote. Koitywy heremo ahepe pote waku pe watoĩ­neꞌen Tupana Pãꞌãu toĩneꞌen ahepe hawyi."

¹⁸ Aito Iesui mohey haria Musei ewywuat kahato Tupana mõtypot hap hẽtyhot hap maꞌato yt ikuꞌuro i ahowa ete Musei wat ewy. Katu­pono ahowa Tupana ewa yꞌy ewa ete hap ewy Tupana Pãꞌãu aimoẽ­tyhot kahato wuatꞌi eꞌat pe. Yt hasep hin i Musei ewa ewy. Miꞌi hawyi Tupana kahu hap ahepe topy­huꞌat. Ipãꞌãu heremo ahete Tupana Mipo­ꞌoro Aika­ꞌiwat nuat Pãꞌãu heremo ahete. Pyno yne eꞌat poꞌog wakuat wato­py­huꞌat hap ewy Tupana Pãꞌãu hẽtyhot hap ete. Miꞌi hawyi yne eꞌat wati­mo­herep poꞌog poꞌog Tupana Pãꞌãu. Katu­pono Tupana ewywuat poꞌog poꞌog wato­py­huꞌat yt kat i sokpe ahowa suwy hap ewy maꞌato Tupana iꞌãuka yt kat i ahowa ete. Ikahu kahato Tupana Pãꞌãu ahete are uimi­mu­ꞌeria uito Pauru.

"

4

¹ Miꞌi pote wati­ꞌa­tu­muꞌe kahato wuatꞌi ywania sehay wakuat Iesui etiat. Katu­pono Tupana Pãꞌãu hegyiꞌat hap kaipyi aiꞌairo towẽ wo. Yt ahewaku hap kaipyi i aiꞌairo miꞌi nug hamo. Aheha­ky­ꞌeꞌi pote aikyꞌe. Miꞌi pote aiꞌairo tehay sytpok hamo. Miꞌi pote yt karãpe i waure­wa­toꞌe ihay sytpok hap ete. Tupana Pãꞌãu aimoe­saika miꞌi nug hamo."

² Iraniaꞌin taꞌa­tu­henoi saꞌag Tupana ehay miitꞌin maꞌat hamo maꞌato aito wati­mo­herep Tupana ehay aikotã toꞌe hap ewy. Yt wahenoi i aikotã iraniaꞌin miitꞌin maꞌat haria ewywuaria henoi hap ewy. Tupana toꞌe hap ewy watoꞌe. Miꞌi hawyi miitꞌin tikuap Tupana ehay pywo piat moherep haria aito hap iꞌewyte Tupana aikuap. Miꞌi hawyi yt aiwe­maꞌat hap wywo i wahenoi pywo piat yn wahenoi pote."

³ Maꞌato yt wati­mo­herep Iesui etiat muꞌap Tupana kapiat pote yt taꞌa­tukuap hin i. Miꞌi hawyi aimi­mu­ꞌeria yt ikuap takaria i wo tukup­teꞌen. Yt naku i yt wahenoi i katu­pono yt wahenoi i hawyi tuwat aria kape yt taꞌa­tukuap i Tupana etiat pote."

⁴ Pyno yt imohey i haria mesu­wa­ro­tiaria hoꞌo­wasat rakaria wo teꞌe­ro­py­huꞌat. Ahiag topy­huꞌat iꞌatue­tu­pana wo. Miꞌi hawyi karãpe wahenoi sehay wakuat aikotã Tupana tipo­ꞌoro Tosa­ꞌyru Aipo­rekuat no hap etiat iꞌewyte karãpe wati­mo­herep yne Iesui etiat Tupana moherep hat sese etiat Tupana ewywuat rakat miꞌi hap etiat wahenoi turan — Yt eweimohey teiꞌo miꞌi. Yt eweimohey teiꞌo miꞌi e ahiag iꞌatu­wa­nẽtup hawe yt toiky­ꞌesat i miꞌiria teꞌe­ro­py­huꞌat Iesui haria pote. Ahiag iꞌatuewa hik hap ewy iꞌatuete yt toiky­ꞌesat i Iesui kapiat iꞌatu­ꞌa­kasa hap pote."

⁵ Yt watu­we­mõ­typot i ahehay wo miitꞌin miat wahenoi turan. — Eheropat haria uruto watoꞌe katu­pono Iesui emiit uruto pote watoꞌe. Miꞌi hawyi Iesui yn Aiꞌakag watoꞌe. Miꞌi yn Tupana tipo­ꞌoro Aipo­rekuat no. Miꞌi yn aimi­mõ­typot sese watoꞌe. — Eheropat haria yn waku watoꞌe wahenoi Iesui etiat turan."

⁶ Saꞌa­wyꞌi sese iꞌypyryp sese turan Tupana toꞌe — Ereĩneꞌen no hẽtyhot hap e. Miꞌi hawyi toĩneꞌen naꞌyn hẽtyhot hap. Koitywy miꞌi hap ewy tutunug aiwa­nẽtup hawe. Aipo­typot Iesui Tupana eꞌariãty ewywuat toĩneꞌen. Karãpe wato­mohey Iesui hawyi Tupana heremo topy­huꞌat aiwa­nẽtup hawe — Worokuap kahato En mesup Tupana watoꞌe. Esaꞌyru En wẽtup miit ewy yn watoꞌe. Koitywy watikuap ewaku hap watoꞌe."

⁷ Tupana Pãꞌãu eiam kahato aito. Miꞌi pote ahesaika kahato Tupana ehay moherep hamo. Pyno yt ahesaika hin i pytkai ahehay Iesui etiat hesaika kahato katu­pono aito heiam yi kawiat ewywuat wato­py­huꞌat pytkai Tupana Pãꞌãu aipytꞌat nug kahato. Miꞌi hawyi woity rakat mehit rakat koꞌi kawiat ewywuat wato­py­huꞌat. Miꞌi hawyi meremo miitꞌin tikuap ahesaika hap toĩneꞌen Tupana Pãꞌãu kaipyi hap yt aipiit yi kawiat kaipyi i."

⁸ Iesui ehay moherep haria aito pote miitꞌin miky­ryꞌi hamo watoĩ­neꞌen aikope aikope ahewyry hap upi. Maꞌato miꞌi pytkai yt aiꞌakit kuap i kat pote uruho­ꞌopot aimoma teran maꞌato yt aimoma kuap i."

⁹ Aiꞌatoiat mesu­wa­ro­tiaria aiꞌakag wuaria kahato maꞌato yt waure wo hin i aiwa­nẽtup hawe imohey hap ete."

¹⁰ Aiꞌauka aru aikotã Aika­ꞌiwat Iesui taꞌa­tu­ꞌauka hap ewy watoꞌe. Aikotã taꞌa­tu­kuasa Iesui iꞌauka hamo hap ewy aimohan aiꞌauka hamo watoꞌe. Yt watikuap i aiku­ꞌuro hap sio mesup mũki­ꞌite watoꞌe. Maꞌato miꞌi pytkai yt watoiat hin i imohey hap watoꞌe. Maꞌato miꞌi pytkai wahenoi ahewa­nĩ­kaptia pe aimi­mohey Iesui etiat. Miꞌi pote — Pywo ti rat iꞌatuꞌe. Iesui tuwẽtem guꞌuro pyi hap watikuap taꞌyn iꞌatuꞌe. Pywo ti rat katu­pono heremo toĩneꞌen iꞌatupiit pe iꞌatuꞌe ahewa­nĩ­kaptia."

¹¹ Ahehay Iesui etiat pote aipyhyp teran aikotã aiꞌauka hamo. Taꞌa­tu­ꞌauka Aika­ꞌiwat. Miꞌi hap ewy teran ahete taꞌa­tunug neran. Miꞌi turan wati­mo­herep yne Iesui toĩneꞌen hap ete."

¹² Pyno aiꞌauka aru watoꞌe maꞌato aipotpap taꞌyn wuatꞌi ywania muꞌe hap ete. Miꞌi hap ewy urutunug saꞌa­wyꞌi eipy­ꞌa­setpe. Miꞌi pote Aika­ꞌiwat mimoieĩ­neꞌen koꞌi wo eweikup­teꞌen mesup."

¹³ Saꞌa­wyꞌi morekuat Tawi toꞌe — Woro­mohey sese En Tupana. Miꞌi pote atimo­herep En wuatꞌi miitꞌin me uhehay wo. Yt atoiat kuap i uhepiat emohey hap e morekuat Tawi. Miꞌi ewywuat kahato aito imohey hap ete. — Uruimohey sese En Tupana. Miꞌi pote uruimo­herep En wuatꞌi miitꞌin me watoꞌe. Yt urutoiat kuap i En watoꞌe."

¹⁴ Taꞌi koitywy watikuap kahato raꞌyn Tupana tihep Aika­ꞌiwat guꞌuro pyi hap etiat. Miꞌi hawyi toimoieĩ­neꞌen i ikuꞌuro hawyi. Miꞌi hap watikuap kahato are. Iꞌewyte aito watikuap kahato meiũran aru Aika­ꞌiwat Iesui aihep guꞌuro pywiat aimoieĩ­neꞌen wuatꞌi eꞌat piat hamo Tosa­ꞌyru mohey haria aito pote. Aimoieĩ­neꞌen hawyi aru aito ahereto Toꞌywot kape aikope toĩneꞌen hap kape. Mio tã e aru miꞌi hawyi — Papai meimuẽ­waria uimohey sese haria e aru. Miꞌi hawyi aru wẽtup miit ewy watoĩ­neꞌen itote."

¹⁵ Saꞌa­wyꞌi eipy­ꞌa­setpe urutu­kup­teꞌen turan miitꞌin mimo­so­ꞌopot koꞌi wo uruto uruiꞌa­tu­muꞌe eipe Iesui etiat pote. Miꞌi hawyi uruepiat hoꞌopot hap kaipyi eweikup­teꞌen pywo e haria wo typyꞌi raꞌyn. Miꞌi hap kaipyi koitywy miitꞌin poꞌog poꞌog Tupana kapiat wehum haria wo tukup­teꞌen. — Egyiꞌat kahato Tupana eweiꞌe. Yt uwe i eꞌewy hegyiꞌat hap eweiꞌe. Uruimõ­typot wuat waku rakat. Uruhe­waku En eweiꞌe itote poꞌog poꞌog saꞌa­wyꞌi kai. Koitywy Tupana topy­huꞌat eimi­mõ­typot no raꞌyn uruepiat hoꞌopot kahato eimuꞌe hamuat rokirẽ."

¹⁶ Karãpe uruta­ꞌa­kasa ehepiat imohey hap kapiat hawyi urutoꞌe — Pyno waku poꞌog waho­ꞌopot iraniaꞌin muꞌe Iesui etiat hamo urutoꞌe. Maꞌato koitywy urupiit yt hesaika kahato i saꞌa­wy­ꞌiwuat ewy maꞌato miꞌi pytkai poꞌog uruesaika saꞌa­wy­ꞌiwuat kai urupyꞌa pe uruwa­nẽtup hawe Tupana esaika hap poꞌog uruete saꞌa­wyꞌi kai katu­pono Tupana Pãꞌãu urumo­pakup kahato Iesui ehay moherep hamo wuatꞌi eꞌat pe. Miꞌi pote yt uruiꞌatoiat hin i sehay wakuat etiat miitꞌin muꞌe hap."

¹⁷ Pyno iraniaꞌin Tupana ehay yt kyꞌesat i haria urusa­tyꞌi satyꞌi kahato urumo­so­ꞌopot kahato mesuwe. Maꞌato aheĩneꞌen turan yn aimo­so­ꞌopot kuap. Miꞌi hawyi poꞌog yt kat i taꞌa­tunug kuap maꞌato yt watoĩ­neꞌen motꞌi i mesu­wa­rote. Miꞌi hawyi watoĩ­neꞌen motꞌi wuatꞌi eꞌat pe hap tote. Miꞌi hawyi atipy pe aru watoꞌe — Taꞌi waho­ꞌopot kahato yi tote miitꞌin muꞌe hamuat turan. Maꞌato koitywy waku aiwa­nẽtup hawe ahepiat hoꞌopot hap watoꞌe. Katu­pono ahepiat hoꞌopot hap kaipyi iꞌatu kahato Tupana mõtypot haria nug mesuwiat hamo watoꞌe aru atipy pe."

¹⁸ Pyno yt naku i watu­wa­nẽtup ahepiat hoꞌopot hap mesu­wa­rotiat kape koran wuat kape yn. Poꞌog waku watu­wa­nẽtup aimo­wepit hap atipy piat hap kape aikotã aru aimo­wepit wuatꞌi eꞌat pe hap kape. Maꞌato koitywy yt heremo i te miꞌi. Katu­pono ahepiat hoꞌopot porap i hap heremo kahato koran aiwa­nẽtup hawe. Pyno poꞌog waku watu­wa­nẽtup ahepiat hoꞌopot hap eꞌyianmete aikotã aru hap kape. Taꞌi yt pya hin i wyti aimo­wepit hamuat wuatꞌi eꞌat piat hap eꞌat watoꞌe. Ahepiat hoꞌopot porapꞌi hawyi tokosap aru pote meremo watoꞌe.

Uimiwan Pauru are.

"

5

¹ Pywo aipiit wyti aikotã og ape ewy. Katu­pono yt watoĩ­neꞌen motꞌi hin i mesu­wa­rote. Miꞌi hawyi aipiit ikuꞌuro aikotã og ape ewy. Maꞌato aipiit pakup Tupana timoeĩ­neꞌen hawyi yt og ape ewy hin i. Katu­pono aipiit pakup topy­huꞌat aikotã Tupana yat atipy piat yt karãpiat ikuꞌuro rakat i."

² Maꞌato mesuwe aipiit hero kahato haty kahato aipiit ete. — Tupana watoꞌe waho­ꞌopot kahato aipiit ete haty kahato watoꞌe. Areto teran ewawi atipy kape watoꞌe. Atiky­ꞌesat uipiit pakup watoꞌe Tupana pe mesuwe yi tote hoꞌopot popuo. Aipiit mesuwe aikotã sokpe potꞌi ewy. Maꞌato aipiit pakup atipy piat aikotã ahesokpe pakup ewy. Miꞌi hawyi wati­ky­ꞌesat kahato aikotã ahesokpe pakup ewy."

³ Yt naku i yt kat i ahesokpe potꞌi hiotꞌe hawyi yt kat haipepiat pakup i hap pote yt naku i are. Yt naku i miitꞌin pyꞌa­setpe yt ahesokpe i hap ewy. Miꞌi hap ewy maꞌato poꞌog saꞌag aiku­ꞌuro hawyi yt kat i aipiit pakup i atipy piat hap yt naku i are."

⁴ Aipiit mesu­wa­rotiat kakꞌe kynkynꞌe neꞌi aipiit ikuꞌuro rakat toĩneꞌen pote. Aipiit mesu­wa­rotiat tiky­ꞌesat kahato ipakup we toĩneꞌen hap. Taꞌi yne aito aipiit mesu­wa­rotiat ikuꞌuro hap watikuap taꞌyn. Yt wati­ky­ꞌesat i pytkai ikuꞌuro. Miꞌi pote wahẽtup Tupana — Atiky­ꞌesat kahato uipiit pakup we toĩneꞌen wuatꞌi eꞌat piat rakat watoꞌe. — Etunug no uipiit pakup ewat ewy watoꞌe Iesui pe. — Uipainug no watoꞌe. Aikotã uhesokpe pakup uiku­ꞌuro hawyi etopag uipiit epiit ikahu hap ewy watoꞌe."

⁵ Pyno aito Iesui mohey haria pote Tupana toꞌe ahepe — Uhaꞌyru mohey haria atum aru ehepe eipiit pakup eiku­ꞌuro hawyi. Pywo ti rat yt uheso i rat e. Miꞌi pote atimo­herep Uipãꞌãu pywo eweiꞌe hamo eipiit pakup toĩneꞌen atipy pe hap kuap hamo e Tupana ahepe."

⁶ Pywo ti rat eipiit pakup toĩneꞌen Tupana Pãꞌãu kawiat wato­mohey poꞌog poꞌog hap kaipyi are. Yt heremo i aipiit pakup maꞌato Tupana toꞌe pote — Pywo watoꞌe yn aimohey hap kaipyi. Aipiit wyti aiꞌyat mesu­wa­rotiat ewy. Aipiit pakup aiꞌyat pakup atipy piat ewy."

⁷ Watoĩ­neꞌen mesu­wa­rotiat aipiit pe pote Tupana yt heremo i. Maꞌato imohey hap kaipyi yn wata­ꞌa­kasa kuap."

⁸ Wato­mohey kahato miꞌi pote watoꞌe — Pywo ti rat atiky­ꞌesat kahato uipiit pakup hap. Katu­pono areĩneꞌen neran uipiit pakup wywo Tupana ehamo watoꞌe. Uito Pauru uiwa­nẽtup hawe poꞌog waku areĩneꞌen uipiit pakup wywo atipy pe mesuwat yi tote areĩneꞌen hap kai."

⁹ Watoĩ­neꞌen neran Tupana wywo miꞌi pote wato­we­potpap kahato aipiit wywo mesuwiat wywo mesu­wa­rote te haty wo Tupana e hap nug hap ete. Taꞌi Tupana mowepit kahato haria wo watu­kup­teꞌen neran sio mesuwat yi totiat sio atipy pe. Mio tã e hap wati­ky­ꞌesat."

¹⁰ Waku aiweꞌeg wo kahato kat som watunug mesu­wa­rote aipiit wywo hap ete. Katu­pono meiũran aru Aipo­typot Iesui aikaykay yne tuwe­wawi haꞌup ium hamo. Wẽtup ok tuereto toikaykay yne aito. Itote toimo­herep aiminug koꞌi wuatꞌi pe. Aiminug wakuat koꞌi iꞌewyte aiminug yt naku i hap koꞌi aiminug mesuwat totiat turan wuat koꞌi. Miꞌi hawyi toꞌe wẽtup ok wẽtup ok pe — En wakuat kahato e. Maꞌato wẽtup ok wẽtup ok pe — En yt naku i e. Miꞌi pote waku aiweꞌeg wo kahato aipiit wywo mesu­wa­rote."

¹¹ Miꞌi hap eꞌat pe Aipo­typot tiꞌa­tu­mo­herep yne aiminug koꞌi sio waku sio yt hap koꞌi. Miꞌi pote waku wato­kenꞌẽ kahato yt naku i nug hap pupi. Waku watoꞌe — Atimõ­typot reran Uika­ꞌiwat uiminug wakuat wywo waku watoꞌe yn. Waku wati­ꞌa­tuekyi kahato miitꞌin Aika­ꞌiwat kape waku watoꞌe. Yt naku i iꞌatuekat kyꞌewi neꞌi wati­ꞌa­tuekyi miitꞌin Iesui kape. Iꞌewyte yt naku i iꞌatu­maꞌat reran haype neꞌi wati­ꞌa­tuekyi miitꞌin. Uruto miꞌi hap koꞌi eipiit kyꞌewi hawyi ehekat kyꞌewi neꞌi hap yt karãpe i uruiꞌa­tuekyi eipe. Miꞌi hap Tupana tikuap pywo piat urutoꞌe hap iꞌewyte eipe."

¹² Yt karãpe i uruiꞌa­tu­maꞌat eipe. — Uruto poꞌog yt urutoꞌe hin i. Taꞌi yt urutu­we­mo­wato teran i aikotã iraniaꞌin eimuꞌe haria ewy. Miꞌiria ti teꞌe­ru­we­painug teꞌe­ru­we­mõ­typot hamo — Uimõ­typot mono taꞌa­tuꞌe hawe neꞌi. Maꞌato iꞌatu­wa­nẽtup hawe yt hãpyk hin i — Uruto poꞌog iꞌatuꞌe hap. Miꞌiria eweikuap teran pote waku apoꞌe­weiꞌe sio waku apoꞌe­weiꞌe sio yt hap kuap hamo. — Urumuꞌe haria Pauru ewywuaria sio yt apoꞌe­weiꞌe. Miꞌi hawyi eweikuap sio waku sio eimaꞌat haria neꞌi hap koꞌi etiat."

¹³ — Pyno uruto poꞌog waku eimuꞌe hamo Pauruꞌin kai iꞌatuꞌe itote. Pauruꞌin yt taꞌa­tukuap i kat e teꞌe­ropat muꞌe hap koꞌi hesoꞌok takaria pote iꞌatuꞌe. Maꞌato Tupana wanẽtup hawe yt uruesoꞌok hin i katu­pono imiky­ꞌesat ewy urutunug. Maꞌato iꞌatu­wa­nẽtup hawe uwe uwe inug Tupana miky­ꞌesat miꞌi haria iꞌatu­wa­nẽtup hawe hesoꞌok takaria wo. Iraniaꞌin teꞌe­roꞌe — Pauruꞌin iꞌatu­weꞌeg kahato miitꞌin maꞌat hap ete iꞌatuꞌe. Mio tã iꞌatuꞌe yt taꞌa­tukuap hin i kat hamo urupotpap kahato eipo­wyro hamo hap yt kat i eikyꞌe hap iꞌatuekai pote. Uruto uruikyꞌe kahato eipe miꞌi pote urupotpap kahato eipo­wyro hamuat ete. Aikotã ywot hoꞌopot tomẽ­pytꞌin powyro hamo hap ewy. Yt urutu­we­kyꞌe i eipo­wyro hamuat hap ete urupotpap kahato."

¹⁴ Pyno kat hamo urupotpap at kaꞌap miitꞌin ekyi Iesui kapiat hamo. Pyno ahenoi kat pote hap. Iesui piat eikyꞌe sese hap totopag naꞌyn uruepe eikyꞌe kahato eipe urukaipyi. Miꞌi hawyi wẽtup miit ewy uruto iwywo eikyꞌe hap ete. Yt woro­ho­ꞌo­kyꞌe i pote haty kahato uruete. Pywo ti rat toiꞌa­tu­kyꞌe torania wuatꞌi ywania koꞌi. Miꞌi pote tutuꞌu yne wuatꞌi apiheg hap toku­ꞌuro ariaꞌyp posak etiat hawyi. Toikuap kahato yne miitꞌin Tupana miꞌa­piheg koꞌi wo aru tukup­teꞌen hap. Toikuap iꞌatu­ꞌa­piheg hap hawyi ikuꞌuro iꞌatueka­wiano."

¹⁵ Tutum saꞌup yne Tupana pe aikyiꞌat hamo. Tohaꞌup nug yne hawyi Tupana wanuaria wo watoĩ­neꞌen. Koitywy Iꞌywot eropat haria watoĩ­neꞌen. Kat pote aikyiꞌat raꞌyn pote. Yt naku i watu­we­ropat neꞌi. Waku poꞌog wate­ropat mekewat ikuꞌuro aika­wiano rakat."

¹⁶ Pyno yt naku i aiwa­nẽtup hawe watoꞌe — Miꞌi miit yt naku i miꞌi miit waku watoꞌe yt watikuap i te sese sio waku sio yt i te pytkai. Mio tã watoꞌe saꞌa­wyꞌi Aikawiat Iesui ete aiwa­nẽtup hawe. Koitywy watikuap taꞌyn Aika­ꞌiwat Iesui sese raꞌyn hawyi watikuap sese Waku Sese rakat toĩneꞌen. Saꞌa­wyꞌi — Yt kan hamo i Iesui watoꞌe yt kat i Iesui etiat watikuap pytkai maꞌato mesup yt naku i miꞌi watunug. Miꞌi hap ewy kahato yt naku i watoꞌe aipyꞌa pe wẽtup ok miit pe — Yt kan hamo i en mana mimi mehĩ yt watikuap i te mekewat aimi­mohit hat re e. Waku iminug upi watikuap waku sio yt e."

¹⁷ Watunug Iesui Aika­ꞌiwat no hawyi watoĩ­neꞌen iwywo wẽtup miit ewy yn watoĩ­neꞌen. Miꞌi hawyi ipakup takaria wo watoĩ­neꞌen. Miꞌi hawyi aheko saꞌa­wy­ꞌiwuat saꞌag koꞌi wati­waure yne raꞌyn. Miꞌi hawyi aheko pakup taꞌyn Aika­ꞌiwat eko ewywuat raꞌyn miit pakup watoĩ­neꞌen pote."

¹⁸ Pyno yne yne ipakup taꞌyn katu­pono Tupana aimo­pakup i raꞌyn. Aiwo­ꞌo­wy­ꞌinug Tupana wywuat hat Aika­ꞌiwat Iesui. Aika­ꞌiwat ewywuat koitywy watoĩ­neꞌen. Wato­ꞌo­wy­ꞌinug naꞌyn ahehay wo."

¹⁹ Pywo ti rat Aika­ꞌiwat Iesui piit pe Tupana toĩneꞌen. Wuatꞌi miitꞌin wywuat tuwy­ꞌinug hamuat toĩneꞌen Tosa­ꞌyru piit pe. Tupana hewyry aipy­ꞌa­setpe Tosa­ꞌyru piit pe. Tomohey haria sese pap tet pupi ti ikuꞌuro. Toiꞌa­tu­morem tewa­nĩ­kaptia towy­riaꞌin sese wo. Yt tote­reko i raꞌyn wyti miitꞌin minug saꞌag topyꞌa pe. Tomo­weityk taꞌyn wyti mekewat topyꞌa piat koꞌi tosuu wo. Koitywy toꞌe ahepe — Ewehenoi ro miitꞌin me waure wo areĩneꞌen iꞌatu­minug saꞌag kai e. Waku teꞌe­ra­ꞌaipok uhowawi e Aipo­typot e mesup ahepe."

²⁰ Koitywy toĩneꞌen Wuatꞌi Porekuat Koro wo. Miꞌi hawyi ainug topot­po­ꞌoro wo morekuat hit koꞌi wo wẽtup tawa kape wẽtup tawa kape tehay moherep hamo — Eweiꞌaipok to Tupana kape e hamo. Aika­ꞌiwat Iesui toĩneꞌen atipy pe. Maꞌato uruto haipe­piaria ihay moherep haria urutoꞌe. Tupana urupo­ꞌoro ehowawi eikyꞌe kahato haype. Woro­ho­ꞌo­ky­ꞌesat eipe uruwy­riaꞌin wo i raꞌyn urutoꞌe. Eiwe­wy­ꞌinug no Tupana wywo urutoꞌe."

²¹ Aika­ꞌiwat Iesui yt karãpe i inug saꞌag watoꞌe. — Taꞌi Uhaꞌyru waku sakpo e Tupana. Maꞌato miꞌi pytkai Tupana tiꞌa­piheg aiminug saꞌag upi. Aiminug saꞌag yne iꞌokpe tote toĩneꞌen kahato iꞌauka hap. Miꞌi hawyi Iesui topy­huꞌat yt naku i nug hat ewy aiminug saꞌag topiit tote hawyi. Yt towat tominug saꞌag hap upi Tupana tiꞌa­piheg Iesui maꞌato aiwat aiminug saꞌag upi toho­ꞌopot kahato. Miꞌi wato­mohey hawyi Tupana ainug wakuat sese rakaria Tosa­ꞌyru suu aikoho hawyi. Tosa­ꞌyru ewaku hap totopag ahepe. Waku pe watoĩ­neꞌen Tupana wanẽtup hawe watoꞌe wuatꞌi ywania pe aikope aikope aipo­ꞌoro hap upi Tosa­ꞌyru haipe­piano.

Uito Tupana mipo­ꞌoro Tosa­ꞌyru moherep hanuat Pauru.

"

6

¹ Urutoria Iesui ehay moherep haria sese. Miꞌi pote koitywy uruhẽtup kahato ehupi. Eipe iꞌewyte uruꞌewy te wẽtup piit ewy yn Tupana wywo. Watu­we­potpap kahato wuatꞌi ywania piat ikuap Haꞌyru etiat hamo. Pyno Tupana eropat haria aito pote uruhẽtup ehupi urupyꞌa pyi kahato. Yt eweikup­teꞌen neiꞌo Tupana piat eikyꞌe hap ete iraꞌak takaria wo neꞌi. Tupana tum naꞌyn ehepe kat koꞌi kat koꞌi topotpap nug hamuat yt kat saꞌup i. Yt naku i Tupana miium ahepiat koꞌi wati­po­re­ro­kosap neꞌi. Yt naku i watipun imiium koꞌi."

² Mio tã e saꞌa­wyꞌi Tupana ahepe — Koran naꞌyn wyti woro­ho­ꞌoe­ha­kye­raꞌat teran e. Mesup eꞌat raꞌyn atiky­ꞌesat eheha­kye­raꞌat e. Woro­ho­ꞌokuap eipe ehepiat uikaykay hap eꞌyianmete e. Woro­ho­ꞌo­ꞌy­kesat eipe ehepiat hoꞌopot hap eꞌat pe e Tupana ahepe mesup taꞌyn miwan me Isaia 49.8 pe."

³ Koitywy Aika­ꞌiwat ehay moherep haria raꞌyn aito. Miꞌi pote waku aiweꞌeg wo kahato watoĩ­neꞌen. Kat pote karãpe wati­ꞌa­parap pote miitꞌin teꞌe­ru­we­ky­ryꞌi kahato Aika­ꞌiwat Iesui ete iꞌewyte ahete. Miꞌi hawyi yt uwe i tuwa­nẽtup teran ahehay kape."

⁴ Uruwy­riaꞌin waku kat koꞌi kat koꞌi watunug aiweꞌeg wo kahato Tupana mowepit hap wywo — Meiẽ Tupana eropat hat sese iꞌatuꞌe hamo. Karãpe putꞌokꞌe ahete ahatek hap ahoꞌopot hap koꞌi turan yt naku i iũteꞌen iũteꞌen aipy­ꞌahak miitꞌin ete iꞌewyte Tupana ete. Waku wati­mo­herep Aipo­typot eropat haria sese hap miꞌi hap eꞌat pe."

⁵ Karãpe aiꞌahyk ahyk iꞌewyte karãpe aipyhyp woꞌo­pyhyp hawe iꞌewyte karãpe miitꞌin sem aiꞌauka teran haria pyꞌa­setpe watoĩ­neꞌen iꞌewyte karãpe ahero ahãꞌãg hap wywo Tupana potpap nug kahato hap ete iꞌewyte karãpe yt watoket i kaꞌap Tupana potpap nug hap eꞌat pe wy iꞌewyte karãpe yt kat i aimiium Tupana potpap nug turan miꞌi koꞌi ahete turan waku watu­we­pỹ­ꞌã­tutuk poꞌog yn naꞌyn. Miꞌi hawyi miitꞌin tikuap taꞌyn Aika­ꞌiwat eropat haria sese aito hap."

⁶ Iꞌewyte karãpe yt kat i aiwa­nẽtup hawe yt naku i nug hap ete miꞌi hawyi meiũran miitꞌin tikuap Tupana eropat haria sese aito hap. Iꞌewyte karãpe watikuap Tupana aiwy sese ewywuat miꞌi hawyi — Tupana emiit kahato miꞌi iꞌatuꞌe. Iꞌewyte karãpe miitꞌin tunug saꞌag ahete maꞌato yt wati­ꞌa­tu­poepyk i miꞌi hawyi — Pywo imohey hat sese iꞌatuꞌe ahepe. Iꞌewyte iwese rakaria wo watoĩ­neꞌen hawyi — Meiẽ iꞌatuꞌe toꞌe hap ewy imohey sese hat iꞌatuꞌe. Iꞌewyte karãpe watunug Tupana Pãꞌãu miky­ꞌesat ewy hawyi iꞌewyte karãpe wati­ꞌa­tu­kyꞌe miitꞌin sese aipyꞌa pyi hawyi taꞌa­tukuap pywuat Aipo­typot Iesui eropat haria sese aito hap."

⁷ Iꞌewyte karãpe wati­mo­herep aikotã Tupana e hap ewy hawyi ipotmu­ꞌeria sese aito hap taꞌa­tukuap taꞌyn. Iꞌewyte karãpe Tupana aimoe­saika yt ahesaika pytkai i hawyi — Pywo rakat iꞌatuꞌe ahepe. Iꞌewyte karãpe waku pe watoĩ­neꞌen Tupana wywo iꞌewyte miitꞌin wywo miꞌi hawyi aikotã surara hesaika rakat ewy watoĩ­neꞌen. Surara typy ipo pe kyseꞌyp takat ewy. Wakuaria watoĩ­neꞌen pote — Miꞌiria Tupana surara wakuat sese iꞌatuꞌe ahepe."

⁸ Waku pe yn wati­ky­ꞌesat Tupana potpap nug ahepiat imõtypot wywuat hamo. Maꞌato iraniaꞌin aimõ­typot kahato tuereto. Maꞌato iraniaꞌin yt aimõ­typot hin i. Maꞌato iraniaꞌin teꞌe­ru­we­ky­ryꞌi kahato ahete. Maꞌato iraniaꞌin yt — Waku iꞌatuꞌe kahato. Pywo piat wati­mo­herep turan iraniaꞌin — Iꞌatueso atueso neꞌi taꞌa­tu­henoi iꞌatuꞌe ahepiat. Maꞌato sio waku iꞌatuꞌe sio yt naku i iꞌatuꞌe pytkai wati­ꞌa­tu­muꞌe kahato te Tupana ehay wakuat ete."

⁹ Taꞌi iraniaꞌin yt aikuap teran hin i. Maꞌato Tupana aikuap kahato. Miꞌi hawyi iraniaꞌin aikuap wen maꞌato aiꞌauka hamo aikuap. Aiꞌahyk ahyk aiꞌa­piheg kahato aipiit suk suk kahato hamo aikuap. Miꞌi hawyi ikuꞌuro raꞌyn iꞌatuꞌe. Maꞌato miꞌi turan watu­we­hymut i raꞌyn kat pote Tupana yt tiky­ꞌesat i te aiku­ꞌuro hap pote."

¹⁰ Aimo­so­ꞌopot hap aimo­ꞌarot kahato. Maꞌato miꞌi pytkai watu­wehum kahato Tupana kape. Maꞌato iꞌatu­wa­nẽtup hawe yt kat hamo rakaria wo i watoĩ­neꞌen. Maꞌato wahenoi Tupana ehay wakuat iꞌatuepe hawyi taꞌa­tu­mohey hawyi taꞌi Tupana mipoi­tyro koꞌi wo tukup­teꞌen naꞌyn. Miꞌi hawyi aikotã hekat rakaria ewy tukup­teꞌen. Yt kat i ahekat pytkai."

¹¹ Uhytꞌiꞌin manaꞌin tawa Kurintiu piaria uruikyꞌe kahato eipe. Torania eipe uruikyꞌe urutoꞌe. Yne uruwa­nẽtup hap uruimo­herep ehepe. Eikyꞌe hap yt karãpe i yi kape neꞌi. Pywo ti rat uruikyꞌe kahato eipe."

¹² Eipe ti urumẽ­pytꞌin uruiꞌa­tu­kyꞌe kahato aikotã ywot tikyꞌe tomẽ­pytꞌin hap ewy."

¹³ Maꞌato eipe aikotã yt taꞌa­tu­ꞌywot etiat i yt iwese i rakaria ewy. Iꞌewyte yt taꞌa­tu­wesat i taꞌa­tu­ꞌywot rakaria ewy eweikup­teꞌen. Uruiꞌa­tu­kyꞌe kahato eipe urutoꞌe hawyi yt kat eweiꞌe i uruwesat. Urumẽ­pytꞌin urukyꞌe pote ewehenoi ro uruepe."

¹⁴ Yt naku i watuwat yt naku i nug haria wyꞌinug hamo. Aikotã iꞌypyryp wywo hẽtyhot hap wywo yt toꞌosat i hap ewy. Miꞌi hap ewy yt naku i watoĩ­neꞌen yt naku i nug haria wywo wẽtup miit ewy iꞌatu­minug saꞌag ete. Aikotã uꞌi mani­ꞌay­karay wywo toꞌo­pype miꞌi hap ewy yt naku i wato­py­huꞌat tupa­naria mõtypot haria wywo iꞌatue­tu­pa­naria mõtypot hamo. Aito Iesui mohey haria pote wẽtup miit ewy watoĩ­neꞌen wakuat nug hap ete. Miꞌi pote Tupana mimo­waku hanuaria yt toꞌosat kuap sese i yt naku i nug haria wywo yt toꞌo­ꞌewy hin i pote."

¹⁵ Aika­ꞌiwat wywo ahiag wywo yt karãpe i toꞌo­wẽka taꞌa­tu­potpap wẽtup ehay yn hamo. Miꞌi hap ewy yt karãpe i aito Aika­ꞌiwat mohey haria wato­ꞌosat sese Aika­ꞌiwat etiat miky­ryꞌi haria wywo. Yt karãpe i wẽtup miit ewy wato­py­huꞌat iꞌatu­wywo."

¹⁶ Saꞌa­wyꞌi mio tã e Tupana tomohey haria pe — Areĩneꞌen eiwywo uheiam eipe. Eiwywo uhewyry e. Ehetu­pana wo areĩneꞌen e. Uhemiit no eweikup­teꞌen e saꞌa­wyꞌi miwan me. Miꞌi pote Tupana yat ewy watoĩ­neꞌen. Tupana toĩneꞌen aipiit pe pote wuatꞌi eꞌat piat ieĩneꞌen hat eiam aito. Yt mo wuat minug Tupana iãꞌãkap eiam hin i aito. Yt karãpe i Tupana iwese tupa­naria wywo. Miꞌi pote yt naku i Tupana aipiit piat watioto tupa­naria mõtypot yat kape iꞌatu­mõ­typot hamo e Tupana saꞌa­wyꞌi miwan me Irewi­tiku 26.12 pe."

¹⁷ Mio tã e saꞌa­wyꞌi Tupana tomohey haria pe — Eweiꞌatoiat ro tupa­naria e. Yt eweikup­teꞌen neiꞌo iꞌatu­wywo e. Eweikup­teꞌen pya iꞌatukai ro e. Yt eweiwat reiꞌo iraniaꞌin wywo iꞌatu­mõ­typot hamo e. Yt ewetemig neiꞌo miꞌiria katu­pono yt naku i kahato miꞌiria e Tupana. Uimi­ky­ꞌesat ewetunug mote uimẽ­pytꞌin wo eweikup­teꞌen e. Iꞌewyte eiwe­hytꞌok uiꞌyat pe e Tupana ahepe Isaia 52.11 pe."

¹⁸ Eiꞌywot sese wo areĩneꞌen e. Miꞌi hawyi eipe uhaꞌy­ruꞌin uhaki­ꞌytꞌin wo e Tupana ahepe Esutu 4.22 pe.

"

7

¹ Eiꞌywot areĩneꞌen e Tupana ahepe. Woro­ho­ꞌo­muꞌe eipe uimẽ­pytꞌin wo Ahetu­pana Koro e. Miꞌi pote uimi­kyꞌe koꞌi eweipy­huꞌat e Tupana ahepe. Pyno waku watu­wehik kahato Tupana ete imẽpytꞌin aito pote. Waku wati­mõ­typot kahato Aiꞌywot Koro yt kat i aiminug saꞌag wywo. Waku wato­kenꞌẽ ahepiat inug saꞌag hap pupi kat pote Tupana ehamo watoĩ­neꞌen pote. Yt naku i watuwat aipiit miky­ꞌesat saꞌag upi neꞌi iꞌewyte aiwa­nẽtup saꞌag hap upi neꞌi. Yt naku i watu­wa­nẽtup poꞌog ahetu­pa­naria saꞌa­wy­ꞌiwuat kape neꞌi.

Waku watoꞌe Tupana pe — Uiminug saꞌag koꞌi aikotã uipiit ipitpit sese hap ewy. Miꞌi hap ewy uiwa­nẽtup hap ipitpit kahato. Uipitpit ok hap pote aremõti kahato uiminug saꞌag pupi waku watoꞌe Tupana pe."

² Uiwy­riaꞌin tawa Kurintiu piaria yne eꞌat pe uruiꞌa­tu­kyꞌe kahato poꞌog saꞌa­wyꞌi kai. Miꞌi pote urukyꞌe aikotã uruiꞌa­tu­kyꞌe eipe hap ewy. Yt karãpe i uruiꞌa­tu­maꞌat eipe. Iꞌewyte yt karãpe i eipiit kyꞌewi hawyi eheka­reꞌen koꞌi kyꞌewi neꞌi urutu­kup­teꞌen eipy­ꞌa­setpe. Iꞌewyte yt karãpe i uruiꞌa­tu­po­hari eipe katu­pono eikyꞌe kahato haria uruto."

³ Taꞌi urutu­wa­nẽtup yn ehowawi yt kat i eimohit hap neꞌi uruwa­nẽtup hawe uruku­ꞌuro eikyꞌe haype."

⁴ Uimo­wepit haria kahato eipe are. Uruimohey kahato eipe are. — Iesui mohey haria tawa Kurintiu piaria waku kahato rakaria urutoꞌe wuatꞌi miitꞌin me. Uruho­ꞌopot kahato mesuwe maꞌato urutu­wa­nẽtup ehowawi hawyi urumo­wepit kahato eipe. Miꞌi hawyi yt kat i uruꞌarot neꞌi hap."

⁵ Saꞌa­wyꞌi putꞌok­ꞌu­ru­toꞌe mesuwe yi Masẽ­tunia pe turan uruho­ꞌopot kahato. Yt urukyꞌe hin i itote. Iꞌatuehay saꞌag uruete yne tawa piaria. Uruto­kenꞌẽ itote kat pote sio uruꞌauka sio yt hap urutu­wa­nẽtup pote. Iraniaꞌin tuꞌuka kahato uruete. Yt ikahu hin i uruwa­nẽtup hawe. Yt urutu­we­mohey kuap i. Miꞌi hawyi yt uruiky­ꞌesat i poꞌog yi kape sese uruto urutu­kup­teꞌen."

⁶ Maꞌato miꞌi turan aimo­wepit hat Tupana tipo­ꞌoro raꞌyn urupo­wyro hat mehĩ Titu are. Putꞌokꞌe hawyi urumo­wepit kahato."

⁷ Miꞌi hawyi mehĩ Titu urumuꞌe kahato — Waku kahato miꞌiria e ehetiat. Uipo­wyro kahato miꞌiria e. Taꞌa­tu­ky­ꞌesat kahato Tupana ehay e ehetiat tohenoi. Taꞌa­tukuap emiwan hawyi paaꞌi­ꞌa­tuꞌe taꞌa­tu­minug saꞌag ete e Titu uhepe. Uruikyꞌe kahato te Pauru iꞌatuꞌe uhepiat pe. Miꞌi hawyi urumo­wepit kahato mio tã mehĩ Titu henoi ehetiat hawyi. Pyno typy urumo­wepit hap mehĩ Titu putꞌokꞌe hawyi tohenoi waku kahato ehetiat hawyi."

⁸ Saꞌa­wy­ꞌiwuat uimiwan ehowawiat eiꞌa­piheg kahato hap eimo­ꞌarot kahato hap paaꞌe­weiꞌe kahato hap. Miꞌi turan areꞌe uiwepe — Yt naku i kahato uimiwan are. Poꞌog waku yt karãpe i atipo­ꞌoro uimiwan are uiwepe. Maꞌato mio waku kahato atipuẽti uimiwan katu­pono eweiꞌaipok taꞌyn Tupana kape paaꞌe­weiꞌe hap. Saꞌa­wy­ꞌiwuat einãpin hap eiꞌa­piheg hap yt he hin i eweipuẽti yt eimo­wepit hin i pote. Maꞌato koitywy eimo­wepit poꞌog poꞌog. Miꞌi hawyi koitywy eweiwat raꞌyn einãpin uhepiat hap upi. Pyno koitywy uimiwan saꞌa­wy­ꞌiwuat ehowawiat uimo­wepit kahato."

⁹ Waku kahato uimiwan saꞌa­wy­ꞌiwuat katu­pono miꞌi kaipyi eiwe­morem kahato Tupana kape. Maꞌato saꞌa­wyꞌi ti haty yn eweipuẽti. Mekewat uimiwan eiꞌa­piheg kahato hap ewy topy­huꞌat. Miꞌi hawyi paaꞌe­weiꞌe kahato eiminug saꞌag ete. Miꞌi kaipyi woꞌo­wese hap eweipuẽti Tupana wywo. Miꞌi pote uimo­wepit hap ewy uimiwan saꞌa­wy­ꞌiwuat ehowawiat haty rakat pytkai."

¹⁰ Karãpe watu­we­mõti aiminug saꞌag ete Tupana ehamo iꞌewyte karãpe paawa­toꞌe aiwa­nẽtup hap saꞌag ete miꞌi hawyi wata­ꞌaipok aiminug saꞌag myi Tupana kape. Miꞌi hawyi aheha­kye­raꞌat raꞌyn. Watu­we­morem Tupana kape hawyi waku kahato ahete. Toiwaure raꞌyn aiminug saꞌag koꞌi. Miꞌi hawyi aimo­wepit kahato hap yn topy­huꞌat. Toiwaure yne aiminug saꞌag koꞌi. Miꞌi pote yt kat i poꞌog aimõti te hap topy­huꞌat. Miꞌi hawyi — Paaꞌwa­toꞌe hap tokosap taꞌyn watoꞌe are. Miꞌi hawyi — Waku kahato aheha­kye­raꞌat hat watoꞌe. Maꞌato yt wata­ꞌaipok i aiminug saꞌag kaipyi pote yt watu­we­mõti hin i e hamo. Miꞌi pote yt karãpe i aheha­kye­raꞌat hap toĩneꞌen. Aiꞌa­piheg hap wuatꞌi eꞌat piat yn topy­huꞌat aiku­ꞌuro sese hap. Miꞌi hawyi mesuwe yi tote yt karãpe i wati­puẽti mekewat aimo­wepit hap. Tupana tiwaure aiminug saꞌag hawyi yt kat i haty hap ahete aimo­wa­nẽtup hawe aiminug saꞌa­wy­ꞌiwuat etiat. Maꞌato yt pote haty hap topy­huꞌat aheĩneꞌen hap ok tã yt aimo­wepit hin i."

¹¹ Pywo ti rat karãpe wati­ꞌa­parap sese yt Tupana miky­ꞌesat ewy i hawyi waha­tyꞌi aiwa­nẽtup hawe watu­we­mõti kahato itote. Miꞌi hap Tupana tiky­ꞌesat kahato. Miꞌi hap ewy topy­huꞌat ehete eiwe­mõti hap mekewat eipy­ꞌa­setpiat hewaire waire rakat. Miꞌi hap atimo­herep ehepe hawyi paaꞌe­weiꞌe kahato Tupana miky­ꞌesat ewy. Miꞌi hawyi eweikup­teꞌen ipyꞌahak takaria wo iminug saꞌag ete. — Yt urumi­ky­ꞌesat ewy i eweiꞌe tope. Uruto­kenꞌẽ kahato eminug saꞌag pupi. Yt naku i ti rat eweiꞌe haty wo tope. Etoiat ro eminug saꞌag hawyi ereĩneꞌen no Tupana emiit sese wo. Mio tã eweiꞌe hawyi yne ikuap yt Tupana miky­ꞌesat ewy i tutunug saꞌag hap. Koitywy miitꞌin tikuap yt miꞌi tã nug haria i eipe hap. — Yt etunug poꞌog i raꞌyn o typuo i eweiꞌe hawyi."

¹² Eiweikuap kat pote uimiwan saꞌa­wyꞌi atipo­ꞌoro ehowawi einãpin haty wuat hap. Pyno ahenoi ehepe woro­ho­ꞌo­kyꞌe kahato moherep hamuat. Yt uheso hin i are. Taꞌi Tupana ehamo yt uheso hin i are. Pywo piat sese woro­ho­ꞌo­kyꞌe eipe hap. Yt atipo­ꞌoro i saꞌa­wyꞌi mekewat miwan eipy­ꞌa­setpiat iꞌaparap hap mohit hamo iꞌewyte imimaꞌat koꞌi mohit hamo wy. Maꞌato eiꞌywot ewy areĩneꞌen woro­ho­ꞌo­nãpin perup i popuo eikyꞌe haype are."

¹³ Pyno saꞌa­wyꞌi mehĩ Titu toto ehowawiat turan yt towepit hin i wywo toto. Maꞌato putꞌokꞌe turan imowepit kahato haria wo eweikup­teꞌen. Miꞌi hawyi koitywy iꞌewyte uruto uruwepit kahato mehĩ Titu henoi yne aikotã aikotã eweikup­teꞌen hap etiat hawyi urumo­wepit haria eipe."

¹⁴ Saꞌa­wyꞌi atipo­ꞌoro mehĩ Titu ehowawiat turan areꞌe tope — Aika­ꞌiwat mohey haria tawa Kurintiu piaria waku kahato rakaria are tope. Taꞌaipok hawyi tohenoi ehetiat aikotã areꞌe hap ewy tohenoi. Miꞌi hawyi pywo ti rat are. Taꞌi pywo are atiꞌa­tu­mohey kahato miꞌiria. Aikotã urutoꞌe saꞌa­wyꞌi pywo e hap ewy. Kurintiu imohey haria waku kahato rakaria are Titu pe."

¹⁵ Koitywy mehĩ Titu eikyꞌe kahato hat poꞌog poꞌog saꞌa­wy­ꞌiwuat kai. Miꞌi pote ehowawi yn iwanẽtup hap. — Taꞌi miꞌiria Tupana miky­ꞌesat nug haria e yn uruepe ehepiat pe. Yt toiwaure kuap i ehowawiat tuwa­nẽtup hap. — Uimõ­typot kahato miꞌiria e. Yt toimõto hin i tuwa­nẽtup hawe. Aikotã paaꞌe haria ewy eweikup­teꞌen itote — Ereke mehĩ ereke mimi eweiꞌe yn tope. — Hegyiꞌat kahato rakaria e yn uruepe ehepiat pe. Miꞌi hawyi ehowawi yn tuwa­nẽtup kahato."

¹⁶ Pyno woro­ho­ꞌo­mohey kahato eipe. Yt karãpiat i aru uimaꞌat haria eweipy­huꞌat. Ehewaku hap yn topy­huꞌat uiwa­nẽtup hawe.

Uito ti mesuwat miwan nug hat Pauru are.

"

8

¹ Pyno koitywy ahenoi teran ehepe aikotã yi Masẽ­tunia piaria koitywy tukup­teꞌen Tupana mipoi­tyro koꞌi wo tukup­teꞌen. Tegyiꞌat hap kaipyi toiꞌa­tu­kyꞌe miꞌiria. Pywo wuat miꞌiria Tupana tiꞌa­tu­poi­tynug poꞌog poꞌog neꞌi. Saꞌa­wyꞌi taꞌa­tu­mohey hawyi itotiaria miitꞌin weukaꞌi kahato haria miꞌiria. Taꞌi ihaky­ꞌeꞌi kahato rakaria wo teꞌe­ro­py­huꞌat itote miꞌiria. Aikotã yt iꞌatuekat hin i rakaria ewy tukup­teꞌen."

² Maꞌato miꞌi pytkai iꞌatu­wepit hap yn topy­huꞌat. Miꞌi pytkai taꞌa­tu­mõꞌẽ taꞌa­tuepiat ekat hit yne iraniaꞌin me. Poꞌog iꞌatue­gyiꞌat hekat rakaria kai taꞌa­tu­mõꞌẽ yne pote. Katu­pono taꞌa­tu­mõꞌẽ yne miitꞌin powyro hamo."

³ Teꞌe­ru­we­pyꞌa pyi taꞌatuium neꞌen neꞌi. Yne taꞌatuium kuap hap ok tã ihaky­ꞌeꞌi rakaria tawa Ieru­sarẽi miaria powyro hamo. Yt uheso i rat katu­pono iꞌatue­gyiꞌat sese miꞌiria."

⁴ — Uruipo­wyro kahato teran Aika­ꞌiwat mohey haria tawa Ieru­sarẽi miaria iꞌatuꞌe uhepe uruiꞌa­tu­kyꞌe kahato miꞌiria pote iꞌatuꞌe. Miꞌi pote urumo­wepit kahato etioto urumiium koꞌi hawyi iꞌatuꞌe yn uhepe typuo i typuo i. Saꞌa­wyꞌi urutoꞌe uruwo­ꞌope — Pyno taꞌatuium aru kurin taꞌa­tumiium ok tã. Miꞌi hawyi watioto tawa Ieru­sarẽi kape urutoꞌe uruwo­ꞌope. Maꞌato yt heĩpyt hin i taꞌatuim poꞌog uruwa­nẽtup hap kai."

⁵ Katu­pono — Tupana iꞌatuꞌe urutum neran urupiit epe iꞌatuꞌe. Miꞌi hawyi urupotpap hap kaipyi urutum neran yne ewawi. Miꞌi hawyi urutum yne Pauruꞌin me imiereto tawa Ieru­sarẽi miaria kapiat hamo iꞌatuꞌe Tupana pe. Miꞌi hawyi taꞌa­tunug Tupana piat taꞌa­tuꞌe hap ewy."

⁶ Saꞌa­wyꞌi uruipo­ꞌoro mehĩ Titu — Toꞌiro wati­ꞌa­tunug tawa Ieru­sarẽi miaria ihaky­ꞌeꞌi rakaria powyro hamo e. Pyno uruikuap mekewat yi Masẽ­tunia piaria iꞌatue­gyiꞌat kahato hap ete hawyi urutoꞌe — Pyno waku wati­po­ꞌoro i raꞌyn mehĩ Titu imohey haria tawa Kurintiu piaria nãpin aikotã waku watum ihaky­ꞌeꞌi rakaria pe hap etiat hamo urutoꞌe. Waku watunug imohey i haria yi Masẽ­tunia piaria ewy e hamo iꞌatue­gyiꞌat hap wywo urutoꞌe. Miꞌi hawyi uruipo­ꞌoro i raꞌyn ehowawi."

⁷ Uruiꞌa­tu­mohey kahato eipe uruwa­nẽtup hawe. Eweikuap kahato aikotã waku hãpyk nug hap ete. Howapy kahato imohey hap wywo eipe. Tupana Pãꞌãu ihay hesaika kahato eikaipyi. Tupana kuap haria sese eipe. Yt eipohep hin i Tupana miky­ꞌesat nug hap ete. Iꞌewyte wekyꞌe hap ete eweikuap kahato. Taꞌi yne miꞌi hap koꞌi ete poꞌog wakuaria wo eweikup­teꞌen. Pyno koitywy wahãꞌãg sio eipe poꞌog hegyiꞌat rakaria sio yt hap kuap hamo."

⁸ Pyno — Ewetum no yt areꞌe i haty wo ehepe. Yt ewetum i pote yt naku i yt areꞌe kuap i ehepe. Eipyꞌa pyi ewetum ihaky­ꞌeꞌi rakaria tawa Ieru­sarẽi miaria piat hap iꞌewyte iꞌatu­kyꞌe kahato wywo hap uruiky­ꞌesat. Miꞌi hawyi Tupana tikuap ehegyiꞌat hap tokyꞌe kahato hap. Waku wati­mo­herep imohey haria yi Masẽ­tunia ewy ehegyiꞌat hap."

⁹ Eipo­typot Iesui aikyꞌe kahato. Miꞌi hap eweikuap taꞌyn maꞌato ahenoi teran i raꞌyn. Hegyiꞌat kahato Miꞌi aikotã hekat sese rakat timõꞌẽ yne teka­reꞌen ihaky­ꞌeꞌi rakaria pe hap ewy Aika­ꞌiwat hegyiꞌat kahato. Saꞌa­wyꞌi sese yne kareꞌen topy­huꞌat ipo pe atipy pe. Miꞌi hawyi ahowawi tut atipy kaipyi. Miꞌi Miit ihaky­ꞌeꞌi rakat topy­huꞌat. Toimõꞌẽ yne tewaku hap ahowawi aikyꞌe haype. Miꞌi hap koꞌi watikuap taꞌyn. Maꞌato waku wato­py­huꞌat aikotã hegyiꞌat hap ewy uheka­tu­wyria are."

¹⁰ Gaꞌatpuat anu — Waku wati­ꞌa­tunug hawyi wati­po­ꞌoro ihaky­ꞌeꞌi rakaria tawa Ieru­sarẽi miaria imohey haria kape eweiꞌe wuatꞌi Iesui mohey haria iraniaꞌin eꞌyianmete."

¹¹ Pyno koitywy woro­ho­ꞌo­nãpin eipe — Ewetunug no aikotã eweiꞌe hap ewy. Eweiꞌa­tunug o eimiium koꞌi eimi­ky­ꞌesat ewy. Taꞌi eiwepit hap wywo wyti ewetum eimi­ky­ꞌesat ok tã. Waku watum aimiium Tupana kapiat haty wo iꞌatu­kyꞌe hap wywo. Waku watum aipap hap wywo. Waku wahoꞌoium ahekat koꞌi aimi­ky­ꞌesat ewy."

¹² Pyno kat koꞌi kat koꞌi watum Tupana kape aipyꞌa pyi ikyꞌe hap wywo miꞌi hawyi ewepit kahato. Iwato sio yt hap kape yt tuwa­nẽtup i miꞌi koꞌi kape. Tupana tiky­ꞌesat watum kuap hap ok tã tope. Yt toiky­ꞌesat i watum yt watum kuap i hap ok tã."

¹³ Yt naku i watum yne ahekat ihaky­ꞌeꞌi rakaria pe hawyi aito watoĩ­neꞌen ihaky­ꞌeꞌi rakaria wo neꞌi hap. Waku poꞌog wati­mõꞌẽ iꞌatuepe hawyi yne aito ahekat topy­huꞌat."

¹⁴ Pyno waku wati­mõꞌẽ ahekat iꞌatuepe katu­pono aiwat iꞌatu kahato pote maꞌato iꞌatuwat yt kat i i pote. Meiũran aru putꞌokꞌe ehepiat hoꞌopot hap eꞌat. Miꞌi hap eꞌat pe waku miꞌiria aipo­wyro aikotã aito wati­mõꞌẽ saꞌa­wyꞌi hap ewy."

¹⁵ Aikotã Tupana toꞌe saꞌa­wyꞌi miwan me — Yt naku i yt hegyiꞌat rakaria wo i watoĩ­neꞌen uiano yne e haria wo neꞌi. Yne aito hegyiꞌat rakaria wo watoĩ­neꞌen pote wati­mõꞌẽ aiwo­ꞌope. Miꞌi hawyi aiwo­ꞌo­ꞌe­wy­ꞌewy hekat rakaria wo watoĩ­neꞌen e Musei tomiwan Esutu 16.18 piat pe."

¹⁶ Uruwy­riaꞌin tawa Kurintiu piaria uruiꞌa­tu­kyꞌe kahato eipe. Koitywy aiwy Titu eikyꞌe aikotã urukyꞌe hap ewy. Eipo­wyro hap yn iwanẽtup hawe. Tupana tunug naꞌyn Titu eikyꞌe kahato hano. Miꞌi pote waku wahe­waku Tupana kape."

¹⁷ Wẽtup eꞌat pe watoꞌe mehĩ Titu pe — Waku eraꞌaipok tawa Kurintiu kape urutoꞌe. — Areto teran ni rat e hawyi toto yt uruipo­ꞌoro poꞌoro poꞌog pytkai i. Tuwe­pyꞌa pyi toto. Ipap kahato pote poꞌog torania kai."

¹⁸ Miꞌi hawyi wẽtup ok uruipo­ꞌoro mehĩ Titu wywo. Miꞌi ti aimuꞌe kuap kahato Tupana ehay wakuat etiat rakat. Wuatꞌi puat mikuap Iesui mohey haria mikuap kahato miꞌi are. Miꞌi pe ti — Wakuat kahato miꞌi iꞌatuꞌe."

¹⁹ Taꞌi torania Tupana mõtypot yat piaria miꞌairo ti meiũwat miit mekewat aimiium ereto tawa Ieru­sarẽi kapiat hamuat. Miꞌi hamuat iꞌatu­mi­ꞌairo iꞌatumiium iꞌatue­gyiꞌat hap moherep hamuat ium hamuat. Miꞌi urutum ihaky­ꞌeꞌi rakaria imohey haria tawa Ieru­sarẽi miaria pe. Miꞌi hawyi teꞌe­ru­wehum kahato Aika­ꞌiwat Iesui kape. Miꞌi hawyi iꞌatu­wepit kahato taꞌa­tukuap taꞌa­tu­kyꞌe kahato ehepiat hap hawyi."

²⁰ Iwato kahato aimiium urutioto. Miꞌi pote urutioto meiũwat miit eimi­ꞌairo miium koꞌi ereto hamo. Yt urutioto teran i katu­pono yt uruiky­ꞌesat i kahato iraniaꞌin toꞌope — Meiẽ Pauru ihoꞌosat aimiium koꞌi muꞌap upi tawa Ieru­sarẽi kapiat aimi­po­ꞌoro koꞌi e hap yt uruiky­ꞌesat i. Miꞌi pote eimi­ꞌairo tioto are."

²¹ Hãpyk kahato yn areĩneꞌen neran wuatꞌi miitꞌin wanẽtup hawe iꞌewyte Tupana wanẽtup hawe. Miꞌi pote yt atioto teran i mesuwat wuatꞌi miium wato koꞌi kat pote yt atiky­ꞌesat i miitꞌin teꞌe­ru­wa­nẽtup saꞌag uhowawi sio toho­ꞌosat sio yt iꞌatuꞌe hap ete."

²² Miꞌi pote eimi­ꞌairo po pe yne urutum hereto hamo. Eimi­ꞌairo waku kahato uruipuẽti aiwy sese. Yt karãpe i topot­maꞌat nimo pyi te aipo­wyro hat. Uruhãꞌãg kahato yne ete maꞌato yt karãpe i urumaꞌat. — Areto teran tawa Kurintiu kape e. Atiꞌa­tu­mohey kahato miꞌiria e imohey haria tawa Kurintiu piaria katu­pono taꞌatuium aru poꞌog watu­wa­nẽtup hap ok tã e uruepe."

²³ Uito hawyi mehĩ Titu aikotã wẽtup miit ewy yn urutu­kup­teꞌen eheropat hamo. Uiwy kahato mehĩ Titu are. Koitywy atipo­ꞌoro miꞌi iraniaꞌin wywo ehowawi. Tuwat yne hawyi areto. Miꞌiria uheꞌyianme tuwat. Waku eweiꞌa­tu­mohey miꞌiria katu­pono Iesui mohey haria yne. Tupana mõtypot yat piaria mipo­ꞌoro kat pote Aika­ꞌiwat mõtypot haria sese iꞌatu­ꞌairo. — Eiwe­hytꞌok eweiꞌe o iꞌatuepe aikotã eimikuap sese koꞌi piat ewy are."

²⁴ Eweiꞌa­tu­kyꞌe sese iꞌatu­mi­po­ꞌoro koꞌi pote — Imohey haria Kurintiu piaria iwese sese rakaria iꞌatuꞌe aru teꞌe­ra­ꞌaipok taꞌa­tue­tawa kape hawyi. — Waku imohey haria Kurintiu piaria iꞌatuꞌe Pauruꞌin e hap ewy aikyꞌe kahato haria miꞌiria iꞌatuꞌe aru are.

Pyno uito Pauru

"

9

¹ Pyno koitywy yt kat hamo i — Waku kahato wati­ꞌa­tu­mõꞌẽ ahekat koꞌi imohey haria ihaky­ꞌeꞌi rakaria tawa Ieru­sarẽi miaria pe yt kat hamo i areꞌe katu­pono ewetum neran."

² — Gaꞌatpuat anu urupotpap kahato hum hamo eweiꞌe uhepe. Meremo uruiꞌa­tunug urumiium muat ihaky­ꞌeꞌi rakaria imohey haria tawa Ieru­sarẽi miaria pe eweiꞌe. Mio tã eiꞌe hap ahenoi wuatꞌi imohey haria pe yi Masẽ­tunia piaria pe. Miꞌi hawyi teꞌe­roꞌe — Pyno uruto wy urutum iꞌatuꞌe. Miꞌi hawyi taꞌatuim taꞌa­tukuap eipe ewetum irane hap hawyi. — Tawa Kurintiu piaria yi Akaia piaria ewy watum iꞌatuꞌe toꞌope."

³ Miꞌi pote atipo­ꞌoro mehĩ Tituꞌin uheꞌyianme eimiium sio waku sio yt i te hap kuap hamo. Maꞌato areto yt eweiꞌa­tunug i te turan wuat pote wato­ꞌo­mõti te hap topy­huꞌat — Urutunug aru eiꞌe yt ewetunug i te pote."

⁴ Katu­pono areto aru yi Masẽ­tunia piaria wywo maꞌato — Urutunug aru eiꞌe hap yt ewetunug i turan yt naku i putꞌok­ꞌu­ru­toꞌe ehetawa pe eimiium sat hamo. Yt kat i pote yi Masẽ­tunia piaria toꞌo­ky­ryꞌi sese taꞌa­tu­pyꞌa pe. — Kat pote — Urutunug aru iꞌatuꞌe pytkai yt taꞌa­tunug i iꞌatuꞌe."

⁵ Miꞌi pote areꞌe mehĩꞌin Tituꞌin me — Uheꞌyian­mete eweiwat ro tawa Kurintiu kape are. Eweiꞌa­tu­nãpin miꞌiria — Waku aiwepit wywo watum e hap ete waku watum aipyꞌa pyi imohey haria ihaky­ꞌeꞌi rakaria tawa Ieru­sarẽi miaria pe e hamo. Pyno waku pe yne raꞌyn aimiium koꞌi taꞌa­tue­reto hap eꞌyianmete tawa Ieru­sarẽi kapiat hamo waku eweiꞌe o tawa Kurintiu piaria pe are Tituꞌin me tawa Kurintiu piaria nãpin hamo. — Waku watum aipyꞌa pyi hap yn eweiꞌe o are mehĩꞌin Tituꞌin me. — Yt naku i watum yt watum neran i pote waku eweiꞌe o are mehĩꞌin Tituꞌin me."

⁶ Pyno ahenoi ehepe hãꞌãkap wuat aikotã waku watum Tupana kape hap ete. Uwe uwe tikoi yt iwato i miꞌi hat aikotã toikoi hap ok tã toipuẽti. Maꞌato uwe uwe tikoi iwato miꞌi hat ipuẽti tepiat ikoi hap ok tã. Miꞌi hap ewy karãpe watum Tupana kape yt ahegyiꞌat wywo i pote meiũran aru yt kat i wati­puẽti yt ahegyiꞌat i pote."

⁷ Uiwy­riaꞌin Tupana tikyꞌe kahato hegyiꞌat sese rakat. Topyꞌa pyi toiky­ꞌesat kahato tutum Tupana kape hat. Yt toiky­ꞌesat i watum tope yt watum neran i wywo watum hap. Iꞌewyte yt toiky­ꞌesat i — Etum no maꞌato yt pote yt naku i pe ereĩneꞌen e wẽtup ok hap upi neꞌi watum hap. Tupana tiky­ꞌesat aiwehum kahato wywo watum aipyꞌa pyi hap tewawiat hap toiky­ꞌesat. Toiky­ꞌesat aimiium muat wati­ꞌairo yianmete kat som watum hap koꞌi."

⁸ Tupana hegyiꞌat sese ahepe. Tutum kuap ahepe poꞌog poꞌog watu­wa­nẽtup hap kai aipoi­tyro kuap kahato aikyꞌe haype. Yt ahewaku hap upi i tutum neꞌen neꞌi maꞌato aikyꞌe hap yn wywo. Miꞌi pote karãpe watunug neran wakuap imiky­ꞌesat turan aimoe­saika kahato inug hamuat poꞌog poꞌog watunug kuap kai. Tupana tikuap kahato ahepiat kat sepap hap kuap hamuat aimo­weꞌeg hamo. Tutum kuap poꞌog ahepiat hum hap tepiat hap kai."

⁹ Miꞌi hap ete Tupana toꞌe miwan me — Eheha­ky­ꞌeꞌi kahato uhepe. Yt woro­ho­ꞌoe­waure hin i eipe ihaky­ꞌeꞌi rakaria e. Atikuap haty ehete hap koꞌi e. Woro­ho­ꞌo­po­wyro eipe wuatꞌi eꞌat pe e morekuat Tawi wepy 112.9 pe. Miꞌi hap kaipyi watikuap hegyiꞌat kahato hap."

¹⁰ Pywo ti rat aipoi kahato hat Tupana. Yne aimikoi nug hat saꞌa­wyꞌi kat koꞌi kat koꞌi watikoi Tupana inug hap kaipyi. Miꞌi pote yne miꞌi tut Tupana po pyi. Tupana timo­wato yne aimikoi koꞌi aiko moehaĩte hat. Tupana tikuap kahato aikotã mowato hap aito hegyiꞌat rakaria watoĩ­neꞌen pote. Wati­mõꞌẽ hap ok tã tutum ahepe."

¹¹ Tupana timo­wato kuap ahekat koꞌi. Yne aiminug koꞌi toipoi­tyro kuap watoĩ­neꞌen hegyiꞌat ahekat koꞌi wo pote. Wati­mõꞌẽ ihaky­ꞌeꞌi rakaria pe pote Tupana kape teꞌe­ru­wehum ahegyiꞌat hap upi."

¹² Pyno wati­po­ꞌoro aimiium ihaky­ꞌeꞌi rakaria imohey haria tawa Ieru­sarẽi miaria kape hawyi — Waku kahato En Tupana iꞌatuꞌe aru. Yt wesok i te haria hin i tawa Kurintiu piaria iꞌatuꞌe aru ihaky­ꞌeꞌi rakaria powyro hamo. Koitywy uruikuap emohey haria tukup­teꞌen iꞌatumiium kaipyi. Koitywy waku ahete kat pote tokosap taꞌyn aheha­ky­ꞌeꞌi hap uruete Tupana iꞌatuꞌe haty wo torania wati­mõꞌẽ ahekat koꞌi pote."

¹³ — Tupana iꞌatuꞌe Esaꞌyru ehay upiaria emohey haria tawa Kurintiu piaria iꞌatuꞌe aru. Emipo­ꞌoro Aipo­rekuat nuat ehay wakuat nug haria miꞌiria iꞌatuꞌe aru Tupana pe. Taꞌa­tu­mõꞌẽ uruepe hãpyk kahato iꞌatuꞌe. Yt uwe pe i poꞌog toꞌo­ku­pitu kupitu kahato hegyiꞌat sese rakaria ewy iꞌatuꞌe aru Tupana pe."

¹⁴ — Tupana tawa Kurintiu piaria emohey haria ekaipyi tukup­teꞌen hegyiꞌat sese rakaria. Miꞌi pote etiꞌa­tu­poi­tyro o miꞌiria katu­pono koitywy uruikyꞌe kahato miꞌiria. Etimo­herep iꞌatuepe aikotã uruiꞌa­tu­kyꞌe miꞌiria hap koꞌi iꞌatuꞌe aru Tupana pe. Eimi­po­wyro koꞌi tawa Kurintiu piaria iꞌatuꞌe."

¹⁵ — Tupana yt uwe i poꞌog hegyiꞌat ekai. Emiium iwato poꞌog torania kai urutoꞌe. Esaꞌyru wẽtup ok yn nakat etum pote Tupana urutu­wehum ewawi urupyꞌa pyi. Maꞌato yt karãpe i uruehay putꞌokꞌe emiium Esaꞌyru etiat enoi yne hamo urutoꞌe.

Pyno waku kahato En urutoꞌe are. Uruto ti Esaꞌyru mohey haria are. Pyno waku are uito Pauru.

"

10

¹ Uito ti eimuꞌe hat sese saꞌa­wy­ꞌiwuat. Haꞌa­wyte Tupana uipo­ꞌoro ehowawi. Miꞌi turan woro­ho­ꞌo­nãpin perupꞌi puo aikotã Aika­ꞌiwat Iesui ainãpin hap ewy aikyꞌe hap wywo. Saꞌa­wyꞌi ihaky­ꞌeꞌi haky­ꞌeꞌi rakano uito areĩneꞌen eipy­ꞌa­setpe turan poꞌog yi kape. Maꞌato koitywy areĩneꞌen pya eikai. Miꞌi pote woro­ho­ꞌo­nãpin uimiwan me haty wo uiwe­mõ­typot wywo."

² Uimohit kahato iraniaꞌin eipy­ꞌa­set­piaria. — Pauru yt Tupana mipo­ꞌoro hin i eweiꞌe. Ahekat koꞌi kyꞌewi neꞌi aimuꞌe eweiꞌe. Eheso sese rakaria eipe yt areꞌe teran i miꞌiria pe iꞌatuewa pe. Miꞌi pote miwan me yn areꞌe iꞌatuepe. Eiweꞌeg wo o are. Mio tã eweiꞌe motꞌi pote eheso are aru ehowa pe. Uiwy­riaꞌin tawa Kurintiu piaria ahẽtup ehupi uipyꞌa pyi haty wo yt uimohit reiꞌo ehehay wo."

³ Taꞌi eiꞌe­wywuat re uito ipuꞌi rakat ikag nakat re. Maꞌato uhesaika hap yt tut i uipiit kaipyi. Tupana Pãꞌãu kaipywiat rat neꞌi wyti uhesaika hap toĩneꞌen. Miꞌi kaipyi neꞌi wyti uhesaika ahiag uka hamo."

⁴ Aito imohey haria watoĩ­neꞌen aikotã surara koꞌi ewy. Maꞌato aipo­ryꞌa koꞌi tuweupiat raꞌyn. Yt mesu­wa­rotiat wuꞌuka hap ewywuat i katu­pono poꞌog poꞌog hesaika iꞌatukai. Miꞌi koꞌi wywo Tupana aipo­wyro kahato miꞌi koꞌi yt naku i nug hat akit hamo. Aiminug saꞌag koꞌi aikotã wanĩ­kaptia ewy topy­huꞌat."

⁵ — Uito poꞌog iraniaꞌin kai e hat yt tuwa­nẽtup kuap kuap i Tupana kape. Miꞌi hawyi Tupana topy­huꞌat yt Tupana wo hin i. Aiwa­nẽtup saꞌag hap topy­huꞌat Tupana ete. Maꞌato Tupana aimoe­saika miꞌi wanẽtup saꞌag hap pun hamo. Miꞌi hawyi Aika­ꞌiwat Iesui yn toĩneꞌen aiwa­nẽtup hawe Aipo­rekuat no. Miꞌi hawyi Aika­ꞌiwat ehay yn aiwa­nẽtup hawe. Iꞌewyte aiwa­nẽtup hap aheha wywo Aika­ꞌiwat timo­hãpyk kuap yne."

⁶ Maꞌato yt wati­ky­ꞌesat i aimo­hãpyk hap pote miꞌi hawyi Aika­ꞌiwat Iesui aiꞌa­piheg katu­pono toikuap kahato aiwa­nẽtup hap koꞌi. Toikuap kahato eipe Kurintiu piaria sio uimohit hap eiwa­nẽtup hap sio yt. Miꞌi pote eiweꞌeg wo o are."

⁷ Tukup­teꞌen aipy­ꞌa­setpe — Uruto Aika­ꞌiwat Iesui emiit sese e haria. Miꞌiria pe urutoꞌe — Eipe Iesui emiit sese pote miꞌi pote eweikuap meremo uruto eiꞌe­wy­wuaria te hap. Eiwe­haꞌat ro urueko kape miꞌi hawyi eweikuap uruto Aika­ꞌiwat eropat haria sio sese hap."

⁸ Haꞌa­wyte Tupana uruꞌairo uruepiat eimuꞌe hamo iꞌewyte eiꞌa­pykok hamo. Yt aremõti hin i Tupana piat uiꞌairo hap ete are at kaꞌap. Maꞌato tukup­teꞌen eipy­ꞌa­setpe yt ikyꞌesat i areꞌe — Tupana uruꞌairo eiꞌa­pykok hamo are hap. Maꞌato Tupana tiꞌairo uruto. Toikuap eikyꞌe hap yn uruto hap. Yt kat i eimaꞌat hap urukai hap toikuap. Toikuap Tupana ehay etiat eimotag hap eimuꞌe tehay etiat hap. Miꞌi pote uruꞌairo uruepiat eiꞌa­pykok hamo."

⁹ Uiwy­riaꞌin yt eweikenꞌẽ uipupiat hamuat i pote mesuwat miwan atipo­ꞌoro. Yt atipo­ꞌoro mesuwat miwan maꞌato ehowawi miitꞌin mohit hamuat neꞌi."

¹⁰ Iraniaꞌin eipy­ꞌa­setpe yt uikyꞌe i haria — Pywo ti rat Pauru aiꞌa­piheg kahato tomiwan me iꞌatuꞌe. Eweikuap kat pote iꞌatuꞌe. Tokenꞌẽ kahato aipy­ꞌa­setpe toꞌe ahepiat hamo iꞌatuꞌe. Yt ipoityꞌi hin i iꞌewyte yt ihay se hin i aimuꞌe turan iꞌatuꞌe."

¹¹ Eiweꞌeg wo o uwe uwe eipy­ꞌa­setpiat toꞌe mio tã e urumohit haria. Urutoꞌe kuap ehowa pe aikotã urumiwan me hap ewy. Eiwa­tetup miꞌi hap kape katu­pono uruiꞌa­piheg kuap."

¹² Tukup­teꞌen eipy­ꞌa­setpe — Aito poꞌog iraniaꞌin kai iꞌatuꞌe toꞌope haria. Maꞌato uruto yt iꞌatu­ꞌe­wywuat hin i koꞌi urutoꞌe. — Uruto poꞌog eikai iꞌatuꞌe teꞌe­ru­wa­nẽtup ahepiat pe. Miꞌi tã wanẽtup haria yt iꞌatu­weꞌeg hin i katu­pono toꞌope toꞌo­ꞌa­kasa hap kaipyi teꞌe­roꞌe — Uito poꞌog iꞌatuꞌe teꞌe­ru­wa­nẽtup hawe. Yt iꞌatu­weꞌeg hin i katu­pono yt teꞌe­ru­wa­nẽtup hin i sio iꞌatue­waku hap putꞌokꞌe sio yt Aika­ꞌiwat ewaku hap ok tã hap kape."

¹³ Uruto eiꞌa­pykok haria pytkai yt karãpe i urutoꞌe uruwa­nẽtup hawe — Uruto poꞌog eikai yt urutoꞌe i iraniaꞌin eipy­ꞌa­set­piaria — Uruto poꞌog e haria ewy. Tupana uruꞌairo eheropat haria ewy yn. Yne uruewaku hap koꞌi uruepiat sepap hap koꞌi yt kat i tuwẽtem uruwe­kaipyi neꞌi."

¹⁴ Saꞌa­wyꞌi Tupana urupo­ꞌoro ehowawi. Tomi­po­ꞌoro Tosa­ꞌyru Aipo­rekuat nuat ehay wakuat moherep hamo. Miꞌi hawyi urutoꞌe ehowawi iꞌe hap ewy. Yt uruiwaure hin i eipe pytkai urutuwat wẽtup ywania kape."

¹⁵ Aikope aikope Tupana urupo­ꞌoro miꞌi hap kape yn urutuwat. Yt karãpe i uruipo­hari iraniaꞌin potmuꞌe neꞌi urupot­muꞌe wo. Iraniaꞌin teꞌe­roꞌe ehepe — Eipe uruimuꞌe Pauruꞌin eꞌyianmete iꞌatuꞌe ehepe urupo­hari teran haype. — Eheso eweiꞌe o miꞌiria pe. Ehehãite sese Iesui mohey hap ete hawyi — Pauruꞌin uruꞌa­pykok haria eweiꞌe. Mio tã eweiꞌe hawyi uruto yt kat hamo i raꞌyn urutoꞌe i. Miꞌi hawyi wẽtup ywania kape urutuwat yt ikuap i te haria kape."

¹⁶ Uiwy­riaꞌin tawa Kurintiu piaria iꞌatu kahato te iraniaꞌin ywania yt taꞌa­tukuap i te Iesui etiaria. Miꞌiria tukup­teꞌen eheꞌyi ehetawa ekuekai poꞌog poꞌog pya wẽtup hy ete. Miꞌi pote urutuwat teran yt taꞌa­tukuap i te sehay wakuat Iesui etiat haria kape. Aikope yt uwe i te toto hap kape. Miꞌi kape watuwat pote yt uwe i itote teꞌe­roꞌe ahepe — Kat pote urumi­mu­ꞌeria eweipo­hari teran neꞌi yt iꞌatuꞌe kuap i ahepe watuwat yt ikuap i te haria kape hawyi."

¹⁷ Aikotã Tupana toꞌe miwan me hap ewy. — Karãpe woro­ho­ꞌo­po­wyro kahato wakuat nug hap ete miꞌi hawyi yt naku i eweiꞌe — Uito atunug uhesaika hap wywo uipo wo uito poꞌog kahato pote yt naku i mio tã eweiꞌe neꞌi e. Poꞌog waku eweiꞌe — Tupana esaika hap wywo atunug waku eweiꞌe e miwan me."

¹⁸ Yt naku i watoꞌe — Uito poꞌog Tupana eropat hat sese pãi yt naku i watoꞌe. Poꞌog waku wahe­katup Tupana kaipyi — En uheropat hat sese e hap. Miꞌi hap eꞌat pe yne ikuap Tupana wẽ kaipyi Tupana emiit sese hap. Miꞌi hap eꞌat pe imimõ­typot no watoĩ­neꞌen are uito eimuꞌe hat Pauru.

"

11

¹ Pyno woro­ho­ꞌo­kyry teran kurin miꞌi pote eweiwa­nẽtup to aikotã yt uiweꞌeg i hap kape hesoꞌok takat ewy."

² Uiwy­riaꞌin tawa Kurintiu piaria areĩneꞌen eiꞌywot ewy. Eipe eweikup­teꞌen uhakiꞌyt ewy yt karãpiat heꞌaito i te rakat ewy. Aika­ꞌiwat Iesui toĩneꞌen aikotã uhakiꞌyt ehaytuwy ewy. Miꞌi pote uheha­ꞌy­wywi kahato ehete. Yt atiky­ꞌesat i iraniaꞌin neꞌi eꞌaito wo. Atiky­ꞌesat Iesui yn eꞌaito wo. Taꞌi uheha­ꞌy­wywi kahato ehete aikotã Tupana ihaꞌy­wywi hap ewy aikotã eꞌywot ewy areĩneꞌen uhakiꞌyt are."

³ Saꞌa­wyꞌi sese ahiag timaꞌat mana Ewa moiꞌok wẽ pyi. Tehay wo totekyi Tupana kaipyi. Miꞌi hap ewy hap pupi arekenꞌẽ kahato. Arekenꞌẽ kahato ahiag tihep eipe Aika­ꞌiwat Iesui po pyi hap pupi. Aika­ꞌiwat Iesui mohey hap yn aheha­kye­raꞌat kuap. Miꞌi pote wẽtup mohey hap yn toĩneꞌen Tupana kape."

⁴ Uimogyt kahato eipe katu­pono eweimohey yne miitꞌin mienoi koꞌi. Putꞌokꞌe wẽtup ok itote hawyi wẽtup Iesui etiat eimuꞌe yt uruepiat eimuꞌe hap ewy hin i. Miꞌi hawyi — Pywo eweiꞌe kahato. Eꞌe hap ewy eweiꞌe tope. Miꞌi hawyi putꞌokꞌe wẽtup i raꞌyn hawyi toꞌe ehepe — Atum neran wẽtup pãꞌãu ehepe. Miꞌi hawyi — Waku mehĩ waku mimi eweiꞌe tope yt eiweꞌeg hin i. Miꞌi hawyi putꞌokꞌe wẽtup ok wẽtup ehay enoi hat yt Aika­ꞌiwat Iesui wakuat ewy hin i. Miꞌi hawyi — Pywo eweiꞌe miꞌi pote uimogyt sese eipe katu­pono — Pywo eweiꞌe yne eimuꞌe haria pe. Miꞌi pote eiweꞌeg wo o are ehepe."

⁵ — Tupana mipo­ꞌoro sese uruto iꞌatuꞌe ehepe eimuꞌe hamo. Urupo­ꞌoro uruto poꞌog Tupana mipo­ꞌoro Pauru kai iꞌatuꞌe. Iꞌatueso kahato neꞌi katu­pono areĩneꞌen Iesui miꞌairo sese ipotpo­ꞌo­roria 12 ok takaria ewywuat areĩneꞌen are."

⁶ — Pauru ehay yt ikahu hin i iꞌatuꞌe. Maꞌato miꞌiria pe Pywo are uhehay yt ikahu i eiwat ewy maꞌato uhehay hesaika kahato einãpin Tupana weꞌeg hap etiat hamo. Yne apoꞌeiꞌe hap atiwesat kuap yne. Miꞌi hap uiweꞌeg hap Tupana kaipyi eweikuap kahato raꞌyn."

⁷ Haꞌa­wy­tepyi te mesup te woro­ho­ꞌo­muꞌe eipe sehay wakuat Iesui etiat. Yt wẽtup mo i woro­ho­ꞌo­muꞌe haꞌup ete. Miꞌi hawyi — Pauru piat aimuꞌe hap yt kat hamo i atum haꞌup kat pote yt ihay se i pote eweiꞌe. Taꞌi uimohit kahato uhegyiꞌat hap ete. Yt kat hamo i aremohit eipy­ꞌa­setpe. Poꞌog waku haꞌup ete aru woro­ho­ꞌo­muꞌe miꞌi hawyi uimõ­typot haria wo eweikup­teꞌen."

⁸ Haꞌa­wyte woro­ho­ꞌo­muꞌe at kaꞌap yt kat saꞌup ete i maꞌato eweikuap uwe tum eimuꞌe hap saꞌup. Pyno ahenoi ehepe. Iraniaꞌin Iesui mohey haria aikope aikope teꞌe­ru­wa­ꞌa­tunug hap kaipyi miꞌiria tipo­ꞌoro uhowawi eimuꞌe hamuat saꞌup. Areĩneꞌen seroꞌokꞌe hat ewy katu­pono iꞌatuwat iꞌatu­saꞌup kaipyi areĩneꞌen eipy­ꞌa­setpe. Yt kat i ewetum uhepe."

⁹ Yt karãpe i areĩneꞌen neran ahẽtup hẽtup kat koꞌi kat koꞌi eikaipyi teran. Saꞌa­wyꞌi areĩneꞌen eipy­ꞌa­setpe turan uiwe­kaipyi arenuk. Miꞌi hawyi uhesyꞌat eipy­ꞌa­setpiat areĩneꞌen turan tõꞌẽ kahato imohey haria yi Masẽ­tunia piaria uhowawi kat koꞌi kat koꞌi taꞌa­tumiium koꞌi erut hamo. Miꞌi kaipyi areĩneꞌen eipy­ꞌa­setpe yt kat i ahẽtup ehepe. Iꞌewyte yt ahẽtup i aru ehepe."

¹⁰ Uiwa­nẽtup hawe — Waku kahato atiꞌa­tu­muꞌe yt kat saꞌup ete i. Miꞌi pote yt kat i ahẽtup uimi­mu­ꞌeria koꞌi kaipyi. Yt areĩneꞌen i eiꞌokpe tote yi Asia pe areĩneꞌen eipy­ꞌa­setpe turan. Yt uheso hin i karãpe areꞌe yt kat saꞌup ete i woro­ho­ꞌo­muꞌe are ehepe. Iꞌewyte Aika­ꞌiwat Iesui tikuap yt uheso i hap kat pote toĩneꞌen uipyꞌa pe."

¹¹ Miꞌi hawyi iraniaꞌin teꞌe­roꞌe eipy­ꞌa­setpe toꞌope uruetiat. — Pauru yt aikyꞌe i miꞌi pote yt toiky­ꞌesat aikaipyi kat koꞌi kat koꞌi. Pywo ti rat Tupana tikuap woro­ho­ꞌo­kyꞌe kahato uhepiat hap."

¹² Eweikuap kat pote yt ahẽtup i eikai eimuꞌe hap saꞌup. Pyno ahenoi ehepe. Tukup­teꞌen eipy­ꞌa­setpe — Eimuꞌe haria Pauru ewy kahato iꞌatuꞌe ehepe maꞌato yt pywo pe i katu­pono ehekat koꞌi kyꞌewi yn eimuꞌe. Waku apoꞌe­weiꞌe iꞌatuepe — Eipe Pauru ewy eweiꞌe pytkai kat pote ewehẽtup haꞌup urukaipyi eweiꞌe o iꞌatuepe. Miꞌi hawyi yt eiwesat kuap i kat pote yt uiꞌewy i pote. Miꞌi pote yt karãpe i ahẽtup eikaipyi haꞌup. Yt urusai­pe­piaria hin i miꞌiria."

¹³ — Pyno Tupana mipo­ꞌo­roria sese uruto iꞌatuꞌe ehepe maꞌato yt pywo pe i iꞌatuꞌe ehepe miꞌi tã maꞌato eimaꞌat reran haype. Taꞌi teꞌe­ru­we­po­ꞌoro eiꞌakag wo teꞌe­roꞌe hamo — Taꞌi 12 ok takaria ewywuat koꞌi uruto iꞌatuꞌe. Aika­ꞌiwat Iesui potmu­ꞌeria koꞌi uruto iꞌatuꞌe eimaꞌat reran haype. Iesui urupo­ꞌoro ehowawi iꞌatuꞌe ehepe yt pywo pe i iꞌatueso neꞌi."

¹⁴ Nimo pyi te ahiag timaꞌat kuap miitꞌin. Tuwe­mo­herep miitꞌin me hẽtyhot hap ewy — Uito Tupana mipo­ꞌoro tehay moherep ehepiat hamuat e yt pywo pe i. Iꞌewyte ahiag emiit koꞌi aikotã taꞌa­tu­ka­ꞌiwat ewy tukup­teꞌen eipy­ꞌa­setpe uiꞌe hap ewy."

¹⁵ Ahiag mẽpytꞌin koꞌi aikotã taꞌa­tu­ꞌywot ewy tukup­teꞌen. Aimaꞌat kuap toꞌywot ewy. Iꞌatuwẽ pyi — Uruto waku nug haria kahato iꞌatuꞌe. Maꞌato iꞌatu­minug yt iꞌatuehay ewy hin i tuwẽtem. Miꞌi pote meremo yt watikuap i sio aimaꞌat sio yt hap maꞌato meiũran watikuap. Iꞌatu­ꞌa­piheg hap eꞌat pe Tupana timo­herep wuatꞌi ehamo iꞌatu­minug saꞌag koꞌi. Miꞌi hap eꞌat pe iꞌatu­ꞌa­piheg hap putꞌokꞌe iꞌatu­minug saꞌag hap ok tã."

¹⁶ — Pauru ti yt iweꞌeg i sese rakat iꞌatuꞌe. Uruto poꞌog iꞌatuꞌe. Are pãi yt karãpe i areꞌe — Uito poꞌog are. Maꞌato areꞌe teran pote areꞌe kuap. Pyno ipoityꞌi ete aremo­wato kuap areꞌe teran iraniaꞌin ewy pote maꞌato ahenoi hawyi yt uiweꞌeg hin i hat ewy areĩneꞌen. Maꞌato iꞌewyte areꞌe hawyi waure wo o eweikup­teꞌen uiꞌe hap ete yt iweꞌeg i rakat areĩneꞌen pote."

¹⁷ Karãpe ahenoi uiminug wakuat ete yt uiweꞌeg hin i katu­pono Tupana yt tiky­ꞌesat i watu­we­mõ­typot hap."

¹⁸ Maꞌato eipy­ꞌa­set­piaria eimuꞌe haria teꞌe­ru­we­mõ­typot yn taꞌa­tuehay wywo — Uruto poꞌog torania kawiat Tupana mipo­ꞌoro koꞌi iꞌatuꞌe. Yt pywo hin i are — Uito poꞌog eikai. Yt uiweꞌeg hin i mio tã are. Maꞌato iꞌatuꞌe hap ewy areꞌe yt iweꞌeg i rakat ewy."

¹⁹ Uiwy­riaꞌin Kurintiu piaria — Aito poꞌog aiweꞌeg kahato torania kai eweiꞌe eiwo­ꞌope. Mio tã eweiꞌe kat pote eweiky­ꞌesat eimaꞌat reran haria yt iꞌatu­weꞌeg i rakaria. Yt eiweꞌeg hin i miꞌi tã ewetunug mote."

²⁰ — Eipotpap to uruemiit no yt kat saꞌup ete i iꞌatuꞌe ehepe haty wo. Miꞌi hawyi — Urutunug eiꞌe hap ewy mehĩꞌin mimiꞌin eweiꞌe eimaꞌat haria pe. Yt eiweꞌeg hin i katu­pono ehekat koꞌi yne taꞌa­tusat. Ihaky­ꞌeꞌi rakaria wo eweikup­teꞌen eimuꞌe hap saꞌup mo ewetum yne hawyi. — Uruto poꞌog eikai iꞌatuꞌe hawyi — Pywo eweiꞌe ehowa petek turan eimohit hamo. Miꞌi taꞌa­tunug yne ehete pytkai eipe — Uruꞌa­pykok haria akag eweiꞌe. Urumuꞌe haria sese eipe eweiꞌe iꞌatuepe yt eiweꞌeg hin i."

²¹ Uito yt miꞌi tã hin i areĩneꞌen eipy­ꞌa­setpe turan. Eimõ­typot hat areĩneꞌen. Woro­ho­ꞌo­mõꞌẽ aikotã eiwy sese ewy. Miꞌi pytkai uimohit uhehay ete. Yt karãpe i atunug kuap iꞌatu­minug ehetiat ewy. Uhesaika hap yt putꞌokꞌe i miꞌi saꞌag nug hamo. Yt teꞌe­ro­kenꞌẽ hin i teꞌe­ru­we­mõ­typot hamo. Pyno ahãꞌãg iꞌewyte uhewaku hap moherep hamo."

²² — Uruto poꞌog iꞌatuꞌe. Uruikuap Iuteuria pusu iꞌatuehay potꞌi iꞌatuꞌe. Uito poꞌog atikuap kat pote uipusu sese pote. — Aseꞌi Isareu emiari­ruꞌin sese uruto iꞌatuꞌe. Uito iꞌewyte Isareu ywania te wy are. Urueꞌa­seꞌi saꞌa­wy­ꞌiwuat eimia­riru sese koꞌi uruto iꞌatuꞌe. Iꞌewyte uito Aparãu saipepiat sese wy are."

²³ — Uruto Aika­ꞌiwat Iesui eropat haria sese iꞌatuꞌe. Maꞌato uito poꞌog iꞌatukai are. Mio tã pote yt iweꞌeg i rakat miꞌiria wemo­wato haria ewywuat areĩneꞌen. Yt uiweꞌeg hin i maꞌato pywo pe areꞌe poꞌog Aika­ꞌiwat emiit areĩneꞌen iꞌatukai. Uito poꞌog iꞌatukai uipotpap. Yt uwe i uhete putꞌokꞌe Aika­ꞌiwat potpap nug hap ete. Yt uiweꞌeg hin i mio tã are maꞌato pywo pe areꞌe. More­kuaria uipyhyp poꞌog miꞌiria kai uhehay Iesui etiat pyhyp teran haype. Yt atikuap karania wo uiꞌahyk ahyk itote yt taꞌa­tu­ky­ꞌesat uhehay Iesui etiat pote. Uiꞌatoiat uiku­ꞌuro turan karania wo."

²⁴ Saꞌa­wyꞌi areto Tupana ehay moherep hap upi turan uito uiꞌahyk ahyk kahato Iuteuria yt mohey i haria 5 wo uiꞌahyk ahyk. Pywo ti rat 39 wo uiꞌape ete woꞌo­ꞌahyk hap 9 haity saꞌag kahato rakano uiku­ꞌuro hap kape. Miꞌi hap ewy 5 tawa pe Iuteuria tunug uhete."

²⁵ Haty kahato uhete uiꞌahyk ahyk hap wiaꞌyp mo. Myeꞌym mo Huma­nuꞌin tunug uhete hawyi uiꞌatoiat. Wẽtup eꞌat pe uimak mak nu koꞌi wo uiꞌauka hamo. Uhewyry yꞌy wato totiat yara wato puat turan myeꞌym wo yara wato uito hap ywytu uato tiꞌa­pymin nu ete pikꞌe yne. Miꞌi hawyi yꞌy wato pe areĩneꞌen wẽtup ewãtym iꞌewyte wẽtup eꞌat yꞌy wato ihy pya kahato rakat pe."

²⁶ Uhero kahato uhewyry kahato Tupana ehay moherep hamuat pote. Ahoꞌopot kahato muꞌap upi yꞌy upi ihy esaika kahato pote. Seroꞌokꞌe haria uiꞌauka teran yne uhewyry hap upi Aika­ꞌiwat ehay moherep hamuat turan. Iꞌewyte uiꞌauka teran Iuteuria. Iꞌewyte iraniaꞌin ywania uiꞌauka teran. Tawa wato piaria uikat uiꞌauka hamo. Niatpo kahato uhewyry hap atipuẽti. Arekenꞌẽ kahato areto gaꞌapy koro kapiat turan sio uiku­ꞌuro sio yt. Yꞌy wato uipo­ha­raꞌi kahato areto sakpo turan. Muꞌap upi teꞌe­roꞌe uhepe — Uruto Iesui mohey haria iꞌatuꞌe maꞌato yt pywo pe i uimaꞌat reran uiꞌauka hamo neꞌi."

²⁷ Uhero kahato uhewyry kahato pote uhatyꞌi kahato. Karania ewãtym neꞌi yt areket kuap i kat pote arekenꞌẽ kahato sio uiket kai uiꞌauka. Iꞌewyte uhesyꞌat kahato areĩneꞌen yt kat i miꞌu pote. Areꞌy­ꞌutui kahato maꞌato yt kat i yꞌy areto yahig wato ekuekai turan. Karania eꞌat yt kat i atuꞌu. Uhenaꞌak kahato wywo uhewyry yt kat i uheꞌog yt kat i uhesokpe koꞌi uimo­sakup hamo."

²⁸ Pywo ti rat ahoꞌopot kahato Iesui ehay sytpok hamuat hap upi. Uiꞌa­kagꞌaia kahato uhewyry hap upi. Arewa­nẽtup kahato iraniaꞌin imohey haria iraniaꞌin tawa piaria kape sio taꞌa­tu­mohey te sio yt hap kape sio tuꞌuka toꞌope sio yt sio iꞌatue­hãite sio yt hap koꞌi kape yn arewa­nẽtup. Uhehatꞌat iꞌatu­ky­ꞌewi. Yne eꞌat yne iꞌatu­ꞌa­pykok hano areĩneꞌen uiwa­nẽtup hawe uipyꞌa pe. Atiky­ꞌesat iꞌatuehay Iesui mohey hap ete yn uiwa­nẽtup hap."

²⁹ Karãpe wẽtup ok Iesui mohey hat iꞌaparap miꞌi hawyi ahatyꞌu kahato uhete haty kahato. Areto teran ipowyro hera­ꞌaipok Tupana kapiat hamo. Karãpe wẽtup ok Iesui mohey hat totoiat iraniaꞌin towy­riaꞌin imohey haria wẽtup ok iꞌatu­py­ꞌa­setpiat ihay saꞌag tuete pote miꞌi hawyi areto teran meremo woꞌo­wese hap nug yt iwese rakat i wywuat hamo."

³⁰ Taꞌi — Uruto poꞌog Pauru kai iꞌatuꞌe eimuꞌe haria. Miꞌiria yt atiꞌa­tu­wesat teran i wen maꞌato atiꞌa­tu­wesat. Wuatꞌi ete poꞌog areĩneꞌen iꞌatukai maꞌato uhehay yt iweꞌeg i rakat ewy. Yt karãpe i ahenoi teran uhewaku hap miꞌiria ewy. Poꞌog waku ahenoi miitꞌin me aikotã uhewaku hap yt putꞌokꞌe hin i Aika­ꞌiwat Iesui ewaku hap ete. Miꞌi hap poꞌog waku ahenoi miitꞌin me. Waku yt hesoꞌok takat ewy i uhehay uito are."

³¹ — Tupana waku kahato En. Wuatꞌi eꞌat pe etikuap aikotã ahoꞌopot Esaꞌyru ehay moherep hamuat. Etikuap yt uheso i mesuwat uimiwan me hap. Esaꞌyru Aika­ꞌiwat iꞌewyte ikuap yt uheso i hap."

³² Yt uheso i saꞌa­wyꞌi areĩneꞌen tawa Tamaku pe turan. Toĩneꞌen itote morekuat Areta. Miꞌi ti ipoꞌoro tesu­ra­raꞌin uiꞌa­piheg hamo. Miꞌi hawyi sura­raꞌin tipyhyp yne tawa wato pyhyp hap yi pype koꞌi uipyhyp hamo. Miꞌi hawyi tawa ewato iheg me toĩneꞌen. Yt arẽtem kuap i."

³³ Miꞌi turan areꞌe — Uiꞌauka aru are. Maꞌato uiwy­riaꞌin uheha­kye­raꞌat. Eraꞌapyk meiũwat yrysakag wato pe iꞌatuꞌe. Miꞌi hawyi ywaiti pyi uimo­ꞌapyk tawa wato pyhyp hap ekuekai haity ete yi kape. Getap hit ywaiti piat kaipyi okenꞌypy hit kaipyi yi kape. Miꞌi hawyi morekuat Areta esura­raꞌin yt uipuẽti hin i. Yt uheso i rat. Tupana tikuap yt uheso i hap. Miꞌi hap kaipyi eweikuap yt uito eimuꞌe haria ewy i hap uito ti Pauru.

"

12

¹ Uiwy­riaꞌin tawa Kurintiu piaria uiminug wakuat koꞌi yt atimo­herep teran i ehepe maꞌato iraniaꞌin miꞌi tã yn taꞌa­tunug. Miꞌi hawyi yt ahenoi uhepiat waku nug hap pote yt uimõ­typot hin i. Pyno ahenoi uhepiat waku nug hap pote yt uiweꞌeg hin i. Eimaꞌat haria eimuꞌe haria — Uruto poꞌog wuatꞌi kai iꞌatuꞌe katu­pono Tupana ehay kahato uruepe urumu­ꞌetu iꞌatuꞌe. Maꞌato uito poꞌog are. Yt uiweꞌeg hin i mio tã areꞌe maꞌato uheha wo araꞌa­kasa kahato Aika­ꞌiwat."

² Saꞌa­wyꞌi 14 anu eꞌyianmete uheha wo araꞌa­kasa aikope Tupana toĩneꞌen hap kape. Wẽtup eꞌat pe uhehay Tupana wywo mesuwe. Miꞌi turan putꞌokꞌe kahato Aika­ꞌiwat Pãꞌãu uhete. Miꞌi hawyi uhereto atipy kape waikiru ekuekai. Yt atikuap i sio uipiit wywo uhereto sio uipãꞌãu yn maꞌato uhero­kosap atipy kape. Atikuap kahato mesuwat uiꞌe hap pywo kahato kat pote araꞌa­kasa pote uheha wywo."

³ Pyno areꞌe i raꞌyn yt atikuap sio uipiit wywo areto atipy kape sio yt. Miꞌi hap Tupana yn ikuap."

⁴ Saꞌa­wyꞌi areto ywyhig ekuekai. Miꞌi hawyi waikiru sakpo Tupana Pãꞌãu uhero­kosap Tupana eiam sese kape. Ikahu kahato itote aikotã Tupana mikoi gaꞌapy ewy itote. Atikuap sehay yt miitꞌin mikuap ok tã i sehay ikahu kahato. — Pyno ahenoi aru mesuwat sehay ikahu rakat miitꞌin yi totiaria pe are Tupana pe maꞌato uiwesat — Iꞌatu­pusu yt putꞌokꞌe i ikahu hap moherep hamo e uhepe."

⁵ Pyno araꞌa­kasa yt uwe i te akasa hap kape. Miꞌi hawyi uito poꞌog atikuap torania kai wen maꞌato — Uito poꞌog yt areꞌe i. Poꞌog waku areꞌe — Uhewaku hap yt putꞌokꞌe hin i Uika­ꞌiwat ewaku hap ete. Yt karãpe i uhewaku hap putꞌokꞌe Uika­ꞌiwat ewaku hap ete pãi. Maꞌato uhewaku hap uimõti re uiwa­nẽtup hawe."

⁶ Yt naku i areꞌe — Uito Iesui mohey poꞌog torania kawiat are. Pywo kahato uito areꞌe kuap maꞌato yt kat hamo i areꞌe mio tã are. Areꞌe mio tã pote yt uiweꞌeg hin i. Miꞌi pote karãpe areꞌe teran tuereto hawyi arewa­nẽtup hawyi yt naku i arewa­nẽtup. Yt uiweꞌeg hin i areꞌe mio tã pote uiwa­nẽtup hawe. Yt naku i kahato miitꞌin uinug Tupana are uiwepe. Uhewaku hap waku miitꞌin teꞌe­ru­wa­nẽtup uhowawi uito taꞌa­tu­ꞌe­wywuat re hap are uiwepe. Waku uikuap aikotã uhewaku hap ok tã maꞌato yt naku i uinug poꞌog."

⁷ Uhewaku hap kai araꞌa­kasa Tupana ieĩneꞌen hap hawyi Tupana toꞌe uhepe — Pyno eraꞌa­kasa yne raꞌyn mio mehĩ e. Areĩneꞌen kahato erenug poꞌog ewato hap kai tet pupi e uhepe. Arekenꞌẽ ereꞌe aru — Uito poꞌog iraniaꞌin kai kat pote araꞌa­kasa raꞌyn atipy sese uito ereꞌe aru eꞌe hap pupi e. Miꞌi pote woro­mo­wa­tetup woro­mohit iraniaꞌin pyꞌa­setpe. Atum aru epe epoha­raꞌi hap aikotã eꞌahu hap ewy haty kahato miꞌi e Tupana uhepe. Miꞌi hawyi Tupana e hap ewy putꞌokꞌe uhete ahiag kaipyi uiꞌahu hap uiwe­mo­wato hap monik hamuat."

⁸ Miꞌi hawyi satꞌe iꞌe hap uhete haty are. — Tupana haty kahato are. Etihep to uipiit pyi uimo­so­ꞌopot hap are. Maꞌato — Yt e Tupana uhepe. Miꞌi hawyi tokosap motꞌi hawyi ahẽtup i maꞌato yt e te wy hawyi tokosap mio tã ne hawyi ahẽtup i maꞌato yt e te wy."

⁹ Miꞌi hawyi toꞌe Tupana uhepe — Yt karãpe i atihep epiit piat eꞌahu hap e. Yt karãpe i epiit hesaika i raꞌyn maꞌato miꞌi pytkai waku ereĩneꞌen. Maꞌato miꞌi pytkai yt karãpe i woro­ꞌatoiat en. Yt karãpe i yt woro­kyꞌe i raꞌyn e. Karãpe iraniaꞌin teꞌe­ra­ꞌa­kasa esaika hap kapiat hawyi teꞌe­roꞌe — Yt topiit kaipyi i Pauru hesaika hap iꞌatuꞌe maꞌato Tupana imoesaika. Miꞌi pote epiit yt hesaika i hap kaipyi uimõ­typot sese hap topy­huꞌat e Tupana uhepe."

¹⁰ — Pyno atiky­ꞌesat eꞌe hap Tupana are. Atikyꞌe emiky­ꞌesat ewy. Waku kahato uipiit perup hap sio emõtypot hap topy­huꞌat miꞌi kaipyi. Taꞌi waku Tupana uhesaika hap yt tut i uipiit kaipyi. Miꞌi pote yt aremohey kuap i uipiit esaika hap ete. Miꞌi hawyi aru poꞌog hesaika saꞌa­wy­ꞌiwuat kai rakano areĩneꞌen katu­pono Esaꞌyru emipo­ꞌoro Urupo­rekuat nuat yn uimoe­saika tesaika sese hap wywo. Poꞌog poꞌog uhesaika saꞌa­wy­ꞌiwuat kai are Tupana pe. Miꞌi hawyi koitywy uipiit yt uhesaika i hap uimo­wepit kahato kat pote miꞌi pytkai poꞌog uhesaika saꞌa­wy­ꞌiwuat kai. Yt uipiit kaipyi i uhesaika hap maꞌato Aika­ꞌiwat esaika hap kaipyi uhesaika. Karãpe putꞌokꞌe miitꞌin miat uimohit hap iꞌewyte uhatek hap putꞌokꞌe turan poꞌog uimo­wepit hap atipuẽti. Karãpe yt imohey i haria uhatyꞌi hatyꞌi iꞌewyte karãpe yt kat i ikahu uhete Iesui mohey hano areĩneꞌen mote iꞌewyte miꞌi hap eꞌat pe uiwe­saika kahato te yt uhesaika hin i pytkai katu­pono uimoe­saika kahato miꞌi hap eꞌat pe Aika­ꞌiwat Iesui tesaika hap wywo. Miꞌi pote uiwepit kahato."

¹¹ Uiwy­riaꞌin tawa Kurintiu piaria yt uimõ­typot hin i Tupana miky­ꞌesat ewy kat pote saꞌa­wyꞌi Tupana uiꞌairo tehay wakuat moherep ehepiat hamo. Iesui potpo­ꞌo­roria 12 ok takaria ewywuat sese areĩneꞌen. Miꞌiria wakuat sese ewywuat areĩneꞌen Iesui potpo­ꞌoro wo. Uito wakuat miꞌiria ewywuat are. Yt uiweꞌeg hin i areꞌe mio tã are maꞌato uimohit pote mio tã are."

¹² Saꞌa­wyꞌi areĩneꞌen eipy­ꞌa­setpiat turan Tupana timo­herep kahato uipiit pyi tesaika hap. Toiky­ꞌesat kahato eipe eweikuap uito imipo­ꞌoro sese hap tehay sese moherep hamuat. Miꞌi pote tutunug kahato uipiit pyi yt miitꞌin mikuap koꞌi e. Ehehamo toimo­herep kahato kat koꞌi kat koꞌi sepap Tupana yn inug kuap hap koꞌi miitꞌin mowa­nẽtup kahato hamo waku nug hap koꞌi ete. Miꞌi koꞌi kapiat eweiꞌa­kasa hawyi eweiꞌe — Pauru ti Tupana mipo­ꞌoro ahowawiat aimuꞌe tehay wakuat etiat hamo eweiꞌe eiwo­ꞌope. Karãpe eweiꞌa­kasa yt uhesaika hap kape i hawyi eweiꞌe uhepiat pe — Pywo ti rat Pauru Tupana mipo­ꞌoro sese katu­pono toimo­herep Pauru piit pyi yt hesaika i pytkai eweiꞌe."

¹³ Uiwy­riaꞌin tawa Kurintiu piaria woro­ho­ꞌo­kyꞌe kahato eipe aikotã atiꞌa­tu­kyꞌe iraniaꞌin Iesui mohey haria aikope aikope gupteꞌen haria hap ewy woro­ho­ꞌo­po­wyro eipe. Yt uwe i poꞌog eiwo­ꞌo­ꞌe­wy­ꞌewy. Maꞌato iraniaꞌin tum ehepe taꞌa­tumiium koꞌi. Saꞌa­wyꞌi ewetum kat koꞌi kat koꞌi maꞌato wãiꞌare neꞌi. Yt areĩneꞌen neran i eiꞌokpe tote. Uhekat kaipyi arenuk hawyi eimõ­py­ꞌahak hano areĩneꞌen. Pyno yt uiwepyi i waure wo o eweikup­teꞌen uhepiat eimõ­py­ꞌahak hap kai."

¹⁴ Pyno areto i raꞌyn ehowawi ehepiok hamo. Saꞌa­wyꞌi areto typuo raꞌyn koran wuat areto hawyi myeꞌym mo raꞌyn areto. Maꞌato putꞌok­ꞌare eipy­ꞌa­setpe turan yt atiky­ꞌesat i areĩneꞌen eiꞌokpe tote. arenuk uhekat kaipyi aikotã saꞌa­wyꞌi areꞌe hap ewy. Eweikuap kat pote pyno ahenoi. Yt atiky­ꞌesat hin i eheka­reꞌen koꞌi. Maꞌato woro­ho­ꞌo­ky­ꞌesat eipe aikotã uhaꞌy­ruꞌin uhaki­ꞌytꞌin hap ewy. Aikotã yt naku i wahẽtup ahaꞌy­ruꞌin ahaki­ꞌytꞌin me miꞌi kareꞌen koꞌi. Miꞌi hap ewy yt ahẽtup i ehepe. Waku poꞌog eiꞌy­wotꞌin iꞌewyte tutum kareꞌen koꞌi hap ewy."

¹⁵ Woro­ho­ꞌo­kyꞌe kahato eipe aikotã uhaꞌy­ruꞌin uhaki­ꞌytꞌin sese ewy woro­ho­ꞌo­kyꞌe. Aikotã eiꞌywot ewy areĩneꞌen pãi are. Taꞌi uimiꞌat uiko kaipyi uimie­reko kaipyi woro­ho­ꞌopoi hap ewy atunug itote. Taꞌi areĩneꞌen eipy­ꞌa­setpe eimuꞌe Iesui etiat haype yt kat saꞌup i ete woro­ho­ꞌo­muꞌe katu­pono eiꞌywot ewy areĩneꞌen. Uipoi ro yt areꞌe hin i katu­pono aikotã aiꞌy­wotꞌin yt karãpe i — Eweium no saꞌup uhepe hawyi woro­ho­ꞌopoi yt iꞌatuꞌe i. Uito ti ety ewy pote atiꞌa­tu­moma yne uhekat ehepe eipo­wyro hamo woro­ho­ꞌo­kyꞌe kahato haype. Maꞌato miꞌi pytkai yt uikyꞌe hin i eipe. Poꞌog poꞌog neꞌi yi kape uikyꞌe hap woro­kyꞌe poꞌog poꞌog pytkai are. Maꞌato miꞌi pytkai poꞌog poꞌog atum aru ehepe uimẽ­pytꞌin eipe pote."

¹⁶ Yt areĩneꞌen neran hin i eiꞌokpe tote iꞌewyte yt areĩneꞌen neran i eheka­reꞌen kaipyi neꞌi. Iraniaꞌin eipy­ꞌa­set­piaria teꞌe­roꞌe uhepiat — Pauru yt sẽtup sẽtup e hat hin i iꞌatuꞌe. Maꞌato eiweꞌeg wo o katu­pono eimaꞌat kuap kahato. Towese hap wywo wyti einug teropat haria wo hawyi ehekat yne totat towano iꞌatuꞌe ehepe uhewa­nĩ­kaptia."

¹⁷ Mio tã iꞌatuꞌe iꞌatueso kahato neꞌi uhepiat pe. Karania wo uhemiit atipo­ꞌoro ehowawi yt wẽtup mo i eimaꞌat eheka­reꞌen kyꞌewi are. Mio tã e haria pe yt karãpe i atipo­ꞌoro wẽtup ok uhemiit eheka­reꞌen ẽtup hamo."

¹⁸ Saꞌa­wyꞌi atipo­ꞌoro mehĩ Titu ehowawi wẽtup ok imohey hat wywo. Miꞌi hawyi tuwat raꞌyn eikyꞌe haype. Yt karãpe i mehĩ Titu ehekat toiky­ꞌesat. Katu­pono mehĩ Titu hawyi uito urutu­kup­teꞌen wẽtup miit ewy yn urutu­kup­teꞌen wẽtup wanẽtup hap yn uruto. Uito woro­ho­ꞌo­kyꞌe iꞌewyte mehĩ Titu eikyꞌe aikotã woro­ho­ꞌo­kyꞌe hap ewy te eikyꞌe. Uhaipepiat sese miꞌi. Uheko ewy te iꞌewyte miꞌi yt karãpe i eimaꞌat."

¹⁹ Yt karãpe i eipy­ꞌa­setpe urutu­kup­teꞌen turan paaꞌu­ru­toꞌe — Wati­ꞌa­tu­maꞌat miꞌiria yt urutoꞌe i. Yt urueso i rat iꞌewyte Tupana tikuap yt urueso i hap. Iꞌewyte Aika­ꞌiwat Iesui tikuap yt urueso i hap. Katu­pono yne uruminug koꞌi eimoe­saika imohey hap etiat hamo. Miꞌi pote yt urueso i."

²⁰ Pyno areto i raꞌyn wyti ehowawi aikotã itotiat hap kuap hamo. Arekenꞌẽ kahato putꞌok­ꞌuiꞌe turan eiwu­ꞌuka hap pupi. Yt woro­ho­ꞌo­puẽti teran i yt eiwo­ꞌo­wese i turan neꞌi. Maꞌato woro­ho­ꞌo­puẽti eiwo­ꞌoehay ewãi ewãi turan neꞌi pote arekenꞌẽ kahato areĩneꞌen eiꞌa­piheg hano neꞌi tet pupi. Yt naku i woro­ho­ꞌo­puẽti eiwo­ꞌoe­ha­ꞌy­wywi ehekat koꞌi etiat turan neꞌi. Iꞌewyte eiwo­ꞌope eimo­py­ꞌahak turan neꞌi yt naku i woro­ho­ꞌo­puẽti yt eiwo­ꞌo­wesat i eiwo­ꞌope turan neꞌi. Iꞌewyte yt naku i eiwo­ꞌoewa pe eiwo­ꞌo­wese maꞌato eiwo­ꞌo­ꞌokpe wo ehehay saꞌag hap ete turan neꞌi woro­ho­ꞌo­puẽti hap. Yt naku i woro­ho­ꞌo­puẽti eiwo­ꞌo­weu­kaꞌi turan neꞌi. Iꞌewyte eiwo­ꞌo­hoiro hoiro turan neꞌi. Arekenꞌẽ wuꞌuka hap etiat — Uito poꞌog eikai eiꞌe turan neꞌi."

²¹ Uiwy­riaꞌin arekenꞌẽ te wyti uiwa­nẽtup hawe aikotã aru eweikup­teꞌen areto turan hap pupi. Yt woro­ho­ꞌo­puẽti teran i ehewaire waire turan neꞌi. Miꞌi tã ewetunug putꞌok­ꞌare turan neꞌi pote aremõti sese Tupana ehamo. — Tupana yt areto teran i. Yt atiꞌa­tu­puẽti teran i tawa Kurintiu piaria Esaꞌyru mohey haria iꞌatue­waire waire turan neꞌi katu­pono uimõti te hap sese topy­huꞌat. Miꞌi hawyi arewak uiwy sese ikuꞌuro hap ewy. Tupana atiky­ꞌesat taꞌa­tu­ꞌatoiat yne toꞌopiit kyꞌesat hap koꞌi yt naku i hap koꞌi. Tupana yt atiky­ꞌesat i areto emohey haria Kurintiu piaria kape uimohit hap yn itote turan uimõti te hap yn pote are Tupana pe.

Uito ti Pauru are.

"

13

¹ Uiwy­riaꞌin tawa Kurintiu piaria areto i raꞌyn ehowawi ehepiok hamo. Saꞌa­wyꞌi areto typuo raꞌyn koran wuat areto hawyi myeꞌym mo raꞌyn areto. Saꞌa­wyꞌi Tupana toꞌe miwan me — Yt naku i eiwe­mohit wẽtup ok okpe wo. Miꞌi ti minug yt naku i eweiꞌe eiwo­ꞌope yt eweikuap i te sio tutunug pywo sio yt hap yt eiweikuap i te pytkai e. Yt eweimohey teiꞌo meremo wẽtup ok yn taꞌa­kasa wẽtup ok minug saꞌag kapiat hat e. Maꞌato myeꞌym ok teꞌe­ra­ꞌa­kasa wẽtup ok minug saꞌag kapiat hawyi waku eweikaykay saꞌa­wyꞌi wẽtup ok. Miꞌi hawyi waku wẽtup ok eweikaykay. Miꞌi hawyi wẽtup i raꞌyn eweikaykay miꞌiria henoi hamo. Miꞌi hawyi taꞌa­tu­henoi teꞌe­ra­ꞌa­kasa hap iꞌewyte taꞌa­tukuap kahato pywo hap toꞌo­ꞌe­wy­ꞌewy taꞌa­tu­henoi pote waku eweimohey. Maꞌato yt toꞌo­ꞌe­wy­ꞌewy i taꞌa­tu­henoi pote yt naku i eweimohey e. Maꞌato yt eweipuẽti myeꞌym ok pote waku eweimohey typy ok toꞌoehay ewy taꞌa­tu­henoi pote e Tupana miwan me saꞌa­wy­ꞌite."

² Saꞌa­wyꞌi akasa haria henoi uhepe iminug saꞌag koꞌi areĩneꞌen eipy­ꞌa­setpe turan. Miꞌi hawyi araꞌaipok hawyi taꞌa­tu­henoi i raꞌyn uhepe. Miꞌi hawyi taꞌa­tu­henoi uhepe typuo raꞌyn. Meiũran aru araꞌaipok i raꞌyn ehowawi miꞌi hawyi taꞌa­tu­henoi uhepe myeꞌym mo raꞌyn iminug saꞌag taꞌa­tu­henoi toꞌo­ꞌe­wy­ꞌewy miꞌi hawyi atimohey raꞌyn. Miꞌi hawyi woro­ho­ꞌo­ꞌa­piheg naꞌyn. Saꞌa­wyꞌi eiweꞌeg wo o are. Miꞌi hawyi araꞌaipok hawyi areꞌe i — Eweiꞌatoiat ro eiminug saꞌag koꞌi koitywy. Woro­ho­ꞌo­ꞌa­piheg aru yt eweitoiat i pote are ehepe. Koitywy myeꞌym mo raꞌyn woro­ho­ꞌoewãi. Yt areĩneꞌen i eipy­ꞌa­setpe wen maꞌato eiweꞌeg wo o woro­ho­ꞌo­ꞌa­piheg aru. Yt uipohep hin i eiꞌa­piheg hap ete haty eweiꞌe pytkai."

³ Toĩneꞌen eipy­ꞌa­setpe — Yt uruikuap i Pauru sio Aipo­typot mipo­ꞌoro sio yt watikuap i sio Iesui wẽ pyi sio yt. Eiweꞌeg wo o katu­pono Aipo­typot wẽ wo kahato areĩneꞌen hesaika kahato. Aika­ꞌiwat eiꞌa­piheg kuap. Taꞌi eiꞌa­piheg haty wo uhehay kaipyi areꞌe hawyi."

⁴ Taꞌa­tu­ꞌauka Aika­ꞌiwat turan yt kat i toꞌe paaꞌe neꞌi. Yt toimo­herep hin i tesaika hap. Yt toiꞌa­tu­poepyk hin i. Yt kat i hesaika hap ikuꞌuro turan maꞌato Tupana timoieĩ­neꞌen i tesaika wo. Koitywy Tupana esaika hap yne eiam topy­huꞌat. Saꞌa­wyꞌi urutu­kup­teꞌen eipy­ꞌa­setpe turan aikotã Aika­ꞌiwat ikuꞌuro turan yt hesaika hin i turanuat ewy wato­py­huꞌat. Maꞌato meiũran uruta­ꞌaipok ewawi hesaika rakaria ewy urutu­kup­teꞌen maꞌato Tupana esaika hap urupiit pe. Eiweꞌeg wo o Tupana eiꞌa­piheg kuap kahato."

⁵ Waku eweiꞌe eipyꞌa pe sio — Uito Tupana Saꞌyru mohey hat sese sio yt waku eweiꞌe. Waku watikuap kahato aipyꞌa pe sio Tupana saꞌy­ruꞌin sese uito sio iꞌewyte sio Tupana saki­ꞌytꞌin sese uito sio yt hap. Maꞌato yt eweikuap i te pote eiweꞌeg wo o. Yt naku i wato­py­huꞌat piku piku koꞌi ewy neꞌi yt iꞌywot wekuap takaria i ewywuaria wo neꞌi. — Uruikuap kahato Tupana Uruꞌywot sese hap. Uruikuap Iesui mohey haria sese uruto hap."

⁶ Atiky­ꞌesat kahato eweikuap uruto Tupana Saꞌyru mipo­ꞌoro koꞌi sese hap. — Yt heso rakaria i waku eweiꞌe kuap uruetiat."

⁷ Tupana are — Etihep to tawa Kurintiu piaria iꞌatueko saꞌag myi iꞌatu­minug saꞌag po pyi are. Yt urutuwat teran i iꞌatue­wawi epiat iꞌatu­ꞌa­piheg hap nug uruepiat hamo are. Yt uruimo­herep teran i esaika hap iꞌatu­ꞌa­piheg hamo neꞌi. Iraniaꞌin itote yt urumohey i emipo­ꞌoro uruto hap. Etunug miꞌiria taꞌa­tu­mohey uruto emipo­ꞌoro sese iꞌatuꞌe hamo. Yt naku i uruiꞌa­tu­ꞌa­piheg miꞌiria esaika wo are Tupana pe mesuwe."

⁸ Uruto Tupana miꞌairo sese tehay pywo piat moherep ehepiat hamo. Yt uheso i rat. Pywo rat uruꞌe hap. Maꞌato — Yt pywo rakat i rat eweiꞌe pote yt eweimohit kuap i urumienoi kat pote Tupana mipo­ꞌoro koꞌi sese uruto. Poꞌog waku eweiꞌe — Pywo kahato eiꞌe hap waku eweiꞌe. Pywo eweiꞌe hawyi poꞌog esaika hap topy­huꞌat katu­pono pywo e haria sok wo watu­kup­teꞌen."

⁹ Uruiky­ꞌesat kahato eweikup­teꞌen waku rakaria Tupana ewywuaria wo hap. Urumo­wepit kahato karãpe eweikup­teꞌen hesaika kahato rakaria wo imohey hap ete. Miꞌi hawyi poꞌog urunãpin haria ewy. Miꞌi hap eꞌat pe urumo­wepit kahato."

¹⁰ Atiky­ꞌesat kahato ehehãite imohey hap ete putꞌok­ꞌuiꞌe turan. Hãpyk Tupana eko ewy hap atiky­ꞌesat. Miꞌi pote woro­ho­ꞌo­nãpin miwan me yt areĩneꞌen i te eipy­ꞌa­setpiat turan. Poꞌog waku uiwa­nẽtup hawe woro­ho­ꞌo­nãpin miwan me aiwo­ꞌo­ꞌewa piat hap kai. Kat pote atiꞌairo kuap uiꞌe hap. Miꞌi hawyi yt kat i uhehay uimiwan me eimohit hap. Yt karãpe i woro­ho­ꞌo­mohit teran eipe. Woro­ho­ꞌo­motag yn neran Aika­ꞌiwat mohey hap ete. Katu­pono saꞌa­wyꞌi Tupana tum uhepe tesaika hap tomohey haria nãpin uhepiat hamo iꞌatu­moe­saika imoheg hap etiat hamo."

¹¹ Uiwy­riaꞌin uheka­tu­wyria kuekatu atipo­ꞌoro ehowawi. Toran naꞌyn uimiwan mesuwe. Waku pe eweikup­teꞌen. Yt kat i iꞌaparap ehepiat hap eheĩneꞌen hap ete hap wywo eweikup­teꞌen. Wẽtup ok miit ewywuat eweikup­teꞌen imohey hap ete. Eiwo­ꞌo­mo­wepit ro eiwo­ꞌo­po­wyro hap ete woꞌo­wese hap ete. Miꞌi ewy ewetunug pote eiwepit kahato katu­pono Tupana wuatꞌi kyꞌe hat toĩneꞌen eipy­ꞌa­setpe eimo­wepit sese hamo."

¹² — Pyno eiwe­hytꞌok to mehĩꞌin manaꞌin eweiꞌe o imohey haria pe ewepit hap wywo. Aikotã Aika­ꞌiwat ewy yne mesu­wa­ro­tiaria Aika­ꞌiwat mohey haria ipoꞌoro kuekatu ehowawi."

^{13 (13-14)} — Uruka­ꞌiwat sese Iesui etiꞌa­tu­kyꞌe kahato tawa Kurintiu piaria emohey haria. Yt iꞌatue­waku hap kaipyi ereĩneꞌen egyiꞌat iꞌatuepiat rakano maꞌato iꞌatu­kyꞌe haype. Tupana are waure wo ereĩneꞌen iꞌatu­minug saꞌag kai. Etiꞌa­tu­kyꞌe miꞌiria yt kat upi i. Tupana Pãꞌãu are ewyꞌinug tawa Kurintiu piaria Esaꞌyru mohey haria wywo. Etunug miꞌiria aikotã wẽtup ok miit ewy yn ahẽtup Tupana. Waku are. Mio tã ewy yn ahẽtup Tupana pe ehepiat uiwy­riaꞌin Iesui mohey haria tawa Kurintiu piaria etiat.Toran naꞌyn uiꞌe hap miwan miat. Uito ti Tupana mipo­ꞌoro sese Pauru."

¹⁴ (-)"