1

¹ Uito ti Pauru are. Mesuwat uimiwan atipo­ꞌoro ehowawi tawa Kurintiu piaria einãpin hamuat torania Iesui mohey haria nãpin hamuat. Uito ti Tupana miꞌairo Tomi­po­ꞌoro Wuatꞌi Porekuat Nuat Iesui moherep miitꞌin miat hanuat are. Iꞌewyte aiwy kahato Sotene po kaipyi tuut mesuwat miwan."

² Pyno kuekatu uruipo­ꞌoro ehowawi. Miꞌi hawyi waku kahato woro­ho­ꞌo­nãpin katu­pono Tupana miꞌai­roria temiitꞌin sese wuat saꞌa­wy­ꞌi­te­wuaria eipe. Taꞌi Tupana wano eiperia wakuaria wo Tupana wywo eweipy­huꞌat — Iesui Aipo­typot Aika­ꞌiwat sese eweiꞌe pote. Yt eipe yn i maꞌato wuatꞌi miitꞌin mesu­wa­ro­tiaria mio tã e haria Tupana wanuaria wakuaria Tupana wywo teꞌe­ro­py­huꞌat."

³ Pyno mio tã ahẽtup Tupana pe — Tupana etum o tawa Kurintiu piaria pe iꞌatu­poi­tyro hap yt kat saꞌup i egyiꞌat hap kaipyi are. Etunug miꞌiria o torania woꞌo­wese haria wo areꞌe Aika­ꞌiwat Aipo­typot Iesui kape Aiꞌywot Atipy piat kape ahẽtup eika­wiano. Uito ti Pauru.

"

⁴ Wuatꞌi eꞌat pe arehum ewawi Tupana katu­pono etum naꞌyn tawa Kurintiu piaria pe iꞌatue­ha­kye­raꞌat hap Uruka­ꞌiwat Iesui mohey haria miꞌiria pote areꞌe."

⁵ Taꞌi Tupana aipoi­tynug kahato Iesui minug hap upi. Miꞌi hawyi ti torania watikuap kahato kat koꞌi kat koꞌi Aipo­typot ok tã. Uhehay Tupana wat ewy topy­huꞌat. Wẽtup piit ewy watoĩ­neꞌen."

⁶ Watoĩ­neꞌen motꞌi Aika­ꞌiwat wywo pote ihay iꞌewyte toĩneꞌen motꞌi aipyꞌa pe."

⁷ Miꞌi pote wahe­katup Aipo­typot turan Iꞌywot aipoi­tyro kahato aipo­wyro kahato. Miꞌi hawyi tuwe­mo­herep aru Aika­ꞌiwat watoꞌe yn wuatꞌi ehamo. Aimoe­haĩte Iesui mohey hap ete."

⁸ Koitywy Aika­ꞌiwat aimoheg kahato tehay wo. Yt watoiat kuap i ahepiat imohey hap wuatꞌi eꞌat pe pote. Miꞌi tã ti tutunug mesuwat yi kahuro hap kape. Miꞌi hawyi meremo taꞌaipok i Aipo­typot Wuatꞌi Mimõ­typot no. Aika­ꞌiwat Iesui putꞌokꞌe hap eꞌat pe turan — Yt kat i saꞌag atipuẽti miꞌiria ete e Iesui ahetiat."

⁹ Miꞌi pote waku wato­mohey iꞌe hap torania aipyꞌa pe. Saꞌa­wyꞌi toꞌe — Atiky­ꞌesat eipe Uhaꞌyru ekatu­wyria sese wo eweikup­teꞌen e. Ewetunug Miꞌi Miit Uhaꞌyru Eipo­typot no pote waku pe iwywo eweikup­teꞌen wuatꞌi eꞌat pe e ahepe. Miꞌi hawyi waku wato­mohey kahato iꞌe hap ewy mesup te.

"

¹⁰ Uheywytꞌin uheinytꞌin pywo pe areꞌe ehepe Aipo­typot Aika­ꞌiwat Iesui ehay moherep hat ti uito are. Miꞌi tupono ahẽtup eiwo­ꞌoehay upi eweikup­teꞌen. Miꞌi pote — Pywo pywo eweiꞌe eiwo­ꞌope hawyi eiwo­ꞌo­wehik kahato. Miꞌi hawyi wẽtup wanẽtup hap wywo yn eweikup­teꞌen. Waku aiwo­ꞌo­ꞌewy yn watoĩ­neꞌen wẽtup miky­ꞌesat upi yn hawyi sehay yt kat i aiwo­ꞌo­sytpok hap toĩneꞌen aikai.

"

¹¹ Gaꞌatpo tõꞌẽ mana Kure yat piaria hawyi miꞌiria henoi uhepe aikotã eipy­ꞌa­setpe tukup­teꞌen sehay wuat wuꞌuka haria etiat."

¹² — Pyno itotiaria wẽtup wẽtup wanẽtup hap wywuaria iꞌatuꞌe. Yt toꞌo­ꞌewy hin i iꞌatu­wa­nẽtup hap koꞌi. Miꞌi pote wuꞌuka hap yn itote iꞌatuꞌe uhepe ehetiat. Pyno atikuap taꞌyn eipy­ꞌa­setpe tukup­teꞌen — Uito ti aimuꞌe hat Pauru upi e haria maꞌato iraniaꞌin — Uito aimuꞌe hat Aporu upiaria e haria. Miꞌi hawyi iraniaꞌin — Uito aimuꞌe hat Peteru upi e haria tukup­teꞌen. Maꞌato iraniaꞌin — Uito aimuꞌe hat Iesui upiaria e haria iꞌatuꞌe taꞌa­tu­henoi uhepe õꞌẽ haria. Miꞌi tã hap kaipyi ti eiwu­ꞌuka hap topy­huꞌat."

¹³ Uiwy­riaꞌin karãpe watu­ꞌuka aiwo­ꞌope miꞌi hawyi wato­patꞌok patꞌok kahato hawyi aiwat i aiwat i yn watoĩ­neꞌen karania heko rakaria ewy neꞌi. Maꞌato Iesui piit yt miꞌi ewywuat hin i areꞌe. Wẽtup piit ewywuat yn watoi­neꞌen. Uito Pauru maꞌato uito yt uiku­ꞌuro i ariaꞌyp posak ete eheha­kye­raꞌat hamo. Iꞌewyte ti ehetꞌok hawyi yt uhet i ti topy­huꞌat eikai ehete. Pywo yt uwe i ti eiperia uimi­setꞌok koꞌi."

¹⁴ Taꞌi uito ti yt woro­ho­ꞌo­setꞌok i eiperia yꞌy pe. Toĩ ni maꞌato typy ok yn itote uimi­setꞌok koꞌi mekewat mehĩ Kiritu hawyi mehĩ Kaiu hawy­tewat uimi­setꞌok koꞌi maꞌato miꞌiria yn ahetꞌok hawyi iraniaꞌin eiperia — Uito ti Pauru upiat hat imisetꞌok pote yt eweiꞌe kuap i katu­pono typyꞌok yn ni itote uimi­setꞌok."

¹⁵ Yt uwe i toꞌe kuap — Uito ti Pauru misetꞌok miꞌi pote poꞌog uito eikai e hat. Iꞌewyte yt uwe i toꞌe kuap — Eipe Pauru misetꞌok toset wuat e hat."

¹⁶ Iꞌewyte uimi­ꞌa­tu­setꞌok koꞌi tukup­teꞌen itote uhyt Etewana yat piaria yn maꞌato miꞌi hawyi uimi­ꞌa­tu­setꞌok koꞌi yt uwe i itote.

"

¹⁷ Pywo ti Aika­ꞌiwat Iesui yt uipo­ꞌoro i miitꞌin setꞌok setꞌok hamo maꞌato tehay wakuat moherep hamo yn uipo­ꞌoro tehay wakuat enoi wuatꞌi puoria piat hamo yn e. Miꞌi hawyi atiꞌa­tu­muꞌe haty wo aikotã Aika­ꞌiwat ikuꞌuro aika­wiano hap ariaꞌyp posak ete hap yn uhehay. Yt aremõ­typot teran i maꞌato ahenoi aikotã Aipo­rekuat nuat Tupana Mipo­ꞌoro ikuꞌuro ariaꞌyp posak etiat hap yn ahenoi teran. Pyno ti yt miitꞌin miky­ꞌesat ewy hin i ti atimo­herep katu­pono aremõ­typot uhehay se wywo hap hawyi yt hesaika hin i uhehay Tupana wanẽtup hawe."

¹⁸ Taꞌi ariaꞌyp posak etiat Iesui ikuꞌuro ahetianuat enoi hap ti yt hee hin i mekewat hoꞌo­wasat rakaria pe — Yt eweꞌeg hin i ti iꞌatuꞌe neꞌi ahepe. Maꞌato aito Iesui miky­ꞌeria pe ti hee kahato raꞌyn katu­pono watikuap taꞌyn hesaika kahato mekewat sehay hap."

¹⁹ Aikotã saꞌa­wyꞌi yianmiaria Tupana ehay moherep haria teꞌe­roꞌe hap ewy — Meiũran ti aru atimoma raꞌyn eiweꞌeg kahato hap — Uito poꞌog kuap hat wuatꞌi kawiat hap e. Atimo­weityk ti aru miitꞌin weꞌeg hap yt nakuat i koꞌi e. Miꞌi hawyi — Uito atikuap poꞌog e haria yt uwe i topy­huꞌat e Tupana saꞌa­wyꞌi tehay moherep hat Isaia miwan 29.14 piat pe.

"

²⁰ Aikope aru tukup­teꞌen — Wuatꞌi etiat kuap haria uruto e haria e. Aikope aru tukup­teꞌen wuatꞌi sehay kuap haria. Aikope tukup­teꞌen mekewat iraniaꞌin akit taꞌa­tuehay wuat haria. Taꞌi yt aikope i ti aru katu­pono iꞌatuwat iꞌatu­weꞌeg hap Tupana tiꞌakit yne raꞌyn. Miꞌi hawyi miitꞌin weꞌeg hap topy­huꞌat wuatꞌi miꞌakit akit wo raꞌyn."

²¹ Katu­pono saꞌa­wy­ꞌiwuat weꞌeg kahato haria ikuap teran Tupana maꞌato yt putꞌokꞌe i iꞌatu­weꞌeg hap Tupana kuap hamuat hap. Katu­pono koitywy Tupana tiky­ꞌesat kahato mekewat yt iꞌatu­weꞌeg i hap kaipywiat ariaꞌyp posak etiat neꞌi ikuꞌuro rakat mohey haria eheha­kye­raꞌat hamuat hap. Poꞌog Tupana iweꞌeg miitꞌin kai Katu­pono Tupana miky­ryꞌi wo toĩneꞌen miitꞌin weꞌeg kahato hap e.

"

²² Mio tã iꞌatuꞌe Iuteu ywania — Etomo­herep to iwato kahato mesuwe uruepe Tupana esaika hap uruepiat emohey hamo miꞌi pote ti aru uruimohey en iꞌatuꞌe wati­ꞌa­tu­mo­herep Iesui iꞌatuepe turan. Maꞌato Kereku ywania miꞌiria — Etimo­herep uruepe ehay iweꞌeg kahato hawyi uruimohey Iesui etiat iꞌatuꞌe."

²³ Maꞌato miꞌiria pe — Iesui yn aheha­kye­raꞌat kuap urutoꞌe. Iesui yn ikuꞌuro ariaꞌyp posak ete ahetiano e hap uruhenoi Iuteu ywania pe Kereku ywania pe yt ihay see hin i pytkai taꞌa­tu­puẽti Iuteuria ywania. Miꞌi hawyi ti Kereku ywania miꞌiria mekewat sehay ti yt weꞌeg hin i hat ehay iꞌatuꞌe ahepe."

²⁴ Maꞌato aito Tupana miꞌai­roria ete ti Iuteu ywania sio Kereku ywania ti mekewat sehay Iesui ikuꞌuro ariaꞌyp posok ete aiku­ꞌuro hap u hamo hap hesaika kahato topy­huꞌat aheha­kye­raꞌat hamo. Taꞌi wato­mohey mekewat sehay Iesui etiat hawyi aheha­kye­raꞌat hap toĩneꞌen. Pywo ti rat Iesui ti Tupana esaika hap wywo iweꞌeg hap wywo toiꞌa­tue­ha­kye­raꞌat kuap wuatꞌi miitꞌin watoꞌe."

²⁵ Katu­pono mekewat Tupana weꞌeg hap poꞌog iweꞌeg torania aiweꞌeg hap kai watoꞌe. Katu­pono Tupana tuwe­ky­ryꞌi pote poꞌog iweꞌeg torania mesu­wiaria weꞌeg hap koꞌi kai haype watoꞌe. Katu­pono Tupana perupꞌi hap ti poꞌog hesaika mesu­wa­rotiat hesaika rakaria kai watoꞌe yn ahehay.

"

²⁶ Taꞌi uheka­tu­wyria koitywy ti watikuap kahato aikotã Tupana tiꞌairo yt weꞌeg i haria temiitꞌin sese wo hap. Saꞌa­wyꞌi aiꞌairo temiit no turan yt aiweꞌeg hin i te turan aiꞌairo. Iꞌewyte yt typyꞌi hin i iwatoꞌin nakaria toiꞌairo temiit no mesuwe. Iꞌewyte yt typyꞌi hin i hesaika rakaria toiꞌairo temiit no. Maꞌato miꞌi pytkai aiꞌairo temiit no torania kaipyi."

²⁷ Maꞌato toiꞌairo yt weꞌeg i haria temiit no typyꞌi kahato. Miꞌi tã tutunug hawyi toiꞌa­tu­mohit kahato — Uito poꞌog weꞌeg hat e haria. Iꞌewyte ti Tupana tiꞌairo miitꞌin emiit temiit no typyꞌi kahato. Miꞌiria kaipyi ti toimohit — Uito poꞌog torania kai e haria."

²⁸ Taꞌi ihaky­ꞌeꞌi rakaria yt uwe mikyꞌe i koꞌi miit emiit koꞌi yt iwato hin i rakaria yn ni toiꞌairo temiit sese wo. Iꞌewyte yt kat sehapap i hap koꞌi wyti toiꞌairo temiit no. Iꞌewyte yt uwe mikuap i koꞌi ti satek takaria toiꞌairo temiit no. Miꞌi hawyi ti — Uruto poꞌog e haria yi kai neꞌi raꞌyn teꞌe­ro­py­huꞌat katu­pono hemiitꞌin sese teꞌe­ru­wa­nẽtup kahato imienoi kape."

²⁹ Eweikuap apo kat pote Tupana tiꞌaro temiitꞌin no paaꞌe haria. Pyno ahenoi teran ehepe. Tupana tiꞌa­tu­ꞌaro temiit no miit hit koꞌi katu­pono yt toiky­ꞌesat aru atipy pe tuwe­mo­wato rakaria. Yt toiky­ꞌesat itote — Uito poꞌog uhewaku torania kai pote Tupana uiꞌairo temiit no e haria. Yt toiky­ꞌesat i itote — Uito poꞌog pote Tupana uiꞌairo saꞌa­wyꞌi tehay moherep hamo e haria katu­pono mio tã e haria Tupana mõpy­ꞌahak haria tukup­teꞌen e."

³⁰ Aito ti Aipo­typot Iesui mohey haria pote Tupana ainug Tosa­ꞌyru wywo wẽtup miit ewy. Saꞌa­wyꞌi yt aiweꞌeg hin i pytkai mesup aiweꞌeg kahato katu­pono Iesui amyãtym toĩneꞌen aipiit pakup we hawyi Iesui weꞌeg hawuo wahe­wyry mesup. Saꞌa­wyꞌi yt ahehay kuap i Tupana wywo maꞌato mesep Iesui wẽ aipiit pe pote ahehay kuap kahato Tupana wywo. Koitywy watoĩ­neꞌen Iesui piit ewy mesu­wa­rote. Miꞌi pote wato­py­huꞌat Tupana saꞌy­ruꞌin koꞌi Tupana saki­ꞌytꞌin koꞌi mesuwe. Miꞌi pote wato­py­huꞌat Tupana ywania ewywuat mesuwe."

³¹ Yt naku i watoꞌe aiwepe pãi — Uito poꞌog Iraniaꞌin kai yt naku i watoꞌe aiwa­nẽtup hawe. Yt miꞌi tã hin i are. Poꞌog waku watoꞌe — Tupana ti waku poꞌog uikai waku watoꞌe. Miꞌi yn ni aipo­wyro kahato hat watoꞌe waku. Aikotã iꞌe hap ewy aru tutunug yne toꞌe hap waku watoꞌe aipe­rupꞌi hap wywo. Uito ti miitꞌin yt naku i rakat maꞌato Iesui miꞌairo kahato. Uito ti Pauru.

"

2

¹ Uiwy­riaꞌin tawa Kurintiu piaria taꞌi mekewat eꞌat pe saꞌa­wy­ꞌite areto ehowawi eimuꞌe hamo turan areĩneꞌen eipy­ꞌa­setpe. Woro­ho­ꞌo­muꞌe kahato Tupana mimo­herep ok tã. Tupana miky­ꞌesat ewy yn woro­ho­ꞌo­muꞌe yt uhehay niatpo hin i atunug eimuꞌe hap ete."

² Mio tã are uiwepe — Mesuwe Iesui yn atimo­herep miitꞌin me hawyi iraniaꞌin ehay atiwaure yne. Aipo­typot ete yn aru uhehay areꞌe uipyꞌa pe. Aikotã Aika­wiano ariaꞌyp posak ete ikuꞌuro hap yn aru uhehay wo atimo­herep tawa Kurintiu piaria pe areꞌe uiwepe."

³ Saꞌa­wyꞌi te areĩneꞌen eipy­ꞌa­setpe turan uipiit yt hesaika hin i hawyi uityry popuo woro­ho­ꞌo­muꞌe paaꞌuiꞌe popuo woro­ho­ꞌo­muꞌe turan."

⁴ Yt ihay se hin i hap ewy woro­ho­ꞌo­muꞌe. Miitꞌin ehay see hap yt ewy i woro­ho­ꞌo­muꞌe maꞌato Tupana Pãꞌãu esaika hap kaipyi woro­ho­ꞌo­muꞌe. Miꞌi hap ewy pytkai ti Tupana Pãꞌãu esaika hap topy­huꞌat uhehay moesaika hamo. Miꞌi pote miꞌi hawyi — Pywo pywo eweiꞌe eipyꞌa pe uhehay tyry wywo pytkai."

⁵ Miꞌi hawyi Iesui mohey haria eweikup­teꞌen Tupana esaika hap kaipyi. Yt eweipuẽti hin i eimohey Tupana piat hap miitꞌin iꞌatuehay weꞌeg hap kaipyi.

"

⁶ Maꞌato iraniaꞌin Iesui mohey haria wo topot­mu­ꞌeria hawyi atiꞌa­tu­muꞌe miꞌiria uhehay wo — Iweꞌeg kahato rakat iꞌatuꞌe uhetiat pe. Maꞌato uito yt mesu­wa­ro­tiaria weꞌeg hap kaipyi uhehay yt ahiag weꞌeg hap kaipyi i. Mesu­wa­ro­tiaria ti koitywy iꞌatu­weꞌeg kahato maꞌato yt iꞌatu­weꞌeg hin i Tupana wanẽtup hawe. Meiũran Tupana timoma yne aru iꞌatu­weꞌeg hap hawyi yt topy­huꞌat hin i aru iꞌatukai."

⁷ Maꞌato uito atiꞌa­tu­muꞌe Iesui mohey haria Tupana weꞌeg hamo yn. Yt miitꞌin mikuap kaipyi hin i atiꞌa­tu­muꞌe maꞌato mekewat weꞌeg hap Tupana kaipywiat yn wo atiꞌa­tu­muꞌe torania miꞌiria. Maꞌato iraniaꞌin yt kuap i hap ewy mesuwat sehay uimi­mo­herep kat pote uhehay sehay yianmiat ewywyat aikotã saꞌa­wyꞌi Tupana aiꞌairo mesuwat yi nug hap eꞌyianmete hap ewy."

⁸ Tupana poꞌog iweꞌeg more­kuaria kai katu­pono more­kuaria weꞌeg hap yt putꞌokꞌe i Tupana Mipo­ꞌoro Aipo­rekuat nuat weꞌeg hap ete. Maꞌato teꞌe­ru­weꞌeg pote kat pote som taꞌa­tu­ꞌauka Aipo­typot ariaꞌyp posak ete.

"

⁹ Aikotã Tupana toꞌe Saꞌa­wyꞌi hap ewy — Mekewat uikyꞌe haria pe atum neran uiminug wakuat poꞌog ikahu torania miitꞌin akasa hap koꞌi kai ikahu rakat e. Atum neran uhemiitꞌin me wakuat sese e. Yt teke i te iꞌatu­wa­nẽtup hawe ikahu hap e. Miꞌi hap ti atum neran uikyꞌe haria pe e Tupana saꞌa­wyꞌi Isaia miwan 64.4 pe."

¹⁰ Miꞌi pote koitywy watikuap taꞌyn mekewat ikahu rakat Tupana miium. Maꞌato aito yn watikuap. Taꞌi Ipãꞌãu ti ahepe imoherep taꞌyn. Katu­pono Tupana Pãꞌãu me heremo yne minug koꞌi heremo yne raꞌyn. Iꞌewyte migꞌi wuat yt uwe mikuap i koꞌi toikuap. Iꞌewyte toikuap yne kat hamuat kat hamuat Tupana Pãꞌãu minug koꞌi. Miꞌi pote aimuꞌe torania ete tepiat ikuap hap ok tã."

¹¹ Aipo­typot ti miit aipiit ewywuat sese e. Miꞌi hawyi Miꞌi Miit wanẽtup hap watikuap toĩneꞌen aipiit pe Iesui Pãꞌãu pote. Miꞌi pote watu­wekuap Iesui pãꞌãu sese toĩneꞌen aipiit pe. Miꞌi hap ewy Tupana wywo Tupana toĩneꞌen Ipãꞌãu. Miꞌi ti ikuap yne tuwetiat."

¹² Koitywy toĩneꞌen naꞌyn Tupana Pãꞌãu aipiit pe. Miꞌi hawyi Tupana Mipo­ꞌoro Iesui pe — Ereke ro watoꞌe hawyi teke raꞌyn. Miꞌi hawyi Ipãꞌãu kaipyi watikuap yne Tupana Pãꞌãu pyꞌa piat ewy. Maꞌato iraniaꞌin mesu­wa­ro­tiaria kai wẽtup mãꞌãu neꞌi yt aiwat ewy hin i raꞌyn."

¹³ Miꞌiria ti wẽtup mãꞌãu ahiag wanuat wanẽtup hap ewy tukup­teꞌen. Miꞌi pote wẽtup sehay iꞌatuete wuatꞌi mikuap ewy miꞌiria weꞌeg hap. Miꞌi pote iꞌatuepe uruweꞌeg kahato katu­pono Tupana Pãꞌãu ti wẽtup sehay wo raꞌyn aimuꞌe. Miꞌi hawyi aiwẽ pyi wẽtup sehay raꞌyn tuwẽtem sehay pywuat sese yn naꞌyn. Miꞌi pote aimi­mu­ꞌeria Tupana Pãꞌãu eiam kahato wo tukup­teꞌen hawyi pywo iꞌatuꞌe ahehay pe."

¹⁴ Maꞌato iraniaꞌin yt Tupana Pãꞌãu yt eiam i koꞌi ti — Yt iꞌatuꞌe neꞌi Tupana ehay pywuat aiwẽ piat ete katu­pono miꞌiria yt kat kuap i Tupana miium Topãꞌãu wakuat kaipywiat. — Yt kat hamo i ehay iꞌatuꞌe Tupana pe. Taꞌi aimienoi Tupana Pãꞌãu kaipywiat ete ti teꞌe­ru­we­ky­ryꞌi neꞌi. Yt taꞌa­tukuap i kahato Tupana miium koꞌi ikahu rakat pytkai katu­pono Tupana Pãꞌãu yt toĩneꞌen i iꞌatu­pyꞌa pe ikuap hamuat."

¹⁵ Maꞌato aipiit pe toĩneꞌen Tupana Pãꞌãu pote watikuap kahato waku sese rakat sehay pywo rakat iꞌewyte yt naku i hap watikuap yne."

¹⁶ Katu­pono miitꞌin mesu­wa­ro­tiaria yt tikuap i kahato kat hamo Tupana tunug tomi­ky­ꞌesat koꞌi. Aikotã toꞌe iwan me hap ewy — Taꞌi yt uwe i ti ikuap Aika­ꞌiwat wanẽtup hap. Taꞌi yt uwe i ti inãpin kuap e Isaia tomiwan me. Yt uwe i Tupana wanẽtup hap kuap hat toĩneꞌen e Isaia miwan 40.13 pe. Watikuap kahato mesup katu­pono Aika­ꞌiwat Iesui wanẽtup hap aikai kahato toĩneꞌen mesup. Iesui wanẽtup hap toĩneꞌen aipyꞌa pe aiwa­nẽtup hawe hawyi Tupana mikuap koꞌi toĩneꞌen wy aipyꞌa pe katu­pono Iesui Toꞌywot ewywuat wanẽtup hat toĩneꞌen aipãꞌãu me aipyꞌa pe e. Tupana mipo­ꞌoro sese Pauru uito are.

"

3

¹ Uiwy­riaꞌin tawa Kurintiu piaria saꞌa­wyꞌi Uito Pauru ahenoi teran Tupana ehay ehepe saꞌa­wyꞌi uheĩneꞌen itote turan maꞌato tig mekewat eꞌat pe yt ahenoi kuap i Tupana Pãꞌãu miky­ꞌesat ewywuat hãpyk poꞌog nakat katu­pono eipe yt Iesui mohey haria yt ewy hin i te eiwa­nẽtup hap. Mesu­wa­rotiat wanẽtup hap ewy yn eipe eweikup­teꞌen katu­pono kurin kat ewy Iesui mohey hap toĩneꞌen eikai mekewat eꞌat pe."

² Saꞌa­wyꞌi eipe hirakat hit ewy eweikup­teꞌen mi hy yn u haria ewy aikotã hirakat yt tuꞌu kuap i te ipuꞌi kãꞌã hap ewy eweikup­teꞌen Tupana ehay yt ewetunug yne kuap i te pote. Miꞌi hawyi woro­ho­ꞌo­muꞌe potꞌi teran Tupana mikuap eikyꞌe hap ok tã. Maꞌato ahenoi hawyi yt eweikuap kuap i. Maꞌato iꞌewyte koitywy yt eweikuap i uiꞌe hap koꞌi eimuꞌe hap."

³ Katu­pono eweikup­teꞌen mesu­wa­rotiat wanẽtup haria ewy yn. Eiwu­ꞌuka wuꞌuka eiwo­ꞌope sehay hit no. Miꞌi hawyi ehaꞌy­wywi eweikup­teꞌen eiwo­ꞌope aikotã mesu­wa­ro­tiaria yt Iesui mohey i haria eko ewy eweikup­teꞌen."

⁴ Mio tã eweiꞌe eiwo­ꞌope — Uruto ti Pauru mohey haria maꞌato iraniaꞌin — Uruto ti aimuꞌe hat Aporu mohey haria eweiꞌe. Miꞌi hawyi eiwu­ꞌuka wuꞌuka at kaꞌap mio tã eiꞌe eiwo­ꞌopiat hamo. Yt naku i miꞌi tã eweiꞌe katu­pono miꞌi tã neꞌi pote mesu­wa­ro­tiaria yt Iesui mohey i haria ewywuat eiwe­wa­nẽtup."

⁵ Maꞌato areꞌe ehepe — Uito ti Pauru Tupana yn eropat hat sese iꞌewyte eimuꞌe hanuat are. Aporu iꞌewyte Tupana yn eropat hat. Kat hamo pyno — Aimuꞌe hat Pauru mohey haria uruto eweiꞌe. Saꞌa­wyꞌi woro­ho­ꞌo­muꞌe eipe miꞌi hawyi Iesui mohey haria wo eweikup­teꞌen uiꞌewy eweimohey pote are. Aika­ꞌiwat emiitꞌin sese uruto urutunug urupo­ꞌoro hap ok tã yn."

⁶ Uito areĩneꞌen hãꞌỹi koi hat Tupana ehay wo ewy woro­ho­ꞌo­muꞌe mekewat eꞌat pe. Miꞌi turan aimuꞌe hat Aporu putꞌokꞌe itote eimuꞌe hamo hap ewy hawyi toihuꞌi huꞌi uimikoi iãꞌỹi hap ewy hawyi iꞌatutag naꞌyn Tupana esaika hap wywo."

⁷ Maꞌato Tupana yn ni aimotag kuap tomohey hamuat hap ete. Miꞌi tupono waku Tupana yn wati­mõ­typot hãꞌỹi nug hat iꞌewyte iꞌyp moehaĩte hat. Yt naku i wati­mõ­typot ikoi hat neꞌi are. Iꞌewyte yt naku i wati­mõ­typot ihuꞌi huꞌi hat neꞌi. Poꞌog waku imotag kuap hat wato­mohey haty wo."

⁸ Meiũran aru Tupana tum ahepe aipotpap hap saꞌup. Tutum ahepe haꞌup aikotã aipotpap hap ok tã aru. Iꞌewyte iwato aipotpap pote iwato tutum yt pote kurin tutum. Pyno tukup­teꞌen aitoria hãꞌỹi koi haria ewy hawyi iraniaꞌin ihuꞌi huꞌi haria ewy maꞌato saꞌup ium hat sese Tupana.

"

⁹ Pyno aito Tupana eropat haria Aikotã wẽtup ok etiat motpap nug haria ewy aito."

¹⁰ Eipe Tupana mõtypot yat ewy eweikup­teꞌen. Uito Tupana mõtypot yat ãkukag moꞌam hat ewy Uipo­ꞌoro hat miky­ꞌesat ewy are. Hãpyk kahato atunug wuatꞌi nug kuap hat ewy. Waku yne hawyi iraniaꞌin inug ipiit. Iꞌewyte iraniaꞌin iꞌahik yi wo hap ewy. Miꞌi hap ewy atunug ehepe are. Katu­pono Tupana toꞌe — Eiweꞌeg wo o ewetunug uiꞌyat nug hap ete waku uiꞌe hap ewy ewetunug o e ahepe. Miꞌi pote waku wati­ꞌa­tu­muꞌe miitꞌin hãpyk kahato ihay pywuat nuat yn."

¹¹ Aika­ꞌiwat Iesui iꞌapy­ꞌyha ewywuat kahato. Iꞌapy­ꞌyha watopag yi pe aiꞌyat moheg hamuat hawyi aiꞌyat yt taꞌat hin i. Miꞌi hap ewy ti Aika­ꞌiwat Iesui watopag aiꞌa­py­ꞌyha wo hawyi watoĩ­neꞌen wuatꞌi eꞌat pe. Yt karãpe i wataꞌat aria pe. Iesui yn Tupana Miꞌairo Aheha­kye­raꞌat hat. Yt naku i watoꞌe iraniaꞌin me — Yt Iesui yn i ti aheha­kye­raꞌat hat maꞌato toĩneꞌen wẽtup ok aheha­kye­raꞌat hat watoꞌe neꞌi yt naku i watoꞌe."

¹² Eimuꞌe haria ti aiꞌyat nug haria ewy tukup­teꞌen. Toĩneꞌen aiꞌyat nug kuap kahato haria ewy miꞌiria aiꞌyat nug nu kawiat ewy iheg nakat nu Uru kawiat nu Parata kawiat getap nug haria ewywuat aimuꞌe hãpyk Tupana ehay sese etiat haria ewywuaria maꞌato iraniaꞌin aimuꞌe haria aiꞌyat nug haria yt iheg hin i nug hap ewy tutunug. Yt toĩneꞌen motꞌi hin i iꞌatu­minug koꞌi nupiꞌa miꞌu wo hap ewy taꞌa­tunug aiꞌyat ikaha wen maꞌato meremo yt ikahu i hap ewy topy­huꞌat. Miꞌiria taꞌa­tunug aiꞌyat meremo upip kawiat hawyi ikahu wen wẽtup ewaty hawyi hatꞌe hap ewy topy­huꞌat. Miꞌiria ewywuat aimuꞌe ikahu kahato maꞌato taꞌa­tu­wa­nẽtup hap kaipyi aimuꞌe yt Tupana ehay sese kaipyi hin i aimuꞌe hawyi wato­mohey iꞌatu­wa­nẽtup hawyi meremo waku maꞌato wẽtup ewaty hawyi aiꞌyat nem nakat hap ewy topy­huꞌat hap ewy."

¹³ Karãpe putꞌokꞌe Aiopo­typot Iesui hawyi toimo­herep aru wuatꞌi miitꞌin me iꞌatu­minug sio waku sio yt hap. Sio watunug iheg nakat sio yt e. Tohãꞌãg yne aiminug koꞌi mekewat eꞌat pe sio iheg nakat nu ewy sio ariaꞌyp kawiat neꞌi hap kuap hamo."

¹⁴ Waku watunug Tupana mõtypot yat iheg kahato rakano nu kawiat ewywuat. Miꞌi hawyi aria putꞌokꞌe itote hawyi aria yt tuꞌu kuap i. Miꞌi hawyi Tupana tuwehum aiminug iheg nakat nuat toꞌyatnug mote."

¹⁵ Maꞌato aria tuꞌu neꞌi hawyi yt kat hamo i topy­huꞌat yt kat hamo i aipotpap. Watoĩ­neꞌen aru Tupana mieha­kye­raꞌat no wen maꞌato aipotpap saꞌup aipo pe yt kat i katu­pono aiminug aria tuꞌu yne. Yt kat i topy­huꞌat Tupana kapiat aipotpap hap watunug saꞌag neꞌi pote."

¹⁶ Eweikuap apo Tupana Pãꞌãu yat sese eipe hap sio yt. Taꞌi Tupana yat sese koꞌi ti eipe. Tupana Pãꞌãu eiam torania imohey haria Iesui kaipywiat haria."

¹⁷ Maꞌato uwe uwe — Tupana yat moma teran e hat Tupana mimoma wo neꞌi aru topy­hyꞌat. Katu­pono Tupana yat no yn waku aipiit topy­huꞌat aikotã Tupana ewaku hap ewy yn waku wato­py­huꞌat. Aito ti Tupana yat sese ewy watoĩ­neꞌen."

¹⁸ Yt naku i watu­we­maꞌat neꞌi Tupana yat — Uito poꞌog iraniaꞌin kai e hap mo. Miꞌi tã neꞌi watunug mote miitꞌin iraniaꞌin yt kat kuap i haria ewy neꞌi watu­wa­nẽtup. Waku watipun — Uito poꞌog e hap pya aikai. Paaꞌwa­toꞌe pote Tupana toꞌe ahepe — Eiweꞌeg kahato rakaria eipe e ahepe miitꞌin miky­ryꞌi hamuat watoĩ­neꞌen pytkai."

¹⁹ Iꞌatu kahato mesuwat yi tote — Uito poꞌog uiweꞌeg e haria maꞌato Tupana wanẽtup hawe yt kat i kuap haria ewy miꞌiria — Uito uiweꞌeg kahato iꞌatuꞌe pytkai. Miwan me mio tã toꞌe — Uito poꞌog uiweꞌeg e haria teꞌe­ru­we­maꞌat neꞌi taꞌa­tu­weꞌeg saꞌag hamo hawyi taꞌa­tu­weꞌeg poꞌog hap suki ewywuat topy­huꞌat taꞌa­tu­ꞌauka hamo pira ewy e Tupana saꞌa­wyꞌi miwan me."

²⁰ Mio tã e haria pe Tupana toꞌe — Uito poꞌog uiweꞌeg iraniaꞌin kai eweiꞌe pytkai yt kat hamo i eiweꞌeg hap e Tupana.

"

²¹ — Aito hekat rakaria ewy katu­pono Aiꞌywot Tupana sakpoꞌe hekat rakat pote. Yt kat i ahekat mesu­we­pytkai hekat rakaria watoĩ­neꞌen wuatꞌi eꞌat pe."

²² Yt naku i watu­we­mõ­typot — Uito poꞌog nakat e hap aiwa­nẽtup hawe. Yt naku i watu­wehum miitꞌin minug teꞌe­ru­we­kai­pywiat ete katu­pono torania aiwat aiminug wuat koꞌi Tupana piat aipo­wyry hap. Uito Pauru maꞌato areĩneꞌen eimuꞌe eiwanuat hamo raꞌyn. Iꞌewyte aimuꞌe hat Peteru aiwanuat re wy aimuꞌe hat Aporu aiwanuat aimuꞌe hap tutum. Katu­pono yne yne Tupana minug aipo­wyro hamuat toĩneꞌen. Tutum aipo­wyro aiku­ꞌuro turanuat aipo­wyro hamo. Koran mũki­ꞌite wuatꞌi eꞌat pe aipo­wyro. Taꞌi iꞌewyte mesup iꞌewyte mũki­ꞌite eꞌihotꞌok pe turan toĩneꞌen kahato aipo­wyro hano. Miꞌi pote hekat rakaria sese ewywuat watoĩ­neꞌen aito. Aito iꞌewyte aiku­ꞌuro wen iꞌewyte mesup iꞌewyte mũki­ꞌite iꞌewyte eꞌihotꞌok hap ewy."

²³ Katu­pono Aika­ꞌiwat Iesui wanuat watoĩ­neꞌen. Aika­ꞌiwat Iesui toĩneꞌen Tupana wanuat. Miꞌi pote yne aito Tupana wuanuat watu­kup­teꞌen. Uito Iesui emiit Pauru are.

"

4

¹ Uiwy­riaꞌin uruto ti Tupana potpo­ꞌo­roria pote waku ti eiwa­nẽtup urumienoi kape — Miꞌiria wyti Aipo­typot eropat haria sese waku eweiꞌe. Miꞌiria wyti yt aimikuap i Tupana etiat moherep haria waku eweiꞌe uruepiat pe."

² Karãpe watu­we­potpap Aika­ꞌiwat potpap nug hap ete turan waku kahato watunug iꞌe hap ewy. Waku watunug imiky­ꞌesat ewy. Miꞌi hawyi watoĩ­neꞌen heropat kuap sese haria wo aito."

³ Iraniaꞌin eipy­ꞌa­setpe tukup­teꞌen — Miꞌi wakuat kahato iꞌatuꞌe uhepiat pe. Iraniaꞌin — Yt naku i iꞌatuꞌe uhepiat pe. Maꞌato ti uito yt atikat i miitꞌin kaipyi — En ni waku e hap katu­pono — En ni waku kahato e hap Tupana kaipyi atiky­ꞌesat. Koitywy yt areꞌe i uiwepe uiwa­nẽtup hawe — Uito waku uito yt naku i yt areꞌe i uiwepe maꞌato atikat kahato Tupana piat uikuap hap — En waku e hap."

⁴ Karãpeĩ yt kat i uiwe­mõti hawe pytkai — Pyno waku kahato uito areꞌe uiwa­nẽtup hawe maꞌato Tupana yn ikuap sio uito waku sio yt hap. Sio atunug waku tope sio yt nakuap i atunug."

⁵ Karãpeĩ Aika­ꞌiwat putꞌokꞌe atipy kaipyi miitꞌin patꞌok patꞌok hamo hap eꞌat pe ti aru Tupana tomo­herep aru wuatꞌi pe aiwa­nẽtup saꞌag hap sio watunug waku tope sio yt hap sio tomõ­typot haria watoĩ­neꞌen sio watu­we­mõ­typot neꞌi sio miitꞌin mõtypot haria aito. Taꞌi mekewat eꞌat pe watikuap taꞌyn Tupana kaipyi — En ni waku e hap sio yt hap watikuap taꞌyn mekewat eꞌat pe — Uito waku aiꞌe pytkai aito waku aiꞌe pytkai."

⁶ Miꞌi hap ewy ti uruto uiwy­riaꞌin. Uito Pauru eimuꞌe hat iꞌewyte Aporu toĩneꞌen itote eimuꞌe hat. Waku eiwa­nẽtup kahato urehay kape katu­pono wẽtup ehay yn urutoꞌe Iesui etiat yn uruimuꞌe eipe. Pyno atiky­ꞌesat kahato uruꞌewy eweikup­teꞌen wẽtup sehay yn moherep haria Iesui moherep haria uruto ewy uruhãiku ewywuat urupusu ewywuat waku eweikup­teꞌen hap atiky­ꞌesat urupot­mu­ꞌeria. Urumi­muꞌe wẽtup ok yn uruto typy ok pytkai. Yt naku i eweiꞌe Uito Pauru mimuꞌe hawyi wẽtup ok — Uito yt Pauru upi i maꞌato uito Aporu upi uito pãi an yt naku i eweiꞌe katu­pono Aporu uito wẽtup miit ewy hawyi wẽtup sehay yn eimuꞌe Iesui Aimi­mõ­typot moherep hap yn uruehay. Yt naku i wati­mohit wẽtup ok aimuꞌe hat hawyi yt naku i watunug wẽtup ok aimuꞌe hat Tupana wo e."

⁷ Miꞌi pote kat hamo watoꞌe iraniaꞌin me — Uito poꞌog ekai katu­pono Tupana tum ahepe tomi­sepap kuap nug kuap hap. Yt aiwewi i watikuap wuatꞌi nug hamuat maꞌato Tupana miium kaipyi wahepap maꞌato yt pote yt kat i aikai. Pyno kat hamo ten — Uito poꞌog waku eikai watoꞌe aipyꞌa pe."

⁸ Koitywy — Uruto poꞌog eweiꞌe katu­pono uruikuap yne eweiꞌe. Taꞌi Miitꞌin muꞌe haria akag wo urutu­kup­teꞌen eweiꞌe. Ikap kahato rakaria ewy urutu­kup­teꞌen mesup pote yt kan hamo i urupoi poꞌog Tupana ehay mesup uruikuap yne raꞌyn mote eweiꞌe eipyꞌa pe yt iweꞌeg i haria ewy. Pywo pote waku uimuꞌe waku Aporu muꞌe haria wo eweikup­teꞌen maꞌato yt pywo hin i eweiꞌe eipyꞌa pe. Hira­karia ewy te eweikup­teꞌen eiwa­nẽtup hawe."

⁹ Uruto urutu­kup­teꞌen wuatꞌi muꞌe hamo Tupana mipo­ꞌoro sese koꞌi uruto. Maꞌato miꞌi pytkai eimi­mohit koꞌi wo urutu­kup­teꞌen poꞌog yi kape wuatꞌi kai wuatꞌi miitꞌin wanẽtup hawe urutu­kup­teꞌen. Iraniaꞌin uruꞌauka teran urukuasa teran urumohit teran wuatꞌi ehamo miitꞌin ehamo iꞌewyte atipy piaria ehamo urumohit turan."

¹⁰ Miꞌi pytkai Aipo­typot Iesui moherep hap ete yt urupohep hin i miitꞌin teꞌe­ru­we­ky­ryꞌi teran uruete pytkai. Maꞌato ehete yt uwe i teꞌe­ru­we­ky­ryꞌi uruetiat ewy. Miꞌi pote — Uruto poꞌog Aipo­typot emiit eweiꞌe. Uruweꞌeg poꞌog iraniaꞌin kai eweiꞌe. Uruto imohey pakup kahato haria eweiꞌe. Taꞌi uruwa­nẽtup hawe eipe ipakup kahato koꞌi. Maꞌato uruto miitꞌin mimohit koꞌi wo uruto­py­huꞌat."

¹¹ Koitywy hesyꞌat rakaria wo urutu­kup­teꞌen. Urute­ꞌyꞌu kahato uruhe­wyry hap upi. Uruesokpe koꞌi hiot hiotꞌe rakat. Miitꞌin miꞌa­hy­kahyk koꞌi uruto. Yt kat i iꞌyat rakaria uruto. Kowoꞌi kowoꞌi uruewyry yt urueꞌyni wywo i."

¹² Urupotpap saꞌup hap kaipyi urutenuk. Karãpe miitꞌin urumohit taꞌa­tuehay wo haywi uruiꞌa­tu­poi­tynug miꞌiria uruehay wo. — Tupana etia­tu­mo­hãite no uruwa­nĩ­kaptia urutoꞌe at kaꞌap. Iꞌatue­haĩte hap urutum urusa­ty­ꞌi­sa­tyꞌi kahato miꞌiria pytkai."

¹³ Urutoĩ­neꞌen motꞌi Iesui mohey hap wywo uruꞌakit taꞌa­tuehay wo kahato pytkai maꞌato uruto uruiwesat sehay iwese rakano yn. Mesu­wa­ro­tiaria mipun wuat uruto­py­huꞌat. — Waku urumi­mohit haria wo eweikup­teꞌen iꞌatuꞌe uruepe. Mio tã iꞌatuꞌe uruepe Tupana miꞌai­roria sese uruto pytkai.

"

¹⁴ Ahenoi yne mesup ehepe uiwy­riaꞌin uimiwan me. Yt atiky­ꞌesat i eiwe­mõti neꞌi uimiwan ete uhehay ete maꞌato eimoe­haĩte eiwa­nẽtup hawe yn woro­ho­ꞌo­nãpin. Aikotã wati­nãpin aimẽpyt ikyꞌe haype hap ewy woro­ho­ꞌo­nãpin mesuwe."

¹⁵ Katu­pono uito areĩneꞌen eiꞌywot ewy katu­pono uiwẽ pyi eweikuap saꞌa­wyꞌi Aipo­typot Iesui etiat. Miꞌi hawyi eweimohey Iesui hawyi wuatꞌi eꞌat pe gupteꞌen haria uimienoi wakuat kaipyi Uimi­mo­herep kaipyi aikotã uimẽ­pytꞌin ewy eweikup­teꞌen. Toĩneꞌen iꞌatu kahato eimuꞌe haria eiꞌa­pykok haria Tawa Kurintiu piaria wen maꞌato wẽtup yn eiꞌywot hap ewy toĩneꞌen. Miꞌi ti uito Pauru rat katu­pono wuatꞌi iraniaꞌin eimuꞌe haria yianme sehay wakuat ahenoi ehepe Iesui etiat."

¹⁶ Miꞌi hawyi uipyꞌa pyi ahẽtup ehupi eweikup­teꞌen itote uiꞌewy kahato hamuat hap Aika­ꞌiwat Iesui mohey hamuat hap ete."

¹⁷ Atiky­ꞌesat kahato eipe uito ewywuaria Iesui mohey haria. Miꞌi pote atipo­ꞌoro eimuꞌe hat ehowawi Uito ewywuat Timoteu. Miꞌi ti uhaꞌyru sese wo ewywuat toĩneꞌen uiwa­nẽtup hawe. Uikyꞌe kahato miꞌi katu­pono yt karãpe i uimaꞌat hano toĩneꞌen. Miꞌi putꞌokꞌe itote hawyi toimo­herep ehepe eimi­waure aikotã woro­ho­ꞌo­muꞌe saꞌa­wy­ꞌiwuat hap koꞌi ete. Aikotã watoĩ­neꞌen ipakup takaria ewy yn naꞌyn wẽtup piit ewy Aika­ꞌiwat Iesui wywo hap ete. Aikope aikope miitꞌin tukup­teꞌen hap kape uruhenoi hawyi Iesui mohey haria wo uruepiat taꞌa­tu­nãpin hap ewy ipakup takaria wo raꞌyn tukup­teꞌen. Wẽtup miit ewy yn Iesui piit wywo tukup­teꞌen. Miꞌi hap ete eimuꞌe hamo atipo­ꞌoro uhaꞌyru Timoteu."

¹⁸ Saꞌa­wyꞌi urutuwat eipy­ꞌa­setpyi hawyi iꞌatu kahato wemõ­typot haria tukup­teꞌen eipy­ꞌa­setpe — Pauru yt taꞌaipok i iꞌatuꞌe haypiat haria."

¹⁹ Maꞌato araꞌaipok irane te Tupana tum muꞌap uhepe hawyi. Areĩneꞌen eipy­ꞌa­setpe hawyi atikat eipy­ꞌa­setpiat haria tukup­teꞌen. Miꞌi hawyi atikuap irane uwe uwe eipy­ꞌa­setpe Tupana mõtypot haria tukup­teꞌen."

²⁰ Tupana toĩneꞌen Aipo­typot no yt aiwẽ kaipywiat i — Uipo­rekuat no En ereĩneꞌen Tupana yt e hap kaipyi i maꞌato aipyꞌa pyi watunug imiky­ꞌesat ewy hap kaipyi Tupana toĩneꞌen kuap Aipo­typot no.

"

²¹ Waku areto eimo­pe­rupꞌi hamo sio eiꞌa­piheg hap mywo. Sio waku woro­ho­ꞌo­mo­pe­rupꞌi eikyꞌe hap mywo uiwese hap wywo sio aikotã eweiky­ꞌesat hap wywo areto ehewowi. Uito Pauru.

"

5

¹ Koitywy ti wuatꞌi miitꞌin eikuap yt eiweꞌeg i hap ete meũpiaria. Taꞌi taꞌa­tu­he­noi­henoi kahato ti aikotã aheĩneꞌen hary­poria wywuat ihainiaꞌin wywuat hap koꞌi. Yt Iesui mohey haria ewy hin i eweikup­teꞌen hap taꞌa­tukuap taꞌyn. Maꞌato eipe poꞌog saꞌag yt nakaria i mekewat yt Iesui mohey i haria kai. Katu­pono uruikuap eipy­ꞌa­setpiat wẽtup ok toꞌywot eharyꞌi pakup toty pakup wywo toket hap."

² Miꞌi hap ete ti yt tuwe­mõti hin i te maꞌato poꞌog ni uruto uruewaku toꞌe neꞌi saꞌag. Miꞌi hawyi eipe yt paaꞌe­weiꞌe hin i maꞌato — Waku miꞌi tã watunug eweiꞌe saꞌag. Uiwy­riaꞌin waku waire waire nug haria eweiꞌa­tu­ꞌywyk eiwe­ꞌa­tunug hap kaipyi."

³ Uipiit yt toĩneꞌen itote eipy­ꞌa­setpe wen maꞌato areĩneꞌen eipy­ꞌa­setpe uiwa­nẽtup hawe hap ewy miꞌi pote woro­ho­ꞌo­nãpin aikotã areĩneꞌen eipy­ꞌa­setpiat turanuat hap ewy. Taꞌi yt naku i kahato etunug ety hit eharyꞌi saꞌag wo mimi uhyt waku watoꞌe itote."

⁴ Miꞌi pote waku eiwe­ꞌa­tunug yne eipe hawyi waku eweikaykay mekewat miit yt iweꞌeg i rakat ehewowi. Miꞌi tote ti toĩneꞌen aru Aipo­typot Iesui eipy­ꞌa­setpe iꞌewyte uipãꞌãu toĩneꞌen eiwywo. Miꞌi hawyi waku mekewat toꞌywot eharyꞌi wywuat get hat eweinãpin kahato — Pyno koitywy ahiag wanuat ereĩneꞌen waku watoꞌe tope. Miꞌi hawyi mono etoiat ro eminug saꞌag maꞌato yt etoiat i ewaire waire hap pote ikuꞌuro rakat no ereĩneꞌen waku watoꞌe tope."

⁵ Maꞌato — Yt atoiat i uiwaire hap toꞌe pote waku watoꞌe Iesui pe — Pyno waku miꞌi miit piit ahiag miꞌauka wo topy­huꞌat maꞌato waku miꞌi miit pãꞌãu topy­huꞌat epo pe Iesui wuatꞌi eꞌat pe aikope Tupana toĩneꞌen morekuat no hap tote waku watoꞌe."

⁶ Pyno yt eiwe­ky­ryꞌi teiꞌo mekewat miit minug saꞌag ete. Yt naku i kahato watu­wehum miꞌi tã nug hat ete katu­pono mekewat miit topy­huꞌat mani puk ewywuat eipy­ꞌaset pe maꞌato eipe eweipy­huꞌat ipyre ewy. Miꞌi pote aikotã watopag ipyre mani puk pe hawyi toimorem yne mani puk hap ewy miꞌi hap ewy waku eweihep o mekewat miit saꞌag eipy­ꞌa­setpyi hawyi ti aru eweipy­huꞌat miit wakuaria ewywuat. Yt naku i hap yt mig hin i haria eipe. Pyno saꞌa­wy­ꞌi­wuaria Iuteuria tuwe­nõꞌẽ taꞌa­tue­wã­ni­kaptia yi Esituꞌin po kaipywiat turan iꞌatu­miꞌu man iteneg nakat yn iꞌatu­miꞌu yt kat i nem nakat ewy."

⁷ Miꞌi ti yt kat i imoperup hap iꞌapuk hap nem nakat. Miꞌi yt ipyp takat i mekwat iꞌatueman. Miꞌi hap ewy koitywy aiwat aheman yt kat i ipyp hit hap imonem kuap hat."

⁸ Pyno toꞌiro Iesui enuk hap kape yt kat i ipyp takat man aimiꞌu wywo hap ewy e. Pyno ti aimopyp hap ewywuat toĩneꞌen mekewat mani puk ewywuat mekewat aiwo­ꞌo­ma­ꞌatꞌi maꞌatꞌi hap ewywuat toĩneꞌen. Iꞌewyte man teneg ewywuat toĩneꞌen mekewat aiwo­ꞌo­kyꞌe hap ewywuat. Miꞌi yn waku saꞌa­wyꞌi aimiꞌu wo watu­wẽtem ye Esitu pyi turan yt kat i mani puk watioto kuap pote. Miꞌi man Tupana ehay pywo rakat yt kat i aheso hap wywo hap ewy. Miꞌi man ewywuat waku aimiꞌu wo katu­pono mekewat man puk aiwo­ꞌo­mo­pitpit hap ewywuat aiwo­ꞌo­tu­ꞌuka hap ewywuat watoꞌe saꞌa­wyꞌi. Waku poꞌog Tupana ehay sese wahenoi miitꞌin me yt kat i miitꞌin ehay heso hap wywo."

⁹ Saꞌa­wyꞌi atipo­ꞌoro uimiwan me einãpin hamuat — Yt naku i watunug aiwy ok sese wo Iesui mohey hat yt iweꞌeg i sese rakat wuatꞌi ihainia wywuat ieĩneꞌen hat wuatꞌi hary­poria wywo."

¹⁰ Tukup­teꞌen aipy­ꞌa­setpe mesuwat yi tote maꞌato iꞌatu kahato aiwy­riaꞌin yt Iesui mohey i haria yt naku i nug haria. Miꞌiria tukup­teꞌen yne eꞌat aikope aikope watoĩ­neꞌen hap tote ahewyry hap tote. Miꞌiria minug ewywuat yt naku i watunug katu­pono miꞌiria wuatꞌi hary­po­riaꞌin ihainiaꞌin wywo ieĩneꞌen haria. Aheka­reꞌen sereꞌak takaria tukup­teꞌen miꞌiria. Ahekat kyꞌewi yn aimaꞌat maꞌat neꞌi miꞌiria wuatꞌi eꞌat pe. Miꞌiria wuatꞌi tupa­naria mo wuat minug mõtypot haria. Yt naku i watunug miꞌiria ewywuat maꞌato waku wati­ꞌa­tuekyi miꞌiria Iesui mohey hap kape. Yt naku i watunug miꞌiria ahewa­nĩ­kaptia wo maꞌato poꞌog waku wati­wesat miꞌiria waku hap ewy. Maꞌato karãpe Iesui mohey hat watoĩ­neꞌen hawyi yt naku i watunug ne aikotã miꞌiria minug yt naku i hap koꞌi ewywuat. Maꞌato miꞌiria ewywuat watoĩ­neꞌen yt naku i nug haria te waku — Iesui mohey haria miꞌa­piheg wo wato­py­huꞌat. Yt naku i watunug ne yt naku i nug hap saꞌa­wy­ꞌiwuat ewy Iesui mohey haria aito hawyi."

¹¹ Maꞌato — Ewetoiat ro meimuẽwat koꞌi katu­pono miꞌi ewywuat watoiat pote watoĩ­neꞌen mesuwat yi tote waku pe.

Koitywy atipo­ꞌoro ewawi wẽtup sehay. Toĩneꞌen eipy­ꞌa­setpe yt nakuap i nug hat — Uito Iesui mohey hat e hat maꞌato wuatꞌi wywo toĩneꞌen hewaire rakat miꞌi hat ewywuat yt eweiwesat wesat teiꞌo iꞌewyte yt erenuk teiꞌo iwywo. Iꞌewyte toĩneꞌen Iesui mohey hat maꞌato tupana iãꞌãkap kape toiwẽpap te toimohey te miitꞌin minug tupana toꞌi — Uito Iesui mohey hat wy toꞌe pytkai waku miꞌi miit kai waure wo waku watu­kut­p­teꞌen."

¹² Iꞌewyte Iesui mohey hat maꞌato miitꞌin mohit tehay wuat hat toĩneꞌen ne iꞌewyte sero­ꞌokꞌe hat iꞌewyte Iesui mohey hat maꞌato mahy kape toĩneꞌen imopẽꞌã rakat."

¹³ Miꞌi hat waku wati­nãpin kahato aikotã saꞌa­wyꞌi Tupana toꞌe miwan me — Eweihep to eipy­ꞌa­setpiat yt naku i nug hat uimohey toꞌe pytkai e Tupana temiitꞌin me. Maꞌato iraniaꞌin mesu­wa­rotiat yt Iesui mohey i haria yt kat hamo i miꞌiria wati­ꞌa­tu­ꞌa­piheg katu­pono Tupana yn miꞌiria apiheg kuap hat. Maꞌato ti waku Iesui mohey haria yt naku i nug haria wati­ꞌa­tu­nãpin hãpyk yn wati­ꞌa­tu­ꞌa­piheg miꞌiria hap ewy waku e Tupana ahepe. Uito emuꞌe hat Pauru.

"

6

¹ Karãpe toĩneꞌen aipy­ꞌa­setpe wuꞌuka hap neꞌi aiwo­ꞌopiat iraniaꞌin Iesui mohey haria wywo. Miꞌi hap eꞌat pe yt naku i kahato watioto miꞌiria sura­raꞌin yt imohey i haria kape. Poꞌog waku miꞌiria wati­ꞌa­tunug Tupana mõtypot yat kape Tupana mohey haria piat ikuap hamo sio waku sio yt hap kuap hamo."

² Meiũran aru aito Iesui emiitꞌin no wato­py­huꞌat wuatꞌi miitꞌin airo hamo sio wakuat sio yt e hamuaria. Miꞌi tã watunug mote aru waku mesup taꞌyn wy aiwo­ꞌope woꞌope wati­ꞌairo sio wẽtup ok tunug yt naku i sio yt hap kuap hamo e."

³ Taꞌi mekewat eꞌat pe aru Tupana ainug temiit atipy piaria airo hamo uwe waku uwe yt e hamo wahenoi kuap mekewat eꞌat pe Tupana pe. Miꞌi tã watunug kuap pote aru waku mesuwe iꞌewyte wati­ꞌairo kat som waku kat som yt naku i. Waku wati­ꞌairo aipy­ꞌa­set­piaria uwe aiwo­ꞌo­patꞌok hat hawyi waku wato­mo­hãpyk aiwu­ꞌuka hap neꞌi."

⁴ Yt naku i watu­ꞌuka aiwo­ꞌope maꞌato toĩneꞌen aiwu­ꞌuka hap pote yt naku i wati­kaykay sura­raꞌin aiwu­ꞌuka wuꞌuka hap monik hamo aiwo­ꞌopiat aiwo­ꞌoehay uka turan."

⁵ Maꞌato sura­raꞌin wati­kaykay mesu­wa­rotiat aiwu­ꞌuka wuꞌuka hap monik hamo miꞌi tã pote waku watu­we­mõti mekewat yt aiweꞌeg i hap neꞌi pupi yt uwe i eipy­ꞌa­setpe iweꞌeg nakat eiwu­ꞌuka hap moma hamo. Maꞌato Iesui mohey haria waku watikat aipy­ꞌa­setpe wẽtup ok iweꞌeg nakat aiwu­ꞌuka hap moma hamo uwe waku uwe yt naku i e hamo."

⁶ Maꞌato wẽtup ok eiwy ok eheinytꞌin koꞌi ewetioto sura­raꞌin kape yt imohey i haria kape uwe waku uwe yt e hamo pote yt eiweꞌeg hin i eipe."

⁷ Maꞌato eiwo­ꞌo­ꞌa­tu­ꞌuka hap kaipyi atikuap taꞌyn yt ihãite i eiwo­ꞌo­kyꞌe hap ete. Miꞌi hap kaipyi atikuap eipe porap te haria hap. Yt naku i ewetioto ehemiit morekuat yt Iesui mohey hat kape. Karã pe Iesui mohey hat aimaꞌat yt naku i watioto surara kape poꞌog waku imaꞌat hat no watu­kup­teꞌen. Poꞌog waku eweikup­teꞌen waku imieroꞌok wo poꞌog morekuat woꞌo­py­hik hawe eweikup­teꞌen.

"

⁸ Koitywy yt naku i woꞌo­maꞌat haria wo eweikup­teꞌen. Yt naku i woꞌoe­roꞌok haria wo eweikup­teꞌen uhytꞌiꞌin manaꞌin."

⁹ Yt uwe i aru woꞌo­ma­ꞌatꞌi maꞌatꞌi hat toĩneꞌen aikope Tupana toĩneꞌen Morekuat nuat hap tote. Eweꞌeg wo o eiwe­maꞌat hap pupi katu­pono eweikup­teꞌen wuatꞌi hary­poria wywo wuatꞌi ihainia wywo pote yt karãpe i putꞌok­ꞌe­weiꞌe Tupana etawa pe. Iꞌewyte yt uwe i mo wuat minug tupa­naria mõtypot haria itote. Seꞌaito wywuat ieĩneꞌen hat seha­ryꞌi wywuat ieĩneꞌen hat yt uwe i aru itote. Hary­po­riaꞌin eꞌaito wo hary­poria te iꞌewyte ihainiaꞌin eꞌaito wo ihainiaꞌin ne haria yt uwe i itote."

¹⁰ Sero­ꞌokꞌe haria yt uwe i itote. Yt hegyiꞌat i rakaria yt uwe i. Iꞌewyte yt uwe i aru woꞌe­ro­mo­pusu hat miitꞌin mohit hat itote. Yt uwe i — Uiano yn mo e hat iꞌewyte imopẽꞌã rakat."

¹¹ Miꞌi haria miꞌi nug ewywuat haria sok aito saꞌa­wyꞌi maꞌato koitywy Tupana timo­weityk aiminug saꞌag koꞌi aheko yt naku i nug hap saꞌa­wy­ꞌiwuat. Miꞌi hawyi ainug naꞌyn temiit sese wo. Koitywy yt kat i saꞌag Tupana tipuẽti aikai Aika­ꞌiwat Iesui mieha­kye­raꞌat koꞌi aito pote. Aika­ꞌiwat ainug naꞌyn Tupana wanuaria wo hawyi tutum Topãꞌãu ahepe hawyi.

"

¹² Tukup­teꞌen eipy­ꞌa­setpe — Uito atunug uimi­ky­ꞌesat ewy e haria. Uimi­ky­ꞌesat ok tã yn atunug yne iꞌatuꞌe miꞌiria. Pyno eiweꞌeg wo o mio tã e haria pupi. Iꞌatu kahato — Aimi­ky­ꞌesat watunug hawyi waku topy­huꞌat wen maꞌato miꞌi kape yn watu­wa­nẽtup pote aimi­ky­ꞌesat nug eropat haria yn wato­py­huꞌat hawyi yt Tupana miky­ꞌesat nug kuap haria hin i wato­py­huꞌat."

¹³ Iꞌewyte iraniaꞌin eipy­ꞌa­setpe — Uimiꞌu kat hap yn atunug neran at kaꞌap yne eꞌat katu­pono miꞌu yn aimo­wepit kuap hap e hat. Maꞌato eiweꞌeg wo o miꞌu mesu­wa­rotiat wywo yn eiꞌok hap. Miꞌu waku kahato wen maꞌato miꞌu yn watikat pote aimaꞌat hap toĩneꞌen katu­pono Tupana eropat hap yt watikat hin i. Meiũran aru Tupana timoma yne ahesyꞌat hap hawyi yt kan hamo i aimiꞌu kat hap. Yt eweikuap i kat hamo Tupana tunug aipiit apo. Taꞌi toiky­ꞌesat aito teropat hamo iꞌewyte toiky­ꞌesat aito tokyꞌe haria. Toiky­ꞌesat aipiit towanuat e. Yt toiky­ꞌesat i aipiit watum yt iweꞌeg i rakaria pe iꞌewyte yt toiky­ꞌesat watum aipiit miꞌu kat hap yn kape. Uiwy­riaꞌin waku watu­wehum kahato Tupana kape aimiꞌu ete maꞌato yt naku i watunug miꞌu ahetu­pana wo. Iesui Aika­ꞌiwat aipoi kuap kahato. Waku iwywo watikat aimiꞌu. Yne Tupana tum teran ahepe aimo­wepit hamuat."

¹⁴ Tupana tihep Aika­ꞌiwat Iesui guꞌuro pyi. Miꞌi hap ewy aito aihep guꞌuro pyi tesaika hap wywo."

¹⁵ Karãpe wato­mohey Iesui hawyi wẽtup piit ewy aipiit Iesui piit wywo. Miꞌi pote yt naku i watu­wehik hary­poria yt iweꞌeg i rakat ete ihainia yt iwẽꞌẽg i rakat ete kat pote ti watoĩ­neꞌen Iesui piit ewywuat pote."

¹⁶ Tupana yt tiky­ꞌesat hin i watum aipiit waire nug hamuat mesuwe watoĩ­neꞌen hap. Saꞌa­wyꞌi Tupana toꞌe — Uwe tuwehik hary­poria ete hawyi wẽtup ok miit piit ewy topy­huꞌat iwywo e. Miꞌi pote yt naku i watu­wehik hary­poria ihainia yt iweꞌeg i rakat ete. Katu­pono miꞌi tã watunug hawyi wẽtup ok piit ewy raꞌyn watoĩ­neꞌen Iesui piit yt ewy i raꞌyn. Miꞌi hawyi yt iweꞌeg i rakat piit ewy watoĩ­neꞌen."

¹⁷ Wato­mohey Aika­ꞌiwat imiky­ꞌesat ok tã pote watoĩ­neꞌen Ipãꞌãu wywo iꞌewyte aipãꞌãu wẽtup mãꞌãu ewywuat topy­huꞌat iwat Ipãꞌãu yn."

¹⁸ Watoĩ­neꞌen yt iweꞌeg i rakat pote o watoĩ­neꞌen pya ikai katu­pono aipiit minug saꞌag kyꞌesat hap toĩneꞌen aika­ꞌiwat no. Watu­wehik hary­poria yt aheha­ryꞌi ete miꞌi hawyi aipiit iwywo wẽtup piit topy­huꞌat hawyi heremo kahato yt Iesui piit ewy i aito."

¹⁹ Yt eweikuap i te aipiit Tupana mõtypot yat ewywuat toĩneꞌen hap. Tupana Pãꞌãu eiam aito hap yt eweikuap i te Tupana toĩneꞌen aipiit pe hap."

²⁰ Aipiit yt aiwanuat i katu­pono koitywy Tupana wanuat wato­py­huꞌat toikyiꞌat raꞌyn haꞌup iwato kahato tutum toikyiꞌat aipiit hamo. Pyno Tupana wat aipiit pote waku watum aipiit Tupana mõtypot hamo. Tupana mõtypot yat sese wo watum aipiit waku. Uito einãpin hat miwan miat Pauru.

"

7

¹ Haꞌa­wyte eipe tawa Kurintiu piaria eweipo­ꞌoro uhowawi miwan apoꞌeiꞌe hamo sio waku aheha­ryꞌi sio yt eiꞌe hap."

² Taꞌi waku kahato aheha­ryꞌi maꞌato wẽtup yn waku e. Miꞌi hawyi waku watoĩ­neꞌen iharyꞌi kahato rakano heꞌaito kahato rakano aheĩneꞌen yne hawe. Miꞌi tã ewetunug mote waku kahato eweikup­teꞌen e. Miꞌi tã ewetunug mote yt ehãꞌãg kuap i ahiag yt eiweꞌeg i hap nug hamo."

³ Waku ereket eharyꞌi sese wywo yn. Waku etum epiit eharyꞌi pe yn eharyꞌi piit miky­ꞌesat ok tã. Iꞌewyte waku etum epiit eꞌaito pe eꞌaito piit miky­ꞌesat ewy."

⁴ Waku toꞌe — Uipiit uheha­ryꞌi wat yn e. Iꞌewyte waku toꞌe — Uipiit uheꞌaito wat yn e. Yt naku i toꞌe — Uipiit yt ewat i pote yt atum i poꞌog uipiit epe yt naku i toꞌe e."

⁵ Yt naku i iharyꞌi wãiꞌe neꞌi teꞌaito piat ikyꞌesat turan e. Iꞌewyte yt naku i wãiꞌe neꞌi ihainia teha­ryꞌi piat ikyꞌesat turan e. Maꞌato ehehay teran Tupana wywo pote waku eiwo­ꞌo­pohep porapꞌi tuereto eiwo­ꞌo­pytyk hap ete e. Eiwo­ꞌo­pohep porapꞌi hawyi waku i raꞌyn eiwo­ꞌo­mo­wepit katu­pono ahiag aru ehãꞌãg neran haype wẽtup hary­poria wẽtup ihainia kyꞌesat hap ete e."

⁶ Pyno koitywy ahenoi teran uiwa­nẽtup hap ewy maꞌato ahenoi hap yn yt woro­ho­ꞌo­po­ꞌoro hin i uhehay wo are."

⁷ Uito areĩneꞌen yt iharyꞌi rakat i. Uito Pauru Tupana miky­ꞌesat ewy areĩneꞌen are. Miꞌi hap atipuẽti waku kahato. Miꞌi pote atiky­ꞌesat iraniaꞌin uiꞌewy yt iharyꞌi i rakat i ewy taꞌa­tu­ky­ꞌesat pote. Miꞌi tã Tupana tiky­ꞌesat uito wen toĩ iraniaꞌin yt uiꞌewy hin i katu­pono miꞌiria iharyꞌi kahato rakaria wo Tupana tiky­ꞌesat."

⁸ Koitywy woro­ho­ꞌo­nãpin neran yt iharyꞌi rakat i te yt heꞌaito rakat i te iꞌewyte hiwu koꞌi. Waku eweikup­teꞌen eiweran aikotã uiꞌewy eweiki­ꞌesat pote areꞌe. Poꞌog waku miꞌi tã areĩneꞌen areꞌe uiwa­nẽtup hawe."

⁹ Maꞌato — Atiky­ꞌesat kahato uheha­ryꞌi uheꞌaito eweiꞌe eipyꞌa pe pote waku etat ro ewary eꞌaito emiky­ꞌesat ewy maꞌato Iesui mohey hat yn waku etat e. Poꞌog waku etat eharyꞌi eꞌaito Iesui mohey hat epiit miky­ꞌesat monik hamuat hap upi epiit miky­ꞌesat haty hap mekewat kytꞌok epyꞌa piat hap kai."

¹⁰ Koitywy woro­ho­ꞌo­nãpin heꞌaito rakaria iwary rakaria yt uito i wen maꞌato Tupana woꞌo­nãpin hap ahenoi. Yt eweitoiat teiꞌo eꞌaito eharyꞌi e."

¹¹ Maꞌato eweitoiat pote ereĩneꞌen o eweran kahato raꞌyn yt heꞌaito i rakano yt ihary i rakano e. Miꞌi hawyi etiky­ꞌesat eꞌaito emiꞌatoiat pote etat i emiꞌatoiat. Yt naku i kahato weha­ryꞌi atoiat hat no eweikup­teꞌen uhytꞌiꞌin e."

¹² Karãpe eharyꞌi yt Iesui mohey hat wo i toĩneꞌen maꞌato o yt etoiat neꞌi teiꞌo kat pote ekyꞌesat hap toĩ ikai pote yt etoiat reiꞌo e. Yt naku i miꞌi tã etunug e."

¹³ Eꞌaito yt Iesui mohey hat i pytkai yt etoiat teiꞌo miꞌi kat pote ekyꞌesat hap toĩ ikai pote."

¹⁴ Wato­mohey Iesui hawyi yt naku i watoiat aheꞌaito aheha­ryꞌi saꞌa­wy­ꞌiwuat yt Iesui mohey hat i pote. Waku wahẽtup kahato Tupana pe aheꞌaito aheha­ryꞌi ehakye­raꞌat hamo katu­pono aheꞌaito aheha­ryꞌi toĩneꞌen yt pya hin i Tupana kai katu­pono Tupana Pãꞌãu eiam kahato aito pote. Waku aiwywo toĩneꞌen Iesui mohey haria aito pote. Waku watoĩ­neꞌen aheꞌaito wywo aheha­ryꞌi wywo katu­pono wahenoi tuereto miꞌiria pe Iesui mohey hap iꞌewyte aimẽ­pyꞌin ahaki­ꞌytꞌin ahaꞌy­ruꞌin yt pya hin i Tupana ehay aiwẽ pywiat kai. Miꞌi pote miꞌiria yt pya hin i tomohey hawyi Tosa­ꞌyru moherep haria aito pote."

¹⁵ Maꞌato eharyꞌi eꞌaito etoiat teran kahato yt imohey hat i pote yt he i tuete Iesui mohey epiat hap pote miꞌi hawyi pyno waku eweiꞌe eꞌaito pe eharyꞌi pe etoiat teran me — Yt naku i uiꞌatoiat mimi mana yt atikyꞌesat i maꞌato uiꞌatoiat teran mote uiꞌatoiat maꞌato yt uimikyꞌesat ewy hin i ereꞌe o e. Katu­pono yt naku i watu­ꞌuka yn yt aiwo­ꞌo­ꞌewy i imohey hap ete e. Tupana yt tiky­ꞌesat i aiwu­ꞌuka aheꞌaito wywo aheha­ryꞌi wywo hap maꞌato toiky­ꞌesat kahato aiwo­ꞌo­kyꞌe aiwo­ꞌo­wese hap yn e."

¹⁶ Waku kahato watoĩ­neꞌen aheha­ryꞌi wywo aheꞌaito wywo hap. Eharyꞌi eꞌaito yt Iesui mohey hano i pytkai waku ereĩneꞌen ne o iwywo e. Yt naku i watoiat aheha­ryꞌi aheꞌaito yt Iesui mohey hat i pote. Waku aiwo­ꞌo­wese hap wywo aiwo­ꞌo­kyꞌe hap wywo watekyi aheꞌaito aheha­ryꞌi Iesui kape imohey hamuat. Pyno waku pe watu­kup­teꞌen aheha­ryꞌi aheꞌaito wywo paaꞌaiꞌe hap wywo pote meiũran ti aru Iesui mohey haria wo teꞌe­ro­py­huꞌat ahehay waku pe hawe. Iesui mohey haria sese watu­kup­teꞌen pote wati­kyꞌe kuap aheha­ryꞌi aheꞌaito Iesui kape imohey hamuat. Miꞌi hawyi aiwese hap kaipyi ahepiat Iesui kuap hap kaipyi wati­ꞌa­tuekyi kuap aheha­ryꞌi aheꞌaito Iesui mohey hap kape.

"

¹⁷ Mesup ti koitywy Tupana aiꞌairo Aika­ꞌiwat emiit sese wo. Waku kahato watoĩ­neꞌen. Maꞌato miꞌi pytkai aikotã saꞌa­wyꞌi watoĩ­neꞌen hap ewy te. Saꞌa­wyꞌi Iuteu ywania aito pote mesup te Iuteu ywania watoĩ­neꞌen e. Saꞌa­wyꞌi tapyiꞌa ywania watoĩ­neꞌen iꞌewyte mesup te tapyꞌyia wo watoĩ­neꞌen. Saꞌa­wyꞌi watoĩ­neꞌen wẽtup ok eropat hano pote wato­mohey Iesui hawyi miꞌi hap ewy te topy­huꞌat re mesup koitywy heropat hat watoĩ­neꞌen ne. Miꞌi pote woro­ho­ꞌo­nãpin neran eipe Iesui mohey haria pakup koꞌi Tupana miꞌairo pakup koꞌi. — Eweimohey Iesui hawyi waku eweikup­teꞌen no aikotã watoĩ­neꞌen wati­mohey iesui hap eꞌat pe aiꞌairo hap eꞌat pe hap ewy waku watu­kup­teꞌen ne."

¹⁸ Iuteu ywania ereĩneꞌen saꞌa­wyꞌi pote ereĩneꞌen Iuteu ywania te. Yt naku i etoiat eꞌywania etimohey Iesui hawyi Tupana ekaykay tuwe­wawiat hawyi. Wẽtup ywania ereĩneꞌen saꞌa­wyꞌi pote pyno yt naku i eweiꞌe — Mesup uito Iesui mohey hat pote waku atoiat uiꞌy­wania iꞌewyte iꞌatueko koꞌi yt naku i kahato mio tã watoꞌe. Tupana aikaykay tuwe­wawiat hawyi waku watoĩ­neꞌen aipiit ewy aipotpap hap ewy aikaykay hap eꞌat pe ewy waku."

¹⁹ Yt naku i watu­we­musin ãpy sokpe tek Iuteuria eko ewy neꞌi wati­mohey Iesui hawyi e. Waku watoĩ­neꞌen aiꞌy­wania ewy yn."

²⁰ Wato­mohey Iesui hawyi waku watoĩ­neꞌen ne aimiit kawiano saꞌa­wyꞌi hap eꞌat kai e. Yt naku i watoiat aheꞌyi aipotpap aiko aheꞌaito aheha­ryꞌi wato­mohey hawyi. Waku watoĩ­neꞌen ne aikotã Tupana aikaykay hap eꞌat pe hap ewy. Waku watu­kup­teꞌen ne aipotpap hap wywo. Miitꞌin emiit no watoĩ­neꞌen pote waku watoĩ­neꞌen ne miitꞌin emiit no te maꞌato poꞌog waku saꞌa­wyꞌi kai. Yt naku i watoiat aika­ꞌi­waria ahetu­ꞌi­saria aiwy­riaꞌin koꞌi Iesui wato­mohey hawyi."

²¹ Aika­ꞌi­waria yt nakuaria i pytkai waku watoĩ­neꞌen iꞌatu­wywo te iꞌatue­ropat hamuat. Yt kat i aika­ꞌiwat pote pyno waku watoĩ­neꞌen ne aiweran aipotpap nug hap ewywuat maꞌato waku yne miitꞌin emiit no hat ewy wato­py­huꞌat yne miitꞌin powyro hat no. Aiwe­te­weru hap iwato pote iwato te topy­huꞌat wato­mohey hawyi. Waku watikat aiwe­te­weru hap tum yne hamuat. Miꞌi hawyi watum yne aiwe­te­weru hap mesu­wa­ro­tiaria pe hawyi Aika­ꞌiwat Atipy piat eropat hano poꞌog no wato­py­huꞌat."

²² Wuatꞌi eropat haria wo watoĩ­neꞌen Aipo­typot Iesui aikaykay turan miꞌi hawyi wuatꞌi eropat hat no watoĩ­neꞌen ne maꞌato waku Iesui eropat hano wato­py­huꞌat miitꞌin eropat hap upi. Iꞌewyte miitꞌin akag wo watoĩ­neꞌen Iesui aikaykay turan hawyi waku miitꞌin akag wo re wato­py­huꞌat maꞌato waku Iesui eropat hano te wato­py­huꞌat miitꞌin akag aito pytkai."

²³ Katu­pono Aikyiꞌat Iesui Tupana wano. Iwato kahato saꞌup tutum aikyiꞌat temiitꞌin nuat hamo. Miꞌi pote yt naku i wato­py­huꞌat yt naku i nug hap eko saꞌag eropat haria wo neꞌi e."

²⁴ Uiwy­riaꞌin uheinytꞌin yt naku i aheko waku rakat watoiat katu­pono saꞌa­wyꞌi Tupana aikaykay tuwe­wawi turan aiꞌy­wania eko waku aheko waku iꞌatu kahato aiminug waku hap ewy. Yt naku i watoiat aiꞌy­wania eko wati­mohey Iesui hawyi. Miꞌi pote waku watoĩ­neꞌen ne aheko wakuap nug haria wo Iesui wati­mohey hawyi.

"

²⁵ Woro­ho­ꞌo­nãpin neran kurum iwasu koꞌi iꞌewyte pĩꞌã makuptia koꞌi yt heꞌaito i te rakaria yt iwary i te rakaria. Yt iharyꞌi rakat i uito pote woro­ꞌo­nãpin Tupana ehay uiwa­nẽtup hawiat ok tã ahenoi."

²⁶ Mesuwat eꞌat pe miitꞌin aikat kahato aiꞌauka teran haype Iesui mohey haria aito pote. Niatpo kahato aheĩneꞌen hap. Miꞌi pote areꞌe uiwa­nẽtup hap. Yt eweiky­ꞌesat i eharyꞌi eiwary pote waku eweikup­teꞌen uiꞌewy katu­pono iraniaꞌin iꞌatu­py­ꞌahak kahato ahete ahaty­ꞌi­ha­tyꞌi kahato hatek takaria ewy iro pote aito. Miꞌi pote niatpo kahato aheha­ryꞌi aheꞌaito koitywy."

²⁷ Maꞌato — Atiky­ꞌesat kahato uheꞌaito uheharyꞌi eweiꞌe pote pyno waku eharyꞌi etat kurum waku eꞌaito etat pĩꞌã areꞌe maꞌato yt eweiꞌe i pote waku yt etikat reiꞌo eꞌaito eharyꞌi hawyi waku uito ewy ereineꞌen areꞌe. Ewetat pote yt eweiꞌatoiat teiꞌo eꞌaito eharyꞌi hoꞌopot hap eꞌat pe katu­pono ahatek hap eꞌat mesup tawa Kurintiu piaria aiꞌauka teran haype pote."

²⁸ Maꞌato epakup te ereĩneꞌen mote waku etikat eharyꞌi eꞌaito Tupana miky­ꞌesat ewy. Maꞌato — Yt atikat teran i wẽtup ok uheha­ryꞌi saꞌa­wyꞌi wuat uheꞌaito saꞌa­wyꞌi wuat uruho­ꞌopot kahato eꞌat mesup pote eweiꞌe pote pyno waku pe eweikup­teꞌen Tupana wanẽtup hawe. Maꞌato etat eharyꞌi eꞌaito kurum iwasu makuptia en mote iꞌewyte waku pe eweikup­teꞌen Tupana wanẽtup hawe e. Waku yne are. Mio miitꞌin aiꞌauka teran mote niatpo kahato aheꞌaito aheha­ryꞌi watikat. Maꞌato etat pote waku maꞌato niatpo kahato aru etipuẽti ehoꞌopot hap mesup eꞌat pe turan."

²⁹ Uheinytꞌin uiwyꞌok koꞌi yt pya hin i Aika­ꞌiwat aipok hap. Yt watikuap i kat eꞌat pe hut hap maꞌato tuut irane hap watikuap. Waku wati­kyꞌe kahato aheꞌaito aheha­ryꞌi maꞌato miꞌi pytkai waku poꞌog watunug Tupana miky­ꞌesat ewy aheꞌaito aheha­ryꞌi miky­ꞌesat koꞌi kai. Waku wati­kyꞌe Tupana koran aikotã Iesui mohey haria yt heꞌaito i te rakat yt iwary i te rakat ewy.

"

³⁰ Eiweꞌeg wo o eheka­reꞌen wywo katu­pono yne mesu­wa­rotiat ahekat yt toĩneꞌen motꞌi i. Karãpe watat ipakup takat aheka­reꞌen hawyi yt naku i watoꞌe aipyꞌa pe — Mio uito poꞌog iraniaꞌin kai katu­pono uhekat poꞌog ikahu iraniaꞌin kai yt naku i watoꞌe. Waku watu­wehum Tupana miium kape wen maꞌato yt naku i wato­mohey neiꞌo ahekat. Tupana kape yn waku watu­wehum ahekat aipo pe hawyi. Waku watunug Tupana miky­ꞌesat ewy sio imiky­ꞌesat aimi­ky­ꞌesat sio yt sio imiky­ꞌesat aimo­wepit sio yt. Waku watunug imiky­ꞌesat sio watuwak sio yt katu­pono aiwak hap tokosap hawyi poꞌog aimo­wepit hap toĩneꞌen."

³¹ Yt naku i mesu­wa­rotiat kape yn watu­wa­nẽtup at kaꞌap katu­pono tuweityk meremo aimo­wepit hap aheꞌaito hap aiwary hap aimi­kyiꞌat koꞌi aheka­reꞌen koꞌi topap topap yne maꞌato aiminug Tupana kapiat toĩneꞌen motꞌi rakat yn waku aiwa­nẽtup hap aimo­wepit hap. Yt tuweityk kuap takat i.

"

³² Iesui mohey haria yt heꞌaito rakaria i yt iwary rakaria i teꞌe­ru­wa­nẽtup at kaꞌap taꞌa­tu­ka­ꞌiwat Iesui potpap nug hap kape taꞌa­tu­ka­ꞌiwat mowepit hap kape yn. Waku miꞌiria ewy watoĩ­neꞌen poꞌog poꞌog mesuwe."

³³ Maꞌato iwary rakat tuwe­mo­wepit hap kape yn tuwa­nẽtup toꞌyat tomiꞌu tesokpe hap kape yn tuwa­nẽtup hawyi."

³⁴ Karãpe tuwa­nẽtup teran Tupana potpap kape turan toĩneꞌen typy iwanẽtup hap Tupana mowepit hap iꞌewyte teha­ryꞌi mowepit hap. Yt heꞌaito rakat i yt iwary rakat i Iesui mohey hat Toka­ꞌiwat potpap hap kape yn tuwa­nẽtup. Toiky­ꞌesat topiit Tupana wanuat yn. Toiky­ꞌesat aiwa­nẽtup Tupana kapiat hap yn iꞌewyte Tupana Pãꞌãu miky­ꞌesat yn toiky­ꞌesat. Maꞌato heꞌaito kahato rakat iwary kahato rakat tuwa­nẽtup aikotã aikotã aru atimo­wepit uheꞌaito uiwary toꞌe hap kape yn tuwa­nẽtup tomiꞌu kape toꞌyat kape tomẽ­pytꞌin kape at kaꞌap hap ewy tuwa­nẽtup."

³⁵ Poꞌog waku aheꞌaito kahato aheha­ryꞌi kahato hap. Woro­ho­ꞌo­nãpin neran eipo­wyro hamo. Atiky­ꞌesat kahato watunug Tupana miky­ꞌesat ewy hap poꞌog torania miky­ꞌesat nug hap kai. Miꞌi pote miꞌi hap ete sio ereĩneꞌen eꞌaito sio yt rakano sio ereĩneꞌen iwary rakano sio yt rakano atiky­ꞌesat eipe atipy piat eropat haria sese yt kat i eipyhyp Aipo­typot potpap nug hap ete haria wo."

³⁶ Pyno mesup woro­ho­ꞌo­nãpin neran eipe. Ehaytuwy hary­poria ihainia kawiat eiwo­ꞌo­ky­ꞌesat pote waku etat eharyꞌi wo eꞌaito wo. Maꞌato — Ahoꞌopot kahato mesup yt kat i aiꞌyat i yt kat i aiko i yt kat i aimiꞌu eweiꞌe eiwo­ꞌope pote — Waku poꞌog yt wato­ꞌo­kyiꞌat i te katu­pono hoꞌopot hap eꞌat mesup katu­pono aito Iesui mohey haria pote miitꞌin miky­ryꞌi haria wo wato­py­huꞌat. Pyno waku watoĩ­neꞌen yt iwary i rakano yt heꞌaito rakano i mesup waku eweiꞌe eiwo­ꞌope. Miꞌi hawyi waku eweikup­teꞌen yt iwary i rakat ewy yt heꞌaito i rakat ewy. Meiũran maꞌato eiwo­ꞌo­kyiꞌat teran mote pyno waku eiwo­ꞌo­kyiꞌat eiwo­ꞌo­ko­kaꞌat e Tupana. Miꞌi hawyi waku eweikup­teꞌen heꞌaito iwary rakano Iesui mohey haria eipe pote."

³⁷ Pyno — Yt karãpe i uheha­ryꞌi e hat yt toiky­ꞌesat i pote waku yt iwary i topy­huꞌat e. Miꞌi hat yt iꞌaparap i Tupana pe katu­pono toiꞌakit kuap topiit miky­ꞌesat."

³⁸ Waku aheha­ryꞌi aheꞌaito. Waku watu­wehum Tupana pe aheꞌaito aheha­ryꞌi miium hap ete. Iꞌewyte yt kat i aheꞌaito pote yt kat i aheha­ryꞌi pote miꞌi hap iꞌewyte waku watu­wehum Tupana pe katu­pono uito ewy eweikup­teꞌen mote. Uiwa­nẽtup hawe poꞌog waku uito ewy katu­pono wahe­wyry kahato Tupana ehay moherep hamo. Uito ti Pauru."

³⁹ Manaꞌin uhytꞌiꞌin waku eꞌaito eharyꞌi wẽtup ok kahato yn ikuꞌuro hap kape e. Maꞌato ikuꞌuro hawyi yt uwe wano i raꞌyn ereĩneꞌen neran mote waku maꞌato etiky­ꞌesat ipakup hawyi waku etat wẽtup ok emiky­ꞌesat Iesui mohey hat yt heꞌaito rakat i ewywuat Iesui mohey hat yn waku yt iwary rakat i yt heꞌaito rakat i waku etat e."

⁴⁰ Maꞌato uiwa­nẽtup hawe waku poꞌog manaꞌin hiwu wo eweikup­teꞌen eweiky­ꞌesat pote. Tupana Pãꞌãu tuwa­nẽtup iꞌewyte uiwa­nẽtup hap ewy hap yt atikuap i maꞌato mio tã areꞌe uiwa­nẽtup hawyi Tupana yt toꞌe i waku hiwu tukup­teꞌen hiwu wo yt e i te atikuap teran pytkai. Pyno uito ti eimuꞌe hat Pauru.

"

8

¹ Mesup woro­ho­ꞌo­nãpin neran tupa­naria iãꞌãkap mõtypot hap miꞌu ete mekewat wewato ahup auka tupa­naria iãꞌãkap eꞌat piat koꞌi ete. Pyno mesuwat uimienoi kuap haria raꞌyn eipe maꞌato ti ahenoi pakup i teran ehepe ikuap i hamo. Pyno Uwe uwe toꞌe topyꞌa pe — Uito poꞌog atikuap tuwe­mo­wato teran tuwe­wa­nẽtup hawe maꞌato tuwe­maꞌat haype katu­pono yt uwe i mimuꞌe wo topy­huꞌat iꞌewyte yt uwe i wy wo toĩneꞌen. Maꞌato uwe uwe toꞌe topyꞌa pe — Miitꞌin kyꞌe hat areĩneꞌen neran miꞌi e hat Tupana mipo­wyro topy­huꞌat hawyi yt aimaꞌat kuap i rakat toĩneꞌen."

² Miꞌi tupono karãpe — Uito poꞌog atikuap e hat putꞌokꞌe ahete hawyi yt aiweꞌeg i hap topy­huꞌat katu­pono mesuwat yi totiat yt uwe i topy­huꞌat ikuap yne hat. Miꞌi tupono waku wato­py­huꞌat — Atikuap teran e haria wo — Uimuꞌe ro e haria wo."

³ Pyno Tupana kuap teran haria yn aru Tupana kuap haria teꞌe­ro­py­huꞌat. Iꞌewyte Tupana kyꞌe haria yn ni aru Tupana kuap haria tukup­teꞌen e."

⁴ Miꞌi tupono ahenoi pakup i raꞌyn aikotã tupana iãꞌãkap mõtypot haria miꞌu etiat. Pyno koitywy watikuap taꞌyn mesu­wa­rotiat mo wuat minug koꞌi tupana koꞌi yt Tupana sese hin i hap tukup­teꞌen maꞌato ariaꞌyp nu yi kawiat yn tukup­teꞌen. Miꞌi tupono ti koitywy watikuap taꞌyn tupa­naria miitꞌin mo wuat minug koꞌi yt kat hamo i tupana wo tukup­teꞌen katu­pono yt kat i ieĩneꞌen hap ipuo hap watikuap. Maꞌato wẽtup ok yn Tupana Sese toĩneꞌen. Miꞌi ti atipy piat wuatꞌi eꞌat piat ieĩneꞌen hat. Pyno iraniaꞌin tupana mesu­watroiat yi kawiat nu kawiat hap koꞌi yt Tupana hin i."

⁵ Uruetu­pa­naria at waty waikiru koꞌi iꞌatuꞌe. Iraniaꞌin — Uruetu­pa­naria mesu­wa­rotiat gupteꞌen haria iꞌatuꞌe. Iꞌatu kahato iãꞌãkap koꞌi pe — Uruetu­pa­naria uruka­ꞌi­waria iꞌatuꞌe mesu­wa­ro­tiaria."

⁶ Maꞌato Tupana sese toĩneꞌen wẽtup yn Miꞌi watoꞌe. Tupana ti Ainug hat Aiꞌywot watoꞌe. Miꞌi ti wuatꞌi nug hat watoꞌe. Miꞌi yn Aimoieĩ­neꞌen hat wẽtup yn Aipo­typot watoꞌe. Aika­ꞌiwat ti Iesui e hap het rakat watoꞌe. Tupana tunug yne topo wo aimoieĩ­neꞌen hap watoꞌe."

⁷ Yt aheso hin i wuatꞌi miitꞌin tikuap aiꞌe hap pywo rakat. Tukup­teꞌen aipy­ꞌa­setpe Iesui mohey pakup haria. Miꞌiria saꞌa­wyꞌi taꞌa­tu­mohey kahato tupa­naria miit minug koꞌi. Miꞌi pote mesup te taꞌa­tu­wa­nẽtup hawe — Mekewat iãꞌãkap uimi­mohey saꞌa­wy­ꞌiwuat wẽtup Tupana wo toĩneꞌen yt Tupana wo toĩneꞌen hin i pytkai. Katu­pono Tupana Sese yn toĩneꞌen Tupana wo. Miꞌi hawyi miꞌu puꞌi taꞌa­tu­kyiꞌat pote — Pyno etum apo mesuwat puꞌi ehetu­pa­naria pe sio yt iꞌatuꞌe puꞌi weneru haria pe. Taꞌi Tupana iãꞌãkap mõtypot hap yne mesuwat puꞌi iꞌatuꞌe hawyi mekewat Iesui mohey haira — Pyno yt atiky­ꞌesat i emiwe­neru hap koꞌi iꞌatuꞌe. — Taꞌi urumiium naꞌyn tupa­naria iãꞌãkap pe iꞌatuꞌe pote teꞌe­ru­we­mõti kahato iꞌu hap ete Iesui mohey haria pakup pote — Yt atuꞌu i iꞌatuꞌe."

⁸ Maꞌato yt aimiꞌu kaipyi i aimohun hap topy­huꞌat e Iesui. Yt watuꞌu i pote waku wato­py­huꞌat Tupana wanẽtup hawe. Watuꞌu teran mote waku Tupana wanẽtup hawe. Tupana yt tuwehum i aheko miꞌu u hap kape. Yt aiꞌa­piheg hin i sio watuꞌu sio yt. Watu­wehum Tupana kape aimiꞌu watuꞌu turan mote waku pe watoĩ­neꞌen Tupana wanẽtup hawe."

⁹ Eweꞌeg wo o karãpe etuꞌu tupa­naria miit minug koꞌi mõtypot hap miꞌu turan. Toĩneꞌen ekai Iesui mohey hat pakup — Yt etuꞌu teiꞌo tupa­naria mõtypot hamuat miium u hap ete iꞌatuꞌe pote pyno yt etuꞌu teiꞌo. Etuꞌu pote — Yt etuꞌu teiꞌo e haria teꞌe­ru­we­mõti etuꞌu hap turan Iesui mohey haria yt itag i te rakaria Iesui mohey hap ete pote. Miꞌi hawyi iꞌaparap hat ereĩneꞌen iꞌatu­wa­nẽtup hawe."

¹⁰ Pywo watikuap taꞌyn tukup­teꞌen kahato miitꞌin — Yt naku i etuꞌu miꞌu puꞌi tupa­naria mõtypot kapiat miium e haria taꞌa­tu­mohey Iesui pytkai. Taꞌa­tu­mohey te taꞌa­tu­wa­nẽtup hawe tupa­naria tukup­teꞌen hap. Maꞌato aito watikuap Tupana wanẽtup hawe — Waku etuꞌu yne miꞌu koꞌi e maꞌato watuꞌu Iesui mohey hat pakup ehamo pote meiũran — Pyno waku wato­mohey tupa­naria iꞌewyte iꞌatuꞌe taꞌa­tu­wa­nẽtup hawe e. Miꞌi hawyi teke tupa­naria mõtypot yat pe aikope toĩneꞌen miꞌu iãꞌãkap kapiat miium koꞌi hap kape hawyi tutuꞌu itote yt iweꞌeg i hat ewy katu­pono taꞌa­kasa aito iꞌu hap ete aiꞌyat pe saꞌa­wyꞌi pote."

¹¹ Iesui mohey pakup hat yt hesaika i rakat tukup­teꞌen Iesui mohey hap ete miꞌi pote yt naku i wati­maꞌat miꞌiria — Watuꞌu yne miꞌu aiꞌe hap wywo katu­pono miꞌiria yt kat i miꞌu tupa­naria mõtypot miꞌu u haria tukup­teꞌen katupno taꞌa­tu­wa­nẽtup hawe tupa­naria Tupana wo tukup­teꞌen ne. Watikuap taꞌyn yt kat i tupana koꞌi mesu­wa­rotiat hap. Maꞌato aiwy­riaꞌin Iesui mohey pakup haria taꞌa­tu­wa­nẽtup tupana nu kawiat ihaĩte rakaria tukup­teꞌen. Yt naku i pyno watuꞌu tupana koꞌi mõtypot hap miꞌi Iesui mohey pakup takaria ehamo katu­pono meremo taꞌa­tu­ꞌatoiat Iesui hawyi teꞌe­ra­ꞌaipok i iꞌatuetu­pana ran koꞌi kape mekewat miꞌu taꞌa­tuꞌu aito ewy hawyi e."

¹² Aika­ꞌiwat Iesui ikuꞌuro mio tã e haria ehakye­raꞌat hamo. Maꞌato watuꞌu yne hap kaipyi Iesui mohey haria pakup takaria teꞌe­ra­ꞌaipok tupana iãꞌãkap yat kape pote aiwy maꞌat hat no watoĩ­neꞌen iꞌewyte Aika­ꞌiwat Iesui maꞌat hat no watoĩ­neꞌen katu­pono yt nakuat i yt taꞌa­tu­mohey kahato i te turan watuꞌu iꞌatu­py­ꞌa­setpe mo wuat minug tupa­naria mõtypot hap miꞌu katu­pono haty kahato miꞌiria ete watuꞌu pote."

¹³ Pyno uito yt karãpe i atuꞌu miꞌu puꞌi mekewat uipot­maꞌat hap pupi katu­pono yt atiky­ꞌesat i uiwyꞌok wẽtup ok Iesui mohey pakup hat maꞌat hano areĩneꞌen. Yt atimaꞌat reran i uheywyt uheinyt uheykeꞌet pote — Waku atoiat miꞌu puꞌi tupa­naria mõtypot hap areĩneꞌen iꞌatu­wywo turan areꞌe yn uipyꞌa pe.

Uito ti Pauru eimuꞌe hat Iesui etiat.

"

9

¹ Taꞌi uito Pauru Tupana emiit sese imipo­ꞌoro tehay moherep hamuat. Yt kat i uiwe­te­weru hap miitꞌin po pe pote areĩneꞌen Iesui emiit no yn. Yt uwe i uipyhyp kuap kat pote yt uwe po pe i areĩneꞌen. Yt uwe i toꞌe kuap uhepe — Etum uhepe mekewat ewete­weru hap hawyi waku ereto Tupana ehay moherep hamo yt taꞌa­tuꞌe kuap i katu­pono yt kat i atipuru miitꞌin kaipyi pote. Aika­ꞌiwat Iesui uinug tomi­po­ꞌoro tehay moherep hamuat. Mekewat eꞌat pe araꞌa­kasa Iesui uheha wo hawyi Aika­ꞌiwat uipo­ꞌoro ehowawi tehay moherep hamo. Miꞌi hawyi Aika­ꞌiwat mohey haria eweikup­teꞌen uhehay upi."

² Miꞌi hap kaipyi eweikuap Tupana uipo­ꞌoro hap. Maꞌato iraniaꞌin yt ipywo i Tupana uipo­ꞌoro hap maꞌato eipe eweipywo katu­pono uiwẽ pyi Aika­ꞌiwat Iesui aimoieĩ­neꞌen hat uhehay pyi einug ipakup takaria wo. Mesup koitywy eweikup­teꞌen Iesui mohey haria wẽtup miit ewy iwywo eweikup­teꞌen. Miꞌi kaipyi eweimohey Tupana potpo­ꞌoro wuat areĩneꞌen hap."

³ Tukup­teꞌen maꞌato — Pauru yt Tupana mipo­ꞌoro ewy hin i iꞌatuꞌe. Yt mekewat 12 ok takaria ewy hin i iꞌatuꞌe toꞌope maꞌato miꞌiria atiwesat — Uito rat Tupana mipo­ꞌoro sese are."

⁴ Areĩneꞌen Iesui potpo­ꞌo­roria 12 ok takaria ewywuat uito areꞌe. Miꞌi pote atiky­ꞌesat pote waku atunug iꞌatu­minug ewywuat are. Atiky­ꞌesat pote waku atipo­ꞌoro uimi­mu­ꞌeria uipoi hamo katu­pono Iesui potmu­ꞌeria 12 ok takaria saꞌup taꞌa­tu­puẽti taꞌa­tu­mi­mu­ꞌeria miium kaipyi. Uito Pauru iꞌewyte atiky­ꞌesat miꞌu eikai pote waku ahẽtup saꞌup eipo pywiat eimuꞌe hamuat wen maꞌato — Atiky­ꞌesat eimi­muꞌe hap saꞌup uipoi ro yt areꞌe hin i ehepe."

⁵ Aika­ꞌiwat potmuꞌe Peteru iharyꞌi rakat toĩneꞌen iꞌewyte Aika­ꞌiwat Iesui ywyt Tiaku iꞌewyte toĩneꞌen iharyꞌi. Miꞌiria tuwat iꞌatu­ꞌaito wywo iꞌatue­wyry hap upi Tupana ehay moherep hamo maꞌato uito yt kat i uheha­ryꞌi miꞌiria ewy maꞌato atiky­ꞌesat pote waku atat uheha­ryꞌi."

⁶ Aiwy Panape iꞌewyte uito urupotpap kahato urupo wo aimiꞌu kyiꞌat hamo ahesokpe kyiꞌat hamo miꞌi tã."

⁷ Sura­raꞌin ni mesuwat yi tote tenuk kahato topo­ꞌoro hat surara akag kaipyi. Toĩneꞌen iꞌatue­su­rara akag miium iꞌatue­sokpe iꞌatue­wyry hamuat. Yt iꞌatu­potpap hin i taꞌa­tupo wo mekewat kyiꞌat hamo. Maꞌato uruto uruwewiat urupotpap kaipyi urutenuk hap toĩneꞌen. Go nug haria yt miꞌi tã hin i katu­pono taꞌa­tu­mikoi kaipyi teꞌe­renuk. Taꞌa­tu­mikoi ypia kaipyi teꞌe­re­sapo u raꞌyn. Iꞌewyte taꞌa­tu­hũria emĩ hy kaipyi teꞌe­renuk. Iꞌatu­potpap hap ti miꞌiria poi hamo toĩneꞌen. Maꞌato uito iꞌewyte Tupana ehay moherep hat Panãpe yt miꞌiria ewy hin i urutu­kup­teꞌen."

⁸ Pyno ahenoi wẽtup ehepe Tupana ehay kaipyi."

⁹ Mio tã e Tupana saꞌa­wy­ꞌiwuat miwan me Musei wẽ pyi ihay — Yt naku i wati­kytyt aihũ wewato ahup ipotpap turan e. Yt naku i wati­wẽ­poꞌi poꞌi neꞌi awati iãꞌỹi akit akit turan e. Yt naku i miꞌi turan wati­wẽ­po­ꞌi­poꞌi neꞌi. Waku tenuk awati ehaꞌok topy wuat turan topotpap popuo aihũ wewato ahup e Tupana Musei pe ainãpin hawe. Pyno Tupana tuwa­nẽtup kahato aihũ hesyꞌat hap kape."

¹⁰ Maꞌato topotpap nug haria topot­po­ꞌo­roria poi hamuat ete uruesyꞌat pote uruipoi hap ete mio tã e Tupana. — Waku watipoi aihũria taꞌa­tu­potpap nug hap popuo iꞌewyte waku watipoi aipotpap nug haria e. Iꞌewyte aikotã ikoi hat ewy iꞌewyte iꞌatunug hat ewy taꞌa­tu­mikoi kaipyi teꞌe­renuk kahato. Miꞌi hap ewy hut hap kape iꞌatu­potpap. Taꞌa­tu­he­katup haype aikotã iꞌatag tomikoi hepamo hap ewy."

¹¹ Karãpe watikoi mani hawyi waku watunug uꞌi aihe­mani iꞌok hawyi. Miꞌi hap ewy kahato waku aimikoi Tupana ehay kaipyi watenuk eimuꞌe hap Tupana ehay etiat saꞌup kaipyi waku urutenuk hap ewy e. Niatpo kahato mani koi hap maꞌato itag hawyi uꞌi kahato wati­puẽti aipotpap saꞌa­wy­ꞌiwuat kai. Miꞌi hap ewywuat kahato eimuꞌe hap Tupana ehay koi hap."

¹² Iraniaꞌin eimuꞌe haria eweipoi kahato. Maꞌato — Yt karãpe i urupoi ro urutoꞌe ehepe. Eweikuap kat pote pyno ahenoi ehepe. Yt uruiky­ꞌesat i eiꞌe hap eiwa­nẽtup hawe — Aimiꞌu kyꞌewi neꞌi aimuꞌe ahekat kyꞌewi neꞌi aimuꞌe sehay wakuat ete Pauru Panape eweiꞌe hap. Miꞌi pote urupotpap at kaꞌap urupo wo urusaꞌup puẽti hamo. Uruho­ꞌopot kahato yat sokpe kawiat nug hap ete urumiꞌu kyiꞌat hamo yt uruiky­ꞌesat i eiꞌokpe tote urutenuk haype pote."

¹³ Saꞌa­wy­ꞌi­wuaria Tupana mõtypot yat piaria paꞌi koꞌi teꞌe­renuk miitꞌin miium kaipyi iꞌatuhũ Tupana kapiat iꞌatu­miwuk kapiat ete. Teꞌe­renuk taꞌa­tuhep ipuꞌi kãꞌã mekewat nu kawiat aihũ wuk hap eiam kaipyi teꞌe­renuk hamo. Paꞌi koꞌi miꞌi tã saꞌa­wyꞌi taꞌa­tu­puẽti taꞌa­tu­miꞌu."

¹⁴ Miꞌi hap ewy Tupana ainãpin mesup — Eweipoi ro eimuꞌe haria e. Eweimõꞌẽ emiꞌu uhehay wakuat moherep haria pe uimi­ky­ꞌesat ok tã e Tupana."

¹⁵ Maꞌato saꞌa­wyꞌi eimuꞌe turan yt atikat i uipoi hamuat. Yt kat i saꞌup atikat. Eimuꞌe hap saꞌup yt atiky­ꞌesat i te. Koitywy atunug mesuwat uimiwan yt kat i ahẽtup eikaipyi mesuwat uimiwan me. Yt atiky­ꞌesat i saꞌup eikaipyi eimuꞌe hap saꞌup. Poꞌog waku uiku­ꞌuro areĩneꞌen yt eimipoi i wywo te areĩneꞌen. Yt atiky­ꞌesat i ekat. Yt kat i uheso hap uhehay ete. Eweimõꞌẽ uhepe pote koitywy yt atikat i te pãi."

¹⁶ Atiꞌa­tu­muꞌe kahato miitꞌin Iesui etiat maꞌato yt uimi­mu­ꞌeria ekat kyꞌewi i atiꞌa­tu­muꞌe miꞌiria iꞌewyte yt uimõ­typot hap kyꞌewi i atiꞌa­tu­muꞌe miitꞌin. Eweikuap apo kat pote atiꞌa­tu­muꞌe miitꞌin Iesui ete hap. Pyno ahenoi ehepe Iesui uipo­ꞌoro miitꞌin muꞌe hamo miꞌi pote atiꞌa­tu­muꞌe wuatꞌi ywania Iesui uipo­ꞌoro hap ewy. Iesui ehay ikahu rakat ete yt atiꞌa­tu­muꞌe i miitꞌin mote Tupana miꞌa­piheg wo areĩneꞌen aru."

¹⁷ Iꞌewyte yt arepo­ꞌoro i Iesui ehay moherep hamo yt uimi­ky­ꞌesat ewy hin i. Maꞌato uipo­ꞌoro hat miky­ꞌesat ewy woro­ho­ꞌo­muꞌe. Maꞌato arepo­ꞌoro neꞌi pote miꞌi hawyi atiky­ꞌesat saꞌup eikaipyi. Maꞌato yt atiky­ꞌesat i saꞌup eikai katu­pono yt uipo­ꞌoro i eipe. Maꞌato Tupana uipo­ꞌoro yt uimi­ky­ꞌesat ewy hin i maꞌato — Etunug o e Tupana uhepe pote waro­ho­ꞌo­muꞌe. Miꞌi atunug mote uimohey Tupana inug hap ete."

¹⁸ Yt haꞌup kyꞌewi i woro­ho­ꞌo­muꞌe pãi. Uhaꞌup sese ti ehepiat Tupana kuap hap. Yt eikat kyꞌewi i maꞌato woro­ho­ꞌo­muꞌe. Yt ekat kyꞌewi i atimo­herep ehepe Iesui etiat ikahu rakat sehay. Atiky­ꞌesat haꞌup eikai uipotpap saꞌup Tupana ehay wakuat moherep hap saꞌup pote waku ahẽtup Tupana wanẽtup hawe maꞌato yt ahẽtup i te miꞌi hap ete."

¹⁹ Yt uwe i uikyiꞌat kuap saꞌup mo are. Yt uwe i — Urumuꞌe ro urumi­ky­ꞌesat ewywuat pote saꞌup iwato urutum epe Pauru e haria. Uito ti Tupana mikyiꞌat uito are. Tupana po pyi yn arenuk teren. Yt kat i miitꞌin wanẽtup hap uikai maꞌato Tupana wanẽtup hap wywo yn woro­ho­ꞌo­muꞌe are. Yt kat i eikat kyꞌewi hap wywo woro­ho­ꞌo­muꞌe. Uito areĩneꞌen wuatꞌi miitꞌin eropat hat katu­pono atekyi teran wuatꞌi miitꞌin Iesui kape pote.

"

²⁰ Atiꞌa­tuekyi teran kahato uiwy­riaꞌin Iuteuria Iesui mohey hap hamo. Miꞌi pote iꞌatu­py­ꞌa­setpe areĩneꞌen Iuteu ywania wo — Uito ti Iuteu yn areꞌe iꞌatuepe. Miꞌi hawyi iꞌatueko Iuteuria eko nug hat areĩneꞌen iꞌatu­py­ꞌa­setpiat areĩneꞌen turan. Iꞌewyte karãpe areĩneꞌen Musei mienoi moherep haria pyꞌa­setpe miꞌi hawyi atimo­herep Iesui iꞌatuepe Musei miwan kaipyi. Musei ainãpin hap nug hat ewy areĩneꞌen miꞌiria pyꞌa­setpe iꞌatuekyi Iesui kape."

²¹ Karãpe iraniaꞌin ywania pyꞌa­setpe areĩneꞌen miꞌi hawyi iraniaꞌin ywania eko wakuat ewy atunug. Areĩneꞌen miꞌiria ewywuat. Areĩneꞌen wẽtup ywania pyꞌas­tpe pote yt atunug i uiꞌy­wania Iuteuria eko ewy maꞌato iꞌatueko wakuat yne rakat atunug. Miꞌi hap atunug katu­pono miꞌiria atiky­ꞌesat kahato Iesui mohey haria torania hap. Miꞌi hap yn atunug Iesui kapiat miitꞌin ekyi hamo."

²² Karãpeĩ areĩneꞌen Iesui mohey haria yt hesaika rakaria i te tokpe miꞌi hawyi paaꞌe hat areĩneꞌen eiꞌewy uito areꞌe iꞌatu­moe­saika imohey hap ete hamo. Miꞌi kai ahoꞌosat Iesui mohey hanuaria."

²³ Atiꞌa­tu­muꞌe kahato miꞌiria Iesui ehay wakuat ete. Iꞌatu­wy­riaꞌin wo areĩneꞌen iꞌatu­muꞌe hamo. Miꞌi hap ahenoi yne hawyi Tupana mipoi­tyro wo miꞌiria tukup­teꞌen iꞌewyte uito.

"

²⁴ Ahetama puo tukup­teꞌen woꞌoiãꞌãg haria mesuwat seput hap ete uwe poꞌog ihyha hap kuap hamo. Iꞌatu kahato teput toꞌo­ꞌe­wy­ꞌewy maꞌato wẽtup yn poꞌog ihyha hat yn topy­huꞌat morekuat miium saꞌup sat hat no. Pyno waku watu­weput hãpyk kahato mekewat morekuat miium saꞌupsat hamo."

²⁵ Woꞌo­ꞌiãꞌãg haria seput haria saꞌa­wyꞌi taꞌa­tu­piit­moe­saika kahato. Yne eꞌat pe teput at iꞌatu­hyha hamo. Miꞌi hawyi wẽtup topy­huꞌat poꞌog torania kai hawyi miꞌi hat pe morekuat tum toꞌakag painug hap ewywuat — Miꞌi seput hat poꞌog e hamo. Ahetama puo morekuat tum toꞌakag painug hap mohyt kawiat poꞌog seput kuap hat pe. Wẽtup eꞌat hawyi igag naꞌyn. Miꞌi hap ewy Tupana tum aru ahepe aipainug hap aiꞌakag totiat maꞌato miꞌi ti yt igag i rakat toĩneꞌen. Wuatꞌi eꞌat piat ikahu rakat sese."

²⁶ Miꞌi hap ewy waku wato­mohey hãpyk kahato Aipo­typot Iesui haty wo. Uito Pauru surara ewywuat ipiit heg nakat ewywuat mekwat woꞌo­ꞌa­hy­kahyk hat ewywuat hãpyk kahato uito. Atuꞌuka aikotã ikuap kahato hat hepap hat uka hap ewy yt arekyry popuo i atuꞌuka."

²⁷ Ahetamã puo wato­ꞌo­ꞌiãꞌãg wuꞌuka hap ete. Miꞌi watunug at pote watu­we­moe­saika kahato aipiit. Yt miky­ꞌesat ewy i haty hap maꞌato wati­mo­pokuat aipiit. Miꞌi hat ewy areĩneꞌen uito. Maꞌato Tupana ehay moherep hap ete uipiit yt ipap i pytkai atunug. Karãpe wẽtup ok yi kai neꞌi raꞌyn watu­ꞌuka hap ete miꞌi hawyi tuwe­mõti. Maꞌato uito miꞌi hat ewy yt areĩneꞌen neran i Tupana ehay moherep hap ete. Areĩneꞌen neran poꞌog hesaika rakat ewy. Miꞌi hap ewy karãpe areꞌe iraniaꞌin me — Toꞌiro waku Iesui upi watuwat areꞌe maꞌato miꞌi pytkai yt areto i Iesui upi pote uito iꞌewyte aremõti. Wãiꞌare uipiit miky­ꞌesat saꞌag ete yt atiky­ꞌesat i Uipo­ꞌoro hat toꞌe uhepe aru — Saꞌag nug hat en e hap yt atiky­ꞌest hin i aru Iesui e hap. Uito ti uipiit miky­ꞌesat monik hat Pauru.

"

10

¹ Uiꞌy­wania woro­ho­ꞌo­muꞌe teran i raꞌyn ahaꞌa­se­ꞌiꞌin saꞌa­wy­ꞌiwuat ete. Saꞌa­wyꞌi te turan ahaꞌa­seꞌi Musei upi tuwat aiꞌy­wania wanĩ­kaptia po pyi. Miꞌi hawyi Tupana tiꞌa­tu­pyhyp sura­raꞌin iꞌatue­wa­nĩ­kaptia iꞌatu­mohan haria. Miꞌi hawyi toipo­ꞌoro ywyhig temiitꞌin apykok hamo yꞌahig iꞌatue­wyry hap moherep hamo."

² Miꞌi hawyi tutunug muꞌap ihyemuiꞌa wato sakpo ihyemuiꞌa Hup e hap het rakat sakpo. Miꞌi hawyi yꞌy wehy­ꞌokmõi hap sakpo tuwat yꞌy pyꞌa­setpuo Tupana puꞌap upi. Miꞌi hawyi ywyhig mekewat wanĩ­kaptia pyhyp hap hewyry iꞌatuupi. Miꞌi hawyi Tupana tiꞌa­tu­setꞌok taꞌyn eipe Musei upiaria e."

³ Miꞌi hawyi tuwat yahig sakpo. Iꞌatu­miꞌu wuat man atipy piaria miꞌu toĩneꞌen itote. Teꞌe­renuk kahato yne eꞌat Tupana miium man ete."

⁴ Iꞌewyte tutum tesaika hap wywo yꞌy wakuat nu wato kaipyi tuwẽtem ihy yne eꞌat pe. Koitywy watikuap taꞌyn mekewat Nu wato Aika­ꞌiwat Iesui iãꞌãkap ewywuat."

⁵ Maꞌato yt naku i nug haria teꞌe­ro­py­huꞌat yahig note e. Miꞌi hawyi Tupana yt iwepit hin i mekewat iꞌatu­minug saꞌag ete hawyi teꞌe­ropap kahato yahig note kowoꞌi kowoꞌi moi miꞌauka wo ahu miꞌauka wo aria miꞌauka wo."

⁶ Miꞌi hawyi aito mesup miꞌiria emiariru koꞌi ewywuat pote yt kan hamo i watunug yt naku i kat pote Tupana tiꞌa­tu­ꞌa­piheg miꞌiria ahaꞌa­se­ꞌiꞌin aimo­weꞌeg hamuat iꞌatu­minug saꞌag koꞌi atoiat hamo e."

⁷ Waku pyno wato­kenꞌẽ kahato ahaꞌa­se­ꞌiꞌin etiat Tupa­naria mug hap pupi. Waku watoiat tupa­naria mõtypot hap katu­pono ahaꞌa­se­ꞌiꞌin timõ­typot kahato miꞌi koꞌi aikotã toꞌe miwan hap ewy. Aiꞌy­wania teꞌe­ra­ꞌapyk miꞌu u hamo sapo hy u hamo Tupana saꞌag wewato ahup iãꞌãkap mõtypot hamo hawyi hairu nug hamo. Miꞌi hawyi iꞌatu­poĩꞌãm taꞌa­tue­tu­pa­naria mõtypot hamo e."

⁸ Miꞌi hawyi hary­po­riaꞌin ihainiaꞌin toꞌope toꞌope inug saꞌag. Taꞌa­tunug saꞌag hawyi teꞌe­ropap kahato sakpo 23000 miit hewo hewo yi tote ikuꞌuro rakaria yt naku i nug haria."

⁹ Miꞌi hawyi yahig note taꞌa­tu­mõ­py­ꞌahak teran Tupana taꞌa­tu­minug saꞌag wo. Taꞌa­tu­hãꞌãg kahato Tupana. Miꞌi hawyi moi koꞌi tiꞌa­tu­ꞌuka kahato miꞌiria."

¹⁰ Iꞌatuehay saꞌag kahato — Emiium koꞌi man yt ikahu hin i iꞌatuꞌe Tupana pe. Miꞌi pote Tupana tipo­ꞌoro temiit atipy kaipyi iꞌatu­moma hamo. Putꞌokꞌe hawyi topap kahato aiꞌy­wania saꞌa­wy­ꞌi­wuaria. Pyno waku aiweꞌeg wo kahato waku watu­wehum imiium ete"

¹¹ Yne mesu­wa­rotiat ikahuro hamuat yt pya hin i raꞌyn. Waku ahewyry iweꞌeg nakaria ewy. Waku wato­kenꞌẽ ahaꞌa­se­ꞌiꞌin minug saꞌa­wy­ꞌiwuat pupi katu­pono aimo­weꞌeg hamo Tupana tiwan ahaꞌa­se­ꞌiꞌin minug koꞌi etiat."

¹² Yt naku i watoꞌe aiwa­nẽtup hawe — Uhesaika kahato Tupana mohey hap ete pote yt karãpe i aru atiꞌa­parap Tupana pe yt naku i watoꞌe. Eweꞌeg wo o mio tã eweiꞌe eipyꞌa pe pote katu­pono miꞌi e haria meremo taꞌa­tu­ꞌa­parap taꞌa­tuiãꞌãg hap yt naku i nug hamo putꞌokꞌe hawyi — Imohey kahato hat areinẽꞌẽn iꞌatuꞌe taꞌa­tu­wa­nẽtup hawe pytkai."

¹³ Yne aito ahiag miiãꞌãg koꞌi aiwo­ꞌo­ꞌe­wy­ꞌewy. Maꞌato saꞌa­wyꞌi Tupana toꞌe ahepe — Atipyhyp aru ehãꞌãg hap pupi e. Miꞌi pote yt karãpe sese i putꞌokꞌe hãꞌãg hap ehete poꞌog hesaika eikai katu­pono areĩneꞌen eiwywo eimoe­saika hamo ehãꞌãg hap pupi e. Miꞌi hawyi ehesaika kahato eweikup­teꞌen ehãꞌãg hap sopo hamo e hawyi atum ehepe muꞌap hatyꞌu wuat ipopywiat ewẽtem hamuat e Tupana."

¹⁴ Miꞌi pote uiwy­riaꞌin sese eipe yt eweimõ­typot teiꞌo iãꞌãkap koꞌi."

¹⁵ Miꞌi tã ewetunug mote weꞌeg haria wo eweikup­teꞌen. Iꞌewyte atikuap uhehay upiat haria eipe sio yt hap ete e.

"

¹⁶ Karãpe watu­we­ꞌa­tunug watuꞌu sapo hy hamo kuiꞌa piat iꞌewyte man u hamo miꞌi turan watu­wehum kahato Tupana kape katu­pono aipoi­tyro miꞌi hap ete. Miꞌi sapo hy Aika­ꞌiwat Iesui suu iãꞌãkap kahato. Miꞌi watuꞌu hu iãꞌãkap hawyi imohey hap wati­mo­herep kahato. Karãpe watipik mekewat man hawyi watuꞌu hawyi imohey haria wato­py­huꞌat hap wati­mo­herep miitꞌin me iꞌewyte wẽtup piit ewy watoĩ­neꞌen hap wati­mo­herep."

¹⁷ Iꞌatu kahato aito Iesui mohey haria maꞌato miꞌi pytkai wẽtup piit ewy watoĩ­neꞌen e. Miꞌi hap ewy wẽtup a yn watipik pik man hawyi watenuk. Miꞌi hawyi wẽtup a yn man watuꞌu Iesui puꞌi pikꞌe hap moherep hap."

¹⁸ Uruꞌy­wania Isareu ywania tum kahato taꞌa­tuhũ Tupana pe. Miꞌi hawyi paꞌiria tiwuk taꞌa­tu­hũria iꞌatuwuk wuk hap heiam note. Iwyp kahato hawyi terenuk kahato raꞌyn taꞌa­tumiium kaipyi Tupana piat taꞌa­tumiium pytkai."

¹⁹ Pyno ahenoi mekewat miꞌu Isareu ywania miium taꞌa­tue­tu­pa­naria imõtypot hap yt ihaĩte hin i. Miꞌi pytkai taꞌa­tuꞌu miꞌu ikuꞌuro rakat katu­pono ikuꞌuro rakaria tupa­naria pote."

²⁰ Taꞌa­tuwuk taꞌa­tu­hũria iꞌatuiã­ꞌãkap pyꞌa­setpe maꞌato iãꞌãkap koꞌi iꞌatue­tu­pa­naria yt taꞌa­kasa hin i. Pywo ti yt Tupana sese kape hin i iꞌatumiium koꞌi maꞌato ahiagnia kape iꞌatu­miwuk koꞌi. Miꞌi hawyi ahiag wyriaꞌin kahato tukup­teꞌen miꞌiria. Yt naku i miꞌi tã ewetunug eipe miꞌiria eko ewy neꞌi Iesui ekuiꞌa sapo hy wo."

²¹ Miꞌiria iꞌewyte teꞌe­re­ꞌyꞌu ahiagnia ehamo mekewat tupa­naria mõtypot hap yparakai totiat. Yt naku i watunug iꞌatu­minug ewy te katu­pono wẽtup sapo hy raꞌyn aiwanuat. Aika­ꞌiwat Iesui ekuiꞌa pyi raꞌyn watenuk huu at hap ewywuat watuꞌu waku rakat."

²² Maꞌato watuꞌu ahiagnia ekuiꞌa pyi iꞌewyte Aika­ꞌiwat ekuiꞌa pyi hawyi waku aiweꞌeg wo katu­pono Aika­ꞌiwat tiky­ꞌesat aito towanuat hap yn. Ihayꞌy­wywi miꞌi tã watunug pote. Waku aiweꞌeg wo kahato katu­pono Aika­ꞌiwat poꞌog hesaika aikai. Waku wato­kenꞌẽ Aika­ꞌiwat aiꞌa­piheg hap pupi uiwy­riaꞌin Tupana saꞌa­ruꞌin saki­ꞌytꞌin aito pote.

"

²³ Waku watunug yne aimi­ky­ꞌesat ok tã iꞌatuꞌe toꞌope iraniaꞌin Iesui mohey haria taꞌa­tueso popuo. Miꞌi pote areꞌe iꞌatuepe — Aimi­ky­ꞌesat waku pote pyno waku watunug maꞌato aimi­ky­ꞌesat yt naku i pote yt naku i watunug. Aimi­ky­ꞌesat miitꞌin powyro hap pote waku watunug areꞌe iꞌatuepe."

²⁴ Yt naku i aimi­ky­ꞌesat yn watunug waku pytkai areꞌe iꞌatuepe. Waku poꞌog iraniaꞌin miky­ꞌesat watunug aiwe­po­wyro hap kai."

²⁵ Karãpe iraniaꞌin terut ahowawi miꞌu puꞌi waku watuꞌu yne imiium. Yt naku i watoꞌe — Etiꞌauka apo mesuwat ehũ iãꞌãkap mõtypot hamo mehĩ mana sio yt watoꞌe neꞌi."

²⁶ Yt naku i mio tã eweiꞌe miꞌu erut hat pe katu­pono Tupana tunug yne puꞌi mesuwat aipytyp nug hap mywo te iꞌewyte aihũria yne Tupana wanuat topy­huꞌat."

²⁷ Miꞌi hawyi wẽtup ok yt imohey i hat toꞌe ahepe — Toꞌiro uiꞌyat kape ahenuk hamo e hawyi waku ereto etiky­ꞌesat pote. Maꞌato waku putꞌok­ꞌere hawyi erenuk kahato imiium ok tã e. Yt ereꞌe teiꞌo tope — Etum naꞌyn apo meiũwat miꞌu iãꞌãkap mõtypot hamo uhyt mana yt apoꞌere teiꞌo maꞌato etuꞌu yt kat i haty ewanẽtup hawiat wywo yn waku."

²⁸ Maꞌato erenuk turan wẽtup ok toꞌe epe — Etikuap apo Tupana iãꞌãkap mõtypot hamuat miꞌu puꞌi watuꞌu hap uhyt e pote — Yt atikuap hin i miꞌi hap waku eweiꞌe iꞌatuepe. Miꞌi hawyi — Pyno yt atuꞌu i poꞌog katu­pono yt naku i watuꞌu miꞌi tã e hat ehamo maꞌato etuꞌu pote haty kahato topy­huꞌat ewanẽtup hawe iꞌewyte mekewat miit itotiaria pe iꞌaparap hat wo en eropy­huꞌat ihamo etuꞌu pote."

²⁹ Yt aiwo­ꞌoewy hin i aimiꞌu u hap eko ete e. Maꞌato waku watuꞌu aiwa­nẽtup hawe wen maꞌato mekewat miit — Yt naku i watuꞌu e hat ehamo yt naku i watuꞌu. Maꞌato iraniaꞌin itotiaria Iesui mohey haria — Waku watuꞌu Tupana miium e haria tukup­teꞌen eipy­ꞌa­setpe pote waku yne aimiꞌu wo watu­wehum kuap Tupana kape pote waku etuꞌu e Iesui Aika­ꞌiwat ahepe. Pywo kahato miꞌi tã wen maꞌato yt naku i — Yt naku i watuꞌu e hat ehamo katu­pono yt naku i watu­ꞌuka ahehay wo iraniaꞌin Iesui mohey haria wywo — Waku watuꞌu yt naku i watuꞌu e hap koꞌi etiat."

³⁰ Watenuk turan waku watoꞌe Tupana pe — Urutu­wehum kahato epe Tupana emiium urumiꞌu wo waku watoꞌe Tupana pe. Miꞌi hap ewy watunug mote yt naku i watoꞌe wẽtup ok — En yt naku i katu­pono etuꞌu mekewat miꞌu yt naku i mio tã watoꞌe katu­pono tuwehum tenuk turan Tupana kape hap wywo tutuꞌu pote."

³¹ Pyno kat koꞌi kat koꞌi watunug waku watunug miꞌi torania Tupana mõtypot hamo sio watenuk sio wate­ꞌyꞌu sio watu­we­potpap Tupana mõtypot hap yn waku aiwa­nẽtup hawe. Taꞌi kat koꞌi kat koꞌi watunug turan waku watu­wehum Tupana kape."

³² Waku aheĩneꞌen yt uwe maꞌat hano i. Waku wato­py­huꞌat yt Iuteu ywania aparap hano i. Yt naku i Iesui mohey hap auka hat wato­py­huꞌat aiminug koꞌi kaipyi. Iꞌewyte iraniaꞌin ywania aparap hano yt naku i wato­py­huꞌat. Yt naku i watoĩ­neꞌen Iesui mohey haria Tupana yat piaria maꞌat hat neꞌi."

³³ Uito Pauru arewy­ꞌinug neran yne uiminug wakuap mo yn.

"

11

¹ Pyno waku eiwe­haꞌat uhowawi uiꞌe­wywuat eweipy­huꞌat katu­pono uito Aika­ꞌiwat Iesui iãꞌãkap kahato uito imiky­ꞌesat ewy yn atunug neran are."

² Pywo pe ti arehum kahato ehete uipot­mu­ꞌeria katu­pono yt uiwaure hin i eipe uimienoi upi kahato eweikup­teꞌen. Haꞌa­wyte woro­ho­ꞌo­muꞌe kahato Iesui moherep hap ete. Miꞌi hawyi areto raꞌyn maꞌato yt eweiwaure hin i uimiatoiat iꞌewyte yt eweiwaure hin i eimuꞌe hap."

³ Pyno wẽtup ete woro­ho­muꞌe teran. Atiky­ꞌesat eweikuap Torania Ihainiaꞌin akag no topy­huꞌat Iesui Aipo­typot Poꞌog torania Kawiat. Miꞌi hawyi hary­poria akag topy­huꞌat heꞌaito. Miꞌi hawyi Aipo­typot Iesui akag topy­huꞌat Tupana."

⁴ Yt naku i ihainia aimuꞌe Tupana ehay etiat turan sio ihainia ihay Tupana wywo aiwo­ꞌo­muꞌe hawe yt naku i morekuat painug hap iꞌakag note katu­pono miꞌi pote Toꞌakag Iesui mõti te hap topy­huꞌat."

⁵ Karãpe Tupana mõtypot yat pe wẽtup ok hary­poria aimuꞌe teran Tupana ehay wo waku totopag taꞌakag note sokpe hit kawiat yt kat i — Uito poꞌog ihainiaꞌin kai e hap toĩneꞌen mekewat hary­poria wanẽtup hawe e hap moherep hamo. Maꞌato tuwepyi aimuꞌe hary­poria yt kat i paaꞌe hap wywo pote ihainiaꞌin mõti hap toĩneꞌen hawyi heꞌaito tuwe­mõti sese — Uheha­ryꞌi uimuꞌe hat toĩneꞌen mesup e hap tuwa­nẽtup hawe pote."

⁶ Maꞌato sokpe hit taꞌakag note pote waku aimuꞌe. Miꞌi pote waku hary­poria topag taꞌakag tote teꞌog sokpe hit kawiat aimuꞌe Tupana ehay etiat turan sio ihay Tupana kape turan — Ihainiaꞌin ywytꞌok­pype areĩneꞌen e hamo."

⁷ Tupana mõtypot kahato hat ihainiaꞌin Tupana iãꞌãkap sese ihainia hary­poria iꞌewyte maꞌato ihainia mõtypot hat iharyꞌi."

⁸ Saꞌa­wyꞌi Tupana tunug hary­poria ihainia kawiat mekewat eꞌat pe. Yt tutunug i ihainia hary­poria kawiat."

⁹ Saꞌa­wyꞌi sese Tupana tunug ihainia hary­poria muꞌe hamo."

¹⁰ Miꞌi pote waku hary­po­riaꞌin tuwe­ꞌakag suwy sokpe wo — Uito atimõ­typot uheꞌaito toꞌe hamo wuatꞌi miitꞌin ehamo hamo. Iꞌewyte atipy piaria heꞌaito poꞌog ikai e hamo."

¹¹ Karãpe wato­py­huꞌat Iesui mohey haria wati­po­wyro kahato hary­poria. Yt wati­mohit i iꞌewyte aiwo­ꞌo­mõ­typot hap yn."

¹² Pyno ti Tupana tunug hary­poria ihainia eturu­ꞌokpy kawiat. Maꞌato iꞌewyte pywo kahato torania ihainiaꞌin tuwẽtem toty ymyẽ pyi. Ainug hat sese maꞌato Tupana sio aito hary­poria sio ihainia."

¹³ Pyno uiwesat eipe sio waku aheha­ryꞌi ihay Tupana kape Tupana mõtypot yat pe aiwa­ꞌa­tunug hap tote yt kat i hin i iꞌakag me teꞌog wywo sio yt."

¹⁴ Maꞌato ihainia tunug toꞌasap hary­poria wat ewywuat pote miꞌi hawyi aiwe­mõti hap topy­huꞌat kat pote ihainia aito pote."

¹⁵ Taꞌi yt naku i katu­pono watikuap yne aito yt uwe i aimuꞌe pytkai hary­poria iꞌasap ywop takat waku. Watikuap taꞌyn hary­poria asap hesokpe ewywuat Tupana tunug saꞌa­wyꞌi hary­poria painug hap ewywuat topy­huꞌat."

¹⁶ Maꞌato uiwa­nẽtup hawe waku hary­poria topag taꞌakag tote sokpe hit taꞌa­tu­henoi ihainiaꞌin Tupana ehay wo turan sio taꞌa­tuehay Tupana kapiat turan. Yne Iesui mohey haria miꞌi seko ewy toĩneꞌen ahetamã pe. Iꞌewyte uruto Iesui potmu­ꞌeria sese 12 ok takaria wy wẽtup seko yn urutu­kup­teꞌen. Pyno waku aheko ewy watunug. — Yt naku i sokpe hit aiꞌakag toto eweiꞌe pote Iuteuria eko ewywuat urueko mohit haria wo eweikup­teꞌen katu­pono yne Tupana mõtypot yat piaria uruetama pe miꞌi ewywuat nug haria tukup­teꞌen.

"

¹⁷ Pyno woro­ho­ꞌo­nãpin teran uito Pauru. Waku kahato ti eipe tawa Kurintiu piaria maꞌato mesup ahenoi teran ehepe yt uimo­wepit i hap koꞌi eiminug. Pyno eiwe­ꞌa­tunug kahato o itote Tupana mõtypot hamo maꞌato yt hãpyk hin i eweimõ­typot Iesui. Miꞌi hawyi miꞌi kaipyi miitꞌin aparap hap topy­huꞌat. Miꞌi hawyi eiwe­ꞌa­tunug hawe poꞌog wuꞌuka hap topy­huꞌat itote. Kat pote som miꞌi tã."

¹⁸ Taꞌi iraniaꞌin henoi uhepe — Yt toꞌo­ꞌewy hin i itotiaria hawyi wuꞌuka hap yn topy­huꞌat itote iꞌatuꞌe. Pyno eipe Iesui mohey haria pytkai eiwe­pat­ꞌok­patꞌok itotiat hap atikuap taꞌyn. Yt atimohey i yne iꞌatuehay koꞌi ehetiat maꞌato miꞌi iꞌatuꞌe hap ehetiat hap atimohey."

¹⁹ — Waku wati­patꞌok patꞌok eweiꞌe saꞌag eiwo­ꞌope. Waku iraniaꞌin aimuꞌe hat Peteru upiaria. Waku irainiaꞌin aimuꞌe Aporu upiaria. Waku iraniaꞌin aimuꞌe hat Pauru upiaria eweiꞌe saꞌag meꞌi eiwo­ꞌope. Miꞌi tã watunug hawyi meremo watikuap uwe hãpyk uwe yt hãpyk i eweiꞌe saꞌag maꞌato miꞌi tã ti yt Tupana miky­ꞌesat ewy hin i."

²⁰ — Toꞌiro watenuk Aika­ꞌiwat enuk hap man pikpik hap kape eweiꞌe. Toꞌiro sapo hy u hamo Iesui kapiat kuekatu hamo waku watoꞌe maꞌato yt miꞌi tã hin i ewetunug."

²¹ Yt Aipo­typot enuk hap ewy hin i ewetunug itote katu­pono yt iweꞌeg nakaria ewy i ewehenuk yt eweimõꞌẽ hin i pote. Saꞌa­wy­ꞌi­wuaria tuꞌu yne miꞌi hawyi iraniaꞌin hesyꞌat topy­huꞌat. Miꞌi hawyi iraniaꞌin teꞌe­ru­we­sapo hy u yne hawyi imopẽꞌã rakaria wo tukup­teꞌen."

²² Yt naku i miꞌi tã. Ehesyꞌat pote waku yianmete ewetuꞌu miꞌu eiꞌyat pe katu­pono iraniaꞌin yt hekat i rakaria yt terut kuap i miꞌu koꞌi. Miꞌi hawyi yt hekat i rakaria pe yt kat i ewetum kuap. Miꞌi hawyi teꞌe­ru­we­mõti kahato yt eiweꞌeg hin i hap ete. Yt arehum hin i miꞌi eminug ete pãi.

"

²³ Pyno waku woro­ho­ꞌo­muꞌe i raꞌyn Aika­ꞌiwat aimuꞌe hap ete aikotã Aika­ꞌiwat Iesui enuk hap ewy. Saꞌa­wyꞌi Iesui maꞌat hap wãtym turan totat man teneg e."

²⁴ Miꞌi hawyi waku e Tupana pe hawyi toipik pik man iꞌatue­hamo — Mesuwat man uiꞌewy e katu­pono uipik irane eheha­kye­raꞌat hamo e. Karãpe ewetuꞌu mesuwat man turan uhowawi waku eiwa­tetup aikotã uiku­ꞌuro eika­wiano hap kape e."

²⁵ Teꞌe­renuk kahu hawyi Iesui tat sapo hy kuiꞌa piat. Miꞌi hawyi toꞌe — Mesuwat sapo hy uhuu ewy e. Miꞌi atum irane saꞌup mo Tupana pe iwywuat miitꞌn woꞌo­wese hap pakup i nug hamuat e."

²⁶ Pyno karãpeĩ ewetuꞌu mesuwat man ewywuat iꞌewyte eiwe­ꞌyꞌu mesuwat sapo hy wo eweimo­herep wuatꞌi miitꞌin me uiku­ꞌuro hap iãꞌãkap uiꞌaipok hap kape e. Miꞌi ewywuat ewetunug uiku­ꞌuro hap moherep hamuat e Iesui imaꞌat hap eꞌat pe turan."

²⁷ Waku hãpyk kahato wati­mõ­typot Aika­ꞌiwat Iesui. Uwe uwe iꞌu iꞌewyte teꞌyꞌu yt kat i imõtypot hap wywo miꞌi hat Tupana miꞌa­piheg wo topy­huꞌat katu­pono Iesui piit etiat miky­ryꞌi hat miꞌi."

²⁸ Maꞌato waku Iesui enuk hap ewy ahenuk hamo. Eꞌyianmete waku watu­wa­nẽtup kahato — Aipyꞌa pe sio waku pe watoĩ­neꞌen Tupana wywo hap kape. Maꞌato waku pe watoĩ­neꞌen Tupana wywo pote waku watuꞌu sapo hy iꞌewyte man pikpikꞌe rakat Iesui kuꞌuro hap kape aiwa­nẽtup hamuat."

²⁹ Maꞌato watuꞌu man pikpik iꞌewyte mekewat sapo hy aiwe­ky­ryꞌi popuo neꞌi miꞌi pote Tupana miꞌa­piheg wo watoĩ­neꞌen. Aimaꞌat hap topy­huꞌat Aika­ꞌiwat piit pun haria neꞌi aito."

³⁰ Miꞌi pote iꞌatu kahato eipy­ꞌa­set­piaria iꞌahu rakaria wo ipiit perup takaria wo get rakaria wo tukup­teꞌen itote Iesui suu etiat weky­ryꞌi haria eweikup­teꞌen mote."

³¹ Pyno waku aiweꞌeg wo waku poꞌog ahepiat. Iꞌu hap eꞌyianmete waku watoꞌe Tupana pe — Waku atuꞌu sio yt watoꞌe. Miꞌi tã watunug mote yt wato­py­huꞌat i Tupana miꞌa­piheg wo."

³² Maꞌato yt naku i wywo watuꞌu pote miꞌi hawyi — Yt naku i eipe e aru Tupana ahepe aiꞌa­piheg hap wywo katu­pono yt toiky­ꞌesat i ahoꞌo­wasat hap iraniaꞌin mesuwat yi totiaria ewy."

³³ Uiwy­riaꞌin tawa Kurintiu piaria karãpe eiwa­ꞌa­tunug mekewat Aika­ꞌiwat ienuk hap ewywuat u hamo turan eiwo­ꞌoe­katup woꞌoe­katup o tukup­teꞌen yne itote hawyi waku ewetuꞌu."

³⁴ Maꞌato wẽtup ok toĩneꞌen eipy­ꞌa­setpe uhesyꞌat kahato e hat miꞌi hat pe — Waku mehĩ waku erenuk eꞌyat pe hawyi eriot meikowo eweiꞌe eꞌyianmete katu­pono yt naku i Tupana miꞌa­piheg haria wo wato­py­huꞌat. Maꞌato Iesui mõtypot hap upi watꞌu man pikpikꞌe hap uwa hy ikuꞌuro aika­wiano hap moherep hamo miꞌi watunug mote Tupana mipoi­tyro koꞌi wato­py­huꞌat e. Miꞌi pote miꞌi hap ete yt ahenoi kuap i koitywy uimiwan me. Iꞌatu kahato te yt ahenoi i ehepe maꞌato areto ehowawi hawyi ahenoi yne ehepe heĩpyt koꞌi.

"

12

¹ Saꞌa­wy­ꞌiwuat einãpin miwan miat hap ewywuat koꞌi koitywy woro­ho­ꞌo­nãpin pakup i tawa Kurintiu piaria. Mesup woro­ho­ꞌo­muꞌe teran Tupana Pãꞌãu etiat aikotã tutum ahepe tesaika hap toꞌe­wywuat pytkai sepap nug hap etiat. Yt naku i watoĩ­neꞌen yt ikuap i haria wo neꞌi Tupana Pãꞌãu miium etiat haria."

² Haꞌa­wyte tupa­naria mõtypot haria mo wuat minug yt ihay i rakat mõtypot haria yt taꞌa­kasa kuap i rakaria mõtypot haria saꞌa­wyꞌi eipe. Miꞌi hap saꞌag kape yn saꞌa­wyꞌi eiwa­nẽtup. Iãꞌãkap upi ehewyry yt Tupana ywania ewy hin i eweikup­teꞌen."

³ Karãpe watoꞌe Iesui pe — En ni Uipo­typot Uika­ꞌiwat watoꞌe pote Tupana Pãꞌãu mimuꞌe wato­py­huꞌat. Maꞌato watoꞌe — Iesui ti yt naku i watoꞌe pote yt kat i Tupana Pãꞌãu aikai."

⁴ Pyno yt aiwo­ꞌo­ꞌewy hin i wẽtup yn Tupana Pãꞌãu aipyꞌa pe pytkai katu­pono Tupana Pãꞌãu tum ahepe tesaika hap yt toꞌo­ꞌe­wy­ꞌewy hin i toimõꞌẽ wuatꞌi nug hamuat wẽtup yn Tupana Pãꞌãu toĩneꞌen pytkai."

⁵ Wẽtup yn Aipo­typot toĩneꞌen. Miꞌi kape watu­we­potpap maꞌato aipotpap hap yt aiwo­ꞌo­ꞌe­wy­ꞌewy hin i."

⁶ Aipotpap hap koꞌi yt toꞌo­ꞌe­wy­ꞌewy i Tupana potpap nug hap. Maꞌato miꞌi pytkai wẽtup yn aimi­sepap koꞌi ium hat. Miꞌi hat ti Tupana are."

⁷ Tupana Pãꞌãu toĩneꞌen aipiit pe. Miꞌi hawyi aiwo­ꞌope aiwo­ꞌo­poi­tyro hap ahewaku hap toĩneꞌen."

⁸ Pyno Tupana Pãꞌãu timo­herep wẽtup ok Iesui mohey hat piit pyi iweꞌeg hamuat miitꞌin muꞌe hat. Wẽtup ok imohey hat pe Tupana Pãꞌãu timo­herep ikuap wuatꞌi miitꞌin muꞌe kuap hamo."

⁹ Miꞌi hawyi Tupana Pãꞌãu timo­herep wẽtup ok imohey hat pe imohey kahato hap. Miꞌi hawyi wẽtup ok pe tutum tesaika hap iꞌahu rakat moehaĩte hamo."

¹⁰ Miꞌi hawyi Tupana Pãꞌãu tum tesaika hap wẽtup ok pe Tupana ewywuat yt uwe misepap i nug hamo. Wẽtup ok pe tutum tesaika hap Tupana wanẽtup hap moherep hamuat hawyi Tupana wẽ wo raꞌyn toĩneꞌen hap. Miꞌi hawyi wẽtup ok pe Tupana Pãꞌãu tum tesaika hap wuatꞌi kuap hamuat pywo sio yt hap kuap hamuat sio Tupana Pãꞌãu kaipyi ihay sio ahiag ihay wẽtup ok miit ete hap kuap hamo. Iꞌewyte tutum wẽtup ok miit pe tesaika hap wẽtup ywania pusu puat iꞌatu­muꞌe hamuat yt toikuap pytkai i hap. Wẽtup ok pe tutum tesaika hap wẽtup ywania pusu moherep hamo aipusu puat imoherep hamo."

¹¹ Tupana Pãꞌãu wẽtup yn toĩneꞌen pytkai iꞌatu kahato tomi­sepap nug hap koꞌi tukup­teꞌen. Tutum ahepe tomi­sepap nug kuap hap Topãꞌãu kaipyi. Maꞌato yt ewy hin i toimõꞌẽ ahepe. Tomi­ky­ꞌesat ewy tutum ahepe tomi­sepap nug kuap hap koꞌi. Wẽtup ok aipy­ꞌa­setpiat pe tutum wẽtup tomi­sepap nug kuap hap hawyi wẽtup aipy­ꞌa­setpiat pe wẽtup tomi­sepap nug kuap hap tutum e. Yt toꞌo­ꞌe­wy­ꞌewy hin i toiꞌa­tu­mõꞌẽ tomi­sepap nug kuap hap ahepe."

¹² Iꞌatu kahato aito Iesui mohey haria pytkai Tupana wanẽtup hawe wẽtup miit ewy yn watoĩ­neꞌen aikotã aipiit wẽtup yn hap ewy. Iꞌatu kahato ahaga koꞌi. Yt toꞌo­ꞌewy hin i aipiit ete maꞌato miꞌi pytkai wẽtup yn aipiit hap ewy ti Iesui piit toĩneꞌen."

¹³ Ipatꞌok aito Iuteu ywania ipatꞌok wẽtup ywania aito ipatꞌok aito miit emiit ipatꞌok miit akag koꞌi maꞌato aito Iesui mohey haria pote Tupana Pãꞌãu eiam aito. Miꞌi pote Tupana Pãꞌãu ahetꞌok taꞌyn — Iesui piit eipe e raꞌyn ahepe."

¹⁴ Aipiit yt wẽtup iaga yn i maꞌato iꞌatu kahato iaga koꞌi aipiit ete."

¹⁵ Miꞌi tupono yt naku i toꞌe aipy aipo pe — Yt kan hamo i areĩneꞌen mesuwe yi ete waku poꞌog areĩneꞌen itote aipo wo en ewy maꞌato uiwy­riaꞌin yt naku i aipy topy­huꞌat aipo wo yt naku i poꞌog areĩneꞌen mesuwe aipy wo. Waku arẽtem aipiit pyi e. Mio tã toꞌe neꞌi pote tuꞌuka kahato tehay wo aipo ete maꞌato yt kan hamo i tuꞌuka katu­pono toĩneꞌen wuatꞌi eꞌat pe aipy wo Tupana inug aipy pote. Yt kan hamo i ihaꞌy­wywi aipo hap kyꞌewi katu­pono aipy wo Tupana inug. Waku aipy waku aipo waku aipiit powyro hamo."

¹⁶ Yt naku i ahewaure kaꞌa toꞌe aipiit pe. — Uito yt ekawiat i katu­pono yt eha ewy i miitꞌin mimõ­typot areĩneꞌen mote. Miꞌi tupono waku yt areĩneꞌen i aipiit ete poꞌog e neꞌi. Mio tã e ahewaure kaꞌa aipiit pe pote heso rakano topy­huꞌat."

¹⁷ Aheha tuwenug aipiit kaipyi neꞌi miꞌi pote aikotã watikuap sehay. Miꞌi hawyi aiꞌãkuat yt toĩneꞌen i aipiit wo yt tuwe­pehik i pote aikotã aru watikuap ikamhig hap."

¹⁸ Miꞌi pote Tupana yt ainug i wẽtup yn ahaga aipiit maꞌato iꞌatu kahato ahaga ainug wẽtup piit kaipyi yn pytkai. Pywo ti tomi­ky­ꞌesat ewy ainug."

¹⁹ Ahaga wẽtup yn toĩneꞌen mote yt kat i aipiit."

²⁰ Iꞌatu kahato aipiit ete ahaga koꞌi maꞌato miꞌi pytkai wẽtup yn aipiit."

²¹ Miꞌi tupono yt naku i aheha yt naku i e aipo kapiat taꞌa­kasa hawyi — Yt kan hamo i aipo e. Iꞌewyte yt naku i aiꞌakag toꞌe aipy pe — En yt kan hamo i woro­ky­ꞌesat e."

²² Iꞌatu kahato ahaga yt hesaika rakaria i wen maꞌato toꞌo­ꞌe­wy­ꞌewy ahaga hesaika rakaria toꞌo­po­wyro kuap kahato."

²³ Maꞌato iꞌatu kahato ahaga aipiit pe yt waꞌa­kasa i hap koꞌi. Yt uwe i tuwehum iꞌatuete yt heremo i pote. Maꞌato miꞌi pytkai aipo­wyro kahato miꞌiria. Maꞌato iꞌahu wẽtup aipyꞌa aimeꞌen hap ewy hawyi wati­ky­ꞌesat kahato miꞌiria mog hap iꞌewyte toĩ ahaga yt ikahu rakat i maꞌato ikahu aiwa­nẽtup hawe katu­pono aipo­wyro kahato hamo waku miꞌiria."

²⁴ Pyno aipiit ahaga koꞌi Tupana minug yne tornia. Miꞌi hawyi tuwehum yne tominug koꞌi ete. Yt wẽtup ete i tuwehum poꞌog iraniaꞌin kai. Wẽtup wẽtup tutunug poꞌog yt ikahu hin i iraniaꞌin kai wen maꞌato miꞌiria aipo­wyro hat ikahu rakat ok tã ne. Miꞌiria maꞌato yt ikahu pytkai i poꞌog wati­po­wyro tuereto aimo­wepit pote."

²⁵ Miꞌi hawyi ahaga koꞌi toꞌo­po­wyro at kaꞌap. Yt naku i ahaga yt toꞌo­po­wyro i toꞌope."

²⁶ Karãpe wẽtup ahaga ete haty raꞌyn hawyi torania aipiit ete raꞌyn haty. Iꞌewyte karãpe ahaga wẽtup ok timõ­typot — Ikahu kahato eha e hap ewywuat hawyi ꞌi hawyi aipiit yne raꞌyn iwepit."

²⁷ Maꞌato ti hãꞌãkap wuo ahenoi ahaga koꞌi etiat Iesui piit etiat. Pyno aito Iesui piit aga koꞌi ewy Iesui mohey haria aito pote."

²⁸ Aito ti haga koꞌi ewy wato­py­huꞌat maꞌato ti Tupana timo­wo­ꞌosat yne wẽtup piit ete yn torania aito Iesui mohey haria. Wẽtup ahaga Tupana tum tesaika hap tehay sytpok wẽtup ywania kapiat hat ewy. Miꞌi hawyi Tupana tum wẽtup haga pe tesaika hap aikotã aikotã meiũran topy­huꞌat hap moherep hamo Tupana yn wyti ikuap e hap moherep hamo e. Miꞌi hawyi wẽtup ok pe tutum tesaika hap tehay wuat miitꞌin atumuꞌe hamo e. Miꞌi hawyi wẽtup ok pe tutum tesaika hap yt uwe i miitꞌin misepap ewywuat nug hamuat e. Miꞌi hawyi wẽtup ok pe tutum tesaika hap iꞌahu rakaria moehaĩte hamo e. Miꞌi hawyi wẽtup ok pe tutum tesaika hap wẽtup ywania iꞌatu­pusu puat miitꞌin atumuꞌe tehay etiat hamo e."

²⁹ Yt yne i aito Tupana ehay sytpok yne ywania piat hanuaria. Yt torania pe i tutum tesaika hap iwato kahato aikotã aikotã hap moherep hamo e. Iꞌewyte yt yne pe i tutum tesaika hap miitꞌin atumuꞌe hamo e. Iꞌewyte yt yne pe i tutum tesaika hap yt uwe i misepap nug hamo e."

³⁰ Yt yne i pe tutum tesaika hap iꞌahu rakaria moehãite hamuat e. Yt yne pe i tutum tesaika hap wẽtup ywania pusu puat iꞌatu­muꞌe hamo yt toikuap pytkai i e. Iꞌewyte wẽtup ok pe tutum tesaika hap wẽtup ywania pusu moherep hamo aipusu puat hamo e."

³¹ Pyno Tupana aimoe­saika wakuat kahato nug hamo. Waku kahato toimo­herep aipiit pyi tesaika hap nug hamo. Yt watikuap i pytkai waku kahato watunug Tupana mikuap hap toipag aipiit pe hawyi. Waku kahato watunug maꞌato wẽtup aimoe­saika hap Tupana piat poꞌog waku iraniaꞌin kai. Miꞌi ti Tupana ehay moherep iraniaꞌin me hap poꞌog waku torania tomiium kai. Miꞌi pote waku wahẽtup aipyꞌa pyi — Tupana uimuꞌe o ehay moherep emikuap ok tã iraniaꞌin me waku watoꞌe wuatꞌi aimi­ky­ꞌesat hap wywo hawyi tutum ahepe tesaika hap tehay moherep hamo.

Uito ti Tupana ehay moherep hat sese Pauru.

"

13

¹ Yt wati­kyꞌe i miitꞌin pote yt kat hamo i aimi­sepap koꞌi sio watikuap yne torania pusu mesu­wa­rotiat sio watikuap atipy piaria pusu yt kat i miitꞌin kyꞌe hap Tupana kyꞌe hap aikai pote aipusu ahehay topy­huꞌat ipuehay ewy aimogyt hap ewy aikotã tamã­raka ehay ewy ihay pirik hap. Watikuap wuatꞌi ywania pusu maꞌato miꞌi pytkai yt wati­ꞌa­tu­kyꞌe i iraniaꞌin pote yt kat hamo i watikuap yne pytkai."

² Watikuap kahato Tupana ehay moherep miitꞌin miat hamo maꞌato miꞌi pytkai yt wati­kyꞌe i aimi­mu­ꞌeria pote miꞌi hawyi yt kat hamo i ahehay see hap topy­huꞌat. Miꞌi hawyi watikuap yne torania mikuap ok tã maꞌato yt miitꞌin kyꞌe hat i aito pote yt kan hamo i aimikuap koꞌi. Maꞌato imohey hap iwato aikai pote aikotã watoꞌe yityꞌok kape — Moto ro mesu­wepyi watoꞌe hawyi toto hap ewy. Miꞌi tã wato­mohey pote maꞌato yt kat i aikai miitꞌin kyꞌe hap pote yt kat hamo i imohey hap iwato aikawiat."

³ Iꞌewyte hegyiꞌat kahato rakat watoĩ­neꞌen hawyi watum yne ahekat miitꞌin me maꞌato yt wati­ꞌa­tu­kyꞌe i miitꞌin mote yt kat hamo i aimi­mohey iwato hap — Yt pywo i rat iꞌatuꞌe neꞌi ahepe. Miꞌi hawyi watum aipiit yne Iesui ehay moherep hamo maꞌato yt kat i miitꞌin kyꞌe hat aito pote yt kan hamo i — Waku pyno uiwuk watoꞌe aiꞌauka teran haria pe Iesui mohey haria kahato aito pote maꞌato miꞌi pytkai yt wati­kyꞌe i miitꞌin mote yt kat hamo i aiwuk hap Iesui moherep haria wuatꞌi ywania muꞌe haria aito pytkai."

⁴ Pyno wati­kyꞌe sese miitꞌin mote motꞌi wati­kyꞌe hawyi wuatꞌi eꞌat pe wati­kyꞌe. Yt Karãpe i watoiat iꞌatu­kyꞌe hap. Wati­ꞌa­tu­kyꞌe sese miitꞌin mote watoĩ­neꞌen iwese kahato rakano wuatꞌi eꞌat pe. Karãpeĩ aimi­kyꞌe topy­huꞌat poꞌog aikai hawyi yt kat i ahehay­ꞌy­wyꞌi hin i maꞌato watu­wehum katu­pono wati­ky­ꞌesat aimi­kyꞌe mõtypot hap pote. Yt karãpe i — Uito poꞌog ekai watoꞌe aipyꞌa pe wati­ꞌa­tu­kyꞌe sese miitꞌin mote. — Waku uito poꞌog eikai wuatꞌi mimõ­typot no yt watoꞌe i wati­kyꞌe sese miitꞌin mote."

⁵ Wati­ꞌa­tu­kyꞌe sese miitꞌin pote waku iꞌatueko wakuat ewy watoĩ­neꞌen. Yt karãpe i watoĩ­neꞌen yt hegyiꞌat i rakano wati­ꞌa­tu­kyꞌe sese miitꞌin mote. Yt karãpe i watoĩ­neꞌen marakꞌa wo wati­kyꞌe sese miitꞌin mote meremo waure wo watoĩ­neꞌen iꞌatu­minug saꞌag aimaꞌat hap kai."

⁶ Wati­kyꞌe miitꞌin mote karãpe taꞌa­tunug waku ahepe meremo aimo­wepit kahato hawyi — Waku uhyt mana watoꞌe. Karãpe taꞌa­tu­ꞌa­parap hawyi watuwak hap ewy topy­huꞌat aipyꞌa pe wati­ꞌa­tu­kyꞌe sese pote."

⁷ Wati­kyꞌe sese miitꞌin pote wati­ꞌa­pykok kahato aimi­kyꞌe koꞌi yt naku i hap pupi. Aimi­kyꞌe sese wato­mohey potꞌi. Wati­kyꞌe miitꞌin mote — Woro­mohey en mehĩ mana watoꞌe. Atikuap waku pe etunug aru hap watoꞌe. Hepamo kahato aipy­ꞌahak hap iꞌatuete wati­ꞌa­tu­kyꞌe sese pote."

⁸ Wati­ꞌa­tu­kyꞌe sese miitꞌin pote mesup mũki­ꞌite wuatꞌi eꞌat pe wati­ꞌa­tu­kyꞌe poꞌog poꞌog hap ewy. Tupana ihay tuereto aiwẽ pyi tehay wo wati­mo­herep kahato. Maꞌato meiũran Tupana ewywuat raꞌyn watoĩ­neꞌen atipy pe hawyi yt kat hamo i ihay aiwẽ pyi katu­pono aimuꞌe hat no toĩneꞌen atipy pe ihay maꞌato miitꞌin kyꞌe hap Tupana kyꞌe hap topy­huꞌat itote wuatꞌi eꞌat pe. Miꞌi pote mesup te Tupana tum ahepe tesaika hap wuatꞌi pusu kuap hamo. Maꞌato atipy pe torania itotiaria wuatꞌi ywania pusu kuap haria tukup­teꞌen maꞌato Tupana kyꞌe hap miitꞌin kyꞌe hap itote topy­huꞌat wuatꞌi eꞌat pe."

⁹ Pyno koitywy Tupana tum ahepe toweꞌeg hap tehay kuap hamo toꞌe hap moherep hamo. Koitywy toĩneꞌen aikai maꞌato ipatꞌok hit yn watikuap."

¹⁰ Pyno koitywy watikuap ipatꞌok yn maꞌato meiũran wuatꞌi kuap hap tutum ahepe tomikuap ok tã. Koitywy wahepap kurin Tupana sepap nug hamo wen maꞌato atipy pe watunug kuap yne hap ewy."

¹¹ Saꞌa­wyꞌi watoĩ­neꞌen hirakat ewy yne ahehay hirakat ehay ewy iꞌewyte aiwa­nẽtup hap hirakat wanẽtup hap ewy iꞌewyte aheĩneꞌen hap hirakat ewy. Aimikuap yt pywo rakat i hirakat mikuap ewywuat wati­wuare yne raꞌyn. Yt kat hamo i watu­wa­nẽtup poꞌog hirakat wanẽtup hap ewy watoĩ­neꞌen Yne Kuap Hat Tupana Kai hawyi."

¹² Koitywy Tupana watikuap iꞌypyryp we pyi hap ewy Tupana etiat ipatꞌok hap koꞌi yn. Maꞌato meiũran watoĩ­neꞌen i hap tote raꞌyn aiwo­ꞌoewa pe raꞌyn wato­ꞌoe­haꞌat. Miꞌi hap eꞌat pe watikuap sese raꞌyn yt watikuap i te hap koꞌi. Maꞌato mesu­wa­rotiat watikuap Tupana aikotã aipãꞌãu wata­ꞌa­kasa yꞌy pe yt heremo i kahato hap ewy neꞌi. Maꞌato meiũran aru Tupana piat aikuap hap ok tã watikuap Tupana."

¹³ Pyno mesu­wa­rotiat toĩneꞌen myeꞌym nakat yn yt karãpe i ikahuro rakat. Wẽtup aiwo­ꞌo­mohey hap wẽtup — Waku pe aru topy­huꞌat e hap wẽtup aiwo­ꞌo­kyꞌe hap. Myeꞌym miꞌiria wuatꞌi eꞌat piaria waku rakat. Wẽtup poꞌog torania kai miꞌi ti aiwo­ꞌo­kyꞌe sese hap. Pyno waku watoꞌe Tupana pe — Uinug o woꞌo­kyꞌe hano waku watoꞌe. Miꞌi hap Tupana wywuat miitꞌin nywuat aiwo­ꞌo­pot­kyꞌe hap poꞌog hesaika torania kai areꞌe. Uito ekyꞌe kahato hat Pauru.

"

14

¹ Pyno waku wahẽtup torania aipyꞌa pyi — Uinug o Tupana woꞌo­kyꞌe hano waku watoꞌe. Atiky­ꞌesat kahato emisepap nug kuap hap koꞌi maꞌato wẽtup atiky­ꞌesat poꞌog torania kai. Atiky­ꞌesat kahato etum o uhepe esaika hap ehay sese moherep hamo miitꞌin me waku watoꞌe."

² Katu­pono karãpe ahehay Tupana wywo ipusu puo yt uwe i mesu­wa­rotiat aikuap yt miitꞌin pusu ewywuat i pote yt aiwa­nẽtup hap kaipyi i ahehay pote maꞌato Tupana wanẽtup hap ewy ahehay Tupana pusu ewy ahehay pote yt uwe i mesuwe ikuap."

³ Maꞌato karãpe Tupana tum ahepe tesaika hap topusu moherep hamo miitꞌin atunãpin hamo miꞌi hawyi ahehay topy­huꞌat miitꞌin powyro hamo. Aimi­mu­ꞌeria iꞌatu­ꞌarot neꞌi potiat wati­ꞌa­tu­muꞌe Tupana Pãꞌãu kaipyi hawyi Tupana mimo­wepit koꞌi tukup­teꞌen. Taꞌa­tu­mohey aimienoi aimi­mu­ꞌeria hatyꞌu pote miꞌi hawyi iꞌatu­wepit kahato raꞌyn."

⁴ Maꞌato karãpe ahehay Tupana wywo ipusu puo miꞌi hawyi aiwe­po­wyro hap yn topy­huꞌat aiweran ahehay pote. Maꞌato karãpe uwe uwe Tupana wẽ wo timo­herep Iesui hawyi yne Iesui mohey haria itote imimu­ꞌeria powyro hat topy­huꞌat miꞌi."

⁵ Waku yne aito Tupana wywo ahehay Tupana pusu puo maꞌato poꞌog waku wati­mo­herep Tupana e hap ewywuat miitꞌin me miꞌi hap poꞌog waku topy­huꞌat ahehay Tupana pusu puo hap kai. Maꞌato toĩneꞌen wẽtup ok aipy­ꞌa­setpe Tupana pusu moherep hat miitꞌin me pote waku ahehay Tupana kape ipusu puo. Saꞌa­wyꞌi ahehay Tupana kape mekewat ipusu puo miꞌi hawyi waku mekewat wẽtup ok Tupana pusu kuap hat imoherep iraniaꞌin me itotiaria pe kat e hap kat e hap koꞌi watoꞌe hap koꞌi.

"

⁶ Meiũran aru areto ehowawi uheywytꞌin. Miꞌi hawyi atimo­herep ehepe Tupana ehay Tupana yn ikuap koꞌi. Tupana Pãꞌãu kaipyi aru woro­ho­ꞌo­muꞌe woro­ho­ꞌo­nãpin. Eipusu puo yn ahenoi ehepe. Yt kat hamo i Tupana pusu puo woro­ho­ꞌo­muꞌe."

⁷ Eity pusu puo eimikuap ok tã woro­ho­ꞌo­muꞌe. Yt areĩneꞌen neran i wepy hap yt hãpyk takat i ewy. Yt areĩneꞌen neran i akuara pyy hat yt ikuap i hat kahato hat ewy. Yt areĩneꞌen neran i kawakiũ yt pyy hat yt hepap kahato i hat ewy katu­pono miꞌiria teꞌe­ru­wepyy hawyi yt watikuap i kat e tuwepyy hap. Maꞌato hepap hat ipy hawyi meremo ipy hap ete watikuap."

⁸ Surara akag tikaykay temiitꞌin taꞌa­tue­wa­nĩ­kaptia wywuat tuꞌuka hamo huhu e hap wywo. Toiꞌa­tu­kaykay maꞌato huhu e hat yt hepap i hat pote surara koꞌi yt tikuap i — Waku mesup watu­ꞌuka yne ahesaika hap wywo sio yt iꞌatuꞌe neꞌi."

⁹ Miꞌi hap ewy kahato karãpe watu­we­ꞌa­tunug Iesui mõtypot hamo hawyi wẽtup ok ihay yt uwe mikuap i pusu puo wẽtup ywania pusu puo sio atipy piaria pusu puo ihay ikahu wen maꞌato itotiaria yt ikuap hin i kat som toꞌe hap yt taꞌa­tu­pusu puo i pote. Ahehay Tupana tikuap wen maꞌato itotiaria yt hawyi ahehay yt kat hamo i. Yt wẽtup sehay i topy­huꞌat miitꞌin wanẽtup hawe ikuap hap."

¹⁰ Iꞌatu kahato yt aipusu ewywuat i mesuwat yi tote yt aimikuap koꞌi i. Maꞌato mekewat pusu ikuap haria taꞌa­tuwat taꞌa­tu­pusu pote taꞌa­tukuap taꞌyn kat e kat e hap."

¹¹ Maꞌato yt watikuap i yt iꞌywania i aito pote. Miꞌi hawyi karaiwo ewy wato­py­huꞌat yt ipusu kuap haria aito pote."

¹² Pyno waku wahẽtup Tupana pe haty wo — Etum no uhepe esaika hap emisepap ewywuat nug hamuat waku watoꞌe Tupana Pãꞌãu me. Miꞌi ewetunug mote tutum ehepe hawyi waku Tupana misepap ewywuat hap wywo watu­we­potpap kahato. Waku watikat muꞌap aiwy­riaꞌin Iesui mohey haria iꞌatuepiat imohey hap moesaika hamo."

¹³ Karãpe ahehay Tupana kape ipusu puo yt watikuap i kat som watoꞌe hap miꞌi pote waku wahẽtup Tupana pe — Etimo­herep uhepe uiꞌe hap Uhyt Mimi waku watoꞌe Tupana pe."

¹⁴ Karãpe ahehay Tupana wywo ipusu puo yt aiwa­nẽtup hap kaipyi i ahehay maꞌato aipyꞌa pyi ahehay tuwẽtem Tupana pãꞌãu ihay hap ewy. Aipyꞌa ihay haty wo sese Tupana wywo pote ahehay pywo pe."

¹⁵ Pyno aikotã waku watunug ahenoi epe. Waku ahehay Tupana kape aipyꞌa pyi Tupana pusu puo waku maꞌato poꞌog waku ahehay Tupana kape aiwa­nẽtup hawyi aipusu puo. Iꞌewyte waku watu­wepy Tupana kape Tupana pusu puo maꞌato poꞌog waku watu­wepy Tupana kape aiwa­nẽtup hawyi aipusu puo."

¹⁶ Pyno watu­wehum Tupana kape Tupana pusu puo yt ikuap i haria pyꞌa­setpe pote — Pywuat ehay mana mehĩ yt iꞌatuꞌe kuap i. Ahehay Tupana kapiat ipusu puo turan teke taꞌa­tu­ꞌe­waure kaꞌa pe wen maꞌato kat som watoꞌe yt taꞌatukuap i. Miꞌi hawyi yt teꞌe­ru­wehum kuap i yt taꞌa­tu­ꞌe­waku kuap i yt taꞌa­tukuap i aimiẽtup koꞌi pote. Yt taꞌa­tukuap i aiwehum Tupana kapiat hap yt taꞌa­tu­pusu puat i pote."

¹⁷ Tupana kapiat aiwehum hap ikahu sese pytkai watunug ipusu puo pote iraniaꞌin itotiaria yt kat hin i ikuap hap. Miꞌi hawyi yt kat hamo i ahehay se Tupana kape miꞌiria pyꞌa­setpe. Yt iꞌatu­po­wyro hap hin i ahehay iro pote."

¹⁸ Uito Pauru arehum kahato Tupana kape katu­pono tutum uhepe tesaika hap topusu kuap hamuat. Miꞌi hap ete atikuap poꞌog eipe torania kai katu­pono uito uhehay kuap Tupana pusu puo e."

¹⁹ Maꞌato karãpe watu­we­ꞌa­tunug Tupana mõtypot hamo turan yt uhehay teran hin i mekewat atipy piat pusu puo neꞌi waꞌa­tunug haria pyꞌa­setpe. Maꞌato aimikuap pusu puo yn uhehay teran. Poꞌog waku wati­ꞌa­tu­muꞌe kurin kurin iraniaꞌin iꞌatu­mikuap sehay puo 5 sehay yn hap ewy sio ahehay at kaꞌap wẽtup 1000 sehay ewy yt uwe mikuap i pusu puo.

"

²⁰ Pyno waku watoĩ­neꞌen hira­karia ewy aikotã hira­karia yt taꞌa­tukuap hin i saꞌag nug hap. Miꞌi hap ewy waku wato­py­huꞌat uheinytꞌin uheywytꞌin. Maꞌato yt naku i watu­wa­nẽtup hirakat ewy katu­pono yt teꞌe­ru­wa­nẽtup kuap kahato i te wakuat sehay enoi hap kape hap ewy neꞌi."

²¹ Mio tã e Tupana saꞌa­wyꞌi miwan me — Iuteuria e meiũran woro­ho­ꞌo­muꞌe eipe wẽtup ywania wẽ pyi yt eipusu kuap i haria wẽ pyi woro­ho­ꞌo­muꞌe maꞌato miꞌi turan iꞌewyte uhehay pun haria eweikup­teꞌen. Eiwe­waure hik neꞌi aru eimuꞌe wẽtup ywania wẽ pywiat turan. Yt taꞌa­tukuap i eipusu pytkai uhesaika hap wywo taꞌa­tu­suꞌat eipusu pote e. Maꞌato miꞌiria mienoi yt eweimohey i aru e Tupana saꞌa­wyꞌi miwan me."

²² Miꞌi hap ewy topy­huꞌat mesup katu­pono Tupana tum tesaika hap ahepe yt imohey i haria muꞌe hamo. Yt watikuap i iꞌatu­pusu pytkai iꞌatu­pusu puo Tupana ihay kahato aiwẽ pyi hawyi teꞌe­ru­wa­nẽtup kahato Tupana e hap aiwẽ pywiat hap kape hawyi teꞌe­roꞌe — Tupana waku kahato iꞌatuꞌe katu­pono ihay ahepe wẽtup ywania wẽ pyi iꞌatuꞌe."

²³ Maꞌato karãpe aito Iesui mohey haria watu­we­ꞌa­tunug waku ahehay yne aimikuap pusu puo yn. Yt naku i ahehay itote Tupana kape atipy piaria pusu puo. Maꞌato miꞌi tã watunug itote pote miꞌi hawyi putꞌokꞌe itote wẽtup ok yt Iesui mohey i hat i te yt aheko kuap i te hat miꞌi hawyi — Are pãi are an iꞌatuꞌe taꞌi mesu­wa­rotiat hesoꞌok takaria iꞌatuꞌe neꞌi taꞌa­tu­wa­nẽtup hawe katu­pono yt taꞌa­tu­mikuap wuo i ahehay Tupana kapiat pote atipy piaria pusu puo pote."

²⁴ Maꞌato Tupana ehay wati­mo­herep itote aiꞌy­wania pusu puo miꞌi pote — Pywo iꞌatuꞌe yt Iesui mohey i te haria. Yt aiwa­nẽtup hap ewy i te hat pytkai — Pywo iꞌatuꞌe Tupana e hap aiwẽ pywiat kape. Miꞌi hawyi — Pyno eweikuap kahato urupusu pote mesup uruikuap taꞌyn iesui moherep hap eiwẽ pywiat pote uruimohey miꞌi iꞌatuꞌe aru. Pywo ti rat uito areĩneꞌen yt naku i nug hat iꞌatuꞌe. Mio atikuap taꞌyn Tupana uiꞌa­piheg ten uiminug yt naku i hap ete iꞌatuꞌe aru."

²⁵ Miꞌi hawyi tuwa­nẽtup koꞌi koꞌi yt naku i yt uwe mikuap koꞌi i migꞌi wuat Tupana timo­herep tope toikuap Tupana ehay topusu puo hawyi. Miꞌi hawyi meremo tuwe­pỹ­ꞌã­tutuk Tupana sese ewawi hawyi toꞌe — Tupana pywo kahato ti ereĩneꞌen mesuwe emohey haria pyꞌa­setpe iꞌatuꞌe aru Tupana pe taꞌa­tu­pusu puo ahehay hawyi.

"

²⁶ Uiwy­riaꞌin uheinytꞌin koitywy woro­ho­ꞌo­muꞌe teran aikotã aikotã waku wati­mõ­typot Tupana aiwo­ꞌo­ꞌa­tunug hap ete. Waku ikahu kahato wati­mõ­typot Tupana. Waku pe yn waku ahehay itote. Waku watikat Tupana mohey hat wẽtup ok aimuꞌe kahato hat itotiat Tupana mõtypot wepy hap ete. Miꞌi hawyi waku wẽtup ok aimuꞌe itote Tupana ehay miwan myi. Miꞌi hawyi wẽtup ok itote ihay kahato Tupana wẽ ewy Tupana ainãpin hap sese moherep hamo Tupana toꞌe hap ewy. Miꞌi hawyi waku wẽtup ok aimuꞌe Tupana pusu puo sio toĩneꞌen itote wẽtup ok atipy piaria pusu kuap hat imoherep ahepe aipusu puo kat e kat e hap koꞌi ete. Miꞌi pote aimoe­saika kahato Tupana mohey hap ete Tupana pusu puat. Atipy piaria pusu puo ihay rakat waku wẽtup ok yn hawyi waku wẽtup ok imoherep hat ihay iwywo kat toꞌe kat toꞌe e hap wuatꞌi pusu puo."

²⁷ Maꞌato miꞌi hawyi miꞌiria aimuꞌe turan waku wẽtup ok aimuꞌe aipusu puo kat som toꞌe kat som toꞌe hap ete."

²⁸ Maꞌato yt uwe i itote Tupana pusu moherep aipusu puat hat yt uwe i imoherep aipusu puat pote — Mehĩ Mana waku aipusu puo aimuꞌe mesup katu­pono atipy piaria pusu moherep haria yt uwe i mesuwe waku watoꞌe itote. Maꞌato waku ahehay Tupana pusu puo aiwa­nẽtup hawe ahehay Tupana kape. Waku wẽtup ok ihay Tupana pusu puo miꞌi hawyi wẽtup ok henoi ahepe kat toꞌe hap koꞌi. Miꞌi hawyi wẽtup ok ihay hawyi wẽtup ok i tuereto."

²⁹ Waku wahenoi iraniaꞌin me kat som kat som Tupana Pãꞌãu toꞌe aiwa­nẽtup hawe aiwe­ꞌa­tunug hawe. Waku wẽtup ok i ihay miꞌi hawyi wẽtup ok i ihay. Miꞌi hawyi taꞌa­tu­mo­herep Tupana ehay torania. Miꞌi pote waku ahewaure kaꞌa kahato Tupana ehay iꞌatu­mienoi kape. Waku watoꞌe aiwa­nẽtup hawe Tupana ehay sio yt waku watoꞌe aiwa­nẽtup hawe."

³⁰ Karãpe Tupana ihay aiwẽ pyi tomi­mu­ꞌeria pe miꞌi hawyi waku wẽtup ok ipoĩꞌãm Tupana Pãꞌãu e hap moherep hamo. Waku mehĩ watoꞌe. Miꞌi hawyi wati­monik porapꞌi wẽtup ok ihay turan."

³¹ Waku yne aito Iesui mohey haria Tupana ehay moherep haria wo e. Yt naku i Tupana ehay wahenoi aiwo­ꞌoetu etu neꞌi. Waku wẽtup ok ti ihay miꞌi hawyi waku wẽtup ok i ihay tuereto. Miꞌi tã watunug mote weꞌa­tunug haria tikuap hãpyk Tupana ehay aiminug koꞌi. Miꞌi hawyi teꞌe­roꞌe — Pywo ti rat pãi iꞌatuꞌe hap ewy. Miꞌi hawyi iꞌatu­ꞌarot hap yt kat i iꞌatu­wa­nẽtup hawe."

³² Miꞌi hawyi toꞌe­roꞌe — Tupana Pãꞌãu kaipyi urumuꞌe pote urumo­wẽꞌẽg Tupana ehay wo. Uiwy­riaꞌin Karãpe Tupana ihay aiwẽ pyi miꞌi hawyi yt ahiag ewy i ihay. Waku pe aiwa­nẽtup hap toĩneꞌen yt ahesoꞌok hap ewy hin i maꞌato ahehay aiwanuat ewy toĩneꞌen aiwa­nẽtup hawe. Taꞌi watikuap Tupana toꞌe hap Iesui mõtypot hap hawyi wati­mo­herep miitꞌin me."

³³ Maꞌato Tupana Pãꞌãu toĩneꞌen aipy­ꞌa­setpe hawyi Tupana mõtypot hap hãpyk kahato watunug. Miꞌi hawyi woꞌo­wese haria wo raꞌyn Tupana Pãꞌãu ainug."

³⁴ Karãpe watu­we­ꞌa­tunug Tupana mõtypot hamo yt naku i ahehay aiwo­ꞌope woꞌope aimuꞌe hat ainuꞌe turan. Waku watu­wa­nẽtup aimuꞌe hat ehay kape yn wẽtup wanẽtup hap yne aito hap ewy waku are. Aheha­ryꞌi yt ikuap i pote waku tohẽtup ahepe taꞌaipok toꞌyat kapiat hawyi."

³⁵ Yt naku i apoꞌe woꞌo­muꞌe hawe. Katu­pono waku Iuteuria eko ewy waku watunug itote. Miꞌi tã Iuteuria ywania — Yt naku i hary­poria aiꞌa­pykok hat aiꞌakag wo iꞌatuꞌe. Miꞌi hawyi waku yne Iesui mohey haria teꞌe­ro­py­huꞌat mesuwat seko upi.

"

³⁶ Pyno yt eikaipyi tuut Tupana ehay miwan miat maꞌatu Iuteu ywania kaipyi yne Tupana ehay miwan miat tuut e. Katu­pono saꞌa­wyꞌi eiperia tawa Kurintiu piaria yt kat i Tupana ehay eikai. Miꞌi turan putꞌokꞌe Tupana ehay ehete uiwẽ kaipywiat. Miꞌi tupono yt eiwe­kaipyi i eweikuap Tupana ehay. Iꞌewyte yt ehepe yn i putꞌokꞌe Tupana ehay uiwẽ kaipywiat. Katu­pono tukup­teꞌen kahato iraniaꞌin ywania Tupana ehay kuap haria maꞌato yt eimienoi hap kaipyi i pãi taꞌa­tukuap are. Yt naku i pyno eweiꞌe — Tupana ehay moherep haria kahato uruto. Yt naku i eweiꞌe uruto poꞌog Tupana ehay kuap haria iraniaꞌin kai yt naku i mio tã eweiꞌe."

³⁷ — Pyno uito ti Tupana ehay moherep haria koro koꞌi eweiꞌe saꞌag. Taꞌi Tupana tum naꞌyn uruepe tesaika hap tomi­sepap nug hamuat eweiꞌe. Poꞌog waku eweiꞌe eiwo­ꞌope — Aimuꞌe hat sese Pauru mimu­ꞌeria aito waku eweiꞌe."

³⁸ Maꞌato toĩneꞌen wẽtup ok eipy­ꞌa­setpe — Taꞌi Pauru yt imoherep kuap i Tupana ehay e hat. Mio tã e hat pote yt eweiwesat teiꞌo. Mio tã toꞌe hawyi yt ewetum neiꞌo ehewaure kaꞌa howawi."

³⁹ Uiwy­riaꞌin waku wahẽtup yne aipyꞌa pyi — Tupana uinug o ewẽ wo ehay moherep miitꞌin miat hamo watoꞌe. Iꞌewyte waku watoꞌe Tupana pusu puat ihay teran nakat pe — Waku mana waku uhyt watoꞌe. Yt etipyhyp teiꞌo miꞌiria."

⁴⁰ Miꞌi hawyi karãpe wati­ꞌa­tunug watu­wa­ꞌa­tunug Tupana mõtypot hamo hawyi waku hãpyk puo watunug. Wati­mõ­typot waku pe kahato imõtypot yat pe are uito Pauru

"

15

¹ Uiwy­riaꞌin tawa Kurintiu piaria pyno mesup uito Pauru ahenoi teran poꞌog mekewat saꞌa­wy­ꞌiwuat uimienoi hãpyk takat sehay etiat. Saꞌa­wyꞌi uiꞌe hap eweimohey haty wo hap ahenoi iraꞌyn teran ehepe. Uiꞌe hap saꞌa­wy­ꞌiwuat ewy yt atiky­ꞌesat i eweiwaure katu­pono miꞌi wato­mohey motꞌi hawyi Iesui mohey haria sese wato­py­huꞌat."

² Pyno mio tã are woro­ho­ꞌo­muꞌe saꞌa­wy­ꞌiwuat sehay wakuat sese ahenoi. Miꞌi eweimohey motꞌi pote Tupana mieha­kye­raꞌat koꞌi eweikup­teꞌen maꞌato wato­mohey ran neꞌi pote yt e."

³ Yt uiwe­kaipyi i saꞌa­wyꞌi woro­ho­ꞌo­muꞌe maꞌato Tupana tum tesaika hap uhepe tehay wakuat moherep miitꞌin miat hamo pote sehay wakuat poꞌog torania kai atimo­herep ehepe Aipo­typot Iesui ikuꞌuro ariaꞌyp posak ete aiꞌa­piheg hap Tupana piat aiminug saꞌag koꞌi etiat. Aimõti hap koꞌi moma hamo ikuꞌuro itote aika­wiano aikotã Tupana toꞌe saꞌa­wyꞌi hap ewy aikotã miwan me toꞌe hap ewy ikuꞌuro raꞌyn."

⁴ Miꞌi hawyi taꞌa­tusyp ipiit miꞌi hawyi itote myeꞌym eꞌat tosyp hawe ikuꞌuro sese hawyi myeꞌym eꞌat hawyi Tupana tomoieĩ­neꞌen i raꞌyn guꞌuro pyi Tosa­ꞌyru aikotã Tupana toꞌe saꞌa­wyꞌi hap ewy aikotã Isaia tiwan 53 piat toꞌe hap ewy."

⁵ Tuwe­mo­herep guꞌuro pyi hawyi tuwe­mo­herep saꞌa­wyꞌi temiit Peteru kape. Miꞌi hawyi tuwe­mo­herep temiitꞌin 12 ok takaria kape topot­mu­ꞌeria sese kape."

⁶ Miꞌi hawyi meiũran Iesui tuwe­mo­herep i raꞌyn miitꞌin sem kape temiitꞌin 500 ok takaria kape saꞌa­wyꞌi hewyry iwywuat rakaria kape. Miꞌiria teꞌe­ra­ꞌa­kasa kahato taꞌa­tukuap ihay. Koitywy ti miꞌiria tukup­teꞌen ne aimuꞌe haria wẽtup ok wẽtup ok maꞌato ikuꞌuro raꞌyn irainaꞌin."

⁷ Miꞌi hawyi ipotmuꞌe Tiaku taꞌa­kasa hawyi yne ipotmu­ꞌeria teꞌe­ra­ꞌa­kasa pakup i iraꞌyn 11 ok takaria."

⁸ Meiũran aru tuwe­mo­herep uhowawi. Uito Pauru araꞌa­kasa i raꞌyn Iesui uheha wo. Uito aikotã aimẽpyt yt tuwe­mo­herep i te rakat ewy areĩneꞌen katu­pono araꞌa­kasa uito iraniaꞌin Iesui potpo­ꞌo­roria iꞌatue­wat­ꞌymo maꞌato ipotpo­ꞌoro sese uito are. Hirakat no areĩneꞌen Iesui toĩneꞌen aipy­ꞌa­setpe turan mote."

⁹ Maꞌato uhewaku hap yt putꞌokꞌe hin i iraniaꞌin Iesui potmu­ꞌeria kai katu­pono saꞌa­wyꞌi Iesui mohey haria ti atiꞌa­tu­sa­tyꞌi satyꞌi kaꞌato. Saꞌawyꞌi atiꞌa­tu­moma kahato miꞌiria. Saꞌawyꞌi atiꞌa­tu­ꞌuka miꞌiria maꞌato miꞌi pytkai Tupana uikyꞌe. Yt uhewaku hap upi hin i uiꞌairo topot­po­ꞌoro wo. Saꞌa­wyꞌi hewa­nĩkap nuat areĩneꞌen pytkai uiꞌairo topot­po­ꞌoro wo are."

¹⁰ Hegyiꞌat kahato Tupana uhepe atikuap koitywy. Atikuap iwese hap hawyi yt atipun hin i uikyꞌe hap. Arepotpap poꞌog ipotpo­ꞌo­roria iraniaꞌin kai aikotã uikyꞌe hap ok tã arepotpap uikyꞌe hap moherep hamo."

¹¹ Miꞌi hawyi uruimo­herep ehepe Tupana ehay Iesui etiat sio uito sio 12 ok takaria Tupana ehay yn Iesui etiat. Taꞌi wẽtup sehay yn uruwẽ pyi tuwẽtem katu­pono uruto wẽtup sehay moherep haria yn uruimo­herep wote. Miꞌi tupono Iesui mohey haria sok eipe mesup urupo­ꞌoro hat mohey haria eipe pote."

¹² Urumi­mo­herep saꞌa­wy­ꞌiwuat ehepiat wẽtup sehay yn aikotã Aipo­typot Iesui tuwẽtem guꞌuro pywiat hap yn. Miꞌi hawyi eweimohey Miꞌi raꞌyn. Maꞌato mesup toĩneꞌen eipy­ꞌa­setpe — Aiku­ꞌuro rokirẽ yt kat i aito. Yt karãpe i watoĩ­neꞌen i e haria."

¹³ Maꞌato yt kat i miitꞌin ieĩneꞌen hap toku­ꞌuro hawyi miꞌi pote yt toĩneꞌen i toku­ꞌuro hawyi Aika­ꞌiwat Iesui katu­pono Aika­ꞌiwat aipuꞌi kawiat sese toĩneꞌen MIIT SESE kawiat toineꞌen Iesui piit. Ikuꞌuro hawyi toĩneꞌen i raꞌyn guꞌuro pyi."

¹⁴ Aika­ꞌiwat yt tuwẽtem i guꞌuro pyi pote yt kat hamo i wati­muꞌe miitꞌin Iesui ete hawyi yt kat hamo i etimohey Iesui sio ikuꞌuro te guꞌuro pe te toĩneꞌen mote."

¹⁵ Haꞌa­wyte uruiꞌa­tu­muꞌe eipe iꞌewyte mesup te Aika­ꞌiwat Iesui tuwẽtem guꞌuro pyi urutoꞌe. Maꞌato mio tã yt watoꞌe i pote heso rakaria watoĩ­neꞌen — Heso rakat e Tupana iro pote ahepe."

¹⁶ Tupana yt aihep i guꞌuro pyi aiku­ꞌuro hawyi pote yt toihep i saꞌa­wyꞌi Aika­ꞌiwat Iesui guꞌuro pyi wy. Aika­ꞌiwat yt ihaĩte i te pote heso hap wato­mohey hawyi yt kan hamo i wahe­katu aheĩneꞌen hap wuatꞌi eꞌat piat are. Maꞌato tuwẽtem guꞌuro hawyi hap watikuap taꞌyn iꞌewyte aheĩneꞌen aiku­ꞌuro hawyi hap watikuap."

¹⁷ Uiwy­riaꞌin taꞌi Tupana yt timoieĩ­neꞌen i Aika­ꞌiwat guꞌuro pyi pote te neke ikuꞌuro te mio topy­huꞌat. Miꞌi hawyi Iesui toĩneꞌen pakup i hap mohey hamo yt kat i. Yt kat hamo i imohey hap. Aimo­ꞌa­kagꞌaia hap yn topy­huꞌat. Miꞌi hawyi wato­py­huꞌat hoꞌo­wasat rakaria ewywuat. Miꞌi hawyi yne aiminug saꞌag topy­huꞌat ahete te iꞌewyte aiꞌa­piheg hap aru topy­huꞌat ahete Iesui ikuꞌuro te pote."

¹⁸ Iꞌewyte yne aiwy­riaꞌin ikuꞌuro rakaria wo tukup­teꞌen ne nimuaria Iesui mohey haria. Yt kat i aheĩneꞌen i hap aiku­ꞌuro hawyi pote yne aitoria hoꞌo­wasat rakaria watu­kup­teꞌen wuatꞌi eꞌat pe iꞌewyte aiwy­riaꞌin ikuꞌuro rakaria iꞌatu­wo­ꞌosyp hawe te tukup­teꞌen ne. Miꞌiria yt karãpe i tuwẽtem woꞌosyp hap popyi yt kat i aheĩneꞌen i hap wote."

¹⁹ Uiwy­riaꞌin yt watoĩ­neꞌen i aiku­ꞌuro hawyi miꞌi pote mesu­wa­rote yn watu­kup­teꞌen. Aiku­ꞌuro hawyi yt kat i topy­huꞌat aiwywo Iesui. Ikuꞌuro te pote heso rakaria watoĩ­neꞌen katu­pono watoꞌe miitꞌin me — Iesui toĩneꞌen ne watoꞌe."

²⁰ Pywo ti rat Aika­ꞌiwat yt nem rakano no hin i toĩneꞌen. Mio yt ikuꞌuro i koran katu­pono Tupana timoieĩ­neꞌen pakup i raꞌyn Aika­ꞌiwat. Toihep Tosa­ꞌyru guꞌuro pyi aimuꞌe hamo — Aikotã atihep Uhaꞌyru miꞌi hap ewy woro­ho­ꞌohep eipe guꞌuro pyi e hamo toihep Tosa­ꞌyru."

²¹ Saꞌa­wyꞌi sese wuatꞌi miitꞌin ahaꞌa­seꞌi Ãtãu kaipyi taꞌa­tu­ꞌa­parap Tupana pe miꞌi pote ikuꞌuro rakaria tukup­teꞌen. Miꞌi hawyi yne aito Ãtãu ewy aiku­ꞌuro hap toĩneꞌen ahaꞌa­seꞌi ewywuat topy­huꞌat iꞌaparap haria aito pote. Miꞌi pote ikuꞌuro rakaria yne aito. Miꞌi hawyi wẽtup MIIT tuwe­mo­herep. Miꞌi MIIT Iesui. Miꞌi yt iꞌaparap hin i Tupana pe. Miꞌi Tupana tihep guꞌuro pyi. Miꞌi hawyi koitywy imẽpytꞌin koꞌi wo aito iꞌewyte watu­wẽtem guꞌuro pyi imohey haria aito pote."

²² Yne miitꞌin teꞌe­ro­py­huꞌat taꞌa­tue­ꞌa­seꞌi Ãtãu ewywuat toꞌo­ꞌe­wy­ꞌewy yt naku i nug haria sok. Miꞌi pote ti yne aito ikuꞌuro rakaria. Miꞌiria Ãtãu saipe­piaria toꞌo­ꞌe­wy­ꞌewy. Karãpe wato­mohey Aika­ꞌiwat Iesui hawyi Miꞌi MIIT ewywuat wato­py­huꞌat. Miꞌi hawyi wẽtup miit ewy aito aikotã Tupana tihep Aika­ꞌiwat Iesui guꞌuro pyi hap ewy iꞌewyte aihep aru aimoieĩ­neꞌen aru Tupana."

²³ Nimo te ti Aika­ꞌiwat Iesui tuwẽtem guꞌuro pyi wuatꞌi miitꞌin eꞌyianmete. Meiũran aito imohey haria hewat­ꞌymo watu­wẽtem iwywo e. Karãpe Iesui tuut turan watoĩ­neꞌen hewat­ꞌymo."

²⁴ Miꞌi hawyi ikahuro hap putꞌokꞌe raꞌyn mekewat eꞌat pe Aika­ꞌiwat tum aru torania temiitꞌin Toꞌywot Tupana pe. Mekewat eꞌat pe topy­huꞌat wuatꞌi Porekuat no Iesui more­kuaria porekuat no topy­huꞌat. Miitꞌin akag akag wo topy­huꞌat. Imohey haria akag Akag wo topy­huꞌat. Miꞌi hawyi Iesui tum yne torania Toꞌywot pe miꞌiria."

²⁵ Koitywy Aika­ꞌiwat Iesui topy­huꞌat Wuatꞌi Porekuat no raꞌyn maꞌato miꞌi pytkai iꞌatu kahato miitꞌin — Yt atiky­ꞌesat i Iesui Uipo­rekuat no e haria. Miꞌiria ti iꞌatu­py­ꞌahak Iesui ete. Nimo more­kuaria tiꞌa­tu­ꞌakit taꞌa­tupy wo taꞌa­tue­wa­nĩ­kaptia akag okpe tote wuatꞌi ehamo. Miꞌi hawyi iꞌatu­mi­mohit wo teꞌe­ro­py­huꞌat. Miꞌi hap ewy ti aru Aipo­typot Iesui tiꞌa­tu­ꞌakit neꞌi — Yt uruiky­ꞌesat i En Urupo­rekuat no e haria aru mekewat eꞌat pe."

²⁶ Toiꞌa­tu­moma yne tewa­nĩ­kaptia hawyi hemiitꞌin yn topy­huꞌat. Miꞌi hawyi toimoma iꞌewyte aiku­ꞌuro hap. Guꞌuro toimo­weityk yne raꞌyn hawyi yt kat i raꞌyn are.

"

²⁷ Nimo Tupana toꞌe — Areĩneꞌen aru yne Porekuat no e. Areĩneꞌen aru torania saꞌag akit hano e saꞌa­wyꞌi Tupana miwan me mekewat morekuat Tawi wepy hawe miwan 8.6 piat pe. Yt tuwete i ihay morekuat Tawi maꞌato Tupana Saꞌyru ewanĩ­kaptia ete ihay. Miꞌi hap ewy Tupana tunug mesup katu­pono tutunug naꞌyn Tosa­ꞌyru Wuatꞌi Porekuat no."

²⁸ Meiũran aru wuatꞌi wanĩ­kaptia okpe tote topy­huꞌat. Miꞌi hawyi wuatꞌi Porekuat no topy­huꞌat hawyi yne toĩneꞌen yi kai. Miꞌi hawyi tuwe­pỹ­ꞌã­tutuk Toꞌywot kape — Uiꞌywot e aru En yn waku uruꞌakag wo e. Koitywy atum torania uhemiit epe e Iesui Tupana pe. Miꞌi hawyi Tupana topy­huꞌat wuatꞌi akag wo i raꞌyn.

"

²⁹ Uiwy­riaꞌin tawa Kurintiu piaria kat pote eweiꞌe — Yt kat i aiku­ꞌuro hawyi aheĩneꞌen pakup i hap eweiꞌe. Yt eiweꞌeg hin i mio tã eiꞌe pote katu­pono toĩneꞌen wẽtup eheko itote — Karãpe wẽtup ok miꞌasyp miit toĩneꞌen maꞌato yt taꞌa­tu­setꞌok i te waku wahetꞌok wẽtup ok ikuꞌuro rakat kawiano ewiꞌe saꞌag maꞌato — Yt kat i aheĩneꞌen i hap eweiꞌe pote kat hamo ten etiꞌa­tu­setꞌok miitꞌin ikuꞌuro rakaria eheko ewy areꞌe."

³⁰ Yt kat i aheĩneꞌen hap aiku­ꞌuro hawyi pote kat hamo ten woho­ꞌopot at kaꞌap miitꞌin muꞌe Iesui etiat hamo apoꞌare."

³¹ Yt karãpe i aiku­ꞌuro hawyi watoĩ­neꞌen mote yt kat hamo i uito atiꞌa­tu­muꞌe at kaꞌap wanĩ­kaptia uiꞌauka teran haria. Uiwy­riaꞌin pywo ti woro­ho­ꞌo­kyꞌe eipe uimo­wepit haria eipe. Mesuwe uimohan haria tukup­teꞌen. Yt taꞌa­tu­ky­ꞌesat i uhehay Iesui etiat hap wote uiꞌauka teran. Maꞌato miꞌi hap ahenoi teran ehepe katu­pono aito wẽtup miit ewy Iesui mohey haria aito pote woro­ho­ꞌo­kyꞌe haype."

³² Meiũpiaria tawa Ewesu piaria haiwot rakaria teꞌe­ro­py­huꞌat uhete. Taꞌi aikotã awyato koꞌi ewy haiwot rakaria uimienoi hap ete. Maꞌato miꞌi pytkai atiꞌa­tu­muꞌe te — Aiku­ꞌuro hawyi watoĩ­neꞌen i e hap ete. Maꞌato atiꞌa­tu­muꞌe te miꞌi hap ete wãiꞌi­ꞌa­tuꞌe pytkai. Uiꞌauka pote uiꞌauka are maꞌato woro­ho­ꞌo­muꞌe te pywo uiꞌe hap pote. Maꞌato yt kat i aheĩneꞌen pakup i hap toĩneꞌen mote kan homo ten uhoꞌopot mesup meiũpe tawa Ewesu pe areꞌe. Yt uiweꞌeg hin i eiꞌe hap pywo pote.

Tawa Kuritiu piaria woro­ho­ꞌo­muꞌe kahato pytkai yt uimohey hin i. — Yt kan hamo i woro­ho­ꞌo­muꞌe kuap katu­pono yt eiweꞌeg hin i eiperia. — Yt watoĩ­neꞌen i aiku­ꞌuro hawei eweiꞌe yt pywo pe i eiwo­ꞌope itote. Kat pote tig mio tã eweiꞌe saꞌag are. Yt pywo pe i watoĩ­neꞌen aiku­ꞌuro hawyi yt kat i aheĩneꞌen hap toĩneꞌen aru pote poꞌog waku ienuk hap yn watunug at kaꞌap mahy ete at kaꞌap hawyi waku aisyp hawyi toran naꞌyn aheĩneꞌen hap."

³³ — Aipap wuatꞌi eꞌat aiku­ꞌuro hawyi iꞌatuꞌe iraniaꞌin eimuꞌe haria. Yt naku i iꞌatuꞌe ehepe eimuꞌe haria eimaꞌat sehay wo katu­pono taꞌa­tu­ky­ꞌesat yt naku i nug haria eiperia eiĩaꞌãg teran haype miꞌiria. Taꞌa­tu­ky­ꞌesat eipe iꞌatu­ꞌe­wy­wuaria hap. Eiweꞌeg wo o miꞌiria pupi. Iꞌatuehay upi eweipy­huꞌat hawyi iꞌatu­mi­maꞌat koꞌi eweikup­teꞌen aru."

³⁴ Aikotã watoĩ­neꞌen pya hesoꞌok takaria pupi hap ewy waku watoĩ­neꞌen miꞌiria pupi. Eweiꞌaipok to eiwe­mo­weꞌeg hamo. Ewetoiat ro saꞌag nug hap koꞌi katu­pono iꞌatu kahato aria kapiat wat hanuaria tawa Kurintiu piaria katu­pono yt karãpe i eweiꞌa­tu­muꞌe miꞌiria Aipo­typot Iesui ete. Waku eiwe­mõti aria kapiat ehehay pyi tuwat hap pupi."

³⁵ Maꞌato eweiꞌe — Aikotã aru ikuꞌuro rakaria tuwẽtem guꞌuro pyi. Aikotã aru iꞌatupiit pakup eweiꞌe."

³⁶ Mio tã eweiꞌe pote yt ikuap sese i hat ewy eweikup­teꞌen. Yt eweikuap i te karãpe watikoi awati aiko pe meiũran aru aimikoi iãꞌỹi tuweityk katu­pono hẽtyt raꞌyn yi pyi pote."

³⁷ Kat iãꞌỹi watikoi sio awati sio wẽtup miꞌi ti yt ipiit i te maꞌato hẽtyt hawyi ipiit itag naꞌyn. Miꞌi ti ipiit sese."

³⁸ Miꞌi hap ewy raꞌyn Tupana tum naꞌyn yne iãꞌỹi pe tesaika hap hẽtyt hamo itag hamo. Yne wati­waure meremo aikopiat iãꞌỹi tuweupi weupi."

³⁹ Miꞌi hap ewy aipiit yt miat piit ewy hin i yt weita piit ewy hin i yt pira piit ewy hin i. Miꞌiria ipuꞌi kawiat maꞌato yt aipiit ewy hin i."

⁴⁰ Miꞌi hap ewy ti atipy piaria tukup­teꞌen. Taꞌi miꞌiria yt mesu­wa­ro­tiaria koꞌi yt ewy hin i raꞌyn. Taꞌi atipy piaria wyti ikahu kahato iꞌewyte mesu­wa­ro­tiaria ikahu wy maꞌato ti yt toꞌo­ꞌe­wy­ꞌewy hin i."

⁴¹ At iꞌewyte ikahu. Waty miꞌi iꞌewyte ikahu maꞌato ikahu hap yt at kahu hap ewy hin i. Waikiru koꞌi iꞌewyte ikahu wen maꞌato yt at waty ewy i ikahu hap ewy hin i. Maꞌato yne miꞌiria ikahu kahato Tupana minug koꞌi pote."

⁴² Miꞌi hap ewy ti guꞌuro pywiat aheĩneꞌen pakup i hap. Aipiit wyti aikotã hãꞌỹi ewy. Taꞌa­tusyp miꞌi hawyi ti tuweityk taꞌyn aimikoi awati iãꞌỹi ewy maꞌato hẽtyt hap tuwẽtem hawyi yt saꞌa­wy­ꞌiwuat hãꞌỹi ewy i. Miꞌi hap ewy aipiit wẽtup taꞌa­tusyp hawyi aipiit aimikoi ikahu kahato tuwẽtem guꞌuro pyi. Tupana tum ne wuatꞌi eꞌat piat ieĩneꞌen hap aipiit pakup we e."

⁴³ Taꞌi aipiit aisyp turan yt ikahu hin i. Yt kat i ahesaika hap aiku­ꞌuro hawyi. Maꞌato karãpe aheĩneꞌen hap ipakup i hawyi aipiit ikahu sese raꞌyn topy­huꞌat hesaika sese toĩneꞌen."

⁴⁴ Aisyp hap eꞌat pe turan aipiit ipuꞌi yn toĩneꞌen maꞌato Tupana aimoieĩ­neꞌen i hap eꞌat pe hawyi aipiit pakup toĩneꞌen Ipãꞌãu minug. Miꞌi ewywuat topy­huꞌat toĩneꞌen aipiit ipuꞌi ikag kawiat maꞌato toĩneꞌen iꞌewyte mekewat piit atipy piaria ewywuat yt aiwat ewy i Tupana Pãꞌãu minug."

⁴⁵ Katu­pono saꞌa­wyꞌi Tupana tunug Ãtãu miit ihaĩte kahato rakat e ti miwan me. Maꞌato iꞌewyte toꞌe miwan me — Putꞌokꞌe aru Ãtãu Saipepiat e Iesui piat. Miꞌi Miit poꞌog naꞌyn katu­pono aikotã Tupana toĩneꞌen hap ewy aimoieĩ­neꞌen hap toĩneꞌen."

⁴⁶ Saꞌa­wyꞌi aipiit ipuꞌi kawiat ikag kawiat toĩneꞌen maꞌato watu­wẽtem guꞌuro pyi hawyi aipiit Tupana Pãꞌãu minug Iesui piit ewywuat toĩneꞌen."

⁴⁷ Saꞌa­wy­ꞌiwuat Tupana tunug Ãtãu yi kawiat. Mekewat Ãtãu Saipepiat Iesui toĩneꞌen."

⁴⁸ Miꞌi hap ewy ti aito mesu­wa­rote watoĩ­neꞌen ahaꞌa­seꞌi Ãtau ewywuat pote ti aito mesu­wa­rotiat kape yn aiwa­nẽtup hap maꞌato mekewat wẽtup ok Miit Iesui Miit sese atipy Kaipywiat mẽpytꞌin no watoĩ­neꞌen mote atipy kapiat wanẽtup haria wo raꞌyn aito."

⁴⁹ Pyno ti Ãtãu iãꞌãkap koꞌi aito mesup watoĩ­neꞌen maꞌato meiũran ti aru Atipy Kaipywiat Aika­ꞌiwat Iesui iãꞌãkap koꞌi wato­py­huꞌat e."

⁵⁰ Pyno eiweꞌeg wo o uheka­tu­wyria katu­pono aipiit mesu­wa­rotiat yt teke kuap i atipy pe katu­pono aipiit ipuꞌi kawiat huu kawiat ikuꞌuro iꞌokpuk takat toineꞌen. Aikope Morekuat no Tupana toĩneꞌen hap tote yt uwe i ikuꞌuro rakaria wo toĩneꞌen itote.

"

⁵¹ Pyno atomo­herep teran mio wuat uimiwan etiat Tupana ehay ehepe."

⁵² Iesui ut turan ni tukup­teꞌen ihaĩte rakaria maꞌato mekewat eꞌat pe ti aru aipiit pakup we Iesui piit ewywuat topy­huꞌat meremo. Mekewat hap eꞌat pe merep hap ewy tut Iesui aikotã aheha mehit hap ewy meremo hap ewy e. Miꞌi hawyi Tupana huhuꞌe — Ariot raꞌyn e hamo. Miꞌi hawyi huhuꞌe hap ihay pirik pya wo hawyi ti aru meimuẽwat map haria teꞌe­ru­we­nõꞌẽ raꞌyn guꞌuro pyi e. Ipaku we watoĩ­neꞌen mekewat eꞌat pe. Aikotã Satere ut topopy kuap hap ewy mekewat eꞌat pe ikahu kahato watu­wẽtem aiwo­ꞌosyp hawyi."

⁵³ Maꞌato ti aru aipiit pakup hap yt ikuꞌuro rakat nuat i raꞌyn watu­we­nõꞌẽ. Miꞌi hawyi aito yt ikuꞌuro rakat i te rakaria iꞌewyte aipiit topy­huꞌat meremo ipakup sese."

⁵⁴ Mekewat eꞌat pe aipiit meremo ipakup we toĩneꞌen. Mesup aipiit ikuꞌuro rakat toĩneꞌen maꞌato mekewat eꞌat pe ieĩneꞌen hat watoi­neꞌen aikotã Tupana toꞌe hap ewy topy­huꞌat aru — Atimoma aru guꞌuro hawyi yt karãpe i eiku­ꞌuro hap toĩneꞌen e hap ewy."

⁵⁵ Wato­kenꞌẽ kahato aiku­ꞌuro hap pupi mesup aikotã moi aheka­tuꞌu hap pupiat ewy wato­kenꞌẽ. Maꞌato mekewat eꞌat pe Tupana aihep guꞌuro pyi hawyi yt kat i aikenꞌẽ hap toimoma raꞌyn pote e."

⁵⁶ Ikuꞌuro rakaria aito katu­pono yt naku i nug haria aito wato­py­huꞌat pote. Karãpe Tupana ainãpin hap koꞌi yt watunug i miꞌi hawyi watikuap yt naku i nug haria aito Tupana wanẽtup hawe wato­py­huꞌat hap watikuap."

⁵⁷ — Tupana urutu­wehum ewawi urupyꞌa pyi. Waku kahato En katu­pono etum naꞌyn Esaꞌyru uruepe Urupo­typot no waku kahato En. Mesup Esaꞌyru urumoe­saika wakuat nug hamo. Urutu­wehum ewawi watoꞌe Tupana pe."

⁵⁸ Urumi­ky­ꞌeria uheka­tu­wyria yt eweitoiat teiꞌo ehepiat Iesui mohey hap. Waku eweikup­teꞌen motꞌi o iwywo e yne eꞌat pe. Poꞌog Tupana miky­ꞌesat ewy ewetunug no katu­pono watikuap taꞌyn ahaꞌup iwato tutum aru aipotpap iwato hap ok tã. Watikuap taꞌyn aiminug Tupana miky­ꞌesat ewywuat hap wuatꞌi eꞌat piat topy­huꞌat. Uito ti Pauru.

"

16

¹ Pyno koitywy ahenoi teran aikotã waku wati­po­wyro Iesui emiitꞌin koꞌi mekewat aimiium teꞌen neꞌi rakat wywo aikotã saꞌa­wyꞌi ahenoi tawa Karata piaria pe. Aikotã aikotã waku wati­mõꞌẽ ahekat hap ete eweikuap hawyi waku ewetunug."

² Pyno o yne torania mytuꞌu eꞌat pe waku eiwa­nẽtup o gaꞌatpo 6 eꞌat eipotpap gosap hap kape aikotã aikotã Tupana eikyꞌe hap tutum hap kape aikotã eipo­wyro hap kape. Miꞌi hawyi kat koꞌi kat koꞌi Tupana tum ehepe mekewat 6 eꞌat piat hawyi waku miꞌi o eweipatꞌok ehekat hawyi ewetum neꞌen neꞌi Tupana pe aikotã Tupana tum neꞌen neꞌi tegyiꞌat hap ewy. Aikotã aipoi­tynug kahato hap kaipywiat hap ewy waku watum. Miꞌi hawyi etioto o emiium Tupana mõtypot yat kape hawyi etoiat emiium itote imõtypot hamuat. Torania eimiium eypa­rakai tote hawyi waku wati­po­ꞌoro miꞌi Iesui mohey haria satek takaria tawa Ieru­sarẽi piaria powyro hamo Iuteuria powyro hamo."

³ Pyno putꞌok­ꞌare i raꞌyn itote hawyi eweiꞌairo eipy­ꞌa­setpyi uwe mekewat eimiium ereto hanuat haria. Miꞌi hawyi ti aru atunug iwan eimie­reto wuat eipe Iesui mohey haria sese kuap hamuat. Miꞌi hawyi eweipo­ꞌoro eimiium neꞌen neꞌi mekewat Ieru­sarẽi kapiano haria upi mesuwat uimiwan nywo."

⁴ Uipo­ꞌoro teran eipe pote areto waku wy iraniaꞌin tuwat uhupi eweiky­ꞌesat pote waku wy yt pote yt."

⁵ Pyno uhewyry teran yi Masẽ­tunia puo hawyi putꞌok­ꞌare ehetawa Kurintiu pe te."

⁶ Pyno iꞌaman mot eꞌat pe putꞌok­ꞌare pote areĩneꞌen motꞌi iꞌaman mot pe itote tawa Kurintiu pe eiwywo. Miꞌi hawyi waku uipo­wyro muꞌap saꞌup ete mekewat uito hap saꞌup ete."

⁷ Taꞌi areĩneꞌen motꞌi teran ni eiwywo itote.

"

⁸ Areĩneꞌen mesuwe tawa Ewesu pe. Karamuo putꞌokꞌe mekewat eꞌat Esituꞌin po pywiat watetup hap eꞌat pe atimõ­typot teran Tupana mesuwe haype. Waku hawyi areto ehowawi."

⁹ Iꞌatu kahato uipyhyp teran haria mesuwe maꞌato yt uipyhyp kuap i katu­pono Tupana uipo­wyro kahato. Miꞌi pote arepotpap kahato ipotpap nug hamuat ete. Waku kahato miꞌi hap uhete.

"

¹⁰ Maꞌato tut uimẽpyt Timoteu eiꞌyat kape hawyi — Ereke ro eweiꞌe tope ikyꞌe hap wywo aikotã uikyꞌe hap ewy te katu­pono uiꞌewy kahato ipotpap Tupana potpap nug hap ete."

¹¹ Yt eweimohit teiꞌo eimuꞌe hat Timoteu are. Eweimõ­typot o miꞌi are. Miꞌi hawyi karãpe toto teran i raꞌyn uhowawi miꞌi hap eꞌat pe o ewetum muꞌap saꞌup tope hap atiky­ꞌesat. Iꞌewyte karãpe toto teran wẽtup tawa kape tuereto iꞌatu­muꞌe hamo turan o ewetum muꞌap saꞌup tope hap atiky­ꞌesat. Ahekatup Timoteu mesuwe iraniaꞌin wywo.

"

¹² Atiky­ꞌesat kahato aimuꞌe hat uhyt Aporu atipo­ꞌoro eimuꞌe hamo — Waku ti ereto tawa Kurintiu piaria powyro hamo iraniaꞌin powyro hamo areꞌe wen tope maꞌato — Yt areto i te Katu­pono yt uipo­hepap i te mesup e uhepe maꞌato meiũran waku yne hawyi areto tawa Kurintiu piaria powyro hamo e uhepe. Uipotpap putꞌokꞌe hap eꞌat pe waku pe yne mesuwe hawyi areto aru iꞌatue­wawi e Aporu uhepe.

"

¹³ Iesui ekuekatu kape o mehit eweiꞌe poꞌog poꞌog wuatꞌi eꞌat pe. Yt naku i waure wo watoĩ­neꞌen aimi­mohey Iesui kai miitꞌin mimo­weu­kaꞌi wato­py­huꞌat hawyi. Maꞌato yt naku i aiko­hyeput Tupana wanĩkap pupiat. Waku sura­raꞌin hesaika kahato rakaria ewywuat watoĩ­neꞌen Tupana potpap nug hap ete."

¹⁴ Pyno waku yne aiminug koꞌi watunug miitꞌin kyꞌe hap wywo.

"

¹⁵ Pyno uiwy­riaꞌin waku eweiwat aimuꞌe hat Etewana ehay upi katu­pono miꞌi ti eiꞌa­pykok kahato hat mesuwat Iesui mohey hap ete. Miꞌi pote eweiwat ro mehĩ Etewana ehay upi eweipo­wyro o miꞌi. Miꞌi ti eiꞌy­wania kawiat mekewat Kereku ywania sese kawiat aimuꞌe hat Etewana."

¹⁶ Miꞌi ti nimo pyi kahato Iesui mohey hat topy­huꞌat. Miꞌi turan ti miꞌi yn toĩneꞌen Iesui mohey hano. Miꞌi tupono waku watunug mehĩ Etewana yianme eiꞌa­pykok hat eꞌakag wo itote katu­pono miꞌi ewywuaria Iesui emiit no woꞌo­pot­kyꞌe kahato hat miꞌi. Iꞌewyte yne toꞌyat piaria wywo te waku pãi. Miꞌiria ewywuat waku aiꞌa­pykok hanuaria."

¹⁷ Gaꞌatpuat re putꞌok­ꞌi­ꞌa­tuꞌe meiũpe emipo­ꞌo­roria aiwy Etewana aiwy Wutu­natu iꞌewyte aiwy Akaiku wywo. Miꞌi pote arehum kahato iꞌatu­wywo katu­pono uipo­wyro kahato haria ti miꞌiria Iesui potpap etiat haria miꞌiria eipe yt uwe i uipo­wyro haria pytkai. Miꞌiria aikotã eipe uipo­wyro hap ewy te meiũpe ehaipe kai uipo­wyro."

¹⁸ Taꞌi miꞌiria ti mohag ewy kahato uimo­wepit kahato haria. Maꞌato iꞌewyte yt uipohag yn i maꞌato yne aipohag no tukup­teꞌen miꞌiria. Taꞌi aiwehum hap eiam kahato Etewana ywaniaria are. Waku wati­mõ­typot miꞌiria iꞌewyte torania yne miꞌiria ewywuaria waku wati­mõ­typot. Iꞌewyte waku miꞌi tã haria ewywuaria eweikat eiꞌa­pykok hamo.

"

¹⁹ Pyno meiũpe Iesui mohey haria yi Asia piaria teꞌe­ru­wehay poꞌoro kahato eikyꞌe hap wywo. Iꞌewyte mehĩ Akuira iꞌewyte mana Pirika e hap ipoꞌoro teꞌe­ru­we­kue­katu sese ehowawi."

²⁰ Taꞌi aipoi­tynug ni Aika­ꞌiwat Iesui iꞌatuꞌe katu­pono koitywy Tupana mõtypot hap toĩneꞌen naꞌyn iꞌatuꞌyat pe. Pyno ti uruwe­ꞌa­tunug hap toĩneꞌen naꞌyn iꞌatuꞌyat pe. Pyno ti eheka­tu­wyria meiũpiaria ehowawi teꞌe­ru­wehay poꞌoro torania Iesui mohey haria."

²¹ Miꞌi hawyi uito Pauru iꞌewyte atipo­ꞌoro uimiwan eikyꞌe uhepiat hap etiat maꞌato uipo wuat atipehik mesup uhet. PAURU uhet are hap atiwan. Kuekatu atipo­ꞌoro ehowawi are atiwan naꞌyn uiꞌe hap."

²² Tut irane tut irane Aipo­typot Iesui waku watoꞌe. Eiweꞌeg wo o katu­pono yt torania i ikyꞌe haria."

²³ Pyno ahẽtup Aika­ꞌiwat Iesui kape uiwy­riaꞌin tawa Kurintiu piaria — Etiꞌa­tu­kyꞌe teꞌen neꞌi o egyiꞌat hap kaipyi at kaꞌap. Etiꞌa­tu­po­wyro miꞌiria Iesui areꞌe."

²⁴ Pyno ti pywo ti woro­ho­ꞌo­kyꞌe kahato eipe torania eiperia kat pote eipe Iesui emiitꞌin sese raꞌyn eweipy­huꞌat pote woro­ho­ꞌo­kyꞌe. Toran naꞌyn mesuwe uimiwan ehowawiat.

Toran uimiwan mesuwe. Uito ti Iesui mipo­ꞌoro tepiat sehay moherep hamo. Pauru ti uhet."