1

¹ Humanu ywania kuekatu sese atipo­ꞌoro ehowawi uimiwan me. Uito Pauru are. Uimiwan ni mesup sehay wakuat atipo­ꞌoro ehowawi. Uito ti Tupana mipo­ꞌoro sehay wakuat moherep wuatꞌi ywania puat hanuat. Iesui potmuꞌe sese ti uito. Uito ti Tupana mipo­ꞌoro Iesui Aipo­rekuat moherep hanuat. Saꞌa­wyꞌi te Tupana uiꞌairo hawyi mio tã e uhepe — Mehĩ Pauru e woro­po­ꞌoro Uhaꞌyru Iesui etiat sehay wakuat moherep wuatꞌi puat miitꞌin miat hamo e. Atiky­ꞌesat sehay ewẽ pywiat Uhaꞌyru etiat yn e uhepe."

² Aikotã nimo te wuaria uhehay moherep haria pe atum hap ewy woronug e. Nimo te mio tã areꞌe ti raꞌyn uhehay enoi haria pe — Meiũran ti aru atipo­ꞌoro ehowawi Uimi­po­ꞌoro Wuatꞌi Miitꞌin Ehakye­raꞌat hat e. Mio tã e Tosa­ꞌyru Iesui etiat pe e Tupana uhepe. Mesup ti miwan miat toĩneꞌen Uhaꞌyru etiat uiꞌe hap taꞌyn e Tupana uhepe."

³ Koitywy atunug naꞌyn uiꞌe hap ewy. Miꞌi ti atipo­ꞌoro raꞌyn Uhaꞌyru Iesui eipo­rekuat nuat e. Miꞌi ti morekuat Tawi saipepiat sese e katu­pono Tawi emiariru emiariru sese Miꞌi e Tupana uhepe."

⁴ Miꞌi ti Uhaꞌyru sese e Tupana uhepe. Uiꞌewy hesaika rakat e. Uipãꞌãu wakuat ok tã ne hesaika rakat e. Koitywy atimo­herep taꞌyn uiꞌe hap e Tupana. Koitywy atimo­herep taꞌyn nimuat uiꞌe hap e Tupana. Koitywy Miꞌi moherep hap niatpo kahato raꞌyn aikotã atiõtem guꞌuro pyi Uhaꞌyru e Tupana uhepe haꞌa­wyte uikaykay tehay sytpok hamuat hap tote are."

⁵ Tosa­ꞌyru mohey hawyi Tupana iwese kahato uhete. Mio tã e uhepe — Woronug en mehĩ uhemiit sese wo e. Atiky­ꞌesat miitꞌin tukup­teꞌen torania Uhaꞌyru mohey haria wo e. Atiky­ꞌesat kahato Uhaꞌyru taꞌa­tunug Taꞌa­tu­po­rekuat no hap. Miꞌi haype woro­po­ꞌoro en iꞌatu­muꞌe hamuat e Tupana uhepe."

⁶ Pyno Humanu ywania uito ti Iesui potpo­ꞌoro Pauru are. Tapyꞌyia Humanu ywania eipe atiky­ꞌesat eipe ipotpo­ꞌo­roria wo uiꞌe­wywuat. Mio tã e raꞌyn ti Tupana ehepe mesup — Ewetunug no Uhaꞌyru Eipo­rekuat no e raꞌyn ehepe. Tupana Eikyꞌe kahato hat pote eiꞌa­tu­kaykay yne tuwe­wawi.

"

⁷ Miꞌi hap atiwan mesuwat uimiwan ehowawi Humanu ywania. Mio tã areꞌe Tupana pe — Uruꞌywot kahato En. Esaꞌyru ti Emipo­ꞌoro sese Uruka­ꞌiwat nuat. Miꞌi pote ahẽtup eset upi Esaꞌyru set upi etum no tapy­ꞌyiaria Humanu ywania pe egyiꞌat kahato hap are. Ereĩneꞌen no hegyiꞌat iꞌatuepiat rakano etum no ewese hap yt kat saꞌup i tapyꞌyia Huma­nuꞌin me are. Etunug no miꞌiria woꞌo­wese haria wo aikotã Esaꞌyru ewese hap ewy are Tupana pe.

"

⁸ Haꞌa­wyte atikuap eweimohey Iesui hawyi arehum kahato Tupana kape. Uimo­wepit kahato haria eipe katu­pono ewetunug naꞌyn Iesui Eipo­typot koro wo pote. Koitywy ti yne mesuwat yi totiaria tikuap kahato raꞌyn eipe Iesui mohey haria raꞌyn hap. Miꞌi pote arehum kahato Tupana kape."

⁹ Yt uheso hin i are maꞌato Tupana tikuap yt uheso i hap. Ahẽtup at kaꞌap Tupana kape eipo­wyro hamuat. Yt uheso i uiwy­riaꞌin. Ahẽtup at kaꞌap Tupana kape eika­wiano. Pywo ti rat Tupana tikuap eweikup­teꞌen uiwa­nẽtup hawe at kaꞌap hap. Pywo ti Tupana uiꞌairo tehay wakuat Tosa­ꞌyru Iesui etiat moherep hano. Uipyꞌa pyi ti ateropat ehetiano at kaꞌap. Ahẽtup at kaꞌap Tupana kape eipo­wyro hamuat."

¹⁰ Ahẽtup Tupana kape turan mio tã areꞌe — Tupana atiky­ꞌesat kahato uipo­ꞌoro Huma­nuꞌin kapiat uhewyry hamo are. Tupana ewaku hap upi uipo­ꞌoro ro En iꞌatu­muꞌe hamo are. Tupana atiky­ꞌesat kahato uhehay Huma­nuꞌin wywuat hap are mesup te maꞌato yt kat i muꞌap iꞌatue­wawi."

¹¹ Atiky­ꞌesat kahato meremo uipo­ꞌoro Huma­nuꞌin kapiat uhewyry hamo. Tupana ewaku hap upi uipo­ꞌoro o iꞌatu­muꞌe hamo. Miꞌi pote etunug o muꞌap iꞌatue­wawi katu­pono teꞌe­ra­ꞌa­kasa uhowawiat hamo tapyꞌyia Humauꞌin kape uipap areꞌe Tupana pe. Atomõꞌẽ teran iꞌatuepe Epãꞌãu miat iꞌatu­poi­tyro hap are. Atiꞌa­tu­moe­saika kary miꞌiria Epãꞌãu wo areꞌe wy. Etunug o muꞌap tapyꞌyia Huma­nuꞌin kapiat uito hamuat are Tupana pe."

¹² Atiky­ꞌesat Iesui mohey hap etiat uruwo­ꞌo­moe­saika moesaika hap itote Tupana. Putꞌok­ꞌu­ru­toꞌe itotiat hawyi urutunug neran Humanu ywania ewanuaria wẽtup miit ewy Esaꞌyru mohey hap upi."

¹³ Saꞌa­wyꞌi areꞌe Tupana pe — Areto teran tawa wato Huma kape katu­pono uheinytꞌin uheywytꞌin Esaꞌyru mohey haria kapiat araꞌa­kasa hamo are. Maꞌato ahãꞌãg hawyi toĩneꞌen uipyhyp pyhyp hap kat koꞌi kat koꞌi uikosap hamo. Uiwy­riaꞌin areto teran ehowawi. Miꞌi hap o yt eweiwaure teiꞌo katu­pono woro­ho­ꞌo­moe­saika teran eiperia Iesui mohey hap ete. Iraniaꞌin ywania aikopiat aikopiat kape areto kahu raꞌyn mote areto teran ehowawi eikuap hamo. Maꞌato uipyhyp pyhyp kat koꞌi kat koꞌi ehowawiat uikosap hamo. Koitywy iraniaꞌin miꞌiria teꞌe­ro­py­huꞌat Iesui mohey haria itag nakaria wo raꞌyn. Miꞌi hap ewy atiky­ꞌesat ehetama pe wy. Yt uheso hin i miꞌi pote ahãꞌãg i ahãꞌãg i kahato ehowawi wen maꞌato yt putꞌok­ꞌare i te ehowawi eimotag."

¹⁴ Uipap kahato Iesui kapiat miitꞌin pore­ro­kosap hamo maꞌato yt atimo­herep i Iesui wuatꞌi ywania pe pote yt naku i nug hat arepy­huꞌat Tupana pe. Miꞌi pote yne ywania miitꞌin kape areto teran Iesui moherep hamo sio iweꞌeg kahato rakaria kape sio yt. Yne ywania kape areto teran pote ehetama kape areto wy. Tawa wato piaria kape areto teran Iesui ehay moherep hamo iꞌewyte yne tawa hit kape areto teran wy. Yne tapy­ꞌyiaria kape areto wy sio haiwot rakaria kape sio iwese rakaria kape sio gaꞌapy puaria gupteꞌen haria sio tawa watoꞌin puaria kape areto wy. Iwan kuap kahato haria kape areto wy. Yt kat kuap i haria kape areto wy. Uipap kahato wuatꞌi miit ekyi Iesui kapiat hamo. Taꞌi areĩneꞌen aikotã wete­weru hat ewy. — Etum no uhehay wuatꞌi miitꞌin me uhehay yt kuap i haria pe e Iesui uhepe pote atum neran wuatꞌi ywania pe wen maꞌato yt atum i pote wuatꞌi piat wete­weru hat ewywuat areĩneꞌen."

¹⁵ Miꞌi pote uipap kahato ehowawi wy atum neran eiꞌy­wania pe Iesui etiat sehay pote. Toran kahato atimo­herep teran sehay wakuat eiꞌy­wania pe ehetawa wato Huma totiaria pe."

¹⁶ Miꞌi pote rat yne uhesaika hap wywo ahãꞌãg neran ehowawiat areto hamo wen. Katu­pono sehay wakuat Iesui etiat hesaika kahato rakat aikotã Tupana esaika hap ok tã ne. Aikotã purake koꞌi esaika hap ewy Iesui etiat sehay. — Pywo ti rat uwe uwe timohey raꞌyn Iesui miꞌi hat Tupana mieha­kye­raꞌat wo topy­huꞌat sio wuatꞌi miitꞌin eropat haria sio wuatꞌi miitꞌin akagnia koꞌi toiꞌa­tue­ha­kye­raꞌat kuap torania Tosa­ꞌyru mohey haria areꞌe raꞌyn wuatꞌi ywania pe. Saꞌa­wyꞌi waku Iuteu ywania kape wati­mo­herep Iesui etiat miꞌi hawyi waku iraniaꞌin yt Iuteu i ywania kape wati­mo­herep Aipo­typot Iesui. Hesaika kahato mesuwat sehay Iesui etiat are. Iesui etiat sehay pupi ti yt aremõti hin i imoherep hamo."

¹⁷ Saꞌa­wyꞌi Tupana toꞌe miwan me — Uimohey haria yn ni aru uimie­ha­kye­raꞌat nuaria e. Miꞌiria yn uimi­moieĩ­neꞌen wuatꞌi eꞌat pianuaria e. Nimo pyi mesup te Tupana timoe­waku Tosa­ꞌyru mohey haria yn. Pywo ti rat woro­ho­ꞌonug eipe wakuap Uiꞌewy uimohey hawyi e Tupana nimo te miwan me. Mesup te wy mio tã e — Uhaꞌyru mohey haria yn atiꞌa­tu­moieĩ­neꞌen wuatꞌi eꞌat pe e wuatꞌi ywania pe. Uiwy­riaꞌin pyno waku yne eꞌat watu­we­moheg ahepiat Iesui mohey hap ete. Imohey haria sese pe Tupana toꞌe — Uiwa­nẽtup hawe uipyꞌa pe eiperia yn wakuaria e.

"

¹⁸ Miitꞌin mesu­wa­ro­tiaria minug koꞌi yt Tupana miky­ꞌesat ewy hin i. Taꞌi yt hãpyk hin i torania iꞌatu­minug koꞌi e Tupana. Taꞌa­tukuap hãpyk nug hap taꞌa­tu­pyꞌa pe wen maꞌato yt iꞌatu­popap i inug hamo e. Miꞌi haype yt naku i nug hap yn taꞌa­tunug neran e. Taꞌa­tukuap yne pywuat koꞌi nug hap taꞌa­tu­pyꞌa pe hepiat taꞌa­tu­nãpin hap wen maꞌato yt taꞌa­tunug hin i uiꞌe hap e Tupana wuatꞌi ywania pe. Yt taꞌa­tu­mohey teran i maꞌato taꞌa­tu­ky­ꞌesat taꞌa­tu­minug saꞌag yn neran haype e. Taꞌa­tu­pyhyp at kaꞌap uhehay pywuat sese moherep haria e. Miꞌi haria yt uwe i uikuap teran haria mesu­wa­ro­tiaria yt uimohey i pote haria e Tupana wuatꞌi miitꞌin miat."

¹⁹ Miꞌi pote miitꞌin minug yt nakuap i ete uhaiwot kahato areĩneꞌen e Tupana. Atimo­herep yne iꞌatuepe iꞌatu­ꞌa­piheg hap iꞌatu­minug saꞌag etianuat atipy kaipyi wen maꞌato taꞌa­tunug ne yt uimi­ky­ꞌesat ewy i e. Taꞌi yne eꞌat pe atimo­herep taꞌyn iꞌatue­wawi uiwat uimi­ky­ꞌesat ewy nug hap iꞌatu­pyꞌa puo maꞌato yt taꞌa­tunug i uimo­herep hap taꞌa­tu­pyꞌa piat hap ewy e. Yt teꞌe­ru­wewãi hin i uhehay wo. Aremo­herep at kaꞌap miitꞌin me iꞌatu­wa­nẽtup hawe maꞌato uiwe­mo­herep hap taꞌa­tupun taꞌa­tu­pyꞌa pyi. Miꞌi pote yt taꞌa­tukuap kuap i areĩneꞌen hap e Tupana. Areĩneꞌen miitꞌin wywo maꞌato yt uikuap i haria wo tukup­teꞌen e. — Tupana yt heremo i iꞌatuꞌe toꞌope. — Maꞌato aremo­herep uiminug ikahu rakaria wo areĩneꞌen nat uiꞌe hap e. Teꞌe­ra­haꞌat uiminug koꞌi kape hawyi — Taꞌi Tupana minug kaipyi watikuap toĩneꞌen Tupana hap yt iꞌatuꞌe i toꞌope e. — Aremo­herep uiminug wo areĩneꞌen sese hap maꞌato uimi­mo­herep yt taꞌa­tu­ky­ꞌesat i taꞌa­tu­wa­nẽtup hawe e Tupana saꞌa­wyꞌi"

²⁰ Tupana minug yi at waty waikiru sem teꞌe­ra­ꞌa­kasa yne pytkai — Pywo ti rat Tupana toĩneꞌen yt iꞌatuꞌe i teꞌe­ra­ꞌa­kasa iminug yne pytkai. Yt naku i katu­pono Tupana tuwe­mo­herep kahato raꞌyn tominug koꞌi wo toieĩneꞌen hap miitꞌin muo. Tupana yt heremo i wen aheha pe maꞌato tuwe­mo­herep taꞌyn ahepe tominug koꞌi wo. Saꞌa­wyꞌi Tupana tunug mesuwat yi hawyi iꞌewyte mesu­wa­ro­tiaria gaꞌapy puat yꞌy puat miat koꞌi. Miꞌiria koꞌi ti yt ihay kuap i rakaria tukup­teꞌen wen maꞌato ihay rakaria ewy — Ainug hat ri Tupana iꞌatuꞌe haria ewy. Pywo ti Ainug hat ri Tupana iꞌatuꞌe wuatꞌi miitꞌin me. Yt heremo i Tupana wen maꞌato toĩneꞌen kahato aikai. Taꞌi hesaika sakpoꞌe Ainug hat iꞌatuꞌe hap ewy iminug koꞌi yne ahepe. Wuatꞌi eꞌat piat — Ainug hat toĩneꞌen iꞌatuꞌe ahepe iminug koꞌi. Yt uruwewi i urutu­wenug iꞌatuꞌe hap ewy ahepe Tupana minug koꞌi wuatꞌi ywania pe. Miꞌi hawyi miitꞌin teꞌe­ra­haꞌat Tupana minug koꞌi kape hawyi — Pywo Tupana ti wuatꞌi nug hat yt iꞌatuꞌe hin i heremo kahato pytkai. Teꞌe­ra­haꞌat kahato hewakuap moherep hap kape pytkai — Aiwewi watu­wenug iꞌatuꞌe saꞌag neꞌi toꞌope."

²¹ Taꞌi mesu­wa­ro­tiaria tikuap taꞌyn Tupana toĩneꞌen iminug koꞌi kaipyi maꞌato taꞌa­tukuap toĩneꞌen pytkai yt taꞌa­tu­mõ­typot hin i Tupana. Iwese kahato hegyiꞌat kahato iꞌatuepe pytkai — Waku kahato En Tupana yt iꞌatuꞌe hin i. Yt teꞌe­ru­wehum hin i Tupana miium ahepiat hap kape. Yt nakuat i wo yn teꞌe­ru­wa­nẽtup Tupana kape. Pywuat sehay Tupana etiat yt taꞌa­tu­ky­ꞌesat hin i mesu­wa­ro­tiaria miitꞌin. Yt karãpe i teꞌe­ru­wa­nẽtup teran Tupana kape. Yt kat i iꞌatu­wa­nẽtup hap Tupana etiat hap pote aikotã hoꞌo­wasat sese rakaria ewy tukup­teꞌen taꞌa­tu­wa­nẽtup hawe. Iꞌypyryp kahato iꞌatu­wa­nẽtup hap miꞌi pote wẽtup sehay kape yn taꞌa­tu­wa­nẽtup. Yt kan hamuat i sehay rakat kape yn taꞌa­tu­wa­nẽtup. Hesoꞌok takaria ewy tukup­teꞌen iꞌatu­wa­nẽtup hawe. Yt nakuaria i sese taꞌa­tu­pyꞌa pe. Yt iꞌatu­weꞌeg i sese rakaria ewy iꞌatu­wa­nẽtup hap."

²² Yt nakuaria sese pytkai — Taꞌi uruto poꞌog uruweꞌeg torania kawiat iꞌatuꞌe taꞌa­tu­pyꞌa pe. Maꞌato Tupana wanẽtup hawe yt iꞌatu­weꞌeg hin i haria wo teꞌe­ro­py­huꞌat."

²³ Tupana toĩneꞌen wuatꞌi eꞌat piat ieĩneꞌen hat pytkai mesu­wa­ro­tiaria yt timohey i mio tã e hap. Taꞌi yt taꞌa­tu­mõ­typot hin i Tupana Sese mekewat Wuatꞌi Eꞌat Piat Ieĩneꞌen hat. Maꞌato taꞌa­tu­ky­ꞌesat poꞌog taꞌa­tupo wuat taꞌa­tu­minug tupa­naria saꞌag hit koꞌi. Miꞌi hawyi miitꞌin me — Eipe ti tupana iꞌatuꞌe saꞌag Tupana minug koꞌi pe iꞌatuꞌe. Taꞌa­tunug miitꞌin mesu­wa­ro­tiaria taꞌa­tue­tu­pana wo. Miꞌi hawyi miitꞌin iãꞌãkap mo wuat minug koꞌi kape teꞌe­ru­we­pỹ­ꞌã­tutuk — En ni tupana iꞌatuꞌe. Iraniaꞌin weitaria iãꞌãkap koꞌi kat kat kawiat mo wuat taꞌa­tunug hawyi — Meimuẽ ni tupana sese iꞌatuꞌe saꞌag. Iraniaꞌin miat koꞌi pira koꞌi iakare koꞌi iãꞌãkap koꞌi taꞌa­tunug saꞌag taꞌa­tue­tu­pana wo. Taꞌa­tunug taꞌa­tupo wo hawyi miꞌiria kape teꞌe­ru­we­pỹ­ꞌã­tutuk — Miꞌiria so tupana iꞌatuꞌe saꞌag. Moi ok kape iꞌewyte iꞌatu­wẽ­papꞌi at kaꞌap maꞌato taꞌa­tunug hat kape Tupana Koro kape mekewat Poꞌog Poꞌog Ikahu Torania Tominug Koꞌi Kawiat Rakat kape yt kat i iꞌatuꞌe hap are. Teꞌe­ru­we­ꞌywyk kahato Tupana sese kaipyi taꞌa­tukuap saꞌa­wyꞌi pytkai. Nuꞌe saꞌy­ruꞌin saꞌa­wy­ꞌiwuat yne aito pote."

²⁴ Yt taꞌa­tu­weꞌeg i hap tupa­naria yn taꞌa­tu­ky­ꞌesat pote Tupana toꞌe iꞌatuepe — Pyno ewetunug no yt eiweꞌeg i hap at kaꞌap eiku­ꞌuro hap kape e. Ewetunug eimi­ky­ꞌesat ok tã eiwepyi hap ok tã e Tupana tomohey hap pun haria pe. Miꞌi hawyi poꞌog saꞌag nug haria wo teꞌe­ro­py­huꞌat saꞌa­wy­ꞌiwuat kai. Miꞌi hawyi yne taꞌa­tu­pyꞌa pywiat iꞌatu­minug saꞌag iꞌatu­mi­ky­ꞌesat koꞌi taꞌa­tunug toran at kaꞌap hawyi yt naku i nug haria sese wo teꞌe­ro­py­huꞌat at kaꞌap. Miꞌi hawyi iꞌatueko yt naku i nug hap po pe teꞌe­ro­py­huꞌat hesoꞌok takaria. Yt taꞌa­tu­ꞌatoiat kuap i taꞌa­tueko taꞌa­tu­hãꞌãg mytkai. Yt naku i nug hap eropat at kaꞌap haria teꞌe­ro­py­huꞌat yt teꞌe­ru­wewãi kuap i hawyi. Miꞌi tupono hewaire waire hap kahato toꞌope toꞌope taꞌa­tunug hary­poria hary­poria wywo ihainia ihainia wywo hap ewy taꞌa­tunug at kaꞌap yt iꞌatu­weꞌeg i haria yne katu­pono saꞌag kahato taꞌa­tunug taꞌa­tupiit wywo. Yt miit ewy i teꞌe­ru­wewuk wuk taꞌa­tupiit miky­ꞌesat saꞌag upi. Taꞌa­tu­mo­herep yt taꞌa­tu­weꞌeg i hap koꞌi toꞌope toꞌope. Miꞌi hawyi teꞌe­ru­we­mõti at kaꞌap hap topy­huꞌat taꞌa­tu­wa­nẽtup hawe iꞌatu­minug saꞌag hap kaipyi."

²⁵ Saꞌa­wyꞌi wuaria sehay Tupana etiat pywuat taꞌa­tukuap taꞌa­tu­wa­nẽtup hawe maꞌato miꞌi hawyi heso rakaria wo tukup­teꞌen hawyi taꞌa­tu­waure teran pywo sehay Tupana etiat. Katu­pono taꞌa­tunug neran yt Tupana miky­ꞌesat ewywuat i koꞌi. Miꞌi hawyi taꞌa­tu­ꞌatoiat Tupana hawyi Tupana minug koꞌi kape — Eipe ti urunug hat iꞌatuꞌe. Waku watunug miitꞌin ahetu­pana wo iꞌatuꞌe toꞌope. Miꞌi hawyi hesoꞌok takaria sese ewy teꞌe­ro­py­huꞌat. Miꞌi hawyi taꞌa­tunug taꞌa­tue­tu­pa­naria taꞌa­tupo wo. Miꞌi hawyi teꞌe­ru­we­pỹ­ꞌã­tutuk tupa­naria iãꞌãkap ran koꞌi taꞌa­tu­mõ­typot hamo. Miꞌi hawyi Tupana minug koꞌi pe — Urunug hat en iꞌatuꞌe taꞌa­tupo minug koꞌi pe.

Maꞌato aito Iesui mohey haria — Tupana watoꞌe En ni Urunug hat sese watoꞌe. Pywo pe ti En ni poꞌog wuat torania kai watoꞌe raꞌyn."

²⁶ Maꞌato iraniaꞌin saꞌag kape yn iꞌatu­wa­nẽtup hap. Miꞌi tã taꞌa­tu­ky­ꞌesat pote Tupana toꞌe iꞌatuepe — Pyno hẽto e. Eiwe­maꞌat teran eiminug saꞌag koꞌi wywo pote woro­ho­ꞌo­ꞌatoiat eipe eiminug yt naku i eheko eropat haria wo e. Miꞌi hawyi teꞌe­ru­wepyi sewaire sewaire hap kape yn taꞌa­tu­ky­ꞌesat haype. Miꞌi hap urumo­wepit kahato hap topy­huꞌat aru iꞌatuꞌe. Maꞌato taꞌa­tunug kahato hawyi iꞌatu­mõti hap yn topy­huꞌat. Miꞌi hawyi awareria ewy tukup­teꞌen toꞌope. Meiũran hary­poria yt hary­poria ewy hin i teꞌe­ro­py­huꞌat. Katu­pono hary­po­riaꞌin yt tiky­ꞌesat poꞌog ihainia taꞌa­tue­ꞌaito wo maꞌato taꞌa­tu­ky­ꞌesat hary­po­riaꞌin ne taꞌa­tue­ꞌaito saꞌag wo taꞌa­tu­ky­ꞌesat."

²⁷ Iꞌewyte ihainiaꞌin tiꞌa­tu­ky­ꞌesat towary wo ihainiaꞌin yt ihainia sese ewy hin i teꞌe­ro­py­huꞌat. Yt Tupana miky­ꞌesat ewy hin i taꞌa­tu­ky­ꞌesat pote yt Tupana minug ewy hin i teꞌe­ro­py­huꞌat. Miꞌi hawyi hary­poria tiꞌa­tu­ꞌatoiat ihainiaꞌin hawyi hary­po­riaꞌin toꞌope toꞌope toꞌo­ky­ꞌesat hap topy­huꞌat iꞌewyte ihainiaꞌin ihainiaꞌin wywo toꞌope toꞌope yt miit ewy i yt naku i hap eropat sese haria wo. Miꞌi hap upi tukup­teꞌen Tupana miꞌa­piheg wuanuaria wo. Iꞌatu­minug saꞌag iwato hap ok tã toiꞌa­tu­mo­so­ꞌopot.

"

²⁸ Miꞌiria pe wahenoi sehay wakuat Tupana etiat pote wãiꞌi­ꞌa­tuꞌe ahepe katu­pono yt taꞌa­tu­ky­ꞌesat i. Miꞌi sehay kape yt teꞌe­ru­wa­nẽtup teran i. Yt taꞌa­tu­ky­ꞌesat iꞌatue­waure kaꞌa pe iꞌatu­wa­nẽtup hawe — Yt kat i Tupana sese iꞌatuꞌe toꞌope pote toĩneꞌen pytkai. Miꞌi pote Tupana toꞌe miꞌiria ewywuaria pe — Hẽto eiwe­wa­nẽtup eiminug saꞌag kape yn at kaꞌap eimi­ky­ꞌesat ewy e. Miꞌi hawyi poꞌog yt ihainia ewy i yt hary­poria ewy i teꞌe­ro­py­huꞌat taꞌa­tu­pyꞌa pe taꞌa­tu­wa­nẽtup hawe taꞌa­tu­minug. Yt naku i hap koꞌi yn neꞌi taꞌa­tunug taꞌa­tu­wepyi hap ewy. Teꞌe­ru­wepyi Tupana wanẽtup hap ikahu rakat kaipyi iꞌatue­ha­ma­naꞌi."

²⁹ Aikotã aikotã saꞌag nug kuap haria tukup­teꞌen. Yt naku i nug hap ete yn teꞌe­ru­we­moe­hapap at kaꞌap — Taꞌi yt nakuap i waku iꞌatuꞌe taꞌa­tu­pyꞌa pe. Uiminug yt nakuap i yn uimo­wepit sese iꞌatuꞌe. Atiky­ꞌesat iraniaꞌin ekat yne uiwanuat uhekat hamo iꞌatuꞌe taꞌa­tu­wa­nẽtup hawe. Iꞌatuehay miitꞌin mõti te hap yn iꞌewyte seha­ꞌy­wywi hap yn taꞌa­tunug torania miitꞌin ete. — Uito poꞌog waku eikai iꞌatuꞌe wakuaria pe iꞌatue­ha­ꞌy­wywi wywo. Miitꞌin potꞌauka haria wo teꞌe­ru­we­py­huꞌat. Miꞌi hawyi woꞌo­pot­maꞌat haria teꞌe­ru­we­py­huꞌat. Teꞌe­ru­wepyi iꞌatu­hoi­roꞌi hoiroꞌi iraniaꞌin ete. Yt pywuat sehay i taꞌa­tu­henoi iraniaꞌin ete miꞌiria maꞌat hamo iraniaꞌin heꞌi heꞌi wo."

³⁰ Toꞌoeowa pe iꞌatu­wese kahato maꞌato haipekai miitꞌin atumohit kahato hap yn iꞌatuehay. Yt taꞌa­tu­kyꞌe hin i Tupana sese iꞌewyte miitꞌin me — Yt kat hamo i eiperia iꞌatuꞌe yn taꞌa­tu­pyꞌa pe. Yt iꞌatu­wese i iꞌewyte yt taꞌa­tu­wesat i iraniaꞌin katu­pono — Uito rat poꞌog nakat eikai iꞌatuꞌe teꞌe­ru­we­wa­nẽtup hawe. Atunug kuap poꞌog eikai iꞌatuꞌe. Yt taꞌa­tu­ꞌy­wotꞌin taꞌa­tu­tyꞌin miat wãiꞌe hap upi hin i teꞌe­ro­py­huꞌat."

³¹ Teꞌe­ru­wepyi taꞌa­tu­pehik taꞌa­tuehay — Taꞌi atunug aru uiꞌe hap iꞌatuꞌe maꞌato yt taꞌa­tunug hamuat pytkai i. Miitꞌin maꞌat hap kape yn teꞌe­ru­wa­nẽtup pote — Atunug aru are ti rat uiꞌe hap iꞌatuꞌe pytkai yt taꞌa­tunug hin i aru taꞌa­tuꞌe hap koꞌi. Yt taꞌa­tukuap teran i taꞌa­tu­weꞌeg hap. Yt taꞌa­tu­kyꞌe kuap i iraniaꞌin. Marakꞌa koꞌi wo tukup­teꞌen. Yt kat i miitꞌin ehaky­ꞌeꞌi hap iꞌatu­pyꞌa pe."

³² Taꞌa­tukuap Tupana wãiꞌe hap mekewat kat som waku watunug kat som yt naku i watunug e hap koꞌi wen maꞌato yt taꞌa­tunug hin i. Yt taꞌa­tu­ky­ꞌesat i haype. — Miꞌi tã ewetunug mote woro­ho­ꞌo­ꞌa­piheg guꞌuro hamo e Tupana. Miꞌi taꞌa­tukuap pytkai taꞌa­tu­pugha yne Tupana piat ainãpin hap koꞌi. Iꞌewyte toꞌo­mo­wehum kahato toꞌope toꞌo­minug saꞌag koꞌi ete — Urumo­wepit kahato haria eipe iꞌatuꞌe yt naku i nug haria pe. Miꞌi hawyi watoꞌe — Maꞌato uito ti yt miꞌiria ewywuat hin i areĩneꞌen katu­pono waku kahato uito watoꞌe pote ti waku aiweꞌeg wo o uiwy­riaꞌin katu­pono yne aito miꞌiria ewywuaria Tupana wanẽtup hawe are.

"

2

¹ Pyno yt naku i watoꞌe — Uito waku yn nug hat pãi an maꞌato iraniaꞌin mesu­wa­ro­tiaria yt naku i nug kahato haria tukup­teꞌen watoꞌe aipyꞌa pe pote yt iweꞌeg hin i rakaria wo watoĩ­neꞌen Tupana wanẽtup hawe e. Katu­pono Tupana ti aikuap kahato. Tupana tikuap yne aiminug saꞌag koꞌi yt heremo i rakaria koꞌi e. Iꞌewyte aiwa­nẽtup hap koꞌi yt ikahu rakat i toikuap. Miꞌi pote — Miitꞌin iraniaꞌin ni saꞌag nug haria sese maꞌato uito waku nug hat areĩneꞌen yne uiminug hap ete watoꞌe pote aiwe­maꞌat haria wo wato­py­huꞌat. Katu­pono aitoria torania yt naku i nug haria Tupana wanẽtup hawe. Miꞌi pote karãpe — Uito poꞌog iraniaꞌin kai aiꞌe pote yt iweꞌeg i rakaria wo watoĩ­neꞌen. Katu­pono — Yt kat i uimi­ꞌa­parap hap Mehĩ Mimi yt watoꞌe kuap i Tupana kape. Taꞌi Tupana tikuap yne aiwe­pywiat aiminug koꞌi. Iraniaꞌin yt tikuap i yt hehamo i watunug yt naku i pytkai Tupana tikuap toikuap yne pote. Pywo ti rat toĩneꞌen kahato aiꞌa­parap hap. Miꞌi pote yt naku i watikat iraniaꞌin miat iꞌaparap hap. Katu­pono aito wy yt naku i nug haria wo wato­py­huꞌat Tupana wanẽtup hawe."

² Taꞌi Tupana tikuap yne aiminug koꞌi sio waku sio yt toikuap. Tupana yn waku e ahepiat hanuat uwe waku uwe yt naku i e hamo uwe toiꞌa­piheg uwe yt e hamuat."

³ — Meimuẽ­waria yt naku i nug haria watoꞌe maꞌato woꞌo­ku­pitu kahato iꞌaparap hap iraniaꞌin minug saꞌag aiꞌa­parap hap koꞌi toꞌo­ꞌe­wy­ꞌewy. — Wãi ne watoꞌe iraniaꞌin me iꞌatu­ꞌa­parap hap ete iꞌatu­minug saꞌag hap toku­pitu watunug pytkai — Atunug yt naku i pytkai yt karãpe i aru Tupana uiꞌa­piheg watoꞌe. Mio tã watoꞌe pote aiwe­moeso haria watoĩ­neꞌen katu­pono Tupana tikuap yne yt nakuap i koꞌi uimi­mu­ꞌeria."

⁴ — Tupana iwese kahato ahete pote waku watunug yt nakuap i motꞌi uimi­ky­ꞌesat ok tã katu­pono iwese te ahete yt naku i watunug motꞌi pytkai aiꞌe hap watoꞌe pote yt aiweꞌeg hin i aito. — Yt karãpe i aru aiꞌa­piheg aiminug yt naku i hap upi yt naku i watoꞌe aiwo­ꞌope are. Pywo ti rat Tupana iwese kahato te ahete aikyꞌe kahato haype. Yt meremo i aiꞌa­piheg teran aiminug yt nakuap i ete. Eweikuap kat pote yt aiꞌa­piheg meremo i katu­pono iwese kahato te toiky­ꞌesat kahato watu­we­morem aiminug saꞌag kaipyi aiꞌa­piheg hap yianmete haype. Miꞌi haype ti iwese motꞌi te ahete. Toiky­ꞌesat wati­ꞌa­tu­ꞌatoiat yne aiminug saꞌag koꞌi. Mesup te yt aiꞌa­piheg i te maꞌato — Atiky­ꞌesat eweiꞌatoiat yne eiminug saꞌag koꞌi e ahepe. Eweiꞌaipok to uhowawi uimẽ­pytꞌin e yn Tupana ahepe."

⁵ Yt naku i ti watunug aiwepyi Tupana yt miky­ꞌesat i. Yt naku i aipyꞌa pyi watunug saꞌag nakat yn aiwepyi uiwy­riaꞌin are. Miꞌi hap watunug teꞌen teꞌen hawyi aiminug saꞌag tuwe­ꞌa­kytka miꞌi hawyi aiꞌa­piheg iꞌewyte tuwe­ꞌa­kytka. Putꞌokꞌe aru aiminug saꞌag hap koꞌi moherep hap eꞌat hawyi aru Tupana timo­herep yne aiminug saꞌag koꞌi aiminug yt Tupana miky­ꞌesat ewy hap koꞌi e. Mekewat eꞌat pe ti yt iwese hin i raꞌyn aiminug saꞌag hap koꞌi ete e. Marakꞌa ewy aru Tupana topy­huꞌat aiminug saꞌag hap koꞌi ete mekewat eꞌat pe e. Mekewat eꞌat pe yne heremo aiminug wuatꞌi ehamo sio waku sio yt toimo­herep."

⁶ Mekewat eꞌat pe aru Tupana tum naꞌyn tomõ­typot haria pe tomi­ky­ꞌesat nug haria pe saꞌup wakuat kahato. Maꞌato iraniaꞌin me yt naku i nug haria pe tutum naꞌyn saꞌup yt naku i iꞌatu­minug saꞌag hap ok tã naꞌyn e miwan me."

⁷ Taꞌi Tupana tum aru tomohey haria pe tomõ­typot haria pe tomi­ky­ꞌesat nug hanuaria pe wuatꞌi eꞌat piat iꞌatuieĩ­neꞌen hap sese tomẽ­pytꞌin saꞌup e. Miꞌiria yt iꞌatu­pohep hin i Tupana mõtypot hap ete. Taꞌa­tu­minug wakuap koꞌi wo taꞌa­tu­mõ­typot at kaꞌap. Yt karãpe i iꞌatu­ku­ꞌuro miꞌiria ete e. Katu­pono tomõ­typot saꞌup Tupana tum miꞌiria pe wuatꞌi eꞌat piat iꞌatuieĩ­neꞌen waku hap."

⁸ Maꞌato iraniaꞌin yt tomohey i haria pe aru tutum iꞌatu­ꞌa­piheg wuatꞌi eꞌat piat katu­pono taꞌa­tu­mi­ky­ꞌesat yt naku i hap ewy yn taꞌa­tu­ꞌa­tunug at kaꞌap. Yt taꞌa­tunug hin i Tupana miky­ꞌesat ewywuat koꞌi pote Tupana miꞌa­piheg koꞌi teꞌe­ro­py­huꞌat wuatꞌi eꞌat pe e. Tupana mõpy­ꞌahak teran hap yn taꞌa­tunug mote Tupana miꞌa­piheg koꞌi wo teꞌe­ro­py­huꞌat wuatꞌi eꞌat pe e. Yt naku i nug haria toran toiꞌa­tu­ꞌa­piheg sio Iuteuria sio iraniaꞌin ywania toiꞌa­tu­moe­ha­ky­ꞌeꞌi kahato wuatꞌi eꞌat pe."

⁹ Taꞌi yt naku i ti yt nakuap i nug haria ete sio aito Iuteu ywania sio wẽtup ywania e. Yt nakuap i nug haria iꞌatu­wa­nẽtup hap moꞌarot kahato tukup­teꞌen wuatꞌi eꞌat pe e. Iuteu ywania poꞌog hoꞌopot rakaria tukup­teꞌen aru iraniaꞌin kai katu­pono miꞌiria ikuap Tupana ehay poꞌog torania ywania kai haꞌa­wy­tepyi wen maꞌato yt taꞌa­tunug i."

¹⁰ Maꞌato ti tukup­teꞌen Tupana mohey haria yne ywania kawiat. Miꞌiria tukup­teꞌen toꞌy­wania pyꞌa­setpe Tupana miky­ꞌesat nug haria wakuat nug haria Iuteu ywania iꞌewyte yt Iuteuria i are. Miꞌiria Tupana mimõ­typot koꞌi tukup­teꞌen. Miꞌiria pe — Woro­ho­ꞌonug eipe wuatꞌi miitꞌin mimõ­typot no wuatꞌi eꞌat pe e Tupana. Woro­ho­ꞌonug eipe uimi­mo­wepit haria sese at kaꞌap wuatꞌi eꞌat pe aru e Tupana wakuap nug haria pe Iuteu ywania kawiaria pe iꞌewyte wakuap nug haria iraniaꞌin ywania kawiaria pe."

¹¹ Tupana tiꞌa­tu­kyꞌe sakpoꞌe torania miitꞌin e. Taꞌi aito yne ywania aiwo­ꞌoe­wy­ꞌewy toꞌo­ku­pitu Tupana piat aikyꞌe hap e. Yt karãpe i Tupana toꞌe wẽtup ok ywania kawiat pe yn — Woro­ho­ꞌo­kyꞌe eipe poꞌog uimi­kyꞌe iraniaꞌin kai.

"

¹² Aparãu emiariru emiari­ruꞌin koꞌi Iuteu ywania kawiaria ti tukup­teꞌen Tupana mienoi koꞌi Musei miwan upi. Toiꞌa­tu­nãpin Iuteu ywania tomi­ky­ꞌesat koꞌi torania ywania eꞌyianmete. Nimo te kat som waku watunug kat som yt naku i watunug hap Tupana tiwan puretig nu kawiat rote hawyi tutum Musei ywania Iuteu ywania pe. Maꞌato taꞌa­tukuap yne Tupana miky­ꞌesat nu kawiat puretig miwan pytkai yt taꞌa­tunug hin i. Miꞌi pote — Hoꞌo­wasat rakaria ewywuat eweikup­teꞌen e Tupana Iuteu ywania pe mesup. Katu­pono eweikuap sakpoꞌe uimi­ky­ꞌesat koꞌi uimiwan koꞌi maꞌato miꞌi pytkai yt ewetunug hin i uhepiat einãpin hap e. Maꞌato mesu­wa­ro­tiaria iraniaꞌin ywania yt kat i uimiwan woꞌo­nãpin hap Musei kaipywiat kuap haria tukup­teꞌen maꞌato yt taꞌa­tukuap i uimiwan Musei piat hap pytkai taꞌa­tunug yt naku i taꞌa­tu­mikuap ok tã. Miꞌi pote mio tã areꞌe yt uimiwan kuap i haria pe iꞌewyte Iuteu ywania uimiwan kuap haria pe — Yt ewetunug i wakuap eimikuap hap ok tã ewy pote hoꞌo­wasat rakaria eweikup­teꞌen e."

¹³ Miꞌi pote areꞌe yne miitꞌin me e Tupana — Wakuap nug haria uimi­ky­ꞌesat nug haria eipe pote waku pe eweikup­teꞌen uipyꞌa pe e ahepe. Uiwy­riaꞌin waku watikuap yne Tupana piat ainãpin hap koꞌi. Waku wati­wẽpap i imiwan maꞌato watikuap Tupana miwan Musei mimo­herep koꞌi yne pytkai yt watunug i yne pote yt naku i nug haria wo wato­py­huꞌat Tupana wanẽtup hawe are katu­pono mio tã e Tupana — Uimi­ky­ꞌesat miwan miat ewywuat nug haria pe yn areꞌe aru — Eipe wakuaria are uimi­ky­ꞌesat miwan miat ewywuat nug haria pe yn e.

"

¹⁴ Iraniaꞌin ywania yt Iuteu ywania i yt ikuap i kahato Tupana wãiꞌe hap Musei mienoi koꞌi wen maꞌato yt ikuap i pytkai taꞌa­tunug kahato Tupana miky­ꞌesat koꞌi teꞌe­ru­wepyi wakuat nug haria tukup­teꞌen mote. Tupana miwan miat puretig nu kawiat ewywuat taꞌa­tunug yt ikuap i pytkai. Katu­pono iꞌatu­wa­nẽtup hawe Tupana woꞌo­nãpin hap ewywuat toĩneꞌen aikotã Tupana miwan miat ewywuat toĩneꞌen iꞌatu­pyꞌa pe. Taꞌa­tukuap kahato kat som waku kat som yt naku i hap taꞌa­tukuap. Katu­pono miꞌi e hap topy­huꞌat yne miitꞌin me Tupana piat ainãpin hap ewywuat aiwe­wa­nẽtup hawe. Miꞌi tupono wemõti haria wo teꞌe­ro­py­huꞌat raꞌyn yt taꞌa­tunug Tupana piat iꞌatu­wa­nẽtup nãpin hap ewy i pote."

¹⁵ Yt nakuat i nug hap tuꞌi­rãpe teꞌe­ru­we­mõti. Yt naku i taꞌa­tunug neran hawyi — Are pãi are an meketã sig atunug hawyi yt naku i nug hat areĩneꞌen uipyꞌa pe iꞌatuꞌe teꞌe­ru­wa­nẽtup hawe. Yne eꞌat pe teꞌe­ru­wewãi yt naku i nug hap pupi wuatꞌi ywania yt taꞌa­tukuap i te Tupana woꞌo­nãpin hap miwan miat pytkai. — Atunug waku hawyi waku pe areĩneꞌen iꞌatuꞌe teꞌe­ru­we­kaipyi. Atunug yt naku i pote yt naku i nug hat areĩneꞌen iꞌatuꞌe at kaꞌap teꞌe­ru­we­wa­nẽtup hawe. Saꞌa­wy­ꞌi­pyite ainug hap eꞌat pe turan Tupana tiwan miitꞌin pyꞌa pe wanẽtup hawe tomi­ky­ꞌesat koꞌi kat som waku kat som yt naku i wanẽtup hap. Miꞌi hap kaipyi watikuap Tupana woꞌo­nãpin hap toĩneꞌen miitꞌin pyꞌa pe hap yt taꞌa­tukuap i te taꞌa­tue­waure kaꞌa puo Tupana ehay wen maꞌato taꞌa­tukuap kahato taꞌa­tu­pyꞌa pe teꞌe­ru­wewãi hap koꞌi kat som waku kat som yt naku i watunug hap koꞌi taꞌa­tukuap kahato.

"

¹⁶ Uito ti Pauru Tupana ehay wakuat sese Iesui etiat moherep hat. Mio tã areꞌe wuatꞌi ywania pe — Uhytꞌiꞌin manaꞌin Tupana tipo­ꞌoro raꞌyn ahowawi Aheha­kye­raꞌat hat are. Toipo­ꞌoro raꞌyn Tosa­ꞌyru Iesui Aipo­rekuat nuat. Eweimohey ro Iesui eipyꞌa pe eiwa­nẽtup hawe. Ewetunug no Iesui Eipo­rekuat no. Tupana tikuap kahato eiwa­nẽtup hap eipyꞌa piat. Putꞌokꞌe aru uwe waku uwe yt e hap eꞌat. Miꞌi e hap eꞌat pe Iesui tiꞌa­tu­mo­herep Toꞌywot Tupana pe uwe temiitꞌin sese uwe yt hap are. Toikuap kahato wuatꞌi miitꞌin wanẽtup hawiat koꞌi migꞌi wuat. Toikuap sese sio wẽtup ok tomohey hat sese toĩneꞌen sio yt hap toikuap sakpo are. Miꞌi pote Iesui ehay pyi aru Tupana aheha­kye­raꞌat wuatꞌi eꞌat pe sio aiꞌa­piheg wuatꞌi eꞌat pe. Uito Pauru miꞌi tã areꞌe wuatꞌi ywania pe.

"

¹⁷ Mesuwe uimiwan me uhehay teran Ahaꞌa­seꞌi Aparãu emiariru emiari­ruꞌin me. Uiꞌy­wania Iuteu ywania — Uruto ti Iuteu ywania sese watoꞌe iraniaꞌin ywania pe. Nimo te Tupana sese mohey haria uruto watoꞌe iraniaꞌin me. Haꞌa­wy­tepyi Tupana uruꞌairo toꞌy­wania sese wo watoꞌe iraniaꞌin ywania pe aito Iuteu ywania Tupana sese mõtypot haria sese uruto watoꞌe. Nimo pyi te wuatꞌi ywania eꞌyianme uruimohey Tupana Koro watoꞌe iraniaꞌin me. Taꞌi uruepe yn saꞌa­wyꞌi Tupana tuwe­mo­herep watoꞌe. Uruepe yn tutum topo wuat miwan uruwo­ꞌo­nãpin hap miwan miat watoꞌe iraniaꞌin ywania pe."

¹⁸ Urumikuap yne kat som Tupana tiky­ꞌesat miitꞌin tunug hap watoꞌe wuatꞌi ywania pe. Uruikuap kahato Tupana miwan kaipyi kat som waku kat som yt naku i hap watoꞌe. Uruikuap kahato urupyꞌa pe kat e hap yt pywuat i hap katu­pono Tupana e hap miwan miat tutum uruepe watoꞌe iraniaꞌin me."

¹⁹ Taꞌi uruto ti iraniaꞌin yt ikuap i te hanuaria muꞌe sese haria watoꞌe iraniaꞌin ywania pe. Eiperia muꞌap upiaria yt ihapytig i rakaria ewywuaria eipe watoꞌe. Eiperia aikotã muꞌap iꞌypyryp wiat yt kat i ariãty ipo piaria rakaria ewywuaria watoꞌe iraniaꞌin me. Uruto eimuꞌe sese hanuaria urutu­kup­teꞌen watoꞌe torania ywaniaꞌin me."

²⁰ Iraniaꞌin ywania yt weꞌeg i te haria moweꞌeg haria uruto watoꞌe yne Tupana woꞌo­nãpin hawe. Tupana miwan yianmiat kuap haria uruto watoꞌe. Taꞌi Tupana miky­ꞌesat koꞌi yne kuap haria uruto watoꞌe kat som waku kat som yt nakuat i hap kuap haria uruto watoꞌe yne iraniaꞌin ywania pe aikope aikope ahewyry hap tote.

"

²¹ Uito Pauru uiꞌywot uity Iuteu ywania sese miꞌi pote uito iꞌewyte areĩneꞌen Iuteu. Miꞌi pote atikuap pywo yne aiꞌe hap uiꞌy­wania maꞌato waku watu­we­muꞌe wy uiꞌy­wania karãpe wati­ꞌa­tu­muꞌe iraniaꞌin waku ahewaure kaꞌa kahato iꞌatu­muꞌe ahepiat hap kape. Kat pote yt watunug i aipot­muꞌe hap ewywuat pote yt iweꞌeg hin i rakaria ewywuaria wato­py­huꞌat aimi­mu­ꞌeria wanẽtup hawe. Pywo ti rat waku watunug aimienoi ok tã. — Yt sero­ꞌok­ꞌe­weiꞌe teiꞌo watoꞌe iraniaꞌin me pote waku iꞌewyte yt sero­ꞌokꞌe hat wo i wato­py­huꞌat aipot­mi­nãpin hap ewy."

²² Yt ewary wary teiꞌo yt eꞌaito aito teiꞌo watoꞌe aimi­mu­ꞌeria pe pote waku wy wato­py­huꞌat iꞌewy iweꞌeg kahato rakaria wo. Waku yt kat i aiwary wary hap iꞌewyte yt kat i aheꞌaito eꞌaito hap are. Waku aiwe­nãpin hawe aimi­muꞌe ewywuat. Maꞌato yt watunug i ahepiat miitꞌin nãpin hap ewy pote aiꞌe hap yt kan hamo i iꞌatu­wa­nẽtup hawe. — Yt naku i kahato iãꞌãkap koꞌi ahetu­pana wo watoꞌe torania ywania pe. Yt naku i aikai mo wat aiminug tupa­naria watoꞌe iraniaꞌin me. Maꞌato miꞌi tã wati­ꞌa­tu­muꞌe pote waku wy wati­moma torania tupa­naria aikaipyi. Haꞌa­wyte aiꞌy­wania timoma iraniaꞌin ywania tupa­naria imõtypot yat piat koꞌi maꞌato miꞌi koꞌi taꞌa­tu­we­neru yne tupa­naria itotiaria saꞌup kyꞌewi — Eweiꞌa­tu­moma ro tupa­naria yne e Tupana pytkai. Miꞌi pote iꞌatu­mi­mu­ꞌeria weky­ryꞌi wuanuaria teꞌe­ro­py­huꞌat itote te. Yt naku i miꞌi tã wati­ꞌa­tu­muꞌe iraniaꞌin turan."

²³ — Urunãpin Tupana piat hap wakuat kahato watoꞌe maꞌato wãiwa­toꞌe pytkai yt watunug hin i ahepiat miitꞌin muꞌe hap ewy miꞌi pote iraniaꞌin toꞌo­ky­ryꞌi kahato Tupana sese ete aiminug saꞌag upi."

²⁴ Aikotã nimo te Tupana toꞌe aiꞌy­wa­niaꞌin me hap ewy mio tã e miwan me — Uimi­ꞌai­roria eimi­mu­ꞌeria iraniaꞌin ywaniaria toꞌo­ky­ryꞌi kahato uhehay ete katu­pono eiperia typy sehay nug haria ewywuaria eweikup­teꞌen. Yt ewetunug Tupana piat einãpin hap ewy hawyi eimi­mu­ꞌeria miky­ryꞌi koꞌi eweikut­p­teꞌen. — Ewetunug no yne Tupana piat ainãpin hamuat eweiꞌe iraniaꞌin me yt ewetunug hin i uhepiat einãpin hap pytkai e Tupana ahaꞌa­se­ꞌiꞌin me nimo te."

²⁵ Uruto ti Iuteu ywania sese watoꞌe iraniaꞌin me. Miꞌi hap moherep hamo uruesa­ꞌy­ruꞌin emusin ãpy sokpe uruitek teꞌe­ru­we­mo­herep 8 eꞌat tokosap hawyi — Tupana urutum neran uruesa­ꞌyru epe emiky­ꞌesat nug hamo watoꞌe itote Tupana mõtypot yat pe. Miꞌi hawyi Tupana wano topy­huꞌat uruesa­ꞌy­ruꞌin watoꞌe iraniaꞌin me. Uiꞌy­wania pywo pe ti areꞌe ehepe yt watunug i Tupana piat ainãpin hap pote yt kan hamo i aheko ahaꞌy­ruꞌin emusin ãpy sokpe tek hap. Miꞌi hamo imoherep Tupana pe watunug neran torania ainãpin ewywuat hap e. Maꞌato yt watunug i Tupana e hap pote yt kan hamo i aheko aiwe­musin ãpy sokpe tek hap — Uito Tupana ywania hap moherep hap are. Taꞌi aikotã iraniaꞌin ywania ewywuaria wato­py­huꞌat yt watunug i Tupana miky­ꞌesat yne ewywuat hawyi."

²⁶ Maꞌato iraniaꞌin yt Iuteuria i yt teꞌe­re­musin ãpy sokpe tek hin i aheko ewy pytkai Tupana miky­ꞌesat nug haria tukup­teꞌen tuereto yt kat i iꞌatue­musin ãpy sokpe tek hat i pytkai. Miꞌiria ti Tupana miky­ꞌesat ewy nug haria pote teꞌe­ro­py­huꞌat poꞌog aiꞌy­wania Iuteuria kai Tupana wanẽtup hawe — Uiꞌy­wania sese torania uimi­ky­ꞌesat nug haria tukup­teꞌen e sio Iuteu sio yt e Tupana mesup e."

²⁷ — Karãpe iraniaꞌin ywania tunug uimi­ky­ꞌesat ewywuat miꞌiria ti uhemiitꞌin sese tukup­teꞌen e Tupana sio Iuteu ywania sio wẽtup ywania sio iꞌatue­musin ãpy sokpe tek hap toĩneꞌen Iuteu ywania ewywuat sio yt e. Eiperia ti uiꞌy­wania Iuteuria ywania ewywuaria e Tupana iꞌatuepe. Yt eweikuap i te uimi­ky­ꞌesat koꞌi miwan miat pytkai uimi­ky­ꞌesat nug haria eweikup­teꞌen mote e Tupana iraniaꞌin ywania pe yt taꞌa­tu­ꞌa­tukuap i te ahaꞌa­seꞌi Musei piat ainãpin hap pytkai are. Uiwy­riaꞌin Iuteu ywania watikuap kahato ahaꞌa­seꞌi Musei e hap koꞌi maꞌato tukup­teꞌen kahato aitoria yt inug hin i rakaria. Miꞌiria pe wyti aru Tupana toꞌe — Iraniaꞌin ywania poꞌog eikai katu­pono uimi­ky­ꞌesat koꞌi taꞌa­tu­ꞌa­tunug yne taꞌa­tu­mikuap ok tã maꞌato eiperia yt ewetunug hin i eweikuap yne uimi­ky­ꞌesat koꞌi pytkai e. Miꞌi pote iraniaꞌin ywania poꞌog waku eikai e Tupana aru aiꞌy­wania iraniaꞌin me yt imiky­ꞌesat ewy nug haria pe."

²⁸ Uiꞌy­wania watikuap mesup aikotã Tupana tikuap temiitꞌin sese hap. Toikuap kahato tomi­ky­ꞌesat nug haria sio Iuteu ywania sio yt sio iꞌatue­musin ãpy sokpe tek hat toĩneꞌen sio yt e. Taꞌi yt aipiit kaipyi i Tupana tikuap toꞌy­wania wo watoĩ­neꞌen hap."

²⁹ Taꞌi Tupana ikuap kahato toꞌy­wania sese koꞌi katu­pono sio toĩneꞌen taꞌa­tu­pyꞌa pe Topãꞌãu Wakuat sio yt hap. Toikuap kahato sio waku pe tukup­teꞌen sio yt hap. Yt tehaꞌat hin i wemusin ãpy sokpe tek hap toĩneꞌen sio yt hap kape maꞌato aiwa­nẽtup hap kape tehaꞌat kahato hawyi aipyꞌa piat kape tehaꞌat kahato hawyi toikuap yne raꞌyn aipyꞌa piat sio waku sio yt. Miꞌi hawyi toꞌe Topãꞌãu miky­ꞌesat nug haria pe — Eipe uiꞌy­wania sese e katu­pono Uipãꞌãu miat einãpin hap ewy kahato ewetunug e. Miꞌi pote eipe uiꞌy­wania sese eweikup­teꞌen e Tupana tomi­ky­ꞌesat nug haria pe sio Iuteu ywania sio wẽtup ywania pe. — Waku kahato eipe e Tupana ahepe pote waku pe watoĩ­neꞌen. Karãpe iraniaꞌin — Yt naku i kahato eipe iꞌatuꞌe ahepe wen maꞌato watikuap yt pywo pe i raꞌyn iꞌatuꞌe hap katu­pono Tupana wanẽtup hawe waku pe watoĩ­neꞌen mote. uito Pauru.

"

3

¹ Eiperia Humanu ywania wen maꞌato uito Pauru Iuteu ywania areĩneꞌen. Waku kahato uiꞌy­wania are. Iuteu ywania waku kahato katu­pono saꞌa­wyꞌi sese Tupana tiꞌairo urueꞌa­seꞌi pot Aparãu. Miꞌi hawyi toꞌe tope — Atiꞌa­tu­poi­tyro kahato aru wuatꞌi miitꞌin mesuwat yi totiaria wẽtup esaipe­piaria emiariru emiariru wo e. Miꞌi pote Iuteu ywania titek taꞌa­tue­sa­ꞌyru emusin sokpe ãpy ete — Uruto Tupana miꞌai­roria e hamo. Pyno waku apo aiꞌy­wania sio yt."

² Pywo ti kẽi waku kahato topy­huꞌat Iuteuria ywania. Uito Pauru ti Iuteu ywania sese are. Waku kahato Iuteu katu­pono yne ywania eꞌyianmete Tupana tum tehay uruꞌy­wania pe. Saꞌa­wyꞌi tuwe­mo­herep sese urueꞌa­se­ꞌiꞌin me. Saꞌa­wyꞌi Tupana ihay kahato uruꞌy­wania miwan me katu­pono tuwe­mo­herep teran wuatꞌi ywania pe urumiwan wo."

³ Tutum tehay urueꞌa­se­ꞌiꞌin saꞌa­wy­ꞌi­wuaria Tupana mohey kahato haria pe maꞌato iꞌatu­me­pytꞌin iꞌatue­mia­ri­ruꞌin tiwaure kahato iꞌatu­mienoi Tupana ehay. Miꞌi hawyi yt taꞌa­tu­mohey i kahato Tupana. Miꞌi pytkai yt karãpe i Tupana waure wo toĩneꞌen aru Iuteu ywania kai. Taꞌi Tupana ti uruꞌy­wania kyꞌe sese hat wuatꞌi eꞌat pe. Taꞌi Tupana miꞌairo ywania pote urutu­kup­teꞌen ne. Uruto wuaria Iuteuria tiꞌatoiat kahato Tupana haꞌa­wy­tepyi wen maꞌato yt karãpe i Tupana uruꞌatoiat katu­pono — Yt karãpe i woro­ho­ꞌo­ꞌatoiat esaipe­piaria e Tupana saꞌa­wyꞌi Urueꞌa­seꞌi Aparãu me pote."

⁴ Tupana ti yt heso kuap i rakat pãi. Saꞌa­wyꞌi — Atiꞌa­tu­poi­tyro aru emiariru emiari­ruꞌin e Tupana urueꞌa­se­ꞌiꞌin me. Miꞌi hap ete yt karãpe i Tupana heso. Tutunug yne toꞌe hap ewywuat. Urutoria Iuteu ywania heso kuap maꞌato Tupana yt karãmuat i heso kuap e. Aikotã morekuat Tawi pe toꞌe saꞌa­wyꞌi hap ewy tutunug wuatꞌi eꞌat pe. Mio tã toꞌe — Tawi e atunug aru uiꞌe hap ewywuat wuatꞌi eꞌat pe e. Atunug esaipepiat Morekuat Koro wo wuatꞌi eꞌat pe e. Eꞌywania yt uimohey i pytkai aru atunug uiꞌe hap ewy e. Yt uwe i uipyhyp kuap uiꞌe hap nug hamuat ete e Tupana nimo morekuat Tawi pe hawyi toiwan towepy hap miwan me."

⁵ Pywo ti rat uruꞌy­wania Iuteuria yt timohey kahato i Tupana e hap — Atunug aru e hap pytkai Tupana tunug yne toꞌe hap ewy. Uruiꞌatoiat Tupana pytkai yt uruꞌatoiat hin i. Miꞌi hap kaipyi watikuap Tupana yn ni waku sese rakat yt uruꞌewy hin i hap. Miꞌi pote uruminug saꞌag hap topy­huꞌat Tupana mõtypot ran hap ewywuat kat pote urukyꞌe sese te yt nakuat i uruto pytkai. — Eikyꞌe sese pote kat pote eiꞌa­piheg apiheg kahato iꞌatuꞌe saꞌag iraniaꞌin uruepe."

⁶ Eweikuap kat pote uruꞌa­piheg urukyꞌe haype aikotã aiꞌy­wotꞌin aiꞌa­piheg aihire te hap ewy Tupana uruꞌa­piheg urukyꞌe haype pote. Tupana ti hãpyk sakpo te miꞌi pote toiꞌa­piheg kahato aru wuatꞌi yt naku i nug haria — Yt uruꞌa­piheg neiꞌo yt uruꞌa­piheg neiꞌo iꞌatuꞌe pytkai. Tupana uruminug saꞌag ni emõtypot hap topy­huꞌat wuatꞌi eꞌat pe iꞌatuꞌe saꞌag. Taꞌi aiminug saꞌag kaipyi miitꞌin tikuap kahato Tupana poꞌog waku aikawiat rakat iꞌatuꞌe saꞌag toꞌope."

⁷ Aheso pote Tupana e hap poꞌog pywo topy­huꞌat kat pote Tupana yt heso i rakat toĩneꞌen pytkai aito heso rakaria wo watoĩ­neꞌen iꞌatuꞌe saꞌag toꞌope. Miꞌi pote aheso hap kaipyi Tupana waku hap poꞌog heremo topy­huꞌat. Taꞌi waku watunug yt naku i Tupana mõtypot hamuat iꞌatuꞌe saꞌag. Miꞌi pote ti yt karãpe i aiꞌa­piheg aru aiminug saꞌag koꞌi ete katu­pono imõtypot hap topy­huꞌat aiminug saꞌag koꞌi kaipyi iꞌatuꞌe maꞌato Tupana tiꞌa­tu­ꞌa­piheg aru wuatꞌi eꞌat pe toꞌe hap ewy."

⁸ — Toꞌiro wuatꞌi ywania waku ti wati­mõ­typot Tupana aiminug saꞌag wo iꞌatuꞌe saꞌag toꞌope. Taꞌi miꞌi tã hap ti aimuꞌe hat Pauru tiky­ꞌesat iꞌatuꞌe uimohit reran haype neꞌi. Saꞌa­wyꞌi ti mio tã e aimuꞌe hat sese Pauru ahepe iꞌatuꞌe toꞌope yt pywo pe i. Miꞌiria yne yne Tupana miꞌa­tu­ꞌa­piheg wuanuaria tukup­teꞌen wuatꞌi eꞌat pe. Tupana tiꞌa­tu­ꞌa­piheg neran miꞌi tã haria ewywuaria.

"

⁹ Iuteu ywania iꞌewyte yne ywania teꞌe­ro­py­huꞌat yt naku i nug haria toꞌo­ꞌe­wy­ꞌewy katu­pono yne yne yt naku i nug haria Tupana wanẽtup hawe. Tupana piat urunãpin hap Musei miwan miat yt urutunug hin i te uruꞌy­wania. Iꞌewyte iraniaꞌin ywania tiꞌa­parap kahato taꞌa­tu­ꞌy­wania wãiꞌe hap koꞌi ete. Miꞌi pote aito torania iꞌaparap haria Tupana wanẽtup hawe e. Miꞌi pote ti yt naku i urutoꞌe iraniaꞌin ywania pe — Uruto ti poꞌog nakat eikai katu­pono uruto waku maꞌato eipe yt nakuaria i yt urutoꞌe kuap i."

¹⁰ Katu­pono saꞌa­wyꞌi Tupana toꞌe miwan me — Yt wẽtup ok i mesuwat yi tote wakuat yn nug hat atipuẽti e."

¹¹ Yt wẽtup miit i uikuap teran sese hat atipuẽti nimo pyi mesup te e. Yt wẽtup ok i mesuwat yi tote atipuẽti uikat reran hat e Tupana."

¹² Yt naku i kat pote yne miitꞌin uiꞌatoiat haria wo tukup­teꞌen e tuwepe. Yt kan hamo i tukup­teꞌen miꞌi tã e. Yt uwe i mesuwat yi totiat atipuẽti waku sese nug hat e Tupana miwan me."

¹³ Iꞌatuehay koꞌi yt hãpyk hin i atipuẽti e. Iꞌatueso hap yn iꞌatuwẽ pe miitꞌin maꞌat hap yn atipuẽti e. Iꞌatuẽku tote sehay nem hap ewywuat yn aikotã miit yt misyp i yi kaꞌa piat ewy nem kahato iꞌatuwẽ pe e. Sehay saꞌag yn tuwẽtem iꞌatuwẽ pyi miitꞌin kuasa hamuat e."

¹⁴ Aikotã moi iãi hy miitꞌin auka hap ewy iꞌatuehay miitꞌin auka hap ewy topy­huꞌat e. Iꞌatuehay aikotã mohag nop takat ewy e. Iꞌatuehay saꞌag uhete iꞌewyte iraniaꞌin ete e Tupana miwan me."

¹⁵ Miitꞌin auka sese haria wo teꞌe­ro­py­huꞌat miitꞌin e. Aikotã miitꞌin ihyha kahato rakaria ewy teꞌe­ru­weput meremo iraniaꞌin atuꞌuka hamo hap ewy. Aikotã awyato tikat yty tomiꞌu wo taꞌa­tukat miitꞌin iꞌauka hamo e."

¹⁶ Aikopuo aikopuo hap saipe upi iꞌatu­moe­ha­ky­ꞌeꞌi koꞌi iꞌatu­mi­satek nug koꞌi tukup­teꞌen e."

¹⁷ Yt karãpe i iraniaꞌin mowepit hap taꞌa­tunug mote yt taꞌa­tukuap hin i iꞌatu­mo­wepit hap e."

¹⁸ Yt karãpe i uimõ­typot hap iꞌatu­wa­nẽtup hawe e Tupana. Uhepiat taꞌa­tu­ꞌa­piheg hap pupi yt teꞌe­ro­kenꞌẽ hin i e Tupana saꞌa­wyꞌi miwan me ahepiat. Mio tã e aito yt naku i nug haria moherep hamuat.

"

¹⁹ Urutoria Iuteuria ywania tikuap kahato Tupana woꞌo­nãpin saꞌa­wy­ꞌiwuat hap Musei mimo­herep kat som waku watunug kat som yt naku i watunug hap. Miꞌi watikuap yne pytkai yt watunug i torania pote wati­ꞌa­parap wãiꞌe hap ete — Ewetunug no e hap ete are. Miꞌi pote yt uwe i mesuwat yi tote uruto — Yt karãpe i atiꞌa­parap Tupana wãiꞌe hap ete yt urutoꞌe kuap i. Iꞌewyte yne aito wuatꞌi puo mesuwat yi totiaria wato­py­huꞌat Tupana miꞌa­piheg wuanuaria wo. Pywo ti rat mekewat eꞌat pe aru — Eiperia yt naku i nug haria e aru Tupana ahepe torania pe. Miꞌi toꞌe pote aru yt uwe i aitoria — U pãi u an yt karãpe i atiꞌa­parap emiky­ꞌesat nug hap ete e haria itote kat pote toiꞌa­tu­mo­herep wuatꞌi ehamo aiminug saꞌag koꞌi e. Miꞌi pote yt wati­wesat kuap i aiwe­mõti hap toĩneꞌen mote e."

²⁰ Yt uwe i tuwe­mo­hãpyk kuap Tupana wanẽtup hawe topiat ainãpin hap Musei mimo­herep miwan nug hap kaipywiat upi e. Taꞌi yne aito wahãꞌãg kahato Tupana piat ainãpin hap nug hamuat ete wen maꞌato aito yt uwe i inug yne ainãpin hap. Wati­ꞌa­tu­ꞌa­parap aparap Tupana piat ainãpin hap ete. Wati­ꞌa­tu­muꞌe kahato aimuꞌe hap Tupana piat kat som waku watunug kat som saꞌag hap ete wen maꞌato wati­ꞌa­parap yn. Miꞌi pote paawa­toꞌe aipyꞌa pe ahepiat yt watunug i pote — Yt naku i kahato uito watoꞌe aiwa­nẽtup hawe aiwepe. Miꞌi pote ti — Uito yt naku i nug hat e hap yn watikuap Tupana piat ainãpin hap kaipyi."

²¹ Aikotã aru pyno wati­puẽti Tupana wywuat aiwo­ꞌo­wese hap are. Pyno ahenoi ehepe. Mio tã e Tupana ahepe — Yt eiminug wakuap kaipyi i woro­ho­ꞌonug eipe waku rakaria e Tupana miwan me. Taꞌi uimohey hap kaipyi woro­ho­ꞌoe­ha­kye­raꞌat e. Uimohey hap eipyꞌa piat kuap hap kaipyi waku pe eweikup­teꞌen uipyꞌa pe uiwa­nẽtup hawe e Tupana miwan me. Atiky­ꞌesat kahato ewetunug yne uhepiat einãpin hap koꞌi maꞌato yt uwe i eiperia inug yne haria miꞌi pote yt uwe i eiperia wakuat e. Eiminug waku hap koꞌi upi yt eweipuẽti i muꞌap uhowawi e Tupana ahepe saꞌa­wyꞌi tehay moherep haria miwan me."

²² — Taꞌi Uhaꞌyru Iesui mohey haria pe yn areꞌe — Eiperia ti waku kahato uiwa­nẽtup hawe uipyꞌa pe e Tupana. Uimi­po­ꞌoro Miitꞌin Porekuat nuat mohey haria yn uimie­ha­kye­ra­ꞌaria e. Miꞌiria yn waku pe uiwa­nẽtup hawe sio Iuteu ywania eipe sio wẽtup ywania e aru Tosa­ꞌyru mohey haria sese pe."

²³ Katu­pono yne ywania yne miitꞌin yt naku i nug haria tukup­teꞌen. Katu­pono yne miitꞌin yt Uito ewy hin i iꞌatue­waku hap ete are e Tupana ahepiat."

²⁴ Pywo kahato uiwy­riaꞌin Tupana ti poꞌog poꞌog waku ahewaku hap kai. Taꞌi ahewaku hap yt Tupana ewaku hap ewy hin i. Miꞌi pote ahewaku hap yt putꞌokꞌe hin i Tupana ewaku hap ete e. Miꞌi pote yne aitoria yt naku i nug haria watoĩ­neꞌen Tupana wanẽtup hawe e. Miꞌi pote mesup Tupana toꞌe ahepe — Uhaꞌyru mohey haria pe yn atum iꞌatue­ha­kye­raꞌat hap wuatꞌi eꞌat piat e Tupana mesup wuatꞌi pe. Uhaꞌyru suu mikyiꞌat upi atum neꞌen neꞌi wuatꞌi eꞌat piat ieĩneꞌen hap e mesup ahepe. Uhegyiꞌat hap upi Uhaꞌyru suu mikyiꞌat upi atum neꞌen neꞌi eimo­waku hap e mesup yne miitꞌin me e."

²⁵ Eikyꞌe haype yt kat i eiminug wakuap pytkai woro­ho­ꞌo­kyꞌe hawyi eheĩneꞌen hap wuatꞌi eꞌat piat hap atum neꞌen neꞌi ehepe Uhaꞌyru Iesui suu mikyiꞌat upi e. Eipo­typot Iesui tikyiꞌat raꞌyn eheĩneꞌen hap yt ikahuro rakat i pote waku eweitat uimiium e Tupana wuatꞌi miitꞌin me. Yt kat saꞌup i rakat atum miitꞌin me Uhaꞌyru Pãꞌãu e Tupana mesup."

²⁶ Miꞌi uiminug kaipyi miitꞌin tikuap taꞌyn Uito wakuat e Tupana. Saꞌa­wyꞌi yt eweikuap i mesuwat muꞌap uhowawiat e ahepe. Mekewat eꞌat pe yt naku i yn ewetunug at kaꞌap e. Maꞌato eiminug saꞌag saꞌa­wy­ꞌiwuat atiwaure torania ewetat raꞌyn Uhaꞌyru suu eipohag wo hawyi e Tupana mesup ahepe. Tupana ti hãpyk kahato rakat yt toiky­ꞌesat hin i aiminug saꞌag. Maꞌato koran toꞌe wuatꞌi miitꞌin me — Eiweꞌeg wo o eiminug saꞌag ete e. Uhaꞌyru suu ti eikoho kuap e. Uhaꞌyru suu ti eimo­hãpyk kuap e. Eweimohey ro miꞌi Uhaꞌyru e. Miꞌi Miit ti eimo­hãpyk kuap e. Uhaꞌyru mohey haria wo eweikup­teꞌen hawyi uikuap haria wo eweikup­teꞌen e. Miꞌi hawyi eweikuap uhewaku hap e koran yne miitꞌin me e Tupana."

²⁷ Pyno koran aito yt uwe i watoꞌe kuap — Tupana uito waku kahato kat pote atunug yne emiky­ꞌesat koꞌi ewy pote waku uheha­kye­raꞌat uhewaku hap upi hat yt pywo pe i ahehay mio tã watoꞌe pote. Pyno kat e hap som waku pyno watoꞌe Tupana pe. Pyno mio tã e yn watoꞌe waku — Tupana atimohey kahato Esaꞌyru Iesui ikuꞌuro uika­wiano uiminug saꞌag moma hamo uheha­kye­raꞌat hamo watoꞌe waku. Miꞌi e hap ewy Tupana yn miky­ꞌesat ewywuat."

²⁸ Kat pote Tupana tiky­ꞌesat kahato ainug kahu Tosa­ꞌyru mohey hap kaipywiat hap wuatꞌi aimo­hãpyk hap maꞌato — Uito ti atunug yne torania Tupana piat uinãpin hap pote waku pe Tupana wywo areĩneꞌen watoꞌe aiwa­nẽtup hawe pote aiwe­maꞌat hap topy­huꞌat kat pote aiminug wakuap koꞌi yt putꞌokꞌe hin i aheha­kye­raꞌat hamo e. Miꞌi muꞌap yt muꞌap i Tupana kape sio aito Iuteu ywania sio wẽtup ywania.

"

²⁹ Pywo ti rat Tupana sese toĩneꞌen Iuteu ywania eTupana wo iꞌewyte Tupana sese toĩneꞌen wy yne ywania eTupana wo. Tupana yt iꞌatu i are. Wẽtup Tupana yn ni toĩneꞌen are. Tupana sese yn toĩneꞌen wuatꞌi ywania nug hat. Karãpe Iuteu ywania timohey Tupana Saꞌyru hawyi — Waku pe eweikup­teꞌen mesup uiwa­nẽtup hawe e Tupana ahepe."

³⁰ Iꞌewyte karãpe iraniaꞌin ywania timohey Haꞌyru hawyi pyno — Waku pe eweikup­teꞌen e Tupana. Pyno wẽtup Tupana yn toĩneꞌen Aiꞌywot no sio aito Iuteu ywania kawiat sio aito iraniaꞌin ywania kawiat. Tupana Wato wẽtup yn toĩneꞌen. Miꞌi ti Iuteu ywania nug hat iꞌewyte iraniaꞌin ywania nug hat wẽtup Tupana wuatꞌi nug hat yn toĩneꞌen."

³¹ Karãpe wato­mohey Iesui hawyi yt naku i watoꞌe — Mesup ti uito Iesui mohey hat miꞌi pote yt atiky­ꞌesat i poꞌog Tupana piat uinãpin hap koꞌi yt naku i watoꞌe. Poꞌog waku watoꞌe aiwo­ꞌope — Iesui mohey haria aito pote waku watunug yne yne Tupana miky­ꞌesat koꞌi aiꞌe hap waku watoꞌe aiwo­ꞌope are. Uito Pauru.

"

4

¹ Pyno toꞌiro watu­wa­nẽtup saꞌa­wy­ꞌiwuat ahaꞌa­seꞌi Aparãu kape. Aparãu ni uruꞌy­wania Iuteuria eꞌaseꞌi pot. Urueꞌa­seꞌi pot timohey kahato Tupana sese topyꞌa pe hawyi — Uiwy kahato en Aparãu e Tupana tope e miwan me."

² Yt karãpe i Aparãu toꞌe — Taꞌi waku kahato rakat uito pote Tupana uheha­kye­raꞌat yt e hin i miitꞌin me. Taꞌi yt tuwe­mõ­typot hin i Aparãu e. Maꞌato mio tã toꞌe saꞌa­wyꞌi miwan me — Aparãu e uimohey pote waku pe ereĩneꞌen uiwa­nẽtup hawe e Tupana tope."

³ Pyno Aparãu timohey kahato Tupana hawyi Tupana mimo­hãpyk wo topy­huꞌat ahaꞌa­seꞌi.

"

⁴ Mesu­wa­ro­tiaria miitꞌin ipotpap takaria aheropat haria pe watum haꞌup wẽtup eꞌat ipotpap hap watum. Wẽtup eꞌat ipotpap saꞌup watum hawyi totat hawyi — Waku e uipotpap saꞌup taꞌyn toĩneꞌen e. Totat hawyi yt karãpe i toꞌe — Yt kat i uipotpap pytkai tutum neꞌen neꞌi uhepe tomiium yt kat saꞌup i yt e i kat pote ipotpap at hap upi totat saꞌup pote."

⁵ Maꞌato yt miꞌi tã hin i Tupana piat aheha­kye­raꞌat hap kat pote yt wati­kyiꞌat kuap i aipotpap wakuap mo Tupana piat aheha­kye­raꞌat hap katu­pono ahewaku hap aipotpap at kaꞌap hap saꞌup yt putꞌokꞌe i ikyiꞌat hamo e. Wati­mohey Iesui hawyi yn tutum neꞌen neꞌi ahepe yt naku i rakaria aito pytkai e. Tosa­ꞌyru mohey haria pe Tupana toꞌe — Eiminug saꞌag ahyt kahato maꞌato eweimohey Uhaꞌyru suu eipohag wo pote woro­ho­ꞌoe­ha­kye­raꞌat eipe Uhaꞌyru piat haꞌup nug hap upi e ahepe. Imohey pote uiwa­nẽtup hawe yt saꞌag nug haria ewy hin i eweikup­teꞌen e. Mio hãpyk kahato eipe uiwa­nẽtup hawe Uhaꞌyru miium upi e Tupana ahepe Iesui mohey haria pe."

⁶ Morekuat Tawi henoi tomiwan me yianmete Aheha­kye­raꞌat hat ete. Mio tã e — Waku kahato ti Tupana e katu­pono Uheha­kye­raꞌat kahato hat atimohey hawyi e yt naku i nug hat uito pytkai — Waure wo areĩneꞌen eminug saꞌag kai e uhepe e Tawi. — Uimohey hat en hawyi waku puo ereĩneꞌen uiwa­nẽtup hawe e uhepe yt kat i uiminug wakuap pytkai. — Woroe­ha­kye­raꞌat en Tawi uimohey hap upi e Tupana saꞌa­wyꞌi uhepe e."

⁷ — Waku kahato En Tupana are. Mesup ti waure wo Tupana toĩneꞌen aiminug saꞌag koꞌi kai e ahepe. Waku kahato wuat sakpoꞌe En Tupana watoꞌe. Waku sese En watoꞌe. Tupana tiꞌa­tu­mo­weityk yne wuatꞌi aiꞌe hap saꞌag koꞌi kat aiꞌe kat aiꞌe tetiat hap toiwuare torania wato­mohey hawyi e. — Aimo­wehum kahato hat En Tupana e tomiwan me towepy puo."

⁸ — Tupana etikuap kahato yne uruminug saꞌag koꞌi iꞌatu hap etiat. Tukup­teꞌen kahato yne yt naku i hap uruete e. Maꞌato miꞌi saꞌag koꞌi yne etiꞌa­tu­mõto raꞌyn pya urukai uruimohey En hawyi e morekuat Tawi. Tupana waku kahato mesup urupyꞌa pe e katu­pono koitywy aiwo­ꞌo­wese hap toĩneꞌen i etiwaure yne raꞌyn uruminug saꞌag koꞌi hawyi e. Waku kahato ti rat koitywy. Uruwehum kahato ewawi uruwepit hap mywo urupyꞌa perup i kahato hawuo e morekuat Tawi tomiwan me towepy hawe nimo te."

⁹ Pyno morekuat Tawi ihay aiwepit hap ete. Morekuat Tawi yt toꞌe hin i — Wemusin sokpe ãpy tek haria yn ni Tupana mimo­wepit rakaria tukup­teꞌen yt e i are. Pywo ti koitywy iꞌatu kahato Tupana mowepit haria tomohey haria yt teꞌe­re­musin ãpy tek hin pytkai i. Pywo ti koitywy iꞌatu kahato Tupana mowepit haria imohey haria yt teꞌe­re­musin sokpe ãpy tek hin i pytkai. Aikotã ahaꞌa­seꞌi pot Aparãu toꞌe hap ewy mesup — Woro­mohey En Tupana e. Atiꞌa­tu­mohey kahato raꞌyn yne eꞌe hap uhowawiat e. Atiꞌa­tu­mohey etunug aru eꞌe hap ewy hap e hawyi Tupana toꞌe Aparãu me — Uimohey en mote waku pe ereĩneꞌen uiwa­nẽtup hawe uipyꞌa pe mehĩ e ti Tupana ahaꞌa­seꞌi koro Aparãu me."

¹⁰ Saꞌa­wyꞌi sese yt kat i ahaꞌa­seꞌi pot emusin ãpy sokpe tek hap i te turan Tupana toꞌe Aparãu me — Uimohey hat en mote uiwy kahato en e. Uimohey kahato en mote waku pe aru ereĩneꞌen e tope. Uiwa­nẽtup hawe hãpyk takano ereĩneꞌen uimohey en mote e mekewat uruꞌy­wa­niaꞌin miat hemusin ãpy sokpe tek hap eꞌyianmete."

¹¹ Ahaꞌa­seꞌi Aparãu toĩneꞌen Tupana mohey potꞌi wo raꞌyn hawyi tuwe­musin ãpy sokpe tek taꞌyn iꞌewyte tosa­ꞌy­ruꞌin wat toitek kyse hit wo toꞌy­wania kuap hap uruꞌy­wania eko ewywuat uruto Tupana mohey haria e hamo toitek. Koitywy ahaꞌa­seꞌi Aparãu toĩneꞌen yne Tupana mohey haria ypy ewywuat. Toimohey saꞌa­wyꞌi aheꞌyianme pote Aparãu topy­huꞌat mesup Tupana sese mohey haria eꞌaseꞌi pot no raꞌyn. Koitywy ahepe imohey haria pe aikotã saꞌa­wyꞌi Aparãu me toꞌe hap ewy raꞌyn — Uiwa­nẽtup hawe hãpyk takaria eipe e Tupana ahepe sio aito aimusin sokpe ãpy tek sio yt pytkai e ahepe Tupana mesup."

¹² Uruꞌy­wania eꞌaseꞌi pot ti Aparãu topy­huꞌat. Uruto ti meimuẽwat wemusin sokpe ãpy tek haria urueko ewywuat. Uruto ti Aparãu piit kawiaria. Maꞌato tukup­teꞌen urupy­ꞌa­setpe yt Tupana mohey hin i haria. Miꞌiria wemusin sokpe tek hap toĩneꞌen wen maꞌato miꞌiria pe yt karãpe i Tupana toꞌe — Eipe waku kahato uimohey hat Aparãu ewywuat yt e i katu­pono miꞌiria yt imohey i Aparãu ewywuat pote are. Ahaꞌa­seꞌi Aparãu mimohey ewywuaria yn ni Aparãu saipe­piaria sese."

¹³ Saꞌa­wyꞌi Tupana toꞌe Aparãu me — Meiũran aru atum yne mesu­wa­rotiat epe iꞌewyte esaꞌy­ruꞌin me iꞌewyte wuatꞌi ywania emiit no iꞌatu kahato waikiru sem iꞌatu hap ok tã atum epe Aparãu uimohey hat kahato en mote e. Miꞌi hawyi Aparãu toꞌe — Tupana woro­mohey En e. Atimohey eꞌe hap ewy iꞌewyte atimohey raꞌyn etunug aru eꞌe hap koꞌi e. Miꞌi pote Tupana toꞌe tope — Aikotã yt karãpiat i iꞌaparap hat ewy ereĩneꞌen uiwa­nẽtup hawe mehĩ uiꞌe hap etimohey yn mote e Tupana nimo yt kat i te Musei piat ahewãi hap Tupana tum te turan Aparãu me yt kat i te Musei woꞌo­nãpin hap te turan. Katu­pono Musei ti Aparãu emiariru emiariru kahato.

"

¹⁴ Maꞌato iraniaꞌin mesu­wa­ro­tiaria — Watunug yne Tupana wãiꞌe hap hawyi waku pe raꞌyn watoĩ­neꞌen Tupana wanẽtup hawe e haria heso rakaria tukup­teꞌen Tupana wanẽtup hawe. Pywo ti rat yt kat i Tupana mohey hap aikai pytkai watunug ahaꞌa­seꞌi Musei mimo­herep Tupana e hap hawyi yt naku i te rat watoĩ­neꞌen Tupana wanẽtup hawe. Kat pote yt uwe i aito Musei miwan miat nug yne haria. Yt karãpe i Tupana toꞌe — Ewetunug yne waĩꞌuiꞌe Musei piat pote waku pe eweipy­huꞌat uiwa­nẽtup hawe yt e i. Maꞌato mio tã e Tupana pote yt uwe i aito waku pe wato­py­huꞌat Tupana wanẽtup hawe yt uwe i aito toran Tupana e hap nug haria pote. — Waku pe ereĩneꞌen uimohey hat en mote e Tupana. Yt karãpe i maꞌato Tupana toꞌe i Aparãu me — Etunug yne uiꞌe hap koꞌi miꞌi pote ti aru waku pe ereĩneꞌen uiwa­nẽtup hawe yt e hin i. Iꞌewyte mio tã yt e hin i ahepe. Maꞌato Tupana toꞌe iraniaꞌin e hap ewy pote — Etunug yne Musei wãiꞌe hap pote neꞌi ti aru uiwa­nẽtup hawe waku pe ereĩneꞌen e pote yt uwe i aitoria waku pe watoĩ­neꞌen Tupana wanẽtup hawe katu­pono aitoria iꞌaparap yne haria katu­pono yne aito wati­ꞌa­parap iꞌe hap ete. Maꞌato miꞌi pytkai yne aito Tupana mipoi­tyro koꞌi watoĩ­neꞌen katu­pono wato­mohey Tupana Aparãu ewywuat aito pote."

¹⁵ Maꞌato watoꞌe iraniaꞌin ewywuat — Watunug yne Tupana piat ainãpin hap hawyi waku pe watu­kup­teꞌen Tupana wanẽtup hawe Musei woꞌo­nãpin hap nug yne pote. Eiweꞌeg wo o Katu­pono miꞌi e hap koꞌi ete eweiꞌa­parap yn wẽtup e hap ete hawyi Tupana ipyꞌahak eiminug saꞌag ete. Nimo te Musei eꞌat eꞌyianme ti yt kat i hin i Tupana piat — Yt etunug neiꞌo e hap sio — Etunug no e hap koꞌi hap eꞌat pe yt uwe i iꞌaparap kuap Tupana piat ainãpin hap ete. Yt kat i Tupana piat aiꞌa­piheg hap mekewat eꞌat pe. Mekewat eꞌat yt wati­ꞌa­parap kuap i wãiꞌe hap ete yt kat i pote. Maꞌato toimo­herep hawyi ti iꞌaparap haria wo wato­py­huꞌat yt watunug i hawyi."

¹⁶ Maꞌato Tupana toꞌe Aparãu me — Uiwy e uimohey pote waku pe kahato ereĩneꞌen uiwa­nẽtup hawe e. Miꞌi hap ewy te koitywy toꞌe ahepe — Eweimohey Uhaꞌyru hawyi atum eheĩneꞌen wuatꞌi eꞌat piat hamuat e. Yt kat saꞌup i ete atum neꞌen neꞌi Uhaꞌyru mohey haria pe e. Uhaꞌyru tum naꞌyn tosuu haꞌup mo e Tupana ahepe mesup. Watat Haꞌyru aipyꞌa pe hawyi wato­py­huꞌat ahaꞌa­seꞌi pot piat imohey hap ewywuaria. Miꞌi pote yt toꞌe hin i ahepe Tupana — Ewetunug yne wãiꞌuiꞌe hap hawyi waku pe eweikup­teꞌen uiwa­nẽtup hawe yt toꞌe i ahepe maꞌato aikotã toꞌe Aparãu me miꞌi hap ewy te toꞌe ahepe mesup — Uimohey haria pote woro­ho­ꞌoe­ha­kye­raꞌat e ahepe mesup."

¹⁷ Mio tã e Tupana Aparãu me miwan me nimo te — Woronug aru wuatꞌi ywania ywot pot no e. Wuatꞌi ywania eꞌaseꞌi koro wo ereĩneꞌen aru uiꞌe hap ewy e. Atunug waku yne esaipe­piaria uimohey haria eꞌewy e Tupana Aparãu me nimo te. Miꞌi hawyi toiwesat — Woro­mohey En pãi e. Atimohey yne eꞌe hap — Atunug aru eꞌe hap atimohey e Aparãu Tupana pe. Atimohey kahato uiku­ꞌuro rokirẽ uimoieĩ­neꞌen kuap hat En hap e Aparãu. Atimohey kahato etunug kuap yne yne yt kat kawiat i hap atimohey e."

¹⁸ Miꞌi pote Tupana toꞌe Aparãu me — Taꞌi emẽpytꞌin sem ni aru atum kahato epe e. Esaꞌy­ruꞌin sem esaki­ꞌytꞌin sem ni aru atum epe e. Iꞌatu kahato atum epe aikotã waikiru sem iꞌatu hap ewy aikotã yi kyt iꞌatu hap ewywuaria atum epe e. — Pyno woro­mohey poꞌog En e Aparãu Tupana pe. Taꞌi atimohey — Atunug aru emẽpytꞌin iꞌatu eꞌe hap ewywuat atimohey e Aparãu Tupana pe. Ipotꞌi raꞌyn yt wẽtup imẽpyt i raꞌyn turan miꞌi tã e hap toimohey. Toimohey pote mesup taꞌyn imẽpytꞌin koꞌi typyꞌi rakaria tukup­teꞌen kahato. Koitywy iꞌatu ywania Tupana mohey haria ywot pot topy­huꞌat Tupana e hap ewy."

¹⁹ Saꞌa­wyꞌi Aparãu iporo kahato hap wywo yt tosa­ꞌyru i te pytkai toimohey te Tupana piat — Atunug aru e hap. Miꞌi hawyi toꞌe — Uiporo sakpo pytkai tutunug aru toꞌe hap ewy e. Taꞌi uipiit porap ikuꞌuro pytkai tutunug aru toꞌe hap ewy e. Taꞌi uheha­ryꞌi iꞌewyte yt myhuꞌat hat i raꞌyn pytkai aru tutum kuap tope hupiꞌa hap atimohey e. Tutum aru uhaꞌyru sese uipiit poro kawiat pytkai e Aparãu tepiat imohey hap pote."

²⁰ Imohey hap yt karamuo i tuwa­nẽtup hawe — Heso som Tupana yt e i maꞌato — Tupana toꞌe atunug aru pote tutum aru toꞌe hap ewy yn e topyꞌa pe. Miꞌi hawyi poꞌog imohey hap ihaĩte tuete saꞌa­wyꞌi kai hawyi meiũran tomohey hap kaipyi Tupana timoe­saika kahato. Miꞌi hawyi Aparãu toꞌe — Tupana arehum kahato ewawi e. Woro­mõ­typot kahato katu­pono etum naꞌyn uhepe eꞌe hap ewy e."

²¹ Atikuap epiat hum hamuat uipyꞌa pe e. Atikuap etunug kuap yne niatpo rakat koꞌi e. Atikuap epiat — Atunug yne aru eꞌe hap etunug yne hap e."

²² Miꞌi pote Tupana iwepit kahato tomohey Aparãu piat hap ete. Miꞌi hawyi Tupana toꞌe tope — Uiwy sese waku pe kahato ereĩneꞌen uipyꞌa pe uimohey kahato hat en mote e."

²³ Ihãpyk kahato rakat ereĩneꞌen uhepe e Aparãu me. Maꞌato yt Aparãu me yn i mio tã e maꞌato yne tomohey haria pe ahepe — Yt kat i saꞌag atipuẽti ekai e tope iꞌewyte ahepe tomohey haria pe."

²⁴ Pyno waku nug hat ereĩneꞌen uipyꞌa pe e Tupana tope uimohey pote e miwan me. — Uimi­kyꞌe en e Aparãu me aimuꞌe hamo tomohey haria aito pote Tupana mikyꞌe koꞌi aito e hamo. Taꞌi Tupana mimo­hãpyk koꞌi aito e hamo miꞌi e hamuat toĩneꞌen iwan me. Koitywy wato­mohey kahato Iesui Tupana timo­hymut i guꞌuro pyi hap wato­mohey kahato. Wati­mohey kahato Tupana tum naꞌyn Tosa­ꞌyru Aipo­typot Koro wuanuat e hap wato­mohey. Taꞌi toꞌe hap ewywuat wato­mohey."

²⁵ Taꞌi wato­mohey kahato Tupana tiꞌa­piheg Tosa­ꞌyru Iesui aiminug saꞌag upiano e hap wato­mohey. Wati­mohey Tupana timoieĩ­neꞌen naꞌyn Tosa­ꞌyru hap toꞌe hap ewy. Miꞌi pote wato­mohey kahato wy Tupana aimoieĩ­neꞌen i hamuat waku hap ete toꞌe hap ewy wato­mohey. Koitywy wato­mohey kahato Tupana ainug tomohey hap kaipywiat wakuaria wo aikotã Tupana — Atunug aru e hap ewy wato­mohey. Aparãu ewywuaria watoĩ­neꞌen imohey hap saipe­piaria aito. Aparãu mẽpytꞌin koꞌi aito. Miꞌi hap eꞌat pe Tupana toꞌe Aparãu me iꞌewyte ahepe — Waku pe ereĩneꞌen uhepe uimohey hat en mote e ahepe. Uito Pauru.

"

5

¹ Wati­mohey Iesui hawyi — Waku kahato eipe e Tupana ahepe. Mio tã e ahepe hawyi aiwepit kahato katu­pono aiwo­ꞌo­wese hap kahato topy­huꞌat Tupana wywo. Wati­mohey Haꞌyru hawyi Aipo­rekuat no topy­huꞌat hawyi watikuap kahato Tupana aiwywo hap e. Miꞌi hawyi meremo watoꞌe tope — Egyiꞌat kahato Tupana katu­pono yt uruewaku i kahato ewawi saꞌa­wyꞌi pytkai ewaku kahato uruepe urutoꞌe mesup epe. Yt nakuaria i uruto pytkai urukyꞌe urutoꞌe. Yt kat i wakuap uruminug pytkai urukyꞌe kahato En katu­pono haꞌa­wy­tepyi urukyꞌe urutoꞌe. Ewanĩ­kaptia uruto te turan urukyꞌe kahato watoꞌe."

² Miꞌi pote — Woro­ho­ꞌo­moieĩ­neꞌen kahato eipe mesuwat yi tote e Tupana mesup ahepe. Miꞌi pote — Uruimõ­typot kahato En Tupana urutoꞌe iꞌewyte urumi­mõ­typot En urutoꞌe. Meiũran aru urutu­kup­teꞌen ewywo emõtypot hap eꞌat pe hap uruimohey kahato miꞌi tã hamuat kape. Miꞌi pote waku kahato En urutoꞌe emowepit hap mywo."

³ Miꞌi pote putꞌokꞌe ahatek hap hawyi watu­wehum yn ne Tupana kape. — Ereĩneꞌen waku kahato Tupana putꞌokꞌe uruete niatpo hap pytkai. Mio tã aiꞌe pote watoĩ­neꞌen motꞌi i imohey sese haria wo. Karãpe watu­wehum motꞌi Tupana ete ahatek hap eꞌat pe miꞌi hawyi waku pe imohey hap katu­pono waha­tyꞌu kuap haria wo wato­py­huꞌat. Miꞌi hawyi wahepap imohey motꞌi hap ete. Ahatek turan yt wati­waure hin i raꞌyn Tupana mohey hap yt naku i ahete pytkai."

⁴ Karãpeĩ watu­wehum motꞌi Tupana kape hoꞌopot hap putꞌokꞌe pytkai miꞌi pote Tupana iꞌewyte tuwehum ahowawi are. Karãpe Tupana toꞌe ahepe — Atunug aru uiꞌe hap ewywuat miꞌi hawyi — Pywo ti rat watoꞌe hawyi poꞌog poꞌog wato­mohey."

⁵ Karãpe watoꞌe — Pywo ti aru taꞌi tutunug ni aru toꞌe hap ewy watoꞌe miꞌi hawyi Ipãꞌãu Wakuat topy­huꞌat kahato ahepe tutum ahepe Topãꞌãu. Miꞌi hawyi aipyꞌa wepit kahato topy­huꞌat katu­pono Ipãꞌãu — Woro­kyꞌe en woro­kyꞌe en e hap yn topy­huꞌat. Miꞌi hawyi ahatek hap neꞌi yt aimo­ꞌarot kuap i raꞌyn katu­pono wato­mohey te ahatek pytkai.

"

⁶ Saꞌa­wyꞌi sese mekewat eꞌat wuat Tupana toꞌe — Atipo­ꞌoro aru En Uhaꞌyru miitꞌin Porekuat nuat e. Uhaꞌyru e koitywy mesuwat eꞌat atiꞌairo eto hamuat yi kape katu­pono hoꞌo­wasat kahato miitꞌin tukup­teꞌen itote pote iꞌatu­minug saꞌag eꞌat yn mote e Tupana tosa­ꞌyru pe. Mio tã e pote Aipo­typot Iesui toto. Miꞌi hawyi aiminug saꞌag kaipywiat aiꞌa­piheg hap tutuꞌu yne aheiam mo."

⁷ Uiwy­riaꞌin niatpo kahato wẽtup ok ehakye­raꞌat hamo aiku­ꞌuro hamuat hap. — Waku rakat sese upi pote pyno ahãꞌãg uiwy sese ehakye­raꞌat yꞌy wato pyi watoꞌe maꞌato yt watipun teran hin i aheĩneꞌen hap wẽtup ok aiwa­nĩkap ehakye­raꞌat hamo. Aiwy sese waku rakat pote sio wahãꞌãg neran."

⁸ Maꞌato yt naku i nug haria ehakye­raꞌat hamo neꞌi Iesui ikuꞌuro. Tewa­nĩ­kaptia etiano ikuꞌuro hawyi watikuap taꞌyn Tupana aikyꞌe kahato hap. Tupana tomo­herep taꞌyn aikyꞌe hap Tosa­ꞌyru kuꞌuro hap kaipyi."

⁹ Iesui suu aikoho hawyi toihep yne aiminug saꞌag. — Eipe wakuaria e Tupana Tosa­ꞌyru suu wuat tomi­koho koꞌi pe. Miꞌi pote koitywy yt wato­kenꞌẽ hin i aiꞌa­piheg hamuat Tupana hap ete. Miꞌi hawyi Tupana yt ipyꞌahak i ahete Tosa­ꞌyru suu tomi­koho koꞌi aito pote."

¹⁰ Saꞌa­wyꞌi watunug Tupana ahewa­nĩkap mo maꞌato miꞌi pytkai ainug towy­riaꞌin wo kahato katu­pono Haꞌyru toku­ꞌuro hamo aiꞌa­tu­pehik Toꞌywot kape — Koitywy yt ahewa­nĩkap mo i topy­huꞌat maꞌato aiwy ok wo raꞌyn. Koitywy Tupana wy kahato uito watoꞌe. Koitywy Tupana toĩneꞌen uipiit pe. Miꞌi kaipyi watikuap taꞌyn pywo ti aru areĩneꞌen wuatꞌi eꞌat pe aiꞌe hap katu­pono Iesui tuwẽtem guꞌuro pyi hawyi uimi­moieĩ­neꞌen hap topy­huꞌat watoꞌe."

¹¹ Miꞌi pote — Watu­wehum kahato ewawi Tupana watoꞌe. Uruka­ꞌiwat Iesui urunug naꞌyn ewy ok wo. Waku kahato uruipuẽti En watoꞌe katu­pono uruwy ok nug naꞌyn En watoꞌe."

¹² Nimo te Ãtãu yt tunug i Tupana miky­ꞌesat ewy miꞌi hawyi wato­py­huꞌat ahaꞌa­seꞌi Ãtãu ewywuat katu­pono Ãtãu ewywuat watunug yt Tupana miky­ꞌesat ewywuat i. Nimo te Tupana toꞌe Ãtãu me — Meke tã etunug saꞌag hawyi ti aru ekuꞌuro hap topy­huꞌat e Tupana Ãtãu me iꞌewyte yne Ãtãu mẽpytꞌin me. Miꞌi hawyi yne aito Ãtãu ewywuat saꞌag nug haria wato­py­huꞌat. Yne ywania raꞌyn miꞌi tã inug. Miꞌi tupono yne miitꞌin ikuꞌuro rakaria wo tukup­teꞌen. Watopap yne Tupana e hap ewy."

¹³ Ãtãu mẽpytꞌin tukup­teꞌen mesuwat yi tote motꞌi. Taꞌa­tunug saꞌag kahato maꞌato yt taꞌa­tukuap i taꞌa­tu­minug saꞌag yt kat i te wãiꞌe hap Tupana kaipywiat pote maꞌato Musei tut raꞌyn hawyi tohenoi raꞌyn kat som Tupana tiky­ꞌesat watunug kat som yt hap tohenoi raꞌyn."

¹⁴ Wẽtup wãiꞌe hap yn Tupana tum Ãtãu me — Yt etuꞌu teiꞌo meiẽwat yp ywa e maꞌato miꞌi pytkai tutuꞌu. Miꞌi hawyi meiũran ikuꞌuro Tupana e hap ewy maꞌato Ãtãu mẽpytꞌin koꞌi kai yt kat i Tupana wãiꞌe hap Ãtãu eꞌat kaipyi Musei eꞌat kape. Yt kat i Tupana wãiꞌe hap maꞌato miꞌi pytkai Ãtãuꞌin saꞌag nug haria kahato tukup­teꞌen. Miꞌi tã hap taꞌyn watikuap katu­pono saꞌa­wy­ꞌi­wuaria Ãtãuꞌin ikuꞌuro yne raꞌyn saꞌag nug haria pote Tupana e hap ewy. Miꞌi hawyi Tupana toꞌe — Pyno atipo­ꞌoro Wẽtup Ok Ãtãu ewywuat maꞌato Miꞌi Miit yt iꞌaparap hat i e."

¹⁵ Pyno Ãtãu wywo Iesui toꞌo­ꞌewy maꞌato yt toꞌo­ꞌewy hin i katu­pono yt iꞌaparap hat i. Miꞌi hawyi mekewat saꞌa­wy­ꞌiwuat Ãtãu kaipyi wati­puẽti aiku­ꞌuro hap katu­pono iꞌewy wato­py­huꞌat yt naku i nug haria wo. Aikotã Ãtãu ikuꞌuro tominug saꞌag kaipyi hap ewy te aito. Maꞌato mekewat Wẽtup Ok Miit Tupana Saꞌyru yt iꞌaparap hat hin i. Miꞌi pote Ãtãu miium aiku­ꞌuro hap maꞌato Mekewat Miit Tupana Mipo­ꞌoro Aipo­rekuat nuat miium aheĩneꞌen wuatꞌi eꞌat piat ieĩneꞌen hap. Ikuꞌuro hawyi Tupana wese hap topy­huꞌat ahete ihaky­ꞌeꞌi kahato aikyꞌe haype. Miꞌi pote Tupana piat aikyꞌe hap poꞌog naꞌyn hewa­nĩ­kaptia aito pytkai. Miꞌi pote toipo­ꞌoro Ãtãu Ewywuat Wẽtup Ok Takat aheha­kye­raꞌat hamo. Miꞌi pote wẽtup ok miit Ãtãu kaipyi aiku­ꞌuro hap iꞌewyte Wẽtup Ok Miit Iesui kaipyi aheĩneꞌen hap."

¹⁶ Pyno ti Ãtãu minug Iesui minug wywo yt toꞌo­ꞌewy hin i katu­pono Ãtãu kaipyi yt nakuap i ypy. Maꞌato Iesui kaipyi Tupana miium aheĩneꞌen wuatꞌi eꞌat piat hap ypy. Ãtãu minug wẽtup muat kaipyi — Yt naku i en e Tupana maꞌato Iesui aheha­kye­raꞌat hawyi aiminug saꞌag toimo­weityk yne hawyi — Waku kahato eiperia e Tupana ahepe Iesui mohey haria pe aiminug saꞌag iꞌatu kahato saꞌa­wyꞌi pytkai. — Eheĩneꞌen waku hap yt eiwat ehewaku hap upi i woro­ho­ꞌonug maꞌato Uhaꞌyru ewaku hap upi waku pe eweikup­teꞌen e Tupana ahepe."

¹⁷ Ãtãu kaipyi aiku­ꞌuro hap maꞌato Haꞌyru kaipyi aheĩneꞌen hap. Yianmiat Ãtãu yt naku i nug hat hawyi miꞌi kaipyi ikuꞌuro. Miꞌi hawyi aito wato­py­huꞌat Ãtãu mẽpytꞌin koꞌi aiꞌywot Ãtãu ewywuaria wato­py­huꞌat yt naku i nug haria. Miꞌi hawyi hoꞌo­wasat kahato rakaria wo wato­py­huꞌat yt nakuaria i saipe­piaria aito pote. Kat pote wẽtup ok miit kaipyi aiku­ꞌuro hap ypy topy­huꞌat aiminug saꞌag iwato hap kaipyi Tupana toꞌe — Woro­ho­ꞌo­ꞌa­piheg e maꞌato miꞌi hawyi Wẽtup Ok Miit putꞌokꞌe mesuwe poꞌog Ãtãu kawiat Miꞌi Miit wakuap nug hap ypy. Miꞌi Miit poꞌog hesaika iminug wakuap Ãtãu minug yt nakuap i hap koꞌi kai. Miꞌi Miit ti Aipo­typot Iesui are. — Ereke ro watoꞌe Iesui pe hawyi Tupana tum aheĩneꞌen wuatꞌi eꞌat piat hap ahepe. Hegyiꞌat kahato ahepe topy­huꞌat — Waku kahato eipe e tosa­ꞌyru mohey haria pe. Woro­ho­ꞌonug eipe more­kuaria ewywuat Uhaꞌyru ewywuat Uimi­po­ꞌoro Eipo­rekuat nuat mohey haria eipe pote e."

¹⁸ Pyno Ãtãu iꞌaparap hap kaipyi wato­py­huꞌat aitoria yne iꞌaparap haria wo raꞌyn katu­pono watunug Ãtãu ewywuat maꞌato Iesui minug wakuap kaipyi Tupana toꞌe ahepe — Yt kat i saꞌag eikai e. Yt woro­ho­ꞌo­ꞌa­piheg hin i e maꞌato atum neꞌen neꞌi ti wuatꞌi eꞌat piat eheĩneꞌen hap e."

¹⁹ Saꞌa­wyꞌi sese ti ahaꞌa­seꞌi pot Ãtãu yt topy­huꞌat hin i Tupana ehay upi. Tuwepyi toiꞌa­parap. Miꞌi hawyi imẽpytꞌin hemia­ri­ruꞌin typyꞌi kahato iꞌewywuat haria tukup­teꞌen iꞌatu­sai­pe­piaria pote taꞌa­tu­ꞌywot ewy. Miꞌi turan putꞌokꞌe Wẽtup Ok Miit inug yne Tupana miky­ꞌesat ok tã nakat. Miꞌi Miit Ãtãu ewywuat maꞌato Tupana miky­ꞌesat ewywuat nug hat. Miꞌi pote koitywy Tupana toꞌe kuap Tosa­ꞌyru mohey haria pe — Eipe waku kahato uipyꞌa pe e."

²⁰ Miꞌi hawyi nimuaria Tupana ehay moherep haria timo­herep kahato kat som Tupana tiky­ꞌesat kat som yt hap. Miꞌi hawyi poꞌog saꞌag nug haria wo te teꞌe­ro­py­huꞌat saꞌa­wy­ꞌi­tewuat kai katu­pono iꞌatu kahato Tupana wãiꞌe hap putꞌokꞌe hawyi iꞌaparap kahato hap topy­huꞌat. Katu­pono yt watunug i pote miꞌi kaipyi hotꞌokꞌe raꞌyn ahete yt nakuap i kahato aito hap. Miꞌi pytkai aikyꞌe teran katu­pono Tupana aikyꞌe hap poꞌog hesaika aiminug saꞌag kai."

²¹ Miꞌi hawyi yt naku i nug hap upi yn wato­py­huꞌat. Yt watoiat kuap i aiminug saꞌag iꞌewyte yt watoiat teran i. — Miꞌi tã etunug mote ekuꞌuro hap topy­huꞌat e Tupana pytkai watunug teꞌen teꞌen neꞌi pote. Miꞌi hawyi aiminug saꞌag kaipyi aiꞌauka hap topy­huꞌat. Maꞌato aiꞌa­piheg hap eꞌyianmete putꞌokꞌe Aipo­typot Iesui mesuwe aiꞌa­piheg hap tutuꞌu yne toku­ꞌuro hamo. Miꞌi pote aimoieĩ­neꞌen wuatꞌi eꞌat pe. Yt nakuaria i kahato aito pytkai Tupana aikyꞌe. Koitywy aikyꞌe pote wato­py­huꞌat hemiitꞌin no imiky­ꞌesat ewy watunug neran mesuwe. Imipo­ꞌoro Iesui aimo­hãpyk hawyi yt Ãtãu wat i aito maꞌato Iesui wat watoĩ­neꞌen wuatꞌi eꞌat pe. Pywo ti rat atiwan ewowi. Uito Pauru.

"

6

¹ Yt naku i iraniaꞌin aimuꞌe — Pyno waku watunug saꞌag katu­pono Tupana aikyꞌe hap poꞌog iwato aiminug saꞌag hap kai iꞌatuꞌe saꞌag. Waku wahãꞌãg saꞌag nug hap ete pote Tupana aikyꞌe poꞌog poꞌog iꞌatuꞌe."

² Maꞌato sakpoꞌe yt pywo i pãi katu­pono aito Iesui mohey haria raꞌyn. Miꞌi pote ahãꞌãg hap putꞌokꞌe ahete saꞌa­wy­ꞌi­tewuat ewy pote waku yt watuwat i ahiag upi yt naku i nug hamo. Waku aikotã ikuꞌuro rakat sehay yt kuap i hap ewy waku yt watikuap i ahãꞌãg hap ete yt ahewaure kaꞌa i ikuꞌuro rakat ewy. Miꞌi pote yt watuwat kuap i aiminug saꞌag ahãꞌãg hap nug hamuat upi."

³ Ahetꞌok turan Iesui set topy­huꞌat ahete. Miꞌi hawyi Iesui set wywo wato­py­huꞌat pote — Iesui mohey haria meimuẽ iꞌatuꞌe ahepe. Miꞌi hawyi wẽtup miit ewy yn wato­py­huꞌat Aipo­typot Iesui wywo. Mekewat minwa­toꞌe yꞌy pe ahetꞌok turan hap tote wati­mo­herep Iesui syp hap ikuꞌuro rakat ewy wato­py­huꞌat iwywo."

⁴ Ahetꞌok turan wati­mo­herep aisyp hap ewywuat Iesui wywo aikotã Iesui ikuꞌuro hap ewy iꞌewyte — Areĩneꞌen i ne e hap ewy wati­mo­herep aihep yꞌy pyi hawyi ahetꞌok turan iraniaꞌin me. Aikotã Iesui tuwẽtem guꞌuro pyi aikotã tesaika wywo Tupana tihep Aika­ꞌiwat guꞌuro pyi miꞌi hap ewy Aiꞌywot atipy piat tunug ahepe watoꞌe. Miꞌi hawyi aheĩneꞌen pakupꞌi hap toĩneꞌen mesu­wa­rote wati­mo­herep aihep yꞌy pyi hawyi ahetꞌok turan watoꞌe iraniaꞌin me. Aikotã Iesui ipakup takat ewy wato­py­huꞌat hap ewy."

⁵ Pyno aito Iesui mohey haria pote wato­py­huꞌat Iesui wywo wẽtup miit ewy yn. Ipiit aiwat aipiit ewy aipiit iãꞌãkap ewy. Ikuꞌuro turan aiku­ꞌuro hap topy­huꞌat hap ewy. Towẽtem guꞌuro pyi hap aiwẽtem guꞌuro pyi hap topy­huꞌat."

⁶ Yt naku i kyꞌesat hap iwato kahato ahete. Miꞌi hap ete yn ahehapap saꞌa­wy­ꞌite. Maꞌato miꞌi hap upi Aika­ꞌiwat Iesui ikuꞌuro ariaꞌyp posak ete hawyi aiwe­pywiat yt naku i nug kyꞌesat hap topy­huꞌat Iesui piit kuꞌuro hap wywo. Miꞌi hawyi Iesui ikuꞌuro hawyi aimi­ky­ꞌesat saꞌag ikuꞌuro iwywo. Koitywy watikuap aiwetiat yt naku i nug hap kyꞌesat hap tuweityk taꞌyn."

⁷ Aiku­ꞌuro hawyi mekewat aiminug saꞌa­wy­ꞌiwuat yt aimo­ꞌa­kagꞌaia kuap i raꞌyn saꞌag nug hap ete. Yt hotꞌokꞌe i raꞌyn yt hesaika i raꞌyn."

⁸ Miꞌi hap ewy kahato topy­huꞌat ahete wato­mohey Iesui Aipo­rekuat nuat hawyi. Wẽtup miit yn wato­py­huꞌat Aika­ꞌiwat wywo. Ikuꞌuro pote aimi­ky­ꞌesat saꞌag ikuꞌuro iwywo. Karãpe tuwẽtem guꞌuro pyi iꞌewyte watu­wẽtem iwywo hap ewy wakuap nug hamo. Koitywy watoĩ­neꞌen ipakup takaria wo.

"

⁹ Pywo ti koitywy watikuap taꞌyn Aika­ꞌiwat tuwẽtem guꞌuro pyi hap. Ikuꞌuro hap tokosap taꞌyn. Koitywy yt ikuꞌuro kuap i raꞌyn. Guꞌuro yt tiꞌauka kuap i raꞌyn. Yt hesaika i raꞌyn guꞌuro tuete."

¹⁰ Ikuꞌuro wẽtup muat hawyi toran naꞌyn ikuꞌuro. Wẽtup muat yn ikuꞌuro miitꞌin minug saꞌag upi. Ikuꞌuro hawyi saꞌag nug hap yt hãꞌãg kuap i raꞌyn. Tuwẽtem guꞌuro pyi hawyi toĩneꞌen kahato Tupana mõtypot hap yn tuete."

¹¹ Koitywy Aipo­typot Iesui emiit no watoĩ­neꞌen mote wato­py­huꞌat Iesui ewy. Waku watu­wa­nẽtup — Iesui kuꞌuro turan uiku­ꞌuro iwywo waku watoꞌe. Miꞌi pote uiminug saꞌag yne yt uhãꞌãg kuap i katu­pono uiku­ꞌuro iwywo wy uipiit miky­ꞌesat saꞌag yt kat i koitywy waku watoꞌe. Iesui toĩneꞌen i guꞌuro pyi hawyi uito areĩneꞌen i guꞌuro pyi wy waku watoꞌe. Koitywy areĩneꞌen kahato iwywo waku watoꞌe. Tupana mõtypot hap wywo yn areĩneꞌen mesup watoꞌe katu­pono Iesui wywo wẽtup miit yn arepy­huꞌat waku watoꞌe."

¹² Saꞌa­wyꞌi aipiit miky­ꞌesat saꞌag nakat po pe wato­py­huꞌat kahato. Miꞌi hawyi aimi­ky­ꞌesat saꞌag nug hap yn aika­ꞌiwat no topy­huꞌat. Aiwẽ pyi watunug saꞌag maꞌato mesup waku waĩwa­toꞌe saꞌa­wy­ꞌiwuat aimi­ky­ꞌesat ete. Koitywy wẽtup miit ewywuat areĩneꞌen Tupana wywo waku watoꞌe."

¹³ Koitywy karãpe aipiit tiky­ꞌesat saꞌag nug hap aikotã wati­ky­ꞌesat saꞌa­wyꞌi hap ewy waku watu­wewãi. Waku wãiwa­toꞌe aipiit miky­ꞌesat saꞌag kape. Waku wãiwa­toꞌe aiwe­mi­ky­ꞌesat saꞌag ete — Yt erenug neiꞌo saꞌag nug hano waku watoꞌe aipiit kape. Miꞌi turan waku watoꞌe Tupana pe — Atum epe uhaga koꞌi waku watoꞌe. Atiky­ꞌesat yne uipiit ewanuat wo emiky­ꞌesat koꞌi nug hamo. Atiky­ꞌesat uipiit koꞌi ewaku hap nug hamo Tupana waku watoꞌe. Atiky­ꞌesat uheko koꞌi ipakup taꞌyn Tupana aikotã miit ikuꞌuro rakat tuwẽtem i guꞌuro pyi hap ewy uipiit pakup atiky­ꞌesat epotpap nug hamo Tupana watoꞌe waku."

¹⁴ Saꞌa­wyꞌi watikuap Tupana piat ainãpin hap Musei mienoi kaipyi. Miꞌi hawyi — Pyno atunug aru watoꞌe maꞌato yt watunug kuap i kat pote yt Iesui mieha­kye­raꞌat koꞌi i te aito pote. Mekewat eꞌat pe yt watikuap hin i Tupana aikyꞌe hap. Koitywy Tupana Pãꞌãu esaika hap mywo watunug kuap taꞌyn ainãpin Tupana piat hap. Pyno koitywy yt naku i wata­ꞌaipok aipiit miky­ꞌesat saꞌag eropat hamuat ipakup i rakaria wo i raꞌyn watu­kup­teꞌen hawyi."

¹⁵ Koitywy yt naku i kahato rat pãi watoꞌe — Pyno koitywy Tupana uikyꞌe kahato sio waku atunug sio yt naku i watoꞌe. Waku watu­wewãi raꞌyn. Tupana piat ainãpin hap iwan miat aiwanuat waku watunug Tupana esaika hap mywo. Waku watoiat aiminug saꞌag hap koꞌi."

¹⁶ Waku koitywy watikuap taꞌyn uwe po pe watoĩ­neꞌen. Aimi­ky­ꞌesat saꞌag aika­ꞌiwat no watunug mote yt naku i nug hap aika­ꞌiwat no topy­huꞌat. Maꞌato yt aipohep kuap i aiminug saꞌag ete pote saꞌag aika­ꞌiwat no topy­huꞌat. Aiminug saꞌag yt watoiat kuap i hawyi meiũran aiꞌauka hano topy­huꞌat. Maꞌato Tupana esaika hap mywo ainãpin topiat hap watunug pote meiũran aru — Waku kahato eipe e Tupana ahepe wuatꞌi ehamo.

"

¹⁷ Uiwy­riaꞌin tawa Humanu ywania saꞌa­wy­ꞌite raꞌyn tig ewetunug eimi­ky­ꞌesat saꞌag koꞌi yn yt eweimonik kuap i. Miꞌi turan putꞌokꞌe itote Tupana ehay hawyi eweiꞌok­satꞌi kahato Tupana ehay — Pywuat kahato miꞌi ehay eweiꞌe. Koitywy wati­puẽti raꞌyn Tupana piat ainãpin hap eweiꞌe. Miꞌi hawyi ewetunug kahato Tupana ehay eipyꞌa pe. Miꞌi pote arehum kahato Tupana kape."

¹⁸ Saꞌa­wyꞌi eimi­ky­ꞌesat saꞌag koꞌi eiꞌa­hi­ꞌypy kytyt kahato aikotã miit mikytyt hap ewy eweipy­huꞌat maꞌato miꞌi hap ewywuat Tupana tiꞌa­saity tek taꞌyn eiminug saꞌag haity ewywuat. Koitywy miꞌi hap kaipyi eweipopy raꞌyn wakuap nug hat emiit no raꞌyn eweikup­teꞌen. Koitywy eisaity wakuap nug hamuat raꞌyn topy­huꞌat. Miꞌi pote arehum kahato Tupana ete."

¹⁹ Eikytyt hap ete ahenoi hãꞌãkap wuo katu­pono poꞌog yt niatpo i hãꞌãkap wuo henoi hap kaipyi. Miꞌi iãꞌãkap ewy kahato saꞌa­wyꞌi eweipy­huꞌat eimi­ky­ꞌesat saꞌag koꞌi saity wo eikytyt hap ewy eiwa­nẽtup hap ipitpit rakat saity ewy topy­huꞌat. Aikotã aihũ saity ete hap ewy saity ete watu­kup­teꞌen saꞌa­wyꞌi miitꞌin maꞌat hano kahato. Wakuap watunug typy wanẽtup hap mywo. Saꞌa­wyꞌi miitꞌin maꞌat hamo watunug wakuap. Miꞌi saity ewy aikytyt hap ewy koitywy Tupana titek yne raꞌyn mekewat saity koꞌi ewywuat. Miꞌi hawyi wato­popy raꞌyn wakuap nug hamo. Koitywy Tupana ahãꞌãg wakuap nug hamo raꞌyn. Pyno waku watuwat miꞌi upi. Waku watuwat ihay upi. Waku Tupana emiit no kahato wato­py­huꞌat mesu­wa­rote wakuap nug hamo. Hewaku hap ewy waku watunug Tupana miky­ꞌesat ok tã miitꞌin powyro hamuat koꞌi. — Koitywy uipiit topy­huꞌat epotpap wakuap nug hamo raꞌyn waku watoꞌe Tupana pe."

²⁰ Saꞌa­wyꞌi wato­py­huꞌat aimi­ky­ꞌesat saꞌag nug haria wo yne. Miꞌi ete yn watu­we­moe­hapap. Wakuap nug hap yt ahewãi kuap saꞌag nug hap ete. Yt teke i aiwa­nẽtup hawe hãpyk nug hap."

²¹ Saꞌa­wy­ꞌi­tewuat aiminug saꞌag watunug i raꞌyn hawyi aiwe­mõti hap topy­huꞌat. Miꞌi koꞌi he kahato wati­puẽti saꞌa­wyꞌi maꞌato koitywy watikuap taꞌyn aiꞌauka hamo topy­huꞌat. Aiꞌa­piheg wuatꞌi eꞌat piat hap. Miꞌi pote waku watoiat sese miꞌi koꞌi saꞌa­wy­ꞌiwuat."

²² Saꞌa­wyꞌi aiminug saꞌag emiit no wato­py­huꞌat. Miꞌi hawyi koitywy wato­py­huꞌat Tupana emiit no raꞌyn. Koitywy Tupana po pe raꞌyn wato­py­huꞌat. Waku kahato poꞌog Tupana po pe wato­py­huꞌat katu­pono aheĩneꞌen mesu­wa­rotiat hap Tupana mõtypot hap yn topy­huꞌat. Miꞌi hawyi aru toĩneꞌen aheĩneꞌen wuatꞌi eꞌat piat Tupana mõtypot hap."

²³ Aiminug saꞌag kaipyi tut haꞌup aiku­ꞌuro hap aiꞌa­piheg hap wuatꞌi eꞌat piat. Tupana wat yt haꞌup takat i tutum teꞌen neꞌi wuatꞌi eꞌat piat aheĩneꞌen hamuat ahepe Aipo­typot Iesui mohey haria aito pote. Mesuwat miwan nug hat Pauru.

"

7

¹ Uiwy­riaꞌin Iesui mohey haria pywo ti eweikuap urueꞌa­seꞌi Musei piat Tupana miium miwan yityꞌok totiat kaipyi kat som waku watunug kat som yt naku i watunug hap puretig nu kawiat rotiat pyi. Miꞌi miwan ni ainãpin kahato aheĩneꞌen turan aiminug kahato aikotã waku watunug aikotã yt naku i watunug hap ete. Miꞌi hawyi waku watunug iꞌe hap ewy watoꞌe aiwo­ꞌope. Watoĩ­neꞌen turan Musei piat Tupana miwan ainãpin hap aimuꞌe hat akag ewy topy­huꞌat. Maꞌato aiku­ꞌuro raꞌyn hawyi yt kat i ainãpin puretig nu kawiat hap yt aimuꞌe hat i katu­pono aiku­ꞌuro raꞌyn mote."

² Pyno ahenoi iãꞌãkap ewywuat ehepe mehĩꞌin manaꞌin Humanu ywania. Eheꞌaito hawyi eiwary hawyi yt naku i etoiat eꞌaito ewary e Tupana tomiwan me. Ereĩneꞌen o iwywo ekuꞌuro hap sio ikuꞌuro hap kape e miwan me. Etoiat eharyꞌi sio etoiat eꞌaito pote yt naku i etunug e Tupana mekewat puretig nu kawiat rote. Maꞌato ikuꞌuro hawyi waku wẽtup etat etiky­ꞌesat re pote e miwan me."

³ Maꞌato eꞌaito toĩneꞌen ne turan eharyꞌi toĩneꞌen ne turan ewaire wẽtup ok wywo pote yt naku i rakano ereĩneꞌen e Tupana mekewat miwan me. Maꞌato eꞌaito ikuꞌuro eharyꞌi ikuꞌuro hawyi waku etat pakup i eꞌaito wo sio eharyꞌi wo yt heꞌaito i yt heha­ryꞌi i rakat e. Miꞌi wywo waku ereĩneꞌen yt kat i yt naku i ewetunug Tupana wanẽtup hawiat e miwan me."

⁴ Pyno miꞌi hap kaipyi ti ahenoi ehepe iãꞌãkap wuo eipe Iesui mohey haria pe. Aito Iesui mohey haria mesup. Saꞌa­wyꞌi watikuap kahato mekewat Musei woꞌo­nãpin hap Iuteuria wãiꞌe hap koꞌi. Waku kahato miꞌi e hap ainãpin hamuat. — Miꞌi e hap watunug yne hawyi aheha­kye­raꞌat hap saꞌup toĩneꞌen watoꞌe saꞌa­wyꞌi aiwo­ꞌope. Miꞌi hawyi watunug neran kahato maꞌato wahãꞌãg kahato yne ahesaika hawe pytkai wati­ꞌa­parap aparap mekewat Tupana piat ainãpin hap ete. Miꞌi pote Iesui ikuꞌuro aika­wiano aheiam muat. Iwywo iꞌewyte aiku­ꞌuro hap ewy toĩneꞌen. Tupana wãiꞌe hap waku wen maꞌato aito yt nakuaria i pote yt watunug kuap i. Saꞌa­wyꞌi wahãꞌãg kahato yne wãiꞌe hap nug hamuat. Mekewat wãiꞌe hap topy­huꞌat aikotã aheꞌaito aiwary ewy. Maꞌato aiku­ꞌuro Aika­ꞌiwat Iesui upi hawyi yt watoĩ­neꞌen poꞌog i saꞌa­wy­ꞌiwuat po piat mekewat aheꞌaito aheha­ryꞌi ewywuat hap. Iesui upi aiku­ꞌuro maꞌato mesup Iesui wywo watu­wẽtem guꞌuro pyi iwywo ipakup takaria Tupana mowepit hamuat hap nug hamo watu­wẽtem. Saꞌa­wyꞌi aheꞌaito aheha­ryꞌi wãiꞌe wãiꞌe yn ahepe maꞌato koitywy aiku­ꞌuro raꞌyn pote aheꞌaito aheha­ryꞌi saꞌa­wy­ꞌiwuat Iuteuria eko koꞌi yt wãiꞌe kuap i ahepe aiku­ꞌuro raꞌyn hap ewy pote. Mio yt aimuꞌe kuap i aheꞌaito aheha­ryꞌi ewywuat. Miꞌi iãꞌãkap ewy wẽtup miit ewy yn naꞌyn wato­py­huꞌat Iesui piit wywo. Ikuꞌuro turan aiku­ꞌuro hap wy topy­huꞌat maꞌato Tupana tihep Iesui guꞌuro pyi iꞌewyte aito watu­wẽtem iwywo hap ewy. Koitywy aheꞌaito aheha­ryꞌi Tupana Pãꞌãu topy­huꞌat hap ewy. Miꞌi pote aheꞌaito pakup ehay upi wato­py­huꞌat. Koitywy watunug Tupana mowepit hap koꞌi. Tupana Pãꞌãu ni aimoe­saika imiky­ꞌesat wakuap nug hamuat. Saꞌa­wyꞌi wahãꞌãg kahato puretig nu kawiat miwan nug hamuat wen aipiit yt hesaika kahato i inug hamuat. Maꞌato mesup aheꞌaito aheha­ryꞌi pakup ewywuat Tupana Pãꞌãu wywo raꞌyn wato­py­huꞌat wẽtup piit ewy. Miꞌi pote ahesaika puretig pakup sehay nug hamuat are sehay iãꞌãkap puo.

"

⁵ Saꞌa­wyꞌi yt naku i nug haria wo kahato wato­py­huꞌat at kaꞌap yne minug ete. Aiwe­kaipyi miit ewy watunug saꞌag. Aiwe­mi­ky­ꞌesat saꞌag nakat ewy yn watunug. Saꞌag yt nakuat i aito hap ewy watunug. Saꞌa­wy­ꞌiwuat miwan wãiꞌe ahepe aimuꞌe pytkai yt watunug i — Yt etunug neiꞌo miꞌi hap e waku miꞌi hap etunug e. Miꞌi hawyi aiwe­pywiat aiwa­nẽtup hawe — Atunug aru watoꞌe wen maꞌato miꞌi hawyi aipiit miky­ꞌesat e hap upi watuwat mekewat — Hẽto e waku etunug epiit miky­ꞌesat saꞌag hap ok tã e saꞌa­wyꞌi ahiag ahepe. Miꞌi hawyi aiwepyi watunug saꞌag Tupana ete. Watikuap pytkai aiꞌa­piheg hap topy­huꞌat aru hap pytkai watunug aiminug saꞌag etiat hap kaipywiat. Aiku­ꞌuro hap kape yn aipotpap saꞌag saꞌup watum yne hap ewy."

⁶ Maꞌato koitywy wẽtup ok miit ewy yn wato­py­huꞌat Iesui Pãꞌãu wywo. Ikuꞌuro pote aiku­ꞌuro hap ewy topy­huꞌat iwywo hap ewy. Miꞌi pote aheꞌaito saꞌa­wy­ꞌiwuat aheha­ryꞌi saꞌa­wy­ꞌiwuat mekewat Iuteuria eko koꞌi sem yt ainãpin kuap i poꞌog ikuꞌuro rakaria wato­py­huꞌat pote hap ewy.

"

⁷ Maꞌato Tupana piat ainãpin hap Musei mimo­herep wakuap kahato topy­huꞌat. Yt naku i wati­mohit Tupana piat ainãpin hap ete. Pywo pe ti Tupana wãiꞌe hap kaipyi watikuap yt naku i watunug sio saꞌag hap watunug iꞌe hap ewy pote. Miꞌi hawyi watikuap aiminug saꞌag watipik neꞌi ainãpin hap hawyi. Uimotag hap turan uito Pauru atiky­ꞌesat kahato uipyꞌa pe iraniaꞌin ekat uiano hawyi atipuẽti ainãpin hap miwan me — Yt etiky­ꞌesat reiꞌo iraniaꞌin ekat eha pe e. Miꞌi e hap ete atikuap yt naku i nug hat areĩneꞌen hap."

⁸ Maꞌato yt watikuap i Tupana piat ainãpin hap Musei mimo­herep pote yt watikuap i aito iꞌaparap hat sio wakuap nug hat yt watikuap i. Aikotã saꞌa­wyꞌi uito yt atikuap i mekewat — Yt etiky­ꞌesat reiꞌo iraniaꞌin ekat eha wo e hap maꞌato atikuap hawyi — Pyno yt atunug i aru poꞌog are uipyꞌa pe maꞌato yt pytkai i katu­pono atunug poꞌog poꞌog neꞌi. Iraniaꞌin ekat kape yn uheha tehaꞌat. Uiwe­kai­pywiat atunug saꞌag poꞌog saꞌa­wy­ꞌiwuat kai."

⁹ Saꞌa­wyꞌi uito sio waku kahato areĩneꞌen areꞌe miꞌi turan putꞌokꞌe Tupana e hap Musei mimo­herep uhete — Yt naku i etunug e. Miꞌi hawyi atikuap Tupana wãiꞌe hap hawyi atunug ne saꞌag katu­pono uipiit miky­ꞌesat saꞌag hap — Etunug no e. Miꞌi hawyi yt naku i pe areĩneꞌen are uiwepe. Yt naku i nug hat uito are."

¹⁰ Uiꞌa­piheg aru uiminug saꞌag upi are. Uiku­ꞌuro aru yn areꞌe uiwepe. Yt atikuap i aheĩneꞌen hap Tupana piat hap ewy. Yt atikuap i Tupana aiminug saꞌag pyhyp hamo saꞌa­wyꞌi Tupana tunug naꞌyn wãiꞌe hap aimoieĩ­neꞌen hamuat. Saꞌa­wyꞌi Tupana tum kahato ainãpin hap aimoieĩ­neꞌen mesu­wa­rotiat hamuat. Waku piat aheĩneꞌen hap tokuap hamuat tutum towãiꞌe hap."

¹¹ Maꞌato uhowawi yt miꞌi tã hin i katu­pono yt atunug i. Miꞌi pote areĩneꞌen Tupana miꞌa­piheg wuanuat kat pote Tupana toꞌe — Yt etunug i uiꞌe hap hawyi ti aru ekuꞌuro e. Miꞌi pote ikuꞌuro rakanuat areĩneꞌen. Saꞌa­wyꞌi areꞌe uiwepe — Are pãi pyno atunug aru yne Tupana piat uinãpin hap hawyi areĩneꞌen wuatꞌi eꞌat pe are. Miꞌi hawyi uiwepe ahãꞌãg kahato inug hap ete maꞌato atiꞌa­parap aparap yne inug hap ete. Miꞌi hawyi — Pãi are uiꞌa­piheg aru Tupana uiꞌe hawyi."

¹² Tupana ainãpin hap miwan miat Musei mimo­herep ikahu kahato hãpyk kahato wakuat kaipyi ainãpin hap pote hãpyk kahato ikahu kahato ainãpin hap. Hãpyk yn ainãpin hap atipuẽti. Waku kahato toĩneꞌen iꞌe hat ewy ti raꞌyn hãpyk topy­huꞌat."

¹³ Tupana piat uinãpin hap yt uimaꞌat hin i. Yt karãmuo i aimaꞌat kuap. Tupana ehay yt aiꞌauka hap i maꞌato Tupana ehay aparap hap nug hap aiꞌauka hap aiꞌa­piheg aru hap topy­huꞌat. Tupana piat uinãpin hap waku kahato pytkai yt atunug hin i — Waku atunug aru areꞌe pytkai atunug saꞌag hawyi atikuap yt nakuat i uito hap. Miꞌi hawyi Tupana piat uinãpin hap Musei mimo­herep tomo­herep kahato uimi­ꞌa­parap koꞌi. Are pãi uito rasig yt naku i rat pãi are. Tupana uiꞌa­piheg aru uiku­ꞌuro hamo are yn saꞌa­wyꞌi mekewat eꞌat pe."

¹⁴ Tupana Pãꞌãu miat ainãpin Musei wẽ pywiat wakuat sese Tupana wanẽtup hap ewy. Miꞌi ti waku maꞌato uito yt atunug i pote yt naku i rakat areĩneꞌen. Miꞌi tã hawyi yt Tupana ewy hin i areĩneꞌen wakuap nug hap ete."

¹⁵ Atunug neran kahato wakuap nug hap koꞌi maꞌato yt uimi­ky­ꞌesat ewy i hawyi saꞌag nug hap tuwẽtem yn uipiit pyi. Miꞌi hawyi uiminug saꞌag uimõti te hap topy­huꞌat."

¹⁶ Miꞌi hawyi atunug yt naku i turan uiwa­nẽtup hap — Wãiꞌe uhepe — Yt etunug Tupana miky­ꞌesat ewy hin i e uiwa­nẽtup hap. Musei piat ainãpin hap yt ewy hin i uiwa­nẽtup hawyi — Yt etunug neiꞌo e hap ete yn Atiꞌa­parap."

¹⁷ Miꞌi hawyi atunug saꞌag uiwa­nẽtup hap miky­ꞌesat ewy kat pote uimi­ky­ꞌesat saꞌag uipyꞌa piat poꞌog hesaika uiwewãi hap kai. Miꞌi pote yt atoiat kuap i uheko saꞌag."

¹⁸ Miit saꞌag nug hat ewy areĩneꞌen uhaꞌum me. Yt kat i wakuap itote. Atunug neran wakuap wen — Hẽto e uiwa­nẽtup hap maꞌato uipiit yt ikyꞌesat i hawyi uimi­ky­ꞌesat saꞌag uipyꞌa piat uipyhyp wakuap nug hamo."

¹⁹ Pyno ahãꞌãg kahato wakuap nug hap ete maꞌato yt atunug kuap i. Miꞌi hawyi yt naku i yn atunug wãiꞌe uiwa­nẽtup hap pytkai."

²⁰ Miꞌi hawyi typy miit ewy areĩneꞌen wẽtup ok yt naku i nug hat ewy wẽtup ok waku nug hat ewy. Mekewat yt naku i nug hat uipyꞌa piat poꞌog hesaika uikai."

²¹ Pyno typy sehay tuꞌuka uipiit pe. Wẽtup sehay — Etunug o wakuap e. Wẽtup sehay — Etunug no yt naku i e. Miꞌi hawyi mekewat sehay saꞌag upi uipap tuereto hawyi mekewat Tupana miky­ꞌesat koꞌi yt atunug i. Yt naku i uito are."

²² Mekewat uito sese atiky­ꞌesat kahato Tupana ehay e hat uipap kahato Tupana piat ainãpin hap upi."

²³ Maꞌato toĩneꞌen wẽtup sehay uipiit pe — Wãi yt etunug neiꞌo Tupana miky­ꞌesat e. Miꞌi hawyi typy sehay tuꞌuka uipiit pe — Ereto ro Tupana ehay upi e uiwa­nẽtup hap. — Etunug no epiit miky­ꞌesat e wẽtup sehay. Miꞌi hawyi atiꞌairo uipiit miky­ꞌesat ewy. Yt arẽtem kuap i uimi­ky­ꞌesat saꞌag po pyi."

²⁴ Yt naku i kahato yt uimo­wepit hin i. Are pãi uwe uwe aru uihep kuap mesuwat uheko saꞌag po pyi katu­pono uipiit miky­ꞌesat saꞌag koꞌi uiꞌauka hat ewy topy­huꞌat. Uhekyi kahato uiꞌa­piheg hap kape."

²⁵ Pyno wẽtup yn uheha­kye­raꞌat kuap hat. Tupana Saꞌyru yn uihep kuap uiminug saꞌag hap po pyi. Miꞌi pote arehum kahato Tupana pe katu­pono yt Tupana esaika hap wywo i pote yt atunug kuap i Tupana miky­ꞌesat ewy. Uiwa­nẽtup hap wywo — Waku etunug e maꞌato uipiit miky­ꞌesat saꞌag esaika hap poꞌog uiwa­nẽtup waku hap nug neran hap kai. — Tupana saꞌa­wyꞌi areĩneꞌen uimi­ky­ꞌesat saꞌag nug hap po pe maꞌato miꞌi hawyi Esaꞌyru uinug pakup hawyi mesup Epo pe areĩneꞌen. Waku kahato En Tupana katu­pono Esaꞌyru Pãꞌãu wo uipyt­ꞌatnug hawyi wẽtup sehay wakuat yn uipiit pe toĩneꞌen.

"

8

¹ Watunug Iesui Aiꞌakag wo hawyi wẽtup miit ewy yn wato­py­huꞌat iwywo katu­pono watoĩ­neꞌen Iesui pe iꞌewyte toĩneꞌen ahepe. Miꞌi hawyi Tupana yt toꞌe hin i ahepe — En yt naku i e hap. Woro­ho­ꞌo­ꞌa­piheg yt e i ahepe."

² Miꞌi hawyi wẽtup sehay yn aipiit pe kat pote Tupana Pãꞌãu wo aipyt­ꞌatnug. Miꞌi hawyi aipiit topy­huꞌat Iesui piit ewy. Saꞌa­wyꞌi te watuwat mekewat wẽtup sehay upi — Etunug no uimi­ky­ꞌesat ewy e hawyi ahiag miky­ꞌesat saꞌag watunug. Miꞌi hawyi aiminug saꞌag ahekyi kahato aiku­ꞌuro hap kape hoꞌopot hap kape maꞌato wato­mohey Iesui hawyi Tupana Pãꞌãu putꞌokꞌe raꞌyn. Miꞌi hawyi Tupana Pãꞌãu aihep taꞌyn aimi­ky­ꞌesat saꞌag po pyi aiku­ꞌuro hap wuatꞌi eꞌat piat po pyi."

³ Saꞌa­wyꞌi Tupana ainãpin kahato Musei upi. — Miꞌi tã waku etunug e. Miꞌi tã yt naku i etunug e maꞌato mekewat eꞌat yt watunug kuap i imiky­ꞌesat koꞌi katu­pono aimi­ky­ꞌesat saꞌag aipyhyp kahato inug hap ete. Miꞌi hawyi Tupana piat ainãpin hap yt aimo­hãpyk kuap i yt watunug i pote. — Pyno atimo­hãpyk miꞌiria e Tupana tuwepe. Miꞌi toꞌe hawyi toipo­ꞌoro Tosa­ꞌyru sese. Putꞌokꞌe hawyi aiꞌewy ipiit Miit kahato Miꞌi. Toiꞌa­parap kuap aito ewy wen maꞌato yt toiꞌa­parap hin i. Yt karãpe i tutunug saꞌag. Toiꞌakit kahato tomi­ky­ꞌesat saꞌag nug hamuat — Yt atunug i e tuwepe. Miitꞌin miky­ꞌesat saꞌag toiꞌakit yne. Miit no tuwenug hawyi aiꞌa­piheg hap tutuꞌu yne ariaꞌyp posak ete."

⁴ Koitywy Topiit wakuat wo aimoe­saika. Tupana Pãꞌãu wywo watuwat hawyi watunug Tupana miky­ꞌesat koꞌi ainãpin iwan miat hap ewy. Tupana Pãꞌãu wo aipytꞌat sese hawyi yt wati­ky­ꞌesat hin i aimi­ky­ꞌesat aiwe­kai­pywiat sehay."

⁵ Maꞌato watuwat aimi­ky­ꞌesat saꞌag upi pote aimi­ky­ꞌesat saꞌag yn watunug. Miꞌi hawyi aiwa­nẽtup hap saꞌag ewywuat po pe wato­py­huꞌat. Aheko yt naku i ewywuat saꞌag hap topy­huꞌat maꞌato Tupana Pãꞌãu eiam mo wato­py­huꞌat pote miꞌi hawyi watuwat Tupana Pãꞌãu ehay upi. Miꞌi hawyi Tupana wanẽtup hap ewy topy­huꞌat aiwa­nẽtup hap. Miꞌi hawyi watunug Tupana miky­ꞌesat ewy."

⁶ Maꞌato watuwat aiwe­pywiat mekewat miit saꞌag wanẽtup hap ewywuat upi miꞌi hawyi aiwa­nẽtup hap mesu­wa­rotiat ewy topy­huꞌat. Miꞌi hawyi yt naku i nug haria sese wato­py­huꞌat hawyi aiku­ꞌuro hap yn topy­huꞌat. Maꞌato Tupana Pãꞌãu toĩneꞌen aiwa­nẽtup hawuo hawyi wẽtup wanẽtup hap yn topy­huꞌat ahete Tupana wat ewy. Miꞌi hawyi yt kowo­ꞌi­ko­woꞌi hin i aiwa­nẽtup hap. Waku kahato aiwa­nẽtup hap topy­huꞌat. Ihay se kahato aheĩneꞌen hap. He kahato rakat topy­huꞌat Tupana Pãꞌãu wo watu­wenug hawyi."

⁷ Karãpe wato­py­huꞌat mesu­wa­ro­tiaria ewy aiwa­nẽtup hawe hawyi yt watunug hin i Tupana miky­ꞌesat koꞌi. Yt watunug hin i ainãpin miwan miat. Pyno watikuap Tupana ehay hawyi — Pyno atunug Tupana miky­ꞌesat watoꞌe maꞌato yt watunug kuap i wahãꞌãg pytkai katu­pono aimi­ky­ꞌesat yn aiwa­nẽtup hawe yt Tupana miky­ꞌesat hin i. Miꞌi pote mesu­wa­rotiat miit ewy aimi­ky­ꞌesat koꞌi watunug hawyi yt naku i nug haria wo wato­py­huꞌat. Watunug Tupana ahewa­nĩkap mo."

⁸ Watuwat aimi­ky­ꞌesat saꞌag upi hawyi miit saꞌag ewywuat wato­py­huꞌat mesu­wa­rote. Miꞌi hawyi yt kat i aiminug koꞌi topy­huꞌat Tupana mowepit hamo."

⁹ Maꞌato aito yt miꞌi tã hin i. Yt watuwat hin i aimi­ky­ꞌesat saꞌag kyꞌesat hap nug hamo iꞌewyte yt ahewaure kaꞌa hin i mekewat sehay kape. Wẽtup sehay upi raꞌyn watuwat katu­pono Tupana Pãꞌãu toĩneꞌen ahepe mio. Maꞌato uwe uwe yt Aipo­typot Iesui Pãꞌãu yt eiam i miꞌi hat ti yt Tupana emiit hin i katu­pono Tupana emiit no Iesui Pãꞌãu eiam yn teꞌe­ro­py­huꞌat."

¹⁰ Maꞌato Aipo­typot Iesui Pãꞌãu wakuat wo aipytꞌat pote aipiit miky­ꞌesat saꞌag hap ikuꞌuro rakat ewy topy­huꞌat katu­pono aipãꞌãu moieĩneꞌen wuatꞌi eꞌat piat hap toĩneꞌen ahete. Aipiit ikuꞌuro aru iraniaꞌin ewy katu­pono saꞌa­wyꞌi watunug neran saꞌag yn mote Tupana Pãꞌãu wakuap aimoe­saika kahato ahãꞌãg hap akit hamo Iesui mieha­kye­raꞌat koꞌi pote."

¹¹ Saꞌa­wyꞌi Tupana Pãꞌãu timoieĩ­neꞌen Iesui piit ikuꞌuro hawyi. Taꞌi Tupana Pãꞌãu hesaika kahato miitꞌin moieĩneꞌen hamo. Miꞌi ti toĩneꞌen ahepuo. Aipiit ikuꞌuro hawyi Tupana Pãꞌãu toĩneꞌen aimoieĩ­neꞌen hamuat Iesui wat ewy. Pywo pe ti Iesui piit ewy Tupana Pãꞌãu esaika hap toĩneꞌen aipiit moieĩneꞌen hamuat.

"

¹² Uiwy­riaꞌin Iesui mohey haria yt kat hamo i koitywy watuwat saꞌa­wy­ꞌiwuat aimi­ky­ꞌesat saꞌag koꞌi kape katu­pono yt watoĩ­neꞌen poꞌog i aimi­ky­ꞌesat saꞌag po pe kat pote Iesui ãu po pe watoĩ­neꞌen mesup. Areĩneꞌen Aipo­typot Aika­ꞌiwat po pe hawyi yn waku are — Tupana arehum ewawi. Uihep taꞌyn uimi­ky­ꞌesat saꞌag po pyi."

¹³ Pyno aipiit miky­ꞌesat saꞌag kyꞌesat hap kape yn watu­we­potpap pote aiꞌa­piheg hap yn topy­huꞌat ahete aiku­ꞌuro hap. Waku watoꞌe Tupana Pãꞌãu me — Etiꞌakit ro uimi­ky­ꞌesat saꞌag kyꞌesat hap watoꞌe Tupana Pãꞌãu me. Miꞌi hawyi Tupana Pãꞌãu aimoieĩ­neꞌen kahato."

¹⁴ Uwe uwe Tupana Pãꞌãu piat topo­ꞌoro hap upi topy­huꞌat miꞌi hat topy­huꞌat Tupana saki­ꞌytꞌin Tupana saꞌy­ruꞌin e."

¹⁵ Katu­pono Tupana tum naꞌyn Topãꞌãu aikyꞌe haype. Yt aimogyt hamo i yt aimo­kenꞌẽ hamo i katu­pono Tupana Pãꞌãu iwese kahato. Aiꞌa­pykok hamo aimo­wepit hamo yn toiky­ꞌesat. Tupana Pãꞌãu aimo­herep Tupana saꞌy­ruꞌin wo haki­ꞌytꞌin wo hawyi watuwak — Papai Papai watoꞌe Tupana pe. Uiꞌywot kahato En watoꞌe Tupana pe."

¹⁶ Miꞌi hawyi Tupana Pãꞌãu aipãꞌãu wywo wẽtup Pãꞌãu ewy yn topy­huꞌat — Tupana mẽpytꞌin eipe e. Tupana Pãꞌãu ahepe miꞌi pote aiꞌãu — Pywo e."

¹⁷ Pyno mesup Tupana mẽpytꞌin koꞌi aito pote Tupana mimõ­py­huꞌat wuatꞌi eꞌat pe katu­pono Aiꞌywot Tupana pote Iesui Aheykeꞌet pote aito iywytꞌin inytꞌin wẽtup sok yn aitoria pote. Tupana ekat yne aiwanuat koꞌi imẽpytꞌin aito pote. Aheykeꞌet mõtypot hap eꞌat pe aito iꞌewyte aimõ­typot hap toĩneꞌen imohey haria aito pote. Aheykeꞌet Aikywyt hoꞌopot kahato aheha­kye­raꞌat hamo miꞌi pote waku kahato waho­ꞌopot Aheykeꞌet Aikywyt ehay moherep hamo katu­pono wẽtup sok yn Tupana mipoi­tyro koꞌi aito. Aheykeꞌet Aikywyt mõtypot hap eꞌat pe aimõ­typot iwywo hap topy­huꞌat.

"

¹⁸ Ahoꞌopot kahato mesuwe uito Pauru. Koitywy ahoꞌopot hap eꞌat kahato. Koran ni miitꞌin mimo­so­ꞌopot koꞌi kahato watoĩ­neꞌen maꞌato Iesui mõtypot hap eꞌat pe Tupana mimõ­typot no kahato wato­py­huꞌat. Mekewat eꞌat pe aito iꞌewyte Tupana mimõ­typot kahato wo wato­py­huꞌat. Aimõ­typot Iesui wywo hap eꞌat pe aru poꞌog iwato mesup eꞌat piat waho­ꞌopot mesu­wa­rotiat. Taꞌi waku watoꞌe ahoꞌopot kahato hawe — Koitywy ahoꞌopot kahato Iesui wanĩkap po upi maꞌato typy sakpo are poꞌog Tupana mimõ­typot no areĩneꞌen wuati eꞌat piat ahoꞌopot hap saꞌup waku watoꞌe."

¹⁹ Yne Tupana minug koꞌi hekatup haria wo teꞌe­ro­py­huꞌat katu­pono taꞌa­tukuap teran kahato uwe uwe Tupana saꞌy­ruꞌin Tupana saki­ꞌytꞌin Tupana mimo­herep hap kuap hamo taꞌa­tu­he­katup kahato."

²⁰ Tupana minug koꞌi mesu­wa­rotiat ikahu kahato maꞌato mesuwe toĩneꞌen hawyi ikuꞌuro yne katu­pono aiꞌa­parap hawyi Tupana tiꞌa­tu­ꞌuhu yne tominug iꞌatu­mo­so­ꞌopot hamuat ipap hamuat aiminug saꞌag upi. Miꞌi pote ikuꞌuro rakaria wo tukup­teꞌen yne yt taꞌa­tu­mi­ky­ꞌesat ewy i. Wato­mohey Iesui hawyi — Wuatꞌi eꞌat piaria eweipy­huꞌat aru e Tupana ahepe. Miꞌi pote aheĩneꞌen hap ipakup i hap kape mesup wahe­katup kahato imohey hap wywo."

²¹ Guꞌuro po pe watoĩ­neꞌen yne aitoria map haria — Uipiit aru tuwe­mopyp e hap yn aiwa­nẽtup hawe. Yne mesuwat yi totiaria wemopyp hanuaria topap hawyi watoꞌe aiwa­nẽtup hawe. Iꞌewyte yne aihũria yne miat koꞌi yne mikoi yne aiminug koꞌi ikahuro rakano tukup­teꞌen watoꞌe. Wati­ꞌa­parap saꞌa­wyꞌi hawyi ikuꞌuro rakaria wo watu­kup­teꞌen watoꞌe. Maꞌato miꞌi pytkai wato­mohey kahato — Meiũran aru tut waku hap ahete i watoꞌe aipyꞌa pe. Tupana aru aihep mesuwat guꞌuro po pyi watoꞌe. Waku pe aru watoĩ­neꞌen watoꞌe iraniaꞌin Iesui mohey haria pe kat pote Tupana saꞌy­ruꞌin Tupana saki­ꞌytꞌin aito pote ti aru waku sese puo watoĩ­neꞌen wẽtup miit ewy yn watoĩ­neꞌen Iesui piit ewywuat watoꞌe. Watu­wẽtem guꞌuro po pyi hap eꞌat pe aru yne mesu­wa­rote aiꞌewy topy­huꞌat i raꞌyn gaꞌapy yi yꞌy waku pe i raꞌyn tukup­teꞌen wuatꞌi eꞌat pe aiꞌewy watoꞌe aipyꞌa pe Tupana mohey hap wywo."

²² Nimo te mesup te yne Tupana minug koꞌi — Waku pe watu­kup­teꞌen aru iꞌatuꞌe iꞌewyte watoꞌe. Maꞌato koitywy waho­ꞌopot kahato aheĩneꞌen hap ete mesu­wa­rote iꞌatuꞌe miat koꞌi pira koꞌi weita koꞌi iꞌewyte watoꞌe. Taꞌi yne Tupana minug koꞌi haty potiat kakꞌi­ꞌa­tuꞌe kakꞌi­ꞌa­tuꞌe hap ewy tukup­teꞌen mesuwe. Aikotã hirakat haty potiat ewy ahatek ahatek hap kahato topy­huꞌat mesuwe."

²³ Hoꞌopot haria sok Tupana minug koꞌi mesu­wa­ro­tiaria. Saꞌa­wyꞌi ainug hap eꞌat pe waku pe watoĩ­neꞌen maꞌato mesup yne raꞌyn hoꞌopot haria wo tukup­teꞌen e. Aito Iesui mohey haria hoꞌopot haria wo kahato watoĩ­neꞌen Tupana tum naꞌyn ahepe Topãꞌãu pytkai. Haty kahato hap ahete pote kynkyn­wa­toꞌe aipyꞌa pe — Uruiky­ꞌesat kahato urupiit yt ikahuro rakat i watoꞌe Tupana pe. Urunug no esaki­ꞌytꞌin esaꞌy­ruꞌin sese wo watoꞌe. Waku pe urutu­kup­teꞌen teran yt kat i uruꞌarot hap wywo. Uruwe­mo­wepit hap yn mywo sese watoĩ­neꞌen neran watoꞌe Tupana pe kynkyn­ꞌaiꞌe hap wywo."

²⁴ Mio tã watoꞌe Tupana pe — Uruimohey kahato eꞌe hap ewywuat watoꞌe. Yne yne nug hat ereĩneꞌen hap uruimohey watoꞌe. Wuatꞌi — Atunug aru eꞌe hap koꞌi ewywuat hap uruimohey kahato watoꞌe. — Uimohey pote woro­ho­ꞌoe­ha­kye­raꞌat wuatꞌi eꞌat pe eꞌe hap ewywuat ti uruimohey watoꞌe. Maꞌato koitywy yt putꞌokꞌe i te eꞌe hap ewywuat pytkai uruimohey te watoꞌe. Yt karãpe i uruta­ꞌa­kasa Esaꞌyru urueha wywo te maꞌato uruimohey MIꞌI yn urueha­kye­raꞌat kuap hat urupyꞌa pe watoꞌe Tupana pe. Yt uruta­ꞌa­kasa i te Esaꞌyru wen urueha pe maꞌato miꞌi pytkai uruimohey kahato tut aru eꞌe hap ewywuat Tupana watoꞌe. Mesup sehay toĩneꞌen urumi­mohey mekewat eꞌat pe aru uruta­ꞌa­kasa eꞌe hap ewywuat heremo raꞌyn eꞌe hap watoꞌe. Maꞌato yt naku i watoꞌe Tupana pe — Uruta­ꞌa­kasa En urueha wo miꞌi pote uruimohey En yt naku i watoꞌe. Uruta­ꞌa­kasa Tupana kape aheha wo hawyi heremo raꞌyn toĩneꞌen aheha pe. Heremo raꞌyn toĩneꞌen aimi­mohey. Miꞌi tupono wẽtup aimi­mohey ewywuat toĩneꞌen yt saꞌa­wy­ꞌiwuat aimi­mohey ewy hin i. Heremo raꞌyn ahehamo Tupana pote yt wahe­katup kuap i poꞌog tut irane hap."

²⁵ Maꞌato yt toĩneꞌen i ahehamo pote imohey hap wywo yn wahe­katup — Ariot i aru e hap ewy. Yt wati­waure hin i ahepiat imohey hap. Wahe­katup imohey hap wywo yt heremo i pytkai.

"

²⁶ Karãpe ahehay Tupana kape turan yt watikuap hin i kat som waku wahẽtup kat som yt naku i wahẽtup katu­pono aiweꞌeg hap yt putꞌokꞌe kat som waku watoꞌe Tupana pe ahehay wo hap ete. Maꞌato miꞌi turan Tupana Pãꞌãu Wakuat putꞌokꞌe ahete aipo­wyro hamo ahehay Tupana kape aiꞌe hap moherep hamo aiwẽ pyi hawyi aiwywo kahato toĩneꞌen Ipãꞌãu ahehay tewawiat ete aipo­wyro kahato ahehay Tupana kapiat hamuat. Miꞌi hawyi aipiit pyi aipyꞌa pyi aiwa­nẽtup hap pyi Ipãꞌãu ihay kahato Tupana wywo aiwẽ pyi. Yt watikuap kuap i kat som waku watoꞌe hawyi Tupana Pãꞌãu ihay aipyꞌa pyi aikotã kynkyn­wa­toꞌe hap ewy hawyi kat som waku Tupana miky­ꞌesat ewy toimo­herep Tupana pe aiwẽ pyi."

²⁷ Tupana yt ahehay se kape hin i ihaꞌat maꞌato aipyꞌa kape aiwa­nẽtup hap kape ihaꞌat kat watoꞌe som aipyꞌa pyi hap kape ihaꞌat. Toikuap kahato Topãꞌãu pusu aipiit pywiat hap. Topãꞌãu wanẽtup hap kat som watoꞌe teran hap toikuap hawyi Ipãꞌãu timo­herep aimiẽtup koꞌi Aiꞌywot pe. Tupana Pãꞌãu ni ihay kuap Tupana wywo aimiẽtup moherep hamo. Toikuap kahato Tupana miky­ꞌesat koꞌi hawyi ahẽtup turan toimo­herep ahepe tomi­ky­ꞌesat ewywuat koꞌi pyi ihay tomi­ky­ꞌesat koꞌi aimi­ky­ꞌesat ewy."

²⁸ Wati­kyꞌe sese Tupana pote iꞌewyte imiky­ꞌesat nug haria wo watoĩ­neꞌen. Miꞌi pote Tupana ipotpap kahato aika­wiano. Pywo ti rat aikotã aikotã topy­huꞌat ahete sio waku sio yt hap puo ipotpap kahato aika­wiano. Putꞌokꞌe ahete aimo­wepit hap sio ahatek hap toĩneꞌen aika­wiano kahato Tupana. Aito Tupana tokyꞌe haria iꞌewyte imiky­ꞌesat nug kahato haria wo pote ipotpap kahato aipo­wyro hamuat aipoi­tyro hamuat waku nug hamuat.

"

²⁹ Yt aheĩneꞌen i te hap eꞌat turan Tupana aikuap taꞌyn. Taꞌi ainug hap eꞌat eꞌyianmete Tupana aikuap. — Taꞌi miꞌiria wyti aru Uhaꞌyru mohey hanuaria tukup­teꞌen e tuwepe nimo te yt uwe i aito hap eꞌat pe. Uhaꞌyru mohey haria wo aru atiꞌa­tunug Uhaꞌyru ewywuaria Taꞌa­tuey­keꞌet ewywuaria Taꞌa­tu­kywyt ewy atunug miꞌiria Uhaꞌyru watꞌypꞌi wo hap atiꞌa­tunug miꞌiria e tuwepe nimo te yt uwe i aito hap eꞌat pe. Uhaꞌyru mohey haria wyti aru atiꞌa­tu­ꞌairo uhemiitꞌin sese wo e Tupana topyꞌa pe nimo te yt uwe i te toĩneꞌen mesu­wa­rote turan."

³⁰ Pyno saꞌa­wyꞌi sese Tupana aiꞌairo atipy pe. Miꞌi hawyi putꞌok­wa­toꞌe aiꞌy­wãꞌĩ hap hawyi watoĩ­neꞌen mesuwat yi tote hawyi wato­mohey Haꞌyru hawyi Tupana aikaykay tuwe­wawi towa­nuaria sese wo. Miꞌi hawyi — Waku kahato uipyꞌa pe uiwa­nẽtup hawe eweikup­teꞌen e ahepe. Pywo ti rat woro­ho­ꞌonug eiperia uhaꞌy­ruꞌin uhaki­ꞌytꞌin sese wo e. Karãpe putꞌokꞌe uimõ­typot hap eꞌat sese mesu­wa­rote hap eꞌat pe uimi­mõ­typot haria wo aru eweikup­teꞌen e. Mekewat eꞌat pe aikotã miitꞌin uimõ­typot hap ewywuat miitꞌin mimõ­typot wo eweikup­teꞌen are e Tupana ahetiat yt kat i te aheĩneꞌen turan.

"

³¹ Waku kahato Tupana katu­pono aikyꞌe hap wywo tutunug yne aika­wiano hap. Nimo pyi mesup te iꞌewyte mũki­ꞌite te aikai yn Tupana toĩneꞌen. Tupana toĩneꞌen aiwy kahato hawyi yt uwe i ahewa­nĩ­kaptia aiꞌakit kuap."

³² Tutum naꞌyn ahepe Tosa­ꞌyru sese Tomi­kyꞌe poꞌog aheha­kye­raꞌat hamo ikuꞌuro aikyꞌe hap upi. Tupana hegyiꞌat kahato. Tosa­ꞌyru po pyi mesup tutum neran ahepe yt kat saꞌup i yne yne yt kat i te aipo piat rakat aheha­kye­raꞌat tuwy."

³³ Koitywy Tupana toꞌe ahetiat — Yt kat i saꞌag atipuẽti Uhaꞌyru mohey haria kai uiwa­nẽtup hawe e katu­pono uimi­ꞌai­roria kahato miꞌiria e Tupana. Yt kan hamo i iraniaꞌin teꞌe­roꞌe uhepe — Yt naku i kahato Esaꞌyru mohey haria katu­pono miꞌiria ti uimi­moe­waku koꞌi sese e Tupana ahepiat."

³⁴ Tupana mimoe­waku koꞌi kahato aito pote yt uwe i toꞌe kuap ahepe — Tupana miꞌa­piheg koꞌi wo aru eweikup­teꞌen yt iꞌatuꞌe kuap i. Yt miꞌi tã hin i aru e Tupana ahepiat. Tupana Mipo­ꞌoro Wuatꞌi Miitꞌin Porekuat nuat ikuꞌuro wuatꞌi miitꞌin apiheg hap koꞌi u hamo. Ikuꞌuro hawyi tuwẽtem guꞌuro pyi miitꞌin moieĩneꞌen wuatꞌi eꞌat piat hamo. Mio raꞌyn toĩneꞌen atipy pe apyk pe Tupana po ran kai imohey haria imimo­hãpyk haria moherep hamuat. Taꞌi wato­mohey hawyi imimo­hãpyk haria wo watu­kup­teꞌen Tupana wanẽtup hawe. — Waku kahato uimohey haria koꞌi e yn ahepe Tupana ahetiano iraniaꞌin me ahewa­nĩ­kaptia pe."

³⁵ — Woro­ho­ꞌo­kyꞌe kahato eipe e Aika­ꞌiwat Iesui ahepe. Yt kat i hin i aihep kuap Aika­ꞌiwat po pyi. Ahatek hap apo aihep kuap Aikyꞌe hat po pyi. Yt hin i watoꞌe are. Ahoꞌopot hap apo aihep kuap Aipo­typot Iesui po pyi. Yt hin i watoꞌe. Miitꞌin miky­ryꞌi ahetiat hap pupi apo aihep kuap Aiꞌakag po pyi. Yt hin i watoꞌe. Ahesyꞌat hap apo pupi aihep kuap Tupana Mipo­ꞌoro Aipo­rekuat nuat po pyi. Yt hin i watoꞌe are. Yt ahekat hin i hap apo aihep kuap Aikyꞌe hat po pyi. Yt hin i watoꞌe. Iraniaꞌin aiꞌauka teran haria pupi apo aihep kuap Aika­ꞌiwat po pyi. Yt hin i watoꞌe. Aiku­ꞌuro hap apo aihep kuap Aikyꞌe sese hat po pyi. Yt hin i watoꞌe."

³⁶ Taꞌi yt kat i aihep kuap Aika­ꞌiwat Aikyꞌe hat po pyi watoꞌe katu­pono mio tã e morekuat Tawi tuwepy hawuo tomiwan me — Tupana uruho­ꞌopot kahato mesuwe emohey haria uruto pote e. Emohey haria pote uruꞌauka teran haria typyꞌi kahato rakaria tukup­teꞌen mesuwe e. Yne eꞌat pe uruꞌauka teran at e. Tupana ienuk koro hap eꞌat pe uruiꞌa­tu­ꞌuka kahato uruhũria urumiꞌu wo. Miꞌi hap ewywuat re uruwa­nĩ­kaptia urukat uruꞌa­tu­ꞌuka hamo mesup mesuwe Mehĩ are e morekuat Tawi tuwepy hawe tomiwan me."

³⁷ Pyno morekuat Tawi ewy kahato wato­py­huꞌat mesu­wa­rote hoꞌopot haria maꞌato miꞌi pytkai yt watoiat hin i Aikyꞌe hat Iesui are katu­pono Aika­ꞌiwat ti aimoe­saika kahato aiꞌakit hap pupi. Miꞌi hawyi Aikyꞌe hat Koro toĩneꞌen aiwywo at kaꞌap wuatꞌi aiꞌakit hap akit hamuat. Miꞌi pote ti watoĩ­neꞌen Ahesu­rara Akag ewy. Aikotã surara poꞌog hesaika rakat torania kawiat ewywuat watoĩ­neꞌen mesu­wa­rote yne yt naku i akit hamuat."

³⁸ Pywo ti rat mesup taꞌyn atikuap kahato raꞌyn yt kat i hin i aihep kuap Aikyꞌe hat po pywiat. Aiku­ꞌuro hawyi watoĩ­neꞌen kahato te Aheka­tuwy po pe. Aheĩneꞌen saꞌag kahato mesu­wa­rotiat hap iꞌewyte yt aihep kuap i Aiwy po pyi hap atikuap taꞌyn. Iꞌewyte atipy piaria yt aipo­hari kuap i Aiꞌa­pykok hat aikyꞌe hap ete. Miꞌi hawyi more­kuaria mesu­wa­ro­tiaria iꞌewyte yt aipo­hari kuap i Aipo­typot Iesui po pyi. Pywo ti rat ahiag iꞌewyte ahiagnia wy yt aihep kuap i Tupana po pyi katu­pono aikyꞌe wuatꞌi eꞌat pe. Taꞌi gaꞌatpo te mesup te iꞌewyte mũki­ꞌite watoĩ­neꞌen ipo pe wuatꞌi eꞌat pe. Yt kat i hin i aipo­hari kuap aito Iesui mohey haria Aikyꞌe hat Koro po pyi."

³⁹ Taꞌi yt uwe hin i mesu­wa­ro­tiaria tipo­hari kuap aito Tupana po pyi. Iꞌewyte yt uwe hin i wy mesuwat yi ywytꞌok­py­piaria aihep kuap aito Aikyꞌe hat po pyi. Yt uwe hin i gaꞌapy puaria wy aipyhyp kuap Aikyꞌe kahato hat Tupana kape Tosa­ꞌyru Aipo­typot Akag mohey haria aito pote e. Mesuwat miwan nug hat ri Pauru.

"

9

¹ Uiwy­riaꞌin Iuteuria ywania uhehay teran eiwywo uimiwan me mesuwe. Eiperia ti uheinytꞌin koꞌi iꞌewyte uheyke­ꞌetꞌin koꞌi are. Uito ti Pauru eheywyt eikywyt sese ewy areĩneꞌen katu­pono ahaꞌa­seꞌi pot Aparãu mote."

² Pywo pe ti woro­ho­ꞌo­kyꞌe kahato eiperia uiꞌy­wania Iuteuria. Pywo ti rat woro­ho­ꞌoekyi teran eiperia yne Tupana Mipo­ꞌoro Aipo­typot Iesui kape uhepiat eimuꞌe hamo maꞌato yt uimohey i eipe. Haty kahato uipyꞌa piat wywo ahẽtup ehepe — Eweimohey ro Iesui eipyꞌa pe Iesui ti Tupana Mipo­ꞌoro Aipo­rekuat nuat hap eweimohey ro are. Haty kahato uipyꞌa pe uiꞌy­wania katu­pono yt eweimohey i te Iesui. Pywo pe ti yt uheso hin i Tupana Pãꞌãu uipyꞌa piat tikuap kahato yt uheso i hap woro­ho­ꞌoekyi teran eipe torania Iesui kape uhepiat eikyꞌe hap wywo are. Atikuap yt uheso i hap. Karãpe arewa­nẽtup uity uiꞌywot ywania Iuteuria kape hawyi arewak kahato uipyꞌa puo katu­pono haty kahato uhete hap toĩneꞌen uipyꞌa puo. Haty hap ewywuat toĩneꞌen at kaꞌap uiwa­nẽtup hawe katu­pono uiꞌy­wania uhaꞌa­se­ꞌiꞌin koꞌi uhaꞌy­ruꞌin koꞌi uhaki­ꞌytꞌin koꞌi uityꞌin koꞌi uiꞌy­wotꞌin koꞌi yt Iesui mohey haria hin i wo tukup­teꞌen mote. Iuteuria atueha­kye­raꞌat teran hap ahatyꞌu kahato uipyꞌa pe are. Yt uheso hin i. Tupana tikuap kahato yt uheso hin i hap."

³ Wẽtup eꞌat pe areꞌe Tupana pe — Pyno waku uiꞌa­piheg uiꞌy­wania ehakye­raꞌat hamo are. Waku areĩneꞌen ekuasa hano hawyi waku uipo­ꞌoro aria wato kape uiꞌa­piheg hano uiꞌy­wania ehakye­raꞌat hamo are. Atiky­ꞌesat kahato uiꞌy­wania tukup­teꞌen emieha­kye­raꞌat koꞌi Tupana are. Miꞌi hap upi waku uihep Iesui po pyi uiꞌa­piheg hamuat uiꞌy­wania emieha­kye­raꞌat wo tukup­teꞌen aru areꞌe saꞌa­wyꞌi Tupana pe yt kat i uheso hap wywo.

"

⁴ Meiũpe uhehay teran eiwywo uiꞌy­wania Iuteuria etiat sehay. Saꞌa­wyꞌi sese te mesup te uiꞌy­wania Iuteuria tukup­teꞌen kahato Tupana miꞌairo sese koꞌi e. Nimo te pyi raꞌyn Tupana saꞌy­ruꞌin koꞌi ewywuat Tupana saki­ꞌytꞌin koꞌi ewywuat wo tukup­teꞌen uruꞌy­wania. Miꞌiria ti Tupana mimõ­typot kahato tukup­teꞌen. Miꞌiria pe uruꞌy­wania puo saꞌa­wyꞌi Tupana timo­herep tehay miwan miat yne iꞌewyte tomõ­typot hap iꞌewyte tẽtyhot hap. Miꞌiria pe saꞌa­wyꞌi — Woro­ho­ꞌo­poi­tyro yne eꞌat e uruꞌy­wania pe urueꞌa­se­ꞌiꞌin me. Saꞌa­wyꞌi Tupana toꞌe — Woro­ho­ꞌo­poi­tyro aru yne eꞌat pe aru uiꞌe hap ewy e. Atunug aru uimõ­typot yat koro eipy­ꞌa­setpe e saꞌa­wyꞌi uruepe. Taꞌi saꞌa­wyꞌi Tupana toꞌe — Atunug aru eipiit kawiat Uimi­po­ꞌoro Wuatꞌi Porekuat nuat hat e urueꞌa­se­ꞌiꞌin me. Urueꞌa­se­ꞌiꞌin saꞌa­wyꞌi Tupana wywo iꞌatuehay kahato rakaria."

⁵ Urueꞌa­seꞌi sese ti mekewat Aparãu e hap het rakat iꞌewyte urueꞌa­se­ꞌiꞌin koꞌi ti mekewat aseꞌi Isaki iꞌewyte mekewat aseꞌi Isareu e hap het rakat. Miꞌiria ti saꞌa­wyꞌi hewyry kahato Tupana wywuat rakaria. Pywo ti Tupana kuap haria akag koꞌi uruꞌy­wania saꞌa­wyꞌi tukup­teꞌen. Saꞌa­wyꞌi iraniaꞌin ywania eiperia Humanu ywania ewywuaria yt tikuap hin i Tupana sese maꞌato miꞌi hap eꞌat pe uruꞌy­wania tikuap sakpo Tupana sese. Uruꞌy­wania saipepiat sese Iesui tuwe­mo­herep. Urupiit ewywuat kahato Iesui tuwe­mo­herep. Taꞌi uruꞌy­wania piit ewywuat kahato Iesui piit toĩneꞌen. Tupana Mipo­ꞌoro Aipo­rekuat nuat ty ti Iuteu kawiat. Miꞌi pote waku watu­wehum kahato Tupana ete — Tupana watu­wehum kahato ewawi katu­pono erepuꞌi nug hawyi ereĩneꞌen kahato aipy­ꞌa­setpe Aiꞌakag wo. Wato­mõ­typot En ni wuatꞌi eꞌat pe. Waku raꞌyn waku raꞌyn waku watoꞌe Tupana pe."

⁶ Saꞌa­wyꞌi Tupana toꞌe urueꞌa­seꞌi Aparãu eharyꞌi mana Sara pe — 9 ewaty putꞌokꞌe hawyi araꞌaipok i ewawi mana hawyi wyti aru emẽpyt raꞌyn toĩneꞌen e Tupana tope hawyi hupiꞌa raꞌyn maꞌato mana Sara iporo sese pytkai. Yt karãpe i Tupana tiꞌa­parap — Atunug aru uiꞌe hap ewy hap ete. Miꞌi hawyi 9 ewaty hawyi taꞌaipok hawyi mana Sara imẽpyt a raꞌyn. Mekewat Aparãu saꞌyru Isaki tuwe­mo­herep taꞌyn itote imẽpyt raꞌyn Tupana e hap ewywuat. Miꞌi hawyi Tupana toꞌe — Isaki ti uimi­ꞌairo sese e. Isaki saipe­piaria ti uhemiitꞌin sese tukup­teꞌen e. Isaki ywania wyti aru uiꞌy­wania mesuwat yi tote tukup­teꞌen aru wuatꞌi eꞌat pe e Tupana urueꞌa­seꞌi pot pe."

⁷ Maꞌato tukup­teꞌen kahato Aparãu saꞌy­ruꞌin yt Isaki kaipywiat i. Miꞌiria ti wẽtup ok Aparãu eharyꞌi kaipywiat tukup­teꞌen wy wẽtup ywania mekewat hary­poria Isitu ywania kawiat mana Sara eropat hat mẽpyt. Miꞌiria ete Tupana toꞌe — Aparãu esaipepiat sese ti Sara mẽpyt Isaki e hap het rakat are e. Uiwa­nẽtup hawe Isaki yn esaꞌyru sese e. Miꞌi emẽpyt kawiat wyti aru atiꞌa­tu­mo­herep emiariru sem koꞌi e. Isaki saꞌyru kawiat atiꞌa­tu­mo­herep eꞌywania sese mesuwe mehĩ e Tupana saꞌa­wyꞌi urueꞌa­seꞌi Aparãu me."

⁸ Mekewat ewary wẽtup ok Sara emiit kaipyi emẽpyt re wen maꞌato Isaki yn ni esaꞌyru sese uimi­ꞌairo watꞌyp sese yn ni are e Tupana. Eharyꞌi mana Sara iporo rakat kaipywiat yt myhuꞌat hat i raꞌyn kaipywiat yn ni aru ewatꞌyp sese toĩneꞌen mehĩ e Tupana urueꞌa­seꞌi Aparãu me."

⁹ Mio tã e ti Tupana uruehary Sara pe — Mũki­ꞌite mũki­ꞌite 9 ewaty tokosap hawyi wyti aru toĩneꞌen emẽpyt epiit sese kaipywiat tuwe­mo­herep aru uiꞌe hap ewy e Tupana saꞌa­wyꞌi mana Sara pe. Miꞌi hawyi topy­huꞌat iꞌe hap ewy raꞌyn. Iporo sese pytkai yt imẽpyt i rakat pytkai mana Sara tomo­herep tomẽpyt Isaki Tupana e hap ewy raꞌyn."

¹⁰ Miꞌi hawyi Isaki totag naꞌyn hawyi totat teha­ryꞌi Hepeka e hap het rakat. Miꞌi hawyi iharyꞌi hawyi hupiꞌa hawyi imẽpyt raꞌyn typy ok ipat rakaria haꞌy­ruꞌin tuwe­mo­herep mana Hepeka pyi."

¹¹ Maꞌato saꞌa­wyꞌi Isaki saꞌy­ruꞌin wemo­herep hap eꞌyianmete Tupana toꞌe mana Hepeka pe — Emẽpyt ipat rakat saꞌa­wy­ꞌiwuat wẽtem yianmiat hat ti aru topy­huꞌat eropat hanuat e Hepeka pe. Miꞌi hawyi iykeꞌet topy­huꞌat toywyt eropat hano Tupana e hap ewy imiky­ꞌesat ewy tutunug. Miꞌi hawyi imẽpyt Iako topy­huꞌat Isaki saipepiat sese. — Atiꞌairo ipat ok watꞌypꞌi Iako e Tupana iꞌatu­ꞌy­wãꞌĩ hap eꞌyianmete."

¹² Miꞌi hap tohenoi iꞌatuty Hepeka pe yianmete Isaki saꞌy­ruꞌin ipat rakaria minug etiat Iako yt kat i te wakuap nug kuap sio waku sio yt hap eꞌyianmete Tupana tiꞌairo. Yt hewaku hap upi i toiꞌairo Iako. Koitywy aito tuwepyi te Tupana aiꞌairo aikaykay tuwe­wawi hap."

¹³ Katu­pono iꞌatu­ꞌy­wãꞌĩ hap eꞌyianmete Tupana toꞌe — Uimi­kyꞌe kahato Iako uimi­ꞌairo kahato e maꞌato iykeꞌet Esau piat — Yt uimi­kyꞌe i kahato e."

¹⁴ — Taꞌi Tupana yt naku i iꞌatuꞌe iraniaꞌin. Yt hãpyk i kahato katu­pono toiꞌairo Iako hawyi yt toiky­ꞌesat i Esau iꞌatuꞌe iraniaꞌin. Yt ahewaku hap upi i aiꞌairo pote yt naku i Tupana toĩneꞌen iꞌatuꞌe saꞌag iraniaꞌin Iako emiari­ruꞌin me uruepe."

¹⁵ Yt miꞌi tã hin i ti rat uiwy­riaꞌin are katu­pono waku kahato Tupana toĩneꞌen. Nimo te Tupana toꞌe ahaꞌa­seꞌi Musei pe — Areĩneꞌen iwese kahato rakat e. Miꞌi pote ti atiꞌa­tue­ha­kye­raꞌat kahato miitꞌin uipyꞌa pyi uimi­ꞌairo koꞌi e. Atiꞌa­tue­ha­kye­raꞌat teran miitꞌin mote atikyꞌe kahato miit uimi­ky­ꞌesat ok tã e. Atiꞌairo miit uhemiit no uimi­ky­ꞌesat upi yt iꞌatue­waku hap upi i atiꞌairo uheropat hanuat e Tupana."

¹⁶ Wẽtup ok miit ihaky­ꞌeꞌi uhepe rakat atekyi uhowawi uiwepyi sio waku rakat sio yt e. Uito ti Tupana pote atunug uimi­ky­ꞌesat ewy e. Uito Tupana pote uiwepyi atiꞌa­tu­ꞌairo miitꞌin uipyꞌa pyi uimi­ky­ꞌesat ewy e Tupana saꞌa­wyꞌi Musei pe. Mio tã e hap kaipyi watikuap taꞌyn yt ahewaku hap upi i Tupana aikyꞌe hap maꞌato towese hap kaipyi aheha­kye­raꞌat hap watikuap."

¹⁷ Saꞌa­wyꞌi Tupana toꞌe morekuat yi Esitu piat Warau e hap het rakat pe — Uiwepyi woro­ꞌairo morekuat no mesuwat yi tote e. Ereĩneꞌen morekuat yi Esitu pe hawyi eminug yt naku i hap koꞌi kaipyi wuatꞌi miitꞌin mesu­wa­rote uhet kuap haria teꞌe­ro­py­huꞌat. Katu­pono atimo­herep kahato irane uhesaika hap hawyi atipo­re­nõtem uhemiitꞌin Iuteu ywania epo pyi e Tupana morekuat Warau me temiitꞌin ewanĩkap sese pe."

¹⁸ Miꞌi pote mesup te Tupana topy­huꞌat iwese rakano tomi­ky­ꞌesat ok tã maꞌato iraniaꞌin ipyꞌahak takaria pe toiꞌa­tu­mõ­py­ꞌahak poꞌog neꞌi tuwepyi tomi­ky­ꞌesat ewy."

¹⁹ Mio tã iꞌatuꞌe iraniaꞌin — Tupana ti yt naku i katu­pono tomi­ky­ꞌesat ewy mesu­wa­rote tutunug iꞌatuꞌe saꞌag. — Yt hãpyk hin i etunug Tupana iꞌatuꞌe iraniaꞌin ipyꞌa heg nakaria. Toiꞌa­tu­mõ­py­ꞌahak kahato poꞌog tehay wo tuweete iꞌatuꞌe. Pyno aikotã aru toiꞌa­tu­ꞌa­piheg tomi­mõ­py­ꞌahak haria iꞌatu­minug saꞌag ete iꞌatuꞌe. Tupana tomi­ky­ꞌesat ewy yn inug mote yt watu­wewãi kuap i Tupana kape. Yt wati­nãpin kuap i pote Tupana katu­pono tomi­ky­ꞌesat ewywuat yn tutunug iꞌatuꞌe iraniaꞌin. Miꞌiria pe areꞌe — Yt eweiwesat saꞌag neiꞌo Tupana are katu­pono aito yi ewywuat yi og ahemyp nug hap ewywuat aito are iꞌatuepe. Miꞌi hawyi Tupana ainug ahemyp nug hat ewy."

²⁰ Yt naku i watoꞌe Tupana kape — Kat pote uinug miꞌi tã Uhyt Mimi watoꞌe tope. Yt naku i watoꞌe — Yt uimi­ky­ꞌesat ewy hin i uinug watoꞌe Tupana pe are. Mio tã watoꞌe pote wato­py­huꞌat aikotã yi og yt kan hamo i yt naku i ahemyp nug hamuat rakat ewy. — Yt uinug neiꞌo emiky­ꞌesat ewy watoꞌe saꞌag. Uinug no Tupana uimi­ky­ꞌesat ewy watoꞌe pote wato­py­huꞌat yt ikahu hin i rakat yi og saꞌag myp nug hat po pe hap ewy. Myp tutunug hawyi yt kan hamo i topy­huꞌat yi og saꞌag kawiat i pote pokꞌe meremo aria pe tosey hawyi. Miꞌi hap ewy kahato aitoria aiwepyi aimi­ky­ꞌesat yn wati­ky­ꞌesat hawyi. Tupana po pe watoĩ­neꞌen wen maꞌato yt aimo­kahu kuap i tomi­ky­ꞌesat ewywuat."

²¹ Miꞌi hap ewy kamũti nug hat po pe yi og wakuat hawyi tutunug tomi­ky­ꞌesat ewywuat. — Koitywy atunug mesuwat yi og kawiat typy kamũti e tuwepe. Wẽtup kamũti atunug miitꞌin mipun eiam yt ikahu i rakat. Maꞌato wẽtup atunug kamũti ikahu kahato rakat uiꞌyat painug hamuat e tuwepe hawyi tutunug naꞌyn typy kamũti yi og kawiat tomi­ky­ꞌesat ewy. Typy kamũti wẽtup yi og kaipyi yn tomi­ky­ꞌesat ewy. Miꞌi hap ewy ti Tupana tunug aito tomi­ky­ꞌesat ewy."

²² Taꞌi kamũti nug hat ewy Tupana ainug tomi­ky­ꞌesat ewy. Yi og saꞌag mote kamũti nug hat ipyꞌahak kahato yt tutunug kuap i kamũti yi og saꞌag mote. Miꞌi hawyi — Yt kat hamo i mesuwat yi og toꞌe hawyi toipun pya toꞌyat pyi. Toiꞌapok taꞌyn tominug kamũti. Miꞌi hap ewy kahato Tupana miitꞌin ete tope­rupꞌi wywo ipotpap miꞌiria wywo. Meiũran iperupꞌi potꞌi hawyi ipyꞌahak — Pyno woro­ho­ꞌo­ꞌa­piheg naꞌyn eipe e iꞌatuepe aikotã kamũti nug hat ewy yt aimo­hãpyk kuap i hawyi."

²³ Maꞌato wẽtup yi og wakuat topy­huꞌat kamũti nug hat po pe hawyi hepamo tutunug kamũti topotpap mo waku rakat wuatꞌi eiam mo raꞌyn. Miꞌi hap ewy Tupana ainug tomõ­typot hamo. Ainug hawyi miitꞌin teꞌe­ra­haꞌat hawyi teꞌe­ru­wehum Tupana ete. — Tupana waku rakat iꞌatuꞌe iwese kahato miꞌiria nug hap ete ihaky­ꞌeꞌi kahato Tupana miꞌiria ete iꞌatuꞌe. Tupana eiam kahato miꞌiria tukup­teꞌen tuwe­pokuap kahato miꞌiria nug hap ete iꞌatuꞌe.

"

²⁴ Tupana miꞌairo kahato aito. Tupana aikaykay tuwe­wawi aito Iuteuria ywania iꞌewyte iraniaꞌin aito wẽtup ywania."

²⁵ Saꞌa­wyꞌi Tupana ehay moherep hat Useia henoi tomiwan me. Tupana ti toꞌe uhepe — Meiũran aru wẽtup ywania pe yt uhemiitꞌin sese i rakaria pe ahenoi — Eiperia ti mesup uhemiitꞌin sese eweikup­teꞌen e. Meiũran aru iraniaꞌin ywania yt uwe miky­ꞌeria i kape — Uimi­ky­ꞌeria kahato sese eiperia e Tupana e Useia miwan me."

²⁶ Meiũran aru aikope aikope miitꞌin teꞌe­roꞌe — Eiperia yt Tupana emiitꞌin hin i iꞌatuꞌe hap tote aru teꞌe­roꞌe — Eiperia ti Wuatꞌi Eꞌat Piat Ieĩneꞌen hat Tupana sese saꞌy­ruꞌin saki­ꞌytꞌin iꞌatuꞌe aru e Useia nimuat Tupana ehay moherep hat tomiwan 1.10 2.23 pe."

²⁷ Miꞌi hawyi Isaia Tupana ehay moherep hat mio tã e haty wo — Aitoria ti Isareu ywania e. Iꞌatu kahato aitoria aikotã yẽpe ete yi kyt iꞌatu hap ewy watoĩ­neꞌen e. Typyꞌi kahato aito maꞌato kurin kurin Tupana mieha­kye­raꞌat wuaria sese aipy­ꞌa­setpe tukup­teꞌen e katu­pono iꞌatu­minug saꞌag yt nakuap i kahato tukup­teꞌen aikotã tawa Sutuma tawa Kumura yt naku i nug haria ewy e."

²⁸ Pywo ti rat Tupana tunug toꞌe hap ewy aru ahete — Woro­ho­ꞌo­ꞌa­piheg kahato aru eiperia yt naku i nug haria merepꞌe hap ewy yn woro­ho­ꞌo­moma sese aikotã nimo atiꞌa­tuwuk tawa Sutuma tawa Kumura hap ewy e Isareu ywania pe."

²⁹ Maꞌato mesup yt atunug i te e. Katu­pono eipy­ꞌa­setpe tukup­teꞌen uimi­ꞌairo koꞌi uimohey hat Aparãu ewywuaria e. Miꞌiria ti yt uiꞌatoiat teran hin i haria e Tupana nimo Isaia tomiwan 10.22 pe uruꞌy­wania Iuteuria pe.

"

³⁰ Pyno eweipo­meꞌeg no ehewaure uhowawi uhytꞌiꞌin manaꞌin Humanu ywania are. Saꞌa­wyꞌi uruꞌy­wania Iuteuria yn Tupana miꞌai­roria tukup­teꞌen wen maꞌato mesup iraniaꞌin ywania mesu­wa­ro­tiaria waku pe tukup­teꞌen taꞌa­tu­mohey Haꞌyru hawyi. Saꞌa­wyꞌi yt taꞌa­tukuap hin i muꞌap Tupana kapiat miꞌiria iꞌewyte yt taꞌa­tukat hin i Tupana maꞌato mesup taꞌa­tu­mohey Iesui hawyi waku pe tukup­teꞌen Tupana wywo."

³¹ Maꞌato Iuteuria Tupana miꞌai­roria saꞌa­wy­ꞌi­wuaria Tupana ywania sese tikat kahato mesup wẽtup muꞌap Tupana kapiat yt Iesui upi i. Taꞌa­tu­ky­ꞌesat kahato — Waku kahato eipe e hap Tupana wanẽtup hawiat hap. Miꞌi hawyi mio tã iꞌatuꞌe — Pyno waku watunug kahato toran Tupana wãiꞌe hap ainãpin hap koꞌi Musei mienoi koꞌi hawyi waku pe watoĩ­neꞌen Tupana pyꞌa pe iꞌatuꞌe kahato toꞌope. Miꞌi hawyi maꞌato taꞌa­tuiãꞌãg inug hap ete at kaꞌap hawyi yt kat i muꞌap taꞌa­tu­puẽti Tupana kape yt taꞌa­tukat i Iesui mohey hap upi hawyi."

³² Taꞌa­tu­ꞌa­parap kahato Tupana kapiat muꞌap ete kat pote taꞌa­tu­wepyi taꞌa­tu­minug wakuat upi taꞌa­tukat taꞌa­tu­we­moe­waku hap. Yt taꞌa­tukat hin i Iesui mohey hap kaipywiat upi taꞌa­tu­we­moe­waku hap. Miꞌi pote — Watunug toran Tupana piat aiwo­ꞌo­nãpin hap koꞌi pote ti waku pe watoĩ­neꞌen Tupana pe iꞌatuꞌe toꞌope yt Tupana e hap ewy i. Miꞌi hawyi Tupana Mipo­ꞌoro Aheha­kye­raꞌat hat Iesui topy­huꞌat iꞌatu­py­ꞌa­setpe pytkai yt taꞌa­tusat i taꞌa­tu­moieĩ­neꞌen wuatꞌi eꞌat piat rakat sese. Miꞌi hawyi Iesui topy­huꞌat iꞌatu­py­ꞌa­setpe aikotã muꞌap tote nu wo py yitytek hat ewy toĩneꞌen iꞌatuepe. Taꞌa­tu­ꞌa­parap Iesui ete aikotã Isaia saꞌa­wyꞌi toꞌe miwan me hap ewy. Mio tã e Tupana ahepe — Eiweꞌeg wo o Iuteuria tawa wato Ieru­sarẽi miaria yityꞌok Siãu miaria are e. Waku mekewat Nu wato tote eweha­ꞌa­wynug yn naꞌyn uimõ­typot yat koro e."

³³ Waku uimi­ꞌairo mekewat Nu Wato ikahu rakat tote eweha­ꞌa­wynug uimõ­typot yat e. Maꞌato taꞌa­tu­puẽti itote mekewat Nu hawyi — Yt kan hamo i Miꞌi iꞌatuꞌe yt aimi­ky­ꞌesat ewywuat hin i iꞌatuꞌe Tupana pe hawyi Tupana Saꞌyru pun haria tukup­teꞌen ne Iuteu ywania. Miꞌi hawyi iꞌatu­mipun topy­huꞌat iꞌatu­puꞌap tote nu ewy. Mio karãpe Iuteu ywania ikohye­wyry itote hawyi hewo hewo kahato meiẽwat Nu Wato ete e aikotã wataꞌat nu ete aipuꞌap upi wãtym muo turan hap ewy are. Mio tã Tupana toꞌe hap ewy — Uwe uwe mesuwat Nu ikahu kahato rakat ete taꞌat miꞌi haria teꞌe­ru­we­ꞌauka hanuaria aru tukup­teꞌen e maꞌato uwe uwe mekewat Nu Wakuat rote tuweꞌyat nug miꞌi hat wuatꞌi eꞌat piat Tupana mowepit hat topy­huꞌat aru e Isaia tomiwan 8.14 pe. Uito ti Pauru.

"

10

¹ Uheywytꞌin uheinytꞌin Iesui mohey haria Yi Humanu totiaria ahẽtup haty wo at kaꞌap Tupana kape — Tupana are etiꞌa­tue­ha­kye­raꞌat ro uiꞌy­wania uiꞌe­wy­wuaria Iuteu ywania ahẽtup kahato uipyꞌa pyi. Etimo­herep to Esaꞌyru Iesui uiꞌy­wania pe. Etiꞌa­tunug no Iuteuria Emipo­ꞌoro Urupo­rekuat nuat mohey kahato hanuaria wo uiꞌe­wywuat haria wo areꞌe yn Tupana pe haty uipyꞌa piat wywo."

² Yt uheso hin i uiꞌy­wania Iuteuria tikuap teran kahato Tupana wen maꞌato yt taꞌa­tukuap i te. — Tupana sese poꞌog uruimõ­typot iraniaꞌin kai iꞌatuꞌe maꞌato yt taꞌa­tukuap i te Tupana taꞌa­tu­pyꞌa pe taꞌa­tuwy ewywuat."

³ Haꞌa­wyte yt taꞌa­tu­mohey i Tupana kapiat muꞌap Iesui. Taꞌa­tu­waure muꞌap Tupana kuap sese hamuat hawyi mesup taꞌa­tukat re wẽtup muꞌap Tupana kapiat kuap hamo e. Tupana kapiat muꞌap pun haria uiꞌy­wania. — Yt wati­ky­ꞌesat i En Urupo­rekuat nuat hap iꞌatuꞌe Tupana Mipo­ꞌoro Iesui pe. Taꞌa­tunug taꞌa­tu­puꞌap taꞌa­tu­wa­nẽtup hawe yt Tupana kapiat muꞌap ewywuat i. Miꞌi hawyi waku kahato urupuꞌap Tupana kapiat iꞌatuꞌe iraniaꞌin me maꞌato yt pywo pe i."

⁴ Katu­pono haꞌa­wyte Tupana toꞌe — Atipo­ꞌoro aru Uhaꞌyru Eipo­rekuat no e. Uwe uwe imohey haria miꞌi haria ti aru waku pe tukup­teꞌen uipyꞌa pe e nimo uiꞌy­wania pe wen maꞌato uruꞌy­wania Iuteuria yt imohey i hawyi — Ewetunug no yne yne urueꞌa­seꞌi Musei wãiꞌe hap hawyi waku pe eweikup­teꞌen Tupana wanẽtup hawe iꞌatuꞌe mesup wuatꞌi ywania pe. — Atimoma raꞌyn mekewat muꞌap e Tupana yt uwe i inug kuap mote e. Mesup Uimi­po­ꞌoro Eipo­rekuat nuat Iesui upi yn toĩneꞌen muꞌap uhowawiat e. Yt karãpe i ehewaku hap putꞌokꞌe uimo­wepit hamo e Tupana mesup wuatꞌi miitꞌin me."

⁵ Pyno eweikuap teran mekewat muꞌap Musei mienoi Tupana kapiat hap pote waku eweikuap sese kat som Musei toꞌe. Mio tã e tomiwan me — Ereĩneꞌen neran hãpyk takat sese Tupana wanẽtup hawe pote ewetunug at kaꞌap yne yne Tupana wãiꞌe hap Tupana etunug no e hap koꞌi e. Yt eweiꞌa­parap hin i yne yne Tupana e hap koꞌi ete hawyi eweikup­teꞌen wakuaria wo maꞌato wẽtup ete eweiꞌa­parap pote Tupana miꞌa­piheg wo eweikup­teꞌen aru e Musei tomiwan me."

⁶ Maꞌato Tupana tikuap kahato yt uwe i mesuwat yi totiat toran tomi­ky­ꞌesat ewywuat nug kuap haria tukup­teꞌen. Miꞌi pote Tupana tunug muꞌap wẽtup takat tuwe­wawiat Tosa­ꞌyru apiheg hap upi. Taꞌi mekewat Wakuat Miit Iesui mohey hap kaipyi aimo­hãpyk kuap. Tomi­po­ꞌoro Aipo­typot nuat mohey haria pe yn Tupana toꞌe — Eipe waku kahato atipuẽti mesup uipyꞌa pe e. Aikotã Tupana toꞌe saꞌa­wyꞌi tehay moherep haria wẽ pyi hap ewy. Mio tã e wuatꞌi miitꞌin me — Yt pya hin i areĩneꞌen eikai e. Uimi­po­ꞌoro Eipo­rekuat nuat iꞌewyte yt pya hin i eikai e."

⁷ Uhehay iꞌewyte yt pya i eikai e. Taꞌi uhehay toĩneꞌen naꞌyn eiwẽ pe ehehẽku tote e. Taꞌi uhehay toĩneꞌen naꞌyn eiwa­nẽtup hawe e ahepe. Yt naku i watoꞌe — Tupana Mipo­ꞌoro toĩneꞌen pya kahato aikai iuẽpe atipy pe watoꞌe. Katu­pono yt pya hin i aikai Aheha­kye­raꞌat hat. Yt naku i watoꞌe aipyꞌa pe — Waku watuwat atipy kape Iesui kape hawyi waku waterut meikowo Aipo­rekuat no yt naku i watoꞌe katu­pono toĩneꞌen kahato aipy­ꞌa­setpe. Yt naku i watoꞌe — Toꞌiro waꞌasyp hap kape Tupana Mipo­ꞌoro Aipo­rekuat nuat kat hamo sio toĩneꞌen itote sio yi ywytꞌok­pype toĩneꞌen sio waku wate­hymut sio yt naku i miꞌi tã watoꞌe katu­pono Tupana Ehay toĩneꞌen mesup yt pya hin i aikai katu­pono aiwẽ pe toĩneꞌen kahato e. Imohey haria piit puo toĩneꞌen."

⁸ Maꞌato miꞌi tã Tupana toꞌe ahepe mesup — Uhehay iꞌewyte yt pya hin i eikai e. Taꞌi uhehay toĩneꞌen naꞌyn eiwẽ pe ehẽku tote. Taꞌi uhehay toĩneꞌen naꞌyn eipyꞌa pe eiwa­nẽtup hawe e ahepe. Miꞌi tã ti ahenoi ehepiat hap. Taꞌi Tupana ehay toĩneꞌen eipiit pe imohey haria eipe pote."

⁹ Katu­pono uwe uwe tuwe­mo­herep towẽ pyi iraniaꞌin me — Iesui ti Uika­ꞌiwat sese e iꞌewyte topyꞌa pe hawyi mio tã e — Iesui woro­mohey kahato ereĩneꞌen guꞌuro pyi hap miꞌi e hat Tupana mieha­kye­raꞌat no topy­huꞌat e."

¹⁰ Katu­pono karãpe aipyꞌa pe watoꞌe — Woro­mohey En Iesui e miꞌi hat pe — Waku pe eweikup­teꞌen wuatꞌi eꞌat pe e Tupana ahepe. Iꞌewyte uwe uwe tuwe­mo­herep iraniaꞌin me towẽ pyi Iesui mohey hat sese uito iꞌewyte Uika­ꞌiwat kahato Iesui e hat pe Tupana toꞌe — Woroe­ha­kye­raꞌat en wuatꞌi eꞌat pe e."

¹¹ Aikotã miwan miat Tupana toꞌe saꞌa­wy­ꞌiwuat hap ewy — Uwe uwe toꞌe uhepe — Tupana woro­mohey En e hat ti aru yt karãpe i tuwe­mõti te uimohey hap ete e Tupana miwan me."

¹² Tupana toꞌe wuatꞌi miitꞌin me sio aito Iuteuria ywania sio wẽtup ywania — Uwe uwe uimohey hat uimo­wepit hat sese toĩneꞌen sio Iuteu ywania sio wẽtup ywania e. Taꞌi Kereku ywania sio gaꞌapy piat ywania uimohey haria uikaykay Uhaꞌyru set upi pote uimie­ha­kye­raꞌat nuaria tukup­teꞌen e Tupana yne ywania pe."

¹³ Aikotã miwan me Tupana toꞌe saꞌa­wyꞌi hap ewy topy­huꞌat mesup. — Uwe uwe e uhepe — Tupana uheha­kye­raꞌat ro e miꞌi e hat pe mio tã areꞌe — Mesup taꞌyn woroe­ha­kye­raꞌat en uhyt mana e."

¹⁴ Maꞌato yt karãpe i yt imohey i te hat hẽtup Iesui kape heha­kye­raꞌat hamo. Iꞌewyte yt ikuap i te Iesui etiat yt uwe i henoi tope pote yt karãpe i hẽtup Tupana kape heha­kye­raꞌat hamo katu­pono yt toikuap i te pote. Iꞌewyte yt kat i i Tupana ehay moherep hat itote pote yt taꞌa­tuẽtup kuap i Tupana kape iꞌatue­ha­kye­raꞌat hamo yt kat i iꞌatu­wo­ꞌo­muꞌe haria i pote."

¹⁵ Iꞌewyte yt wati­po­ꞌoro i wẽtup ok iꞌatuepe Iesui ehay etiat iꞌatu­muꞌe hamo pote yt karãpe i taꞌa­tukuap katu­pono yt uwe i henoi iꞌatu­py­ꞌa­setpe iꞌatu­muꞌe hamo Tupana etiat pote yt taꞌa­tu­mohey kuap i. Miꞌi pote ti — Waku kahato uhehay wakuat moherep haria tukup­teꞌen e Tupana. Ikahu kahato iꞌatupy koꞌi uiwa­nẽtup hawe katu­pono uhehay ereto hamuat iꞌatupy koꞌi e Tupana. Aikotã Tupana toꞌe hap ewy — Karãpe wẽtup ok toto uhehay moherep hamo iraniaꞌin kape uiwa­nẽtup hawe miꞌi miit wakuat kahato wo toĩneꞌen e. Ipy koꞌi iꞌewyte ikahuria ewy teꞌe­ro­py­huꞌat uiwa­nẽtup hawe katu­pono iꞌatu­ko­hye­wyry kahato uhehay moherep hamo pote e."

¹⁶ Saꞌa­wyꞌi Tupana ehay moherep hat Isaia toꞌe tomiwan me — Tupana e atiꞌa­tu­muꞌe kahato mesu­wa­ro­tiaria ehay wo maꞌato yt taꞌa­tu­mohey i te e. Taꞌa­tukuap kahato aiwẽ pywiat pytkai yt taꞌa­tu­pywo i ahehay etiat e Isaia saꞌa­wyꞌi. Miꞌi e hap kaipyi watikuap taꞌyn iꞌatu kahato Tupana ehay wakuat kuap haria mesu­wa­ro­tiaria tukup­teꞌen maꞌato yt taꞌa­tu­mohey teran i haria hap watikuap."

¹⁷ Iꞌewyte Tupana Mipo­ꞌoro Aheha­kye­raꞌat hamuat moherep hap kaipyi yn ni miitꞌin teꞌe­ro­py­huꞌat Iesui mohey haria wo."

¹⁸ Uiꞌy­wania Iuteuria tikuap kahato mesuwat sehay wakuat aikotã morekuat Tawi toꞌe tuwepy hawe tomiwan me hap ewy — Taꞌi uiꞌy­wania ti Tupana ehay kuap kahato haria e. Aikope aikope taꞌa­tue­wyry mesuwat yi wato hap ok tã note aru taꞌa­tu­mo­herep kahato Tupana ehay itotiaria pe e. Uiꞌy­wania Iuteuria tukup­teꞌen wuatꞌi etama pe Tupana ehay moherep hamo e tomiwan me."

¹⁹ Pyno uruꞌy­wania Iuteuria tikuap taꞌyn saꞌa­wy­ꞌite mesuwat sehay wakuat e. Mekewat urueꞌa­seꞌi pot Isareu emiariru koꞌi ikuap kahato aikotã Musei toꞌe wuatꞌi eꞌyianmete hap taꞌa­tukuap. Mio tã toꞌe Tupana uruepe Isareu emiariru koꞌi pe — Meiũran aru wẽtup ywania tukup­teꞌen uimohey haria wo e. Mekewat eꞌat pe miꞌiria yt nakuaria i ywania eiwa­nẽtup hawiat tukup­teꞌen pytkai uheropat kahato haria e. Uimie­ha­kye­raꞌat koꞌi wo tukup­teꞌen kahato miꞌiria e. Miꞌiria ete aru ehaꞌy­wywi kahato e Tupana saꞌa­wyꞌi uruꞌy­wania pe iraniaꞌin ywania yt iweꞌeg nakaria i ewy te iro pote e. Taꞌi miꞌiria uimie­ha­kye­raꞌat koꞌi tukup­teꞌen irane uiꞌy­wania sese ewywuaria e. Miꞌi atunug hawyi eweipy­huꞌat ipyꞌahak miꞌi haria etiat rakaria wo uhehay iꞌatuehay wo pote e."

²⁰ Musei ikuꞌuro hawyi Tupana ehay moherep hat Isaia putꞌokꞌe mekewat Musei ewy te ihay — Mio tã e Tupana uhepe e meiũran ti aru iraniaꞌin ywania yt uikat i haria uipuẽti raꞌyn aikope aikope tukup­teꞌen yi wato hap ok tã e Tupana uhepe e. Iꞌewyte — Aremo­herep iraniaꞌin ywania pe — Yt karãpe i eremo­herep uruepe e haria pe e Tupana Isaia miwan me."

²¹ Maꞌato uiꞌy­wania Iuteuria kape mekewat Isareu emiariru koꞌi pe mio tã e Tupana at kaꞌap — Eweĩꞌẽ o uhowawi woro­ho­ꞌoꞌok­hytsat reran are at kaꞌap Aparãu emiariru emiariru koꞌi pe maꞌato — Yt yt yt iꞌatuꞌe uhowawi e. Yt uruiky­ꞌesat i yt kat i emiky­ꞌesat urutunug neran eweiꞌe uhepe Isareu ywania e Tupana saꞌa­wyꞌi Isaia miwan me. Taꞌi aikaykay kahato tuwe­wawi Tupana yt nakuaria aito pytkai. Uito Pauru.

"

11

¹ Miꞌi pote apoꞌare ehepe sio Tupana Iuteuria kyꞌe te sio yt sio toiꞌa­tu­pugha sio waureꞌe raꞌyn Iuteuria ywania kai temiitꞌin kai sio yt i te areꞌe. Yt rat pãi toiꞌa­tu­kyꞌe kahato te miꞌiria e. Uito ti mekewat Iuteuria ywania kaipywiat hat pote atikuap kahato urukyꞌe hap pãi. Atikuap kahato Tupana yt uruwaure hin i te hap. Uhaꞌa­seꞌi pot ti mekewat Tupana mohey hat akag sese Aparãu are. Pywo ti rat uhaꞌa­seꞌi Pesamĩ ti Aparãu emiariru toĩneꞌen saꞌa­wyꞌi."

² Yt karãpe i aru Tupana tiꞌatoiat temiitꞌin sese Iuteuria ywania e. Katu­pono toiꞌairo miꞌiria toꞌy­wania wo wuatꞌi eꞌyianmete. Saꞌa­wyꞌi Tupana ehay moherep hat Eria toꞌe Tupana pe tomiwan me — Uruꞌy­wania yt naku i kahato e. Taꞌa­tunug saꞌag kahato yne emiky­ꞌesat koꞌi ete e."

³ Taꞌa­tu­ꞌuka kahato emipo­ꞌoro ehay moherep hanuaria e. Yt naku i aikope aikope emiitꞌin tunug emõtypot hamuat aikope aikope taꞌa­tuwuk taꞌa­tu­hũria emõtypot hamo miꞌiria kape tõꞌẽ kahato uruꞌy­wania wãita­ꞌa­tuꞌe hamo e. Taꞌa­tu­pugha emõtypot yat koꞌi e. Taꞌa­tu­ꞌa­porok yne emõtypot yat e. Taꞌa­tu­moma teran yne emiit emipo­ꞌoro koꞌi e. Pywo ti rat Tupana mesup taꞌyn uikat kahato uiꞌauka hamo e tomiwan me. Uito yn ni emiit sese mesu­wa­rote areĩneꞌen Iuteuria pyꞌa­setpe pote e Eria saꞌa­wyꞌi Tupana pe."

⁴ Miꞌi hawyi Tupana tiwesat — Eria e yt en yn i uimõ­typot hat itote katu­pono uhemiitꞌin sese uhehay moherep haria tukup­teꞌen ne 7000 miit itote uimõ­typot haria sok yt karãpiat i tupa­naria neꞌi mõtypot haria miꞌiria e. Yt taꞌa­tu­mõ­typot hin i mekewat tupana iãꞌãkap Paeu e hap het rakat. Yt en yn hin i uimõ­typot hat topy­huꞌat itote e Tupana Eria pe."

⁵ Miꞌi hap ewy Tupana toꞌe mesup Isareu ywania etiat uruepe yt iꞌatu i wen iꞌewyte Iesui mohey haria maꞌato tukup­teꞌen ne Iuteuria ywania uimi­ꞌai­roria e Tupana uruepe katu­pono ahoꞌoekyi raꞌyn uhowawi miꞌi ywania kaipyi ipatꞌok hit ihaky­ꞌeꞌi uhepiat rakaria katu­pono paaꞌare hawyi ahoꞌoekyi heĩpyt uhowawi e Tupana."

⁶ Ahoꞌo­ꞌairo miꞌiria uhepiat iꞌatu­kyꞌe hap ete katu­pono iꞌatue­ha­ky­ꞌeꞌi uhepiat hap kaipyi atunug miꞌiria uhemiitꞌin no e. Yt iꞌatu­minug wakuap upi hin i atiꞌa­tu­ꞌairo miꞌiria e. Uiwepyi atiꞌa­tu­ꞌairo miꞌiria uipyꞌa pyi e Tupana. Miꞌi hap ewy koitywy Tupana aiꞌairo yt aiminug wakuap upi hin i maꞌato tuwepyi aiꞌairo haty wo aikyꞌe haype yt kat i i watunug wakuap pytkai aheha­ky­ꞌeꞌi pote. Maꞌato wakuaria aito hawyi ahewaku hap upi aikyꞌe watoꞌe pote miꞌi ti yt pywo pe i katu­pono watoĩ­neꞌen tewa­nĩkap mo turan hap eꞌat pe aikyꞌe."

⁷ Pyno Aito Tupana mohey haria wato­py­huꞌat aikyꞌe hap kaipyi hawyi Tupana mowa­kuaria watoĩ­neꞌen. Koitywy aimikuap muꞌap Tupana kapiat Iuteuria ywania tikat kahato. Isareu ywania tiky­ꞌesat kahato Tupana piat — Waku eipe e hap maꞌato miꞌiria yt ipuẽti i katu­pono teꞌe­ru­wepyi taꞌa­tunug Tupana kapiat yt muꞌap i. Miꞌi pytkai Tupana toꞌe kahato iꞌatuepe — Uhaꞌyru mohey hap upi ro uipuẽti e maꞌato yt iꞌatuꞌe Tupana ihay at kaꞌap pytkai. Meiũran teꞌe­ru­we­wau­rehik taꞌyn maꞌato kurin kurin ipuẽti uiꞌy­wania Iuteuria kawiat. Taꞌi imiꞌai­roria yn ipuẽti."

⁸ Aikotã toꞌe miwan me hap ewy — Yt yt iꞌatuꞌe hawyi — Pyno waku eweikup­teꞌen yt iweꞌeg i rakaria wo waku eweikup­teꞌen ipyꞌa heg nakaria wo e. Pyno eweikup­teꞌen yt ikuap kuap takaria wo i e Tupana Iuteuria pe. Miꞌi pote mesup eꞌat pe e — Iuteuria yt ikuap kuap i pywuat sehay Iesui ehay moherep haria henoi iꞌatue­hamo pytkai yt putꞌokꞌe i iꞌatu­pyꞌa pe. Tupana ehay miwan miat teꞌe­ra­ꞌa­kasa hawyi teke iꞌatueha py pe maꞌato yt putꞌokꞌe i iꞌatu­pyꞌa pe."

⁹ Yt taꞌa­tu­mohey teran i rakaria Iuteuria aikotã miwan me morekuat Tawi toꞌe hap ewy — Tupana uruꞌy­wania yt emohey teran i pote waku etunug iheg me iꞌatuenuk hap ewamiri kape hap ewy waku iꞌatuenuk hap topy­huꞌat iꞌatu­ꞌauka hap e. Waku iꞌatu­puꞌap tote ehewãhik yi kaꞌa iꞌatuꞌat hamo iꞌatu­minug saꞌag upi iꞌatu­ꞌa­piheg hamo e Tawi."

¹⁰ Waku etiꞌa­tueha py sasep miꞌiria yt emohey teran i haria pote e. Waku etiꞌa­tue­waure kaꞌa hik iꞌatu­wo­ꞌo­kakꞌi hap pupi e. Waku myk puo yne miꞌiria yt emohey teran hin i pote e morekuat Tawi Tupana pe tuwepy hawe."

¹¹ Uruꞌy­wania Iuteuria iꞌaparap kahato Tupana kapiat muꞌap kuap hap ete aikotã miit taꞌat yi hot pe hap ewy yt ihapytig i pote e. Maꞌato miꞌi pytkai atuꞌa­parap pytkai Tupana yt tiꞌa­tu­waure hin i — Atomog aru miꞌiria e. Yt karãpe i aru woro­ho­ꞌo­ꞌatoiat uiꞌatoiat eipe pytkai e. Yt eweiky­ꞌesat i eheha­kye­raꞌat uhepiat hap pote atum iraniaꞌin ywania yi totiaria pe. Miꞌi atunug hawyi iraniaꞌin ywania etiat ihaꞌy­wywi rakaria wo eweikup­teꞌen katu­pono uimie­ha­kye­raꞌat koꞌi wo tukup­teꞌen miꞌiria uimẽ­pytꞌin koꞌi wo e Tupana Iuteuria pe."

¹² Uruꞌy­wania Tupana piat taꞌa­tu­poi­tyro hap pun haria taꞌa­tu­ꞌa­parap kahato Tupana imiium taꞌa­tue­ha­kye­raꞌat hamuat ete. Yt taꞌa­tu­ky­ꞌesat i hawyi ihaky­ꞌeꞌi rakaria ewy tukup­teꞌen mesuwe. Katu­pono pya kahato Tupana kai tukup­teꞌen. Uruꞌy­wania mipun iraniaꞌin ywania ewy topy­huꞌat. Miꞌi hawyi koitywy iraniaꞌin ywania Tupana mipoi­tyro wo tukup­teꞌen aikotã Tupana Pãꞌãu kuap haria wo. Taꞌa­tu­mohey Tupana hawyi Tupana mihu­ꞌi­huꞌi koꞌi wo tukup­teꞌen. Maꞌato meiũran aru Iuteuria ywania urutoria yne Iesui mohey haria wo urutu­kup­teꞌen aru imiꞌai­roria ok tã aikotã iraniaꞌin ywania mesuwat yi tote wẽtup sok yn watu­kup­teꞌen hap ewy. Miꞌi hap eꞌat pe Tupana mipoi­tyro koꞌi yne miitꞌin. Miꞌi pote mesuwat yi yne Tupana mipoi­tyro wo topy­huꞌat. Waku kahato miꞌi hap eꞌat topy­huꞌat waku sakpo e.

"

¹³ Pyno koitywy uhehay teran eiwywo iraniaꞌin ywania yt uruꞌy­wania i yt Iuteuria i koꞌi kape uhehay teran. Saꞌa­wyꞌi Tupana uikaykay eimuꞌe hamo tehay moherep ehepiat hamo uiꞌairo Tupana. Yt Iuteuria i pe Tupana ehay moherep hat kahato uito maꞌato Tupana ehay moherep wẽtup ywania piat hat uito. Yt aremõti hin i mesuwat motpap nug hamo. Waku kahato atipuẽti uiꞌairo hap."

¹⁴ Yt atiwaure i uruꞌy­wania maꞌato ahãꞌãg kahato iꞌatue­ha­kye­raꞌat hap nug hamo. Uiꞌy­wania tehaꞌat uiminug iraniaꞌin ywania muꞌe hap kape hawyi atiky­ꞌesat iꞌatue­syꞌat rakaria ewy teꞌe­ro­py­huꞌat iꞌatu­pyꞌa piat Iesui mohey hap kyꞌewi yt kat i Tupana poityro hap iꞌatukai pote. Taꞌa­tukuap iraniaꞌin poityro hap hawyi atiky­ꞌesat taꞌa­tukat kahato Iuteuria poityro hap iꞌatue­ha­ꞌy­wywi hap kaipyi. Miꞌi hap atiky­ꞌesat kahato."

¹⁵ Saꞌa­wyꞌi — Yt uruiky­ꞌesat i En Urupo­rekuat no iꞌatuꞌe Iesui pe. Miꞌi pote Tupana tuwe­morem iꞌatue­wawi uruꞌy­wania pyi hawyi. — Pyno yt taꞌa­tu­ky­ꞌesat i En pote uruiky­ꞌesat En Urupo­rekuat no iꞌatuꞌe iraniaꞌin ywania Iesui pe. Miꞌi pote koitywy iraniaꞌin ywania tukup­teꞌen Tupana wy oktia wo kahato maꞌato meiũran aru uruꞌy­wania teꞌe­ru­we­morem i raꞌyn — Uruiky­ꞌesat En Urupo­rekuat no iꞌatuꞌe aru Iesui pe hawyi — Pyno uiwa­nuaria eipe e Tupana aru iꞌatuepe uiwa­nuaria i raꞌyn eipe e. Iꞌatupap i raꞌyn Iesui upi uruꞌy­wania. Mekewat eꞌat pe aru wakuap kahato topy­huꞌat mesu­wa­rote aikotã guꞌuro pyi woro­he­nõtem hap waku kahato hap ewy e.

"

¹⁶ Pyno ahenoi teran iãꞌãkap ewy uruꞌy­wania ete. Woro­hoꞌoium aimikoi mani Tupana kape pote aimiium kaipyi topy­huꞌat Tupana wano uꞌi. Miꞌi pote Aparãu topy­huꞌat aimi­soꞌoium aimikoi aiko pywiat ewy. Miꞌi hawyi Iuteuria topy­huꞌat uꞌi mani kaipywiat ewy. Pyno wẽtup sehay iãꞌãkap wuo ahenoi teran ehepe. Karãpe watikoi kat ypia iꞌyp watum Tupana kape pote miꞌi hawyi haga ete topy­huꞌat Tupana wat yne. Iꞌyp hapo topy­huꞌat Aparãu ewy miaria urueꞌyian­miaria uruꞌy­wania Iuteuria tukup­teꞌen haga ewy."

¹⁷ Uruetama puo toĩneꞌen Uriweira yp koꞌi urumikoi wakuaria kahato iꞌewyte toĩneꞌen Uriweira yp gaꞌapy piat nop sese rakaria Uriweira ran urutoꞌe. Miꞌi yp ewywuat kahato eiperia Humanu ywania. Uruto Iuteuria mekewat Uriweira yp sese ewywuaria. Haꞌa­wy­tepyi uruikuap Tupana sese maꞌato eiperia Humanu ywania yne tupa­naria mohey haria eipe. Saꞌa­wy­ꞌi­tewuat tupana iãꞌãkap mohey haria mesuwat yi totiat yt Iuteuria i koꞌi tukup­teꞌen aikotã mekewat Uriweira ran yp nop takat ewy maꞌato uruto Iuteuria yt ikyꞌesat i Iesui Urupo­rekuat no hawyi Uriweira yp sese yp pikꞌe hap ewy yp tek hap ewy urutu­kup­teꞌen. Miꞌi hawyi Tupana tipag iraniaꞌin ywania itote haga howapy piat ewy. Miꞌi hawyi satꞌe koitywy haat kahato iraniaꞌin ywania kat pote iꞌypy Iuteuria ywania kaipyi haga ewy iraniaꞌin ywania."

¹⁸ Yt etimohit reiꞌo ehay wo Iuteuria ywania. Yt ereĩneꞌen neiꞌo haiwot iꞌatuetiat rakano katu­pono hatek hap ewy Uriweira yp tek hap ewy tukup­teꞌen. Yt ereꞌe teiꞌo — Uruwehay pyi urutu­wenug uruto poꞌog Iuteuria kai yt eweiꞌe teiꞌo. Mio tã eweiꞌe pote yt eiweꞌeg hin i kat pote haga yt haat kuap i yt iꞌypyꞌa ete i pote katu­pono yt tuwe­mosat kuap i yt iꞌypyꞌa i pote. Yt naku i haga toꞌe iꞌypy kape — Yt naku i en e miꞌi hap ewy yt watoꞌe kuap i Iuteuria ywania pe — Yt kat hamo i eipe katu­pono miꞌiria tukup­teꞌen hapo sese ewywuat iꞌypy ewy maꞌato iraniaꞌin gaꞌapy piat Uriweira ypia nop takaria ewy."

¹⁹ Maꞌato iraniaꞌin teꞌe­roꞌe — Toitek haga saꞌag nakat miꞌi hawyi wati­pehik poꞌog waku rakat haga totopag itote iꞌatuꞌe saꞌag. Miꞌi hap ewy urutu­kup­teꞌen. Toihep Iuteuria haga potꞌi ewy hawyi uruto urupehik itote waku poꞌog nakaria uruto pote iꞌatuꞌe saꞌag yt pywo pe hin i iꞌatuꞌe iraniaꞌin."

²⁰ Pywo ti toihep Iuteuria aikotã haga watihep hap ewy maꞌato yt iꞌatu­minug saꞌag myi i toihep maꞌato yt taꞌa­tu­mohey i Tosa­ꞌyru pote. Miꞌi hawyi totopag eipe aikotã haga wati­pehik hap ewy Haꞌyru mohey haria eipe pote. Yt naku i eiwa­nẽtup hawe — Uruto poꞌog Iuteuria kai eweiꞌe eiwa­nẽtup hawe. Waku poꞌog paaꞌe­weiꞌe — Tupana kat pote uruꞌairo ewanuat poꞌog waku watoꞌe. Taꞌi Haꞌyru mohey haria aito pote uruꞌairo waku watoꞌe yn kat pote yt ahewaku hap upi i aheha­kye­raꞌat."

²¹ Taꞌi yt tomohey poꞌog i hap upi toihep Iuteuria haga sese ikahu rakat pytkai toihep aikotã Uriweira yp haga sese rakat ewywuat. Pyno eipe Uriweira yp aga ran kahato ewywuat eweikup­teꞌen. Pyno Iuteuria ewy yt eweimohey poꞌog i pote eipe iꞌewyte eihep."

²² Iwese kahato Tupana maꞌato towese pytkai aiꞌa­piheg kuap mekewat toꞌy­wania sese Iuteuria yt tomohey poꞌog i raꞌyn hawyi toiꞌa­tuhep toiꞌa­tu­ꞌa­piheg naꞌyn. Miꞌi tupono eipe yt toꞌy­wania sese i Tosa­ꞌyru mohey haria pote topy­huꞌat iwese rakano ehete maꞌato meiũran eweipun iwese hap pote yt eweimohey i aikotã tutunug toꞌy­wania hap ewy aikotã haga watihep hap ewy te toihep eipe e."

²³ Maꞌato meiũran aru toꞌy­wania Iuteuria Haꞌyru mohey haria tukup­teꞌen mote miꞌi hawyi tohytmoi i raꞌyn mekewat aikotã tomihep hap tote te Iuteu ywania tomohey sese i raꞌyn hawyi. Taꞌi Tupana tiꞌa­tu­pehik kuap kahato Iuteu ywania i raꞌyn toꞌyp etiat neꞌi pote. Eipe yt Iuteuria hin i."

²⁴ Eipe ti Huma­nuꞌin koꞌi eipe wẽtup pusu kuap haria. Eipe eweikup­teꞌen aikotã Uriweira yp haiwot rakat ewywuat aikotã haga Uriweira ran ewy. Aikotã imihep haga hawyi totopag wẽtup yp tote tomihep saipe­piano hap ewywuat. Toihep eipe haga ran hawyi toipehik Uriweira yp sese wakuat ete raꞌyn hap ewy mekewat Uriweira he rakat hewo kahato aimiꞌu wuat rakat ewy Iuteuria tukup­teꞌen. Niatpo kahato watopag wẽtup yp kaipyi haga hap wẽtup yp kape. Watunug kuap i maꞌato niatpo kahato. Yt niatpo hin i iwat haga te watopag hap tote wẽtup yp kaipywiat yn naꞌyn haga iꞌewyte hapo pote yt niatpo i miꞌi ewywuat eihep eipe hawyi totopag Iuteuria towat toꞌyp ete sese raꞌyn hap ewy yt niatpo hin i totopag.

"

²⁵ Koitywy ehepe iraniaꞌin ywania pe atimo­herep teran Tupana ehay ehepe yt uwe mikuap i te hap. Miꞌi eweikuap hawyi yt eweiꞌe kuap i — Uruto poꞌog weꞌeg haria ywania Iuteuria kawiat e hap. Koitywy Iuteuria yt timohey kahato i Tupana Mipo­ꞌoro Aipo­rekuat nuat Iesui iꞌatu­pyꞌa heg kahato rakaria pote maꞌato meiũran aru paaꞌi­ꞌa­tuꞌe hawyi taꞌa­tu­ky­ꞌesat kahato imohey hap. Koitywy yt taꞌa­tu­ky­ꞌesat i pote — Pyno atiꞌa­tue­ha­kye­raꞌat iraniaꞌin ywania taꞌa­tu­mohey kahato Uimi­po­ꞌoro Iesui Iꞌatu­po­rekuat nuat pote e Tupana. Meiũran aru yt uwe i eipe Tupana Mipo­ꞌoro Aipo­rekuat nuat mohey haria hawyi yt uwe i poꞌog ikyꞌesat hawyi mekewat eꞌat pe ti uimi­ꞌai­roria Iuteuria iꞌatupap i raꞌyn imohey hap ete miꞌi hap eꞌat pe yt niatpo hin i tuwe­hytꞌok Uhaꞌyru mohey hawe e. Katu­pono miꞌiria tukup­teꞌen Uriweira yp haga sese koꞌi ewy e Tupana ahepe."

²⁶ Taꞌi Iuteu ywania aru topy­huꞌat Iesui mohey haria aikotã saꞌa­wyꞌi Tupana ehay moherep haria teꞌe­roꞌe taꞌa­tu­miwan me hap ewy topy­huꞌat aru. Mio tã e Tupana — Meiũran aru atipo­ꞌoro Iuteuria ehakye­raꞌat hat sese e. Tuwẽtem aru tawa Ieru­sarẽi yityꞌok Siãu tote pyi. Tuwe­mo­herep yityꞌok Siãu tote hawyi toiꞌa­tuhep taꞌyn yne iꞌatu­minug saꞌag koꞌi Iuteuria wanuat. Yne iꞌatu­minug koꞌi yt Tupana ewywuat koꞌi i toimo­weityk yne. Mekewat aseꞌi Iako emiariru emiariru koꞌi iminug saꞌag koꞌi toipo­re­raꞌat yne iꞌatue­ha­kye­raꞌat hamuat e Tupana."

²⁷ Atunug aru sehay iꞌatu­wywo waku uiꞌe hap aikotã areꞌe atunug aru uiꞌe hap ewy. Mekewat eꞌat atiꞌa­tu­mo­weityk yne iꞌatu­minug uhetiat iꞌatu­minug saꞌag koꞌi hap mekewat eꞌat pe e Tupana temiit Ieremia miwan me 31.31 pe."

²⁸ Koitywy Iuteuria tunug naꞌyn Tupana taꞌa­tue­wa­nĩkap wo katu­pono taꞌa­tupun neꞌen neꞌi yne mekewat sehay wakuat Iesui etiat. Miꞌi pote yt atiꞌa­tue­ha­kye­raꞌat kuap i miꞌiria e Tupana mesup iꞌatuepe. Maꞌato yt eweiwaure teiꞌo Tupana Mipo­ꞌoro Aipo­rekuat nuat miꞌiria ewy. Koitywy tukup­teꞌen ne Tupana e hap saꞌa­wy­ꞌiwuat Aparãu Isaki Iako kapiat hap ewy. Miꞌi pote toꞌy­wania towy­riaꞌin ne miꞌiria tukup­teꞌen Tupana miꞌai­roria. Koitywy eweipy­huꞌat raꞌyn Tupana wy koꞌi aikotã Iako kape hap ewy. Maꞌato toꞌy­wania iwyriaꞌin ne miꞌiria tukup­teꞌen ne."

²⁹ Aikotã toꞌe saꞌa­wyꞌi tomohey saꞌa­wyꞌi haria pe mekewat Tupana ehay moherep haria saꞌa­wyꞌi sese rakaria Aparãu Isaki hawyi aseꞌi Irauꞌin me — Meiũran aru atunug iraniaꞌin ywania torania uimẽ­pytꞌin koꞌi wo e. Miꞌi hap ewy karãpe Tupana toꞌe — Meiũran aru atunug toꞌe miꞌi pote tutunug. Yt uwe i wãiꞌe kuap Tupana kape. Uwe toiky­ꞌesat topoi­tyro hap ewy Tupana miꞌai­roria teꞌe­ro­py­huꞌat raꞌyn. Mio tã e Tupana — Woro­ho­ꞌo­poi­tyro uiwepyi e. Atiꞌa­tu­poi­tyro miitꞌin yne uimi­ky­ꞌesat ewy e. Miꞌi pote tutunug tuwe­mi­ky­ꞌesat ewy. Yt uwe i wãiꞌe kuap Tupana kape."

³⁰ Pyno eipe wẽtup ywania koꞌi yt Iuteuria ywania i. Saꞌa­wyꞌi yt kat i Tupana miky­ꞌesat nug haria eipe maꞌato mesup Tupana miꞌa­tu­kyꞌe kahato wo eweikup­teꞌen. Pyno yt woro­ho­ꞌo­ꞌa­piheg hin i e ehepe katu­pono uimohey haria mesup. Atum neꞌen neꞌi ehepe Iuteuria poityro hap koꞌi katu­pono Iuteuria yt iꞌatupap i uimi­ky­ꞌesat nug hap ete e Tupana mesup ehepe yt Iuteuria i pe."

³¹ Pyno koitywy Iuteuria yt teꞌe­ro­py­huꞌat i Tupana kai maꞌato tut aru wẽtup eꞌat hawyi paaꞌi­ꞌa­tuꞌe. Miꞌi hap eꞌat pe tukup­teꞌen haky­ꞌeꞌi koꞌi eiꞌewy tukup­teꞌen aru Iuteuria. Meiũran — Urueha­kye­raꞌat Tupana iꞌatuꞌe haria eiꞌewy teꞌe­ro­py­huꞌat."

³² Pyno Tupana toꞌe wuatꞌi ywania pe — Eipe torania yt uimi­ky­ꞌesat koꞌi nug haria i e miꞌi pote hoꞌo­wasat rakaria sese wo eweikup­teꞌen eiminug saꞌag pyꞌa­setpe eweikup­teꞌen. Eheko saꞌag po pe eweikup­teꞌen iheg me hap ewy. Miꞌi tã e Tupana pytkai — Meiũran wuare wo areĩneꞌen eiminug saꞌag koꞌi kai e. Woro­ho­ꞌo­kyꞌe haype Uhaꞌyru mohey haria e wuatꞌi ywania pe.

"

³³ Miꞌi hawyi mio tã toꞌe saꞌa­wyꞌi Tupana ehay moherep hat Isaia — Wakuat wakuat kahato tig Tupana. Wakuat sese kahato En. Urutu­wa­nẽtup kahato hawyi yt uruikuap hin i ekuap hap koꞌi eweꞌeg hap koꞌi e. Kurin kurin uruikuap ewakuap sese hap kaipyi ewato hap sese hap ete e. Eweꞌeg hap iwato kahato. Ekuap hap poꞌog wuatꞌi kai e. Yt uwe i uruto aikotã etunug hap ikuap kat pote etunug aikope aikope ewyry hap upi e. Kat som etunug yt uwe i uruto uruikuap yt uruikuap kuap i kahato e."

³⁴ Aikotã toꞌe miwan me — Uwe uwe mesuwat yi tote Tupana kuap hat topy­huꞌat e. Yt uwe i mesuwat yi tote Tupana nãpin kuap hat yt uwe i pãi e Isaia miwan me 40.13 pe."

³⁵ Taꞌi Tupana yt ahepiat wete­weru hat i. Yt watunug kuap i Tupana aimiium kaipywiat wete­weru hano."

³⁶ Katu­pono aikope aikope toĩneꞌen kat koꞌi kat koꞌi sio heremo sio yt Tupana tunug yne miꞌi yt kat kawiat i tutunug. Tuwe­kaipyi tutunug yne yne. Iꞌewyte yne mesuwat yi tote toĩneꞌen katu­pono Tupana imoieĩneꞌen pote. Tesaika hap kaipyi tutunug yne tomõ­typot hamuat yne yne iminug koꞌi. Miꞌi pote — Urutu­wehum kahato ewawi Tupana urutoꞌe. Waku kahato En waku kahato En urutoꞌe epe Tupana. Mio tã watoꞌe Tupana pe are uito Pauru.

"

12

¹ Uheywytꞌin uheyke­ꞌetꞌin uheinytꞌin yt ahewaku hin pytkai i Tupana aikyꞌe — Yt atiꞌa­tu­ꞌa­piheg teran i miꞌiria e tuwepe ahetiat pe. Tupana miꞌa­tu­kyꞌe eipe pote ahẽtup ehepe uheyke­ꞌetꞌin uheinytꞌin Iesui mohey haria Tupana eikyꞌe pote ewetum no eipiit tope eweikup­teꞌen kahato imõtypot haria wo. Aikotã saꞌa­wy­ꞌi­wuaria tiꞌauka taꞌa­tu­hũria Tupana mõtypot hamo hap ewy waku ewetum eipiit Tupana kape Tupana potpap nug hamo. Waku eheĩneꞌen hap imiky­ꞌesat ewy imõtypot hap yn topy­huꞌat. Waku eipiit pyi tuwẽtem sehay Tupana mõtypot hap yn Tupana ewaku hap ok tã aikotã waku watunug hap ewy. Aika­ꞌiwat wakuat kahato pote waku wato­py­huꞌat heropat sese haria wo."

² Waku watum aipiit Tupana kape. Yt naku i watunug ne aikotã mesu­wa­rotiat Tupana yt kuap i haria wanẽtup saꞌag hap ewy ainãpin saꞌag ewywuat. Yt naku i watuwat iꞌatuehay upi kat koꞌi kat koꞌi saꞌag nug hamo. Waku poꞌog watoꞌe Tupana kape — Etihep uiwa­nẽtup hap wyi mesu­wa­rotiat saꞌag wanẽtup hap hawyi uiwa­nẽtup hap etimo­pakup i ewat ewywuat. Uipyꞌa pe uiꞌakag me uipiit pe uiwa­nẽtup hawe ereĩneꞌen Tupana uipytꞌat nug hano. Miꞌi hawyi ewanẽtup hap eiam mo areĩneꞌen neran. Mio tã eweiꞌe Tupana pe pote eweikuap kuap Tupana miky­ꞌesat koꞌi kat som tutunug neran hap nug hamo. Kat som imowepit hap kat som hãpyk sese imiky­ꞌesat ewywuat hap mio tã eweiꞌe Tupana pe pote."

³ Pyno uito Pauru Tupana uipo­ꞌoro einãpin hamo. Tupana hegyiꞌat kahato hawyi uinug eimuꞌe hano miꞌi pote woro­ho­ꞌo­nãpin eipe. Yt naku i aiwa­nẽtup hawe — Uito poꞌog torania kai aiꞌe hap kape. Waku — Uito en wato­ꞌo­ꞌewy kahato watoꞌe. Katu­pono aito wẽtup ok poꞌog imohey wẽtup ok yt maꞌato wẽtup sok yn aito pytkai. Miꞌi pote yt ereꞌe kuap i — Uito poꞌog eikai hap ete."

⁴ Aipiit ete iꞌatu kahato ahaga maꞌato aipiit wẽtup yn toĩneꞌen. Miꞌi hawyi ahaga koꞌi yt toꞌo­ꞌewy hin i aipiit miky­ꞌesat motpap nug hap ete."

⁵ Miꞌi hap ewy kahato Iesui mohey haria koꞌi. Iꞌatu kahato aitoria yt aiwo­ꞌo­ꞌewy i maꞌato wẽtup piit ewywuat yn wato­py­huꞌat. Iesui Tupana Mipo­ꞌoro Aipo­rekuat nuat piit ewywuat wato­py­huꞌat mesuwe aikotã aipiit ahaga wywo toꞌosat toꞌosat hap yt toꞌo­ꞌewy hin i pytkai. Miꞌi hap ewy wato­ꞌosat kahato Iesui mohey haria koꞌi Iesui piit ewy wẽtup piit ewy watoĩ­neꞌen."

⁶ Pyno wẽtup ok imohey hat pe Tupana tum tesaika hap topotpap nug hamuat maꞌato wẽtup ok pe wẽtup sepap hap tutum. Yt toꞌo­ꞌewy hin i tutum ahepe aimikuap koꞌi aimi­sepap nug hap koꞌi. Maꞌato Tupana tum yne miꞌi koꞌi ahepe tegyiꞌat pote haype. Tutum neꞌen neꞌi yt kat saꞌup i. Wẽtup ok pe tutum tesaika hap tehay moherep hamuat. Tutum ahepe pote pyno waku wati­mo­herep ihay imohey hap mywo imohey hap ok tã."

⁷ Maꞌato tutum ahepe tesaika hap teropat hap miitꞌin powyro hamo pote waku watu­we­potpap kahato heropat nug hap ete. Maꞌato tutum ahepe miitꞌin muꞌe kuap hap miꞌi pote waku wati­ꞌa­tu­muꞌe miitꞌin hesaika hap wywo."

⁸ Maꞌato tutum ahepe tesaika hap miitꞌin mowepit hamuat miitꞌin arotꞌi potiat iꞌatuhep hamuat miꞌi pote etiꞌa­tu­mo­wepit ro hatek takaria hoꞌopot haria. Maꞌato tutum ahepe tegyiꞌat hap miitꞌin powyro hamuat aimiium kaipyi pote waku wato­py­huꞌat hegyiꞌat kahato miꞌi hap wywo. Tupana ainug miitꞌin akag wo pote waku ahemiitꞌin kyꞌe hap wywo wati­po­wyro hãpyk takat ewy. Tupana ainug miitꞌin powyro hano pote waku watum kat koꞌi kat koꞌi satek takaria pe iꞌatu­kyꞌe hap wywo."

⁹ Karãpe wati­ꞌa­tu­kyꞌe miitꞌin pote waku wati­ꞌa­tu­kyꞌe kahato aipyꞌa pyi yt kat aheso hap wywo i. Waku wato­py­huꞌat haiwot rakat ewy maꞌato yt miitꞌin ete i. Waku ahaiwot rakaria ewy wato­py­huꞌat aiminug saꞌag hap koꞌi ete. Maꞌato waku wati­ky­ꞌesat kahato waku nug hap koꞌi. Yne wakuat waku watat maꞌato yt naku i hap waku watipun."

¹⁰ Waku woꞌo­kyꞌe haria wo watoĩ­neꞌen aikotã wẽtup ywania toꞌo­kyꞌe kahato hap ewy. Aikotã aheinytꞌin aheywytꞌin aheyke­ꞌetꞌin aiꞌy­wotꞌin aityꞌin toꞌo­kyꞌe kahato hap ewy aiwese hap wywo. Waku wato­ꞌo­kyꞌe katu­pono Tupana Mipo­ꞌoro mohey haria aito. Iesui eropat haria aito miꞌi pote waku watikat kahato aikotã waku wato­ꞌo­mõ­typot hamuat. Waku watoꞌe aiwa­nẽtup hawe — En ni waku. Miꞌi ti waku watoꞌe."

¹¹ Yt iperup takaria ewy i waku wato­py­huꞌat. Waku watu­we­potpap at hakup wywo. Yt ereĩneꞌen neiꞌo sẽtup e hano. Aika­ꞌiwat eropat hat sese wo waku watoĩ­neꞌen. Waku aipyꞌa pyi Aika­ꞌiwat mowepit hap yn aiwa­nẽtup hawe ipotpap nug hap ete."

¹² Tupana tunug aru toꞌe hap ewy pãi an watoꞌe. Mio tã watoꞌe pote aimo­wepit hap topy­huꞌat aikotã Tupana wepit hap ewy. Wati­mohey pote putꞌokꞌe ahete hoꞌopot hap niatpo kahato hap. Miꞌi hawyi waku watoĩ­neꞌen motꞌi aiperup i hap wywo. Waku wahe­katup tokosap aru hap — Yt watoiat hin i imohey hap aiꞌe hap wywo. Miꞌi pytkai waku ahehay Tupana wywo at kaꞌap aikope aikope ahewyry hap upi."

¹³ Waku hegyiꞌat rakaria wo watoĩ­neꞌen ahekat wywo. Waku wati­mõꞌẽ ahekat iraniaꞌin me hatek takaria pe — Iesui mohey haria eweikup­teꞌen uruwywo eweiꞌe iraniaꞌin yt aimikuap i koꞌi pe pytkai. Iesui mohey haria miꞌiria pote waku mio tã watoꞌe õꞌẽ haria yt uwe mikuap i koꞌi pe."

¹⁴ Karãpe wẽtup ok ihay saꞌag ahete pote waku wahẽtup Tupana ewawi — Tupana etipoi­tyro ro mesuwat uhewa­nĩkap uinug neran ne tewa­nĩkap wuat hat watoꞌe. Taꞌi yt atiky­ꞌesat i iꞌapiheg hap watoꞌe Tupana pe. Maꞌato yt naku i haiwot rakaria wo wato­py­huꞌat ahatyꞌi hatyꞌi haria ete. Yt naku i wate­ro­mo­pusu miꞌiria yt naku i iminug upi. Yt naku i watu­we­poepyk aimo­sa­tyꞌi satyꞌi haria."

¹⁵ Karãpe wẽtup ok putꞌokꞌe ahete iwepit kahato pote waku watu­we­mo­wepit iwywo. Maꞌato karãpe wẽtup ok putꞌokꞌe ahete tuwak taꞌa­rotꞌi hap wywo miꞌi pote waku watu­we­mowak iwywo."

¹⁶ Yt naku i ipatꞌok ete aiwese ipatꞌok ete yt. Karãpe putꞌokꞌe ahete motpap hap yt aimi­ky­ꞌesat ewy i miitꞌin emiit minug hap ewy pote waku watunug aimi­sakup hap wywo iꞌatu­ꞌakag wo wato­py­huꞌat pytkai. — Uito poꞌog mote yt naku i uipotpap aikotã miit emiit ewy yt naku i watoꞌe."

¹⁷ Karãpe wẽtup ok tunug saꞌag kahato ehete yt eweipoepyk teiꞌo. Yt etunug neiꞌo miꞌi hat ete aikotã tutunug saꞌag hap ewy te maꞌato etipoepyk waku puo wakuap mo. Waku watunug yne yne yt kat i miitꞌin maꞌat hap aikai yt kat i aheso hap wywo. Miꞌi hawyi miitꞌin tikuap taꞌyn yt kat i taꞌa­tu­maꞌat hap aikai."

¹⁸ Waku wahãꞌãg yne ahesaika hap koꞌi wo miitꞌin iperup i kahato iwese kahato rakano iraniaꞌin yt iꞌatu­wese i rakaria wo tukup­teꞌen pytkai. Waku aito iwese rakano. Yt naku i watu­ꞌuka iraniaꞌin wywo sehay wo maꞌato woꞌo­kyꞌe hap yn waku watikat."

¹⁹ Yt naku i wati­poepyk uhetiat yt naku i nug haria. Uiwy­riaꞌin wẽtup ok aimaꞌat pote yt naku i wato­py­huꞌat aipy­ꞌahak. Poꞌog waku wahenoi Tupana kape miꞌi pote Tupana ipyꞌahak aika­wiano hamo katu­pono mio tã e Tupana miwan me — Atiꞌa­tu­ka­wiano yne eipe. Eipoepyk hat uito e Tupana miwan me."

²⁰ Yt naku i watu­we­poepyk uiwy­riaꞌin. Tupana yt tiky­ꞌesat i kat pote toꞌe miwan me — Ewanĩkap hesyꞌat pote eweiꞌa­tupoi o miꞌiria e. Iꞌatu­we­sa­po­ꞌutui pote etum o sapo hy iꞌatuepe. Miꞌi etunug pote tuwe­mõti topy­ꞌahak hap ete kat pote ewaku hap etunug pote aikotã naꞌak hawywiat aheꞌyni ywytꞌok­pype aria sapuẽ hap ewy. Miꞌi hawyi imowepit hap topy­huꞌat iꞌewyte tuwe­mõti tominug saꞌag ehetiat hap pupi."

²¹ Karãpe yt naku i hap ahãꞌãg kahato karãpe ahatek hap aiꞌakit teran pote yt naku i watoiat imohey hap. Waku watu­ꞌuka kahato aiꞌakit hap akit hamo. Waku wati­ꞌakit saꞌag wakuap nug hamo kat pote wakuap nug hap poꞌog hesaika saꞌag koꞌi kai are uito Pauru.

"

13

¹ Karãpe more­kuaria toꞌe ahepe — Etunug no wakuap e pote waku watunug iꞌe hap ewy Iesui mohey haria aito pote. Waku watuwat iꞌatuehay wakuap upi are katu­pono yne aika­ꞌi­waria Tupana mipag koꞌi. Yne tuꞌi­saria iꞌewyte Tupana miꞌairo koꞌi tukup­teꞌen. Taꞌi aheka­pitãu koꞌi yne aiꞌakag koꞌi more­kuaria koꞌi ahetu­ꞌi­saria aika­ꞌi­waria Tupana miꞌairo koꞌi tukup­teꞌen aiꞌa­tu­ꞌa­pykok hamo. — Taꞌi uhehay kaipyi ti yne more­kuaria tukup­teꞌen atipy pe iꞌewyte yi tote e Tupana ahepe."

² Yt naku i watu­ꞌuka more­kuaria ainãpin waku nug hap ete. Waku aiweꞌeg wo o katu­pono yt naku i watu­ꞌuka more­kuaria airo hat Tupana ete are. Watu­ꞌuka miꞌiria ainãpin waku hap ete pote Tupana miꞌa­piheg wuanuaria wo wato­py­huꞌat."

³ Maꞌato wakuap watunug aiꞌakag koꞌi aipo­ꞌoro hap ewy pote yt wato­kenꞌẽ hin i more­kuaria sura­raꞌin mupi are katu­pono waku pe watoĩ­neꞌen kahato more­kuaria wanẽtup hawe. Miꞌi hawyi karãpe putꞌokꞌe surara ahowawi hawyi yt wato­kenꞌẽ hin i ipupi maꞌato aiwy ok wo toĩneꞌen are. Maꞌato karãpe watunug saꞌag miꞌi hawyi yt naku i nug haria wo watoĩ­neꞌen more­kuaria wanẽtup hawe. Miꞌi pote wato­kenꞌẽ kahato more­kuaria pupi iꞌewyte iꞌatue­su­ra­raꞌin miat aiꞌa­piheg hap pupi wato­kenꞌẽ. Pyno aito Iesui mohey haria pote yt karãpe i wato­kenꞌẽ more­kuaria pupi."

⁴ Tupana miꞌai­roria koꞌi ti aipo­rekuat tuꞌi­saria aiꞌakag koꞌi pywo ti rat Tupana tiꞌa­tu­ꞌairo yne miꞌiria aipo­wyro hamuat yt naku i nug hap pupiat aiꞌa­pykok hanuaria toiꞌa­tu­ꞌairo aika­ꞌi­waria maꞌato watunug yt naku i hap koꞌi pote waku wato­kenꞌẽ kahato iꞌatu­pupi katu­pono aiꞌa­piheg kuap taꞌa­tue­su­ra­raꞌin po wo are. Pyno tuꞌi­saria more­kuaria Tupana eropat haria ewywuaria tukup­teꞌen kahato aipy­ꞌa­setpe are. Miꞌiria ti toiꞌa­tupag aiꞌa­piheg hamuat aiminug saꞌag etiat hamo."

⁵ Pyno yt nakuap i ahete yt watunug i more­kuaria tuꞌi­saria ehay pote. Watunug waku pote waku pe watoĩ­neꞌen sura­raꞌin nywo. Miꞌi pote poꞌog waku iꞌatu­wese kahato hap toĩneꞌen are katu­pono waku watunug hawyi yt kat i aiwe­mõti hap topy­huꞌat aipyꞌa pe aiwa­nẽtup hawe."

⁶ Iꞌewyte karãpe more­kuaria tiꞌa­tu­ky­ꞌesat saꞌup taꞌa­tu­potpap hap upi miꞌi pote waku watum iꞌatuepe iꞌatu­miẽtup katu­pono iꞌatu­potpap kahato aiꞌa­pykok hawe. Miꞌiria iꞌatu­potpap kahato Tupana miky­ꞌesat nug hamuat ahetama aheꞌyi wanĩ­kaptia pyhyp hamo. Miꞌiria tiky­ꞌesat kahato aheĩneꞌen hap ikahu kahato hap. Yne minug hap ete aipo­wyro kahato aiꞌakag koꞌi mesu­wa­ro­tiaria."

⁷ — Eweiꞌa­tu­mõ­typot ro pyno miꞌiria tuꞌi­saria e Tupana ahepe. More­kuaria torania pe ehegyiꞌat ro ehekat wo e mesup ahepe Tupana. Eweha­ꞌupnug o eiwe­te­weru hap iꞌatuepiat e. Taꞌa­tu­ky­ꞌesat taꞌa­tu­po­wyro hap taꞌa­tu­konug hamuat ete pote waku watu­we­potpap iꞌatuko nug hamuat e Tupana ahepe. Waku miꞌi tã watunug miꞌiria mõtypot hamo are. Waku more­kuaria pe tuꞌi­saria pe watum saꞌup katu­pono miꞌiria iꞌatu­potpap kahato Tupana miky­ꞌesat ewy nug hamuat aipo­wyro hap ete. Waku ipotpap takaria wo watu­kup­teꞌen yne aito Iesui mohey haria aito pote."

⁸ Eiwe­te­weru hap meremo eweha­ꞌupnug e. Yt naku i ti rat aito Iesui mohey haria watu­we­te­weru neꞌi. Waku wẽtup yn aiwe­te­weru hap mesu­wa­rote are miꞌi ti miitꞌin kyꞌe hap kawiat. Waku wahãꞌãg kahato miꞌi nug hamo yne miitꞌin ete. Miꞌi hawyi waku yt kat i aiwe­te­weru hap. Waku wuatꞌi miitꞌin kyꞌe haria wato­py­huꞌat. Miꞌi yn waku aiwe­te­weru hap sese. Miitꞌin kyꞌe kahato haria wo watoĩ­neꞌen pote wakuap yn naꞌyn watunug iꞌatuepe. Miꞌi hawyi Tupana miky­ꞌesat nug haria wo wato­py­huꞌat miitꞌin kyꞌe haria aito pote. Yt karãpe i wati­ꞌa­parap miwan miat wãiꞌe hap koꞌi ete Musei mienoi koꞌi ete kat pote wati­ꞌa­tu­kyꞌe kahato iraniaꞌin miitꞌin mote yt karãpe i wati­maꞌat miꞌiria."

⁹ Kat pote saꞌa­wyꞌi yityꞌok tote Tupana tiwan nu tote puretig. Miꞌi hawyi tutum ahaꞌa­seꞌi Musei pe — Yt ereket reiꞌo wẽtup ok eꞌaito wywo wẽtup ok eharyꞌi wywo e. Yt etiꞌauka teiꞌo miit e. Yt eteroꞌok teiꞌo iraniaꞌin ekat e. Yt eheso teiꞌo iraniaꞌin minug hap ete iꞌatu­maꞌat hamuat. Yt etiꞌa­tu­ky­ꞌesat reiꞌo eha wo iraniaꞌin ekat iraniaꞌin emiit e. Yt ereĩneꞌen neiꞌo ehaꞌy­wywi iraniaꞌin ekat ete e Tupana ainãpin tomiwan me nu tote. Miꞌi e hap koꞌi waku watunug yne yne are. Iꞌewyte wẽtup ainãpin hap poꞌog miꞌiria kai toĩneꞌen are. — Eweiꞌa­tu­kyꞌe ro iraniaꞌin eiwe­kyꞌe hap ok tã e Tupana. Miꞌi e hap watunug mote yne Tupana kaipywiat ainãpin hap tomiwan miat watunug naꞌyn."

¹⁰ Kat pote wati­ꞌa­tu­kyꞌe iraniaꞌin aiwe­kyꞌe hap ok tã mote yt karãpe i wati­ꞌa­tu­maꞌat reran aimi­kyꞌe kahato haria. Yt karãpe i woꞌo­maꞌat haria wo wato­py­huꞌat Tupana piat ainãpin hap koro — Eweiꞌa­tu­kyꞌe iraniaꞌin eiwe­kyꞌe hap ok tã e hap nug hawyi. Woꞌo­pot­kyꞌe hat wo watoĩ­neꞌen hawyi yne ainãpin hap Tupana miky­ꞌesat koꞌi nug haria wo watu­kup­teꞌen."

¹¹ Uimi­mu­ꞌeria tawa wato Huma piaria toꞌiro wati­ꞌa­tu­kyꞌe miitꞌin. Yt naku i woꞌo­maꞌat haria wo wato­py­huꞌat. Aheha­kye­raꞌat hat Iesui tut hamuat. Yt watikuap i kat eꞌat putꞌokꞌe maꞌato miꞌi hap watikuap poꞌog yt pya i gaꞌatpo hap kai. Poꞌog poꞌog yt pya i Aika­ꞌiwat ut hap saꞌa­wy­ꞌiwuat ahepiat yt imohey i te hap kai. Yt naku i get haria ewywuaria wo watu­kup­teꞌen hut turan. Pyno koran waku wahe­katup kahato hut hap."

¹² Yt naku i nug haria tiky­ꞌesat kahato wãtym muo yt naku i nug hamuat hap. Taꞌa­tu­ky­ꞌesat kahato ti iꞌypyryp wiat saꞌag nug hap maꞌato aito yt miꞌiria ewywuat i aito katu­pono aitoria wato­py­huꞌat ihotꞌok puo ieĩneꞌen haria ewy are. Waku nug haria tiky­ꞌesat kahato waku nug hap yne ehamo hamuat Tupana mõtypot hamuat. Waku nug haria tiky­ꞌesat kahato ihotꞌok wuo wuatꞌi ehamo waku nug hamuat. Mesup taꞌyn wãtym porap tokosap taꞌyn uiwy­riaꞌin are. Mesup taꞌyn ihotꞌok porap putꞌokꞌe. Uimi­mu­ꞌeria Aika­ꞌiwat ut hap yt pya i at wẽtem hap ewy ihotꞌok hap."

¹³ Wuatꞌi ehamo eꞌat pe turan yt uwe i inug saꞌag. Aiminug wakuap wen yne heremo. Waku yt watu­we­mõti hin i aiminug waku hap upi. Waku wati­ꞌatoiat yne yt naku i nug hap kat koꞌi mekewat wãtym muat hairu saꞌag nug haria woꞌo­pytyk pytyk hap ewywuat. Waku wati­ꞌa­tu­ꞌatoiat yne kat som mekewat mahy wemo­pẽꞌã hap aikotã wãtym muaria tunug hap ewywuat. Waku wati­ꞌatoiat yne kat som mekewat aiwary wary aheꞌaito heꞌaito hap. Waku miitꞌin hãpyk takaria ewywuaria wato­py­huꞌat mesuwat yi tote are aikotã wakuap nug haria ewy. Waku wati­ꞌatoiat yne kat som aiwu­ꞌuka hap woꞌo­ꞌahyk hap koꞌi. Waku wati­ꞌatoiat yne kat som mekewat woꞌoe­ha­ꞌy­wywi hap."

¹⁴ Miꞌi pote waku wati­ꞌauka aipiit miky­ꞌesat saꞌag nug hap koꞌi. Waku wẽtup ehay kape watum aiwa­nẽtup hap mekewat Aika­ꞌiwat Iesui wanẽtup hap ewywuat. Yt naku i wati­po­wyro aipiit imiky­ꞌesat saꞌag nug hamuat ete. Karãpe putꞌokꞌe ahete aimi­ky­ꞌesat saꞌag yt naku i nug neran hap hawyi waku meremo yt ahewaure i howawi. Aikotã watopag ahesokpe pakup aipiit pe aipainug hamuat hap ewywuat waku watopag Aipo­typot Aika­ꞌiwat Iesui aipyꞌa pe aiwa­nẽtup hawe aipiit puo aimo­kahu sese hap aipainug sese hap are uito Pauru.

"

14

¹ Karãpe putꞌokꞌe wẽtup ok Iesui mohey pakup te hat yt itag i te Iesui mohey hap ete hawyi waku — Ereke ro mehĩ mana watoꞌe tope. Iesui mohey hat en mote waku ereĩneꞌen uruwywo Tupana mõtypot hamuat wuatꞌi eꞌat pe watoꞌe imohey pakup i hat pe are. Waku — Ereke ro watoꞌe imohey pakup i hat pe yt ihãite i imohey hap ete pytkai."

² Yt naku i wati­mohit neꞌi miꞌi wẽtup ok miit yt ikuap kahato i te aimikuap Iesui etiat pytkai. Yt naku i watu­ꞌuka sehay wo miꞌu ete kat som waku watuꞌu kat som yt e hap ete katu­pono imohey pakup takaria tuꞌuka teran miꞌu eko ete. Yt naku i watu­ꞌuka imohey hap yt aiwo­ꞌoeko ewy hap ete mekewat kat eꞌat waku wati­mõ­typot Tupana e hap ete. Miꞌi pote yt naku i wati­mohit Iesui mohey pakup i hat. Poꞌog waku wati­kyꞌe kahato miꞌiria."

³ Yt aiwo­ꞌo­ꞌewy hin i miꞌu eko ete katu­pono wẽtup ok Iesui mohey hat iꞌu yne miꞌu koꞌi hat maꞌato wẽtup ok yt ihaĩte i te Iesui mohey hap ete rakat — Wãi wãiꞌe neꞌi miꞌu koꞌi ete. Miꞌi hawyi miꞌu u yne hat yt naku i toꞌe yt iꞌu yne i hat pe — Yt naku i kahato en mehĩ mana e yt etuꞌu yne i miꞌu uruꞌewy yt naku i mio tã watoꞌe imohey pakup hat pe. Katu­pono — Uhaꞌyru mohey hat en mote waku ereĩneꞌen uipyꞌa pe e Tupana ahepe."

⁴ Yt naku i wati­mohit iraniaꞌin Iesui eropat haria iꞌatueko ete kat pote Iꞌatu­ka­ꞌiwat koro Iesui yn ikuap waku teropat hap sio yt hap katu­pono Taꞌa­tu­ka­ꞌiwat kaipyi yn taꞌa­tu­ky­ꞌesat — En ni waku rakat e hap. Uiwy­riaꞌin Aika­ꞌiwat tikuap kahato aimoe­saika topotpap nug hamuat hap. Aipoi­tyro kuap kahato Aipo­typot koro topotpap nug hamo. Yne tomohey pakup i haria poityro kuap hat Iesui toĩneꞌen. Iꞌewyte yt naku i watoꞌe iꞌu yne hat pe — Yt naku i en katu­pono etuꞌu yne yt urueko ewy i watoꞌe. Yt naku i mio tã watoꞌe katu­pono Tupana toꞌe Tosa­ꞌyru mohey haria pe — En ni waku kahato uiwa­nẽtup hawe e yne miitꞌin me sio miꞌu tutuꞌu yne sio yt pytkai i."

⁵ Pyno iraniaꞌin Iesui mohey haria — Waku ti wati­mõ­typot Tupana yne eꞌat pe iꞌatuꞌe maꞌato iraniaꞌin Iesui mohey haria — Wẽtup eꞌat yn nat poꞌog waku wati­mõ­typot Tupana iꞌatuꞌe. Taꞌi yt aiwo­ꞌo­ꞌewy hin i kat eꞌat poꞌog waku hap ete. Pyno waku wato­mohey aipyꞌa pe yt heremo i kat som wato­mohey miꞌi hap ete are. Waku watikuap aiwewi kat eꞌat waku kat eꞌat yt hap Tupana mõtypot hamuat are. Miꞌi hawyi yt naku i wati­mohit iraniaꞌin mimohey."

⁶ Waku kahato wati­mõ­typot Tupana. Miꞌi pote waku watoꞌe — Mesuwat eꞌat pe atimõ­typot teran Tupana watoꞌe. Yt aiwo­ꞌo­ꞌewy hin i aimiꞌu eko koꞌi wo Iesui mohey haria aito pytkai. Wẽtup ok toꞌe — Mesup atuꞌu miꞌu Tupana mõtypot hamo e. Pyno waku miꞌi ewy ewetuꞌu katu­pono eiwehum kahato mekewat miꞌu ete Tupana kape pote waku ewetuꞌu. Ewetuꞌu hawyi — Waku kahato En Tupana katu­pono uipoi kahato hat en eweiꞌe. Maꞌato iraniaꞌin Iesui mohey haria — Yt urutuꞌu kuap i mekewat miꞌu mana mehĩ iꞌatuꞌe katu­pono uruwa­nẽtup hawe Tupana yt tiky­ꞌesat i urutuꞌu mekewat miꞌu hap iꞌatuꞌe. Miꞌi haria pe waku watoꞌe — Pyno waku yt ewetuꞌu i mekewat miꞌu mana mehĩ katu­pono yt eiwehum kuap i mekewat miꞌu ete Tupana kape watoꞌe. Miꞌi pote yt naku i ewetuꞌu katu­pono waku wati­mõ­typot Tupana ahenuk turan. Iꞌewyte waku watu­we­mo­syꞌat tuereto Tupana mõtypot hamo watoꞌe aiwo­ꞌope aheko miꞌu u hap koꞌi ete."

⁷ Yt naku i watoĩ­neꞌen mesuwat yi tote aiwehay upi aimo­wepit hap yn nug hamo kat pote Aika­ꞌiwat mowepit hap kape aiwy­riaꞌin mowepit kape yn waku watu­we­potpap are. Yt wato­ꞌo­po­wyro i pote yt naku hin i watoĩ­neꞌen mesuwat yi tote."

⁸ Uiwy­riaꞌin waku watoꞌe — Yt uiwepyi i uiwe­mo­wepit hamo areĩneꞌen neran mesuwat yi tote maꞌato Tupana mowepit hamuat iꞌewyte miitꞌin mowepit hamuat areĩneꞌen neran mesuwe watoꞌe. Iꞌewyte uiku­ꞌuro hap eꞌat pe atimõ­typot teran Tupana uiku­ꞌuro hamo waku watoꞌe aiwo­ꞌope uimi­mu­ꞌeria are. Mio tã watoꞌe pywo pe pote Tupana wanuaria sese watoĩ­neꞌen."

⁹ Tupana tipo­ꞌoro Tosa­ꞌyru Aipo­rekuat nuat. Miꞌi hawyi ikuꞌuro hawyi tuwẽtem i guꞌuro pyi. Aika­ꞌiwat toku­ꞌuro rẽ toikuap aiku­ꞌuro hap miꞌi pote iraniaꞌin Iesui mohey haria ikuꞌuro rakaria Kaꞌiwat no topy­huꞌat. Iꞌewyte Aika­ꞌiwat no toĩneꞌen i toku­ꞌuro hawyi miꞌi pote watoĩ­neꞌen iwywo katu­pono toĩneꞌen i pote tuwẽtem guꞌuro pyi. Mesup Iesui toĩneꞌen wuatꞌi ieĩneꞌen haria Kaꞌiwat no. Iꞌewyte toĩneꞌen mesup wuatꞌi ikuꞌuro rakaria Kaꞌiwat nuat. Miꞌi pote aiku­ꞌuro hap toikuap kahato mesup."

¹⁰ Miꞌi pote yt naku i watoꞌe aiwo­ꞌope — Uiwa­nẽtup hawe mekewat miit yt kat hamuat i yt naku i watoꞌe mesuwe kat pote Tupana yn waku aipatꞌok uwe waku uwe yt hap e hamuat are. Mekewat eꞌat pe wyti aru toiho­ꞌo­mo­herep uwe tomohey sese haria. Yt naku i watoꞌe wẽtup ok Iesui mohey hat pe — Yt woro­ky­ꞌesat i kahato en mana mehĩ watoꞌe. Yt naku i wati­mohit aiwa­nẽtup hawe iraniaꞌin Iesui mohey haria katu­pono Tupana yn aikuap sio waku sio yt hap. Miꞌi yn toꞌe kuap. Meiũran wyti aru yne aito watoĩ­neꞌen iꞌam me Tupana ehay ahepiat kuap hamuat sio waku rakat no watoĩ­neꞌen aipyꞌa pe aiwa­nẽtup hawe sio yt naku i hap kuap hamo."

¹¹ Taꞌi miꞌi tã toꞌe Tupana miwan me — Meiũran aru yne tuwe­pỹ­ꞌã­tutuk uhowawi e. Mekewat eꞌat pe yne teꞌe­roꞌe aru — En yn ni Tupana iꞌatuꞌe teꞌe­ru­we­pỹ­ꞌã­tutuk popuo e. Yt uheso hin i e. Pywo ti rat uiꞌe hap ewy aru topy­huꞌat e. Torania teꞌe­ru­we­pỹ­ꞌã­tutuk uhowawi uiꞌe hap ewy e. Yne yne miitꞌin aru mekewat eꞌat pe — En ni En yn ni Tupana iꞌatuꞌe aru uhepe e Tupana miwan me Isaia 45.23 pe."

¹² Miꞌi pote torania aito aru wahenoi Tupana pe yne yne ahetiat kat som watunug mesu­wa­rotiat aikotã watoĩ­neꞌen mesu­wa­rote watoꞌe aru Tupana pe."

¹³ Miꞌi pote waku watoiat mekewat aiwa­nẽtup hawiat — Mekewat miit yt naku i aiꞌe hap. Miꞌi hawyi waku wẽtup sehay watoꞌe aiwa­nẽtup hawe — Yt ahoꞌo­ꞌa­parap teran i iraniaꞌin Iesui mohey haria ete e hap waku watoꞌe aipyꞌa pe. Waku watoꞌe aipyꞌa pe — Yt atiꞌa­parap teran i wẽtup ok Iesui mohey hap pun hamuat waku watoꞌe at kaꞌap aipyꞌa pe uheka­tu­wyria.

"

¹⁴ Uito ti eiwy Pauru are. Uito eiperia wywo wẽtup piit ewy yn Iesui piit wo watoĩ­neꞌen mesuwat yi tote. Uiwy­riaꞌin pywo pe ti uiwa­nẽtup hawe miꞌu mesu­wa­rote Tupana minug wakuat yne toĩneꞌen miꞌu wo are uipyꞌa pe uiwepe. Saꞌa­wyꞌi yt atimohey i maꞌato koitywy atimohey kahato. Iesui e hap kaipyi atikuap hawyi. Maꞌato uiwy­riaꞌin — Yt naku i mekewat miꞌu watuꞌu eweiꞌe eipyꞌa pe pote yt ewetuꞌu teiꞌo are kat pote ewetuꞌu hawyi eiwe­mõti hap topy­huꞌat. Katu­pono — Atunug yt naku i miꞌu atuꞌu pote eweiꞌe aru eipyꞌa pe. Miꞌi pote yt ewetuꞌu teiꞌo eiwe­mõti popuo."

¹⁵ — Pyno waku watuꞌu yne watoꞌe pote waku aiweꞌeg wo uwe pe mio tã watoꞌe katu­pono tukup­teꞌen iraniaꞌin Iesui mohey haria yt aiwa­nẽtup hap ewywuaria i kahato iꞌatueko miꞌu etiat miꞌi pote — Pãi an waku watuꞌu yne watoꞌe iꞌatue­hamo hawyi iꞌatu­mohey hap mohit haria wato­py­huꞌat iꞌatu­wa­nẽtup hawe. Poꞌog waku watoꞌe — Mehĩ mana yt naku i watu­ꞌuka aheko miꞌu ete miꞌi pote atuꞌu teran eimi­ky­ꞌesat ewy mesuwe areĩneꞌen eiwywo turan waku watoꞌe. Miꞌi hawyi waku watu­we­moe­syꞌat iꞌatueko ewy itote. Tukup­teꞌen wy yt imohey i te haria. Miꞌiria pyꞌa­setpe watoĩ­neꞌen turan waku wati­ꞌa­tu­kyꞌe miꞌiria iꞌatueko miꞌu etiat ewywuat nug hap ete watoĩ­neꞌen iꞌatu­wywo turan are. Yt naku i waho­ꞌo­mõ­py­ꞌahak aimiꞌu u hap wywo iraniaꞌin are. Yt naku i aimiꞌu wo wati­mõ­py­ꞌahak iraniaꞌin seko wãiꞌe hap ete katu­pono miꞌiria ehakye­raꞌat hamo Iesui ikuꞌuro wy. Maꞌato watenuk kahato iꞌatue­hamo — Yt ewetuꞌu teiꞌo miꞌi miꞌu iꞌatuꞌe hap ete pote yt karãpe i taꞌa­tu­mohey Iesui hawyi miꞌiria maꞌat haria wato­py­huꞌat katu­pono aimiꞌu wo wati­ꞌa­tu­mõ­py­ꞌahak neꞌi pote yt waho­ꞌoekyi kuap i miꞌiria Iesui kape."

¹⁶ Maꞌato iraniaꞌin waku watuꞌu yne iꞌatuꞌe. Waku wati­mõ­typot kahato Tupana aimiꞌu wywo iꞌatuꞌe. Waku watu­wehum kahato Tupana kape ahenuk turan iꞌatuꞌe. Miꞌi hap waku wen maꞌato eiweꞌeg wo o uwe pe mio tã eweiꞌe. Katu­pono kat som waku pe toĩneꞌen aiwa­nẽtup hawe iraniaꞌin me yt naku i topy­huꞌat tuereto. Miꞌi hawyi aiminug wakuap topy­huꞌat yt nakuat i iꞌatuepe. Miꞌi hawyi iꞌatu­wa­nẽtup hawe yt naku i nug haria wato­py­huꞌat yt kat i watunug yt naku i aiwa­nẽtup hawe pytkai. Miꞌi pote waku aiweꞌeg wo kahato ahehay wywo aiminug wywo katu­pono miꞌi hawyi yt iꞌatue­waure kaꞌa i ahowawi yt naku i aito iꞌatu­wa­nẽtup hawe hawyi."

¹⁷ Maꞌato pywo pe ti Tupana topy­huꞌat Aheha­kye­raꞌat hat yt aimiꞌu u hap kaipyi i yt ahesapo hy u hap kaipyi i. Tupana topy­huꞌat Aipo­rekuat no Topãꞌãu tutum ahepe hawyi. Ipãꞌãu yn ainug kuap toꞌy­wania koꞌi wo. Yt aheko miꞌu etiat aheha­kye­raꞌat hap. Yt aheko i aimo­hãpyk kuap. Tupana Pãꞌãu yn aimo­wepit kuap. Aheko miꞌu u hap ete yt aimo­wepit kuap i. Karãpe aiwa­nẽtup hap hewyry kahato kowo­ꞌi­ko­woꞌi hawyi Tupana Pãꞌãu yn aimo­wepit kuap. Aheko miꞌu ete eꞌat ete wati­ꞌa­tunug yne hawyi yt kat i te aheha­kye­raꞌat hap are. Tupana yn aheha­kye­raꞌat kuap."

¹⁸ Pywo ti rat areꞌe ehepe — Karãpe wati­ꞌa­tu­kyꞌe iraniaꞌin aipyꞌa pyi Tupana Pãꞌãu mimo­wepit koꞌi aito pote miꞌi hawyi Tupana mowepit haria wo iꞌewyte miitꞌin mowepit haria wo watu­kup­teꞌen mesu­wa­rote."

¹⁹ Miꞌi pote waku watikat kahato muꞌap aiwo­ꞌo­wese hap nug hamo. Waku wato­py­huꞌat woꞌo­wese haria wo. Waku watikat kahato muꞌap aiwo­ꞌo­mo­poĩꞌãm hamuat are. Waku watikat muꞌap aiwo­ꞌope aiwo­ꞌo­moe­saika Iesui ehay wo imohey poꞌog hamuat hap ete."

²⁰ Pyno Tupana wanẽtup hawe waku watuꞌu yne miꞌu maꞌato yt naku i Tupana wanẽtup hawe wato­py­huꞌat wuꞌuka haria aheko miꞌu u hap ete. Miꞌi tã watunug mote wati­moma aiwo­ꞌo­wese hap aiwo­ꞌope. Yt naku i watu­ꞌuka ahehay wo aimiꞌu u hap aheko ete. Miꞌi tã watunug mote Tupana hũria atuꞌuka haria wo watoĩ­neꞌen hawyi Tupana potpap moma haria wo wato­py­huꞌat. Poꞌog waku watikat kahato aiwo­ꞌo­kyꞌe hap. Waku watoꞌe Tupana pe — Uipo­wyro o miitꞌin ekyi ewawiat hamo mehĩ uipo­wyro kahato o katu­pono yt atiꞌa­tu­sytpok teran i emohey haria uheko miꞌu u hamo waku watoꞌe Tupana pe."

²¹ Pyno kat som kat som waku iꞌatu­wywuat aheĩneꞌen turan waku watunug. Waku watikuap iraniaꞌin eko koꞌi hawyi waku iweꞌeg nakaria wo watoĩ­neꞌen. Iꞌatu­miꞌu hap ewy waku watuꞌu iꞌatue­hamo. Waku watuꞌu iꞌatu­miꞌu ipuꞌi u hap ewy iꞌatu­wywo watoĩ­neꞌen nuran. Yt naku i wati­ꞌa­tu­ꞌa­parap neꞌi iraniaꞌin Iesui mohey haria yt iꞌatueko ewywuat i watunug hap kaipyi. — Wãi iꞌatuꞌe mahy u hap ete pote waku yt watuꞌu i. Miꞌi pote waku — Yt naku i watuꞌu mekewat miꞌu puꞌi iꞌatuꞌe pote — Pyno waku watoꞌe. Yt naku i wati­ꞌa­tu­ꞌa­parap neꞌi iraniaꞌin aiminug koꞌi wo."

²² Waku watikuap kahato aipyꞌa pe kat som waku watunug kat som yt naku i watunug Tupana e hap miꞌi hawyi waku watunug aimi­mohey ewy. Waku watikuap kat som wato­mohey miꞌu ete sapo hy u ete eꞌat hap ete miꞌi hawyi waku yt wahenoi i iraniaꞌin me miꞌi hap koꞌi kaipywiat imohey hap ete. Waku wahenoi Tupana kape yn kat som wato­mohey miꞌi ete hap maꞌato aiwa­nẽtup hap toꞌe — Yt naku i miꞌi tã etunug e pote yt etunug neiꞌo mekewat epyꞌa piat. Maꞌato watunug mekewat wãiꞌe aipyꞌa piat hap pote aiwe­mõti kahato hap topy­huꞌat. Aipyꞌa piat haty hap toĩneꞌen — Yt naku i nug hat uito watoꞌe aiwepe."

²³ Maꞌato iraniaꞌin aito Iesui mohey haria haty kahato topy­huꞌat aipyꞌa pe watuꞌu kat koꞌi kat koꞌi hawyi. Watu­we­mõti neꞌi aipyꞌa pe katu­pono aheko yt ewy i watunug mote. Miꞌi pote yt watu­wehum kuap i Tupana kape watuꞌu turan yt imohey hap upi i watuꞌu pote. Miꞌi pote waku watoiat mekewat aiminug saꞌag koꞌi yne yt watu­wehum kuap i Tupana kape hap watunug nuran mote are. Yt Iesui mohey hap wywo i watunug aiminug koꞌi hawyi wati­ꞌa­parap Tupana pe yt wati­mõ­typot i Tupana aiminug wywo pote are uito Pauru.

"

15

¹ Maꞌato yt wato­mohey kahato i seko koꞌi pote waku wati­po­wyro iraniaꞌin yt aiwa­nẽtup hap ewywuaria i Iesui mohey pakup i haria. Waku wati­ꞌa­tu­po­wyro miꞌiria Iesui mohey hap etiat iꞌatu­moe­hãite hamo. Yt naku i watu­we­potpap aiwe­mo­wepit hap kape yn. Waku watu­we­potpap kahato iraniaꞌin Iesui mohey haria powyro hamuat hap ete. Waku Iesui mohey pakup i haria wati­ꞌa­tu­kyꞌe kahato aiwese kahato hap wywo taꞌa­tu­ꞌa­parap kahato te pytkai."

² Poꞌog waku iraniaꞌin Iesui mohey haria mowepit hano wato­py­huꞌat. Waku watikat iraniaꞌin Iesui mohey haria waku piat hap are. Waku wati­ꞌa­tu­motag neran Iesui mohey hap ete iraniaꞌin."

³ Yt karãpe i Aiꞌakag Iesui tuwe­mo­wepit hap kat hano toĩneꞌen. Taꞌi Aika­ꞌiwat Tupana mowepit hap koꞌi yn toikat. Saꞌa­wyꞌi mio tã e miwan me — Saꞌa­wyꞌi toꞌo­ky­ryꞌi kahato eete Tupana hawyi uipo­ꞌoro iꞌatue­ha­kye­raꞌat hamo. Mesup iꞌatuehay saꞌag kahato topy­huꞌat uhete e. Yne miitꞌin sehay saꞌag Tupana piat hap topy­huꞌat uhete e Iesui eꞌyianmete miwan me Tawi wepy hawe 69.9 pe. Miꞌi hap ewy waku poꞌog wati­ꞌa­tu­mo­wepit iraniaꞌin watu­we­mo­wepit hap kai.

"

⁴ Uiwy­riaꞌin yne yne Tupana e hap miwan miat saꞌa­wy­ꞌiwuat toĩneꞌen aimuꞌe hamo. Pywo ti rat saꞌa­wy­ꞌiwuat miwan aimuꞌe kahato hap topy­huꞌat aiꞌarot hap hep kahato hamuat. Miꞌi e hap koꞌi aimoe­saika kahato imohey hap ete. Watu­we­muꞌe saꞌa­wy­ꞌiwuat miwan ete hawyi watikuap kahato yne Tupana e hap — Atunug aru e hap koꞌi. Watikuap kat som tutunug aru hawyi wahe­katup kahato iꞌe hap ewywuat eꞌat putꞌokꞌe hap. Miꞌi hawyi aimo­wepit kahato hap topy­huꞌat katu­pono watikuap waku kahato aru Tupana tunug aru ahepe toꞌe hap ewy watikuap miwan saꞌa­wy­ꞌiwuat kaipyi.

"

⁵ Uiwy­riaꞌin miꞌi tã kahato ahẽtup Tupana pe ehowawi — Uruꞌywot atipy piat En yn ni wuatꞌi uruwat uruꞌarot hap kaipywiat urumo­wepit hat. En yn ni urumoe­saika kuap hat yt karãpiat i ehay atoiat uruepiat hap ete. Urunug Esaꞌyru mohey haria wo pote wẽtup miit ewy yn uruwa­nẽtup hawe urupyꞌa pe hap ahẽtup epe. Tupana urunug no Esaꞌyru Urupo­rekuat saipe­piaria kahato wo hap ahẽtup ewawi are. Aikotã Esaꞌyru toĩneꞌen kahato mesuwe yi tote emõtypot kahato hano miꞌi hap ewy urunug no Esaꞌyru ewywuat mesuwe hap ahẽtup ewawi Tupana."

⁶ Miꞌi etunug mote wẽtup miit ewy uruimõ­typot En mesuwe Uruꞌywot are. Waku wẽtup sehay yn tuwẽtem uruwẽ pyi Esaꞌyru Emipo­ꞌoro Urupo­rekuat nuat Iesui ete are. Waku wẽtup miit ewy yn uruehay emõtypot hap are. Urumoe­saika Epãꞌãu wo urupyꞌa pe hawyi emõtypot haria kahato urutu­kup­teꞌen uimiẽtup ewawiat are.

"

⁷ Saꞌa­wyꞌi karãpe wato­mohey Aipo­typot Iesui hawyi meremo Tupana ainug towy­riaꞌin wo. Iwese kahato toĩneꞌen ahowawi. Miꞌi ewywuat waku meremo watunug iraniaꞌin Iesui mohey haria aiwy­riaꞌin wo. Waku iwese kahato rakaria wo watoĩ­neꞌen iꞌatu­wywo yt aiwo­ꞌoeko i pytkai. Miꞌi watunug mote meremo Tupana mõtypot kahato hap topy­huꞌat mesu­wa­rote.

"

⁸ Saꞌa­wyꞌi Tupana toꞌe urueꞌa­seꞌi pot Aparãu me — Meiũran aru yne ywania mesuwat yi totiaria atiꞌa­tu­poi­tyro e. Taꞌi Wẽtup emiariru emiariru topy­huꞌat aru Wuatꞌi Ywania Porekuat no e. Miꞌi hawyi Iesui tuwe­mo­herep mesuwe Aparãu saipepiat sese Iuteuria pyꞌa­setpe. Miꞌi hawyi toꞌy­wania eropat kahato hat ewy topy­huꞌat."

⁹ Taꞌi Tupana yt heso hin i Aparãu me. Tutunug toꞌe hap ewy maꞌato yt Iuteuria kape yn i Iesui tuwe­mo­herep katu­pono iraniaꞌin ywania kape iꞌewyte tuwe­mo­herep wy. Toiky­ꞌesat yne ywania Tupana mõtypot hanuaria hap toiky­ꞌesat. Toiky­ꞌesat yne yne ywania tikuap Toꞌywot egyiꞌat hap. Aiwy Iesui tiky­ꞌesat aikotã toꞌe miwan me saꞌa­wyꞌi hap ewy — Uiꞌywot e arehum aru uhẽku wo ewawi iraniaꞌin ywania pyꞌa­setpyi e. Arepy aru ewawi Uiꞌywot e. Miꞌi hawyi iraniaꞌin ywania wẽ pyi eset kahu aru wemõ­typot haria wo teꞌe­ro­py­huꞌat e Tupana Saꞌyru saꞌa­wyꞌi sese temiit morekuat Tawi wepy hawe miwan me 18.49 pe."

¹⁰ Iꞌewyte mio tã e miwan me — Wuatꞌi ywania eweimõ­typot ro Tupana imowepit kahato hap ehehay wywo e. Eweimõ­typot ro Tupana mekewat Iuteuria ywania wywo iwat iꞌywania sese wywo e. Eiwe­mo­wepit ro Tupana kape ehehay wepit kahato hap wywo e morekuat Tawi towepy hawe miwan me ahepe Saumu 72 pe."

¹¹ Iꞌewyte poꞌog toꞌe morekuat Tawi — Wuatꞌi ywania eweimõ­typot ro Ainug hat eipyꞌa pyi e. Mio tã eweiꞌe ro tope — Waku kahato sakpoꞌe En Urupo­typot Uruka­ꞌiwat eweiꞌe ro Einug hat Tupana ewawi areꞌe yne miitꞌin sem mesuwat yi totiaria pe e morekuat Tawi towepy hawe tomiwan me Saumu 11.1 pe."

¹² Iꞌewyte Tupana ehay moherep hat Isaia mio tã e wy — Meiũran aru wẽtup ok miit Tupana Mipo­ꞌoro topy­huꞌat mesu­wa­rote Wuatꞌi Ywania Porekuat no e. Miꞌi Miit wyti aru morekuat Tawi ywot Iesi saipepiat sese toĩneꞌen aru e. Morekuat Tawi ywot Iesi toĩneꞌen aikotã ariaꞌyp ypy potꞌi ewy maꞌato Tupana Mipo­ꞌoro aru toĩneꞌen aikotã mekewat ariaꞌyp koro sese gaꞌapy piat ewy e. Mekewat iꞌypy kyt tuweityk taꞌyn hawyi iꞌypy kyt hẽtyt heremo hawyi tuwe­mo­wato sese iꞌyp e. Miꞌi hap ewy aru Tupana Mipo­ꞌoro sese toĩneꞌen aru Wuatꞌi Ywania Porekuat nuat Miit toĩneꞌen e. Yt Iuteuria ywania Porekuat no yn toĩneꞌen maꞌato yne miitꞌin mesu­wa­ro­tiaria Porekuat no toĩneꞌen aru e ti saꞌa­wyꞌi Tupana ehay moherep hat Isaia tomiwan me 11.9 pe.

"

¹³ — Tupana uito ti emipo­ꞌoro Pauru atiky­ꞌesat kahato etiꞌa­tu­po­wyro iraniaꞌin ywania kape ekuap hamuat hap ete. Koitywy iꞌatu­ꞌarot potꞌi wywo tukup­teꞌen. En yn waku iꞌatu­mo­wepit kuap hanuat. Esaꞌyru kape yn teꞌe­ru­wa­nẽtup taꞌa­tu­he­katup haype are. Uiꞌywot mekewat ewat wuatꞌi eꞌat piat woꞌo­mo­wepit hap yn waku etum iꞌatuepe. Esaꞌyru mohey hap kaipyi etum no iꞌatuepe iꞌatu­wa­nẽtup saꞌag hap monik hap Esaꞌyru mohey hap kaipyi are. Papai etum o Epãꞌãu Wakuat iꞌatuepe poꞌog poꞌog yne eꞌat pe. Etimoe­saika miꞌiria Epãꞌãu Wakuat kaipyi are. Epãꞌãu Wakuat kaipyi atiky­ꞌesat taꞌa­tu­he­katup Esaꞌyru ut hap at kaꞌap. Uruꞌywot Tupana etimo­wepit kahato uheywytꞌin uheinytꞌin tawa wato Huma piaria.

"

¹⁴ Uiwa­nẽtup hawe waku kahato ti eiperia tawa Huma piaria. Uiwy­riaꞌin uheinytꞌin kahato eiperia Iesui mohey haria eweikup­teꞌen mote Aiꞌywot Tupana Wakuat eiam kahato eiperia. Taꞌi Tupana kuap hamo eipytꞌat eheho­wapy kahato miꞌi pote woro­ho­ꞌo­mohey kahato eipe. Waku eweikup­teꞌen eiwo­ꞌo­muꞌe muꞌe hanuaria wo eimikuap Tupana etiat wo. Taꞌi waku kahato woro­ho­ꞌo­puẽti eiperia wuatꞌi miitꞌin muꞌe hamuat."

¹⁵ Pyno uito Pauru mesuwat uimiwan ehowawiat. Uimiwan mesuwe yt iꞌperup takat i einãpin hamuat sese. Atiwan haty wo aikotã wati­ꞌa­tu­nãpin aimẽ­pytꞌin haty wo hap ewy woro­ho­ꞌo­nãpin eipe mesuwe. Miꞌi hap uimiwan atunug mesuwe. Waku pe atiwan katu­pono Tupana uipo­ꞌoro iraniaꞌin ywania nãpin hamo. Tupana uiꞌairo miꞌi hap inug hamuat. Yt uhewaku hap upi i uiꞌairo wen maꞌato uikyꞌe tepiat hap kaipyi yn mote."

¹⁶ Waku kahato atipuẽti Aipo­typot Iesui eropat hano. Waku atipuẽti mesuwat uipotpap iraniaꞌin muꞌe hamuat Iesui ehay wakuat etiat. Saꞌa­wy­ꞌiwuat paꞌiria koꞌi iwuk miitꞌin hũria Tupana mowepit hamo. Miꞌi hap ewy areĩneꞌen Iesui miꞌairo paꞌi saꞌa­wy­ꞌi­wuaria ewywuat. Paꞌi ewy areĩneꞌen katu­pono atomo­herep kahato sehay wakuat Iesui etiat Tupana kaipywiat. Paꞌi ewy atimo­herep kahato iraniaꞌin me Tupana e uhepiat hap ewy. Aikotã paꞌi saꞌa­wy­ꞌi­wuaria ewy atum Tupana pe iraniaꞌin ywania mohãpyk hamo Iesui suu hap ewy. Mesup eiperia atum Tupana kape paꞌi ewy. Eiperia Tupana mowepit kahato haria ewy eweikup­teꞌen katu­pono Iesui suu mikoho koꞌi eiperia. Wuatꞌi ywania atum Tupana kape hawyi tuwehum kahato uimiium ete katu­pono Ipãꞌãu Wakuat mimo­hãpyk koꞌi iraniaꞌin tukup­teꞌen mesup. Iesui suu mimo­waku koꞌi tukup­teꞌen iraniaꞌin ywania mesup. Miꞌi pote paꞌi ewy atum miꞌiria Tupana pe hap ewy."

¹⁷ Uika­ꞌiwat Iesui yn uheha­kye­raꞌat hat. Miꞌi yn ni Uiꞌakag sese. Wẽtup ok miit ewy yn iwywo urupotpap miitꞌin yne ywania ekyi Tupana kape hap. Miꞌi pote atiꞌa­tuekyi kuap kahato iraniaꞌin ywania Tupana kape. Yt aremõti hin i mesuwat uipotpap ete Tupana eropat hap ete."

¹⁸ Uipo­typot no hap upi Iesui toĩneꞌen kahato uikai. Ipãꞌãu ipotpap kahato uipo pyi iraniaꞌin ywania ekyi hamo Tupana kapiat hamo. Iesui Pãꞌãu ihay kahato uiwẽ pyi tomikuap koꞌi wo. Iꞌewyte Iesui misepap nug hap toimo­herep kahato uipiit pyi iraniaꞌin ywania pore­ro­kosap Tupana miky­ꞌesat nug hamuat hamo."

¹⁹ Ipãꞌãu uimoe­saika kahato iraniaꞌin ywania pore­ro­kosap tuwe­wawiat hamuat. Pywo ti rat yt uhesaika hap kaipyi maꞌato Ipãꞌãu uimoe­saika kahato sepap nug hamo wuatꞌi ywania ehamo. Yt uwe i mikuap mesuwat yi totiat nug hamuat koꞌi tutunug uipiit pyi Tupana Pãꞌãu. Uimoe­saika kahato uhewyry tehay sytpok hamuat wuatꞌi tawa puat. Uipiit yt hesaika hin i pytkai uhewyry wuatꞌi yi totiat wuatꞌi tawa koꞌi puat hamo wuatꞌi yꞌy upi hamuat atimo­herep kahato sehay wakuat Aheha­kye­raꞌat hat Iesui etiat wuatꞌi miitꞌin me. Taꞌi mekewat tawa wato Ieru­sarẽi kaipyi saꞌa­wyꞌi areto yne yne tawa puo uhewyry ihay moherep hamo. Yne yne tawa kape areto te ihay wywo Ieru­sarẽi myi tawa Ieriko kape. Yne muꞌap upi atiꞌa­tu­muꞌe torania miitꞌin Iesui ete Tupana Pãꞌãu uimoe­saika hawuo."

²⁰ Arepotpap kahato yne uhesaika hap ok tã mesuwat sehay wakuat Iesui etiat moherep hamo iraniaꞌin ywania puo torania puo aikope aikope Tupana Saꞌyru Aipo­rekuat set Iesui yt taꞌa­tukuap i te hap upi. Taꞌi yt atiꞌa­tu­po­hari i Iesui mohey haria wẽtup ok aiꞌa­pykok hat po pyi are. Atiꞌa­tu­muꞌe teran yt ikuap i te haria hawyi yt atiꞌa­tu­po­hari teran hin i iraniaꞌin iꞌatu­pot­mu­ꞌeria ete."

²¹ Aikotã toꞌe miwan me saꞌa­wyꞌi hap ewy — Yt karãpiat i ikuap i te haria aru meiũran ikuap yne. Yt karãpe i te tuwat iraniaꞌin iꞌatu­muꞌe hamo pytkai meiũran teꞌe­ra­ꞌa­kasa e. Yt karãpe i Tupana etiat kuap haria aru meiũran ikuap haria wo tukup­teꞌen e Isaia miwan me 52.15 pe saꞌa­wyꞌi."

²² Uiwy­riaꞌin Humanu ywania nimo kahato raꞌyn areto teran ehowawi. Ahãꞌãg hawyi ahãꞌãg i hap ewy maꞌato eweikuap taꞌyn Iesui etiat pote yt areto kuap i katu­pono yt ikuap i te haria iraniaꞌin kape yn areto teran."

²³ Maꞌato mesup areto raꞌyn katu­pono atomo­herep yne raꞌyn yne ywania pe yne tawa tote miitꞌin me yne sehay wakuat Iesui etiat yne hy upiat raꞌyn miꞌi rokirẽ koitywy waku areto raꞌyn ehowawi eipe Huma­nuꞌin araꞌa­kasa hamo. Uimi­ky­ꞌesat saꞌa­wyꞌi hap ewy mesup atunug naꞌyn."

²⁴ Pyno ehetawa sakpo toĩneꞌen mekewat yi wato Epania. Areto teran itotiaria muꞌe Iesui etiat hamo. Miꞌi haype areto ehowawi ehetawa puo. Miꞌi hap yn ahekatup. Pyno uikosap mo maꞌato areĩneꞌen teran eiwywo. Woro­ho­ꞌokuap teran eipe pote areĩneꞌen porap i hamuat eipy­ꞌa­setpe uimi­ky­ꞌesat ewy. Waku kahato aru atipuẽti itote eiwywo. Atiky­ꞌesat kahato eipe uipo­wyro mekewat yi wato Epania kapiat muꞌap saꞌup nug hap ete."

²⁵ Maꞌato mio koran areto tawa wato Ieru­sarẽi kape. Miꞌi kahu rẽ ehowawi areto. Maꞌato saꞌa­wyꞌi atiꞌa­tu­po­wyro teran Tupana saꞌy­ruꞌin Tupana saki­ꞌytꞌin Ieru­sarẽi miaria katu­pono iꞌatu kahato itote Tupana mẽpytꞌin hoꞌopot haria ihaky­ꞌeꞌi kahato rakaria."

²⁶ Miꞌi pote Iesui mohey haria iraniaꞌin ywania aikope aikope teꞌe­ru­wa­ꞌa­tunug hap tote tawa koꞌi yi Mase­tunia piaria tawa yi Akaia piaria tiꞌa­tu­mõꞌẽ teran taꞌa­tuekat ihaky­ꞌeꞌi rakaria tawa wato Ieru­sarẽi miaria puo Iesui mohey haria tawa Ieru­sarẽi miaria powyro hamo."

²⁷ Teꞌe­ru­we­pyꞌa pyi miꞌi tã taꞌa­tunug — Waku wati­mõꞌẽ ahekat Ieru­sarẽi miaria pe iꞌatuꞌe teꞌe­ru­wehay pyi yt uhehay pyi i. Miꞌi taꞌa­tunug neran mote — Waku eweimõꞌẽ ihaky­ꞌeꞌi rakaria Ieru­sarẽi miaria pe are. Taꞌi ewetunug o are iꞌatuepe. Katu­pono ti saꞌa­wyꞌi taꞌa­tu­mõꞌẽ kahato Tupana ehay ahepe. Tupana ehay wywo eipoi­tyro hanuaria teꞌe­ro­py­huꞌat iꞌewyte yne Tupana miium taꞌa­tu­poi­tyro hap kaipywiat taꞌa­tu­mõꞌẽ ehepuo wẽtup ywania eipe pytkai taꞌa­tunug. Miꞌi pote koitywy waku eweimõꞌẽ ehekat Iesui mohey haria ihaky­ꞌeꞌi rakaria pe are. Miꞌi pote hẽto areꞌe iꞌatuepe tama Masẽ­tunia piaria pe tama Akaia piaria pe Iesui mohey haria."

²⁸ Miꞌi hawyi aikope aikope iꞌatu­wa­ꞌa­tunug hap tote tuereto taꞌa­tu­ꞌa­tunug taꞌa­tumiium koꞌi miꞌi hawyi taꞌatuium uruepe — Etioto ro Ieru­sarẽi kape iꞌatuꞌe miꞌi pote areto iꞌatumiium koꞌi wywo. Putꞌok­ꞌare itote hawyi atimõꞌẽ yne ihaky­ꞌeꞌi rakaria pe. Miꞌi hawyi iꞌatumiium ok tã atum yne Iuteuria Iesui mohey haria itotiaria pe. Miꞌi atimõꞌẽ yne hawyi atoiat yne itotiaria pe hawyi areto Ieru­sarẽi myi tawa Epania kape eitok puo eikuap hamo."

²⁹ Putꞌok­ꞌare eipy­ꞌa­setpiat hawyi atiky­ꞌesat kahato Aika­ꞌiwat Iesui aipoi­tyro kahato hap. Atikuap taꞌyn uipyꞌa pe meiũran wuatꞌi aiꞌa­tu­poi­tyro itotiat hamuat tegyiꞌat hap wato hap ok tã hawyi waku kahato raꞌyn.

"

³⁰ Uiwy­riaꞌin tama Humanu piaria ahẽtup kahato ehupi uheinytꞌin uheywytꞌin ewehẽtup yne eipyꞌa pyi haty wo uipo­wyro hamuat Tupana pe — Etipo­wyro Pauru hewyry hap upi eweiꞌe o. Etimõ­typot Esaꞌyru Emipo­ꞌoro Urupo­rekuat nuat Pauru ehay kaipyi Pauru minug kaipyi eweiꞌe o Tupana kape. Taꞌi atikuap uikyꞌe Tupana Pãꞌãu kaipywiat ehepiat hap miꞌi pote ahẽtup ehepe ewehẽtup o Tupana kape uipo­wyro hap."

³¹ Uikyꞌe eipe pote ehẽtup o Tupana pe — Etipo­wyro kahato o Pauru katu­pono yt Iesui mohey haria i Iuteuria tiꞌauka teran haype. Miꞌi tupono etika­wiano kahato iꞌatu­py­ꞌa­setpiat turan toĩneꞌen eweiꞌe o Tupana pe. Iꞌewyte mekewat aimiium ereto hap ete etipo­wyro o Pauru Tupana. Etiꞌa­tu­po­wyro o Iesui mohey haria mekewat Pauru miium taꞌa­tuepiat sat taꞌa­tu­wehum wywuat hamuat eweiꞌe o Tupana pe yt taꞌa­tusat i iraniaꞌin ywania teꞌe­ru­we­mõti taꞌa­tumiium yt kyꞌesat i hap ete."

³² Miꞌi eimiẽtup ok tã Tupana tunug yne raꞌyn hawyi uimo­wepit hap topy­huꞌat uhowapy mekewat Tupana wepy hap ewywuat. Miꞌi hawyi areto ehowawi uimo­wepit Tupana piat hap wywo. Miꞌi hawyi areĩneꞌen eiwywo hawyi poꞌog uiwepit aiwo­ꞌo­kyꞌe aiwo­ꞌo­wese hap itote pote.

"

³³ Tupana ereĩneꞌen kahato o Huma­nuꞌin wywo Esaꞌyru mohey haria itotiaria powyro hamo ereĩneꞌen. Iwese rakaria wo yne o etunug miꞌiria katu­pono En woꞌo­wese hap hanuaria nug hat kahato. Etunug o mesuwat uimiẽtup ewy Tupana areꞌe mesuwe eika­wiano. Uito Pauru.

"

16

¹ Atipo­ꞌoro ehowawi wẽtup hary­poria Iesui mohey hat kahato. Miꞌi ti aheinyt mana Wepi. Iwepit kahato mana Wepi wakuat kahato Iesui mohey hat sese. Miꞌi ti ipotpap kahato tawa Sekeia totiaria Iesui mohey hap tote iꞌatu­wa­ꞌa­tunug hap howare totiat hat. Miꞌi atipo­ꞌoro ehowawi meiũwat mana Wepi."

² Aikotã Iesui kape — Ereke o eiwese hap wywo hap ewy o — Ereke ro eweiꞌe mana Wepi pe aikotã Tupana mẽpytꞌin ewywuat eweikup­teꞌen pote eiwese tuete. Topo­wyro hap toiky­ꞌesat eikaipyi miꞌi o ewetunug tope imiky­ꞌesat ok tã. Mana Wepi ti mesuwe uipo­wyro kahato iꞌewyte uiwy kahato topy­huꞌat iꞌewyte toiꞌa­tu­po­wyro kahato mesuwiat Iesui mohey haria. Iꞌatu kahato mesu­wa­ro­tiaria wy ok wo topy­huꞌat mana Wepi. Wakuat kahato uipot­po­ꞌoro miꞌi.

"

³ Pyno kuekatu atipo­ꞌoro mana Pisira heꞌaito Akira kape uipo­wyro Aipo­typot Iesui eropat hap etiat are."

⁴ Saꞌa­wyꞌi sese miꞌiria uipo­wyro kahato. Wẽtup eꞌat pe tõꞌẽ tõꞌẽ kahato miitꞌin uiꞌauka hamuat wen maꞌato uhyt Akira iwary Pisira uheha­kye­raꞌat uhewa­nĩ­kaptia po pyi. — Uruꞌauka teran mote waku maꞌato yt naku i eweiꞌauka Pauru iꞌatuꞌe wanĩ­kaptia pe arepopy pytkai. Miꞌi hap upi uheha­kye­raꞌat uhyt Akira mana Pisira. Miꞌi ete yne Iesui mohey haria yne ywania aimẽpuo aimẽpuo teꞌe­ru­wa­ꞌa­tunug hap ok tã teꞌe­ru­wehum Tupana pe mehĩ Akira mana Pisira ete. Miꞌiria kape atipo­ꞌoro uhekue­katu."

⁵ Iꞌewyte atipo­ꞌoro uhekue­katu Iesui mohey haria mehĩ Akira mana Pisira yat piaria waꞌa­tunug haria kape.

Iꞌewyte atipo­ꞌoro uhekue­katu uhewakuap uiwy sese mekewat mehĩ Epenetu kape. Iꞌatu kahato mio Iesui mohey haria tawa Asia pe yi Asia pe maꞌato uiwy Epenetu torania miꞌiria eꞌyianmete topy­huꞌat Iesui mohey hano tawa Asia piaria kai. Miꞌi inug yianmete Iesui Topo­rekuat no."

⁶ Uhewaku hap atipo­ꞌoro mekewat mana Maria pe eheropat hap ete ipotpap kahato rakat kuekatu atipo­ꞌoro miꞌiria pe miꞌi pe."

⁷ Saꞌa­wyꞌi toĩneꞌen typy ok uiꞌy­wania Iuteuria woꞌo­pyhik hawe wẽtup ok Ãtu­niku wẽtup ok Iunia. Miꞌiria Iesui mohey haria aheꞌyianmiat haria kahato miꞌiria Iesui potpo­ꞌo­roria mikuap kahato koꞌi. Miꞌiria kape uhewaku hap kuekatu e hap atipo­ꞌoro."

⁸ Iꞌewyte atipo­ꞌoro kuekatu sese mekewat uiwy sese mekewat mehĩ Ãpiatu kape. Iesui urumo­wehik kahato wẽtup miit ewy yn uruto­py­huꞌat. Uiwy kahato miꞌi Iesui mohey hat pote."

⁹ Etum uhekue­katu mehĩ Upanu pe Aika­ꞌiwat Iesui eropat uruwywuat hat kahato miꞌi. Uhekue­katu sese atipo­ꞌoro uiwy sese Etaki kape."

¹⁰ Iꞌewyte atipo­ꞌoro kuekatu kahato aiwy Apere kape. Miꞌi ti toku­ꞌuro hap kapiat Aika­ꞌiwat mohey hap — Yt atoiat i e hat. Saꞌa­wyꞌi taꞌa­tu­hãꞌãg ihep imohey hap kaipywiat hap maꞌato yt taꞌa­tuhep kuap i. Kuekatu mehĩ Aritũ­puru yat piaria kape atiꞌa­tue­waku."

¹¹ Arehum kahato uhehay wo iꞌewyte mehĩ Erotiãu kape miꞌi ti Iuteu ywania uiꞌewy. Iꞌewyte kuekatu atipo­ꞌoro Nasisu kape iꞌewyte haꞌy­ruꞌin Iesui mohey haria kape."

¹² Atiꞌa­tue­waku teran mehĩ Tiwena Iꞌewyte Tiwosa. Miꞌiria aheropat kahato Aipo­typot potpap nug hap ete. Yt atiwaure i aiwy mana Pesĩte Aipo­typot potpap ahyt nug hat. Miꞌi ti Aipo­typot eropat hat kahato."

¹³ Miꞌi hawyi haikaꞌat mehĩ Huwu kape sepap nug hap ewy Aika­ꞌiwat potpap nug hap ete ipotpap iꞌewyte ety kape atipo­ꞌoro uiwy Huwu kuekatu. Waku kahato ety are. Uity ewywuat kahato miꞌi topy­huꞌat uipyꞌa pe are. Taꞌi uipo­wyro kahato ety aikotã uity sese hap ewy uipo­wyro are."

¹⁴ — Tupana are etipoi­tyro uiwy­riaꞌin kuekatu atipo­ꞌoro mehĩ Asikitu kape mehĩ Wẽkũte kape aiwy Ema kape mehĩ Patũpa kape mehĩ Eme kape iꞌewyte yne Iesui mohey haria iꞌatu­wy­wuaria kape atipo­ꞌoro yne kuekatu."

¹⁵ Yt atiwaure teran hin i uhekue­katu poꞌoro ewawiat hap mehĩ Wiro­ruku are. Iꞌewyte mana Iuria kape iꞌewyte mehĩ Nereu kape iꞌewyte inyt kape iꞌewyte uhehay atipo­ꞌoro ewawi uiwy Urĩpa kape iꞌewyte yne iꞌatu­wywuat ieĩneꞌen haria Tupana Saꞌyru emiitꞌin koꞌi kape kuekatu atipo­ꞌoro.

"

¹⁶ Karãpe putꞌokꞌe wẽtup ok Iesui mohey hat sese ahowawi pote waku iwese kahato rakat howawiat hano wato­py­huꞌat. Waku ahehay wese kahato iwywo waku. Waku wati­wesat — Waku aiwy­riaꞌin Iesui mohey haria sese. Taꞌi waku wati­ꞌa­hi­ꞌy­pysat aimẽpuo aimẽpuo Iesui mohey haria teꞌe­ru­wa­ꞌa­tunug hap kaipyi taꞌa­tu­po­ꞌoro ehowawi taꞌa­tue­kue­katu eipe Humanu ywania kape mesu­wepyi.

"

¹⁷ Tukup­teꞌen Iesui mohey ran haria maꞌato mesuwat yi tote yt naku i rakaria katu­pono woꞌoehay uka teran sehay wuat haria tukup­teꞌen. Taꞌi miꞌiria taꞌa­tu­patꞌok patꞌok teran kahato aito hap taꞌa­tu­ky­ꞌesat kahato. Miꞌiria aimo­ꞌa­kagꞌaia taꞌa­tuehay wuat hap taꞌa­tuehay wo. Yt Iesui kyꞌe hap kaipyi i maꞌato wẽtup mohey hap kape wẽtup sehay kape aimo­ꞌa­kagꞌaia teran. Typy mohey hap nug hamo yt Aimi­mohey Iesui ewy i taꞌa­tu­mo­herep yt aimi­mohey sehay yt ewy i yt aimuꞌe hap saꞌa­wyꞌi wuat Iesui potmu­ꞌeria piat yt aimuꞌe hap ewy i aimuꞌe. Yt naku i. Uiwy­riaꞌin karãpe miꞌiria ewywuaria putꞌok­ꞌi­ꞌa­tuꞌe eipy­ꞌa­setpe ehepiat Iesui mohey hap nug kowo­ꞌi­ko­woꞌi hanuaria eiweꞌeg wo o miꞌiria pupi. Miꞌiria putꞌok­ꞌi­ꞌa­tuꞌe turan waku eweikuap meremo iꞌatuepiat eimaꞌat reran hap hawyi yt eweiwat i iꞌatuehay upi. — Urumuꞌe ro uhyt mana yt eweiꞌe teiꞌo iꞌatuepe. Iꞌatuehay pupi eweikenꞌẽ o. Uiwy­riaꞌin Iesui mohey haria eipe pyno woro­ho­ꞌo­nãpin haty puo yt eweipo­meꞌeg teiꞌo ehewaure kaꞌa woꞌo­patꞌok patꞌok Iesui mohey haria etiat iꞌatu­mo­ꞌa­kagꞌaia hap kaipy­wiaria kape."

¹⁸ Katu­pono woꞌo­patꞌok patꞌok haria yt Aika­ꞌiwat Iesui eropat haria i hin i. Taꞌi yt Aika­ꞌiwat Iesui upiat hin i aimo­ꞌa­kagꞌaia hamo. Taꞌi miꞌiria tõꞌẽ tõꞌẽ ahowawi katu­pono taꞌa­tu­ky­ꞌesat kahato aito taꞌa­tue­miitꞌin no haype saꞌag nug hamuat aiꞌu hamo tõꞌẽ. Miꞌi pote eiweꞌeg wo o pyno iꞌatuehay sese kahato miꞌiria wẽtup sehay ete aimaꞌat taꞌa­tuehay iwese rakat nuat hamo — Yt uwe i poꞌog ikahuria eipe kawiat haria iꞌatuꞌe ahepe maꞌato yt pywo pe i aimaꞌat reran haype. Iꞌatuehay upi mekewat hira­karia wanẽtup hap ewywuaria meremo tuwat kahato iꞌatuehay upi. Miꞌi pote uipyꞌa pyi areꞌe — Eiweꞌeg wo o eimaꞌat tet pupi eipatꞌok hamuaria neꞌi pote ahekat kyꞌewi aimaꞌat haria miꞌiria."

¹⁹ Maꞌato eiperia yt iraniaꞌin ekat kyꞌewi i miitꞌin muꞌe hanuaria miꞌiria ewywuaria hin i. Taꞌi aito sehay wakuat Iesui etiat yn aiwẽ ete. Taꞌi yt kat i wẽtup sehay kowuat kowuat hap upiaria aito. Aito ti wẽtup mohey hap yn aikai Iesui mowepit hap yn aikai waku. Miꞌi pote uimo­wepit kahato eipe. Eipe Iesui ehay upiaria Humanu ywania katu­pono yt miitꞌin piit kyꞌewi eweimuꞌe Iesui hũria. Waku kahato. Pyno waku wato­py­huꞌat waku nug hap sepap nug haria wo. Waku watikuap yn wakuat koꞌi weꞌeg haria ewy. Maꞌato yt naku i wato­py­huꞌat yt ikuap i hat ewy sio waku sio yt aikotã aimẽ­pytꞌin yt ikuap i te haria ewy aikotã — Waku atunug yt naku i migꞌi wo mesup e haria ewy yt naku i wato­py­huꞌat iꞌatuehay upi. Waku watu­wewãi yt naku i nug hap koꞌi ete Iesui esura­raꞌin ewy waku."

²⁰ Pyno Tupana aiwa­nẽtup kowo­ꞌi­ko­woꞌi hap monik kahato hat topy­huꞌat aiwa­nẽtup hawe. Waku ahewaure kahato Tupana kape. Miꞌi watunug mote aimo­wese kahato hap topy­huꞌat aiwo­ꞌope. Waku aiwo­ꞌo­kyꞌe hap upi watu­ꞌuka te at kaꞌap ahiag ete. Miꞌi watunug mote meiũran yt pya hin i raꞌyn hap eꞌat pe Tupana tiꞌakit sese raꞌyn ahiag aipy wo toiꞌa­porok ahiag. Taꞌi aipy wo aru toiꞌakit ahiag akag aikotã wati­ꞌakit moi akag ewy e.

— Uipo­typot Iesui ereĩneꞌen kahato ro emiitꞌin Humanu ywania wywo. Ereĩneꞌen hegyiꞌat kahato itotiaria piat hano. Ereĩneꞌen egyiꞌat iꞌatu­kyꞌe hap wywuat wywo hap ahẽtup epe Iesui pe ehepiat.

"

²¹ Uhaꞌyru Timoteu ipotpap kahato uiwy wo mesuwe. Kuekatu toipo­ꞌoro teran ehowawi — Aikotã sura­raꞌin timõ­typot taꞌa­tu­ꞌakag hap ewy taꞌa­tu­wehum hap wywo hap ewy arehum ehowawi e Timoteu ehepe. Tupana potpap nug haria mesuwe uiꞌy­wania Iuteuria kawiat uiꞌe­wy­wuaria — Woro­ho­ꞌo­kyꞌe kahato eipe woro­ho­ꞌo­mõ­typot eipe iꞌatuꞌe ehepiat. Aiwy Irusiu mio tã e miꞌi hawyi mehĩ Iasãu iꞌewyte mekewat aiwy Sosi­patu tipo­ꞌoro teran miꞌi e hap ehowawi.

"

²² Mesuwat uipot­po­ꞌoro iwan nug hat topo wywuat hat uiwẽ pywiat aiwy uhyt Tesiu e hap het rakat iꞌewyte toipo­ꞌoro teran kuekatu e hap ehowawi. — Pyno uiwy­riaꞌin Tupana Mipo­ꞌoro Eipo­rekuat nuat Iesui piat eiꞌa­tu­poi­tyro hap atipo­ꞌoro ehowawi atiwan mesuwe uito Pauru e hap wan nug hat Tesiu uito toran are.

"

²³ Uito Pauru mesup areĩneꞌen mehĩ Kaiu yat pe areket mesuwe. Iesui mohey haria teꞌe­ru­wa­ꞌa­tunug mesuwe mehĩ Kaiu yat pe. Pyno uipo­wyro hat Kaiu iꞌewyte toipo­ꞌoro teran kuekatu e hap ehowawi. Wẽtup ok mehĩ Eratu tipo­ꞌoro kuekatu ehowawi. Aiwy Eratu ti toĩneꞌen mesuwat tawa pe morekuat ekareꞌen apykok kuap hat miitꞌin miat imõꞌẽ kuap hat.

"

²⁴ — Uika­ꞌiwat Iesui etiꞌa­tu­kyꞌe kahato o emiitꞌin yi Humanu totiaria areꞌe mesuwe etiꞌa­tu­kyꞌe hap upi etiꞌa­tu­poi­tyro o miꞌiria egyiꞌat hap ok tã areꞌe mesuwe Iesui pe.

"

²⁵ Pyno toꞌiro wati­mõ­typot Tupana ahehay wo — Tupana En ni wakuat kahato waku watoꞌe. Ikahu kahato ewakuap urutoꞌe. Urumoe­hãite kuap kahato Esaꞌyru sese mohey hap ete urutoꞌe. Ehay wakuat Esaꞌyru etiat wo Urupo­rekuat etiat Emimo­herep ete urumoe­hãite kuap kahato urumotag kuap kahato Esaꞌyru mohey hap ete urutoꞌe. Nimo te Esaꞌyru yt putꞌokꞌe i te mesuwat yi tote turan ehay moherep haria urueꞌa­se­ꞌiꞌin timo­herep kahato yianmete Esaꞌyru Iesui etiat taꞌa­tu­miwan me waku watoꞌe. Aikotã sehay migꞌi wuat ewy taꞌa­tu­mo­herep uruepe maꞌato yt heremo kahato i aikotã mesup eꞌat hap ewy urutoꞌe Epe Tupana. Esaꞌyru eꞌyianmete taꞌa­tu­mo­herep yne Esaꞌyru ete yn urutoꞌe. Putꞌokꞌe hawyi urumoe­hãite hanuat kahato. Miꞌi miwan kaipyi Esaꞌyru mohey uruepiat hamo urutoꞌe. Urupo­wyro kahato emohey hap ete urutoꞌe."

²⁶ Mekewat miwan pywuat sehay etiat yianmiat Tupana ehay moherep haria mienoi heremo kahato topy­huꞌat wuatꞌi ywania mikuap mo kahato. Waku kahato En Tupana urutoꞌe. Taꞌi Iesui etiat miwan koꞌi Emipo­ꞌoro Aipo­rekuat nuat etiat waku kahato urutoꞌe. Miꞌi pote uruimo­herep Esaꞌyru etiat mesuwat sehay pywuat torania ywania pe mesuwat yi tote hap uruhẽtup ewawi Tupana. Uruiky­ꞌesat kahato yne ywania Esaꞌyru mohey haria wo tukup­teꞌen hap urutoꞌe. Iꞌewyte uruiky­ꞌesat yne miꞌiria Esaꞌyru ehay upiaria wo tukup­teꞌen urutoꞌe ewawi Tupana."

²⁷ En yn ni Tupana miꞌi hawyi yt uwe i Tupana wo toĩneꞌen urutoꞌe. En yn ni wuatꞌi wuatꞌi kuap hat urutoꞌe. En yn ni yne yne weꞌeg hap eiam sese urutoꞌe. Uruimõ­typot kahato En katu­pono etipo­ꞌoro Esaꞌyru Iesui uruewawi Uruꞌakag Sese wo urutoꞌe. Uruimõ­typot kahato En at kaꞌap wuatꞌi eꞌat pe urutoꞌe. Waku kahato ti rat En pãi an urutoꞌe. Miꞌi hap ewy waku watoꞌe Tupana pe. Waku.

Waku raꞌyn uiꞌe hap ehowawi Iesui mohey haria yi Humanu wanuat rotiaria.

Uito ti Iesui potpo­ꞌoro Pauru."