1

¹ Uito ti Iesui mikyꞌe Iuwãu. Mesuwat uimiwan atipo­ꞌoro ehowawi uiwy­riaꞌin. Iesui etiat atiwan ehowawi.

Aheĩneꞌen hap eꞌyianmete Iesui toĩneꞌen are. Pywo ti rat uruto ipotmu­ꞌeria urueha wo uruta­ꞌa­kasa raꞌyn mesuwe mekewat Tupana ehay Miit kawiat rakat. Iꞌewyte miꞌi turan uruewaure kaꞌa wo uruikuap ihay wakuat. Iꞌewyte ti urutemig urupo wo mekewat aipiit ewywuat rakat."

² Saꞌa­wyꞌi yt heremo i toĩneꞌen Tupana ehay wakuat rakat maꞌato miꞌi hawyi tuwepit nug naꞌyn tuwe­mo­herep taꞌyn Miit no sese raꞌyn ahowawi are. Miꞌi Miit wyti uruta­ꞌa­kasa raꞌyn. Miꞌi hap ti koitywy uruimo­herep taꞌyn ehepuo uruehay wuat. Miꞌi ti wuatꞌi eꞌat piat ieĩneꞌen hat uruta­ꞌa­kasa raꞌyn. Saꞌa­wyꞌi Toꞌywot atipy piat wywo yn toĩneꞌen maꞌato koitywy toimo­herep ahepe Tosa­ꞌyru."

³ Aiwywo raꞌyn toĩneꞌen. Miꞌi hap uruikuap uruewaure kaꞌa pe. Uruehaꞌat hap uruimo­herep ehepe katu­pono uruꞌewy aiwo­ꞌo­ꞌe­wy­ꞌewy wato­py­huꞌat hap uruiky­ꞌesat kahato Iꞌywot wywo Haꞌyru wywuat aiwo­ꞌo­wese hap. Uruꞌe­wywuat Aipo­typot Iesui ewywuat hap uruiky­ꞌesat."

⁴ Miꞌi hap kyꞌewi ti mesuwat urumiwan atipo­ꞌoro ehowawi uruehay eimo­wepit kahato hamuat.

"

⁵ Pyno Haꞌyru wẽ pywiat imienoi uruimo­herep taꞌyn ehepe saꞌa­wy­ꞌi­tewuat imienoi mio tã e hap. Tupana yn nyti ariãty sese e hap. Tupana kai ti yt kat i iꞌypyryp hap toĩneꞌen. Yt naku i nug hap yt kat i ikai."

⁶ Pyno Tupana wywo uruto­ꞌo­wese kahato watoꞌe maꞌato watunug ne seko saꞌag nug hap pote iꞌypyryp wiat watoĩ­neꞌen hap ewy. Miꞌi pote ti — Atikuap Tupana watoꞌe maꞌato yt naku i watunug saꞌag pytkai. Miꞌi pote aiwe­maꞌat hap neꞌi topy­huꞌat yt kat i wyti aiꞌe pywo piat hap pote are."

⁷ Maꞌato wato­py­huꞌat hẽtyhot pe Aika­ꞌiwat ewy pote pywo pe watoĩ­neꞌen. Miꞌi pote ti iwywuat aiwo­ꞌo­wese hap topy­huꞌat kahato are. Miꞌi hap kaipyi ti Tosa­ꞌyru Iesui suu wo Tupana tikoho yne aiminug saꞌag koꞌi. Mekewat kat koꞌi kat koꞌi aiminug saꞌag koꞌi toiꞌa­tu­koho at kaꞌap ahewyry Iesui wywo imiky­ꞌesat ewywuat pote. Miꞌi hawyi tomi­ky­ꞌesat nug haria wato­py­huꞌat."

⁸ Iꞌewyte ti — U yt karãpe i saꞌag atunug watoꞌe pote iꞌewyte koitywy yt karãpe i atiꞌa­parap Tupana pe watoꞌe pote heso rakano wato­py­huꞌat katu­pono iꞌaparap kahato haria aito pote. — Yt kat i saꞌag atunug watoꞌe pote aiwe­maꞌat hap topy­huꞌat mio tã aiꞌe hap kaipyi are. Yt kat i hin i topy­huꞌat pywo aiꞌe hamuat hap e. Miꞌi hawyi heso rakaria wo watoĩ­neꞌen."

⁹ Maꞌato watoꞌe Tupana pe aipyꞌa pyi — Uiꞌywot atiꞌa­parap kahato epe uhehay wo uiminug saꞌag wo watoꞌe pote aimo­hãpyk kahato. Miꞌi hawyi — Waku pe ereĩneꞌen mesup e ahepe watoiat yne aiminug saꞌag hawyi. Tupana aikyꞌe kahato pote toĩneꞌen kahato aika­wiano hamo. Yt aiꞌatoiat teran hin i wati­ꞌa­parap topiat pytkai aikyꞌe kahato. Aiꞌa­piheg hamuat pytkai aikyꞌe hap wywo aiꞌa­piheg are."

¹⁰ Maꞌato watoꞌe — Yt karãpe i atiꞌa­parap Tupana pe miitꞌin me watoꞌe pote ti — Heso rakaria wo eipe e Tupana ahepe katu­pono yne miitꞌin iꞌaparap haria atikuap kahato e Tupana ahepe. Atikuap yne eiwa­nẽtup saꞌag hap koꞌi e ahepe.

"

2

¹ Pyno uhaꞌy­ruꞌin koꞌi uhaki­ꞌytꞌin koꞌi yt atiky­ꞌesat i ti eweiꞌa­parap Tupana pe iꞌewyte miitꞌin me. Miꞌi hap etiano ti mesup atiwan ehowawi. Maꞌato wati­ꞌa­parap Tupana pe miitꞌin me pote waku wahenoi ahepiat iꞌaparap hap. Miꞌi hawyi Aika­ꞌiwat timo­herep Toꞌywot pe aimo­hãpyk hamuat toꞌe."

² Aika­ꞌiwat Iesui ti ihay kuap kahato aika­wiano hamo katu­pono miꞌi ti yt karãpe i iꞌaparap Tupana piat hat. Aiꞌa­piheg hap tutuꞌu yne. Iꞌewyte aiꞌa­piheg hap saꞌup tutum yne. Maꞌato yt aiwat ahaꞌup mo yn i tuweium maꞌato yne yi totiaria yne ywania saꞌup mo tuweium Toꞌywot pe aiꞌa­piheg hap saꞌup mo are.

"

³ Karãpe watunug Tupana miky­ꞌesat ewy ainãpin hap ok tã miꞌi hawyi watikuap taꞌyn aipyꞌa pe Tupana kuap haria sese wo watoĩ­neꞌen hap."

⁴ Maꞌato — Atikuap ti Tupana watoꞌe yt imiky­ꞌesat ewywuat nug hin i pytkai miꞌi pote heso rakano watoĩ­neꞌen. Mio tã watoꞌe pote yt kat i aipyꞌa pe topy­huꞌat pywo aiꞌe hap."

⁵ Maꞌato watunug ihay ewy imiky­ꞌesat ewywuat pote ikyꞌe sese hano watoĩ­neꞌen watunug imiky­ꞌesat ewy pote. Miꞌi tã watunug pote watikuap kahato Tupana woꞌo­wese hap."

⁶ Uito ti Tupana wywo sese watoꞌe pote waku watoĩ­neꞌen haꞌyru ewy hakiꞌyt ewy are. Waku watunug Aika­ꞌiwat Iesui minug ewywuat yn waku watunug.

"

⁷ Uheka­tu­wyria yt kat i einãpin pakup i hap ahenoi ehepe maꞌato ahenoi saꞌa­wy­ꞌiwuat ainãpin hap te aikotã saꞌa­wy­ꞌite ainãpin hap ewy yn ahenoi ehepe. Pyno Tupana e hap saꞌa­wy­ꞌiwuat ahenoi ehepe. Eiwo­ꞌo­kyꞌe ro e hap yn ahenoi ehepe."

⁸ Ipotꞌi rakat sehay maꞌato ti yne eꞌat pe wyti ipakup takano topy­huꞌat aikotã Aika­ꞌiwat aikyꞌe hap ewy waku wato­ꞌo­kyꞌe are. Miꞌi tã watunug hawyi pywo imohey haria miꞌiria iꞌatuꞌe aru iraniaꞌin."

⁹ Maꞌato uito ti Tupana mohey kahato hat hẽtyhot puo uhewyry watoꞌe wen maꞌato ti aiwy­riaꞌin ete aipy­ꞌahak yn watoĩ­neꞌen pote iꞌypyryp we wãtym muat ewy raꞌyn wato­py­huꞌat are."

¹⁰ Maꞌato uwe uwe towy­riaꞌin Iesui mohey haria wywo waku kahato toĩneꞌen toꞌo­kyꞌe kahato miꞌi pote ti pywo ariãty hot puo hewyry rakat ewy topy­huꞌat. Miꞌi hat ti yt taꞌat kuap i kat pote yt iꞌypyryp we i hewyry pote. Iꞌewyte yt kat i ikai miitꞌin maꞌat hamuat neꞌi."

¹¹ Maꞌato aiwy­riaꞌin Iesui mohey haria ete aipy­ꞌahak miꞌi hap kaipyi iꞌypyryp wiat ewy watu­kup­teꞌen aikotã yt ihapytig i rakaria sese wo watoĩ­neꞌen."

¹² Uimẽ­pytꞌin eiminug saꞌag koꞌi yne Tupana timo­hãpyk taꞌyn wato­mohey Aika­ꞌiwat Iesui hawyi.

"

¹³ Miꞌi pote woro­ho­ꞌo­nãpin neran kahato uimiwan me uiꞌy­wotꞌin. Eipe ti wuatꞌi nug hap eꞌyianote wuat ieĩneꞌen haria ti eipe. Tupana kuap kahato haria eipe. Iꞌewyte miꞌi pote woro­ho­ꞌo­nãpin uimiwan me kurumꞌin makup­tiaria katu­pono wuatꞌi saꞌag kaꞌiwat akit haria ti eipe ahiag akit haria. Miꞌi pote woro­ho­ꞌo­nãpin uimiwan me."

¹⁴ Uimẽ­pytꞌin eweikuap kahato Aiꞌywot sese. Miꞌi pote woro­ho­ꞌo­nãpin eipe uimiwan me. Uiꞌy­wotꞌin eipe ti yi nug hap eꞌyianmete wuatꞌi woꞌo­moieĩ­neꞌen hat kuap haria eipe. Tupana sese kuap haria eipe are miꞌi pote woro­ho­ꞌo­nãpin eipe uimiwan me. Kurumꞌin ehesaika kahato katu­pono Tupana ehay ahyt eiam ni eipe. Miꞌi pote wuatꞌi saꞌag nug haria akag akit haria ti eipe. Miꞌi pote ti uimiwan me woro­ho­ꞌo­nãpin."

¹⁵ Pyno yt eweiky­ꞌesat i raꞌyn o iraniaꞌin miky­ꞌesat saꞌag koꞌi. Iꞌewyte yt eweiky­ꞌesat i raꞌyn o mesu­wiaria yi totiaria saꞌag koꞌi. Maꞌato wati­kyꞌe mesu­wa­rotiat minug saꞌag pote yt kat i raꞌyn Aiꞌywot atipy piat kyꞌe hap aikai. Pyno ahenoi teran ehepe kat koꞌi kat koꞌi yt naku i wati­kyꞌe mesu­wa­rotiat koꞌi aipiit miky­ꞌesat koꞌi yt nakuat i nug hap."

¹⁶ Taꞌi eheha tiky­ꞌesat kat koꞌi kat koꞌi yt Tupana miky­ꞌesat ewy i iꞌewyte — Uito poꞌog watoꞌe hap yn wati­ky­ꞌesat. Uimõ­typot hap yn atiky­ꞌesat watoꞌe pote miꞌi hap koꞌi yt Aiꞌywot atipy kaipywiat piat yt aimuꞌe hap i."

¹⁷ Maꞌato mesu­wa­rote pywiat kaipyi yn aimuꞌe saꞌag koꞌi miitꞌin miky­ꞌesat koꞌi ti aru tuweityk yne. Maꞌato uwe uwe Tupana miky­ꞌesat ewywuat nug haria ti aru teꞌe­ro­py­huꞌat wuatꞌi eꞌat pe.

"

¹⁸ Uhaki­ꞌytꞌin uhaꞌy­ruꞌin putꞌokꞌe irane ikahuro hap eꞌat katu­pono ti putꞌokꞌe irane Aipo­typot Iesui ewanĩ­kaptia are. Miꞌi ti Aipo­typot Iesui pohari teran haype. Koitywy typyꞌi kahato miꞌi ewywuaria tukup­teꞌen. Miꞌi hap kaipyi ti watikuap taꞌyn yt pya i raꞌyn ikahuro hap eꞌat hap."

¹⁹ Saꞌa­wyꞌi te ti aiꞌewy kahato tukup­teꞌen tuereto aipy­ꞌa­setpe maꞌato mesup ti aiꞌatoiat raꞌyn. Tuwat yne raꞌyn miꞌiria. Tuwat raꞌyn ahiag upi kat pote yt aimi­mohey ewywuat i miꞌiria pote. Maꞌato aimi­mo­heyria pote ti teꞌe­ro­py­huꞌat aiwywo. Miꞌi pote ahokꞌiwat raꞌyn."

²⁰ Maꞌato aito ti yt miꞌi tã haria hin i raꞌyn katu­pono ti Tupana Pãꞌãu topy­huꞌat kahato raꞌyn ahete. Ahowapy kahato raꞌyn Iesui tum ahepe Topãꞌãu hawyi."

²¹ Miꞌi hap kaipyi watikuap yne kahato raꞌyn pywuat sese sehay Tupana Pãꞌãu aimuꞌe pote. Ehepiat ikuap pytkai raꞌyn ti woro­ho­ꞌo­muꞌe i raꞌyn sehay pywuat sese rakano."

²² — Iesui yt Tupana Mipo­ꞌoro Aipo­rekuat nuat i e haria ti heso yn nakaria wo teꞌe­ro­py­huꞌat. Iesui ewanĩ­kaptia wo wyti miꞌiria."

²³ Miꞌiria ti Iꞌywot Haꞌyru ewanĩ­kaptia sese miꞌiria. Uwe uwe iraniaꞌin me — U yt atimohey i ti Iesui toĩneꞌen Tupana Saꞌyru hap e hat. Miꞌi hat ti yt Tupana wywo i sese toĩneꞌen. Maꞌato uwe uwe iraniaꞌin me — Uito Iesui mohey hat e miꞌi hat ti Tupana wy sese toĩneꞌen. Taꞌi watipun neꞌi raꞌyn Haꞌyru pote iꞌewyte Iꞌywot pun haria wo raꞌyn watoĩ­neꞌen. Maꞌato — Iesui En nyti Tupana Saꞌyru sese watoꞌe pote Iꞌywot mohey haria wo watoĩ­neꞌen. Tupana toĩneꞌen aipyꞌa pe."

²⁴ Saꞌa­wy­ꞌiwuat aimikuap aikai potꞌi toĩneꞌen pote miꞌi hawyi Haꞌyru Iꞌywot wywo watoĩ­neꞌen woꞌo­wese kahato haria wo."

²⁵ Miꞌi tã eweikup­teꞌen pote — Atum potꞌi eheĩneꞌen wuatꞌi eꞌat piat hamuat hap e Aipo­typot ahepe."

²⁶ Pyno arehay poꞌoro hamuat ehowawi eiweꞌeg wo o eimaꞌat sehay wuat haria pupi."

²⁷ Aipo­typot Iesui Pãꞌãu aimuꞌe hap sese topy­huꞌat katu­pono toĩneꞌen Ipãꞌãu aikai pote miꞌi yn aimuꞌe. Miꞌi hawyi yt uwe i aimuꞌe pytkai toĩneꞌen. Miꞌi ti aimuꞌe at kaꞌap. Yne eꞌat pywo rakat etiat aimuꞌe kahato Ipãꞌãu. Yt kat i saꞌag ete aimuꞌe. — Pyno uipap eupi watoꞌe. Uimuꞌe ro watoꞌe Ipãꞌãu me. Miꞌi tã watunug mote aiwo­ꞌo­wese hap yn topy­huꞌat Aika­ꞌiwat Iesui wywo."

²⁸ Uimẽ­pytꞌin waku kahato ti aipap Aika­ꞌiwat upi. Miꞌi pote ti aru karãmuo Aika­ꞌiwat taꞌaipok i raꞌyn meikowo miꞌi hawyi yt kat i aiwe­mõti hap toĩneꞌen ipupiat hap. Yt watu­wemig hin i ipupi maꞌato watu­wehum yn hut turan. Yt kat i aheha yi kape hut turan. Aipo­typot ewywuat hap wahe­katup kahato pote yt kat i aiꞌa­piheg hap Tupana kaipyi. — Waku yn e ahepe. Miꞌi pote aito iꞌewyte waku pe yn watoĩ­neꞌen iꞌewy aito pote."

²⁹ Taꞌi watikuap kahato raꞌyn mekewat wakuap yn nug hat Aika­ꞌiwat Tupana Saꞌyru. Miꞌi hawyi Aika­ꞌiwat ewy wakuap nug haria aito pote iꞌewyte Tupana mẽpytꞌin sese wo raꞌyn watu­kup­teꞌen are.

"

3

¹ Katu­pono ti iwato kahato Aiꞌywot piat aikyꞌe hap. Toimo­herep kahato ti aikyꞌe hap tomẽ­pytꞌin wuat raꞌyn ainug hawyi. Taꞌi tegyiꞌat hap toimo­herep kahato aikyꞌe hap. Pyno yt taꞌa­tukuap i Tupana pote iꞌewyte yt taꞌa­tukuap i aito Tupana mẽpytꞌin koꞌi hap."

² Uimi­ky­ꞌeria koitywy ti aito Tupana mẽpytꞌin naꞌyn. Taꞌi yt watikuap hin i ti aikotã miat aheĩneꞌen hamuat hap. Iesui ut hawyi ti aru watikuap aikotã me watoĩ­neꞌen hamuat katu­pono topiit ewy ti ainug hamuat. Miꞌi hawyi ti aru mekewat eꞌat pe wata­ꞌa­kasa raꞌyn Iesui sese. Miꞌi hawyi ti aru wato­py­huꞌat aikotã iꞌewy raꞌyn are."

³ Miꞌi hap wato­mohey yne eꞌat pe pote ti yt kat i saꞌag aipitpit hap topy­huꞌat. Miꞌi hawyi ti maꞌato poꞌog poꞌog aikoho hap toĩneꞌen. Miꞌi hawyi ti watoĩ­neꞌen aikotã topiit kahu hap ewy ainug."

⁴ Maꞌato uwe uwe yt inug i Tupana piat tonãpin hap koꞌi miꞌi hat Tupana piat yt naku i nug hat topy­huꞌat katu­pono karãpeĩ wati­ꞌa­parap Tupana piat ainãpin hap motꞌi miꞌi hawyi yt naku i nug haria watoĩ­neꞌen Tupana wanẽtup hawe."

⁵ Katu­pono Aika­ꞌiwat yt karãpe i iꞌaparap Tupana pe. Maꞌato Aika­ꞌiwat tuut hamuat yne yt nakuat i hep hamo. Miꞌi hap eweikuap taꞌyn."

⁶ Iꞌewyte uwe uwe toĩneꞌen Aika­ꞌiwat wywo kahato miꞌi hat yt iꞌaparap teran i Aika­ꞌiwat pe. Toikyꞌe kahato haype. Maꞌato iraniaꞌin Aika­ꞌiwat maꞌat haria miꞌiria kaipyi watikuap Aika­ꞌiwat yt kuap i haria hap. Yt karãmuat i Aika­ꞌiwat mohey hanuaria i raꞌyn."

⁷ Uhaki­ꞌytꞌin uhaꞌy­ruꞌin eiweꞌeg wo o wẽtup sehay pupi. Eiweꞌeg wo o eimaꞌat hap pupi. Waku nug haria waku pe tukup­teꞌen Tupana wanẽtup hawe aikotã Aika­ꞌiwat toĩneꞌen waku pe Tupana wanẽtup hawe hap ewy."

⁸ Maꞌato uwe uwe inug saꞌag Tupana pe miꞌi hat ahiag wano topy­huꞌat katu­pono saꞌa­wy­ꞌiwuat yt nakuat i nug hat sese ahiag. Miꞌi pote yt nakuat i akit hamo tuwe­mo­herep Tupana Saꞌyru yne ahiag minug saꞌag koꞌi moma hamo tuwe­mo­herep."

⁹ Uwe uwe tuwe­mo­herep Tupana mẽpyt no miꞌi hat yt toiky­ꞌesat i Tupana piat iꞌaparap hap katu­pono Tupana Pãꞌãu toĩneꞌen ipiit pe. Miꞌi pote Toꞌywot atipy piat ewy topy­huꞌat. Yt toiky­ꞌesat i poꞌog saꞌag nug hap Tupana mẽpyt pote ti raꞌyn."

¹⁰ Pyno yt toꞌo­ꞌewy hin i Tupana mẽpytꞌin ahiag wat wywo yt toꞌo­ku­pitu hin i. Katu­pono uwe uwe wakuat nug hano topy­huꞌat iꞌewyte uwe uwe Tupana mẽpytꞌin kyꞌe hano topy­huꞌat miꞌi hat ti topy­huꞌat Tupana saꞌyru wo Tupana sakiꞌyt koꞌi wo are."

¹¹ Pyno ahenoi i raꞌyn saꞌa­wy­ꞌiwuat sehay sese yianmiat Tupana ainãpin hap — Eiwo­ꞌo­kyꞌe ro e Tupana saꞌa­wyꞌi."

¹² Saꞌa­wyꞌi sese toĩneꞌen Kãi e hap het rakat. Miꞌi yt ikyꞌe hin i toywyt. Toiꞌauka neꞌi. Miꞌi pote yt naku i watoĩ­neꞌen Kãi minug ewy neꞌi."

¹³ Uiwy­riaꞌin tukup­teꞌen miitꞌin mesu­wa­ro­tiaria mekewat Kãi ewywuat yt naku i nug haria ahiag wywuaria aiꞌauka teran haria. Karãpe iꞌatu­py­ꞌahak ahete miꞌi pote yt naku i watu­wa­nẽtup koꞌi koꞌi neꞌi miꞌiria yt iꞌatu­wese i ahete hap kape."

¹⁴ Saꞌa­wyꞌi watu­kup­teꞌen ikuꞌuro rakaria ewy Tupana wanẽtup hawe katu­pono yt watikuap i ihay pote. Katu­pono yt kat i aikai Tupana aimoieĩ­neꞌen pakup i hap. Maꞌato mio watoĩ­neꞌen Tupana wywo katu­pono koitywy aiwo­ꞌo­kyꞌe hap toĩneꞌen. Maꞌato yt kat i aiwo­ꞌo­kyꞌe hap aikai pote ikuꞌuro rakaria ewy watoĩ­neꞌen Tupana wanẽtup hawe."

¹⁵ Maꞌato wato­ꞌo­weu­kaꞌi neꞌi pote watu­kup­teꞌen woꞌo­ꞌauka haria ewy watu­kup­teꞌen Tupana wanẽtup hawe. Maꞌato woꞌo­pot­ꞌauka hat aito pote yt kat i Tupana kapiat aheĩneꞌen hap."

¹⁶ Kat pote Aika­ꞌiwat Iesui ikuꞌuro aika­wiano hamo raꞌyn. Ikuꞌuro hawyi yt kat i aiku­ꞌuro hap sese topy­huꞌat aikai. Pyno ikuꞌuro ahetiano hap watikuap hawyi watikuap aikyꞌe hap sese. Koitywy waku wati­ꞌa­tu­po­wyro wuatꞌi aiwy­riaꞌin Iesui mohey haria aiku­ꞌuro hap kape."

¹⁷ Hekat rakaria aito pote waku wati­mõꞌẽ ihaky­ꞌeꞌi rakat pe wati­puẽti hawyi. Waku ahekat watum iꞌatuepe. Yt naku i watoꞌe aiwepe — Pyno yt naku i atimõꞌẽ uheka­reꞌen ihaky­ꞌeꞌi rakaria pe. Mio tã watoꞌe pote yt kat i Tupana kyꞌe hap aikai. Yt ahegyiꞌat i pote yt naku i watoꞌe iraniaꞌin me — Tupana kyꞌe kahato hat uito yt naku i watoꞌe katu­pono yt pywo pe i watoꞌe."

¹⁸ Yt naku i wato­ꞌo­kyꞌe ahehay wo yn uimẽ­pytꞌin. Waku wati­mo­herep aiwo­ꞌo­kyꞌe hap aiwo­ꞌo­po­wyro hap wywo are."

¹⁹ Aiwo­ꞌo­kyꞌe sese pote miꞌi hap kaipyi watikuap taꞌyn pywo rakaria aito hap. Miꞌi pote karãpe watoĩ­neꞌen Tupana ehamo yt watu­we­mõti hin i Iesui mohey haria kyꞌe haria aito pote."

²⁰ Wati­ꞌa­parap Tupana pe hawyi watu­we­mõti i raꞌyn maꞌato Tupana tikuap aiwa­nẽtup hap. Toikuap yt watunug neran i hap. Watu­we­mõti pytkai aikyꞌe te koran."

²¹ Maꞌato poꞌog waku yt kat i hin i aiwe­mõti hap Tupana ehamo watoĩ­neꞌen turan. Watunug yne Tupana miky­ꞌesat koꞌi ainãpin hap koꞌi miꞌi hawyi Tupana mowepit haria wo watoĩ­neꞌen."

²² Miꞌi hawyi kat e hap kat e hap wahẽtup tope hawyi tutum aimiẽtup ok tã watunug imiky­ꞌesat ewy pote."

²³ Pyno ahenoi ehepe Tupana miky­ꞌesat sese. Mio tã e — Eweimohey ro Uhaꞌyru e. Ewetunug Miꞌi Eipo­rekuat no e. Miꞌi hawyi eiwo­ꞌo­kyꞌe ro aikotã Eika­ꞌiwat Iesui e hap ewy e Tupana ahepe."

²⁴ Uwe uwe Tupana piat tonãpin hap inug miꞌiria ti tukup­teꞌen kahato Tupana wanẽtup hawe. Tupana tomoieĩ­neꞌen tomohey haria wo tukup­teꞌen hap. Iꞌewyte Tupana toĩneꞌen iꞌatu­pyꞌa pe. Tupana tum naꞌyn Topãꞌãu ahepe hawyi watikuap kahato watoĩ­neꞌen hap sese tepiat hamuat. Miꞌi hawyi watikuap kahato raꞌyn Tupana toĩneꞌen aipyꞌa pe hap.

"

4

¹ Uiwy­riaꞌin yt eweimohey teiꞌo yne woꞌo­muꞌe haria — Uito Tupana Pãꞌãu eiam iꞌatuꞌe pytkai. Waku eweikat i kat i miꞌiria sio Tupana Pãꞌãu eiam sio yt hap kuap hamo. Katu­pono iꞌatu kahato woꞌo­muꞌe haria mesuwat yi totiaria yt pywo piat haria i katu­pono wẽtup pãꞌãu iꞌatupiit pe."

² Pyno ahenoi teran ehepe aikotã aikotã waku wahãꞌãg miꞌiria sio waku sio yt naku i hap kuap hamo sio Tupana Pãꞌãu kaipyi sio yt hap kuap hamo. Miꞌi pe waku apoꞌere o — Mehĩ mana etimohey apo uhyt Tupana Mipo­ꞌoro Aipo­rekuat nuat Iesui tuwe­mo­herep miit kawiat hap sio yt apowa­toꞌe. Miꞌi pote aiwesat — Taꞌi atimohey kahato miꞌi uito e pote Tupana eiam kahato miꞌi."

³ Maꞌato — Yt atimohey i miꞌi e pote iꞌewyte yt Iesui mohey hat i mio tã e hat yt Tupana eiam hin i topy­huꞌat. Kat pote wẽtup Pãꞌãu eiam pote. Aikotã toꞌe Tupana saꞌa­wyꞌi hap ewy koitywy topy­huꞌat raꞌyn. — Tuut aru wẽtup pãꞌãu porekuat nuat ewanĩkap ti miꞌi. Koitywy watikuap miꞌi mãꞌãu saꞌag toĩneꞌen naꞌyn aipy­ꞌa­setpe hawyi aima­ꞌatꞌi maꞌatꞌi raꞌyn."

⁴ Uimẽ­pytꞌin aito ti Tupana wanuat koꞌi sese. Yt pywo piat sehay akit hanuaria i aito. Aimuꞌe haria yt pywo piat i yt Tupana kaipywiat koꞌi akit hanuat haria aito. Maꞌato Tupana Pãꞌãu aipiit piat poꞌog hesaika aimuꞌe saꞌag haria pãꞌãu kai. Aito Tupana ehay moherep haria maꞌato miꞌiria mesu­wa­rotiat seko saꞌag enoi haria."

⁵ Tupana ehay taꞌa­tu­henoi saꞌag kahato ahepe. Miꞌi hawyi iraniaꞌin yt Iesui mohey i haria — Pywo iꞌatuꞌe katu­pono miitꞌin eko saꞌag ewywuat waku watunug iꞌatuꞌe pote. Miꞌiria ahiag wanuaria tukup­teꞌen."

⁶ Maꞌato aito Tupana wanuaria watoĩ­neꞌen. Miꞌi hawyi yne Tupana wanuaria teꞌe­ru­we­waure kaꞌa kahato aimienoi kape. Maꞌato iraniaꞌin yt teꞌe­ru­we­waure kaꞌa i aimienoi pywuat kape. Miꞌi hap kaipyi meremo watikuap uwe Tupana Pãꞌãu pywuat ehay upi toĩneꞌen sio uwe ahiag pãꞌãu saꞌag ehay upi neꞌi toĩneꞌen hap.

"

⁷ Uiwy­riaꞌin toꞌiro wato­ꞌo­kyꞌe katu­pono aiwo­ꞌo­kyꞌe hap nug hat Tupana. Woꞌo­kyꞌe haria wo watoĩ­neꞌen pote Tupana mẽpytꞌin no watu­kup­teꞌen. Tupana kuap sese haria wo wato­py­huꞌat."

⁸ Maꞌato yt woꞌo­kyꞌe i haria aito pote yt Tupana kuap haria wo i aito katu­pono woꞌo­pot­kyꞌe hat sese ti Tupana."

⁹ Tupana timo­herep taꞌyn ahepe aikyꞌe kahato hap katu­pono toipo­ꞌoro Tosa­ꞌyru sese ahowawi aimoieĩ­neꞌen pakup i hap nug hamo."

¹⁰ Saꞌa­wyꞌi yt wati­kyꞌe hin i Tupana. Miꞌi pytkai aikyꞌe kahato hawyi toipo­ꞌoro Tosa­ꞌyru aiminug saꞌag koꞌi atumoma yne hamo. Haꞌyru ikuꞌuro hawyi aiꞌa­piheg hap tutuꞌu yne raꞌyn."

¹¹ Pyno waku wato­ꞌo­kyꞌe aikotã Tupana piat aikyꞌe hap ewy waku wato­ꞌo­kyꞌe."

¹² Uiwy­riaꞌin yt karãpe i wata­ꞌa­kasa Tupana maꞌato miꞌi pytkai watikuap kahato toĩneꞌen aiwywo. Miꞌi hawyi wati­ꞌa­tu­kyꞌe miitꞌin pote Tupana toĩneꞌen poꞌog aikai. Aimoe­saika kahato miitꞌin kyꞌe hap hãpyk nug hamo tepiat aikyꞌe hap ewywuat nug hamo."

¹³ Tupana tum naꞌyn ahepe Topãꞌãu hawyi meremo watikuap Tupana wywuat aheĩneꞌen hap watoĩ­neꞌen hap. Iꞌewyte aipyꞌa pe Tupana toĩneꞌen hap."

¹⁴ Tupana tipo­ꞌoro raꞌyn ahepe Tosa­ꞌyru aheha­kye­raꞌat hamo. Miꞌi kape uruta­ꞌa­kasa raꞌyn. Miꞌi hawyi uruimo­herep taꞌyn wuatꞌi miitꞌin me uruehay wo."

¹⁵ Uwe uwe toꞌe iraniaꞌin me — Uito atimohey kahato Iesui toĩneꞌen Tupana Saꞌyru sese hap e miꞌi hat Tupana eiam mo topy­huꞌat. Iꞌewyte Tupana topy­huꞌat heiam mo."

¹⁶ Miꞌi pote watikuap taꞌyn Tupana aikyꞌe hap wato­mohey kahato raꞌyn hawyi. Tupana ti woꞌo­pot­kyꞌe hat sese. Miꞌi pote uwe uwe woꞌo­pot­kyꞌe hat sese toĩneꞌen Tupana wywo miꞌi pote Tupana toĩneꞌen iwywo ipyꞌa pe."

¹⁷ Aipo­typot saipe­piaria ti aito. Miꞌi pote iꞌewy sese waku watoĩ­neꞌen miitꞌin pyꞌa­setpe hãpyk kahato Aika­ꞌiwat ewaku hap ewy. Miꞌi tã watoĩ­neꞌen pote yt watu­we­mõti hin i mekewat karãpe Tupana timo­herep ahewaku hap sio yt hap eꞌat pe. Miꞌi hap eꞌat pe yt watu­we­mõti hin i katu­pono woꞌo­kyꞌe haria wo Tupana ainug towat miitꞌin kyꞌe hap ewywuat no ainug."

¹⁸ Wati­kyꞌe sese iraniaꞌin pote yt wato­kenꞌẽ hin i iꞌatu­pupi katu­pono toĩneꞌen aikai iꞌatu­kyꞌe hap sese Tupana miium kaipywiat hawyi yt wato­kenꞌẽ kuap i iꞌatu­pupi. Maꞌato wato­kenꞌẽ neꞌi pote yt kat i iꞌatu­kyꞌe hap aikai. Miꞌi hawyi wato­kenꞌẽ poꞌog katu­pono Tupana piat aiꞌa­piheg hap pupi."

¹⁹ Yt wati­kyꞌe i te Tupana turan aikyꞌe Miꞌi. Miꞌi hap kaipyi wati­kyꞌe Tupana mesup. Aikyꞌe yianmete pote mesup aito wati­kyꞌe Tupana."

²⁰ Karãpe wẽtup ok toꞌe ahepe — Uito atikyꞌe Tupana e maꞌato miꞌi yt topot­kyꞌe hin i pytkai miꞌi watikuap taꞌyn heso rakat. Karãpeĩ yt wati­ꞌa­tu­kyꞌe i aiwy­riaꞌin miꞌi pote yt wati­kyꞌe hin i Tupana. Katu­pono yt heremo hin i Tupana maꞌato iraniaꞌin heremo kahato miꞌi pote poꞌog yt niatpo i wati­kyꞌe hamo miꞌiria heremo pote."

²¹ Pyno ahenoi i raꞌyn Aika­ꞌiwat piat ainãpin hap sese. Mio tã e hap — Eweiꞌa­tu­kyꞌe ro eiwy­riaꞌin e. Yt eweiꞌa­tu­kyꞌe eiwy­riaꞌin pote pyno yt Tupana kyꞌe haria hin i eweikup­teꞌen are.

"

5

¹ Uwe uwe imohey Iesui Tupana Mipo­ꞌoro Aipo­typot nuat miꞌi hat Tupana mẽpyt sese wo topy­huꞌat. Karãpe wati­kyꞌe Aiꞌywot mẽpytꞌin miꞌi hawyi Aiꞌywot mowepit hano wato­py­huꞌat. Miꞌi hawyi watoĩ­neꞌen Aiꞌywot kyꞌe hano sese."

² Karãpe wati­kyꞌe Tupana iꞌewy karãpeĩ watunug Tupana piat ainãpin hap koꞌi miꞌi hawyi Tupana mẽpytꞌin kyꞌe hano watoĩ­neꞌen."

³ Iesui Ywot kyꞌe haria ti imiky­ꞌesat nug haria wo tukup­teꞌen. Karãpe iraniaꞌin ahãꞌãg yt naku i nug hamo Tupana mẽpytꞌin aito miꞌi pote Aiꞌywot ehay upi yn waku watoĩ­neꞌen."

⁴ Taꞌi yt niatpo hin i watunug Aiꞌywot ainãpin hap koꞌi katu­pono Aiꞌywot mohey haria kahato aito pote. Karãpeĩ iraniaꞌin ahãꞌãg yt naku i nug hamo miꞌi hawyi yt iꞌatuehay upi hin i watoĩ­neꞌen katu­pono Tupana mẽpytꞌin aito pote."

⁵ Karãpeĩ wato­mohey kahato Iesui Tupana Saꞌyru e hap miꞌi hawyi Tupana aipo­wyro kahato miitꞌin miat ahãꞌãg hap akit hamo. Miꞌi hawyi poꞌog ahesaika watoĩ­neꞌen iꞌatueko saꞌag nug hap kai.

"

⁶ Iesui ti Tupana miꞌairo Aheha­kye­raꞌat hanuat. Miꞌi pote putꞌokꞌe hawyi Tupana miky­ꞌesat ok tã yne tutunug. Hãpyk kahato toĩneꞌen Toꞌywot ehay ewy toĩneꞌen. Saꞌa­wyꞌi toto tosetꞌok hamo. Meiũran ikuꞌuro. Miꞌi hawyi huu taꞌat yne yi tote Toꞌywot miky­ꞌesat ewy. Koitywy Tupana toꞌe wuatꞌi pe — Uhaꞌyru ti uimi­ꞌairo wuatꞌi Porekuat nuat e. Iꞌewyte Tupana Pãꞌãu mio tã e. — Yt heso hin i e Tupana Pãꞌãu ahepe."

⁷ Toĩneꞌen myeꞌym aimuꞌe haria mesuwat yi totiaria pywo Iesui Tupana Mipo­ꞌoro Eipo­rekuat nuat e haria."

⁸ Taꞌi Tupana Pãꞌãu ihay Iesui ete. Iꞌewyte Iꞌywot ihay Tosa­ꞌyru setꞌok turan. Iꞌewyte Iesui suu aimuꞌe kahato. Miꞌiria myeꞌym ok ihay te Iesui mõtypot haria toꞌo­ꞌe­wy­ꞌewy iꞌatu­mienoi."

⁹ Iꞌewyte typyꞌi kahato miitꞌin ihay Iesui etiat rakaria. Miꞌiria — Waku wato­mohey Tupana e hap Tosa­ꞌyru piat hap. Pywo pe ti Miꞌi poꞌog poꞌog hesaika miitꞌin mienoi kai — Uhaꞌyru kahato En e hap waku wato­mohey."

¹⁰ Maꞌato — Yt atimohey i Tupana e pote — Heso rakat En watoꞌe tope. Maꞌato wato­mohey Iesui Tupana Saꞌyru hawyi iꞌewyte toĩneꞌen aipyꞌa pe ihay rakat pywuat e hap ewy. Maꞌato aipiit yt e i pote yt kat i Tupana pywo e hap aikai — Heso heso yn watoꞌe Tupana pe."

¹¹ Mio tã e aipyꞌa pe — Tupana tum naꞌyn uhepe Tosa­ꞌyru. Miꞌi pote areĩneꞌen naꞌyn wuatꞌi eꞌat piano watoꞌe aiwepe."

¹² Pywo pe ti rat uwe uwe topy­huꞌat Tupana Saꞌyru eiam mo miꞌi hat yn toĩneꞌen wuatꞌi eꞌat pe maꞌato uwe uwe yt Tupana Saꞌyru yt eiam mo i miꞌi hat yt kat i heĩneꞌen wuatꞌi eꞌat piat hamuat hap."

¹³ Eipe ti Tupana Saꞌyru mohey haria sese eipe. Miꞌi pote atiky­ꞌesat eweikuap eweikup­teꞌen wuatꞌi eꞌat piat hamuat hap. Miꞌi hap kuap hamo atiwan mesuwat uimiwan ehepe."

¹⁴ Karãpeĩ wahẽtup Tupana pe imiky­ꞌesat ewy hawyi watikuap taꞌyn ahehay Tupana ewaure kaꞌa pe teke raꞌyn ahehay. Miꞌi hawyi watu­wehum at howawi aimiẽtup ium hat kape."

¹⁵ Karãpe wahẽtup imiky­ꞌesat ok tã hawyi tuwe­waure kaꞌa kahato ahehay kape hawyi — Pywo watoꞌe tutum aru aimiẽtup watoꞌe aiwo­ꞌope."

¹⁶ Uiwy­riaꞌin karãpe wẽtup ok aiwy­riaꞌin Aipo­typot Iesui mohey hat yt naku i nug hat pote waku watoꞌe Tupana pe — Waku waure wo ereĩneꞌen aiwy minug saꞌag ete waku watoꞌe. Etihep aiwy iminug saꞌag myi watoꞌe katu­pono yt tuwepyi hin i tutunug saꞌag waku watoꞌe. Emohey te maꞌato yt hesaika kahato i te yt naku i nug hap akit hamo waku watoꞌe Tupana pe. Toĩneꞌen mekewat saꞌag nug hat sese emohey hap pun hat maꞌato miꞌi hawyi yt tutunug i miꞌi pote waku waure wo ereĩneꞌen aiwy minug saꞌag koꞌi kai waku watoꞌe Tupana pe. Mio tã watoꞌe pote meremo Tupana topy­huꞌat waure wo iꞌewyte tutum aiwy pe imoehãite hap imoesaika hamo are uiwy­riaꞌin. Maꞌato karãpe wẽtup ok Iesui mohey hat topy­huꞌat ipyꞌahak Tupana ete Iesui ete ahete iꞌewyte — Yt atimohey i te Iesui e mio tã toꞌe haype yt imohey i hat ewy tutunug tuwepyi. Miꞌi hawyi Tupana ipyꞌahak kahato topy­huꞌat miꞌi hat ete. Yt kan hamo i watoꞌe Tupana pe — Waure wo ereĩneꞌen aiwy minug saꞌag kai katu­pono tuwepyi i ipyꞌahak toĩneꞌen Tupana ete watoꞌe."

¹⁷ Yne aiminug saꞌag koꞌi yt naku i topy­huꞌat Tupana wanẽtup hawe wen maꞌato wẽtup aiminug saꞌag poꞌog saꞌag torania kawiat katu­pono karãpe aiwepyiat hap — Yt woro­mohey i En poꞌog watoꞌe Tupana pe Haꞌyru pe miꞌi hawyi yt kat i poꞌog paaꞌaiꞌe hap saꞌag nug hap etiat. Miꞌi hawyi Tupana yt aimo­hãpyk kuap i katu­pono aiwepyi watipun aheha­kye­raꞌat hap pote. Aiwepyi watikat aiꞌa­piheg hap wuatꞌi eꞌat piat hap. Yt naku i kahato watipun imohey hap are."

¹⁸ Uiwy­riaꞌin karãpe wato­mohey Iesui hawyi Tupana ainug tosa­ꞌy­ruꞌin tosa­ki­ꞌytꞌin wo. Miꞌi hawyi imẽpytꞌin koꞌi wo wato­py­huꞌat. Miꞌi hawyi Aiꞌywot ewy watoĩ­neꞌen yt kat i saꞌag yt kat i yt naku i hap watunug neran. Aheko yt watunug neran i poꞌog aiminug saꞌag koꞌi saꞌa­wy­ꞌiwuat aheko saꞌag koꞌi katu­pono Tupana ainug tomẽ­pytꞌin no Tosa­ꞌyru Pãꞌãu wo aipyt­ꞌatnug hawyi. Koitywy ahowapy kahato Tupana Pãꞌãu wywo. Miꞌi hawyi Tupana eiam mo kahato watoĩ­neꞌen. Miꞌi hawyi karãpe Ahiag ahãꞌãg neran kat saꞌag kat saꞌag nug hamo miꞌi hawyi Tupana Pãꞌãu aiꞌãuka kahato ainãpin kahato aihep ahiag aima­ꞌatꞌi maꞌatꞌi hap po pyi. Miꞌi hawyi yt kat i ahewaure ahiag ahãꞌãg hap kape — Yt reiꞌo yt reiꞌo watoꞌe ahiag me."

¹⁹ Pywo ti rat iraniaꞌin mesu­wa­ro­tiaria ahiag ehay upi yn teꞌe­ru­we­wa­nẽtup at kaꞌap katu­pono ahiag emiit no teꞌe­ro­py­huꞌat are. Maꞌato aito Tupana mẽpytꞌin nuat watoĩ­neꞌen pote yt iraniaꞌin ewy i aito yt kat i aikai ahiag wat."

²⁰ Koitywy watikuap kahato Tupana saꞌy­ruꞌin saki­ꞌytꞌin aito hap. Taꞌi watikuap Tupana Saꞌyru hawyi Tupana moherep hat sese topy­huꞌat poꞌog poꞌog mekewat pywuat etiat kuap hamo. Miꞌi tupono mekewat Tupana Mipo­ꞌoro Aipo­rekuat nuat hat watikuap hawyi topo­ꞌoro hat Tupana watikuap iꞌewyte. Saꞌa­wyꞌi watikuap teran uwe Tupana hap maꞌato yt heremo hin i Tupana ahepe. Maꞌato mesup heremo raꞌyn Ahetu­pana katu­pono Haꞌyru imoherep ahepe. Tupana Haꞌyru ti Toꞌywot ewywuat wẽtup miit ewy. Karãpe wata­ꞌa­kasa Haꞌyru kape pote Iꞌywot kape ti raꞌyn wata­ꞌa­kasa wy are. Miꞌi pote mesup — Worokuap kahato En watoꞌe yn Tupana pe. Koitywy uiwy­riaꞌin watoĩ­neꞌen Tupana pe aikotã Tupana eiam ewy miꞌi pe wato­py­huꞌat. Saꞌa­wyꞌi wato­mohey Iesui ti Tupana Saꞌyru e hap hawyi Iesui po pe wato­py­huꞌat. Ipyꞌa pe kahato watoĩ­neꞌen. Aika­ꞌiwat yat piaria ewywuaria wato­py­huꞌat. Iesui ti Tupana sese miꞌi pote Tupana pe watoĩ­neꞌen Iesui pe watoĩ­neꞌen pote. Iesui ti wuatꞌi eꞌat piat ieĩneꞌen hat iꞌewyte aito wuatꞌi eꞌat piat watoĩ­neꞌen Iesui wywo wẽtup miit piit ewywuat pote are."

²¹ Uimi­kyꞌe koꞌi uhaꞌy­ruꞌin uhaki­ꞌytꞌin uito Iuwãu ti eꞌywot uito. Uimẽ­pytꞌin ewywuat eipe miꞌi pote woro­ho­ꞌo­nãpin. Eweiꞌa­tu­ꞌatoiat ro tupa­naria yne yne aipo wuat aiminug saꞌag koi are. Miꞌi hawyi ewetunug no Tupana yn Ehetu­pana wo are uito Iuwãu. Pyno toran naꞌyn uimiwan areꞌe.

Uito ti Iesui potpo­ꞌoro Iuwãu."