1

¹ Uito ti Peteru Aipo­typot Iesui eropat hat sese uito. Uito Iesui mipo­ꞌoro miitꞌin muꞌe hanuat ihay moherep hat uito. Uito ti 12 ok hap Iesui emiit uito. Iꞌewyte imohey haria nãpin hat uito. Aimi­mohey ikahu rakat moherep hat uito. Hekat kahato rakaria ewywuaria watu­kup­teꞌen katu­pono imohey hap saꞌup iwato kahato hap ewy topy­huꞌat imohey hap kaipyi. — Uhaꞌyru mohey haria ti eipe uiwa­nẽtup hawe uipyꞌa pe e Tupana ahepe. Miꞌi pote atum yne wakuat ehepe e Tupana."

² Atiky­ꞌesat kahato eipe Iesui kuap kahato haria wo eweikup­teꞌen. Taꞌi eweikuap Aipo­typot Iesui hawyi Tupana tum neꞌen neꞌen neꞌi tegyiꞌat hap ehepe. Iꞌewyte tutum woꞌo­wese hap tutum yt kat saꞌup i. Aipoi­tyro kahato Tupana tuwehay pyi. Iwese pote tutum yne ahepe. Tutum iwato kahato typy sakpo itote. Toimõꞌẽ kahato tegyiꞌat hap are. Tutum ahepe wuatꞌi tokuap hap Tosa­ꞌyru kuap hap kaipyi tutum yne yne ahepe are."

³ Tutum ahepe yne yne towanuat yt kat saꞌup i. Tesaika hap toieĩneꞌen hap tewaku hap tutum ahepe are. Watikuap Haꞌyru Iesui hawyi tutum yne yne tomõ­typot hamuat hap tutum. Taꞌi iꞌewyte wato­mohey Iesui hawyi Tupana aiꞌairo topot­po­ꞌo­roria koꞌi wo are."

⁴ Tutum ahepe tehay wakuat. Koitywy mio tã e ahepe — Atum aru yne yne ehepe e. Pywo yt uheso hin i e. Woro­ho­ꞌo­kyꞌe haype e. Taꞌi saꞌa­wyꞌi ti watoĩ­neꞌen yi totiaria ewy neꞌi yt naku i hap nug haria wo are. Katu­pono yt watu­wẽtem kuap i ti aipiit miky­ꞌesat seko saꞌag myi. Aiminug saꞌag yt nakuat i po pe yn watoĩ­neꞌen. Maꞌato koitywy ti watu­wẽtem naꞌyn mekewat kaipyi Tupana piat ainug pakup i raꞌyn hap kape. Miꞌi tupono ti koitywy aito ipakup takaria wo raꞌyn watoĩ­neꞌen Tupana toꞌe hap ewy — Woro­ho­ꞌonug ti aru eipe ipakup takaria wo e hap ewy watu­kup­teꞌen are mesuwe.

"

⁵ Pyno toĩneꞌen naꞌyn aikai Iesui mohey hap. Miꞌi tupono ti Tupana tiky­ꞌesat poꞌog Tosa­ꞌyru ewywuat wato­py­huꞌat hap uiwy­riaꞌin are. Iꞌewyte aikaipyi toiky­ꞌesat aiwa­nẽtup hap aheko Tosa­ꞌyru ewywuat ikahu rakat yn toiky­ꞌesat. Miꞌi hawyi toiky­ꞌesat ahepiat tokuap hap aikotã aiwo­ꞌo­ꞌe­wy­ꞌewy hap toiky­ꞌesat are."

⁶ Waku hawyi iꞌewyte toiky­ꞌesat aiwewãi kuap hap toiky­ꞌesat. Miꞌi hap watikuap hawyi toiky­ꞌesat aiwo­ꞌo­kyꞌe hap. Iꞌewyte toiky­ꞌesat yt aipohep i tomohey hap etiat hap toiky­ꞌesat. Miꞌi watunug kuap hawyi toiky­ꞌesat aito toiãꞌãkap koꞌi ewy hap toiky­ꞌesat are."

⁷ Miꞌi toĩneꞌen hawyi toiky­ꞌesat aiwo­ꞌo­kyꞌe sese hap aikotã wati­kyꞌe aheywyt aheinyt hap ewy aikywyt aiky­pyꞌyt hap ewy are. Miꞌi watunug kuap hawyi toiky­ꞌesat aiwo­ꞌo­kyꞌe potꞌi sese hap. Itag saꞌa­wy­ꞌi­tewuat imohey hap kaipyi hap toiky­ꞌesat are."

⁸ Miꞌi tã watu­kup­teꞌen mote ti aru ikahu kahato watoĩ­neꞌen are. Miꞌi hawyi ti aru hekat kahato rakaria wo watoĩ­neꞌen Tupana mõtypot hanuaria aito hawyi are. Miꞌi hawyi ti ihãite rakano watu­kup­teꞌen are. Miꞌi hawyi aikotã mekewat mikoi haat kahato rakat ewy watoĩ­neꞌen are. Miꞌi hawyi ti aru watu­kup­teꞌen Aika­ꞌiwat Iesui kuap haria kahato are. Miꞌi hawyi ti aru Aipo­rekuat no kahato topy­huꞌat Aika­ꞌiwat are."

⁹ Maꞌato meimuẽwat wakuat koꞌi yt iwato i aikai pote ti aru yt ihapytig i rakaria wo watoĩ­neꞌen uiwy­riaꞌin katu­pono saꞌa­wyꞌi yt eweikuap hin i Iesui eipe. Miꞌi turan ti yt ihapytig i rakaria ewy eweikup­teꞌen. Yt kat i heremo Tupana etiat uiwy­riaꞌin saꞌa­wyꞌi mekewat eꞌat pe. Saꞌa­wy­ꞌiwuat eiminug saꞌag koꞌi yn topy­huꞌat. Miꞌi pote ti yt ihapytig i rakaria ewywuaria wo eweikup­teꞌen. Miꞌi pote ti eiminug saꞌag koꞌi tukup­teꞌen ne eiꞌy­myẽpe katu­pono ti kurin kat Iesui mohey hap kaipyi wyti yt watikuap i mekewat pywuat sese hap. Yt watoꞌe kuap i pywo sio yt katu­pono yt wato­mo­wato i Iesui mohey hap ahepiat pote."

¹⁰ Pyno uheywytꞌin uheinytꞌin eiwe­muꞌe ro haty wo mekewat Tupana miꞌairo sio uito sio yt hap kuap ehepiat hamo are. Miꞌi hawyi ti aru eweimo­wato ro mekewat seko pakup i eiwa­nẽtup hawe hawyi ti aru eweikuap taꞌyn — Pywo ti rat uito Tupana emiit no areĩneꞌen e hap eweikuap. Uito ti Tupana miꞌairo areĩneꞌen hap eweikuap. Miꞌi hawyi ti aru eweimo­wato mekewat seko pakup i eiwa­nẽtup hawe uiꞌe hap ewy. Miꞌi hawyi ti aru eweikuap kahato raꞌyn — Pywo ti Iesui wanuat uito hap eweikuap are. Miꞌi pote ti aru yt karãpe i raꞌyn eweiꞌatoiat mekewat aheha­kye­raꞌat hap mohey hap kaipyi."

¹¹ Miꞌi hawyi ti aru mekewat eꞌat putꞌokꞌe turan — Ereke ro e Tupana. Aikotã aiwy sese pe watoꞌe — Ereke ro watoꞌe hap ewy ti aru topy­huꞌat. Miꞌi hawyi ti aru itote watu­kup­teꞌen naꞌyn wuatꞌi eꞌat pe raꞌyn aikope Iesui toĩneꞌen Aipo­rekuat no aheha­kye­raꞌat hap tote. Miꞌi hawyi ti aru Aika­ꞌiwat yat pe raꞌyn watu­kup­teꞌen."

¹² Miꞌi pytkai yt uipohep hin i eimo­weꞌeg hamo. Yt eweiwaure teiꞌo Tupana piat einãpin hap koꞌi are yn katu­pono eweikuap taꞌyn saꞌa­wy­ꞌite. Miꞌi tupono poꞌog waku watikuap pakup i hap poꞌog waku. Waku watikuap kahato aipyꞌa pe."

¹³ Pyno ti waku wuatꞌi eꞌat pe pywo aiꞌe hap yn. Pyno toꞌiro watu­we­muꞌe i muꞌe i kahato iwan miat ete."

¹⁴ Pyno koitywy areĩneꞌen eipy­ꞌa­setpe Tupana Pãꞌãu uipiit piat wywo maꞌato yt atikuap i karãmuo yt uwe i raꞌyn uipiit piat hap. Meiũran taꞌat hawyi yt uwe i raꞌyn. Koitywy uiꞌyat toĩneꞌen ne. Miꞌi tupono areĩneꞌen eimuꞌe hamo. Pyno saꞌa­wy­ꞌiwuat meimuẽwat eimi­waure koꞌi koitywy atimo­pakup i. Moro­ho­ꞌo­muꞌe pakup i raꞌyn. Meimuẽwat eimi­waure koꞌi ahenoi pakup i raꞌyn. Pyno uito ti eimuꞌe hat. Meiũran yt uwe i mesuwe katu­pono uheiam ikuꞌuro rakat nuat neꞌi. Aikotã aiꞌyat ipotꞌi raꞌyn hawyi watipun hap ewy areĩneꞌen. Katu­pono Uika­ꞌiwat Iesui toꞌe uhepe — Wuatꞌi eꞌat pe eieĩneꞌen hap yt pya i e. Porap yn naꞌyn ekuꞌuro hap e. Mio tã toꞌe hamo Uika­ꞌiwat tuwe­mo­herep wuatꞌi eꞌat pe uhepe."

¹⁵ Miꞌi tupono moro­ho­ꞌo­muꞌe poꞌog poꞌog katu­pono uiku­ꞌuro hawyi eiwa­nẽtup hawe uimienoi topy­huꞌat re — Taꞌi Peteru mienoi ewy kahato ti tut irane Aipo­rekuat Iesui iꞌe hap ewy eweiꞌe aru uiku­ꞌuro hawyi."

¹⁶ Pywo ti rat uruta­ꞌa­kasa hap sese Iesui ieĩneꞌen hap. Miꞌi kape urueha wo uruta­ꞌa­kasa are. Uruto uruikuap kahato Miꞌi Miit katu­pono uruewyry kahato iwywo are. Iesui hesaika kahato hap uruikuap taꞌyn are. Yt urumu­ꞌetu wuat hap kaipyi hin i uruiꞌa­tu­muꞌe eipe Iesui ete are. Pywo ti rat uruta­ꞌa­kasa raꞌyn Tupana Mipo­ꞌoro Wuatꞌi Potypot Koro wuat. Waku kahato Miꞌi Miit poꞌog poꞌog torania miitꞌin kai are. Uruikuap kahato Miꞌi uruewyry at kaꞌap hawyi. Uruikuap kahato Tupana Mimõ­typot sese Iesui hap. Urumi­mo­herep Iesui etiat ehepe yt urumu­ꞌetu wuat hap kaipyi i maꞌato urueha wuat uruꞌa­kasa hap kaipyi uruiꞌa­tu­muꞌe eipe Miꞌi Miit sese ete are."

¹⁷ Pyno saꞌa­wyꞌi Tupana henoi atipy kaipyi uruehamo Tosa­ꞌyru etiat tohenoi. Mio tã e Aiꞌywot Tupana itote — Miꞌi ti Uhaꞌyru sese uimi­kyꞌe kahato e. Uimo­wepit sese Miꞌi Miit e. Pywo ti rat uimõ­typot kahato hat Miꞌi e Tupana teiam ywyhig muo ikytsig nakat ikahu rakat kaipyi mekewat tomõ­typot hap teiam kaipyi mio tã e are."

¹⁸ Pyno saꞌa­wy­ꞌite mio tã e Tupana atipy kaipyi uruehamo. Taꞌi urutu­kup­teꞌen Iesui wywo mekewat yityꞌok wakuat hap tote turan mio tã toꞌe."

¹⁹ Saꞌa­wy­ꞌi­wuaria Tupana ehay moherep haria tiꞌa­tu­muꞌe kahato Tupana Mipo­ꞌoro Aipo­rekuat nuat ete. Mesup wẽtup ihay poꞌog hesaika miꞌiria kai katu­pono koitywy Iꞌywot ihay atipy kaipyi uruehamo — Miꞌi ti Uhaꞌyru sese uimo­wepit hat sese Miꞌi Miit e atipy kaipyi ahowawi. Taꞌi Tupana kaipywiat ti sehay poꞌog hesaika torania iraniaꞌin mienoi koꞌi kai are. Miꞌi pote waku wato­mohey kahato miꞌi e hap katu­pono miꞌi Tupana wẽ kaipywiat sehay sese are. Pywuat sese ti topy­huꞌat miꞌi e hap poꞌog torania kai are. Miꞌi tupono eiwa­nẽtup kahato o mio tã e Tosa­ꞌyru piat hap kape are uiwy­riaꞌin e. Katu­pono ti mekewat sehay ti Tupana ehay moherep haria timo­herep kahato Tupana Mipo­ꞌoro Aipo­rekuat nuat hap etiat. Aikotã ariãty iꞌypyryp wiat hẽtyhot hap ewywuat. Pyno miꞌi sehay eweikuap eipyꞌa pe Tupana Saꞌyru hap miꞌi hawyi aikotã at tuwe­mo­herep hune pyi hẽtyhot tuerut hap ewy eipyꞌa pyi wyti aru hẽtyhot hap tuwe­mo­herep are. Aikotã waikiru wato tuwẽtem hunete miꞌi hap ewy eipyꞌa pyi tuwẽtem hẽtyhot tuerut eweimohey raꞌyn Iesui Tupana Saꞌyru hap hawyi."

²⁰ Pyno ahenoi hamuat Tupana ehay aikope pyi tut saꞌa­wyꞌi hap mekewat miwan miat. Pyno ti yt miitꞌin wanẽtup hap kaipyi i tut are. Yt yne miitꞌin mikuap kaipyi i tut miꞌi wuat are. Yt miitꞌin muꞌetu wuat kaipyi hin i ti."

²¹ Pyno miitꞌin wakuaria Tupana kuap haria kaipyi ti tuwẽtem Tupana ehay. Saꞌa­wyꞌi yianmete taꞌa­tu­henoi Tupana Pãꞌãu mienoi aikotã aikotã hamuat koꞌi. Taꞌi Tupana Pãꞌãu mienoi koꞌi ahepiat ti taꞌa­tu­mo­herep kahato raꞌyn.

"

2

¹ Saꞌa­wyꞌi tukup­teꞌen Tupana ehay enoi haria maꞌato ti yt pywuat sese koꞌi i te. Miꞌi hap ewy te ti mesup tukup­teꞌen ne eimuꞌe haria heso rakaria eipy­ꞌa­setpe. Miꞌiria ti imoherep yt pywo piat i sehay eimaꞌat hamuat neꞌi Tupana etiat. Miꞌiria ti — Iesui ti yt Aheha­kye­raꞌat hat i e haria. Yt Iesui kaipyi i ti aheha­kye­raꞌat hap saꞌup e haria. Aipo­rekuat pun haria neꞌi mio tã e haria. Pyno mio tã e haria ti Aipo­rekuat Iesui atoiat haria. Miꞌi haria ti teꞌe­ru­we­ꞌa­tu­ꞌuka aimaꞌat hap kaipyi."

² Miꞌiria ehay aimuꞌe hap topy­huꞌat iꞌatuehay se maꞌato yt pywo piat i. Miꞌi hawyi iraniaꞌin tuwat iꞌatu­mienoi upi. Taꞌa­tunug saꞌag kahato taꞌa­tu­muꞌe haria minug ewy. Miꞌi hawyi hary­po­riaꞌin seha­ryꞌi wo hary­po­riaꞌin wywo iꞌewyte ihainiaꞌin seꞌaito wo ihainiaꞌin wywo hap taꞌa­tunug iwaire waire hap ewy. Yne miꞌi tã saꞌag hap ewy taꞌa­tunug. Miꞌi hawyi iraniaꞌin wehaꞌat haria mekewat pywuat sese hap ete iꞌatuehay saꞌag saꞌag neꞌi meimuẽ waria wẽtup sehay upiaria inug saꞌag hap haria kaipywiat."

³ Pyno ehekat kyꞌewi yn eimuꞌe haria. Taꞌi ehekat taꞌa­tu­ky­ꞌesat eiꞌa­tu­muꞌe hap eimaꞌat hamuat hap kaipyi. Miꞌiria ti eiky­ꞌesat taꞌa­tuemiit no iꞌewyte taꞌa­tu­ky­ꞌesat torania taꞌa­tupo puo hap eheka­reꞌen eimẽ­pytꞌin. Miꞌi tã hap yn taꞌa­tu­ky­ꞌesat. Pyno Tupana toĩneꞌen ne miꞌiria apiheg hamo. Taꞌi Tupana toĩneꞌen eimaꞌat hanuaria moma hanuat. Taꞌi Tupana ti yt pya hin i iꞌatukai iꞌatu­ꞌuka hamo."

⁴ Saꞌa­wyꞌi sese ti atipy piaria Tupana wywuat hap taꞌa­tu­ꞌatoiat kahato raꞌyn. Miꞌi pote ti yt naku i nug haria teꞌe­ro­py­huꞌat miꞌiria. Miꞌi pote ti Tupana tiꞌa­tu­ꞌa­piheg naꞌyn. Yt toihep hin i iꞌatu­ꞌa­piheg hap kaipyi maꞌato ti aria koro kape toiꞌok­hyt­pugha atipy kaipyiaria are. Iꞌypyryp hap kape toiꞌa­tu­po­ꞌoro poꞌoro are iꞌatu­pyhik hap iꞌypyryp takat kape. Miꞌi hawe ti tukup­teꞌen taꞌa­tu­pyhik hawe iheg me. Meiũran ti aru putꞌokꞌe mekewat uwe waku uwe yt naku i hap moherep hap eꞌat pe hawyi Tupana timo­herep taꞌyn iꞌatu­minug saꞌag koꞌi wuatꞌi puo."

⁵ Saꞌa­wyꞌi te tukup­teꞌen kahato yt nakuaria mesu­wa­rotiat. Mekewat eꞌat turan Nuꞌe wywuaria toꞌyat piaria 7 ok takaria yn wakuaria Tupana tipuẽti. Miꞌi pote miꞌiria yn toiꞌa­tue­ha­kye­raꞌat. Maꞌato iraniaꞌin yt Tupana mohey i haria yt naku i nug haria Tupana tiꞌa­tu­moma yne yne yꞌy wato wo iꞌaman 40 eꞌat piat 40 wãtym miat tutunug hawyi. Mekewat ahaꞌa­seꞌi Nuꞌe tiꞌa­tu­muꞌe kahato wen — Eweiꞌatoiat ro eiminug saꞌag koꞌi hawyi eweiꞌaipok to Tupana kape e wen maꞌato yt teꞌe­ru­we­morem hin i Tupana kape yt taꞌa­tu­ꞌatoiat teran i iꞌatu­minug saꞌag hap koꞌi pote. Miꞌi pote ti Tupana tikaykay yꞌy kahato iꞌatu­ꞌa­tu­ꞌuka hamo. Miꞌi hawyi teꞌe­ropap kahato Tupana yt miky­ꞌesat ewy i gupteꞌen haria. Teꞌe­ru­we­ꞌã­py­hyka ãpy­hyka miitꞌin. Tupana yt ipohep hin i iꞌatu­ꞌa­piheg hap ete. Miꞌi hawyi ahaꞌa­seꞌi Nuꞌeꞌin 8 ok takaria imohey haria yn Tupana tiꞌa­tue­ha­kye­raꞌat raꞌyn.

"

⁶ Iꞌewyte ahenoi teran tawa Sutuma tawa Kumura e hap etiat are. Itotiaria ti yt nakuap i nug kahato haria torania. Saꞌag nug hap kape yn teꞌe­ru­wa­nẽtup. Miꞌiria ti Tupana timoma raꞌyn aria wato wo. Toiꞌa­tuwuk kahato iꞌatuꞌyat koꞌi yne yne iꞌatue­tawa koꞌi. Yne yne Tupana tiwuk taꞌyn torania. Miꞌi hawyi itup yn topy­huꞌat itote. Miꞌi hawyi yt wẽtup ok i topy­huꞌat itote. Toiꞌa­tu­ꞌakit yne raꞌyn miꞌiria. Miꞌi tupono koitywy eiminug saꞌag hap kai eiweꞌeg wo o. Yt eweiwaure teiꞌo tawa Sutuma tawa Kumura Tupana piat iꞌapiheg hap koꞌi. Yt nakuaria i minug upiat miꞌi tã hap. Miꞌiria ti Tupana kuap hap pun haria. Miꞌi pote waku iꞌatu­ꞌa­piheg hap aimuꞌe hap aimo­kenꞌẽ hamuat hap topy­huꞌat are. Miꞌi ete ti aimuꞌe kahato raꞌyn aimo­kenꞌẽ hap ete are. Miꞌi hawyi watikuap yt naku i nug motiat yt naku i kue pãi aiꞌe aiwa­nẽtup hawiat hamo."

⁷ Maꞌato toĩneꞌen tawa Sutuma pe wẽtup ok Tupana mohey sese hat wakuat nug neran hat Iro e hap het rakat. Miꞌi ti Aparãu ywyt saꞌyru — Yt naku i yn nug haria mesuwe uhetawa piaria e. Sewaire hap kape yn wanẽtup haria e. Yt naku i kahato atipuẽti miꞌiria e Iro tawa Sutuma totiat gupteꞌen haria minug saꞌag koꞌi ete. Iro yt tiky­ꞌesat hin i itotiat seko saꞌag koꞌi. Miꞌi tupono Tupana tieha­kye­raꞌat Iro tosa­ki­ꞌytꞌin wywo. Miꞌi pote mekewat aria yt tuꞌu hin i iroꞌin mekewat tawa wuk turan katu­pono yt toiky­ꞌesat hin i iꞌatu­minug saꞌag itotiat hap koꞌi."

⁸ Itotiaria yt taꞌa­tunug hin i Tupana miky­ꞌesat ewy. Iꞌewyte yt miitꞌin mikyꞌe ewy hin i taꞌa­tunug. Taꞌi iꞌatu­minug koꞌi yt miitꞌin eko ewy hin i taꞌa­tunug. Miꞌi hap koꞌi Iro yt tiky­ꞌesat i pote Tupana mieha­kye­raꞌat wo topy­huꞌat."

⁹ Taꞌi Tupana aheha­kye­raꞌat kuap kahato ahãꞌãg hap kaipyi inug hap kaipyi imohey haria aito pote. Yne mekewat yt tomi­ky­ꞌesat ewywuat i hap koꞌi kaipyi aihep kuap. Iꞌewyte toikuap yt nakuaria i apiheg hap. Pyno ti yt nakuaria i apiheg hamuat Tupana po pe toĩneꞌen. Taꞌi yt pya hin i mekewat eꞌat Tupana piat — Yt naku i kahato eipe e hamuat hap eꞌat are."

¹⁰ Tupana timoma yne raꞌyn tawa Sutuma tawa Kumura piaria. Katu­pono Tupana yt tiky­ꞌesat hin i iꞌatuwat iꞌatuieĩ­neꞌen hap. Wuatꞌi yne taꞌa­tu­puꞌi miky­ꞌesat ewy yn taꞌa­tunug wuatꞌi hary­po­riaꞌin wywo wuatꞌi ihainiaꞌin wywo. Taꞌa­tupiit miky­ꞌesat hap koꞌi yn taꞌa­tunug toꞌope toꞌope. — Yt kan hamo i Tupana miky­ꞌesat hap koꞌi taꞌa­tuꞌe haype. Taꞌa­tu­mi­ky­ꞌesat ewy yn taꞌa­tunug. Yt taꞌa­tu­mõ­typot hin i Tupana wãiꞌe hap iꞌewyte miitꞌin wãiꞌe hap yt taꞌa­tu­mõ­typot i. Yt teꞌe­ru­we­mõti hin i taꞌa­tu­minug saꞌag hap koꞌi ete. — Atunug mote atunug e haria yn. Taꞌi miꞌiria ti toꞌo­ky­ryꞌi kahato neꞌi wakuaria ete. Iꞌewyte atipy piaria ete toꞌo­ky­ryꞌi. Taꞌi atipy piaria ti sakpoꞌe ikahuria iꞌewyte poꞌog hesaika rakaria. Miꞌi pytkai wemuꞌe haria yt pywuat i enoi haria — Uruto poꞌog iraniaꞌin kai iꞌatuꞌe yn iꞌewyte mio tã iꞌatuꞌe atipy piaria pe."

¹¹ Taꞌi atipy piaria ikahu rakaria hesaika kahato rakaria. Taꞌi poꞌog hesaika mekewat eimaꞌat haria kai wen maꞌato yt kat i saꞌag iꞌatuꞌe Tupana pe yt pywo piat i henoi haria ete."

¹² Meke­waria ti aikotã miat haiwot rakaria ewywuaria. Aikotã miat wati­ꞌauka teran meremo hap ewywuaria miꞌiria. Miꞌi haype toꞌo­ky­ryꞌi kahato mekewat wakuap wuatꞌi mikuap wuat ete. Maꞌato ti yt taꞌa­tukuap i haype. Mekewat seko saꞌag taꞌa­tu­minug wo neꞌi ti teꞌe­ru­we­ꞌa­tu­ꞌuka kahato."

¹³ — Urumi­ky­ꞌesat ewy yn urutunug neran iꞌatuꞌe saꞌag. Miꞌi hawyi miitꞌin pyꞌa­setpuo ihotꞌok puo yt naku i kahato taꞌa­tunug iraniaꞌin ehamo. Maꞌato Tupana haꞌup nug irane iꞌatu­minug saꞌag hap koꞌi. Yne iꞌatu­mi­ky­ꞌesat ewy taꞌa­tunug hawyi yt teꞌe­ru­we­mõti hin i. Maꞌato eipe ti eiwe­mõti kahato eweipy­huꞌat meke­waria teꞌe­renuk eipy­ꞌa­setpe turan katu­pono teꞌe­ru­we­moꞌok saꞌag kahato. Taꞌi eimaꞌat kahato ti eimiꞌu wuat teꞌe­renuk turan. Iꞌatupiit moꞌok hap mowepit hap yn taꞌa­tu­ky­ꞌesat. Miꞌiria ti teꞌe­ru­wa­nẽtup hap ywyk hanuaria. Taꞌi saꞌag nug hap ete ti toꞌo­mo­wepit kahato raꞌyn. Maꞌato iꞌatu­saꞌup iꞌatu­minug saꞌag hap ete putꞌokꞌe irane. Taꞌi Tupana tiꞌa­tu­sa­tyꞌi satyꞌi irane yt naku i nug hap koꞌi ete. Taꞌa­tu­mo­so­ꞌopot hap ewy taꞌa­tu­puẽti irane."

¹⁴ Miꞌiria eha pe ti toĩneꞌen hary­po­riaꞌin ihainiaꞌin kyꞌesat hap koꞌi yn ti raꞌyn. Miꞌiria ti — Taꞌi yt karãmuo hin i ti aru ahero aiminug saꞌag wo e haria. Miꞌi hawyi Tupana mohey haria yt hesaika kahato rakaria maꞌat haria wo teꞌe­ro­py­huꞌat miꞌiria. Taꞌi miitꞌin ekareꞌen koꞌi taꞌa­tu­ky­ꞌesat yne taꞌa­tu­wano hap. Mio tã hap ewy iꞌatuieĩ­neꞌen hap yt naku i kahato. Pywo ti rat miꞌiria Tupana mikuasa wuanuaria wo teꞌe­ro­py­huꞌat."

¹⁵ Taꞌi miꞌiria ti muꞌap hãpyk takat atoiat haria wo teꞌe­ro­py­huꞌat. Aikotã gaꞌapy piat hoꞌo­wasat rakaria ewy tukup­teꞌen. Mekewat Tupana ehay moherep saꞌag hat Parãu e hap Posu saꞌyru upiaria miꞌiria. Kat pote Parãu ti haꞌup etiat Tupana ywania maꞌat hat — Pyno haꞌup ewetum uhepe pote kat e kat e hap saꞌag atunug e hat miꞌi. Maꞌato inug saꞌag hat ete Tupana ihay pirik kahato neꞌi. Wãiꞌe kahato neꞌi Tupana mekewat ete."

¹⁶ Miꞌi hawyi Tupana tinãpin yt weꞌeg i hat wẽ pyi mekewat ihũ wẽ pyi wãiꞌe Parãu me. Miꞌi hawyi ihay mekewat ihũ miit ehay ewy — Wãiꞌe etiwaure ro eso hap e. Hesoꞌok takat ewy ereĩneꞌen e mekewat Iumentu ihay mekewat kat koꞌi kat koꞌi moherep hat pe mekewat Tupana ehay moherep ran hat pe."

¹⁷ Pyno meke­waria yt pywuat sehay enoi haria i yrasa gag ewy miꞌiria. Aiwe­ꞌy­ꞌutui turan yꞌy hitꞌi yrasa kaipyi waku kahato wati­puẽti maꞌato wẽtup tuereto igag naꞌyn pote yt kat i yꞌy wati­puẽti aiwe­ꞌy­ꞌutui hap monik hamuat. Mio tã hap ewy yt kat i waku wati­puẽti miꞌiria kai. Aikotã ywyhig koꞌi ywytu uato turan hewyry kahato wasere upi hap ewy miꞌiria. Taꞌi miꞌiria eiam ti Tupana tunug naꞌyn iꞌypyryp sese yt wẽtup iꞌypyryp ewywuatꞌi ti iꞌatueiam Tupana minug. Miꞌi hawyi ti aru miꞌiria tukup­teꞌen iꞌypyryp we yn naꞌyn wuatꞌi eꞌat pe."

¹⁸ Miꞌiria iꞌatuehay se wen maꞌato yt kat iꞌatuꞌe pytkai i raꞌyn. Taꞌi iꞌatuehay kahato maꞌato kat iꞌatuꞌe kat iꞌatuꞌe yt watikuap i. — Uruto ti iweꞌeg kahato rakaria iꞌatuꞌe. Miꞌi wo ti ahekyi teꞌe­ru­we­wawi. Miꞌi hawyi taꞌa­tupiit koꞌi wywo taꞌa­tu­maꞌat neꞌi iraniaꞌin Iesui mohey pakup haria yt hesaika kahato rakaria i te. Iraniaꞌin teꞌe­ru­wẽtem neran yt naku i nug hawyi maꞌato miꞌiria taꞌa­tuiãꞌãg kahato iraniaꞌin taꞌa­tupiit minug saꞌag wo. Mio wyti taꞌa­tunug aikotã pina puta ewy miitꞌin pytyk teran haype. Miꞌi hawyi saꞌag nug hap kaipyi wẽtem neran haria yt hesaika i pote woꞌo­pyhik hawiat ewywuaria teꞌe­ro­py­huꞌat. Miꞌi tã me ti taꞌa­tu­ho­ꞌo­maꞌat reran Iesui mohey pakup i haria."

¹⁹ Miꞌi hawyi — Eweiwat uruupiat pote ti ren eweikup­teꞌen eimi­ky­ꞌesat ewy e haria. Yt uwe po pe i eweikup­teꞌen e haria ti. Miꞌi pote yn ti ren waku kahato rakaria wo eweikup­teꞌen e haria. Taꞌi eweiwat uruupiat pote yt uwe i eipo­ꞌoro hat e haria. Miꞌi tupono poꞌog waku pe eweikup­teꞌen iꞌatuꞌe saꞌag. Maꞌato ti iꞌatueso kahato neꞌi katu­pono miꞌiria yt teꞌe­ru­we­nõꞌẽ kuap i mekewat taꞌa­tu­minug saꞌag pyi. Pywo pe ti taꞌa­tu­minug saꞌag koꞌi eropat haria miꞌiria. Iꞌatueko saꞌag ni topy­huꞌat iꞌatu­ꞌokpe tote iꞌatu­ꞌakit hamo. — Yt uwe i uruka­ꞌiwat iꞌatuꞌe pytkai iꞌatu­minug saꞌag hap koꞌi iꞌatu­ka­ꞌiwat sese topy­huꞌat. Pyno ti miꞌiria iheg me tukup­teꞌen mekewat seko saꞌag eiam me. Pyno uwe po pe watoĩ­neꞌen pote pyno miꞌi ti raꞌyn aika­ꞌiwat no toĩneꞌen. Yt watoiat kuap i aiminug saꞌag pote aiminug saꞌag topy­huꞌat aipo­typot no ti raꞌyn are."

²⁰ Maꞌato tukup­teꞌen yt naku i nug hap atoiat haria Iesui kuap haria maꞌato meiũran teꞌe­ra­ꞌaipok i mekewat saꞌa­wy­ꞌiwuat seko saꞌag kape raꞌyn mesuwat yi totiaria wemohun hap kape i raꞌyn. Miꞌi hawyi ti aikotã kiã eꞌyni pianuaria ewy tukup­teꞌen. Miꞌi hawyi ti yt teꞌe­ru­we­nõꞌẽ kuap i iraꞌyn mekewat taꞌa­tu­minug saꞌag hap saꞌa­wy­ꞌiwuat kaipyi. Miꞌi hawyi taꞌa­tu­minug saꞌag hap koꞌi po pe i raꞌyn tukup­teꞌen. Miꞌi hawyi poꞌog poꞌog saꞌag saꞌa­wy­ꞌiwuat kai teꞌe­ro­py­huꞌat."

²¹ Miꞌi hawyi ti yt naku i kahato raꞌyn tukup­teꞌen. Taꞌi poꞌog waku miꞌiria yt karãpe i taꞌa­tu­puẽti muꞌap hãpyk takat wakuap nug hap sio taꞌa­tukuap hawyi teꞌe­ra­ꞌaipok i raꞌyn saꞌa­wy­ꞌiwuat yt naku i nug hap kape. Miꞌi hap ewy pote poꞌog naꞌyn saꞌag teꞌe­ro­py­huꞌat saꞌa­wy­ꞌiwuat kai."

²² Aikotã aware teꞌen hawyi tutuꞌu i hap ewy are. Hãꞌãkap aimikuap awareria etiat hap ewy miꞌiria. Aikotã hamaut tuwei hawyi meiũran taꞌat i raꞌyn ipitpit pe hap ewy tuwei hawyi. Tuwesot sot ihy nem nakat pe hap ewy miꞌiria are. Pyno typuat raꞌyn uimiwan ewawi.

"

3

¹ Typuo raꞌyn atipo­ꞌoro uimiwan ehowawi uiwy­riaꞌin. Iꞌewyte mesuwat uimiwan aikotã saꞌa­wyꞌi einãpin hap ewywuat re. Yt eweiwaure teiꞌo aikotã saꞌa­wyꞌi hoꞌo­wasat rakaria ewy eweikup­teꞌen. Koitywy ti eiwa­nẽtup hap yt ipitpit hin i raꞌyn toĩneꞌen. Pyno o yt eweiwaure teiꞌo aikotã saꞌa­wyꞌi hoꞌo­wasat rakaria eweikup­teꞌen eiwa­nẽtup hawe hap. Iꞌewyte yt eweiwaure teiꞌo aikotã meiũran tut eimaꞌat hanuaria ikahuro turan wuat hap ete. Miꞌi ti aru Tupana ehay etiat weky­ryꞌi hat e hap."

² Aikotã saꞌa­wy­ꞌi­wuaria mienoi iwan miat Tupana ehay ewy putꞌokꞌe. Aikotã uruto Aika­ꞌiwat Iesui potmu­ꞌeria e hap ewy."

³ Tut wyti aru eimuꞌe hanuaria. Miꞌiria ti aru taꞌa­tu­mi­ky­ꞌesat ete yn eimuꞌe. Taꞌa­tupiit piat miky­ꞌesat saꞌag koꞌi hap taꞌa­tunug kahato eiky­ꞌewi iꞌewyte eheka­reꞌen kyꞌewi. Miꞌi hawyi eimi­mohey Iesui tut aru e hap ete taꞌa­tu­ky­ryꞌi kahato."

⁴ — Yt tut i wyti Eika­ꞌiwat Iesui iꞌatuꞌe irane ahepe. Pyno eipe iꞌewyte saꞌa­wy­ꞌi­wuaria Tupana mohey haria — Tut irane uruka­ꞌiwat eweiꞌe raꞌyn wen maꞌato yt tut i te iꞌatuꞌe irane ahepe. Taꞌi saꞌa­wy­ꞌi­wuaria Tupana mohey haria iꞌewyte Iesui potpo­ꞌo­roria 12 ok takaria topap yne pytkai yt tut i te iꞌatuꞌe. Saꞌa­wy­ꞌiwuat mesuwat mytyp waha­ꞌa­wynug hap ewy raꞌyn topy­huꞌat mesup. Miꞌi tupono ti yt putꞌokꞌe hin i irane aiminug saꞌag aiꞌa­piheg hamuat Tupana piat iꞌatuꞌe irane mesu­wa­ro­tiaria woꞌo­ky­ryꞌi haria."

⁵ Pyno ti aru teꞌe­ru­wepyi raꞌyn yt iweꞌeg i rakaria wo teꞌe­ro­py­huꞌat miꞌiria katu­pono miꞌiria ti yt Tupana ehay kaipyi i teꞌe­ru­we­muꞌe. Katu­pono Tupana toꞌe — Saꞌa­wyꞌi ti waikiru koꞌi tukup­teꞌen miꞌi hawyi iꞌewyte mesuwat yi. Miꞌi hap ewy te ti mesuwat yi toĩneꞌen. Miꞌi hawyi yꞌy toĩneꞌen mesuwat yi tote. Pyno ti miꞌi tã saꞌa­wy­ꞌite toĩneꞌen yꞌy yn maꞌato yꞌy pe yi toĩneꞌen. Miꞌi hawyi meiũran peꞌamꞌe raꞌyn yi yꞌy pyi. Miꞌi hawyi yꞌy tuwe­patꞌok taꞌyn. Miꞌi hawyi yi poꞌog ywaiti yꞌy kai toĩneꞌen. Maꞌato iꞌewyte toĩ yꞌy ywytꞌok­pype."

⁶ Miꞌi hawyi meiũran aikotã saꞌa­wy­ꞌiwuat ewy yꞌy i raꞌyn poꞌog iwato mekewat Nuꞌe eꞌat pe. Heremo rakaria minꞌi­ꞌa­tuꞌe i raꞌyn. Miꞌi hawyi ti mekewat saꞌa­wy­ꞌiwuat yi heremo rakat minꞌe yne i raꞌyn. Miꞌi hawyi ti topy­huꞌat yt saꞌa­wy­ꞌiwuat ewy i raꞌyn mytyp."

⁷ Aikotã mekewat eꞌat pe Tupana toꞌe Nuꞌe pe miꞌi hap ti tutunug naꞌyn. Maꞌato koitywy ti mekewat saꞌa­wy­ꞌiwuat ewy sehay wẽtup te toĩ. Maꞌato ti mekewat yi wuk hap etiat raꞌyn Tupana tohenoi — Pyno ti aru meimuẽwat aria wo yi waikiru yne atimoma aria wo e ti Tupana. Aikotã saꞌa­wy­ꞌite atimoma yne yꞌy wo hap ewy te ti aru. Taꞌi tut ti aru mekewat eꞌat katu­pono miꞌi hap ewy atunug e ti Tupana. Miꞌi hawyi ti aru yt nakuap i nug haria apiheg hap eꞌat putꞌokꞌe raꞌyn e ti Tupana are. Maꞌato mio tã e Tupana pytkai yt tut i aru iꞌatuꞌe neꞌi meimuẽ waria taꞌa­tu­wa­nẽtup hap kaipyi neꞌi."

⁸ Maꞌato uimie­ha­kye­raꞌat koꞌi uimi­ky­ꞌeria yt eweipy­huꞌat reiꞌo iꞌatuehay upi. Eweikuap to aikotã mekewat Tupana eꞌat. Taꞌi Tupana yt tomo­rania i ti yne eꞌat aikotã aikotã hap koꞌi. Wẽtup eꞌat yn ni Tupana po pe toĩneꞌen aikotã wẽtup 1000 anu hap ewy. Tupana wanẽtup hawe wẽtup eꞌat wẽtup 1000 anu hap ewy iꞌewyte wẽtup 1000 ano wẽtup eꞌat hap ewy Tupana wanẽtup hawe."

⁹ Katu­pono saꞌa­wy­ꞌi­tewuat — Atunug aru e hap tutunug naꞌyn. Pyno ti Aika­ꞌiwat wyti saꞌa­wy­ꞌiwuat — Atunug aru e hap tutunug naꞌyn. Yt aimaꞌat hin i are. Taꞌi Tupana ti yt waureꞌe hin i saꞌa­wy­ꞌiwuat tehay — Atiꞌa­tu­ꞌa­piheg ti aru yt nakuaria i te hap ete. Maꞌato ahowawi ti iperupꞌi kahato. Yt tutunug neran i te aikyꞌe haype katu­pono toiky­ꞌesat yt wẽtup i hoꞌo­wasat hap. Yne torania topo piat hap toiky­ꞌesat. Kat pote yt meremo i aiꞌa­piheg neran i maꞌato ti hepamo putꞌokꞌe mekewat mio tã e hap. Toiky­ꞌesat miitꞌin teꞌe­ru­we­morem tewawiat yt naku i pywiat hap haype. Miꞌi pote hepamo putꞌokꞌe mekewat — Atunug aru e hap. Yt toiky­ꞌesat i miitꞌin moma hamuat hap."

¹⁰ Maꞌato pywo putꞌokꞌe irane mekewat eꞌat pe. Taꞌi pywo ti aru putꞌokꞌe Aika­ꞌiwat piat miitꞌin apiheg hap. Maꞌato ti karãmuo kat eꞌat pe yt uwe i ikuap maꞌato ti putꞌokꞌe hamuat. Aikotã sero­ꞌokꞌe hat ewywuat tut irane. Kat eꞌat pe yt uwe i ikuap are. Mekewat eꞌat pe ti aru ikahuro raꞌyn wakiru koꞌi. Mekewat eꞌat pe tehay pirik wo toimo­weityk taꞌyn waikiru koꞌi. Iꞌewyte mesuwat yi tuweityk taꞌyn. Miꞌi hap eꞌat pe ti aru yi ihywap taꞌyn hakup wote yt aikopiat wẽtup hakup iꞌewy­ꞌewy i hakup sese ti raꞌyn. Miꞌi hawyi ti aru wukꞌe yne raꞌyn mesu­wa­rotiat miitꞌin minug saꞌag koꞌi. Iꞌewyte yi ikahuro raꞌyn."

¹¹ Pyno uiwy­riaꞌin watikuap taꞌyn mesuwat yi ihywap irane hap. Miꞌi hawyi yt kat i raꞌyn. Miꞌi tupono waku wato­mo­hãpyk yne aiwa­nẽtup hap koꞌi. Miꞌi hawyi wakuaria Tupana ewaku hap ewywuat watu­kup­teꞌen. Waku Tupana kape yn aiwa­nẽtup hap watu­kup­teꞌen mesu­wa­rotiat turan. Miꞌi hawyi ti aheko pakup wywo yn raꞌyn ahewyry waku kat pote wakuaria yn naꞌyn aito."

¹² Miꞌi hawyi ti waku — Eriot ro Mehĩ Eriot ro Mimi watoꞌe yn naꞌyn. Miꞌi pote ti wate­haꞌat kahato raꞌyn Tupana putꞌokꞌe hap eꞌat kape. Yt pya i raꞌyn watoꞌe yn naꞌyn. Taꞌi wukꞌe ti aru waikiru koꞌi. Miꞌi hawyi ti aru tuweityk yne raꞌyn watoꞌe. Watikuap taꞌyn mio tã e hap. Taꞌi meiũran ti aru yne raꞌyn iheg nakat iꞌewyte yt iheg i rakat i ti aru wukꞌe raꞌyn hakup pote ihywap yne. Maꞌato ti aito watikuap taꞌyn."

¹³ Miꞌi hawyi iꞌewyte Tupana toꞌe — Atunug ti aru miꞌi rẽ wẽtup yi ipakup takat. Iꞌewyte ti waikiru koꞌi ipakup takat raꞌyn atunug e. Maꞌato ti aru miꞌi hawyi itote saꞌa­wy­ꞌiwuat koꞌi kai hãpyk sese rakaria yn naꞌyn. Miꞌi hawyi ti aru wakuat nug haria yn naꞌyn tukup­teꞌen itote Tupana mimoe­waku koꞌi mio tã watoꞌe ti aiwo­ꞌope. Uiwy­riaꞌin miꞌi watikuap taꞌyn hawyi ti aru merep taꞌyn wati­ky­ꞌesat putꞌokꞌe yi pakup hap iꞌewyte waikiru pakup koꞌi."

¹⁴ Miꞌi pote ti hãpyk yn wati­ky­ꞌesat watoĩ­neꞌen Tupana wywuat hap. Iraniaꞌin wywuat aiwo­ꞌo­wese hap yn waku watikat. Tupana wywuat aiwo­ꞌo­wese hap yn wati­ky­ꞌesat. Pyno uiwy­riaꞌin waku watoĩ­neꞌen iwywo mekewat eꞌat pe. Waku yt kat i iꞌaparap hap aiwa­nẽtup hawe. Waku yt kat i yt nakuap i aikai Tupana wanẽtup hawe. Waku yt kat i hin i raꞌyn aiminug saꞌag aikawiat koꞌi."

¹⁵ Taꞌi ewehe­haꞌat kahato mekewat eꞌat pe hekatup turan. Yt perupꞌi puo hin i ewehe­katup maꞌato Tupana miky­ꞌesat nug hap ete ewehe­katup are katu­pono Tupana tunug irane toꞌe hap ewy wen maꞌato yt waureꞌe hin i aheha­kye­raꞌat hamuat hap ete. Toiky­ꞌesat wuatꞌi miitꞌin ehakye­raꞌat hamuat pote yt merep i tut. Yt tut i te katu­pono toiky­ꞌesat yne eiperia tomie­ha­kye­raꞌat koꞌi wo eweipy­huꞌat hap. Aikotã aheykeꞌet Pauru henoi hap ewy are. Tuweꞌeg hap Tupana kaipywiat wo eimuꞌe miꞌi hat ti meke. Tupana miium ewy kahato eimuꞌe. Taꞌi toiwan kahato ti mesuwat ehowawi."

¹⁶ Taꞌi mio tã e Pauru Tupana ut hap etiat tohenoi tomiwan miat. Yne tomiwan me mio tã e. Aimuꞌe kahato mekewat sehay wo. Pyno niatpo kahato aimuꞌe wen mekewat sehay wo. Yt watikuap i kahato ti yne aiwy Pauru miwan koꞌi. Miꞌi pote tukup­teꞌen yt weꞌeg i haria mekewat Pauru ehay ywyk haria. Miꞌi pote ti mehĩ Pauru miwan kaipyi eimuꞌe wen maꞌato ti yt aimuꞌe hat Pauru mienoi ewy sese i. Taꞌi miꞌi haria ti iꞌatu kahato. Kat pote mekewat Pauru miwan etiat yt wemuꞌe kahato haria pytkai i are. Miꞌi pote Iesui mohey ran haria iꞌewyte Tupana mipo­ꞌo­roria ran nakaria pote Tupana ehay pun haria miꞌiria. Iꞌewyte taꞌa­tue­roꞌok taꞌyn imienoi kat e hap kat e hap. Miꞌi hawyi ti taꞌa­tu­wa­nẽtup hap kaipyi raꞌyn taꞌa­tunug yt Pauru e hap ewy i. Miꞌi hap kaipyi ti teꞌe­ru­we­maꞌat Tupana ehay ran enoi hap ete. Miꞌi hawyi Tupana mimoma haria teꞌe­ro­py­huꞌat."

¹⁷ Pyno uheka­tu­wyria eiweꞌeg wo o miꞌi haria pupi are. Miꞌiria yt aiwy Pauru ewy hin i taꞌa­tu­henoi — Taꞌi Pauru e hap miꞌi iꞌatuꞌe pytkai. Yt ehewyry teiꞌo iꞌatuehay upi are. Yt nakuaria i miꞌiria are. Yt Tupana miky­ꞌesat ewywuat nug haria i miꞌiria. Iꞌewyte yt miitꞌin miky­ꞌesat ewywuat nug haria i. Pyno mesup yianmete uimiwan me ahenoi raꞌyn yne yne eimo­weꞌeg hap. Aikotã aru aikotã aru miitꞌin eimaꞌat reran haria putꞌokꞌe aru ehete hap turan. Miꞌiria ti aru wẽtup Iesui e hap ran taꞌa­tu­mo­herep wen maꞌato yt toꞌe hap ewy hin i are. Karãpe aru meimuẽwat ewywuat putꞌok­ꞌi­ꞌa­tuꞌe ehãꞌãg hamo miꞌi hawyi ti aru — Yt rat eweiꞌe yn no iꞌatuepe. — Kopuo yn muꞌap meiko yn muꞌap iꞌatuꞌe pytkai ti aru. — Yt rat eweiꞌe o iꞌatuepe Iesui ehay sese upiaria uruto eweiꞌe ro. Eheso i rat eweiꞌe i ro iꞌatuepe. Miꞌi hawyi ti aru yt eimaꞌat kuap i raꞌyn miꞌiria. Taꞌi miꞌiria eimaꞌat teran haype wẽtup sehay upi. Miꞌi hawyi awyato ewy tõꞌẽ eiꞌu hamo. Taꞌa­tu­ky­ꞌesat Iesui mohey hap ahepiat hep hamuat. Taꞌa­tu­ky­ꞌesat watunug yt naku i taꞌa­tu­minug saꞌag hap ewy. Eiweꞌeg wo miꞌiria pupi are. Pyno yt eweiꞌatoiat teiꞌo Iesui mohey hetiat hap iꞌatu­mi­mohey wẽtup sehay upi pãi are. Maꞌato iheg me kahato imohey hawe waku eweikup­teꞌen pote waku pe raꞌyn eweikup­teꞌen wuatꞌi eꞌat pe are pãi.

"

¹⁸ Pyno eiwe­motag o Tupana ehay wo hegyiꞌat hap kaipyi are iꞌewyte Tupana eikyꞌe hap kaipyi. Aheha­kye­raꞌat hat Aipo­typot Iesui mohey hamo eiwe­motag o. Imohey kahato haria wo eweikup­teꞌen hawyi ihãite kahato rakaria eipe. Imohey hap upi ihay wakuat upi yn atiky­ꞌesat eweikup­teꞌen uito areꞌe ehepe uimiwan me ahenoi.

Uito ti Peteru Iesui potpo­ꞌoro sese uito."