1

¹ Uito ti Peteru Aipo­typot Iesui eropat hat sese uito. Uito ti Iesui mipo­ꞌoro miitꞌin muꞌe hanuat ihay moherep hat uito are.

Uiwy­riaꞌin Iesui mohey haria mesup uimiwan Iesui etiat atipo­ꞌoro ehowawi aikope aikope eweikup­teꞌen mesuwat yi wato hap ok tã are. Atipo­ꞌoro einãpin hamuat ehowawi tama Puntu puaria iꞌewyte yi Karasia puaria kape. Atipo­ꞌoro wy uiꞌe hap yi Kapa­tusia totiaria kape iꞌewyte yi wato Asia puaria kape iꞌewyte yi Pitinia puaria kape. Mesuwat sehay miwan miat atipo­ꞌoro ehowawi uiwy­riaꞌin torania imohey haria kape aikope aikope eweikup­teꞌen hap kape. Saꞌa­wyꞌi aitoria yne watu­kup­teꞌen tawa wato Ieru­sarẽi me maꞌato mesup ahewa­nĩ­kaptia aimohan mohan kahato aiꞌa­tu­ꞌuka hamo mesuwat yi wato hap ok tã are. Miꞌi pote atipo­ꞌoro ehowawi uimiwan uipot­mu­ꞌeria aikope aikope wesytpok hap ewywuaria hap kape uimiwan atipo­ꞌoro.

"

² Saꞌa­wyꞌi sese ti Aiꞌywot atipy piat Tupana aiꞌairo Tosa­ꞌyru sese eropat hanuaria wo. Mesuwat yi eꞌyianmete Tupana aikuap kahato yt uwe i te aitoria mesu­wa­ro­tiaria pytkai aikuap yne. Pywo ti rat saꞌa­wyꞌi Tupana toꞌe tuwepe — Meiũran ti aru atipo­ꞌoro Uhaꞌyru sese wuatꞌi miitꞌin uiminug koꞌi Potypot nuat e tuwepe. Uwe uwe aru topy­huꞌat Uhaꞌyru mohey haria wo miꞌiria ti aru uimi­moe­waku koꞌi wo tukup­teꞌen. Katu­pono Uhaꞌyru suu wo atiꞌa­tu­moe­waku miꞌiria hawyi Uipãꞌãu Wakuat atum iꞌatupiit piat ieĩneꞌen hanuat e Tupana tuwepe nimo te yt kat i te tutunug ne turan. — Miꞌi hawyi Uipãꞌãu yne iꞌatupiit puo atopag iꞌatu­moe­waku hamo e ahepe. Miꞌi hawyi atiky­ꞌesat kahato imohey haria imiky­ꞌesat yne nug haria wo hap etiat atiky­ꞌesat. Miꞌi hap atiky­ꞌesat e Tupana Aiꞌywot koro saꞌa­wyꞌi sese atipy piat pe.

"

³ Saꞌa­wyꞌi Aipo­typot Iesui ikuꞌuro hawyi Tupana timoieĩ­neꞌen guꞌuro pyi. Saꞌa­wyꞌi yt wato­mohey hin i aiku­ꞌuro hawywiat aheĩneꞌen i hamuat hap. Maꞌato mesup koitywy wato­mohey kahato kat pote Aiꞌywot Tupana tihep taꞌyn Aika­ꞌiwat ikuꞌuro hap kaipyi. Miꞌi pote koitywy — Waku kahato En Tupana. Poꞌog wakuat torania kai urutoꞌe kat pote egyiꞌat kahato uruepe. Urukyꞌe kahato En. Poꞌog poꞌog torania miitꞌin kai urukyꞌe hat En katu­pono etihep taꞌyn Uruka­ꞌiwat hyp hawyi urutoꞌe."

⁴ Waku kahato En Tupana katu­pono koitywy urutu­kup­teꞌen esaꞌy­ruꞌin esaki­ꞌytꞌin. Miꞌi pote ewywo irane urutu­kup­teꞌen wuatꞌi eꞌat pe aru atipy pe eꞌyat pe. Miꞌi tote urutu­kup­teꞌen kat pote esaꞌy­ruꞌin esaki­ꞌytꞌin uruto pote. Uruekat atipy piat yt tuweityk kuap i. Yt tuwepik pik kuap i. Yt ikahuro kuap i katu­pono iheg me toĩneꞌen aiꞌyat pe atipy piat Tupana urutoꞌe."

⁵ Tupana pywo ti rat En yn Urueha­kye­raꞌat kuap hat ereĩneꞌen. Koitywy uruto emẽpytꞌin pote Uruꞌa­pykok hat kahato En Tupana. Esaika kahato En. Uruimohey kahato En. Meiũran aru yne miitꞌin tikuap uruimohey kahato En hap Urueha­kye­raꞌat Hat En hap. Miꞌi pote urutu­kup­teꞌen aikotã hekat kahato rakat ewy katu­pono epowatꞌyp yne tukup­teꞌen urupo pe Tupana. Hekat rakat En ewy urutu­kup­teꞌen. Yt uruiꞌatoiat hin i aru katu­pono urumoe­saika raꞌyn Epãꞌãu wo. Miꞌi pote yt wẽtup ok i uruto hoꞌo­wasat rakaria wo urutoꞌe ewawi Tupana."

⁶ Urumo­wepit kahato En. Miꞌi pote urutu­wehum kahato ewawi Tupana. Uruho­ꞌopot kahato wen mesuwe maꞌato yt motꞌi i. Uruho­ꞌopot hap uruipuẽti tuereto maꞌato tokosap aru urutoꞌe. Uruiãꞌãg kahato ahiag. Urumo­ꞌa­rotꞌi kahato ahiag. Uruiãꞌãg kahato urusatek hap wywo urutoꞌe Tupana pe.

"

⁷ Uiwy­riaꞌin waku ahoꞌopot hap katu­pono miꞌi kaipyi Tupana tikuap tomohey sese sio yt haria aito are. Mesu­wa­rotiat miitꞌin tikat kahato mekewat nu mehit rakat hekat kahato rakat kawiat Uru e hap het rakat. Maꞌato iꞌytyk kahato iꞌatu­mi­puẽti yi puat pote. Miꞌi hawyi taꞌa­tupag aria pe hawyi ihywap taꞌyn hawyi iꞌytyk hap toto yne. Miꞌi hawyi imehit hawyi ikahu kahato mekewat nu Uru kawiat. Miꞌi hap ewy kahato aito uruwy­riaꞌin are. Uito ti Peteru uhepiat hoꞌopot hap uhatek hap miitꞌin miky­ryꞌi hap aria ewy iꞌytyk uhepiat hap ewy hep hamuat. Miꞌi hawyi poꞌog hesaika rakat areĩneꞌen Tupana mõtypot hamuat. Waho­ꞌopot turan mekewat Tupana mõtypot hap Tupana kapiat aiwehum hap poꞌog poꞌog aimoe­saika saꞌa­wy­ꞌiwuat kai are. Meiũran aru Aika­ꞌiwat Aipo­typot Iesui tuut mesuwat yi kape tuut Morekuat nuat hamo. Miꞌi hap eꞌat pe ti aru aitoria watu­kup­teꞌen imehit rakaria ewy aikotã mekewat Uru mehit hap ewy are. Kat pote waho­ꞌopot hap kaipyi waku pe raꞌyn watoĩ­neꞌen. Miꞌi hawyi aikotã hekat rakaria ewywuaria wo watoĩ­neꞌen mekewat nu imehit rakat ewy watoĩ­neꞌen mekewat eꞌat pe aru Iesui ut hap eꞌat pe ti aru. Miꞌi hap eꞌat pe urumo­wepit kahato mesu­wa­rotiat uruepiat hoꞌopot hap katu­pono yt uruiꞌatoiat hin i Iesui mohey uruepiat hap urusatek pytkai uruꞌahyk ahyk pytkai iꞌewyte urupyhik pytkai uruꞌa­tu­ꞌuka pytkai are.

"

⁸ Taꞌi atikuap kahato Iesui uito katu­pono araꞌa­kasa uito maꞌato eiperia yt eweiꞌa­kasa i eheha wo Aika­ꞌiwat Iesui. Maꞌato yt eweiꞌa­kasa pytkai i eweimohey kahato raꞌyn. Miꞌi hawyi eimo­wepit hap kahato toĩneꞌen imohey hap kaipyi. Mekewat wepit hap Iesui tum tomohey hap kaipyi. Waku kahato mekewat. Yt wati­mo­herep kuap i miitꞌin me Iesui piat aimo­wepit sese hap. Ahowapy kahato Iesui mõtypot hap wywo miꞌi pote aimo­wepit kahato poꞌog torania kai. Yt heremo i maꞌato aipyꞌa pe toĩneꞌen aimi­kyꞌe sese aimi­mohey Iesui are."

⁹ Saꞌa­wyꞌi woꞌo­wy­ꞌinug Iesui mohey hap ete. Koitywy wato­mohey te. Mũki­ꞌite ti aru wato­mohey te. Saꞌa­wyꞌi wato­mohey hawyi aheha­kye­raꞌat aipyꞌa aipiit piat aiwa­nẽtup hap yne toieha­kye­raꞌat. Meiũran aru wuatꞌi eꞌat pe aheha­kye­raꞌat hap toĩneꞌen katu­pono mekewat eꞌat pe heremo kahato Tupana miium saꞌa­wy­ꞌiwuat ahepiat aheha­kye­raꞌat hamuat are.

"

¹⁰ Saꞌa­wyꞌi sese aheꞌyian­miaria Tupana ehay moherep haria henoi kahato aikotã aru Tupana topy­huꞌat hegyiꞌat kahato wuatꞌi ywania piat hap ete iꞌatuehay. Aikotã aikotã aru tutunug hap ete iꞌatuꞌe Iesui etiat. Taꞌa­tu­mo­herep kahato aikotã Tupana aheha­kye­raꞌat hap. Taꞌa­tukuap teran sese saꞌa­wyꞌi maꞌato iꞌypyryp hap ewy taꞌa­tukuap. Maꞌato taꞌa­tu­mikuap ok tã taꞌa­tu­mo­herep Tupana Pãꞌãu kaipyi ahepe Iesui ut hap etiat katu­pono miwan myi saꞌa­wy­ꞌi­wuaria imoherep Tupana yn mikuap koꞌi sehay are."

¹¹ Kat eꞌat pe aru Aipo­typot Iesui tuut e hap kape teꞌe­ru­wa­nẽtup kahato taꞌa­tukat kahato. Taꞌi saꞌa­wy­ꞌi­wuaria Tupana ehay moherep haria iꞌatuehay kahato Aika­ꞌiwat Pãꞌãu mimo­herep koꞌi ete. Taꞌi taꞌa­tu­mo­herep yianmete aikotã aru Aipo­typot ikuꞌuro hoꞌopot hap rokire hamuat koꞌi taꞌa­tuwan kahato miwan me. Iꞌewyte taꞌa­tuwan kahato Tupana Pãꞌãu kaipyi aikotã me Aipo­typot wuatꞌi miitꞌin potypot no topy­huꞌat hamuat koꞌi taꞌa­tuwan are."

¹² Aikotã iꞌatu­mu­ꞌetu wuat ewy Tupana Pãꞌãu timo­herep iꞌatuepe aikotã aru Aipo­typot toku­ꞌuro hap eꞌyianmete toĩneꞌen hap koꞌi aikotã tuwẽtem guꞌuro pyi hap taꞌa­tukuap kahato Tupana Pãꞌãu kaipyi. Miꞌi hawyi putꞌokꞌe mekewat eꞌat pe hawyi uruepe topot­mu­ꞌeria sese pe tuwe­mo­herep taꞌyn Aipo­typot. Miꞌi hawyi uruimo­herep taꞌyn ehepe iꞌatuꞌe hap ewywuat saꞌa­wy­ꞌiwuat Tupana ehay moherep haria e hap ewywuat. Uruta­ꞌa­kasa yne iꞌatuꞌe hap ewywuat Aika­ꞌiwat moherep hap. Uruta­ꞌa­kasa yne miꞌi hawyi mesup uruimo­herep yne Iesui etiat ehepe uruꞌa­kasa hap koꞌi. Uruimo­herep kahato uruehay wywo Iesui etiat Tupana Pãꞌãu urupiit piat uruwa­nẽtup hap koꞌi. Uruimo­herep mesuwat sehay wakuat Iesui etiat kat pote uruta­ꞌa­kasa raꞌyn Tupana Mipo­ꞌoro atipy kaipywiat. Koitywy uruikuap Tupana mieha­kye­raꞌat koꞌi wuat aito hap. Mekewat atipy piaria teꞌe­ru­wa­nẽtup kahato kat pote saꞌa­wyꞌi yt uruimohey hin i maꞌato mesup uruimohey raꞌyn. Saꞌa­wyꞌi yt Tupana kape hin i uruwa­nẽtup hap. Koitywy Tupana kape yn naꞌyn uruwa­nẽtup hap. Miꞌi hap ete atipy piaria teꞌe­ru­wa­nẽtup kahato. Taꞌa­tukuap teran haype maꞌato yt taꞌa­tukuap i kat pote mesup Tupana mieha­kye­raꞌat koꞌi wuat raꞌyn mesup uruto are.

"

¹³ Uiwy­riaꞌin meiũran ti aru Tupana tipo­ꞌoro Aipo­rekuat nuat. Tuwe­mo­herep mesuwat yi tote i raꞌyn wuatꞌi ehamo. Miꞌi pote waku aiwa­nẽtup hap Aheha­kye­raꞌat hat kape yn watu­wa­nẽtup. Yt naku i aiwa­nẽtup hap kowoꞌi kowoꞌi neꞌi. Waku wahe­katup kahato Aipo­typot hut hap kape iwemo­herep hap kape katu­pono mekewat eꞌat pe tuut irane Aheha­kye­raꞌat hat. Miꞌi hawyi iwese kahato ahete hegyiꞌat kahato ahepe tomohey haria aito pote. Miꞌi pote waku aikotã watopag aiweꞌok kytyt hap aipiit ete ahesokpe moheg hamo miꞌi hap ewy waku wati­moheg kahato aiwa­nẽtup hap Iesui kape yn hap ewy are ehepe uiwy­riaꞌin. Uito ti Peteru are.

"

¹⁴ Pywo ti rat waku aito Tupana mẽpytꞌin no watu­kup­teꞌen aikotã Aiꞌywot miky­ꞌesat ewy yn waku watunug are. Waku iꞌywot kahato rakat ewy watoĩ­neꞌen Saꞌa­wyꞌi watu­kup­teꞌen aikotã piku piku koꞌi ewy yt iꞌywot rakaria ewywuat i watoĩ­neꞌen aito uiwy­riaꞌin. Maꞌato watunug mesu­wa­ro­tiaria ainãpin hap ewy yn pote saꞌag koꞌi upi yn watuwat. Watunug saꞌa­wy­ꞌiwuat aimi­ky­ꞌesat ewy pote yt watunug kuap Aiꞌywot atipy piat miky­ꞌesat ewy hin i are. Miꞌi hawyi mekewat eꞌat pe yt weꞌeg hin i haria wo wato­py­huꞌat. Aipiit miky­ꞌesat koꞌi aiwuk kahato yne yt naku i nug ahepiat hap koꞌi. Maꞌato mesup Aiꞌywot toĩneꞌen naꞌyn. Miꞌi hawyi yt piku piku koꞌi ewy i raꞌyn aito. Miꞌi pote waku Aiꞌywot atipy piat miky­ꞌesat ewy yn waku watunug are."

¹⁵ Aiꞌywot atipy piat waku sese rakat. Yt kat i hin i iꞌaparap hap Tupana kaipyi. Miꞌi tupono waku aito Aiꞌywot Tupana ewaku hap ewy waku watunug mesu­wa­rote aheĩneꞌen turan are."

¹⁶ Katu­pono saꞌa­wyꞌi Tupana toꞌe — Uiat uiminug koꞌi wyti hãpyk yne e. Yt karãpe i atiꞌa­parap Uito Tupana pote. Miꞌi pote atiky­ꞌesat kahato eiperia uiꞌe­wy­wuaria wo e Tupana saꞌa­wyꞌi tomiwan me.

"

¹⁷ Pyno eipe wyti Tupana saki­ꞌytꞌin Tupana saꞌy­ruꞌin eipe miꞌi pote iꞌewyte Tupana wywuat ihay rakaria wo eipe pote pyno waku eiweꞌeg kahato mesu­wa­rote eiminug saꞌag koꞌi pupi iꞌaparap ehepiat hap koꞌi pupi are. Kat pote meiũran Aiꞌywot Tupana tiꞌa­tu­ꞌa­piheg kahato yt naku i nug haria sio aitoria hekat rakaria sio yt sio aitoria miitꞌin akag koꞌi sio yt sio aitoria ikuap kahato rakaria sio yt are. Mekewat eꞌat pe Tupana tiꞌa­tu­ꞌa­piheg miitꞌin iꞌatu­minug saꞌag upi. Toimo­herep yne aiminug saꞌag koꞌi. Yt toimõ­typot hin i aiminug saꞌag miitꞌin akag aito pytkai. Miꞌi pote ti waku aiweꞌeg wo kahato ahepiat iꞌaparap hap pupi are."

¹⁸ Miꞌi tupono waku wati­koho kahato aiminug saꞌag koꞌi Aika­ꞌiwat suu wo. Waku wati­mo­weityk yne aiminug saꞌag koꞌi are. Ahekat yt aheha­kye­raꞌat kuap i kat pote ahekat yt toĩneꞌen motꞌi i pote. Meiũran ahekat ipyp iꞌytyk topy­huꞌat aikotã ahewahi aiminug imehit rakat ewy Paratu kawiat Uru kawiat ewy. Porap neꞌi imehit maꞌato meiũran yt ikahu i hap ewy raꞌyn topy­huꞌat. Miꞌi koꞌi wo yt wati­kyiꞌat kuap i aheĩneꞌen wuatꞌi eꞌat piat hamuat hap are. Uiwy­riaꞌin saꞌa­wy­ꞌi­wuaria aiꞌy­wania aiꞌy­wotꞌin tikyiꞌat teran wuatꞌi eꞌat piat taꞌa­tuieĩ­neꞌen hamuat hap. Kat pote taꞌa­tunug neran Tupana mowepit hamuat taꞌa­tue­sokpe ete taꞌa­tu­miꞌu ete taꞌa­tueko ete maꞌato yt putꞌokꞌe hin i muꞌap Tupana kapiat ete. Koitywy watikuap yt miꞌi kaipyi i aheha­kye­raꞌat hap aheĩneꞌen wuatꞌi eꞌat piat hamuat hap are."

¹⁹ Koitywy watikuap taꞌyn mekewat saꞌup iwatoꞌin nakat kaipyi aheha­kye­raꞌat hap. Taꞌi Iesui Aipo­typot suu kaipyi yn aheha­kye­raꞌat hap. Koitywy watikuap taꞌyn Aika­ꞌiwat ikuꞌuro aikotã saꞌa­wy­ꞌi­wuaria tiꞌauka taꞌa­tu­hũria Kuteiru hap ewy. Iꞌatu­hũria ikahuria kahato rakat yt kat i ipiit ete saꞌag hap ewy ikytsig kahato rakat taꞌa­tu­ꞌauka Tupana mowepit hamo hap ewy Aika­ꞌiwat Aipo­typot ikuꞌuro. Miꞌi hawyi huu taꞌat yne itote Tupana kapiat aheha­kye­raꞌat hap saꞌup mo are."

²⁰ Saꞌa­wyꞌi sese Tupana toꞌe tuwepe. Mesuwat yi yt kat i te turan Tupana toꞌe — Atipo­ꞌoro aru Uhaꞌyru wuatꞌi ywania minug saꞌag saꞌup mo e nimo sese turan. Koitywy tuwe­mo­herep taꞌyn ikuꞌuro raꞌyn Tupana Saꞌyru. Aihũ Kuteiru ewy ikuꞌuro. Gaꞌatpo eꞌat ikuꞌuro raꞌyn Aika­ꞌiwat. Howapy hap eꞌat pe hap ewy ikuꞌuro are."

²¹ Miꞌi pote mesup yt niatpo hin i wato­mohey Tupana aipyꞌa pe kat pote uruehamo Aika­ꞌiwat toihep guꞌuro pyi. Miꞌi hawyi Tupana toꞌe itote wuatꞌi ehamo — Miitꞌin Ehakye­raꞌat hanuat Miꞌi Miit e. Miꞌi pote koitywy Iesui yn wato­mohey aheha­kye­raꞌat hamo. Waku watoꞌe tope — Uruimohey En yn Iesui Urueha­kye­raꞌat hanuat waku watoꞌe Iesui pe are.

"

²² Uiwy­riaꞌin karãpe Aipo­typot suu topy­huꞌat aheha ete aipy ete aiwa­nẽtup hawe aipiit ete miꞌi hawyi ikytsig kahato rakat ewy topy­huꞌat aikai. Yt saꞌa­wy­ꞌiwuat aiminug saꞌag koꞌi ewywuat hin i. Miꞌi hawyi waku watunug yne Tupana mimo­herep tomi­ky­ꞌesat koꞌi pywuat koꞌi waku watunug. Yt watunug kuap i wen maꞌato Tupana Pãꞌãu aimoe­saika kahato mekewat pywuat sehay nug hamo are. Waku Tupana Pãꞌãu ainug miitꞌin kyꞌe sese haria wo yt kat i aheso hap aipyꞌa piat miitꞌin kyꞌe hap wywo maꞌato aipyꞌa pyi miitꞌin kyꞌe sese hap yne ahesaika hap wywo. Waku wati­ꞌa­tu­kyꞌe miitꞌin Tupana Pãꞌãu aimoe­saika hap kaipyi are."

²³ Kat pote aito Tupana saꞌy­ruꞌin sese Tupana saki­ꞌytꞌin sese ewy aitoria katu­pono Tupana Pãꞌãu aity ewy aimo­herep pakup i raꞌyn. Saꞌa­wyꞌi aimo­herep haria aity aiꞌywot. Aipiit nug hap taꞌa­tunug mekewat toꞌu­piꞌa kaipyi mekewat iãꞌỹi kaipyi ainug. Miꞌi ti waku kahato wen maꞌato yt toĩneꞌen motꞌi i aipiit. Aikotã aipiit nug haria ewy aiku­ꞌuro neꞌi are. Meiũran ikuꞌuro raꞌyn iꞌatu­minug aipiit maꞌato aiwe­mo­herep pakup i hap Tupana kaipywiat mekewat hãꞌỹi Tupana ehay aity aiꞌywot ewy topy­huꞌat. Miꞌi ti ainug wuatꞌi eꞌat piat aimoieĩ­neꞌen hamuat. Yt karãpe i ikahuro Tupana ehay maꞌato toĩneꞌen wuatꞌi eꞌat pe. Miꞌi kaipyi aiwe­mo­herep hawyi watoĩ­neꞌen wuatꞌi eꞌat pe are."

²⁴ Maꞌato aito ti ipuꞌi kawiat. Aipiit aimikoi ewy katu­pono meiũran ti aru ipotꞌi hawyi igag naꞌyn hawyi ikuꞌuro. Aimi­mõ­typot mesu­wa­rotiat aikotã ipohyt ewy ikahu kahato saꞌa­wyꞌi maꞌato meiũran taꞌat raꞌyn hawyi yt ikahu i raꞌyn hap ewy topy­huꞌat. Miꞌi hap ewy watoĩ­neꞌen mesu­wa­rote aimikoi ewy ipohyt ewy are."

²⁵ Maꞌato Tupana e hap wuatꞌi eꞌat pe toĩneꞌen. Yt aimikoi i yt pohyt potꞌi rakat i ewy Tupana ehay. Sehay wakuat tuwe­mo­herep wuatꞌi miitꞌin me. Miꞌi tã ti sehay wakuat atimo­herep ehepe uiwy­riaꞌin are.

Uito ti Peteru are.

"

2

¹ Pyno uiwy­riaꞌin waku watoĩ­neꞌen Tupana mẽpytꞌin no ipakup i rakaria ewy kurin nakaria ewy. Aikotã mihy sym haria ewy watu­kup­teꞌen katu­pono Tupana mimo­herep pakup i koꞌi raꞌyn aito. Miꞌi tupono waku watoiat yne aiminug koꞌi saꞌa­wy­ꞌiwuat yt naku i hap koꞌi. Mekewat miitꞌin maꞌat hap koꞌi mekewat miitꞌin mohit hap koꞌi mekewat typy sehay nug hap koꞌi mekewat iraniaꞌin ekat kyꞌesat hap koꞌi mekewat sehay saꞌag nug hap koꞌi mekewat miitꞌin ekat kyꞌesat hap koꞌi uheha­ꞌy­wywi hap koꞌi waku watoiat yne aikotã watoiat ahesokpe yt ikahu i rakat hap ewy waku watoiat."

² Kat pote Tupana saki­ꞌytꞌin Tupana saꞌy­ruꞌin sok aito miꞌi pote waku wati­ky­ꞌesat kahato Tupana ehay aikotã aimẽpyt hit tiky­ꞌesat kahato mihy hap ewy. Pyno watuꞌu kahato Tupana ehay hawyi ahehãite aikap aipiit hesaika aimotag hap topy­huꞌat aikotã aimẽpyt pakup mihy ete itag hap ewy."

³ Pyno watikuap kahato miꞌu ete aimotag hap. Miꞌi hap ewy wahãꞌãg Aika­ꞌiwat egyiꞌat hap ete aikyꞌe hap ete. Miꞌi hawyi watikuap taꞌyn iwese kahato rakat he kahato rakat Aipo­typot Iesui hap."

⁴ Uiwy­riaꞌin saꞌa­wyꞌi mesu­wa­ro­tiaria ipun kahato haria Aika­ꞌiwat taꞌa­tu­mi­mohey wuanuat. Aikotã miitꞌin tikat nu ikahu rakat taꞌa­tuꞌyat nug hamuat hap ewy. — Wẽtup waku wẽtup yt naku i watikat nu turan. Miꞌi hap ewy saꞌa­wy­ꞌi­wuaria taꞌa­tu­pugha mekewat nu — Yt naku i meimẽwat nu aiꞌyat nug no iꞌatuꞌe. Miꞌi yt kan hamo i aiꞌyat haꞌawy nug hamo iꞌatuꞌe. Miꞌi hap ewy ti Iesui topy­huꞌat Tupana miꞌairo aiꞌyat nug nu kawiat hamo. Maꞌato miꞌi Nu hekat kahato rakat mekewat aiꞌyat wuat — Poꞌog waku torania kai mesuwat Nu eꞌyat nug hamo e Tupana. Uimi­ꞌairo kahato mesuwat Nu e Tosa­ꞌyru Iesui etiat. Waku etopag mesuwat Nu saꞌa­wy­ꞌiwuat eꞌyat nug hamo e Tupana ahepe."

⁵ Iꞌewyte aitoria Iesui mohey haria wato­py­huꞌat nu koꞌi ewy Tupana yat nug hamuat hap ewy. Pyno iꞌatu kahato nu Tupana yat nug hap wẽtup nu uito wẽtup nu en wẽtup nu eipe hap ewy. Tupana yat nu koꞌi aito hap ewy wato­py­huꞌat. Iꞌewyte ti aito Tupana epaꞌi koꞌi ewywuat watoĩ­neꞌen katu­pono ahehay kuap Tupana wywo aikotã saꞌa­wy­ꞌi­wuaria taꞌa­tu­ꞌa­tu­ꞌuka taꞌa­tu­hũria hawyi taꞌa­tuwuk Tupana mowepit hamo. Miꞌi hap ewy watunug mesup. Wati­mohey Iesui Aipo­typot hawyi Tupana mowepit haria wo wato­py­huꞌat Tupana hũ Aika­ꞌiwat pote. Miꞌi aihũ watum Tupana pe imowese hamuat imowepit hamo aikotã paꞌi koꞌi ewy aito."

⁶ Mio tã Tupana toꞌe saꞌa­wyꞌi tehay moherep haria wẽ pyi miwan me. Mio tã e — Toĩneꞌen uhetama pe tawa Ieru­sarẽi me yityꞌok Siãu note ahaꞌa­wynug uimõ­typot yat sese mekewat Nu wato tote mekewat Nu uimi­ꞌairo tote mekewat Nu ikahu rakat rote mekewat Nu hekat rakat rote ahaꞌa­wynug uimõ­typot yat sese e. Saꞌa­wyꞌi sese atopag mekewat Nu yityꞌok Siãu tote. Iraniaꞌin yt tiky­ꞌesat i mekewat Nu maꞌato uwe uwe ikyꞌesat uwe uwe imohey mekewat miit topy­huꞌat iheg kahato rakat aikotã mekewat Nu totiat eꞌyat iheg nakat kahato hap ewy. Uwe uwe inug toꞌyat mekewat Nu tote miꞌi pote yt karãpe i taꞌat iꞌatuꞌyat."

⁷ Ikahu kahato mekewat Nu watoꞌe imohey haria aito pote. Maꞌato iraniaꞌin yt imiky­ꞌesat nug neran i haria — Yt kan hamo i mekewat Nu iꞌatuꞌe. Yt naku i watunug aiꞌyat itote iꞌatuꞌe. Miꞌi hawyi taꞌa­tu­ꞌatoiat mekewat Nu maꞌato Tupana yt totoiat hin i. Miꞌi pote pyno — Mekewat Nu iraniaꞌin miꞌatoiat wakuat kahato rakat Uimẽpyt ewywuat e. Iraniaꞌin miꞌatoiat wo topy­huꞌat maꞌato Miꞌi tote atunug uimõ­typot yat koro e kat pote atipuẽti mekewat Nu poꞌog hãpyk takat torania kai e Tupana."

⁸ Karãpe toĩneꞌen nu muꞌap tote hawyi wataꞌat tuereto mekewat nu ete aimõ­py­ꞌahak kahato. — Yt naku i mekewat nu aipuꞌap tote watoꞌe maꞌato iheg me toĩneꞌen. Miꞌi hap ewy kahato iraniaꞌin yt Iesui mohey i haria tukup­teꞌen Tupana e hap Iesui etiat pe. Taꞌa­tu­puẽti mekewat sehay wakuat hawyi iꞌatu­mõ­py­ꞌahak hap topy­huꞌat — Yt naku i iꞌatuꞌe.

"

⁹ Maꞌato aito ti aikotã wẽtup ywania Tupana miꞌairo wẽtup ywania ewywuat koꞌi aito. Kat pote Tupana saꞌy­ruꞌin saki­ꞌytꞌin aito. Miꞌi pote Tupana aiꞌairo tepaꞌi koꞌi wo maꞌato yt mesu­wa­rotiat paꞌi koꞌi ewywuat i. Katu­pono aito more­kuaria ewy wato­py­huꞌat Tupana wanẽtup hawe. Aitoria aikotã wẽtup tama piaria ewywuat Tupana eꞌyi kaꞌi­waria aito. Aiwa­nẽtup hap koꞌi yt mesu­wa­ro­tiaria minug koꞌi mesu­wa­ro­tiaria wanẽtup hap koꞌi ewy hin i. Miꞌi pote — Eiperia yt miit ewy i iꞌatuꞌe ahepe. Miꞌi pote Tupana mõtypot hap yn wati­ky­ꞌesat mesu­wa­rote. — Waku kahato Uruetu­pana watoꞌe iraniaꞌin me. Saꞌa­wyꞌi urutu­kup­teꞌen aikotã iꞌypyryp we hap ewy. Maꞌato mesup urutu­kup­teꞌen hẽtyhot puo hap ewy. Saꞌa­wyꞌi Tupana yt heremo hin i uruepe. Koitywy heremo hap ewy urupyꞌa pe uruimohey pote."

¹⁰ Saꞌa­wyꞌi watoĩ­neꞌen aikotã piku piku koꞌi ewy yt iꞌywot i yt ity i rakaria ewy. Gaꞌapy piat hewyry rakaria ewy yt uwe ywania ewy i ahewyry. Maꞌato wato­mohey Aika­ꞌiwat Iesui hawyi Tupana ainug tosa­ki­ꞌytꞌin sese tosa­ꞌy­ruꞌin sese wo raꞌyn. Miꞌi hawyi Tupana ywania wo wato­py­huꞌat. Saꞌa­wyꞌi yt uwe i aikyꞌe haria — Yt kan hamo i eipe iꞌatuꞌe ahepe. Maꞌato koitywy Tupana mikyꞌe koꞌi kahato aito. Aheha­kye­raꞌat raꞌyn Tupana yt ahewaku pytkai hin i aikyꞌe. Miꞌi pote Tupana etama puaria aito wato­py­huꞌat.

"

¹¹ Uito ti Peteru. Uimi­ky­ꞌeria sese eipe. Miꞌi pote atiky­ꞌesat kahato ewetunug uimi­ky­ꞌesat ewy. Atiky­ꞌesat kahato eweiꞌatoiat yne ehewaire hap kyꞌesat hap koꞌi eipiit miky­ꞌesat saꞌag koꞌi. Karãpe wẽtup ok ehãꞌãg hawyi — Yt atiky­ꞌesat i eweiꞌe. Taꞌi aimi­ky­ꞌesat saꞌag koꞌi aipyꞌa piat toĩneꞌen at kaꞌap hawyi meiũran yt kat i Tupana kyꞌe hap toĩneꞌen aikai kat pote mekewat aimi­ky­ꞌesat saꞌag koꞌi tuꞌuka kahato Tupana miky­ꞌesat hap wywo aipyꞌa pe. Mesuwat rotiaria ewy yt naku i wato­py­huꞌat kat pote atipy piaria aito pote. Ahewyry mesu­wa­rote wen maꞌato ahetama sese yt mesu­wa­rote i. Miꞌi pote yt naku i iraniaꞌin miky­ꞌesat ewywuat watunug saꞌag iꞌatu­wywo."

¹² Iraniaꞌin teꞌe­ra­haꞌat kahato ahowawi sio pywo pe wato­mohey sio yt hap kape. Miꞌi pote aheĩneꞌen hap mesu­wa­rote aikotã Iesui ewy hãpyk kahato rakat ewy waku wato­py­huꞌat are. Uiwy­riaꞌin waku watunug hãpyk kahato iꞌatue­hamo. Miꞌi pote meiũran hoꞌopot hap eꞌat putꞌokꞌe iꞌatuete hawyi meremo taꞌa­tu­mohey aikotã aito hap ewy. Miꞌi hawyi Tupana mõtypot hap ete aikotã aiꞌewy tukup­teꞌen hãpyk kahato watunug wakuat pote. Mesup iꞌatu­mi­ky­ryꞌi hamo watoĩ­neꞌen wato­mohey Iesui pote — Yt naku i nug haria iꞌatuꞌe maꞌato yt pywo pe i. Katu­pono aikotã wẽtup ywania miꞌiria tukup­teꞌen yt Tupana ywania hin i yt aiꞌe hap ewywuat i miꞌiria."

¹³ Pyno watoĩ­neꞌen mesu­wa­rote turan waku watunug aika­ꞌi­waria piat aipo­ꞌoro hap ok tã ahetu­ꞌisa piat aipo­ꞌoro hap ok tã aiꞌakag koꞌi piat aipo­ꞌoro hap ok tã. Miꞌi watunug pote aiꞌakag sese atipy piat mõtypot haria wo watoĩ­neꞌen. — Wãi yt etunug neiꞌo iꞌatuꞌe pote pyno — Waku watoꞌe. — Miꞌi tã o etunug iꞌatuꞌe pote pyno — Waku more­kuaria watoꞌe."

¹⁴ More­kuaria ti Tupana miꞌairo koꞌi tukup­teꞌen. Iꞌatue­su­ra­raꞌin iꞌewyte Tupana miꞌairo koꞌi tukup­teꞌen. Miꞌiria tukup­teꞌen yt naku i nug mupiat monik hamuat mesuwat yi totiat. Iꞌewyte waku nug haria mõtypot hamuat. Miꞌi hamo taꞌa­tu­ꞌairo mesu­wa­ro­tiaria more­kuaria tuꞌi­saria aipo­wyro hamuat."

¹⁵ Mesuwat rotiaria yt iweꞌeg i rakaria i ihay saꞌag nakaria aimohit reran taꞌa­tuehay wuat rakaria maꞌato wati­ꞌa­tunug wakuat kahato yne miitꞌin kape hawyi yt iꞌatuehay saꞌag kuap i poꞌog ahete. Miꞌi hap ewy Tupana tiky­ꞌesat kahato."

¹⁶ Pyno pywo pe ti aitoria Iesui mohey haria watu­kup­teꞌen aikotã yt kat i i aipyhyp hap ewy kat pote Tupana eropat haria watu­kup­teꞌen Tupana miky­ꞌesat watunug iꞌe hap ewy pote. Yt naku i watoꞌe more­kuaria pe — Pyno yt poꞌog i atunug emiky­ꞌesat ewy katupono miꞌi hawyi ti aru Tupana miky­ꞌesat ewy yn atunug yt naku i watoꞌe. Yt naku i watoꞌe aikaꞌiwaria pe — Uito Iesui eropat hat mesup pote yt atunug i poꞌog emipoꞌoro ewy naku i watoꞌe ahetuꞌisaria pe."

¹⁷ Waku wati­ꞌa­tu­mõ­typot yne mesu­wa­rotiat miitꞌin. Yt naku i wati­mohit mesu­wa­ro­tiaria miitꞌin. Waku iꞌewyte wati­ꞌa­tu­kyꞌe kahato yne Iesui mohey haria aikotã wẽtup yat piaria ewy waku watu­kup­teꞌen. Waku watoꞌokyꞌe aikotã watikyꞌe aheywytꞌin aheinytꞌin aheyke­ꞌetꞌin aiky­wytꞌin aiky­py­ꞌytꞌin aheki­ꞌitꞌin wati­kyꞌe hap ewy. Waku wati­mõ­typot kahato Ahetu­pana yne aikyꞌe hap wywo. Waku tyryꞌ­wa­toꞌe aipyꞌa pe Tupana pupi. Iꞌewyte waku wati­ꞌa­tu­mõ­typot kahato mesu­wa­rotiat aipo­re­kuaria are."

¹⁸ Uiwy­riaꞌin toĩneꞌen aika­ꞌi­waria ahetu­ꞌi­saria aipo­re­kuaria mesu­wa­ro­tiaria iwese kahato rakaria. Iꞌewyte toĩneꞌen yt iwese hin i rakaria. Toĩneꞌen wakuaria iꞌewyte toĩneꞌen yt nakuaria i. Miꞌi pote woro­ho­ꞌo­nãpin eipe. Waku ewetunug eika­ꞌi­waria ehetu­ꞌi­saria eipo­re­kuaria miky­ꞌesat ewy sio iwese rakaria sio yt sio ipyꞌahak takaria sio yt hap. Pyno waku wato­py­huꞌat iꞌatue­ropat haria wo iꞌatu­mõ­typot hanuaria wo aito Tupana eropat haria aito pote."

¹⁹ Karãpe iraniaꞌin mesu­wa­ro­tiaria aimohit kahato taꞌa­tuehay wo aiꞌa­piheg kahato yt kat i watunug saꞌag pytkai ahaty­ꞌi ha­tyꞌi kahato taꞌa­tu­wepyi miꞌi hawyi yt wati­poepyk hin i iꞌatue­wawi. Yt kat watoꞌe i. Wati­mohey te ti Tupana. Miꞌi hawyi miꞌi hap watunug pote Tupana — Waku kahato eipe e ahepe."

²⁰ Karãpeĩ watunug yt naku i hawyi sura­raꞌin more­kuaria aiꞌa­piheg kahato aiminug saꞌag saꞌup taꞌatuium kahato ahepe. Miꞌi hap eꞌat pe yt waho­ꞌo­wesat kuap i kat pote yt naku i nug haria aito pote. Maꞌato karãpe more­kuaria esura­raꞌin koꞌi aiꞌa­piheg yt kat i watunug saꞌag pytkai Iesui mohey haria aito pote miꞌi turan yt wati­ꞌa­tu­wesat i pote yt watu­we­mõ­py­ꞌahak i. Waku watu­wehum yn Tupana kape aiꞌa­piheg turan. Miꞌi watunug pote Tupana mõtypot hap sese topy­huꞌat ahepe — Waku kahato eiperia e Tupana ahepe."

²¹ Aika­ꞌiwat Aipo­typot Iesui saꞌa­wyꞌi hoꞌopot kahato miitꞌin iꞌatu­mi­ky­ryꞌi kahato tuwete. Yt kat i tutunug saꞌag pytkai taꞌa­tu­ꞌahyk taꞌa­tu­ꞌauka maꞌato yt kat i toꞌe saꞌag iꞌatuepe. Yt toiꞌa­tu­poepyk hin i miꞌi tã taꞌa­tunug pytkai kat pote toimo­herep teran ahepe aikotã waku watunug aiꞌa­piheg haria pe hap. Toiky­ꞌesat kahato watunug tominug hap ok tã toiky­ꞌesat. Miꞌi hap kape aikaykay aikotã topiat hoꞌopot hap ewy hamuat hap kape."

²² Pywo pe ti rat Aika­ꞌiwat yt kat saꞌag hin i tutunug pytkai taꞌa­tu­ꞌauka. Yt wẽtup sehay saꞌag tutunug towẽ pywiat pytkai i taꞌa­tu­ꞌahyk ahyk Aika­ꞌiwat are."

²³ Taꞌa­tu­mohit kahato Aika­ꞌiwat Iesui taꞌa­tuehay saꞌag wywo maꞌato yt kat i i toiꞌa­tu­wesat saꞌag. Yt toiꞌa­tu­poepyk hin i saꞌag wywo. Taꞌa­tu­ꞌahyk ahyk Iesui turan hoꞌopot kahato tepiat turan yt kat e hin i iꞌatuepe — Meiũran woro­ho­ꞌo­ꞌahyk eipe yt e i maꞌato toꞌe Tupana pe — Atikuap Papai aikotã aru uhewaku hap etimo­herep wuatꞌi ehamo. Ewẽ pyi yn waku uwe waku uwe yt enoi hamo. En yn etikuap e Iesui Toꞌywot pe."

²⁴ Pywo ti rat Aika­ꞌiwat Iesui tuut irane kat pote yne aiminug aiꞌa­piheg saꞌag koꞌi yne miitꞌin mesu­wa­ro­tiaria minug saꞌag koꞌi topy­huꞌat Aika­ꞌiwat piit pe. Mekewat ariaꞌyp tote toho­ꞌopot kahato topiit ete. Tupana miꞌa­piheg wo topy­huꞌat. Tuwepyi Aika­ꞌiwat yne Tupana piat aiꞌa­piheg hap aiminug saꞌag koꞌi u hamo tuut. Miꞌi hawyi aiꞌa­piheg hap yne topy­huꞌat Iesui piit ete mekewat ariaꞌyp posak tote. Ipiit ete yne topy­huꞌat Tupana kaipywiat aiꞌa­piheg hap koꞌi aiꞌahyk ahyk hap tutuꞌu yne. Haty kahato tuete. Miꞌi hawyi aimoe­hãite hamuat hap topy­huꞌat. Haty hap yne tutuꞌu yne hawyi ikuꞌuro aheiam me. Aiku­ꞌuro hap tutuꞌu yne. Miꞌi pote aito watoĩ­neꞌen ikuꞌuro rakaria ewy iwywo mekewat aiminug saꞌag ete. Yt ahesaika i poꞌog aito watoĩ­neꞌen. Aikotã ikuꞌuro rakat yt wahãꞌãg kuap i yt naku i nug hamo hap ewy. Miꞌi hap ewy wato­py­huꞌat mesup. Maꞌato wakuat yn sake i watunug kuap mesup kat pote watu­wẽtem guꞌuro pyi Aika­ꞌiwat wywo hap ewy. Miꞌi hawyi waku nug haria wo wato­py­huꞌat iwywo."

²⁵ Maꞌato saꞌa­wyꞌi aitoria watu­kup­teꞌen aikotã aihũria miꞌa­pykok koꞌi ewy piku piku koꞌi ewy aikotã aihũria Kuteiru koꞌi hoꞌo­wasat gaꞌapy piat hap ewywuaria watu­kup­teꞌen saꞌa­wyꞌi. Maꞌato mesup aitoria Aika­ꞌiwat Koro hũria wo watu­kup­teꞌen. Miꞌi ti aiꞌa­pykok hat akag. Miꞌi upi ti watuwat atipy kape Ahepaꞌi Koro Miꞌi Miit Iesui pote are.

"

3

¹ Pyno waku watunug more­kuaria miky­ꞌesat ewywuat. Iꞌewyte waku etunug eꞌaito miky­ꞌesat ewywuat uheinytꞌin are. Eꞌaito toĩneꞌen pote etunug o imiky­ꞌesat ewywuat. Maꞌato eꞌaito yt Iesui mohey hat i pote iꞌewyte waku etunug imiky­ꞌesat ewy. Miꞌi tã etunug mote meremo etekyi Iesui mohey hap kape. Kat pote teꞌe­ra­haꞌat kahato ewese hap kape maꞌato yt ehenoi hin i Tupana ehay tope pytkai. Eheĩneꞌen hap ikahu rakat kaipyi topy­huꞌat Iesui mohey hano saꞌa­wyꞌi yt tutunug neran hin i Tupana ehay pytkai are. Miꞌi pote waku etunug eꞌaito eꞌakag wo uheinytꞌin are."

² Waku etum epiit eꞌaito pe yn yt kat i ewaire waire hap wywo. Miꞌi hawyi waku etimõ­typot kahato eꞌaito. Miꞌi hap kape tehaꞌat hawyi meremo ehekyi kuap Iesui kape."

³ Miꞌi hawyi waku ewepainug hap koꞌi eipyꞌa pe eiwese hap wywo ewepit hap wywo eiwa­nẽtup hawe. Waku pe eweikup­teꞌen Tupana miky­ꞌesat ewywuat. Iꞌewyte eweikup­teꞌen hekat rakat ewy mekewat ewepainug hap wuatꞌi eꞌat piat hap ewy. Waku ewetopag wahi koꞌi eimo­kahu hamuat eiwa­nẽtup hap ikahu rakat. Iꞌewyte eipyꞌa piat ikahu hap ewywuat are. Iraniaꞌin hary­po­riaꞌin mesu­wa­ro­tiaria teꞌe­ru­wa­nẽtup taꞌa­tu­kahu hap kape yn taꞌa­tupiit kape yn teꞌe­ru­wa­nẽtup."

⁴ Taꞌa­tu­kyiꞌat taꞌa­tuekat ikahu kahato rakat mekewat mehit rakat hekat rakat kawiat Uru kawiat saity koꞌi hawyi taꞌa­tupag yne taꞌa­tu­ꞌasap taꞌa­tupiit koꞌi ete Uru imehit rakat yn taꞌa­tupag. Teꞌe­ru­we­painug kahato wen maꞌato taꞌa­tupiit ete yn. Maꞌato eipe waku poꞌog ewetunug eipyꞌa pe ehekat ikahu hap eiwa­nẽtup hawe eiwese hap eiwepit hap koꞌi. Miꞌi ewetunug mote ikahu rakat sese wo eweikup­teꞌen Tupana wanẽtup hawe. Hekat rakaria sese wo eweikup­teꞌen Tupana wanẽtup hawe Tupana miky­ꞌesat ewy ewetunug mote."

⁵ Iꞌatu kahato saꞌa­wy­ꞌi­wuaria hary­po­riaꞌin Tupana mohey haria wakuap nug kahato haria are. Miꞌiria inug kahato taꞌa­tue­ꞌaito miky­ꞌesat ewywuat. Taꞌa­tue­ꞌaito eropat haria kahato miꞌiria tukup­teꞌen. Miꞌiria teꞌe­ru­we­painug kahato Tupana mohey hap wywo."

⁶ Saꞌa­wyꞌi sese ahehary mana Sara tunug yne ahaꞌa­seꞌi pot Aparãu miky­ꞌesat ewy. — Uika­ꞌiwat en e teꞌaito pe. Pyno waku hary­po­riaꞌin eweikup­teꞌen ehehary pot koꞌi ewywuaria wo. Pywo ti rat ewetunug eheꞌaito miky­ꞌesat ewy ewetunug wakuat pote yt uwe i pupi i eweikenꞌẽ aru are. Yt kowoꞌi kowoꞌi hin i eiwa­nẽtup hap topy­huꞌat kat pote eika­ꞌiwat eheꞌaito topy­huꞌat pote."

⁷ Iꞌewyte woro­ho­ꞌo­nãpin neran yne eipe mehĩꞌin. Toĩneꞌen eharyꞌi pote mio tã areꞌe ehepe — Eiweꞌeg wo o yt eiweꞌeg i hap pupi are. Ereĩneꞌen eharyꞌi wywo aikotã iweꞌeg nakat ewy are. Etimõ­typot ro eharyꞌi are. Epiit poꞌog hesaika eharyꞌi kai pote etipo­wyro eharyꞌi epiit wywo. Pyno wẽtup miit ewywuat eweikup­teꞌen mote waku eweiwat atipy kape eiwo­ꞌo­kyꞌe hap wywo eiwo­ꞌo­wese hap wywo eiwo­ꞌo­gyiꞌat hap wywo are. Waku woꞌo­mo­wepit haria wo eweikup­teꞌen. Miꞌi ewetunug mote karãpe ehehay Tupana kape eheha­ryꞌi wywo hawyi meremo Tupana eiwesat eipe wẽtup miit wanẽtup hap ewy eweikup­teꞌen mote.

"

⁸ Pyno mesup ahenoi teran uiwe­nãpin hap yne Iesui mohey haria pe. Mio tã are aikotã wẽtup miit ewy waku eweikup­teꞌen eiwa­nẽtup hawe. Waku woꞌo­kyꞌe kahato haria wo eweikup­teꞌen are. Waku eipyꞌa pe eiwo­ꞌo­kyꞌe eiwo­ꞌope are. Waku eiwo­ꞌo­kyꞌe Iesui mohey haria pote aikotã eheywytꞌin eheyke­ꞌetꞌin eheinytꞌin kyꞌe hap ewywuat are. Aikotã eiky­wytꞌin eiky­py­ꞌytꞌin eheki­ꞌitꞌin kyꞌe hap ewy wẽtup mẽpytꞌin sok ewy waku eiwo­ꞌo­kyꞌe are. Karãpe hoꞌopot hap putꞌokꞌe wẽtup ok Iesui mohey hat ete hawyi etipo­wyro o miꞌi. Iꞌewyte karãpe iraniaꞌin hatek pote etipo­wyro miꞌi eipyꞌa pyi ikyꞌe hap wywo. Waku eweikup­teꞌen eiwese kahato iraniaꞌin etiat rakaria wo. Waku eweiꞌe iraniaꞌin Iesui mohey haria pe — Wẽtup yn aimi­mohey uhyt mana eweiꞌe o are. Ereke uhyt mana mimi eweiꞌe. Eraꞌapyk o eweiꞌe. Miꞌi hawyi hegyiꞌat rakaria wo aru eweikup­teꞌen Iesui mohey hap wywo are."

⁹ Karãpe Iesui mohey haria iraniaꞌin yt iꞌatu­wese i ehete hawyi waku eweikup­teꞌen iwese rakaria wo. Yt eweipoepyk teiꞌo iraniaꞌin tunug saꞌag ehetiat pote. Taꞌa­tunug saꞌag hawyi — Waku eweiꞌe emohit miꞌiria pote. Etiꞌa­tu­mõ­typot miꞌiria uhytꞌiꞌin manaꞌin. Miꞌi tã ewetunug mote Tupana mipoi­tyro koꞌi wo eweikup­teꞌen. Yne Tupana ekat topy­huꞌat eiwanuat atipy pe. Miꞌi tã ewetunug mote — Woro­ho­ꞌo­poi­tyro eipe e Tupana ahepe."

¹⁰ Uiwy­riaꞌin eweikup­teꞌen mesu­wa­rote iwese kahato rakaria wo iwepit sese rakaria wo eweikup­teꞌen are. Maꞌato eheĩneꞌen hap mesu­wa­rotiat iꞌewyte wepit hap ikahu sese hap koꞌi eweiky­ꞌesat pote eiwe­nãpin ihay nug hap ete iraniaꞌin wywo. Eweimuꞌe ro ehẽku sehay wakuat nug hamo are. Karãpe ehẽku ihay teran saꞌag nug hap ete pote — Wãiꞌe­weiꞌe o ehẽku pe. Karãpe ehẽku timohit reran iraniaꞌin mote — Wãiꞌe­weiꞌe o ehay saꞌag nug hap ete."

¹¹ Waku eweimuꞌe ehẽku sehay iwese rakat nug hamuat hap ete miitꞌin wywo. Miꞌi hawyi eimo­wepit hap mesu­wa­rotiat eweipuẽti Tupana kaipyi are. Yt naku i aiwẽ pyi ahehay haiug nakat yt iwese rakat i yt hẽꞌẽ i rakat. Waku watu­we­muꞌe sehay miitꞌin mowepit hamuat e hap nug hamuat ete are. Waku wati­ꞌatoiat yne aiminug saꞌag koꞌi aimi­ky­ꞌesat koꞌi aiminug saꞌa­wy­ꞌiwuat hap ewy. Miꞌi hawyi waku watikat at kaꞌap woꞌo­wese nug hamuat hap. Aikotã wati­mohan miat yne ahesaika hap wywo hap ewy. Miꞌi hap ewywuat yne ahesaika hap wywo wati­mohan aiwo­ꞌo­mo­wepit hap are."

¹² Taꞌi uiwy­riaꞌin Tupana tikuap kahato uwe uwe topy­huꞌat waku nug hat waku wanẽtup hat iwese rakat. Miꞌi hat kape Tupana ewaure kaꞌa tuwehik kahato. Tupana tikuap kahato mekewat miit miẽtup koꞌi. Mekewat miit ihay hawyi meremo Tupana tiwesat. Maꞌato iraniaꞌin yt naku i nug haria ete Tupana yt tuwehum hin i iꞌatue­wawi maꞌato topy­huꞌat yt naku i nug haria ewanĩkap mo are."

¹³ Watunug Tupana miky­ꞌesat ewy pote waku mekewat wati­mohan kahato inug hamo kat pote yt uwe i mesu­wa­rotiat aimaꞌat kuap hat topy­huꞌat.

"

¹⁴ Uiwy­riaꞌin karãpe mesu­wa­ro­tiaria yt iꞌatu­wese i kahato ahete waku nug haria aito pote waku watu­we­mo­wepit mesu­wa­rote. Yt naku i wato­kenꞌẽ iꞌatu­pupi. Yt naku i aiwa­nẽtup hap kowoꞌi kowoꞌi miꞌiria pupi."

¹⁵ Waku poꞌog wati­mõ­typot Tupana aipyꞌa pe. Miꞌi hawyi waku watikat sehay wakuat aiwa­nẽtup hawe yne miitꞌin wesat hamuat hap. Karãpe putꞌokꞌe wẽtup ok ahowawi hawyi toꞌe ahepe — Kat pote etimohey Iesui. Miꞌi hawyi waku wati­mo­herep iꞌatuepe aimi­mohey Iesui ahehay perupꞌi puo yt kat i — Uito poꞌog eikai aiꞌe hap wywo. Maꞌato aikotã paaꞌe haria ewy waku wati­ꞌa­tuekyi miitꞌin aimi­mohey Iesui kape."

¹⁶ Uiwy­riaꞌin waku watoiat yne aiminug koꞌi aiwa­nẽtup saꞌag hap koꞌi. Miꞌi hawyi waku ahewyry yt kat i haty aipyꞌa piat wywo aiwa­nẽtup hawiat aiminug saꞌag wywo. Miꞌi hawyi karãpe iraniaꞌin iꞌatuꞌe saꞌag kahato ahete iꞌatueso hap kaipyi yt kat i aiwe­mõti hap topy­huꞌat kat pote watikuap yt kat i i saꞌag watunug pote. Watikuap Aika­ꞌiwat Iesui miky­ꞌesat ewy watunug mesu­wa­rote pote."

¹⁷ Pyno Tupana tiky­ꞌesat tuereto hoꞌopot ahepiat hap waku nug haria aito pote. Miꞌi hawyi mesu­wa­ro­tiaria ahaty­ꞌi­ha­tyꞌi haria wo tukup­teꞌen. Karãpe hoꞌopot hap toĩneꞌen waku nug haria aito pote miꞌi pote waku watu­wehum Tupana kape. Maꞌato karãpe aito Iesui mohey hat pytkai watunug saꞌag mote mesu­wa­ro­tiaria ahaty­ꞌi­ha­tyꞌi hawyi haty sese hap topy­huꞌat kat pote yt watu­wehum kuap i Tupana kape."

¹⁸ Saꞌa­wyꞌi Aipo­typot Aipo­rekuat Iesui miitꞌin miky­ryꞌi hamo topy­huꞌat mesu­wa­rote aikotã aikotã taꞌa­tunug saꞌag tuwete waku rakat pytkai taꞌa­tu­ꞌauka. Maꞌato yt kat i saꞌag tutunug pytkai toho­ꞌopot kahato. Maꞌato aiminug saꞌag upi toho­ꞌopot. Iesui hãpyk kahato rakat maꞌato ikuꞌuro yt hãpyk i rakaria mohãpyk hamo. Ikuꞌuro muꞌap nug hamo Toꞌywot Tupana kapiat muꞌap nug hamuat. Koitywy toĩneꞌen muꞌap Tupana kapiat Iesui hoꞌopot hap kaipyi. Yt hãpyk i sese rakat toimo­hãpyk kuap taꞌyn. Pyno ipiit ikuꞌuro ariaꞌyp posak ete maꞌato miꞌi hawyi Tupana Pãꞌãu timoieĩ­neꞌen Aika­ꞌiwat."

¹⁹ Ikuꞌuro ariaꞌyp posak ete hawyi Iesui toto aikope miitꞌin pãꞌãu sem tukup­teꞌen hap kape aikope miitꞌin pãꞌãu sem tukup­teꞌen iꞌatu­pyhyp hap kape toto. Miꞌi tote toimo­herep iꞌatuepe tehay ikahu rakat toku­ꞌuro hawyi."

²⁰ Iꞌatu kahato miit itote yt naku i nug haria. Miꞌi haria kape toto. Aikope tukup­teꞌen Nuꞌe mimu­ꞌeria. Saꞌa­wyꞌi Nuꞌe tiꞌa­tu­muꞌe miꞌiria. Tutunug mekewat yara wato koro turan toiꞌa­tu­muꞌe maꞌato yt taꞌa­tu­mohey i. Tupana tiꞌa­tu­ky­ꞌesat kahato miꞌiria tuwe­wawiat hap. Toiꞌa­tuekyi kahato Nuꞌe ehay wo maꞌato yt taꞌa­tu­mohey i. Miꞌiria kape Iesui toto toku­ꞌuro hawyi aikope tukup­teꞌen ikuꞌuro rakaria hap kape. Miꞌi hawyi toimo­herep iꞌatuepe mekewat sehay wakuat. Katu­pono saꞌa­wyꞌi mesuwat yi tote Nuꞌeꞌin yn Tupana mieha­kye­raꞌat koꞌi topy­huꞌat. Mekewat yara wato pe tukup­teꞌen 8 ok yn Nuꞌeꞌin koꞌi. Miꞌi hawyi iꞌaman iwato tiꞌa­tu­ꞌuka yne mesu­wa­ro­tiaria maꞌato mekewat Nuꞌe minug yara wato tiꞌa­tue­ha­kye­raꞌat 8 ok takaria katupono mekewat yara wato pe tukupteꞌen Nuꞌeꞌin mekewat yꞌy wato yowa tote."

²¹ Miꞌi hap ewy kahato ahetꞌok hap topy­huꞌat. Yꞌy piat wateke aikotã Iesui ikuꞌuro hap ewy. Watu­wẽtem yꞌy pyi hawyi aikotã Iesui tuwẽtem guꞌuro pyi hap ewy watoĩ­neꞌen. Maꞌato mekewat yꞌy yt aikoho kuap i aipitpit ok hap aiminug saꞌag koꞌi maꞌato ahetꞌok hap watunug hawyi yt kat i haty hap aiwa­nẽtup hawe kat pote Tupana miky­ꞌesat ewy watunug aikotã Nuꞌe ewy yꞌy sakpo watuwat aheꞌyara puo hap ewy."

²² Mesup taꞌyn Aheykeꞌet Iesui teke raꞌyn atipy pe. Koitywy taꞌapyk Tupana po sese kai taꞌapyk. Miꞌi tote Tupana mimõ­typot no topy­huꞌat — Koitywy Uhaꞌyru woronug En wuatꞌi miitꞌin Akag wuatꞌi pore­kuaria Akag wuatꞌi atipy piaria akag wo woronug En e Tupana Tosa­ꞌyru pe. Yne esaika hap atum epe e Tupana Tosa­ꞌyru pe Iesui pe.

"

4

¹ Pyno uiwy­riaꞌin Aipo­typot Iesui hoꞌopot kahato topiit no mesuwat yi tote maꞌato yt tominug saꞌag upi hin i toho­ꞌopot miitꞌin miꞌa­piheg wo maꞌato aiminug saꞌag upi i toho­ꞌopot aiꞌa­piheg hap upi. Pyno waku watu­wa­nẽtup Aika­ꞌiwat ewy waku waho­ꞌopot iraniaꞌin ehakye­raꞌat hamo hap ewy. Karãpe wati­mo­wepit aipuꞌi hawyi yt kat i ahoꞌopot hap wati­ky­ꞌesat wen maꞌato yt kan hamo i watoĩ­neꞌen katu­pono aipiit miky­ꞌesat saꞌag hap yne watunug. Poꞌog waku watunug Iesui miky­ꞌesat wakuap koꞌi are. Poꞌog waku waho­ꞌopot Aika­ꞌiwat ewy miitꞌin ehakye­raꞌat hamo are."

² Maꞌato yt naku i watoĩ­neꞌen mesu­wa­rote aiku­ꞌuro hap kape yt naku i nug hanuaria wo aikotã saꞌa­wyꞌi yt wato­mohey i te Iesui turan wuat ewy are. Yt naku i aipiit miky­ꞌesat saꞌag watunug. Maꞌato watunug mote yt kat hamo i watoĩ­neꞌen. Waku watoĩ­neꞌen mesu­wa­rote Tupana miky­ꞌesat nug hamo Tupana mowepit hamo are."

³ Saꞌa­wyꞌi yt aiweꞌeg hin i yt watikuap i te Iesui turan. Saꞌa­wyꞌi aimi­ky­ꞌesat yn watunug iꞌewyte iraniaꞌin mesu­wa­ro­tiaria miky­ꞌesat ewy yn watunug. Mekewat eꞌat pe yt watikuap i Iesui te turan yt watunug hin i Tupana miky­ꞌesat ewy. katu­pono watunug at kaꞌap iraniaꞌin miky­ꞌesat ewy yn watunug. Taꞌi yt Tupana kuap i haria miky­ꞌesat ewy yn watunug. Miꞌi turan watunug ahewaire waire hap yn aiwa­nẽtup hawe. Aipiit miky­ꞌesat saꞌag koꞌi yn watunug neran mekewat eꞌat pe. Iꞌewyte mahy u hap at kaꞌap hap wati­ky­ꞌesat watunug mekewat eꞌat pe. Watu­ꞌuka teran yne miitꞌin wywo ahehay wo aipiit wywo yt aiwese hin i. — Uito poꞌog e hap yn aiwa­nẽtup hawe. Taꞌi saꞌa­wyꞌi ienuk hap nug hap kape yn watuwat. Yt miitꞌin ewywuat i watenuk. Aiꞌok hap sakpo watenuk mekewat eꞌat pe. Miꞌi hawyi ahetu­pa­naria sem karania ahetu­pa­naria saꞌa­wyꞌi aheĩneꞌen hap yt watikuap i Iesui turan."

⁴ Koitywy aiwy­riaꞌin saꞌa­wy­ꞌi­wuaria — Kat pote uruꞌatoiat iꞌatuꞌe. Kat pote yt etunug i te aikotã saꞌa­wyꞌi etunug hap ewy iꞌatuꞌe. Toꞌiro uhytꞌiꞌin manaꞌin pĩꞌãꞌin kurumꞌin iꞌatuꞌe ahepe maꞌato — Yt watoꞌe. Toꞌiro iꞌatuꞌe maꞌato yt watuwat i hawyi iꞌatuehay saꞌag ahete. Taꞌa­tu­ky­ꞌesat watunug saꞌag aikotã taꞌa­tunug hap ewy."

⁵ Maꞌato aito yt watuwat i iꞌatupi mekewat saꞌag nug hamo kat pote watikuap taꞌyn tuut irane yt pya hin i Aika­ꞌiwat Iesui ut hap. Miꞌi hawyi toipo­ꞌoro miitꞌin aikotã aikotã imohey hap etiat kuap hamo. Wẽtup kai totopag yne tomohey haria. Wẽtup kai yt tomohey haria i koꞌi totopag. Mekewat eꞌat pe toimo­herep wuatꞌi ehamo uwe waku uwe yt sio watoĩ­neꞌen sio aiku­ꞌuro hut turan maꞌato yne miitꞌin sio toĩneꞌen wakuaria ihãite rakaria sio ikuꞌuro rakaria toipatꞌok mekewat eꞌat pe. Towanuat sio yt towanuat koꞌi i hap moherep hamo toipatꞌok."

⁶ Miꞌi pote toto toku­ꞌuro hawyi aikope miitꞌin pãꞌãu tukup­teꞌen hap kape woꞌo­pyhyp hap kape toto toku­ꞌuro hap totepyi mekewat Nuꞌe mimu­ꞌeria muꞌe hamo. Yt taꞌa­tukuap i te ikuꞌuro taꞌa­tu­ka­wiano hamuat hap. Yt taꞌa­tukuap i te pote toto. Miꞌi pote koitywy ikuꞌuro rakaria ikuap iꞌewyte ihãite rakaria ikuap. Miꞌi hawyi meiũran aru toiꞌa­tu­patꞌok uwe imohey haria uwe yt rakaria i. Iꞌewyte ikuꞌuro rakaria ihãite rakaria Tupana Pãꞌãu tomo­herep yne."

⁷ Pywo ti rat yne mesu­wa­rotiat mesuwat yi iꞌewyte aheka­reꞌen aiꞌyat koꞌi aiko hawyi waikiru waty at gaꞌapy yne mesu­wa­rotiat ikahuro hamuat koꞌi eꞌat yt pya hin i. Pywo ti rat tuut irane uiwy­riaꞌin yne mesuwat ikahuro hap eꞌat. Yt pya hin i are. Miꞌi pote waku weꞌeg haria wo watu­kup­teꞌen mesu­wa­rote. Waku wahẽtup at kaꞌap Tupana kape mesu­wa­ro­tiaria ehakye­raꞌat hamo. Waku wahe­katup Iesui ut hap."

⁸ Pyno mesuwat ikahuro hap eꞌat yt pya hin i pote Tupana tiky­ꞌesat kahato aito tomohey haria wo wẽtup miit ewy aiwo­ꞌo­kyꞌe hap toiky­ꞌesat. miꞌi tã Tupana tiky­ꞌesat kahato. Uiwy­riaꞌin toiky­ꞌesat wati­ꞌa­tu­kyꞌe iraniaꞌin Iesui mohey haria yne ahesaika hap wywo. Toiky­ꞌesat wati­mo­herep aiwo­ꞌope aiwo­ꞌo­kyꞌe hap aimiium kaipyi aimi­mõꞌẽ hap kaipyi aiminug kaipyi toiky­ꞌesat aiwo­ꞌo­kyꞌe hap. Pywo ti rat toĩneꞌen aiwo­ꞌo­kyꞌe hap sese aiwo­ꞌopiat hap hawyi yt kat i aiwo­ꞌo­ma­ꞌatꞌi hap toineꞌen. Yt heremo i aiwo­ꞌo­ꞌa­parap hap koꞌi aiwo­ꞌo­kyꞌe kahato hap toĩneꞌen mote. Aiwu­ꞌuka hap yt tuwe­mo­herep i. Aiwo­ꞌo­kyꞌe hap toĩneꞌen pote yt watikat aiwy­riaꞌin kai iꞌatu­minug saꞌag koꞌi aiwo­ꞌo­ꞌa­parap hap koꞌi."

⁹ Uiwy­riaꞌin waku — Eiwe­hytꞌok o watoꞌe iraniaꞌin me. Waku eiwe­hytꞌok watoꞌe aiwo­ꞌope. Eweiꞌapyk o waku watoꞌe. Waku — Uruꞌyat aiwanuat watoꞌe iraniaꞌin me. Waku wati­po­wyro hatek takaria aiꞌyat pe. Yt naku i watoꞌe iraniaꞌin me — Yt atiky­ꞌesat hin i iraniaꞌin uiꞌyat piat watoꞌe."

¹⁰ Pyno Tupana tum ahepe tesaika hap wakuat moherep hamuat miitꞌin powyro hamuat. Yt toꞌo­ꞌewy hin i tutum ahepe tesaika hap. Pyno kat som wati­puẽti Tupana esaika hap kaipyi waku wati­mõꞌẽ iraniaꞌin me. Kat som watikuap waku rakat pyno waku wahenoi iraniaꞌin me Tupana mienoi hepiat koꞌi. Waku wati­po­wyro iraniaꞌin aipo wywo Tupana miium aimi­sepap koꞌi wywo aikotã Tupana piat aimuꞌe hap ewy. Watikuap pote waku wati­ꞌa­tu­po­wyro iraniaꞌin aimi­sepap koꞌi wywo aikotã Tupana aimuꞌe hap ok tã. Aimi­sepap koꞌi yne Tupana miium koꞌi tukup­teꞌen yne aimikuap koꞌi Tupana aimuꞌe hap koꞌi. Yt kat saꞌup i tutum ahepe pote waku watum miitꞌin me yt kat saꞌup i. Waku wato­py­huꞌat Tupana eropat haria wo wakuaria ewy. Waku Tupana miium wati­mõꞌẽ iraniaꞌin me ahegyiꞌat kahato hap wywo aikotã Tupana hegyiꞌat hap ewy."

¹¹ Pyno iraniaꞌin aitoria Tupana mimu­ꞌeria kahato ahehay se kahato Iesui etiat moherep hamo aimuꞌe kahato. Ahẽku ete tutum tesaika hap tehay moherep hamuat. Miꞌi pote karãpe wati­ꞌa­tu­muꞌe miitꞌin waku ahehay wati­mo­herep aipyꞌa pyi aikotã Tupana ihay aiwẽ pyi Topãꞌãu kaipyi hap ewy waku wati­mo­herep Tupana ehay. Maꞌato iraniaꞌin yt ahehay kuap i rakaria Tupana tiky­ꞌesat aipo wywo aipy wywo wati­ꞌa­tu­po­wyro miitꞌin hap. Miꞌi pote tutum ahepe iraniaꞌin me tesaika hap miitꞌin eropat hamuat. Tupana aimuꞌe kahato aipyꞌa pyi aikotã aikotã waku watunug miitꞌin eropat hap ete. Miꞌi hawyi tutum ahepe tesaika hap wakuat sese nug aipo wywo aipiit wywo hamuat hap. Pyno kat som tutum ahepe sepap nug hamuat hap koꞌi miꞌi pote waku i ok tã wati­mõꞌẽ miitꞌin me Tupana mõtypot hamuat Aipo­typot Tupana Mipo­ꞌoro Iesui mõtypot hamuat hap koꞌi are. Pyno ahẽtup uiwy Iesui pe — Atiky­ꞌesat kahato ereĩneꞌen Wuatꞌi Miitꞌin Porekuat no hap. Atiky­ꞌesat En Wuatꞌi Miitꞌin Mimõ­typot no. Mesup wuatꞌi eꞌat pe aru atiky­ꞌesat En yne mesu­wa­ro­tiaria emiitꞌin sem akag wo. Miꞌi ti mesup ahẽtup are waku."

¹² Uimi­ky­ꞌesat koꞌi Iesui mohey haria karãpe putꞌokꞌe ehete ehatek hap miitꞌin miky­ryꞌi hap koꞌi ehoꞌopot hap koꞌi aikotã aria haty hap ewy putꞌokꞌe ehete yt eiwa­nẽtup teiꞌo kowoꞌi kowoꞌi — Kat pote miꞌi tã uhete yt eweiꞌe teiꞌo eiwa­nẽtup hawe. Katu­pono miꞌi tã yne Iesui mohey haria ete toĩneꞌen tuereto uiwy­riaꞌin uimi­kyꞌe koꞌi. Miꞌi pote yt eweiwa­nẽtup teiꞌo — Taꞌi yt iraniaꞌin ewy hin i ahoꞌopot yt eweiꞌe i kat pote yne aitoria Iesui mohey haria ihaky­ꞌeꞌi rakaria watu­kup­teꞌen tuereto. Miꞌi tã Tupana tunug ahete ahãꞌãg hap koꞌi sio watoĩ­neꞌen Haꞌyru mohey haria sese wo sio yt haria wo i kuap hamo."

¹³ Karãpe putꞌokꞌe ahãꞌãg hap ahatek hap miitꞌin miky­ryꞌi hap aiꞌahu hap yne mekewat koꞌi putꞌokꞌe pote waku meremo watu­we­mo­wepit hawyi waku watoꞌe Tupana pe ahoꞌopot hap putꞌokꞌe hawyi — Tupana koitywy atikuap taꞌyn Esaꞌyru Emipo­ꞌoro Urupo­rekuat nuat hoꞌopot hap. Yt atikuap yne i maꞌato ahoꞌopot hap kaipyi atikuap Emipo­ꞌoro hoꞌopot hap. Waku kahato atuꞌu Iesui ewy mekewat hoꞌopot koꞌi waku watoꞌe Tupana pe. Meiũran aru atikuap Esaꞌyru Urupo­rekuat nuat putꞌokꞌe mesuwe Wuatꞌi Mimõtyot no tuwe­mo­herep mesuwe. Miꞌi hap eꞌat pe uimo­wepit hap sese wuatꞌi eꞌat piat hap toĩneꞌen waku watoꞌe Tupana pe."

¹⁴ Pywo ti rat uiwy­riaꞌin karãpe miitꞌin ihay saꞌag kahato ahetiat pote wato­mohey Aipo­rekuat nuat pote miꞌi hap eꞌat pe waku watu­we­mo­wepit kahato. Eweikuap kat pote. Aimo­wepit hap sese topy­huꞌat aru ahete wuatꞌi eꞌat pe katu­pono wato­py­huꞌat Tupana mimõ­typot koꞌi sese. Tupana Pãꞌãu eiam kahato wato­py­huꞌat. Katu­pono Tupana yt aiꞌatoiat hin i waho­ꞌopot turan. Katu­pono mesu­wa­ro­tiaria iꞌatuehay saꞌag Aika­ꞌiwat Iesui ete maꞌato aitoria wati­mõ­typot kahato Aika­ꞌiwat. Miꞌi hap kaipyi Tupana aikuap. Miꞌi pote tutum ahepe Topãꞌãu pywuat imõtypot koꞌi wato­py­huꞌat pote."

¹⁵ Pyno waku wato­py­huꞌat miitꞌin mesu­wa­ro­tiaria miky­ryꞌi hamo. Waku wato­py­huꞌat miitꞌin misa­tyꞌi satyꞌi koꞌi wo Iesui mohey haria aito pote. Maꞌato yt naku i kahato waho­ꞌopot mesu­wa­rotiat sero­ꞌokꞌe haria aito pote yt naku i nug haria pote miitꞌin maꞌat haria aito pote miitꞌin ekat pore­raꞌat haria aito pote miitꞌin potpap pyhyp haria aito pote ahehay saꞌag iraniaꞌin etiat aito pote. Miꞌi hap upi aipyhyp ahatyꞌi hatyꞌi pote yt nakuaria i wo wato­py­huꞌat. Maꞌato waho­ꞌopot Iesui potpap nug pote waku."

¹⁶ Taꞌi karãpe ahatyꞌi hatyꞌi Iesui Aipo­typot emiitꞌin pote waku watu­we­mo­wepit. Yt naku i watu­we­mõti neꞌi Aika­ꞌiwat pupi ahatyꞌi hatyꞌi Iesui etiat turanuat pote. Poꞌog waku watoꞌe Tupana pe — Tupana waku kahato En kat pote ahoꞌopot Esaꞌyru mohey hap upi waku watoꞌe."

¹⁷ Pyno waho­ꞌopot hap kaipyi miitꞌin iraniaꞌin minug saꞌag kaipyi aiꞌa­piheg hap mesu­wa­ro­tiaria piat hap kaipyi Tupana tikuap sio aito Iesui mohey haria sese sio yt hap sio aito imẽpytꞌin sese aito sio yt hap. Pyno saꞌa­wyꞌi ahãꞌãg Tupana miꞌi hawyi waku pe aito aipuẽti aheĩneꞌen wuatꞌi eꞌat piat hamo. Maꞌato aikotã aru iraniaꞌin meimuẽ wuaria yt sehay wakuat Iesui etiat yt kyꞌesat i haria ete aikotã aru miꞌiria ete. Kat som aru Tupana tunug miꞌiria ete yt tomi­ky­ꞌesat nug neran i haria ete. Taꞌi miꞌiria ete poꞌog poꞌog saꞌag topy­huꞌat iꞌatuepiat hoꞌopot hamo. Mesuwat rotiat hoꞌopot hit iꞌatuepiat hap kaipyi hoꞌopot hap te topy­huꞌat wuatꞌi eꞌat pe iꞌatuete."

¹⁸ Pyno niatpo kahato aheha­kye­raꞌat hap Tupana mimoe­waku koꞌi aito pytkai. Maꞌato aikotã aru iraniaꞌin yt Tupana kyꞌesat i haria iraniaꞌin mesu­wa­ro­tiaria yt naku i nug haria ete aikotã aru miꞌiria ete mekewat eꞌat pe. Taꞌi aitoria wato­py­huꞌat Tupana mieha­kye­raꞌat koꞌi wo maꞌato miꞌiria yt karãpe i iꞌatue­ha­kye­raꞌat hap topy­huꞌat."

¹⁹ Pyno areꞌe ehepe — Miitꞌin miky­ryꞌi hamo o eweikup­teꞌen Iesui mohey haria eipe pote waku eweikup­teꞌen no Iesui mohey haria wo are. Waku ewetunug no Tupana miky­ꞌesat ewywuat. Waku eweiꞌe Tupana kape — Tupana atum uipiit uiwa­nẽtup hap uipyꞌa piat uheĩneꞌen hap yne atum epe. Uiku­ꞌuro pote uiku­ꞌuro maꞌato yt atoiat hin i waku nug hap. Iꞌewyte yt atoiat hin i emohey hap uinug hat En mote Tupana watoꞌe waku. Miꞌi pote atikuap yt uiꞌatoiat hin i hap. Miꞌi pote epo pe atum uipiit uipãꞌãu uiwa­nẽtup hap uinug hat waku watoꞌe miitꞌin miky­ryꞌi hano watoĩ­neꞌen turan Iesui mohey haria aito pote.

"

5

¹ Pyno uito Peteru iporo rakat areĩneꞌen. Eiꞌa­pykok hat areĩneꞌen. Pyno uhehay teran Iesui mohey haria apykok haria pe. Woro­ho­ꞌo­nãpin neran eipe. Uito ti Iesui potmuꞌe sese uito. Araꞌa­kasa yne Aika­ꞌiwat ikuꞌuro hap kape. Araꞌa­kasa aikotã hoꞌopot hap kape. Iꞌewyte araꞌa­kasa Iesui wẽtem guꞌuro pywiat hap kape. Araꞌa­kasa Iesui Tupana mõtypot hawe hẽtyhot hap pyꞌa­setpe araꞌa­kasa. Miꞌi hap ewy tut irane. Miꞌi hap kape iꞌewyte araꞌa­kasa uimu­ꞌetu wuat ewy are."

² Miꞌi pote woro­ho­ꞌo­nãpin eipe uipyꞌa pyi aikotã watopoi aihũria yne eꞌat pe aikotã wati­ꞌa­pykok aihũria wãtym muo. Miꞌi hap ewy eweiꞌa­tupoi Tupana ehay wo Iesui mohey haria Tupana hũria eimi­ꞌa­pykok koꞌi are. Eweiꞌa­tu­ꞌa­pykok o Tupana hũria ahiag mupi yt naku i nug hap pupi are. Eweiꞌatoiat ro mekewat eiwa­nẽtup hawe — Yt atunug neran i e hap. Miꞌi hawyi eweiꞌa­tu­ꞌa­pykok Iesui mohey haria yne eipyꞌa pyi yne ehepiat kyꞌesat hap wywo. Uiwy­riaꞌin karãpe putꞌokꞌe mekewat eiwa­nẽtup hawe — Atiky­ꞌesat uhekat kahato Tupana hũria kaipyi. Iꞌewyte areĩneꞌen neran hekat rakano Tupana hũria apykok hap saꞌup kaipyi e hap pupi eiweꞌeg wo kahato o are. Katu­pono yt naku i wati­ky­ꞌesat kahato Iesui mohey haria ekat koꞌi. Pyno waku watu­we­potpap iꞌatu­muꞌe hap ete poꞌog miitꞌin kyꞌe hap aikai waku. Yt naku i watoket neꞌi. Waku aiwa­nẽtup hawe aiperup yn aipotpap turan miitꞌin muꞌe Iesui etiat hap turan are ehepe nagnia pe aiꞌa­pykok haria pe are."

³ Yt naku i wati­ꞌa­tu­po­ꞌoro poꞌoro ahehay pirik hap wywo aihũria kat pote aihũria Tupana saꞌy­ruꞌin saki­ꞌytꞌin. Miꞌi pote poꞌog waku wati­mo­herep Tupana hũria pe muꞌap ikahu rakat. Waku wato­py­huꞌat Iesui iãꞌãkap koꞌi wo ewywuat no. Miꞌi hawyi waku watoꞌe aimi­mu­ꞌeria pe — Ereĩneꞌen no eweikup­teꞌen no aikotã areĩneꞌen waku hap ewy waku watoꞌe. Waku watu­we­potpap poꞌog aihũria kai. Miꞌi hap kaipyi taꞌa­tukuap aikotã waku taꞌa­tunug hap koꞌi wakuap koꞌi are."

⁴ Pyno karãpe wati­ꞌa­tu­ꞌa­pykok aihũria turan waku watu­wa­nẽtup kahato Aiꞌa­pykok hat toĩneꞌen hap kape. Miꞌi kaipyi ahaꞌup sese tut aru. Mekewat saꞌup waku rakat aimõ­typot hap sese wuatꞌi eꞌat piat tut Aiꞌa­pykok hat Iesui kaipyi aru watoꞌe aiwa­nẽtup hawe. More­kuaria mesu­wa­ro­tiaria teꞌe­ru­we­painug kahato nu imehit rakat wywo teꞌe­re­we­painug kahato taꞌa­tu­ꞌakag ete. Hekat kahato rakat ewy teꞌe­re­we­painug more­kuaria mesu­wa­rote. Miꞌi hap ewy Tupana tum aru ahepe aipotpap saꞌup. Maꞌato aipainug hap wuatꞌi mimõ­typot koꞌi wato­py­huꞌat aru wuatꞌi eꞌat piat more­kuaria ewywuat aipainug hap are.

"

⁵ Pyno uito Peteru atiꞌa­tu­nãpin neran mesuwe kurumꞌin. Makup­tiaria woro­ho­ꞌo­nãpin neran eipe. Uiwy­riaꞌin eweimõ­typot ro nagnia are. Ewetunug no eiꞌa­pykok haria miky­ꞌesat koꞌi. Karãpe eiꞌa­pykok haria eipo­ꞌoro hawyi meremo ewetunug iꞌatu­mi­ky­ꞌesat koꞌi. Eweikup­teꞌen no miitꞌin mimuꞌe koꞌi wo — Uimuꞌe ro eweiꞌe ro nagnia pe. Eweimõ­typot ro iraniaꞌin eiwo­ꞌo­mõ­typot eiwo­ꞌope are ehepe. Eweiꞌatoiat ro mekewat — Uito poꞌog iraniaꞌin kai e hap. Miꞌi hawyi aikotã watopag sokpe pakup hap ewy eweipag wẽtup wanẽtup hap ikahu rakat eipyꞌa pe mekewat — Atikuap teran uhyt mana e hap mekewat — Uimuꞌe ro e hap mekewat paaꞌeiꞌe hap wywo eiwe­painug o aikotã sokpe pakup hap ewy. Katu­pono — Uito poꞌog iraniaꞌin kai e hat Tupana mimohit no aru topy­huꞌat. Tupana yt tiky­ꞌesat i — Uito poꞌog iraniaꞌin kai e haria wo watu­kup­teꞌen. Maꞌato paaꞌe haria kape yn tehaꞌat. Miꞌiria pe tutum kahato hegyiꞌat hap kaipyi tekat yne tomi­mõ­typot koꞌi pe are."

⁶ Pyno uiwy­riaꞌin ipakup takaria waku eweiꞌe Tupana kape — En ni poꞌog poꞌog uikai. Uimuꞌe ro. Aremohit epyꞌa­setpe Tupana. Paaꞌare areĩneꞌen epo pe Tupana. Iꞌewyte areĩneꞌen neran yt uwe i uimõ­typot mesu­wa­rote. Atikuap taꞌyn uito kurum te ipakup takat re waku eweiꞌe Tupana pe. Mio tã eweiꞌe pote meiũran Tupana mimõ­typot no eweipy­huꞌat mesuwat yi tote. Iꞌewyte miitꞌin akag wo miitꞌin apykok hano eweipy­huꞌat. Kurum hin pĩꞌã hin Tupana mikyꞌe koꞌi kahato wo eipe are."

⁷ Miꞌi pote waku eweiꞌe Tupana pe — Tupana aikotã miitꞌin timohy yrysakag ipotyi rakat hero iꞌakag ete miꞌi hap ewy etihep uhetiat uhero hap uipyꞌa piat hap. Wẽtup ok po pe wẽtup ok akag note aikotã taꞌa­tue­reto mekewat yrysakag ipotyi rakat ewy. Miꞌi hap ewy atoiat yne uiwa­nẽtup hap ipotyi rakat ewywuat kowoꞌi kowoꞌi hap koꞌi. Aikotã aikotã aru atunug uiꞌe hap koꞌi atoiat yne epo pe eꞌakag ete Tupana eweiꞌe. Kat pote uikyꞌe kahato hat En waku eweiꞌe kurum iwasuria makup­tiaria are.

"

⁸ Pyno eiweꞌeg wo o ahiag mupi kurum iwasuria makup­tiaria i are. Aikotã sura­raꞌin ewy eweikup­teꞌen. Eiweꞌeg wo kahato o ahiag mupi kat pote ehewa­nĩkap sese toĩneꞌen ahiag kurum iwasu koꞌi makup­tiaria. Pyno eweikup­teꞌen aikotã moryꞌa epo pe hap ewy. Kat pote ahiag awyato marakꞌa hap ewy toĩneꞌen kowoꞌi kowoꞌi hewyry rakat ewy hesyꞌat rakat ewy. Toikat kahato Tupana hũria ipakuptia u hamo are."

⁹ Pyno etiꞌawa ahiag — Wãiꞌe­weiꞌe ahiag me. Iesui mohey hat uito eweiꞌe. Karãpe eweho­ꞌopot kahato Iesui mohey haria eipe pote yt ewehe­haꞌat reiꞌo yi kape kat pote iraniaꞌin mesu­wa­ro­tiaria pyꞌa­setpe kurum iwasuria makuptia eiperia ewy tukup­teꞌen hoꞌopot hawe. Taꞌa­tukuap wy miꞌi pote waku hesaika rakaria ewywuat eweikup­teꞌen ahiag sopo hamo are."

¹⁰ Maꞌato Tupana ti eipo­wyro kahato hat toĩneꞌen uiwy­riaꞌin ipakup takaria. Tutum neran ehepe yne tesaika hap yt kat saꞌup i. Toiky­ꞌesat kahato eiperia tomi­mõ­typot koꞌi wuatꞌi eꞌat piat hano. Kat pote Aipo­typot Iesui mohey haria eipe pote. Pyno hoꞌopot hap yt motꞌi hamuat i toĩneꞌen. Mũki­ꞌite eꞌihotꞌok eꞌihotꞌok hap ewy tokosap taꞌyn. Pyno waku etuꞌu hoꞌopot hap mesup miꞌi hawyi meiũran Tupana mimotag koꞌi wo eweikup­teꞌen waku rakaria hãpyk kahato rakaria wo. Yt uwe mimaꞌat koꞌi wo i eweikup­teꞌen. Meiũran Tupana ehay wywo ehesaika eweikup­teꞌen. Miꞌi hawyi meiũran eiwa­nẽtup hap yt kowoꞌi kowoꞌi hin i toĩneꞌen. Hesaika rakaria wo Tupana mohey haria ewy eweikup­teꞌen eweho­ꞌopot hap tokosap hawyi ehãꞌãg hap tokosap hawyi are yne pe nagnia pe makup­tiaria pe kurum iwasuria pe hira­karia pe yne pe are."

¹¹ Uito eiꞌa­pykok hat Peteru mio tã are yn Tupana pe — Atiky­ꞌesat kahato emõtypot hap mesu­wa­rote are. Atiky­ꞌesat yne miitꞌin epo pe are. Mesup mũki­ꞌite wuatꞌi eꞌat pe atiky­ꞌesat En Miitꞌin Potypot Koro wo are. Pyno waku toran naꞌyn uiꞌe hap uito Peteru."

¹² Pyno uito Siwanu atunug mesuwat miwan. Peteru wẽ pyi atiwan yne mesuwat sehay. Uhet wyti Siwanu. Uito areĩneꞌen aikotã eheywyt eikywyt yt eimaꞌat hat hin i ewywuat i areĩneꞌen. Atipo­ꞌoro mesuwat Peteru miwan Peteru e hap ehowawi uimiwan miat. Yne miitꞌin tikuap uimiwan aikotã aikotã atunug hap. Taꞌi heremo kahato uimiwan kaipyi uwe uito hap. Yt iwato hin i uimiwan. Pyno pywo kahato aimuꞌe mesuwe Peteru. Uiꞌe hap ewy kahato toꞌe mesuwe. Areꞌe Peteru e hap ewy uito. Taꞌi wato­py­huꞌat ahãꞌãg hap turan waho­ꞌopot turan miꞌi pote wato­py­huꞌat wuatꞌi eꞌat pe Tupana mipoi­tyro koꞌi wo. Tupana aikyꞌe kahato pote waku wato­py­huꞌat yꞌam me hap ewy sura­raꞌin ewy. Yt karãpe i watoiat aikyꞌe hat hegyiꞌat kahato pote are."

¹³ Pyno Iesui mohey haria mesuwe kuekatu taꞌa­tu­po­ꞌoro ehowawi are. Saꞌa­wyꞌi ti Iesui uiꞌairo mesuwe Tosa­ꞌyru eropat hat wo uiꞌairo are. Aikotã taꞌa­tu­ꞌairo eipe hap ewy. Miꞌi pote kuekatu atipo­ꞌoro ehowawi. Iꞌewyte yne uiwy­woria Iesui mohey haria kuekatu ehowawi taꞌa­tu­po­ꞌoro. Urupo wywo yꞌam me urueko ewy uruipo­ꞌoro kuekatu ehowawi. Uhaꞌyru iꞌewyte toĩneꞌen mesuwe. Uhaꞌyru set Maku. Miꞌi iꞌewyte kuekatu toipo­ꞌoro ehowawi are."

¹⁴ Uiwy­riaꞌin eiwo­ꞌo­kyꞌe ro eiwo­ꞌope. Waku eiwo­ꞌo­kyꞌe eiwo­ꞌope aikotã wẽtup mẽpytꞌin koꞌi ewy. Pyno ahẽtup Tupana pe — Tupana etunug no miꞌiria Esaꞌyru mohey haria wẽtup miit ewy are. Etunug miꞌiria woꞌo­kyꞌe kahato haria wo Tupana are kat pote taꞌa­tu­mohey Esaꞌyru Iesui pote are. Taꞌa­tu­mohey Emipo­ꞌoro Urupo­rekuat nuat pote are. Pyno toran naꞌyn uiꞌe hap are.

Uito ti Peteru"