1

¹ Uito Iesui ywyt sese Tiaku. Iesui ti uheykeꞌet sese are. Pyno meiũ uito Tiaku uimiwan atipo­ꞌoro ehowawi. Uito ti Tiaku Tupana eropat hat iꞌewyte Aika­ꞌiwat Aipo­typot Iesui eropat hat uito are. Koitywy atipo­ꞌoro uiꞌe hap torania kape Tupana mẽpytꞌin aimẽpuo aimẽpuo yi wato hap ok tã tukup­teꞌen hap kape."

² Uiwy­riaꞌin karãpe putꞌokꞌe ahete aikotã aikotã miky­ryꞌi hap hoꞌopot hap ahãꞌãg hap miꞌi pote waku watu­wehum kahato Tupana kape."

³ Miꞌi hap watunug mote poꞌog ihãite ahepiat imohey hap. Miꞌi hawyi wahaty sepap neꞌi raꞌyn karãpe wẽtup ok kaipyi raꞌyn ahãꞌãg hap putꞌokꞌe turan."

⁴ Waku yt watu­wemig i ahãꞌãg hap pupi. — Waku arakosap aru hoꞌopot hap sakpo watoꞌe yn waku yn aipyꞌa pe. Miꞌi hap watunug motꞌi pote Iesui mohey haria wo kahato watoĩ­neꞌen hãpyk sese rakat hap ete. Wahupit kuap waho­ꞌopot hap ahãꞌãg hap pote ti hekat kahato rakaria ewy watoĩ­neꞌen Tupana wanẽtup hawe.

"

⁵ Karãpe yt watikuap i kat som waku watunug hãpyk takat ahãꞌãg hap putꞌokꞌe turan miꞌi hap eꞌat pe waku wahẽtup kahato wuatꞌi kuap sese hat Tupana kape. Miꞌi hawyi aikotã waku hamuat tohenoi kahato ahepe towese popuo aimuꞌe yt ahatyꞌi hatyꞌi popuo hin i ainãpin Tupana."

⁶ Imohey kahato hap wywo yn waku wahẽtup aimo­weꞌeg hamuat wahẽtup Tupana pe. Yt naku i wahẽtup Tupana pe imohey ran hap wywo. Maꞌato karãpe wahẽtup imohey ran hap wywo neꞌi pote ahehay yt aiwesat i wyti aru imohey ran nywo neꞌi wahẽtup wote. Yt naku i imohey hap kowoꞌi kowoꞌi aiwa­nẽtup hap mywo wahẽtup. Maꞌato miꞌi hap wywo wahẽtup pote wato­py­huꞌat aikotã yꞌy hyemueri piat ewy neꞌi aiwa­nẽtup hap. Aikowo aikowo wasere wato upi hap ewywuat watoĩ­neꞌen aiwa­nẽtup hawe imohey hap upi. Yt naku i are."

⁷ Aikowo aikowo neꞌi imohey hap aiwa­nẽtup hawe pote yt naku i kahato wato­py­huꞌat katu­pono atimohey kahato Tupana watoꞌe iraniaꞌin me maꞌato yt pywo pe i katu­pono typy ihay rakat ewy watoĩ­neꞌen aiwa­nẽtup hawe."

⁸ Karãpe wahẽtup Tupana kaipyi aimi­ky­ꞌesat koꞌi maꞌato yt wato­mohey kahato i hap wywo pote typy ehay rakat ewy watoĩ­neꞌen. Yt naku i watoꞌe Tupana pe — Woro­mohey En Tupana wen maꞌato yt atikuap i sio etum aru uimiẽtup sio yt watoꞌe pote kowoꞌi kowoꞌi wato­mohey typy wanẽtup haria wato­py­huꞌat. Miꞌi hap ewy wahẽtup pote aimiẽtup yt heremo hin i Tupana wanẽtup hawe. Miꞌi pote yt tutum kuap i aimiẽtup Tupana tuwe­kaipyi.

"

⁹ Karãpe wato­mohey Iesui hawyi hoꞌopot kahato hap topy­huꞌat ahete katu­pono iraniaꞌin yt imohey i haria yt iꞌatu­wese hin i ahete — Yt naku i kahato eipe iꞌatuꞌe ahepe. Miꞌi hawyi aheha­ky­ꞌeꞌi kahato hap toĩneꞌen ahete. Miꞌi pote yt naku i aiwa­nẽtup hap yi kape are. Yt naku i watu­we­mõti imohey hap ete katu­pono Tupana wanẽtup hawe waku pe watoĩ­neꞌen."

¹⁰ Hekat rakaria miitꞌin mimõ­typot koꞌi tukup­teꞌen mesu­wa­rote iꞌatuꞌe maꞌato Tupana wanẽtup hawe imohey haria hekat rakaria ewy tukup­teꞌen katu­pono yne Tupana wanuat toĩneꞌen imohey haria po pe. Miꞌi tupono waku hekat rakaria mesu­wa­rote aito pote waku watu­wehum Tupana kape are maꞌato yt naku i watu­wehum ahekat ete — Uito poꞌog uhekat watoꞌe aiwa­nẽtup hawe. Waku paaꞌe haria wo wato­py­huꞌat aheka­reꞌen koꞌi ete katu­pono ikuꞌuro irane miꞌiria hekat rakaria pytkai. Miꞌi hawyi aiku­ꞌuro hawyi yt kat i ahekat mesu­wa­rote. Taꞌi aheĩneꞌen hap mesu­wa­rote ipohyt koꞌi ewy kahato. At hakup kahato hawyi igag ipohyt hawyi iteneg naꞌyn hawyi ikuꞌuro."

¹¹ Pywo ipohyt ewy kahato hekat rakaria tukup­teꞌen. Mesup hekat kahato rakaria tukup­teꞌen miꞌi hawyi mũki­ꞌite satek hap eꞌat pe hawyi ihaky­ꞌeꞌi kahato rakaria wo tukup­teꞌen ipohyt teneg ewy. Karãpe Tupana ainug hekat rakano miꞌi pote waku watu­wehum kahato ahekat nug hat Tupana ete. Iꞌewyte karãpe yt aheka­reꞌen kahato i hap putꞌokꞌe ahete waku watu­wehum kahato wy Aimo­wepit hat Tupana ete are katu­pono watikuap yt ahekat kaipyi i aimo­wepit sese hap tut. Waku watoꞌe — Taꞌi ahekat mesu­wa­rotiat ipohyt ewy waku watoꞌe mesup. Ikahu kahato tig wen maꞌato mũki­ꞌite toto raꞌyn. Miꞌi hap ewy ahekat yt toĩneꞌen motꞌi hin i waku watoꞌe ahatek hap eꞌat pe mesuwe.

"

¹² Maꞌato uwe uwe tepiat hoꞌopot turan te haky­ꞌeꞌi turan yt iwaure i imohey hap miꞌi hat ti Tupana mimo­waku wo toĩneꞌen iꞌewyte Tupana mimo­wepit kahato wo topy­huꞌat wuatꞌi eꞌat pe katu­pono hoꞌopot hap sakpo gosap hat toĩneꞌen imohey hat. Miꞌi hat pe Tupana toꞌe aru — Uikyꞌe hat sese en e. Miꞌi pote woro­moieĩ­neꞌen kahato wuatꞌi eꞌat pe e yt tewaure i haria pe."

¹³ Karãpe ahãꞌãg hap toĩneꞌen ahete yt naku i nug hamuat miꞌi pote yt naku i watoꞌe aipyꞌa pe — Tupana ti uhãꞌãg kahato yt naku i nug hamo yt naku i watoꞌe katu­pono Tupana yt ahãꞌãg kuap i saꞌag nug hamo i. Iꞌewyte yt wahãꞌãg kuap i Tupana saꞌag nug hap ete aito."

¹⁴ Aiwa­nẽtup hap miky­ꞌesat saꞌag kaipyi ti tuwẽtem ahãꞌãg saꞌag nug hamuat hap. Aimi­ky­ꞌesat saꞌag aipyꞌa piat aimaꞌat hamuat topy­huꞌat aikotã ewamiri miat hãꞌãg hap ewy. Aimi­ky­ꞌesat ahãꞌãg kahato yt naku i nug hamuat. Wahãꞌãg hawyi wato­py­huꞌat aimaꞌat hawe aikotã hapiri topy­huꞌat ewamiri pe hap ewywuat."

¹⁵ Aimi­ky­ꞌesat saꞌag koꞌi ahepiat iꞌaparap hap toĩneꞌen. Aiwa­nẽtup saꞌag hap aikotã aikotã waku watunug aru aiminug saꞌag ainug yt naku i nug haria sese katu­pono meremo watuwat aiwa­nẽtup saꞌag hap koꞌi upi. Watunug aimi­ky­ꞌesat saꞌag koꞌi hawyi saꞌag nug haria wo raꞌyn wato­py­huꞌat Tupana wanẽtup hawe. Miꞌi hawyi Tupana uiꞌa­piheg hap yn topy­huꞌat aiwa­nẽtup hawe."

¹⁶ Yt naku i watu­we­maꞌat uiwy­riaꞌin are. Yt naku i watunug aimi­ky­ꞌesat saꞌag. Waku watoiat aimi­ky­ꞌesat koꞌi yt naku i nug neran hap koꞌi.

"

¹⁷ Tupana ti hẽtyhot kahato rakat ewy toĩneꞌen. Tupana ti at nug hat waty nug hat iꞌewyte wuatꞌi waikiru nug hat wyti Miꞌi. Tupana yne wakuap nug hat. Yt kat hin i saꞌag Tupana tunug. Yne imienoi koꞌi hãpyk yn naꞌyn. Ewaty at yt hẽtyhot motꞌi i ahowawi. Hẽtyhot rokirẽ yt raꞌyn tuereto at waty waikiru koꞌi wen maꞌato Tupana sese yt miꞌiria tominug koꞌi yt ewywuat hin i toĩneꞌen. Tupana ti poꞌog poꞌog aipo­wyro hat tominug at waty waikiru koꞌi kai. Miꞌi ti poꞌog poꞌog ipotpap at kaꞌap wyti aipoi­tyro hamuat. Yt kat saꞌup i watum pytkai tutum yne yne ahepe tekat koꞌi aimo­wepit hamuat koꞌi. Hẽtyhot at kaꞌap Tupana."

¹⁸ Tehay pywuat sese wo ainug tomẽ­pytꞌin koꞌi. Miꞌi hawyi aito wato­py­huꞌat Tupana mowepit kahato haria aikotã aimikoi pakup haat rakat aimo­wepit hap topy­huꞌat. Miꞌi hap ewy aito Iesui mohey haria wato­py­huꞌat Tupana mowepit hanuaria wo sese katu­pono — Poꞌog poꞌog uimi­ky­ꞌeria eipe torania uiminug koꞌi kai e Tupana ahepe tosa­ꞌy­ruꞌin me tosa­ki­ꞌytꞌin me.

"

¹⁹ Uiwy­riaꞌin waku wyti watu­we­waure kaꞌa kahato aimuꞌe haria mienoi kape. Waku watu­wa­nẽtup kahato hawyi waku aiweꞌeg ahehay. Yt naku i iũteꞌen hap wywo. Yt naku i aipy­ꞌahak hap wywo neꞌi wati­wesat aiwy are. Yt etiwaure teiꞌo miꞌi hap nug hamuat. Uiwy­riaꞌin waku ehewaure kaꞌa kahato aimuꞌe haria ehay kape. Waku watu­wa­nẽtup kahato. Waku aiweꞌeg hap wywo ahehay yt kat i iũteꞌen hap wywo. Yt naku i aipy­ꞌahak hap wywo wati­wesat iũteꞌen. Yt etiwaure teiꞌo miꞌi hap nug hamuat. Uiwy­riaꞌin waku ehewaure kaꞌa kahato aimuꞌe haria ehay kape. Waku watu­wa­nẽtup — Uimuꞌe o uiwy e hap yn aiwa­nẽtup hawe waku watoꞌe."

²⁰ Tupana tiky­ꞌesat kahato wyti hãpyk takat yn miꞌi tupono ti aiwo­ꞌo­py­ꞌahak hap kaipyi neꞌi yt watunug kuap i Tupana miky­ꞌesat ewywuat koꞌi."

²¹ Waku ti watoiat yne yne aiminug yt naku i hap koꞌi iꞌewyte yne aheko saꞌag nug hap koꞌi. Miꞌi hawyi ti waku watu­we­waure kaꞌa kahato Tupana ehay kape paaꞌaiꞌe hap wywo yn katu­pono Tupana yn aheha­kye­raꞌat kuap tehay wo. Miꞌi pote — Uimuꞌe kahato ro ehay nug hamo waku watoꞌe Tupana pe. Tupana etikoi kahato o ehay uiwa­nẽtup hawe waku watoꞌe. Yt naku i aheko saꞌa­wy­ꞌiwuat ewywuat ahewaire waire nug hap."

²² Yt naku i ti ahewaure kaꞌa wo yn watu­we­wa­nẽtup Tupana ehay kape. Ahewaure pe yn Tupana ehay toĩneꞌen mote ti aiwe­maꞌat hap yn toĩneꞌen katu­pono ihay watunug hap kaipyi Tupana miky­ꞌesat wy. Toiky­ꞌesat kahato aheko towat ewy hap toiky­ꞌesat. Toiky­ꞌesat tehay hẽtyt rakat ewy hap aimikoi ewy hap toiky­ꞌesat. Tomi­ky­ꞌesat nug hepiat hap wyti toiky­ꞌesat."

²³ Yꞌy kape wate­haꞌat aipãꞌãu kape watu­wepiok kahato aipãꞌãu kape. Aikotã aipiit aikotã aipainug hap aikotã aikahu hap wate­haꞌat aipãꞌãu yꞌy piat kape. Maꞌato wate­haꞌat kahu hawyi wato i raꞌyn hawyi meremo wati­waure raꞌyn aikotã ahowapy aikotã hap."

²⁴ Miꞌi hap ewy ti Tupana ehay watikuap saꞌag hawyi wato hawyi wati­waure raꞌyn watikuap saꞌa­wyꞌi rokirẽ wuat pytkai."

²⁵ Maꞌato ahewaure kaꞌa kahato Tupana ehay kape — Atikuap teran kahato ehay watoꞌe Tupana pe hawyi watu­we­waure kaꞌa kahato Tupana piat ainãpin hãpyk takat kapiat hawyi watu­we­muꞌe kahato hawyi watikuap kahato inug hamuat hap. Watunug Tupana miky­ꞌesat ewy hawyi Tupana aimo­wepit kahato aiminug upi katu­pono watunug iꞌe hap ewy kahato hawyi aipoi­tyro kahato yne aiminug ete.

"

²⁶ Karãpe yt wãiwa­toꞌe i ahehay saꞌag hap miitꞌin ete miꞌi pote yt kan hamo i — Tupana mohey kahato hat uito watoꞌe katu­pono wemaꞌat haria wo i watoĩ­neꞌen. Yt kan hamo i ahehay miitꞌin muꞌe hap ete katu­pono taꞌa­tukuap typy ihay rakaria aito hawyi ahehay Tupana ete ihay se wen maꞌato ahehay iraniaꞌin ete yt naku i katu­pono sehay iꞌewyte saꞌag tuwẽtem aiwẽ pyi wy."

²⁷ Uwe uwe yt ity i yt iꞌywot i rakat powyro hap kaipyi Aiꞌywot atipy piat Tupana tikuap kahato tomohey hat sese pywo sio yt hap. Uwe uwe hiwuria powyro hap koꞌi toikuap aito tomohey hat sese pywo sio yt hap e. Uwe uwe hatek takaria powyro hap koꞌi toikuap tomohey hat sese pywo sio yt hap e. Karãpe iraniaꞌin ahãꞌãg yt naku i nug hamo maꞌato yt watuwat i iꞌatuꞌe hap upi — Uito Iesui mohey hat pote yt atunug neran i te watoꞌe. Mio tã watoꞌe hawyi Aiꞌywot atipy piat tikuap kahato aito tomohey sese haria wo raꞌyn aikuap are uito Tiaku.

"

2

¹ Uiwy­riaꞌin Apotypot Koro Iesui ti wuatꞌi mimõ­typot nuat topy­huꞌat. Miꞌi tupono ti waku wati­ꞌa­tu­mõ­typot iraniaꞌin. Yt naku i uimi­ꞌai­roria yn i miitꞌin wati­ꞌa­tu­kyꞌe. Maꞌato Aika­ꞌiwat tiꞌa­tu­kyꞌe yne miitꞌin torania hap ewy waku wati­ꞌa­tu­kyꞌe yne. Yt naku i wati­ꞌairo aiwy­riaꞌin iꞌatuekat hap upi iꞌatu­we­painug hap upi neꞌi are. Yt naku i wati­ꞌa­tu­kyꞌe aiꞌy­wania koꞌi yn."

² Karãpe aiwo­ꞌo­muꞌe hawe tut wẽtup ok miit hekat rakat wuatꞌi iwat toĩ tuwe­painug hesokpe ikahu ipuꞌiãpiat imehit. Iꞌewyte tut wy wẽtup ok yt hekat i rakat hesokpe saꞌag wywo tut."

³ Miꞌi hawyi watoꞌe hekat rakat pe — Uiwy kahato en. Waku eraꞌapyk mesuwe eꞌamyap ikahu rakat rote maꞌato miꞌi hawyi yt hekat i rakat pe — Pyno waku en itote yꞌam me ro ereĩneꞌen sio yi tote ro eraꞌapyk watoꞌe hap kaipyi Aiꞌywot Tupana aikuap."

⁴ Uiwy­riaꞌin yt naku i wati­mohit hatek takaria yt hekat i rakaria. Maꞌato wati­mohit miitꞌin yt hekat rakaria i yt uwe wat i mimõ­typot koꞌi yt hekat i rakaria pote meremo Tupana tikuap aiminug yt naku i hap. Tupana tiꞌa­tu­kyꞌe yne aito sio aipiit ikahu sio yt. Sio ahesokpe ikahu sio yt kat i ahesokpe toiꞌa­tu­kyꞌe torania aitoria topyꞌa pe. Waku Tupana ewy wati­ꞌa­tu­kyꞌe torania miitꞌin sio hekat rakat sio yt. Waku wati­ꞌa­tu­kyꞌe iraniaꞌin Tupana aikyꞌe hap ewy. Miitꞌin ekat kyꞌewi hap neꞌi wati­ꞌairo aiwy­riaꞌin mote — Uito poꞌog e hat ewy watoĩ­neꞌen Tupana wanẽtup hawe katu­pono wati­kyꞌe miitꞌin iꞌatukat kyꞌewi hap wywo neꞌi. Wẽtup kyꞌe hamo yn waku wati­ꞌa­tu­kyꞌe miitꞌin sio more­kuaria sio miit emiit koꞌi."

⁵ Pyno ewetum no ehewaure kaꞌa uhepe uimi­kyꞌe koꞌi. Yt eweikuap i te apo aikotã Tupana tiꞌairo kahato yt hekat i rakaria Iesui mohey kahato hanuaria wo hap. Poꞌog toiꞌairo ihaky­ꞌeꞌi rakaria temiit no tetama pianuaria wo iraniaꞌin kai katu­pono saꞌa­wyꞌi toꞌe — Uhemiit sese wyti aru tukup­teꞌen miit emiit haria wo karãpe arepy­huꞌat Wuatꞌi Miitꞌin Morekuat Koro mesu­wa­rote e Tupana miwan me saꞌa­wyꞌi. Mio tã toꞌe hap ewy raꞌyn ti mesup te toiꞌairo temiitꞌin no miit yt uwe mikuap ewywuat koꞌi i yt uwe mikyꞌe ewywuat koꞌi i e. Miꞌiria pe ti — Woro­ho­ꞌo­ꞌairo eipe miitꞌin pore­kuaria wo uimohey sese haria eiperia pote e. Woro­ho­ꞌonug eipe morekuat no yne mesuwat yi tote e hatek takaria pe tokyꞌe sese haria pe. Woro­ho­ꞌo­moe­saika uimohey kahato hap wywo wuatꞌi nug hamo e Tupana tomohey haria pe."

⁶ Eiperia yt hekat i rakaria pote hekat rakaria eimohit reran neꞌi. Yt naku i taꞌa­tunug hekat rakaria. Taꞌa­tu­ꞌa­tu­ky­ꞌesat wyti eiwe­te­weru taꞌa­tuepiat hap yn taꞌa­tu­ky­ꞌesat. Miꞌi hawyi yt ewehaꞌup nug i raꞌyn eiwe­te­weru hap hawyi ti ehereto raꞌyn sura­raꞌin kape eiꞌa­piheg hamo. Yt ewenug neiꞌo miꞌiria ewy neꞌi are."

⁷ Aipo­typot Iesui set mohit kahato haria wyti hekat rakaria. Yt iꞌatu­weꞌeg hin i miꞌiria katu­pono Tupana ahetꞌok Iesui set upi. Yt kat set i poꞌog Iesui set kai ikahu rakat ahepe. Iesui ti Aika­ꞌiwat koro maꞌato yt taꞌa­tu­mõ­typot hin i Aika­ꞌiwat.

"

⁸ Saꞌa­wyꞌi Aipo­typot Iesui aimuꞌe tehay pywuat sese wo. Mio tã e — Waku wati­ꞌa­tu­kyꞌe kahato iraniaꞌin aiwe­kyꞌe kahato hap ewy e ahepe ainãpin hap sese."

⁹ Pyno waku watunug Aika­ꞌiwat koro ainãpin hap ewy yn waku watunug. Waku wati­ꞌa­tu­kyꞌe torania miitꞌin aiwe­kyꞌe hap ewy. Maꞌato waho­ꞌo­kyꞌe miitꞌin hekat hap upi ikahu hap upi miꞌi pote Aimuꞌe hat ainãpin hat ehay pun haria wo wato­py­huꞌat. Miꞌi hawyi yt nakuaria i wo wato­py­huꞌat Tupana wanẽtup hawe. Waku wati­ꞌa­tu­kyꞌe torania miitꞌin watu­we­kyꞌe kahato hap ewy e ahepe.

"

¹⁰ Tupana tiky­ꞌesat kahato watunug wuatꞌi tepiat ainãpin hap maꞌato wati­ꞌa­parap wẽtup ainãpin hap miꞌi hawyi yt naku i nug haria wo raꞌyn watoĩ­neꞌen. Wẽtup yn aimi­ꞌa­parap hawyi yt naku i wato­py­huꞌat Tupana wanẽtup hawe katu­pono wẽtup ainãpin hap pe toĩneꞌen yne Tupana piat ainãpin hap wẽtup sehay pe — Aikotã eweiꞌa­tu­kyꞌe iraniaꞌin eiwe­kyꞌe hap ewy e hap. Miꞌi hap yt watunug i mote wati­ꞌa­parap yne Tupana piat ainãpin hap koꞌi."

¹¹ Katu­pono saꞌa­wy­ꞌite Tupana ainãpin miwan me — Yt eweipo­hari teiꞌo wẽtup ok iharyꞌi ete heꞌaito ete e. Iꞌewyte toꞌe — Yt eweiꞌauka teiꞌo miit e tomiwan nu kawiat puretig etiat. Miꞌi hawyi yt wati­po­hari i wẽtup ok iharyꞌi ete heꞌaito ete maꞌato wati­ꞌauka wẽtup ok hawyi Tupana woꞌo­nãpin hap wati­ꞌa­parap kahato katu­pono miit auka hano raꞌyn wato­py­huꞌat raꞌyn.

"

¹² Maꞌato ahowawi Tupana ihaꞌat kahato sio watunug imiky­ꞌesat ewy sio yt hap kape yn. Tupana ihaꞌat ahowawi sio wati­ꞌa­tu­kyꞌe iraniaꞌin aiwe­kyꞌe hap ewy. Miꞌi tupono waku wati­ꞌa­tu­kyꞌe miitꞌin Iesui ewy. Waku aiweꞌeg wo aiminug koꞌi kai ahehay koꞌi kai sio miitꞌin kyꞌe hap toĩneꞌen aikai Iesui miky­ꞌesat ewy sio yt Iesui miky­ꞌesat ewy i watunug hap koꞌi."

¹³ Tupana piat miitꞌin apiheg hap eꞌat putꞌokꞌe raꞌyn turan miꞌi hap eꞌat pe wyti yt kat i raꞌyn Tupana kai iꞌatue­ha­ky­ꞌeꞌi hap meimuẽ waria miitꞌin yt ehaky­ꞌeꞌi kuap i haria ete. Maꞌato iraniaꞌin woꞌo­ha­ky­ꞌeꞌi kuap haria kape yt kat i hin i aru iꞌatu­ꞌa­piheg hap topy­huꞌat katu­pono Tupana tuwehum woꞌo­ha­ky­ꞌeꞌi kuap haria ete.

"

¹⁴ Pyno uiwy­riaꞌin yt naku i ti ahehay wo yn wato­mohey Iesui katu­pono yt wato­mo­herep i ahepiat imohey hap miitꞌin me aiminug wakuap koꞌi miꞌi pote ti yt kat hamo i ahehay se — Uito atimohey kahato Tupana watoꞌe. Uito ti Iesui mohey hat sese aiꞌe hap toĩneꞌen aikai hawyi yt kat i aiminug wakuap koꞌi miitꞌin kyꞌe hap moherep hamuat aikai miꞌi pote ti yt kat i Iesui mohey hap sese toĩneꞌen aipyꞌa pe maꞌato heso rakaria wo watoĩ­neꞌen iraniaꞌin wanẽtup hawe iꞌewyte Tupana wanẽtup hawe."

¹⁵ Karãpe putꞌokꞌe aiꞌyat pe hatek takat Iesui mohey hat yt imiꞌu i rakat yt hesokpe i rakat hawyi yt kat i watum tope maꞌato wahenoi Tupana pe yn — Pyno waku mehĩ mana ahẽtup aru Tupana pe eipo­wyro hamuat watoꞌe yt kat i watum pytkai — Tupana aru epoi mehĩ mana watoꞌe yt kat i miꞌu watum pytkai."

¹⁶ Maꞌato yt kat i watum mote yt karãpe i taꞌa­tu­mohey ahehay — Uruto ti Iesui mohey kahato haria aiꞌe hap. Tupana eipainug watoꞌe yt kat i sokpe ium wywo iꞌatu­po­wyro hamo hawyi yt taꞌa­tu­mohey i ahehay — Uruimohey kahato Iesui aiꞌe hap."

¹⁷ Miꞌi tã watunug pote yt wato­mo­herep hin i iꞌatuepe ahepiat Iesui mohey sese hap are. Miꞌi pote heso rakaria wo watoĩ­neꞌen iꞌatu­wa­nẽtup hawe iꞌewyte Tupana wanẽtup hawe. Uiwy­riaꞌin ikuꞌuro rakat nem kahato rakat yt ikahu hin i toĩneꞌen. Yt uwe miky­ꞌesat ewy hin i toĩneꞌen aikotã iꞌokpuk nem nakat ewy watoĩ­neꞌen aitoria Iesui mohey haria yt hegyiꞌat i rakaria aito hawyi."

¹⁸ Miꞌi hawyi teꞌe­roꞌe iraniaꞌin ahepe — Maꞌato tukup­teꞌen ni Iesui mohey haria yt kat i taꞌa­tu­minug wakuap koꞌi e haria. Miꞌi hawyi eheso kahato are iꞌatuepe katu­pono Iesui mohey hap sese kaipyi tuwẽtem wuatꞌi waku nug hamuat koꞌi are. Yt pote yt kat i Iesui mohey sese hap aikai are iꞌatuepe. Uito ti atimo­herep uhepiat Aika­ꞌiwat mohey hap miitꞌin kyꞌe hap wywo are."

¹⁹ — Uruto ti uruimohey kahato Tupana iꞌatuꞌe uhepe iraniaꞌin. Uruimohey sese Tupana wẽtup yn toĩneꞌen iꞌatuꞌe uhepe. Pyno waku miꞌi tã wato­mohey iꞌatuepe wen maꞌato eiweꞌeg wo o katu­pono iꞌewyte ahiag timohey kahato wy wẽtup yn Tupana toĩneꞌen hap tokenꞌẽ popuo. Ahiagnia timohey Tupana toĩneꞌen hap wen maꞌato yt Tupana miky­ꞌesat ewywuat nug hin i haria wo tukup­teꞌen. Ahiagnia taꞌa­tu­mohey saꞌag pytkai."

²⁰ Yt kan hamo i — Atomohey kahato Tupana watoꞌe hawyi yt kat i watunug wakuap miitꞌin me. Miꞌi tã watunug pote — Heso kahato rakaria eipe iꞌatuꞌe iraniaꞌin ahepe teꞌe­ru­wa­nẽtup hawe. Ahehay wo yn wato­mohey Iesui pote yt aiweꞌeg hin i aito."

²¹ Watikuap taꞌyn aikotã saꞌa­wy­ꞌite ahaꞌa­seꞌi Aparãu tunug nu kawiat heiam aikope aihũ watiwuk Tupana mowepit hamuat hap ewy. Miꞌi hap tote toipo­rokpun tosa­ꞌyru Isaki iꞌauka hamo Tupana piat ipoꞌoro hap ewy. Miꞌi hawyi miꞌi tã iminug kapiat tehaꞌat howawi Tupana hawyi — Waku kahato rakat en Aparãu e Tupana tope. Eminug kaipyi mesup atikuap sese raꞌyn uimohey hat sese en e Tupana tope."

²² — Waku en Tupana katu­pono ahaꞌa­seꞌi pot timo­herep tepiat Tupana mohey hap tominug wo. Imohey hap toimo­herep kahato wuatꞌi pe tominug wo. Toꞌo­ku­pitu kahato imohey hap iminug koꞌi. Iꞌe hap tutunug hap kaipyi Tupana tikuap tomohey hap sese ahaꞌa­seꞌi pot Aparãu saꞌa­wyꞌi."

²³ Aikotã Tupana toꞌe saꞌa­wyꞌi hap ewy — Uiwy kahato ti en Aparãu e. Uimohey hat sese ti en e. Hãpyk kahato rakat en uiwa­nẽtup hawe uiwy e Tupana tope."

²⁴ Uiwy­riaꞌin imohey hap toĩneꞌen ahehay pe yn mote Tupana yt aimo­hãpyk kuap i katu­pono uiminug wakuap kaipyi yn wati­mo­herep kuap Tupana mohey hap sese toĩneꞌen aipyꞌa pe. Maꞌato yt kat i imohey hap moherep hap aikai waku nug hap koꞌi miꞌi pote yt toĩneꞌen i Iesui mohey hap sese aikai maꞌato heso rakaria wo wato­py­huꞌat aito."

²⁵ Saꞌa­wyꞌi mana Irapi timo­herep kahato Tupana mohey tepiat hap katu­pono toiꞌa­tu­po­re­reke toꞌyat pe typy ok surara Isareu ywania Tupana mipo­ꞌoro koꞌi sepiok e hanuaria. Miꞌiria pe mana Irapi timo­herep muꞌap wẽtup iꞌatu­popy hamuat migꞌi wo toimo­herep iꞌatue­ha­kye­raꞌat hap katu­pono iraniaꞌin surara tikat miꞌiria iꞌatu­ꞌuka hamo. Miꞌi hap ewywuat mana Irapi tunug hawyi Tupana tikuap taꞌyn tomohey hat raꞌyn toĩneꞌen hap. Miꞌi hawyi toieha­kye­raꞌat mekewat hary­poria yt iweꞌeg i rakat wuatꞌi ihainiaꞌin wywuat ieĩneꞌen hat pytkai."

²⁶ Pywo ti rat uheka­tu­wyria yt kat i aipãꞌãu pote yt kat hamo i aipiit katu­pono ikuꞌuro raꞌyn. Aheha piat toto hawyi — Ikuꞌuro sese raꞌyn iꞌatuꞌe. Miꞌi hap ewy ti yt kat i miitꞌin powyro hap Iesui mohey hap moherep hap aikai hawyi ikuꞌuro rakat ewy raꞌyn watoĩ­neꞌen yt iwese rakat ewy i yt kat nug hat wo i raꞌyn watoĩ­neꞌen. Yt wati­mo­herep Iesui piat miitꞌin kyꞌe hap iraniaꞌin me ahegyiꞌat hamo pote yt kan hamo i watoꞌe hatek takaria pe — Uruimohey kahato Iesui watoꞌe aiꞌe hap. Pywo ti rat uimienoi are uito Tiaku.

"

3

¹ Uiwy­riaꞌin eiweꞌeg wo o — Uito poꞌog torania kawiat woꞌo­muꞌe hat eiꞌe hap wywo katu­pono miitꞌin muꞌe haria kape yn Tupana poꞌog ihaꞌat sio taꞌa­tu­muꞌe hap ewy taꞌa­tunug sio yt teꞌe­ro­py­huꞌat sio taꞌa­tunug taꞌa­tuepiat miitꞌin nãpin hap ewy sio yt hap kape tehaꞌat kahato Tupana. Maꞌato yt watunug i ahepiat miitꞌin nãpin hap miꞌi pote poꞌog aiꞌa­piheg hap topy­huꞌat aipot­mu­ꞌeria kai katu­pono yt watunug i Tupana ainãpin hap koꞌi pote miꞌi pote ti — Typy ihay haria eipe e aru ahepe Tupana mekewat eꞌat pe karãpe Tupana timo­herep yne miitꞌin me uwe waku uwe yt naku i hap airo hap eꞌat pe. Miꞌi tupono waku perupꞌi puo wati­ꞌa­tu­muꞌe miitꞌin are. Waku watoꞌe aiwa­nẽtup hawe — Yt hãpyk i ahenoi pote atiꞌa­parap kahato Tupana pe waku watoꞌe aipyꞌa pe."

² Pyno torania aito iꞌaparap haria watoĩ­neꞌen. Maꞌato ahehay wo ahẽku wo yt wati­ꞌa­parap i pote yt karãpe i saꞌag nug hano watoĩ­neꞌen katu­pono aipyꞌa piat aiwa­nẽtup hap moherep hap ahehay topy­huꞌat. Karãpe yt wati­ꞌa­parap i ahehay wo pote hãpyk pe kahato watoĩ­neꞌen aheĩneꞌen hap tote. Ahehay hãpyk takat watunug kuap pote watu­we­po­ꞌoro kuap yne aipiit wakuap nug hamo.

"

³ Aihũ Kawaru wẽ sakpo wati­kytyt saity hawyi miꞌi ete wati­mo­hãpyk aikotã hewyry aimi­ky­ꞌesat ewy hamo. Kurin kat ete pyi wati­moe­wyry aihũ iwato sese pytkai."

⁴ Iꞌewyte aheꞌyara iwato kahato rakat pytkai wati­mo­hãpyk kahato yꞌy puo apukuita kurin kat no. Miꞌi hawyi aimi­ky­ꞌesat ewy toto aheꞌyara iwato kahato pytkai. Imohãpyk hap kurin hetuꞌa pe toĩneꞌen wen maꞌato toto­moe­saika kuap yne wasere wato pytkai waku ahewyry."

⁵ Miꞌi hap ewy ahẽku topy­huꞌat kurin aipiit kai mekewat saity aihũ Kawaru wẽ sakpuat ewy mekewat imohãpyk hap kurin hetuꞌa piat aheꞌyara etiat hap ewy. Taꞌi ahẽku ti yt iwato i pytkai — Uito poꞌog torania kai watoꞌe ahẽku hit no. Iꞌewyte aikotã aria hit taꞌat go iwato rakat rote igag nakat rote hap ewy meremo aria iwato kahato topy­huꞌat itote. Miꞌi hap ewy ahẽku hit kaipyi iwato kahato saꞌag tuwenug."

⁶ Ahehay saꞌag ni aiwa­nẽtup hap maꞌat kuap hat toĩneꞌen. Aimaꞌat hat kahato ti rat ahẽku. Woꞌoe­re­mo­pusu hap tuwẽtem ahẽku pyi aiwo­ꞌo­ma­ꞌatꞌi maꞌatꞌi hamo. Aikotã aria aheka­reꞌen wuk hap ewy ahehay toĩneꞌen. Ahehay aikotã mekewat saꞌag nug hat eiam wyti aria wato yn toĩneꞌen. Ahehay saꞌag ahẽku kaipywiat miitꞌin wuk hap ewy topy­huꞌat. Ahehay wo miitꞌin maꞌat hap topy­huꞌat katu­pono aheĩneꞌen hap mokoꞌi mokoꞌi hap aiwa­nẽtup hap pyi tuwẽtem ahẽku pyi are. Taꞌi aimohun hap wyti ahehay saꞌag."

⁷ Taꞌi watikuap kahato haiwot rakaria gaꞌapy piaria mope­rupꞌi aihũ wuat hap iꞌewyte weitaria aihũ wo atimo­pe­rupꞌi kuap iꞌewyte topy­huꞌat hewyry rakaria aihũ wo watunug. Iꞌewyte piraria wati­mo­pe­rupꞌi kuap aito."

⁸ Maꞌato miꞌi pytkai ahẽku yt wati­mo­perup i kuap i katu­pono ahẽku miitꞌin auka kuap hap topy­huꞌat. Ahehay wo wati­maꞌat kuap kahato miitꞌin. Moi haiwot rakat ewy ahẽku toĩneꞌen katu­pono miꞌi wo wati­ꞌa­tu­ꞌuka kuap miitꞌin aimi­maꞌat koꞌi."

⁹ Ahehay saꞌag ahẽku pyi guꞌuro hy ewy toĩneꞌen katu­pono — Waku kahato en watoꞌe Aiꞌywot Aika­ꞌiwat Tupana pe wen maꞌato miitꞌin me — Motoro meiũpepyi aria wato kape watoꞌe saꞌag ahewa­nĩ­kaptia pe miitꞌin me Tupana minug toiãꞌãkap koꞌi pe. Ahẽku wo — Waku kahato En Tupana watoꞌe miꞌi hawyi mekewat ahẽku wo wati­ꞌa­tu­kuasa Tupana minug miitꞌin koꞌi. Yt naku i kahato miꞌi tã are."

¹⁰ Wẽtup ahehay pyi tuwẽtem Tupana mõtypot hap iꞌewyte wẽtup ahehay pyi tuwẽtem miitꞌin mohit hap. Yt naku i ti rat miꞌi tã are. Are pãi yt aiweꞌeg hin i ahẽku mope­rupꞌi hap ete aito. Aiwe­mõti hap kahato ahehay."

¹¹ Yrasa pyi yt karãmuo i yꞌy tuwẽtem he rakat nop takat wẽtup kaꞌa pyi yn. Miꞌi hap ewy yt naku i ahehay he rakat ahehay nop takat ahẽku pywiat."

¹² Iꞌewyte yt karãpe i Pakuꞌa yp kaipyi hewo muse saat neꞌi. Iꞌewyte yt karãpe i hewo Warana yp kaipyi Wasaꞌi saat neꞌi. Iꞌewyte yrasa ihy nop takat yt tum kuap i aimiꞌu he rakat."

¹³ Miꞌi hap ewy kahato yt naku i ahehay saꞌag yt Tupana Pãꞌãu miky­ꞌesat ewy i ahẽku wo. Waku watunug wakuat yt kat i aiwe­mõ­typot hap wywo. Miꞌi hap ewy waku aheĩneꞌen hap he rakat ewy aiminug woꞌo­wese hap wywo yt kat i — Uito poꞌog aiꞌe hap aiwa­nẽtup hawe. Waku yne ahehay wakuap wo wati­mo­herep aiweꞌeg hap imõtypot hamuat."

¹⁴ Karãpeĩ wato­ꞌoe­ha­ꞌy­wywi hawyi yt kat i aiwo­ꞌo­wese hap aikai topy­huꞌat. Miꞌi pote yt kan hamo i — Uito ti poꞌog iraniaꞌin kai watoꞌe neꞌi. Maꞌato miꞌi tã mote watu­we­maꞌat neꞌi."

¹⁵ Karãpeĩ watu­ꞌuka aiwo­ꞌope Tupana piat aimuꞌe hap kaipyi miꞌi pote yt weꞌeg hin haria wo i wato­py­huꞌat. Karãpe wato­ꞌoe­ha­ꞌy­wywi aiwo­ꞌope wato­py­huꞌat iraniaꞌin yt imohey i haria ewy neꞌi. Aikotã ahiag potmu­ꞌeria ewy watoĩ­neꞌen. Aikotã taꞌa­tu­mi­ky­ꞌesat yn nug haria ewy wato­py­huꞌat. Yt naku i kahato watu­ꞌuka aiwo­ꞌope Tupana piat aimuꞌe hap kaipyi. Miꞌi tã watunug mote yt karãpe i Tupana mimu­ꞌeria wato­py­huꞌat maꞌato ahiag potmu­ꞌeria watoĩ­neꞌen."

¹⁶ Karãpe wato­ꞌoe­ha­ꞌy­wywi aiwo­ꞌope — Uito ti poꞌog eikai aiꞌe hap aipyꞌa piat kaipyi miꞌi hawyi meiũran wanĩ­kaptia wo wato­py­huꞌat itote hawyi aiwo­ꞌo­ma­ꞌatꞌi maꞌatꞌi hap yt ikahu hin i rakat topy­huꞌat aiwo­ꞌopiat. Yt naku i are.

"

¹⁷ Maꞌato Aiꞌywot atipy piat iweꞌeg sakpo toĩneꞌen. Miꞌi ti aimuꞌe kahato aipyꞌa pe toweꞌeg hap yt ahiag wat ewywuat hin i. Mio tã e ahepe — Pywuat kahato eweikup­teꞌen no Uiꞌewy e ahepe. Woꞌo­wese haria wo ro eweikup­teꞌen e. Woꞌo­kyꞌe haria wo woꞌo­po­wyro haria wo woꞌo­wesat kahu hanuaria uiꞌewy o eweikup­teꞌen o e ahepe. Waku woꞌo­kyꞌe hap moherep hanuaria wo eweikup­teꞌen e ahepe. Waku wakuat nug haria wo eipe e. Waku yt wẽtup ok i miit mohit hanuaria wo eweikup­teꞌen no e ahepe. Waku yt typy ehay rakaria wo eweikup­teꞌen e. Waku toꞌo­ꞌe­wy­ꞌewy wuatꞌi miitꞌin kyꞌe haria wo eweikup­teꞌen e ahepe aimuꞌe kahato hat atipy piat Aiꞌywot."

¹⁸ Watikoi aikope aimikoi wakuat pote waku kahato hẽtyt hawyi maꞌato yt pote yt kat i aimiꞌu wakuat wati­puẽti aru hat hawyi. Miꞌi hap ewy kahato woꞌo­kyꞌe hap watikoi hawyi aiwo­ꞌo­wese hap toĩneꞌen aru aiwo­ꞌope hawyi aimo­wepit hap toĩneꞌen aiwo­ꞌope. Miꞌi hawyi hewo kahato aru waku hap ahete aimiꞌu he kahato hap ewy aimikoi he hap ewy. Uito eimuꞌe hat pot Tiaku are.

"

4

¹ Koitywy ahenoi teran ehepe kat kaipyi kat kaipyi aiwu­ꞌuka hamuat aiwo­ꞌoehay poepyk hamuat hap tuwe­mo­herep hap koꞌi. Pyno ahenoi ehepe — Uiat uipo pe atiky­ꞌesat ewat ekat aiꞌe hap saꞌag kaipyi ti watu­ꞌuka. — Uimi­ky­ꞌesat yn waku watunug e hap kaipyi watu­ꞌuka. Miꞌi hap kaipyi yt aiwo­ꞌo­wese i hap toĩneꞌen."

² — Atiky­ꞌesat ewat uiano watoꞌe iraniaꞌin me maꞌato — Yt atum i iꞌatuꞌe ahepe hawyi — Pyno yt etum i pote yt uiwese i aru watoꞌe aipyꞌa pe aiwy­riaꞌin me. Miꞌi hawyi wato­ꞌo­ꞌauka teran iraniaꞌin ete iꞌatuekat kyꞌewi. Yt naku i miꞌi tã are. Poꞌog waku wahẽtup hẽtup Aiꞌywot Tupana pe aimi­ky­ꞌesat koꞌi are. Yt kat i aimi­ky­ꞌesat koꞌi toĩneꞌen aipo pe katu­pono yt wahẽtup Ahekat nug hat Tupana pe i pote e."

³ Miꞌi hawyi aimi­ky­ꞌesat Tupana pe wahẽtup tuereto wen maꞌato yt tutum i aimiẽtup katu­pono yt tomi­ky­ꞌesat ewy i wahẽtup pote. Aimi­ky­ꞌesat ewy saꞌag neꞌi wywo yn wahẽtup wote aimo­wepit hamuat kape yn wahẽtup pote yt tutum kuap i aimiẽtup.

"

⁴ Aikotã aheha­ryꞌi ete aipo­hari hap ewy yt ikahu hin i miꞌi hap ewy kahato yt ikahu hin i typy ahetu­pana pote. Yt naku i typy ok miky­ꞌesat ewy watunug Tupana miky­ꞌesat wakuat iꞌewyte mesu­wa­ro­tiaria miky­ꞌesat ewywuat yt naku i nug haria miky­ꞌesat ewywuat pote. Yt ikahu hin i miꞌi tã watoĩ­neꞌen are. Tupana ewanĩ­kaptia miky­ꞌesat ewy watunug mote Tupana ewanĩ­kaptia wo watoĩ­neꞌen. Uwe uwe mesu­wa­rotiat yt naku i nug haria seko saꞌag wo tuwe­wy­ꞌinug miꞌi hat Tupana ewanĩkap mo topy­huꞌat."

⁵ Eweꞌeg wo e Tupana saꞌa­wy­ꞌiwuat pupi — Uiwano yn woro­ky­ꞌesat e ahepe. Maꞌato wẽtup tupana eweimohey hawyi uheha­ꞌy­wywi kahato tupa­naria ete e Tupana Pãꞌãu ahepe."

⁶ — Atiꞌa­tu­moe­saika kahato waure wuat gupteꞌen haria pe. Miꞌiria pe atum neꞌen kahato wakuap miꞌiria pe maꞌato iraniaꞌin me — Uito poꞌog e haria ewanĩkap wo areĩneꞌen e Tupana ahepe. Uhegyiꞌat hap poꞌog atum paaꞌe haria pe e Tupana ahepe."

⁷ Tupana tiky­ꞌesat aiꞌe hap — Tupana atiky­ꞌesat emiit sese wo waku watoꞌe aipe­rupꞌi popuo e. Uiꞌywot uimoe­saika kahato uiminug saꞌag koꞌi akit hamo waku watoꞌe. Tupana etiꞌakit o ahiag uiꞌokpe totiat watoꞌe waku. Uimoe­saika Epãꞌãu wo ahiag sopo hamo ehay wo — Motoro uiꞌya­ty­pepyi ahiag me e hamo waku wahẽtup Tupana pe. Miꞌi hawyi waku watoꞌe — Tupana etisopo ro ahiag uhãꞌãg hat mesuwe waku watoꞌe. Miꞌi hawyi ahiag topopy raꞌyn meremo aiꞌya­ty­pepyi Tupana pupi.

"

⁸ Pyno karãpe wati­ky­ꞌesat watu­kup­teꞌen Tupana wywo miꞌi pote waku watuwat Tupana kape aimi­ky­ꞌesat ẽtup hamo. Aiwa­nẽtup hap kaipyi aipyꞌa pyi ahehay hawyi tut ahowawi aimi­ky­ꞌesat ewy. Miꞌi hawyi aikotã watuwei aipitpit potiat hap ewy raꞌyn yꞌy pe waku miꞌi hap ewy waku watoꞌe Tupana pe — Uiꞌywot uikoho Esaꞌyru suu wo uimi­ꞌa­parap saꞌag koꞌi waku watoꞌe. Uipo ti iminug yt naku i hap koꞌi pote uipo ipitpit hap ewy. Miꞌi pote etikoho uipo yt naku i nug hap hep hamo waku watoꞌe. Uiꞌywot atipy piat pe uiwa­nẽtup hap uipyꞌa piat typy sehay potiat uipiit yt naku i topy­huꞌat. Miꞌi pote etikoho kahato uhepiat iꞌaparap hap koꞌi yne waku watoꞌe Tupana pe."

⁹ Waku paawa­toꞌe Tupana pe aiminug saꞌag upi aikotã haty kahato hap aipyꞌa pe hap ewy aikotã aiwy sese ikuꞌuro hawyi haty hap ewy waku aiwak hap aipyꞌa pe hawyi — Tupana sakpoꞌe atunug saꞌag watoꞌe. Yt ikahu hin i atunug eete. Miꞌi tupono uimõti te kahato rat uipyꞌa pe waku watoꞌe aiwak popuo. Tupana uhepiat emaꞌat hap koꞌi yt ikahu hin i uipyꞌa pe uiwa­nẽtup hawe. Ahatyꞌu kahato yt kat i hin i uiwepit hap toĩneꞌen. Uimõti hap yn toĩneꞌen uikai waku watoꞌe yt kat i aimi­ky­ryꞌi hap wywo."

¹⁰ — Ehamo Tupana aremõti kahato uipyꞌa pe paaꞌe hap wywo watoꞌe. Pywo pe pote Tupana mimõ­typot sese koꞌi wato­py­huꞌat wuatꞌi eꞌat pe wuatꞌi ehamo.

"

¹¹ Uiwy­riaꞌin yt naku i ahehay saꞌag wẽtup ok ete iraniaꞌin ete katu­pono Tupana toꞌe miwan me — Eiwo­ꞌo­kyꞌe ro eiwo­ꞌope e. Miꞌi pytkai wati­mohit neꞌi wẽtup ok iraniaꞌin ehamo pote — Yt naku i meiẽwat miit watoꞌe pote Tupana woꞌo­nãpin hap pun hanuaria wo watoĩ­neꞌen katu­pono yt iꞌe hap ewy hin i watunug mote. Uiwy­riaꞌin yt naku i wati­mohit wẽtup ok ahehay yt naku i rakano. — Etiꞌa­tu­mõ­typot ro iraniaꞌin e Tupana saꞌa­wyꞌi miwan me. Karãpe wati­ꞌa­tu­sa­tyꞌi satyꞌi miitꞌin ahehay wo hawyi wati­ꞌa­parap kahato Tupana piat ainãpin hap yt wati­mõ­typot i aiwy pote. Miꞌi hawyi wati­mohit Tupana piat ainãpin koꞌi katu­pono aiꞌe hap aiwe­nãpin hap saꞌag yn watunug. Poꞌog waku watunug ainãpin hap sese Tupana iweꞌeg sese rakat piat ainãpin hap. Yt naku i eweiꞌa­tu­mohit wẽtup ok miit e Tupana pote."

¹² Tupana yn aikuap sese sio waku aito sio yt hap katu­pono Tupana yn ni ikuap aiwa­nẽtup hap wakuap koꞌi sio yt nakuap i koꞌi. Miꞌi tupono kat poteĩ pyno — Yt naku i en watoꞌe wẽtup ok miat pe yt watikuap i kahato ipyꞌa piat pytkai. Tupana yn ikuap wakuat sio yt hap. Miꞌi yn ikuap ainug koꞌi. Miꞌi pote Tupana yn aheha­kye­raꞌat kuap iꞌewyte Tupana yn ni aiꞌa­piheg kuap. Miꞌi pote yt naku i watoꞌe wẽtup ok etiat — Yt kan hamo i mekewat miit. Yt naku i kahato miꞌi tã watoꞌe katu­pono yne miitꞌin Tupana mikyꞌe koꞌi tukup­teꞌen. — Wuatꞌi miitꞌin torania ahekat koꞌi ewy tukup­teꞌen e Tupana ahepe. Miꞌi pote yt eweimohit reiꞌo uhekat koꞌi e Tupana yt miitꞌin mõtypot i haria pe.

"

¹³ Waku aiweꞌeg wo kahato ahehay pupi — Uimi­ky­ꞌesat yn atunug neran e hap pupi — Pyno mũki­ꞌite uimi­ky­ꞌesat ewy uiwepyi areto wẽtup tawa kape hawyi itote areĩneꞌen motꞌi hawyi itote atunug uiko iwatoꞌin nakat uimi­ky­ꞌesat ok tã hawyi uhekat kahato raꞌyn areĩneꞌen itote aiꞌe hap pupi waku aiweꞌeg wo. — Pywo ti rat uiꞌe hap ewy atunug aru uimi­ky­ꞌesat ok tã hawyi uiwepyi arepotpap kahato itote hawyi atiꞌa­tunug iwato kahato uhekat koꞌi hawyi areĩneꞌen hekat kahato rakano itote uito. Taꞌi uimi­ky­ꞌesat ewy yn aru atiꞌa­tunug e hap pupi waku aiweꞌeg wo uiwy­riaꞌin."

¹⁴ Katu­pono yt watikuap hin i aikotã mũki­ꞌite aipo­re­ꞌi­hotꞌok hap pytkai i aikotã aru watoĩ­neꞌen sio are. Tupana yn miꞌi tã kuap hat iꞌewyte yt watikuap hin i karania eꞌat re aheĩneꞌen hamuat hap koꞌi. Taꞌi aikotã hunete yꞌy heꞌyhig am hawyi atpo­sake hawyi yt kat i raꞌyn toĩneꞌen itote. Miꞌi hap ewy kahato aheĩneꞌen hap topy­huꞌat mesu­wa­rote. Taꞌi aheĩneꞌen porap i hawyi aiku­ꞌuro raꞌyn meremo hap ewy watoĩ­neꞌen mesuwat yi tote uiwy­riaꞌin."

¹⁵ Miꞌi pote poꞌog waku watoꞌe aipyꞌa pe — Tupana atunug neran emiky­ꞌesat ewy poꞌog waku watoꞌe. Tupana etum uhepe ehesaika hap uipo­wyro hamuat. Miꞌi pote ti aru areto motpap nug hamo poꞌog waku watoꞌe aipyꞌa pe."

¹⁶ Yt naku i kahato watu­we­mo­wato kahato ahehay wo — Atunug kuap yne aiꞌe hap ete uiwy­riaꞌin. Yt naku i watoꞌe — Uito poꞌog yne miitꞌin kai aiꞌe hap ete. Yt naku i aito wato­py­huꞌat aiwehay pyi. Yt naku i — Uito poꞌog ekai e hano wato­py­huꞌat.

"

¹⁷ Uimi­mu­ꞌeria karãpe watikuap kat som waku Tupana tiky­ꞌesat watunug hap hawyi maꞌato yt watunug i imiky­ꞌesat ewy hawyi wati­ꞌa­parap kahato Tupana pe yt watunug i imiky­ꞌesat pote. Yt nakuaria i wo wato­py­huꞌat yt kat i hin i watunug pytkai. Miꞌi tã hap atiky­ꞌesat eweikuap taꞌyn uiwy­riaꞌin are uito Tiaku.

"

5

¹ — Eiweꞌeg wo o hekat rakaria. Eiweꞌeg wo o woꞌo­po­ꞌoro i poꞌoro i teꞌen neꞌi haria pupi e Tupana. Koitywy yt pya hin i eiwo­ꞌo­kakꞌi hamuat hap eꞌat e Tupana. Yt pya hin i kynkyn­ꞌeiꞌe hap eꞌat ehepiat hoꞌopot hap wuatꞌi eꞌat piat hamuat e katu­pono eiwe­moekat kahato miitꞌin maꞌat hap kaipyi e Tupana."

² Mekewat eꞌat pe ti aru eimi­soknug ni hokpyp neꞌi raꞌyn topy­huꞌat e Tupana. Ehesokpe sok koꞌi nupiꞌa yat no raꞌyn topy­huꞌat yne yne aru e Tupana."

³ Ehekat ikahuria rakat ahyt aru yt kan hamo i raꞌyn topy­huꞌat iꞌytyk tutuꞌu yne raꞌyn hawyi e. Mekewat eꞌat ehekat ikahu miitꞌin mipugha wo raꞌyn topy­huꞌat nem neꞌi pote e. Saꞌa­wyꞌi imehit rakat yn ehekat maꞌato mekewat eꞌat pe iꞌytyk kahato rakano raꞌyn topy­huꞌat ikamhig saꞌag nakano raꞌyn topy­huꞌat e. — Kat pote kahu yt eweimõꞌẽ i ehekat koꞌi nimo te uruepe iꞌatuꞌe ti aru ehepe ewyriaꞌin hatek takaria. Kat pote yt ehegyiꞌat hin i uruepe nimo iꞌatuꞌe aru ehepe ihaky­ꞌeꞌi rakaria. — Miꞌi hawyi ehekat koꞌi iꞌytyk kaipyi ti aru taꞌa­tukuap meremo raꞌyn yt ehegyiꞌat hin i kahato hap e Tupana — Uiwano yn neran e haria pe. — Ehekat ahyt topy­huꞌat aru aria wato miꞌu wo e Tupana. Miꞌi hawyi eipe ekat wuk hap pe eweikup­teꞌen at kaꞌap eiꞌa­piheg hamuat wuatꞌi eꞌat pe e Tupana aru hatek takaria pohari haria pe."

⁴ — Saꞌa­wyꞌi eimikoi eropat haria iꞌatu­potpap kahato eiko nug hamuat pytkai maꞌato yt kat i ewetum iꞌatuepe. — Pywo ti rat mũki­ꞌite aru atum eipotpap saꞌup eweiꞌe pytkai yt kat hin i ewetum iꞌatuepe. Yt ehegyiꞌat i hap kape araꞌa­kasa yne raꞌyn Uito e aru Tupana yt imõꞌẽ i haria pe. Iꞌatue­syꞌat kahato ehemiitꞌin e. Yt iꞌatue­sokpe hin i rakaria miꞌiria. Iꞌatue­ha­ky­ꞌeꞌi kahato teꞌe­re­potpap at kaꞌap pytkai yt kat hin i ewetum e. Saꞌa­wyꞌi kakꞌi­ꞌa­tuꞌe kakꞌi­ꞌa­tuꞌe ahetiat — Tupana yt urupoi i urupo­ꞌoro haria uruka­ꞌi­waria hekat rakaria iꞌatuꞌe uhepe e. Yt taꞌa­tu­mõꞌẽ hin i uruepe urupotpap hap saꞌup iꞌatuꞌe irane toꞌo­kakꞌi popuo uhepe ihaky­ꞌeꞌi rakaria e Tupana."

⁵ Yt ehegyiꞌat hin i eipe e aru ehepe katu­pono eiwe­mo­wepit hap yn ewetunug eheĩneꞌen hap turan e. Kat koꞌi kat koꞌi eimi­ky­ꞌesat ok tã eweiꞌa­tunug atunug kahato. Eiꞌyat wakuat pe ienuk hap yn ewetunug. Eimiꞌu ikahu kahato maꞌato eiweran eweiꞌa­tu­moꞌok kahato. Yt kat i ewetum hesyꞌat sese rakaria pe e Tupana aru ihaky­ꞌeꞌi rakaria maꞌat haria pe. Aikotã saꞌa­wyꞌi eihũria eweiꞌa­tu­mokyt kahato awati wo iꞌatu­ꞌuka hamuat iꞌu hamuat hap ewy kahato eiperia tukup­teꞌen ikap kahato rakaria wo e aru Tupana yt hegyiꞌat rakaria i pe. Ikap kahato rakaria wo koitywy eweikup­teꞌen eihũria ewy e. Eikap ti waku kahato aria miꞌu wo pote mesup taꞌyn waku pe eweikup­teꞌen kahato maꞌato uimi­ꞌa­piheg wuanuaria wo e Tupana miꞌiria pe yt taꞌa­tupoi hin i taꞌa­tu­potpap nug haria hawyi."

⁶ — Saꞌag nug haria ti eipe katu­pono miitꞌin wakuat kuasa haria wo eweikup­teꞌen areꞌe aru ehepe e Tupana. Iꞌatuekat kyꞌewi — Eweiꞌa­tu­ꞌuka miꞌiria eweiꞌe yn esura­raꞌin me wakuap yn taꞌa­tunug pytkai e. Eweiꞌa­tu­ꞌuka yt kat i saꞌag iꞌatuꞌe i ehepiat pytkai e aru Tupana yt hegyiꞌat i rakaria hekat rakaria pe.

"

⁷ Uiwy­riaꞌin waku aipe­rupꞌi poꞌog poꞌog watoĩ­neꞌen Iesui ekatup haype miitꞌin aimo­weu­kaꞌi pytkai. Aikotã aikopiat aimikoi wahe­katup hepamo hap ewy. Saꞌa­wyꞌi watikoi hawyi iꞌaman hap wahe­katup imoẽtyt hamo. Miꞌi hawyi wahe­katup i iꞌaman tuereto hap imotag hamo. Perupꞌi popuo wahe­katup haat hap kape imoꞌa­puhup hamuat kape. Miꞌi hap ewy waku wahe­katup Iesui ut hap."

⁸ — Yt pya hin i ti Iesui ut hap waku watoꞌe yn aiwo­ꞌope aiwe­moe­saika hamo. Yt naku i watoiat hut hap mohey hap katu­pono tut aru Aika­ꞌiwat. Waku wahe­katup hut hap aiwe­mo­wepit hap wywo."

⁹ Uiwy­riaꞌin yt naku i wato­ꞌoehay petek petek hekatup haype katu­pono woꞌoehay petek petek haria pe ti aru — Yt nakuaria i eipe e aru Tupana. Yt pya hin i aika­ꞌiwat ut hamuat uwe waku uwe yt naku i toꞌe hamo. Yt pya hin i Aika­ꞌiwat ut hap aikotã okenꞌypy og me hap ewy yn ni toĩneꞌen meke — Areke teran e hat ewy toĩneꞌen.

"

¹⁰ Uiwy­riaꞌin yt naku i ti wati­waure aipyꞌa pe saꞌa­wy­ꞌiwuat Tupana ehay moherep haria piat hoꞌopot hap koꞌi. Taꞌi nimo te ti taꞌa­tu­ho­ꞌopot potꞌi kahato miitꞌin miky­ryꞌi taꞌa­tuetiat imohey hap wywuat hap. Taꞌi yt iꞌatu­wẽ­pohep hin i ti Tupana e hap moherep hap ete miitꞌin tiꞌa­tu­sa­tyꞌi satyꞌi pytkai. Miꞌi tupono waku watunug miꞌiria ewy."

¹¹ Miꞌiria saꞌa­wyꞌi toko­kaꞌat raꞌyn hoꞌopot hap sakpo. Miꞌi tupono koitywy Tupana miꞌa­tue­waku koꞌi wo tukup­teꞌen eimi­ꞌa­tu­mõ­typot no raꞌyn tukup­teꞌen. Watikuap taꞌyn ti aikotã nimo ahaꞌa­seꞌi Io hoꞌopot potꞌi kahato hap maꞌato yt toiwaure hin i Tupana mohey tepiat hap. Imohey motꞌi hap poꞌog iwato hoꞌopot hap kai. Miꞌi pote hoꞌopot kahato hap sakpo tokosap aseꞌi Io. Miꞌi pote Tupana mipoi­tynug wo raꞌyn topy­huꞌat. Uiwy­riaꞌin Tupana tikuap kahato ahepiat hoꞌopot hap. Taꞌi Aika­ꞌiwat aikyꞌe kahato toha­tyꞌu kahato ahepiat hoꞌopot hap.

"

¹² Ahehay pywo piat hap yn Tupana tiky­ꞌesat. Karãpe iraniaꞌin me — Atunug aru watoꞌe pote waku watunug aiꞌe hap ewy hap. Yt naku i aheso — Atunug aru aiꞌe hap ete. Maꞌato aheso hap neꞌi pote Tupana aiꞌa­piheg e. Iꞌewyte ti yt naku i Tupana set wati­pehik — Atunug aru e hap ete. Yt naku i watoꞌe — Yt atunug i aru uiꞌe hap ewy pote waku Tupana uiꞌauka watoꞌe. Poꞌog waku — Atunug aru mehĩ mana watoꞌe hawyi waku watunug aiꞌe hap ok tã poꞌog waku are. Iꞌewyte yt naku i miitꞌin set wati­pehik pywo aiꞌe hap moheg hamo. Maꞌato Tupana tiky­ꞌesat pywo piat yn ahehay hap — Atunug aru aiꞌe hap ete.

"

¹³ Ahatek pote wate­moe­ha­ma­naꞌi hawyi waku wahẽtup Tupana kape aika­wiano hamuat hap. Maꞌato toĩneꞌen ahehãite hap aiwepit hap yn ahete pote waku watu­wehum Tupana ete aiwepy hap wywo.

"

¹⁴ Wẽtup ok iꞌahu aipy­ꞌa­setpiat pote waku mekewat iꞌahu rakat tiꞌa­tu­kaykay tuwe­wawi Iesui mohey haria apykok haria koꞌi taꞌa­tu­hẽtup Tupana kapiat hamo iꞌahu kosap hamuat hap. Miꞌi hawyi ikap takat mohag wo waku taꞌa­tupag iꞌahu rakat ete. Miꞌi hawyi waku taꞌa­tu­hẽtup — Tupana etimoe­hãite kahato mesuwat iꞌahu rakat esaika hap mywo Esaꞌyru Iesui mõtypot hamo waku iꞌatuꞌe itote iꞌahu rakat moehãite hamuat."

¹⁵ Miꞌi tã taꞌa­tunug Iesui mohey hap mywo pote ti aru ipoĩꞌãm naꞌyn teꞌyni pyi ihãite raꞌyn topy­huꞌat iꞌahu rakat. Iꞌewyte iminug saꞌag kaipywiat iꞌahu pote Tupana timo­weityk taꞌyn iminug yt naku i saꞌag hap koꞌi."

¹⁶ Miꞌi pote waku wahenoi aiwo­ꞌope aiminug saꞌag koꞌi iꞌewyte waku wahẽtup kahato Tupana kape aiwy­riaꞌin kawiano hamuat. Wahẽtup aipyꞌa pyi pote aiwo­ꞌo­poi­tyro kahato hap ewy topy­huꞌat ahete aiwo­ꞌo­kyꞌe hap ewy aiwo­ꞌope. Miꞌi hawyi toĩneꞌen kahato aimoe­hãite kahato hap Tupana kaipywiat hap. Aipyꞌa hãpyk kahato Tupana wywo hawyi meremo tutum aimiẽtup niatpo kahato rakat pytkai. Meremo tutum waku miẽtup koꞌi."

¹⁷ Saꞌa­wyꞌi mekewat Tupana ehay moherep hat Eria aiꞌe­wywuat miit kahato maꞌato tohẽtup kahato tepiat imohey kahato hap mywo yn — Tupana etipyhyp to iꞌaman myeꞌym anu 6 ewaty hap atiky­ꞌesat e. Miꞌi hawyi hẽtup ewy Tupana tunug itote."

¹⁸ Miꞌi hawyi tohẽtup i raꞌyn — Etum i ro iꞌaman e hawyi iꞌaman kahato i raꞌyn hap Tupana tunug iꞌe hap ewy. Miꞌi hawyi itote ihãite kahato i raꞌyn iꞌatu­mikoi koꞌi.

"

¹⁹ Uiwy­riaꞌin toĩ wẽtup ok wẽtup ok tuereto aipy­ꞌa­set­piaria wemig Tupana po piat haria taꞌa­tu­minug saꞌag kyꞌewiat haria. Waku miꞌiria watekyi ahehay wo teꞌe­ra­ꞌaipok Tupana ewawiat hamo."

²⁰ Uwe uwe yt nakuat i nug hat pore­ro­kosap Tupana kapiat iminug saꞌag myi miꞌi hat tihep wẽtup ok miit woꞌo­ꞌa­piheg hap kaipyi iminug saꞌag ahyt po pyi toipo­re­nõtem Tupana piat ieha­kye­raꞌat hamo. Uiwy­riaꞌin yt eweiwaure ro miꞌi tã nug hamo yt waure wo teiꞌo.

Uito Tiaku ti mekewat Iesui ywyt sese. Uheykeꞌet sese Iesui uruty Maria pote. Koitywy toran naꞌyn uimiwan."