1 Mesup mienoi wakuat ti Aipotypot Iesui etiat. Uito ti ewy Iruka. Mesuwat uimiwan atipoꞌoro ewawi uiwy Teowiru. Mesup ti atipoꞌoro ewawi uimiwan Aimimohey Iesui etiat aikotã saꞌawyꞌi toĩneꞌen Aipyꞌasetpiat hat enoi hamuat atipoꞌoro uimiwan ewawi mehĩ Teowiru. Miꞌi e hap typyꞌi rakaria tiwan naꞌyn aikotã saĩke tokosap Tupana Mipoꞌoro Iesui ehat aipyꞌasetpiat toĩneꞌen turanuat hap koꞌi. Miꞌi hap koꞌi ti taꞌatuwan naꞌyn. Miꞌi e hap ti wẽtup ok wẽtup ok tiwan naꞌyn taꞌatupo wo. Miꞌiria miwan toĩneꞌen uipo pe hawyi — Pyno waku iꞌatumiwan kaipyi atiwan yne sehay Iesui etiat wẽtup yn uimiwan me areꞌe uipyꞌa pe hawyi mesup ewawi mehĩ Teowiru atipoꞌoro raꞌyn yne urumikuap wẽtup yn miwan me are."
2 Miꞌi pote iraniaꞌin miwan Iesui etiat aremuꞌe kahato hawyi atikuap kahato Iesui minug koꞌi iꞌewyte Iesui e hap koꞌi. Miꞌi hawyi areꞌe — Pyno waku atiwan yne Iesui etiat wẽtup yn uimiwan me are. Pyno waku Iesui wywo hewyry rakaria wẽ pyi yn atiwan yne Iesui ete iꞌatumiꞌakasa koꞌi sese are. Waku atiwan yne Iesui e hap iꞌatumikuap koꞌi are. Waku Iesui wywo hewyry rakaria yn uimuꞌe areꞌe uiwepe are. Waku Iesui kuap haria miwan kaipyi yn atiwan uimiwan are. Miꞌi hawyi waku atipoꞌoro uimiwan Iesui kyꞌe haria pe are."
3 Pyno ti uito iꞌewyte atikuap yne yne aikotã aikotã Iesui etiat hap saꞌawyꞌiwuaria iwywo hewyry rakaria mienoi koꞌi. Miꞌi hawyi atiwan mesuwat uimiwan iꞌatumiwan koꞌi ewatꞌymo. Pyno waku.
"4 Miꞌi uimiwan Iesui etiat mesup atipoꞌoro raꞌyn ewawi uiwy sese Teowiru are. Pyno saꞌawyꞌi ahenoi teran aikotã Iesui ywãꞌĩ hap etiat aikotã saꞌawyꞌi tuwemoherep hap etiat."
5 Saꞌawyꞌi ti Iesui ywania etama puo toĩneꞌen wẽtup ok Paꞌi Sakaria e hap het rakat. Miꞌi miit Paꞌi koro wo turan hap eꞌat pe Iesui ywãꞌĩ hap eꞌat putꞌokꞌe. Pyno waku saꞌawyꞌi uimiwan me ahenoi epe kurin paꞌi Sakaria e hap ete. Paꞌi Sakaria saꞌawyꞌi paꞌi koro wo toĩneꞌen Tupana mõtypot yat koro pe. Iꞌywot ti Paꞌi koro Apiꞌa e hap het rakat. Miꞌi saipepiat ipotpap takat Paꞌi Sakaria toĩneꞌen. Miꞌi tupono paꞌi Apiꞌa emiariru koꞌi tukupteꞌen paꞌi koꞌi wo tawa wato Ierusarẽi me maꞌato haipepiat sese ti paꞌi Sakaria toĩneꞌen. Miꞌi pote Paꞌi koro wo toĩneꞌen tawa wato Ierusarẽi me. Maꞌato Paꞌi Sakaria yt haꞌyru rakat i katupono iharyꞌi Isapeu yt karãpe i imẽpyt rakat toĩneꞌen. Pyno paꞌi koro Sakaria eꞌaseꞌi koro sese Arãu toĩneꞌen mekewat Musei yketꞌet. Miꞌi pote Sakaria paꞌi koro sese toĩneꞌen. Sakaria ipotpap kahato paꞌi wo maꞌato yt iwepit sese i katupono yt kat i tosaipepiat nuat pote. Iꞌewyte mana Isapeu yt iwepit i. Taꞌatukyꞌesat kahato taꞌatumẽpyt hap. Sakaria toĩneꞌen paꞌi koro wo Eroti toĩneꞌen morekuat no turan."
6 Paꞌi Sakariaꞌin waku kahato rakaria wo tukupteꞌen Tupana wanẽtup hawe. Taꞌi Tupana mikyꞌesat yn nug haria yn miꞌiria. Paꞌi tunug kahato wuatꞌi eꞌat pe Tupana mienoi ewy."
7 Mekewat eꞌat pe turan maꞌato paꞌi Sakaria saipepianuat yt kat i katupono iꞌatuporo kahato raꞌyn. Iꞌewyte heharyꞌi mana Isapeu pyhuꞌat hap tokosap woityꞌi raꞌyn. Mana Isapeu ti topakup wyi te yt karãpe i imẽpyt."
8 Wẽtup eꞌat pe paꞌi koro Sakaria toĩneꞌen Tupana mõtypot yat koro pe Tupana mikyꞌesat nug hamo toꞌywot Apiꞌa potpap ewy te tutunug."
9 Toꞌywotꞌin Apiꞌaꞌin potpap ewy te toĩneꞌen ipotpap kat pote toꞌywot Apiꞌaꞌin saipepiat sese toĩneꞌen. Paꞌi Apiꞌaꞌin miꞌairo Sakaria pote iꞌatueko ewy te tutunug itote. Miꞌi pote paꞌi Sakaria teke Tupana eiam sese pe Tupana mõtypot hamuat ikamhig se rakat wuk hap yparakai tote. Miꞌi tote toiwuk ikamhig se rakat Tupana mõtypot hamuat hap."
10 Miꞌi wuk totiat turan okenypyke õꞌẽ haria typyꞌi kahato Tupana kapiat ihay rakanuaria tukupteꞌen."
11 Miꞌi hawyi Tupana mõtypot yat eꞌokipyke atipy kaipywiat sut hat tuwemoherep taꞌyn paꞌi Sakaria kape. Mekewat mohag wuk hamo ran kawiat rote tuwemoherep."
12 Maꞌato paꞌi Sakaria mekewat wemoherep hat pupi tokenꞌẽ kahato neꞌi taꞌakasa hawyi."
13 Miꞌi pote atipy kaipywiat sut hat toꞌe paꞌi Sakaria pe — Yt erekenꞌẽ teiꞌo e katupono Tupana miium epiat saꞌawyꞌiwuat emiẽtup taꞌyn emẽpyt kyꞌesat hap taꞌyn e. Miꞌi hawyi eharyꞌi ti imẽpyt irane raꞌyn e. Esaꞌyru irane raꞌyn wyti Tupana miium epiat e. Miꞌi set wyti Iuwãu e hamuat waku ehetꞌok iwemoherep hawyi e."
14 Miꞌi hawyi esaꞌyru wemoherep hap eꞌat pe wyti aru ewepit kahato raꞌyn e. Iꞌewyte ti aru yne iraniaꞌin iꞌatuwepit kurum hit wemoherep hap ete hap eꞌat pe e."
15 Miꞌi ti aru Tupana wywuat myhuꞌat hanuat e. Esaꞌyru tuwemoherep hawyi meremo howapy raꞌyn Tupana Pãꞌãu Wakuano e. Taꞌi yne eꞌat pe toĩneꞌen hap ok tã howapy Tupana Pãꞌãu Wakuano e."
16 Itag hawyi ti aru esaꞌyru tiꞌatumorem wyti aru eꞌaseꞌi Isareu ywania Tupana kape e."
17 Esaꞌyru ti aru topyhuꞌat Tupana ehay moherep hat akag wo e. Aikotã saꞌawyꞌiwuat mekewat Tupana ehay moherep hat Eria e hap het rakat ewywuat topyhuꞌat esaꞌyru itag hawyi e. Aikotã Eria saꞌawyꞌi hesaika kahato Tupana ehay enoi hap ete topyhuꞌat miꞌi hap ewy te aru esaꞌyru Iuwãu ete topyhuꞌat e. Taꞌi esaꞌyru ti aru miitꞌin sem muꞌe hat koro wo topyhuꞌat e. Ipotmuꞌeria sem ni aru teꞌeropyhuꞌat woꞌokyꞌe hanuaria e. Taꞌi woꞌowese hap sese toterut irane eꞌaseꞌi Isareu ywania kape e. Taꞌi toiꞌatumorem kahato ti aru miitꞌin Tupana kape tehay wo tomienoi wo e. Miꞌi hap eꞌat pe ti aru esaꞌyru Iuwãu terut woꞌowese hap sese eꞌywania kape e. Miꞌi piat taꞌatumuꞌe hap kaipyi ti aru nagniaꞌin tukupteꞌen woꞌokyꞌe haria wo e. Miꞌi hawyi hirakaria tiꞌatukyꞌe kahato taꞌatuꞌywotꞌin taꞌatutyꞌin esaꞌyru piat taꞌatumẽpytꞌin muꞌe hap kaipyi e. Iꞌewyte eꞌywotꞌin tiꞌatukyꞌe kahato taꞌatumẽpytꞌin esaꞌyru piat taꞌatuꞌywotꞌin muꞌe hap kaipyi e. Taꞌi taꞌatumuꞌe hap kaipyi woꞌowese haria wo yn tukupteꞌen iꞌyat piaria e. Miꞌi hawyi ti aru Tupana yt mikyꞌesat i nug haria esaꞌyru tiꞌatumuꞌe hap kaipyi Tupana mikyꞌesat nug haria wo raꞌyn tukupteꞌen e. Waku puo i raꞌyn tukupteꞌen Tupana mikyꞌesat ewy ipotmuꞌeria tunug turan ti aru tut esaꞌyru Mimoherep mekewat Tupana Mipoꞌoro Wuatꞌi Miitꞌin Porekuat Nuat e. Mekewat eꞌat pe meimuẽwat esaꞌyru mimuꞌeria koꞌi Tupana Mipoꞌoro ekatup hanuaria wo raꞌyn tukupteꞌen. Miꞌi taꞌatuekatup turan ni aru putꞌokꞌe Iꞌatuehakyeraꞌat Hat sese esaꞌyru Mimoherep e ti atipy kaipywiat sut hat paꞌi koro Sakaria pe."
18 Miꞌi toꞌe pote paꞌi Sakaria tiwesat saꞌag atipy kaipywiat ehay pe — U pãi e aikotã apuru eꞌe hap atikuap sio pywo sio yt e. Kat som iwato kahato etomoherep epo wo ehay sio pywuat sio yt moherep hamo e. Pywo eꞌe hap pote pywo are aru maꞌato yt pote yt e. Katupono uiporo kahato raꞌyn iꞌewyte uheharyꞌi mẽpyt hap eꞌat tokosap kahato raꞌyn uhyt e. Iporo sese raꞌyn uheharyꞌi mehĩ e."
19 Mio tã toꞌe Sakaria pote atipy kaipywiat Tupana e hap erut hat tiwesat haty wo — Uito ti atipy kaipywiat Tupana ehay erut hat koro e. Tupana ti uipoꞌoro tehay enoi epiat hamo e. Uhet sese ti Kapireu e. Tupana e hap ewywuat yn moherep hat uito pãi e. Tupana yt karãpe i heso rakat are e. Uito areĩneꞌen Tupana wywuat sese hat e. Yne ti uhehay uimimoherep epiat Tupana ehay esaꞌyru wanuat etiat pywo sese topyhuꞌat aru katupono Tupana toꞌe mio tã uhepe pote e. Miꞌi pote ti aru putꞌokꞌe yne iꞌe hap ewy emowepit hamuat e."
20 Uhyt e kat pote som yt etimohey i Tupana e hap uimierut e. Yt naku i kahato e. Yt etimohey i Tupana e hap pote ti yt ehay kuap i aru uhyt e. Iꞌewyte ti aru ewaure kaꞌa pe yt teke kuap i sehay katupono Tupana ehay uimierut pytkai yt uimohey i pote e. Maꞌato eimẽpyt putꞌokꞌe uiꞌe hap ewy eraꞌakasa raꞌyn esaꞌyru hawyi ewaure kaꞌa i raꞌyn iꞌewyte ehay kuap i raꞌyn mehĩ e atipy kaipywiat sut hat paꞌi koro Sakaria pe."
21 Miꞌi turan okenꞌypyke gupteꞌen haria hekatup kahato paꞌi Sakaria wẽtem hap. Miꞌi pytkai yt tut i potꞌi kahato hawyi teꞌeruwanẽtup toꞌope — Katuponoĩ koitywy heniatpo kahato toĩneꞌen motꞌi Tupana mõtypot yat pe iꞌatuꞌe."
22 Miꞌi hawyi paꞌi Sakaria tuwẽtem hawyi putꞌokꞌe okenꞌypykiaria ete. Miꞌi hawyi tohenoi teran toꞌe hap wen maꞌato yt ihay kuap i raꞌyn. Yt ihay kuap i pote okenꞌypykiaria teꞌeroꞌe toꞌope — Pyno tomuꞌetu wuat ewy raꞌyn Tupana eꞌokipyke toĩneꞌen turan pote yt ihay kuap i iꞌatuꞌe teꞌeruwanẽtup hawe. Miꞌi hawyi Sakaria topo wo yn naꞌyn tohenoi teran tehay okenꞌypykiaria pe."
23 Miꞌi hawyi Tupana yat pe tuwepotpap kahu hawyi paꞌi Sakaria toto i raꞌyn toꞌyat kape.
"24 Putꞌokꞌe i raꞌyn paꞌi Sakaria toꞌyat piat hawyi ti toĩneꞌen teharyꞌi wywo hawyi iharyꞌi hupiꞌa raꞌyn Tupana e hap ewy. Miꞌi hawyi iheg me toĩneꞌen 5 ewaty."
25 Miꞌi turan mana Isapeu toꞌe — Waku kahato Tupana tunug uhepe e. Uikyꞌe kahato raꞌyn Uhetupana e. Saꞌawyꞌi aremõti kahato yt uimẽpyt i pote maꞌato mesup uhupiꞌa raꞌyn toĩneꞌen mote yt aremõti kuap i raꞌyn e. Saꞌawyꞌi iraniaꞌin uimohit kahato yt uimẽpyt i pote e. Maꞌato uimẽpyt Tupana miium toĩneꞌen hawyi yt kat i iꞌatuꞌe kuap i aru e. Miꞌi pote yt aremõti hin i katupono Tupana uikyꞌe kahato hawyi tutum naꞌyn uhepe uimẽpyt raꞌyn toꞌe hap ewy e. Waku kahato Tupana e mana Isapeu.
"26 Wẽtup eꞌat pe hawyi mana Isapeu 6 ewaty hupiꞌa toĩneꞌen turan Tupana tipoꞌoro i raꞌyn saꞌawyꞌiwuat atipy kaipywiat sut hat akag Kapireu wẽtup tama kape i raꞌyn mekewat yi Karireia popykiat tawa hit Nasare kape i raꞌyn toipoꞌoro."
27 Itote wẽtup ok pe pĩꞌã makuptia Maria e hap het rakat kape tuwemoherep atipy kaipywiat Kapireu. Pĩꞌã Maria ti yt heꞌaito rakat i te iꞌewyte yt hewaire i te rakat toĩneꞌen. Toikyꞌesat kahato maꞌato teꞌaito wo wẽtup ok Iuse e hap het rakat mekewat morekuat Tawi emiariru emiariru toikyꞌesat. Miꞌi tohekatup turan atipy kaipywiat Kapireu tuwemoherep tope."
28 Miꞌi hawyi toꞌe tope — Mana Maria e eremowepit ro e katupono koitywy ti Tupana mipoityro sese wo ereĩneꞌen e. Katupono tutum neran epe emẽpyt ihainia Wuatꞌi Miitꞌin Porekuat Nuat e. Miꞌi pote ti aru poꞌog Tupana mipoityro wo ereĩneꞌen torania haryporia kai katupono Wuatꞌi Miitꞌin Potypot ty wo ereĩneꞌen aru pote e."
29 Miꞌi hawyi Mana Maria tehaꞌat kahato atipy kaipywiat kape hawyi tuwanẽtup kahato tewawiat sehay kape hawyi — Kat toꞌe hamuat ewy ran uhepe an e tuwanẽtup hawe."
30 Miꞌi hawyi Kapireu toꞌe tope — Maria yt erekenꞌẽ teiꞌo e katupono Tupana tuwehum kahato ewawi e."
31 Pyno emẽpyt irane wyti mana e. Emẽpyt ihainia ti tuwemoherep irane Tupana miium epiat e. Wakuat kahato eꞌiunmỹꞌã piat Emẽpyt mana e. Emẽpyt tuwemoherep hawyi waku ehetꞌok Miꞌi — Iesui ereꞌe e."
32 Miꞌi hawyi En ni Tupana Poꞌog Torania Kawiat Saꞌyru iꞌatuꞌe aru miitꞌin Emẽpyt Iesui pe e. Iꞌewyte — En ni Wuatꞌi Ywania Porekuat no iꞌatuꞌe Emẽpyt pe mana e. Emẽpyt ihainia pe Tupana tum aru Morekuat Tawi eiam e. Morekuat Tawi saipepiano ti aru topyhuꞌat Emẽpyt e atipy kaipywiat Kapireu Maria pe."
33 Miꞌi hawyi ti aru eꞌaseꞌi pot Iako emiariruꞌin sem Porekuat no raꞌyn Emẽpyt Iesui topyhuꞌat wuatꞌi eꞌat pe e. Yt karãpe i aru Emẽpyt piat Wuatꞌi Porekuat no hap ikahuro e atipy kaipywiat sut hat Maria pe."
34 Miꞌi hawyi Maria apoꞌe — Aikotã aru uhupiꞌa mimi katupono yt kat i te uheꞌaito e."
35 Miꞌi hawyi Tupana mipoꞌoro Kapireu tiwesat raꞌyn — Taꞌi Tupana Pãꞌãu tut ewawi e. Miꞌi hawyi Ipãꞌãu esaika howa eupiꞌa aru toĩneꞌen e. Miꞌi pote Emẽpyt topyhuꞌat ri Tupana Koro Sese Saꞌyru e atipy pywiat Maria pe."
36 Iꞌewyte wyti eꞌapiꞌi paꞌi Sakaria eharyꞌi Isapeu e hap het rakat hupiꞌa raꞌyn wy. Iporo sese rakat pytkai toupiꞌa wywo toĩneꞌen mesup toꞌyat pe e. Pywo pe wyti imẽpyt tuwemoherep irane raꞌyn eꞌapiꞌi pot piat wy e. Saꞌawyꞌi yt imẽpyt kahato rakat i eꞌapiꞌi e. Iꞌewyte mesup ipoꞌoro sese rakano toĩneꞌen. Maꞌato miꞌi hap pytkai toupiꞌa wywo toĩneꞌen mesup toꞌyat pe e. Pywo pe wyti imẽpyt tuwemoherep irane raꞌyn eꞌapiꞌi pot piat e."
37 Taꞌi hesaika kahato Ahetupana e. Taꞌi Tupana ti wuatꞌi nug kuap hat e. Yt kat i wyti niatpo Tupana wanẽtup hawe katupono tutunug kuap yne yne koꞌi e. Yt watunug kuap i pytkai Tupana inug kuap e Kapireu mana Maria pe."
38 Miꞌi hawyi pĩꞌã Maria toꞌe Kapireu pe — Uito ti Tupana eropat hano areĩneꞌen e. Pyno waku atung toꞌe hap ewy e. Waku Tupana tum uhepe toꞌe hap ewy e Maria Kapireu pe. Mio tã e kahu hawyi Kapireu taꞌaipok taꞌyn atipy kape Mana Maria pyi."
39 Miꞌi hawyi Maria tuweꞌarumary hawyi meremo toto teꞌapiꞌi Isapeu yat kape. Wẽtup yi mekewat yi Iuta e hap kape yityꞌok hit puat muꞌap upi toto. Pya kahato toto."
40 Miꞌi hawyi putꞌoktoꞌe mana Maria paꞌi Sakaria yat pe hawyi teke hawyi — Ihotꞌok e teꞌapiꞌi mana Isapeu pe."
41 — Ihotꞌok e hawyi mana Isapeu mẽpytꞌa hurukꞌe iꞌymyẽ pe."
42 Miꞌi hawyi mana Isapeu howapy raꞌyn Tupana Pãꞌãu wo hawyi toꞌe mana Maria pe tehay pirik wo — Waku pe kahato Tupana tunug mesup katupono Tupana poꞌog hegyiꞌat epe iraniaꞌin manaꞌin kai e. Mesup taꞌyn Tupana Saꞌyru Sese toĩneꞌen eꞌymyẽ pe e."
43 Tupana Mipoꞌoro Ahehakyeraꞌat Hanuat ty wo raꞌyn ereĩneꞌen mesup e. Miꞌi pote ti uimowepit kahato Eꞌiunmỹꞌã Piat e. Ereke hin waku ereĩneꞌen uruꞌyat pe e. En ne poꞌog uikai katupono Tupana Mipoꞌoro Aiporekuat nuat ty wo ereĩneꞌen e."
44 Koitywy — Ihotꞌok ereꞌe uhepe turan uimẽpyt tuwemũkup uheꞌymyẽ pe iwepit haype e. Katupono uimẽpyt uhunmỹꞌã piat tikuap taꞌyn Emẽpyt Eiunmỹꞌã piat toĩneꞌen Toporekuat Koro wuat hap e. Miꞌi pote tuwemũkup uipiit pe tuwehum kahato haype e mana Isapeu Mana Maria pe."
45 Saꞌawyꞌi etomohey kahato Tupana e hap pote mesup waku pe kahato ereĩneꞌen e. Tupana e hap upi eupiꞌa raꞌyn toĩneꞌen mesup e. Miꞌi pote mesup Tupana mimowepit kahato wo ereĩneꞌen e heꞌapiꞌi Isapeu pĩꞌã Maria pe."
46 Miꞌi hawyi mana Maria tuwehum kahato Tupana ete hawyi toꞌe — Woromõtypot kahato uipyꞌa pyi Tupana e."
47 Uhehakyeraꞌat kahato hat En Tupana e. Uimowepit kahato hat En e."
48 Tupana mihakyꞌeꞌi kahato rakano. Miit emiit no areĩneꞌen pytkai uikyꞌe kahato En an e. Saꞌawyꞌi erehaꞌat uhowawi uikyꞌe hap wywo e. Yt miitꞌin mikyꞌe i uito pytkai uikyꞌe En e. Are an uito wuatꞌi miit eropat hanuat yn areĩneꞌen pytkai uiꞌairo e. Uito ti poꞌog yi kapiat nakano areĩneꞌen wuatꞌi miit emiit kai pytkai uikyꞌe kahato En e. Miꞌi hawyi uiꞌairo Esaꞌyru eiam mo Uruehakyeraꞌat hat ty wo e. Taꞌi uhewaku hap upi yt uiꞌairo i maꞌato uikyꞌe hap upi uiꞌairo e. Taꞌi miꞌi pote ti aru — Waku kahato En Tupana iꞌatuꞌe ewawi wuatꞌi ywania Uhehakyeraꞌat hat En mote."
49 Esaika kahato En Tupana e Maria. Waku sese En Tupana are katupono egyiꞌat hap kaipyi wakuap sese etunug uhete e. Miꞌi hawyi uimẽpyt hap kaipyi wuatꞌi miitꞌin teꞌeroꞌe aru — Waku kahato Tupana iꞌatuꞌe epe e."
50 Pywo pe ti yne mesuwarotiat gupteꞌen haria emõtypot haria wo tukupteꞌen aru katupono Esaꞌyru miehakyeraꞌaria tukupteꞌen aru pote e. saꞌawyꞌitewuaria koranuaria iꞌewyte meiũranuaria gupteꞌen haria yt wemoherep i te haria kyꞌe kahato hano ereĩneꞌen mote e Maria Tupana pe."
51 Yt uwe i poꞌog hesaika rakat ekai Tupana e. Waku kahato En poꞌog poꞌog torania kai e. Maꞌato iraniaꞌin mesuwarotiaria — Uruto poꞌog torania kai e haria mohit sese hanuat ereĩneꞌen Tupana e. Miꞌi hawyi ti aru iꞌatuminug saꞌag hap koꞌi etiꞌatumoma yne raꞌyn e. Iꞌewyte iꞌatuwanẽtup saꞌag hap etiꞌatumoweityk yne raꞌyn e."
52 Iꞌewyte wemowato haria etipuruk kahato iꞌatuwemowato hap kaipyi maꞌato miꞌi pytkai miit emiit koꞌi paaꞌe haria ewywuaria etiꞌatumowato kahato morekuat no mesuwe e mana Maria Tupana pe."
53 Are an Hegyiꞌat kahato rakano ereĩneꞌen hesyꞌat rakaria pe ihakyꞌeꞌi rakaria pe. Miꞌi hawyi miꞌu wakuano etiꞌatupoi kahato miꞌiria e maꞌato iraniaꞌin — Uruto poꞌog hekat rakaria e haria etiꞌatunug hesyꞌat kahato rakaria wo e."
54 Waku sese rakat En Tupana are katupono yt etiwaure hin eꞌe hap — Atunug aru e hap etunug yne eꞌe hap ok tã e. Saꞌawyꞌiwuat urueꞌaseꞌi pot Isareu pe mio tã ereꞌe — Esaipepiat kawiano wyti aru atiꞌatuehakyeraꞌat wuatꞌi ywania ere hap ewy etunug mesup e. Mesup taꞌyn eꞌe hap ewy etiꞌatupowyro kahato uruꞌywania eꞌe hap urueꞌaseꞌi pot Isareu piat ewy e urueꞌaseꞌi emiariru emiariru uruto pote. Waku kahato En katupono eꞌe hap urueꞌaseꞌi piat hap ewywuat mesup taꞌyn etunug aikotã saꞌawyꞌi eꞌe hap ewy — Atipoꞌoro aru emiariruꞌin me Iꞌatuehakyeraꞌat hanuat eꞌe hap ewy etunug naꞌyn mesup katupono etipoꞌoro koran uruewawi Uruehakyeraꞌat hat eꞌe hap saꞌawyꞌiwuat ewy ehay urukyꞌe wywuat hap ewy e."
55 Aikotã urueꞌaseꞌiꞌin me — Atunug aru uiꞌe hap ewy etunug naꞌyn mesup aikotã saꞌawyꞌi urueꞌaseꞌi koro Aparãu me ereꞌe hap ewy — Atiꞌatupoityro aru torania Wẽtup Esaipepiat po wo e. Wẽtup Emiariru upi Eiãꞌỹi upi aru atiꞌatumowaku kahato imohey haria wuatꞌi ywania mesuwat yi totiaria e Tupana saꞌawyꞌi urueꞌaseꞌi Aparãu me e. Pyno waku kahato En Tupana katupono eꞌe hap ewy raꞌyn putꞌokꞌe mesup e. Are an Aparãu Emiariru Koro toĩneꞌen naꞌyn mesup uhunmỹꞌã pe e mana Maria Tupana pe."
56 Miꞌi hawyi mana Maria topyhuꞌat myeꞌym ewaty teꞌapiꞌi Isapeu yat pe. Miꞌi hawyi teꞌaipok i raꞌyn toꞌyat kape tawa Nasare kape.
"57 Wẽtup eꞌat hawyi mana Isapeu mẽpyt hap eꞌat putꞌokꞌe raꞌyn hawyi imẽpyt raꞌyn ihainia tuwemoherep taꞌyn Tupana miium topiat toꞌe hap ewy."
58 Miꞌi hawyi iwyriaꞌin sese koꞌi iꞌewyte hekatuwyriaꞌin tikuap taꞌyn Tupana miium wakuat mana Isapeu piat hawyi teꞌeruwehum kahato Tupana kape."
59 Miꞌi hawyi mana Isapeu emẽpyt 8 eꞌat raꞌyn hawyi tuwat tuwat raꞌyn iwyriaꞌin mana Isapeu yat kape hawyi — Pyno waku watikaykay paꞌi meikowo emẽpyt emusin sokpe ãpy tek hamuat iꞌatuꞌe."
60 — Miꞌi watunug hawyi waku watum het emẽpyt pe aheko ewy iꞌatuꞌe. Waku wahetꞌok emẽpyt Sakaria eꞌaito set mõtypot hamo iꞌatuꞌe maꞌato mana Isapeu — Yt an e. Waku watum tope het Iuwãu e iꞌatuepe."
61 Miꞌi hawyi teꞌeroꞌe mana Isapeu pe — Ahetama puo waku wahetꞌok aimẽpytꞌin ahaꞌyruꞌin aiꞌywotꞌin set ewywuat sio ahaꞌaseꞌiꞌin set ewywuat iꞌatuꞌe. Kat pote pyno — Uimẽpyt set ti waku Iuwãu ereꞌe uruepe iꞌatuꞌe. Maꞌato eꞌaito paꞌi Sakaria eꞌaseꞌiꞌin set Iuwãu e hap het rakat yt uwe i iꞌatuꞌe mana Isapeu pe."
62 Miꞌi pote taꞌatupo wo taꞌatuhẽtup paꞌi Sakaria pe yt hewaure i pote — Kat som waku wahetꞌok esaꞌyru uhyt iꞌatuꞌe hap kuap hamo."
63 Maꞌato paꞌi Sakaria yt ihay kuap i. Miꞌi hawyi paꞌi Sakaria hẽtup miwan hug hap hawyi — Waku wahetꞌok uhaꞌyru Iuwãu e tomiwan me. Miꞌi hawyi teꞌeruwanẽtup kahato toꞌe miwan miat hap ete. — Aikotã toikuap ahehay mesuwe iꞌatuꞌe katupono yt toikuap i ahehay tewaure pote iꞌatuꞌe."
64 Maꞌato miꞌi hawyi paꞌi Sakaria tiwan het hawyi meremo ihay kuap i raꞌyn itote hewaure kaꞌa i raꞌyn. Miꞌi hawyi toimõtypot kahato raꞌyn Tupana tehay wo saꞌawyꞌi yt ihay kuap i rakat paꞌi Sakaria."
65 Miꞌi pote Sakaria yat piaria hekatuwyriaꞌin teꞌerewanẽtup kahato haꞌyru Iuwãu wemoherep hap kape. Miꞌi hawyi tuwat raꞌyn tawa piaria koꞌi kape Iuwãu wemoherep hap enoi hamo."
66 Meiũran iraniaꞌin yne tama Iuteu piaria ikuap taꞌyn Sakaria saꞌyru Iuwãu wemoherep hap etiat hawyi teꞌeroꞌe toꞌope — Kan no aru paꞌi Sakaria saꞌyru topyhuꞌat iꞌatuꞌe. Uwe ewy aru mekewat Iuwãu topyhuꞌat iꞌatuꞌe toꞌope tawa piaria. Miꞌi hawyi Iuwãu Tupana mipoityro kahato wo topyhuꞌat itote. Miꞌi hawyi Tupana toĩneꞌen kahato Iuwãu kai hawyi waku pe kahato toĩneꞌen ipiit ete iwanẽtup hap ete."
67 Miꞌi hawyi paꞌi Sakaria ihay kahato itote Tupana Pãꞌãu kaipyi tohenoi kahato yianmete tosaꞌyru Iuwãu etiat Tupana e hap ewy tohenoi."
68 Miꞌi koꞌi tohenoi henoi yian note wuat sehay yne tosaꞌyru pakup etiat aikotã aru hamuat ihay iꞌewyte Aipotypot Iesui etiat aikotã aru hamuat ihay yt iwemoherep i te pytkai."
69 Mio tã toꞌe Paꞌi Sakaria — Taꞌi esaika kahato Tupana uruehakyeraꞌat hamo. Taꞌi esaika hap poꞌog hĩpo po ehãꞌãpe esaika hap kai uruewanĩkaptia moma hamo e. Taꞌi morekuat Tawi saipepiat sese ti Emipoꞌoro tuwemoherep irane e."
70 Aikotã ereꞌe saꞌawyꞌi te morekuat Tawi pe hap ewy — Meiũran wyti aru atum epe Emiariru Emiariru Kawiat Wẽtup ok Esaipepiat Wuatꞌi Miitꞌin ekyi Ehowawi Hanuat e hap ewy putꞌokꞌe mesup taꞌyn uruewawi e. Aikotã saꞌawyꞌitewuat ehay moherep haria pe ereꞌe hap ewy raꞌyn mesup taꞌyn etunug naꞌyn e. Aikotã haꞌawytepyite mesuwuat kape miꞌi eꞌe hap ewywuat yne yne mesup etunug raꞌyn urukyꞌe haype e paꞌi Sakaria Tupana pe."
71 Mio tã ereꞌe saꞌawyꞌi uruepe ehay moherep haria wẽ pyi — Pywo ti aru meiũran atipoꞌoro Uhemiit sese ehewanĩkaptia po pywiat eipuruk hamo ereꞌe. Miꞌi hawyi eꞌe hap ewywuat etunug mesup e."
72 — Yt atiwaure hin i ti saꞌawyꞌiwuat uiꞌe hap atunug aru uiꞌe hap ereꞌe. Uiwese hap wyti aru atimoherep yne raꞌyn uiꞌe hap ewy ereꞌe urueꞌyian miaria pe e. — Uhegyiꞌat hap uiwese hap atimoherep wuatꞌi miitꞌin me aru ereꞌe saꞌawyꞌi e. Miꞌi eꞌe hap ewy koitywy etunug naꞌyn uruepe e."
73 Iꞌewyte saꞌawyꞌitewuat urueꞌaseꞌi pot koro Aparãu miat eꞌe hap ewywuat re etunug naꞌyn aikotã ereꞌe saꞌawyꞌi — Atunug irane eꞌe hap ewy etunug naꞌyn mesuwat eꞌat pe e. Yt etiwaure hin i eꞌe hap Tupana e. Aikotã ereꞌe urueꞌaseꞌi pot Aparãu me — Atiꞌatumoehãite aru wuatꞌi ywania mesuwat yi totiaria Esaipepiat po wo eꞌe hap ewy etunug naꞌyn mesup e. Wẽtup ok Emiariru emiariru minug kaipyi ti aru atiꞌatupoityro wuatꞌi imohey haria ereꞌe hap ewy etunug naꞌyn mesup e paꞌi Sakaria Tupana pe itote wuatꞌi miitꞌin ehamo.
"74 Miꞌi hawyi paꞌi Sakaria toꞌe raꞌyn taꞌapypueri haria pe — Uiwyriaꞌin e Tupana tikyꞌesat kahato ahewanĩkaptia po pywiat ahenõtem hap e. Toikyꞌesat kahato aheropat tepiat hap yn e. Yt toikyꞌesat hin i watokenꞌẽ ahewanĩkaptia pupiat hap e. Miꞌi pote aiporenõtem neran ahewanĩkaptia po pyi e."
75 Miꞌi hawyi Tupana ainug neran hãpyk kahato rakaria wo aikotã tewaku hap ewy hap toikyꞌesat e. Toikyꞌesat yne eꞌat pe waku hap ewy watukupteꞌen hap e paꞌi Sakaria itotiaria pe tosaꞌyru Iuwãu ywãꞌĩ hap eꞌat pe.
"76 Miꞌi hawyi paꞌi Sakaria toꞌe tosaꞌyru Iuwãu me — Uhaꞌyru e meiũran ni aru ereĩneꞌen Tupana kapiat muꞌap moherep hano e. Miꞌi hap eꞌat pe mio tã ereꞌe miitꞌin sem me — Tut irane tut irane Tupana ahowawi Aiporekuat nuat ereꞌe aru e. Miꞌi hawyi miitꞌin emienoi kape teꞌeruwanẽtup kahato hap turan aru putꞌokꞌe Emimoherep e paꞌi Sakaria tosaꞌyru Iuwãu me Ahehakyeraꞌat hat Iesui etiat. Miꞌi hawyi toꞌe i Iuwãu me — Pywo ti rat ehenoi henoi aru aiꞌywania pe aikotã waku taꞌatupuẽti taꞌatuehakyeraꞌat hap Tupana piat hap e."
77 Uhaꞌyru Iuwãu e aiꞌywania timohey eꞌe hap Emimoherep hawyi ti aru waku pe kahato tukupteꞌen are katupono taꞌatumohey ehay hawyi Tupana waure wo toĩneꞌen aru taꞌatuminug saꞌag koꞌi kai e. Miꞌi hap koꞌi ti aru ehenoi henoi aiꞌywania pe Tupana Mipoꞌoro ut hap etiat yianmete e paꞌi Sakaria tosaꞌyru Iuwãu me. Miꞌi hap eꞌat pe ti aru ehenoi aikotã waku taꞌatupuẽti taꞌatuehakyeraꞌat Tupana piat hamuat hap e. Katupono taꞌatumohey Emimoherep hawyi Tupana waure wo toĩneꞌen iꞌatuminug saꞌag koꞌi kai e."
78 Taꞌi Tupana yt tiꞌatupopetek teran hin i miitꞌin e. Tehay wo toiꞌatukyꞌe kahato miitꞌin e. Taꞌi miitꞌin hoꞌowasat hap haty kahato tuete e. Miꞌi hap kaipyi toipoꞌoro Temiit sese Ahehakyeraꞌat hanuat e. Taꞌi atipy kaipyi toipoꞌoro ahekyi tuwewawiat hanuat e. Toikyꞌesat wuatꞌi miitꞌin mesuwat yi totiaria tuwewawiat hap uhaꞌyru e. Aikotã at taꞌam hawyi toimoẽtyhot yne iꞌypyryp hap miꞌi hap ewy toimoẽtyhot teran tehay wo wuatꞌi ywania e."
79 Uhaꞌyru Iuwãu e mesuwarotiaria ti yt ihapytig hin i rakaria ewy kahato tukupteꞌen aikotã iꞌypyryp we gaꞌapy puat hoꞌowasat rakaria ewy miitꞌin tukupteꞌen e. Aikotã miitꞌin misyp we tukupteꞌen iꞌypyryp we hap ewy mesuwarotiaria tukupteꞌen yt teꞌeraꞌakasa kuap i Tupana kape pote e. Aikotã hoꞌowasat kahato rakaria gaꞌapy piaria yt ikuap i muꞌap taꞌatuꞌyat kapiat hap ewy kahato miitꞌin mesuwarotiaria tukupteꞌen e. Yt taꞌatupuẽti hin i taꞌatumowepit Tupana piat hap e. Maꞌato hẽtyhot hap putꞌokꞌe hawyi taꞌatukuap meremo muꞌap i raꞌyn hawyi waku pe i raꞌyn tukupteꞌen e. Miꞌi uiꞌe hap Emimoherep Tupana Mipoꞌoro aimoẽtyhot hamuat toĩneꞌen aru e. Uhaꞌyru Iuwãu e mio tã ereꞌe aru emimuꞌeria pe — Tut irane tut irane Aimoẽtyhot Kahato Hanuat hawyi waku pe aru watoĩneꞌen ereꞌe ti aru e paꞌi Sakaria tosaꞌyru Iuwãu hire pe.
"80 Miꞌi hawyi haꞌyru Iuwãu hit tuwemotag itote paꞌi Sakaria mana Isapeu yatype. Miꞌi tote ipiit hesaika kahato toĩneꞌen ihãite kahato. Itote tuwemoesaika kahato Tupana kuap hap ete. Miꞌi hawyi Tupana Pãꞌãu Wakuat imuꞌe kahato itote. Iuwãu kurum iwasu turan hawyi toto raꞌyn yahig wato sese kape. Miꞌi tote tuwemuꞌe kahato Tupana e hap kuap hamo. Mekewat yahig koro tote Tupana mikuap ok tã tuwemuꞌe kahato katupono toikyꞌesat tuwemoesaika kahato aikotã aru toimoherep toꞌywania pe Tupana e hap koꞌi hap ete.
"1 Saꞌawyꞌi toĩneꞌen mesuwat yi tote wẽtup ok morekuat akag kahato morekuaria porekuat koro Sesa Aukutu e hap het rakat. Miꞌi turan toikyꞌesat kahato temiitꞌin yne yne atumorania hap. Miꞌi hawyi toiꞌatupoꞌoro kahato tesuraraꞌin sem tomiwan wywo yne tetama koꞌi kape temiitꞌin atuset pehik yne hamo — Atikyꞌesat kahato yne yne uhemiitꞌin set koꞌi miwan me e. Waku iꞌatuset koꞌi eweiꞌatupehik yne are katupono atiꞌatumorania teran torania uhemiitꞌin sem koꞌi uhetama wato piaria e ok tã katupono toikyꞌesat yne miitꞌin kaipyi tekat koꞌi iꞌatusaꞌupsat hamuat. Miꞌi hawyi toiꞌatupoꞌoro raꞌyn tomiwan koꞌi yne tetuꞌisaria pe tosuraraꞌin sem po pe."
2 Miꞌi hap ewy taꞌatunug mesuwat yi tote Tuꞌisa wato Sireniu e hap het rakat toĩneꞌen morekuat koro wuat mekewat yi wato Siria pe turan.
"3 Miꞌi hawyi mõtypot Sesa Aukutu etama puaria tuwat raꞌyn taꞌatuetawa sese koꞌi kape. Taꞌatueꞌaseꞌiꞌin etawa koꞌi kape tuwat taꞌatuset pehik hamo saꞌup ium hamo morekuat koro Sesa Aukutu e hap ewy."
4 Miꞌi e hap upi iꞌewyte toto mehĩ Iuse yi Karireia popykiat tetawa Nasare kaipyi yi upi tawa hit Perẽi kape teꞌaseꞌi morekuat Tawi ywãꞌĩ hap kape mekewat yi Iuteu piat tawa hit Perẽi kape toto tuwesetpehik hamo. Toto tawa Perẽi kape katupono mehĩ Iuse ti toĩneꞌen mekewat saꞌawyꞌiwuat morekuat Tawi emiariru emiariru pote. Miꞌi pote toto teꞌaseꞌi Tawi etawa kape."
5 Iꞌewyte mana Maria toto mehĩ Iuse upi toupiꞌa wato kahato wywo toto. Maꞌato yt Iuse wat toupiꞌa wywo i toto maꞌato Tupana Pãꞌãu Wakuat upiꞌa wywo toto. Yt pya hin i raꞌyn putꞌoktaꞌatuꞌe hamuat tawa hit Perẽi tote turan imẽpyt haty kahato raꞌyn mana Maria."
6 Miꞌi hawyi itote Tawa hit Perẽi me tukupteꞌen hawyi putꞌokꞌe heꞌat raꞌyn hewãtym naꞌyn hawyi imẽpyt tuwemoherep hap eꞌat putꞌokꞌe meremo itote hawyi meremo taꞌatukat kahato itote taꞌatuket hap wen maꞌato yt aikope kuap i katupono yt uwe i Perẽi miaria — Waku eiwehytꞌok uruꞌyat pe e haria itote katupono iꞌatu kahato miitꞌin õꞌẽ haria itote pote."
7 Miꞌi pote taꞌatukat kahato taꞌatueiam hawyi yt taꞌatupuẽti hawyi tuwehytꞌok wewato ahup yat pe hawyi mekewat hũria yat pe teꞌeroket. Miꞌi hawyi mekewat wãtym muo tuwemoherep taꞌyn Maria Mẽpyt saꞌawyꞌiwuat ihainia raꞌyn. Tuwemoherep hawyi sokpe wo tohuwy kahato raꞌyn taꞌatueko ewy ipiit mohãpyk sese nug hamo. Miꞌi hawyi tawa hit Perẽi me teꞌeruwemosyꞌat raꞌyn wẽtup ewaty.
"8 Mekewat ewãtym muo Iesui tuwemoherep turan tukupteꞌen itote yt pya hin i tawa Perẽi kai yahig note taꞌatuhũ Uweuria apykok haria. Miꞌi tote teꞌeroket taꞌatuhũria pyꞌasetpe katupono taꞌatuꞌapykok teran taꞌatuhũria awyato pupi."
9 Miꞌi tote ti atipy kaipywiat sut hat tuwemoherep wehũria apykok haria kape. Miꞌi ti Tupana ẽtyhot hap wywo tuwemoherep hawyi yne iꞌatuete hẽtyhot kahato. Miꞌi pote Uweira koꞌi apykok haria teꞌerokenꞌẽ kahato hẽtyhot putꞌokꞌe taꞌatuetiat pote."
10 Miꞌi hawyi atipy kaipywiat sut hat toꞌe wehũria apykok haria pe — Yt eweikenꞌẽ teiꞌo uipupi e iꞌatuepe. Katupono wakuat sehay ahenoi teran ehepe eimowepit kahato hamo e. Taꞌi yt ehepe yn i uhehay wakuat maꞌato wuatꞌi ywania mesuwat yi totiaria mowepit hap ahenoi e."
11 Waku kahato Tupana tunug mesup ehepe katupono mesuwat ewãtym Tupana tum Temiit sese Wuatꞌi Miitꞌin Ehakyeraꞌat hanuat tuwemoherep taꞌyn e. Pywo ti rat tuwemoherep taꞌyn mesup taꞌyn itote ehaꞌaseꞌi morekuat Tawi tawa Perẽi me Tupana Mipoꞌoro Wuatꞌi Ywania Ehakyeraꞌat Hanuat e. Miꞌi sehay wakuat enoi hamuat Tupana uipoꞌoro ehowawi e."
12 Pyno ahenoi teran ehepe aikotã waku eweipuẽti imẽpyt e hamuat hap. Pyno waku eweiwat tawa Perẽi kape hawyi waku eweikat eihũria yat mekewat eihũria poi hap. Miꞌi tote wyti aru eweipuẽti uiꞌe hap ewywuat e iꞌatuepe. Miꞌi tote sokpe wo tosuwy pe raꞌyn ti aru eweipuẽti Tupana Saꞌyru e. Taꞌi eihũria miꞌu upip tote toket itote uiꞌe hap ewy e. Miꞌi uiꞌe hap ewy eweipuẽti hawyi ti aru eweikuap taꞌyn pywo kahato uiꞌe hap e mekewat atipy kaipywiat sut hat wehũria apykok haria pe."
13 Miꞌi toꞌe turan atipy kaipywiaria sem itote teꞌeruwemoherep wy mekewat yahig note. Miꞌi hawyi mekewat saꞌawyꞌiwuat wemoherep hat wywo tukupteꞌen Tupana mõtypot hamo."
14 — Wakuat wakuat wakuat En Tupana iꞌatuꞌe. Ywaiti Piat Ieĩneꞌen Hat Sese En iꞌatuꞌe. Uruimõtypot kahato En katupono mesup taꞌyn Miitꞌin Mowepit Hat Sese etum naꞌyn yi totiaria pe iꞌatuꞌe. Pyno Miitꞌin Woꞌowese Hap Nug Hat topyhuꞌat raꞌyn mesuwat mytyp tote iꞌatuꞌe. Waku kahato katupono mesup taꞌyn aru woꞌokyꞌe haria wo tukupteꞌen miitꞌin emohey haria iꞌatuꞌe. Emikyꞌe kahato koꞌi miitꞌin mote iꞌatuꞌe Tupana emiitꞌin atipy kaipywiaria typyꞌi rakaria yahig note Tupana mõtypot hamo."
15 Miꞌi hawyi atipy kaipywiaria teꞌeraꞌaipok i raꞌyn atipy kape hawyi hũria apykok haria teꞌeroꞌe toꞌope — Toꞌiro tawa hit Perẽi kape Tupana mienoi kapiat akasa hamo iꞌatuꞌe toꞌope."
16 Mio tã taꞌatuꞌe hawyi meremo tuwat raꞌyn tawa Perẽi kape. Putꞌoktaꞌatuꞌe itote hawyi taꞌatukat kahato atipy piaria mienoi upi hirakat. Miꞌi hawyi taꞌatupuẽti raꞌyn Hirakat hũria yat pe hũria poi hap upip tote. Iꞌewyte uhyt Iuse mana Maria taꞌatupuẽti itote."
17 Teꞌeraꞌakasa hawyi taꞌatuhenoi raꞌyn uhyt Iuse pe mana Maria pe atipy kaipywiat sut hat ehay yne Iesui etiat taꞌatuhenoi."
18 Miꞌi hawyi tuwat hawyi muꞌap upi taꞌatuhenoi yne iraniaꞌin me tawa hit Perẽi miaria pe. Miꞌi hawyi iraniaꞌin teꞌeruwanẽtup kahato Uweria koꞌi apykok haria mienoi kape."
19 Miꞌi hawyi mana Maria tereko yne tomẽpyt wemoherep hap etiat topyꞌa pe. Miꞌi hawyi yne eꞌat pe tuwanẽtup kahato atipy piaria ehay tomẽpyt etiat hap kape."
20 Miꞌi hawyi Uweuria apykok haria teꞌeraꞌaipok i raꞌyn taꞌatuhũria koꞌi kape. Teꞌeraꞌaipok turan teꞌeruwehum kahato raꞌyn Tupana kape — Wakuat kahato En iꞌatuꞌe katupono atipy kaipywiat sut hat mienoi ewywuat raꞌyn urutaꞌakasa iꞌatuꞌe Tupana pe.
"21 Miꞌi hawyi 8 eꞌat raꞌyn toĩneꞌen hawyi Hirakat taꞌatuemurui sokpe ãpy tek hawyi taꞌatusetꞌok taꞌyn — IESUI eset iꞌatuꞌe aikotã saꞌawyꞌiwuat atipy kaipywiat sut hat Kapireu mienoi mana Maria yt upiꞌa i te turan hap ewy raꞌyn taꞌatusetꞌok Imẽpyt — Iesui het iꞌatuꞌe."
22 Miꞌi hawyi Iuseꞌin teꞌeruwemosyꞌat wẽtup ewaty hap kahu hawyi tuwat raꞌyn tawa wato Ieruserẽi kape Tupana mõtypot yat wato kape. Miꞌi tote taꞌatuhenoi Iesui Tupana pe — Uruikuap taꞌyn ewanuat kahato Mesuwat Hirakat toĩneꞌen wuatꞌi eꞌat pe iꞌatuꞌe."
23 Miꞌi hawyi taꞌatuium Iesui Tupana pe itote aikotã saꞌawyꞌi Tupana mienoi aseꞌi Musei miwan me e hap ewy — Waku etum esaꞌyru saꞌawyꞌiwuat Uhepe e hap ewy."
24 Miꞌi hawyi taꞌatuhenoi Iesui Tupana kape hawyi taꞌatuium Tupana pe typy pykasu hit koꞌi paꞌi pe. Paꞌi tiꞌatuꞌauka pykasu hawyi toiꞌatuwuk itote Tupana mõtypot hamo aikotã Tupana toꞌe aseꞌi Musei miwan me saꞌawyꞌi hap ewy — Waku etum typy pykasu hit sio typy pykasu wato uhepe uimõtypot hamo esaꞌyru saꞌawyꞌiwuat tuwemoherep hawyi e hap ewy taꞌatunug itote.
"25 Toĩneꞌen Ierusarẽi me wẽtup ok paꞌi koro Simeãu e hap het rakat. Simeãu ni waku rakat toĩneꞌen Tupana mõtypot kahato hat miꞌi. Miꞌi iꞌewyte hekatup kahato Isareu ywania Ehakyeraꞌat Hat Isareu Ywania powyro hanuat katupono Simeãu kai toĩneꞌen kahato Tupana Pãꞌãu."
26 Tupana Pãꞌãu henoi raꞌyn tope — Ekuꞌuro hap owakai te ti aru eraꞌakasa Uimipoꞌoro Ehakyeraꞌat Hanuat e Tupana Pãꞌãu Simeãu me."
27 Meiũran hawyi wẽtup eꞌat pe Tupana henoi i raꞌyn Simeãu me — Ereto ro koran uimõtypot yat kape e. Miꞌi hawyi toto raꞌyn Tupana Pãꞌãu mienoi ewy. Paꞌi Simeãu toto turan putꞌokꞌiꞌatuꞌe Iuseꞌin Tupana mõtypot yat ete. Miꞌi hawyi tuwehytꞌok taꞌatueko ewywuat nug hamo."
28 Miꞌi hawyi Simeãu iꞌewyte teke itote hawyi totat raꞌyn Iesui hit Maria po pyi hawyi tuwehum kahato Tupana kape."
29 Miꞌi hawyi toꞌe — Woromõtypot kahato En Tupana katupono uheha wo araꞌakasa raꞌyn Emipoꞌoro Wuatꞌi Ywania Ehakyeraꞌat Hanuat kape araꞌakasa raꞌyn e Tupana pe Iesui hit piat pe."
30 Uimowepit kahato Tupana katupono eꞌe hap ewy etunug naꞌyn mesup uikuꞌuro hap eꞌyianmete e."
31 — Pyno waku raꞌyn uikuꞌuro hap mesup uimowepit hap wywo katupono mio atikuap taꞌyn Emipoꞌoro Uhehakyeraꞌat Hat toĩneꞌen mote e paꞌi Simeãu Tupana pe."
32 Miꞌi hawyi paꞌi Simeãu toꞌe Maria pe — Mesuwat uipo piat Emẽpyt wyti aru topyhuꞌat Wuatꞌi Ywania Piat Tupana Moherep Hano e. Aikotã ariãty timoherep muꞌap ahepe wãtym muo hap ewy wyti aru Emẽpyt timoherep muꞌap Tupana kapiat e. Taꞌi Emẽpyt topyhuꞌat Wuatꞌi Miitꞌin Puꞌap Tupana kapiat hat e. Emẽpyt Iesui wyti aru topyhuꞌat Uruꞌywania Mimõtypot kahato wo e paꞌi Simeãu Iesui ty pe."
33 Mio tã toꞌe hawyi mehĩ Iuse mana Maria teꞌeruwanẽtup kahato paꞌi Simeãu ehay kape."
34 Miꞌi hawyi Simeãu tiꞌatupoityro Iuseꞌin hawyi toꞌe mana Maria pe — Emẽpyt wyti aru Aiꞌywania Ehakyeraꞌat Hano topyhuꞌat maꞌato iraniaꞌin aiꞌywania yt timohey i Emẽpyt itag hawyi pote teꞌeruwemaꞌat kahato yt taꞌatumohey i hawyi e. Miꞌi hawyi Tupana miꞌapiheg wanuaria tukupteꞌen e. Maꞌato iraniaꞌin aiꞌywania imohey kahato haria Tupana mimõtypot kahato wanuaria tukupteꞌen wuatꞌi eꞌat pe e. Miꞌiria Tupana mimowepit kahato koꞌiria tukupteꞌen wuatꞌi eꞌat pe e paꞌi Simeãu Iesui piat Maria pe."
35 Taꞌi saꞌag kahato aru taꞌatunug Emẽpyt ete itag hawyi e. Miꞌi pote haty kahato topyhuꞌat aru epyꞌa pe aikotã kyse aipyꞌa piat haty hap ewy topyhuꞌat eete emẽpyt taꞌatuꞌauka hawyi e paꞌi Simeãu Iesui ty pe.
"36 Miꞌi hawyi toĩneꞌen wy itote Tupana mõtypot yat pe wẽtup ok hiwu mana Ana e hap het rakat. Miꞌi ti uhyt Wanueu sakiꞌyt toĩneꞌen iꞌewyte aseꞌi Ase ywania toĩneꞌen. Hiwu Ana tuwemosyꞌat kahato tuereto tehay teran Tupana wywuat turan."
37 Hiwu Ana ti Tupana ehay moherep hat kahato toĩneꞌen. Miꞌi ti waku kahato rakat toĩneꞌen Tupana wanẽtup hawe. Tupana eropat kahato rakat toĩneꞌen itote. At kaꞌap toimõtypot kahato Tupana tehay wo. Waku pe toĩneꞌen miꞌi hap ete. Ihay kahato Tupana wywo at kaꞌap. Ihay Tupana wywo turan yt tenuk hin i hawyi yt tuwẽtem hin i Tupana mõtypot yat pyi. Heꞌaito ikuꞌuro hawyi toto Tupana mõtypot yat kape hawyi toĩneꞌen motꞌi itote at kaꞌap hap ewy 84 anu toĩneꞌen itote heꞌaito ikuꞌuro hawyi. Hiwu pot 84 anu turan hiwu iꞌatuꞌe."
38 Miꞌi turan Mana Ana putꞌokꞌe paꞌi Simeãu henoi Iesui piat mana Maria pe turan. Miꞌi hawyi mana Ana taꞌakasa imẽpyt Iesui kapiat hawyi tuwehum kahato wy Tupana kape — Waku kahato En Tupana e. Mesup taꞌyn araꞌakasa Emipoꞌoro Uruehakyeraꞌat nuat e. Miꞌi hawyi yne itotiaria Tupana yat piaria pe tohenoi Iesui etiat torania Tupana Mipoꞌoro ekatup haria pe — Putꞌokꞌe raꞌyn wyti Ahehakyeraꞌat Hanuat sese uiwyriaꞌin e. Tupana Mipoꞌoro Aiporekuat nuat sese wyti putꞌokꞌe raꞌyn e mana Ana Iesui piat. Miꞌi hawyi toto wuatꞌi piat henoi hamo tawa wato Ierusarẽi miaria Tupana Mipoꞌoro ekatup haria piat henoi hamo. Miꞌi hawyi tohenoi hirakat Iesui etiat — Putꞌokꞌe raꞌyn wyti Ahehakyeraꞌat hanuat sese uiwyriaꞌin e hiwu Ana.
"39 Miꞌi hawyi Iuseꞌin tunug naꞌyn yne Tupana mienoi ewy hawyi teꞌeraꞌaipok i raꞌyn tawa wato Ierusarẽi kaipyi yi Karireia popykiat tawa hit Nasare kape tuwat saꞌawyꞌiwuat taꞌatuieĩneꞌen hap kape."
40 Miꞌi tote Iesui tuwemotag kahato tawa Nasare pe. Ihay kahato Tupana wywo itote. Tupana Pãꞌãu wo tuwemoweꞌeg kahato hawyi hesaika kahato rakano toĩneꞌen ipiit ete iꞌewyte iweꞌeg hap ete Tupana ehay ete. Yne eꞌat pe poꞌog poꞌog itag saꞌawyꞌiwuat kai. Miꞌi hawyi Tupana tipoityro sese Iesui iwemotag turan.
"41 Miꞌi hawyi wẽtup eꞌat pe tuwat raꞌyn Iuseꞌin tawa wato Ierusarẽi kape man teneg u hamo. Teꞌeruwaꞌatunug itote taꞌatueꞌaseꞌiꞌin ehakyeraꞌat taꞌatuewanĩkaptia po piat yi Esituꞌin ywania po pywiat hap eꞌat kapiat teꞌeruwanẽtup hay piat kape."
42 Miꞌi hawyi kurum iwasu Iesui 12 anu raꞌyn hawyi toto wy Iuse upi toty wywo tawa wato Ierusarẽi kape teꞌeruwaꞌatunug yne anu hap kape. Itote tukupteꞌen 7 eꞌat."
43 Miꞌi hawyi teꞌeruwaꞌatunug hap tokosap hawyi tuwat raꞌyn Iuseꞌin taꞌatuꞌyat kape maꞌato Iesui yt toto i tawa Ierusarẽi myi totyꞌin upi. Saꞌawyꞌi yt taꞌatukuap hin i Iesui topyhuꞌat hap."
44 Maꞌato yt teꞌeraꞌakasa i hawyi taꞌatuwyriaꞌin tok pe rasom Iesui iꞌatuꞌe — Towyriaꞌin upi tut watꞌymo iꞌatuꞌe toꞌope wen maꞌato wãtym hawyi taꞌatukat Kurum Iwasu Iesui iwyriaꞌin upi maꞌato yt taꞌatupuẽti i."
45 Miꞌi hawyi teꞌeraꞌaipok i raꞌyn tawa wato Ierusarẽi kape Iesui kat hamo."
46 Myeꞌym eꞌat taꞌatukat Iesui itote hawyi taꞌatupuẽti Tupana mõtypot yat pe. Isareu ywania woꞌonãpin haria akag tok pe taꞌatupuẽti kurum iwasu Iesui. Miꞌi tote Iesui tuwanẽtup kahato woꞌonãpin haria akag koꞌi ehay kape hawyi apo apoꞌe woꞌonãpin haria akagnia kape. Myeꞌym eꞌat turan ihay se kahato miꞌiria kape."
47 Miꞌi pote itotiaria woꞌomuꞌe akag kororia teꞌeruwanẽtup kahato Kurum Iwasu Iesui piat taꞌatuwesat kuap kahato hap kape. Miꞌi hawyi teꞌeroꞌe toꞌope — Taꞌi iweꞌeg kahato rasig Iesui iꞌatuꞌe."
48 Iuseꞌin ipuẽti Tupana mõtypot yat pe woꞌonãpin haria pyꞌasetpe hawyi teꞌeruwanẽtup kahato hawyi ity Maria toꞌe tope — Kat poteĩ meiũpe erepyhuꞌat uimẽpyt e. Paaꞌurutoꞌe kahato ekat haype kowoꞌi kowoꞌi uruikat en tawa wato pe e. Haty kahato uruwanẽtup hawe yt uruipuẽti i En hawyi e Iesui pe ity."
49 Miꞌi hawyi Iesui tiwesat — Kat pote uikat kowoꞌi kowoꞌi e. Kat pote yt uikat i mesuwe Tupana mõtypot yat pe yn e. Yt eweikuap i apo aikotã areĩneꞌen neran Uiꞌywot sese yat pe ipotpap nug hap ete e Iuse pe Maria pe."
50 Maꞌato yt taꞌatukuap hin i Iesui e hap."
51 Miꞌi hawyi Iesui taꞌaipok i raꞌyn toꞌywot hit mana Maria wywo tawa Nasare kape iꞌatumikyꞌesat ewywuat nug hamo. Miꞌi hawyi ity yt waureꞌe hin i raꞌyn Iesui e hap tawa Ierusarẽi miat hap. Tuwanẽtup kahato ihay kape — Kat pote yt uikat i Uiꞌywot Sese yat upi Iesui e hap kape at kaꞌap tuwanẽtup.
"52 Miꞌi hawyi tawa hit Nasare pe Iesui topyhuꞌat motꞌi. Tuwemotag itote yne ete. Miꞌi hawyi itote tuwepiitmoesaika hawyi tuwemotag kahato poꞌog poꞌog yne eꞌat hap ewy. Iweꞌeg kahato yne eꞌat pe poꞌog poꞌog totag hap ewyꞌewy iweꞌeg. Miꞌi hap ewy miitꞌin mowepit hap ete tuwemotag iꞌewyte Tupana kuap hap ete tuwemotag. Miꞌi hap upi Tupana tuwehum kahato Iesui ete.
"1 Pyno saꞌawyꞌi mekewat morekuat Sesa toĩneꞌen morekuat koro hap eꞌat pe turan Tupana ihay raꞌyn paꞌi Sakaria saꞌyru Iuwãu kape yahig wato sese tote. Miꞌi hawyi Tupana tiwyro kahato Iuwãu wanẽtup hawe ihay. Miꞌi turan morekuat Tiperiu Sesa e hap 15 anu toĩneꞌen morekuat koro wo yi wato Humanu ywania torania potypot no toĩneꞌen. Miꞌi pote wẽtup eꞌat pe morekuat Sesa tiꞌatukaykay tuwewawi tetuꞌisaria hawyi toiꞌatumowato miꞌiria. Miꞌi hawyi toꞌe tuꞌisa Pũsiu Piratu pe — Waku ereĩneꞌen Iuteu ywania morekuat no yi Iuteu pe uhyt e. Miꞌi hawyi toꞌe tuꞌisa Eroti pe — Waku ereĩneꞌen yi Karireia piaria porekuat no uhyt e. Miꞌi hawyi iꞌewyte toikaykay toywyt sese Wiripi tuwewawi hawyi toꞌe tope — Waku ereĩneꞌen yi Itureia piaria porekuat no mekewat Iuteu ywania iraniaꞌin kawiat porekuat no e. Maꞌato waku aru poꞌog atum yi epe uheywyt en tupono e. Waku wy yi wato Tacunite atum epe iꞌewyte yi wato Irisania atum epe wy iꞌewyte yi wato Apirene atum epe uheywyt Wiripi en mote e. Miꞌi hap eꞌat pe Tupana ihay saꞌawyꞌi Paꞌi Sakaria saꞌyru Iuwãu wywo mekewat yahig koro note."
2 Iꞌewyte mekewat eꞌat pe Iuteu ywania tiꞌatuꞌairo typy paꞌi taꞌatuepaꞌi koro wuat. Wẽtup paꞌi Anai e hap wẽtup ok paꞌi Kaꞌiwa e hap. Miꞌi hawyi miꞌiria taꞌatunug paꞌi koro wo Tupana mõtypot yat pe. Miꞌi hap eꞌat pe Tupana ihay saꞌawyꞌiwuat ahetꞌok hat Iuwãu wywo."
3 Pyno miꞌiria tukupteꞌen miitꞌin akag wuat turan Tupana ihay kahato paꞌi Sakaria saꞌyru Iuwãu yahig notiat ieĩneꞌen hat pe — Iuwãu e woroꞌairo en uhehay enoi miitꞌin miat hamo e. Miꞌi hawyi Iuwãu toto Tupana ehay moherep hamo Tupana e hap ewy. Miꞌi hawyi ikohyewyry kahato mekewat Iũtãu hy ẽpe upi. Miꞌi hap upi ẽpe upiaria toiꞌatumuꞌe kahato Tupana ehay wo. Mio tã e — Eweiꞌaipok to Tupana kape e. Waku hawyi worohoꞌosetꞌok eipe e. Taꞌi eweitoiat ro eminug saꞌag koꞌi hawyi Tupana waure wo toĩneꞌen eiminug saꞌag koꞌi kai e."
4 Aikotã saꞌawyꞌitewuat Tupana ehay moherep hat Isaia timoherep yne ahetꞌok hat Iuwãu etiat tomiwan me hap ewy. Mio tã toꞌe — Tut wyti aru wẽtup ok tehay pirik wuat henoi henoi miitꞌin miat yahig notiat hat e Iuwãu etiat tomiwan me. Miꞌi miit wyti aru mio tã e wuatꞌi tomimuꞌeria pe — Eiwanẽtup hawiat muꞌap yt hãpyk i rakat ewy toĩneꞌen iporiꞌok kahato rakat ewy e aru e. — Maꞌato miꞌi kaipyi eweiꞌaipok to Tupana kape eiwanẽtup hap mohãpyk hamo hawyi muꞌap hãpyk hap ewy Tupana einug e aru mekewat Tupana mipoꞌoro e. — Eweikupteꞌen no Tupana wanẽtup hawe hãpyk takat hawyi eiwanẽtup hap muꞌap ikahu rakat ewy raꞌyn topyhuꞌat aru e aru Tupana mipoꞌoro e Tupana Isaia miwan me."
5 Mio tã e Tupana saꞌawyꞌi — Uimipoꞌoro Miitꞌin Ehakyeraꞌat ut hap moherep hat wyti aru atipoꞌoro e. Miꞌi miit wyti aru muꞌap nug hat ewy topyhuꞌat e Tupana miwan miat ahetꞌok hat Iuwãu ete. Taꞌi miꞌi miit wyti aru muꞌap nug hat ewy topyhuꞌat e. Muꞌap saꞌag koꞌi mokahu hamuat tutunug e. Muꞌap iꞌanam kahato hyri kawiat toihywytip yne e. Muꞌap yityꞌok ete ipoity rakat toimohãpyk e. Miꞌi hawyi muꞌap saꞌag koꞌi yi hot pe itym nakat toimokahu kahato e. Miꞌi hawyi hãpyk yne muꞌap hawyi atipoꞌoro Uhemiit Hoꞌowasat Rakaria Puẽti Hat e. Miꞌi hawyi Uimipoꞌoro Uhemiit Sese muꞌap mohot hat toimoherep kahato miitꞌin me tehay pirik wo — Tut irane tut irane Tupana Mipoꞌoro Ahehakyeraꞌat hat e aru. Eiwemohãhyk to ipuꞌap hawyi wyti aru tut ahepe e aru Uhemiit ut hap moherep hat e Tupana saꞌawyꞌi."
6 Miꞌi hawyi ti Uimipoꞌoro Wuatꞌi Ywania Ehakyeraꞌat Hat akasa haria iꞌatu kahato tukupteꞌen aru mesuwat yi wato hap ok tã e Tupana Isaia miwan 40.3 pe Tosaꞌyru Iesui etiat.
"7 Pyno Isaia e hap ewy kahato Iuwãu tiꞌatumuꞌe miitꞌin itote Iũtãu hy ẽpe upiaria. Miꞌi hawyi tõꞌẽ kahato miitꞌin tuwewawi. Miꞌi hawyi typyꞌi kahato miitꞌin putꞌokꞌiꞌatuꞌe Iuwãu ete taꞌatusetꞌok hap kyꞌesat haria. Miꞌiria pe Iuwãu toꞌe — Moi mẽpyt ewywuat eipe e. Yt nakuaria i eipe e. Tupana piat eiꞌapiheg hap yt eweikyꞌesat i pote eweiꞌõꞌẽ Tupana kape imohey hamo hawyi worohoꞌosetꞌok e. Taꞌi Tupana piat ehetꞌok hap eweikyꞌesat pote eiwemorem no Tupana kape e Iuwãu."
8 — Waku eiminug saꞌag koꞌi hap eweiꞌatuꞌatoiat yne yne e. Miꞌi tã ewetunug hawyi iraniaꞌin ikuap taꞌyn Tupana kapiat eiꞌaipok hap e. Maꞌato — Waku kahato uruto yt eweiꞌe teiꞌo e. — Uruto ti aseꞌi Aparãu emiariru koꞌi pote wakuaria urutukupteꞌen Tupana wanẽtup hawe yt eweiꞌe teiꞌo e. Taꞌi ahaꞌaseꞌi minug wakuap koꞌi yt putꞌokꞌe i ahowawi aimowaku Tupana wanẽtup hawe e. Taꞌi aiwaku hap yt tut i aiꞌywãꞌĩ hap kaipyi e. Taꞌi Aparãu ewaku hap yt ahehakyeraꞌat kuap hin i e. Taꞌi eipiit ahaꞌaseꞌi Aparãu piit ewywuat kahato toĩneꞌen maꞌato eiminug saꞌag koꞌi yt Aparãu ewywuat hin i e. Taꞌi Tupana tikyꞌesat pote tutunug kuap mesuwat nu koꞌi kawiat aipiit koꞌi ewywuat e. Toikyꞌesat pote Aparãu emiariru piit koꞌi tutunug kuap mesuwat yi kawiat e. Maꞌato wakuaria imohey haria Aparãu ewywuaria yn waku Tupana wanẽtup hawe e Iuwãu."
9 — Eiweꞌeg wo o e katupono Tupana mikoi ypia yt haat i rakat ewywuat eweikupteꞌen. Aikotã aimikoi yt aipoi i hap ewywuat eipe. Pywo pe ti mesup taꞌyn ehapo ete toĩneꞌen Tupana piat eiꞌapiheg hap. Ywyhap ewywuat toĩneꞌen Tupana po pe eikai aikotã aimikoi yp yt haat i rakat ewywuat watitek ywyhap wo hap ewy eweikupteꞌen mesup e. Pyno eiweꞌeg wo o katupono ywyhap ewywuat toĩneꞌen Tupana po pe ehete aikotã ariaꞌyp koꞌi yt haat i rakaria ypugha hamo hat ewy toĩneꞌen eikai. Aikotã watiꞌypugha hawyi watiꞌatusokwuk aheꞌaria wo miꞌi hap ewy Tupana tunug ehepe saꞌag ewetunug mote e Iuwãu õꞌẽ haria pe."
10 Miꞌi hawyi yahig kapiat howawiat õꞌẽ haria apoꞌiꞌatuꞌe Iuwãu me — Yt naku i rat urutuwat aria wato kape iꞌatuꞌe. Yt naku i Tupana uruꞌapiheg koꞌi urutopyhuꞌat wuatꞌi eꞌat pe iꞌatuꞌe. Miꞌi pote aikotã aru waku urutunug Tupana ehamo paaꞌurutoꞌe hamo iꞌatuꞌe Iuwãu me."
11 Miꞌi hawyi Iuwãu tiꞌatuwesat — Pyno ehesokpe typy pote ewehoꞌoium no yt hesokpe i rakaria pe e. Iꞌewyte eimiꞌu toĩ mote eweiꞌatumoenuk to hesyꞌat rakaria e Iuwãu paaꞌe haria pe."
12 Iꞌewyte woꞌopyhyp haria tukupteꞌen itote wesetꞌok teran hanuaria. Miꞌiria iꞌatupotpap Iuteuria ewanĩkaptia Humanu ywania eporekuat saꞌup sat hamo. Miꞌiria wyti wuatꞌi kaipyi taꞌatuporekuat wuanuat haꞌup poreraꞌat haria. Maꞌato poꞌog iwato taꞌatusat taꞌatuporekuat miẽtup koꞌi kai. Miꞌi hawyi ipatꞌok — Uruwano raꞌyn iꞌatuꞌe haria. Iꞌewyte miꞌiria apoꞌiꞌatuꞌe Iuwãu me — Urumuꞌe hat aikotã aru waku urutunug Tupana mowepit hamo iꞌatuꞌe katupono Tupana piat uruꞌapiheg hap yt uruikyꞌesat i pote iꞌatuꞌe Iuwãu me."
13 Miꞌi hawyi Iuwãu tiꞌatuwesat morekuaria saꞌup sat haria pe — Yt eweiꞌatumaꞌat reiꞌo miitꞌin e. Eiporekuat miẽtup ok tã yn ewetat ro e Iuwãu muꞌap pyhyp haria pe.
"14 Miꞌi hawyi iꞌewyte suraraꞌin wesetꞌok teran haria apoꞌiꞌatuꞌe Iuwãu me — Miꞌi hawyi uruto apuru aikotã urutunug Tupana mowepit hamo iꞌatuꞌe. Miꞌi hawyi Iuwãu tiꞌatuwesat — Yt ewepohari teiꞌo iraniaꞌin ekat eipyꞌahak popuo neꞌi e. Yt eheso i teiꞌo miitꞌin minug koꞌi ete e. — Waku rakat miꞌi miit eweiꞌe ro waku rakat pe e. — Yt naku i rakat miꞌi miit eweiꞌe ro yt naku i rakat pe e. Yt eheso i teiꞌo miitꞌin etiat eiporekuat pe e. Miꞌi hawyi yt naku i eweiꞌe eiporekuat pe — Uhepiat uipotpap hap saꞌup emiium yt iwato i yt eweiꞌe teiꞌo e Iuwãu suraraꞌin me.
"15 Miꞌi hawyi miitꞌin hekatup kahato Tupana Mipoꞌoro Taꞌatuporekuat nuat. Miꞌi pote teꞌeruwanẽtup kahato Iuwãu kape — Pywo apo Iuwãu ni Tupana Mipoꞌoro Aiporekuat nuat putꞌokꞌe sio yt iꞌatuꞌe teꞌeruwanẽtup hawe."
16 Maꞌato Iuwãu toꞌe iꞌatuepe — Uito ti yt Tupana Mipoꞌoro Wuatꞌi Ywania Ehakyeraꞌat hanuat i e. Taꞌi uito yꞌy wuat woꞌosetꞌok hat neꞌi maꞌato Miꞌi Miit wẽtup ok wyti aru poꞌog wakuat uikawiat raꞌyn e. Uhewaku hap uiat yt putꞌokꞌe hin i heropat hanuat e. Uhewaku hap yt putꞌokꞌe i Tupana Miꞌairo Wuatꞌi Miitꞌin Porekuat nuat py sokpe saity pok hamo e. Uito yꞌy wuat yn woꞌosetꞌok hat maꞌato Tupana Mipoꞌoro Koro ti aru topotsetꞌok miitꞌin Tupana Pãꞌãu wo raꞌyn e. Maꞌato yt eweimohey i Imipoꞌoro pote ehatyꞌi hatyꞌi hap yn topyhuꞌat Tupana kaipywiat e. Taꞌi yt eweimohey i Tupana Mipoꞌoro pote aria wo ehetꞌok hap haty hap ewywuat tutunug e."
17 Miꞌi Miit panene ewy ihay putꞌoktoꞌe hawyi aikotã watiꞌatuꞌyky arui iãꞌỹi sese puẽti hamuat hap ewy ti aru toiꞌyky miitꞌin wakuaria puẽti hamo e. Miꞌi hawyi toiꞌatukat kahato temiitꞌin wakuaria aikotã watikat panene pe arui iãꞌỹi wakuat hap ewy e. Tomohey haria toiꞌatukat watikat iãꞌỹi wakuat ewy iꞌewyte tomohey ran haria toiꞌatukat iãꞌỹi ape ewy e. Wasere upi toikat panene pyi hap ewy toiꞌatupatꞌok tomohey haria sese iꞌewyte tomohey ran haria e. Yt nakuaria i ti aru iꞌape koꞌi ewywuaria mipugha wuat aria yt hasep i rakat pe miꞌiria ti aru toiꞌatupugha aria wuatꞌi eꞌat piat pe e Iuwãu õꞌẽ haria pe."
18 Wakuat sehay iãꞌãkap wuo Iuwãu tiꞌatunãpin Iũtãu hy ẽpe etiaria miitꞌin moweꞌeg hamo."
19 Iꞌewyte morekuat Eroti minug yt naku i hap koꞌi toimoherep yne. — Taꞌi morekuat Eroti teroꞌok toywyt morekuat Wiripi eharyꞌi hawyi totioto raꞌyn toꞌyat kape teharyꞌi e. Yt naku i kahato miꞌi tã watunug mote e Iuwãu miitꞌin me."
20 Miꞌi tã e Iuwãu morekuat ete pote morekuat Eroti tipyhik taꞌyn ahetꞌok hat Iuwãu woꞌopyhik hawe. Toipyhyp Iuwãu hawyi — Yt naku i kahato morekuat Eroti iꞌatuꞌe miitꞌin. Iwato kahato morekuat Eroti minug saꞌag koꞌi watikuap mesup iꞌatuꞌe.
"21 Pyno Iuwãu topyhik hap owakai te Iuwãu tiꞌatusetꞌok kahato miitꞌin. Iꞌewyte wẽtup eꞌat pe Iesui tut raꞌyn howawi tosetꞌok hamo. Tosetꞌok hawyi Iesui Tupana kape ihay. Miꞌi turan okenꞌypy ewy tuwemoherep atipy kaipyi."
22 Miꞌi hawyi atipy kaipyi Tupana Pãꞌãu tut raꞌyn pykasu ewy. Miꞌi hawyi taꞌapyk Iesui apy tote. Miꞌi hawyi atipy kaipyi sehay putꞌokꞌe Iesui etiat — Uhaꞌyru Sese En e. Uimowepit kahato hat En Uhaꞌyru En mote e. Arehum kahato epe Uhaꞌyru Sese e Tupana Iesui pe.
"23 Tosetꞌok hawyi Iesui haꞌawynug naꞌyn topotpap hap 30 anu tuwemotag hap ete. Miꞌi hawyi Iesui haꞌawynug Toꞌywot Tupana piat topoꞌoro hap koꞌi. Miꞌi pote imimuꞌeria miitꞌin teꞌeroꞌe — Taꞌi watikuap taꞌyn Iesui iꞌatuꞌe. Meiẽ ti ahetawa Nasare piat panipaniꞌe hat Iuse saꞌyru iꞌatuꞌe. Iesui ywot Iuse mimotag hat topyhuꞌat iꞌatuꞌe.
Uito ti mesuwat miwan nug hat IRUKA. Pyno mesuwe ahenoi teran ehepe Iesui eꞌaseꞌiꞌin saꞌawyꞌitewuaria. Pyno Iesui ywot hit ewywuat IUSE Imotag hap topyhuꞌat. Pyno Iesui eꞌaseꞌi Iuse ywot ERI e hap toĩneꞌen miwan me iꞌatuꞌe."24 Miꞌi hawyi Iesui eꞌaseꞌi Eri ywot MATATI e hap toĩneꞌen. Miꞌi hawyi Matati ywot IREWI toĩneꞌen iꞌatuꞌe. Miꞌi hawyi Irewi ywot MEUKI e hap. Miꞌi pytkai Meuki ywot IANAI iꞌatuꞌe. Ianai e hap ywot IUSE POT iꞌatuꞌe."
25 Pyno Iuse pot ywot MATATIA iꞌatuꞌe. Miꞌi hawyi Matatia ywot AMO iꞌatuꞌe. Miꞌi hawyi Amo ywot NAŨ iꞌatuꞌe. Pyno Naũ ywot ESIRI iꞌatuꞌe. Esiri ywot NAKAI iꞌatuꞌe."
26 Miꞌi hawyi Nakai ywot MAATE iꞌatuꞌe. Maate ywot MATATIA iꞌatuꞌe. Matatia ywot SEMEI iꞌatuꞌe. Semei ywot IUSEKI iꞌatuꞌe. Iuseki ywot IOTA iꞌatuꞌe."
27 Iota ywot IUANA iꞌatuꞌe. Iuana ywot IRESA iꞌatuꞌe. Iresa ywot SURUPAPEU iꞌatuꞌe. Surupapeu ywot SARATIEU iꞌatuꞌe. Saratieu ywot NERI iꞌatuꞌe."
28 Miꞌi hawyi Neri ywot MEUKI iꞌatuꞌe Meuki ywot ATI iꞌatuꞌe. Ati ywot KUSÃ iꞌatuꞌe. Kusã ywot EUMUTÃ iꞌatuꞌe. Eumutã ywot ET iꞌatuꞌe."
29 Miꞌi hawyi Et ywot IUSUE iꞌatuꞌe. Iusue ywot ERIESE iꞌatuꞌe. Eriese ywot IURĨ iꞌatuꞌe. Iurĩ ywot MATATE iꞌatuꞌe. Matate ywot IREWI iꞌatuꞌe."
30 Irewi ywot SIMEÃU iꞌatuꞌe. Simeãu ywot IUTA POT iꞌatuꞌe. Miꞌi hawyi Iuta pot ywot IUSE iꞌatuꞌe. Iuse ywot IUNA iꞌatuꞌe. Iuna ywot ERIAKĨ iꞌatuꞌe."
31 Eriakĩ ywot MEREA iꞌatuꞌe. Merea ywot MENA iꞌatuꞌe. Mena ywot MATATA iꞌatuꞌe. Matata ywot NATÃ iꞌatuꞌe. Miꞌi hawyi Natã ywot ahaꞌaseꞌi Morekuat TAWI iꞌatuꞌe."
32 Miꞌi uimiwan kaipyi watikuap taꞌyn AIPOTYPOT IESUI Morekuat Tawi Emiariru Emiariru hap. Miꞌi hawyi Morekuat Tawi ywot IESE iꞌatuꞌe. Iese ywot IUPETE iꞌatuꞌe. Iupete ywot PUASI iꞌatuꞌe. Puasi ywot SAMŨ iꞌatuꞌe. Samũ ywot NAASŨ iꞌatuꞌe."
33 Miꞌi hawyi Naasũ ywot AMINATAPE iꞌatuꞌe. Aminatape ywot ATIMĨ iꞌatuꞌe. Atimĩ ywot ARANI iꞌatuꞌe. Arani ywot IRŨ iꞌatuꞌe. Irũ ywot WARE iꞌatuꞌe. Miꞌi hawyi Ware ywot aseꞌi pot IUTA iꞌatuꞌe."
34 Aseꞌi pot Iuta ywot IAKO iꞌatuꞌe. Iako ywot ISAKI iꞌatuꞌe. Isaki ywot ahaꞌaseꞌi koro APARÃU iꞌatuꞌe. Miꞌi uimiwan kaipyi watikuap AIPOTYPOT IESUI ahaꞌaseꞌi koro Aparãu Emiariru Emiariru hap. Miꞌi hawyi ahaꞌaseꞌi Aparãu ywot TARE iꞌatuꞌe. Tare ywot NAKU iꞌatuꞌe."
35 Miꞌi hawyi Naku ywot SERUKI iꞌatuꞌe. Seruki ywot IRAKÃU iꞌatuꞌe. Irakãu ywot WAREKI iꞌatuꞌe. Wareki ywot EPET saꞌyru. Miꞌi hawyi Epet ywot SARE iꞌatuꞌe."
36 Miꞌi hawyi Sare ywot KAINÃ iꞌatuꞌe. Kainã ywot AWASATE iꞌatuꞌe. Awasate ywot SẼ iꞌatuꞌe. Sẽ ywot wuatꞌi eꞌaseꞌi pot NUꞌE iꞌatuꞌe."
37 Nuꞌe ywot IRAMEKI iꞌatuꞌe. Irameki ywot METUSARA mekewat ieĩneꞌen motꞌi kahato hat iꞌatuꞌe. Miꞌi hawyi Metusara ywot INOKI iꞌatuꞌe. Inoki yt ikuꞌuro i katupono Tupana tioto atipy kape miꞌi miit. Miꞌi hawyi Inoki ywot IARETE iꞌatuꞌe. Iarete ywot MAREREU iꞌatuꞌe. Miꞌi hawyi Merereu ywot KAINÃ iꞌatuꞌe."
38 Kainã ywot ENU iꞌatuꞌe. Enu ywot SETE iꞌatuꞌe. Sete ywot ÃTÃU iꞌatuꞌe. Ãtãu ni Tupana minug mekewat miit saꞌawyꞌiwuat miitꞌin eꞌaseꞌi pot.
Mesuwat miwan nug hat ti Iesui ehay moherep hat IRUKA. Pyno mesuwat uimiwan kaipyi watikuap yne raꞌyn AHEHAKYERAꞌAT HAT IESUI eꞌaseꞌi eꞌaseꞌi pot Ãtãu emiariru emiariru emiariru hap koꞌi Ãtãu kaipyi Iesui kape set koꞌi watikuap yne raꞌyn IESUI eꞌaseꞌi set koꞌi. IESUI ywot sese maꞌato TUPANA. Waku raꞌyn."1 Tosetꞌok hap kahu hawyi Iesui toto tuweran naꞌyn miitꞌin kaipyi mekewat Iũtãu hy pyi. Tupana Pãꞌãu yn naꞌyn Iesui piit pe. Taꞌi yne Tupana Pãꞌãu topyhuꞌat kahato ipiit pe. Miꞌi pote tutunug Tupana mikyꞌesat koꞌi torania iꞌe hap ewy yn tutunug. Miꞌi hawyi muꞌap upi Tupana Pãꞌãu toꞌe tope — Uhaꞌyru e atikyꞌesat ereto yahig wato kape aikope yt uwe i miitꞌin toĩneꞌen hap kape e. Miꞌi hawyi Iesui toto Tupana Pãꞌãu mikyꞌesat ewy. Miꞌi hawyi ahiag akag sese toto Iesui maꞌat hamo. Toikyꞌesat Iesui temiit no. Toikyꞌesat Iesui tomikyꞌesat nug hanuat."
2 Taꞌi 40 eꞌat 40 ewãtym Iesui toĩneꞌen mekewat yahig wato tote. Yt kat i miꞌu tutuꞌu. Itote yt tenuk i 40 eꞌat 40 wãtym. Miꞌi hawyi hesyꞌat sakpoꞌe tuete itote. Miꞌi hawyi yt hesaika i yt kat i miꞌu tutuꞌu hawyi sese yt hesaika i."
3 Hesyꞌat kahato sese itote. Miꞌi turan ahiag akag toto Iesui iãꞌãg hamo. Toikyꞌesat Iesui tunug hãꞌãg hap. Toikyꞌesat Iesui tomikyꞌesat nug hat. Miꞌi hawyi toto Iesui kape hawyi toꞌe tope — Pywuat Tupana Saꞌyru En mote etomoherep to uhepe esaika hap wuatꞌi nug kuap hap e. Etunug no emiꞌu wo man mesuwat nu kawiat Mehĩ e."
4 Maꞌato Iesui tiwesat — Yt atunug i rat eꞌe hap ewy ahiag e katupono saꞌawyꞌi sese mio tã e Tupana Musei miwan Teuterumumiu 8.3 pe — Yt naku i miꞌu mesuwarotiat yn eweikat at kaꞌap eipiit moꞌok hamo e. Yt naku i miꞌu kape yn eiwewanẽtup e. Miꞌu kape yn eiwewanẽtup wote yt karãpe i eweikat eheĩneꞌen hap sese wuatꞌi eꞌat piat e Tupana Musei miwan me Teuterunumiu 8.3 pe e Iesui ahiag me."
5 Miꞌi hawyi ahiag tioto Iesui yityꞌok ywaiti kahato rakat kape hawyi itote pyi meremo toimoherep Iesui kape morekuaria etama mesuwat yi totiaria torania wuatꞌi etama iꞌatuekat ikahu rakat toimoherep yne Iesui kape tomuꞌetu hap ewy. Miꞌi hawyi miꞌi tote toꞌe Iesui pe."
6 — Erahaꞌat ro mesuwarotiat ikahu kahato rakat koꞌi kape Mehĩ katupono mesuwat yi totiat atum yne teran epe uhemiit no ereĩneꞌen mote e. Taꞌi yne miit atum teran epe mesuwat ewaꞌakasa hap koꞌi katupono uiat yne mesuwat yi tote torania e. Atum kuap yne mesuwarotiat ekat wo epe uimikyꞌesat ewywuat etunug yne hawyi e. Uimõtypot hap etunug hawyi mesuwat koꞌi iwato hap ok tã atum yne torania epe e. Miꞌi hawyi wuatꞌi Miitꞌin Porekuat no ereĩneꞌen mesuwat yi wato ok tã e. Miꞌi hawyi wuatꞌi ywania tukupteꞌen ewano iꞌewyte emõtypot haria miꞌiria teꞌeropyhuꞌat e ahiag Iesui pe."
7 Toꞌiro uhupi e. Taꞌi uiat koꞌi tukupteꞌen meimuẽwaria yi totiat yne e. Miꞌi pote uimõtypot En hawyi erepỹꞌãtutuk uhowawi miꞌi pote aru atum yne raꞌyn mesuwat yi totiaria epe Uhyt e ahiag Iesui pe."
8 Maꞌato Iesui tiwesat — Yt rat ahiag yt naku i arepỹꞌãtutuk ewawi katupono yt naku i woronug uhetupana wo neꞌi katupono mio tã e Tupana Musei miwan me — Waku uhowawi yn eiwepỹꞌãtutuk e hawyi waku Uito yn eTupana wo areĩneꞌen e. Yt uwe i toĩneꞌen miꞌi rẽ e Tupana nimopywiat Teuterunumiu 6.13 miwan me. Yt naku i pãi areꞌe — en tupana wo ahiag katupono Tupana yn Tupana wo topyhuꞌat uimimõtypot nuat Tupana yn aheropat hat e miwan me e Iesui ahiag me."
9 Miꞌi hawyi ahiag tioto Iesui Ierusarẽi kape yityꞌok totiat Tupana mõtypot yat koro ywaiti rakat tote toipag Iesui. Itote Tupana mõtypot yat piaria sem tukupteꞌen mekewat okipy wato tote. Miꞌi hawyi ahiag toꞌe Iesui pe — Pywo Tupana Saꞌyru En mote eꞌoghytꞌat ro meiũpepyi wuatꞌi miitꞌin ehamo hawyi waku erepopy hawyi wuatꞌi miitꞌin tikuap En Tupana Saꞌyru sese hap e."
10 Waku eꞌoghytꞌat meiũpepyi yi kape iꞌatuehamo katupono saꞌawyꞌi Tupana toꞌe morekuat Tawi wepy 91.11 pe — Uhemiit taꞌat pote yt ikuꞌuro i katupono meremo atipoꞌoro wẽtup ok atipy kaipyi taꞌat rakat okhytꞌat hamo hawyi yt ikuꞌuro hin i e ti ahepe nimo te miwan me Mehĩ e ahiag Iesui pe."
11 Miꞌi hawyi — Pyno ehãꞌãg no katupono atipy kaipywiaria meremo epytyk hawyi yt eraꞌat i hamo e. Pyno erepopy ro mesuwepyi wuatꞌi miitꞌin ehamo yi kape hawyi meremo taꞌatukuap esaika hap e. Miꞌi ehãꞌãg hawyi yt erepik hin i yi tote e miwan me e ahiag Iesui pe."
12 Maꞌato Iesui tiwesat — Motoro ahiag pya kahato uikai yt atikyꞌesat hin i eꞌe hap ewy atunug yt naku i ahãꞌãg Tupana sio uikuꞌuro sio yt hap ete katupono mio tã e iꞌewyte Tupana miwan me — Yt naku i eiwekaipyi eweiꞌe — Yt uiweꞌeg i pytkai uiminug saꞌag ete eweipehik uipowyro aru Tupana eiꞌe hap e. Yt naku i — Uipowyro aru ipoityꞌi pytkai eweiꞌe uhepe e Tupana miwan me e. Yt naku i uhãꞌãg e Tupana sio ekuꞌuro sio yt hap ete e Tupana ahepe nimo te Musei miwan Teuterunumiu 6.16 pe e Iesui ahiag me."
13 Miꞌi hawyi ahiag ipohep taꞌyn Iesui iãꞌãg kahato hap ete pyi. Yt toimaꞌat kuap i yt nakuap i nug hap ete maꞌato toto porapꞌi hap ewy neꞌi katupono tut i tut i tereto karania wo Iesui iãꞌãg iãꞌãg hamo maꞌato Iesui poꞌog hesaika ahiag kai.
"14 Miꞌi hawyi Iesui taꞌaipok i raꞌyn tomotag hap kape yi Karireia kape. Tupana Pãꞌãu piat tomoesaika topytꞌatnug naꞌyn hap wywo taꞌaipok. Miꞌi hawyi waku kahato toimoherep itote wuatꞌi miitꞌin mikuap kahato wo Iesui tuwemotag hap itote hawyi taꞌatuhenoi kahato toꞌope toꞌope — Iesui minug koꞌi waku kahato yt uwe i minug koꞌi ewy iꞌatuꞌe."
15 Miꞌi hawyi tewyry hap upi yne Tupana mõtypot yat koꞌi pe teke miitꞌin atumuꞌe hamo. Toiꞌatumuꞌe hawyi waku kahato iꞌatuꞌe imienoi koꞌi pe."
16 Miꞌi hawyi Tupana mõtypot hap eꞌat pe Iesui teke Tupana mõtypot hawe teko ewy Tupana mõtypot hamo. Miꞌi hawyi Iesui ipoĩꞌãm naꞌyn miitꞌin pyꞌasetpe Tupana ehay moherep miwan miat hamo teko saꞌawyꞌiwuat ewy tomotag eko ewywuat."
17 Miꞌi hawyi taꞌatuium naꞌyn saꞌawyꞌitewuat Isaia miwan tope imimowẽpap hamo katupono saꞌawyꞌi tetawa Nasare pe toimowẽpap Tupana ehay iꞌatuepe aikotã saꞌawyꞌi kurum iwasu Iesui turan tomotag hap turan toimoherep Tupana ehay miwan miat hap ewy. Miꞌi hawyi totat Tupana ehay miwan miat hawyi toikat raꞌyn miwan me aikowuat tomikyꞌesat ewywuat. Miꞌi hawyi toipuẽti raꞌyn sehay tuwetiat hawyi toimowẽpap tomipuẽti Tupana ehay tomoherep hat Isaia e hap miwan miat hap ewy."
18 — Uiwyriaꞌin e mesuwe mio tã e miwan me — Tupana Pãꞌãu Wakuat toĩneꞌen kahato uhepe e. Taꞌi Tupana uiꞌairo raꞌyn tehay wakuat moherep hamo e. Taꞌi Tupana uiꞌairo satek takaria ehakyeraꞌat hamo yt hekat i rakaria muꞌe yt kat saꞌup i hamuat e. Yt kat etiat kuap i haria moweꞌeg hamo uiꞌairo Tupana e. Mesup taꞌyn Tupana uipoꞌoro wanĩkaptia mipyhik piat koꞌi porenõtem taꞌatupyhik hap kaipywiat hamo e. Iꞌewyte ti yt iha pytig i rakaria mohapytig hamo uipoꞌoro e. Taꞌi Tupana uipoꞌoro raꞌyn miitꞌin yt uwe mikyꞌe i koꞌi kyꞌe sese hamo e. Taꞌi Tupana mio tã e uhepe — Atikyꞌesat etiꞌatuporenõtem miitꞌin yne iꞌatuwanĩkaptia po pywiat hamo e mesuwe miwan me e."
19 Tupana emiitꞌin ehakyeraꞌat hap eꞌat enoi hamuat uipoꞌoro e. Taꞌi Tupana ihay mesuwe Isaia miwan me yianmete uhetiat e Iesui itotiaria Tupana mõtypot yat piaria pe."
20 Mio tã e Iesui timowẽpap kahu hawyi tutum i raꞌyn mekewat Isaia miwan Tupana mõtypot yat piat eropat hat pe. Miꞌi hawyi Iesui taꞌapyk taꞌyn hawyi itote iꞌatumuꞌe hamo. Miꞌi hawyi itotiaria teꞌerahaꞌat kahato howawi kat e aru ihay e hap kuap hamo."
21 Miꞌi hawyi Iesui henoi iꞌatuepe — Mesuwat eꞌat mesuwat miwan uimimowẽpap saꞌawyꞌiwuat Isaia mienoi yianme uhetiat tohaꞌawynug naꞌyn ehehamo raꞌyn topyhuꞌat raꞌyn e Iesui tomotag haria pe."
22 Miꞌi hawyi itotiaria — Waku kahato ihay iꞌatuꞌe. Ihay se kahato hap watikuap iꞌatuꞌe. Maꞌato kat pote iweꞌeg kahato raꞌyn iꞌatuꞌe. Uwe som imuꞌe iweꞌeg hap ete katupono watikuap kahato Iesui ywot sese Iuse iꞌatuꞌe."
23 Taꞌi iꞌywot Iuse panꞌipanꞌiꞌe hat iꞌatuꞌe. Pyno uwe imuꞌe iweꞌeg hamo iꞌatuꞌe. Miꞌi hawyi Iesui toꞌe tomotag haria pe — Taꞌi eweikuap teran uwe piat uimuꞌe hap e. Taꞌi ewehenoi teran sehay potꞌi kaipyi mekewat sehay mikyryꞌi hap kaipyi — Paini iꞌahu rakat eremoehãite ro uruehamo aikotã iraniaꞌin etiꞌatumoehãite hap ewy eweiꞌe teran uhepe uimoweukaꞌi hamo. — Etiꞌatumoehãite kahato miitꞌin tawa Kawanaꞌũ piaria iꞌatuꞌe pyno waku mesuwe emotag hawe tawa Nasare pe iꞌewyte etiꞌatumoehãite urutoria eweiꞌe teran uhepe yt kat i uimohey hap eikai pytkai e Iesui."
24 Miꞌi hawyi — Etimoherep uruepe esaika hap wuatꞌi nug hamuat hawyi uruimohei En kurum eweiꞌe pote worohoꞌowesat — Yt uimõtypot hin i yt uimohey hin i eipe mesuwe uimotag hap etawa pe areꞌe. Pywo ti rat Tupana ehay moherep hat Uito pytkai uimotag hap totiaria yt uimohey hin i e. Aikotã toꞌe miwan me — Uimotag haria yt uimohey hin i e maꞌato iraniaꞌin kape atipoꞌoro uhehay moherep hat pote taꞌatumohey kahato maꞌato imotag hap tote yt hin i e hap ewy kahato eiperia mesup eweipyhuꞌat e. Maꞌato atipoꞌoro uiꞌe hap moherep hat wẽtup ywania kape pote itotiaria iꞌatuewaure kaꞌa kahato e. Maꞌato taꞌaipok taꞌyn tuwemotag hap kape hap totiaria yt uwe i ikyꞌesat e. Maꞌato iraniaꞌin tawa koꞌi kape — Ereke Mehĩ iꞌatuꞌe — Ereke Mimi iꞌatuꞌe e Tupana miwan me e Iesui tehay pun haria pe. Miꞌi hap ewy kahato mesuwe e Iesui tomotag haria pe. Yt uwe i mesuwe uimohey haria e Iesui tawa Nasare piaria pe.
"25 Pyno ahenoi teran poꞌog uimohey hap pun hap ete e Iesui. Nimo sese te iꞌatu kahato hiwu koꞌi tukupteꞌen aiꞌywania Isareu ywania tukupteꞌen mesuwe saꞌawyꞌi aheꞌyi tote e. Miꞌi hawyi Tupana tipoꞌoro temiit Eria e hap iꞌatuewawi e. Miꞌi hawyi Eria toꞌe iꞌatuepe — Mio tã e Tupana ehepe — Yt kat i hin i iꞌaman aru eimikoi ete hawyi yt kat i aru eimiꞌu e. Topap yne eimikoi yt kat i iꞌaman hawyi e. Myeꞌym anu kape ti yt kat i iꞌaman e Tupana ahaꞌaseꞌiꞌin me saꞌawyꞌi Tupana mipoꞌoro Eria wẽ pyi maꞌato yt taꞌatumohey hin i. Maꞌato toꞌe hap ewy putꞌokꞌe. Miꞌi hawyi 6 ewaty yt kat i iꞌaman mote iꞌatumikoi koꞌi topap yne hawyi iꞌatusyꞌat kahato mesuwat yi wato hap ok tã."
26 Miꞌi hawyi Tupana tipoꞌoro i tehay moherep hat Eria wẽtup ywania kape mekewat yi Sareta ywania etawa kape. Miꞌi hawyi putꞌokꞌe itote tawa hit Sitãu note uruꞌywania ewanĩkaptia etawa tote e. Miꞌi hawyi itote hiwu wẽtup ywania yat pe toĩneꞌen porap Eria. Mekewat hiwu Tupana tipoityro kahato e. Maꞌato Eria motag haria ahaꞌaseꞌiꞌin yt timohey i Eria pote Tupana yt tipoꞌoro hin i temiit Eria ahaꞌaseꞌiꞌin hiwu koꞌi kape e."
27 Iꞌewyte saꞌawyꞌiwuat Tupana ehay moherep hat Eriseu toĩneꞌen Tupana e hap moherep hat pywo sese hat mesuwe ahetawa pe e. Miꞌi eꞌat pe tukupteꞌen kahato itotiaria hepihi pihi rakaria heĩneꞌen turan maꞌato miꞌiria Tupana mipoꞌoro Eriseu yt tiꞌatumoehãite kuap i kat pote yt taꞌatumohey i pote e. Miꞌi hap eꞌat pe wẽtup surara akag putꞌokꞌe pya pyi Eriseu kape. Wẽtup ywania kaipyi tut. Wẽtup yi kaipyi tut mekewat hepihi pihi rakat Namã e hap het rakat e. Mekewat yi Siria kaipyi e. Miꞌi hawyi toikat Tupana ehay moherep hat Eriseu tomoehãite hamuat hap kyꞌewi. Miꞌi ti Eriseu timoehãite meremo raꞌyn Tupana esaika wo tomohey hap upi e. Yt aiꞌywania hin pytkai i toimoehãite e. Maꞌato aiꞌywania itote iꞌahu rakaria ahyt tukupteꞌen hepihi pihi rakaria e. Maꞌato miꞌiria yt toiꞌatumoehãite hin i katupono yt uwe i ahetama piaria imohey pote e Iesui tuwemotag hap totiaria pe yt tomohey i haria pe. Miꞌi hap ewy te Uito areĩneꞌen mesup eipyꞌasetpe e. Iraniaꞌin ywania poꞌog uimohey eikai e Iesui tomotag hanuaria pe mekewat tawa Nasare piaria pe."
28 Miꞌi hawyi Iesui ehay kuap kuap haria Tupana mõtypot yat piaria iꞌatupyꞌahak kahato raꞌyn Iesui ete — Iraniaꞌin ywania poꞌog eikai Tupana mohey hap ete e Iesui hawyi."
29 Miꞌi hawyi — Toꞌiro watiꞌauka Iesui iꞌatuꞌe. Toꞌiro watipun Iesui yityꞌok pyi yihot pe iꞌauka hamo iꞌatuꞌe. Miꞌi hawyi taꞌatuhãꞌãg iꞌauka hamo."
30 Maꞌato putꞌoktaꞌatuꞌe yityꞌok tote Iesui auka hamo iꞌokpun hamo raꞌyn turan Iesui tuwemorem iꞌatueowa kape hawyi yt heremo hin i topyhuꞌat. Miꞌi hawyi — Aikope toto Iesui iꞌatuꞌe. Yt watikuap i raꞌyn aikowo toto hap iꞌatuꞌe katupono iꞌatupyꞌasetpuo tokosap.
"31 Miꞌi hawyi Iesui toto wẽtup tawa kape raꞌyn tawa Nasare tuwemotag hap totepyi. Miꞌi hawyi Iesui taꞌaipok taꞌyn yi Karireia popyke tawa hit Kawanaꞌũ kape. Itote Tupana mõtypot hap eꞌat turan teke Tupana mõtypot yat pe itotiaria muꞌe hamo."
32 Itotiat Tupana yat piaria teꞌeruwanẽtup kahato aikotã aikotã Iesui mienoi koꞌi kape. — Iesui yt iraniaꞌin aimuꞌe haria ewy hin i iꞌatuꞌe katupono Morekuat Koro ewy aimuꞌe iꞌatuꞌe."
33 Miꞌi turan toĩneꞌen Tupana yat pe wẽtup ok miit ahiag ipiit piat rakat. Miꞌi hawyi ahiagnia taꞌatuehay pirik wo teꞌeroꞌe Iesui pe mekewat miit wẽ pyi."
34 — Kat hamo som eriot uruewawi Iesui iꞌatuꞌe. Kan etikyꞌesat urukaipyi iꞌatuꞌe. Taꞌi uruikuap taꞌyn uruꞌauka hamo eriot iꞌatuꞌe. Pywo ti rat uruikuap En. En ni Iesui tawa Nasare kaipywiat sut hat wakuat iꞌatuꞌe. En ni Tupana Mipoꞌoro ahiag akit hamuat iꞌatuꞌe haty wo."
35 Miꞌi hawyi Iesui wãiꞌe ahiagnia pe — Eipoꞌinik to ahiag e. Erẽtem no meiẽwat miit piit pyi ahiag e. Miꞌi hawyi ahiag tipun temiit iꞌatupyꞌasetpe tuwẽtem ipiit hawe. Miꞌi hawyi saꞌawyꞌiwuat miit ahiag ipiit piat rakat waku raꞌyn ahiag ipun pytkai yt kat i haty ipiit ete."
36 Miꞌi hawyi Iesui minug wakuat kape teꞌerewanẽtup kahato hawyi teꞌeroꞌe toꞌope — Aikotã som toiꞌatusopo kuap ahiagnia iꞌatuꞌe. Poꞌog ahiag kai Miꞌi Miit hesaika iꞌatuꞌe. Yt aimuꞌe haria ewy hin i tutunug kuap. Toipoꞌoro pote ahiag tuwẽtem meremo ihay pyi. Pywo pe ti poꞌog paini kai Iesui iꞌatuꞌe. Taꞌi Tupana Mipoꞌoro Aiporekuat nuat hesaika hap ewywuat nug hat toiꞌatuporenõtem ahiagnia meiũwat miit piit pyi iꞌatuꞌe. Tehay wo yn toiꞌatusopo kuap ahiagnia iꞌatuꞌe wanẽtup haria."
37 Miꞌi hap ewy tutunug mote wuatꞌi puaria ikuap yne Iesui minug wakuap koꞌi ahiag sopo tehay wuat hap.
"38 Miꞌi hawyi Iesui tuwẽtem Tupana yat pyi hawyi toto raꞌyn topotmuꞌe Nu Simãu Peteru yat kape. Miꞌi tote Peteru sakitu iꞌahu rakat toĩneꞌen. Ipiit hakup kahato. Miꞌi hawyi taꞌatuhẽtup taꞌyn Iesui pe — Etimoehãite o meiũwat uruwy Peteru sakitu iꞌahu rakat Mehĩ iꞌatuꞌe Iesui pe."
39 Miꞌi hawyi Iesui toto raꞌyn Simãu sakitu ewawi. Miꞌi hawyi wãiꞌe iꞌahu hawe hawyi tokosap meremo ipiit sakup hap. Miꞌi hawyi waku raꞌyn. Tehãite meremo hawyi iãpeꞌokꞌam getap wiat topotpap hamo õꞌẽ haria eropat hamo."
40 Miꞌi hawyi at minꞌe hawyi taꞌatuerut kahato taꞌatuwyriaꞌin iꞌahu rakaria Iesui ewawi. Miꞌi hawyi Iesui tuweponug iꞌahu rakaria ete hawyi toiꞌatumoehãite yne. Tuweponug hawyi waku yne raꞌyn."
41 Iꞌewyte Iesui tiꞌatupoꞌoro yne ahiagnia miitꞌin piit pyi. Tuwenõꞌẽ turan iꞌatuehay pirik kahato — Taꞌi En ni Tupana Saꞌyru Iesui iꞌatuꞌe. Maꞌato Iesui wãiꞌe iꞌatuepe. Yt toikyꞌesat i tomoherep hap katupono ahiag tikuap Iesui Tupana Saꞌyru hap. Miꞌi pote — Wãiꞌe iꞌatuepe eipoꞌinik to yt ewehenoi teiꞌo uwe Uito hap eweikuap hap ok tã e Iesui ahiagnia pe.
"42 Ihotꞌok kai i toto Iesui tuweran tawa Kawanaꞌũ pyi yt uwe i miit toĩneꞌen hap kape Tupana wywuat tehay kahato hamo. Miꞌi hawyi miitꞌin tikat kahato Iesui. Taꞌatupuẽti hawyi — Ereĩneꞌen no uruwywo uruetawa pe Mehĩ iꞌatuꞌe. Eto hawyi yt uruikyꞌesat hin i katupono iꞌatu kahato miitꞌin ekat haria iꞌatuꞌe miitꞌin sem Iesui pe."
43 Maꞌato Iesui tiꞌatuwesat — Uiwyriaꞌin ahenoi teran wuatꞌi tawa pe aikotã aikotã Tupana topyhuꞌat Wuatꞌi Miitꞌin Porekuat no hap etiat e. Miꞌi nug hamo Tupana uipoꞌoro e. Miꞌi tupono atunug neran uipoꞌoro hap e. — Atikyꞌesat yne ywania muꞌe hap Tupana e hap ewy uipoꞌoro pote Wuatꞌi muꞌe hamo e."
44 Miꞌi pote toto raꞌyn tawa Kawanaꞌũ pyi yne yꞌy hit i upi yne yi Iuteu puo wuatꞌi miitꞌin muꞌe hamo. Yne Tupana mõtypot yat koꞌi kape toto. Miꞌi hawyi teke yne Tupana mõtypot yat koꞌi pe tohenoi Tupana toĩneꞌen Miitꞌin Porekuat hap.
"1 Miꞌi hawyi wẽtup eꞌat pe Iesui yi Kenesare hyemyiꞌa hyẽpeke toĩneꞌen. Miꞌi tote teꞌeruwaꞌatunug kahato miitꞌin typyꞌi rakaria Iesui ewawi Tupana ehay kapiat wanẽtup hanuaria."
2 Itote turan typy eꞌyara yẽpe piat koꞌi pe Iesui taꞌakasa pira pytyk haria kape. Maꞌato ikaꞌiwaria yt uwe i yara koꞌi pe katupono teꞌeruwesuki wato koho hamo tuwenõꞌẽ taꞌatueꞌyara pyi ihyemyiꞌa hyẽpeke kape pira pytyk haria."
3 Miꞌi hawyi typyꞌi kahato tomimuꞌeria pote Iesui teke raꞌyn wẽtup yara pe hawyi toꞌe yara kaꞌiwat Simãu Peteru pe — Mehĩ atipuru porap eꞌyara katupono miꞌi totepyi atiꞌatumuꞌe teran miitꞌin sem ihyemyiꞌa hyẽpeke piaria hamo e Iesui Simãu me. Miꞌi hawyi Iesui e hap ewy meremo Simãu tunug. Miꞌi hawyi Iesui taꞌapyk yara pe hawyi toiꞌatumuꞌe raꞌyn miitꞌin mekewat yẽpeketotiaria yara pyi."
4 Miꞌi hawyi tehay kahu raꞌyn hawyi toꞌe raꞌyn Simãu me — Ereto i ro ihy pya kape e. Miꞌi totepyi ewyriaꞌin wywo waku eweipytyk pira koꞌi waku ewetopag ehesuki yꞌy pe pira pytyk hamo e."
5 Maꞌato Simãu toꞌe — Urukaꞌiwat e uruikat kahato raꞌyn kaꞌap mo pira suki wato wo wen maꞌato rat yt kat i hin i pira uruipytyk yt wẽtup i uruipytyk uruesuki wo e. Maꞌato etikyꞌesat pote urutunug neran eꞌe hap ewy miꞌi hawyi waku eꞌe hap ewy urutopag uruesuki yꞌy pe Mehĩ e Iesui pe."
6 Miꞌi hawyi taꞌatupag yꞌy pe taꞌatuesuki wato hawyi ipytꞌat kahato raꞌyn pira wo. Miꞌi hawyi pira sem koꞌi tihiot iꞌatuesuki wato."
7 Miꞌi pote taꞌatukaykay raꞌyn taꞌatuwyriaꞌin wẽtup yara piaria taꞌatupowyro hamo. Miꞌi hawyi taꞌatuhytmoi taꞌatueꞌyara koꞌi pe pira sem hawyi porap teꞌeraꞌapyꞌat pira iꞌatu kahato pote."
8 Miꞌi hawyi Simãu Peteru taꞌakasa Iesui minug wakuat kapiat hawyi toikuap taꞌyn Iesui minug yt uwe i minug kuap hap ok tã hawyi tuwepỹꞌãtutuk Iesui eowa kape toꞌe hamo — Mehĩ e ereto o pya kahato uikai kat pote yt nakuat i kahato rakat uito e tuwenoi raꞌyn Iesui pe. — Taꞌi uiat uhewaku hap ti yt putꞌokꞌe hin i emiit no areĩneꞌen hamo e. Mesup worokuap En wuatꞌi nug kuap hat ereĩneꞌen hap e. Miꞌi pote Wuatꞌi Kaꞌiwat no ereĩneꞌen e. Miꞌi pote aremõti uiminug saꞌag koꞌi ete e. Miꞌi pote yt naku i areĩneꞌen emiit no e Peteru Iesui pe."
9 Miꞌi hawyi Simãu tuwanẽtup kahato pira sem kape iꞌewyte yne iwywuat wat haria yara piaria teꞌeruwanẽtup kahato iꞌatu kahato pira taꞌatupytyk pote."
10 Iꞌewyte Simãu ekatuwyria seseria heꞌyara piaria ipowyro haria mehĩ Tiaku mehĩ Iuwãu mekewat uhyt Sepeteu saꞌyruꞌin teꞌeruwanẽtup kahato wy pira pytyk kahato hap kape. Iꞌewyte Simãu tehaꞌat kahato hawyi Iesui toꞌe — Yt erewanẽtup teiꞌo poꞌog miꞌi hap kape Simãu e katupono wyti aru mesuwat hawyi miitꞌin atupytyk Tupana wanuat hamo raꞌyn ereĩneꞌen ni aru aikotã mesuwat pira pytyk suki wuat hap ewy e."
11 Miꞌi hawyi teꞌeruwehik taꞌyn ihyemyiꞌa hyẽpeke hawyi taꞌatuꞌatoiat taꞌatupotpap hap pira pytyk hap Iesui upiat tuwat hamo.
"12 Iesui toĩnꞌen wẽtup tawa pe turan tut raꞌyn wẽtup ok miit hepihi pihi kahato rakat Iesui ewawi. Ipe ete hepihi yn yne ipiit ete. Miꞌi ti tuwewahik yi tote porog me Iesui yatype hẽtup hamo — Mehĩ e uimoehãite teran mote atikyꞌesat kahato uimowaku hap."
13 Miꞌi hawyi Iesui tuweponug ipiit pe hawyi toꞌe — Taꞌi woromoehãite teran uhyt e. Mio tã e hawyi meremo ipe pakup we toĩneꞌen. Yt wẽtup hepihi pihi i toĩneꞌen ipiit ete tokãꞌã raꞌyn hepihi pihi hap koꞌi."
14 Ipiit waku hawyi Iesui haty wo raꞌyn toꞌe tope — Uhyt yt ehenoi teiꞌo iraniaꞌin me uhepiat emoehãite hap mesup maꞌato ereto ro meremo paꞌi kape epiit kahu hap etiat moherep hamo aheko ewy e. Iꞌewyte etum no paꞌi pe Tupana piat emoehãite hap saꞌup aikotã saꞌawyꞌiwuat Musei aimuꞌe hap ewywuat e. Miꞌi etunug hawyi paꞌiria tikuap taꞌyn epe moehãite hap e.
"15 Miꞌi hawyi iraniaꞌin poꞌog ikuap Iesui etiat hawyi tõꞌẽ tõꞌẽ miitꞌin typyꞌi kahato Iesui ehay kapiat teꞌeruwanẽtup hamo. Iꞌewyte iꞌahu rakaria koꞌi tõꞌẽ taꞌatumoehãite Iesui piat kat hamo."
16 Miꞌi pote Iesui toto tuereto yt uwe i miit hap kape Tupana wywuat tehay hamo."
17 Wẽtup eꞌat pe Iesui piat miitꞌin atumuꞌe hap tote tukupteꞌen nagnia ehay enoi haria iꞌewyte miwan enoi haria apyk puo tukupteꞌen yi Karireia kaipywiaria yi Iuteu kaipywiaria tawa wato Ierusarẽi kaipywiaria tõꞌẽ miꞌiria Iesui mienoi kuap hamo. Mekewat eꞌat pe toĩ kahato Iesui kai Tupana esaika hap iꞌahu rakaria moehãite hamo."
18 Miꞌi turan tõꞌẽ ihainiaꞌin koꞌi wẽtup ok yt ipoĩꞌãm kuap i rakat yni pe ariaꞌyp ete heꞌyni pe taꞌatuerut Iesui ewawi. Miꞌi tote miit sem kahato puo taꞌatuerokosap iꞌahu rakat Iesui kape."
19 Maꞌato yt aikopuo kuap i taꞌatuerokosap Iesui kape. Miꞌi hawyi miitꞌin tok puo yt taꞌatuereke kuap i pote teꞌeraꞌam naꞌyn getap ok tote hawyi taꞌatuꞌoghot raꞌyn mare itote ywaiti Iesui apy tote. Miꞌi hawuo taꞌatumoꞌapyk Iesui yatype yt hewyry kuap i rakat. Miitꞌin tok puo Iesui ywytpe taꞌatumoꞌapyk."
20 Miꞌi hawyi Iesui tikuap taꞌyn iꞌatuepiat tomohey hap hawyi toꞌe yt ipoĩꞌãm kuap i rakat pe — Uiwy e koitywy o waure wo raꞌyn eminug saꞌag koꞌi kai areĩneꞌen e."
21 Miꞌi hawyi itotiaria nagnia ehay enoi haria iꞌewyte miwan enoi haria teꞌeroꞌe teꞌeruwanẽtup hawe — Heiẽ yt naku i Iesui ihay saꞌag kahato Tupana ete iꞌatuꞌe katupono Tupana yn ni iwaure kuap aiminug yt naku i hap koꞌi iꞌatuꞌe."
22 Maꞌato iꞌatuwanẽtup hap koꞌi Iesui tikuap yne raꞌyn tuwanẽtup hawe. Miꞌi pote toꞌe wanẽtup haria pe — Kat pote mio tã eweiꞌe eiwanẽtup hawe e."
23 Taꞌi — Waure wo raꞌyn ni eminug saꞌag koꞌi kai areĩneꞌen mesup areꞌe raꞌyn mesuwat miit pe e. Yt niatpo hin i — Waure wo areꞌe miitꞌin me e. Maꞌato poꞌog niatpo watoꞌe yt hewyry kuap i rakat pe — Epoĩꞌãm no hawyi ewyry ro watoꞌe niatpo kahato e."
24 Miꞌi pote pono atimoherep ehepe uhesaika hap miitꞌin miꞌaparap koꞌi moweityk hamo e. Taꞌi Uito ti Miitꞌin Eykeꞌet miꞌi pote ti uhesaika hap putꞌokꞌe wuatꞌi miitꞌin minug yt naku i hap koꞌi moma hamuat e. Miꞌi uhesaika hap moherep hamuat mesup uhehay wo atimoehãite meiũwat yt hewyry kuap i rakat yne ehehamo e. Miꞌi hawyi eweikuap taꞌyn uhehay wuat atihep kuap wy eiminug saꞌag koꞌi hap e itotiaria pe. Miꞌi hawyi toꞌe yt ipoĩꞌãm kuap i rakat pe — Epoĩꞌãm no mehĩ hawyi etiꞌokpoꞌi ro eꞌyni hawyi ereto ro eꞌyat kape e."
25 Mio tã e hawyi meremo saꞌawyꞌiwuat iꞌahu rakat ipoĩꞌãm hawyi toiꞌokpoꞌi teꞌyni hawyi toto raꞌyn toꞌyat kape tuwehum kahato Tupana kape toto turan."
26 Itotiaria teꞌeruwanẽtup Iesui minug etiat hawyi teꞌeruwehum kahato Tupana kape maꞌato teꞌerokenꞌẽ hap wywo teꞌeroꞌe — Iesui yt uwe i ewy iꞌatuꞌe. Aikotã pyno tutunug wakuap miꞌi hap ewy iꞌatuꞌe. Meiũwat ewywuat yt miitꞌin minug kuap ewy hin i iꞌatuꞌe. Yt karãpe i miꞌi ewywuat kape wataꞌakasa meikotã nug hap kape iꞌatuꞌe toꞌope. Miꞌi pote teꞌerokenꞌẽ kahato Iesui pupi.
"27 Miꞌi hawyi toto i raꞌyn Iesui mekewat tomimoehãite yat pyi hawyi muꞌap upi tehaꞌat kahato wẽtup miit kape. Taꞌakasa wẽtup ok yt uwe mikyꞌesat i rakat kat pote muꞌap pyhyp hano toĩneꞌen suraraꞌin wanĩkaptia powyro rakat pote. Morekuaria wanĩkaptia wywo toiꞌatupyhyp yne muꞌap koꞌi. Itote pyi toiꞌatukyꞌesat wuatꞌi miitꞌin kaipyi muꞌap saꞌup. Iwato kahato toiꞌatuporeraꞌat Iuteuria ewanĩkaptia porekuat wano. Miꞌi hawyi ipatꞌok towanuat totat saꞌag. Miꞌi hawyi ihaꞌat kahato Iesui howawi mehĩ Mateu Irewi e hap het rakat kape. Miꞌi hawyi toto howawi hawyi toꞌe — Worokyꞌesat en uhemiit no e. Pyno toꞌiro uhupi e Iesui Mateu pe."
28 Toikaykay hawyi meremo ipoĩꞌãm Iesui upiat toto hamo. Miꞌi hawyi toiꞌatuꞌatoiat yne yne tomisat koꞌi saꞌup iwato rakat yparakai tomiꞌapykok tote. Yt toikyꞌesat i poꞌog katupono toto teran Iesui upi pote e."
29 Miꞌi hawyi Irewi Mateu toto raꞌyn Iesui upi hemiit no. Miꞌi hawyi Iesui mekewat Mateu Irewi tioto toꞌyat kape imoenuk hamo. Putꞌoktoꞌe toꞌyat pe hawyi ienuk hap tutunug Iesui etiat tuwehum haype. Miꞌi hawyi toiꞌatukaykay towyriaꞌin toꞌewywuat saꞌup poreraꞌat haria toiꞌatukaykay iraniaꞌin wywo. Miꞌi hawyi yt naku i kahato rakaria pyꞌasetpe Iesui toĩneꞌen."
30 Miꞌi hawyi nagnia ehay enoi haria iꞌewyte miwan etiat wãiꞌe hap moherep haria teꞌerahaꞌat Iesui ienuk hap kape hawyi miꞌiria iꞌatupyꞌahak Iesui ete iꞌewyte Iesui potmuꞌeria ete. Miꞌi pote teꞌeroꞌe — Kat poteĩ Eikaꞌiwat yt nakuaria i saꞌup poreraꞌat haria wywo tenuk hamuat toto iꞌatuꞌe. Yt naku i yt nakuaria i wywo watenuk e miwan me iꞌatuꞌe."
31 Maꞌato Iesui tiꞌatuwesat — Uhytꞌiꞌin e yt eweikuap i apo aikotã ihãite rakaria yt ikat hin i mohag nug hat taꞌatumoehãite hamo e. Maꞌato iraniaꞌin iꞌahu rakaria ihãite pikꞌe rakaria ikat kahato mohag nug hat taꞌatumohãite pakup i hat taꞌatumopakup i hat e. Uito areĩneꞌen mohag nug hat ewy. Mesuwarotiaria ehakyeraꞌat hamo Tupana uipoꞌoro miitꞌin yt naku i nug haria moehãite hamo uipoꞌoro e."
32 — Uito ti yt ariot i wakuaria mowaku pakup i hamo katupono — Uruto poꞌog waku toraniaꞌin kai iꞌatuꞌe. Miꞌi e haria yt uikat i — Uruto waku kahato Tupana wanẽtup hawe iꞌatuꞌe haria ewy e. Miꞌi pote yt atiꞌatuehakyeraꞌat kuap i miꞌiria maꞌato iraniaꞌin — Yt nakuaria i uruto e haria tikuap kahato raꞌyn yt iꞌatuewaku i hap pote miꞌiria atiꞌatueraꞌaipok kuap Tupana kape e. Miꞌiria muꞌe hamo ariot e. Maꞌato — Uruto waku e haria yt atiꞌatuehakyeraꞌat kuap i e Iesui.
"33 Miꞌi hawyi mekewat — Uruto poꞌog e haria teꞌeroꞌe Iesui pe — Uhyt iꞌatuꞌe ahetꞌok hat Iuwãu potmuꞌeria iꞌewyte nagnia ehay enoi haria teꞌeruwemosyꞌat kahato taꞌatuehay Tupana kapiat moesaika hamo iꞌatuꞌe. Maꞌato ewat epotmuꞌeria teꞌeruwenuk yn iꞌatuꞌe. Yt teꞌeruwemosyꞌat hin i taꞌatuehay Tupana kapiat moesaika hamo iꞌatuꞌe."
34 Mio tã teꞌeroꞌe hawyi Iesui tiꞌatuwesat — Pyno ahenoi teran hãꞌãkap wuo uhehay e. Karãpe toĩneꞌen ienuk wato hap eꞌat aiwoꞌomowepit hap eꞌat turan heꞌaito pakup takat eꞌat mõtypot hap turan iharyꞌi pakup takat eꞌat mõtypot hap turan mekewat eꞌat pe yt uwe i tuwemosyꞌat teran iꞌatuwepit teran hap yn teꞌerenuk hap yn woꞌokyiꞌat hap eꞌat piat pote seꞌaito hap eꞌat piat pote e. Taꞌi iꞌatuwepit kahato teꞌerenuk turan e. Miꞌi hap ewy kahato areĩneꞌen mekewat Seꞌaito Pakup ewy e. Uhemiitꞌin wywo areĩneꞌen turan iꞌatuwepit kahato aikotã woꞌokyiꞌat hap eꞌat piaria ewy are e. Pyno seꞌaito hap eꞌat pe iꞌatuwyriaꞌin iꞌatuwepit kahato teꞌerenuk turan e. Seꞌaito wywo tukupteꞌen turan yt teꞌeruwemosyꞌat teran hin i e. Yt iꞌatuꞌarot hin i tukupteꞌen aikotã woꞌokyiꞌat hap turanuat ienuk hap ewy e."
35 — Maꞌato meiũran ti aru Uito iraniaꞌin tioto uiꞌauka hamo miꞌi hap eꞌat turan aikotã seꞌaito pya taꞌatuereto toꞌyat totepyi hap ewy irane areĩneꞌen e. Miꞌi hap eꞌat pe ti aru iꞌatuꞌarot sese hap topyhuꞌat iꞌatuepe. Yt teꞌerenuk hin i katupono iꞌatuehatꞌat kahato uikyꞌewi haype e. Aikotã watihep seꞌaito ipakup te turan hap ewy hawyi iwary pakup iꞌarot toĩneꞌen hap ewy aru tukupteꞌen taꞌatuꞌarot hap wywo e. Miꞌi hap eꞌat pe yn teꞌeruwemosyꞌat kahato raꞌyn e Iesui — Kat pote yt eremosyꞌat i uruto ewy e haria pe.
"36 Miꞌi hawyi wẽtup sehay iãꞌãkap i Iesui henoi seko potꞌi enoi haria pe. — Uiwyriaꞌin manaꞌin eweikuap aikotã yt naku i watomog ahesokpe potꞌi sokpe kype pakup wo e. Miꞌi tã yt ikahu hin i watunug katupono watopiꞌig sokpe potꞌi hiotꞌe hap sokpe pakup wo hap yt ikahu hin i topyhuꞌat e. Miꞌi watikoho hawyi sokpe pakup tihiot neꞌi raꞌyn totekyi kahato pote sokpe potꞌi e. Miꞌi hawyi sokpe potꞌi hiotꞌe rakat poꞌog hiotꞌe saꞌawyꞌiwuat kai e. Taꞌi miꞌi ewy kahato ti uhehay wakuat pakup toĩneꞌen e. Taꞌi yt watopag kuap i uhehay pakup sehay potꞌi tote katupono yt toꞌoꞌewy hin i e. Maꞌato toꞌopuo toꞌopuo wahenoi uhehay sehay potꞌi puo pote poꞌog topyhuꞌat yt naku i e. Aikotã ahesokpe potꞌi hiotꞌe sese hap ewy topyhuꞌat e. Iꞌape potꞌi hawyi iteneg kahato raꞌyn e Iesui — Kat pote yt etunug yne i urueko ewy e haria pe."
37 Miꞌi hawyi Iesui toꞌe miitꞌin akag koꞌi yt tomohey i haria pe — Pyno wẽtup sehay iãꞌãkap ahenoi i ehepe e. Uiwyriaꞌin e yt naku i watomohey typy sehay yt toꞌoꞌewy i pytkai e. Yt naku i toꞌopuo toꞌopuo eweipag uhehay pywo sehay rakat sehay yt pywo rakat i wywo e. Pywo ti rat ahetama puo watopag Uwa ywa hy heiam pakup we yn e. Taꞌi ahekamũti iꞌape pakup kawiat pe yn watopag e. Miꞌi hawyi mekewat Uwa ywa hy tuwemõpuk itote e. Miꞌi iꞌape pakup we waku yt ipe teneg i pote e. Taꞌi iꞌape yt gag i te pote torokꞌe teꞌen teꞌen neꞌi Uwa ywa hy pakup henãpuk neꞌi hawyi e. Maꞌato ahetama puo watopag Uwa hy pakup yt ihyenãpuk i te turan heiam potꞌi pe pote iꞌape teneg nakat heiam me miꞌi myeꞌym eꞌat hawyi ihyenãpuk taꞌyn turan ipe heiam teneg nakat ipotꞌi rakat yt torokꞌe i hawyi yt naku i katupono heiam pokꞌe hawyi Uwa hy yt kat i raꞌyn toto yne yi tote e. Miꞌi hawyi yt kat i topyhuꞌat Uwa hy toto yne raꞌyn mote e. Iꞌewyte heiam motꞌi hiotꞌe wy hawyi yt naku i pe toĩneꞌen."
38 Miꞌi pote ahetama puo watopag Uwa hy iꞌape yt igag i te rakat pe e. Miꞌi hawyi toĩneꞌen motꞌi itote ahesapo wuat waku rakat e. Miꞌi tã ti watunug ahetama puo manaꞌin uhytꞌiꞌin e. Miꞌi uiꞌe hap ewy kahato ti uhehay he kahato rakat ipakup e. Miꞌi pote waku watopag ipakup we e. Yt teke kahato i sehay potꞌi pe e Iesui typy sehay upiaria pe."
39 Maꞌato eipe — Poꞌog waku iporo rakat eweiꞌe hawyi yt eweikyꞌesat i uhehay pakup e. Eipe eweikupteꞌen mahy u haria ewy e. Miꞌi u haria tikyꞌesat kahato sapo hy potꞌi ahetama pe teꞌeruwemopẽꞌã hamo e. — Watikuap ihy nem hap u hap iꞌatuꞌe. Miꞌi poꞌog waku uruwanẽtup hawe iꞌatuꞌe. Yt kan hamo i sapo hy pakup uruwanẽtup hawe iꞌatuꞌe. Imopẽꞌã teran nakaria mio tã iꞌatuꞌe. Miꞌi haria ewy kahato eweikupteꞌen uhehay pakup yt kyꞌesat i pote — Yt kan hamo i ehay pakup eweiꞌe pote katupono urumikuap iporo rakat poꞌog he eweiꞌe e. Miꞌi pote yt karãpe i eiwehekuap ipakup takat e. — Ipotꞌi rakat poꞌog waku eweiꞌe yn e Iesui tehay pun haria pe.
"1 Miꞌi hawyi yt iꞌatupotpap i hap eꞌat pe Iesui awati ypia puo tokosap towyriaꞌin nywo. Miꞌi hap tote iwyriaꞌin hoꞌopik taꞌyn awati taꞌatukokaꞌat no hawyi taꞌatuꞌu raꞌyn."
2 Miꞌi pote nagnia ehay enoi haria teꞌeroꞌe iꞌatuepe — Kat poteĩ ewehoꞌopik awati yt aipotpap i hap eꞌat pe iꞌatuꞌe. Miꞌi tã ti yt naku i aiwoꞌonãpin hawe iꞌatuꞌe."
3 Miꞌi tã ti iꞌatuꞌe pote Iesui toꞌe — Yt eweikuap i aikotã saꞌawyꞌite morekuat Tawi tunug tesyꞌat hawyi e. Iꞌewyte towywuaria tesuraraꞌin iꞌatuesyꞌat hawyi hap e."
4 Teke Tupana mõtypot hawe hawyi tutuꞌu mekewat man wakuat Tupana kapiat paꞌi miꞌu wuat yn mekewat man yt naku i miit reꞌen neꞌi miꞌu wo e miwan me wen maꞌato morekuat Tawi iꞌu hesyꞌat kahato hawyi. Iꞌewyte toimõꞌẽ mekewat man tesuraraꞌin me. Maꞌato miwan me waku paꞌi miꞌu wuat yn wo rakat man tutuꞌu tesuraraꞌin wywo. Yt naku i iraniaꞌin miꞌu e miwan me wen."
5 Pyno Tupana tipoꞌoro raꞌyn ehowawi Wuatꞌi Miitꞌin Ykeꞌet e hap het rakat e. Miꞌi Miit toĩneꞌen Tupana Mipoꞌoro Wuatꞌi Miitꞌin Akag wo e. Miꞌi pote waku ahenoi ehepe uheywytꞌin uheinytꞌin kat som waku watunug kat som yt naku i watunug Tupana mõtypot hap eꞌat pe e Iesui tuwepiat.
"6 Miꞌi hawyi wẽtup yt motpap i hap eꞌat piat turan teke raꞌyn Iesui Tupana mõtypot hawe miitꞌin atumuꞌe hamo. Miꞌi hap tote wẽtup ok ipo sese kawiat ipo kag motꞌi rakat toĩneꞌen."
7 Miꞌi hawyi Miitꞌin muꞌe haria itotiaria wãiꞌe hap miwan miat moherep haria teꞌeroꞌe toꞌope — Waku watehaꞌat kahato Iesui kape sio ipotpap mesup yt aipotpap i hap eꞌat pe sio yt sio toimoehãite mekewat ipo kĩꞌã rakat sio yt iꞌatuꞌe toꞌope. Ipotpap Iesui pote waku watoꞌe wuatꞌi ehamo — Yt naku i rakat meiẽ Iesui watoꞌe iꞌatuꞌe."
8 Maꞌato tomaꞌat teran hap iꞌatuwanẽtup hawiat Iesui tikuap taꞌyn tuwekaipyi hawyi toikaykay raꞌyn ipo kĩꞌã rakat tuwewawi wuatꞌi ehamo hawyi toꞌe — Uhyt eriot ro meikowo waku meiũpe yꞌam me ereĩneꞌen wuatꞌi miitꞌin pyꞌasetpe wuatꞌi miitꞌin ehamo e ipo kĩꞌã rakat pe. Ipoĩꞌãm naꞌyn hawyi hewyry miitꞌin pyꞌasetpuo."
9 Miꞌi hawyi Iesui apoꞌe iraniaꞌin me — Kat som toꞌe miwan me Tupana mõtypot hap eꞌat ete e. Aikotã watunug mesuwat eꞌat pe sio wakuap watunug sio yt nakuap i watunug sio miitꞌin kyꞌe hap sio miitꞌin auka hap kat som toꞌe miwan me hap watunug e miꞌi hap ete apoꞌe itotiaria pe."
10 Miꞌi hawyi yt taꞌatuwesat kuap i. Miꞌi hawyi Iesui tehaꞌat kahato itotiaria ewawi motꞌi hawyi toꞌe ipo kĩꞌã rakat pe — Uiwy e erepotorok to meikowo e. Miꞌi hawyi ipo kĩꞌã rakat tuwepotorok taꞌyn hawyi waku raꞌyn ipo."
11 Miꞌi pote wãiꞌe hap enoi haria iꞌatupyꞌahak kahato raꞌyn Iesui ete. Miꞌi hawyi teꞌeroꞌe toꞌope — Aikotã aru watiꞌakit watimohit mesuwat Iesui iꞌatuꞌe taꞌatupyꞌahak popuo.
"12 Miꞌi hawyi Iesui toto yityꞌok kape Tupana wywuat toꞌoehay hamo. Miꞌi hawyi wãtym kaꞌap ihay Tupana wywo yityꞌok tote."
13 Ihotꞌok hawyi toiꞌatukaykay raꞌyn temiitꞌin sem tuwewawi. Miꞌiria kaipyi 12 ok takaria toiꞌatuꞌairo topotpoꞌororia 12 ok takaria wo."
14 Saꞌawyꞌi Simãu toiꞌairo topotpoꞌoro wo tehay moherep hamo. Miꞌi hawyi het tutum pakup i PETERU e Simãu me het pakup taꞌyn. Miꞌi hawyi Peteru ywyt ÃTERE toiꞌairo tomipoꞌoro wo tehay moherep hamo. Miꞌi hawyi TIAKU toiꞌairo temiit sese wo tehay moherep hamo. Miꞌi hawyi IUWÃU toiꞌairo tomiit sese wo tehay moherep hamo. Miꞌi hawyi WIRIPI toikaykay tuwewawi temiit sese wo tehay moherep hamo. Miꞌi hawyi PATURUMEU toiꞌairo topotmuꞌe sese wo tehay moherep hamo."
15 Miꞌi hawyi MATEU toiꞌaro topotmuꞌe sese wo tehay moherep hamo. Miꞌi hawyi TUME toiꞌairo tomipoꞌoro sese wo tehay moherep hamo. Miꞌi hawyi wẽtup ok TIAKU mekewat Auweu saꞌyru toiꞌairo tomipoꞌoro wo tehay moherep hamo. Iꞌewyte wẽtup ok SIMÃU toiꞌairo topotpoꞌoro wo tehay moherep hamo. Mekewat saꞌawyꞌiwuat surara powyro hat tetama piaria wanĩkaptia sytpok hamo rakat — Uhetama Kanaꞌa poꞌog wakuat torania kai e hat."
16 Miꞌi hawyi IUTA mekewat Tiaku saꞌyru toiꞌairo temiit sese wo tehay moherep hamo. Miꞌi hawyi wẽtup IUTA toiꞌairo temiit no tehay moherep hamo mekewat Ikarioti saꞌyru. Miꞌi miit yt naku i maꞌato Iesui maꞌat hanuat neꞌi topyhuꞌat. Miꞌi hawyi toran naꞌyn 12 ok takaria tehay moherep hanuaria wo toiꞌatuꞌairo.
"17 Iesui tiꞌatuꞌairo 12 ok takaria temiitꞌin topotpoꞌororia wo miitꞌin muꞌe hamuat hawyi ipotꞌapyk yityꞌok kaipyi yi hot kape tomiꞌairoria wywo. Miꞌi hawyi yt putꞌoktoꞌe yi hot piat i te turan iraniaꞌin ipotmuꞌeria sem tipuẽti Iesui mekewat yahig note. Miꞌi hawyi mekewat yahig wato tote tukupteꞌen Iesui kat haria aikopepyi aikopepyi tõꞌẽ. Iꞌatu kahato miitꞌin itote toipuẽti yi Iuteu kaipywiaria tawa wato Ierusarẽi kaipywiaria iꞌewyte yꞌy wato yẽpe etiat tawa Tiru kaipywiaria tawa Sitãu kaipywiaria toiꞌatupuẽti itote."
18 Iꞌatu kahato miitꞌin itote Iesui ekatup haria. Tõꞌẽ tõꞌẽ Iesui ehay kapiat teꞌeruwanẽtup teran haype. Iꞌewyte iꞌahu rakaria taꞌatuehãite hap kyꞌewi haria tõꞌẽ kahato Iesui kape. Iꞌewyte tõꞌẽ kahato ahiag ipiit piat rakaria. Miꞌi haria ahiag iꞌatumosoꞌopot koꞌi maꞌato Iesui tiꞌatusopo yne ahiag iꞌatupiit pyi."
19 Miꞌi hawyi yne Itotiaria teꞌeruwehik teran Iesui ete katupono taꞌatukyꞌesat taꞌatumoehãite hap Iesui piat katupono Iesui hesaika kahato Tupana esaika hamo miitꞌin moehãite hamo. Miꞌi pote taꞌatukyꞌesat kahato Iesui emig taꞌatupo wuat hap yne iꞌahu rakaria. Taꞌatuemig hawyi meremo iꞌatuehãite hap topyhuꞌat.
"20 Miꞌi hawyi Iesui tehaꞌat topotmuꞌeria kape hawyi toiꞌatukyꞌe kahato hawyi toꞌe — Tupana mipoityro koꞌi eipe uimohey haria yt hekat rakaria i eipe pytkai morekuaria Tupana etama pe eweikupteꞌen wuatꞌi eꞌat pe e. — Uhekatuwyria uwe uwe Tupana pe toꞌe — Yt uimikyꞌesat ok tã i te worokuap e topyꞌa pe mio tã e haria pe Tupana toꞌe — Pyno uimipoityro sese koꞌi eipe katupono worohoꞌonug wyti aru eipe wuatꞌi ywania porekuaria wo mesuwarote aikotã Uito areĩneꞌen Morekuat no atipy pe hap ewy e Tupana tepiat — Worokuap teran e haria uimohey haria."
21 Miꞌi hawyi Iesui tehaꞌat topotmuꞌeria kape hawyi toiꞌatukyꞌe kahato hawyi toꞌe — Tupana mipoityro koꞌi eipe uimohey haria hesyꞌat rakaria eweikupteꞌen pytkai katupono uwe uwe toꞌe Tupana pe — Uhesyꞌat kahato ekuap hap kyꞌewi aikotã hesyꞌat kahato rakaria tikat miꞌu yn hap ewy — Worokat kahato En Tupana e haria pe — Aikotã ienuk kahato haria iwepit kahato haria ewy worohoꞌonug eiperia iꞌok kahato rakaria ewy e Tupana tokuap teran haria pe e. Miꞌi hawyi Iesui tehaꞌat topotmuꞌeria kape hawyi toiꞌatukyꞌe kahato hawyi toꞌe — Tupana mipoityro koꞌi eipe uimohey haria e. koitywy eweiwak eipyꞌa pe maꞌato miꞌi hawyi Tupana mimowepit kahato rakaria eweikupteꞌen wuatꞌi eꞌat pe e. Taꞌi uwe uwe tuwak topyꞌa pe iraniaꞌin satek pote hoꞌopot pote miꞌi haria pe ti Tupana toꞌe — Worohoꞌomowepit kahato eipe katupono karãpe ehehakyꞌeꞌi hap putꞌokꞌe ehete miꞌi hap atuꞌu yne uipyꞌa pe wy aikotã iraniaꞌin ehakyꞌeꞌi hap ewetuꞌu yne hap ewy e Tupana miꞌiria pe e Iesui topotmuꞌeria pe ahepe."
22 Miꞌi hawyi Iesui tehaꞌat topotmuꞌeria kape hawyi toiꞌatukyꞌe kahato hawyi toꞌe — Tupana mipoityro koꞌi eipe uimohey haria miitꞌin mikyryꞌi eweikupteꞌen mesuwe pytkai e. Uwe uwe wakuap nug motiat miitꞌin woꞌokyryꞌi hamo topyhuꞌat miꞌi haria pe ti Tupana toꞌe — Pywo pe ti worohoꞌomowepit kahato katupono atum aru ehepe uhetama atipy piat e Tupana. Pywo pe ti worohoꞌomowepit kahato eipe katupono aikope Uito areĩneꞌen Morekuat no hap tote hekat kahato rakaria wo eweikupteꞌen wuatꞌi eꞌat pe e."
23 Miꞌi hawyi Iesui tehaꞌat topotmuꞌeria kape hawyi toiꞌatukyꞌe kahato hawyi toꞌe — Uwe uwe uhemiit sese wo miitꞌin mikyryꞌi hamo teꞌeropyhuꞌat miitꞌin misatyꞌi satyꞌi wo miitꞌin mimoweukaꞌi miꞌi uhemiit pote miꞌi hat pe — Pywo pe ti woromowepit poꞌog ni wuatꞌi kai e Iesui temiitꞌin me. — Taꞌi miꞌi tã hap ewy taꞌatunug saꞌawyꞌiwuaria uhehay moherep haria ete e Tupana. Miꞌi tupono iꞌatuehay saꞌag yt pywo pe i ehete uhemiitꞌin eipe pote eiwemowepit ro eiwewehum hawyi waku pesoꞌeweiꞌe iwepit sese rakat pesoꞌe hap ewy katupono meiũran ti aru Tupana mimõtypot kahato haria wo eweikupteꞌen atipy pe are e. Taꞌi atipy pe — Woromõtypot kahato eipe e Tupana aru uimohey haria potiat miitꞌin mikyryꞌi hap koꞌi wo eipe pote e Iesui."
24 Miꞌi hawyi Iesui tehaꞌat yt tomohey haria i pe hawyi toꞌe tuwak popuo — Hoꞌowasat kahato rakaria eiperia katupono — Uruekat kahato hap kaipyi urumowepit hap toĩneꞌen e haria eipe e. Yt naku i pe eiwanẽtup hap katupono eweikat at kaꞌap ewepit hap ehekareꞌen sok mesuwarote hap kaipyi e. Taꞌi mesuwarotiat ewepit kahato hap yn eweikat e. Pyno emikyꞌesat ewy toĩneꞌen eipo pe aru hap ok tã maꞌato Tupana piat eimowepit hap yt eweikat hin i e. Pywo ti rat eimipuẽti ok tã mesuwarote yn toĩneꞌen irane ehaꞌup mo maꞌato atipy piat ehaꞌup yt kat i hin i irane eweipuẽti aru e mesuwarotiat yn hekat rakaria pe."
25 Miꞌi hawyi Iesui tehaꞌat yt tomohey haria i pe hawyi toꞌe tuwak popuo — Hoꞌowasat kahato rakaria ewy eweikupteꞌen mesuwarotiat miꞌu yn eweiꞌatukat pote e. — Uruꞌok kahato miꞌu wo eweiꞌe eiwoꞌope maꞌato yt ehesyꞌat hin i eipyꞌa pe Tupana kuap hap kyꞌewi e. — Uruꞌok kahato uruto eweiꞌe maꞌato meiũran aru ehesyꞌat kahato raꞌyn wuatꞌi eꞌat pe e. Koitywy eiwepit kahato mesuwe wen maꞌato miꞌi irẽ aru paaꞌeweiꞌe ehesyꞌat sese wuatꞌi eꞌat pe hap kaipyi e. Yt naku i kahato aru topyhuꞌat ehepe e. Eweiwak kahato wuatꞌi eꞌat pe eiꞌarotꞌi kahato hap aru putꞌokꞌe e Iesui mesuwarotiat miꞌu yn kat haria pe."
26 Miꞌi hawyi Iesui tehaꞌat yt tomohey haria i pe hawyi toꞌe tuwak popuo — Yt naku i pe aru eweikupteꞌen wuatꞌi eꞌat pe e. — Uruto poꞌog iraniaꞌin kai eweiꞌe yn eipyꞌa pe pote e. Eweikat kahato miitꞌin kaipyi — Waku poꞌog en iꞌatuꞌe hap. Eiwemõtypot hap yn eweikat iraniaꞌin kaipyi e. Miꞌi pote ti aru ihakyꞌeꞌi kahato rakaria ewy eweikupteꞌen wuatꞌi eꞌat pe yt kat i Tupana mõtypot hap eikai pote e. Saꞌawyꞌiwuat Tupana ehay yt pywo rakat i moherep haria heso rakaria koꞌi ewy kahato eweikupteꞌen are e. Taꞌi saꞌawyꞌi miꞌiria pe — Waku kahato eipe poꞌog torania kai iꞌatuꞌe wen maꞌato — Yt nakuaria i kahato ti eipe e Tupana saꞌawyꞌi miꞌiria pe e Iesui. Miꞌiria ewy kahato aru toꞌe ehepe are e Iesui — Uruto poꞌog iraniaꞌin kai e haria pe.
"27 Miꞌi hawyi Iesui toꞌe tomohey haria pe. — Uhaꞌyruꞌin uhakiꞌytꞌin e eiwanẽtup to mesup uimienoi koro kape e. Eiwewaure kaꞌa kahato ro mesuwat uimienoi koro kape e katupono atikyꞌesat kahato ewetunug kahato mesuwat uiꞌe hap — Waku watiꞌatukyꞌe yne yne ahewanĩkaptia koꞌi e. Waku pe yn waku watukupteꞌen yt nakuap i nug ahetiat haria wywo e. Waku watunug waku yn yt aikyꞌe i haria pe e. Waku watiꞌatukyꞌe kahato yn naꞌyn yt aikyꞌe i haria e."
28 Uimohey haria e waku watiꞌatuewaku yn naꞌyn aiꞌatusatyꞌi satyꞌi haria e. Miꞌi hawyi waku aimosoꞌopot haria upi wahẽtup Tupana kape yn naꞌyn — Etiꞌatuehakyeraꞌat o uruewanĩkaptia yt aipowyro hin i haria waku watoꞌe Tupana pe e. Iꞌewyte waku wahẽtup kahato Tupana kaipyi aimoweukaꞌi haria upi iꞌatupoitynug ahiag pupiat hamo e."
29 Waku watiꞌatukyꞌe aimaꞌat haria yt naku i watuꞌuka aiwuꞌuka teran haria wywo e. Karãpeĩ ahewanĩkap ahowapetek hawyi waku watoꞌe tope — Waku kokai i ro uhowapetek uhyt mana waku watoꞌe ahowapetek hat pe e. Karãpe ahewanĩkap aipohari aheꞌyni ete waku watum ahesokpe koꞌi tope ahewanĩkap kyꞌe hap moherep hamo are e."
30 Iꞌewyte karãpe wẽtup ok hẽtup kat ahekat kat ahekat ahepe miꞌi hat pe waku watum imikyꞌesat ewy e. Iꞌewyte karãpe ahewanĩkaptia aheroꞌok ahekat koꞌi miꞌi hawyi yt naku i — Eterut i ro emieroꞌok uhyt mana watoꞌe. Yt naku i aipohari ahekat etiat hat kaipyi wateraꞌaipok e."
31 Uimohey haria waku watunug wakuap torania miitꞌin muo e. Taꞌi uiwyriaꞌin aikotã iraniaꞌin tunug waku hap ehepe aimikyꞌesat ewy miꞌi hap ewy o waku watunug waku hap iraniaꞌin me e. Taꞌi aikotã watikyꞌesat iraniaꞌin miat wakuap nug ahepiat hap ok tã waku watunug miꞌi waku hap ewy iꞌatuepe e."
32 Uiwyriaꞌin e mesuwarotiaria tikyꞌe taꞌatukyꞌe haria yn maꞌato areꞌe ehepe wẽtup sehay — Waku watiꞌatukyꞌe yne miitꞌin sio aikyꞌe haria sio yt aikyꞌe i haria e."
33 Maꞌato aikyꞌe haria yn watiꞌatukyꞌe pote watukupteꞌen yt Tupana mohey i haria mesuwarotiaria ewywuat haria ewy kahato watukupteꞌen katupono miꞌiria tiꞌatukyꞌe taꞌatukyꞌe haria yn e. Miꞌi haria mesuwarotiaria ewy watopyhuꞌat iro yt poꞌog i miꞌiria kai ahewaku hap e."
34 — Taꞌi mesuwarotiaria yt Tupana mohey haria i timõꞌẽ kahato taꞌatuekat taꞌatukyꞌe haria kape yn e. Yt Tupana mohey hin i haria pytkai taꞌatukyꞌe kahato taꞌatukyꞌe haria — Etipuru ekat uhyt mana mimi taꞌatukyꞌe hat toꞌe pote meremo taꞌatupuru taꞌatukat iraniaꞌin miẽtup hap katupono teꞌeruwanẽtup — Pyno meũran aru uimõꞌẽ uimipuru saipepiat poꞌog toterut iꞌatuꞌe teꞌeruwanẽtup hawe. Pyno uimohey haria eipe pote yt atikyꞌesat i eweimõꞌẽ iraniaꞌin miat turan eweipuru turan miꞌiria wanẽtup hap ewywuat eiwanẽtup hap wywo e. Atikyꞌesat mio tã watoꞌe aipyꞌa pe ahekat puru hap ete — Taꞌaipok pote waku maꞌato yt taꞌaipok i uimipuru uimimõꞌẽ pote iꞌewyte waku uhepe waku watoꞌe kahato aipyꞌa pe yt kat i ahekat kyꞌewi hap wywo e Iesui ahepe."
35 Pyno waku kahato watimõꞌẽ ahekat maꞌato yt naku i watimõꞌẽ ahekat mesuwarotiaria yt Tupana mohey i haria mimõꞌẽ hap ewy e. Waku watipuru ahekat wuatꞌi miitꞌin me yt kat yt naku i aiwanẽtup hap wywo i e. Waku watipuru ahekat wuatꞌi miit pe taꞌatupuru reran mote e. Yt naku i apowatoꞌe — Eweterut apuru uimipuru sio yt yt naku i watoꞌe. Waku watimõꞌẽ aikotã Tupana timõꞌẽ hap ewy are e. Taꞌi aikyꞌe hap wywo yn toiꞌatumõꞌẽ ahowawi aikyꞌe hap wywo. Iꞌaman tutum kahato wuatꞌi miitꞌin me iꞌatuko koꞌi moehãite hap sio waku nug haria kape sio yt naku i nug haria kape sio tomohey hap upi sio yt tomohey i hap upi tutum iꞌaman iꞌatuko koꞌi moehãite hap e. Taꞌi Tupana tiꞌatukyꞌe tewanĩkaptia torania hawyi tutum at iꞌatuko moehãite hamo yt kat saꞌup i wuatꞌi pe e. Pyno waku Aiꞌywot Tupana ewywuat waku watimõꞌẽ ahekat are e. Taꞌi waku watunug Tupana minug ewy e. Taꞌi ahegyiꞌat kahato hap kaipyi watimõꞌẽ pote meiũran yt taꞌatuerut i aimipuru iꞌatuepiat saipepiat maꞌato Tupana yt tiwaure hin i aimaꞌat hap miꞌi hawyi ahekat saipepiat hum ahepe aimipuru."
36 Uipotmuꞌeria eipe pote mio tã areꞌe ehepe — Eweiꞌatukyꞌe ro yne yne ehewanĩkaptia are e. Waku yn no ewetunug ehewanĩkaptia pe hãpyk takat yn iꞌatukyꞌe hap upi e. Ehekat koꞌi kape yt eiwanẽtup at kaꞌap teiꞌo — Kat koꞌi kat koꞌi aru uimipuru saipepiat uhekat taꞌatuium yt eweiꞌe teiꞌo eipyꞌa pe e. Yt eiwanẽtup teiꞌo eimipuru porap hap kape are. Miꞌi tã eweipuẽti eimipuru saipepiat Tupana kaipyi poꞌog poꞌog eimipuru kupitu kai e. Miꞌi tã uiꞌe hap ewy ewetunug pote ti aru Tupana saꞌyruꞌin Tupana sakiꞌytꞌin eipe iꞌatuꞌe miꞌiria ehepiat pe e. — Tupana mẽpytꞌin eipe iꞌatuꞌe ehepiat pe e. Taꞌi Aiꞌywot atipy piat minug ewywuat nug haria eipe iꞌatuꞌe ehepiat katupono Tupana iwese kahato yt iwese kahato i rakaria ete hap ewy waku aito iwese kahato rakaria wo watopyhuꞌat wuatꞌi miitꞌin ete are e. Tupana tuwemosatyꞌi kahato topyꞌa pe tewanĩkaptia satek hap eꞌat pe e. Waku watuwemosatyꞌi ahewanĩkap satek hap eꞌat pe e. Waku watiꞌatupowyro miꞌiria hatek hap upi e. Pyno waku Aiꞌywot Koro miitꞌin kyꞌe hat ewy watoĩneꞌen wuatꞌi miitꞌin kyꞌe hap wywo sio wakuaria sio miit yt nakuaria i are e. Wakuat yn ewetunug o wuatꞌi miitꞌin me Aiꞌywot Koro minug hap ewywuat e Iesui uruepe ahepe topotmuꞌeria pe.
"37 Miꞌi hawyi poꞌog Iesui toꞌe ahepe — Uiwyriaꞌin yt naku i watiꞌatumohit miitꞌin — Mekewat miit yt kan hamo i yt naku i watoꞌe iraniaꞌin me are e. Yt naku i watoꞌe aiwanẽtup hawe — Uito poꞌog miꞌi miit kai e. Iꞌewyte karãpe miitꞌin inug saꞌag ahetiat hawyi yt naku i wahenoi iraniaꞌin me iminug saꞌag ahetiat e. Miitꞌin minug saꞌag ahetiat wahenoi iraniaꞌin me wẽtup ok minug saꞌag koꞌi pote ti aru Tupana iꞌewyte henoi eiwat eiminug yt naku i hap koꞌi wuatꞌi miitꞌin ehamo aru e. Maꞌato waku waure wo watoĩneꞌen iraniaꞌin miat aimaꞌat hap kai. Miꞌi hap ete eweikupteꞌen waure wo pote Tupana iꞌewyte eiminug yt naku i hap koꞌi kai waure wo toĩneꞌen are e Iesui ahepe."
38 Waku hegyiꞌat kahato rakaria wo watukupteꞌen uhekatuwyria are. Watimõꞌẽ ahekat iraniaꞌin me pote ti aru iꞌewyte Tupana timõꞌẽ kahato tekat ahowawi aikotã ahegyiꞌat hap ok tã tutum ahepe maꞌato ahegyiꞌat hap wywo watum kurin kurin iraniaꞌin me pote miꞌi hap ok tã ne aru Tupana tum ahepe e. Maꞌato ahegyiꞌat hap iwato kahato watum mote Tupana iꞌewyte hum iwato kahato ahepe e. Iꞌewyte aimiium kurin yt ahegyiꞌat i pote iꞌewyte Tupana tum kurin ahepe ahegyiꞌat hap ok tã aru tutum ahowawi e. Wahoꞌoium kurin pote Tupana hoꞌoium kurin ahowawi e Iesui.
"39 Miꞌi hawyi poꞌog Iesui henoi hãꞌãkap wuo — Taꞌi e ahetama puo yt ihapytig i rakaria ikat kahato taꞌatuporereko hat e. Miꞌi hawyi wẽtup ok tuereto yt ipuẽti i toporereko hanuat hawyi toꞌoꞌewywuat toipuẽti toporereko hamo yt ihapytig i rakat re e. Miꞌi hawyi hewo yi hot pe toꞌoꞌewy e. Miꞌi hap ewy ti aimuꞌe haria yt Tupana kuap i rakaria pote aimuꞌe hap Tupana moherep hap yt heremo hin i katupono yt iha i rakaria ewy tukupteꞌen. — Miꞌi ti muꞌap Tupana kape iꞌatuꞌe pytkai yt muꞌap hin i. Miꞌi pote iꞌatumimuꞌeria iꞌewyte hoꞌowasat rakaria ewy e. Yt toikuap i kahato muꞌap hawyi yt toimoherep kuap i topotmuꞌeria pe yt ihapytig i rakaria ewywuaria pe e."
40 Maꞌato eiwemuꞌe kahato Eimuꞌe Hat mienoi ete uhehay ete hawyi Eimuꞌe Hat mikuap hap ok tã ewehenoi kuap are e. Maꞌato woꞌomuꞌe hat yt ihapytig i rakat ewywuat pote iꞌewyte woꞌomuꞌe haria yt ihapytig i rakaria ewywuaria tukupteꞌen taꞌatumuꞌe kahato pytkai. Miꞌi hawyi taꞌatumuꞌe hat ewy hewo yi hot pe toꞌoꞌewy e. Pyno areĩneꞌen Eimuꞌe Haria Akag wo e Iesui. Atikyꞌesat kahato yne eiperia ewetunug torania uiꞌe hap ok tã e. Uiꞌe hap ewy ewetunug pote Uito ewywuat eweikupteꞌen miitꞌin muꞌe hamo e. Yt naku i eweiꞌe eipyꞌa pe — Atikuap poꞌog Uimuꞌe hat Iesui kai miꞌi pote waku wẽtup sehay ahenoi iraniaꞌin me uiwanẽtup hap ewy yt uimuꞌe hap sehay ewy yt naku i eweiꞌe. Uipotmuꞌeria sese eipe pote uimimuꞌe hap ewy kahato aru eweiꞌatumuꞌe e. Miꞌi hawyi hãpyk sese uipoꞌororia wo miitꞌin muꞌe hamo eweikupteꞌen e."
41 Tukupteꞌen iraniaꞌin uimimuꞌeria teꞌerahaꞌat kahato iraniaꞌin kape sio taꞌatuꞌaparap sio yt hap kuap hamo e. Iꞌatueha iraniaꞌin kape yn yt naku i kat hamo e. Yt teꞌerahaꞌat hin i taꞌatuminug taꞌatuwat kape sio waku sio yt taꞌatuminug kuap hamo e. Miꞌiria taꞌatumohey teran iraniaꞌin yt naku i nug hap etiat haype e. Yt karãpe i paaꞌiꞌatuꞌe taꞌatuminug saꞌag hap koꞌi ete e. Yt eweikupteꞌen neiꞌo miꞌiria ewy e Iesui ahepe."
42 — Uito poꞌog iraniaꞌin kai e haria ewy eweikupteꞌen mote yt ihapytig i rakaria ewy te eweikupteꞌen katupono — Hehu iwatoꞌin nakat eheha pe hap ewy toĩneꞌen aikotã hu yp toĩneꞌen eheha pe hap ewy e. — Atihep teran mekewat eha piat hu hit eweiꞌe maꞌato yt etunug kuap i kat pote hu yp ewywuat toĩneꞌen eha pe pote e. Pyno waku etihep hu yp eha pyi hawyi pote etihep kuap kurin nakat hu iraniaꞌin eha pyi e. Miꞌi hap ewy eweikupteꞌen eweikat iraniaꞌin minug saꞌag mote e. Waku eweiꞌe eipyꞌa pe — Atoiat teran uiminug saꞌag e. Maꞌato yt naku i eweiꞌe — Uito waku maꞌato iraniaꞌin yt naku i nug haria wo yt eweiꞌe teiꞌo e Iesui ahepe.
"43 Miꞌi hawyi Iesui toꞌe ahepe — Pyno uiwyriaꞌin ahenoi teran ehepe wẽtup uhehay iãꞌãkap e. Pyno aito watopyhuꞌat kat kat yp ewywuat watoĩneꞌen iywa he rakat yp ewy e. Taꞌi aiꞌywa he rakat ewywuat aito pote iwese kahato rakaria ewy watoĩneꞌen e. Maꞌato aiꞌywa nop takat pote yt kan hamo watoĩneꞌen miitꞌin ekyi Tupana kape are. Yt karãpe i ywa nop takat watikoi are. Taꞌi watuꞌu he kahato rakat hawyi — Waku mesuwat iãꞌỹi aimikoi wo watoꞌe e."
44 Pyno watikuap mikoi yp waku sio yt naku i hap iꞌywa he sio nop hap ete. — He pote he yt pote yt watoꞌe. Maꞌato he nakat kape wataꞌaipok aimiꞌu wuat hep hamo. Maꞌato nop takat kape yt karãpe i wataꞌaipok aimiꞌu wuat hep hamo e. Ihep hawyi watuꞌu hap kyꞌewi maꞌato nop takat pote yt karãpe i wataꞌaipok iꞌu hamo e. Miꞌi hap ewy kahato aiminug waku hap iraniaꞌin me teꞌeraꞌaipok ahowawi aiwese hap upi maꞌato yt naku i nug hap ahehay pote yt teꞌeraꞌaipok hin i ahowawi Tupana ehay kuap hamo e Iesui ahepe.
Pyno watikuap mikoi yp waku sio yt naku i hap iꞌywa he sio nop hap ete. Iꞌewyte Yt karãpe i watipuẽti Wiku yp ywa he rakat ewywuat hu yp ete neꞌi e. Taꞌi ahetama Wiku yp ywa he rakat watipuẽti Wiku yp ete yn e. Yt karãpe i watipuẽti hu yp kape Wiku ywa he rakat e. Miꞌi hap ewy yt karãpe i yt he i rakat kape watuwat Tupana ehay he rakat kat hamo are e Iesui ahepe."45 Pyno uiwyriaꞌin aito waku rakaria watukupteꞌen mote mekewat Wiku yp he rakat ewy watukupteꞌen e. Hewo hewo waku mug hap yn mote waku kahato rakat no watoĩneꞌen. Iwese kahato rakaria wo watukupteꞌen e. Pyno waku hap kape yn watuwanẽtup aipyꞌa pe miꞌi hawyi ahehay kaipyi tuwẽtem waku rakat yn e. Maꞌato yt naku i watuwanẽtup pote yt naku i hap tuwẽtem ahehay kaipyi e. Pyno aiwanẽtup hap aipyꞌa piat toĩneꞌen ahekat hap ewy e. Waku rakat aiwanẽtup hap pote toĩneꞌen waku rakat ewy aheĩneꞌen hap e. Maꞌato yt pote yt naku i nug hano watoĩneꞌen e Iesui ahepe.
Pyno aiwanẽtup hap ahesokpe eiam ewy toĩneꞌen e. Pyno ahesokpe waku rakat watopag aheuru pe pote pyno waku rakat ahesokpe watihep kuap itotepyi are. Maꞌato yt naku i rakat ahesokpe watopag ahesokpe eiam me pote miitꞌin mipun ewywuat watihep aheuru pyi are e. Miꞌi hap ewy kahato aipyꞌa pe watopag waku e hap pote waku e hap ewywuat tuwẽtem aru aiwẽ pyi e Iesui ahepe."46 Uipotmuꞌeria kat pote som eweiꞌe uhepe — Urumuꞌe hat ekag koro En Mehĩ Urumuꞌe hat akag koro Mimi eweiꞌe uhepe at kaꞌap maꞌato miꞌi pytkai yt ewetunug hin i yne yne uhepiat einãpin hap koꞌi e. Urukaꞌiwat sese En eweiꞌe hawyi yt uimikyꞌesat ewy hin i ewetunug pytkai e. Yt naku i eimikyꞌesat koꞌi yn ewetunug hawyi uimikyꞌesat pun haria eweikupteꞌen are e ahepe."
47 Pyno uwe uwe tut uhowawi miꞌi hawyi uhehay toikuap tonãpin hap koꞌi toikuap miꞌi hawyi tutunug yne tonãpin hap uhepiat ok tã ewy miꞌi hat topyhuꞌat aikotã getap nug hat ikahu waku kahato rakat nug hat ewy are e."
48 Taꞌi uipotmuꞌeria ewetunug uhepiat einãpin hap ewy pote eweikupteꞌen aru iweꞌeg kahato rakaria ewywuat aikotã getap iheg nakat nug hat ewy eweikupteꞌen e. Taꞌi saꞌawyꞌi toikat kurusuꞌyp iheg nakat toꞌyat eãkukag wo e. Miꞌi hawyi toiꞌatutuk iãkukag yi pya pe hap ewy e. Miꞌi yat toĩneꞌen iheg nakat kahato ikahu kahato hap ewy. Iꞌyat iminug aikotã aiꞌyat yi heg note ewy iheg hap ewy. Miꞌi turan ywytu uato kahato putꞌokꞌe wen maꞌato tominug toꞌyat iheg kahato rakat yt taꞌat hin i hawyi ywytu uato yt timoma kuap i katupono yi heg nakat tote yi pan me toĩneꞌen kahato pote yt taꞌat hin i ywytu uato hap eꞌat pe e. Miꞌi hap ewy kahato uimienoi koꞌi nug haria tukupteꞌen e Iesui ahepe."
49 Maꞌato uwe uwe tuwanẽtup uhehay kape tonãpin hap kape porapꞌi miꞌi hawyi tuwanẽtup tuwepe — Yt atunug neran i Iesui piat uinãpin hap e miꞌi e hat wanẽtup hat aikotã getap nug yt iheg miat i rakat ewy aikotã ariaꞌyp nupiꞌa misekuap kahato wuat neꞌi getap nug hat ewy. Iꞌewyte yt ikaꞌa pya pe i toipan hat ewy e. Miꞌi turan putꞌokꞌe ywytu uato hawyi ywytu uato tiꞌypyhep hap ewy e. Miꞌi hawyi iꞌyat yt kat i taꞌat raꞌyn hawyi e. Miꞌi hap ewy topyhuꞌat uhepiat tonãpin hap uhehay upi yt topyhuꞌat i rakat e Iesui ahepe mekewat yityꞌok totepyi.
"1 Tohenoi yne raꞌyn hawyi toto raꞌyn Iesui tawa Kawanaꞌũ Kape."
2 Miꞌi turan toĩneꞌen itote wẽtup ok suraraꞌin sem akag koro eropat hat. Miꞌi miit surara akag koro mikyꞌe kahato. Miꞌi miit waku rakat iꞌahu kahato. Ikuꞌuro irane poityꞌi hap ewy."
3 Miꞌi turan surara sem akag tikuap Iesui ieĩneꞌen hap tetawa Kawanaꞌũ piat. Miꞌi hawyi toipoꞌoro sehay meremo Iesui kape Iuteu ywania akagnia upi — Uheropat hat uimikyꞌe kahato ikuꞌuro irane Uhyt miꞌi pote meremo eriot uhowawi uheropat hat moehãite hamo e tohẽtup toipoꞌoro tehay."
4 Miꞌi hawyi nagnia putꞌokꞌiꞌatuꞌe Iesui ete hawyi teꞌeroꞌe tope — Uhyt waku eriot urupoꞌoro hat surara sem akag eropat hat moehãite hamo iꞌatuꞌe. Iꞌahu kahato hawyi epiat imoehãite hap surara akag tikyꞌesat kahato iꞌatuꞌe. Iꞌewyte uruto wy uruikyꞌesat etimoehãite surara akag emiit katupono aiꞌywania powyro kahato hat mekewat surara akag iꞌatuꞌe."
5 Taꞌi miꞌi surara akag ni aiꞌywania Iuteu ywania powyro kahato hat iꞌatuꞌe. Miꞌi ti wẽtup ywania kaipywiat pytkai aikyꞌe kahato iꞌatuꞌe. Gaꞌatpo tutum saꞌup iwato kahato Ahetupana mõtypot yat nug hamo iꞌatuꞌe Iesui pe."
6 Miꞌi Iesui tikuap hawyi toto raꞌyn nagnia wywo surara akag yat kape hemiit iꞌahu rakat kape. Maꞌato tuwat turan surara koro yat kape turan surara koro tipoꞌoro sehay Iesui ewawi towyriaꞌin upi — Yt ereke teiꞌo uiꞌyat pe katupono uhewaku hap yt putꞌokꞌe i ereke uhowawiat hamo katupono En ni poꞌog poꞌog Morekuat no uikai e Iesui pe."
7 Mesup atipoꞌoro uhemiit ewawi uhehay moherep epiat hamo katupono yt areto kuap i ewawi uhewaku hap yt putꞌokꞌe i uhehay ewawi hamo Mehĩ e. En poꞌog uikai pote e. Pyno waku ehay etipoꞌoro uhemiit kape — Woromoehãinte ere o itote hawyi uhemiit mesuwe emimoehãite meremo topyhuꞌat hap atimohey raꞌyn e surara koro tuwehay poꞌoro Iesui kape."
8 Uito ti areĩneꞌen surara akag wo e. Taꞌi En ni uito ewy e. Atiꞌatupoꞌoro kuap kahato uhesurara sem koꞌi aikope aikope uimikyꞌesat ewy e. Iꞌewyte uiꞌakag koꞌi morekuaria poꞌog uikai uipoꞌoro hap atikuap taꞌyn e. Iꞌewyte 100 ok surara tukupteꞌen uhemiit no mesuwe uiꞌyat pe e. Pyno wẽtup ok surara pe uhemiit pe — Ereto ro tuꞌuka hamo are hawyi meremo toto uiꞌe hap nug hamo e. Eriot i ro areꞌe pote meremo te tut uhowawi e. Etunug no areꞌe uheropat hat uhesurara pe hawyi meremo tutunug uimikyꞌesat ewy e surara akag Iesui pe tehay poꞌoro. Pyno atikuap taꞌyn En uito ewy ereĩneꞌen Uruꞌakag wo hap e. Pyno erehaypoꞌoro meikowo eꞌe hap hawyi meremo uheropat hat uimikyꞌe iꞌahu kahato rakat waku raꞌyn topyhuꞌat eꞌe hap ok tã e."
9 Iesui tikuap Surara akag ehay hawyi tuwanẽtup kahato ihay kape hawyi toꞌe tewatꞌymuaria õꞌẽ haria pe — Taꞌi eiperia uiꞌywania koꞌi Isareu ywania eweikupteꞌen e. Eiperia eweikupteꞌen naꞌyn uimohey kahato haria wen maꞌato ti mesup te ti yt atipuẽti i eipyꞌasetpe miitꞌin uimohey haria mesuwat surara akag piat uimohey hap ewywuat koꞌi e. Yt aiꞌywania i wen maꞌato uimohey kahato e Iesui toꞌywania pe tewatꞌymuaria õꞌẽ haria pe."
10 Miꞌi hawyi suraraꞌin akag ehay erut haria teꞌeraꞌaipok i raꞌyn surara akag yat kape. Putꞌoktaꞌatuꞌe turan mekewat surara koro eropat hat imikyꞌe ihãite kahato raꞌyn hap taꞌatupuẽti.
"11 Miꞌi hawyi Iesui toto raꞌyn tawa Naĩ kape topotmuꞌeria wywo. Iꞌewyte miitꞌin typyꞌi kahato rakaria tuwat hupi."
12 Yt pya hin i tawa Naĩ pyhyp hap eꞌokenꞌypy wato kai turan toipuẽti woꞌosyp hanuaria muꞌap upi wẽtup ok ihainia ikuꞌuro rakat taꞌatueroto tawa pyi hyp hamo. Ikuꞌuro rakat ty toĩneꞌen itote wẽtup ok takat imẽpyt ikuꞌuro rakat wywo. Ity ti hiwu toĩneꞌen. Imẽpyt wẽtup yn nakat ikuꞌuro pote yt kat i raꞌyn ipowyro hamuat. Mekewat hiwu yatype tukupteꞌen typyꞌi kahato tawa kaipywiaria ikuꞌuro rakat hyp hanuaria. Ikuꞌuro rakat ty upi tuwat muꞌap upi."
13 Miꞌi hawyi Iesui tehaꞌat ity kape hiwu raꞌyn hap kape hawyi totomohaty kahato topyꞌa pe hawyi toikyꞌe kahato hawyi toꞌe hiwu kape — Mana e yt erewak teiꞌo e."
14 Mio tã e Iesui hawyi toto raꞌyn ikuꞌuro rakat ewawi hawyi tuweponug ikuꞌuro rakat eiam note hereto turan. Miꞌi hawyi meremo hereto haria teꞌeropyhuꞌat muꞌap tote. Miꞌi hawyi toꞌe raꞌyn ikuꞌuro rakat pe — Kurum eꞌãpeꞌokꞌam no e Iesui iꞌokpuk kape."
15 Miꞌi hawyi ikuꞌuro rakat tuwẽtem guꞌuro pyi hawyi tuweꞌãpeꞌokꞌam hawyi ihay i raꞌyn. Miꞌi hawyi Iesui tioto raꞌyn ity kape mekewat hiwu kape. Ihãite i raꞌyn tuwẽtem naꞌyn tokuꞌuro sese hawyi."
16 Miꞌi pote miitꞌin itotiaria teꞌeruwanẽtup kahato hawyi iꞌatuwepit kahato. Miꞌi hawyi teꞌeruwehum kahato Tupana kape — Waku kahato En Tupana iꞌatuꞌe iꞌatuehay wo. Miꞌi turan teꞌeroꞌe — Wakuat kahato En Tupana wakuat kahato En Tupana. Mesup taꞌyn Ehay Moherep Hat toĩneꞌen mesuwe urupyꞌasetpe iꞌatuꞌe. Putꞌokꞌe Emiit Uruehakyeraꞌat Hanuat iꞌatuꞌe Iesui piat Tupana kape mekewat ikuꞌuro rakat Iesui timoieĩneꞌen i raꞌyn hawyi."
17 Miꞌi hawyi taꞌatuhenoi kahato Iesui minug yt uwe i mesuwarotiaria minug kuap ewywuat iꞌatuꞌe wuatꞌi tawa pe hawyi yne yi Iuteu piaria tikuap taꞌyn — Iesui minug iwato hap. Iꞌewyte iraniaꞌin tawa puaria yi Iuteu hyẽpe upiaria ikuap yne raꞌyn.
"18 Miꞌi hawyi ahetꞌok hat Iuwãu potmuꞌeria henoi raꞌyn Iuwãu me Iesui minug wakuap yt uwe i mesuwarotiaria minug kuap ewywuat koꞌi etiat."
19 Miꞌi hawyi Iuwãu tikuap hawyi toikaykay typy ok topotmuꞌeria tuwewawi topyhik hap kape hawyi toꞌe — Uhytꞌiꞌin eweiwat ro Iesui kape apoꞌeweiꞌe hamo e. Mio tã eweiꞌe o tope uhehay ewehenoi — En apo Urumiekatup Tupana Mipoꞌoro Uruehakyeraꞌat Hanuat raꞌyn sio apo waku wẽtup ok uruhekatup eweiꞌe o Iesui pe e Iuwãu topotpoꞌororia typy ok pe."
20 Miꞌi hawyi Iuwãu mipoꞌoro koꞌi tuwat raꞌyn Iesui kape. Putꞌoktaꞌatuꞌe Iesui ete hawyi apoꞌiꞌatuꞌe — Woꞌomuꞌe hat iꞌatuꞌe Iuwãu woꞌosetꞌok hat wyti urupoꞌoro ewawi iꞌatuꞌe. Ahetꞌok hat tikuap teran epiat towesat hap — En apo urumiekatup Tupana Mipoꞌoro Wuatꞌi Porekuat nuat sio apo wẽtup ok te uruhekatup uruehakyeraꞌat hamo iꞌatuꞌe Iuwãu potpoꞌororia Iesui pe."
21 Miꞌi hawyi putꞌokꞌiꞌatuꞌe Iuwãu potpoꞌororia turan Iesui tiꞌatumoehãite kahato iꞌahu rakaria. Wuatꞌi iꞌatuꞌahu rakaria toiꞌatumoehãite. Miꞌi hawyi Iuwãu mipoꞌororia tehaꞌat kahato Iesui minug wakuap hap koꞌi kape. Ahiag ipiit piat rakaria toiꞌatusopo kahato. Yt iha pytig i rakaria toiꞌatumoehapytig naꞌyn putꞌokꞌiꞌatuꞌe turan."
22 Miꞌi tutunug turan Iesui toꞌe apoꞌe haria pe — Pyno eweiꞌaipok i ro Iuwãu kape hawyi ewehenoi ro yne aikotã aikotã eiꞌakasa hap koꞌi yne eimikuap koꞌi ewehenoi tope e iꞌatuepe. Yt ihapytig i rakaria ti toiꞌatumoehapytig naꞌyn eweiꞌe ro Iuwãu me e. Miꞌi hawyi yt hewyry kuap i rakaria toiꞌatumoewyry taꞌyn eweiꞌe ro e. Iꞌewyte hepihi pihi rakaria toiꞌatumokãꞌã raꞌyn iꞌatuepihi eweiꞌe ro e. Hewaure rakaria iꞌatuewaure hotꞌokꞌe raꞌyn eweiꞌe ro ahetꞌok hat Iuwãu me e. Iꞌewyte ti ikuꞌuro sese rakaria toiꞌatumohymut i raꞌyn iꞌatukuꞌuro sese hawyi eweiꞌe ro e. Miꞌi hawyi yt hekat i rakaria toiꞌatumuꞌe kahato raꞌyn Tupana ehay wakuano yt haꞌup ete i eweiꞌe ro aiwy Iuwãu me e Iesui."
23 Miꞌi hawyi wẽtup uhehay eweiꞌe ro Iuwãu me — Pywo ti rat waku kahato tukupteꞌen uimohey kahato rakaria uhepiat pywo yn e haria — Woromohey uikuꞌuro hap kape e haria iꞌatuwepit kahato tukupteꞌen maꞌato iraniaꞌin tuwemõti kahato uipupi yt naku i pe tukupteꞌen eweiꞌe o aimuꞌe hat saꞌawyꞌiwuat Iuwãu me e Iesui apoꞌe haria pe Iuwãu potpoꞌororia pe."
24 Miꞌi hawyi Iuwãu potmuꞌeria tuwat taꞌatupotpoꞌoro hat kape Iesui miwesat moherep hamo Iuwãu kape. Miꞌi hawyi Iesui tiꞌatumuꞌe kahato itotiaria yne taꞌatuhetꞌok hat Iuwãu etiat — Saꞌawyꞌi te kat hamo kahu eweiwat yahig kape e. Taꞌi aimuꞌe hat wakuat Iuwãu ehay wakuat kuap hamo watuwat saꞌawyꞌi yahig kape e Iesui. Taꞌi Iuwãu aimuꞌe kahato Tupana ehay sese wo e. Upip wasera upi taꞌat turan kowoꞌi kowoꞌi tuwat yt hãpyk hin i taꞌat e. Aimuꞌe hat Iuwãu yt upip wasera upi ewywuat hin i e. Hãpyk kahato aimuꞌe e. Upip wasera upi yt tikuap i aikotã waku hawyi kowoꞌi kowoꞌi toto e. Maꞌato Iuwãu yt miꞌi hap ewywuat hin i e."
25 Pyno apo kat som yahig note eweiꞌakasa saꞌawyꞌi. Kat kapiat eiꞌakasa hamo som eweiwat Iuwãu ewawi e. Miit esokpe ikahuria rakat ewywuat kapiat apo eweiꞌakasa hamo eweiwat yahig kape saꞌawyꞌi. Yt hesokpe ikahuria rakat hin i Iuwãu e. Taꞌi hekat kahato rakaria esokpe ikahu kahato maꞌato Iuwãu esokpe aihũ Kameru sap kawiat. Hekat rakaria yt tukupteꞌen i yahig note maꞌato morekuaria yat pe yn tukupteꞌen ikahuria puaria maꞌato Iuwãu yt miꞌiria ewywuat hin i toĩneꞌen e."
26 — Pyno saꞌawyꞌi kat som eweikat mekewat yahig note. Kan hamo ten eweiwat mekewat yahig at hakup hap kape saꞌawyꞌi e. Taꞌi Tupana ehay enoi hat koro akasa hamo eweiwat yahig kape saꞌawyꞌi are. Pywo ti rat Tupana Mipoꞌoro ut hap moherep hat kape eweiwat e. Miꞌi hawyi eimikat eweipuẽti itote e. Iuwãu ni poꞌog wuatꞌi Tupana ehay moherep haria kai are. Tupana ehay moherep hat koro ahetꞌok hat are e Iesui."
27 Taꞌi waku kahato ahetꞌok hat Iuwãu e Iesui. Saꞌawyꞌi sese Tupana ehay enoi hat pot Isaia henoi kahato Iuwãu etiat eꞌyianmete tomiwan me. Uiwyriaꞌin e mio tã toꞌe Tupana saꞌawyꞌi sese Tosaꞌyru pe. — Uhaꞌyru e saꞌawyꞌi eꞌyianme wẽtup ok miit atipoꞌoro teran eꞌut hap moherep hamuat wuatꞌi miitꞌin miat hamo e Tosaꞌyru pe e. Miꞌi hat yahig note aru toiꞌatumuꞌe kahato Uhaꞌyru eꞌut hap mohãpyk hanuat atipoꞌoro e Tupana Isaia miwan me saꞌawyꞌi Iuwãu etiat. Pyno miꞌi ti Isaia e hap ewy eweipuẽti raꞌyn yahig note e. Taꞌi Tupana Saꞌyru ut hap moherep eꞌyianmiat hat henoi tehay wuat hat ti eweipuẽti raꞌyn ahetꞌok hat Iuwãu e Iesui."
28 — Pyno areꞌe teran aikotã areꞌe saꞌawyꞌi ehepe hap ewy e Iesui. Mio tã areꞌe saꞌawyꞌi — Mesup yt uwe i miitꞌin muo mesuwarotiat poꞌog Iuwãu kai. Iuwãu poꞌog poꞌog yne haryporia mẽpyt kai e. Iuwãu poꞌog torania saꞌawyꞌiwuat Tupana ehay moherep haria kai e. Maꞌato pywo ti rat aikope aikope toĩneꞌen wẽtup uipotpoꞌoro uhehay moherep hat miꞌi miit ti poꞌog poꞌog Iuwãu kai toĩneꞌen Tupana wanẽtup hawe e. Taꞌi ahetꞌok hat Iuwãu wakuat kahato wen maꞌato yne Tupana mikyꞌesat nug haria uhehay moherep haria poꞌog ahetꞌok hat Iuwãu kai e."
29 Saꞌawyꞌi tuwat raꞌyn miitꞌin Iuwãu kape Iuwãu ehay kapiat teꞌeruwanẽtup hamo e. Woꞌopyhyp haria miitꞌin maꞌat haria koꞌi tuwat e. Imienoi taꞌatukuap hawyi — Pywo iꞌatuꞌe. Hãpyk kahato Tupana iꞌatuꞌe. Miꞌi hawyi teꞌeraꞌaipok taꞌyn Tupana kape imikyꞌesat nug hamo e. Miꞌi hawyi taꞌatuẽtup taꞌyn Iuwãu miat taꞌatusetꞌok hap katupono — Tupana mohey haria urutoria e hap moherep hamo miitꞌin ehamo."
30 Maꞌato iraniaꞌin nagnia ehay enoi haria iꞌewyte miwan enoi haria yt Iuwãu mohey hin i e Iesui. Miꞌiria ti yt inug neran i Tupana mikyꞌesat ewy e. Miꞌi pote yt taꞌatukyꞌesat i Iuwãu piat taꞌatusetꞌok hap e Iesui."
31 Are pãi yt naku i miꞌiria katupono — Uruto poꞌog waku wuatꞌi miitꞌin kai iꞌatuꞌe taꞌatupyꞌa pe. Uruto poꞌog Iuwãu kai iꞌatuꞌe hawyi Iuwãu mimoherep uhepiat sehay taꞌatupun neꞌi e Iesui Tupana mohey haria muꞌe haria akag koꞌi piat.
"32 Pyno mesuwarotiaria — Uruto poꞌog e haria yt uimohey i teran tukupteꞌen aikotã hirakaria ihaꞌywywi rakaria ewywuaria are e. Aikotã hirakaria teꞌeroꞌe toꞌope — Toꞌiro waku watuwepy aiwoꞌomowepit hamo iꞌatuꞌe toꞌomahara hap mywo maꞌato iraniaꞌin hirakaria — Yt naku i aiwoꞌomowepit hap mesup iꞌatuꞌe. Yt urutuwat teran i aiwoꞌomahara hap kape watuwepy hap kape iꞌatuꞌe iraniaꞌin hirakaria pe e. Yt urutunug neran i wepy hap aiwepit hap upi iꞌatuꞌe. — Pyno waku aiwoꞌohayka hap watunug miitꞌin syp haria ewywuat aiwoꞌomikyryꞌi hap iꞌatuꞌe iraniaꞌin hirakaria pe wen maꞌato — Yt uruikyꞌesat i aiwak hap neꞌi aiwoꞌomikyry hap neꞌi iꞌatuꞌe toꞌope toꞌope hirakaria miꞌi hap ewy kahato eweikupteꞌen — Uruto poꞌog toraniaꞌin kai e haria pe e Iesui. Yt taꞌatukyꞌesat i uimienoi iꞌewyte yt taꞌatukyꞌesat i ahetꞌok hat Iuwãu mienoi. Kat koꞌi kat koꞌi areꞌe hawyi — Yt uruimohey ehay iꞌatuꞌe uhepe. Iꞌewyte kat koꞌi kat kat koꞌi ahetꞌok Iuwãu henoi — Yt uruimohey i ehay iꞌatuꞌe wy e."
33 Pyno eipe ti iraniaꞌin hirakaria ewywuaria eweipyhuꞌat katupono saꞌawyꞌi Iuwãu miitꞌin setꞌok hat tuwemosyꞌat at kaꞌap kahato eimikyꞌesat ewy tutunug yne e. Miꞌu iꞌewyte yt tutuꞌu i tuwemosyꞌat Tupana wywo ihay hamuat eimikyꞌesat ewy tutunug e. Iꞌewyte mahy mekewat Uwa hy potꞌi kawiat yt tutuꞌu i. Taꞌi Iuwãu eimikyꞌesat ewy tenuk wen miꞌi pytkai eiperia — Ahiag ipiit piat rakat Iuwãu eweiꞌe wuatꞌi miitꞌin me e. Yt naku i mio tã eiꞌe hap e Iesui tomohit haria pe."
34 Miꞌi hawyi iꞌewyte uimohit kahato eipe ehehay wo katupono atuꞌu yne miꞌu iꞌewyte Uwa hy atuꞌu e Iesui. — Yt naku En eweiꞌe uhepe. — Taꞌi erenuk kahato yne miꞌu ete eweiꞌe uhepe. Iꞌewyte En ni mahy u hat mekewat uwa hy potꞌi u kahato hat eweiꞌe uhepe e. — En ni yt naku i katupono imopẽꞌã rakat ereĩneꞌen iꞌewyte wuatꞌi miꞌu u hat ereĩneꞌen yt uruto ewy i eweiꞌe saꞌag uhepe e Iesui tewanĩkaptia pe. Eiperia ti Iuwãu ehay wakuat pun haria iꞌewyte uhehay wakuat kahato pun haria uruehay Tupana mipoꞌoro sese wen. Yt naku i kahato ewetunug e Iesui toꞌywania pe — Uruto poꞌog ekai e haria pe. — En ni yt naku i eweiꞌe uhepe. En ni yt eremosyꞌat hin i hawyi erenuk yn at kaꞌap imopẽꞌã rakat ewy rat eweiꞌe uhepe e. Taꞌi En ni urupyhyp haria uruewanĩkaptia esuraraꞌin kyꞌe hat eweiꞌe uhepe e. Iꞌewyte yne yt nakuaria i wyꞌok wo ereĩneꞌen eweiꞌe uhepe e. Miꞌi pote yt kat hamo i En eweiꞌe uhepe. Pywo pe ti yt uimohey haria uhehay pun haria eweikupteꞌen katupono aikotã hirakaria iꞌatuwoꞌokyryꞌi hap potiat ewy eweipyhuꞌat e Iesui tewanĩkaptia pe. Yt eweikuap i kat som eweikyꞌesat. Iuwãu mienoi yt eweikyꞌesat i pote iꞌewyte uimienoi kape yt eweiwanẽtup hin i e."
35 Iraniaꞌin uimohey haria pe — Yt naku i nug haria eipe eweiꞌe maꞌato miꞌi pytkai miꞌiria Tupana ehay kapiat wanẽtup kahato haria. Eipe urumohit haria eweikupteꞌen e. Ewehaꞌat ro uimohey haria sese kape hawyi meremo eweikuap aru Tupana mienoi kyꞌesat kahato rakaria miꞌiria tukupteꞌen hap maꞌato eipe yt eweikyꞌest hin i e. Eimienoi wãiꞌe hap koꞌi kyꞌesat haria yn eipe are e Iesui toꞌywania yt tomohey hin i haria pe mekewat wãiꞌe hap moherep haria pe.
"36 Miꞌi hawyi wẽtup ok nagnia wãiꞌe hap moherep hat toꞌe Iesui pe — Uhyt toꞌiro uhupi e. Waku watuwat uiꞌyat kape enuk hamo e. Miꞌi hawyi Iesui toto raꞌyn iꞌyat kape tenuk hamo mekewat — Uruto poꞌog waku e haria sem wywo tenuk taꞌyn hamo."
37 Miꞌi hawyi toĩneꞌen itote mekewat tawa pe wẽtup ok haryporia yt iweꞌeg i rakat wuatꞌi ihainiaꞌin wywo ieĩneꞌen hat. Miꞌi toikuap taꞌyn Iesui toĩneꞌen hap hawyi toto raꞌyn nagnia wãiꞌe hap moherep hat yat kape. Mohag hy ikamhig se rakat heiam nu Arapatu kawiat ikahu rakat wywo saꞌup iwato kahato rakat wywo toto."
38 Putꞌoktoꞌe nagnia ehay wãiꞌe hap moherep hat yat pe hawyi toipuẽti Iesui porog me tupe tote tenuk yparakai yt itypore i rakat ete iꞌatueko ewy tenuk hamo. Miꞌi hawyi mekewat haryporia yt iweꞌeg i rakat toto Iesui kape hawyi tuwepỹꞌãtutuk ipy yatypiat kape. Miꞌi hawyi tuwak taꞌyn haty kahato topyꞌa pe pote paaꞌe kahato tominug saꞌag koꞌi poꞌypyi. Miꞌi hawyi homꞌe teha hy Iesui py ok pe ete hawyi toitip taꞌyn taꞌasap mo teha hy ipy okpe ete. Miꞌi hawyi toiꞌãpysig ipy hawyi mekewat nu wakuat mohag hy eiam toiꞌokpik hawyi mekewat mohag hy hekat rakat toiꞌokpun yne Iesui py okpe ete. Miꞌi hawyi toitip taꞌyn taꞌasap mo mohag hy imõtypot haype ikyꞌe kahato hap moherep hamo."
39 Miꞌi hawyi mekewat getap kaꞌiwat wãiꞌe hap kuap hat taꞌakasa haryporia yt iweꞌeg i rakat Iesui py ete hawyi mio tã toꞌe tuwepe tuwanẽtup hawe — Are pãi Iesui yt Tupana Mipoꞌoro Tehay Moherep hat hin i e katupono yt toikuap i raꞌyn meiẽ haryporia hewaire hewaire kahato rakat e tuwepe tuwanẽtup hawe yt naku i e. Iesui Tupana Wanẽtup Kuap hat pote meremo toikuap mana yt kan hamo i rakat toĩneꞌen topysei hat hawyi toipoꞌoro pya topiit pyi e. Taꞌi yt naku i Iesui tunug itote katupono uruto Iuteu ywania Tupana wãiꞌe hap kuap haria hawyi yt uruikyꞌesat hin i haryporia yt iweꞌeg i rakat uruehamo e tuwepe tuwanẽtup hawe mekewat paꞌi Simãu."
40 Miꞌi hawyi Iesui tikuap taꞌyn tuwepe mekewat miit tuwanẽtup hap hawyi toꞌe tope — Paꞌi Simãu e ahenoi teran wẽtup sehay epe e. Miꞌi hawyi toiwesat — Waku Uhyt waku uimuꞌe e Iesui pe."
41 Miꞌi hawyi Iesui toꞌe paꞌi Simãu me sehay iãꞌãkap wuo. Mio tã e — Saꞌawyꞌi so wẽtup ok toĩneꞌen weteweru hat. Iwato kahato saꞌup toipuru morekuat po pyi iwato kahato aikotã topotpap wuatꞌi eꞌat kapiat haꞌup takat ewy. Miꞌi hawyi wẽtup ok iꞌewyte ipuru morekuat po pyi kurin aikotã topotpap wẽtup ewaty kapiat yn haꞌup takat ewy."
42 Miꞌi hawyi so weteweru haria yt haꞌup nug kuap i taꞌatuweteweru hap morekuat pe katupono yt kat i taꞌatuweteweru hap saꞌup wote. Miꞌi pote ti mekewat morekuat tineiru puru hat toꞌe tepiat weteweru iwato kahato hat pe — Pyno waure wo areĩneꞌen mekewat emipuru iwato rakat kai e so. — Miꞌi hawyi toꞌe tepiat weteweru yt haꞌup wato i rakat pe wẽtup ewaty kapiat yn haꞌup takat pe — Pyno waku mehĩ atiwaure raꞌyn uhepiat eweteweru hap kurin kat mehĩ e tope wy e morekuat e Iesui sehay iãꞌãkap puo. Miꞌi hawyi Iesui apoꞌe paꞌi pe — Simãu e aiũwat som poꞌog morekuat kyꞌe tuweteweru hap kawiat waureꞌe hat e. Sio mekewat tuweteweru iwato rakat waure hap sio mekewat weteweru kurin kat waure hap e Iesui Simãu me."
43 Miꞌi hawyi Simãu tiwesat — Pyno arewanẽtup weteweru wato hat poꞌog ikyꞌe katupono iwat iweteweru hap poꞌog iwato rakat toiwaure wẽtup ok kai pote e Simãu. Miꞌi hawyi — Pywo kahato uhyt e Iesui Simãu me."
44 Miꞌi hawyi Iesui tuwemorem haryporia topy yatypiat kape hawyi toꞌe paꞌi Simãu me — Erahaꞌat ro mesuwat uipy yatpiat haryporia kape uikyꞌe kahato hat kape katupono Tupana waure wo iweteweru uato hap kai e maꞌato en meiũwat haryporia yt ewy hin i ereĩneꞌen uhyt e. Miꞌi ti uikyꞌe hap moherep kahato hat toĩneꞌen e maꞌato en areke eꞌyat pe wen maꞌato yt kat i yꞌy eiam ewy etum uhepe uipysei hamo maꞌato meiũwat haryporia tehahy wo uipysei hawyi taꞌasap mo uipy toimogag e."
45 Maꞌato yt uiꞌãpysig hin i en areke eꞌyat piat turan aheko ewy e. Maꞌato haryporia ti tut hawyi uipy ãpysig e."
46 — Taꞌi putꞌokꞌe miit aiꞌyat pe hawyi watꞌatuꞌãpysig hawyi watopag mohag hy yt haꞌup woity i rakano õꞌẽ haria asap ete aheko ewy e. Pyno en ni Simãu yt etipag hin i uiꞌasap mohag kap mo areke eꞌyat pe pytkai wen maꞌato mesuwat haryporia uipysei hap ewy haꞌup woity rakano mohag hy ikamhig se rakano uipypen hap ewy e."
47 Pywo pe ti meiũwat haryporia uipy etiat pe — Yt weꞌeg hat hin i ereꞌe epyꞌa pe imohit hamo e. Iminug saꞌag iwato kahato ereꞌe mana pe e. — Taꞌi weteweru wato kahato hat ewy toĩneꞌen Tupana pe ereꞌe mana pe maꞌato koitywy iminug saꞌag koꞌi Tupana tiwaure yne raꞌyn e. Taꞌi waure wo raꞌyn iminug kai uikyꞌe kahato hat topyhuꞌat pote e. Maꞌato wẽtup ok weteweru yt iwato i hat minug saꞌag kurin nakat pote waure wo yt iwato i pote e. En ni miꞌi hat ewy e. Miꞌi pote uikyꞌe hap epiat yt iwato i e. Miꞌi pote Tupana kyẽ hap epiat kurin topyhuꞌat e Iesui Simãu me. Pyno en ereĩneꞌen aikotã uhehay iãꞌãkap ewy aikotã mekewat weteweru kurin kat hap ewy ereĩneꞌen uhehay iãꞌãkap hap ewy e. Maꞌato meiũwat uiꞌyatypiat haryporia minug saꞌag weteweru uato kahato hap etiat uhehay iãꞌãkap ewy e. Miꞌi hap ewy pote uikyꞌe kahato hat toĩneꞌen e. Maꞌato en ni yt uikyꞌe miꞌi haryporia ewy i e paꞌi Simãu me. — Uiweteweru hap epiat yt iwato hin i e hat ewy ereꞌe Tupana pe pote are e."
48 Miꞌi hawyi Iesui toꞌe topysei hat pe mekewat haryporia pe — Koitywy waku ereĩneꞌen Tupana wanẽtup hawe waku raꞌyn mana e. Waure wo Tupana toĩneꞌen eminug saꞌag koꞌi kai saꞌawyꞌiwuat yt naku i sese nug hat en rokirẽ e Iesui haryporia pe saꞌawyꞌi yt iweꞌeg i rakat pe."
49 Mio tã e Iesui hawyi ienuk haria teꞌeroꞌe toꞌope — Yt naku i mio tã watoꞌe katupono Tupana yn ni ihep kuap aiminug saꞌag koꞌi iꞌatuꞌe. Pyno mio tã e Iesui yt naku i kahato watoꞌe iꞌatuꞌe toꞌope."
50 Maꞌato Iesui toꞌe haryporia pe — Waku raꞌyn mana ewepit ro katupono uimohey raꞌyn en mote waku pe raꞌyn ereĩneꞌen koitywy Tupana wanẽtup hawe e. Waku eraꞌaipok eꞌyat kape ewepit kahato hap wywo katupono koitywy Tupana miehakyeraꞌat ereĩneꞌen e Iesui mekewat haryporia topysei hat saꞌawyꞌiwuat 7 ok ahiagnia ipiit piat rakat mana Maria tawa Matarena piat e hap het rakat pe.
"1 Miꞌi hawyi Iesui toto yne tawa koꞌi upi temiitꞌin 12 ok takaria wywo sehay wakuat enoi hamo. Aikotã Tupana topyhuꞌat irane Wuatꞌi Ywania Porekuat no hap tomohey hawyi hap moherep hamo raꞌyn yne tawa hit yne tawa watoꞌin koꞌi upi."
2 Temiitꞌin sem koꞌi wywo tuwat iꞌewyte haryporiaꞌin tuwat hupi miꞌu nug hamo. Wẽtup ok haryporia Maria tawa Matarena piat e hap het rakat saꞌawyꞌiwuat 7 ok ahiagnia ipiit piat rakat Iesui tisopo raꞌyn nakat."
3 Miꞌi hawyi Iuana mekewat Kusa eharyꞌi toto hupi hemiitꞌin eropat hamo. Heꞌaito ti mekewat Kusa morekuat Eroti yat pe toĩneꞌen. Yne motpap hap koꞌi morekuat yat piat toĩneꞌen Kusa po pe. Iꞌewyte yne morekuat ekat topyhuꞌat Iuana eꞌaito po pe. Miꞌi hawyi mana Susana iꞌewyte iraniaꞌin haryporia Iesui potpoꞌororia powyro haria teꞌeropyhuꞌat. Iesui potmuꞌe koꞌi 70 ok takaria poi haria. Miꞌi hawyi taꞌatuekat kaipyi taꞌatukyiꞌat kat koꞌi kat koꞌi Iesui powyro hamo.
"4 Miꞌi hawyi yne tawa kaipywiaria aikopepyi aikopepyi teꞌeruwaꞌatunug Iesui ewawi."
5 Miꞌi hawyi miꞌiria sem me Iesui henoi hãꞌãkap wuo — Wẽtup eꞌat pe so hãꞌỹi sytpok hat toto toko kape hãꞌỹi sytpok hamo maꞌato yt yne i hewo go sese tote e. Iraniaꞌin hãꞌỹi go puꞌap upi hewo e. Miꞌi ti miitꞌin ikohyewyry iko puꞌap tote hawyi taꞌatuꞌakit akit neꞌi raꞌyn hãꞌỹi hawyi weitaria tuꞌu yne hãꞌỹi koꞌi hewo rakat muꞌap upiat e."
6 Iraniaꞌin hãꞌỹi nu upi yi heg upi hewo e. Wẽtup tuereto hẽtyt maꞌato meiũran ikuꞌuro yt kat i yꞌy yi kaipyi hãꞌỹi nu totiat neꞌi pote e."
7 Iraniaꞌin hãꞌỹi iꞌanam me hu ypia pe hewo e. Miꞌiria hẽtyt wen maꞌato iꞌanam wywo toꞌoꞌewy neꞌi pote meiũran iꞌanam tohik neꞌi raꞌyn hawyi yt tuwenug i raꞌyn e."
8 Iraniaꞌin yi wakuat upi hewo hewo heko go tote e. Miꞌiria ti iꞌatuehãite kahato hawyi wẽtup sat kaipyi 100 iãꞌỹi tuwemoherep e. Pyno ehewaure kaꞌa pote ewehẽtup kahato o mesuwat uhehay iãꞌãkap puat uimienoi e Iesui miitꞌin sem me."
9 Miꞌi hawyi ipotmuꞌeria apoꞌiꞌatuꞌe Iesui pe — Pyno kat e hap som ehenoi teran iãꞌãkap wuo hãꞌỹi koi hap ete iꞌatuꞌe."
10 Miꞌi hawyi Iesui tiꞌatuwesat — Taꞌi uiwyriaꞌin ahenoi teran ehepe wuatꞌi mikuap yt heremo i rakat i aikotã Tupana topyhuꞌat irane Wuatꞌi Miitꞌin Porekuat no hap etiat e. Maꞌato iraniaꞌin me miitꞌin sem me hãꞌãkap wuo ahenoi teran yt uikuap teran i haria miꞌiria pote e. Teꞌeraꞌakasa wen uipiit kape maꞌato uhehay kape yt hotꞌokꞌe i iꞌatuete. Taꞌatukyꞌesat taꞌatuehãite hap taꞌatupoi hap wen maꞌato Tupana ehay yt taꞌatukuap teran hin i pytkai e temiitꞌin me."
11 — Pyno koitywy ahenoi i ehepe mesuwat iãꞌỹi iãꞌãkap etiat eweikuap sese hamo. Pyno uhehay iãꞌãkap we Tupana ehay topyhuꞌat mekewat iãꞌỹi ewy e."
12 Mekewat mikoi iãꞌỹi go puꞌap upiat ti hewo rakat iãꞌỹi wẽtup ok wẽtup ok wanẽtup hat ewywuat e. Teꞌeruwanẽtup maꞌato meremo ahiag putꞌokꞌe iꞌatuwanẽtup hap ete hawyi Tupana ehay mikoi iãꞌỹi ewywuat toihep taꞌyn iꞌatuewaure pyi. Yt toikyꞌesat i taꞌatukuap hawyi uimohey hap katupono taꞌatumohey hawyi Tupana piat uimienoi hap taꞌatuehakyeraꞌat hamuat taꞌatukuap taꞌyn e. Miꞌi ahiag yt tikyꞌesat i e."
13 Miꞌi hawyi ti nu totiat hewo rakat ewywuat wẽtup ok wẽtup ok wanẽtup hat ewy e. Teꞌeruwanẽtup hawyi waku kahato taꞌatupuẽti uimienoi e. Pywo kahato iꞌatuꞌe maꞌato miꞌiria iãꞌỹi yt hapo rakaria i ewywuaria koꞌi tukupteꞌen e. Miꞌi pote yt toĩneꞌen motꞌi i uhehay mohey hap ete e. Meiũran iraniaꞌin tiꞌatukyryꞌi iꞌatuepiat uimohey hap ete hawyi meremo taꞌatuwaure raꞌyn Tupana ehay uiwẽ pywiat e."
14 Iꞌewyte ti mekewat iãꞌỹi iꞌanam miat hu ypia puat hewo rakat wẽtup ok wẽtup ok wanẽtup hat ewywuat e. Miꞌiria teꞌeruwanẽtup kahato uhehay wakuat kapiat hawyi taꞌatumohey ran naꞌyn. Saꞌawyꞌi inug neran Tupana mikyꞌesat ewywuat wen maꞌato taꞌatupotpap iwato hap kape taꞌatuekareꞌen iwato hap kape taꞌatumikyꞌesat wuatꞌi hap kape teꞌeruwanẽtup yn hawyi saꞌawyꞌiwuat taꞌatusat hap ewywuat uhehay toĩ wen maꞌato yt karãpe i waku sese ihãite hap ewy toĩneꞌen iꞌatupyꞌa pe maꞌato iꞌakyt haria ewywuaria wo teꞌeropyhuꞌat yt haat i hap ewy iꞌatuwanẽtup hap at kaꞌap iꞌatumonik poityꞌi neꞌi raꞌyn Tupana e hap uimienoi e. Miꞌi hawyi taꞌatumohey ran kahato hawyi waure wo teꞌeropyhuꞌat Tupana e hap koꞌi kai e."
15 Maꞌato mekewat hãꞌỹi yi wakuat upiat hewo rakaria wẽtup ok wẽtup ok wanẽtup hat ewywuat e. Miꞌiria ti iꞌatupyꞌa piat yi wakuat ewywuat pote teꞌeruwanẽtup at kaꞌap Tupana ehay kapiat hawyi yt taꞌatuwaure hin i. Taꞌatuhytmõi taꞌatupyꞌa pe Tupana ehay hawyi taꞌatunug naꞌyn Tupana mikyꞌesat ewy e. Miꞌi pote mikoi haat kahato rakat ewywuat teꞌeropyhuꞌat teꞌeruwenug kahato rakat ewy e Iesui.
"16 Miꞌi hawyi wẽtup iãꞌãkap wuo Iesui henoi towyriaꞌin me — Getap we wãtym hawyi yt uwe i ariãty hẽtyhot hap ipag neran kamũti pe migꞌi wo e. Iꞌewyte yt taꞌatupag i yni ywytꞌokpype neꞌi maꞌato ywaiti pe waku pe heiam note yn taꞌatuhupit teran e. Miꞌi hawyi wehytꞌok haria meremo taꞌatukuap hẽtyhot hap e."
17 Miꞌi hap ewy kahato uimohey hap topyhuꞌat e Iesui. Taꞌi uimohey sese pote meiũran aru heremo yne miitꞌin me ehepiat topyhuꞌat hap uimohey hap aikotã ariãty ywaiti piat ewy e. Niatpo kahato uimohey hap migꞌi wo hap are aikotã ariãty wãtym muat migꞌi wo hap ewy e. Miitꞌin pyꞌa pe uimohey hap toĩneꞌen mote meiũran hotꞌokꞌe kahato itote hawyi heremo kahato e."
18 Pyno eweiwanẽtup to uimienoi kape uhytꞌiꞌin manaꞌin e Iesui. Eweiwanẽtup haty wo hawyi taꞌi ehewaure kahato uhehay kape motꞌi hawyi meremo aru eweikuap uimienoi mikoi saat kahato rakat ewy eweikupteꞌen hawyi Tupana mienoi hẽtyhot kahato rakat powyro hamuat miitꞌin hap ewy eweikupteꞌen e. Iꞌewyte poꞌog naꞌyn saꞌawyꞌiwuat kai eimikuap koꞌi hap ahenoi ehepe. Maꞌato yt haty wo i pote waure wo eweikupteꞌen uimienoi nug hap kai pote yt kat wywo i aru eweipyhuꞌat e Iesui temiitꞌin me.
"19 Miꞌi turan Iesui ty putꞌokꞌe Iesui ywytꞌin wywo. Miꞌi hawyi Iesui ewawi taꞌatukyꞌesat maꞌato yt tuwehytꞌok kuap i ipotmuꞌeria iꞌatu kahato sakpo getap we Iesui yatype pote Maria yt teke kuap i tomẽpyt kape. Miꞌi pote Maria tikaykay Tomẽpyt tuwewawi ipotmuꞌeria pyꞌasetpyi."
20 Miꞌi pote wẽtup ok toꞌe Iesui pe — Uhyt iuẽ ety putꞌokꞌe okenꞌypyke hawyi eywytꞌin nywo iꞌatuehay teran so ewywo e Iesui pe."
21 Miꞌi hawyi Iesui toꞌe tomohey haria pe topotmuꞌeria pe — Uity sese ewywuaria eweikupteꞌen eipe meiũpe e. Eipe ti uheywytꞌin sese uheinytꞌin sese ewywuat e. Pyno eipe meiũpe eweikupteꞌen uimikyꞌe koꞌi aikotã uity uheywytꞌin uheinytꞌin koꞌi ewy katupono uwe uwe tuwanẽtup kahato uhehay kape uimienoi Tupana ehay kape hawyi tutunug uhehay ewy hawyi miꞌi haria ti uityꞌin uheywytꞌin uheinytꞌin tukupteꞌen uiwanẽtup hawe uipyꞌa pe e Iesui ahepe tomohey haria pe tomikyꞌesat nug haria pe.
"22 Wẽtup eꞌat pe Iesui toꞌe temiitꞌin me — Toꞌiro yara puo hyemyiꞌa wato sakpo e. Miꞌi hawyi toto raꞌyn yara wato kape hawyi teke temiitꞌin wywo. Tuwehytꞌok hawyi toꞌe temiitꞌin me — Toꞌiro uhytꞌiꞌin ysakpo watuwat e. Miꞌi hawyi tuwat raꞌyn ysakpo."
23 Yꞌy pyꞌasetpiat turan Iesui toket kahato. Miꞌi turan ywytu kahato putꞌokꞌe yꞌy ete hyemyiꞌa wato pyꞌasetpiat ikupteꞌen turan. Miꞌi hawyi ipoityꞌi kahato yara ete katupono yꞌy teke teke raꞌyn iꞌatueꞌyara pe — Yt naku i iꞌatuꞌe minwatoꞌe hamuat iꞌatuꞌe taꞌyn. Pãi iꞌatuꞌe toꞌope ipoityꞌi kahato iꞌatuꞌe toꞌope toꞌope haty wo."
24 Miꞌi hawyi teꞌeruwẽpowat Iesui kape — Urukaꞌiwat Urukaꞌiwat erehymut ro iꞌatuꞌe teꞌerewẽpowat. — Watoꞌopyꞌat irane raꞌyn iꞌatuꞌe. — Yꞌy teke teke kahato aheꞌyara pe iꞌatuꞌe. Aiꞌauka irane yꞌy iꞌatuꞌe. Miꞌi hawyi Iesui tuwehymut hawyi — Wãi neiꞌo ywytu are e ywytu uato pe. — Epoꞌinik to yꞌy e ihy wato pe hawyi ipoꞌinik taꞌyn yꞌy wato iꞌewyte ywytu uato ipohep taꞌyn. Taꞌi meremo ipoꞌinik taꞌyn Iesui ehay upi iwẽpowat hawyi."
25 Miꞌi hawyi apoꞌe haty wo topotmuꞌeria pe — Uiwyriaꞌin kat pote som yt uimohey kahato i e. Miꞌi hawyi poꞌog teꞌeruwanẽtup iminug ete hawyi teꞌeroꞌe toꞌope — Uwe som pyno Meiũ Miit Iesui katupono yt miit ewy i tutunug kuap iꞌatuꞌe toꞌope. Tupana ewy toimopoꞌinik kuap yꞌy wato ywytu uato hap tehay wo iꞌatuꞌe — Kat kawiat som pyno Iesui iꞌatuꞌe toꞌope.
"26 Miꞌi hawyi meremo yi Kerasenu eꞌy sakpuat putꞌokꞌiꞌatuꞌe hawyi tawa Katarenu yẽpeke teꞌeruwehik taꞌyn."
27 Tuwẽtem yara wato pyi hawyi putꞌokꞌe howawi wẽtup ok ahiagnia sem ipiit piat rakat. Tawa Katarenu piat ieĩneꞌen hat miꞌi ti yt toĩneꞌen kuap i towyriaꞌin wywo tetawa pe katupono ipyꞌahak kahato hesoꞌok sese ahiagnia tuete ipiit pe pote. Miꞌi pote toĩneꞌen at kaꞌap woꞌosyp hawe yt tesokpe pe i."
28 Tehaꞌat Iesui kape hawyi tehay pirik wo tuwewahik yi totiat hawyi iwẽpapꞌi tehay pirik wo — Worokuap En Tupana Ywaitiat Ieĩneꞌen hat Saꞌyru En e. Kat aru etunug uhete e haty wo Iesui pe. Uhyt wãi urusatyꞌi satyꞌi teiꞌo e ahiagnia miit piit pyi."
29 Mio tã iꞌatuꞌe katupono Iesui tiꞌatusopo teran mekewat miit piit pyi ahiagnia pote. Saꞌawyꞌi ahiagnia topytyk tuereto mekewat miit ipiit ete hawyi hesoꞌok sese hap tuete topyhuꞌat. Iraniaꞌin ipoꞌi poꞌi teran ahiagnia ipiit piat rakat haity iheg nakat wo ipo ete ipy ete maꞌato ahiagnia tuete hawyi toiterek tuereto haity iheg nakat hawyi ahiag tioto yahig kape."
30 Miꞌi tote Iesui toꞌe — Kat eĩ eset e tope. Miꞌi hawyi — Isem uhet katupono saꞌawyꞌi ahiag koꞌi typyꞌi rakaria tuwehytꞌok uipiit pe pote hawyi miitꞌin uhetꞌok Isem e."
31 Miꞌi hawyi ahiag koꞌi teꞌeroꞌe Iesui pe taꞌatuemiit piit pyi — Uhyt iꞌatuꞌe yt urupoꞌoro teiꞌo aria wato kape wuatꞌi eꞌat piat uruhoꞌopot hamo urutaꞌat taꞌat hamo iꞌatuꞌe."
32 Maꞌato tukupteꞌen itote hamaut koꞌi pote — Pyno meimuẽwat hamaut koꞌi piit pe urutuwehytꞌok teran iꞌatuꞌe Iesui pe. Mio tã iꞌatuꞌe hawyi Iesui — Eiwehytꞌok to hamaut koꞌi pe eiꞌe hap ewy e ahiagnia pe."
33 Miꞌi hawyi tuwenõꞌẽ raꞌyn mekewat miit hesoꞌok rakat piit pyi hamaut koꞌi kapiat tuwehytꞌok hamo. Miꞌi hawyi hamaut koꞌi raꞌyn ikohyeput i kohyeput i yityꞌok totepyi yꞌy wato kape hawyi hewo hewo raꞌyn yꞌy wato pe topap yne raꞌyn."
34 Miꞌi hawyi hamaut apykok haria teꞌeraꞌakasa hawyi meremo tuwat henoi hamo tawa koꞌi kape. Iꞌewyte muꞌap upiat gupteꞌen haria pe taꞌatuhenoi — Tapap taꞌyn yne aihũ hamaut koꞌi iꞌatuꞌe yꞌy wato pe uhytꞌiꞌin manaꞌin iꞌatuꞌe yne miitꞌin me. Mekewat ahiag koꞌi ipiit piat rakat waku raꞌyn iꞌatuꞌe."
35 Pyno iꞌatuepiat henoi hawyi tõꞌẽ kahato Iesui kape. Putꞌokꞌiꞌatuꞌe turan mekewat saꞌawyꞌiwuat ahiag ipiit piat rakat waku raꞌyn taꞌatupuẽti. Sokpe pe raꞌyn toĩneꞌen Iesui yatype. Teꞌeraꞌakasa hawyi õꞌẽ haria teꞌeruwanẽtup kahato."
36 Miꞌi hawyi saꞌawyꞌiwuat akasa haria henoi yne aikotã aikotã Iesui timoehãite hap etiat õꞌẽ haria pe."
37 Miꞌi tupono mekewat tawa Katarenu kaipywiaria gytꞌiꞌatuꞌe Iesui pupi hawyi — Mehĩ ereto ro meiũpepyi iꞌatuꞌe Iesui pe. Yt uruikyꞌesat i meiũpe ereĩneꞌen poꞌog iꞌatuꞌe. Miꞌi pote Iesui teke i raꞌyn yara pe hawyi taꞌaipok yꞌy wato sakpo."
38 Teke turan saꞌawyꞌiwuat ahiag ipiit piat rakat — Uikaꞌiwat areto teran eupi katupono areĩneꞌen epotmuꞌe wato wo teran e Iesui pe."
39 Maꞌato Iesui — Yt uhyt waku poꞌog eraꞌaipok eꞌyat kape tawa koꞌi kape ipuo mono eremoherep aikotã Tupana emoehãite hap ehenoi ewyriaꞌin me hamo e. Miꞌi hawyi Iesui henoi hawyi toto raꞌyn wuatꞌi ipiat henoi hamo tetawa piaria pe toto. Miꞌi tote yne tawa piaria pe aikotã Iesui tunug tetiat hap tohenoi kahato.
"40 Miꞌi hawyi Iesui tokosap i raꞌyn ysakpo. Miꞌi tote miitꞌin typyꞌi rakaria toiꞌatupuẽti putꞌoktoꞌe turan. Iꞌatuwepit kahato katupono taꞌatuhekatup Iesui ut hap."
41 Miꞌi turan tut Iesui ewawi wẽtup ok Tupana mõtypot yat piaria akag Iairu e hap het rakat. Miꞌi hawyi Iesui owa kape tuwepỹꞌãtutuk hawyi tuwewahik yi kape hawyi toꞌe Iesui pe — Mehĩ eriot ro uhupi uiꞌyat kape e."
42 — Mehĩ e uhakiꞌyt makuptia rakat 12 anu rakat ikuꞌuro teran moityꞌi raꞌyn e. Mio tã e hawyi Iesui — Toꞌiro pyno Iairu pe. Iesui toto turan yne itotiaria miitꞌin sem tuwat hupi. Miitꞌin tohik kahato tuwat kahato hupi pote."
43 Toĩneꞌen iꞌatutok pe wẽtup ok haryporia huu wato rakat 12 anu raꞌyn tohoꞌopot. Toipun yne raꞌyn tekat koꞌi paini koꞌi upi mohag nug haria koꞌi upi tomoehãite hap kyꞌewi wen maꞌato yt toipuẽti hin i tehãite hap."
44 Miꞌi ti putꞌokꞌe Iesui ape kai hesokpe emig neran haype. Miꞌi hawyi totemig hesokpe hawyi meremo huu iponik taꞌyn ihãite raꞌyn."
45 Miꞌi hawyi tesokpe emig hawyi Iesui apoꞌe — Uwe keĩ uhemig hat meikope e. Maꞌato õꞌẽ haria — Yt uruto i iꞌatuꞌe torania. Miꞌi hawyi Peteru toꞌe Iesui pe — Uikaꞌiwat miitꞌin typyꞌi rakaria toꞌoran me meiũ watukupteꞌen e. Iꞌatu kahato emig emig haria mesuwe e. Kat poteĩ — Uweĩ uhemig hat meikope ereꞌe e."
46 Maꞌato Iesui toꞌe — Peteru e uhemig hat sese uimohey kahato hat toĩneꞌen meikope atikuap taꞌyn. Uhesaika hap tuwẽtem uhemig hap kape uipiit pyi hap ete e. Miꞌi uimimoehãite topyhuꞌat atikuap e."
47 Toikuap taꞌyn hawyi hemig hat tyrytoꞌe popuo tut howawi. Miꞌi hawyi tuwepỹꞌãtutuk Iesui ewawi. Mio tã e — Mimi mesup taꞌyn migꞌi wo woromig uimoehãite hap kyꞌewi e. Woromig hawyi meremo epiat uimoehãite hap atipuẽti e Iesui pe wuatꞌi ehamo. Miꞌi hawyi itotiaria Iesui upiaria ikuap taꞌyn huu wato rakat tomoehãite raꞌyn hap."
48 Miꞌi hawyi Iesui toꞌe tomimoehãite hat pe — Uhakiꞌyt pyno waku raꞌyn en e. Uimohey hap kaipyi emoehãite hap topyhuꞌat koitywy etipuẽti raꞌyn e. Waku pyno eraꞌaipok i raꞌyn eꞌyat kape ewepit hap wywo e."
49 Miꞌi turan Iesui piat henoi imoehãite hap turan putꞌokꞌe wẽtup ok Iairu yat kaipyi. Miꞌi toꞌe Iairu piat henoi hamo. — Uhyt e ikuꞌuro sese raꞌyn wyti esakiꞌyt e. Pyno yt kan hamo i wahenoi poꞌog Aimuꞌe hat Iesui pe e."
50 Katupono yt kat i aikuꞌuro hawyi aheĩneꞌen i hap e Iairu yat kaipywiat sut hat. Miꞌi hap Iesui tikuap hawyi toꞌe Iairu pe — Yt gytꞌere teiꞌo esakiꞌyt ikuꞌuro hap pupi maꞌato etimohey yn naꞌyn Tupana hawyi waku pe esakiꞌyt e."
51 Miꞌi hawyi Iesui putꞌokꞌe Iairu yat ete hawyi Iesui toꞌe miitꞌin sem me — Yt atikyꞌesat i miitꞌin typyꞌi poityꞌi ikuꞌuro rakat yatype e. Waku Peteru Iuwãu Tiaku iꞌewyte iꞌywot ity yn atikyꞌesat ikuꞌuro yatype e."
52 Teke hawyi toipuẽti itote miitꞌin wak haria hakiꞌyt ikuꞌuro pote teꞌeruwak taꞌatueko ewy saꞌup ete. Miꞌiria pe Iesui toꞌe — Yt eweiwak teiꞌo e eipoꞌinik to e. Yt ikuꞌuro i rat e. Toket neꞌi wyti e."
53 Miꞌi pote wak haria toꞌokyryꞌi neꞌi Iesui ehay ete — Pywo ti rat ikuꞌuro sese hakiꞌyt iꞌatuꞌe. Eraꞌakasa ro iꞌatuꞌe Iesui pe."
54 Iesui teke raꞌyn ikuꞌuro rakat kape iwywuat pe hawyi toipopytyk taꞌyn hawyi tuwẽpowat — Ereꞌãpeꞌokꞌam no pĩꞌã makuptia e."
55 Miꞌi hawyi tuwẽpowat hakiꞌyt yt ipyhu i raꞌyn nakat. Miꞌi hawyi tuwẽtem guꞌuro pyi hawyi tuweꞌãpeꞌokꞌam i raꞌyn. Miꞌi hawyi Iesui toꞌe ity pe — Mana etopoi ro emẽpyt e."
56 Iꞌywotꞌin teꞌeruwehum kahato Iesui ete maꞌato miꞌi hawyi Iesui toꞌe — Yt ewehenoi teiꞌo aikotã uiminug esakiꞌyt etiat koꞌi iraniaꞌin me aikotã atomoieĩneꞌen esakiꞌyt atiõtem guꞌuro pyi hap koꞌi e.
"1 Iesui tuwẽtem Iairu yat pyi hawyi toiꞌatukaykay tuwewawi temiitꞌin sese 12 ok takaria. Miꞌi hawyi toꞌe temiitꞌin sese pe — Uiwyriaꞌin Mesup atum naꞌyn ehepe uhesaika hap ahiag sopo hamuat e. Iꞌewyte atum naꞌyn ehepe uhesaika hap iꞌahu rakaria moehãite hamuat katupono mesup worohoꞌopoꞌoro teran wuatꞌi tawa koꞌi puat wuatꞌi miitꞌin muꞌe uhehay wakuat nuat e."
2 Miꞌi hawyi toiꞌatupoꞌoro temiitꞌin miitꞌin muꞌe hamo aikotã waku miitꞌin tunug Tupana Taꞌatupotypot Koro wo mesuwat yi tote hap enoi hamo. Iꞌewyte iꞌahu rakaria moehãite hamo toiꞌatupoꞌoro."
3 — Uipotpoꞌoro koꞌi eipe e. Uhehay moherep hanuaria e. Miꞌi pote atikyꞌesat eweiꞌatumuꞌe miitꞌin uimikyꞌesat ewy e. Pyno worohoꞌomuꞌe aikotã atikyꞌesat eweiwat hap owakai te e. Yt kat i teiꞌo eweitioto ehekat koꞌi e. Eipoꞌyha ti seroꞌok ehat pupiat wyti aru yt ewetioto i e. Yt ehekuriwu i wyti yt eimiꞌu koꞌi i wyti i yt ehetineiru i wyti yt typy ehesokpe i wyti ewetioto teiꞌo e."
4 Putꞌokꞌeweiꞌe wẽtup tawa pe hawyi eikyꞌesat hat wẽtup ok toꞌyat pe pote eweikupteꞌen o itote e. Waku wẽtup yat pe yn eweikupteꞌen eimimuꞌeria etawa pe e. Yt eikohyewyry kohyewyry teiꞌo iraniaꞌin yat koꞌi upi miꞌu kat hamo eimimuꞌeria etawa ok tã e. Waku wẽtup ok eꞌyat pe — Ereĩneꞌen mesuwe mehĩ e haria eꞌyat pe yn o eweiket eipoi hap ok tã are e. Wẽtup getap we yn eweikupteꞌen uhehay sytpok hamuat eweiwat eimimuꞌeria etawa pe turan e."
5 Maꞌato mekewat tawa piaria yt uwe i iꞌatuwese pote eweiwat i raꞌyn o iꞌatuetawa pyi e. Maꞌato eiwat hap owakai te o tawa sawiu eipy etiat eiweipitpitꞌok kahato — Tupana ehay pun haria eipe hap enoi iꞌatuepiat hamo e Iesui topotpoꞌororia 12 ok takaria pe."
6 Miꞌi hawyi tohenoi yne aikotã waku miitꞌin muꞌe hawyi tuwat raꞌyn Iesui eꞌyianme yne tawa koꞌi upi. Miꞌi hawyi taꞌatuhenoi wuatꞌi tawa pe sehay wakuat Iesui etiat hawyi iꞌahu rakaria tawa piaria taꞌatumoehãite kahato.
"7 Miꞌi hawyi tama Karireia piat morekuat Eroti tikuap taꞌyn aikotã Iesui minug koꞌi etiat hawyi tuwanẽtup kahato — Atikuap som uwe sese Iesui pãi e. Atikuap ti mekewat uimiꞌauka Iuwãu woꞌosetꞌok hat raꞌyn tuwehymut i e tuwepe Iesui pe."
8 Taꞌi Iesui wyti Iuwãu uimiꞌauka tuwehymut i raꞌyn guꞌuro pyi sio tuwehymut guꞌuro pyi mekewat saꞌawyꞌiwuat Tupana ehay moherep hat Eria sio yt e tuwanẽtup Iesui etiat sio yt miꞌi miit i sio wẽtup ok Tupana ehay moherep hat tuwehymut i raꞌyn e morekuat Eroti topyꞌa pe Iesui etiat. Miꞌi pote morekuat Eroti tuwanẽtup kowoꞌi kowoꞌi."
9 — Pyno uiꞌakagꞌaia Iuwãu pãi e. Tuwẽtem guꞌuro pyi e maꞌato Miꞌi Iesui e hap het rakat uwe sese yt atikuap i pote e. Iraniaꞌin mienoi uhepiat pywo sio yt atikuap i e. Uwe kahato som atikuap teran mesup e. Miꞌi hawyi morekuat Eroti tehaꞌat teran kahato Iesui ewawi. Toikyꞌesat kahato Iesui kapiat taꞌakasa hap. Toikyꞌesat taꞌakasa Iesui minug yt miitꞌin eminug kuap i iwato rakat haype.
"10 Miꞌi hawyi Iesui potpoꞌororia teꞌeraꞌaipok i raꞌyn tawa koꞌi kaipyi ihay moherep haria. Miꞌi hawyi taꞌatuhenoi aikotã aikotã ipuꞌap muat upi taꞌatuminug hap koꞌi taꞌatuewyry hap upi taꞌatuhenoi henoi yne yne Iesui pe.
Taꞌatuhenoi yne raꞌyn hawyi Iesui teꞌerepoꞌok i raꞌyn temiitꞌin wẽtup tawa kape tawa Pesaita kape taꞌatuweran temiitꞌin nywo hap toikyꞌesat."11 Maꞌato miitꞌin typyꞌi rakaria tikuap hawyi aikope Iesui toto hap kape tuwat hewatꞌymo. Iesui tikyꞌesat kahato tuweran pytkai iwese kahato toĩneꞌen õꞌẽ haria ete. — Waku uhytꞌiꞌin manaꞌin e õꞌẽ haria pe. Eiwehytꞌok to e iꞌatuepe. Miꞌi hawyi miꞌiria toiꞌatumuꞌe kahato aikotã waku watunug Tupana Aiporekuat no hap ete. Iꞌewyte iꞌahu rakaria toiꞌatumoehãite kahato itote."
12 Miꞌi hawyi porap wãtym i kape hemiitꞌin 12 ok takaria teꞌeroꞌe Iesui pe — Urumuꞌe hat etiꞌatupoꞌoro i ro miitꞌin sem tawa koꞌi upi getap koꞌi kape miꞌu kyiꞌat hamo iꞌatuket hamo katupono yahig wato pe watukupteꞌen mesuwe neꞌi pote yt kat i getap iꞌatuꞌe Iesui pe."
13 Mio tã iꞌatuꞌe hawyi Iesui toꞌe — Eweiꞌatupoi ro hesyꞌat rakaria mio e ti temiitꞌin me. Miꞌi hawyi — Mehĩ kurin kahato aimiꞌu mesuwe iꞌatuꞌe. Taꞌi aimiꞌu 5 man typy pira yn wuatꞌi poi hamo iꞌatuꞌe. Sio apo etikyꞌesat urutuwat tawa kape miꞌu kyiꞌat poꞌog iwato hamo typyꞌi rakaria moenuk hamo iꞌatuꞌe."
14 Tukupteꞌen itote miitꞌin sem kahato aikotã 5000 ihainiaꞌin iꞌewyte haryporiaꞌin hirakariaꞌin tukupteꞌen itote hesyꞌat rakaria maꞌato yt taꞌatumorania yne i. Miꞌi hawyi Iesui toꞌe raꞌyn — Pyno eweiꞌapyk to yi upi kowo 50 kowo 50 eweiꞌe ro waꞌatunug haria pe e Iesui temiitꞌin me."
15 Miꞌi hawyi taꞌatunug naꞌyn iꞌe hap ewy hawyi apyk puo tukupteꞌen."
16 Miꞌi hawyi Iesui tat raꞌyn man a hit rakat typy pira hawyi tehaꞌat atipy kape — Waku kahato emiium uruepiat urumiꞌu wuat Tupana e. Waku toꞌe Tupana pe hawyi tutum naꞌyn mekewat man 5 a hit typy pira temiitꞌin me itotiaria moenuk hamo."
17 Miꞌi hawyi tuwemowato kahato itotiaria erenuk hap. Miꞌi hawyi iꞌatuꞌok taꞌyn hawyi miꞌu ieĩpyt 12 yrysakag me topyhuꞌat. Wẽ sakpo iꞌatumiꞌu ieĩpyt topyhuꞌat re.
"18 Wẽtup eꞌat hawyi meiũran Iesui tuweran toĩneꞌen temiitꞌin nywo Tupana kapiat tehay hamo. Miꞌi hawyi apoꞌe temiitꞌin me — Uwe som uito iraniaꞌin wanẽtup hawe e."
19 Miꞌi hawyi taꞌatuwesat — En ni woꞌosetꞌok hat Iuwãu tuwẽtem guꞌuro pywiat hat iꞌatuꞌe iraniaꞌin epiat pe Uhyt iꞌatuꞌe. En ni erẽtem saꞌawyꞌiwuat Tupana ehay moherep hat Eria e hap iꞌatuꞌe iraniaꞌin epiat pe Uhyt iꞌatuꞌe. Yt Eria i pote wẽtup ok saꞌawyꞌitewuat Tupana ehay enoi hat tuwehymut i raꞌyn guꞌuro pyi iꞌatuꞌe iraniaꞌin etiat Uhyt iꞌatuꞌe."
20 Miꞌi hawyi apoꞌe i raꞌyn temiitꞌin me — Maꞌato ehepe apo uwe Uito eiwanẽtup hawe e. Uwe sese som Uito ehepe e temiitꞌin me. Miꞌi hawyi Peteru tiwesat — En ni Tupana Mipoꞌoro Uruehakyeraꞌat hanuat rat Mehĩ e. En ni Wuatꞌi Miitꞌin Porekuat Hanuat Uhyt e Iesui pe.
"21 Mio tã e hawyi Iesui tiꞌatunãpin haty wo temiitꞌin — Pyno uiwyriaꞌin e uikuap ehepiat hap yt ewehenoi teiꞌo iraniaꞌin me e temiitꞌin me."
22 Yt ewehenoi teiꞌo iraniaꞌin me Peteru toꞌe uhepiat hap ewy katupono uhehay pun hanuaria iraniaꞌin tukupteꞌen mote e. Pywo ti aru ahoꞌopot kahato aru e. Uito ti Wuatꞌi Miitꞌin Ykeꞌet iꞌewyte Wuatꞌi Miitꞌin Kywyt pytkai yt uimohey hin i e. Pywo ti rat ahoꞌopot hap putꞌokꞌe irane e. Yt uikyꞌe hin i mesuwarotiaria nagnia iꞌewyte paꞌi watoria yt uikyꞌesat hin i taꞌatuporekuat no hap e taꞌatuehakyeraꞌat hap e. Iꞌewyte Tupana ehay miwan etiat henoi haria yt uikyꞌesat hin i e. Uiꞌauka teran haype Uito Taꞌatueykeꞌet Taꞌatukywyt pytkai e. Uikuꞌuro maꞌato miꞌi hawyi ti aru araꞌaipok i raꞌyn guꞌuro pyi hawyi areĩneꞌen ne e. Pywo myeꞌym eꞌat uisyp uikuꞌuro hawe areĩneꞌen hawyi e Iesui tuwetiat tohenoi temiitꞌin 12 ok takaria pe.
"23 Miꞌi hawyi iraniaꞌin itotiaria kape Iesui henoi — Eweiwat teran uhupi uipotmuꞌeria wo pote eweitoiat ro yne eimikyꞌesat koꞌi yt uimikyꞌesat i ewywuat koꞌi e. Miꞌi hawyi haty wo o — Atunug neran Tupana mikyꞌesat ewywuat eiꞌe hap wywo eweiwat ro uhupi e. Taꞌi ehoꞌopot hap eweipuẽti irane eweiwat uhupi hawyi e. Yt eimikyꞌesat ewy i ewetunug maꞌato Tupana minug neran hap ewywuat wywo o eweiwat e. Iꞌewyte iraniaꞌin yt eikyꞌesat i haria iꞌatupyꞌahak hamuat ehete e. Ehatyꞌi hatyꞌi aru uhupiat eweiwat hawyi e. Uiꞌauka irane ariaꞌyp posak ete e. Pyno waku eipe uiꞌewy eweikupteꞌen e. — Uiꞌauka pote uiꞌauka maꞌato yt atoiat hin i Uikaꞌiwat mohey hap eweiꞌe o eweikupteꞌen neran uipotmuꞌeria wo pote e. Waku aheꞌariaꞌyp posak etiat ewywuat raꞌyn wywo ahoꞌopot hap upi aikuꞌuro hap kape watuwat wẽtup sok yn aito hawyi e. Uhemiit sese yt uiꞌatoiat i miitꞌin pupi e Iesui."
24 Uwe uwe ikuꞌuro uipotpap we uhehay wakuat enoi hamo miꞌiria wyti aru taꞌatuieĩneꞌen hap sese puẽti wuatꞌi eꞌat pe mesuwe iꞌewyte atipy pe e. Maꞌato iraniaꞌin taꞌatuieĩneꞌen hap mesuwarotiat kape yn wanẽtup haria taꞌatuieĩneꞌen hap sese pun haria howasat rakaria teꞌeropyhuꞌat e."
25 Pyno torania mesuwarotiat kareꞌen eipo pe hawyi hekat rakaria eipe mesuwe maꞌato miꞌi pytkai yt kat i haꞌup eweipuẽti eheĩneꞌen sese wuatꞌi eꞌat piat saꞌup mo e. Miꞌi hap yt kat i topyhuꞌat eipo pe katupono eweipun naꞌyn eheĩneꞌen sese mesuwuat uimikyꞌesat nug hap hawyi eimikyꞌesat nug hap mesuwe yn ewetunug pote e."
26 Uwe uwe mesuwarotiaria uipupi tuwemõti uhehay pupi tuwemõti miꞌi hawyi iꞌewyte Uito aremõti wy miꞌi haria pupi e. Taꞌi mekewat eꞌat aru karãpeĩ Uito Eheykeꞌet Eikywyt ariot atipy kaipyi uhẽtyhot hap puo Uiꞌywot esaika hap puo hap eꞌat miꞌiria pupi aremõti e. Taꞌi mekewat ikahu sese hawuo ariot atipy piaria wywo uhesaika kahato hap wywo e. Miꞌi hap eꞌat pe turan aremõti aru wemõti uipupiat haria pupi e.
"27 Yt eweiwaure teiꞌo mio wuat uiꞌe hap e. Pywo ti rat tukupteꞌen meiũpe Tupana topyhuꞌat Morekuat nuat hap kapiat akasa haria e. Aikotã Tupana topyhuꞌat Morekuat hap kape teꞌeraꞌakasa irane taꞌatukuꞌuro hap owakai e Iesui itotiaria pe temiitꞌin Peteru Iuwãu Tiaku piat pe mio tã e."
28 Miꞌi hawyi 7 eꞌat hawyi Iesui tioto raꞌyn topotmuꞌeria sese Peteru Iuwãu Tiaku tuwewywo yityꞌok kape. Miꞌi tote ihay Toꞌywot Tupana wywo."
29 Miꞌi turan Iesui owa yt saꞌawyꞌiwuat ewy hin i hẽtyhot kahato iꞌewyte hesokpe imehit kahato ikytsig kahato."
30 Miꞌi hawyi meremo teꞌeruwemoherep iwywo typy ok saꞌawyꞌiwuat Tupana ehay moherep haria atipy kaipyi. Wẽtup ok aseꞌi Musei wẽtup ok aseꞌi Eria."
31 Miꞌiria atipy piat hẽtyhot hap ewywuat puo teꞌeruwemoherep. Miꞌi hawyi Musei Eria iꞌatuehay kahato Iesui wywo aikotã Iesui tunug irane Tupana mikyꞌesat etiat aikotã ikuꞌuro irane Tawa Ierusarẽi me hap. Ikuꞌuro hap aikawiano hap ete e hap ete iꞌatuehay."
32 Miꞌi turan Peteru Iuwãu Tiaku teꞌeroket kahato itote maꞌato teꞌeruwehymut hawyi teꞌeraꞌakasa raꞌyn Iesui ẽtyhot hap. Iꞌewyte iꞌyatypiaria saꞌawyꞌiwuaria Tupana ehay moherep haria aseꞌi Musei aseꞌi Eria teꞌeraꞌakasa raꞌyn."
33 Miꞌi hawyi Musei Eria Iesui yatypepyi tuwat turan Peteru toꞌe Iesui pe — Waku meiũpe watopyhuꞌat wuatꞌi eꞌat pe Mehĩ e. Pyno waku urutunug mesuwe wẽtup yat aseꞌi Musei mõtypot hamo wẽtup yat aseꞌi Eria mõtypot hamo hawyi wẽtup yat emõtypot hamo urutunug mesuwat yityꞌok tote e Peteru Iesui pe maꞌato yt tepiat yt ikuap i popuo mio tã toꞌe katupono tokenꞌẽ haype."
34 Mio tã e turan ywyhig putꞌokꞌe Peteru Iuwãu Tiaku ete. Miꞌi hawyi teꞌerokenꞌẽ kahato."
35 Miꞌi hawyi Tupana ehay taꞌatukuap taꞌyn ywyhig kaipyi — Mekepe eipyꞌasetpe ti Wẽtup ok Miit toĩneꞌen. Miꞌi ti Uhaꞌyru Uimiꞌairo Wuatꞌi Miitꞌin Ehakyeraꞌat hanuat e. Pyno eiwanẽtup to Uhaꞌyru mienoi kape e Iesui piat pe Iꞌywot Tupana ehay putꞌokꞌe atipy kaipyi."
36 Mio tã e hawyi Iesui tuweran toĩneꞌen Musei Eria teꞌeraꞌaipok atipy kape hawyi. Miꞌi hawyi Peteru Tiaku Iuwãu yt henoi hin i iraniaꞌin me taꞌatuꞌakasa hap koꞌi maꞌato meiũran taꞌatuhenoi raꞌyn taꞌatumikuap koꞌi Iesui tehymut raꞌyn guꞌuro pywiat hawyi.
"37 Eꞌihotꞌok pe hawyi Iesui topotmuꞌeria wywo ipotꞌapyk yityꞌok kaipyi yi hot kape. Miꞌi turan putꞌokꞌiꞌatuꞌe typyꞌi rakaria Iesui ete."
38 Miꞌi hawyi wẽtup ok miitꞌin tok piat tikaykay raꞌyn Iesui — Urumuꞌe hat erahaꞌat ro uhaꞌyru wẽtup yn nakat kape e."
39 Maꞌato ahiag teke uhaꞌyru piit pe hawyi tehay pirik wo ihay saꞌag hawyi ahiag tihuruk kahato uhaꞌyru Uhyt e. Yt naku i kahato tuete hawyi iwẽnãpuk saꞌag kahato uimẽpyt e. Miꞌi hawyi tohatyꞌi hatyꞌi hawyi iperup kahato toĩneꞌen motꞌi tuete hawyi tuwẽtem porap i tuereto uimẽpyt piit pyi e. Miꞌi hawyi meremo teke i raꞌyn ipiit pe tuereto iꞌahyk ahyk hamo e."
40 Emiitꞌin me ahiag hep hap ahẽtup wen maꞌato yt taꞌatuhep kuap i e Iesui pe."
41 Miꞌi hawyi Iesui toꞌe itotiaria pe — Are pãi eipe ti yt Tupana mohey hin i haria iꞌewyte eiwanẽtup hap yt hãpyk hin i Tupana kape e. Areĩneꞌen motꞌi raꞌyn eiwywo eimuꞌe hamo wen maꞌato yt uimohey kahato i e. Miꞌi hawyi toꞌe ahiag ipiit piat rakat eꞌywot pe — Pyno eterut ro esaꞌyru uhowawi e."
42 Miꞌi hawyi kurum tut Iesui ewawi turan ahiag tipun i yi tote hawyi toihuruk huruk kahato iꞌewyte iwẽnãpuk. Maꞌato miꞌi turan Iesui — Wãiꞌe ahiag me hawyi tuwẽtem hawyi ihãite. Waku hawyi Iesui tum haꞌyru iꞌywot pe.
"43 Miꞌi hawyi itotiaria teꞌeruwanẽtup Tupana esaika hap iwato kahato Iesui mimoherep hap kape."
44 Teꞌerewanẽtup turan Iesui minug koꞌi etiat turan Iesui henoi topotmuꞌeria pe — Yt eweiwaure teiꞌo mesuwat uimienoi e. Pywo ti rat Miitꞌin Eheykeꞌet kahato areĩneꞌen pytkai miitꞌin mimaꞌat aru arepyhuꞌat hawyi uiꞌauka teran haria po pe uhenoi."
45 Maꞌato yt taꞌatukuap hin i kat toꞌe hawe mio tã e maꞌato hemiitꞌin apo yt iꞌatuꞌe teran i teꞌerokenꞌẽ haype.
"46 Miꞌi hawyi Iesui potmuꞌeria tuꞌuka toꞌope taꞌatuehay wo uwe kahu poꞌog tuꞌisa wo toĩneꞌen hap ete. Miꞌi hawyi — Uito poꞌog eikai yn iꞌatuꞌe toꞌope."
47 Miꞌi hawyi Iesui tikuap taꞌyn iꞌatuwanẽtup hap hawyi toterut hirakat iꞌatuewawi tuwewywo."
48 Miꞌi hawyi toꞌe temiitꞌin me — Uwe uwe toĩneꞌen neran uhemiitꞌin akag wo waku miꞌi miit topyhuꞌat hirakaria powyro hat wo mẽpytꞌin kyꞌe hat wo poꞌog torania kai e. Uwe uwe tiꞌatukyꞌe kahato hirakaria Uito ewy miꞌi hat poꞌog uhemiit koro toĩneꞌen iraniaꞌin kai Tupana wanẽtup hawe e. Miꞌi pote ewehaꞌat ro meiũwat hirakat kape uwe uwe meiũwat hirakat ewywuat kyꞌe hat iꞌewyte uikyꞌe hat sese e. Meiũwat hirakat ewywuat kyꞌe hat uikyꞌe hat toĩneꞌen miꞌi hawyi miꞌi hat waku eiꞌakag wo e. Pywo ti rat uwe uwe uikyꞌe hat toĩneꞌen miꞌi hat piat Tupana toꞌe — Uikyꞌe kahato hat en e hirakaria kyꞌe hap upi e. Miꞌi hat ti eiꞌakag wo toĩneꞌen Tupana wanẽtup hawe e. Pywo ti rat uwe uwe toꞌe hirakat yt iꞌywot i yt ity i rakat pe — Ereke o uiꞌyat pe uimẽpyt no e hat pe — En poꞌog uhemiit e aru Tupana e Iesui. Meiũwat hirakat ewywuat kyꞌe kahato hat uimiꞌairo eiꞌakag wo toĩneꞌen e. Uwe toꞌe hirakaria pe — Toꞌiro watenuk hit e miꞌi hat iꞌewyte uhepe — Toꞌiro watenuk e hat ewy toĩneꞌen e Iesui. Miꞌi hat uikyꞌe hat iꞌewyte uwe uwe uikyꞌe hat Uiꞌywot Atipy piat kyꞌe hat toĩneꞌen e. Meiũwat hirakat kyꞌe hat ewywuat eipe pote uikyꞌe hat iꞌewyte toĩneꞌen iꞌewyte Uipoꞌoro hat Tupana kyꞌe hano toĩneꞌen e. Uwe hirakat powyro hano toĩneꞌen miꞌi ti poꞌog waku eimuꞌe hat akag e. Taꞌi yt wemowato i hat poꞌog iraniaꞌin kai eiꞌakag wo e Tupana e Iesui ahepe temiitꞌin me.
"49 Miꞌi hawyi Iuwãu toꞌe Iesui pe. — Urukaꞌiwat gaꞌatpo urutaꞌakasa raꞌyn wẽtup ok ahiag koꞌi sopo hat e. Eset wo toiꞌatusopo kahato ahiag wen yt hewyry hin i ahupi hat. Miꞌi pote — Wãiꞌurutoꞌe tope katupono yt karãmuo i uruwywo hewyry rakat i pote e. Taꞌi yt karãpe i mekewat miit etiꞌairo uruehamo emiit no pote — Yt naku i etunug Iesui motpap mesuwe yt uruwywo i ereto pote urutoꞌe tope e. Miꞌi hawyi — Maꞌato uito ti eipe ewywuat kahato katupono uito iꞌewyte Iesui mohey hat areĩneꞌen e uruepe. Miꞌi hawyi — Wãiꞌurutoꞌe i tope katupono toiꞌatusopo kahato ahiag itote ehay wo maꞌato yt hewyry i uruupi urutoꞌe tope iꞌatuꞌe Iesui pe topotpoꞌororia."
50 Maꞌato Iesui tiwesat topotpoꞌoro Iuwãu me iꞌewyte iraniaꞌin topotmuꞌeria pe — Yt naku i wãiꞌeweiꞌe wẽtup uhemiit yt hewyry i eiwywuat rakat pe e katupono ti aru tukupteꞌen kahato uhemiitꞌin yt eimikuap koꞌi i e. Miꞌiria ti aru maꞌato howapy kahato uhesaika hap wywo eiperia ewywuat e. Miꞌiria uimohey kahato haria tukupteꞌen eiperia ewywuat uimohey kahato rakaria yt karãpe i eiwywo hewyry rakaria pytkai e. Miꞌiria ti yt karãpe i uimohit taꞌatuehay wuat haria katupono uhet wywo taꞌatusopo ahiag e. Miꞌi pote ti yt naku i iraniaꞌin uhemiitꞌin me — Wãi neiꞌo eweiꞌe yt eiwywuat hewyry rakaria i pytkai are e. Pyno poꞌog waku — Hẽ to uhyt mana eweiꞌe yne uhemiitꞌin waku nug haria pe e Iesui ahepe.
"51 Iesui aipok hap atipy kapiat hamuat yt pya hin i miꞌi pote Ierusarẽi kape yn toto teran toꞌauka ahekawiano hap kape toto teran."
52 Toto Ierusarẽi kapiat tokosap mo teran tawa Samaria kape. Miꞌi pote saꞌawyꞌi toiꞌatupoꞌoro temiitꞌin teꞌyianme tawa kape taꞌatuket hamuat heiam kat hamo."
53 Maꞌato toto tawa wato Ierusarẽi kapiat tokosap mo. Miꞌi pote tawa Samaria piaria sakpo toto teran. Miꞌi pote toiꞌatupoꞌoro temiitꞌin teꞌyianme tawa Samaria kape iꞌatumiꞌu kat hamo iꞌatuket hap kat hamo. Maꞌato tawa Samaria piaria yt tikyꞌesat i katupono taꞌatukuap taꞌyn taꞌatuewanĩkaptia tawa Ierusarẽi piara kapiat tokosap mo toto Iesui hap. Taꞌi Iuteu ywania Iesui pote yt taꞌatukyꞌesat i Iesui ut hap. Katupono tawa Samaria piaria gupteꞌen haria yt ikyꞌesat hin i Iuteuria koꞌi."
54 Tiaku Iuwãu miꞌi tawa piaria e hap taꞌatukuap hawyi apoꞌiꞌatuꞌe Iesui pe — Urukaꞌiwat waku apo aria uruikaykay atipy kaipyi yt ekyꞌesat i haria tawa Samaria yawnia u hamo iꞌatuꞌe. Pyno waku etiꞌatumoma yne miꞌiria aria atipy kaipywiat wo iꞌatuꞌe Iesui pe."
55 Miꞌi hawyi Iesui tuwemorem wãitoꞌe hamo — Yt rat yt eiweꞌeg hin i e. Yt ariot i wyti miitꞌin auka hamo Uito e. Yt naku i eweikaykay aria atipy kaipyi miit auka hamo e. Miitꞌin ehakyeraꞌat hamo ariot e."
56 Miꞌi hawyi tuwat i raꞌyn wẽtup tawa kape wẽtup muꞌap upi yi Samaria sakpo.
"57 Muꞌap upi putꞌokꞌe Iesui ewawi wẽtup ok tehay hamo — Mehĩ areto teran kahato eupi aikowo aikowo ewyry hap upi e. Uipap eupi emiit no areĩneꞌen neran e. Ehay moherep wuatꞌi ywania piat hamo atikyꞌesat uito e."
58 Miꞌi hawyi Iesui tiwesat — Pyno ereto teran pote waku saꞌawyꞌi eto hap owakai etikuap niatpo kahato ereto uhupi hap e. Yt kat hin i uiꞌyat toĩneꞌen mesuwarotiat e Iesui. Uito Miitꞌin Ykeꞌet areĩneꞌen wen maꞌato yt kat i uhekat uimiꞌu mesuwe e. Ereto teran uhupi pote yi tote yn watoket yt kat i aiꞌyat pote e. Taꞌi mesuwarotiat awahuru koꞌi tukupteꞌen taꞌatukaꞌa puo maꞌato Uito yt kat i uiket hap e. Iꞌewyte weitaria taꞌatusok koꞌi puat teꞌeroket maꞌato Uito Wuatꞌi Miitꞌin Porekuat pytkai areket yahig me muꞌap upi yt kat i uiꞌyat i pote. Yt kat i uhekat mesuwarote areꞌe epe e. Niatpo kahato uhemiit no hap waku miitꞌin tikuap tuwat uhupi teran haria e. Yt naku i eweiwat uhupi hawyi uiꞌatoiat niatpo kahato hap upi are e Iesui ahepe."
59 Miꞌi hawyi Iesui tuwẽpowat wẽtup ok kape — Toꞌiro uhupi mehĩ e. Miꞌi hawyi toiwesat Iesui — U pãi wen maꞌato saꞌawyꞌi waku atipoi uiꞌywot ikuꞌuro hap kape miꞌi hawyi isyp rokirẽ waku meremo areto eupi e."
60 Maꞌato Iesui toꞌe — Etipoꞌoro ikuꞌuro rakaria ikuꞌuro rakat syp hamo uhyt e. Tukupteꞌen ni ikuꞌuro rakaria ewywuaria Tupana kape yt ihay i haria yt kuap i haria waku miꞌiria po pe etoiat saꞌup eꞌywot poi eꞌywot syp hamo uhyt e. Miꞌi hawyi meremo ereto uhupi miitꞌin muꞌe aikotã waku taꞌatunug Tupana taꞌatuporekuat nuat enoi hamo e."
61 Miꞌi hawyi wẽtup ok toꞌe Iesui pe — Taꞌi areto teran eupi pãi Uhyt e maꞌato saꞌawyꞌi ahẽtup teran uiꞌywot uity pe sio waku sio yt hap e."
62 Miꞌi pote Iesui toꞌe — Yt naku i wateput hap upi watehaꞌat at kaꞌap ahewatꞌymo hap kape katupono miꞌi tã watunug pote meremo wataꞌat e. Miꞌi hap ewy kahato uwe uwe toto uhupi uhehay moherep hamo hawyi tewatꞌymo hap kape tehaꞌat kahato hawyi toikyꞌesat tomiꞌatoiat koꞌi hawyi taꞌaipok i raꞌyn saꞌawyꞌiwuat hap kape miꞌi miit yt naku i topyꞌa pe uhemiit no. Miꞌi miit yt naku i uhemiit no Tupana ehay moherep hamo aikotã waku watunug Tupana Aipotypot no e hap moherep hamo e Iesui — Areto teran eupi wen e haria pe.
"1 Wẽtup eꞌat Iesui Aikaꞌiwat tiꞌatuꞌairo poꞌog 70 ok takaria topotmuꞌeria wo. Miꞌiria typy ok tuereto toiꞌatupoꞌoro aikowo aikowo toto irane hap tawa kape teꞌyianme tawa koꞌi upiat miitꞌin atumuꞌe yian notiat hamo."
2 Toiꞌatuꞌairo topotpoꞌororia hawyi toiꞌatunãpin iꞌatuwat hap eyianmete aitotã waku taꞌatunug ipuo hap ete mio tã e — Worohoꞌoꞌairo eipe miitꞌin sem atumuꞌe hanuaria wo e. Miitꞌin haat rakaria ewywuaria Tupana wanuat nug hamuat e. Aikotã awati ewy kahato miꞌiria tukupteꞌen waku pe hamo e. Waku eweipuruk aimiꞌu wo e katupono awati sem ewywuat itote miitꞌin sem e. Yt eweipuruk kuap i hap ewy iꞌatu kahato awati ewy e. miꞌi pote waku eiperia typyꞌi kahato ipuruk hamo e. Waku ewehẽtup ipuruk hamo Mikoi Kaꞌiwat Tupana pe — Etipoꞌoro o meremo urupowyro hanuaria haat koꞌi puruk hamuat eweiꞌe Ipuruk Hat Kaꞌiwat pe e. Waku wahẽtup Tupana pe aipowyro hap are. Miꞌi hawyi temiit 70 ok takaria toiꞌatupoꞌoro tehay moherep hamo."
3 — Pyno eweiwat ro e maꞌato eiweꞌeg wo o eimimuꞌeria pupi are katupono iraniaꞌin itote aiꞌauka teran haype neꞌi e. Taꞌi worohoꞌopoꞌoro ehewanĩkaptia pyꞌasetpiat eikupteꞌen hamo aikotã aihũria tukupteꞌen awahuru sem pyꞌasetpe hap ewy aru eweikupteꞌen itote aikotã awyato aiꞌu teran haria ewywuaria itote tukupteꞌen uhetiat eweiꞌatumuꞌe turan e topotpoꞌororia 70 ok takaria pe."
4 Eiwat hap upi yt eweitioto teiꞌo ehekat koꞌi iꞌewyte mekewat saꞌup eiam me yt kat i saꞌup eweitioto o e. Iꞌewyte ehesokpe eiam yt eweitioto teiꞌo e. Wẽtup yn eipy piat eipy sokpe miꞌi waku eretopag e. Miꞌi hawyi yt eweikupteꞌen motꞌi i muꞌap upi iraniaꞌin wehay mikyryꞌi hamo e. Maꞌato eweiwat ro hãpyk mekewat tawa koꞌi kape eipoꞌoro hap koꞌi nug hamo iꞌatumuꞌe hamo are ehepe e Iesui."
5 Kat etawa kat etawa pe putꞌokꞌeweiꞌe hawyi o wẽtup getap we yn eiwehytꞌok hawyi waku ewehẽtup Tupana pe — Etiꞌatuehakyeraꞌat kahato ro meiũwat getap wiaria hawyi etiꞌatumoehãite yne miitꞌin meiũwat getap wiaria o eweiꞌe itote e."
6 Miꞌi hawyi getap wiaria eimienoi koꞌi Tupana mipoityro koꞌi tukupteꞌen eiꞌe hap ewy e. Taꞌatukuap teran ehay pote meremo taꞌatukuap e. Iꞌatuwese ehete pote eiꞌe hap — Tupana etiꞌatuehakyeraꞌat meiũwat yat piaria o eiꞌe hap saꞌawyꞌi eimiẽtup ewy Tupana tunug naꞌyn eiꞌe hap ewy wen maꞌato mekewat yat piaria yt iꞌatuwese i uhehay kuap hamo pote hawyi wuꞌuka teran haype pote eimiẽtup — Tupana etiꞌatupoityro meiũwat yat piaria eiꞌe hap Tupana yt tum i taꞌatumowepit hap eimiẽtup saꞌawyꞌiwuat ewy e."
7 — Miꞌi hawyi wẽtup getap we yn eweikupteꞌen eikyꞌesat haria piat pe e. Eiwehytꞌok hawyi itote yn o eweikupteꞌen e. Kat som taꞌatuium ehepe eimiꞌu wo miꞌi ti waku ewetuꞌu e. Yt eweiwemõti teiꞌo iꞌatumium ete yt kat saꞌup i katupono eipe ti iꞌatumuꞌe haria pote eipoi eipotpap saꞌup mo e. Maꞌato yt naku i ehehamaneꞌi yne getap koꞌi upi sẽtup sẽtup eharia ewy e. Saꞌawyꞌiwuat eiwehytꞌok hawe yn eweikupteꞌen hawyi itote yn eweinuk e."
8 Tawa piaria waku kahato eweipuẽti e haria pote ehuꞌu ro kat koꞌi kat koꞌi taꞌatumierut eimiꞌu wuat."
9 Miꞌi tote yne iꞌahu rakaria waku eweimoehãite e. Waku kotã eweiꞌe itotiaria pe — Tupana topyhuꞌat meiũ Porekuat no hap yt pya hin i eikai eweiꞌe iwese etawa piaria pe."
10 Maꞌato tawa piaria yt iꞌatuwese i ehete pote waku eiwenõꞌẽ iꞌatuetawa pyi hawyi muꞌap upi itote pyi eiwepitpitꞌok iꞌatuetawa sawiu eipy etiat hep hamo hawyi eweiꞌe wuatꞌi tawa piaria ehamo — Pyno mehĩꞌin manaꞌin Tupana ehay pun haria eipe eweiꞌe iꞌatuepe e. Pyno yt uruikyꞌesat i raꞌyn ehetawa sawiu urupy ete eweiꞌe o iꞌatuewawi. Tupana ehay pun haria raꞌyn eipe eweiꞌe itotiaria pe e. Miꞌi hap ewetunug hawyi meiũwat tawa piaria tikuap taꞌyn uimohey hap pun haria neꞌi miꞌiria iꞌewyte Tupana tikuap taꞌyn uimohey hap pun haria hap e Iesui topotpoꞌororia pe 70 ok takaria pe."
11 Mio tã waku eweiꞌe itote — Pyno urumienoi Tupana Mipoꞌoro Ahehakyeraꞌat hat etiat sehay yt eweikyꞌesat i hawyi ehetawa sawiu urupy etiat yt uruikyꞌesat i hawyi uruipitpitꞌok eweiꞌe o e. Miꞌi tã urutunug eiꞌapiheg irane hap enoi hamuat hap eweiꞌe o e. Koitywy Tupana tiꞌatuꞌapiheg aru yt eweikyꞌesat i urumienoi pote eweiꞌe o e. Tupana topyhuꞌat Miitꞌin Porekuat nuat hap yt pya hin i eikai toĩneꞌen maꞌato yt eweikyꞌesat i pote eiꞌapiheg hap yn topyhuꞌat irane eweiꞌe o yt uikyꞌesat i haria pe e.
"12 Miꞌi hawyi Iesui toꞌe wuatꞌi tawa koꞌi puaria towanĩnkaptia pe yt tomohey i haria pe — Arewak uipyꞌa pe eiꞌapiheg hap ete e. Pywo ti rat areꞌe ehepe Tupana miꞌapiheg koꞌi eweikupteꞌen aru e. Karãpe putꞌokꞌe aru mekewat uheꞌat hawyi areꞌe Tupana pe uwe waku rakaria uwe yt naku i rakaria hap eꞌat pe ti aru ahenoi Tupana pe mio tã — Eipe ti uipotpoꞌororia yt kyꞌesat i haria pote yt naku i pe eweikupteꞌen poꞌog saꞌawyꞌitewuat tawa Sutuma piaria kai saꞌawyꞌiwuat uimiwuk kai areꞌe. Miꞌiria yt naku i kahato rakaria atiꞌatumoma raꞌyn aria wo atipy kaipywiat no maꞌato eipe poꞌog yt naku i wo eweipyhuꞌat tawa Sutuma piaria kai uhehay enoi haria yt eweikyꞌesat i pote are aru ehehay uhetiat pun haria pe e Iesui topotmuꞌeria pe."
13 Miꞌi hawyi poꞌog tohenoi tawa koꞌi puaria yt tomohey haria i etiat — Ahenoi wyti Iuteuria kaipywiaria tawa Kurasĩ miaria gupteꞌen haria iꞌewyte tawa Pesaita piaria apiheg hap etiat e. Yt naku i pe teꞌeropyhuꞌat irane e. Arewak uipyꞌa pe eiꞌapiheg hap ete e. Teꞌeraꞌakasa uiminug wakuap koꞌi kape yt iraniaꞌin ewywuat i maꞌato miꞌi pytkai yt uimohey teran hin i. Uito iwato kahato rakat hap upi iꞌatuehamuat atunug kahato pytkai yt miit minug ewywuat i atunug maꞌato uimohit neꞌi e Iesui."
14 Nimo kahato tawa Tiru piaria tawa Sĩtau piaria Tupana tiꞌatumoma e. Tawa Sĩtau piaria tawa Tiru piaria topap yne itote e miwan me e. Miꞌiria yt naku i sese rakaria tukupteꞌen hap watikuap. Pywo raꞌyn iꞌatuminug saꞌag koꞌi poꞌog iwato toĩneꞌen wuatꞌi saꞌawyꞌiwuaria kai wen maꞌato uimohey pun hap mesuwarotiaria tawa Kurasĩ piaria tawa Pesaita piaria poꞌog yt naku i nug haria Tawa Sĩtau tawa Tiru piaria yt naku i nug hap kai katupono uimohey hap pun haria miꞌiria pote e. Taꞌi atiꞌatumuꞌe kahato miꞌiria Tupana ehay wakuat wo maꞌato yt uimohey i haria hap yn topyhuꞌat yt kat i uimohey hap e. Are pãi arewak uipyꞌa pe eiꞌapiheg hap Tupana piat hap aru hap pupi. Yt naku i kahato hawuo topyhuꞌat aru tawa Kurasĩ tawa Pesaita piaria e. Saꞌawyꞌi tawa Sĩtau piaria tawa Tiru piaria yt teꞌeraꞌakasa hin i uiminug wakuat nug hap koꞌi kape maꞌato teꞌeraꞌakasa pote tawa Kurasĩ tawa Pisaita piaria ewy meremo teꞌeruwemorem Tupana kape hap atikuap. Teꞌeraꞌakasa hawyi meremo sokpe iꞌanam nakat ewywuat taꞌatupag taꞌatuepiit ete haty nug hamo paataꞌatuꞌe Tupana kapiat hap moherep hamo are e. Miꞌi hawyi yi tote teꞌeraꞌapyk hawyi ywytup koꞌi taꞌatuꞌakag me taꞌatupag taꞌatueko ewy taꞌatuminug saꞌag atoiat hap moherep hamo e. Maꞌato eipe ti tawa Kurasĩ piaria tawa Pesaita piaria yt naku i pe eweipyhuꞌat poꞌog tawa Tiru piaria kai tawa Sĩtau piaria kai aru are katupono eweiꞌakasa uiminug wakuap koꞌi iꞌewyte uhehay Tupana etiat yn hap wen maꞌato yt eweiꞌatuꞌatoiat teran hin i eiminug saꞌag hap koꞌi e."
15 Miꞌi hawyi Iesui — Arewak uipyꞌa pe eiꞌapiheg hap Tupana piat hap pupi tawa Kawanaꞌũ piaria e. — Taꞌi uruto poꞌog naꞌyn toraniaꞌin kai urutopyhuꞌat e haria eipe wen maꞌato eiwemaꞌat neꞌi mio tã eweiꞌe katupono ti aru eikuꞌuro hap topyhuꞌat irane hawyi yt uwe i teꞌeropyhuꞌat ehetawa pe aru eikuap haria tukupteꞌen mesuwat yi tote katupono eipe yt uimohey i haria pote are e Iesui tawa Kawanaꞌũ piaria pe."
16 Miꞌi hawyi toꞌe i raꞌyn topotpoꞌororia pe — Uwe eimienoi kapiat wanẽtup hat wyti aru iꞌewyte uimienoi kapiat wanẽtup hanuat. Yt eikyꞌesat i hat ti aru iꞌewyte yt Uito i wyti uikyꞌesat hat raꞌyn e. Yt uikyꞌesat hat i pote iꞌewyte yt Uipoꞌoro Hat Tupana kyꞌesat hat i e 70 ok takaria pe iꞌatupoꞌoro haype."
17 Miꞌi hawyi 70 ok takaria Iesui tiꞌatupoꞌoro raꞌyn tawa koꞌi upiat tehay henoi hamo. Miꞌi hawyi 70 ok takaria tuwat hawyi iꞌatukohyewyry hap tawa koꞌi upi miitꞌin muꞌe hamo hawyi teꞌeraꞌaipok i raꞌyn Iesui kape iꞌatuwepit kahato. Miꞌi hawyi teꞌeroꞌe — Urukaꞌiwat iꞌatuꞌe pywo wyti ahiag tuwat raꞌyn esaika wuat uruiꞌatusopo hawyi iꞌatuꞌe. Eset nywo uruiꞌatusopo kuap kahato ahiagnia iꞌatuꞌe Iesui pe."
18 Miꞌi hawyi Iesui toꞌe i raꞌyn 70 ok takaria pe — Taꞌi uimiium uhesaika hap poꞌog ahiag kai e. Saꞌawyꞌi ahiag atipy pe toĩneꞌen Tupana yatype hemiit no wen maꞌato tuwemowato teran poꞌog Tupana kai hawyi Tupana tipun ahiag atipy kaipyi yi kape e. Miꞌi hap Uito araꞌakasa ahiag Tupana tiꞌokhytpun turan. Merep merepꞌe hap putꞌokꞌe hap ewy taꞌat atipy kaipyi yi kape ahiag e. Iꞌewyte eweiwat turan araꞌakasa i taꞌat i raꞌyn ahiag hap araꞌakasa uhehay eweiꞌatumuꞌe miitꞌin wuatꞌi tawa koꞌi upi turan e Iesui topotpoꞌororia 70 ok takaria pe."
19 Miꞌi pote uimiium uhesaika hap ehepiat poꞌog hesaika ahewanĩkap sese ahiag kai. Iꞌewyte eikohyewyry hap upi miitꞌin muꞌe uhehay wo turan moi ok yt hesaika i ehete iꞌewyte sapot yt haty kuap i eipiit ete e. Pywo pe ti yt kat i eipyhyp kuap eipe uhehay ehewyry hap upi uhehay moherep hamuat turan e Iesui temiitꞌin me."
20 Gaꞌatpo raꞌyn atum ehepe uhesaika hap wuatꞌi nug kuap hamo e. Miꞌi pote waku kahato ahesaika eweiꞌe eipyꞌa pe. Waku kahato ahesaika hap ahiag sopo hamo eweiꞌe eipyꞌa pe e. Miꞌi pote eiwepit kahato mesup e. Pyno waku eiwemowepit uhesaika hap toĩneꞌen eipiit ete wuatꞌi nug hamo wen maꞌato poꞌog poꞌog waku eweiꞌe eipyꞌa pe — Uimowepit hap sese ti toĩneꞌen mesup katupono Tupana uhehakyeraꞌat raꞌyn wuatꞌi eꞌat pe uimowepit hap sese poꞌog waku eweiꞌe eipyꞌa pe e. — Taꞌi uhet sese toĩneꞌen miwan me atipy pe Tupana miehakyeraꞌat areĩneꞌen pote uiwepit kahato mesup poꞌog uhesaika ahiag sopo miitꞌin moehãite hap kai poꞌog waku eweiꞌe eipyꞌa e. Miꞌi Tupana piat ehehakyeraꞌat wuatꞌi eꞌat piat hap are waku katupono ehet koꞌi toĩneꞌen atipy pe miwan me uwe Tupana miehakyeraꞌat koꞌi sese e hap miwan note e. Miꞌi hap poꞌog waku toĩneꞌen wuatꞌi kai eimowepit hap e Iesui temiitꞌin me ahepe.
"21 Miꞌi hawyi Tupana Pãꞌãu timowepit raꞌyn Iesui hawyi toꞌe — Papai waku kahato ti En e. Atipy piat Morekuat nuat iꞌewyte mesuwarotiat Morekuat nuat. Waku kahato en Papai katupono emikuap koꞌi yt heremo i rakat koꞌi yt etimoherep hin i — Uruikuap yne poꞌog torania kai raꞌyn e haria pe maꞌato — Yt uruikuap i kahato te e haria pe hirakaria ewywuaria pe etimoherep taꞌyn ekuap hap uimimoherep hap koꞌi uhehay wakuat emikyꞌesat ewy e Iesui Toꞌywot pe."
22 Miꞌi hawyi Iesui toꞌe temiitꞌin me — Tupana tum naꞌyn uhepe towanuat koꞌi apykok hamo tesaika hap e. Taꞌi Uiꞌywot yn ni uikuap hat sese e. Uiꞌywot yn nyti Uito Tosaꞌyru kuap hat sese e. Iꞌewyte Uito yn nyti Uiꞌywot kuap hat e. Haꞌyru yn nyti Toꞌywot kuap hat sese e. Maꞌato uwe uwe pe atimoherep teran Uiꞌywot kuap hamuat miꞌiria ti aru Uiꞌywot kuap haria teꞌeropyhuꞌat e."
23 Pyno uiwyriaꞌin e iꞌatu kahato saꞌawyꞌiwuaria Tupana ehay moherep haria teꞌerahaꞌat teran kahato uhowawi rakaria maꞌato yt teꞌerahaꞌat kuap i yt uheꞌat i te pote e maꞌato eiperia ti ewehaꞌat raꞌyn uikuap haria sese raꞌyn eipe. Miꞌi pote ti areꞌe ehepe eheha koꞌi yt uwe wuat ewy i tukupteꞌen eheha wuat ewaꞌakasa uhowawiat haria eipe pote e. Eipe poꞌog Tupana mipoityro koꞌi torania kai are e Iesui topotpoꞌororia 12 ok takaria pe."
24 Katupono saꞌawyꞌitewuaria Tupana ehay enoi haria iꞌewyte porekuat nuaria koꞌi hekatup kahato mesuwat eꞌat piat e. Teꞌeraꞌakasa teran eiꞌakasa hap koꞌi kape maꞌato mesuwat eꞌat pe yt putꞌokꞌe i te iꞌatukupteꞌen hap eꞌat pe e.
"25 Miꞌi hawyi wẽtup ok miwan enoi hat apoꞌe Iesui pe — Urumuꞌe hat e aikotã som waku uheĩneꞌen hap sese puẽti hamo atunug e yt pywo pe i maꞌato toimaꞌat reran haype neꞌi apoꞌe."
26 Miꞌi hawyi Iesui tiwesat — Etikuap apo aikotã Musei mienoi koꞌi e."
27 — Taꞌi atikuap e. — Etikyꞌe o Tupana yn epyꞌa pe e. Etikyꞌe yne ewanẽtup hawe. Etikyꞌe Tupana yne eweꞌeg hawe e. Iꞌewyte etiꞌatukyꞌe iraniaꞌin yne ro ewekyꞌe hap ewy e tomiwan me e miwan enoi hat Iesui apoꞌe hawyi."
28 — Pywo kahato uiwesat en uhyt e Iesui. Miꞌi koꞌi etunug hawyi eieĩneꞌen hap sese etipuẽti raꞌyn e."
29 Mekewat miwan enoi hat — Uito poꞌog waku iraniaꞌin kai e hat toĩneꞌen pote yt toiꞌatukyꞌe hin i iraniaꞌin. Miꞌi pote toꞌe Iesui pe — Uwe pyno waku atikyꞌe iraniaꞌin e."
30 Miꞌi hawyi Iesui henoi sehay iãꞌãkap tope uwe waku watikyꞌe hap enoi hamuat — Saꞌawyꞌi so wẽtup ok Iuteu ywania kaipywiat toto raꞌyn tawa Ierusarẽi kaipyi tawa Ieriko kape. Miꞌi hawyi muꞌap upi tuwemoherep seroꞌok takaria. Miꞌiria muꞌap upiat hat esokpe taꞌatuhep yne hawyi taꞌatuꞌahyk ahyk neꞌi e. Porap taꞌatuꞌauka e iꞌahyk ahyk hawe e. Miꞌi hawyi taꞌatuꞌatoiat muꞌap tote e. Iꞌewyte taꞌatueroto yne hekareꞌen e."
31 Taꞌatuꞌatoiat hawyi paꞌi Iuteu kaipywiat toto ipuo e. Miꞌi taꞌakasa hawyi tokosap neꞌi miꞌahyk ahyk ywytpuo e Iesui."
32 Miꞌi hawyi Irewi ywania kaipywiat hat Tupana yat piat motpap nug hat tut e. Miꞌi ti iꞌewyte ipuẽti mekewat iꞌatumiꞌahyk ahyk maꞌato paꞌi ewywuat kahato pote yt taꞌakasa teran i ikuꞌuro rakat hawyi tokosap neꞌi iꞌywytpuo e."
33 Miꞌi hawyi meiũran putꞌokꞌe wẽtup ywania mekewat yi Samaria kaipywiat e. Yt aiꞌywania Iuteuria ywania mikyꞌe hin i Samaria ywania maꞌato miꞌi pytkai mekewat yi Samaria kaipywiat tehaꞌat kahato mekewat miꞌahyk ahyk kape hawyi toikyꞌe kahato topyꞌa pe."
34 Miꞌi hawyi tuwepohagnug mohag ikap takano iꞌewyte mahy ewy wuano hawyi sokpe wo raꞌyn toipoꞌi poꞌi. Tepiat ipohag nug waku hawyi mekewat yi Samaria kaipywiat hupit raꞌyn tohũ ok tote miꞌi hawyi getap kapiat totioto hamo. Miitꞌin ket howare pe hawyi hekatuwy wo toĩneꞌen wãtym muo kaꞌap iꞌapykok hamo e."
35 Eꞌihotꞌok pe hawyi yi Samaria kaipywiat tum naꞌyn saꞌup iwato kahato rakat getap kaꞌiwat pe mekewat seroꞌok miꞌahyk ahyk poi hamo hawyi typy iꞌape nu Uru kawiat tutum haꞌup iwato kahato rakat hawyi tohenoi getap kaꞌiwat pe — Etikyꞌe ro meiũwat iꞌahu rakat e. Miꞌi hawyi ariot hawyi poꞌog atum epe ikyꞌe hap saꞌup mo e."
36 Tohenoi hawyi Iesui apoꞌe raꞌyn Tupana ehay miwan miat enoi hat pe — Uwe kahu meiẽwat seroꞌok takaria miꞌahyk ahyk kyꞌe hat e."
37 Miꞌi hawyi miwan enoi hat tiwesat — Mekewat yi Samaria kaipywiat iwese rakat ikyꞌe kahato hat e. Miꞌi ti toto miꞌahyk ahyk kape ipohag nug hamo e. Miꞌi hawyi Iesui toꞌe — Pyno ereto ro iꞌewywuat nug hamo ewanĩkaptia kyꞌe hamo e mekewat — Uwe waku watikyꞌe iraniaꞌin apoꞌe hat pe.
"38 Miꞌi hawyi Iesui temiitꞌin wywo putꞌokꞌiꞌatuꞌe wẽtup tawa pe. Miꞌi tote haryporia Mata ehap het rakat — Eiwehytꞌok o uiꞌyat pe Mimi e Iesui pe."
39 Miꞌi hawyi teꞌeruwehytꞌok hawyi mana Mata kypyꞌyt Maria toĩneꞌen Iesui yatype imienoi kapiat tuwanẽtup hamo."
40 Maꞌato mana Mata ipotpap yn miꞌu toiꞌatuꞌanug kahato Iesui moenuk hamo. Ikypyꞌyt yt ipowyro i hawyi ipyꞌahak taꞌyn tokypyꞌyt ete hawyi toꞌe — Uiporekuat e uikypyꞌyt Maria wyti yt uipowyro hin i e Iesui pe. Uiweran kahato uipotpap an e. Pyno etipoꞌoro o uikypyꞌyt Maria uipowyro hamo e."
41 Miꞌi hawyi Iesui tiwesat — Uiwy Mata uiwy Mata e eminug koꞌi kape yn erewanẽtup kahato e."
42 Waku wen maꞌato toĩneꞌen poꞌog waku hap uimiꞌu nug hap kai katupono Uito uiwywuaria uhehay kapiat wanẽtup haria waku wy uiwanẽtup hawe e. Uhehay kuap hap mana Maria tiꞌairo raꞌyn e. Miꞌi hawyi yt uwe i tihep kuap imikyꞌesat uiwywuat hap e. Pywo kahato uikuap hap mana Maria piat wyti aru yt uwe i ihep kuap uiꞌyatype tuwemuꞌe hap e Iesui mana Mata pe.
"1 Wẽtup eꞌat pe Iesui toto tehay teran Tupana wywuat hamo. Miꞌi hawyi ihay kahato Toꞌywot wywo hawyi wẽtup ok ipotmuꞌe hẽtup Iesui pe — Uruporekuat urumuꞌe ro En Tupana kapiat Tupana wywuat uruehay hamuat hap ete e. Aikotã ahetꞌok hat Iuwãu tiꞌatumuꞌe topotmuꞌeria hap ewy e katupono uruikyꞌesat En ewywuat uruehay Tupana wywuat hap e."
2 Mio tã tohẽtup hawyi Iesui henoi raꞌyn — Pyno Uimohey haria yt atikyꞌesat i ehehay Tupana kape ewehuꞌatꞌi huꞌatꞌi eiwẽpapꞌi wẽpapꞌi ahut ewy hap yt atikyꞌesat i e. Atikyꞌesat ti ehehay eipyꞌa pyi Tupana wywo hap e. Miꞌi e hap eipyꞌa piat waku eweiꞌe maꞌato emikyꞌesat ewy hap ehehay ewy hap atikyꞌesat e. Saꞌawyꞌi waku watoꞌe
— Uruꞌywot Atipy piat waku kahato En waku watoꞌe.Uruimõtypot kahato En waku watoꞌe e.Uruikyꞌesat emõtypot hap mesuwat yi tote wuatꞌi miitꞌin pyꞌasetpiat eset mowato hap uruikyꞌesat kahato waku watoꞌe.Tupana ereĩneꞌen no mesuwat yi toto Wuatꞌi Miitꞌin Potypot no miꞌi hap uruikyꞌesat. Uruikyꞌesat kahato mesuwarotiaria wuatꞌi ywania tunug emikyꞌesat ewywuat hap aikotã atipy piaria tunug emikyꞌesat hap ok tã hap uruikyꞌesat waku watoꞌe e."3 Tupana mesuwat eꞌat uruihẽtup epe urueꞌuꞌi mesuwarotiat urumiꞌu hap uruhẽtup epe waku watoꞌe e.
"4 Uruiꞌaparap kahato ewawi Tupana miꞌi pote uruhẽtup kahato ewawi waure wo ereĩneꞌen uruminug saꞌag koꞌi ete hap waku eweiꞌe e. Tukupteꞌen kahato urumaꞌat haria uruetiat iꞌaparap haria. Miꞌi hap saꞌag koꞌi ete waure wo teran urutukupteꞌen haype aikotã En ereĩneꞌen waure wo eetiat uruꞌaparap hap koꞌi kai hap ewy katupono waure wo En ereĩneꞌen uruweteweru epiat hap kai pote En ewywuat urutupteꞌen neran waku eweiꞌe Tupana pe e.
Mesuwat eꞌat pe iꞌatu kahato uruiãꞌãg ahiag ehay wo yt naku i nug hamo miꞌi pote uruporeroto uruiãꞌãg hap sakpuo urukosap hamo katupono yt urutunug poꞌog teran i yt naku i nug hap waku eweiꞌe Tupana pe e Iesui topotmuꞌeria pe.Uiwyriaꞌin waku miꞌi e hap ok tã ewehẽtup turan Tupana kape ehehay Tupana wywo e maꞌato eipyꞌa pyi ehehay eimikyꞌesat ewy yn waku. Yt atikyꞌesat i ewehuꞌatꞌi huꞌatꞌi mesuwat uhehay e Iesui ahepe."5 Miꞌi hawyi Iesui toꞌe ahepe — Aiꞌywot Tupana tum aru aimiẽtup ok tã ahepe e. Yt naku i aipohep Tupana piat aimiẽtup hap koꞌi ete are e. Waku wahẽtup hẽtup i Tupana pe tutum ahepe hap kape e Iesui ahepe."
6 Taꞌi miꞌi hap ewy waku wahẽtup aikotã karãmuo putꞌokꞌe aiꞌyat pe aiwy wãtym turan hesyꞌat kahato hap wywo hap ewy waku watipoi maꞌato aimiꞌu yt kat i pote waku watuwat ahekatuwy yat kape hawyi waku wahẽtup ahekatuwy yat piaria õꞌẽ haria poi hamo e. — Uhyt mana watoꞌe uruwyriaꞌin tõꞌẽ iuẽpe uruꞌyat pe hawyi yt kat i urueꞌuꞌi turan i. Uruikyꞌesat etipuru porapꞌi eikaipyi uꞌi uiwyriaꞌin poi hamo hesyꞌat kahato pote waku mio tã watoꞌe."
7 — Maꞌato wãtym hake turan pote aiwesat toꞌyat pyi. — Watoket uhyt mana yt ehẽtup i raꞌyn o uꞌi meikoran katupono wãtym naꞌyn katupono areꞌokenhyp taꞌyn wyti urutoket raꞌyn wyti e. Taꞌi teꞌeroket yne raꞌyn wyti uimẽtpytꞌin uiꞌyat piaria. Pyno meiũpe urueꞌyni koꞌi poityꞌi pote yt areto kuap i raꞌyn ewawi emiẽtup ium epiat hamo e."
8 Maꞌato miꞌi hawyi — Eherut ro uhyt mana katupono uruwy muꞌap upiat putꞌokꞌe rokirẽ hesyꞌat kahato watoꞌe i watoꞌe i kahato hawyi iꞌãpeꞌokꞌam hawyi uꞌi tutum ahepe yt toket kuap i hawyi wahẽtup motꞌi hawyi miꞌi tu sake ti aru tut ahowawi uꞌi ium hamo e."
9 Pyno Tupana kape waku ahehay miꞌi uhãꞌãkap ok tã ahehay turan ahẽtup hẽtup kahato mekewat uꞌi kyꞌesat hap ewy uiꞌe hap ewy e. Miꞌi pote ti aru tutum ahepe watikat kahato Tupana kape pote watipuẽti aru e. Teg teg watoꞌe Tupana eꞌokenꞌypy ete hawyi aru toꞌokenhyp toꞌokenꞌypy hawyi aru tutum kahato aimiẽtup ewy wyti aru ahowawi e."
10 Taꞌi wahẽtup hẽtup motꞌi hawyi Tupana tum aru ahepe are e. Watikat turan Tupana miium turan yt naku i aipohep aimiẽtup ete pyi miꞌi pote watipuẽti irane aimiẽtup ipo pyi e. Waku Uhyt Uhyt Uhyt Mimi Mimi Mimi watoꞌe potꞌi hawyi toꞌokenhypꞌok hap ewy wyti aru are e."
11 Uipotmuꞌeria Tupana hegyiꞌat kahato pote tutum teran kahato aimihẽtup ahepe pãi are e. Taꞌi karãpe aimẽpytꞌin hẽtup uꞌi pira ahepe taꞌatuhesyꞌat hawyi miꞌi pote watum iꞌatumiẽtup koꞌi ahepiat iꞌatukyꞌe aimẽpytꞌin mote e. Yt karãpe i yi neꞌi watum yi aimẽpytꞌin me uꞌi ẽtup ahepiat hawyi e. Iꞌewyte pira kãꞌã taꞌatuhẽtup ahepe pote watum pira e. Yt karãpe i watum iꞌatuepe moi neꞌi katupono watiꞌatukyꞌe kahato aimẽpytꞌin koꞌi pote e."
12 Pyno aimẽpytꞌin waipaka upiꞌa taꞌatuhẽtup pote hupiꞌa watum e. Yt karãpe i ti watum aimẽpyt pe sapot hupiꞌa tohẽtup hawyi are maꞌato toĩ pote iꞌatumiẽtup ewywuat watum ahaꞌyruꞌin me ahakiꞌytꞌin me e."
13 Eiꞌywotꞌin eityꞌin ni eipoi kahato eimiẽtup koꞌi ewywuat. Yt naku i nug haria eityꞌin eiꞌywotꞌin pytkai waku yn taꞌatunug neran ehepe eikyꞌe haype e. Pyno Aiꞌywot atipy piat Tupana ti yt karãpe i saꞌag nug hat e. Waku Kahato rakat toĩneꞌen Aiꞌywot Tupana e. Miꞌi tupono ti aimiẽtup kat koꞌi tomikyꞌesat ewy yn aimiẽtup tutum. Wahẽtup Ipãꞌãu Wakuat mikyꞌesat ewywuat pote tutum e. Mesuwarotiaria yt nakuaria i pytkai hum kuap wakuap yn. Taꞌatumõꞌẽ kahato miꞌu wakuat koꞌi taꞌatumẽpytꞌin me. Miꞌi hap ewy ti poꞌog Aiꞌywot atipy piat timõꞌẽ kahato poꞌog poꞌog ahepuo wahẽtup kahato hawyi aito imẽpytꞌin mote e Iesui ahepe.
"14 Pyno wẽtup eꞌat pe Iesui ipotpap kahato miitꞌin moehãite hap ete. Miꞌi hawyi itote toĩneꞌen yt ihay kuap i rakat ahiag topiit piat pote rakat. Miꞌi ti Iesui tisopo raꞌyn hawyi ihay kuap i raꞌyn. Miꞌi pote iraniaꞌin itotiaria teꞌeruwehum kahato Tupana ete."
15 Maꞌato iraniaꞌin teꞌeroꞌe saꞌag Iesui ete itote — Taꞌi ahiagnia akag esaika hamo mekewat ahiag potypot Peusepu aipusu puat hesaika hamo wyti Iesui tiꞌatusopo meiũwat miit piit piat ahiag iꞌatuꞌe saꞌag Iesui mohit hamo."
16 Iraniaꞌin itote — Uhyt Mimi iꞌatuꞌe etunug no emisepap yt miitꞌin minug kuap i hap ewywuat iwato rakat atipy kaipywiat Tupana kaipyi hap uruikyꞌesat iꞌatuꞌe. Yt miitꞌin minug kuap i iwato rakat merep hap ewy etunug paini ewywuat miꞌi hawyi meremo — En Uruetupana urutoꞌe iꞌatuꞌe saꞌag hãꞌãg hap neꞌi."
17 Maꞌato Iesui tikuap iꞌatuwanẽtup hap saꞌag hawyi toꞌe — Wẽtup tama piaria tuꞌuka tuꞌuka kahato toꞌope toꞌope hawyi meiũran ti aru meiẽwat tama woꞌokyꞌe hap esaika hap yt kat i raꞌyn topyhuꞌat itote e. Iꞌewyte getap wiaria tuꞌuka tuꞌuka toꞌope toꞌope hawyi meiũran yt kat i woꞌowese hap topyhuꞌat itote hawyi yt iꞌatupotpap kuap i kat nug kat nug hap ete yt toꞌowesat i hawyi e."
18 Pyno — Ahiag koro Peusepu esaika hamo etiꞌatusopo ahiagnia eweiꞌe ti uhepe maꞌato ahiag akag emiitꞌin koꞌi tuꞌuka tuꞌuka toꞌope toꞌope pote yt kat i toꞌowesat hap toĩneꞌen itote hawyi toꞌomoma hap yn topyhuꞌat itote irane e. Yt karãpe i ti tuꞌuka ahiag akag temiitꞌin ahiagnia wywo e. Ahiag akag yt toꞌosopo teran hin i ahiagnia wyti miitꞌin piit pyi maꞌato toꞌopowyro toꞌokawiano hap yn taꞌatukyꞌesat e. Pyno yt eiweꞌeg hin i are e. Kat pote som — En ahiag akag koro esaika hamo wyti etiꞌatusopo ahiagnia eweiꞌe katupono pywo ti rat ahiag koro yt tiꞌatusopo teran i temiit ahiagnia miitꞌin piit koꞌi pyi uiminug ewy are e."
19 Pyno koitywy apoꞌeweiꞌe eiwoꞌope — Kat esaika hamo som toiꞌatusopo ahiagnia e hap ete eweiꞌe uhepiat. Pyno ahenoi ehepe uwe esaika hamo atiꞌatusopo sopo ahiag koꞌi sem hap miitꞌin piit pywiat hap e."
20 Pyno pywo ti rat Tupana esaika hamo ti rat atiꞌatusopo ahiagnia e. Taꞌi Tupana po wo atiꞌatusopo ahiagnia are e. Tupana puĩꞌã wo atiꞌatupugha ahiagnia miitꞌin piit pyi are e Iesui. Miꞌi pote ti Tupana topyhuꞌat mesuwe Morekuat no i raꞌyn e."
21 Pyno ahiag ni yt toĩneꞌen kuap i poꞌog morekuat no miitꞌin piit pe katupono karãpeĩ uhesaika hap topyhuꞌat surara akag koro hesaika kahato rakat ewywuat ahiagnia esaika hap moma kahato hano ti areĩneꞌen Tupana esaika hap ti toĩneꞌen uhehay wo."
22 Miꞌi pote karãpe wẽtup ok surara koro toĩneꞌen toꞌyat pe tesurara sem wywo toꞌyat apykok haype miꞌi hawyi yt uwe i hekareꞌen seroꞌok kuap surara akag wo toĩneꞌen itote pote iꞌewyte tesuraraꞌin sem tukupteꞌen itote pote hesaika hap pupi seroꞌok koꞌi teꞌerokenꞌẽ kahato are e."
23 Pywo pe ti uwe uwe yt uhupiat i hat uhewanĩkaptia wo teꞌeropyhuꞌat e. Yt uipowyro i miitꞌin atuekyi uhowawiat hamo pote miitꞌin sytpok uhowapyiat haria wo tukupteꞌen are e. Taꞌatusytpok neꞌi uimohey hap kaipyi iꞌatuehay mikyryꞌi uhetiat hap wywo pote yt uikawiano hin i tukupteꞌen are e. Miꞌi hat ewywuat ereĩneꞌen pote uimohey haria sytpok haria wo eweikupteꞌen uhewanĩkaptia sese wo eweikupteꞌen are e.
"24 Miꞌi hawyi Iesui toꞌe ihay mikyryꞌi tetiat haria pe — Eiperia aikotã ahiag ipiit piat rakat ewy eweikupteꞌen e. Miꞌi hawyi meiũran tuwẽtem naꞌyn mekewat ahiag mekewat miit piit pyi tuwepyi haype hawyi waku raꞌyn toĩneꞌen hap ewy hawyi hewyry kahato yahig note teiam miitꞌin piit pakup kat hamo e. Maꞌato yt toipuẽti i tomikyꞌesat ewywuat hawyi toꞌe tuwepe — Pyno araꞌaipok irane saꞌawyꞌiwuat uheiam kape uimiꞌatoiat miit piit kape e tuwepe hawyi mekewat miit piit saꞌawyꞌiwuat kape toto hawyi teke i raꞌyn tomikyꞌesat ewy e. Miꞌi hap ewywuat eiperia e tehay pun haria pe. Mesup waku pe eweikupteꞌen wen maꞌato meiũran ti ahiag hewyry kahato hawyi toꞌe tuwepe — Pyno araꞌaipok i mesup saꞌawyꞌiwuat uheiam kape miꞌi hawyi areke i mekewat saꞌawyꞌiwuat miit piit pe aikope areĩneꞌen saꞌawyꞌiwuat hap kape e tuwepe ahiag e."
25 Miꞌi hawyi tut i raꞌyn miit saꞌawyꞌitewuat toĩneꞌen hap kape. Miꞌi turan toipuẽti i ipiit waku pe tuwepainug turan ikahu toipuẽti yt kat i hesoꞌok hap toĩneꞌen itote. Pyno waku kahato toipuẽti mekewat miit aikotã aiꞌyat wahywytip rokire hap ewy toĩneꞌen miꞌi miit piit aikotã aiꞌyat topen pakup i turan ikytsig kahato hap ewy e."
26 Miꞌi hawyi ahiag saꞌag toꞌe towyriaꞌin ahiagnia pe — Toꞌiro watuwehytꞌok meiũwat miit piit pe e 7 ok takaria pe towyriaꞌin ahiagnia saꞌag koꞌi pe. Miꞌi hawyi tuwehytꞌok ahiagnia 8 ok takaria e. Saꞌawyꞌi wẽtup yn toĩneꞌen itote mekewat miit piit pe miꞌi hawyi poꞌog poꞌog naꞌyn tukupteꞌen kahato itote e. Miꞌi hawyi miꞌiria tukupteꞌen at kaꞌap mekewat miit piit pe. Miꞌi pote poꞌog yt naku i saꞌawyꞌiwuat kai poꞌog hesoꞌok saꞌawyꞌiwuat kai toĩneꞌen hap ewy kahato mekewat miit e. Miꞌi uhehay ewy kahato eiperia uhehay pun hanuaria e katupono yt uimohey teran i eipe yt kat i ahiag eipiit piat hawyi atiꞌatusytpok yne ahiagnia eipiit pyi hawyi e. Maꞌato yt uimohey i pote teꞌeraꞌaipok i poꞌog naꞌyn ehowawi e Iesui tehay pun haria pe.
"27 Mio tã toꞌe hawyi wẽtup ok haryporia miitꞌin tok pyi toꞌe Iesui pe tehay pirik hap — Mimi e uiwanẽtup hawe waku kahato ety Maria toĩneꞌen e katupono ety wo toĩneꞌen epoi temi wuat hat pote emotãg hat pote e. Emoherep topiit pywiat hat pote waku kahato ety e Iesui pe."
28 Mio tã e hawyi Iesui tiwesat tope — Mana waku uity wen maꞌato poꞌog waku Tupana wanẽtup hawe uimienoi kapiat wanẽtup kahato haria poꞌog Tupana mipoityro koꞌi miꞌiria tukupteꞌen uipiit moherep hat uity kai e Iesui ahepiat pe tomohey haria piat pe.
"29 Miꞌi hawyi miitꞌin sem teꞌeruwaꞌatunug poꞌog typyꞌi kahato Iesui ewawi wanẽtup hanuaria. Miꞌi hawyi toꞌe iꞌatuepe — Are pãi e eipe eweikupteꞌen mesuwarotiat miitꞌin ehay yt uimohey reran i haria eipe Iuteu ywania uimotag haria pytkai e. Uikat kahato haria wo eipe maꞌato eipoi hamuat eimoehãite hamuat hap yn eweikat uikai wen maꞌato yt uikat hin i uhehay kuap hamuat are e. Eweikyꞌesat kahato ti eweiꞌakasa uiminug Tupana misepap koꞌi kape miitꞌin moehãite hap koꞌi kape kat koꞌi kat koꞌi hap yt uwe minug kuap i ewywuat uiminug koꞌi kape e. Eiperia sehaꞌat sese hanuat õꞌẽ haria neꞌi eipe e. Miꞌi pote ti rat pãi yt atomoherep teran i eimikyꞌesat koꞌi ewehaꞌat hamo katupono yt uimohey teran i haype ewehaꞌat teran yn pote e. Miꞌi pote wẽtup yn aru uimisepap iwato aru atimoherep ehepe yt uwe i te inug nakat katupono uikuꞌuro sese hawyi areĩneꞌen pakup i hap yn ti aru atomoherep ehepe aikotã aikotã saꞌawyꞌiwuat Tupana ehay moherep hat Iona e hap het rakat ewy aru areĩneꞌen e."
30 Saꞌawyꞌiwuat Tupana ehay moherep hat Iona Tupana tipoꞌoro tawa Niniwe kape yt naku i rakaria kape wẽtup ywania kape. Pyno apoꞌare — Kat pote Iona Pira wato hunmỹꞌã pe myeꞌym eꞌat pe toĩneꞌen hap ete e. Pira wato hunmỹꞌã pe toĩneꞌen myeꞌym eꞌat. Miꞌi hawyi pira teꞌen neꞌi yi Niniwe pe hawyi Iona tuwẽtem naꞌyn. Miꞌi hap tawa Niniwe piaria tikuap taꞌyn hawyi taꞌatukuap pywo Iona ti Tupana mipoꞌoro hap. Myeꞌym eꞌat pe ikuꞌuro pira hunmỹꞌã hawyi tuwẽtem e. Miꞌi hap ewy aru atunug e. Uito ti Miitꞌin Ykeꞌet Sese e Iesui miꞌi hawyi arẽtem guꞌuro pyi i raꞌyn hawyi aremoherep i aru ehowawi Iona ewy e. Myeꞌym eꞌat hap ete uikuꞌuro hawe yi hunmỹꞌã pe uisyp hawe arepyhuꞌat myeꞌym eꞌat hawyi arẽtem guꞌuro pyi hawyi eweikuap aru pywo Uito Tupana Mipoꞌoro Miitꞌin Ehakyeraꞌat Hanuat hap are e Iesui."
31 Saꞌawyꞌi sese wẽtup ywania porekuat haryporia kawiat tut pya pyi at wẽtem hap moran kai tut morekuat pot Sarumãu weꞌeg hap kapiat tuwanẽtup hamo ihay se kuap hamo tut e. Meiũran ti aru karãpeĩ Tupana henoi uwe waku uwe yt naku i e hap eꞌat piat turan toĩneꞌen itote saꞌawyꞌiwuat morekuat haryporia kawiat eiminug yt naku i hap enoi hanuat e katupono saꞌawyꞌi pya pyi tut morekuat Sarumãu kapiat iweꞌeg hap kapiat tuwanẽtup hamo maꞌato koitywy Uito areĩneꞌen eipyꞌasetpe poꞌog uiweꞌeg aseꞌi morekuat Sarumãu kai maꞌato uhehay kape yt eweiwanẽtup teran hin i raꞌyn eipe e. Miꞌi pote mekewat wẽtup ywania poꞌog waku Tupana wanẽtup hawe eikai e. Miꞌi pote mekewat eꞌat pe aru — Kat pote yt eweimohey i Tupana Mipoꞌoro Sarumãu Saipepiat e aru ehepe mekewat morekuat haryporia kawiat yi Sapa piat eiwemõti hamo e Iesui tehay pun haria pe."
32 Iꞌewyte meiũran ti aru mekewat Tupana uwe waku uwe yt naku i e hap enoi hamuat hap eꞌat pe ti aru tawa Niniwe piaria henoi — Eipe yt nakuaria i iꞌatuꞌe ehepiat katupono saꞌawyꞌi miꞌiria teꞌeruwanẽtup Tupana ehay enoi hat Iona mienoi kapiat hawyi teꞌeraꞌaipok kahato Tupana kape. Maꞌato eiperia yt eweiꞌaipok hin i Tupana kape Uito ti rat poꞌog Iona kai pytkai e. Taꞌi eipyꞌasetpe areĩneꞌen wen maꞌato uimienoi kape yt eweiwanẽtup hin i e.
"33 Miꞌi hawyi poꞌog Iesui henoi — Yt uwe i migꞌi wo hytmoi ariãty hot hap e. Yt taꞌatupag hin i kamũti kaꞌa pe maꞌato ipytyp sese pe yn taꞌatupag ariãty hot hamo e. Miꞌi hawyi wehytꞌok haria teꞌeraꞌakasa raꞌyn hawyi tehaꞌat kuap heremo hawyi e."
34 Yne heremo aheha pytig pote. Ihotꞌok hawyi aheha koꞌi wo wataꞌakasa kuap yne raꞌyn e. Miꞌi pote eheha koꞌi ariãty ewywuat eipiit piat moẽtyhot hamo e. Waku aheha koꞌi pote waku kahato heremo kahato yne yne maꞌato yt aheha pytig i yt kat i heremo ahepe. Watikyꞌesat muꞌap kuap hamo maꞌato ahoꞌowasat hap ewy watoĩneꞌen at toĩneꞌen pytkai are e. Eipyꞌa piat uimohey hap hawyi eheha wakuat ewywuat toĩneꞌen hawyi heremo kahato muꞌap Tupana kapiat hap maꞌato yt naku i kyꞌesat haria eipe pote ariãty yt nakuat i ewywuat eipyꞌa pe toĩneꞌen. Miꞌi pote saꞌag hap yn eweikat are e. Miꞌi hawyi eipiit puo iꞌypyryp we sese topyhuꞌat e."
35 Yt naku i hap nug neran haria eipe pote yt eheha pytig i rakaria ewywuat eweikupteꞌen e. Miꞌi pote iꞌypyryp wiat gupteꞌen haria ewy eweikupteꞌen kahato eipe hawyi eipiit puo eheĩneꞌen hap yt naku i pe topyhuꞌat e. Miꞌi pote Tupana kuap hap yt kat i eipyꞌa pe yt uimohey i eipe pote e."
36 Waku hap yn eweikyꞌesat pote eheha koꞌi ariãty wakuat ewywuat topyhuꞌat e. Miꞌi hawyi yt kat i iꞌypyryp hap eipiit pe. Eheĩneꞌen hap ete hẽtyhot hap yn ehete e.
"37 Iesui piat taꞌatunãpin kahu turan putꞌokꞌe Musei miwan enoi hat hawyi toꞌe — Toꞌiro uiꞌyat kape watenuk hamo e. Miꞌi hawyi Iesui toto raꞌyn hupi iꞌyat kape. Putꞌokꞌiꞌatuꞌe hawyi taꞌapyk yparakai ypyke maꞌato yt tuweposei i tenuk hamo."
38 Miꞌi pote Musei miwan enoi hat tuwanẽtup — Kat pote som yt tuweposei i Iesui aheko ewy e."
39 Miꞌi hawyi Iesui toꞌe — Tupana mikyꞌesat koꞌi toĩ yne miwan me wen miꞌi hap koꞌi eweiwaure hawyi wẽtup sehay ehenoi e. Eipe ti eheko wẽtup enoi kahato haria e. Eheko upi eiwepiitsei sei kahato eiweposei kahato eikoho koho kahato hawyi — Waku kahato aito mesup Tupana wanẽtup hawe eweiꞌe eipyꞌa pe e. Maꞌato yt miꞌi tã hin i are e. Eiperia ahekuiꞌa koꞌi ipitpit kahato hap ewywuat are e. Aikotã eiwekuiꞌakoho kahato iꞌokpe ete maꞌato ehekuiꞌa pyꞌa yt eiwepyi hin i miꞌi pote miꞌu nem ipyꞌa pe toĩneꞌen hap ewy e. Eipo pe ete waku kahato yt ipitpit hin i maꞌato eiwanẽtup hawe ipitpit hap ewy toĩneꞌen e."
40 — Yt weꞌeg i kahato rakaria ti rat eipe e. — Pyno Tupana aipiit nug hat pote waku aipiit sei hap watunug at kaꞌap imowepit hamo eweiꞌe eiwoꞌope e. Maꞌato pywo pe areꞌe ehepe aiwanẽtup hap aipyꞌa piat nug hat Tupana toĩneꞌen wy are e. Miꞌi pote waku aipyꞌa piat aiwanẽtup hap sei hap watunug at kaꞌap wy imowepit hamo are e. Maꞌato eipyꞌa ipitpit hap ywytip hap eweiwaure kahato raꞌyn e. Eiwanẽtup hap eipyꞌa koꞌi ipitpit kahato eiminug saꞌag koꞌi wo e. Yt eiweꞌeg hin i ti rat katupono eipiit painug hap yn ewetunug maꞌato eiwanẽtup hap eipyꞌa piat painug hap yt kat i Tupana wanẽtup hawe are e. Eipiit koꞌi ikahu kahato yt ipitpit hin i wen maꞌato eipyꞌa koꞌi yt ikahu hin i eiminug saꞌag koꞌi wo e. Eipitpit kahato eiwanẽtup saꞌag koꞌi wo e."
41 Taꞌi eiwepyi kahato ehekuiꞌa koꞌi ok pe ete maꞌato yt eiwepyi hin i kat som nem toĩneꞌen ehekuiꞌa koꞌi pe hap e. Waku poꞌog aiwanẽtup hawe — Pyno waku atiꞌatumõꞌẽ uimiꞌu uhekareꞌen yt hekat i rakaria pe hatek takaria pe miꞌi hawyi Tupana mowepit hat areĩneꞌen e hap kape poꞌog waku watuwanẽtup at kaꞌap — Uiposei sio yt e hap kape yn watuwanẽtup hap kai are e."
42 Miꞌi hawyi poꞌog Iesui toꞌe — Urutunug uruposei hap pote poꞌog waku urutoria eikai e haria eipe e Iesui tewanĩkaptia pe miꞌi pote eipe ti rat yt naku i poꞌog Tupana wanẽtup hawe e. — Taꞌi wẽtup hyt uꞌi 10 hyt uꞌi kaipyi atum Tupana pe pote poꞌog waku uito iraniaꞌin kai eweiꞌe neꞌi maꞌato Tupana — Yt naku i kahato eipe e. Eipe eimiꞌu apopyt hit kaipyi eweihoꞌoium Tupana pe hawyi — Waku poꞌog toraniaꞌin kai urutukupteꞌen eweiꞌe eiwoꞌope neꞌi wen maꞌato Tupana kyꞌe hap ete iꞌewyte miitꞌin kyꞌe hap ete waure wo kahato eweikupteꞌen e. Waku watum Tupana aimiium wẽtup hyt 10 hyt aheꞌuꞌi hap kaipyi maꞌato poꞌog waku watum aipiit yne Tope waku poꞌog watiꞌatukyꞌe miitꞌin e Iesui."
43 — Taꞌi eipe ti iraniaꞌin miat eimõtypot hap yn eweikyꞌesat haria eipe maꞌato Tupana piat eimõtypot hap yt eweikyꞌesat hin i haria eipe e. Tupana eimõtypot hap yt eweikat hin i hawyi e. Tupana mõtypot yat pe eiꞌapyk hap poꞌog wakuat iraniaꞌin kawiat hap eweikyꞌesat e. Iꞌewyte yne tawa pe muꞌap upi ehekat kyiꞌat hap tote miitꞌin wẽpowat kahato hap eimõtypot hamuat hap yn eweikat at kaꞌap maꞌato Tupana piat eimõtypot hap yt eiwekat hin i e. Yt naku i are mesuwarotiaria kaipywiat yn eimõtypot hap toĩneꞌen hawyi yt kat i Tupana kaipywiat eimõtypot hap toĩneꞌen e Iesui woꞌomuꞌe haria pe."
44 Aikohyewyry tuereto woꞌosyp hap tote turan yt watikuap hin i aikope aikope ikuꞌuro rakaria toĩneꞌen yi pe aimisyp koꞌi saꞌawyꞌi katupono yt heremo i te itote e. Miꞌi hap ewy kahato eiperia e. Taꞌi eipe ti woꞌosyp hawiat hap gupteꞌen haria yt heremo i rakat ewywuat are e. Taꞌi miitꞌin teꞌeruwanẽtup eimienoi kape maꞌato ehehay kaipyi yt taꞌatukuap hin i Tupana hawyi iꞌatumohun hap yn topyhuꞌat eimienoi kaipyi e. Eimienoi ikuꞌuro rakat nem nakat ewy e wẽtup sehay moherep haria pe yt Tupana e hap ewywuat moherep haria pe.
"45 Pyno itote toĩneꞌen wẽtup ok miit uwe waku uwe yt naku i e morekuat piat hat. Miꞌi hawyi toꞌe Iesui pe — Are pãi etimohit kahato urumuꞌe haria akag koꞌi iꞌatuminug saꞌag hap ete Uhyt e. Pyno kat som ereꞌe teran uruepe sio uruto waku sio yt sio uruto iraniaꞌin aimuꞌe haria akag koꞌi ewy ewanẽtup hawe sio yt katupono uruto poꞌog morekuat ehay kuap haria toraniaꞌin kai sio miit tiꞌaparap morekuat ete sio yt e haria uruto pote e Iesui pe."
46 Miꞌi pote Iesui tiwesat — Yt uheso i uhyt e. Eweikuap kahato miwan eiperia e. Kat som waku miitꞌin tunug kat som yt naku i hap e. Miꞌi hawyi uruikuap poꞌog iraniaꞌin kai eweiꞌe. Miꞌi hawyi miitꞌin airo haria eweikupteꞌen miwan moherep hap kaipywiat haria wo eweikupteꞌen e. — Wãi wãiꞌeweiꞌe hap yn miitꞌin kape — Yt etunug neiꞌo eweiꞌe hap yn miꞌi pote waku nug haria yt tunug kuap i wakuap katupono waku nug haria pyhyp haria eweikupteꞌen morekuat e hap kaipyi e. Yt uheso hin i mehĩ eiperia ti eweikupteꞌen aikotã ipotyi rakat ewy eiwoꞌoꞌapyk miitꞌin okpe tote haria ewy hawyi yt taꞌatuhupit kuap i ti ehehay ipotyi rakat are e. Eweiporokpun yt hekat i rakaria okpe tote morekuat ehay ipotyi rakat hawyi — Ewetunug o morekuat e hap ewy eweiꞌe maꞌato yt pote surara po pe uruipag eipe ehatyꞌi hatyꞌi hamo eweiꞌe e. Morekuat ehay nug hap ete yt eweipowyro hin i hatek takaria e. Iꞌewyte yt ewetunug hin i ti morekuat piat einãpin hap koꞌi eimimoherep hap koꞌi e hap ewywuat e. Miꞌi pote typy ihay rakaria ewy eweikupteꞌen are e. Pyno ti eimienoi aikotã aikotã ipotyi kahato rakat ewy — Ewetunug no ewetunug no eweiꞌe hap yn uruepiat eiꞌatunãpin hap ewy ewetunug o eweiꞌe maꞌato ti iꞌewyte eipe yt ewetunug hin i eiꞌe hap ewy iraniaꞌin miat eiꞌe hap ewywuat e miꞌi pote ti Tupana wanẽtup hawe yt nakuaria i sese eipe e. Miꞌi pytkai yt eiwemõti hin i ehaꞌaseꞌi minug saꞌag koꞌi ete katupono ehaꞌaseꞌin koꞌi tukupteꞌen eiꞌewywuaria koꞌi e. Saꞌawyꞌiwuaria eiꞌywotꞌin tiꞌatuꞌuka kahato Tupana mipoꞌoro koꞌi e. Taꞌatumoma teran kahato Tupana ehay moherep haria koꞌi e. Miꞌi hap ewy te ti eiperia eweikupteꞌen ahaꞌaseꞌiꞌin saꞌawyꞌiwuaria ewy te eweikupteꞌen Tupana ehay moherep haria auka haria eperia are e Iesui morekuaria wãiꞌe hap moherep haria pe."
47 Yt nakuaria i kahato eipe. Yt eiwemõti hin i ehaꞌaseꞌiꞌin minug koꞌi ete. Saꞌawyꞌi taꞌatuꞌatuꞌuka kahato Tupana ehay enoi haria Tupana mipoꞌororia koꞌi e."
48 Miꞌi hawyi eipe eweiꞌatumokahu ehaꞌaseꞌiꞌin miꞌatuꞌuka syp hap koꞌi e Tupana mipoꞌoro tehay moherep hamuat syp hap koꞌi. Mesup ti eweiꞌatumõtypot kahato ehaꞌaseꞌiꞌin miꞌatuꞌuka koꞌi woꞌosyp hawiat iꞌatuꞌkag koꞌi katupono eiwemõti kahato eipyꞌa pe ehaꞌaseꞌiꞌin minug saꞌag koꞌi maꞌato eiꞌywotꞌin ewy te eweikupteꞌen katupono mesup te ti eweiꞌatuꞌuka teran Uito iꞌewyte yne Tupana mipoꞌoro koꞌi are e. Yt nakuaria i sese ti eipe — Uruto poꞌog torania kai eiꞌe pytkai e."
49 Taꞌi aikotã aikotã tohenoi saꞌawyꞌi miwan me ehetiat hap ewy mesup ewetunug e. Mio tã e ti saꞌawyꞌi Tupana — Uhemiitꞌin iraniaꞌin taꞌatuꞌauka e. Iraniaꞌin ti taꞌatusatyꞌi satyꞌi yne iraniaꞌin taꞌatumohit mohit e Tupana ti miwan me ehepiat pe e Iesui toꞌauka teran haria pe."
50 Pyno ti koitywy ehepiat Tupana ihay mekewat miwan me saꞌawyꞌi — Taꞌi koitywy eiꞌywotꞌin miꞌauka uimipoꞌoro koꞌi suu koꞌi yne yne eipo ete te topyhuꞌat e. Ehepe yt heremo i maꞌato uheha pe ti tuwekuap uhemiit suu yn ni eipo ete e. Iꞌewyte ti mesup te ti eweikupteꞌen uimipoꞌoro atuꞌuka rakaria e. Taꞌi eiꞌywotꞌin ewywuaria eipe eweikupteꞌen e. Haꞌawynug hap totepyiwiaria te wẽtup ywania yn mesup te eweikupteꞌen. Yt uheso hin i uhytꞌiꞌin. Tupana miꞌapiheg kahato koꞌi aru eweikupteꞌen wuatꞌi eꞌat pe e. Katupono ehaꞌaseꞌiꞌin minug upi ewetunug ne e. Iꞌatusaipepiaria sese te ti eweikupteꞌen e Iesui toꞌauka teran haria pe."
51 Saꞌawyꞌi sese ti ahaꞌaseꞌi pot Atãu saꞌyru Apeu ehaꞌaseꞌi Kãi tiꞌauka toywyt Tupana mohey sese hat Apeu. Toipun kahato toywyt suu yi tote. Miꞌi hap ewy te Tupana mipoꞌoro koꞌi eweiꞌatuꞌuka e Iesui toꞌauka teran haria pe. Saꞌawyꞌi Tupana mipoꞌoro aseꞌi Sakaria eiꞌywotꞌin miꞌauka wo toĩneꞌen. Ipotpap kahato Tupana mõtypot hap etiat. Tupana mõtypot hap yat etiat turan toiwuk yne miitꞌin miium Tupana kapiat hawyi tuwẽtem Tupana ehamo turan eiꞌywotꞌin tiꞌauka raꞌyn Tupana mõtypot yat pe e. Taꞌi saꞌawyꞌiwuat Tupana mohey hat Apeu taꞌatuꞌauka iꞌewyte Tupana mipoꞌoro Sakaria taꞌatuꞌauka wy iꞌewyte iraniaꞌin Tupana mipoꞌoro koꞌi taꞌatuꞌatuꞌuka kahato eiꞌywotꞌin miꞌauka koꞌi tukupteꞌen e. Pyno mesup te ti eiperia eiꞌywotꞌin ewywuat eweikupteꞌen ne e Iesui toꞌauka haria pe."
52 Yt naku i wo kahato eipe miwan moherep haria ete are e. Eipe ti rat okenꞌypy pyhyp haria ewywuaria Tupana mienoi koꞌi ete are e. Eweikuap kahato Tupana ehay Musei mimoherep poꞌog torania kai. Iraniaꞌin tikuap teran Tupana etiat maꞌato yt ewehenoi hin i iraniaꞌin me e. Tupana kuap teran haria mesuwe tukupteꞌen maꞌato yt ewehoꞌokenhypꞌok hin i ikyꞌesat haria pe. Taꞌi muꞌap Tupana kapiat eweikuap wen maꞌato yt eweiwat i miꞌi upi iꞌewyte yt ewehenoi hin i iraniaꞌin me e. yt ewehenoi hin i muꞌap Tupana kuap hamo iꞌewyte yt eiwehytꞌok hin i wy mekewat okenꞌypy puo hawyi seke teran haria pysokpun haria eweikupteꞌen e Iesui — Uwe waku miꞌapiheg wo uweꞌin yt e haria morekuat piat haria pe."
53 Mio tã Iesui toꞌe hawyi iꞌatupyꞌahak sese Iesui ete nagnia ehay enoi haria iꞌewyte miwan enoi haria iꞌatupyꞌahak kahato mio tã e pote. Miꞌi hawyi apo apoꞌiꞌatuꞌe kahato at Iesui pe kat ehay kat ehay pirik kahato itote Iesui ete tuꞌuka teran haype. Taꞌatukyꞌesat sehay Iesui kaipyi iwemaꞌat hap iꞌauka hamuat hap taꞌatumõpyꞌahak teran Iesui hap maꞌato yt toiꞌaparap hin i towesat hap ete."
54 Miꞌi hawyi yt taꞌatuwaure hin i taꞌatupyꞌahak Iesui ete. Iꞌaparap hap taꞌatukyꞌesat haype taꞌatukat kahato. Taꞌatumaꞌat hap yn taꞌatukyꞌesat. Miꞌi pote migꞌi wo teran Iesui taꞌatusat iꞌypyryp wyi aikotã wamiri ewy tukupteꞌen Iesui pytyp teran hap ete iꞌaparap hap taꞌatukat kahato ihay kaipyi maꞌato ti yt taꞌatupuẽti i hawyi taꞌatuhenoi teran suraraꞌin miat iꞌauka Iesui iꞌaparap hap taꞌatukat hawyi maꞌato yt taꞌatunug kuap i katupono Iesui waku yn ihay waku yn tutunug mote.
"1 Miꞌi hawyi miitꞌin sem kahato teꞌeruwaꞌatunug Iesui ewawi taꞌatumoehãite hap taꞌatukyꞌesat kahato. Miꞌi pote toꞌopykit pykit neꞌi iꞌatu kahato hemig neran haria. Miꞌi hawyi Iesui toꞌe temiitꞌin me — Eiweꞌeg woꞌo Tupana ehay ran enoi haria pupi e. Miꞌiria typy sehay enoi haria e. — Uruto poꞌog urikuap Tupana ehay torania kai iꞌatuꞌe. Miꞌi hawyi — Waku kahato eipe iꞌatuꞌe taꞌatupotmuꞌeria pe maꞌato — Yt nakuaria i eipe e Tupana iꞌatuemimuꞌeria pe pytkai e. Taꞌatusuꞌat kahato Tupana wenãpin miwan miat wen maꞌato yt taꞌatunug hin i aikotã Tupana toꞌe hap ewy. — Waku kahato uruto iꞌatuꞌe miitꞌin me hawyi — Pywo ti rat waku kahato eipe e iraniaꞌin miꞌiria pe maꞌato — Yt naku i kahato eipe e i Tupana miꞌiria pe katupono Tupana piat ainãpin hap taꞌatusuꞌat kahato pytkai yt naku i kahato taꞌatunug migꞌi wo. Sehay ikahu kahato rakano taꞌatuhenoi wen maꞌato iꞌatuminug koꞌi yt naku i kahato e. Typy hẽku rakaria ewywuaria miꞌiria yt ewetunug neiꞌo miꞌiria ewywuat are. Taꞌi manĩ puk koꞌi ewywuat neꞌi miꞌi haria are e. Manĩ kurin kat ipyp takat watopag manĩ pakup we hawyi toimoꞌokpuk neꞌi ipakup takat e. Pyno eipe ti yt eiweꞌeg i pote iꞌatuminug saꞌag koꞌi timowato neꞌi aru yt naku i nug ehepiat hamo e. Pyno waku eiweꞌeg wo iꞌatuminug koꞌi ewywuat nug hap pupi are e katupono miꞌiria ti manĩ puk ewy meiũran ti eipe eiꞌewyte eweikupteꞌen miꞌiria ewy e."
2 Iꞌewyte yne huwy piat ewywuat iꞌatuminug koꞌi migꞌi wo iꞌatumiꞌapyhik koꞌi meiũran aru Tupana tiꞌatumoherep wuatꞌi ehamo e. Meiũran ti aru heremo kahato iꞌatuminug saꞌag migꞌi wo topyhuꞌat wuatꞌi mikuap mo are e."
3 Kat eweiꞌe som iꞌypyryp we meiũran ti aru Tupana timoherep wuatꞌi miitꞌin ehamo sio waku sio yt hap are e. Aikotã watimoherep ahehay ywaiti hap totepyi aheyparakai ywaiti hap kaipyi hap ewy toimoherep aru wuatꞌi miitꞌin minug saꞌag wuatꞌi miitꞌin minug wakuap tehay wo wuatꞌi miitꞌin ehamo wuatꞌi miitꞌin ikuap hamuat e. Aikotã morekuaria mipoꞌoro sehay ewywuat Tupana timoherep wuatꞌi ehamo iꞌatuminug saꞌag sio iꞌatminug wakuap e Iesui.
"4 Uiwyriaꞌin miitꞌin miat eiꞌauka hap pupi yt eweikenꞌẽ teiꞌo katupono eipiit auka hawyi yt kat i raꞌyn poꞌog taꞌatunug kuap ehete eiꞌauka hawyi."
5 Maꞌato Tupana pupi waku eweikenꞌẽ kahato katupono Miꞌi ti eipiit toiꞌauka kuap iꞌewyte toipugha kuap eipe aria koro pe aikope ehoꞌopot hap toĩneꞌen wuatꞌi eꞌat hawe e. Miꞌi pote waku Tupana pupi eweimõtypot kahato poꞌog poꞌog miitꞌin kai e."
6 Maꞌato Tupana aikyꞌe kahato e Iesui. Pywo kahato toiꞌatukyꞌe wuatꞌi miitꞌin. Miitꞌin yt uwe i mikyꞌe koꞌi toikyꞌe kahato e. Taꞌi miitꞌin kyꞌe kahato hat Uiꞌywot e. Poꞌog aikyꞌe iraniaꞌin aikyꞌe haria kai. Taꞌi ahetama pe watiweneru raꞌyn weitaria hit koꞌi haꞌup yt iwato hin i haꞌup typy ape kurin nakaria putꞌokꞌe 5 weita hit kyiꞌat hamo watoꞌe mesuwe yt haꞌup kahato rakat i miitꞌin wanẽtup hawe weita hit aimiꞌu apopyt watoꞌe. Yt kan hamo i weitaria miitꞌin iꞌatuꞌe maꞌato Tupana pyꞌa pe waku kahato yne tominug koꞌi e. Taꞌi toiꞌatukyꞌe kahato weitaria koꞌi e. Yt toiwaure hin i weitaria apykok hamo e Iesui."
7 Yt eweikenꞌẽ teiꞌo uiwyriaꞌin katupono eipe ti poꞌog kahato weitaria kai eikyꞌe Tupana e. Pyno aikuap kahato Tupana aikyꞌe haype are e. Taꞌi toikuap yne ahetiat e. Taꞌi toiꞌatukuap kahato yne ahepiat. Aipiit yne ete toikuap. Karania karania aiꞌasap koꞌi etiat toikuap yne. Wẽtup aiꞌasap taꞌat yi tote hawyi toikuap are. Miꞌi hap ewy aikuap Tupana e. Miꞌi pote yt naku i watokenꞌẽ miitꞌin pupi sio aiꞌauka sio yt hap pupi katupono aiꞌapykok kahato Aiꞌywot atipy piat e Iesui ahepe.
"8 Pywo areꞌe ehepe uwe uwe yt tokenꞌẽ i uimohey hap moherep hamo ahewanĩkaptia ehamo aiꞌauka teran haria pe miꞌi e hat piat — Uhemiit kahato miꞌi miit areꞌe kahato atipy pe Uiꞌywot pe e. Miꞌi miit piat yt aremõti hin i e. Uito areĩeneꞌen Eheykeꞌet Koro iꞌewyte Eikywyt Koro wuatꞌi eꞌat pe uimohey hap eweimoherep miitꞌin me — Uiꞌauka pote uiꞌauka maꞌato yt aremõti hin i Uimimohey moherep hamo e hat pe — Aimohey hat sese mekewat miit are Uiꞌywot sese atipy piat pe e Iesui."
9 Maꞌato — Yt atimohey i eweiꞌe iraniaꞌin me uhepiat — Uiꞌauka aru atimoherep Uheykeꞌet Wato Uikywyt Wato iꞌatuepe hawyi uiꞌauka hap pypi arekenꞌẽ eweiꞌe hawyi iꞌewyte Uito ahenoi Uiꞌywot Atipy piat iꞌewyte yne Tupana yatypiat ieĩneꞌen haria itotiaria pe mio tã e hat etiat — Yt Uimohey kahato hat i miꞌi miit areꞌe aru itotiaria pe e Iesui."
10 Pyno ehehay saꞌag uhetiat Eheykeꞌet Koro etiat Eikywyt Koro etiat iꞌewyte saꞌag ewetunug uhete miꞌi pe ehẽtup Tupana pe paaꞌeweiꞌe hap wywo pote Tupana tiwaure kuap eiminug saꞌag koꞌi uhetiat hap wen maꞌato wẽtup eiꞌe saꞌag hap Tupana yt tiwaure kuap i are. Karãpe Tupana Pãꞌãu toꞌe ehepe — Eweimohey ro Uhaꞌyru miꞌi hawyi eweiꞌe Tupana Pãꞌãu Wakuat pe — Eso eweiꞌe motoro yt atikyꞌesat i eꞌe hap katupono ahiag mẽpyt ri Emimoherep Iesui eweiꞌe saꞌag eipyꞌa pe Tupana Pãꞌãu Wakuat pe pote Tupana yt karãpe i waure wo eiꞌe hap saꞌag eipyꞌa piat Topãꞌãu miat eiꞌe hap etiat are e Iesui tuwepiat. Pyno eiweꞌeg woꞌo — Eso eiꞌe Tupana Pãꞌãu miat eimuꞌe turanuat uhepiat hap pupi katupono pywuat sehay yn tohenoi uhetiat e Iesui — En ni ahiag mẽpyt e haria pe.
"11 Uipotmuꞌeria meiũran ti aru eheropoꞌok teꞌeruwaꞌatunug hap kape Tupana mõtypot yat kape taꞌatuꞌakagnia pyꞌasetpiat — Miꞌiria yt naku i kahato rakaria taꞌatuꞌe hamo eimaꞌat sehay wuat eiꞌauka hamo eheroto surara kape e."
12 Miꞌi turan eheroto turan — Kat areꞌe aru atiꞌatuwesat yt eweiꞌe i teiꞌo eipyꞌa pe eiwanẽtup hawe are katupono aikowat wakuat wyti aru iꞌatuwesat hamuat Tupana Pãꞌãu henoi ehepe aru itote ihay aru toꞌe hap ok tã maꞌato eiwẽ pyi ihay e Iesui temiitꞌin me.
"13 Miꞌi hawyi wẽtup ok miitꞌin tok pyi toꞌe Iesui pe — Urumuꞌe hat e uiꞌywot wyti ikuꞌuro raꞌyn maꞌato uiꞌywot ekareꞌen yt kat i tutum uhepe maꞌato uheykeꞌet pe tutum yne hawyi mesup uheykeꞌet yt hoꞌoium neran hin i uhepe uiꞌywot powatꞌyp pãi — Uiano uiano areꞌe pytkai yt toipatꞌok hin i e. Miꞌi pote atikyꞌesat kahato ehay ro — Ehoꞌopatꞌok to eꞌywot ekat eywyt pe ere o uheykeꞌet pe e Iesui pe."
14 Miꞌi hawyi Iesui tiwesat — Are pãi Uito wyti yt atimõꞌẽ teran i eiꞌywot ekareꞌen koꞌi ehepe uhyt e. Yt ariot i mesuwat yi kape iraniaꞌin ekat mõꞌẽ hamo e. Pywo ti rat eweꞌeg wo o eheykeꞌet ekat kyꞌewi hap pupi areꞌe epe uhyt e. Tupana yt uipoꞌoro i mesuwe eꞌywot ekareꞌen mõꞌẽ hamo pãi e."
15 Mio tã toꞌe hawyi tohenoi yne itotiaria pe — Eiweꞌeg wo o meimuẽwat ehekareꞌen iwato kahato kyꞌe kahato hap pupi e. Uhekat kahato teran eweikyꞌesat maꞌato eheĩneꞌen hap sese yt eweikat hin i hawyi yt eweipuẽti i wyti aru ehekat wuatꞌi eꞌat piat hap e. Mesuwarotiat ehekareꞌen iwato kahato hap kaipyi yt eweipuẽti hin i eipyꞌa piat eimowepit hap sese hap e."
16 Miꞌi hawyi hãꞌãkap wuat tohenoi ahekat kyꞌewi hap etiat. Mio tã toꞌe Iesui — Saꞌawyꞌi so toĩneꞌen wẽtup ok iko iwato kahato rakat iꞌatuꞌe. Miꞌi hawyi so toiꞌatukoi kahato yne teꞌyi koro tote hawyi so tuwenug kahato raꞌyn manĩ itote iꞌatuꞌe."
17 Miꞌi hawyi so tutunug kahato uꞌi hawyi iꞌatu kahato uꞌi hyt ahyt koꞌi sem tutunug at kaꞌap hawyi — Aikotã som waku atunug aru e katupono Uheꞌuꞌi hyt ahyt kahato raꞌyn e so topyꞌa pe. Uiꞌyat koꞌi yne yt putꞌokꞌe hin i uheꞌuꞌi hyt ahyt ereko hamo e so. Pyno aikotã aru atunug aru e topyꞌa pe."
18 Miꞌi hawyi toꞌe tuwepe — Pyno atikuap taꞌyn aikotã waku uheꞌuꞌi hyt ahyt sem atimoheg wuatꞌi eꞌat pe e. Pyno waku atunug kahato uheꞌuꞌi hyt yat koro koꞌi hawyi waku uheyparakai sem itote atunug uheꞌuꞌi hyt ahyt sem koꞌi ereko hamo e so tuwepe. Pyno waku atiꞌatupugha uheꞌuꞌi yat pot koꞌi hawyi poꞌog iwato ikahu rakaria atiꞌatunug kahato uheꞌuꞌi hyt ahyt sem ereke hamo e so."
19 Miꞌi hawyi ti aru uimowepit hap toĩneꞌen wuatꞌi eꞌat pe katupono yt karãpe i aru yt uimiꞌu i hap toĩneꞌen uikai e so tuwepe topyꞌa pe tuwanẽtup hawe e. Taꞌi waku raꞌyn waku raꞌyn wuatꞌi eꞌat pe e. Uheꞌuꞌi iwato sese sakpo raꞌyn mesup waku pe raꞌyn aru areĩneꞌen pãi e so. Uiꞌok hap yn aru toĩneꞌen e. Miꞌi pote uheĩneꞌen hap waku pe areĩneꞌen uꞌi hyt ahyt sem pote e so topyꞌa pe tuwehum kahato tuwewawi haype. Mesup taꞌyn yne uimikyꞌesat ok tã wuatꞌi eꞌat pe atikyiꞌat kuap e so uꞌi saꞌup mo e so. Pyno waku uipohep taꞌyn wyti aru uipotpap hap koꞌi ete pyi hawyi uiwepit hap yn naꞌyn atikat hawyi arenuk at kaꞌap uimiereko iwato kahato e. Karania eꞌat kapiat neꞌi miꞌi raꞌyn uhekareꞌen e so topyꞌa pe e."
20 Miꞌi hawyi Tupana toꞌe tope atipy kaipyi — Yt eweꞌeg i kahato rasig e katupono mesup ewãtym wyti ekuꞌuro hap toĩneꞌen are e uꞌi wo hekat rakat pe. Miꞌi hawyi apuru uwe po pe ekareꞌen koꞌi sem topyhuꞌat e Tupana tekat iwato mohey hat pe e."
21 Mio tã e hãꞌãkap wuo tohenoi hawyi toꞌe itotiaria pe tomimuꞌeria pe — Miꞌi ewywuat teꞌeropyhuꞌat mesuwarotiaria taꞌatuekareꞌen etiat yn wehum haria e. Miꞌiria yt hekat rakaria i Tupana wanẽtup hawe e. Teꞌeruwanẽtup kahato taꞌatuekareꞌen ete hawyi iꞌatuwanẽtup hawe yt putꞌokꞌe i Tupana kapiat teꞌeruwanẽtup hamo e Iesui itotiaria waꞌatunug sok haria pe.
"22 Miꞌi hawyi Iesui henoi i raꞌyn topotmuꞌeria pe — Uiwyriaꞌin e yt naku i watuwanẽtup yn aimiꞌu mesuwarotiat kape e. Yt naku i aipiit piat ehesokpe koꞌi kape yn watuwanẽtup e."
23 Katupono aheĩneꞌen hap wuatꞌi eꞌat piat aimowepit hap wuatꞌi eꞌat piat yt tut i aimiꞌu iwato kahato hap kaipyi iꞌewyte aipainug hap kaipyi aimowepit hap yt tut i e. Aiwepit sese hap yt tut i ahesokpe aipainug hap kaipyi are e. Taꞌi aimiꞌu sese ahesokpe sese ti tut Tupana miium kaipyi are. Miꞌi ti poꞌog waku watikat aimiꞌu koꞌi kai ahesokpe koꞌi kai are e."
24 Eiwehaꞌat ro weitaria koꞌi kape e. Yt teꞌeruwemiꞌu koi kuap i wen maꞌato Tupana tiꞌatupoi kahato weitaria koꞌi are e. Iꞌewyte yt kat i uꞌi hyt koꞌi taꞌatuereko aito ewy maꞌato Tupana tiꞌatupoi kahato weitaria koꞌi yne eꞌat pe taꞌatuhewyry hap upi e. Pyno aito ti poꞌog poꞌog Tupana miꞌatukyꞌe koꞌi torania weitaria koꞌi kai are miꞌi pote aipoi kuap Tupana aikotã toipoi weitaria koꞌi ewy e Iesui."
25 Taꞌi pywo ti yt aitypore i pote yt kan hamo i watuwanẽtup koꞌi koꞌi katupono watuwanẽtup koꞌi koꞌi haty wo pytkai aipiit motypore hap yt kat i toĩneꞌen e. Iꞌewyte — Pyno areĩneꞌen motꞌi kahato mesuwat yi tote e hap kape watuwanẽtup at kaꞌap aimokenꞌẽ hap wywo pytkai aikuꞌuro hap eꞌat tut aru hawyi yt watoĩneꞌen kuap i wẽtup eꞌat poꞌog watuwanẽtup koꞌi koꞌi ahesaika hap wywo pytkai e."
26 Pyno aipiit motypore hap yt watunug kuap i aiwanẽtup koꞌi koꞌi hawuo hap ewy yt kan hamo i aiwanẽtup koꞌi koꞌi — Are pãi are an yt kat i uimiꞌu hawyi uikuꞌuro uhesyꞌat hap upi pãi an aiwanẽtup aimokenꞌẽ hap upi hap yt kan hamo i katupono yt aiwanẽtup koꞌi koꞌi hap kaipyi ti aimiꞌu koꞌi toĩneꞌen e. Yt naku i paaꞌwatoꞌe — Yt kat i uhesokpe hawyi uhatek hap sese toĩneꞌen hawyi uikuꞌuro aru yt kat i uhesokpe hawyi e hap upi yt naku i watuwanẽtup saꞌag aimogyt hap ewy e Iesui ahepe."
27 Uimohey haria e eiwehaꞌat ro gaꞌapy pohyt koꞌi kape katupono tuwepainug kahato gaꞌapy koꞌi ikahu kahato sese e. Taꞌi gaꞌapy yahig kape eiwehaꞌat ro katupono tuwepainug kahato i hupi itote ipohyt koꞌi wo ikahuria kahato rakaria miꞌiria e. Ikahu kahato poꞌog poꞌog ikahu saꞌayꞌiwuat ieĩneꞌen hat morekuat koro pot Sarumãu hekat rakat esokpe kahuria kahato rakat kai. Poꞌog poꞌog ikahu gaꞌapy piat pohyt koꞌi morekuat Sarumãu esokpe koꞌi kai e. Gaꞌapy piat pohyt koꞌi yt wepotpap haria i iꞌewyte yt teꞌeruwesokpe piꞌig kuap i haria tukupteꞌen maꞌato iꞌatuwepainug hap Tupana minug poꞌog ikahu ahesokpe kai are e."
28 Wuatꞌi eꞌat pe gaꞌapy piat koꞌi Tupana minug sokpe puo e. Gaꞌapy watitek hawyi mũkiꞌite ipohyt pap taꞌyn aiko watunug hawyi e. Miꞌi hawyi igag hawyi aheꞌaria wo iꞌyp koꞌi watunug e. Uimohey haria kat pote yt eweimohey i Tupana tikuap kahato ahesokpe nug hap aipainug hap e. Yt eweikuap i te apo aikotã aito poꞌog Tupana mikyꞌe koꞌi gaꞌapy pohyt koꞌi kai hap e. Pywo kahato Tupana tum kuap ahepe ahesokpe e."
29 Miꞌi tupono yt naku i watuwanẽtup koꞌi koꞌi yt kat i Tupana mohey hap wywo — Yt kat i uimiꞌu pote uikuꞌuro irane mũkiꞌite aiwanẽtup aimokenꞌẽ hap upi e. Yt naku i — Uhatek hawyi kat som aru atuꞌu rat kat som uimẽpyt miꞌu wo aikope pyi aru uhesokpe e hap kape yn yt naku i watuwanẽtup koꞌi koꞌi haty kahato aipyꞌa pe hap wywo yt kat i Tupana kapiat imohey hap wywo are e. Aikope pyi aru ahesapo hy pãi an yt naku i hawyi yt naku i aru e hap aimokenꞌẽ hap wywo yt naku i watuwanẽtup at kaꞌap aimokenꞌẽ hap ewywuat koꞌi hap upi e."
30 Taꞌi yt Tupana mohey haria i mekewat koꞌi koꞌi kape yn teꞌeruwanẽtup at kaꞌap teꞌerokenꞌẽ hap wywo yt kat i Tupana mohey hap wywo maꞌato aito — Pywo pe wyti Tupana ti aimoieĩneꞌen kahato kuap hat waku watoꞌe e."
31 Taꞌi Tupana tiꞌatukuap kahato ahesyꞌat yt ahesokpe i hap e. Taꞌi mesuwarotiat iraniaꞌin ywania Yt Tupana kuap i haria taꞌatuꞌok hap taꞌatusokpe hap taꞌatuꞌyatnug hap kape yn teꞌeruwanẽtup at kaꞌap maꞌato yt atikyꞌesat i eipe miꞌiria ewy eweikupteꞌen aikotã yt Tupana mohey i haria ewy e. Yt atikyꞌesat eipe miꞌiria ewy eweikupteꞌen uiwyriaꞌin maꞌato atikyꞌesat eweikat kahato aikotã pote waku miitꞌin muꞌe Tupana etiat hamuat hap kape e. Miꞌi hap kape yn poꞌog waku watuwanẽtup at kaꞌap hap atikyꞌesat e. Miꞌi hap ti watunug mote watipuẽti kahato iraniaꞌin aimikyꞌesat koꞌi Tupana po pyi mekewat aiꞌok hap aiꞌyat koꞌi ahesokpe hap koꞌi wy e. Miꞌi hawyi waku eweiwanẽtup aikotã Tupana topyhuꞌat Wuatꞌi Ywania Porekuat nuat hap kape are e. Miꞌi hap eweikat poꞌog mesuwarotiat koꞌi kai hawyi putꞌokꞌe aru ehepe eipoityro hap mesuwarotiat hap koꞌi eimoieĩneꞌen hap koꞌi eimiꞌu eiꞌyat eisapo hy eheꞌyni eimikoi ehesokpe koꞌi hawyi Tupana mipoityro koꞌi eweikupteꞌen ipo pyi are e Iesui ahepe.
"32 Miꞌi hawyi Iesui toꞌe tomohey haria pe — Uihũria koꞌi ewywuat no eipe are e. Yt typyꞌi kahato i eipe maꞌato yt eweikenꞌẽ teiꞌo katupono Tupana einug neran morekuaria wo karãpe Tupana topyhuꞌat Wuatꞌi Miitꞌin Morekuat nuat hap eꞌat pe e."
33 Waku watiweneru ahekareꞌen miꞌi hawyi waku ahekareꞌen saꞌup kaipywiat waku wahoꞌoium ahekat yt hekat i rakaria pe hatek takaria pe are e. Miꞌi watunug hawyi ahekareꞌen sese iwato kahato toĩneꞌen atipy pe wuatꞌi eꞌat pe e. Miꞌi tote ahekat sese mohag hap toĩneꞌen aheiam yt karãpe i ipotꞌi rakat are e. Yt karãpe i ikahuro ahekat itote e. Iꞌewyte seroꞌok eharia yt tuwehytꞌok kuap i itote yt uwe i itote aipohari rakaria are e. Iꞌewyte ahekareꞌen u haria koꞌi apeꞌi koꞌi sari koꞌi nupiꞌa koꞌi wẽkiꞌa ahekat u haria yt uwe i itote atipy pe e."
34 Ahekareꞌen atipy pe pote iꞌewyte eiwanẽtup hap aipyꞌa piat iꞌewyte tukupteꞌen itote maꞌato ehekareꞌen mesuwarotiat yn tukupteꞌen pote iꞌewyte eikyꞌe hap eiwanẽtup hap eipyꞌa piat toĩneꞌen wy mesuwarotiat koꞌi ete yn e. Watuwehaꞌat kahato aimikyꞌe koꞌi kyꞌewi hap kape are e. Pywo kahato aikope ahekat toĩneꞌen hap kape aiwewanẽtup hap iꞌewyte toĩneꞌen kahato are e. Aimikyꞌe kape yn aheha toĩneꞌen aiwanẽtup hawe are e Iesui ahepe.
"35 Miꞌi hawyi wẽtup sehay Iesui henoi ahepe itote. Mio tã e — Waku woꞌoeropat haria ewywuat watopyhuꞌat e. Mesuwarotiaria tikyꞌesat kahato taꞌatueropat hap waku kahato rakat e. Waku Tupana eropat kahato haria watoĩneꞌen are e. Taꞌi ahetama pe karãpe morekuaria tuwat taꞌatuetawa pyi taꞌatuꞌatoiat taꞌatuꞌyat pe surara akag iꞌatuꞌyat piaria apykok hamo. — Eweꞌeg wo o uiꞌyat apykok hap ete e tesurara akag me. Araꞌaipok hawyi saꞌup iwato atum epe mehĩ e morekuaria taꞌatuꞌyat piaria apykok haria pe. Miꞌi hawyi tuwat wẽtup tama kape hawyi waku yne hawyi teꞌeraꞌaipok taꞌatuꞌyat kape taꞌatumẽpytꞌin kape. Miꞌi hawyi waku itote yne taꞌatuꞌyat piaria iꞌatuwepit itote hawyi morekuaria timõtypot kahato taꞌatuꞌyat piaria apykok haria. — Waku kahato ti rat en uhyt mana e toꞌyat apykok haria pe e. Pyno waku watukupteꞌen Tupana yat piaria apykok hat ewy e. Waku surara akag ewywuat aheropat Aipotypot Tupana e. Aikotã ipotpap takaria ariãty wywo wãtym muat ipotpap yat piaria poi hamo mohag ium hamo aria nug hamo haria ewywuat waku waheropat Tupana mẽpytꞌin e. Waku wateropat wãtym muo rakaria ewy haty pytkai yt watoket pytkai i waku waheropat kahato Aiꞌakag emiitꞌin taꞌatukyꞌe hap wywo are e. Aikotã hesaika rakat ipiit sakup wywo rakat ewy waku watuwepotpap Tupana mẽpytꞌin eropat hap upi e. Aikotã aheropat haria wãtym muo taꞌatupag ariãty aiꞌyat pe miꞌi hawyi yne heremo itote miꞌi hap ewywuat waku watuwepotpap e. Waku aheꞌariãty imehit rakat ewy yt kat i iꞌytyk hap miꞌi ete hap ewy watuwepotpap Tupana mẽpytꞌin kyꞌe hap yn ahete e."
36 Taꞌi ahetama puo morekuaria eropat haria hekatup kahato morekuat ut hap at kaꞌap taꞌatuhekatup katupono putꞌokꞌe morekuat turan meremo taꞌatuhoꞌoꞌokenhyp teran haype e. Miꞌi hawyi at kaꞌap taꞌatuhekatup taꞌatumorekuat ut hap e. Miꞌi hawyi morekuat putꞌokꞌe toꞌokenꞌypyke hawyi meremo taꞌatuhoꞌoꞌokenhypꞌok teran hawyi taꞌatupysei aheko ewy waku hap ewy hawyi taꞌatupoi hawyi taꞌatumõtypot kahato taꞌatukyꞌe taꞌatuporekuat taꞌatupotpap hap ete e. Miꞌi haria ewywuat waku watukupteꞌen are e katupono tut irane Tupana akotã morekuat tut hoꞌokyiꞌat hap ienuk wato hap eꞌat kape hap ewy e. Miꞌi hawyi woꞌokyiꞌat hap enuk hap kapiat hut turan — Ariot raꞌyn eweiꞌokenhypꞌok to e haty wo toꞌyat koro ete hawyi meremo heropat haria tuwat hawyi — Ereke ereke Urupotypot iꞌatuꞌe hawyi teke e."
37 Heropat haria yt teꞌeroket hin i teꞌeropyhuꞌat taꞌatukaꞌiwat putꞌokꞌe turan iꞌatuwepit kahato yt teꞌeroket i maꞌato taꞌatukat kaꞌap sio tut sio yt Aiꞌakag iꞌatuꞌe hap ete e. Miꞌi hawyi putꞌokꞌe hawyi iꞌatukaꞌiwat koro piit ete taꞌatuesokpepag hawyi — Eraꞌapyk o mehĩ mimi iꞌatuꞌe taꞌatuꞌakag sese pote e. Maꞌato karãpe teropat haria yt naku i rakaria ket kai neꞌi putꞌokꞌe morekuat pote teꞌeruwemõti kahato. Miꞌi hawyi okenꞌypy ete ihay taꞌatukuap taꞌatuket turanuat pote teꞌeruwemõti kahato maꞌato heropat hap etiat taꞌatupotpap turanuat pote teꞌeruwehum kahato taꞌatuetuꞌisa ut hap ete e. Miꞌi hap ewy waku watuwepotpap e. Miꞌi turan Aipotypot putꞌokꞌe pote yt mesuwarotiat morekuat minug ewy hin i tutunug Tupana are e. — Uheropat ro uheropat ro iꞌatuꞌe haty wo mesuwarotiaria morekuaria e. Maꞌato Aiꞌakag Tupana putꞌokꞌe hawyi — Worohoꞌokyꞌe kahato e yn ahepe hawyi aheropat hat ewy topyhuꞌat itote hawyi toihep tesokpe ikahu kahato rakat morekuat nuat esokpe miꞌi te pagꞌe topiit etewuat eropat hat esokpe ewywuat miꞌi hawyi toꞌe aru ahepe — Saꞌawyꞌi uheropat kahato haria waku kahato rakaria eipe e ahepe. Miꞌi pote koitywy areĩneꞌen eheropat hat eipotpap nug hat ewy areĩneꞌen e aru ahepe hawyi — Eraꞌapyk to uheyparakai ete hawyi worohoꞌopoi yne ehenuk hap koro ikahu kahato e aru Ahetuꞌisa Koro Tupana ahepe. — Taꞌi waku kahato eipe katupono yt eiket turanuat i putꞌokꞌare pote e."
38 Pyno waku watopyhuꞌat iweꞌeg kahato rakaria ewy watuwepotpap Aikaꞌiwat potpap nug hap ete uhytꞌiꞌin manaꞌin e Iesui katupono yt eweikuap hin i karãmuo putꞌokꞌe Aiꞌakag Koro hap sio ihotꞌok puo sio wãtymꞌi sio wãtym hake sio atposake turan hap yt eweikuap hin i e. Pyno waku pe kahato watoĩneꞌen putꞌokꞌe Aiꞌywot Tupana yt watoket i te turan hap e Iesui temiitꞌin me ahepe."
39 Pyno waku wateropat kahato katupono yt pya hin i putꞌokꞌe hamuat Wuatꞌi Potypot Nuat hap. Miꞌi tupono waku wateropat kahato aikotã — Putꞌokꞌe irane Ahetuꞌisa e haria ewy. Waku watiꞌarymary yne putꞌokꞌe turan hap atikyꞌesat e haria ewy katupono karãpe Aikaꞌiwat aipok hap kat eꞌat pe turan kat eꞌat pe turan hap yt watikuap hin i pote e. Taꞌi tut wyti aru aikotã seroꞌokꞌe hap tut hap ewy yt uwe i ikuap hap ewy e. Mesuwarote yt watikuap hin i karãpe putꞌokꞌe seroꞌokꞌe hat katupono migꞌi wo seroꞌokꞌe haria tõꞌẽ hap ewy. miꞌi tupono waku aiweꞌeg wo kahato seroꞌokꞌe hat hap pupi hap ewy katupono tuwehytꞌok aiꞌyat pe yt iheg i rakat pe meremo aheroꞌok hamo ahekareꞌen koꞌi pohari hamo. Maꞌato aiweꞌeg wuat pote yt aheroꞌok kuap i miꞌi hap ewy kahato. Waku watukupteꞌen suraraꞌin ewywuat haria teꞌerahaꞌat at kaꞌap takaria ewy miꞌi pote karãpe Eikaꞌiwat putꞌokꞌe aru hawyi meremo eweikuap uhut hap mekewat suraraꞌin ewywuat uhekatup pote are e."
40 Uito areĩneꞌen Wuatꞌi Miitꞌin Eykeꞌet wo Wuatꞌi Miitꞌin Kywyt wo miꞌi pote ariot i te aru mesuwat yi kape are. Maꞌato mekewat uhut hap eꞌat pe yt uwe mikuap mo i ariot are. Mekewat uhut hap eꞌat yt iꞌatu hin i uhekatup haria tukupteꞌen e. Mekewat eꞌat pe — Yt tut i iraꞌyn poꞌog Aikaꞌiwat iꞌatuꞌe haria ahyt tukupteꞌen are. — Yt tut i poꞌog mesuwat yi kape Aikaꞌiwat e haria tukupteꞌen hap eꞌat pe aru ariot aikotã seroꞌokꞌe hat ut hap ewy e Iesui ahepe tomohey haria pe.
"41 Miꞌi e hap tohenoi hawyi ipotmuꞌe Peteru apoꞌe Iesui pe — Urukaꞌiwat e mekewat sehay iãꞌãkap ehay uwe pe ehenoi e sio uruto epotmuꞌeria piat muꞌe hano sio yne miitꞌin mesuwat yi totiaria muꞌe hamo ehenoi e."
42 Yt uruhekatup i apuru eut hap kape sio iraniaꞌin yt emohey i haria kape mio tã ere e Peteru Iesui pe. Miꞌi hawyi Iesui tiwesat — Pyno ahenoi uwe pe ahenoi mekewat uhehay iãꞌãkap. Karãpe mekewat morekuat toto turan tesurara akag po pe iweꞌeg kahato rakat po pe totoiat torania toꞌyatpiaria sem iꞌewyte tomẽpytꞌin hawyi — Etiꞌatuꞌapykok o uiꞌyat piaria areto hap turan e tope. Iꞌewyte etiꞌatupoꞌoro miitꞌin mesuwe iꞌatupoi hamo iꞌatuꞌapykok kahato hamo e tesurara akag me e. Miꞌi surara akag ni uimohey haria apykok haria ewywuat kahato areꞌe uhehay iãꞌãkap upi e. Miꞌi pote eweꞌeg wo uimohey haria apykok hap pupi are ehepe e. Taꞌi uheropat haria sese pe mio tã are einãpin hamuat katupono atikyꞌesat kahato eiperia aikotã morekuat eropat haria powyro kahato sese rakaria ewy hap atikyꞌesat areto turan e."
43 Atikyꞌesat kahato uhemiit apykok haria powyro kahato rakaria aikotã morekuat eropat haria hãpyk sese rakaria ewy hap e."
44 Miꞌi tã ewywuat eweikupteꞌen turan ariot pote worohoꞌonug eipe morekuaria wo uhetama pakup we. Uhekat yne yne eiwano topyhuꞌat e. Pywo pe miitꞌin kyꞌe hap upi eweiꞌapykok uimohey haria pote — Pyno waku kahato en wuatꞌi uhemiit akag wo hap atikyꞌesat areꞌe aru e. — Atikuap taꞌyn uimohey haria poi hãpyk kahato hap kaipyi uimohey haria kyꞌe hap kaipyi worohoꞌokuap eipe waku kahato rakaria wo eweikupteꞌen uheropat haria akag wo koꞌi areꞌe aru uimikyꞌesat ewy uimohey haria powyro kahato rakaria pe e. Miꞌiria ewywuat Tupana mimõtypot sese koꞌi tukupteꞌen aru wuatꞌi eꞌat pe uhut hawyi e."
45 Maꞌato iraniaꞌin uheropat haria maꞌat haria yt iweꞌeg nakaria i miꞌi haria pupi aremõti kahato uhut hap eꞌat pe e. Katupono — Aikaꞌiwat yt tut irane i raꞌyn miꞌi tupono waku yt naku i watuwenug e haria e hamo taꞌatumaꞌat uimohey haria. — Taꞌi yt tut i som katupono toĩneꞌen motꞌi itote iatuꞌe uhut hap ete. Pyno waku watuꞌu mahy aimopẽꞌã hamo yn waku iꞌatuꞌe saꞌag. Waku watiꞌatuꞌahyk iraniaꞌin heropat haria iꞌatuꞌe. Waku watuꞌuka hemiitꞌin ete uhytꞌiꞌin manaꞌin koꞌi ete iꞌatuꞌe aru. Waku mahy ete watuwenuk iꞌatuꞌe katupono yt tut hamuat i raꞌyn mesup wote toĩneꞌen motꞌi itote. Waku aimopẽꞌã yn hap wywo waku watoĩneꞌen iꞌatuꞌe ti aru uheropat haria akag koꞌi yt iweꞌeg i sese rakaria e."
46 Yt taꞌatumohey hin i aru Taꞌatukaꞌiwat putꞌokꞌe hamuat hap maꞌato mio tã taꞌatuꞌe turan sese putꞌokꞌare i raꞌyn are e. Karãpe putꞌokꞌare hawyi mekewat uhemiitꞌin maꞌat haria atiꞌatuꞌapiheg apiheg kahato itote e. Miꞌi hawyi — Yt naku i kahato eipe areꞌe aru iꞌatuepe hawyi — Motoro pya pya uikai hawyi eweikupteꞌen aikope yt uimohey haria i tukupteꞌen hap tote areꞌe aru uimohey apykok haria pe uimohey haria maꞌat haria pe. Miꞌi hawyi atiꞌatuꞌokpok kyse wo hawyi atiꞌatumokuꞌi iꞌatupiit koꞌi uimohey haria apykok haria saꞌag nakaria e Iesui."
47 Pywo pe areꞌe heropat hat ikuap kahato kat koꞌi kat koꞌi Tokaꞌiwat Tupana mikyꞌesat koꞌi wen maꞌato yt tutunug i pote miꞌi hat wyti Ikaꞌiwat tipokpok kahato aru taꞌaipok hawyi are e."
48 Maꞌato uheropat hat yt ikuap i kahato kat som Tokaꞌiwat mikyꞌesat hawyi miꞌi hap yt inug i miꞌi hat iꞌewyte Ikaꞌiwat tiꞌpokpok aru maꞌato yt kahato i aikotã toipokpok teropat hat ikuap kahato pytkai yt tutunug i Tokaꞌiwat mikyꞌesat hap ewy katupono yt tuwepyi i toiꞌaparap e. Maꞌato waku watukupteꞌen heropat waku rakaria yne Aikaꞌiwat mikyꞌesat koꞌi aimikuap ok tã nug haria e. Miꞌi hap ewy Aikaꞌiwat tikyꞌesat kahato e. Pyno karãpe wẽtup ok pe ikaꞌiwat tum iwato kahato teropat hap miꞌi hat kaipyi ti toikyꞌesat iwato hap poꞌog miꞌi teropat hat pote e. Pyno poꞌog poꞌog Tupana timoherep ahepe tomikyꞌesat watunug hap koꞌi tomiꞌairoria aito pote. Pyno waku watunug tomikyꞌesat tomimoherep ahepe aimohey haype pote. Waku watunug imikyꞌesat hap ok tã tomowepit hap e. Maꞌato yt watunug i toꞌe ahepe hap ewy pote poꞌog watiꞌaparap iraniaꞌin kai katupono watikuap imikyꞌesat pytkai yt watunug i hawyi pote are e. Watunug imikyꞌesat hawyi tuwehum kahato ahowawi hawyi poꞌog toimoherep ahepe tomikyꞌesat koꞌi maꞌato yt pote yt aimohey kuap i e Iesui temiitꞌin me ahepe.
"49 Miꞌi hawyi Iesui toꞌe ahepe — Pyno ahenoi teran ehepe uhetiat e. Uito ti aria ewywuat yt naku i nug hap yne mesuwat yi tote wuk hamo e. Aikotã aria wy Uito aikotã watiwuk aiko hap ewy wẽtup aria aipo piat hap kaipyi watiwuk yne e. Saꞌawyꞌi yt iwato hin i aria itote maꞌato watopag aria itote hawyi tutuꞌu yne. Iwato kahato aria itote hawyi wuk wukꞌe itote hawyi ikahu hawyi yt kat i moi yt kat i iꞌanam yt kat i saꞌag tutuꞌu kahato hawyi waku pe amikoi koꞌi hamo e. Uito ti mekewat aria ewywuat areĩneꞌen mesuwat yi tote wuatꞌi saꞌag miitꞌin wanẽtup hawe wuk hamo e. Aria ewywuat ti Uito maꞌato uiko yt atiwuk i te maꞌato atiwuk teran haype e."
50 Katupono ahoꞌopot hap ariaꞌyp posak etiat yt i te wen maꞌato miꞌi kape arewanẽtup kahato e. Saꞌawyꞌi ahetꞌok hat Iuwãu uhetꞌok taꞌyn yꞌy wo maꞌato wẽtup ok uhetꞌok hap toĩneꞌen ne miꞌi ti aria ewywuat uimosoꞌopot hap sese are."
51 Uimohey haria yt naku i aru topyhuꞌat ahete pãi e. Pywo ti rat yt ariot i mesuwarotiat kape woꞌowese hap erut hamo maꞌato ariot hawyi woꞌotuꞌuka kahato hap yn sehay topyhuꞌat e. Uhehay pun haria tiꞌatuꞌatuꞌuka teran haype uhehay mohey haria ete e. — Yt pywo pe ihay iꞌatuꞌe yn uhehay ete eimimoherep ete hawyi yt iꞌatuwese kahato ehete uhehay moherep haria eipe pote e. Pyno yt eweiwanẽtup teiꞌo eipyꞌa pe meiũran aru yne mesuwarote woꞌowese haria tukupteꞌen hap kape e. Yt eiwanẽtup teiꞌo miitꞌin iꞌatuwese kahato hap uhehay kape eipyꞌa pe are e. Yt karãpe i aru yne miit woꞌowese haria tukupteꞌen katupono poꞌog iꞌatupyꞌahak aru uhehay moherep haria ete ahewanĩkaptia are e. Aikotã surara sese tipatꞌok kuap miit piit kyseꞌyp wo hap ewy miꞌi hap ewy uhehay tiꞌatupatꞌok miitꞌin wẽtup kai uimohey haria hawyi wẽtup kai yt uimohey haria i e. Pyno miitꞌin woꞌopatꞌok hat ewy areĩneꞌen e. Wẽtup kai uhehay upiaria tukupteꞌen hawyi wẽtup kai yt iꞌatupap i uhehay upiaria e."
52 Miꞌi hawyi ti aru 5 ok wẽtup yat piaria gupteꞌen haria meiũran aru yt toꞌowese hin i toꞌopatꞌok uimohey hawyi are e. Miꞌi hawyi toꞌopatꞌok patꞌok haria wo tukupteꞌen wẽtup yat pe e. Uimohey haria iwese kahato pytkai iraniaꞌin mekewat yat piaria yt iꞌatuwese hin i itote wẽtup ywania pytkai e. Typy ok myeꞌym ok ete sio myeꞌym ok typy ok ete uimohey haria ete ipatꞌok hawyi — Wãiꞌiatuꞌe iraniaꞌin uimohey haria mohit hamo aru e."
53 Miꞌi turan miitꞌin tuꞌuka teran ehete uimohey haria eipe hawyi e. Taꞌi eiꞌywotꞌin yt iꞌatuwese hin i ehete uimohey haria eipe hawyi e. Ehaꞌyruꞌin ehakiꞌytꞌin iꞌewyte yt iꞌatuwese hin i ehete uimohey eipe hawyi eimẽpytꞌin pytkai are e. Iꞌewyte eity ipyꞌahak ehete topyhuꞌat uimohey hawyi eipe tomẽpytꞌin eipe pytkai e. Iꞌewyte eimẽpytꞌin yt iꞌatuwese i ehepe uimohey hawyi taꞌatutyꞌin taꞌatuꞌywotꞌin eipe pytkai are e. Ehakituꞌin iꞌewyte yt iꞌatuwese i ehete taꞌatumimohapyꞌap koꞌi pytkai eipe e. Miꞌi hawyi getap kaꞌiwat yt iwese hin i tosaꞌyru ete tosakiꞌyt ete tosaꞌyru tosakiꞌyt uimohey hano raꞌyn mote e. Taꞌi ariot pote miitꞌin toꞌopatꞌok kahato wyti aru uimohey haria ete yt iꞌatuwese hin i iraniaꞌin mesuwarotiaria eipe eiwese kahato pytkai e. Yt kat i aru woꞌowese hap sese mesuwe aru are e Iesui ahepe tomohey haria pe.
"54 Miꞌi hawyi poꞌog Iesui tohenoi miitꞌin sem itotiaria pe — Uhekatuwyriaꞌin e mesuwarotiaria tikuap kahato iꞌaman ut irane hap teꞌerahaꞌat at hun kape — Meiẽ iꞌaman hamuat iꞌatuꞌe. At wẽtem hap kaipyi iꞌaman tut iꞌatuꞌe miꞌi hawyi iꞌatuꞌe hap ewy iꞌaman tut kahato. — Meiũpe ywyhig at ẽtyhot hap aũka hap koꞌi miꞌi pote iꞌaman irane iꞌatuꞌe ahetama pe hawyi iꞌatuꞌe hap ewy iꞌaman naꞌyn tut e."
55 Taꞌi kahato atipy ihyrypꞌi kahato hap miꞌi pote mesuwiaria iũe eꞌat hakup irane mesup iꞌatuꞌe hawyi iꞌatuꞌe hap ewy putꞌokꞌe eꞌat kahu hap e."
56 Mesuwarotiaria tikuap kahato iꞌaman ut hap sio yt hap teꞌerahaꞌat atipy kape hawyi taꞌatukuap maꞌato mesuwarotiaria taꞌatuieĩneꞌen wuatꞌi eꞌat piat hap kape yt teꞌeruwanẽtup teran hin i e. Taꞌi miꞌiria tikuap aikotã aru iꞌaman sio at waku hap maꞌato uwe Uito hap yt taꞌatukuap hin i. Taꞌatukuap uhehay koꞌi kape taꞌatuwanẽtup pytkai yt uikuap i te uwe sese Uito e. Teꞌeraꞌakasa kahato uiminug yt miitꞌin eminug kuap i iwato rakat koꞌi kape pytkai yt uikuap i te uwe Uito e hap kape yt teꞌeruwanẽtup teren hin i teꞌerahaꞌat kahato uhowawi yt uimohey i te rakaria mesuwarotiaria e. Yt ihapytig i rakaria Tupana kape yt kat i iꞌatueha rakaria ewywuaria pote e Iesui miitꞌin sem itotiaria pe.
"57 Miꞌi hawyi poꞌog toꞌe Iesui itotiaria pe — Kat poteĩ yt eiwanẽtup teran i uwe Uito sese e hap kape e. Kat pote yt eiwanẽtup sio Uito waku sio yt hap kape e. Eiwoꞌokuap uwe waku uwe yt hap kape meremo eiwoꞌokuap yne eiwoꞌomohey hap ete uwe waku uwe yt naku i watomohey maꞌato uhetiat uimohey hap kape yt eiwewanẽtup teran hin i wuatꞌi atunug waku ehehamo pytkai are.
"58 Uimohey haria wẽtup sehay ahenoi teran ehepe — Karãpe ehewanĩkaptia aheroto suraraꞌin po pe Morekuat kape aiꞌauka hamo aiꞌpyhik hamo waku watikat kahato aiwenõꞌẽ i aiwanĩkaptia popywiat hamuat are e. Miꞌi hap eꞌat pe aiꞌauka teran pote waku watoĩneꞌen iweꞌeg kahato rakano iꞌatupyꞌasetpe miꞌi hawyi muꞌap upi waku watikat kahato muꞌap aiwetopopy ahewanĩkaptia po pywiat hap are. Yt naku i watuwat morekuat koro kape aiꞌauka teran haria upi katupono itote meremo ahum morekuat koro pe hawyi morekuat — Yt naku i en e hawyi ahum tesuraraꞌin akag pe hawyi surara akag aipag iheg me kat aiwoꞌopyhik hawe e."
59 Miꞌi hawyi woꞌopyhik hawe watukupteꞌen at kaꞌap hawyi aikotã aru watuwenõꞌẽ mekewat woꞌopyhik hap saꞌag myi e. Taꞌi itote yt uwe i tuwẽtem kuap i e. Miꞌi tote wahoꞌopot kahato mekewat saꞌup iwato ium hamo hawyi aiꞌyat toiweneru aiko koꞌi aimikoi koꞌi aimẽpytꞌin koꞌi totat temiitꞌin nuat aheharyꞌi totat towanuat ahemiitꞌin torania toipoꞌoro topotpap nug hamo hawyi ahekat koꞌi toiꞌatuweneru yne saꞌup sat hamo. Miꞌi hawyi yne aiwanuat morekuat nuat hawyi watuwenõꞌẽ aipyhik hap kaipywiat hawyi — Waku raꞌyn motoro pya mesuwepyi e ahepe sio meremo woroꞌauka en aru e ahepe. Miꞌi tupono waku poꞌog ahewanĩkaptia meremo watunug aiwyriaꞌin sese wo muꞌap upi eheroto suraraꞌin miat morekuat kape turan are e Iesui temiitꞌin me ahepe.
"1 Iesui tiꞌatumuꞌe itotiaria turan iraniaꞌin itotiaria teꞌeroꞌe Iesui pe — Mehĩ iꞌatuꞌe wanĩkaptia mipoꞌoro aiporekuat nuat mekewat Piratu e hap het rakat yt naku i kahato tutunug katupono gaꞌatpo ti ahetama Karireira piaria morekuat Piratu timoma kahato iꞌatuꞌe. Morekuat totat ahemiitꞌin hawyi toiwuk Tupana mõtypot yat pe iꞌatuꞌe. Miꞌi hawyi totopag mekewat iꞌatusuu at hap Tupana mõtypot yat piat yparakai tote mekewat aihũria suu wuk hap eyparakai tote aihũ watum hawyi watiwuk Tupana mõtypot hamuat hap tote iꞌatuꞌe Iesui pe."
2 Miꞌi hawyi Iesui toꞌe iꞌatuepe — Pyno uruto poꞌog morekuat Piratu miꞌatuꞌuka koꞌi kai eweiꞌe. Yt karãpe i urutunug saꞌag imiꞌatuꞌuka koꞌi minug ewywuat eweiꞌe. Miꞌi pote Tupana miꞌapiheg koꞌi wuaria tukupteꞌen miꞌiria aiꞌywania eweiꞌe eiwoꞌope e Iesui."
3 Maꞌato pywo pe ti areꞌe ehepe eiperia ti wy iꞌewyte yt nakuaria i kahato eweikupteꞌen are. Gaꞌatpo eiꞌywaniaria morekuat Piratu tiꞌatuꞌuka kahato yi Karireira piaria. Yt naku hin i ti ipap hap eweiꞌe. Yt ikahu hin i iꞌatukuꞌuro hap eweiꞌe e. Miꞌi hap ewy ti aru eweipap yt uimohey i eipe pote e. Maꞌato wuatꞌi eꞌat pe ti aru hoꞌopot hap eiwanuat topyhuꞌat eiwano e. Maꞌato yt paaꞌeweiꞌe i yt uimohey i hap ete pote yt naku i pe wuatꞌi eꞌat pe eweikupteꞌen poꞌog yt naku i morekuat Piratu miꞌauka koꞌi hoꞌopot hap kai are."
4 Taꞌi saꞌawyꞌi sese 18 surara topap yne taꞌatuꞌyat nu kawiat ywaiti rakat taꞌat iꞌatuepiit ete hawyi yt naku i eweiꞌe. Miꞌi hawyi suraraꞌin gupteꞌen haria topap yne nu yat taꞌat iꞌatuete hawyi. Iꞌatukuꞌuro hap yt ikahu hin i eweiꞌe. Miꞌi pote eweiꞌe eiwoꞌope — Eweikuap kat pote mekewat 18 surara topap nu miꞌatuꞌuka koꞌi eweiꞌe. Taꞌi suraraꞌin yt naku i nug kahato haria pote ti Tupana tiꞌatuꞌapiheg sese miꞌiria eweiꞌe eiwoꞌope. Taꞌi poꞌog tawa Ierusarẽi miaria kai yt naku i nug haria miꞌiria pote Tupana tiꞌatumoma yne eweiꞌe eiwoꞌope."
5 Maꞌato pywo pe areꞌe ehepe meiũran ti aru eipe poꞌog eweipap miꞌiria kai poꞌog yt naku i areꞌe. Eikuꞌuro hap poꞌog yt ikahu i miꞌiria kuꞌuro hap kai. Katupono wuatꞌi eꞌat piat eikuꞌuro hap topyhuꞌat yt ikahu hin i. Maꞌato paaꞌeweiꞌe yt uimohey i hap ete hawyi miꞌi hawyi uimohey haria wo eweikupteꞌen hawyi waku puo eweikupteꞌen wuatꞌi eꞌat pe e Iesui tomohey hap pun haria pe.
"6 Miꞌi hawyi Iesui henoi hãꞌãkap wo iꞌatuepe. — Wẽtup ok so toto tomikoi ypia wato hap kape e. Saꞌawyꞌi warana ypia pyꞌasetpe Wiku yp toĩneꞌen itote hawyi toto mekewat tomikoi Wiku yp kape hawyi tohoꞌokat Wiku saat tohoꞌohep hamo. Maꞌato putꞌoktoꞌe hawyi so maꞌato iꞌyhop yn toĩneꞌen itote ihãite kahato. Maꞌato yt kat i haat ipoi hamo. Yt wẽtup i haat toipuẽti tomiꞌu wo."
7 Miꞌi hawyi toikaykay tuwewawi teropat hat tomikoi ypia apykok hat — Uhyt e gaꞌatpuat gaꞌatpuat eꞌat ariot saꞌawyꞌi meiũwat yp kape uipoi hap kat hamo maꞌato yt kat i atipuẽti te e so. Miꞌi hawyi gaꞌatpo eꞌat iꞌewyte haat hap eꞌat raꞌyn turan ariot i maꞌato iꞌewyte iꞌyhop yn ne atipuẽti yt uipoi hin i uhesyꞌat hawyi. Koran ariot i hawyi heꞌat raꞌyn maꞌato araꞌakasa hawyi yt uipoi hin i hat mesuwat uimikoi Wiku yp e. Pyno uhyt etiꞌyppun no meiũwat yp ywyhop mo e. Kat pote uheꞌyi u hat toĩneꞌen maꞌato yt uipoi hat i e. Miꞌi hawyi waku wẽtup i watikoi mesuwat yi aikope toĩneꞌen mesup Wiku yp hap tote e."
8 Mio tã e pote — Yt uhyt e mikoi ypia apykok hat. Yt rat uikaꞌiwat yt naku i rat watiꞌyppun e. Waku watum yi hun kahato tope 12 ewaty pe te sio haat hamuat sio yt ti raꞌyn hap kuap hamo e. Miꞌi hawyi waku watipoi kahato aimipun koꞌi wo e. Waku ahywytip kahato iꞌanam koꞌi miꞌi hawyi weita iun aꞌẽpo koꞌi waku watipuruk kahato haga etiat e. Miꞌi hawyi arewanẽtup irokirẽ wat 12 ewaty hawyi haat aru maꞌato yt haat pote waku watipugha e."
9 Pyno 12 ewaty hawyi waku mehĩ eraꞌaipok erahaꞌat sio wakuat sio yt hap kuap hamo e. Maꞌato miꞌi turan yt haat i te raꞌyn pote waku etiꞌyppun uhyt e. Miꞌi mikoi Wiku yp ewy kahato ti eweikupteꞌen eipe e Iesui. Wẽtup 12 ewaty hawyi ete sio haat rakat ewy sio yt hap ewy eweikupteꞌen. Maꞌato yt i te ti pote Tupana miꞌyppun wo eweikupteꞌen e Iesui toꞌywania pe yt tomohey i te haria pe.
"10 Miꞌi hawyi Iesui toĩneꞌen i raꞌyn wẽtup Tupana mõtypot yat pe i raꞌyn miitꞌin muꞌe hamo."
11 Miꞌi tote toĩneꞌen wẽtup ok haryporia ahiag ipiit piat rakat itote. Iꞌahu kahato 18 anu raꞌyn. Tohoꞌopot kahato katupono ahiag mimoꞌahu toĩneꞌen. Iꞌok tũꞌã kahato hap wywo tohoꞌopot ahiag minug."
12 Iesui tehaꞌat miꞌi haryporia kape hawyi toikaykay tuwewawi. Miꞌi hawyi toꞌe tope — Mana atipok taꞌyn epoꞌi poꞌi hap ahiag minug e. Pyno mana e eꞌahu hap epoꞌi poꞌi hap ewy kahato. Pyno miꞌi hap ewywuat epoꞌi poꞌi hap atiporop taꞌyn e."
13 Miꞌi hawyi tuweponug hawyi iꞌok tũꞌã hap meremo tokosap taꞌyn. Waku hawyi haryporia toꞌe tehay wepit kahato hap wywo — Waku kahato En Tupana e."
14 Maꞌato Tupana mõtypot yat apykok hat ipyꞌahak kahato Iesui ete katupono Iesui timohãite mekewat haryporia yt topotpap i hap eꞌat pe pote. Miꞌi pote toꞌe tomimuꞌeria pe — Toĩneꞌen wyti 6 eꞌat aipotpap nug hamuat e. Pyno waku 6 eꞌat aiwepotpap hap turan watikat aimoehãite hap maꞌato mesup eꞌat pe yt naku i kahato watikat amoehãite hap e. Miꞌi hawyi Iesui tiwesat — Mehĩ e yt eweꞌeg hin i aikotã typy ehay rakat ewy ereĩneꞌen katupono etipotpap kahato tuereto mesuwat eꞌat pe ehũ wewato ahup taꞌat yi kaꞌa pe pote meremo etiõtem hap atikuap e."
15 Miꞌi hawyi Iesui tiwesat — Typy hẽku rakat neꞌi wyti en e. Yne eꞌat pe eweterepoꞌok ewetioto eihũria iꞌatumoeꞌyꞌu hap kape. Yne eꞌat pe eweterepoꞌok yꞌy kape eihũria e Iesui Tupana mõtypot yat apykok hat pe."
16 Pyno mesuwat haryporia ahaꞌaseꞌi Aparãu emiariru toĩneꞌen wen maꞌato 18 anu turan ahiag mipoꞌi wo toĩneꞌen aikotã ehũ saity ete hap ewy are. Kat poteĩ pyno yt eweikyꞌesat i Aparãu emiariru moehãite hap e. Kat poteĩ — Wãiꞌere mesuwat mana erepoꞌok hap ete yt naku i yt aipotpap i hap eꞌat pe e Iesui."
17 Mio tã e Iesui hawyi wanĩkaptia paaꞌiꞌatuꞌe. Maꞌato iraniaꞌin itotiaria teꞌeruwehum kahato Tupana pe Iesui minug wakuap koꞌi ete.
"18 Miꞌi hawyi poꞌog Iesui henoi teran iãꞌãkap wuo maꞌato saꞌawyꞌi apoꞌe iꞌatuepe — Aikotã som Tupana topyhuꞌat Miitꞌin Porekuat no hap ete apoꞌe."
19 — Pyno ahetama pe toĩneꞌen iãꞌỹi kurin kahato rakat aimiꞌu mosẽꞌẽ hap Mutata iãꞌỹi watoꞌe. Miꞌi ti kurin kahato wen maꞌato wẽtup ok tikoi toko pe hawyi hẽtyt hawyi meiũran iꞌyp ywaiti kahato raꞌyn ariaꞌyp sese ewy wo raꞌyn toĩneꞌen. Miꞌi hawyi iꞌyp haĩkupy pe weitaria teꞌeruwesoknug naꞌyn iꞌyhop koꞌi og muo. Miꞌi hap ewy ti Tupana topyhuꞌat Morekuat no mesuwat yi tote Mutata iãꞌỹi mikoi hap ewy e Iesui tomimuꞌeria pe.
"20 Miꞌi hawyi Iesui apoꞌe i raꞌyn — Aikotã wyti aru so Tupana topyhuꞌat Miitꞌin porekuat no e hawyi sehay iãꞌãkap wuo toiꞌatumuꞌe i raꞌyn."
21 — Pyno uhytꞌiꞌin aikotã uꞌi nug hap ewy kahato ti aru Tupana topyhuꞌat Morekuat no mesuwarotiaria pe e. Aikotã watopag manĩ puk ipyre kape. Miꞌi hawyi watiꞌapokik manĩ puk ipyre wywo. Miꞌi hawyi watiꞌahik hawyi watoiat hawyi meiũran iꞌapoperup hawyi watikaray miꞌi hawyi aimiꞌu wo raꞌyn he kahato raꞌyn. Miꞌi hap ewy ti aru Tupana teke aipyꞌa pe tehay wo e. Kurin nakat ewy iꞌapopyt ewy ihay pytkai hawyi ihay tuwemowato aiwanẽtup hawe hawyi meiũran uꞌi he hap ewy watopyhuꞌat e Iesui itote muꞌap upi tawa wato Ierusarẽi kape toto turan.
"22 Miꞌi hawyi Iesui tiꞌatumuꞌe kahato yne tawa hit piaria Tupana ehay wo. Miꞌi hawyi tawa wato Ierusarẽi kapiat epuꞌap upiaria toiꞌatumuꞌe kahato Tupana ehay wo."
23 Miꞌi hawyi muꞌap upi wẽtup ok apoꞌe Iesui pe — Uruporekuat e karania apuru pyno teꞌeropyhuꞌat Tupana miehakyeraꞌat koꞌi wo atipy pe e sio apuru typyꞌi kahato miit sio apuru yt typyꞌi i apoꞌe Iesui pe. Miꞌi hawyi Iesui tiwesat."
24 Waku eweiꞌe eipyꞌa pe — Uito areke teran pãi areke teran an mekewat okenꞌypy yt iwato i rakat ewywuat pe arehakyeraꞌat hap puẽti hamo waku eweiꞌe at kaꞌap eipyꞌa pe are. Yt naku i — Waku mũkiꞌite areke eweiꞌe hap ewy eweiꞌe are. Katupono meiũran ti aru iꞌatu kahato tuwehytꞌok teran atipy pe aikope Tupana toĩneꞌen Morekuat no hap kape wen maꞌato miꞌiria yt tuwehytꞌok kuap i katupono wehytꞌok hap motꞌi poityꞌi rakaria — Mũkiꞌite waku areke saꞌawyꞌi iꞌatuꞌe pote e haria pote e. Yt kat i typy okenꞌypy atipy kape. Eweikat ro mekewat wẽtup yn okenꞌypy Uiꞌywot kape hap e Iesui tuwepiat."
25 Miꞌi hap eꞌat pe aru — Ereꞌokenhypꞌok to Mimi ereꞌokenhypꞌok to Uhyt iꞌatuꞌe motꞌi kahato uhowawi wen — U pãi yt worohoꞌokuap kahato i eipe aikope pyi eweiõꞌẽ areꞌe iꞌatuepe aru. Uiꞌyat ri iheg me raꞌyn areꞌe aru. Iheg me sese raꞌyn ni okenꞌypy areꞌe aru — Ereꞌokenhypꞌok o eweiꞌe motꞌi uhepe hawyi e. Waku mesup ereke uhytꞌiꞌin manaꞌin are e Iesui."
26 Miꞌi tote aru okenꞌypke teꞌerewak kahato. — Saꞌawyꞌi urutenuk kahato ewywo Mimi. Urutuwesapoꞌu kahato kue ewywo Mehĩ iꞌatuꞌe uhepe. Ehay ete ti urutuwemuꞌe kahato wuatꞌi puo muꞌap upi iꞌatuꞌe aru uhepe."
27 Miꞌi hawyi atiꞌatuwesat — Pywo pe ti rat areꞌe ehepe saꞌawyꞌi yt uimohey i pote yt worohoꞌokuap hin i eipe areꞌe aru. Yt atikuap hin i aikope pywiat eweiõꞌẽ hap areꞌe aru. Eweiwat ro uiꞌyatypepyi pãi katupono yt nakuap i nug haria ti eipe areꞌe aru yt tuwehytꞌok i haria pe e Iesui."
28 Miꞌi hawyi teꞌeruwak popuo teꞌeraꞌaipok haty turanuat hap ewy iꞌatuwanẽtup hawe iꞌatupyꞌa pe kyryꞌet kyryꞌet taꞌatuiãi ete haty kahato iꞌatupiit ete pote. Katupono saꞌawyꞌi Aparãu yt pya hin i iꞌatukai toĩneꞌen meiẽwat getap we toĩneꞌen. Iꞌewyte Isaki iꞌewyte Iako iꞌewyte saꞌawyꞌiwuaria Tupana ehay moherep tukupteꞌen kahato itote Tupana yat pe ienuk hap ikahu kahato hap tote. Miꞌi haria ewy aru eweikupteꞌen mekewat woꞌokakꞌi haria ewy yt eiwehytꞌok teran i mesup yn mote. Meiũran aru Tupana okenꞌypy sakpo eweikupteꞌen hoꞌopot hap tote yn. Yt eweikupteꞌen hin i aru uiwywo atipy pe are — Mũkiꞌite waku watomohey eweiꞌe mesup pote e."
29 Maꞌato tuwehytꞌok kahato iraniaꞌin ywania. Miꞌi haria ti tuwehytꞌok aikope Tupana toĩneꞌen Morekuat no hap tote yt aiꞌywania sese hin i pytkai. Tõꞌẽ tõꞌẽ kahato aikope pyi at tuwẽtem hap kaipyi aikope at minꞌe hap kape hawyi at posak kaipyi tõꞌẽ Tupana wywuat tukupteꞌen hamo. Miꞌi hawyi miꞌiria paaꞌe haria pe — Eiwehytꞌok to areꞌe miꞌiria pe maꞌato ehepe ti aru — Eiwehytꞌok to yt are hin i e. Uhehamo eweikupteꞌen mesup uhehay sio waku sio yt hap kape ehewaure toĩneꞌen pytkai mekewat eꞌat wyti aru — Yt worohoꞌokuap i eipe areꞌe aru Tupana ehamo ehepiat yt uimohey i haria te eipe pote e Iesui yt tomohey i te haria pe."
30 Uiꞌywania e eipe ti Tupana ehay kuap yianmiat haria eweikupteꞌen maꞌato o iraniaꞌin ywania ehewotꞌyptia rakaria wyti aru tuwehytꞌok eheꞌyianme atipy pe wẽtup ywania pytkai katupono uimohey haria tukupteꞌen miꞌiria aru are maꞌato eipe uhepiat sehay yianmiat kape eweikuap kahato pytkai yt eiwehytꞌok teran i mesup okenꞌypyke atipy kape e. Miꞌi pote iraniaꞌin tuwehytꞌok kakato aru maꞌato eipe yt eweikyꞌesat i pote iꞌatuwatꞌymo eiwehytꞌok aru are e Iesui toꞌywania Iuteuria pe.
"31 Miꞌi hawyi Tupana ehay enoi haria putꞌokꞌiꞌatuꞌe Iesui yatype teꞌeroꞌe hamo — Erẽtem no meremo meiũpepyi iꞌatuꞌe katupono morekuat Eroti wyti eꞌauka teran moityꞌi raꞌyn Uhyt iꞌatuꞌe Iesui pe."
32 Miꞌi hawyi Iesui tiꞌatuwesat — Morekuat Eroti ti awahuru ewywuat uiwanẽtup hawe katupono woꞌoꞌauka teran hat miꞌi miit areꞌe. Miꞌi hawyi eweiwat ro Eroti kape hawyi ehenoi uiꞌe hap tope — Uito ti meiũ ahiagnia atusopo kahato hat raꞌyn iꞌewyte atiꞌatumoehãite kahato iꞌahu rakaria mũkiꞌite ti aru iꞌewyte atunug atunug wakuat uipotmoehãite hap koꞌi uhewyry hap upi e. Miꞌi hawyi mũkiꞌite eꞌihotꞌok hawyi ti aru waku yne raꞌyn uiminug koꞌi miꞌi hawyi waku yne hawyi areto e."
33 Mesup eꞌat pe uipotpap teran miitꞌin moehãite hap ete hawyi mũkiꞌite iꞌewyte uipotpap teran hawyi mũkiꞌite eꞌihotꞌok hawyi toran naꞌyn uipotpap hap mesuwe katupono uiꞌauka hap eꞌat aru putꞌokꞌe raꞌyn are. Maꞌato mesup eꞌat pe waku te arepotpap waku uhewyry mesuwe iꞌewyte mũkiꞌite waku ti wy. Maꞌato eꞌihotꞌok toran naꞌyn uipotpap hap toran naꞌyn. Katupono uiꞌauka hap eꞌat yt pya hin i raꞌyn waku eweiꞌe mekewat Eroti pe awahuru ewywuat pe. Miꞌi hawyi iꞌewyte wẽtup ewehenoi tope — Yne saꞌawyꞌiwuat Tupana ehay moherep haria topap kahato tawa Ierusarẽi me iꞌewyte Uito Tupana Mipoꞌoro Tehay Moherep Hanuat yt naku i pyno wẽtup tawa pe uiꞌauka hap e. Iꞌewtye Uito atikyꞌesat saꞌawyꞌiwuat Tupana mipoꞌoro koꞌi atuꞌuka hap tote te uikuꞌuro hap uhyt eweiꞌe o miowat uiꞌe hap ewehenoi mekewat awahuru pe e.
"34 Miꞌi hawyi Iesui tuwak toꞌywania kyꞌewi tomohey hap pun haria pote. — Tawa Ierusarẽi miaria e yt eweiweꞌeg hin i eiperia katupono Tupana mipoꞌororia auka haria eipe e. Ihay moherep haria eweiꞌatuꞌuka haꞌawyte nu koꞌi wo e. Eweiꞌatuꞌakit kahato i ti Tupana mipoꞌoro koꞌi e. Miꞌi hap ewy Uito wy worohoꞌokyꞌe eipe pytkai — Eweiõꞌẽ ro eweiõꞌẽ ro uhowawi are yn pytkai akotã waipaka ty tiꞌatukaykay tomẽpytꞌin koꞌi hap ewy worohoꞌokaykay kahato eipe — Eweiõꞌẽ ro eweiõꞌẽ ro uhowawi are kahato waipaka waryꞌi imẽpyt rakat ewy maꞌato ti — Yt yt yt eweiꞌe uhepe piku piku koꞌi ewy. Uipopesap ywytꞌokpype are waipaka ewy maꞌato — Yt rat eweiꞌe uhepe e Iesui tawa wato Ierusarẽi piaria pe tuwak turan."
35 Are pãi miꞌi hawyi ti aru eiweran eweipyhuꞌat areto hawyi. Yt eweiꞌakasa hin i uhowawi aru maꞌato meiũran ti aru esaipepiaria aiꞌywania Iuteuria — Waku kahato Tupana Mipoꞌoro Sese Ahehakyeraꞌat hat iꞌatuꞌe aru uhetiat pe hawyi miꞌi hap eꞌat pe aru araꞌaipok ehowawi i raꞌyn e Iesui tuwak hawuo. Maꞌato mesup yt uimohey hin i eipe pote eweikupteꞌen aru aikotã aiꞌyat ikahu rakat yt uwe i miit wywo rakat ewy iꞌanam kahato gaꞌapy mihik pe tawa Ierusarẽi toĩneꞌen motꞌi are. Miꞌi hawyi eiꞌyat mesuwe yt kat i eipe yt uwe i hawyi are. Maꞌato meiũran ti aru — Miꞌi Miit waku kahato Aiporekuat no eweiꞌe uhepiat hawyi mekewat eꞌat pe iraniaꞌin ewy waku puo eweikupteꞌen Tupana ywania wo i raꞌyn maꞌato mesup te yt e Iesui toꞌywania pe yt tomohey teran i te haria pe.
"1 Miꞌi hawyi yt iꞌatupotpap i hap eꞌat pe putꞌokꞌe itote Tupana mõtypot yat pyi wẽtup getap kape Iesui toto Tupana mõtypot yat piaria apykok hat yat kape toto. Itote iꞌatu kahato nagnia ehay enoi haria. Itote Iesui taꞌapyk tenuk iꞌatuꞌakag wywo hamo. Miꞌi hap kape teꞌerahaꞌat kahato Iesui kape. Taꞌatukyꞌesat kahato Iesui tiꞌaparap hap sio Iesui ipotpap yt iꞌatupotpap i hap eꞌat miitꞌin moehãite hap ete sio yt iꞌatuꞌe."
2 Katupono itote ti toĩneꞌen ihainia iꞌahu kahato rakat ipiit puk takat. Miꞌi pote teꞌerahaꞌat kahato sio apuru Iesui timoehãite sio yt aipotpap i hap eꞌat pe taꞌatueromõpusu teran haype."
3 Miꞌi hap Iesui tikuap tuwekaipyi miꞌi hawyi toꞌe — Eiperia ti eweikuap kahato wãiꞌe hap koꞌi yt naku i mesup eꞌat pe mio tã watunug hap koꞌi. Taꞌi aheꞌaseꞌi Musei wãiꞌe hap koꞌi kuap kahato haria eipe pote apoꞌare teran ehepe — Waku apo miitꞌin moehãite hap watunug Tupana mõtypot eꞌat pe sio yt e. Uiwesat ro e Iesui woꞌomuꞌe haria akag me."
4 Maꞌato yt taꞌatuwesat teran i katupono iꞌatupyꞌahak Iesui ete. Miꞌi hawyi Iesui tipopytyk ipiit puk takat ipo ete. Miꞌi hawyi tuweponug ipiit puk takat ete pote meremo ipiit ihãite i raꞌyn topyhuꞌat. Miꞌi hawyi ipohep ipiit ete pyi — Pyno waku raꞌyn eete mehĩ e. Waku ereto i ro eꞌyat kape e."
5 Toto hawyi Iesui tuwemorem itotiaria ewawi — Eiperia eipotpap kahato yt motpap i hap eꞌat pe e. Worohoꞌokuap eipe. Eihũ wewato ahup taꞌat yi kaꞌa pe yꞌy pe hap enõtem hap ete eipotpap miꞌi hap eꞌat pe pywo are sio yt. Taꞌi pywo ti are e miꞌi tã ti ewetunug yt naku i aipotpap e hap eꞌat pe. Miꞌi pytkai kan hamo uimohit teran mesuwat eꞌat piat miit moehãite hap upi e."
6 Miꞌi hawyi yt taꞌatuwesat kuap i kahato Iesui.
"7 Miꞌi hawyi toiꞌatumuꞌe i tehay iãꞌãkap wo Iesui katupono toikuap itotiaria teꞌeruwemowato hap pote. Taꞌatukyꞌesat morekuat eꞌyparakai totiat taꞌatuꞌapyk ienuk hap eꞌat turan — Uito poꞌog torania kai taꞌatuꞌe hap moherep teran haype iꞌewyte taꞌatuesokpe ikahu kahato hap ete taꞌatuꞌapyk hap tote. Morekuat eꞌokipy tote teꞌerenuk teran. Yt teꞌerenuk teran i iraniaꞌin miitꞌin emiit wywo."
8 Miꞌiria pe Iesui toꞌe — Uhytꞌiꞌin manaꞌin karãpeĩ morekuaria eikaykay ienuk hap kape turan o yt eiwoꞌoꞌapyk teiꞌo iwatoꞌin nakaria eꞌamyap tote eiwemowato haype hap e. Pyno poꞌog waku paaꞌe haria wo yn itote eweikupteꞌen. Maꞌato eweiꞌapyk morekuaria ewy turanuat putꞌokꞌe wẽtup ok poꞌog iwato rakat eikawiat hat."
9 Miꞌi hawyi aru ienuk hap kaꞌiwat toꞌe aru ehepe — Apuete uhyt mana etum no eꞌamyap meiũwat uiwy pe e aru. Miꞌi hawyi eraꞌapyk kuepe e aru. Miꞌi pote aru eiwemõti hap kahato topyhuꞌat ehete e. Miꞌi hawyi ienuk hap eꞌat pe eremõti kahato yi tote apyk pe eraꞌapyk hawyi e."
10 Miꞌi pote worohoꞌonãpin teran uhytꞌiꞌin manaꞌin. Karãpe aikaykay ienuk hap kape turan waku wataꞌapyk yt uwe mikuap i yatype. Miꞌi pote aru ienuk kaꞌiwat tut ahowawi hawyi — Poꞌog waku morekuat amyap tote ro eraꞌapyk mana uhyt e aru ahepe. Miꞌi hawyi aiwemõtypot hap itote topyhuꞌat. Iꞌewyte aru itotiaria aikuap taꞌyn morekuaria mimõtypot no watoĩneꞌen hap are."
11 Katupono mio tã e ehowawi AheTupana — Wemowato haria mohit hano areĩneꞌen e. Maꞌato wemohit haria mõtypot hano areĩneꞌen e."
12 Miꞌi hawyi tuwemorem hawyi Iesui toꞌe i ienuk kaꞌiwaria pe — Uhytꞌiꞌin manaꞌin e karãpe ienuk hap iwato rakat watunug teran yt naku i watiꞌatukaykay ienuk hap kape aikatuwyria aiwyriaꞌin iwatoꞌin nakaria are. Poꞌog waku watuwẽka ienuk kape yt uwe mikuap i koꞌi hesyꞌat rakaria hatek takaria katupono miꞌi haria yt aikaykay kuap i aru taꞌatuenuk hap kape yt hekat rakaria i pote. Maꞌato aiwyriaꞌin hekat rakaria yn watiꞌatukaykay pote meiũran iꞌewyte aikaykay taꞌatuenuk wato hap kape. Yt naku i — Waku atikaykay uiwyriaꞌin hekat rakaria uiꞌyat kape ienuk hamo katupono atiꞌatupoi hawyi iꞌewyte wyti aru uikaykay iꞌatuꞌyat kape iꞌatumiꞌu u hamo yt naku i watoꞌe aiwanẽtup hawe watiꞌatukaykay miitꞌin ehenuk hap kape turan."
13 Poꞌog waku watoꞌe aiwanẽtup hawe — Waku poꞌog atiꞌatukaykay uiꞌyat kape tenuk hamo hatek sese rakaria ipiit saꞌag nakaria ipy saꞌag nakaria poꞌog waku watoꞌe. Waku yt ihapytig i rakaria yt miitꞌin mikyꞌe koꞌi i atiꞌatukaykay uiꞌyat kape ienuk hamo poꞌog waku watoꞌe are."
14 Pyno miꞌi tã watunug hawyi Tupana meremo tikuap ahegyiꞌat hap hawyi wy ti aru meremo aru Tupana aikaykay tomimõtypot koꞌi wo watopyhuꞌat aipoi hamo toenuk wato hap kape e. Katupono hatek takaria kyꞌe haria wo watoĩneꞌen Tupana ewywuat pote. Miꞌi hawyi eweinõꞌẽ eikuꞌuro hap pyi miꞌi hawyi aru taꞌaipok kahato ehowawi mekewat miꞌu eimiium hap satek takaria piat enuk wato nug hap saꞌup Tupana po pyi atipy pe e Iesui.
"15 Miꞌi hawyi wẽtup ok miit itote ihay kahato Iesui kape tenuk hap yparakai totepyi — Ikahu kahato tig ehay e. Urumuꞌe kahato En. Pywo aru meiũran meimuẽwat ienuk haria iꞌatuwepit kahato Tupana yparakai henuk hap tote e. Taꞌi Tupana putꞌokꞌe Morekuat no hap eꞌat pe ienuk hap aimowepit kahato hap aru toĩneꞌen e."
16 Miꞌi hawyi Iesui tiwesat — Pywo ti rat mehĩ wen maꞌato ti mesup taꞌyn Tupana tiꞌatukaykay tenuk wato hap kape maꞌato miꞌi pytkai miitꞌin yt tuwat teran i e. Pyno ahenoi ehepe miꞌi iãꞌãkap wuo. Wẽtup eꞌat pe so hekat kahato rakat tiꞌatukaykay kahato tominug ienuk hap iwato kahato rakat kape. Katupono Miꞌi Miit miitꞌin Potypot nuat ieĩneꞌen hat."
17 Miꞌi hawyi tuwehay poꞌoro kahato miitꞌin typyꞌi rakaria kape — Eweiõꞌẽ ro eweiõꞌẽ ro waku raꞌyn aimiꞌu ikãꞌã raꞌyn iwato kahato rakat waku raꞌyn eweiõꞌẽ mesuwe katupono yparakai tote raꞌyn aimiꞌu wuat aimowepit hap e. Iꞌewyte ahesapo hy waku raꞌyn wy e. Uꞌi he kahato rakat toĩneꞌen e. Pyno eweiõꞌẽ ro e. Waku raꞌyn eweiõꞌẽ ro uiwyriaꞌin e. Pyno waku eweiꞌe ro iraniaꞌin me uiwyriaꞌin me e teꞌeropat haria tehay enoi haria pe e. Miꞌi hawyi tuwat. — Aimiꞌu raꞌyn iꞌatuꞌe."
18 Maꞌato — Apu i ete iꞌatuꞌe. Yt naku i te mesup areto e. Etikuap kat pote yt uipohepap i te mesup katupono atipuẽti raꞌyn mesup yi wakuat uiweko nug hamuat e. Katupono mesup taꞌyn ti areto hamuat mekewat yi hun kapiat uiꞌakasa uiweko nug hamuat hap kape e. Miꞌi tote ti ikahu kahato. Pyno waku ereꞌe morekuat pe — Yt areto kuap enuk hap ikahu rakat kape e morekuat potpoꞌoro pe."
19 Miꞌi hawyi wẽtup ok pe i — Toꞌiro morekuat enuk hap kape mehĩ e. Waku raꞌyn e. Ikahu kahato tig itote e. Miꞌi pote — Waku mehĩ e wen maꞌato ti mesup te yt areto kuap i e yt uipohepap i te mesup. Etikuap kat pote. Naꞌatpo atikyiꞌat 5 wewato ahup miꞌi pote mesup areto uiꞌakasa hamo waku sio uimikyiꞌat koꞌi sio yt hap kuap hamo. Sio iꞌatuesaika uheꞌyara ekyi yi totiat hamo sio yt. Miꞌi hap koꞌi ete ti yt uipohepap i e. Pyno miꞌi pote ereꞌe o morekuat pe — Areto teran wen waku kahato hap kape maꞌato yt areto kuap i. Pyno waure wo o morekuat toĩneꞌen uikai mehĩ e."
20 Miꞌi hawyi wẽtup ok morekuat wy ok yat pe teke hawyi — Aimꞌu raꞌyn mehĩ e. Ikahu kahato tig morekuat yat pe e. Iwato kahato tig ahenuk hap e. Pyno toꞌiro mehĩ e. Miꞌi hawyi toiwesat — Pyno waku areto teran ni maꞌato ti yt uipohepap i te koitywy morekuat enuk hap kape e. Etikuap kat pote e. Gaꞌatpo atipuẽti uheharyꞌi ikahu rakat miꞌi pote areĩneꞌen mesup iwywo e. Pyno waku ereꞌe morekuat pe — Waure wo soke ereĩneꞌen ere morekuat pe kat pote ti yt uipohepap i te. Mesup uheharyꞌi mowepit hap ete areĩneꞌen e. Miꞌi hap ete areĩneꞌen mesup e."
21 Miꞌi hawyi heropat haria teꞌeraꞌaipok i raꞌyn morekuat kape — Yt tõꞌẽ i wyti ewyriaꞌin uhyt teꞌeroꞌe hamo. Miꞌi hawyi toikuap yne raꞌyn iꞌatuꞌe hap — Yt uipohepap i te mesup e haria yn aimikaykay koꞌi iꞌatuꞌe hawyi morekuat ipyꞌahak kahato iꞌatuete hawyi toꞌe tomipoꞌororia pe — Pyno eweiwat i ro wuatꞌi muꞌap wato upi wuatꞌi muꞌap hit koꞌi upi. Miꞌi hap upi eweiꞌatukaykay wuatꞌi hakyꞌeꞌi rakaria hatek takaria uhenuk hap kape e. Waku eweiꞌatukaykay yne tawa wato piaria yt hekat rakaria i yt ipy kahato rakaria i yt ipo kahato rakaria i yt ihapytig i rakaria yt hewyry kuap i rakaria ipiit saꞌag saꞌag nakaria yt uwe mikyꞌe i koꞌi miꞌiria meikowo henuk hap kape eweiꞌatukaykay ro e morekuat teropat haria pe."
22 Miꞌi hawyi tuwat hawyi taꞌatuꞌatukaykay yne miitꞌin yt iwatoꞌin nakaria i yt uwe mikyꞌe i koꞌi morekuat enuk wato hap kape. Miꞌiria tõꞌẽ tõꞌẽ kahato howawi. Miꞌi hap kaipyi teꞌeraꞌaipok i raꞌyn ihay moherep haria morekuat kape. — Urutunug naꞌyn ni emikyꞌesat ewy mehĩ iꞌatuꞌe. Miꞌi hawyi tõꞌẽ emikaykay koꞌi iꞌatuꞌe. Typyꞌi kahato ti wen enuk hap tote tukupteꞌen mesup maꞌato miꞌi pytkai emiꞌu iwato kahato pote yt taꞌatuꞌu kuap i yne iꞌatuꞌe."
23 Miꞌi pote morekuat toꞌe — Are pãi e pyno waku eweiwat i ro yne yꞌy hit i koꞌi upiat gupteꞌen haria kape e. Yne tawa hit tawa hit koꞌi kape gaꞌapy piaria kape e. Miꞌiria etiꞌatukaykay meikowo hamo e. Katupono ti atikyꞌesat uiꞌyat pytꞌat nug yne miitꞌin miat hap e. Atikyꞌesat nyti hikꞌe miitꞌin no uiꞌyat hap e."
24 Saꞌawyꞌiwuaria uimikaykay koꞌiria uimõpyꞌahak kahato uiwyriaꞌin sese miꞌiria uiꞌywania pytkai yt tõꞌẽ i. Pywo pe ti rat areꞌe pyno yt karãpe i aru miꞌiria teꞌerenuk uimiꞌu wakuat rakat ete. Yt taꞌatukuap i aru he hap. Yt wẽtup ok i raꞌyn ti teke kuap irane uhenuk hawe uimikaykay saꞌawyꞌiwuaria koꞌi e morekuat topotpoꞌororia tehay enoi haria pe. Miꞌi hap ewy ti miitꞌin tukupteꞌen mesup e Iesui. Tupana tiꞌatukaykay kahato koran te tenuk wato kahato hap kape e Iesui yt tehay mohey i haria pe.
"25 Miꞌi hawyi Iesui toto i raꞌyn hawyi typyꞌi rakaria miitꞌin tuwat tuwat raꞌyn hupi. Miꞌi hawyi tuwesaipeꞌok toupiat õꞌẽ haria muꞌe hamo."
26 Eweipyhuꞌat teran uipotpoꞌororia uhemiit sese wo miꞌi pote worohoꞌokyꞌesat kahato. Miꞌi pote ahenoi aikotã aikotã eweikupteꞌen uhemiit sese wo hap uimikyꞌesat ewywuat nug hap e. Uhupi ereto hap etikyꞌesat pote eweitoiat yne eimikyꞌesat e. Miꞌi hawyi poꞌog uikyꞌe eiwat eꞌywot kai ety kai eharyꞌi kai eheꞌaito kai eimẽpytꞌin kai eheykeꞌet kai eheywyt kai ehesakiꞌyt kai eikypyꞌyt kai eheinyt kai iꞌewyte eiwekyꞌe hap kai uikyꞌe uimikyꞌesat nug hap poꞌog eimikyꞌesat koꞌi nug hap kai. Miꞌi hawyi eweiꞌe — Uikuꞌuro pote uikuꞌuro maꞌato areto eupi eweiꞌe uhepe miꞌi hawyi miꞌi hap yn waku uhemiit no."
27 Maꞌato eweikenꞌẽ eikuꞌuro hap pupi pote miꞌi pote ariaꞌyp posak ete eikuꞌuro hap uiꞌewy e hap yt eweikyꞌesat i. Miꞌi hawyi yt eweiwat kuap i uhupi uhemiitꞌin sese wo uipotpoꞌororia wo e."
28 Pyno ahenoi hãꞌãkap wo aikotã waku hap. Pyno so wẽtup ok surara akag tunug neran ywaiti rakat toꞌyat. Tuꞌuka teran itote pywiat hap moryꞌa wywuat hap. Miꞌi hawyi tutunug hap eꞌyianme ti ipotpap kahato miwan ete karania upi miꞌi hap nug hamuat hap ete karania eꞌat temiitꞌin poi hamuat hap ete karania upi nu wato kyiꞌat hap ete karania upi haꞌup nug hap ete sio tekat putꞌokꞌe inug hamo sio yt hap kuap hamo."
29 Miꞌi hawyi tuwepe toꞌe — Pyno uiweꞌeg wo mesuwat nug hap ete e. Yt naku i atunug wẽtup ipatꞌok yn e. Waku atunug yne e. Maꞌato ahaꞌawynug hap yn mote miꞌi hawyi uhekat yt putꞌokꞌe i raꞌyn hawyi miitꞌin mikyryꞌi areĩneꞌen aru e. Pyno yt atikyꞌesat i miꞌi tã pote waku atikuap saꞌawyꞌi sio uhekat putꞌokꞌe uiꞌyat ywaiti nug hamo e tuwepe."
30 Pyno waku atunug yne kahato miꞌi pote yn miitꞌin mimõtypot no areĩneꞌen kuap e. Katupono atimowaku yne kahato maꞌato yt pote ten toꞌokyryꞌi kahato uiminug ipatꞌok hap ete e. Pyno miꞌi iãꞌãkap ewy kahato eweikupteꞌen uhemiit no teran eweikupteꞌen mote. Waku eweiwekuap ti sio pytꞌokꞌeweiꞌe inug hamo hap ete sio yt hap kuap hamo. Miꞌi hawyi waku eweiwat uhupi e Iesui itotiaria pe — Urutuwat teran ehupi e haria pe."
31 Pyno wẽtup iãꞌãkap i ahenoi ehepe e. Pyno saꞌawyꞌi so wẽtup tawa porekuat toꞌe tuwepe — Pyno atimoma teran iraniaꞌin ywania uhewanĩkaptia uhesuraraꞌin wywo e tuwepe tuwanẽtup so e Iesui. Miꞌi hawyi maꞌato yt atikuap i uhesuraraꞌin imoma hamo sio putꞌokꞌe sio yt e so. Katupono uhesuraraꞌin sok 10000 surara yn maꞌato uhesuraraꞌin kai maꞌato uhewanĩkatptia esuraraꞌin 20000 hap ewy tukupteꞌen e. Miꞌi hawyi morekuat tiꞌatukaykay tuwewawi tonãpin hat surara akag iweꞌeg kahato rakat — Waku apo watuwat uhesuraraꞌin nywo uhewanĩkaptia moma hamo e sio apo yt e."
32 Katupono ti uhewanĩkaptia tõꞌẽ kahato ahetawa moma hamo 20000 suraraꞌin wywo maꞌato aiwat ahesuraraꞌin 10000 surara yn tukupteꞌen e. Miꞌi pote atikuap teran waku watuwat sio yt hap e. Maꞌato yt naku i eweiꞌe pote worohoꞌopoꞌoro eipe uhehay wywo iꞌatuewawi iꞌatuporekuaria kape e. Miꞌi hawyi waku watum ahekat aiwoꞌowese hap nug hamuat e so mekewat morekat tesurara akag me e Iesui tehay iãꞌãkap hawe itotiat — Urutuwat teran ehupi e haria pe."
33 Pyno mesuwat uhehay iãꞌãkap wuo ahenoi teran ehepe aikotã waku eweiwat uhupi hap uhemiitꞌin sese wanuat hap. Pyno waku miꞌi hap ewy heꞌyianmete eiwewanẽtup niatpo kahato eito uhupiat hap ete e. Katupono pywo ti uwe uwe uhupi toto uwe uwe toto teran uhupi waku miꞌi hat tuwanẽtup kahato — Atunug aru uikaꞌiwat mikyꞌesat ewy yn e. Pyno miꞌi hawyi uiat uimikyꞌesat atiwaure yne uiminug neran hap koꞌi hawyi waku eweiꞌe eweiwat teran uipotpoꞌororia waku maꞌato yt mio tã eweiꞌe i eiwat teran uhupiat hap ete pote yt karãpe i waku eweikupteꞌen uhemiit no uipotpap nug hamo e Iesui areto teran ehupi e haria pe.
"34 Miꞌi hawyi Iesui toꞌe temiitꞌin me — Ewetum no ehewaure kaꞌa uhepe uiwyriaꞌin e katupono uhehay pywo kahato pe areꞌe ehepe e. Yt uheso i rat eiperia aikotã ukyt ewy eweikupteꞌen uipotpoꞌororia sese eweikupteꞌen hawyi e. Ukyt waku kahato aimiꞌu apopyt no. Miꞌi hawyi hẽꞌẽ kahato waku kahato aimiꞌu mosẽꞌẽ hamo ukyt waku kahato e. Maꞌato toĩneꞌen ukyt yt he rakat i mesuwarote uhemiit yt kan hamo i ewywuat katupono ukyt nop takat ewywuano tukupteꞌen hawyi yt hẽꞌẽ hin i pote yt he i hap ewywuat hawyi yt kat hamo i e."
35 Ukyt yt hẽꞌẽ i rakat ti yt kat hamo i e. Yt naku i wy aimikoi ete katupono aimikoi auka hap topyhuꞌat e. Pyno ukyt nop takat yt kat hamo i miꞌi pote miitꞌin mipugha muꞌap tote ahetama pe hawyi miitꞌin miꞌakit akit no toĩneꞌen muꞌap tote e. Miꞌi hap ewy uhemiit yt he kahato rakat i ewy e. Pyno eiwanẽtup o uhehay mio wuat kape uiwyriaꞌin e. Ehewaure kaꞌa apypok kahato uhehay kape e Iesui toupiat wat haria pe muꞌap upi.
"1 Wẽtup eꞌat pe putꞌokꞌiꞌatuꞌe kahato Iesui ete yt nakuaria i sese koꞌi. Taꞌatukuap teran ihay haype. Iraniaꞌin tukupteꞌen itote seroꞌokꞌe haria ewywuat katupono miꞌiria muꞌap pyhyp haria. Miꞌiria ti wuatꞌi kaipyi taꞌatukyꞌesat saꞌup ikokaꞌat hap hawyi. Miꞌi saꞌup taꞌatuium morekuaria pe Iuteu ywania ewanĩkaptia pe maꞌato yt taꞌatuium i yne saꞌup katupono saꞌup poꞌog morekuaria mikyꞌesat hap ok tã taꞌatusat miitꞌin kaipyi hawyi taꞌatupatꞌok hawyi saꞌup iwato taꞌatuteroꞌok taꞌatuewanuat. Miꞌi pote yt uwe mikyꞌesat i koꞌi miꞌiria tukupteꞌen."
2 Miꞌiria Iesui tiꞌatumuꞌe kahato Tupana ete. Miꞌi hawyi Tupana mõtypot yat akag koꞌi putꞌokꞌiꞌatuꞌe itote hawyi teꞌeroꞌe — Kat poteĩ Iesui ihay yt nakuaria i wywo iꞌatuꞌe. Yt naku i ti miꞌi tã watunug iꞌatuꞌe. Iꞌewyte Tupana ehay wan haria putꞌokꞌiꞌatuꞌe itote wy. Miꞌi hawyi taꞌatumohit kahato Iesui — Kat poteĩ Iesui tenuk yt nakuat i sese wywo iꞌatuꞌe. Yt Tupana mikyꞌesat ewy i Iesui tunug iꞌatuꞌe toꞌope."
3 Miꞌi hawyi Iesui tuwemorem Tupana mõtypot yat apykok haria akag koꞌi kape hawyi toꞌe iꞌatuepe — Uhytꞌiꞌin e worohoꞌomuꞌe teran sehay hãꞌãkap wuo kat poteĩ Tupana tiꞌatukyꞌe kahato yt nakuaria i hap ete."
4 Pyno so wẽtup ok toĩneꞌen tohũ 100 Uweuria rakat apykok hat e. Miꞌi hat so wẽtup eꞌat pe toiꞌatumorania kahato tohũria hawyi toipuẽti 99 yn tohũria itote hawyi toꞌe — Are pãi wẽtup uihũ sig hoꞌowasat pãi e. Miꞌi hawyi so aikotã som atipuẽti aru uihũ howasat rakat ehakyeraꞌat hamo e. Miꞌi hawyi so tohokꞌiwat 99 rakat iꞌatuenuk hap tote. Miꞌi rokirẽ toto tohũ hoꞌowasat rakat kat hamo. Miꞌi hawyi so hoꞌowasat rakat kat hap ete yt ipohep hin i e."
5 Miꞌi tusoke ti toipuẽti raꞌyn tohũ hoꞌowasat hap tote. Miꞌi hawyi totat hawyi tohupit hawyi toterut i raꞌyn toꞌyat kape e. Miꞌi hat so miꞌi hawyi iwepit kahato tohũ wẽtup ok takat puẽti hap ete wẽtup yn hoꞌowasat rakat puẽti hap ete 99 ihũria yt hoꞌowasat rakaria i pytkai e."
6 Miꞌi hawyi putꞌoktoꞌe toꞌyat piat hawyi towyriaꞌin toiꞌatukaykay tuwewawi tuwepit haypiat iꞌatupoi hamo hawyi toꞌe iꞌatuepe — Koitywy uiwepit hap eꞌat pe katupono uihũ hoꞌowasat rakat atipuẽti i raꞌyn e. Pyno toꞌiro watenuk toꞌiro watesapoꞌu pyno waku aiwepit miꞌi hap ete e tekatuwyria pe e Iesui henoi hãꞌãkap wuo itote."
7 Miꞌi hawyi tomohey haria pe Iesui toꞌe — Taꞌi karãpe aihũ watipuẽti hoꞌowasat rakat aimowepit kahato hap toĩneꞌen e. Miꞌi hap ewy kahato ti Tupana toĩneꞌen wẽtup ok miit hoꞌowasat rakat toipuẽti hawyi tuwemowepit kahato e. Pyno toikyꞌesat kahato ti yt nakuaria i aipok tewawiat hap e. Toikyꞌesat kahato miitꞌin waure wo toĩneꞌen neran taꞌatuminug saꞌag koꞌi hap etiat hap e. Karãpe hoꞌowasat rakat wẽtup ok toipuẽti hawyi atipy piaria iꞌatuwepit kahato Tupana wywo e. Ienuk hap iwato kahato taꞌatunug hap ewy e. Mekewat saꞌawyꞌiwuat poꞌog yt nakuat i wemorem naꞌyn Tupana ewawiat hap imowepit kahato e. Iꞌewyte tukupteꞌen 99 rakaria ewywuaria miꞌiria ti — Uruto wakuaria e haria ewywuaria tukupteꞌen — Yt karãpe i uruto hoꞌowasat rakaria wo e haria. Uruto hãpyk sese rakaria iꞌatuꞌe. Miꞌi hap ewywuaria tukupteꞌen 99 rakaria ewy uhehay iãꞌãkap hawuo e. Tupana tiꞌatukyꞌesat kahato yne tohũria maꞌato wẽtup ok hoꞌowasat raꞌyn hawyi toikat kahato miꞌi hat e. Yt waure hin i hoꞌowasat hap ete e. Miꞌi hat puẽti hap hawyi poꞌog iwepit iraniaꞌin kai e Iesui — Kat pote pãi etiꞌatumuꞌe yt nakuat i rakaria ehay uhyt e haria pe.
"8 Miꞌi hawyi wẽtup i ahenoi teran hãꞌãkap wuo e Iesui. Ahetama pe ti ihainiaꞌin tum haryporiaꞌin me — Worokyꞌesat en uheharyꞌi wo pote atum epe mesuwat wahi 10 a imehit rakat Uru kawiat atum naꞌyn haꞌup ekyiꞌat hamuat e hap moherep hamo hap ewy taꞌatunug ahetama pe e. Miꞌi hap ewywuat wẽtup a taꞌat hewahi pyi hawyi toikat kahato haryporia ahetama piat hawyi wãtymꞌi turan mote meremo teꞌaria uhu miꞌi hawyi toikat toꞌyat pe. Yt toipuẽti i hawyi tohywytip toꞌyat hawyi yi perup we toikat kahato mekewat iꞌa mehit rakat at hat teꞌaito wuat miium tesaꞌup wote howoity kahato rakat wahi iꞌa mehit rakat e."
9 Miꞌi hawyi toipuẽti raꞌyn hawyi haryporia iwepit kahato torania i raꞌyn 10 a rakat hawyi e. Miꞌi hawyi toiꞌatukaykay raꞌyn towyriaꞌin haryporiaꞌin tuwewawi miꞌiria pe — Toꞌiro watenuk watesapoꞌu e katupono mesup eꞌat uiwepit hap sese toĩneꞌen katupono saꞌawyꞌiwuat uheꞌaito miium uheharyꞌi wuat e hap 10 a rakat wẽtup atipun nakat atipuẽti hawyi e."
10 Miꞌi hawyi toꞌe i itotiaria — Uruto poꞌog e haria pe. — Taꞌi yt uheso hin i ti uhytꞌiꞌin manaꞌin e. Aikotã haryporia tipuẽti tewahi tomipun hawyi tuwehum iwepit kahato hap ewy ti Tupana hoꞌowasat rakat aipok towawiat hap ete tuwehum kahato e. Toiꞌatukaykay atipy piaria hawyi — Toꞌiro aiwepit e katupono wẽtup ok miit taꞌaipok uhowawi hoꞌowasat rakat itote e yt naku i sese nug haria miꞌiria pytkai e. Miꞌi hap ewy ti areĩneꞌen yt nakuaria i muꞌe hamo yt eimikyꞌesat ewy i pytkai e. Katupono Tupana tikyꞌesat miꞌiria aipok tuwewawiat hap pote e Iesui.
"11 Miꞌi hawyi Iesui toꞌe — Pyno wẽtup iãꞌãkap i ahenoi Tupana tikyꞌesat kahato yt naku i nug haria aipok hap tuwewawiat hap ete. Saꞌawyꞌi so wẽtup ok ihainia typy ok haꞌyru rakat toĩneꞌen. Miꞌi iꞌatuꞌywot waku kahato rakat."
12 Miꞌi hat so wẽtup ok haꞌyru watꞌypꞌi toꞌe toꞌywot pe — Papai yt atikyꞌesat i epowatꞌyp ekuꞌuro turan hawyi e maꞌato mesup taꞌyn atikyꞌesat e. Pyno etipatꞌok o kat koꞌi kat koꞌi uhepe epowatꞌyp uiat e katupono uhewyry teran wyti Papai e. Miꞌi pote toimõꞌẽ raꞌyn tekat koꞌi tokuꞌuro hap owakai e. Miꞌi hawyi so wẽtup eꞌat hawyi — Pyno areto raꞌyn Papai e so."
13 Miꞌi hawyi toꞌywot miium tohytmoi yne toꞌyara wato pe hawyi toto e. Iwato kahato totioto toꞌywot ekat hawyi toto pya wẽtup tawa kape wẽtup yꞌy kape e. Miꞌi hap tote toiweneru kat koꞌi kat koꞌi hawyi toikyiꞌat mahy koꞌi hawyi temahyꞌu haryporiaꞌin toiꞌatukaykay kahato tuwewawi. Hairu hap yn tutunug at kaꞌap itote toꞌywot ekareꞌen saꞌup mo tenuk kahato itote e. Towyriaꞌin kyiꞌat hamo toipugha kahato toꞌywot ekat yt tuweꞌeg hin i haype toipugha topiit mikyꞌesat yt naku i nug hap upi e Iesui."
14 Miꞌi hap tote tehairu at kaꞌap pote toꞌywot miium iwato rakat tekat toimoweityk yne e. Miꞌi hap eꞌat pe ti syꞌat kahato hap taꞌyn putꞌokꞌe tuete hawyi yt kat i raꞌyn miꞌu kyiꞌat hamuat haꞌup ipo pe e. Miꞌi turan yt iꞌaman hin i yne mekewat tawa ko ete yi wato hap ok tã e. Miꞌi hawyi iꞌatumikoi yt tuwenug kuap i hawyi yne yne iꞌatuesyꞌat e."
15 Miꞌi hawyi tesyꞌat sese raꞌyn hawyi tohoꞌokat topoi hanuat. Toikyꞌesat topotpap hap miꞌu hit saꞌup mo. Miꞌi hawyi wẽtup ok yat kape toto miꞌi hat pe toꞌe — Arepotpap teran eupi uhyt e. Miꞌi hawyi — Pyno waku uhehamaut asuwai koꞌi etiꞌatupoi at at e tope. Miꞌi hawyi toto hamaut asuwai koꞌi apykok hamo e."
16 Miꞌi tote hamaut asuwai pyꞌasetpiat toĩneꞌen turan hesyꞌat sese hap putꞌokꞌe tuete hawyi ti toꞌe tuwepe — Pyno waku ahuꞌu hamaut asuwai miꞌu ape kumana ape e. Mio tã tuwanẽtup hawe putꞌokꞌe hamaut asuwai kaꞌiwat hawyi toꞌe — Yt etuꞌu teiꞌo maꞌato uihũria miꞌu e."
17 Miꞌi hawyi hesyꞌat sese hap tuete hawyi ti tuwewanẽtup kahato topyꞌa pe — Yt uiweꞌeg hin i pãi e katupono areĩneꞌen hesyꞌat sese maꞌato yne uiꞌywot eropat haria teꞌerenuk at kaꞌap kahato uiꞌywot yat pe yne eꞌat pe miꞌu puꞌi sakpoꞌe tukupteꞌen itote e. Miꞌi hawyi ikap takaria wo uiꞌywot eropat haria tukupteꞌen maꞌato uito uikag motꞌi rakat areĩneꞌen. Uꞌi he rakat hẽꞌẽ rakat ete teꞌerenuk at kaꞌap maꞌato atuꞌu teran hamaut miꞌu kumana ape maꞌato — Yt etuꞌu teiꞌo uhehamaut miꞌi iꞌatuꞌe uhepe. Yt naku pe i areĩneꞌen mesuwe e tuwepe."
18 Pyno yt uiweꞌeg hin i areĩneꞌen meiũpe pãi e. Pyno waku araꞌaipok i uiꞌywot yat kape hawyi — Papai areꞌe aru tope woromaꞌat kahato en uiminug saꞌag wo iꞌewyte ti Tupana maꞌat hano areĩneꞌen are aru tope e. Katupono ti ihamo ti atunug yt naku i hap are aru uiꞌywot pe uiꞌaipok hawyi e."
19 Pyno Papai uhewaku hap yt putꞌokꞌe i te raꞌyn esaꞌyru wat uheĩneꞌen hamo are aru Papai pe e. Miꞌi tupono waku eropat hano raꞌyn uinug Papai are aru e. Pyno miꞌi hawyi — Uhaꞌyru yt ereꞌe teiꞌo poꞌog uhepe maꞌato uheropat hat en ereꞌe ro aru uhepe papai areꞌe aru e topyꞌa pe tuwanẽtup hamaut asuwai pyꞌasetpiat toĩneꞌen hap eꞌat pe."
20 Miꞌi hawyi ti paaꞌe sese raꞌyn itote tuwak popuo hawyi topoĩꞌãm hawyi meremo toto raꞌyn toꞌywot kape. Miꞌi turan iꞌywot taꞌakasa pya howawi muꞌap upiat hut turan. Miꞌi pote iꞌywot hatyꞌu kahato topyꞌa pe tosaꞌyru toikyꞌesat kahato topyꞌa pe hawyi so iꞌywot punꞌe howa kape hawyi iporokꞌat tosaꞌyru ete hawyi toiꞌãpysig tosaꞌyru e."
21 Miꞌi pote haꞌyru toꞌe toꞌywot pe — Papai yt uiweꞌeg hin i e. Ekat atipun yne raꞌyn uiminug saꞌag hap ete e. Yt naku i sese atunug Tupana ehamo wẽtup hy tote e. miꞌi pote iꞌewyte epe yt naku i atunug e. Miꞌi pote yt putꞌokꞌare i raꞌyn emẽpyt wuat uheĩneꞌen hamo uiꞌywot e. Pyno koitywy waku areĩneꞌen eropat hano yn naꞌyn e."
22 Maꞌato ti iꞌywot toꞌe — Yt nyti yt nyti uhaꞌyru wo kahato ereĩneꞌen ne e. Miꞌi hawyi kaykayꞌe teropat haria tehay pirik wo — Merep to eweterut ro uhaꞌyru esokpe wuat ikahu rakat hawyi ewetopag ipiit pe. Miꞌi hawyi iꞌewyte ipy sokpe eweterut ro e. Iꞌewyte eterut ro muĩꞌãpiat hekat rakat hawyi ewetopag ipuĩꞌã pe e."
23 Miꞌi hawyi toꞌe i tomiꞌu nug haria pe — Eweterut ro wẽtup wewato ahup mẽpyt aimiꞌu wo ikap takat e. Miꞌi hawyi eweiꞌauka hawyi ewetey hawyi waku watenuk kahato e. Miꞌi hawyi waku aiwepit hap sese watunug meiũpe e teropat haria pe."
24 Uhaꞌyru saꞌawyꞌi hoꞌowasat rakat toĩneꞌen ikuꞌuro rakat ewy maꞌato mesup uimipuẽti toĩneꞌen i. Saꞌawyꞌi pya pyi aikai toĩneꞌen maꞌato ti mesup miꞌi kaipyi tuwẽtem naꞌyn guꞌuro pyi hap ewy toĩneꞌen e. Saꞌawyꞌi ti hoꞌowasat kahato rakat ewy uhaꞌyru toĩneꞌen maꞌato ti mesup uipuẽti i raꞌyn e. Miꞌi hap uimowepit kahato. Miꞌi pote waku mesup aiwepit kahato hap watunug ahenuk hap iwato e. Miꞌi hawyi ti teꞌerenuk kahato raꞌyn itote haꞌyru mõtypot hamo."
25 Miꞌi turan ti iykeꞌet putꞌokꞌe toko pyi temiitꞌin nywo taꞌaipok topotpap hap toko kaipyi hawyi yt pya hin i turan iꞌyat kai turan toikuap pypyꞌe hap toywyt hoꞌowasat saꞌawyꞌiwuat rakat mõtypot hap ienuk hap toikuap."
26 Toikuap toywyt mõtypot hap toꞌywot piat hawyi ti ipyꞌahak kahato hawyi yt teke teran hin i ienuk hawe. Miꞌi hawyi toiꞌatukaykay toꞌywot emiitꞌin tuwewawi apotoꞌe hamo — Kat poteĩ iꞌatuwepit meikope e."
27 Miꞌi hawyi taꞌatuwesat — Mehĩ mimi iꞌatuꞌe eywyt mesup tut iꞌatuꞌe. Yt ikuꞌuro hin i ti yt aiꞌywot wanẽtup hap ewy hin i. Miꞌi pote aiꞌywot iwepit kahato hawyi mesup aiꞌywot tikyꞌesat mesup aiwoꞌomowepit hap iꞌatuꞌe. Waku kahato raꞌyn hap upi ti eiꞌywot tiꞌauka tohũ mẽpyt ikap takat aimiꞌu aiwepit haypiat wuat iꞌatuꞌe. Ikãꞌã raꞌyn mimi uhyt iꞌatuꞌe pyno ereke ro mehĩ iꞌatuꞌe."
28 Toywyt yt naku i nug hat aipok hap toikuap hawyi poꞌog ipyꞌahak iykeꞌet hawyi yt teke teran hin i raꞌyn toꞌywot yat pe. Miꞌi hap toikuap hawyi iꞌywot toto raꞌyn howawi toꞌyat pyi ikaykay hamo — Ereke ro uhaꞌyru e. Waku aimowepit yne aito mesup uhaꞌyru e. Katupono eywyt hoꞌowasat rakat wyti watipuẽti i raꞌyn mesup e tosaꞌyru yianme."
29 Maꞌato — Yt rat Papai e. Yt karãpe i ti uimowepit hamo etiꞌauka ehũ ikap takat e. Arepotpap at at kaꞌap kaꞌap eimikyꞌesat nug hap etiat pytkai maꞌato ti yt karãpe i uiat uimõtypot hap etunug Papai e. Emikyꞌesat ewy kahato atunug pytkai maꞌato ti yt waipaka i te wyti uiwyriaꞌin wywuat uimowepit haypiat miꞌu wo etiꞌauka e."
30 Maꞌato ti mekewat uheywyt ekareꞌen sem pun hat esaꞌyru aipok hap pote ienuk wato hap etunug imõtypot hamuat etunug yt karãpe i emikyꞌesat tutunug epiat pytkai e. Yt naku i miꞌi hap Papai e. Ekat saꞌup kaipyi ti haryporiaꞌin yt iweꞌeg i rakaria toiꞌatukyiꞌat kahato e. Miꞌi rokirẽ taꞌaipok hawyi aihũ poꞌog he rakat etiꞌauka maꞌato imowepit hamo poꞌog he waipaka kawiat rakat etiꞌauka imowepit hamo wewato ahup ikap takat etiꞌauka imowepit hamo. Yt naku i Papai e."
31 Miꞌi hawyi toꞌe iꞌywot tosaꞌyru yianmiat pe — Uhaꞌyru e yt mio tã ereꞌe teiꞌo e. Atikuap ewat ewaku hap miꞌi pote ti uipowatꞌyp epo pe yne uiꞌyat uihũria uiko koꞌi uiꞌyat koꞌi torania meimuẽwat epo puo toĩneꞌen uipowatꞌyp e. Atikuap ereĩneꞌen uiwywo wuatꞌi eꞌat pe hap e. Uhekat koꞌi yne emikyꞌesat ok tã toĩneꞌen ewano uipowatꞌyp e."
32 Miꞌi pytkai ti mesup yt naku i ereĩneꞌen ipyꞌahak eywyt ete are. Ereke ro uhaꞌyru waku watumowepit mesuwat wãtym kaꞌap katupono eywyt saꞌawyꞌi ikuꞌuro rakat ewy toĩneꞌen aiwanẽtup hawe maꞌato meiũ tut i raꞌyn saꞌawyꞌi hoꞌowasat kahato maꞌato mesup ti aipuẽti raꞌyn e iykeꞌet pe tosaꞌyru poꞌog nag nakat pe. Pyno ti uiꞌe hap ewy kahato ti e Iesui itotiaria pe. Katupono Tupana tuwemowepit kahato karãpe yt naku i nug haria tiꞌatoiat raꞌyn taꞌatuminug yt naku i hap koꞌi hawyi teꞌeraꞌaipok Taꞌatuꞌywot Tupana kape mekewat haꞌyru hoꞌowasat rakat ewy e Iesui — Uruto poꞌog iraniaꞌin kai e haria pe.
"1 Miꞌi hawyi Iesui henoi hãꞌãkap wuo topotmuꞌeria pe wuatꞌi nagnia ehay enoi haria pyꞌasetpe. — Saꞌawyꞌiwuat ieĩneꞌen hat so hekat kahato rakat toĩneꞌen iꞌatuꞌe so e. Miꞌi hawyi so toikat kahato topotpap nug hap akag wuat hawyi toꞌe — Pyno waku ereĩneꞌen uiꞌe hap nug hap akag wo e. Atikyꞌesat etimowato uhekareꞌen e so. Waku etiporeraꞌat yne uhepiat weteweru haria kaipyi uhekat e. Miꞌi hawyi ti ipotpap taꞌyn hekat rakat ekareꞌen mowato hap ete. Maꞌato so wẽtup eꞌat pe tõꞌẽ kahato miitꞌin hekat rakat kape — Esaipepiat ti epotpap nug hat ti yt naku i sese yt hãpyk i sese taꞌatuꞌe hamo e. Toiꞌatumona toiꞌatueroꞌok atueroꞌok ti ekareꞌen iꞌatuꞌe."
2 Mio tã iꞌatuꞌe hap tepiat hawyi toikaykay temiit tekareꞌen apykok hat tuwewawi apotoꞌe hamo — Uhyt e iraniaꞌin uhemiitꞌin henoi kahato ti uhepe eminug uimaꞌat hap koꞌi etiat e maꞌato yt atikuap i sio pywo sio yt e. Miꞌi pote etimoherep aikotã aikotã eminug epopera piat hap koꞌi uhyt e. Atikyꞌesat yne mesup miwan miat yne e maꞌato waku pytkai pote waku maꞌato pywo pote yt kan hamo i ereĩneꞌen poꞌog uipotpap nug hamuat e. Yt worokyꞌesat poꞌog i en uhemiit akag wo e."
3 — Pyno waku etimoherep emiwan yne aikotã hãpyk uinug hap. Miꞌi hawyi toto tokaꞌiwat toꞌakag maꞌat hat miꞌi hawyi toꞌe tuwepe — Are pãi aikotã aru atunug e katupono toikuap aru uimiwan koꞌi kaipyi tomaꞌat uhepiat hap e. Miꞌi hawyi aru yt kat i raꞌyn uipotpap hamuat toĩneꞌen hawyi uhehakyꞌeꞌi aru arepyhuꞌat e. Mesup te waku maꞌato meiũran yt naku i e. Uhesaika hap yt putꞌokꞌe i te uiweko nug hamo e iꞌewyte yt areĩneꞌen neran sẽtup sẽtup e hano e tuwepe tuwanẽtup hawyi."
4 Aikotã aru atunug pãi e tuwepe. Pyno atikuap koitywy waku mesup taꞌyn atunug uiwyriaꞌin wo kahato uiwyriaꞌin uikaꞌiwat piat uikaꞌiwat eweteweru haria e. Pyno waku atiꞌatukaykay miꞌi haria uhowawi hawyi waku atipatꞌok iꞌatuweteweru hap e iꞌatumowepit hamo e. Katupono areĩneꞌen ne mesup uikaꞌiwat emiit no te e. Katupono mũkiꞌite uikaꞌiwat yt uikyꞌesat i poꞌog naꞌyn e. Miꞌi hawyi maꞌato waku uikaꞌiwat hekat rakat piat weteweru haria yat pe areĩneꞌen e."
5 Miꞌi hawyi ikaꞌiwat hekat rakat piat weteweru haria toiꞌatukaykay tuwewawi. Miꞌi hawyi toꞌe wẽtup ok pe — Karania upi kẽi eweteweru uikaꞌiwat piat hap mehĩ e."
6 — Taꞌi iwato kahato tig uhyt e aikotã 100 kamũti howapy kahato hap ewy Uriweira kap muat rakat ewy uhyt e. Miꞌi hawyi toiwesat — Pyno ti waku watipatꞌok hawyi waku 50 kamũti ikap yn uhyt e. Mio tã e pote weteweru hat iwepit kahato tuwehum kahato. Miꞌi hawyi miwan miat toiwan 50 yn iweteweru hap e. Miꞌi hawyi taꞌatuset pehik mekewat miwan me hawyi toto."
7 Miꞌi hawyi wẽtup ok i toikaykay weteweru hat — Karania upi kẽi uikaꞌiwat piat eweteweru hap uhyt e. — Taꞌi iwato kahato e. 100 hyt uꞌi kapiat hap ewy uhyt e. Miꞌi hawyi hekat rakat emiit akag tiwesat — Pyno waku watipatꞌok eweteweru hap hawyi waku etum 50 hyt yn e. Mio tã e pote weteweru hat iwepit tuwehum kahato. Miꞌi hawyi mekewat miwan me taꞌatupag iweteweru hap pakup 50 hyt kapiat yn iweteweru hap mesup e hap. Miꞌi te weset pehik iꞌatuꞌe. Miꞌi tã ti tutunug at at tokaꞌiwat hekat rakat maꞌat hat hemiit."
8 Miꞌi hawyi wẽtup ewaty hap ete ikaꞌiwat tikaykay tuwewawi hawyi tokaꞌiwat toꞌe temiit akag me — Are pãi pyno koitywy yne uiweteweru haria ewyriaꞌin no tukupteꞌen uimaꞌat kahato hap upi ewyriaꞌin sem etunug hawyi e. Pyno erewyꞌinug kahato uhekareꞌen kaipyi e. Yt ikahu hin i eminug uhepiat hap atikuap taꞌyn e. Pyno worokuap taꞌyn eweꞌeg kahato saꞌag nug hap etiat hap e so e Iesui sehay iãꞌãkap wuo topotmuꞌeria pe. Miꞌi hawyi toꞌe i Iesui iꞌatuepe — Taꞌi uhytꞌiꞌin manaꞌin mesuwarotiaria iꞌatuweꞌeg kahato saꞌag nug kahato hap ete saꞌag nug hap kuap kahato hap ete. Maꞌato Tupana mohey haria yt iꞌatuweꞌeg hin i Tupana potpap nug kahato hap ete e. Maꞌato mesuwarotiaria poꞌog iꞌatukai teꞌeruweꞌeg e. Iꞌypyrypwiat ikohyewyry rakaria ewy mesuwarotiaria saꞌag nug hap yn taꞌatukuap kahato e. Miꞌi haria ewy worohoꞌokyꞌesat eipe maꞌato wakuap nug hap kuap hap ete iꞌewyte hẽtyhot puat wakuap nug hap ete e. Waku pyno eiwemoweꞌeg kahato Tupana mikyꞌesat minug kuap hap ete e."
9 Katupono mesuwarotiaria miitꞌin tikat kahato toꞌopowyro woꞌomaꞌat hap etiat hap taꞌatukaꞌiwat hekat rakat maꞌat hap kaipyi taꞌatunug taꞌatuwyriaꞌin mesuwarote e. Uiwyriaꞌin waku atikyꞌesat kahato ewetunug uhekat kaipyi Tupana wyriaꞌin wuat koꞌi e. Miꞌi hawyi miꞌiria tukupteꞌen wuatꞌi eꞌat pe atipy pe e. Waku watiꞌatuekyi kahato miitꞌin hekat kaipyi miitꞌin Tupana wano e."
10 Pyno uiwyriaꞌin waku watunug yne aiweꞌeg hap ok tã Tupana mikyꞌesat yne ete sio motpap wato nug hap kaipyi sio kurin motpap hap nug hap kaipyi waku watimõtypot kahato Tupana aiminug koꞌi hap ete e. Karãpe aheso hap kurin miꞌi pote iꞌewyte aheso hap iwato hap watunug kuap pote Tupana yt aimohey kuap i pywo sehay nug hamo e. Maꞌato hãpyk kahato aiminug kurin yn mytkai miꞌi pote meiũran iwato rakat nug hamo Tupana aimohey kahato e. Maꞌato yt hãpyk i kurin kat aiminug kaipyi pote iꞌewyte yt aimohey hin i iwato rakat nug hamo e."
11 Uiwyriaꞌin eiweꞌeg wo o ehekat mõꞌẽ hap ete. Waku hãpyk kahato eweimõꞌẽ Tupana miium ehepiat koꞌi e. Ehegyiꞌat hãpyk kahato hap kaipyi ti aru Tupana eikuap hãpyk sio yt sio ehekat iwato sio kurin hap e. Maꞌato hãpyk kahato ehekat mõꞌẽ hap taꞌakasa toikuap hawyi meiũran poꞌog tekat toimõꞌẽ kahato ehowawi eimohey hap toikuap hawyi eimohey hap upi e Iesui. Yt kat i i tomaꞌat hap toikuap eikai hawyi poꞌog tutum ehepe tekareꞌen hawyi iꞌewyte wuatꞌi eꞌat piat kareꞌen tutum ehepe wy e."
12 Uiwyriaꞌin eiweꞌeg wo o iraniaꞌin ekat eipo piat hawyi e. Yt etiꞌatumaꞌat reiꞌo iꞌatumipuru taꞌatuekat ete e. Maꞌato miitꞌin ekat etimaꞌat epo pe toĩneꞌen mote meiũran yt kat i Tupana tum tekat ehepe yt eimohey i pote e. Miꞌi hawyi yt karãpe i hekat rakano eweikupteꞌen yt karãpe i Tupana mipoityro wo eweikupteꞌen e Iesui."
13 Uiwyriaꞌin eiweꞌeg wo o ehekareꞌen koꞌi wywo eweikupteꞌen e. Pyno wẽtup sehay i ahenoi teran ehepe e. Yt naku i kahato typy eikaꞌiwat e. Niatpo kahato ti pyno typy ok aikaꞌiwat pote e. Typy aikaꞌiwat hap kaipyi wẽtup aikaꞌiwat no wẽtup ahewanĩkap mo wẽtup aiwy ok sese wẽtup ahewanĩkap sese topyhuꞌat e. Katupono yt watunug kuap i typy ok mikyꞌesat i koꞌi e. Wẽtup ok aipoꞌoro — Etunug no miꞌi pytkai wẽtup ok — Yt e. Yt wateropat kuap i typy ok ahetuꞌisa koꞌi aipoꞌoro haria e. Miꞌi hap ewy kahato yt watunug kuap i typy Ahetupana wo e. Yt naku i watunug ahekat neꞌi ahetupana wo katupono miꞌi watunug hawyi ti Tupana sese yt watunug kuap i Ahetupana wo ahekat mowato hap kape yn aiwanẽtup hap hawyi e. Miꞌi hawyi Tupana yt aipoꞌoro kuap i towat nug hamo maꞌato ahekat kyꞌesat hap kape yn aipoꞌoro. Miꞌi tã neꞌi pote ti typy ahetupana rakano watoĩneꞌen."
14 Mio tã e pote itotiaria wekareꞌen kyꞌe haria teromõpusu kahato Iesui Tupana ehay Musei mienoi kaipywiat enoi haria — Yt eweꞌeg hin i ti Mehĩ iꞌatuꞌe. Waku kahato ti ahekat iwato iꞌatuꞌe."
15 Miꞌi pote Iesui tiꞌatuwesat — Miitꞌin sehaꞌat turan ti wakuaria sese eipe eweikupteꞌen e. Yne eiminug koꞌi ewetunug eimõtypot hamuat hap miitꞌin ehamo e. Yt karãpe i ewetunug Tupana mõtypot hap eipyꞌa pe e. Eiwanẽtup hap ti Tupana tikuap kahato e. Toikuap kahato ti eipyꞌa piat eiwemõtypot hap yn nug neran hap eiwanẽtup hap e. Miꞌi hap upi mesuwarotiaria teꞌeruwehum kahato ehete e. Maꞌato Tupana ehaꞌat turan ti yt naku i sese nug haria kahato eipe e."
16 Koitywy iraniaꞌin tikyꞌesat kahato tuwehytꞌok Tupana etama piat hap e. Taꞌatukyꞌesat kahato Tupana taꞌatuporekuat no hap e. Miꞌi haria pyhyp haria kahato ti eipe e. Eweiꞌatumuꞌe kahato Musei miwan iꞌewyte Tupana ehay enoi haria miwan kaipyi iꞌewyte koran wuat hetꞌok hat Iuwãu ut hap kape miꞌiria maꞌato wẽtup sehay yn henoi Tupana ut Wuatꞌi Porekuat nuat hap ete yn iꞌatuehay e."
17 Yne yne ti topyhuꞌat aru iꞌatuꞌe hap ewy e. Yne iꞌatumiwan hit koꞌi aikotã aikotã aru hap koꞌi topyhuꞌat yne e. Yt wẽtup i iꞌatumiwan kaipyi iꞌatueso hap — Tut ti aru tut ti aru iꞌatuꞌe hap yne e. Pyno yt karãpe i miꞌi hap iꞌatumiwan ikahuro aru e. Niatpo kahato ti aru iꞌatumiwan hit tuwemoma poꞌog niatpo at ikahuro hap kai e. Poꞌog niatpo waikiru koꞌi yne ikahuro hap kai e. Katupono miꞌi iꞌatumiwan hit toĩneꞌen wuatꞌi eꞌat pe e."
18 Saꞌawyꞌi Musei toꞌe ainãpin hamuat — Yt etoiat teiꞌo eharyꞌi e. Etoiat hawyi yt naku i wẽtup ok etat e. Maꞌato wẽtup ok i etat hawyi yt naku i nug hano ereĩneꞌen e. Aikotã hewaire hewaire rakano ewy ereĩneꞌen Tupana wanẽtup hawe e. Yt eimikyꞌesat ewy hin i einãpin hap ehepe e. Yt etat reiꞌo haryporia saꞌawyꞌiwuat heꞌaito miꞌatoiat e. Maꞌato etat pote hewaire hewaire rakat ereĩneꞌen Tupana wanẽtup hawe e Musei saꞌawyꞌi ahepe. Miꞌi e hap miwan yt eweikyꞌesat hin i maꞌato toĩneꞌen ne wuatꞌi eꞌat pe eweikyꞌesat sio yt e.
"19 Miꞌi hawyi wẽtup sehay Iesui henoi iꞌatuepe. — Toĩneꞌen hekat rakat e. Miꞌi hesokpe ikahu kahato e. Wuatꞌi eꞌat pe yne imikyꞌesat koꞌi toĩneꞌen e. Ienuk hap tutunug kahato e. Yne miitꞌin itotiaria ikuap miꞌi hap ete e."
20 Toĩneꞌen wy itote wẽtup ok yt hekat i rakat iꞌahu kahato rakat hepihi pihi rakat Irasaru e hap het rakat e. Miꞌi ti wuatꞌi eꞌat pe iwyriaꞌin terut hawyi taꞌatuꞌatoiat hekat rakat eꞌokenꞌypyke kat ẽtup ẽtup hamo e."
21 Mipun miꞌu ieĩpyt koꞌi soꞌoẽtup hamo hekat rakat miꞌu iwato kahato mipun kaipyi maꞌato yt tohoꞌoium i yt hegyiꞌat hin i hekat rakat pote. Miꞌi tusake syꞌat pono ikuꞌuro raꞌyn. Miꞌi hawyi ti toto raꞌyn atipy kape e."
22 Meiũran Irasaru ikuꞌuro raꞌyn hawyi atipy piaria tioto wakuaria ienuk ieĩneꞌen hap kape haꞌaseꞌi Aparãu eꞌyatypiat heĩneꞌen hamo e. Miꞌi hawyi hekat rakat ikuꞌuro hawyi taꞌatusyp taꞌyn e."
23 Maꞌato aria kape toto hoꞌopot hap aria wato pe toĩneꞌen e. Miꞌi hawyi hoꞌopot hap kaipyi hekat rakat tehaꞌat ywaipe hawyi taꞌakasa raꞌyn Irasaru aseꞌi Aparãu eꞌyatype raꞌyn toĩneꞌen."
24 Miꞌi hawyi tuwẽpowat — Aseꞌi e etipoꞌoro ro meikowo uhowawi Irasaru yꞌy wywo e. Waku topuĩꞌã etiat yꞌy wo uhẽku pen e. Ahoꞌopot kahato raꞌyn mesup uito aria pe e."
25 Yt kat i i yꞌy uiweꞌyꞌu hamo e. Mio tã e pote Aparãu tiwesat — Uhaꞌyru e etiwaure raꞌyn apo eieĩneꞌen ne turan aikotã ereĩneꞌen saꞌawyꞌi hap waku kahato yne emikyꞌesat koꞌi wywo maꞌato Irasaru ieĩneꞌen yi totiat turan hoꞌopot hap yn toĩneꞌen tuete ihakyꞌeꞌi e."
26 Pyno meiũ wyti waku pe raꞌyn toĩneꞌen Irasaru maꞌato en wyti hoꞌopot hawe yn meiẽ ereĩneꞌen e."
27 Yt uwe i mesuwiaria tokosap kuap ewawi iꞌewyte yt uwe i ewywuaria tokosap kuap uruewawi e. Katupono toĩneꞌen yi hot iwato rakat yt kat i wyti meiũpepyi muꞌap hoꞌopot hap kape e Aparãu hekat rakat pe."
28 Miꞌi hawyi hekat rakat toꞌe i raꞌyn Aparãu me — Pyno etipoꞌoro ro Irasaru uiꞌywot yat kape uheywytꞌin 5 ok takaria piat henoi hamo e. Katupono yt atikyꞌesat i raꞌyn wyti miꞌiria tõꞌẽ meiũpe uhepiat hoꞌopot hap kape uiwyriaꞌin e."
29 Maꞌato Aparãu tiwesat — Uhaꞌyru e tukupteꞌen kahato eywytꞌin nãpin hanuaria itote. Waku teꞌeruwanẽtup Musei potnãpin hap koꞌi kape iꞌewyte Tupana ehay enoi haria mienoi kape e."
30 Miꞌi hawyi hekat rakat — Yt rat e maꞌato wẽtup ok wẽtem guꞌuro pywiat hat henoi iꞌatuepe pote taren yt tõꞌẽ i meiũpe uhepiat hoꞌopot hap kape taꞌatuepiat hoꞌopot hamuat hap kape hawyi teꞌeruwemorem Tupana kape taꞌatuminug saꞌag kaipyi pote e. Meremo taꞌatuminug saꞌag taꞌatuꞌatoiat hawyi Tupana taꞌatumohey miꞌi hawyi yt tõꞌẽ kuap i mesuwe taꞌatuepiat hoꞌopot hamuat hap kape e."
31 Miꞌi hawyi Aparãu toꞌe i raꞌyn — Pyno yt atipoꞌoro Irasaru iꞌatuewawi katupono yt teꞌeruwanẽtup i Musei mienoi kape yt teꞌeruwanẽtup i Tupana ehay moherep haria kape pyno ti iꞌewyte yt guꞌuro kaipywiat wẽtem hat Irasaru toto henoi hamo pote i wyti teran teꞌeruwanẽtup e Aparãu aria piat ieĩneꞌen hat pe e Iesui hekat rakat pe.
"1 Wẽtup eꞌat pe hawyi Iesui toꞌe temiitꞌin me — Mesuwarotiat eikupteꞌen turan wyti aru ehãꞌãg haria sem putꞌokꞌiꞌatuꞌe ehete hawyi taꞌatukyꞌesat aru ehepiat uimohey hap hep hamuat yt naku i nug hamo e. Yt waku pe hin i aru miꞌiria tukupteꞌen aru katupono poꞌog Tupana miꞌapiheg koꞌi wo tukupteꞌen wuatꞌi eꞌat pe aru are e."
2 Yt waku pe hin i miꞌiria tukupteꞌen aru aikotã wuatꞌi eꞌat piat yꞌy wato pe nu wato ete saity ete minꞌiꞌatuꞌe yt ahenꞌiꞌatuꞌe kuap i hap ewy taꞌatuhoꞌopot aru eimaꞌat reran haria uimohey hap ehepiat hep teran haria e. Miꞌi hap ewy kahato ti uhemiitꞌin hirakaria iãꞌãg iãꞌãg i haria ete e. Tupana miꞌapiheg koꞌi aru tukupteꞌen aikotã yꞌy wato piat ahaity ete nu wato ãpeꞌok etiat Miꞌi hap ewy kahato ti hirakaria maꞌat saꞌag nug hamuat haria ete Tupana miꞌapiheg koꞌi aru tukupteꞌen wuatꞌi eꞌat pe hoꞌopot kahato rakaria wo teꞌeropyhuꞌat. Yt naku i sese eweihep uimohey hap hirakat pyꞌa pyi are."
3 Eweꞌeg wo eimaꞌat reran haria pupi e. Karãpe wẽtup ok ahãꞌãg yt naku i nug hamo miꞌi hawyi — Yt naku i mio tã watunug mehĩ mana waku watoꞌe aimaꞌat reran hat are maꞌato — Yt uiwepyi i mehĩ mana toꞌe ahepe — Pyno waure wo areĩneꞌen uimaꞌat hap kai mehĩ mana waku watoꞌe tope."
4 Yt naku i ipyꞌahak aimaꞌat haria etiat rakaria wo watopyhuꞌat e. Waku watiꞌatuwesat aimaꞌat haria pytkai e. Waku heꞌihotꞌok heꞌihotꞌok pe i — Yt uiwepyi i e — Yt uiwepyi i e 7 wo toꞌe i toꞌe i ahepe pote waku — Uito waure wo areĩneꞌen watoꞌe i watoꞌe i 7 wo are.
"5 Miꞌi hawyi 12 ok takaria ipotmuꞌeria tõꞌẽ Iesui ewawi hawyi teꞌeroꞌe Iesui pe — Urukaꞌiwat uruimohey kahato poꞌog neran Tupana wuatꞌi nug hamo ete. Pyno etimowato o uruepiat imohey hap iꞌatuꞌe Iesui pe."
6 Miꞌi tã iꞌatuꞌe pote Iesui tiꞌatuwesat — Uiwyriaꞌin watomohey Tupana pote tutunug yne aimiẽtup e. Yt uheso hin i eimimohey yt iwato hin i pytkai ehãꞌãg no imohey hawyi tutum eimimohey ok tã e. Gaꞌapy pe ti toĩneꞌen ariaꞌyp koro koꞌi poꞌog torania kai maꞌato iãꞌỹi kurin kahato hap ok tã yt heremo hin i hap ewy wasere upi topopy rakaria iãꞌỹi tuwemoherep mekewat ariaꞌyp koro koꞌi e. Waku miꞌi iãꞌỹi ewy eweimohey Tupana. Aimimohey watikoi hawyi iwato topyhuꞌat aru kurin kahato saꞌawyꞌi pytkai katupono Tupana ti aimiẽtup nug hat pote e. Tupana mohey hap wywo eweiꞌe Wasere yp pe — Motoro gaꞌapy pyi hawyi erekoi ro ihyemuiꞌa wato tote watoꞌe hawyi Tupana mohey hap wywo pote meremo tutunug aiꞌe hap ewy e. Miꞌi hawyi Wasere yp toto meremo hawyi ihyemuiꞌa wato pyꞌasetpe tuwekoi itote hap ewy eweimohey Tupana hawyi are. Taꞌi yt aiminug kuap i koꞌi Tupana tunug kuap meremo e Iesui ahepe.
"7 Miꞌi hawyi wẽtup sehay i tohenoi — Karãpe wataꞌaipok i aiꞌyat kape ahesyꞌat kahato hap wywo hawyi meremo watoꞌe aheropat haria pe — Arewei hawyi meremo uipoi ro hawyi meremo uheꞌyni ãti ro. Arenuk kahuro hawyi waku areket uhero pote watoꞌe aheropat haria aiꞌyat piaria ahetama pe morekuaria watoĩneꞌen pote. Yt karãpe i watoꞌe aheropat hat pe — Mesup atunug eimiꞌu hawyi waku erewei hawyi worohoꞌopoi yt watoꞌe i aheropat haria pe e."
8 Mio tã watoꞌe — Ewetunug no uimiꞌu hawyi arenuk teran watoꞌe aheropat haria pe. — Aresapohyꞌu hawyi areket hawyi waku watoꞌe ahetama pe morekuaria aito pote. Uheropat hap kahu hawyi waku eweinuk eweiket watoꞌe."
9 Yt karãpe i morekuaria koro koꞌi teꞌeroꞌe taꞌatueropat haria pe — Eiperia poꞌog uikai uheropat kahato haria eiperia pote yt iꞌatuꞌe i katupono morekuat ekat kaipyi tukupteꞌen mote. Taꞌi morekuat miꞌu kaipyi teꞌerenuk teꞌerosapoꞌu. Morekuat sokpe kaipyi teꞌeruwepainug. Taꞌi morekuat saꞌup ete iꞌatupotpap pote — Waku kahato eipe yt iꞌatuꞌe i morekuaria taꞌatupotpap nug haria pe ahetama pe e Iesui."
10 Pyno waku kahato watopyhuꞌat Tupana eropat kahato haria wo are. Waku Tupana mikyꞌesat ewywuat yn watunug are. Waku watuwepotpap kahato imikyꞌsat nug hap ete aikotã morekuat eropat haria akag koꞌi ewy. Yt naku i watoꞌe Tupana pe — Yt ewese hin i kat pote yt karãpe i uheropat yt karãpe i uimikyꞌesat ewy etunug iꞌewyte yt karãpe i uipoi yt naku i watoꞌe Tupana pe. Poꞌog waku watoꞌe Tupana pe — Arehum ewawi pote eropat hano areĩneꞌen waku watoꞌe Tupana pe. — Atunug neran poꞌog hãpyk emikyꞌesat koꞌi katupono yt naku i te areĩneꞌen emikyꞌesat nug hap ete waku watoꞌe Tupana pe e Iesui temiitꞌin me.
"11 Miꞌi hawyi Iesui toto hãpyk kahato yi Karireia yi Samaria sakpo tawa wato Ierusarẽi kape."
12 Miꞌi hawyi muꞌap upi Iesui toto wẽtup tawa hit kapiat turan 10 ok takaria hepihi pihi rakaria tõꞌẽ howawi. Taꞌatuꞌahu pote yt tukupteꞌen kuap i iraniaꞌin wywo."
13 Iꞌatupe nem mote pya Iesui kai teꞌeropyhuꞌat hawyi teꞌerowẽpowat haty wo — Uruꞌakag erahaꞌat ro uruewawi hawyi uruehakyeraꞌat iꞌatuꞌe."
14 Miꞌi hawyi Iesui taꞌakasa iꞌatuewawiat hawyi toikuap iꞌatuehay hawyi toꞌe iꞌatuepe — Eweiwat ro paꞌi koꞌi kape eipiit moherep iꞌatuepiat hamo ehehãite hap moherep hamo e iꞌatuepe. Tohenoi hawyi hepihi pihi rakaria tuwat raꞌyn paꞌi koꞌi kape yt taꞌatuehãite hin mywo i te tuwat maꞌato muꞌap upiat tuwat hap tote iꞌatuehãite raꞌyn taꞌatuehepihi kãꞌã raꞌyn iꞌatupe kahuria raꞌyn."
15 Miꞌi hawyi wẽtup ok taꞌaipok Iesui kape hawyi toꞌe tehay pirik wo — Waku kahato Tupana pe katupono mesup taꞌyn uimoehãite i raꞌyn e."
16 Putꞌoktoꞌe Iesui ete hawyi porog myi ihay — Waku kahato uhete etunug Uikaꞌiwat e. Uimoehãite raꞌyn En e Iesui pe. Miꞌi miit aipok hat yt Iesui ywania kaipywiat hat i maꞌato yi Samaria ywania kaipywiat sut hat. Samaria ywania yt taꞌatukyꞌe hin i Iesui ywania pytkai meiũwat Iesui mimoehãite tuwepỹꞌãtutuk — Waku kahato En e hamo."
17 Miꞌi hawyi mekewat Iesui mimoehãite yi Samaria kaipywiaria Iesui py ywytpe hawyi Iesui toꞌe tope — Pyno 10 ok takaria atiꞌatumoehãite mesup maꞌato en yn eraꞌaipok uhowawi epihi kãꞌã moherep hamo — Waku e hamo e."
18 — Aikope pyno iraniaꞌin 9 ok takaria uimimoehãite koꞌi aikope tuwat miꞌiria kat poteĩ yt tõꞌẽ i uhowawi — Waku taꞌatuꞌe uhepiat hamo e."
19 Miꞌi hawyi toꞌe — Waku eraꞌaipok eꞌyat kape mehĩ e. Mesup waku pe ereĩneꞌen i raꞌyn katupono uimohey hawyi emoehãite hap toĩneꞌen mesup e Iesui tomimohãite pe.
"20 Miꞌi hawyi tõꞌẽ miitꞌin Iesui maꞌat reran hanuaria meimuẽwat Tupana ehay miwan etiat kuap kahato rakaria. Miꞌi hawyi — Mehĩ iꞌatuꞌe uruikuap teran ehay iꞌatuꞌe. Karãpe aru putꞌokꞌe mesuwat yi tote Tupana Aiporekuat nuat hap iꞌatuꞌe. Aikope aru pyno tuwemoherep Aipotypot no Tuapana iꞌatuꞌe. Miꞌi hawyi Iesui tiꞌatuwesat — Pywo ti rat yt heremo i hap ewy Tupana topyhuꞌat yi Porekuat no tuwemoherep mesuwarotiaria pe e."
21 Yt uwe i ikuap are e. Yt naku i eweiꞌe — Meiẽ Tupana toĩneꞌen aiporekuat nuat. Yt naku i eweiꞌe — Eweiꞌakasa ro iuẽpe toĩneꞌen naꞌyn Tupana aiporekuat nuat yt naku i mio tã eweiꞌe katupono yt heremo i tuwemohep Eiporekuat nuat e iꞌatuepe. Taꞌi eipyꞌasetpe yt heremo i hap ewy tuwemoherep Tupana Eiporekuat nuat mesup maꞌato yt heremo hin i ehepe e tuwepe.
"22 Miꞌi hawyi Iesui toꞌe topotmuꞌeria pe tomohey haria pe — Uiwyriaꞌin e mesup taꞌyn Tupana toĩneꞌen Eiporekuat nuat eipyꞌasetpe e. Mesup taꞌyn Eheykeꞌet toĩneꞌen eiwywo heremo kahato hap ewy maꞌato yt motꞌi i areĩneꞌen eiwywo e. Areto hawyi ti aru ehehatꞌat kahato — Waku kahato saꞌawyꞌi karãpe Aheykeꞌet Aikywyt toĩneꞌen aiwywo hap eweiꞌe aru uhepiat e. Waku kahato nimuat Aiwy toĩneꞌen aiwywo hap eꞌat eweiꞌe aru uhepiat e. Ehehatꞌat kahato mekewat eꞌat hawyi — Watikyꞌesat kahato wẽtup eꞌat poꞌog Aheykeꞌet wywo Aikywyt wywo i raꞌyn hap watikyꞌesat eweiꞌe aru uhepiat pe eiwoꞌope maꞌato miꞌi hawyi ti aru yt uipuẽti hin eipe hawyi uhehatꞌat kahato are e Iesui."
23 Miꞌi hap eꞌat pe aru iraniaꞌin teꞌeroꞌe ehepe eimaꞌat hamo — Pywo ti rat taꞌaipok taꞌyn Aheykeꞌet Aikywyt kuepe raꞌyn toĩneꞌen i raꞌyn iꞌatueso ehepe. — Pyno toꞌiro Aheykeꞌet Aikywyt ewawi iꞌatuꞌe aru ehepe iraniaꞌin eimaꞌat hamo maꞌato yt eweiwat reiꞌo miꞌiria upi uikat hamo katupono yt pywo pe i mio tã iꞌatuꞌe ehepe maꞌato eimaꞌat hamo mio tã iꞌatuꞌe ehepe aru e."
24 Katupono Uito Miitꞌin Eykeꞌet ut hap eꞌat pe turan merep e hap ewy ariot atipy kaipyi are e. Heremo sese hap ewy ariot atipy kaipyi are e. Wuatꞌi mikuap ewy uhẽtyhot kahato puo ariot Wuatꞌi Miitꞌin Potypot no ariot aru atipy kaipyi e Iesui tomohey haria sese pe."
25 Maꞌato koitywy mesuwarotiaria yt uimohey haria i tukupteꞌen e. Pywo ti rat koran te ti mesuwarotiaria iraniaꞌin Eheykeꞌet Eikywyt pun haria teꞌeropyhuꞌat are e. Yt taꞌatukyꞌesat hin i uimohey hap pãi e. Ahoꞌopot kahato irane taꞌatumikyryꞌi hap upi e."
26 Pyno areto hawyi araꞌaipok i mesuwe i raꞌyn e. Saꞌawyꞌi sese te mekewat iꞌaman at kaꞌap 40 eꞌat piat hap turanuat mekewat ahaꞌaseꞌi pot Nuꞌe toĩneꞌen hap eꞌat piat turanuat yt uwe i ahaꞌaseꞌi pot Nuꞌe mohey hat toĩneꞌen e. Miꞌi hap ewy kahato ti aru miitꞌin tukupteꞌen wyti aru Eheykeꞌet ut hap eꞌat pe wyti aru are e."
27 Nuꞌe ieĩneꞌen hap eꞌat turan teꞌerenuk hap koꞌi kape yn taꞌatuwanẽtup mesuwat yi tote are e. Mahy u hap kape yn teꞌeruwewanẽtup at kaꞌap e. Taꞌi iꞌatuwary wary kahato itote e. Woꞌowaire waire hap kape yn taꞌatuwanẽtup e. Yt teꞌeruwanẽtup hin i mekewat Tupana ehay Nuꞌe mimoherep kape iꞌaman koro tut irane e hap kape yt teꞌeruwanẽtup teran hin i saꞌawyꞌi e. Miꞌi hawyi Nuꞌe teke raꞌyn mekewat yara wato sese pe toꞌyat piaria wywo hawyi iꞌaman koro kahato raꞌyn Tupana e hap ewy raꞌyn hawyi yꞌy wato taꞌam kahato yi tote hawyi yꞌy koro hap ewy yn toĩneꞌen yi tote hawyi yt imohey i haria yꞌy koro tiꞌatuꞌatuꞌuka kahato torania mesuwat yi totiaria e miwan me e. Miꞌiria ewywuat aru tukupteꞌen miitꞌin uhut hap eꞌat pe e Iesui."
28 Taꞌi saꞌawyꞌi sese Tupana toꞌe aseꞌi Iro pe — Eiwenõꞌẽ ro tawa wato Sutuma pyi katupono atiꞌatuwuk tawa Sutuma piaria iꞌatuminug saꞌag upi e. Mekewat eꞌat pe Iro tuwẽtem turan miꞌi hap eꞌat pe Tupana tiwuk taꞌyn itotiaria e miwan me e. Mekewat eꞌat pe teꞌerenuk at kaꞌap hap koꞌi kape yn teꞌeruwanẽtup e. Iꞌatuꞌyat nug hap kape yn teꞌeruwanẽtup e. Taꞌatueko nug hap kape yn taꞌatuwanẽtup e. Teꞌeruwesapo mahy u hap koꞌi kape yn teꞌeruwaꞌatunug e. Weneruꞌi weneruꞌi hap ete woꞌowaire waire hap kape yn taꞌatuwanẽtup hawyi Iro tuwẽtem naꞌyn mekewat tawa pyi toꞌyat piaria hupi hawyi aria raꞌyn hewo hewo itote atipy kaipyi hawyi yt teꞌeruwanẽtup teran i Tupana e hap kapiaria wuk hamo e miwan me e. Miꞌi hap ewy kahato ti aru mesuwarotiaria tukupteꞌen aru araꞌaipok hap eꞌat pe."
29 Maꞌato mekewat eꞌat pe karãpe Iroꞌin tuwẽtem naꞌyn tawa saꞌag Sutuma pyi hawyi aria hewo hewo raꞌyn atipy kaipyi nukara ewywuat koꞌi Tupana minug. Miꞌi haria tawa Sutuma piaria Tupana ehay pun haria aria miꞌu wo yn tukupteꞌen e."
30 Miꞌi hap ewy kahato ti aru miitꞌin tukupteꞌen Eheykeꞌet ut hap eꞌat pe hamuat turan acre e. Yt uwe i Tupana ehay kape teꞌeruwanẽtup mekewat eꞌat pe e. Taꞌatuminug koꞌi kape yn teꞌeruwanẽtup e. Uhut hap kape yt teꞌeruwanẽtup hin i mekewat eꞌat pe hawyi ariot e Iesui ahepe."
31 Mekewat uhut hap eꞌat pe eweinõꞌẽ ro tawa Ierusarẽi myi meremo are e. Eheꞌyni toĩneꞌen eiꞌyat pe pote yt eweiꞌaipok i ehekareꞌen koꞌi sat hamo are e. Meremo eweinõꞌẽ ro tawa Ierusarẽi myi are e. Eiko totiat eweikupteꞌen mote uhut turan mote yt eweiꞌaipok teiꞌo eiꞌyat kape ehekat sat hamo e."
32 Aseꞌi Iro eharyꞌi taꞌaipok teran tawa Sutuma kape hawyi tehaꞌat tawa Sutuma kape taꞌaipok teran haype hawyi nu ukyt kawiat mana Iro eharyꞌi topyhuꞌat itote e. Pyno yt eweiꞌaipok teiꞌo tawa Ierusarẽi kape Iro eharyꞌi ewy are katupono tuwenõꞌẽ tawa Sutuma pyi turan Tupana toꞌe Iroꞌin me — Yt eweiwehaꞌat teiꞌo tawa kape eweiwenõꞌẽ hawyi e maꞌato Iro eharyꞌi tehaꞌat i raꞌyn tosaipe hawyi ipiit nu ykyt kawiat topyhuꞌat ihaꞌat turan hawyi e. Toikyꞌe kahato toieĩneꞌen hap Sutuma totiat pote e."
33 Pyno eheĩneꞌen hap mesuwarotiat eweikyꞌe kahato eweiꞌapykok kahato pote yt putꞌokꞌeweiꞌe i eheĩneꞌen hap ehehakyeraꞌat wuatꞌi eꞌat piat hamo are e. Maꞌato yt eweikyꞌe kahato i eheĩneꞌen hap mesuwarotiat pote maꞌato Tupana mikyꞌesat ewywuat hap upiat eweiwanẽtup hawyi pywo pe ti eweipuẽti wyti aru eheĩneꞌen hap sese ehehakyeraꞌat hap hamuat e Iesui ahepe."
34 Mekewat wãtym me Eheykeꞌet Eikywyt ut hap eꞌat pe turan tukupteꞌen aru typy ok teꞌeroket neꞌi wyti aru getap wiat toꞌokipy pe e. Miꞌi hawyi wẽtup ok yt uwe i raꞌyn Tupana tioto hawyi maꞌato wẽtup yt uimohey hat i pote Tupana toiat raꞌyn itote e."
35 Mekewat eꞌat pe turan uhut hap eꞌat typy haryporia wemiꞌutok haria tukupteꞌen irane hawyi wẽtup haryporia yt uwe i wyti aru Tupana tioto hawyi maꞌato wẽtup ok totoiat raꞌyn itote yt uimohey hat i pote e."
36 Iꞌewyte wyti aru typy ihainia taꞌatuko tote tukupteꞌen wẽtup ok wyti aru yt uwe i raꞌyn Tupana tioto hawyi maꞌato wẽtup ok totoiat itote mekewat eꞌat pe e. Yt uimohey hat i wyti aru totoiat e Iesui ahepe."
37 Miꞌi hawyi iwyriaꞌin apoꞌiꞌatuꞌe Iesui pe — Uruporekuat iꞌatuꞌe aikope aikope aru eriot eut hap eꞌat pe iꞌatuꞌe. Miꞌi hawyi toiꞌatuwesat — Pyno mekewat uhut hap eꞌat pe putꞌokꞌe hawyi meremo eweikuap uhut hap are. Taꞌi karãpe watꞌakasa Uruwu koꞌi teꞌerepopy hawyi meremo watikuap iꞌokpuk takat toĩneꞌen itote iꞌatumiꞌu wo teꞌeruwaꞌatunug kahato itote pote e. Taꞌi yt niatpo hin i watikuap aikope toĩneꞌen hap. Miꞌi hap ewywuat yt niatpo hin i eweikuap aikope ariot hap e Iesui topotmuꞌeria pe ahepe.
"1 Miꞌi hawyi poꞌog Iesui henoi tehay iãꞌãkap wuo — Uiwyriaꞌin e waku ahehay kahato Tupana kape e. Waku yt aipohep hin i maꞌato wahẽtup hẽtup hap pyi e. Tupana yt tum i aimiẽtup hawyi waku wahẽtup i e. Yt naku i ahehay yi kape yt hum i ahepe hawyi e. Pyno ahenoi teran uhehay hãꞌãkap wuo aikotã waku wahenoi Tupana kapiat wahẽtup aimikyꞌesat koꞌi hap etiat e."
2 Pyno saꞌawyꞌi so wẽtup tawa piat toĩneꞌen morekuat esurara akag koro iꞌatuꞌe. Miꞌi miit topyhuꞌat morekuat muꞌe hat uwe waku uwe yt naku i e hanuat iꞌatuꞌe e. Miꞌi miit maꞌato ti yt Tupana mohey hin i hat iꞌewyte yt toiꞌatukyꞌe hin i miitꞌin iꞌatuꞌe so e."
3 Iꞌewyte hiwu toĩneꞌen wy mekewat tawa tote iꞌatuꞌe. Miꞌi ti toto mekewat surara akag kape katupono toikyꞌesat topowyro hap. Miꞌi hawyi topowyro hap tohẽtup mekewat surara akag me — Uipowyro ro e katupono tukupteꞌen kahato miitꞌin yt iꞌatuwese rakaria uimaꞌat kahato rakaria e tope. Pyno wãiꞌere ro uhewanĩkaptia pe mimi e so. Miꞌi hawyi eweimohãpyk o iꞌatuminug saꞌag uhetiat hap e morekuat emiit akag me."
4 — Maꞌato so mekewat morekuat surara akag yt ipowyro teran hin i haype mekewat hiwu iꞌatuꞌe. Miꞌi pote yt toiwesat i tohẽtup hawyi iꞌatuꞌe so. Miꞌi hawyi yne eꞌat pe yne wãtym me toto i hẽtup hẽtup kahato hamo maꞌato yt kat i tutum ipowyro hap iꞌatuꞌe so. Miꞌi hawyi wẽtup eꞌat pe — Are pãi e tuwepe mekewat surara akag hawyi so — Yt arekenꞌẽ i Tupana pupi e. Iꞌewyte iraniaꞌin mupi yt arekenꞌẽ hin i maꞌato mesuwat hiwu pupi arekenꞌẽ kahato katupono yt areket kuap i mekewat hiwu tut at kaꞌap hẽtup hẽtup hamo pote e. Yt naku i uhete pote atum pãi imikyꞌesat ewy hawyi yt tut i uhowawi e tuwepe iꞌatuꞌe so e."
5 Taꞌi uimosero mosero kahato rat mekewat haryporia hiwu tehay wo e so. Miꞌi pote atipowyro hawyi yt tut i e so tuwepe. Wuatꞌi eꞌat pe tut wuatꞌi wãtym me tut pote atum imikyꞌesat ewy hawyi yt tut i e so e Iesui tehay iãꞌãkap wuo."
6 — Pyno eiwewanẽtup to mekewat hiwu miẽtup uhehay iãꞌãkap kape e. eiwewanẽtup to mekewat surara akag ehay kape e."
7 — Pywo ti rat Tupana yt mekewat surara akag saꞌag ewy hin i katupono Tupana tikyꞌe kahato temiitꞌin yne hawyi tutunug neran yne aimiẽtup towawiat hap are e. Pywo ti rat toikyꞌesat kahato ahẽtup hẽtup kahato hap sio ihotꞌok puo sio wãtym muo hap e. Taꞌi waku wahẽtup tope at kaꞌap yt aipohep hin hẽtup hẽtup hap etepyi e. Taꞌi meremo Tupana timohãpyk aru iraniaꞌin minug saꞌag ahetiat koꞌi wahẽtup hawyi e temiitꞌin me."
8 Taꞌi areĩneꞌen Eheykeꞌet Uito miꞌi pote uhut hap eꞌat turan atiꞌatuꞌapiheg kahato iraniaꞌin minug saꞌag uimohey haria etiat e. Taꞌi uimohey sese haria ihay kahato rakaria Tupana mohey hawuo are e. Miꞌi ewywuat Uiꞌywot mohey haria atiꞌatukat kahato e. Uhut hap eꞌat pe miꞌiria ewywuat atiꞌatukat kahato sio toĩ sio yt hap e. Are pãi yt atikuap i te sio tukupteꞌen aru Tupana wywo ihay rakaria uimohey sese haria mekewat uhut hap eꞌat pe hap yt atikuap i te e Iesui temiitꞌin me ahepe.
"9 Miꞌi hawyi wẽtup sehay iãꞌãkap wuo Iesui henoi miitꞌin me katupono tukupteꞌen itote — Uruto poꞌog wakuaria torania kai e haria yt iraniaꞌin atukyꞌe hin i haria."
10 Miꞌi haria pe Iesui henoi — Saꞌawyꞌi so typy ihainiaꞌin tuwat raꞌyn Tupana mõtypot hap yat kape taꞌatuehay Tupana wywuat hamo e. Wẽtup ok Tupana ehay moherep hat miꞌi — Poꞌog uito iraniaꞌin kai e tuwepe hat e. Miꞌi hawyi so wẽtup ok yt naku i kahato rakat katupono ipotpap ahewanĩkaptia porekuat emiit no ahekareꞌen poreraꞌat hamuat wuatꞌi muꞌap upi hanuat miꞌi e."
11 Miꞌi hawyi so mekewat — Uito waku kahato rakat e hat putꞌokꞌe Tupana mõtypot hawe hawyi teke aikope paꞌi yn teke hawe pya kahato pyi iraniaꞌin yt naku i nug haria kai hawyi ihay se hap ewy Tupana kape — Waku sese kahato atunug e so uito poꞌog waku iraniaꞌin kai e so tuwepe tuwanẽtup hawe e. Arehum ewawi uiwaku hap upi e so. Uito yt iraniaꞌin ewy hin i iꞌatuminug saꞌag hap ete e so. Uito waku kahato nug hat yn e so. Are pãi e uito ti yt miitꞌin maꞌat hat ewy hin i e. Uito yt areĩneꞌen i wuatꞌi haryporia wywo ehat i e. Waku kahato uito pãi e so. Tupana e so toĩneꞌen mesuwe eꞌyat pe wẽtup ok miit yt naku i sese nug hat e so. Miꞌi miit ahewanĩkaptia esuraraꞌin powyro hat hawyi ahekareꞌen toiporeraꞌat ahewanĩkaptia porekuat ekat no e so. Yt karãpe i atiꞌaparap miꞌi miit ewywuat e so tuwepe Tupana mõtypot yat pe e."
12 Taꞌi waku kahato atunug yne ete e. Pywo ti rat typy eꞌat 7 eꞌat turan yt kat i hin i atuꞌu miꞌu emõtypot hamuat haype e so. Waku kahato atunug katupono uhegyiꞌat kahato katupono uiko kaipyi uhekat kaipyi atimõꞌẽ 10 kaipyi wẽtup aterut ewawi Tupana hawyi 9 yn atioto uiꞌyat kape e. Iwato kahato atiꞌatumõꞌẽ uihũria kaipyi wẽtup 10 kaipyi atum e so Tupana pe e maꞌato miꞌi tã toꞌe Tupana pe wuatꞌi miitꞌin tikuap tehay hamuat hap toikyꞌesat e."
13 Miꞌi hawyi mekewat yt naku i nug hat mekewat wanĩkaptia powyro hat wuatꞌi ekareꞌen pyhyp hat pya kahato iraniaꞌin waku nug haria kai toĩneꞌen okenꞌypy ete. Yt tehaꞌat hin i atipy kape Tupana ewawi tehay hamo maꞌato yi kape yn teheꞌat hawyi tuweꞌahyk ahyk tuwemõti Tupana wywo tehay hamuat haype. — Yt uiꞌapiheg neiꞌo uiminug saꞌag upi e. Atikuap taꞌyn uito yt naku i kahato rakano areĩneꞌen wen maꞌato uhehakyeraꞌat En hap atikyꞌesat e Tupana pe paatoꞌe haype e so e Iesui."
14 Pywo pe areꞌe ehepe mekewat paaꞌe tominug saꞌag koꞌi ete mekewat — Atoiat teran uiminug yt naku i e hat yn taꞌaipok toꞌyat kape waku pe Tupana wanẽtup hawe are katupono Tupana tiwaure yne iminug saꞌag koꞌi pote maꞌato mekewat — Uito poꞌog poꞌog iraniaꞌin kai e hat ete Tupana yt tiwaure kuap i iminug yt naku i koꞌi hap kai katupono — Uito yt atunug i yt naku i e hat toĩneꞌen mote e. Miꞌi hat ewywuat kahato eweikupteꞌen katupono — Uruto poꞌog waku torania kai e haria eweikupteꞌen e Iesui tewanĩkaptia pe itotiaria pe. Pywo ti rat areꞌe ehepe uwe uwe tuwemowato topyꞌa pe tuwanẽtup hawe — Uito poꞌog waku iraniaꞌin kai e hap wywo miꞌi hat wy ti aru Tupana mimohit kahato rakano topyhuꞌat wuatꞌi eꞌat pe wen uwe uwe paaꞌe topyꞌa pe tuwanẽtup hawe tominug saꞌag hawyi — Uhehakyeraꞌat Tupana pe toꞌe hat miꞌi hat toĩneꞌen Tupana mimõtypot no toĩneꞌen wuatꞌi eꞌat pe are e Iesui wuatꞌi miitꞌin me.
"15 Miꞌi hawyi wẽtup eꞌat pe miitꞌin terut taꞌatumẽpytꞌin Iesui ewawi katupono taꞌatukyꞌesat kahato taꞌatumẽpytꞌin poityro hap Iesui po kaipywiat hap. Taꞌatukyꞌesat iꞌatuewaku Iesui piat hap. Miꞌi hawyi tõꞌẽ howawi wen maꞌato Iesui emiitꞌin wãiꞌiꞌatuꞌe hirakaria erut haria pe."
16 Maꞌato Iesui ihay pirik temiitꞌin me — Kat poteĩ eweiꞌatupyhyp hirakaria uhowawi haria e. Wãi neiꞌo are e katupono atiꞌatukyꞌesat kahato hirakaria uhowawiat hap e. Yt eweiꞌatupyhyp teiꞌo hirakaria iꞌatuepap uhowawiat hap upi are e topyꞌahak hap wywo temiitꞌin me. Yt eweiꞌatupyhyp teiꞌo hirakaria katupono hirakaria timohey kahato Tupana are e. Taꞌi hirakaria tuwehytꞌok teran kahato Tupana etama pe e. Tupana mohey kahato haria kahato ti hirakaria miꞌi pote ti aru miꞌiria ewywuat rakaria yn wyti aru tukupteꞌen Tupana etama pe e. Mesuwe karãpe Tupana topyhuꞌat Wuatꞌi Miitꞌin Porekuat no hap eꞌat pe turan miꞌiria pe — Atum aru uhetama sese ehepe e. Atum aru mesuwat yi yne hirakaria ewywuat uimohey haria pe e Tupana e."
17 — Pywo pe ti eweiwat teran aikope Tupana toĩneꞌen morekuat no hap kape pote hirakaria tikyꞌesat tuwehytꞌok hap ewy o eweiwat o are e. Maꞌato yt pote yt eweiwat kuap i e. Eweiwat ro Tupana mohey kahato hawuo hirakaria imohey kahato haria ewywuat pote ti aru putꞌokꞌeweiꞌe aikope Tupana toĩneꞌen hap tote e Iesui topotmuꞌeria pe taꞌatupyhyp hirakaria howawi turan.
"18 Miꞌi hawyi wẽtup ok Iuteuria ywania akag hekat kahato rakat apoꞌe Iesui pe — Uimuꞌe hat e waku kahato En e. Pyno uimuꞌe ro kat som waku atunug uheĩneꞌen wuatꞌi eꞌat piat hap kyiꞌat hamo e. Atikyꞌesat kahato areĩneꞌen Tupana wywo wuatꞌi eꞌat pe e. Pyno kat som waku atunug miꞌi hap puẽti hamo apoꞌe Iesui pe. — Waku sese kahato en e Iesui pe."
19 Miꞌi hawyi Iesui toꞌe — Kat poteĩ — Waku sese kahato En ereꞌe uhepiat pe e. Tupana yn ni waku sese hap watikuap e. Uito apo areĩneꞌen Tupana wo ewanẽtup hawe e."
20 Pyno etikuap apo Tupana piat ainãpin hap koꞌi e. Etikuap aikotã Tupana ainãpin Musei miwan miat apo. Mio tã e — Yt naku i wẽtup ok wywo wẽtup ok wywo eharyꞌi eꞌaito e miwan me e. Yt naku i etiꞌauka miit e miwan me e. Yt naku i seroꞌokꞌere e miwan me e. yt naku i eso e. Etimõtypot ro eꞌywot ety e miwan me e. Mio tã e hap koꞌi etikuap apoꞌe mekewat hekat rakat pe mekewat miit akag me."
21 Miꞌi hawyi toiwesat — Taꞌi atiꞌatukuap yne mekewat Tupana piat ainãpin hap koꞌi mehĩ e. Taꞌi uihire pyi te ti atunug yne yne mio tã e hap koꞌi e Iesui pe."
22 Miꞌi hawyi Iesui toꞌe tope — Waku mehĩ wen maꞌato wẽtup mo yt etunug i te e. Miꞌi hap etunug hawyi waku pe ereĩneꞌen Tupana wanẽtup hawe e. Pyno ereto ro eꞌyat kape hawyi ekat iwato kahato hap etiꞌatumõꞌẽ yne yt hekat i rakaria pe miitꞌin hakyꞌeꞌi rakaria pe satek takaria pe e. Etiꞌatumõꞌẽ yne hawyi waku eraꞌaipok uhowawi uhemiit no uhupiat eto hamo e Iesui mekewat miitꞌin akag me mekewat hekat kahato rakat pe. Mio tã etunug pote etipuẽti ekareꞌen sese wuatꞌi eꞌat piat mesuwe karãpe Tupana toĩneꞌen mesuwe wuatꞌi porekuat nuat hap eꞌat pe e Iesui mekewat hekat kahato rakat pe."
23 Maꞌato mio tã e Iesui hawyi mekewat miit yi kape yn tehaꞌat hawyi paaꞌe kahato katupono iwat hekareꞌen iwato kahato hap toiꞌatukyꞌe kahato pote yt toimõꞌẽ teran i tekat sem hatek takaria pe yt hekat i rakaria pe pote."
24 Miꞌi hawyi Iesui tehaꞌat kahato mekewat hekat kyꞌe kahato hat ewawi hawyi toikuap taꞌyn paaꞌe kahato hap hawyi toikyꞌe kahato hawyi toꞌe itotiaria pe — Are pãi e niatpo kahato ti rat wekareꞌen kyꞌe kahato haria tuwehytꞌok aikope Tupana toĩneꞌen Morekuat no hawe are e Iesui."
25 Taꞌi niatpo kahato yt hegyiꞌat i rakat teke atipy pe e. Niatpo kahato wateke atipy pe ahekat iwato wywo e. Niatpo kahato aikotã aihũ iwato kahato rakat mekewat Kameru e hap het rakat teke awi ehapo kaꞌa puo maꞌato sakpo niatpo sese ewy wekat iwato kahato kyꞌe kahato rakaria teke atipy pe e. Niatpo aihũ Kameru iwato kahato rakat teke awi ehapo sakpo poꞌog poꞌog niatpo tuwehytꞌok Tupana etama pe — Uhekat ti uhetupana wo toĩneꞌen e hat e Iesui."
26 Mio tã toꞌe hawyi wanẽtup haria itotiaria teꞌeroꞌe tope — Pyno yt uwe i teke kuap atipy pe hekat rakat iꞌatuꞌe toꞌope."
27 Maꞌato Iesui toꞌe — Pywo miitꞌin yt uwe i teke kuap atipy pe e. Tupana yn tiehakyeraꞌat kuap miitꞌin e. Pywo pe ti rat miitꞌin yt tikyiꞌat kuap i ereke hap atipy pe e. Maꞌato Tupana yn miitꞌin ehakyeraꞌat kuap e. Yt kat i niatpo Tupana wanẽtup hawe e. Miitꞌin yt minug kuap koꞌi i yt niatpo hin i Tupana pe e. Tupana tiehakyeraꞌat kuap miitꞌin hekat rakaria pytkai e."
28 Miꞌi hawyi Peteru toꞌe — Urumuꞌe hat uruto ti uruiꞌatoiat raꞌyn uruꞌyat koꞌi urueꞌyara uruekat uruepotpap uruko eupiat tuwat hamo ehay moherep hamo e."
29 — Pywo kahato ti eꞌe hap Peteru e. Worohoꞌokuap kahato eipe e. Atikuap aikotã saꞌawyꞌi eweitoiat yne uhupiat tuwat hamo hap e. Waku kahato ti rat eipe e. Pywo ti rat uwe uwe eipe ewy uikyꞌe poꞌog poꞌog toꞌyat kai toty kai teharyꞌi kai toywytꞌin kai tomẽpytꞌin kai topotpap kai hawyi toto uhehay Tupana piat Aiporekuat nuat e hap moherep hamo miꞌi hat eipe ewywuaria wyti aru waku pe tukupteꞌen wuatꞌi eꞌat pe atipy pe e Iesui Peteru pe ahepe."
30 Kat koꞌi kat koꞌi eweitoiat uhehay sytpok hamo wuatꞌi ywania enoi hamuat miꞌi koꞌi eimiꞌatoiat koꞌi atum aru ehowawi i raꞌyn mesuwe maꞌato poꞌog poꞌog atum eimiꞌatoiat saꞌawyꞌiwuat koꞌi kai e. Taꞌi eimiꞌatoiat koꞌi saipepiat uimiium koꞌi poꞌog poꞌog iwato poꞌog ikahu atum ehepe eweiwat uhupi hawyi iꞌewyte eheĩneꞌen hap Tupana wywo wuatꞌi eꞌat piat hap ikahu kahato hap atum ehepe e Iesui ahepe topotpoꞌororia pe.
"31 Miꞌi hawyi temiitꞌin Iesui terepoꞌok miitꞌin typyꞌi rakaria tokpyi enoi tepiat hamo. — Uhekatuwyria watuwat mesup tawa wato Ierusarẽi kape e. Itote ti aru uiꞌauka irane aikotã saꞌawyꞌitewuat Tupana ehay moherep haria miwan miat e hap ewywuat wyti taꞌatunug saꞌag yne uhete Eheykeꞌet ete e."
32 Itote ahewanĩkaptia ywania esuraraꞌin po pe raꞌyn uipag uiꞌauka hamo itote irane e Iesui. Yt naku i taꞌatunug uhete e. Miꞌiria teꞌeruweukaꞌi kahato uhete taꞌatumikyryꞌi uhete hawyi kuitu kuituꞌiꞌatuꞌe uipiit ete uimohit haype irane itote e. Uito Wuatꞌi Miitꞌin Eykeꞌet pytkai uipun aru itote are e. Yt uimõtypot hin i itote e."
33 Uipak pak kahato itote hawyi aru uiꞌauka saꞌag neꞌi aru maꞌato miꞌi pytkai myeꞌym eꞌat hawyi arẽtem aru uikuꞌuro sese hap pyi e. Guꞌuro pyi araꞌaipok ehowawi i raꞌyn. Uiꞌasyp pytkai arẽtem i raꞌyn aru uiꞌasyp hap kaipyi e."
34 Tuwetiat tohenoi maꞌato hemiitꞌin yt ikuap hin i imienoi koꞌi yt hotꞌokꞌe i pote yt taꞌatukuap kuap i iꞌe hap pote.
"35 Miꞌi hawyi Iesui toto temiitꞌin wywo tawa wato Ierusarẽi kape. Miꞌi hawyi putꞌokꞌiatuꞌe tawa Ieriko ete. Miꞌi tote toĩneꞌen apyk pe muꞌap ẽpeke ete yt iha pytig i rakat muꞌap tote. Itote pyi tohẽtup kahato miitꞌin miium koꞌi teko ewy."
36 Miitꞌin typyꞌi rakaria õꞌẽ hap toikuap hawyi tohẽtup taꞌyn — Kat hamo som miitꞌin typyꞌi rakaria tõꞌẽ e apoꞌe muꞌap upiaria pe yt iha pytig i hat."
37 Miꞌi hawyi taꞌatuwesat — Taꞌi Mekewat Miit tawa Nasare kaipywiat wyti tut meikowo mekewat Iesui e hap het rakat iꞌatuꞌe taꞌatuhenoi yt iha rakat i pe."
38 Miꞌi hawyi mekewat yt iha rakat i tikuap hawyi tuwẽpowat Iesui kape tehay pirik wo — Uipowyro ro uipowyro ro Morekuat Tawi Emiariru uhehakyeraꞌat ro En e."
39 Maꞌato iraniaꞌin muꞌap upiaria — Wãi neiꞌo iꞌatuꞌe. Yt naku i ehay pirik hap iꞌatuꞌe. Epoꞌinik to iꞌatuꞌe wen maꞌato poꞌog neꞌi tuwẽpowat haty wo kahato hamo — Morekuat Tawi Emiariru uhehakyeraꞌat En e."
40 Miꞌi hawyi Iesui topyhuꞌat itote muꞌap tote hawyi toꞌe — Eweterut ro uhowawi iwẽpapꞌi kahato hat e muꞌap upiaria pe. Miꞌi hawyi taꞌatuerut mekewat sẽtupꞌe hat."
41 Putꞌokꞌe Iesui yatype hawyi apoꞌe Iesui — Kat e hap etikyꞌesat uipo pyi mehĩ apoꞌe tope. Mio tã e pote — Mehĩ e uimoehapytig i hap epiat hap atikyꞌesat kahato pãi e Iesui pe."
42 — Pyno waku raꞌyn emikyꞌesat ewy atunug e Iesui. Pyno waku raꞌyn ereĩneꞌen e. Mesup taꞌyn atum epe emiẽtup ewywuat e. Eraꞌakasa ro are katupono uimohey kahato hap emoehãite hap topyhuꞌat e Iesui yt iha i rakat pe."
43 Mio tã toꞌe Iesui hawyi meremo iha i raꞌyn meremo waku i raꞌyn iha ete ihapytig hap waku hap wywo toĩneꞌen kahato. Taꞌakasa kuap i raꞌyn hawyi — Waku kahato En Tupana waku kahato En katupono waku i raꞌyn uheha e itote tehay se kahato hap ewy tuwehum kahato Tupana kape. Miꞌi hawyi muꞌap upi toto raꞌyn Iesui upi tawa Ieriko kape iwepit kahato hap wywo toto — Waku kahato En waku kahato En yn toꞌe Tupana pe itote. Iꞌewyte iraniaꞌin Iesui minug wakuat kapiat akasa haria teꞌeruwehum yn kahato Tupana ete itote muꞌap upi Iesui toto tawa Ieriko kape turan.
"1 Miꞌi hawyi Iesui teke raꞌyn tawa Ieriko pe. Miꞌi hawyi tawa Ieriko sakpo toto mekewat tawa puꞌap upi tuwat."
2 Miꞌi tawa pe toĩneꞌen hekat kahato rakat Sakeu e hap het rakat itotiat. Miꞌi miit ri yt naku i kahato rakat toĩneꞌen iraniaꞌin wanẽtup hawe katupono ipotpap Iuteu ywnia wanĩkaptia esuraraꞌin powyro toꞌywania ekareꞌen pyhyp hamo. Toikat kahato miitꞌin kaipyi iꞌatuekat patꞌok hap wanĩkaptia porekuat saꞌup mo. Wanĩkaptia porekuat powyro kahato rakano toĩneꞌen mote tuwemowato kahato tekareꞌen ete tawa Ieriko tote."
3 Miꞌi hawyi Sakeu taꞌakasa teran kahato Iesui kape maꞌato yt itypore i sese rakat pote yt taꞌakasa kuap i miitꞌin tok piat sakpo Iesui kape."
4 Miꞌi pote punꞌe iraniaꞌin eꞌyianme wẽtup ariaꞌyp muꞌap upiat kape hawyi meremo taꞌam haga tote ywaipe pyi tehaꞌat kahato Iesui ewawi taꞌakasa teran haype."
5 Putꞌokꞌe Iesui ariaꞌyp ypyke hawyi tehaꞌat kahato ywaiti hawyi toꞌe — Uhyt Sakeu e eraꞌapyk to uhowawi uhyt e. Mesuwat eꞌat pe at areĩneꞌen neran ewywo eꞌyat pe mehĩ e."
6 Miꞌi hawyi meremo taꞌapyk hawyi iwepit hap wywo — Hẽ to uhyt e. Waku kahato ereĩneꞌen uiꞌyat pe e Iesui pe."
7 Maꞌato iraniaꞌin tikuap Sakeu yat kapiat Iesui to hap hawyi teꞌeroꞌe toꞌope — Yt naku i Iesui iꞌatuꞌe katupono ahewanĩkap yat kape toto iꞌatuꞌe toꞌope yt nakuat i kahato rakat yat kape Iesui toto raꞌyn yt Tupana mikyꞌesat ewy i tutunug iꞌatuꞌe taꞌatupyꞌahak hap wywo."
8 Miꞌi hawyi Iesui toto mekewat muꞌap pyhyp hat upi mekewat Sakeu e hap het rakat upi iꞌyat kape. Putꞌokꞌiꞌatuꞌe itote hawyi teꞌerenuk hap upi mekewat Sakeu toꞌe Iesui pe — Uhyt e ipatꞌok uhekat yne ti rat atimõꞌẽ mesup yt hekat i rakaria pe e. Pywo ti rat miitꞌin ekareꞌen pyhyp hap koꞌi miitꞌin maꞌat hap koꞌi atum mesup iꞌatuepe e katupono atimohãpyk teran yne uiminug saꞌag koꞌi uheroꞌok hap koꞌi atiporeraꞌaipok teran mesup uimisat koꞌi yne muꞌap upiaria po pyi miitꞌin ekat koꞌi e. Wẽtup ok hyt uꞌi atat uimipohari poꞌog atum 4 hyt uꞌi atiporeraꞌaipok tuwewawi atum e. Atupohari hap koꞌi yt naku i hap ewy atum yne i raꞌyn uimimaꞌat koꞌi pe e. Mekewat wẽtup hap ete uimipohari koꞌi ete atiporeraꞌaipok 4 hap ewywuat ipakup takat koꞌi uimimaꞌat koꞌi pe e. Pyno atiꞌatuꞌatoiat teran uiminug saꞌag yne hawyi waku yn atunug neran miꞌi hawyi e Iesui pe Sakeu."
9 Miꞌi hawyi Iesui toꞌe iraniaꞌin me tawa Ieriko piaria pe — Uruto poꞌog waku iraniaꞌin kai e haria eipe e. Mesup taꞌyn Tupana miehakyeraꞌat no topyhuꞌat Mehĩ Sakeu e. Mesup taꞌyn ti rat Ahaꞌaseꞌi Aparãu emiariru sese toĩneꞌen mehĩ Sakeu katupono mesup taꞌyn mehĩ Sakeu waku pe toĩneꞌen Tupana wanẽtup hawe e."
10 Mesup taꞌyn Tupana miehakyeraꞌat no topyhuꞌat iꞌewyte yne iꞌyat piaria waku pe toĩneꞌen e. Miꞌi hawyi toꞌe mehĩ Sakeu pe — Pyno waku pe raꞌyn mehĩ e mesup taꞌyn Tupana miehakyeraꞌat ereĩneꞌen wuatꞌi eꞌat pe e Iesui mehĩ Sakeu pe. Pywo ti Uito Eheykeꞌet ariot mesuwat mytyp kape hoꞌowasat rakaria kat hamo ariot e. Taꞌi hoꞌowasat rakaria ehakyeraꞌat hamo ariot miitꞌin kat hamo e. Maꞌato — Uruto poꞌog iraniaꞌin kai e haria yt atimowaku kuap i katupono — Uruto waku raꞌyn iꞌatuꞌe. Miꞌi pote yt naku i rakaria wywo uhewyry iꞌatumuꞌe Tupana kuap hamo e Iesui tawa Ieriko piaria pe — Uruto poꞌog iraniaꞌin kai e haria pe.
"11 Miꞌi hawyi miitꞌin tuwat tuwat tawa wato Ierusarẽi kape. Miꞌi hawyi iꞌatuehay kahato muꞌap upi — Pywo ti rat Tupana Mipoꞌoro Aiporekuat nuat tut irane ahewanĩkaptia akit hamo hawyi waku pe watukupteꞌen i raꞌyn aikotã saꞌawyꞌiwuat hap eꞌat piat hap ewy iꞌatuꞌe toꞌope muꞌap upi."
12 Miꞌi hawyi yt pya i tawa wato Ierusarẽi kai turan Iesui tiꞌatumuꞌe muꞌap upiaria tehay iãꞌãkap wuo — Saꞌawyꞌi so wẽtup tuꞌisa waku rakat hekat kahato rakat wuatꞌi etama piaria mikuap toto raꞌyn tetawa kaipyi morekuat koro kape. — Atikyꞌesat wuatꞌi tuꞌisaria akag wo uinug uruetama pe e hap wywo toto e so."
13 Maꞌato toto morekuat koro kapiat hap owakai toiꞌatukaykay raꞌyn toeropat haria akag koꞌi 10 ok takaria tuwewawi hawyi so — Areto raꞌyn Morekuat koro kape hawyi atikyꞌesat uiꞌairo temiit akag wo mesuwat ahetama piaria wuatꞌi tuꞌisaria akag wo e so. Pyno areto turan atikyꞌesat uhekat eipo pe areto turan imowato hamo e so. Pyno atimõꞌẽ uhekat eipo pe hawyi waku areto maꞌato Morekuat koro uinug wuatꞌi tuꞌisaria akag wo ahetama piat hawyi tutum uhepe tomiwan uimowato hap hawyi meremo araꞌaipok mesuwe hawyi atikyꞌesat uimiium ehepiat mowato kahato hap e so temiit 10 ok takaria pe. Miꞌi hawyi wẽtup ok pe tuereto tutum nu mehit kahato rakat tekat kahato hap hawyi — Pyno areto raꞌyn mesup e. Miꞌi hawyi areĩneꞌen morekuat koro yat pe mekewat tama koro pe hawyi miꞌi turan eweiꞌatumowato kahato o uhekat mesuwe e so. Miꞌi hawyi iwato toimõꞌẽ iꞌatuepe nu mehit rakat hawyi toto tetawa pyi."
14 Toto raꞌyn tetama pyi turan hawyi so itotiaria tuꞌisaria teꞌeruwaꞌatunug hawyi so meremo tuwat morekuat koro kape wẽtup muꞌap upi poꞌog meremo tuwat at kaꞌap hap ewy. Miꞌi hawyi so putꞌokꞌiꞌatuꞌe mekewat tuꞌisa yianmete hawyi so — Morekuat iꞌatuꞌe tut wyti aru wẽtup ok miit uruetama pyi yne mikuap takat iꞌatuꞌe. Miꞌi miit tikyꞌesat kahato uruetuꞌisa akag wo uruetama pe wen maꞌato yt uruikyꞌesat i rat meiẽwat miit uruetuꞌisaria akag wo iꞌatuꞌe so. Yt naku i etiꞌairo miꞌi miit wuatꞌi tuꞌisaria akag wo uruetama pe iꞌatuꞌe so."
15 Pyno mekewat wuatꞌi miitꞌin mikyꞌesat hekat rakat etama puat gupteꞌen haria yt tikyꞌe hin i mekewat tuꞌisa e. Maꞌato mekewat morekuat eporekuat koro rakat tikyꞌe kahato hawyi — Woronug naꞌyn en uhemiitꞌin sem mesuwat yi totiaria porekuat no e tope. Miꞌi hawyi taꞌaipok taꞌyn tetama kape morekuat koro miꞌairo wo wuatꞌi miitꞌin porekuat no. Miꞌi hawyi so itote hawyi toiꞌatukaykay raꞌyn tuwewawi temiit 10 ok takaria teropat haria aikotã iꞌatupotpap hap moherep hamo aikotã tomiium saꞌawyi taꞌatumowato hap kuap hamo."
16 Miꞌi hawyi saꞌawyiwuat putꞌokꞌe hawyi toꞌe morekuat pakup we — Saꞌawyi wẽtup eiam howapy nu mehit rakat hekat kahato rakat etum uhepe e. Koitywy 10 eiam howapy nu mehit rakat hekat kahato hap ewy aterut ewawi Uikaꞌiwat e."
17 Miꞌi hawyi mekewat Tuꞌisa Wato pakup iwepit kahato hawyi toiwesat — Waku kahato etunug uhekat wywo areto hap turan e. Uhemiit kahato en uhyt e so. Waku rakat rasig en e. Pyno eweꞌeg kahato uhekat wywo pote mesup woronug en uhemiit koro wo 10 uhetawa pe e temiit wakuat pe."
18 Miꞌi hawyi wẽtup ok teke henoi hamo — Pyno saꞌawyꞌi etoiat uipo pe wẽtup eiam nu mehit rakat hekat rakat e. Koitywy 5 eiam howapy atum epe uikaꞌiwat e."
19 Miꞌi hawyi morekuat toꞌe mekewat temiit pe — Waku pyno etunug mehĩ e. Yt uimaꞌat hin i pote mesup atum epe 5 tawa koꞌi iꞌatupoꞌoro epiat hamo e. Waku ereĩneꞌen itote iꞌatuetuꞌisa akag wo e morekuat pakup temiit wakuat pe."
20 Miꞌi hawyi wẽtup i teke towat etiat enoi hamo — Heno uikaꞌiwat meiũ ti emiium ok tã e. Saꞌawyiwuat emiium ewywuat atum epe e. Uhesokpe ikahu rakat pe atiꞌapykok kahato mesuwat emiium hekat rakat e. Koitywy toĩneꞌen ne yne mesuwat sokpe pe emiium iwato hap ok tã."
21 Pywo arekenꞌẽ epupi pote waku pe kahato atunug iheg me mekewat nu imehit kahato koꞌi e. Atiꞌapykok kahato katupono worokuap kahato en uhyt e. Atikuap wy eweꞌeg kahato hap kaipyi yt ewat i pytkai etiꞌatuporeraꞌat ekat koꞌi e. Iꞌewyte yt emikoi i pytkai ehoꞌohep kuap iraniaꞌin ko koꞌi hap atikuap e. Taꞌi uruikuap kahato en aikotã ereĩneꞌen iweꞌeg kahato epotpap nug hap ete ekat mowato hap ete e. Miꞌi pote emiium atisyp yi pe hawyi mesup atum yne i raꞌyn epe e."
22 Miꞌi hawyi ikaꞌiwat toꞌe tope topyꞌahak popuo — Uhemiit saꞌag kahato wo ereĩneꞌen pãi are e. Yt naku i kahato etunug uhekat wywo e. Uipyꞌahak hap etikuap pytkai uhekat yt etiꞌatumowato hin i e. Yt uiat i pytkai atiporeraꞌat ereꞌe uhepe. Iꞌewyte yt uimikoi pytkai i ahoꞌohep taꞌyn ereꞌe uhepe."
23 Pyno erekenꞌẽ uipupi hawyi kat pote kahu uhekat kahato hap yt etimowato i en wẽtup ok potpap nug hap kai e. Kat pote yt etipuru i wẽtup ok pe uhekat mowato hamo e temiit iperup takat pe."
24 Miꞌi hawyi morekuat pakup toꞌe tesuraraꞌin me — Eweitat ro meiũwat uhekat uhemiit yt iweꞌeg i rakat po pyi hawyi ewetum no ipo piat uimiium uhemiit wakuat pe hekat poꞌog mowato hamo e."
25 Miꞌi hawyi hesuraraꞌin teꞌeroꞌe morekuat pakup we — Urukaꞌiwat iꞌatuꞌe iwato kahato raꞌyn ipo pe toĩneꞌen 10 eiam howapy raꞌyn toĩneꞌen naꞌyn ipo pe kat pote pyno etum moꞌog tope iꞌatuꞌe."
26 Miꞌi hawyi morekuat pakup toꞌe tesuraraꞌin me — Pywo pe ti uhekat mowato hat pe poꞌog poꞌog atum aru saꞌawyꞌiwuat kai e. Maꞌato yt iweꞌeg i rakat pe uhekat mohit hat pe mio tã are — Saꞌawyꞌiwuat iwato kahato atum epe maꞌato mesup yt kat i poꞌog atum epe e. Miꞌi hawyi mekewat kurin epo piat ewanuat tuweityk taꞌyn hawyi yt kat i topyhuꞌat epo pe aru e morekuat pakup temiit yt iweꞌeg i rakat pe tekat tomiium yt imowato i hat pe."
27 Miꞌi hawyi meimuẽwat saꞌawyꞌiwuaria morekuat pakup wanĩkaptia — Yt uruikyꞌesat i miꞌi miit uruporekuat nuat e haria toiꞌatupoꞌoro tesuraraꞌin herepoꞌok tewawiat hamo. Taꞌatuerut hawyi mio tã e iꞌatuepe — Pyno saꞌawꞌi yt uikyꞌesat hin i uito eiporekuat no e. Miꞌi hawyi ehehay saꞌag kahato uhetiat hap atikuap taꞌyn e. Yt naku i kahato eipe uiwanẽtup hawe e. Miꞌi hawyi toꞌe tesuraraꞌin me — Meremo meiũpe raꞌyn uhowakai te eweiꞌatuꞌuka ro miꞌiria e so mekewat morekuat pakup itote e Iesui tehay iãꞌãkap wuo. Tuwepiat ihay tehay pun haria pe — Yt naku i Iesui Aikaꞌiwat no e haria pe.
"28 Mio tã e tohenoi hawyi Iesui toto i raꞌyn muꞌap upi mekewat tawa wato Ierusarẽi kape temiitꞌin sem eꞌyianmete toto."
29 Putꞌokꞌe mekewat mikoi ypia pe mekewat Uriweira ypia koꞌi eꞌyityꞌok totiat mekewat yi yt pya i tawa hit Pewake kai tawa hit Petania kai hawyi Iesui henoi typy ok temiitꞌin me."
30 Mio tã toꞌe — Eweiwat ro meiẽwat tawa hit kape hawyi putꞌokꞌeweiꞌe itote hawyi eiwehytꞌok tawa hit pe turan aru iꞌatuhũ hit Iumenta mẽpyt eweipuẽti itote e. Miꞌi iꞌatuhũ atikyꞌesat mesuwe katupono iꞌok pe tote uhewyry teran tawa wato Ierusarẽi kape e. Maꞌato yt uwe i te hewyry mekewat iꞌatuhũ hit okpe tote are e. Pyno eweiꞌasaitypok iꞌatuhũ hawyi meikowo eweterut uhowawi uihũ wo e."
31 Itotiaria tikuap teran aru kan hamo iꞌatuhũ asaity eweipok e pote waku eweiꞌatuwesat miꞌiria — Taꞌi Aikaꞌiwat Iesui tikyꞌesat wyti eihũ waku eweiꞌe apoꞌe haria pe e Iesui temiitꞌin typy ok takaria pe."
32 Tuwat raꞌyn meimuẽwat tawa hit kape hawyi Iesui toꞌe hap ewywuat kahato taꞌatupuẽti putꞌoktaꞌatuꞌe itote hawyi."
33 Iꞌatuhũ taꞌatuꞌasaitypok turan putꞌokꞌiꞌatuꞌe mekewat hũ kaꞌiwaria hawyi — Kan hamoĩ uruhũ eweiꞌasaitypok hamuat apotaꞌatuꞌe."
34 Miꞌi hawyi Iesui emiitꞌin iꞌatuwesat — Aikaꞌiwat Iesui tikyꞌesat kahato ti eihũ iꞌatuꞌe Iesui mipoꞌororia."
35 Miꞌi hawyi — Pyno waku eweitioto ro iꞌatuꞌe. Miꞌi hawyi taꞌatuꞌeroto Iumentu hit Iesui kape. Pukꞌokꞌiꞌatuꞌe Iesui kape hawyi taꞌatuporokpun naꞌyn taꞌatuesokpe koꞌi mekewat hũ okpe tote hawyi taꞌatumoꞌapyk taꞌyn Iesui ihũ hit okpe tote."
36 Miꞌi hawyi muꞌap upiaria tiporokpun taꞌatuesokpe muꞌap tote Iesui to hap owakai ipuꞌap ikahu rakat nug hamo morekuat ewywuat muꞌap nug hamo imõtypot haype taꞌatunug."
37 Miꞌi hawyi Iesui ipotꞌapyk mekewat yityꞌok Uriweira ypia piat kaipyi tawa wato Ierusarẽi kape hawyi toto mekewat muꞌap miitꞌin minug upi toto tohũ hit tote apyk pe ipotꞌapyk."
38 Yt pya hin i tawa wato Ierusarẽi kai turan typyꞌi rakaria hupiaria sem — Waku kahato En Tupana iꞌatuꞌe. Waku kahato Emiꞌairo Uruporekuat nuat iꞌatuꞌe taꞌatuehay pirik wo. Meiũwat Miit timoherep kahato Tupana esaika hap yt uwe mesuwarotiat minug ewy i tutunug uruehamo iꞌatuꞌe kahato itote. En Tupana Mipoꞌoro sese iꞌatuꞌe katupono urutaꞌakasa raꞌyn eminug koꞌi Emipoꞌoro mimoherep koꞌi iꞌatuꞌe iꞌatuwepit kahato haype. Miꞌi pote urutuwehum kahato ewawi Tupana iꞌatuꞌe."
39 Miꞌi taꞌatunug kahato itote hawyi woꞌomuꞌe haria itotiaria teꞌeroꞌe Iesui pe — Woꞌomuꞌe hat iꞌatuꞌe etiꞌatumopoꞌinik to epotmuꞌeria iꞌatuꞌe."
40 Miꞌi hawyi Iesui tiꞌatuwesat — Pyno miꞌiria iꞌatupoꞌinik uimõtypot hap ete pote meremo aru mesuwat nu koꞌi muꞌap upiat teꞌeruwẽpowat uimõtypot hap — Tut ri tut ri Tupana Mipoꞌoro Wuatꞌi Ywania Ehakyeraꞌat Hanuat iꞌatuꞌe aru nu koꞌi are e Iesui tewanĩkaptia pe."
41 Miꞌi hawyi porap putꞌokꞌe Ierusarẽi me hawyi Iesui tehaꞌat tawa wato kape hawyi tuwak popuo toꞌe — Ierusarẽi miaria Ierusarẽi miaria ariot raꞌyn maꞌato yt uikuap i eiperia e."
42 Mesup taꞌyn aterut teran ehowawi wuatꞌi eꞌat piat eimowepit hap wen maꞌato yt heremo i pote yt eweikat i uimierut e tuwak popuo. Taꞌi Tupana uipoꞌoro ehehakyeraꞌat hamo hawyi eiwoꞌowese hap wywo eweikupteꞌen e maꞌato yt eweikyꞌesat i pote miꞌi hawyi uimienoi eiwoꞌowese hap etiat yt heremo i raꞌyn toĩneꞌen e. Migꞌi wo raꞌyn toĩneꞌen yt eweikyꞌesat i hawyi e."
43 Uimohey hap pun haria eipe pote ti aru ehewanĩkaptia esuraraꞌin sem tõꞌẽ tõꞌẽ kahato irane eimoma hamo are e. Putꞌoktaꞌatuꞌe ehetawa wato ete hawyi yne muꞌap taꞌatupyhyp ehetawa kapiat e. Miꞌi hawyi eimiꞌu yt kat i toĩneꞌen aru e. Miꞌi hawyi yt eiwenõꞌẽ kuap i ehetawa pyi."
44 — Miꞌi hawyi ehetawa wato pe tuwehytꞌok kahato ehewanĩkaptia suraraꞌin sem wẽtup ywania eiwuꞌuka hamuat eimoma yne hamuat aru e. Taꞌatuꞌatuꞌuka torania ehetawa piaria mekewat eꞌat pe aru e. Iꞌewyte ehetawa piaria topap topap yne e. Eiꞌyat koꞌi taꞌatupuruk yne wyti aru e. Yt wẽtup i nu ehetawa piat tukupteꞌen aru eiꞌyat nug hap katupono itote taꞌatupugha yi kape yne eiꞌyat koꞌi e. Hewo hewo yne nu wato koꞌi yi kape aru are e. Pywo ti rat eimoma hap yn topyhuꞌat aru e. Tupana miꞌapiheg koꞌi eweipyhuꞌat aru kat pote Tupana Mipoꞌoro Ehehakyeraꞌat hanuat mohey hap pun haria eipe pote e Iesui tuwak popuo maꞌato eipe ti yt eweikuap i Tupana heĩneꞌen eipyꞌasetpiat hap e tuwak popuo tetawa Ierusarẽi piaria pe.
"45 Miꞌi hawyi Iesui teke raꞌyn tawa Ierusarẽi me hawyi Tupana mõtypot yat koro pe teke hawyi toiꞌatusopo kahato kareꞌen weneru weneruꞌi haria itote."
46 Miꞌi hawyi toꞌe wuatꞌi weneru haria pe — Wãi neiꞌo e yt ewetunug ne Tupana mõtypot yat kat weneru kat weneru hap netap e. Saꞌawyꞌi mio tã e Tupana tehay moherep haria miwan me — Uiꞌyat yi tote atikyꞌesat wuatꞌi ywania uhowawiat uiwywuat iꞌatuehay hamuat hap atikyꞌesat uiꞌyat e Tupana saꞌawyꞌi Isaia miwan 56.7 pe. Maꞌato eipe ti seroꞌokꞌe haria yat no ewetunug naꞌyn e Iesui wuatꞌi kat weneru haria pe."
47 Miꞌi hawyi mekewat eꞌat koꞌi turan wuatꞌi eꞌat pe turan Iesui tiꞌatumuꞌe miitꞌin Tupana mõtypot yat koro piaria. Maꞌato paꞌi akagnia miwan enoi haria iꞌewyte tawa piaria akagnia iꞌauka teran kahato haype itote."
48 Miꞌi hawyi hewanĩkaptia tiꞌatukat kahato aikotã waku Iesui auka hap maꞌato yne itotiaria iꞌatupap kahato Iesui ehay upi pote yt taꞌatupuẽti i muꞌap iꞌauka hamuat.
"1 Wẽtup eꞌat pe Iesui toĩneꞌen Tupana mõtypot yat pe turan toiꞌatumuꞌe kahato itotiaria tehay wakuat Tupana etiat. Miꞌi turan putꞌokꞌiꞌatuꞌe howawi paꞌi akag koꞌi miwan ehay enoi haria wywo iꞌewyte nagnia akag koꞌi wywo."
2 Miꞌi hawyi apoꞌiꞌatuꞌe Iesui pe — kat pote ti rat etiꞌatusytpok miitꞌin gaꞌatpo Tupana mõtypot yat pyi iꞌatuꞌe. Yt naku i miꞌi tã etunug yt uruehay upi i iꞌatuꞌe. Pyno uwe kahu epoꞌoro hat miꞌi tã nug hamuat iꞌatuꞌe sio morekuaria sio ewepyi miꞌi saꞌag hap etunug iꞌatuꞌe."
3 Miꞌi hawyi Iesui tiꞌatuwesat — Pyno ahenoi aru ehepe uwe uipoꞌoro Tupana mõtypot yat apykok hamo maꞌato saꞌawyꞌi atikyꞌesat uiwesat hap ehepiat e."
4 Pyno uiwesat ro — Uwe sese ahetꞌok hat Iuwãu poꞌoro hat apo toĩneꞌen sio Tupana tipoꞌoro Iuwãu sio miitꞌin tipoꞌoro ahetꞌok hap nug hamo apoꞌare e. Uiwesat ro miꞌi hawyi worohoꞌowesat wy uwe uipoꞌoro Tupana mõtypot yat hywytip hamo e tewanĩkaptia pe."
5 Miꞌi hawyi teꞌeroꞌe toꞌope — Aikotã som waku watiwesat Iesui katupono iꞌatu kahato mesuwe ahetꞌok hat Iuwãu mõtypot kahato rakaria iꞌatuꞌe toꞌope. Pyno — Tupana ipoꞌoro hat watoꞌe pote apoꞌe irane ahepe Iesui — Kat poteĩ pyno yt eweimohey i te urumimohey Iuwãu toꞌe aru ahepe iꞌatuꞌe toꞌope."
6 Maꞌato — Tuwepyi tuwepoꞌoro Iuwãu watoꞌe mesuwe pote mesuwat iraniaꞌin sem Iuwãu kyꞌe haria meremo aiꞌauka wyti aru taꞌatupyꞌahak popuo iꞌatuꞌe. Katupono miꞌiria — Tupana ehay moherep hat koro Iuwãu iꞌatuꞌe katupono taꞌatumohey kahato te imienoi iꞌatuꞌe toꞌope."
7 Mio tã iꞌatuꞌe toꞌope hawyi taꞌatuwesat raꞌyn Iesui apoꞌe hap — Yt uruikuap i kahato te uwe sese Iuwãu poꞌoro hat iꞌatuꞌe. Uwe ehay pyi Iuwãu tut miitꞌin setꞌok hamo hap yt uruikuap kahato i te iꞌatuꞌe."
8 Miꞌi hawyi Iesui tiꞌatuwesat — Are pãi kat pote yt uiwesat i e. Pyno yt uiwesat i pote uito eipe ewywuat yt worohoꞌowesat i rat uwe hay upi atiꞌatusytpok mesuwepyi Tupana mõtypot yat piat yt naku i nug haria e Iesui paꞌi kororia pe miwan ehay moherep haria pe nagnia akagnia pe. Miꞌi hawyi yt kat i toꞌe iꞌatuepe Tupana Mipoꞌoro Iesui.
"9 Miꞌi hawyi hãꞌãkap wuo Iesui henoi Tupana mõtypot yat koro piaria pe tewanĩkaptia pe — Wẽtup eꞌat pe so wẽtup yi wato kaꞌiwat warana koi hat tiꞌatukoi kahato tewarana ypia koro yi wato hap ok tã toikoi. Waku raꞌyn hawyi so toipuru tewarana ypia toꞌywania pe hawyi toꞌe — Waku etiꞌatuꞌapykok uheꞌyi e hawyi eweium no uhepe saꞌup wuatꞌi ewaty pe warana eweiweneru hawyi e warana ypia kaꞌiwat hawyi toto raꞌyn pya wẽtup tama kape hawyi toĩneꞌen motꞌi itote e."
10 Meiũran mekewat warana ypia haat raꞌyn hawyi mekewat warana ypia kaꞌiwat tipoꞌoro temiit pya pyi mekewat warana ypia apykok haria pe towanuat warana sat hamo hoꞌohep hap kaipyi. Maꞌato hemiitꞌin warana ypia apykok haria yt iꞌatuwese hin i hawyi yt hoꞌoium i haype hawyi imipoꞌororia pe taꞌatuehay saꞌag hawyi taꞌatupokpok hawyi taꞌatupoꞌoro i raꞌyn yt kat i hin i iꞌatupo pe wywo e."
11 Miꞌi hawyi warana ypia kaꞌiwat wẽtup ok i raꞌyn toipoꞌoro raꞌyn towarana ypia piat ipotpap takaria kape warana koꞌi towanuat saꞌup sat hamo iꞌatumipoꞌoksuꞌat hamo maꞌato iꞌewyte yt kat i taꞌatuhaꞌupium tope maꞌato yt iꞌatuwese hin i imipoꞌoro ete hawyi taꞌatupokpok imipoꞌororia saꞌawyꞌiwuaria ewy hawyi taꞌatuporeraꞌaipok yt kat i wywo i e."
12 Miꞌi hawyi wẽtup ok temiit warana ypia kaꞌiwat tipoꞌoro i raꞌyn maꞌato miꞌi miit miꞌi hare taꞌatuꞌahyk ahyk hawyi taꞌatupun naꞌyn warana ypia pyi e."
13 Miꞌi hawyi warana ypia kaꞌiwat tuwanẽtup — Aikotã waku atunug uimipoꞌororia pun haria ete e tuwepe hawyi toꞌe tuwepe — Pyno atikuap taꞌyn aikotã waku atunug e tuwepe taꞌi Uhaꞌyru sese uimikyꞌe kahato atipoꞌoro hawyi ti aru taꞌatumõtypot miꞌi miit uimipoꞌoro katupono Uhaꞌyru sese miꞌi uimipoꞌoro pote e tuwanẽtup hawe."
14 Miꞌi hawyi toipoꞌoro raꞌyn wen maꞌato tewarana ypia apykok haria teꞌeraꞌakasa hawyi teꞌeroꞌe toꞌope — Toꞌiro waku watiꞌauka mesuwat yi warana ypia koro kaꞌiwat saꞌyru iꞌatuꞌe toꞌope. Taꞌi pãi watiꞌauka haꞌyru hawyi ti aru haꞌyru ywot ikuꞌuro hawyi yt kat i ipowatꞌyp hawyi mesuwat yi yne aiwanuat tukupteꞌen hawyi hekat rakaria wo watoĩneꞌen iꞌatuꞌe saꞌag. Pyno toꞌiro warana ypia koro kaꞌiwat pakup auka hamo hawyi ikuꞌuro hawyi yne iꞌywot ekat sem topyhuꞌat aipo pe raꞌyn iꞌatuꞌe teꞌeroꞌe toꞌope."
15 Miꞌi hawyi taꞌatusat haꞌyru hawyi taꞌatupugha saꞌag ipiit iꞌywot mikoi ypia pyi hawyi itote taꞌatuꞌauka saꞌag neꞌi haꞌyru e Iesui hãꞌãkap wuo tuwepiat ihay tewanĩkaptia pe. Miꞌi hawyi Iesui apoꞌe iꞌatuepe — Uiwesat ro kat pyno aru kat pyno aru haꞌyru ywot tunug aru tomikoi ypia apykok haria saꞌag ete e."
16 Miꞌi hawyi yt iwesat i. Miꞌi pote Iesui toꞌe toꞌauka teran haria pe — Pyno ahenoi ehepe kat som tutunug mekewat Morekuat akag tosaꞌyru auka haria ete e taꞌi meremo tut tesuraraꞌin sem wywo hawyi toiꞌatuꞌuka kahato Tosaꞌyru auka haria hawyi tutum aru tewarana ypia eꞌyi wato wẽtup ywania po pe raꞌyn hawyi toipag teꞌyi wato tomikoi warana ypia koro wẽtup ywania po pe iꞌapykok hamo e Iesui toꞌywania pe tehay pun haria pe. Miꞌi hawyi itotiaria tikuap Iesui ehay iãꞌãkap hawyi — Yt naku i kahato ehay aiꞌywania ete Uhyt iꞌatuꞌe Iesui pe."
17 Miꞌi hawyi Iesui tehaꞌat tewanĩkaptia ewawi hawyi toꞌe — Pyno topyhuꞌat aru uiꞌe hap ewy aikotã Tupana toꞌe saꞌawyꞌi tehay miwan miat puo ewy e. Mio tã toꞌe — Waku ewetunug uimõtypot yat Mesuwat Nu ikahu rakat iheg nakat kawiat e Tupana tomiꞌairoria pe toꞌyat nug haria pe wen maꞌato — Yt naku i kahato Miꞌi Nu Tupana Miꞌairo iꞌatuꞌe hawyi inug haria yt tikyꞌesat i maꞌato — Miꞌi Nu poꞌog hesaika toraniaꞌin kai poꞌog ikahu uimõtypot yat nug hamo e Tupana tomiwan me e Iesui tuwepiat. maꞌato miꞌi pytkai eweipugha Tupana Miꞌairo e Iesui tomohey hap pun haria pe."
18 Uwe uwe yt tikyꞌesat i Mekewat Nu Tupana Mõtypot Yat Nug Hamuat miꞌi miit ri yt iweꞌeg hin i topyhuꞌat e katupono miꞌi hawyi Mekewat Nu Wato toipun turan toꞌakit hap tokag pik hap topyhuꞌat e miwan me e. Iꞌewyte uwe uwe tipun Mekewat Nu hawyi taꞌaipok tuwewawi hawyi mekewat miit Mekewat Nu mikuꞌi wo topyhuꞌat e. Taꞌi e Mekewat Nu Koro tote eiwetaꞌat hawyi eipiit pokꞌe itote hawyi Mekewat Nu Koro mimokuꞌi wo eweikupteꞌen aru wuatꞌi eꞌat pe e Iesui toꞌauka kat haria pe tuwepiat tehay iãꞌãkap hawuo."
19 Mio tã toꞌe hawyi paꞌi akag koꞌi iꞌewyte nagnia ehay enoi haria teꞌeroꞌe toꞌope — Yt naku i Iesui ehay ahete iꞌatuꞌe toꞌope. Pywo pe ti ahetiat tohenoi mekewat hãꞌãkap wuo iꞌatuꞌe. Miꞌi pote taꞌatupytyk teran Iesui iꞌauka hamo maꞌato miitꞌin pupi teꞌerokenꞌẽ i. Katupono iraniaꞌin Iesui mimuꞌeria — Waku kahato aimuꞌe Iesui iꞌatuꞌe toꞌope miꞌi tupono yt taꞌatupytyk kuap i. Watat Iesui hawyi ipotmuꞌeria aiꞌauka rakaria wo tukupteꞌen iꞌatuꞌe toꞌope."
20 Taꞌatukat kahato Iesui pytyk hamo wãtym muat hap yt heremo i hawuo. Taꞌatuhaꞌup nug ihainiaꞌin me yt nakuaria i pe Iesui maꞌat haria taꞌatuehay wo. Miꞌiria wakuaria ewywuaria tõꞌẽ taꞌatuehay wuat Iesui maꞌat hamo. Iꞌatupoꞌoro haria taꞌatupag neran Iesui taꞌatuporekuat nuat po pe iꞌauka hamo. Iesui ihay saꞌag hap morekuat ete hap taꞌatukat hawyi."
21 Putꞌokꞌiꞌatuꞌe hawyi taꞌatumaꞌat reran taꞌatuehay wo — Woꞌomuꞌe hat koro iꞌatuꞌe hãpyk kahato emienoi miitꞌin me uruwanẽtup hawe iꞌatuꞌe. Uruikuap aikotã Tupana mikyꞌesat yn ewy etunug miitꞌin me iꞌatuꞌe. Iꞌewyte pywo pe yn uruwesat hap uruikuap iꞌatuꞌe. Taꞌi yt erekenꞌẽ hin i rasig miitꞌin pupi Tupana ehay etimoherep wuatꞌi miitꞌin me turan iꞌatuꞌe Iesui pe. Taꞌi uruikuap aikotã waku kahato ereĩneꞌen wuatꞌi miitꞌin kyꞌe hap ete sio morekuaria sio aheropat haria iꞌatuꞌe. Uruikuap aikotã miit emiit powyro hano ereĩneꞌen iꞌewyte miit akag koꞌi powyro hano ereĩneꞌen wy iꞌatuꞌe Iesui pe."
22 Pyno ehenoi uruepe sio waku watum saꞌup aiporekuat uruewanĩkaptia pe mekewat wẽtup ywania Humanu ywania porekuat wato Sesa e hap het rakat pe sio yt iꞌatuꞌe. Waku watum morekuat Sesa pe imiẽtup ewy sio yt apoꞌiꞌatuꞌe Iesui pe imaꞌat hamo."
23 Miꞌi hawyi meremo Iesui tomaꞌat hap toikuap tuwepe hawyi toꞌe iꞌatuepe."
24 — Eweterut ro uhowawi mekewat saꞌup wẽtup eꞌat piat aipotpap saꞌup mekewat wẽtup imehit rakat kawiat e. Miꞌi hawyi taꞌatuium iꞌape rakat Iesui pe hawyi apoꞌe iꞌatuepe — Pyno uwe miit akag iãꞌãkap mesuwe miwan me uwe set toĩneꞌen meiũ saꞌup iꞌape tote e. Miꞌi pote — Taꞌi mekewat morekuat koro Sesa e hap iãꞌãkap mekewat Sesa set itote toĩneꞌen miwan me iꞌatuꞌe taꞌatuwesat."
25 Pyno morekuat wato Sesa set toĩneꞌen itote pote Sesa wanuat toĩneꞌen are e. Miꞌi pote morekuat Sesa wanuat tohẽtup iꞌape koꞌi pote ewetum no tope morekuat Sesa saꞌup are e. Iꞌewyte Tupana miẽtup hap ok tã saꞌup ewywuat ewetum no Tupana wanuat Tupana pe are e Iesui tomaꞌat reran e haria pe apoꞌe haria pe."
26 Miꞌi hawyi teꞌeruwemõti kahato Iesui pupi yt taꞌatumaꞌat kuap i haype katupono Iesui poꞌog poꞌog iweꞌeg nakat tomaꞌat reran haria kai pote. Miꞌi hawyi iꞌatupohep taꞌyn miitꞌin sem ehamo Iesui apoꞌiꞌatuꞌe hap. Miꞌi hawyi yt kat iꞌatuꞌe kuap i itote miitꞌin ehamo maꞌato teꞌeruwanẽtup kahato Iesui piat taꞌatuwesat hap kape.
"27 Miꞌi hawyi tõꞌẽ Iesui ewawi Tupana ehay miwan miat miitꞌin muꞌe haria akag koꞌi Satuseuria e hap koꞌi. Miꞌiria ti — Aikuꞌuro hawyi yt kat i raꞌyn aheĩneꞌen pakup i hap e haria."
28 Tõꞌẽ hawyi apoꞌiꞌatuꞌe Iesui pe — Woꞌomuꞌe hat aheꞌaseꞌi Musei miwan me mio tã toꞌe ahepe — Eykeꞌet ikuꞌuro hawyi maꞌato yt kat i te mẽpyt rakat pote waku iykeꞌet i hehiwu heꞌaito wo toĩneꞌen iywyt saꞌyru nug hamo hakiꞌyt nug hamo ikuꞌuro yt kat i haipepiaria pote e ti ahaꞌaseꞌi Musei tomiwan me iꞌatuꞌe."
29 — Pyno saꞌawyꞌi so tukupteꞌen so 6 ywytꞌin taꞌatuykeꞌet etawa pe. Iꞌatuykeꞌet toĩneꞌen teharyꞌi wywo hawyi ikuꞌuro yt kat hin i haꞌyru hakiꞌyt te turan ikuꞌuro so."
30 Miꞌi hawyi so iywyt poꞌog wuat yian nakat wywo raꞌyn hehiwu maꞌato iywyt ikuꞌuro wy yt kat i imẽpyt i te turan."
31 Miꞌi hawyi so wẽtup ok iywyt wywo raꞌyn hehiwu toĩneꞌen maꞌato iꞌewyte yt imẽpyt i te turan ikuꞌuro so. Mio tã hap ewy 6 ok takaria iywytꞌin hehiwu wywo toĩneꞌen tuereto hawyi yne so topap hawyi taꞌatuehiwu yt kat i imẽpyt rakano te so."
32 Miꞌi hawyi so iꞌewyte iꞌatuehiwu ikuꞌuro iꞌatuꞌe yt imẽpyt i te turan ikuꞌuro so iꞌatuꞌe Iesui pe."
33 Pyno uruikuap teran karãpeĩ tukupteꞌen yne miitꞌin guꞌuro pyi hawyi apuru uwe wary wo aru mekewat hiwu iꞌatuꞌe katupono 7 ok heꞌaito apoꞌiꞌatuꞌe Iesui pe."
34 Miꞌi hawyi Iesui tiꞌatuwesat — Pywo pe ti mesuwarotiaria woꞌokyiꞌat hap taꞌatunug ihainiaꞌin haryporiaꞌin aikotã aikotã aheko ewy wen maꞌato atipy pe yt miꞌi tã hin i e."
35 Taꞌi miitꞌin tuwẽtem guꞌuro pyi hawyi atipy piaria ewywuaria tukupteꞌen wuatꞌi eꞌat pe yt kat i woꞌokyiꞌat hap itote yt taꞌatunug i woꞌokyiꞌat hap itote are e."
36 Katupono atipy piaria ewywuaria wo teꞌeropyhuꞌat miꞌiria tuwenõꞌẽ guꞌuro pyi hawyi yt iꞌatukuꞌuro i wuatꞌi eꞌat pe tukupteꞌen Tupana mẽpytꞌin sese wo are e."
37 Iꞌewyte ahaꞌaseꞌi Musei miwan kaipyi watimuꞌe hawyi watikuap aheĩneꞌen pakup i hap watuwẽtem guꞌuro pyi hap watikuap katupono mio tã toꞌe Musei tomiwan me — Taꞌi mekewat ariaꞌyp wukꞌe hap kaipyi Tupana toꞌe uhepe — Uito ti ewat eꞌaseꞌi Aparãu eTupana e. Uito ti eꞌaseꞌi Isaki eTupana e uhepe. Iꞌewyte Uito ti ewat eꞌaseꞌi Iako eTupana e uhepe ariaꞌyp wukꞌe hap kaipyi e Musei tomiwan me mekewat eꞌat ihay Tupana wywo hap eꞌat pe turan e."
38 Miꞌi tupono ahaꞌaseꞌi Musei miwan kaipyi watikuap ahaꞌaseꞌi Aparãu Isaki Ioko toĩneꞌen ne taꞌatukuꞌuro pytkai katupono Ahetupana ieĩneꞌen haria eTupana wo toĩneꞌen are. Yt naku i map haria eTupana Ahetupana toĩneꞌen watoꞌe e. Taꞌi ieĩneꞌen haria eTupana katupono Musei mio tã e — Tupana ti gupteꞌen haria ahaꞌaseꞌi Aparãu Isaki Ioko eTupana toĩneꞌen Aparãu Isaki Ioko ikuꞌuro rakaria tukupteꞌen pytkai Musei toĩneꞌen mesuwat yi tote turan pytkai mio tã e."
39 Miꞌi hawyi wẽtup ok miwan ehay enoi hat itote toꞌe Iesui pe — Woꞌomuꞌe hat waku kahato uruwesat hap e."
40 Miꞌi hawyi yt apoꞌiꞌatuꞌe kuap i poꞌog naꞌyn Iesui pe miwan kuap kahato rakaria. Miꞌi hawyi iꞌatuponik taꞌyn — Are pãi iꞌatuꞌe taꞌatuwanẽtup hawe iwesat kuap kahato Iesui pote yt watiꞌaparap kuap i Miꞌi ahehay wo iꞌatuꞌe. Taꞌi Miꞌi Miit poꞌog iweꞌeg aikai iꞌatuꞌe Iesui piat taꞌatuwanẽtup hawe.
"41 Miꞌi hawyi Iesui toꞌe i Musei miwan kuap kahato rakaria pe yt apotoꞌe hap wesat kuap i rakaria pe — Woꞌomuꞌe haria e kat pote ri rat eweiꞌe eimuꞌe haria pe — Tupana Mipoꞌoro Aiporekuat nuat ri morekuat Tawi emiariru emiariru kaipywiat tuwemoherep eweiꞌe ahepe e."
42 Katupono saꞌawyꞌi sese ahaꞌaseꞌi pot morekuat Tawi toꞌe tomiwan me towepy hawe — Uipotypot koro Tupana toꞌe Uipotypot koro Tupana pe — Eraꞌapyk o Uimimõtypot no mesuwe uipo sese kai e."
43 Waku ereĩneꞌen mesuwe uikai hawyi ti aru atunug ewanĩkaptia yne epy ywytꞌokpype e TUPANA UIKAꞌIWAT pe e ahaꞌaseꞌi morekuat Tawi towepy hawe e."
44 Pyno Tupana Mipoꞌoro Aikaꞌiwat nuat toĩneꞌen pãi Tawi KAꞌIWAT KORO wo e. Kat pote pyno eweiꞌe — Morekuat Tawi emiariru emiariru topyhuꞌat aru Tupana Mipoꞌoro Aikaꞌiwat Koro wo yt Tawi e hap ewywuat e Iesui tuwepiat e yt tomohey i haria pe Iesui morekuat Tawi kaꞌiwat pote mio tã.
"45 Miꞌi hawyi itotiaria teꞌeruwanẽtup kahato Iesui e hap kape turan Iesui toꞌe temiitꞌin me."
46 Uhekatuwyria e eiweꞌeg wo o miitꞌin ehamo miitꞌin mikuap mo watunug waku aiwemõtypot hamo aiwemowato hamo yt Tupana mõtypot hap kyꞌesat hap wywo are e. Katupono yt naku i watopyhuꞌat typy ehay moherep haria ewy are e. Miꞌiria ti — Waku poꞌog uruto iraniaꞌin kai iꞌatuꞌe taꞌatuwanẽtup hawe e. — Waku poꞌog uruto eimuꞌe haria akag wo eweiꞌe uruepe iꞌatuꞌe ahepe. Miꞌiria taꞌatumõtypot hap miitꞌin miat yn taꞌatukyꞌesat taꞌatuminug waku hap kaipyi miitꞌin ehamo miitꞌin mikuap mo. Yne waku hap taꞌatunug wen maꞌato Tupana mõtypot hap kape yt teꞌeruwewanẽtup hin i e. Morekuaria wywo yn teꞌeraꞌapyk teran haype Tupana mõtypot yat hawe ienuk hap iwato rakat hap tote — Eiwehaꞌat ro uruewawi e hap yn toĩneꞌen iꞌatupyꞌa pe. Yt naku i miꞌiria ewywuat watoĩneꞌen e Iesui temiitꞌin me ahepe."
47 Miꞌiria iꞌatuwẽpap se kahato Tupana kape maꞌato yt pywo pe i e. Iꞌatuehay iꞌywop kahato taꞌatunug Tupana kape miitꞌin ehamo miitꞌin mikuap mo — Uruto Tupana kuap kahato haria e hamo iraniaꞌin me maꞌato yt Tupana kape hin i iꞌatuehay are e. Yt eweimohey teiꞌo miꞌiria katupono yt pywo pe i iꞌatuehay se maꞌato ahekat kyꞌewi Tupana mohey haria tukupteꞌen are e. Taꞌi iꞌatuehay at Tupana kape miitꞌin ehamo miitꞌin mikuap mo. Iꞌywop kahato taꞌatunug taꞌatuehay Tupana kape wuatꞌi miitꞌin ehamo maꞌato yt pywo pe i e. Eiweꞌeg wo o pyno mekewat typy sehay nug haria pupi are e Iesui ahepe.
"1 Miꞌi hawyi Iesui tehaꞌat miitꞌin kape iꞌatumiium Tupana kapiat hap kape tehaꞌat kahato hawyi taꞌakasa raꞌyn hekat rakaria miium hap kape. Iwato kahato taꞌatupag heiam me Tupana mõtypot hamo."
2 Iꞌewyte taꞌakasa wẽtup ok hiwu yt hekat rakat i itote hap kape taꞌakasa. Miꞌi hawyi hiwu tum naꞌyn tomiium kurin sese hap ewy tutum katupono typy kurin kat ape yn totopag mekewat yparakai tote Tupana kapiat imiium heiam ikaꞌa pe totopag hap kape taꞌakasa Iesui."
3 Miꞌi hiwu kape tehaꞌat hawyi Iesui toꞌe temitꞌin me — Eiwehaꞌat ro mekewat hiwu kape mekewat yt hekat i kahato rakat kape katupono mekewat hiwu tum iwato kahato Tupana pe e. Poꞌog poꞌog tutum Tupana pe iraniaꞌin hekat rakaria miium hap kai are pãi e."
4 Katupono iraniaꞌin hekat rakaria taꞌatuekareꞌen sem kaipyi heĩpyt hit yn taꞌatuium Tupana pe maꞌato mekewat hiwu tum naꞌyn Tupana pe tomiꞌu yne saꞌup are tutum naꞌyn yne tomoieĩneꞌen sese hamuat saꞌup Tupana pe mesup e. Miꞌi pote areꞌe ehepe mekewat hiwu miium poꞌog Tupana mowepit hap topyhuꞌat torania hekat rakaria miium kai katupono tutum yne yne tope pote are e Iesui topotmuꞌeria pe ahepe.
"5 Miꞌi hawyi Iesui potmuꞌeria teꞌerahaꞌat kahato Tupana mõtypot yat ikahu kahato hap etiat hawyi teꞌeroꞌe toꞌope — Pãi iꞌatuꞌe ikahu kahato mesuwat Tupana mõtypot yat iꞌatuꞌe toꞌope. Iwato kahato tig mesuwarotiat nu koro koꞌi Tupana mõtypot yat iꞌatuminug iꞌatuꞌe. Waku kahato mesuwe iꞌatuꞌe. Eiwehaꞌat ro mekewat miitꞌin miium koꞌi Tupana kapiat hap kape iꞌatuꞌe toꞌope. Taꞌi taꞌatumokahu kahato Tupana mõtypot hap yat mesuwe iꞌatuꞌe toꞌope."
6 Mio tã iꞌatuꞌe hawyi Iesui toꞌe iꞌatuepe — Uhemiitꞌin e eiwehaꞌat ro meiũwat nu koro koꞌi kape e. Taꞌi mesuwarotiat nu koro koꞌi ikahu kahato pytkai iwato kahato pytkai hewo hewo wyti aru hawyi yt kat i aru wẽtup nu koro topyhuꞌat mekewat eꞌat pe toꞌotote tote rakat are e.
"7 Miꞌi hawyi hekatuwyria apoꞌiꞌatuꞌe Iesui pe — Urumuꞌe hat iꞌatuꞌe karãpe aru pãi mesuwat nu koro koꞌi hewo hewo hap topyhuꞌat iꞌatuꞌe. Aikotã aru pyno uruikuap mekewat eꞌat putꞌokꞌe hap iꞌatuꞌe Iesui pe."
8 Miꞌi hawyi Iesui tiꞌatuwesat topotpoꞌororia pe — Eiweꞌeg wo o are katupono wyti aru uhet wywo uhet eroꞌok haria putꞌokꞌiꞌatuꞌe ehepe eimaꞌat hamo are. — Uito Iesui ti rat iꞌatuꞌe wyti aru. Uito ti ariot raꞌyn eiporekuat koro wuat iꞌatuꞌe aru. Tupana mipoꞌoro uito wuatꞌi miitꞌin porekuat nuat iꞌatuꞌe aru õꞌẽ haria. — Araꞌaipok taꞌyn manaꞌin uhytꞌiꞌin iꞌatuꞌe aru ehepe wen maꞌato yt eweiwanẽtup teiꞌo iꞌatueso rakaria kape are katupono eimaꞌat hamo tõꞌẽ are. Yt pywo piat rakaria i miꞌiria pote e. Ehekat kyꞌewi eipiit kyꞌewi tõꞌẽ aru — Uito Tupana mipoꞌoro sese e haria e Iesui ahepe."
9 — Taꞌi mekewat eꞌat pe wyti aru wuꞌuka hap koꞌi kahato eweikuap yne mesuwarotiat wuꞌuka hap etiat eweikuap aru e. Miꞌi hawyi yt kat hin i woꞌowese hap mesuwarote hap ewywuat eweipuẽti aru are e. Yt ikahu hin i hap ewy miitꞌin toꞌoꞌatuꞌuka atuꞌuka kahato wyti aru hap kape eiwaꞌakasa pytkai yt eweikenꞌẽ miꞌi pupi katupono poꞌog poꞌog saꞌag miꞌi eꞌat kai turan putꞌokꞌe mekewat hoꞌopot hoꞌopot hap eꞌat koro are e."
10 Miꞌi hawyi woꞌoꞌatuꞌuka atuꞌuka sakpo hap eꞌat wyti aru putꞌokꞌe are e. Miꞌi hawyi morekuaria koro koꞌi toꞌomoma teran aru hawyi toꞌoꞌatuꞌuka atuꞌuka iraniaꞌin ywania eporekuaria koꞌi wywo e."
11 — Iꞌewyte wyti aru mekewat eꞌat yt naku i hap koro owakai mesuwat yi aipytyp huruk hurukꞌe kahato tyryꞌe tyryꞌe hap ewy hawyi yt kat hin i miitꞌin miꞌu mesuwat yi tote toĩneꞌen are e. Miꞌi hawyi wuatꞌi etama piaria hesyꞌat kahato rakaria wo tukupteꞌen e. Miꞌi hawyi miitꞌin satyꞌi satyꞌi hap yt ikahu hin i hap ewy teꞌeruwemoherep aru mesuwarote e Iesui. Taꞌi yt naku i hap yn wyti aru miitꞌin ete taꞌatupuẽti are e. Iꞌewyte atipy wyti aru yt aimikuap ewy hin i topyhuꞌat aru katupono ipoity kahato uiꞌe hap ewywuat hap kape eweiꞌakasa aru e. Taꞌi atipy kaipyi ywaiti pyi hewo hewo kahato miitꞌin ete yt naku i hap ewywuat yt karãpe i eweiꞌakasa hap ewywuat e. Miꞌi hap koꞌi kape eiwehaꞌat turan waku eiwatetup mesuwat uimienoi kape e."
12 Maꞌato mekewat eꞌat pe wyti aru mesuwarotiaria yt uimohey haria eipytyk kahato wyti aru ehatyꞌi hatyꞌi hamo are e Iesui. Taꞌi Tupana mõtypot hap yat kape eheroto eipe hawyi — Yt nakuaria i kahato miꞌiria iꞌatuꞌe ehepiat uipotpoꞌororia eipe pote are e. Miꞌi hawyi wyti aru taꞌatupyhik kahato eipe are e. Morekuat koro koꞌi tuꞌisaria eiꞌauka teran haria tukupteꞌen uhemiit eipe pote are e."
13 — Maꞌato eheroto haria pe iꞌewyte morekuaria pe waku ehenoi uhehay wakuat iꞌatuepe eweikupteꞌen iꞌatupyꞌasetpe turan mekewat eꞌat. Ereĩneꞌen suraraꞌin po pe pytkai waku ewehenoi ewanĩkaptia pe sehay wakuat uhetiat e."
14 — Yt eweiwanẽtup teiꞌo saꞌawyꞌi — Kat som waku aru areꞌe uiꞌauka teran haria pe iꞌatuwesat hap ete are e."
15 Katupono mekewat eꞌat saꞌag me aru uito ti aru areĩneꞌen eiwywo kahato hawyi atopag eiwẽ pe uhehay iꞌatuwesat hamuat are e. Taꞌi aikotã waku kahato hap ahenoi ehepe e. Miꞌi hawyi ehewanĩkaptia yt taꞌatumohit kuap i eiꞌe hap hawyi paaꞌiꞌatuꞌe uhehay wakuat eiwẽ pywiat pupi are e."
16 Pywo ti rat meiũran aru eiꞌywotꞌin eityꞌin yt uimohey i haria yt iꞌatuwese hin i ehete uhehay upiaria eipe pote iꞌewyte ehekatuwyria sese wyti aru eimaꞌat hanuaria teꞌeropyhuꞌat uikyꞌe haria sese eipe pote are e. Miꞌi hap eꞌat pe eikatuwyria sese tiꞌatukaykay suraraꞌin sem eiꞌauka hamo are e. Miꞌi hawyi taꞌatuhoꞌoꞌatuꞌuka kahato uhehay moherep haria mekewat eꞌat pe are e."
17 Yt uwe i eikyꞌesat haria tukupteꞌen mekewat eꞌat pe uikai eweikupteꞌen eipe pote are e."
18 Iꞌatupyꞌahak kahato ehete uhemiitꞌin eipe pote are e. Maꞌato eimosatyꞌi satyꞌi pytkai wyti aru yt uwe i eihep kuap Tupana po pyi are e. Ehehay pywo sese uhetiat yt taꞌatuꞌakit kuap i are e. Taꞌi yt wẽtup e hap taꞌatumoma kuap mekewat eꞌat pe uimiꞌapykok koꞌi eiperia pote e."
19 Uimohey ro haty wo poꞌog mekewat eꞌat pe are yt naku i kahato ahete pytkai are e. Yt eweipun neiꞌo uimohey hap miitꞌin eiꞌatuꞌuka hap eꞌat pe are e. Waku uikawiano eweikupteꞌen ne wuatꞌi eꞌat pe e. Yt uiꞌatoiat i pote waku pe eweikupteꞌen wuatꞌi eꞌat pe are e.
"20 — Mekewat eꞌat pe karãpeĩ tukupteꞌen suraraꞌin sem ahewanĩkaptia yt pya i ahetawa wato Ierusarẽi kaipywiat hawyi karãpe tuwehytꞌok teran ahetawa pe aiꞌatuꞌuka hamo miꞌi hap eꞌat pe meremo eweikuap taꞌyn yt pya hin i ahetawa wato Ierusarẽi moma sese hap eꞌat hap eweikuap are e."
21 Tawa wato Ierusarẽi toĩneꞌen yi Iuteu pyꞌasetpe pote waku eikohyeput kahato pya kahato yi Iuteu kaipyi are e. Waku eikohyeput yityꞌok koꞌi kape eiwemig hamo are e. Maꞌato tawa Ierusarẽi miaria eipe pote meremo eiwenõꞌẽ ro pya pya tawa wato Ierusarẽi kaipyi hawyi meremo eikohyeput pya pya tawa pyi e. Muꞌap upi Ierusarẽi kapiat eweikupteꞌen mote yt eweiꞌaipok teiꞌo tawa Ierusarẽi kape are e."
22 Katupono miitꞌin apiheg hap koro hap eꞌat sese topyhuꞌat mekewat eꞌat pe aru are e. Taꞌi saꞌawyꞌiwuat Tupana miwan ewywuat saꞌag hap ewywuat topyhuꞌat aru mekewat eꞌat saꞌag hap eꞌat pe are e."
23 Mekewat eꞌat turan yt naku i kahato topyhuꞌat aru hupiꞌa rakaria ete manaꞌin mẽpyt sat haria wywo ete are e. Katupono hoꞌopot hap yn topyhuꞌat itote are e. Tupana piat miitꞌin apiheg hap putꞌokꞌe raꞌyn yne yi Iuteu piaria ete are e."
24 Miꞌi hawyi wẽtup ywania tiꞌatuꞌuka kahato yne Iuteu ywania kyseꞌyp mo taꞌatuꞌatuꞌuka kahato are e. Iraniaꞌin taꞌatueroto taꞌatuetama kape taꞌatupotpap nug hamo hawyi iraniaꞌin taꞌatupyhik taꞌatuwoꞌopyhik hawe are e. Taꞌi iraniaꞌin wẽtup ywania kaipywiaria koꞌi tiꞌatumoma irane Ierusarẽi miaria maꞌato miꞌi hawyi wẽtup eꞌat pe aru Tupana — Wãiꞌe miꞌiria pe toran naꞌyn e aru hawyi taꞌatupohep taꞌyn aiꞌywania moma hap hawyi taꞌatuꞌatoiat tawa Ierusarẽi are e. Miꞌi hawyi yt taꞌatuewyry kuap i poꞌog tawa Ierusarẽi me are e.
"25 At waty waikiru koꞌi iꞌewyte tohenoi wyti aru uhut hap eꞌat taꞌatuhenoi are. Yt pya i raꞌyn toran naꞌyn e hap eꞌat pe putꞌokꞌe hap taꞌatuhenoi aru are. At waty waikiru koꞌi yt tukupteꞌen i taꞌatueiam me are e. Taꞌi yt saꞌawyꞌiwuat ewy hin i at waty waikiru tukupteꞌen are e. Mekewat eꞌat pe kowo i kowo i taꞌatuewyry mekewat eꞌat pe are. Taꞌi mesuwat yi tote ywytu uato hap ewy kahato yꞌy tote yi tote poꞌog poꞌog saꞌawyꞌiwuat kai are e. Miꞌi hawyi wasere saꞌag hap ewy toĩneꞌen e. Miꞌi hawyi yꞌy wato hap wasere upiat aiꞌyat ypik hap pupi miitꞌin teꞌerokenꞌẽ kahato pote iꞌatuꞌakagꞌaia hawuo teꞌerewanẽtup kahato at kaꞌap hawyi — Yt naku i kahato mesuwe iꞌatuꞌe aru toꞌope are e. Pywo pe ti yne hyemyiꞌa wato koꞌi ete yꞌy ihyesaika kahato hap ewy topyhuꞌat mekewat eꞌat pe aru e Iesui temiitꞌin me itote."
26 — Miꞌi hawyi at waikiru waty kohyewyry hap kapiat mesuwarotiaria teꞌeraꞌakasa hawyi gytꞌiꞌatuꞌe aru e. Iꞌatuperup iꞌatuwuwu genꞌẽ pono e. Atipy piat iꞌatueiam koꞌi hurukꞌe hawyi yt teꞌeropyhuꞌat kuap i saꞌawyꞌitewuat ewy e. Miꞌi hawyi — Watopap yne irane aito iꞌatuꞌe toꞌope teꞌerokenꞌẽ haype are e."
27 — Miꞌi hawyi tut raꞌyn Uito Eheykeꞌet Eikywyt ywyhig muo uhesaika hawuo uimõtypot hawe putꞌokꞌare raꞌyn e Iesui."
28 — Pyno uimienoi hap ewy putꞌokꞌe hawyi yt eweikenꞌẽ teiꞌo maꞌato eiwepit ro katupono yt pya hin i ehehakyeraꞌat hap hamuat eꞌat toĩneꞌen are e Iesui ahepe temiitꞌin me.
"29 Miꞌi hawyi hãꞌãkap wuo tohenoi i raꞌyn. Mio tã e Iesui — Pyno eweikuap taꞌyn aikotã ahetama pe ariaꞌyp koꞌi haat kahato taꞌatueꞌat putꞌokꞌe hawyi e."
30 Ahetama pe Wiku yp iꞌyhop kyt eweiꞌakasa hawyi iꞌaman mot eꞌat yt pya hin i watoꞌe mesuwe ahetama pe e."
31 Miꞌi hap ewy karãpe eweiꞌakasa yne yne uimienoi koꞌi ewy wyti aru tokosap yne hap — Waku eweiꞌe eipyꞌa pe tut irane Tupana Miꞌairo Wuatꞌi Miitꞌin Porekuat nuat hap eꞌat waku eweiꞌe are e."
32 Pywo ti rat tut aru wuatꞌi uiꞌe hap ok tã koꞌi are e. Mũkiꞌite eꞌihotꞌok wyti aru uimohey haria mesuwat yi totiaria teꞌerahaꞌat aru yne uiꞌe hap kape hawyi teꞌeroꞌe toꞌope aru — Aimuꞌe hat toꞌe hap ok tã topyhuꞌat raꞌyn mesuwat yi tote aikotã toꞌe hap ewy iꞌatuꞌe aru e. Yt uheso i tut wyti aru yne uimimoherep uiꞌe hap koꞌi ok tã e. Uimohey haria tukupteꞌen aru mesuwat yi tote karãpe putꞌokꞌe yne uimimoherep aikotã aru uiꞌe hap koꞌi e. Aimimuꞌeria ehaipepiaria uimohey haria yt karãpe i ikahuro mesuwat yi tote maꞌato teꞌerahaꞌat aru uimimoherep uhehay aikotã aru hap akasa hamuat e Iesui tomohey sese haria pe ahepe."
33 Taꞌi atipy koꞌi waty at waikiru koꞌi teꞌeruweityk kahato aru yne yne iꞌewyte mesuwat yi rotiat yne yne yt kat i aru toĩneꞌen katupono tuweityk aru yne yne maꞌato uimienoi koꞌi yt karãpe i ikahuro aru are maꞌato toĩneꞌen wuatꞌi eꞌat pe uhehay e Iesui ahepe."
34 — Eiweꞌeg wo o eiwanẽtup hawe are yt naku i kahato mesuwarotiat eimiꞌu kape esapo hy u hap kape yn eweiwanẽtup are e. yt naku i ehenuk iwato kahato hap kape yn eiwemahy u hap kape yn eipyꞌa pe toĩneꞌen mekewat eꞌat putꞌokꞌe turan are e. Yt naku i eiminug koꞌi hap kape mesuwarotiat kape yn eiwewanẽtup are. Miꞌi wanẽtup hap ewy ereĩneꞌen mote karãpe mekewat eꞌat putꞌokꞌe hawyi eiwemogyt mogyt neꞌi aru Tupana pupi are e."
35 — Taꞌi wuatꞌi miitꞌin mesuwarotiaria teꞌeraꞌakasa hamuat mekewat eꞌat pe hut turan maꞌato yt hekatup i haria pote miꞌiria pyhik hap ewywuat putꞌokꞌe irane e. Aikotã pay yt tikuap i moryꞌa toĩneꞌen muꞌap tote toꞌauka hamuat hap ewy kahato putꞌokꞌe mekewat eꞌat yt naku i rakat yt Tupana mohey i te haria ete are e."
36 Pyno ewehẽtup to Tupana piat eimoesaika hap eiꞌapykok hamuat mekewat hoꞌopot hap eꞌat putꞌokꞌe ehete pote are e. Waku miat iweꞌeg rakat ewy eweikupteꞌen are e. Waku ewehẽtup o Tupana pe — Yt atoiat teran i uhepiat emohey hap waku eweiꞌe tope are. Miꞌi hawyi putꞌokꞌeweiꞌe wyti aru mekewat ehoꞌopot hap eꞌat hawyi waku — Uipowyro ro mesuwat eꞌat sakpo areto hamuat eweiꞌe ro Tupana pe are e Iesui ahepe itote.
"37 Miꞌi hawyi wuatꞌi eꞌat pe Iesui tiꞌatumuꞌe kahato miitꞌin sem Tupana mõtypot yat koro pe."
38 Hunete wuatꞌi miitꞌin teꞌeruwaꞌatunug itote Tupana mõtypot yat koro pe Iesui mienoi kapiat teꞌerowanẽtup hamo. Maꞌato wãtymꞌi hawyi toto i raꞌyn Iesui mekewat Uriweira ypia yityꞌok kape. Miꞌi tote toĩneꞌen wãtym muo ẽtup hamo.
"1 Pyno wẽtup eꞌat pe putꞌokꞌe mekewat man teneg u hap eꞌat karãpe Iuteuria teꞌeruwaꞌatunug kahato taꞌatuetawa koro Ierusarẽi kape man teneg u hamo — Miꞌi man aimiꞌu saꞌawyꞌiwat ewywuat kahato ewy watoĩneꞌen ahewanĩkaptia po pe turan e hap kuekatu hamo teꞌeruwaꞌatunug."
2 Miꞌi hawyi itote paꞌi kororia iꞌewyte wãiꞌe hap enoi haria tikat kahato aikotã waku migꞌi wo Iesui auka hamo hap taꞌatukat tawa Ierusarẽi me wen maꞌato yt taꞌatupuẽti i katupono Iesui kyꞌe haria sem mupi teꞌerokenꞌẽ kahato itote."
3 Miꞌi turan ahiag teke raꞌyn Iesui potmuꞌe Iuta e hap piit pe mekewat Ikarioti saꞌyru piit pe teke mekewat Iesui potmuꞌe wẽtup ok 12 ok takat pe."
4 Ahiag teke hawyi Iuta piit pe hawyi toto raꞌyn paꞌi wato kororia kape iꞌewyte suraraꞌin akag koꞌi kape Tupana mõtypot yat apykok haria kape hawyi ihay kahato miꞌiria wywo aikotã waku Iesui pytyk hamuat kat hamo."
5 Toiꞌatumowepit paꞌi wato koꞌi iꞌewyte surara akag koꞌi imienoi saꞌag wo hawyi taꞌatuhaꞌup nug neran saꞌup iwato Iuta pe Iesui maꞌat hap pe saꞌup mo."
6 Haꞌup totat hawyi toto raꞌyn hawyi toikat kahato aikotã karãpeĩ waku Iesui moherep hamo iꞌauka teran haria po piat hum hamo iraniaꞌin yt mikuap mo i hap toikat.
"7 Miꞌi hawyi putꞌokꞌe raꞌyn mekewat man teneg u hap eꞌat tawa wato Ierusarẽi me. Miꞌi turan Iesui ywania Iuteuria ywania iꞌauka taꞌatuhũ Kuteiru mẽpyt iꞌatuminug saꞌag saꞌup mo Tupana mowepit hamo."
8 Mekewat man teneg u hap eꞌat owokai Iesui tipoꞌoro typy ok temiit Peteru Iuwãu tawa Ierusarẽi kape toꞌe henoi hamo hawyi — Eweiwat ro tawa kape ienuk wato hap nug hamo."
9 Miꞌi hawyi apoꞌiꞌatuꞌe — Mehĩ aikope som waku watunug aimiꞌu itote iꞌatuꞌe Iesui pe."
10 Miꞌi tupono toiꞌatuwesat — Eweiwat tawa wato Ierusarẽi kape hawyi meremo itote eweipuẽti aru ihainia kamũti piat yꞌy sat hat itote are e. Miꞌi hawyi hewatꞌymo eweiwat ro hawyi teke raꞌyn wẽtup getap we."
11 Miꞌi hawyi waku eweiꞌe ro getap kaꞌiwat pe — Urupoꞌoro hat Iesui tuwehay poꞌoro ewawi uhyt katupono toikuap teran — Aiũwat mekewat okipy wato waku rakat Uito uhemiitꞌin wywo man teneg u hamuat eweiꞌe ro getap kaꞌiwat pe."
12 Miꞌi eweiꞌe mekewat getap kaꞌiwat pe hawyi toimoherep aru ehepe wẽtup okipy iwato rakat ywaiti rakat piat are e. Miꞌi pe tukupteꞌen yne aimikyꞌesat mekewat ienuk hap nug hamuat aru are e. Waku miꞌi okipy koro tote ewetunug aimiꞌu are e."
13 Miꞌi hawyi tuwat Peteru Iuwãu Iesui mienoi ewy hawyi taꞌatupuẽti yne raꞌyn Iesui e hap ewy hawyi itote ienuk hap iwato rakat taꞌatunug itote Iesui mikyꞌesat ewy.
"14 Miꞌi hawyi wãtymꞌi turan hawyi Iesui toto wy mekewat okipy ywaiti kape hawyi putꞌokꞌe itote hawyi Iesui taꞌapyk taꞌyn yparakai koro ete temiit 12 ok takaria wywo."
15 Miꞌi hawyi toꞌe iꞌatuepe — Waku kahato mesuwe watenuk e. Ahekatup kahato raꞌyn mesuwat ienuk hap u hamuat eiwywo uhepiat hoꞌopot hap owakai e."
16 Uiwyriaꞌin e areto irane eikai hawyi yt arenuk i iraꞌyn ienuk hap man teneg u hap mesuwat yi tote i raꞌyn are e. Maꞌato meiũran karãpe Tupana topyhuꞌat Wuatꞌi Miitꞌin Porekuat Koro wanuat hap eꞌat pe hawyi atuꞌu i raꞌyn eiwywo e Iesui. Taꞌi wuatꞌi miitꞌin tikuap taꞌyn hawyi Tupana topyhuꞌat Wuatꞌi Miitꞌin Porekuat no hawyi ahuꞌu i raꞌyn man teneg ienuk hap eiwywo e Iesui temiitꞌin me."
17 Miꞌi tã toꞌe hawyi totat raꞌyn mekewat kuiꞌa piat sapo hy hawyi — Waku e Tupana pe. Miꞌi hawyi tutum mekewat kuiꞌa torania temiitꞌin me hawyi toꞌe iꞌatuepe — Waku eweimõꞌẽ ro mesuwat kuiꞌa piat sapo hy eiwoꞌope e."
18 — Pywo pe ti Uito areꞌyꞌu meiũ hawyi yt areꞌyꞌu i sapo hy eiwywo i raꞌyn maꞌato mekewat eꞌat karãpe Tupana toĩneꞌen Wuatꞌi Miitꞌin Porekuat nuat eꞌat putꞌokꞌe hawyi areꞌyꞌu i raꞌyn mesuwat ewywuat sapo hy eiwywo i raꞌyn e temiitꞌin me."
19 Miꞌi hawyi man teneg totat hawyi waku e Tupana pe hawyi toipik topo wo hawyi tutum naꞌyn topotmuꞌeria pe hawyi toꞌe — Mesuwat man uimipik uipiit ewy kahato toĩneꞌen katupono uipiit miitꞌin tipik kahato uiꞌauka turan e. Miꞌi pote uipiit iãꞌãkap kahato meikowat man e. Taꞌi meikowat man ni uipiit e. Miꞌi hap ewy topyhuꞌat uipiit irane uiꞌauka turan e. Katupono uikuꞌuro irane wuatꞌi miitꞌin kawiano e. Miꞌi pote waku man u hat uikuꞌuro hap kuekatu hap ewetunug aru e."
20 Teꞌerenuk kahu hawyi sapo hy kuiꞌa piat totat hawyi — Meikowat sapo hy uhuu ewywuat e. Taꞌi uhuu at hap topyhuꞌat aru mohag wo miitꞌin Tupana wywo woꞌowese hap nug hamuat e. Uhuu taꞌat yne irane miitꞌin ehakyeraꞌat hamuat e.
"21 Miꞌi hawyi Iesui toꞌe — Maꞌato eiweꞌeg wo o katupono wẽtup ok aipyꞌasetpiat mesuwat yparakai ete apyk piat uimaꞌat hanuat toĩneꞌen naꞌyn e. Katupono uiꞌaukakare saꞌag neꞌi miꞌi miit toĩneꞌen e."
22 Taꞌi Uito ti Wuatꞌi Ywania Ykeꞌet pote uikuꞌuro irane miitꞌin yne kawiano Tupana mikyꞌesat ewywuat maꞌato yt naku i kahato topyhuꞌat aru uimaꞌat hat ete katupono Tupana miꞌapiheg sese miꞌi miit topyhuꞌat e Iesui temiit Iuta piat."
23 Mio tã toꞌe hawyi hemiitꞌin apoꞌiꞌatuꞌe toꞌope toꞌope — Uweĩ aiwywo Aikaꞌiwat maꞌat hanuat iꞌatuꞌe.
"24 Miꞌi hawyi Iesui potmuꞌeria 12 ok takaria tuꞌuka toꞌope yparakai ete toꞌoehay wo — Uito ti poꞌog Iesui potmuꞌe eikai torania kai iꞌatuꞌe saꞌag toꞌope."
25 Miꞌi hawyi Iesui toꞌe temiitꞌin me — Uiwyriaꞌin e ahewanĩkaptia ywania porekuaria mio tã iꞌatuꞌe — Worohoꞌokyꞌe kahato iꞌatuꞌe ahepe maꞌato iꞌatueso neꞌi katupono marakꞌa koꞌi neꞌi miꞌiria tupono e. Yt kat i aikyꞌe hap wywo aipoꞌoro taꞌatupotpap nug hamo e. Pyno yt naku i miꞌiria ewywuat koꞌi eiperia are e. Yt atikyꞌesat i e temiitꞌin me."
26 Maꞌato eipe ti yt miꞌiria ewywuat no i eweikupteꞌen e. Atikyꞌesat kahato eiperia iwese kahato rakaria wo e. — En ni poꞌog uikai e haria wo atikyꞌesat eipe e. — Waku uito ewatꞌymo areto uhyt mana e haria wo atikyꞌesat eipe e. — Woropowyro teran e haria wo atikyꞌesat eipe e. — Waku uipoꞌoro uhyt mana e haria wo atikyꞌesat eipe e. Atikyꞌesat eweipyhuꞌat iraniaꞌin powyro hanuaria e. Miꞌi haria wo eweipyhuꞌat pote miꞌi hawyi poꞌog poꞌog iraniaꞌin kai Tupana wanẽtup hawe eweipyhuꞌat e. Iꞌewyte miit akag wuat eipe pote heropat haria ewywuaria waku eweipyhuꞌat eimiitꞌin powyro hanuaria hap atikyꞌesat e Iesui temiitꞌin me tomohey haria yne pe."
27 Mesuwarotiaria aiporekuaria teꞌeruwepyk hawyi taꞌatukaykay taꞌatueropat haria hawyi — Uipoi ro mesuwe meremo iꞌatuꞌe. Miꞌi hawyi heropat haria meremo taꞌatuerut morekuat kape imiꞌu ipupi teꞌerokenꞌẽ hawyi. Maꞌato Uito yt miꞌiria ewy hin i are. Yt atikyꞌesat eiperia morekuaria ewy maꞌato waku poꞌog miitꞌin poi hanuaria wo ewy hap atikyꞌesat aikotã uito worohoꞌopoi hap atikyꞌesat eiperia katupono areĩneꞌen mesuwe miitꞌin eropat hano are miitꞌin poi hano areĩneꞌen e Iesui temiitꞌin me."
28 Mesuwarote ahoꞌopot kahato miitꞌin mikyryꞌi wo hap upi ahenoi miꞌiria pe turan wen maꞌato eipe yt uiꞌatoiat hin i uhãꞌãg turan e. Waku kahato eiperia e Iesui topomuꞌeria pe."
29 Saꞌawyꞌi Uiꞌywot Tupana tum uhepe wuatꞌi ywania uhemiit no. Koitywy Uiꞌywot ewy atunug eiperia morekuaria wo uiꞌewywuaria e. Taꞌi Uiꞌywot uinug naꞌyn Morekuat no mesuwarote e. Miꞌi hawyi eipe ti iꞌewyte worohoꞌonug morekuaria wo uiꞌewy e Iesui."
30 Pywo pe ti areꞌe ehepe aikope aikope areĩneꞌen morekuat no hap tote wyti aru uimiꞌu nug hap tote uiwywo eweiꞌapyk aru e. Taꞌi morekuaria wo uiwywo eweikupteꞌen e. Taꞌi uiwywo eweiꞌapyk uimiꞌu u hamo uhesapo hy u hamo itote uimõtypot sese hap eꞌat e. Iꞌewyte eiꞌapyk hap koꞌi sese iwato rakat tote eweiꞌapyk morekuaria kororia wo 12 aiꞌywania Isareu ywania morekuaria wo eweikupteꞌen aru itote are e. Miꞌi hawyi taꞌatuerut ehowawi aiꞌywania uwe waku uwe yt naku i eweiꞌe hamo e Iesui temiitꞌin me 12 ok takaria pe.
"31 Miꞌi hawyi Iesui toꞌe Peteru pe — Simãu Simãu e mesup wãtym muo ahiag ehãꞌãg kahato e. Taꞌi ahiag tihep teran epiat uimohey hat uhyt iꞌewyte iraniaꞌin uipotmuꞌeria yne toikyꞌesat towano e. Pyno eiãꞌãg hap iwato kahato tutunug neran eiꞌakit reran haype e. Aikotã arui ape watihuꞌi huꞌi hap ewy tutunug hawyi arui ape toihep yne hawyi arui sese yn topyhuꞌat panene pe iꞌape wasere upi toto yne hap ewy uimohey hap yn topyhuꞌat eikai aru Peteru e."
32 Pyno atikuap ahiag mikyꞌesat hawyi meremo ahẽtup kahato Uiꞌywot pe emoesaika hamo — Tupana are yt atikyꞌesat i Simãu tipun aimohey hap are kahato Uiꞌywot pe ekawiano Peteru e. Miꞌi hawyi karãpeĩ eraꞌaipok uhowawi i raꞌyn aru miꞌi hawyi etiꞌatumoesaika o ewyriaꞌin uimohey haria iꞌatuiãꞌãg hap turan e Iesui Peteru pe."
33 Miꞌi hawyi Simãu tiwesat Iesui — Uikaꞌiwat pywo ti rat areto ewywo wuatꞌi eꞌat pe ekuꞌuro hap kape miitꞌin epyhik hap kape areto wy e. Taꞌi areto ewywo eꞌauka hap kape Mehĩ e. Taꞌi uiꞌauka teran iraniaꞌin mote — Waku uiꞌauka areꞌe aru iꞌatuepe maꞌato yt karãpe i moroꞌatoiat En Uhyt Uiwy Iesui e Peteru."
34 Miꞌi hawyi Iesui toꞌe Peteru pe — U uiwy Simãu mesuwat wãtym nuran aru — Yt atikuap i Miꞌi Miit ereꞌe aru uhepiat myeꞌym mo mekewat waipaka ehay eꞌyianmete e. Taꞌi myeꞌym mo aru — Yt atikuap i Miꞌi Miit ereꞌe uhewanĩkaptia pe uhyt e Iesui Peteru pe."
35 Miꞌi hawyi Iesui apoꞌe temiitꞌin me — Saꞌawyꞌi worohoꞌopoꞌoro eipe yt kat wywo i Tupana ehay moherep hamo e. — Yt ewetioto teiꞌo muꞌap saꞌup ehupi are saꞌawyꞌi ehepe e. Yt ewetioto teiꞌo ehekuriwu ehupi are saꞌawyꞌi. Yt naku i typy ehesokpe ewetioto are saꞌawyꞌi ehepe e. Iꞌewyte eipy piat eipy sokpe wywo yn waku eweiwat are saꞌawyꞌi ehepe worohoꞌopoꞌoro uhehay moherep hamo turan e. Yt naku i ekyseꞌyp surara ewywuat are saꞌawyꞌi ehepe e. Pyno apoꞌare ehepe — Kat som yt kat i eweipuẽti mekewat eꞌat pe e. Yt kat i eimiꞌu hap eweipuẽti sio yt e. Yt kat i ehesokpe hap eweipuẽti sio yt e Iesui temiitꞌin me. Miꞌi hawyi taꞌatuwesat — Yt Uhyt waku kahato uruipuẽti yne urumikyꞌesat ok tã toĩneꞌen uruiꞌatumuꞌe miitꞌin itote turan hap uruipuẽti iꞌatuꞌe Iesui pe."
36 Miꞌi hawyi Iesui toꞌe i temiitꞌin me — Pyno saꞌawyꞌi yt ewetioto teiꞌo muꞌap saꞌup are maꞌato koran wẽtup uiꞌe hap areꞌe ehepe e. Mio tã are — Toĩneꞌen eipo pe muꞌap saꞌup pote ewetioto o yne ehupi are. Ehekuriwu koꞌi howapy ekat wo tukupteꞌen mote ewetioto yne ro ehupi are. Iꞌewyte ehekyseꞌyp surara wat ewywuat yt kat i eikai pote waku meremo ehesokpe wywo eweikyiꞌat ro ehekyseꞌyp suraraꞌin wat ewywuat are ehepe e Iesui."
37 Pywo pe ti saꞌawyꞌiwuat Tupana ehay moherep haria mio tã iꞌatuꞌe taꞌatumiwan me — Yt nakuaria i po pe wyti aru topyhuꞌat Uipoꞌoro Wuatꞌi Ehakyeraꞌat hat e Tupana saꞌawyꞌi miwan me e Iesui temiitꞌin me. Pyno koitywy saꞌawyꞌiwuaria uhetiano taꞌatuwan e. Miꞌi pote koran naꞌyn areĩneꞌen yt nakuaria i po pe aikotã Tupana toꞌe hap ewy e. Katupono yne Tupana e hap uheteiat ewywuat aru topyhuꞌat tomimoherep miwan saꞌawyꞌiwuat e hap ok tã e."
38 Mio tã toꞌe hawyi ipotmuꞌeria teꞌeroꞌe — Urukaꞌiwat erahaꞌat kope urupo pe typy kyseꞌyp suraraꞌin wat ewywuat toĩneꞌen iꞌatuꞌe. Miꞌi hawyi Iesui toꞌe — Pyno waku typy kyseꞌyp putꞌokꞌe e.
"39 Miꞌi hawyi aikotã saꞌawyꞌitewuat ewy Iesui toto i raꞌyn tawa wato Ierusarẽi pyi mekewat yityꞌok Uriweira ypia koꞌi kape temiitꞌin wywo."
40 Putꞌoktaꞌatuꞌe yityꞌok tote hawyi Iesui toꞌe temiitꞌin me — Uikyꞌe haria waku mesup wãtym kaꞌap ewehẽtup kahato Tupana pe — Urumoesaika ro Tupana esaika hamo emohey poꞌog hamo katupono mesup taꞌyn ewanĩkaptia uruhep teran epo pyi emohey hap po pyi waku eweiꞌe kaꞌap Tupana pe e Iesui temiitꞌin me."
41 Miꞌi hawyi Iesui taꞌam naꞌyn poꞌog yityꞌok upi temiitꞌin myi yt pya i aikotã nu watipun hap ewy toto hawyi tuwepỹꞌãtutuk ihay Toꞌywot Atipy piat Tupana wywo."
42 — Uiꞌywot atikyꞌesat kahato emikyꞌesat ewy yn atunug e. Etikyꞌesat miitꞌin hoꞌopot hap wuatꞌi eꞌat piat atuꞌu yne hap pote atuꞌu e. Papai uhepiat hoꞌopot hap sapo hy kuiꞌa piat ewy toĩneꞌen e. Yt atuꞌu teran i mekewat kuiꞌa piat Papai katupono uiꞌauka hap toĩneꞌen mote wen maꞌato etikyꞌesat atuꞌu pote atuꞌu mesup emikyꞌesat ewy Papai e. Etihep teran mesuwat kuiꞌa uipo pyi pote etihep to maꞌato yt etihep teran i mote atuꞌu yne e Iesui Toꞌywot Tupana pe."
43 Miꞌi tohenoi hawyi tuwemoherep howawi raꞌyn wẽtup ok atipy kaipywiat sut hat Tupana mipoꞌoro Iesui moesaika hamo."
44 Miꞌi hawyi Iesui ihay kahato Tupana wywo. Miꞌi hawyi tuwesatyꞌu kahato itote. Miꞌi hawyi huu tuwẽtem ipiit pyi huu aikotã an hakup ewy homhomꞌe yi tote iꞌakag owa pe pyi."
45 Ihay kahato Tupana wywo hawyi ipoĩꞌãm naꞌyn hawyi taꞌaipok temiitꞌin kape maꞌato iꞌatuket turan neꞌi toiꞌatupuẽti katupono yt iꞌatuwepit hin i pote."
46 Miꞌi hawyi toꞌe iꞌatuepe — Are pãi kat poteĩ eweiket neꞌi mesup e. Eipoĩꞌãm no hawyi ewehẽtup to Tupana pe e. Yt pote ahiag miꞌakit koꞌi eweikupteꞌen aru e."
47 Mio tã e turan suraraꞌin sem putꞌokꞌiꞌatuꞌe miitꞌin typyꞌi kahato rakaria wywo. Miꞌiria muꞌap moherep hat tut raꞌyn wẽtup ok Iesui potmuꞌe saꞌag Iuta e hap. Miꞌi tokosap Iesui ewawi imoherep suraraꞌin me hamo hawyi iporokꞌat Iesui iꞌãpysig hamo."
48 Miꞌi hawyi Iesui toꞌe — Uimoherep teran suraraꞌin me uiꞌauka hamo pote uiꞌãpysig uikyꞌe hat ewy apo Iuta e."
49 Miꞌi hawyi ipotmuꞌeria taꞌatukuap taꞌyn Iesui maꞌat hap hawyi teꞌeroꞌe — Urukaꞌiwat koitywy apo waku urutat uruekyseꞌyp typy hawyi waku apo urutuꞌuka suraraꞌin nywo ehakyeraꞌat hamo iꞌatuꞌe."
50 Miꞌi hawyi wẽtup ok Iesui potmuꞌe Peteru tiꞌahapehep taꞌyn paꞌi koro emiit tekyseꞌyp mo. Ipo sese kai toiꞌahapehep."
51 Maꞌato Iesui toꞌe Peteru pe — Wãi ne mehĩ yt naku i e hawyi tuweponug naꞌyn paꞌi koro emiit eahape tek hap ete hawyi meremo satꞌe hawyi waku saꞌawyꞌi ewywuat i raꞌyn topyhuꞌat."
52 Miꞌi hawyi Iesui toꞌe paꞌi kororia esuraraꞌin akag koꞌi pe nagnia pe toꞌauka teran haria pe — Kat pote uimohan mesuwe wãtym muo seroꞌok takat mohan hap ewy e. Kat pote kyseꞌyp koꞌi wywo ariaꞌyp koꞌi wywo uimohan e iꞌatuepe itote."
53 Saꞌawyꞌiwuatꞌi eꞌat pe areĩneꞌen eiwywo Tupana mõtypot yat pe eimuꞌe hamo wen maꞌato mekewat eꞌat pe turan yt uhat hin i eipo wo uiꞌauka hamo e. Maꞌato eheꞌat raꞌyn toĩneꞌen katupono uiꞌauka teran iꞌypyryp we aikotã eiꞌakag ahiag ewy cewetunug mesup uhete e suraraꞌin me.
"54 Miꞌi hawyi suraraꞌin ipytyk taꞌyn Iesui hawyi taꞌatueroto raꞌyn paꞌi koro koꞌi yat kape. Miꞌi hawyi ipotmuꞌe Peteru toto wy hupi wen maꞌato pya Iesui kai toto."
55 Miꞌi hawyi paꞌi koro koꞌi okenꞌypy totiaria aria taꞌatunug hawyi teꞌeraꞌapyk aria ywytpe teꞌeruwemõpe hamo. Iꞌewyte Peteru taꞌapyk iꞌatupyꞌasetpe iraꞌak pote."
56 Miꞌi hawyi wẽtup pĩꞌã makup surara miꞌu nug hat tehaꞌat kahato raꞌyn Peteru kape aria kupykiat iwemõpe turan miꞌi hawyi toꞌe — Mimi e en ni mekewat saꞌawyꞌiwuat Iesui wywo hewyry rakat hap atikuap e are an worokuap kahato e Peteru pe."
57 Maꞌato Peteru toꞌe — Yt atikuap i uito Miꞌi Miit Iesui e hap het rakat pãi e."
58 Miꞌi hawyi meiũran wẽtup ok surara tehaꞌat kahato Peteru ewawi hawyi toꞌe — Are pãi worokuap kahato en e. En ni wẽtup ok Iesui emiit sese e Peteru pe maꞌato toiwesat — Eso kahato yt atikuap i rat Mekewat Miit e."
59 Poꞌog wãtym hawyi wẽtup ok itote tehaꞌat Peteru kape hawyi toꞌe — Pywo ti rat en ni ereĩneꞌen saꞌawyꞌi mekewat aimipyhik Iesui wywo e. Worokuap taꞌyn katupono epusu wẽtup tama pusu ewywuat mekewat yi Karireia hy pusu ewywuat aikope Iesui motag hap toĩneꞌen pusu ewywuat e."
60 Maꞌato Peteru tiwesat — U pãi e yt atikuap hin i rat emienoi Iesui etiat e. Mio tã e turan waipaka ihay — Akurẽꞌã e raꞌyn e."
61 Miꞌi hawyi Iesui tuwemorem Peteru ewawi hawyi ihaꞌat kahato howawi hawyi Peteru paaꞌe kahato katupono Iesui mienoi hotꞌokꞌe raꞌyn tuwanẽtup hawyi Iesui e hap saꞌawyꞌiwuat — Mesuwat ewãtym waipaka ehay owakai te myeꞌym mo — Yt atikuap i Miꞌi Miit ereꞌe aru uhepiat Peteru e hap kape tuwanẽtup hawyi paaꞌe."
62 Iwanẽtup Iesui ehay kape hawyi Peteru toto meremo itote pyi hawyi tuweran hawyi tuwak kahato katupono — Yt atikuap i Iesui toꞌe myeꞌym mo pote tuwak haty wo tuwemõti kahato hap wywo.
"63 Miꞌi hawyi Iesui pytyk haria suraraꞌin tiꞌahyk ahyk kahato raꞌyn hawyi teꞌeruwekyryꞌi kahato taꞌatumikyryꞌi wo Iesui ete."
64 Miꞌi hawyi sokpe wo taꞌatuowahik iha koꞌi wywo hawyi — Etikuap yne Tupana ewywuat pote ehenoi ro uruepe eꞌahyk ahyk haria set koꞌi iꞌatuꞌe neꞌi Iesui pe suraraꞌin sem."
65 Iꞌewyte taꞌatumoweukaꞌi kahato taꞌatuehay saꞌag wo itote.
"66 Miꞌi hawyi hunete ihotꞌok hawyi nagnia miwan enoi haria iꞌewyte paꞌi koro koꞌi teꞌeruwaꞌatunug yne hawyi taꞌatuerut Iesui iꞌatuewawi apoꞌiꞌatuꞌe hamo."
67 — En keĩ Tupana Mipoꞌoro Wuatꞌi Miitꞌin Ehakyeraꞌat hamuat sio yt iꞌatuꞌe. Ehenoi ro uruepe iꞌatuꞌe Iesui pe. Miꞌi hawyi toiwesat — Ahenoi ehepe uwe Uito hap pote wyti aru yt uimohey hin i e."
68 Apoꞌare ehepe — Uito kẽi Tupana Mipoꞌoro Miitꞌin Ehakyeraꞌat hamuat are ehepe pote yt uiwesat hin i eipe e."
69 Miꞌi hawyi Iesui tuwemoherep tehay wo uwe sese toĩneꞌen hap mio tã e — Uito araꞌapyk aru Tupana Koro po sese kai araꞌapyk aru Wuatꞌi Miitꞌin Ykeꞌet no e. Miꞌi hap eꞌat pe Tupana Sese Poꞌog Poꞌog Hesaika Rakat Mimõtypot sese wo araꞌapyk atipy pe e Iesui tuwepiat."
70 Mio tã toꞌe hawyi apoꞌiꞌatuꞌe Iesui pe — Pyno En nyti Tupana Sese Saꞌyru Sese sio yt iꞌatuꞌe. Miꞌi hawyi toiꞌatuwesat — Eiꞌe hap ewy e."
71 Miꞌi hawyi morekuaria iꞌatupyꞌahak kahato raꞌyn Iesui ete hawyi teꞌeroꞌe toꞌope — Heso kahato raꞌyn iꞌatuꞌe. Towẽ piat — Uito Tupana Saꞌyru Sese toꞌe saꞌag neꞌi pote waku watiꞌauka katupono towẽ pyi tehay wo tuwenug naꞌyn Tupana wo raꞌyn iꞌatuꞌe. Yt kat hamo i watikaykay iraniaꞌin morekuaria — Iesui yt naku i e hamo katupono watikuap taꞌyn ihay pyi heso kahato hap iꞌatuꞌe morekuaria.
"1 Miꞌi hawyi torania raꞌyn teꞌeropoĩꞌãm Iesui eroto hamo morekuat koro Piratu kape."
2 Miꞌi hawyi taꞌatukuasa teran haype Iesui Piratu pe. — Taꞌi mesuwat miit yt naku i sese rakat pãi iꞌatuꞌe. Gaꞌatpo watipuẽti Miꞌi Miit miitꞌin maꞌat hap ete iꞌatuꞌe. — Yt ewetum neiꞌo morekuat koro pe pohaꞌup katupono Uito ti Morekuat sese wo areĩneꞌen e itote hap ete watipuẽti iꞌatuꞌe Piratu pe maꞌato yt pywo pe i."
3 Miꞌi hawyi morekuat Piratu apoꞌe Iesui pe — En apo eꞌywania Iuteuria Porekuat e. Miꞌi hawyi Iesui tiwesat — Mio tã apo eꞌe hap ewy ereꞌe uhyt e Iesui Piratu pe."
4 Miꞌi hawyi Piratu toꞌe paꞌi koro koꞌi pe iꞌewyte iraniaꞌin waꞌatunug haria pe — Yt atiꞌauka teran i Iesui katupono yt kat i hin i toiꞌaparap uiwanẽtup hawe e."
5 Miꞌi hawyi poꞌog haty wo taꞌatukuasa Iesui — Pywo ti rat Iesui tiꞌatumuꞌe kahato temiitꞌin yt naku i nug hamuat hap ete iꞌatuꞌe. Pywo pe ti wuꞌuka hap topyhuꞌat Iuteu etama pe Iesui mienoi hap kaipyi iꞌatuꞌe. Taꞌi saꞌawyꞌi mekewat wẽtup eꞌyi Karireia pe toiꞌatumuꞌe itotiaria ehay pun hamo hawyi mio meiũpe hawyi — Waku watuꞌuka morekuat ete tohenoi raꞌyn mesuwe wuatꞌi emiitꞌin me iꞌatuꞌe saꞌag Iesui ete morekuat Piratu pe."
6 Iꞌatuꞌe hap toikuap hawyi apoꞌe iꞌatuepe — Iesui apo yi Karireia piat e iꞌatuepe."
7 Taꞌi yi Karireia piaria mimotag Iesui iꞌatuꞌe Piratu pe. Miꞌi toikuap hawyi morekuat Eroti kape toipoꞌoro Iesui katupono yi Karireia piaria porekuat no Eroti toĩneꞌen iꞌewyte mekewat eꞌat pe morekuat Eroti toĩneꞌen tawa Ierusarẽi me. Miꞌi pote yt niatpo hin i ipoꞌoro morekuat Eroti kapiat hamo."
8 Miꞌi hawyi morekuat Eroti iwepit Iesui putꞌokꞌe tewawiat hawyi katupono sehay Iesui etiat toikuap hawyi taꞌakasa teran howawi. Iesui misepap kapiat taꞌakasa teran haype."
9 Putꞌokꞌe Iesui morekuat Eroti ewawi hawyi morekuat Eroti apo apoꞌe kahato maꞌato Iesui yt iwesat i."
10 Iꞌewyte tukupteꞌen itote paꞌi koro koꞌi iꞌewyte iꞌatunãpin hap enoi haria. Pyno morekuat Eroti apoꞌe apoꞌe miꞌiria pe Iesui etiat hawyi taꞌatukuasa kahato Iesui tope."
11 Iꞌewyte morekuat Eroti tesuraraꞌin wywo tikuasa kahato Iesui. Miꞌi hawyi morekuat esokpe ikahu kahato hap ewywuat taꞌatupag Iesui piit pe imohit hamo hawyi taꞌatupoꞌoro i raꞌyn morekuat Piratu kape."
12 Saꞌawyꞌi te ti morekuat Piratu morekuat Eroti hewanĩkaptia wo neꞌi maꞌato mekewat eꞌat pe Iesui kuasa hap eꞌat pe iwyriaꞌin wo raꞌyn tukupteꞌen Piratu Eroti katupono wẽtup wanẽtup hawe ewywuat teꞌeropyhuꞌat Iesui ete."
13 Miꞌi hawyi Piratu tiꞌatukaykay raꞌyn paꞌi koro koꞌi iꞌewyte nagnia ehay enoi haria yne waꞌatunug haria toiꞌatukaykay howawi."
14 Miꞌi hawyi morekuat Piratu toꞌe iꞌatuepe — Meiũ miit Iesui eimierut wo toĩneꞌen uhowawi raꞌyn iminug yt naku i hap moherep hamuat e. — Miitꞌin maꞌat hat Miꞌi Miit Iesui eweiꞌe raꞌyn uhepe maꞌato uito ti apoꞌare eipyꞌasetpe hawyi yt kat i hin atipuẽti eimienoi ewy e. Waku rakat Iesui are e."
15 Miꞌi hawyi atipoꞌoro Iesui morekuat Eroti ewawi waku sio yt kuap hamo e. Miꞌi hawyi Eroti — Waku rakat miꞌi e yt kat i i iminug kaipyi atipuẽti saꞌag kahato e. Yt naku i watiꞌauka Miꞌi Miit Iesui e uhepe e morekuat Eroti e uhepe e Piratu."
16 Pyno waku watipokpok haity hehu kahato rakat wywo hawyi waku atiporenõtem naꞌyn Iesui e Piratu iꞌatuepe."
17 Mio tã toꞌe katupono yne anu pe ienuk hap iwato rakat eꞌat pe wẽtup ok saꞌawyꞌi morekuat mipyhik koꞌi Piratu tiporenõtem naꞌyn tomipyhik woꞌopyhyp hap pyi."
18 Maꞌato itotiaria paꞌi kororia emiitꞌin iꞌatuehay kahato taꞌatuehay pirik wo — Etiꞌauka ro etiꞌauka ro Iesui hawyi waku wẽtup ok mekewat aiwy Pasapa etiporenõtem woꞌopyhik hap wyi iꞌatuꞌe. — Waku miwan me etunug ehay — Waku watiporenõtem uhyt Parapa ipyhik hap wyi ereꞌe ro emiwan me iꞌatuꞌe."
19 Mekewat woꞌopotꞌauka hat Parapa saꞌawyꞌi Piratu tipyhik katupono saꞌawyꞌi Parapa tipoꞌoro tesuraraꞌin tuꞌuka kahato Piratu suraraꞌin ete toikyꞌesat Piratu etawa towanuat haype."
20 Maꞌato morekuat Piratu Iesui porenõtem hap toikyꞌesat pote tuwẽpõwat i raꞌyn miitꞌin sem kape — Yt naku i watiꞌauka Iesui katupono waku rakat Miꞌi e."
21 Miꞌi hawyi poꞌog haty wo teꞌeroꞌe i — Waku ariaꞌyp posak ete watiꞌauka Iesui iꞌatuꞌe taꞌatuehay pirik wo."
22 Miꞌi hawyi myeꞌym wo Piratu toꞌe iꞌatuepe — Are pãi kat som Iesui tunug yt naku i iꞌauka hamo e. Yt kat i hin i atipuẽti saꞌag Miꞌi Miit minug koꞌi e. Yt naku i pyno watiꞌauka Miꞌi e. Pyno waku watipokpok hawyi waku watiporenõtem woꞌopyhik hap pyi hawyi waku watipohep Miꞌi Miit piit ete e morekuat Piratu Iesui auka teran haria pe."
23 Maꞌato waꞌatunug haria yt iꞌatupohep hin i poꞌog iꞌatuꞌe — Yt naku i watiporenõtem Iesui iꞌatuꞌe taꞌatuehay pirik wo. Waku watiꞌauka ariaꞌyp posak ete iꞌatuꞌe. Waku watipehik hawyi waku ikuꞌuro iꞌatuꞌe at. Mio tã iꞌatuꞌe at hawyi morekuat Piratu yt tiporenõtem kuap i Iesui."
24 Miꞌi hawyi miitꞌin mikyꞌesat ewy tutunug naꞌyn. Toiwan naꞌyn — Waku watiꞌauka Iesui e."
25 Miꞌi hawyi mekewat woꞌopotꞌauka hat mekewat wuꞌuka hap nug hat Parapa e hap het rakat Piratu tiporenõtem naꞌyn woꞌopyhik hap pyi hawyi iꞌatumikyꞌesat ewy maꞌato Iesui tutum tesuraraꞌin me iꞌauka hamo iraniaꞌin mikyꞌesat saꞌag ewywuat nug hamuat."
26 Miꞌi hawyi ariaꞌyp posak ipotyi rakat taꞌatunug hawyi taꞌatupag Iesui okpe tote. Maꞌato muꞌap upi taꞌatupuẽti raꞌyn wẽtup tapaiũnꞌa Simãu e hap yi Sireneu kaipywiat hat. Miꞌi ti go kaipyi tut tawa Ierusarẽi kape. Miꞌi Simãu suraraꞌin tiꞌatupytyk hawyi iꞌokpe tote taꞌatupag Iesui eꞌariaꞌyp posak hawyi Iesui ewatꞌymo totioto."
27 Miꞌi hawyi typyꞌi rakaria tuwat Iesui ewatꞌymo hawyi toĩneꞌen miitꞌin tok puo haryporiaꞌin wak haria. Miꞌiria Iesui hoꞌopot hap taꞌatumohaty kahato haype teꞌeruwak kahato."
28 Miꞌi hawyi Iesui tehaꞌat wak haria kape hawyi toꞌe — Manaꞌin Ierusarẽi miaria e yt eweiwak teiꞌo uhepiat hoꞌopot pote e. Maꞌato eiwat ehepiat hoꞌopot hap aru eimẽpytꞌin hoꞌopot hawiat waku eweiwak e."
29 Pywo putꞌokꞌe irane ehepiat hoꞌopot kahato hap sese e. Mekewat eꞌat pe turan aru eweiꞌe kahato — Waku poꞌog haryporiaꞌin yt kat i imẽpytꞌin nakaria eweiꞌe aru e. Taꞌi yt imẽpyt i rakaria pote poꞌog waku eweiꞌe. Waku poꞌog yt kat i aimẽpytꞌin ahemĩ ete an eweiꞌe aru mekewat ehoꞌopot sese hap eꞌat pe e."
30 Mekewat eꞌat pe eweiꞌe aru yityꞌok koꞌi pe — Eiwehytꞌok to uruewawi uruꞌauka hamuat eweiꞌe aru e. Miꞌi hawyi yityꞌok hit koꞌi pe eweiꞌe aru — Urumig neran eikaꞌa koꞌi pe katupono uruꞌauka teran uruwanĩkaptia eweiꞌe aru e."
31 Pyno yt watiwuk kuap i aiko pe ariaꞌyp iwato rakat yt igag i te rakat e. Pyno Uito ariaꞌyp iwato rakat yt igag i te rakat aiko piat ewy e. Maꞌato eipe ariaꞌyp koꞌi igag kahato koꞌi ewy eweikupteꞌen e. Meremo aria satꞌe ariaꞌyp igag nakat ete are e. Taꞌi Uito yt kat i atunug saꞌag poꞌypyi uiꞌauka saꞌag neꞌi ariaꞌyp posak ete e. Pyno mio tã ewetunug mesup uhete yt kat i atunug saꞌag pytkai aikotã aru taꞌatunug ehete ehewanĩkaptia aru eiminug saꞌag kahato hap poꞌypyi e. Mesup ahoꞌopot kahato aikotã aria pe ewy ahoꞌopot yt kat i atunug saꞌag pytkai e. Pyno aikotã aru ehoꞌopot ehoꞌopot hap eꞌat putꞌokꞌe aru hawyi e Iesui haryporia wak haria pe topiat hoꞌopot hap turan.
"32 Miꞌi hawyi iꞌewyte typy ok yt naku i sese nug haria miitꞌin potꞌauka haria miitꞌin potseroꞌok takaria taꞌatueroto yityꞌok kape iꞌatuꞌuka Iesui wywuat hamo."
33 Miꞌi hawyi putꞌokꞌiꞌatuꞌe itote mekewat yityꞌok saꞌag note mekewat yityꞌok nu kawiat miit akag kag ewywuat hap tote hawyi taꞌatupehik taꞌyn Iesui imuheg hap koꞌi wo teꞌariaꞌyp posak ete. Miꞌi hawyi taꞌatupoĩꞌãm ywaipe.
Miꞌi hawyi taꞌatupehik wy mekewat typy ok yt naku i sese nug haria wy taꞌatuꞌariaꞌyp posak koꞌi ete hawyi taꞌatupotꞌam wẽtup ok Iesui po sese kai hawyi wẽtup ok ipo ran kai taꞌatupoĩꞌãm taꞌatueꞌariaꞌyp posak koꞌi ete yꞌam me."34 Miꞌi hawyi Iesui toꞌe Tupana pe — Uiꞌywot Uiꞌywot waure wo ereĩneꞌen no uhewanĩkaptia minug saꞌag kai hap atikyꞌesat katupono yt taꞌatukuap i uwe sese uwe Uito Taꞌatuꞌmiꞌauka e Tupana pe.
Saꞌawyꞌi ipehik hap owakai Iesui esokpe taꞌatuhep taꞌyn hawyi teꞌeruwemahara raꞌyn hesokpe kyiꞌat hamo aikotã waku hesokpe taꞌatupatꞌok hamo."35 Miꞌi hawyi iraniaꞌin teꞌerahaꞌat at Iesui ewawi. Miꞌi hawyi toꞌywania Iuteuria ywania iꞌatuehay saꞌag kahato Iesui ete — Hẽie yt pywo rakat hin i iꞌatuꞌe. Taꞌi iraniaꞌin toiꞌatuehakyeraꞌat kuap wen maꞌato yt hesaika hin i tuwehakyeraꞌat hamo iꞌatuꞌe. Miꞌi hawyi iꞌatuꞌe Iesui pe — Pywo pe ti En Tupana Mipoꞌoro Uruporekuat nuat pote waku ewewi erehakyeraꞌat hawyi erehep to eꞌariaꞌyp posak pyi iꞌatuꞌe."
36 Suraraꞌin iꞌewyte Iesui moweukaꞌi saꞌag haria tukupteꞌen itote. Miꞌi hawyi suraraꞌin hum sapo hy ewywuat maꞌato yt naku i rakat nop takat neꞌi."
37 Miꞌi hawyi — Pyno En aiꞌywania porekuat pote erehakyeraꞌat ro iꞌatuꞌe tope suraraꞌin."
38 Miꞌi hawyi Morekuat Piratu tiwan naꞌyn — MIꞌI MIIT RI IUTEU YWANIA POREKUAT KORO e tomiwan me hawyi toipehik Iesui akag apy tote ariaꞌyp posak ete."
39 Miꞌi hawyi mekewat wẽtup ok mekewat miit auka hat yt nakuat i tomoweukaꞌi haype Iesui wẽtup ariaꞌyp posak pyi — Pywo ti rat En nyti pywuat Tupana Mipoꞌoro pote uruhep to mesuwepyi hawyi uruehakyeraꞌat ro En iꞌewyte erehakyeraꞌat ro meiũpepyi ariaꞌyp posak pyi e Iesui pe."
40 Mio tã toꞌe hawyi wẽtup ok Iesui po sese kawiat yt nakuat i mio tã toꞌe Iesui moweukaꞌi hat pe — Yt naku i miꞌi tã ere Iesui pe e. Yt erekenꞌẽ i apo Tupana pupi e. Pywo pe ti aiꞌapiheg aiminug saꞌag poꞌypyi mesuwat ariaꞌyp posak koꞌi ete e."
41 Taꞌi aiminug saꞌag upi aiꞌauka aiꞌapiheg hamuat wen maꞌato Iesui yt kat i hin i saꞌag tutunug pytkai toĩneꞌen toꞌapiheg hawe ikuꞌuro hamuat e."
42 Miꞌi hawyi Iesui pe toꞌe — Mehĩ e yt uiwaure teiꞌo En karãpeĩ ereĩneꞌen Wuatꞌi Miitꞌin Potypot nuat turan e."
43 Miꞌi hawyi Iesui tiwesat raꞌyn — Pywo ti ahenoi epe mesup eꞌat pe ereĩneꞌen uiwywo uhetama sese pe e Iesui tomohey pakup takat pe mekewat saꞌawyꞌi miitꞌin auka hat pe ariaꞌyp posak pyi.
"44 Miꞌi hawyi atposake putꞌokꞌe hawyi wãtym kape putꞌokꞌe myeꞌym ura turan iꞌypyryp kahato wãtym ewy mesuwat yi tote."
45 At yt hẽtyhot hin i mesuwat yi tote hawyi mekewat Tupana mõtypot yat eꞌokenꞌypy sokpe kawiat hiotꞌe kahato myasetpuo yi kape."
46 Miꞌi hawyi ariaꞌyp posak pyi Iesui toꞌe tehay pirik wo Tupana pe — Papai e epo pe raꞌyn atoiat Uipãꞌãu e. Mio tã toꞌe ipyhu tek taꞌyn hawyi ikuꞌuro raꞌyn."
47 Miꞌi hawyi wẽtup ok suraraꞌin akag taꞌakasa yne hawyi tuwehum kahato Tupana pe — Pywo pe ti Meiũ Miit Iesui waku kahato rakat are e."
48 Miꞌi hawyi iraniaꞌin sehaꞌat haria ikuap taꞌyn aikotã aikotã Iesui ikuꞌuro waku hap ewy hawyi teꞌeraꞌaipok taꞌyn taꞌatuꞌyat koꞌi kape. Maꞌato iꞌatuwat turan teꞌerepotiꞌa petek petek kahato muꞌap upi — Paaꞌurutoꞌe paaꞌurutoꞌe e hamo Iuteuria eko ewy."
49 Miꞌi hawyi Iesui wywuaria typyꞌi kahato rakaria yi wato Karireia pywiaria teꞌerahaꞌat kahato Iesui kuꞌuro hap kape pya pyi ariaꞌyp posak koꞌi kai tukupteꞌen wen maꞌato itote pyi teꞌeruwehaꞌat yne aikotã Iesui kuꞌuro turan hap kape.
"50 Toĩneꞌen itote wẽtup ok miit Iuse e hap het rakat tawa Arimateia kaipywiat."
51 Iuse ti waku kahato rakat. Miꞌi ti miitꞌin mimõtypot kahato — Tupana topyhuꞌat irane Miitꞌin Porekuat nuat e hap ekatup hat Iuse. Saꞌawyꞌi toĩneꞌen iraniaꞌin woꞌonãpin haria pyꞌasetpe karãpe — Yt naku i kahato Iesui pote waku watiꞌauka miꞌi iꞌatuꞌe turan maꞌato Iuse — Yt naku i watiꞌauka Miꞌi Miit e itote."
52 Miꞌi hawyi Iesui ikuꞌuro hawyi Iuse toto morekuat Piratu kape hawyi tohẽtup — Etum no Iesui piit atisyp hamo e."
53 Miꞌi hawyi morekuat Piratu — Waku e hawyi Iuse tihep taꞌyn Iesui piit ariaꞌyp posak pyi hawyi tohuwy raꞌyn sokpe ikahu rakat hoꞌowoity rakano. Miꞌi hawyi totopag naꞌyn ipiit woꞌosyp hawe nu wato kaꞌa pe aikope yt uwe i syp hawe nu kaꞌa miitꞌin minug pakup we totopag."
54 Toisyp taꞌyn Iesui wãtym yt pya i turan. Miꞌi turan watunug miꞌu wãtymꞌi turan mũkiꞌite wanuat Tupana mõtypot hap eꞌat piat miꞌu wo yt kat i miꞌu watiꞌanug Tupana mõtypot eꞌat pe hap ewy. Miꞌi wãtymꞌi turan Iuse topag naꞌyn Iesui piit ikuꞌuro sese rakat mekewat nu kaꞌa woꞌosyp hawe wãtym i turan."
55 Iꞌewyte haryporiaꞌin Iesui wywuaria yi Karireia kaipywiaria tuwat Iuse wywo Iesui syp hap kapiat teꞌeraꞌakasa hamo."
56 Miꞌi hawyi teꞌeraꞌaipok taꞌyn taꞌatuꞌyat koꞌi kape mohag ikamhig se rakat kyiꞌat hamo Iesui piit pen hamo. Miꞌi hawyi meiũran taꞌatueroto hyp hap kape ipiit pen mohag wuat hamo Iuteuria eko ewy. Miꞌi hawyi mũkiꞌite wẽtup eꞌat teꞌeruwemohy at Tupana e hap miwan miat ewy Tupana mõtypot hamo.
"1 Miꞌi hawyi hunete mytuꞌu eꞌat pe haryporiaꞌin Iesui emiitꞌin tuwat Iesui syp hap kape. Mana Maria yi Matarena kaipywiat iꞌewyte mana Iuana hawyi wẽtup ok mana Maria Iesui potmuꞌe Tiaku ty iꞌewyte iraniaꞌin haryporiaꞌin saꞌawyꞌiwuat hewyry Iesui upiaria tuwat raꞌyn isyp hap kape mohag hy ikamhig se kahato rakat wywo ipiit pen hamuat Iuteu ywania eko ewy."
2 Putꞌokꞌiꞌatuꞌe hawyi mekewat nu kaꞌa hap ete isyp hap ete hawyi yt kat i te okenꞌypy nu kawiat saꞌawyꞌi ewy toĩneꞌen itote maꞌato tuweꞌokenhypꞌok pe raꞌyn taꞌatupuẽti Iesui syp hap. Mekewat nu wato tuwemorem yi kaꞌa okenꞌypy pyi topyhuꞌat."
3 Miꞌi hawyi Iesui emiitꞌin haryporia kawiat tuwehytꞌok taꞌyn woꞌosyp hawe mekewat yi kaꞌa pe hawyi maꞌato Iesui piit yt taꞌatupuẽti hin i itote."
4 Miꞌi hawyi teꞌeruwanẽtup kahato ipiit weityk hap etiat turan teꞌeruwemoherep taꞌyn iꞌatupyꞌasetpe typy ok ihainia atipy kaipywiat sut haria. Iꞌatuesokpe hẽtyhot kahato wywo teꞌeruwemoherep taꞌyn."
5 Miꞌi hawyi haryporiaꞌin iꞌatupupi teꞌerokenꞌẽ kahato hawyi yi kape neꞌi hewo genꞌẽ pono. Miꞌi hawyi wemoherep haria atipy kaipywiaria teꞌeroꞌe iꞌatuepe — Kat pote ieĩneꞌen hat eweikat woꞌosyp hawe map haria pyꞌasetpe apoꞌiꞌatuꞌe Iesui piat."
6 Taꞌi Iesui yt uwe i meiũpe katupono toĩneꞌen i raꞌyn aikotã iꞌe hap ewy iꞌatuꞌe. Waureꞌeweiꞌe apo raꞌyn kat som iꞌe ehepiat eweikupteꞌen tawa Karireia pe turanuat aikotã Iesui toꞌe — Myeꞌym eꞌat hawyi arẽtem guꞌuro pyi e hap apoꞌiꞌatuꞌe."
7 Taꞌi mio tã iꞌe hap ewy topyhuꞌat mesup iꞌatuꞌe. Mio tã toꞌe ehepe — Uito ti Ekywyt koro Uito e. Miꞌi hawyi wyti aru iraniaꞌin yt nakuaria i uiꞌauka hamo arepyhuꞌat aru e. Miꞌi hawyi taꞌatupehik taꞌyn Uito ariaꞌyp posak ete uiꞌauka hamo e. Miꞌi hawyi uikuꞌuro miitꞌin ekawiano maꞌato myeꞌym eꞌat uikuꞌuro sese hawyi areĩneꞌen i raꞌyn guꞌuro po pyi e ti raꞌyn kue Iesui ehepe yi Karireia pe turan iꞌatuꞌe atipy kaipywiaria Iesui emiitꞌin haryporiaꞌin kawiat pe."
8 Miꞌi hawyi haryporiaꞌin teꞌeruwewanẽtup saꞌawyꞌiwuat Iesui e hap kape hawyi tuwenõꞌẽ raꞌyn isyp hap kaipyi."
9 Miꞌi hawyi teꞌeraꞌaipok Iesui potmuꞌeria kape 11 ok takaria kape iꞌewyte iraniaꞌin Iesui emiitꞌin me hawyi putꞌokꞌiꞌatuꞌe hawyi teꞌeraꞌakasa hap taꞌatuhenoi — Iesui ti toĩneꞌen i raꞌyn an tuwẽtem naꞌyn guꞌuro pyi ti an iꞌatuꞌe."
10 — Pywo Iesui toĩneꞌen iꞌatuꞌe mana Maria yi Matarena kaipywiat iꞌewyte mana Iuana hawyi wẽtup ok mana Maria Iesui potmuꞌe Tiaku ty iꞌewyte iraniaꞌin haryporiaꞌin saꞌawyꞌiwuat haria Iesui syp hap akasa haria. Miꞌiria ti teꞌeraꞌaipok hawyi taꞌatuhenoi yne raꞌyn Iesui potmuꞌeria pe — Aipotypot toĩneꞌen i raꞌyn iꞌatuꞌe."
11 Miꞌi hawyi ipotmuꞌeria pe haryporiaꞌin henoi yne yne atipy piaria e hap koꞌi hawyi — Heso kahato manaꞌin iꞌatuꞌe haryporiaꞌin me. Yt taꞌatumohey hin i."
12 Maꞌato Peteru tikuap hawyi meremo teput raꞌyn Iesui syp hap kape tehaꞌat hamo. Putꞌoktoꞌe hawyi iꞌywytꞌokpypuo tehaꞌat. Tehaꞌat hawyi Iesui suwy hap sokpe yn toipuẽti itote. Miꞌi hawyi taꞌaipok taꞌyn toꞌyat kape maꞌato tuwanẽtup kahato taꞌakasa hap koꞌi etiat.
"13 Iꞌewyte mekewat mytuꞌu eꞌat pe tuwat raꞌyn typy ok Iesui potmuꞌeria tawa hit Emau kape tawa wato Ierusarẽi kaipyi. Tawa hit Emau yt pya hin i Ierusarẽi pyi. Wãtymꞌi hap kaipyi wãtym hap kape hap ewy wahewyry muꞌap upi hap ewy taꞌatuhewyry."
14 Miꞌiria toꞌoehay kahato toꞌope yne taꞌatuꞌakasa hap Iesui kuꞌuro hap ete taꞌatuehay muꞌap upi."
15 Miꞌi turan Iesui putꞌokꞌe iꞌatuwywo tewyry hamo."
16 Maꞌato yt taꞌatukuap i uwe sese Iesui hap. Teꞌeraꞌakasa raꞌyn wen maꞌato yt taꞌatukuap i sese uwe Iesui katupono Tupana tunug iꞌatueha yt hãpyk i."
17 Miꞌi hawyi Iesui toꞌe iꞌatuepe — Kat eweiꞌe ehehay eiwoꞌope eikohyewyry hap upi uhytꞌiꞌin e. Mio tã apoꞌe hawyi teꞌeropyhuꞌat muꞌap tote yt kat i iꞌatuete taꞌatuwepit hap wywo."
18 Miꞌi hawyi wẽtup ok ihainia mehĩ Keupa apoꞌe Iesui pe — En ni Ierusarẽi miat ieĩneꞌen porap i hat apoꞌe. Yt etikuap i te apo aikotã tokosap itote eꞌihotꞌok e. Yt ikuap hat apo en e."
19 Mio tã toꞌe hawyi Iesui apoꞌe — Aikotã som tokosap itote e. Miꞌi hawyi toiwesat — Saꞌag kahato taꞌatunug naꞌyn itote wẽtup ok ete mekewat Iesui ete mekewat tawa hit Nasare kaipywiat hat ete e. Taꞌi Tupana ehay enoi hat kahato Miꞌi Miit Iesui e. Pywo pe ti iminug koꞌi iwato kahato tutunug yt uwe minug ewywuat i e. Waku kahato tutunug iꞌewyte ihay se kahato rakat toĩneꞌen Mekewat Miit Iesui iꞌatuꞌe. Taꞌi Mekewat Miit Wakuat kahato wo toĩneꞌen Tupana wanẽtup hawe iꞌewyte miitꞌin wanẽtup hawe iꞌatuꞌe."
20 Miitꞌin powyro rakat pytkai ahepaꞌi koro koꞌi iꞌewyte aiꞌakagnia imaꞌat kahato rakaria wo tukupteꞌen hawyi taꞌatupag Iesui morekuaria ahewanĩkaptia po pe raꞌyn iꞌauka hamo e. — Eweiꞌauka ro Miꞌi Miit iꞌatuꞌe. Miꞌi hawyi iꞌatumikyꞌesat ewy taꞌatunug saꞌag neꞌi Iesui ete iꞌatuꞌe. Miꞌi hawyi taꞌatuesuraraꞌin tipehik pereku wo ariaꞌyp posak ete hawyi ikuꞌuro raꞌyn iꞌatuꞌe."
21 — Taꞌi aiꞌywania Isareu ywania wanĩkaptia po pywiat ehakyeraꞌat hat Miꞌi Miit Iesui urutuwanẽtup saꞌawyꞌi maꞌato mio ikuꞌuro raꞌyn pote aikotã aru iꞌatuꞌe. Miꞌi hawyi koitywy myeꞌym eꞌat tokosap taꞌyn ikuꞌuro hawyi iꞌatuꞌe."
22 Iraniaꞌin haryporiaꞌin Iesui emiitꞌin uruwywuaria urumõgyt kahato katupono mesup ti hunete tuwat Iesui syp hap kape hawyi taꞌatukat ipiit itote ipen hamuat wen maꞌato yt kat i ipiit taꞌatupuẽti itote."
23 Miꞌi hawyi teꞌeraꞌaipok uruewawi hawyi mio tã iꞌatuꞌe uruepe — Mesup taꞌyn urumuꞌetu hap ewy itote turan tuwemoherep taꞌyn atipy kaipywiaria uruewawi iꞌatuꞌe haryporiaꞌin teꞌeraꞌaipok hawyi iꞌatuꞌe."
24 Miꞌi hawyi iraniaꞌin uruto tuwat raꞌyn haryporiaꞌin mienoi kuap hamo sio pywo sio yt kuap hamo. Miꞌi hawyi Iesui syp hap teꞌeraꞌakasa haryporiaꞌin mienoi ewywuat taꞌatupuẽti itote wen maꞌato Iesui piit sese yt taꞌatupuẽti hin i iꞌatuꞌe Iesui pe yt ikuap i te turan."
25 Miꞌi hawyi Iesui toꞌe iꞌatuepe — Are pãi kat poteĩ yt eweimohey i te saꞌawyꞌiwuat Tupana ehay enoi haria miwan miat e hap koꞌi apoꞌe."
26 Taꞌi saꞌawyꞌiwuaria Tupana ehay wan haria taꞌatuhenoi kahato Miꞌi Miit ete e. Mio tã iꞌatuꞌe saꞌawyꞌi — Tupana Mipoꞌoro Ahehakyeraꞌat tohoꞌopot kahato aru miitꞌin po wo hawyi miitꞌin miꞌauka wo topyhuꞌat hawyi tuwẽtem guꞌuro pyi hawyi taꞌaipok atipy kape i raꞌyn e kahato saꞌawyꞌi Tupana ehay moherep haria taꞌatumiwan me e. Miꞌi Tupana e hap ewy toĩneꞌen mesup taꞌyn. Tupana Mimoieĩneꞌen toĩneꞌen mesup katupono Tupana Mimõtypot no toĩneꞌen Miꞌi Miit wuatꞌi eꞌat pe e."
27 Miꞌi hawyi Tupana ehay moherep hat akag Musei tiwan kahato Tupana Mipoꞌoro Wuatꞌi Miitꞌin Ehakyeraꞌat hanuat ete e Iesui tuwepiat muꞌap tote."
28 Miꞌi hawyi tuwat i tawa hit Emau kape hawyi yt pya i tawa hit Emau kai hawyi Iesui toꞌe iꞌatuꞌe pe — Pyno meiũran irane uhytꞌiꞌin e."
29 Maꞌato — Yt Mehĩ eropyhuꞌat ro mesuwe uruwywo katupono wãtym naꞌyn iꞌatuꞌe Iesui pe. Miꞌi tupono topyhuꞌat topotmuꞌeria wywo maꞌato yt taꞌatukuap hin i te uwe hap."
30 Miꞌi hawyi Iesui tenuk iꞌatuwywo turan man teneg totat hawyi — Waku e Tupana pe hawyi toipik aikotã saꞌawyꞌiwuat ewy hawyi tutum naꞌyn iꞌatuepe."
31 Toipik mekewat man teneg topo wywo saꞌawyꞌi ewy hawyi meremo taꞌatukuap taꞌyn uwe hap hawyi Tupana tomog naꞌyn yt iꞌatueha pytig i hap ewy hawyi meremo taꞌatukuap Iesui itote hawyi tuweityk taꞌyn iꞌatupyꞌasetpyi Iesui."
32 Miꞌi hawyi teꞌeroꞌe toꞌope — Pywo pe ti rat Aiꞌakag Iesui tuwẽtem naꞌyn guꞌuro pyi hawyi ihay raꞌyn ikahu kahato aiwywo iꞌatuꞌe. Taꞌi ihay aria ewy aipyꞌa pe toĩneꞌen muꞌap upi ihay aiwywo turan iꞌatuꞌe."
33 Miꞌi hawyi meremo teꞌeraꞌaipok taꞌyn iraniaꞌin Iesui mohey haria kape tawa wato Ierusarẽi kapiaria enoi hamo. Putꞌokꞌiꞌatuꞌe itote hawyi taꞌatupuẽti raꞌyn mekewat 11 ok takaria iraniaꞌin ipotmuꞌeria wywo."
34 Putꞌokꞌiꞌatuꞌe hawyi — Pywo pe ti rat tuwẽtem naꞌyn Aikaꞌiwat Iesui katupono tuwemoherep taꞌyn mesup Simãu me iꞌewyte uhepe e."
35 — Mesup taꞌyn muꞌap upiat Iesui tuwemoherep uruepe iꞌatuꞌe. Miꞌi hawyi urutenuk hap turan toipik aheman aikotã Iesui tipik man saꞌawyꞌiwuat man imipik hap ewy hawyi uruikuap taꞌyn uwe Iesui iꞌatuꞌe."
36 Mio tã taꞌatuhenoi turan tuwemoherep taꞌyn Aikaꞌiwat Sese IESUI iꞌatupyꞌasetpe. Miꞌi hawyi toꞌe topotmuꞌeria pe — Tupana eimowepit uiwyriaꞌin e.
"37 Miꞌi hawyi maꞌato — Miit ehog iꞌatuꞌe taꞌatuwanẽtup hawe teꞌerokenꞌẽ kahato hawyi Iesui pupi."
38 Miꞌi hawyi apoꞌe — Kat poteĩ eweiwanẽtup kahato kowoꞌi kowoꞌi eipyꞌa pe yt kat i eiwepit hap wywo e. Kat poteĩ tig yt eweimohey i te uheĩneꞌen guꞌuro pyi hap e."
39 Pyno uimohey ro e. Eiweponug no uipiit ete uipiit suk hap koꞌi ete sio Uito sio yt kuap hamo e. Uito rat ewehaꞌat ro yt miit ehog hin i Uito katupono uikag koꞌi wywo uipiit puꞌi wywo areĩneꞌen e topotmuꞌeria pe."
40 Mio tã toꞌe hawyi toimoherep taꞌyn topo suk hap kaꞌa koꞌi topy suk hap kaꞌa koꞌi hawyi — Uito ti rat uimohey ro eipe e."
41 Maꞌato niatpo kahato imohey hamuat ipotmuꞌeria. Teꞌeruwanẽtup kahato itote iꞌewyte iꞌatuwepit kahato raꞌyn. Miꞌi hawyi Iesui apoꞌe iꞌatuepe yt taꞌatumohey i pote — Toĩneꞌen apo meiũpe eimiꞌu uiwyriaꞌin e."
42 Miꞌi hawyi pira iwyp takat taꞌatupuẽti hawyi taꞌatuium naꞌyn Iesui pe."
43 Miꞌi hawyi Iesui tuꞌu raꞌyn topotmuꞌeria ehamo miit Uito hap moherep hamo."
44 Tutuꞌu hawyi poꞌog Iesui toꞌe temiitꞌin me — Saꞌawyꞌi areĩneꞌen eipyꞌasetpiat turan ahenoi kahato ehepe aikotã aru topyhuꞌat uhete hap. Mesup eꞌat pe ahenoi teran ahaꞌaseꞌi Musei miwan kaipyi Tupana ehay enoi haria miwan kaipyi yne uhetiat e. Iꞌewyte morekuat Tawi wepy hap miwan kaipyi uhetiat yne atimoherep teran yne uhetiat e. Koitywy topyhuꞌat raꞌyn yne iꞌatumienoi yianmiat uhetiat hap ewy e."
45 Miꞌi hawyi heremo yn naꞌyn iꞌatuwanẽtup hawe Tupana ehay Iesui tunug. Miꞌi hawyi taꞌatukuap kahato raꞌyn miwan saꞌawyꞌiwuat kai Iesui etiat hap hawyi heremo raꞌyn iꞌatuepyꞌa pe yne Iesui ete."
46 Miꞌi hawyi Iesui toꞌe i — Taꞌi miwan saꞌawyꞌiwuat Tupana mimoherep tohenoi kahato uhetiat ahoꞌopot hap etiat uikuꞌuro hawyi myeꞌym eꞌat uikuꞌuro raꞌyn hawyi areĩneꞌen i hap e Tupana miwan me saꞌawyꞌiwuat pe e."
47 Taꞌi yianme Tupana henoi kahato uhetiat tehay wan haria po wo aikotã aru taꞌatuhenoi kahato tesaika hap wywo torania ywania pe aikotã waku miitꞌin teꞌeruwemorem Tupana kape iꞌatuminug saꞌag hap koꞌi kaipyi uhet upi hap tohenoi miwan me e Iesui. Miitꞌin teꞌeruwemorem Tupana kape uhet upi hawyi waure wo Tupana toĩneꞌen iꞌatuminug saꞌag hap koꞌi ete e kahato yne mekewat Tupana ehay miwan me. Waku tawa Ierusarẽi me tohaꞌawynug naꞌyn mesuwat sehay wakuat hawyi waku yne ywania kape taꞌatuhenoi Uhaꞌyru ete e Tupana miwan me e."
48 — Pyno eipe ti eweikuap taꞌyn uheĩneꞌen guꞌuro pyi hap uhowawi eweiꞌakasa hawyi e."
49 Pyno Tupana mikyꞌesat ewy atum ehepe Tupana Pãꞌãu eimoesaika hamuat e. Maꞌato waku meiũpe tawa Ierusarẽi me eweikupteꞌen hawyi meiũran areto hawyi atum aru ehepe Tupana Pãꞌãu eimoesaika kahato uipotpap nug hamuat hap e. Pyno waku mesuwe tawa Ierusarẽi me eweikupteꞌen Tupana Pãꞌãu ut hap eꞌat ekatup hamuat e topotmuꞌeria pe Iesui.
"50 Miꞌi hawyi Iesui tioto raꞌyn topotmuꞌeria tawa wato Ierusarẽi myi tawa hit Petania kape. Miꞌi tote ipo koꞌi ywaiti pe tutunug hawyi — Tupana etipowyro uimohey haria wuatꞌi eꞌat pe etiꞌatupoityro miꞌiria ahẽtup e."
51 Miꞌi toꞌe Tupana pe turan Iesui taꞌam naꞌyn atipy kape."
52 Miꞌi hawyi taꞌatumõtypot kahato itote Tupana hawyi teꞌeraꞌaipok taꞌyn tawa wato Ierusarẽi kape iꞌatuwepit sakpo hap wywo."
53 Putꞌokꞌiꞌatuꞌe hawyi teꞌeropyhuꞌat Tupana mõtypot yat hawe hawyi — Waku kahato En Tupana taꞌatuꞌe itote at kaꞌap.
Mesup miwan Iesui etiat atunug mesuwe ikyꞌe haria mowepit hamo.Toran naꞌyn uimiwan. Uhet IRUKA."