1

¹ Mesup mienoi wakuat Aipo­typot Iesui etiat Tupana Saꞌyru etiat aikotã saꞌa­wyꞌi te Tupana toꞌe Tosa­ꞌyru pe — Uhaꞌyru e woro­po­ꞌoro aru En miitꞌin ehakye­raꞌat hamo e maꞌato saꞌa­wyꞌi atipo­ꞌoro teran wẽtup ok eut hap enoi hamo e."

² Miitꞌin ekatup hawyi woro­po­ꞌoro En iꞌatue­wawi iꞌatue­ha­kye­raꞌat hamo e Tupana miwan me Marakia 3.1 pe."

³ Maꞌato saꞌa­wyꞌi mekewat wẽtup ok eut hap henoi miitꞌin me — Tut irane wyti Tupana Mipo­ꞌoro Miitꞌin Porekuat nuat e hat e. Mio tã wyti aru toꞌe epiat Uhaꞌyru e. — Eweihy­wytip ipuꞌap e aru eipyꞌa piat eiwa­nẽtup hawe. Miꞌi hawyi toĩneꞌen muꞌap ewy raꞌyn Tupana Mipo­ꞌoro ehay mohey hamo e aru Uhaꞌyru e Tupana. Ekatup hawyi woro­po­ꞌoro En miitꞌin kape Uhaꞌyru e. Waku hawyi ti aru ekatup taꞌyn miitꞌin turan ti aru waku En ereto e Tupana Tosa­ꞌyru pe. Eꞌyianmiat uimi­po­ꞌoro wyti aru henoi henoi haty wo miitꞌin me — Tut irane ti Miitꞌin Porekuat nuat e. Miꞌi hawyi eweitoiat ro eiminug saꞌag koꞌi eiwa­nẽtup saꞌag hap koꞌi hawyi muꞌap ewy raꞌyn toĩneꞌen Tupana Mipo­ꞌoro Eheha­kye­raꞌat hanuat mohey pote eꞌyianmiat henoi e Tupana Tosa­ꞌyru pe. Waku hawyi ti aru ekatup taꞌyn miitꞌin miꞌi turan ti aru waku ereto En e Tupana Tosa­ꞌyru pe saꞌa­wyꞌi. Miꞌi hawyi Tupana ehay moherep hat Isaia iwan Tupana e ihay Tosa­ꞌyru piat hap Isaia 40.3 pe."

⁴ Miꞌi turan ni Iuwãu tut raꞌyn mekewat woꞌo­setꞌok hat Tupana toꞌe hap ewy. Miꞌi hawyi yahig note tohenoi henoi kahato miitꞌin me — Eweiwaure ro eiminug yt naku i hap koꞌi e. Miꞌi hawyi eweiꞌaipok to Tupana ewawi e. Waku hawyi woro­ho­ꞌo­setꞌok e Iuwãu miitꞌin me."

⁵ Miꞌi hawyi miitꞌin tawa Ieru­sarẽi kaipy­wiaria yi Iuteu kaipy­wiaria tõꞌẽ tõꞌẽ yahig kape Iuwãu mienoi kuap hamo. Miꞌi hawyi ti õꞌẽ haria henoi raꞌyn wuatꞌi aikotã taꞌa­tunug yt naku i hap koꞌi toꞌope. Waku hawyi Iuwãu tiꞌa­tu­setꞌok Iũtãu hy pe."

⁶ Miꞌi hap Iuwãu esokpe ti ihũ Kameru sap kawiat. Imiꞌu wyti pohit iꞌewyte awiꞌa hy imiꞌu wo. Iweꞌok kytyt hap ti miꞌat pe kawiat."

⁷ Miꞌi hawyi ti tohenoi henoi miitꞌin me — Meiũran ti aru tut wẽtup ok poꞌog poꞌog wakuat uikawiat rakat e. Uiat uhewaku hap yt putꞌokꞌe i ipysei hamo ipy sokpe saity pok hamo e."

⁸ — Uito ti woro­ho­ꞌo­setꞌok yꞌy wo maꞌato miꞌi ti aru Tupana Pãꞌãu wakuat no raꞌyn ehetꞌok e Iuwãu miitꞌin me.

"

⁹ Miꞌi hawyi wẽtup eꞌat pe tut raꞌyn Iesui tawa Nasare kaipyi tomotag hap tama Karireia kaipyi Iuwãu kape tosetꞌok Iũtãu hy piat hamo tut."

¹⁰ Miꞌi hawyi Iesui tuwẽtem yꞌy pyi hawyi tehaꞌat raꞌyn atipy kape. Miꞌi hawyi taꞌa­kasa raꞌyn okenꞌypy ewy raꞌyn. Miꞌi totepyi tut raꞌyn Tupana Pãꞌãu hawyi putꞌokꞌe raꞌyn pykasu ewywuat Iesui ete."

¹¹ Miꞌi hawyi sehay tut Iesui pe atipy kaipyi — Taꞌi uimi­kyꞌe kahato En Uhaꞌyru e. Miꞌi tupono arehum kahato ete e.

"

¹² Miꞌi hawyi meremo Tupana Pãꞌãu toꞌe Iesui pe — Ereto ro yahig koro kape mesu­wepyi Iũtãu hy sakpo Uhaꞌyru e."

¹³ Miꞌi hawyi toto Iesui Iuwãu pyi iꞌewyte Iũtãu hy kaipyi yahig koro kape. Miꞌi hawyi itote tuweran toĩneꞌen miꞌat koꞌi pyꞌa­setpe 40 eꞌat toĩneꞌen itote. Miꞌi turan ahiag hãꞌãg kahato Iesui. Toiky­ꞌesat Iesui tunug yt naku i hap koꞌi. Miꞌi hawyi Tupana mipo­ꞌo­roria atipy kaipy­wiaria tõꞌẽ tõꞌẽ Iesui moesaika hamo.

"

¹⁴ Wẽtup eꞌat pe miitꞌin tipyhik woꞌo­setꞌok hat Iuwãu. Miꞌi hawyi Iesui toto i raꞌyn yi Karireia kape Tupana ehay wakuat enoi enoi hamo."

¹⁵ Miꞌi hawyi toꞌe — Koitywy ti porap putꞌokꞌe raꞌyn Tupana Morekuat nuat ieĩneꞌen hamuat. Miꞌi tupono eweitoiat ro eiminug yt naku i hap koꞌi hawyi eweimohey ro Tupana ehay wakuat e Iesui tetama piaria pe.

"

¹⁶ Wẽtup eꞌat pe so hewyry Iesui yi Karireia hyemyiꞌa eꞌyi kyt upi. Miꞌi turan taꞌa­kasa pira pytyk haria kape uhyt Simãu iywyt Ãtere kape. Miꞌi turan kowoꞌi kowoꞌi suki wato wo taꞌa­tukat pira yꞌy pe."

¹⁷ Miꞌi hawyi Iesui tiꞌa­tu­kaykay raꞌyn — Toꞌiro uhupi uhytꞌiꞌin e. Mesup te ti pira pytyk haria wo eipe maꞌato meiũran ti aru ahenoi miitꞌin pytyk Tupana wanuat hap ehepe e Iesui Simãu iꞌewyte Ãtere pe."

¹⁸ Mio tã e Iesui hawyi meremo taꞌa­tu­ꞌatoiat taꞌa­tue­suki wato hawyi tuwat raꞌyn Iesui upi."

¹⁹ Miꞌi hawyi Iesui toto porapꞌi ywykuꞌi upi. Miꞌi turan taꞌa­kasa i Sepeteu saꞌy­ruꞌin kape Tiaku Iuwãu kape wesuki wato mog yara piat haria kape."

²⁰ Miꞌi hawyi toiꞌa­tu­kaykay meremo miꞌiria hawyi tuwat raꞌyn hupi yara pyi taꞌa­tu­ꞌywot wywuatpyi. Miꞌi hawyi Sepeteu topy­huꞌat temiitꞌin wywo yara pe.

"

²¹ Miꞌi hawyi toto i raꞌyn Iesui temiitꞌin wywo tawa Kawa­naꞌũ kape. Tupana mõtypot hap eꞌat pe hawyi Iesui teke Tupana mõtypot yat pe itotiaria muꞌe hamo."

²² Miꞌi hawyi teꞌe­ru­we­wa­nẽtup kahato hawyi teꞌe­roꞌe toꞌope — Kat poteĩ Iesui aimuꞌe yt miwan enoi haria ewy i raꞌyn iꞌatuꞌe. Miꞌi ti morekuat ewy raꞌyn wen iꞌatuꞌe."

²³ Miꞌi turan woꞌo­muꞌe hawe wẽtup ok toĩneꞌen ahiag ipiit piat rakat. Miꞌi so toꞌe — Taꞌi uruikuap ti En e. En ni mekewat Iesui tawa Nasare kaipywiat. En ni Tupana Saꞌyru wakuat e tehay pirik wo."

²⁴ Kat ere teran kahu uruete iꞌatuꞌe. Urutu­ꞌuka hamo apo eriot iꞌatuꞌe."

²⁵ Miꞌi pote Iesui wãiꞌe haty wo — Epoꞌinik to ahiag e. Erẽtem no meiẽwat miit piit pyi e."

²⁶ Miꞌi pote meiẽwat miit ahiag tihuruk tuwẽtem tehay pirik wuat haype."

²⁷ Miꞌi pote iraniaꞌin teꞌe­ru­wa­nẽtup kahato hawyi apoꞌi­ꞌa­tuꞌe toꞌope — Uweĩ meiẽ woꞌo­muꞌe hat iꞌatuꞌe. Yt wata­ꞌa­kasa i meiẽwat ewywuat tehay esaika wuat ahiag sopo hat iꞌatuꞌe."

²⁸ Miꞌi hawyi wuatꞌi pe raꞌyn taꞌa­tu­henoi henoi Iesui etiat hawyi iraniaꞌin yi Karireia piaria ikuap taꞌyn Iesui piat wakuap nug hap etiat.

"

²⁹ Miꞌi hawyi ti Iesui tuwẽtem naꞌyn Tupana mõtypot yat pyi. Miꞌi hawyi toto i raꞌyn towy­riaꞌin Iuwãu Tiaku wywo temiitꞌin Ãtere Simãu yat kape."

³⁰ Miꞌi hawyi Simãu sakitu iꞌahu rakat yni pe taꞌa­tu­puẽti. Miꞌi hawyi ti mekewat iꞌahu hap taꞌa­tu­henoi Iesui pe."

³¹ Miꞌi hawyi toto raꞌyn howawi. Putꞌok­toꞌe hawyi toipo­pytyk taꞌyn hawyi — Epoĩꞌãm no e hawyi iꞌãpe­ꞌokꞌam naꞌyn waku raꞌyn. Miꞌi hawyi iꞌahu kosap iwy Simãu sakitu. Tehãite meremo hawyi tote­ropat raꞌyn Iesuiꞌin.

"

³² Miꞌi hawyi at minꞌe turan taꞌa­tuerut Iesui kape wuatꞌi iꞌahu rakaria wuatꞌi ahiag ipiit piat rakaria tawa wato Kawa­naꞌũ kaipy­wiaria."

³³ Miꞌi hawyi ti yne tawa piaria teꞌe­ru­wa­ꞌa­tunug okenꞌy­pyke. Miꞌi hawyi ti toiꞌa­tu­moe­hãite kahato iꞌahu rakaria."

³⁴ Iꞌewyte ahiagnia toiꞌa­tu­sopo kahato miitꞌin piit pyi. Miꞌi hawyi toꞌe i ahiagnia pe — Eipo­ꞌinik to ahiagnia e. Yt ewehenoi teiꞌo uikuap ehepiat hap e iꞌatuepe.

"

³⁵ Ihotꞌok kai i toto raꞌyn Iesui tuweran yahig kape. Miꞌi hap tote toꞌoehay Tupana wywo."

³⁶ Meiũran ti Simãuꞌin tuwat hupi ikat hamo."

³⁷ Taꞌa­tu­puẽti hawyi teꞌe­roꞌe tope — Urumuꞌe hat iꞌatuꞌe mio ti ekat haria typyꞌi kahato Mehĩ iꞌatuꞌe. Pyno toꞌiro i wata­ꞌaipok ekat haria kape iꞌatuꞌe."

³⁸ Maꞌato toiꞌa­tu­wesat — Toꞌiro iraniaꞌin tawa kape e. Wuatꞌi tawa pe ahenoi teran e. Yt wẽtup tawa pe yn i ahenoi teran e. Wuatꞌi piat henoi hamo ariot mesuwat yi kape e."

³⁹ Miꞌi hawyi toto i raꞌyn Iesui yi Karireia piat Tupana mõtypot yat piaria enoi hamo ahiagnia sopo hamo miitꞌin kaipyi toto.

"

⁴⁰ Wẽtup eꞌat pe Iesui ewyry hap tote hepihi pihi rakat tut Iesui kape. Miꞌi hawyi tuwe­pỹ­ꞌã­tutuk haype toꞌe — Uhyt e uimoe­hãite teran mote uimoe­hãite o e."

⁴¹ Miꞌi hawyi Iesui tikyꞌe hawyi tuwe­ponug hawyi toꞌe — Taꞌi woro­kyꞌe kahato woro­moe­hãite teran uhyt e."

⁴² Mio tã e hawyi meremo raꞌyn ipiit kahu raꞌyn tuweityk taꞌyn hepihi."

⁴³ Miꞌi hawyi Iesui tinãpin haty wo — Pyno uhyt waku raꞌyn epe etiat e. Miꞌi pote areꞌe epe ereto ro paꞌi koꞌi kape hawyi epiit kahu hap etomo­herep to iꞌatuepe e. Miꞌi hawyi ti aru taꞌa­tukuap taꞌyn emoehãite hap e. Maꞌato iraniaꞌin me o yt etomo­herep teiꞌo emoehãite hap muꞌap upiaria pe e."

⁴⁴ Katu­pono etomo­herep saꞌa­wyꞌi paꞌiria piat hap atiky­ꞌesat e. Waku ehenoi iꞌatuepe aikotã ahaꞌa­seꞌi Musei nimo ainãpin hap ewy ehenoi o emoehãite kuap miitꞌin miat hamo e."

⁴⁵ Maꞌato yt Iesui miky­ꞌesat ewy i tohenoi Iesui piat tomoe­hãite hap yne pe. Miꞌi pote ti Iesui yt teke kuap i tawa pe katu­pono ti typyꞌi kahato akasa teran haria tõꞌẽ tõꞌẽ howawi wuatꞌi kaipyi. Miꞌi pote yahig note toĩneꞌen yt teke kuap i tawa pe pote.

"

2

¹ Meiũran Iesui taꞌaipok i raꞌyn tawa Kawa­naꞌũ kape. Putꞌok­toꞌe itotiat hawyi teke wẽtup netap we. Toĩneꞌen porapꞌi itotiat hap hawyi miitꞌin tikuap taꞌyn aikope Iesui ieĩneꞌen hap."

² Miꞌi hawyi meremo tõꞌẽ tõꞌẽ i raꞌyn howawi typyꞌi kahato raꞌyn hawyi iraniaꞌin miitꞌin sem oken upi neꞌi raꞌyn yn tukup­teꞌen. Miꞌi hawyi Iesui tiꞌa­tu­muꞌe Tupana ehay wo õꞌẽ tewawiat haria."

³ Miꞌi turan taꞌa­tuerut Iesui kape yt ipoĩꞌãm kuap i rakat yni pe 4 ok herut haria. Maꞌato yt tuwe­hytꞌok kuap i Iesui ewawi sese kat pote typyꞌi poityꞌi netap wiat pote."

⁴ Miꞌi pote teꞌe­raꞌam naꞌyn netap ok tote hawyi taꞌa­tu­ꞌahot raꞌyn netap ok Iesui apy tote. Miꞌi hawyi iꞌokhotꞌe hawuo taꞌa­tu­mo­ꞌapyk yt hewyry kuap i rakat yni pe."

⁵ Miꞌi hawyi taꞌa­kasa yne hawyi Iesui tikuap taꞌyn tomohey iꞌatuepiat hap koꞌi. Miꞌi hawyi toꞌe iꞌahu rakat pe — Koitywy ti yt naku i eminug saꞌag koꞌi Tupana tihep yne raꞌyn epyꞌa piat uiwy e."

⁶ Miꞌi pote apyk puaria miwan enoi haria teꞌe­ru­wa­nẽtup hawe teꞌe­roꞌe — Kat pote mio tã e Iesui iꞌatuꞌe teꞌe­ru­wa­nẽtup hawe."

⁷ Tupana yn ni yt nakuaria i aiminug hep kuap hat iꞌatuꞌe. Yt naku i mio tã e Iesui iꞌatuꞌe teꞌe­ru­wa­nẽtup hawe."

⁸ Maꞌato meremo Iesui tikuap topyꞌa pe iꞌatu­wa­nẽtup hap. Miꞌi hawyi Iesui toꞌe iꞌatuepe — Kat poteĩ yt eweiky­ꞌesat i uiꞌe iꞌahu rakat piat hap e."

⁹ Kat areꞌe som pyno poꞌog yt niatpo i yt hewyry kuap i rakat pe sio apo koitywy ti yt nakuap i eminug atihep taꞌyn areꞌe sio erepoĩꞌãm no hawyi etiꞌok­poꞌi ro eꞌyni hawyi ereto ro eꞌyat kape areꞌe. Kat som pyno poꞌog yt niatpo i areꞌe yt ipoĩꞌãm kuap i rakat pe e Iesui miwan enoi haria pe."

¹⁰ Miꞌi hawyi toꞌe i — Taꞌi Miitꞌin Ykeꞌet ti yt nakuap i hep kuap hat wuatꞌi yt naku i hep kuap hat wyti Uito e. Miꞌi tupono atimo­herep mesup ehepe uhesaika hap yt nakuap i hep hamuat e."

¹¹ Miꞌi hawyi Iesui toꞌe i yt hewyry kuap i rakat pe — Epoĩꞌãm no hawyi etiꞌok­poꞌi ro eꞌyni hawyi ereto ro eꞌyat kape e."

¹² Miꞌi hawyi meremo raꞌyn iꞌahu rakat ipoĩꞌãm hawyi toiꞌok­poꞌi teꞌyni hawyi toto raꞌyn wuatꞌi ehamo. Miꞌi hawyi teꞌe­ra­haꞌat kahato hawyi teꞌe­ru­wehum kahato Tupana ete. Miꞌi hawyi teꞌe­roꞌe toꞌope — Aito yt karãpe i wata­ꞌa­kasa meikotã iꞌatuꞌe raꞌyn.

"

¹³ Miꞌi hawyi toto raꞌyn Iesui tawa pyi yi Karireia hyemyiꞌa hy ẽpe kape. Miꞌi hawyi yi kyt upi tõꞌẽ tõꞌẽ miitꞌin typyꞌi kahato howawi. Miꞌi hawyi tohenoi henoi iꞌatuepe."

¹⁴ Miꞌi hawyi tewyry hap tote Iesui taꞌa­kasa uhyt Irewi mekewat Auweu saꞌyru apykpe ipotpap netap wiat rakat. Miꞌi ipotpap muꞌap pyhyp hap ete. Wuatꞌi muꞌap kareꞌen koꞌi toipyhyp. Toipo­re­raꞌat saꞌup toꞌy­wania kaipyi wanĩ­kaptia porekuat pe. Miꞌi hawyi Iesui tuwẽ­powat howawi — Toꞌiro uiwywo Irewi e. Miꞌi hawyi ipoĩꞌãm naꞌyn hawyi toto Iesui upi.

"

¹⁵ Wẽtup eꞌat pe Iesui toto Irewi yat kape topot­mu­ꞌeria wywo teꞌe­renuk hamo. Miꞌi hap tote typyꞌi kahato Irewi wyriaꞌin teꞌe­ru­wa­ꞌa­tunug ienuk hap tote. Iꞌewyte Iesui wywo tukup­teꞌen yt nakuaria i saꞌup pore­raꞌat haria teꞌe­renuk hamo."

¹⁶ Miꞌi hawyi iraniaꞌin nagnia ehay enoi haria teꞌe­ra­haꞌat ienuk hap kape iꞌewyte miwan enoi haria teꞌe­ra­haꞌat. Miꞌi hawyi apoꞌi­ꞌa­tuꞌe Iesui potmu­ꞌeria pe — Kat poteĩ eimuꞌe hat yt nakuaria i iwywo saꞌup pore­raꞌat haria wywo tenuk iꞌatuꞌe."

¹⁷ Miꞌi e hap Iesui tikuap hawyi toiꞌa­tu­wesat — Uhytꞌiꞌin yt eweikuap i apo aikotã ihãite rakaria yt tikat hin i mohag nug hat maꞌato iraniaꞌin iꞌahu rakaria ti ikat kahato e. Miꞌi hap ewy ti koitywy ariot yt nakuaria i eraꞌaipok Tupana kapiat hamo e. Maꞌato — Uruto poꞌog waku e haria yt atera­ꞌaipok kuap i Tupana kape e katu­pono yt uikat hin i — Uruto poꞌog iꞌatuꞌe pote.

"

¹⁸ Miꞌi hawyi mekewat iꞌatu­we­mo­syꞌat hap eꞌat pe miitꞌin teꞌe­roꞌe Iesui pe — Woꞌo­setꞌok hat Iuwãu potmu­ꞌeria koitywy teꞌe­ru­we­mo­syꞌat kahato raꞌyn iꞌatuꞌe. Iꞌewyte ti nagnia ehay enoi haria teꞌe­ru­we­mo­syꞌat kahato raꞌyn iꞌatuꞌe. Maꞌato ewat epotmu­ꞌeria yt teꞌe­ru­we­mo­syꞌat hin i iꞌatuꞌe. Kat poteĩ miꞌi tã epotmu­ꞌeria iꞌatuꞌe."

¹⁹ Miꞌi hawyi Iesui tiꞌa­tu­wesat — Katu­pono uipot­mu­ꞌeria iꞌatu­wepit kahato aikotã ienuk hap eꞌat piat seꞌaito hap eꞌat piat ienuk hap ewy uipot­mu­ꞌeria tukup­teꞌen e. Ienuk hap eꞌat pe yt uwe i tuwe­mo­syꞌat iꞌatu­wepit hap eꞌat pote e."

²⁰ Maꞌato karãpe iraniaꞌin tioto seꞌaito pya toꞌo­ꞌya­ty­pepyi miꞌi hawyi teꞌe­ru­we­mo­syꞌat e Iesui wemo­syꞌat haria pe."

²¹ — Iꞌewyte ti wẽtup sehay ahenoi teran ehepe e. Ahesokpe potꞌi iꞌewyte hiotꞌe pote yt naku i watomog sokpe pakup wo neꞌi e. Katu­pono ti ahepiat imog hap tuwe­ꞌatuk hawyi toihiot neꞌi raꞌyn ahesokpe potꞌi e. Miꞌi hawyi ahesokpe hiotꞌe rakat topy­huꞌat poꞌog naꞌyn saꞌag e."

²² Iꞌewyte ahetama pe watopag Uwa hy heiam iꞌape pakup we e. Maꞌato heiam iꞌape potꞌi pe iteneg moityꞌi pote yt naku i miꞌi tã katu­pono ti henãpuk hawyi heiam iꞌape teneg hawyi pokꞌe i raꞌyn e. Pokꞌe hawyi yt kat i Uwa hy iꞌewyte yt kat i heiam pokꞌe hawyi. Maꞌato iꞌape pakup wote yt pokꞌe i torokꞌe pote. Miꞌi ewywuat yt naku i uhehay pakup eweipag sehay potꞌi puo e Iesui nagnia ehay enoi haria pe.

"

²³ Miꞌi hawyi yt iꞌatu­potpap i hap eꞌat pe Iesui tokosap taꞌyn go sakpo awati ypia wywuat sakpo. Miꞌi hawyi iwyriaꞌin hoꞌopik taꞌyn awati toko­kaꞌat no."

²⁴ Miꞌi hawyi maꞌato iraniaꞌin nagnia ehay enoi haria teꞌe­ra­haꞌat kahato iꞌatu­potpap hap kape. Miꞌi hawyi tõꞌẽ meremo hawyi wãita­ꞌa­tuꞌe Iesui piat hamo — Yt naku i ti taꞌa­tu­ho­ꞌopik awati yt aipotpap i hap eꞌat pe. Yt naku i ti miꞌi tã iꞌatuꞌe."

²⁵ Maꞌato Iesui tiꞌa­tu­wesat — U pãi yt eweikuap i apo miwan me aikotã saꞌa­wyꞌi Tupana mikyꞌe morekuat Tawi teke Tupana mõtypot hawe tesyꞌat wywuat hawyi toimõꞌẽ mekewat Tupana mõtypot haria eman tesu­ra­raꞌin me hap e."

²⁶ Miꞌi hawyi tutuꞌu tesu­ra­raꞌin nywo paꞌi wato miꞌu wuat neꞌi. Miꞌi aikotã aipo­rekuat saꞌa­wy­ꞌiwuat Tawi tunug mekewat paꞌi Apiata ieĩneꞌen hap eꞌat pe turan e. Miꞌi tã hat pytkai — Waku kahato aipo­typot saꞌa­wy­ꞌiwuat Tawi eweiꞌe."

²⁷ — Uhytꞌiꞌin saꞌa­wyꞌi Tupana tunug tomõ­typot hap eꞌat hawyi tutum miitꞌin me iꞌatu­mo­wepit hamo tomohey hamuat e. Miꞌi pote mio heꞌat toĩneꞌen miitꞌin po pe aimo­wepit hamo e. Maꞌato yt naku i Tupana mõtypot eꞌat neꞌi topy­huꞌat aiꞌakag wo wãiꞌe hano e. Kat pote Tupana tum ahepe teꞌat aimo­wepit hamo e."

²⁸ Tutum naꞌyn miitꞌin me teꞌat are miꞌi pote Uito areĩneꞌen Tupana eꞌat Kaꞌiwat no iꞌewyte areĩneꞌen Wuatꞌi Miitꞌin Ykeꞌet no e Iesui nagnia wãiꞌe hap enoi haria pe.

"

3

¹ Miꞌi hawyi Tupana mõtypot hap eꞌat pe Iesui teke i Tupana ehay enoi hawe. Miꞌi hawyi itotiaria wywo toĩneꞌen ipo kĩꞌã rakat."

² Miꞌi hawyi teꞌe­ru­wa­nẽtup — Iesui timoe­hãite apo ipo kĩꞌã rakat yt aipotpap i hap eꞌat pe. Miꞌi hap ti yt naku i iꞌatu­wa­nẽtup hawe. Miꞌi hawyi teꞌe­ra­haꞌat kahato Iesui kape ikuasa te hamo."

³ Miꞌi hawyi Iesui tikaykay tuwe­wawi ipo kag motꞌi rakat — Uhytꞌi eriot ro meikowo e. Epoĩꞌãm no meiũpe miitꞌin pyꞌa­setpe e."

⁴ Miꞌi hawyi toꞌe Iesui iraniaꞌin me — Koran wyti Tupana mõtypot hap eꞌat e. Miꞌi pote apoꞌare ehepe waku som mesuwat eꞌat pe wakuap watunug sio apo yt naku i e. Waku apo mesup eꞌat pe watunug miitꞌin kyꞌe hap sio miitꞌin atuꞌuka hap watunug e. Miꞌi hawyi maꞌato yt taꞌa­tu­wesat i raꞌyn Iesui. Iꞌatunik neꞌi raꞌyn."

⁵ Miꞌi pote Iesui ipyꞌahak hawyi ihaꞌat kahato iꞌatue­wawi iꞌatu­pyꞌa heg nakaria kape yt taꞌa­tu­kyꞌe i ipo kĩꞌã rakat pote. Miꞌi hawyi toꞌe i ipo kĩꞌã rakat pe — Erepo­torok to uhyt e. Miꞌi hawyi toitorok taꞌyn hawyi ipo kokawiat ewy raꞌyn."

⁶ Miꞌi hawyi nagnia ehay enoi haria tuwat raꞌyn Iesui kaipyi. Miꞌi hawyi tuwat raꞌyn morekuat Eroti esura­raꞌin kape. Miꞌi hawyi miꞌiria wywo taꞌa­tukat aikotã waku Iesui auka hamuat hap.

"

⁷ Miꞌi hawyi Iesui toto raꞌyn topot­mu­ꞌeria wywo tawa Karireia hyemyiꞌa kape. Miꞌi hap upi typyꞌi kahato miitꞌin tuwat hupi tawa Karireia kaipy­wiaria tawa Iuteu kaipy­wiaria"

⁸ Tawa Ieru­sarẽi kaipy­wiaria yi Itumeia kaipy­wiaria Iũtãu hy sakpuaria tuwat hupi iꞌewyte mekewat tawa koꞌi pya pywiat Tiru kaipy­wiaria tawa Sitãu kaipy­wiaria tuwat tuwat Iesui upi."

⁹ Karãpe Iesui minug wakuap taꞌa­tukuap taꞌyn hawyi teꞌe­ru­wa­ꞌa­tunug howawi wuatꞌi kaipy­wiaria."

¹⁰ Miꞌi hawyi itote iꞌahu rakaria typyꞌi kahato Iesui tiꞌa­tu­moe­hãite. Miꞌi pote teꞌe­ru­wa­ꞌa­tunug kahato howawi hemig hamo. Miꞌi pote Iesui toꞌe towy­riaꞌin me — Eweterut ro yara uhowawi e. Katu­pono meiũpe uhemig neran haria typyꞌi kahato e. Taꞌi uiꞌakit kuap neꞌi raꞌyn ti uhemig neran haria e."

¹¹ Miꞌi hawyi ahiag ipiit piat rakaria hewo yi tote. Iꞌewyte ahiagnia kakꞌi­ꞌa­tuꞌe. Iesui kapiat teꞌe­ra­haꞌat hawyi — Tupana Saꞌyru ti En iꞌatuꞌe."

¹² Miꞌi pote Iesui wãiꞌe ahiagnia pe — Eipo­ꞌinik to e. Yt ewehenoi teiꞌo eimikuap uwe Uito hap e Iesui ahiagnia pe.

"

¹³ Miꞌi hap totepyi Iesui taꞌam naꞌyn yityꞌok tote. Miꞌi totepyi toiꞌa­tu­kaykay tuwe­wawi tomi­ꞌai­roria 12 miit. Miꞌi hawyi toko­kaꞌat howawi hawyi toꞌe topot­mu­ꞌeria pe"

¹⁴ — Uimi­ꞌai­roria eipe uiwywuat wuatꞌi eꞌat piat ieĩneꞌen haria eipe e."

¹⁵ Uimi­po­ꞌo­roria ahiag sopo hanuaria ti eipe e."

¹⁶ Saꞌa­wyꞌi toikaykay tuwe­wawi Simãu. Miꞌi hawyi tutum het pakup Simãu me PETERU Nu e."

¹⁷ Miꞌi hawyi toikaykay TIAKU Sepeteu saꞌyru tuwe­wawi hawyi toikaykay Tiaku ywyt IUWÃU tuwe­wowi. Miꞌi hawyi miꞌiria pe Iesui tum iꞌatuset pakup Ipuehay rakaria e maꞌato Iesui pusu puo Puanesei e."

¹⁸ Miꞌi hawyi toiꞌa­tu­kaykay tuwe­wawi temiitꞌin ÃTERE WIRIPI PATORUMEU. Miꞌi hawyi toikaykay MATEU TUME tuwe­wawi. Iꞌewyte TIAKU Auweu saꞌyru hawyi TATEU hawyi SIMÃU SERATI torania toiꞌa­tu­kaykay."

¹⁹ Torania toikaykay IUTA Ikarioti saꞌyru. Miꞌi ti meiũran imaꞌat hano topy­huꞌat.

"

²⁰ Miꞌi hawyi Iesui taꞌaipok i raꞌyn yityꞌok kaipyi netap kape towy­riaꞌin nywo. Miꞌi hawyi miitꞌin teꞌe­ru­wa­ꞌa­tunug kahato i raꞌyn howawi typyꞌi kahato."

²¹ Miꞌi pote yt aikotã kuap i teꞌe­renuk. Miꞌi hap ti iywytꞌin tikuap taꞌyn hawyi teꞌe­roꞌe toꞌope — Meiẽ Aheykeꞌet Iesui wyti hesoꞌok taꞌyn yt tenuk i pote iꞌatuꞌe toꞌope. Miꞌi hawyi tuwat raꞌyn Taꞌa­tuy­keꞌet Iesui enõtem hamo. Waku watioto i aiꞌyat kape kat pote ti hesoꞌok taꞌyn iꞌatuꞌe."

²² Iꞌewyte miwan enoi haria Ieru­sarẽi kaipy­wiaria toꞌoehay toꞌope — Taꞌi watikuap taꞌyn Iesui hepap ahiagnia pore­nõtem miitꞌin mywiat hap iꞌatuꞌe. Taꞌi ahiagnia porekuat aipusu puo Peusepu toĩneꞌen Iesui piit pe pote toiꞌa­tu­po­ꞌoro kuap ahiagnia saꞌag iꞌatuꞌe toꞌope."

²³ Miꞌi pote Iesui tiꞌa­tu­kaykay miitꞌin tuwe­wawi hawyi toꞌe iꞌatuepe — Uiwy­riaꞌin e ahenoi teran ehepe uhehay iãꞌãkap wuo e. Are pãi kat hamo ten ahiag tuwe­sopo are e."

²⁴ Yt aikotã kuap i wyti ren e. Katu­pono yt karãpe i tuwe­sopo kuap miit piit pyi ahiag e. Katu­pono karãpe wẽtup setama pe miitꞌin tuꞌuka tuꞌuka toꞌope meiũran ti mekewat setama pe yt uwe i raꞌyn topy­huꞌat e. Kat pote toꞌo­ꞌatoiat yne yne e yt kat i woꞌo­wese hap itote pote e."

²⁵ Iꞌewyte ti karãpe miitꞌin wẽtup yat pe tuꞌuka tuꞌuka toꞌope meiũran ti yt uwe i raꞌyn topy­huꞌat mekewat yat pe toꞌo­ꞌa­tu­ꞌuka pote e."

²⁶ Miꞌi hap ewy kahato karãpe ahiag tuwe­ꞌuka tuwete meiũran tuwe­moma hap yn topy­huꞌat e. Iꞌewyte sero­ꞌokꞌe hat yt teke kuap i surara hesaika rakat yat pe heka­reꞌen eroꞌok hamo e."

²⁷ Maꞌato saꞌa­wyꞌi toipoꞌi poꞌi hesaika rakat miꞌi hawyi ti tote­roꞌok kuap heka­reꞌen e. Miꞌi pote ti rat toipo­hari kuap ahiag e."

²⁸ Pywo ti areꞌe ehepe yne ehehay yt nakuap i koꞌi Tupana timo­hãpyk kuap maꞌato ehehay yt nakuat i Tupana Pãꞌãu kapiat ti ihay uhepiat turan Tupana yt timo­hãpyk kuap i — Miꞌi Miit Uhaꞌyru sese e Tupana Pãꞌãu ehepe turan — Eso kahato eweiꞌe tope hawyi Tupana yt tomo­hãpyk kuap i raꞌyn e."

²⁹ Miꞌi e hat ti Tupana miꞌa­piheg hano topy­huꞌat wuatꞌi eꞌat pe. Katu­pono Tupana yt timo­hãpyk kuap i — Yt uimohey teran i e hat. Tupana Pãꞌãu wakuat etiat — Eso kahato toꞌe hawyi ihay uhetiat turan. Miꞌi e hat wuatꞌi eꞌat piat Tupana miꞌa­piheg hanuat topy­huꞌat e Iesui tomohey hap pun haria pe."

³⁰ Iesui toꞌe mio tã e katu­pono Iesui ete saꞌa­wyꞌi teꞌe­roꞌe — Ahiag pãꞌãu toĩneꞌen Iesui piit pe iꞌatuꞌe pote.

"

³¹ Miꞌi turan putꞌok­ꞌi­ꞌa­tuꞌe Iesui ywytꞌin inytꞌin ity wywo Taꞌa­tuy­keꞌet ereto tawa Nasare kapiat hamo. Miꞌi hawyi typyꞌi kahato Iesui apypueri wo pote ityꞌin yt teke kuap i Iesui ewawi. Miꞌi pote sehay taꞌa­tu­po­ꞌoro Iesui kaykay hamo oken kape ipotmu­ꞌeria pyꞌa­setpyi."

³² Miꞌi hawyi Iesui apypueri haria henoi tope — Urumuꞌe hat ety eywytꞌin einytꞌin ekaykay oken kape iꞌatuꞌe."

³³ Miꞌi hawyi Iesui tiꞌa­tu­wesat — U e uweĩ uity e uweĩ uheywytꞌin e uweĩ uheinytꞌin e."

³⁴ Miꞌi hawyi tehaꞌat taꞌa­py­pueri haria kape tomohey haria kape hawyi toꞌe"

³⁵ — Meiũpe ti uity uheywytꞌin uheinytꞌin e. Katu­pono Tupana ehay pe pywo e haria wyti uheywytꞌin uheinytꞌin uityꞌin e. Uiꞌywot miky­ꞌesat nug haria eipe pote Uheywytꞌin uheinytꞌin uityꞌin wo eweipy­huꞌat e Iesui taꞌa­py­pueri haria pe iꞌewyte ahepe.

"

4

¹ Miꞌi hawyi Iesui toto i raꞌyn yi Karireia hyemyiꞌa eꞌyikytꞌok upi miitꞌin atumuꞌe hamo. Miꞌi hap tote typyꞌi rakaria teꞌe­ru­wa­ꞌa­tunug howawi. Miꞌi hawyi Iesui teke yara pe. Miꞌi hawyi taꞌapyk yara pe yowa tote­pywiat miitꞌin atumuꞌe hamo. Miꞌi pytkai miitꞌin yi kyt upi tukup­teꞌen."

² Miꞌi hawyi tohenoi henoi sehay iãꞌãkap wuo iꞌatuepe."

³ — Eweiwa­nẽtup o e. Wẽtup eꞌat pe so hãꞌỹi sytpok hat toto toko kape hãꞌỹi sytpok hamo e."

⁴ Putꞌok­toꞌe raꞌyn go totiat hawyi tohytpok taꞌyn hãꞌỹi teꞌyi go pe maꞌato yt yne i hãꞌỹi hewo go sese tote. Iraniaꞌin so hãꞌỹi hewo go puꞌap upi. Miꞌi koꞌi ti weitaria tuꞌu neꞌi e."

⁵ Maꞌato iraniaꞌin hãꞌỹi ti hewo yi hit nu totiat rote."

⁶ Miꞌi ti meremo hẽtyt maꞌato meiũran at hakup hawyi ti ikuꞌuro raꞌyn itotiat hapo yt toto kuap i yi piit kapiat pote e."

⁷ Miꞌi hawyi so iraniaꞌin hãꞌỹi hewo tuereto iꞌanam me e. Miꞌi koꞌi so hẽtyt wen maꞌato iꞌanam wywo toꞌo­ꞌewy neꞌi. Miꞌi pote meiũran iꞌanam tohik neꞌi raꞌyn hawyi yt tuwenug i raꞌyn e."

⁸ Maꞌato iraniaꞌin hãꞌỹi yi wakuat rote go sese tote hewo e. Miꞌiria ti hẽtyt meremo hawyi ihãite kahato hawyi haat kahato e. Miꞌi koꞌi kaipyi toimo­rania haat karan karan iãꞌỹi hawyi toipuẽti 30 iãꞌỹi. Wẽtup sat kaipyi toipuẽti 60 raꞌyn. Wẽtup kaipyi 100 raꞌyn e."

⁹ Uhytꞌiꞌin Manaꞌin ehewaure kaꞌa pote eweikuap to kat som areꞌe teran eimuꞌe hap uhehay iãꞌãkap wuo hap e Iesui yẽpe upiaria pe.

"

¹⁰ Tuwat porap i raꞌyn yne miitꞌin hawyi iwyriaꞌin 12 ok takaria apoꞌi­ꞌa­tuꞌe Iesui pe — Urumuꞌe hat kat ete som mesuwat hãꞌỹi hãꞌãkap wuo urumuꞌe iꞌatuꞌe."

¹¹ Miꞌi hawyi Iesui tiꞌa­tu­wesat — Taꞌi uiwy­riaꞌin ahenoi teran ehepe wuatꞌi mikuap yt heremo i aikotã Tupana topy­huꞌat irane Miitꞌin Porekuat no hap etiat e. Maꞌato iraniaꞌin me pya aikawiat haria pe yt uimohey teran i haria pe ahenoi teran sehay iãꞌãkap wuo e."

¹² Miꞌi tupono uhehamo maꞌato yt taꞌa­tukuap i kat areꞌe sese hap miꞌiria e. Teꞌe­ra­ꞌa­kasa yne maꞌato yt heremo i rakat e. Miꞌi pote yt karãpe i teꞌe­ra­ꞌaipok Tupana kape taꞌa­tu­minug yt nakuap i pyi taꞌa­tu­mo­hãpyk Tupana piat hamo e."

¹³ Koitywy kat poteĩ yt eweikuap i mesuwat mikoi iãꞌãkap sehay e. Aikotã aru pyno eweikuap iraniaꞌin uimienoi iãꞌãkap ewywuaria e topot­mu­ꞌeria pe."

¹⁴ Pyno ahenoi ehepe eweikuap sese hamo e. Mekewat iãꞌỹi sytpok hat ti Tupana ehay enoi moherep hat ewy e."

¹⁵ Miꞌi hawyi mekewat go puꞌap ẽpe upiat ti wẽtup ok wẽtup ok wanẽtup haria ewy e. Miꞌiria tote hawyi Tupana ehay hewo mikoi hãꞌỹi ewy maꞌato taꞌa­tukuap saꞌag hawyi meremo ahiag tihep teꞌen teꞌen iꞌatu­pyꞌa pyi Tupana ehay e."

¹⁶ Iꞌewyte ti mekewat iãꞌỹi hin nu totiat ti wẽtup ok wẽtup ok wanẽtup hat ewy e. Taꞌa­tu­wa­nẽtup hawyi meremo waku kahato taꞌa­tu­puẽti e."

¹⁷ Maꞌato yt iꞌatu­sopo i pote yt toĩneꞌen motꞌi e. Meiũran iraniaꞌin miat taꞌa­tu­sa­tyꞌi satyꞌi Tupana ehay mohey iꞌatuꞌe piat pote miꞌi hawyi meremo taꞌa­tu­ꞌatoiat Tupana ehay e. Saꞌa­wyꞌi iꞌatu­wepit kahato maꞌato iraniaꞌin toꞌo­ky­ryꞌi e i hawyi meremo taꞌa­tu­waure raꞌyn e."

¹⁸ Iꞌewyte ti mekewat hu ypia piat ewy toĩneꞌen e. Miꞌiria taꞌa­tu­wa­nẽtup Tupana ehay kape."

¹⁹ Maꞌato meiũran hawyi teꞌe­ru­wa­nẽtup taꞌa­tu­potpap iwato hap kape taꞌa­tue­ka­reꞌen iwato hap kape. Taꞌa­tu­mi­ky­ꞌesat wuatꞌi hap kape yn teꞌe­ru­wa­nẽtup."

²⁰ Miꞌi pote Tupana ehay yt tuwenug i e. Maꞌato mekewat yi wakuat upiat ti wẽtup ok wẽtup ok wanẽtup haria ewy e. Saꞌa­wyꞌi taꞌa­tu­wa­nẽtup Tupana ehay kapiat hawyi taꞌa­tu­ky­ꞌesat kahato. Miꞌiria tuwenug naꞌyn e. Taꞌi wẽtup ok 30 hap ewy wẽtup ok 60 hap ewy hawyi wẽtup ok 100 hap ewy raꞌyn Tupana ehay tuwenug kahato raꞌyn iꞌatuieĩ­neꞌen hap tote e Iesui topot­mu­ꞌeria pe.

"

²¹ Miꞌi hawyi Iesui henoi wẽtup iãꞌãkap sehay teka­tu­wy­riaꞌin me — Wãtym mote wyti miitꞌin topag ariãty ywaiti heiam note taꞌa­tupag hẽtyhot hamo e. Maꞌato yt uwe i ariãty ipag neran yrysakag ywytꞌok­pype e. Taꞌi yt uwe i tuwe­ꞌa­riã­typag neran yparakai ywytꞌok­pype e. Yt naku i miꞌi tã. Iwat heiam me yn waku ariãty e."

²² Katu­pono meiũran imierewyi tuwe­mo­herep e iꞌewyte huwy piat meiũran heremo e."

²³ Ehewaure kaꞌa pote eweikuap to uiwy­riaꞌin e Iesui tomohey haria pe."

²⁴ Eweiwa­nẽtup to sehay kape e. Imõꞌẽ haria wyti aru poꞌog hereko e."

²⁵ Meiũran poꞌog naꞌyn Tupana tum ehepe e. Maꞌato yt eweimõꞌẽ Tupana miium pote mekewat kurin kat toihep yne eipo pyi. Tupana piat einãpin hap eweimuꞌe iraniaꞌin me pote poꞌog tehay tutum ehepe e. Maꞌato yt eweimuꞌe iraniaꞌin me i Tupana piat einãpin hap koꞌi pote ti aru toihep yne i raꞌyn toꞌe hap eipyꞌa pyi eimikuap hit e. Miꞌi hawyi poꞌog yt kat i saꞌa­wy­ꞌiwuat kai topy­huꞌat eiwa­nẽtup hawe e Iesui."

²⁶ — Taꞌi miꞌi tã ti Tupana topy­huꞌat irane Miitꞌin Porekuat no aikotã hãꞌỹi koi hat ewy ti aru e."

²⁷ Saꞌa­wyꞌi toikoi hawyi tuwewi hẽtyt raꞌyn maꞌato ikoi hat toĩneꞌen toꞌyat pe miꞌi turan hẽtyt e. Miꞌi hawyi itag naꞌyn miꞌi hawyi haat raꞌyn maꞌato ikoi hat yt uwe i itote pytkai iꞌewyte yt taꞌa­kasa hin i aikotã itag hap kape pytkai e."

²⁸ Taꞌi mekewat at esaika hap upi mekewat iãꞌỹi tuwe­moe­hãite tuwepyi e. Mekewat go koi hat toket turan hewyry turan hẽtyt raꞌyn tuwe­motag naꞌyn haat raꞌyn. Miꞌi hawyi iko nug hat toto raꞌyn taꞌa­kasa hamo hawyi — Waku kahato e uimiꞌu raꞌyn e yt uipotpap i pytkai tuwenug pãi e tuwepe e."

²⁹ Waku yne hawyi toiterek kyseꞌyp wo e. Miꞌi uhehay iãꞌãkap ewy kahato Tupana tuwenug Morekuat no mesuwat yi tote e Iesui topot­mu­ꞌeria pe apoꞌi­ꞌa­tuꞌe hap wesat hamo.

"

³⁰ Miꞌi hawyi Iesui henoi poꞌog naꞌyn wẽtup iãꞌãkap sehay towy­riaꞌin me — Are pãi aikotã Tupana topy­huꞌat Miitꞌin Porekuat no. Miꞌi hap ete ahenoi teran ehepe sehay iãꞌãkap wuo e."

³¹ Taꞌi aimikoi iãꞌỹi kurin kat Mutata iãꞌỹi ewy ti. Eweikoi yi pe hawyi hẽtyt hawyi meremo topy­huꞌat itag iꞌyp e. Ywaiti raꞌyn hawyi weitaria teꞌe­ru­we­soknug naꞌyn haga tote iꞌyhop og me."

³² Aikotã aimikoi yt kat iãꞌỹi ok tã rakat i poꞌog kurin kat wen maꞌato meremo iꞌyp uato raꞌyn e. Miꞌi hap ewy ti Tupana topy­huꞌat irane Miitꞌin Porekuat no e Iesui iꞌatuepe."

³³ Miitꞌin me Iesui henoi henoi kahato sehay hãꞌãkap wuo yn tohenoi yt iꞌatu­mikuap wuo i."

³⁴ Maꞌato tuweran hawyi topot­mu­ꞌeria sese pe tohenoi sese kat e kat e tohenoi hãꞌãkap wuo hap.

"

³⁵ At minꞌe turan Iesui toꞌe — Toꞌiro ysakpo uhytꞌiꞌin mesuwat yara puo e."

³⁶ Miꞌi hawyi taꞌa­tu­hok­ꞌiwat raꞌyn yẽpeke typyꞌi rakaria. Miꞌi hawyi maꞌato ipatꞌok iraniaꞌin tuwat hupi hewat­ꞌymo yara koꞌi puo."

³⁷ Miꞌi turan Iesui toket neꞌi yara etuꞌa pe toꞌakag pysop tote. Iket kai ti ihyemyiꞌa wato pyꞌa­setpiat turan ywytu kahato raꞌyn ywytu uato kahato raꞌyn. Miꞌi hawyi yꞌy teke teke raꞌyn iꞌatue­ꞌyara pe."

³⁸ Miꞌi hawyi hemiitꞌin toꞌo­kakꞌi teꞌe­ra­ꞌa­pyꞌat irane ihy wato taꞌa­tue­ꞌyara piat pote. Miꞌi hawyi meremo teꞌe­ru­wẽ­powat taꞌa­tuehay pirik wo Iesui kape — Urumuꞌe hat erehymut ro iꞌatuꞌe. Yt urukyꞌe i apo En iꞌatuꞌe. Urutopap hamuat raꞌyn wyti iꞌatuꞌe minwa­toꞌe Uhyt iꞌatuꞌe Iesui pe."

³⁹ Miꞌi hawyi Iesui ipoĩꞌãm naꞌyn hawyi toꞌe ywytu uato pe ihy esaika rakat pe — Epoꞌinik to yꞌy e epohep to wasere wato e. Miꞌi hawyi meremo wasere ipohep hawyi yꞌy iꞌewyte ipoꞌinik taꞌyn. Miꞌi hawyi ihy nik kahato raꞌyn."

⁴⁰ Miꞌi hawyi toꞌe towy­riaꞌin me — Uhytꞌiꞌin e kat poteĩ eweikenꞌẽ uimohey haria eipe pytkai e."

⁴¹ Miꞌi hawyi teꞌe­ro­kenꞌẽ poꞌog neꞌi hawyi apoꞌi­ꞌa­tuꞌe toꞌope — Yt uwe i mesuwat yi tote Miꞌi Miit Iesui ewywuat iꞌatuꞌe. Taꞌi ywytu yꞌy tunug kahato Aimuꞌe hat Iesui mipo­ꞌoro ewy iꞌatuꞌe. Uwe pyno Iesui iꞌatuꞌe toꞌope.

"

5

¹ Miꞌi hawyi Iesui hakpo temiitꞌin wywo yi Karireia hyemyiꞌa. Miꞌi hawyi putꞌok­ꞌi­ꞌa­tuꞌe yi Kata­renu wã tote teꞌe­ru­wehik taꞌyn."

² Miꞌi hawyi Iesui tuwẽtem yara pyi yi kape. Miꞌi hawyi meremo ahiagnia ipiit piat rakat wẽtup ok teput tuerut Iesui kapiat taꞌa­kasa hamo."

³ Miꞌi so nimo raꞌyn toĩneꞌen woꞌosyp hawe yt uwe i ipyhik kuap."

⁴ Haꞌa­wyte raꞌyn karania wo neꞌi raꞌyn taꞌa­tu­pyhik woꞌo­pyhik hawe wen maꞌato so toipirik neꞌi topyhik hap koꞌi. Taꞌi kurenti wo taꞌa­tu­pyhik maꞌato toitektek neꞌi. Miꞌi hawyi yt uwe i imope­rupꞌi hamo topy­huꞌat."

⁵ Miꞌi tã ti mekewat ahiagnia ipiit piat rakat wãtym muo ihotꞌok puo miit syp hawe yityꞌok tote toĩneꞌen. Kakꞌe kakꞌe yityꞌok upi tuwe­witwit nu koꞌi wo hawyi haty kahato raꞌyn tuwete."

⁶ Miꞌi turan so taꞌa­kasa Iesui kape pya pyi hawyi so teput tuerut raꞌyn. Miꞌi hawyi putꞌokꞌe Iesui ete hawyi tuwe­pỹ­ꞌã­tutuk howa kape."

⁷ Miꞌi hawyi Iesui pe toꞌe tehay pirik wo — Kat som etunug neran uhete Iesui Tupana Saꞌyru e."

⁸ Miꞌi hawyi Iesui toꞌe ahiagnia pe — Eiwe­nõꞌẽ ro meiũwat miit piit pyi e. Mio tã hawyi toiwesat — Yt urusa­tyꞌi satyꞌi teiꞌo En iꞌatuꞌe."

⁹ Miꞌi hawyi Iesui toꞌe mekewat miit piit piat ahiagnia pe — Kat eĩ pyno ehet e Iesui ahiagnia pe."

¹⁰ Mio tã e hawyi taꞌa­tu­wesat — Isem e uruwat uruset Uhyt iꞌatuꞌe katu­pono uruty­pyꞌi kahato uruto pote. Pyno yt urupo­ꞌoro teiꞌo pya meiũpe pyi Uhyt iꞌatuꞌe mekewat miit ahiag ipiit piat rakat wẽ pyi."

¹¹ Miꞌi turan hamaut koꞌi typyꞌi rakaria tukup­teꞌen mekewat yityꞌok tote teꞌe­renuk hap tote."

¹² Miꞌi hawyi ahiagnia hẽtup Iesui pe — Meimuẽwat hamaut asuwai koꞌi kape ro urupo­ꞌoro iꞌatuꞌe. Miꞌiria pe mono urutu­we­hytꞌok iꞌatuꞌe raꞌyn."

¹³ Miꞌi hawyi Iesui toꞌe — Eweiwat ro pono e. Mio tã e hawyi tuwe­nõꞌẽ raꞌyn ahiagnia mekewat miit piit pyi hawyi tuwe­hytꞌok taꞌyn hamaut asuwai koꞌi 2000 rakaria piit pe raꞌyn tuwe­hytꞌok. Miꞌi hawyi hamaut koꞌi ikohye­putꞌi kohye­putꞌi yityꞌok totepyi hawyi tuwe­hytꞌok yꞌy pe hawyi topap yne raꞌyn."

¹⁴ Miꞌi hawyi hamaut sem apykok haria ikohyeput raꞌyn yi Kata­renu etawa koꞌi upi go koꞌi upi iraniaꞌin miat henoi hamo. Miꞌi hawyi so tuwat yne miitꞌin Iesui kapiat teꞌe­ra­ꞌa­kasa hamo."

¹⁵ Miꞌi hawyi teꞌe­ra­ꞌa­kasa mekewat miit Iesui yatype apyk pe raꞌyn waku i raꞌyn tuwe­painug me raꞌyn toĩneꞌen yt kat i raꞌyn ahiagnia ipiit pe."

¹⁶ Miꞌi hawyi ti teꞌe­ro­kenꞌẽ Iesui pupi. Miꞌi hawyi ti mekewat õꞌẽ haria pe akasa haria henoi yne raꞌyn aikotã aikotã mekewat ahiag ipiit piat rakat etiat hamaut asuwai koꞌi topap yne hap etiat."

¹⁷ Miꞌi hawyi taꞌa­tu­hẽtup hẽtup i Iesui pe — Uhyt Mimi iꞌatuꞌe motoro meiũwat uruetama pyi iꞌatuꞌe."

¹⁸ Miꞌi hawyi Iesui teke yara pe turan mekewat saꞌa­wy­ꞌiwuat ahiagnia ipiit piat rakat imimoe­hãite tuwẽ­powat Iesui kape — Uipap kahato eupi Mehĩ e."

¹⁹ Maꞌato Iesui tiwesat — Yt wyti waku poꞌog ni eraꞌaipok i raꞌyn eꞌyat kape hawyi ehenoi henoi mesu­wa­ro­tiaria pe aikotã Uito Ekaꞌiwat pakup ekyꞌe hap aikotã enug waku hap ewyriaꞌin miat hap ti atiky­ꞌesat uhaꞌyru e Iesui."

²⁰ Miꞌi hawyi ti toto raꞌyn Iesui yaty­pepyi. Miꞌi hawyi wuatꞌi 10 tawa puaria piat henoi henoi aikotã wakuap Iesui tunug tetiat hap. Miꞌi hawyi ikuap haria teꞌe­ru­wa­nẽtup kahato — Waku kahato Iesui iꞌatuꞌe toꞌope.

"

²¹ Miꞌi hawyi Iesui toto i raꞌyn temiitꞌin nywo yara puo yi Karireia hyemyiꞌa wato sakpo. Miꞌi hawyi putꞌok­ꞌi­ꞌa­tuꞌe hawyi miitꞌin tõꞌẽ tõꞌẽ howawi."

²² Miꞌi hawyi miitꞌin sem raꞌyn tukup­teꞌen yẽpeke. Miꞌi hawyi Tupana mõtypot yat kaꞌiwat wẽtup ok Tupana mõtypot yat akag uhyt Iairu tut Iesui kape. Miꞌi hawyi tuwe­pỹ­ꞌã­tutuk Iesui ewa kape."

²³ Miꞌi hawyi tohẽtup Iesui pe haty wo — Mehĩ e uhakiꞌyt hin ikuꞌuro irane Uhyt e. Pyno toꞌiro meremo imoehãite hamo e. Ereponug itote hawyi mono ihãite hawyi uhakiꞌyt yt ikuꞌuro i e."

²⁴ Miꞌi hawyi toto Iesui Iairu upi. Maꞌato mekewat typyꞌi rakaria tuwat yne hupi. Miꞌi hawyi muꞌap upi taꞌa­tu­py­huhik neꞌi Iesui."

²⁵ MIꞌi hawyi Iesui toto Tupana mõtypot yat akag uhyt Iairu upi miitꞌin sem tuwat hupi. Miꞌi turan ti wẽtup ok hary­poria huu wato rakat toĩneꞌen iꞌatu­wywo. Miꞌi wyti nimo kahato raꞌyn iꞌahu. Miꞌi wyti 12 anu raꞌyn toho­ꞌopot mekewat toꞌahu hap."

²⁶ Miꞌi so hewyry mohag nug haria upi. Tutum yne raꞌyn teka­reꞌen mohag nug haria pe. Maꞌato yt naku i poꞌog poꞌog neꞌi tuwete."

²⁷ Miꞌi turan Iesui etiat toikuap taꞌyn."

²⁸ Miꞌi hawyi tuwa­nẽtup taꞌyn — Pyno mesup aru areto raꞌyn Mimi Iesui upi hesokpe emig hamo e. Miꞌi atunug mote mono waku raꞌyn uhete e. Miꞌi hawyi ti toto raꞌyn miitꞌin typyꞌi tok puo Iesui ewatꞌymo. Miꞌi hawyi totemig naꞌyn hesokpe ete."

²⁹ Miꞌi hawyi meremo waku tuwete hawyi mekewat hary­poria tikuap taꞌyn tehãite hap. Toikuap tetiat yt tosuu wato i raꞌyn hap."

³⁰ Miꞌi hawyi maꞌato meremo tuwewi Iesui tikuap tesaika wẽtem topiit pywiat miitꞌin moehãite hamuat hap koꞌi. Miꞌi pote tuwe­morem naꞌyn hawyi apoꞌe topy­huhik haria pe — Uwe kahu uhesokpe emig e."

³¹ Mio tã e pote ipotmu­ꞌeria teꞌe­roꞌe — Urumuꞌe hat meiũpe ti miitꞌin sem me watu­kup­teꞌen typyꞌi poityꞌi emig haria iꞌatuꞌe. Kat poteĩ — Uwe uhesokpe emig ere iꞌatuꞌe."

³² Maꞌato Iesui tehaꞌat yne iꞌatuewa pe. Toikat temig hat uwe hap. Miꞌi pote mekewat hary­poria tokenꞌẽ kahato katu­pono toikuap taꞌyn tomoe­hãite hap."

³³ Miꞌi hawyi tut i raꞌyn hawyi tuwe­pỹ­ꞌã­tutuk howa kape tyry­toꞌe wywo hawyi tohenoi raꞌyn Iesui piat tomoe­hãite hap."

³⁴ Miꞌi hawyi Iesui toꞌe — Uheinyt ewat uimohey hap emoehãite raꞌyn e. Miꞌi hawyi ti aru ehãite raꞌyn e. Miꞌi tupono ewepit ro eraꞌaipok i ro eꞌyat kape e.

"

³⁵ Miꞌi turan Tupana mõtypot yat akag uhyt Iairu emiitꞌin tõꞌẽ raꞌyn iꞌyat kaipyi. Miꞌi hawyi taꞌa­tu­henoi Iairu pe — Uruka­ꞌiwat iꞌatuꞌe yt naku i kahato raꞌyn. Yt kat hamo i raꞌyn wyti Woꞌo­muꞌe hat etiky­ꞌesat katu­pono ti esakiꞌyt wyti ikuꞌuro sese raꞌyn iꞌatuꞌe iꞌywot Iairu pe."

³⁶ Maꞌato Iesui tikuap hawyi toꞌe iꞌywot pe — Yt erekenꞌẽ teiꞌo e. Uimohey yn no en e."

³⁷ Miꞌi hawyi typyꞌi rakaria iraniaꞌin Iesui yt tiky­ꞌesat i tuwat yne hap. Temiitꞌin yn Peteru Tiaku iywyt Iuwãu wywo yn toiky­ꞌesat tuwat hap."

³⁸ Miꞌi hawyi tuwat raꞌyn Iairu yat kape. Miꞌi hawyi putꞌok­ꞌi­ꞌa­tuꞌe tuꞌisa yat pe turan miitꞌin typyꞌi poityꞌi taꞌa­tu­puẽti wak haria."

³⁹ Teꞌe­ruwak ihay pirik kahato pĩꞌã hin ikuꞌuro pote. Miꞌi turan Iesui teke netap we hawyi toꞌe wak haria pe — Kat poteĩ eweiwak e. Kat poteĩ ehehay pirik e. Yt ikuꞌuro i ti pĩꞌã maꞌato toket neꞌi ti e. Mio tã e pote wak haria toꞌo­ky­ryꞌi Iesui ete. Miꞌi pote wak haria Iesui tiꞌa­tu­sopo raꞌyn iꞌyat pyi."

⁴⁰ Miꞌi hawyi toko­kaꞌat ity iꞌywot Iuwãu Tiaku Peteru wywo yn naꞌyn ikuꞌuro rakat kape."

⁴¹ Miꞌi hawyi Iesui tiꞌy­kesat hawyi toꞌe ikuꞌuro rakat pe — Pĩꞌã hin epoĩꞌãm no e."

⁴² Maꞌato towat topusu puo — Tarita kumi e. Miꞌi hawyi meremo pĩꞌã hin 12 anu rakat ipoĩꞌãm naꞌyn hewyry i raꞌyn. Miꞌi pote teꞌe­ra­haꞌat kahato teꞌe­ru­wa­nẽtup kahato raꞌyn."

⁴³ Miꞌi hawyi Iesui tiꞌa­tu­nãpin — Pyno ewetopoi ro eimẽpyt e. Maꞌato o yt ewehenoi teiꞌo pĩꞌã hin ieĩneꞌen i hap iraniaꞌin me e iꞌatuepe.

"

6

¹ Miꞌi hawyi Iesui toto i raꞌyn uhyt Iairu etawa kaipyi towy­riaꞌin wywo tomotag hap tawa hit Nasare kape."

² Miꞌi hawyi Tupana mõtypot hap eꞌat pe Iesui henoi henoi tetawa Nasare piaria pe Tupana mõtypot yat pe. Miꞌi hawyi itotiaria teꞌe­ru­wa­nẽtup kahato. Miꞌi hawyi teꞌe­roꞌe toꞌope — Yt saꞌa­wy­ꞌiwuat meiũpiat panꞌi panꞌi e hat i apo meiẽ iꞌatuꞌe. Yt mana Maria mẽpyt i apo Miꞌi Miit iꞌatuꞌe. Yt Tiaku Iuse Iuta Simãu eykeꞌet i apo Miꞌi Miit Iesui iꞌatuꞌe. Iꞌewyte iwat yt Iesui einytꞌin i apo tukup­teꞌen meiũpe iꞌatuꞌe toꞌope."

³ Uwe som pyno mekewat weꞌeg hap henoi Iesui pe iꞌatuꞌe. Hawytepyi ipatpap mesuwe tawa Nasare pe wuatꞌi ariaꞌyp kawiat hap nug hanuat iꞌatuꞌe. Katu­pono som pono tohepap kahato wuatꞌi wakuap nug hanuat iꞌatuꞌe raꞌyn. Uwe som mesuwat tesaika hap henoi tope Tupana ewywuat nug hamo iꞌatuꞌe toꞌope. Miꞌi hawyi yt taꞌa­tu­mohey hin i Iesui haype. Miꞌi pote Iesui yt timoherep kuap i wakuap Tupana mimoherep yt uwe tunug kuap i hap iꞌatuepe."

⁴ Kurin Kurin tutunug tesaika wo tawa Nasare pe. Wẽtup ok wẽtup ok yn toimoe­hãite topo wo iꞌahu rakaria."

⁵ Maꞌato yt tomohey i haria pe yt tutunug kuap i aikotã aikotã e hap koꞌi. Yt tomohey i haria kape tuwa­nẽtup kahato — Kat pote yt uimohey i uimotag haria e tuwepe."

⁶ Miꞌi pote toꞌe iꞌatuepe — Iraniaꞌin setama puaria wyti imohey kahato Tupana ehay moherep hat e. Maꞌato iwat hetama puaria ti yt imohey i e. Iwat iꞌywania sese ti iꞌewyte yt imohey i e. Iꞌyat piaria iꞌewyte yt imohey i e Iesui tetawa Nasare piaria pe tomotag hanuaria pe yt tomohey i haria pe. Mio tã e hawyi toto raꞌyn tomotag hap tawa Nasare pyi iraniaꞌin tawa hit koꞌi kape henoi henoi ipuat hamo.

"

⁷ Miꞌi turan Iesui tikaykay temiitꞌin tuwe­wawi. Miꞌi hawyi tutum naꞌyn tesaika hap ahiag sopo hamuat towy­riaꞌin me 12 ok takaria pe. Miꞌi hawyi toiꞌa­tu­nãpin — Uipot­mu­ꞌeria e koitywy woro­ho­ꞌo­po­ꞌoro wuatꞌi tawa piaria muꞌe hamo e."

⁸ Typy ok tuereto woro­ho­ꞌo­po­ꞌoro e. Pyno waku ti ewetioto eheka­reꞌen kurin kurin muꞌap upianuat e. Esokpe epiit etiat yn etioto e."

⁹ Waku epy sokpe epy etiat yn etioto are. Epoꞌyha wẽtup waku e. Waku yt kat i eimiꞌu muꞌap upianuat ewetioto e. Waku yt kat i ehesokpe eiam e. Waku yt kat i muꞌap saꞌup ape ewetioto e. Waku sokpe eipiit piat yn ewetioto are."

¹⁰ Miꞌi hawyi putꞌok­ꞌe­weiꞌe wẽtup tawa pe hawyi waku wuatꞌi eꞌat pe ti wẽtup getap we yn ewehenuk iꞌewyte eweiket e."

¹¹ Maꞌato tawa piaria yt iꞌatu­wese i ehete yt teꞌe­ru­wa­nẽtup teran i eimienoi uhetiat kape miꞌi pote eweiwat i raꞌyn iꞌatue­tawa pyi e. Eiwe­nõꞌẽ hamo waku meiẽwat tawa sawiu eipy etiat koꞌi eiwe­py­pit­pitꞌok kahato iꞌatue­hamo e. Miꞌi tã ewetunug hawyi ti aru taꞌa­tukuap taꞌyn Tupana etiat yt taꞌa­tu­wese i hap e Iesui topot­po­ꞌo­roria 12 ok takaria pe.

Miꞌi hawyi tuwat raꞌyn typy ok tuereto tawa koꞌi upi Iesui yaty­pepyi ihay enoi hamo."

¹² Putꞌok­ta­ꞌa­tuꞌe hawyi mio tã iꞌatuꞌe miitꞌin me — Koitywy eweiꞌatoiat ro yt nakuap i eiminug koꞌi hawyi eweiꞌaipok to Tupana etiat kuap hamo iꞌatuꞌe miitꞌin me."

¹³ Miꞌi hawyi iꞌewyte ahiag koꞌi taꞌa­tu­ꞌa­tu­sopo miitꞌin piit pyi. Iꞌewyte ikap takat wo taꞌa­tupen iꞌahu rakaria akag hawyi iꞌatue­hãite raꞌyn. Miitꞌin teꞌe­ru­we­wa­nẽtup kahato uwe Iesui e hap ete."

¹⁴ Miꞌi hawyi yne raꞌyn ikuap Iesui etiat ipotmu­ꞌeria 12 ok takaria wẽ pyi. Miꞌi hawyi mio tã hap morekuat Eroti tikuap hawyi toꞌe tuwa­nẽtup hawe — Iuwãu taꞌaipok taꞌyn guꞌuro pyi e. Iesui wyti woꞌo­setꞌok hat Iuwãu toĩneꞌen i raꞌyn guꞌuro pyi e. Miꞌi tupono ti tote­reko hesaika hap e morekuat Eroti Iesui etiat."

¹⁵ Miꞌi hawyi wẽtup ok wẽtup ok toꞌe — Iesui wyti Tupana ehay moherep nimuat hat iꞌatuꞌe. Maꞌato iraniaꞌin — Taꞌi Tupana ehay moherep hat saꞌa­wy­ꞌiwuat Eria wyti Iesui iꞌatuꞌe."

¹⁶ Maꞌato morekuat Eroti toꞌe tuwe­wa­nẽtup hawe — Are pãi atikuap wyti uwe sese hap e. Taꞌi Iuwãu uimi­ꞌakag tek wyti e tuwe­wa­nẽtup. Taꞌi toĩneꞌen i raꞌyn guꞌuro pyi e tuwa­nẽtup hawe morekuat Eroti Iesui etiat.

"

¹⁷ Mio tã toꞌe katu­pono saꞌa­wyꞌi morekuat Eroti toywyt Wiripi eharyꞌi wywo mana Erotia e hap het rakat wywo toĩneꞌen."

¹⁸ Miꞌi pote saꞌa­wyꞌi te ahetꞌok hat Iuwãu toꞌe morekuat pe — Wãiꞌe yt naku i ti ereĩneꞌen eywyt eharyꞌi wywo neꞌi e tope. Mio tã e pote morekuat tiꞌa­tu­po­ꞌoro tesu­ra­raꞌin Iuwãu sat hamo ipoꞌi poꞌi hamo. Miꞌi hawyi iheg me taꞌa­tupag."

¹⁹ Miꞌi hawyi morekuat eharyꞌi pakup Erotia yt iwese hin i Iuwãu ete. Toiꞌauka teran maꞌato yt toiꞌauka kuap i katu­pono Iuwãu pupi heꞌaito tokenꞌẽ kahato."

²⁰ Morekuat Eroti tikuap taꞌyn Iuwãu wakuat kahato hap. Miꞌi hawyi toika­wiano Iuwãu katu­pono morekuat tikuap teran Iuwãu ehay aikotã kahato hap. Toikuap hawyi ikenmuꞌe kahato tuwete."

²¹ Miꞌi hawyi wẽtup eꞌat pe morekuat Eroti ywãꞌĩ hap kapiat waꞌa­tunug hap eꞌat pe tõꞌẽ tõꞌẽ hesu­ra­raꞌin akagnia teꞌe­renuk hamo. Teꞌe­ru­wa­ꞌa­tunug tuꞌi­saria yne yi Karireia kaipy­wiaria tõꞌẽ tõꞌẽ."

²² Miꞌi hawyi iꞌatu­wa­ꞌa­tunug hawe teke iharyꞌi hit Erotia mẽpyt ikahu rakat tehairu tuweran hamo. Miꞌi hawyi tehairu waku raꞌyn hawyi morekuat Eroti iwepit kahato ienuk haria wywo. Miꞌi hawyi toꞌe pĩꞌã makuptia pe — Ehairu hap ikahu kahato pĩꞌã e."

²³ Pyno ehẽtup to kat som etiky­ꞌesat e. Miꞌi hawyi kat emiẽtup atum epe ehẽtup pote e. Taꞌi etiky­ꞌesat pote uheꞌyi ipatꞌok atum epe pĩꞌã e morekuat ihairu rakat pe."

²⁴ Miꞌi hawyi pĩꞌã toto toty kape ihay kuap hamo hawyi toꞌe — Mamai e kat som waku ahẽtup morekuat pe e. Miꞌi pote ity toꞌe e — U an e pyno ehẽtup to miitꞌin setꞌok hat Iuwãu akag. Miꞌi som yn waku e mana Erotia pĩꞌã pe."

²⁵ Miꞌi hawyi pĩꞌã taꞌaipok meremo raꞌyn morekuat piat henoi hamo. Putꞌok­toꞌe hawyi pĩꞌã toꞌe — Pyno mesup uito atiky­ꞌesat warupy hit piat Iuwãu akag e."

²⁶ Mio tã e pote morekuat iperup taꞌyn yt iwepit hin i raꞌyn. Yt toiꞌauka teran i Iuwãu haype maꞌato saꞌa­wyꞌi mio tã e pĩꞌã piat hap iwywuat ienuk haria tikuap taꞌyn kat e hap."

²⁷ Miꞌi pote toipo­ꞌoro raꞌyn wẽtup ok surara Iuwãu auka hamo. Miꞌi hawyi toto raꞌyn woꞌo­pyhik hap kape iꞌauka hamo."

²⁸ Miꞌi hawyi toterut warupy hit pe imiẽtup Iuwãu akag hawyi tutum naꞌyn pĩꞌã pe."

²⁹ Miꞌi hawyi pĩꞌã hum naꞌyn toty pe. Miꞌi hawyi Iuwãu potmu­ꞌeria tikuap taꞌyn iꞌauka hap hawyi tõꞌẽ raꞌyn hyp nu kaꞌa piat hamo.

"

³⁰ Miꞌi hawyi imipo­ꞌo­roria 12 ok takaria teꞌe­ra­ꞌaipok i raꞌyn Iesui ewawi woꞌo­pot­muꞌe haria wuatꞌi tawa kaipyi. Miꞌi hawyi taꞌa­tu­henoi henoi Iesui pe aikotã taꞌa­tu­minug koꞌi iꞌewyte taꞌa­tu­mienoi wuatꞌi tawa puat koꞌi."

³¹ Miꞌi hawyi typyꞌi kahato õꞌẽ õꞌẽ haria tukup­teꞌen itote miꞌi pote yt teꞌe­renuk kuap i raꞌyn typyꞌi poityꞌi pote. Miꞌi pote Iesui toꞌe topot­mu­ꞌeria pe — Toꞌiro wato aiweran aikope yt uwe i miitꞌin hap kape aiwe­mohy hamo e."

³² Miꞌi hawyi typyꞌi rakaria kaipyi Iesui toto raꞌyn temiitꞌin wywo yara puo ihyemyiꞌa sakpo."

³³ Maꞌato iraniaꞌin tikuap taꞌyn iwat hap hawyi yi upi wuatꞌi kaipyi miitꞌin teꞌe­ru­wa­ꞌa­tunug aikowo Iesui toto hap kape."

³⁴ Miꞌi hawyi Iesui tuwehik hawyi tuwẽtem yara pyi. Miꞌi turan yahig note yẽpeke toiꞌa­tu­puẽti miitꞌin typyꞌi kahato yt tuweran hin i. Miꞌi hawyi maꞌato toiꞌa­tu­kyꞌe kahato katu­pono toiꞌa­tu­puẽti aikotã hũria Uweuria koꞌi ewy aikotã yt ikaꞌiwat rakaria i ewy toiꞌa­tu­puẽti. Miꞌi hawyi Iesui tiꞌa­tu­muꞌe."

³⁵ Wãtym irane raꞌyn hawyi Iesui potmu­ꞌeria tõꞌẽ Iesui kape teꞌe­roꞌe hamo — Wãtym irane raꞌyn wyti Uhyt iꞌatuꞌe."

³⁶ Yahig note neꞌi ti watu­kup­teꞌen miꞌi pote etiꞌa­tu­po­ꞌoro i ro hesyꞌat rakaria iꞌatue­tawa koꞌi kape iꞌatuꞌe. Waku netap koꞌi kape tuwat miꞌu kyiꞌat hamo iꞌatuꞌe."

³⁷ Maꞌato Iesui tiꞌa­tu­wesat — Yt rat waku eweiꞌa­tupoi hesyꞌat rakaria e. Miꞌi hawyi taꞌa­tu­wesat — Aikotã etiky­ꞌesat Mehĩ miitꞌin sem poi hap iꞌatuꞌe. Etiky­ꞌesat man iwato wati­kyiꞌat miitꞌin miꞌu wo iꞌatuꞌe. Katu­pono 200 eꞌat motpap saꞌup yn putꞌokꞌe iꞌatupoi hap saꞌup mo iꞌatuꞌe."

³⁸ Miꞌi hawyi Iesui toꞌe temiitꞌin me — Karania a pyno aheman e. Eweiꞌa­kasa ro pyno e. Taꞌa­tukuap hawyi taꞌa­tu­henoi — 5 man typy pira yn Uhyt iꞌatuꞌe."

³⁹ Miꞌi hawyi Iesui toꞌe temiitꞌin me — Eweiꞌapyk to mopep hyp tote eweiꞌe ro miitꞌin me e."

⁴⁰ Miꞌi hawyi teꞌe­ra­ꞌapyk taꞌyn kowo 50 ok kowo 50 ok kowo 100 ok kowo 100 ok. 5000 rakaria yne mopep hyp tote."

⁴¹ Waku hawyi Iesui tat 5 man typy pira hit topo pe hawyi ihaꞌat ywaipe hawyi toꞌe — Waku kahato En Tupana e. Urupoi kahato hat En e. Miꞌi hawyi toipatꞌok kahato mekewat 5 a man 2 pira hit rakat towy­riaꞌin me. Miꞌi hawyi miꞌiria imõꞌẽ iraniaꞌin me."

⁴² Toiꞌa­tu­mi­ꞌu­mo­wato kahato raꞌyn. Miꞌi hawyi ti teꞌe­renuk kahato raꞌyn hawyi iꞌatuꞌok kahato raꞌyn tukup­teꞌen."

⁴³ Miꞌi hawyi iꞌatu­miꞌu ieĩpyt topy­huꞌat re 12 eyry­sakag ne."

⁴⁴ Mekewat eꞌat pe Iesui tiꞌa­tupoi 5000 ihainia 5 man wo yt miit minug kuap ewy hin i tutunug kuap Iesui.

"

⁴⁵ Teꞌe­renuk waku hawyi Iesui tiꞌa­tu­po­ꞌoro raꞌyn temiitꞌin ihyemyiꞌa sakpo tawa Petsaita kape. Miꞌi hawyi iraniaꞌin tomipoi koꞌi iꞌewyte toiꞌa­tu­po­ꞌoro iꞌatue­tawa koꞌi kape."

⁴⁶ Toiꞌa­tu­sopo yne yne hawyi Iesui toto raꞌyn yityꞌok kape. Miꞌi hap tote tuweran naꞌyn hawyi ihay Tupana wywo."

⁴⁷ Wãtym irane hawyi tehaꞌat ihyemyiꞌa kape towy­riaꞌin kape. Miꞌi turan wasere kahato iꞌatuewa kapiat pote yt iꞌatu­hyha i iwyriaꞌin ihaꞌat turan."

⁴⁸ Miꞌi pote waipaka ehay hap owakai Iesui toto raꞌyn temiitꞌin ewatꞌymo yowa tote."

⁴⁹ Maꞌato teꞌe­ra­ꞌa­kasa Iesui kapiat hawyi toꞌo­kakꞌi — Kat kahu meke iꞌatuꞌe. Miit ehog keĩ iꞌatuꞌe."

⁵⁰ Miꞌi hawyi iꞌatu­wuwu kahato raꞌyn. Miꞌi hawyi Iesui toꞌe — Uiwy­riaꞌin Uito rat yt eweikenꞌẽ teiꞌo e."

⁵¹ Mio tã toꞌe hawyi Iesui teke raꞌyn yara pe temiitꞌin wywuat pe raꞌyn. Teke hawyi meremo ywytu ipohep taꞌyn. Miꞌi pote teꞌe­ru­wa­nẽtup aikotã aikotã Iesui hewyry yowa tote hap kape."

⁵² Katu­pono saꞌa­wyꞌi teꞌe­ra­ꞌa­kasa Iesui minug koꞌi 5 man etiat maꞌato yt taꞌa­tukuap i uwe sese Iesui hap iꞌatu­pyꞌa heg mote yt taꞌa­tu­mohey kuap i.

"

⁵³ Miꞌi hawyi putꞌok­ꞌi­ꞌa­tuꞌe tama Kene­sare wã tote i raꞌyn."

⁵⁴ Teꞌe­ru­wehik yẽpeke hawyi tuwẽtem naꞌyn yara pyi. Miꞌi hawyi meremo yi Kene­sare piaria tikuap Iesui miꞌi pote yni puo taꞌa­tue­ro­poꞌok iꞌahu rakaria kope pyi kope pyi raꞌyn howawi."

⁵⁵ Miꞌi hawyi taꞌa­tu­hẽtup iꞌatu­moe­hãite hamuat hesokpe emig hamo. Miꞌi hawyi tewyry hap upi toiꞌa­tu­moe­hãite kahato iꞌahu rakaria iꞌatu­mierut koꞌi. Miꞌi turan yne muꞌap upi tukup­teꞌen iꞌahu rakaria Iesui esokpe emig neran haria."

⁵⁶ Tawa wato puꞌap upiaria tawa hit puꞌap upiaria go puꞌap upiaria tawa eꞌoken upiaria iꞌatue­tama puꞌap upiaria yne yne Iesui tiꞌa­tu­moe­hãite iꞌahu rakaria tesokpe emig haria. Iꞌahu rakaria taꞌa­tuerut kahato Iesui ewawi hawyi Iesui hewyry hap upi taꞌa­tuemig hesokpe yne muꞌap upi hawyi yne yne temig haria toiꞌa­tu­moe­hãite tomohey hap ok tã.

"

7

¹ Wẽtup eꞌat pe teꞌe­ru­wa­ꞌa­tunug kahato Iesui kape nagnia ehay enoi haria iꞌewyte miwan enoi haria tawa wato Ieru­sarẽi kaipy­wiaria wywo."

² Miꞌi hawyi taꞌa­tuenuk hap tote teꞌe­ra­ꞌa­kasa Iesui ekatu­wy­riaꞌin yt teꞌe­ru­we­posei i nagnia mienoi yt ewy i."

³ Miꞌi hawyi teꞌe­ra­haꞌat kahato katu­pono yne Iuteu ywania teꞌe­ru­we­posei yne teꞌe­renuk hamo. Kareꞌen kyiꞌat haria teꞌe­ruwei yne."

⁴ Yt teꞌe­ruwei i pote yt teꞌe­renuk kuap i. Taꞌi niatpo kahato ti iꞌatu­we­pokuap hap. Katu­pono yne taꞌa­tupyi wuatꞌi yꞌy eiam koꞌi miꞌu eiam koꞌi wuatꞌi taꞌa­tupyi teꞌe­renuk hamo. Aikotã nagnia inug saꞌa­wyꞌi hap ewy taꞌa­tunug."

⁵ Miꞌi hap yn taꞌa­tunug. Maꞌato iraniaꞌin Iesui mohey haria yt teꞌe­ru­we­pokuap i miꞌi tã. Miꞌi pote nagnia ehay enoi haria miwan enoi haria apoꞌi­ꞌa­tuꞌe Iesui pe — Woꞌo­muꞌe hat kat poteĩ emimu­ꞌeria yt teꞌe­ru­we­posei posei i urumuꞌe haria ewy i iꞌatuꞌe. Kat poteĩ yt taꞌa­tunug i ainãpin saꞌa­wy­ꞌiwuat hap koꞌi iꞌatuꞌe. Katu­pono ti aipo pitpit hap wywo yt naku i watuꞌu aimiꞌu yt naku i iꞌatuꞌe."

⁶ Miꞌi pote Iesui tiꞌa­tu­wesat — Nimo te ti aseꞌi Isaia henoi tomiwan me ehetiat typy ihay rakat etiat. Mio tã e Isaia — Miꞌi tã haria Tupana mõtypot taꞌa­tuwẽ pywiat haria yn miꞌiria maꞌato yt taꞌa­tu­pyꞌa pyi i taꞌa­tu­mõ­typot Tupana e Isaia 29.13 pe."

⁷ Taꞌi miꞌiria ti Tupana mõtypot saꞌag neꞌi katu­pono yt taꞌa­tu­henoi Tupana ehay sese i maꞌato miitꞌin kaipywiat sehay yn taꞌa­tu­henoi e ti Isaia henoi ehetiat e Iesui."

⁸ Miꞌi hawyi poꞌog toꞌe — Taꞌi Tupana ehay atoiat haria ti eipe katu­pono nagnia ehay yn ni topy­huꞌat eipyꞌa pe iꞌewyte ewehenoi miitꞌin e hap koꞌi maꞌato Tupana e hap meremo eweiwaure are e."

⁹ Taꞌi apuete eweiꞌe ti Tupana miky­ꞌesat koꞌi nug hawe hawyi eimi­ky­ꞌesat yn ewetunug at kaꞌap. Tupana ehay aikotã waku watunug e hap pun haria eipe wen maꞌato eiꞌe hap aikotã waku watunug e hap ewetunug kahato."

¹⁰ Nimo te ti Tupana tinãpin tehay moherep hat Musei — Waku ti eimẽ­pytꞌin eimõ­typot hanuaria wo tukup­teꞌen are e. Waku taꞌa­tuty taꞌa­tu­ꞌywot kyꞌe kahato haria wo teꞌe­ro­py­huꞌat e. Maꞌato yt kat i taꞌa­tu­tyꞌin taꞌa­tu­ꞌy­wotꞌin mõtypot hap iꞌatuete pote taꞌa­tu­sa­tyꞌi satyꞌi taꞌa­tu­tyꞌin taꞌa­tu­ꞌy­wotꞌin. Waku miꞌiria miitꞌin tiꞌa­tu­sa­tyꞌi satyꞌi nu wo taꞌa­tu­ku­ꞌuro hap kape e Tupana saꞌa­wyꞌi Musei pe mekewat Esutu 20.12 piat pe."

¹¹ Maꞌato eipe wẽtup sehay moherep haria e Iesui paꞌiria pe nagnia pe. Yt mio tã eweiꞌe hin i katu­pono mio tã eweiꞌe — Waku Tupana pe yn eweium eipo hap nug hap koꞌi eweiꞌe saꞌag ahaꞌy­ruꞌin muo ahaki­ꞌytꞌin muo. Waku Tupana yn wati­mõ­typot yt kan hamo i wati­mõ­typot aiꞌy­wotꞌin eweiꞌe saꞌag. Waku watum aity aiꞌywot saꞌup Tupana paꞌi pe eweiꞌe saꞌag e. Waku watum saꞌup aipo hap nug hap koꞌi ahepaꞌi pe uruepe Tupana wanuat eweiꞌe saꞌag yn eimuꞌe haria pe e Iesui."

¹² Yt naku i ti eimienoi katu­pono koitywy yt kat i raꞌyn miitꞌin po hap nug hap taꞌa­tu­ꞌywot taꞌa­tuty piat hap e. Yt taꞌa­tu­mõꞌẽ hin i taꞌa­tu­tyꞌin taꞌa­tu­ꞌy­wotꞌin me mesup e. Yt naku i are katu­pono mesup yt taꞌa­tu­mõ­typot hin i taꞌa­tu­tyꞌin taꞌa­tu­ꞌy­wotꞌin eimienoi saꞌag nagnia ehay upi pyi e. Miꞌi pote mesup taꞌa­tu­ꞌy­wotꞌin me — Papai Mamai iꞌatuꞌe yt kat i ti koitywy topy­huꞌat uikaipyi eipo­wyro hamuat hap iꞌatuꞌe katu­pono uimiium ehepiat eipo­wyro hamo atum yne raꞌyn Tupana mõtypot yat piaria akag koꞌi pe iꞌatuꞌe saꞌag eimienoi upi maꞌato yt Tupana e hap ewy hin i eiꞌe hap koꞌi are."

¹³ Taꞌi miꞌi hap koꞌi ewywuat ti rat saꞌag neꞌi ewehenoi miitꞌin me maꞌato Tupana e hap yt eweimo­herep hin i yt naku i rat eipe are. Katu­pono Tupana ehay etiat eipohep takaria eipe. Miꞌi pytkai — Uruehay ti Tupana ehay toĩneꞌen eweiꞌe saꞌag neꞌi. Miꞌi hap kaipyi ti Iraniaꞌin Tupana ehay sese yt ikuap hin i are e Iesui Iuteu ywania muꞌe haria pe wẽtup miwan enoi haria pe.

"

¹⁴ Miꞌi hawyi Iesui tiꞌa­tu­kaykay tuwe­wawi iraniaꞌin miitꞌin miat henoi hamo — Koitywy areꞌe teran ehepe aikope pyi som yt nakuap i tut e."

¹⁵ Pywo ti yt eimiꞌu kaipyi i ti iꞌewyte yt eiposei eipysei hap eiwe­painug hap kaipyi i ti tut iꞌaparap ehepiat hap e."

¹⁶ Maꞌato miitꞌin minug yt nakuap i ti tuwẽtem iꞌatu­pyꞌa pyi iꞌatu­wa­nẽtup saꞌag hap kaipyi e. Pyno ehewaure kaꞌa pote eiwa­nẽtup to mio wat uiꞌe hap kape e Iesui iꞌatuepe.

"

¹⁷ Miꞌi hawyi Iesui toto temiitꞌin wywo miitꞌin typyꞌi rakaria pyꞌa­setpyi hawyi teke wẽtup netap we. Miꞌi hawyi meiũran hemiitꞌin apoꞌi­ꞌa­tuꞌe Iesui pe — Kat ereĩ iꞌatuepe sehay hãꞌãkap wuo ehenoi Mehĩ iꞌatuꞌe."

¹⁸ Miꞌi hawyi Iesui tiꞌa­tu­wesat — Are pãi yt eweikuap i apo uhehay e. Iraniaꞌin ewy te ti apo eipe e. Pyno ahenoi i ehepe e. Yt miitꞌin miꞌu kaipyi i ti tuwenug yt naku i hap e."

¹⁹ Pywo pe ti miꞌu yt teke i aiwa­nẽtup hawe aipyꞌa piat maꞌato aimẽꞌẽn me yn teke kuap e. Miꞌi hawyi tuwẽtem hawyi toto i raꞌyn aipiit pyi e Iesui. Mio tã tupono ti waku yne miꞌu aimiꞌu wo e Iesui."

²⁰ Miꞌi hawyi Iesui toꞌe — Uiwy­riaꞌin miitꞌin minug yt nakuat i tuwẽtem iꞌatu­pyꞌa pyi ti e. Pywo pe ti miitꞌin pyꞌa pyi tuwetẽm wanẽtup yt nakuat i hap e."

²¹ Tuwepyi tutunug yt nakuap i e. Wuatꞌi hary­po­riaꞌin nywo e hat sero­ꞌokꞌe hat miit auka hat wẽtup ok ti seꞌaito wywo uito e hat wẽtup ok ti seha­ryꞌi wywo uito e hat miitꞌin pyꞌa pyi tuwẽtem"

²² Iꞌewyte uiwano yn iraniaꞌin ekareꞌen e hat atiꞌa­tu­mo­weu­kaꞌi uito iraniaꞌin e hat atimaꞌat sehay wo wẽtup ok e hat uito ti poꞌog uiwaku iraniaꞌin kai e hat ti Tupana ehay etiat weky­ryꞌi hat yt iweꞌeg i rakat tuwepyi taꞌa­tuehay taꞌa­tu­pyꞌa pywiat taꞌa­tunug yt naku i e."

²³ Pyno uiwy­riaꞌin eweikuap taꞌyn som miit pyꞌa pyi tuwẽtem wanẽtup hap yt naku i hap. Miꞌi wo ti yt naku i tuwenug tuwe­mohun e Iesui temiitꞌin me.

"

²⁴ Miꞌi hawyi Iesui toto pya kahato tetama pyi wẽtup ywania etama kape i raꞌyn wẽtup setama pya wuat kape. Miꞌi hap tote putꞌokꞌe raꞌyn iꞌatue­tama Tiru piat hawyi iheg me raꞌyn toĩneꞌen. Katu­pono yt toiky­ꞌesat i miitꞌin miat tokuap hap. Maꞌato yt aikotã me kuap i tuwemig."

²⁵ Miꞌi hawyi wẽtup ok hary­poria tikuap Iesui etiat hawyi toikat raꞌyn Iesui."

²⁶ Kat pote tomẽpyt piit piat ahiag putsit hamo toikat Iesui. Miꞌi hary­poria so yt Iesui ywania i raꞌyn. Wẽtup setama pywiat mekewat yi Siru­we­nisia pywiat. Miꞌi ti wẽtup taꞌyn ipusu Kereku ehay puo raꞌyn ihay. Miꞌi hawyi toipuẽti Iesui hawyi tuwe­pỹ­ꞌã­tutuk howa kape hawyi toꞌe — Mimi e etihep o ten ahiag uimẽpyt piit piat e haty wo."

²⁷ Miꞌi hawyi Iesui tiwesat — Apuete mana e saꞌa­wyꞌi ti atipoi teran uiꞌy­wania e katu­pono yt naku i hira­karia miꞌu wo urutopoi awareria neꞌi e."

²⁸ Miꞌi hawyi toꞌe Iesui pe hary­poria — Are an miꞌi tã ti Mimi e maꞌato ti iꞌewyte aware hit koꞌi tuꞌu miꞌu kuꞌi hewo rakat eꞌywania mẽpytꞌin tenuk turan e."

²⁹ Mio tã e pote Iesui tiwesat — Hẽ ti waku kahato mana uiwesat en e. Pyno eraꞌaipok i ro emẽpyt kape katu­pono koitywy ti yt kat i raꞌyn ahiag emẽpyt piit pe areꞌe hap ewy e. Atisopo raꞌyn wyti ahiag emẽpyt piit pyi mana e. Pyno koitywy waku raꞌyn tuwete e. Yt kat i raꞌyn som pyno ahiag emẽpyt piit pe mana e."

³⁰ Miꞌi hawyi ity taꞌaipok taꞌyn tomẽpyt kape. Putꞌokꞌe toꞌyat pe hawyi toipuẽti raꞌyn tomẽpyt yni pe waku pe i raꞌyn. Tokosap taꞌyn hesoꞌok hap. Miꞌi hawyi ti ity tikuap taꞌyn tomẽpyt piit pywiat ahiag wẽtem hap.

"

³¹ Miꞌi hawyi toto Iesui tawa Tiru pyi yi Sitãu sakpo raꞌyn. Miꞌi hawyi taꞌaipok i raꞌyn hẽpype tetama sese kape i raꞌyn. Miꞌi hap upi toiꞌa­tu­muꞌe tetama Karireia hyemyiꞌa piaria 10 tawa koꞌi."

³² Miꞌi hap tote taꞌa­tuerut raꞌyn Iesui kape wẽtup ok hewaure rakat yt ihay hãpyk kuap i rakat. Miꞌi hawyi taꞌa­tu­hẽtup Iesui pe imoehãite topo wuat hamo."

³³ Miꞌi hawyi Iesui tioto hewaure rakat miitꞌin tok pyi hawyi totemig naꞌyn hewaure kaꞌa koꞌi hawyi kuituꞌe raꞌyn hawyi tohẽku pen tẽty hy wo."

³⁴ Miꞌi hawyi Iesui ihaꞌat atipy kape hawyi kynkynꞌe — Etimoe­waure kaꞌa i ro meiũwat miit Tupana e. Maꞌato towat topusu puo Iesui toꞌe tope — Ewata e."

³⁵ Miꞌi hawyi meremo hewaure kaꞌa i raꞌyn ihay kuap wuatꞌi ewy raꞌyn."

³⁶ Miꞌi hawyi Iesui wãiꞌe iraniaꞌin me haty wo — Yt ewehenoi teiꞌo uhepiat imoehãite hap iraniaꞌin me e wen maꞌato taꞌa­tu­henoi henoi raꞌyn wuatꞌi puo raꞌyn yt Iesui miky­ꞌesat ewy hin i raꞌyn."

³⁷ Miꞌi hawyi taꞌa­tukuap wuatꞌi puo raꞌyn Iesui piat hewaure rakat moehãite hap hawyi teꞌe­roꞌe toꞌope — Waku kahato Iesui tunug iꞌatuꞌe. Hewaure rakaria wyti tutunug hewaure kaꞌa koꞌi wo raꞌyn iꞌatuꞌe. Yt ihay kuap i rakaria tutunug ihay kuap i koꞌi wo raꞌyn iꞌatuꞌe. Miꞌi hawyi tuwat tuwat Iesui kape pya pyi.

"

8

¹ Miꞌi hawyi teꞌe­ru­wa­ꞌa­tunug Iesui kape miitꞌin sok. Miꞌi hawyi myeꞌym eꞌat Iesui tiꞌa­tu­muꞌe at kaꞌap."

² Miꞌi hawyi temiitꞌin me toꞌe raꞌyn — Uimi­mu­ꞌeria meiũpiaria ti myeꞌym eꞌat pe raꞌyn myeꞌym wãtym naꞌyn uhupi hupi uhehay kuap hamo e. Miꞌi pote ti yt kat i raꞌyn topy­huꞌat iꞌatu­miꞌu wuat e. Miꞌi pote iꞌatue­ha­ky­ꞌeꞌi kahato uhepe miꞌiria pãi e."

³ Koitywy ti yt naku i raꞌyn teꞌe­ra­ꞌaipok taꞌa­tue­tawa koꞌi kape katu­pono pya kahato raꞌyn iꞌatue­tawa koꞌi tukup­teꞌen e. Taꞌi teꞌe­ropap neꞌi raꞌyn ni ren muꞌap upi yahig koro sakpo tuwat turan syꞌat pono e. Yt naku i raꞌyn atiꞌa­tu­po­re­ra­ꞌaipok yt kat i iꞌatu­miꞌu wywo i e Iesui."

⁴ Miꞌi hawyi hemiitꞌin teꞌe­roꞌe Iesui pe — Pywo mehĩ maꞌato aikotã waku wati­ꞌa­tupoi mesuwe yahig wato tote iꞌatuꞌe. Yt kat i meiũpe man iꞌatupoi hamo iꞌatuꞌe Iesui pe."

⁵ Miꞌi hawyi apoꞌe Iesui — Karania a kahu pyno man aiwat e. Mio tã e pote — Taꞌi 7 man yn Uhyt iꞌatuꞌe."

⁶ — Pyno eweiꞌapyk to yi upi e Iesui torania miitꞌin me. Miꞌi hawyi Iesui waku e Tupana pe — Uruꞌywot atipy piat urutu­wehum ewawi urupoi hap upi e hawyi toipikpik kahato raꞌyn mekewat 7 rakat man hawyi toimõꞌẽ kahato temiitꞌin me. Miꞌi hawyi hemiitꞌin iraniaꞌin me imõꞌẽ raꞌyn wy."

⁷ Miꞌi hawyi iꞌewyte pira hit koꞌi totat hawyi waku e Tupana pe hawyi toipatꞌok kahato hawyi tutum temiitꞌin me hawyi — Eweimõꞌẽ o iraniaꞌin me e."

⁸ Miꞌi hawyi teꞌe­renuk kahato raꞌyn hawyi iꞌatuꞌok taꞌyn 4000 miit."

⁹ Miꞌi hawyi hemiitꞌin tiꞌa­tunug iꞌatu­miꞌu ieĩpyt 7 eꞌyry­sakag ne topy­huꞌat. Waku hawyi Iesui tiꞌa­tu­po­ꞌoro raꞌyn iꞌatue­tawa pya rakat koꞌi kape.

"

¹⁰ Miꞌi hawyi toto i raꞌyn Iesui yara puo tama Tauma­nuta kape temiitꞌin wywo."

¹¹ Putꞌok­ꞌi­ꞌa­tuꞌe hawyi nagnia ehay enoi haria hãꞌãg Iesui taꞌa­tuehay wo — Heno pyno etomo­herep esaika hap atipy kaipywiat iwato rakat iꞌatuꞌe. Miꞌi etunug mote ti aru uruikuap taꞌyn Tupana Mipo­ꞌoro En hap iꞌatuꞌe."

¹² Mio tã iꞌatuꞌe pote Iesui hatyꞌu kahato topyꞌa pe hawyi henꞌẽ poityꞌi hawyi toꞌe mio tã e haria pe — Kat poteĩ mesu­wiaria tiky­ꞌesat kahato atimo­herep yt miitꞌin misepap koꞌi ewywuat i uimohey hamo e. — Taꞌi esaika hap etimo­herep uruepe hawyi uruimohey En iꞌatuꞌe. Mio tã e haria pe ti yt atomo­herep teran i uhesaika hap mio tã e haria pe e Iesui yt imohey i haria tewa­nĩ­kaptia pe."

¹³ Miꞌi hawyi tohok­ꞌiwat hawyi toto i raꞌyn temiitꞌin wywo ihyemyiꞌa sakpo i raꞌyn.

"

¹⁴ Maꞌato hemiitꞌin tiwaure taꞌa­tu­miꞌu man. Miꞌi pote taꞌa­tukat man yara pe muꞌap upi maꞌato wẽtup man yn taꞌa­tu­puẽti."

¹⁵ Miꞌi hawyi Iesui tiꞌa­tu­nãpin — Eiweꞌeg wo o nagnia ehay enoi haria mani puk hap ewywuaria pupi e. Iꞌewyte morekuat Eroti mani puk hap ewywuat pupi e."

¹⁶ Miꞌi hawyi teꞌe­roꞌe toꞌope — Kat poteĩ mio tã e ahepe sio aheman yt iwato i pote iꞌatuꞌe toꞌope."

¹⁷ Miꞌi hawyi Iesui tikuap hawyi toꞌe iꞌatuepe — Kat pote aheman yt iwato i eweiꞌe eiwo­ꞌope e. Yt eweikuap hin i te iwato kahato atunug man gaꞌatpo pytkai apo e. Eipyꞌa heg kahato te apo e."

¹⁸ Yt eheha pytig i te apo e. Yt ehewaure kaꞌa i te apo e."

¹⁹ Eweiwaure raꞌyn apo aikotã saꞌa­wyꞌi miitꞌin atiꞌa­tupoi 7 man wo yn 4000 rakaria hap e."

²⁰ Miꞌi kaipyi apo pyno karania eꞌyry­sakag ne topy­huꞌat miꞌu ieĩpyt e Iesui temiitꞌin me. — Taꞌi 7 eꞌyry­sakag ne ti howapy topy­huꞌat Uhyt iꞌatuꞌe. Miꞌi hawyi Iesui toꞌe — Iꞌewyte ti saꞌa­wy­ꞌiwuat 5 man wo atiꞌa­tupoi 5000 rakaria. Miꞌi kaipyi apo karania eꞌyry­sakag ne topy­huꞌat miꞌu ieĩpyt mekewat eꞌat piat wy e. — Taꞌi 12 eꞌyry­sakag ne iꞌatuꞌe."

²¹ Miꞌi hawyi Iesui toꞌe — Yt eweikuap i apo te aikotã atimo­wato kuap man hap pyno kat — Aheman yt iwato i eweiꞌe. Wẽtup man a yn toĩneꞌen aimiꞌu wo eweiꞌe e. Yt uimohey i te apo eipe e Iesui temiitꞌin me katu­pono poꞌog kurin ipo pe toĩneꞌen pote poꞌog iwato tutunug kuap.

"

²² Miꞌi hawyi putꞌok­ꞌi­ꞌa­tuꞌe ysakpo tawa Petsaita pe. Miꞌi turan so taꞌa­tuerut Iesui ewawi yt iha pytig i rakat — Etimoe­hãite epo wo meiũwat yt iha pytig i rakat iꞌatuꞌe."

²³ Miꞌi hawyi Iesui tiꞌy­kesat ereto raꞌyn yt iha pytig i rakat tawa pyi. Miꞌi hap tote iha pe kuituꞌe raꞌyn hawyi totemig topo wo."

²⁴ Miꞌi hawyi apoꞌe — Waku raꞌyn apo eha uhyt e. Miꞌi hawyi tehaꞌat hawyi toiwesat — Hẽ porap waku Uhyt e maꞌato meimuẽwat miitꞌin hewyry rakaria wyti ariaꞌyp koꞌi ewy neꞌi e."

²⁵ Miꞌi hawyi Iesui temig i topũꞌĩa wo iha hawyi waku raꞌyn yne taꞌa­kasa raꞌyn. Miꞌi hawyi Iesui toꞌe tope — Pyno waku raꞌyn eete koitywy uhyt e."

²⁶ Eraꞌaipok to eꞌyat kape wẽtup muꞌap upi e. Yt erokosap teiꞌo wẽtup tawa puo emoehãite hap enoi hamo e Iesui tomi­moe­ha­pytig me.

"

²⁷ Miꞌi hawyi Iesui ipotꞌam towy­riaꞌin wywo yi Sesareia piat tawa Wiripi kape tawa koꞌi upi toto temiit wywo. Miꞌi hawyi muꞌap upi Iesui apoꞌe towy­riaꞌin me — Uwe som pono Uito iraniaꞌin wanẽtup hawe e."

²⁸ Apoꞌe hawyi taꞌa­tu­wesat — U pãi Tupana ehay moherep hat nimuat hat raso woꞌo­setꞌok hat Iuwãu raso Eria raso iꞌatuꞌe."

²⁹ Miꞌi hawyi toꞌe — Maꞌato apo uwe Uito eiwa­nẽtup hawe e. Miꞌi pote mekewat Nu e hap het rakat mekewat Peteru tiwesat — Woꞌoe­ha­kye­raꞌat hat Tupana Mipo­ꞌoro Urupo­rekuat nuat rat En Uhyt e."

³⁰ Miꞌi hawyi Iesui tiꞌa­tu­nãpin — Yt ewehenoi teiꞌo koitywy uikuap ehepiat hap iraniaꞌin me e temiitꞌin sese pe."

³¹ Pywo ti Uito Wuatꞌi Miitꞌin Eykeꞌet wen maꞌato miꞌi pytkai nagnia yt uiky­ꞌesat hin haria i e. Taꞌi paꞌi kororia miwan enoi haria iꞌewyte uhehay pun haria neꞌi e. Pywo ti Uito Eheykeꞌet taꞌa­tu­ꞌauka irane e. Ahoꞌopot kahato uiꞌauka hap turan maꞌato uiꞌauka saꞌag hawyi uiku­ꞌuro sese hawyi myeꞌym eꞌat yn uisyp hawe areĩneꞌen hawyi Tupana uihep guꞌuro po pyi Eheykeꞌet e Iesui towy­riaꞌin me."

³² Mio tã e pote Peteru tikaykay Iesui tuwe­wawi wãitoꞌe hamo — Uhyt e yt naku i ti ehenoi eꞌauka hamuat hap e."

³³ Maꞌato Iesui tuwe­morem topot­mu­ꞌeria kape Peteru satyꞌi satyꞌi hamo hawyi toꞌe Peteru pe — Erepik to ahiag e. Uinãpin saꞌag neꞌi yt Tupana uinãpin hap ewy i raꞌyn maꞌato miitꞌin woꞌo­nãpin hap ewy neꞌi raꞌyn uinãpin en e."

³⁴ Miꞌi hawyi Iesui tiꞌa­tu­kaykay tuwe­wawi iraniaꞌin muꞌap upiaria iꞌatu­muꞌe hamo — Pywo ti rat eweiwat teran uhupiat pote eweitoiat ro eimi­ky­ꞌesat koꞌi yt Tupana miky­ꞌesat koꞌi hawyi eweiwat ro uhupi eheꞌa­riaꞌyp posak wywo e."

³⁵ Uwe uwe ikuꞌuro uhehay wakuat enoi hap upi pote uikyꞌe haria wo topy­huꞌat e. Miꞌi haria ti aru wuatꞌi eꞌat piat ieĩneꞌen hap sese puẽti hanuaria e. Maꞌato iraniaꞌin mesuwat rotiat ieĩneꞌen hap yn kyꞌesat haria ti aru ieĩneꞌen hap sese pun hanuaria wo hoꞌo­wasat rakaria neꞌi tukup­teꞌen e."

³⁶ Kat hamo ten eweikyiꞌat yne yne mesuwat yi totiat eheĩneꞌen hap sese saꞌup mo e."

³⁷ Maꞌato mesu­wa­rotiat kyiꞌat hap kape yn eiwa­nẽtup at kaꞌap hawyi aru aikotã eweikyiꞌat kuap wuatꞌi eꞌat piat ikahu sese rakat eheka­reꞌen Tupana wuat hap e. Miꞌi hawyi eheĩneꞌen wuatꞌi eꞌat piat hap koꞌi eimipun no topy­huꞌat e. Miꞌi hawyi uhehay wakuat kuap hap yt teke kuap i eiwa­nẽtup hawe e Iesui ahepe."

³⁸ Mesu­wa­rotiat miitꞌin wyti yt uimohey i kahato haria mesu­wiaria e. Taꞌi taꞌa­tu­mi­ky­ꞌesat koꞌi yn taꞌa­tunug neran e. Miꞌi pote uwe uwe uhehay pupi tuwe­mõti yt uimohey haria i pyꞌa­setpe miꞌi haria pupi ti aru Uito iꞌewyte aremõti wy mekewat eꞌat pe karãpe Uito Eheykeꞌet no ariot i raꞌyn Morekuat no atipy piaria wywo Tupana wat hẽtyhot rakat pe imehit rakat piat turan. Miꞌi hap eꞌat pe ti aru Uito Eheykeꞌet aremõti uipupiat wemõti haria pupi e Iesui muꞌap upiaria pe.

"

9

¹ Wẽtup eꞌat pe Iesui toꞌe temiitꞌin me — Meiũran ti aru Tupana uimo­herep sese ehepe Uito Miitꞌin Porekuat nuat sese areĩneꞌen hap e. Maꞌato wẽtup ok wẽtup ok yn eipe meiũpe akasa uhowawiat haria eweipy­huꞌat e. Taꞌi eipe ti eiwa­ꞌa­kasa raꞌyn uhewaku hap koꞌi e eiku­ꞌuro hap eꞌyianmete are e. Yt yne i eipe maꞌato wẽtup ok wẽtup ok ti aru miꞌi hap kapiat akasa hanuaria eweikup­teꞌen aru e Iesui Iuwãu Tiaku Peteru piat."

² Miꞌi hawyi 6 eꞌat itote toĩneꞌen hawyi Iesui toto i raꞌyn yityꞌok ywaiti kahato rakat kape towy­riaꞌin nywo myeꞌym ok takaria wywo yn Peteru Tiaku Iuwãu wywo. Miꞌi hawyi itote Iesui timo­herep taꞌyn aikotã toĩneꞌen hap sese."

³ Miꞌi turan Iesui esokpe imehit kahato ikytsig kahato poꞌog ikytsig mesu­wa­rotiat koꞌi kai e."

⁴ Miꞌi hawyi hemiitꞌin teꞌe­ra­ꞌa­kasa typy ok Tupana ehay moherep haria saꞌa­wy­ꞌi­wuaria iwywo. Wẽtup ok Eria wẽtup ok Musei teꞌe­ra­ꞌa­kasa. Miꞌiria ti toꞌoehay Iesui wywo."

⁵ Miꞌi hawyi Peteru toꞌe — Urumuꞌe hat e taꞌi waku kahato meiũpe watoĩ­neꞌen e. Etiky­ꞌesat apuru urutunug eheꞌog myeꞌym e wẽtup ewano wẽtup Musei wano wẽtup Eria wano e Peteru Iesui pe."

⁶ Maꞌato ipoityꞌi tuete pono mio tã e neꞌi. Taꞌi tokenꞌẽ pote. Yne raꞌyn teꞌe­ro­kenꞌẽ."

⁷ Miꞌi hawyi ywyhig me ywaiti pyi sehay tut raꞌyn — Uhaꞌyru Uimi­kyꞌe kahato ti eipy­ꞌa­setpe toĩneꞌen e. Miꞌi tupono eweiwa­nẽtup to ihay kape are e Tupana ywaiti pyi."

⁸ Mio tã e hawyi Iesui yn naꞌyn heremo temiitꞌin yatype."

⁹ Miꞌi hap totepyi tuwat popuo Iesui toꞌe towy­riaꞌin me myeꞌym ok takaria pe — Yt ewehenoi teiꞌo aikotã Eimuꞌe hat eweiꞌa­kasa mesup yityꞌok totiat hap iraniaꞌin me e. Maꞌato karãpe Uito Eheykeꞌet arẽtem guꞌuro pyi hawyi ti aru waku raꞌyn ewehenoi Eimuꞌe hat eweiꞌa­kasa mesup hap e."

¹⁰ Miꞌi pote iraniaꞌin me yt taꞌa­tu­henoi teran i. Maꞌato mio tã e Iesui pote teꞌe­ru­wa­nẽtup kahato — Kat pote mio tã e — Araꞌaipok guꞌuro pyi e iꞌatuꞌe teꞌe­re­wa­nẽtup hawyi."

¹¹ Miꞌi hawyi yityꞌok tote­pywiat tuwat hap upi teꞌe­roꞌe Iesui pe — Kat poteĩ saꞌa­wy­ꞌiwuat miwan enoi haria teꞌe­roꞌe ahepe miwan me — Taꞌi Tupana tipo­ꞌoro ti aru wuatꞌi ehakye­raꞌat hanuat maꞌato toipo­ꞌoro aru Miꞌi Miit eꞌyianme mekewat saꞌa­wy­ꞌiwuat tehay moherep hat Eria toipo­ꞌoro Temiit ut hap moherep hamuat iꞌatuꞌe ahepe. Mio tã iꞌatuꞌe pote Iesui tiwesat — Taꞌi Eria ti tut hamuat yianme uipuꞌap mohãpyk hamo e. Taꞌi tohenoi kahato Eria etiat miwan me. Toꞌe hap ewy ti raꞌyn e. Iꞌewyte ti tohenoi kahato Eheykeꞌet kuꞌuro hamuat hap etiat miwan me e."

¹² Iꞌewyte tohenoi kahato aikotã hoꞌopot hamuat hap etiat aikotã iꞌatu­mi­ky­ryꞌi tuetiat hamuat etiat hap koꞌi tohenoi miwan me wy e. Miꞌi hap ewy ti tohenoi Eria ut hamuat hap etiat e."

¹³ Pywo ti Eria ti putꞌokꞌe raꞌyn haꞌa­wyte raꞌyn e hap ewy e. Taꞌi Uimo­herep taꞌyn miitꞌin me miꞌi miit Tupana ehay moherep hat saꞌa­wy­ꞌiwuat Eria ewywuat e Iuwãu piat. Pywuat sese ti iꞌatu­mi­ky­ryꞌi kahato miꞌi ete. Taꞌa­tu­ꞌauka raꞌyn wyti aikotã saꞌa­wy­ꞌiwuat henoi hap ewy ti raꞌyn e Iesui towy­riaꞌin myeꞌym ok takaria pe muꞌap upi yityꞌok totepyi.

"

¹⁴ Miꞌi turan myhuꞌat haria iraniaꞌin hemiitꞌin tihep teran wẽtup ok kurum piit pyi ahiag pãꞌãu maꞌato yt taꞌa­tuhep kuap i. Miꞌi pote itotiaria miwan enoi haria toꞌo­ky­ryꞌi kahato iꞌatuete. Miꞌi turan Iesui putꞌokꞌe i raꞌyn iꞌatuete myeꞌym ok takaria wywo."

¹⁵ Hemiitꞌin teꞌe­ra­ꞌa­kasa Iesui kape hawyi punꞌi­ꞌa­tuꞌe howa kape iraniaꞌin typyꞌi rakaria wywo iꞌatu­wepit kahato raꞌyn. Miꞌi hawyi teꞌe­ru­wẽ­powat — Haikaꞌat Uhyt haikaꞌat Mimi iꞌatuꞌe."

¹⁶ Miꞌi hawyi Iesui putꞌokꞌe raꞌyn iꞌatuete myeꞌym ok takaria wywo hawyi Iesui apoꞌe iꞌatuepe — Kat eiweiꞌeĩ eiwo­ꞌope uhytꞌiꞌin manaꞌin e."

¹⁷ Miꞌi hawyi wẽtup ok typyꞌi tok pyi toꞌe — Woꞌo­muꞌe hat gaꞌatpo aterut uhaꞌyru ahiag ipiit piat rakat ewawi wen maꞌato En yt uwe i e. Yt naku i kahato ahiag uhaꞌyru ete Uhyt e. Ahiag teke hawyi yt ihay kuap i tuereto e."

¹⁸ Taꞌi taꞌat yi tote hawyi ti tuwe­ꞌokhyt morem morem tuereto iwẽ enãpuk tyryꞌe kyry­ꞌet­ky­ryꞌet e. Miꞌi haype ikuꞌuro porap i tuereto e hap. Yt naku i Uhyt e. Saꞌa­wyꞌi epotmu­ꞌeria pe ahẽtup ahiag putsithep hamuat hap wen maꞌato yt taꞌa­tuhep kuap i e."

¹⁹ Miꞌi hawyi Iesui toꞌe — Taꞌi yt uimohey i haria miitꞌin mesuwat yi totiaria pote e. Karania eꞌat ti aru areĩneꞌen eiwywo eimuꞌe uimohey mono uiꞌe haype e. Karãmuo putꞌokꞌe uimohey ehepiat hap woro­ho­ꞌo­muꞌe motꞌi pytkai yt Tupano mohey i rakaria wo eweikup­teꞌen ne e. Pyno eterut ro meikowo uhowawi esaꞌyru ahiag ipiit piat rakat e Iesui ahiag ipiit piat rakat ywot pe."

²⁰ Miꞌi hawyi meremo taꞌa­tuerut raꞌyn howawi. Miꞌi hawyi taꞌa­kasa raꞌyn Iesui ewa kape hawyi ahiag tipun hirakat yi tote hawyi toiꞌokhyt morem morem hawyi iwẽ enãpuk taꞌyn."

²¹ Miꞌi pote Iesui toꞌe iꞌywot pe — Karãmuo kahu saꞌa­wyꞌi meiko tã emẽpyt ete uhyt e. — Taꞌi ihire pyi te mekewat ahiag toĩneꞌen ipiit pe Mehĩ e."

²² Aria pe kawiat re i ahiag tipun tuereto iꞌauka hamo e. Miꞌi tusake ti yꞌy pe toiꞌauka teran tuereto iꞌauka hamo e. Yt naku i kahato miꞌi tã uhaꞌyru etiat hap uhete Uhyt e. Urueha­kye­raꞌat ro En Uhyt e. Eithep kuap pote etihep to ahiag Uhyt e."

²³ Miꞌi hawyi Iesui tiwesat — Etihep kuap pote ereꞌe apo uhepe e. Kat pote mio tã ere. Yt uimohey i apo en. Eꞌe hap kaipyi ti yt uimohey i kahato hap atikuap. Tupana mohey haria pe ti yt kat i niatpo e Iesui mio tã e pote."

²⁴ Miꞌi hawyi hirakat ywot toꞌe haty wo — Taꞌi atimohey Tupana Uhyt maꞌato yt kahato i e. Pyno uipo­wyro poꞌog uhepiat Tupana mohey hamuat e tuwak popuo."

²⁵ Miꞌi turan typyꞌi raꞌyn tõꞌẽ pote Iesui hatyꞌi hatyꞌi tehay wo ahiag — Erẽtem no ahiag saꞌag meiũwat hirakat piit pyi e. Yt naku i kahato en e. Miitꞌin pusu mõto hat en e. Miitꞌin ewaure kaꞌa pyhyp hat en e Iesui ahiag me. Yt karãmuo i raꞌyn o eraꞌaipok hirakat kape e."

²⁶ Miꞌi hawyi ahiag tuwẽtem naꞌyn kaktoꞌe kaktoꞌe popuo hawyi toihuruk huruk kurum tuwẽtem hawe. Miꞌi hawyi kurum taꞌat yi tote ikuꞌuro rakat ewy raꞌyn. Miꞌi pote raso — Ikuꞌuro raꞌyn wyti iꞌatuꞌe raꞌyn iraniaꞌin."

²⁷ Maꞌato Iesui timo­poĩꞌãm naꞌyn topo wo hawyi ipoĩꞌãm waku i raꞌyn tuete."

²⁸ Miꞌi hawyi toto i raꞌyn Iesui wẽtup getap kape towy­riaꞌin nywo. Miꞌi tote apoꞌi­ꞌa­tuꞌe Iesui pe — Uhyt kat pote som yt uruihep kuap i mekewat ahiag uruto iꞌatuꞌe raꞌyn."

²⁹ Miꞌi hawyi toiꞌa­tu­wesat — Taꞌi uhytꞌiꞌin mesuwat ewywuat ahiag niatpo kahato tuwẽtem e. Tupana yn naꞌyn ti mekewat ewywuat ihep kuap e. Ewehẽtup Tupana pe haty wo eiwe­mo­syꞌat hap wywo ahiag hep hamuat miꞌi pote yn ni tuwẽtem maꞌato iũteꞌen ewehẽtup pote yt karãpe i eweimõto kuap meremo mekewat ahiag ewywuat e Iesui temiitꞌin me.

"

³⁰ Miꞌi hap totepyi toto Iesui towy­riaꞌin wywo yi Karireia sakpo i raꞌyn. Maꞌato yt tuwenoi i toto hamo iraniaꞌin me katu­pono temiitꞌin muꞌe hamo neꞌi tuweran toto."

³¹ Miꞌi hawyi muꞌap upi toiꞌa­tu­muꞌe muꞌe kahato raꞌyn towy­riaꞌin — Meiũran ti aru Uito Eheykeꞌet taꞌa­tu­pyhik hawyi uiꞌauka raꞌyn e. Miꞌi hawyi ti aru taꞌa­tusyp woꞌo­pyhyp hawe e. Miꞌi hawyi ti aru taꞌa­tusyp hawyi myeꞌym eꞌat yn ikuꞌuro mekepe e. Miꞌi hawyi ti aru maꞌato areĩneꞌen i raꞌyn guꞌuro pyi Uito Eheykeꞌet e."

³² Maꞌato mio tã e hap iwyriaꞌin yt tikuap i maꞌato apo yt iꞌatuꞌe i katu­pono teꞌe­ro­kenꞌẽ haype apoꞌi­ꞌa­tuꞌe hap pupi.

"

³³ Miꞌi hawyi putꞌokꞌe Iesui temiitꞌin wywo getap we hawyi apoꞌe temiitꞌin me — Mehĩꞌin e kat eweiꞌeĩ eiwo­ꞌope ehehay muꞌap upi e."

³⁴ Maꞌato yt taꞌa­tu­wesat teran i katu­pono toꞌoehay moweu­kaꞌi neꞌi — Uito ti wakuat no poꞌog eikai iꞌatuꞌe toꞌope wen."

³⁵ Miꞌi hawyi taꞌapyk taꞌyn Iesui hawyi toiꞌa­tu­kaykay temiitꞌin 12 ok takaria hawyi tohenoi iꞌatuepe — Poꞌog nakano ereĩneꞌen neran mote ereĩneꞌen no wuatꞌi miit eropat hano wuatꞌi miitꞌin miat motpap nug hano. Miꞌi hawyi poꞌog ereĩneꞌen Tupana wanẽtup hawe e Iesui temiitꞌin me iꞌewyte ahepe."

³⁶ Miꞌi hawyi hirakat toipo­rokpun iꞌatu­py­ꞌa­setpe hawyi toiꞌa­hi­ꞌy­pysat hawyi toꞌe towy­riaꞌin me."

³⁷ — Uwe uwe ti aru uhetiano wẽtup ok hirakat kyꞌe meikowat ewy e miꞌi hat wyti uikyꞌe hano topy­huꞌat e. Iꞌewyte uwe uwe uikyꞌe hat toĩneꞌen miꞌi hat ti aru yt Uito yn i uikyꞌe maꞌato Uipo­ꞌoro hat Tupana kyꞌe hano topy­huꞌat wy e.

"

³⁸ Miꞌi hawyi iwy ok Iuwãu toꞌe — Woꞌo­muꞌe hat gaꞌatpo uruta­ꞌa­kasa wẽtup ok ahiag sopo eset wuat hat e. Miꞌi hawyi wãiꞌu­ru­toꞌe katu­pono yt aiwywuat hewyry rakat i pote e."

³⁹ Miꞌi hawyi Iesui tiwesat — Yt naku i wãiwa­toꞌe wẽtup ok pe uhet wuat ahiag sopo hat e katu­pono atiky­ꞌesat miꞌi ewywuat nug hap. Kat pote uhet wuat ahiag sopo haria yt teꞌe­ru­we­ky­ryꞌi kuap i uhet esaika hap ete e."

⁴⁰ Miꞌi pote uwe uwe uhehay etiat uhet etiat yt ipyꞌahak i rakat miꞌi hat aiwywuat hewyry rakat ewy toĩneꞌen e Iesui."

⁴¹ Taꞌi uwe uwe ehepe hum yꞌy wẽtup ekuiꞌa yn uhemiitꞌin eipe pote miꞌi hat ti aru haipepiat ipuẽti haꞌup Tupana piat e."

⁴² Uiwy­riaꞌin e taꞌi yt naku i kahato wato­py­huꞌat ihy pya pe nu wato aipiit ete saitynug wo katu­pono miꞌi hap ewy hawyi aiku­ꞌuro hap yn topy­huꞌat. Mekewat nu ipotyi rakat aipiit ete pote yt watoꞌam kuap i ihy pya pyi hawyi. Maꞌato poꞌog yt naku i miꞌi hap kai topy­huꞌat aru hira­karia uimohey haria maꞌat haria e."

⁴³ Maꞌato eipo wo eweimaꞌat hirakat pote waku eweitek eipo e. Katu­pono poꞌog waku eiwe­hytꞌok Tupana etawa pe wẽtup eipo wywo yn maꞌato typy eipo wywo eiwe­hytꞌok aria pe neꞌi e."

⁴⁴ Taꞌi yt naku i ti eiwe­hytꞌok hamuat aikope aria yt hasep i hawe aikope ut yt topap i hawe e. Iꞌewyte eipy wo eweimaꞌat hirakat wẽtup muꞌap upi miꞌi ti waku eweitek eipy e."

⁴⁵ Katu­pono poꞌog waku eiwe­hytꞌok Tupana etawa pe wẽtup eipy wywo yn maꞌato typy eipy wywo eiwe­hytꞌok aria pe neꞌi e. Miꞌi pote karãpe eipy ehewyry yt naku i nug hamuat poꞌog waku eweitek eipy eweiwat yt naku i nug hamuat kai are e Iesui ahepe."

⁴⁶ Taꞌi yt naku i ti eweikup­teꞌen hamuat aikope aria yt hasep i hawe aikope ut yt topap i hawe e."

⁴⁷ Iꞌewyte eweimaꞌat hirakat eheha wo miꞌi eheha waku eweihep o areꞌe e."

⁴⁸ Poꞌog waku wẽtup eheha wywo yn eiwe­hytꞌok aikope Tupana toĩneꞌen Morekuat no hawe. Iꞌewyte typy eheha wywo eiwe­hytꞌok aikope ut yt topap i rakat hap tote e Iesui tomohey haria hira­karia maꞌat haria pe.

"

⁴⁹ Miꞌi hawyi Iesui toꞌe temiitꞌin me — Taꞌi aria waku kahato aimiꞌu mokãꞌã hamo e."

⁵⁰ Iꞌewyte waku kahato ukyt yne mosẽꞌẽ hamo maꞌato ukyt yt hẽꞌẽ i rakanuat pote yt uwe i ikyꞌesat e. Uhytꞌiꞌin miꞌi hap ewy o eweikup­teꞌen aria ewy ukyt hẽꞌẽ rakat ewy wuatꞌi mosẽꞌẽ hamo e. Hẽꞌẽ kahato rakaria ewy o eweikup­teꞌen eiwo­ꞌope e. Yt eiwu­ꞌuka teiꞌo eiwo­ꞌope e Iesui temiitꞌin me e.

"

10

¹ Miꞌi hawyi Iesui toto i raꞌyn yi Iuteu kape. Miꞌi hawyi toto Iũtãu hy sakpo. Miꞌi hap tote teꞌe­ru­wa­ꞌa­tunug typyꞌi kahato howa kape. Miꞌi hawyi tohenoi henoi iꞌatuepe tomi­ky­ꞌesat ewy Tupana ehay."

² Miꞌi turan nagnia ehay enoi haria tõꞌẽ howa kape imaꞌat teran haype apoꞌi­ꞌa­tuꞌe — Uhyt urunãpin En sio waku apo urueha­ryꞌi wywo uruto­ꞌo­ꞌatoiat wẽtup ok wywuat i raꞌyn hamo iꞌatuꞌe Iesui pe."

³ Miꞌi hawyi Iesui tiꞌa­tu­wesat — Kat eĩ pono nimuat ahaꞌa­seꞌi Musei ainãpin miꞌi hap yt eweikuap i apoꞌe."

⁴ Miꞌi hawyi taꞌa­tu­wesat — Nimo Musei toꞌe — Eiwo­ꞌo­ꞌatoiat teran pote ewetunug miwan popera tote yt eiwo­ꞌo­wese i hap morekuat ehamo miꞌi hawyi ti waku eiwo­ꞌo­ꞌatoiat e Musei saꞌa­wyꞌi iꞌatuꞌe."

⁵ Maꞌato Iesui tiꞌa­tu­wesat — Eweikuap kat pote Musei einãpin mio tã e. Pyno ahenoi ehepe. Taꞌi yt eiwo­ꞌo­kyꞌe kuap i ti eipyꞌa heg mote. Miꞌi pote ti Musei mio tã e miwan me e."

⁶ Maꞌato saꞌa­wyꞌi sese ti yt miꞌi tã hin i katu­pono saꞌa­wyꞌi te ti Tupana tunug miit ipaꞌiat iwaryꞌi e."

⁷ Miꞌi tupono waku ihainia tiꞌatoiat toꞌywot toty hawyi teha­ryꞌi wywo toĩneꞌen e."

⁸ Miꞌi hawyi ihainia teha­ryꞌi wywo wẽtup piit ieĩneꞌen hap ewy raꞌyn topy­huꞌat e."

⁹ Miꞌi tupono yt eweitek teiꞌo Tupana mipoꞌi woꞌo­kyiꞌat hap e."

¹⁰ Getap wiat hawyi iwyriaꞌin apoꞌi­ꞌa­tuꞌe Iesui pe — Kat toꞌe hawe som mio tã iꞌatuꞌe."

¹¹ Miꞌi hawyi toiꞌa­tu­wesat — Uwe uwe teha­ryꞌi atoiat miꞌi hawyi toĩneꞌen wẽtup ok wywo i raꞌyn miꞌi hat ti yt naku i inug teha­ryꞌi saꞌa­wyꞌi pe Tupana wanẽtup hawe e."

¹² Iꞌewyte ti uwe teꞌaito atoiat miꞌi hawyi toĩneꞌen wẽtup ok wywo i raꞌyn miꞌi hat ti yt naku i inug teꞌaito saꞌa­wyꞌi pe Tupana wanẽtup hawe e. Miꞌi tã ti yt naku i kahato ewetunug uimohey haria eipe pote e Iesui.

"

¹³ Miꞌi hawyi miitꞌin teꞌe­ro­poꞌok teran hira­karia Iesui ewawi iꞌatue­waku topo wuat hamo. Maꞌato ipotmu­ꞌeria tiꞌa­tu­pyhyp hira­karia howawi waĩꞌi­ꞌa­tuꞌe."

¹⁴ Miꞌi pote ipyꞌahak Iesui temiitꞌin ete hawyi toꞌe — Tero tõꞌẽ uhowawi hira­karia e. Yt eweipyhyp teiꞌo uhowawi hira­karia pãi e. Katu­pono karãpe Tupana topy­huꞌat Wuatꞌi Ywania Miitꞌin Porekuat no miꞌi hap eꞌat pe hemiitꞌin imohey haria hira­karia ewy raꞌyn tukup­teꞌen hetama pe."

¹⁵ Pywo pe ti eweiwat teran aikope Tupana toĩneꞌen Morekuat no hap kape pote aikotã hira­karia tiky­ꞌesat tuwe­hytꞌok taꞌa­tuty taꞌat­ꞌywot kapiat hap ewy o eweiky­ꞌesat eiwe­hytꞌok hap maꞌato yt pote ti aru yt eiwe­hytꞌok hin i atipy pe e Iesui topot­mu­ꞌeria pe."

¹⁶ Miꞌi hawyi hira­karia toiꞌa­tu­ꞌok­hytsat hawyi topo wo toiꞌa­tue­waku.

"

¹⁷ Miꞌi hap totepyi Iesui toto raꞌyn. Miꞌi turan wẽtup ok hekat rakat punꞌe Iesui owawi muꞌap upi. Putꞌok­toꞌe hawyi tuwe­pỹ­ꞌã­tutuk howa kape. Miꞌi hawyi toꞌe — Woꞌo­muꞌe hat waku kahato En e. Miꞌi pote uimuꞌe katu­pono atiky­ꞌesat wyti areĩneꞌen wuatꞌi eꞌat piat hap e maꞌato yt atikuap i kahato kat som atunug waku haꞌup mo e. En ni wakuat kahato e."

¹⁸ Miꞌi hawyi Iesui toꞌe mekewat miit pe — Tupana yn ni wakuat e. Uito wakuat ereꞌe apo. Uito Tupana ewanẽtup hawe apo e."

¹⁹ Miꞌi hawyi Iesui toꞌe tope — Etikuap apo Tupana woꞌo­nãpin hap koꞌi yt erepot­ꞌauka teiꞌo e hap yt wẽtup ok wywo teiꞌo eharyꞌi eꞌaito e hap yt sero­ꞌok­ꞌere teiꞌo e hap yt eso teiꞌo e hap yt erepot­maꞌat teiꞌo e hap etimõ­typot eꞌywot ety e hap etikuap apoꞌe. Taꞌi mio tã e hap etikuap e Iesui kurum iwasu hekat rakat pe."

²⁰ Miꞌi hawyi kurum iwasu tiwesat — Taꞌi uihire pyi te ti yt atiꞌa­parap i mio tã e hap ete e."

²¹ Miꞌi hawyi Iesui tehaꞌat howawi ikyꞌe kahato hap wywo hawyi toꞌe — Mehĩ wẽtup mo etunug hawyi waku ereĩneꞌen neꞌen Tupana wywo e. Pyno motoro eꞌyat kape hawyi etimõꞌẽ yne ekareꞌen yt hekat i rakaria pe hawyi eraꞌaipok uhowawi ereto uhupi hamo e. Miꞌi pote ti aru ekareꞌen sese etipuẽti Tupana etama pe e."

²² Mio tã e Iesui pote paaꞌe neꞌi raꞌyn hawyi toto Iesui kaipyi yt iwepit i raꞌyn katu­pono iwat heka­reꞌen iwato kahato pote yt toimõꞌẽ teran i."

²³ Miꞌi hawyi Iesui tehaꞌat temiitꞌin kape hawyi toꞌe — Are pãi niatpo kahato ti rat weka­reꞌen kyꞌe haria tuwe­hytꞌok aikope Tupana toĩneꞌen Morekuat no hawe e."

²⁴ Miꞌi hawyi hemiitꞌin teꞌe­ru­we­wa­nẽtup kahato ihay kape miꞌi hawyi Iesui toꞌe i — Taꞌi niatpo kahato ti rat weka­reꞌen mohey hat teke aikope Tupana Morekuat no toĩneꞌen hawe e."

²⁵ Taꞌi niatpo kahato aikotã aihũ iwato rakat Kameru teke awi ehapo kaꞌa puo hap ewy e. Miꞌi hap ewy maꞌato ti poꞌog niatpo tuwe­hytꞌok Tupana etama pe weka­reꞌen mohey haria e temiitꞌin me."

²⁶ Miꞌi hawyi hemiitꞌin gytꞌi­ꞌa­tuꞌe i raꞌyn hawyi teꞌe­roꞌe toꞌope — Pyno yt uwe i hekat rakat pono teke kuap atipy pe iꞌatuꞌe. Miꞌi hawyi apoꞌi­ꞌa­tuꞌe Iesui pe — Yt uwe i aru pono hekat rakaria Tupana miꞌa­tue­ha­kye­raꞌat rakaria iꞌatuꞌe."

²⁷ Mio tã iꞌatuꞌe pote Iesui tehaꞌat iꞌatue­wawi hawyi toꞌe — Pywo ti rat yt uwe i tuwee­ha­kye­raꞌat kuap tuwewi. Tupana yn tiꞌa­tue­ha­kye­raꞌat kuap miitꞌin e."

²⁸ Miꞌi hawyi Peteru toꞌe raꞌyn — Urumuꞌe hat saꞌa­wyꞌi te ti uruꞌatoiat yne meimuẽwuat koꞌi uruekat eupiat urutuwat hamo e Peteru Iesui pe."

²⁹ Miꞌi hawyi Iesui toꞌe — Atikuap eimi­ꞌatoiat yne hap e. Taꞌi pywo ti rat areꞌe ehepe uwe uwe uhehay moherep wẽtup ywania pe toto uikyꞌe haype hawyi iꞌatoiat toꞌyat towy­riaꞌin toty toꞌywot tomẽ­pytꞌin tomikoi koꞌi miꞌi hat poꞌog toipuẽti saꞌa­wy­ꞌiwuat wakuat tomi­ꞌatoiat hap koꞌi kai e."

³⁰ Miꞌi hawyi toipuẽti mesu­wa­rotiat koꞌi kai poꞌog poꞌog naꞌyn saꞌa­wy­ꞌiwuat kai aikotã 100 hap ewy aru toipuẽti toꞌyat koꞌi towy­riaꞌin totyꞌin tomẽ­pytꞌin tomikoi koꞌi saꞌa­wy­ꞌiwuat wẽtup takat tomi­ꞌatoiat kai 100 hap ewy aru toiꞌa­tu­puẽti e. Iꞌewyte ti aru eweipuẽti miitꞌin miky­ryꞌi hap uhehay upi uhupi eweiwat pote e. Iꞌewyte mesu­wa­rotiat toku­ꞌuro hap saipepiat toipuẽti hamuat toieĩneꞌen hap yt sakewuat ikahuro rakat i raꞌyn e."

³¹ Mekewat eꞌat pe ti aru ipoity kahato saꞌa­wy­ꞌiwuat mesu­wa­ro­tiaria iwato rakaria teꞌe­ro­py­huꞌat kurin rakaria wo yt miitꞌin mimõ­typot koꞌi i wo e. Maꞌato saꞌa­wy­ꞌiwuat kurin nakaria paaꞌe haria ti aru teꞌe­ro­py­huꞌat poꞌog iwato rakaria wo poꞌog mimõ­typot koꞌi wo wuatꞌi miitꞌin kai atipy pe e Iesui temiitꞌin me.

"

³² Miꞌi hawyi Iesui ipotꞌam towy­riaꞌin eꞌyianme tawa wato Ieru­sarẽi kape. Miꞌi hawyi teꞌe­ro­kenꞌẽ kahato ipotmu­ꞌeria iꞌewyte iꞌatu­wuwu kahato katu­pono — Taꞌi itote tukup­teꞌen aiꞌauka teran haria iꞌatuꞌe toꞌope. Miꞌi pote toiꞌa­tu­kaykay tuwe­wawi temiitꞌin hawyi tohenoi iꞌatuepe aikotã aikotã tawa wato Ieru­sarẽi miaria tunug tuwetiat hamuat."

³³ — Wato hamuat wyti tawa Ieru­sarẽi kape e. Putꞌok­wa­toꞌe itote hawyi ti aru Uito Eheykeꞌet paꞌi kororia miwan enoi haria uipag naꞌyn sura­raꞌin po pe raꞌyn e. Miꞌi hawyi miꞌiria ti aru uipo­ꞌoro raꞌyn uiꞌauka hamuat kape e hawyi ti aru iraniaꞌin ywania po pe uipag uiꞌauka hamo e. Miꞌi hawyi teꞌe­rehay miky­ryꞌi kahato uhete."

³⁴ Iꞌewyte kuitu­ꞌi­ꞌa­tuꞌe uhete e. Miꞌi hawyi ti aru uipokpok taꞌyn hawyi ti aru uiꞌauka raꞌyn wen maꞌato ti aru myeꞌym eꞌat yn areĩneꞌen guꞌuro pe hawyi ti aru areĩneꞌen i raꞌyn Uito Eheykeꞌet e Iesui muꞌap upi tawa Ieru­sarẽi kapiat tuwat hap upi.

"

³⁵ Miꞌi hawyi hemiitꞌin Iuwãu Tiaku Sepeteu saꞌy­ruꞌin tuwat Iesui kape hawyi taꞌa­tu­hẽtup tope — Urumuꞌe hat etum uruepe kat urumi­ky­ꞌesat ok tã iꞌatuꞌe."

³⁶ Miꞌi hawyi toꞌe — Pyno kat som eweiky­ꞌesat atum ehepe e."

³⁷ Miꞌi hawyi taꞌa­tu­wesat — Pyno karãpe eropy­huꞌat Wuatꞌi Miitꞌin Porekuat no miꞌi turan ni aru uruiky­ꞌesat uruta­ꞌapyk poꞌog eꞌyatype etuꞌi­saria wo emimõ­typot koꞌi iraniaꞌin kai iꞌatuꞌe."

³⁸ Maꞌato Iesui tiꞌa­tu­wesat — U yt eweikuap i kahato kat som ewehẽtup uhepe hap e. Pyno uhekuiꞌa pyi apo eiwe­ꞌy­ꞌukuap e. Uhatek hap apo ewehãꞌãg kuap e."

³⁹ Miꞌi hawyi taꞌa­tu­wesat — Taꞌi uruhepap kahato iꞌatuꞌe."

⁴⁰ Miꞌi hawyi Iesui toꞌe — Pywo eiwe­ꞌyꞌu aru ti uhekuiꞌa pyi iꞌewyte ewehãꞌãg irane uhatek hap e maꞌato eimiẽtup uhepiat ti yt atum kuap i ehepe katu­pono Tupana tiꞌairo yn naꞌyn uiꞌya­typiat apyk hanuaria e Iesui Tiaku Iuwãu pe."

⁴¹ Mio tã iꞌatuꞌe taꞌa­tu­hẽtup Iesui piat pote iraniaꞌin hemiitꞌin iꞌatu­py­ꞌahak Iuwãu Tiaku ete."

⁴² Miꞌi hawyi Iesui tiꞌa­tu­kaykay i raꞌyn tuwe­wawi hawyi toꞌe iꞌatuepe — Uheka­tu­wyria e eweikuap apo aikotã mesu­wa­rotiat more­kuaria teꞌe­ru­we­mo­wato kahato hap e. Taꞌi taꞌa­tu­po­ꞌoro kahato ti taꞌa­tue­miitꞌin sehay pirik wo e."

⁴³ Maꞌato mesu­wa­ro­tiaria epore­kuaria ewy yt atiky­ꞌesat hin i eweikup­teꞌen e. Maꞌato uwe wemo­wato teran hat wuatꞌi powyro hano atiky­ꞌesat e."

⁴⁴ Uwe topy­huꞌat eiꞌakag wo teran miꞌi hat waku topy­huꞌat ehemiit no Eheykeꞌet ewy e. Katu­pono Uito Eheykeꞌet ariot mesuwat yi kape miitꞌin eropat hamo e. Maꞌato yt miitꞌin miat uheropat hamo i ariot mesuwe e."

⁴⁵ Taꞌi miitꞌin hep yt nakuap i pywiat hamo ariot ehowawi e. Taꞌi uheĩneꞌen hap atum irane wuatꞌi miitꞌin kyiꞌat Tupana wanuat saꞌup mo atum uhuu e Iesui topot­mu­ꞌeria pe.

"

⁴⁶ Miꞌi hawyi Iesui putꞌokꞌe i tawa Ieriko pe temiitꞌin nywo. Miꞌi hawyi tuwe­nõꞌẽ mekewat tawa pyi miitꞌin tok puo. Miꞌi hawyi tawa ekuekai muꞌap tote toĩneꞌen mehĩ Patimeu apyk pe. Miꞌi ti yt iha pytig i. Wuatꞌi kaipywiat kat ẽtup hat toĩneꞌen. Miꞌi ti Timeu saꞌyru."

⁴⁷ Miꞌi hawyi toikuap taꞌyn Iesui tawa Nasare piat ut hap hawyi tohẽtup haty wo Iesui pe — Morekuat Tawi Saꞌyru uheha­kye­raꞌat En e."

⁴⁸ Maꞌato so iraniaꞌin — Wãiꞌi­ꞌa­tuꞌe ehay pirik kahato. Epoꞌinik to iꞌatuꞌe. Maꞌato poꞌog neꞌi haty wo iwẽpapꞌi tuwatka watka — Morekuat Tawi Saꞌyru uheha­kye­raꞌat En e Iesui pe."

⁴⁹ Miꞌi hawyi Iesui topy­huꞌat hawyi toꞌe — Eweikaykay ro meikowo yt iha pytig i rakat e iꞌatuepe. Miꞌi hawyi teꞌe­roꞌe Patimeu pe — Iesui ekaykay raꞌyn koitywy uhyt mimi iꞌatuꞌe. Pyno epoĩꞌãm no ereto ro ewepit ro iꞌatuꞌe."

⁵⁰ Toikuap hawyi topysop toipun hawyi ipoĩꞌãm pesoꞌe hawyi toto raꞌyn Iesui kape."

⁵¹ Miꞌi hawyi apoꞌe Iesui tope — Pyno kat aru emiky­ꞌesat atunug epe e. Miꞌi hawyi toiwesat — Woꞌo­muꞌe hat uheha pakup i nug hap atiky­ꞌesat e."

⁵² Miꞌi hawyi Iesui toꞌe tope — Pyno koitywy waku raꞌyn eha ete katu­pono uimohey hap emoehãite raꞌyn e. Miꞌi hawyi meremo waku raꞌyn tuete taꞌa­kasa i raꞌyn. Miꞌi hawyi Patimeu toto muꞌap upi Iesui upi saꞌa­wy­ꞌiwuat yt iha pytig i rakat.

"

11

¹ Miꞌi hawyi Iesui toto i raꞌyn tawa wato Ieru­sarẽi kape towy­riaꞌin wywo. Putꞌok­toꞌe mekewat yityꞌok Uriweira ypia yityꞌok hap het rakat tote hawyi teꞌe­raꞌam hawyi teꞌe­ro­py­huꞌat mekewat yityꞌok tote. Yt pya hin i raꞌyn tawa wato Ieru­sarẽi kai tawa Pewake kai tawa Petania kai tukup­teꞌen itote."

² Miꞌi totepyi toiꞌa­tu­po­ꞌoro typy ok temiit tawa Ieru­sarẽi kape — Eweiwat ro mekewat tawa kape hawyi putꞌok­ꞌe­weiꞌe hawyi aru eweiꞌa­kasa aru wẽtup iꞌatuhũ Iumentu mẽpyt taꞌa­saity piat eweipuẽti aru e. Mekewat iꞌatuhũ Iumentu mẽpyt pakup takat toĩneꞌen katu­pono yt uwe i hewyry itotiat rakat te toĩneꞌen iꞌatuhũ e. Pyno miꞌi hawyi o waku eweiꞌa­sai­typok hawyi o eweterut raꞌyn iꞌatuhũ uhowawi katu­pono uhewyry teran mekewat Iumentu mẽpyt rote areto tawa wato Ieru­sarẽi kape teran e Iesui typy ok temiitꞌin me."

³ Miꞌi hawyi toꞌe i tomi­po­ꞌoro koꞌi pe — Taꞌa­tukuap teran aru — Kat hamoĩ ewetioto uruhũ iꞌatuꞌe hawyi waku eweiꞌe aru — Aika­ꞌiwat wyti ipuru porapꞌi eihũ uhytꞌiꞌin waku eweiꞌe o ikaꞌi­waria pe e Iesui typy ok tomi­po­ꞌo­roria pe."

⁴ Miꞌi hawyi tuwat raꞌyn hawyi miꞌi Iesui e hap ewy raꞌyn taꞌa­tu­puẽti itote iꞌatuhũ Iumentu taꞌa­saity pe muꞌap tote oken note."

⁵ Miꞌi hawyi taꞌa­tu­ꞌa­sai­typok pote itotiaria apoꞌi­ꞌa­tuꞌe — Kat hamoĩ ewetioto uruhũ iꞌatuꞌe."

⁶ Miꞌi hawyi taꞌa­tu­wesat — Aika­ꞌiwat Iesui wyti ipuru meremo iꞌatuꞌe. Miꞌi hawyi so — Pyno waku iꞌatuꞌe."

⁷ Miꞌi hawyi ti tuwat raꞌyn iꞌatuhũ wywo Iesui kape. Putꞌok­ꞌi­ꞌa­tuꞌe hawyi taꞌa­tu­po­rokpun iꞌok tote taꞌa­tue­sokpe koꞌi iꞌatuhũ tote. Miꞌi hawyi Iesui taꞌam naꞌyn apyk pe mekewat Iumentu pakup ok tote."

⁸ Miꞌi hawyi iraniaꞌin iporokpun taꞌa­tue­sokpe yi upi. Taꞌa­tu­terek iꞌyhop koꞌi haga koꞌi gaꞌa­koran koꞌi hawyi taꞌa­tu­po­rokpun howa kai ipuꞌap mokahu hamo more­kuaria puꞌap ewy."

⁹ Miꞌi hawyi yianmiaria watꞌy­muaria teꞌe­rehum taꞌa­tuehay wepit wywo — Taꞌi waku kahato ti Tupana iꞌatuꞌe. Meiũwat Miit ti Tupana Mimõ­typot iꞌatuꞌe."

¹⁰ Meiũwat Miit ri Tupana Mipo­ꞌoro Aipo­rekuat nuat aikotã morekuat Tawi ewywanuat iꞌatuꞌe. Toꞌiro Tupana Mipo­ꞌoro Morekuat Tawi Saipepiat sese mõtypot hamo iꞌatuꞌe mekewat muꞌap upiaria sem tuwat tuwat Iesui upi tawa wato Ieru­sarẽi kape turan."

¹¹ Putꞌokꞌe tawa wato Ieru­sarẽi me hawyi Iesui teke Tupana mõtypot hawe. Miꞌi hawyi tehaꞌat yne hawyi toto i tawa wato Ieru­sarẽi myi wãtym neran moityꞌi pote toto mekewat tawa hit Petania kape temiitꞌin 12 ok takaria wywo.

"

¹² Heꞌi­hotꞌok pe tawa Petania kaipyi taꞌaipok i raꞌyn Ieru­sarẽi kape. Miꞌi hap tote muꞌap upi Iesui hesyꞌat kahato raꞌyn."

¹³ Miꞌi hawyi taꞌa­kasa Wiku yp kape pya wuat kape iꞌyhop kahuria rakat kape. Miꞌi hawyi toto haat kyꞌewi maꞌato yt kat i haat toipuẽti. Iꞌyhop yn toipuẽti hesyꞌat turan. Yt haat rakat i."

¹⁴ Miꞌi hawyi Iesui toꞌe Wiku yp we hawyi — Are pãi e pyno miꞌi hawyi wyti aru yt sake i raꞌyn esaat e. Yt uwe i raꞌyn ti aru esaatꞌu e tesyꞌat hap wywo te. Mio tã e hap hemiitꞌin tikuap.

"

¹⁵ Miꞌi hawyi Iesui toto temiitꞌin wywo i raꞌyn Ieru­sarẽi kape. Putꞌok­ta­ꞌa­tuꞌe hawyi tuwe­hytꞌok i raꞌyn Tupana mõtypot yat wato pe. Miꞌi turan kareꞌen kyiꞌat haria wene­ruꞌi wene­ruꞌi e haria tukup­teꞌen itote typyꞌi kahato toipuẽti. Miꞌi hawyi Iesui tiꞌa­tu­po­re­nõtem i raꞌyn miꞌiria Tupana mõtypot yat wato hawyi. Miꞌi hawyi Iesui iꞌatue­ti­neiru patꞌok patꞌok hap mesa yparakai koꞌi tohytpok yne. Miꞌi hawyi pykasu weneru haria eꞌamyap koꞌi tohytpok yne. Toiꞌa­tu­sopo yne iꞌatukat weneru haria."

¹⁶ Miꞌi hawyi herut haria toiꞌa­tu­pyhyp taꞌyn yt toiky­ꞌesat i raꞌyn Tupana mõtypot yat wato eꞌokipy sakpo toko­kaꞌat."

¹⁷ Miꞌi hawyi miꞌi haria toiꞌa­tu­nãpin haty wo — Yt eweikuap i apo aikotã Tupana toꞌe Isaia miwan me — Uiꞌyat rat ri atiky­ꞌesat wuatꞌi ywania ehay uhowawiat hamuat e. Maꞌato ti Tupana mõtypot yat ewetunug sero­ꞌokꞌe haria yat no neꞌi are e. Yt naku i kahato ewetunug are e Iesui Tupana mõtypot yat piaria kareꞌen weneru haria pe."

¹⁸ Miꞌi tã naꞌyn tutnug mote miwan enoi haria paꞌi akagnia tikat kahato raꞌyn aikotã miat iꞌauka hamuat maꞌato teꞌe­ro­kenꞌẽ Iesui pupi kat pote typyꞌi poityꞌi ihay upiaria pote."

¹⁹ Miꞌi hawyi wãtymꞌi irane hawyi toto Iesui tawa Ieru­sarẽi myi temiitꞌin wywo.

"

²⁰ Miꞌi hawyi heꞌi­hotꞌok pe hunete Iesui toto i raꞌyn towy­riaꞌin nywo Ieru­sarẽi kape. Miꞌi hawyi muꞌap upi iwyriaꞌin teꞌe­ra­haꞌat i mekewat Wiku yp kape. Miꞌi turan iꞌyp gag naꞌyn hapo wywo raꞌyn."

²¹ Miꞌi hawyi ti Peteru toꞌe — Urumuꞌe hat mekewat Wiku yp ikuꞌuro raꞌyn emisa­tyꞌi satyꞌi e."

²² Miꞌi hawyi Iesui tiꞌa­tu­nãpin — Taꞌi eweimohey ro Tupana haty wo e."

²³ Pywo pe ti areꞌe ehepe uwe uwe meiũwat yityꞌok wato rakat ewywuat pe toꞌe — Ereto ro meiũpepyi yꞌy wato kape hawyi minꞌere ro yꞌy wato pe imohey hap wywo yn miꞌi pote ti aru topopy raꞌyn meremo yityꞌok yꞌy wato kape hawyi minꞌe imohey hap ok tã are e."

²⁴ Miꞌi tupono ti karãpeĩ eimi­ky­ꞌesat ehẽtup Tupana pe imohey hap wywo eweiꞌe ro eipyꞌa pe — Tut aru tut aru pãi tut aru an uimiẽtup ewywuat eweiꞌe ro eipyꞌa pe e. Katu­pono imohey hap wywo ehẽtup Tupana pe pote eimiẽtup ewy tutunug ehepiat tomohey hap ok tã tutunug. Miꞌi pote ti meremo aru eipo pe raꞌyn eimi­ky­ꞌesat toĩneꞌen Tupana miium emiẽtup hap ok tã."

²⁵ Pyno Tupana kapiat ehehay hamo eweimo­hãpyk to eipyꞌa piat yt eiwo­ꞌo­wese i hap koꞌi miꞌi pote ti aru Eiꞌywot atipy piat timo­hãpyk yne eiminug yt nakuap i koꞌi e."

²⁶ Maꞌato yt waure wo i eweikup­teꞌen mote ti aru Eiꞌywot atipy piat iꞌewyte yt waure wo i toĩneꞌen eiminug saꞌag koꞌi ete e Iesui temiitꞌin me Wiku yp gag naꞌyn hap tote apoꞌe haria pe.

"

²⁷ Miꞌi hawyi putꞌokꞌe i raꞌyn Iesui tawa wato Ieru­sarẽi me. Miꞌi hawyi Tupana mõtypot hap yat puo hewyry. Miꞌi hawyi paꞌi akag koꞌi seko miwan enoi haria iꞌewyte nagnia tipuẽti Iesui itote."

²⁸ Miꞌi hawyi apoꞌi­ꞌa­tuꞌe Iesui pe"

²⁹ — Uweĩ epoꞌoro gaꞌatpo meketã nug hamo Tupana mõtypot yat pyi uruemiitꞌin sopo hamo iꞌatuꞌe."

³⁰ Miꞌi hawyi Iesui tiꞌa­tu­wesat — Pyno ahenoi aru ehepe wen maꞌato saꞌa­wyꞌi ewehenoi uhepe uwe ipoꞌoro Iuwãu woꞌo­setꞌok hamo sio Tupana sio miitꞌin e Iesui."

³¹ Miꞌi hawyi taꞌa­tukat Iesui wesat hamuat hap. Miꞌi hawyi teꞌe­ru­wa­nẽtup — Kat watoꞌe som waku wati­wesat iꞌatuꞌe. Sio Tupana ti Iuwãu poꞌoro hat watoꞌe pote ti ren — Kat poteĩ pyno yt eweimohey i Iuwãu e aru ahepe."

³² Maꞌato miitꞌin mipo­ꞌoro ti Iuwãu watoꞌe pote aru iꞌatu­py­ꞌahak ahete iraniaꞌin katu­pono iraniaꞌin Iuwãu mohey haria tukup­teꞌen iꞌatuꞌe toꞌope."

³³ Miꞌi hawyi taꞌa­tu­wesat Iesui — Uhyt yt uruikuap i sese uwe ehay pyi Iuwãu topot­setꞌok iꞌatuꞌe. Miꞌi pote Iesui tiꞌa­tu­wesat — Yt uiwesat i pote miꞌi hawyi yt ahenoi i ehepe uwe ehay pyi atiꞌa­tu­sopo wene­ruꞌi wene­ru­ꞌiꞌe haria pya Tupana mõtypot yat pyi hap e Iesui paꞌi akag koꞌi miwan enoi haria pe.

"

12

¹ Miꞌi hawyi Iesui henoi hãꞌãkap wuo iꞌatuepe sehay — Wẽtup eꞌat pe so wẽtup ok miit tuwa­nẽtup Uwa ypia nug tepiat hap ete e. Miꞌi hawyi toikoi hawyi toiꞌa­tu­pyhyp kurara wato pe hawyi tutunug nu kaꞌa wato Uwa hy sat hamuat e. Miꞌi hawyi so iꞌypia pyꞌa­setpe tuwe­py­typnug ywaiti rakat surara eiam Uwa u haria pupi Uwa eroꞌok haria pupi e."

² Hãpyk yne hawyi ipotpap takaria po pe raꞌyn toipuru. Miꞌi hawyi so toto raꞌyn tewyry hamo e. Meiũran haat hap eꞌat pe so toipo­ꞌoro wẽtup ok temiit Uwa poꞌok hamo e."

³ Miꞌi hawyi putꞌokꞌe ipotpo­ꞌoro imikoi ypia pe maꞌato yt iꞌatu­wese i raꞌyn imipo­ꞌoro ete. Yt taꞌatuium neran i raꞌyn taꞌa­tu­mi­poꞌok e. Miꞌi hawyi taꞌa­tu­pytyk hawyi taꞌa­tu­pokpok kahato raꞌyn. Miꞌi hawyi taꞌa­tu­po­re­ra­ꞌaipok yt kat nywo i raꞌyn e."

⁴ Miꞌi hawyi wẽtup ok temiit i raꞌyn ikaꞌiwat tipo­ꞌoro maꞌato iꞌewyte miꞌi ipotpap takaria tiꞌahyk ahyk iꞌakag ete e. Miꞌi hawyi iꞌatu­mi­ky­ryꞌi wo neꞌi raꞌyn."

⁵ Miꞌi hawyi wẽtup ok temiit i raꞌyn toipo­ꞌoro. Miꞌi ti taꞌa­tu­ꞌauka raꞌyn e. Miꞌi hawyi iraniaꞌin i raꞌyn toiꞌa­tu­po­ꞌoro maꞌato iꞌewyte te taꞌa­tunug iraniaꞌin taꞌa­tu­ꞌahyk ahyk iraniaꞌin taꞌa­tu­ꞌa­tu­ꞌuka neꞌi raꞌyn e Iesui."

⁶ Miꞌi hawyi Haꞌyru yn naꞌyn topy­huꞌat Imikyꞌe kahato. Miꞌi ti maꞌato toipo­ꞌoro — Taꞌi Uhaꞌyru sese tupono ti aru taꞌa­tu­mõ­typot kahato raꞌyn Miꞌi Miit rat pãi e so tuwa­nẽtup hawe e."

⁷ Maꞌato ti yt hin i. Miꞌi hawyi teꞌe­roꞌe toꞌope — Toꞌiro wati­ꞌauka Iꞌypia Kaꞌiwat Saꞌyru iꞌatuꞌe. Katu­pono ti aru meiũran Miꞌi raꞌyn Ikaꞌiwat Pakup mo iꞌatuꞌe. Wati­ꞌauka hawyi mono aipo pe yne raꞌyn topy­huꞌat mesuwat mikoi ypia iꞌatuꞌe neꞌi toꞌope e Iesui tuwepiat."

⁸ Miꞌi hawyi taꞌa­tu­ꞌauka raꞌyn Haꞌyru hawyi taꞌa­tu­pugha ipiit mikoi iꞌypia kaipyi e."

⁹ Miꞌi hawyi Iesui toꞌe — Kat aru miꞌi hawyi mikoi ypia Kaꞌiwat tunug Tosa­ꞌyru auka haria ete e. Taꞌi tut hawyi ti aru toiꞌa­tu­ꞌuka miꞌiria hawyi ti aru wẽtup ywania po pe i raꞌyn toipuru teꞌyi e Iesui nagnia pe toꞌauka teran haria pe."

¹⁰ Miꞌi hawyi Iesui toꞌe iꞌatuepe — Yt karãmuo i apo eiwe­muꞌe miwan me aikotã Tupana toꞌe saꞌa­wy­ꞌiwuat hap ete — Meiũran aru Wẽtup ok Uimi­ꞌairo iꞌapy­ꞌyha ewywuat netap nug haria yt tiky­ꞌesat i uimõ­typot yat nug hamo e Iesui. Maꞌato miꞌi ti aru topy­huꞌat netap akywyt yp mo ipoꞌog hesaika iraniaꞌin kai e."

¹¹ Miꞌi wyti Aipo­typot minug ikahu kahato rakat atipuẽti e. Miꞌi wyti aru akywyt yp mo ahaꞌa­wynug uimõ­typot yat sese uiꞌyat nug haria yt tiky­ꞌesat i pytkai e ti miwan me e morekuat Tawi miwan 118.22 pe."

¹² Mio tã e pote hewa­nĩ­kaptia teꞌe­ru­wa­nẽtup kahato hawyi teꞌe­roꞌe — Ahete ti mio ihay yt wati­ky­ꞌesat i Iesui pote iꞌatuꞌe. Miꞌi pote taꞌa­tu­pytyk teran Iesui maꞌato typyꞌi poityꞌi iwyriaꞌin pote teꞌe­ro­kenꞌẽ hawyi tuwat Iesui yaty­pepyi.

"

¹³ Miꞌi hawyi meiũran morekuat Eroti emiit taꞌa­tu­po­ꞌoro Iesui kape nagnia ehay enoi haria Iesui ehay aparap taꞌa­tuehay wuat hamo tuwat."

¹⁴ Miꞌi hawyi apoꞌi­ꞌa­tuꞌe — Woꞌo­muꞌe hat iꞌatuꞌe taꞌi uruikuap En. Pywo ti ehenoi hãpyk yn Tupana kapiat puꞌap wuatꞌi miitꞌin me katu­pono yt uwe pupi i erekenꞌẽ iꞌatuꞌe. Wẽtup ehay yn ehenoi wuatꞌi miitꞌin iꞌatuꞌe. Miꞌi tupono urunãpin En. Waku apo aheti­neiru wati­patꞌok morekuat wato Sesa pe sio yt iꞌatuꞌe Iesui pe."

¹⁵ Maꞌato Iesui tikuap toiãꞌãg neꞌi hap morekuat mõpy­ꞌahak hap. Miꞌi hawyi toiꞌa­tu­wesat — Kat poteĩ mio tã eweiꞌe sio apo uhãꞌãg hap e. Eweterut ro uhepe tineiru iꞌape rakat araꞌa­kasa mono pyno e Iesui apoꞌe haria pe."

¹⁶ Miꞌi hawyi taꞌa­tu­ꞌerut raꞌyn hawyi Iesui apoꞌe iꞌatuepe — Uwe iãꞌãkap kahu pyno meiũ tineiru ete toset wywo e. Miꞌi hawyi taꞌa­tu­wesat — Taꞌi morekuat wato Sesa iãꞌãkap ti iꞌatuꞌe."

¹⁷ Miꞌi hawyi Iesui toꞌe — Pyno waku watum morekuat wato pe towanuat koꞌi saꞌup e. Maꞌato Tupana wanuat koꞌi saꞌup waku watum Tupana pe e. Miꞌi hawyi mio tã e Iesui pote teꞌe­roꞌe toꞌope — Pywo ti rat ihay hãpyk kahato Iesui wyti iꞌatuꞌe. Taꞌi tuweꞌeg kahato ti ihay iꞌatuꞌe toꞌope Iesui ewanĩ­kaptia.

"

¹⁸ Wẽtup eꞌat pe hawyi tõꞌẽ Iesui kape woꞌo­muꞌe haria. Miꞌiria so miitꞌin muꞌe aiku­ꞌuro hawyi ti yt kat i raꞌyn aheĩneꞌen pakup i hap e haria. Miꞌiria so apoꞌi­ꞌa­tuꞌe Iesui pe."

¹⁹ — Woꞌo­muꞌe hat nimo te Musei miwan ainãpin hap mio tã e — Karãpe eheykeꞌet ikuꞌuro maꞌato yt kat i imẽpyt miꞌi pote waku hehiwu iywyt eharyꞌi wo ikuꞌuro rakat mẽpyt nug hamo e ti Musei mienoi nimuat Mekewat Musei miwan miat Teute­ru­numiu 25.5 pe iꞌatuꞌe."

²⁰ Miꞌi hawyi wẽtup eꞌat pe so iywyt sem nakaria toĩneꞌen. Miꞌi hawyi so iꞌatuy­keꞌet tipuẽti teha­ryꞌi maꞌato meiũran so ikuꞌuro yt imẽpyt i te turan iꞌatuꞌe."

²¹ Miꞌi hawyi so iywyt wywo i raꞌyn hehiwu toĩneꞌen iꞌatuꞌe. Miꞌi iꞌewyte yt imẽpyt i te turan so ikuꞌuro raꞌyn iꞌatuꞌe."

²² Meiũran 7 ok takat topap yne taꞌa­tue­hiwu yatype maꞌato yt wẽtup ok i imẽpyt topy­huꞌat iꞌatuꞌe Iesui pe. Miꞌi hawyi so ikuꞌuro raꞌyn iꞌatue­hiwu iꞌatuꞌe aiku­ꞌuro hawyi yt kat i aheineꞌen hap e haria Iesui pe."

²³ Miꞌi hawyi apoꞌi­ꞌa­tuꞌe Iesui pe — Atipy pe hawyi mekewat hiwu uwe teꞌaito wywo toĩneꞌen kat pote 7 heꞌaito toĩneꞌen mesuwe pote. Miꞌi hawyi apuru uwe wary wo mekewat hary­poria katu­pono 7 ok heꞌaito iꞌatuꞌe Iesui pe."

²⁴ Miꞌi hawyi Iesui tiꞌa­tu­wesat — Taꞌi eweiꞌa­parap kahato wyti katu­pono yt eweiwa­nẽtup hãpyk hin i wyti uhytꞌiꞌin e katu­pono Tupana mienoi yt eweikuap i kahato iꞌewyte Tupana esaika hap yt eweikuap i kahato e iꞌatuepe."

²⁵ Karãpeĩ tuwe­nõꞌẽ guꞌuro pyi miitꞌin miꞌi hawyi ti aikotã Tupana emiitꞌin atipy piaria ewy teꞌe­ro­py­huꞌat. Maꞌato yt heꞌaito rakaria i yt iwary rakaria wo i raꞌyn tukup­teꞌen itote e."

²⁶ Miꞌi hawyi Iesui toꞌe — Eipe ti aiku­ꞌuro hawyi ti yt kat i raꞌyn aheĩneꞌen pakup i hap e haria e. Pyno ahenoi teran wẽtup sehay ehepe guꞌuro pywiat aheĩneꞌen pakup i hap e. Yt karãmuo i apo eiwe­muꞌe Musei miwan ete aikotã ariaꞌyp wukꞌe hat kaipyi toꞌe Tupana Musei pe — Uito ti Aparãu eTupana Isaki eTupana Iako eTupana Uito e Tupana Musei pe saꞌa­wyꞌi e Esutu 3.6 pe."

²⁷ Miꞌi tupono areꞌe ehepe Tupana ti yt map haria eTupana i ti. Taꞌi uhytꞌiꞌin Tupana ti ieĩneꞌen haria eTupana yn hap watikuap e. Miꞌi pote Aparãu Isaki Iako yt karãpiat i ikuꞌuro raka­nuaria maꞌato wuatꞌi eꞌat piat ieĩneꞌen hanuaria miꞌiria e Iesui yt kat i aheĩneꞌen hap aiku­ꞌuro hawyi e haria pe.

"

²⁸ Miꞌi turan wẽtup ok miwan enoi hat tikuap yne Iesui wesat waku hap koꞌi pote apoꞌe Iesui pe — Uhyt e kat e hap som ewanẽtup hawe iraniaꞌin kai poꞌog iwato Tupana woꞌo­nãpin hap e."

²⁹ Miꞌi hawyi Iesui tiwesat — Pyno ahenoi poꞌog iwato rakat epe e. Mio tã e ti miwan me tohenoi Isareu ywania pe — Wẽtup Tupana yn ni toĩneꞌen e Aipo­typot no e."

³⁰ Tupana ro eweikyꞌe kahato yne yne eipyꞌa pe yne yne eiwa­nẽtup hawe yne yne eiweꞌeg hawe e ti e Musei tomiwan Teute­ru­mumia 6.5 pe e Iesui tope."

³¹ Miꞌi hawyi wẽtup woꞌo­nãpin hap toĩneꞌen porap iꞌewywuat — Etiꞌa­tu­kyꞌe miitꞌin iraniaꞌin aikotã aikotã ewekyꞌe hap ewy e Musei tomiwan Irewi­tiku 19.18 pe."

³² Yt kat i ti wẽtup poꞌog iwato woꞌo­nãpin hap mesuwat kawiat rakat e Iesui tiwesat."

³³ Miꞌi hawyi mekewat miwan enoi hat Iesui pe toꞌe — Taꞌi waku ti wati­kyꞌe Tupana yne yne aipyꞌa pe aiwa­nẽtup hawe aiweꞌeg hawe e iꞌewyte iraniaꞌin waku wati­ꞌa­tu­kyꞌe aiwe­kyꞌe hap ewy e. Pywo pe ti miꞌi poꞌog waku watunug ikamhig se wuk hamuat sio aihũ aimiium Tupana piat kai. Taꞌi poꞌog waku wati­kyꞌe Tupana aipyꞌa pyi e Iesui pe."

³⁴ Miꞌi hawyi Iesui tipuẽti iwesat hamuat ikahu rakat sehay. Miꞌi hawyi Iesui toꞌe tope — Taꞌi porap yn naꞌyn ni en Tupana emiit no e Iesui miwan enoi hat pe. Miꞌi hawyi yt taꞌa­tu­hãꞌãg poꞌog i Iesui ehay aparap taꞌa­tuehay wuat hamo katu­pono iwesat hap pupi teꞌe­re­mõti raꞌyn iwesat hap waku yne yne pote.

"

³⁵ Miꞌi hawyi toꞌe Iesui Tupana mõtypot yat piaria pe — Kat poteĩ einãpin haria mio tã iꞌatuꞌe ehepe — Wẽtup ok morekuat Tawi emiariru aru topy­huꞌat Wuatꞌi Miitꞌin Porekuat no iꞌatuꞌe ehepe e."

³⁶ Maꞌato nimo te Tupana Pãꞌãu mikuap morekuat Tawi toꞌe — Tupana ti toꞌe Uhetu­pana pe — Eraꞌapyk to uipo sese kai e. Miꞌi hawyi ti aru atiꞌa­tu­ꞌakit torania eꞌakit reran haria e. Miꞌi hawyi ti aru yt kat iꞌatuꞌe i raꞌyn ewanĩ­kaptia aru katu­pono atunik yne raꞌyn e wyti Tupana uhepe e morekuat Tawi e Iesui."

³⁷ — Kat poteĩ pyno Tawi emiariru yn topy­huꞌat Wuatꞌi Porekuat no eweiꞌe maꞌato Tawi toꞌe — Tupana ti toꞌe Uhetu­pana pe e e Iesui. Miꞌi hawyi mio tã e Iesui pote ti Tupana mõtypot hawiaria — Taꞌi ihay se kahato ti Iesui iꞌatuꞌe raꞌyn toꞌope.

"

³⁸ Miꞌi hawyi Iesui toꞌe — Eiweꞌeg wo o einãpin haria ran mupi e. Katu­pono sokpe kahuria puo teran ikohye­wyry miitꞌin koꞌi upi e. Miꞌi hawyi taꞌa­tu­ky­ꞌesat miitꞌin wẽpowat kahuria iꞌatu­ꞌe­ka­reꞌen kyiꞌat hap upi e."

³⁹ Iꞌewyte Tupana mõtypot hawe ienuk turan taꞌatueiam nug poꞌog waku iraniaꞌin kawiat hap taꞌa­tu­ky­ꞌesat e."

⁴⁰ Miꞌi hawyi hiwuria taꞌa­tu­maꞌat taꞌa­tuꞌyat koꞌi kape taꞌa­tue­roꞌok hamo e. Yt nakuaria i miꞌiria pote meiũran aru poꞌog miꞌiria Tupana tiꞌa­tu­mo­so­ꞌopot iraniaꞌin kai e. Eiweꞌeg wo o Tupana mõtypot yat piaria nãpin haria yt pywo i rakaria pupi e Iesui itotiaria pe.

"

⁴¹ Iesui henoi kahu raꞌyn hawyi taꞌapyk towy­riaꞌin nywo Tupana piat miium eiam yatype. Miꞌi hawyi miitꞌin terut terut taꞌa­tumiium Tupana pianuat koꞌi. Miꞌi hap kape Iesui ihaꞌat. Miꞌi turan hekat rakaria miium iwato raꞌyn."

⁴² Miꞌi turan wẽtup ok hiwu yt hekat i rakat iꞌatu­py­ꞌa­setpe hum tomiium kurin typy ape hit rakat yn tutum."

⁴³ Miꞌi hawyi Iesui tehaꞌat kahato hawyi teka­tu­wyria toiꞌa­tu­kaykay hawyi toꞌe iꞌatuepe — Ewehaꞌat ro mekewat hary­poria hiwu kape e. Pywo pe ti areꞌe ehepe mekewat hiwu yt hekat i rakat miium poꞌog iwato Tupana pe hekat rakaria wat kai e."

⁴⁴ Katu­pono hekat rakaria wyti hum Tupana pe taꞌa­tue­ti­neiru eĩpyt yn maꞌato mekewat hiwu tuwe­mi­ꞌu­kyiꞌat hamuat tutum yne yne Tupana pe e Iesui towy­riaꞌin me.

"

13

¹ Miꞌi hawyi Iesui toto meiẽwat Tupana mõtypot yat koro pyi. Miꞌi hawyi wẽtup ok ipotmuꞌe tuwẽ­powat Iesui kape — Woꞌo­muꞌe hat e erahaꞌat ro meikowo e ikahu kahato rasig Tupana mõtypot hap yat nu wato kawiat e."

² Miꞌi pote Iesui tiwesat — Taꞌi iwato kahato nu kawiat ikahu kahato e eraꞌa­kasa ro e. Maꞌato meiũran ti aru yt wẽtup i raꞌyn nu wato woꞌo­totiat totiat rakat topy­huꞌat e. Meiũran ti aru sura­raꞌin tiꞌa­tu­ꞌa­po­rokꞌe yne nu wato wuat Tupana mõtypot yat yt kat i topy­huꞌat meiũpe e Iesui topot­muꞌe haria pe."

³ Miꞌi hawyi tuwat raꞌyn Uriweira ypia yityꞌok kape raꞌyn. Miꞌi hawyi teꞌe­ra­ꞌapyk yityꞌok apypeke raꞌyn. Itote pyi heremo yne Tupana mõtypot yat nu wato kawiat koꞌi. Miꞌi hawyi ipotpo­ꞌo­roria Peteru Iuwãu Tiaku Ãtere taꞌa­tu­weran hawyi apoꞌi­ꞌa­tuꞌe Iesui pe — Urumuꞌe hat karãmuo aru meiẽwat Tupana mõtypot yat iꞌatu­ꞌa­po­rokꞌe iꞌatuꞌe."

⁴ Iꞌewyte aikotã aikotã aru uruta­ꞌa­kasa yian Tupana mõtypot hap yat aporokꞌe hamo iꞌatuꞌe. Miꞌi hap uruikuap teran mesup yianmete iꞌatuꞌe. Miꞌi hawyi ti aru karãpe hut hamuat hap uruikuap taꞌyn iꞌatuꞌe."

⁵ Miꞌi hawyi Iesui tiꞌa­tu­wesat — Uiwy­riaꞌin eiweꞌeg wo o katu­pono meiũran tut aru uhet eroꞌok haria — Meiũ raꞌyn Uito Iesui iꞌatuꞌe miitꞌin maꞌat reran haype e."

⁶ Uito ti Tupana Mipo­ꞌoro Miitꞌin Porekuat nuat raꞌyn iꞌatuꞌe ti aru miitꞌin me yt pywo pe i teꞌe­ro­pot­maꞌat neꞌi ti aru wẽtup muꞌap upi e."

⁷ Miꞌi hap upi ti aru toĩ wuꞌuka hap koꞌi wuatꞌi setama puo iꞌewyte ehetama puo iraniaꞌin etama puo wyti aru yne kaipyi wuꞌuka hap sehay eweikuap maꞌato o yt gytꞌe­weiꞌe teiꞌo katu­pono ti aru yt ikahuro hap i te e."

⁸ Iꞌewyte ti aru wẽtup ywania wẽtup ywania wywo ti aru toꞌo­ꞌa­tu­ꞌuka atuꞌuka iꞌewyte ti aru wẽtup setama wẽtup setama wywo toꞌo­ꞌa­tu­ꞌuka atuꞌuka yne mesuwat yi wato hap ok tã e. Miꞌi hap ewy ti aru aikope aikope yi huruk hurukꞌe. Miꞌi hawyi ti aru miitꞌin topap kahato yt kat i hin i miꞌu pote e. Maꞌato meiũran ti aru poꞌog poꞌog haty wo rakat tut e."

⁹ Eiwa­nẽtup kahato o katu­pono wyti aru ehum wanĩ­kaptia po pe raꞌyn eipe tuꞌi­saria po pe raꞌyn eipe e. Miꞌi hawyi eiꞌahyk ahyk wyti aru Tupana mõtypot hawe e. Miꞌi hawyi ti aru iꞌatu­po­rekuat po pe iꞌatue­tu­ꞌisa po pe raꞌyn eipe ehum uhetiat enoi iꞌatuepiat hamo e."

¹⁰ Mesuwat uhehay wakuap wyti aru wuatꞌi miitꞌin me yi wato ok tã tuwe­mo­herep ikahuro hap sese owakai te e."

¹¹ Miꞌi hawyi karãpe eipyhik ehehay kuap hamo miꞌi pote o yt eweikenꞌẽ teiꞌo miꞌi hap eꞌat pe are — Kat som pono aru waku areꞌe atiwesat pãi an yt eweiꞌe teiꞌo eipyꞌa pe katu­pono ti aru mekewat eꞌat pe Tupana Pãꞌãu ti aru eiwẽ pyi henoi e."

¹² Miꞌi hawyi ti aru toꞌo­kuasa toꞌo­ꞌauka toykeꞌet toywyt toinyt toty toꞌywot tomẽ­pytꞌin nywo yne yne wywo toꞌope toꞌope toꞌo­kuasa toꞌo­ꞌauka wyti aru e."

¹³ Katu­pono ti uimohey haria ti eipe miꞌi pote ti aru wuatꞌi iꞌatu­py­ꞌahak ehete e. Maꞌato uwe uwe taꞌa­tu­sa­tyꞌi satyꞌi pytkai yt uiwaure i wuatꞌi eꞌat pe miꞌi hat ti aru Tupana mieha­kye­raꞌat topy­huꞌat wuatꞌi eꞌat pe e Iesui.

"

¹⁴ Iwan miat woꞌo­muꞌe hat uito ti Maku. Mesuwe atiwan uimiwan me Iesui e hap. Eweikuap to kat e som Iesui toꞌe meiũpe hap. Mio tã e Iesui — Uiꞌy­wania saꞌawyꞌi Tupana ehay moherep hat aseꞌi Tanieu tiwan kahato ahaig mipoꞌoro wuatꞌi porekuat ran hap etiat. Miꞌi pote areꞌe ehepe karãpe ti aru eweiꞌa­kasa mekewat miit poꞌog poꞌog yt nakuat i rakat ahiag saꞌyru — UIto ti Tupana e hat yt teiam me i Tupana mõtypot yat wato pe wuatꞌi miitꞌin porekuat no hawyi o eiko­hyeput haty wo raꞌyn mekewat miit uhet ereꞌok saꞌag nakat pyi yityꞌok koꞌi kape hawyi eiwemig no yi kaꞌa koꞌi pe miꞌi hat pupi ahiag mote areꞌe e."

¹⁵ Eihyha wo ro eweinõꞌẽ. Yt eweiꞌaipok teiꞌo i raꞌyn o eiꞌyat kape eheka­reꞌen sat hamo e."

¹⁶ Eipotpap turanuat putꞌokꞌe pote o eiko­hyeput tawa Ieru­sarẽi myi o yityꞌok kape yn naꞌyn. Yt eweiꞌaipok i raꞌyn o ehesokpe pag hamo eiꞌyat kape e."

¹⁷ Mekewat eꞌat wyti aru yt naku i kahato mĩ u haria ete hupiꞌa rakaria ete e."

¹⁸ Ewehẽtup to Tupana pe — Yt etipo­ꞌoro teiꞌo mekewat hoꞌopot hap eꞌat sese iꞌaman mot pe eweiꞌe ro e."

¹⁹ Mekewat eꞌat ti aru poꞌog satek hap eꞌat wuatꞌi eꞌat kai Tupana piat yi nug hawyi te mesup te aheꞌat kape yt iraniaꞌin eꞌat piat ewy i raꞌyn poꞌog naꞌyn yt naku i e."

²⁰ Taꞌi miitꞌin topap topap kahato mekewat eꞌat pe e. Miꞌi tupono ti aru Tupana titek taꞌyn miꞌi hap eꞌat — Yt atiky­ꞌesat poꞌog hoꞌopot hap e aru tomi­ꞌai­roria etiano e. Yt pote miitꞌin topap yne mesuwat yi totiaria e."

²¹ Miꞌi hawyi ti aru miitꞌin teꞌe­roꞌe ehepe — Taꞌi miitꞌin Porekuat Aipo­typot Tupana Mipo­ꞌoro wyti putꞌokꞌe raꞌyn iꞌatuꞌe ti aru. Toꞌiro eweiꞌa­kasa pyno iꞌatuꞌe ti aru ehepe. Maꞌato ti aru yt eweimohey teiꞌo — Eheso eweiꞌe ro iꞌatuepe e."

²² Katu­pono ti aru iꞌatu kahato — Uito Tupana Mipo­ꞌoro Eipo­rekuat nuat e haria ewywuat saꞌag koꞌi teꞌe­ru­we­mo­herep mesuwat yi totiat kape e. Tupana ehay henoi saꞌag haria neꞌi yt pywo pe i maꞌato teꞌe­ru­we­mõ­typot hanuaria e. Miꞌiria ti aru aikotã aikotã imoherep taꞌa­tue­saika hap iwato rakat iꞌatu­minug koꞌi ti aru yt miit minug kuap i ewy taꞌa­tunug Tupana miꞌai­roria sese maꞌat reran haype e."

²³ Taꞌi yianmete raꞌyn ni ahenoi ehepe yne miꞌi hoꞌopot hap eꞌat aikotã aru hap etiat e. Miꞌi tupono eimitum o raꞌyn eweikup­teꞌen e."

²⁴ Miꞌi hawyi mekewat hoꞌopot hap eꞌat tokosap hawyi ti aru yt hẽtyhot i sese i raꞌyn at iꞌewyte waty iꞌypyryp raꞌyn e."

²⁵ Iꞌewyte ti aru waikiru koꞌi taꞌatueiam myi hewo hewo hawyi ti aru huruk hurukꞌe atipy e."

²⁶ Miꞌi hawyi ti aru ariot i raꞌyn Uito Eheykeꞌet Wuatꞌi Miitꞌin Ykeꞌet Sese wo. Uhesaika kahato hawe ariot mesuwat yi kape uimõ­typot kahato hawe ariot aru e. Teꞌe­ra­ꞌa­kasa kahato hamuat uhut hap ywyhig me wuatꞌi miitꞌin e."

²⁷ Miꞌi hawyi ti aru atipo­ꞌoro Tupana potpo­ꞌo­roria atipy piaria yne mesu­wa­rotiat uimi­ꞌai­roria uimohey haria atunug uhowawiat hamo mesuwat yi sasat kaipyi taꞌa­tu­ꞌa­tunug uhowawi e. At minꞌe hap kaipyi at wẽtem hap kaipyi at posak hap kaipyi yne kaipyi taꞌa­tu­ꞌa­tunug aru uhemiitꞌin sese e Iesui iꞌatuepe."

²⁸ Miꞌi hawyi Iesui toꞌe i temiitꞌin me — Pyno mesup ahenoi teran wẽtup sehay iãꞌãkap ehepe e — Wiku yp iꞌyhop kyt raꞌyn hawyi eweikuap taꞌyn meremo iꞌaman mot ut hamuat e."

²⁹ Iꞌewyte ti aru karãpe taꞌa­tunug mesuwat uimienoi ewywuat miꞌi hawyi ti aru eweikuap taꞌyn meremo Uito Eheykeꞌet ut hamuat hap e."

³⁰ Pywo pe ti taꞌa­tunug ni aru yne mesuwat uimienoi ewy miꞌi hawyi ti aru mesu­wa­ro­tiaria uimohey haria ahaipe­piaria wo raꞌyn tukup­teꞌen yne aheĩneꞌen hawe e."

³¹ Taꞌi at waikiru yi ti aru ikahuro yne maꞌato uimienoi koꞌi yne yt sake i ikahuro e Iesui."

³² Yt uwe i mesu­wa­ro­tiaria ikuap karãmuo mekewat uhut hap eꞌat putꞌokꞌe hap e. Yt atipy piaria i wyti ikuap yt Haꞌyru i wyti ikuap. Maꞌato Uiꞌywot atipy piat yn wyti ikuap e."

³³ Miꞌi tupono eiwa­tetup we o eweikup­teꞌen katu­pono yt uwe i ikuap karãpe mekewat eꞌat putꞌokꞌe hap e Iesui temiitꞌin me.

"

³⁴ Miꞌi hap ewy uhut hap eꞌat piat e. Miꞌi uhehay iãꞌãkap ewy — Wẽtup eꞌat pe so wẽtup ok netap kaꞌiwat koro toto tewyry hamo e. Miꞌi hawyi temiitꞌin sem toiꞌa­tu­kaykay tohenoi aikotã iꞌatu­potpap nuat koꞌi mesuwiat tosaipe kawianuat turanuat hap koꞌi henoi iꞌatuepiat hamo e. Miꞌi hawyi toꞌe okenꞌypy wato apykok hat pe — Ewatetup we o ereĩneꞌen karãmuo uiꞌaipok hap kape e. Putꞌok­ꞌare hawyi woro­kaykay hawyi waku eroꞌo­ken­hypꞌok uhowawi e."

³⁵ Miꞌi hawyi toto netap kaꞌiwat e. Iꞌewyte Uimohey haria eiwa­tetup we o eweikup­teꞌen katu­pono yt eweikuap hin i karãmuo Uito Eiꞌyat Kaꞌiwat putꞌokꞌe aru hap sio hunete sio wãtym hake turan sio waipaka ehay turan yt uwe ikuap i kat eꞌat kat ewãtym araꞌaipok i hap e."

³⁶ Yt naku i eiket at Tupana motpap nug hap kai aru putꞌok­ꞌare i miꞌi hap eꞌat pe e. Taꞌi yt naku i eiwe­mõti hap putꞌokꞌe Eika­ꞌiwat ut turan e."

³⁷ Meremo ti tut hamuat miꞌi pote kat areꞌe ti ehepe areꞌe yne uhemiitꞌin me wuatꞌi uimohey aru haria pe ewatetup we o e Iesui ahepe mekewat mikoi Uriweira ypia eꞌyityꞌok tote.

"

14

¹ Typy eꞌat man teneg u hap eꞌat koꞌi owakai te paꞌi akag koꞌi miwan enoi haria wywo teꞌe­ru­wa­ꞌa­tunug tawa wato Ieru­sarẽi kape saꞌa­wyiwuat Iuteu ywania ehakye­raꞌat hap taꞌa­tue­wa­nĩ­kaptia Esituꞌin po pyi eꞌat kapiat watetup hamo teꞌe­ru­wa­ꞌa­tunug kahato itote. Miꞌi hawyi teꞌe­roꞌe toꞌope — Aikotã som pyno waku wati­pyhik hawyi wati­ꞌauka Iesui yt uwe mikuap mo i iꞌatuꞌe."

² Yt naku i wati­pyhik aheman teneg u hap eꞌat koꞌi pe katu­pono wuꞌuka hap neꞌi raꞌyn topy­huꞌat miitꞌin me iꞌatu kahato Iesui mohey haria pote iꞌatuꞌe.

"

³ Miꞌi turan toĩneꞌen Iesui hepihi pihi rakat Simãu yat pe tawa Petania pe. Miꞌi hawyi teꞌe­renuk turan wẽtup ok hary­poria tut Iesui owawi mohag hy Natu kawiat okpun Iesui esap ete hamo. Haꞌup woity kahato rakat toterut. Miꞌi hawyi toiꞌokpik heiam hekat rakat nu Arapatu kawiat hawyi toiꞌokpun Iesui esap ete."

⁴ Miꞌi pote iraniaꞌin ienuk haria iꞌatu­py­ꞌahak kahato hary­poria ete hawyi teꞌe­roꞌe toꞌope — Taꞌi haꞌup woity kahato ti mekewat iꞌatuꞌe."

⁵ Yt naku i ti mohag hy moma yne hat hary­poria iꞌatuꞌe. Waku poꞌog ti toiwe­neru hawyi ti haꞌup iwato yt hekat i rakaria pe toimõꞌẽ iꞌatuꞌe."

⁶ Maꞌato Iesui toꞌe — Kat poteĩ eweha­tyꞌi hatyꞌi mesup hary­poria tero tutunug wakuap uhepe e."

⁷ Yt hekat i rakaria ti aru tukup­teꞌen wuatꞌi eꞌat pe eiwywo e. Karãpe ewetunug waku teran miꞌiria pe miꞌi pote waku eweimõꞌẽ ehekat miꞌiria pe wuatꞌi eꞌat pe wen maꞌato Uito yt areĩneꞌen motꞌi i eiwywo ewetunug waku uhepiat hamo e."

⁸ Taꞌi mesuwat hary­poria tiꞌokpun howakai te raꞌyn uipiit ete mohag hy uhyp hap eꞌyianmete e. Miꞌi ti inug waku uhepe tomikuap ok tã e."

⁹ Miꞌi pote pywo pe ti rat areꞌe ehepe aikope aikope ti aru mesuwat yi wato hap ok tã miitꞌin henoi Tupana ehay wakuat miꞌi hap iꞌewyte te ti aru mesuwat hary­poria minug wakuap uhepiat hap taꞌa­tu­henoi wuatꞌi ywania pe yt waure­ꞌi­ꞌa­tuꞌe i hamo e Iesui iꞌatuepe — Yt naku i tutunug mekewat hary­poria e haria pe.

"

¹⁰ Miꞌi hawyi sura­raꞌin tikat kahato Iesui iꞌauka hamo maꞌato yt taꞌa­tu­puẽti i. Miꞌi hawyi wẽtup ok hemiit 12 ok hap toto paꞌi wato koꞌi kape Iesui enoi iꞌatupo piat hamo. Miꞌi hawyi putꞌokꞌe hawyi Iuta henoi. Miꞌi pote iꞌatu­wepit kahato paꞌiria akag koꞌi — Taꞌi urutum epe haꞌup Iesui puẽti hamo iꞌatuꞌe tope."

¹¹ Miꞌi hawyi Iuta tikat at kaꞌap aikotã waku sura­raꞌin po piat hum hamuat hap.

"

¹² Miꞌi hawyi mekewat man teneg u hap eꞌat putꞌokꞌe hawyi mekewat iꞌatuhũ Kuteiru mẽpyt auka hap eꞌat putꞌokꞌe raꞌyn hawyi hemiitꞌin apoꞌi­ꞌa­tuꞌe Iesui pe — Aikopeĩ etiky­ꞌesat koity urutunug aheman teneg u hap eꞌat mesuwat ewãtym Mehĩ iꞌatuꞌe Iesui pe."

¹³ Miꞌi hawyi Iesui tipo­ꞌoro typy ok temiit tawa Ieru­sarẽi kape maꞌato saꞌa­wyꞌi toiꞌa­tu­nãpin aikotã som waku taꞌa­tunug hap. Mio tã e typy ok pe — Pyno eweiwat ro eipe tawa kape e. Putꞌok­ꞌe­weiꞌe hawyi te ti aru eweipuẽti wẽtup ok ihainia kamũti piat yꞌy soꞌosat hat e. Miꞌi ti aru tut ehowawi teka­mũti wywo e."

¹⁴ Miꞌi upi o eweiwat hawyi ti aru teke wẽtup ok yat pe e. Miꞌi hawyi o ewehenoi uhehay mekewat netap kaꞌiwat pe — Aiũwat okipy keĩ waku woꞌo­muꞌe hat temiitꞌin nywo teman teneg u wãtym muo mesup eweiꞌe o netap kaꞌiwat pe e."

¹⁵ — Miꞌi pote ti aru netap kaꞌiwat tomo­herep ehepe okipy wato ywaiti rakat waku yne rakat raꞌyn e. Miꞌi pe o eweipo­rokpun yparakai mesa tote aimiꞌu koꞌi e Iesui temiit typy ok takaria pe."

¹⁶ Miꞌi hawyi tuwat raꞌyn tawa kape. Miꞌi hawyi ti aikotã aikotã Iesui henoi iꞌatuepe saꞌa­wyꞌi hap ewy yne raꞌyn taꞌa­tu­puẽti. Miꞌi hawyi putꞌok­ta­ꞌa­tuꞌe hawyi taꞌa­tu­po­rokpun yparakai tote taꞌa­tu­miꞌu koꞌi."

¹⁷ Miꞌi hawyi ti wãtym i turan ni tut raꞌyn Iesui temiitꞌin 12 ok takaria wywo.

"

¹⁸ Miꞌi hawyi taꞌa­tuenuk hap tote Iesui toꞌe temiitꞌin me — Pywo pe ti areꞌe wẽtup ok ti aipy­ꞌa­setpe ahenuk tuwy uhenoi aru wanĩ­kaptia sura­raꞌin po piat uiꞌauka hanuat e."

¹⁹ Mio tã e pote ti hemiitꞌin hatyꞌu kahato taꞌa­tu­pyꞌa pe hawyi wẽtup ok tuereto apoꞌe Taꞌa­tu­muꞌe hat pe — Urumuꞌe hat uito apo emaꞌat hat apoꞌi­ꞌa­tuꞌe tuereto."

²⁰ Miꞌi hawyi Iesui tiꞌa­tu­wesat — Eipe 12 ok hap wyti mekewat mĩkau u piat uiwywuat man pag hat kuiꞌa piat wyti Eheykeꞌet maꞌat hat toĩneꞌen e."

²¹ Taꞌi Uito Eheykeꞌet wyti ikuꞌuro irane aikotã saꞌa­wyꞌi Tupana ehay enoi haria henoi hap ewy ti raꞌyn e Iesui. Maꞌato ti aru yt naku i yn naꞌyn Eheykeꞌet maꞌat hat topy­huꞌat wuatꞌi eꞌat pe e. Taꞌi waku poꞌog uimaꞌat hat yt karãpe i saꞌa­wyꞌi iꞌywãꞌĩ hap eꞌat piat toĩneꞌen e Iesui temiit Iuta piat.

"

²² Miꞌi hawyi teꞌe­renuk hamo Iesui tat wẽtup a man hawyi waku e Tupana pe hawyi toipikpik hawyi toimõꞌẽ temiitꞌin me. Miꞌi hawyi toꞌe iꞌatuepe — Ewetuꞌu ro man pikpik e. Miꞌi ti uipiit e."

²³ Miꞌi hawyi ihy kuiꞌa piat totat hawyi waku e Tupana pe hawyi toimõꞌẽ iꞌatuepe. Miꞌi hawyi yne teꞌe­re­ꞌyꞌu ihy wo."

²⁴ Miꞌi hawyi toꞌe Iesui — Miꞌi ti uhuu at hap miitꞌin woꞌo­wehik Tupana wywuat hamuat hap e."

²⁵ Pywo ti areꞌe ehepe miꞌi hawyi ti aru yt areꞌyꞌu i raꞌyn sapo hy mesuwe eiwywo maꞌato karãpe Tupana toĩneꞌen Morekuat no miꞌi hap eꞌat pe ti aru watu­we­ꞌyꞌu i raꞌyn e Iesui."

²⁶ Miꞌi hawyi teꞌe­ru­wepy Tupana pe hawyi tuwat Uriweira yp eꞌyityꞌok kape i raꞌyn.

"

²⁷ Miꞌi hawyi Iesui toꞌe towy­riaꞌin me — Eiwe­sytpok yne ti aru uiꞌya­ty­pepyi mesup ewãtym e. Taꞌi uiꞌatoiat yne eipe aikotã iwan me saꞌa­wyꞌi tohenoi hap ewy ti aru — Taꞌa­tu­ka­ꞌiwat auka hawyi ihũ koꞌi tuwe­sytpok yne e miwan me e Iesui towy­riaꞌin me."

²⁸ Miꞌi hawyi toꞌe — Maꞌato uimoieĩ­neꞌen i hap hawyi ti aru areto eheꞌyian me uimotag hap Karireia kape e. Miꞌi hap tote ti aru wato­ꞌo­puẽti i raꞌyn e."

²⁹ Miꞌi hawyi Peteru toꞌe Iesui pe — Iraniaꞌin eꞌatoiat yne mesup ewãtym mote uito yt woro­ꞌatoiat hin i e Peteru Iesui pe."

³⁰ Maꞌato Iesui — Pywo pe ti mesup ewãtym naꞌyn ni aru waipaka ehay typuot hap owakai ti aru — Yt atikuap i Iesui ereꞌe irane iraniaꞌin me myeꞌym mo e Iesui Peteru pe."

³¹ Miꞌi hawyi tehay pirik wo Peteru wẽtup het Nu toꞌe — Yt nyti yt nyti e. Uiꞌauka iraniaꞌin ewywo pytkai yt woro­ꞌatoiat i En e Peteru Iesui pe. Iꞌewyte iraniaꞌin hemiitꞌin Peteru ehay ewyte iꞌatuꞌe.

"

³² Miꞌi hawyi toto Iesui towy­riaꞌin nywo mikoi ypia ikahu rakat Kese­mani e hap kape. Miꞌi hawyi toꞌe towy­riaꞌin me — Eweiꞌapyk to meiũpe uhehay Tupana wywuat turan e."

³³ Miꞌi hawyi totioto Peteru Tiaku Iuwãu tuwe­wywo hap tote."

³⁴ Toha­tyꞌu tuwa­nẽtup kahato hawyi toꞌe iꞌatuepe — Uiwy­riaꞌin Uito ti ahatyꞌu kahato raꞌyn uipyꞌa pe e. Taꞌi ipoityꞌi kahato ti uhete e. Yt uipyꞌa wasu i hap porap uiꞌauka e. Ewehe­haꞌat ro wanĩ­kaptia pupi e Iesui hemiitꞌin myeꞌym ok takaria pe."

³⁵ Miꞌi hawyi toto porap i hawyi paragꞌe towa puo tehay Tupana kapiat hamo. Miꞌi hawyi toꞌe — Uiꞌywot e etiky­ꞌesat pote etihep o meiko­ranmuo uikaipyi e."

³⁶ Uiꞌywot wuatꞌi nug kuap hat En miꞌi tupono etat teran uipo pyi meikowat kuiꞌa miꞌi pote etat maꞌato yt pote yt e."

³⁷ Miꞌi tã toꞌe kahu hawyi taꞌaipok taꞌyn towy­riaꞌin kape. Miꞌi hawyi taꞌa­kasa towy­riaꞌin kape miꞌi turan ti teꞌe­roket neꞌi raꞌyn iwyriaꞌin. Miꞌi hawyi toꞌe Peteru pe — Uhyt Simãu ereket apoꞌe. Yt erahaꞌat porapꞌi apo uheka­wiano e."

³⁸ Yt eweiket neꞌi teiꞌo maꞌato ewehẽtup o Tupana pe koran ni yt ahiag eihãꞌãg hawyi ewetunug yt naku i hap e. Taꞌi ewetunug neran ni Tupana miky­ꞌesat ewy eipyꞌa pe ehesaika kahato wen maꞌato ti eipiit wyti iperup kahato hap ewy toĩneꞌen e Iesui Pete­ruꞌin me."

³⁹ Miꞌi hawyi toto i raꞌyn Iesui Tupana wywo tehay hamo — Papai e etiky­ꞌesat pote etihep o uipo pyi meikowat kuiꞌa maꞌato yt pote yt e."

⁴⁰ Tehay kahu hawyi taꞌaipok i raꞌyn towy­riaꞌin kape. Miꞌi turan ni teꞌe­roket i typy wo raꞌyn yt mehit­ꞌi­ꞌa­tuꞌe kuap i raꞌyn. Miꞌi hawyi yt kat iꞌatuꞌe kuap i raꞌyn teꞌe­ru­we­mõti i raꞌyn haype."

⁴¹ Miꞌi hawyi toto hawyi kat e saꞌa­wyꞌi ihay miꞌi e hap ewy te ihay hawyi taꞌaipok hawyi toiꞌa­tu­puẽti i raꞌyn iꞌatuket kai myeꞌym mo. Miꞌi hawyi toꞌe iꞌatuepe — Eweiket i raꞌyn apoꞌe."

⁴² Pyno toran naꞌyn e. Koran naꞌyn ni yt nakuaria i po pe Uito Eheykeꞌet topy­huꞌat e. Putꞌokꞌe raꞌyn uiku­ꞌuro hap eꞌat e. Eweipoĩꞌãm no ewehaꞌat ro meikowo ti uimaꞌat hat tut raꞌyn uiꞌauka haria wywo e.

"

⁴³ Mio tã e turan wẽtup ok hemiit Iuta 12 ok hap tut. Miꞌi wywo typyꞌi kahato raꞌyn sura­raꞌin tõꞌẽ tõꞌẽ Iesui pyhik hanuaria. Iraniaꞌin ariaꞌyp ãkun koꞌi wywo iraniaꞌin kyseꞌyp wywo tõꞌẽ tõꞌẽ. Paꞌi koro miwan enoi haria nagnia mipo­ꞌo­roria tõꞌẽ tõꞌẽ hemiit Iuta upi."

⁴⁴ Saꞌa­wyꞌi maꞌato Iuta henoi sura­raꞌin me — Aiũwat uimi­ꞌã­pysin o eweto­pytyk to e katu­pono ti aru Iesui raꞌyn Miꞌi Miit e. Miꞌi ti aru eweiꞌa­pykok kahato o hawyi ewetioto o e Iuta saꞌa­wyꞌi sura­raꞌin me."

⁴⁵ Miꞌi hawyi putꞌok­toꞌe hawyi Iuta tokosap Iesui kape meremo hawyi — Uimuꞌe hat toꞌe hawyi toiꞌã­pysin naꞌyn."

⁴⁶ Miꞌi hawyi sura­raꞌin topytyk taꞌyn Iesui."

⁴⁷ Miꞌi pote wẽtup ok Iesui emiit iꞌyatypiat iherep taꞌyn towape pyi kyseꞌyp hawyi toiꞌa­ha­pehep taꞌyn paꞌi akag emiit."

⁴⁸ Miꞌi hawyi topyhik teran haria pe toꞌe Iesui — Sero­ꞌokꞌe hat Uito miꞌi pote apo eweĩꞌẽ uipyhik hamo kyseꞌyp koꞌi wywo ariaꞌyp ãkun koꞌi wywo e. Haꞌa­wyte areĩneꞌen at eiwywo Tupana mõtypot yat pe wuatꞌi eꞌat pe eimuꞌe hamo maꞌato mekewat eꞌat pe yt uipytyk hin i eipe e."

⁴⁹ Maꞌato mesup ti aikotã nimo tohenoi yianme miwan me uhetiat hap ewy ti raꞌyn uipytyk eipe e topyhik haria pe."

⁵⁰ Miꞌi hawyi iwyriaꞌin yne tiꞌatoiat raꞌyn Iesui. Teꞌe­ru­we­sytpok yne ipytyk pote."

⁵¹ Miꞌi hawyi maꞌato wẽtup kurum wasu toto Iesui upi tuwe­suwy puo yn."

⁵² Miꞌi hap tote taꞌa­tu­pytyk taꞌyn miꞌi kurum wasu hesokpe ete maꞌato totoiat tuwe­suwy hap iꞌatupo pe hawyi topopy kahato raꞌyn yt kat i topiit piat sokpe wywo i teput.

"

⁵³ Miꞌi hawyi taꞌa­tue­reto Iesui paꞌi akag koro kape. Miꞌi hawyi yne nagnia paꞌi wato koꞌi miwan enoi haria teꞌe­ru­wa­ꞌa­tunug naꞌyn."

⁵⁴ Miꞌi hap kape toto Iesui upi Peteru maꞌato yt heremo i. Miꞌi hawyi tokosap Iesui upi paꞌi wato eꞌoken­ꞌypy kape. Miꞌi hawyi taꞌapyk sura­raꞌin pyꞌa­setpe aria kupyke tuwe­mõpe hamo."

⁵⁵ Miꞌi hawyi paꞌi wato emiitꞌin tuꞌi­saria wywo taꞌa­tukat Iesui kuasa te haria iꞌauka hamo — Araꞌa­kasa Iesui yt naku i nug hap kape e haria maꞌato yt taꞌa­tu­puẽti i."

⁵⁶ Miꞌi pote heso rakaria yn naꞌyn henoi ikuasa hap itote maꞌato yt iꞌewy i raꞌyn taꞌa­tu­henoi saꞌag."

⁵⁷ Miꞌi hawyi ikuasa haria wẽtup ok wẽtup ok iꞌatu­poĩꞌãm taꞌa­tuehay hamo — Taꞌi haꞌa­wyte Iesui toꞌe — Atipugha aru meiũpiat Tupana mõtypot yat miitꞌin minug koꞌi e ti iꞌatuꞌe."

⁵⁸ Miꞌi hawyi wẽtup Tupana mõtypot yat atunug myeꞌym eꞌat pe yn e. Miꞌi hawyi Tupana yat atunug yt mo wuat i minug naꞌyn e ti Iesui iꞌatuꞌe."

⁵⁹ Maꞌato yne iꞌatuꞌe hap koꞌi yt toꞌo­ꞌewy i taꞌa­tu­henoi. Miꞌi hawyi ipoĩꞌãm naꞌyn paꞌi akag koro apotoꞌe Iesui piat hamo — Taꞌa­tu­henoi kahato eminug yt naku i hap koꞌi maꞌato yt kat ereꞌe i e."

⁶⁰ Etiꞌa­tu­wesat ro pywo apo taꞌa­tu­henoi sio yt e."

⁶¹ Maꞌato ipoꞌinik neꞌi raꞌyn Iesui yt kat e i hawyi paꞌi akag i raꞌyn apoꞌe tope — En apo Tupana Mipo­ꞌoro Miitꞌin Porekuat nuat sio yt e. En apo Tupana Wakuat Sese rakat Saꞌyru e."

⁶² Miꞌi hawyi ti Iesui tiwesat — Taꞌi Uito Miꞌi Miit eꞌe hap ewy e. Meiũran ti aru eweiꞌa­kasa Uito Miitꞌin Ykeꞌet Tupana hesaika poꞌog nakat po sese kai apyk pe e. Taꞌi eweiꞌa­kasa ti aru uhut turan atipy kaipyi ywyhig kytsig me e."

⁶³ Mio tã e Iesui pote paꞌi akag koro totat tesokpe hawyi toihiot raꞌyn topy­ꞌahak hap Iesui ete moherep hamo iraniaꞌin me — Heso kahato Iesui e paꞌi akag koro. Ihay saꞌag kahato Tupana ete — Taꞌi Uito Tupana Mipo­ꞌoro Wuatꞌi Ywania ehakye­raꞌat hamo e hap yt naku i kahato. Pyno yt wati­ky­ꞌesat i poꞌog miitꞌin ehay Iesui etiat meiũpe katu­pono iwẽ pyi yne ahehamo yt naku i mio tã saꞌag ihay e. Pyno aikotã ewetunug neran mesuwat Miit heso rakat ete e."

⁶⁴ Miꞌi hawyi iraniaꞌin tiwesat — Taꞌi mio tã e hat auka potiat neꞌi yn waku iꞌatuꞌe."

⁶⁵ Miꞌi hawyi iraniaꞌin kuitu­ꞌi­ꞌa­tuꞌe Iesui ete hawyi iraniaꞌin ihahik iꞌahyk ahyk hamo hawyi teꞌe­roꞌe — Etikuap yne pote uwe mio eꞌahyk ahyk apoꞌi­ꞌa­tuꞌe Iesui pe. Iꞌewyte sura­raꞌin howa petek tuereto Iesui piit ete.

"

⁶⁶ Miꞌi turan Peteru toĩneꞌen oken note aria kupyke tuwe­mõpe turan ni wẽtup paꞌi koro emiit hary­poria tut."

⁶⁷ Miꞌi taꞌa­kasa Peteru kape aria kupyke hawyi tehaꞌat hawyi toꞌe — Are an worokuap en tawa Nasare piat Iesui emiit keĩ en e."

⁶⁸ Maꞌato Peteru toꞌe — U pãi yt atikuap i kat ereꞌe mana e. Miꞌi hawyi Peteru toto kurara eꞌoken­ꞌypy wato kape. Ikosap turan wẽtup waipaka ihay."

⁶⁹ Meiũran tut i raꞌyn turan mekewat hary­poria paꞌi wato eropat hat hawyi iꞌewyte toꞌe Peteru yaty­piaria pe — Meiũ ti Iesui emiit e."

⁷⁰ Maꞌato Peteru iꞌewyte — Yt uito i rat e. Meiũran iꞌyaty­piaria iꞌewyte teꞌe­roꞌe — En nat wẽtup ok hemiit katu­pono tama Karireia kaipywiat en iꞌatuꞌe. Epusu Karireia pusu ewy kahato pote uruikuap en iꞌatuꞌe."

⁷¹ Maꞌato Peteru tiwesat — Yt uheso i ti. Uheso pote waku raꞌyn Tupana uhatyꞌi hatyꞌi e. Pywo rat yt atikuap i Miꞌi Miit Iesui ti rat e Peteru."

⁷² Mio tã e hawyi ihay i raꞌyn mekewat waipaka. Miꞌi pote Peteru iwatetup Iesui ehay saꞌa­wy­ꞌiwuat kape — Waipaka ehay typuot hap owakai te — Yt atikuap i Miꞌi Miit ereꞌe aru uhepiat myeꞌym mo iraniaꞌin me e Iesui Peteru pe saꞌa­wyꞌi. Miꞌi Iesui e hap kape iwatetup Peteru teso hap kape hawyi tuwak kahato haty wo tuwe­mõti kahato haype.

"

15

¹ Miꞌi hawyi hunete at wẽtem hawyi meremo teꞌe­ru­wa­ꞌa­tunug paꞌi wato koꞌi nagnia miwan enoi haria yne yne iraniaꞌin woꞌo­nãpin saꞌag haria wywo i raꞌyn teꞌe­ru­wa­ꞌa­tunug. Miꞌi hawyi toꞌope toꞌoehay aikotã aikotã waku Iesui ete taꞌa­tunug hap koꞌi ete. Miꞌi hawyi taꞌa­tu­poꞌi poꞌi hawyi taꞌa­tue­roto hawyi taꞌatuium morekuat Piratu kape."

² Miꞌi hawyi morekuat apo apoꞌe Iesui pe — En apo Iuteu ywania Porekuat e. Miꞌi hawyi Iesui tiwesat — Uito Iuteu Ywania Porekuat ereꞌe apo e."

³ Miꞌi hawyi paꞌi wato koꞌi tikuasa kahato raꞌyn Iesui."

⁴ Miꞌi hawyi morekuat Piratu apoꞌe i Iesui pe — Ekuasa kahato miꞌiria Uhyt e. Yt kat ereꞌe i apo etiꞌa­tu­wesat e."

⁵ Maꞌato yt kat e i poꞌog Iesui tiwesat. Miꞌi pote morekuat tuwa­nẽtup kahato — Kat poteĩ yt uiwesat i e tuwa­nẽtup hawe.

"

⁶ Yne 12 ewaty eꞌat pe ienuk hap eꞌat pe morekuat tipo­re­nõtem wẽtup ok woꞌo­pyhik hap wyi miitꞌin miky­ꞌesat ewy."

⁷ Mekewat ewaty pe toĩneꞌen morekuat woꞌo­pyhik hawe wẽtup ok yt naku i rakat Parapa e hap. Miꞌi ti morekuat tipyhik saꞌa­wyꞌi katu­pono woꞌo­hoiro hap tote toiꞌauka wẽtup ok miit."

⁸ Miꞌi hawyi teꞌe­ru­wa­ꞌa­tunug morekuat kape miitꞌin kahato hawyi taꞌa­tu­hẽtup — Morekuat etipo­re­nõtem i ro emipyhik wẽtup ok iꞌatuꞌe."

⁹ Miꞌi hawyi Piratu tiwesat — Eweiky­ꞌesat apo pyno atipo­re­nõtem eiꞌy­wania Porekuat Iesui hap e."

¹⁰ Mio tã e Piratu iꞌatuepe paꞌi akag koꞌi moweu­kaꞌi hamo katu­pono Piratu tikuap paꞌi koꞌi Iesui auka teran iꞌatu­py­ꞌahak kahato tuete miitꞌin miat ikyꞌe pote iꞌatu­ha­ꞌy­wywi pote."

¹¹ Miꞌi hawyi paꞌi akag koꞌi teꞌe­roꞌe taꞌa­tue­miitꞌin me — Yt etipo­re­nõtem neiꞌo Miꞌi Miit Iesui maꞌato etipo­re­nõtem emipyhik Parapa eweiꞌe ro morekuat Piratu pe iꞌatuꞌe taꞌa­tu­mi­mu­ꞌeria koꞌi pe."

¹² Miꞌi hawyi Piratu toꞌe — Kat aru pyno atunug Eiꞌy­wania Porekuat ete e."

¹³ Miꞌi hawyi taꞌa­tu­wesat taꞌa­tuehay pirik wo — Eweiꞌauka ro eweiꞌauka ro ariaꞌyp posak ete iꞌatuꞌe."

¹⁴ Miꞌi pote Piratu apoꞌe — Kat poteĩ kat som tutunug yt naku i e. Miꞌi hawyi teꞌe­roꞌe i poꞌog haty wo — Eweiꞌauka ro ariaꞌyp posak ete iꞌatuꞌe."

¹⁵ Miꞌi hawyi miꞌiria mowepit hamo morekuat Piratu tipo­re­nõtem Parapa woꞌo­pyhyp hawyi. Miꞌi hawyi toipo­ꞌoro Iesui ipokpok hamo hawyi tutum tesu­ra­raꞌin me ariaꞌyp posak etiat ipehik hamo.

"

¹⁶ Miꞌi hawyi sura­raꞌin tioto Iesui aikope morekuat mipyhik haria satyꞌi satyꞌi hamuat hap kape. Miꞌi tote hawyi hereto haria tiꞌa­tu­kaykay iraniaꞌin sura­raꞌin koꞌi Iesui moweu­kaꞌi hamo."

¹⁷ Miꞌi hawyi taꞌa­tupag Iesui ipiit pe sokpe hupꞌi morekuat ewy. Miꞌi hawyi taꞌa­tu­piꞌig morekuat eꞌamãtap maꞌato hu kawiat neꞌi maꞌato. Miꞌi hawyi taꞌa­tupag iꞌakag me taꞌa­tu­mi­ky­ryꞌi hap."

¹⁸ Miꞌi hawyi teꞌe­ru­wẽ­powat taꞌa­tu­mi­ky­ryꞌi hap — Wakuat wakuat En Urupo­rekuat iꞌatuꞌe saꞌag imohit hap neꞌi maꞌato."

¹⁹ Miꞌi hawyi teꞌe­ro­poityk pina wyꞌyp koꞌi wo iꞌakag ete hawyi kuitu­ꞌi­ꞌa­tuꞌe tuwete hawyi teꞌe­ru­we­pỹ­ꞌã­tutuk taꞌa­tu­mõ­typot yt pywo pe i hamo."

²⁰ Taꞌa­tu­mi­ky­ryꞌi kahu hawyi taꞌa­tuhep i raꞌyn taꞌa­tu­mipag sokpe hupꞌi morekuat ewy hap hawyi taꞌa­tupag iwat hesokpe sese i raꞌyn. Miꞌi hap totepyi taꞌa­tue­reto ariaꞌyp posak etiat iꞌauka hamo.

"

²¹ Miꞌi hawyi muꞌap upi tut Simãu yi Sireneu kaipywiat mekewat Aresã­tere ywot Huwu ywot tut toko kaipyi. Miꞌi hawyi tokosap hawyi sura­raꞌin teꞌe­roꞌe tope — Etipo­wyro ro Iesui heꞌa­riaꞌyp posak ereto hap ete iꞌatuꞌe mekewat Simãu me.

"

²² Miꞌi hawyi taꞌa­tue­roto Iesui Iꞌakag Kag e hap eꞌyityꞌok kape maꞌato Iesui pusu puo Koukuta e hap kape."

²³ Putꞌok­ta­ꞌa­tuꞌe hawyi taꞌatuium neran Iesui pe mohag Mira e hap Winu hy puo haty monik hamo maꞌato yt tutuꞌu i."

²⁴ Miꞌi hawyi taꞌa­tuhep i raꞌyn hesokpe hawyi teꞌe­ru­we­mo­hara raꞌyn aikotã waku hesokpe taꞌa­tu­patꞌok patꞌok hamo toꞌope."

²⁵ Miꞌi hawyi ihotꞌok poꞌog naꞌyn taꞌa­tu­pehik taꞌyn ariaꞌyp posak ete."

²⁶ Miꞌi hawyi toĩneꞌen miwan kat pote Iesui auka hap enoi hap ariaꞌyp posak tote. Miꞌi ti henoi miitꞌin me — Miꞌi Miit Iuteu Ywania Porekuat e."

²⁷ Iꞌewyte typy ok iwywo taꞌa­tu­pehik iꞌatue­ꞌa­riaꞌyp posak ete sero­ꞌokꞌe haria miitꞌin atuꞌuka haria ipo ran kai ipo sese kai aikotã nimo taꞌa­tu­henoi miwan me."

²⁸ — Yt nakuaria i pyꞌa­setpiat ikuꞌuro pote Miꞌi Miit iꞌewyte yt naku i teꞌe­ru­wa­nẽtup hawe e Tupana ehay moherep hat Isaia tomiwan 53.12 pe."

²⁹ Miꞌi hawyi gosap haria teꞌe­ru­we­mõ­koꞌi mõkoꞌi howawi taꞌa­tuehay miky­ryꞌi tuwete — Meiẽ Tupana mõtypot yat okhytpun hat hawyi myeꞌym eꞌat piat yn inug pakup i hat iꞌatuꞌe."

³⁰ — Ereha­kye­raꞌat ro iꞌatuꞌe. Eraꞌapyk to eꞌariaꞌyp posak pyi iꞌatuꞌe."

³¹ Iꞌewyte paꞌi watoria miwan enoi haria toꞌo­ky­ryꞌi tuete — Taꞌi iraniaꞌin ni toiꞌa­tue­ha­kye­raꞌat kuap maꞌato tuwewi ti yt tuwe­ha­kye­raꞌat kuap hin i iꞌatuꞌe."

³² Miꞌi hawyi teꞌe­roꞌe miky­ryꞌi hap wywo Iesui pe — Pyno En ni Tupana Mipo­ꞌoro Aipo­rekuat no pote waku eraꞌapyk to ariaꞌyp posak kaipyi iꞌatuꞌe. Taꞌi eꞌapyk hap ariaꞌyp posak pyi uruta­ꞌa­kasa pote ti aru uruimohey raꞌyn En yt pote yt iꞌatuꞌe Iesui pe imoweu­kaꞌi haype. Miꞌi hawyi iꞌyaty­piaria mipehik koꞌi teꞌe­roꞌe yt naku i tope iraniaꞌin ehay ewy.

"

³³ Atpo­sake hawyi at minꞌe hap kape iꞌypyryp kahato wãtym ewy raꞌyn yne mesuwat yi tote topy­huꞌat."

³⁴ Myeꞌym ura hawyi Iesui iwẽpapꞌi tehay pirik wo — Uhetu­pana Uhetu­pana kat pote uiꞌatoiat En e. Maꞌato topusu puo toꞌe — Erui Erui irama sapa­tani apoꞌe."

³⁵ Miꞌi hawyi sehaꞌat haria teꞌe­roꞌe — Meiẽ toikaykay saꞌa­wy­ꞌiwuat aseꞌi Eria topo­wyro hamuat iꞌatuꞌe."

³⁶ Miꞌi hawyi wẽtup ok teput amũkiusu ap ewywuat kape hawyi toipoꞌi pina wyꞌyp ãpo ete hawyi toipukꞌa ihy haiũg nakat pe. Miꞌi hawyi tutum Iesui pe ihy sym hamo. Miꞌi hawyi toꞌe iraniaꞌin me — Apuete toꞌiro wate­haꞌat sio Eria tut imoꞌapyk ariaꞌyp posak pywiat hamo sio yt e."

³⁷ Miꞌi hawyi Iesui kakꞌe haty wo hawyi ipyhu tekꞌe raꞌyn ikuꞌuro sese raꞌyn."

³⁸ Miꞌi hawyi Tupana mõtypot yat wato eꞌokenhyp wato sokpe iꞌanam kawiat miitꞌin pyhyp Tupana kapiat hap hiotꞌe raꞌyn atipy kaipyi okenꞌypy yi kape."

³⁹ Miꞌi hawyi surara akag Iesui owakaipyi taꞌa­kasa yne aikotã Iesui ikuꞌuro hap hawyi toꞌe — Pywo rasig Meiẽ Ihainia ti Tupana Saꞌyru sese e."

⁴⁰ Miꞌi hawyi hary­poria tawa Ieru­sarẽi kaipy­wiaria teꞌe­ra­ꞌa­kasa pya pyi Iesui auka hap kape. Miꞌi haria pyꞌa­setpe tukup­teꞌen mana Sarume mana Maria yi Mata­rena kaipywiat hawyi mana Maria Tiaku hit ty Iuse ty."

⁴¹ Miꞌiria saꞌa­wyꞌi Iesui ieĩneꞌen tama Karireia piat turan tuwat Iesui upi heropat hamo. Yt miꞌiria yn i maꞌato iꞌatu hary­poria tõꞌẽ Iesui upi Ieru­sarẽi kape. Miꞌi pote tukup­teꞌen itote mekewat eꞌat pe iꞌauka hamuat turan.

"

⁴² Tupana mõtypot hap eꞌat owakai te waku puo yne raꞌyn taꞌa­tunug neran motpap koꞌi Iuteu ywania."

⁴³ Miꞌi pote wãtymꞌi turan pote Iuse tawa Arimateia kaipywiat tiꞌasyp teran naꞌyn Iesui piit meremo at minꞌe hap yianmete. — Iuse ti Iuteu ywania atunãpin hat akag waku sese rakat iꞌatuꞌe. Miꞌi ti hekatup kahato karãmuo Morekuat no Tupana tut hap eꞌat. Miꞌi ti toto morekuat Piratu kape Iesui piit ẽtup hamo hyp hamo. Morekuat pupi yt tokenꞌẽ hin i."

⁴⁴ Miꞌi hawyi morekuat Piratu tuwa­nẽtup — Ikuꞌuro raꞌyn koitypuo yt pãi e tuwa­nẽtup hawe. Miꞌi pote toikaykay tesu­rara akag hawyi apoꞌe tope — Ikuꞌuro raꞌyn apo Iesui sio yt e."

⁴⁵ Miꞌi hawyi toiwesat — Taꞌi ikuꞌuro sese raꞌyn e. Miꞌi pote morekuat tum naꞌyn Iuse pe ipiit."

⁴⁶ Miꞌi hawyi Iuse toto sokpe kytꞌi kype kyiꞌat hamo. Miꞌi hawyi toimo­ꞌapyk Iesui piit ariaꞌyp posak pyi. Miꞌi hawyi tohuwy ipiit mekewat sokpe kype kytꞌi wo. Miꞌi hawyi totopag ipiit woꞌosyp pakup we tominug saꞌa­wyꞌi nu kaꞌa pe. Miꞌi hawyi toho­ꞌo­kenhyp taꞌyn nu wato wo raꞌyn."

⁴⁷ Mana Maria yi Mata­rena piat mana Maria Iuse ty teꞌe­ra­ꞌa­kasa yne Iesui syp hap aikopiat hyp hap.

"

16

¹ Tupana mõtypot hap eꞌat kosap hawyi mana Maria yi Mata­rena kaipywiat mana Sarume hawyi mana Maria Tiaku ty tikyiꞌat mohag hy ikamhig se rakat Iesui piit pen hamo."

² Miꞌi hawyi hunete mytuꞌu eꞌat pe at wẽtem turan tuwat raꞌyn Iesui syp hap kape."

³ Miꞌi turan muꞌap upi teꞌe­roꞌe toꞌope — Uwe aru hoꞌo­ꞌo­ken­hypꞌok ahepe iꞌatuꞌe. Nu wato ipotyi pote Iesui syp hap okenꞌypy ete pote aikotã me aru watipen Iesui piit mohag hy wo iꞌatuꞌe."

⁴ Maꞌato teꞌe­ra­haꞌat turan teꞌo­ken­hypꞌok pe raꞌyn toĩneꞌen ikaꞌa."

⁵ Miꞌi hawyi tuwe­hytꞌok nu kaꞌa pe. Miꞌi hawyi mo sese kai apyk pe teꞌe­ra­ꞌa­kasa kurum iwasu ewywuat atipy kaipywiat ieĩneꞌen hat sokpe kytꞌi iꞌywop takat piat. Miꞌi hawyi iꞌatu­perup taꞌyn."

⁶ Miꞌi hawyi toꞌe iꞌatuepe — Yt gytꞌe­weiꞌe teiꞌo e. Atikuap kat pe eweĩꞌẽ. Iesui tawa Nasare piat kape eweĩꞌẽ e. Ariaꞌyp posak etiat miꞌauka kape eweĩꞌẽ meikowo e. Yt uwe i raꞌyn Iesui meiũpe hyp hawe e. Katu­pono toĩneꞌen i raꞌyn guꞌuro pyi e. Eweiꞌa­kasa ro aikope ipag hap kape are e."

⁷ Miꞌi pote eweiꞌaipok i ro iwyriaꞌin miat henoi hamo iꞌewyte Peteru kape hawyi ewehenoi Iesui ehay iꞌatuepe — Areto ti aru ahetama Karireia kape eheꞌyianme e hap e. Miꞌi tote raꞌyn aru wato­ꞌo­puẽti i kat areꞌe saꞌa­wyꞌi e hap ewy e. Miꞌi e hap ewehenoi ro e atipy piat hary­poria pe."

⁸ Miꞌi hawyi hary­po­riaꞌin ikohyeput kahato Iesui potmu­ꞌeria 11 ok takaria enoi hamo. Yt uwe pe i taꞌa­tu­henoi muꞌap upi teꞌe­ro­kenꞌẽ haype.

"

⁹ Miꞌi hawyi mekewat mytuꞌu eꞌat pe Iesui wẽtem guꞌuro pywiat hap eꞌat pe hunete Iesui tuwe­mo­herep Maria tawa Mata­rena piat kape tomiahiag sopo 7 ok takat potꞌi kape."

¹⁰ Miꞌi hawyi Maria taꞌaipok iwyriaꞌin kape henoi hamo. Miꞌi hawyi paaꞌi­ꞌa­tuꞌe teꞌe­ruwak toiꞌa­tu­puẽti."

¹¹ Miꞌi hawyi toꞌe iꞌatuepe — Taꞌaipok i raꞌyn ni Iesui guꞌuro pyi Mimiꞌin e. Araꞌa­kasa i raꞌyn an uito e iꞌatuepe. Maꞌato mio tã e hap iwyriaꞌin yt timohey i.

"

¹² Miꞌi hawyi typy ok hemiit tuwat wẽtup tawa kape. Miꞌi hawyi muꞌap tote Iesui tuwe­mo­herep iꞌatue­wawi maꞌato yt taꞌa­tukuap i saꞌa­wyꞌi."

¹³ Taꞌa­tukuap Iesui hawyi teꞌe­ra­ꞌaipok iraniaꞌin miat henoi hamo. Maꞌato taꞌa­tu­henoi hawyi iꞌewyte yt taꞌa­tu­mohey hin i.

"

¹⁴ Miꞌi hawyi 11 ok takaria kape Iesui tuwe­mo­herep iꞌatuenuk turan. Miꞌi hawyi toiꞌa­tu­sa­tyꞌi satyꞌi tehay wo — Kat poteĩ yt eweimohey i uheĩneꞌen pakup i hap kapiat akasa haria e. Eipyꞌa heg kahato rat e iꞌatuepe."

¹⁵ Miꞌi hawyi toꞌe i — Uiwy­riaꞌin eweiwat ro yne mesuwat yi totiaria wuatꞌi ywania uhehay wakuat enoi hamo e."

¹⁶ Uwe uwe uimohey haria wesetꞌok haria ti aru uimie­ha­kye­raꞌat nuaria teꞌe­ro­py­huꞌat e Iesui. Maꞌato yt uimohey i haria ti aru woꞌo­ꞌa­piheg haria tukup­teꞌen wuatꞌi eꞌat pe e."

¹⁷ Miꞌi hawyi uimohey haria tomo­herep miitꞌin me wakuap kahato. Miꞌi tã taꞌa­tunug ahiag koꞌi miitꞌin miat taꞌa­tu­sopo uhesaika wo. Musu pakup koꞌi taꞌa­tu­suꞌat."

¹⁸ Miꞌi hawyi moi ok akit hanuaria tukup­teꞌen. Moi pytyk pytkai yt haty i uimohey haria ete e. Iꞌewyte guꞌuro hy u pytkai yt haty i iꞌatuete e. Taꞌi iꞌahu rakaria ete teꞌe­ru­we­ponug hawyi waku raꞌyn iꞌatuete e. Miꞌi tã ti aru uimohey haria timo­herep miitꞌin me e Iesui topot­mu­ꞌeria pe.

"

¹⁹ Mio tã e Aika­ꞌiwat Iesui hawyi Tupana tioto Iesui atipy kape. Miꞌi hawyi taꞌapyk Tupana po sese kai tomi­mõ­typot poꞌog eiam note raꞌyn taꞌapyk taꞌyn.

"

²⁰ Miꞌi hawyi hemiitꞌin tuwat raꞌyn Iesui ehay enoi hamo wuatꞌi ywania mesuwat yi totiaria enoi hamuat. Iꞌewyte ti Iꞌatu­ka­ꞌiwat Pãꞌãu ipotpap kahato iꞌatu­wywo tesaika wo wakuap nug hamo miitꞌin miat tomohey hamo.

Toran naꞌyn uimiwan

Uito ti Maku"