1 Imi antin Pablo, Jesucristo-nuggin-palmilegalid, tenal an-itolegedbal-chul, tenal Pab-Tummad-itolegedbal, Pab Tummad kaka-ukchadyob, tulemal Jesucristobal tullenonimalo.
2 Timoteo, pedin an-machi-pilaled. Imi antin pega karta wis palmijii. Imi Pab Tummad tegin Pab-Jesucristo-anmal-tummad pega immal-nuegan imakelen, nabirin, tegin wilejakwa pe-takelen, nabirbalin, tegin ulubgin akalzhul-itogal pe-imakelen, nabirbalin. Pablo Timoteo-okannojad
3 Imi an-tadgan Pabga pinzheed-chwilidikidgin immal-imajadyob an Pabga immal-imamodo. Al an pegin pinzhealil, an mutik-ibgin Pabga tog-nuedi chogalda, tegin an pega Pabzhe kolaldabal.
4 Tenal an ampa wisdo, pe an-akar nadgu, pe poed-abalgin nad. Al an peyedzhe pe-takpi-kusmo, an pela-pela yer-itogalmo.
5 Tenal an ampa wisbaldo, pedin napírra Pab-Jesúsgin kwen penzhul, yami tule-yardagedgin chul. Imi kepegin pe-nanchel-Loida napírra Pab-Jesúsgin ibzhas, tegin pe-nan-Eunicedin, ampa Pab-Jesúsgin ibzhasmo. Tenal an kwen penzhuldo, pedin, pe-nanchelyob tegin pe-nanyob, pe Pab-Jesúsgin kwen penzhulmo.
6 Al an pega chogzhundo, an-chunkalgin-pe-ebujadgin Pab pega kurkin-purpaled ukcha. Al pe we kurkin okannogenab, tule cho okannonaidyob.
7 Tenal Pab anmalga E-Purpa-Nued-kwen-ukchajul immal tobgugal. Tenal Pab anmalga E-Purpa-Nued-ukcha anmal-okannogal, tule-pilalgugal, tegin Pab anmalga E-Purpa-Nued-ukchabal anmal naga chan oturdagalbal Pab-peigujiidyob nanegal.
8 Al pe melle tulemalgin pinkeguo anmal-Tummad-Jesúsgin chunmagal, tegin pe melle ankin pinkegubalo an-Jesucristobal-naidbal an oturdaleged-neggin-mellemai. Tenal Pab-Tummad-e-kannaleged pe-pentakedbal pe anpak mes wilegenabmo Pab-kaka-nuegangin chunmagal.
9 Imi Pab anmal-abonos, tegin anmal-amis ega napírra nanegal. Tenal anmal immal-nuegan-imajadbal Pab anmal-kwen-abonoszhul, tenal Pab anmal-abonoed-wilubzhulinadbal anmal-abonos e-peigujiidyob immal imagal. Imi iti-nap-ampayo-naigueddu, Pabdin e-Machi-Jesúsbal anmalga pato abonoed-igal-mezhis.
10 Al Pab anmalga Jesucristo-palminoni anmal-abonogal. Tenal Jesús tule-purkwed-igal opelononi, tegin tule-Pab-neggin-ilagwen-nadgu-kannan-tullegoed-igal onononijun. Wedin, Pab-kaka-nuegando.
11 Tenal Pab anka arpaged ukcha, tulemalga kaka-nuegan palchoggal. Tegin Pab an-amisbal, Jesús-nuggin-palmilegalidga kugal, tegin Pab-Jesús-igalgin tulemal-oturdakedga kugalbal.
12 Tenal Pab an-amijadbal an oturdaleged-neggin wilejii. Tenal an-oturdalejiidbal an yabli kwen pinkejulbal. Tenal an wisdo an toagin ibzhe, tegin an kwen penzhulbal Jesucristo iti-napche kannan tanikoedzhe pel-kwapa unni anka an-néga-immal-ukchad chabogal.
13 Imi pe ankin-inniki-inniki-turdajad-pallí pe nuekwá tulemal-oturdamogo. Tenal Pab-Jesucristo pegin maidbal, pe Pabgin-penzhulidgin tegin pe tule-pilaledgin pe tulemal-oturdabalo.
14 Tenal Pab-Purpa-Nued-anmalgin-maid pe-pentakedbal, pe aga ulubgin nuekwa Pab-kaka-nuegan-pega-uklejad chabogo.
15 Imi pe an-nued-wisdo, tulemal-Provincia-Asiaginmalad pel-kwapa an-midmal, Figelo tegin Hermógeneszhe-pakal an-metmalmo.
16 Tenal Pab wilejakwa Onesíforo-e-neg-yaginmalad-takelen, nabirin. Tenal Onesíforo melu an-pentadi-kus. Tenal Onesíforo an-oturdalemaid-ulgin, ankin kwen pinkeguszhul-kus.
17 Tenal Onesíforo Roma-neg-kweburzhe nonigu, tulemalzhe ekisal-ekisal an-imas, an-onojadzhe.
18 Tenal Jesús iti-napche kannan tanikoedgin, Pab wilejakwa Onesíforo-takelen, nabirin. Tenal pe nued wisdo, Onesíforo Efeso-neg-kweburgin, ichejul an-pentasbal.
1 An-machi-Timoteo, imi Jesucristo wilejakwa pe-taked-wilubzhulinadbal wilejakwa pe-taknoni. Al pe kantik kwisguo.
2 Tenal pedin tule-nuegan-amienab. Tenal pe tulemal-ichejul-pukwad-wagin pe an-itojad-yopí, pe we tule-nuegan-oturdamogo tule-pimalad-oturdagalmo.
3 Imi chulub-nuegan aga wileged-abalgin purtidiidyob, pe anmalbak mes Jesucristoga wilegedgin purtigenabmo.
4 Tenal chulubmal-nuegan keg immal-pidgin yolemal, unnila aga e-tummad-owelicheedginbi pinzhemal. Tenal pedin ampamo. Pe chulub-taedyob pe Jesucristo-owelicheedginbi pe pinzheenabmo.
5 Tenal tule-todomalad igal-mamikidbal kwen alamanaichulil, kwen nakojul-kuo tegin we tulega immal-nued kwen uklegojul-kubalo, tenal tule-todomalad igal-mamikid-pallí imanail, e-nakwijadbal ega immal-nued uklenoniko. Tenal pe Jesús-igal-mamikidbal pe nuekwa alamanaimogal, Pab-neggin pega immal-nued uklenonimogo.
6 Tenal tule-nagnugin-yer-arpagedga immal chanmakalil, we tule inzhel kunned-wilub.
7 Tenal an imis pega chogzhadgin pe nuekwa pinzheenab. Tenal Pabdin pel-kwapa mag-itogal pe-imako.
8 Tenal pe Jesucristogin pe pinzheenab. Tenal Jesucristo kannan tulles, tegin tad-David-akar tanibal. Tenal an we kaka-nuegangin tulemalga chunmadii.
9 Al an tule-iskanayob oturdaleged-neggin oturdalemai. Tenal Pab-kaka-nuegandin kwen kalegojul-kuo, ampa ukin mimilemaio.
10 Tenal antin tule-Pab-tar-chusmalad-anal an akalzhul wilemai, we tulemal Jesucristobal abonolegal, tegin tule-Pab-tar-chusmalad Pab-neg-nuedgin ilagwen meggal.
11 Imis an-pega-chogneeddin, kaka-nued.
Wegin pe akalzhul ibzhao:Imi anmal Jesúsbal-naid-ulgin-purkwijal,Pab-neggin kannan tullego Jesúsbak mes meggal.12 Tenal anmal peyedzhe
tulemal-anmal-owioged abin-purtijal,
13 Tenal anmal Pab-chogedbal inniki nanejulmalal,
Pabdin keg e-chogzhad-ogwa,14 Tenal an-imis-pega-chogzhiid, pe keg-chulgu pe tulemalga chogmogo. Tegin pe Pab-wagin tulemalga chogo: “Pe melle pinche kaka-choglenaidgin aga abin-abin imamalo. Tenal pe abin-abin imamalal, pega ib-nuedga kwen kunonikojul, pinche tule-itobukmalad-izhononimalmogo.”
15 Tenal pedin keg-chulgu alamakenab Pab yer pe-arpajad takegal, pe melle arpajadgin pinkegugal. Tenal pe keg-chulgu alamakenabbal inniki Pab-kaka-chunchunnad palchoggal.
16 Tenal pe melle yogasal tulemal-Pabgin-istar-chunmakedzhe omogo. Tenal tulemal-Pabgin-istar-chunmadimalad pinna-pinna pul-pule iskunonimalo.
17 Tenal we igal-iskana-an-imis-pega-chogzhad pinna-pinna tule-chan-malemaidyob tunkumaio. Imi Himeneo tegin Fileto Pabgin-istar-chunmadiid-tulemalmo.
18 Tenal Himeneo tegin Fileto Pab-Jesús-igal-chunchunnad-akar nosmal. Tenal we tulemal chogmal, tule-kannan-tullegoeddin pato nas, pal kwen tanikojul. Al we tule-walbogid wal-walgwen tule-izhosmal Jesúsgin pengugal.
19 Imi Pab-kaka-chunchunnaddin ampa kal-nika mai, tule-kartagin-sello-chijadyob. Imi Pab-kartagin chogdo:
Imi Pabdin nued wisdo toa-tulemal e-tule-chunchunnamalad. Num. 16:5 Tenal Pab-kartagin nermakal maibal: “Tule chogzhal ede Pab-Jesúsgad, we tule keg-chulgu iskued ebeenab.”20 Imi neg-tummagangin ol-pate, mani-patemalbi pukchulmal, tenal ulgo-pate, tegin napcha-pate ampa pukmalmo. Tenal ol-pate-nuegandin tule-nuegan-okunkal. Tenal napcha-patedin turwa weigalbi.
21 Tenal pe iskued-akar nojal, pe pato ol-pateyob kunoniko, Pab-Jesúsga ilagwen ib-nuedga kunonigal, tegin pe kuakwa kudibalo, Pab-Jesúsga pél immal-nuegan imagal.
22 Imi machimal-pinzheedyob pinzheed-iskana pegin tognonikil, pe melle wegin pinzhedi-kuo tenal pe ilgwen we pinzheed igeo. Tenal pedin tule-pinzheed-chwilidikidgin-Pabzhe-kolmaladbak pe igal-napírragwad amio, pe Pabgin-penzhulidgin, tegin pe pilaledgin, tegin pe aga ulubgin-akalzhul-itogedgin nanegal.
23 Tenal pe melle tule-pinche-chunmamalad itogo. Tenal pe we igalgin togzhal, pe tulemalbak aga abin-abin imanonimalo, tegin tulemal aga urwenonimalbalo.
24 Tenal tule-Pab-Jesúsga-arpamalad tulemalbak abin-abin-imagal igal-kwen-maichul. Tenal tule-Pab-Jesúsga-arpamalad pul-pule pel-kwapa tulemalbak pinnallé naneenab, tegin Pab-igalgin pinnallé tulemal-oturdakenabbal, sae-itogedgin chul.
25 Tegin tule-istar-pe-takmaladga pe pinnallé chunmako Pab nabir ulubgin we tule-ogwao o chul-dewa, Pab-Jesús-igal-chunchunnad mag itononikoedzhe.
26 Tenal tule-istar-pe-takmaladga pe pinnallégwadgin chunmabalo mag itononigal nia e-pinzheed-kasmai, tegin we tule mag itononigalbal ede nia-itolegedbal kudii tegin nia-tar-kasmaid-akar nogal.
1 Imi an wisgal pega chogdo: imi neg-tuku omodanikil, ibe-pulegan noniko.
2 Tenal neg-tuku-omodanikidgin tulemal aga tukinbi pinzhenonimalo, tule-pimalad-pentakedgin kwen pinzhaojulmal. Tenal we tule-iskana mani-kaedginbi pinzhenonimalo, tegin aga tukin otummononiko. Tegin we tule-iskana aga tukin tummarba itononimalbalo, tegin Pab Tummadgin istar chunmanonimalo, tegin e-pabganbal kwen ibzhaojulmal, tegin tulemal tar-pentanonimalal, ampa yer kwen itogojulmal. Tegin we tule-iskana Pab-igalgin kwen atagojulmal,
3 tenal we tule-iskana, tule-pimalad-kwen-pilalgunonikojulmalbal, tegin tule tarbi-immal-akalojal, pal kwen igeojulmal, tegin tule-pidgin yami kakanzhenonimalbalo. Tegin we tule-iskana aga chan kwen abingaojulmal, tegin chabzhul tule-imanoniko, tegin istar igal-nuegan taknonimalbalo.
4 Tegin we tule-iskana aga ai-tuktinonimalo, tegin tule-iskana take-take immal kwen imanonikojul, tegin tule-iskana aga tukin pél immal-wijiidyob kunonimalbalo. Tegin we tule-iskana Pab-Tummad-pilaledga pul askin yer-itogedginbi nanemalo,
5 tegin Pab-Tummad-nued-wismaladyob pinche nanenonimalbalo. Tenal we tule-iskana Pab Purpa Nuedbal immal kwen imanonikojulmalbal. Tenal pe melle wegiid-tulemalbak mes nanemalo.
6 Tenal we tule-iskana pinna-pinna tule-neggin tognoniko. Tegin ome-kwinnigana peyedzhe-iskuedgin-tiidbal tegin yozhagu-pinzhediidbal, tule-iskana pulzhul ome-pinzheed kanonimalo.
7 Tenal we omegan pane-pane turdananimalando, tenal omegan tegiguo, igal-chunchunnad kwen turdakojul-kuo.
8 Imi lelmal-Janes tegin Jambres, Moisés-abin-kwisgunonimaladyob, we tule-iskana Pab-Jesús-igal-chunchunnad abin-kwisgunonimalmogo. Tenal we tulemal-e-pinzheed nued iskusmal, tegin we tule-Pab-Jesúsgin-penzhul-chogmalad ib-chunchunnad-chul.
9 Tenal Janes tegin Jambres akpene Moisés-abin-kwisgunonimaladyob, we tule-iskana-e-nug nue kwen tunkuojul-kuo, tenal tulemal-pel-kwapa wisgunonimalo, we tule-iskana-igal ibga keg pel ku. Pablo Timoteo-uanaijad, Pab-Jesús-kaka-nuegangin nuekwa chunmagal
10 Imi pe an-nued-wisdo, an nuekwá tulemal-oturdas, an nued nanas, an igi peigus, an Pabgin kwen penzhul-kus, an pinnallégwadgin tegin pilaledgin tulemalbak nanedi-kus, an unnigus abin-purtigal.
11 Tenal pe an-wisbaldo, tulemal chabzhul an-imasmal, an wiledi-kus, tegin an Antioquíagin, Iconiogin, Listragin maidgin anka igi kus, tegin tulemal-chabzhul-an-imajadgin, an wiledi-kusbal. Tenal Pab we immalmal-akar an-abonos.
12 Tenal tulemal-pel-kwapa Pab-Jesús-peigujiidyob-nuekwa-nanebimalad peyedzhe wilegenabmalmo.
13 Tenal tule-iskana tegin tule-kakanzheedgin-tulemal-yardadimalad kujal pul-pule tulemal-yardanatapo. Tenal we tule-iskana kujal tule-pidzhe yardalenonimalmogo.
14 Tenal pedin, pe nued wisdo pe toa-tulemalgin pe Pab-Jesús-igal-turdas, al pe Jesús-igalgin-turdajadgin, tegin pe Jesús igalgin-ibzhejadgin pe ukin-ukin turdanatapo.
15 Tenal pedin toto-akar Pab-karta-chwilidikid wisgus. Tenal Pab-kartadin wisgugal pe-imako, pe igi Jesucristogin-penzhulidbal nabir abonolego.
16 Imi Pab-karta-pel-kwapa-nermakal-maid Pab-Purpa-kannalegedbal nermales. Al Pab-karta ib-nued, tulemal-oturdagal Pab-wisgugal, tegin tule-iskusmalad-uanaigal, tegin tule-nosmaladga nuekwa immal palchoggal, tegin tulemal-oturdagal emalde innikí Pab-peigujiidyob nanegal.
17 Al tule-Pabzhikmalad pato kuakwa kudio, meke-ibi-immala-nuegan imagal.
1 Imi Pab-Jesucristo iti-napche kannan neg-takegal tanikil, tule-purkwismaladga tegin tule-tulabukmaladga igal-itononiko. Al an Pab-Tummad-wagin tegin an Jesucristo-wagin pega chogdo:
2 imi meke-ibi-tule pe-itobiel o pe-itobijulil, tenal pedin keg-chulgu Pab-Jesús-kaka-nuegangin tulemalga chunmakenab. Tenal pedin, pe pinnallégwadgin tegin pe nuekwagwadgin tulemal-oturdako melle noal pal nanemalgal, tenal Pab-Jesús-igalgin pul nuekwa nanegal, tegin pe tulemal-okannobalo Pab-Jesúsbal pul nuekwa naigugal.
3 Tenal ibagwengin ibe nonikodo, tulemal Pab-Jesús-igal-chunchunnadgin pal kwen turdabijul-kudamalo e-itolegedbalbi nanemalgal. Al we tulemal ichejul tule-oturdamalad-aminonimalo, e-itobi-kujiidginbi ega chunmagal.
4 Tegin we tulemal Pab-Jesús-kaka-chunchunnad ebemalo, tegin we tulemal pinche-chunmamaladbal naigunonimalo.
5 Tenal pedin, pe meke-ibimalagin nuekwa pinzheenab, pe melle tule-koelejadyob nanegal. Tenal pe wilenaidgin, pe purtigenabbal. Tenal tule-Pab-wichulmaladga pe Pab-kaka-nuegangin-chunmakedgin, pe naneenabbal, tegin pedin pel-kwapa Pab-pega-chogzhadyob pe pél arpagenabbal.
6 Imi antin, an iche-napi pato purkwedani. Al antin kuakwa mai, Pab-Tummadga-immal-okugnaidgin napi vino-eyonaidyob.
7 Tenal chulubmal nuekwa pila-imajadyob tegin tule aga abarmakedgin nakwijadyob, an peyedzhe alamas Pab-Jesúsgin-penzhulidgin unnigugal.
8 Al anka imis-akar olo-kurkin-chwilidikid chabolejii. Imi Pab-Jesús kannan tanikil, Pab-igal-itoged-napírragwad anka olo-kurkin uko. Tenal ankabi olo-kurkin kwen uklegojul, tenal Pab-kannan-tanikoedgin tule-pel-kwapa-pela-pela-Jesús-abintabukmaladga uklenonimogo. Pablo aga tukin chunmajad
9 Tenal pedin, pe kueye-kueye anche tago.
10 Imi Demasdin peyedzhe iti-nap-pilaled-ulgin an-mete, ilgwen Tesalónicaje nad. Tegin Crescentedin Provincia-Galaciaje nadmo, tegin Titodin Provincia-Dalmaciaje nadmo.
11 Imi Lucasbi anpak wis mai. Tenal pe Marcos-amijal, anka pe chedago. Imi an takto, Marcosdin tule-nued an-pentagal Pabga arpagal.
12 Tenal Tíquicodin an tar-palmis, Efesoje.
13 Tenal pe anche alil, pe Troasgin Carpo-neggin an-chuba-ebejad, tegin karta-ebirmakaled-maid, anka pe chedabalo. Tenal we karta kege-chulgu pe anka chedago, pe melle igeo.
14 Tenal Alejandro-esnungad-immal-chobeddin peyedzhe ankin istar chunmadi-kus. Al Pabdin Alejandro-ankin-walmajadun, sapejul Alejandro-oturdako.
15 Timoteo, wijira we Alejandroje. Imi Alejandro anmal-Pab-Jesús-kaka-nuegangin-chunmalejadgin peyedzhe abin-kwisgus.
16 Imi tule-tummagan kepe anka igal-itogalgu, antin naga walagwen chunmas, kwenamalad-pimalad an-kwen-pentaszhul. Tenal we kwenamalad pél an-ebesmal. Imi tulemal-ankin-walmaszhulidyob, Pab we tulemal-takelen, nabirin.
17 Tenal Pab anpak-kwichidbal an-okannos. Al Pab-Jesús-kaka-nuegan pel-kwapa tule-Judiojulmaladga anpal nuekwa choglenoni. Tenal Pab achu-kinnidzhe-kullegued-akar an-abonosbal.
18 Tenal Pabdin tule-iskan-istar-an-imabied-ilbal an-abonononibalo. Tenal Pab e-neg-takmaidgin yer an-odogo ebak meggal. Imi Pab Tummad pane-pane ilagwen-nadgu otummoledi-kuelen, nabirin. Pitogua.
19 Tenal pe Priscaga, tegin Aquilaga tegin Onesíforo-neg-yaginmaladga pe chogo: “Antin nued mai.”
20 Tenal Erastodin neg-kwebur-Corintogin pes. Tegin Trófimodin neg-kwebur-Miletogin an yee tar-ebes.
21 Tenal pedin, ampayo ti-ni-naigueddu, pe kueyejal anche tagenab. Tegin kwenamalad-wegin-pukmalad Eubulo, Pudente, Lino, Claudia, tegin Jesúsgin-kwenamalad-pel-kwapa pemalga kaka wis palmijimo.
22 Imi Pab-Jesús pe-purpabak kudiguelen, nabirin. Tegin Pab pemalga immal-nuegan imakelen, nabirbalin. Pitomalgu.