1

¹ Buki teina ainai Yeisu Besinana yana veꞌita wasana, Yaubada iꞌaiyauyaei na ebeha Yeisu iveꞌitaei yana taupaihowao aidiyai na hihanapui hava mata muhamuhana imahalavane. Teina veꞌitane Yeisu Besinana yana tausagenawasa ivetamalei yau yana taupaihowa Yoni aliguwai na yawalo mahalavaei.

² Yau ginaulidine bada yaꞌitadiꞌo maudoina, ainaena yamwau mahalavaedine, neta Yaubada yana walo, na hinage Yeisu Besinana yana wasa.

³ Uyaliyaya owa taulauvahili na amyaliyaya omiu taubenali, eeta teina walomahalava lelelelena ambenalei na ammulitaei, wuwuna ginaulidine yawalo mahalavaedine muhamuhana mata himahalava. Awayauwedo boda maudoina 7 aidiyai

⁴ Yau Yoni yami leta yaleleyawa omiu boda tauyemidiwo tupwa 7 Esiya holanai. Atemuyamuya na nuwadaumwali alimiyai, Yaubada ainaena, na hinage aluꞌaluwa 7 aidiyena, hinage Yeisu Besinana ainaena. Iya Yaubada mwalona, ta hauga teina, yo hauga ilalaoma aidiyai imiyamiya, na aluꞌaluwaone 7 hiya Yaubada yana abamiya wasawasa mehenai himiyamiya. Yeisu Besinana iya tauwalo moiha, na hinage iya mwalowoiyena itowolo mugai, ta baleꞌu ana tauwasawasao yadi Tauwasawasa. Ibom Yeisune ivelauwegita na yada pwanoliwone ꞌwahinanaena iwuwadine.

⁶ Eeta imwau ahaigita na ebeha tavetauloina na tapwaoli Tamana Yaubada ainai. Iya Yeisunane yana wasawasa yo yana wahiyala miyamiya vateyaidi. Moiha.

⁷ Na amꞌita iya ilalaoma yalovi ainaena, na tomowa maudoidi yo hinage ana tauwomaliwo maudoidi hiꞌita, na taumiya baleꞌu tupwa maudoina aidiyena hinuwaꞌuvali na vehabana mata hidou mwalaꞌina. Teina mata imahalava. Moiha.

⁸ Yada Bada iwalo, ‘Yau abavetuwuni yo abaꞌovi’. Ibom Yaubadane Tauwahiyala moiha, na mwalona yo wau yo hauga hilalaoma aidiyai imiyamiya. Besinana ana ita

⁹ Yau tahimiu Yoni. Taveboda eheboꞌo Yeisu Besinana baidada, yana abaloina holanai omiu na yau taꞌalamaꞌiꞌitanegita muyamuya yo vitai aidiyena. Yau mwalona hipaigau na himwauwigau bwanabwana Patimo ainai, wuwuna yaguguya Yaubada yana walo yo Yeisu wasana.

¹⁰ Tenem ainai yada Badane yana ahubena ainai Aluꞌaluwa Veꞌahihi yalautowoi aliguwai, na ainaena ehebo alinana mwalaꞌina yabenalei dova yoguli iꞌauꞌaubabada dagelaguwai, iwalo,

¹¹ ‘Ginaulidine howola abo uꞌitadi na vehabadi ulaulele buki ainai, na bukine uvetamalei boda tauyemidiwo 7 aidiyai, neta Epeso, Simena, Pegamosi, Tayataila, Sadisi, Piladelipiya yo Laodisiya aidiyai’.

¹² Eeta yatowolo gwaipile ebeha yaꞌita yaiya aliguwai iꞌauꞌaubabadane. Tenem ainai masele adi abamwau 7 yaꞌiꞌitadine goula aidiyena hipapaihowaidine.

¹³ Na ahiꞌahipudiyai ehebo yaꞌita, dova Towaho Moihana, ana aleꞌo dabalonaena ta idobi aenai, na nuwanuwanai ana tulituli goula,

¹⁴ na vahunane hewahewa alilina, dova ahole vauvauna, na mehena dova aiwa alaꞌalahawawalina.

¹⁵ Na aena namanamalina dova pwawati vauvauna higabu, na alinana ana benali dova bwahi mwalaꞌidi dagugudi,

¹⁶ na hinage utui 7 nima tautuwanaena iꞌabihinidi, na hinage awanaena elepa aleꞌaleha imahamahalava mehemehegaina tupwa bwaubwauna ainaena, na maninane dova mahana ihinahinali, mahana alaꞌalapwahiyai.

¹⁷ Na haugana yaꞌita, aenai yabeꞌu dova yamwalowoi, na nima tautuwanaena iꞌabi aliguwai, na iwalo, ‘Havena umehemeheuhi, wuwuna yau abavetuwuni yo abaꞌovi.

¹⁸ Mayawahigu yamiyamiya, mwalona yamwalowoi na uꞌita yau yamiyamiya na mata nigele yayaꞌovi. Eeta nimaguwai mwalowoi yo Bwebweso adi awaꞌeda abahoꞌena yaꞌabiꞌabi avivinidi.

¹⁹ ‘Inamwanamwa. Ginauli teina uꞌitadiꞌo uleledi, na hinage hava mata mulitai himahalava uleledi.

²⁰ Teina utuine 7 nima tautuwaguwai na hinage masele adi abamwau 7 uꞌitadiꞌo, adi nuwamasele dawadawanidi, alimwai yaꞌabiye masele. Utui 7 neta tausagenawasao 7 tauyemidiwo 7 vehabadi, na masele abamwauwina 7 neta hiya boda tauyemidiwo 7.

2

¹ ‘Tausagenawasane tautapwalolowone Epeso ainai iꞌitaꞌita avivinidine yana leta ulele Epesowone vehabadi, na uwalo, ‘Wasa teina ilaoma towahone ainaena iya utuiwone 7 nima tautuwanaena iꞌabi avivinidine, na masele abamwauwina goula 7 ahiꞌahipudiyai ilaulau. Iya teina yana walomahalava alimiyai, iwalo:

² ‘Yahanapuiyaꞌo, neta yami paihowa mwalaꞌina ainaena, yo yami alamaꞌiꞌita aidiyena, amwahiyalaꞌo, eena tauyababao nigele nuwamiu, eeta amtowoidi ta ebeha hiya tauyewasao na hesi hiya nigele, ta yadi oyamaꞌo amlobaidiꞌo.

³ Na hinage alamaꞌiꞌita amhanahanapui, ta paihowa vitaidi na mwalaꞌidi aidiyena nigele amyatapiya yehagu vehabana.

⁴ ‘Na yau ehebo ginauli alimiyai yaꞌita nigele iyanamwanamwa, neta mwalona yami velau namwanamwana aliguwai na hesi bada amlau mwauyaꞌo.

⁵ Mwalona namwanamwamiu, na amnuwatuwu avivini yami miyamiyawa ainaena ambebeꞌune, eeta amnuwabui na ampaihowa namwanamwa, dova mwalona. Na ebe nigele amyanuwabui mata yalaowa na yami masele abamwauwina yavaivehulu alimiyena.

⁶ Na yahanapuigomiuꞌo ebeha ginauli namwanamwana alimiyai, neta Nikoleitani yana bodao yadi mumuga amtaꞌwataꞌwataei, yau dova.

⁷ ‘Eeta ebe alimiyena yaiya matalinana ibenalei Aluꞌaluwa Veꞌahihi yana walo tauyemidiwone aidiyai. Na ebe alimiyena yaiya Tomodulele iwahiyala, gabae iya yawahi ana aiwa ainona yatalamwei iꞌai, aiwane itowotowolo Yaubada yana tanovi namwanamwana ainai. Simena yadi leta

⁸ ‘Tausagenawasane tautapwalolo Simenawone ainai iꞌitaꞌita avivinidine yana leta ulele Simena vehabadi na uwalo, Wasa teina ilaoma iya abavetuwuni yo abaꞌovi ainaena, iya imwalowoiꞌo na itowolouyo ta mayawahina imiyamiya. Iya teina ibom yana walomahalava alimiyai iwalo:

⁹ ‘Bada yahanapuiyaꞌo amveꞌatemuyamuya, neta omiu wewelohe, na hesi moiha omiu wasawasa. Na hinage yahanapuiyaꞌo ebeha tupwadi hiꞌawaꞌawa yababaegomiu na hinage hiwalo, “Ai Yudeya”, na nigele. Na hesi hiya Tomodulele yana bodao.

¹⁰ Na havena ammehemeheuhi ebe ginauli teya ainai muya amlobai. Amnuwatuwu avivini mata howola Tomodulele abo itowoigomiu na tupwamiu hipaigomiu na vada paipaiyai himwauwigomiu, na hesi ami vitaine ahubena 10 aꞌava vehabana. Na amtowolo wahiyala ana higa mwalowoi, ta ebe yawahimiu vateyai yamohegomiu.

¹¹ ‘Eeta ebe alimiyena yaiya matalinana Aluꞌaluwa Veꞌahihi yana walo tauyemidiwo aidiyai ibenalei, na hinage yaiyadiwo alimiyena Tomodulele amwahiyala gabaei, mata nigele mwalowoi bwauna iyaꞌabiye yababagomiu. Pegamosi yadi leta

¹² ‘Tausagenawasane tautapwalolowone Pegamosi ainai iꞌitaꞌita avivinidine yana leta ulele Pegamosiwone vehabadi, na uwalo, ‘Wasa teina ilaoma iya mayana elepa aleꞌaleha, mehemehegaina tupwa bwaubwauna ainaena. Iya teina yana walomahalava alimiyai, iwalo:

¹³ Bada yahanapuiyaꞌo tupwanane ainai ammiyamiyane neta Tomodulele yana abamiya wasawasana. Na hesi amyemidiyegau, wuwuna nigele amyauvalaegau. Na Tomodulele yana tupwane ainai mwalona ehebo agu tauwalo moiha hiꞌoiye mwalowoiyaꞌo, yehana Anitipasa, na hesi amꞌabi avivinigau mwalaꞌina.

¹⁴ ‘Mumugamiu tupwana vehabana nigele yayayaliyaya, wuwuna tupwamiu Balam yana veꞌitao ammulimulitaedi. Na yana veꞌitaone mwalona Belaki imulitaedi, na Isileli mumuga yababana iveꞌitadi, neta aiwa tagitagi aiꞌai himomoheiwa, ta hiꞌaiꞌai, yo hinage himehemeheganawali.

¹⁵ Na hesi ehebo ginauli nigele namwanamwana, neta tupwamiu Nikoleitani yana bodao yadi veꞌita ammulimulitaedi.

¹⁶ Ainaena teina taꞌi mumuga yababana aidiyena amnuwabui. Na ebe nigele, hauga habuluna ainai yalaowa na yaꞌalehaigomiu, elepa aleꞌalehaena awaguwena imahamahalava ainaena.

¹⁷ ‘Eeta ebe alimiyena yaiya matalinana, Aluꞌaluwa Veꞌahihi yana walo tauyemidiwo aidiyai ibenalei. Na ebe yaiyadiwo Tomodulele amwahiyala gabaei, aiꞌai dawadawanina yamohegomiu. Na hinage ehebo ehebo ainai yaꞌaiyauya gaima hewahewadi, na gaimadine aidiyai yehamiu vauvaudi leleleledi, neta nigele teya howahowana ihanapuidi, bada hibom tauvainane hihanapuidi. Tayataila yadi leta

¹⁸ ‘Tausagenawasane tautapwalolowone Tayataila ainai iꞌitaꞌita avivinidine yana leta ulele Tayatailawone vehabadi, na uwalo, ‘Wasa teina ilaoma Yaubada Natuna ainaena, iya mehena adi ita dova aiwa hawahawawalina, na hinage aena namanamalidi dova pwawati vauvauna higabu.

¹⁹ Iya teina yana walomahalava alimiyai, iwalo: ‘Yami paihowao bada yahanapuidiꞌo, yami velau yo yami yemidi yo yami paihowa yo yami alamaꞌiꞌita, na yahanapuigomiuꞌo teina hauga yami paihowao hinamwanamwa alili, na mwalona tupwana.

²⁰ ‘Na hesi teina ainai ehebo ginauli vehabana nigele yayayaliyaya, wuwuna Yesibeli ainai amtalamwegomiu, ibom waihiune iwawalone ebeha iya ehebo Yaubada ana tauwalo mahalava, na nigele. Hesi waihiune yagu taupaihowaone iveꞌita pwanolidi ta higanaganawali yo hinage aiwa tagitagi aidiyena iniuniulidi, ta ana himohemohei na tupwana hiꞌaiꞌaidi.

²¹ Na bada waihiunane yana hauga yamohenaꞌo na ebeha yana meheganawali aidiyena inuwabui, na hesi nigele nuwana na yana pwanoline itaꞌwataꞌwataei.

²² Eeta asiyebwa mata yamohei na ebe yaiyadiwo hiya baidanao hipwanoli muya mwalaꞌina hilobai, ebe yadi paihowa yababana aidiyena nigele hiyanuwabui.

²³ Na hinage natunao mata yaꞌoiye mwalowoidi, na ainaena tauyemidiwo maudoidi hihanapuigau ebeha yau tomowa maudoidi yadi nuwanuwatuwu atediyai maudoina yahanahanapuidi, na hinage maudoina alimiyai yayemaiha hava dova yami paihowao, namwanamwadi bo yababadi.

²⁴ Na hesi omiu Tayatailawone maudoimiu, vitai teina yababanane nigele amyamulitaedi, yo Tomodulele yana nuwatuwu honihoni nigele amyahanapui, mata nigele avaꞌavala vitavitaina yayamohegomiu.

²⁵ Na hesi mayami yemidi amtowolo wahiyala ana higa yawuyoma.

²⁶ ‘Hinage ebe yaiyadiwo omiu Tomodulele amwahiyala gabaei, na yagu paihowaone besiwa ampaipaihowaidi ana higa yana abaꞌovi ainai, loina yamohegomiu na tupwa maudoidi amloinaedi, dova Tamagu loina imohegauꞌo. Na yami loinane wahiwahiyalana ainaena amloina tomowa aidiyai, dova pwawati ainaena walata taꞌoiwowoli yehaꞌahaꞌa.

²⁸ Na hinage utui sailohana mata yamohegomiu.

²⁹ ‘Eeta ebe alimiyena yaiya matalinana, Aluꞌaluwa Veꞌahihi yana walo tauyemidiwo aidiyai ibenalei.

3

¹ ‘Tausagenawasane tautapwalolowone Sadisi ainai iꞌitaꞌita avivinidine yana leta ulele Sadisiwone vehabadi, na uwalo, ‘Wasa teina ilaoma towahone ainaena, iya towahone Yaubada Aluꞌaluwana 7 yo hinage utui 7 ainai himiyamiya. Iya teina yana walomahalava alimiyai, iwalo: ‘Yami paihowa bada yahanapuidiꞌo, na wasamiu yabenalei ebeha mayawahimiu ammiyamiya, na hesi nigele, wuwuna aluꞌaluwamiu bada himwalowoiꞌo.

² Ainaena enoꞌenowena amtowolo na hava habuluna alimiyai imiyamiya amꞌabiye mwalaꞌi, na havena maudoina imwalomwalowoi. Yahanapui yami paihowa yagu Yaubada mehenai tupwana nigele hiyadumwalu.

³ Na mwalona veꞌitanane hiveꞌitagomiuꞌo yo ambenalenaꞌo, howahowana amnuwatuwu avivini na amnuwabui, ta ammulita iliꞌilimani. Na ebe nigele enoꞌenowena amyatowolo, howola abo alimiyai yalaowa na aluwamiu yavegavai dova tauꞌaivavali, na nigele amyahanapui aiteya ahubena ainai yalaowa.

⁴ ‘Na tupwamiu Sadisi ainai ami aleꞌo masemaseledi, howola abo omiu baidaguwao talau oviꞌovi maꞌada aleꞌo hewahewadi, wuwuna omiu ilowoinanegomiu.

⁵ Na ebe yaiyadiwo alimiyena Tomodulele amwahiyala gabaei omiu hinage ami aleꞌo hewahewana amliꞌwadi, na havena yehamiu yawahi bukina ainaena yahoꞌehoꞌe vehulu, na hesi ebeha yehamiu mata yawalo mahalavaedi Tamagu mayana tausagenawasao mehediyai, ebeha omiu yagu boda.

⁶ ‘Eeta ebe alimiyena yaiya matalinana Aluꞌaluwa Veꞌahihi yana walo tauyemidiwo aidiyai ibenalei. Piladelipiya yadi leta

⁷ ‘Tausagenawasane tautapwalolowone Piladelipiya ainai iꞌitaꞌita avivinidine yana leta ulele Piladelipiyaone vehabadi na uwalo, ‘Wasa teina ilaoma iya masemaselena na moihana ainaena, na hinage iya Deivida yana abahoꞌe nimanai iꞌabiꞌabi avivini, na ebe awaꞌeda ihoꞌe nigele teya howahowana na igudui, na hinage ebe igudui nigele teya howahowana ihoꞌe.

⁸ Iya teina yana walomahalava alimiyai iwalo: ‘Yami paihowao bada yahanapuidiꞌo, na hinage yahanahanapui yami wahiyala tupwana imiyamiya, wuwuna yagu veꞌitao ammulimulitaedi, na hinage yehagu nigele amyauvalaei. Eeta amwaha yahoꞌeyaꞌo mehemiyai na nigele teya howahowana na igudui.

⁹ Na moiha, hiya Tomodulele yana bodao hiꞌoyama hiwalo ebeha hiya Yudeya, na hesi nigele. Eeta howola abo yaloinaedi na hilaoma mehemiyai na hipwagogo na maudoidi hihanapui ebeha omiu yavelauwegomiu.

¹⁰ Na howola abo hauga vitai imahalava baleꞌuwai, na tomowa maudoidi itowoidi na omiu hesi mata vitaine ainai yaꞌita avivinigomiu wuwuna yagu walo ammulimulitaedi na vehabagu amꞌalamaꞌiꞌitaegomiu.

¹¹ ‘Muhamuhana abo yalaowa na hava dova alimiyai imiyamiya amꞌabi avivinidi na mata nigele yaiya maihane alimiyena iyavaivehulu.

¹² Na ebe alimiyena teya Tomodulele iwahiyala gabaei, yaloina na ivelogidi Yaubada yana vada veꞌahihi vehabana, na mata nigele hinage iyalaugabaei, na alimiyai Yaubada yehana yalele, na hinage Yaubada yana dalava yehana yalele, neta Yelusalem vauvauna, howola abo galewaena iꞌaituluma yagu Yaubada ainaena. Na hinage alimiyai yehagu vauvauna yalele.

¹³ ‘Eeta ebe alimiyena yaiya matalinana, Aluꞌaluwa Veꞌahihi yana walo tauyemidiwo aidiyai ibenalei. Laodisiya yadi leta

¹⁴ ‘Tausagenawasane tautapwalolowone Laodisiya ainai iꞌitaꞌita avivinidine yana leta ulele Laodisiyaone vehabadi, na uwalo, ‘Wasa teina ilaoma Moiha ainaena iya tauwalo moiha, na hinage iya Yaubada yana paihowao wuwuna, iwalo mahalava alimiyai iwalo:

¹⁵ Yami paihowao bada yahanapuidiꞌo ebeha nigele alaꞌala wowoli yo gwagwama. Nuwanuwagu ehebo tupwa ainai ammiyamiya.

¹⁶ Na hesi omiu bada ahiꞌahipuwai, nigele alaꞌala wowoli yo gwagwama yadi tupwai amyamiyamiya. Ainaena awaguwena mata yahowa vehulugomiu.

¹⁷ Na omiu amwalo, “Yau wasawasa, na ginauli maudoina howahowagu”, na nigele amyahanapui ebeha omiu bada wewelohe, na atemuyamuyamiu, na hinage mehegibugibumiu na bugebugewamiu.

¹⁸ Ta ainaena yavenuwamwauwegomiu na aliguwena goula moiha amgimwala na ainaena amwasawasa, na hinage aleꞌo hewahewadi amgimwala na amliꞌwadi na havena mabugebugewamiu amlaulau, na hinage mulamula amgimwala na mehemiyai amhiwaidi na mehemiu himaseleuyo.

¹⁹ ‘Na amnuwatuwu avivini ebeha yaiyadiwo omiu yavelauwegomiu, ta yahinahinabodaigomiu neta yaꞌabiye dumwalugomiu ta amwahiyala na amnuwabui.

²⁰ Na amꞌita, yau yami awaꞌedai yatowotowolo na yaꞌaigohagoha. Na ebe yaiya owa alinagu ubenalei awaꞌeda uhoꞌe, mata yaluwuwa na owa na yau taveꞌauꞌaugelu, na owa baidagu taꞌai yaugogo.

²¹ Na ebe yaiyadiwo alimiyena Tomodulele amwahiyala gabaei, yatalam alimiyai na baidaguwao tamiya yagu abamiya wasawasa ainai, dova yau Tomodulele yawahiyala gabaeine, ta Tamagu yana abamiya wasawasa ainai baidagu amiyamiyane.

²² ‘Eeta ebe alimiyena yaiya matalinana Aluꞌaluwa Veꞌahihi yana walo tauyemidiwo aidiyai ibenalei.’

4

¹ Ginauli teina bada hiꞌoviꞌo na yavinuvinunu, ta ehebo awaꞌeda yaꞌiꞌitane galewaena ilotahoꞌe. Na hinage ehebo alinana yabenalei dova yoguli, iya mwalona yabebenaleiwa, aliguwai iwalowalo iwalo, ‘Uhaema na yaveꞌitago hava mata mulitai imahalavane’.

² Maiꞌehebo na Aluꞌaluwa Veꞌahihi yana wahiyala yalautowoi, na galewai ehebo towaho yaꞌiꞌitane yana abamiya wasawasa ainai imiyamiya.

³ Na maninane yaꞌita inamanamali dova gaima wasawasa. Na yana abamiya wasawasane hulele alaꞌalawana itowolo gwaigwaipileyei.

⁴ Na abamiyao wasawasadi adi bagibagili 24 himiya gwaigwaipileyei na abamiya wasawasa aidiyai babadao hitau 24 himiyamiya maꞌadi aleꞌo hewahewadi na hinage maꞌadi pwaopwaomi wasawasa goula vahudiyai.

⁵ Na abamiya wasawasane ahiꞌahipudiyena tupwana ginauli himahamahalava, namali na dagugu na tutu. Na hinage abamiya wasawasa mehenai lampa 7 hiꞌalaꞌalahi, hiya neta Yaubada Aluꞌaluwanao 7.

⁶ Na abamiya wasawasane mehenai ehebo ginauli inamanamali dova daumwali namwanamwana niꞌu ewanai, ana ita dova vihilo. Na hinage abamiya wasawasane vahalinai meimeituwa vehopali hitowolo taꞌiꞌiliyei, na mehedi dageladi yo nuwanuwadi iꞌoiye mwau.

⁷ Ehebo meimeituwa ana ita dova laiyoni, na bwaunane dova bulumakau, na tonuganane maninane ana ita dova tomowa, na hinage vehopalinane ana ita dova manihubu iyevayeva.

⁸ Na ehebo ehebo pepediyao adi bagibagili 6, na pepediyaone maudoidi aidiyai mehe hiꞌoiye mwaudi pepedi ewadiyai yo elauhadiyai. Na hauga maudoina, ahubena yo masigili aidiyai, hiwaliwali, na hiwalowalo:

‘Veꞌahihim, veꞌahihim, veꞌahihim, Bada Yaubada Tauwahiyala alili.

Owa hauga mugai, na hauga teina na hauga ilalaoma aidiyai umiyamiya.’

⁹ Taumiya vateyaine yana abamiya wasawasa ainai imiya, na hauga bagibagilidi meimeituwaone teina hiwaliwali vetuvehae na hiveꞌaveꞌahihiyei, na hinage hiꞌawaꞌawa yauwedo ainai.

¹⁰ Na hauga bagibagilidi ebe meimeituwaone hiwaliwali babadaone hitau 24 hipwagogo iya miyamiya vateyaina yana abamiya wasawasane mehenai na hiwalowalo vetuvehae ainai. Na adi pwaopwaomi wasawasao abamiya wasawasa mehenai himwauwi aituluwedi na hiwalowalo,

¹¹ ‘Owa yama Bada na yama Yaubada, na walo vetuvehae yo veꞌahihi yo wahiyala ilowoinanego, wuwuna owa ginauli maudoidi uyemaseledi ubom yamnuwatuwuwena ta wau himiyamiya.’

5

¹ Eeta iya abamiya wasawasana ainai imiya na yaꞌiꞌitane, na nima tautuwanaena peipa youyouna iꞌabi avivini, na lelelelena holanai yo tuluhanai, na hinage peipane ana hipwaone adi bagibagili 7.

² Na hinage ehebo tausagenawasa wahiwahiyalana yaꞌita, na alinana mwalaꞌina iyogayoga, iwalo, ‘Yaiya ilowoinanei lauhipwane ilivahidi na peipane iꞌala?’

³ Na moiha, nigele yaiya teya iyalobai galewai yo baleꞌuwai yo baleꞌu elauhanai ebeha howahowana na lauhipwaone ilivahidi na peipa holana iꞌita.

⁴ Ainaena yanuwayababa moiha na yadou, wuwuna nigele yaiya teya howahowana na peipa iꞌala na holana iꞌita.

⁵ Eeta babadao aidiyena ehebo aliguwai iwalo, ‘Havena udoudou, wuwuna laiyonine Yuda ainaena, iya Deivida yana huhuwena bada Tomodulele iwahiyala gabaenaꞌo, ta iya howahowana na lauhipwane 7 ilivahidi na peipane youyouna iꞌala’.

⁶ Na hinage abamiya wasawasa vahalinai ehebo Lami yaꞌita, meimeituwa vehopali ahiꞌahipudiyai itowotowolo, na babadao hinage ahiꞌahipudiyai, na ana ita dova tomowa Lamine hiꞌoiye mwalowoiyaꞌo. Na waꞌiyanao maudoina 7 na hinage mehenao maudoina 7, hiya mehenaone Yaubada Aluꞌaluwanao hitau 7 ivetamaledi baleꞌu maudoina aidiyai.

⁷ Na Lamine ilau ta peipane youyounawa ivai iya abamiya wasawasa ainai imiyamiya nima tautuwanaena.

⁸ Na peipanane youyounane ivai na meimeituwao hitau vehopali, na hinage babadaone hitau 24 Lamiwa mehenai hibeꞌutalu mayadi abayepaipaihi, na hinage mayadi gaeba goula namwanamwadi, na gadoꞌa panena namwanamwana gaeba holadiyai hiꞌoiye mwaudi na ana nuwamasele neta Yaubada yana tomowao yadi awanoi.

⁹ Na wali vauvauna hiwaliyei, hiwalo,

‘Moiha, owa ilowoinanego na peipa youyouna neta uvai, na hinage ilowoinanego ta ana lauhipwao ulivahidi, wuwuna bada hiꞌoiye mwalowoigoꞌo, na ꞌwahinamwena tomowa uyemaihadiꞌo Yaubada vehabana, hiya bodaone yo alinaone yo huhuwone yo abaloinaone maudoidi aidiyena.

¹⁰ Wuwuna owa uꞌabiye lowoinanedi ta ebeha yam abaloina holanai hivetaupwaoli yada Yaubada vehabana, yo hinage baleꞌuwai mata hivetauloina.’

¹¹ Na hinage yaꞌita na yabenalei tausagenawasao tausani ta tausani, nigele howahowana tavahili veꞌovidi. Tausagenawasaone abamiya wasawasane na meimeituwaone na hinage babadaone hitowolo taꞌiꞌiliyedi,

¹² na alinadi mwalaꞌina yabenalei hiwaliwali, hiwalo,

‘Iya Laminane hiꞌoiye mwalowoiwa howahowana loina yo wasawasa yo hanapu yo wahiyala yo veꞌahihi yo walo vetuvehae yo hinage noꞌo ilobaidi’.

¹³ Na hinage Yaubada yana yemaselewo ehebo ehebo galewai yo baleꞌuwai yo baleꞌu holanai yo niꞌuwai, na hinage yana yemaselewo tupwa maudoina aidiyena, yabenaledi hiwaliwali, hiwalo:

‘Iya abamiya wasawasa ainai imiyamiya na hinage Lamine baidana walo vetuvehae yo veꞌahihi yo noꞌo, yo wahiyala aidiyai imiya vateyai’.

¹⁴ Na meimeituwaone hitau vehopali hiwalo, ‘Moiha’, na hinage babadaone hibeꞌutalu, na hipwagopwagogo na hiwalowalo vetuvehaeyei.

6

¹ Na Lamine yaꞌita lauhipwa ehebo ililivahine lauhipwaowa aidiyena, na meimeituwaone vehopali aidiyena ehebo alinana dova tutu yabenalei, iwalo, ‘Ulaoma!’.

² Eeta yavinuvinunu na ehebo hosi hewahewana ilaoma, na ana taugelune nimanai gita, na Yaubada pwaopwaomi wasawasana imomoheine. Na ilau iꞌaleha ta ebe iwahiyala.

³ Na Lamine lauhipwa bwauna ilivahi, na hinage meimeituwa bwauna alinana yabenalei iwalo, ‘Ulaoma’.

⁴ Eeta hinage teya hosi hawahawawalina ilaoma, na ana taugelune Yaubada wahiyala himohei ta aleha ivaiyama baleꞌuwai, na ebe tomowa maudoidi hibom hiꞌalehauyoidi ta hiwunuwunuyoidi. Ta elepa aleꞌaleha mwalaꞌina imohei.

⁵ Na Lamine hinage lauhipwa tonugana ilivahi na hinage meimeituwa tonugana alinana yabenalei iwalo, ‘Ulaoma’. Eeta yavinuvinunu na ehebo hosi gibagibana ilaoma, ana taugelune nimanai yana sikele aiꞌai vehabana.

⁶ Na ehebo alina meimeituwaone vehopali ahiꞌahipudiyena yabenalei, iwalo, ‘Aee, kapole vahali mwalaꞌina: pegapega ana vitai ehebo neta ahubena ehebo ana maiha na pwalawa ana vitai tonuga neta ahubena ehebo ana maiha. Na hesi olibe aiwadi yo guleipi oyadi havena amveyaveyababadi.’

⁷ Na Lamine hinage lauhipwa vehopalina ilivahi, na hinage meimeituwa vehopalina alinana yabenalei, iwalo, ‘Ulaoma’.

⁸ Eeta yavinuvinunu na ehebo hosi ana ita tupwana hewahewana ilaoma. Na ana taugelune yehana Mwalowoi na hinage Bwebweso vahalinai imulimulitaei, na hitau bwauwone loina hivai Yaubada ainaena ebeha tomowa maudoidi himutudi alehaena yo vahaliyena yo asiyebwaena yo hinage lagulagu manimaninidi aidiyena, na nigele ebeha tomowa maudoidi himutudi, na hesi baleꞌu maudoina ainaena boda tawahei adi bagibagili vehopali, na aidiyena mata ehebo boda maudoidi himutudi, na boda tonuga hitupwa.

⁹ Na hinage Laminane lauhipwa 5 ilivahi, na Yaubada yana abapwaoli elauhanai yana tamowao aluꞌaluwadi yaꞌitadi, hiya mwalona baleꞌuwai Yaubada yana walo ana tauwalo moiha namwanamwadi, na teina vehabana tomowa hiveꞌalehaedi na hiꞌoiye mwalowoidine.

¹⁰ Na aluꞌaluwaone alinadi mwalaꞌinaena hiyogayoga, hiwalo, ‘Bada Tauwahiyala moiha na veꞌaveꞌahihim, aiteya hauga ainai mata ama tauꞌoiye mwalowoiwone baleꞌuwai ulauvetalaedi na uyemahaidine’.

¹¹ Eeta adi aleꞌo hewahewadi imohedi, na iwalo ta hauga ubwaꞌubwana hiꞌaiyawasi, ana higa tupwadi hinage yadi taliya taupaihowao yo tahidiyao taumiya baleꞌu hiꞌoiye mwalowoidi, ta dova mwalona hiya himwamwalowoiwa Yaubada yana paihowa vehabana ta adi vahivahili howahowadi na abo Yaubada taumiya baleꞌu iyemaihadi.

¹² Na Lamine hinage yaꞌita lauhipwa 6 ilivahi na mwaniꞌiniꞌi mwalaꞌina isagena, na mahana iguguyou, ana ita dova walata dubina, na hinage waiꞌena ana ita maudoina hawahawawalina ꞌwahina dova.

¹³ Na utuiwone galewaena hibeꞌuma, dova ebe aiwa ainona yaumai wahiwahiyalana itowa ta ainonaone hiholuholu.

¹⁴ Na galewa yaꞌita dova peipa iyou ta isawali, na oya ehebo ehebo yo bwanabwanao himiya geyoꞌawa vali tupwa aidiyai.

¹⁵ Na baleꞌu adi tauwasawasao yo tauloinao yo aleha adi babadao yo wasawasao yo tauwahiyalao, yo hinage tomowa mohili yo taupaihowao, maudoidi hidena oyai, na duluva yo gaima aidiyai hiꞌaidawani.

¹⁶ Eena hiyoga gaima yo oya aidiyai, hiwalo, ‘Ambeꞌuma ewamaiyai, ta ebe havena iya abamiya wasawasa ainai imiyamiyane iꞌitaꞌitagai, na hinage Lamine yana modiꞌini ainaena.

¹⁷ ‘Wuwuna Yaubada na Lamine yadi modiꞌini ana ahubena mwalaꞌina bada imahalavamaꞌo, na nigele teya yaiya howahowana na iwahiyala gabaedi.’

7

¹ Ginauli teina tuluhanai tausagenawasa vehopali yaꞌiꞌitadine hitowotowolo baleꞌu tupwanao vehopali aidiyai. Tausagenawasawone yaumai mehena adi bagibagili vehopali hiꞌabiꞌabi avivinidi ta ebeha havena baleꞌu yo niꞌu yo aiwa aidiyai hitowatowa.

² Yaubada italam na ebeha tausagenawasaone baleꞌu yo niꞌu hiꞌabiye yababadi. Na ehebo hinage tausagenawasa yaꞌita mahana yana abapoetaohaniyena ilaolaoma na nimanai Yaubada miyamiya vateyaina ana veꞌiveꞌilala. Tausaganawasanane iyoga tausagenawasaone vehopaline aidiyai,

³ iwalo, ‘Havena baleꞌu yo niꞌu yo aiwao amꞌabiꞌabiye yababadi ana higa yada Yaubada yana taupaihowao adi veꞌiveꞌilala tamwauwi manidiyai’.

⁴ Eeta veꞌiveꞌilalane himwauwi tupwana Isileli manidiyai, na mulitai Isileliwone adi bagibagili yabenaledi, neta 144,000 maudoina, neta Isileli huhu aidiyena.

⁵ Huhu Yuda aidiyena tomowa adi bagibagili neta 12,000 manidiyai himwauwidi, na Lubeni 12,000, na Gada 12,000,

⁶ hinage Ase 12,000, na Napitalai 12,000, na Manasa 12,000,

⁷ hinage Simiyoni 12,000, na Livai 12,000, na Aisake 12,000,

⁸ hinage Sebuloni 12,000, na Yosepa 12,000, na hinage Beniyamina 12,000. Boda mwalaꞌi aliꞌalilina

⁹ Mulitai, yavinuvinunu na boda imwalaꞌi alilina yaꞌiꞌitadine, nigele aivahili. Tomowaone abaloina ehebo ehebo aidiyena, na huhu ehebo ehebo aidiyena, na boda ehebo ehebo aidiyena, na alinao ehebo ehebo aidiyena, maudoidi abamiya wasawasa mehenai na hinage Lami mehenai hitowotowolo na adi aleꞌo hewahewadi, na labulabu luguna hiꞌabi avivinidi,

¹⁰ na alinadi mwalaꞌinaena hiyogayoga, hiwalo, ‘Ada livahi yada Yaubada ainai, iya abamiya wasawasa ainai imiyamiya, na hinage Laminane ainai’.

¹¹ Na tausagenawasaone abamiya wasawasanane yo hinage babadaone yo meimeituwaone vehopali hitowolo gwaigwaipileyedi, na maudoidi hibeꞌutalu na Yaubada ainai hipwagopwagogo ta mehenai hiwalowalo vetuvehae,

¹² hiwalo, ‘Moiha, yada Yaubada ainai tanoꞌo, yo taꞌawa wasawasaei yo hanapu yo awayauwedo yo veꞌahihi yo wahiyala himiya vateyai ainai. Moiha!’

¹³ Na babadaone aidiyena ehebo ipanivila aliguwai, iwalo, ‘Yaiyadiwo teina maꞌadi aleꞌo hewahewadi? Na havaena hilalaomane?’

¹⁴ Na ainai yawalo, ‘Taubada owa uhanahanapuidi, yau nigele’. Na iwalo aliguwai, iwalo, ‘Teina tomowaone baleꞌu muyana mwalaꞌina hiveꞌalo, na adi aleꞌowone Lamine ꞌwahinanaena hiuwadi ta hihehewane.

¹⁵ Neta wuwuna Yaubada yana abamiya wasawasa mehenai himiyamiya, na ahubena yo boniyai aidiyai yana paihowao hipaipaihowaidi yana vada veꞌahihi holanai. Na hinage Yaubada yana abamiya wasawasa ainai imimiya, iya iꞌitaꞌita avivinidi.

¹⁶ Nigele mata hiyavahaliuyo yo gadodi hiyamaguniuyo, na nigele mata mahana yo hava alaꞌalawowolina ainaena hiyamuyauyo.

¹⁷ Wuwuna Lamine, iya abamiya wasawasa holanai imiyamiya, iya adi tauꞌita aviviniyede, eeta iya imugaiyedi bidala aidiyai, yawahidi vehabana, na Yaubada mata mehelinodi ibaꞌilivehuludi.’

8

¹ Na Lamine lauhipwa sebenina ililivahine mahana ana hawahawaga tupwana holanai, nigele teya hinage taꞌetaꞌe yo dagugu yayabenalei galewai.

² Na mulitai tausagenawasaone 7 Yaubada mehenai hitowotowolo yaꞌitadi na Yaubada yadi yoguli ehebo ehebo imohedi.

³ Na hinage ehebo tausagenawasa mayana gaeba goula ilaoma, na abapwaoli mehenai itowolo. Na abapwaoline goulane Yaubada yana abamiya wasawasa vahalinai. Na Yaubada gaeba goulane iꞌoiye mwau gadoꞌa ainaena, na tausagenawasane imohei. Eeta tausagenawasane abapwaoline ainai imwauwi na igabu ta panenane Yaubada yana tomowao veꞌaveꞌahihidi yadi awanoi baidana ivilai ta ihahaene Yaubada mehenai.

⁴ Na gadoꞌa gaebana iꞌabi avivini na Yaubada mehenai itowotowolo ta awanoi yo gadoꞌa asuna baidana hihaehae.

⁵ Na tausagenawasane gaeba aꞌavana ivai, na abapwaoline ainaena aiwa alaꞌalahina ivai, ta gaebane iꞌoiye mwau, na igabaei aituluwei baleꞌuwai, na tenem ainai namali yo tutu yo tupwadi dagugu mwalaꞌidi na hinage mwaniꞌiniꞌi himahalava. Yoguli hiyuvidi

⁶ Eeta tausagenawasaone 7 yadi yoguli hiꞌabi avivinidi habi yuvidi.

⁷ Na ehebo yana yoguli iyuvi na ꞌwesu ana ita vagana iꞌaitulu dova aisi poupouwana, na hinage aiwa alaꞌalahina ꞌwahina baidana hiholuholuma baleꞌuwai. Ebe baleꞌu maudoina tawahei tonuga, ehebo tupwa iꞌalahi na tupwa bwau nigele. Na tupwanane iꞌalaꞌalahine ainai aiwa yo awahi maudoina iꞌala veꞌovidi.

⁸ Eena tausagenawasa bwauna, yana yoguli iyuvi, na ehebo ginauli ana ita dova oya mwalaꞌina iꞌala hawawali na niꞌuwai higabaei.

⁹ Na ebe niꞌu maudoina tawahei tonuga, ehebo aidiyena iyemala ꞌwahina, na bwau namwanamwadi. Na niꞌune iyemala ꞌwahina ta yama na ginauli maudoidi himwalowoi na waga maudoidi ainai hilotalotaloꞌene.

¹⁰ Na tausagenawasa tonugana yana yoguli iyuvi, na utui mwalaꞌina iꞌalaꞌalahi ana ita dova wodam galewaena ibeꞌuma, ta baleꞌune wahei tonugaei na ehebo waheine ainai utuine ibebeꞌune ta bwahinao yo bidalanao maudoina hiꞌabele gogoidine.

¹¹ Utuinane yehana ‘Abele’, na ebe tomowa bagibagilidi bwahine abeꞌabelena ainaena hinuma mata himwalowoi.

¹² Hinage tausagenawasa vehopalina yana yoguli iyuvi na mahana tupwa ehebo iguguyou na tupwa bwau namwanamwadi, na hinage waiꞌena tupwa ehebo iguguyou na tupwa bwau namwanamwadi, na hinage utuiwone ebe tawaheidi tupwa tonuga aidiyai, tupwa ehebo ana utuiwo higuguyou, na tupwa bwau aidiyai himasemasele. Na ahubena maudoina ana wahei tonuga, ehebo hauga guguyou na bwau namwanamwadi. Dova hinage boniyai ehebo hauga guguyou, na bwau namwanamwadi.

¹³ Eena yavinuvinunu ta manihubu mwalaꞌina iyevayeva galewai yaꞌiꞌitane, na alinana mwalaꞌina yabenalei iwalo, ‘Vitai, vitai, vitai, omiu baleꞌu ana taumiyao, wuwuna ebe tausagenawasao tonuga hinage yoguli tonuga hiyuvidi, mata vitai mwalaꞌina imahalava alimiyai’.

9

¹ Hinage tausagenawasa paibina yana yoguli iyuvi, na ehebo utui yaꞌiꞌitane galewaena ibeꞌuma baleꞌuwai, na utuine guda mwalaꞌina ana abahoꞌe ivai,

² na gudanane ihohoꞌene, na holanaena asu imahamahalavama, dova guguyou mwalaꞌina, ta mahana iguguyou, na hinage baleꞌu maudoina iguguyou asunane ainaena.

³ Na asune holanaena mwaimwaiꞌeꞌe hiꞌaiꞌaituluma baleꞌuwai, na yadi wahiyala hilobai dova ilamgigina yadi wahiyala,

⁴ na hinage Yaubada iꞌauhidi ta havena awahi hiꞌabiꞌabiye yababadi, yo aiwa, yo hinage aiꞌai iniꞌinidi, na hesi tomowaone hibom nigele Yaubada ana veꞌiveꞌilala manidiyai iyamiyamiya hiya hesi hiꞌabiye yababadi.

⁵ Na mwaimwaiꞌeꞌewone nigele adi talam na tomowa hiyemwalowoidi, na hesi muya himohedi waiꞌena 5 aidiyai. Na muyaone mwalaꞌidi, dova ilamgigina yadi awa alahi.

⁶ Na waiꞌenaone aidiyai taumuyaone mwalowoi hilauꞌamumuwei, na hesi nigele mata hiyamwalowoi, wuwuna mwalowoi ana amwaha hibeha ahayai.

⁷ Na mwaimwaiꞌeꞌewone adi ita dova hosi atuꞌatububunidi aleha vehabana, na vahudiyai dova pwaopwaomi goula himwauwidi, na manidi dova tomowa manidi,

⁸ na hinage vahudi daodaodi dova waiwaihiu, na saladi dova laiyoni saladi.

⁹ Na nuwanuwadi hilau auꞌauhidi ana ita dova pwawati aidiyena. Na pepediyaone yadi dagugu dova hosi bagibagilidi mayadi waga niuniuli hisagesagena aleha ainai.

¹⁰ Na hinage mawulidi, dova ilamgigina wulidi, wuwuna wulidiyena howahowana tomowa hiwomalidi, na waiꞌena 5 aidiyai himuyamuya.

¹¹ Na hinage mayadi tauloina, iya tausagenawasa gudane ana tauꞌita avivini, na yehana Hibulu alinadiyena hiwalo, ‘Abadoni’, na alina Gilisi hiwalo, ‘Apoliyoni’, na ana nuwamasele neta ‘Tauveyababa’.

¹² Na vitai ehebo iꞌoviꞌo, na howola vitai bwau hilalaoma.

¹³ Na tausagenawasa sikisina yana yoguli iyuvi, na ehebo alina yabenalei ilalaomane abapwaoli tupwa vehopali aidiyena, abapwaoline goulane Yaubada mehenai itowotowolo.

¹⁴ Na alinane iwalo tausagenawasa sikisinane mayana yoguli ainai, ‘Tausagenawasa hitau vehopali paipaidi bwahi mwalaꞌina yehana Yupeletisi ainai ulivahidi, na hilau’.

¹⁵ Eeta tausagenawasa vehopaliwone ilivahidi ta hilalaune, wuwuna Yaubada iꞌatububunidiꞌo yadi ahubena, yo waiꞌena, yo bolimai ta ebe tomowa bagibagilidi hiꞌoiye mwalowoidi. Na ebe tomowa maudoina baleꞌuwai tawahei boda tonuga, mata boda ehebo hiꞌoiye mwalowoidi.

¹⁶ Na tauꞌalehaone yadi bodao adi vahivahili yabenalei ebeha 200 miliyoni, maudoidi hosi ainaena hisagesagena.

¹⁷ Na teina enoꞌitaꞌita ainai hosiwone yaꞌiꞌitadine, na adi taugeluwone maꞌadi lauꞌauꞌauhi nuwanuwadiyai himwauwidi, tupwadi hawahawawalidi na tupwadi alaꞌalawadi na tupwadi yogeyogedi. Na hosiwone uluꞌuludi dova laiyoni uluꞌuludi, na aiwa alaꞌalahawawalidi yo asu yo gaima alaꞌalawowolidi awadiyena himahamahalava.

¹⁸ Eeta boda tonuga baleꞌuwai hiveꞌahadi, ta boda ehebo hiꞌoiye mwalowoidine, teina ginauli tonugaone aidiyena. Neta aiwa alaꞌalahawawalina yo asu yo gaima alaꞌalawowolidi, awadiyena himahamahalava.

¹⁹ Wuwuna hosiwone yadi wahiyala awadiyai yo wulidiyai himiyamiya, na wulidine dova weso maꞌawadi, na aidiyena tomowa hiꞌabiꞌabiye muyadi.

²⁰ Na tomowaone maudoidi nigele hiyamwalowoi ginauliwone teina yababadine aidiyena. Wuwuna hava ibom hipapaihowaidiwa nigele hiyataꞌwataꞌwataedi. Na hesi hiꞌabi avivini mwalaꞌina na hipwagopwagogo aidiyai. Ginauliwone dova aluꞌaluwa yababadi yo aiwa tagitagi goula yo siliba yo kopa yo gaima yo aiwa. Teina aiwa tagitagiwone nigele howahowadi na hivinunu yo hibenali yo hilowouhi.

²¹ Na hinage tomowaone nigele hiyanuwanuwabui oiyemwalowoi yo oba yo meheꞌayo yo aivavali aidiyena.

10

¹ Ehebo hinage tausagenawasa wahiwahiyalana galewaena iꞌaiꞌaituluma yaꞌita yaloviyena ihumauyoi, na uluꞌulunai hulele itowolo taꞌiꞌiliyei, na manina dova mahana, na aena dova aiwa alaꞌalahina.

² Tausagenawasanane nimanai peipa youyouna habuluna iꞌabi avivini na alaꞌalavateyaina, na iꞌaituluma ae tautuwana niꞌuwai iwutuwei, na ae ehaꞌehana baleꞌuwai.

³ Na alinana mwalaꞌina iyoga ana benali dova laiyoni iyogayoga. Eeta yana yoga iꞌovi na tutu adi bagibagili 7 yana yoga hiyeyemaihane.

⁴ Tutuwone alinadi yabenaledi ta ebeha yaleledi, na galewaena alina yabenalei iwalo, ‘Tutu alinadi hitau 7 bada ubenalediꞌo udawanidi, na havena uleleleledi’.

⁵ Eeta tausagenawasane ibom yaꞌiꞌitawa niꞌu yo baleꞌu aidiyai itowotowolowa, nima tautuwana iꞌabihini galewai,

⁶ na iꞌawa Tamada Yaubada yehanaena iya miyamiya vateyaina, na hinage iya galewa maudoina, yo baleꞌu maudoina yo hinage niꞌu yo ginauli maudoidi holadiyai, adi tauyemasele. Na tausagenawasanane iwalo, ‘Bada hauga iꞌahubaliꞌo.

⁷ Ta mata tausagenawasa sebenina yana yoguli iyuvi na Yaubada yana nuwatuwu dawadawanidi maudoidi iveꞌovidi, hava yana taupaihowao hiya neta tauwalo mahalavao mwalona aidiyai iwalo mahalavaediꞌo’.

⁸ Na alinawa galewaena yabenale mugaiyeiwa hinage aliguwai iwalo, “Ulau peipa youyouna alaꞌalana tausagenawasane itowotowolo niꞌuwai yo baleꞌuwai nimanaena uvai.”

⁹ Eeta yalau tausagenawasane ainai peipa youyouna habuluna yaꞌawa noiyeine. Ta peipa youyouna habuluna imohegau na aliguwai iwalo, ‘Inamwanamwa, uvai, uꞌai. Na haugana utonoli, howola ana abele diyamwai ulautowoi, na hesi awamwai ana amna gawawalina, dova mwagagau’.

¹⁰ Eeta peipa youyouna habuluna yavai yaꞌai, na awaguwai ana amna igawawali, dova mwagagau, na hesi yatonoli na diyaguwai yalautowoi iꞌabele alili.

¹¹ Na hinage aliguwai iwalo, ‘Owa mata Yaubada yana walowone bodao yo abaloinao yo alinao yo tauwasawasao vehabadi uwalo mahalavauyowedi’.

11

¹ Mulitai aiꞌaiwa ehebo imohegau dova abalive, na aliguwai iwalo, ‘Utowolo na Yaubada yana vada veꞌahihi yo abapwaoli uliveidi, na tautapwalolowone holanai uvahilidi.

² Na hesi vada veꞌahihi mwalaꞌina tuluhanai havena ulivelivei, wuwuna tuluhanane neta taumiya ganamuli vehabadi, hiya neta nigele Yudeya, mata aediyena Yaubada yana dalava veꞌaveꞌahihina hiwutuye biꞌibiꞌidi waiꞌena 42 holadiyai.

³ Na tauwalo moiha bwau mata yavetamaledi na alaꞌalawowoli yamohedi ta hiwalo mahalava, adi aleꞌo dova hiwahiwape adi aleꞌo, na Yaubada yana walo hiwalowei ahubena 1260 holadiyai.’

⁴ Tauwalo moihaone neta aiwa olibe bwau na masele abamwauwina bwau hitowotowolone baleꞌu ana Badane mehenai.

⁵ Na ebe yaiya itowoi na iveꞌaleha tauwalo moihaone aidiyai, aiwa alaꞌalahawawalina awadiyena imahalava na adi alehaone hiveyababadi, na hiꞌoiꞌoiye mwalowoidi.

⁶ Hitau bwau teina mayadi wahiyala ta hauganane ainai Yaubada yana walo hiwalowalowei, howahowana ꞌwesu galewaena higudui. Hinage mayadi wahiyala bwahi yo bidala aidiyai, ta hiyemala ꞌwahina. Hinage mayadi wahiyala vitai vaganavagana yo muyamuya vehabadi, ta ebe aiteya hauga nuwanuwadi vitaiwone himahalava mata himahalava.

⁷ Eeta tauwalo moiha bwauwone yadi walo tomowa aidiyai iꞌovi, na mata lagulagu manimaninina ehebo guda mwalaꞌina ainaena imahalava, ta iꞌaleha tauwalo moihaone baidanao, na iwahiyala ta iꞌoiye mwalowoidi.

⁸ Na mwalomwalowoidi hiꞌenoꞌeno maseleyai dalava mwalaꞌina ainai. Dalavanane mwalona yada Bada ainai hiveꞌabahi, na walo dawaniyena yehana himwauwi hiwalo, Sodoma, bo Itipita.

⁹ Tomowa bagibagilidi hitauꞌahaiyama, boda, huhuwo yo alinao yo abaloinao aidiyena, eeta taumwalowoiwone hivinuvinuidi ahubena tonuga na tupwana aidiyai. Na taumwalowoiwowa adi mwau magaiyai hilaugagayowedi.

¹⁰ Na taumiya baleꞌu hiyaliyaya tauwalo moiha bwauwone yadi mwalowoi vehabana, ta hiyemahuli, na velau himohe ehebo ehebo aidiyai, wuwuna tauwalo mahalava bwauwone muya mwalaꞌina taumiya baleꞌu aidiyai hivaiyama.

¹¹ Eeta ahubena tonuga na tupwana hiꞌovi, na Yaubada yawahi imohedi, ta hitowolouyo, na tomowa bagibagilidi hiꞌitadi, ta himeheuhi mwalaꞌina.

¹² Na tauwalo mahalava bwauwone alina galewaena hibenalei, aidiyai iwalo, ‘Amhaema teinai’. Eeta yaloyaloviyena hihahaene, na adi alehaowa hivinuvinunuidi.

¹³ Hauganane tenem ainai mwaniꞌiniꞌi mwalaꞌina isagena, na dalava mwalaꞌina ana biliutuhi teni aidiyena ehebo tupwa iloloꞌene, ta tomowa adi bagibagili 7 tausani himwalowoi mwaniꞌiniꞌine ainaena. Na tomowaowa himiyamiyane himeheuhi mwalaꞌina, na Yaubada galewai hinoꞌowei.

¹⁴ Na muya bwauna bada iꞌoviꞌo, na tonugana muhamuhana imahalava. Yoguli sebenina

¹⁵ Eeta tausagenawasa sebenina yana yoguli iyuvi, na galewaena alina mwalaꞌina hiwalo, ‘Bada mayana Besinana teina hauga yadi alaꞌalawowoli ta hiloina baleꞌu yana abaloina maudoina aidiyai, na yana loinane mata nigele yana abaꞌovi.’

¹⁶ Na babadao hitau 24 Yaubada mehenai himiyamiyawa yadi abamiya wasawasa aidiyena, hibeꞌu aitulu na ainai hipwagopwagogo na hinoꞌowei,

¹⁷ hiwalo,

‘Yama Bada Yaubada tauwahiyala moiha, owa umiyamiya, wau yo mwalona aidiyai, awayauwedo alimwai, wuwuna yam wahiyala mwalaꞌina uꞌabiye mahalava, eeta uvetuwuni uloina.

¹⁸ Hiya taumiya ganamuli himodiꞌini moiha, na hesi yam hauga lauvetala ana hauga imahalavaꞌo ta taumwalowoi hitowolo na uloinaedi yo yam tauwalo mahalavao adi maiha umohedi yo yam tomowa maudoidi adi maiha umohedi, hiya mwalaꞌidi yo hiya habuhabuludi aidiyai, wuwuna hiya am tauveꞌahihiwo. Na hesi baleꞌu ana tauꞌabiye yababao owa uveyababadi.’

¹⁹ Ainaena Yaubada yana vada veꞌahihi galewai ihoꞌe, ta Dedewaga Veꞌahihi vada veꞌahihi holanai, yaꞌita. Na namali yo dagugu yo tutu igoha, yo mwaniꞌiniꞌi isagena, yo ꞌwesu patupatuna dova aisi italu.

12

¹ Na galewai abanuwapwanopwano mwalaꞌina imahalava, neta waihiu ehebo ana aleꞌo dova mahana, na waiꞌena aena elauhanai, na vahuna ana pwaopwaomi wasawasa neta utui 12 hiꞌalaꞌalahi.

² Na waihiunane hiuhiumana na muya mwalaꞌina isidasida habi labalaba.

³ Hinage ehebo abanuwapwanopwano galewai imahalava, neta weso mwalaꞌina hawahawawalina, na uluꞌuluna adi bagibagili 7 yo waꞌiyanao adi bagibagili 10, na uluꞌulunao 7 aidiyai pwaopwaomi wasawasa himiyamiya.

⁴ Na wulinaena utui bagibagilidi iniulidi na igabaedi baleꞌuwai. Ebe utui maudoina tawahei boda tonuga aidiyena, ehebo boda bada igabaediꞌo, na bwau hitupwa. Na weso hawahawawalina waihiu mehenai itowotowolo, ta ebe ilabalaba, gamanane iꞌai.

⁵ Eeta waihiuwa ilabalaba, ta towahona, iya ebeha tupwa maudoina adi tauloina wahiwahiyalana dova pwawati yana wahiyala, na gamanane Yaubada iꞌabivai ibom yana abamiya wasawasa ainai.

⁶ Na waihiuwa balabala awawai idena. Tenem ainai waihiune yana abamiya Yaubada iꞌatububuni, na ainai iꞌita avivini ahubena adi bagibagili 1,260 aidiyai.

⁷ Ainaena galewai aleha imahalava. Alehanane ainai Maikeli mayana tausagenawasao na wesowa hawahawawalina mayana tausagenawasao hiꞌaleha.

⁸ Eeta wesowa mayana tausagenawasao nigele howahowana na hiwahiyala Maikeli mayana bodao aidiyai, eeta wesonane mayana tausagenawasao galewaena hiꞌabi avivinidi ta higabae aituluwedi.

⁹ Wesonane hawahawalina na mwalaꞌina, iya weso miyamiyana yehana Tomodulele, bo Seitani, iya baleꞌu ana tauꞌoyama. Iya mayana tausagenawasao maudoidi baleꞌuwai higabae aituluwedi.

¹⁰ Na mulitai galewaena alina mwalaꞌina yabenalei, iwalo, ‘Teina hauga Yaubada yana wahiyalaena iloinaegita, yo ilivahigita. Na hinage ada Besinana ivetauloina alidai, wuwuna tahidao adi tauveꞌewa, iya mwalona ahubena yo boniyai Yaubada mehenai itowotowolo na iveꞌeveꞌewaidi, bada galewaena higabae aituluwenaꞌo.

¹¹ Na tahidaone moiha yawahidi hitalamwedi ta Besinana vehabana himwalowoi, wuwuna Tomodulele baidadi hiꞌaleꞌaleha ta hiwahiyala. Na yadi wahiyalane Lami ꞌwahinanaena, hinage yadi walomahalavane Lami vehabana.

¹² ‘Eeta omiu taumiya galewa maudoimiu amyaliyaya, na hesi omiu baleꞌu yo niꞌu ana taumiyao vitai mwalaꞌina alimiyai, wuwuna Tomodulele bada iꞌaituluꞌo alimiyai mayana manini, ta ihanapuiyaꞌo ebeha yana hauga iuꞌiuna taꞌi imiyamiya.’

¹³ Tenem ainai weso hawahawawalinawa inuwamasele ebeha bada baleꞌuwai higabae aituluwenaꞌo, eeta iheusili waihiuwa, iya gamawa ana taulabahiwa.

¹⁴ Waihiunane manihubu mwalaꞌina peipanao Yaubada imohei, ta ainaena iyeva yana tupwai balabala awawai, na nemai Yaubada iꞌita avivini bolimai tonuga na tupwana aidiyai, ta ebe havena wesone iꞌabiꞌabitovoi.

¹⁵ Hinage wesone awanaena weꞌaha isagena dova abaita waihiune dagelanaena, ebeha waihiune ilibai.

¹⁶ Na baleꞌu waihiuwa ihagui, wuwuna baleꞌunane ilotahoꞌe na bwahi maudoina wesowa awanaenawa itotonoline.

¹⁷ Eeta wesone imodiꞌini moiha waihiune ainai, ta ilau waihiune yana huhu iꞌalehaidi, hiya neta Yaubada yana walo ana tautuluhahegoyao, yo Yeisu ana tauwalo moihao.

¹⁸ Na wesowa hawahawawalinawa leꞌawai itowotowolo.

13

¹ Yavinuvinunu na ehebo lagulagu yaꞌita ihaema niꞌuwena, na waꞌiyanao adi bagibagili 10, na uluꞌuluna adi bagibagili 7 na waꞌiyanao maudoina maꞌadi pwaopwaomi wasawasa, na uluꞌulunaone aidiyai Yaubada ana walo hinali hileledi.

² Na lagulagune yaꞌiꞌitane ana ita dova simai mwalaꞌina, na aena adi ita dova hagwai aedi, na awana dova laiyoni awadi. Eena wesowa iya hawahawawalinawa ibom yana wahiyala lagulagune niꞌuwenane imohei, na hinage yana abamiya wasawasa yo yana loina mwalaꞌina imohei.

³ Na lagulagune niꞌuwenane uluꞌuluna ehebo ana ita dova silasilahena, na bada mwalowoiyena inamwanamwauyoꞌo. Na tenem ainai taumiya baleꞌu maudoidi nuwadi hipwanopwano mwalaꞌina, na lagulagune niꞌuwenane himulimulitaei.

⁴ Na hinage tomowa maudoina weso hawahawalina ainai hipwagopwagogo, wuwuna bada loina imohenaꞌo lagulaguwa niꞌuwenane ainai. Na hinage lagulagu niꞌuwenane ainai hipwagopwagogo, hiwalo, ‘Nigele teya yaiya yana wahiyala lagulagune teina dova ta ebe hiꞌalehai’.

⁵ Na lagulagunane bada talam ivaiyaꞌo Yaubada ainaena ta iwalo haehae na iꞌabiꞌabitalawahiyei, na hinage mayana loina waiꞌena 42 holanai.

⁶ Na lagulagunane ivetuwuni ta Yaubada iꞌawa yababaei, yehana yo yana dalava yo galewa ana taumiyao iꞌawa yabayababaedi.

⁷ Na hinage talam ivai ebeha Yaubada yana tomowao iꞌalehaidi na iwahiyala, na hinage mayana loina bodao bagibagilididi aidiyai, na huhuwao yo alina bagibagilidi aidiyai, yo abaloina bagibagilidi aidiyai.

⁸ Na taumiya baleꞌu maudoina howola abo ainai hipwagogo, hiya neta nigele yehadi hiyamiyamiya yawahi bukina holanai, bukinane Lamine hiyeyemwalowoine bukina, wuwuna bukine holanai mwalona nigele yehadi hiyalele mugaiyedi abo mulitai baleꞌu iyeyemaselene.

⁹ Ainaena ebe yaiya matalinana walo teina ibenalei, wuwuna,

¹⁰ ‘Ebe yaiya hiꞌabi avivini, mata hiꞌabi avivini taꞌi, na hinage yaiya ebe elepa aleꞌalehaena hiꞌoiye mwalowoi mata hiꞌoiye mwalowoi taꞌi’. Walo teina ainaena howahowana Yaubada yana tomowao hiyemidiyei na hiꞌaipate wahiwahiyala.

¹¹ Hinage lagulagu bwauna yaꞌita baleꞌuwena imahalava na waꞌiyanao bwau dova lami waꞌiyanao, na iꞌauꞌaubabada dova wesowa hawahawawalinawa alinanane.

¹² Na lagulaguwa niꞌuwenane yana wahiyala maudoina lagulagune bwaunane imohei ta ebeha ibom iloina, ta lagulagune niꞌuwenane iꞌitaꞌita mohilei. Eeta lagulagune bwaunane taumiya baleꞌu maudoina iloinaedi, na lagulaguwa niꞌuwenane ainai hipwagopwagogo, iya mwalona uluꞌulunawa isilahe na inanamwanamwauyone.

¹³ Na hinage veꞌiveꞌilala mwalaꞌidi ipaihowaidi, dova aiwa alaꞌala hawahawawalina ipaihowai ta galewaena ibeꞌu baleꞌuwai tomowa mehediyai.

¹⁴ Na bada talam ivaiyaꞌo ta Yaubada ainaena ebe lagulaguwa niꞌuwenane mehenai veꞌiveꞌilala ipaihowaidi, ta ainaena taumiya baleꞌu maudoidi iꞌoyamaedi. Eeta yana oyamaena aidiyai iwalo, ‘Aiwa tagitagi ehebo amtagi, ta ana ita dova lagulagune iya elepa aleꞌalehaena isisilahewa, na inanamwanamwauyone’.

¹⁵ Eeta hitagi na lagulagune bwaunane teina mayana wahiyala ainaena aiwa tagitagiwa ana ita dova lagulaguwa mugamugainawa yawahina imohei ta howahowana iꞌaubabada, na iloina ta ebe yaiyadiwo tomowa nigele ainai hiyapwagogo mwalowoi hilobai.

¹⁶ Na hinage maudoidi iloinaedi, habuhabuludi yo mwalamwalaꞌidi na wasawasao yo wewelohewo, na hinage tautaubadao, yo tomowa mohili yo taupaihowao, ta nima tautuwadiyai na uluꞌuludiyai ana veꞌiveꞌilala himwauwi,

¹⁷ na aidiyai loina yaiyaina imwauwi neta hiya ebe veꞌiveꞌilalanane nigele aidiyai, havena hinage hivegivegimwala, bo higimwagimwala, Na lagulagunane ana veꞌiveꞌilalane teina yehana yo ana numela.

¹⁸ Na ana nuwamasele imiyamiya ebe yaiya mayana nuwamasele lagulagunane ana numela ivahililobai, neta ehebo towaho yehana 666.

14

¹ Hinage yavinuvinunu, na Lami yaꞌita oya Saiyoni ewanai itowotowolo, na tomowa hitau 144 tausani baidanao, hiya neta Lamine yehana yo hinage Tamana yehana manidiyai hilelediꞌo.

² Eena galewaena alina ehebo yabenalei dova bwahi daguguna, na hinage dova tutu daguguna. Na alinane yabenalei dova tomowa mayadi aiꞌopiꞌopi higohagoha adi benali namwanamwadi.

³ Na tomowaone abamiya wasawasa mehenai hitowolo, neta meimeituwa vehopali na babadaone mehediyai, na wali vauvauna hiwaliwaliyei. Na walinane nigele teya yaiya howahowana ihanapui, bada taꞌi hiya bodadine hitau 144 tausani howahowadi, na hesi hibom taumiya baleꞌu Yaubada bada igimwalaidiꞌo.

⁴ Na towatowahowone hiya nigele lauhapuli waiwaihiu baidadiyao hiyapaihowai, wuwuna hiya nuwanuwapuyodi, na hesi Lami himulitaei iliꞌilimani, ebe havaidova ilalau. Hiya bada Yaubada igimwala mugaiyediꞌo tomowa aidiyena, hiya neta Yaubada na Lami yadi lauꞌeli mugamugaina.

⁵ Hiya nigele teya oyama awadiyena, yo nigele teya lauhapuli aidiyai. Tausagenawasa tonuga yadi wasa

⁶ Hinage ehebo tausagenawasa yaꞌita ewaena iyevayeva, ilaoma wasa namwanamwana miyamiya vateyaina habi walomahalavaeina taumiya baleꞌu aidiyai, neta abaloinao yo huhu yo alina ehebo ehebo yo boda ehebo ehebo aidiyai.

⁷ Na tauwagenawasanane alinana mwalaꞌina iwalo,

‘Yaubada ammeheuhei na amwalo vetuvehaeyei, wuwuna yana hauga lauvetala bada imahalavaꞌo, iya galewa yo baleꞌu yo niꞌu, yo hinage bwahi bidala adi tauyemasele ainaena mehenai aemiu amyoudi na ampwagogo’.

⁸ Na tausagenawasa bwauna imulitaenama na iyoga, iwalo,

‘Babiloni bada ibeꞌuꞌo, bada ibeꞌuꞌo, dalavanane yana mumugaena boda maudoidi ivenumadi, mumuganane neta tauda ana nuwalele mumuga yababana vehabana’.

⁹ Tausagenawasa bwauwone tuluhadiyena ehebo hinage imulitaedima, na tausagenawasanane iya hinage iyoga alinana mwalaꞌina, iwalo,

‘Ebe yaiyadiwo lagulagune yo yana aiwa tagitagi aidiyai hipwagogo, na adi veꞌiveꞌilala manidiyai bo nimadiyai,

¹⁰ hiya Yaubada yana waini wahiwahiyalana mata hinuma, na waininane neta Yaubada yana manini moiha bada ihiwaiyaꞌo modiꞌini vedina ainai. Na hinage aiwa alaꞌalahawawalina yo gaima alaꞌalawolidi tomowaone taudiyai mata hilautowoi, Yaubada yana tausagenawasao yo Lami mehediyai.

¹¹ Na adi muya neta aiwane asuna ihaehae vateyai, na nigele yana abaꞌovi. Na nigele teya yadi aiyawasi ahubena yo boniyai aidiyai wuwuna tomowaone hiya lagulagune mayana aiwa tagitagi ana tautapwalolowo, na ana veꞌiveꞌilala adi tauvaiwo.’

¹² Walo teina ainaena Yaubada yana tomowao hiꞌalamaꞌiꞌita, hiya yana loina ana taumulitao na Yeisu ana tauyemidiwo.

¹³ Hinage galewaena alinana yabenalei iwalo, ‘Teina uleledi, ebe yaiyadiwo yada Bada ana tauyemidiwo teina haugane talaulaune, hiya himwalowoi mata hiyaliyaya’. Na Aluꞌaluwa Veꞌahihi hinage iwalo, ‘Moiha mata hiyaliyaya, wuwuna mata hiꞌaiyawasi yadi paihowa wahiyala ainaena, na yadi paihowa maihana mata hilobai’. Baleꞌu ana laulauꞌeli

¹⁴ Yavinuvinunu na yaloyalovi hewahewana yaꞌita, na yaloyalovinane ainai dova Towaho Moihana yaꞌiꞌitane, imiya na vahunai ana pwaopwaomi wasawasa goula, na nimanai yana elepa mehemehegaina.

¹⁵ Na ehebo tausagenawasa vada veꞌahihi ainaena imahalava, na alinana mwalaꞌina ainaena iyogahae towahone yaloyalovine ewanai imimiyane ainai, iwalo, ‘Yam elepaena ulautom, wuwuna baleꞌuwai hauga lauꞌeli bada imahalavaꞌo, ta bada aiꞌai hihunaꞌo’.

¹⁶ Ainaena towahowa yaloyalovine ewanai yana elepa ilauꞌwadiyei ta baleꞌu lauꞌelina ihiwa ahaidine.

¹⁷ Na ehebo tausagenawasa vada veꞌahihiyena galewa ainaena imahalava, iya hinage elepa mehemehegaina nimanai.

¹⁸ Na ehebo hinage tausagenawasa abapwaoli ainaena ilaoma, iya aiwa alaꞌalahi ana tauloina, na alinana mwalaꞌina iyoga tausagenawasane mayana elepane ainai, iwalo, ‘Yam elepane uyepaihowa na guleipi ainona baleꞌuwai utanoꞌahai, wuwuna bada hibuinaꞌo’.

¹⁹ Eeta tausagenawasane yana elepaena guleipi ainona baleꞌuwai itomdi, na abapihagi mwalaꞌina holanai ihiwaidi. Na abapihagine neta Yaubada yana modiꞌini.

²⁰ Na guleipine maudoina ipihagidi, abapihagi ainai, neta dalava mwalaꞌina tulutuluhanai, na ꞌwahina isagesagena abapihagi holanaena, dova abaita, ana daodao 300 kilomita, na ana hae dova baleꞌuwena na hosi itowotowolo gadona ainai.

15

¹ Ehebo hinage abanuwapwanopwano mwalaꞌina yaꞌita galewai, neta tausagenawasa 7, mayadi muyamuya yababadi 7. Na muyamuyaone yababadine neta Yaubada yana modiꞌini yana abaꞌovi.

² Na hinage yaꞌita dova niꞌu yana daumwali na aiwa alaꞌala hawahawawalina, na niꞌunane dova vihilo papalinai boda hitowotowolo, hiya lagulaguwo yo aiwa tagitagi yo hinage yehana ana numela ainaena bada hiwahiyala gabaediꞌo. Na bodane nimadiyai abaꞌaiꞌopiꞌopi Yaubada ainaena,

³ na maudoina Mosese yana wali hiwaliwaliyei, iya Yaubada yana taupaihowa, na hinage Lami walina hiwaliwaliyei, hiwalo,

‘Taubada Yaubada Tauwahiyala moiha, yam paihowao mwalaꞌidi na abanuwapwanopwano, na yam mumuga maudoina namwanamwana na dumwaludi, na hinage abaloina maudoidi uloinaedi.

⁴ ‘Taubada ee, tomowa maudoina hiveꞌahihiyego, na hiꞌawa wasawasaego, hinage owa taumasele, ainaena taumiya baleꞌu maudoidi mata hilaoma mehemwai na hipwagogo, wuwuna tomowa maudoidi yam loinao dumwadumwaludi bada hiꞌitadiꞌo.’

⁵ Na mulitai hinage yaꞌita galewai Yaubada yana vada veꞌahihi hoꞌehoꞌena, na vadanane holanai yana waloyemidi lelelelena imiyamiya.

⁶ Na vada veꞌahihine ainaena tausagenawasa hitau 7 himahalavama na muyamuya 7 nimadiyai. Tausagenawasaone adi aleꞌo hewahewadi na masemaseledi, na adi tulituli goula nuwanuwadiyai hihipwaidi.

⁷ Na meimeituwa vehopali aidiyena ehebo vedi goula 7 ivaidi, ta tausagenawasaone 7 imohedi, na vediwone holadiyai Yaubada miyamiya vateyaina yana modiꞌini iꞌoiye mwaudi.

⁸ Tenem ainai vada veꞌahihi holana imwau Yaubada yana wasawasa yo yana alaꞌalawowoli ainaena, ana ita dova asu, na nigele teya yaiya howahowana vada veꞌahihine ainai iluwu, ana higa tausagenawasao 7 yadi paihowa muyamuyaone 7 hiveꞌovidi.

16

¹ Hinage vada veꞌahihi holanaena ehebo alina mwalaꞌina yabenalei, iwalowalo tausagenawasaone 7 aidiyai, iwalo, ‘Ammahalava na Yaubada yana modiꞌini vedinao 7 amꞌatuhiwaidi baleꞌuwai’.

² Eeta tausagenawasa mugamugaina ilau na yana vedi baleꞌuwai iꞌatuhiwai, ta bonu yababadi yo muyamuyadi himahalava hiya lagulagune yana aiwa tagitagi ana tautapwalolo aidiyai, hiya neta lagulagune ana veꞌiveꞌilala aidiyai imiyamiya.

³ Na tausagenawasa bwauna hinage yana vedi ivai na niꞌuwai iꞌatuhiwai, ta niꞌune maudoina iyemala ꞌwahina, ana ita dova ehebo taumwalowoi ꞌwahinana. Na ainaena ginauli maudoina mayawahidi niꞌuwai himwalowoi.

⁴ Na tausagenawasa tonugana hinage yana vedi ivai ta weꞌaha sagesagenadi yo weꞌaha eli yo bidala aidiyai iꞌatuhiwaidi, na hinage hiyemala ꞌwahina.

⁵ Na tausagenawasane iya weꞌaha ana tauloina alinana yabenalei, iwalo,

‘Veꞌaveꞌahihim Yaubada ee, owa hauga teina aidiyai umiyamiya na hinage hauga hiꞌoviꞌo umiyamiya, owa dumwadumwalum na masemaselem. Yam lauvetala teina idumwalu alili, wuwuna tomowaone yababadi,

⁶ na yam tomowao yo hinage yam tauwalo mahalavao hiꞌoiye mwalowoidi ta ꞌwahinadi hivesagenadi. Ainaena adi maiha bada umohediꞌo ebeha ꞌwahina hinuma, na neta adi maihane ilowoinanedi moiha.’

⁷ Na alina ehebo hinage yabenalei abapwaoli ainaena iwalo, ‘Taubada ee, owa Yaubada Tauwahiyala moiha yam loina teina namwanamwadi na dumwaludi’.

⁸ Na hinage tausagenawasa vehopalina yana vedi ivai ta mahana ainai iꞌatuhiwai, ta mahana yana wahiyala ilauhepoiyei ta howahowana tomowa iꞌalahidi.

⁹ Eeta alaꞌalawowoli mwalaꞌina tomowa iꞌalahidi, ainaena Yaubada yehana hiꞌawa yabayababaei, wuwuna iya yana loinaena muyamuyaone himahamahalava. Na hesi nigele hiyanuwabui ta ebe Yaubada hiwalo vetuvehaeyei.

¹⁰ Eena tausagenawasa paibina hinage yana vedi iꞌatuhiwai lagulaguwa yana abamiya wasawasa ainai, na yana abaloina maudoina iguguyou. Na tomowa muya ainaena memenadi hiꞌalahidi.

¹¹ Na Yaubada galewai hiꞌawa yabayababaei bonudine yadi muya vehabadi, na hesi nigele hiyanuwabui yadi paihowa yababadi aidiyena.

¹² Na tausagenawasa sikisina yana vedi ivai ta bwahi mwalaꞌina yehana Yupilitisi ainai iꞌatuhiwai, na weꞌahanane maudoina iguma ta ainaena tupwadi tauwasawasa aluwabu ainaena mata higeyoꞌawama.

¹³ Na aluꞌaluwa tonuga yababadi adi ita dova ꞌweꞌwe, yaꞌitadi himahalava wesone hawahawawalinane awanaena, na lagulagune niꞌuwenane awanaena na hinage yana tauwalo mahalava oyaꞌoyamane awanaena.

¹⁴ Aluꞌaluwa tonugaone neta Tomodulele yana hedahedao, hiya abanuwapwanopwano hipaihowaidi, na hiya teina hilau ta tauwasawasaone baleꞌu maudoina ainai ebeha yadi bodao hiyemiya ahaidi habi alehaidi, neta Yaubada Tauwahiyala moiha yana ahubena yana abaꞌovi ainai.

¹⁵ ‘Ambenali iliꞌilimani, wuwuna mata yagu laoma dova tauꞌaivavali yadi laoma, na ebe yaiya owa uhilahilawa na am aleꞌo uꞌita avivini iliꞌilimani, owa mata uyaliyaya, nigele mata uyahinimaya tomowa ahiꞌahipudiyai wuwuna nigele uyabugewa’.

¹⁶ Na aluꞌaluwaone tauwasawasaone mayadi bodao hiyemiya ahaidima ehebo tupwa ainai, neta alina Hibuluwena hiwalo ‘Amagedoni’.

¹⁷ Tausagenawasa sebenina hinage yana vedi ivai na hawahawaga awawa ewanai iꞌatuhiwai, na abamiya wasawasa vada veꞌahihi holanaena ehebo alina mwalaꞌina iwalo, ‘Teina iꞌoviꞌo’.

¹⁸ Tenem ainai pigabu yo dagugu yo tutu yo hinage mwaniꞌiniꞌi mwalaꞌina himahalava. Mwalona ta ana higa wau tomowa yadi hauga ainai nigele teya mwaniꞌiniꞌi ana mwalaꞌi dova iyamahalava. Na teina moiha iyababa alili.

¹⁹ Eeta dalava mwalaꞌinawa itom iwahei, ta tupwa tonuga himamahalavane. Na dalavao mwalaꞌidi yadi tupwao maudoidi aidiyai mwaniꞌiniꞌine iꞌabiye yababadi. Na dalava mwalaꞌina yehana Babiloni yana yababa Yaubada inuwatuwu avivini, na yana vedi ainaena waini ivenuma, na waininane neta yana modiꞌini mwalaꞌina wainina.

²⁰ Na hinage bwanabwanao yo oya maudoidi hisawali, na nigele howahowana na talobauyoidi.

²¹ Na hinage ꞌwesu mwalaꞌidi na poꞌupoꞌuwadi, dova gaima mwalaꞌidi galewaena hibeꞌuma tomowa aidiyai. Na tomowaone Yaubada hiꞌawa yabayababaei ꞌwesu yababanane vehabana.

17

¹ Tausagenawasao 7 mayadi vedi 7 Yaubada ainaena, ehebo aidiyena ilaoma na iwalo aliguwai, ‘Ulaoma yaveꞌitago Yaubada yana lauvetala waihiu ainai yana meheꞌayo vehabana, na taumeheꞌayone ana nuwamasele neta dalava mwalaꞌina weꞌaha bagibagilidi ewadiyai imiyamiya,

² na baleꞌu ana tauwasawasao pwanoli ainai hiwahiyala taumeheꞌayone baidadi, na ainaena taumiya baleꞌu maudoidi lauhapuli mumuganane hinuma na hiyauyaulene.’

³ Na Aluꞌaluwa Veꞌahihi ainaena yalautowoi dova tausagenawasawa ilauvaigau tupwa balabala awawai, na waihiu ehebo yaꞌita lagulagu hawahawawalina ainai igelu, na lagulagunane tauna maudoina ainai yeha yababadi hileledi, na uluꞌuluna ana bagibagili 7, na waꞌiyanao ana bagibagili 10.

⁴ Na waihiune ana aleꞌo hawahawawalina dova wasawasao adi aleꞌo, na ana pasao goula yo gaima wasawasa yo epo, na nimanai vedi goula iꞌabi avivini, bada iꞌoiye mwauyaꞌo mumuga yababana ainaena, pwanoli vehabana.

⁵ Na uluꞌulunai yehana hilele, na ana nuwamaselese dawadawanina iwalo, ‘Babiloni mwalaꞌina, neta taumeheꞌayo yo taupwanoli yababadi hinadi’.

⁶ Na waihiunane yaꞌitayaꞌo, Yaubada yana tomowao yo Yeisu ana tauwalo moihao yadi mwalowoiyena ꞌwahinadi inumadiꞌo, na ainaena iyauyaule ta nuwagu ipwanopwano waihiunane ana ita vehabana.

⁷ Eeta tausagenawasane iwalo auligau, iwalo, ‘Havena nuwam ipwanopwano, mata yalivahi alimwai hava waihiune na lagulagune ainai igegelune iya uluꞌuluna 7 na waꞌiyanao 10 adi nuwamasele.

⁸ Lagulagune uꞌitaꞌitane mwalona mayawahina na bada imwalowoiꞌo, howola abo imahalava guda mwalaꞌina ainaena ta ilau, na mata hiveyababa moiha. Na tomowa taumiya baleꞌu, yaiyadiwo hiya yehadi Yaubada nigele iyaleledi yawahi bukina holanai, haugana baleꞌu ana yemasele mugai ainai, hiya lagulagunane mata hiꞌita na nuwadi ipwanopwano, wuwuna mwalona mayawahina na teina hauga imwalowoiꞌo, na howola abo imahalavauyoma.

⁹ ‘Ebe nuwamasele alimwai, uhanapu ebeha uluꞌulunane 7, neta oya adi bagibagili 7, na aidiyai waihiunane imiyamiya, na ana nuwamasele hinage tauwasawasao hitau 7,

¹⁰ na 5 aidiyena bada hibeꞌuꞌo, na ehebo teina taꞌi howola iloiloina, na ehebo howola nigele iyamahalava, na haugana imahalava mata hauga ubwaꞌubwana imiyamiya.

¹¹ ‘Na tauwasawasaone 7 yadi loina mata iꞌovi, na tauwasawasa teya yadi bodane ainaena neta lagulaguwa mwalona mayawahina ta imwamwalowoiwa mata adi boda iyemutulai na hesi mata ilau ta imwalowoi na abo hilobai.

¹² ‘Na waꞌiyanao 10 uꞌitadiꞌo neta tauwasawasa adi bagibagili 10, hiya nigele hiyavetuwuni na hiloina, na howola abo hiloina, hauga ubwaꞌubwana taꞌi ainai lagulagunane baidadi.

¹³ ‘Hiya hitau 10 yadi nuwatuwu ehebo, neta nuwanuwadi yadi wahiyala na yadi loina hitalamwedi lagulagune ainai.

¹⁴ Eena mata Lami ainai hiꞌaleha, ta Laminane iwahiyala alili, wuwuna iya babadao yadi Taubada, na tauwasawasao yadi Tauwasawasa, na hinage iya yana vesinuwaena iyogaedima ana taumulita moiha baidanao.’

¹⁵ Na tausagenawasa aliguwai hinage iwalo, ‘Weꞌahaone bada uꞌitadiꞌo, aidiyai waihiune taumeheꞌayone imiyamiyane, adi nuwamaselewo neta bodao yo huhuwo yo alinao.

¹⁶ Na waꞌiyanao 10 yo lagulagune hiya uꞌitaꞌitadine mata howola abo taumeheꞌayone hiveꞌalehaei, yo hiveyababa moiha ta mabumabugewana imiyamiya, yo hinage bunumana hiꞌai, na hilihiliyana aiwaena higabu.

¹⁷ Wuwuna Yaubada bada atediyai ivenuwamwauwediꞌo ta yana nuwatuwu hipaihowai, neta yadi paihowa eheꞌehebona yo yadi wahiyala na yadi loina lagulagune himohei, na iya iloina ana higa Yaubada yana walowone ipaihowaidi.

¹⁸ ‘Na waihiune uꞌitaꞌitane, iya dalava mwalaꞌina, na iloiloina baleꞌu ana tauwasawasa maudoidi aidiyai.’

18

¹ Mulitai ehebo tausagenawasa yaꞌita galewaena iꞌaiꞌaituluma, iya mayana loina mwalaꞌina, na hinage maselenaena baleꞌu maudoina iꞌabiye masele,

² na alinana mwalaꞌinaena ilohagali iwalo, ‘Dalava mwalaꞌina Babiloni bada ibeꞌuꞌo, na Tomodulele mayana aluꞌaluwao yababadi bahudi yo hinage lowolowo yababadi vagadi vagadi hivedalavaenaꞌo.

³ Wuwuna Babiloni yana waini boda bagibagilidi ivenumadi, waininane neta pwanoli yababana. Iya taumeheꞌayo ainaena baleꞌu ana tauwasawasao baidadi hipwanopwanoli, na pwanolinane aidiyena tauꞌawa une yadi wasawasa mwalaꞌina hilobalobaidi.’

⁴ Hinage galewaena ehebo alina yabenalei, iwalo, ‘Yagu tomowao dalava neta ainaena ammahalavama, na mata yana yababane alimiyai igeyoꞌawa na ana maiha yababana amlobai.

⁵ Wuwuna yana yababa ana mwalaꞌi dova galewa yana hae, na yana mumuga yababanane teina vehabadi Yaubada inuwanuwatuwu na iyemaiha.’

⁶ Na hinage tausagenawasanane iwalo, ‘Dalava tenem uyemaiha dova yana paihowane, na uyemaiha mai bwau yana paihowa vehabana. Hinage iya yana waini yababana uyebweli mai bwau ta umohei inuma.

⁷ Na hinage yana walo haehae yo yana meheꞌayo adi maiha umohei, muya yo dou, wuwuna iya iwalo, “Yau alawata, nigele mata hiwape yana tupwa ainai yayamiyamiya, na hinage nigele dou yayalobai”.

⁸ Ainaena maiꞌehebo muyamuya teina ainai himahalava, neta asiyebwa yo dou yo vahali na aiwa alaꞌalahawawalina iꞌalahiye sawali. Na Taubadawa Yaubada abo waihiune ana maiha imoihei, wuwuna ibom Tauwahiyala moiha.’

⁹ Na baleꞌu ana tauwasawasao, hiya waihiune baidadi hipwanoliꞌo na himehemeheꞌayo, hibom hinage dalavanane vehabana hidou vahivahili, na mehelinodi hisagena haugana dalavane iꞌalaꞌalahi na asuna hiꞌita.

¹⁰ Na himeheuhi ana muya vehabana, eena amwaha daodaowai hitowolo na hiwalo, ‘Aiyoi, aiyoi! Teina taꞌi dalava mwalaꞌina na wahiwahiyalana Babiloni bada ana mehesabu ilobaiyaꞌo.’

¹¹ Na hinage baleꞌuwai tauꞌawa unewo hinuwavitai na dalavanane vehabana hidou, wuwuna yadi tobwatobwao nigele teya hinage adi taugimwala.

¹² Yadi tobwatobwaone goula yo siliba yo gaima wasawasa yo giniuba yo aleꞌo namanamalidi hewahewadi yo aleꞌo wasawasa yebweyebwelidi yo aiwa panepanedi bagibagilidi yo ginauliwo waꞌiya ainaena hipapahowaidine yo aiwa namwanamwadi dova gavi yo kopa yo pwawati yo gaima hewahewadi

¹³ yo gadoꞌa yo haiyala yo waini yo woloi olibe yo pwalawa yo witi yo bulumakau yo sipi yo hosi yo waga niuniuli, na hinage tomowa mayawahidi higimwalaidi na hinage taupaihowao.

¹⁴ Na tauꞌawa unewo hiwalo dalavane ainai, hiwalo, ‘Ginauli namwanamwadi hiya nuwanuwam bada hiꞌoviꞌo, na hinage yam wasawasa, yo amwalo vetuvehae maudoina iꞌoviꞌo, na mata nigele uyalobauyoidi’.

¹⁵ Na tauꞌawa unewone hiya wasawasa mwalaꞌina dalavanane ainaena hilobaidi, hitowolo amwaha daodaowai, wuwuna dalavane ana muyao hiꞌitayaꞌo, ta himeheuhi, na mayadi nuwayababa hidou,

¹⁶ hiwalo, ‘Aiyoi, aiyoi, dalava tenem mwalaꞌina mwalona ipasa aleꞌo wasawasa yo hewahewadi na hawahawawalidi na ihumauyoi goula yo gaima wasawasa yo giniuba aidiyena,

¹⁷ na hauga habuluna taꞌi ainai yana wasawasaone hiꞌoviꞌo’. Na hinage hiya tauꞌabiꞌeyaisi, yo yadi taugelugelu maudoidi yo niꞌu ana tauꞌadau bagibagilidi ainaena yadi namwanamwa hilobalobai amwaha daodaowena hitowolo,

¹⁸ na dalavane asuna hiꞌita, na hiyoga, hiwalo, ‘Nigele teya dalava ana ita dova teina dalavane mwalaꞌinane, na teina wau vedova?’

¹⁹ Ainaena vahudi higawalaidi, yo hidou mwalaꞌina, hiwalo, ‘Aiyoi, aiyoi, dalava tenem mwalaꞌina ainaena tauꞌadauwo yadi wasawasa hilobalobaidi na hauga muhamuhana taꞌi ainai yana wasawasa maudoina bada isawaliꞌo.

²⁰ ‘Amyaliyaya galewai omiu Yaubada yana tomowao, yo hinage tauyewasao yo ana tauwalo mahalavao amyaliyaya, wuwuna mwalona ami muyao dalavanane ainaena amlobalobai na teina taꞌi Yaubada muya ainaena iyemaihadiꞌo.’

²¹ Eena ehebo tausagenawasa wahiwahiyalana gaimatau mwalaꞌi alilina iꞌavalaihini ta niꞌuwai ivehanenene iwalo, ‘Dalava mwalaꞌina Babiloni mata ibeꞌu teina dova gaimane, na mata nigele tayaꞌitauyoi’.

²² ‘Ainaena dalavane ana yaliyaya iꞌoꞌovi, na nigele teya abaꞌaiꞌopiꞌopi alinana, yo yoguli alinana hiyabenabenalei. Na hinage paihowa adi tauhanapuwo nigele mata hiyaꞌitadi, na hinage witi abamutuna daguguna iꞌovi ainaena

²³ ‘Na masele abamwauwina maseledi ainai mata nigele hiyaꞌitadi. Na hinage tauvetawahola alinadi dalavane ainaena mata nigele hiya benaliuyowei. ‘Moiha, baleꞌu maudoina ainaena dalavane ana tauwasawasao hihae alili, na yadi balau aidiyena tomowa maudoina baleꞌu ana taumiya hiꞌoyaꞌoyamaedi.

²⁴ Na hinage mwalona tomowa bagibagilidi hiya tauwalo mahalavao, yo Yaubada yana tomowao hiꞌoiye mwalowoidiꞌo dalavane Babiloni ainai. Moiha ulauhapuliꞌo wuwuna taumiya bagibagilidi uꞌoiye mwalowoidiꞌo ainaena ana mehesabu mata ilobai Yaubada ainaena.

19

¹ Mulitai taꞌetaꞌe mwalaꞌina galewaena yabenalei dova boda mwalaꞌina alinadi hiwalowalo,

‘Yaubada tanoꞌowei, iya livahi yo wasawasa yo alaꞌalawowoli wuwuna.

² Na yana loina maudoina dumwaluna na namwanamwana, wuwuna taumeheꞌayowa yana meheganawaliyena baleꞌu maudoina iꞌabiye yababane, ta ana maiha ilobaiyaꞌo. Na hinage dalavanane Yaubada yana tomowao hiꞌoiye mwalowoidine, ainaena ilaumehesabuwenaꞌo.’

³ Na hinage hiyoga hiwalo,

‘Yaubada tanoꞌowei wuwuna dalavane mwalaꞌina iꞌalaꞌalahi, na asuna hauga maudoina ihaehae’.

⁴ Eena babadaone hitau 24 na hinage meimeituwaone hitau vehopali hitalupwagogo Yaubada yana abamiya wasawasa ainai imiyamiya mehenai, na ainai hiwalo, ‘Moiha. Anoꞌowego!’ Lami yana tawahola guyauna

⁵ Abamiya wasawasa ainaena ehebo alina ilaoma iwalo,

‘Omiu Yaubada yana taupaihowao yo ana tauveꞌahihiwo habulumiu yo mwalaꞌimiu amwalo vetuvehae ainai’.

⁶ Na hinage yabenalei dova boda mwalaꞌina alinadi, na hinage dova weꞌaha sagesagenana daguguna, yo hinage dova tutu daguguna iwalowalo,

‘Yaubada amnoꞌowei wuwuna iya yada Bada, Yaubada Tauwahiyala alili, na bada ivetauloinaꞌo.

⁷ Tayaliyaya mwalaꞌina, na hinage tanoꞌowei, Lami yana tawahola vehabana, na waihiu bada iꞌaupasaꞌo yadi tawahola vehabana,

⁸ na wahiune bada ana aleꞌo hewahewana na masemaselena Yaubada imohenaꞌo.’ Na aleꞌone ana nuwamasele neta Yaubada yana tomowao yadi mumuga dumwaluna.

⁹ Eeta tausagenawasane aliguwai iwalo, ‘Walo teina uleledi “Yaiyadiwo omiu Yaubada iyogaegomiu Lamine yana tawahola guyauna ainai, amyaliyaya” ’. Na hinage tausagenawasane iwalouyo, na iwalo, ‘Teina Yaubada yana walo moiha’.

¹⁰ Na aenai yabeꞌutalu ta ebeha yapwagogo ainai, eena iwalo, ‘Havena dova. Yau Yeisu yana taupaihowa, owa dova, na hinage dova tahimwao hiya Yeisu ana tauwalo mahalavao, Yaubada hesi ainai upwagogo.’ Wuwuna Yeisu ana tauꞌawa moihao Yaubada Aluꞌaluwana ipaihowaidi ta hiꞌauꞌaubabada dova tauwalo mahalava. Hosi hewahewana ana taugelu

¹¹ Ainaena galewa yaꞌita ilotahoꞌe, na ainai hosi hewahewana imahalava, na ana taugelune yehana himwauwi Taudumwalu na Moiha. Na yana loina dumwaluna ainaena ilauvetala, yo hinage iꞌaleha.

¹² Na mehena adi ita dova aiwa alaꞌalahawawalina, na vahunai ana pwaopwaomi wasawasao bagibagilidi himiyamiya. Na hinage yehana hilele nigele howahowana yaiya ihanapui. Ibom ihanahanapui.

¹³ Na ana aleꞌone iliꞌwa, ꞌwahina ainaena hiyebuta, na yehana himwauwi, hiwalo, ‘Yaubada yana Walo’.

¹⁴ Na galewa yana tauꞌalehao yadi hosi hewahewadi higeluidi, na himulitaei, adi aleꞌo hewahewadi na gaugaudi.

¹⁵ Na yadi taumugaine awanaena elepa aleꞌaleha mehemehegaina imahamahalava, iya mata elepane ainaena tupwa maudoina iwahiyala gabaedi na aidiyai iloina dova pwawati, na hinage waini abapihagi ainai ipihagidi, neta Yaubada Tauwahiyala alili yana modiꞌini mwalaꞌina.

¹⁶ Na ana aleꞌo yo esiꞌesina aidiyai yehana hilele, hiwalo, ‘Towaho teina tauwasawasao yadi Tauwasawasa, na hinage babadao yadi Taubada’.

¹⁷ Eena ehebo tausagenawasa yaꞌita mahana ainai itowotowolo, na alinana mwalaꞌina ainaena iyogayoga lowolowo maudoidi ahipuwai hiyevayeva aidiyai, iwalo, ‘Amhulu gogoiyama Yaubada yana guyau mwalaꞌina ainai,

¹⁸ na amꞌai tauwasawasao bunumadi, yo aleha adi taumugaiwo bunumadi, yo tauꞌalehao bunumadi, na hinage hosiwone, yo adi taugeluwo bunumadi, na hinage tomowa maudoidi bunumadi, hiya tomowa mohili na hinage taupaihowao, tomowa mwalaꞌidi yo habuludi.’

¹⁹ Na lagulagune niꞌuwena ilaoma, na baleꞌu ana tauwasawasao mayadi tauꞌalehao yaꞌitadi hilau ahaidi habi aleha hosine ana taugelune mayana tauꞌalehao aidiyai.

²⁰ Tenem ainai lagulagune mayana tauwalo mahalava oyaꞌoyamao hiꞌabi avivinidi na mayawahidi higabaedi dalava alaꞌala wowoli mwalaꞌina holanai. Tauwalo mahalava oyaꞌoyamane iya mwalona yana paihowa wahiwahiyaladi ipaihowaidi lagulagune mehenai na aidiyena tomowa iꞌoyaꞌoyamaedi, hiya lagulagune ana veꞌiveꞌilala aidiyai imiyamiya, na yana aiwa tagitagine ana taupwagogowo.

²¹ Na elepa aleꞌalehane hosi ana taugelune awanaena imahamahalava na ainaena lagulagune yo yana tauwalo mahalava oyaꞌoyama yadi tauꞌalehao bagibagilidi iꞌoiye mwalowoidi. Eeta lowolowo bagibagilidi hilaoma ta taumwalowoi bunumadiwa hiꞌaidi, na diyadi imwau.

20

¹ Ehebo hinage tausagenawasa yaꞌita galewaena iꞌaiꞌaituluma, na gudane mwalaꞌina ana abahoꞌe, na balavai mwalaꞌina ivaidi, ta ilaoma,

² na weso hawahawawalinane iꞌabi avivini, iya weso mugamugaina, neta Tomodulele, bo Seitani, na ipai ana higa tausani bolimai hiꞌovi.

³ Eeta tausagenawasane wesone iꞌabihini, na igabaei guda mwalaꞌina holanai, na nemai iguduꞌauhi, na iꞌabiye yaiyai, ta havena boda iꞌoyaꞌoyamaedi ana higa bolimai tausani hiꞌovi, na mulitai ilivahi hauga habuhabuluna vehabana.

⁴ Na hinage tupwana abamiya wasawasa yaꞌitadi aidiyai hiya Yaubada loina imohediꞌo himiyamiya, na hinage tomowaone gadodi mwalona hitomdiꞌo, wuwuna hiya Yeisu ana tauwalo mahalavao na Yaubada yana walo ana tauyewasaeina, aluꞌaluwadi yaꞌitadi, hiya nigele lagulagune yo yana aiwa tagitagine aidiyai hiyapwagogo, na nigele ana veꞌiveꞌilala vahudiyai yo nimadiyai hiyamwauwidi. Hiya teina mwalowoiyena bada hitowoloꞌo, na Besinana baidadi hiloiloina bolimai tausani aidiyai.

⁵ Na taumwalowoi maudoidi mata nigele hiyayawahaiuyo ana higa bolimai tausani hiꞌovi. Teina taumwalowoiwone yadi towolo mugamugaina.

⁶ Ta hiya tautowolo mugamugaidi masemaseledi, ainaena mayadi yaliyaya, na mwalowoi bwauna nigele mata hiyalobai, na hesi Yaubada na Besinana yadi taupwaoliwo, na Besinana baidadi mata hivetauloina bolimai tausani aidiyai. Tomodulele yana tapiya

⁷ Bolimai tausani hiꞌovi, abo Tomodulele abapaiyena hilivahi, na imahalavama,

⁸ na ilau baleꞌu maudoina aidiyai habi oyamaedi, tupwadine dova Gogi na Meigogi aidiyai. Ainaena Tomodulele tauꞌaleha maudoidi iꞌatuꞌahaidi habi aleha, adi bagibagili tavahili ahayai, dova namonamo leꞌawai.

⁹ Ainaena baleꞌu maudoina hitauꞌahai ta Yaubada yana tomowao yadi abamiya na dalavane Yaubada ivevelauweiwa himiya gwaigwaipileyei na aiwa alaꞌalahawawalina galewaena iꞌaituluma ta iꞌalaveꞌovidi.

¹⁰ Eena tauꞌoyamawa Tomodulele, tomowa iꞌoyaꞌoyamaediwa bada higabaenaꞌo dalava alaꞌalahi holanai. Alaꞌalawowoline holanai mwalona lagulagunane na tauwalo mahalava oyaꞌoyamawa higabaediꞌo, na tupwanane ainai hitau tonugaone himuyamuya ahubena yo boniyai aidiyai, na havena iꞌoviꞌovi. Lauvetala yana abaꞌovi

¹¹ Na yaꞌita ehebo abamiya wasawasa hewahewana na mwalaꞌina, na abamiyane ana taumiyane mehenaena galewa yo baleꞌu hisawali, ta nigele howahowana taꞌitauyoidi.

¹² Na taumwalowoiwo maudoidi yaꞌitadi, mwalaꞌidi yo habuludi, abamiya wasawasane mehenai hitowotowolo, na buki hiꞌaladi, na ehebo hinage buki hiꞌala, iya yawahi ana buki, na taumwalowoi iloinaedi, hava dova mumugadi lelelelena bukiwone aidiyai imiyamiya.

¹³ Hiya niꞌu adi tauꞌenowo hilaoma, na Bwebweso ana taumiyao, yo baleꞌu ana taumwalowoiwo maudoidi hilaoma, na ehebo ehebo iloinaedi, hava yadi mumuga dova.

¹⁴ Ainaena mwalowoi yo Bwebweso igabae aituluwedi dalava alaꞌalahi holanai, na teina dalava alaꞌalahinane neta mwalowoi bwauna.

¹⁵ Na ebe yaiyadiwo nigele yehadi iyalobaidi yawahi bukina ainai igabaedi dalava alaꞌalahina ainai.

21

¹ Ainaena galewa yo baleꞌu miyamiyadi yaꞌitaꞌitadi na hitauꞌaidawani ta hisasawaline, na galewa vauvauna na baleꞌu vauvauna hitaumahalava, na hesi nigele niꞌu.

² Na dalava mwalaꞌina veꞌaveꞌahihi yaꞌiꞌitane, iya Yelusalem vauvauna, galewaena iꞌaiꞌaituluma Yaubada ainaena, bada iyepasayaꞌo dova tautawahola waihiuna ipasa, na mwanena baidana hivelau lobaloba.

³ Na abamiya wasawasa ainaena alinana mwalaꞌina yabenalei, iwalo, ‘Uꞌita teina hauga, Yaubada mayana tomowao himiyamiya, wuwuna iya mata baidanao, na hiya mata yana tomowao. Moiha Yaubada ibom iya baidadi.

⁴ Yaubadane mehelinodi ibaꞌilidi, ta mata nigele mwalowoi, nuwana nuwayababa yo muyamuya yo dou aidiyai iyamahamahalava, wuwuna mumuga miyamiyana bada iꞌoviꞌo.’

⁵ Eena abamiya wasawasa ana taumiyane iwalo, ‘Ginauli maudoidi yaꞌabiye vauvaudi’, na hinage iwalo, ‘Walo teina uleledi, wuwuna walo moiha na howahowana tayemidiyedi’.

⁶ Na hinage iwalo auligau, iwalo, ‘Bada iꞌoviꞌo. Yau abavetuwuni na abaꞌovi na Taumugai yo Taumulita. Na ebe yaiyadiwo hiya gadodi himaguni weꞌaha bidalaena yamohe mohiledi, yawahidi vehabana.

⁷ Na ebe yaiyadiwo Tomodulele hiwahiyala gabaei, mata ginauli namwanamwana aliguwena yamohedi ta yau yadi Yaubada na hiya natuguwao.

⁸ Na hesi hiya nigele tauꞌatepatu na nigele hiyayemidi, na tauveyababa yo tauꞌoiye mwalowoi yo taupwanoliwo yo taubalau, yo aiwa tagitagi tautapwalolowo, yo tauꞌoyamao maudoidi, hiya teina yadi tupwa dalava alaꞌalahina, neta mwalowoi bwauna.’ Yelusalem vauvauna

⁹ Eeta tausagenawasaone 7 mwalona muyamuya vedidi 7 adi tauꞌavalao, ehebo aidiyena ilaoma, na iwalo auligau, iwalo, ‘Ulaoma na waihiu yaveꞌitago, neta iya Lami mwanena’.

¹⁰ Na Aluꞌaluwa Veꞌahihi ilauvaigau oya haehae alilina ewanai, na dalava masemaselena iveꞌitagau, yehana Yelusalem, galewaena iꞌaiꞌaituluma Yaubada ainaena.

¹¹ Na Yaubada yana wasawasa maselena dalavanane ainai ihinahinali, na dalavanane maselena dova gaima wasawasa alaꞌalawana yo hawahawawalina, na inamanamali dova vihilo masemaselena.

¹² Na dalavanane ana abwalu mwalaꞌina na ewaꞌaliliyai, na ana awaꞌeda adi bagibagili 12, na awaꞌedaone adi tauꞌita avivini tausagenawasao 12, hinage awaꞌedanane aidiyai huhu 12 Isileli aidiyena yehadiyaone hilelediꞌo.

¹³ Abwalu ana waheiwone vehopali. Ehebo tupwa aluwabu ainaena, na ana awaꞌedao tonuga, tupwa bomatu ainaena awaꞌedao tonuga, yalasiyena hinage awaꞌedao tonuga, na tupwa bwauli awaꞌedao tonuga.

¹⁴ Dalavane mwalaꞌina ana abwalu wahuwahuna, neta gaima namwanamwadi 12 yaiyaidi ewadiyai, na gaimadine aidiyai Lami ana tauyewasao 12 yehadiyaone hilelediꞌo.

¹⁵ Na tausagenawasane aliguwai iꞌaꞌaubabadawa, nimanai abalive goula, na ebeha ainaena dalavane yo ana awaꞌedao yo ana abwalune iliveidi.

¹⁶ Dalava mwalaꞌina ana daodao yo ana tabataba tupwa vehopali eheꞌehebodi. Eena tausagenawasane yana abalive ainaena dalavanane ilivei, na ana daodao yo ana tabataba yo ana hae maudoina eheꞌehebodi, neta 2400 kilomita.

¹⁷ Na abwalune ana bado nimanaena ilivei ta ilobai 36 ana bado neta 144 kiubita. Tausagenawasanane nimana dova towaho nimana ana daodao.

¹⁸ Dalava mwalaꞌina ana abwalune gaima wasawasa na namanamalidi aidiyena hiꞌaꞌabine, na dalava holana goula ainaena hiꞌaꞌabine, na hinamanamali dova vihilo.

¹⁹ Dalavanane ana wahuwahu gaimanaone, gaima wasawasa na namanamalidi aidiyena hiyepasane, wahuwahu mugai ana pasa ehebo gaima wasawasa hewahewana, gaima bwauna ana ita dova giniuba, tonugana yebweyebwelina, na vehopalinane dova mwadaya tayana,

²⁰ paibina dova siyae, sikisina hawahawawalina, na sebenina yogeyogena, na eitina dova tavali alaꞌalawana, na naenina magomagolona, na tenina hulehulelena, na lebenina dova niꞌu gibagibana, na tuwelona gibagibana dova nabuꞌa.

²¹ Na dalavane ana awaꞌedao tuwelowone giniuba mwalaꞌidi tuwelo aidiyena hipapaihowaidine, na awaꞌeda ehebo giniuba ehebo ainaena hipaihowai. Na dalavanane ana amwaha maudoina goula aꞌava, inamanamali dova vihilo.

²² Dalavanane ainai nigele vada veꞌahihi yayaꞌita, wuwuna Taubada iya Yaubada Tauwahiyala alili yo Lami, hiya vada veꞌahihinaede.

²³ Mahana yo waiꞌena nigele adi lowoinana ta hihinali dalavanane ainai, wuwuna Yaubada yana wasawasaena ihinahinali maudoina, na hinage Lami iyemala masele dalavanane ainai.

²⁴ Na maselenane ainaena taumiya baleꞌu hilowolowouhi, na baleꞌu ana tauwasawasao yadi wasawasa hivaiyama dalavanane ainai.

²⁵ Na dalavanane ana awaꞌedao nigele howahowana ahubenaena higuduidi, na tenem ainai nigele teya boniyai.

²⁶ Na abaloinao maudoidi yadi veꞌahihi yo yadi walo vetuvehae hivaidima dalavanane holanai.

²⁷ Na nigele howahowana ginauli biꞌibiꞌidi dalavanane ainai hiluwu, dova mumuga vedeba hinihinimayadi yo tauꞌoyamao. Na hesi hiya yehadi hilelediꞌo Lamine yana yawahi bukina ainai mata hiluwu.

22

¹ Eeta tausagenawasane yawahi bwahina iveꞌitagau, bwahinane mehena masemaselena moiha dova vihilo, Yaubada yo Lami yadi abamiya wasawasa ainaena isagesagenama.

² Ta dalavane ana amwaha ahiꞌahipunaena isagesagena dobi. Na bwahine papalina ainai yawahida aiwanao hitowotowolo. Aiwadine ainodi waiꞌena ehebo ehebo vagadi na vagadi, eeta bolimai ehebo holanai maituwelo hiꞌaiꞌaino, na lugunao boda maudoidi baleꞌuwai yadi mulamula.

³ Na hesi Yaubada ginauliwowa iꞌawa yababaediwa mata nigele dalavanane ainai hiyalobaidi Yaubada yo Lamine yadi abamiya wasawasa ainai himiyamiya, na Lamine yana taupaihowao ainai hipaihowa.

⁴ Yo hinage manina hiꞌita, na hiya yehanane manidiyai.

⁵ Nigele masigili, na nigele mahana yo lampa, wuwuna Bada yada Yaubada iya taꞌi yadi maselene na mata hiloina vateyai. Yeisu yana laoma

⁶ Ainaena tausagenawasane iwalo aliguwai, iwalo, ‘Walo teina moiha na howahowana tayemidiyedi, wuwuna Bada Yaubada ibom Aluꞌaluwana ana taumohe tauwalo mahalavao aidiyai, na yana tausagenawasa ivetamalei na yana taupaihowao aidiyai iveꞌita hava mata muhamuhana imahalavama’.

⁷ Na Yeisu iwalo, ‘Amꞌita! Teina hauga na yalaowa, na hiya waloyemidi buki teina ainai adi tauꞌawa abiwo hiyaliyaya’.

⁸ Yau Yoni ginauli teina maudoina yabenalediꞌo, na yaꞌitadiꞌo. Teina ginauliwone yabenaledi na yaꞌitadi ta tausagenawasanane aenai yatalupwagogo na yatapwalolo iya ginaulidine iveveꞌitagaune vehabana.

⁹ Eeta iwalo aliguwai, iwalo, ‘Havena dova, wuwuna yau taupaihowa bada dova owa na tahidao hiya tauwalo mahalavao, yo hinage hiya buki teina ana tauꞌawa abiwo. Na Yaubada hesi ainai upwagogo.’

¹⁰ Na hinage iwalo auligau, iwalo, ‘Havena waloyemidine buki teina holanai udawadawanidi, wuwuna hauga bada ilauvahavahaliyaꞌo,

¹¹ na ebe hiya tauyababa besiwa mata yababana aidiyai imiyamiya, na ebe hiya yadi mumuga biꞌibiꞌidi besiwa biꞌi ainai himiyamiya, na ebe hiya yadi mumuga namwanamwana besiwa yadi mumuga namwanamwana ainai himiyamiya, na hinage hiya veꞌaveꞌahihidi besiwa veꞌahihi ainai himiyamiya’.

¹² Ainaena Yeisu iwalo, ‘Mata muhamuhana na yalaowa ta ami maiha yavaidiwa ta yaꞌaiyauya alimiyai, dova yami paihowa ana mwalaꞌi,

¹³ wuwuna yau Taumugai yo Taumulita, na abavetuwuni yo abaꞌovi’.

¹⁴ Na amyaliyaya ebe yaiyadiwo omiu ami aleꞌo amꞌabiye maseledi, wuwuna omiu mata aiwa ainona yawahida vehabana amꞌaidi, yo hinage dalavanane ana awaꞌedao aidiyena amluluwu.

¹⁵ Na dalavanane maseleyai ana taumiyao adi ita dova edewa, neta tomowa yadi mumuga biꞌibiꞌidi, yo balabalaudi, yo taumeheꞌayowo, yo tauꞌoiye mwalowoiwo, yo alawai adi tauyemidiwo, yo hinage oyamao adi taunuwalelewo.

¹⁶ ‘Yau Yeisu, na yagu tausagenawasa bada yavetamalenawaꞌo alimiyai, ta ginauli teina iwalowedi tauyemidiwo alimiyai. Yau Deivida wuwuna yo yana huhu ainaena yalaoma, na yau hinage sailohana maselena.’

¹⁷ Eeta Aluꞌaluwa Veꞌahihi na Lami mwanena hiwalo, ‘Yeisu ulaoma’. Yo yaiyadiwo omiu walo teina ambenalenaꞌo, omiu hinage amwalo, ‘Yeisu ulaoma’. Na hiya gadodi himaguni hilaoma, yo yaiyadiwo hiya nuwanuwadi yawahi bwahina hivai awawai na hinuma. Nigele ana maiha. Abaꞌovi

¹⁸ Omiu walomahalavao buki teina ana taubenaliwo teina ami venuwamwau, ebeha havena yami walowena amyemuyemutulai, mata dova muyamuya buki teina holanai iwalo mahalavaediꞌo Yaubada iyemutulaidi alimiyai.

¹⁹ Na hinage havena ehebo walomahalavao buki teina ainaena amvaivai vehulu, mata dova ta Yaubada hinage ami aiꞌaiyauya yawahi aiwana ainaena ivai vehulu, na hinage yami abamiya dalavane masemaselena holanai, yo ginauli bagibagilidi namwanamwadi buki teina ainai iwalowediꞌo, alimiyena ivai vehuludi.

²⁰ Walo teina ana tauꞌabiye mahalava iwalo, ‘Moiha. Teina na yalaowa.’

‘Dova Bada, ulaoma, owa Yeisu’.

²¹ Yada Bada Yeisu yana veꞌiꞌila yo yana velau maudoimiu ana tauyemidiwo alimiyai. Moiha.