1

¹ Mugai vali hauga yo vali amwaha aidiyai ta nuwatuwu bagibagilidi aidiyena Yaubada yana walo tauwalo mahalavao imohedi, na hiya hiwalo mahalavaedi tubudao aidiyai.

² Na yana abaꞌovi ita yada haugai yana walowone iwalo mahalavaediꞌo alidai Natuna ainaena. Yaubada Natuna ivesinuwai ta ebeha ginauli maudoina aidiyai iloina, na mugai Natuna ainaena ginauli maudoina iyeyemaseledine.

³ Yaubada Natuna tamanane yana masele iꞌabiye maseleyei na iya Yaubada ana oleya dova, na yana walo wahiwahiyalana ainaena ginauli maudoina galewai na baleꞌuwai iꞌabi avivinidi. Na yada pwanoliwo aidiyena iuwagita na mulitai Yaubada Ewa aliliyai nima tautuwanai imimiyane.

⁴ Iya ihae alili abo tausagenawasaone, na yehanane Yaubada imohei tausagenawasaone yehadiyao imwalaꞌi gabaedi.

⁵ Wuwuna nigele teya hauga Yaubada tausagenawasao aidiyai iyawalo,

‘Moiha na wau yau Tamam na mata owa Natugu’. Na nigele teya tausagenawasa vehabana iyawalo,

‘Yau aliguwai uꞌawa tamagu na yau alimwai yaꞌawa natugu’.

⁶ Na haugana Natuna tautuwana ivetamalenama baleꞌuwai, iwalo,

‘Yaubada yana tausagenawasao galewai mata iya ainai hipwagogo’.

⁷ Na hesi tausagenawasaone vehabadi yana walovagana, iwalo,

‘Yaubada yana tausagenawasaone iꞌabiye mahalavaedi, ainaena yadi lau dova yaumai, na yana taupaihowaone dova aiwa lohalohawawalina’.

⁸ Na hesi Natunane vehabana iwalo,

‘Owa Yaubada uloina vateyai taꞌi.

Na mayam loina dumwadumwaluna uloina’.

⁹ Mumuga dumwadumwaluna amhenuhenuwa na mumuga yababana amtaꞌwataꞌwata. Ainaena Yaubada, yam Yaubada bada ibesinanaigoꞌo yaliyaya moiha ainaena na yam yaliyayane am geluwo yadi yaliyaya imwalaꞌi gabaedi.’

¹⁰ Na ehebo yana walo Natunane ainai iwalo,

‘Bada ee, hauga mugai ainai baleꞌu uyemasele na nimamwena galewa upapaihowaine.

¹¹ Ginauliwone howola abo hisawali na owa umiya vateyai, na ginauli maudoidi mata himiyamiya ta dova aleꞌo,

¹² na uyoudi dova abobo na adi ita hibuidi, na owa mata nigele uyabuigo na hesi umiya vateyai.’

¹³ Na Yaubada nigele teya hinage tausagenawasa ainai iyawalo,

‘Nima tautuwaguwena umiya ana higa am alehao yamwau aituluwedi aem elauhanai’.

¹⁴ Na tausagenawasaone hiya aluꞌaluwa taupaihowa Yaubada imwauwidi ta ebe hihaguigita livahi vehabana.

2

¹ Ainaena howahowana walowowa tabebenalediwa ta nuwatuwu avivinidi na havena tavelibai awawaidi.

² Mwalona tausagenawasaone Yaubada yana walo hiwalo mahalavaei tomowa alidai, na walonane walo moiha, ainaena ebe tomowa nigele hiyamulitaedi, neta yadi pwanoli ana maiha hilobai.

³ Ita hinage ebe livahine mwalaꞌinane tataꞌwataꞌwataei, Yaubada yana lauvetala talobai na nigele mata tayadena gabaei. Walone livahi vehabana yada Bada Yeisu iwalo mahalava mugaiyei, ainaena yana walowone ana taubenaliwo hiya himohegitaꞌo.

⁴ Na Yaubada hinage walonane iꞌabiye moihaedi, neta veꞌiveꞌilala yo vedevededewo abanuwapwanopwano aidiyena. Ta Aluꞌaluwa Veꞌahihi yana aiyauya iꞌaꞌaiyauyanei hiya aidiyai Yaubada yana nuwatuwuwena. Ada Taulivahi ana muya vehabana

⁵ Aꞌauꞌaubada alimiyai dalava vauvauna howola abo talobai, na Yaubada tausagenawasao mata nigele yadi loina iyamohedi teina dalavane ainai,

⁶ na hesi tomowa ehebo imohenaꞌo, wuwuna Buki Veꞌahihi ainai iwalo mahalavaenaꞌo iwalo:

‘Yaubada ee, hava vehabana tomowane unuwanuwatuwuidine?

Na tomowane moihana yaiya ta uꞌitaꞌita avivinine?

⁷ Hauga ahuꞌahubali aꞌavana umwau aituluwei tausagenawasao elauhadiyai, na mulitai vewasawasa walo vetuvehaena ainaena uꞌabi vahui.

⁸ Na ginauli maudoidi logulogunai umwauwidi ta iloinaedi.” Na yana abaloinanane ginauli maudoina aidiyai iloina. Eeta yana abaloina ainai mata nigele teya hava iyamiyamiya. Na nigele teina taꞌi, na hesi howola abo iloina ginauli maudoina aidiyai.

⁹ Na hesi Yeisu bada taꞌitayaꞌo, neta hauga ahuꞌahubalina ainai imiya aitulu tausagenawasao elauhadiyai na mulitai ana veꞌahihi yo ana walo vetuvehae mwalaꞌina ilolobaidine ana muyao yo yana mwalowoi aidiyena. Neta Yaubada yana veꞌiꞌila alidai. Wuwuna Yeisu mwalowoi ana muya iveꞌalo maudoida vehabada.

¹⁰ Yaubada ginauli maudoina ipaihowaidi iya vehabana, ainaena nuwanuwana natunao maumaudoida ilauvaigita iya yana tupwa wasawasa ainai, na howahowana Yaubada ada Taulivahiwa iꞌabiye masele, teina wuwuna muya mwalaꞌina iveꞌalo, ta ainaena mumugana maudoina dumwadumwaluna.

¹¹ Yeisu iya veꞌaveꞌahihina ta yana veꞌahihiyena iya iꞌabiye veꞌahihigitane, ainaena iya na ita huhu ehebo. Eeta mata nigele Yeisu iyahinimaya vehabada, na hesi iꞌawaꞌawa tahinaegita,

¹² wuwuna yana walo tamana ainai iwalo,

‘Yeham mata yawalo mahalavaei tahiguwao aidiyai na miya ahai holadiyai yanoꞌowego’.

¹³ Na hinage iwalo:

‘Yaubada ainai mata yagu yemidi yamwauwi’. Na hinage iwalo,

‘Hedahedaowa Yaubada imomohegauwa baidaguwao teinai amiyamiya’.

¹⁴ Moiha taꞌi, Yeisu yana hedahedao ita tomowa mabunumada na maꞌwahinada, ainaena Yeisu hinage ivetowaho na towaho tauda ivai ta imwalowoi, eeta yana mwalowoiyena Tomodulele igohapeiyei, na Tomodulele yana loina mwalowoi vehabana hinage iꞌoiye uhagwali.

¹⁵ Na mwalowoi ana meheuhi yo yana pai wahiwahiyalana yada hauga maudoina aidiyena ilauyeyawahaigita.

¹⁶ Yana vehaguhagu nigele tausagenawasa vehabadi na hesi ita Abelaham tubunao vehabada.

¹⁷ Ainaena Yeisu iyemala tomowa mohili mumugada maudoidi aidiyena ita tahinao vehabada ta ebeha ivetaupwaoli mwalaꞌina mayana atemuyamuya moiha Yaubada yana paihowa ainai eeta ipwaoli yada mumuga yababadi vehabadi ta ebeha Yaubada inuwahamuidi.

¹⁸ Na hinage Yeisu baleꞌuwai miyavitai yo abatowoi bagibagilidi ilobaidi, ta ebe Tomodulele itowoigita Yeisu bada abatowoinane ihanapuidiꞌo ta howahowana aidiyena ihaguigita.

3

¹ Tahiguwao veꞌaveꞌahihimiu, omiu na yau Yaubada iyogaegitaꞌo yana tupwa vehabana, ilowoinanegita na Yeisu tanuwatuwu avivini, wuwuna iya yada yemidi ana tauyewasa yo hinage yada taupwaoli mwalaꞌi alilina.

² Na iꞌaipate yana paihowawa Yaubada imomoheiwa vehabana, neta dova Mosese mwalona iꞌaipate Yaubada yana vadai.

³ Ainaena Yeisu walo vetuvehae mwalaꞌina ilobai, na Mosese ana noꞌo tupwana taꞌi, dova vada namwanamwana nigele iya ana noꞌo mwalaꞌina iyalobalobai, na ana tauꞌabine hesi. Na Mosese dova vada, na Yeisu tauꞌabi.

⁴ Moiha, vada ehebo ehebo adi tauꞌabi himiyamiya, na hesi ginauli maudoidi adi tauꞌabi Yaubada.

⁵ Mosese Yaubada yana vada iꞌaipatei dova taupaihowa. Na Yaubada yana walowo ginauliwone howola abo himahalava vehabadi, iwalo mahalavaedi.

⁶ Na Besinana Yaubada yana vada iꞌaipatei nigele taupaihowa dova, na hesi iya natu mohimohihilina. Ita tabom Yaubada yana vadane taꞌi, ta ebeha tayemidi vateyai mayada atepatu yo mayada nuwatuwuhae. Yaubada yana bodao ita howola abo taꞌaiyawasi

⁷ Eeta Aluꞌaluwa Veꞌahihi iwalo auligita, iwalo:

‘Mata ebe alinana ambenalei,

⁸ havena amꞌuluꞌulu yaiyai dova tubumiyaone mugamugaina nuꞌula awawai hitowoigau ta yagu loina hitaꞌwataꞌwataei.

⁹ Wuwuna bolimai 40 holadiyai yagu paihowa wahiwahiyaladi bagibagilidi hiꞌitadiꞌo, na tubumiyaone yadi ulumiyaiyena hitowoigau, ta vehabadi yaꞌalaꞌiꞌiwahiꞌo, na yawalo, “Hauga maudoina hiya yadi nuwatuwuwena hilaulauhapuli, wuwuna yagu amwaha nigele hiyahanapui”.

¹¹ Ainaena yamodi iniyedi na yawalo venayaidi, yawalo, “Havena hinage yagu abaꞌaiyawasi ainai himluwuluwu”.’

¹² Tahiguwao, yami nuwanuwatuwu amꞌita avivinidi mata dova ta yababana ivaigomiu na yemidi amwahana amlaugabaei ta amlaupwano na Yaubada Mayawahina ammiya vehulu.

¹³ Na teina hauga ambom amvehaguhagu yoigomiu ahubena ehebo ehebo aidiyai ta ainaena havena mumuga yababana iꞌoyaꞌoyamaegomiu na Yaubada alinana amꞌabiꞌabitauꞌwataei.

¹⁴ Ita mwalona yada yemidi Besinana ainai tamwauwiyaꞌo, ta ebe yada yemidine taꞌabi avivini iliꞌilimani ana higa hauga yana abaꞌovi ainai, Besinana baidadai tayaliyaya toyawa.

¹⁵ Dova Buki Veꞌahihi yana walo, iwalo, ‘Ebe Yaubada alinana ambenalei, havena amꞌuluꞌulu yaiyai dova tubumiuyaone mugai yagu loinao hitaꞌwataꞌwataei.

¹⁶ Yaiyadiwo yede Yaubada yana walo hibenalei na hitaꞌwataꞌwataeine? Hiya Mosese Itipitaena imugaiyedi na himamahalavamane, awa?

¹⁷ Hiya bolimai 40 holanai yadi mumuga yababadi vehabadi Yaubada iꞌalaꞌiꞌiwahi ta tauyababaowa nuꞌulai himwalowoi ovine.

¹⁸ Wuwuna hiya yana walo nigele hiyamulitaei, eeta iwalo venayaidi iwalo, ‘Havena yagu abaꞌaiyawasi ainai hiluwuluwu’.

¹⁹ Ainaena taꞌita lobaiyaꞌo hiya nigele hiyaluwu, wuwuna nigele hiyayemidi.

4

¹ Yaubada yana waloyemidiwa howola imiyamiya ebeha yana abaꞌaiyawasi iya ainaena talobai, eeta ilowoinanegita na tameheuhei mata dova ta tupwada tabeꞌu na nigele tayalobai.

² Moiha wasa namwanamwana imohegitaꞌo, dova hiya mugai imohediꞌo, ta wasanane nigele iyahaguidi, wuwuna hibenalenaꞌo na nigele hiyayemidiyei.

³ Na ita ana tauyemidiwo aiyawasi bada talobaiyaꞌo, na hiya mugai nigele hiyalobai wuwuna Yaubada iwalo venayaidi iwalo:

‘Yamodiꞌiniyedi ainaena yawalo venayaidi ta havena aiyawasi aliguwena hilobalobai’. Yaubada yana aiyawasi imiyamiya, wuwuna baleꞌu maudoina iyemasele iꞌovi, na iꞌaꞌaiyawasine.

⁴ Na ahubenane iꞌaꞌaiyawasine vehabana bada Buki Veꞌahihi ainai iꞌaubabadaenaꞌo, iwalo, ‘Yaubada ahubena sebenina ainai yana paihowa maudoina aidiyena iꞌaiyawasi’.

⁵ Eeta tanuwanuwatuwu yana walo teina vehabana, ‘Havena abaꞌaiyawasi aliguwena hilobalobai’.

⁶ Teina haugane abaꞌaiyawasinane imiyamiya na hesi mugai nigele bagibagilidi hiyalobai. Mosese yana hauga ainai hiya wasa hibenale mugaiyei na wasane hiꞌawa sewaei. Eeta nigele hiyalobai.

⁷ Ainaena Yaubada hauga vauvauna imwauwi na ainai tomowa abaꞌaiyawasi hilobai, na hanapu Deivida ainai imohei ta Deividanane iwalo:

‘Ebe Yaubada alinana ambenalei havena amꞌuluꞌulu yaiyai’.

⁸ Ta abaꞌaiyawasine Yaubada iwawaloweine nigele Yosuwa yo yana bodao yadi abaꞌaiyawasi, na hesi vali abaꞌaiyawasi, neta hauga ehebo vauvauna imwauwiyaꞌo ta ebe tomowa aiyawasinane hilobai.

⁹ Na Yaubada yana tomowa ita yada abaꞌaiyawasi imiyamiya, na abaꞌaiyawasinane Tapwalolo ana aiyawasi dova.

¹⁰ Eeta ebe talobai, ita yada paihowa ainaena taꞌaiyawasi, dova mugai Yaubada yana paihowa ainaena iꞌaꞌaiyawasine.

¹¹ Na ilowoinanegita ebe tatowolo wahiyala ta aiyawasinane talobai, na havena teya yaiya iꞌawaꞌawa sewa mata dova ta ibeꞌu, dova hiya mugai hibebeꞌune.

¹² Moiha, Yaubada yana walo mayawahina na wahiwahiyalana dova elepa aleꞌaleha yana mehemehegai matupwa bwaubwauna, na howahowana itomgita ta hola aliꞌalilidai nuwatuwu yo mumuga dawadawanidi himiyamiya iveꞌitaedi.

¹³ Wuwuna Yaubada mehenai nigele teya ginauli iyamiya aidawani, maudoina maseleyai, na iya ainai howola abo yada paihowa maudoina tawalo mahalavaedi. Yada taupwaoli mwalaꞌina iya Yeisu

¹⁴ Yada taupwaoli mwalaꞌina imiyamiya, iya Yeisu Yaubada Natuna, vehabada ihaeꞌo galewai, ainaena yada yemidi ainai taꞌabi avivini.

¹⁵ Tupwadi taupwaoliwo nigele hiyaꞌatemuyamuyaegita yada tapiyao vehabadi, na Yeisu hesi yada miya vitai ihanapuidiꞌo ta iꞌatemuyamuyaegita, wuwuna mwalona baleꞌuwai Tomodulele yana woya maudoina ilobaidiꞌo dova ita taꞌi talobalobaidi, ta Yeisu nigele teya hinage yana pwanoli.

¹⁶ Ainaena mayada atepatu talau yo taꞌawaꞌawanoi ada Tauloinane ainai ta ainaena yada miya vitai aidiyai iveꞌiꞌilaegita na hinage ihaguigita.

5

¹ Taupwaoliwo mwalaꞌidi Yaubada ivesinuwaediꞌo tomowa aidiyena ta imwauwidiꞌo na iya mehenai hipwaopwaoli ita tomowa yada mumuga yababa vehabadi.

² Ilowoinanei na yada taupwaoliwone hinuwanamwanamwa taunuwapwanopwanowo yo taulaupwanowo aidiyai, wuwuna taupwaoliwone hiya tomowa taꞌi mayadi tapiya.

³ Eeta hiya yadi pwanoli vehabana na hinage tomowa bagibagilidi yadi pwanoliwo vehabadi hipwaopwaoli Yaubada ainai.

⁴ Nigele howahowana na teya yaiya yana nuwatuwuwena ivetaupwaoli, na hesi Yaubada yana yogaena, dova mugai Yaubada Eloni iyogaei ta ivetaupwaoline.

⁵ Hinage Besinana nigele ibom iyaꞌabi hiniuyoi ta ivetaupwaoli, na Yaubada ivesinuwaei ta iwalo auli, iwalo:

“Owa natugu, wau taꞌi yaꞌawa natuguwegoꞌo.”

⁶ Na hinage yana walo bwauna iwalo, ‘Owa yamvetaupwaoli imiya vateyai dova Melikisedeki’.

⁷ Haugana Yeisu baleꞌuwai ivetomowa mohili ta imiyamiya mayana dou yo mamehelinona iꞌawaꞌawanoi Tamana ainai, ta nuwanuwana mwalowoiyena ihaloi. Na tamana yana awanoi ibenalei yana veꞌahihi vehabana.

⁸ Yeisu iya Yaubada Natuna, na hesi muya ilobai ta yana alamaꞌiꞌitaena iꞌawa abi moiha.

⁹ Ainaena yana mumuga maudoina dumwadumwaluna. Eeta ebe taꞌawa abi, livahi miyamiya vateyaina Yeisu ainaena mata talobai.

¹⁰ Wuwuna Yaubada Yeisu ivesinuwaei ta ivetaupwaoli mwalaꞌina dova Melikisedeki. Havena Yaubada tataꞌwataꞌwataei

¹¹ Ginauliwone teina vehabadi neta walodi hibagibagili alili himiyamiya. Nuwanuwagu yo yawalo mahalavaedi alimiyai, na nigele howahowana wuwuna amteibabaꞌo.

¹² Hauga teina ilowoinanegomiu na vali tomowa aidiyai amveꞌitadi na nigele howahowamiu, wuwuna Yaubada wasana ana walomoiha nigele amyahanapui ainaena howola aveꞌiveꞌitagomiu. Omiu huhu aꞌava ilowoinanegomiu wuwuna aiꞌai yaiyaina nigele howahowamiu.

¹³ Eeta omiu dova hedaheda amwaha dumwadumwaluna nigele nuwamiu hiyamasele moiha, ainaena ami lowoinana ebe veꞌita hegohegoyadi aidiyena aveꞌai mugaiyegomiu.

¹⁴ Na ebe yaiyadiwo yadi nuwatuwuwo hihuna, hiya dova aiꞌai yaiyaina adi tauꞌaiwo, wuwuna nuwadi bada imaseleꞌo ainaena howahowadi hivesinuwa hava namwanamwana na hava yababana.

6

¹ Veꞌita mugamugaina Besinana vehabana bada ambenalenaꞌo, na amhanapuidiꞌo, ainaena nuwanuwagu hanapu vauvauna Besinana vehabana yaveꞌitagomiu ta yami nuwatuwu aidiyai amvetowaho. Veꞌitadine bada tabenalediꞌo na tahanapuidiꞌo ta havena tabwaubwauyoidi. Veꞌitadine teina: yada mumuga mwalona yababadi taꞌwataꞌwataei na yada Yaubada ainai tayemidi,

² bapitaiso na abivahu veꞌitadi, na taumwalowoi yadi towolouyo, na yababana ana maiha na muya nigele ana higa. Veꞌitadine bada amhanapuidiꞌo.

³ Ebe Yaubada italam, hanapu mugamugaidi amꞌabi avivinidi na ana yemutulai hinage yaveꞌitagomiu.

⁴ Hiya hitaꞌwataꞌwataei nigele howahowana hinuwabui wuwuna yaiyadiwo mwalona Yaubada vehabana nuwadi himaseleꞌo, ta velaunane galewaena hilautowoiyaꞌo, na Aluꞌaluwa Veꞌahihi hivai,

⁵ na hinage Yaubada yana walo hilautowoiyaꞌo ebeha namwanamwana, na yana wahiyala hauga ilalaoma vehabana hinage hilausawahiyaꞌo,

⁶ na ebe mulitai hitaꞌwataꞌwataei, nigele howahowana na hinuwabuiuyo, wuwuna hiya yadi mumugaena Yaubada Natuna bada hiveꞌabahiuyoiyaꞌo na yehanane hiꞌawa ginauli awaꞌawawaenaꞌo.

⁷ Na oya vehabana tanuwatuwu, ebe iꞌwesu alaꞌalabili, mata toputopu igwagwama na venuvenu iꞌini iliꞌilimani mayana wahiyala, neta oya taniwagana yana abanamwanamwa wuwuna Yaubada toputopune iꞌawa namwanamwaenaꞌo.

⁸ Na hesi ebe toputopune ainai awahi yo haihaili womawomalidi hiꞌini, toputopunane Yaubada ivenayaiyaꞌo, ta laumohe aꞌava ilowoinanei.

⁹ Eeta augeluwo, yagu walo teina venuwamwau taꞌi, na yanuwatuwu avivini ebeha havena amtaꞌwataꞌwataei na hesi omiu Besinana yana livahi ana tauvaiwo amwahiyala moiha.

¹⁰ Yaubada yana loina alimiyai dumwadumwaluna, ainaena yami paihowa namwanamwadi mata nigele iyanuwapwanopwanowedi, neta hauga maudoina yami velau Yaubada yehanaena yami hagu yana tomowao aidiyai.

¹¹ Eena nuwanuwagu ebeha omiu ehebo ehebo ampaihowa wahiyala ta ebe yami yemidine ainona maudoina hauga mulitai amlobai.

¹² Havena amꞌabiꞌabitauꞌwata, na hesi tomowaone amveꞌaoꞌaonaedi, wuwuna hiya mayadi alamaꞌiꞌita hiyemiyemidi ta ebe ginauliwone Yaubada iwalowalo yemidiyedine hivaidi. Yaubada yana waloyemidi

¹³ Mwalona Yaubada yana waloyemidi Abelaham imohei, ta Yaubada ibom yehanaena iwalo yemidi, wuwuna nigele teya yeha miyamiya haena na ainaena iꞌawa tamada.

¹⁴ Na yana waloyemidine teina:

‘Moiha, mata yaꞌawa namwanamwaego na ana higa tubumwao hidabalala’.

¹⁵ Na Abelaham iꞌalamaꞌiꞌita hauga daodaona abo waloyemidiwa ainona ilolobaine.

¹⁶ Ita tomowa ebe taveꞌawa paꞌipaꞌiꞌi mata ehebo yeha mwalaꞌina ainaena taꞌawa tamada ta ebeha nuwanuwada tomowa hiꞌawa moihaegita.

¹⁷ Yaubada dova nuwanuwana yana walomoihana ita iveꞌitagita ebeha hava iwalo yemidiyeiwa alidai mata howola abo talobai, ainaena ibom yehanaena iꞌawa tamadane.

¹⁸ Eeta ginauli wahiwahiyaladi bwau miyamiya vateyaidi, neta Yaubada yana waloyemidi na yana awatamada. Ainaena tahanapuiyaꞌo Yaubada nigele howahowana na iꞌoyama. Ainaena ita bada Yaubada ainai tadena lauꞌo ta ihaguigitaꞌo, eeta taꞌatepatu na tanuwatuwu hae ebeha yana waloyemidi alidai mata nigele iyalaugabaigita.

¹⁹ Yada nuwatuwuhae dova yada lowom wahiwahiyalana aluꞌaluwada vehabana, ta ebe ainaena aleꞌo biliwutuhi taluwulapai na taluwu Yaubada yana abamiya ainai.

²⁰ Tenem ainai Yeisu bada vehabada iluwu mugaiꞌo, na ivetaupwaoli mwalaꞌina yo miyamiya vateyaina vehabada, dova Melikisedeki mugai.

7

¹ Melikisedeki Salema yadi tauwasawasa, na Yaubada Ewa aliliyai iya yana taupwaoli. Na mugai Melikisedeki Abelaham ilobai, haugana aleha ainaena ilaulau gwaipile. Na Abelahamnane tauloinao bagibagilidi maꞌadi bodao bada imutudiꞌo, eeta Melikisedeki Abelaham iꞌawa namwanamwaei.

² Ainaena Abelaham yana tobwatobwa iwaheidi veguveguyai 10 adi bagibagili, ta ehebo Melikisedeki imomoheine, na Abelaham iya 9 ivavaidine. Na Melikisedeki yehana ana bui neta, ‘Tauwasawasa Dumwadumwaluna’ na yana dalava yehana Salema, ana bui “Daumwali”. Eeta iya hinage Daumwali ana Tauwasawasana.

³ Na Melikisedeki nigele tamana yo nigele hinana, yo hinage nigele ana auꞌaubabada yo nigele abalabahina yo yana mwalowoi nigele ana hanapu na ana ita dova Yaubada Natuna ivetaupwaoli vateyai.

⁴ Moiha, Melikisedeki towaho haehaena eeta ada mumuga Abelaham yana tobwatobwa ainaena tupwana imohei Melikisedeki.

⁵ Na taupwaoliwo hiya Livai yana bodao yadi tobwatobwa tupwana hivaivai ita Abelaham tubunao alidaena, wuwuna hiya yo ita huhu ehebo taꞌi, na hinage maꞌadi loina tobwatobwa ana vai tomowa aidiyena vehabana.

⁶ Na Melikisedeki nigele auꞌaubabadana, na yana miya hae aꞌava ainaena tobwatobwa tupwana ivavaine Abelaham ainaena, na hinage Melikisedeki yana awanamwanamwa Abelaham imohei. Abelaham towaho mwalaꞌina, wuwuna mwalona Yaubada yana walovelau imohei.

⁷ Na Melikisedeki Abelaham imwalaꞌi gabaei, wuwuna hiya yehadi habuludi awanamwanamwa hivaivai hiya yehadi mwalaꞌidi aidiyena. Yeisu taupwaoli dova Melikisedeki

⁸ Teina taꞌi Livai yana bodao yadi tobwatobwa tupwana hivaivai, na howola mata himwalowoi. Na hesi Melikisedeki aubabadana ebeha iya miyamiya vateyaina.

⁹ Na Livai hinage iya tomowa yadi velau tauvaina, Melikisedeki yana velau imomoheine.

¹⁰ Wuwuna Livai Abelaham tubuna na haugana Abelaham velaune Melikisedeki imohei iya Abelaham diyanai imiyamiya. Yeisu taupwaoli dova Melikisedeki

¹¹ Livai tubunao hiya yadi paihowa neta Yaubada yana loinao Isileliwo ita hiveꞌiveꞌitagita na loinadine nigele howahowana hiꞌabiye dumwalugita moiha, eeta nuwanuwada ehebo taupwaoli vauvauna ta iꞌabiye dumwalugita. Taupwaoline dova Melikisedeki, na nigele dova Eloni matubunao.

¹² Eeta ebe taupwaoli vagana tamwauwi, loina hinage vagana tamwauwi.

¹³ Tahanapuiyaꞌo ebeha Besinana iya yada taupwaoli vauvauna, nigele Livai yana huhu ainaena, na hesi Yuda yana huhu ainaena ilaoma, hiya nigele vesinuwa hiyalobai Mosese ainaena na hivetaupwaoli.

¹⁴ Eeta yada taupwaoli vauvauna Melikisedeki dova. Nigele Mosese yana loinaena ivetaupwaoli, na hesi yawahina miyamiya vateyaina na wahiyala ainaena.

¹⁷ Iya Yeisu, na vehabana Buki Veꞌahihi iwalo:

‘Owa uvetaupwaoli vateyai, dova Melikisedeki’.

¹⁸ Moiha, Mosese yana loinao nigele howahowadi na iꞌabiye dumwalu iliꞌilimani, eeta loina mugamugaina talauvehulu, wuwuna itapiya, na yemidi vauvauna yo ausalana mata imahalava, eena yemidinane ainaena Yaubada tatauvahali.

²⁰ Na Yaubada mugai Besinana yana vetaupwaoli vehabana iꞌawa tamada.

²¹ Na taupwaoli tupwadi Yaubada yana awatamada nigele hiyalobai. Na Besinana ibom vehabana Yaubada yana Buki ainai iwalo:

‘Bada iꞌawa tamadaꞌo mata nigele yana nuwatuwu iyabuiuyoi: Mata uvetaupwaoli vateyai’.

²² Ainaena Yeisu yana waloyemidi vauvauna tahanapui moiha ebeha waloyemidi miyamiyana inamwanamwa gabaei.

²³ Mugai taupwaoli mugamugaidi bagibagilidi hipaipaihowa ana higa tupwadi himwalowoi na mulitai vauvaudi hiyemiyalaedi.

²⁴ Na hesi Yeisu iya yada taupwaoli vateyai ainaena nigele ana miyalae.

²⁵ Na Yeisu hauga maudoina howahowana ilivahigita ebe yana amwahaena ta lau Yaubada mehenai, wuwuna Yeisu miyamiya vateyaina, ta hauga maudoina vehabada iꞌawaꞌawanoi Yaubada ainai.

²⁶ Moiha, Yeisu ilowoinanei ta ivetaupwaoli vehabada, wuwuna iya veꞌaveꞌahihina yo masemaselena yo yana mumuga namwanamwana, na nigele dova ita tauyababao, ainaena Yaubada Yeisu iꞌabihini ta galewa ana taumiyao ihae gabaedi.

²⁷ Na taupwaoli mugamugaidi ahubena ehebo ehebo Yaubada ainai hipwaopwaoli hiya yadi yababao yo tomowa yadi yababao vehabadi. Na Yeisu maiꞌehebo taꞌi tauna italamwei ta ipwapwaoliuyoweine Yaubada ainai vehabada.

²⁸ Yaso mugamugaidi aidiyai Mosese yana loinaena tomowa tapitapiyadi hivesinuvaedi ta hivetaupwaoli mwalaꞌina, na mulitai Yaubada yana awatamada ainaena Natuna iya mumugana dumwadumwaluna ivetaupwaoli vateyai.

8

¹ Yagu walo ainona teina, yada taupwaoli mwalaꞌina imiyamiya, na teina Yaubada yana wasawasa haehae alilina galewai nimatautuwanai imimiyane.

² Na iya ivetaupaihowa Yaubada yana vada veꞌahihi moiha ainai. Vadanane tomowa nigele hiyaꞌabi, na hesi Bada iya iꞌaꞌabine.

³ Baleꞌu ana taupwaoli maudoidi yadi paihowa neta velau na pwaoli himohemohe Yaubada ainai, ainaena yada taupwaoli vauvaunane iya hinage ilowoinanei yo ehebo velau Yaubada imohei.

⁴ Na iya ebe baleꞌuwai imiyamiya nigele howahowana ivetaupwaoli wuwuna taupwaoli bagibagilidi himiyamiya, na hauga maudoina hipwaopwaoli, dova Mosese yana loinao.

⁵ Na yadi paihowa vada veꞌahihi holanai. Na vada veꞌahihine baleꞌuwai abaꞌita dova maꞌamaꞌayau taꞌi, na hesi vada veꞌahihi moiha galewai imiyamiya. Wuwuna Mosese vada veꞌahihi mugamugaina iꞌabi, na Yaubada ivenuwamwauwei, iwalo, ‘Mosese unuwatuwu avivini vadawa ana ita maudoina oyai bada yaveꞌitagoꞌo, maudoina uveꞌaoꞌaonaei ta yagu vada veꞌahihine uꞌabi’.

⁶ Eeta teina taꞌi Besinana yana paihowa, paihowa miyamiyana inamwanamwa gabaei, dova hinage yana loinane, loina mugamugaina inamwanamwa gabaei, wuwuna yana loinane waloyemidi vauvauna ainaena imamahalavane. Na waloyemidinane waloyemidi mugamugainawa inamwanamwa gabaei.

⁷ Ebe waloyemidi miyamiyana tomowa maudoidi ihaguidi, mata nigele tayanuwanuwatuwu waloyemidi vauvauna vehabana. Na hesi nigele iyahaguigita, ainaena vauvauna nuwanuwada.

⁸ Mugai Yaubada ihanapuiyaꞌo ebeha Isileliwo yadi mumuga nigele namwanamwana, eeta vehabadi iwalo:

‘Ahubena hilalauma aidiyai mata waloyemidi vauvauna yamwauwi Isileliwone yo Yudaone vehabadi.

⁹ Nigele dova waloyemidiwa yamwamwauwine tubudiyao vehabadi, haugana nimaguwena yamugaiyedi ta Itipita ainaena himahalava ta hilalaune yadi tupwai. Wuwuna waloyemidiwa yamwamwauwiwa hidiꞌwai ta nimagu aidiyena yavavaine!

¹⁰ “Howola abo yagu waloyemidi vauvaudi Isileliwo yamohedi na atediyai yagu loina yaleledi, ta hihanapuigau yau yadi Yaubada na hiya yagu tomowao.

¹¹ Ainaena nigele howahowadi adi geluwo yo tahidiyao hiveꞌitadi yo hiwalo, ‘Omiu Bada amhanapui’, wuwuna maudoidi mata hihanapuigau, hiya yehadi mwalaꞌidi yo hiya tauwewelohe.

¹² Na mata yaꞌatemuyamuyaedi yo yadi mumuga yababadi yanuwahamuidi na yanuwapwanopwanowedi.” ’

¹³ Yaubada waloyemidi vauvauna imwauwi wuwuna waloyemidi miyamiyana bada itapiyaꞌo, ta muhamuhana isawali.

9

¹ Waloyemidi mugamugaina holanai loina bagibagilidi himiyamiya miyagogoi vehabana, na hinage vada veꞌahihi baleꞌuwai vehabana.

² Na vadanane lagulagu wapidiyena hipapaihowaine, na aleꞌo ainaena hibiliutuhi bwauwi, na biliutuhi mwalaꞌina hiyogaei tupwa veꞌahihi na biliutuhi habuluna holanai moiha hiyogaei tupwa veꞌahihi moiha. Biliutuhi mwalaꞌina holanai lampa adi abamwau na ehebo gwalatau ainai pwalawa himwaumwauwi Yaubada mehenai.

³ Na tupwa veꞌahihi moiha holanai abagabu imiyamiya dova gadoꞌa vehabana neta goula ainaena hipapaihowaine, na hinage loina ana dedewaga imiyamiya, neta goula hinage ainaena hipapaihowaine, dedewaganane holanai gaeba goula imiyamiya, na gaebanane holanai tubudao adiwa yehana mana, tupwana imiyamiya. Ta hinage dedewagane holanai Eloni yana digona imiyamiya neta mwalona iꞌiꞌinine, yo waloyemidi gaimadiyaowa Yaubada yana loina ilelelediwa himiyamiya.

⁵ Na dedewagane ewanai tausagenawasa pigapigabudi bwau hipaihowadi ta dedewaganane hitowolo logulogui, neta Yaubada yana abamiya tomowa yadi yababao adi nuwahamu vehabana, na hesi nigele howahowada na hauga teina tanuwanuwatuwu tobwatobwadiyaone vehabadi.

⁶ Ebeha tobwatobwa maudoidi hiꞌatububunidi, abo taupwaoli hiluwu tupwa veꞌahihi holanai ta yadi paihowa hipaipaihowaidi hauga maudoina.

⁷ Na hesi tupwa veꞌaveꞌahihina moiha ainai taupwaoli mwalaꞌina ibom iluwu, na bolimai ehebo holanai maiꞌehebo taꞌi. Ta hauganane iluwuluwu ꞌwahina ivai na ꞌwahinane iꞌoihiuhiuli, ta ebe ipwaoli Yaubada ainai yana mumuga yababadi vehabadi na hinage tomowa maudoidi yadi yababao vehabadi.

⁸ Teina abaꞌita ainaena Aluꞌaluwa Veꞌahihi iveꞌitagita nigele teya yaiya howahowana tupwa veꞌaveꞌahihina moiha iluwui haugana vada veꞌahihi mugamugaina hiyepayepaihowa.

⁹ Neta veꞌiveꞌilala teina haugane vehabana, ta ainaena ta ita lobai ebeha velauwo yo pwaoliwo aidiyena mata nigele abiyemasele tayalobai ateda ainai,.

¹⁰ Wuwuna loinaone tomowa himulimulitaedi aiꞌai yo numanuma yo vehuguvi vehabadi. Neta mwalona loinadine miyamiyadi Yaubada imwauwidi ta himiyamiya taudao vehabadi ana higa Yeisu Besinana imahalavama ta loina ibubuine. Besinana yana pwaoli

¹¹ Besinana iya taupwaoli mwalaꞌina eeta miya namwanamwana moiha imohegita, ta vali vada veꞌahihi ainai iluwu, na vadanane namwanamwana na mwalaꞌina, neta tomowa nigele baleꞌuwai hiyaꞌabi.

¹² Ainaena Yeisu tupwa veꞌahihi moiha ainai iluwu maiꞌehebo, ta ꞌwahina ainaena ipwaoli, na ꞌwahinane nigele lagulagu ꞌwahinadi, goti nuwana bulumakau habuludi ꞌwahinadi, na hesi iya ꞌwahinana ainaena yawahi vateyai talolobaine.

¹³ Ebe ginauli biꞌibiꞌidi taꞌabi towoidi mata aidiyena tauda taꞌabiye biꞌidi na goti ꞌwahinana nuwana bulumakau ꞌwahinana ainaena taꞌoihiuhiuligita, nuwana bulumakau yauyaubona tagabu na ainaena tapwaoli Yaubada ainai, neta tauda ana abiyevauvau vehabana.

¹⁴ Na Besinana ꞌwahinana abaꞌabiye masele moiha, wuwuna ateda iꞌabiye maseledi na ebe paihowaone mwalowoi vehabana tataꞌwataꞌwataedi wuwuna Aluꞌaluwa Veꞌahihi miyamiya vateyaina Besinana iꞌabiye wahiyala ta ainaena iya mumugana maudoina dumwadumwaluna na nigele teya hinage yababana ainai. Eeta iya ipwaoliuyowei Yaubada ainai, neta imwalowoi ita ada abiyemasele vehabana ta ebe Yaubada Mayawahina vehabana tavetaupaihowa.

¹⁵ Eeta Besinana waloyemidi vauvauna ivaiyama ta ainaena talaoma Yaubada baidada taveꞌauꞌaugelu na ebe ivesinuwaigita mata yawahi miyamiya vateyaina iwalo yemidiyenaꞌo imohegita. Wuwuna ita waloyemidi mugamugaina tahoꞌeyaꞌo ainaena ilowoinanei ta tamwalowoi, na hesi Besinana bada vehabada imwalowoiꞌo habi haloigita.

¹⁶ Amhanapuiyaꞌo mwalona ebeha yaiya mulitai na imwalowoi mugai loina imwauwi nuwana ilele yana tobwatobwa maudoina ana veguyai vehabadi na ebe haugana imwalowoi, mata loinanane yana huhu himulitaei.

¹⁷ Na ebe howola mayawahina mata nigele loinanane hiyamulitaei. Neta bada ebe imwalowoi, loinane iwahiyala na himulitaei.

¹⁸ Hinage dova loina mugamugaina Mosese ainaena, mugai tupwadi lagulagu hiꞌoiye mwalowoidi, na ꞌwahinadine ainaena waloyemidi hiꞌabiye dumwalu.

¹⁹ Wuwuna loina maudoina iwalo mahalavaedi tomowa aidiyai, eeta bulumakau habuludi yo gouti ꞌwahinadi bwahi baidana iyebwelidi na ivai ta sipi wiyawiyana hawahawawalina na aiwa yehana isopa mehenai iwomalei ta ꞌwahina yo bwahi ainaena iyebuta, na ainaena buki yo tomowa ihiulidi,

²⁰ na Mosese iwalo, ‘Waloyemidi Yaubada imwau vehabamiu, ana veꞌiveꞌilala ꞌwahina teina eeta amꞌawa abiyei’.

²¹ Hinage dova vada veꞌahihi yo gaeba vada veꞌahihinane ainai ꞌwahinaena ihiulidi.

²² Wuwuna Mosese yana loina aidiyai ebeha ꞌwahina ainaena ginauli maudoidi mata himasele. Na mumuga yababana ana nuwahamu hinage ꞌwahina ainaena. Na ebe nigele ꞌwahina iyasagena, nigele howahowana nuwahamu talobai.

²³ Vada veꞌahihi ana tobwatobwao galewai himiyamiya, na adi maꞌamaꞌayau baleꞌuwai Mosese ipaihowaidi, ainaena ilowoinanei na ꞌwahina ana paihowaena ipwaoli Yaubada ainai ta iꞌabiye maseledi, na hesi ginauliwone galewai adi pwaoli namwanamwa alilina ainaena, neta Besinana ꞌwahinanaena.

²⁴ Na Besinana nigele iyaluwu vada veꞌahihi abiꞌabina ainai, neta vada moiha ana maꞌamaꞌayau taꞌi, na hesi galewai iluwu Yaubada mehenai imiyamiya na ihaguhagu vehabada.

²⁵ Besinana mata nigele hauga bagibagilina iyapwaoliuyowei Yaubada ainai dova bolimai ehebo ehebo tupwa veꞌahihi moiha holanai taupwaoli mwalaꞌina iluwuluwu na ꞌwahina ainaena ipwaopwaoli, neta ꞌwahinane iya nigele ꞌwahinana.

²⁶ Moiha ebe Besinana yana paihowane dova taupwaoliwone mwalaꞌidi, mata imwalomwalowoiuyo baleꞌu ivetuwuni ta wau, na hesi maiꞌehebo taꞌi, hauga yana abaꞌovi teina ainai, tauna ibom ipwaoliyei, mumuga yababadi adi nuwahamu vehabadi.

²⁷ Tomowa ita ada loina imiyamiya ebeha maiꞌehebo tamwalowoi na mulitai abo Yaubada yana lauvetala talobai.

²⁸ Dova hinage Besinana yana mwalowoiyena iya ipwaoliuyowei maiꞌehebo taꞌi, na bagibagilida mumugada yababadi iboho vehuludine. Na howola abo ilau gwaipilema, nigele ebeha mumuga yababadi iboho vehuluyoidi na hesi habi livahigita ebe mayada nuwalele tahaꞌwahaꞌwa.

10

¹ Howola abo abanamwanamwa moiha imahalava, na hesi Mosese yana loina neta maꞌamaꞌayau aꞌavana, na nigele abanamwanamwa moiha. Mosese yana loinane ebeha bolimai ta bolimai lagulagu hiwunuwunuidi na Yaubada ainai hipwaopwaoliyedi, na paihowanane nigele howahowana yo iꞌabiye dumwaludi.

² Wuwuna ebe paihowanane howahowana na iꞌabiye maseledi, maiꞌehebo taꞌi hipaihowai na adi lautowoi inamwanamwa vateyai, eeta ebe havena bolimai ehebo ehebo hipaipaihowaiyoi, awa?

³ Nigele! Na hesi bolimai ehebo ehebo hipaipaihowai abanuwatuwu avivini yadi mumuga yababadi vehabadi, ainaena adi lautowoine nigele howahowana inamwanamwa.

⁴ Wuwuna bulumakau na gouti ꞌwahinadi nigele howahowana na pwanoliwo hivaivehuludi.

⁵ Na haugana Besinana baleꞌuwai ilaoma, Besinanane Yaubada ainai iwalo:

‘Pwaoli yo velau nigele nuwanuwam, ainaena taugu umohegau yam paihowa vehabana.

⁶ Hinage nigele nuwam lagulagu gabugabudi ebe tomowa hipwaoliyedi yadi mumuga yababadi vehabadi.

⁷ Eeta yawalowalo alimwai, yawalo, Yatalamwegau, owa Yaubada alimwai ta bada yalaomaꞌo, yam nuwatuwu yapaihowai, dova mwalona Buki youyouna ainai vehabagu hilelelelewa.’

⁸ Yana walowa amnuwatuwu avivini, iwalo, ‘Nigele nuwanuwam velau pwaoli, bo nuwana lagulagu higabugabudi, bo nuwana hava hipwaoliyei yadi mumuga yababana vehabadi, mata nigele uyayaliyaya paihowaowa Mosese yana loinaena vehabadi’.

⁹ Na hinage iwalo, ‘Bada yatalamwegauꞌo alimwai na ebe yam nuwatuwu yapaihowai’. Neta ebeha loina mugamugaina ivaivehulu na loina vauvauna imwauwi.

¹⁰ Na Yaubada yana nuwatuwuwena Yeisu Besinana tauna ipwaoliyei ta iꞌabiye maselegita yana mwalowoi maiꞌehebo ainaena.

¹¹ Na taupwaoliwo maudoidi vada tapwalolo ainai hitowotowolo na ahubena ehebo ehebo yadi pwaoliwone himohemohei Yaubada ainai, na hesi pwaoliwone nigele howahowana yo mumuga yababadi hivaivehuludi.

¹² Na Besinana hesi maiꞌehebo aꞌava ipwaoli mumuga yababana vehabana, na yana pwaoline hauga maudoina howahowana mata iveꞌalo ta yana pwaoline tuluhanai Yaubada nimatautuwanai imimiyane.

¹³ Na ihaꞌwahaꞌwa aiteya hauga ana alehao Yaubada imwau aituluwedi aena elauhanai.

¹⁴ Wuwuna yana pwaoli maiꞌehebo taꞌi, ainaena howahowana ta hauga maudoina aidiyai iꞌabiye maselegita yo iꞌabiye namwanamwagita.

¹⁵ Abiye masele teina vehabana Aluꞌaluwa Veꞌahihi hinage Buki Veꞌahihi ainai iveꞌitagita Bada yana walo neta mwalona haugana vehabada iwalo mahalavaei, iwalo:

¹⁶ ‘Howola abo waloyemidi vauvauna yamohedi yo yagu loinao nuwadiyai yamwauwi na atediyai yaleledi’.

¹⁷ Na hinage iwalo,

‘Yadi yababao yo yadi pwanoliwo mata yanuwapwanopwanowedi’.

¹⁸ Teina vehabana havena hinage tapwaopwaoli yada mumuga yababadi vehabadi, wuwuna Yaubada bada inuwahamuigitaꞌo. Ita tavehaguhaguyoigita

¹⁹ Tahiguwao, Yeisu ꞌwahinana vehabada bada isagenaꞌo, ainaena mayada atepatu taluwu Yaubada yana tupwa veꞌahihi aliꞌalilina ainai.

²⁰ Neta amwaha vauvauna yawahida vehabana, mwalona Yaubada yana tupwa veꞌahihi aleꞌo ainaena hibiliutuhine na Yeisu ihohoꞌene ibom tauna yana mwalowoi ainaena ta howahowana na taluwu Yaubada ainai.

²¹ Na hinage yada taupwaoline ihae alili ta Yaubada yana vada vehabana ipaipaihowa.

²² Ainaena Yaubada tatauvahali mayada atetalam yo mayada yemidi moiha na ainaena tauda taꞌabiye maseledi bwahi namwanamwana ainaena, na hinage yada nuwatuwu himasele, wuwuna Yeisu yana lauhiuhiuli ainaena yada nuwatuwu yababadi iꞌabiye maselediꞌo.

²³ Eeta Yeisu taꞌabi avivini, yo tawalo mahalava tomowa aidiyai, ta tatowolo wahiyala yada yemidi ainai, wuwuna iya iwalo yemidiyegita ta mata iyemala moiha.

²⁴ Ilowoinanegita hinage na ita tavelauyoigita yo tavehaguhagu yo paihowa namwanamwadi tapaihowaidi.

²⁵ Tupwadi ada geluwo tapwalolo ana miyaꞌahai hinuwapwanopwanowediꞌo, na havena omiu dova, na hesi hauga maudoina amꞌabiye wahiyalagomiu ta ebe aiteya hauga amhanapui ebeha Yeisu yana laugwaipilema ilalau tebitebini amvehaguhagu mwalaꞌina, yami miyagogoi aidiyai.

²⁶ Na ebe tanuwamasele Yaubada wasana moihana ainai, na mulitai tatalamwegita mumuga yababana ainai, mata nigele teya hinage pwaoli iyamiyamiya ta ebe iꞌabiye maselegita,

²⁷ na hesi mayada meheuhi neta mata lauvetala talobai, neta aiwa alaꞌalahina ainaena igabu veꞌovigita. Teina Yaubada iꞌabi nonovaiyaꞌo ana alehao vehabadi.

²⁸ Mwalona ebe yaiya teya Mosese yana loinao idiꞌwaidi na tauwalo mahalava bwau nuwana tonuga yana mumuga hiwalo mahalavaei, mata nigele hiyaꞌatemuyamuyaei na hesi mata hiꞌoiye mwalowoi.

²⁹ Ainaena ebe yaiya Yaubada Natunane isosomanei, na waloyemidi ꞌwahinanaowa iꞌabiꞌabiye maselewa iꞌawa yababaei, na hinage Aluꞌaluwa Veꞌahihi yana veꞌiꞌila iꞌawa yababaei muya mata mwalaꞌi alilina ilobai Yaubada ainaena.

³⁰ Wuwuna bada tahanapuiyaꞌo ada Tauloina mwalaꞌina iwalo auligitaꞌo, iwalo:

‘Yau yagu loina ainaena tauyababao yayemaihadi muya ainaena’. Na hinage iwalo,

‘Yau yami Bada, na omiu yagu tomowao mata yaloinaegomiu’.

³¹ Ainaena Yaubada Mayawahina tameheuhei mata dova ta iloinaegita.

³² Mwalona masele yana mugaima alimiyai, amnuwatuwu avivini haugana yami miya vitai aidiyena amtowoi wahiyala,

³³ neta tupwadi hauga tomowa hiꞌabiye hinimayagomiu na hitaꞌwataꞌwataegomiu yo tupwadi hauga ami geluwo baidamiyao ammuyamuya toyatoyawa.

³⁴ Na hinage tupwadi vada paipaiyai himwauwidi vehabadi amꞌatemuyamuya, na hinage haugana tomowa yami paulao alimiyena hiꞌaluhewaidi amyaliyaya moiha, wuwuna amhanapuiyaꞌo ebeha galewai yami paulao namwanamwa alilidi na miyamiya vateyaidi himiyamiya.

³⁵ Ainaena yami yemidine amꞌabi avivini na havena amtaꞌwataꞌwata wuwuna howola abo yami yemidine ana maiha namwanamwa alilina amlobai.

³⁶ Eeta amꞌalamaꞌiꞌita na Yaubada yana nuwatuwu ampaihowai, na yana waloyemidi ainona amvai.

³⁷ Wuwuna hauga muhamuhana na taulaomawa imahalavama, nigele mata iyabweda.

³⁸ Ainaena yaiyadiwo hiya taudumwalu yadi yemidiyena yawahidi namwanamwana hilobai na ebe hiꞌatehawawali na hitaugwaipile Yaubada mata nigele iyayaliyaya vehabadi.

³⁹ Na ita nigele tayaꞌitaꞌita gwaipile, wuwuna neta abasilahe. Bada taꞌi mayada yemidi na aluꞌaluwada himiya namwanamwa.

11

¹ Yada yemidi ainaena ta nuwatuwu avivini ebeha yada nuwanuwatuwuhae ginauli nigele tayaꞌitadi mata taꞌitadi.

² Tubudao mwalona tanuwatuwu avivinidi hiya yadi yemidiyena Yaubada iꞌawa namwanamwaedi.

³ Ita hinage yada yemidi ainaena tahanahanapui ebeha Yaubada yana walo ainaena baleꞌu maudoina iꞌaꞌabiye maseledine, neta ginauliwowa nigele tayaꞌitadiwa aidiyena ginauli maudoina taꞌitaꞌitadi iꞌaꞌabiye maseledine.

⁴ Na Abeli hinage mayana yemidi ipwaoli Yaubada ainai, Abeli yana pwaoli Keni yana pwaoli inamwanamwa gabaei, na Yaubada iyaliyaya Abeli yana pwaoli vehabana, ta iꞌawa dumwaluwei. Abeli bada imwalowoiꞌo na hesi yana yemidi ainaena iveꞌiveꞌita alidai.

⁵ Inoke hinage yana yemidiyena nigele iyamwalowoi na hesi mayawahina Yaubada ivai galewai na tomowa nigele hiyalobai, ta Yaubada iwalo mahalava mugai ebeha, Inoke iya vehabana iyaliyaya.

⁶ Moiha, ebe nigele tayayemidi Yaubada ainai, nigele mata vehabada iyayaliyaya. Wuwuna ebe nuwanuwada na Yaubada ainai tahululau, tayemidi mugai ebeha Yaubada imiyamiya ta yada yemidiyena ana taumulitao ita iyemaihagita.

⁷ Nowa hinage Yaubada iveꞌita hava mata imahalava aidiyai, eeta Nowa imeheuhi, na yana yemidiyena waga mwalaꞌina iꞌabi ta ainaena iya mayana huhuwo ihahaloidine. Na yana lauꞌabi ainaena iveꞌitaei neta iya towaho dumwadumwaluna Yaubada mehenai na tomowa maudoidi hiya tauyababao.

⁸ Abelaham hinage yana yemidiyena Yaubada yana yoga imulitae ta yana dalava ilaugabaei na yana dalava vauvauna vali tupwa ibehaei, eeta itowolo ilau na nigele iyahanapui aiteya tupwa ainai ilaulaune.

⁹ Na hinage yana yemidiyena dalava walowalo yemidinawa ainai manatunao Aisake yo Yakobo himimiyane, dova taumana na yadi vada lagulagu ꞌwapina ainaena hiꞌaꞌabidine, dalavane Yaubada iwalowalo yemidiyeiwa ebeha Abelaham ainai ivedalava, na mulitai tubunao hinage yadi dalava.

¹⁰ Na Abelaham inuwatuwuiyaꞌo ebeha dalava mata yaiyaina ainai iluwu, neta Yaubada yana nuwatuwuwena iyemasele na dalavane mata nigele iyasawali.

¹¹ Abelaham mwanena yehana Sela hinage ivemala aiꞌaihaleꞌo na yana yemidiyena tauna iwahiyala ta ihihiumane, wuwuna Yaubada yana waloyemidiwa iyemidiyei moiha.

¹² Moiha, Abelaham bada ivetautaubadaꞌo ta muhamuhana imwalowoi, na hesi boda mwalaꞌina iyadayada ainaena adi bagibagili dova utuiwone galewai, na hinage dova namonamo leꞌawai adi bagibagili.

¹³ Teina tauyemidiwone mayadi yemidi na hesi himwalowoiꞌo ainaena waloyemidiwone ainodi nigele hiyalobaidi na hesi amwaha daodaowena hiꞌitayamaꞌo na hiꞌawa yauwedo vehabana, na hinage hibom hiꞌawa taumanaedi dova taumanao tupwa teina baleꞌu ainai.

¹⁴ Moiha, ebe taꞌawa taumanaegita, neta bada tawalo mahalavaꞌo ebeha yada dalava moiha tabehabeha.

¹⁵ Na babada mugamugaidi yadi dalavao hilaugabaidi, na ebe nuwanuwadi na hilau gwaipile, mata amwaꞌamwaha hibeha na hilau gwaipile,

¹⁶ na hesi nigele hiyalau gwaipile, wuwuna nuwanuwadi dalavane namwanamwa gaugauna neta galewai. Ainaena Yaubada nigele iyahinimaya na hesi iya yadi Yaubada moiha, ta yadi dalava bada iꞌatububuniyaꞌo.

¹⁷ Abelaham hinage mayana yemidi hauganane abatowoi ilobai Yaubada ainaena ebeha natu mohimohilina Aisake ipwaoliyei Yaubada ainai. Mwalona Yaubada yana waloyemidiwo imohei Abelaham ainai,

¹⁸ ta iwalo, ‘Howola Aisake ainaena yam boda imahalava’. Na Abelaham natunane italamwei ta ebeha iꞌoiye mwalowoi,

¹⁹ wuwuna Abelaham ihanapuiyaꞌo Yaubada howahowana taumwalowoiwo iꞌabiye towolodi, ainaena abaꞌita bada ta natunane mwalowoiyena iyemaiha.

²⁰ Aisake hinage yana yemidiyena natunaone Yakobo yo Iso iwalo yemidiyedi yadi abanamwanamwa hauga ilalaoma vehabana.

²¹ Yakobo hinage haugana habi mwalowoi yana digona ihagui ta itowolo ta Yaubada ainai ipwagogo, na yana yemidiyena Yosepa natunao bwau yadi abanamwanamwa mulitai vehabana iwalo mahalavaeine.

²² Yosepa hinage ana bolimai yana abaꞌovi ainai yana yemidiyena iwalo mahalava Isileliwo yadi mahalava Itipita ainaena na iwalo aulimugaiyedi ana mwau magaiyai vehabana.

²³ Mosese haugana hilabahi, tamana yo hinana yadi yemidiyena himwaudawani waiꞌena tonuga holanai, wuwuna gamane ana ita namwanamwa gaugauna, na hinage tauwasawasa Pelo yana loina yaiyaina nigele hiyameheuhei.

²⁴ Mosese hinage haugana ivetowaho, yana yemidiyena nigele nuwanuwana na tomowa hiwalo, “Mosese iya Pelo tubuna”, wuwuna Pelo natuna waihiuna Mosese ivai iꞌita avivini ta iꞌawa natunaei.

²⁵ Eena Mosese nigele nuwanuwana, ta hauga ahuꞌahubalina ainai iyaliyaliyaya mumuga yababana vehabana, na hesi nuwanuwana ebeha Yaubada yana tomowao baidanao himiyavitai.

²⁶ Na nigele nuwana wasawasa baleꞌu Itipita holanai na hesi muya Besinana vehabana ivesinuwaenaꞌo, wuwuna ihanapuiyaꞌo howola abo maiha namwanamwana ilobai.

²⁷ Ainaena yana yemidiyena Itipita itauvehulu na nigele tauwasawasa Pelo yana modiꞌini iyameheuhei na hesi iꞌatepatu wuwuna iꞌitayaꞌo Yaubada mehenai imiyamiya, ta iꞌalamaꞌiꞌita ta Yaubada nigele mehenaena iyaꞌita na hesi yana yemidiyena iꞌiꞌitane.

²⁸ Na hinage yana yemidiyena Buidiꞌwa guyauna hipapaihowaine na ꞌwahina ainaena yadi vadao hiꞌoihiulidine, ebeha havena tautuwao adi tauꞌoiye mwalowoi aidiyai iluwuluwu na iꞌoiꞌoiye mwalowoidi.

²⁹ Bodadine yadi yemidiyena niꞌu hawahawawalina higeyoꞌawai dova toputopu leleyaina ainaena hilalaune, na Itipitaone himulitaedi ebeha hinage higeyo awa ta nigele howahowadi, na maudoidi hihahanenene.

³⁰ Na hinage haugana Isileliwo dalava Yeliko hitaꞌiꞌiliyei mabodadi ahubena 7 aidiyai, yadi yemidi ainaena dalavanane ana abwalu mwalaꞌina iguli ta hiluluwune.

³¹ Eeta dalava taniwagadiyaowa hiwunui veꞌovidi yadi awasewa vehabana. Na hesi waihiu yehana Lehabi iya mehemeheꞌayona nigele hiyaꞌoiye mwalowoi, wuwuna waihiunane mayana yemidi, hauganane mwalona Yosuwa yana tauꞌalehao bwau ivetamaledi dalavanane ainai hiluwu na Lehabinane ihahaguidine.

³² Na hava mata yawalo auligomiune tauyemidi bagibagilidi vehabadi? Neta Gidiyoni, Belaki, Samisoni, Yepita, Deivida, Samwela na hinage tauwalo mahalavao, nigele howahowada yehadi tavahiliveꞌovidi.

³³ Hiya yadi yemidiyena hiwahiyala adi alehao aidiyena, na hinage yadi tomowao hiloina dumwadumwaluwedi na hinage Yaubada yana waloyemidi ainona hilobaidi, na hinage laiyoni manimaninidi awadi hiꞌabiye taludi, yo hinage

³⁴ aiwa alahawahawawalidi mwalaꞌidi hibohoidi yo aleha elepadi mehedi hidena gabaedi ta yadi hauga tapiya ainai hiwahiyala, yo aleha ainai hiwahiyala alili, ta adi alehao hibagibagili alili hiheuheusili budeyanaedi.

³⁵ Na tomowa tupwadi waiwaihiu hinage yadi mwadimwadiwo mwalowoiyena hitowolouyo. Tupwadi hinage tauyemidiwone adi alehaone aidiyena muya hilobaidi, ainaena hitowoidi ebeha hiꞌabiye gwaipiledima na yadi yemidi hilaumwau, ta hitowoi ahayaidi, wuwuna hiyemidi wahiyala ebeha howola abo mwalowoiyena hitowolouyo na yawahi namwanamwana hivai.

³⁶ Tupwadi hinage adi alehao hiꞌabiꞌabitalawahiyedi na balavaiyena hitalatalaidi na hinage vada paipaiyai himwauluwuwedi na hipaipaidi.

³⁷ Tupwadi hinage gaima mwalaꞌidi aidiyena hiveꞌalagaimaidi, na tupwadi hitomtom bwauwedi, na tupwadi elepa aleꞌaleha aidiyena hiꞌoiꞌoiye mwalowoidi, na tupwadi sipi yo gouti ꞌwapidi hilaulauliꞌwa ta mayadi wewelohe himiyamiya lalaꞌauhi.

³⁸ Na hesi tauyemidiwone taumiya baleꞌu hinamwanamwa gabaedi ainaena nuꞌula awawai yo oya aidiyai hilowolowouhi, na hinage toputopu gudadi yo gaima gudadi aidiyai hiꞌenoꞌeno lalaꞌauhi.

³⁹ Ta tauyemidiwowa auꞌaubabadadi namwanamwadi bada tabenalediꞌo na hesi Yaubada yana waloyemidi ainona moiha nigele hiyalobai, hiya yadi hauga ainai,

⁴⁰ na hesi abanamwanamwa ita vehabada Yaubada iꞌaubabadaenaꞌo, ebeha hiya howola abo baidadao tamiya namwanamwa.

12

¹ Tauyemidiwo bagibagilidi himiya taꞌiꞌileyegita na hivinuvinunuigita na howahowada ginauli vitavitaidi alidaena taꞌabi vehuludi na ainaena tasagena wahiyala abasagenane ana amwaha ainai, na mumuga yababadi hiꞌabiꞌabi avivinigita taꞌabi gabaedi.

² Na Yeisu ainai tavinuvinunu mehedai. Wuwuna Yeisunane yada yemidi yana abavetuwuni na yana abaꞌovi. Haugana Yeisu baleꞌuwai imiyamiya ihanapuiyaꞌo howola mata abayaliyaya mwalaꞌina ilobai, eeta aiwa lagalagana ana muya iꞌalamaꞌiꞌitanei, ta hinimaya nigele iyadena gabaei ana higa ihahaene galewai ta Yaubada nimatautuwanai imimiyane.

³ Yeisu amnuwatuwui ebeha iꞌalamaꞌiꞌita mwalaꞌina tauyababao yadi aleha ainaena, eeta omiu hinage dova ebeha havena amhabuhabulolo nuwana amtapitapiya.

⁴ Na haugana mumuga yababana amꞌalehaei yami miya vitai habuluna taꞌi na tomowa nigele hiyaꞌoiyemwalowoigomiu dova Yeisu.

⁵ Nuwana guguyane amnuwapwanopwanowenaꞌo, guguyanane ainai iꞌawa natunaegomiu, iwalo,

‘Natugu, ebe haugana yada Bada mehem isabui neta habi abiyedumwalugo teina vehabana unuwatuwu na havena utapitapiya

⁶ Wuwuna ebe yaiya Yaubada iꞌawa natunaei na ivelauwei ilowoinanei na sapi ilobai yana pwanoli vehabadi na ainaena inamwanamwauyo.’

⁷ Ta ebe sapi amlobai Yaubada ainaena besiwa amꞌalamaꞌiꞌita ta dova tama maudoidi natudiyao hisapidi habi abiyedumwaludi.

⁸ Ainaena Yaubada hinage maudoida isapisapigita, na ebe yaiya owa Yaubada nigele iyasapigo neta owa nigele natuna moiha, na hesi owa teya tamabudabuda.

⁹ Amnuwatuwui hinage ebe tamadao baleꞌuwai hisapigita taveꞌahihiyedi, ainaena ilowoinanegita mwalaꞌina na aluꞌaluwada Tamadi galewai taveꞌahihiyei yo ebe yawahida namwanamwana imohegita.

¹⁰ Wuwuna tamadao baleꞌuwai hiya yadi nuwatuwu aidiyena hisapisapigita na hiꞌabiye dumwalugita hauga ahuꞌahubalina taꞌi vehabana, na Yaubada hesi isapisapigita ada hagu vehabana ta ebe iꞌabiye maselegita na tamumuga namwanamwa iya yana mumuga dova.

¹¹ Haugana ada mehesabu ta veꞌalo mata nigele ta yayaliyaya wuwuna muya taveveꞌalone, na hesi hauga ilalaoma ainai mata aino namwanamwana talobai, neta mumuga dumwaluna yo nuwadaumwali.

¹² Ainaena yami tapiya amtauvehulu na amwahiyala.

¹³ Na yami amwaha amꞌabiye dumwaludi, ta ebe peupeudi hilalau havena ainai hibeꞌubeꞌu na hesi aedi hinamwanamwa na hiya hinage hiwahiyala.

¹⁴ Amtowoi wahiyala na ammiya daumwali tomowa maudoidi baidamiyao, na hinage amtowoi na yami mumuga himasele maudoina, wuwuna ebe yaiya yana mumuga nigele iyamasele mata nigele Yaubada iyaꞌita.

¹⁵ Amꞌita avivinigomiu ta havena teya yaiya alimiyena Yaubada yana veꞌiꞌila ivehuvehulu awawai. Ainaena amꞌita aviviniuyoigomiu mata dova ta gamwagamwanimiyai tomowa tupwadi dova aino abeꞌabelena, wuwuna tomowa bagibagilidi iꞌabiꞌabiye beꞌudi.

¹⁶ Havena ampwanopwanoli yo hinage havena Yaubada yana atemuyamuya amtaꞌwataꞌwataei, dova Iso mwalona Yaubada yana waloyemidi iya vehabana na iꞌuneyei tahinane ainai, ana maiha aiꞌai ehebo mohimohili vehabana.

¹⁷ Tanuwatuwu avivini ebeha mulitai Iso waloyemidiwa inuwatuwui, ta vehabana idodoune, na nigele howahowana na ivaiyoi wuwuna bada tahina ivaiyaꞌo.

¹⁸ Teina taꞌi talaomaꞌo Yaubada ainai nigele dova mwalona Mosese yo Isileliwone baidanao hilau na lautowoi oya Sainai ainai hivaivai. Wuwuna aiwa alaꞌalaha wawalina yo guguyou badobadona yo hogahoga yo wowoli mwalaꞌina

¹⁹ yo yoguli alinana, na hinage tomowa alinana oyanane ainai, eeta Isileliwone himeheuhi mwalaꞌina, na hiꞌawaꞌawanoi ta ebeha havena alinane hibenabenaleuyoi.

²⁰ Wuwuna loina hibebenaleine iꞌabiye meheuhidi ebeha, ‘Havena teya, hava oya teina ainai hiꞌabiꞌabitowoi, na ebe ehebo lagulagu ilaoma oyanane ainai, gaimaena hiꞌoiye mwalowoi taꞌi’.

²¹ Moiha, oyanane abameheuhi mwalaꞌina, ainaena Mosese iya hinage imeheuhi ta iꞌaubabada iwalo, ‘Yagu meheuhi ainaena yabatutuli’.

²² Na ita hesi bada talaomaꞌo Saiyoni oyana ainai, neta Yaubada iya mayawahina yana dalava, Yelusalem galewai, tausagenawasao bagibagili alilidi ainai himiyamiya na hiyaliyayaliyaya dova guyau ainai.

²³ Eeta bada ta luwuꞌo Yaubada Natuna tautuwana yana boda alonai ta yehada galewai ilelediꞌo. Ainaena bada talaomaꞌo Yaubada taulauvetalaegita ainai, yo hinage ginauli maudoidi taulauvetalaedi. Na hiya aluꞌaluwadi Yaubada iꞌabiꞌabiye dumwaludi himiyamiya,

²⁴ na hinage ta laomaꞌo Yeisu ainai, iya waloyemidi vauvauna ana taumohe na ꞌwahinana ana lauhiuhiuli ainaena ilivahigitaꞌo, ta nigele dova Abeli ꞌwahinana wuwuna neta abasilahe.

²⁵ Eeta amꞌita avivinigomiu ta iya galewaena iwalowalone alidai havena alinana amtaꞌwataꞌwataei. Wuwuna mwalona tupwadi tomowa baleꞌuwai Mosese yana guguya hitaꞌwataꞌwataei, ta vitai hilolobaine. Na teina taꞌi Yaubada galewaena iguguguguya alidai, ainaena ebe alinana taꞌwataꞌwataei vitai mwalaꞌi alilina talobai.

²⁶ Wuwuna alinana mwalona baleꞌu inuꞌuvi na teina bada iwalo yemidiꞌo ebeha, ‘Howola abo galewa yo baleꞌu hinage yanuꞌuvidi maiꞌehebo taꞌi’.

²⁷ Teina dova iwawalone wuwuna ginauli iyeyemaselediwa ebeha inuꞌuvitowoidi ta ebe ginauli nigele hiyayaiyaine hibeꞌu na ginauli yaiyai aꞌavadi hitowolo vateyai.

²⁸ Teina ada loina vauvauna ainai taluwuluwune, wahiwahiyalana na miyamiya vateyaina, ainaena ilowoinanegita na Yaubada ainai taꞌawa yauwedo na tatapwalolo hava dova yana nuwatuwu ana lowoinana, yo hinage taveꞌahihiyei mayada meheuhi,

²⁹ wuwuna yada Yaubadane dova aiwa alaꞌalahina.

13

¹ Hauga bagibagilina amvelavelauyoigomiu ta dova tahimiyao amvelavelauwedine.

² Na hinage taumanao amyogaedi alimiyai, dova mwalona tupwana tomowa taumanao hiꞌita avivinidi na hesi taumanaone hiya tausagenawasao, na dalava taniwagadi nigele hiyahanapuidi.

³ Na hinage ami geluwo amnuwatuwu avivinidi hiya vada paipaiyai himiyamiya, na amhaguidi dova omiu vada paipaiyai baidamiyao ammiyamiyane. Dova hinage ami geluwo hiya taumiyavitai amnuwatuwu avivinidi yo amhaguidi, wuwuna omiu tomowa taꞌi dova hiya!

⁴ Maudoimiu tawahola amveꞌahihiyei na tautawahola maudoimiu havena ampwanopwanoli wuwuna taupwanoliwo yo tauꞌaihiganiwo howola abo Yaubada ilauvetalaedi.

⁵ Havena tobwatobwa baleꞌuwai nuwamiu ivaivaidi na hesi amyaliyaya hava bada amlobalobai vehabana, na havena vali ginauli yo vali ginauli vehabadi amꞌaiꞌaipate, wuwuna Yaubada iwalo:

‘Mata nigele yayanuwanuwapwanopwanowego nuwana yalaulaugabaigo.’

⁶ Ainaena mayada atepatu moiha tawalo,

‘Bada iya agu tauhagu eeta havena hava yamehemeheuhei, nuwana ebe tomowa hipaipaihowa yababana aliguwai’.

⁷ Ami taumugaiwo amnuwatuwu avivinidi wuwuna mugai Yaubada wasana himohegomiuꞌo na hinage amnuwatuwui ebeha yadi yemidi ainona namwanamwana bada hilobaiyaꞌo, ainaena yadi yemidi amveꞌaoꞌaonaedi.

⁸ Yeisu Besinana mumugana mwalona ta wau ta hauga hilalaoma aidiyai mata nigele iyaꞌabibuibui.

⁹ Ainaena havena veꞌita vagadi yo vagadi ambenabenaledi, wuwuna ateda bada hiwahiyalaꞌo Yaubada yana veꞌiꞌila ainaena na nigele hudi aidiyena. Hudi aiꞌai vehabana tomowa himulimulitaedi nigele howahowana hiꞌabi haguigita.

¹⁰ Na ita mayada abapwaoli, eeta vada veꞌahihi baleꞌuwai ana taupwaoliwo nigele howahowana yo hiꞌai abapwaoli ainai.

¹¹ Moiha, yadi taupwaoliwo mwalaꞌidi lagulagu ꞌwahinadi hivaivaidima tupwa veꞌaveꞌahihi moiha holanai, na mumuga yababadi vehabadi hipwaopwaoli Yaubada ainai, na mulitai lagulaguwowa taudi higabu vehuludi dalava tuluhanai.

¹² Ainaena Yeisu hinage dalava tuluhanai muya ilobai ta ebe ꞌwahinanaena iꞌabiye maselegita.

¹³ Ita hinage howahowana talau dalava tuluhanai neta Yeisu ainai, na abahinimaya talobai dova iya.

¹⁴ Wuwuna teina baleꞌuwai nigele teya yada dalava miyamiya vateyaina, ainaena ilowoinanegita na dalava miyamiyavateyaina tabehaei hauga ilalaoma vehabana.

¹⁵ Eeta Yeisu yana hagu ainaena hauga maudoina aidiyai Yaubada tawalowalo vetuvehaeyei. Teina yada pwaoli nonovana, ebe iya yehana taꞌawa mwalaꞌiyei.

¹⁶ Ehebo pwaoli hinage Yaubada nuwanuwana mwalaꞌina, neta tavelau tomowa aidiyai yo yada tobwatobwaena tahaguidi.

¹⁷ Yami taumugaiwo aidiyai amꞌawa abi na amtalamwegomiu yadi loinao aidiyai, wuwuna aluꞌaluwamiune hiꞌitaꞌita avivinidi, eeta ebe hauga ilalaoma yami mumuga vehabana hiwalo mahalava Yaubada ainai. Ilowoinanegomiu na amꞌaipate iliꞌilimani ta yami paihowa vehabadi hiyaliyayaigomiu na nigele ebeha hiꞌabiye hinimayagomiu, eeta mata hagu amlobai.

¹⁸ Nuwanuwamai hinage ai vehabamai amꞌawaꞌawanoi Yaubada ainai. Teina taꞌi anuwatuwuiyaꞌo ebeha yama mumuga ausaladi, ta nuwanuwamai mumuga namwanamwanane ainai atowolo vateyai.

¹⁹ Ainaena ateguwena yaꞌawaꞌawanoi alimiyai ta ebe yami awanoiyena yagu amwaha idumwalu na yalau gwaipile mwayamwayauwa alimiyai. Awayauwedo

²⁰ Yaubada miyadaumwali ana taumohe, na iya hinage yada Bada Yeisu mwalowoiyena iꞌabiye towolouyoine, na Yeisu yana tauyemidiwo ita ada tauꞌita avivini moiha, na iya ꞌwahinana ainaena ada waloyemidi namwanamwana na miyamiya vateyaina imohegita.

²¹ Yaubada howahowana ginauli maudoina namwanamwadi imohegomiu na aidiyena yana nuwatuwu maudoina ammulita iliꞌilimanidi ta Yeisu Besinana yana paihowaena Yaubada iꞌabiye namwanamwagomiu hava dova yana nuwatuwu na vehabamiu iyaliyaya. Ainaena Yeisu Besinana tawalo vetuvehaeyei, nigele yana abaꞌovi. Moiha.

²² Tahiguwao, yami leta teina bada ahuꞌahubalina na yaꞌawanoi alimiyai mayami alamaꞌiꞌita yagu guguya teina ambenalei.

²³ Nuwanuwagu hinage ada gelu Timoti wasana ambenalei, wuwuna bada vada paipaiyene hilivahiyaꞌo, ainaena ebe imwayamwayau aliguwai, mata baidagu alaowa alimiyai.

²⁴ Yama awayauwedo yavetamalenawa ami taumugaiwo yo tauyemidiwo maudoimiu alimiyai. Na Italiwone hinage yadi awayauwedo hivetamalenawa maudoimiu alimiyai.

²⁵ Yaubada yana veꞌiꞌila maudoimiu imiya vahaligomiu. Moiha.