1

¹ Yau Paulo, Yaubada yana taupaihowa na Yeisu Besinana ana tauyewasa, yagu paihowa teina imohegau ebeha Yaubada ivesinuwaidiꞌo yaꞌabiye wahiyaladi, na hiyemidi moiha, na walomoihana yaveꞌitaei na ainaena yalauvaidima ta hihanapu.

² Hanapu na yemidi ainodi neta ebeha yawahi vateyai Yaubada imohedi, dova hauga mugai ainai iwawalo yemidiyeiwa ta nigele iyaꞌoyama.

³ Ainaena Yaubada ibom yana walowena hauga vesivesinuwana ainai Yeisu ilaoma na yawahida vateyai iꞌabiye mahalava, na Yaubada, iya ada Taulivahi iloinaegau na yaguguyaei.

⁴ Taito owa yaꞌawa natuna moiha alimwai yada yemidi ehebo ainaena, tamada Yaubada yo ada Taulivahi Yeisu Besinana yadi veꞌiꞌila na yadi nuwadaumwali himiya vahaligo. Taito yana paihowa Kiliti ainai

⁵ Yalaugabaigo Kiliti ainai eeta ebe hava tapwalolo holadiyai nigele namwanamwana uꞌabiye dumwalu, yo taumugaiwo uvesinuwaidi dalava ehebo ehebo aidiyai dova yawawalo auligowa.

⁶ Na yagu loina taumugai aidiyai vesinuwa vehabana, ebe towaho mumugana namwanamwana, na mwanena ehebo, ta natudiyao Yaubada ainai hiyemidi eeta ainaena hiya nigele tauꞌalomagigili, yo nigele tauyababa, yo nigele tauꞌabitauꞌwata.

⁷ Wuwuna taumugaiwo Yaubada vehabana hipaipaihowa, ainaena ilowoinanedi na mumugadi namwanamwana, na havena veꞌewa aidiyai yo havena hiꞌawa paꞌipaꞌiꞌi yo himodimodiꞌini, yo havena weꞌaha wahiwahiyalana ainaena hinumanuma yauyaule, bo tomowa hitalatalaidi, yo tobwatobwa hinuwanuwaleleyedi.

⁸ Na hesi ilowoinanedi na taumanao hiꞌita avivinidi, ta mumugadi dova taumumuga namwanamwana, yadi nuwatuwuwo hunadi. Hinage mumugadi dumwaluna yo masemaseledi na alamaꞌiꞌita wuwudi.

⁹ Na hinage veꞌita moiha bada hibenalenaꞌo ta hiyemidiꞌo, eeta hiꞌabi avivinidi, ta ebe vali tomowa aidiyai hiveꞌita, na yaiyadiwo tauꞌawa oyaꞌoyama hiꞌabiye dumwaludi.

¹⁰ Wuwuna tauꞌabitauꞌwata bagibagilidi himiyamiya, na Yudeya yadi loina ana taumulitao hibagibagili alili hiwalowalo awawa yo tomowa hiꞌoyaꞌoyamaedi.

¹¹ Ainaena yadi aubabada oyaꞌoyama vehabana taꞌauhidi, wuwuna tomowa natudiyao baidadiyao hibenabenaledi na hilaulau yabayababa, na yadi veꞌita oyaꞌoyama ainaena nuwanuwadi mane hilobai.

¹² Teina ainaena tauwalo mahalava ehebo iya Kilitiyena iwalo, “Kiliti hiya tauꞌoyamao yo tauꞌabitauꞌwatao, na mumugadi dova lagulagu, neta ai iꞌiwahi vehabana hinuwanuwatuwu mwalaꞌina”.

¹³ Na yana walone teina walo moiha. Eeta uhinahinabodaidi ta hinuwabui yo hiyemidi moiha.

¹⁴ Hinage uꞌauhidi havena Yudeya yadi vedevedede hibenabenaledi, yo hinage tauꞌabitauꞌwatao havena himulimulitaedi.

¹⁵ Tomowa masemaseledi aidiyai ginauli maudoidi masemaseledi, na hiya wasa namwanamwana ana tauꞌabitauꞌwata, yadi mumuga yababana, hiya aidiyai nigele teya ginauli masemaselena, wuwuna yadi nuwatuwu maudoina yababana.

¹⁶ Na hiya hiwalo ebeha Yaubada hihanapiyaꞌo, na yadi paihowa aidiyena Yaubada hiuvalaei, wuwuna hiya tauyababa na loina ana tauhinali, na paihowa namwanamwadi nigele iyalowoinanedi.

2

¹ Na owa veꞌita dumwadumwaluna uveꞌitaei.

² Ta babadao uwalo aidiyai havena hinumanuma yauyaule bwahi wahiwahiyalana ainaena na hiyaliyaliyaya awawauhi, na hesi Yaubada hiyemidiyei moiha, na velau yo alamaꞌiꞌita iꞌoiye mwaudi.

³ Aiꞌaihale hinage uwalo aidiyai ta hiveꞌahihi na havena tomowa hiꞌawaꞌawa yababaedi, yo havena waini hinumanuma alili, na hesi mumuga namwanamwana hiveꞌita.

⁴ Eeta waiwaihiu vauvaudi hiꞌita lobai ta mwanediyao yo natudiyao hivelauwedi.

⁵ Na mayadi veꞌahihi yo mumuga maselena aidiyena yadi vada hiꞌita avivinidi. Na hinage mwanediyao hivelauwedi na alinadi himulitaedi, yo ebe ainaena Yaubada yana walo tomowa hiveꞌahihiyei, na havena hiꞌawaꞌawa yababaei.

⁶ Yam hevahevaliwo uguguyeidi ta mumugadi hiꞌita avivinidi.

⁷ Na owa mumugam namwanamwana maudoina ainaena tomowa uveꞌitadi ta hinage hibom himumuga namwanamwa. Na mumuga dumwaluna ainaena uveꞌita, ta yam mumuga yo yam veꞌita adi ita ehebo.

⁸ Eeta yam veꞌitao havena tomowa hiꞌawaꞌawa oyaꞌoyamaei, na hesi yam walo namwanamwadi aidiyena amꞌalehao uvehinimayadi yadi alomagigili awawa vehabana.

⁹ Taupaihowa awawao hinage uwalo aidiyai na yadi tautaubadao yadi loina hiveꞌahihiyedi ta havena hiꞌabiꞌabitauꞌwata.

¹⁰ Havena aivavali na hesi mayadi veꞌahihi moiha Yaubada Taulivahigita wasana hiꞌabiye mahalava, yadi paihowa namwanamwana ainaena.

¹¹ Yaubada yana veꞌiꞌila bada imahalavamaꞌo tomowa adi livahi vehabana,

¹² Na iveꞌitagita ebeha mumuga awaꞌawawa na nuwatuwu yababadi tataꞌwataꞌwatadaedi, na hesi tamiya mumuga namwanamwadi yo dumwaludi aidiyena.

¹³ Teina hauga mayada yaliyaya ada Taulivahi Yeisu Besinana tayemidiyei, ibom yada Yaubada wahiwahiyalana na mayana wasawasa, yo yana mahalava vehabana tahaꞌwahaꞌwa.

¹⁴ Ibom italamwei vehabada na imwalowoi habi yemaihagita yada yababa maudoidi aidiyena, yo iꞌabiye maselegita na ana boda ainai imwauwigita yo yana paihowa namwanamwadi aidiyena tamulitaedi.

¹⁵ Veꞌita teina uveꞌitaei tomowa aidiyai, ta loina dumwadumwaluna aidiyena uguguyeidi na ebe himumuga namwanamwa. Nigele mata yaiya teya iyawalo hinaligo.

3

¹ Nuwadiyai hinage umwauwi neta dalava adi tauloinao yadi loina aidiyai hitalam, yo hiꞌawa abi, yadi paihowa namwanamwa ainaena.

² Na havena hiwalo yabayababa yo himanimanini tomowa aidiyai na hesi himumuga hegoya mayadi veꞌahihi.

³ Moiha taꞌi, ita mwalona yauyauleda yo abitauꞌwata wuwuna, yo nuwadawani yo yaliyaya awaꞌawawa adi nuwatuwu aidiyena amwaha namwanamwana talaugabaenaꞌo. Na hinage ita mwalona veꞌaleha yo alomagigili wuwuna, na vali tomowa aidiyai tamumuga yababa, na alidai hinuwayababa na hinage ita aidiyai tanuwayababa.

⁴ Na mulitai Yaubada iya ada Taulivahi yana velau yo yana atemuyamuya iꞌabiye mahalavaei alidai,

⁵ na ilivahigita, nigele ebeha taudumwalu vehabadi, na hesi ibom yana atemuyamuyaena yana Aluꞌaluwa Veꞌahihi ainaena yada yababao inuwahamuidi, na iꞌabiye maselegita, ta yawahida vauvauna imomohegitane.

⁶ Na ada Taulivahi Yeisu Besinana ainaena Yaubada Aluꞌaluwa Veꞌahihi ihiwai atedai.

⁷ Ibom yana veꞌiꞌilaena iꞌawa namwanamwaegita na yawahi vateyai ana nuwatuwu avivini imomohegitane.

⁸ Walo moiha maudoina ainaena uvaivai adi guguya vehabana, yo ainaena hiya Yaubada ana tauyemidiwo walowone himulitaedi na paihowa namwanamwadi hipaihowaidi. Teina ginauli namwanamwana tomowa adi abahagu.

⁹ Taꞌaiꞌaipate awawa loina aidiyai, yo hinage yaso mugamugaidi yehadi vehabadi, teina nigele hihaguhaguigita, ainaena ulaugabaidi.

¹⁰ Eeta ebe yaiya manini nuwanuwana mai ehebo nuwana mai bwau na ilaumwauwi, na ebe nigele iyalaumwau, ulaugabaei,

¹¹ wuwuna yana nuwatuwu nigele dumwaludi, neta ibom ihanapuiyaꞌo ta ginaulidine ipaipaihowaidine yababadi. Walo yana abaꞌovi

¹² Howola abo Atemasi na Tikiko yavetamalediwa alimwai, na ebe hilaowa, ulau mwayamwayauma wuwuna gwaugwau ana hauga ta nuwanuwagu dalava Nikopolisi ainai yamiyamiya.

¹³ Loina ana tauhanapu hiya Senasi yo hinage Apolosa uhaguidi, ta manimaꞌabidi uvetamaledi yadi adau ainai eeta mayadi yaliyaya.

¹⁴ Ainaena yadi bodao maudoidi uveꞌitadi na hiꞌawa abi, ta howahowana taumiya vitai hihaguidi, na havena himiyamiya awawauhi.

¹⁵ Teinai mayagu bodao yama awayauwedo alimiyai, na ada geluwo, yada Bada ana taumulitao baidamwao ammiyamiya, hiya hinage yama awayauwedo aidiyai. Yaubada yana veꞌiꞌila maudoimiu alimiyai.