1

¹ Yau Paulo, Yaubada yana nuwatuwuwena yavetauyewasa Yeisu Besinana vehabana. Neta iya yawahida wuwuna dova Yaubada yana waloyemidi tubudao aidiyai.

² Timoti owa yavelauwego eeta yaꞌawa natunaego ta yama leta teina yavetamalenawane. Tamada Yaubada na Yeisu Besinana yada Bada yadi veꞌiꞌila na yadi atemuyamuya na yadi nuwadaumwali ainaena umiya yaliyaya. Timoti yana yemidi Yaubada ainai

³ Yaubada ainai yaꞌawa yauwedo, wuwuna iya tubuguwao yadi Yaubada na ainai yavetaupaihowa yagu nuwanuwatuwu maseledi aidiyena, na hinage ainai vehabam yaꞌawaꞌawanoi boniyai yo ahubena aidiyai.

⁴ Mwalona yalaugabaigo ainai yam dou yanuwatuwu avivini ainaena nuwanuwagu mwalaꞌina na aiteya hauga ainai yaꞌitauyoigo ta yayaliyaya.

⁵ Na hinage yam yemidi moiha Yaubada ainai yanuwatuwu avivini, dova hinage tubum Loise yo hinam Yunisi Yaubada hiyemidiyei moiha ainaena owa hinage teina hauga Yaubada uyemidiyei moiha.

⁶ Hinage hauganane yaꞌabidebaigo na Yaubada wahiyala imohego na wahiyalane uꞌita avivini ta havena alimwena iꞌoviꞌovi.

⁷ Wuwuna Yaubada nigele meheuhi iyamohegita, na hesi wahiyala yo velau yo nuwatuwu moiha imomohegitane.

⁸ Ainaena havena yada Bada wasana ana walomahalava vehabana uhinihinimaya. Yau hinage yagu luwu vada abapai ainai vehabana havena uhinihinimaya. Na owa hinage howola abo Yeisu wasana vehabana tupwana vitai mata ulobaidi aidiyai, ainaena ilowoinanego na Yaubada yana wahiyalaena utowolo wahiyala.

⁹ Yaubada ihaguigita na iyogaegita ebeha miya namwanamwana tamulitaei. Ita nigele yada namwanamwana vehabana iyayogaegita na baleꞌu ana yemasele mugamugaina ainai mwalona yana nuwatuwuwena iveꞌiꞌila alidai Yeisu Besinana ainaena.

¹⁰ Ta teina hauga yana veꞌiꞌila alidai iꞌabiye mahalavayaꞌo ada Taulivahi Yeisu Besinana ainaena. Na Besinana mwalowoi iꞌoiye sawali, ta wasana namwanamwana ainaena yawahi vateyai ilalaomane alidai.

¹¹ Yaubada yagu paihowa imohegau ebeha wasa namwanamwana yawalo mahalavei. Ainaena yau tauyewasa yo tauveꞌita teya.

¹² Teina vehabana yagu miya vitai yalobai, ta nigele vehabana yayahinimaya, na hesi yada Bada yayemidiyei iya yahanahanapui, na hinage yahanapui ebeha yagu paihowa imohegau yaꞌita avivini ana higa ahubena mwalaꞌina yana laugwaipilema ainai.

¹³ Mwalona guguya namwanamwana yamohegoꞌo Yeisu Besinana ana yemidi yo ana velauna vehabana, neta umulita moiha.

¹⁴ Na Aluꞌaluwa Veꞌahihi iya holadai imiyamiya, na hanapu moiha bada imohegitaꞌo, ta hanapunane unuwatuwu avivini.

¹⁵ Bada uhanapuiyaꞌo neta hiya Esiya yo Paigelo yo Hemogenisi bodaone hitaꞌwataꞌwataegau na hilaugabaigauꞌo.

¹⁶ Na hesi Onesipolo vehabagu nigele iyahinimaya ebeha vada abapaiyai yamiyamiya, na yana hagu hauga maudoina ainaena agu lautowoi iꞌabiye namwanamwa, ainaena Yaubada ainai yaꞌawaꞌawanoi ta Onesipolo maꞌana bodao iꞌatemuyamuyaedi.

¹⁷ Walo moiha, mwalona Onesipolo imahalavama teinai Loma ainai, na vehabagu ibeha wahiyala ana higa ilobaigau.

¹⁸ Na yana paihowa tupwa Epeso ainai bada uhanapuiyaꞌo ainaena nuwanuwagu na yada Bada yana hauga lauvetala ainai atemuyamuya ilobai.

2

¹ Natugu Timoti, Yeisu Besinana yana veꞌiꞌilaena uwahiyala,

² na wasana uꞌita avivini. Wasanane aliguwena ubebenaleine tomowa maudoidi mehediyai, ainaena hiya maꞌadi yemidi aidiyai umohedi, ta hinage vali tomowa hiveꞌitadi.

³ Yeisu Besinana vehabana na utalamweuyoigo ta haugana vitai uveꞌalodi uꞌalamaꞌiꞌita ta dova yana tauꞌaleha wahiwahiyalana.

⁴ Unuwatuwu avivini ebeha tauꞌaleha nuwanuwana ana tauloina yana nuwatuwuwone ipaipaihowaidi, ainaena havena yana dalava ana paihowa vehabana inuwanuwatuwu.

⁵ Tausagena dova, ebe sagena ana loina nigele iyamulimulitaei, nigele howahowana ana maiha ilobai.

⁶ Dova hinage taulau venuvenu, ebe ipaihowa wahiwahiyala oya ainai mata yana paihowa ainona neta mahuli ilobai.

⁷ Yagu walowone teina unuwatuwu avivinidi, na adi nuwamasele maudoina yada Bada iya imohego.

⁸ Yeisu Besinana unuwatuwu avivini iya Deivida yana huhu, na mwalowoiyena itowolouyoꞌo bada yawalo mahalavaenaꞌo yagu guguya ainai.

⁹ Yagu guguya vehabana yau bada miya ivitai yalobaiyaꞌo na vada abapai ainai hipaigau dova tauyababa ehebo. Na Yaubada yana walo havena ehebo yaiya iꞌabiye laumwau.

¹⁰ Teina vehabana yagu miya vitai aidiyena yaꞌalamaꞌiꞌita, na Yaubada ivesinuwaidiꞌo ebeha yahaguidi ta Yeisu Besinana ilivahidi eeta wasawasa vateyai hilobai.

¹¹ Walo teina walo moiha:

Ebe Besinana baidada tamwalowoi howola abo baidada yawahida namwanamwana talobai.

¹² Ebe Besinana baidada yada miya vitai aidiyai taꞌalamaꞌiꞌita, howola baidada taloinatoyawa

Ebe Besinana tauvalae howola abo iyuvalaegita.

¹³ Ebe nigele Besinana tayanuwapwanopwanowei, mata nigele iyanuwapwanopwanowegita. Besinana yana nuwatuwu idumwalu ta imulita iliꞌilimani. Yaubada yana taupaihowa namwanamwadi

¹⁴ Ainaena Yaubada mehenai yam tomowa uguguyeidi na uvenuwamwauwedi yo uꞌabiye nuwanuwatuwudi ta tapwalolo ana walo sebasebai vehabana havena hiꞌawa paꞌipaꞌiꞌi. Wuwuna awapaꞌipaꞌiꞌi awaꞌawawa mata nigele taumugaiwone iyahaguidi, na hesi mata iꞌabiye beꞌudi.

¹⁵ Eeta ebeha owa uꞌaipate wahiwahiyala Yaubada ainai na uvetaupaihowa, mata nigele uyahinimaya na hesi iꞌawa namwanamwaego. Neta vehabana na yana walo dumwadumwaluna uveꞌitaei iliꞌilimani.

¹⁶ Na tauwalo awaꞌawawa yadi boda havena aidiyai uluwuluwu, wuwuna walo awaꞌawawa ainaena yababa mwalaꞌina himahamahalava.

¹⁷ Moiha, walo awaꞌawawa dova bonu na mata tomowa atediyai imwalaꞌi ta yababa mwalaꞌina ivetuwuni. Tauwalo awaꞌawawaone yehadi teina, neta Haimeniyo yo Pilito,

¹⁸ na hitau bwauwone bada veꞌita moiha hilaugabainaꞌo na hiwalo, ‘Taumwalowoi yadi towolouyo ana hauga bada iꞌoviꞌo’, ta tupwadi ada geluwo yadi oyama hibenalei ainaena yadi yemidi itapiya.

¹⁹ Na hesi Yaubada yana walo ana wahuwahu yaiyaina ainai mwalona hilelelelene iwalo, ‘Yada Bada yana tomowa ihanahanapuidi’, na hinage, ‘Hiya hibom yada Bada ainai hitalamwedi, ilowoinanedi na yadi mumuga yababana hitaꞌwataꞌwataedi’.

²⁰ Walo moiha, vada wasawasa holadiyai tupwana gaeba goula yo siliba, na tupwana gaeba aiwa yo walata baleꞌu ainaena hipaipaihowaidine. Na gaebane namwanamwadi taumana vehabadi himwauwidi, na gaeba yababadi himwauwahiyedi mohomoho vehabana.

²¹ Na ebe yaiya yana mumuga yababana ainaena iꞌabiye masele na iyemala gaeba namwanamwana, mata Bada iꞌawa namwanamwaei vehabana.

²² Ainaena hevahevali yadi nuwatuwu dawani utaꞌwataꞌwataedi na mumuga namwanamwana yo mumuga dumwaluna yo yemidi yo velau yo miya daumwali umulitaedi, na hinage hiya Yeisu hiꞌawa Badaei maꞌatemasemaseledi uveꞌauꞌaunaedi.

²³ Na tauꞌawa paꞌipaꞌiꞌi ulaugabaidi, wuwuna awapaꞌipaꞌiꞌi aleha yana abamahalava.

²⁴ Na awapaꞌipaꞌiꞌi Bada yana taupaihowao nigele iyalowoinanegita na hesi atemuyamuya yo veꞌita namwanamwana yo alamaꞌiꞌita.

²⁵ Na hinage ada alehao aidiyai yada mumuga hegoyana ainaena taꞌabiye dumwaludi, ta Yaubada ihaguigita na hinuwabui ta veꞌitao moiha himulitaedi.

²⁶ Na hinage Tomodulele yana hipwahipwa ainaena hidena, wuwuna hiya Tomodulele mwalona ihipwaidiꞌo, na ainai hivetaupaihowa yana nuwatuwu vehabana.

3

¹ Nuwanuwagu na nuwam imasele hauga yana abaꞌovi ilalaoma vehabana, neta hauganane ainai vitai maudoidi himahalava.

² Hauganane ainai tomowa hinuwatuwuyoidi na hibom vehabadi hinuwanuwatuwu, na wasawasa nuwaleledi iꞌoiye mwaudi, na hinuwahaehae yo hinoꞌonoꞌoweuyoidi na tomowa hiꞌabituluha yaiyaiyedi. Na hinadiyao yo tamadiyao yadi walo hiwalo tauꞌwataedi, na vali tomowa yadi abiꞌiliꞌilimani vehabana mata nigele hiyaꞌawa yauwedo aidiyai.

³ Guguyou mumugana ainai himiyamiya. Ainaena mata nigele tomowa hiyaꞌateꞌatemuyamuyaedi, yo hiyanuwatuwu avivinidi, hesi mata hivetalapiliyedi. Na tomowa mata hiꞌabituluha yaiyaiyedi na himodiꞌini ta mumuga namwanamwana hitaꞌwataꞌwataei.

⁴ Mata adi geluwo hinuwapwanopwanowedi na higagasa awaꞌawawa na hiwalo haehae moiha na Yaubada mata nigele hiyavelauwei na hibom yadi yaliyaya ainai mata hinuwanuwatuwu.

⁵ Tomowaone hitapwalolo, na Yaubada yana wahiyala nigele hiyayemidiyei, ainaena yadi tapwalolone ginauli awaꞌawawa. Eeta tomowaone adi boda havena ainai uluwuluwu.

⁶ Wuwuna tupwana aidiyena vadai hiluwuluwu na waiwaihiuwone yadi nuwatuwu tapitapiyadi, hiꞌoyaꞌoyamaedi, na waiwaihiuwone hihanapui neta hiya tauyababa, na vali lautowoi na vali lautowoi holadiyai himulimulitaedi,

⁷ veꞌita vagana na vagana ana taubenaliwo, ta nigele howahowana na veꞌita moiha hihanapui.

⁸ Walo moiha, tomowaone veꞌita moiha hiveꞌalehaei, dova mwalona hiya Yanesi yo Yamebelisi Mosese hiveꞌalehaeine. Na hiya adi ita dova tauyemidi, na hesi holadiyai oyama yo nuwatuwu yababa himiyamiya.

⁹ Eeta howola abo teina ginaulidine himahalava, na vali tomowa hiꞌitadi. Dova mwalona Yunesi yo Yamebelisi yadi oyama iyemahalavaei na tomowa hiꞌiꞌitane. Timoti ana venawamwau

¹⁰ Na owa Timoti bada uhanapuigaꞌo yagu veꞌita, yo yagu mumuga yo yagu amwaha, na yagu yemidi, yo yagu alamaꞌiꞌita, yo yagu velau, yo yagu towolo wahiyala.

¹¹ Na dalavaone Anitiyoki yo Aikoniyom na Lisitila aidiyai yagu miya vitaidi yo yagu muyamuya tomowa aidiyena yalobalobaidi bada uhanapuidiꞌo. Tupwadi aidiyai yamiya vitai alili, na vitaine maudoidi aidiyena yada Bada ihahaloigaune.

¹² Walo moiha, ebe ita Yeisu Besinana tayemidiyei, na tatalamwegita yana amwaha namwanamwana ainai, mata vitai talaobai tomowa aidiyena.

¹³ Na hiya tauyababa yo tomowa adi tauꞌoyamao mata yadi yababa himwalaꞌi moiha, wuwuna Tomodulele bada iꞌoyamaediꞌo.

¹⁴ Owa hesi veꞌita bada uvaiyaꞌo na uyemidiyediꞌo na uhanapuidiꞌo, ta aidiyena ulaulau, na ai amtauveꞌitao uhanapui ebeha yama veꞌitaone hinage ammulimulitaedi.

¹⁵ Owa yam hauga heda ainai ta ana higa wau Yaubada yana Buki Veꞌahihi uhanapuiyaꞌo eeta utowolo wahiyala wuwuna Bukine ainaena Yeisu Besinana uyemidiyei ta iya ilauyeyawahaigone.

¹⁶ Wuwuna Yaubada yana Buki walodi maudoidi Yaubada yawahina ainaena hilalaomane, na walodine aidiyena iveꞌiveꞌitagita ta yada yababao himiyamiya mahalava yo ada venuwamwau namwanamwana talobalobai ta yada miya hidumwalu.

¹⁷ Ainaena ita taumulitao paihowa namwanamwadi maudoidi tapaihowaidi.

4

¹ Timoti, amvenuwamwau yamohego Yaubada na Yeisu Besinana mehediyai iya mwalomwalowoidi yo mayawahidi mata ilauvetalaedi, iya howola abo imahalavauyoma na iloinaegita.

² Amvenuwamwau teina yamohego: Hauga maudoina upaihowa wahiyala na wasane uwalo mahalavaei, hauga vitavitaidi yo hauga yaliyaya aidiyai, na tomowa aidiyai uguguya ta hiyemidi na hinage uꞌabidumwaludi na uꞌabiye wahiyaladi, ta ginaulidine teina aidiyena uveꞌita moiha mayam alamaꞌiꞌita.

³ Wuwuna hauga hilalaoma aidiyai tomowa veꞌita dumwaluna mata hitaꞌwataꞌwataedi, na vali veꞌita adi benali namwanamwana aidiyai himulita.

⁴ Na veꞌita vagadi adi mulita aidiyena veꞌita moiha hilaugabei.

⁵ Owa havena dova hiya. Hauga maudoina utowolo wahiyala na miya vitaina aidiyai uꞌalamaꞌiꞌita, na wasana namwanamwana uwalo mahalavaei. Teina ainaena owa mata taupaihowa wahiwahiyalana Yaubada yana paihowa ainai.

⁶ Yau yatalamwegau ta dova yapwaoliyoigau Yaubada ainai ta muhamuhana yagu paihowa yaveꞌovi na baleꞌu teina yalaugabai.

⁷ Yaubada vehabana bada yaꞌalehaꞌo, na yagu sagena bada yaveꞌoviyaꞌo, eeta hauga maudoina yagu yemidi Besinana ainai.

⁸ Ainaena mata howola abo yada Bada agu maiha imohegau mayana loina dumwaluna ta ebe yana ahubena imahalavama, ita ana taumulitao ada maiya imohegita. Walo yana abaꞌovi

⁹ Timoti, nuwanuwagu ulau mwayamwayauma.

¹⁰ Dimasa bada ilaugabaigauꞌo, wuwuna baleꞌu mumugana nuwana ivai ta bada ilaoꞌo Tesalonaika. Kelesenisi hinage bada ilaoꞌo Galetiya, na Taito bada ilaoꞌo Dalimetiya. Hiya agu haguwone maudoidi hilaugabaigauꞌo.

¹¹ Na Luke ibom itupwa. Ta yam laoma ainai Maki ulauvaiyama, wuwuna iya agu tauhagu namwanamwana.

¹² Tikiko bada yavetamalenaꞌo Epeso ainai.

¹³ Ebe ulalaoma tupwana yagu ginauli uvaidi, agu luwuluwu mwalona Tilowasi ainai yalaugabaidiꞌo Kaposi yana vadai, yo yagu pepa abalaulele yo yagu bukiwo, hiya nuwanuwagu uvaidima.

¹⁴ Pwawati ana taupaihowa, yehana Alekisana vitai mwalaꞌina imohegau. Ainaena ana maiha Yaubada howola abo imohei.

¹⁵ Alekisana yada veꞌita iveꞌaleha aliliyei. Ainaena owa uꞌita avivinigo.

¹⁶ Yagu lauvetala mugai ainai nigele teya iyahaguigau, na yadi meheuhi ainaena hidena gabaegau na yabom, ta Yaubada yadi yababa teina nigele iyamaiha.

¹⁷ Na yagu lauvetala ainai Yaubada ihaguigau, ta wahiyala imohegau, na wasana maudoina yawalo mahalavaei hiya nigele Yudeya aidiyai. Hinage Yaubada yana hagu aliguwai ta laiyoni awanaena ihaloigau ta namwanamwana ainai imwamwauwigaune.

¹⁸ Na vitai aidiyena yada Bada mata ihaguigau ta yana abaloina galewai ainai yaluwu. Yaubada tanoꞌowei wuwuna yana wasawasa miyamiya vateyaina. Moiha.

¹⁹ Yagu velau Pilisila yo Akwila, na Onesipolo mayana huhuwo aidiyai.

²⁰ Elasitosi imiyamiya Kolinita ainai, na Tilopimo iꞌasiyebwa Melito ainai ta yalaugabaeine.

²¹ Na ulau mwayamwayauma wuwuna muhamuhana gwaugwau ana hauga imahalavama. Yubulosi yo Pudinisi yo Linosi yo Kalodiya yo hinage tahidao yadi velau alimwai.

²² Yada Bada baidam yo aluꞌaluwam iꞌabiye wahiyala, na owa yo yam bodao iveꞌiꞌilaegomiu.