1

¹ Yau Paulo, Yaubada taulauyeyawahaigita yo Yeisu Besinana yada aba nuwatuwu avivini yadi loinaena Yeisu Besinana vehabana yavetauyewasa.

² Timoti, owa dova natugu moiha yemidi ainaena eeta yam leta yavetamalenawa. Tamada Yaubada yo Besinana yada Bada yadi veꞌiꞌila, yo atemuyamuya, na nuwadaumwali himiya vahaligo. Veꞌita oyaꞌoyama vehabana

³ Mwalona hauganane yalaugabaigo na yalau Masedoniya, na yavenuwamwauwego yawalo, ‘Havena ulaulau, badagi teina Epeso ainai umiyamiya na tomowa tupwadi uꞌauhidi vali veꞌitao aidiyena hiveꞌiveꞌita.

⁴ Na hinage hiya tubudao yadi vedevedede yo yehadi hibehabehaedi ebeha Yaubada yana paihowa hilobai ta nigele howahowadi wuwuna hiꞌawa paꞌipaꞌiꞌi eeta uꞌabiye laumwaudi na Yaubada yana amwaha himulitaei yemidiyena’.

⁵ Teina yagu loina ainaena atemiu himasele ta ambom amvelauwegomiu moiha, yo amnuwanamwanamwa, yo amyemidi moiha Besinana ainai.

⁶ Tupwadi tomowa mumuga teina hitaꞌwataꞌwataei, na walo awaꞌawawaena bada hiteibabaꞌo.

⁷ Nuwanuwadi na Yaubada yana loina hiveꞌitaedi, na yadi walowone yo yadi guguyaone wuwuna nigele hiyahanapui.

⁸ Walo moiha, loinadine aba hagu namwanamwana, ebe tamulitaei moiha.

⁹ Yaubada laugagayo imwauwidi nigele taunamwanamwao vehabadi, na hesi laugagayo ana tauhoꞌewo yo tautalinatuiwo, yo tauꞌawa sewao yo Yaubada nigele hiyaveꞌahihiyei, yo tauyababao yo yadi nuwatuwu biꞌibiꞌidi yo Yaubada yana paihowa ana tauwalo sebasebaiwo hinage vehabadi, yo hiya tamadiyao yo hinadiyao yo tomowa tupwadi hiyemwalowoidi vehabadi,

¹⁰ na tawatawaholadi aidiyai hipwanopwanoli, yo tomowa adi tauꞌaivavaliwo, yo tauveꞌewa oyaꞌoyama yo tauwalo oyaꞌoyama yo hinage veꞌita namwanamwana yo dumwaluna ana tauveyababa maudoidi,

¹¹ na veꞌita dumwaluna Yaubada ainaena, ibom masele yo yaliyaya wuwuna, neta vehabana na yagu paihowa imohegau ta wasana yaguguyaei tomowa aidiyai. Yaubada yana veꞌiꞌila vehabana

¹² Yaꞌawa yauwedo yada Bada Yeisu Besinana ainai wuwuna iꞌabiye wahiyalagau yana paihowa teina vehabana, ainaena yaꞌawa yauwedo mwalaꞌina wuwuna Yaubada yana nuwatuwu yo yana paihowa howahowagu ta yapaihowai eeta nimaguwai ammwamwauwine.

¹³ Mwalona nigele dova, wuwuna Yeisu yaꞌawa yababaei hauganane ainai yana bodao aidiyai yaveꞌaleha, na Yaubada ihanapuiyaꞌo ginauli yababadi yapaihowaidi yau yagu nuwapwanopwano ainaena, hinage nigele yayayemidi, ainaena iꞌatemuyamuyaegau,

¹⁴ na yada Badane iveꞌiꞌilaegau, ta yayemidiyei na yana velau Yeisu Besinana ainaena imohegau.

¹⁵ Walo teina walo moiha, na ilowoinanei na tayemidi, wuwuna Yeisu Besinana bada baleꞌuwai ilaomaꞌo tauyababa habilivahidi, na tauyababa maudoidi aidiyena yau yayababa alili.

¹⁶ Na Yaubada yana atemuyamuya aliguwai wuwuna yau tauyababa mwalona na Yeisu Besinana vehabagu iꞌalamaꞌiꞌita, ta tauyababa maudoidi hiꞌita aliguwai na hihanapui ebeha hibom hinage, ebe Besinana hiyemidiyei, yawahi moiha hilobai.

¹⁷ Ainaena Yaubada taveꞌahihiyei yo tanoꞌowei, wuwuna iya Yaubada moiha, nigele howahowana na maninina taꞌita. Iya Tauwasawasa na yana Abaloina nigele yana abaꞌovi. Moiha.

¹⁸ Natugu Timoti, unuwatuwu avivini mwalona Yaubada yana tauwalo mahalavao, na hinage yau yagu venuwamwau alimwai neta walowone unuwatuwudi, ta dova yam abaꞌaleha Yaubada yana paihowa vehabana.

¹⁹ Wuwuna tupwadi adi geluwo nuwatuwu namwanamwana hitaꞌwataꞌwataei, ainaena yadi yemidi itapiya na hibeꞌu.

²⁰ Na taubeꞌuwone ehebo yehana Haimeniyo, na hinage teya yehana Alekisani, hitau bwau Tomodulele ainai yatatamwedi na mehedi isabui, ta nuwadi imasele na havena yada Bada yehana hiꞌawaꞌawa yababaei.

2

¹ Ainaena yami miyagogoi aidiyai, mugai amꞌawaꞌawanoi Yaubada ainai tomowa maudoidi vehabadi, ta amꞌawaꞌawanoi mayami awayauwedo Yaubada ainai.

² Hinage tauwasawasao yo tauloinao vehabadi amꞌawaꞌawanoi, ta ebe yadi loina idumwalu na ainaena tamiya daumwali, mayada mumuganamwanamwa, yo mayada veꞌahihi.

³ Ada Taulivahine Yaubada teina dova awanoi yana abayaliyaya,

⁴ wuwuna Yaubada tomowa maudoidi yadi yababa ainaena ilivahidi, ta nuwadi imasele veꞌita moiha vehabana.

⁵ Yaubada ehebo taꞌi, na hinage towaho ehebo taꞌi ilauvaigita Yaubada ainai, iya Yeisu Besinana.

⁶ Wuwuna Besinana iya italamyowei na maudoida vehabada ipwaoli. Eeta hauga dumwaluna ainai yana velau iyemala moiha.

⁷ Ainaena yagu paihowa imohegau na wasa teina yawalowalo mahalava yo yaguguguguya yo yaveꞌiveꞌita hibom tupwa vehopali aidiyai, ta ebeha nuwamasele moiha Yaubada ainaena hiyemidiyei. Teina walo moiha, na nigele oyama.

⁸ Ainaena nuwanuwagu towatowaho tupwa maudoidi aidiyai, mayadi mumuga daumwali, nimadi hiꞌabihinidi na hiꞌawanoi Yaubada ainai, mayadi yaliyaya na havena mayadi modiꞌini yo mayadi manini.

⁹ Waiwaihiu nuwanuwagu hiya hiyepasauyoidi paihowa namwanamwana aidiyena, wuwuna neta tapwalolo ilowoinanedi, na havena ꞌwapi ana pasa ainai yadi hauga higabagabaei, na hipasa iliꞌilimani, na havena mayadi nuwahaehae.

¹¹ Na hinage tapwalolo holanai mayadi atetalam veꞌita hibenaledi, na havena hiꞌauꞌaubabada.

¹² Nigele yayatalam na waiwaihiu hiveꞌita tapwalolo ainai. Havena hiloiloina towatowaho aidiyai, na hesi himiya alahai, na hibenali moiha.

¹³ Wuwuna Yaubada Adam ipaihowa mugaiyei, na Ive mulitai.

¹⁴ Na hinage Tomodulele yana oyama ainai Adam nigele iyatapiya, na waihiu hesi itapiya ta pwanoli ipaihowa mugaiyei.

¹⁵ Eeta waiwaihiu yadi labalaba ainai, Yaubada mata muya ainaena ihaloigomiu, ebe yemidi, yo velau yo veꞌahihi amwaꞌamwahadi ammulitaedi.

3

¹ Walo moiha ebe yaiya nuwanuwana na ivetau mugai, neta paihowa namwanamwana,

² Tauloina amvevetowolo tomowa namwanamwana, yo yana mumuga dumwadumwaluna na mwanena ehebo taꞌi, na yana nuwatuwu wahiwahiyalana yo tuluhana hegohegoyana na yana nuwatuwu hunana na taumana yana vada alonai ivelauwedi yo tauveꞌita hinage namwanamwana.

³ Havena bwahi wahiwahiyalana inumanuma yauyaule, yo hinage havena imanimanini, na hesi mumugana hegohegoyana, na nigele iyaꞌawa paꞌipaꞌiꞌi yo havena wasawasa ainai yana yemidi imwaumwauwi.

⁴ Ilowoinanei na iya yana vada ana taumiyao imugaiyedi mumuga namwanamwana ainaena, ta natunao walo hibenalei mayadi veꞌahihi.

⁵ Na ebe towaho nigele howahowana natunao iloina dumwaluwedi, iya nigele howahowana Yaubada yana boda imugaiyedi na iloina dumwalu aidiyai, awa?

⁶ Havena tauyemidi vauvauna amvesivesinuwaidi ta ebeha hivetaumugai mata yadi nuwahaehae ainaena na hibeꞌu dova Tomodulele nuwahaehae ainaena mwalona ibebeꞌune.

⁷ Taumugaiwone ilowoinanedi yo maꞌadi awanamwanamwa hiya ganamuli mehediyai, wuwuna mata tomowa yadi itayababa vehabana, na hibeꞌu Tomodulele hipwahipwa himwamwauwiwa ainai.

⁸ Vada tapwalolo adi tauꞌita avivini hinage ilowoinanedi yo himumuga namwanamwa mayadi nuwatuwu dumwadumwaluna, na havena bwahi wahiwahiyalana hinumanuma aliliyedi yo hinage havena wasawasa ainai yadi yemidi himwaumwauwi,

⁹ na yadi nuwatuwu dawadawanina hiꞌabi avivini nuwatuwu namwanamwaena.

¹⁰ Ainaena amtowoi mugaiyedi ta hiwahiyala yemidi ainai na abo amvetowolodi ta vada tapwalolo hiꞌita avivinidi.

¹¹ Mwanediyaone hinage yadi nuwatuwu dumwadumwaluna, yo havena adi geluwo hiꞌawaꞌawa yababaedi, na havena bwahi wahiwahiyalana hinumanuma alili, na hesi hituluhahegoya moiha.

¹² Vada tapwalolo ana tauꞌita avivini mwanena ehebo taꞌi, na natudiyao yo yadi huhuwo himugai iliꞌilimaniyedi.

¹³ Vada tapwalolo adi tauꞌita aviviniwo ebe hituluhahegoya, mata tomowa hiꞌawa namwanamwaedi, na hinage Yeisu ana yemidi vehabana hitowolo wahiyala.

¹⁴ Yanuwatuwuiyaꞌo ebeha hauga iuꞌiuna na yalaowa alimwai, na mugai yam leta teina yaleleyawa.

¹⁵ Na ebe yabwedabweda, leta teina ainaena uhanapui aiteya mumuga ita tauyemidi ilowoinanegita iya yada Yaubada Mayawahina yana boda holanai, wuwuna ita tauyemidi yana veꞌita moiha ana tauꞌita aviviniwo.

¹⁶ Moiha taꞌi, yada tapwalolo ana hanapu dawadawanina, na ginauli mwalaꞌina Besinana vehabana teina:

Bada ivetomowa, na Aluꞌaluwana ainaena iwahiyala, na tausagenawasa hiꞌitayaꞌo, na wasana tupwa bagibagilidi hibenaledi, ta taumiya baleꞌu tupwadi hiyemidiyei, na mulitai ihae tupwa wasawasa ainai.

4

¹ Aluꞌaluwa Veꞌahihi bada iwalo mahalavaꞌo neta howola abo hauga yana abaꞌovi ainai tomowa tapwalolo hitaꞌwataꞌwataei, na aluꞌaluwa yababadi yo Tomodulele yadi veꞌita oyaꞌoyama hibenaledi.

² Mumuga yababadi aidiyena, tauveꞌita oyaꞌoyamao tomowa mata hiveꞌahihiyedi, na yadi yababao nigele vehabadi hiyanuwanuwatuwu.

³ Yadi oyamaone tupwana teina, ebeha tawahola ginauli yababana, na hinage tupwadi aiꞌai adi ai hiꞌauhidi. Na omiu Besinana ana tauyemidiwo veꞌita moiha amhanahanapui ebeha Yaubada aiꞌai maudoina ipaihowaidi ai vehabana, yo ebeha mayada awayauwedo taꞌaidi.

⁴ Ginauli maudoina Yaubada ipaihowaidi namwanamwadi ainaena vehabadi taꞌawa yauwedo Yaubada ainai, na tavaidi,

⁵ wuwuna Yaubada yana walowena yo yada awanoiyena bada iꞌabiye maselediꞌo. Yaubada yana taupaihowa mumugadi

⁶ Venuwamwau teina ebe ada geluwo aidiyai uveꞌitaei neta owa Besinana yana taupaihowa namwanamwana, wuwuna veꞌita dumwaludi Yeisu ana yemidi vehabana umulimulitaedi, na aidiyena aluꞌaluwam iwahiwahiyala.

⁷ Na aubabada awaꞌawawa bagibagilidi nigele Yaubada ainaena. Eeta havena ubenabenaledi, na hesi utowolo wahiyala hauga maudoina na umumuga namwanamwa Yaubada mehenai.

⁸ Ebeha ulautowotowoi taum yana wahiyala vehabana, neta hauga ahuꞌahubalina ainai, na aluꞌaluwam vehabana neta iya inamanamwa alili wuwuna iya mata ihaguigita yawahida baleꞌuwai vehabana, na hinage hauga ilalaoma ainai.

⁹ Walo teina walo moiha, ainaena tatalamwegita ainai,

¹⁰ eeta hauga teina ainai mayada paihowa yo mayada tuluhahegoya, wuwuna Yaubada miyamiyavateyaina tomowa maudoida ada Taulivahi ebe tayemidiyei, Ta yada nuwatuwu hae ainai bada tamwauwiyaꞌo.

¹¹ Ginauliwone teina uguguyaedi, na uveꞌitaedi tomowa aidiyai.

¹² Tomowa havena hihinahinaligo wuwuna ebeha owa hevahevali na hesi yam walo namwanamwana yo yam paihowa namwanamwana, yo yam velau yo yam yemidi, yo yam mumuga masemaselena aidiyena neta abaꞌita hiya aidiyai.

¹³ Na hinage tapwalolo holanai Buki Veꞌahihi uvahili, yo uguguya, na uveꞌita, ana higa yamahalavawa.

¹⁴ Mwalona tapwalolo ana babadao hiꞌabivahuigo, ainaena paihowanane vehabana Yaubada iꞌabiye wahiyalago. Na unuwatuwu avivini

¹⁵ ta paihowadine aidiyai havena uꞌabiꞌabitauꞌwata, eeta ebe tomowa yam paihowa vehabana hiwalo, ‘Moiha taꞌi, Timoti taudagelahegoya’.

¹⁶ Timoti, uꞌita avivinigo, na uveꞌita iliꞌilimani, na ainaena owa na yam taubenaliwo Yaubada ihaguigomiu.

5

¹ Havena babadao uwalowalowedi, na hesi nuwam hegohegoyanaena uꞌaubabada aidiyai, bada dova taꞌi tamam uꞌawaꞌawanoiyei, na hevahevali uꞌawaꞌawa tahiguwedi;

² na aiꞌaihalewo aidiyai umumuga dova hinamwao na vahavahala aidiyai yam nuwatuwu masemaselenaena uꞌawa nuhuguwedi.

³ Hiwahiwapewone nigele yadi huhu amhaguidi.

⁴ Na ebe natudiyao nuwana tubudiyao himiyamiya, hiya teina ilowoinanedi na hiꞌita avivinidi, ta dova mwalona habuludiyai yadi itaꞌaviviniwa hiyemaiha, vehaguhagu teina dova Yaubada yana abayaliyaya.

⁵ Ainaena hiwahiwapewone hiya nigele yadi huhuwo, ebeha yadi yemidi Yaubada ainai himwauwi, na awanoiyena ahubena yo boniyai aidiyai amhaguidi.

⁶ Na yaiya waihiu yaliyaya awaꞌawawa vehabana inuwayababa, neta iya tauna mayawahina na hesi aluꞌaluwana bada imwalowoiꞌo.

⁷ Ainaena hiwahiwapewo guguya teina umohedi na himumuga iliꞌilimani, ta ebe havena tomowa hiwahiwapewone hiꞌawaꞌawa yababaedi.

⁸ Na ebe taunuwabui teya nigele yana huhuwo bo natunao iyaꞌita avivinidi, iya bada Yaubada yana veꞌita itaꞌwataꞌwataenaꞌo, eeta iya ganamuliwone iyababa gabaedi.

⁹ Hiwahiwapewone uvahili eheboidi na uveꞌahadi: ebe adi bolimai 60 bo ihae, na mwanediyao mwalona ehebo taꞌi,

¹⁰ na tomowa mehediyai yadi mumuga dumwaluna, wuwuna natudiyao adi itaꞌavivini ainai hipaihowa iliꞌilimani, yo taumanao na hinage tauyemidiwo adi italau ainai, yo taumiya vitai hihaguidi neta hiya uvahili eheboidi.

¹¹ Na waiwaihiu vauvaudi hihiwahiwapedi havena hiluwu hiwalowalo yemidi Besinana ainai ta ebeha havena hitawatawaholauyo, wuwuna hiya mata yadi waloyemidine hihoꞌe na hitawaholauyo,

¹² ta teina ainaena Yaubada mehenai bada hiyababaꞌo.

¹³ Eeta waiwaihiu vauvaudi havena uvetovetowolodi, wuwuna mata hiꞌabituluha yaiyai na vada ehebo ehebo aidiyai hivelavelabina na hivetalapili yo tomowa yadi vada alodi ulumiyaidi himodemodeyedi na hiwalowalo awaꞌawawauhi.

¹⁴ Ainaena yagu nuwatuwu ebeha waiwaihiu vauvaudi ilowoinaedi na hitawaholauyo, ta hilabalaba, yo hibom natudiyao hiꞌita avivinidi, eeta ainaena adi alehao nigele howahowana na hiꞌawa yababaedi, yadi mumuga vehabana.

¹⁵ Wuwuna tupwadi hiwahiwapewone bada hitapiyaꞌo, ta Tomodulele yana amwaha ainai hilaulau.

¹⁶ Ebe tauyemidi waihiuna, na yana huhu ainai teya ihiwape, ilowoinanei yo iꞌita avivinidi. Na Besinana yana boda ita havena iyemoyemodegita. Na hesi hiwahiwape nigele adi gelu, ita yada boda mata hiꞌita avivinidi.

¹⁷ Ami taumugaiwo hipaipaihowa iliꞌilimani omiu hinage amveꞌahihiyedi moiha yo amꞌita avivinidi, neta yadi guguya yo yadi veꞌita ana mutulai.

¹⁸ Teina vehabana Buki Veꞌahihi ainai Yaubada iloina, iwalo:

‘Ebe bulumakau ipaipaihowa witi patuna ainai, howahowana yo tupwana witi iꞌai’. Na hinage iwalo:

‘Taupaihowa adi maiha ilowoinanedi na hiꞌai’.

¹⁹ Timoti, ebe yaiya tomowa taumugai teya iveꞌewai na iwalo, ‘Teina taumugaine yababana ipaihowaiyaꞌo’, na nigele tauwalo haguina, neta walone havena ubenabenalei. Na ebe tomowa bwau bo tonuga yadi walo ana benali ehebo, taumugaine ulauvetalaei.

²⁰ Ebe taumugai yana yababa amꞌita lobai, amwalowei tomowa bagibagilidi mehediyai, ta ebe tupwadi tomowa pwanolinane havena hipaipaihowai.

²¹ Teina amvenuwamwau aliguwena Yaubada yo Yeisu Besinana mehediyai, yo hinage tausagenawasao masemaseledi mehediyai, ebeha loina teina umulitaedi moiha. Tomowa maudoidi uloinaedi loina ehebo taꞌi ainaena, na havena tupwadi aꞌava aidiyai uloiloina yaiyai, na tupwadi aidiyai nigele.

²² Taumugai ana vesinuwa ainai havena utotototoya, mata dova ta mayana yababa dawadawanina vesinuwa ilobai, ta neta ana ita dova yana yababao aidiyai uhaguhagui. Mata maumaudoina ulauvehulu.

²³ Havena bwahi aꞌavana unumanuma, wuwuna hauga bagibagilina ulovalovala na diyam imuyamuya, ainaena ilowoinanego na tupwana waini unumanuma.

²⁴ Tupwadi tomowa yadi yababao miyamiya mahalavadi vehabadi adi loina hilobai. Na tupwadi yadi yababao miyamiya dawanidi, na mulitai abo himiya mahalava.

²⁵ Dova hinage paihowa namwanamwadi tupwadi miyamiya mahalavadi, na tupwadi mulitai abo himiya mahalava, wuwuna nigele howahowana na himiya mahalava.

6

¹ Taupaihowao yadi babadao hiveꞌahihiyedi yo hiꞌawa abi aidiyai. Ebe nigele mata tupwadi tomowa yada veꞌitaone hiyaꞌawa yaliyedi, na hiwalo, ‘Yaubada ana tauyemidiwo hiya, na nigele hiyapaihowa dumwalu’.

² Hinage hevahevaliwone ebeha yadi babadaone baidadiyao hiꞌawa tahigu Besinana ana yemidi ainai, ta ebe havena yadi babadao adi yemidi hilaulaumwau. Na hesi himwahaliuhi vehabadi, yo yadi paihowa namwanamwadi himwalaꞌi, wuwuna yadi babadaone hiya Besinana ana tauyemidiwo, eeta velauwena aidiyai hipaihowa. Tauveꞌita oyaꞌoyama vehabadi Veꞌita teina uguguyaedi tomowa aidiyai.

³ Na ebe yaiya yana veꞌita vagana, nuwana yada Bada Yeisu Besinana yana walo dumwadumwaludi nigele iyamulitaedi, na veꞌitaowa mumuga namwanamwana vehabana itaꞌwataꞌawataedi,

⁴ iya yana nuwapwanopwano inuwahaehaeyei, ta miya tulutuluha ivevetuwunine. Teina mumugaone aidiyena alomagigili yo modiꞌini yo walo yabayababa yo manini na vetaꞌetaꞌe himahamahalava.

⁵ Ainaena adi geluwo baidadiyao hiveꞌawa paꞌipaꞌiꞌi, na yadi nuwatuwu yababanaena vehabana veꞌita moiha havena hihanahanapui, na hesi hinuwatuwui ebeha Yaubada ana veꞌahihi ainaena wasawasa baleꞌu mwalaꞌina hilobai.

⁶ Na ita yada wasawasa vagana, Yaubada ana veꞌahihi ainaena howahowana iloinaegita, na hesi wasawasa baleꞌu ana loba havena vehabana tanuwanuwatuwu.

⁷ Wuwuna ita mwalona nimanima aꞌavada baleꞌuwai tamahalavama, na howola abo nimanima aꞌavada baleꞌu teina talaugabaei.

⁸ Ainaena ada yo ada aleꞌo vehabadi tayaliyaya, na vali ginauli vehabadi havena tanuwanuwatuwu alili.

⁹ Hiya wasawasa ana taunuwalelewo howola abo Tomodulele yana hipwahipwa ainaena ilauhipwaidi, na yadi nuwatuwu pwano aidiyena hiꞌabiye yababadi, yo howola abo hiya silahe moiha hilobai.

¹⁰ Wuwuna wasawasa ana nuwalele yababana maudoina wuwudi, na hinage wasawasa ana beha wahiyala ainaena, tupwadi adi geluwo tapwalolo moiha hilaugabaei, ta aba nuwayababa bagibagilidi hilobalobaidi. Amwaha namwanamwana vehabana

¹¹ Timoti, owa Yaubada yana taupaihowa, eeta teina mumugane ainaena uꞌita avivinigo, na mumuga dumwadumwaluna umulitaei, teina ginauliwone amwaha namwanamwana, neta yemidi yo velau yo alamaꞌiꞌita yo nuwahegoya.

¹² Hinage tapwalolo ana paihowa namwanamwadi aidiyai utowolo wahiyala, na yawahim vateyai hinage uꞌabi avivini, wuwuna mwalona Yaubada ivesinuwaigo hauganane yam yemidi Yaubada ainai uwalo mahalavaei tomowa bagibagilidi mehediyai.

¹³ Timoti, yaloinaego Yaubada mehenai, iya ginauli bagibagilidi yawahidi ana taumohe, na hinage Yeisu Besinana mehenai, iya mwalona Ponitiyo Pailato mehenai walomoihaena iwawalone.

¹⁴ Na yagu loinane ebeha venuwamwau teina umulitaei iliꞌilimanidi, na havena ehebo ainai utapitapiya ana higa yada Bada Yeisu Besinana iwuyouyoma.

¹⁵ Wuwuna howola abo haugawa vesivesinuwanawa ainai Yaubada Yeisu iꞌabiye mahalava. Yaubada Tauloina ibom na namwanamwana, iya tauwasawasa maudoidi yadi Tauwasawasa, na hinage babadao maudoidi yadi Bada.

¹⁶ Yaubada ibom miyamiyavateyaina, eeta nigele teya yaiya dova, na yana dalava nigele howahowana taꞌita, wuwuna imasele alili, yo hinage nigele howahowana Yaubadanane taꞌita, na yana wasawasa yo yana wahiyala mata nigele iyaꞌovi. Moiha.

¹⁷ Baleꞌu ana tauwasawasao uvenuwamwauwedi ta havena hinuwanuwahaehae yadi wasawasa vehabadi, na hinage havena hiyemiyemidi ebeha howola abo aba hagu mwalaꞌina yadi wasawasa aidiyena hilobaidi, wuwuna wasawasadine sawasawalidi. Na hesi Yaubada ibom ainai hiyemidi, wuwuna Yaubada iya tauꞌaiyauya namwanamwana, na yada abayaliyaya maudoina iya ainaena himahamahalavama.

¹⁸ Hinage tauvewasawasaone uvenuwamwauwedi ta paihowa namwanamwadi yo vehaguhagu yo aiyauya aidiyena hivewasawasa moiha.

¹⁹ Teina ainaena adi maiha namwanamwana hauga ilalaoma ainai mata hilobai neta yawahi vateyai.

²⁰ Timoti, yemidina Yaubada imomohegone uꞌitaꞌita iliꞌilimani, na hanapu oyaꞌoyama yo awapaꞌipaꞌiꞌi awaꞌawawa havena umulimulitaedi.

²¹ Wuwuna hiya mumugaone teina adi taumulitao yadi yemidi Yeisu ainai itapiyaꞌo. Yaubada yana veꞌiꞌila imiya vahaligo.