1 Yau Paulo na Sailasa yo Timoti baidaguwao yami leta aleleyawa omiu Yaubada yana bodao Tesalonaika alimiyai, wuwuna omiu Tamada Yaubada yo Bada Yeisu Besinana adi taumulitao.
2 Tamada Yaubada yo Bada Yeisu Besinana yadi veꞌiꞌilaena ammiya daumwali. Besinana howola abo iwuyoma tomowa adi loina vehabana
3 Tahimaiyao, ilowoinanegai ebeha hauga maudoina Yaubada aꞌawa yawedowei wuwuna yami yemidi iꞌiniꞌini yo yami velau ambom alimiyai imwalamwalaꞌi.
4 Ainaena Yaubada yana bodao maudoidi mehediyai anoꞌonoꞌowegomiu, awalo, ‘Hiya Tesalonaika moiha tauꞌalamaꞌiꞌita. Bwagana adi alehao vitai mwalaꞌina himohemohedi na hesi mayadi alamaꞌiꞌita yo mayadi yemidi Yaubada ainai’.
5 Teina abaꞌita howahowana ainaena Yaubada yana loina dumwaluna tahanapui, wuwuna yami miya vitai aidiyena iꞌabiye wahiyalagomiu, eeta ami muyao vehabadi yana abaloina ana luwu ilowoinanegomiu.
6 Na ami tauꞌabiye muyamuyao adi maiha Yaubada iꞌatububuniyaꞌo ta yana modiꞌini mata hilobai.
7 Na hesi omiu taumiya vitai ihaguigomiu, neta howola abo Bada Yeisu galewaena iꞌaitulu mwayamwayauma, mayana tausagenawasao wahiwahiyaladi na hinage aiwa alaꞌalahawawalina ivaiyama, na omiu yo ai yada aiyawasi abo imohegita,
8 na hibom yada Bada Yeisu Besinana wasana hitaꞌwataꞌwataeiwa ta Yaubada hiteibabaeine abo adi maiha vitavitaina imohedi.
9 Mata himiyawahi na hisilahe vateyai dalava alaꞌalawowolina ainai, nigele yana abaꞌovi na Bada manina yo yana wahiyala wasawasana yo ana walo vetuvehae nigele howahowana hiꞌita.
10 Eeta haugana ilaoma ana noꞌo mwalaꞌina abo ilobai yana paihowa abanuwapwanopwano vehabadi ana tauyemidiwo masemaseledi aidiyena. Na omiu mwalona wasana amohegomiu ta amyeyemidiyeiwa howola abo omiu baidamaiyao Yeisu yana mahalava ainai tanoꞌowei.
11 Mwalona Yaubada ivesinuwaigomiu ta iyogaegomiu ainaena amyeyemidiyeine. Teina vehabana ai hauga maudoina aꞌawaꞌawanoi vehabamiu ta ebe ammulita moiha. Wuwuna omiu nuwanuwamiu na yemidi moiha ainaena ammumuga dumwalu eeta yama awanoi Yaubada ainai ebeha iꞌabiye wahiyalagomiu na yami paihowaone ampaihowaidi.
12 Teina ainaena mata tomowa maudoidi yada Bada Yeisu yehana hinoꞌowei, omiu yami paihowa namwanamwadi vehabadi. Na hinage walo vetuvehae mata amlobai ibom yehanaena, wuwuna omiu Yaubada yo Bada Yeisu Besinana yadi veꞌiꞌila alimiyai.
1 Tahimaiyao, nuwanuwamai ebeha amhanapui Bada Yeisu Besinana yana mahalavawuyoma na yada miyatoyawa ainai vehabana,
2 ta ebe havena amꞌateꞌatehawawali, ebe tomowa hiwalo, ‘Besinana yana hauga bada imahalavaꞌo’, havena amyemiyemidiyedi. Nuwana yadi walo hanapu aidiyena bo guguya hibebenaleine ainaena, bo nuwana yau yadi leta yalelelene aidiyai ainaena.
3 Havena hinage teya oyama amyemiyemidiyei, na hesi amnuwatuwu avivini ebeha mugai howola abo tomowa bagibagilidi Yaubada hiveꞌalehaei, mata towaho yababana imahalava na abo mulitai Yeisu iwuyoma. Moiha, towahone yababanane neta guguyou towahona,
4 iya Yaubada ana aleha na hinage tauyemidiwo maudoidi adi aleha, howahowana iya iꞌabihiniuyoi ta Yaubada yana vada tapwalolo ainai imiya na ivetauloina dova Yaubada.
5 Amnuwatuwu avivini neta mwalona omiu baidaguwao tamiyamiya na ginaulidine vehabadi bada yawaloꞌo alimiyai.
6 Ebeha yana hauga moihana ainai imahalavama na hesi hava iꞌauꞌauhi bada amhanapuiyaꞌo.
7 Moiha teina taꞌi towahone yababanane yana paihowao himahamahalava dawani baleꞌuwai, na hesi towaho vagana paihowane yababadine iꞌauꞌauhidi ana higa tauꞌauhine itowolowahi
8 abo tauyababane imahalavama. Na hesi tuluhanaena yada Bada Yeisu ilalaoma na yana wahiyala awanaena yo manina pigapigabunaena towahone iꞌabiye yababa.
9 Na towahone yababanane ilaolaomane, neta Tomodulele yana wahiyalaena veꞌiveꞌilala yo vedevedede mata ipaihowaidi tomowa habi oyamaedi.
10 Wuwuna hiya wasa moihana hitaꞌwataꞌwataei ta yadi tupwa neta dalava alaꞌalahina, ainaena Yaubada italamwediꞌo ta Tomodulele yana oyama maudoina hiyemidiyei, na abo lauvetala hilobai, wuwuna veꞌita moihana hitaꞌwataꞌwataenaꞌo,
12 Eeta mumuga yababa ana paihowa nuwadi ivaiyaꞌo. Ebe mugai wasa namwanamwana hiyemidiyei, Yaubada mata ihaguidi na teina nigele. Yaubada yana vesinuwao
13 Tahimaiyao, yada Bada ivelauwegomiu, wuwuna mwalona ivesinuwanegomiu ta ebeha Aluꞌaluwa Veꞌahihi ainaena iꞌabiye maselegomiu, na wasa namwanamwana amyemidiyei ami hagu vehabana, eeta howahowana hauga maudoina vehabamiu aꞌawa yauwedo Yaubada ainai.
14 Mwalona Yaubada yana nuwatuwu dova na wasanane aguguyaei alimiyai ta amyemidiyei, neta ainaena yada Bada Yeisu Besinana yana wasawasa imohegomiuꞌo.
15 Tahimaiyao, amtowolo wahiyala, yama veꞌitaone yo yama walowone aidiyai neta yama aubabada yo yama leta aidiyena.
16 Tamada Yaubada ivelau moiha alidai, eeta hauga maudoina iꞌabiꞌabiye yaliyayagita, ta hinage tanuwatuwu avivini mata ginaulidine howola yana veꞌiꞌilaena abo vehabada ipaihowaidi.
17 Yaubada yo yada Bada Yeisu Besinana hiꞌabiye yaliyayagomiu, yo hiꞌabiye wahiyalagomiu, yami paihowao aidiyai, ta hauga maudoina yami walowo hinamwanamwa.
1 Tahimaiyao, ehebo ginauli hinage vehabana amnuwanuwatuwu na amꞌawaꞌawanoi Yaubada ainai, ta ebe Bada wasana yama guguyaena idabalala yo iwahiyala tomowa aidiyai, dova mugai alimiyai.
2 Na hinage amꞌawaꞌawanoi ta tauyababao aidiyena Yaubada ihaguigai, wuwuna Bada ana tauuvalao bagibagilidi himiyamiya.
3 Na hesi Bada yana abiꞌiliꞌilimaniyena howahowana iꞌabiye wahiyalagomiu, yo iꞌita avivinigomiu Tomodulele yana towoi ainaena.
4 Eeta Bada ayemidiyei ebeha yama veꞌitao alimiyai mata ammulitaedi,
5 na hinage iꞌabiye nuwamaselegomiu, yana velau vehabana, yo hinage yami alamaꞌiꞌita Besinana ainai vehabana. Havena abitauꞌwata
6 Tahimaiyao, aloinaegomiu yada Bada Yeisu Besinana yehanaena ebeha tupwadi ada geluwo abiꞌabitauꞌwatadi havena aidiyai amꞌitaꞌitalau, wuwuna abitauꞌwata ai nigele ayaveꞌitagomiu.
7 Ainaena bada amhanapuiyaꞌo ebeha howahowana ai amveꞌaoꞌaonaegai. Wuwuna mwalona omiu baidamaiyao tamiyamiya, nigele teya hauga ayaꞌabitauꞌwata paihowa ainai.
8 Dova hinage ai abom amaiyena aiꞌai. Na boniyai yo ahubena aidiyai apaipaihowa, wuwuna nigele nuwanuwamai ami vitai amwauwi amai vehabana.
9 Na hesi loina imiyamiya ebeha omiu amveꞌaigai, na besiwa ai abom amai vehabana apaihowa, eeta omiu yama paihowane amveꞌaoꞌaonaedi.
10 Hinage mwalona tamiyamiya, aloinaegomiu neta ebe yaiya nigele iyapaihowa havena iꞌaiꞌai.
11 Wasamiu bada abenalenaꞌo ebeha tupwadi alimiyena hiꞌabitauꞌwata, ta nigele hiyamiya alahai na hiyapaihowa.
12 Eeta ada geluwone nuwadiyai amwauwi, na yada Bada Yeisu Besinana yehanaena aloinaedi, na yadi paihowa hibom hipaihowaidi, na himiya alahai ta ebe aiꞌai hilobai.
13 Tahimaiyao, paihowa namwanamwana vehabana havena amtapitapiya.
14 Ebe yaiya veꞌita teina yami leta holanai nigele iyaꞌawa abiyei, havena towahonane ainai amꞌitaꞌitalau, na ainaena yana paihowane vehabana ihinimaya.
15 Amtowoi ta havena amveꞌaveꞌalehaei, wuwuna iya tahida, eeta veꞌita aꞌava ammohei.
16 Yada Bada iya nuwadaumwali wuwuna, ainaena iꞌabiye nuwadaumwaligomiu, yo iꞌabiye yaliyayagomiu hauga maudoina na baidamiu ammiya vateyai.
17 Leta teina yana abaꞌovi yau nimaguwena yaleleyawa, dova yagu leta tupwadi aidiyai.
18 Yada Bada Yeisu Besinana yana veꞌiꞌila maudoimiu alimiyai.