1 Yau Paulo na Sailasa yo Timoti baidaguwao teina yami leta aleleyawa omiu Yaubada yana bodao Tesalonaika ainai. Omiu Tamada Yaubada yo yada Bada Yeisu Besinana adi tauyemidiwo yadi veꞌiꞌilaena ammiya daumwali. Tesalonaika himumuga namwanamwa
2 Hauga maudoina aꞌawa yauwedo Yaubada ainai, mumugamiu namwanamwana vehabana, yo hinage hauga maudoina Tamada Yaubada ainai aꞌawaꞌawanoi vehabamiu.
3 Wuwuna yami yemidiyena ampaihowa iliꞌilimani, yo hinage yami paihowao velauwena mayami alamaꞌiꞌita yo mayami yemidi yada Bada Yeisu Besinana ainai yo Yaubada Tamada mehenai.
4 Tahimaiyao, Yaubada bada ivelauwegomiuꞌo yo ivesinuwanegomiuꞌo.
5 Eeta haugana wasa namwanamwana amohegomiu, nigele ebeha walo aꞌava, na hesi Aluꞌaluwa Veꞌahihi walone iꞌabiye wahiyala alimiyai, ta ebe walonane amꞌawa moihaei. Na hinage yama paihowa vehabamiu amꞌiꞌitane neta paihowa dumwaluna.
6 Eeta bada amveꞌaoꞌaonegai yo hinage yada Bada amveꞌaoꞌaonaenaꞌo. Ammiya vitaiꞌo na hesi wasanane amvaiyaꞌo mayami yaliyaya na yaliyayanane Aluꞌaluwa Veꞌahihi ainaena ilalaomane.
7 Ta omiu abaꞌita namwanamwana Besinana ana tauyemidiwo tupwa Masedoniya, yo Gilisi aidiyai.
8 Moiha yada Bada wasanane bada alimiyena idabalalaꞌo Masedoniya, yo Gilisi aidiyai na hinage omiu yami yemidi Yaubada ainai wasana bada idabalalaꞌo tupwa maudoidi aidiyai; ainaena ebe tupwa yehana ainai alalau nigele howahowana vehabamiu aꞌaubabada,
9 wuwuna hiya alimaiyai hiꞌauꞌaubabada yami talam mwalona ai alimaiyai vehabana, ebeha yami abayemidi miyamiyadi amtaꞌwataꞌwataediꞌo ta Yaubada ainai amtalamwegomiuꞌo, wuwuna ibom Yaubada moiha na mayawahina, eeta iya vehabana ampaipaihowa.
10 Na Natuna amhaꞌwahaꞌwai aiteya hauga iꞌaituluma galewaena. Wuwuna Yeisu itowolouyoꞌo mwalowoiyena na howola mata ilaoma na Yaubada yana modiꞌini ainaena ihaloigita.
1 Tahimaiyao, bada amhanapuiyaꞌo ebeha mwalona yama tauboꞌe alimiyai, nigele ayatauboꞌe awawa na hesi maꞌainona.
2 Amnuwatuwu avivini hinage ebeha Pilipaiwone mwalona himumuga yababaegai ta hiꞌabiye hinimayaegai, na besiwa Yaubada iꞌabiye wahiyalagai, yo iꞌabiye atepatugai na wasa namwanamwana awawaloweine alimiyai, bwagana tomowa hiveꞌaveꞌalehaegai?
3 Na aguguguguya alimiyai nigele oyamaena, nigele walo yababana ainaena, na hesi walomoiha ainaena.
4 Yama paihowa teina Yaubada italam alimaiyai ebeha wasa namwanamwana awalo mahalavaei na yama walone nigele teya hava tomowa nuwanuwadi na hesi hava Yaubada nuwanuwana. Na nuwatuwuwone atemaiyai himiyamiya, Yaubada ibom ihanahanapuidi.
5 Na amhanapuiyaꞌo mwalona alaowa alimiyai, nigele yama walo gwawawalidi yo hinage Yaubada ihanapuiyaꞌo nigele ebeha yama walo amꞌamnaena na ebeha yami ginauli avaidi.
6 Na hinage ginauliwone apaipaihowaidine mehemiyai yo hinage vali tomowa mehediyai nigele ai ama noꞌo vehabana na hesi omiu ami hagu vehabana.
7 Moiha, ai Besinana ana tauwalo mahalavao, howahowana avetauloina alimiyai, na hesi nigele. Yama mumuga alimiyai mayama nuwahegoya dova waihiu natunao aidiyai mayana nuwahegoya.
8 Na nuwamai amvaiyaꞌo eeta mayama atetalam alimiyai Yaubada wasana ayewasaei na hinage ai abom atalamwegai ta aꞌawa auꞌaugelu moiha alimiyai.
9 Ama geluwo amnuwatuwu avivini mwalona yama paihowa alimiyai ahubena yo boniyai aidiyai apaipaihowa mwalaꞌina, ta ebe abom aveꞌaigai na hinage Yaubada wasana awalo mahalavaei alimiyai, wuwuna nigele nuwanuwamai ami vitai amwauwi ama itaꞌavivini vehabana.
10 Omiu Besinana ana tauyemidiwo, na yama mumuga alimiyai amhanapuiyaꞌo, yo hinage Yaubada ihanapuiyaꞌo ebeha masemaselemai yo dumwadumwalumai na namwanamwamai.
11 Wuwuna maudoimiu aꞌita avivinigomiu dova towaho natunao iꞌitaꞌita avivinidi,
12 na hinage aguguyeigomiu ta aꞌabiye wahiyalagomiu na awalo alimiyai ta ammumuga namwanamwa, wuwuna Yaubada ivesinuwaigomiuꞌo iya yana abaloina yo yana wasawasa vehabana.
13 Tahimaiyao, hauga maudoina aꞌawaꞌawa yauwedo Yaubada ainai, wuwuna Yaubada yana walo bada amohegomiuꞌo ta ainai amtalamwegomiuꞌo nigele ebeha tomowa yadi walo na hesi Yaubada ainaena. Eeta moiha, walone Yaubada ainaena amyemidiyenaꞌo ta ana wahiyala bada amlautowoiyaꞌo.
14 Na hinage miya vitai amlobaiyaꞌo, dova hinage Yeisu Besinana ana tauyemidiwo Yudeya ainai, wuwuna Yaubada yana bodao miya vitai hilobalobai hiya yadi boda aidiyena.
15 Ainaena Yudeya hiya mumugadiyena, ta yada Bada Yeisu hiꞌoiyemwalowoi yo hinage mwalona tauwalo mahalavao hiꞌoꞌoiyemwalowoidine eeta ai hinage hiveꞌalehaegai ainaena Yaubada nigele aidiyai iyayaliyaya wuwuna tomowa maudoidi hitaꞌwataꞌwataedi.
16 Yama walomahalava tupwa maudoina tomowadiyao aidiyai hitowotowoi na hiꞌauhigai wuwuna nigele nuwadi na Yaubada ilivahigomiu, ainaena yababa iꞌoiye mwaudi ta Yaubada yana modiꞌini bada hiveꞌaloyaꞌo. Paulo nuwanuwana ebeha itauboꞌeyoidi
17 Tahimaiyao, mwalona alaugabaigomiu na hauga ahuꞌahubalina nigele ayaꞌitauyoigomiu na hesi nigele ayanuwapwanopwanowegomiu na atowotowoi wahiyala ta alaowa habi itauyoigomiu.
18 Yau Paulo yatowotowoi wahiyala na ebeha alaowa na atauboꞌeyegomiu, na aꞌaipate ahaya, wuwuna Tomodulele yama amwaha iguduguduidi.
19 Omiu ambom anuwanuwatuwu avivinigomiu na ebe aiteya hauga yada Bada Yeisu yana mahalavama,
20 mata walo vetuvehae yo yaliyaya vehabamiu alobai.
1 Haugana Atenisi ainai amiyamiya aꞌateꞌatehawawali vehabamiu eeta yaloina yawalo, ‘Timoti, ulau Tesalonaika na ataubwau teinai amiyamiya’.
2 Eeta tahidane Timoti avetamalenawa, wuwuna iya teya ama boda Yaubada yana paihowa Besinana wasana vehabana, tahidane avetamalenawa ta ebeha iꞌabiye wahiyalagomiu na Besinana ainai amyemidi moiha,
3 ta ebe havena yami muyamuya aidiyena amtapitapiya, wuwuna bada miya vitaiwone amhanapuidiꞌo ebeha maudoida talobalobaidi.
4 Mugai ai baidamiu tamiyamiya, bada awaloꞌo alimiyai mata miya vitaiwone alimiyai himahalava, eeta teina himahamahalavane.
5 Neta vehabana yanuwanuwatuwu mwalaꞌina ta Timoti yavetamalenawa na yami yemidi iꞌita ta wasamiu ivaiyama aliguwai, wuwuna aꞌatehawawali Tomodulele ainai, mata dova ta abatowoi mwalaꞌina imohegomiu na amtapiya ta yama paihowa mwalona alimiyai iꞌabiye yababa.
6 Ainaena Timoti ilaowa na wasamiu ivaiyama iwalo, ‘Tesalonaika Besinana ainai hiyemidi moiha na velau wuwudi na hinage hauga maudoina yada tauboꞌe mugamugaina hinuwatuwu avivini mayadi yaliyaya, na nuwanuwadi ta hiꞌitauyoigita’. Ai hinage dova nuwanuwamai na aꞌitauyoigomiu.
7 Tahimaiyao, bwagana mayama muyamuya yo mayama miyavitai na hesi yami yemidi wasana bada abenalenaꞌo ta iꞌabiye yaliyayagaiꞌo.
8 Ainaena yami towolo wahiyala Bada vehabana ama lautowoi inamwanamwa.
9 Eeta yama awayauwedo Yaubada ainai nigele howahowana alaumwauwi, wuwuna Yaubada ainai yama yaliyaya vehabamiu imwalaꞌi alili.
10 Na boniyai yo ahubena aidiyai aꞌawaꞌawanoi wahiyala ebeha manimiu aꞌitauyoidi yo hinage viha ababeꞌu alimiyai himiyamiya aidiyena aꞌabiye wahiyalagomiu.
11 Ainaena yagu nuwatuwu bwau teina: Mugai Tamada Yaubada yo yada Bada Yeisu yama amwaha hiloinaei na ainaena alaowa alimiyai.
12 Bwauna ebeha Bada yana velauwena iꞌoiye mwaugomiu na ambom amvelauyoigomiu, yo hinage vali tomowa amvelauwedi, dova ai avelavelauwegomiune.
13 Na ebe haugana yada Bada Yeisu maꞌana tauyemidiwo himahalavama omiu mayami wahiyala yo nuwamiu masemaseledi Tamada Yaubada mehenai amtowolo.
1 Tahimaiyao, teina ginauli yana abaꞌovi, mwalona mumuga aveꞌitagomiu ebeha Yaubada amꞌabiye yaliyaya ta teina haugadine bada ammulitaediꞌo eeta havena amlaulaumwau na ebeha Bada Yeisu vehabana ampaihowa hamahamadudu.
2 Yada Bada Yeisu yana loina yamohegomiuꞌo ta amhanapuidiꞌo.
3 Yaubada nuwanuwana yami miya masemaselena na havena ammehemeheganawali,
4 na ehebo ehebo amtawahola mumuga namwanamwana na dumwaluna ainaena.
5 Havena nuwatuwu dawani dova hiya ganamuli Yaubada nigele hiyahanapui.
6 Hinage havena vali tomowa mwanediyao amhalohaloidi mata dova Bada yana modiꞌini amlobai. Ginaulidine bada mwalona vehabadi avenuwamwauwegomiuꞌo.
7 Wuwuna Yaubada ivesinuwaegita nigele mumuga biꞌibiꞌidi vehabana, na hesi mumuga masemaseledi vehabana.
8 Ainaena ebe yaiya loina ihoꞌe nigele ebeha tomowa yadi loina na hesi Yaubada yana loina ihoꞌehoꞌe wuwuna Aluꞌaluwa Veꞌahihi iya nuwatuwu ana tauꞌabiye masele ta teina Yaubada yana aiyauya alidai.
9 Tahidao adi velau vehabana, mata nigele ayalelediwa, wuwuna Yaubada bada iveꞌitagomiuꞌo eeta ambom bada amvelauyoigomiuꞌo.
10 Dova hinage tahidao Masedoniya holanai bada amvelauwediꞌo. Eeta awalo huluhuluigomiu ta yami velauwone aidiyai imwalaꞌi.
11 Na hinage amtowoi ta ammiya daumwali na ambom yami paihowa ampaipaihowaidi, na havena tomowa yadi paihowa amvetavetalapiliyedi dova mwalona bada yawaloꞌo alimiyai.
12 Teina ainaena mata hiya nigele Besinana ana tauyemidiwo hiveꞌahihiyegomiu eeta yami miya vehabana havena vali tomowa aidiyai amduiduivahali. Bada yana laugwaipilema vehabana
13 Tahimaiyao, havena amnuwanuwapwanopwano taumwalomwalowoi vehabadi na ebe teya ada gelu imwalowoi, havena amnuwanuwayababa dova hiya nigele yadi yemidi towolouyo ainai.
14 Na ita Yeisu tayemidiyei ebeha mwalowoiyena itowolouyo na hinage tayemidiyei ebeha ada geluwo bada himwalowoiꞌo, Yaubada abo ilauvaidi Yeisu baidanao.
15 Teina yada Bada yana walo awalowaloweine alimiyai ebeha haugana iwuyoma hiya taumwalowoi Besinana hilobai mugaiyei na ita mayawahida mulitai.
16 Wuwuna Bada alinana mwalaꞌina howola imahalava, na tausagenawasao adi taumugai hinage iyoga yo hinage yoguli hiyuvi mwalaꞌina na Badawa galewaena iꞌaituluma na taumwalowoiwo mwalona Besinana ana tauyemidiwo hitowolo mugai,
17 na hinage ita howola mayawahida hiya baidadao tahae galewai na yada Bada baidada tavelaulobaloba yaloyalovi ainai na iya baidada tamiya vateyai.
18 Eeta teina wasane ainaena amꞌabiye wahiyalagomiu yo amyaliyaya.
1 Tahimaiyao, nigele howahowana na yami letane teina ainaena awalo alimiyai aiteya hauga ainai Yeisu mata iwuyoma,
2 wuwuna bada amhanapuiyaꞌo ebeha nigele tayahanapui, na hesi yana laomane dova tauꞌaivavali yana laoma boniyaiyena,
3 na ebe tomowa hiwalo, ‘Yadi miya maudoina namwanamwana’, na mulitai hisilahe hiya mata iveꞌaluwagavaidi dova waihiu yana abivelolo yana hauga labalaba ainai. Ainaena teina dova silahene nigele howahowana hidena gabaei.
4 Eeta tahimaiyao, omiu nigele tupwa guguyouna ainai amyamiyamiya, ainaena silahe haugana mata nigele iveꞌaluwagavaigomiu dova tauꞌaivavali.
5 Wuwuna omiu masele ainai ammiyamiyane, eeta maseleyena talaulau na havena guguyou yana amwahaena.
6 Ainaena havena taꞌenoꞌeno, dova tomowa maudoidi hiꞌenoꞌenone, na hesi Yeisu tahaꞌwahaꞌwai mayada nuwadumwalu.
7 Havena ita dova hiya taumeheꞌenoꞌeno, yo bwahi wahiwahiyalana aadina taunumao, hiya guguyou yadi abapaihowa.
8 Na hesi ita masemaseleda, eeta ita tabom taꞌita avivinigita, yo aluꞌaluwada tawutuꞌauꞌauhi Yaubada ana yemidi yo ana velau aidiyena, na hinage mayada nuwatuwu avivini ada livahi howola abo talobai ainaena.
9 Wuwuna Yaubada nigele ebeha iloinaegita na yana modiꞌini ana tupwa ainai tamahalava, na hesi nuwanuwana yada Bada Yeisu Besinana yana paihowa ainaena lavihi tavai.
10 Eeta Besinana vehabada imwalowoi ta ebe mayawahida bo mwalomwalowoida na iwuyoma, ilauvaigita ta baidada tamiya vateyai.
11 Ainaena howahowana ambom amꞌabiye wahiyalagomiu yo amvehaguhaguyoigomiu, neta paihowane dova teina hauga ampaipaihowaidine. Abaꞌovi
12 Tahimaiyao, aꞌawanoi alimiyai ebeha ami taumugaiwone aidiyai amveꞌahihi, yo amvelau iliꞌilimanidi, wuwuna Bada yana paihowa hipaipaihowai, neta hiꞌitaꞌita avivinigomiu yo higuguguguya alimiyai. Na ehebo ginauli hinage havena awapaꞌipaꞌiꞌi, na hesi nuwadaumwaliyena ammiyamiya.
14 Tahimaiyao, howahowana hinage tautuluhayaiyai amguguyeidi, yo tauꞌatehawawali amꞌabiye atepatudi yo tautapiya amhaguidi, teina ginauliwone alamaꞌiꞌitaena ampaipaihowaidi.
15 Amꞌita avivinigomiu, havena teya alimiyena yababana iyemayemaiha yababana ainaena, na hesi hauga maudoina amvelauyoigomiu, na amvehaguhagu, yo vali tomowa hinage amhaguidi.
16 Hauga maudoina amyaliyaliyaya.
17 Hinage hauga maudoina Yaubada ainai amꞌawaꞌawanoi.
18 Yo hauga maudoina amꞌawaꞌawa yauwedo Yaubada ainai yami miya namwanamwadi yo yababadi vehabadi. Neta Yaubada yana nuwatuwu, ita Yeisu Besinana yana bodao vehabada.
19 Havena Aluꞌaluwa Veꞌahihi yana paihowa amꞌauꞌauhi,
20 Eeta ebe tauguguya teya iwalo mahalava, havena yana walomahalavane amtaꞌwataꞌwataei,
21 na hesi walonane amtowoi na ebe namwanamwana amꞌabi avivini,
22 na ebe yababana neta maudoina amtaꞌwataꞌwataei.
23 Yaubada iya miya daumwali wuwuna, eeta aluꞌaluwamiu yo nuwamiu yo taumiu iꞌabiye masele moiha ta himasele ta ebe ammumuga namwanamwa na ammiyamiya ana higa Yeisu Besinana iwuyoma.
24 Yaubada ivesinuwaigomiu, iya Taudumwalu eeta hava bada iwalowediꞌo mata ipaihowaidi.
25 Tahimaiyao, amꞌawanoi vehabamai Yaubada ainai.
26 Na hinage Yaubada yana bodao maudoimiu velauwena amꞌatuhapwaliuyoigomiu.
27 Na yaloinaegomiu Yaubada yehanaena na leta teina tahidao mehediyai amvahili.
28 Yada Bada Yeisu Besinana yana veꞌiꞌila alimiyai.