1 Yau Paulo, Yaubada yana vesinuwaena yavetauyewasa Yeisu Besinana ainai. Na tahidane Timoti ihaguigau ta yami leta teina aleleyawa
2 omiu Kolosewone Yaubada yana bodao na hinage Besinana ana tauyemidiwo alimiyai. Yaubada tamada yana veꞌiꞌila na yana nuwadaumwali alimiyai. Paulo iꞌawa yauwedo Kolosewone aidiyai
3 Yaubada iya Yeisu Besinana Tamana, na hauga maudoina yama awanoiyena, anuwanuwatuwu avivinigomiu na vehabamiu aꞌawaꞌawa yauwedo,
4 wuwuna wasamiu abenalei ebeha Yeisu Besinana amyemidiyei na Yaubada yana bodao maudoidi amvelauwedi,
5 eena amnuwatuwu avivini ebeha yami abayaliyaya howola abo galewai amlobai, dova mwalona wasa namwanamwana, neta walomoiha, bada ambenalenaꞌo.
6 Wasane ambebenaleine imwalamwalaꞌi na hinage iꞌaiꞌaino, teina hauga tupwa maudoina aidiyai. Dova omiu hauganane ainai Yaubada yana veꞌiꞌila ambenali mugaiyei Epapilasi ainaena na amꞌawa moiha.
7 Moiha, adage Epapilasi towaho namwanamwana. Wasane iveveꞌita mugaiyegomiune, iya aiꞌaivelahemai ipaipaihowa Besinana vehabana alimiyai.
8 Na Epapilasi Aluꞌaluwa Veꞌahihi ana velau atemiyena bada iwalo mahalavaenaꞌo aliguwai. Besinana yana paihowa
9 Hauganane wasamiu abenali mugaiyei ana higa wau, nigele awanoi ayalaumwauwi vehabamiu, na hesi Yaubada ainai aꞌawaꞌawanoi na ebe Aluꞌaluwa Veꞌahihi nuwamiu iꞌabiye maseledi, ta amhanapui moiha hava yana nuwatuwu vehabamiu,
10 na hinage yami paihowaena yada Bada amꞌabiye yaliyaya yo hinage mumugamiu namwanamwana iꞌaiꞌaino, ta Yaubada ana hanapu atemiyai ebe imwalaꞌi,
11 yo hinage ibom ana wahiyala mwalaꞌinaena iꞌabiye wahiyalagomiu, na yami paihowa maudoidi aidiyena, amꞌalamaꞌiꞌita, na amtowolo wahiyala,
12 na hinage mayami yaliyaya, amꞌawa yauwedo Tamada ainai, iya ibom yana talamwena wau teina tamiyamiya tupwa masemaselena ainai, yana tomowa baidadao.
13 Iya tupwa guguyou ainaena ilauvaigita ta imwaulawegita Natuna namwanamwana yana Abaloina ainai.
14 Wuwuna iya igimwalaigita, ta yada pwanoli aidiyena iꞌabiye maselegita.
15 Ita nigele howahowada Yaubada taꞌita, na hesi ana ita dova Natunane, na Besinana Yeisu yemaselewo maudoidi aidiyena inamwanamwa gabaedi, ta iya ihae alili.
16 Wuwuna iya ginauli maudoidi galewai yo baleꞌuwai ibom wuwudi, ginauli taꞌitaꞌitadi yo ginauli nigele tayaꞌitaꞌitadi, yo hinage tausagenawasao yo tauloinao yo tauwahiyalao yo aluꞌaluwao, hiya maudoidi Yaubada iyemaseledi Natuna yana paihowaena, na Natunane vehabana.
17 Mulitai abo yana yemaselewo himahalava iya imiyamiya, na yana wahiyalaena ginauli maudoina hipaipaihowa.
18 Ita Yaubada yana bodao dova taunao, hinage iya ibom uluꞌuluda yo ibom abavetuwuni na iya ibom mwalowoiyena itowolo mugai, eeta ginauli maudoidi adi taumugai.
19 Yaubada yana nuwatuwuwena na yana wahiyalaena yo mumugana maudoina aidiyena Yeisu iꞌoiye mwau.
20 Na Yeisu aiwa lagalagana ainai ꞌwahinana yana sagenaena ginauli maudoidi baleꞌuwai yo galewai himimiyawahiwa, bada ivaidimaꞌo Yaubada ainai habi awaheliheliyamyo.
21 Omiu hinage mwalona ammiyawahi alili na yami nuwanuwatuwu aidiyena Yaubada ainai amꞌaleha na ammumuga yababa.
22 Na Yeisu tauna mwalowoiyena ivaigomiuma ta iꞌabiye veꞌahihigomiuꞌo na hinage iꞌabiye maselegomiuꞌo ta ebe imwau hinigomiu Yaubada mehenai madumwadumwalumiu.
23 Neta ebe yami yemidi havena hitapitapiya, na hinage amtowolo wahiyala wasana namwanamwana ambebenaleiwa ana yemidi ainai, ta havena amlaulaugabaei. Wasanane ana guguya tomowa maudoidi baleꞌuwai hibenalenaꞌo, na yau Paulo ana tauguguya teya. Paulo yana paihowa Yaubada yana bodao vehabadi
24 Teina hauga yagu muya yalobalobai omiu vehabamiu, na hesi mayagu yaliyaya. Yau taugu yana muya na Besinana yana muya ilauhepoiyedi na imwalaꞌiꞌo Yaubada yana bodao vehabamiu, wuwuna omiu neta Besinana taunao.
25 Yau hinage Yaubada yana loinaena yavetauvepaihowa omiu Yaubada yana bodao vehabamiu, ta ebeha Yaubada yana walo maudoina yaꞌauꞌaubabadaedi.
26 Walonane mwalona tomowa mugamugaidi ita tubudao aidiyena imwau dawanidi, na teina hauga imwau mahalavaedi Yaubada yana bodao ita alidai.
27 Wuwuna Yaubada ana hanapu mwalona dawadawanina, na inamwanamwa alili, eeta nuwanuwana iꞌabiye mahalava omiu nigele Yudeya alimiyai, hanapunane ebeha Besinana imiyamiya atemiyai, yo ainaena amnuwatuwu avivini ebeha tupwa wasawasa holanai mata amluvu.
28 Ibom Besinanane awalowaloweiwa na mayama nuwamasele moihaena aguguya na aveꞌita tomowa maudoimiu alimiyai, na omiu Besinana ana taumulitao ebeha aꞌabiye mahalavaegomiu mayami mumuga maudoina namwanamwana yo hunana.
29 Teina vehabana yapaipaihowa na yawahiwahiyala ibom yana wahiyala mwalaꞌina aliguwai ainaena.
1 Nuwanuwagu amnuwamasele ebeha yau yapaipaihowa mwalaꞌina omiu vehabamiu yo hinage taumiya Laodisiya vehabadi, yo hinage hiya manigu nigele hiyaꞌita vehabadi.
2 Ta ebe ainaena hibom velauwena hiꞌawa heliheliyam moiha maꞌadi lautowoi namwanamwana yo mayadi nuwamasele moiha. Ainaena hiyaliyaya mwalaꞌina, wuwuna bada nuwadi imaseleꞌo mwalona nuwatuwu dawadawanina vehabana, neta iya Besinana.
3 Na Besinana ainai hanapu yo nuwamasele maudoina wasawasadi himiyamiya.
4 Yawalowalo ebeha havena vali tomowa yadi walo amꞌamnana ainaena hiꞌoyaꞌoyamaegomiu.
5 Teina hauga taugu imiyawahi alimiyena, na yagu nuwanuwatuwu alimiyai imiyamiya, na yayaliyaya yami miya namwanamwana yo yami yemidi wahiwahiyalana Besinana ainai vehabadi. Besinana baidada
6 Eeta Besinana Yeisu yada Bada ainai amꞌatetalamꞌo, ainaena ibom taꞌi yana wahiyalaena amlaulau.
7 Wuwuna Besinana yami yemidi ana wahuwahu, na yami yemidi ana abiyemwalaꞌi, yo ana abiyewahiyala, dova hiveveꞌitagomiune, ta vehabana amꞌawa yauwedo mwalaꞌina.
8 Havena teya yaiya iꞌoyaꞌoyamaegomiu tomowa yadi hanapu aidiyena, yo aluꞌaluwa yababadi yadi nuwatuwena wuwuna yadi nuwamaselene ginauli awaꞌawawa baleꞌuwena, na nigele Besinana ainaena.
9 Besinana ibom ainai Yaubada yana wahiyala yo hinage mumugana maudoina himiyamiya.
10 Na Besinana ainaena miya namwanamwa moihana bada amlobaiyaꞌo ta tausagenawasao yo aluꞌaluwa yababadi maudoidi iwahiyala gabaedi, na iloiloinaedi.
11 Na hinage Besinana ainaena yami veꞌiveꞌilala amlobaiyaꞌo ana ita dova hapi, nigele hapi ababwaꞌabwaꞌala ꞌwapina ainai, na hesi mumuga baleꞌu atemiyai itom gabaediꞌo.
12 Hinage Besinana baidamiu bapitaiso amvaiyaꞌo neta himagaiyegomiuꞌo, na Besinana baidamiu yami bapitaisowa ainaena amtowolouyoꞌo, wuwuna Yaubada yana wahiyala amyemidiyei neta Besinana mwalowoiyena iꞌabiye towoloyaꞌo.
13 Omiu mwalona nigele hapi amyavai, ta yami mumuga yababana ainai ammwalowoi moiha, na hesi Besinana baidada yawahi vauvauna Yaubada imohegitaꞌo na yada pwanoliwone inuwahamuidiꞌo.
14 Ada vagavaga ana loina vitaina bada itomgabaenaꞌo, na ana aiwa lagalagana ainai hitutuye patune vehabada.
15 Na hinage Tomodulele yo maꞌana geluwo maudoidi imwau aituluwedi, na ana aiwa lagalagana ainai adi hinimaya imwauwi yo iwahiyala gabaedi.
16 Nigele howahowana teya yaiya iꞌawaꞌawa yababaegomiu amiu bo ami bwahi bo yami guyau bo waiꞌena vauvauna ana haugai bo tapwalolo aidiyai, dova Yudeyaone.
17 Ginauliwone abaꞌita taꞌi, na hesi adi hanapu moiha Besinana ibom ainaena iꞌabiye maseledi.
18 Na havena yaiya teya iꞌawaꞌawa yabababaegomiu wuwuna omiu nigele amyatapwatapwalolo mayami nuwadobi tausagenawasa aidiyai. Tomowadine yadi nuwamasele niviniviyena vehabana hinuwahaehae baleꞌu ana nuwatuwu aidiyena.
19 Na hesi Besinana nigele hiyaꞌabi avivini, ibom uluꞌuluda, na ita Besinana taunao ehebo ehebo, na taunane ehebo taꞌi ainai tapaipaihowa yana namwanamwa vehabana, yo taunane imwalamwalaꞌi Yaubada yana paihowa ainaena. Yawahi vauvauna Besinana ainaena
20 Mwalona ammwalowoiꞌo Besinana baidamiu, neta aluꞌaluwa yababadi yadi loina alimiyai bada iꞌoviꞌo, na hava vehabana howola ampaipaihowa dova baleꞌu yadi paihowa? Hava vehabana tomowa yadi veꞌitao
21 yo yadi loinao ammulimulitaedi, ebeha havena ginauli laulaugagayodi amꞌabiꞌabitowoidi yo amlaulautowoidi?
22 Teina ginauli sawasawalidi na ebe tayepaihowadi mata hiꞌovi. Wuwuna tomowa yadi nuwatuwuwena yo yadi veꞌita aidiyena hilalaomane.
23 Teina loinaone adi ita aꞌava dova hanapu moiha, na adi taumulitao himumuga mayadi nuwadobi, yo hinage taudi hilaugagayowedi, na hesi loinadine nigele teya yadi wahiyala, ainaena taudi yana nuwatuwu dawadawanidi iloiloinaedi.
1 Yaubada Besinana baidamiu bada mwalowoiyena iꞌabiye towolouyoigomiuꞌo eeta howahowana galewa ana nuwatuwu ambehaedi, wuwuna Besinana Yaubada nima tautuwanai imiyamiya galewai.
2 Hinage yami nuwatuwuwo ammwauwidi galewai, havena baleꞌu ainai.
3 Wuwuna bada ammwalowoiꞌo na teina hauga yawahimiu Besinana baidamiu Yaubada ainai.
4 Eeta yawahida namwanamwana Besinana ainaena tavaiyaꞌo, ta ebe haugana Besinana ilaoma omiu hinage Besinana baidamiu ammahalava yana wasawasa masemaselena ainai.
5 Ainaena baleꞌu mumugana atemiyai amyemwalowoidi, dova ainatole yo paihowa yababadi yo nuwatuwu dawani yo aiduma yo vetobwatobwa neta vali abayemidi pwanowo.
6 Na ginauliwone teina vehabadi mata Yaubada imodiꞌini alidai.
7 Mumugaone yababadine teina mwalona bada ampaihowaidiꞌo,
8 ta teina taꞌi amtaꞌwataꞌwataedi, neta modiꞌini, aleha, alomagigili yo hinali yo awayabayababa.
9 Hinage havena amꞌoyaꞌoyama ami geluwo aidiyai, wuwuna mumuga baleꞌu bada amtaꞌwataꞌwataenaꞌo.
10 Ainaena mumuga vauvauna amlobaiyaꞌo, ta ada tauꞌabiye masele hauga maudoina iꞌabiꞌabiye vauvaugomiu, ebeha amhanapui ta ami lautowoi ana ita dova iya.
11 Eeta nigele teya wahei iyamiyamiya, na amwalo, ‘Yudeya vali boda bo hiya nigele Yudeya vali boda’, bo nuwana amwalo, ‘Hiya ꞌwapidi hihapidi boda vagana, na hiya nigele hiyahapidi boda vagana’, bo ‘Taumanao yo dalava tanitaniwagadi’, bo ‘Taupaihowao mohili yo tauloinao’, na hesi boda teina maudoina Besinana yana boda, eeta iya atedai imiyamiya na ibom taꞌi ilaulau ahaigita.
12 Omiu Yaubada yana velauwena ivesinuwaigomiu ta ebe veꞌaveꞌahihimiu ibom vehabana, ainaena amꞌatemuyamuya yo amvelauyoigomiu yo amnuwadobi mayami atetalam yo mayami alamaꞌiꞌita.
13 Na amvehaguhagu ehebo ehebo ainai, ta havena ami geluwo amꞌawaꞌawa yaliyedi, na hesi hiya yadi pwanoliwone amnuwahamuidi, wuwuna yada Bada hinage yami pwanoliwo inuwahamuidiꞌo.
14 Na velau amliꞌwa wuwuna velau mumuga haehae alilina na mumuga maudoidi iꞌuinidi.
15 Na hinage Besinana yana nuwadaumwali atemiu iloinaei, wuwuna Yaubada maudoida iyogaegita ta tayeboda ehebo eeta taꞌawa yauwedo Yaubada ainai.
16 Hinage Besinana yana walo namwanamwa alilidi hiꞌiniꞌini iliꞌilimani atemiyai, yo ainaena ehebo ehebo ainai amveꞌita yo amguguya hanapu moiha ainaena; yo yami wali yo Sam walinao aidiyena yo walibui ta ebe Aluꞌaluwa Veꞌahihi ainaena amꞌawa yauwedo Yaubada ainai atemiyena.
17 Na yami paihowao yo yami walowo maudoina aidiyena yada Bada Yeisu yehanaena ampaihowaidi mayami awayauwedo Tamada Yaubada ainai. Vali boda yo vali boda adi loina
18 Yada Bada yana tomowao ita ada lowainana ebeha waiwaihiu tawatawaholamiu mwanemiyao yadi walo ammulitaedi.
19 Hinage dova omiu towatowaho mwanemiyaone amvelau aidiyai, na havena amwalowalowedi.
20 Hedaheda habulumiu, omiu hauga maudoina tamamiyao yo hinamiyao alinadi ammulitaedi teina yada Bada yana abayaliyaya.
21 Na omiu tama, natumiyao havena amꞌabiꞌabiye modiꞌinidi, mata dova ta taudi hisosomana yo hiꞌwataꞌwata.
22 Omiu hinage taupaihowaone yami tautaubadao baleꞌuwai alinadi ammulitaedi ginauli maudoidi vehabadi, na nigele ebeha hiyaꞌitaꞌitagomiu abo aidiyai ampaihowa mayami tuluha hegoya, na ebeha amꞌabiye yaliyayadi hauga maudoina aidiyai mayami atetalam, ta ebe Bada amveꞌahihiyei.
23 Yami paihowa maudoina aidiyena amtuluhahegoya nigele tomowa vehabadi, na hesi Bada vehabana.
24 Eeta mulitai abo Besinana ainai ami maiha amvai, wuwuna yada Bada Besinana vehabana tapaipaihowa.
25 Na hesi tauyababao iyemaihadi ginauli yababadi aidiyena, wuwuna Bada mata nigele iyaveꞌahadi.
1 Omiu tautaubadao amloina dumwalu yami taupaihowaone ehebo ehebo aidiyai, wuwuna amnuwatuwu avivini omiu hinage yami Taubada imiyamiya galewai. Guguya awanoi vehabana
2 Amꞌita avivinigomiu, na havena yami awanoi itapitapiya, na hesi amꞌawa yauwedo Yaubada ainai, yo amꞌalamaꞌiꞌita awanoi aidiyena.
3 Na hinage ai vehabamai amꞌawaꞌawanoi ta ebe Yaubada amwaha iꞌabiye mahalava alimayai, na Besinana wasana mwalona dawadawaninawa ebe ayewasaei tomowa aidiyai, na teina wasane vehabana himwamwauwigaune vada paipaiyai Yeisu wasana ana guguya vehabana.
4 Ainaena amꞌawaꞌawanoi vehabagu, ta wasanane ana nuwamasele yaꞌabiye masele. Yagu paihowa ana lowainana dova.
5 Na hinage hiya Yeisu nigele hiyayemidiyei aidiyai ammumuga dumwalu, na havena yami hauga amgabagabaei.
6 Amꞌaubabada iliꞌilimani hauga maudoina mayami nuwamasele moiha, na ebe ami geluwo hipanivilaegomiu amyemaiha dumwalu ehebo ehebo aidiyai. Walo velau Kolose aidiyai
7 Tikiko howola abo ilaowa na yagu paihowa maudoina iwalowei alimiyai. Na iya tahida velavelauna, yada Bada yana taupaihowa dumwaluna, na baidamai apaipaihowa ovi.
8 Ta bada yavetamalenawaꞌo alimiyai abo iya yama miya iꞌaubabadaei, na hinage yana walowena iꞌabiye wahiyalagomiu.
9 Tahidane Onesimo Tikiko baidana hilalaowa. Onesimo iya yami dalava towahona, na tahida velavelauna mayana yemidi. Na hinage hava teinai himahamahalava mata hiꞌaubabadaedi alimiyai.
10 Alisitako iya baidagu vada paipaiyai amiyamiya, na yana awayauwedo alimiyai teina yawalowenawa, na hinage Maki, neta Banabasi nubaina, mwalona bada nuwamiyai yamwauwiyaꞌo Maki vehabana, na ebe ilaowa alimiyai, amyogaei yami vadai.
11 Na hinage Yeisu iya yehana bwauna Yasitosi, na hitau tonuga yadi awayauwedo alimiyai. Hitautonugaone teina hiya Yudeya na baidaguwo apaipaihowa Yaubada yana Abaloina vehabana, na hiya yagu miya vitai aidiyena hiꞌabiꞌabiye wahiyalagau.
12 Epapilasi hinage yana awayauwedo alimiyai, na iya yami boda alimiyena na ipaipaihowa Besinana Yeisu vehabana. Na hinage yana awanoiwone aidiyai iꞌawaꞌawanoi mwalaꞌina ebe amtowolo wahiyala mayami mumuga namwanamwana maudoina dova Yaubada yana nuwatuwu.
13 Moiha taꞌi, Epapilasi ibom ipaihowaꞌo mwalaꞌina vehabamiu, yo Laodisiyaone yo Hiyelapolowone vehabadi.
14 Hinage ada gelu Luke iya tauꞌasiyebwaone yadi taulaumulamula yo Dimasa yadi awayauwedo alimiyai.
15 Tahidao tupwa Laodisiya ainai himiyamiya yagu awayauwedo amwalowei aidiyai, yo hinage Yaubada yana bodaone waihiu Nimipasi yana vadai hitapwatapwalolo aidiyai.
16 Yami leta teina omiu Yaubada yana bodao amvahili mugaiyei, mulitai amvetamalei Yaubada yana bodao tupwa Laodisiya aidiyai, yo Laodisiyao yadi letane hinage hivetamalenawa alimiyai na amvahili.
17 Akiposi amwalo ainai, ‘Paihowawa yada Bada imohegoꞌo uwahiyala na uveꞌovi.’
18 Awayauwedo teina yau nimaguwena yalelelelene, Yau Paulo. Na amnuwatu avivinigau ebeha yau vada paipaiyai yamiyamiya. Veꞌiꞌila alimiyai.