1 Yau Paulo na Timoti baidagu apaipaihowa Taulivahi Yeisu vehabana, yami leta aleleyawa omiu taumiya Pilipai Yeisu Besinana yana Yaubada yana bodao yo hinage yami taumugaiwo na Besinana yana taupaihowao maudoimiu alimiyai.
2 Aꞌawanoi Tamada Yaubada na yada Bada Yeisu Besinana yadi veꞌiꞌila yo yadi nuwadaumwali imiyamiya alimiyai. Paulo yana awanoi taumiya Pilipai vehabadi
3 Hauga teina Yaubada ainai yaꞌawa yauwedo, hauganane yanuwatuwuigomiu.
4 Na yayaliyaya vehabamiu yagu awanoiwo aidiyai.
5 Yo Yaubada ainai yaꞌawa yauwedo ama haguwo alimiyena alobalobaidi, wasa namwanamwana ana walomahalava abavetuwuni ainai ta wau.
6 Yo hinage yahanapui ebeha Yaubada yana paihowa namwanamwadi bada alimiyai ivetuwuniyaꞌo ta ibom mata iveꞌovi Yeisu Besinana yana ahubena mwalaꞌina ainai.
7 Yagu yaliyaya vehabamiu idumwalu wuwuna omiu nuwagu amvaiyaꞌo, ta omiu baidaguwao Yaubada ihaguhaguigita teina hauga vada paipaiyai yamiyamiya, yo ihaguhaguigita hinage wasa namwanamwana ana loꞌaleha, yo yana abawahiyala aidiyai.
8 Yaubada ihanahanapuigau neta Yeisu Besinana yana velauwena nuwanuwagu yavelauweomiu.
9 Na yaꞌawa awanoi vehabamiu ta yami velau namwanamwa imwalaꞌi, mayami hanapu yo nuwamasele maudoina.
10 Ta ainaena ginauli namwanamwadi amvesinuwaidi, eeta Besinana yana ahubena ainai mata mumugamiu dumwadumwaludi yo masemaseledi,
11 na yami paihowa namwanamwadi Yeisu Besinana yana wahiyalaena vehabamiu tomowa Yaubada hiwalo vetuvehaeyei yo hiꞌawa wasawasaei. Paulo yana talam Besinana ainai
12 Tauhiguwao, nuwanuwagu yo amhanapui ebeha vitaiwone teina bada yalobaidiꞌo ta aidiyena wasa namwanamwana iꞌaiyauya tomowa bagibagilidi aidiyai.
13 Ainaena dalava teina Sisa yana tauꞌalehao yo tomowa maudoidi bada hibenalenaꞌo ebeha Besinana vehabana himwamwauwigaune vada paipaiyai.
14 Yo hinage tahidao bodadi yagu miya vada paipaiyai hiꞌitayaꞌo, ta hinuwamotu yada Bada yana paihowa ainai, yo Yaubada yana walo hiwalowalo mahalava mayadi atepatu.
15 Tupwadi tauguguyao alomagigiliyena higuguguguya Besinana vehabana, na tupwadi neta nuwatuwu namwanamwa ainaena higuguguguya,
16 ta hiya hivelauwegau yo hihanapuigau neta vada paipaiyai yamiyamiya wasa namwanamwana ana veꞌita vehabana,
17 Na hesi tauꞌalomagigiliwone nuwanuwadi ta hiꞌabiye nuwavitaiyegau hauga teina vada paipaiyai yamiyamiya, eeta oyamaena Besinana wasana higuguguguyaei hibom yadi boda vehabana.
18 Besiwa, na Besinana wasana ana guguya mwalaꞌina vehabana yayaliyaliyaya, nuwana oyamaena bo walomoihaena.
19 Yo hinage yayaliyaya, wuwuna yahanahanapui neta Yeisu Besinana Aluꞌaluwana yana hagu ainaena, yo yami awanoi aidiyena, ebe hilivahigau teina miya vitai ainaena.
20 Hinage mayagu nuwatuwuhae ta nuwanuwagu mwalaꞌina ebeha havena yahinihinimaya, na hesi mayagu atepatu teina taꞌi ta hauga maudoina Besinana yehana yaꞌabiꞌabiye mwalaꞌi, nuwana yagu miya baleꞌuwai mayawahigu, bo nuwana yagu mwalowoi ainaena.
21 Moiha taꞌi, yagu miya baleꞌuwai neta Besinana baidagu, na hesi yagu mwalowoi ainai lauhepoi Besinana ainaena mata yalobai.
22 Ebe baleꞌuwai yamiyamiya yagu paihowao namwanamwadi Besinana vehabana himahamahalava, eeta nigele yayahanapui hava mata nuwanuwagu yavesinuwaeine.
23 Na ginauli bwau aidiyena adi vesinuwa aliguwai hivitai alili. Nuwanuwagu yo baleꞌu teina yalaugabaei ta Besinana baidagu amiyamiya, neta abayaliyaya mwalaꞌina.
24 Na hesi ilowoinanegau ta baleꞌuwai yamiyamiya yo ebe yahaguhaguigomiu.
25 Eena yahanapui moiha mata omiu baidaguwao tamiyamiya na yahaguigomiu ta amyaliyaya yami yemidi Besinana ainai vehabana,
26 yo hinage yagu laugwaipilewa alimiyai vehabana amyaliyaya mwalaꞌina, wuwuna Yeisu Besinana yana hagu alidai.
27 Amꞌita avivinigomiu ebeha yami paihowaena tomowa Besinana wasana hiꞌawa namwanamawaei, eeta yatau boꞌeyegomiu, bo nuwana ebe yamiyauyo, bada taꞌi wasamiu namwanamwana yabenabenalei ebeha mayami atetalam amtowotowolo wahiyala, na yami nuwatuwu ehebo ta amꞌaiꞌaipate wasa namwanamwana ana yemidi vehabana.
28 Havena hinage ammehemeheuhi ami alehao aidiyai. Teina wuwuna hibom hihanapui moiha ebe hisilahe, omiu mata livahi amlobai Yaubada ainaena.
29 Wuwuna Yaubada bada italamꞌo alimiyai ta Besinana ainai amyemiyemidi ta ibom hinage vehabana muyao mata amlobaidi.
30 Dova yagu loꞌaleha Besinana vehabana yo agu muyao amꞌitadiꞌo, na teina hauga ambenabenaledi, ta omiu hinage yami loꞌaleha yo ami muyao dova amlobalobaidi.
1 Howahowana Besinana iꞌabiye atepatugita, bo yana velauwena taꞌaiꞌaipate? Howahowana Aluꞌaluwa Veꞌahihi iveꞌauꞌaugeluwegita, yo ainaena tavelau namwanamwaegita yo taꞌatemuyamuyauyoigita?
2 Ebe dova, amvenuwatoyawa na amvelau namwanamwaegomiu, aluꞌaluwamiyena yo atemiyena amveꞌehebo ta ebe yami velau namwanamwana teina vehabana yayaliyaya moiha.
3 Havena amꞌaiꞌaiduma yo amnuwahaehae, na hesi amnuwadobi, yo ami geluwo yehadi amꞌabihinidi.
4 Havena ambom yami paihowa vehabana amnuwanuwatuwu na hesi ami geluwo yadi miya namwanamwa vehabana amnuwanuwatuwu.
5 Howahowana ebe yami nuwatuwuwo Yeisu Besinana yana nuwatuwu dova.
6 Iya Yaubada, na hesi nigele nuwanuwana ta yana vetauloina iꞌabi avivini,
7 aenaena Yaubada yana wasawasa ilaugabaei, na hilabahi baleꞌuwai, ta ivetaupaihowa ana oleya tomowa ita dova.
8 Hinage yana nuwadobi ainaena, ibom italamyowei ta imwalowoi aiwa lagalagana ainai.
9 Teina vehabana Yaubada Yeisu iꞌabihini na yehanane iꞌabihiniuyoi yeha maudoidi ewadiyai,
10 eeta yehanane taumiya galewa yo taumiya baleꞌu na taumiya bwebweso hinage, maudoida tapwagogo ainai,
11 yo taꞌawa moiha ebeha Yeisu Besinana ibom yada Bada, neta Tamada Yaubada tanoꞌowei. Masele taumiya baleꞌu vehabadi
12 Augeluwo, mwalona amꞌawa abi moiha na teina taꞌi alimiyena yamiya amwaha daodaoꞌo, na besiwa howola amꞌawaꞌawa abi iliꞌilimani, ta mayami meheuhi na mayami atehawawali ampaipaihowa ta ebe livahi namwanamwana ainai ammiya iliꞌilimani.
13 Yaubada iya atemiyai ipaipaihowa, ta ibom yana nuwatuwuwena amnuwanuwatuwu na ampaipaihowa.
14 Yami paihowa aidiyai amtalam ampaihowa, na havena amtaꞌwataꞌwata yo nuwana amꞌuluꞌulumiyai,
15 ta ainaena omiu Yaubada natunao namwanamwamiu yo masemaselemiu, eeta nigele teya yami yababa, na hesi taumiya baleꞌu yadi masele omiu, wuwuna hibom mumugadi guguyouna yo yababana.
16 Augeluwo, wasa namwanamwana amꞌabi avivini ta ainaena yawahi vateyai amlobai, na haugana Besinana ilau gwaipilema yayaliyaya, wuwuna nigele nuwagu yagu paihowao alimiyai yagabaedi.
17 Ebe agu alehao hiꞌoiye mwalowoigau, neta dova hipwaoliyegau yami yemidi vehabana, ta mata omiu baidaguwao tayaliyaya.
18 Ta ebe howahowana na omiu baidaguwo tayaliyaya toyawa.
19 Yanuwatuwuhae ebeha yada Bada Yeisu yana haguwena mata hauga iuꞌiuna ainai Timoti yavetamalaenawa ta wasamiu ivaiyama, eeta yabenalei na ebe yayaliyaya.
20 Timoti ibom agu tauhagune, na nigele teya yaiya iyamiyamiya ta ebe vehabamiu inuwatuwu iliꞌilimani.
21 Na agu tauꞌabihaguwo bagibagilidi hibom vehabadi hinuwanuwatuwu, na nigele Yeisu Besinana yana paihowa vehabana hiyanuwanuwatuwu.
22 Timoti amhanapuiyaꞌo neta towaho namwanamwana, ta iya dova natugu baidagu wasa namwanamwana vehabana aꞌaiꞌaipate.
23 Eeta haugana ebe agu loina yabenalei, nuwanuwagu na Timoti yavetamalenawa alimiyai.
24 Na yayemidi mata yada Bada yana hagu yalobai ta hauga iuꞌiuna taꞌi na yau hinage yalaowa alimiyai.
25 Teina hauga nuwanuwagu Epapilodaito yavetamalenawa ilau gwaipilewa alimiyai, ibom tahigu baidagu apaipaihowa, bada dova aꞌaleꞌaleha Yeisu Besinana vehabana. Epapilodaito mugai agu hagu alimiyena ivaiyamaꞌo,
26 na teina taꞌi iya nuwanuwana omiu, ta haugana yana lovala wasana ilaowa ta ambenalenaꞌo, inuwavitai moiha wuwuna omiu amꞌateꞌatehawawali yana lovala vehabana.
27 Bada ilovalaꞌo mwalaꞌina, na hesi Yaubada iꞌatemuyamuyaei, yo hinage yau iꞌatemuyamuyaegau wuwuna mata dova ta Epapilodaito imwalowoi na ainaena yanuwavitai moiha.
28 Ainaena nuwanuwagu mwalaꞌina yavetamalenawa na amꞌitauyoi mayana namwanamwa ta ebe amyaliyaya, eeta yagu nuwayababa iꞌovi.
29 Haugana imahalavawa yada Bada yehanaena amyogaei yami vadai mayami yaliyaya. Yo hinage tupwadi yada Bada yana taupaihowao, ebe hilaowa alimiyai dova amveꞌahihiyedi.
30 Moiha Epapilodaito muhamuhana na Besinana yana paihowa ainaena imwalowoi, wuwuna omiu nigele howahowamiu yo amhaguigau, eeta iya italam ta ihahaguigaune neta vehabana ilolovalane.
1 Tahiguwao, yada Bada vehabana amyaliyaya. Mwalona nuwatuwu teina yaleleyawaꞌo, na teina hinage nuwanuwagu ebeha yaleleuyoi, yami miya namwanamwa vehabana.
2 Amꞌita avivinigomiu tauyababao yadi mumuga dova edewa, hibom hapi ꞌwapidiyai ana tauvai bodadi aidiyena.
3 Na hesi ita ada hapi atedai, ta Yaubada ainai tapwagopwagogo Aluꞌaluwana ainaena, eeta Yeisu Besinana ibom tawalowalo vetuvehaeyei, na nigele ginauli baleꞌu ainai tayayemiyemidi, neta ainaena ita hapi moiha bada tavaiyaꞌo.
4 Yau baleꞌu mumugana aidiyena yanuwahaehae, wuwuna yau hinage tomowa tupwadi yamwalaꞌi gabaedi.
5 Yau taꞌi Isileli towahona moiha, na yagu huhu Beniyamina, ta agu ulutubu Hibulu na ꞌwapiguwai hihapigau yagu tubui ana ahubena 8 ainai, ta taupwaoliwo yadi loinao yamulita iliꞌilimanidi dova Palisi yadi boda.
6 Na tapwalolo ainaena yaꞌaiꞌaipate mwalaꞌina Yaubada yana bodao adi abiyemuya vehabana, na loina ainai nigele teya Mosese yana laugagayo yayahoꞌe.
7 Na hesi teina mumugaone bada yaꞌawa ginauli awaꞌawawaediꞌo, wuwuna Besinana ibom ainai yatalamwegauꞌo.
8 Moiha, yagu Bada Yeisu Besinana ana hanapu iya ginauli mwalaꞌi alilina, na ginauli baleꞌuwai imwalaꞌi gabaedi, eeta mumugawone teina nigele nuwagu, ta Yeisu ibom vehabana ginauli maudoina yamwauvehuludi yo yaꞌawa yababaedi wuwuna nuwanuwagu Besinana taꞌi.
9 Yo hinage nuwanuwagu Besinana ainai yamiyamiya nigele ebeha yabom yagu mumuga dumwaluwena bo Mosese yana loinao aidiyena, na hesi yagu yemidi Besinana ainai vehabana. Neta mumuga dumwaluna Yaubada ainaena na imohemohegita yada yemidi Besinana ainai vehabana.
10 Nuwanuwagu hinage Besinana yahanapui yo yana towolouyo ana wahiyala yalautowoi, ta ana muyao baidagu aveꞌavaꞌavalaedi, na hinage yana mwalowoi yaveꞌaoꞌaonaei,
11 ta ainaena ebe mwalowoiyena yau hinage yatowolouyo.
12 Nigele ebeha towolouyo bada yalobaiyaꞌo, bo nuwana yagu mumugao maudoidi hinamwanamwaꞌo na hesi teina ebeha yaꞌabi avivini. Ginauli teina vehabana Yeisu Besinana bada iꞌabi avivinigauꞌo.
13 Tahiguwao, nigele yayawalowalo ebeha bada yaꞌabi aviviniyaꞌo, na hesi yagu nuwatuwu ehebo taꞌi, ainaina ginauli dagelaguwai yanuwagabaediꞌo ta hava meheguwai vehabadi yaꞌaiꞌaipate wahiyala,
14 neta abamasiwa, Yaubada yana yoga haehaena ana maiha galewai Yeisu Besinana ainaena.
15 Eeta maudoida teina dova tanuwatuwu toyatoyawa ebe yada nuwatuwu bada hihunaꞌo. Na ebe yami nuwatuwu vagadi, ginauli teina vehabadi howola abo Yaubada iveꞌitaedi alimiyai.
16 Na hava talobalobaidi ebeha taꞌabi avivini iliꞌilimanidi.
17 Tahiguwao, maudoimiu amveꞌaoꞌaonaegau, na ebe yaiyadiwo yadi mumuga dova yau, amvinuvinunuidi ta omiu amvemumuga dova.
18 Na hesi tomowa bagibagilidi yadi mumuga ainaena Besinana yana mwalowoi aiwa lagalagana ainai hiveꞌalehaei. Hiya mwalona yawalo mahalavaediꞌo alimiyai, na teina hauga hinage mayagu dou yawawalouyo tauyababaone vehabadi.
19 Hibom yadi abaꞌovi ainai mata hisilahe, wuwuna yadi abayemidi diyadi ibom vehabana, yo ginauliwo abahinimaya hiwalowalo vetuvehaeyedi, wuwuna ginauli baleꞌu taꞌi nuwanuwadi.
20 Na ita hesi yada dalava galewai, ta ainaena ada Taulivahi, ibom yada Bada Yeisu Besinana, howola abo iwuyoma, eeta vehabana tahaꞌwahaꞌwa.
21 Na haugana iwuyoma, mata tauda tapitapiyadi imwau gwaipiledi, ta tauda wahiwahiyaladi yo masemaseledi dova ibom taunane. Yana paihowa teina ibom yana wahiyalaena, wuwuna howahowana yo ginauli maudoidi aidiyai ivetauloina.
1 Tauhiguwao, yagu velau alimiyai wuwuna omiu yagu abayaliyaya yo yagu abanoꞌo, eeta yagu nuwatuwu mwalaꞌina ebe yaꞌitauyoigomiu. Amtowolo wahiyala yada Bada ainai. Guguya
2 Omiu waiwaihiu, Yuwodiya na Sinitiki yaꞌawanoi alimiyai ebeha amveꞌawa auꞌaugeluyo, yada Bada yana nuwatuwu teina dova.
3 Hinage owa augelu moiha, yaꞌawanoi ta waiwaihiu teina uhaguidi, wuwuna mwalona hibom baidaguwao apaipaihowa toyawa wasa namwanamwana ana walomahalava vehabana, yo hinage Kalemeniti na tupwadi agu tauhaguwo baidamaiyao apaipaihowa, hiya yehadi yawahi bukina holanai leleleledi.
4 Hauga maudoina amyaliyaliyaya yada Bada vehabana, na yawalouyo ebeha amyaliyaya taꞌi.
5 Howahowana yo tomowa maudoidi yami alamaꞌiꞌita hihanahanapui, wuwuna mata yada Bada iwuyouyoma.
6 Havena teya hava vehabana amꞌateꞌatehawawali, na hesi amꞌawa yauwedo ginauli maudoidi vehabadi Yaubada ainai, na ampwagopwagogo, ta yami nuwatuwuwo vehabadi amꞌawaꞌawanoi.
7 Ta Yaubada yana nuwadaumwali ainaena iꞌabiye yaliyayagomiu. Na yana nuwadaumwaline nigele howahowana tanuwamaseleyei eeta ainaena Yeisu Besinana baidamiu atemiu yo yami nuwatuwu himiya namwanamwa.
8 Tahiguwao, teina yagu walo ana higa, neta ginauli moihadi vehabadi amnuwanuwatuwu: Ginauli namwanamwadi, yo dumwadumwaludi, yo masemaseledi, yo adi oleya namwanamwadi, yo venuwavaivaidi, ta hava ebe namwanamwa aidiyai, vehabadi amwalo vetuvehai.
9 Omiu amveꞌaoꞌaonaegau, yagu paihowaone amꞌiꞌitadine aidiyena, yo yagu walowone aidiyena na yagu veꞌitaone ambebenaledine ta amhanapuidiꞌo. Ainaena Yaubada mayana nuwadaumwali baidamiu ammiyamiya. Taumiya Pilipai yadi velau Paulo ainai
10 Yada Bada iveyaliyayagauꞌo wuwuna teina hauga amꞌatemuyamuyaegauꞌo. Mwalona nuwanuwamiu amhaguigau, na hesi nigele teya amwaha.
11 Ta havena yaꞌuluꞌulumiyai yagu miya vitai mwalona vehabana, wuwuna bada yahanapuiyaꞌo ta howahowagu yagu miyamiya maudoina aidiyai yayaliyaliyaya taꞌi:
12 Hauga miyavitai bo yaliyaya; hauga mahuli bo vahali; hauga vewasawasa bo vewewelohe.
13 Howahowagu miya maudoidi aidiyai ebeha yayaliyaya, wuwuna Besinana ibom baidagu ta ainaena iꞌabiꞌabiye wahiyalagau.
14 Na yagu miyavitai teina bada amꞌabiye malamalaiyaꞌo yami haguwena, ta vehabana yaꞌawa yauwedo mwalaꞌina alimiyai.
15 Omiu taumiya Pilipai amhanapuiyaꞌo wasa namwanamwana ana walomahalavao mugai alimiyai, na haugana Masedoniya yalaugabaei, nigele teya Yaubada yana bodao tobwatobwa yo aiꞌai ainaena hiyahaguhaguigau, na omiu hesi taumiya Pilipai ambom amhahaguigaune.
16 Hauga mugai Tesalonaika ainai yamiyamiya amhaguigauꞌo na mulitai hinage amhahaguyoigaune.
17 Yagu walo teina nigele ebeha nuwanuwagu aiyauya awawa ammohemohegau, na hesi ebeha yami aiyauya ainona alimiyai imwalaꞌi ami hagu moiha vehabana.
18 Na yami velauwa Epapilodaito ivavaiyamawa maudoina yalobaiyaꞌo ta imwalaꞌi alili bada dova yami pwaoliwo Yaubada ainai amgabudiꞌo ta panena namwanamwana ibenalediꞌo ta vehabana iyaliyaya.
19 Eeta yagu Yaubada yami venuwao maudoidi imohemohegomiu, neta ibom yana wasawasa ibagibagili alili Yeisu Besinana yana paihowa aidiyena.
20 Ainaena Tamada Yaubada tanoꞌowei ta nigele yana abaꞌovi. Moiha.
21 Yagu awayauwedo Yeisu Besinana yana Yaubada yana bodaone maudoidi aidiyai, yo tahiguwone teinai baidaguwao amiyamiyane hinage yadi awayauwedo alimiyai,
22 yo Yaubada yana bodaone Sisa yana vadai hipaipaihowane, yo hinage Yaubada yana bodao maudoidi yadi awayauwedo alimiyai.
23 Yada Bada Yeisu Besinana yana veꞌiꞌilaena aluꞌaluwamiu himiya namwanamwa.