1

¹ Yauwedowo omiu Yeisu Besinana ana tauyemidiwo, yami leta teina yau Paulo aliguwena. Yaubada yana nuwatuwuwena yavetauyewasa Yeisu vehabana.

² Tamada Yaubada yo Bada Yeisu Besinana yadi veꞌiꞌilaena na yadi nuwadaumwali himiya vahaligomiu. Abihagu Besinana ainaena

³ Augeluwo taꞌawa yauwedo Yaubada ainai, iya yada Bada Yeisu Besinana Tamana, na Besinana ainaena aluꞌaluwada ivelauwedi na wasawasa galewa maudoina imohegitaꞌo.

⁴ Wuwuna mwalona howola baleꞌu nigele iyayemasele, na ivesinuwa mugaiyegita ta ebeha taveboda ehebo Besinana baidada, yo Yaubada mehenai mumugada masemaselena, na nigele ada abaveꞌewa.

⁵ Ainaena Yaubada nuwanuwana na yana velauwena ivesinuwaegita na Yeisu Besinana ainaena iꞌawa natunaegita,

⁶ na Yaubada tanoꞌowei teina veꞌiꞌila namwanamwa alilina vehabana, iya Natuna moiha imohe awawaigita.

⁷ Na natunane ꞌwahinanaena ilivahigita yada pwanoli aidiyena, ta Yaubada inuwahamuidi, neta iya yana veꞌiꞌila mwalaꞌi alilina imohegita. Na ana mwalaꞌi nigele ana abalive.

⁹ Hinage nuwamasele yo hanapu imohegita, eeta ibom yana nuwatuwu dawadawanidi tahanahanapuidi, wuwuna yana waloyemidi miyamiyana ebeha Besinana ainaena hagu imohegita.

¹⁰ Yana waloyemidi teina ebeha hauga yana abaꞌovi ainai Besinana ginauli maudoidi imwauꞌahaidi na hiyemala ehebo, neta ginauli galewai yo hinage ginauli baleꞌuwai maudoidi imwauꞌahaidi iya mehenai.

¹¹ Na Yaubada ibom yana nuwatuwuwena iloiloina, ta yana paihowa maudoina ipaipaihowaidi, na inuwatuwu mugai vehabada ta ivesinuwaegita na iloinaegita Besinana yana boda vehabana,

¹² ebeha tauyemidi mugamugaimai Besinana ainai yana wasawasa anoꞌowei.

¹³ Na hinage omiu Besinana ainaena wasa moiha na namwanamwana, neta ami livahi vehabana, ambenalenaꞌo, eeta iya amyemidiyei na hinage Aluꞌaluwa Veꞌahihiwa iwalo yemidiyenaꞌo ta imohegomiuꞌo,

¹⁴ iya dova ilaꞌilala, ta ainaena tahanapui ebeha ada maiha galewai Yaubada ainaena howola abo talobai, na ainaena yana wasawasa tanoꞌowei. Paulo yana awanoi

¹⁵ Hauga maudoina aidiyai omiu vehabamiu yaꞌawaꞌawa yauwedo Yaubada ainai, na yaꞌawaꞌawanoi vehabamiu, wuwuna wasamiu yabenalenaꞌo neta Bada Yeisu amyemidiyenaꞌo, na hinage ana tauyemidiwo maudoidi atemiyena amvelavelauwedi.

¹⁷ Na yagu awanoi vehabamiu ebeha yada Bada Yeisu Besinana yana Yaubada, iya Tamada na Tauwasawasa mwalaꞌina, iꞌabiye hanapugomiu, na iya amhanapui iliꞌilimani.

¹⁸ Yo hinage atemiyena ginaulidine namwanamwadi vehabadi iyogaegomiuꞌo mata amhanapuidi, yo amyemidiyei ebeha howola abo amlobaidi. Ta ebe amhanapuidi yana aiyauya mwalaꞌina yana tomowao ita alidai, neta iya yana wasawasa ainaena.

¹⁹ Na hinage mata amhanapui Yaubada ipaipaihowa wahiyala ita ana tauyemidiwo vehabada.

²⁰ Yana wahiyalane iveꞌitaei Besinana ainaena, haugana mwalowoiyena iꞌabiye towolouyoi, na yana abamiya galewai imohei, Yaubada nima tautuwanaena.

²¹ Ainaena Besinana tomowa dawadawanidi yadi loinao maudoidi imwalaꞌi gabaedi, nuwana ꞌtausagenawasao yadi loinao bo aluꞌaluwa yababadi yadi loinao, bo hiya yehadi mwalaꞌina yadi loinao, teina hauga yo hauga hilalaoma aidiyai.

²² Wuwuna Yaubada Besinana ana loina imohei ginauli maudoidi ebeha iloinaedi, na tauyemidiwo ita hinage maudoida iloiloina alidai.

²³ Wuwuna tauyemidiwo ita dova Besinana taunao, ainaena Besinananane iꞌoiye mwauwigita dova ginauli maudoidi iꞌoiye mwauwidi.

2

¹ Omiu mwalona dova mwalomwalowoimiu yami awasewa yo yami yababao aidiyena.

² Na mwalona baleꞌu mumugana yababadi ampaipaihowaidi, wuwuna aluꞌaluwa yababadi hiya yadi bada yana wahiyala alonai ammiyamiya yo amꞌawaꞌawa abiyei, eeta neta aluꞌaluwane, iya tauwalo sebasebaiwo himulimulitaei ta nuwadiyai imiyamiya.

³ Mwalona hinage ita dova hiya na tauda yana nuwatuwu dawaniwo tamulimulitaedi, ta hava ita yada nuwatuwu tapaipaihowaidi. Ainaena Yaubada imodiꞌiniyegita wuwuna mumugada yababadi, dova taumiya baleꞌu maudoidi.

⁴ Ainaena yada lauhapuliwone hiꞌoiꞌoiye mwalowoigita, na hesi Yaubada yana atemuyamuya imwalaꞌi alili yo yana veꞌiꞌila mwalaꞌina alidai na ainaena iꞌabiye towolouyoigita, Besinana baidada. Yaubada iya yana velau ainaena ilivahigita,

⁶ na hinage Besinana baidada iꞌabihinigita, na galewa yana wahiyala imohegita, ta Yeisu Besinana yana besinanaena taloiloina.

⁷ Teina ipaihowai na ebeha hauga ilalaoma aidiyai yana veꞌiꞌila mwalaꞌi alilina iveꞌitaei, neta yana atemuyamuya Yeisu Besinana ainaena.

⁸ Moiha, yana veꞌiꞌila ainaena ilivahigomiuꞌo yami yemidi vehabana, na nigele ambom yami paihowa aidiyena, na hesi Yaubada yana aiyauya ainaena.

⁹ Yada abihagune nigele ebeha yada paihowa ainaena tayalobai, mata dova ta tanuwahaehae ebeha ita bada yada wahiyalaena.

¹⁰ Na hesi Yaubada iya yana paihowa atedai iꞌatububunidiꞌo Yeisu Besinana ainaena, na ebeha tapaipaihowai paihowaone namwanamwadi Yaubada mugamugaina ivesinuwanediꞌo vehabada. Besinana yehanaena taveboda ehebo

¹¹ Omiu taumiya ganamuli na nigele Yudeya tomowadiyao na nigele Yudeya, eeta hiya Yudeya yadi veꞌiveꞌilala neta ꞌwapi ana hapi tomowa nimadiyena nigele amyavaivai, ta hihinahinaligomiu.

¹² Mwalona omiu nigele Besinana yana boda, ainaena ammiya bala daodao, ta Isileli yana abaloina ammiya tulutuluhaei na Yaubada yana waloyemidi iwawalo mahalavaeiwa, nigele habuluna amyaꞌita lobai. Ainaena nigele amyaꞌita haeyei, wuwuna Yaubada nigele amyahanapui na nigele amyanuwanuwatuwui.

¹³ Mwalona ammiyawahi, na teina haugane Yeisu Besinana imwalowoi na ꞌwahinana isagena vehabamiu eeta ilauvaigomiu ta amlaomaꞌo vahalinai.

¹⁴ Mwalona tamiya tulutuluhauyoigita ta ai Yudeya na omiu nigele Yudeya na teina haugane Besinana yada miyawahei ihoꞌeyaꞌo na imwauwi iliꞌilimanigita daumwali alonai ta ita huhu ehebo.

¹⁵ Iya tauna ana ꞌoiyemwalowoi ainaena Mosese yana laugagayowo itauꞌauꞌauhigomiu maudoidi ibohoidi, eeta ilau ahaigita ta taveboda ehebo iya baidada, na nigele dova mwalona boda bwau himiyamiya, na teina hauga tamiya daumwali.

¹⁶ Hinage yada wahei aidiyena ilivahigita ta ivaigitama Yaubada ainai yo iya baidada taꞌawa auꞌaugeluyoꞌo, ta yana paihowane, iya tauna ehebo ainaena aiwa lagalaga ainai hiꞌoiye patu, ta veꞌalehaone hiꞌoꞌovine.

¹⁷ Ainaena Yeisunane ilaowa na daumwali iguguyaei omiu taumiya amwaha daodao alimiyai, yo ai hinage vahalinai amiyamiya alimaiyai.

¹⁸ Eeta iya ainaena, omiu yo ai Aluꞌaluwa ehebo ainaena ilauvaigita Tamada ainai.

¹⁹ Omiu mwalona taumanao ammiya wahiꞌo, na hauga teina hesi bada amvetaniwaga toyawaꞌo Yaubada yana bodao baidamiyao, na amveboda ehebo Yaubada yana huhu ainai.

²⁰ Omiu hinage hiꞌabigomiu, eeta ita dova vada, na Yeisu Besinana iya yada wahuwahu, iya ainai logidi mwalaꞌidi neta Yeisu ana tausagenawasao yo tauwalo mahalavao,

²¹ na ainaena ita maudoida vada ana ginaginauli, na Yeisu iꞌabigita ta tayevada mwalaꞌina na veꞌaveꞌahihida.

²² Na omiu nigele Yudeya ta hesi bada amyemala ginaginauliꞌo, Yaubada Aluꞌaluwana yana abamiya.

3

¹ Teina vehabana yau Paulo yapwagogo na yaꞌawaꞌawanoi Yaubada ainai, iya yagu paihowa imohegau omiu nigele Yudeya alimiyai, na Yeisu yana paihowa vehabana vada paipaiyai himwauwigauꞌo ta yamiyamiya.

² Mwalona yagu paihowa wasana ambenalenaꞌo, ta yagu paihowane Yaubada imohegau, na ebeha iya yana veꞌiꞌilaena omiu ami hagu amlobai.

³ Na yagu paihowa teina hanapu mwalona dawadawanina vehabana, na hesi ana nuwamasele Yaubada bada iveꞌitagauꞌo, dova mwalona yaleleyawa yami leta ubwaꞌubwana ainai.

⁴ Na ebe amvahili mata amꞌita lobai ebeha Besinana ana hanapu dawdawanina bada yahanapuiyaꞌo.

⁵ Na hanapunane yaso mugamugaidi nigele hiyahanapui, eeta teina taꞌi Aluꞌaluwa Veꞌahihi iꞌabiye mahalava yana tauyewasao yo tauwalo mahalavao alimaiyai.

⁶ Hanapu dawadawanina ainaena omiu nigele Yudeya howahowana na Yaubada yana livahi amlobai, ai Yudeya dova. Yana livahi mwalona iwalo yemidiyenaꞌo, eeta Yeisu Besinana wasana ainaena talobaiyaꞌo ta taveboda eheboꞌo.

⁷ Na Yaubada yana wahiyalaena yo yana velauwena paihowa teina imohegau, ta ebeha wasa namwanamwanane Besinana vehabana yawalo mahalavaei.

⁸ Na yau dova wewelohe tauyemidiwo holadiyai, na hesi Yaubada yana veꞌiꞌilaena paihowa teina imohegau, na omiu nigele Yudeya alimiyai Besinana wasana yaguguyaei, ta ainaena yana wasawasa mwalaꞌi alilina amꞌita lobaidi.

⁹ Yo hinage tomowa maudoidi hihanapui ebeha Yaubada iya ginauli maudoina adi tauyemasele, na hauga daodaona aidiyai yana nuwatuwu idawani, ta wau yagu paihowaena iꞌabiye mahalavayaꞌo.

¹⁰ Eeta Yaubada yana waloyemidi ebeha ita yana boda alidaena yana hanapu vagana yo vagana iꞌabiye mahalavadi galewa ana tauloinao yo tauwahiyalao dawadawanidi aidiyai.

¹¹ Teina Yaubada yana nuwatuwu mwalona ta ana higa wau, na teina taꞌi iꞌabiye mahalavayaꞌo yada Bada Yeisu Besinana ainaena.

¹² Besinana bada tayemidiyenaꞌo eeta taꞌatepatu na baidada taluwu Yaubada mehenai taꞌawaꞌawanoi ainai.

¹³ Ainaena agu muyao teina vehabamiu havena vehabana atemiu hitapitapiya, na hesi amhanapui ebeha agu muyaone teina omiu yami vewasawasa vehabana. Besinana yana velau mwalaꞌina

¹⁴ Teina wuwuna yau aetutuligu yatauyoudi Tamada mehenai.

¹⁵ Iya huhu maudoidi galewai yo baleꞌuwai wuwudi.

¹⁶ Na yaꞌawaꞌawanoi ainai ta ebeha yana wasawasa yo yana wahiyala italamwei alimiyai, ta ebe iya Aluꞌaluwana atemiu iꞌabiye wahiyaladi.

¹⁷ Na hinage yami yemidiyena Besinana imiyamiya atemiyai, ta mumugamiu yo yami miya maudoina ana wuwu moihana velau taꞌi.

¹⁸ Ainaena taumaselewo maudoidi baidamiyao howahowamiu Besinana yana velau amhanapu iliꞌilimani neta ana tabataba, yo ana daodao, yo ana hae, yo ana dobi, nigele ana live. Besinana yana velau imwalaꞌi alili, yo hinage Yaubada iya tauwahiyala moiha yana mumugaena iꞌoiye mwaugomiu.

²⁰ Moiha, yana wahiyala holadai ipaipaihowa, ta ebe hava vehabana taꞌawanoi mayada yemidi, iya howahowana na ipaihowai, maꞌana yemutulai mwalaꞌina vehabada.

²¹ Ainaena yana boda maudoida Yeisu Besinana yehanaena tanoꞌovateyai, yaso ta yaso hilalaoma hauga maudoina aidiyai. Moiha.

4

¹ Yau Bada yana taupaihowa paipaina, yagu nuwatuwu ebeha yami mumugao hinamwanamwa ta dova iya iyogaegomiu yana mumuga.

² Na mayami nuwadobi, yo mayami atetalam, yo mayami alamaꞌiꞌita, na ehebo ehebo amvelauyoigomiu, yo amnuwatuwu avivini ami geluwo aidiyai.

³ Na amꞌaipate wahiyala, ta ebe Aluꞌaluwa Veꞌahihi iꞌuinigomiu, ta mayami nuwadaumwali ammiya yaliyaya.

⁴ Moiha ita bada ehebo, Aluꞌaluwa Veꞌahihi hinage ehebo taꞌi, ta iyogaegita omiu yo ai, na tanuwanuwatuwu ada livahi ehebo aꞌava hauga ilalaoma vehabana.

⁵ Yada Bada hinage ehebo taꞌi, yada yemidi ehebo taꞌi, yada bapitaiso hinage ehebo taꞌi.

⁶ Tamada Yaubada ehebo taꞌi, iya ginauli maudoidi ewadiyai, na hinage alidai imiyamiya.

⁷ Na Besinana yana wasawasa ainaena ada yau iꞌaiyauya.

⁸ Teina vehabana Buki Veꞌahihi yana walo, iwalo:

“Haugana ihae ewai ana alehao iwahiyala gabaedi, na tomowa iꞌaiyauyanei adiyau.”

⁹ Walo teina ebeha “ihae galewai”, na vedova? Nigele iyabom iyahae na hesi iꞌaitulu baleꞌu holaꞌalilinai.

¹⁰ Na iya tauꞌaitulune ihae ta galewa ihae gabaei ewai, ainaena iya tupwa maudoidi aidiyai imiyamiya na iloiloina.

¹¹ Na yana aiyauyane teina dova, ebeha tupwadi tomowa tauyewasao, na tupwadi tauwalo mahalava na tupwadi tauguguya na tupwadi taumugai na tupwadi tauveꞌita.

¹² Na maudoida yada paihowa ehebo ehebo neta yana boda ada hagu vehabana na ebeha tawahiyala, Besinana bodana yana mwalaꞌi vehabana.

¹³ Na maudoida tayemidi ovi, na hinage Yaubada Natuna tahanapui mayada mumuga hunadi, dova Besinana yana mumuga hunana, na namwanamwana maudoina.

¹⁴ Teina ainaena heda mumugana alidaena talaugabaidi, wuwuna mwalona yada hanapu tapitapiyana ainai veꞌita vagadi yo vagadi hiꞌabiꞌabiye nuꞌuvigita, neta tupwadi tauꞌoyama yadi veꞌita amꞌamnadi yo yababadi aidiyena.

¹⁵ Na hesi ilowoinanegita na velauwena tawalowalo moiha, eeta yada mumuga maudoidi himwalaꞌi uluꞌuluda Besinana yana mumuga dova.

¹⁶ Wuwuna ita Besinana taunao, na yau vagadi yo vagadi imohegita ebeha ta tubweuyoidi yo tavehaguhaguyoigita velauwena na tawahiwahiyala. Mumuga miyamiyana na mumuga vauvauna

¹⁷ Teina hinage Bada yehanaena yaguguya alimiyai ebeha yami mumuga taumiya ganamuli dova amlaumwauwi, wuwuna yadi nuwatuwu awaꞌawawa aidiyena.

¹⁸ Yadi hanapu higuguyou, na nigele Yaubada yawahina aidiyai iyamiyamiya, eeta yadi uluꞌulu yaiya aidiyena bada talinadi ituiꞌo.

¹⁹ Ainaena bada hiyababa aliliꞌo, ta hitalamwedi mumuga meheꞌayo aidiyai, na mumuga biꞌibiꞌidi maudoidi nuwadi ivai.

²⁰ Na omiu Besinana yana mumuga bada amhanapuiyaꞌo ebeha vagana.

²¹ Wuwuna mwalona amwaha moiha ambenalenaꞌo ta Yeisu vehabana hiveꞌitagomiu.

²² Ainaena mumuga miyamiyana amtaꞌwataꞌwataedi, neta paihowadine mwalona ampaipaihowaidi, hauganane nuwadawaniwo hiꞌabiꞌabiye yababagomiu moiha,

²³ na hesi howahowana yami nuwatuwuwo yo atemiu hivauvauyo.

²⁴ Ta ainaena mumuga vauvauna amvai, Yaubada yana mumuga dova, wuwuna iya atedai mumuga dumwadumwaluna yo masemaselena imwauwiyaꞌo.

²⁵ Ainaena oyama amtaꞌwataꞌwataei na maudoimiu amwalowalo dumwalu ehebo ehebo alimiyai, wuwuna maudoida Besinana tauna yaunao.

²⁶ Na ebe ammodiꞌini, havena ammumuga yababa, na hesi amtowoi na amnuwadaumwali mwayamwayau.

²⁷ Havena Tomodulele yana hawahawaga ammohemohei ta ivetauloina alimiyai.

²⁸ Tauꞌaivavali ilowoinanedi na hilaumwau, na hesi ginauli namwanamwadi nimadiyena hipaihowaidi, ta paihowanane ana maiha ainaena hagu himohemohedi tauwewelohe aidiyai.

²⁹ Havena hinage teya walo yababana amꞌataꞌataidi, na hesi walo namwanamwa aꞌavadi tomowa adi hagu vehabana, hava hauga ehebo ehebo ana lowoinana vehabana amꞌauꞌaubabada, ta ainaena yaiyadiwo hiya hibenalegomiu yami aubabadaena mata hagu hilobai.

³⁰ Havena Aluꞌaluwa Veꞌahihi nuwana amꞌabiꞌabiye yababa, wuwuna Aluꞌaluwa Veꞌahihinane dova veꞌiveꞌilala alidai, ebeha howola abo ada abiye vauvau talobai.

³¹ Na hinage yababaone teina dova amtaꞌwataꞌwataedi: walo abelena, modiꞌini, awapaꞌipaꞌiꞌi, manini, awayabayababa, na hinage walo hinahinali,

³² Hesi amvehaguhaguyoigomiu, yo amnuwahegoya ta ami geluwo yadi yababa amnuwahamuidi ehebo ehebo ainai, dova Yaubada yami yababao Besinana ainaena inuwahamuidiꞌo.

5

¹ Yaubada yana velauwena bada iꞌawa natunaegomiuꞌo, ainaena iya yana mumugane amveꞌaoꞌaonaei.

² Hinage amvelavelauyoigomiu dova Besinana yana velaune, ta italamweuyoi na ivetaupwaoli Yaubada ainai ita vehabada ta imwamwalowoine dova pwaoli panena Yaubada ibenalei ebeha namwanamwana.

³ Omiu Yaubada ana tauyemidiwo, ainaena ilowoinanegomiu na pwanoli yo meheꞌayo yo wasawasa ana nuwalele amlaugabaidi, na havena vehabadi hava teya amwalowalowei.

⁴ Hinage havena mumuga biꞌibiꞌidi amꞌataꞌataidi yo walo awaꞌawawa amꞌataꞌataidi, yo walo talawahi wuwuna walodine nigele adi lowoinana holamiyai, na hesi yami walowena Yaubada amwalo vetuvehaeyei.

⁵ Moiha, tauyababa nigele howahowana hiluwu Besinana yo Yaubada yadi abaloina ainai, dova hiya taupwanoli yo taumeheꞌayo yo tauꞌaiduma, wuwuna tobwatobwa ana nuwalele ainona teina, ebeha yada yemidi tamwauwi tobwatobwa aidiyai, na nigele Yaubada ainai. Masele vehabana

⁶ Mumuga teina vehabadi Yaubada loina ana tauhoꞌewo imodiꞌiniyedi, eeta havena teya yaiya yana walo awaꞌawawaena iꞌoyaꞌoyamaegomiu.

⁷ Na hinage havena loina ana tauhoꞌewo baidamiyao amꞌawaꞌawa auꞌaugelu.

⁸ Wuwuna omiu guguyou mwalona ainaena bada amgeyoꞌawamaꞌo Bada yana masele ainai, eeta masele mumugadi ampaipaihowaidi.

⁹ Ta mumugaone namwanamwadi yo dumwaludi yo moihadi himahamahalava masele ainaena.

¹⁰ Na hinage hava yada Badane nuwanuwana amtowoi ta amhanapuidi na ampaihowaidi.

¹¹ Na guguyou ana paihowa awaꞌawawa aidiyena amdena, ta amveꞌitadi ebeha yababadi.

¹² Moiha taꞌi abahinimaya, ebe hiya yadi paihowa dawadawanidi vehabadi taꞌauꞌaubabada.

¹³ Na masele ana taupaihowa mata yababao iꞌabiye mahalavadi.

¹⁴ Wuwuna masele ginauli biꞌibiꞌidi mata iꞌabiye mahalavadi ta ainodi tahanapuidi. Teina vehabana na hiꞌauꞌaubabada na hiwalo:

“Owa tauꞌenoꞌeno, mwalowoiyena utowolo ta Besinana maselena imaseleigo.”

¹⁵ Ilowoinanegomiu na yami mumuga amꞌita iliꞌilimanidi na havena ampaipaihowa awaꞌawawa, na hesi amhanapui iliꞌilimani.

¹⁶ Havena yami hawahawaga amgabagabaei, wuwuna teina taꞌi hauga yababa alilina.

¹⁷ Ainaena havena amyauyaule, na hesi nuwamiu imasele, hava Yaubada dova yana nuwatuwu vehabamiu.

¹⁸ Havena weꞌaha wahiwahiyalana ainaena amnumanuma yauyaule, neta ginauli abasilahe, na hesi Aluꞌaluwa Veꞌahihi iꞌoiye mwaugomiu.

¹⁹ Na amwaliwali maꞌami geluwo, wali tapwalolo, yo Sam walinao, yo hinage walibui aidiyena, mayami yaliyaya atemiyena amwali yada Bada ainai.

²⁰ Na hauga maudoina amꞌawaꞌawa yauwedo ginauli maudoidi vehabadi, yada Bada Yeisu Besinana yehanaena Tamada Yaubada ainai. Hiya tawatawaholadi adi loina

²¹ Yami veꞌahihi Besinana ainai dova hinage omiu ambom amveꞌahihiyuyowegomiu.

²² Omiu waiwaihiu tawatawaholamiu mwanemiyao yadi walo amveꞌahihiyedi, dova yami veꞌahihi Besinana ainai.

²³ Wuwuna waihiu ana taumugai neta mwanena, dova Besinana ita yana boda ada taumugai na ada Taulivahi, na ita dova tauna yaunao.

²⁴ Ainaena ita Besinana yana boda ta tamulitaei, dova hinage waiwaihiu mwanediyao yadi nuwatuwu himulimulitaedi.

²⁵ Tautawahola towatowaho ilowoinanegomiu na mwanemiyao amvelauwedi, dova Besinana yana boda ivelauwegita, eeta iya italamyowei ta imwalowoi vehabada.

²⁶ Ada abiye masele vehabana, neta yada yababa ana abaꞌuwa weꞌahana yana walo ainaena.

²⁷ Ainaena ita mata iꞌita lobaigita yana boda namanamalina, na nigele ebeha biꞌi bo hava yababana alidai, na hesi maudoina bada namwanamwana, na vauvauna.

²⁸ Neta dova towatowaho ilowoinanegomiu na mwanemiyao amvelauwedi, omiu taumiu dova. Wuwuna ebe yaiya mwanena ivelauwei, neta ibom bada ivelauyowenaꞌo.

²⁹ Wuwuna nigele teya hinage tomowa ibom tauna ainai iyaveꞌaleha, na hesi iꞌita avivini na ana aiꞌai imohei tauna ana hagu vehabana, dova Besinana yana boda ita iꞌita avivinigita.

³⁰ Eeta ita iya tauna yaunao.

³¹ Yaubada yana Buki iwalowei:

“Towaho tamana yo hinana ilaugabaidi na mamwanena himiya ehebo, dova tau ehebo taꞌi.”

³² Walo teina dova walo vegevegedi dawadawanina, na ana hanapu neta Besinana yo tauyemidiwo vehabada.

³³ Eeta ilowoinanegomiu na ehebo ehebo mwanena ivelauwei ibom dova, na waihiu tawatawaholana howahowana mwanena iveꞌahihiyei.

6

¹ Omiu hedaheda ilowoinanegomiu na hinamiyao yo tamamiyao yadi walo amꞌawa abiyedi, yada Bada mehenai, wuwuna teina ainaena ebeha ammumuga namwanamwa.

² Hinage, “Tamam yo hinam uveꞌahihiyedi”. Teina loina mugamugaina maꞌana waloyemidi ana tauꞌawa abiwo vehabadi.

³ Teina dova iwalo, “Aba yaliyaya ulobai na baleꞌuwai umiya daodao”.

⁴ Omiu tama hinage havena natumiyao adi tauꞌwataꞌwata amwaumwauwi ta mata himodiꞌiniyegomiu, na hesi yada Bada yana loinao yo yana veꞌitao amguguyaedi. Babadao yo taupaihowao adi loina

⁵ Omiu taupaihowa mohili yami babadao baleꞌuwai yadi walo mayami meheuhi amveꞌahihiyedi, yo yadi walo amꞌawa abiyedi, dova Besinana yana walo amꞌawa abiyei, na havena hinage yami nuwatuwu bwau.

⁶ Nigele ebeha hauganane yami babadaone hivinuvinunuigomiu na abo aidiyai ampaihowa iliꞌilimani, na hesi Yaubada vehabana amtuluhahegoya atemiyena na Besinana vehabana ampaipaihowa iliꞌilimani.

⁷ Omiu Besinana yana bodao, ilowoinanegomiu na yami babadao aidiyai amꞌatetalam, dova Bada ainai amꞌateꞌatetalamne, na vehabadi ampaihowa iliꞌilimani.

⁸ Ta amnuwatuwu avivini ebeha babadao yo yadi taupaihowao maudoidi yadi paihowa namwanamwadi adi maiha Bada ainaena hilobai eheꞌehebona.

⁹ Omiu babadao hinage ammumuga iliꞌilimani yami taupaihowao aidiyai, na havena amwalowalo yagaidi, na hesi amnuwatuwu avivini ebeha omiu na hiya yami Bada galewai imiyamiya, eeta yana loina alimiyai eheꞌehebona maudoimiu vehabamiu, nigele vagana yo vagana. Yaubada yana abaꞌaleha tobwatobwana

¹⁰ Tahiguwao, yana abaꞌovi teina, Bada yana ꞌalaꞌalawowoli ainaena amwahiyala.

¹¹ Yo Yaubada yana abaꞌaleha maudoina aidiyena amlauliꞌwa, na ainaena havena amtapitapiya hauganane ebe Tomodulele iꞌoyamaegomiu.

¹² Wuwuna yada alehane nigele tomowa baidadao, na hesi tauloina yababadi aidiyai, hiya guguyou teina taꞌi baleꞌuwai adi tauloinao, yo galewa ana aluꞌaluwao yababadi.

¹³ Teina vehabana Yaubada yana abaꞌaleha maudoina amliꞌwadi, na ebe havena amtapitapiya howola hauga yababana ainai, na ainaena mayami wahiyala ana higa hauga ilalaoma amtowolo wahiyala.

¹⁴ Eeta amtowolo na walomoihana amlau tulituliyei, na nuwaꞌepomiu amlau auꞌauhidi mumuga dumwaluna ainaena.

¹⁵ Yo ami aehumahuma amliꞌwadi neta nuwadaumwali, wasa namwanamwana ainaena amlauliꞌwa.

¹⁶ Na hinage yami yemidi dova yami ꞌwapeya ainaena amlau auꞌauhigomiu, neta howahowana Tomodulele yana gita hawahawawalina ilau auꞌauhidi.

¹⁷ Uluꞌulumiu ana oiꞌauꞌauhi Yaubada yana livahi amvai, yo Aluꞌaluwa Veꞌahihi yana elepa aleꞌaleha amvai, neta Yaubada yana walo.

¹⁸ Hauga maudoina Aluꞌaluwa Veꞌahihi yana hagu ainaena amꞌawaꞌawanoi Yaubada ainai awanoi bagibagilidi aidiyena. Havena amtapitapiya na hesi amtowolo wahiyala na amꞌita avivinigomiu na amꞌawanoi Yaubada yana tomowao maudoidi vehabadi.

¹⁹ Yo yau hinage vehabagu, ta ebe mayagu atepatu wasa namwanamwana ana nuwamasele dawadawanina yawalowalo mahalavaei.

²⁰ Wasa teina ana paihowa vehabana vada paipaiyai himwauwigau, ainaena amꞌawaꞌawanoi Yaubada ainai ta ebe wasanane yawalo mahalavaei mayagu atepatu, wuwuna ana lowoinana teina dova. Abaꞌovi

²¹ Tikiko, iya tahida namwanamwana, ta iꞌaiꞌaipate yada Bada yana paihowa ainai, na yavetamalenawaꞌo ta ebe wasagu maudoina iꞌaubabadaei alimiyai, na ebeha yagu miya yo yagu paihowa vehabadi amhanapuidi, eena yama miya vehabana ivenuwamwauwegomiu, yo hinage iꞌabiye wahiyalagomiu.

²³ Velau yo yemidi yo nuwadaumwali Tamada Yaubada yo Bada Yeisu Besinana aidiyena omiu tahiguwao moiha alimiyai.

²⁴ Yo hinage yaiyadiwo baidamiyao, ebe yada Bada Yeisu Besinana ainai hivelau vateyai, iya yana veꞌiꞌilaena hinage ivelauwedi.