1 Yau Paulo, Yeisu Besinana yana tauyewasa teya, nigele tomowa yadi vesinuwaena, na hesi Yeisu yana vesinuwaena, yo hinage Tamada Yaubada. Ibom Yeisu mwalowoiyena iꞌabiye towolouyoi.
2 Na tahidao baidaguwao yami leta avetamalenawa omiu tautapwalolo, boda ehebo ehebo tupwa Galetiya holanai ammiyamiya.
3 Tamada Yaubada yo yada Bada Yeisu Besinana yadi veꞌiꞌilaena ammiya namwanamwa.
4 Wuwuna Tamada Yaubada yana nuwatuwu teina dova, ainaena Yeisu ibom italam ta imwalowoi yada pwanoli vehabadi, eeta ihaguigita teina baleꞌu yababana yana wahiyalaena,
5 teina vehabana Yaubada ainai tawalowalo vetuvehae, nigele yana abaꞌovi. Moiha. Wasa namwanamwana ehebo taꞌi
6 Abanuwapwanopwano teina aliguwai, wuwuna Yaubada mugai ivesinuwaigomiu ta ebe Besinana ainaena veꞌiꞌila amlobai, yo wasana namwanamwana amyemidiyei. Na mwayamwayauwena teina hauga amtaꞌwataꞌwataenaꞌo, na wasa vagana amyemidiyeine.
7 Wasa namwanamwana ehebo taꞌi, na nigele teya hinage wasa iyamiyamiya, na hesi tupwadi tomowa bada hivelau pwanopwanogomiuꞌo, wuwuna nuwanuwadi yo Besinana wasana himwau gwaipile ta ainaena hiꞌoyaꞌoyamaegomiu.
8 Besinana wasana mugai ambenaleine neta moihana, eeta havena teya yaiya vali wasa imohemohegomiu. Ai yo tausagenawasa galewaena nigele howahowana wasa vagana ayamohegomiu. Na ebe yaiya wasa namwanamwana imwau gwaipile ta vali wasa iyemahalava, vitai mata ilobai Yaubada ainaena.
9 Bada mugai awalo mahalavaꞌo alimiyai, na teina hinage yawalo mahalavauyo neta ebe yaiya vali wasa imohegomiu, yababana mata ilobai Yaubada ainaena.
10 Vedova, tomowadine adi walo vetuvehae vehabana yanuwanuwatuwu, bo nuwana Yaubada ana walo vetuvehae? Wuwuna ebe tomowa yadi nuwatuwu yapaipaihowai, nigele howahowagu ta Besinana vehabana yavetaupaihowa. Paulo yana nuwabui
11 Tahiguwao, amnuwatuwu avivini neta wasa namwanamwana yawalowalo mahalavae, nigele tomowa aidiyena.
12 Wasane nigele tomowa yadi walomahalavao yo yadi veꞌitao aidiyena, na hesi Yeisu Besinana yana veꞌitao aliguwai ainaena.
13 Na yagu mumuga mugamugaina, haugana taumiya Yudeya yadi boda holanai yamiyamiya, neta ambenalenaꞌo, ebeha Yaubada yana bodao yaꞌabiꞌabiye muyadi na nuwanuwagu yo yamutudi.
14 Ainaena agu yasowone taumiya Yudeya holanai yawahiyala gabaedi, wuwuna tubudao yadi mumuga vehabana yaꞌaiꞌaipate wahiyala na agu yasoyasowowa yadi aipate tupwana taꞌi.
15 Haugana nigele hiyalabahigau, na mugai Yaubada yana veꞌiꞌilaena bada ivesinuwagauꞌo,
16 ta ibom yana nuwatuwena natuna aliguwai iveꞌitaei, ta yavetauyewasa vehabana nigele Yudeya aidiyai. Ainaena nigele yayalaulau tomowa aidiyai habi panivila wasa teina vehabana.
17 Nigele yayalau Yelusalem Besinana ana tauyewasa mugai aidiyai, na hesi yalau Alebiya, ta nemai yamiyamiya ana higa yalau gwaipilema Damasiko.
18 Mulitai bolimai tonuga tuluhadiyai yahae Yelusalem, Pita yatau boꞌeyei, na nemai baidagu ahubena 15 amiyamiya.
19 Na Yeisu ana tauyewasa bahudi nigele yayaꞌitadi. Neta bada Yemesa, ibom yada Bada tahina.
20 Yagu walo teina Tamada mehenai yalelediwa nigele teya hinage oyama.
21 Iꞌovi na Yelusalem yalaugabaei ta yalau Siliya yo Silisiya yadi tupwa ainai.
22 Na haugana yamiyamiya aidiyai Besinana yana bodao Yudeya tupwanao aidiyai nigele agu oleya hiyahanapui.
23 Bada wasagu hibenalenaꞌo ebeha ‘Ibom mugai iyeyemuyagitawa, na hesi bada inuwabuiꞌo, ta wasa namwanamwana mugai ilaulaugagayoweiwa hauga teina iguguguyaei.’
24 Ainaena Yaubada hiwalo vetuvehaeyei yagu nuwabui vehabana.
1 Bolimai 14 hiꞌovi na Banabasi baidagu ahaeuyo Yelusalem na Taito yalauvai ta baidamai ahahaene.
2 Na yagu lau wuwuna Yaubada yana veꞌita aliguwai. Eeta yahae Yelusalem, na yalau Yaubada yana bodao adi taumugaiwo aidiyai, ta abom aꞌauꞌaubabada, na yagu yewasa yaguguyaei hiya nigele Yudeya aidiyai. Wuwuna nigele nuwagu yaguguya awaꞌawawa, eeta yadi taumugaiwo yagu guguyane hiꞌawa namwanamwaei.
3 Na Taito iꞌwayabuigau ta ahahaene Yelusalem, ibom teya towaho Gilisi, na hesi taumugaiwone nigele hiyaloinaei yo ebe ꞌwapina hihapi vehulu ana veꞌiveꞌilala dova hibom.
4 Na tupwadi adi geluwo oyaꞌoyamadi bada alimaiyai hiluwumaꞌo, nuwanuwadi yada miya namwanamwana Yeisu Besinana imomohegitawa hiꞌita, na hibom nigele tauyemidi moiha, nuwanuwadi yo loina vitaina himohegai.
5 Na hesi yadi loina maudoina ataꞌwataꞌwataei, ta nigele teya hava ainai ayatalam. Havena yada wasa moihana himwaumwau gwaipile.
6 Na hinage tauyewasao tomowa hiyogaedi adi taumugaiwo, na hesi nigele yayamodemode aidiyai nuwana hiya taumugaiwo bo taumulitao wuwuna maudoida Yaubada mehenai tatoyatoyawa, hiya havena teya lauhepoi himwaumwauwi yagu guguyane ainai.
7 Na hesi taumugaiwone Yaubada yana veguveguyai hihanapuiyaꞌo ebe yau wasa namwanamwana yaguguguyaei hiya nigele Yudeya aidiyai, na Pita hesi iguguguyaei Yudeya aidiyai.
8 Wuwuna Yaubada Pita wahiyala imohenaꞌo yana paihowa Yudeya aidiyai, na yau hinage dova wahiyala imohegau yagu paihowa hiya nigele Yudeya vehabadi.
9 Ainaena taumugaiwone, Yemesa, Pita na Yoni, Yaubada yana velau aliguwai hiꞌita lobai, na hitalam Banabasi yo yau alimaiyai, ta nimamaena avelau. Hitau tonugaone tomowa hiꞌawa taumugaiyedi hitalam alimaiyai ta ebe yau yo Banabasi alau hiya nigele Yudeya aidiyai, na hibom hilau Yudeya aidiyai.
10 Ta ehebo ginauli vehabana hivenuwamwauwegai, ebeha wewelohedi ahaguidi. Ginauli teina inamwanamwa alili eeta hauga maudoina yaꞌaiꞌaipate wahiyala vehabana. Paulo Pita iwalo debadebai
11 Hauganane Pita ilaoma Anitiyoki ainai, ta nemai yana mumuga nigele hiyadumwalu, ta yawalo debadebai yana mumuga yababadi vehabana.
12 Moiha taꞌi, yana lau mugaima ainai yana mumuga namwanamwana, eeta Yaubada yana bodao hiya nigele Yudeya iꞌawa auꞌaugeluwedi ta baidanao hiꞌaiꞌai ehebo, na mulitai tupwadi Yemesa yana bodao hilaoma, ta Pita Yudeyao imeheuhedi, eeta ai toyawa nigele Yudeya baidanao itaꞌwataꞌwataei, yo ilaugabaidi. Neta Pita yana lauhapuli.
13 Eeta taumiya Yudeya bahudi hinage hiꞌoyama, ta Banabasi hinage yadi oyamane imulitaei.
14 Ainaena yau yahanapuiyaꞌo ebeha Yeisu Besinana wasana dumwadumwaluna nigele hiyamulimulitaei moiha, ta maudoidi mehediyai Pita yapanivilaei, yawalo, ‘Augelu, owa Yudeya towahona, na tupwana hauga taumiya Yudeya yada mumugao utautau gabaedi na vali dalava mumugadi uveꞌaoꞌaonaedi, eeta vedova mata vali dalava tomowadiyaone uꞌabiye nuwabuidine ta ita Yudeya mumugada himulitaei?’ Yaubada iꞌawa namwanamwaegita yada yemidi aꞌava ainaena
15 Hiya nigele Yudeya dalava maudoina aidiyai yabayababadi taꞌi, na tabom hesi taumiya Yudeya,
16 tahanahanapui neta Yaubada tomowa iꞌawaꞌawa dumwaluwegita nigele Mosese yana loina ana awaꞌabiyena, na hesi yada yemidi Yeisu Besinana ainai vehabana. Wuwuna ita yada yemidi Yeisu Besinana ainai tamwauwiyaꞌo ta Yaubada iꞌawa dumwadumwaluwegita. Na hesi yada yemidi nigele Mosese yana loina ana awaꞌabi ainai tayamwaumwauwi, wuwuna Yaubada nigele tomowa iyaꞌawaꞌawa dumwadumwaluwedi Mosese yana loina ana awaꞌabi vehabana.
17 Maudoimai taumiya Yudeya nuwanuwamai yo Besinana yana mwalowoi ainaena Yaubada iꞌawa dumwaluwegai. Na tupwana hauga alaulau hapuli pwanoli ainaena, vedova teina, nuwana Besinana ivevelau pwanoligai? Nigele.
18 Yau ebe yawuyouyo ta yagu yemidi Mosese yana loina ainai yamwauwi, neta yayababaꞌo.
19 Wuwuna Mosese yana loinane bada iyemwalowoigauꞌo, na mulitai yana wahiyala aliguwena iꞌoviꞌo, ta ebeha yawahi moiha yalobai Yaubada yana paihowa vehabana.
20 Besinana baidagu bada hiveꞌabahi gogoigaiꞌo, ta yamwamwalowoine na hesi yawahigu yalobauyoi, nigele yau yawahiguwena na Besinana yawahina aliguwai imiyamiya. Teina hauga mayawahigu yamiyamiya, na yawahigune wuwuna neta yagu yemidi Yaubada Natuna ainai. Besinana ibom yana veꞌiꞌilaena italamyowei, ta vehabagu imwamwalowoine.
21 Havena Yaubada yana veꞌiꞌilane aliguwai yauvauvalaei. Havena tanuwanuwatuwu ebeha Mosese yana loinao adi awaꞌabi ainaena Yaubada iꞌawa namwanamwaegita. Mata dova ta Besinana yana mwalowoine iveginauli awaꞌawawa.
1 Omiu Galetiyao yauyaulemiu! Yaiya ivevenayaigomiune ta nuwamiune hipwanopwanone? Mugai aveꞌitagomiu ta nuwamiune himasele moiha Yeisu Besinana vehabana, ebeha aiwa lagalagana ainai imwalowoi na hesi amnuwagabaenaꞌo! Ainaena yami nuwatuwu ebeha Mosese yana loina ana yemidiyena livahi amlobai?
2 Ehebo panivila yapanivilaegomiu: Aiteya amwaha ainaena Aluꞌaluwa Veꞌahihi amvavaine? Mosese yana loina ana paihowa ainaena, bo Besinana wasana ambenalei ta ana yemidi ainaena?
3 Yauyaulemiu! Yami tapwalolo yana vetuwuni amhanapuiyaꞌo ebeha Aluꞌaluwa Veꞌahihi ainaena, eeta havena amtowotowoi ta ebeha yami tapwalolo amveꞌovi ambom yami paihowa aidiyena.
4 Vedova ta ami lautowoi maudoina amyepaipaihiyei, na Besinana ana yemidi ainai amꞌaipate ahaya?
5 Ehebo hinage panivila: Yaubada ibom Aluꞌaluwa Veꞌahihi imohemohe alimiyai, na yana wahiyalaena yami paihowa wahiwahiyaladi ampaipaihowaidi. Vedova yana aiyauyao alimiyai, Mosese yana loinao adi awaꞌabi, bo Besinana wasana ana yemidi ainaena?
6 Amnuwatuwu avivini Abelaham neta ibom Yaubada iyemidiyei, ainaena Yaubada iꞌawa dumwaluwei,
7 yo amhanapui neta Yaubada ana tauyemidiwo hibom Abelaham natunao.
8 Mwalona Yaubada Abelaham iwalo auli, iwalo,
‘Owa alimwena mulitai vali dalava yadi awanamwanamwa hilobai.’Na Yaubada yana walo teina Buki Veꞌahihi holanai iwalo mahalava mugai, neta dalava bagibagilidi adi abiye dumwalu Yaubada ana yemidi ibom ainaena.9 Eeta tahanahanapui neta tauyemidiwone maudoidi adi awanamwanamwa hilobai, hiya Abelaham baidanao.
10 Na yaiyadiwo yadi nuwatuwu neta ebeha Mosese yana loina ana awaꞌabi ainaena hinamwanamwa, mata awayababa aꞌava hilobai, wuwuna Buki Veꞌahihi iwalo,
‘Loina maudoina buki teina holanai ebe yaiya nigele11 Nigele howahowana Yaubada iꞌawa dumwaluwegita ebe Mosese yana loina aꞌava taꞌawaꞌabiyei. Wuwuna Buki Veꞌahihi dova iwalo,
‘Taudumwalu yadi yemidiyena yawahi namwanamwana mata hilobai.’12 Mosese yana loina ana amwaha vagana, na yemidi ana amwaha vagana. Loina ana amwaha Buki Veꞌahihi ainai teina dova hileleyaꞌo, iwalo,
‘Ebe yaiya loina maudoina iꞌawa abiyedi, yawahi namwanamwana ilobai.’13 Na nigele howahowana na loina maudoina tamulitaedi, eeta Besinana iveꞌaivelahegita ta ihaguigita teina loinane ana vitai ainaena. Loina ana vitai teina ebe nigele tayamulitaei mata tamwalowoi, eeta Besinana ita vehabada imwalowoi dova tauyababa mwalaꞌidi adi oiyemwalowoi aiwa lagalagana ainai. Buki Veꞌahihi mugai yana walo teina dova iwalo,
‘Ebe yaiyadiwo aiwa lagalagana ainai himwauwidi ta himwalowoi,14 Ta Yeisu Besinana ainaena nigele Yudeya yaliyaya hilobai, dova yaliyayawa Yaubada iwalo yemidiyeiwa Abelaham ainai, ebeha maudoida yada yemidiyena mata Aluꞌaluwa Veꞌahihi iwawalo yemidiyeiwa imohegita. Waloyemidi vehabana
15 Tahiguwao, ehebo abaꞌita yada mumuga ainaena yamohegomiu, teina dova: Ebe towaho iwalo yemidi yana heda ainai, yana waloyemidine nigele teya yaiya howahowana yo imwau gwaipiledi.
16 Dova hinage Yaubada yana waloyemidi Abelaham yana huhu imohei. Nigele ebeha Buki Veꞌahihi iyawalo, ‘Huhuwo aidiyai’ na hesi yana huhu ehebo taꞌi ainai, neta Besinana.
17 Ana hanapu neta Yaubada yana ulewahi ivenuwamwau mugaiyei Abelaham ainai, eeta bolimai 430 tuluhanai Mosese yana loina imahalava. Na nigele howahowana waloyemidine ihoꞌe, bo imwau gwaipilei loinanane ainaena, na hesi mayana wahiyala howola imiyamiya.
18 Amnuwanuwatuwu avivini, ebe ada awanamwanamwa talobai Mosese yana loina ainaena, neta mata nigele Yaubada yana walo yemidi tayalobai. Na hesi mugai Yaubada awanamwanamwa iwalo yemidiyei Abelaham ainai.
19 Na hava vehabana loina imamahalavane? Loinane iꞌaꞌabiye mahalavane alidai yada yababao vehabadi ta alidai imiyamiya ana higa Abelaham yana huhuwa Yaubada iwalo yemidiyeiwa imamahalavamane. Na loinane tausagenawasa aidiyena Mosese ivai, ta tomowa imohedi.
20 Na Yaubada yana waloyemidi ana mohene vagana, wuwuna Yaubada imohe dumwalu Abelaham ainai. Yada yemidiyena Yaubada iꞌawa natunaegita
21 Havena amnuwanuwatuwu ebeha Mosese yana loina Yaubada yana waloyemidi iveveꞌalehaei? Wuwuna nigele hinage teya loina howahowana yo yawahida imohegita bo yada mumuga iꞌabiye dumwaludi. Nigele.
22 Na hesi Buki Veꞌahihi maudoida iꞌawa yababaegita, eeta Yeisu Besinana ana tauyemidiwo hibom Yaubada yana waloyemidi hilobalobai.
23 Mugai haugana nigele yemidi tayahanapui, ita Mosese yana loina iꞌabi avivinigita na tamiya vitai, ana higa Yaubada yemidi iꞌabiye mahalava alidai.
24 Ta loinanane iꞌitaꞌita avivinigita ana higa Besinana imahalava, na ebe tayemidi ainai mata Yaubada iꞌawa namwanamwaegita.
25 Teina hauga Besinana bada ilaomaꞌo, eeta loina yana ita avivini alidai iꞌoviꞌo,
26 na hesi yada yemidiyena Yaubada howahowana iꞌawa natuguwegita, Yeisu Besinana baidada.
27 Wuwuna yaiyadiwo omiu ambapitaisoꞌo Yeisu Besinana yehanaena bada Besinana ibom baidamiu ammiya ehebo.
28 Na hinage maudoida Besinana baidada, na nigele teya wahei holadai iyamiyamiya. Ainaena taumiya Yudeya yo vali bodao ita ehebo, na taubadao yo yana taupaihowao hiya boda ehebo, yo hinage towatowaho na waiwaihiu hiya boda ehebo, ta maudoida Yeisu Besinana ainaena taveboda eheboꞌo,
29 ta maudoida Abelaham yana huhu, wuwuna maudoida Besinana yana bodao, eeta Yaubada yana waloyemidi Abelaham ainai bada tavaiyaꞌo.
1 Ebe yaiya yana hauga gama ainai na tamana yana abaloina imohei, gamanane mata nigele iyavetauloina, na hesi ivetaupaihowa,
2 na yana tauveꞌitao alinadi iꞌawa abiyedi, ana higa aiteya hauga tamana italam na natunane ivetauloina.
3 Ita dova, wuwuna mugai yada yemidi mugamugaidi vehabadi tavetaupaihowa.
4 Ainaena Yaubada Natuna yana hauga ana lowainana ainai ivetamalenama, na hinana ilabahi ta ivetomowa alidai, neta ita Mosese yana loinao hipaipaigita, ta aidiyena ivavai vehulugitane. Teina ainaena Yaubada maudoida iꞌawa natuguwegita.
6 Eeta Yaubada Natuna aluꞌaluwana atedai imwauwiyaꞌo ta Yaubada iꞌawa tamanaei, iwalo, ‘Tamagu!’
7 Ainaena, omiu nigele ebeha yana taupaihowao, na hesi natunao, howola abo yana abaloina imohegomiu, dova yana waloyemidi. Taumiya Galetiyao Paulo nuwanuwana
8 Omiu mugai Yaubada nigele amyahanapui, ta yami abayemidiwo baleꞌu ginaulidi aidiyai, hibom dova yaubada oyaꞌoyamao.
9 Na teina hauga Yaubada amhanapuiyaꞌo, nuwana tawalo Yaubada ihanapuigomiuꞌo. Ainaena havena Yaubada amtaꞌwataꞌwataei, na amwuyowuyo yami abayemidiwo tapitapiyadi vehabadi ampaipaihowa.
10 Yami nuwatuwu pwano vehabadi na tupwana ahubena, bo waiꞌena, bo nuwana bolimai, bo vali hauga na vali hauga vehabadi yami paihowaone ampaipaihowaidi.
11 Teina vehabadi yaꞌatehawawali, ta nuwana mata yagu paihowao alimiyai amveginauli awaꞌawawaedi.
12 Tahiguwao, bada ami boda ainai yaluwuꞌo ta yau dova omiu, eeta ilowoinanegomiu ebe omiu yagu mumugao amvaidi. Nigele teya yababana aliguwai amyapaihowai.
13 Na amnuwatuwu avivini mugai yalaowa alimiyai maꞌagu lovala, na besiwa wasa namwanamwana yaguguyaei alimiyai.
14 Ta nigele amyasosomanaegau taugu yana tapiya vehabana, na hesi amtalam aliguwai ta amlauvaigau dova Yaubada yana tausagenawasa ehebo bo nuwana Yeisu Besinana dova.
15 Na hinage amveꞌauꞌaugeluwegau moiha, ebe howahowana mehemiu amvaivehuludi ta ammohegau mehegu yababadi adi miyalae. Na teina hauga vedova yada veꞌauꞌaugeluwa?
16 Ana ita dova bada amveveꞌalehaegau, wuwuna walo moiha bada yamohegomiuꞌo.
17 Yami nuwabui wuwuna yami tauveꞌitao vauvaudi bada hiꞌaiꞌaipate vehabamiu, na hesi hiꞌoyaꞌoyamaegomiu. Hibom nuwanuwadi ta yagu loina amtaꞌwataꞌwataei na yadi loinao nuwamiu hivaidi.
18 Yagu loina teina ebe yau baidamiu tamiyamiya, bo nuwana ebe alimiyena yamiya daodao, yagu loina ehebo taꞌi, neta howahowamiu ta amꞌaipate paihowa namwanamwana vehabana.
19 Natuguwao, vehabamiu ategu imuyamuya hauga maudoina yami nuwabui vehabana, na ana higa Besinana alimiyai imahalavauyo, ta atemiyai imiya, ta ainaena yagu abayaliyaya yalobauyoi.
20 Ebe dova yau baidamiu tamiyamiya, na ainaena amnuwabui ta agu lautowoi hinamwanamwa, na hesi bada yanuwanuwatuwu mwalaꞌina yami yababao vehabadi. Heiga yo Sela aubabadadi
21 Omiu nuwanuwamiu ta Mosese yana loinao ammulitaedi, na hesi adi hanapuwo nigele amyahanapuidi.
22 Amnuwatuwu avivini Abelaham aubabadana hilelediꞌo, natunao towatowahodi bwau, ehebo yana vahala ainaena, na bwaunane mwanena moiha ainaena.
23 Yana vahalane yehana Heiga, na mwanenane yehana Sela, ta Heiga yana hiuma mumuga baleꞌu ainaena, na Sela yana hiumane Yaubada yana waloyemidi ainaena, ta natuna yehana Aisake.
24 Na teina waiwaihiuwone auꞌaubabadadi aidiyena waloyemidi bwau taꞌita lobaidiꞌo. Waiwaihiu hitau bwau adi nuwamasele teina: Heiga dova Yaubada yana loina tomowa imohemohedi oya Sainai ainaena. Eeta natunao ilabahidi hiya taupaihowa paipaidi.
25 Na yadi tupwa Alebiya holanai, oya Sainai ainai, na Heiga ana ꞌita dova hibom taumiya Yelusalem wuwuna wau hiya paipaidi Mosese yana loinao aidiyena.
26 Na Sela ana ita dova ita Yelusalem galewaena tomowada wuwuna ita natunao livalivahida.
27 Ginauli teina vehabana Buki Veꞌahihi ainai hileleyaꞌo, iwalo:
‘Waihiu owa yaiyaipoim uyaliyaya.Mugai nigele uyalabalaba, na hesi uyaliyaya mwalaꞌina natumwao boda mwalaꞌina vehabana, na waihiune iya mamwanena himiyamiya manatudiyao, nigele adi boda.’28 Tahiguwao, ita Aisake dova, wuwuna Aisake hinana yaiyaipoina, na mulitai Yaubada yana waloyemidi vehabana ta ilalabalabane.
29 Na Isimeli Aisake iveꞌalehaei. Abaꞌita teina, ibom mumuga baleꞌu ainaena hilalabahine iveꞌalehaei iya waloyemidiyena hilalabahine. Mugai hiya hitau bwauwone dova wau teina hinage tomowa, adi geluwo aidiyai hipaipaihowai.
30 Na Buki Veꞌahihi holanai loina lelelelena iwalo:
‘Vahalane manatuna uheusili mahalavaedi. Havena vahala natuna na natum moiha hiloiloina eheꞌehebo. Na hesi Aisake ibom abaloinane ivai.’31 Ita nigele Isimeli dova, wuwuna Isimeli taupaihowa paipaina natuna, na hesi ita Aisake dova, ta yada miya namwanamwana.
1 Miya namwanamwa vehabadi Besinana ilivahigita ada paiwo aidiyena, eeta amtowolo wahiyala na havena amtalatalamyo Mosese yana loina paipaina ainai. Besinana yana loina namwanamwana
2 Yau Paulo yaguguya alimiyai ta ebe Mosese yana loinao aidiyai amtalam na Yudeyao yadi veꞌiveꞌilala ꞌwapimiu hihapi vehulu mata Besinana yana hagu alimiyai iveginauli awaꞌawawa.
3 Wuwuna ebe yaiya alimiyena italam ta ꞌwapina hihapi vehulu, howahowana yo hinage Mosese yana loina maudoidi iꞌawa abiyedi,
4 yo ebe yaiya owa nuwanuwam na Mosese yana loinao adi awaꞌabiyena mata awanamwanamwa ulobai, bada Besinana yana veꞌiꞌila alimwai ugabaenaꞌo, ta utom vehuluyaꞌo.
5 Na ita Yaubada tayemidiyei mata iꞌawa dumwaluwegita. Teina yada nuwaꞌavivini Aluꞌaluwa Veꞌahihi ainaena, na vehabana tahaꞌwahaꞌwa.
6 Moiha taꞌi, Yeisu Besinana ainai Yudeyao adi veꞌiveꞌilala, neta hapi, nigele iyaꞌabiye dumwalugita, yo hinage ebe hapi tataꞌwataꞌwataei neta nigele ginauli mwalaꞌina. Na hesi ebeha Yeisu tayemidi ainai na tavelawei, ibom ada tauꞌabiye dumwalu.
7 Omiu mugai amsagena wahiyala yemidi ana amwaha moihana ainaena, na yaiya imwau auhigomiune?
8 Laugagayo teina nigele Yaubada ainaena, wuwuna mugai Yaubada iyogaegomiu ibom yana amwaha ainai, na hesi laugagayo teina vali tomowa aidiyena.
9 Teina dova ehebo ginauli iuꞌiuna na yababana, tahowahowana yo maudoimiu iꞌabiye yababagomiu.
10 Yau yada Bada yayemidiyei ebeha howahowana iꞌabiye nuwamaselegomiu, ta yagu loina aꞌava ammulitaei na ebe yaiya iꞌabiye tapiyagomiu, ana maiha Yaubada ainaena mata ilobai.
11 Tahiguwao, havena amnuwanuwatuwu yagu guguya vehabadi ta ebeha tomowa hapi hivai yo Yudeyao yadi loina himulitaei, na yagu guguya hesi Besinana yana mwalowoi aiwa lagalagana ainai vehabana, na guguya teina vehabana taumiya Yudeya hinuwanuwayababa ta hiveve alehaegau.
12 Moiha taꞌi howahowana yo ami tauꞌabiye tapiyaone hivehapihapiuyoidi hibom.
13 Tahiguwao, Yaubada bada ivesinuwaigomiuꞌo ta livalivahimiu, na havena amnuwanuwatuwui ebeha nigele ami loina teya ta mumuga baleꞌu ammulimulitaedi, na hesi velau namwanamwa ana loinaena amlau ta ambom amvehaguhaguyoigomiu.
14 Wuwuna loina maudoina adi uini, loina ehebo teina, iwalo,
‘Am geluwo uvelau namwanamwaedi dova ubom amvelaune.’15 Ebe loinane teina amtaugabaei na ambom alimiyai amveveꞌalehauyoigomiu, howola ami boda amvesawali. Aluꞌaluwa ainona vagana na yada nuwalelewo vagana
16 Alimiyai yawalo, Aluꞌaluwa Veꞌahihi ammulitaei ta havena mumugada ainaena amlaulau.
17 Wuwuna yada nuwalelewo Aluꞌaluwa Veꞌahihi iveꞌaveꞌalehaedi, ainaena hinage Aluꞌaluwa Veꞌahihi yada nuwalelewo iveꞌaveꞌalehaedi. Eeta holadai hiꞌaleꞌaleha, na hava namwanamwana nuwanuwada ebe tapaihowai nigele howahowada tapaihowai.
18 Neta taꞌi ebe Aluꞌaluwa Veꞌahihi imugaiyegomiu, Mosese yana loinao hiꞌoꞌovi alimiyena.
19 Yada nuwalelewo yana paihowa tahanahanapuidi, neta pwanoli, meheꞌayo, aihigani,
20 balau, alawai awapaꞌipaꞌiꞌi, aleha, alonagigili, modiꞌini, aiduma, wahei, vehinahinali,
21 yo hinage abayaliyaya yababana bwahi wahiwahiyalana ana numa ainaena, yo tupwadi mumuga yababadi. Mumugaone teina vehabadi mugai yavenuwamwauꞌo, ta wau hinage yavenuwamwau alimiyai, ebeha adi taupaihowao havena Yaubada yana Abaloina ainai hiluwuluwu.
22 Na Aluꞌaluwa Veꞌahihi ainona namwanamwana atedai hibom neta, velau, yaliyaya, nuwadaumwali, alamaꞌiꞌita, atemuyamuya, vehaguhagu, nuwaꞌehebo,
23 nuwahegoya, yo tuluhegoya. Na nigele teya loina iyamiyamiya yo mumugaone teina ilaugagayowedi.
24 Na hesi ita Yeisu Besinana iloinaegita, ta yada nuwalelewo yababadi iꞌoiye mwalowoidiꞌo ana aiwala lagalagana ainaena.
25 Na yawahi namwanamwana imohegita Aluꞌaluwa Veꞌahihi ainaena, ta howahowana Aluꞌaluwa Veꞌahihi imugaiyegita.
26 Na havena tanuwanuwahae, bo nuwana ada geluwo tataꞌwataꞌwatadi, bo taꞌaloꞌalomagigiliyedi.
1 Tahiguwao, ebe tahida ehebo yana lauhapuli ainaena ibeꞌu, omiu aluꞌaluwamiu wahiwahiyaladi amtowoi ta tahidane amvedumwalu, nuwahegoyaena, na hesi amꞌitaꞌitayoigomiu, ta ebe havena hinage yana aba beꞌune ainai ambeꞌubeꞌu.
2 Ami avaꞌavalao vitavitaidi aidiyai amvehaguhaguyoigomiu, wuwuna teina ada loina Besinana ainaena.
3 Ebe yaiya iꞌabihiniuyoi ebeha iya tauwasawasa, neta iꞌoꞌoyamauyowei.
4 Eeta howahowana ehebo ehebo ibom yana mumuga iꞌita, aiteya paihowa namwanamwana na aiteya yababana. Na ebe namwanamwana, anawalo vetuvehaei yana nuwatuwuwena ibom ilautowoi na havena ana geluwo yadi walo ainaena.
5 Na ada avaꞌavala tabom ehebo ehebo taꞌavalaidi.
6 Tapwalolo ana tauveꞌitao, ebe hanapu hiveꞌitagita, howahowana ginauli tamohedi, ebe teya hava aidiyai iꞌubwa.
7 Havena ubom uꞌoyaꞌoyamauyoigo, wuwuna nigele howahowana Yaubada taꞌoyamaei. Havaidova towaho itudai, ainaena ilauꞌeli.
8 Ebe yada nuwalelewo ainaena iꞌuma, lauꞌeline ainai yababana ilobai, na ebe Aluꞌaluwa Veꞌahihi ainaena iꞌuma, mata yawahi miyamiya vateyaina iꞌeli.
9 Havena yada paihowa namwanamwadi aidiyena tatapitapiya, wuwuna ebe havena tatapitapiya, mata laulauꞌeli ana hauga lauꞌeli namwanamwana talobai.
10 Ainaena howahowada hauga maudoina tomowa maudoidi tahaguhaguidi, na hesi Yaubada ana tauyemidiwo tahaguidi mwalaꞌina. Walo yana abaꞌovi
11 Lele teina mehena mwalaꞌina yau nimaguwena yaleleyawa.
12 Yudeya yadi hapi ana tauvaiwo nigele nuwadi yagu guguyane teina dova: ada abiyedumwalu talobai Besinana yana mwalowoi aꞌava ainaena, na nigele hapi ainaena. Eeta hiveꞌiveꞌiꞌimanegomiu ta ebeha yadi hapine amvai, ta hiꞌawa namwanamwaegomiu.
13 Na amnuwatuwu avivini ebeha hapi ana tauvaiwo ilowoinanedi yo Mosese yana loinao maudoidi himulitaedi, na hesi nigele hiyamulimulitaedi. Neta taꞌi nuwanuwadi hapi amvai, ta tenem yadi abagagasa yami luwu adi boda holanai vehabana.
14 Na yau havena yawalo haehae, na hesi yada Bada Yeisu Besinana ana aiwa lagalagana vehabana yawalo haehae, wuwuna mumuga baleꞌu iꞌoiye mwalowoiyaꞌo ta yana loinane aliguwai iꞌoviꞌo, na hinage hibom mumuga baleꞌu ana taumulitao hitaꞌwataꞌwataegau dova yau taumwalowoi.
15 Moiha taꞌi, hapi nigele ginauli mwalaꞌina, na hinage ebe hapi nigele tayavai teina nigele ginauli mwalaꞌina. Ginauli mwalaꞌinane ehebo taꞌi, neta ebeha Yaubada Aluꞌaluwana iꞌabiye vauvaugita.
16 Ebe iꞌabiye vauvaugita mata Yaubada yana nuwadaumwali yo yana atemuyamuya imiya vahaligita ta dova Isileliwo moiha.
17 Teina hauga yo hauga ilalaoma aidiyai havena teya yaiya iꞌabiꞌabiye tauꞌwataꞌwatagau, wuwuna ꞌwapiguwai Yeisu yana veꞌiveꞌilala himiyamiya, teina ꞌweyadine yalobaidi yana paihowa vehabana.
18 Tahiguwao, yada Bada Yeisu Besinana yana veꞌiꞌila namwanamwana aluꞌaluwamiu aidiyai. Moiha.