1

¹ Yau Paulo Yeisu Besinana yana taupaihowa, yo tauyewasa Yaubada iyogaegau yo imwauwahiyegau na wasa namwanamwana vehabana yawalo mahalava.

² Wasa namwanamwana mwalona Yaubada iwalo yemidiyei yana tauwalo mahalavao aidiyai, ta hileleyaꞌo Buki Veꞌahihi ainai.

³ Wasane neta Yaubada Natuna Yeisu Besinana vehabana ibom iyemala tomowa moiha Deivida yana huhu ainaena,

⁴ na mulitai Aluꞌaluwa Veꞌahihi yana wahiyalaena iꞌabiye mahalava neta iya Yaubada Natuna na mwalowoiyena iꞌabiye towolouyoi, ta iveꞌitagita ebeha Yeisu Besinana iya yada Bada.

⁵ Na iya ainaena Yaubada iꞌatemuyamuyaegau ta ivesinuwaigau ebeha Besinana yehana vehabana yavetau yewasa ta ebeha tomowa tupwa maudoidi yemidi awaꞌabina yamugaiyedi.

⁶ Na omiu hinage Loma Yaubada bada iyogaegomiuꞌo ta omiu Yeisu Besinana yana boda ainai ammiyamiya.

⁷ Ainaena na yalaulele omiu maudoimiu Loma ainai ana taumiya. Omiu Yaubada ivelauwegomiu ta iyogaegomiu ebeha omiu iya yana tomowao veꞌaveꞌahihimiu. Yaubada Tamada na Bada Yeisu Besinana yadi atemuyamuya yo yadi nuwadaumwali imiya vahaligomiu. Paulo nuwanuwana Loma itauboꞌeyedi

⁸ Yaꞌawa yauwedo Yaubada ainai Yeisu Besinana ainaena, wuwuna bagibagilimiu yami yemidi wasana hibenabenalei tupwa maudoina ainai.

⁹ Yaubada ihanapuigauꞌo, hauga maudoina yagu awanoi ainai yanuwanuwatuwuigomiu. Yaubada ibom yana paihowa ainai yatalamyowegau mwalaꞌina Natuna wasana ana guguya vehabana.

¹⁰ Yagu awanoi Yaubada ainai hauga maudoina ebeha howahowana yalaowa yatauboꞌeyegomiu, ebe teina iya yana nuwatuwu dova.

¹¹ Wuwuna nuwanuwagu mwalaꞌina yo yaꞌitagomiu, ta Aluꞌaluwa Veꞌahihi yana aiyauya ainaena yaꞌabiye wahiyalagomiu.

¹² Teina ainaena omiu na yau tavehaguhagu, eeta omiu yami yemidiyena amhaguigau, yau hinage yagu yemidiyena yahaguigomiu.

¹³ Tahiguwao, nuwanuwagu ta amhanapui neta hauga bagibagilidi yagu nuwatuwu ebeha yatauboꞌeyegomiu na hesi nigele howahowagu. Na nuwanuwagu ebeha gamwagamwanimiyai tupwamiu yaꞌabiye nuwabuigomiu ta dova taumiya ganamuli tomowadi gamwagamwanidiyai yaꞌabiye nuwabuidine.

¹⁴ Wuwuna ilowoinanegau ebe boda maudoidi aidiyai yapaihowa, hiya dalava mwalaꞌidi aidiyai himiyamiya, yo hinage nuꞌula adi taumiyao, yo tauhanapuwo, yo hinage taunuwapwanopwanowo.

¹⁵ Ainaena omiu Lomaone nuwanuwagu mwalaꞌina wasa namwanamwana alimiyai yaguguyaei.

¹⁶ Wasa namwanamwana ana guguya vehabana nigele yayahinihinimaya, wuwuna Yaubada yana wahiyala ainai imiyamiya ainaena ebe yaiyadiwo hiyemidi ilauyeyawahaidi, mugai ai Yudeya alimaiyai, na omiu taumiya ganamuli mulitai abo alimiyai.

¹⁷ Eeta moiha, wasa namwanamwana teina iveꞌitagita ebeha yada yemidi aꞌava ainaena Yaubada imwau yedumwalugita ta hauga maudoina mayada yemidi. Wuwuna Buki Veꞌahihi yana walo dova, iwalo, ‘Taudumwaluwo yadi yemidiyena yawahi hilobai’. Tomowa yadi mumuga yababana

¹⁸ Yaubada hinage galewaena yana modiꞌini bada iveꞌitaenaꞌo hiya taumumuga yababa maudoidi aidiyai, wuwuna hiya yadi mumuga yababana aidiyena mumuga dumwaluna hiꞌauꞌauhidi.

¹⁹ Yaubada ana hanapu bada iꞌabiye mahalavayaꞌo aidiyai, na ibom iveꞌitauyowenaꞌo ta nuwadi bada imaseleꞌo.

²⁰ Haugana Yaubada baleꞌu iyemasele, yana mumuga dawadawanidi dova yana alaꞌalawowoli miyamiya vateyaina yo lautowoi haehaedi aidiyena tomowa bada hiꞌitayaꞌo. Eeta nigele howahowana ta tomowa hiwalo, ‘Nigele ayahanapui’.

²¹ Na hihanapuiyaꞌo ibom Yaubada, na hesi nigele hiyaveꞌahihi bo ainai hiyaꞌawa yauwedo, ainaena ta nuwatuwu awaꞌawawao aidiyai hiwahiyala, eeta guguyou ana amwahao atedi iꞌoiye mwau.

²² Na hiya hiꞌawa hanapuyowedi, na hesi yauyauledi.

²³ Wuwuna Yaubada miyamiya vateyaina nigele hiyawalo vetuvehaeyei, na hesi miyalaena yadi abayemidi ginauli vagadi hipaihowaidi adi ita dova tomowa yo lagulagu yo lowolowo yo lagulagu daladaladi, ta aidiyai hitapwatapwalolo.

²⁴ Ainaena Yaubada italam ta yadi nuwatuwu biꞌibiꞌidi atediyai himiyamiya hipaipaihowaidi, eeta gamwagamwadiyena taudi hipwanopwanoli mumuga yababana ainaena.

²⁵ Wuwuna walomoiha Yaubada vehabana higwaipile oyama vehabana ainaena Yaubada nimaginaulidi aidiyai hitapwatapwalolo, na Tauyemaselediwa nigele hiyawalo vetuvehaeyei, ibom ana noꞌo miyamiya vateyaina. Moiha.

²⁶ Ainaena Yaubada italam ta yadi nuwatuwudawaniwo yababadine hipaihowaidi, eeta yadi waiwaihiuwone nigele taudi ana yepaihowa moihana ainaena hiyalaulau, na vali mumuga ainaena hilaulau neta yadi taliya waiwaihiuwo baidadiyao hiꞌenoꞌeno.

²⁷ Na hinage dova towatowahodi. Veꞌawa auꞌaugelu moihana waiwaihiu baidadiyao hibui ta yadi taliya towatowaho baidadiyao hinuwanuwaleleuyoidi. Taudi ana yepaihowa vedebahinihinimayadi aidiyena ta yababana ana maiha ewanai mata yababana.

²⁸ Tenem ainaena nigele nuwadi Yaubada ana nuwatuwu hanapu, eeta Yaubada aidiyai italam ebeha nuwatuwu yababana iꞌoiye mwaudi ta ginaulidine nigele iyalowoinanedi, hipaihowaidi.

²⁹ Hiya mumuga yababa maudoina iꞌoiye mwaudi, dova tobwatobwa nuwanuwadi yo mumuga yababa yo alomagigili yo oiyemwalowoi yo awapaꞌipaꞌiꞌi yo oyamao yo tauvesosomana yo ulumiyai,

³⁰ walo yabayababa yo veꞌaleha Yaubada ainai yo awasewa yo nuwahaehae yo gagasa yo paihowa yababadi adi tauꞌabiye mwalaꞌi, na tamadiyao yo hinadiyao hiꞌawa sewaedi.

³¹ Na hiya yauyaule, ta yadi waloyemidi nigele hiya paihowaidi, na hinage nigele velau yo atemuyamuya aidiyai iyamiyamiya.

³² Teina tomowaone Yaubada yana loina hihanapuiyaꞌo ta ebe yaiyadiwo dova himumuga mwalowoi taꞌi ilowoinanedi, na hesi yababanane hipaipaihowai ta ainaena adi geluwo hiveꞌaoꞌaonaedi na hiwalo huluhulidi.

2

¹ Augeluwo havena ami geluwo yadi mumuga vehabana amꞌawa yababaedi, wuwuna ebe amꞌawa yababaedi na omiu hinage mumuga ehebonane ampaipaihowai neta, ambom amꞌawaꞌawa yababaegomiu.

² Na tahanapuiyaꞌo ebeha Yaubada ibom ilowoinanei na taupaihowa yababaone ana dumwaluwena ilauvetalaedi.

³ Ainaena augeluwo omiu, ebe vali tomowa amꞌawaꞌawa yababaedi havena amnuwanuwatuwu ebeha Yaubada yana lauvetala mata nigele amyalobai. Nigele! Mata iloinaegomiu hinage, wuwuna mumugane omiu dova ampaipaihowaidi.

⁴ Na havena Yaubada yana velau amꞌawaꞌawa ginauli yabayababaedi, wuwuna iꞌatemuyamuyaegomiu na vehabamiu iꞌalama iꞌita ta ebeha yami yababa ainaena iꞌabiye buigomiu ainai.

⁵ Ta omiu yami talinatui yo yami tuluhayaiyai vehabana ami maiha yababana amhiwahiwai ewanai. Eeta haugana Yaubada yana modiꞌini yo yana lauvetala dumwadumwaluna iꞌabiye mahalava ana ahubena ainai ami maiha mata imwalaꞌi alili.

⁶ Wuwuna maudoida mata ehebo ehebo alidai iyemaiha, hava yada paihowa dova.

⁷ Tomowa tupwadi amwaha namwanamwana hipaihowai alaꞌalabiliyei ta ebeha Yaubada yana vewasawasa yo veꞌahihi yo velau miyamiya vateyaina hibehaei, ta hiya mata Yaubada yawahi vateyai imohedi.

⁸ Na hesi tupwadi tomowa hiꞌuluꞌuluyaiyai alili ta mumuga namwanamwana hitaꞌwataꞌwataei, na mumuga yababana himulimulitaei, ainaena ebe Yaubada imodiꞌiniyedi mata iloinaedi.

⁹ Eeta yaiyaidiwo mumuga yababana ana taupaihowao mata loina vitaina yo muyamuya mwalaꞌina hilobai, mugai Yudeyao na mulitai abo nigele Yudeyao.

¹⁰ Na taumumuga dumwalu maudoida mata Yaubada yana vewasawasa yo veꞌahihi yo nuwadaumwali imohegita. Ita Yudeya Yaubada mata iyemaiha mugaiyegita na abo hinage nigele Yudeya.

¹¹ Yaubada mata maudoida iloinaetoyatoyawaegita.

¹² Na yaiyadiwo howola Mosese yana loina nigele hiyabenalei na mumuga yababana hipaipaihowai mata nigele iyalauvetalaedi yadi yababa vehabana ta maudoidi mata himwalowoi. Dova hinage Yudeyaone hiya bada Mosese yana loina hihanapuiyaꞌo na ebe hilauhapuli mata ilauvetalaedi Mosese yana loinao aidiyena.

¹³ Wuwuna nigele loina ana benali aꞌava ainaena Yaubada iyamwau yedumwalugita na hesi yana loina ana paihowa ainaena.

¹⁴ Hiya nigele Yudeyaone loinane Mosese ainaenane nigele aidiyai, na hesi hiya yadi nuwatuwuwena hipaihowa hava namwanamwana, neta bada hiya yadi loina.

¹⁵ Ainaena yadi paihowa aidiyena tahanapui ebeha atediyai loina namwanamwana imiyamiya dova Mosese yana loina, ta hiya yadi mumuga hihanapuidiꞌo neta aiteya yababana na aiteya namwanamwana.

¹⁶ Wasana namwanamwana, bada yaguguyaenaꞌo alimiyai ta mata lauvetala ana hauga ainai Yaubada Yeisu Besinana iloinaei ta ibom tomowa yada nuwatuwu dawadawanidi vehabadi ilauvetalaegita. Yudeya vehabadi

¹⁷ Na omiu vedova? Ta ambom amꞌabiꞌabihihiyoigomiune na amwalo, ‘Ai Yudeya Yaubada ihaguhagugai na yana loina imohegai Mosese ainaena’.

¹⁸ Eeta Yaubada yana nuwatuwu bada ahanapuiyaꞌo wuwuna loinanane bada iveꞌitagomiuꞌo, mumuga namwanamwa alilina vehabana.

¹⁹ Eena ambom amꞌawa hanapuwegomiu ebeha tomowa mehegibugibudi adi taumugaiwo, yo hiya mumuga guguyou ana taumiyao, amꞌabiye maseledi.

²⁰ Na yauyauledi yo hedaheda aidiyai amvetauveꞌita, ebeha omiu Mosese yana loina ainaena nuwamasele na walomoiha amvaiyaꞌo.

²¹ Owa uveꞌiveꞌita tomowa aidiyai, na vedova owa? Ebe aidiyai uwalo, ‘Havena aivavali’, na owa, uꞌaiꞌaivavali?

²² Na hinage ebe uwalo, ‘Havena ampwanopwanoli’, na owa upwanopwanoli. Na ebe uwalo yau yaubada oyaꞌoyama yataꞌwataꞌwataenaꞌo, na owa yaubada oyaꞌoyamane yana vada tapwalolowai uꞌaiꞌaivavali?

²³ Omiu amwalo haehae alili amwalo, ‘Mosese yana loina alimaiyai imiyamiya’, na hesi loinanane nigele amyamulitaedi, ainaena yada Yaubada ammwaumwau dobiyei.

²⁴ Dova Buki yana walomahalava, iwalo, ‘Omiu Yudeya yami mumuga ainaena nigele Yudeya Yaubada hiꞌawa yabayababaei’.

²⁵ Na moiha omiu Yudeya Abelaham yana ilaꞌilala hapi taumiyai imiyamiya. Na ebe Mosese yana loinaone ammulitaedi, ilaꞌilalawa hapine ginauli namwanamwana alimiyai, na hesi ebe loinanane nigele amyamulitaedi moiha ilaꞌilalanane alimiyai ginauli awaꞌawawa.

²⁶ Na hesi nigele Yudeya Abelaham yana veꞌiveꞌilalane nigele taudiyai iyamiyamiya, na ebe loinadine hiꞌawa abiyedi hiya adi oleya dova ilaꞌilalanane aidiyai imiyamiya.

²⁷ Ainaena omiu Yudeya howola abo nigele Yudeya hiwalo meheigomiu, wuwuna Mosese yana loina yo Abelaham yana ilaꞌilalane alimiyai imiyamiya, na nigele loinadine amyamulimulitaedi, na hesi nigele Yudeya bwagana nigele Abelaham yana ilaꞌilalane taudi ainai, Mosese yana loina himulimulitaedi.

²⁸ Eeta aiteya tomowa ana veꞌiveꞌilala tauna hapi tomowa nimadiyena hipaipaihowai, neta iya nigele Yudeya moiha.

²⁹ Hesi Yudeya tomowana moihana neta atenai veꞌiveꞌilalane. Nigele loina lelelelena yana paihowaena na Yaubada Aluꞌaluwana yana paihowaena. Nuwana tomowa teina dova mata nigele tomowa hiyanoꞌowedi, na hesi Yaubada mata inoꞌowedi.

3

¹ Ebe dova, hava ana namwanamwa ita boda teina yehada Yudeya? Na hinage hava ana namwanamwa veꞌiveꞌilala tauda hihapihapidi?

² Ta moiha, ginauli namwanamwadi bagibagilidi alidai himiyamiya. Na ginauli mugamugaina neta Yaubada yana walo alidai imwauwiyaꞌo.

³ Na ebe Yudeyaone tupwadi nigele hiyayemidi, neta mata vedova? Mata taunuwatuwu bwaubwau vehabadi na Yaubada yana waloyemidi mata nigele iyayemala moiha, bo?

⁴ Mata nigele! Bwagana tomowa maudoidi hiꞌoyaꞌoyama na Yaubada mata nigele iyaꞌoyama. Dova Yaubada yana Buki ainai hilele hiwalo,

‘Yam walo aidiyai ebeha tomowa hiꞌawa dumwaluwego.

Lauvetala ainai yam walo hidumwalu ta havena tomowa hiwalo auꞌauhi.’

⁵ Hesi ebe yada mumuga yababa Yaubada yana mumuga namwanamwana iꞌabiye mahalava, na hava vehabana mata ilaumehe sabuwegitane. Nuwana mumugana nigele hiꞌabiye dumwalu, bo? (Teina tomowa yadi nuwatuwuwena yaꞌauꞌaubabadane.)

⁶ Mata nigele. Wuwuna ebe Yaubada nigele yana dumwalu nigele howahowana taumiya baleꞌu ilauvetalaegita.

⁷ Eeta yada veꞌoyaꞌoyamaena mata Yaubada yana vewasawasa yo yana dumwalu taꞌabiye mahalava, hava vehabana na mata veꞌewa tavai ita tauyababa.

⁸ Na nuwana amwaꞌamwaha yababadi ta paipaihowaidi aidiyena na mata Yaubada yana namwanamwa taꞌita lobai, bo? Mata nigele. Tomowa tupwadi teina veꞌitane vehabana na hiwalo sebasebaiyegau. Na ana dumwalu hiya mata veꞌewa hivai. Nigele teya yana mumuga namwanamwana

⁹ Ebeha ita Yudeya yada miyamiyane nigele Yudeya yadi miyamiya inamwanamwa gabaei? Nigele! Bada yaveꞌitagitaꞌo ebeha maudoida tauyababa.

¹⁰ Dova Buki Veꞌahihi yana walomahalava iwalo:

‘Nigele teya yana mumuga dumwaluna. Nigele alili.

¹¹ Nigele hinage teya yaiya iyahanapui, ta nigele teya yaiya Yaubada iyabehabehaei.

¹² Eeta, tomowa maudoidi bada hilau hapuliꞌo ta amwaha yababana ainai himahalavaꞌo.

Nigele teya hinage yana paihowa namwanamwana. Nigele alili.

¹³ Na awadi hibowa dova magai hoꞌehoꞌena, ta veꞌoyaꞌoyama memenadiyena himahamahalava.

Hopadiyena yadi walowone dova weso womawomalidi.

¹⁴ Na walo yabayababa yo manini hauga maudoina himahamahalava.

¹⁵ Na aedi himwayamwayau tomowa adi oiyemwalowoi vehabadi.

¹⁶ Na ebe aiteya tupwa ainai hilalau, mata ginauli maudoina hiꞌabiye yababadi yo hivenuwayababadi.

¹⁷ Nigele teya nuwadaumwali bo veꞌawa auꞌaugelu aidiyai iyamiyamiya.

¹⁸ Yo hinage nigele Yaubada ana meheuhi aidiyai iyamiyamiya.’

¹⁹ Na wau tahanapuiyaꞌo Mosese yana loina hava iwalowaloweine neta iwalowalo lawei yaiyadiwo loina alonai adi taumiya aidiyai. Eeta neta ainai na tomowa mata nigele hiyawalo auꞌauhi na Yaubada mata tomowa maudoida ilauvetalaegita.

²⁰ Wuwuna mata nigele yaiya teya iwalo, ‘Yaubada mehenai yau yadumwalu wuwuna yana loina hava iwalowalowei maudoina yamulimulitaei’. Loina yana paihowa tomowa ipaihowaidi ta hiꞌitauyoidi ebeha bada hiyababaꞌo. Yaubada imwau dumwaluwegita

²¹ Hesi teina hauga Yaubada tomowa imwauye dumwalugitawa iya baidana bada imiya mahalavaꞌo. Iya nigele yana paihowa loina yana tupwa ainai. Bwagana Mosese yana loina yo tauwalo mahalavao teina mumugane hiwaloꞌauligita.

²² Yaubada tomowa imwau yedumwalugita yada yemidi ainaena Yeisu Besinana ainai. Teina dova Yaubada ipaihowai maudoida Yeisu Besinana ana tauyemidiwo alidai wuwuna nigele teya ana vagavaga.

²³ Taumiya baleꞌu maudoida tauyababa, na tamiya wahi Yaubada yana wasawasa ainaena.

²⁴ Na hesi Yaubada yana aiyauya veꞌiꞌilaena maudoida imwau yedumwalugita Yeisu Besinana ainaena ta ihahaloigitane.

²⁵ Na Yaubada Natuna iꞌaiyauyanei ta ꞌwahinanaena ilauvaigita Yaubada ainai baidada taveꞌauꞌaugelu, neta ebe Yeisu tayemidiyei. Teina Yaubada ipaihowai ta ainaena iveꞌitagita ebeha iya taudumwalu, wuwuna mwalona tomowa yadi yababao iꞌitadiꞌwaidi na iꞌalamaꞌiꞌita ana higa Yeisu Besinana ivetamalenama alidai.

²⁶ Eeta teina hauga Yaubada iveꞌitagita ebeha ibom taudumwaluna, ta Yeisu ana tauyemidiwo ita iꞌawa dumwaluwegitai.

²⁷ Eena vedova, howahowana tawalo haehae ginauli teina vehabana? Nigele taꞌi! Wuwuna yada yemidi aꞌava ainaena iꞌawaꞌawa dumwaluwegita, na nigele loina ana awaꞌabi ainaena.

²⁸ Ainaena taꞌita lobai neta tomowa yada yemidiyena Yaubada mata iꞌawa dumwaluwegita, na nigele loina ana awaꞌabi ainaena.

²⁹ Yede Yaubada ita Yudeya tabom yada Yaubada? Nigele, na nigele Yudeya hinage yadi Yaubada.

³⁰ Yaubada ehebo taꞌi. Ainaena na ita Yudeya imwauye dumwalugita yada yemidiyena, na hinage nigele Yudeya yadi yemidiyena imwau yedumwaluwedi.

³¹ Eeta ebeha teina yemidine vehabana na Mosese yana loina tamwau gabaei, bo? Nigele! Hesi loina ana tupwa ainai tatowolo wahiyala.

4

¹ Na hava mata Abelaham vehabana tawalowei? Abelaham iya tubuda mugamugaina, na hava iya yana ita loba?

² Ebe iya Yaubada imwau dumwaluwei ginauliwone ipaipaihowaidine aidiyena, howahowana vehabadi iwalo haehae, na hesi havena Yaubada mehenai.

³ Wuwuna Buki Veꞌahihi iwalo, ‘Abelaham Yaubada iyemidiyei, ta yana yemidi ainaena Yaubada ivahili ta iya tomowa dumwadumwaluna’.

⁴ Towaho ipaihowa neta ana maiha himohemohei, ta nigele hiyawalowei ebeha dova ana aiyauya, na hesi yana alaꞌiꞌiwahi ana maiha.

⁵ Ainaena ebe yaiya tomowa nigele yana paihowa na hesi Yaubada iyemidiyei neta iya tauyababao inuwanuwahamuidi. Neta tomowane yana yemidi vehabana na Yaubada iꞌawa dumwaluwei.

⁶ Na mwalona bada Deivida iwaloꞌo haugana tomowa teya Yaubada iꞌawa dumwaluwei nigele yana paihowaena na hesi yana yemidiyena. Eeta yana yaliyaya vehabana iwalo:

⁷ ‘Hiya tauyaliyaya moiha wuwuna Yaubada yadi yababao maudoidi inuwahamuidi na imwauwahiyediꞌo.

⁸ Hiya hinage hiyaliyaya wuwuna Bada yadi yababao mata nigele iyavahilidi.’

⁹ Teina yaliyayane Deivida iwawaloweine tomowa hibom taudi hapihapidi veꞌiveꞌilaladi vehabadi, bo? Nigele alili! Hiya hinage nigele taudi veꞌiveꞌilaladi aidiyai. Eeta bada awalowenaꞌo awalo, ‘Abelaham Yaubada iyemidiyei ta yana yemidi vehabana Yaubada ivahili iya tomowa dumwadumwaluna’.

¹⁰ Maivihana teina laulaune ivevetuwunine? Howola nigele Abelaham yana veꞌiveꞌilala hiyamwauwi bo bada himwauyaꞌo na ivevetuwunine? Howola nigele Abelaham yana veꞌiveꞌilala hiyamwauwi na teina laulaune ivevetuwunine.

¹¹ Neta haugane nigele veꞌiveꞌilala hiyamwauwi na veꞌiveꞌilalane ebeha iꞌabiye mahalava neta yana yemidi vehabana na Yaubada ivahili iya tomowa dumwadumwaluna. Teina ainona neta yaiyadiwo maꞌadi veꞌiveꞌilalao na hiyemidi ebeha Yaubada imwaumwau yedumwaludi, hiya Abelaham adi mumuga.

¹² Hiya mayadi veꞌiveꞌilalao neta Abelaham adi mumuga, na yemidinane ainai himiyamiya na himulimulitaei dova Abelaham yana yemidine mulitai abo veꞌiveꞌilalanane ivavaine. Yemidiyena Yaubada yana waloyemidi tavai

¹³ Yaubada Abelaham iwalo yemidiyei ebeha mata mayana huhuwo baleꞌu maudoina hiloina. Na yana waloyemidi neta nigele yana awaꞌabi loina vehabana ainaena, na hesi yemidiyena awadumwalu ilobai Yaubada ainaena.

¹⁴ Eeta, ebe Yaubada yana waloyemidi loina ana awaꞌabi ainaena, neta mata yada yemidi nigele ainona, yo hinage Yaubada yana waloyemidi nigele ainona.

¹⁵ Wuwuna loina ainaena Yaubada yana modiꞌini ilawelawenama. Na havaidova ainai nigele loina neta ainai nigele loina ana awasewa.

¹⁶ Eeta neta waloyemidine ita tauyemidiwo alidai imiyamiya. Teina vehabana na waloyemidine yana wahiyala imiya geyoꞌawa Abelaham tubunao aidiyai neta yana veꞌiꞌila nigele maihana. Ita nigele tauꞌawa abi tayabom alidai na hiya hinage loina nigele hiyabenabenalei na hiyemidi dova Abelaham iyeyemidine. Ainaena Abelaham iya maudoida ada mumuga mugamugaina.

¹⁷ Dova Yaubada yana Buki ainai iwalo, ‘Yavesinuwaigoꞌo ta owa baleꞌu maudoina tubudi’. Abelaham Yaubada iyemidiyei. Ibom Yaubada taumwalowoi adi tauꞌabiye towolouyo, na hinage hava nigele iyamiyamiya howahowana iwalo na himahalava.

¹⁸ Abelaham iyemidi na inuwatuwuhae. Bwagana nigele teya nuwatuwuhae ana aino iyaꞌita, na hesi dalava maudoida iya ada mumuga. Dova Buki yana walo, ‘Tubumwao adi bagibagili mata dova utui adi bagibagili’.

¹⁹ Eeta, Abelaham bada ana bolimai muhamuhana na 100 na hesi yana yemidi nigele iyatapiya haugana inuwatuwui tauna bada imwalowoiꞌo yo hinage mwanena Sela nigele howahowana na heda ilobahi.

²⁰ Na yana yemidi nigele iyalaugabaei eeta Yaubada iwalo yemidiyei ebeha havena inuwanuwatuwu bwaubwau. Na hesi yemidi wahiyala ainaena iꞌoiye mwau ta Yaubada iwalo vetuvehaeyeine.

²¹ Iya atenai iwahiyala alili, ebeha Yaubada yana waloyemidine howahowana ipaihowai.

²² Neta vehabana ta Abelaham yana yemidi Yaubada iꞌawa dumwaluwei.

²³ Walowone ainaena ana awadumwalu ilolobaine nigele iya ibom vehabana hiyalele,

²⁴ ita hinage maudoida vehabada hilele. Ebeha mayada yemidi Yaubada ainai, iya yada Bada Yeisu mwalowoiyena iꞌabiye towolouyoi mata ivahiligita ita tomowa dumwadumwaluda.

²⁵ Na ita yada yababao vehabana Yeisu hiyemwalowoi, na mwalowoiyena Yaubada iꞌabiye towolouyoi, ta ainaena ebeha iꞌabiye dumwalugita Yaubada mehenai.

5

¹ Ainaena teina hauga yada yemidiyena bada Yaubada imwau yedumwalugitaꞌo ta Yaubada baidada tanuwadaumwalu yada Bada Yeisu Besinana ainaena.

² Ta yemidiyena Yeisu iya iluwuwegita Yaubada yana veꞌiꞌila alonai ta wau tamiyamiya. Na Yaubada yana wasawasa veꞌalona tahaꞌwai mayada yemidi diꞌwaena tayaliyaliyayai.

³ Hinage tayaliyaya hauga vitai aidiyai wuwuna ta hanapui neta vitai iya alamaꞌiꞌita ivaivaiyama.

⁴ Na alamaꞌiꞌita iya Yaubada yana mumuga namwanamwa ilawelawenama. Na mumuga namwanamwana iya yemidi miya haꞌwana ilawelawenama.

⁵ Nuwatuwuhaene teina nigele teya nuwaꞌuvali ainai iyamiyamiya, wuwuna Yaubada yana velau ilauꞌatuhiwai atedai Aluꞌaluwa Veꞌahihi ainaena neta iya yana aiyauya.

⁶ Haugana ita howola tapitapiyada Besinana imwalowoi yada yababao vehabadi mahananane ivevesinuwaiwa ainai.

⁷ Ginauli oloꞌololona ebe yaiya imwalowoi taudumwalu vehabana. Nuwana mata dova ta tomowa teya iꞌatepatu ta imwalowoi tomowa namwanamwana vehabana.

⁸ Hesi Yaubada iveꞌitagita yana velau ana mwalaꞌi haugana ita howola tauyababa neta Besinana yana mwalowoi ainaena.

⁹ Iya ꞌwahinana yana sagena vehabana imwau yedumwalugita Yaubada baidada ainaena ta hanapui iliꞌilimani Yaubada yana modiꞌini mata nigele tayaveꞌalo wuwuna Besinana bada imwalowoiꞌo vehabada.

¹⁰ Eeta moiha, mwalona ita Yaubada ana alehao na hesi natuna yana mwalowoi ainaena bada taveꞌauꞌaugeluꞌo. Ta teina haugane ita Yaubada ana geluwo eeta Besinana yana yawahaiyena mata ilivahigita.

¹¹ Hesi neta nigele ibom, ita hinage tayaliyaya wuwuna hava Yaubada ipapaihowaine yada Bada Yeisu Besinana ainaena ta hauga teina Yaubada ainai taꞌawa auꞌaugeluyo. Adam na Besinana

¹² Mugai mumuga yababana ilaoma baleꞌuwai ehebo towaho ainaena, na yana yababa ainaena mwalowoi baidana ivaiyama, eeta ainona neta mwalowoi idabalala tomowa maudoida alidai, wuwuna maudoida taumumuga yababa.

¹³ Na mwalona Mosese yana loina nigele baleꞌuwai hiyamiyamiya, yababa imiyamiya, na hesi Yaubada nigele tomowa iyaꞌawa yababaedi wuwuna nigele loinanane aidiyai.

¹⁴ Eeta, Adam yana haugai ana higa Mosese yana hauga ainai mwalowoi iloina tomowa maudoidi aidiyai. Bwagana hiya yaiyadiwo nigele hiyalauhapuli dova Adam ipapaihowaine haugana Yaubada yana loina iꞌawa sewaedine na hesi mwalowoi iloinaedi. Towaho mata mulitai ilalaoma neta ana oleya dova Adam.

¹⁵ Na hitau bwauwone nigele eheꞌehebodine wuwuna Yaubada yana aiyauya nigele dova Adam yana lauhapuli. Moiha neta tomowa maudoina himwalowoi wuwuna ehebo towaho yana lauhapuli ainaena. Na hesi Yaubada yana veꞌiꞌila imwalaꞌi alili na hinage yana aiyauya tomowa bagibagilidi aidiyai ehebo towaho yana veꞌiꞌila ainaena neta Yeisu Besinana.

¹⁶ Na tenem ehebo ana vagavaga gamwagamwai neta Yaubada yana aiyauya na towaho ehebo yana lauhapuli. Lauhapuline tuluhanai yababa veꞌewana ana lauvetala ilalaomane na hesi lauhapuli bagibagilidi tuluhadiyai aiyauya ainona Yaubada imwau yedumwalugita.

¹⁷ Eeta, towaho ehebo taꞌi yana yababa ainaena mwalowoi ivetauloina towaho ehebo yana yababa ainaena. Na hesi towahone bwaunane yana paihowa iwahiyala alili, ibom Yeisu Besinana Yaubada yana veꞌiꞌila imohe vehulugita nigele iꞌawa maimaiha, na hesi imwau yedumwalugita iya baidada. Ta mata aiyawasi ainai Yeisu Besinana ainaena taloina.

¹⁸ Ainaede tahanahanapui ebeha ehebo towaho yana yababa ainaena na tomowa maudoida lauvetala veꞌewana taveveꞌalone. Dova hinage ehebo towaho yana paihowa dumwaluna ainaena howahowana tomowa maudoida ilivahigita, na Yaubada iꞌawa namwanamwaegita na yawahi vateyai imohegita.

¹⁹ Eeta ehebo towaho yana loina hoꞌe ainaena tomowa maudoidi hiyababa, na hinage ehebo towaho yana awaꞌabi ainaena tomowa maudoidi iꞌabiye maseledi ta Yaubada iꞌawa dumaluwedi.

²⁰ Moiha, hauganane Mosese yana loina imahalava, yababa imwalaꞌi, na haugana yababa imwalaꞌi alili Yaubada yana veꞌiꞌila imwalaꞌi diꞌwa.

²¹ Ainaena tahanapuiyaꞌo ebeha yababa ainona neta mwalowoi iwahiyala tomowa aidiyai, na Yaubada yana veꞌiꞌila ainona iwahiyala alili, eeta imwau yedumwalugita iya baidada na yawahi vateyai tavai yada Bada Yeisu Besinana ainaena.

6

¹ Yede hava mata tawaloweine? Ita ebeha mumuga yababana ainai besiwa tamiyamiya na Yaubada yana veꞌiꞌila alidai imwalaꞌi, bo?

² Nigele alili! Ita tamwalowoiꞌo yada yababao miyamiyadi ainaedi nigele howahowana talautowoi na vedova ta mata tamiyamiya alabili yababa holanai?

³ Wuwuna tahanapui neta haugana bapitaiso tavavaine, yada veꞌehebo Yeisu Besinana baidada hinage bapitaiso ainaena tamwalowoi toyatoyawa.

⁴ Ainaena haugana ta bapitaiso neta Besinana baidada tamwalowoi, ta hiyemagai eheboigitaꞌo. Teina vehabana na Besinana Tamana yana wasawasaena mwalowoiyena iꞌabiye towolouyoi neta dova hinage ita mata yawahi vauvauna ainai tamiya ilimani.

⁵ Na ita bada yana mwalowoine alonai taveꞌeheboꞌo. Eeta mata iya yo ita taveꞌehebo yana towolouyo ainaena.

⁶ Tahanapuiyaꞌo neta ada lautowoi miyamiyadi bada Besinana baidana hiveꞌabahi oviyediꞌo. Eeta tauda adi lautowoi biꞌibiꞌidi yadi wahiyala bada ibohoidiꞌo ta mata nigele yababa ainai tavetaupaihowa.

⁷ Wuwuna haugana tomowa imwalowoi, neta bada yababa yana pai ilotalivahiꞌo.

⁸ Na ebe Besinana baidada tamwalowoi toyawa tayemidi mata iya baidada mayawahida tamiya toyawa.

⁹ Wuwuna tahanapuiyaꞌo neta Besinana mwalowoiyena itowolouyoꞌo ta mata nigele hinage iyamwalowoiuyo. Mwalowoi yana wahiyala iya ainai bada iꞌoviꞌo.

¹⁰ Besinana maiꞌehebo imwalowoi eeta yababa yana wahiyala iya ainaena bada iꞌoviꞌo ta wau livahine imiyamiyane neta Yaubada vehabana imiyamiyane.

¹¹ Ainaena ita yababa ana tupwa ainai tavahiliuyoigitaꞌo neta bada tamwalowoiꞌo na Yeisu Besinana ainaena Yaubada vehabana tamiyamiya.

¹² Yababa havena amtalatalamwei ta taumiu yana paihowa biꞌibiꞌidi iloiloinaegomiu ta yadi nuwalelewo ammulimulitaedi.

¹³ Havena taumiu yaunao amtalatalamwedi ta tau ana yepaihowa yababana vehabadi. Na hesi Yaubada ainai amtalamwegomiu dova tomowa mwalowoiyena iꞌabiye yawahaigomiu. Yaubada ainai maudoina amtalamwedi ta iya mumuga dumwalu vehabana iyepaihowagomiu.

¹⁴ Yababa havena iloiloinaegomiu, wuwuna Yaubada yana veꞌiꞌila ammiyamiya, na nigele yana loina ainaena. Dumwalu ana taupaihowao

¹⁵ Yede mata vedova? Howahowana yababa tamulitaei wuwuna nigele Mosese loinaena tayamiyamiya na Yaubada yana veꞌiꞌilaena ilivahigita, bo? Nigele alili!

¹⁶ Tahanapui iliꞌilimani neta ebe tauloina teya ainai tatalamyowegita ebeha tavetaupaihowa moihana ita neta tauloinane taꞌawaꞌawa abiyeine. Ebe yababa ainai tatalamyowegita mata tamwalowoi na ebe Yaubada taꞌawa abiyei mata imwau yedumwalugita.

¹⁷ Hesi Yaubada yaꞌawa yauwedowei wuwuna mwalona yababa iyepaihowagomiu na wau veꞌita teya ana ita amvai ta veꞌitane ainai yami nuwatuwu holadiyena amꞌawa abiyei.

¹⁸ Na yababaena Yaubada ivaivehulugomiu ta wau mumuga dumwaluna ana taupaihowao.

¹⁹ Yaiyadiwo tomowa hiꞌauꞌaubabada alimiyai neta dova yau yaꞌauꞌaubabada vetaupaihowa vehabana wuwuna yami hanapu nigele iyamwalaꞌi. Mwalona taumiu yaudiyao tupwadi amtalamwedi ta amyepaihowadi miya biꞌibiꞌidi ta yababadi aidiyai ta yababana iyepaihowagomiu. Howahowana dova wau, taumiu yaudiyao amtalamwedi ta amyepaihowadi mumuga dumwaluna ainai ta miya veꞌaveꞌahihina vehabana amvetaupaihowa.

²⁰ Haugana ita yababa iyepaihowagita, nigele habuluna mumuga dumwaluna tayaꞌita lobai.

²¹ Neta mumugaone wau tahinimayaedi. Hesi mwalona tapaipaihowaidi hava namwanamwana aidiyena talolobaidine. Neta mumugaone tapaipaihowaidine tuluhanai mata mwalowoi taveꞌalo.

²² Hesi wau yababa yana paiyena Yaubada ivaivehulugita ta ita Yaubada yana taupaihowao. Yada vetaupaihowa maihana mata miya veꞌaveꞌahihina iya ainai talobai ta tuluhanai mata aiyawasi vateyai taveꞌalo.

²³ Wuwuna yababa ana maiha neta mwalowoi, na hesi Yaubada yana aiyauya nigele maihana, neta yawahi vateyai yada Bada Yeisu Besinana ainai.

7

¹ Tahiguwao, hava ebeha mata yawalowei neta amhanapui iliꞌilimaniyaꞌo wuwuna maudoimiu Mosese yana loina amhanapuiyaꞌo. Loinane neta tomowa iloiloinaei ana higa tomowane yawahina baleꞌuwai iꞌovi.

² Abaꞌita dova waihiu tawatawaholana. Loinaena mata waihiune mwanena ainai imiyamiya ana higa towahone imwalowoi. Hesi ebe towahone imwalowoi mata loina waihiune ipapaiyepatune towahone ainai bada ilotahoꞌeꞌo.

³ Ainaena ebe mwanena howola mayawahina na waihiune teya towaho baidana himiyamiya neta mata iya yehana taumeheꞌayo. Hesi ebe mwanena imwalowoi mata loinanaena iya nigele pai ainai iyamiyamiya ta mata nigele yehana taumeheꞌayo ebe towaho teya itawaholai.

⁴ Tahiguwao, howahowana hinage dova ita. Loina ainai ita bada tamwalowoiꞌo Besinana Tauna ainaena wuwuna ita Besinana tauna yaunao. Na iya mwalowoi ainaena Yaubada iꞌabiye towolouyoi ta ita iya ainaena ebe taꞌaino iliꞌilimani Yaubada vehabana.

⁵ Wuwuna haugana tabom yada nuwatuwuwena tamiyamiya neta loina ada lautowoi holadai biꞌibiꞌidi iꞌoiꞌoiye mwahalidi ta hipaipaihowa ta ebeha taꞌaino iliꞌilimani mwalowoi vehabana.

⁶ Na hesi wau loinanane yana pai ainai bada tamiya wahiꞌo, wuwuna mwalona loinanane iꞌabi avivinigitane bada tamwalowoi gabaenaꞌo. Ainaena taꞌita nigele loina miyamiyana lelelelena ainai tayapaipaihowa na Aluꞌaluwa Veꞌahihi mayawahina vauvauna ainai tapaipaihowane. Loina na yababa

⁷ Ainaena hava mata tawaloweine? Ebeha loinaone neta yababadi, bo? Nigele! Na hesi ebe nigele loina, mata nigele yababa yayahanapui. Ebe nigele loina teina dova iyawalowei iwalo, ‘Hava tomowa teya ainaena havena unuwanuwaleleyei’, mata nigele yayahanapui neta nuwalele tenem dova imiyamiya.

⁸ Hesi loina teina ainaena na yababa yana hawahawaga ilobai ta nuwalele aiduma ana ita vagana ateguwai imahamahalava. Ebe nigele loina mata yababana nigele ana ita yayahanapui.

⁹ Yau hinage mwalona loinane nigele yayahanapui neta mayagu yaliyaya yamiyamiya. Na hesi haugana loinane yahanapui ta yababa iveꞌita lobaigau ta yau yanuwayababa.

¹⁰ Na loinanane ainona ebeha mata yawahi ivaiyama na yau aliguwai neta mwalowoi ivavaiyamane.

¹¹ Loinane ainaena yababana yana hawahawaga ilobai ta iꞌoyamaegau yo iꞌoiꞌoiye mwalowoigau.

¹² Eeta Mosese yana loina neta ginauli veꞌaveꞌahihina, ta loinane ana aubabada neta idumwalu yo inamwanamwa ta iya ainai veꞌaveꞌahihina.

¹³ Yede teina loinane namwanamwanane mwalowoi ivaivaiyama aliguwai, bo? Nigele alili. Yababana iya yagu mwalowoi ivaivaiyama. Na hava namwanamwana ainaena mwalowoi ipaipaihowa holaguwai neta ebeha yababana iꞌabiye mahalava neta yababana. Eeta loinane ainaena ebeha iꞌabiye mahalava neta yababa moiha iyababa vateyai. Aluꞌaluwada na tauda yadi paihowa

¹⁴ Mosese yana loinane bada tahanapuiyaꞌo ebeha Yaubada ainaena, na yau neta tomowa mohili ta taugu yana nuwaleleyena yamiyamiya yo yababana ainai yapaipaihowa.

¹⁵ Eena nigele yayanuwamasele hava vehabana ginaulidine yapapaihowaidine, wuwuna hava yataꞌwataꞌwaediꞌo besiwa yapaipaihowaidi, na hesi hava nuwanuwagune nigele yayapaipaihowaidi.

¹⁶ Eeta, Mosese yana loinane yaꞌawa moihaei, wuwuna yababa yapaihowaiyaꞌo nigele namwanamwana aliguwai.

¹⁷ Nigele ebeha yau yagu paihowa na hesi lautowoi yababana ateguwai yana paihowa.

¹⁸ Yahanapuiyaꞌo ebeha nigele teya mumuga namwanamwana tauguwai iyamiyamiya, eeta mumuga namwanamwana nuwanuwagu na hesi nigele howahowagu yapaihowai.

¹⁹ Ainaena, nuwanuwagu mwalaꞌina yamumuga namwanamwa na hesi nigele howahowagu, wuwuna yababa howola yapaipaihowai.

²⁰ Teina ainaena tahanapui ebeha yababanane yapaipaihowaine nigele yau aliguwena, na hesi lautowoi yababana ateguwai iya yana paihowa,

²¹ Ginauli teina hiveꞌita iliꞌilimanigau ebeha hava namwanamwana nuwanuwagu yapaihowaidi, na hesi yababa ihaꞌwahaꞌwa ta mata bada yapaihowai.

²² Yahanapu iliꞌilimaniuyoigauꞌo Yaubada yana loina ainai yayaliyaya moiha,

²³ na hesi vali loinao aidiyena taugu maudoina iloiloinaegau, hauga maudoina lautowoi yababana ateguwai iwahiyala alili ta yagu nuwatuwu namwanamwadi iꞌabiꞌabiye tapiyadi, na taugu yana paihowa yababana ainaena pai yo mwalowoi yalobalobaidi.

²⁴ Moiha yau tomowa ate muyamuyagu! Teina nuwalelene taugu ilawelawei mwalowoi ainai na mata yaiya ihaloigaune?

²⁵ Na hesi taꞌawa yauwedo Yaubada ainai wuwuna yada Bada Yeisu Besinana ihaloigauꞌo. Ainaena yagu miya teina dova yau ategu yatalamwei moiha Yaubada yana loina yapaihowai, na hesi taugu nuwanuwana loina yababana yapaihowai.

8

¹ Eeta moiha ebe Yeisu Besinana baidada, nigele mata yababa veꞌewana tayaveꞌalo.

² Besinana Yeisu baidada, ainaena Yaubada Aluꞌaluwana yana wahiyalena yababa yo mwalowoi yadi loina aidiyena ilivahigitaꞌo, ta yawahi vauvauna talobaiyaꞌo.

³ Livahine teina Mosese yana loinane nigele howahowana, wuwuna ada lautowoi tapitapiyana, ainaena Yaubada livahine ipaihowai, neta Natuna moiha italamwei idobima baleꞌuwai ana oleya dova ita tauyababa tauda iliꞌwa, na yada yababa vehabana ipwaoliuyowei ta yada yababaone iwahiyala gabaedi,

⁴ eeta teina hauga Yaubada Aluꞌaluwana yana hagu ainaena howahowana loina dumwadumwaluna tamulitaei, na nigele ada lautowoi tapitapiyana ainaena.

⁵ Wuwuna ebe yaiyadiwo adi lautowoi tapitapiyana himulimulitaedi neta hibom vehabadi hinuwanuwatuwu, na mumugane ainaena mwalowoi hilobalobai, na yaiyadiwo ebe Aluꞌaluwa Veꞌahihi himulimulitaei, hiya Yaubada yana nuwatuwu hipaipaihowai, adi maiha neta yawahi namwanamwana yo miyadaumwali.

⁷ Na ebe ada lautowoi tapitapiyana tamulitaei, neta bada Yaubada taveꞌaveꞌalehaei, ainaena nigele howahowana yana loina tamulitaei.

⁸ Eeta ebe ada lautowoi tapitapiyana nigele howahowana Yaubada iyaliyaya vehabada.

⁹ Na hesi omiu Yaubada Aluꞌaluwana iloiloinaegomiu yo hinage alimiyai imiyamiya, ainaena ambom ami lautowoi tapitapiyana nigele iyaloiloinaegomiu. Eeta ebe yaiya nigele Besinana Aluꞌaluwana ainai iyamiyamiya, iya nigele Besinana yana boda.

¹⁰ Eeta moiha, tauda mwalomwalowoidi mumuga yababa ainaena, na ebe Besinana alidai imiyamiya, aluꞌaluwada nigele howahowana imwalowoi, na hesi mayawahida tamiya namwanamwa, wuwuna bada iꞌabiye dumwalugitaꞌo.

¹¹ Yaubada Aluꞌaluwana Yeisu mwalowoiyena iꞌabiye towolouyoi, eeta ebe alimiyai imiyamiya, mata Yaubada Aluꞌaluwanane ainaena taumiu mwalomwalowoidi alimiyai yawahi vauvaudi iꞌaiyauya.

¹² Ainaena tahiguwao, nigele iyalowoinanegita ebe ada lautowoi tapitapiyana tamulimulitaei.

¹³ Mata dova ta tamwalowoi, na hesi ada lautowoi tapitapiyana tataꞌwataꞌwataei na Yaubada Aluꞌaluwana tamulitaei ta ebe Aluꞌaluwanaena ada lautowoi tapitapiyana taꞌoiye mwalowoi, ta ebe yawahi namwanamwana talobai.

¹⁴ Na hinage Yaubada iꞌawa natugu alidai ebe Aluꞌaluwana tamulitaei.

¹⁵ Wuwuna Aluꞌaluwane Yaubada imomohegitawa nigele ebeha ipaihowaigita ta mayada meheuhi tapaihowa. Na hesi Aluꞌaluwane ipaihowaigita ta ita Yaubada natunao yo Aluꞌaluwane yana alaꞌalawowoliyena tayoga Yaubada ainai na tawalo, ‘Aba, Tamamai’.

¹⁶ Yo hinage Aluꞌaluwanaena aluꞌaluwada hanapu imohedi ta ebe tahanahanapui ebeha ita Yaubada natunao.

¹⁷ Ebe ita Yaubada natunao mata Besinana baidada awanamwanamwa talobai Yaubada ainaena. Na hesi tamuya dova Besinana yana muya ta ebe wasawasa talobai dova Besinana yana wasawasa. Vewasawasa mehedai

¹⁸ Muya teina hauga talobalobai yanuwatuwui ebeha nigele ginauli mwalaꞌina, wuwuna miya wasawasa howola abo talobai, neta namwanamwa alilidi,

¹⁹ wuwuna Yaubada yana yemaselewo maudoidi hihaꞌwahaꞌwa nuwanuwadi mwalaꞌina ebeha natunaone iꞌabiye mahalavagita ta hiꞌitagita.

²⁰ Na Yaubada yana yemaselewo nigele yababadi, na iloinaedi ta teina hauga hiveginauli awaꞌawawa, na hesi yana yemaselewone maꞌadi yemidi hihaꞌwahaꞌwa mata ivedumwaludi.

²¹ Wuwuna howola abo Yaubada iꞌabiye vauvaudi ta havena hipwahapwaha, na yadi miya namwanamwana imohedi, dova ita natunaone na yadi vewasawasa hiveꞌalo.

²² Tahanapuiyaꞌo neta Yaubada yana yemaselewo hauga maudoina adi muyamuyao aidiyena hisidasida, dova waihiu ana muyao labalaba ainai.

²³ Na ita hinage Aluꞌaluwa Veꞌahihi lautowoi namwanamwana habuluna taꞌi imohemohegita na mulitai abo miya namwanamwana moiha talobai, ainaena teina taꞌi maꞌada muyao tasidasida na tahaꞌwahaꞌwa, aiteya hauga ainai tauda iꞌabiye vauvau, na iꞌawa natuna moiha alidai.

²⁴ Hauga teina yemidiyena ta haꞌwahaꞌwa neta ada livahi ainona ebeha taꞌita. Wuwuna neta yada nuwatuwuhae nigele tayaꞌita lobai. Moiha, howola nigele tayaꞌita ginauli hava taꞌitaꞌitadine neta vehabana havena tanuwanuwatuwu mugai.

²⁵ Na ebe yada nuwatuwuhae ainona nigele tayalobai, bada besiwa mayada alamaꞌiꞌita tahaꞌwahaꞌwa ana higa taꞌita lobai.

²⁶ Aluꞌaluwa Veꞌahihi hinage yada tapiya aidiyena ihaguhaguigita, wuwuna yada awanoi aidiyai nigele tayahanapui vedova mata taꞌawanoine. Hesi Aluꞌaluwa Veꞌahihi ibom ateda yana sida ainaena na Yaubada ainai iꞌawaꞌawanoi vehabada nigele howahowana tawalowei.

²⁷ Yaubada ibom ateda iꞌita yayahidiꞌo na ihanapuidiꞌo hava Aluꞌaluwa Veꞌahihi inuwanuwatuwuine. Wuwuna ita yana tomowa veꞌaveꞌahihida eeta Aluꞌaluwa Veꞌahihi iꞌawaꞌawanoi vehabada Yaubada yana nuwatuwuwena.

²⁸ Tahanapuiyaꞌo neta yaiyadiwo Yaubada tavelauwei yo ita yaiyadiwo yana nuwatuwuwena na iyogayogaegita mata ginauli maudoidi vehabada imwau iliꞌilimanidi.

²⁹ Ainaena yaiyadiwo ita iyogaegitaꞌo bada iwalo yemidiyegitaꞌo ebeha natunao, bada dova natunane, eeta ibom ada tautuwa na ita maudoida tahinao.

³⁰ Yaubada ivesinuwaegita ta iyogaegita na iꞌawa dumwaluwegita yo hinage yada abamiya wasawasa imohemohegita. Yaubada yana velau

³¹ Moiha, Yaubada yana velaune vehabana nigele howahowana hava tawalowei, wuwuna ebe Yaubada baidada na ihaguhaguigita nigele howahowana yaiya iveꞌalehaegita.

³² Na Yaubada Natuna moiha nigele iyanuwavi, na hesi italamwei maudoida vehabada, ainaena ginauli maudoina hinage howola abo imohe awawaigita.

³³ Ainaena nigele howahowana yaiya teya iveꞌewaigita wuwuna Yaubada bada ivesinuwaegitaꞌo yo iꞌawa dumwaluwegitaꞌo.

³⁴ Na hinage nigele howahowana yaiya ebeha lauvetala veꞌewana alidai imwauwi, wuwuna Besinana Yeisu imwalowoiꞌo vehabada na mwalowoiyena itowolouyo, ta teina hauga Yaubada nima tautuwanai imiyamiya, na vehabada iꞌawaꞌawanoi.

³⁵ Eeta nigele teya ginauli howahowana Besinana yana velau alidaena iwaheigita, vitaiwone dova, walosebasebai yo muya yo alomagigili yo vahali yo wewelohe yo silahe yo mwalowoi.

³⁶ Wuwuna Buki Veꞌahihi ainai waloyemidi ehebo iwalo:

‘Ahubena ehebo ehebo aidiyai yam paihowa vehabana na abamwalowoi ainai atowotowolo, dova sipi ainai guyau habi oiyemwalowoidi’.

³⁷ Na hesi ginauli maudoina teina aidiyena tawahiyala alili, wuwuna Besinana yana velau yo yana hagu alidai imwalaꞌi.

³⁸ Bada yahanapuiyaꞌo moiha neta nigele teya ginauli howahowana Yaubada yana velau alidaena ivai vehuludi, ita mayawahida yo mwalomwalowoida, yo hinage tausagenawasao yo Tomodulele maꞌana geluwo yadi paihowao aidiyena, hauga teina ainai yo hauga ilalaoma aidiyai.

³⁹ Yo tauloinao galewai bo baleꞌuwai yadi wahiyalaena, wuwuna nigele teya yaiya howahowana Yaubada yana velaune yada Bada Yeisu Besinana ainaena, ivaivehulu alidaena.

9

¹ Yawalo dumwalu alimiyai, yau Besinana baidagu na nigele yayaꞌoyaꞌoyama, neta yagu huhu Isileli vehabadi nuwagu iyababa mwalaꞌina, ainaena hauga bagibagilina ategu imuyamuya vehabadi. Yagu walomahalava teina Aluꞌaluwa Veꞌahihi ihanahanapui neta walo moiha.

³ Bada ebe vehabadi na Yaubada yana awayababa alonai yamiyamiya ta Besinana vehabadi iveꞌahagau ta hiya yagu huhuwo hivebesinana.

⁴ Wuwuna hiya Yudeyaone ivesinuwaidi ta hiya natunao yo aidiyai yana wasawasa iꞌabiye mahalava. Yana waloyemidi ipaihowa hiya baidadi ta Mosese yana loina imohedi. Hiya walovetuvehae moiha aidiyai yo Yaubada yana waloyemidi hivaiyaꞌo.

⁵ Babada mugamugaidi aidiyai, hiya dova Abelaham yo Aisake yo Yakobo na mulitai yadi huhu ainaena Besinana imahalava. Eeta ginauli teina vehabadi Yaubada ibom imwalaꞌi alili tawalo vetuvehae hauga maudoina. Moiha.

⁶ Nigele Yaubada yana waloyemidi iyabeꞌu wuwuna Isileli tomowadi maudoidi nigele Yaubada yana tomowao.

⁷ Eeta moiha, nigele Abelaham yana huhu maudoina Yaubada iyaꞌawa natunaedi, wuwuna Yaubada iwalo, ‘Yam huhuwo Aisake natunao ainaena’, mata nigele Aisake tahina ainaena.

⁸ Eeta teina ana nuwamasele iveꞌitagitaꞌo moiha ebeha Yaubada natunao nigele Abelaham yana huhu ainaena, na hesi Yaubada yana waloyemidi ainaena.

⁹ Wuwuna mwalona Yaubada Abelaham ainai iwalo yemidi, iwalo, ‘Howola abo hauga yawalowei ainai, yalau gwaipilema na natum towahona yamohego, mwanemne Sela ainaena’.

¹⁰ Na hinage dova tubuda Aisake Lebeka itawaholai, na natunao patubwau diyanai,

¹¹ na mulitai abo Lebeka ilabalaba, Yaubada iwalo auli, iwalo, ‘Ebe natumwone ulabahidi alomauna ivetauloina tautuwa ainai’. Teina ainai tahanapui moiha ebeha hedahedadaone nigele yadi paihowa namwanamwana bo yababana aidiyena iyavesinuwaedi na hesi yana waloyemidi ainaena, wuwuna Yaubada nigele tomowa yadi paihowaena iyavesinuwaedi, na hesi ibom yana nuwatuwuwena.

¹³ Dova hinage Yaubada iwalo mahalava Buki Veꞌahihi ainai, iwalo, ‘Yakobo yavelauwei, na hesi Iso yataꞌwataꞌwataei’.

¹⁴ Ainaena hava mata tawaloweine Yaubada yana paihowa teina vehabana, ebeha nigele dumwaluna, bo? Nigele!

¹⁵ Wuwuna Mosese yana loina ainai, Yaubada iwalo:

‘Ebe teya nuwanuwagu yaꞌatemuyamuyaei mata yaꞌatemuyamuyaei, hinage ebe yaiya nuwanuwagu yavelauwei mata yavelauwei’.

¹⁶ Teina ainaena iveꞌitagita ebeha Yaubada yana velau nigele iyamahamahalava awawa, tomowa yadi nuwatuwuwo bo nuwana yadi paihowao aidiyena, na hesi ibom bada yana atemuyamuyaena.

¹⁷ Na teina hinage ehebo abaꞌita Itipita yadi tauwasawasa ainaena, wuwuna mwalona Yaubada yana walo Pelo vehabana, iwalo, ‘Yavetowologo ta owa tomowa mwalaꞌina wuwuna ebeha alimwena yagu wahiyala yaꞌabiye mahalava yo hinage yehagu uꞌabiye dabalala baleꞌu tupwa maudoina aidiyai.

¹⁸ Eeta moiha, ebe Yaubada nuwanuwana na yaiya iꞌatemuyamuyaei mata iꞌatemuyamuyaei bada, na ebe yaiya nuwanuwana na iꞌabiye tui mata iꞌabiye tui. Yaubada yana modiꞌini yo yana atemuyamuya

¹⁹ Nuwana tupwamiu omiu ginauli teina vehabana amnuwanuwatuwu, ebeha maudoida yada mumugaone Yaubada yana vesinuwaena, hava yede vehabana iveꞌewaigita?

²⁰ Augeluwo, ita havena teina dova Yaubada taꞌuluꞌulumiyanei, dova walata ana tauꞌabi, ehebo hauga towahonane walata iꞌabidi, na ehebo walata tauꞌabiwa iwalo auline, iwalo, ‘Hava wuwuna nigele uyaꞌabigau dova augelune?’

²¹ Na hesi ana dumwalune neta tauꞌabi walatane ibom yana paihowa iloinaei, ebe nuwanuwana na toputopu ehebonane ainaena walata bwau iꞌabidi, ehebo ana ita namwanamwana na ehebo nigele. Ibom abo iloiloina.

²² Yaubada hinage dova yana paihowa ibom iloiloina, na hauga maudoina tauyababa aidiyai iꞌalaꞌalamaꞌiꞌita mwalaꞌina, na yadi yababa nigele iyaveuveuyodi, ta yana modiꞌini yo yana wahiyala hiyaꞌita.

²³ Hinage nuwanuwana na yana wasawasaone mugai iꞌatububunidiꞌo ita ivesinuwaegita vehabada, ebeha yana atemuyamuya iveꞌitagita.

²⁴ Eeta boda bwau aidiyena iyogaegita, Yudeya alimaiyena, na omiu nigele Yudeya alimiyena.

²⁵ Dova tauwalo mahalava Hoseya yana Buki ainai iwalo mahalava, iwalo:

“Tomowao hiya nigele yagu bodao yayogaedima ta yagu boda ainai hiluwu, wuwuna mwalona nigele yagu velau ainai hiyamiyamiya, na teina hauga bada yavelauwediꞌo.

²⁶ Na dalavanane ainai Yaubada iwalo aidiyai, iwalo: Omiu nigele yagu bodao, mata walonane hibui ta hiyogaedi hiwalo, ‘Hiya Yaubada Miyawahina natunao!’.”

²⁷ Aisaya hinage dova Isileli vehabadi iwalo mahalava, iwalo:

“Howola abo Isileli bodanao idabalala dova namonamo leꞌawai, na hesi mata aidiyena vihavihadi Yaubada ilauyeyawahaidi.

²⁸ Wuwuna Bada mata baleꞌu maudoina ilaumehesabu mwayamwayauwei”.

²⁹ Dova hinage mwalona Aisaya yana walo, iwalo:

“Yaubada ibom Tauwahiyala, ainaena ebe nigele teya ada mumuga iyaꞌatemuyamuyaedi,
mata maudoida imutugita, dova Sodoma yo Gomola maudoidi iꞌoiye mwalowoidine”. Isileliwo nigele hiyayemidiyei

³⁰ Teina ainaena tahanapui ebeha nigele Yudeya nigele hiyatowotowoi ta ebeha Yaubada iꞌawa dumwaluwedi, na hesi yadi yemidi aidiyena awadumwalu hilobalobai.

³¹ Na hesi Isileliwone hiꞌaiꞌaipate ta ebeha loina ana awaꞌabi ainaena Yaubada iꞌawa dumwaluwedi, na hesi hiꞌaiꞌaipate ahaya.

³² Hiya yadi nuwatuwu ebeha yadi paihowa vehabana mata Yaubada iꞌawa dumwaluwedi ainaena, ta nigele hiyayemidiyei. Neta yadi lauhapuli dova gaima ainai hitupatupa.

³³ Eeta Buki Veꞌahihi ainai vehabana iwalo:

“Amꞌita avivinigomiu wuwuna gaimane mata Saiyoni ainai yamwauwi, na tomowa bagibagilidi ainai hibeꞌu, na hesi ebe yaiyadiwo ainai hiyemidi, mata nigele hinimaya hiyalobai”.

10

¹ Tahiguwao, walo moiha yagu bodaone vehabadi yanuwanuwatuwu mwalaꞌina vedova na livahi hilobai, ainaena hauga bagibagilina vehabadi yaꞌawaꞌawanoi wahiwahiyala Yaubada ainai.

² Yahanahanapuidi ebeha Yaubada vehabana hiꞌaiꞌaipate wahiyala, na hesi nigele ana amwaha moiha ainaena hiyalau.

³ Amwahanane iyababa, ainaena hiya yadi nuwatuwu himulimulitaedi, ta ebeha ainaena Yaubada iꞌawa dumwaluwaedi, na hitowoi ahaya, wuwuna Yaubada yana nuwatuwune adi awadumwalu vehabadinane nigele hiyatalamyowedi.

⁴ Eeta Mosese yana loina neta Besinana itomvehuluyaꞌo, ta ebe yaiya Besinana iyemidiyei mata awanamwanamwa ilobai Yaubada ainaena. Yaubada yana livahi tomowa maudoida vehabada

⁵ Mosese yana loina ada awadumwalu vehabana, na ilele, iwalo, ‘Ebe yaiya loina maudoina imulitaedi, mata yawahi ilobai’.

⁶ Na teina taꞌi ita yada yemidi ebeha Yaubada ibom iꞌabiye dumwalugita, wuwuna ginauli teina vehabana Buki Veꞌahihi yana walomahalava ainai iwalo, ‘Havena teya alimiyena inuwanuwatuwu iwalo, “Yaiya mata ihae galewai?”.’ (Ana nuwamasele ebeha yaiya Besinana ilauvaiyama?)

⁷ Na hinage havena yaiya alimiyena inuwanuwatuwu iwalo, “Yaiya iꞌaitulu baleꞌu elauhanai?”.’ (Ana nuwamasele ebeha yaiya Besinana iꞌabiye towolouyoi mwalowoiyena?)

⁸ Na hesi Buki Veꞌahihi yana walomahalava dumwadumwaluna iwalo, ‘Walonane vahalimiyai imiyamiya neta awamiyai yo hinage atemiyai’. Eeta ai yemidi vehabana aguguguguya.

⁹ Ainaena ebe Yaubada nuwanuwada ilivahigita awadaena tatalam, tawalo, ‘Yagu Bada owa Yeisu’, na atedaena tayemidi moihana neta Yaubada Yeisu mwalowoiyena iꞌabiye towolouyoiyaꞌo.

¹⁰ Wuwuna atedaena Yaubada tayemiyemidiyei na imwau yedumwalugita, na awadaena tawalowalo mahalava, ta ilivalivahigita,

¹¹ dova Buki Veꞌahihi iwalo, ‘Ebe yaiyadiwo hiyemidiyei, mata nigele hinimaya hiyalobai’.

¹² Eeta nigele teya wahei alidai iyamiyamiya, ai Yudeya na omiu nigele Yudeya ahiꞌahipudai, wuwuna maudoida ita yada Bada. Ainaena ebe ainai taꞌawanoi mata awanamwanamwa mwaumwauna tavai.

¹³ Dova Buki Veꞌahihi yana walo, ‘Ebe yaiya yehanaena iꞌawanoi, mata ilivahi’.

¹⁴ Na moiha, tomowa nigele howahowana na livahi vehabana hiꞌawanoi ainai, ebe nigele hiyayemidiyei. Na ebe nigele hiyayemidiyei mata vedova wasanane hibenaleine. Na nigele howahowana hibenalei ebe nigele yadi tauguguya.

¹⁵ Mata vedova wasane namwanamwana higuguyaei ebe tauguguyaone nigele hiyavetamaledi? Dova Buki Veꞌahihi ainai iwalo, ‘Tauguguyaone hiya wasa namwanamwanane higuguyaedi iyawedi inamwanamwa alili’.

¹⁶ Na hesi tomowa tupwadi wasa namwanamwana nigele hiyaꞌawa abiyei, dova Aisaya iwalo mahalavaꞌo vehabadi, iwalo, ‘Bada, yam walo teina vehabana nigele hiyayemidiyegau’.

¹⁷ Eeta yemidi wasa ainaena ilaolaomane. Na wasana neta Besinana guguyana ainaena ilaolaoma.

¹⁸ Na yapanivila Yudeyaone bada yana walone hibenalenaꞌo, bo nigele? Bada hibenalenaꞌo, wuwuna Buki Veꞌahihi ainai iwalo:

“Yadi guguya bada dalava maudoina hibenalenaꞌo, wuwuna baleꞌu maudoina ainai walonane hiwalo mahalavaenaꞌo”.

¹⁹ Na vedova? Walo teina vehabana Isileli hinuwamaseleꞌo bo nigele? Bada hihanapuiyaꞌo, wuwuna Yaubada mwalona Mosese ainai iwalo:

“Omiu Isileli, mata yagu paihowa ainaena vali tomowa amꞌalomagigiliyedi, yo hinage ammodiꞌiniyedi, nigele Yudeya vehabadi.”

²⁰ Aisaya hinage iwalo wahiyala Yaubada yana walo vehabana iwalo:

“Yaiyadiwo, nigele hiyabehabehaegau hiya hilobaigauꞌo, na hiya nigele hiyapanipanivila vehabagu, bada aidiyai yaꞌabiye mahalavauyoigaꞌo”.

²¹ Hesi Isileliwone vehabadi iwalo:

“Hauga maudoina yayogayoga ebeha hilaoma aliguwai, na hesi hitaꞌwataꞌwataegau, wuwuna hiya tauꞌabitauꞌwata”.

11

¹ Yapanivila, moiha Yaubada yana bodao Isileliwone itaꞌwataꞌwataediꞌo, bo? Nigele! Yau ehebo Isileli huhu Beniyamina ainaena, na ama mumuga mwalaꞌina yehana Abelaham.

² Ainaena yahanapuiyaꞌo ebeha ai Yaubada yana bodao ivesinuwa mugaiyegai ta ai yana tomowao, eeta nigele mata iyasosomanaegai. Mwalona Elaitiya Isileli ivetalapiliyedi Yaubada ainai, na yana walowone Buki Veꞌahihi ainai iwalo,

³ ‘Bada, yam tauwalo mahalavao maudoidi hiꞌoiye mwalowoidiꞌo yo hinage yam abapwaoli hiꞌabiye yababayaꞌo, na yau yabom yatutupwane, na teina taꞌi nuwanuwadi ebeha hiꞌoiꞌoiye mwalowoigau’.

⁴ Na yana panivilane maihana hava Yaubada ainai iwawaloweine? Na Yaubada iwalo, ‘Nigele ebeha ubom umiyamiyane, yagu bodao hitau 7,000 hinage himiyamiya, hiya Baꞌala ainaena yaꞌabi avivinidi, ta nigele ainai hiyatapwatapwalolo’.

⁵ Hinage dova teina taꞌi Yaubada bada yana bodao Yudeya aꞌava vihavihamai ivesinuwaegai yana veꞌiꞌilaena, na ai teina atupwa amiyamiyane.

⁶ Hagu teina alobai nigele ebeha yama paihowao aidiyena, na hesi Yaubada yana veꞌiꞌila ainaena, wuwuna veꞌiꞌila maꞌana maiha neta nigele veꞌiꞌila moihana.

⁷ Yede vedova. Teina ainaena Isileli maudoidi hava hibehabehaeine nigele hiyalobai, na hesi ai vihaviha aꞌavamai Yaubada yana bodao ivesinuwanegai ta livahine alolobaine. Na maudoidi talinadine itui ta Yaubada yana yoga nigele hiya benalei.

⁸ Na Buki Veꞌahihi dova yana walomahalava, iwalo:

“Mwalona ta wau Yaubada iꞌabiye nuwapwanopwano, ainaena mehedi igibuidi na hinage talinadi iꞌabiye tuidi”.

⁹ Deivida hinage yana walomahalava dova iwalo:

“Ilowoinanedi ebe yadi guyau aidiyena mata hiꞌona na ilauhipwaidi dova hipwahipwa, yo hinage dova haꞌe aidiyai hibeꞌu, ta maihana hiveꞌalo.

¹⁰ Na hinage ilowoinanedi ebe mehe gibugibudi havena hava hiꞌitaꞌita, na hinage hauga maudoina adi avaꞌavala vitaidi aidiyena tuluhadi hilotayou vateyai.” Hiya nigele Yudeya adi livahi vehabana

¹¹ Na yapanivila, nuwana Yudeyaone bada hibeꞌu vateyaiꞌo ta nigele mata hiyatowolouyo, bo? Nigele, howola abo hitowolouyo. Eeta amnuwatuwu avivini neta hiya hilauhapuli ta omiu nigele Yudeya livahi amlobalobai ta Isileliwone hiꞌalomagigiliyegomiu.

¹² Na moiha omiu nigele Yudeya awanamwanamwa amlobalobai wuwuna hiya Yudeya bada hibeꞌuꞌo, na hesi ebe hitowolouyo neta awanamwanamwa mwalaꞌina maudoida alidai.

¹³ Yagu walo teina omiu nigele Yudeya vehabamiu, wuwuna yavetauyewasa omiu nigele Yudeya vehabami eeta yagu paihowa teina vehabana yawalo haehaei.

¹⁴ Ta ebe Yudeyao hiꞌalomagigiliyegomiu, na yadi alomagigiline ainaena nuwadi iꞌabi gwaipiledi, ta livahi hilobai Yaubada ainaena.

¹⁵ Na moiha, Yaubada Yudeya itaꞌwataꞌwataedi na omiu nigele Yudeya Yaubada iꞌawa auꞌaugeluwegomiu, na ebe aiteya hauga ainai Yudeyaone hinuwabui neta, ginauli namwanamwana, na ainona taumwalowoi mata hiyawahai iliꞌilimani.

¹⁶ Ebe pwalawa tupwana Yaubada tamohei, neta veꞌaveꞌahihina ta pwalawane maudoina mata veꞌaveꞌahihina. Dova hinage aiwa ebe lamlamna amꞌita veꞌaveꞌahihina, bada amhanapuiyaꞌo ebeha lagalagana maudoina veꞌaveꞌahihidi.

¹⁷ Na Yudeyaone dova Yaubada yana aiwa, wuwuna lagalaganao tupwadi igodudi na omiu alimiyena itoleꞌaivelaheyedi, wuwuna omiu vali aiwa laganao na hesi ivaigomiu ta yana aiwa ainai itubweigomiu, eeta yana aiwane ana bwahiyena amnumanuma, neta Yaubada yana velau hauga maudoina amlobalobai.

¹⁸ Na hesi velaunane havena vehabana amnuwatuwu haehae, wuwuna lagalaga nigele howahowana wuwu iloinaei, na hesi aiwa wuwuna howahowana lagalaga iloinaei.

¹⁹ Wuwuna ebe amnuwahaehae na amwalo, ‘Yaubada yana aiwa lagalaganao bada igodudiꞌo na ai alimaiyena itoleꞌaivelaheyedi’.

²⁰ Neta walo moiha. Na hesi amnuwatuwu avivini neta lagalaganaone igogodudine, nigele hiyayemidiyei, ainaena omiu yami yemidiyena amtowolo wahiyala. Eeta ilowoinanegomiu ebe Yaubada ammeheuhei na havena amnuwahaehae,

²¹ Yudeyaone hiya lagana moihadi na Yaubada itaꞌwataꞌwataedi. Yami nuwatuwu amwalo ebeha mata nigele iyatom vehulugomiu, bo?

²² Veꞌita teina iveꞌitagita ebeha Yaubada yana veꞌiꞌila yo yana lauvetala taꞌita lobaiyaꞌo, neta taubeꞌu aidiyai loina imwauwi. Na omiu mata inuwanamwanamwa alimiyai ebe nuwanamwanamwa ainai ammiyamiya. Na hesi ebe yana veꞌiꞌilane amtaꞌwataꞌwataei, omiu hinage igoduvehulugomiu.

²³ Na ebe Yudeya hinuwabuiuyo na hiyemidiuyowei, mata Yaubada itubweuyoidi, wuwuna Yaubada howahowana na ipaihowai.

²⁴ Na omiu nigele Yudeya amnuwatuwu avivini neta mwalona omiu vali aiwa lagalaganao, ta nigele Yaubada yana aiwane ainai amyamiyamiya, na hesi yana paihowa abanuwapwanopwano mwalaꞌina alimiyai ipaihowai, wuwuna yana aiwane ainai itubweigomiu, eeta Yudeyaone, hiya Yaubada yana aiwa lagalaganao moiha, ta Yaubada howahowana itubweuyoidi yana aiwane ainai. Isileli mata livahi hilobai

²⁵ Tahiguwao, nuwanuwagu ehebo ginauli dawadawanina Isileli vehabadi yawalo mahalava alimiyai na ebe havena amnuwahaehae, na hesi ginauli teina amhanapui neta howola Isileli mayadi awasewa himiyamiya ana higa omiu nigele Yudeya ami vahivahili maudoina ilaoma Yaubada ainai.

²⁶ Na howola abo Isileli livahi hilobai. Wuwuna Buki Veꞌahihi ainai iwalo mahalava, iwalo:

‘Taulivahine towaho Saiyoni howola abo imahalava na Yakobo yana huhu yadi yababa aidiyena ivaivehuludi.

²⁷ Na haugana ebe yadi yababa yavaivehulu, mata waloyemidi namwanamwana yamohedi.’

²⁸ Na moiha, teina hauga Yudeya Yaubada hiveꞌaveꞌalehaei, wuwuna yana wasa namwanamwana hitaꞌwataꞌwataei, ainaena omiu nigele Yudeya livahi amlobalobai, na hesi amnuwatuwu avivini ebeha Isileli Yaubada ivelauwedi, wuwuna mwalona tubudiyaone Yaubada ivesinuwanediꞌo yana bodao.

²⁹ Wuwuna Yaubada mumugana yo yana velau yo yana vesinuwa aidiyai mata nigele iyamwau gwaipiledi.

³⁰ Na omiu nigele Yudeya mwalona Yaubada nigele amyamulitaei, na teina hauga Yaubada yana atemuyamuya bada amlobaiyaꞌo, wuwuna Isileli Yaubada hitaꞌwataꞌwataei.

³¹ Ainaena wau Yudeyaone Yaubada hiꞌawa sewaei ta atemuyamuyane ehebonane amveveꞌalone hiya hinage mata hiveꞌalo.

³² Wuwuna Yaubada tomowa maudoida ipaihowigita ta awasewa yana pai holanai tamiyamiya. Eeta iya mata yana atemuyamuya iꞌabiye mahalava maudoida alidai.

³³ Yaubada yana wasawasa yo yana nuwatuwu honihoni imwalaꞌi alili ainaena ita nigele teya howahowana Yaubada yana nuwatuwu yo yana paihowa ihanapuidi.

³⁴ Eeta moiha, yana hanapu imwalaꞌi alili, ainaena nigele howahowada tadiꞌwai yo ebeha taveꞌita ainai teya hava ginauli vehabana.

³⁵ Na nigele howahowana ta ana vagavaga tamwauwi na ebeha alidai iyemaihauyoi.

³⁶ Wuwuna ibom ginauli maudoina adi taupaihowa, yo hinage ibom yana wahiyalaena ginauli maudoina ibom vehabana iginaulidi. Ainaena Yaubada tawalo vetuvehae vateyai. Moiha.

12

¹ Tahiguwao, amnuwatuwu avivini neta Yaubada yana atemuyamuya alidai imwalaꞌi alili, ainaena teina yagu awanoi alimiyai ebeha haugana mayawahimiu ampwaoliyegomiu Yaubada ainai, wuwuna Yaubada nuwanuwana na taumiu maudoina amtalamwedi yana paihowa veꞌaveꞌahihina ainai. Teina tapwalolo moiha Yaubada mehenai ebe dova ampaihowai.

² Havena ampaihowauyoigomiu ta mumuga baleꞌu ammulimulitaei, na Yaubada ainai amtalamyowegomiu, ta yami nuwatuwu ilauyevauvaudi ta ainaena ami oleya ibuidi ta mata howahowana Yaubada yana nuwatuwu hava namwanamwadi, yo yaliyaliyayadi, yo dumwadumwaludi amhanapuidi.

³ Yau Yaubada ainaena atemuyamuya yalobai, eeta ilowoinaegau na yaꞌaubabada alimiyai na ebe nuwatuwu moiha amvai ta havena amnuwahaehae, na hesi mayami nuwamasele amliveliveuyoigomiu wuwuna yami yemidi ehebo ehebo amlobalobai Yaubada yana aiyauya ainaena.

⁴ Na tauda ehebo taꞌi, na hesi yaudao bagibagilidi na yaudaone maudoidi yadi paihowa vagadi vagadi.

⁵ Na ita hinage Yeisu Besinana Tauna, na yada paihowa vagadi yo vagadi, na hesi maudoida Besinana ainai taveboda ehebo, na tavehaguhaguyoigita.

⁶ Eeta veꞌiꞌila ana mwalaꞌi viha Yaubada imohemohegita neta hinage dova ebeha ada aiyauya vagadi vagadi tayepaihowadi. Ebe ada aiyauya Yaubada yana tauwalo mahalava, mata yada yemidi ana mwalaꞌiyena tawalo mahalavaei. Ta ebe yaiya alimiyena mayana yemidi yo hinage mayana nuwamasele walomahalava vehabana, ana lowoinana moiha ebe bada ipaihowai.

⁷ Na ebe yada aiyauya neta abihagu, taꞌabi hagu iliꞌilimani. Na ebe Yada aiyauya veꞌita, taveꞌita dova.

⁸ Na ebe yaiya iꞌaiꞌaipate yo ana geluwo hauga maudoina iꞌabiꞌabiye wahiyaladi, dova yana paihowa. Na ebe yaiya hauga bagibagilina iꞌaiꞌaiyauya awawa, mayana talam ipaihowa dova. Na ebe taumugaiwone paihowa ilowoinanedi, hipaihowa bada. Na hinage ebe yaiya yana atemuyamuyaena ana geluwo ihaguhaguidi, mayana yaliyaya ipaihowa. Velau amwaꞌamwaha moiha

⁹ Amvelau moiha na yababana amtaꞌwataꞌwataei, na hesi mumuga namwanamwana amꞌabi avivini.

¹⁰ Awa tahina ana velau ainaena amvelauweuyoigomiu yo veꞌahihi ainai amvelauweuyoigomiu.

¹¹ Na havena Yaubada yana paihowa ainai amꞌabiꞌabitauꞌwata, na hesi mayami atetalam ampaihowa.

¹² Na amnuwatuwu avivini neta howola abo Yaubada yana hagu imahalava alidai yo vehabana amyaliyaya, ainaena yami miya vitai aidiyai amꞌawaꞌawanoi Yaubada ainai mayami alamaꞌiꞌita.

¹³ Na ebe tauyemidiwo hiꞌabiye ahubali, yami tobwatobwaena amhaguidi, na amyogaedi yami vadai.

¹⁴ Ebe yaiyadiwo hitaꞌwataꞌwataegomiu havena amwalowalowedi, na hesi amꞌawa namwanamwaedi.

¹⁵ Na ebe tauyaliyayao amꞌitadi, baidamiyao amyaliyaya. Hinage dova ebe taudou amꞌitadi, baidamiyao amdou,

¹⁶ ainaena maudoimiu nuwami ehebo na amiyamiya. Havena amnuwahaehae na hesi paihowa nuwanuwadobidi amvaidi. Havena amnuwanuwatuwuyoigomiu na amwalo ebeha omiu tauhanahanapu.

¹⁷ Ebe yaiyadiwo hiveꞌalehaegomiu, havena mumuga yababana ainaena amyemayemaiha aidiyai, na hesi amyemaihadi mumugane tomowa maudoidi hiꞌawaꞌawa namwanamwaedine aidiyena.

¹⁸ Na hinage amtowoi wahiyala ta mumuga namwanamwana ainaena miya daumwali vehabana amiya tomowa maudoidi aidiyai.

¹⁹ Na havena tauyababa aidiyai amvaivai maiha yo ebeha yadi yababao amyemaihadi, wuwuna ginauli teina Yaubada ibom ana tauloina, vehabana Buki Veꞌahihi ainai bada iwalo mahalavaꞌo, iwalo, ‘Yayoi tomowa yadi yababa vehabana yaloina’. Teina dova Taubada yana walo:

²⁰ ‘Na ebe ami alehao hivahali, aiꞌai am mohedi yo ebe gadodi imaguni, bwahi am mohedi,
ta ebe yadi yababao aidiyena hihinimaya iꞌiwahi.’

²¹ Ainaena havena yababa ainai amtalatalamwegomiu ta alimiyai iwahiwahiyala, na omiu hesi amwahiyala gabaei yami mumuga namwanamwana aidiyena.

13

¹ Maudoida howahowana ebe yada gabemaniwo taveꞌahihiyedi, wuwuna yadi abatowolowo Yaubada imohedi. Na ebe yadi abatowolowone nigele Yaubada ainaena, nigele howahowana na alidai hivetauloina.

² Ainaena ebe yaiya tauloinao ihinalidi, neta Yaubada yana paihowa ihinaliyaꞌo, eeta maiha yababana ilobai.

³ Na tauloinaone nigele yadi paihowa ebeha taunamwanamwao hiꞌabiye meheuhidi, tauyababa aidiyai. Ainaena ebe nigele nuwanuwamiu tauloinao ammeheuhedi, howahowana ammumuga dumwalu, ta ebe tauloinaone hiꞌawa namwanamwaegomiu.

⁴ Wuwuna hibom Yaubada yana taupaihowao imwauwidi habi haguigomiu. Na ebe ammumuga yababa, mata ammeheuhi, wuwuna hiya tauloinao ta howahowana hiloinaegomiu. Neta Yaubada yadi abatowolo imohediꞌo ta ebeha loina himwauwi tauyababa aidiyai.

⁵ Eeta howahowana ebe tauloinao amꞌawa abiyedi ta Yaubada yana modiꞌini havena amveꞌaveꞌalo yo amꞌateꞌatehawawali.

⁶ Hinage howahowana yada takesi tamohedi, wuwuna hiya Yaubada ivesinuwanedi teina paihowane vehabana.

⁷ Ami vagavaga tomowa aidiyai imiyamiya amvedumwaludi. Ebe ami vagavaga takesi ainaena amvedumwalu. Ebe ami vagavaga tomowa aidiyai ainaena amvedumwaludi. Eeta yami veꞌahihi maudoidi amꞌabiye mahalava yo tomowa maudoidi amveꞌahihiyedi. Velau

⁸ Ami vagavagao amyemaiha veꞌovidi, ta ebe vagavaga ehebo taꞌi neta velau vehabana amnuwanuwatuwu wuwuna velau nigele howahowana amyemaihadi, ainaena ebe ada geluwo tavelauwedi, loina maudoidi bada tapaihowaidiꞌo,

⁹ Loina dova havena pwanoli, yo havena yemwalowoi, yo havena aivavali, yo havena tomowa yadi tobwatobwa amnuwanuwaleleyedi, yo hinage loinao tupwadi himiyamiya, na hesi loinaone adi uini teina dova iwalo, ‘Am geluwo uvelauwedi dova owa amvelau’.

¹⁰ Ta ebe loina teina umulitaei, Mosese yana loinao maudoidi bada uꞌawa abiyediꞌo, wuwuna ebe yaiya velau atenai imiyamiya, mata nigele ana geluwo iyaꞌabiꞌabiye yababadi.

¹¹ Eeta teina taꞌi howahowana na dova ampaihowa, wuwuna hauga muhamuhana na iꞌovi. Yeisu bada amyemidiyenaꞌo, ainaena havena amꞌenoꞌeno, na hesi amhilahilawa, wuwuna hauga muhamuhana ainai na ada Taulivahi imahalavama.

¹² Boniyai nige bweda na iꞌovi ta masele muhamuhana na imahalava. Ainaena na guguyou mumugadi ta paipaihowaidi talaumwauwidi na masele aleha ginaulidi taliꞌwadi

¹³ Eeta taꞌita avivinigita ta dova tomowa masele ana taumiya. Na havena tapwanopwanoli, na havena tanuma yauyaule, na havena meheganawali, na havena aleha, na havena wahei, na havena alomagigili.

¹⁴ Na hesi Bada Yeisu Besinana taliꞌwa na havena baleꞌu mumugana vehabana tanuwanuwatuwu na tamulimulitaedi.

14

¹ Tupwana tomowa yadi yemidi tapitapiyadi, nigele wahiwahiyaladi, ainaena howahowana tatalam na baidadao taveboda ehebo, na havena taꞌawa yagayagala.

² Tupwadi tomowa hiwalo, ‘Aiꞌai maudoina howahowana taꞌaidi’, na tupwadi yadi yemidi tapitapiyana hiwalo, ‘Lagulagu bunumadi havena taꞌaiꞌaidi’.

³ Howahowana na hibom lagulagu bunumadi adi tauꞌai havena adi geluwo hiꞌuluꞌulumiyaedi, dova hiya bunuma ana tauveꞌahihi havena hinage adi geluwo hiya bunuma adi tauꞌai hiꞌuluꞌulumiyaedi, wuwuna Yaubada bada ivesinuwaediꞌo ebeha natunao,

⁴ Omiu vedova ta Yaubada yana taupaihowao amloiloinaedi. Wuwuna Yaubada ibom yana taupaihowao ebe iꞌawa namwanamwaedi bo iꞌawa yabayababaeidi na ibom mata iꞌabiye wahiyaladi.

⁵ Tupwadi tomowa hinage dova yadi nuwatuwu, ebeha tupwadi ahubena, ahubena mwalaꞌidi, na hesi tupwadi adi geluwo yadi nuwatuwu ebeha ahubena maudoina eheꞌehebonane bada. Ebe ginauli teina dova talobaidi, howahowana na ehebo ehebo tabom, ebe hava tahanapui neta inamwanamwa tamulitaei.

⁶ Wuwuna ebe yaiya ahubena teya inuwatuwuidi ebeha ahubena mwalaꞌidi, neta ibom yana nuwatuwu ebeha tenem ainaena Bada iveꞌahihiyei. Hinage dova ebe yaiya aiꞌai maudoina iꞌaiꞌaidi, neta ibom yana nuwatuwu ebe ainaena Bada iveꞌahihiyei, eeta aiꞌaidine vehabadi iꞌawa yauwedo Yaubada ainai. Hinage dova ebe yaiya tupwadi aiꞌai aidiyena iveꞌahihi, ibom hinage yana nuwatuwu ta ainaena Bada iveꞌahihiyei mayana velau na iꞌawa yauwedo Yaubada ainai.

⁷ Na moiha, nigele tabom tayaloiloinauyowegita bwagana mayawahida bo tamwalowoi.

⁸ Ebe tayawayawahai, neta yada Bada vehabana tayawayawahaine. Na ebe tamwalowoi, neta yada Bada vehabana tamwalomwalowoine. Ainaena yada Bada ibom yawahida maudoina yo yada mwalowoi adi tauloina.

⁹ Teina ainaena Besinana imwalowoi na itowolouyo, eeta taumwalowoi yo ita mayawahida maudoida alidai iloina.

¹⁰ Eeta amnuwatuwu avivini na havena ami geluwo amꞌuluꞌulumiyaedi na amꞌawaꞌawa yababaedi, wuwuna howola mata maudoida Yaubada mehenai tatowolo na ibom iloinaegita,

¹¹ dova Buki Veꞌahihi yana walomahalava ainai Yaubada iwalo:

‘Moiha, yau miyamiya vateyaigu, eeta tomowa maudoidi meheguwai hipwagogo, na alinadi mwalaꞌinaena hiwalo vetuvehaegau na hiwalo, Yau Bada’.

¹² Mata ita ehebo ehebo tabom yada mumuga tawalo mahalavaedi Yaubada ainai. Havena ada geluwo taꞌabiꞌabiye tapiyadi

¹³ Ainaena tahida havena taꞌawaꞌawa yababaedi, na hesi tabom yada paihowa yo yada mumuga taꞌita avivinidi, ta ebe havena teya ada gelu taꞌabiꞌabiye beꞌu yana veꞌahihi aidiyena.

¹⁴ Na moiha, yada Bada Yeisu bada iꞌabiye nuwamaselegauꞌo ta yahanapuiyaꞌo ebeha nigele teya aiꞌai laulaugagayona iyamiyamiya, na hesi ebe teya tomowa inuwatuwui tupwadi aiꞌai laulaugagayodi, laugagayodine ibom bada vehabana ainaena ibiꞌibiꞌi.

¹⁵ Na ebe tupwadi tahidao hinuwanuwatuwu ebeha bunuma ginauli laulaugagayodi, na ebe bunuma uꞌaiꞌai mata tomowadine taꞌabiye nuwayababadi ta bada velau amwahana tagabaenaꞌo. Na hesi unuwatuwu avivini neta tomowadine vehabadi Besinana imwalowoi, ainaena havena ginauli veꞌaveꞌahihinane mehediyai uꞌaiꞌai mata dova uꞌabiye tapiyadi.

¹⁶ Na aiꞌainane alimwai ebeha namwanamwana, na hesi vali tomowa aidiyai nigele, ta ebe hiꞌitago na uꞌai mata hiꞌawa yabayababaego.

¹⁷ Na hesi amnuwatuwu avivini ebeha Yaubada yana Abaloina nigele aiꞌai yo bwahi vehabadi, na hesi mumuga dumwadumwaluna yo nuwadaumwali yo yaliyaya, Aluꞌaluwa Veꞌahihi ainaena, vehabadi.

¹⁸ Ta ebe mumugane teina aidiyena Besinana yana paihowa tapaihowai, mata Yaubada vehabada iyaliyaya, na hinage tomowa hiꞌawa namwanamwaegita.

¹⁹ Eeta yada abamasi nuwadaumwali, ta ebe ehebo ehebo taꞌabiye wahiyalauyoigita.

²⁰ Na hesi havena aiꞌai aidiyena Yaubada yana paihowa amꞌabiꞌabiye yababa, wuwuna aiꞌai maudoina namwanamwadi, na ebe tupwadi aiꞌai aidiyena ada geluwo taꞌabiye beꞌudi, aiꞌainane havena hinage taꞌaiꞌaidi.

²¹ Ainaena teina taꞌi howahowana ginaulidine vehabadi ada geluwone hiveꞌaveꞌahihine, bunuma yo waini, havena taꞌabiꞌabitowoidi, mata dova ta taꞌabiye beꞌudi.

²² Yam yemidi ana miyamiya teina mumugane ainaena nigele tomowa hiyahanahanapui na owa Yaubada ubom alimwai. Hiya nigele adi lautowoi yababana hauganane na ginauli teya hipaihowai na hiꞌawa dumwaluwei hiya tauyaliyaya.

²³ Na hinage ebe mayada nuwabwaubwau aiꞌaidine taꞌaidi, neta bada talauhapuliꞌo Yaubada mehenai, wuwuna nigele tayayemidi. Na bada tahanapuiyaꞌo ebeha hava tapaihowaiyaꞌo, na nigele mayada yemidi, neta lauhapuli.

15

¹ Yaiyadiwo ita yada yemidi wahiwahiyalana, ilowoinanegita na ada geluwo hiya yadi yemidi tapitapiyana tahaguidi, na havena tabom vehabada tanuwanuwatuwu.

² Ainaena ehebo ehebo howahowana ada geluwo tahaguidi ta ebe yadi yemidi imwalaꞌi.

³ Wuwuna Besinana hinage dova nigele ibom vehabana iyanuwanuwatuwu, na hesi dova Yaubada yana Buki Veꞌahihi ainai iwalo mahalavaꞌo, iwalo, ‘Yaiyaidiwo hiꞌawaꞌawa yababaego, yadi awayababane aliguwai hiꞌataidi’.

⁴ Na hinage veꞌita bagibagilidi Buki Veꞌahihi ainai imiyamiya Yaubada yana veꞌitawone vehabada. Na mayada alamaꞌiꞌita tahaꞌwahaꞌwa na Buki Veꞌahihi yana haguwena mata nuwatuwuhae tavai.

⁵ Ainaena tanuwatuwu avivini ebeha Yaubada ibom alamaꞌiꞌita yo abiye wahiyala wuwuna, eeta ibom howahowana na iꞌabiye wahiyalagita nuwatuwu ehebo ainaena, dova Besinana Yeisu yana nuwatuwu,

⁶ ta ebe maudoida nuwatuwu ehebo ainaena Yaubada tanoꞌowei, iya yada Bada Yeisu Besinana Tamana yo yana Yaubada. Wasana namwanamwana teina omiu nigele Yudeya alimiyai

⁷ Ainaena ami geluwo ehebo ehebo amyaliyayaidi yami awaꞌauꞌaugelu aidiyena, dova Yeisu Besinana ita iꞌawa auꞌaugeluwegita, ta yami awaꞌauꞌaugelu namwanamwana ainaena Yaubada ana noꞌo imwalaꞌi.

⁸ Na yawalo auligomiu ebeha Besinana hinage Yudeya aidiyai ivetau paihowa, ta Yaubada yana waloyemidi babada mugamugaidi aidiyai ana moiha imahalava,

⁹ na hinage hibom nigele Yudeya tupwa maudoina aidiyai himiyamiya, Yaubada hinoꞌowei yana atemuyamuya aidiyai vehabadi. Wuwuna ehebo lele Buki Veꞌahihi ainai iwalo:

‘Teina ainaena nigele Yudeya baidaguwao awalo vetuvehaego, na hinage yeham vehabana mayama walo vetuvehae awaliwali alimwai’.

¹⁰ Na hinage iwalo:

‘Omiu nigele Yudeya, Yaubada yana tomowao baidamiyao amyaliyaya’.

¹¹ Na hinage iwalo:

‘Omiu nigele Yudeya Bada amnoꞌowei, na hinage tomowa maudoimiu amnoꞌowei’.

¹² Hinage dova Aisaya yana Buki ainai iwalo:

‘Yesi yana huhu ainaena ehebo towaho ilaoma na tupwa maudoidi aidiyai ivetoloina, na nigele Yudeya hinuwatuwuhae ainai’.

¹³ Yaubada iya nuwatuwuhae wuwuna na iya yami yemidiyena yaliyaya mwalaꞌina yo nuwadaumwali maudoina mata imohegomiu ta Aluꞌaluwa Veꞌahihi yana alaꞌalawowoliyena yami nuwatuwuhaene mata imwalaꞌi alili. Paulo yana loguguya vehabana

¹⁴ Tahiguwao, bada yahanapuigomiuꞌo moiha ebeha omiu tomowa namwanamwamiu na hanahanapumiu, ainaena howahowana ami geluwo aidiyai amwaha namwanamwana amveꞌita.

¹⁵ Na mayagu atepatu yami leta teina yaleleyawa ta tupwadi ginauli amnuwatuwu avivinidi, wuwuna yagu paihowa teina Yaubada imohegau,

¹⁶ neta Yeisu Besinana vehabana yawalo mahalava omiu nigele Yudeya alimiyai. Yagu paihowa teina ainai dova pwaoli yapaipaihowai ta ebe Yeisu wasana ambenalei, na mulitai yamohegomiu Yaubada ainai, wuwuna Aluꞌaluwa Veꞌahihi bada iꞌabiye maselegomiuꞌo ta Yaubada vehabamiu iyaliyaya mwalaꞌina.

¹⁷ Eena moiha, mayagu yaliyaya Yaubada yana paihowa vehabana yapaipaihowa, wuwuna Yeisu Besinana baidagu apaipaihowa.

¹⁸ Eeta hava Besinana ipaihowai ta omiu nigele Yudeya Yaubada amꞌawa abiyei ta mata mayagu atepatu ibom yawalowei. Teina yagu walo yo yagu paihowa ipaihowai aidiyena.

¹⁹ Na hinage yagu paihowao veꞌiveꞌiladi yo wahiwahiyaladi yo abanuwapwanopwano ta Aluꞌaluwa Veꞌahihi yana wahiyalaena Besinana wasana maudoina yaguguya taꞌiꞌiliyei Yelusalemaena ana higa yalaoma Ililikom.

²⁰ Na wasa namwanamwana nuwanuwagu tupwa vauvaudi hiya aidiyai yaguguya mugai, hibom tupwadine nigele Besinana wasana hiyabenalei, wuwuna nigele nuwanuwagu na vali tauguguyao yadi paihowa yayemutulaidi.

²¹ Wuwuna Buki Veꞌahihi iwalo mahalavaꞌo iwalo:

‘Yaiyadiwo hiya Besinana wasana nigele hiyabenalei, mata howola abo hibenalei, na hinuwamasele’. Paulo nuwanuwana Loma itauboꞌeyedi

²² Teina wuwuna ta nigele yayaꞌitagomiune. Na hesi moiha, bolimai bagibagilina aidiyai nuwanuwagu na yaꞌitagomiu, na nigele howahowagu. Na tupwaone teina aidiyai yagu paihowa bada yaveꞌovidiꞌo.

²⁴ Ainaena teina hauga yaꞌita mugaiyegomiu, na tupwana omiu baidaguwao tayaliyaya, na amhaguigau ta yalau Sipeni.

²⁵ Na hesi mulitai abo yalaowa alimiyai, nuwanuwagu yalau mugai Yelusalem na Yaubada yana bodao adi hagu yamohedi.

²⁶ Wuwuna Masidoniya yo Gilisi nuwanuwadi ebe yadi velau yamohedi Yaubada yana bodao wewelohedi Yelusalem ainai.

²⁷ Tenem velaune hiya adi yaliyaya na hesi ana dumwalu wuwuna adi vagavaga hiya Yudeyaone aidiyai mwalona. Yudeyaone wasa namwanamwana hilawei aidiyai ta Besinana Yeisu hilobai eeta adi lowoinana ta teina hauga yadi vehaguhagu hinage mane habuluna hivetamalei ta yalawei Yelusalem.

²⁸ Ainaena teinai yagu paihowane yaveꞌovi, neta velaune teina Yelusalem yamohedi, na mulitai yalaowa alimiyai na yaꞌitagomiu, na alimiyena yageluyo ta yalau Sipeni.

²⁹ Na yahanapuiyaꞌo mata yagu tauboꞌene inamwanamwa, wuwuna Besinana yana awanamwanamwa mwalaꞌina aliguwai imiyamiya, ainaena tayaliyaya toyawa.

³⁰ Tahiguwao, yada Bada Yeisu Besinana yehanaena na Aluꞌaluwa Veꞌahihi yana velauwena, alimiyai yaꞌawanoi mwalaꞌina ebe omiu na yau Yaubada ainai taꞌawanoi vehabagu,

³¹ neta Yudeya tupwadi Yeisu nigele hiyayemidiyei, ta ebe havena hipaipaigau, yo hinage Yaubada yana bodao Yelusalem ainai vehabadi, na ebe velau teina yalalawedi vehabadi hiyaliyaya.

³² Eeta Yaubada yana nuwatuwu teina dova, mata mayagu yaliyaya yalaowa alimiyai, ta netai alimiyai yaꞌaiyawasi.

³³ Yaubada baidamiu, ibom nuwadaumwali wuwuna. Moiha.

16

¹ Nuwamiyai yamwauwi nuhudane Pibi vehabana, iya dalava Kenikiliya ainai Yaubada yana boda ihaguhaguidi,

² na hauganane ilaowa alimiyai, nuwanuwagu na yami vadai amyogaei, Bada yehanaena, wuwuna amwaꞌamwaha teina dova Yaubada yana tomowa ilowoinanedi, eeta Pibi amhagui ebe tupwadi ginauli aidiyena iꞌubwa, wuwuna ibom hinage dova Yaubada yana boda bagibagilidi ivelauwediꞌo, na hinage yau dova ihaguigau.

³ Na hinage yagu awayauwedo Pilisila yo Akwila aidiyai amwalowei, hiya mwalona baidaguwao Besinana Yeisu vehabana avetau paihowa.

⁴ Na hinage yawahidi hitalamwedi vehabagu hauga abasilahe aidiyai. Ainaena vehabadi yaꞌawa yauwedo, na nigele ebeha yabom yagu awayauwedo, na hinage Yaubada yana bodao hibom himiyamiya nigele Yudeya aidiyena.

⁵ Na hinage yagu awayauwedo amwalo mahalavaei hiya Yaubada yana bodao himiya gogoi Pilisila yo Akwila yadi vada ainai. Na yagu awayauwedo amwalo mahalavaei augelu Epenitosi ainai, iya Yeisu Besinana ana tauyemidi mugai Esiya yana abaloinao aidiyena.

⁶ Na hinage yagu awayauwedo Meli ainai, iya ipaipaihowa mwalaꞌina vehabamiu.

⁷ Yaꞌawa yauwedo hinage augeluwo Anidalonikosi yo Yuniyasi aidiyai, hiya Yudeya mwalona baidaguwao vada paipaiyai amiyamiya, hitau bwaune maꞌadi veꞌahihi Yeisu ana tauyewasao aidiyena, wuwuna hiya Besinana ana tauyemidiwo mugamugaidi, na mulitai yau.

⁸ Na hinage yagu awayauwedo augelu moiha Ampiliyasi ainai, iya Bada ana tauyemidi ehebo.

⁹ Na hinage yagu awayauwedo Ebanosi ainai, iya baidada Besinana vehabana tapaipaihowa, hinage yagu awayauwedo augelu Sitakisi ainai.

¹⁰ Na hinage yagu awayauwedo Apelisi ainai, iya Besinana ana tauyemidi moiha. Na Alisitobulosi mayana bodao yagu awayauwedo hinage aidiyai,

¹¹ yo hinage Helodiyoni iya Yudeya towahona, na hinage Bada yana bodao hiya Nasisosi yana vadai himiyamiya.

¹² Yagu awayauwedo hinage Bada yana taupaihowao hiya waiwaihiudiyao Tilipena yo Tiliposa aidiyai. Na hinage augelu Pesisi ainai, ibom Bada vehabana ipaipaihowa mwalaꞌina.

¹³ Na yagu awayauwedo hinage Luposi ainai, iya Bada ivesinuwai, yo hinanane hinage ainai, iya ivelauwegau dova yau natuna moiha.

¹⁴ Yagu awayauwedo hinage Asinikilito yo Pilegoni yo Hemisi yo Patalobasi yo Hemasi, yo Yaubada yana bodaone baidadiyao aidiyai.

¹⁵ Yagu awayauwedo Pilologosi yo Yuliya aidiyai, na hinage towahone Neliyosi manuhuna aidiyai, yo Olimipasi, yo Yaubada yana tomowao bodaone baidanao aidiyai.

¹⁶ Ainaena ehebo ehebo ami geluwo awaꞌauꞌaugelu moiha ainaena amvelauwedi. Na hinage Besinana yana bodao maudoidi tupwa maudoina aidiyena, yadi velau omiu Yaubada yana bodao Loma ainai alimiyai. Paulo yana venuwamwau yana abaꞌovi

¹⁷ Tahiguwao, teina yagu awanoi mwalaꞌina alimiyai ebeha amꞌita avivinigomiu hiya tauwahei aidiyena, wuwuna veꞌitanane mwalona amvaiyaꞌo hiya nigele nuwadi, ainaena hiꞌawaꞌawa yababaei, na hinage tomowa yadi yemidi hiꞌabiꞌabiye tapiyaedi eeta amdena gabaedi.

¹⁸ Ebe yaiyadiwo yadi paihowa tenem dova, hiya nigele yada Bada Besinana vehabana hiyapaihowa, na hesi hiya yadi aiduma hipaipaihowaidine, wuwuna yadi walo amꞌamnadi aidiyena tomowa hiya nigele wahiwahiyaladi hiꞌoyaꞌoyamaedi, na hiniuniuli wuyowedi.

¹⁹ Na omiu bada tomowa hihanapuigomiuꞌo maudoimiu ebeha wasa namwanamwana ana taumulitao, ainaena vehabamiu yayaliyaya mwalaꞌina. Na hinage nuwanuwagu na mumuga namwanamwana maudoina amhanapui moiha, na mumuga yababana amtaꞌwataꞌwataedi.

²⁰ Walo moiha, Yaubada ibom nuwadaumwali wuwuna, na aemiu vahalinai mata Tomodulele igoha mutumutu. Yada Bada Yeisu Besinana yana veꞌiꞌila alimiyai.

²¹ Timoti baidagu apaipaihowa na yana velau ilalaowa alimiyai, dova hinage tupwadi ama geluwo Yudeya aidiyena, Lusiyasi yo Yesoni yo Sosipateli.

²² Yau Tetiyasi leta teina yalele Paulo vehabana, yagu awayauwedo alimiyai Bada yehanaena.

²³ Na hinage towahone yana vadai amiyamiya, Yehana Gayosi, yana velau alimiyai, vada teina Yaubada yana boda yadi abamiya dalavai. Na hinage Elasitosi, ibom dalava teina mwalaꞌina ana mane ana tauꞌita avivini, na tahidane Kwatasi, hitau bwau yadi velau alimiyai. [

²⁴ Yada Bada Yeisu Besinana yana veꞌiꞌila maudoimiu alimiyai.]

²⁵ Ainaena teina hauga Yaubada tanoꞌowei, wuwuna ibom howahowana na iꞌabiye wahiyalagomiu, yau yagu guguya ainaena, neta Yeisu Besinana wasana. Na hinage mwalona bolimai daodaodi aidiyai wasa teina dawadawanina na teina hauga iꞌabiye mahalavayaꞌo.

²⁶ na hesi teina hauga bada iꞌabiye mahalavayaꞌo alidai tauwalo mahalavao yadi leleowa aidiyena, na hinage Yaubada Miyamiya vateyaina iloina na ebeha dalava maudoina tomowadiyao wasa teina hihanapui ta ebe hiyemidi na hiꞌawa abiyei.

²⁷ Yaubada ibom tauhanapu moiha, ainaena howahowana Yeisu Besinana yehanaena tanoꞌowei, hauga maudoina. Moiha.