1

¹ Hauga mayamayauni ainai walo mayawahina imiyamiya, ainaena ai mehemaiyena aꞌita na talimaiyena abenalei, na nimamaiyena towahonane aꞌabi towoine, wuwuna bada imahalavaꞌo ta mehemaiyena aꞌitayaꞌo, ta iya vehabana awalowalo mahalava alimiyai, neta iya yawahi vateyai wuwuna, na hesi mugai iya tamana baidana himiyamiya ta bada imahalavaꞌo alidai.

1

³ Iya aꞌita yo abenalei ta alimiyai awalo mahalavaei, ta ebe omiu baidamaiyao taveꞌauꞌaugelu, yo hinage Tamada na Natuna Yeisu Besinana baidadao taveꞌauꞌaugeluwegita.

⁴ Ainaena yami leta teina bada aleleyawaꞌo, ta ebeha amvahili, na tayaliyaya moiha. Yaubada masele wuwuna

⁵ Wasa teina abenalenaꞌo iya ainaena, ta awalo mahalavaei alimiyai neta Yaubada masele wuwuna, na nigele teya guguyou ainai iyamiyamiya.

⁶ Ainaena ebe tupwa guguyou ainai tamiyamiya, havena taꞌoyaꞌoyama na tawalo, “Yaubada baidada taveꞌauꞌaugelu”. Neta nigele mumuga dumwaluna.

⁷ Na ebe tupwa masele ainai tamiyamiya, dova Yaubada tupwa masele ainai imiyamiyane, neta taveꞌauꞌaugeluꞌo moiha, wuwuna natuna Yeisu ꞌwahinanaena iꞌabiye maselegitaꞌo yada yababao maudoidi aidiyena.

⁸ Maudoida tauyababao taꞌi, na ebe tauvauvala na taoyaꞌoyamaegita, yo tawalo, ‘Yau namwanamwagu, na nigele yagu yababao.’ Neta ana nuwamasele ebeha walomoiha nigele alidai.

⁹ Na hesi ebe tawalo dumwalu na tawalo, ‘Moiha, bada yalauhapuliꞌo.’ Eeta Yaubada yada pwanoliwo inuwahamuidi na ainaena iꞌabiye maselegita, wuwuna Yaubada iya taudumwalu ta imwau yedumwalugitaꞌo.

¹⁰ Na ebe tawalo, ‘Nigele teya hauga yalaulauhapuli’, neta Yaubada taꞌawaꞌawa oyamaei, ta yana walo nigele alidai.

2

¹ Ae natuguwao, yami leta teina yaleleyawa ta ainaena havena amlaulau hapuli. Na ebe talaupwanoꞌo, Yeisu Besinana iya ada tauhagu dumwadumwaluna iꞌawanoi vehabada Tamada ainai,

² yo yada lauhapuliwo inuwahamuidi, wuwuna Yeisu iya ipwaoliyowei yada lauhapuliwo vehabadi, yo hinage taumiya baleꞌu maudoidi yadi lauhapuliwo vehabadi.

³ Ebe Yaubada yana loina taꞌawaꞌawa abiyei, mata tahanapui neta iya ada gelu moiha.

⁴ Eeta ebe yaiya iꞌauꞌaubabada na iwalo, “Yau Yaubada augelu” na ebe Yaubada yana loina nigele iyaꞌawa abiyei, neta iꞌoꞌoyama, ta walomoiha nigele ainai.

⁵ Na ebe Yaubada yana walo tamulimulita iliꞌilimani, mata yada velauwo Yaubada vehabana iꞌoiye mwaugita ta hanahanapui ebeha Yaubada baidada tamiyamiya.

⁶ Ta mata tawalo, ‘Yau Yaubada baidagu amiyamiya,’ eeta ebeha yada miya dova Yeisu yana miya. Loina vauvauna

⁷ Tahiguwao, teina loinane yalelelelene nigele loina vauvauna, na loina miyamiyana neta mugai wasana ambenalenaꞌo, ta bada amhanapuiyaꞌo.

⁸ Na loina teina yaleleuyoi ta dova loina vauvauna, velau namwanamwa walomoiha vehabana, wuwuna walomoiha neta Besinana ainai, yo omiu alimiyai hinage. Ta ainaena guguyou isawasawali, na masele moiha bada ihaemaꞌo.

⁹ Eeta ebe yaiya tahina iveꞌalehaei na iwalo ebeha iya masele ainai imiyamiya, neta iꞌoꞌoyama, wuwuna iya howola taꞌi guguyou ainai imiyamiya.

¹⁰ Na ebe yaiya owa tahim uveꞌilahi namwanamwaei, owa masele ainai umiyamiya, ainaena mata nigele uyabeꞌu.

¹¹ Na ebe tahim uveꞌalehaei, owa howola guguyou yana tupwa ainai umiyamiya, na hinage guguyoi ainai ulaulau, ta ainaena nigele uyahanapui havaidova ulalau, wuwuna mehem ihoga.

¹² Hedaheda, walo teina yaleleyawa wuwuna yami lauhapuliwo Yaubada inuwahamuidiꞌo Besinana yehanaena.

¹³ Tama, walo teina yaleleyawa wuwuna iya hauga vetuwuni ta wau imiyamiya bada amhanapuiyaꞌo. Hevahevaliwo, walo teina yaleleyawa, wuwuna iya tauyababa bada amwahiyala gabaenaꞌo. Hedaheda mwalamwalaꞌimiu, walo teina yaleleyawa wuwuna Tamada bada amhanapuiyaꞌo.

¹⁴ Tama, walo teina yaleleyawa wuwuna iya hauga mugai ta wau imiyamiya bada amhanahanapui. Hevahevaliwo, walo teina yaleleyawa wuwuna omiu tauwahiyala ta Yaubada yana walo imiyamiya alimiyai, ainaena iya tauyababawa bada amwahiyala gabaenaꞌo.

¹⁵ Havena baleꞌu mumugana amnuwanuwaleleyei na baleꞌu ginaulidi havena nuwamiu ivaivaidi. Ebe baleꞌu mumugana amnuwaleleyei mata Tamada yana velau amtaꞌwataꞌwataei

¹⁶ neta nuwadawani yo tobwatobwa adi nuwavai yo wasawasa nuwaleledi vehabana, ginauli teina nigele Tamada ainaena hiyalaoma, na hesi baleꞌu ainaena.

¹⁷ Na baleꞌu teina mata isawali ta baleꞌu adi nuwalelewo maudoina mata hiꞌovi, na ita hesi ebe Yaubada yana nuwatuwuwo tapaipaihowai mata tamiya vateyai. Besinana ana aleha

¹⁸ Natuguwao, hauga yana abaꞌovi ilaomaꞌo, ta mugai ambenalenaꞌo ebeha Besinana ana alehawa muhamuhana imahalavama, eeta amnuwatuwu avivini Besinana ana alehao bahudi baleꞌuwai himiyamiya, ainaena tahanahanapui hauga yana abaꞌovi teina.

¹⁹ Na Besinana ana tauꞌalehao yada boda alonaena hiꞌaꞌaitulune, na hesi nigele yada boda moihana wuwuna ebe yada boda moihana mata baidadao tamiyamiya. Nigele teya yaiya, eeta yadi laune imiya mahalava ebeha neta nigele alidaena.

²⁰ Na omiu Aluꞌaluwa Veꞌahihi ibesinanaigomiuꞌo, eeta hanapu moiha bada amhanapuiyaꞌo.

²¹ Nigele yami nuwapwanopwano vehabana leta teina yayavetamalenawa, wuwuna veꞌita dumwaluna bada amhanapuiyaꞌo, yo hinage amhanapui ebeha nigele teya oyama iyamahamahalavama mumuga dumwaluna ainaena.

²² Na hiya tauꞌoyamaone Yeisu hiuvalaei, na hiwalo, ‘Yeisu iya nigele Besinana towahona’. Ebe yaiyadiwo hiwalowalo dova, hiya Besinana ana alehao, eeta Besinana Tamana baidana hitaꞌwataꞌwataedi.

²³ Na ebe yaiya owa Yaubada Natuna utaꞌwataꞌwataei, Tamana nigele baidam amyamiyamiya. Na hesi ebe utalam Natuna ainai, iya yo Tamana baidamwao ammiyamiya.

²⁴ Omiu mugai wasadi ambenalenaꞌo, ainaena ebe wasane alimiyai imiyamiya mata Besinana na Tamana baidamiyao ammiyamiya,.

²⁵ Teina waloyemidine iwalo yemidiyeiwa neta yawahi vateyai.

²⁶ Besinana ana tauꞌalehao vehabadi yalalaulelewa ta ainaena havena hiꞌoyaꞌoyamaegomiu.

²⁷ Na hanapunane bada amhanapuiyaꞌo, wuwuna Besinana bada ibesinanaigomiuꞌo, ta alimiyai imiyamiya, yo iveꞌiveꞌitagomiu. Eeta havena amnuwanuwapwanopwano ebeha tomowa teya iveꞌitagomiu, na hesi Yaubada Aluꞌaluwana iveꞌitagomiu. Neta besinana moihana, na nigele oyama. Ainaena yana veꞌitaꞌo ammulitaedi, ta Besinana baidamiu ammiyamiya. Yaubada natunao ita

²⁸ Ainaena natuguwao, ilowoinanegomiu ta Besinana ainai ammiya vateyai, eeta haugana ebe imahalavama, havena amhinihinimaya, na hesi mayami atepatu yana laoma vehabana.

²⁹ Na Yaubada hinage amhanapui iya taudumwalu, ainaena yaiyadiwo hiya hipaihowa dumwalu, hiya Yaubada natunao.

3

¹ Tamada yana velau imwalaꞌi alidai ainaena iꞌawa natunaegita. Ta nigele yana walo aꞌava na natumohimohilinao ita. Ainaena taumiya baleꞌu nigele hiyaꞌita lobaigita wuwuna Yaubada nigele hiyahanapui.

² Augeluwo, teina hauga Yaubada iꞌawa natunaegita, na mulitai, hava imahalava alidai? Neta tahanahanapui haugana yana mahalava ainai ana oleya mata taꞌita, na imwaugwaipilegita ta ana oleya dova ita wuwuna iya taꞌita lobaiyaꞌo moiha.

³ Yada nuwatuwuhae ginauli teina vehabana ainaena ebeha taꞌabiye maseledi dova Besinana.

⁴ Na hesi ebe teya alidaena yababa ipaihowai neta Yaubada yana loina hihoꞌehoꞌe, wuwuna teina mumuga yababana.

⁵ Hinage tahanahanapui ebeha Besinana ilaoma yada mumuga yababadi ivaivehuludi, wuwuna iya nigele teya yana lauhapuliwo.

⁶ Ainaena ebe ita Besinana baidada tamiyamiya havena yababa tapaipaihowaidi. Na hesi hiya tauyababao nigele Besinana hiyaꞌita ta hinage nigele hiyahanapui.

⁷ Natuguwao, havena teya iꞌoyaꞌoyamaegomiu, na hesi nuwamiu himasele ebe yaiyadiwo hiya yadi mumuga hidumwalu, hiya neta taudumwalu dova Besinana mumugana.

⁸ Na tauyababao neta hiya Tomodulele yana bodao, wuwuna hauga mugamugaina ainaena ta wau Tomodulele iya tauyababa. Eeta Yaubada Natuna ivetamalenama ta baleꞌuwai ilaoma Tomodulele yana paihowa habi oipeiyedi.

⁹ Na hinage ebe Yaubada ilabahigita havena tapaipaihowa yababa, wuwuna mumuga vauvauna atedai imwauwiyaꞌo, ainaena ita Yaubada natunao nigele howahowana yo yababana tapaihowai.

¹⁰ Eeta ebeha tomowa taꞌita lobaidi yaiyadiwo Yaubada natunao, na yaiyadiwo Tomodulele natunao, wuwuna hiya Tomodulele natunao nigele hiyapaipaihowa dumwalu, na nigele hiyavelau namwanamwa matahidiyao. Ada geluwo ta velauwedi

¹¹ Venuwamwau teina mugai ambenalenaꞌo ebeha ada geluwo baidadao ta tavelauyowegita.

¹² Na havena dova Keni, wuwuna iya Tomodulele yana boda, na tahina iwunui. Na yana oiyemwalowoina wuwuna neta tahina Abeli yana paihowa namwanamwana na Keni yana paihowa yababana.

¹³ Ainaena tahiguwao, havena amꞌaluꞌaluwagavai ebe taumiya baleꞌu hiveꞌalehaegomiu.

¹⁴ Teina ainaena na mata tahanapui mwalowoi yana tupwa bada talaugabainao ta talaoꞌo yawahi vateyai ana tupwa ainai. Wuwuna tahidao tavelau namwanamwaedi. Na ebe yaiya nigele velau atenai tahinao vehabadi, iya howola mwalowoi yana tupwa ainai imiyamiya.

¹⁵ Walo moiha, ebe yaiya tahina iveꞌalehaei, iya taulauwunu taꞌi na tahanapuiyaꞌo iya mata nigele yawahi vateyai iyalobai.

¹⁶ Eeta teina ainaena velau tahanapuiyaꞌo, neta ebeha Besinana yawahina italamwenaꞌo vehabada imwalowoi, ainaena ilowoinanegita ebeha yawahida tatalamwei tahidao vehabadi.

¹⁷ Amnuwatuwu avivini neta ebe yaiya mayana tobwatobwa imiyamiya na ana gelu teya iꞌabiye ahubali, ta nigele teya hagu iyamohemohei, vedova mata Yaubada yana velau atenai imiyamiyane? Nigele.

¹⁸ Natuguwao, havena yada velau walo aꞌava ainaena, na hesi yada paihowaena tavelau moiha.

¹⁹ Teina ainaena tahanahanapui neta walomoiha ainai tamiyamiya, na havena tamehemeheuhi Yaubada mehenai.

²⁰ Na ebe mayada atehawawali ebeha yababa howola atedai imiyamiya, Yaubada atehawawawaliwone mata ibohoidi, wuwuna Yaubada iya imwalaꞌi alili, na yada nuwatuwuwo maudoina ihanahanapuidi,

²¹ Augeluwo, ebe nigele yada atehawawaliwo, howahowana taꞌatepatu Yaubada mehenai,

²² na ebe hava taꞌawanoi ainai mata imohegita, wuwuna iya yana loina taꞌawa abiyedi, na yada paihowao vehabadi iyaliyaya.

²³ Na loina teina ebeha Natuna Yeisu Besinana yehana tayemidiyei, na hinage ada geluwo tavelau iliꞌilimanidi, dova Besinana ada loina imomohegitawa.

²⁴ Ainaena ebe yana loina tamulitaedi, ita ainai tamiyamiya, na iya alidai imiyamiya. Na vedova yana miyamiya alidai mata tahanapuine? Wuwuna Aluꞌaluwana imohegita, ta alidai imiyamiya.

4

¹ Augeluwo, havena aluꞌaluwa maudoidi amyemiyemidiyedi, na hesi amtowoidi Yaubada Aluꞌaluwana ainena bo alawai ainaena, wuwuna teina hauga tauwalo mahalava oyaꞌoyamao bagibagilidi aluꞌaluwadi nigele Yaubada ainaena.

² Teina ainaena tahanapui Yaubada Aluꞌaluwana: ebe yaiyadiwo hiwalo mahalava neta Yeisu Besinana ilaoma baleꞌuwai ta iyemala tomowa, neta Yaubada Aluꞌaluwana ainaena.

³ Na ebe yaiyadiwo Yeisu hiuvalaei, hiya nigele Yaubada ainaena, na hesi hiya neta Besinana ana alehao. Na tauꞌalehane yana laoma bada mugai ambenalenaꞌo, ta hauga teina baleꞌuwai imiyamiya.

⁴ Natuguwao, omiu Yaubada ilabahigomiu, ainaena vali aluꞌaluwaone bada amwahiyala gabaediꞌo, wuwuna Aluꞌaluwane alidai imiyamiya iya iwahiyala alili, na hesi aluꞌaluwa taumiya baleꞌu aidiyai himiyamiya yadi wahiyala nigele iyamwalaꞌi.

⁵ Na hiya taumiya baleꞌu mumuga baleꞌu ainaena hiꞌauꞌaubabada, ainaena taumiya baleꞌu bahudi alinadi hibenabenaledi.

⁶ Na ita hesi Yaubada ilabahigita, ainaena mata hiya Yaubada tauhanapuina alinada hibenalei, na hiya nigele Yaubada hiyahanahanapui alinada mata nigele hiyabenalei. Ainaena tahanapui aiteya aluꞌaluwa moihadi na aiteya aluꞌaluwa oyaꞌoyamadi. Yaubada yana velau

⁷ Augeluwo, maudoida tavevelavelauyowegita, wuwuna Yaubada velau wuwuna, ainaena yaiyadiwo hiya tauvelau bada Yaubada iꞌawa natuguwediꞌo, na hiya Yaubada ana tauhanapuwo.

⁸ Na hesi hiya nigele tauvelau, hiya nigele Yaubada ana tauhanapuwo, wuwuna Yaubada tauvelau.

⁹ Na yana velau iꞌabiye mahalava alidai natuna ainaena, ta natu eheꞌehebona ivetamalenama, na baleꞌuwai ilaoma, ta ebe yawahi moihana ainaena tavai.

¹⁰ Teina velau moiha, nigele ebeha ita Yaubada tavelauwei, na Yaubada hesi ivelauwegita, ta natuna italamwei yo ipwaoliyei ita yada pwanoliwo vehabadi.

¹¹ Augeluwo, ebe teina dova Yaubada yana velau alidai, ainaena ita tavevelavelauyowegita.

¹² Nigele teya hauga taumiya baleꞌu Yaubada hiyaꞌita, na ita hesi tavevelavelauyowegita, neta ainaena Yaubada alidai, na hinage yana velau ainona alidai imwalaꞌi.

¹³ Teina ainaena tahanapui ebeha ita ainai tamiyamiya na iya alidai imiyamiya? Wuwuna Aluꞌaluwana bada imohegitaꞌo.

¹⁴ Na ai mehemaiyena Yaubada Natuna aꞌitayaꞌo, ta vehabana awalowalo mahalava ebeha Tamana baleꞌuwai ivetamalenama ta ebeha tomowa maudoida ada Taulivahi.

¹⁵ Ainaena ebe yaiya iꞌawa moiha neta Yeisu iya Yaubada Natuna, Yaubada ainai imiyamiya na iya Yaubada ainai imiyamiya.

¹⁶ Eeta Yaubada yana velau alidai bada tahanapuiyaꞌo ta tayemidiyenao. Walo moiha, Yaubada velau wuwuna, ainaena ebe yaiya velau ainai imiyamiya, iya Yaubada ainai imiyamiya, na Yaubada iya hinage ainai imiyamiya.

¹⁷ Ainaena ebeha velau mumugana alidai imwalaꞌi alili ta lauvetala ana ahubena ainai havena tamehemeheuhi, na hesi taꞌatepatu. Wuwuna hauga teina baleꞌuwai tamiyamiya ita dova Besinana.

¹⁸ Na yada velau ainaena havena tamehemeheuhi, wuwuna velau moiha yada meheuhi ivai vehuluyaꞌo. Walo moiha, lauvetala ainai tameheuhi, ebe velau moiha nigele alidai.

¹⁹ Na tavelauwei wuwuna iya ivelau mugaiyegita.

²⁰ Ebe yaiya iwalo, ‘Yaubada ivelauwei’, na tahina iveꞌalehaei, iya tauꞌoyama, wuwuna tahina iꞌitayaꞌo, na nigele iyavelauwei, ainaena nigele howahowana ta Yaubada ivelauwei wuwuna nigele iyaꞌita.

²¹ Na ada loina Yaubada ainaena ta ebeha iya tavelauwei, na hinage tahidao tavelauwedi.

5

¹ Ebe maudoida Yeisu tayemidiyei na tawalo, ‘Iya Besinana towahona’ ita Yaubada natunao. Na ebe Tamada tavelauwei, natunao hinage tavelauwedi.

² Haugana Yaubada tavelauwei, na yana loina taꞌawa abiyedi, teina ainaena mata tahanapui ebeha Yaubada natunao hinage tavelauwedi.

³ Wuwuna Yaubada yana velau ainona ebeha yana loina taꞌawa abiyei. Ta yana loinao nigele hiyavitai.

⁴ Eeta ebe Yaubada ilabahigita mata mumuga baleꞌu tawahiyala gabaei. Hava ainaena tawahiwahiyalane? Yada yemidiyena.

⁵ Wuwuna ebe Yeisu tayemidiyei ebeha Yaubada Natuna, teina ainaena mumuga baleꞌu tawahiyala gabaenaꞌo. Yaubada Natuna ana walomahalava vehabana

⁶ Na Natuna yana laoma alidai neta weꞌahaena na ꞌwahinanaena neta iya Yeisu Besinana. Nigele weꞌaha aꞌavana ainaena, na hesi weꞌaha yo ꞌwahina aidiyena. Teina vehabana Yaubada Aluꞌaluwana iwalo mahalava moiha wuwuna Aluꞌaluwana mumugana dumwadumwaluna.

⁷ Na Besinana ana tauwalo moiha tonuga himiyamiya,

⁸ neta Aluꞌaluwa, weꞌaha, na ꞌwahina, na yadi veꞌita eheꞌehebonane.

⁹ Ebe tomowa yadi walo moihao tayemidiyedi, howahowana na Yaubada yana walo moiha tayemidiyei, wuwuna Yaubada iya tauwahiyala, na Natuna vehabana iwalo moiha alidai.

¹⁰ Ainaena ebe iya tayemidiyei, atedai talautowoi ebeha iya Yaubada Natuna. Na hesi ebe Yaubada nigele tayayemidiyei, tenem ainaena mata taꞌawa oyaꞌoyamaei, wuwuna yana walo moiha Natuna vehabana nigele tayayemidiyei.

¹¹ Na yana walo moihane ebeha Natunane ainaena yawahi vateyai imohegita.

¹² Eeta ebe yaiya Yaubada Natuna ainai imiyamiya, tomowanane yawahi bada ilobaiyaꞌo, na ebe yaiya nigele Yaubada Natuna baidana, iya nigele yawahi ainai. Yawahi vateyai vehabana

¹³ Yami leta teina bada yaleleyawaꞌo ta amhanahanapui ebe Yaubada Natuna yehana amyemidiyei, yawahi vateyai bada amlobaiyaꞌo.

¹⁴ Na hinage ebe mehenai taꞌatepatu mata yada awanoi ibenaledi, yo imohegita hava taꞌawanoiyedine vehabana, ebe iya yana nuwatuwu tamulitaedi.

¹⁵ Walo moiha, yada awanoiwo maudoidi ibenaledi, ainaena tahanapui ebeha yada awanoiwone ainodi imohemohegita.

¹⁶ Tupwadi lauhapuliwo adi maiha mwalowoi na tupwadi nigele, ainaena ebe yaiya owa tahim uꞌita ilauhapuli, na lauhapuline iuꞌiuna neta nigele ana maiha mwalowoi, na hesi taulauhapuline vehabana uꞌawanoi Yaubada ainai, ta Yaubada yam awanoi ibenalei, na tahimne ihagui. Na hesi lauhapuliwone adi maiha mwalowoi, havena vehabadi amꞌawaꞌawanoi Yaubada ainai.

¹⁷ Walo moiha, lauhapuli maudoidi yababadi, na tupwadi adi maiha nigele mwalowoi.

¹⁸ Na hesi tahanahanapui neta ebe Yaubada ilabahigita havena talaulauhapuli, wuwuna Yaubada Natuna iꞌitaꞌita avivinigita, ta nigele tauyababa iyaꞌabiꞌabisawahigita.

¹⁹ Na hinage ita tahanahanapui neta Yaubada ilabahigita, bwagana baleꞌu maudoina tauyababane yana loina elauhanai.

²⁰ Na hinage tahanahanapui neta Yaubada Natuna bada ilaomaꞌo alidai, ta nuwada iꞌabi maselediꞌo ebeha Yaubada iya moiha, na moiha ainai tamiyamiya, wuwuna ita Yaubada Natuna Yeisu Besinana baidada. Yeisu iya Yaubada moiha, na yawahi vateyai wuwuna.

²¹ Natuguwao, amꞌita avivinigomiu vali abayemidi aidiyena, na amlau vehuludi.