1

¹ Yau Saimoni Pita Yeisu Besinana yana taupaihowa, na ana tauyewasa, leta teina yaleleyawa alimiyai omiu na yau yada Yaubada yo ada Taulivahi Yeisu Besinana yadi dumwalu ainaena mayada yemidi talobalobai.

² Yaubada na yada Bada Yeisu amhanapuidiꞌo, eeta mata yadi veꞌiꞌila na yadi nuwadaumwali imwalaꞌi alili alimiyai. Miya namwanamwa mumugana

³ Yaubada iya yana wahiyalaena ihaguhaguigita, ainaena yana nuwatuwu maudoidi ta mulita iliꞌilimanidi Yaubada yana nuwatuwu hanapu ainaena. Eeta iyogaegita ebeha yana wasawasa yo yana mumuga namwanamwadi iveꞌitagita.

⁴ Iya yana waloyemidi hinamwanamwa alili eeta yana alaꞌalawowoli aidiyena mumuga baleꞌu ana nuwatuwu dawaniwo yababadi tadena gabaediꞌo, ta Yaubada ana lautowoi namwanamwana ta lobaiyaꞌo.

⁵ Neta vehabana na amtowoi wahiyala ta yami yemidi amyemutulaidi mumuga namwanamwana ainaena, mumuga namwanamwana ewanai hanapu.

⁶ Hanapu ewanai veꞌao iliꞌilimani, veꞌao iliꞌilimani ewanai towolo wahiyala, towolo wahiyala ewanai Yaubada yana miyamiya,

⁷ na ewanai veꞌauꞌaugelu, na yana abaꞌovi neta tahida tavelauwei.

⁸ Ainaena ebe mumugaone teina aidiyai amwahiyala mata yada Bada Yeisu Besinana ana hanapu alimiyai imiya alili, ta yami paihowa yo yamo lauꞌaino mata nigele hiyatautowolo.

⁹ Na ebe mumuga teina nigele alimiyai hiyamiyamiya ana ita dova mehe gibugibumiu, wuwuna yami pwanoliwo miyamiyadi Taunuwahamuina bada amnuwapwanopwanowenaꞌo.

¹⁰ Ainaena tahiguwao, amtowoi wahiyala ta Yaubada yana boda vesivesinuwada ainai ammiyamiya na havena aidiyena ammiyamiya mahalava. Na ebe yagu walo teina amꞌawa abiyedi mata nigele amyabeꞌu.

¹¹ Hauga mehedai moiha mata iꞌabiye yaliyayagomiu ta amluwu yada Bada ada Taulivahi Yeisu Besinana yana abaloina miyamiyavateyaina ainai.

¹² Eeta nuwanuwagu yo yaguguyaigomiu ebeha ginauli teina amnuwatuwu avivinidi, wuwuna bada amhanapuidiꞌo yo walomoiha amꞌawa abiyediꞌo.

¹³ Na hauga teina baleꞌuwai mayawahigu yamiyamiya, na yaꞌabiye nuwatuwu avivinigomiu ta amꞌaipate mumuga namwanamwa vehabana.

¹⁴ Wuwuna yada Bada Yeisu Besinana bada iveꞌitagauꞌo ta muhamuhana na yawahigu yalaugabaei teina baleꞌuwai.

¹⁵ Ainaena yatowotowoi wahiyala ta ebe yagu mwalowoi tuluhanai veꞌitaone havena amnuwanuwa pwanopwanowedi. Besinana yana wasawasa aꞌitayaꞌo.

¹⁶ Mwalona yada Bada Yeisu Besinana yana wahiyala yo yana laoma awalo mahalavaediꞌo alimiyai, na yama walomahalavao nigele tomowa yadi aubabadao aidiyena, na hesi mehemaiyena yana wasawasa aꞌitayaꞌo.

¹⁷ Na haugana mwalona baidamai oya veꞌaveꞌahihina ewanai amiyamiya na Yaubada alinana galewaena abenalei iwalo, ‘Teina Natugu yavelauwei na iya vehabana yayaliyaya mwalaꞌina’. Na alinane teina neta Tamana yana wasawasa maselenaena ilalaomane, ta oyanane ewanai Yaubada walo vetuvehaenana ta yana wasawasa Natuna imohegeyoꞌawaheine.

¹⁹ Ainaena tahanapuiyaꞌo ebeha tauwalo mahalavao mugai yadi walo aidiyena Besinana hiwalo mahalava mugaiyei neta moiha. Eeta tauwalo mahalavaone yadi walo amnuwatuwu iliꞌilimanidi, wuwuna walowone dova masele tupwa guguyou ainai ihinahinali ana higa mala itomtom ta saelohana atemiyai ihihinaline.

²⁰ Teina ginauli mwalaꞌina eeta amhanapui neta nigele howahowana tabom Yaubada yana walomahalava ainona taꞌita lobai.

²¹ Wuwuna tauwalo mahalava nigele hiyabom yadi nuwatuwuwena hiyawalowalo mahalava na hesi Aluꞌaluwa Veꞌahihi tauwalo mahalavaone ivenuwamwauwedi ta Yaubada yana walowone hiwalowalowedine.

2

¹ Tupwadi tauwalo mahalava oyaꞌoyama mwalona tomowa ahiꞌahipudiyai himahalava. Dova hinage teina haugane tauveꞌita oyaꞌoyama ahiꞌahipumiyai himahamahalava, ta mata hiꞌoyamaegomiu yadi yababa yo yadi nuwatuwu dawaniwo aidiyena, ta Bada igimwagimwalaigitawa hiuvalaei, eeta mata maihana yababana hilobai.

² Hiya paihowa vedeba hinihinimayadi aidiyena mata tomowa bagibagilidi hiꞌoyamaedi ta himulitaedi na taumiya ganamuli hiꞌitadi ta hiwalo, walo moiha amwahana iyababa.

³ Hiya tobwatobwa nuwaleledi aidiyai imwalaꞌi alili na yadi walo amꞌamnaena ebeha nuwamiu hivaidi ta oyamaena yami tobwatobwao hivaidi. Na hesi Yaubada yadi abalauvetala bada iꞌatububuniyaꞌo ta ihahaꞌwahaꞌwa.

⁴ Yaubada tausagenawasao yadi yababa nigele iyaꞌateꞌatemuyamuyaedi na hesi guda guguguguyouna ainai ihiwa aituluwedi, ta himiyamiya na lauvetala ana ahubena hihaꞌwahaꞌwai.

⁵ Na hinage mwalona taumiya baleꞌu maudoidi Yaubada nigele iyaꞌatemuyamuyaedi, eeta tauyababao abaitaena imutu veꞌovidine. Na Nowa mayana bodao hitau 7 iyayayovidine, wuwuna Nowa iya dumwalu ana tauguguya.

⁶ Na hinage dalavaone yababadi bwau igabudi ta hiꞌalahi veꞌovidine neta Sodoma na Gomola, ta ainaena ebeha maudoida tahanapui na havena mumuga yababana tapaipaihowai.

⁷ Na Lota iya dalavaone aidiyena yana mumuga dumwadumwaluna, ainaena Yaubada ihahaloine. Walo moiha, Lota neta tauyababa yadi mumuga biꞌibiꞌidi vehabana inuwavitai.

⁸ Lota iya taudumwalu na hesi tauyababaone ahiꞌahipudiyai imiyamiya, ta abubena ehebo ehebo yadi mumuga yababao iꞌitaꞌitadi na ibenabenaledi ta inuwavitai mwalaꞌina.

⁹ Ainaena tahanahanapui ebeha Bada taunamwanamwao adi towoiwo maudoidi aidiyena mata ihaloidi, na tauyababao mata ipaipaidi ana higa hauga lauvetala ana ahubena imahalava.

¹⁰ Tomowaone, neta hiya taupwanoliwo Yaubada yana loina namwanamwana hitaꞌwataꞌwataedi, na yadi nuwatuwu dawaniwo biꞌibiꞌidi himulimulitaedi, adi maiha yababa alilina mata imohedi. Taupwanoliwone hinage yadi gagasa woiyawa, yo nigele yadi veꞌahihi taumiya galewa namwanamwadi aidiyai, na hiwalo dobidobiyedi.

¹¹ Na tausagenawasao wahiwahiyala alilidi yadi abamiya Yaubada ainai, na hesi tausagenawasao yababadi nigele hiyawalo dobidobiyedi Bada mehenai.

¹² Tomowaone hiya tauveꞌita oyaꞌoyamao mumuga yababana hipaipaihowai adi oleya dova lagulagu, ta adi lautowoi hibom himulimulitaedi. Yadi nuwapwanopwano vehabana hiwalowalo sebasebai ta mata yadi mwalowoi dova lagulagu hipwahipwa ainai,

¹³ ainaena yadi yababao maihana mata himuya. Wuwuna tomowa mehediyai adi amna dawadawanidi ainodi hiꞌabiꞌabiye mahalavadi. Na ebe baidamiyao amꞌai toyawa mata hiꞌabiye hinimayagomiu yadi mumuga yababao vehabadi.

¹⁴ Na yadi mehe ayouhi vehabana hipwanopwanoli lau na nigele mumuga yababana hiyalaumwauwi. Na tapitapiyadi himugaiyediꞌo amwaha yababana ainai na hiꞌaiduma moiha. Neta vehabana ta Yaubada iꞌawa yababaediꞌo.

¹⁵ Amwaha dumwaluna bada hilaugabainao ta hilau pwanoꞌo, ta Biyo natuna yehana Balam yana mumuga himulimulitaei, wuwuna iya nuwanuwana yo yana paihowa yababana ainaena ivetobwatobwa,

¹⁶ na doniki ehebo Balam yana mumuga yababana ivelau mwauwi dova tomowa yana aubabada ainaena. Donikinane tauwalo mahalavane yana paihowa yababanane abiye lau mwauwidine.

¹⁷ Tomowa teina dova yadi mumuga adi ita dova bwahi gumagumadi, na hinage dova yaloyalovi, yaumai itowatowapeiyei, ainaena Yaubada howola abo ihiwa aituluwedi guda guguyou ainai ta nemai himiya vateyai.

¹⁸ Yadi mumuga yababadi mayadi walo gagasa na hiꞌauꞌaubabada yauyaule, na hinage yadi pwanoli aidiyena taunuwabui vauvaudi hiniuniulidi ta hiwuyowuyo yadi mumuga mugai aidiyai.

¹⁹ Adi taumulitawone aidiyai hiwalo, ‘Amwaha teina hoꞌehoꞌena amwaha namwanamwana, na nigele teya laugagayo iyamiyamiya’. Na hesi hiya yadi mumuga yababana ainaena hibom hipaipaiyoidi. Wuwuna yaiya tomowa mumuga yababana ipaipaihowa alaꞌalabiliyei ibom ipaipaiuyoi

²⁰ Hiya mugai yada Bada yo ada Taulivahi Yeisu Besinana wasana bada hibenalenaꞌo yo hiyemidiyenaꞌo ta mumuga yababadi hidena gabaediꞌo, na ebe hiwuyouyo mumuga miyamiyana aidiyai mata yadi yababa mugamugaina hidiꞌwai.

²¹ Ebeha amwaha dumwadumwaluna nigele hiyahanapui, ainaena yababa hiveveꞌalone. Na hesi hiya bada amwaha dumwadumwaluna hihanapuiyaꞌo na hilaugabaei, mata miya yababa alilina ainai himahalava wuwuna loina veꞌaveꞌahihina hilaugabainaꞌo.

²² Ta yadi mumugao ipaihowauyaoidi ta tomowa hiwalo adi ita dova edewa maliwaidi hiꞌaiꞌaiyoidi. Na hinage maheya tauna ta abiye maseledi, na mulitai hiwuyo ta hitobatobauyo.

3

¹ Augeluwo, teina yagu leta bwauna alimiyai, na letaowone bwaune aidiyai yatowotowoi ta yavenuwatuwu avivinigomiu na amnuwanuwatuwu iliꞌilimani.

² Yaubada yana tauwalo mahalava veꞌaveꞌahihidi yadi walo mugamugaidi amnuwatuwu avivinidi, yo hinage yada Bada, Taulivahigita, yana tauyewasa hiwawalo auligomiuwa amnuwatuwu avivinidi.

³ Na teina ginauli mwalaꞌina amhanapui mugaiyei ebeha hauga yana abaꞌovi ainai tauꞌabi talawahi himahalava, na hiya taudi nuwalelena himulitaedi,

⁴ na hiwalo, ‘Aiteya hauga ainai yami Bada iwuwuyoma dova yana waloyemidi. Mwalona baleꞌu yana abavetuwuni ainaena ta wau nigele teya hinage ginauli iyamwaugwaipile. Mugai tubudao mwalomwalowoidi yadi haugaena na ilalaomane, ginauli maudoina adi oleyaone ehebodine.’

⁵ Hiya nigele nuwanuwadi hinuwatuwu avivini ebeha mugai Yaubada yana walowena galewa imamahalavane, na niꞌu ainaena Yaubada baleꞌu iyeyemaselene,

⁶ na mulitai niꞌu ainaena baleꞌu maudoina iꞌabiye yababane Nowa yana hauga ainai.

⁷ Na Yaubada yana walo ehebonane ainaena galewa yo baleꞌu imwau iliꞌilimanidi ta hihaꞌwahaꞌwa na hauga lauvetala ana ahubena ainai mata igabu vehuludi, yo tauyababao imutudi.

⁸ Augeluwo, ehebo ginauli amnuwatuwu avivini, ebeha Bada ainai ahubena ehebo dova bolimai 1000 alidai, na bolimai 1000 ainai dova ahubena ehebo.

⁹ Hesi tupwadi tomowa yadi nuwatuwu pwano hiwalo, ‘Bada yana waloyemidi inuwapwanopwanowenaꞌo ta mata nigele iyapaihowaidi’. Nigele iyabwedabweda na hesi iꞌalama iꞌita na ihaꞌwahaꞌwaigita ebeha maudoida tanuwabui, ta havena teya igabagabaei.

¹⁰ Eeta Bada yana lauvetala ana ahubena mata yana laoma dova tauꞌaivavali na iveꞌaluwagavaigita. Ta galewa isawali mayana alapwahi mwalaꞌina yo ginauli maudoidi galewai aiwa alaꞌalahina ainaena iꞌala yesawalidi, yo hinage baleꞌu ta ginauli maudoidi holanai himiyamiya iꞌalaye hisawalidi.

¹¹ Ginauli teina maudoina mata hisawali, ainaena ilowoinanei yo mayami mumuga maselena yo mayami veꞌahihi Yaubada ainai ammiyamiya.

¹² Na amhaꞌwahaꞌwa mayami nuwatuwu avivini Yaubada yana ahubena yana lau mwayamwayau vehabana, yo haugana ainai Yaubada galewa yo ginauli maudoidi iꞌoiye sawalidi aiwa alaꞌalahina ainaena.

¹³ Ta ita tahaꞌwahaꞌwa na galewa yo baleꞌu vauvaudi taꞌitadi, dova Yaubada mugai iwalo yemidi, na dalavanane ainai mumuga dumwadumwaluna imiyamiya.

¹⁴ Augeluwo, yami haꞌwa ana hauga ainai amtowoi wahiyala, ta ebe imahalavama ilobaigomiu mayami mumuga dumwalu maudoina na nuwadaumwaliyena ammiyamiya.

¹⁵ Na amnuwatuwu avivini yada Bada yana alamaꞌiꞌita ebeha nuwanuwana yo livahi talobai. Ginauli teina vehabana ada gelu moiha Paulo bada alimiyai ilaulelewaꞌo. Na yana hanapu Yaubada ainaena ilaoma.

¹⁶ Ta ginauli teina maudoidi Paulo iwalowalo yana letao aidiyai. Na tupwadi ginauli yana letao holadiyai adi hanapu vitaina, ainaena yauyauledi yo tautapiyao ginauliwone himwaubuidi, ta Yaubada yana Buki ana lelewo hinage himwaubuidi ta aidiyena hibom hiꞌabiye yababauyowedi.

¹⁷ Augeluwo, ginauli teina bada amhanapuidiꞌo, ainaena amꞌita avivinigomiu ta havena tauꞌawa sewao himugai pwanoligomiu mata dova ta yami towolo momohi ainaena ambeꞌu.

¹⁸ Na hesi yada Bada, iya ada Taulivahi Yeisu Besinana, ana veꞌiꞌila yo yana hanapu alimiyai imwalaꞌi, na iya tawalo vetuvehaeyei wau ta nigele yana abaꞌovi. Moiha.