1

¹ Yau Pita Yeisu Besinana ana tauyewasa, teina yagu leta alimiyai, omiu Yaubada yana bodao ivesinuwaigomiu ta ammiya taumana vali dalava aidiyai, dova Ponita yo Galetiya yo Kapadosiya yo Esiya, yo hinage Bitiniya dalavadiyaone aidiyai.

² Omiu mugai Yaubada inuwatuwuiyaꞌo ta ebeha ivesinuwaigomiu yana bodao, ainaena Aluꞌaluwa Veꞌahihiyena bada iꞌabiye maselegomiuꞌo neta Natuna ꞌwahinanaena, ta ebeha Yeisu Besinana amꞌawa abiyei. Yaubada yana veꞌiꞌila yo yana nuwadaumwali himwalaꞌi alimiyai. Yemidi Yeisu Besinana ainai

³ Yaubada tawalo vetuvehaeyei, iya yada Bada Yeisu Besinana Tamana, wuwuna iꞌatemuyamuyaegita mwalaꞌina, ta yada tubuiuyo vauvauna imohegita Yeisu Besinana yana towolouyo mwalowoiyena ainaena. Teina vehabana hauga maudoina tanuwatuwu avivini

⁴ ebeha ada velau galewai howola abo talobai. Tenem ainai yada dalava imwau iliꞌilimanidiꞌo vehabamiu, ta ebeha havena hipwahapwaha yo havena hiyabayababa yo havena hisawasawali.

⁵ Ebe Yaubada amyemidiyei mata yana wahiyalaena iꞌita avivinigomiu, ta hauga yana abaꞌovi ainai hava iꞌaꞌatububuniwa vehabamiu abo imohegomiu.

⁶ Ainaena amyaliyaya mwalaꞌina na hesi hauga iuꞌiuna teina ainai mata towoi vitaidi amlobalobaidi.

⁷ Teina aidiyena yami yemidi Yeisu ainai Yaubada itowotowoidi. Dova goula ainai alaꞌalahawawalinaena hitowotowoidi. Na hesi yami yemidi goula imwalaꞌi gabaei, wuwuna goula ginauli oviꞌovina. Ta ebe yami yemidi wahiwahiyalana hauga ilalaoma Yeisu Besinana yana mahalavama ainai, walo vetuvehae yo vewasawasa yo veꞌahihi amlobaidi.

⁸ Besinana iya nigele amyaꞌita, na hesi amveꞌilahi namwanamwa ainai, dova teina taꞌi nigele amyaꞌitaꞌita, na hesi ainai amyemidiꞌo, ta yami yaliyaya ainai mata nigele tayavahiliveꞌovi.

⁹ Wuwuna yami yemidi ainona bada ainai ammahalavaꞌo, neta aluꞌaluwamiu adi livahi.

¹⁰ Teina veꞌiꞌilane mugai tauwalo mahalavao hiwalo mahalavaei yo hibehaei ta livahine alidai hiwalo yemidiyenaꞌo ebeha Yaubada mata imohegita.

¹¹ Na Besinana Aluꞌaluwana atediyai iveꞌitaedi ana muyao yo yana vewasawasa hauga mulitai vehabadi, na tauwalo mahalavao hanapu hibehabehaei aiteya hauga ainai abo livahine tenem imahalava.

¹² Na Yaubada tauwalo mahalavao iveꞌitadi ebeha waloyemidi teina hiwalo mahalava mugaiyedi ebeha hiya vehabadi, na omiu hesi vehabamiu, ta ginauliwowa mugai vehabadi hiwawalowa bada teina, ambenalediꞌo, wasa namwanamwana ana tauwalo mahalavao aidiyena, neta Aluꞌaluwa Veꞌahihi galewaena yana wahiyalaena. Na ginauli teina namwanamwadi vehabadi mwalona hiwalowediꞌo alimiyai. Tausagenawasa galewai nuwanuwadi ebeha teina ginauliwone hinage hinapuidi. Miya masemaselena

¹³ Ainaena ginauli teina vehabadi yami nuwatuwu maudoina amꞌabiye wahiyaladi, yo yami yemidi ammwau iliꞌilimanidi ta ebe haugana Yeisu Besinana imahalavama mata awanamwanamwa amlobai Yaubada ainaena.

¹⁴ Eeta Yaubada ainai amꞌawa abi na havena yami nuwatuwu dawaniwo hiloiloinaegomiu, dova mugai yami hauga nuwapwanopwano aidiyai.

¹⁵ Na hesi yami miya maudoidi masemaselena, dova ibom iyogaegomiu yana mumuga maselenaena.

¹⁶ Wuwuna Buki Veꞌahihi ainai iwalo, ‘Amꞌabiye maselegomiu, wuwuna yau masemaselegu.’

¹⁷ Howola abo Yaubada yana lauvetala dumwadumwaluna imahalava alidai ta iloinaegita yada paihowa namwanamwadi yo yababadi aidiyena. Yaubada ainai amꞌawanoi amwalo, ‘Tamamai’, eeta mayami veꞌahihi ammeheuhei yami miyamiya haugadi aidiyai, wuwuna omiu amiya taumana.

¹⁸ Mwalona tubumiyao yadi mumuga dova lagulagu amveveꞌaoꞌaonaedi na hesi Yaubada iyemaihagomiuꞌo. Na ami maiha neta bada amhanahanapui ebeha nigele ginauli oviꞌovidi, dova siliba yo goula.

¹⁹ Na hesi maihane Yaubada yana Lami ꞌwahinana ainaena iuwagomiu, neta iya Besinana namwanamwa alilina yo masemaselena.

²⁰ Yaubada Besinana ivesinuwa mugaiyei yana paihowa teina vehabana, na mulitai baleꞌu iyeyemaselene, eeta teina hauga tuluhanai Besinananane imahalavamaꞌo ita vehabada.

²¹ Besinana ainaena Yaubada amyemidiyei neta ibom mwalowoiyena iꞌabiye towolouyoiyaꞌo na abamiya wasawasa ainai imwauwiyaꞌo, eeta yami yemidi yo yami nuwatuwu hae ammwau iliꞌilimanidi Yaubada ainai. Tubuiuyo

²² Eeta amwaha dumwadumwaluna bada ammulitaei iliꞌilimani, ta ainaena yami masele amlobaiyaꞌo, yo hinage ami geluwo amveꞌilahi namwanamwaedi atemiu maudoina ainaena, eeta ilowoinanegomiu na amvelavelauyoigomiu tomowa ehebo ehebo aidiyai.

²³ Na omiu bada hilabahiuyoigomiuꞌo, nigele tamamiyao mwalomwalowoidi aidiyena, na hesi Tamamiu yana walo na yawahina na miyamiya vateyaina ainaena.

²⁴ Dova Buki Veꞌahihi yana walomahalava iwalo:

‘Tomowa maudoidi dova awahi, na yadi wasawasa dova awahi tayadi.

Wuwuna awahi mata himwalowoi, na tayadine hinage mata hiwelai yo hibeꞌu.

²⁵ Na hesi Bada yana walo miyamiya vateyaina.’ Walone teina hauga alidai imiyamiya, neta wasa namwanamwana bada ambenalenaꞌo.

2

¹ Omiu bada amtubuiuyoꞌo ta ebeha yami yababao bagibagilidi dova yami mumuga oyaꞌoyamao, yami vehinihinini, yami alomagigili, yami ulumiyai maudoidi amtaꞌwataꞌwataedi.

² Yami tubuiyo ebeha aluꞌaluwamiune ana huhu namwanamwana ambehaei. Dova hedaheda iuꞌiudi huhu nuwanuwadi, na huhu teina aluꞌaluwamiu adi livahi vehabana.

³ Walo moiha, yada Bada yana atemuyamuya bada amlautowoiyaꞌo. Logidi mayawahina

⁴ Amlaoma Bada ibom ainai, iya logidi mayawahina taumiya baleꞌu hisosomanaei, na hesi Yaubada nuwanuwana ta ivevesinuwaneine.

⁵ Omiu hinage dova vada ana ginaginauli mayawahina, aluꞌaluwamiu amtalamwedi na alimiyai Yaubada yana vada iꞌabi, yo tenem ainaena amvetau pwaoli masemaselemiu, na Yeisu Besinana ihaguigomiu ta aluwaluwamiyena ampwaoli iliꞌilimani Yaubada ainai.

⁶ Dova hinage Buki Veꞌahihi ainai iwalo:

‘Amꞌita logidi teina namwanamwana na vesivesinuwana yamwau mugaiyei vada ana abi dalava Saiyoni ainai, na ebe yaiyadiwo hiya hiyemidiyei, mata nigele hiyahinimaya’.

⁷ Eeta omiu yaiyadiwo logidi teina amyemidiyei neta iya howomiu, na yaiyadiwo hiya nigele ainai hiyayemidi, vehabadi Buki Veꞌahihi ainai iwalo mahalavaꞌo iwalo:

‘Logidi teina mugai tauvada abi hitaꞌwataꞌwataei, na teina hauga bada hivetowoloyaꞌo ta ivelogidi mugai, ainaena logidi maudoidi iloinaedi.’

⁸ Na hinage iwalo:

‘Logidi teina tomowa yadi abatautupa, howola mata ainai hitautautupa na hibeꞌubeꞌu.’ Eeta hitautautupa ainai wuwuna walo nigele hiyayemidiyei. Dova Yaubada iloina mugai vehabadi.

⁹ Omiu hesi Yaubada yana boda vesivesinuwamiu, ainaena omiu Tauwasawasa yana taupwaoliwo na yana bodao masemaselemiu, wuwuna dalava guguyou ainaena iyogaegomiu, yo yana masele namwanamwana moiha ainai imwauwigomiuꞌo, ta ebeha yana paihowa ausaladi amwalo mahalavaei.

¹⁰ Walo moiha, hauga mugai aidiyai omiu nigele amyaveboda ehebo na teina taꞌi bada Yaubada ainai amyeboda eheboꞌo, na mugai hinage Yaubada yana ate muyanuya nigele alimiyai iyamiyamiya, na teina taꞌi amlobaiyaꞌo. Yaubada yana taupaihowao

¹¹ Augeluwo ita baleꞌu teina ana taumanao, eeta nuwanuwagu mwalaꞌina ebeha yami nuwatuwu dawaniwo atemiyai himiyamiya amtaꞌwataꞌwataedi, wuwuna aluꞌaluwamiu hiveꞌaveꞌalehaedi.

¹² Na hesi ammumuga namwanamwa hiya taumiya ganamuli aidiyai. Wuwuna teina taꞌi howola hiꞌawaꞌawa yababaegomiu, ta hauga mulitai yami paihowa namwanamwana hiꞌita, yo ebe haugana Yaubada imahalavama iya hiwalo vetuvehaeyei.

¹³ Na omiu Bada yana boda, ainaena ilowoinanegomiu ta loina bagibagilidi baleꞌuwai amveꞌahihiyedi, dova tauwasawasa yana loina ainai amtalamwegomiu, wuwuna iya tauloina mwalaꞌina,

¹⁴ yo hinage gabemaniwo amveꞌahihiyedi, wuwuna Bada neta ivesinuwaedi ta gabemani hiya tauyababao hiloinaedi, yo taunamwanamwa hiꞌawa namwanamwaedi.

¹⁵ Na Yaubada yana nuwatuwu teina ebeha taunuwapwanopwanowo hauganane hiwalo awaꞌawawa vehabamiu, mata yami paihowa namwanamwana howola abo hiꞌita lobai, yo havena hinage hava vehabamiu hiwalowalowei.

¹⁶ Na omiu hesi bada Yaubada ilivahigomiu yo ebeha ambom amloinaegomiu, ta havena paihowa yababadi aidiyai amlaulau, na hesi ampaihowa dova Yaubada yana taupaihowao.

¹⁷ Ainaena tomowa maudoidi amveꞌahihiyedi, na ami geluwo hiya Yeisu ana tauyemidiwo amveꞌilahi namwanamwaedi. Yaubada ainai amveꞌahihi mwalaꞌina, yo hinage gabemaniwo amveꞌahihiyedi. Yeisu vehabada muya ilobaidi.

¹⁸ Ainaena omiu taupaihowa mohiliwo, yami tauloinao amveꞌahihiyedi na aidiyai amꞌawa abi, na nigele ebeha tauloina namwanamwa aꞌavadi aidiyai na hiya hinage yadi loina oloꞌololodi aidiyai.

¹⁹ Wuwuna ebe nigele teya yami paihowa yababana, na hiꞌabiye muya awawaigomiu yo Yaubada vehabana amnuwanuwatuwu mwalaꞌina na amꞌalama iꞌita, neta mumuga namwanamwana Yaubada mehenai.

²⁰ Ebe yami mumuga yababadi vehabadi na hipwedipwediligomiu na amꞌalamaꞌiꞌita, neta nigele iyanamwanamwa. Na hesi ebe miyamiya namwanamwa vehabadi na hipwedipwedigomiu na amꞌalamaꞌiꞌita, neta Yaubada mehenai inamwanamwa alili.

²¹ Na muya amwahana teina vehabada Yaubada iyogaegitaꞌo, wuwuna Besinana iya vehabada imuyamuya, ta yada abaꞌita imwauwi alidai na ebe aeleleyanaena tamulita.

²² Wuwuna iya nigele yana pwanoliwo yo hinage nigele yana oyama ainaena iyamahalava.

²³ Na haugana hiꞌawa yababaei nigele hinage aidiyai iyaveuveuyo, yo hinage hiꞌabimuya, nigele ana modi iyaꞌiniyedi, na hesi Yaubada iyemidiyei moiha, wuwuna iya tauloina dumwadumwaluna.

²⁴ Walo moiha, Besinana iya tauna ainaena yada pwanoliwo iꞌavalaidi aiwa lagalagana ainai, ta tenem ainaena ebeha yada mumuga yababadi hiꞌovi, na mumuga dumwadumwaluna ainaena talau, ibom ana muya ainaena yami namwanamwa amlobai.

²⁵ Walo moiha, omiu dova sipi sawasawalina, na ana tauꞌitaꞌita avivini ivaiyoigomiuꞌo ainai, iya aluꞌaluwamiu ana tauꞌita avivini.

3

¹ Omiu hinage tautawahola waiwaihiu, mwanemiyao amveꞌahihiyedi. Ebe hiya nigele Yaubada yana walo hiyayemidiyei, omiu yami paihowa namwanamwana ana veꞌahihiyena amveꞌitadi, ta ainaena hiyemidi.

³ Na havena amꞌauꞌaupasa ginauli mahamahalavadi aidiyena, dova vahumiu ampaihowa iliꞌilimanidi, nuwana ginauli goula aidiyena amꞌaupasa, nuwana ami aleꞌowo namwanamwadi amliꞌwadi.

⁴ Na hesi atemiu amyepasadi, pasa miyamiya vateyaidi aidiyena, hiya dova mumuga hegohegoyana yo nuwadobi aidiyena amnuwatuwu avivini ebeha teina ginauline ginauli mwalaꞌina Yaubada mehenai.

⁵ Dova mugai hiya waiwaihiu tautapwalolo Yaubada hiyemidiyei ta atedi hiyepasadi mumuga hegohegoyana yo nuwadobi aidiyena na mwanediyao hiveꞌahihiyedi.

⁶ Dova hinage Sela mwanena Abelaham alinana iꞌawa abiyei na iꞌawa badaei eeta ebe omiu ammumuga namwanamwa, yo havena teya ginauli ammehemeheuhei, omiu Sela natunao.

⁷ Na omiu hinage tautapwalolo towatowaho, mwanemiyao baidamiyao ammiyamiya, amnuwatuwui ebeha hiya tapitapiyadi, ainaena amꞌita avivinidi na amveꞌahihiyedi, wuwuna omiu yo mwanemiyao baidamiyao Yaubada yawahina imohegomiuꞌo. Teina dova ammumuga yo ainaena havena yababa yami awanoiwone itautau auhidi. Muya taveꞌalodi

⁸ Teina yagu walo yana abaꞌovi alimiyai ebeha yami nuwatuwena yo ami lautowoiyena amveꞌehebo yo amveꞌilahi namwanamwaegomiu, yo mayami nuwadobiyena amꞌatemuyamuyaegomiu.

⁹ Na ebe tupwadi alimiyai hipaihowa yababana, havena aidiyai amyemayemaiha, na ebe hiwalowegomiu havena amwalowalowedi. Na hesi amveuyodi walo namwanamwana ainaena. Wuwuna ita Yaubada bada ivesinuwaigitaꞌo ebeha nuwahegoyaena taꞌauꞌaubabada ta ebe Yaubada iꞌawa namwanamwaegita.

¹⁰ Dova Buki Veꞌahihi ainai iwalo mahalava, iwalo:

‘Ebe yaiya iya nuwanuwana na iyaliyaya hauga maudoina aidiyai, ilowoinanei yo walo awaꞌawawa yo oyama ilaumwauwi.

¹¹ Yo hinage paihowa yababadi itaꞌwataꞌwataedi na ipaihowa namwanamwana vali tomowa aidiyai, yo hinage iꞌaipate wahiyala nuwadaumwali vehabana.

¹² Wuwuna yada Bada hauga maudoina taunamwanamwa iꞌitaꞌita avivinidi, yo hinage yadi awanoiwo ibenali iliꞌilimanidi,
na hiya tauyababao itaꞌwataꞌwataedi’.

¹³ Walo moiha, ebe ginauli namwanamwana nuwamiu ivai, nigele howahowana yaiya teya iꞌabiye muyagomiu.

¹⁴ Ebe mumuga namwanamwana ammiyamiyanei na tomowa hiꞌabiye muyagomiu havena amnuwanuwatuwu yo hinage havena ammehemeheuhi, wuwuna Yaubada mata iꞌawa namwanamwaegomiu.

¹⁵ Eeta atemiyena Besinana ainai amwalo, ‘Yama Bada Masemaselena’. Ebe yaiya tomowa ipanivilaegomiu, ‘Yami wuwu hava ta Besinana amyemiyemidiyeine?’ Eeta yaꞌatububunigomiu tomowane yana panivilane amyemaiha

¹⁶ mayami veꞌahihi yo mayami nuwahegoya. Ita Besinana ana taumulitao ainaena mumuga namwanamwadi tamulitaedi. Na ebe hiwalo sebasebaiyegomiu mata yadi walowone iꞌabiye hinimayadi yami mumuga nwamwanamwadi vehabadi.

¹⁷ Mumuga yababana vehabadi muya amlobalobaidi neta nigele iyanamwanamwa. Na mumuga dumwadumwaluna vehabadi na muya amlobalobaidi neta Yaubada yana nuwatuwu.

¹⁸ Walo moiha, Besinana imwalowoi mai ehebo yada pwanoliwo vehabadi, na ibom taꞌi namwanamwana, na ita tauyababa vehabada imwalowoi, ta ebe ilau vaigita Yaubada ainai. Na Besinana tauna hiꞌoiyemwalowoi, ta Yaubada Aluꞌaluwana ainaena iyawa haiuyo.

¹⁹ Na hinage Aluꞌaluwana yana wahiyalaena iꞌaitulu bwebweso ana taumiyao aidiyai.

²⁰ Na tomowaone aidiyai iguguyane neta hiya mwalona Nowa yana haugai waga iꞌaꞌabiwa ainai Yaubada yadi awasewa vehabana iꞌalamaꞌiꞌita. Na hesi abaita ainai maudoidi hihanene na hitau 8 hibom hiyayawahaine wagane alonai.

²¹ Bwahine teina bapitaiso veꞌiveꞌilalana ebe ainaena tahugu mata tayawahai. Bapitaiso bwahina nigele tau ana yemasele vehabana, na ate yana masele Yaubada mehenai vehabana Yeisu Besinana yana towolouyo ainaena.

²² Iya bada ihaeꞌo galewai ta teina hauga Yaubada nima tautuwanai imiyamiya, na tausagenawasao yo galewa ana tauloinao yo tauwahiyalao maudoidi iloiloinaedi.

4

¹ Besinana iya iyemala tomowa mohili yo muya ilobai, eeta omiu hinage muya alonai amtowolo wahiyala ta dova Yeisu. Wuwuna muya ebe amveꞌalo yami yababao bada amtaꞌwataꞌwataediꞌo.

² Ainaena yada hauga maudoina baleꞌuwai ta miyamiya, tatalamwegita Yaubada ainai na iya iloinaegita, na yada nuwatuwu dawaniwo havena hiloiloinaegita.

³ Mugai yami mumuga yababana, dova hiya guguyou ana taumiyao, na teina haugane amtaꞌwataꞌwataediꞌo, dova pwanoli yo, nuwatuwu dawani yo, bwahi wahiwahiyaladi adi numa yauyaule, yo veꞌauꞌaugelu paihowa yababadi vehabadi yo hinage yemidi oyaꞌoyama vali ginauliwo aidiyai.

⁴ Na taumiya ganamuli yami yemidi nigele hiyaꞌita lobai wuwuna paihowa yababadi nigele amyapaipaihowaidi, ainaena hiꞌawa yababaegomiu.

⁵ Na hesi howola Yaubada tomowa mayawahidi yo mwalomwalowoidi iloinaedi, ta ainaena hiya taumiya ganamuli hilauvetala mehenai,

⁶ Teina vehabana ta Yeisu iꞌaitulu taumwalomwalowoi aidiyai na wasa namwanamwana iguguyaei wuwuna tau ana lauvetala bada iveꞌaloyaꞌo na aluꞌaluwadi howola abo yawahai hilobai Yaubada ainaena.

⁷ Eeta hauga iuꞌiuna na ginauli maudoidi hiꞌovi. Ainaena amꞌita avivinigomiu yo havena amvevetauhabulolo, na hesi hauga maudoina amꞌawaꞌawanoi Yaubada ainai.

⁸ Ainaena amveꞌilahi namwanamwa iliꞌilimani ehebo ehebo alimiyai, wuwuna velau ginauli maudoina imwalaꞌi gabaedi. Na hinage velau howahowana yo yababa bahudi iꞌauhidi.

⁹ Eeta ami geluwo amyogaedi yami vadai nuwanamwanamwaena, na havena vehabadi amꞌuluꞌulumiyai.

¹⁰ Na ehebo ehebo Yaubada veguveguyai vagavagadi imohegomiuꞌo, ainaena veguveguyaiwone aidiyena ampaihowa ta ami geluwo amhaguidi, ta ainaena omiu Yaubada yana taupaihowa namwanamwamiu.

¹¹ Ai tauguguya Yaubada yana walomoihana aguguguyaei. Na omiu tauꞌabihagu yami wahiyala Yaubada imomohegomiune ainaena amvehaguhagu. Eeta yami paihowa maudoina tomowa hihanapui na Yaubada hiwalo vetuvehaeyei Yeisu Besinana yehanaena. Wuwuna iya Wasawasa yo Wahiyala miyamiya vateyaina. Moiha. Yeisu yana bodao himuyamuya.

¹² Augeluwo havena amꞌaluꞌaluwagavai muyao mwalaꞌidi amveꞌaveꞌalodi vehabadi. Neta muyaone nigele ginauli vauvaudi.

¹³ Na hesi amyaliyaya wuwuna Yeisu Besinana muya ilobai, ta omiu hinage dova amlobalobaidi, na mulitai haugana yana wasawasa imahalava amyaliyaya moiha.

¹⁴ Na ebe tomowa hiꞌawa yababaegomiu yami yemidi Yeisu Besinana ainai vehabana, amyaliyaya taꞌi, wuwuna Yaubada Aluꞌaluwana masemaselena bada alimiyai imiyamiya.

¹⁵ Omiu nigele iyalowonanegomiu ebeha mumuga yababadi vehabana muya amveꞌalodi eeta oiyemwalowoi, aivavali, nuwatuwu yababa yo mumuga yababadi, tupwadi amtaꞌwataꞌwataedi.

¹⁶ Na hesi ginauli ehebo aꞌava ilowoinanegomiune neta omiu Besinana yana bodao eeta yehana vehabana na mata muya amveꞌalodi, ainaena havena amhinihinimaya na hesi Yaubada amwalo vetuvehaeyei.

¹⁷ Hauga bada imahalavaꞌo na Yaubada yana loina ivetuwuni yana bodao alidai. Na tuluhanai Yaubada yana wasa namwanamwana ana tauꞌawa sewao mata lauvetala mwalaꞌi iꞌalilina hiveꞌalo Yaubada ainaena.

¹⁸ Na Buki Veꞌahihi ainai iwalo mahalavao, iwalo:

‘Taunamwanamwao muhamuhana na mata lauvetala hiveꞌalo, na hesi tauyababao mata lauvetala mwaliꞌi alilina hiveꞌalo’.

¹⁹ Ebe omiu Yaubada yana nuwatuwu ainaena muya amlobaidi, yawahimiu amtalawedi ainai, dova iwalo yemidiyegomiuwa mata iꞌita avivinigomiu wuwuna iya tauyemasele.

5

¹ Omiu babadao teina yawalo auligomiu yami paihowa vehabana, wuwuna yau taumugai teya. Besinana muyao iveꞌalodi yau tauꞌawa moihaeina teya ta mata yana wasawasa iꞌabiye mahalava agu guyau abo imohegau.

² Babadao yami bodao amꞌita avivini iliꞌilimanidi wuwuna hiya Yaubada yana bodao imohegomiu ebeha amloina iliꞌilimanidi. Amꞌita avivini Yaubada yana velau vehabana na havena ami maiha vehabana na hesi amꞌaipate yo tomowa amhaguidi.

³ Na havena amtowotowoi yo amvetau loina aidiyai, na hesi mumuga namwanamwana amveꞌitaei aidiyai, ta himulitaegomiu.

⁴ Eeta hauga mehedai Tauꞌita avivini mwalaꞌina imahalava, iya ainaena ami maiha namwanamwana na miyamiya vateyaina mata amlobai.

⁵ Eeta omiu hinage hevali vauvaumiu babadao amveꞌahihiyedi, na maudoimiu amnuwadobi yo ehebo ehebo alimiyai amvehaguhagu. Dova Buki Veꞌahihi iwalo mahalava, iwalo:

‘Yaubada taunuwahaehae iꞌauhidi, na hesi taunuwadobi iveꞌiꞌilaedi’.

⁶ Eeta amnuwadobi yo amtalamwegomiu Yaubada Tauwahiyala iya nimanai, na ainaena mulitai iya yana hauga namwanamwana ainai iꞌabihinigomiu.

⁷ Na ami vitaiwo maudoidi Yaubada ainai ammohei ta ami vitaiwone ivai vehuludi.

⁸ Amꞌita avivini iliꞌilimaniuyoigomiu ami aleha Tomodulele ainaena. Wuwuna iya dova laiyoni, hauga maudoina itaꞌitaꞌiꞌili na ibehabeha ta ebe ana tauꞌilobai yo iꞌai.

⁹ Na havena ammehemeheuhi, na hesi yami yemidi ainai amtowolo wahiyala, wuwuna amhanapui ebeha ada geluwo hiya Yeisu ana tauyemidiwo vitaiwone hilobalobaidi tupwa vehopali aidiyai.

¹⁰ Yaubada iya tauveꞌiꞌila na bada iyogaegitaꞌo ta ebeha yana wasawasa miyamiya vateyaina ainai tamiyamiya Besinana baidada. Ami muyao hauga ubwaꞌubwana na hiꞌovi, eena mulitai Yaubada iꞌabiye maselegomiu na iꞌabiye wahiyalagomiu ta yaiyaimiu ebe ammiya namwanamwa.

¹¹ Wuwuna iya tauwahiyala miyamiya vateyaina. Moiha. Walo awayauwedo

¹² Yami leta ubwaꞌubwana teina Sailasa ihaguigau ta yalelelene vehabamiu. Iya Sailasa tahanapui ebeha ehebo tahida mayana yemidi. Eeta yami leta teina ainai nuwanuwagu na Yaubada yana veꞌiꞌila moihanaena yawalo mahalavaei, alimiyai, ta ainai amtowolo wahiyala.

¹³ Na hinage tautapwalolo tupwa teina Babiloni ainai yadi awayauwedo alimiyai. Hiya Yaubada ivesinuwaidi dova omiu ivesinuwaigomiune yadi awayauwedo alimiyai. Yo hinage natugu Maki iꞌawa yauwedo alimiyai.

¹⁴ Amꞌawa yauwedouyoigomiu ehebo ehebo ainai, yo amꞌatuhapwaliuyoigomiu velau moihanaena. Omiu Besinana yana bodao ammiya daumwali.