1

¹ Pigoya, ma kamanapa Isu Karaisiti aboranti kamanane. Piya, agarosama aborakibintana kayokaya kinaꞌwa iyakikenaga Kotiba Isu uma aboramintiye. Aboramogana, Karaisiti aeba enisore kinaꞌwa otaogana kayokaya yagarawa Yoninteti tumpa aboranamintiye.

² Aiboga, Yoninaba Koti aboranti kamanape Isu Karaisiti nkawaga kamanape abimagi: Pipa tagantanawe, untuwe. Eya, aꞌyaꞌmaema agantontanagaba: Tagane, untone.

³ Piya, wasanamaba ma poropete kamanapa aisuma awamupisa uma aboraiꞌna, aeba aꞌmuntanabi mpikiye. Piya pegiri, wasanamiba ma kaeyo kamanapa abima aegaraꞌnagitaba tigeba kaga tiꞌmuntanabi mpikibewe. Eya, pi kanapa agarosaye. Yoniba monota aiꞌaru pume kinaꞌmiti esa kaentiye

⁴ Nae Yonina, ma kamanapa tonaentisa tara umaema monota aiꞌaru pukenaenata Esiya mari wainti, tigeti kaeyuwe. Piya, Koti aeba iba mintipe, pai mintantipe, ainti mirite wakibipe, aepisa awagaenabe paruyenabe tigeti waiyeno. Eya, Kotipisabe, ae waꞌega aemu yabaera miye tonaentisa tara umaema Awamusaꞌama nkagobisabe,

⁵ Isu Karaisitipisabe, awagaenabe paruyenabe tigeti waima waiyeno. Piya, Karaisiti aeba tagantana aboraraminti, aeba purintapisa paitama asimagina, mabisa waꞌegamipa kabiwaitaye. We, aeba agu kaoꞌena puratamagina, korankatasa aguntaenarepisa akariyobatatamagina,

⁶ kaꞌena puratama kabiratamagina, aeꞌwa nkabawampa Kotiti mono kiye kina kanta puma miyiyoma, uratantiye. Piya puntegi, ae agegaꞌeba asagayuyekana kabiratayaba miyeno. Tagane.

⁷ Abiyo. Aeba ibinankama nkakapi ampa aborakini aꞌyaꞌma kinaꞌmiba iyowaitasa agakibewe. We, aꞌyaꞌma ita atama aegunta kinaꞌmibe kaga agakibewe. Pigoya, aꞌyaꞌma maga maga kinaꞌmiba agama aeka iyekuru puma intara pukibewe. Kanarana, aborao. Tagane.

⁸ Piya: Naeba paitanta yagara mite aintisa yagaraba mite puwe, Waꞌega Kotiba piya iye. Eya, Koti aeba iba mintipe, pai mintantipe, ainti mirite wakibipe, aeba taberakaꞌyane. Yoniba Karaisiti nkaogaꞌena agantiye

⁹ Nae Yoni tiyoꞌyagaranawe. Naeba tigege Isuti atokaema mimagi tauki nakiyenarepa aesagaꞌmagi, Koti kabiratakenaenabi ubaiꞌma, tigege kaga paebume mima monoka asima esegima miyuwe. Piya, naeba Koti aboranti kamanape Isu nkawaga kamanape aborasanaga akuntatama nagarubakasugu, wani nkakapisa Patimosi mara mintantuwe.

¹⁰ Piya, ka yaga, Waꞌegawama nkaota yagaba, naeba Awamusaꞌamati atokaema kasaꞌenaba agauwagana, nakaꞌisa ka tabera awamu aga maya uma pikuri aga usu puntiye:

¹¹ Aꞌyaꞌmaena agampentanaba esapi kaemagina, tonaentisa tara umaema monota akibukenaenara atagana wano. Piya, Epesasi kinape, Simena kinape, Pegamami kinape, Tiyatira kinape, Satisi kinape, Piratepiya kinape, Areyotisiya kinape, igeti kaema atagana wano, unatantine.

¹² Piya unataoga, naeba kamana unamemiꞌnapa agakenaga aꞌwae puntuwe. Aꞌwae pumagi, tonaentisa tara umaema korirasa pumaranta kani waintoga agauwapa,

¹³ pi kaniꞌama nkakapipa ka yagara, aeba wasanama ntagara kanta puma mintoga, agantuwe. Piya, aeba eꞌero kai potama, abamukantiba korirasa pumarantatasa aebarakima ki uꞌmawe.

¹⁴ Piya, aꞌnope abiyape wae puwama, sipisipiwama nkaya kanta puma, wae nkibina kanta puntiye. Piya pogana, aowamaba yaku ikisu pogana,

¹⁵ agisawamaba, tabe yakunkama kapa kaema iꞌnintanawa kaigasagina taꞌneraꞌne pisa pogana, awamuꞌwampaba tabe wani nkabawama yisa suntiye.

¹⁶ Piya, aeba ayatakanti tonaentisa tara umaema nori uꞌma mintogana, awamupisaba ka paroya ntogipa torirori agana wainta yogipa aboraogana, aowawamaba eꞌwasa puwama, pa nkesegi pataisa poga agantuwe.

¹⁷ Naeba piyama agategi, agisabi puꞌwanta kina kanta puma wareꞌnantuwe. Piya puwagana, aeba ayatakanti natama, maya untiye: Kaekuruba a-po. Naeba paitanta yagara mite aintisa yagara mite puma,

¹⁸ naogama mintuwe. Piya, paipa nae purintoka, we, ibaba naogama miyaba miyuwe. Piya, naeba purikenarasa kibe karasa kibe uruntuwe.

¹⁹ Piyama kaeba pintana agampentanaba esapi kaeyo. Eya, iba waintintanagabe ainti aborakibi ntanagabeba kaeyo.

²⁰ Pigoya, kaeba tonaentisa tara umaema nori nayatakanti waintegina agampepe, tonaentisa tara umaema korirasa pumaranta kani agampepe, pipa awameꞌenawe. Piꞌna nkagowapa mayamawe: Pi tonaentisa tara umaema kanipa, pabi tonaentisa tara umaema monota aiꞌaru pukena kinane. Pi tonaentisa tara umaema noriba, pipa pi mponota aiꞌaru pe kinaꞌmi kiye kinanema, unamintiye.

2

¹ Pigoya, Epesasi kumata monota aiꞌaru pe kinaꞌmi kiye yagaramati kamanapa mayama kaeyoma, unamintiye: Naeba nayatakanti tonaentisa tara umaema noriba uꞌurinta, tonaentisa tara umaema korirasa pumaranta kaniꞌama nkakapintiba naso ntagaramana, naeba ma kamanapa kaetiba atauwe, iye:

² Piya, naeba aꞌyaꞌma monota tiyapisaenabe, araga ntugaripe, paebuma mima kuntaena aesaga pentanaripe, ago agantuwe, iye. Eya, tigepa kamparaga kinakaba kampa tibegiri, kumpari kamana: Taeba aposororawe, ye kinaꞌmi nkagowaipa aꞌyigimpa agama kumpariꞌenawaipa aboraga, pipa agauwe, iye.

³ Piya, tigeba naekaba paebuma mima kuntaena aesagaꞌma esegima asimagiri, tiyekitaba kampa pega, agauwe, iye.

⁴ We, tigeti ka kamana uritauwe, iye. Piya, maruꞌenaba naeti agu kaoꞌenaba aogima punatantawe. Pipa ibaba kasawe, iye.

⁵ Piya, paipa tigeba aogiyena puntakiri, ibanto ago kaite wareꞌnawawe, iye. Pika napimagiri tigu aꞌwae pumagiri maruꞌena puntasa piye, iye. Piya kampa pukibepa, kanetipa marunkatasa tumpaegaikuwe, iye. Eya, kampa tigu aꞌwae pukibepa piya pukuwe, iye.

⁶ We, kapa tige pega naeba abogana kanarasaye, iye. Piya, tigeba Nikorasi tumpi pentanaba kampa tibugagina, naekeba kampa nabugagina kanarasaye, iye.

⁷ Piya, wasana ageyaga kinaꞌmaba Awamusaꞌama monota aiꞌaru pe kinaꞌmi uwaimemi kamanapa abeno, iye. Pigoya, wasanama mono yuga puma agaikibipa, naeba otakana wasanama eꞌwasaena amikena yamankapa maekiye, iye. Eya, pi ntamankapa Koti nkauka kumata waintakana amekana nakiyema, Isu piya untiye. Simena kinaꞌmi nkisane

⁸ Pigoya, Simena kumata monota aiꞌaru pe kinaꞌmi kiye yagaramati kamanapa mayama kaeyoma, unamintiye: Naeba paitanta yagara mite aintisa yagara mite punta, nae purintoka ibaba naogama miyuwe, iye. Piya po ntagaramana naeba ma kamanapa kaetiba atauwe, iye:

⁹ Piya, tiki nkaiyena tigeti aborarimegi, naeba tigantuwe, iye. We, tigeba mantabinti uwaena kutapa akibewe, iye. Piya, kaꞌisa kinaꞌmiba igeba: Yuta kinatawe, yepa, pipa tagapa kampaye. Igeba Satani tumpi akayasuritapa, pipa abuntuwe, iye.

¹⁰ Pigoya, aro ntaganto tigetiba kuntaenaba aborarimekiripa, pikaba a-tiyekuru piyo, iye. Abiyo. Kewamaba tige tikapisa kaꞌisa kinapa timiyo pusanaga tiyesagayuma igaꞌnabi maeburitakiye, iye. Piyama tigeba tiki nakiyenaba nayataraꞌmu yaga maeyigina aꞌya wakiye, iye. Eya, tiyeguyigiri puꞌwantiripa, timatitiꞌenaripa a-kasiyo, iye. Piyama aogima mikibepa, Kotitisa eꞌwasa antotapa timukuwe, iye.

¹¹ Piya, wasana ageyaga kinaꞌmaba Awamusaꞌama monota aiꞌaru pe kinaꞌmi uwaimemi kamanapa abeno, iye. Pigoya, wasanama mono yuga puma agaikibipa, aintisa purikenaenamaba kampa ataba potakiye, Isu piya untiye. Pegamami kinaꞌmi nkisane

¹² Pigoya, Pegamami kumata monota aiꞌaru pe kinaꞌmi kiye yagaramati kamanapa mayama kaeyoma, unamintiye: Naeba paroya ntogipa torirori agana wainta yogipa uro ntagaramana, naeba ma kamanapa kaetiba atauwe, iye:

¹³ Naeba miye kumaꞌama nkagoba abintuwe, iye. Pitapa Satani nkaemu yabae waima kabiwaitagiri, nae nagegaꞌeba esegima arakuꞌma kampa nagasaga tigauwe, iye. We, paipa Antipasi aeba tigege mintana, amatitiꞌenaba kampa kasima nae nawamu aboraogini aeguyuguna, Satani mintemi nkwaꞌe pitaꞌi purintiye. Tigeba pi ntagaba naeti timatitiꞌenaripa atamagiri kampa tikabitaugu, agantuwe, iye.

¹⁴ We, naeba tigeti kaꞌisa kamanapa uwa waintiye, iye. Piya, paipa Peramuba Perekipa omogana, aeba Isureyo kinaꞌmiba igisaimisaꞌma wareꞌnakenaenawaipa aboraogini, igeba ama kotiti muta ataume ntanintaba namagini kumiyena puma agunta puntawe. We, tikapisa kaꞌisa kinaꞌmiba Peramu puntisa puma pi ki takuꞌma upebe pega, kamanapa uritauwe, iye.

¹⁵ We, pabiyamagini tigetisa kaꞌisamiba Nikorasi tumpi kamanapa takuꞌma upebe puma ata pewe, iye.

¹⁶ Pigoya, pika tigu aꞌwae piyo, iye. Piya, kampa pigipa, aro ntaganto tigetiba wamagi, pi kinaꞌmipa nawamupinti paroya ntogi waintitasa kama puwaitakuwe, iye.

¹⁷ Piya, wasana ageyaga kinaꞌmaba Awamusaꞌama monota aiꞌaru pe kinaꞌmi uwaimemi kamana abeno, iye. Pigoya, wasanama mono yuga puma agaikibipa, naeba kaꞌisa mantabintisa kakanta mana naninta amimagi, taberabe yabapa kaga amukuwe, iye. Piya, pi ntabata aoso agiba kaeyakana, maekibiꞌnaba ae abintowa agowapa abikiye, Isu piya untiye. Tiyatira kinaꞌmi nkisane

¹⁸ Pigoya, Tiyatira kumata monota aiꞌaru pe kinaꞌmi kiye yagaramati kamanapa mayama kaeyoma, unamintiye: Naeba Koti Ntagaranaga, naowamaba yaku ikisu pegi, nagisawamaba kapa taꞌneraꞌne pisa pegi, piya miyo ntagaramana, naeba ma kamanaꞌnepa kaetiba atauwe, iye:

¹⁹ Piya, naeba aꞌyaꞌma monota tiyapisaenabe, agu kaoꞌenaripe, timatitiꞌenaripe, kayokayaꞌenaripe, paebuma mima kuntaena aesaga pentanaripe, ago agantuwe, iye. Eya, tige maruꞌena puntantanaba ibantoba asugasaga agauwe, iye.

²⁰ We, tigeti ka kamana mayama uritauwe, iye: Piya, tige tikapipa ka Yesebe kanta wae uwa atagana miye, iye. Pi nkwaeꞌmaba: Naeba poropete waeꞌnawe, uma, aeba yoga kinaꞌnepa amiyoꞌena puwaitama kumiyena puwaiyakegini, aꞌyugu puma ama kotiti muta ata ntanintaba naga, tigeti kamanapa uritauwe, iye.

²¹ Piya, ae agu aꞌwae penema, kaꞌisa yagaba uwa ataogana, kumiyenawakaba kampa agu aꞌwae punta, akabitaye, iye.

²² Abiyo. Naeba tabe inu aboramimagi, pi nkwaeke kumiyena pe kinaꞌmiba aeꞌwantanara kampa ikabitakibepa, tabe iki nakiyenabi kaiwaitakuwe, iye.

²³ Piya, aꞌyaꞌma araga yagarawapa iyeguyekini purikibewe, iye. Piya pekini, aꞌyaꞌma monota aiꞌaru pe kinaꞌmiba igeba nae iguꞌamabe napiyenawaipeba aguyosaꞌma aborao ntagaranagini abikibewe, iye. Piya, aꞌyaꞌma pukibentanaraka antotaꞌenaba ka ka aborarimukuwe, iye.

²⁴ Pigoya, aꞌyaꞌma to Tiyatira miye kina, pi ata kamana kampa abe kinaꞌmititi ma kamanapa kaeyuwe, iye. Eya, kaꞌisamiba pi ata kamanaka: Pipa Satani nkago kamanaꞌwane, yewe. Pi nkagoba kampa abe kina tigeti ma kamanapa kaeyuwe, iye. Piya, naeba maya urimuwe, iye: Piyama tiboboriba kuntaenaba to kakemaba kampa atauwe,

²⁵ tigeba mono abintapa upebe puma urintigi, naeba irosano, iye.

²⁶ Pigoya, wasanama naeꞌenaena aegaꞌma purite wama kampa natamagina, aeba mono yuga puma agaikibipa, naeba esegiyena amekana aeba maga maga kina paitawaitamagina, kabiwaitakiye, iye.

²⁷ Eya, nabanempa esegiyenaba namintisa puma aepa amekana kaꞌmasa puma aeni kasutasa kabiwaitakiye, iye. Eya, magabu aeguma ayasagasasa puma piya puwaitakiye, iye.

²⁸ Piya, naeba abayarasa nori amato potama eꞌwasa potakuwe, iye.

²⁹ Piya, wasana ageyaga kinaꞌmaba Awamusaꞌama monota aiꞌaru pe kinaꞌmi uwaimemi kamana abeno, Isu piya untiye.

3

¹ Pigoya, Satisi kumata monota aiꞌaru pe kinaꞌmi kiye yagaramati kamanapa mayama kaeyoma, unamintiye: Naeba tonaentisa tara umaema Koti Nkawamusaꞌama nkagobe, tonaentisa tara umaema noribe uro ntagaramana, naeba ma kamanapa kaetiba atauwe, iye: Piya, naeba aꞌyaꞌma monota tiyapisaenaba ago agantuwe, iye. Piya, wasanami tigagiripa, tigeba aoganta mintasu pewe. We, tige tigupa ago puꞌwasu piyema, iye.

² Piya, tige pentanamaba Kotinempa nkaobipa kampa aogi pegi agauwe, iye. We, tigeba purikena pepa, uwaenanto esegiyenaripa waintiya, tigeba asima tiyogama uwa waintintanaba esegima arakuriyo, iye.

³ Piya, paipa tigeba aogi kamanapa abima maentawe. Pika to kake napima abibebe puma tigupa aꞌwae puma kabiyiyo, iye. Piya, tigeba kampa asinta waitamikibepa, naeba ku kina kinaisa puma tigeti kanakuwe, iye. Eya, nae kanapa kampa abintapa kanakuwe, iye.

⁴ Pigoya, Satisi kumata tikapisa tarantomiba uwa mima itasaenawaipa kampa iꞌnintanaba pegana kanarasagini, igeba waentanamana purite, naege nasikibewe, iye.

⁵ Piya, wasanama mono yuga puma agaikibipa, aepa wae kai amekana pureka, agegaꞌewapa eꞌwasa maekena isapipa kampa asuꞌa pukuwe, iye. Eya, agegaꞌewapa nabanempa nkaobipe enisore kinaꞌwampi nkiyobipe uma aborakuwe, iye.

⁶ Piya, wasana ageyaga kinaꞌmaba Awamusaꞌama monota aiꞌaru pe kinaꞌmi uwaimemi kamanapa abeno, Isu piya untiye. Piratepiya kinaꞌmi nkisane

⁷ Pigoya, Piratepiya kumata monota aiꞌaru pe kinaꞌmi kiye yagaramati kamanapa mayama kaeyoma, unamintiye: Naeba aota takaꞌya, taga takaꞌya mimagi, Tebitinta kiba uruntuwe, iye. Piya, naeba kabe aigekanaba kaꞌwainaba kampa akuneka, to akunekanaba kaꞌwainaba kampa aigikiye, iye. Piya pukena yagaramana naeba ma kamanapa kaetiba atauwe, iye:

⁸ Piya, naeba aꞌyaꞌma monota tiyapisaenaba ago agantuwe, iye. Agaiyo. Tiyoriba kabeba aꞌwaitaogana waintikana kaꞌwainaba kampa kanarasama akunikiye, iye. Piya, naeba ago abintopa, tigeti uwaena esegiyenanto waintegiri tigeba kamanaꞌnepa upebe pumagiri, naeka kampa tikabinatawe, iye.

⁹ Abiyo. Kaꞌisa kinaꞌmiba igeba: Yuta kinatawe, yepa, pipa tagapa kampaye. Igeba Satani tumpi kumpari yewe, iye. Abiyo. Naeba ige puwaitakini, igeba tige tigisabi ampa irakabima mima, nae agu kaoꞌena puritaontanaba agama abibebe pukibewe, iye.

¹⁰ Pigoya: Paebuma mima kuntaenaba aesaga piyo, uriminto kamanaꞌnepa tigeba wasintawe, iye. Pika aintiba tabe kuntuyenaba aꞌyaꞌma maga maga kinaꞌmiti aborasanaga kabiritakuwe, iye.

¹¹ We, naeba agarosama irosakuwe, iye. Wairitantintanaba upebe puma kaꞌwaina eꞌwasa antotaꞌenaripa tiparisanaga esegima kabiyiyo, iye.

¹² Piya, wasanama mono yuga puma agaikibipa, naeba asitakana aeba Kotinempa nkaota namapisa wage kanta puma, aeba aota namapa kampa kaite wakiye. Kamparakaꞌyane, iye. Piya, naeba Kotinempa nkagegaꞌeba aeti kaemagi, Kotinempa kumaꞌama nkagegaꞌebe aeti kaga kaekuwe, iye. Pi kumaꞌamaba Kotinempatisa mantabintisa tumpa aborakiye. Pipa kasa Yerusaremi kumane, iye. Piya, naeꞌne kasa naginekeba kaga aeti kaekuwe, iye.

¹³ Piya, wasana ageyaga kinaꞌmaba Awamusaꞌama monota aiꞌaru pe kinaꞌmi uwaimemi kamanapa abeno, Isu piya untiye. Areyotisiya kinaꞌmi nkisane

¹⁴ Pigoya, Areyotisiya kumata monota aiꞌaru pe kinaꞌmi kiye yagaramati kamanapa mayama kaeyoma, unamintiye: Naeba taga kamanaꞌama nkagonaga, aꞌyaꞌma Koti nkawaga kamanapa uma arupu puma tagantana po ntagara nawe, iye. Eya, naeba aꞌyaꞌma Koti pumaranti ntanama paitawaitanto ntagaramana, naeba ma kamanapa kaetiba atauwe, iye:

¹⁵ Piya, naeba aꞌyaꞌma monota tiyapisaenaba ago agantuwe, iye. Tigeba yoganepa kampa esegima puma muꞌmuꞌenaba kampa pewe, iye. Tigeba kampa agora tikabinatama esibaena kantaba kampa puma miyewe, iye. We, nae nabemika esiba pusiwo, muꞌmupaya pukibewe, iye.

¹⁶ Piya, tigeba muꞌmutakaꞌyapa kampa puntiri, esibarakaꞌyapa kampa puntiri, isibakapi mima amuntana puma miyeka, nawamupisa muyena puritama ntagigaye, iye.

¹⁷ Piya, tigeba mayama yewe: Taetiba uwaena kutapa waintegi, kanara maenta, kaꞌenagaba kampa kusiba pune, yewe, iye. Pipa kamparakaꞌyane. Tigeba agorika aibo pewe, iye. Piya, tigeba ata maru mpiyegini, intara puritagiri, kusi kina miyegina, tiyori kaentegiri, uwa tika mintawe, iye.

¹⁸ We, pika ma ntapiyenanepa maema aegaraiyo, iye: Piya, naepisa kori yakupi kaeyakana aborama narentare pekiri ika pumagiri, tigetiba aki piyo, iye. Piyama, tigeba naepisa wae kai ika pumagiri, tiꞌamaka tinintana pusanaga airari kaeyiyo, iye. Piyama, naepisa tigeba tiyobisa tusaena apa ika pumagiri tiyobi atama agaiyo, iye.

¹⁹ Piya, naeba agu kaoꞌena puwaitao kinaꞌmipa iyeguma arupu puwaitauwe, iye. Piyama, tigeba esegima napi napi puma tigupa aꞌwae piyo, iye.

²⁰ Agaiyo. Naeba kabera asima mimagi aiwakarusuwe, iye. Piya, kaꞌwaina kamanaꞌnepa abitegina aꞌwainataka, naeba aeti ubaiꞌma aege naninta nakana, aeba naege kaga nakiye, iye.

²¹ Piya, wasanama mono yuga puma agaikibipa, naeba: Kanarane, otakana, waꞌega kinaꞌmi nkiyemu yabaeneta naege ampikiye, iye. Piya, paipa naeba agasuwagana, nabanempaba waꞌega kinaꞌmi nkiyemu yabaewapa namoga aege mintantosa puma, otakana naege ampikiye, iye.

²² Piya, wasana ageyaga kinaꞌmaba Awamusaꞌama monota aiꞌaru pe kinaꞌmi uwaimemi kamanapa abeno, Isu piya untiye.

4

¹ Pi kamana unamoga, mantabinti agauwapa, ka kabiba aꞌwai waintoga agauwagana, marusa awamu, pikuriꞌama yemisa puma unaminti nkawamuꞌama to ka maya uma unamintiye: Kaeba mata iyega, ainti aborakenaenaba kayakekana agao, unamintiye.

² Piya unamoga, agora uma Awamusaꞌamati atokaema mima agauwapa, mantabinti Waꞌegawama nkaemu yabaeba waintiti kaꞌwaina maraꞌmintoga agantuwe.

³ Pi maraꞌmikena yagaraba aeba taberabe yasipa yabape tete koniriyo yabape taꞌneraꞌne pisa puma mintoga agantuwe. Piya, pi nkaemu yabaera ka kobawama yanta emero yabankama eꞌwara eꞌwara pisa puma ainkintoga agantuwe.

⁴ Piya, pi nkaemu yabaera to 24-wa waꞌega kinaꞌmi nkiyemu yabaeba ainkintogini, 24-wa anasa kinaꞌamana kana iyemu yabaera mintugu agantuwe. Igeba waentanamana potamagini, iꞌnotiba korirasa pumaranta waꞌega kinaꞌmi taminoku purintugu agantuwe.

⁵ Piya, Waꞌegawama nkaemu yabaerasaba apayaena puma aga uma antaru yoga abintuwe. Pi nkaemu yabaewama nkaowariba tonaentisa tara umaema kani ikegana eꞌwasa poga agantuwe. Piya, pi kanipa tonaentisa tara umaema Koti Nkawamusaꞌama nakgowe.

⁶ Piya, pi nkaemu yabaewama nkaoriba tabe kayo wani kantaba poga agantuwe. Pipa pemonta kanta puma agabasasa puntiye.

⁷ Piya, maru aoganta kinaꞌmaba arayonima nkaoga pogana, ainti aoganta kinaꞌmaba purumaka nkaoga pogana, kakagaenamaba wasanama nkaoga pogana, tarawa tarawaꞌenamaba paꞌwakena kegeba nkaoga puntiye.

⁸ Pi tarawa tarawaki iyoganta kina ka ka tonaentisa kaꞌumaema igaga waintogana, uwaena iyo intabaipintibe itibe pumaewaintoga, agantuwe. Aibuwagini, igeba arape asekape iniba mayama uyaba mintantawe:

Taberakaꞌya Waꞌega Koti aeba aota, aota, aotaꞌyaga mintiye.

Aeba pai mintantipe, iba mintipe, ainti mirite wakibipe, taga takaꞌyane, piya untawe.

⁹ Piya, iyoganta kinaꞌmiba igeba aemu yabaera miyaba miyemiꞌna nkagegaꞌeba maete ima asagayuma iꞌmu potawe.

¹⁰ Piya pegini, 24-wa anasa kinaꞌmiba aemu yabaera miyemiꞌnakaba irakabitama parokaemagini, aꞌyaꞌma yaga miyaba miyemiꞌna nkagisewe. Eya, igeba waꞌega kinaꞌmi taminokuꞌwaipa pi nkaemu yabaera maebuma amintini, ini mayama yewe:

¹¹ We, Waꞌegare, Kotirekawe. Aꞌyaꞌma kinaꞌmiba kae kagegaꞌeba maete ima asagayigina, esegiyenagampa uwaesakana kanarasakiye, yewe.

Piya, kaeba aꞌyaꞌmaenaba aborantampene. Eya, kabemika aꞌyaꞌmaenaba aborantampepa uwa waintika kagiseno, piya yewe.

5

¹ Piya, Kotiba aemu yabaera maraꞌmimagina, ayatakantisa auꞌisa esapa uꞌurintoga agauwapa, aoribe akaꞌibe awaꞌena waintogana, arakurikena kaꞌme tonaentisa tara umaema waintoga agantuwe.

² Aiboga, naeba agauwapa, esegi enisore yagaramaba taberasa kegaꞌe uma maya untiye: Kebaya aogi yagarama, ma nkisapa aꞌwaima asaemaranta kaꞌmeba akaosakana kanarasakiye, untiye.

³ Piya uma aguyosagaogana, mantabintisabe, mampabisabe, mawama nkantabaipintisabe, aꞌwaima agakena yagaraba kapa kampa mintantiye.

⁴ Eya, ka yagaramaba kanarasama pi nkisapa aꞌwaima agakena yagaraba kampa agaoga, naeba tabera kubeꞌena puntuwe.

⁵ Piya puwagana, anasa kina igetisa kaꞌwaina maya unamima untiye: Kaeba a-kubeꞌenaba po, untiye. Abeno. Yuta kinaꞌmi tupisa araiyoni yagaraba asu againtiꞌna, aeba againti nkesegiyenarasa tonaentisa tara umaema asaemaranta kaꞌme akaosaꞌma pi nkisapa aꞌwaikiyema, unamintiye. Yoniba sipisipi awaro agantiye

⁶ Piya, naeba agauwapa, ka sipisipi awaroba aeguyogana purusu poga agantuwe. Aeba Waꞌegawama nkaemu yabae agora, tarawa tarawaki iyoganta kina mintita, anasa kinaꞌmi nkikapi asima mintoga agantuwe. Piya, aeba tonaentisa tara umaema awa waintogana, aoba pabiyama tonaentisa tara umaema waintoga agantuwe. Pi tonaentisa tara umaema aoba igeba Koti Nkawamusaꞌama nkago waintuguni, uwaitogini aꞌyaꞌma maga magaba wantawe.

⁷ Piya, pi sipisipi awarowamaba asugina, aemu yabaera mintantiꞌna nkayatakantisa kana isapa maentiye.

⁸ Aeba pi nkisapa ago maeyogini, pi tarawa tarawaki aoganta kinaꞌmibe 24-wa anasa kinaꞌmibe irakabima mima, sipisipi awarowama nkaora parokaentawe. Igeba aꞌyaꞌma ka ka kinaꞌmiba ini ukena kita kantaenaba u uꞌmagini, ka ka aogi agunta ukena kori tuꞌnapa urintawe. Pi aogi agunta ukenaenamaba pumaewantipa, pipa Kotiti atokaeya kinaꞌmi ntunamuwaine.

⁹ Piya, igeba sipisipi awaromati kasa ini maya untawe:

Kaeba tagapa pi nkisapa uꞌma, asaemaranta kaꞌme aꞌwaima akaosaganaba kanarasakiye, iye.

Piya, igeba kaeguyuguna, kaeba korakatasa wasanaba ika puwaitama Kotiti iba puwaitantampene, iye.

Eya, kaeba aꞌyaꞌma tupisabe, aꞌyaꞌma to kamana to kamanapisabe, aꞌyaꞌma to iꞌyaga to iꞌyaga kinapisabe, aꞌyaꞌma maga maga kinapisabe, kaꞌisa iba puwaitantampene, iye.

¹⁰ Piya, kaeba kaꞌena puwaitama kabiwaitamagina: Kotirempati mono kiye kina kanta puma miyiyoma, uwaitantampene, iye.

Eya: Igeba marapa kabiyiyo, uwaitantampene, piya ini untawe. Mantabinti awaromati tabe aꞌmuntana aborantiye

¹¹ Pigoya, naeba torebata agamagi, abuwapa, uwaena enisore kinaꞌmi nkiwamu aga abuntuwe. Igepa kampa aisukena kanara, uwaena mintantawe. Piya, igeba Waꞌegawama nkaemu yabae waintita, aoganta kinaꞌmibe anasa kinaꞌmibe mintume igora, ainkintawe.

¹² Ainkimagini igeba tabe kigaꞌe maya untawe:

Ma sipisipi awaroba aeguyuguna purintemiꞌnapa, aeba esegiyenabe, tabe ikape, aogi napiyenabe maema, tabera esegi pekini, auꞌwapa maete ima, agegaꞌeba asagayuma, iꞌmu potaigina kanarasano, untawe.

¹³ Piya yuguna abuwapa, aꞌyaꞌma Koti pumaranti ntanamaba, mantabintisa kinape, mabisa kinape, mawama nkantabaipintisa kinape, kayo wanipintisa kinape, igeba kaga mayama yugu abintone:

Waꞌegawama nkaemu yabaera mintiꞌnape, sipisipi awaropeba, isigetiba aꞌmuntanabe, isiꞌikenaenabe, isige asagayukenaenabe, esegiyenabe, aꞌyaꞌma yagaba waiyaba miyeno, untawe.

¹⁴ Piya yuguni, pi tarawa tarawaki iyoganta kinaꞌmiba: Tagane, yuguni, anasa kinaꞌmiba igeba parokaema isigisoga agantuwe.

6

¹ Pigoya, naeba agauwapa, sipisipi awaroma tonaentisa tara umaema kaꞌmerasa asaemaranta ka akaosaoga agantuwe. Agauwagana, tarawa tarawaki iyoganta kinapisa kapa antaru yisa puma kegaꞌe uma: Kanao, yoga abintuwe.

² Piyama abima agauwapa, we, ka wae nkosi aboraogana akabata irebu wantaga yagara aboraoga agantuwe. Aepa tabe kinaꞌmi taminokupa amuguna, maꞌena puma agasi kina kanta puma wama asugaikena maꞌena puta waoga agantuwe.

³ Piya, sipisipi awarowamaba kaꞌmerasa asaemaranta tara akaosaogana, aintisaena aoganta kinaꞌmaba: Kanao, yoga abintuwe.

⁴ Piyama abuwapa, to ka autiba tete puwanta osi aborantiye. Aboraogana otaogana, akabata miyome ntagaramaba mampabisa paruyena agarubakena esegiyenaba amintiye. Eya, to kinaꞌmi to kina iyeguyigina purikena esegiyena amimagina, pika tabe paroya ntogipa amoga, agantuwe.

⁵ Piya, sipisipi awaromaba kaꞌmerasa asaemaranta kakaga akaosaogana, kakaga aoganta kinaꞌmaba: Kanao, yoga abintuwe. Piyama abima agauwapa, we, ka tunu nkosi aboraogana, akabata sigeri ayapi wantaga yagara aboraoga agantuwe.

⁶ We, tarawa tarawaki iyoganta kinaꞌmi nkikapisa awamu aga yoga abuwagana, maya untiye: Naya taraꞌmutasa araisiba uwaena kankabentobi aꞌyigi atao, untana: Piya, to kakaga kankabebi pari nakenaenaba naya taraꞌmutasa aꞌyigi atama, apabe wainibe kaga ataiyo, untiye.

⁷ Piya, sipisipi awaromaba kaꞌmerasa asaemaranta tarawa tarawaki akaosaogana, tarawa tarawaki aoganta kinaꞌmaba: Kanao, yoga abintuwe.

⁸ Piyama abima agauwapa, we, to ka asasu auꞌyaga osi aboraogana, akabata miyome ntagarama nkageba purikenaenawe. Aibogana kawamaba aegaurite wantiye. Pi taramisipa uwaisitaoginisi, mabisa tupa kakaga uwa atate ka tu aegukena esegiyenaba maentase. Eya, paroya ntogitasabe, igaꞌenarasabe, iki nakiyenarasabe, kabu kinatasabe, iyegukenaena yokege pusugu agantuwe.

⁹ Pigoya, sipisipi awaromaba kaꞌmerasa asaemaranta naya kaꞌmu akaosaoga agauwapa, kaꞌisa purinta kinapa arataꞌama nkamentapinti mintugu agantuwe. Piya, pi kinaꞌmiba Koti kamanapa wasima awaga kamanaꞌwapa uma aborauguni kama kinaꞌmiba iyeguyugu, igu imankaipa agantuwe.

¹⁰ Piya, pi nkimankaimpaba tabera kegaꞌe uma maya untawe: We, aꞌyaꞌmaenama kabintampe Waꞌega, kaeba aota taga takaꞌya mpiyene. Ayaki yaga wagasakana kaeba mabisa kinapa kamanapa uwaitamagina, koratempa nkantotapa imikibene, untawe.

¹¹ Piya yuguna, igepa eꞌero wae kai ka ka amimagina maya uwaimintiye: Tigeba uwaena yaganto migaraiginto. Toganaba ka yugari pe kinape, mono tiyokinape, kama kinaꞌwaipa iyeguyigini tige puntasa puma purigina, aisuta iyekana asu kanarasakanaba, Kotiba ika puwaitakiye, uwaimoga abintuwe.

¹² Pigoya, sipisipi awaromaba kaꞌmerasa asaemaranta tonaentisa kaꞌumaema akaosaoga agauwapa, tabe imima pogana, pankamaba aꞌwae puma paisaena kanta puma tunusu waogana, oꞌamaba kora kanta puma tete puwaeyoga agantuwe.

¹³ Piya pogana, nakena yamankaꞌama kampa agutantegina esiba puma tutubu pisa puma, mantarisa noriwamaba mabinti tutubu puwaeyoga agantuwe.

¹⁴ Piya pogana, kai akarakiyompesa puma, mantaba akarakiyogana, aꞌyaꞌma amupe wanipisa mabe marunkaitasa maebugasogana agantuwe.

¹⁵ Aibogana, mampabisa waꞌega kinape, ige wainta kinape, irebu kinaꞌmi tabewaipe, kotantaga kinape, esegi kinape, aꞌyaꞌma kina kayokaya kinape uwa miye kinape, aꞌyaꞌma iyegaka ma awabintibe amupintisa tabe yaba nkagebintibe ubasi apasi pugu, agantuwe.

¹⁶ Igeba piya pumagini, amuꞌamakabe yabankamakabe kegaꞌe uma maya untawe: Tigeba tigabaꞌma tumpa taerarikaeyaga, waꞌegawama nkaemu yabaera miyemiꞌna nkaorape sipisipi awarowama nkamoꞌenarape kakaratao, untawe.

¹⁷ Piya, pi taramisi kanaba aboraginisi isimoꞌena puma antotaꞌenaba aboraramemekana, taepisa kebaya asima esegiba pukiye, a. Pipa kampaye, piya yugu abintuwe.

7

¹ Pipa aꞌya waoga agauwapa, tarawa tarawaki enisore kinaꞌmiba tarawa tarawaki ma atuta asima mimagini, igeba marasa tarawa tarawaki esibaba akumpaꞌma mintagana, mabipe kayo wanipipe kampa wanema, akumpaꞌma miyugu agantuwe.

² Piya, pi enisore kinaꞌmiba igeba mabe kayo wanipe ata pukena esegiyenaba maentane. Aibugu to agauwapa, to ka enisore yagarama pa nkirosaometisa uma aoganti Koti nkaraꞌenawapa mae uꞌma, pi tarawa tarawaki enisore kinaꞌmika taberasa kegaꞌe uma maya uwaimintiye:

³ Tigeba mabe kayo wanipe yabe a-nkata puwaitaiyo. Paitama taeba Koti nkiba pukena araꞌenawapa ae kayokaya kinaꞌwampi nkiꞌnebi ataokiri, aintiba ataba pukibewe, piya uwaimintiye.

⁴ Piya, naeba abuwapa, pi araꞌena maeyume kinapa aisoga mayama abintuwe: Igeba 144,000 kina, aꞌyaꞌma Isureyo tupisawe.

⁵ Piya, Yuta tupisa 12,000 kinaꞌmiba araꞌena maeyuguni,

Arubeni tupisa 12,000-wa,

Kati tupisa 12,000-wa,

⁶ Asa tupisa 12,000-wa,

Napatarai tupisa 12,000-wa,

Manasa tupisa 12,000-wa,

⁷ Simiyoni tupisa 12,000-wa,

Aribai tupisa 12,000-wa,

Isaka tupisa 12,000-wa,

⁸ Seburoni tupisa 12,000-wa,

Yosepe tupisa 12,000-wa,

Penisameni tupisa 12,000-wa sumagini, pi kinaꞌmi igeba Kotitisa araꞌenaba maeyugu agantuwe. To uwaena kinaꞌmiba Kotiti aki puntawe

⁹ Pipa agategi, to agauwapa, we, uwaena kina, kampa aisema kinaꞌmi aki puma, waꞌegawama nkaemu yabaera, sipisipi awaroma nkaori asima mintugu agantuwe. Piya, pi kinaꞌmiba aꞌyaꞌma maga maga kinapisabe, aꞌyaꞌma tupisabe, aꞌyaꞌma to iꞌyaga to iꞌyaga kinapisabe, aꞌyaꞌma to kamana to kamanapisabe, asima mimagini, igeba eꞌero wae kaimana pu uꞌma, wayo nkaꞌye iyapipa uꞌma asima mimagini,

¹⁰ taberasa kegaꞌe uma maya untawe: Aemu yabaera miyemi Kotirempatisabe, sipisipi awaromatisabe, tauꞌikenaenaba aboraye, untawe.

¹¹ Piya yuguni, aꞌyaꞌma enisore kinaꞌmiba aemu yabaera asima ainkimegini, anasa kinape tarawa tarawaki iyoganta kinape akapi atama ainkiwaitamagini, aemu yabaema nkagora parokaema Koti nkagisuma,

¹² maya untawe: Pipa tagane. Kotirempatiba aꞌmuntanabe, age asagayukenaenabe, taꞌmu potaompentanabe, auꞌikenaenabe, aꞌyaꞌma tonarona esegiyenabe, aeti aꞌyaꞌma yagaba waiyaba miyeno. Tagane, untawe.

¹³ Piya, anasa kinaꞌmipisa kaꞌwaina nabigama maya untiye: Pi eꞌero wae kai purinta kinapa, igeba ae kinane. Aetasa kanantane, untiye.

¹⁴ Piya yugu, naeba: We, naba-o, kaeba abintane, omuntuwe. Omuwagana aeba maya unamintiye: Pi kinaꞌmiba kama kinaꞌwaimpiba tabe iki nakiyena puwaitantanta, pi kanabisa aborawe. Piya, igeba kaiwaipa sipisipi awaroma kuratasa aeyobagana, kaiwaimpaba waentanaba piye, untiye.

¹⁵ Piya, igeba Koti nkaemu yabaera mima, arape asekape aota namankapi kayokayaꞌena potawe, iye.

Piya pegana, aemu yabaera maraꞌmiyemiꞌnaba ama nkiwaitama kabiwaitakiye, iye.

¹⁶ Piya, nanintagabe wanikabe igeba to kakema igaꞌena kampa ibekana, to kakema pankamaba kampa irabatekana, yakutasa iki nakiyenaba kampa aborawaikiye, iye.

¹⁷ Piya, aemu yabaewama nkakapi miyemi sipisipi awaromaba kabiwaitamagina, paitama wama nabaiꞌnami nkeꞌwasa waniti iba pukiye, iye.

Piya, Kotiba iyoꞌnuba aebago puwaegaikiye, piya untiye.

8

¹ Pigoya, sipisipi awaromaba tonaentisa tara umaema asaemaranta kaꞌmerasa akaosaogana, mantabinti aꞌyaꞌmaenaba paka puwama apu-awa kamanapa kampa untawe.

² Aibugu to agauwapa, Koti nkaora asima miye tonaentisa tara umaema enisore kinaꞌmi aboraugu agauwagana, tonaentisa tara umaema pikuri imogini maentawe.

³ Piya maeyuguna, to ka enisore yagarama kanamagina, kaema agunta pasaꞌatakena kori tuꞌna u uꞌma aratara ampa asintiye. Asiyogini, igeba aogi agunta ukenaenaba uwaena amuguna, aeba aꞌyaꞌma Kotiti atokaeyume kinaꞌmi ntunamuwai mpaema kapi aki puwaitamagina, aemu yabaewama nkaora kori aratara aeba kaema aguntaba pasaꞌatantiye.

⁴ Piya, Koti nkaora miyume enisorewama nkayapisaba aogi agunta ukenaenama kunkawamabe, Kotiti atokaeyume kinaꞌmi ntunamuwaimpabe, kaga aogima intiye.

⁵ Piya pogana, pi enisorewamaba pi tuꞌnapa maema yakupa aratarasa maema pumaetama, pi ntakupa mabinti maebugaintiye. Maebugasogana, antaru uma ago yogana, apayaena purite waogana, maba imima poga, agantuwe. Tarawa tarawaki enisore kinaꞌmiba pikuriba pukantawe

⁶ Aibogana, pi tonaentisa tara umaema pikuri mae urintume enisore kinaꞌmiba pukakena yokege puntawe.

⁷ Pigoya, marusa enisorewamaba pikuriwatasa pukaogana, kabayarape yakupe korantaga aꞌyugu puma, mabinti tubuma tumintiye. Piya tumogana, mabe yabe tara aukaꞌisa awatepa uwa waiyogana, ka aukaꞌisa awate yaku tawamagina, aꞌyaꞌma apararetare kabuyenabeba yaku tawaewaoga, agantuwe.

⁸ Pigoya, aintisa enisorewamaba pikuriwatasa pukaogana, yaku abuyaga tabe amu kantaenaba maebugasogana kayo wanipinti tumintiye. Tumogana, tara aukaꞌisa awatepa uwa waiyogana, kayo wanipa ka aukaꞌiba korantana puwantiye.

⁹ Piya pogana, kayo wanipintisa iyogama mintume kinaꞌmiba tara aukaꞌisa uwa mintuguni ka aukaꞌisa puꞌwaewauguna, wanipisa kareba tara aukaꞌisa uwa waintogana, ka aukaꞌisaba ata puwaewaoga, agantuwe.

¹⁰ Pigoya, kakaga enisorewamaba pikuriwapa pukaogana, ka tabe nori mantabintisa tubuma eꞌama nkeꞌwasa pusu purite tumimagina, tara aukaꞌisa uwa atamagina, anompapintibe nakena wanipintibe ka aukaꞌi tumogana ata puwaewantiye.

¹¹ Piya, pi ntoriwama nkageba: Asa tusawe, yewe. Piyama tumogana, wanipa tara aukaꞌisa uwa ataogana, to ka aukaꞌisaba aꞌwae puma asa tusa wani aboraogini, pika uwoma kinaꞌmiba nagaite puꞌwaewaugu, agantuwe.

¹² Pigoya, tarawa tarawaki enisorewamaba pikuriwapa pukaogana, tara aukaꞌisa uwa atate, pape ope noribe ka aukaꞌisawaipa ata puwaewaogana, ka aukaꞌisa kaneꞌwaipa kampa tama tunusu wantiye. Piya, arape asekape ka aukaꞌisawaipa kampa taoga, agantuwe.

¹³ Aiboga, naeba to agauwapa, ka kegebankama mantabinti paꞌurite wama taberasa kegaꞌe yoga abuwagana, maya untiye: A-e, a-e, a-e, mabi minta kinapa, to kakaga enisore kinaꞌmiba pikuriwai pukakena yokege pekana, pukakibepa wawayaꞌmitiba tabe kuntuyena aborarimikiye, yoga abintuwe.

9

¹ Pigoya, nayakaꞌmu enisorewamaba pikuriwapa pukaogana, ka noriwama manta kaitegina tubuma mabi tumoga agauwagana, abe kampa wainta kawama kiba amogana maentiye.

² Piya maemagina, kana ka aigogana, pi kabintisaba kunka kima tabe yakunkama kunka kiyisa puntiye. Piyama kimagina, pape mantabe airarikaeyogana tunusu wantiye.

³ Aibogana, pi kunkabisa uwaena iroꞌamaba mabinti aboraogana, patakabama wasana iba nakena esegiyenaba imintiye.

⁴ Imimagina mayama uwaitantiye: Tigeba mampabisa apararetare kabuyena aꞌnobe yabe a-nkata potaiyo. Kampaye. Koti nkaraꞌena iꞌnebi kampa wainta kinaꞌmana ata puwaitaiyo, iye.

⁵ Piya, tigeba pi kinapa opa nayakaꞌmuta iki nakiyena puwaitamagiri, a-nkiyeguyigini puriyo, piya uwaitaoga abintuwe. We, pi iroꞌama nkimikena iki nakiyenaba patakabama wasana iba nama iki nakiyena pemisa poga agantuwe.

⁶ We, pi kanabipa wasanamiba purikena ki kuꞌenaba pugagategini, kampa agakibewe. Eya, purisanaga ibugakibemipa, purikenaenamaba aegaka wagaikiye.

⁷ Piya, nae agauwapa, kana iroꞌamaba osirasa maꞌena pukena arabasa puma arabaogana, iꞌnotiba taminokuꞌwaipa korirasa pumaranta kanta pogana, iyowamaba wasana iyo kanta puntiye.

⁸ Piya, ibiyaꞌamaba eꞌero puma wayaꞌmi nkibiya kanta pogana, iwawamaba araiyoniwama nkiwa kanta puntiye.

⁹ Piya, ibaꞌwaimpaba kapa maꞌena iꞌana kanta pogana, igaga agawamaba uwaena osiwama kare paiburite maꞌenari waisa kamana uma aga puntiye.

¹⁰ Piya, iyegeꞌamaba patakabama nkaege kanta puma, wasanaba aba nakena yokege puntiye. Eya, opa nayakaꞌmuta wasana iki nakiyena puwaitakena esegiyenawaipa iyegeta waintoga, agantuwe.

¹¹ Aibogana, waꞌegawaimpaba aeba kampa abewa nkwainta karasa enisorewe. Piya, pi enisorewama nkagewapa Iburu kamanapisaba: Abatoniwe, yegini, Kariki kamanapisaba: Aporiyoniwe, yewe. Piya, taete kamanapisaba: Ataena puma kaikena yagarawe, yune.

¹² Pigoya, marusa tabe kuntuyenama kamanapa aꞌya waginisi, to tara kuntuyenaba waintinisi, aintiba aborakibese. Tonaentisa kaꞌumaema enisorewama pikuriwa pukantiye

¹³ Pigoya, tonaentisa kaꞌumaema enisorewamaba pikuriwapa pukaogana, Koti nkaobi kori pumaranta aratara tarawa tarawa atuta wainta awawatasa awamupisa kamana yoga, abintuwe.

¹⁴ Aeba kana pikuri pukaome nkenisore maya omintiye: Tarawa tarawaki enisorewama Yuparatisi anompata mima igaꞌna puntapa, kaeba wama aꞌyobaꞌitagini waiyo, yoga abintuwe.

¹⁵ Piya yogana, aeba wama pi tarawa tarawaki enisore kinapa aꞌyobaꞌitaogini, igeba aꞌyaꞌma kinapa maema aꞌyigimpa tara tupa iyegukena yokege puntawe. Eya, pi ntuga, pi nku, pi ntaga, pi nkawa, pi kanara aꞌyobaꞌitaogini iyegukena yokege puntawe.

¹⁶ Piya, osira wakibe irebu kinapa, 200,000,000 kina aisuwaitaoga abintuwe.

¹⁷ Piya, naeba amonta kiꞌi mayama agantuwe: Osi akabata miyume kinaꞌmiba maꞌena iꞌana atantapa, pipa kaꞌisaba tete yaku kanta pogana, to kaꞌisa kokomu kunka pogana, to kaꞌisaba mopai yakupisa kagu kanta puntawe. Piya puguni, osimi nkiꞌnopa araiyoniwama nkaꞌno kanta puguna, piyama iwamupisaba yakupe, kunkabe, yakupisa kagupe iroꞌma wagana puntiye.

¹⁸ Eya, yakupe, kunkabe, yakupisa yakupe, iwamupisa pi kakaga irosume nkataenamaba wawayapa ka tupa iyeguyuguni purugu, agantuwe.

¹⁹ Piya, pi osiwama nkesegiyenaba iwamutape iyawarape waintiye. Eya, iyawamaba kuyawama nkaꞌno kanta pegina, pi nkiꞌnotasaba wasanaba ata puwaitawe.

²⁰ Pigoya, pi ata puwaitakena kakagaenama to tara tupisa kinapa kampa iyeguyuguni, igeba iyapisa pentanarapa kampa igu aꞌwae puma, igeba keginape ama kotipe kampa ikabitantawe. Kampaye. We, pi ama kotiba igeba korirasabe, siribarasabe, kaparasabe, yabatasabe, yarasabe, iyapisa puguna, pintanamaba kampa aoba agama, kampa kamanapa abima, kampa nasintiye.

²¹ Piya, pi kinaꞌmiba tabe kuntuyenaba agamagini, ataenawaikaba kampa aꞌwae puntawe. Eya, wasana iyegumagini, kiyoꞌenaba pumagini, kumiyena pumagini, kuntana puta nasimagini, igupa kampa aꞌwae pugu agantuwe.

10

¹ Pigoya to agauwapa, to ka esegi enisorewama mantabintisa tumoga agantuwe. Ae autasaenamaba ibina puwaogana, aꞌnotapa koba aewanama waintogana, aowamaba pa kanta puma eꞌwasa puwaogana, agisawamaba waꞌega yaku kanta puntiye.

² Piya, aeba ka uwaena isaꞌanto aꞌwaitama ayapi uꞌmagina, ayatakantisa agisaba kayo waninkama nkabobori aema mima, ayakeꞌmasisa agisaba mara aema mintantiye.

³ Piyama mimagina, aeba araiyoniwama kegaꞌe yisa puma tabe kigaꞌe untiye. Piya yogini, tonaentisa tara umaema antaru untawe.

⁴ Pi tonaentisa tara umaema antaru yugu, naeba pi kamana kaekena puwagana, ka awamu mantabintisa maya kamana yoga abintuwe: Pi tonaentisa tara umaema antaru ye kamanapa kaeba akumpaꞌma mima a-kaeyo, unamintiye.

⁵ Aiyogana, kayo wanitape marape asintoga aganto nkenisore yagarama aeba ayatakantisa inati maeyotamagina,

⁶ miyaba yagarama nkaobi esegi puntiye. Piya, miyaba yagara Kotiba aeba pi mantabe pipinti waintintanabe, mabe pipinti waintintanabe, wanipe pipinti waintintanabe pumarantine. Piya, enisorewama Koti nkaobi mayama esegima untine: Kanapa pabigo aꞌya wakena pika, to ka yagaba kampa aobi pukune. Kampaye, iye.

⁷ Piya, tonaentisa tara umaema enisorewama pikuriwapa pukakana, pi ntagaba Koti kakanti ntapiyenawampa nkauꞌwapa aborakiye, iye. Eya, pi aogi kamanapa pai kayokaya poropete kinaꞌwapa uwaimintintanama nkauꞌwapa aborakiye, piye untiye.

⁸ Pigoya, pi nkawamu mantabintisa unaminti nkawamuꞌamaba to kake maya unamintine: Kaeba wama pi aꞌwainti nkisa, kayo wanitake marake asintemi nkenisore yagarama nkayapi wainti nkisapa umaeyo, unamintiye.

⁹ Piya unamoga, naeba pi nkenisore yagaramati wama uma abigamagi: Kaeba pi uwaena isaꞌantoba namo, yuwagana, aeba maya unamintiye: Kaeba maema nao. Pipa kantabintiba asa kabakanaba, kawamupipa igaenawapa tunkama iga pusu pukiye, untiye.

¹⁰ Aeba piya yoga, naeba enisorewama nkayapisa pi uwaena isaꞌantoba maema nauwagana, nawamutapa tunkama iga pusu poga, nagasuwaganaba nantabintiba asa pantiye.

¹¹ Aibogana, to ka maya unamintiye: Kaeba to kakeba uma, uwoma to iꞌyaga to iꞌyaga kinaꞌmikabe, maga maga kinaꞌmikabe, to kamana to kamana ye kinaꞌmikabe, mabisa waꞌega kinaꞌmikabe, Koti nkawamutasa kamanapa uma aborawaimo, piya unamintiye.

11

¹ Piya umagina, kabi aisukena asa namintana, maya unamintiye: Kaeba asima wama Koti nkaota namapinti ima eꞌeronkape tabenawape ayaki kanarapayawe aisuma, aratarape asu aisumagina, pitaꞌi Koti nkagise kinapa ayakipayawa, kaga aisuma agao, iye.

² We, kaeba aota nama nkawamorisa kumapa a-nkaiso. Uwa atao. Pi kumapa to marisa kinaꞌmintanawe, iye. Piyama igeba Yerusaremi kumatapa 42 uta nasima aegara puma aeratapa kaikibewe, iye.

³ Piya, naeba nawamupisa kamana ukena yagarane taraba esegiyenaba isimekinisi, isigeba abaraena pu uꞌma, 1,260 yagaba kamanaꞌnepa uma aborakibese, piya untiye.

⁴ Pigoya, pi kamana ukena poropete yagara taraba, isigeba tara oribi ya kanta puma mima, isigeba aꞌyaꞌma mara kabintemi Nkwaꞌegawama nkaora waiyeme kani kanta puma miyese.

⁵ Piya, kaꞌisa kinaꞌmiba pi tara yagarara ata puwaisitakena pukibepa, pi taramisi nkisiwamupisa yaku iroꞌma, kama kinaꞌwaisipa irabatikiye. Eya, ata puwaitakibeꞌnagiba antotapa pabiyama purikibewe.

⁶ Piya, ibina mpantaba akunikena esegiyenaba isigeti waiyekana, Koti nkawamupisa kamana uma aborakibeme kanabipa kaba kampa aekiye. Piya, wanipa aꞌwae pikena esegiyenaba isigeti waiyekana kora nkwanintana puwakiye. Piya, mabisa kinapa aꞌyaꞌma ata puwaitakena esegiyenaba isigeti waiyekinisi, isigeba isibemika pabiyama pukibese, piya untiye.

⁷ Piyama, isigeba awaga kamanaꞌwaisipa uwaetaisigini, abe kampa wainta kabintisa kabu kinaꞌmaba iroꞌma ima, maꞌena puwaisitama, asu isigasima isiyeguyekinisi purikibese.

⁸ Isigeba puꞌmaginisi, isiwaisipa pi tabe kumaꞌama kepi uwa waikiye. Eya, paipa Waꞌegawaisimpa yara purinti kumatapa uwa waikiye. We, meto kamana uma pi kumaꞌama nkageba: Sotomuwe, Isipiwe, yompene.

⁹ Aibekini, to iꞌyaga to iꞌyaga kinaꞌmibe, aꞌyaꞌma tupisa kinaꞌmibe, to kamana to kamana ye kinaꞌmibe, maga maga kinaꞌmibe, igeba pi nkisapa kakaga yaga apuwa suma agasabaꞌwaetamagini, kaiwaisitakenaenaba akumpaꞌma mikibewe.

¹⁰ Piya, mabisa kinaꞌmiba pi tara yagarara puꞌwakibemekaba tabe iꞌmu pumagini, waꞌena puma iyoꞌmipa iꞌmuntanaba imikibewe. Pi tara poropete taramisi, mabisa kinaꞌmitapa ata puratantame ntagararaba purese, umagini, piyama iꞌmu pukibewe.

¹¹ Pigoya, agauwapa, kakaga yaga apuwa suma aꞌya waogana, Kotiba uwaisitaoginisi isigeba aemu maema isiyogama asiyusuguni, isigaume kinaꞌmiba tabera pami ntami puma iyekuru pugu, agantuwe.

¹² Piyama isiyogama asiyusuguna, mantabintisa tabera kegaꞌe umagina: Tisigeba mataꞌi iyiso, yeginisi, isigeba mantabinti mimigara iyusuguni kama kinaꞌwaisimpiba isigantawe.

¹³ Piya, pabi ntaganto tabe imima pogana, pi kumatasa age ka megasima aukaꞌi uwa waintogana ka aukaꞌi akasabaꞌma aeguwaewaugu, agantuwe. Piya, pi imimankamaba 7,000-wa kina iyeguyogini puꞌwaewauguni, aꞌyaꞌma to kinaꞌmiba tabera iyekuru pumagini, mantabintisa Koti nkagisuntawe.

¹⁴ Pigoya, tara tabe kuntuyenama kamanapa aꞌya wagina, kakaga kuntuyenaba waintana agaro ntaganto aborakiye. Tonaentisa tara umaema enisorewama pikuriwa pukantiye

¹⁵ Pigoya, tonaentisa tara umaema enisorewama pikuriwapa pukaogana, mantabintisa iwamu aga uma esegi kigaꞌe uma maya untawe: Waꞌegarempabe otanti ntagara Karaisitiwampabe ibaba aꞌyaꞌma marisa kinaꞌmipa kabiwaitakiye. Eya, Waꞌegarempa aꞌyaꞌma yaga kabiwaitayaba mikiye, piya yugu abintuwe.

¹⁶ Piya yuguni, 24-wa anasa kinaꞌmiba, Koti nkaora iyemu yabaera miyumeꞌnagiba, igeba mara parokaema Koti nkagisumagini,

¹⁷ maya untawe:

We, Waꞌega Koti, kaeba taberakaꞌyane. Kaeba ibabe paipe miyaba miyeka, taꞌmu pugataune, iye.

Piya, kaeba tabe esegiyenagapa aborama kabiwaitakenaena ago peka, taeba taꞌmu pugataune, iye.

¹⁸ Piya, abeꞌisa kinaꞌmiba imoꞌena puntaka, kae kamoꞌenagapa ibanto aborawaeye, iye.

Piya, purinta kinaꞌmi kamana ukena yaga aboraye, iye.

Eya, ibaba kayokaya kinakapa pipa poropete kinape kaeti atokaenta kinape, we, aꞌyaꞌma intape tumintape iyekuru pugatama kamentapinti miye kina, igeba aogi ika nkimikena yagawe, iye.

Piya, ibaba mabi ata pe kinapa ata puwaitakena yagageba kagane, piya yugu abintuwe.

¹⁹ Piya yugu, naeba to agauwapa, mantabinti Koti nkaota nama aiꞌataogana, pi aota namankapinti Koti esegi uwaitanti kamana wainta pokisiba wasanami nkiyora aborawaintantiye. Piya pogana, apaya purite waogana, antaru uma tabera aga yogana, mawamaba imima pogana, tabe kabayara poga agantuwe.

12

¹ Pigoya, to agauwapa, mantabintiba tabe awameꞌena mayama aboraoga agantuwe: Piya, ka wae miyogana, pankamaba autasaena kanta puma aerarikaeyogana, oꞌamaba agisa amentapinti waiyegana, aꞌnotiba nori nagisarisa tara tumpaema norirasa waꞌega kinaꞌmi taminokuꞌena puntiye.

² Piya pogana, aeba agaꞌe pogana, yagaraena pukena auki nakiyena aboramogana, pi ntagaraena puma nagarikenaga tabera: A-e, a-e, yoga abintuwe.

³ Agauwapa, mantabintiba to ka awameꞌena mayama aboraoga agantuwe: Piya, ka tabe kuyewama mintomepa, aeba tete puwaogana, aꞌnonkapa tonaentisa tara umaema aꞌnu waiyogana, awawapa nayataraꞌmu waintantiye. Piya pogana, aꞌnotiba tonaentisa tara umaema waꞌega kinaꞌmi taminokuꞌanto waiyogana,

⁴ ayawa kasu aeyogana, mantarisa noriba tara aukaꞌisa uwa atate ka aukaꞌisa aꞌyaꞌma maebugaogini mabinti tumintawe. Aibuguna, kana kuyawamaba yagaraena pukena waeꞌma nkaori ampimagina, yagaranto maꞌatakana aeguma nakenaraka aobi puma mintoga, agantuwe.

⁵ Aibogana, pi wayaꞌmaba masi maꞌatantiye. Piya, pi ntagaramaba aeba ainti esegi kaso ayapipa mae uꞌmagina maga maga kinapa esegima kabiwaitakena yagarawe. Piya, masi maꞌataogana karuꞌena kana yagaraba ababute ima Kotiti aemu yabaewata mesu atantawe.

⁶ Aibuguna, kana waeꞌmaba aegaka wama kaꞌme mpari ampintantiye. Piya, pi mpariba 1,260 yaga miyekiri: Nanintaba amima kabitaiyema, Kotiba yokege poga, agantuwe.

⁷ Agauwapa, mantari tabe maꞌena aborama, Maikoroge enisore kinaꞌwake kana kuyewamapa maꞌenaba potantawe. Piya, pi kuyawamage enisore kinaꞌwake antotapa maꞌena pumagini,

⁸ igeba kampa esegi puguni asu igaintawe. Aibumagini: Ige marupa mantabinti ibaba kampa waikiye, umagini,

⁹ pi tabe kuyeba maebugasuguna tumintiye. Piya, pi tabe kuye aeba paisa kuyewe. Ae ageba Sataniwe, kewe, yewe. Aeba aꞌyaꞌma marisa kina imiyoꞌena puwaitakena yagarawe. Piya, aeba kampa igasogini, igeba mabinti maebugasimagini, aoꞌenisore kinaꞌwake kaga igarubauguni tumugu agantuwe.

¹⁰ Piya puguna, mantabinti tabe awamuꞌama mayama kegaꞌe yugu abintuwe: Ibaba Kotirempa tauꞌikenaenawape esegiyenawape kabiratakenaenawape aboragina, Karaisitiwampaba kabikena esegiyenawapa aboraye, iye. Piya, taoꞌmi kamana uwaitakena yagara, aeba asi nasiba arape asekape Kotirempa nkaobi kamana uwaitami ntagaraba maebugasuguna tumintiye, iye.

¹¹ Piya, taoꞌmiba igeba ago esegi puma sipisipi awarowama koratasabe kamanaꞌama nkago aborakena yugawaitasabe asugasima agarubantawe, iye. Piya, igeba puꞌwakenaenagaba kampa napinta yogawaipa pumagini againtawe, iye.

¹² Pigoya, pika mantabe aꞌyaꞌma mantabinti minta kinape, tigeba tiꞌmu piyo. We, mabinti minta kinape kayo wanipinti minta kinape, ataenabi miyewe. Piya, kewamaba tigeti ago tumintana, ae yaga aro ntagantowema, abimagina, tabera amoꞌenaba purite tumegiri, ataenabi miyewe, piya untiye.

¹³ Pigoya, pi kuyewamaba maebugasuguna mabinti tumimagina, aeba kana masi maꞌatanti nkwae aegaꞌma wama arakurikena puntiye.

¹⁴ Piya pogana, kana waepa tabe kegebankama nkagaga taraba amogana: Paꞌurite wanema, amogana, aeba pi kuyewamaka aegaka wama kaꞌme mpari umintantiye. Pitaꞌiba kakaga kabu apuwa suma miyekiri nanintaba amima kabitaiyema Kotiba yokege puntiye.

¹⁵ Piya, pi waeꞌmaba aegaka waogana, kana kuyewamaba awamupisa tabe wanintama ikasogana, kana wanipa anompa aborama karuꞌena pi wae aegaꞌurite wantiye. Piya, kuyawamaba napiyomepa: Wani paꞌma kana waepa amaerite wama apaikasanema, piya puntiye.

¹⁶ Piya pomepa, mawamaba aoꞌmaemagina, kana kuyewama nkawamupisa ikasome nkano nkwanipa akunikena awamu aka puntogana, pitaꞌi paiꞌwaewantiye.

¹⁷ Piya pogana, kana kuyewamaba pi nkwaeka amo pogana, aeba aguyosagata wama, aꞌyaꞌma to yagarawampige maꞌena puwaitakena wantiye. Eya, aeba Koti unti kamana wasima: Isu nkaoꞌyagaranawe, ye kinaꞌmipa iyegukena wantiye.

¹⁸ Pigoya, kana kuyeba wama kayo wani kepiyati tumpintoga, agantuwe.

13

¹ Pigoya, to agauwapa, kayo wanipisa ka kabu kina irosaoga agantuwe. Aeba nayataraꞌmu awawa, tonaentisa tara umaema aꞌnuna suma agantuwe. Piya, awawatapa nayataraꞌmu waꞌega kinaꞌmi taminokuꞌanto waintogana, aꞌnotapa akaya agiba waintantiye.

² Pi aganto kabu kinaꞌmaba tabe kabu pusi kanta pogana, agisawamaba peyawama nkagisa kanta pogana, awamuꞌamaba araiyoniwama nkawamu kanta puntiye. Pigoya, tabe kuyewamaba pi kabu kinapa esegiyenawape, waꞌegawama mparunkape, tabe kabikena esegiyenabe amintiye.

³ Piya, kabu kinaꞌma ka aꞌnupa aegugasuguna puꞌwasu poga agantuwe. We, piya puguna pi nkanamunkapa ago ata waogini, aꞌyaꞌma marisa kinaꞌmiba agate pami puma, pi kabu kinapa aegarantawe.

⁴ Piya, pi tabe kuyewamaba kabikena esegiyenawapa kabu kinapa amogini, aꞌyaꞌma kinaꞌmiba kuyawama nkagisuntawe. Piya pumagini, igeba kabu kinaꞌma nkageba kaga agisuma maya untawe: Ke kanarasama kabu kinaꞌma pisa pukiye, a. Ke kanarasama maꞌenaba puma agaikiye, a, piya untawe.

⁵ Piyama Kotiba kanarasaogana, pi kabu kinaꞌma nkawamupisa agebigo kamanape akaya kamanape umagina, aeba kabikena esegiyenawapa 42 uta aborantiye.

⁶ Piya, aeba awamupa aka puma Kotikaba akaya kamanapa untiye. Eya, aeba Koti nkagegaꞌebe kumaꞌwakabe kaga akaya suntiye. Piya, aꞌyaꞌma manta kumapinti miyume kinaꞌmikaba akaya suntiye.

⁷ Piya pogana, Kotiba kanarasaogana, aeba asima Kotiti atokaeyume kinape maꞌenaba puwaitama igasugu, agantuwe. Piyama aeba kabikena esegiyenaba maema, aeba aꞌyaꞌma tupisa kinape, aꞌyaꞌma to iꞌyaga to iꞌyaga kinape, aꞌyaꞌma to kamana to kamana ye kinape, aꞌyaꞌma maga maga kinape kabiwaitakiye.

⁸ Kabiwaitakini, aꞌyaꞌma mabi mikibe kinaꞌmiba kabu kinaꞌma nkagisukibewe. Piya, paipa Koti mampa kampa punta, aeba aegunti sipisipi awarowampa nkeꞌwasa maekena isapipa aokinaꞌmi nkigeba ago kaentine. Piya, aꞌyaꞌma to kina, igewai pi nkisapi kampa wainta kinaꞌmiba igeba pi kabu kinaꞌma nkagisukibewe, piya untiye.

⁹ Wasana ageyaga kinaꞌmaba ma kamanapa abibebe peno:

¹⁰ Piya, igaꞌnabi ataigina wakibiꞌnaba igaꞌnabi wano, iye. Eya, maꞌena puma kasotasa aeguyigina purikibiꞌnaba kasotasa pureno, iye. Pigoya, piyaena aborakapa, Kotiti atokaeyompe kinaꞌmitaba, esegima mpima tamatitiꞌenara upebe peno.

¹¹ Piya, to agauwapa, to ka kabu kinaꞌmaba mabintisa irosaꞌma iyoga agantuwe. Aeba tara awawa sipisipi awaroma nkawa kanta puma waintogana, kamanaꞌwapa tabe kuyewama usu puntiye.

¹² Piya, aintisa kabu kinaꞌmaba pi marusa kabu kinaꞌma kabikena esegiyena maewaemagina, ae aobipa yogawapa aogima puntiye. Yogawapa piya pumagina uwaitaogini, aꞌyaꞌma maga maga kinaꞌmiba marusa aegunti nkanamu ata wanti kabu kinaꞌma nkagisugu, agantuwe.

¹³ Piya, aintisa kabu kinaꞌma toma toma nkawameꞌena tabera puntiye. We, aeba otaogana wawayaꞌmi nkiyora mantabintisa yakupa mabi tumintiye.

¹⁴ Piya, Koti kanarasaogana, aeba tonarona awameꞌena marusa kabu kinaꞌma nkaobi pumagina, pi nkawameꞌenarasa mabisa kinapa imiyo pumagina maya uwaitantiye: Kasotasa aeguyogana kampa puꞌwanti kabu kinaꞌma nkamapa tigeba pumagiri agisiyo, untiye.

¹⁵ Piya, Koti kanarasaogana, aeba kabu kinaꞌma nkamapa auma amogana pi nkamankamaba kamana untiye. Piya, auma amimagina otaogana, pi kaꞌisa kina amankama kampa agisumeꞌnagipa amankamaba iyeguyogini purintawe.

¹⁶ Piya, aintisa kabu kinaꞌmaba otaogini, aꞌyaꞌma kina, tuminta kinape inta kinape, kotantaga kinape kusi kinape, kayokaya kinape uwa miyume kinape, aꞌyaꞌma kinaꞌmi nkiya takantiwo, iꞌneranoma, ka araꞌena menkatantawe.

¹⁷ Piya, kaꞌwaina kabu kinaꞌma nkaraꞌena kampa puntakibiꞌnapa, ikantana pukenaenawapa akunkatakiye. Piya, araꞌenawapa pipa kabu kinaꞌma nkagiwo, pi nkagiwama ntampawano.

¹⁸ Pika taeba aogima napiyeno. Piya, napiyenayaga kinaꞌmiba kabu kinaꞌma ntampawapa abima agowapa aogima aiseno. Piya, kana nampapa wasanami ntampane. Pi ntampawapa 666-we.

14

¹ Piya, naeba to agauwapa, we, Yerusaremi kumata Saiyoni amuti sipisipi awarowama asintogini, 144,000 kina kaga asintugu agantuwe. Piya, pi kinaꞌmi nkiꞌnebi sipisipi awaroma nkagebe abawampa nkagebe kaga kaentine.

² Aibogana, mantabintisa tabe kamana tumoga abuwagana, pi kamanaꞌamaba tabe wani nkabawama usu pumagina, tabe antaru yisa puntiye. Piya, pi kamanaꞌamaba iniwama usa puma, wasanami kita aeguyegana yisa kamana untiye.

³ Pi unta kinaꞌmiba kasa ini ka uma, Koti nkaemu yabaera uma, pi tarawa tarawaki iyoganta kinaꞌmi nkiyobipe anasa kinaꞌmi nkiyobipe ini untawe. Piya yuguni, pi 144,000-wa mabisa kina, Koti ika puma ibabemi, pi kinaꞌamana pi kasa iniba abikena puntawe.

⁴ Pi kinaꞌmiba igeba wayapa kampa maenta kina kanta puma, nare ntare puma mimagini, aꞌyaꞌma kumati sipisipi awaro wakena pemitapa, igeba ae aegarawe. Piya, mabisa kinaꞌmi ikapisa pi kinapa Koti ika puwaitagini, igeba paitaratama Kotitibe awarowampatibe ka tuntana puma mintawe.

⁵ Piya, ige iwamupisa kumpari kamana kapa kampa aboraogini, igeba nare ntare kina mintugu agantuwe. Kakaga enisore kinaꞌmiba kamana untawe

⁶ Pigoya agauwapa, to ka enisore yagara paꞌurite manta akapinti waoga agantuwe. Piya, ae yugawapa aogima waiyaba kamana uma aborama mabisa kina uwaimikenaenawe. Aeba uma aborama aꞌyaꞌma maga maga kinaꞌmitibe, aꞌyaꞌma tupisa kinaꞌmitibe, aꞌyaꞌma to kamana to kamana ye kinaꞌmitibe, aꞌyaꞌma to iꞌyaga to iꞌyaga kinaꞌmitibe aborakena yuga puntiye.

⁷ Piya pumagina, aeba tabera kegaꞌe uma maya untiye: Koti antotaꞌena aborakena kanaꞌwapa aboragiri, tigeba Kotikaba tiyekuru puma agisiyo, untiye. Eya, mantabe mabe kayo wanipe nabaiꞌnami wanipe aborantiꞌna nkagisiyo, piya untiye.

⁸ Pigoya, to ka enisorewamaba marusa enisorema nkakaꞌi aborama maya untiye: Pebironi kumapa ata puwaye. Ata puwaye, untiye. Pi tabe kumatasa ago kinaꞌmiba aꞌyaꞌma maga maga kinaꞌmitiba kumiyena iꞌnintana aborauguni, igeba waini wani ntama aibo pesa puma aegaꞌma kumiyena puntawe. We, pi tabe kumapa aya puwaye, untiye.

⁹ Pigoya, to ka enisorewama tara enisoremisi nkisikaꞌi aborama tabera kegaꞌe uma maya untiye: Piya, kaꞌwainaba kabu kinaꞌmabe amankape agisuma, aiꞌnerano, aeyatano araꞌenawapa maekibipa,

¹⁰ waini namisa puma Koti nkamoꞌenaba kaga maema nakiye, untiye. Eya, wasanama wanipa kampa maenta waini abiwa kankabebi atama maema nama aꞌyugu pisa puma, Koti nkamoꞌenama nkesegiyenamana nakiye. Piya, yakunkamabe yakupisa kaguꞌamabe auki nakiyena aboramima, aota enisore kinaꞌmi nkiyobipe sipisipi awaroma nkaobipe aboramekana ataenabi mikiye.

¹¹ Piya, pi kinaꞌmi nkiki nakiyenabisa kunka irosaꞌma, aꞌyaꞌma yaga iyabaꞌmikiye. Piya, pi kinaꞌmiba kabu kinaꞌmabe amankape agisumagini, agegaꞌewa nkaraꞌenawa maeya kinaꞌmiba igeba arape asekape iki nakiyenabisa kampa migarawe.

¹² Pigoya, piyaena aborakapa, Kotiti atokaeyompe kinaꞌmitaba, esegima asiyeno. Eya, Koti unti kamana wasima Isuti tamatitiꞌena upebe pompe kinaꞌmitaba, esegima asiyeno.

¹³ Pigoya, naeba mantabintisa awamu aga maya yoga abintuwe: Kaeba maya kamana kaeyo, untiye: Wa waya Waꞌegawamati atokaema yogawa pugaite pureꞌnagiba, ibasa kanara agobima iꞌmuntanabi mikibewema kaeyo, untiye. Piya yogana, Awamusaꞌama kaga: Tagane, untana: Igeba araga ntugawaipa kaitegini migaraigina, yogawaimpa nkawaga kamanapa aborakini iꞌmuntanabi mikibewe, untiye. Wasana a asikena yagawe

¹⁴ Pigoya, to ka agauwapa, we, wae nkibina waintogana pi ibinata wasanama ntagara kanta yagara maraꞌmintoga agantuwe. Ae aꞌnotapa kori taminoku purintana, ayatiba agana wainta kasu uꞌma mintantiye.

¹⁵ Piyama mintogana, to ka enisore yagarama tabe mono namapisa irosaꞌmagina, tabera kegaꞌe uma ibinata mintome ntagaraga maya omintiye: Kaeba kasokatasa mabisaenaba kasao. Piya, aꞌyaꞌma mabisaenaba ago agutawaeyagina ibaba mabisa naninta aki pukena yagawe, untiye.

¹⁶ Piya yogana, ibinata mintome ntagaramaba kasonkatasa mabinti arisa pugasimagina, mabintisa nanintaba kasama maeyoga, agantuwe.

¹⁷ Piya, to ka enisore yagaramaba mantabintisa tabe mono namapisa iroꞌmagina, aegeba agana wainta kasupa urite irosantiye.

¹⁸ Piya, to ka enisore yagarama aratarasa irosantiye. Pi yakuta kabintome nkenisore yagarama iroꞌmagina, tabera kegaꞌe uma agananta kasu urintome enisore yagaraga maya untiye: Kaeba agananta kasukapa maete tumima arisa pugasimagina, mabisa waini yamankapa agutamipa kasama aki puwaeyo, untiye.

¹⁹ Piya yogana, pi nkenisore yagaramaba kasonkatasa mabinti arisa pugasimagina, mabisa waini aꞌwapa aki pumagina, tabe aerakena kankabebi maebugaintiye. Piya, pi kankabeba Koti nkamoꞌenawane.

²⁰ Piya, kumaꞌama nkakaꞌi igeba pi yamankapa aerapantawe. Piya puguna, korapa pi kankabebisa uwaena aborama ima, osiwama nkawamuta ka kana puma eꞌeronkapa 300 kiromita waoga agantuwe.

15

¹ Pigoya, naeba to agauwapa, to ka tabe awameꞌena mantabinti agamagi, pika uwaena nagi napintuwe. Piya, tonaentisa tara umaema enisore kinaꞌmiba tonaentisa tara umaema ataenarakaꞌya wasana puwaitakenaena urintugu agantuwe. Piyama pi nkataenamaba uma aꞌya wakana, aintiba to kapa kampa aborakiye. Kampaye. Pi nkataenamaba aꞌya wakanaba, Koti nkamoꞌenawapa aꞌya wakiye.

² Piya, naeba tabe kayo wani kantaenaba agantuwe. Pipa karasirasabe yakutasabe pumaranti kanta poga agantuwe. Piya, wasanamiba kabu kinape amankape agegaꞌewama ntampawape asu igasume kinaꞌmiba pi karasi waninkama nkatata asima mimagini Koti kitawapa uꞌma mintantawe.

³ Igeba mimagini, Koti kayokaya yagara Mosese nkinibe, sipisipi awaroma nkinibe mayama sewe:

We, Waꞌega Koti, taberakaꞌyane. Aꞌyaꞌma pempentanagapa tabe pegi agategi uwaena tagi napiyune, iye.

We, miyaba Waꞌega, aꞌyaꞌma kikapa arupu puma tagatakaꞌyane, iye.

⁴ We, Waꞌega, kae kabintoga aotatakaꞌya miyekana, kebaya kaekaba kampa aekuru pumagina, kebaya kampa kagegaꞌeba asagayukiye, a. Pipa kampaye, iye.

Piya, arupu yuga pekana agogapa aborawaeyagini, aꞌyaꞌma maga maga kinaꞌmiba kanama kae kagisukibewe, piya ini yewe.

⁵ Piya, ainti to agauwapa, mantabinti kairasa kimaranta mono namankapa aꞌwaiwaintoga agantuwe. Pi ntamapa Koti miyemi ntamane.

⁶ Piya, pi tonaentisa tara umaema enisore kinaꞌmiba tonaentisa tara umaema ataena puwaitakenaenaba urite, pi tabe mono namapisa irosaꞌma kanantawe. Igeba eꞌwasa wae kai amimagini korirasa ibamukantiba kintawe.

⁷ Aibuguna, tarawa tarawaki iyoganta kinapisa kaꞌwainaba tonaentisa tara umaema korirasa tuꞌna maema tonaentisa tara umaema enisore kinapa imintiye. Piyama pi tuꞌnapipa miyaba Koti nkamoꞌenawapa pumaewantiye.

⁸ Pumaema imogini maeyuguna, Koti nkeꞌwasabisabe esegiyenawapisabe kunka kima pi mpono namapa pumaewaugu agantuwe. Piya, tonaentisa tara umaema enisore kinaꞌmi ataena puwaitakenaenaba kampa aꞌya puntogana, kaꞌwainaba pi mpono namapintiba kampa ubaiꞌma wakena puntiye.

16

¹ Pigoya, naeba abuwagana, ka tabe awamu aga tabe mono namapisa uma tonaentisa tara umaema enisore kinaka maya uwaimintiye: Tigeba wamagiri, tonaentisa tara umaema tuꞌnapisa Koti nkamoꞌenawapa asunu kaegasigina mabinti tumeno, untiye.

² Piya yogana, marusa enisore yagarama wama tuꞌnankapa asunu kaegasogana mabinti tumintiye. Piya pogana, kabu kinaꞌma nkaraꞌena maema amata agisunta kinaꞌmipa tonarona esegi inamu tuꞌma iki nakiyena ibuntiye.

³ Piya, aintisa enisore yagaramaba tuꞌnankapa asunu kaegasogana kayo wanipinti tumintiye. Piya pogana, kayo waninkamaba aꞌwae puma puꞌwanta kinaꞌma kura kanta pogana, kayo wanipinitsa iyoganta kinapa puꞌwaewantiye.

⁴ Piya, kakaga enisore yagarama pabiyama tuꞌnankapa asunu kaegasogana anompabintibe nabaiꞌnami nkwanipintibe tumogana, aꞌwae puma korantana puntiye.

⁵ Piya poga naeba abuwagana, wanita kabintome nkenisore yagaramaba maya untiye:

Kaeba ibaba mite paipa mite aota takaꞌyane. Piya, ma nkantotaꞌenagapa aborakenaga arupu pene, iye.

⁶ Piya, wasanamiba kaeti atokaeyume kinape poropete kinape iyeguyuguni korankaipa airiꞌma purintane, iye.

Piya puguna, kaeba kanarasama igeꞌwai kurankaipa kamparaga potama antotaꞌena imukuni nantane, piya untiye.

⁷ Piya, naeba abuwagana, aratarasa awamuꞌama mayama kegaꞌe untiye:

Eya, Waꞌega Koti kaeba taberakaꞌyane. Antotaꞌena aborakenagaba kaeba tagantana puma arupuyena pene, piya untiye.

⁸ Pigoya, tarawa tarawa enisore yagarama tuꞌnankapa maema pata asunu kaegasogana, otaogana, pankama yaku tasubuma wasanaba yaku irantiye.

⁹ Piya, pi tabe pa ntakunkamaba irasu puma irabatogini, pi kinaꞌmiba Koti nkage, pi ataenaraka kabinti ntagarama nkage akayasotamagini, igupa kampa aꞌwae puma agegaꞌeba kampa asagayuntawe.

¹⁰ Pigoya, nayakaꞌmu enisore yagarama tuꞌnankapa asunu kaegasogana, kabu kinaꞌma nkwaꞌega aemu yabaera tumintiye. Tumogana, pi kabu kinaꞌma kabiyome kinaꞌwampitiba tunusu waewantiye. Piya pogini, igeba agasiya iki nakiyena maema intebu utisa pumagini,

¹¹ iki nakiyenawaikabe inamonkaikabe mantabintisa Kotikaba akayasotamagini, ata yugawaika kampa igupa aꞌwae puntawe.

¹² Pigoya, tonaentisa kaꞌumaema enisore yagarama tuꞌnankapa asunu kaegasogana Yuparatisi anompapi tumintiye. Piya pogana, wanipa tagankaogana pa nkirosamitisa mabisa waꞌegama kanakena kipa iꞌma aogi puntiye.

¹³ Piya, naeba agauwagana, kakaga ke kinaꞌmi taro kanta pumagini, tabe kuyewama nkawamupisabe, kabu kinaꞌma nkawamupisabe, kumpari poropetewama nkawamupisabe irosaugu agantuwe.

¹⁴ Piya, pi kinaꞌmiba igeba ke kina mima toma toma awameꞌena pewe. Piya, igeba aꞌyaꞌma mabisa waꞌega kinaꞌmiti nasima aki puwaitamagini, taberakaꞌya Koti tabe kanabi maꞌena pukenaga aki puwaitakena pewe.

¹⁵ We, abiyo. Nae tigeti tumpa ku kina kanamisa puma kanama ampa aborawaekuwe, iye. Piya, wasanama kampa awaitaminta mima, kaiwapa aogima ami uꞌma piyisa puma mimagina, auka mima wasana iyobi ani pisanaga yokege pukibiꞌnaba aꞌmuntanabi mpiyeno, piya untiye.

¹⁶ Piya, pi ke kinaꞌmiba igeba mabisa waꞌega aki puwaitaugu agantuwe. Pi nkaki puwaitakena aukaꞌigaba Iburu kamanapisaba: Amagetoniwe, yewe.

¹⁷ Pigoya, tonaentisa tara umaema enisore yagarama tuꞌnankapa asunu kaegasogana esibabinti tumogana, tabe mono namapintisa, Waꞌegawama nkaemu yabaerasa awamuꞌamaba tabe kigaꞌe yogana, maya uma tumintiye: Pipa iba aꞌya wano, untiye.

¹⁸ Piya yogana, apaya purite waogana, antaru uta wama tabera aga yogana, agasiya imima puntiye. Pi nkimimapa taberakaꞌyane. Piya, mabi mintanta kinaꞌmiba paipa tabe imimapa piyama pogini kampa agantane.

¹⁹ Aibogana, pi tabe Pebironi kumapa aigasagasubaꞌma kakaga atuntana pogana, aꞌyaꞌma maga maga kumapa akasaba kaintiye. Piya, Kotiba Pabironi kumaka napimagina otaogana, pi kumatasa kinaꞌmiba wainiba kapubisa nawaegasisa puma, Koti nkagasiya amuꞌenaba nawaeyugu agantuwe.

²⁰ Aibogana, aꞌyaꞌma wanipintisa maba aegaka wagasogana, to ka amupa kampa waintogini agantawe.

²¹ Piya pogana, tabe kabayara mantabintisa wasana ita tumoga agantuwe. Piya, kuntaenawaimpaba ka ka kopi ku kanta puma tumogini, wasanamipa pi kabayarankama ata puwaitantiye. Piya, agasiya ata puwaitantikaba igeba Koti nkageba akayasuntawe.

17

¹ Piya puguna, tonaentisa tara umaema tuꞌna urintume enisore kinapisa kaꞌwaina maya tumpa unamintiye: Kaeba kanao. Tabe kumi wae, uwaena wani nkabobori maraꞌmintipa, antotaꞌenaba aborameka, pipa kababute kayakikuwe, untiye.

² Piya, mampabisa waꞌega kinaꞌmiba pi nkwaeꞌmaga kumiyena puta nasewe. Piya pegini, aꞌyaꞌma mabisa kinaꞌmiba waini namisa puma pi kumiyenaba nama aiboꞌnabo pewe, piya unamintiye.

³ Piya, Awamusaꞌamaba nagu aꞌwae pogana, pi nkenisore yagaramaba nababute kaꞌme mpari wantiye. Piya poga agauwapa, ka waeꞌma tete kabu kinaꞌma nkakabata maraꞌmintoga agantuwe. Piya, pi kabu kinaꞌma nkautiba uwaena Koti akaya nkagi pumaewaintogana, aꞌnonkapa tonaentisa tara umaema waintogana, awawapa nayataraꞌmu waintoga agantuwe.

⁴ Piya, pi nkwaeꞌmaba aogi konkonumuya kanta kaibe aogi tete kaibe pu uꞌmagina, toma toma nkawaꞌena korirasabe taꞌneraꞌne yabatasabe aogi pasesurasabe pu uꞌma, ayapipa korirasa pumaranta kapu u uꞌma mintantiye. Piya, pi kapurapa Koti nkaobi kamparagaena pukenaenabe kumiyenawampa nkiꞌnintanabe pumaewantiye.

⁵ Piya agegaꞌewapa, meto kamanapisa aiꞌnera mayama waintoga agantuwe: Pebironi tabe kuma, mabisa kamparagaena pe kinaꞌmi nkino, kumi waeꞌmi nkino nawema, kaemaranta waintoga agantuwe.

⁶ Piya, pi kana waeꞌmaba Kotiti atokaeyume kinaꞌmi kurape Isuka iyeguyume kinaꞌmi kurape namagina aiboꞌnabo poga agantuwe. We, pi nkwaepa agategi, uwaena nagi napintuwe.

⁷ Pigoya, pi enisorewama to maya unamintiye: Nanaga uwaena kagiba napiyene, untiye. Piya, pi nkwaeꞌma nkagobe, pi kabu kinaꞌma tonaentisa tara umaema aꞌnuna nayataraꞌmu awawa suma wainta, pi nkwaepa ababute wami kinaꞌma nkagobe, kakantipa, kaga aboragamukuwe, untiye.

⁸ Piya, kaeba ago agampe kabu kinaꞌmaba paipa mintantikana ibaba kampa mintiye. Piya pikana, aintiba aeba pi abe kampa wainta kabisa asu irosakana, aꞌabibi kaitakana agora tumikiye. Pigoya, paipa Koti mampa kampa punta, aeba eꞌwasa maekena isapi aokinaꞌmi nkigeba ago kaentine. Piya, aꞌyaꞌma to kina igewai pi nkisapi kampa wainti kinaꞌmiba igeba kabu kina agateginiba, uwaena igi napikibewe. Eya, pi kabu kinaꞌmaba paipa mintantikana, ibaba kampa mintikana, aintiba to ka irosakini, uwaena igi napikibewe, untiye.

⁹ Pigoya, aogi napiyenayaga kinaꞌmaba ma kamanaꞌama nkagoba aogima napiyeno: Piya, tonaentisa tara umaema aꞌnunkamaba pipa tonaentisa tara umaema amu kanta pegina, pi nkwaepa pi nkamuta maraꞌmintiye.

¹⁰ Piya, pi tonaentisa tara umaema aꞌnunkamaba pipa tonaentisa tara umaema mabisa waꞌega kinane. Eya, nayakaꞌmu waꞌega aꞌya wagana, ibantoba ka mintemikana, to kaꞌwainaba kampa waꞌegaenaba puntiye. Piya, aeba aintiba uwaena yaganto aborama mikiye.

¹¹ Pigoya, kabu kinaꞌmaba paipa mintantikana ibaba kampa mintiꞌna, aeba waꞌega kanta puma tonaentisa tara umaema waꞌega kinaꞌmi tupisa aboramagina, piyama aeba tonaentisa kakaga umaema mikekana, aintiba aꞌabibi kaitawakana agora tumikiye.

¹² Piya, nayataraꞌmu agampe nkawawapa pipa nayataraꞌmu waꞌegawe. Igeba kampa waꞌegaba maentakini, togana igebe kabu kinaꞌmabe esegiyenayaga maemagini, igeba aro ntaganto wani awara waꞌegaena puma mikibewe.

¹³ Piya, pi nkwaꞌegamiba igeba ka igi napimagini esegiyenawaipe waꞌegaenawaipe kabu kinaꞌma amentapinti atakibewe.

¹⁴ Piya, igeba sipisipi awaropa maꞌena potaigina, awaroma asu igaikiye. Eya, aeba tabe kinaꞌmi tabewaine. Aeba waꞌegami nkwaꞌegawaine. Piya, aꞌyaꞌma aeti atokaeya kina, kegaꞌe uma uwaitaogini imatiti pota kinaꞌmiba, igebe sipisipi awaromageba asu igaikibewe, piya unamintiye.

¹⁵ Pigoya, aeba to ka maya unamintine: Kaeba wani ago agane. Pi nkwani nkabobori kumi waepa maraꞌmintemi wani, pipa uwaena wabe wayape to iꞌyaga to iꞌyaga kina mima, maga maga kina mima, to kamana to kamana ye kina miyegana aganema, unamintiye.

¹⁶ Piya, nayataraꞌmu agampe nkawa, pipe kabu kinape kaga pi kumi wae kama potakibewe. Kama potamagini aꞌyaꞌma autasaenawapa akugu pugasigina auka wakini awaseba nagasima yakupi kababai kaikibewe.

¹⁷ Eya, Kotiba napiyena imintikini igeba ae abugaintanaba aborakibewe. Piya, igeba ka igi napimagini waꞌegaenawaipa kabu kinaꞌma amentapinti atamagini, piya puta wagina Koti aꞌyaꞌma umarantemi kamanaꞌama nkagoba uma nagarikiye, untiye.

¹⁸ Piya, pi nkagampe nkwae aeba aꞌyaꞌma mabisa waꞌega kinaꞌmi nkaiꞌne kuma kanta puma mintiye, piya unamintiye.

18

¹ Piya unamoga naeba agauwapa, to ka enisore, tabe kabikena esegiyena wantaga enisorewama mantabintisa tumoga agantuwe. Piya, aeba tabe eꞌwasaena wantaga tumogana maba arawantiye.

² Aeba taberasa kegaꞌe uma maya untiye:

Pebironi kumapa age ata puwaye. Pi tabe kumapa ago ata puwaye, iye.

Piya, ibaba pipa ke kina miye kumane, iye.

Pipinti iꞌninkamana ke kinape kama potama iꞌninkamana kabarape igeba ampiyewe, iye.

³ Piya, aꞌyaꞌma maga maga kinaꞌmiba igeba waini wani ntama aibo pesa puma iꞌninkama kumiyenawapa aegaꞌma puntawe, iye.

Piya, mabisa waꞌega kinaꞌmiba aege kupiyona puntawe, iye.

Piya, mabisa pisinisi kinaꞌmiba agebigoꞌenawapa aegaꞌma pi ntugarasa uwaena kuta maentawe, piya untiye.

⁴ Pigoya, naeba to abuwagana, to ka awamu aga mantabintisa maya untiye:

We, naokinaꞌnempitaba, pi kumapa atate wagasiyo, iye.

Piya, aeti atokaema aguntaenawa pumaꞌma ataena potakenaenawapa kaga maesanaga atate wagasiyo, iye.

⁵ Piya, aguntaenawampa aigatopa aigatopa purite mantabinti iyegina, Kotiba ataenawampa nkikakaba ago napiye, iye.

⁶ Piya, pi kumi waeꞌma nkaborantintanagaba tigeba napima aꞌwae puma kaꞌmasa puma ata potaiyo, iye.

Ae puntikaba antotaꞌena tara yaga atokaema amiyo, iye.

Aeba esegi wani kapubi yokege puma imintikaba, tigeba pi kapubi antotaꞌena tara yaga atokaema yokege puma amigina nano, iye.

⁷ Piya, aeꞌwa nkagegaꞌe asagayuma agebigoꞌena puta wantemikaba tigeba pi kanara auki nakiyena amigina kubeꞌena peno, iye.

We, antabaipinti mayama napiye: Naeba waꞌega wae mima aogima miyuwe, iye.

Naeba abeya waepa kampaye. Pikaba naeba ata kubeꞌenaba kampa pukuwema, napiye, iye.

⁸ Pigoya, pika aꞌyaꞌma ata potakenaenawapa ka yaga kaga aetiba aborakiye, iye.

Piya, auki nakiyenabe kubeꞌenabe iꞌmikenaenabe aetiba aborakana, pi Pebironiba yaku kaegaikiye, iye.

Eya, Waꞌega Kotiba esegiyenayaga mima ikankapa aꞌyigi atakiye, piya untiye.

⁹ Piya, mabisa waꞌega kina, aege kumiyena puma atokaema igebigoꞌena punta kinaꞌmiba, yaku tama kunka iyekiniba, agategini aeka tabe intaraꞌena puma kubeꞌena pukibewe.

¹⁰ Piya, igeba auki nakiyenagaba tabera iyekuru pumagini pagasara mima agama maya ukibewe: We, we, Pebironi, kaeba tabe kuma, esegi kumakawe. Ka yaga ka awara antotaꞌenagapa maema aꞌya wane, ukibewe.

¹¹ Piya, mabisa pisinisi kinaꞌmiba pi kumaka napimagini: Kebaya kotatepa ika pukiyema, napimagini kunta puma, pi kumaka intaraꞌena puma kubeꞌena pukibewe.

¹² Pi kutapa aeba koribe, siribabe, taꞌneraꞌne yabape, aogi pasesube, aogi wae kaibe, konkonumuya kaibe, sirikabe, tete kaebe, tonarona aogi agunta yabe, tonarona iwa pumarantape, tonarona yarasa pumaranta tabe ikantagaꞌenabe, kapabe, aenibe, agoginagogi yabape,

¹³ nanintabi atakena sinamoni agunta kagupe, tonarona supupe, aogi agunta ukenaenabe, tusa masawaepe, aogi agunta masawaepe, waini wanipe, apabe, aogi parawape witibe, purumakabe sipisipibe, osibe osiwama paibukena karebe, wasanabe, eya wasanami nkigupe, pipa pisinisi kinaꞌmi kutankai waiyomeka, pika intara pugu agantuwe.

¹⁴ Piya, igeba pi kumaka maya ukibewe: Pi kaguꞌama nkabugai nkauꞌwapa kagaite wagasaye. Eya, aꞌyaꞌma iga nanintagape aꞌyaꞌma kauka kautasaenabe agora kagaite wagasikana, kaeti to kakema aborakiye, ukibewe.

¹⁵ Piya, pi kuta mpaeya pisinisi kina, pi kumatasa uwaena yaba maeya kinaꞌmiba igeba auki nakiyenagaba tabe iyekuru pumagini, pagasara mima agama intaraꞌena puma kubeꞌena puma, maya kamana ukibewe:

¹⁶ We, we, pi tabe kumakaba tantarane. Paipa pi kumatasa kinaꞌmiba aogi wae kaibe, konkonumuya kaibe, tete kaibe pu uꞌma, autiba koribe taꞌneraꞌne yabape aogi pasesube awaꞌenaba puntawe.

¹⁷ We, ka awantora aꞌyaꞌma kutankaipa nagari waya, tantarane, ukibewe. Piyama agauwagana, aꞌyaꞌma wanipisa karewama nkababe, pubasanakena kinape, posikurube, aꞌyaꞌma kayo wanipinti pisinisi pe kinaꞌmiba igeba pagasara mima agamagini,

¹⁸ yaku tama kunka iyome agategini, aeka kegaꞌe uma maya untawe: We, to ka kumapa aeba pi tabe kumankamage kaꞌmasa puma waintemipa aempaye, a. Pipa kampaye, untawe.

¹⁹ Piya, igeba iꞌni nkakaeꞌma iꞌnotiba paiꞌma, intaraꞌena puma kubeꞌena puma, mayama kegaꞌe untawe: We, we, pi tabe kumakaba tantarane. Paipa aꞌyaꞌma wanipisa karewama nkabawampa aepisa tabe mone aki puntawe. We, ka awantora aꞌyaꞌma kutankapa nagari waya, tantarane, untawe.

²⁰ We, mantabintisa kinape, Kotiti atokaeya kinaꞌmitabe, aposorobe, poropetebe, tigeba aekaba tiꞌmu piye. Piya, ata puritaitaka Kotiba kana kumapa antotaꞌena amiye, piya untawe.

²¹ Aiyuguna, ka esegi enisore yagarama tabe yaba, witi airapakena tabe yaba kanta yabapa asagayuma kayo wanipinti maebugasogana tumogana, maya untiye:

Piyama maebugasosa puma pi tabe Pebironi kumapa aeguma maebugasakana tumiwakini, wasanamiba to kakema kampa agakibewe, iye.

²² Piya pekana, kita agabe, tonarona inibe, kabuwae agabe, pikuri agabe, to kakema kae kumapintiba kampa abikibewe, iye.

Piya, wasanami iyapisa pukenaena aogima aganta kinapa to kakema kae kumapintiba kampa igakibewe, iye.

Yabankama witi airapantana yi kamanapa to kakema kae kumapintiba kampa yekini abikibewe, iye.

²³ Kanepa to kakema kae kumapintiba kampa arakiye, iye.

Iba waeꞌma kamanape awae kamanape to kakema kae kumapintiba kampa abikibewe, iye.

Piya, paipa kae kumatasa kinaꞌmiba pisinisi pumagini, mabisa tabe kina mimagini, tonarona kiyoꞌenagatasa maga maga kinapa agoꞌena puwaigaintane, iye.

²⁴ Piya, kae kumapintiba wasanamiba poropete kinape Kotiti atokaeyume kinape iyeguyogini puruguna, eya, aꞌyaꞌma iyeguyume mabisa kinaꞌmi kurapa Kotiba kaga agama, pika antotaꞌena kamiye, Pebironikaba piya untiye.

19

¹ Pipa aꞌya waoga, naeba abuwagana mantabinti uwaena kinaꞌmi nkiwamu aga kanta puma maya uma tabe kegaꞌe yoga abintuwe:

We, Koti nkage asagayuyeno. Piya, tauꞌikenaenabe eꞌwasaenabe esegiyenabe, piꞌna nkagoba Kotirene, iye.

² Piya, Kotiba kamanapa aꞌyigi nkitamagina aeba tagantana puma arupu piye, iye.

Piya, tabe kumi waeꞌma kumiyenawapa aꞌyaꞌma mabisa kina iyakima ata puwaitagina, Kotiba ata ikankapa amiye, iye.

Aeba Koti kayokaya kina iyeguyogini purintaka Kotiba antotaꞌena amegina kanarasaye, piya untiye.

³ Piyama igeba to kakema kegaꞌe uma maya untawe: Koti nkage asagayuyeno. Piya, pi tabe kuma yaku tami kunkamaba aꞌyaꞌma yaga iyaba miye, untawe.

⁴ Piya yuguni, 24-wa anasa kinape, tarawa tarawaki iyoganta kinape, igeba parokaema aemu yabaera minti Koti nkagisuma: Tagane, Koti nkage asagayuyeno, untawe.

⁵ Piya yuguna, Waꞌega aemu yabaerasa to ka awamupa kegaꞌe uma maya untiye: Koti kayokaya kina, tuminta kinape inta kinape, aꞌyaꞌma Kotika tiyekuru pe kinaꞌmitaba, tigeba Kotirempa nkage asagayuyiyo, untiye. Sipisipi awaroma waya maekena aꞌmuntanawe

⁶ Piya, naeba to abuwagana, uwaena kinaꞌmi nkiwamu aga kanta puma kegaꞌe yoga abintuwe. Piyama uwaena wani nkabawama aga yisa puma, tabera antaru yisa puma maya untiye:

We, Koti nkage asagayuyeno. Piya, Waꞌega Kotirepa aeba taberakaꞌya mima, waꞌega airatama kabirataye, iye.

⁷ Piya, taeba tabera taꞌmuntana puma agegaꞌeba asagayuyeno, iye.

Piya, sipisipi awarowama waya maekena kana arosaika, ibaꞌwaeꞌwapa ago yokege puma mintune, iye.

⁸ Piya, Koti otagina aogi wae kai, eꞌwasa puma nare ntare puwai kai pu uꞌma yokege pune, piya yugu abintuwe. We, aogi wae kaiba pipa Kotiti atokaeya kinaꞌmi arupu pentanawe.

⁹ Pigoya, enisorewamaba to ka maya unamimagina: Kaeba ma kamanapa kaeyo, untiye: Piya, Koti kegaꞌe uma, sipisipi awaroma waya maema tabe nakena aborakibita iba pikibiꞌnagiba, igeba iꞌmuntanabi mpikibewema, kaeyoma unamintiye. Piya: pi kamanapa taga Koti kamanane, unamintiye.

¹⁰ Piya unamoga, naeba aeꞌwa nkagisabi parokaema agisukena puwagana, aeba maya unamintiye: Kampaye. Kaeba piyaba a-po. Piya, naebe, kaebe, aꞌyaꞌma to Isu nkawaga kamana abibebe pe kaokinaꞌmibe, taeba ka yuga pompene. Kaeba Kotitimana agiso, untiye. Piya, aꞌyaꞌma poropete kinaꞌmi usu kamanaꞌama nkagoba, pipa Isukawe. Wae nkosira mintanti ntagarama kamanane

¹¹ Pigoya, naeba to agauwapa, mantaba aꞌwaiyogana, we, wae nkosi mintoga agantuwe. Piya, akabata mintomeꞌna nkagegaꞌewapa: Aogima kabima mima Tagantanamana pemi Ntagarawe, untawe. Piya, aeba arupuyenamana nkaegaꞌma kamanapa aogima aꞌyigi nkatamagina, maꞌena aogima piye.

¹² Piya, aowamaba yaku nkikisu pogana, aꞌnotiba uwaena waꞌega kinaꞌmi taminokuꞌantonto waintogana, autapa abintowa abinti nkagegaꞌewapa kaemarantiye.

¹³ Piya, eꞌero kaiwapa koratasa paiꞌataogana aeꞌwa nkagewapa: Koti Kamana Agowe, untawe.

¹⁴ Aibogini, aꞌyaꞌma mantabintisa irebu kinaꞌmiba igeba aogi wae kai, nare ntare pe kai u uꞌma, wae nkosi mima aegaꞌma wantawe.

¹⁵ Piya, awamupisa agananta paroya ntogi aboraogana, kana yogitasa maga maga kinaꞌmipa iyegukena puntiye. Piya, aeba aeni asarasa kabiwaitakiye. Aeba waini airapakena kankabebi airapakiye. Piya, pi kankabeba taberakaꞌya Koti tabe amoꞌenawane.

¹⁶ Piya, kaiwatape arutape agewapa: Waꞌega Kinaꞌmi Waꞌegawe, Tabe Kinaꞌmi Tabewaine, piyama kaemaꞌma mintiye.

¹⁷ Piya naeba to agauwapa, ka enisore yagarama papinti asintoga agantuwe. Aeba aꞌyaꞌma manta akata paꞌurite waume kabaraka tabera kegaꞌe uma maya untiye: Tigeba menkaki puma Koti tabe nakenaba ampa naiyo, untiye.

¹⁸ Piya, tigeba mabisa waꞌegawama nkipe, paitanta irebu kinaꞌmi nkipe, esegi pe kinaꞌmi nkipe, osiwama nkipe akabata wa kinaꞌmi nkipe ampa naiyo. Eya, kayokaya kinaꞌmipe uwa kinaꞌmipe, tuminta kinape inta kinape, tigeba aꞌyaꞌma kinaꞌmi nkipa nakibewe, untiye.

¹⁹ Piya, naeba to agauwagana, pi kabu kinape maga maga waꞌega kinape aꞌyaꞌma irebu kinaꞌwaipe aki pumagini, igeba wae nkosira mintanti ntagaramage ae irebu kinaꞌwake maꞌena puwaitakena aki pugu agantuwe.

²⁰ Piya pumepa, aeba kabu kinape kumpari poropetewape asu isigasima igaꞌna puwaisitantiye. Piya, pi poropetewamaba kabu kinaꞌma nkaobi toma toma awameꞌena pumagina, pintanarasa agoꞌena puma kabu kinaꞌma nkaraꞌena maenta amata agisume kinapa kumpariꞌena puwaigaintine. Piya, pi kabu kinape kumpari poropetewape uwa isiyo agantusuguna, isiyesagayuma maebugasoginisi esegi kaguꞌama yaku tami kotupintiba tumintase.

²¹ Piya, pi wae nkosira mintome ntagarama aeba awamupisa aboraome paroya ntogirasa aꞌyaꞌma to kama kinapa iyeguyogini purintawe. Aibogini, aꞌyaꞌma kabarankamaba ampagini pi kinaꞌmi nkipa nauguna igaꞌe paoga agantuwe.

20

¹ Piya naeba to agauwapa, ka enisore yagarama mantabintisa tumoga agantuwe. Piya, ayapipa ka ki, abe kampa wainta karasa ki u uꞌma tabe igaꞌna kaga urite tumintiye.

² Aeba tumimagina pi tabe kuyeba arakuꞌma igaꞌna potaugu agantuwe. Piya, pi paisa kuyewama aeba Satani, kewe. Piya, pi enisorewama igaꞌna potamagina: 1,000-wa kabu igaꞌnabi mpiyoma, otamagina,

³ abe kampa wainta kabinti apasanakasogana tumintiye. Piya tumogana aeba awaba akumpa esegi potantiye. Piya, Sataniba 1,000-wa kabu kampa maga maga kina kumpari uwaitasanaga akunkataoga agantuwe. Piya, pi kana aꞌya wakanaba ainti aiꞌataigina aeba ima aro ntaganto to aborama nasikiye.

⁴ Piya, naeba agauwapa, kaꞌisa waꞌega aemu yabae waiyogana, pitaꞌi aꞌyigimpa agama kamana uwaitakena yogara Kotiba iba puwaitanti kinaꞌmiba maraꞌmintugu agantuwe. Piyama agauwapa, Isuti imatiti puma auꞌwa aborama Koti kamanapa upebe puntaka, kama kinaꞌwaimpiba inaꞌmu arisa kasuguni purinta kinaꞌmi nkimankamaba agantuwe. Piya agauwapa, kabu kinatano, amankatano kampa agisunta kinaꞌmi nkimape, araꞌenawapa iꞌnerano, iyatano kampa maenta kinaꞌmi nkimape agantuwe. Piyama agauwagini, pi kinaꞌmiba to ka asima iyogamagini, igeba Karaisitibe kaga waꞌega puma 1,000-wa kabu miyugu agantuwe.

⁵ Piya, igeba maruꞌena irubintisa asintawe. Aibuguna, aꞌyaꞌma to kaꞌisa purinta kinaꞌmiba pabi ntagaba kampa asima iyogantawe. Kampaye. Igeba pi 1,000-wa kabu aꞌya waogana asima mintugu agantuwe.

⁶ Piya, marusa yaga asima mikibe ntagaba iyogakibeꞌnagiba igeba aota mima iꞌmuntanabi mpikibewe. Piya, ainkagogo purikena yagagaba kampa iyekuru pekana ataba kampa puwaitakiye. Kampaye. Piya, pi kinaꞌmiba igeba Kotige Karaisitige isige mono yuga pumagini, Karaisitibe kaga mima 1,000-wa kabu waꞌega puma mikibewe. Sataniba atarakaꞌya puntiye

⁷ Pigoya, aintiba pi 1,000-wa kabu aꞌya wakanaba, Satanipa igaꞌnabisa akariyoba ataigina kanakiye.

⁸ Kanakiniba, maga maga kina, tarawa tarawaki ma atutasa kina, pipa Kogibe Mekogibe, igepa Satani kaga kumpari uwaigasima, tabe maꞌenara iba puma aki puwaitakiye. We, pi kinapa kayo wani kepiya kanta puma kampa aisema kanara, aki pikibewe.

⁹ Piya, naeba aguwapa, igeba aꞌyaꞌma mariba masi purite kanama ampaki puma Kotiti atokaeyume kinaꞌmi kumape Koti nkabugai kumape kaga ainkinki pugu agantuwe. Piya puguna, mantabintisa yaku tumima pi nkirebu kinapa irabatintiye.

¹⁰ Aibogana, Kotiba piyama kumpari uwaigainti keba aesagayuma maebugasogana, aeba kotupi, yakupe kagu yakupe esegima tami kotupinti tumoga agantuwe. Piya, pi kabu kinake kumpari poropetege maebugasoginisi mintusume kotupinti tumogini kaga mimagini, arape asekape aꞌyaꞌma yaga iki nakiyenabi miyaba miyugu agantuwe. Tabe pako pikenaenawe

¹¹ Pigoya, naeba agauwapa, ka tabe wae nkaemu yabae waintogana, kaꞌwaina maraꞌmintoga agantuwe. We, ae aorisaba mabe mantabe aegaka wawaegasusuguna, marunkaisipa to kapa kampa waintantiye.

¹² Piya to agauwapa, purinta ige wainta kinape tuminta kinape, aꞌyaꞌma kinaꞌmiba aemu yabaewama nkaori asima mintugu, agauwagana esaka esaka apira puma aisuntiye. Piyamagina to ka isakeba apira puntipa, pipa miyaba kinaꞌmi nkisane. Piya, maraꞌmintiꞌnaba aeba esaka esaka aisuma kaemarantaꞌenaba agamagina, purinta kinapa aꞌyigi nkitantiye. Eya, aꞌyaꞌmaena pume kanara aꞌyigi nkitantiye.

¹³ Piya, kayo waninkamaba aeti mintome purinta kina aborawaeyogana, pabiyamagina purintapisa kabintisa aꞌyaꞌma kinaꞌmiba aborawaeyuguna, aꞌyaꞌma kinapa pume kanara ka ka aꞌyigi nkitantiye.

¹⁴ Piya pumagina, purikenaenabe kabinti mikenaenabe kaga maebugasogana yaku tami kotupinti agora tumintiye. Pi yaku tami kotupa pipa ainkagogo purikenaenawe.

¹⁵ Piya, aeba kaꞌwaina nkage miyaba isapi kampa agantanaba, aesagayuma pi ntaku tami kotupinti kaga maebugasoga agantuwe.

21

¹ Pigoya, naeba agauwapa, kasa mantage kasa mage aboraoga agantuwe. Piya, marusa mantage marusa mageba nagari waogana, kayo wanipa kaga to kakema kampa waintantiye.

² Piya, aota kuma, kasa Yerusaremi kumapa Kotitisa mantabintisa tumoga agantuwe. Piya, pi kumaꞌamaba wayaꞌma ibaꞌena puma wara atakena awaꞌena pusu puma tumogana,

³ tabe awamu aga aemu yabaerasa mayama tumoga abintuwe: Abo. Ibaba Koti miyemi kumapa wasana igeti waintiye. Piya, aeba igege miyekini, igeba ae aokina mikibewe. Eya, Koti aewapa igeti mikiye.

⁴ Igeti mimagina, aeba iyoꞌnuba aebago puwaegasakini, to kakema wasanamiba kampa purikibewe. To kakema kuntaenabe kubeꞌenabe iki nakiyenabe kampa aborakiye. Kampaye. Pi paisaenaba ago nagari waye, piya yoga abintuwe.

⁵ Pigoya, aemu yabaera maraꞌmintomeꞌnaba maya untiye: Agao. Naeba aꞌyaꞌmaenaba kasaꞌena mana pumarauwe, untiye. Piya umagina aeba to kakema maya uma unamintiye: Kaeba ma yo kamanapa kaeyo. Piya, pi kamanapa kampa antageꞌena puma taga takaꞌyane, untiye.

⁶ Aeba to kakema maya unamintiye: Piya, aꞌyaꞌmaenaba aborawaentuwe. Naeba paitanta yagara mite aintisa yagaraba mite puma, aꞌyaꞌmaenama nkago nawe. Piya, wanika abemikaba naeba kanara eꞌwasa nabaiꞌnami wanipa uwaba amekana nakiye.

⁷ Piya, yoga puma agaikibiꞌnapa mayama aboramukuwe: Naeba Kotiwa mpiyekana, aeba yagarane mpikiye, untiye.

⁸ We, iyekuru puma iyegaka wa kinape, kampa imatiti pe kinape, tonarona iꞌnintana pe kinape, iyeguye kinape, kumiyena pe kinape, kiyoꞌena pe kinape, ama koti nkagise kinape, aꞌyaꞌma kumpari ye kinape, igeꞌwai nkantotaꞌenaba esegima tami kotupi iyesagayuma maebugaikiye. Piya, pi yakupe kagu yakupe tami kotupa, pipa ainkagogo purikenaenawe. Kasa Yerusaremi

⁹ Pigoya, ka enisore yagarama naeti ampagina, aeba tonaentisa tara umaema wasana ata puwaitakenaena pumaewainta tuꞌna uꞌurintume nkenisore kinaꞌmipisa naeti ampa maya unamintiye: Kaeba kanao. Naeba ibaꞌwae, sipisipi awaroma maekena pemi nkwaepa kayakikuwe, unamintiye.

¹⁰ Piya umagina, pi enisorewamaba Awamusaꞌamati atokaenatama nababute tabe eꞌero amuti imagina, aeba aota kumapa, Yerusaremi kumapa, nayakintiye. Pi kumaꞌamaba Kotitisa mantabintisa tumogana nayakintiye.

¹¹ Piya, pi kumapintiba Koti nkeꞌwasaenama arantiye. Eya, eꞌwasaenawapa tabe ikankantaga yaba kanta puma taberabe yasipa yaba kanta taꞌneraꞌne puma, arawama karasi kanta puntiye.

¹² Pi kumatapa tabe kagisa inata asugasima ainkimaranta kagisa waintogana, pi kagisabi nagisarisa tara tumpaema kabi waintogana, pi kaberapa nagisarisa tara tumpaema Isureyo kinaꞌmi tupisa igiwaipa kaemaraogana, pi kaberapa nagisarisa tara tumpaema enisore kinaꞌmiba asima mintantawe.

¹³ Piyaenaba, pa nkirosai nkaukaꞌiba kakaga kabiwa, pa tupasaitiba kakagawa, metakaeri kakagawa, maretakaeri to kakaga kabiwa suma waintantiye.

¹⁴ Pi kumaꞌama kagisawamaba nagisarisa tara tumpaema yabata kimaraogana, pi ntabatapa sipisipi awaroma nkaposoro kinaꞌmi nkige kaemaraoga agantuwe.

¹⁵ Pigoya, pi enisore, nae kamana unamomeꞌnaba aeba korirasa pumaranta asa ayapi uꞌma, pi kumape kabewape kagisawape aisukena asaba urintoga agantuwe.

¹⁶ Piya, pi kumapa po kona kumane. Eꞌeronkape tabenawape kaꞌmasane. Piya, enisorewamaba asawatasa kana kuma aisuma agaomepa, eꞌeronkape tabenawape inatisaenawape kaꞌmasa pumagina, pipa 12 tauseni kanara agantiye. Pipa 2,400 kiromita aisuma agantiye.

¹⁷ Piya, pi enisorewama pi kagisa aisuma agaomepa, wasanami aisikenaenarasa agama, tabenawapa 144 kanara agantiye. Pipa 70 mita aisuma agantiye.

¹⁸ Piya, kana kumaꞌama kagisaba yasipa yabatasa kimagina, kana kumapa korirasa pumaraogana, arawama karasi kanta puntiye.

¹⁹ Pi kagisawama nkago yabapa tabe ikankatasa toma toma taꞌneraꞌne yabatasa awaꞌenawapa pumarantiye. Piya, marusa yabapa yasipawa, tarasa pome ntabapa sapayawa, kakagasa pome ntabapa agetiwa, tarawa tarawaki pome ntabapa emerowa,

²⁰ nayakaꞌmu pome ntabapa satonikisiwa, tonaentisa kaꞌumaeyome ntabapa koniriyawa, tara umaeyome ntabapa karisoraitiwa, kakaga umaeyome ntabapa periyowa, age ka megasome ntabapa topasiwa, nayataraꞌmu yabapa karisoparesiwa, nagisarisa ka tumpaeyome ntabapa ayasiniwa, nagisarisa tara tumpaeyome ntabapa ametisiwa, suma waintantiye.

²¹ Piya, nagisarisa tara tumpaema kabiba pipa nagisarisa tara tumpaema wae pasesuwe. Eya, ka kabiba ka tabe pasesu waintogana, pi kumapintisa kipa korirasa pumaraogana, aeba karasi kanta pogini agarosaꞌma agantawe.

²² Piya, pi kumapintiba tabe mono namapa kampa agantone. Kampaye. Waꞌega Koti taberakaꞌyape, sipisipi awaromabe, isigeba pi mpono namapa mintusugu agantone.

²³ Piya, pi kumapintiba pankamabe oꞌamabe eꞌwasaba kampa pukiye. Kampaye. Koti ae eꞌwasa pekana, sipisipi awaromaba aeba kaneꞌwane.

²⁴ Piya, pi kumaꞌama nkeꞌwasaenara aꞌyaꞌma maga maga kinaꞌmiba nasigini, pitaꞌi mabisa waꞌega kinaꞌmiba aogi iwaꞌenawaipa maete metakibewe.

²⁵ Piya, arapa pi kumaꞌama kabeba kampa akunikibewe. We, pi kumatapa kampa ase ukiye.

²⁶ Piya pekini, aꞌyaꞌma marisa iwaꞌenabe iꞌmuntanawaipe maete kanagana pukibewe.

²⁷ Piya, iꞌnintanabe, wasanama tonarona kamparagaena pukibiꞌnabe, kumpari ukibiꞌnabe, pipinti kampa ubasikiye. Kampaye. Piya, sipisipi awaroma nkeꞌwasa maekena isapi igewai kaetanti kinaꞌmi ibiwaipa ubasikibewe, piya untiye.

22

¹ Piyama agauwagana, enisorewamaba anompa nayakintiye. Pi nkwanipa eꞌwasaena maekena wani, karasiwama taꞌneraꞌne pusu pi wani, pipa Kotige sipisipi awarowampage isiyemu yabaerasa aborami nkwanine.

² Piya, pi waninkama pi kumapintisa kiꞌama nkakapinti wagina, to awamori to awamori eꞌwasaena maekena ya waintiye. Pi ntawamaba nagisarisa tara tumpaema toma toma aꞌwapa waiyegina, piꞌna oka oka aborama agutaye. Piya, pi ntawama nkaꞌyenkapa maga maga kinaꞌmiba naigina, kamparagaenawaipa maegasima kaba itakiye.

³ Piya, pi kumatiba kaikenaenaba to kapa kampa aborakiye. Piya, pi kumapintiba Kotige sipisipi awarowampage isiyemu yabaewama waiyekini, kayokaya kinaꞌwampiba agisuma mikibewe.

⁴ Piya, igeba aogawapa agama miyigina, iꞌnera ae ageba aborama waikiye.

⁵ Piya, pi kumatapa kampa toba ase ukiye. Kampaye. Pi kumatasa kinaꞌmiba kanepe pape kampa aguyosagaigina, Waꞌega Koti aeba arakenaenawaipa mikiye. Aibekini, igeba asi nasiba waꞌega kina kanta puma miyaba mikibewe. Isu kanakena kamanane

⁶ Pigoya, pi enisorewamaba mayama unamintiye: Pi abempe kamana pipa kampa antageꞌena puma, pipa tagatakaꞌyane. Piya, Waꞌega Koti, poropete kina uwaitantiꞌna, aeba enisorewapa otagina tumpa kayokaya kinaꞌwapa agaro nkaborakibintanaba iyakegini agawe.

⁷ Piya, abo. Naeba agarosama kanakuwe, iyema unamoga abintuwe. Piya, kaꞌwaina ma nkisapi kaeyo kamana, Koti nkawamupisa kamanapa aegaramiꞌnaba, aeba aꞌmuntanabi mpikiye.

⁸ Pigoya, nae Yonina, pintana agama abiwaentuwe. Piya agama abiwaemagi, naeba nayakinti enisorewama nkagisabi parokaema agisukena puwagana,

⁹ aeba maya unamintiye: Kampaye. Kaeba piyaba a-po. Piya, naebe, kaebe, poropete kaokinape, ma nkisapisa kamana wasiye kinape, taeba ka yuga pompene. Kaeba Kotitimana agiso, untiye.

¹⁰ Piya, to ka maya unamintiye: Kaeba ma nkisapisa Koti nkawamupisa kamanapa a-nkasaema akumpaꞌma miyo. Kampaye. Piya, pi kamanaꞌama nkaꞌwa aborakena kanaꞌwapa ago agarosaye.

¹¹ Pi kanaꞌwakaba ataena peꞌnagiba ataena pikena puntanaba peno. Iꞌnintana peꞌnagiba iꞌnintana pukena puntanaba peno. Piya, arupuyena peꞌnagiba arupuyena pukena puntanaba peno. Aota miyeꞌnagiba aota mikena puntanaba aota miyeno, untiye.

¹² Abo. Naeba agarosama kanamagi, antotaꞌenanentaga irosaꞌmagi, aꞌyaꞌma wasana pentanawaika ikankaipa kaꞌmasa puma aꞌwae puma imikuwe, iye.

¹³ Piya, naeba paitanta yagara mite aintisa yagara mite puma, marusabe atutasabe aꞌyaꞌmaenama nkagonawe, piya untiye.

¹⁴ Piya, itasaenaba wani nkaema aebarupaꞌnagiba, igeba iꞌmuntanabi mpikibewe. Piya peꞌnagipa uwaitakini eꞌwasaena maekena yawamankapa namagini, pi kumaꞌama kabirasa wama antabaipinti ubasigina kanarasano.

¹⁵ We, yaga kara kanta pe kinape, kiyoꞌena pe kinape, kumiyena pe kinape, wasana iyeguye kinape, ama koti nkagise kinape, aꞌyaꞌma kumpariꞌena ibugagina aegaꞌma pe kinape, igeba Koti kumaꞌama nkabeꞌi mikibewe, piya untiye.

¹⁶ Piya: Naeba Isuna, naeba enisorene agarubaogana monota aiꞌaru pe kinaꞌmititi wama ma nkawaga kamanapa uma aborarimiye. Piya, naeba Tebiti tupisa ago aiꞌne nawe. Naeba abayara eꞌwasa nori nawe, piya untiye.

¹⁷ Pigoya, Awamusaꞌamage sipisipi awaroma nkwaeꞌmage: Kanao, untase. Wasana ma kamana abiꞌnaba: Kanao, yeno. Piya, wanika abemiꞌnaba aeba kanano. Eya, eꞌwasaena maekena wanika abemiꞌnaba aeba kanama eꞌwasa wanipa uwa ampaema nano. Nagarikena kamanane

¹⁸ Pigoya, wasanami ma nkisapisa Koti nkawamupisa kamanapa abeꞌnagipa, naeba esegi kamanapa maya urimuwe: Piya, kaꞌwaina ma kamanata kaꞌisa to kamana atokaekibipa, Kotiba ma nkisapisa wasana ata puwaitakena kamanaꞌama nkauꞌwapa aeti atokaetakiye.

¹⁹ Piya, to kaꞌwaina ma nkisapisa Koti nkawamupisa kamanatasa kaꞌisa maegaikibemipa, aogi antotaꞌenawapa Kotiba maegaikiye. Eya, eꞌwasaena maekena yagabe, aota kumakabe unti nkantotaꞌenawapa maegaikiye.

²⁰ Pigoya, ma kamana uma aborama: Taga, tagane, yika, aeba: Karuꞌena kanakuwe, iye. Eya, Waꞌega Isu kaeba karuꞌena kanao.

²¹ Pigoya, Waꞌega Isu nkawagaenawampa aꞌyaꞌma tigeti waima waiyeno. Tagane.