<h4>1</h4>
<p><sup>1</sup> Paipa uwaena yaga Kotiba toma toma ki iꞌma poropete kinaꞌmi nkiwamutasa tayabamagi mono kamanaꞌwapa uwaimita kanantiye.
<p><sup>2</sup> Piya, ainti atuti iba nagarikena kanara, Kotiba kamana agowapa, yagarawa nkaboraramintine. Pi ntagarama nkayatasa Kotiba mampaba pumaꞌma, aꞌyaꞌmaenama nkago miyenoma otantine. 
<p><sup>3</sup> Piya, yagarawampa aeba Koti kanta puma mima kaꞌmasa pumagina, aeba Koti nkeꞌwasaena aboraramimagina, kamanaꞌwampa nkesegiyenarasa aꞌyaꞌmaena mabe mantabe parutu puma kabiye. Aeba aguntaenabisa aeyobatatakena yuga puma aꞌya kaitegina, Tabe Waꞌegama nkayatakanti inati asu maraꞌmintiye. Koti Ntagarama aꞌyaꞌma enisore kinapa igantiye 
<p><sup>4</sup> Pigoya, abawampa yagaranene ominti nkagiba enisore kinaꞌmi nkigeba igasisa puma, aewapa enisore kinaꞌmi igasima abawampa nkayatakanti maraꞌmintiye. 
<p><sup>5</sup> Piya, paipa paipa Kotiba yagarawaka maya omintiye:<p/>Yagaranekawe. Kaepa iba aboragatauwe, untiye, iye. Piya, aeka to kake maya untiye:<p/>Naeba abawampantana puma miyekana, aeba yagaranentana puma miyeno, untiye, iye. Pigoya, pi kamanapa Kotiba ka enisore yagaraga untiye, a. Kampaye. 
<p><sup>6</sup> Piya, aeba amaru yagarawa mabi ataogana aboraogana maya untiye:<p/>Aꞌyaꞌma enisore kinaꞌnempitaba, aeti tirakabima agisiyo, untiye, iye. 
<p><sup>7</sup> Piya, enisore kinaꞌmikaba maya untiye:<p/>Naeba enisore kinaꞌnepa esiba kanta puma aboramagi, pi ntuga kinaꞌnepa yaku nkantebu kanta puma aborawaitauwe, untiye, iye. 
<p><sup>8</sup> We, aꞌwae puma yagarawaka Kotiba maya omintiye:<p/>Kaeba Koti mimagina, tabe Waꞌega aꞌyaꞌma yaga miyaba mima, kabiwaitakenaenagatapa kabima mima parutuꞌena puma miyaba mikibene, iye.<p/> 
<p><sup>9</sup> Piya, kaeba arupuyenaga kabegina, antageꞌenaba kama potane, iye.<p/>Pika kae Kotina, naeba kaꞌmuntanagapa kae tikataogana kaoꞌmipa igasaye, untiye, iye. 
<p><sup>10</sup> Pigoya, to kapa Kotiba maya omintiye:<p/>Waꞌega, kaeba paitakaꞌya maba aboratama, mantaba kayapisa pumarantampene, iye.<p/> 
<p><sup>11</sup> Piya, kaeba miyaba miyegana, mantabe mabe paisa kai abararaisa puma abararama ata puwakiye, iye.<p/> 
<p><sup>12</sup> Piya, kabi akarakitantana to antota kasa maema kabisa puma, mantabe mabe to antota kasaꞌena aborakiye, iye.<p/>We, kaeba kampa antota kasaꞌena aborama pabiyama mimagina, masimabi kauꞌyaga miyaba mikibene, untiye, iye. 
<p><sup>13</sup> Pigoya, paipa Kotiba yagarawaka to ka maya omintiye:<p/>Kaeba nayatakanti maraꞌmiyega, kama kinakapa kagisa amentapinti atakini waiyo, untiye, iye. Pigoya, pi kamanapa Kotiba ka enisore yagaraga untiye, a. Pipa kampaye. 
<p><sup>14</sup> We, enisore kina igeba awamusa kina mima Koti kayokaya potagina, iꞌikibi kina iyoꞌmaeyiyema uwaitaye.<p/>
<h4>2</h4>
<p><sup>1</sup> Piya pegi, pi abintompe kamana uwasuwa pusanaga, taeba napiyenaretapa arakuꞌma upebe puma aegarano. 
<p><sup>2</sup> Piya, Kotiba kamanaꞌwapa enisore kinaꞌmi nkiwamuta umarantegina, pi kamanaꞌamaba waima esegi puntiye. Kana kamanaꞌamaba aꞌyaꞌma aibasanaꞌma aemita punta kinape kamana akayunta kinape ata ikankaipa antotapa maentawa, taewariye. 
<p><sup>3</sup> We, aogima tauꞌikena aboraratantintanaga taekita pompepa, aya pumabaya ataenabisaba taegakapa wagaikune. Pipa kamparakaꞌyane. Pigoya, Waꞌegawama aewa pi tauꞌikena kamanapa maru uma aboraratantegini, ae kamana abinta kinaꞌmiba kaga taeti ago ampa aborantawe. 
<p><sup>4</sup> Ampa aborauguna, Kotiba agowa abompeka iyapisa tonarona aboraogini, igeba awameꞌenabe kasaꞌenabe toma toma esegiyenabe aborantini, Aota Awamusaꞌama nkabemika ka ka imogini tonarona aꞌmu ntuga aborantawe. Isu aeba tauꞌikena aiꞌnerakaꞌyane 
<p><sup>5</sup> Piya, aborakibi mpaga kamanapa yune. Pi mpa kabiyiyomaba, enisore kinapa Kotiba kampa uwaitantiye. Pipa kampaye. 
<p><sup>6</sup> Pika ka yagarama mono isapi mayama ka aukaꞌi Kotipa omintiye:<p/>Wasanaba nanagana kaeba napiyene. Wasanama Ntagaraba nanagana aepa kabitanema, untiye, iye.<p/> 
<p><sup>7</sup> Piya, arontaganto enisore kinaꞌmi nkimentapinti kaeba aepa atamagina, to kake aꞌwae puma aba puma au maete ima agegaꞌeba asagayuma, 
<p><sup>8</sup> aꞌyaꞌmaenaba ae agisa amentapinti aki pekana waiyegina aeba kabiye, untiye, iye. Eya, Kotiba pi ntagarama nkamentapinti aꞌyaꞌmaenaba waiyenema otantana, kaꞌisaenaba uwaba kampa waiyenema otantiye. We, aꞌyaꞌmaena pi ntagarama nkamentapinti waiyemaba ibaba taobisaba kampa agaune. 
<p><sup>9</sup> Piya, to kapa agaune: Isupa enisore kinaꞌmi nkimentanti arontaganto otaogana, tumpimagina Koti nkawagaenawa mpaema aꞌyaꞌma kinaꞌmiteka purintiye. Aeba auki nakiyena puma purogana asitama au maete ima ageba asagayuntiye. Piꞌna nkagoba ago agaune. 
<p><sup>10</sup> Pigoya, Kotiba aꞌyaꞌwaemaenama nkagogana pumaꞌma mintiye. Piya, aeba otaogana Isu puꞌmagina auki nakiyenawatasa tauꞌima paitakena yagara aota mikena agegaꞌeba maeyogana, Kotiba uwoma araga yagara ibabute eꞌwasaenawapi ubasintiye. Pintanaba aeba arupuyenarakaꞌya puntiye. 
<p><sup>11</sup> Piya, aota puratakena yagarabe, aota puratami kinape, ka aukaꞌisa aboraune. Piya pokana, aeba taeka ani pusanaga kampa napima: Naꞌnatabararawe, uramiye. 
<p><sup>12</sup> Pika mono isapi maya untiye:<p/>We, Koti, naeba kae kagegaꞌeba naꞌnatabaraba uwaimukuwe, iye.<p/>Eya, naeba monota aiꞌaru pe kinaꞌmi nkikapi kagegaꞌeba asagayukuwe, untiye, iye. 
<p><sup>13</sup> Piya, aeba to ka maya untiye:<p/>Naeba Kotiti namatiti potakuwe, untiye, iye. Pigoya, pika to ka maya untiye:<p/>Kaeba nagaka, naeba mataꞌi mima aꞌyaꞌma yagaraba Koti namemiꞌnagigeba kaga miyompene, untiye, iye. Isu wasanarakaꞌya aborama taoꞌmaentiye 
<p><sup>14</sup> Pigoya, Koti ntagarakiꞌnu taeba wasana mintokana, Isuba tae kanta puma aborantiye. Eya, tae kanta puma aboramagina, purikenama nkagoba aegugaikenaga puꞌma asintiye. Piꞌna nkagoba kewamawe. 
<p><sup>15</sup> Piya, aꞌyaꞌma purikenaenaga taekuru pompe kinaꞌmiba aꞌyaꞌma yaga kewama igaꞌna purataginaba, Isu aepa aegugasimagina pi nkigaꞌnabisa akariyobatatakenaga puꞌma asintiye. 
<p><sup>16</sup> We, tagane. Aeba enisore kinaꞌmikaba aeꞌwa ntuga kampa puma iyoꞌmaentiye. Pipa kampaye. Aeba Abaraꞌamu tumpi ntuga puma iyoꞌmaentiye. 
<p><sup>17</sup> Piya, aꞌnatabara iyoꞌmaekenaga aeba kaꞌmasa puma aborantine. Piya, aeba monota paitanta kiye yagara ampima, Koti ntuga puma arupu puma antara puratama, wawayaꞌmite nkaguntaenarempa nkantota ika puratakenaga, aꞌnatabaramige kaꞌmasa puma aborantine. 
<p><sup>18</sup> Piya, auki nakiyenabe amiyoꞌenabe aeti aboramogana aeba asu againtemika, taepa pabiyama tamiyoꞌena aborarameginaba kanara taoꞌmaeye.<p/>
<h4>3</h4>
<p><sup>1</sup> Pigoya, aota naoꞌmitaba, mantabi ubasikibe kinaꞌmitaba, tigeba Isugaba aogima napiyiyo. Aeba tamatitiꞌenama nkagowama tabe aposorobe monota paitanta kiye yagararepe mima, Koti nkawamupa aogima wasintiye. 
<p><sup>2</sup> Piya, Kotiba pi ntugaraka otaogana, pai Mosese Koti nkawamu wasima Koti nkaokinaꞌmi kayokayaꞌena puntisa puma, Isuba Koti nkawamupa aogima wasima yogawapa puntiye. 
<p><sup>3</sup> Eya, nama kiyi ntagarama nkagewamaba pi ntamankama nkageba asu agasisa puma, Koti nkaobipa Isu nkagewamaba Mosese nkageba asu againtiye. 
<p><sup>4</sup> Piya, namapa wasanami nkiyapisa aborantegina, we, aꞌyaꞌwaemaena aboranti ntagaraba Kotiwe. 
<p><sup>5</sup> Piya, Moseseba aeba Koti nkawamu wasima Koti nkaokinapa kabima mima, ainti aborakibintanaga awaga kamana umagina, aeba kayokaya yagaragana mintantiye. 
<p><sup>6</sup> We, Karaisitiba Koti nkawamu wasima Koti nkaokinapa kabima mimagina, aeba Koti Ntagaragana mintiye. Piya, taeba aꞌyaꞌma yaga esegima aegaꞌma Kotiti atokaekenaga taꞌmu puntapa, taeba Koti nkaokina mima namantanawapa pukune. Isureyo kinaꞌmiba ata puntasapa a-piyo 
<p><sup>7</sup> Pigoya, pika Aota Awamuasꞌama maya untiye:<p/>Ibaba, tigeba Koti kamana abintiripa, aogima abiyo, iye.<p/> 
<p><sup>8</sup> Eya, Isureyo kinaꞌmiba kaꞌme mpari mima Koti amiyoꞌena potama ago kamana akayumagini, igu akunintasa piyaba a-piyo, iye.<p/> 
<p><sup>9</sup> Eya, kaꞌme mpari tiyabamagiba 40-wa kabuba mima nae puwantanaba agantiniba namiyo puntane, iye.<p/> 
<p><sup>10</sup> Piya pugu, naeba igama pi kinaꞌmika namoꞌenaba puma maya yuwe: Iguꞌamaba aꞌyaꞌma yagaba kepa agasima antageꞌena pumagini, nae kipa kampa agama nasewe, yuwe, iye.<p/> 
<p><sup>11</sup> Piya, igeka namoꞌena puwaitamagi, mayama esegima yuwe: Igeba migarakenaenanetiba kampa ubasikibewe, yuwe, untiye, iye. 
<p><sup>12</sup> We, naoꞌmitaba, tigeba aogima kabiyiyo. Aꞌyugu tikapisa kaꞌwainaba antabinti aguntaena puma amatitiꞌenawa kaite, miyaba Koti akaꞌintaesi potasanaga, aogima kabiyiyo. 
<p><sup>13</sup> We: Ibawe, untipa ma ntagawe. Piya, ibasa yagaba aguntaenama tikapisa kaꞌwaina nkao airarikaeyakana antaba akunisanaga, tigeba kabima mima aꞌyaꞌma yaga tiyoꞌmipa aogi kamana uwaimigini, napiyenawaipa igegano. 
<p><sup>14</sup> Piya, pai tamatiti puntompentana to esegi puma mirite wama nagariyeka, Karaisitintanabi ubasikune. 
<p><sup>15</sup> Eya, ibasa yagaga mono isaꞌamaba maya iye:<p/>Ibaba, tigeba Koti kamana abintiripa, aogima abiyo, iye.<p/>Eya, Isureyo kinaꞌmiba Koti nkago kamana akayumagini, igu akunintasa piyaba a-piyo, untiye, iye. 
<p><sup>16</sup> Pigoya, aya pume kinaꞌmi Koti kamana abima ataena puma akayuntawe. Pipa Moseseba wawaya iba purite Isipi maba agaite waume kinaꞌmi, ige akayuntawe. 
<p><sup>17</sup> Eya, aya pume kinaꞌmi kamana akayuguna Koti 40-wa kabuba amoꞌenaba puwaitantiye. Pipa wawayaꞌmi aguntaena pume kinaꞌmika Kotiba amoꞌenaba puwaitantegini, iꞌwaipa kaꞌme mpari wareꞌnawaewantawe. 
<p><sup>18</sup> Aya pume kinaꞌmika Kotiba: Igeba migarakenaenanetiba kampa ubasikibeweba, untiye. Pipa wawayaꞌmi kamanaꞌwa akayuye kinaꞌmika untiye. 
<p><sup>19</sup> Piꞌna nkagoba taeba abune. Kampa imatiti peꞌnagiba, igeba Koti mpigarakenaenawatiba kampa ubasikibewe.<p/>
<h4>4</h4>
<p><sup>1</sup> Pigoya, Koti migarakenaenawapi uma pasikena kamana utaratantine. Pi kamanaꞌamaba uwa waiyeka, taekuru pumagi, taepisa kaꞌwainaba kampa abae puma apasisanaga kabiyeno. 
<p><sup>2</sup> Piya, paipa Mosese nkaokinaꞌmiti aogi kamana aborantasa puma, taeti pabiyama aboraye. Pigoya, pi kana aogi kamana abintapa, kampa wasima imatiti puguna, igetiba kampa auꞌwapa aborantiye. 
<p><sup>3</sup> Piya, tae tamatiti pompe kinaꞌmitaba Koti utaratantemi mpigarakenaenabi uma pasune. We, paipa Kotiba mampa puma nagaritaogana, wasanamiteti yogawapa aꞌya waogana aeba agama maya untiye:<p/>Kamanaꞌne kampa abikibe kinaꞌmika namoꞌena pokini, igeba migarakenaenanepipa taganema kampa ubasikibewema utawaitauwe, untiye, iye. 
<p><sup>4</sup> Piya, mono isaꞌama ka aukaꞌi maya iye:<p/>Kotiba tonaentisa kaꞌumaema yaga yoga puma nagarigaite, to tarumaema yaga migarantiye, untiye, iye. 
<p><sup>5</sup> Eya, pi nkaukaꞌi to ka maya iye:<p/>Igeba taganema migarakenaenanepipa kampa ubasikibewe, untiye, iye. 
<p><sup>6</sup> Piya, pai aogi kamana abinta kinaꞌmiba kamana ago akayumagini, kampa uma pasintawe. We, migarakenaenari wakena kipa uwa waintikini, to kaꞌisamiba pasikibewe. 
<p><sup>7</sup> Eya, Kotiba ka yagaga: Ibawe, otantiye. Piya, aintiba uwaena kabu wagasoganaba, Kotiba Tebiti nkawamupisa kamanapa maya uma aborantiye:<p/>Ibaba, tigeba Koti kamana abintiripa, aogima abima, tiguꞌamapa a-nkakunkataiyo, untiye, iye. Pipa ago urimintuwe. 
<p><sup>8</sup> Pigoya, pai Yosuwa ago migarakenaenabi iba puntisinta, Kotiba pika to ka yagagaba kampa otasine. 
<p><sup>9</sup> Piya, migarakenaenaba taeti uwa waintiye. Owe, sabati yaga kanta puma migarakenaenaba waintegi, pipa Koti nkaegaraompe kinaꞌmitaba aobi pune. 
<p><sup>10</sup> Piya, kaꞌwaina Koti mpigarakenaenawapinti ubasikibipa, aeba yogawapa aꞌya atate migarakiye. Eya, pai Koti yogawa aꞌya kaite migarantisa puma, aeba yogawapa aꞌya atate migarakiye. 
<p><sup>11</sup> We, migarakenaenawapi uma pasikenaga taeba esegima mono yuga peno. Aꞌyugu taepisa kaꞌwainaba, pai kamanapa akayuntasa puma wareꞌnasanagaba, kabima mima aogi mono yuga peno. 
<p><sup>12</sup> Piya, Koti kamanapa eꞌwasaena wantaga, esegima yogawapa piye. Piyamaba, aganantaꞌenawampa tara awa wainta paroya ntoginkamantana asugasima, tagu tamankama atokaentipa nawaegasima, tayampu taraꞌnuwama atokaentipa nawaegasaye. Eya, aꞌyaꞌma tantawama ntapiyenabe tabugaintanabe aꞌyigimpa aboraye. 
<p><sup>13</sup> Piya, Koti nkaobipa kakantaꞌenaba kapa kampa waintiye. Kampaye. Aꞌyaꞌmaenarepa apira puma ae aobi ago aborawaeye. Eya, Koti aeba aꞌyaꞌmaena pompentana tage tatai ntagarawe. Isuba monota paitanta kiye yagararene 
<p><sup>14</sup> Pigoya, taetiba monota tabe paitanta kiye yagarare mintiye. Aeba mantabinti asu pasinti ntagara Isu, Koti Ntagarawe. Pika taeba tamatiti potaompentanaba upebe puma aesaga peno. 
<p><sup>15</sup> Piya, aeba magimagiyenare atama antaraꞌena kampa punta yagara kanta puma kampa miye. Kampaye. Aeba aboraogana amiyoꞌena potaomepa kampa aguntaenaba punta, monota paitanta kiye yagarare tagantana puma taeti aborantiye. 
<p><sup>16</sup> Pigoya, pika kampa taekuruba punta, taeba Koti awagaenawa tamikena marunkati uma airokaeyeno. Piya, taeba airokaeyakana antaraꞌena purataka, kuntaenare aesaga pikenaga awagaenawatasa taoꞌmaeyano.<p/>
<h4>5</h4>
<p><sup>1</sup> Pigoya, mabisa kina taepisa monota paitanta kiye yagarare Kotiba otaye. Kotiba otagina, aeba tauꞌikenaga Kotiti taꞌmuntanarepa amima yagaba aeguma kaema agunta pasaꞌatagina aguntaenarepa airarikaegasaye. 
<p><sup>2</sup> Piya, pi ntagaramaba aegeba tae kanta puma magimagi yagara mintanaba, aeba pika napima, aibo antage kinaꞌmiteka taga antara puratama pasema taoꞌmaeye. 
<p><sup>3</sup> Piya, aeba mabisa magimagi yagara mintanaba, wayaꞌwamika muta ataisa puma aeꞌwa aguntaenawa maegaikenaba pabiyama muta ataye. 
<p><sup>4</sup> Pigoya, pi monota paitanta kiye yagarama mparupa uwa maekenaba kampaye. Pipa Koti Eronipa pai otantisa puma otagina maeye. 
<p><sup>5</sup> We, pabiyamagina Karaisiti kampa aeꞌwa nkagegaꞌeba maete inta, monota paitanta kiye yagararepa aborantine. Koti otaogana aeba pi ntugaba puntine. Eya, Kotiba maya omintiye:<p/>Kaeba yagaranekawe. Iba aboragatauwe, untiye, iye. 
<p><sup>6</sup> Piya, mono isapi to aukaꞌiba to ka maya omintiye:<p/>Kaeba Meyokisete ae tu mpima mono kiye yagara miyaba miyeno, untiye, iye. 
<p><sup>7</sup> Pigoya, Kotiba purintapisa auꞌikena esegiyena waintegina, paipa Isuba mampabisa yagara mintanaba, pika napima tabera kegaꞌe uma kubeꞌena puma Kotiti nunamu uma naoꞌmaeyoma abigantiye. Aibumagina, aeba aeꞌwa ntapiyena wareꞌnama Koti nkawamupa wasiyomeka, Kotiba nunamuwapa abintiye. 
<p><sup>8</sup> Piya, Isu aeba Koti Ntagara mintiye. We, tae kanta puma auki nakiyenarasa Koti nkawamu wasikenaenama nkagoba abibebe puntiye. 
<p><sup>9</sup> Piya, Isu aeba abibebe pumagina, Koti nkaobi aotaꞌenarakaꞌya puma, aꞌyaꞌma ae awamu wasiyompe kinaꞌmitepa tauꞌima miyaba mikenaenama agoba aborantiye. 
<p><sup>10</sup> Eya, Kotiba otaogana, aeba Meyokisete tu kanta puma monota paitanta kiye yagarare aborantine. Inamu ntagara kantaba taeba a-peno 
<p><sup>11</sup> We, mono yugawaka uwaena kamana waintegi, tige akuninta mintaka, urimikenaenaba kunta piye. 
<p><sup>12</sup> Piya, tigeba mono abirite kanantaꞌnagita, ayamabaya mono tisa kinapa kampa miyewe, a. Tige napiyenaripa aronkanto waiyegina, ka yagarama Koti nkaogi kamanaꞌama nkagoba to kake urimikibipa, pipa kanarane. We, tigeba esegi nanintaba kampa na kina mimagiri, nonoꞌamana mpaema miyiyo. 
<p><sup>13</sup> Eya, aꞌyaꞌma kinaꞌmiba nono nayaba mima, igeba inamu ntagara kanta puma mima arupuyenama nkagoba kampa aogima agantawe. 
<p><sup>14</sup> Piya, esegi nanintaba iꞌanosa kinaꞌmintanawe. Piya kinaꞌmiba igewai ntapiyenarasa aogima napima asi nasiba aogiyenabe ataenabe taga aꞌyikewe.<p/>
<h4>6</h4>
<p><sup>1</sup> Pigoya, taeba marupa kaꞌisa Karaisiti nkaegarakena kamanapa abuntune. We, pi aintana kamanapa agasima to kaꞌisa kamanaꞌwapa abima amato puma anosano. Aꞌyugu asi nasiba nama kampa kinta, maruntana puyaba mikune. Eya, eꞌwasaenawa kampa waintaꞌenamakaba takabitama aꞌwae puma Kotiti tamatiti potakena kamanapa agasima, to kaꞌisa amato puma anosano. 
<p><sup>2</sup> Eya, wani paiꞌitakena kamanape, iya nkiꞌnota atakena kamanape, purintapisa asikena kamanape, aꞌyigitatama antotaꞌena tamikena kamanape, agasima amato puma anosano. 
<p><sup>3</sup> Piya, Koti abekana kanarasakapa, taeba pabiya pukune. 
<p><sup>4</sup> Pigoya, kaꞌisa kina, eꞌwasaenayagaꞌena Kotitisa maeya kinaꞌmiba, igeba Kotintana ikabitamagini, to intara puma aꞌwae puma eꞌwasaena maeyanema pukibepa, pi kipa kampaye. Eya, mantabintisa iꞌmuntana imakagama Aota Awamusaꞌena punta kina, igetiba to aꞌwae pukena kipa kampa waintiye. 
<p><sup>5</sup> Eya, igeba Koti kamanaꞌama nkaogiyenabe, ainti aborakibi nkesegiyenabe, imakagamagini, 
<p><sup>6</sup> Kotintana ikabitapa, igetiba to igu aꞌwae pukena kipa kampa waintiye. Piya, igeba Koti Ntagaraba maripo yara to ka itaꞌatama wasanami nkiyobi ani pukena kamanapa otane. Pika igetiba to aꞌwae pukena kipa kampa waintiye. 
<p><sup>7</sup> Piya, ka mara asi nasi ka tumegina, maema ago yagarama ntakenaba aogima aboragina, pi mpagaba Kotiba aꞌmu piye. 
<p><sup>8</sup> Piya, maba akenaenabe kabuyenabe aboraipa, pipa uwa ma waiyekana, aro ntaganto pumirere potama, aintiba antota yaku kaegaikiye. Pipa wasanamiteti piyama aborakiye. 
<p><sup>9</sup> We, tabugai ntaoꞌmitaba, ibaba tigeti kunta kamanapa yune. We, tigeba piya ataenaba kampa puma, tiꞌimaenama nkauꞌwapa aogima aborakibewema, napiyune. 
<p><sup>10</sup> Piya, Kotiba antage yagaraba kampa mima, aogi yuga pekaba kampa ageguꞌaba piye. Kampaye. Tigeba aogi yuga puma Kotika agu kaoꞌena puma aeti atokaeya kinaꞌmi kayokayaꞌena pai puntiri, ibageba piginaba, kampa uwaba titakiye. 
<p><sup>11</sup> Pigoya, tigeba ka ka kinaꞌmita maya pusanaga tabiye. Tigeba Kotiti atokaekenaga esegima ntapima auꞌwapa aogima aborama wairite wama aꞌya pusanaga tabiye. 
<p><sup>12</sup> We, tigeba uwasuwaba a-piyo. Piya, imatiti puma kampa uwasuwa punta kinaꞌmiba Koti nkutaratantintanaba maeyawe. Pi kinaꞌmi pesa, tigeba piyo. Koti utaratantintanama kamanane 
<p><sup>13</sup> Pigoya, paipa Kotiba Abaraꞌamu kamana otantipa, Koti aeꞌwa nkagera uma esegi potantiye. Piya, to ka yagaramaba kampa asu agasogana Kotiba aeꞌwa nkagera uma esegi potamagina, 
<p><sup>14</sup> maya omintiye: Naeba taga kauwe. Naeba naꞌmuntananepa aboragamekana, kayabamagi uwaena aborakibewema, omintiye. 
<p><sup>15</sup> Aiyogana, Abaraꞌamuba antawamapa esegi potama kampa aekita puma paibuma mintanaba, aintiba otantintanaba maentine. 
<p><sup>16</sup> Pigoya, wasanamiba asu againta kinaꞌmi nkigera kamanaꞌwaipa esegi pegina, pi kamana akayukenaenaba kampa waiye. 
<p><sup>17</sup> Piya, Kotiba abugaogana utaratanti kinaꞌmiteti ae agera kamanaꞌwapa esegi puntine. Eya, aeba tara agi kampa napinta, untintanaba taga aboraramikiye. 
<p><sup>18</sup> Piya, aeba kamana otamagina ae agera esegi potantine. Aibuntikana Kotiba kamanaꞌwapa kampa akayumagina, kumparipa kampa ukiye. Pika Kotiti taegaka uma kakaompe kinaꞌmitepa esegi purataka, uratantemintanaba arakuꞌma upebe puma esegi peno. 
<p><sup>19</sup> Piya, Koti uratantintanaba, pipa taumaꞌama nkarakurikena igaꞌnawe. Pi nkigaꞌnarasa Koti mparuti, tabe kaiyama nkakaꞌi, asaerataye. 
<p><sup>20</sup> Pi mparuti Isuba paitaratama ubaiꞌma, Meyokisete ae tu mpima monota paitanta kiye yagararepa miyaba miye.<p/>
<h4>7</h4>
<p><sup>1</sup> Piya, Meyokisete, Saremi kumatasa waꞌega, aeba ima minta tabe Kotiwama mpono kiye yagara mintantiye. Pigoya, paipa Abaraꞌamuba wama mabisa waꞌega kama kinaꞌwapa iyeguma igarubakaite aꞌwae puma waꞌeri kanaogana, Meyokisete aeba keꞌi uma pabuma aꞌmu potantiye. 
<p><sup>2</sup> Aꞌmu potaogana, Abaraꞌamuba aꞌyaꞌmaenawapisaba aisuma nayataraꞌmu pogana age ka maeta maeta puma Meyokisetepa amintiye. Piya, Meyokisete nkage aꞌwae puma tae kamanapisa: Arupuyenama nkwaꞌegawe, yune. Pigoya, aeba Saremi kumatasa waꞌega miyoga, pi nkageba tae kamanapisa: Paruyenama nkwaꞌegawe, yune. 
<p><sup>3</sup> Piya, aeba ano aba kampa minta, abigutasa yagara miyegina, maꞌatantaꞌenawape purikenaenawape kampa waiyegina, aeba Koti Ntagara kanta puma mima mono kiye yagara miyaba miye. 
<p><sup>4</sup> We, tigeba Meyokiseteka napiyiyo. Aeba taberakaꞌyane. Piya, tayabama Abaraꞌamuba maꞌenabisa kota maema aisuma nayataraꞌmu pogana age ka maeta maeta puma Meyokisetepa amintiye. 
<p><sup>5</sup> Pigoya, Aribai ntagarakiꞌnupa mono kiye kinaꞌmi ntugamana mpaeya kinaꞌmika, Isureyo kinaꞌmintana nayataraꞌmu pogana age ka maeta maeta piyoma, ago kamanaꞌama uwaitantiye. We, Aribai kinaꞌmibe aꞌyaꞌma to Isureyo kinaꞌmibe igeba Abaraꞌamupisa aboranta, ka tune. Piya, Aribai kinaꞌmiba iyoꞌmitasa igewaintanaba maeyawe. 
<p><sup>6</sup> Pigoya, Meyokisete ige tupipa kampa aboranta, maruꞌenaba Abaraꞌamuntanaba age ka maeta puntiye. Eya, Meyokisete aeba Koti kamana otanti ntagaramapisa age ka maeta pumagina aꞌmu potantiye. 
<p><sup>7</sup> Piya, taeba ago abintune: Asugasima mintiꞌna aeba amentapinti mintiꞌnapa aꞌmu potaye. Eya, Meyokisete asugasima mintiꞌnawe. 
<p><sup>8</sup> We, ibantoba purikibe mono kiye kinaꞌmiba age ka maeta maeta pewe. Paipa Meyokisete age ka maeta puntiꞌna, aeba miyaba mikena yagaramawe, iye. 
<p><sup>9</sup> Piya, ibaba Aribai tupisa mono kiye kinaꞌmiba age ka maeta maeta pewe. We: Aribai, aeba Abaraꞌamu nkayapisa marupa Meyokisetepa menkamogana age ka maeta puntiye, yompesinta, kanara yompesine. 
<p><sup>10</sup> Eya, Aribai kampa maꞌatantogana, Meyokisete Abaraꞌamuti aborantogana, Aribai aeba atawampa Abaraꞌamu nkayapisa age ka menkamintiye. Kasa mono kiyerempa marusaenama mparu maentiye 
<p><sup>11</sup> Pigoya, pai Kotiba ago kamanaꞌwapa aboraramintipa, pi kamanape Aribai kinaꞌmi mpono yugabe kaga kapi atama aboraramintiye. Piya, igewai mpono yugarasa aota kina aboraompesinta, Meyokisete kanta puma mikena mono kiye yagara, Isuba, kampa aboramisine. Eya, igewai mpono yugarasa aota kina aboraompesinta, Eroni kanta puma mikena yagara utaratamisine. 
<p><sup>12</sup> Pigoya, mono kiye kinaꞌmi ntugawaipa wagina aogaso yuga ampa aboraginaba, ago kamanaꞌwapa kaga wagina to aogasoꞌena ampa aboraye. 
<p><sup>14</sup> 
<p><sup>13</sup> Piya, Aribai tupi kampa aboranti ntagara Isuka pi kamanapa untiye. Aeba to tupisawe. We, Waꞌegare Yuta tupisa aborantine. Pipa ago abune. Pigoya, Yuta tupisa tabe mono kiyeba aborakibewemaba, Moseseba kampa untine. Kampaye. Pai pi tupisaba mono namapinti aratara mono yugaba kapa kampa puntine. Kampaye. Pigoya, pi tupisa kasaꞌena taeti aboraye. Isuba Meyokisete kanta puma monota paitaratanta kiyerene 
<p><sup>15</sup> Piya, kasa mono kiye yagara aborama Meyokisete kanta puma kaꞌmasa peginaba, pi kasa monoꞌama nkagoba taeti uma arawaeye. 
<p><sup>16</sup> Piya, kasa mono kiyerepa ago kamanaꞌama otanti tupisa kampa aborantiye. Kampaye. Aeba miyaba mikena esegiyenayaga, mono kiyerepa aborantine. 
<p><sup>17</sup> Piya, aeka mono isaꞌama maya iye:<p/>Kaeba Meyokisete ae tu mpima, mono kiye yagara miyaba miyeno, untiye, iye. 
<p><sup>18</sup> Eya, paisa ago kamanaꞌamaba esegiyenawape tauꞌikenaenabe kampa waintomeka Kotiba maegaintiye. 
<p><sup>19</sup> Piya, paisa ago kamanaꞌamaba kaꞌenaba kampa aota potantine. Kampaye. We, Kotiti atokaekena kasa ki aboraogana, pi kipa paisa ago kamanapa agasimagina Koti nkagora uma irosakubompe kine. Pi kipa Karaisitiwe. 
<p><sup>20</sup> Piya, Isuba tabe mono kiyerepa kampa uwaba aborantogana, Kotiba uma esegi potantine. Pigoya, paisa monotasa kiye kinaꞌmipa kampa esegi potaogini, igewai tupisa mono yugawai uwa maentane. 
<p><sup>21</sup> We, Kotiba Isu mono kiyena pukenaga esegi kamana uma mayama omintiye:<p/>Waꞌegawamanaba, naeba uma esegi pumagi, napiyenanepa kampa aꞌwae pukuwe. Kaeba mono kiye yagaraba miyaba mikibene, untine. 
<p><sup>22</sup> Eya, Kotiba pi kamana umagina, kasa utaratantaꞌenama nkatunkapa Isupa aboraramogana, pipa paisaenamaba asugasima waintiye. 
<p><sup>23</sup> Pigoya, paisa kiye kinaꞌmiba puꞌmaba, uwaena kinaꞌmiba pi mpono yuga puma mita mita kanantawe. 
<p><sup>24</sup> We, Isu aeba miyaba mima, mono kiyenawa kampa kainta kabima miyabane. 
<p><sup>25</sup> Piya, aꞌyaꞌma ae yugarasa Koti nkagora ampiyompe kinaꞌmitepa agora tauꞌiye. Eya, aeba miyaba miyemika, taeka asi nasi Kotiti nunamu yegina taoꞌmaeye. Isu aeba monota paitaratanta kiyerepa aogiyenarakaꞌyane 
<p><sup>26</sup> Pigoya, Isu aeba aota yagara miyegina kamanapa kapa kampa aeti waiyegina, agunta kina kantaba kapa kampa puma narentare pumagina, mantaba agasima inata minti ntagaraba mintiye. Pabiya yagara monota paitanta kiyenarepa pegina, Koti nkaobi kanarasaye. 
<p><sup>27</sup> Piya, marusa tabe mono kiye kinaꞌmiba igeba aꞌyaꞌma yagaba muta atakena puntiniba, maruꞌenaba igewai nkaguntaena maegaite, aintiba aꞌyaꞌma kinaꞌmi nkaguntaenaba mae igaikenaga mutapa atantawe. We, Isuba piya yugaba kampa punta, ka yaganto aeꞌwa nkaupa taeka muta ataogana nagariwantiye. 
<p><sup>28</sup> Piya, paisa ago kamanatasaba Kotiba marasa magimagi kinaꞌmipa tabe mono yugara uwaitantiye. Aibumagina, aintiba esegi kamana uma, aota miyaba yagarawapa pi ntugara otantegina, aeba miyaba miye.<p/>
<h4>8</h4>
<p><sup>1</sup> Pigoya, pi kaeyo kamanaꞌama nkagowapa mayamawe: Monota paitaratanti kiyerepa mantabinti mima Tabe Waꞌegawama nkaemu yabaera ayatakantisa aukaꞌi mima, 
<p><sup>2</sup> mono yugawapa Koti nkaota namapi piye. Pi nkaota namapa taga mono namane. Pipa wasanama wanane. Waꞌegawama ituru puma kintemine. 
<p><sup>3</sup> Pigoya, aꞌyaꞌma monota paitanta kiye kinaꞌmiba Kotiti iꞌmuntana atakena yugarape muta atakena yugarape uwaitaye. Pigoya, kiyarepa Isu aeba muta atagina kanarasaye. 
<p><sup>4</sup> We, mampara mono kiye kina mima, paisa ago kamana wasima muta atawe. Piya puntika, Isu aeba mampabi mintesinta, mabisa mono kiyenawapa kampa waintesine. 
<p><sup>5</sup> Eya, mantabinti taga mpono namapa waintegini, marapa igeba awame namantanaba puma mono kiye yugaba pewe. Piya, paipa Moseseba kairasa mono nama ituru pukena poganaba, Kotiba marupa maya omintiye: Amuti awame pugayakintosa puma aꞌyaꞌmaenaba po, omintiye. 
<p><sup>6</sup> Piya, Karaisiti aeba mono kiye yugaba aogima puma, paisa mono kiye kinaꞌmi ntuga igaintiye. Eya, utaratami ntanama pai uwaitanti ntanamapa asugasagina, Karaisiti ntugarasa Kotiti atokaeratakenaenama paisaenamapa asugasaye. Kasa atokaekenaenama marusaenamapa asugasaye 
<p><sup>7</sup> Pigoya, marusa uwaitanti ntanamaba auꞌwantana aogima aborasinta, kasaꞌenagaba kampa utaratamisine. 
<p><sup>8</sup> Piya, Koti wasanamika abogana kampa kanarasaogana, maya untine:<p/>Aintiba ka yagaba naeba Isureyo tupe Yuta tupe naeti atokaewaitakena auꞌwapa kasaꞌena aborakuwe, Waꞌegawamaba piya untiye, iye.<p/> 
<p><sup>9</sup> Piya, paisaena wanane. Kasaꞌena aborakuwe, untiye, iye.<p/>Piya, paipa iyabamagipa iyata uꞌma, Isipi marisa ibaburite wama menkitauwagini wantane. Pi ntagaba kamanaꞌnepa uwaitauwagini, atokaekenaenama nkagupi kampa mintantane. Piya pugu, naeba nakabiwaitantone, Waꞌegawamaba piya untiye, iye.<p/> 
<p><sup>10</sup> Eya, ma ntagaba aꞌya waka, Isureyo tu atokaekenaga to kakema mayama utawaitakuwe, Waꞌegawama untiye:<p/>Piya, ago kamanaꞌnepa napiyenawaipi atakana waikiye, iye.<p/>Eya, ago kamanaꞌnepa igupi kaetakana waikiye, iye.<p/>Piya, naeba ige Koti miyekini, igeba nae tu mpikibewe, iye.<p/> 
<p><sup>11</sup> Piya, ka ka kinaꞌmiba igora miye kinaꞌmipa: Waꞌegamakaba abibebe piyomaba, kampa uwaimikibewe, iye.<p/>Eya, igeba iyoꞌmipa: Waꞌegamakaba abibebe piyomaba, kampa uwaimikibewe, iye.<p/>We, pi ntagaba aꞌyaꞌma kinaꞌmiba, amana kinape tabe kinape, kaga nagabebe puma nagakibewe, iye.<p/> 
<p><sup>12</sup> Piya, pi ntagaba naeba nantara puwaitamagi ataenawaipa mae igasima, aguntaenawaikaba to kakema kampa napikuwe, Waꞌegawamaba piya untiye, iye. 
<p><sup>13</sup> Piya, Kotiba kasa atokaekenaenaga untipa, marusaenaba abararawaye. Eya, marusa kamanaꞌwapa karenara wama, nagarikena piye.<p/>
<h4>9</h4>
<p><sup>1</sup> Pigoya, marusa kamanapa Kotiba uwaitamagina, aeba mono ukena kipe mampara aota mono nama kikenaenabe uwaimima iyakintiye. 
<p><sup>2</sup> Piya, igeba ka seri nama asitamagini, marusa marupi kanepe yarebe Koti nkaobi atanta paretibe atauguna waintantiye. Pi mparukaba: Aota marune, omintawe. 
<p><sup>3</sup> Piya, akapintiba tabe kai itama akugasimagini akaꞌisa marukaba: Aota marutakaꞌyane, untawe. 
<p><sup>4</sup> Piya, pi mparupi kaema agunta pasa atakena korirasa punta arata atamagini, nayataraꞌmu kamana wainta korirasa airari kaenta pokisi kaga atantawe. Pi pokisi antabaipintiba mana naninta wainta korirasa punta kankabebe, Eroni nkasarasa asaeꞌwa pama iraome nkasabe, nayataraꞌmu kamana kaema aminti ntaba tarabe, kaga atantawe. 
<p><sup>5</sup> Piya, tara enisore kinaꞌmi nkimapa pi polisi abobori potaugunisi, eꞌwasa Koti antara puratakena aukaꞌi kabintase. We, ibaba kanaenama nkagoba aꞌyaꞌmaba kampa aborakuwe. 
<p><sup>6</sup> Pigoya, pabiyama atauguna waintogini, mono kiye kinaꞌmiba pi aota seri namapinti ite tumite puma marusa marupinti asu paiꞌma, mono yugawaipa puntawe. 
<p><sup>7</sup> Aibuguna, monota paitanta yagara kaꞌwainantoba akaꞌisa aota marupintiba asu pasintiye. Asi nasiba kampaye. Aeba aꞌyaꞌma kabuba ka yaga ka yaga asu pasintiye. Piya, aeba uwaba kampa inta, aeba korapa mae uꞌma aeꞌwaka muta atama aꞌyaꞌma kinaꞌmi nkaiboꞌenawaika kaga aeyoba itakena ubasintiye. 
<p><sup>8</sup> Pintanaba Aota Awamusaꞌama mayama tayakintiye: Pi aota seri namapa uwa waintegina marusa aukaꞌi mono yuga uwa pepa, Koti nkaota namapi uma pasikena kipa kampa aborantiyema, napiyiyoma tayakintiye. 
<p><sup>9</sup> Piya, ma kanarapa pi seri nama kanta puma waiye. Piya, wasanamiba paisa mono aegaꞌma iꞌmuntanabe muta atakenaenabe Koti amegana, pipa napiyenawaimpaba aotaꞌenaba kampa potaye. Kampaye. 
<p><sup>10</sup> Piya, naninta nakenaenabe wani ntakenaenabe, wani pasikenaenabe, pika paisa monoꞌamaba uramiye. Eya, paisaenamaba tauꞌama nkagoba wairite kanama waiyegina, aꞌyaꞌmaena uma arupu pukibi ntaga uma nagarikiye. Karaisiti aeba aeꞌwa kuratasa muta atantiye 
<p><sup>11</sup> Piya, kasa aogiyenaba aboramogana, Karaisitiba kasa monota paitaratanti kiyeba ago ampa aborantiye. Piya, kasa monopipa ubaiꞌma, paisa seri mono namapa asugasaye. Piya, kasaꞌenaba wasanamaba kampa ayapisaba puma mampabisaenaba kampaye. Pipa inatisaenawe. 
<p><sup>12</sup> Piya, Karaisitiba aeba aota marupintiba asu pasintipa, aeba memewama kurape purumaka nkawaroma kurape kampa maete asu pasintiye. Kampaye. Aeba aeꞌwa kuratasa muta atama ika puratantika miyaba mikune. 
<p><sup>13</sup> Piya, wasanami iꞌnintana puguniba, paisa mono kiye kinaꞌmiba memewama kurape purumakankama kurape purumaka nkawaro kaenta kagupe maema, wasanami nkiti asunu kaeyuguna, asuꞌa puma iꞌamaba Koti nkaobipa aogi puntiye. 
<p><sup>14</sup> We, Karaisiti kurankama asugaintiye. Piya, Karaisitiba aiboꞌenaba kapa kampa punta, aota mimagina, miyaba Awamusaꞌama nkesegiyenarasa aeꞌwa nkaupa Kotiti muta atantiye. Eya, pi ntugarasa korankamaba napiyenaretasa arirasaena asuꞌa puma, kasa taumaba tamegi aoganti Kotiti kayokayaꞌena potaune. Korankama aguntaenaba aeyobakasaye 
<p><sup>15</sup> Piya, Isu aeba Kotike wasanage atarawaisitakena yagara mima, kasa atokaekena kamana esegi piye. Aeba piya pumagina, taba puratai wasanamitepa waiyabaꞌena utaratantintanabi ubaseno. Eya, akayuyompentanabisa ika puratakenaga Isuba purintiye. 
<p><sup>16</sup> Piya, pure kinaꞌmi kuta etaꞌmaima wasana imikena pepa, marupa taga puꞌwayema umagini etaꞌmaikibewe. 
<p><sup>17</sup> Eya, wasana aogama minteginiba, kotankapa kampa etaꞌmaiyewe. Aeba pureginiba, etaꞌmaiyewe. 
<p><sup>18</sup> Piya, marusa mono kamana pai uma esegi puntapa, igeba yaga aeguma korankapa Koti nkaobi paiꞌatama esegi puntawe. 
<p><sup>19</sup> Eya, maruꞌenaba Mosese aeba ago kamanapisa aꞌyaꞌma Koti unti kamana aꞌyaꞌma kinaꞌmipa uwaimitegina, purumaka nkawaroma korape memewama korape wanipe maemagina, sipisipiwama tete aepe kakintape maema aeyuꞌma, Koti nkisatibe aꞌyaꞌma kinaꞌmi nkitibe aeguse pugasogana wagana kana puntiye. 
<p><sup>20</sup> Aibumagina, Moseseba: Pi kurankamaba Kotiti atokaeritakena untintanaba esegi potaye, untiye. 
<p><sup>21</sup> Piya pumagina, Moseseba seri mono namatibe mono namapisa kankaberibe korapa aeguse puma paiꞌitantiye. 
<p><sup>22</sup> Eya, ago kamana untitaka, korankama uwomantana aeyobaꞌma aogi puwaitaye. Piya, kora kampa pagemisinta, aguntaenawaipa kampa aeyobakasasine. Karaisitiba aeꞌwa nkautasa muta atantiye 
<p><sup>23</sup> Pigoya, mampara monopa mantabinti waintintanama nkamankane. Piya, marasaena aota potakena puntiniba, pabiyama yaga kuratasa aeyobantawe. We, mantarasaena muta atama aota potakenaenaba to awametane. 
<p><sup>24</sup> Eya, Karaisiti aeba tagantanabi ubasintiye. Piya, wasanami serirasa kimaranta aota mono namapa aeba amankane. Pi ntamapinti wanane. Aeba mantabinti asu paiꞌma, ibaba Koti nkaobi uma aborama taoꞌmaeye. 
<p><sup>25</sup> Pigoya, paisa monota paitanta kiye kinaꞌmiba ka ka kabura yagama kurapa maerite wama Kotiti muta atakenaga aota marupintiba ubasi puntawe. Kaboga kaboga puntasa puma, Karaisitiba aeꞌwa kuratasaba piyaba kampa puntiye. Kampaye. 
<p><sup>26</sup> Piya, aeba kaboga kaboga puntemisinta, Koti mampa puntemi ntaga aukigakenaenawapa agobima wairite kanantesine. Pipa kampaye. Kanapa agarosaogana, Karaisitiba ka yaga aeꞌwa nkaupa Kotiti muta atama aguntaena maegaintiye. 
<p><sup>27</sup> Piya, aꞌyaꞌma kinaꞌmitaba kaꞌanto purukubompeka uratantikana, aintiba kamanatepa aborakiye. 
<p><sup>28</sup> Piya pogana, Karaisitiba uwaena kinaꞌmi nkaguntaena mae igaikenaga aeꞌwa nkaupa ka yaga Kotiti muta atantiye. Aibuntana, aintiba to kakema tumikibipa, aguntaenaba to kakema mae igaikena wanane. Aeba aobi punta kinaꞌmi nkiꞌima ibabute ikenaga tumikiye.<p/>
<h4>10</h4>
<p><sup>1</sup> Pigoya, paisa mono ago kamanapa pipa amane. Eya, aogi auꞌwa ainti aborakibintanaba pipa tagantanawe. Piya, paisa monoti pase kinaꞌmika kaboga kaboga paisa muta atantapa, pika ago kamanaꞌamaba kampa arupu puwaitagini igeba aota kina kampa aborawe. Pipa kampaye. 
<p><sup>2</sup> Piya, igeba aota kina aborasinta, pika to ka kaburapa kampa mutapa atasine. Piya, monoti pase kinaꞌmiba apuya puma miye kina aborasinta, to kakeba aguntaenawaikaga kampa napiyesine. 
<p><sup>3</sup> We, aꞌyaꞌma kabuba muta atamaginiba, aꞌyaꞌma yaga aguntaenawaikaba uwa napiyewe. 
<p><sup>4</sup> Eya, purumakankama kuratasabe memewama kuratasabe aguntaena agora maegaikenaba kampa waintiye. Kampaye. 
<p><sup>5</sup> Aibuguna, Karaisiti mampabi tumintana Kotipa maya omintiye:<p/>Kaema agunta pasa katakenaenabe muta katakenaenabe kampa kabogana napintana, kaeba pika nauꞌnepa aboranamintane, iye.<p/> 
<p><sup>6</sup> Piya, kaeti yaga kaekenaenagabe aguntaena maegasima muta atakenaenagabe kampa kaꞌmu pene, iye.<p/> 
<p><sup>7</sup> Piya, naeba maya yuwe: We, Koti, pai kamanaꞌnepa esapi kaemarantasa puma, ibaba kabugaintana wasikena kanauwe, yuwe, untiye, iye. 
<p><sup>8</sup> Piya, aeba ago kamana wasikenaga napima marupa maya untiye: Kaeba kaema agunta pasa katakenaenagabe muta katakenaenagabe, kaeti yaga kaekenaenagabe aguntaena maegasima muta atakenaenagabe, kampa kabegina kampa kaꞌmu pene, untiye. 
<p><sup>9</sup> Piya untana, akaꞌiba maya untiye: We, kabugaintana wasikena kanauwe, untiye. Piyama maruꞌenaba asuꞌa pugasima, kasaꞌenaba ae marupi asima esegi potantiye. 
<p><sup>10</sup> Piya, Isu Karaisiti aeba Koti nkabugaintana wasima, auꞌwapa muta atantiye. Piya puma, aeba ka yaga muta atama esegi pogana aota puratantiye. Karaisiti mputa atakenaenawampa aguntaenarepa maegaintiye 
<p><sup>11</sup> Piya, aꞌyaꞌma mono kiye kinaꞌmiba asi nasi asima mima yogawaipa puma muta atabuntawe. Piya puntapa, aguntaenaba agorapa kampa maegaintiye. 
<p><sup>12</sup> Piya, Karaisiti aeba ka yaga ka muta atama aguntaenaba agora maegaintine. Piya potate, aeba Koti nkayatakanti asu maraꞌmimagina, 
<p><sup>13</sup> kama kinaꞌwapa aki puwaitakana agisa aema miyemika aobi puma miye. 
<p><sup>14</sup> Eya, Karaisitiba ka muta atamagina, pi ntugarasa aeti atokaeyompe kinaꞌmite aota puratantika, aota miyaba mikune. 
<p><sup>15</sup> Pika Aota Awamusaꞌamageba awaga kamanapa mayama aboraramiye:<p/> 
<p><sup>16</sup> Piya, Waꞌegawamaba maya untiye: Ma ntagaba aꞌya waka, wasana to ka atokaekena kamana uma esegi pukuwe, untiye, iye.<p/>Pi kamanapa mayamawe: Ago kamanaꞌnepa igupi atakana waikiye, iye.<p/>Eya, ago kamanaꞌnepa napiyenawaipipa kaetakana waikiye, untiye, iye. 
<p><sup>17</sup> Pigoya, to amato puma maya untiye:<p/>Aguntaenawaikabe antageꞌenawaikabe to kakema kampa napikuwe, untiye, iye. 
<p><sup>18</sup> Piya, Kotiba aguntaena ago asuꞌa pugasaka, aguntaena maegaikena muta atakenaba to kakema kampa waintiye. Kotiti atokaema miyeno 
<p><sup>19</sup> We, naoꞌmitaba, Isu kuratasa kabe aitatantika, kampa taekuruba punta Koti nkaota marupipa asu pasokana kanarasaye. 
<p><sup>20</sup> Piya, pi mparupi asu pasikena kasa eꞌwasa kipa Isu aeꞌwa nkautasa aitatantiye. Eya, auꞌwapa kairasa kabera akumparanta kanta puma aꞌwaeratantiye. 
<p><sup>21</sup> We, mono kiyerentaga kana Koti nkaokinatapa kabirataka, aeti atokaema miyeno. 
<p><sup>22</sup> Piya, aeba korankapa aibarase puma tagupisa ata napiyenarepa aeyobakasima, aota wanitasa tautepisa iꞌnintana aeyobatagaintika, taeba tara tagiba kampa napinta Kotiti tamatititakaꞌya puma aeti atokaema miyeno. 
<p><sup>23</sup> Eya, utaratanti Kotiba tagantanama nkagowe. Pika taeba tara tagiba kampa napinta, aeti atokaema tamatiti pompentanaba kampa kaenta, aeti esegima atokaeyano. 
<p><sup>24</sup> Eya, pika taoꞌmikegaba napima kabima mima, agu kaoꞌenabe aogi yugabe takapintisa aborano. 
<p><sup>25</sup> We, monota aiꞌaru petiba kaꞌisa kinaꞌmiba kampa irosaꞌma wanta uwasuwa puma miyewe. Ige pesapa kampa punta, taoꞌmipa kabiwaitano. We, Karaisiti kanaba aborakena pemika aogima kabiyeno. Koti Ntagarapa a-tikabitaiyo 
<p><sup>26</sup> Pigoya, Karaisiti taga kamanaꞌama nkagoba aogima abibebe punta, aintiba taete ntapiyenarasa agunta kiꞌi nasi nasi pukubompepa, aguntaena maegaikena mutapa to kakema kampa waikiye. Pipa kampaye. 
<p><sup>27</sup> Piya pe kinaꞌmiti tabera iyekuru piginaba, kamana uwaitakenaena igeti aborakana, pabi ntaga tabe yakutasa Kotiba kama kinaꞌwapa kaegaikiye. 
<p><sup>28</sup> Pigoya, taeba abune: Kaꞌwainaba Mosese nkago kamanapa aemita puma ataena pukibipa, tarawo kakaga kinaꞌmiba agama kamanaꞌwapa aboraigini, pi ntagaragaba kampa intarapa puma aeguyigina purikiye. 
<p><sup>29</sup> We, to kaꞌwainaba Koti Ntagara akabitamikaba, ayawema napiyewe. Pi ntagaramaba atokaekena kuratasa aota yagara aboranti, pi kurapa iꞌnintana potamagina, awagaena taminti Nkawamusaꞌamaka uma ata potamagina, aeba tabe kuntuyenaba maekiye. 
<p><sup>30</sup> Eya: Kamparaga ika nkantotaꞌena naeꞌenawe, yemi ntagarama nkagowapa ago agaune. Piya, aeba to ka maya untiye: Waꞌega aeba aokinaꞌmi kamanapa abima aewa aꞌyiginkitakiye, untiye. 
<p><sup>31</sup> We, eꞌwasa Kotiba tarakuꞌma kamparaga ikatepa aboraramikibipa, pipa tabe taekuruyenawe. Tamatitiꞌenara asima esegi peno 
<p><sup>32</sup> Pigoya, tigeba paipa Kotitisa eꞌwasaena maentaka napiyiyo. Pi ntagaba tabe kuntuyenaba timigiri, tigeba aesagaꞌma araga ntuga puma esegi puntawe. 
<p><sup>33</sup> Piya, kaꞌisa yagaba wasanami nkiyobi asiritama, kamparaga kamana uritama tabe kuntuyena timintini, to kaꞌisa yagaba tiyoꞌmikeba kaꞌmasa puma imuguri, tigeba tiyoꞌmiti iyoꞌmaekena atokaentawe. 
<p><sup>34</sup> Eya, tigeba igaꞌna punta kinakaba tintara puwaitantawe. We, kaꞌisa yagaba wasanamiba mone kutati tiparauguripa, tigeba: Aerawane, uma, tigeti asugasima waiyabaꞌenaripa waintika napima, tintawamaba asoya puntawe. 
<p><sup>35</sup> Piya pumagiri, tigeba pi esegi timatitiꞌenabisa tabe ikantana maekibewe. Pipa a-kasiyo. 
<p><sup>36</sup> Piya, tigeba esegima asimagiri, Koti nkabugaintana wasiyiyo. Piya puntiripa, Koti utaritantintanaba maekibewe. 
<p><sup>37</sup> Eya, mono isaꞌamaba maya iye:<p/>Pigoya, aro ntagantowe, iye.<p/>Aborakibi ntagara kampa uwa migaranta aborakiye, iye.<p/> 
<p><sup>38</sup> Piya, arupu kinaꞌnempiba imatiti puma miyaba mikibewe, iye.<p/>We, kapa aꞌwae puma natakibipa, nantawamaba kampa aꞌmu potakiye, untiye, iye. 
<p><sup>39</sup> We, taeba aꞌwae puma ataenabi mpikena kinaꞌmi tupisa kampa mintune. Taeba tamatiti puma tauma waiyaba mikena kinaꞌmi tupisawe.<p/>
<h4>11</h4>
<p><sup>1</sup> Tamatitiꞌenaba pipa Kotiti atokaema agawa pompentanama nkagowe. Eya, taowama kampa agamintanaba taguꞌamaba tamatiti puma tagantana piye. 
<p><sup>2</sup> Piya, paisa kinaꞌmiba esegima imatiti puguna, Kotiba igaogana kanarasantiye. 
<p><sup>3</sup> Piya, taeba tamatiti puma, Koti nkawamutasa maba punti kamanapa abune. Eya, Kotiba kaꞌena kampa waintapisa aborantika agaune. Eborowa Inokowa Nowawa sumawe 
<p><sup>4</sup> Eboro aeba Kotiti amatiti puma muta ataogana, pi mputa ataomeꞌnaba Keni muta ataomepa againtiye. Eya, Eboro amatiti pogana, Kotiba muta ataomentanawaka agaogana kanarasaogana: Arupu yagaragawe, otantiye. We, Eboro puꞌwantemipa amatitiꞌenawampaba kamanapa uwa uyaba miye. 
<p><sup>5</sup> Inoko aeba Kotiti amatiti pogana, purikenaenama auti kampa aegayabomeka Kotiba aoganta ababute mantabinti intiye. Eya, wasanamiba aeka aguyosagaumepa, Koti ababurogini kampa agantawe. Piya, Inoko kampa intogana aeka Koti abogana kanarasantiye, mono isaꞌamaba piya iye. 
<p><sup>6</sup> Piya, wasanama Kotiti kampa amatiti pemipa, Koti abimagina kampa aꞌmu potaye. Kampaye. We, wasanamaba Kotiti atokaekena puntanaba, aeba: Koti uwa mintana aeka aguyosaga kinapa aogi ika imikiye, utegina amatiti pekana kanarasakiye. 
<p><sup>7</sup> Nowa aeba Kotiti amatiti puntiye. Piya pogana, Kotiba ainti aborakibintanaga omogana, Nowaba kamanawapa aegaꞌma ae tunka nkiꞌikenaga wanipisa kareba puntiye. Piya pumagina, aeba pi amatitiꞌena yugawatasa mampabisa kinapa kamanapa uwaitantiye. Eya, amatitiꞌenawata arupu puratakenaenara Nowa paitaratantiye. Abaraꞌamuwe 
<p><sup>8</sup> Abaraꞌamu aeba Kotiti amatiti pogana, Kotiba Abaraꞌamuka kegaꞌe yogana pi kamanapa wasintiye. Piya, aeba kumaꞌwapa kaitegina, Koti amikena maga agakena wama amatiti puta kampa agantome kiꞌi wantiye. 
<p><sup>9</sup> Wamagina, aeba amatiti puma Koti otaome mpara wama, pimpara namu yagara kanta puma umintantiye. Aeba seri nama kimaꞌma mintoginisi, yagarawa Aisakibe Yekobube kaga mintantase. Piya, isigeba pimpa kaga maekibesema, Koti uma esegi puntiye. 
<p><sup>10</sup> Piya, Abaraꞌamuba aꞌyaꞌma yaga aota kumapi ampikenaga napintiye. Pi kumapa esegi waꞌega wantaga, Koti aema aborakibi kumaka napintiye. 
<p><sup>11</sup> Serageba Kotiti amatiti puntiye. Piya, aeba yakari pukena kanapa ago agasoganaba, otanti ntagarama kamanaka: Tagane, uma amatiti puma, kanara yagaraena pukena esegiyenaba maentiye. 
<p><sup>12</sup> Piya, Abaraꞌamuba karenarama aro ntaganto purikena pogini, aepisa uwaena kina aborantawe. Eya, mantarisa noribe kayo wanitasa kepiyape kampa aisompesa puma, pi nkawameta aborantawe. 
<p><sup>13</sup> Pigoya, pi kinaꞌmiba imatitiꞌenayaga mima puꞌwaewantawe. Piya, utawaitanti ntanama nkauꞌwa kampa maenta, pagasara waintogini agama iꞌmu puma mintantawe. Piya igeba: Taeba namuꞌisa kina kanta puma mamparapa aꞌyo ampintune, untawe. 
<p><sup>14</sup> Piya yume kinaꞌmiba ma agowai iyota aguyosagakena untawe. 
<p><sup>15</sup> We, igeba ikaꞌintaesi potanta mpawaika napintasinta, aguyosaꞌma aꞌwae puma wakena kipa agantasine. 
<p><sup>16</sup> We, pipa kampaye. Igeba mawaipa agasima waintome mpa agakenaga ibugantiye. Eya, manta asu agakenaga ibugantiye. Piya puguna, Kotiba abima ige Koti mikenaga kampa ani puntiye. Kampaye. Aeba aota kumaꞌwaipa ago yokege puntiye. 
<p><sup>18</sup> 
<p><sup>17</sup> Piya, Abaraꞌamuba Kotiti amatiti pogana, Koti abaraꞌamu nkagoba agakenaga omogana, aeba Aisakipa ababuma Kotiti muta atakena puntiye. We, paipa Kotiba Abaraꞌamupa maya omintiye: Aisakipisa yakarakiꞌnunkapa uwaena aborakibewe, omintiye. Pi kamanakaba Abaraꞌamuba kampa tara agiba napinta, aeba Koti nkawamu wasima, ka yagarantowa aeguma kaema muta atakena puntiye. 
<p><sup>19</sup> Piya, aeba mayama napintiye: Aeba puꞌwakanaba Kotiba kanara asitakiyema, napima ababute wantiye. Eya, aeba yagarawa purintapisa ababunti nkawametane. Aisakiwa Yekobuwa Yosepewa sumawe 
<p><sup>20</sup> Aisaki aeba Kotiti amatiti pumagina, Yekobuke Isokeba aꞌmu puwaisitama, ainti Kotitisa isigeti aborakibintanaga uma aꞌmu puwaisitantiye. 
<p><sup>21</sup> Yekobu aeba Kotiti amatiti puma, purikena puntanaba aeba aꞌmuntana Yosepe ntagara tara isimintiye. Piyama asawata amagi tara puma Kotiti parokaema aꞌmu puwaisitantiye. 
<p><sup>22</sup> Yosepe aeba Kotiti amatiti pumagina, purikena kanaꞌwa arosaogana, Isureyo kinaꞌmiba Isipi ma kaitakibe kamanapa untana, ayampuwaka: Uma kainataiyo, uwaimintiye. Mosesewe 
<p><sup>23</sup> Mosese anoge abage isigeba Kotiti isimatiti puma yakari potamaginisi, Mosese agausumepa aogi yagara aboraoginisi, isigeba mabisa waꞌegawama kamanakaba kampa isiyekuru pumaginisi, kakaga u kakatantase. 
<p><sup>24</sup> Mosese aeba Kotiti amatiti pumagina, anosantanaba Parao nkaragama ntagarawe usanagaba kampa abuntiye. 
<p><sup>25</sup> Piya, aguntaenama nkigaenawapa aronkanto waiyogana pipinti uma pasisanagaba kampa abogana, aeba Koti nkaokinaꞌmige kuntaena maesanaga abuntiye. 
<p><sup>26</sup> Eya, aeba Isipi kinaꞌmi mpone kuta maesanaga kampa abogana, aeba Karaisiti aborakibi ntagaga karana potaumekaba: Kanarane, untiye. Piya, aeba Kotitisa aogi ika mpaekenaga piya puntiye. 
<p><sup>27</sup> Piya, Mosese aeba Kotiti amatiti pumagina, mabisa waꞌega yagarama nkamoꞌenagaba kampa aekuru punta, asima Isipi maba kaintiye. Piya, aeba Koti nkagasu puma asima esegi puntiye. 
<p><sup>28</sup> Aeba amatiti puma, Pasoba naninta nama, korapa maema kabera paiꞌataogana marusa yagara aegukena enisorewama agama kampa iyeguntiye. 
<p><sup>29</sup> Isureyo kinaꞌmiba Kotiti imatiti puma, tete kayo wanipi uwa mari wasuma taꞌeyuguna, Isipi kinaꞌmiba igate ikaꞌi wauguna, wanipa tumima iyeguyogini pirintama naesuwaewantawe. 
<p><sup>30</sup> Igeba Kotiti imatiti pumagini, wama Yeriko kuma tonaentisa tarumaema yaga ainkinki puguna, yabatasa kimaranta kibi takuma aigasabaꞌwantiye. 
<p><sup>31</sup> Piya, kumi wae Areyabu aeba Kotiti amatiti pomekana, aeba tara yagara tara pi kumapinti kiya pukena wausuguna isiyoꞌmaeyomekana, pi kumatasa kamana akayuyome kinake kampa purintiye. Uwaena to kinaꞌmiba imatiti puntawe 
<p><sup>32</sup> Pigoya, aya kita to kamanapa amato puma usuwe. Aꞌyaꞌma kinaꞌmika yosinta eꞌero kamana yosine. Piya, Kitiyoniwa, Parakiwa, Samusoniwa, Yepitawa, Tebitiwa, Samuweriwa, aꞌyaꞌma poropete kinana, sumagini, 
<p><sup>33</sup> igeba Kotiti imatiti puntawe. Piya, igeba maꞌena puma uwoma kina igaintawe. Igeba arupu puwaitakena yuga puntawe. Igeba Koti utawaitanti nkauꞌwapa maentawe. Igeba araiyoni yagami iba nakena iwamupa akunintawe. 
<p><sup>34</sup> Igeba tabe yakunkama nkesegiyenawapa asugasima atuꞌmantawe. Igeba iyegaka wauguna paroya ntoginkamaba kampa irisantiye. Igeba magimagiyenabisa esegiyenawaipa maentawe. Igeba esegi maꞌena kina aborantawe. Igeba namuꞌisa kama kinapa igarubakaentawe. 
<p><sup>35</sup> Wayaꞌmiba iyokinapa purintapisa ibabuntawe. Pigoya, to kaꞌisa kinaꞌmiba asima aogi eꞌwasaena maekenaga napiyuguni karana itama iyeguyuguni: Aerawane, ute puꞌwantawe. 
<p><sup>36</sup> To kaꞌisa kinaꞌmiba kuntaena maeyuguni karana puwaita kinaꞌmiba igeꞌwaintanaraka akayasuma, igaꞌna kasutasa iyegumagini, esegi igaꞌnarasa kirokaetama, igaꞌna namapi itantawe. 
<p><sup>37</sup> Piya, igeti kuntaena maeyuguni, yaba kasutasa iyeguntini, sorasa ikapi katisakasi puntini, paroya ntogirasa iyeguyuguni puꞌwantawe. Piya, igeba sipisipa aribe meme aribe maema itasaenaba puma mimagini, kusi kinaꞌena puma miyuguni, wasanamiba tabe kuntuyena imima, ataena puwaitantawe. 
<p><sup>38</sup> Igeba kaꞌme mparibe amu wainta maribe wagana kana puma, yaba nkagepintibe ma agepintibe uma kakama mintantawe. We, pi kinaꞌmiba aogima imatiti puma, mampabisa kinaꞌmipa asu igasuguni igege mikenaba kampa kanarasantiye. 
<p><sup>39</sup> We, aꞌyaꞌma pi kinaꞌmiba Kotiti imatiti puguna, Koti igaogana kanarasantiye. Aibogini, igeba Koti utawaitanti ntanama nkauꞌwapa kampa maentawe. Kampaye. 
<p><sup>40</sup> Piya, pi nkagoba mayamawe: Koti aeba aogima againtintanaba uwa aeꞌwaratakena puntine. Eya, paisa imatiti pume kinaꞌmiba kampa paitaratama taobi puma taebe kaga aotaꞌena aborama auꞌwapa kaga maekune.<p/>
<h4>12</h4>
<p><sup>1</sup> Pigoya, pi paisa kinaꞌmiba imatitiꞌenawaipa tayakintawe. Piya, iwaga kamana tabe ibina kanta puma taenkima kobe purataye. Piya pegi, taeba aꞌyaꞌma kuntaenarepe tarakuri nkaguntaenarepe kasima, tantawamaba maema esegi puma ankagasi ankagasi puma utaratanti mpono kiꞌi karuseno. 
<p><sup>2</sup> Eya, taowamaba Isuti agano. Aeba amatitiꞌenama nkagoba mima paitaratama tamatitiꞌenama nkauꞌwapa aborakena yagarawe. Piya, aeba aꞌmuntanabi mpikenaga napima, auki nakiyena maema yara puꞌma anintanama nkabobori asugaintiye. Piya, ibaba Koti nkaemu yabaera ayatakanti asu maraꞌmintiye. Pika napima aepa agano. Koti kuntaena tamemipa aota puratakenawe 
<p><sup>3</sup> We, tigeba Isuka aogima ntapiyiyo. Piya, agunta pume kinaꞌmiba kama potantaka, pipa aeba asima esegi puntiye. Pika tigeba napima, tintawamaba uwasuwa puma tiyonanta puma wareꞌnasanaga, aeka napima asima esegi piyo. 
<p><sup>4</sup> Piya, aguntaenaba aeguma mabi nkatakenaraka maꞌena pepa, koratipa kampa pagiye. Asugasima esegi piyo. 
<p><sup>5</sup> We, Koti: Naene ntagararawe, urimima esegi puritami kamanapa ago tigeguꞌa piya, a. Pipa mayamawe:<p/>Yagaranene. Waꞌegawama parutu pugatakanapa, uwaena kantaba a-peno, iye.<p/>Piya, aeba parutu pugatakena kuntuyena kamekanapa, kantawamaba anuntanaba a-peno, iye.<p/> 
<p><sup>6</sup> Eya, Waꞌegawama ka yagara agu kaoꞌena potamipa, antabaipinti parutu potakena yugaba piye, iye.<p/>Piyama ae tunkapa ababuwaitami kinapa eru kasutasa parutu puwaitaye, mono isaꞌama piya iye. 
<p><sup>7</sup> Piya, Kotiba parutu puritakenaenarapa a-tiyekuru puma, asima esegi puma maeyiyo. Eya, Koti ntagarawa mpiyegana piya puritaye. We, yagarawampa aba kampa parutu potamipa, aempaye. Pipa kampaye. 
<p><sup>8</sup> We, aꞌyaꞌma Koti tumpitepa parutu puratakena yugaba tantabaipi puntiye. Piya, aeba kampa parutu puritamisinta, tigeba yagarawapa kampa mima keꞌisa yagara kanta pesine. 
<p><sup>9</sup> Pikaba to ka urimekiri abiyo: Mabisa tabarempagiba parutu purataga, ige igeba asagayuyune. We, taguꞌama nkaba igepa asu igasima mintika, amentapinti miyaba mima eꞌwasaenabi mpiyeno. 
<p><sup>10</sup> Piya, mabisa tabarempagiba igewai ntapiyena aegaꞌma aro ntaganto parutu puratagana, Kotiba taoꞌmaekenaga parutu puratamika, taeba aotaꞌenawapi ubasikune. 
<p><sup>11</sup> Piya, marupa parutu puratamika tanta asoyaena kampa punta kunta pegi, aintiba parutu puratami kinaꞌmitaba paru puma arupuyenama nkauꞌwapa tayapisa aborakune. Asima esegi piyo 
<p><sup>12</sup> Piya, magimagi tiyenkama nkagaꞌnawapa pakisuma yogaba esegima piyo. Tigisa puꞌwaintakiripa aebarotama asima esegi piyo. 
<p><sup>13</sup> Pugage kinaꞌmi nkigisa airigiwasanaga, kepa arupu puma iyoꞌmaeyakana itawano. 
<p><sup>14</sup> Eya, tigeba wasanaba kaga paruyenabi mpikenaga yogaba piyo. Tigeba aota kina aborama mikenaga esegi piyo. We, aotaꞌena kampa waintaiꞌnagiba Waꞌegaba kampa asu agakibewe. 
<p><sup>15</sup> Piya, tigetisa kaꞌwainaba Koti nkawagaenawa kaisanaga aogima kabiyiyo. Piya, tikapi asa kamana aborama ata puma uwoma kinapa iꞌnintana puwaitasanaga, aogima kabiyiyo. 
<p><sup>16</sup> Piya, Iso puntisa puma kumiyena pusanagabe Koti mpono akabitasanagabe aogima kabiyiyo. Piya, aeba amaru yagarama mpaekenaenaba aꞌnanto menkamima ka nakenaenawapa ika puntiye. 
<p><sup>17</sup> Ika pumagina, aintiba pi nkaꞌmuntana maekena pogana Kotiba kakataogana, Isoba tabera kubeꞌena puma aguyosagaomepa, ae aꞌwae puma maekena kipa kampa waintantiye. Pipa ago abintawe. Ae puntisa pusanaga aogima kabiyiyo. Moseseti wanane, Isuti aboraune 
<p><sup>18</sup> Pigoya, tayabamagi Sainai amuti aborama auꞌwaintaꞌenamati iya atantasa puma arirasaenariba kampa aegaꞌma aborawe. Kampaye. Piya, igetiba tabe yakupe tununtanabe ibinape antaruyenabe irari kaentiye. 
<p><sup>19</sup> Eya, pikuriyama aga yogana, awamu aga agasiya kamana yogini, abume kinaꞌmiba: To kakema kampa abema tagigaye, untawe. 
<p><sup>20</sup> Piya, Kotiba maya untiye: Ka yagaramawo, yagamawo, pi nkamuta aya atama arakurekiripa, yaba kasutasa aeguyigina pureno, untiye. Piya yogini, pi kamanakaba iyekuru pumagini: Toba a-so, untawe. 
<p><sup>21</sup> We, iyekuru puguna pintanaraka Mosesegeba: Naekuru puma tabaraba puwe, untiye. 
<p><sup>22</sup> Pigoya, tigeba pi nkamuti wanane. Tigeba Saiyoni amuti irosantawe. Eya, miyaba Koti mintiti ae kumati mantarasa Yerusaremi aborakenaga irasantawe. Pi kumatia enisore kina kampa aisuwaeyama kina mima iꞌmu pewe. 
<p><sup>23</sup> Pitaꞌi marusa yakarakiꞌnu, mantabinti igewai kaenta kinaꞌmi aki pegana, aꞌyaꞌma kinaꞌmi kamana abima pakobemi ntagara Kotiba miyegini, aota puwaitanti arupu kinaꞌmi nkimaba miyewe. 
<p><sup>24</sup> Eya, pitaꞌi Isu, aeba Kotike wasanage atarawaisitama kasa utaratanti kamanaꞌama nkauꞌwa aborakena yagara mintiye. Eya, pitaꞌi paitatanti kurankapa, Eboro kura agasima awaga yugaba aogima aboranti kurapa waintiye. We, pi kumati aborakenaga aota kina irosantawe. Koti unti kamanapa aogima kabiyeno 
<p><sup>25</sup> Pigoya, taga kamana urimintiꞌnapa tikaꞌintaesi pusanaga kabima miyiyo. Piya, paitakaꞌya mabi Mosese aeba esegi kamana uwaitaogini, akayuyuguna Kotiba ata antotaꞌena imogini kampa kakama mintantawe. We, Kotiba mantabintisa esegi kamana uramintegi, takaꞌintaesi potaompeka antotaꞌena tamemipa kampa kakama mikune. 
<p><sup>26</sup> Piya, paipa Koti nkawamuꞌama mampaba imimapa puntiye. Piya puntana aeba to ka maya uramintiye: Naeba to ka yagaba ma abiba kampaye. Mantabe mabe kaga asari pukuwe, untiye. 
<p><sup>27</sup> Pi kamanapa: To ka yagaba, uma piyama tayakiye: Aꞌyaꞌmaena pumarantintanaba asari puma aebasanakana, to kaꞌisa kampa asari pukenaenaba uwa waikiye. 
<p><sup>28</sup> Piya, kabiratakenaena maekubompeka taꞌmu peno. Pipa kampa asari pukenaenawe. Eya, pika Kotiti taꞌmu potamagi, aeꞌwa nkabemintana puma agegaꞌe asagayuma aeka taekuru peno. 
<p><sup>29</sup> Pipa nanagawe: Kotirempa aeba yaku tawaewakenaenama nkagowe.<p/>
<h4>13</h4>
<p><sup>1</sup> Pigoya, tigeba mono kinatawa, tiyoꞌmipa timaba imiyaba miyiyo. 
<p><sup>2</sup> Tigeba naꞌmu kina a-tiyogapa agagasima kayone puwaitaiyo. We, paipa kaꞌisa kinaꞌmiba pabiyama wasanawema napimagini, enisore kinapa kayone puwaitama ibabuntawe. 
<p><sup>3</sup> Tigeba igaꞌnabi mpinta kinaꞌmikaba aogima napintiri, tiba puritasuma napima iyoꞌmaeyiyo. Piya pumagiri, tigeba iꞌwaita kuntaena maeya kinaꞌmikaba napintiri, kaga wasanarawema napima iyoꞌmaeyiyo. 
<p><sup>4</sup> Pigoya, ibaꞌena pukenaenaba kanaraꞌenawe. Pipa asagayuntiri, iꞌnintana potasanaga kabima mima kumiyenaba a-piyo. Eya, kumiyena pe kinape kupiyona pe kinape Kotiba ata ikapa imikiye. 
<p><sup>5</sup> Tigeba mone kutakaba asi nasi maekenagaba a-ntapiyiyo. Wairitanti nkawameta maema uwa miyiyo. Piya, Kotiba maya uramintiye: Naeba kaege ampima kampa nakabikatama kamparakaꞌya katakuwe, untiye. 
<p><sup>6</sup> Eya, taeba pika napima tara tagi kampa napinta, mayama esegima seno:<p/>Waꞌega aeba naoꞌmaenta yagara mintemika, kampa naekuruba pukuwe, yeno.<p/>Piya, wasanamiba igeꞌwai ntapiyenabisaba nana punatakibewe. Pipa kampaye, taeba yeno. Paisa monoꞌama nkawameta aegaraune 
<p><sup>7</sup> Pigoya, tigeba Koti kamana uriminta paitaritanta kinatimpikaba napiyiyo. Eya, mono kita nasi nasiyenawaimpa nkagowapa agama imatiti pesa piyo. 
<p><sup>8</sup> Piya, Isu Karaisiti aeba aibe ibabe aꞌyaꞌma yagabe kaꞌyaga miyemisa puma miyabane. 
<p><sup>9</sup> Piya, tonarona kasa kamanaꞌama ampa tibaibusanaga kabiyiyo. Piya: Pipa nao, pipa a-ntao, kamana wasiye kinaꞌmiba pintanarasaba esegiyenaba kampa maeyawe. Kampaye. We, tigeba Kotitisa awagaena maeyaka tigupa esegi pukibewe. 
<p><sup>10</sup> Pigoya, taetiba aota arata yare awameta Karaisitiba mintiye. Piya, paisa seri namapisa mono wasiye kinaꞌmiba aota aratarasaba nakenaba kampa maeyawe. 
<p><sup>11</sup> Piya, monota paitanta kiyema yagama kurapa maete seri nama nkaota marupintiba ima, aguntaena maegaikena muta atabuntiye. Piya puntana, yagama nkauꞌwapa abeꞌi yakupi tumpa kaegasi puntiye. 
<p><sup>12</sup> Piya pumagina, Isuba abeꞌi kagisa awari auki nakiyenaba maema aeꞌwa kurankatasa aota puratakena puntiye. 
<p><sup>13</sup> Piya, taegeba kuma abeꞌi wasu puma aeti atokaema ae kuntu yugabi ubaseno. 
<p><sup>14</sup> Eya, mampabipa waiyaba kumaꞌamaba kampa taeti waiyegi, taeba taga kuma aborakibika aobi pune. 
<p><sup>15</sup> Pigoya, pika aeti atokaema Kotiti taꞌmu potakena muta atano. Eya, agewapa maete ima tawamuꞌama nkauꞌwapa muta atano. 
<p><sup>16</sup> Piya, aogiyena pukenaenabe titasaenarasa tiyoꞌmipa iyoꞌmaekenaenabe, uwasuwaba a-piyo. Piya puma iyoꞌmaekibepa, tigeba Kotiti muta ataiginaba aꞌmu pukiye. 
<p><sup>17</sup> Pigoya, paitaritanta kinatimpi imentapinti mima kamanaꞌwaipa wasiyiyo. Piya, igeba aintiba Kotita uma aborama yogawaimpa nkawaga kamanapa omikenaga tigupipa kabiwaitawe. Aibigiripa, tigeba kamanaꞌwaipa aegaꞌma wasiyiyo. Wasikibepa, igeba iꞌmuntanabisa aogima kabiritakibewe. Aꞌyugu intawama kuntaꞌyaga kabiritantiniba, kampa aogima tiyoꞌmaekibewe. Nagarikena kamanane 
<p><sup>18</sup> Pigoya, tigeba Kotiti nunamu yigina taoꞌmaeyano. Piya, taeba aꞌyaꞌma yaga arupu puma nasikenaenareka Koti nkaobi kamanatepa kampa waintiyema, napiyune. 
<p><sup>19</sup> Eya, nunamurasa naoꞌmaeyigi, Koti naoꞌmaeyakapa tigeti karuꞌena to kake ampa aborakuwema, esegima urimuwe. 
<p><sup>20</sup> Pigoya, Waꞌegare Isu aeba yagawampate tabe kiyerene. Isuba atokaeratayaba mikenaga purogana, paru Koti aeba purintapisa asitantiye. 
<p><sup>21</sup> Tigeba aeꞌwa ntapiyena aegarakenaga, asitanti Kotiba aogiyenarasa paitaritama tiyoꞌmaeyano. Eya, Isu Karaisiti ntugarasa ae aobi kanarasantintana tagupipa aꞌyaꞌma aborano. Ae agegaꞌeba asagayuyaba miyeno. Tagane. 
<p><sup>22</sup> We, naoꞌmitaba, naeba aro kamana kaema urimekiripa, esegi kamanaꞌnepa abigina ataba a-peno. 
<p><sup>23</sup> Pigoya, taoꞌyagara Timotika urimekiri abiyo. Aepa igaꞌnabisaba ago akariyoba atakana, agaro kanakapa ababurekara tigeti wakuse. 
<p><sup>24</sup> Pigoya, aꞌyaꞌma paitaritanta kinatimpibe aꞌyaꞌma Kotiti atokaenta kinaꞌmibe, taetisaba: Aya pewe, uwaimiyo. Piya, Itari marisa kinaꞌmiba kaga: Aya pewe, yewe. 
<p><sup>25</sup> Pigoya, Koti nkawagaenawapa aꞌyaꞌma kinaꞌmititi waima waiyeno.<p/>