1 Nae Poro, Koti kayokaya yagara, Isu Karaisiti nkaposoro nawe. Aeba unatama, Koti uwaitanti kinaꞌmi nkimatitiꞌena esegi puwaitaoma, naba punatantine. Piya, taga kamanapa abibebe pigina anosakini Koti kanta puma mima,
2 utarantanti nkeꞌwasaenabi ubasikibeka unatantine. We, Kotiba kumparipa kampa ukena yagara mimagina, paitakaꞌya eꞌwasaenawapi ubasikibeka utaratamagina,
3 aintiba aeꞌwa kanapa pi kamanaꞌama nkauꞌwapa mono kamanaꞌwapisa aboraramintiye. Eya, tauꞌikena yagarare Kotiba aeba ago ugasima pi ntugaba namegi kamanaꞌnetasa uma aborauwe.
4 Taitasi kati ma nkisapa kaeyuwe. Piya, kaeba taga nae yagara kanta puma mimagina, kamatitiꞌena tae pompesa puma kaꞌmasa pene. Pigoya, taba Kotige, tauꞌikena yagarare Karaisiti Isuge, isigetisa awagaenabe paruyenabe kaeti waima waiyeno. Monotasa kiye kinaꞌmi kamanane
5 Pigoya, Kariti mariba mono yuga atunkapa waintoga: Puma nagaraoma, megatamagi, aꞌyaꞌma kumaka kumaka monota kabiye kinaꞌmikaba: Asiwaitaoma, ugamintone.
6 Piya, kaꞌwainaba wasanami nkiyobipa kamanaꞌwa kampa waintakanaba, anara kaꞌanto mintakanaba, araga yagarawaisiti aguntaena pusanagaba kamanaꞌwaipa kampa wainta, ino ibagi kamana kampa akayunta Karaisititi imatiti pigina kabikibi, piya kina kiyaba asitao.
7 Piya, pasitori kinaꞌmaba aeba Koti ntugara kabikenaenara mima aꞌyugu kamana aeti waisanagaba kabima miyeno. Aeba agebigoꞌenaba a-peno. Karuꞌenaba anta aukikenaenaba a-peno. Esegi wani ntama aiboꞌenaba a-peno. A-nkaibasanano. Aeba mone kuta asugasima maekenaenagaba a-nkabeno. Kampaye.
8 Aeba wasana kayone puma kabiyeno. Aogiyenagaba aepa abugano. Aeꞌwa nkaupa kabima mima, Kotintana aegaꞌma, aota mima, napiyenawatapa aogima kabiyeno.
9 Aeba taga kamana omogana abintitapa esegima asiyeno. Piya pukibepa, aeba wasanamipa arupu kamanapa aogima uwaimimagina, akayuye kinaꞌmi kamanapa akayuma asu igasano. Kariti maripa uwaena kinaꞌmiba kumpari kamana untawe
10 We, pi mpariba uwaena kinaꞌmiba taga kamanapa akayuyewe. Igeba auꞌwa kampa wainta kamana uma wasana imiyoꞌena puwaitawe. Eya, Yuta kina, i kasakena tupisa kinaꞌmiba piya pewe.
11 We, piya kinaꞌmi nkiwamupa akunkitao. Piya, igeba kota mpaekenaga aꞌyuguyenaba puwaiyakima, piyaenaba kaꞌisa kinaꞌmi ntapiyenaba waya yagarawaipe ibaibewe. Ibaibegana, pi kinaꞌmi nkiwamupa akunkitao.
12 We, paipa ka Kariti poropete yagarama aokinaꞌmikaba maya untiye: Kariti kinaꞌmiba aꞌyaꞌma yaga kumpariꞌena puma, kabu kina kanta puma mima, iyekita karegi kinane, untiye.
13 Pi nkawaga kamanapa tagane. Piya, kaeba esegi kamanatasa uwaimegini, igeba imatiti pukenaraka esegima asiyeno.
14 Eya, Yuta kinaꞌmi nkamani kamanapa a-nkaegaꞌma, taga kamana ikabita kinaꞌmi nkimentantiba a-mpiyeno.
15 Piya, wasanami ntapiyenawaipa nare ntare peginaba, aꞌyaꞌmaenaba iyobipa nare ntare piye. We, kampa imatiti puma kamparagaena napiye kinaꞌmitiba, kaꞌenaba kampa nare ntarepa piye. Kampaye. Igeꞌwai napiyenawaintaga iguꞌyaga kaga iꞌni pawaye.
16 Piya, igeba iwamutasaba Kotipa aegarauwe untiniba, nasikenaenawaitasaba Kotiba ikabitawe. Piya pegana, Kotiba igekaba aema itaye. Igeba kamana akayumagini, aogiyena pukenaenaba kapa kampa abae pewe.
1 Pigoya, kaekantanaga napima maya yuwe: Kaeba wasanaba arupu kamanapa uwaimo.
2 Piya, kaeba anasa kinaꞌmipa mono uwaimegini, igeba paebuma mima, arupu puma mima, napiyenawaitapa kabima mima, imatitiꞌenabe agu kaoꞌenabe monota asima mikenaenabe tagantana pigina waiwaitano.
3 Piya, anasa waeꞌmikeba pabiyama uwaimegini, igeba monota aota mima, akaya kamana kampa uma, aibo waninkama igaꞌna puwaitasanaga kabima mima, aogiyenama nkagowapa puwaiyakiyo.
4 Puwaiyakimagini igeba kasa waeꞌmipa uwaimigini, igeba iwaegipe yagarawaipe agu kaoꞌena aogima puwaitama,
5 napiyenawaitapa kabima mima, nare ntare puma mima, namapintisaena aogi puma, kayonena puma, iwaegi nkiwamu wasiyiyo. Piya, Koti kamana akayasuma maete tumisanaga, piya piyo.
6 Piya, masimabimikeba pabiyama esegima uwaimegini, igeba iꞌwaitapa kabima miyiyo.
7 Pigoya, kaega aogiyenamana paitawaitama, aꞌyaꞌma aogi yuga pegini agama kaegaraiyo. Mono untanapa antage kamanakeba kagapa a-nkuwaimima, taga kamana paebuma uwaimo.
8 Piya, aogima parutu kamana yegini, kama kinatimpiba akayapa kampa uma taeti ata kamanaka aisakateginiba, igeba ini piyo.
9 Pigoya, kaeba kayokaya kinapa kamana uwaimegini, igeba kiya kinaꞌwaimpi nkimentanti mima, aꞌyaꞌma kayokayaꞌena aogima puwaitaiyo. Piya, igeba iwamupisa kamanapa a-nkakayuma,
10 kuntanaba a-punta mima, aꞌyaꞌmaenawaipa tagantanamana puwaitaiyo. Aꞌyaꞌmaenawaika piya pumagini, tauꞌikena yagarare Koti aeꞌwa kamanaꞌama nkauꞌwapa aboraigini iꞌmu piyo. Taeba nare ntare puma Karaisiti kanaka aobi peno
11 Pigoya, aꞌyaꞌma maga maga kinaꞌmite tauꞌikenaraka Koti nkawagaenawampa aborantine.
12 Piya, atama mpikenaenarepe mampabisa iꞌnintanarepe atasanagaba aborama purayakima: Mampara paebuma arupu puma mima Koti kanta puma miyiyomagina, awagaenawapa aborantine.
13 Eya, tabe Kotire, tauꞌikena yagara Karaisiti Isuba eꞌwasaenabi aborawaeyakana aeti aogima atokaekenaga: Aobi puma aota miyiyoma, utaratantine.
14 Piya, aeꞌwa nkauma kasima, aꞌyaꞌma antageꞌenabisa ika puma taba puratantegi, ae tunkampitaba nare ntare puma mima aogi mono yuga pukenaga esegi pukubompeka, puꞌma aogi puratantiye.
15 Pigoya, kaeba ma kamanaꞌama nkagoba aogima uwaimimagina, kiya kinaꞌmi usu kamana uma asiwaitagini ataenawaipa aebasanaiyo. We, kaekaba wasanamiba: Uwa yagaragawe, usanagaba, aogima kabiyo.
1 Piya, kaeba kaoꞌmipa asi nasiba uwaimegini, igeba kabiwaita kinaꞌmipe kiya kinaꞌmipe imentapinti mima, igeꞌwai nkiwamupa wasimagini, aogi yuga pukenagaba yokege piyo.
2 Piya, igeba a-nkakayasuwaitamagini, maka kamanapa a-nkuwaitamagini, paru puma mima aꞌyaꞌma wasanamipa kayone puwaitaiyo.
3 We, paipa taegeba aiboꞌena pumagi kamanapa akayuntune. Piya puwakana, kewamaba antage kiꞌi tabaibogana, tonarona tagu iꞌnintanamage kamparaga taꞌmuntanamage igaꞌna puratantine. Piya purataoga, taeba asi nasiba wasana ata puwaitama igeꞌwai mparuta maekenagaba napintune. Piya puwakini, wasanamiba kama purataugu, taeba taoꞌmipa pabiyama kamaena puwaitantompene.
4 Pigoya, aintiba tauꞌikena yagarare Kotiba aogiyenama nkagowa aborama agu kaoꞌena pukena antaraꞌenaba aborantipa tauꞌima taba puntiye.
5 Piya, aeba taere nkarupuyena pompe ntugaraka wanane. Aeꞌwa nkagutasa antara puratamagina, Aota Awamusaꞌwatasaba aeyobatatama aota aboraratama, kasa yagara kanta puma taba puratantine.
6 Eya, tauꞌikena yagarare Isu Karaisiti ntugarasa Kotiba Aota Awamusaꞌwapa asunu kaeyogana, taetiba tumpa pumaewantiye.
7 Piya, aeba awagaenawatasa arupu purataka, taeba aeti atokaema waiyaba eꞌwasa maekenaga asunu kaerataogana, taeti tumintiye.
8 Pi kamanapa tagane. Piya, nae nabemika kaeba pi kamanapa esegima uwaimegini, Kotiti imatiti peꞌnagiba asima paebuma mima aogi yuga pukenaga asi nasi napiyiyo. Pi ntugaba kanara puma wasanaba iyoꞌmaeye.
9 Pigoya, tonarona uwa ibigata nasikena kamanape, aotumpi kamanape, akayukena kamanape, ago kamanataka maka ukenaenabe, pintanamaba kampa taoꞌmaema aogi nakenaba kampa aekiye. Pipa kaeba kakabitao.
10 Piya, kaꞌwaina aeba mono kinaꞌmi ntapiyena paibekanapa, katano, tararano, arupu potagana kampa abekanapa, kasagana abira miyeno.
11 We, kaeba abintane. Piya kinaꞌmaba aeba kepa kaitegina aguntaena puma, aeꞌwa nkaupi pima piye. Nagarikena kamanane
12 Pigoya, Atemasiwo, Tikikasiwoma otakana kaetiba wakanapa, kaeba Nikoporisi kumati ampa nagao. Piya, tabe esiba yagaba pi kumata ampikuwema, napiyuwe.
13 Pigoya, ago kamanaꞌyaga yagara Senasibe, aoꞌmi Aporobe, isigeba kaeti aboraisiginapa, keꞌi kusi pusanaga nasikenaenarapa isiyoꞌmaeyo.
14 Piya, taokinaꞌmipa puwaiyakegini, igeba asima paebuma mima asi nasiba aogi yuga puma, kusi pe kinapa iyoꞌmaeyigina, monoꞌwaimpaba auꞌwantagaꞌena peno.
15 Aꞌyaꞌma naege miye kinaꞌmiba: Aya pene, ugamewe. Kaeba imatiti puma agu kaoꞌena purata kinaꞌmipa: Aya pewe iyema, uwaimo. Pigoya, awagaenaba aꞌyaꞌma tigeti waima waiyeno.
Poro piya isa kaentiye.