1 Nae Porona: Karaisiti Isu nkaposorogawe, Koti abogana unatantemine. Piya, taeba Karaisiti Isuti atokaema utaratanti nkeꞌwasaenabi ubasikenaraka aposoro unatantine.
2 Timoti, kaeba nabugai ntagaranempakati ma nkisapa kaeyuwe. Koti tabage, Waꞌegare Karaisiti Isuge, isigepisa awagaenabe, isintaraꞌenabe, paruyenabe, kaeti waima waiyeno. Aogi kamanakaba tanipa kampa pukune
3 Nayabamagiba Koti aegarantasa puma naegeba pabiyama aegaꞌma kayokayaꞌena potaogana, ae aobipa napiyenanempaba nare ntare piye. Aibegina, naeba asi nasiba asekape arape nunamu uma kaeka napima Kotiti naꞌmu potauwe.
4 Piya, naeba kaoꞌnu pageka napimagi, nabemika kagate tabera naꞌmu pusanaga nabiye.
5 Naeba kamatitiꞌena waigatantika napiyuwe. Pipa tagantanawe. Piya, maru paitama arogampa Arowisiba amatiti puntiye. Piya poga, naeba abuntuwe. Kaeba taga kamatiti potane.
6 Piyama napiyenaga pugatakana, kaeba napiyomawe. Piya, nae kaꞌnota naya katauwagana Kotiba yoga pukenaga aꞌmuntana kamogana kantabaipi wainti, pipa wasanama yaku pukama to kaeyamisa puma ituru po.
7 Piya, Kotiba taemarakenaenaba kampa tamiye. Kampaye. Aeba esegi puma mikenaenabe, agu kaoꞌenabe, taupa kabikena esegiyenabe, tantabaipi aborama ituru purataye.
8 Piya pika, kaeba Waꞌegarempa kamana ukenaba a-kani po. Piya, naeba igaꞌna yagarawantawa, kaga naeka a-kanipa po. Kaeba Kotitisa esegiyena maemagina, kaeti aborakibi kuntuyenaba aesagaꞌma mono auꞌwapa uma aborao.
9 Piya, Kotiba tauꞌima aota mikenaenara taba puratantiye. Aogi pompentanareka wanane. Aeꞌwa ntapiyenarasa taba puratantine. Eya, paitakaꞌya aeba Karaisiti Isu ntugarasa awagaenawapa utaratamagina,
10 ibasa yagaba pi nkawagaenama nkauꞌwapa aboraramintiye. Piya, tauꞌikena yagarare Karaisiti Isu aeba ampa aborama purikenaenama nkauꞌwapa aegugasima, aogi kamanaꞌwatasa eꞌwasaenabe miyaba mikenaenabe aboraramintiye.
11 Piya, pi aogi kamana aborakenaga aeba naeka: Mono kamana yoma, aposoronabe tisaenabe poma, unatantine.
12 Piya, pi ntugaraka kuntaenaba aboranamewe. Aerawane. Naeba kampa nanipa puwe. Kampaye. Naeba namatiti potao ntagarama nkagoba aogima agantuwe. Piya, naeba abuntuwe. Ae ayata ataontanaba aeba aogima kabita wagana agogo yaga uma aborano.
13 Pigoya, arupu kamanapa nawamupisa abempe, pi kipa aegaꞌma upebe po. Eya, kaeba Karaisiti Isuti atokaemagina kamatitiꞌenama nkauꞌwape agu kaoꞌenama nkauꞌwape aogima aborao.
14 Piya, Aota Awamusaꞌamaba tagupinti mima taoꞌmaeye. Piya, aeba tagantanama ntuga kayata atamipa, aogima kabiyegana waigatano.
15 We, kaeba ago abintane. Aꞌyaꞌma Esiya marisa kinaꞌmiba ikabinataginisi, Pigerasibe Emogenisibe isigeba kaga nagasase.
16 Pigoya, Waꞌegawamaba Onisiporasi nkaotumpiba antaraꞌena puwaitama iyoꞌmaeyano. Piya, uwoma ntagaba aeba kayonena punatama, igaꞌna puntokaba kampa anipa piye. Kampaye.
17 Aeba Aroma kumata aborama araga puma naguyosaꞌma nagantine.
18 We, Waꞌegawamaba agogo yagaba Onisiporasikaba antara potakana aogima miyeno. Piya, Epesasi kumata aeba kayokayaꞌena uwaenara puntiye. Pipa kaega aogima agantane.
1 We, yagaranempa, Karaisiti Isu aeba awagaena pugatakanaba, kaeba maema esegima asiyo.
2 Piya, naeba uwoma kinaꞌmi nkiyobipa kamanaꞌnepa uma aboraogana abempe, pipa aꞌwae puma taga kinaꞌmiti uma aborawaimegini igeba to kaꞌisa kinapa aborawaimiyo.
3 Kaeba Karaisiti Isu nkaogi irebu yagara mimagina, kaeba to irebu kinaꞌmi pesa puma kuntaenaba aesaga po.
4 Piya, kaꞌwaina irebu yugara miyemiꞌnaba, aeba uwa kinaꞌmi ntugaba kagapa kampa puta waye. Kampaye. Aeba irebu yugamana puma, aeba ababunti ntagarama nkawamupa wasiyekana kanarasakiye.
5 Pita, to kaꞌwaina ankagasi agasi pukena pemiꞌnaba, aeba ari kamanaꞌwata kampa aegaꞌma uwa karusemipa, aeba ikankapa kampa maekiye.
6 Piya, to kaꞌwaina araga ntuga peꞌnagiba, aeba paitama pi ntugarasaba nanintawapa maeyakana kanarasakiye.
7 Pi yo kamanapa napiyo. Waꞌegawamaba napiyenagapa maema aragatakana aꞌyaꞌmaenama nkagowapa abiwaeyano.
8 Pigoya, Isu Karaisiti aeba Tebiti tupisa aboramagina, purintapisa asintika, aogima napi napi po. Pika naeba aogi kamanaꞌnepa yuwe.
9 Piya, pi aogi kamana uma aboraoka kuntaenaba namewe. Eya, igeba igaꞌna kina kanta punatamagini kirokaentawe. We, Koti kamanaꞌamaba wasanaba igaꞌnaba kampa kirokaetakenaenawe.
10 Piya, Koti ababikibi kina iyoꞌmaekenaga naeba aꞌyaꞌma kuntuyenaba aesaga puwe. Piya, nae nabemika, igeba Karaisiti Isuti atokaeyigina iꞌima, miyaba eꞌwasaenaga kaga aborawaimeno.
11 We, ma kamanapa tagane:
Piya, taeba aeti atokaema purintipi ubasikubompepa, aege kaga miyaba mikune, iye.12 Piya, aeka kuntaenarepa aesaga pukubompepa, aege kaga asu kabikune, iye.
Piya, taeba takabitakanaba, aegeba akabiratakiye, iye.13 We, taeba kamana akayukubompepa, ae abiwa tagantanarakaꞌya piye. Eya, aeba tagantanama nkago mima, kamanaꞌwapa kampa akuyukiye, iye. Koti nkaobipa mono yugaba aogima piyo
14 Pigoya, pi kamanakaba kaeba wasanamipa uwaimegini igeba aogima abiyo. Piya, Koti nkaobipa esegi kamanapa uwaimegini, igeba abima uwa kamanakaba maꞌenaba a-piyo. We, pintanamaba abe kinaꞌmi nki maete tumikenaenawe.
15 Kaeba araga ntugaba puma taga kamanaꞌama nkagowapa arupu puma aboramagina, Koti nkaobipa aogima aborakana kanarasano. Piya pukibempepa, ae aobipa kampa kanintanaba waikiye.
16 Eya, aꞌyugu kamana yiginapa, kaeba kakabitao. Piya kamana yeꞌnagiba igeba to kamparagaena puta wama mono ataigina,
17 kamanaꞌwaimpaba ata inamunkama pisa puma anosama abararano. We, Aimeniyasige Pairitasige isige pi tupisa piyama ata puntase.
18 Piya, isigeba taga kamanakaba paga pamaginisi: Asiratakenaenaba ago nagari waye, umaginisi kaꞌisa kinaꞌmi nkimatitiꞌenaba asunu kaegasawe.
19 We, Kotiba esegi wage aemaꞌma mintegina, pi wageba asima esegi puntiye. Pika awaꞌena mayama kaentiye: Waꞌegawamaba aeba wayaꞌwawampipa aogima igantiye, iye. Piya, aꞌyaꞌma Waꞌegawamati atokaema ae agegaꞌeba maeya kinaꞌmiba igeba ataenaba ikabitaiyo, iyema kaentiye.
20 Pigoya, tabe namapipa tuꞌnapa korirasabe siribarasabe pewe. Ibiwanane. Igeba to kaꞌisaba yarasa puntini, kaꞌisaba marasa pewe. Piyama kaꞌisamiba aogi yuga pegini, kaꞌisamiba tuminta yugaba pewe.
21 Piyamagina, kaꞌwainaba tumintaꞌenawapa maegaitegina nare ntare puma mimaginaba, aeba aogi tuꞌna pisa puma aogi yuga puma mima, aota mikiye. Aeba piyama kanara tabewapa aoꞌmaema tonarona aogi yuga pukenaba yokege pukiye.
22 Piya, kaeba masimabi kinaꞌmi nkigu iꞌnintanaba kakabitamagina, kekapa iꞌma arupu puma, kamatiti puma, agu kaoꞌena puma, paruyenabi miyo. Eya, aꞌyaꞌma apuya igutasa Waꞌegawama nkagegaꞌe ye kinaꞌmiba, igege kaga ketipa iꞌma paruyenabi miyiyo.
23 We, kaꞌisamiba aiboꞌnabo puma kampa abinta tonarona kamanapa uwa uta nasewa, kaeba kakabiwaitao. Piya, kaeba ago abintane. Pi kamanapa maka kamana aboraye.
24 Piya, Waꞌegawama ntuga pemi kinaꞌmaba maka kamanapa a-seno. Kampaye. Aeba aꞌyaꞌma kinaꞌmipa kayonena puwaitamagina, aogi tisa mimagina, kampa karuꞌena aꞌwae puma ikapa puwaitamagina,
25 aeba paebuma mima kamanaꞌwapa akayuye kinaꞌmi ntapiyenaba arupu puwaitano. Aeba piya pekanaba, Kotiba iyoꞌmaeyagini, igupa aꞌwae puma taga kamanapa aegaꞌma abibebe piyo.
26 Eya, kewamaba aeꞌwa nkawamu wasikenaga koꞌwapi iraꞌwaitantikini, kaeba paebuma taga kamana uwaimeginiba igeba abima koꞌwapisaba paima iyegaka waiyo.
1 Pigoya, ma kamanapa aogima abo: Agogo yagaba uwaena kuntaenaba aborakiye.
2 Piya, pabi ntagaba wasanamiba igeꞌwai nki asagayuyigina, mone kutaka ibugakini, paebuta nasima, igebigoꞌena pumagini, kamanapa akayasumagini, ino ibagi kamanapa akayuma, kampa iꞌmupa puma, aota mikenaenaba akayumagini,
3 iyoꞌena kampa puma, imoꞌenawaipa kampa kasimagini, akaya kamanapa uta nasima, iꞌama ntapiyenarapa kampa kabima mimagini, wasanaba ata puwaitama, aogiyenamapa kama potamagini,
4 iyokinaꞌmipa minagaꞌena puwaitamagini, kampa napinta karuꞌena kamparagaena pigina, igebigoꞌenawaimpaba anosakini, Kotikaba kampa napiyigina ari itasaenaga ibegini,
5 mono iga puma mima agowama nkesegiyenaba ikabitakibewe. Piyama miyiginapa igama kakabitao.
6 Piya, kaꞌisa piya kinaꞌmiba igebi nkiyobi kamana uma aibo wayaꞌmi ntamapinti ubaiꞌmagini, napiyenawaipa igaꞌna puwaitawe. Piya waeꞌmiba aguntaenawaika kuntaena napiyegana intawamapisa tonaronama ibai puta nasegini,
7 igeba tonarona kinaꞌmi kamana abima, taga kamanaꞌama nkagowapa kampa abikena pewe.
8 We, paipa Yanisige Yampirisige Mosesepa kama potantamesa puma, kana kinaꞌmiba taga kamanapa kama potawe. Piya, igewai ntapiyenaba abararantaꞌena pegina imatitiꞌenawaipa agoꞌenaba piye.
9 Piya pepa, pintanawaipa agorapa kampa kakawakiye. Kampaye. Piya, pai Yanisige Yampirisige aiboꞌenawaisipa agantasa puma, kana kinaꞌmi nkaiboꞌenawaipa aꞌyaꞌma kinaꞌmi nkiyobi aborakini agakibewe. Koti kamanata arakuregana kabigatano
10 Pigoya, kaeba agonepa aogima agantane. Piya, tisaena yuganepe, nasikenaenanepe, mikenaenanempa kipe, namatitiꞌenanepe, paebuma mikenaenanepe, agu kaoꞌenanepe, asima esegima mikenaenanepe,
11 kama punatantananepe, nauki nakiyenanepe, ago agantane. Piya, Antiyoki kumatape, Aikoniyamu kumatape, Arisitera kumatape, tabe kuntuyena namugu aesaga pintopa nagantane. We, Waꞌegawamaba aꞌyaꞌma pi kuntuyenabisa nauꞌintiye.
12 Eya, aꞌyaꞌma kina, Karaisiti Isuti atokaema Koti kanta puma misanaga ibemi kinaꞌmipa, igepa wasanamiba karana puwaitakebewe.
13 Piya, agunta kinaꞌmibe amiyo kinaꞌmibe igeba tonarona ataena pigina anosakiye. Eya, igeba imiyoꞌena pigini, to igepa imiyoꞌena puwaitakibewe.
14 Pigoya, kaeba aogi kamana abima esegima kamatiti puntampene. Pi kamanapa upebe po. Piya, ugamintompe kinaꞌmite nkagorepa agantane.
15 Piya kaeba uwaena yagaranto mintana aota mono isapa maema aisuma abita kanama miyempene. Pi nkisaꞌama aogi napiyenaba ugamekana, Karaisiti Isuti kamatiti pegana Kotiba kauꞌiyeno.
16 Piya, Piya, aꞌyaꞌma mono isapa Koti ntapiyenabisa aborantiye. Aibumagina, pi kamanapa ketepa aogima purayakima, aguntaenarekaba taupi pima, nasikenaenarepa parutu puratama, arupu kipa purayakiye.
17 Piya pegina, Koti nkaoyagaramaba monota anosama aꞌyaꞌma aogi yugara yokege peno.
1 Pigoya, Karaisiti Isu aeba aoganta kinape purinta kinape aꞌyigitatakiye. Piyama, aeba tumpa aborama kabiratakenaenaga napima ae aobipe Koti nkaobipe naeba esegi kamanapa mayama ugamuwe:
2 Kaeba mono kamanaꞌwapa uma aborao. Piya, wasanami abikena piginape, kampa abikena piginapeba aꞌyaꞌma yaga kaeba yokege puma monopa uma aborao. Kaeba esegi kamana uma intawamapa aseyo puwaitamagina, aguntaenawaika kamana uwaitamagina, igupa asiwaitagini Kotipa aegaraiyo. Piyama, aꞌyaꞌma yagaba pasema yoga puwaitama aogima ibubasanao.
3 Piya, ka kana arosakanapa, wasanamipa arupu kamana maesanagaba kampa ibikiye. Kampaye. Piyama, igeba igebinti antunta uwakena tisa kina aki puma iba pigini, igebi nkiyobi kamanapa nigiꞌma ukibewe.
4 Aibigini, igeba taga kamana abikenagaba ikabitama, tonarona aꞌyugu amani kamana kiꞌi nasikibewe.
5 We, kaeba kampaye. Aꞌyaꞌma yaga kaega parutu kagi napiyo. Kaeba kuntaenaba aesagabo. Eya, aogi kamanapa aborakena yugaba puma, mono yugagampa nkauꞌpa aogima aborano. Poro kanaꞌwapa arosantiye
6 Pigoya, nae nau Kotiti muta atakena kanapa arosasu pegi, mampaba atakena puwe.
7 Naeba agasigasi pukenaenaba aogima puntuwe. Eya, naeba keꞌnempa nkatuta ago kanamagi, namatitiꞌenanempa kampa antage potauwe.
8 Piya, ibaba arupuyenama nkantotaꞌena taminonki natakena yokege pumagina, agogo yagaba Waꞌega, arupu kamana ukena yagaramaba, aeba namikiye. We, naeꞌmana nane. Aꞌyaꞌma ae irosakibitaka ibugai kina, igeke kaga imikiye. Nagarikena kamanane
9 Pigoya, kaeba karuꞌena naetiba kanao.
10 Piya, Timasiba aeba mampabisaenaga abugaogana nagasima Tesaronaika kumati wantiye. Keresenisiba aeba kanara puma Karesiya mari waogana, Taitasiba aeba Tarimesiya mari wantiye.
11 We, Aruku ae abintowapa naege mintiye. Piya, kaeba Makapa aba puregirisi kanaisigina, aeba kanara yogaba ampa naoꞌmaeyano.
12 Naeba Tikikasipa otauwagana aeba Epesasi kumati wantiye.
13 We, naeba eꞌero muꞌmu kainepa Torowasi kumata Kapasi ntamapi atantogana, kaeba kanakena puntanapa, maentana purite kanantana, esaꞌnepe, we, yaga auꞌarirasa pumaranta isapa kaga maete kanao.
14 Aresanta aeba kapa yugawa pukena yagara, aeba tabera ata punatantiye. Aintiba Waꞌegawamaba antotaꞌenaba aꞌwae pomeno.
15 We, aeba kamanatepa tabera kama puratantegina, kaegeba aekaba kabima miyo.
16 Pigoya, maruꞌenaba kamana unatauguni, wasanamiba kampa naoꞌmaema aꞌyaꞌma kinaꞌmiba nagaintawe. We, naeba Kotiti nunamu yokini, pi nkaiboꞌenawaikaba kamanapa a-nkuwaitano.
17 Pigoya, Waꞌegawama nagora asimagina esegiyenaba namima naoꞌmaeyoga, naeba kanara aogi kamanaꞌama nkago uma aborauwagini, aꞌyaꞌma namuꞌisa kinaꞌmiba abintawe. Eya, Kotiba araiyoniwama nkawamupisa apaꞌnatantisa puma nauꞌintiye.
18 Piyama, Waꞌegawamaba aꞌyaꞌma aguntaenabisa apaꞌnatamagina, mantawama kabiratakenaenawapi ubasikenaga nauꞌikiye. We, ae agegaꞌeba asagayuyaba miyeno. Tagane.
19 Pigoya, Pirisikabe Akurabe Onisiporasi tunkape: Aya pewe uritayema, uwaimo.
20 Pigoya, Erasitasiba aeba Korinti kumata pabita mintogana, Toropimasipa yoni nkaboga aepa Mairitasi kumata atauwagana mintantiye.
21 We, kamparaga esiba yaga aborakiya, kaeba karuꞌena naeti kanao. Pigoya, Yuburasibe Putenisibe Arainasibe Korotiyabe aꞌyaꞌma mono kinaꞌmibe kaga: Aya pene, yewe.
22 Waꞌegawamaba kauma kagukampage miyeno. Awagaenawampaba tigeti waima waiyeno.
Poro piya isa kaentiye.