1 Nae Porona, Karaisiti Isu nkaposoronawe. Pi ntugaraka tauꞌikena yagara Kotibe aobi pompe ntagara Karaisiti Isube isigeba unatantame aposoronawe.
2 Timoti, kaeba monota yagaranetakaꞌya miyempeka naeba ma nkisapa kaeti kaeyuwe. Piya, taba Kotike Waꞌegare Karaisiti Isuke isigetisa awagaenabe isintaraꞌenabe paruyenabe, kaeti waima waiyeno. Aꞌyaꞌma kumpariyenaba maete tumo
3 Pigoya, paipa naeba Masetoniya mari wakena punta, ugamintosa piya po. Piya, kaeba Epesasi kumata agora mimagina, kaꞌisa pi kinapa esegima uwaimegini, igeba to kamana to kamanaꞌwaipa a-siyo.
4 Piya, igeba uwa amani kamanape aotumpi kamanape kasiyoma, uwaimo. Piya, pi kamanaꞌamaba kampa nagarikena puma, napiyenawaipa paibegini tara tara igiba napiyegana, monota kampa iyoꞌmaeyagina, imatitiꞌenawaipa kampa anosaye.
5 We, ugamo kamanapa wasanamiba aegarakibepa, igeba igupa nare ntare puma, aogi napiyena maema, taga imatitiꞌenaba pikibewe. Piya, aegarakibe kinaꞌmiba igeba ugamo kamanaꞌama nkauꞌwapa aborama agu kaoꞌenaba pukibewe.
6 We, kaꞌisamiba ma kamanatepa kaitegini, aiboꞌnabo puma aꞌyugu kamana uta nasewe.
7 Igeba Koti nkago kamana aborakena tisa kina misanaga ibiye. We: Taga taga piye, ye kamanaꞌwaipe, kamanaꞌama nkagobeba, igeba kampa aogima abintawe.
8 Pigoya, taeba mayama abune: Kotiba ago kamanaꞌama ntugaba tayakemika, pi ntugaga napima ago kamana ukubompepa, pi kamanaꞌama nkauꞌwapa kanarasakiye.
9 Piya, taeba mayama kaga aogima abune: Kotiba ago kamanapa arupu kinaꞌmiti wanane. Antage kinaꞌmiti atantine. Eya, akayuye kinana, Koti ikabita kinana, aguntaena pe kinana, kampa aota miye kinana, iꞌnintana pe kinana, ibawaimpa iyeguye kinana, inowaimpa iyeguye kinana, to wasana iyeguye kinana,
10 kumiyena pe kinana, wa paibe kinana, wasana ababuma kakata kinana, kumpari kinana, taga kamana uma antage pe kinana, aꞌyaꞌma to kamana uma taga mono kamana akayasota kinana sumagini, igeti ago kamanapa utawaitantine.
11 Pi taga eꞌwasa mono kamanapa eꞌwasa Kotiba aboranamegi, uma aborauwe. Koti nkantaraꞌenaga nkantaraꞌenaga Poro aꞌma potaye
12 Pigoya, Waꞌegarempa Karaisiti Isu aeba naekaba tagantana piyema napima yogawata unatamagina, pi ntugaraka esegiyenawapa namegi, pika naꞌmu potauwe.
13 We, paipa ae agegaꞌeba akayasotama ae aegaraume kinapa kama puwaitama, aepa ata potantone. Pi ntagaba naeba agowapa kampa abibebe punta, namatitiꞌenaba kampa potantone. Piya puwagana, pika Waꞌegarempa antara punatama,
14 awagaenawapa ariꞌma pumaenatama, Karaisiti Isuti atokaekena namatitiꞌenabe agu kaoꞌenabe aboranamintiye.
15 Piya, Karaisiti Isuba agunta kinaꞌmite tauꞌikenaga mampabi aborantiye. Pi kamanapa tagane. Aꞌyaꞌma kinapa abibebe pesinta kanara pesine. We, naeba tabe aguntaena pumagi to kinapa igaintone.
16 Piya puwagana, Karaisiti Isu aeba antara punatama, igainto nkaguntaenanepa asuꞌa punagaintiye. Eya, aeba aota agoyaenawapa nae nautasa aborantiye. Piya, aintiba aꞌyaꞌma aegarakibe kinaꞌmiba nagategini, aogima abima aeti imatiti puma wayaba eꞌwasaena maekibeka, antara punatantiye.
17 Pika, Koti nkagegaꞌeba asagayuyiyo. Aeba miyaba Waꞌega mima kampa purikiye. Aeba wasanamite taora kampa aborama, kaꞌanto taga Koti mintika, ae agegaꞌe maete ima asagayuyaba miyeno. Tagane. Timotika: Kama kinaꞌmipa asu igaso, omintiye
18 We, yagarane Timoti, kaeka paipa poropete kinaꞌmi unta kamanaka naeba napima maya yugagaba ugatauwe: Kaeba pi kamanapa napima esegiyena maema Koti kama kinaꞌmipa maꞌenaba aogima puwaitao.
19 Eya, kaeba kamatitiꞌenayaga aota napiyenayaga upebe puma mita wama pi mpaꞌenaba po. We, kaꞌisa kinaꞌmiba aota napiyenawaipa kasima Kotipa ikabitauguna, imatitiꞌenawaimpaba akasabaꞌma kakawantiye.
20 Piya, Aimeniyasige Aresantage isigeba piya pusugu, naeba isigepa Satani nkayapa isitantuwe. Piya, isigeba aogi napiyena maema to kakeba Kotikaba akaya kamanapa a-sisoma, isitantuwe.
1 Pigoya, naeba maru ma kamana esegima ugamukuwe, abo. Tigeba aꞌyaꞌma kinakaba Kotipa kegaꞌe uma nunamu uma iyoꞌmaekenaga abigama auꞌwa aborakibikaba tiꞌmu potaiyo.
2 Eya, mabisa waꞌegabe aꞌyaꞌma to kiya kinape iyoꞌmaekenaga abigaiyo. Piya, aꞌyaꞌma kinaꞌmitepa paebuma paruyenabi mima Kotintana puma wasanami nkiyobi kanara mikenaga, pabiyama nunamu yiyo.
3 Piya, nunamuwamaba kanarasagina, tauꞌikena yagarare Koti ae aobipa aogi piye.
4 Piya, aꞌyaꞌma kinapa iꞌiyekini taga kamanaꞌama nkagowapa abisanagaba abugaye.
5 Piya, ka Koti abintowa mintegina, pi Kotike wasanage maema kabo puwaisitakena yagaraba ka mintiye. Aeba auꞌyaga Karaisiti Isuwe.
6 Aebe aꞌyaꞌma kinapa ika puratakenaga aeꞌwa nkaupa kaintiye. Piya, pika awaga kamanapa Kotiba aeꞌwa ntagaba aboraramintiye.
7 Pigoya, pi nkawaga kamana aborakenaga Kotiba: Aposorogawe, unatantiye. Naeba taga kauwe. Kumparipa kampa yuwe. Eya, aeba mono kamana ukena aposoro yugara unatamagina, to marisa kinaꞌmi tisa yagara mima tamatitiꞌenabe taga kamanape aborawaimoma, unatantine. Wa wayaꞌmi kamanane
8 Pigoya, nae nabemika, aꞌyaꞌma aukaꞌiba wamiba imoꞌenabe makabe kasima, aota mima Kotiti iyapa atama nunamu yiyo.
9 Pabiyamagina nae nabemika, wayaꞌmi paega paega pukenaenaba a-puma, igeba itasaenaba aogiyena mana puriyo. Piya, igeba iꞌnotasa iwaꞌenabe tabe ikatasaenabe, kori, pasesu, kai pi nane.
10 Wayaꞌmiba aogi mono yugarasaena mana puriyo. Eya, igeba mono kina mimagini, mono auꞌwapa aogima aboraiyo.
11 Wayaꞌmiba iwamupa akumpa mima i maete tumima mono kamanapa aogima abiyo.
12 Piya, wayaꞌmiba wami tisaena puma aiꞌnewaipa misanaga kampa nabegi, akumpaꞌma mintuwe. Igeba paka puma mima kamana abiyo.
13 Piya, Kotiba aeba marupa Antamu potantana, aintiba Ibiba potantine.
14 Piya, kewamaba amiyoꞌena potaogana Antamu wanane. Wayaꞌma kumpari kamanaꞌwapa aegaꞌma kamparagaenaba puntine.
15 Pigoya, wayaꞌmiba yagaraena pukena yuga piginaba kanarasakiye. Eya, igeba imatitiꞌena puma agu kaoꞌenaba puma, aota mima paega paega kampa pukibepa, Kotiba iꞌikiye.
1 Pigoya, kaꞌwaina aeba pasitori mima monota kabikena puntanaba, aogi yuga peno. Pi kamanapa tagane.
2 Piyamagina pasitori yagaramaba arupu pegana wasanamaba kamanapa a-nkotano. Aeba ka waeꞌma nkawae miyeno. Aeba paebuma mima, aogi napiyena aegaꞌma, paruyena yaga mima, aoꞌena puma, aeba aogi tisa yagaraba miyeno.
3 Aeba esegi wani ntama aiboꞌenaba a-peno. Maꞌena a-puma paebuma miyeno. Aeba maka kamanapa a-nkuma, mone kutakaba a-ntapi napi peno.
4 Aeba waya yagarawatapa aogima kabima mima, yagarawapa aogi puwaitakini ae amentanti kamanaꞌwapa wasiyaba miyiyo.
5 We, kaꞌwaina aeba waya yagarawata kampa aogima kabiwaitakibipa, ayamabaya Koti mponota aiꞌaru pe kinapa aogima kabiwaitakiye, a. Pipa kampaye.
6 Piya, aro ntaganto agu aꞌwae puma mono aegaramiꞌnapa pi ntugarapa a-nkotano. Kampaye. Aꞌyugu aeba agebigoꞌena pekana, Koti kewama nkotakibintana maekiye.
7 Piya, wasanamiba kamana otaigina aeba kewama ku uma pasanaga, kaeba kaꞌwaina, aeba abeꞌisa kinaꞌmi nkiyobi aogi agi waintakibiꞌnapa, pi ntugarapa otano. Monota aki pukena yuga pe kinaꞌmi kamanane
8 Pabiyamagini, monota aki pukena yuga pe tikeni kinaꞌmiba, igeba arupu puma mima, intebu aꞌwae u kina a-mpimagini, uwaenara esegi wanipa a-ntama, igeba uwoma mone kuta mpaekenagaba a-ntapiyiyo.
9 Napiyenawaipa nare ntare puma, igeba tamatitiꞌenama aboranti nkagowapa aogima upebe piyo.
10 Maruꞌenaba agowaipa aogima agamagini, igetiba kamanapa kampa aborakibipa, kanara tikeni yugara uwaitaiyo.
11 Pabiyamagini, wayaꞌwaimpiba, igeba arupu puma mima, akaya kamanapa a-suma mima, paebuma mima, aꞌyaꞌmaena tagantana piyo.
12 Piya, tikeni kinaꞌmaba ka waeꞌma nkawae mima, yagarawape aꞌyaꞌma kinaꞌwatape aogima kabiyeno.
13 Piya, tikeni kinaꞌmiba aogi yuga pukibepa, igetiba aogi igi waiyekini, igeba kampa iyekuru punta Karaisiti Isuti aogima imatitiꞌena puma esegima mikibewe. Koti nkago kamanane
14 Pigoya, nae nabemika, agarosama kaeti wakena puwe. We, maruꞌena iba ma kamanapa kaeti kaeyuwe.
15 Piya, narakureka kampa karuꞌena aborakanapa, kaeba ma kamanapa agama, Koti tumpi nkikapi: Ayamabaya mikenawa, pi agogaba aogima abo. Piya, tunkapa eꞌwasa Koti mponota aiꞌaru pe kina mima, wage ya kanta puma mima taga kamanapa aogima aesagabiye.
16 Eya, taeba abune. Aboraratami mponotepa agasiyaenawe. Pipa mayamawe:
Aeba auꞌyaga aborama kanantiye, iye.Awamusaꞌamaba: Agowapa arupuyenawe, otantiye, iye.Enisore kinaꞌmiba agama ae ageba asagayuntawe, iye.Wasanamiba kamanaꞌwapa maga maga kinaꞌmiti uma aborantawe, iye.Mampabisa kinaꞌmiba abima imatiti potantawe, iye.Kotiba eꞌwasaena yaga aba puntiye, iye.1 Pigoya, Awamusaꞌamaba maya uma aogima aboraye: Nagarikena yagaba agarosakanaba, kaꞌisa kinaꞌmiba amiyo puwaitakibi nkawamusapa aegaꞌma kewama kamanapa abima, imatitiꞌenawaipa ikabitakibewe, iye.
2 Eya, kumpari kinaꞌmiba igeba aborama metoꞌena puma paibuwaitakibewe. Pi kumpari kinaꞌmi ntapiyenaba yaku tamisa pekini,
3 igeba waya maekenaenaba akunkitamagini, kaꞌisa nanintaba: A-ntaiyoma, uwaitakibewe. We, Kotiba aeba tamatiti puma taga kamanaꞌwapa abompe kinaꞌmiteka pi ntanintaba aborantegi, taeba taꞌmu potama maema nakana kanarasakiye.
4 Eya, aꞌyaꞌmaenaba Kotiba aogiyena pumarantine. Piya, taeba maema Kotiti taꞌmu potaompepa, pipa kaikenaenaba kampaye.
5 Eya, Koti kamanaꞌamage nunamurempage aborama aota atagina aogi piye. Timoti yogara otanti kamanane
6 Pigoya, pi yo kamanapa mono kina uwaimikibempepa, kaeba aogi Karaisiti Isu ntuga yagara mikibene. Eya, tamatiti kamanaꞌamabe aogi aegarampe mponoꞌamabe kaoꞌmaema esegi pugatakana anosakibene.
7 Piya, kaeba iꞌni kamanape aꞌyugu amani kamanape kakabitamagina, Kotintanaba aegaꞌma puma miyo.
8 Piya, tauꞌama ntuga pukenaenaba aeba aro ntagantoba taoꞌmaeye. We, Koti kanta puma mikenaenaba tabera taoꞌmaeye. Eya, pipa ibaba mampara taoꞌmaeyamikana, aintiba mantabinti to kakema taoꞌmaekiye.
9 Pi kamanapa tagane. Aꞌyaꞌma kinapa abibebe pesinta kanara pesine.
10 Piya, Koti kanta puma eꞌwasaena yaga mikenaga taeba araga ntugaba pune. Piya, taeba eꞌwasa Kotiti tamatiti puma utaratanti ntanagaba aobi pune. Eya, aeba aꞌyaꞌma kinaꞌmiteka tauꞌikena yugaba pumagina, aeti tamatiti pompe kinaꞌmite tauꞌikena yagarawe.
11 Kaeba pi yo kamanapa wawayapa uwaimima, puwaiyakegini aegaraiyo.
12 Kaeba aogi yuga pekini, igeba kagapa: Masimabi miyenema, napimagini kageba a-mpaete tumiyo. We, aogi kamanakatasabe, mikenaenagatasabe, agu kaoꞌenagatasabe, kamatitiꞌenagatasabe, nare ntare puma mikenaenagatasabe, kepa mono kinapa aogima iꞌma iyako.
13 Kaeba naobi puma mintanapa, akiyenabi mono kamanapa aisumagina, wasanaba mono uwaimimagina, kepa aogima iꞌiyako.
14 Pigoya, pai monota kabiyume kinaꞌmiba poropete kinaꞌmi kamanapa aegaꞌma yogarapa iyapa kaꞌnota atauguna, Kotiba esegiyenaba kamintine. Pika a-nkuwasuwaba po.
15 Aꞌyaꞌma yaga kaeba yogagata aogima kabima mima auꞌwapa aborakini, aꞌyaꞌma kinaꞌmiba kagaigina aogi pikiye.
16 Piya, kaeka pempentanarapa aogima kabima mima, wasanaba puwaiyakikenaenarapa kabiyo. Eya, pikaba esegi yuga po. Piya pukibempepa, kaegape kae kamana abe kinaꞌmipe kaga tiꞌikenaenama nkauꞌwapa aborakibene.
1 Kaeba karuꞌenaba kamana omikena puntanapa, esegima a-nkomo. Kabagampa kanta puma pasema omo. Piyamagina masimabi kinapa kaꞌnatabara kanta puma uwaimo.
2 Kaeba aentaba kanogampa kanta puma uwaimima, kasa waeꞌiyaba apuyaena puwaitama kae kamana kanta puma uwaimo. Abeya waeꞌmi kamanane
3 Pigoya, abeya wae abiwa mintakanapa, kayonena puwaitao.
4 Pigoya, ka abeya waeꞌma ntagarawo, agaꞌnugiwo mintini, aoꞌmaeyiyo. Eya, igeba marupa mono abibebe puma auꞌwapa aokinaꞌmiti aboraiyo. Piya, igeba anasa kinaꞌwaimpipa antotaꞌena puwaitaigina, Kotiba abekana kanarasano.
5 Piya, ka abeya waeꞌma ae abintowa mimagina arape asekape Kotika kegaꞌe uma nunamu yemipa, aeba Kotiti atokaekenaga aobi piye.
6 We, to ka abeya waeꞌmaba aeꞌwa nkauꞌama ntapiyena aegarakibipa, aeba puꞌwaisa puma miye.
7 Kaeba pikaba uwaimegini, igeba wasiyigina kamanaꞌwaipa kampa waiyeno.
8 Piya, kaꞌwaina aeba aokinapa, we, aotumpipa kampa iyoꞌmaeyamipa, aeba amatitiꞌenawapa akabitama kasima, mono kampa abinta kinapa asu igasima kamparagaena piye.
9 Pigoya, abeya waeꞌmapa mono yugaraka agewapa kaekibempepa, kaeba mayama napiyo: Piya, aeba waba ka maentegina, kabowapa 60-wa kabu aꞌya wagina,
10 yogawapa kanara puntakaba aogi agigaꞌe waiya, pika napima kaeyo. Eya, aeba paipa yagarawapa aogima kabitantemino. Aeba to marisa kinapa kayonena puwaitantino. Kotiti atokaeya kinapa aogi puwaitantino. Ikinakiyenabi mintanta kinapa iyoꞌmaeyuguna paru ibuntiyo. Aeba aꞌyaꞌma aogi yugaba puyaba mintipera kampaye. Pika napima igepa ibabo.
11 Pigoya, kasa abeya waeꞌmi nkigegaꞌeba a-kaeyo. Piya, igeba to wa maekenaga napikibepa, Karaisiti akabitama:
12 Ae yugara mikune, unta kamanapa akayuyigina, kamanapa igeti waikiye.
13 Piya, igeba tonageba mayama pewe: Igeba iyampuyena kampa punta, namaka namaka wama uwasuwa puma miyewe. We, iyampuyena kampa punta uwa nasimagini, to waina kamanapa maete mare-u me-u puta nasima tonarona aꞌyugu kamanapa aborawe.
14 Piya peka nae nabemika, kasa abeya waeꞌmiba igeba to ka wa maema, yagaraena puma namatapa kabiyigina, kama kinatempiba akayasuratakena kikaba aguyosagano.
15 We, kaeba abintane. Kaꞌisa abeya waeꞌmiba aogi kipa kasima Satani kipa aegarawe.
16 Pigoya, ka mono aegarami nkwaeꞌmaba ae tupisa abeya waepa kabiyeno. Eya, monota aiꞌaru pe kinaꞌmi nkiyobipa kampa kunta pekana kabiyekini, igeba abiwa miyemi waepa kabitakibewe. Kiya kinaꞌmi kamanane
17 Pigoya, monota aogi yuga puma kabiye kinaꞌmi nkigiba maete ima, to maete iyiyo. Eya, mono kamana uma puwaiyakikena araga ntuga pe kinaꞌmi nkigegaꞌeba inata maete iyiyo.
18 Piya, mono isaꞌamaba maya iye: Purumakankama witi apa aerapakanapa, naninta na siyemaba awamupa a-nkakuno, iye. Eya, yoga kinaꞌmaba ikankapa maeyagina kanarasaye, iye. Pika napima monota kabiye kinaꞌmi nkigiba maete ima kabiwaitaiyo.
19 Pigoya, kaꞌwainaba pi kabiyemi ntagaraga kamana otakanapa, kaeba a-nkabo. Piya, tara kinano, kakaga kinaꞌmi piya yiginapa, kanara abo.
20 We, kabiyemi ntagarama aguntaena pekiripa, tigeba aꞌyaꞌma kinaꞌmi nkiyobi arupu potaigini, to kaꞌisamiba agama iyekuru piyo.
21 Pigoya, Koti nkaobipe, Karaisiti Isu nkaobipe, Koti aba punti nkenisore kinaꞌmi nkiyobipe, ma kamanapa wasiyoma, ugatauwe. Eya, igebi nkiyobi kamanapa a-suma, wasana intapera tumintapera ka kana puwaitamagina, ma kamanapa wasiyoma, ugatauwe.
22 Kaeba wasana mono yugaraka kayapa aꞌnota karuꞌenaba a-mpenkatao. To kinaꞌmi nkaguntaenabipa a-nkubaso. Kae kagupa nare ntare potao.
23 We, kaeba waninkamanapa a-ntao. Kanta kaukikibintanagabe to kaꞌisa yonintanagabe wainiba uwaenantoba nagana kaoꞌmaeyano.
24 Pigoya, kaꞌisa kinaꞌmi nkaguntaenamaba wasanami nkiyobi aboragi, taeba karuꞌena aꞌyiginkitaune. Piya, to kaꞌisa kinaꞌmi nkaguntaenama kakama waima ainti uma aborakiye.
25 We, pabiyamagina, kaꞌisa kinaꞌmi aogiyena pentanaba taobi aborawaeye. Piya, to kaꞌisa kampa agaompe nkaogiyena pentanaba agorapa kampa kakawaye.
1 Aꞌyaꞌma wasanami nkimentanti miye kayokaya kinaꞌmitaba, igeba kabiwaita kinaꞌmikaba: Tabe kina miyeka igegaꞌeba asagayukune, yiyo. Eya, wasanamiba Koti nkagegaꞌebe kamanaꞌwape maete tumisanaga kabima mima piyama yiyo.
2 We, tabe kinaꞌwaimpiba Isu nkaegarami ntagara miyegana, aꞌyugu aeka: Tao mono yagarama, iyemagini kamanaꞌwapa akayuyewe. Pipa kampaye. Igeba mayama napiyiyo: Tabugai mpono yagarama ntuga potamagi, taeba asugasima aogi yugaba penoma, napiyiyo. Pigoya, kaeba pi kamanapa uwaimiwaeyagini abima aogi yugaba piyo. Tabe mone maekenaenagaba a-ntapi napi piyo
3 Piya, kaꞌwaina aeba Waꞌegare Isu Karaisiti arupu kamanape Koti kanta puma mikena kamanape akayuma aꞌwae puma to kamana wasana uwaimikibipa, aeka maya yiyo:
4 Aeba age maete iyokana anosagina, napiyenawapa kampa waintiye. Aeba kamparagaenagaba wasana ibigama, kamana akayukena maꞌena puta nasima ankagasi agasiyenaga abiye. Piya pegina, pi ntugawatasa mayama aboraye: To waina mparuta mikenaenabe, wasana pako puma atarakenaenabe, kamana akayukenaenabe, iyoꞌmikaba ata kamana uwaitakenaenabe, piyama aboraye.
5 Eya, piya kinaꞌmi ntapiyenawaipa kamparaga pegini taga kamanapa kampa upebe puma, aꞌyaꞌma yagaba maka uta nasewe. We, piya kinaꞌmiba piya puta nasimagini, igeba Koti ntugarasa tabe kuta mpaekenaenawe, yewe.
6 Tagane. Kaꞌwaina aeꞌenawaka napima: Kanarane, uma Koti kanta puma miyemipa, ae aguꞌama kutapa uwaena maeye.
7 Eya, yakari purata ntagaba kaꞌena kampa maerite aboraune. Aintiba mampa kaikubompe ntagaba taeba kaꞌenaba kampa maete wakune.
8 Piya, nakenarepe kairepe wairatantika napima: Kanara miyune, ukune.
9 We, uwaena kuta mpaekena peꞌnagiba, igepa imiyoꞌena pigina wareꞌnakibewe. Eya, igeba ko uma paigina uwaena ibugaintanamaba ata puwaitakini aiboꞌnabo pigina kamparaga puwaitama igaikiye.
10 Piya, yabaka abugaintanaba aeba aꞌyaꞌma ataenama nkagowe. Eya, kaꞌisa kinaꞌmiba piyama ibugagini, igeba imatitiꞌenaba kasagana tabe iki nakiyenamaba igupi wanta aeye. Kaeba eꞌwasaenara miyaba miyo
11 We, Koti nkaoꞌyagaramagaba, kaeba pintanaba kakabitama naso. Piya, kaeba kekapa iꞌma arupu puma, Koti kanta puma mima, kamatiti potama, wasana agu kaoꞌena puwaitama, esegima asima, agoya puwaitao.
12 Kaeba kamatitiꞌenama araga ntugaba puma agaso. Piya, pai kaeba kamanapa abima uwaena kinaꞌmi nkiyobi aogi kamatitiꞌenagapa uma aboragasima, Koti nkugatanti nkeꞌwasaba maentane. Pi waiyaba eꞌwasaenaba arakuꞌma auꞌwapa aogima aborao.
13 Pigoya, Kotiba aꞌyaꞌmaenama nkimaba imegi, ae aobi ma kamanapa ugamuwe. Piya, Karaisiti Isu aeba Pontiyasi Pairati nkaora agowapa uma amatitiꞌenawapa aogima aboranti, ae aobi kaga ma kamanapa ugamuwe.
14 Piya, kaeba Koti unti kamanapa aogima wasiyegana, iꞌnintanamaba kekapa kampa ataba pugatakana, wasanamaba kamanapa kampa ugatano. Kaeba piya puta kanagana Waꞌegare Isu Karaisiti irosanoma, esegima ugamuwe.
15 Piya, Kotiba aewa ntaga, otanti ntagaba taora Karaisitipa aborakiye. We, pi eꞌwasa Koti abintowa kabiratakenama nkagowe. Aeba waꞌega kinaꞌmi Nkwaꞌegawe. Aeba tabe kinaꞌmi Tabewaine.
16 Ae abintowa kampa purinta, eꞌwasaenara miyika, taeba agorapa kampa uma airokaekune. Kaꞌwainaba kampa agantikana, to kaꞌwainaba kampa agakiye. We, ae agigaꞌeba asagayuyekana, esegiyenawantaga miyaba miyeno. Tagane. Uwaena kutantaga kinaꞌmi kamanane
17 Pigoya, mampabi uwaena kutantaga kinaꞌmika uwaimegini, igeba igebigoꞌenaba a-puma, nagarikena kutankaitiba imatitiba a-piyo. We, Koti aeba aꞌyaꞌmaenaba tamiwaeyagi maema taꞌmu potaune. Piya, igeba aeti imatiti potama aobi piyo.
18 Eya, igeba aogi yuga puma, aogiyenawaipa uwaena aborama puma, kotankaipa a-nkupebe puma mima, iyoꞌmaekenaga napiyiyo.
19 Igeba piya puntiniba, aintisa maruntana puma, ibaba miyaba eꞌwasaenayaga arakuꞌma upebe piyo. Timoti ntugawatasa kamanane
20 We, Timoti, kaeba Koti ugatantemi ntugaba aogima kabiyo. We, kaꞌisamiba igeꞌwai kamanakaba: Aogi napiyenawe, yepa, pipa kumparine. Pi kamanapa uwa iꞌni kamana, atarakena kamanana, pipa kakabitao.
21 Piya, kaꞌisa kinaꞌmiba pi kumanati atokaeyapa, imatitiꞌenawaipa paga pagasawe. Pigoya, awagaenaba tigeti waima waiyeno.
Poro piya isa kaentiye.