1 Poronawa, Sairasiwa, Timotiwa, sumagita esa kaeyune. Tesaronaika kumata monota aiꞌaru pe kina, tabarempa Koti, Waꞌega Isu Karaisiti, isigeti atokaenta kina, tigeti ma nkisapa kaeyune.
2 Tabarempa Kotige, Waꞌega Isu Karaisitige, isigetisa awagaenabe paruyenabe tigeti waima waiyeno. Poro Kotipa aꞌmu potantiye
3 Taoꞌmitaba, taeba tigeka aꞌyaꞌma yaga Kotiti taꞌmu potaompepa, pipa kanarane. Aꞌyugu kampa piyaba pukune. Timatitiꞌenamaba ampa anosama esegi pegiri, aꞌyaꞌma ka kapa agu kaoꞌenaripa tiyoꞌmipa puwaitagana, anosagi agama taꞌmu potaune.
4 We, tigepa karana puritagiri tiki nakiyenabi mima, kuntaenaba aesagaꞌma miyegana, timatitiꞌenamaba esegi piye. Pika Koti nkaegaranta kinaꞌmi nkaruyenabi tigeri maete iyune. Koti antota kamanane
5 Pigoya, tigeba pintana pekaba, Koti arupu antotaꞌenawapa aborawaekenamana puma tayakiye. Piya, Koti kabiratakena kumata ampikibeka, tige tigupa ago yokege puta waye. Pi kabiratakenaenaraka tiki nakiyenaba aesagabewe.
6 Pigoya, tiki nakiyena purita kinaꞌmipa Kotiba kanara antota iki nakiyenaba aborawaimikiye.
7 Piya aborawaimimagina, tiki nakiyena maeya kina tigepe taepe kaga maeragasima migarakenaenaba tamikiye. Pi ntagaba Waꞌega Isu esegi enisore kinaꞌwantaga, tabe yaku nkabu eꞌwasaenayaga, tumpa aboramagina,
8 Kotika kampa ibuma, Isu Waꞌegarempa nkaogi mono kamanaꞌwa kampa wasiye kina, igepa kamparaga ika antota meru imikiye.
9 Piya, pi ntagaba igeba Koti nkantotaꞌenaba maeyigina kaiwaitakini, Waꞌegawama nkaowari kampa wanta, esegiyenawampa nkeꞌwasaenaba kampa asu agakibewe.
10 Pi tumikibi ntagaba, Kotiti atokaenta kinaꞌwampiba ae agegaꞌeba asagayuma, aꞌyaꞌwaema imatiti pota kinaꞌmiba aeka tabera iꞌmu potakibewe. Pabiyama tigeba tae kamanapa abima timatiti puntapa, pabiyama tabera iꞌmu potakibewe. Pi kinaꞌmi esegi piyema Poro nunamu untiye
11 Taeba pika napima, asi nasi tigeka Kotirempati nunamu maya yune: Tige utaritantiꞌna aogima aegaꞌma mimagiri, aogiyena pukena puntiripa, timatiti yuga pigina, Kotirempa, aeꞌwa nkesegiyenarasa auꞌwa aborarimenoma, nunamu yune.
12 Pi pukibentanaga, Waꞌegare Isu nkagegaꞌe asagayuyekana, aeba pabiyama tigegaꞌeba asagayukiye. Piya puma, Kotirempa Waꞌega Isu Karaisiti, awagaenawaisitasa pabiya puritase.
1 Pigoya, taoꞌmitaba, Waꞌegare Isu Karaisiti aborakibi ntaga aege uma aki pukubompeka urimekiri abiyo.
2 Pipa kaꞌisa kinaꞌmi: Amonta agaune, ukibipera: Aoso taga kamanapa yunema, ukibipera, taeka: Ige esa kaeyaga maeyune, umagina: Waꞌega aborakena yagaba aborawaeyema yigiripa, a-pami puma karuꞌenaba a-nkiyegaraiyo.
3 Pigoya, ka yagara a-nkuwa ataigina amiyo kamana urimeno. Piya, Waꞌegawama kanaꞌwapa arosakena pekana, mono akayuma akabitakena yagarama maru aborakiye. Piya, aꞌabibinti tumikena yagara ae maru aborama nagarikiye.
4 Piya, wasanami kotiwaipe aegarantanawaipe kamaena potama aꞌyaꞌwaemaenaba agisabi kasima, aewa nkagegaꞌe asagayuma, Koti mpono namapi asu paiꞌma maraꞌmima kamana uma aborama: Naeba Kotinawe, piya ukiye.
5 Napiyenari ago kasapera aya pewe. Pintanaga paipa tigege minta ago urimintone.
6 Pi ntagarama ki akunikenaenaba ago abintawe. Piyama, Koti otantemi ntagaba aborakiye.
7 Piya, ibaba kamana akayukenaenamaba kakama mima yoga pegina, toganaba keꞌwa akunintemiꞌnaba aeꞌwatakana wakiye.
8 Pigoya, pi ntagaba pi kamana akayukena yagaraba aborakiye. Piya pekana, Waꞌega Isu nkawamupisa aumawampa aegumagina, pi ntaga ae tumpa aborakibi nkesegiyenawampa agora pubasana kaikiye.
9 Pigoya, kamana akayukena yagara aeba Satani ntugarasa aborakiye. Aborama, uwoma nkesegiyenabe awameꞌenabe kasaꞌenabe kumpariꞌena aborawaekiye.
10 Piya, kaꞌisa kinaꞌmi taga kamanakaba kampa ibika, mantari kampa ikibewe. Pigoya, pi ataenabi tumikibi kinapa kana kewama aꞌyaꞌma ata amiyo kamana uwaigasima iyobi airarikaekiye.
11 Piya puma, Koti iyorikaekena agoꞌena otakana igeti tumekini, pi kumpari kamanapa aegarakibewe.
12 Piya, taga kamana kampa aegaꞌma ataenawaimpaka iꞌmu pe kina, pi aꞌyaꞌma kinapa ata ika maekibewe. Kotiba tibabikena uritantiye
13 We, taoꞌmitaba, Waꞌegawama tigekaba abugaye. Taeba tigeka aꞌyaꞌma yaga Kotiti taꞌmu potaompepa, pipa kanarane. Piya, Kotiba tiꞌikenagaba paitakaꞌya utaritaogana, Aota Awamusaꞌama tibabuma Kotiti aota titaogiri, taga kamana aegarantawe. Pintanaraka Koti tibabegi taꞌmu puritaune.
14 Pintanaraka Koti abogana, Waꞌegare Isu Karaisiti nkeꞌwasaena maekenaga, aogi urimompe mono kamanatasa utaritaogiri aegarantawe.
15 Pigoya, taoꞌmitaba, esegima asima mima, taga kamana tawamupisabe esapisabe urimintompepa arakuꞌma aegaraiyo.
16 Pigoya, Waꞌegare Isu Karaisiti aewape tabarempa Kotibe esegi puritaiso. Piya, aeba agu kaoꞌena puratama, tagu taumapa esegi puratayaba mima, aeti atokaekenaenaga napiyokana awagaenawatasa aogima taoꞌmaeye.
17 Piya, aeba tigupa maema esegi puritama, aꞌyaꞌma aogi kamanape aogiyenabe tonkiya tiyoꞌmaeyano.
1 We, taoꞌmitaba, to ka kamanapa waintiye. Abiyo. Taeka nunamu yigina, tigeti aboraompesa puma Waꞌegawama kamanaꞌama uwaesama auꞌwapa aborano.
2 Piya, nunamu yigina, kampa aogima napinta aguntaena pe kinaꞌmi nkiyapisa ipatatano. Tigeba ago agantawe. Uwoma kinaꞌmi Kotitiba taga imatitiba kampa pewe.
3 Pigoya, Waꞌegawamaba tagantanamana piye. Aeba esegi puritama kabiritakana, aguntaena pemi ntagaramaba kampa tibaebukiye.
4 Piya, Waꞌegawama napiyena tamegi, tigekaba mayama napima abune: Aꞌyaꞌmaena piyoma yompentana kanara pewe. Piya, aintiba pabiya pukibekaba, ago abune.
5 Pigoya, tae tabemika, Waꞌegawama tigutipa maema arupu puma, Koti nkagu kaoꞌenawapipe Karaisiti kunta aesagaꞌma esegiyenawapipe uwaesaiyo. Aꞌyaꞌma kinaka yoga kamana waintiye
6 Pigoya, taoꞌmitaba, Waꞌegare Isu Karaisiti ae awamuta urimekiri aogima abiyo. Kaꞌwaina aeba yogaga aekita puma uwa miyaba yagarama, esegima urimintompe kamana kampa aegaranta uwa miyekiripa, aeꞌwataiyo.
7 Tigeripa ago abintawe. Tae pompentanaba aegaraiyo. Paipa tigege mintantompepa, yogaga kampa taekita puma mintantompene.
8 Piya, taeba tiyapisa kaꞌisa nakenaba kampa uwaba maema nantompene. Tige kuntaena puritasanaga arape asekape esegima araga ntuga puyaba mima, ikantanaretasa maema nantompene.
9 Piya, taeba tigetisa naninta uwa maeyompesinta kanara pesine. Pipa kampaye. Taeba taeꞌenaena aegaraiyoma tayapisa puma tiyakune.
10 Paipa tigege mintapa kamana mayama esegima urimuwakiri, ago abintawe: Yoga kampa pukibiꞌnaba iꞌmiyenoma, urimintompene.
11 Piyamaba, tigetisa kamana mayama kanagi abune: Kaꞌisa kinaꞌmi yogawai iyekita puma atate uwa mima, kamana kiki uta nasepa, abune.
12 Pigoya, piya kinaꞌmika, Waꞌega Isu Karaisiti nkawamuta mayama esegima urimigiri abibebe piyo: Pasema mima yogari pumagiri, tigeti ntugarasa nakenaripa maeyiyo.
13 Piya, taoꞌmitaba, iyoꞌmaekena yugaba tiyekitaba a-puma uwa piyo.
14 Pigoya, ma nkisapi kaemaraompe kamanapa kaꞌwaina kampa aegarakibipa, ae agoba aogima agamagiri, aegeba a-mpima abira ataigina mima, pika ani peno.
15 Piya, pukibemika kamaena a-potaiyo. Pipa kampaye. Tiyoꞌena puma arupu napiyena amiyo. To kaꞌisa kamanane
16 Waꞌega, aeba paruyenama nkagowama, aꞌyaꞌwaemaenabi miyigina asi nasi aewa paruyena aborarimeno. Piya, pi Waꞌegaba aꞌyaꞌma kinaꞌmititi miyeno.
17 Naeba Poronawe. Naeba: Aya pewema, naeꞌne ntayapisa kaeyuwe. Piya, aꞌyaꞌma isaꞌnempa araꞌenane kaeyuwa, agama naepisa aogima abiyo.
18 Pigoya, Waꞌegare Isu Karaisiti nkawagaenawampaba aꞌyaꞌma tigeti waima waiyeno.
Poro piya isa kaentiye.