1 Poronawa, Sairasiwa, Timotiwa, sumagita esa kaeyune. Tesaronaika kumata monota aiꞌaru pe kina, tabarempa Koti, Waꞌega Isu Karaisiti, isigeti atokaenta kina, tigeti ma nkisapa kaeyune. Awagaenabe paruyenabe tigeti waima waiyeno. Igeba aegaꞌma arupu puma mintantawe
2 Asi nasi tigeka Kotipa taꞌmu potama, aꞌyaꞌma yaga nunamu yompepa, tigekega esuritaune.
3 Piya, timatitiꞌenaritaka auꞌwapa aboraye. Agu kaoꞌenarika esegi yuga pewe. Waꞌegare Isu Karaisititi atokaekenaga napima agasiyaena puma miyewe. Pika tabarempa Koti ae aobi napima esuritama taꞌmu potaune.
4 Taoꞌmitaba, tigekaba Koti agu kaoꞌena puritama utaritagi agaune.
5 Piya, aogi kamana tigeti maete kanaompepa, uwa kamanapa kampaye. Pipa aogima abompe kamanapa Aota Awamusaꞌama esegima urimogiri, aꞌwae puma aegarantawe. Ti tikapi tiyoꞌmaeyompe agowapa tige ago abintawe.
6 Piya, tae taegaꞌmagiri Waꞌegamape kaga aegarantawe. Tigeba Kotitisa kamana maeyuguna, uwaena tiki nakiyena tigeti aboraogana, Aota Awamusaꞌama asiritaogiri aeka tiꞌmu puntawe.
8
7 Piyama tigeba mintumeꞌnagiba, tige agoripa aogima agantawe. Piya, tigetisa Waꞌegawama kamanaꞌama kanarasama, Masetoniya maribe Akaiya maribe aboraogini abintawe. Ibintowaipa kampaye. Kotiti timatiti pe kamanapa aꞌyaꞌma marisaba abewe. Igeba agoripa ago abintaka, to urimikenaenaba kampaye.
9 Pi ntuga pokana, aboramintanagaba igewai uramewe. Taeba tigeti kanauwakiri, ama kotintana pumarantaꞌena tikabitategiri aꞌwae puma Kotiti kanamagiri, pi taga miyaba Koti kayokaya kinaꞌwa aborama mintantawe.
10 Piya puma, yagarawa Isu purintapisa asitantegina, mantarisa tumikibintanaga agawa puma mintawe, uramewe. Pi Isu, aeba Koti nkamoꞌenawa maete tumikibemitasa, tumpa aꞌyigitatamagina tababikiye.
1 Taoꞌmitaba, tigeti irosaꞌma yoga puwakana, auꞌwantagaꞌena aborawaeyogiri tigeri ago agantawe.
2 Piya, Piripai kumata marupa aerari kaeratama, tauki nakiyena purataumepa ago agantawe. Pipa aerawane. Kotirempatisa to esegiyena maema, kumatiti wasanami to tabera ata puratakaba kampa taekuruba puma, Kotitisa aogi mono kamana uma aborarimintune.
3 Taeba kamana urimompepa, pipa aibo kamanapa kampa urimima, iꞌnintanabe agoꞌenabe kampa puritaune.
4 Kampaye. Kotiba tagagina kanarasagi, aogi kamanaꞌwapa yune. Wasanami nkiyobinane. Koti tagu agakenama, ae aobi abekana kanarasanoma ka yune.
5 Tigeba abintawe. Tigebinkaobi kamanapa kampa urimintune. Pipa kampaye. Kotiba tagantoga, pi ntugaba puma abugakenaenagaba ka kampa ampa puntompene.
6 Taeba pi ntuga puma, wasanami tabe igi maekenaba pipa tigetisaba kampaye. To kinaꞌmitisabe kampaye. Taeba Karaisiti nkaposoro mima, piya puma taeba tabe pukenaba kanarane.
7 Piya, taeba paipa tigege pasema mima, mayama wayaꞌma yagarawa aogima kabiyisa puma, tigege mintantompene.
8 Piya, Koti nkaogi kamana urimikena, abiba kampaye. Tae taguke kaga aborarimikena yune. Pipa nanagawe. Taeba tigekaba tabugagi, tagutepa timiwaema timune.
9 Taoꞌmitaba, tigetiba araga ntuga puntompepa, ago tagantawe. Piya, nanintaripe arisarontanaripe paibukenaenaba kampaye. Taeba arape asenabipe agasiya yuga puma, Kotitisa aogi kamanapa uwa urimintompene.
10 Tigeba ago tagantagana, Kotigeba ago tagantiye. Taeba Isu nkaegaranta kinaꞌmiti abakatipi mimagi, aota parutu puma mima, Koti nkaobi kampa kamanate abakatipi miyuwakiri tagantawe.
11 Piya, abawampa yagarawa kabiyisa puma, pabiyama taeba tiyoꞌmaema, ka ka asiritama, tigu tiꞌamapa uma esegi puritama urimuwakiri abintawe.
12 Piya, tigeba Koti kabiratakena eꞌwasaenawapi ago utaritamika, ae aobi aogima nasiyo. Pika uma esegi puritama urimintompene. Mono abintini maya puntawe
13 Pigoya, Koti kamana urimuwakiripa abimagiri, wasanami kamana abisuba kampa puntawe. Pipa taga Koti kamananema abintawe. Piya puguna, pi kamanaꞌamaba aegaranta kinaꞌmiti tigupipa esegi puntemine. Pika asi nasi Kotiti taꞌmu potaune.
14 We, taoꞌmitaba, Yutiya marisa Koti mponota aiꞌaru pume kinaꞌmi Karaisiti Isuti atokaeyuguni, iyokinaꞌmi iyeguntawe. Iyeguntasa puma, tigepa tiyokinaꞌmi tiyeguntawe.
15 Pi Yuta kinaꞌmi poropete kinapa iyeguta iyeguta iyuguna, Waꞌega Isu ampa aboraogini aeguma kaintawe. Kaitamagini taekeba tagarubakasima, Koti nkabugaomentanamapa kama tuꞌatama, aꞌyaꞌwaema kinapa akunkitantawe.
16 Piya, taeka: To marisa kina uwaimigina, iꞌima aogi pusanaga, akutatakena puntawe. Piyama aguntaenawaipa maema anosama ago tabe puntaka, Koti nkamoꞌenawampa igeti ankwaintiye. Poro to kake igasanaga abuntiye
17 We, taoꞌmitaba, tagarubaugu wauwakana, tagu taumawamaba tigeti waintantiye. Piya poga, taeba arontaganto to auꞌi mima kampa tigamagi, kinta yagara kanta puma mimagi, esegima ke kuꞌena puma, tige tiyowarapa tigakenaga puntune. Pipa kampaye.
18 Piyamagi, taeba uma tigakena puntune. Naeba Porona, uwoma ntaga tigeti wakena pugate atauwe. Pipa kampaye. Sataniba ke akutagasaye.
19 Pigoya, ainti Waꞌegare Isu tumikibi ntaga, nanaraka ae aobi asikune. Nanaraka tantawama aogi peka, taꞌmupa pukune. Pipa tigerine.
20 Eya, pabi ntaga aege mikibeka eꞌwasaenarepa taꞌmuntanawe.
1 Pigoya, uwasuwa puma misanagaba kampa tabuma, tige tigasanaga tabugama, napiyenarempa kanara poga, tasibinto Atenisi kumata mima,
3
2 taoꞌyagara Timoti otauwagana, tasitate tigeti wantiye. Aeba Koti kayokayaꞌena puma, Karaisiti mpono yuga pemi ntagarawe. Piya, aꞌyugu kaꞌisa tigetisa kinaꞌmi iki naki puma iyekuru pusanaga, aepa otauwagana, tiyoꞌmaema timatitiꞌena tonkiya puritanema wantiye. Tigeba ago agantawe. Pi tauki nakiyenaga taeke utaratantiye.
4 Eya, pai tigege mima taeba maya urimintompene: Aintiba tauki nakiyenaba maekunema, urimintompekana, pigo taeti aboragiri agawe.
5 Piya pemika, uwasuwa puma misanagaba kampa naboga, timatiti agori abenema, Timoti otauwagana tigeti wantiye. Aꞌyugu amiyo puritakena yagarama ampa tigekara iyekiri, araga yogare kaisanaga untuwe. Timoti iwaga kamana omogana Poro aꞌmu puntiye
6 Pigoya, Timoti titate aꞌwae puma taeti ibanto kanamagina, timatitiꞌena agu kaoꞌenarikabeba aogi awaga kamanati ampa yegi abune. Tige tiganema yokiri, pabiyama tae tagakena pumagiri, taeka asi nasi napiyewema, yegi abune.
7 We, taoꞌmitaba, tigeba aogi timatiti puma abeka taeba ago abune. Piꞌna esegi puratagi, tauki naki puma taekuruyena pompeꞌnapa asugasune.
8 Piyama, Waꞌegawamati esegima atokaema miyigipa, abima taꞌmuntanabi mikune.
9 Taeba tigekaba Kotirempa nkaobi tabera taꞌmu puritaune. Pi taꞌmuntanaba Kotiba pumaeyanoma tamemikawe.
10 Piya, arape asenabipe taeba esegima nunamu yompepa, tigeti wama tiyowara agakena puma timatitiꞌena arosasanaga, pumaema esegi puritanema yune. Koti esegi puwaitanema Poro nunamu untiye
11 Pigoya, tabarempa Koti aewake, Waꞌega Isuge, isigewaisi kepa tayakisigi, tigeti wanema, yune.
12 Pigoya, Waꞌegawama agu kaoꞌena puritaomesa puma, tigeba tiyokinaꞌmitibe aꞌyaꞌma kinaꞌmitibe pabiyama puwaitaiyo.
13 Piya puwaitaigina, Waꞌegawama tigu esegi puritanema yune. Piya puritakiri, aintiba Waꞌega Isurempa Kotiti atokaenta kinaꞌwake tumikibi ntagaba, tigeba tabarempa Koti nkaobi kamana kampa utaritakiri aota mikibewe. Pika nunamu yune.
1 Pabigoya, taoꞌmitaba, tigekaba esuritama esegi kamana urimekiri, Waꞌega Isuka napima abiyo: Tiyakompentana Koti ntapiyenara aegaꞌma aogima nasiyo. Piya pesa puma, amato puma aogima miyiyo.
2 Tigeba ago abintawe. Waꞌega Isu, ae awamu mima kamanapa urimintune.
3 Piya, tigeba aota misanaga Koti nkabemika maya iye: Kumiyenaba tigeba aꞌwae puma miyiyo.
4 Tigeba waya maekenaenaba, aogima napimagiri aota mikenaenama aegaꞌmagiri, aogi puma wayapa maeyiyo.
5 Tiguꞌamaba a-tika pekiri, to marisa kina, Koti kampa aegara kinaꞌmi pesapa a-piyo.
6 Aiboꞌenaba a-puma tiyoꞌmi nkwaepa a-paibuma, pintanagaba kumparipa a-nkuwaigasiyo. Piya, Waꞌegawama aꞌyaꞌma kinaꞌmi kuntaenawaipa antota imiwaekiye. Taeba pi kamanapa pai uma aborama esegima urimintompene.
7 Piya, tagu iꞌnintanayaga miyiyoma taba puratanti nane. Pipa kampaye. Koti aegaꞌma aota miyiyo, uma taba puratantine.
8 Pigoya, pi kamanaka kaꞌwaina akaꞌi ntaesi potakibipa, wasanama nane. Kotipa akaꞌi ntaesi potaye. Piya pemikaba, kampa aeba napiye. Kotiba Aota Awamusaꞌwapa tamima: Aota miyiyo, uma taba puratantine.
9 Agu kaoꞌena mono kina puwaitakenaenagaba ago abintawe. Pika naeba kampa esapa kaema timukuwe. Kotiba aewa agutasa kaoꞌena agowapa puriyakintekiri tiyoꞌena aogima pewe.
10 Piya, tigeba aꞌyaꞌma Masetoniya mari minta Isu nkaegaranta mono kinaꞌmipa, agu kaoꞌena puwaitawe. Pipa tagane. Pigoya, taoꞌmitaba abiyo. Tigeka maya uma esegi puritaune: Tigeba pintanaba to kake pumagiri,
11 esegima napima paebuma mimagiri, to kinaꞌmi mikibentanagaba a-ntapima tigeꞌenarika aogima kabima mima, tiyapisa yogaenaripa puma maeyiyo. Piyama pai urimintompesa puma piyo.
12 Piya pumagiri, mono kampa abinta kinaꞌmi nkiyori aogima mima, inamukantaba a-piyo. Waꞌegawama irosaꞌma tumpa asiratakiye
13 We, taoꞌmitaba, Isu nkaegaꞌma puꞌwanta kinaꞌmikaba aibosapo pisiwe. Piya puma to kinaꞌmi Kotiti atokaekenaga kampa napima uwa intara pesa puma, aꞌyugu tintawama kubeꞌena pusanaga, pi kamanapa yune.
14 Piya, taeba Isu puꞌma asinti kamana abibebe puma abene. Piya puma, Isu nkaegaꞌma puꞌwanta kina Koti iba pekini, Isuge kaga irosakibewe. Pika abiyo.
15 Pigoya, Waꞌegawama kamana urimompepa mayamawe: Ainti Waꞌegawama tumikibi ntagaba, taogama mintompe kinaꞌmitaba purinta kinaꞌmipa kampa uma paitawaitakune.
16 Toganaba Kotiba esegima kegaꞌe yekana, marusa enisorewama kegaꞌe yekana, pikuriyama aga yekana, Waꞌegawama mantaba kaitegina tumikiye. Tumimagina, Isuti atokaema puꞌwanta kinaꞌmipa paitama asiwaitama,
17 taogama mintompe kinapa ibinapinti tumpa taba purite, pi kinake Waꞌegawamati mesurataka, Waꞌegawamage kaga miyaba mikune.
18 Piya, pi kamana abima, tiyoꞌmi nkigu imapa esegi puwaitaiyo.
1 We, taoꞌmitaba, kanaꞌwa aborakibintanaga ayantagabayawema, kampa esa kaema urimukune. Pipa kampaye.
2 Tigeripa ago abintawe. Waꞌegawama antotaꞌena tamikena yagaba, ku kinaꞌmi aseka ampa aboraisa puma aborakiye. Pipa ago abintawe.
3 Piya: Paruyenabi mima aogima miyune, piya yiginaba, pabi ntaga, wayaꞌma yagaraena pukena yagaba auki nakiyenawapa aboramisa puma, ige ataena puwaitakenaena karuꞌena ampa aborakiye. Piyamagina kampa igaikiye.
4 We, naoꞌmitaba, pabi ntaga ampa aborarimekiripa, ku kina kanagiri pami pesapa kampa pami pukibewe. Tigeba tununtanabi miye kinapa kampaye.
5 Tigeba eꞌwasaena maema ara miye kina mintawe. We, tigebe taebe asekasa kinape tununtanabisa kinape kampa mintune.
6 Piya puma, Kotika kampa kabinta aꞌyugu tauwaima, to kinaꞌmi pesa pusanaga, taoba aꞌwaintakana napiyenarempaba kanara peno.
7 Taeba agantune. Iwaikena kinaꞌmiba aseka iwaiyewe. Wani nakena kinaꞌmiba aseka nama aiboꞌenaba pewe.
8 Pigoya, taeba arasa kinatawe. Piya, napiyenarepa kanara peno. Irebu kinaꞌmi maꞌena iꞌana pesa puma, tamatitiꞌenarepe agu kaoꞌenarepe peno. Maꞌena taminoku atasa puma, Kotiba tauꞌiyeka taeba tagu esegi peno.
9 Piya, Kotiba amoꞌenaba puratakenaba kampa uratantine. Pipa kampaye. Aeba Isu Karaisiti Waꞌegarepa aegarakana taba puma tauꞌiyenema uratantine.
10 Ainti taogama mintakubompepe, puꞌma mintakubompepe, Waꞌegare taeka pai puꞌma eꞌwasaena tamintika aege mikune.
11 Pika tiyoꞌmi uwaimima, iba pesa puma amato puma iyoꞌmaema esegi puwaitaiyo. Wasana maema asaekena kamanane
12 Pigoya, taoꞌmitaba, taeba urimekiri abiyo: Tige tikapi, yoga puma napiyenaripa arupu puma esegi purita kinaꞌmi nkige asagayuyiyo. Pipa Waꞌegawama kiya kinati uwaitakiri,
13 yogawaitaka agu kaoꞌena puwaitama abiwaitaigina iyeno. Piya, paruyena puma miyiyo.
14 We, taoꞌmitaba, kamana to esegima urimekiri abiyo: Aꞌyaꞌma yugaga iyekita pe kinapa arupu pumagiri, tara tara igi napiye kinapa esegi puwaitamagiri, anu kinapa iyoꞌmaemagiri, aꞌyaꞌma kinaꞌmipa pasema paru puwaitaiyo.
15 Wasanami ataena puritaigiri, aꞌyugu antotaꞌena ataena puwaitasanaga kabiyiyo. Asi nasi tiyokinape aꞌyaꞌma to kinape aogi puwaitakenaenaga napiyiyo.
16 Asi nasi Kotiti tiꞌmu potaiyo.
17 Asi nasi nunamu uma miyiyo.
18 Aꞌyaꞌmaena aborarimekiripa, pipa Kotiti tiꞌmu potaiyo. Karaisiti Isu aegaꞌma piya pukibeka Kotipa abiye.
19 Pigoya, Aota Awamusaꞌama ntaku a-nkatuꞌmaiyo.
20 Wasanami: Koti nkawamupisa kamanapa yunema, urimigiripa, tikaꞌi ntaesi uwaba a-pumagiri,
21 aꞌyaꞌwaemaenama nkagowapa marupa uma aborama napiyiyo. Piya puma aogiyenaba upebe puma,
22 aꞌyaꞌma aguntaenaba kasiyo.
23 Pigoya, Koti aeba anta paruyenama nkago, aewa mpaema aota puwaerigasima, Waꞌegare Isu Karaisiti tumikibi ntagagaba aꞌyaꞌma aogima miyigina kamanatipa kampa waisanaga, timatape tigutape titape Kotiba kabiritano.
24 Piya: Aota miyiyo, uma tibaburi ntagara, tagantana puma, kabiritama aota titakiye.
25 Pigoya, taoꞌmitaba, taeka nunamu yiyo.
26 Aꞌyaꞌma mono kinapa aogima tiyapa imiyo.
27 Pigoya, ma nkisapa aꞌyaꞌma mono kinaꞌmitaba aisuma uwaimiyoma, Waꞌegawama nkagegaꞌeraka urimuwe.
28 Waꞌegare Isu Karaisiti nkawagaena tigeti waima waiyeno.
Poro piya isa kaentiye.