1 Nae Porona: Karaisiti Isu nkaposorogawe, Koti abogana unatantemine. Piya, naene taoꞌyagara Timotibe mimagira,
2 Korosi kumatasa Kotiti atokaema Karaisiti nkawamu wasiye kina, ma nkisapa tigeti kaeyuse. Tabarempa Koti aetisa awagaenabe paruyenabe tigeti waiyeno. Korosi kina Koti aegarantawe
3 Tigekaba nunamu yome ntaga, Waꞌega Isu Karaisiti ae aba Kotiti tasiꞌmu potause.
5
4 Piya, mantabinti asu mikenaga puritanti, pika tigeba Karaisiti Isuti timatiti pumagiri, aꞌyaꞌma Kotiti atokaenta kinapa agu kaoꞌena puwaitawe. Pi nkawaga kamanatipa ago abuse. Tigeba aogi taga mono kamanapa pai urimogiri, pi mantabinti asu mikenaga abima agawa puntawe.
6 Pi aogi kamana aꞌyaꞌma kinaꞌmiti kanama, aꞌwa aborama anosamagina, tigeti pabiyaena aboraye. Piya, Kotitisa taga awagaena awaga kamana maru abinta ntaga, tigeti wairite kanama ampa tabe piye.
7 Pi aogi kamanapa tasibugai tasiyo yagara Epaparasi urimintiye. Aeba Karaisiti nkawamu wasima kayokaya yagara, ka yugare puma kabiritamine.
8 Piya, tigeba agu kaoꞌenaba Aota Awamusatasa aboragana, urasimegira Kotiti tasiꞌmu potause. Mono aꞌwa aborakenaga nunamu untiye
9 Piya pegira, tasigeba abintome ntaga kampa tigasima, agobima tigeka mayama nunamu yuse: Awamusaꞌama napiyenaripe abikenaenaripe timekana anosama tabe pukiye. Piya pekiri inatisa abemintana abibebe pukibeka, nunamu yuse.
10 Piya, Waꞌegawama aogi puritakiri, mikenaenarimpa nkagowapa uma arakana tigakana kanarasakiye. Piya pumagiri, mono yuga pigina, aꞌwapa aborakiri Koti nkagowapa abibebe pigina anosakiye.
11 Piya aogi esegiyenawatasa tabera esegi puritakiri, asima aꞌyaꞌma kuntuyenaripa aisagaꞌma, tintawama kampa pami pumagiri,
12 tabarempati tiꞌmu potama, tikaenabi mikibeka nunamu yuse. Piya, tabarempa utaratama, eꞌwasaenabi Kotiti atokaenta kinake kaga mikenaga tababuntiye.
13 Aeba tununtanama nkesegiyenabisa aꞌyobatatama, yagarawampa kabiratakenabi tababuratantiye. Pi abugai ntagarawapa
14 ago ika puratama aguntaenarepa asuꞌa pugasakiri, aogima mikibeka nunamu yuse. Karaisiti ntugawane
15 Pigoya, kampa agaompe Kotipa yagarawampa ae aoga aboraye. Aꞌyaꞌwaemaena Koti pumarantemi, paitama aiꞌne aewe.
16 Piya, Koti otaogana, aeba mantabinti waintintanabe mabi waintintanabe, pi agaompentanabe kampa agaompentanabe, pi aꞌyaꞌwaemaena ae aborantiye. Pabi amani kinaꞌmi waꞌega kinape, kamana ukena kinape, paitanta kinape, kabikena kinape, aeꞌwantana aborama asu igasima mintiye.
17 Aeba aꞌyaꞌwaemaenamapa paitama mintegini, aꞌyaꞌwaemaena ae esegiyenarasa marunkaipa mirite kanama mintawe.
18 Piya, monota aiꞌaru pe kinaꞌmi auꞌwa mintokana, aeba aiꞌnerene. Aeba agorepa mintana, ae agobima purintapisa asima, paitaratama aꞌyaꞌmaenaba aeba asuragasima mintiye.
19 Piya, Kotiba ae abemika, aꞌyaꞌma aumawapa pi ntagarawampati pumaema amintiye.
20 Piya, yagarawampa ntugarasa aꞌyaꞌma marasabe mantarasabe, Koti aewati kaga asaeratama, maripo kurankatasa paruyena aborama, piya puratantiye.
21 Paipa tigeba Koti tikaꞌintaesi potama, napiyenarimpaba kama potama aguntaena puma mintantawe.
22 Piya puma mintuguna, Karaisiti puꞌmagina, auꞌwatasa Kotike asaema ka kinaꞌena puritantiye. Piya, tigeba aota mima, aobipa ataena kampa puma, kamana kampa uritakibi kina mikibeka, tibabuma Koti nkaobi mutatitakena piye.
23 Pigoya, aꞌyugu kaꞌenama tibaibekiri, aogi kamanati atokaentaꞌena kaisanaga, tigeba timatitiꞌenaripa aebebe puma, kibasa atama, esegi puma miyiyo. Piya mikibeka, Koti nkaobi mutatitakiye. Pi aogi kamana mampabisa aꞌyaꞌma wayaꞌwa mite aborantine. Pi kamana kayokaya yagara Porona mintuwe. Poro auꞌwatasa mono kina iyoꞌmaentiye
24 Pigoya, nauki nakiyenabisa kuntaenaripa aesagaꞌma tiyoꞌmaeyoka naꞌmu puwe. Piya, Karaisiti auki nakiyena aboramintanaba kaꞌisa naeba ae auka aesagabuwe. Pi nkaupa monota aiꞌaru pe kinane.
25 Pi aegara kina tigeti Koti kamana maema aborawaeyoma unatantegi, tige kayokaya yagara mima piya puwe.
26 Piya, Koti kamana agowapa pai aꞌyaꞌma yaga kakama waintanti, Kotiti atokaenta kinaꞌmiti ibaba aboraye.
27 Piya, Koti ae abemika, ae aokinaꞌmiti kakanta kamana agoba aborawaimiye. Pi aogi eꞌwasa kamanapa to marisa kinaꞌmitibe kaga aborawaimiye. Pi kakanta kamanaꞌama nkagoba mayama waintiye: Karaisiti tigupi mintika eꞌwasa kumati asu mikibewe.
28 Pigoya, Karaisiti nkagoba uma aborama aꞌyaꞌma kinaꞌmiti uwaimima, obisuma, igu aogantasikena kamana aꞌyaꞌma kina uwaimune. Piya, aꞌyaꞌma kina Karaisiti nkauꞌwantana pigina Kotiti ibabusanaga nabiye.
29 Pika agasiyaena popa, tabe esegiyenawatasa asinatagi, piya puwe.
1 Naeba urimekiri abiyo. Tigege, Areyotisiya kumatasa kinape, nae naowara kampa aga kinape, tige tiyoꞌmaekena nunamu agasiyama yuwe.
2 Piya, tigutasa maema agu kaoꞌena puma atokaema esegi piyo. Piya puma, tigeba aogi napiyenaba maema, Koti kakanta kamanaꞌama nkagowapa Karaisititi napima, tagantanaba abibebe puma abiyoma, pika nunamu yuwe.
3 Pigoya, aꞌyaꞌma aogi abikenaenabe napikenaenabe Karaisititi kakantanabi pumaeyagina, taeti ago aboraye.
4 Piya, kaꞌwaina iga kamanatasa kumpari urigasima tige kakaꞌisanaga, ma kamanapa yuwe.
5 Pigoya, naeba naupa pagasara mima, nagutasa tigege miyuwe. Piya, tigeba kaga arabama, Karaisiti esegima aegaraga, tigaogana nantawama kanara piye. Isuti wama eꞌwasaena maekune
6 Pigoya, tigeba Karaisiti Isu aegaꞌma: Waꞌegarene, otantawe. Pabiya puma ae aguta nasiyo.
7 Tibupa aeti uma aema, ubuꞌma esegi pumagiri, urimintana napima timatitiꞌenaba esegi piyo. Piya puma Kotiti tabera tiꞌmu potaiyo.
8 Pigoya, tigeba aogima kabiyiyo. Aꞌyugu kaꞌwaina wasanami ntapiyenabisa esiba kamanaꞌama iga puritamagina, tigupa maerite wagasanaga, tiyota tiyota piyo. Piꞌnaba ayabamagi kamanapisabe amani kinaꞌmi kamanapisabe iye. Pipa Karaisiti kamanaꞌnane. Mampabisa kamanane.
9 Tigeba ago abintawe. Koti nkagoba Karaisiti nkautasa aborawaeye.
10 Piya, aeba aꞌyaꞌmaena paitantaꞌenamape esegiyenamape aiꞌnewane. Aeti atokaentaka eꞌwasaenaba pumaeritaye.
11 Tigeba tiyatasa auta araꞌena pikenaenawanane. Ariritasaenaba maegasima, Karaisiti tigupi araꞌena puritaye.
12 Piya puma, mono wani paititama, ae purintapi kaga kairitantawe. Pigoya, Koti aeba esegiyenawatasa Karaisiti purintapisa asintiye. Pabiyama, pi nkesegiyenawaka timatiti puguna, kaga asima atokaeritantiye.
13 Paipa tigeba ti kasama araꞌenaba kampa punta, aiboꞌena puma puꞌwanta kina kanta mintantawe. Mintiri, timatiti puguna Kotiba aꞌyaꞌma aiboꞌenaripa asuꞌa purigasima, Karaisitike kaga asiritama eꞌwasaenawapa timintiye.
14 Piya, agunta puwakana, paisa ago kamanapa esegi puma, kamana uratama tapirintakena puntiye. Piya pogana, pi paisaenaba Karaisiti ntugarasa maripo yara itaꞌatama kaintiye.
15 Piya puma, amani kinaꞌmi waꞌega kinape kamana ukena kinape, ige esegiyenawaipa aꞌyaꞌma kinaꞌmi nkiyobi mae igasimagina, maripora agowapa aogima aborantegi agaune. Karaisitige puꞌwantaka uwa napiyenaba aꞌnkaegaraiyo
16 Tigeba Isu aegarawe. Pigoya, tabe yagabe, kasa utape, sabatirano aki puma mikenabe, kaꞌisa naninta wani nakenabe, pikaba kaꞌwaina uwa kamana tipi mpaꞌma yekiripa: Kumparina, kaso, omiyo.
17 Pintana amankane. Ae akaꞌi auꞌwapa, Karaisiti, ago aborantiye.
18 Piya, kaꞌwaina: Naeba kasaꞌenaba agaopa, tabe yagaranawe yemiꞌnaba, kamana uritakiripa, kumparina, a-nkabiyo. Pi ntagaraba: Tipa maete tumima, enisore kina aegaraiyo, iye. Pi ntagara aeꞌwa nkau maema amantana puma tabe piye. A-nkuwa ataigina piyaba peno.
19 Pi ntagara Karaisititi kampa atokaeye. Karaisiti aeba aiꞌnerene. Aegaraompe kina taeba auꞌwane. Piya, agaꞌnabe agisa aya nkaope amato puratama atokaeye. Piya puma, mono naninta tamima Koti nkesegiyenawatasa iꞌma anosarataye.
20 Tigeba Karaisitige kaga puꞌwama, mabisaenaba tikaꞌintaesi puntawe. Nanaga mabisa kina nasisuba pewe. Nanaga pi kamana amentantiba miyewe.
21 Pi kamanapa mayamawe: Ma nanintaba a-mpaeyo. Pipa a-ntao. Maropa a-nkaigayabo.
22 We, nanintaba uwa nagaikenaenawe. A-ntao kamanapa wasanama ntapiyenawe.
23 Pi kamanakaba, monotapa esegi puma, tanta aꞌwa puratama, tauꞌamapa aeguma arupu puma, wasanami nkiyobi aogi piye. Piya, akumpaꞌma mintintanama wasanami nkiyobipa uwa aogi pegina, piꞌnaba ata napiyenarempa kampa aogi pumagina, tagupa kampa taoꞌmaeye. Piya, wasanami ntapiyenaba aꞌnkaegaraiyo.
1 Pigoya, Kotiba Karaisiti asitaogana, inati ayatakanti mintiye. Piya, aege kaga asiritami kina tige inatisaenaga napiyiyo.
2 Mampabisaenagaba a-ntapimagiri, inatisaenaga napiyiyo.
3 Tigeba purinta kina kanta puma miye kinaꞌmitaba, mampabisaenagaba a-ntapiyiyo. Piya, mikenaenari Karaisitige Kotiti kakama waintiye.
4 Piya, Karaisiti aeba mikenaenarempa nkagowe. Ae aborakibi ntaga tigege kaga eꞌwasaenawatapa aborakibewe. Piyama inatisaenaga napiyiyo. Paisaena kasiyo
5 Pigoya, asiratami kina mintiri, mampabisaenaripa kaigasiyo. Piya, kumiyenaba a-piyo. Kumiyenagaba a-ntapiyiyo. Tigu iꞌnintanaripa kasiyo. Ataenaga tintabinti pami pepa kasiyo. To wainantanagaba a-ntapimagiri waꞌegari kantaba a-piyo.
6 Piya, piya pe kinapa Koti amoꞌenaba imikiye.
7 Paipa tigeba mampabisaena aegaꞌma piya puntawe. Piya, ibaba kaigasiyo.
8 Ibaba ataenaripa asarosuma kasiyo. Piya, timoꞌenabe, kabirakenaenabe, ata puwaitakenaenabe, akaya kamanatipe, tiwamupisa iꞌni kamanatipe, asarosuma kasiyo.
9 Piya, tigaꞌnagipa kumpari kamanapa a-nkuwaigasiyo. Tigeba paisa timawama ntugaba ago kaitegiri,
10 tigeba kasa kina aborama mintawe. Mintagana, kasa aborariti ntagara, Koti, asi nasi napiyenaba kasa timima, aeꞌwa aoga kina pabiyama aboraritama mintiye.
11 Piya ae aobi Yuta kinape to kinape pako pikena araꞌenaba kampa waintiye. I kasanta kinape kampa kasanta kinape pako pikena araꞌenaba kampa waintiye. Namuꞌisa kinape, kabu kinape, kayokaya kinape, uwa kinape, Koti nkaobi pako pikena araꞌenaba kampa waintiye. Karaisiti aeba aꞌyaꞌwaemaenama nkagoba ka mima, aꞌyaꞌma aokinaꞌmi nkigupi aborama miye. Tinta paruyenabi miyiyo
12 Pigoya, Koti utaritanti kina, aota tibabuma agu kaoꞌena puritantiye. Piya puritantika kaꞌmasa puma, wasana iyoꞌmaema, tipa mara maete tumima, agoya puwaitaiyo. Wasanami ata puritaigiripa uwa ataiyo.
13 Tigetipa a-mpaete ima tiyo kabiwaitaiyo. Abakatipi kamana aborakiripa timoꞌenaba ataiyo. Waꞌegawama antotaꞌenaripa asuꞌa purigaintika, tigeba aꞌwae puma to kinaꞌmipa pabiya puwaitaiyo.
14 Pigoya, agu kaoꞌena maema miyiginaba aꞌyaꞌwaemaenaba asu igasano. Piya pukibepa ka kinaꞌena puma mikibewe.
15 Piya, Karaisiti paruyenawampa tigupi pumaeyakana kabiritano. Ka tiꞌena puma mikibeka tibabuntine. Pika tiꞌmu potaiyo.
16 Pigoya, kamana aogima napima, toma toma uwaimima ankomi ankomi puma miyiyo. Paisa mono inibe, ibasa inibe, kasa inibe, Kotiti umagiri, tigupinti tiꞌmu potaiyo. Piya pigina, Karaisiti kamanaꞌama tintabaipinti pumaewama aogi napiyena timeno.
17 Piya, tiwamupisa ukenaenabe, tiyatasa pukenaenabe, Waꞌega Isuti napima aꞌyaꞌmaenaba ae pemisa puma, pi ntugaba puma, agegaꞌewataka tabarempa Kotipa tiꞌmu potaiyo. Waꞌegawama nkaobi aogima miyiyo
18 Wayapa, tigeba tiwaegi kamana wasima miyiyo. Piya pigina, Waꞌegawama nkaobi kanara pikiye.
19 Waba, tigeba wayatipa agu kaoꞌena puwaitama, intawaipa ataba a-puwaitaiyo.
20 Araga yagara, tigeba tinogi tibagi kamana abima aꞌyaꞌmaenaba wasima miyiyo. Piya pigina, Waꞌegawama abekanaba kanarasakiye.
21 Ibagitaba, araga yagararipa imoꞌena pusanaga, asi nasi tigobipa a-puwaitaiyo.
22 Kayokaya, tigeba mabisa tabe kinatimpi nkiwamupisa kamanapa aꞌyaꞌma wasiyiyo. Aꞌyugu sepena puma wasanami nkiyora tabe yuga pusanaga, Waꞌegawamati paruyena puma, ae aobi arupu puma mima, tabe kinatimpi ntuga aogi piyo.
23 Piya, aꞌyaꞌwaema yuga puma wasanamiti wanane. Tigeba tiꞌmu puma Waꞌegawamati aogi pigina,
24 Waꞌegawama utaritanti nkeꞌwasa antota timikiye. Pipa tigeba ago abintawe. Tigeba Waꞌega Karaisiti, ae kayokaya mintawe. Pika napiyiyo.
25 Piya, Koti aeba ataena pikibe kina, tabe agi wainta kinape uwa kinape, kaga antotaꞌena imikiye.
1 Tabe kinaꞌmitaba, kayokaya kinatipa arupuyena puma aogi puwaitaiyo. Pabiyama tabe yagararipa mantari mintemika, napima aogi puwaitaiyo. Nunamu uma arupu kiꞌi waiyo
2 Tigeba asi nasi nunamu uma, a-tiyekita pumagiri Kotiti tiꞌmu potaiyo.
3 Pigoya, taekega nunamu yiyo. Yigina, Kotiba mono kipa tayakeka, Karaisititisa pi kakanti kamana uma aborakune. Pi kamanataka igaꞌnabi nataugu miyuwe.
4 Piya, Koti yogawa namegi, aeꞌwa kamanapa aogima uma aboraoka, nunamu yiyo.
5 Pigoya, aꞌyaꞌma yagaba a-tiyekita puma, kamana kampa abinta kinaꞌmi nkiyobi asi nasi arupu puma miyiyo.
6 Aꞌyaꞌma antota kamana aꞌwae puma aogima uwaimikibeka, aꞌyaꞌma yagaba kamanatipa kayo asigi yigina, iga peno. Tikikasige Onisimasige kamana maete wantase
7 Pigoya, Tikikasi kamanaꞌnepa urimikiye. Aeba tabugai taoꞌyagara mima, ka yugare piye. Aeba Waꞌegawamati kayokayaꞌena puma awamu aogima wasiye.
8 Tae mikenaenarempa urimima, tige tigu esegi puritanema, tigeti otaogana waye.
9 Piya, aogi tagaꞌnaba Onisimasi, tige kumatasa yagara, monopa aogima wasiyemika, otaogana Tikikasige wase. Isigeba mataꞌi aboramintanagaba urimiwaekibese. Korosi kinaꞌmiti Poro: Aya pewe, untiye
10 Arisitakasi, aeba naege igaꞌna punti ntagaramaba: Aya pewe, iye. Maka, aeba Panabasi nkababa, aegeba: Aya pewe, iye. Aeka pi kamanapa abimagiri, tigeti kanakiripa ababiyo.
11 Isu Yasitasi aegeba: Aya pewe, iye. Pigoya, Koti kabiratakenaga unti ntugarapa kaꞌisa kina naoꞌmaeyawe. Piya, pi kakaga igeba ibinto Yuta kinane. Igeba naoꞌmaegawe.
12 Pigoya, tige kumatasa yagara Epaparasi, aegeba: Aya pewe, iye. Aeba Karaisiti Isu kayokaya yagara mimagina, tigeka asi nasi nunamuwatasa esegi puritaye. Koti nkabemintanara asima aebebe puma abiyema, tigeka nunamu iye.
13 Naeba agowapa agantuwe. Aeba tigebe, Areyotisiya kumatasa kinape, Iraporisi kumatasa kinape, tigekaba mono yuga agasiyama pegi agauwe.
14 Aruku aeba tabugai tusa yagarabe, Timasibe isigeba: Aya pewe, yese.
15 Pigoya, Areyotisiya kumatasa mono kinape, Nimpage, ae namapi monota aiꞌaru pe kinape, igekaba: Poro, aya pewe iyema, uwaimiyo.
16 Pigoya, tigeba ma nkisapa aisuma abigaiteba, ataigina Areyotisiya kumatasa monota aiꞌaru pe kinaꞌmiti wano. Areyotisiya kinaꞌmi nkisake kayogana wamipa, maema aisuma abiyo.
17 Pigoya, Akipasipa maya omiyo: Waꞌegawama ugatanti mono yuga puma aogima aꞌaiyoma, omiyo.
18 Naeba Poronawe. Naeba: Aya pewema, naeꞌne ntayapisa kaeyuwe. Igaꞌnabi miyoka, naeka napi napi piyo. Awagaena tigeti waima waiyeno.
Poro piya isa kaentiye.