1 Poronage Timotige, Karaisiti Isu kayokaya yagarara mimagira, tasigeba ma nkisapa kaeyuse. Piripai kumatasa pasitori kinape, tikeni kinape, aꞌyaꞌma Karaisiti Isuti atokaeya kinape, tigeti ma nkisapa kaeyuse.
2 Pigoya, tabarempa Koti, Waꞌega Isu Karaisiti, isigetisa awagaenabe paruyenabe tigeti waiyeno. Poro igaꞌna namapi mpima pi kinaꞌmika nunamu untiye
3 Pigoya, aꞌyaꞌma tigeka napiyo ntagaba naeba Kotinempati naꞌmu potauwe.
4 Aꞌyaꞌma yaga tiyoꞌmaekenaga nunamu yopa, naeba naꞌmuntanabisa nunamuba yuwe.
5 Tigeba marusa yaga kamana abima, taege ampa atokaemagiri, aꞌyaꞌma yaga aogi kamana uwaimikena yugara miyekaba, naeba naꞌmu puwe.
6 Piya, naeba ago abintuwe. Aogi yuga tigeti agobinti ntagara Koti, aeba tabubasanata iyabaꞌmima ainti Isu Karaisiti kanabi, pi ntugawama nkauꞌwapa aogima aborakiye.
7 Owe, naeba piyamaba aꞌyaꞌma tigeka naꞌmu puritakenaenaba, pipa aogi piye. Piya, paipa mono kamanaꞌama nkagoba esegima aborauwagiri tigeba naoꞌmaemagiri, awagaenawapa naege kaga maeyawe. Piya puma ibaba naeba igaꞌna namapi mintogiripa, tigeba awagaenawapa naege kaga maeyawe. Pika naeba nantabaipintiba tirakuꞌma upebe puma naꞌmu puritakenaenaba aogi piye.
8 Piya, Koti abintegi, naeba taga kamana yuwe. Karaisiti Isu nkagu kaoꞌenawampa tutusunatagina tigeka nabugaye.
9 Pigoya, naeba piyama nunamu yuwe: Tigeba aogi abikenaenabe uwaena napiyenabe maeyigina, agu kaoꞌenarimpaba anosaurite wagana pikiyema, nunamu yuwe.
10 Piya, aogi napiyenaba maentiripa aꞌyaꞌmaenaripa aꞌyigimpa, arupuyenagaba owe uma mikibewe. Piyama mikibepa, tigeba Karaisiti aborakibi ntagaba kampa iꞌni kina miyigina, Koti nkaobipa kampa kamanatipa waikiye.
11 Piya puma, arupuyenama nkauꞌwapa Isu Karaisititisa tigeti pumaeritakiri, Kotiti tiꞌmu potama ae ageba asagayukibewe. Poro igaꞌna namapi mintogana mono kamana wagana puntiye
12 We naoꞌmitaba, tigeba aogima abiyo: Naeti aboraintanamaba mono kamanapa kampa akuniye. Kampaye. Pipa uwa aoꞌmaerite waye.
13 Piya, naeba Karaisiti nkagegaꞌeraka igaꞌna namapipa mintuwe. Pipa aꞌyaꞌma kiya yagarama ntamata kabiye irebu kinaꞌmiba aꞌyaꞌma to kinape, igeba abintawe.
14 Piya, naeba igaꞌna namapi mintogini, pika uwaena mono kinaꞌmiba napima Waꞌegawamatisa to esegiyenaba maema, iyekuruyenaba kasima, Koti kamanapa esegima uma aborawe.
15 Tagane, kaꞌisamiba nae nageba maete tumimagini igewai nkige maete ikenaga, Karaisiti kamana uma aborawe. Piya pegini, to kaꞌisamiba aogi napiyenawaitasa Karaisiti kamanapa uma aborawe.
16 We, ma mima mono kamanaꞌama nkagoba aboraoma unatantika, pi aogi kinaꞌmiba abima, agu kaoꞌena punatama kamanapa uma aborawe.
17 Piya, to kaꞌisamiba kampa arupu puma igewai tabe igigaꞌe uma aboramagini Karaisiti kamanapa uma aborama, igaꞌnanepi to kaꞌisa kuntuyena punatakena pewe.
18 Pipa aerawane. Anagiꞌena napiyewo, tagantana napiyewo, Karaisiti kamanaꞌama nkagoba uma aborakena peka naꞌmu puwe. Eya, naꞌmu puyabaꞌmima mikuwe. Poro mikenaenawapa Karaisititi atokaekenaenawe
19 Pigoya, naeba ago abuwe. Tigeba nunamu uma naoꞌmaeyakana, Isu Karaisiti nkawamusaꞌama esegi punatakana, ibaba aboranamemintanamaba kampa ataba punatama uwa naoꞌmaekiye.
20 Piya, to aboranamikibintanaga aobi puma kabima mimagi, ago napiyopa aintiba uwaenantoba kampa nanipa pukuwe. Kampaye. Naeba aꞌyaꞌma yaga posa puma, aintiba kampa naekuru pekana, naogama misuwo, puꞌwasuwo, nauꞌnempaba Karaisiti tabe agegaꞌeba asagayukiyema, napiyuwe.
21 Eya, naeba abuwe. Mikubopa, Karaisititi atokaekenaenaba mikenaenanene. Puꞌwakubopa, aogiyenaba maekuwe.
22 Piya, naeba mampabi uwa mikubopa, yoganempaba aꞌwapa aekiye. Piya, puꞌwasuwo, uwa misuwo, naeba ayabaya pukuwe. Naeba kampa abintuwe.
23 Naeba pi taraenagaba aogi nanta paruwe. Pikaba naeba maba atate Karaisitige umisanaga nabiye. Pipa asugasaye.
24 Pigoya naeba abopa, mampabi naeba mintapa, aogima tiyoꞌmaeyakana kanarasakiye.
25 Pika naeba esegima abibebe puwe. Naeba uwa mima tikapi yoga puma kanarasaritakiri, timatitiꞌenabe tiꞌmuntanabe to kake aborakibewe.
26 Piya, naeba to kake tigeti uma irosakuwe. Pika tigeba tiꞌmu punatama, Karaisiti Isu nkage asagaꞌyuyeno. Monota esegima mpiyiyo
27 Pigoya, ke nasentanarimpaba arupu pekiri, Karaisiti nkaobi aogi kamanawapa aegaꞌma miyiyo. Eya, kampa tigasuwo, uma tigasuwo, ka tintabarima misanaga nabiye: Tigeba kaga esegima mimagiri ka napiyena puma ankaoꞌmae ankaoꞌmae puma aogi kamanata imatiti pusanaga yogaba esegi puntiri,
28 kama kinatimpika tiyekuruba a-piyo. Pika abisanaga nabiye. Eya, kampa tiyekuru pentanaba pipa Kotitisa awameꞌenawe. Piya, pipa tigeti ima ige iyeguma kaikena awameꞌenawe.
29 Piya, Kotiba Karaisiti ntugaraka timatitiꞌena potakenaena manapa kampa timiye. Kampaye. Aeba timatitiꞌenabe tikinakiyenabe kaga timima ae yugawa piyoma timiye.
30 Piya, paipa kunta yuganepa agantakiri, to ibaba pabiyamagiri nawaga kamanapa abewe. Pi ntugaba tigeba pabiyama kaga pewe.
1 We, tintabaipinti Karaisititisa esegiyenawapa maemagiri, agu kaoꞌena puma tutusuritagiri, Awamusaꞌamati atokaemagiri, to kinaꞌmikaba agu kaoꞌena puma tintaraꞌena puwaitawe. Pintanaba kanarasaye.
2 Piya pepa, tigeba ka tintabarimagiri, agu kaoꞌena kaga pumagiri, kaꞌmasa puma mima, ka tintabarima miyiyo. Tigeba piya pukibepa, naꞌmuntananempaba pumaewakiye.
3 Piya, tigeba tigeꞌena manakaba a-ntapimagiri, tipa a-mpaete iyiyo. Pipa kampaye. Tigeba tipa maete tumima to kinaꞌmikaba: Tagasawema, napiyiyo.
4 Tigeꞌenaena manatipa a-kabiyiyo. Pipa kampaye. To kinaꞌmintanarapeba kaga kabiwaitama iyoꞌmaeyiyo. Karaisiti ntapiyenara aegaraiyo
5 Pigoya, Karaisiti Isu napiyisa puma, tigeba kaꞌmasa puma napiyiyo.
6 Napiyenawapa mayamawe: Piya, aeba Kotirakaꞌya mintemipa, Kotige kaꞌmasa puma mikenaenagaba kampa antageꞌenaba puma ageba maete tumiye.
7 Aeba mikenaenawapa kaitegina, wasana aborama kayokaya kinaꞌmi nkiyoga puntiye.
8 Piya puma aborama, aeba wasanarakaꞌyantana puntiye. Piya puma aeꞌwa nkaupa maete tumima, Koti nkawamu wasirite wamagina purometa uma nagarintiye. Eya, awamu wasima maripo yara purintiye.
9 Pika Kotiba inata asitama, ae ageba aꞌyaꞌma kinaꞌmi nkigeba asu agasima to agi omintiye.
10 Pi nkagi omintipa, pipa aꞌyaꞌma mantarisa kinape mabisa kinape mawama amentapintisa kinape, igeba kaga Isuti irakabima mima, ae agegaꞌe uma asagayukibewe.
11 Piyama aꞌyaꞌma kinaꞌmi nkiwamupisaba: Isu Karaisitiba Waꞌegawe, ukibewe. Piya ukibepa Koti taba nkagegaꞌeba asagayukibewe. Tigeba wasanami nkikapi eꞌwasaena puwaitaiyo
12 We, nabugai kinaꞌmitaba, paipa tigeba aꞌyaꞌma yaga nae nawamu wasintasa puma ibage pabiyama piyo. Pai mintanto ntaga abiwanane. Ibaba kampa tigege mintakubo ntagageba kakema tabera wasimagiri, tigeba tiyekuru puma tabaraba puma Koti tiꞌikenaenama nkauꞌwaka napima esegima aboraiyo.
13 Piya, ae aꞌmuntanaga tibekiri, yoga pukibeka Koti tikapinti yoga puma tutusuritaye.
14 Piya, aꞌyaꞌmaena puntiripa, a-tiyekita puma kamanapa a-nkakayuyiyo.
15 Tigeba pabiya pukibepa, parutu kina miyigina Koti nkaobi kamanatipa kampa waikiye. Piya puma mima, tigeba Koti ntagara kanta puma mima, kampa aogima napima antage pe kinaꞌmi nkikapi mima, e kanta puma eꞌwasaba puwaitaiyo.
16 Eya, miyabaꞌenama kamanapa uwaimimagiri eꞌwasa puwaitaiyo. Piya pigipa, Karaisiti kanabipa naꞌmu puma mayama napikuwe: Tigeka naeba uwa yugaba kampa puma esegiyenanepa kampa uwaba maebugasuwema, napima naꞌmu pukuwe.
17 We, timatitiꞌenari tabera puma Kotiti titipa muta atawe. Pigoya, naeguyigina korantepa tumima tigeꞌenage kaga Kotiti muta atakiye. Pipa kanarane. Pika naeba nanta asoyaena puma tigege naꞌmu pukuwe.
18 Piyama, tigegeba tinta asoyaena puma naege kaga taꞌmu peno. Timoti kamanane
19 Pigoya, Waꞌega Isu abekana kanarasakapa, uwaena yaganto Timotipa otakana tigeti wakiye. Aeba wama tigategina to aꞌwae puma kanama tigekaba ampa unamekana, nantawamaba aꞌmuntanaba pikiye.
20 Eya, Timoti aeba asi nasiba tigeka napima aumarasa esegi puritakena piye. To kapa ae kanta yagaraba naegeba kampa mintiye.
21 Piya, aꞌyaꞌma to kaꞌisa kinaꞌmiba igewaintanara amana kabintini, Isu Karaisiti ntugarapa kampa aogima kabiyewe.
22 Piya, Timoti aeba mono kamanataka, yagara abawampa aoꞌmaeyisa puma naoꞌmaema yogaba piye. Pi nkagowapa tigeba abintawe. Aeba aogi yagarawe.
23 Pigoya, naeba marupa naeti aboramintanaba ago agagaitegintema karuꞌena aepa tigeti agarubakana wakiyema, napiyuwe.
24 Piya, naeba Waꞌegawama ntapiyenaga nabegina, ke iremika naegeba aro ntaganto ampa tigasanagaba nabiye. Epaparotaitasi kamanane
25 Pigoya, naoꞌyagara Epaparotaitasiba, pai tigeba agarubauguna naeti kanama tigegaꞌerapa naoꞌmaenti ntagara, aeba naege ka yuga puma, kama kinaꞌne kanta yagara mintiye. Aepa ago agarubakana tigeti wanema napiyopa, to kipa kampaye.
26 Piya, yoni nkabogiri awaga kamana abuguna tintaraꞌena abuma kunta piye. Piya puma, aseyonabisa uma tigakena piye.
27 Tagane. Paipa aeba yoni nkabuma purikena pogana, Koti antara potama aoꞌmaentiye. Piya, Kotiba ae abiwa antara potantiyanane. Kampaye. Aeba naeke antarapa punatantine. Aeba tabe kuntuyenama nairarikaesanagaba kampa abogana naoꞌmaentiye.
28 Piyama nae nabugamika otakana wakiri, tigeba agama tiꞌmu pigina, kuntaenanekeba maete tumenomawe.
29 Piyama tigeba tiꞌmu puma Waꞌegawama nkageraka aepa aba piyo. We, tigeba piya kinaꞌmi nkigegaꞌeba asagayuyiyo.
30 Piya, aeba yogaripa naeti ampa aboramagina, aogama misanagaba aeba kampa napiye. Kampaye. Kampa napimagina, aeba Karaisiti ntugaraka purikena puntiye. We, piya kinaꞌmi nkigeba asagayuyiyo.
1 We naoꞌmitaba, naeba maya kamana uma aꞌya pukena puwe: Tigeba Waꞌegawamaka tiꞌmu piyo. Naeba to kakema kaema timikenaga kampa kuntaba nabegi esegi puritakena puwe.
2 Pigoya, ata yuga pe kinaꞌmiba, igeba kabu kara kanta puma mima, wasanami nkipa kasama araꞌenaba uwa puwaitawe. Pi kinaꞌmikaba aogima kabima miyiyo.
3 We, Koti Nkawamusaꞌama taoꞌmaeyagi, Karaisiti Isu nkageba asagayuma tautepa kampa maete iyompe kinaꞌmitaba, taeba taga araꞌenawapa maeyune.
4 We, naegeba nauꞌnepa maete iyosinta, wasanami nkiyobi kanara maete iyosine. Piya, to kaꞌwaina au maete iyekapa, naeba asugaikuwe.
5 Piya, naeba aborama mintuwagana, papa tonaentisa kakaga umaeyogana naupa kasanta, naeba Isureyo yagaranawe. Naeba Penisameni pi tuntawe. Yuta kinaꞌmi maꞌnatanta, Yuta ago yagaranawe. Naeba Koti nkago kamana aegarao, Parasi yagaranawe.
6 Naeba Koti ntuga puwema napima, asagarare puma Isu mponota aiꞌaru pume kinapa karana puwaitamagi, Yuta yagara aogima mintantuwe. Piya, mono ago kamanaꞌama nkarupuyenaraka naeti kamanapa kampa aborantine.
7 Pigoya, aꞌyaꞌma pintanarasa tabe nagiba maentopa, pipa anagiyenawe. Karaisititi atokaekenaenama asugasayema abuwe.
8 We, aꞌyaꞌma tonaba anagiyenawema napiyuwe. Piya, Waꞌegane Karaisiti Isu ae agoba abibebe pukenaenanaba aꞌyaꞌma tonamapa asugasaye. Piya, aeka aꞌyaꞌmaenanekaba iꞌnintanawema napimagi kaintone. Eya, naeba Karaisiti nkarakuꞌma upebe puma,
9 aeti atokaekenaga tabe naginepa kaintone. We, naeba ago kamanapa aegaꞌma arupu nagiba kampa maeyuwe. Kampaye. Naeba Karaisititi namatiti pogana, pi ntamatitiꞌenagaba Koti aewapa: Arupu yagaragawe, unataye.
10 We, naeba Karaisiti nkagoba aogima abibebe pukena puwe. Piya, ae asikena esegiyenawapa naeti aborasanaga nabiye. Piya, ae auki nakiyena abuntisa puma naepa pabiyama nabeka, ae purinti nkagoba aogima abima kaꞌmasa pusanaga nabiye.
11 Piya, naeba purintapisa asima aota kina misanaga nabiye. Poro esegima ntasima aogi antotaꞌena maekena puntiye
12 Pigoya, naeba purintapisa asinti nkeꞌwasa kampa ago maema, kasa mima aota kina kanta naeba kampa puma mintuwe. Pipa kampaye. We, aota misanaga nabiye. Piya, Karaisiti Isuba naba puma: Naeꞌenawe, unatantika, naeba ae aobi aota kina abora misanaga esegima ntasuwe.
13 We naoꞌmitaba, naeba piyamapa kampa aborauwe. Pigoya, naetiba ka napiyena waintiye: Piya, naeba pai putontanaba nakaꞌi kaitegi, naeba ainti aborakibintanaga esegima karusuwe.
14 Piya, naeba kampa migarama esegima karusuma aꞌimarantaꞌenari wama, Karaisiti Isu nkaꞌmuntanawapa mantabinti maekena puwe. Pintanaraka Kotiba uta marantine.
15 Piya, aogima ntapiyena wainta kinaꞌmitaba, pi aota kiꞌiba aegarano. We, tigepisa kaꞌwaina to ka napiyenaba aborakibipa, Kotiba agowapa aogima urimima arupu puritakiye.
16 Piya, ka kita kanantompe, pabiyama wano.
17 We naoꞌmitaba, paitaritakiri nagamagiri nae posa piyo. Piya, tae miyompesa puma miye kinapa igama iyegaraiyo.
18 We, paipa uwoma ntagaba tigepa kaꞌisa kinaꞌmikaba kamana urimima, to kake naoꞌnu pagegi urimuwe. Piya, uwaena kinapa Karaisiti mparipowamapa kamaena potama mintawe.
19 Igeba iꞌama ntapiyena aegaꞌma kotiwai kantaba pewe. Igeba inintanawaimpa asagayuma iꞌmu pewe. Igeba mabisaenaga napiyewe. We, pi kinaꞌmiba purikena kiꞌi wawe.
20 Pigoya, manta ago kinatawe. Taeba kabintakana, Waꞌega Isu Karaisiti mantaba kaite tumpa tauꞌima taba pukibika, agawa puma mintune.
21 Piya, aeba pi ntagaba iꞌninkamana tauꞌamaba aeꞌwa nkauꞌama pisa puma aꞌwae puma kaga eꞌwasa pukiye. Aeba piyama aꞌyaꞌwaemaena kabiratakena esegiyenarasa eꞌwasa puratakiye.
1 We naoꞌmitaba, naeba agu kaoꞌena puritaogana, naguꞌamaba tigeka abugaye. Tigeba naꞌmuntana antotaꞌenane mpintawe. We, nabuga kinapa, tigeba piyama Waꞌegawamati atokaema esegima miyiyo.
2 Pigoya, Yuwotiyawa, Sintikiwa suma, tisigeba Waꞌegawamati atokaema ka napiyena piso.
3 We, ka yuga pome taga naoꞌyagaraba, naeba mayama ugamuwe: Kaeba pi tara wae taraba isiyoꞌmaeyo. Isigeba naebe, Keremenibe, to kaꞌisa igewaipa miyaba isapi wainti kinaꞌmibe, isigeba kabo puma mima mono kamana yugaba pese. Pi tara wae tara isiyoꞌmaeyo.
4 Tigeba Waꞌegawamati atokaema tiꞌmu puyaba miyiyo. Naeba to kakeba yuwe: Tigeba tiꞌmu piyo.
5 Pigoya, Waꞌega aborakenaenamaba agarosaye. Tigeba paruyena puma miyigina aꞌyaꞌma kinaꞌmiba tigaiyo.
6 Tigeba tonaronagaba a-tiyekuruba piyo. Pipa kampaye. Tigeba aꞌyaꞌmaena pintanagaba Kotiti tiꞌmu puma nunamurasa esotaiyo.
7 Piyama esotaiginaba, Karaisiti Isu ntugarasa Koti nkanta paruyenamaba tintarape napiyenaritape aogima kabikiye. Pi anta paruyenamaba aꞌyaꞌma kinaꞌmi ntapiyenaba igasaye.
8 We naoꞌmitaba, ma kamanapa piya uma nagarikena puwe: Aꞌyaꞌma tagantanabe, aogi napiyenabe, arupuyenabe, apuyapukenaenabe, tikaenabe, aogi agigaꞌe ukenaenabe, aꞌyaꞌmaenama asugaikenaenabe asagayukenaenabe waintika, piyaenagaba tigeba napiyiyo.
9 Piya, nae uriminto kamanapa abima aegaꞌmagiri, agonepa agama abewe. Pintanaba wasima miyiyo. Piya piginaba, agoya Koti tigege mikiye. Poro paenabisa Piripai kinaꞌmiti aꞌmuntana imintiye
10 Pigoya, ibaba tigeba naeka to napiyenaripa aboragi, agama naeba Waꞌegamatiba tabera naꞌmu puwe. Piya, tigeba asi nasiba naekaba napintapa, naoꞌmaekena kitipa kampa waintantiye.
11 We, naeba kaꞌisaenaga kusi puwe, piyaba kampa yuwe. Pipa kampaye. Naeba mayama ago abuwe: Tonarona naeti aboragina, nantawamaba Kotiti paru pegina aꞌyaꞌmaenaba kanara piye.
12 Piya, nagenepa kampa asagayukibepa, kanarane. Asagayukibepa, pipa kanarane. Piya, nagaꞌena nabukenaenabe nagaꞌe pakenaenabe, uwaenaena maekenaenabe iꞌmikenaenabe, aꞌyaꞌma yagaba aꞌyaꞌma aukaꞌiba, naeba Koti paruyenabi mikenaenama nkagoba agantuwe.
13 Eya, esegi punatami ntagaramaba esegi punatagi, aꞌyaꞌmaenaba aogi puma miyuwe.
14 Pigoya, tigeba kanara kayone punatama, kuntaenanepa aesagabewe.
15 Piripai kinaꞌmitaba, tigeri piyama abewe: Paipa naeba agobima aogi kamanapa tigeti aboramagi, Masetoniya maba atate kanauwagana, pi ntagaba to kaꞌisa monota aiꞌaru pe kinaꞌmiba kampa naeti atokaema, ankami ankamiyenaba kampa puntane. Kampaye. Tigemana piya puntane.
16 Eya, naeba Tesaronaika mintuwagiripa tigeba ka yaga yabatitasa naoꞌmaemagiri, ti kakema aintiba naoꞌmaentawe.
17 We, naoꞌmaekibentanagaba kampa kegaꞌeba yuwe. Kampaye. Nae nabemika monotipa auꞌwa aborakana tigegaꞌe waiyenema yuwe.
18 We, ibaba uwomantana namiwaema namegana pumaewaye. Piya, tigeba tiꞌmuntanaba atagana Epaparotaitasi nkayata kanagi maeyuwe. Pi tiꞌmuntanaba Kotiti muta atagana, aogi aguntaenaba Koti pigama aꞌmu pegina antawamaba kanara piye.
19 Pigoya, Kotinempati aꞌyaꞌma aogiyenaba pumaema waintika, tigeti aꞌyaꞌmaema kampa waintintanaba aeba Karaisiti Isu ntugarasa aborarimikiye.
20 We, tae tabarempa Koti, ae agegaꞌeba asagayuyaba miyeno. Tagane. To kaꞌisa kamanane
21 Pigoya, aꞌyaꞌma Karaisiti Isuti atokaeya kinaꞌmikaba, Poroba: Aya pewe iyema, uwaimiyo. Piya, mono kina naege miye kinaꞌmiba kaga: Aya pewe, yewe.
22 Aꞌyaꞌma Kotiti atokaeya kinaꞌmiba: Aya pewe, yewe. We, Sisa ntamapi yoga pe mono kinaꞌmi igeba esegima: Aya pewe, yewe.
23 Pigoya, Waꞌega Isu Karaisiti nkawagaenama tintabaipi waima waiyeno.
Poro piya isa kaentiye.