1 Nae Porona: Karaisiti Isu nkaposorogawe, Koti abogana unatantemine. Piya, Epesasi kumatasa Kotiti atokaema Karaisiti Isu nkawamu wasiye kina, ma nkisapa tigeti kaeyuwe.
2 Pigoya, tabarempa Koti, Waꞌega Isu Karaisiti, isigetisa awagaenabe paruyenabe tigeti waiyeno. Koti mono ki tayakintiye
3 Pigoya, Waꞌegare Isu Karaisiti nkabawampa Koti, aeba mantarasaena akayona puratama, Karaisititi atokaentompeka mono kaoꞌenawa toma toma tamemine. Pika agegaꞌeba asagayuyeno.
4 Paipa ma mpaba kampa puntometa aeba Karaisititi atokaeratakenaga utaratantine. Taeba ae aobi aota mima kamanate kampa waikibika Koti piyama utaratantine.
5 Piya, Koti aewa nkabomeka, Isu Karaisititi atokaema araga yagarawaka uma mikunompeka, agu kaoꞌena puratama utaratantine.
6 Aeba abugai ntagarawaka uma eꞌwasaenawa awagaenawatasa atitatama aogi puratantine. Piya pemika, Koti nkagegaꞌeba asagayuyeno.
7 Piya, Koti nkawagaenawampa pumaewaogana, Isu puꞌmagina koratasa aiboꞌenarepa asuꞌa puragasima ika puratantine.
8 Piya, awagaenawapa asunu kaema uwaena tamintana, aogi napiyena abompentanarepa aboraratantine.
9 Piya, paipa Koti aeꞌwa nkabugaomentana kakamagina, pai Karaisiti ntuga aborakibemika untemintana ibaba aegaꞌma taeyakiye.
10 Pi nkabugaomentanaga ke iꞌma, aborakibi ntagaga aeba ago aꞌitantiye. Piya, mantarasaenabe mampabisaenabe aki potama, Karaisitiba aꞌyaꞌmaenama nkwaꞌega mikiyema, untiye. Pi untintanaba aboraratantiye.
11 Pigoya, Kotiba aeꞌwa nkaumawatasa uma aꞌyaꞌwaemaena esegi piye. Piꞌna paipa tagama napimagina, Karaisitika uma ae tu mpikunompeka utaratantine.
12 Piya, paitama Karaisititi atokaentompe kinaꞌmiteka, Koti nkeꞌwasaenawantaga mima agegaꞌe asagayukenaga utaratantine.
13 Piya, tigeba pabiya taga kamana, tiꞌikena aogi mono kamana, abima Karaisiti nkaegarantakana Koti aeba pai tamikena utaratantemi Nkaota Awamusapa tigepe taepe tamima, ae araꞌena purataye.
14 Pabiyama, Koti ainti tababuma utaratanti nkeꞌwasa antota tamikibika napima, ibaba Aota Awamusaꞌwa tamegina, taege kaga mimagina Koti nkaraꞌena purataye. Pika agegaꞌe asagayuyeno. Epesasi kinaꞌmika Poro nunamu untiye
15 Piya, tigeba Waꞌega Isuti timatiti potamagiri, aꞌyaꞌma Kotiti atokaenta kinaꞌmiti agu kaoꞌena puwaitawe. Pika tiwaga kamana abimagi,
16 nunamu yo ntagaba asi nasi tigeka napimagi, Kotiti naꞌmu potauwe.
17 Piya, Waꞌegare Isu Karaisiti ae Koti, eꞌwasa tabarempa, aeꞌwa nkauma timekiri, pika aososima napiyigina, Waꞌegawama nkagowapa uma aboraritakiri, abibebe puma abiyoma, nunamu yuwe.
18 Piya, eꞌwasaenama ntapiyenawa timisanagaba nabiye. Mantabisa tigeti aborakibiꞌna tigeba aogima abisanagaba nabiye. Pigoyema, Koti utaratanti nkeꞌwasa antotapa aeti atokaentompe kina taeti aborakibiꞌna, abigina auꞌwantana peno.
19 Piya, Isu nkaegarantompe kinaꞌmiteti esegiyenawapa aboraramima tabe puma asu againtiye. Pi nkesegi yugawaka abigina auꞌwantana peno.
20 Piya, pi nkesegiyenawatasa Karaisiti purintapisa asitamagina mantabinti ayatakanti asitantiye.
21 Piya, ibabe aintibe aꞌyaꞌma kiya kinape, kabirata kinape, esegi kinape, kamana ukena kinape, aꞌyaꞌma toma toma inta kinape, Koti otagina Karaisiti asu igasima mintiye.
22 Piya, Karaisiti nkagisabinti aꞌyaꞌwaemaena potama, aꞌyaꞌma monota aiꞌaru pompe kinaꞌmite nkaiꞌnere otantiye.
23 Piya, mono kinaꞌmitaba Karaisiti nkaukanta puma miyokana, Karaisitiba tantabaipinti mima, aꞌyaꞌwaemaenaba pumaetama miye.
1 Pigoya, paipa tigeba aiboꞌena puma aguntaena pumagiri, tigupa Kotiti puꞌwantiye.
2 Piya, paipa tigeba agasiyaena puma mampabisa kinatagiri, ke kinaꞌmi nkwaꞌega aegaꞌma mintantawe. Piya, ibasa yagaba pi kewamaba Koti kamana akayuma minta kinaꞌmi nkintabaipinti yoga piye.
3 We, aꞌyaꞌma taeba paipa pi kinaꞌmige kaga mimagi, paisa tagu iꞌnintanabi mpima napiyenarempape tauꞌamape abugaomentana aegarantompene. Taere piyama mima aꞌyaꞌma to kinaꞌmi pesa puma mima, Koti antota amoꞌena puratakena kina mintantompene.
5
4 Tagane. Tae aiboꞌenarempa taeguyoga, puꞌwanta kina kanta puma mintuwakana, Koti nkantaraꞌenawampa pumaewaogana, taeka abugaogana agu kaoꞌena tabera puratama, Karaisitike kaga asiratantine. Eya, Kotiba awagaena puritama tiꞌiye.
6 Piya, aeba taepa Karaisiti Isuti atokaeratamagina, kaga mantara mikenaga taba puratantine.
7 Piya, aꞌyaꞌma yaga Koti asugainta awagaenawapa aborawaekibemika, kayonena puratama Karaisiti Isuti atokaetama taba puratantine.
8 Abewo. Koti awagaena puritama, timatitiꞌenarika tiꞌiye. Tigerinane. Pipa Koti aeꞌwa ntapiyenarasa timiye.
9 Piya, tiyapisaenaba kampaye. Aꞌyugu ka yagarama au maete isanaga, pipa Koti uwa tamiye.
10 Koti aewa aboraratamagina, Karaisiti Isuti atokaema kasa kina mima tayapisa aogiyena puma mikubompeka, aboraratantine. Piya, pi tayapisa aogiyena pukubompeka Koti paipa utaratantine. Karaisiti ka kinaꞌena puratantiye
11 Tigeba abiyo. Yuta kinaꞌmiba igewai nkiyapisa ipa kasawe. Pi kinaꞌmiba tigekaba: To marisa kina kampa ipa kasama kampa abinta kinane, uritawe. Piya, paipa tigeba mono kampa abinta namu kina mimagiri,
12 pabi ntaga Karaisitipa pagasara atama mintantawe. Tigeba Isureyo kinaꞌmiti abeꞌi mintiri, Koti aborawaekibintanaga uwaimogiripa tigeba kampa abintawe. Piya, Koti tamikenaenagaba kampa napima agawa pumagiri, mampabi uwa mima Kotitiba kampa atokaentawe.
13 Piya, tigeba paipa pagasara mintiri, ibaba Karaisiti Isuti atokaeyagana, korankatasa ika puma tibabegiri, kanama Koti nkagora miyewe.
14 Piya, Karaisiti aeba agore mimagina, tanta paruyena puma miye. Paipa Yuta kinaꞌmige to marisa kinaꞌmige kamaena puma mintantompekana, ibaba Karaisitiba tupurepa uwa airataye. Piya puma, tara kinapa maema ka kinaꞌena puratantiye.
15 Piya, Karaisiti aewa ntuga pumagina, Yuta kinaꞌmi nkago kamanape aegaranta ariwape maegaintemine. Piya puma, aeba tara kinaꞌmi kamaenarepa kasima, ka kinaꞌena puma paruyena puratantiye.
16 Piya, maripora puꞌmagina, kamaena aꞌya kasima, tara kinapa maema aki puma Kotiti ka auꞌena puratantiye.
17 Pigoya, Karaisiti irosaꞌmagina pagasara mintanta kinape, Koti nkagora mintantompe kinape, paru kamana uramintiye.
18 Piya, Karaisiti ntugarasa ka Awamusaꞌama kaꞌena puratama, tabarempati ikena ki aboraratantiye. Koti nkaegaranta kina aeꞌwa ntamane
19 Pigoya, tigeba ibanto namuꞌisa aꞌyo kana kina kampa mintawe. Tigeba Kotiti atokaenta kinake ka kinaꞌena pumagiri, Kotiti ka tuntana puma Koti ntama kanta puma miyewe.
20 Aposoro kinape poropete kinape Koti igepa marukanta puwaitama, Karaisiti Isu aepa waꞌega aetamagina, taepa maema aeꞌwa ntama kanta puratantine.
21 Piya, aꞌyaꞌma pi ntamankama nkayampu Karaisitita uma asaeratagina, Waꞌegawama nkaota mono nama anosama waikena piye.
22 Pabiyama Karaisitita Awamusaꞌama tigegepa asaeritagiri, Koti mikena namanka aborawe.
1 Pigoya, naeba Porona mima, to marisa kina tigeka Karaisiti Isu nkigaꞌna yagarawantana puma mintuwe.
2 We, tigeti: Mono yuga poma, Koti unatama, awagaenawa namemintanaga tigeba agobaya abewema, napiyuwe.
3 Piya, Koti kakama waintintanaba uma aborama namoga, pi kamana aronkanto paipa kaema urimintuwe.
4 Piya, Karaisititi kakanti kamanaꞌamaba napiyenanepipa arawaye. Pipa aisuma abiyo.
5 Pi kamanaꞌama nkagowapa paipa wasana mirite kananta kinaꞌmiti kampa aborantiye. Ibasa yagaba Awamusaꞌama aota aposorowape poropetewape uwaimegini, aborama uramewe.
6 Pi kakanti kamanaꞌama nkagoba mayama waintiye: To marisa kina, tigebe taebe ka tu, ka auꞌena puma mimagi, Karaisiti Isu ntugarasa Koti utaratantintanama nkauꞌwapa kaga maemagi mikune.
7 Pigoya, pi aogi mono kamana uwaimoma, unatantine. Piya, Koti awagaenawapa aboranamimagina, mono yugawata unatama, pika esegiyenawapa namintemine.
8 Piya, aꞌyaꞌma Kotiti atokaeya kinaꞌmi tu amentapinti mintuwagana, Kotiba awagaenawapa aboranamima: To marisa kinaꞌmiti wama Karaisiti nkaogiyenawaka uwaimoma, unatantine. Piya, pi Karaisiti nkaogiyenawampaba atupe awamobe kampa uma aꞌya wantaꞌenawe. Pika uwaimoma, unatantine.
9 Eya, Koti paipa aꞌyaꞌwaemaena pumarantana, napiyenawapa aegaꞌma, ainti pukenaena kakantemi, ibaba pi kamanaꞌwapa aꞌyaꞌma kinaꞌmiti aborama uwaimoma, naba punatantine.
10 Piya, Kotiba mantari paitanta kinape esegima mpiye kinape, aogi napiyenawapa iyakikenaga monota aiꞌaru pompe kinaꞌmite abakatepi aeꞌenawapa ibaba aogima aboraye.
11 Pika paitakaꞌya Kotiba napima, Waꞌegare Karaisiti Isu, ae yuga piya pukiyema, otama aborantiye.
12 Piya, aeba Kotiti ikena kitene. Taeba aeti tamatiti potama, tanipa kampa puma, Koti nkaobi aborakenaga taekuruba kampa pukune.
13 Piya, pika napima abiyo. Nauki nakiyenanempaka aꞌyugu tintawama arusasanaga, pipa kampaye. Tigetaka ataena punatapa, pipa tiyoꞌmaekenaenawe. Poroba Epesasi kinaka nunamu untiye
15
14 Pigoya, mantarake marake aꞌyaꞌma kina tamata tamata Koti aboraratantiye. Aboraratantemi tabati narakabima, tige aogima mikibeka nunamubisa maya yuwe:
16 Koti tabe eꞌwasaenawatasa Awamusaꞌwapa tintabaipinti pumaeritama esegima asiritanema, nunamu yuwe.
17 Piya, timatiti pigina, Karaisiti tigupi miyaba miyeno. Abuꞌama mabi esegi potagina, esegi pisa puma agu kaoꞌenawapinti esegi piyo.
18 Piya puntiri, aꞌyaꞌma Kotiti atokaenta kinaꞌmige kaga Karaisiti nkagu kaoꞌenawapa tabe, eꞌero, inatibe, mabintibe, agasiyema nunamu yuwe.
19 Piya, agu kaoꞌenawapa wasana abikenaenaba igasima waima waintiye. Piya puma, Kotiti agu pumaema wainti, piꞌna pumaema wairitano, pabiyama tigeka nunamu yuwe.
20 Pigoya, Koti nkesegiyenawampa tantabaipinti yogaba piye. Ae esegiyenawatasa aꞌyaꞌma esukenaenarepe napiyenarepe asu agasima, tabena pukena yagara mintiye.
21 Piya, aꞌyaꞌma monota aiꞌaru pompe kinaꞌmitaba Karaisiti Isuti atokaema mirite kanama, aꞌyaꞌma yagaba Koti nkage asagayuyaba miyeno. Tagane.
1 Pigoya, naeba Waꞌegawama ntugara igaꞌna yagaramana, maya urimuwe: Koti monota utaritama tibabunti, pika napima aogima miyiyo.
2 Piya, tige tumima pasema mima, tigaꞌnagi agoya puwaitama, kuntaenawaipa atama agu kaoꞌena puwaitaiyo.
3 Awamusaꞌama maema paru puma asaerataika, pika napima kaꞌena puma miyiyo.
4 Mayaenaba, taeba ka tauꞌena puma, ka Awamusa maema mima, kaꞌenaga agawa puma mintakana Kotiba tababeno.
5 Piya, Waꞌegaba kaꞌenawe. Tamatitiꞌenaba kaꞌenawe. Monota paitaratakenaenaba kaꞌenawe.
6 Koti ae kaꞌanto aꞌyaꞌma kinaꞌmite tabarempawe. Aeba aꞌyaꞌma kina asuragasima mima, aꞌyaꞌma kinaꞌmite abakatepi mima, yogawa aꞌyaꞌma kinaꞌmite tayara puma miye.
7 Piya, Karaisiti napimagina aꞌyaꞌma kinaꞌmitepa tayapisaena abikenaena ka ka tamoga, pika awagaenaba maentune.
8 Pika mono isaꞌamaba maya iye:
Aeba inati intipa, uwoma igaꞌna kina akariyobaꞌma paitawaitama ibabute ima, wasana aꞌmuntanaba imintiye, iye.9 Pigoya, pi kamana: Aeba inati intipa, pipa nanaga untiye. Piya, inati abiwapa kampa intana, aeba marupa mabintirakaꞌya tumintemine.
10 Piya, mabinti tumintemi ntagarama, to ae manta abobori ima asugasima, aꞌyaꞌmaena pumaema miyenema intine.
11 Pigoya, aeba pabiyaki taya pukenaena aꞌmuntanawa tamintiye. Piya, kaꞌisa kinapa aposoro yugara uwaitantana, kaꞌisa kinapa poropete yugara uwaitantana, kaꞌisa ke iꞌma uwaimikena yugara uwaitantana, to kaꞌisaba pasitorowa, tisawa, suma uwaitantiye.
12 Piya, Kotiti atokaeyompe kinapa taoꞌmaema, mono yugawapa puma, Karaisiti nkauꞌamaba taepa esegi purataka, Karaisitiba pi aꞌmuntanawapa aboraramintine.
13 Piya, pi ntugamaba wairite kanama aꞌyaꞌma taeba kanarasama ka tamatiti puma, Koti ntagaragaba kaga aogima ntapima, monoti anosakana, Karaisiti nkesegiyena pumaerataka ae kanta puma mikunompeka aꞌmuntanawa tamintemine.
14 Piya, monota aꞌyugu inamu kanta puma mikune. Piya, kaꞌisa kinaꞌmiba igebinkaobi puma tonarona kamanaꞌwaitasa uma agoꞌena puratakena pewe. Aꞌyugu inamu kanta puma mima kamanaꞌwai abima, esibawama yoni nkaosa aibarara purite nasisa, piyaba aꞌyugu pukune.
15 Pipa kampaye. Agu kaoꞌena puwaitama taga kamanapa yeno. We, Karaisiti aeba aiꞌnerene. Monota anosama esegi puma aeti atokaeyano.
16 Aeti atokaeyokana aki puratagi, ae auꞌwa mpiyokana kabirataye. Piya, taeba aꞌyaꞌma auꞌama nkaukaꞌiba mima, agu kaoꞌena puma utaratanta yugaba aogi pokana, auꞌama anosama aogima asiyune. Mono abe kinaꞌmiba kasa kina miyewe
17 Pigoya, Waꞌegawama nkawamutasa ageꞌma kamana esegima uma aborarimuwe: Piya, tigeba to marisa kampa abinta kina pesapa a-piyo. Igeba kampa aogima napima,
18 abikenaenawaipa airarikaegasawe. Piya, igeba Kotiti igupa akumpaꞌmagini kampa napinta aiboꞌena puma Kotige mikenaenaba ikaꞌintaesi potama,
19 inintanaba kampa punta kupiyona puta nasimagini, iꞌnintanabinti ubaiꞌma aꞌyaꞌma tonarona kamparagaenaba pewe.
20 We, tigeba Karaisitintanagaba kampa abima piyaba pewe. Kampaye.
21 Naeba ago abuwe. Isuti tagantanaba waintikaba, aogima pi kamanapa urimuguri, tigeba ago abintawe.
22 Piya, tigeba paisa timawama ntugaba kasiyo. Paipa tiyobi airarikaema ataenaga abugama, pintanama maema ata puritantiye. Piya, pi paisaenaba kasiyo.
23 Piya, napiyenarimpaba kasaꞌena pekiri,
24 tigeba kasa kina aboraiyo. Piya, tigeba Koti ae aoga pumaranti kina aota arupu puma taga kasa kina aboraiyo.
25 Pigoya, tigeba kumpariꞌenaba kasimagiri tiyoꞌmige asi nasi taga kamana uma miyiyo. We, taeba ka tau mintune.
26 Piya, timoꞌena puntiripa aogima kabiyiyo. Aꞌyugu aguntaena pukibewe. Aꞌyugu timoꞌena uwa waintakana papa tupasikiye.
27 Aꞌyugu kewama kabi aꞌwaikibewe.
28 Kuntana piꞌnaba to kakema kuntanaba a-peno. Kampaye. Ibaba aewa nkayapisa aogi yuga puma, kaꞌisaena kampa wainta kinapa iyoꞌmaeyano.
29 Tiwamupisaba ata kamana aꞌnkaborano. Kampaye. Wasana iyoꞌmaekena kamanaꞌamana nkaborano. Piya puma, kamanatitasa abe kinaꞌmiti awagaenamana nkaborama iyoꞌmaeyano.
30 Tigeba Koti Nkaota Awamusaꞌamapa kuntaenaba a-nkamiyo. Piya, aeba arupu puritakena yagagaba araꞌena puritantiye. Kuntaenaba a-nkamiyo.
31 Piya, tigeba aꞌyaꞌmaena tinta tikikenaenabe, ka ibirakenaenabe, timoꞌenabe, tabera ata kamana ukenaenabe, kamana uma akaya ukenaenabe, aꞌyaꞌma to ataenabe, kasiyo.
32 Kasimagiri, tiyoꞌmipa kayone puwaitamagiri, agu kaoꞌena puwaitaiyo. Eya, Karaisititi atokaeyaka Kotiba aguntaenaripa asuꞌa purigasisa puma, tiyoꞌmipa pabiya puwaigasiyo.
1 Pigoya, tigeba Koti nkabugai ntakarantontowampitaba, ae pemisa puma miyiyo.
2 Karaisitiba agu kaoꞌena puratasa puma, tigeba wasana agu kaoꞌena puwaitama miyiyo. Piya, taeka aeꞌwa nkaumawapa meru kasima, Kotiti muta atama iga agunta asu abasantiye.
3 Piya, Kotiti atokaeya kinaꞌmitaba, tigeba kumiyenabe, aꞌyaꞌma iꞌnintanabe, to wainantanaga abugakenaenabe, tikabitaiyo. Aꞌyugu pika kamanapa aborakiye.
4 Piya, aꞌyugu tigeba iꞌni kamanape, aibo kamanape, karana kamanape usanaga, aogima kabima mima Kotiti tiꞌmu potaigina kanarasano.
5 We, tigeba ago abintawe. Kumiyena pe kinape, iꞌnintana pe kinape, to wainantanaga abugai kina igeba ama koti nkaegara kinape, igeba Karaisitige Kotige kabiratakenaenawaisipi kampa ubasikibewe.
6 Aꞌyugu wasana ampa esiba kamana uma iga puritaigiri aegarakibewe. Pika aogima kabiyiyo. Pika kamana akayuye kinaꞌmiti Koti amoꞌenawapa antota aborawaimikiye.
7 Piya, igegeba agaya agayaba a-piyo.
8 Eya, paipa tununtanabi mintantawe. Ibaba tigeba aꞌwae puma Waꞌegawamati atokaema eꞌwasaenawata miyewe. Piya, eꞌwasa kina kanta puma nasiyo.
9 Piya, aꞌyaꞌma aogiyenabe arupuyenabe tagantanabe, pipa eꞌwasaenama nkaꞌwane.
10 Piya, tigeba aogima nasima, Waꞌegawama nkabugaintanama nkaꞌwapa aboraiyo.
11 Pigoya, tununtana pe kinaꞌmi ntugaba a kampa aema yugawe. Piya, igegeba kaga pi ntugaba a-pumagiri arantaꞌenara agowaipa aborawaitaiyo.
12 We, kakama uma pugasantanama nkawaga kamana usanagaba nani ntabiye.
13 Pigoya, eꞌwasaenamaba aꞌyaꞌmaenama nkagoba aboramagina age atakenaenawe. Aborama age atakana eꞌwasa pukiye.
14 Pika mono isapi Kotiba maya iye:
Ibanto waitamintampe ntagara, karuꞌena kaogama purintapisa asiyegana, Karaisitiba eꞌwasaena kameno, iye.15 Piya, nasikenaenaripa aogima kabima nasiyo. Napiyena kampa wainta kinaꞌmi ntasisuba a-puma, abinta kina kanta puma nasiyo.
16 Piya, ibasa yagaba aguntaenaba pumaema waiyegiri, aogima kabima mima Kotintanaba maema piyo.
17 Piyama tigeba a-nkaiboꞌnabo puma mimagiri, Waꞌegawama nkabugaintanaba abima aegaraiyo.
18 Tigeba uwaena waini wanipa a-ntama aiboꞌnabopa a-a-piyo. Kampaye. Pintanamaba ata puritaya, tigeba Kotitisa Awamusa maeyigina, aeba pumaeritano.
19 Piya, tigeba tiyoꞌmige mono kamana uma, mono inibe, ibasa inibe, kasa inibe tiyoꞌmige uma, tigupi Waꞌegawamati ini uma, tiꞌmu potaiyo.
20 Eya, aꞌyaꞌma yagaba tigeba aꞌyaꞌmaenagaba tabarempa Kotiti tiꞌmu potamagiri, Waꞌegare Isu Karaisiti nkagera uma esegi potaiyo. Waya waena pe kinaꞌmi kamanane
21 Tigeba Karaisiti nkagegaꞌe asagaꞌyuma tiyoꞌmi nkimentanti miyiyo.
22 Wayapa, tiwaegi kamana wasima miyiyo. Piya pukibepa Waꞌegawama kamanapa wasima mikibewe.
23 Piya, monota aiꞌaru pompe kinapa Karaisiti nkauꞌwa mintokana, aeba tauꞌikena yagara mintiye. Piya, Karaisitiba mono kinaꞌmi nkaiꞌnewai mintisa puma, waba wayaꞌmi nkaiꞌnewaine.
24 Piya, monota aiꞌaru pe kinaꞌmiba Karaisiti nkawamu wasiyesa puma, wayaꞌmitaba, aꞌyaꞌma tiwaegi kamanapa wasiyiyo.
25 Waba, tigeba wayatipa agu kaoꞌena puwaitaiyo. Karaisitiba monota aiꞌaru pompe kinakaba aeꞌwa nkaumawapa meru kasima, agu kaoꞌena puratantisa puma, wayatipa agu kaoꞌena puwaitaiyo.
26 Piya, Karaisiti aeba piya puma mono kinaꞌwapa aeyoba tagasogana wani pasisu puma kamanaꞌamabeba kaꞌmasa pumagina, aota kinaꞌwantana puratantiye.
27 Piya, monota aiꞌaru pompe kinaꞌmitepa ae aoriba eꞌwasaenaba aboraratamagina, monoꞌamaba iꞌnintanabe aowapisipasiyenabe to kanaenabeba kampa waima, aota waima kampa ataba penema aboraratama, aeꞌwa mputa nataiyoma puratantine.
28 Piya, Karaisiti kabiratasa puma, wamitaba wayatipa agu kaoꞌena puwaitaiyo. Titi kabiyesa pumagiri wayatipa kabiwaitaiyo.
30
29 Piya, kaꞌwainaba aeꞌwa nkaupa kamaba kampa potaye. Kampaye. We, taeba Karaisiti nkaupa mintokana, mono kinaꞌwata kabirataisa puma wasanaba aeꞌwa nkaupa nakena amima aogima kabitaye. Piya pemisa puma wayatipa kabiwaitaiyo.
31 Pikaba mono isaꞌamaba maya iye: Wasanama ano aba atate wayake wage kabobuma isigeba ka isiꞌena pese, iye.
32 Pi esegi kamanapa nae napiyopa mayamawe: Isigeba ka isiꞌena pemesa puma, Karaisitibe monota aiꞌaru pompe kinaꞌmitabe ka tauꞌena puma mikune.
33 Pigoya, tigeba ka ka maya piyo: Tigeba titi kabiyesa puma wayatipa agu kaoꞌena puwaitaiyo. Piya pigiripa, wayaꞌmitaba, tiwaegi nkigegaꞌe asagaꞌyuyiyo.
1 Araga yagara, tigeba Waꞌegawamaka napima tino tibagi kamana abima wasiyiyo. Pipa arupuyenawe.
2 Piya, mono isaꞌamaba maya iye: Kaeba kano kaba kamanapa aegarao, iye. Pigoya, pi nkakumparanta kamanapa aeba marupa aogi antotaꞌena wantagane.
3 Pi nkantotaꞌenaba mayamawe: Piyama aegarakibempepa, kaeba aogima mintanapa mampara eꞌerota mikibene, iye.
4 Ibagitaba, araga yagararipa imoꞌena pusanaga tigobipa a-puwaitamagiri, Waꞌegawamantana abima wasikenaenaga kabiwaitaigina anosaiyo. Yoga kinaꞌmike kiya kinaꞌmike kamanane
5 Kayokaya, tigeba mabisa tabe kinatimpi nkiwamupisa kamanapa wasiyiyo. Tigeba tiyekuru puma aogi arupu puma mima, Karaisititi yoga piyo.
6 Aꞌyugu sepena puma wasanami nkiyora tabe yuga pusanaga aogima kabima mimagiri, Karaisiti kayokayaꞌena puma Koti nkabemintanaba tigutasa aegaꞌma miyiyo.
7 Piya, yoga puma wasanamiti wanane. Tigeba aogi tintabarima Waꞌegawamati aogi piyo.
8 Eya, tigeba ago abintawe. Wasanamaba aꞌyaꞌmaenaba aogiyenamana pukibipa, pabiya puma Waꞌegawamaba antotaꞌenaba aogiyena amikiye. Kayokaya kinape uwa kinape kaꞌmasa nkika imikiye.
9 Tabe kinaꞌmitaba, tigeba pabiya puma kayokaya kinatimpi nkiyekuru pukenaena a-puwaitama kayone puwaitaiyo. Tigeba aogima abiyo. Tigebe igebe kaga Waꞌegaripa mantabinti mintiye. Piya, aeba tabe agi wainta kinape uwa kinape kaga antotaꞌena imikiye. Karaisitiba iregutene
10 Pigoya, ka kamana amato puma ukuwe: Tigeba Waꞌegawamati atokaema esegi puma miyigina, agasiya esegiyenawapa pumaeritano.
11 Piya, tigeba aꞌyaꞌma Koti tamemi mpaꞌena kairipa maema piyo. Piya pukibepa, tigeba kanara asima esegi puma, kewama nkagoꞌenawapa aibasanakibewe.
12 Eya, wasana ibimanapa kampa kamaenaba pune. Kampaye. Amani paitanta kinaꞌmige, esegiyena pe kinaꞌmige, mampabi tununtanara kabintemi kinaꞌmige, aꞌyaꞌma mantarasa agunta pe kinaꞌmigeba kamaba peno.
13 Piya puma, aꞌyaꞌma maꞌena kairi Koti timemipa maema puma, agunta aborakibi ntagaba kanara asima esegi puma pi kinaꞌmigeba kamaena aogima pukibewe. Piya, nagarima asu igaikibeka maꞌena kairipa maema piyo.
14 Eya, tigeba asimagiri, tikapi tagantana maema amimagiri, arupuyenama nkiꞌana tibira atamagiri,
15 Koti nkaogi paru kamana uma aborawaimikena tigisa anapa maema pumagiri,
16 asi nasi timatitiꞌena iregutipa maema arakaebiyo. Piya, kewamanta yaku tanta iriyamaba pi iregutapa ampa pagonkosaꞌnama tuꞌma wakiye.
17 Koti tauꞌikenaenarasa maꞌena taminokuꞌena maema pumagiri, Awamusaꞌamanta paroya ntoginkapa maema uriyo. Pi paroya ntoginkapa Koti kamanane.
18 Piya, asi nasi nunamuba yiyo. Awamusaꞌama nkabemintana aegaꞌma Kotiti esotama nunamu yiyo. Aꞌyaꞌma yagaba tiyogama tiyekita pusanaga aogima kabima mimagiri, aꞌyaꞌma Kotiti atokaeya kinaꞌmikaba esotaiyo.
19 Tigeba naekegaba nunamu yiyo. Piya, Kotiba naekuruyenanepa kasima nawamupa aerarayeka, ae aogi kakanti kamanapa uma aborakenaga naeka nunamu piyama yiyo.
20 Naeba aogi agoya kamanaꞌwa ukena yagaranaga, naeba pika igaꞌnabipa mintuwe. Piyama nunamuba Kotiti unataigi, naekuruyenanepa kasimagi kamanaꞌwapa uma aogima aborano. Uma nagarikena kamanane
21 Pigoya, mikenaenanekabe pukenaenanekabe agowapa Tikikasiba urimikiye. Aeba tabugai taoꞌyagara, Waꞌegawama nkawamu wasima kayokaya yagara, aeba naekaba aꞌyaꞌma urimikiye.
22 Pika naeba ataogana tigeti waye. Piya, taekaba ayama mintawema umagiri napiyiyoma, tinta esegi puritakenaga tigeti waye.
23 Pigoya, Koti tabage, Waꞌega Isu Karaisitige, isigebisa paruyenabe agu kaoꞌenabe mono kinaꞌmititi waiyekana, timatitiꞌenaba kaga aborarimeno.
24 Piya, aꞌyaꞌma Waꞌegare Isu Karaisiti kampa tikabitanta tibugai kina, tigeti awagaenawapa waima waiyeno.
Poro piya isa kaentiye.