1 Naeba Poro, aposoronawe. Piya, aposoro yugara wasanamiba kampa unatauguna, to ka yagaramaba kampa yuga aboranamintine. Kampaye. Isu Karaisiti aebe, purintapisa asitanti ntagara Koti tababe, isigeba unatantamene.
2 Naebe aꞌyaꞌma naege miye mono kinaꞌmiba ma nkisapa kaeyokana, Karesiya mari monota aiꞌaru pe kinaꞌmiti tigeti waye.
3 Taba Kotige, Waꞌegare Isu Karaisitige, isigetisa awagaenabe paruyenabe tigeti waima waiyeno.
4 Piya, Karaisiti aeba tabarempa Koti nkabemintana aegaꞌma aguntaenaretaka aumawapa kasima, kamparagaena mampabi ibanto waintintanabisa akariyobatataye.
5 Piya pika, taeba Koti nkagegaꞌe uma asagayuyaba miyeno. Tagane. Aogi kamanapa kaꞌanto waintiye
6 We, tigeka naeba pami puwe. Karaisiti nkawagaenawataka Kotiba tigegaꞌe uma tiba pegiri, tigeba karuꞌena agaite aogi kamanapa toma aegaraga, naeba abite tabe pami puwe.
7 Piya, to ka aogi kamanapa kampa waintiye. Kampaye. Kaꞌisa kinaꞌmiba napiyenaripa paibukena puma Karaisitintana aogi kamanapa maema aꞌwae ubewe.
8 Piya, taeba uma taga kamana aborarimintompene. Pigoya, taewo, mantarasa enisorewamawo, akayuma kasa mono kamana urimikibipa, piya ukibiꞌnaba aꞌabibinti aesawano.
9 Eya, paipa taeba kamanapa ago urimintompeka ibaba to kake yuwe: Kaꞌwaina aeba kasa mono kamana urimima, pai tige maenta kamana akayikibiꞌnaba, aꞌabibinti aesawano.
10 Ma kamanaꞌnekaba ayama napiyewe. Ibasa kamanapa naeba wasanami nkiyobipera Koti nkaobi yuwe, a. Wasanami asoyaena punatataka yuwa, a. We, wasana asoyaena puwaitaosinta, pipa Karaisiti kayokaya yagaraba kampa miyosine. Poro aposoro aborantemi kamanane
11 We, naoꞌmitaba, naeba urimekiri aogima abiyo: Naeba aogi kamana pai aborarimintopa, pipa wasanami wanane.
12 Pipa ka yagaramaba kampa aboranamintine. Ka yagaramaba kampa nayakintine. Pipa kampaye. Isu Karaisiti aewa aboranamintine.
13 Pigoya, naeba pai Yuta kinaꞌmintana aegarantopa, tigeba ago abintawe. Piya, pi ntagaba naeba Koti mponota aiꞌaru pume kina agasiya kama puwaitamagi, pi mpono maegaikenaraka puntone.
14 Piya, naeba nayabama kamanapa esegima aegaꞌma agasiyaena puntuwe. Eya, Yuta kinaꞌmintana aegaꞌma Yuta kinaꞌmi nkibakapi naeba ka kananepa igasimagi agasiyaena puntuwe. Pipa ago abintawe.
15 Pigoya, paipa nanonempaba kampa yakari punatantogana, pi ntagaba Kotiba aewa ntapima awagaenawatasa kegaꞌe uma: Aota miyoma, unatantine.
16 Eya, aeba: To marisa kinaꞌmiti uma yagaranempantana aborawaimomagina, abemintana aegaꞌma yagarawampa nkagoba aboranamintiye. Aboranamintika, naeba wasanamiti ige kamanapa kampa wama abimagi,
17 Yerusaremi kumatiba kampa ima aposoro paitanatanta kinaꞌmi kamanapa kampa abimagi, naeba Arebiya mari wama umimagi, ainti aꞌwae puma Tamasiko kumata irosantuwe.
18 Aibumagi, aintiba kakaga kabu wagasaga naeba Yerusaremi kumati ima, Pita asu agama nagisa kaꞌamu yaga aege mintantone.
19 Piya, pi ntaga naeba aꞌyaꞌma aposoro kinaꞌmi wanane. Yemisi, Waꞌegawama nkaꞌnantoba, abiwapa agantone.
20 We, ma kaeyo kamanapa Koti nkaobipa kumpari kamanapa kampa kaema urimuwe.
21 Pigoya, aintiba naeba Siriya maribe Sirisiya maribe wantone.
22 Piya, pi ntagaba Yutiya marisa Karaisiti mponota aiꞌaru pume kinaꞌmiba igeba naowarapa kampa nagantini,
23 igeba mayama nawaga kamanaꞌamana abintane: Pai kama puratamagina tamatitiꞌena aegukena puntiꞌnaba, ibaba pi kamanapa aborayema, abintane.
24 Piyama nawaga kamana abimagini, pika igeba Koti nkageba asagayuntawe.
1 Pigoya, nagisarisa tarawa tarawaki tumpaema kabu aꞌya poga, naeba to aꞌwae puma Yerusaremi kumati intuwe. Piya, Panabasiba nababoga, Taitasi ababute kaga intune.
2 Piya, Kotiba kamana uma aboranamegi abite imagi, to marisa kina uwaimo mpono kamanapa naeba uma aborawaitantuwe. Eya, ige wainta kiye kinaꞌamana uwaimima, pai punto ntugabe iba po ntuganepe aꞌyugu pusanaga uma aborawaimintuwe.
3 Pigoya, Taitasiba naege inti, aeba Kariki yagarawe. We: Pika au kasama Yuta kinaꞌmi nkaraꞌena potaomaba, kampa unatantine. Kampaye.
4 Piya, kaꞌisa kumpari kina, mono kina kanta puma miye kina, igeba kakama kanama ampa paiꞌmagini: Au kasao, untawe. Igeba ampa paiꞌma Karaisiti Isu agoyaena tamomentana kunki agama, paisa ago kamanaꞌama amentapinti tatama igaꞌna puratakena puntawe.
5 Piya pugu, taeba ka yaganto kamanaꞌwaipa kampa aegaꞌma abuntune. Kampaye. Piya, mono kamanaꞌama nkago kamparaga pusanaga tigeti waiyenema, taeba ige kamanapa kampa aegaꞌma abintune.
6 Pigoya, mono kiye igi wainta kinaꞌmiba, igeba kamana kasaꞌenagaba kampa amato puma unamintane. We, ige waintika kampa naekuruba puntuwe. Piya, wasana intapera tumintapera Koti nkaobi ka kanara mintawe.
7 Eya, igeba kasaꞌenagaba kampa unamintawe. Piya, Kotiba Pita: Yuta kinaꞌmiti wama mono uwaimoma, otantisa puma: Namuꞌisa kinaꞌmiti wama monopa aborawaimoma, unataogini agantawe.
8 Piya, Pita Yuta kinaꞌmi nkibakapi aposoro yugara otanti ntagaramaba pabiyama naeka namuꞌisa kinaꞌmiti wama aposoro yugara unatantine.
9 Pigoya, tabe igi wainta kina Yemisiwa, Pitawa, Yoniwa suma, igeba Koti awagaena namima yogara unatantintanaba agamagini, igeba Panabasike naeke iya tasimima ka tantabarima, tasigepa: To marisa kinaꞌmiti wama yoga pisoma, urasitama, igewaika: Taeba Yuta kinaꞌmiti yoga pukune, untawe.
10 Pigoya, igeba mayama to ka kamana untawe: Tigeba kusi kinaꞌmikaba aogima ntapima iyoꞌmaeyiyoma, urataugu, naeba pintanagaba nabugaoga, esegima yogaba puntuwe. Pita nkaiboꞌena Poro aborantiye
11 Pigoya, aintiba Pita kanama Antiyoki kumati aborama ata poga, naeba ae aobi kamanaꞌwa akayuntuwe.
12 Piya, paipa Yemisi nkaokinaꞌmiba kampa aborauguna, aeba to marisa kinaꞌmiti atokaema naninta naogini, aborauguna aeba Yuta kinaꞌmikaba aekuru pumagina, igepa itate abira mintantiye.
13 Piya pogini, to kaꞌisa Yuta kinaꞌmiba aeti atokaema kaga kumpariyena puguna, Panabasiba aewape kumpari napiyenawaipa maema kaga puntiye.
14 Piya pugu, naeba agauwapa, igeba taga mpono kamanakaba kampa arupu puma nasugu, igategi, ige iyobi Pitapa mayama omintuwe: We, kaeba Yuta yagaramaga to kinaꞌmintana iyegaꞌma mima Yuta kina kantaba kampa pempeka, ayamabaya kaeba to marisa kinapa: Yuta kinaꞌmi pesantanaba piyoma, esegima uwaimene, a, uma abigantuwe. Yuta kinape to marisa kinape imatiti piginaba iꞌikiye
15 Pigoya, taeba to marisa agunta kinapisaba kampaye. Taeba Yuta tupisarawe.
16 Pigoya, taeba abintune: Ago kamana aegaramiꞌnakaba: Arupu kinanemaba, Kotiba kampa otanta, Karaisiti Isuti amatiti pukibiꞌnaka: Arupu kinanema, otaye. Pipa abintune. Piya, ago kamana aegarakena yugawanane. Taegeba Karaisititi tamatiti pompentanaraka arupu kina aborakenaga Karaisiti Isupa aegarantune. We, ago kamana aegarakena yugarasaba arupu yagaraba kapa kampa aborakiye. Kampaye.
17 Pigoya, taeba Karaisititi tamatiti puma arupu kina aborakenaga, taguꞌamaba to marisa agunta kina kanta puma miyompenema abompeka, taeba: Karaisitiba to aguntaena aboranti ntagarawema, ukuna, a. Pipa kampaye.
18 We, naeba kaitantontanaba to kakeba ituru pukubopa, pipa taga kamana akayukena yagara torebata aborakuwe.
19 Piya, ago kamanaꞌamaba agonepa aboraoga, pi kamanaꞌamati puꞌwantoka Kotiti atokaema miyekanaba toba igaꞌnaba kampa punatakiye.
20 Eya, naeba maripora Karaisitige itanataugu purintuwe. Piya puma, ibaba naenepa kampa agauwe. Kampaye. Karaisiti aeba nagupinti eꞌwasaenayaga mintiye. Piya, ibaba aꞌyaꞌma mabi nasikenaenanepa namatitiꞌena manane. Eya, Koti Ntagarawamaba agu kaoꞌena punatama naeka aumawapa kaintegi, ibaba aeti namatiti puma mintuwe.
21 Piya, naeba Koti nkawagaenawapa kampa kasuwe. Kampaye. We, ago kamanaꞌamaba kanara arupu kina aboraratasinta, Karaisitiba uwa purintesine.
1 We, Karesiya kinaꞌmitaba, tigeba aibo kinane. Piya, paipa Isu Karaisitipa wasanami nkiyobi maripora itaꞌatanta kamanapa urimuwagiri, tigeba tiyobisa agasu puntane. We, ibaba kiyoꞌena ke puritagina tiyoba atikaeye, a.
2 Pigoya, naeba kaꞌenamanaka mayama tibigakiri unamiyo: Tigeba ago kamana wasima tiyapisa yuga puntiri Awamusapa mayabera, aogi kamana abima timatiti puntiri maeyawe.
3 We, tigeba aibo kinatawa, a. Maru agobima Awamusaꞌama ntuga puntiri, ibaba tigeba arirasaenarasa nagarikena pewa, a.
4 Piya, marupa tigeba aota kina aborama kuntaena aesagabintapa, pipa uwawa, a. Nae napiyopa uwaba kampaye.
5 Piya, Koti Awamusapa timimagina abakatipi esegiyenawapa aboraye. We, tigeba ago kamana wasima tiyapisa yuga peka aborabera, aogi kamana abima timatiti peka aboraye.
6 Piya, Abaraꞌamuka mono isaꞌama maya iye: Abaraꞌamu aeba Kotiti amatiti puntika, Kotiba: Arupu yagarawe, otantiye, iye.
7 Piya puma, imatiti peꞌnagiba igeba taga Abaraꞌamu ntagarawema, ago abintawe.
8 Piya, to marisa kinaꞌmiba imatiti puma arupu kina aborakibewema, Kotiba abimagina, pi nkaogi kamanapa Abaraꞌamupa omintiye. Piya, mono isaꞌamaba maya iye: Abaraꞌamu, kaepisa aꞌyaꞌma kinaꞌmitiba aꞌmuntanaba aborawaimukuwe, Kotiba omintiye, iye.
9 Piya, Abaraꞌamuba amatiti puntegini, aꞌyaꞌma imatiti peꞌnagiba aege kaga Koti nkaꞌmuntanabi pasewe.
10 Pigoya, aꞌyaꞌma iꞌikenaga ago kamana wasiye kinaꞌmiti aꞌabibi nkaesakibe kamanapa waintiye. Pika mono isaꞌamaba maya iye: Aꞌyaꞌma ago kamana isapi kaentantanaba kampa wasiye kinaꞌmiba aꞌabibi nkaesawaewakibewe, iye.
11 Pigoya, mono isaꞌamaba to maya iye: Kaꞌwaina Kotiti amatiti pekanaba: Arupu yagarawe, omekana eꞌwasaenabi mpikiye, iye. Piya, to kaꞌwaina ago kamanaꞌama kipa aegarantanaba, Koti nkaobipa arupu yagara kampa mikiyemaba, ago abune.
12 Piya, ago kamanaꞌamaba amatitiꞌenaba kampaye. Pika mono isaꞌamaba maya iye: Kaꞌwaina ago kamana wasikibipa, pitasa eꞌwasaenaba maeyano, iye.
13 Pigoya, ago kamanaꞌamaba aꞌabibi nkaesawaiyoma, uratantegina, Karaisitiba taoꞌmaema aeꞌwa nkautasa pi nkantota maema ika puratantiye. Pika mono isaꞌamaba maya iye: Aꞌyaꞌma yara itaꞌitanta kinaꞌmiba aꞌabibi nkaesakena kinane, iye.
14 Piya puntagini, to marisa kinaꞌmiba Karaisiti Isuti atokaeyigini, igeba Abaraꞌamu aboraminti nkaꞌmuntanabi ubasikibeka puntiye. Eya, taeba tamatiti puma pai Koti uraminti Nkawamusa maekubompeka, Karaisiti piya puntiye. Ago kamanaꞌamaba maru utaratanti kamanapa kampa maegaikiye
15 We, naoꞌmitaba, naeba meto kamanapa urimekiri abiyo: Taeba piyaena pune: Piya, kaꞌwainaba puꞌwakenaenawakaba napima esegi kamanaꞌwa segipa, taeba pi ntagarama kamanapa kampa akayumagi, to kaꞌisa kamana kampa amato pune. Kampaye.
16 Pigoya, Kotiba kamanaꞌwapa Abaraꞌamupe yagarawampape esegima uwaisimintiye. Aeba uwaena yagarawakaba kampa untiye. Aeba ka yagarantowaka untipa, pipa Karaisitiwe.
17 Piya, kamanaꞌnempa nkagoba mayamawe: Kotiba marupa kamanapa esegima otantogana, aintiba 430 kabu aꞌya wagasoganaba, Koti ago kamanapa aborantiye. Aboraogana, pipa pai esegima potanti kamanapa kampa akayuma maegaintiye. Kampaye.
18 Piya, taeba ago kamanapa wasikena yugarasa aboraramikibintanaba maeyompesinta, utarantanti nkawaga kamanawatasaba kampa maeyompesine. We, Kotiba: Uwa kamukuwema, Abaraꞌamupa otantine.
19 Pigoya, nanaraka Kotiba ago kamanaꞌwapa aborantiye, a. Piya, wasanami akayukenaenawaitaka aborantiye. Aborataogana wairite kanamagina, otanti ntagaraba aborakanaba nagarikiyema, untiye. Piya, enisore kinaꞌmiba akapisa yagaramatasa ago kamanaꞌwapa aboraramintiye.
20 Piya, akapisa yagara atarawaisitakena yugaba piye. We, Kotiba Abaraꞌamupa kamanapa omintipa, akapisa yagara wanane. Ae abintoba omintine. Ago kamanaꞌama tamatitiꞌenaraka yokege purataye
21 Pigoya, Koti nkago kamanape utaratanti kamanape kamaena pesa, a. Pipa kampaye. Piya, ago kamanaꞌamaba eꞌwasaenaba aboraramisinta, pi nkago kamanatasaba arupu kinapa aboraompesine.
22 We, paisa mono isaꞌamaba aꞌyaꞌma kinaꞌmitekaba: Agunta kinatawe, urataye. Piya pegini, aꞌwae puma Isu Karaisititi imatiti peꞌnagipa Koti otantintanaba imiye. Eya, aegaraompe kinaꞌmitepa tamiye.
23 Pigoya, paipa tamatitiꞌenaba kampa aborantogana, ago kamanaꞌamaba igaꞌna puratantiye. Eya, tamatitiꞌena aborakibi ntagaga igaꞌna puratantiye.
24 Piya, ago kamanaꞌamaba kabiratakena wairite kanaogana Karaisiti aboraogana yogawapa nagarintiye. Eya, Karaisititi tamatitiꞌena puma arupu kina aboraiyoma, kabiratantiye.
25 Pigoya, ibaba tamatitiꞌenaba aboragi, taeba ago kamanaꞌama nkamentapintiba kampa mintune. Tamatitiꞌenarasa Koti ntagaraenaba pune
26 Piya, tigeba Karaisiti Isuti atokaemagiri, aꞌyaꞌma kinaꞌmitaba timatitiꞌenarasa Koti ntagaraenaba pewe.
27 Eya, aꞌyaꞌma Karaisititi atokaema paitanta kinaꞌmitaba, tigeba Karaisitige ka kanta puma miyewe.
28 Pigoya, ae aobi pako pukenaenaba kampaye. Yuta kinano, Kariki kinano, kagane. Kayokaya kinano, uwa miye kinano, kagane. Wawo, wayano, kagane. Eya, aꞌyaꞌma Karaisiti Isuti atokaeya kinaꞌmiba ka kinaꞌena puma miyewe.
29 Piya, tigeba Karaisititi atokaeyapa, tigeba Abaraꞌamu tu mpimagiri, tigeba pai Koti otantintana maekena kinatawe.
1 Pigoya, kamanaꞌnempa nkagoba mayamawe: Piya, yagarawampaba abawampanta aꞌyaꞌmaena maekenaenawe. Pigoya, kaꞌwaina ntagara masi mintanaba, abawampatisa aeꞌenawapa ka kutapa kampa maema aesa piye. Kampaye. Aeba masi mintanaba, kayokaya kina kanta puma mima kampa maeye.
2 Piya, masi mintanaba, kabitaꞌnagi nkimentapinti mimagina, anosamagina, abawampa otantemi ntagaba aba mparu mpaema miye.
3 Pigoya, taege pabiya puntune. Paipa taeba monota yagaranto kanta puma mintapa, taeba aꞌyaꞌma amani kinaꞌmi nkimentapinti mintantune.
4 Piyama mintuwagana, kanapa arosaogana, Kotiba yagarawapa otaogana wayaꞌmaba yakari potaogana, aeba ago kamanaꞌama nkamentapinti aborantiye.
5 Piya, ago kamanaꞌama nkamentapinti miyompe kinaꞌmitepa: Ika puritakiri Koti ntagaraena piyema, taba puratakenaga, aeba ago kamanaꞌama nkamentapinti aborantiye.
6 Piya, ibaba tigeba piyama yagarawa aboragana, Kotiba Yagarawampa Nkawamusapa otagina, tintabinti irosaꞌma tintabaipisa: Naba-o, naba-o, Kotikaba iye.
7 Piya, pika tigeba ibaba kampa kayokaya yagara mima, Koti ntugarasa yagarawapa aborama mintawe. Eya, yagarawapa mintiripa, ae maru mpaekena kina mintawe.
8 Pigoya, paipa tigeba Kotikaba kampa aogima agantumetapa, taga kotiwanane, ama kotintanama igaꞌna puritantine.
9 Pigoya, ibaba tigeba Koti nkagoba agantawe. Aꞌa-o, Kotiba agoripa agantipa, nanagabaya tigeba to aꞌwae puma magimagi kusi ki, amani kinaꞌmi kiꞌi aegaꞌma kayokayaꞌena puwaitakibewe, a.
10 We, aꞌyaꞌma tabe yagawo, kasa uno, mono iꞌmu ntagawo, kasa kabuwoma, tigeba napima aegarawe.
11 We, naeba tigeka naekuru puritauwe. Eya, yoga tigeti pontanama uwaena kanta pusanaga naekuru puritauwe.
12 We, naoꞌmitaba, naeba esuritauwe. Tigeba naekanta puma aborama miyiyo. Piya, naeba ago kamanaꞌama nkamentapintisa uwa yagara aborama tige kanta puma miyuwe. Pigoya, marupa tigeba kampa tikabinatantawe.
13 Eya, tigeba ago abintawe. Nauꞌnepa kampa esegi puntika, naeba aogi kamanapa marupa aborama urimintuwe.
14 Piya nauꞌnempaba kampa esegi pogana, tigeti kuntaena aborantemipa tigeba aogima aesagaꞌma, kampa tikabinatama agoꞌenaba kampa punatantawe. Kampaye. Tigeba Koti nkenisore kano, Karaisiti Isuwo, ababesa puma naba puntawe.
15 We, pi ntagaba tigeba tiyorasa naoꞌmaentasinta piꞌmagiri namintasine. Piꞌna nkagoripa napima agantona, ibaba pi tiꞌmuntanaba aeta wantiye, a.
16 We, ibaba taga kamana yopa, kama kinatintana puwa, a.
17 Pigoya, kaꞌisa kinaꞌmiba tigebi nkaobi puma aꞌyugu puritawe. Piya, igeba monopa atate igeꞌwai nkige asagayukenaga akumpaꞌma miyewe.
18 Pigoya, asi nasi aogiyena aborakenaga tigebi nkaobi pukenaba kanarane. Aꞌyugu mitanto ntaga puntaka, wauwagiripa ataena puntawe.
19 We, yagaranempitaba, wayaꞌma yagaraena pemisa puma tigeka torebata naukemikana, Karaisiti tintabaipinti aborakibi ntagaba nata wakiye.
20 We, ibaba naeba tigeka tara nagi napiyoka ayabaya pukuwe. Piya, naeba ibaba tigege to kakema ampima kamanaꞌnepa aꞌwae puma kayone puritasanaga nabiye. Egake Serake meto kamanaꞌwaisine
21 We, to marisa kinaꞌmitaba, tibigakiripa kamana agoripa unamiyo. Piya, tigeba ago kamanaꞌama nkamentapinti mikena kinaꞌmitaba, ago kamanaꞌama nkagoba aogima abewa, a.
22 Piya, Abaraꞌamupisa tara yagarara aborantasema, mono isaꞌama piya iye. Piya, kayokaya aragawaeꞌma kapa yakari potaogana, autasa waeꞌmaba ka yakari potantiye.
23 Piyama, kayokaya aragawaeꞌma yakari potaogana yagarawampa wasanami ntapiyenabisa aborantiye. Aibogana, autasa waeꞌmaba yakari potaogana yagarawampa Koti otanti nkesegiyenabisa aborantiye.
24 Pigoya, pi kamanapa meto kamanane. Piya, pi tara wae taramisi nkagoba mayama uratantiye: Kapa, agewapa Ega, aeba Sainai amuta utaratantiꞌna mpetoꞌenawe. Piya, ae yakarakiꞌnupa ago kamanaꞌama nkamentapinti miyuguna igaꞌna puwaitantiye.
25 Piya, Sainai amu Arebiya mari waintipa, pipa Egawe. Piya, Yerusaremi kinaꞌmipa ibaba ago kamanaꞌama nkamentapinti igaꞌna puwaitaogana, ibasa Yerusaremi kumape kayokaya aragawae Egabe kagane.
26 Pigoya, Sera to metoꞌenawe. Piya, to Yerusaremi mantabinti waintipa, pipa autasa tanorempawe.
27 Pika mono isaꞌamaba maya iye:
We, anamo wae, kampa yagaraena punta wae, kaꞌmu po, iye.Kantaba tagugunkami nkwae, kaeba kaꞌmuntanabisa tabe kigaꞌe yo, iye.Piya, marusa anamo wayaꞌmaba aintisa waeꞌma agasima uwaena yagara aborakiye, untiye, iye.28 We, naoꞌmitaba, taeba anamo waeꞌma ntagara Aisaki kaꞌmasa pune. Piya, Koti Abaraꞌamu otanti, taeba ae yagararawe.
29 Pigoya, pai wasanami ntapiyenabisa aboranti ntagaramaba Awamusaꞌama otaogana aboranti ntagarama kamaena potantisa puma, ibaba taetiba piyaena aboraye.
30 Pigoya, mono isaꞌama nana kamana iye. Aeba maya iye: Kayokaya aragawaepe yagarawape isigarubaiginisi waiso, iye. Piya, kayokayaꞌenama ntagaramaba autasa waeꞌma ntagaramati kampa atokaema otanti ntanaba kampa maekiye, iye.
31 Eya, naoꞌmitaba, taeba kayokayaꞌenama ntagaraba kampa mintune. Kampaye. Taeba autasa waeꞌma ntagara aboraune.
1 Pigoya, igaꞌna kampa pusanaga Karaisiti aeba akariyobatatantiye. Pika tigeba asima esegi puma igaꞌna ubutitakenaenama nkametapintiba toba kakeba a-mpiyiyo.
2 Pigoya, nae Porona, urimekiri abiyo: Tigeba ago kamana wasima araꞌenawapa titipa maekibepa, Karaisiti ntugaba kampa tiyoꞌmaekiye. Kampaye.
3 Piya, aꞌyaꞌma ti kasakena araꞌena maeya kinaꞌmitaba, naeba to kakema urimekiri abiyo: Piya, ka akayukibepa ago kamanaꞌama kampa kanara tiyoꞌmaekiye, urimuwe.
4 Piya, tigeba ago kamanaꞌama ntugarasa arupuyena aguyosaga kinaꞌmitipa, Karaisititi aꞌyigititantine. Eya, Koti nkawagaenabisa wareꞌna wantane.
5 Piya, taeba Awamusaꞌama nkesegiyenarasa tamatiti puma Koti arupu puratakenaenagaba aobi pune.
6 Piya, Karaisiti Isuti atokaeyompepa tau kasakenaenawo, kampa kasakenaenawo, pipa uwaenawe. Piya, aeti agu kaoꞌena puma tamatitiꞌenamaba auꞌwapa aborama tagantana piye.
7 Pigoya, tigeba mono kita agobima aogima nasintawe. Taga wasikenaenarapa ke akutitagiri tikabitawe, a.
8 We, tiba puritantiꞌnaba pi ntapiyenaba kampa aborarimiye. Kampaye.
9 Piya, uwaenanto abararamipa aꞌyaꞌma abararawaewaye.
10 Pigoya, Waꞌegawama tiyoꞌmaeyamikaba naeba namatiti pekiri, nae napiyenaba tigeba aegaꞌmagiri, to ka napiyenaba kampa aegarakibewema, napiyuwe. We, tibaibemi ntagarama nkagegaꞌeba kampa abokana, Kotiba antotaꞌenaba amikiye.
11 We, naoꞌmitaba, naeba au kasakena araꞌenaba maeyiyo, yosinta, ayama kamaenaba punatayaba miyesine. Piya, naeba piya kamanapa yosinta, maripo ya aibasanakenaenamaba aꞌya wasine.
12 Pigoya, i kasama araꞌena puma napiyenari paibukena kinaꞌmiba, igeꞌwai nkipa kasama maebugaikibepa, kanarane.
13 We, naoꞌmitaba, Kotiba igaꞌnabisa tiba puritantina, iyobatitanta kina kanta puma miyiyo. Pigoya, aiyobatitanti ntanaba a-nkaꞌyugu puma arirasaenaba a-piyo. Tigeba tiyoꞌmipa agu kaoꞌena puwaitama kayokayaꞌenaba puwaitaiyo.
14 Piya, aꞌyaꞌma ago kamanaꞌama nkagoba mayama untiye: Kaeka kauka kabitampesa puma kagora miye kinaꞌmipa pabiyama agu kaoꞌena puwaitao, untiye, iye.
15 We, yaga kanta pumagiri ankabana abana pumagiri, aꞌyugu aesawae wakibewe. Pika kabiyiyo. Arirasa kipi kasima Awamusa aegaꞌma miyeno
16 Pigoya, kamanaꞌnepa mayamawe: Piya, Awamusaꞌama nkesegiyenara nasiyo. Tigeba tiꞌama nkabugakibintanaba a-nkaboraiyo.
17 Piya, tiꞌama nkabugaintanamaba Awamusapa maema nagintakena pegina, Awamusaꞌamaba tiꞌamantanaba nagintakena piye. Piya, taramisi kamaena pementanama napiyenaripa aꞌyugu puritagiri aupa kampa aborawe.
18 Pigoya, Awamusaꞌama paitaritagiri aegarapa, tigeba ago kamanaꞌama nkamentapintiba kampa miyewe.
19 Piya, tiꞌama ntugaba mayamawe: Kumiyenawa, iꞌnintanawa, tinta pami pentanawa,
20 ama koti nkaegarakenaenawa, kiyoꞌenawa, kamaenawa, maꞌenawa, agobi pukenaenawa, amoꞌenawa, kota mpaema agintanawa, atataraenawa, mono kina pakobikenaenawa,
21 to waina mparuta mikenaenawa, esegi wani ntama aiboꞌena pikenaenawa, uwaena ataena pikenaenawa, aꞌyaꞌmaena to auga to augaꞌenawa, sumaba, pipa tiꞌama ntugawe. Pika pai naeba urimintosa puma, ibaba to kake esegima urimuwe: Piya pe kinaꞌmiba Koti kabiratakenaenabi kampa ubasikibewema, yuwe.
22 Pigoya, Awamusaꞌama nkauꞌwapa mayama aboraye: Agu kaoꞌena pukenaenawa, aꞌmuntanawa, paruyenawa, paebuma mikenaenawa, aoꞌena pikenaenawa, aogiyenawa, arupu puma mikenaenawa,
23 pasema kabikenaenawa, aupa nagintakenaenawa, suma, igetiba ka ago kamanaꞌamaba aupi pima kamanapa otakenaenaba kampa waintiye. Kampaye.
24 Piya, Karaisiti Isuti atokaeya kinaꞌmiba iꞌwaipa maripo yara itaꞌitama, iꞌama nkiꞌnintanawaipe ibugaintanabe ago kaintawe.
25 Pigoya, Awamusaꞌamaba eꞌwasaena tamegi, taeba Awamusaꞌama kepa tayakeka naseno.
26 Piya, taete tageba a-nkasagayuyeno. Taeba taoꞌmi nkintabaipa tutupa a-suwaitano. Taeba taoꞌmi mparupa a-mpaeyano.
1 We, naoꞌmitaba, ka yagarama aiboꞌena pikibipa, Awamusa waintiꞌnagita, tigeba paebuma kabima mima pi ntagaraba to asitaiyo. Tigeke timiyo pusanaga kaga kabiyiyo.
2 Tigeba tiyoꞌmi kuntaenawaipa aesaga piyo. Piya pikibepa, tigeba Karaisiti nkago kamanaꞌama nkauꞌwapa aogima aborakibewe.
3 We, ka yagarama aewaka napima: Nageba waintiyema, yipa, ageba kampa waintipa, aeba amiyoꞌena puma aeꞌwa nkaoba airari kaeye.
4 Eya, aꞌyaꞌma ka ka kinaꞌmiba igeꞌwai ntuga aogiyenawo, kamparagaenawoma, napiyiyo. Piya pukibiꞌnaba aeba aewaka aꞌmu pumagina, au maete ikenaenaba aoꞌmi nkiyobipa kampa pukiye.
5 Piya, aꞌyaꞌma ka ka kinaꞌmitaba aesaga pikena kuntaenarepa waintakapa, tageba a-mpaete iyeno.
6 Piya, mono kamana abe kinaꞌmiba igeba uwaimima iyakinta kinapa aogi kutankaipisa antotaꞌenaba imiyo.
7 Pigoya, tigeba timiyoꞌenaba tiyoba a-nkairari kaeyiyo. Piya, kaꞌwainaba Koti kamanapa kampa akaya sukiye. Kampaye. Piya, wasanama aintana pipa, pabiyaenaba aeti aborakiye.
8 Piya, kaꞌwainaba aeꞌwa nkau maete ima aintana pipa, aintiba aeꞌwa nkaupisa abararakenaenaba aboramikiye. To kaꞌwainaba Awamusaꞌamati atokaema aintana pipa, aintiba Awamusaꞌamapisa eꞌwasaenaba maema miyabaꞌmikiye.
9 Piya puma, taeba aogi yuga pikenaga tayampu peno. Taekita kampa pukubompepa, aeꞌwa ntagaba auꞌwapa aboraramikiye.
10 Piya, kete waintakapa, taeba aꞌyaꞌma kinaꞌmiti aogi yuga aborano. We, imatiti pe kinaꞌmika napima aogi yuga tabera aborano. Poroba maripo yugaraka aꞌmu puntiye
11 Pigoya, tabe awaꞌena naene nayapisa kaeyopa aogima agaiyo.
12 Pigoya, iꞌwaipa wasanami nkiyobi maete ikena kinaꞌmiba igeba ti kasakenaraka uritawe. Piya, igeba mayama napiyewe: Ita araꞌena pukubompepa, Karaisiti mparipora ukubompe kamanatekaba kampa kamaena puratakibewema, napiyewe.
13 We, pi nkaraꞌena maeya kinaꞌmiba igegeba kampa ago kamanapa aogima wasintawe. Kampaye. Igeba ti kasakibetasa tabe igi maekenaga pewe.
14 We, tonaga wanane. Naeba Waꞌegare Isu Karaisiti mparipo yugara amanaka naꞌmu pukuwe. Piya, pi ntugaraka mampabisaenaba naeka itaꞌataogana puꞌwantiye. Eya, naekeba mampabisaenaga itaꞌnataoga puꞌwantuwe.
15 Piya, tau kasakenawo, kampa kasakenawo, pipa uwaenawe. Eya, aoso kinaꞌamana aborakenaba pipa auꞌwane.
16 Piya, aꞌyaꞌma ma ntapiyena wasiye kinaꞌmiba, igeba taga Isureyo kinane. Pigoya, Koti taga Isureyo kinane. Pigoya, Koti taga Isureyo kinaꞌmiti paruyenabe antaraꞌenawape tigeti waiyeno.
17 Pigoya, kaꞌwainaba to ka kuntaenaba a-nkaboranameno. Kampaye. Isuka naegunta, pi nkaraꞌenaba nauta waintiye.
18 Naoꞌmitaba, Waꞌegare Isu Karaisiti nkawagaena tigutimapi waiyeno. Tagane.
Poro piya isa kaentiye.