1 Naeba Porona, Karaisiti Isu nkaposoro Koti nkabemika unatantiye. Piya, naebe taoꞌyagara Timotibe, tasigeba Korinti kumata Koti mponota aiꞌaru pe kinaꞌmititibe, Akaiya mari Kotiti atokaeya kinaꞌmititibe, tigeti ma nkisapa kaeyuse.
2 Pigoya, tabarempa Koti, Waꞌega Isu Karaisiti, isigetisa awagaenabe paruyenabe tigeti waiyeno. Koti Poro aoꞌmaeyomeka aꞌmu potantiye
3 Pigoya, taeba Waꞌegare Isu Karaisiti nkaba Koti taꞌmu potama agiseno. Piya, tabarempa aeba antaraꞌenama nkagowe. Pi Kotirempa aeba agoya puratakenama nkagowe.
4 Piya, taeba aꞌyaꞌma tauki nakiyenabi mpiyompeka agoya purataye. Eya, Koti agoya puratamisa puma taeba pabiyama iki nakiyenabi mpiyeꞌnagipa kanara agoya puwaitaiyoma taoꞌmaeye.
5 Piya, Karaisiti ae kuntuyenama nkatunkapa tabera taeti aboraisa pumagina, pabiyama Karaisitibisa agoyaenawapa taeti tabera aboraramiwaye.
6 Piya, taeti tauki nakiyenaba aboraramemipa, pipa tigeka agoya puritama tiꞌikenaga aboraramiye. Kotiba agoya puratamipa, pipa tigeka agoya puritakenaga aboraramiye. Piya, tae puratamisa puma aborariminti kuntaenaba kaga aesagaꞌma paebuma miyigina Koti pi nkagoyaenawapa puritakiri miyiyo.
7 We taeba tigeka tara tara tagiba kampa napinta, mayama napima esegi pune: Tigeba kuntaenarepa asima kubo pukibepa, taegeba kaga agoyaenarapa asima kabo pukibewema, abuntune.
8 We naoꞌmitaba, taeba Esiya mari miyuwakini tauki nakiyenaba tabera aboraraminti, pika aibo pusanaga kamana urimekiri abiyo: Pitaꞌiba kuntaenama agasiya puratama esegiyenarepa asuragasima taerari kaeyoga: Mikenaenarepa nagariwakiyema, napintune.
9 Piya, taeka: Iyeguyigini puriyoma, utaratantisa puma aboraramintiye. Pipa uwaba kampaye. Taeba taete nkesegiyenarekaba kampa napinta Kotiti atokaekenaga aboraramintiye. Eya, Koti aeba purintapisa asiwaitakena esegiyenawa nkwainta yagaramati esegima tamatiti potakenaga aboraramintiye.
10 Piya, taeguyigi purikenaena pi ataenabisa Kotiba taba puratantiye. Piya, aintiba to kakema taba pukiye. Eya, esegima aeti tamatiti pekana to kakema taba pikiye.
11 We, tigegeba nunamubisa taoꞌmaeyiyo. Piya pigina Kotiba uwaena kinaꞌmi ntunamu abintana agoya puratakiye. Agoya puratagiri uwaena kinaꞌmitaba tigeba pika tiꞌmu potaigina kanarasano. Poro aeba Korinti kinapa ata kamana kampa uwaimintiye
12 Piya, taeba mantanaga taꞌmupa pune: Taeba mampara aꞌyaꞌma kinaꞌmi nkikapipa aogima ntasimagi, pabiyama tige tikapi asugasima aogima ntasintompene. Piya, taeba aota puma Koti pisa puma tagantana puntune. Mabisa kinaꞌmi ntapiyenamaba kampa aboramagi, taeba Koti nkawagaenabisa kamanatepa aborantune. Eya, tagu taumarempaba: Pipa tagantanawe, iye.
13 Ma kamanapa tigetiba kaeyompepa, agowapa pipa kampa kakantiye. Kampaye. Kaema timopa aisuma abiyo. Piya, nae nabemika tigeba agowapa abiwaekibewe.
14 Eya, paipa tigeba kaꞌisa abintakina nae nabemika abiwaeyiyo. Piya pikibepa, Waꞌega Isu kanabipa taeba tigeka taꞌmu pukubompesa puma tigeba taeka tiꞌmu pukenaga napiyiyo.
15 Piya, tigeba pikaba kanara napikibewema abibebe punta, paitama tigeti wakuwe, untone. Pipa kayone puritakenaga tara yaga tigeti aborakuwema napintone.
16 Eya, naeba pabiyama napimagi paitama tigeti wama urigaitegi Masetoniya mari wakuwema napintone. Piti umigategi to kakema aꞌwae puma Masetoniya maba agaite to tigeti kanakiripa, Yutiya mari wakenaga naoꞌmaeyiyoma napintone.
17 We, naekaba nanawe yewe. Pi kamanaꞌnepa naeba tara nagi napinta aꞌyugu kamana untona, a. We, naeba kaꞌena pikena pontanaba, pipa mampabisa kinaꞌmi yesa suwa: Owe, owe, kampaye, kampaye, kaga yesa suma yuwa, a. We, pipa kampaye.
18 Kotiba tagantana puma taoꞌmaeyoga taeba urimintompe kamanatepa owebe kampayebe kaga kampa untune.
19 Piya, naebe Sairasibe Timotibe taeba Koti Ntagara Isu Karaisitika kamana urimintune. Piya, Karaisiti aeba tara agi kampa napinta, owe aꞌa-o kaga kampa untiye. Kampaye. Aewapa owe uma asi nasiba tagantana piye.
20 Eya, aꞌyaꞌma Koti utaratanti kamanaka Karaisiti owe uma auꞌwapa aborawaeye. Pika taeba Koti kamanapa abimagi, Karaisiti nkagerapa taeba tagane uma Koti nkageba asagayuyune.
21 Piya, Kotiba tigepe taepe Karaisititi kaga atokaeratamagina esegima asiratama yogaretapa utarataye.
22 Piya, aeꞌwa nkaraꞌena puratama Awamusaꞌwapa tagupipa ataogana tumintiye. Piya, aintiba aꞌyaꞌwaemaena aboraramikenaga awameꞌena taminti, pipa Awamusane. Poroba kampa agaropa igetiba wantiye
23 Pigoya, naeba Korinti kumatiba wama namoꞌena puritasanaga kampa wantone. Piya, kamanaꞌnepa Koti pipa abintegi taga taga yuwe.
24 We, taeba timatitiꞌenaritapa tabe kina kanta puritakenagaba kampa yune. Kampaye. Taeba tiyoꞌmaeyakiri tiꞌmuntanabi miyiyoma, yune. Piya, tigeba timatitiꞌenayaga esegima asima mintapa, pipa abuntune.
1 Piya, naeba tigeti wama tinta ataena to kake aborarimisanaga napima kampa wantone. Kampaye.
2 Piya, naenepa tinta ata puritakiripa, aeꞌnagita nae nantaba asoya punatakibewe, a. Piya, tige asoya punatakibeꞌnagitipa, nana piyema naeba tige tintaba ata puritakuwe, a. Pipa kampaye.
3 Piya, naeba wakiripa, tigeba asoya punatakibeꞌnagitipa nanta ataena aboranamisanaga naeba arupu puritakena isaꞌnepa pai kaerimintone. Piya, naeba tigekaba mayama napintone: Nae nantawamaba asoya pegina tige tintawamaba kaga asoya piyema, napintone.
4 Piya, nae nantawamaba tigekaba tabera nauki nakiyena pegina kunta nabegi tabera kubeꞌena puma marusa isapa kaema timintone. Piya, tinta ata puritakena wanane. Agu kaoꞌenanepa tigeti tabera waintegi, piꞌna aborarimikenaga kaema timintone. Aguntaena maegainti ntagaraba to kake tiyoꞌena potaiyo
5 Pigoya, kaꞌwaina tinta kuntaena aborarimemipa, aeba naeꞌamana nane. Tigeti kuntuyena aborarimintiye. We, aꞌyugu naeba esegi kamanapa uwa yuwa, aeba tigetibe naetibe kaga kaꞌisa kuntuyenaba aboraramintiyema, yuwe.
6 Pigoya, aeba agu aꞌwae piya, antotaꞌenawa tikabitakenaenaripa tigeba aꞌyaꞌma uwa ataiyo. Pipa pabigoye.
7 Piya, ibaba tigeba aꞌwae puma asuꞌa potama to kakema tiyoꞌena potaiyo. Eya, tabe kuntuyenama aerarikaesanaga to kakema tiyoꞌena potaiyo.
8 Pika naeba to kakema agu kaoꞌenaripa aboramiyoma, esuritauwe.
9 Piya, aꞌyaꞌmaenagaba tigeba kanara nawamupa wasiyewo, kampayoma abisanaga esa paipa kaentone.
10 Piya, tigeba kaꞌwaina kaintana atunkapa agaikibepa, pipa naegeba kaga agaikuwe. Piya, kainto kaintanaba pipa naeba Karaisiti nkaobi kaintone. Eya, tige tiyoꞌmaekenaga pabiyama kaintone.
11 Pipa Satani tamiyo pusanaga piyaba puntone. We, aeba ata puratakena napiyaba miye. Pikaba taeba aiboꞌenaba kampa puma, kabiyeno. Poroba Torowasi kumata kuntaena abuntiye
12 Paipa naeba Karaisiti nkawaga kamana ukenaga Torowasi kumata ampa irosauwagana, Waꞌegawamaba kepa pita iꞌnatantiye.
13 Aiboga, naꞌnanto Taitasipa pi kumatapa kampa agauwagana naumanempaba pikaba kampa aogima pasema mintantiye. Piya poga, naeba Torowasi kinapa igaite Masetoniya mari kanantuwe. Koti nkesegiyenaba asugaikenaenawe
14 Pigoya, Koti aeba Karaisiti ntugarasa paitaratagi, kama kinatepa igasune. Pikaba taꞌmu potano. Piya, aeba yogaretaka uratagini wasanami tae yugarasa Karaisitipa agagana, aogi aguntaena aꞌyaꞌma mariba piꞌnaba piye.
15 Eya, taeba aogi agunta kanta puma miyokana Karaisitiba kaeyagina Kotiti iye. Pi nkaguntamaba iꞌikena peꞌnagi nkikapi aboramagina, kaiwaitakena peꞌnagi nkikapipa kaga aboraye.
16 Piya, agora purikibe kinaꞌmitiba pipa ata purikena agunta kanta puma aboraye. Piya, to kaꞌisa kinaꞌmitiba, eꞌwasa maenta kinaꞌmitiba pipa aogi eꞌwasa agunta kanta puma aboraye. We, pi ntugaba ke pekana kanarasakiye, a.
17 We, taeba kaꞌisa uwaena kina kantaba kampaye. Ige Koti kamanatasa pisinisi yugawaipa pesapa kampa pune. Kampaye. Taeba tagantana pompeka Kotiba yogaretapa utaratagi, taeba Karaisititi atokaema Koti nkaobipa kamanaꞌwapa taga uma aboraune.
1 We, taeka: Igewai asagayukena pewema, napiyewa, a. Taeba kaꞌisa kina pesa puma, wasanami tage asagayuntini isa kaema tamigi tiyakisuna, a. Tage asagayukena isa tigeba kaema tamigi wasanaba iyakisuwa, a.
2 Pipa kampaye. Tagegaꞌe asagayukena isapa tigewe. Piya isapa kaemarantapa, tigupi waiyegini, aꞌyaꞌma kinaꞌmiba ago agama aisumagini taekaba aogima abewe.
3 Piya, taeba tigeti yoga pokiri, Karaisiti nkisaꞌena puguna piꞌna nkagowapa arantiye. Piya, pi nkisapa inkirasa wanane. Pipa eꞌwasa Koti Nkawamusatasa kaemarantine. We, yaba nkisata nane. Wasana igupi kaemarantine.
4 Piya, pi yo kamanaꞌama nkagoba mayamawe: Taeba Karaisiti ntugarasa Kotiti atokaema tara tagiba kampa napiyune. Kampaye.
5 We, pi ntugarapa tae esegiyena kampa waintegi, tae tayapisa taeba kaꞌenaba kampa uwa abae puma pune. Kampaye. Koti ae abintowa esegiyenawapa tamegi yogarepa abae puma pune.
6 Eya, Koti aeba kasaꞌena utaratamagina taepa pi kasa monotapa yoga kina urataye. Piya, pai yaba nkisata kaemaranti ago kamana nane. Awamusatasa kasa mono aborama pi ntugara utarataye. Eya, pai yaba nkisata kaemaranti kamanaꞌamaba wasanaba aeguma kaiye. We, Awamusaꞌamaba kasaꞌena aborama wasanamipa aoganta eꞌwasaba imiye.
7 Pigoya, paipa Koti aeba ago kamanaꞌwapa yaba nkisata kaema imogana, iwaꞌenawaimpa aogiyenaba puntine. Eya, pi ntagaba Koti nkeꞌwasaenamaba Mosese nkaowabipa eꞌwasa puwantiye. Piya, pi nkeꞌwasaba nagarikena pogini, Isureyo kinaꞌmiba aowabi kampa uwa aganta parokaentawe. We, pi paisa ago kamanapa aogi iwaꞌenabisa aboramagina purikenaenamaba arawantiye.
8 Aibogana, Awamusaꞌama aborami aogantaꞌenamaba iwaꞌena taberakaꞌyapisa aboraye. Pipa to awametane.
9 Eya, ata ikantaga kamana aboranti ntagaba eꞌwasaenaba puntegina, we, arupu puratakena kamana aborai ntagaba eꞌwasaenawapa tabera asugasima waiye.
10 We, pikaba maya yuwe: Kasaꞌenaba eꞌwasarakaꞌyane. Piya, paipa eꞌwasaenara aborantintanaba ibaba eꞌwasaena kampa wainta kanta puma waiye. Eya, kasaꞌenamaba paisaenaba asugasima tabera eꞌwasaba piye.
11 Eya, nagarikenaba aeba eꞌwasaenayaga pai aborantiye. We, waiyaba mikenaba aeba tabe eꞌwasaenayaga waiyegina kanarasaye.
12 Piya, Koti utaratanti waiyaba mikenaenagaba taeba aobi puma miyompeka taeba kampa taekuruba pune. Kampaye.
13 We, taeba Mosese puntemisapa kampa pune. Piya, aeba kai atutasa aowabipa aerarikaetama, Isureyo kinaꞌmiba eꞌwasaenawa nagarikena pogana agaigina ani pusanaga kakantiye.
14 Piya, napiyenawaipa akumpa esegi puwaitagini igeba paisa utawaitanta ago kamana aisepa, agowapa kampa aogima ntapiyewe. Kampaye. Piya, kana kai atupa iyora uwa waintegini kampa maegasima agawe. Kampaye. We, wasanamitaba Karaisititi atokaeyakana maegasaka agakune. To kipa kampaye.
15 Eya, igeba paipe ibasa kanabipe Mosese kaemaranti kamana aisepa, kai atunkama napiyenawaipa aerarikaeyagini kampa napiyewe.
16 Aibegina, kaꞌwaina agu aꞌwae puma Waꞌegawamati atokaeyamipa, pi kai atupa maegasagina agaye.
17 We, Waꞌegaba aeba Awamusane. Piya, Waꞌegawama Nkawamusaꞌamaba kaꞌwainati miyegina, kaꞌenamaba pi ntagaraba kampa arakuriye. Kampaye. Aeba aogima uwa miye.
18 Pigoya, aogima uwa miyompe kinaꞌmite taowabisa kaiba ago maegasagi agaune. Piya, Waꞌegawama nkeꞌwasaenamaba taeti aboragi pemonta kanta puma pakasa piye. Eya, aꞌyaꞌma yagaba tagu aꞌwae puta iyegi, taeba eꞌwasaenawapa maeta ima ae kanta puma aborakena pune. Piya, Waꞌega, aeba Awamusaꞌama, aeba piyaba purataye.
1 Pigoya, Kotiba antaraꞌena aboraramima aeꞌwa nkago aborakena yugarapa uratantegi, pika kampa taekitaba pune.
2 Piya pumagita, kakakena tanintanaba takabigasima kumpari kipa kampa nasima, Koti kamanapa kampa antageꞌena potaune. Kampaye. Taeba Koti nkaobi taga kamanatakaꞌya uma aborakini aꞌyaꞌma kinaꞌmiba yogarepa agamagini taeka intabaipintiba aogima ntapiyewe.
3 Piya, kana mono yompepa, pipa igaikena kinaꞌmi nkiyobinkamana kakasu piye.
4 Eya, mampabisa ama koti aeba kampa imatiti pe kinaꞌmi ntapiyenawaipa airarikaewaitamagina, Karaisiti nkeꞌwasaenama nkawaga kamanaꞌama igupipa ubasegini Koti nkaraꞌenawapa agasanaga airarikaewaitaye. Piya, Karaisiti aeba Koti nkamatakaꞌyane.
5 We taeba mono urimompepa, pipa taerekaba kampa urimune. Kampaye. Isu Karaisiti aeba Waꞌega miyegi, taeba Isuka kayokaya kinati mpiyune, pipa urimima miyune.
6 Piya, Koti aeba paitakaꞌya: Tununtanabisa arao, yogana arantiye. Pi unti Koti nkeꞌwasaenawampaba ibaba tagupi araye. Eya, Koti nkeꞌwasaenamaba Karaisiti nkaobisa aboragi agabebe pune.
7 Piya, taeba magabu kanta puma miyokana, pi mantabintisa eꞌwasaba tantabaipi waiye. Piya, taetisa aogiyenaba aboramipa pipa taeꞌena wanane. Aeba Koti nkesegiyenarakaꞌya tae tauta aboragini agawe.
8 Piya, wasanamiba tonarona tauki nakiyena aboraramepa, kampa akutatawe. Kuntaena aboraramekaba, kampa taekitaba pune.
9 Igeba kama puratakaba Kotiba kampa tagasaye. Igeba taeguyega wareꞌnaokanaba taoꞌmaeyagi to ka asima yogaba pune.
10 Piya, aꞌyaꞌma yagaba Isu mpiyaba mikenaenawapa tae tauta ampa aborakenaga tae tautepa Isu purintemi kiꞌi wama miyune.
11 Eya, aꞌyaꞌma yaga mampara miyompe ntagaba Isukaba igeba ata purataga, taeba purikena kiꞌi nasune. Piya, Isu mpiyaba mikenaenawampaba tae purikena taupisaba aborakenaga piyama nasune.
12 Pipa mayamawe: Taetiba purikenaenamaba yoga pegina, pi ntugarasa tigetiba miyabaꞌena ago aboraye.
13 Pigoya, paipa kaꞌwainaba amatiti puma mono isapipa mayama kaentiye: Naeba namatiti poka kamana uma aborauwe, untisa puma, taeba tamatiti puma mono kamana yune.
14 Piya, taeba mayama abibebe pune: Waꞌega Isu purintapisa asinti, aeba taepa pabiyama Isuge purintapisa asiratamagina, tigepe taepe kaga aeꞌwa nkagora taba puratakiyema, abintune.
15 Piya, aꞌyaꞌma taeti aboraramintintanaba pipa tiyoꞌmaekenaenawe. Piya, Koti nkawagaenamaba wagana kana pegini, uwaena kinaꞌmiba abima tabera iꞌmu puma Koti nkage asagayuyiyo. Mabisa kuntuyenamaba aogi eꞌwasaena aborakiye
16 Pikayema taeba kampa taekitaba pune. Kampaye. We, tauꞌamaba paka paka abararagina, aꞌyaꞌma yagaba taguꞌamaba paka paka aososiye.
17 Piya, tauki nakiyena taeti aborawaeyamipa pipa uwa aro ntaganto puwama, tabe eꞌwasaena taeti aborama, tabe kuntuyenaba asugasima waiyaba mikiye.
18 Piya, taeba taorasa agaompentanagaba kampa napiyune. Kampaye. Taeba taorasa kampa agaompentanaga, pika taeba kamanapa yune. Pikaba kampa taekitaba pune. Eya, taorasa agaompentanaba pipa aro ntaganto waiyekana, taorasa kampa agaompentanaba pipa waiyaba mikiye.
1 Pigoya, taeba mayama abintune: Mampabi ibaba seri nama kanta puma tau mintompepa, pipa maegasigipa: Aerawane, ukune. Piya, Kotiba ka esegi namatepa kimaꞌma mintikana aborama tamikiye. Pi ntamapa wasanamiba iyatasaba kampa kimaranta ntamapa mantara uwa waiyaba waikiye.
2 Piya, taeba mampabi pi ntamapi mima kubeꞌenaba puma miyune. We, taeba mantabinti wainti ntamatasa kai kanta puma amirisanaga tabugaye.
3 Eya, uwa tauka misanaga pintana purisanaga tabugaye.
4 Piya, taeba ma seri namapi miyompeka, taeba: A-e, a-e, uma kubeꞌena puma miyune. We, paisa tau kasakana wanane. Taeba to aogaso tauꞌena pu uꞌma misanaga tabiye. Piya pekana aoganta eꞌwasaenamaba purikenaenarepa nawagaikiye. Pikaba tabugaye.
5 Piya, aogantaꞌenara yokege puratai ntagara aeba Kotiwe. Piya, aeba marupa Aota Awamusapa tamintegi, ainti aꞌyaꞌmaena tamikenaenagaba taeba abibebe pune.
6 Piya, taeba pika abima pero puma miyune. Pipa mayama abune: Ibasa yaga Waꞌegamageba kumaꞌwatiba kampa miyompekaba mamparapa tauꞌamaba namate kanta pegi miyunema, abune.
7 Piya, ma kanarapa taobisa agantompentana wanane. Taeba uwa tamatiti puma mono kiꞌiba nasune.
8 Pika abima pero pune. Piya puma, taupa kaite Waꞌegamage ampisanaga tabugaye.
9 Piya, ma ntamatepi miyompepe, kaite aege miyompepe, taeba yokege puma Waꞌegawama nkabugaintana wasiyekana aꞌmu puratano.
10 Piya, taeba aꞌyaꞌma kinaꞌmitaba Karaisiti nkantotaꞌena aborakena aemu yabaera irosakune. Aibekana, tauꞌyaga pompentanaba aꞌyigitatama aꞌyaꞌma ka ka kinaꞌmitepa ikapa aogiyenawo, ataenawo aboraramikiye. Poroba wasana Kotiti atokaekena yuga puntiye
11 Piya, taeba Waꞌegamaka taekuru pukenagaba napima, wasanamikaba imatiti piyema yogaba pune. Piya pokanaba Kotiba agorepa tagawaeye. Piya tintabaipipa pabiyama agorepa tagawaeyanema, napiyuwe.
12 Piya, ma kamana yompepa, pipa tae taupa tiyobi to kakema kampa maete iyune. Kampaye. Tigeba abiginaba taekaba aogima ntapima, wasanami nkiyoriba tiꞌmuntanaba aborano. Eya, iꞌama nkasagayuntini igupa kampa napiye kinaꞌmi nkiyoriba taekaba abima tiꞌmu piyo.
13 Piya, wasanami nkiyobi taeba aibosabo pompepa, aerawane, taeba Koti ntuga pune. Wasanami nkiyobi taeba aogima ntapiyompepa, pipa tiyoꞌmaekenaenawe.
14 We, Karaisiti nkagu kaoꞌenawampa kabirataye. Pikaba taeba aogima napimagita mayama abibebe pune: Aꞌyaꞌma kinaꞌmite nkantotapa ka yagarama ago purintiye. Piya, aeti atokaekenaga aꞌyaꞌma kinaꞌmitepa mampabisaenara ago puruntunema, abune.
15 Piya, miyaba miye kinaꞌmiba taetentana wanane. Aeti atokaema miyaba miyompeka purintiye. Eya, aeti atokaesanaga aꞌyaꞌma kinaꞌmiteka purogana asitantiye.
16 Piya, ibasa yagaba taeba wasanami ntapiyenabisa wasanapa kampa aꞌyigi nkitaune. Kampaye. Piya, paipa Karaisitikaba wasanami ntapiyenabisa aꞌyigi nkatantune. We, ibaba kampaye. Aeba to awametanema, abune.
17 Piya, kaꞌwainaba Karaisititi atokaeyamipa aeba to auga puwaeye. Paisaenawampaba nagariwagina, we, aogantaꞌenawampa aborawaeye.
18 Pipa aꞌyaꞌma aogantaꞌenaba Kotintana manane. Piya, aeba Karaisiti ntugarasa taepa maema aeti atokaeratama ka tantabariratantiye. Piya pumagina, aeba ka tantabarikena yugara uratantiye.
19 Eya, Karaisiti ntugarasa Kotiba aeꞌwa ntuga puma mabisa kinaꞌmite nkaiboꞌenarepa aewake ka tantabariratantiye. Piya pumagina, aeba ka tantabarikena kamanapa tayapisa aboranoma uratantiye.
20 Pika taeba Karaisiti nkaogi agoya kamanaꞌwa ukena kina miyokana, Kotiba kamanaꞌwapa tawamutasa esegima urimiye. Piya, taeba Karaisiti ntugaraka mayama esuritaune: Tigeba Kotiti atokaema ka tintabarima miyiyoma, uritaune.
21 Piya, Karaisitiba aguntaenawapa kampa waintipa, tae agunta asuꞌa puratakenagaba otaogana agunta yagara kanta puma purintiye. Aiboga, taeba Karaisititi atokaemagi yogawatasa Koti nkarupu kina aborakena pune.
1 Piya, taeba Kotige ka yuga pompe kinaꞌmitaba, kamanapa esegi kamana urimima: Tigeba Koti nkawagaenawapa maentapa, a-nkuwa ataiyoma, urimune.
2 Piya, aeba maya kamanapa untiye:
Aogi kanabipa kamanakapa abimagi, wasanami nkiꞌikena yagaba kaoꞌmaentone, untiye, iye. We, aogi kanarapa iba aboraye. We, tauꞌikena yagaba ibanto aboraye.3 Pigoya, wasanami tae yugaga uma ata pusanagaba taeba kaꞌenaba igisabi wareꞌnakenaenaba kampa puma kabiyune.
4 Piya, taeba Koti kayokaya kina mimagi aogi yugarepa tonaronabisa aborariyakima miyune. Piya, taeba tauki nakiyenarepe kuntaenarepe kamparagaenabi mpikenaenabe pasema aesagaꞌma asima esegi pune.
5 Eya, kasotasa taeguma, igaꞌna puratamagini, tabe kamana uratawe. Aerawane. Taeba araga ntuga puma, aogima kabima mimagi, nanintagaba iꞌmima agorepa aboraune.
6 We, tabe nare ntare puma mimagi, abikenaenarepa aogima aborama, kampa karuꞌena taoꞌmipa kamana uwaitama, kayonena puma agorepa aboraune. Eya, Aota Awamusati atokaema mima, agu kaoꞌena auꞌwantaga mimagi,
7 taga kamanaꞌamana uma, Koti nkesegiyenaba aboramagi miyune. Piya, taeba Koti nkarapuyenaba kaso kanta puma tayatakantibe tayakeꞌmasibe puꞌma miyune.
8 We, kaꞌisa kinaꞌmiba tageba asagayuyegini, to kaꞌisamiba maete tumewe. Kaꞌisamiba ata kamana uratagini, to kaꞌisamiba: Aogi yuga pewema, uratawe. Kaꞌisamiba taekaba: Kumpari kinanema, napiyepa, pipa kampaye. Taeba tagantana pune.
9 Uwoma kinaꞌmiba tagapa, agorepa kampa aogima agawe. Taeba purikena kina kanta pompepa, uwa taogama miyune. Taeguyepa, kampa purune.
10 Piya, taeba intaraꞌena pe kina kanta puma mima, asi nasiba taꞌmuba pune. Taeba kusi kina kanta puma mima, mono kutatepa etaꞌma ima uwoma kina imune. Eya, taeba kota kampa wainta kina mima, aꞌyaꞌmaena wainta kina kanta puma taꞌmu puyabaꞌmiyune.
11 We, Korinti kinapa, agu kaoꞌenayaga puritamagi, tantabaipisa kamanapa aborawaerimune.
12 Taeba agu kaoꞌena puritakenaenaba kampa akunune. Kampaye. Taeba kanara agu kaoꞌena puritaokiri, tigeba agu kaoꞌenaripa akunega kaꞌenaba kampa puma miyune.
13 We, araga yagarane kanta puma miyepa, tigeba antotapa tigupa ataigina taeti kananoma, urimuwe. Taerepa Koti ntama mpintune
14 Pigoya, kampa imatiti punta kinaꞌmigeba ka kina kanta pumaba a-mpiyiyo. We, ayama antageꞌenambe arupuyenamabe kaꞌenaba pukiye, a. Kampaye. Ayama eꞌwasaenamabe tununtanamabe kaꞌenaba pukiye, a. Pipa kampaye.
15 Piya, ayama Karaisitige kewamageba napiyenawaisipa kaꞌmasa puma mikibese, a. Kampaye. We, ayama amatiti pemiꞌnabe kampa pemiꞌnabe isigupa kaꞌmasa puma mikibese, a. Pipa kampaye.
16 Piya, ayama Koti mpono namake ama kotigeba maema atokaekibese, a. Pipa kampaye. Abiyo. Miyaba Koti mpono namapa pipa taewe. Pika Kotiba maya untiye:
Naeba igege mima, ige ikapi nasikuwe, iye.Piya pumagi, ige Koti miyekini igeba nae tu mpikibewe, iye.17 Piya, abeꞌisa kinapa igaitegiri aota miyiyo, Waꞌegawama naba piya yuwe, iye.
Piya, iꞌnintanaba a-mpaema miyigi, naene tibabeno, iye.18 Piya, naeba tibantana pekiri, tigeba araga yagaranentana puma mikibewema, tabe Waꞌegarakaꞌyankamana yuwe, piya untiye.
1 Piya, nabugai ntaoꞌmitaba, piyaenaga agebama utaratantika, taeba tagu tauꞌama iꞌnintana pemika aeyobaꞌmagi Kotikaba taekuru puma aotaꞌenama nkaupa aogima aborama miyeno. Korinti kinaꞌmi igu aꞌwae puguna Poro aꞌmu puntiye
2 We, tigeba agu kaoꞌena purataiyo. Piya, taeba tigetiba kaꞌwainapa ataena kampa potantune. Piya, kaꞌwainapa antage kipa kampa aboraeyakintune. Piya, kaꞌwainapa kumpari kamana kapa kampa omima aeꞌenawapa paibuntune. Kampaye.
3 We, naeba piyama tipi pima kamanapa kampa yuwe. Kampaye. Naeba: Tigekaba napima agu kaoꞌena puritaunemaba, taga kamana ago urimuwe. Eya, taeba tigege kaꞌena puma mita wama purenemawe.
4 Piya, tigeba aogima ntapima arupuyena pusanagaba tara nagiba kampa napiyuwe. Tigekaba tabera naꞌmu pogiri esegima asinatawe. Eya, wasanamiba tauki nakiyenaba aborawae tamega, aerawane. Tigekaba napima tabera naꞌmuntanabi mpiyuwe.
5 We, paipa Masetoniya mariba ampa irosauwapa, pitaꞌigeba uwaba kampa mintantune. Kampaye. Asi nasiba toma toma tauki nakiyenaba tauta aborantiye. Eya, tautapa maꞌena puratauguna, tantabaipipa taekuruyena aborantiye.
6 Aibogana, Kotiba aeba kuntaena maeya kinaꞌmipa agoya puwaitaiꞌna aeba Taitasipa otaogana taeti kanaogana tantaba agoya puratantiye.
7 Piya, Taitasi taeti kanantemipa, pikaba Kotiba agoya puratantiye. We tigeba Taitasi nkantaba agoya potauguna, aeba pi kamana maete kanama kaga agoya puratantiye. Piya, Taitasiba kamanatipa unamimagina: Tigeba nagakenagaba tibugagina, tintawamaba naeka kubeꞌena pegiri, nae nage asagayuyewema, unamintiye. Piya, pi kamana unamintikaba tabera naꞌmu puritantuwe.
8 Naeba paipa ka isa kaema timima, tinta tiki nakiyena maema aborarimintopa, pika abima nantarapa kampa puwe. We, paipa nantawamaba kunta puntikana, ibaba kampaye. Piya, esaꞌnempa aro ntaganto tinta tiki nakiyenaba aborarimintegina, aꞌya wayema, abuwe.
9 Piyamaba nantawamaba aogi piye. Pipa tinta tikintika wanane. Tigeba tintaraꞌena puma tigu aꞌwae puntika nantawamaba aogi piye. Eya, Koti nkabintanaga tinta tiki nakiyenaba puguna, kamanatempaba kampa ata yugaba puritantine.
10 Piya, wasanamaba Koti nkabintanaga anta auki nakiyena puntanaba, ago aꞌwae pekana Kotiba auꞌima ababekana, pikaba kampa napima ata pikiye. We, wasanamaba mampabisaenaraka anta auki nakiyena pekanaba, piꞌna nkauꞌwapa purikenaenawe.
11 We, abiyo. Tigeba Koti nkabintanaga tintaraꞌena puguna, piꞌna nkauꞌwapa aogiyenaba tigupinti atama tutusuritaogiri abintane. Piyama tutusuritaogiri, tigeba asima kamanatipa uma arupu pumagiri, pi ntagarama nkaguntaenaraka pami pumagiri, Kotika tiyekuruba puntawe. Eya, pi ataena pemiꞌnapa arupu potakenaga tigeba tabera napima esegi puma kamanaꞌwapa karuꞌena uma aogi puma antotaꞌenawapa amintawe. Aꞌyaꞌma yuga puntapa, pipa aogi pumagiri, Koti nkaobipa kampa kamanatipa uwa waintantiye.
12 Piya, pai isa kaema timintopa, pipa aruꞌena puntiꞌna aekawemaba kampaye. Ataena potantiꞌna aekawemaba kaga kampaye. Piya kamana urimuwagiri, tawamupa wasikenaenaripa Koti nkaobi aboranema, pika kaema timintone.
13 Piya, pintanarimpaba tantawamapa agoyaena potawe. Piya, tanta manapa agoya puntika wanane. Tigeba Taitasi nkanta agoya potantaka aꞌmu puma kanama ampa uramoga, taeba tabera taꞌmupa puntune.
14 Piya, paipa naeba tige tige asagayuma Taitasipa omintone. Pi kamanaꞌama nkauꞌwantaga aborawaeyugu kampa nanipa puntuwe. Piya, paipa tigepa kamana urimintopa, pipa taga auꞌwa aborantaisa puma, tige asagayuma Taitasipa kamanati omintopa, pikeba auꞌwantagaꞌena aborantiye.
15 We, Taitasiba tigeti waogiripa tigeba ababuma tiyekuru puma pami ntami puma awamuꞌwapa wasintawe. Pika aeba napintana agupa tigeti uwaenara abugantiye.
16 Piya, antageꞌena pusanaga tigekaba tara nagiba kampa napinta, pikaba naꞌmu puritauwe.
1 We, naoꞌmitaba, Masetoniya marisa monota aiꞌaruyenabipa Koti nkawagaena aboranti, pika urimikena pune.
2 Piya, tabe iki nakiyenaba igeti aborama imiyo puwaitagini, igeba pugararakaꞌya mintantawe. Mimagini, igeba monotaka iꞌmuntana puma asugasima tabera pumagini, igeꞌwai kupisa uwaena aki puma iyokinapa iyoꞌmaentawe.
3 Piya, igeꞌwai ntapiyenarasa aegaꞌma kana moneba imintawe. Eya, igeba waintemintana kanara napima atamagini, piꞌnapa piꞌnapa agasima to kake atantawe. Naeba pika ago abigaite awagaba urimuwe.
4 Piya, igeba taeka tabera esurataugu: Tigege kaga Kotiti atokaema ataenabi mpintaꞌnagipa iyoꞌmaeyanema, tabigantawe.
5 Piyama tabigaugu, taeba: Kaꞌisa atakibewema, napintompene. We, piyama kampa puntawe. Kampaye. Maruꞌenaba igeꞌwai nkigupa Waꞌega amigaitegini, Koti nkabomeka aegaꞌma igupa taepa kaga tamima napiyenarepa asugasima tabera puntawe.
6 Igeba piya pumeka, taeba Taitasi otakana tigeti wanomawe. Piya, aeba pi nkasoya yuga agobintisa puma, tigeti ampa nagarigasanema, otaune.
7 Piya, tigeba aꞌyaꞌmaenaba aogiyena mana pewe. Eya, tigeba Kotiti timatiti pumagiri, kamanatipa aogima aboramagiri, uwaena napiyenarintagakiri, Koti ntugaba esegima pumagiri, tigeba agu kaoꞌena aogima puratawe. We, pabiyamagiri iba ma nkiyoꞌmaekena asoya yuga kaga asugasima piyo.
8 We, pika naeba kampa esegima uritauwe. Kampaye. Kaꞌisa kinaꞌmiba aogi yuga puma iyoꞌmaeyaga urimuwa, abima piyaenaga napiyigina kaga agu kaoꞌenarimpaba tagantana peno.
9 We, tigeba ago Waꞌegarempa Isu Karaisiti nkawagaenawapa abintawe. Aeba uwaenaena waintaga mima, atate pugara puma ampintantiye. Eya, pugara puma mintantipisa tigeba uwaena maekibewemawe.
10 Pigoya, ibaba nae napiyenanepa mayama urimuwe: Ma ntugagaba marusa kabuba tigeba agobima puntawe. Eya, marupa kina yuga pusanagaba tibugaogiri puntakiri, ibanto nagariyiyomawe.
11 Eya, paipa agarosama pi ntugagaba tibogiri puntakiri, piyama ibageba agarosama auꞌwapa aborama, tigetintana waintintanaritasa nagariyiyo.
12 Piya, kaꞌwaina amikenaenaga abugakibipa, pi ntagaramati waintintanagaba Kotiba napiyegina kanarasaye. Kampa waintintanagaba kampa napiye.
13 We, tigeba imimagiripa ataenabi mpiyigini igeba aogiyenara miyiyemaba, kampa yuwe. Kampaye.
14 Naeba tigegeba kaꞌmasa puma miyiyoma, yuwe. Piya, ibaba ma kanarapa tigeba kampa waintiꞌnagipa uwaenaenaritasaba kanara iyoꞌmaeyiyo. Piya pigini, tigeba kaꞌisaenagaba aisagakibepa, igeba uwaenaenawaitasaba kanara tiyoꞌmaeyiyemawe. Piya pukibepa, igege tigegeba kaꞌmasa puma mikibewe.
15 Piya, mono isaꞌamaba untamisa puma maya piye: Kaꞌwaina mana naninta uwaena maentiꞌnaba kampa asugaintiye. To kaꞌwaina taranto maentiꞌnaba, aeba kampa kusiba puntiye, iye. Taitasibe aoꞌyagararabe Korinti kumati wakena puntawe
16 Naeba Kotipa naꞌmu potauwe. Aeba Taitasi nkanta maema asitagina, aeba tae napiyompesa puma tiyoꞌmaekenagaba napima abugaye.
17 Piya, aeba tae otaompe kamana aegaraye. We, tae kamana abiwanane. Aekeba pi ntuga pusanaga abegina, aeꞌwa ntapiyenabisa tigetiba waye.
18 Piya, taeba ka mono yagara otakana aegeba wakiye. Kana mono yagara, aeba aꞌyaꞌma monota aiꞌaruyenabipa aogi mono ukena agigaꞌe wainta yagarawe.
19 Pi abiwanane. Monota aiꞌaru pe kinaꞌmiba aepa otagana, taege nasima pi Yerusaremi kina iyoꞌmaekena agoya yugare taoꞌmaeye. Piya, taeba Waꞌegawama nkage asagayuma aogima tiyoꞌenaba puritama aborarimune.
20 Piya, tabera aki pompe ntabapa kabikena pompekaba ata kamana usanaga, taeba pi taoꞌyagara otakana Taitasige wakiye.
21 Piya, taeba aogiyena manapa pusanaga tabugaye. Eya, Waꞌegawama nkaobinkamana wane. Wasanami nkiyobipeba kaga aogiyena pusanaga tabugaye.
22 Piya, taeba to ka mono yagara otakana, isigegeba wakiye. Taeba uwaena yaga toma toma ntugaba amompepa, aeba esegima yogaba pegi agawaeyune. Piya, ibaba tigeba aogiyenamana pewema, napima pi ntugaba to kakema esegima piye.
23 Pigoya, Taitasipa mayama agaiyo: Aeba naoꞌyagaragana, naege kabo puma ka yuga puma tiyoꞌmaekena piye. Piya, tara mono yagararamisipa tigeba mayama abiyo: Isigeba monota aiꞌaru pe kinaꞌmi ntuga puma Karaisiti nkeꞌwasaenaba maema aboramene.
24 Pika tigeba aꞌyaꞌma monota aiꞌaru pe kinaꞌmi nkiyobi ma kakaga kinaꞌmiti agu kaoꞌenaripa aborawaimima, tigeka kamana uwaimompe nkauꞌwapa aboraiyo.
1 Tigeba Kotiti atokaeya kinaꞌmiti muta atama iyoꞌmaekenaenaba agantaka, naeba pikaba eꞌero kamanapa kampa kaekuwe.
2 Eya, tintawamaba pi ntuga pikenagaba aogi puntiyemaba, agantuwe. Piya, naeba Masetoniya kinaꞌmi nkiyobipa tigeripa asagayuma, tigekaba maya uwaimuwe: Abetasa kaburapa Akaiya kinaꞌmiba pi ntuga pikenaba ago yokege puntawema, uwaimuwe. Piya, esegi punta ntugarimpa nkawaga kamanaꞌamaba tutusuwaitaye.
3 Pigoya, ma kamanapa uwa kamana pusuma tigegaꞌe asagayusu pusanagaba kampa nabiye. Kampaye. Piya, nae uwaimosa puma tigeba yokege puma miyiyemaba, naoꞌmipa uwaitaogini tigetiba wawe.
4 Piya, aꞌyugu tigeba kampa yokege puntigini, kaꞌisa Masetoniya kinaꞌmiba naege wamagini uma tigaigiri, taeba tani pusanaga yokege piyo. We, tigegeba kaga tini pusanaga yokege piyo. Piya, tige pentanagaba esegi kamana uwaimune.
5 Piya pumagi, naeba naoꞌmipa uwaitakini paitama wama tigetiba wakibewema, kanara napiyuwe. Piya, tigeti wamagini, tige atakena muta marupa yokege puma miyigi kanano. Piya, tipi pigaurisanaga kana yabapa tiꞌmuntanabisa ibaba aki piyo.
6 Piya, yo kamanaꞌama nkagoba mayamawe: Kaꞌwainaba taranto aintana pemiꞌnaba pi ntugabisaba taranto maekiye. To kaꞌwainaba uwaena aintana pemiꞌnaba, aeba pi ntugabisa uwaenaba maekiye.
7 Piya, tigeba ka ka tintabintiba aogima napigaitegiri, pi ntapiyena aegaꞌma uwaenaba imiyo. Aꞌyugu kaꞌwainaba antabinti aukintaꞌyaga imisanagawo, wasanami tutusunatawe usanagaba tiꞌmuntanabisa imiyo. Eya, Kotiba aeba wasanama aꞌmuntanabisa amisanagaba abugaye.
8 We, Kotiba aꞌyaꞌma aꞌmuntanaba asugasima timikena piye. Piya pekini, tigeba kanara maewaemagiri, aꞌyaꞌma toma toma aogi yuga pikenaga tiꞌmuntana pumaewaintapisa aborama kampa aisagawe.
9 Pika mono isaꞌamaba maya iye:
Kotiti atokaeyami ntagaramaba aeꞌenawatasa aibarase puma pugara kinapa imiye, iye.Piya, arupuyenawampaba pipa waiyaba mikiye, iye.10 Piya, Koti aeba aintana pukena kinapa a imimagina, nanintaba aborama wasanapa imiye. Piya, aeba pabiyama aintanaripa tabera aborarimima, arupuyenarimpa nkauꞌwapa uwaenaba aborakiye.
11 Piya, tigeba uwaenaena aborama imikibepa, tigetiba uwaenaenaba to kakema aborakiye. We, tiꞌmuntanaripa maete wama imekiniba, tigeka igeba Kotiti tabera iꞌmu potakibewe.
12 Piya, tigeba piya yugarasa Kotiti atokaeya kinapa iyoꞌmaekena pepa, aguyosaꞌma kampa waintintanaba maema aborawaeyawe. Piyaena mana nane. Pi pentanaraka Kotiti tabera aꞌmuntanaba kaga aborawaeye.
13 Pi nkiyoꞌmaekena yuga pepa, tige pentanama nkauꞌwapa aborakibewe. Eya, tigeba Karaisiti mpono kamanapa abima wasimagiri Koti nkagegaꞌeba asagayukibewe. Eya, igebe to aꞌyaꞌma kinaꞌmibe tigamagini: Tabera iꞌmuntanaba tamewe, umagini Koti nkage asagayukibewe.
14 Piya, igeba Koti nkawagaenamaba tigeti asugasima waintakini tigakibewe. Tigamagini, pika igeba tigege kaga mikenaga umagini Kotiti nunamu uritakibewe.
15 We, Koti aꞌmuntanawapa tamipa, pikaba taꞌmu potano. Pika kamanatepa kampa uma nagarikune.
1 Nae Porona, naeba Karaisiti nkagoyaenawape anta paruyenabe napima kaꞌisaenagaba urimuwe. We, kaꞌisa kinaꞌmiba naeka maya yewe: Aeba tae taora mintanaba agewapa maete tumimagina, pagasara mintanaba aeba esegi kamanapa urataye, yewe.
2 We, naeba urimekiri abiyo: Aintiba tigetiba kanakubopa kaꞌisa kina, taekaba mampabisaena aegarawema ye kinaꞌmikaba, esegi kamanapa uwaitakuwema, napiyuwe. Piya, naeba tigeke kaga esegi kamanapisa urimisanagaba kampa nabiya, pika aogima kabiyiyo.
3 Tagane. Taeba mampabi nasintapa, we, mampabisa esegiyenarasaba kampa maꞌenarepa pune.
4 Piya, maꞌena pikenaena urintompepa, pipa mabisaenaba kampaye. Pipa Koti nkesegiyenawe. Piꞌnaba kama kinatempi kagisa akasabakaikena esegiyenawe.
5 Eya, taeba Koti nkesegiyenabisa wasanami ntapiyenawaipa akayumagi, aꞌyaꞌma Koti agakena ki akunikena agebigoꞌenaba maema metamagi, aꞌyaꞌma kinaꞌmi ntapiyenaba igaꞌna potama Karaisiti nkawamu wasiyiyomawe.
6 Eya, taeba ago yokege pumagita kamana akayuyeꞌnagipa kamparaga antotapa imukune. We, marupa tigeba arupu puma Karaisiti nkawamu wasiyiyo.
7 Pigoya, tiyobi waintintanaba agamagiri arirasaena manaka napiyewe. We, tigetisa kaꞌwaina aeꞌwakaba: Karaisiti nkaoꞌyagara mintuwema, napiyemiꞌnaba, aeba taekaba mayama napiyeno: Naeba Karaisiti nkaoꞌyagara miyosa puma igeba kaga aokina mintawema, taekaba napiyeno.
8 Piya, Waꞌegamaba yoga pikena esegiyenaba tamintipa ata puritakena wanane. Pi nkesegiyenapa nama kiyesa puma esegima asiritakenaga tamintiye. We, naeba pi ntugaraka tae tage maete ikubopa, naeba kampa nanipa pukuwe. Kampaye.
9 Piya, esa kaema timopa abigina naekaba tiyekuru punatasanagaba kampa nabiye.
10 Piya, kaꞌisa kinaꞌmiba maya unatawe: Esaꞌwapipa esegi kunta kamanaꞌamana kaema tamintana, aeba taorapa ampiyemipa kampa esegima pegina kamanaꞌwampaba uwaena kanta piye, yewe.
11 We, piya ye kinaꞌmitaba mayama abiyo: Taeba pagasara mintata kamana kaeyompe, pi kamanaꞌama nkauwapa tikapi mpinta aborakunema, napiyiyo.
12 We, taeba taekuru puma, kaꞌisa iꞌwai mpaete iye kinaꞌmigeba taeba kaꞌmasa puma miyunemaba, kampa yune. Piya, igeba iyokinapa agama mare-u me-u puma iꞌwaipa maete ima, aiboꞌenaba pewe.
13 Piya, Kotiba yoga uratantinkamana pikaba taꞌmu pumagi, kamanapa ukune. Tonaraka kampa ukune. We, uratanti ntugaba tigeti kaga aboraiyoma uratantiye.
14 Piya, taeba maruꞌenaba eꞌero mpari wama tigeti irosaꞌma Karaisiti nkaogi mono kamanapa urimintompene. We, taeba kampa tigeti wama irosaompesinta, kamanatipa taeti a-nkaboraiyo, uma nagaresine.
15 Piya, taeba to kinaꞌmi ntugaraka wanane. Taeba Koti yoga uratantinkamana pikaba taꞌmu puma taupa maete iyune. Piya, timatitiꞌenamaba anosakana tikapi yoga agorempa nkauꞌwapa aborama tabe pusanaga tabiye.
16 Piya, tikapi tabena aboraka, taeba wasana tikaꞌi mintaꞌnagiti uma aogi mono kamanapa urite wama aborasanaga tabugaye. Piya, aꞌyugu taeba ka aukaꞌi wama to waina ntugaraka tae tauꞌikune. Pipa kampaye.
17 We, mono isaꞌamaba maya iye: Kaꞌwaina aeba aꞌmu kamana ikena untanaba, Waꞌegawamaka uma aꞌmu kamanapa yeno, iye.
18 Piya, kaꞌwaina aeba aeꞌwa nkauꞌima asagayukibemipa, Koti nkaobipa kampa kanarasakiye. We, Waꞌegawama to kaꞌwaina nkau asagayukibiꞌnapa agegaꞌeraka waikiye.
1 Tigeba abintigi, anagi kamanaꞌanto urimeno. We, anagi kamanaꞌantonepa aogima abiyo.
2 Naeba tigeba to kiꞌi wasanaga Koti nkaobi tiba puritama, to kipa akunikena puwe. Piya, nare ntare puma miyi nkaragawaepa awaeta menkatamisa puma naeba tigepa Karaisitika agebantaka, aeti atokaeritakena puwe.
3 Piya, kuyawamaba agoꞌena puma Ibi amiyo puntisa puma, kaꞌisa kinaꞌmi napiyenaripa paibusanaga kabiritauwe. Eya, Karaisititi atokaema taga nare ntare kitasa paiburitasanaga tara tara nagi napima kabiritauwe.
4 We, tigeti kaꞌwaina irosaꞌma Isukaba tae urimintompesa pumaba kampaye. Toma urimikibipa karuꞌena aegarakibewema, napiyuwe. Piya, Aota Awamusa maentasa pumaba kampaye. To aborarimikibi nkawamusapa karuꞌenaba maekibewema, napiyuwe. Piya, aogi mono kamana taetisa aborarimintompesa pumaba kampaye. To ka monoꞌena aborarimikibipa, pipa tigeba kampa akayunta karuꞌena uma abigina aogi pukiyema, napiyuwe.
5 Abiyo. Naeba abopa, i maete iye nkaposoro kanta kinatimpi nkimentantiba kampa miyuwe. Pipa kampaye.
6 Tagane. Kamana ukenaba kampa aogima iyema napiyepa, pipa aerawane. Mono abikenaenagaba kampa aguyosagauwe. Piya, aꞌyaꞌma yugaretasa taeba aꞌyaꞌma abikenaenarepa ago aborariyakokiri abewe.
7 Tigeba abintawe. Koti mpono kamanapa naeba tigepa urimintuwe. Pi ntugarisaba ikantepa kampa maentuwe. Kampaye. We, pintana popa tige tigeripa maete isanaga naeꞌne ntageba maete tumintopa, pipa Koti nkaobipa aguntaena puntuwa, a.
8 Piya, tigeti mono yuga pikenaga tigetisa wanane. To kaꞌisa aiꞌaru pe kina igetisa taoꞌmaekena yabapa esuma iparintone.
9 Piya, paipa tigege minta, kotakaba aisaganto ntaga kampa kuntaenaba urimima esuritantuwe. Kampaye. Mono kinaꞌmiba Masetoniya maba atate tige mari kananta, igeba maete mentamintawe. Pi ntaga kuntaenaba kaꞌenaba kampa puritantuwe. Aintigeba kaga pabiyama kampa kunta puritakuwe. Kampaye.
10 We, Karaisiti taga kamanaꞌamaba naeti waintegi, naeba taga yuwe. Piya, aꞌyaꞌma Akaiya aukaꞌiba nae pontanagaba nage asagayukenaba kampa akunikibewe. Kampaye.
11 Nana piyema naeba piyaenaba puwe, a. Naeba tigepa agu kaoꞌena kampa aborarimuwa, a. We, naeba agu kaoꞌena puritauwemaba Kotiba aogima agantiye.
12 Pi aꞌyaꞌmaena popa pipa pabiya puta wakuwe. Pipa uwaba kampaye. Kaꞌisa kinaꞌmi igeba: Poroge kaꞌmasa puma tabe yuga punema, untini iꞌwaipa maete iyeka akayusanaga pabiya pukuwe.
13 Piya, pi kana kinapa kampari aposoro kina mima monotaka tiyobi airarikaeyawe. We, igeba Karaisiti nkaposoro tae kanta puma miyewe.
14 Pipa aosoꞌenaba kampa puwaeyawe. Kampaye. Piya, Satani aewa tamiyoꞌena puma eꞌwasaenayaga enisore kina kanta puma miye.
15 We, aeꞌwa kayokaya kinaꞌwapa igeba Koti nkarupu kayokaya kina kanta puma miyekaba a-pami piyo. Aintiba yogawaimpa pisa puma antotaꞌena maekibewe. Poroba aposoro yugawatasa tabe kuntuyenaba maentiye
16 Pigoya, naeba yo kamanapa to kake ikena puwe. Piya, aꞌyugu kaꞌwainaba: Anagi yagaragawe, unatakiye. We, anagi yagaragawe unatagiripa, uwa nababiyo. Kanarane. Ibaba tiyobipa naupa uwaenanto asagayukuwe.
17 Piya, naeba ma kamana ukubopa, Waꞌegawama nkawamu wasimaba kampa ukuwe. Naeba anagiꞌena pusu puma uwaba naupa asagayukuwe.
18 Eya, uwaena kinaꞌmiba arirasaenaga iꞌmu kamanapa uma iꞌwaipa maete iyeka, naeba pabiyama naupa maete ikuwe.
19 Piya, anagi kinaꞌmiba kamana urimegiri abima kanara pewe. We, tigeba aogi napiyenayaga kina mintawe, a.
20 Piya, kaꞌwainaba tirakuꞌma kayokayaꞌenawata igaꞌna puritagiripa, kanara pewe. Eya, kaꞌwainaba timiyo puritamawo, titasaenaripa tipaꞌuꞌmawo, agebigoꞌena puritamawo, tiyobi aya kasutasa tiyeguyiripa tigeba uwa atama kanara pewe.
21 We, taeba kampa pabiyama ataba puritaune. Kampaye. Pikaba ayama napiyewe. Taekaba: Amu kina kanta puma miyewema, napiyewa, a. We, pika nanipa puwe. Pigoya, kaꞌwaina aeba miyemintanawano, pemintanawano ukibipa, naegeba pikaba kaga uma naupa maete ikuwe. We, naeba aibo kinaꞌmi usu kamana yuwe.
22 Piya, igeꞌwaika: Yuta ago kina mintune yepa, pabiyama naegebewe. Igeꞌwaika: Isureyo ago kina mintune yepa, pabiyama naegebewe. Igeꞌwaika: Isureyo ago kina mintune yepa, pabiyama naegebewe. Igeba: Abaraꞌamu nkagaꞌnurawe yepa, pabiyama naegebewe.
23 Igeba: Karaisiti ntuga kinatawe yepa, naeba asu igasima pi ntugaba tabera puwe. We, naeba aibo kinaꞌmi usu kamana uma nau maete iyuwe. Piya, naeba araga ntuga puma asu igasimagi, igaꞌna namapi uwoma ntaga mintuwagini, kampa aisema kanara kasotasa naeguyugu, uwaena yaga puꞌwakena puntuwe.
24 Piya, nayakaꞌmuta Yuta kinaꞌmiba igaꞌna kasutasa tabera naeguyuguna 39 puntiye.
25 Kakagara eru kasutasa naeguntane. Kapa pipa yaba kasutasa maebuma tabera naeguntane. Piya, kakagara wanipisa kareba aegasagasubaoga wanipi naisuwakena puntone. Piya poga, ka asege ka pake kayo wani nkaꞌeti mintantone.
26 Piya, uwoma ntaga pagasa kiꞌi nasuwapa, anompankamaba ata punatakena pogini, ke kinaꞌmibe nae tupisa kinaꞌmibe to marisa kinaꞌmibe kaga ata punatakena puntawe. Eya, tabe kumapintiwo, kabubintiwo, kayo wani nkaꞌetiwo miyuwagana ata punatakenaba aborantiye. We, kampari mono kinaꞌmiba kaga ata punatakena puntawe.
27 Naeba araga ntugaba esegima punta, uwaena yaga asenabintisa yuga punta nauba kampa waintone. Naeba naninta wanika nagaꞌena naboga, uwaena yaga iꞌmiyuwagana, esiba naboga, kainekaba aguyosakantone.
28 We, piꞌna nane. Aꞌyaꞌma yagaba naeba aꞌyaꞌma monota aiꞌaru pe kina iyoꞌmaekenaga napiyogana kuntaba nabiye.
29 Piya, kaꞌwainaba monota kampa esegiyena waintipa, naegeba kaga nantara potauwe. We, kaꞌwainaba aguntaenabi paibemiꞌnakaba naeba namo potauwe.
30 Pigoya, nananetasa naupa maete ikuwe, a. We, Waꞌegawama nkesegiyena aborasanaga magimagiyenanepa maete ima aborakuwe.
31 Eya, Koti, aeba Waꞌega Isu nkaba, agoyaenabi mpiyaba miyiꞌna, aeba kamanaꞌnepa taga yopa pipa abiye.
32 Pigoya, Tamasiko kumata mintuwapa, waꞌega yagara Aretasi otanti kiya yagaraꞌwapa uwaitaogini narakurikenaga Tamasiko kuma kabera kabintawe.
33 Piya puguni, kaꞌisa naoꞌmi igeba waꞌnu kupi iraꞌnatamagini, kagisa abakupintisa mo nagasugu, ae ayapisa naegaka wagaintone.
1 Pigoya, tae tage asagayukena kamana yokanaba, kampa aogi purataye. Aerawane. Naeba tiyobi nae nage to kake asagayukuwe. Eya, naeba amato puma to kaꞌisa kamana, Kotiba amonta kamanake kakama kamanake aborantika ukuwe.
2 Naeba Karaisititi atokaenta yagarama nkagoba kapa agantuwe. Pi ntagaraba naewe. Piya, paipa miyuwagana Kotiba inatisa mantara nababute ima nayakogana, 14-wa kabu aꞌya wantiye. Pigoya, naeba nauꞌyagape, naupa kampa waintape ima agantopa, pipa naeba kampa abintuwe. Koti mana abintine.
3 Piya, Kotiba Paratisibinti, aeꞌwa ntauka yugabinti nababute ima nayakoga agantuwe. We, naeba nauꞌyagape, naupa kampa waintape ima agantopa, pipa naeba kampa abintuwe. Koti mana abintine.
4 Piya, aeba nayakoga, mabisa kinaꞌmi kamanatepisa kampa ukenaenaba abuntuwe. We, pika mabisa kinaꞌmiba aborakenaga akumpaꞌma mintiye.
5 Piya, aboranamintintanagaba nageba asagayukuwe. We, uwa nauꞌnekaba kampa maete ikuwe. Kampaye. Waꞌegawamaba esegiyenawapa magimagi nauꞌnepisa aborantika, asagayukuwe.
6 Pigoya, nae nage maete iyosinta, naeba anagi yagara kantaba kampa posine. Kampaye. Naeba taga kamana yosine. We, aꞌyugu wasanamaba pi kamana abima nae nage uwa maete inati isanaga, nae nage asagayukena kamanapa kampa uwaba ukuwe. Kampaye. Piya, nae mikenaenanepa yoga kamana ukenaenanepe abima, pi nkawameta nae nage asagayuyekana kanarasano. Poro nkaupi akena waintasu puntiye
7 We, Waꞌegawamaba uwaena kasaꞌenaba abora nayakintiye. Pika naeꞌne nagebigoꞌena pusanaga nae naupi akena atantegina waintasu piye. Pipa Satani kayokaya yagara kanta puma naeguma asi nasi nageba maete tumemika, kampa nagebigoꞌena pukuwe.
8 We: Pipa nagasanema, Waꞌegawamaka kegaꞌe yuwagana kakaga puntiye.
9 Piya yuwagana aeba kamanaꞌwapa mayama aꞌwae punamintiye: Awagaenanempaba kanarasagataye. Piya, esegiyenanempa nkauꞌwampaba wasanami mpagimagiyenabisa aboraye, untiye. Piya, Karaisiti nkesegiyenamaba naeti waisanaga magimagiyenanekaba napima tabera naꞌmu pukuwe.
10 Piya, Karaisititaka esegiyenanepa kampa waintipe, wasanami akayasunatape, toma toma kuntuyenama aboranamemipe, karana punatape, ataenaba naeti aboramipe, pikaba nantawamaba aogi piye. We, esegiyenane kampa waintegipa, pi ntagaba karuꞌena esegiyenaba maeyuwe. Poroba Korinti kinaꞌmi nkimatitiꞌena esegi puwaitantiye
11 Pigoya, naeba anagi yagara kanta puma mima ma kamana yuwe. We, tigeba uma aogi punatasinta naeba esegimaba piyaba kampa urimosine. Piya, i maete iye nkaposoro kanta kinatimpi nkimentantiba kampa miyuwe. Pipa kampaye. Naeba Koti nkaobi mana uwaena kanta puma mintuwe.
12 Piya, tige tikapi mintantopa, naeba paebuma mima taga aposoro yugama nkauꞌwapa aborarimintuwe. Eya, toma toma awameꞌenabe kasaꞌenabe, tabe esegiyenabe aborarimintuwe.
13 Pigoya, to monota aiꞌaruyenabi aborantontanaba kaꞌantoba tigeti kampa aborarimintuwe. Pipa mayamawe: Naeba kotatipa kampa paibuma, pi kuntuyenaba kampa aborarimintone. We, pi aiboꞌenanekaba nantara puwa, maenagasiyo.
14 Piya, naeba tarara ago tigantuwe. Pigoya, ibaba to kake wama tigakenaga yokege puwe. Wamagi, kuntaenaba kampa aborarimukuwe. Kampaye. Kotati paibukena wanane. Uwa tige tigekenagawe. Piya, yagaramiba igeba maema aki puma ino ibagi iyoꞌmaekena yugaba kampa pegini, ino ibagi igeba aki puma yagarawaipa imima kabiyewe. We, naeba tige tiba mintuwe.
15 Piya, tige timankama tiyoꞌmaekenaga naeba aꞌyaꞌmaenanepe kasiwaekubopa, kanarane. Eya, naeba agu kaoꞌena tabera puritaogiri, ayabaya pegiri agu kaoꞌenaba antotaꞌena tarantoba punatawe.
16 We, kaꞌisa kinaꞌmitaba naekaba maya yewe: Tagane. Aeba kaꞌenarepa kampa paibuntine. We, aeba karoꞌne karaꞌne suma agoꞌena puratama tabaibiyema, yewa, a.
17 Pigoya, naeba kaꞌisa kinapa ago uwaitauwagini tigetiba wantane. Piya, ige yugarisa kaꞌisaenaripa paibuntuwa, a. Pipa kampaye.
18 Piya, naeba Taitasipa otauwagana tigeti wantine. Eya, to ka mono yagara otauwagana aege wantine. Pigoya, Taitasiba kaꞌenaripa kampa paibuntine. Kampaye. Aebe naebe ka taumarasa mono yuga pumagira, tikapipa aogima nasintomene. Pipa ago abintane.
19 Pigoya, aꞌyaꞌma kamana kaema timompepa, pika tigeba: tae taobi kamanaꞌwai uma aogi pikena pewema, napiyewe, a. Piyaba kampaye. We, nabugai ntaoꞌmitaba, taeba Karaisititi atokaemagi, Koti nkaobipa kamanatepa uma tige timatitiꞌenaripa asiritanema, uma kaeyune.
20 Piya, naeba tigeti kanakiripa mikenaenarimpa kampa arupu pusanaga, naekuruba puwe. Eya, naeba tigeti aborama aꞌyugu puritasanaga aogima kabiyiyo. We, tigeti kanama maka kamanana, tigobi pikenaenawa, kabirakenaenawa, agintanawa, akaya kamanana, wasana ikaꞌi kamana uwaitakenaenawa, tigebigoꞌenaenawa, atataraenawa, suma tikapi agasanaga naekuruba puwe.
21 Aꞌyugu tigeti to kake wakana Kotinempa tige tiyobi nae nage maete tumisanaga, naekuruba puwe. Piya, tikapisaba uwaena kinaꞌmiba aguntaenawaipa kampa ikabitama mintigipa, pai punta nkiꞌnintanawaipe kumiyenawaipe kupiyonawaipe kampa ikabitama kampa asuꞌa puntaka, naekuruba puwe.
1 Pigoya, ibaba naeba tigeti iyekana kakagasa pukiye. Wama uma irosakini, kaꞌwaina kamanaꞌwapa otamaginiba mono isaꞌama kamana aegaꞌma, tarawo kakagawo ka tiwamu yiginaba arupu peno.
2 Piya, paipa tigeti wantopa, wasana agunta punta kinape to kaꞌisa kinape obina kamanapa urimintone. Piya, tarasa puma wanto ntagaba obina kamana urimintosa puma, naeba to kakema pagasara yuwe. Piya, wama tigeti uma agakanaba, ka aguntaena pukibi ntagara uwaba kampa atakuwe.
3 We, Karaisiti nae nawamupisa aboramipa kampa napiyewa, a. We, Karaisiti aeba tigeti yogawapa yubu yabuba kampa piye. Aeba tige tikapipa esegi yuga pusu pipa, agaiyo.
4 Piya, aeba yubu yabu pusu pogini maripo yarapa aeguyuguna, to asintikana Koti nkesegiyenara mintiye. Taeba pabiyama yubu yabu puma miyune. Eya, aeti atokaema mima, aega kaga Koti nkesegiyenara mima, tigetiba yogaba pune.
5 Tigeba timatitiꞌenayaga miyebera aya pewe. Piꞌna tigupa aegasama agantana agowapa aboraiyo. Piya, Isu Karaisitiba tigupipa mintipa, piꞌna nkauꞌwapa kampa abewa, a. We, timatitiꞌena kampa waintisinta aeba tigupipa kampa mintisine.
6 Pigoya, tigeba taepa tagama taeka: Igeba mono kiꞌisa kampa paga pawe, usanaga nabugaye.
7 Pigoya, Kotiba kabiritakiri ataenaba kampa aboranema, nunamuba otamagita miyune. Taepa tagaigita, monoꞌama nkauꞌwantagaꞌena aborawe, usanagaba kampa yune. Kampaye. We, wasanami nkiyobi taeba paga pasu pompepa, aerawane. Tigeba arupuyenama nkauꞌwantagaꞌena penoma, kaꞌantoga nunamu yune.
8 Eya, taeba tagantana akayukena wanane. Taeba tagantana mana pukena pune.
9 Piya, taeba yubu yabuba puma miyokiri, tigeba esegiyenayaga miyepa pikaba tantawamaba aogi piye. Piya, tigupa esegima anosanema, Waꞌegamapa nunamu otaune.
10 Piya, naeba tigeti wama tiki nakiyena puritasanaga maruꞌena pagasarasa obina kamana kaema timuwe. Piya, Waꞌegawamaba esegiyena naminti pipa akasabakasasa puma tiyebaꞌmarakena wanane. Uwa kiyesa puma imatitiꞌena esegima anosanema, namintine. Nagarikena kamanane
11 We naoꞌmitaba, kamanaꞌnepa uma mayama nagari yuwe: Tigeba aogi tintabarima miyiyo. Piya, obina kamanaꞌnepa abintiri, tigupa maema aewarama miyiyo. Tigeba ka tintabarima paruyenabi mpiyiyo. Piya pukubepa, Koti aeba agu kaoꞌenamape paruyenamape agowamaba tigege miwaema miyeno.
12 Aꞌyaꞌma mono kinapa tiyapa imima aogima tiyoꞌena piyo.
13 Aꞌyaꞌma matasa Kotiti atokaeya kinaꞌmiba: Aya pewe, yewe.
14 Pigoya, Waꞌega Isu Karaisiti nkawagaenawampage, Koti nkagu kaoꞌenawampage, Aota Awamusaꞌama ka tintabariritama atokaeritakenaenabe, aꞌyaꞌma tigeti waima waiyeno.
Poro piya isa kaentiye.