1 Naeba Porona, Karaisiti Isu nkaposoro Koti nkabemika unatantiye. Piya, naebe taoꞌyagara Sositenisibe,
2 tasigeba Korinti kumatasa Koti mponota aiꞌaru pe kinaꞌmititi ma nkisapa kaeyuse. We, tigepa Karaisiti Isuti atokaeritama aota puritantiye. Piya, tae Waꞌegaba aꞌyaꞌma kinaꞌmi Nkwaꞌega mintiye. Eya, maga maga Waꞌegare Isu Karaisiti nkagegaꞌe uma aegara kina, igeke tigekeri ma nkisapa kaeyuse.
3 Pigoya, tabarempa Koti, Waꞌega Isu Karaisiti, isigetisa awagaenabe paruyenabe tigeti waiyeno. Korinti kina igeti mono auꞌwa aborawaentiye
4 Pigoya, tigeba Karaisiti Isuti atokaeyuguna Kotiba awagaenawapa timintiye. Pika naeba tigeka asi nasi naꞌmu potama omuwe.
6
5 Piya, Karaisiti kamana uma aborarimintompe kamanapa tikapintiba auꞌwapa esegima aboraye. Eya, tigeba aeti atokaemagiri, aꞌyaꞌma mono ukenaenabe abikenaenabe to kaꞌisa aogiyenabe aepisa maema miyewe.
7 Piyama maema mimagiri, tigeba monoꞌama nkauꞌwapa kapa kampa aguyosagawe. Piya, Waꞌegare Isu Karaisiti aborakibi ntagaga agawa puma mimagiripa, ka auꞌwapa kampa aguyosagawe.
8 Piya, aeba aꞌyaꞌma yagaba aogima kabiritakana, Waꞌegare Isu Karaisiti kanabi kamanatipa kampa waikiye.
9 Eya, Kotiba yagarawa Isu Karaisiti, Waꞌegare, aeti ka tintabarikenaenaba utaritamagina, tagantana puma aogima kabiritaye. Korinti kinaꞌmiti monoka atataraena aborantiye
10 Naoꞌmitaba, naeba Waꞌegare Isu Karaisiti nkagewataka ma kamanapa yuwa, abiyo: Tigeba kamanapa atataraenaba a-nkaboraiyo. Kampaye. Tigeba ka napiyena puma aki puma, kaꞌmasa puma mima ka tintabariyiyo.
11 We, naoꞌmitaba, tikapi maka kamana aborama waintemi, pipa Korowe nkaokinaꞌmiba yugu abintone.
12 Pi kamanaꞌama nkagoba mayama abuwe: Tigetisa kaꞌwainaba: Naeba Poro mpono aegarao kinaꞌnawe, iye. Piya, to kaꞌwainaba: Aporo nkaegarao kinaꞌnawe, iye. To kaꞌwainaba: Pita nkaegarao kinaꞌnawe, iye. Piya, to kaꞌwainaba: Naeba Karaisiti nkaegarao kinaꞌnawe, iye.
13 We, pipa ayamawe. Ke Karaisitipa pako potantiye, a. Poronaba, naeba tigeka maripora puꞌma tiyoꞌmaentuwa, a. Nae nageraka wani pasintawa, a. Pipa kampaye.
15
14 We, tigeba naeka: Aeti atokaema ae agera mono wani pasintompene, usanaga, naepa kampa nabiye. Piya, naeba kampa wanipa paititantoka Kotiti naꞌmu potauwe. Piya, Karisipasike Kaiyasike isige isibi paiꞌisitantone.
16 Pigoya, to kapa mayama napiyuwe: Setepana nkaokina igeke paiꞌitantone. To kaꞌisa paiꞌitantokaba kampa napiyuwe.
17 Pigoya, Karaisitiba: Mono wani paiꞌitaomaba, kampa unamima: Mono kamana uwaimoma, unatantine. Eya, Karaisiti mparipo kamanaꞌama nkagowapa maete tumisanaga, iga kamana yesa puma a-suma, mono kamanaꞌamana uwaimoma, unatantine. Karaisiti aeba Koti nkesegiyenawe
18 Pigoya, aꞌabibinti tumikibe kinaꞌmiba: Maripo kamanapa ata kamanane, yewe. We, tauꞌikibi kinaꞌmitaba, taeba mayama abune: Pi maripo kamanaꞌama nkagoba Koti nkesegiyenawema, abune.
19 Pikaba mono isaꞌama kamanapa maya iye:
Naeba aogi napiyena pe kinaꞌmi nkiga napikenaenawaipa aeguyekana tumikiye, iye.Piya, abikenaena waintaga kinaꞌmi nkabikenaenawaipa maema aꞌyugu puwaitakuwe, untiye, iye.20 Piya, Kotipa agasi ntapiyena yaga yagaraba aempa mintiye, a. Ago kamana abinta yagaraba aempa mintiye, a. Kamana aogima aꞌwae pukena yagaraba aempa mintiye, a. Pipa kampaye. Mampabisa kinaꞌmi ntapiyenama nkagowapa ataenawema, Kotiba tayakintiye.
21 Piya, wasanamiba igewai ntapiyenabisa Koti nkagoba kampa napikibewema, Kotiba aewa aogima ntapintiye. Piya, mabisa kinaꞌmiba mono kamanaka: Aibo kamanane, yewe. Piya yegana, mono aboraompe kamanatasa Kotiti imatiti pe kinapa iꞌikenaga aogima iye.
22 We, Yuta kinaꞌmiba awameꞌena agasanaga ibiye. Kariki kina igeba wasanama ntapiyena abisanaga ibiye.
23 We, taeba piyaba kampa tabegi, taeba Karaisiti yara aegunta mpono yune. Piya, pi kamanapa Yuta kina igeba abegana, igisa aimisa imegini wareꞌnasa puma ataenaba pegana, to marisa kinaꞌmi abepa: Aibo kamana kanta piye, yewe.
24 Pigoya, Koti aeꞌwati atokaeyiyema uwaitai kina, pipa Yuta kinape Kariki kinape, kaga Karaisitika abimagini, igeba: Karaisiti aeba Koti nkesegiyenabe napiyenawampa nkagowape miyema, yewe.
25 Piya, wasanami Kotika: Aiboꞌena piye yepa, pi nkaiboꞌenawampa wasanami ntapiyenawaipa asu igasaye. Eya: Koti aeba magimagiyena piye yepa, pi mpagimagiyenawampaba wasanami nkesegiyenawaipa asu igasaye.
26 Naoꞌmitaba, Kotiti kampa atokaenta ntagaba, aya kina tigeba mintuguna tigegaꞌe uma tiba puritantiye. Pipa mayamawe: Tigepisaba tarantomi mampabisa napiyenaba aogima maema mintantawe. Tigepisaba tarantomi mamparapa esegiyenaba maema mintantawe. Tigepisaba mampara tarantomi tabe igiba aborama mintantawe.
27 Piyama mintuguna, mamparasa aogima ntapiye kinaꞌmi nkini pusanaga, aibo kanta puma miye kinapa Kotiba tiba puntiye. Mampara esegi puma miye kinaꞌmi nkini pusanaga, magimagi kinapa tiba puntiye.
28 Piya, wasanami nkiyobi kampa agegaꞌe waimaenabe ataenabe kampa aboraintanabe, Kotiba utawaitama maete ima, mampabi agegaꞌe waintintanama airisakasagina tumiwaye.
29 Eya, mabisa kina kaꞌwainaba Koti nkaobi au maete isanaga, piya puntiye.
30 Piya, Koti aeba tigepa Karaisiti Isuti atokaeritama eꞌwasaena timimagina, Karaisitipa tae napiyenareka atantine. Piya aeba wasana arupu puma aota puratama taba puma ika puratakena ketene.
31 Pigoya, pikaba mono isaꞌamaba maya iye: Kaꞌwaina aꞌmu pukena untanaba, Waꞌegawama nkau maete ima aꞌmu potano, iye.
1 Naoꞌmitaba, naeba tigeti irosaꞌma Koti nkage awaga kamana urimintopa, aogi napiyenanetasabe tabe kamanaꞌnetasabe kampa aborarimintone.
2 Naeba to kaꞌisa kamanapa kampa uma, Isu Karaisiti nkago kamanaꞌamana urimikena napintone. Piya, aeba yara purinti kamana urimintone.
3 We, pai tigege mintantopa, esegiyenanepa kampa waima tabera naekuru puma tabaraba puma mintantone.
4 Piya, monopa urimintopa, aogi napiyenayaga yagarama kamanapisaba kampa napiyenaripa aꞌwae puntone. Kampaye. Awamusaꞌama nkesegiyenarasa aboraramintuwe.
5 Piya, aꞌyugu timatitiꞌenarimpa wasanama kamanaꞌamati atakibewe. Koti nkesegiyenamanati ataiyoma, piya puntone. Koti kakamaranta kamanapa Awamusaꞌama aboraramintiye
6 We, Kotitisa aogi napiyenagaba taga sune. Eya, mono aogima abinta kinaꞌmiba pipa abintawe. Pipa mabisa napiyenaba kampa uma, mabisa kiye kinaꞌmi ntapiyenaba kampa yune. Kampaye. Mampabisa kinaꞌmi ntapiyenaba nagariwakiye.
7 Pigoya, taeba Koti kakanta kamanaꞌama nkagoba uma aboraune. Piya, pi eꞌwasa puratakena kamanapa Kotiba paitakaꞌya, ma kampa aboranti ntagaba, napima wasanami nkiyobi kakantemine. Pipa ibaba uramega agowapa uma aboraune.
8 We, mampabisa kiye kinaꞌmiba pi kamanaꞌama nkagoba kampa abibebe puntawe. Abibebe puntasinta, eꞌwasa Waꞌegaba maripo yarapa kampa aeguntasine.
9 Pikaba mono isaꞌamaba maya iye:
Wasana aorasa kampa agama, agebisa kampa abima, antabaipinti kampa napiyemintanaba, pipa Kotiba aborama, ae agu kaoꞌena pota kina, igeꞌena Koti maema aiꞌaru puwaitaye, iye.10 Pigoya, pi kamanaꞌama nkagoba Kotiba otaogana Awamusaꞌama uma aboraramintine. Eya, Awamusaꞌamaba aꞌyaꞌmaenama nkagowapa abiwaemagina, Koti kakamarantapa kaga abintiye.
11 Piya, kaꞌwaina aoꞌma nkagutasa agowapa abikiya, a. Pipa kampaye. Aguꞌwama nkagowama aewa abikiye. Pabiyama wasana Koti nkagoba kampa uwaba abegina, Koti Nkawamusaꞌwampa abiwa abiye.
12 Piya, taeba mampabisa awamusapa kampa maeyune. Kampaye. Taeba Koti Nkawamusa maeyompepa, Koti aꞌmuntana tamemika abiyomawe.
13 Eya, Koti aboraramintemintanama nkagoba kampa wasanami ntapiyenabisa aboraune. Kampaye. Pi nkagoba Awamusaꞌama uramegi uma aboraune. Piya, Awamusaꞌama taga kamanapa uwaimokini, Awamusa maeya kinaꞌmiba abewe.
14 Pigoya, Awamusa kampa wainta yagaramaba Koti Nkawamusaꞌama nkaboraramintanaba kampa maekiye. Pipa kampaye. Aeba pika abekanaba: Aibo kamanane, umagina kampa aogima abikiye. Kampaye. Pipa Awamusaꞌamatasa agoba abokana, uwa kinaꞌmi abikenaenaba kampaye.
15 Piya, Awamusaꞌwantaga yagarama aꞌyaꞌmaenama nkagoba agama kanara aꞌyikikiye. Aibekana, Awamusa kampa wainta kinaꞌmiba pi ntagarama nkagoga aibosabo pikibewe.
16 We, mono isaꞌamaba maya iye: Waꞌegawama ntapiyenaba kebaya aꞌyaꞌma abima amato puma omikiye, iye. Pigoya, taeba Karaisiti ntapiyenaba maema miyune.
1 We, naoꞌmitaba, Awamusa waintaga kinaꞌmi kamanapa uwaimintopa, pabiyama tigepa paipa kampa urimintone. Pipa kampaye. Marusa napiyenayaga kina uwaimosa puma tigepa paibuma urimima, tigeba inamu kanta puma Karaisitintanabipa mintugu, paibuma urimintone.
2 Eya, naeba esegi nanintaba kampa timima, inamu ntagara nono amemisa puma kamanapa paibuma urimintone. Piya, esegi naninta nakenaba paipa kampa kanara puntiri, ibaba piyaba kampa pewe.
3 We, tigeba marusa napiyenayaga kina kanta puma mintiri, kampa esegima abintawe. Piya, tigeba tigobipa tabera puma maka kamana ukenaena aborantiripa, tigeba marusa napiyenayaga kina kanta puma miyewe.
4 We, tigepisa kaꞌwainaba: Naeba Poro nkaegarao kinaꞌnawe yegina, to kaꞌwainaba: Naeba Aporo nkaegarao kinaꞌnawe yemipa, tigeba uwa kina kanta puma miyewe.
5 Pigoya, nanawema tigeba napiyewe. Aporo aeba aya yagarawema, Poronteka aya yagarawema, napiyewe. We, tasigeba yoga kinatasawe. Piya, Waꞌegawamaba urasitantemi ntuga puma mono urimuwagiri, abima Kotiti timatiti puntane.
6 Piya, naeba aintana puwagana, Aporo aeba yonintana pogana, Kotiba aborataogana iꞌma auꞌwa aborantiye.
7 Piya, aintana pemiꞌnakaba a-so. Ae agegaꞌeba kampaye. Yonintana pemiꞌnakaba a-so. Ae agegaꞌeba kampaye. Koti ae abintowa pegina iꞌma auꞌwa aboraye. Aeka yo.
8 Pigoya, aintana pemiꞌnabe yonintana pemiꞌnabeba, isigeba pemepa kaꞌmasa pese. Piya, yogawaisimpa pemesa puma nakenaba antotapa pabiyama maekibese.
9 Eya, tasigeba Koti ntuga ka yuga pogiri, tigeba Koti ntuga mintiri, Koti kimaranti ntama mintawe. Tasigeꞌenaba kampaye. Yogarempa nkagowapa aborakiye
10 Pigoya, Kotiba unatantemi ntugaba naeba puwe. Piya, na kikena kinaꞌmi pesa puma, naeba Kotiti maruntana aogi potaogini kiyewe. Pigoya, tigeba ka aukaꞌisa amato potama kintiri, ka ka kinaꞌmitaba aogi potama kabiyiyo.
11 We, Isu Karaisiti aeba tige marune. To ka maruntana pukenaba toba kampaye.
12 Piya, pi mparuta wasanamiba korirasawo, siribarasawo, aogi yabatasawo, yarasawo, kabirasawo, aꞌnorasawo, amato puma kikibewe.
13 Pigoya, aꞌyaꞌma na kiye kinaꞌmi ntugawama nkagowaipa ka ka aborakiye. Piya, ainti tabe kanabipa yakutasa agowaipa aborakiye. Eya, pi tabe yaku kaemagina, yogama nkagowapa aogiyenawo aya pumabaya aborakiye.
14 Pigoya, kaꞌwaina pi mparuta kiyekana yakunkamaba kampa tawaenta uwa waiyekanaba, aogi ikanka mpaekiye.
15 Piya, to kaꞌwainanta yakunkama tawaeyakanaba, ikankapa kampa maeyakana, aewapa aoꞌmaema yakupisa isoꞌatama uwa auꞌikiye. Wasanama nkageba a-nkasagayuyiyo
16 We, tigeba Koti nkaota nama miyegana, Koti Nkawamusaꞌama tikapi miyaba miye. Pikaba kampa abintawa, a.
17 Pigoya, tigeba Koti mpono nama mpimagiri, pipa aota nama mpintawe. Pika kaꞌwaina aeba Koti ntamapa ata potakibemipa, Koti aepa antotapa ata potama kaikiye.
18 Tigeba tigutimpapa amiyoꞌenaba a-piyo. Piya, tigetisa kaꞌwaina aeba: Wasanama kamana aogima abo ntagaranawema napiyemipa, pi ntapiyenaba kasano. Eya, mampabisaena kampa abe kina kanta puma mintanaba, taga abikenaenaba inatisa maeyano.
19 We, mabisa napiyenaba Koti nkaobipa aiboꞌenawe. Pika mono isaꞌamaba kapa maya iye:
Napiyenayaga kinaꞌmiba igewaintana pegana, Kotiba igeꞌwai ntapiyenarasa aꞌwae puma ko pawaitaye, iye.20 Piya untana to kapa maya iye:
Waꞌega aeba wasanami ntapi napiyena abemipa, anagiyena kanta puwaye, iye.21 Pika abima, mabisa kinaꞌmi nkigeba a-mpaete iyeno. We, aꞌyaꞌmaenaba tigeti Kotiba ataye.
22 Piya, Porontepe, Aporope, Pitape, mabisaenabe, aogantaꞌenabe, purintaꞌenabe, waintintanabe, aborakenaenabe, aꞌyaꞌmaenaba Kotiba tiyoꞌmaema aborantipa, tigeꞌenawe.
23 We, tigeba Karaisitintanarawa, Karaisitiba Kotintanawe.
1 Pigoya, tigeba taeka napimagiri: Karaisiti kayokaya kina mima, Koti kakanta kamanaꞌama nkago aborakena kiyewema, taeka napiyiyo.
2 Pigoya, kiya kinaꞌmikaba yogawaitapa aogima kabiyiyoma, iba puwaitama uwaitawe.
3 We, tigebera wasana akiyenabi kaꞌwaina naeka kamana unatakibepa, pipa abekana nae naobi auꞌwantana kantaba kampa pikiye. Eya, naenekeba agonekaba kamana kampa ukuwe.
4 Piya, nae aiboꞌenanekaba kapa kampa napintapa, pikaba: Arupu yagara mintuwemaba, kampa ukuwe. Kampaye. Nae unatakenaenaba Waꞌegawama ntuga kana unatakiye.
5 Pigoya, Waꞌegawama kanapa kampa aborantemitapa, tigeba pintanaba a-nkaꞌyikiyo. Kampaye. Waꞌegawama aborakibipa, tununtanabi kakantintanaba maema arantaꞌenara atama, wasanami ntapiyenaba kaga maema aborakiye. Piya, pabi ntagaba Kotiba aꞌyaꞌma kinaꞌmiteti antota aꞌmuntanaba aꞌyigitatakiye. Korinti kinaꞌmi igewai nki maete intawe
6 Naoꞌmitaba, naeba Aporoke naeke tasigeresika yuwe. We, tigeba aꞌyaꞌma kiya kinaꞌmikaba napima, mono isapisa kamana aegaꞌma a-nkasugasi tunkagasi purataiyo. Pikaba tigu maete ikenaenaba a-piyo.
7 Pipa tabe tigigaꞌeba ketisa maeyawe, a. Tigeti waintintanaba Kotitisaba nana kampa maeyawe, a. Kotitisaena maentiripa, pipa nanaga ago kina kantaba puma titipa maete iyewe, a.
8 We, tigeba monoꞌama igaꞌe pami kina kanta puma miyewe. Tigeba uwaena yaba mpaeya kina kanta puma miyewe. Tigeba ago tagasima, waꞌega kiye kina kanta puma miyewe. We, tigeba taga waꞌega kiye kina kanta puma kabiyesinta, taeba tigeti atokaema kaga kabiyompesine.
9 Pigoya, taeba Koti nkaposoro kina miyokini, asi nasiba mabisa kinaꞌmi nkiyobipe enisore kinaꞌmi nkiyobipe taeguyewe. We, wasanamiba ikaꞌisa paibuma iyeguyegini pure kina kanta puma miyiyoma, Koti uratantibayawema, napiyuwe.
10 Piya, wasanami nkiyobi taeba Karaisititiba aibo pompe kina miyokiri, tigeba Karaisititi atokaema aogima abe kina kanta puma miyewe. Tigeba esegi kina miyega, taeba magimagi kina miyune. Tigeba wasanami nkiyobi tige wainta kina miyega, taeba tuminta kina kanta puma miyune.
11 Piya, paipa agobima mirite, ibageba pabiyama taeba nanintagabe wanikabe tagaꞌena tabemintaga, aogi kai kampa amirinta kusi puma mintokana, kamaena puratagana, nama kumatepa kampa waiyegi aogimaba kampa miyune.
12 Piya, tayapisa araga ntuga taere pune. Pigoya, wasanamiba ata kamana urataga taeba akayona puwaitaune. Karana purataga uwa itaune.
13 Akayasurataga paru puwaitaune. Piya, wasanami nkariyena kanta purataga, taeba ibaba wasanami nkiyobi iꞌni kina kanta puma miyune. Poro Korinti kinaꞌmi nkibantana puntiye
14 Pigoya, ma nkisa kaeyopa, tinintanara aeritakenawanane. Esegi puritakenaga ma kamanapa kaema nabugai ntagaranempititi urimuwe.
15 We, Karaisitintanaga ukena kinapa uwaena mintapa, ibantana pe kinapa taranto mintawe. Eya, tigepa naeba mono kamana urimuwagiri, Karaisiti Isuti atokaeyugu, nae nabintone tibantana puntopa mintuwe.
16 Piya, monota nae posa puma miyiyoma, uritauwe.
17 Naeba pika uma Timotipa otaogana tigeti waye. Aeba Waꞌegawama nkawamu wasiyegina, nabugai ntagarane mintemi, aepa otaogana tigeti waye. Wamagina, kumaka kumaka ampima aꞌyaꞌma monota aiꞌaru pe kinaꞌmi nkaruyenabi uwaiminto kamanaꞌama nkagoba ampa urimikiye.
18 Pigoya, tigetisa kaꞌisamiba naeka: Kampa kanakiye, umagini igebigoꞌena puta nasewe.
19 We, Waꞌegawama abemika, naeba aro ntaganto tigeti wakuwe. Wamagi, igebigoꞌena pe kinaꞌmi kamanapa kampa abinta, esegiyenawaipa ayakipaya waintiyema agakuwe.
20 Piya, Koti kabiratakenaenama nkagoba, pipa uwa kamanapa kampaye. Pipa esegiyena maema aogima mikenaenawe.
21 Pigoya, tigeba naekaba nanaga tibiye: Arupu puratakena kasu maete kanao, yebera: Agoya puma agu kaoꞌena puratakena kanaoma, yewe.
1 Tige tikapi kumiyenaba tabera aborama waintiye, yega abuwe. Piya, kaꞌwaina abawampa nkwae maeye, yega abuwe. We, piyaenaba abeꞌisa kinaꞌmi nkikapipa kampa aboragina, to awametane.
2 Pigoya, tigeba nana pegiri tigebigoꞌena pewe, a. Ayamabaya tigeba kampa tintaraꞌena puntiri, pi pemi ntagarapa kampa agasawe.
3 Pigoya, naeba nauꞌnepa pagasara mintogana, naguꞌnempa tigege mintiye. Piya, tigege miyosinta, pi pemitaka kamana yosa puma, ibantoba Waꞌega Isu nkagegaꞌera otaosine.
4 Piya, tigeba aki pigina, naguꞌnempaba tigege ampintakana, Waꞌegare Isu ae esegiyena timekiri, maya uma otaiyo:
5 Kana yagaramaba auꞌwapa Satani nkamekana paisaenawapa ata potakana, ainti Waꞌega Isu kanabi aguꞌwapa Koti ababeno, uma otaiyo. Ataena pemiꞌnapa kasiyo, untiye
6 Pigoya, titipa uwa maete iyepa, pipa kamparagaena pewe. We, yisiti pisa puma asaena amanankantoba nakenabinti ataigina, aꞌyaꞌma asabawaewakiye. Pika kampa napiyewe, a.
7 Pigoya, tigeba Koti nkaobi aota kina mintiripa, tikapintisa asaenaba aisaꞌma maegasima, aota naninta kanta puma miyiyo. We, tauꞌikena sipisipi awaropa antotaꞌenaretapa aeguntane. Pi mputapa Karaisitiwe.
8 Pigoya, tauꞌikenaenagaba kaoꞌena puma aogima taꞌmu peno. Piya, nanintabisa asaenawapa kasisa puma, wasana ata puwaitakenaenabe aguntaenaripe kasimagiri, aogi Pasoba naninta nasa puma, parutuꞌenabe tagantanabe maema kaoꞌena puma nama tiꞌmu piyo.
9 Pigoya, kupiyona pe kinaꞌmigeba ka kina kanta pumaba a-mpiyiyoma, esaꞌnepa kaema timintone.
10 Piya, mamparasa kupiyona pe kinaꞌmikaba kampa untuwe. Igebe, mampabisaenaga ibugai kinape, ku kinape, ama koti nkaegara kinape, igekaba kampa untuwe. Kampaye. We, mamparasa kinapa igasasinta aempari wasine.
11 Piya: Mono yagaranawe, yemi ntagarama kupiyona pemipa, aegeba kapipa a-mpiyiyoma, kaerimintuwe. Eya, kupiyona pemi, mampabisaenaga abugami, ama koti nkaegarami, akaya kamana yemi, esegi wani ntama aiboꞌena pemi, kuntana pemi, pabiya pe mpono kinaꞌmigeba kapipa a-mpimagiri, igege kapipa nanintaba a-ntaiyoma, kaerimintuwe.
13
12 We, abeꞌisa kina kamana uwaitakenaenaba naeꞌenaba kampaye. Pipa Kotintanawe. Piya, monota aiꞌaru pe kinaꞌmitaba tikapintisa ata pe kinaꞌmipa kamana uwaitakenaenaba tigeꞌenawe. Eya, aguntaena pemi ntagaraba agarubakasigina tikapintiba a-mpiyeno.
1 Tigetisa kaꞌwaina aoꞌmika amo kamana otamipa, aeba Kotiti atokaeya kinapa iyemita puma, abeꞌisa kinaꞌmi nkiyobi kana kamana otaginaba, ayamabaya kampa anipa piye, a.
2 We, Kotiti atokaeyompe kina taeba aꞌyaꞌma mamparasa kinaꞌmi kamana aꞌyikikune. Pipa tigeba kampa abintawa, a. Piya, aꞌyaꞌma kinaꞌmi kamanapa aintiba aꞌyikikibeka, tikapinti anagi kamanaꞌanto aboraipa, tigeba kampa abae pewa, a.
3 Piya, aintiba taeba enisore kinaꞌmi kamanapa aꞌyikikune. Kampa abewa, a. We, tae mikenaenarepa arupu pukenaga abae pune.
4 Pigoya, tigeti kamana aboragiripa, nana pegiri monota ige kampa wainta kinaꞌmiti wagana, uma aꞌya tigasawe.
5 We, tigeba kamanaꞌnepa abigina tini penoma, urimuwe. Piya, monotasa tara yagararamisi kamanapa aborakanaba, tige tikapipa aꞌyikikena napiyena wantaga yagara kapa kampa mintiye, a.
6 We, tigetisa kaꞌwainabe aoꞌmibe isimo kamana aborakinisiba, Isu kampa aegaranta kinaꞌmiti waisigina uma aꞌya isitakibepa, pipa kamparagaenawe.
7 Tigetikapipa kamana aboraipa, piꞌna monotipa aeguyegina tumiwaye. Piya, ataena puritagiripa, ayama tigeba kampa uwa itawe, a. Tigeꞌenaba aꞌyugu uwa maeyagiripa, nanaga tigeba kamana uwaitawe, a.
8 We, tigegeba antageꞌena pumagiri, tiyotimpipa ataena puwaitama, igeꞌenaba aꞌyugu uwa maeyawe. Pipa kamparagaenawe.
9 Pigoya, aruꞌena pe kinaꞌmiba Koti kabiratakenaenabipa kampa ubasikibewe. Pipa kampa abintawa, a. Pika tigeba tara tara tigiba a-ntapiyiyo. Piya, kumiyena pe kinaꞌmibe, ama koti nkaegara kinaꞌmibe, kupiyona pe kinaꞌmibe, wami waya kanta puma kupiyona pe kinaꞌmibe,
10 kuntana pe kinaꞌmibe, mampabisaenaga ibugai kinaꞌmibe, esegi wani ntama aiboꞌena pe kinaꞌmibe, akayasuwaita kinaꞌmibe, iyeguma kuntana pe kinaꞌmibe, piya kinaꞌmiba Koti kabiratakenaenabipa kampa ubasikibewe.
11 Pigoya, paipa kaꞌisamitaba pabiya puma mintantapa, ibaba kampaye. Piya, monotaka paititama, aota puritama, arupu puritantine. Eya, Waꞌega Isu Karaisiti ntugaraka Kotirempa Nkawamusatasa piyama aogi puritantine. Tauteka Koti nkagegaꞌe asagayukune
12 Pigoya: Aꞌyaꞌma tae pukenaenaba kanara pukune, yepa, pipa kanarane. We, piꞌnaba kaꞌisaenaba kampa tiyoꞌmaekiye. Eya, aꞌyaꞌma nae pukenaenaba kanara pukuwe, yopa, pipa kanarane. We, aꞌyugu kaꞌisaena pekana igaꞌna punatasanagawe.
13 Piya, nakenaba tantawama ntanawa, tantawamaba nakena maekenaenawe, yepa, pipa tagane. We, Kotiba tarayagapa kaga isigaikiye. Piya, taupa kumiyena mantanaba kampaye. Pipa Waꞌega mantana utatantine. Piya, Waꞌega aeba tauꞌamantanawe.
14 Pigoya, Kotiba Waꞌega asitantemisa puma, esegiyenawatasa taepa asiratakiye.
15 Pigoya, titipa amato amato puma Karaisiti nkaukanta puma, pipa kampa abewa, a. Piya, Karaisiti nkautasa kaꞌisa kasamagipa, kumiyena pemisa puma tona aegaraiyoma, otasuwa, a. Pipa kampaye.
16 Piya, wasana kaꞌwaina kumi waeꞌmage atokaeyamipa, isigeba ka aukanta puma miyese. Pikaba tigeba kampa napiyewa, a. Pigoya, pikaba Kotiba maya untiye: Isigeba ka isiꞌena puma mikibese, piya untiye.
17 Piya, kaꞌwainaba Waꞌegamati ato kaeyamipa, aege ka isimara miyese.
18 Tigeba kumiyenaba kasigina aegaka wano. Piya, kaꞌwaina kaꞌisaena aguntaena pemiꞌnaba ka awameta piye. Piya, kumiyena pemiꞌnaba aeba to awameta puma, aeꞌwa nkagupa ata potaye.
19 Pigoya, titipa Aota Awamusaꞌama mpono namane. Pipa kampa abintawa, a. Eya, pi Aota Awamusapa tigupinti miyenema, Kotiba timigaintemine. Piya, tigeba tigeꞌenaripa kampaye.
20 Tigepa tabe ikatasa Kotiba ika puritantemi, tigeba aeꞌenawane. Piya puntika, tigeba tititasa Koti nkagegaꞌeba asagayuyiyo.
1 Tigeba esa namintiri, kamana nabigataga, pika mayama aborakiri abiyo: Ka yagarama waya kampa maenta uwa mikena puntanaba, kanara pikiye.
2 Pigoya, kumiyena pusanaga, wamiba ka ka wayati maema miyigina, wayaꞌmiba pabiyama wa ka ka maema airokaema miyiyo.
3 Piya, wama nkaupa anarantawe. Aeba a-nkaꞌa-o otano. Pabiyamagina, anarimpa nkaupa awaentawe. Aeba a-nkaꞌa-o otano.
4 Eya, wayaꞌmaba aeꞌwa nkaupa kampa kabiye. Pipa awaentawe. Pabiyamagina, wama aeꞌwa nkaupa kampa kabiye. Pipa anarantawe.
5 Piya, wayaꞌwarara tisitisipa uwa akunikenaba aꞌyuguba a-piso. Pigoya, ka napiyena pumagirisi, arontaganto tisipa akumpa nunamu ukena yuga pisigina, kanara peno. Piya, aꞌyugu tisita kampa kabiyisigina Sataniba tisimiyo pusanaga, aꞌwae pumagirisi tisipa kata airokaeyiso, naeba piya yuwe.
6 Pi kamana nabigaka, uma esegi puritamaba kampaye. Uwa urimuwe.
7 We, aꞌyaꞌma nae miyosampa age kina misanagaba nabiye. Pipa aerawane. Koti aewa uma, ka ka kinaꞌmiteti awagaena tamima tonarona yugara urataye.
8 Pigoya, age kinape kiya waepe, tigeka maya yuwe: Tigeba nae miyosa puma age kina mikibepa kanarasakiyema, yuwe.
9 We, pi kinaꞌmiba i akunikena esegiyena kampa waintakiniba, wayaꞌwaena piyo. Eya, intabaipinti kumiyenaga yaku irasanaga, wayaꞌwaena puma miyiyo.
10 Pigoya, wayaꞌwa, tige kamana ukuwa, abiyo. Piya, pipa nae kamanaꞌnane. Waꞌegawama nkawamutasa kamanane: Piya, waya kaꞌwainaba awaewampapa a-nkagasano.
11 Pigoya, awaewampapa ago againtakanaba, age wae uwa miyeno. Kampa akanaba, ampaꞌmaete awaeti wano. Pabiyamagina, wamageba wayaꞌwapa a-nkagasano.
12 Pigoya, to kaꞌisa kinaꞌmiba kamanaꞌne yekiri abigina, Waꞌegamanta kampaye. Naeꞌnentana peno: Piya, mono yagara ae wae kampa Isu nkaegaranta miyemipa, kana waeꞌma aege misanaga abekanaba, a-nkagasano.
13 Piya, mono wae ae awae kampa Isu nkaegaranta miyemipa, kana awaewampa aege misanaga abekanaba, a-nkagasano.
14 Pipa mayamawe: Mono abinta waeꞌma aeꞌwa nkawaewampa aotaꞌenama uwaesagina, mono abinta yagarama aeꞌwa nkanara aotaꞌenama uwaesa piye. Piya, pika yagararimpiba aota miyewe. Piyama kampa waintisinta, igeba abeꞌisa kina kanta puma miyesine.
15 Pigoya, kampa aegaranta wamabe, wayaꞌmabe, atate wagaikibipa, uwa atate wagaikiye. Aeꞌenawane. Pika mono abinta kinaꞌmitiba kamanapa kampa waikiye. Eya, Kotiba: Paru puma miyiyoma, tagegaꞌe uma taba puntine.
16 We, waya, kaeba kawaegampa mono kiꞌi abaibegana kanakibe, kampabayawe. Pikaba napiyena, a. We, kaeba wayakapa mono kiꞌi abaibegana kanakibe, kampabayawe. Pikaba napiyena, a. Pigoya, Koti: Paru puma miyiyoma, taba puntine. Tigegaꞌe a-mpaete ima Koti utaritantaꞌenara miyiyo
17 Pigoya, aꞌyaꞌma ka kaꞌmitaba Waꞌegawamaba utaritantintanaba aegaꞌma miyiyo. Piya, Koti tiba punti ntagaba maruti mpiyentanaba a-nkuwa kasiyo, yuwe. Pi kamanaꞌnepa aꞌyaꞌma monota aiꞌaru pe kinaꞌmipa uwaimiwaeyuwe.
18 Piya, kaꞌwaina aeba aupa kasama araꞌena puma mintanaba, aba puntemika araꞌenaba a-kasano. To kaꞌwainaba araꞌena kampa puma mintanaba, aba puntemika araꞌenagaba a-seno.
19 Eya, araꞌena puma mikenaenabera, araꞌena kampa puma mikenaenabe, auꞌwantagaꞌenaba kampaye. Koti nkunti kamana wasikenaenaba, piꞌna taga auꞌwantagaꞌenawe.
20 Pigoya, kaꞌwainaba ka yugara mintakana Koti kegaꞌe uma aba pekanaba, pabita uwa miyeno.
21 Piya, kaeba kayokaya puma mintukuna kaba puntemika, abima kuntaba a-puma miyo. We, akariyobakatakanapa: Aꞌa-oba, a-suma uwa wao.
22 Piya, kaꞌwaina aeba kayokaya puma mintegina Waꞌegawamaba aba pegina, aeba Waꞌegawama nkaobi uwa kina kanta puma miye. Piya, to kaꞌwaina aeba uwa kina mintegina Waꞌegawamaba aba pegina, aeba Karaisiti kayokaya kina kanta puma miye.
23 Pigoya, tigepa tabe ikatasa Kotiba ika puritantika, wasanami ntapiyenama kayokayaꞌenaba a-piyo.
24 Piya, naoꞌmitaba, tigeba ka ka pai mintuguna tiba puntemipa, pabi ntuga uwa mima kanara Kotiti atokaema miyiyo. Age kinaꞌmi kamanane
25 Aragawae igeka Waꞌegama nkawamutasa kamana kampa maema mintokana, Waꞌegawama antaraꞌena punatama taga ntagara aboranatanti, naeꞌne kamana urimekiri abiyo:
26 Ma kanabipa kuntaena uwaena aboraika, kaꞌwaina waya kampa maenta uwa mikibipa, aogi pikiye.
27 Pigoya, wayake ago atokaentampepa, pipa a-kaso. Kaeba age mintanaba, pipa wayakaba a-so.
28 Pigoya, kaeba waya maeyampepa, aguntaenaba kampa pene. Piya, aragawaeꞌma wa maeyamipa, aegeba aguntaenaba kampa piye. We, wayaꞌwaena pe kinaꞌmiba mamparasa kuntuyena aborarimisanaga piya, yuwe.
29 We, naoꞌmitaba, kamanaꞌnepa mayamawe: Kanapa ago agarosawaye. Piya, kana aronkanto waintika, waya maeyaꞌnagitaba waya kampa maenta miyesa puma, Waꞌegawamantanaga napima miyiyo.
30 Piya, kubeꞌena peꞌnagiba, kubeꞌena kampa punta kina kanta puma miyiyo. Tiꞌmuntana peꞌnagiba, iꞌmuntana kampa punta kina kanta puma miyiyo. Ika peꞌnagiba, tigeba kota kampa wainta kina kanta puma miyiyo.
31 Mamparasaenara yoga peꞌnagiba, mampabisa esegiyena kampa pe kina kanta puma miyiyo. Eya, mampabisaenaba aꞌya wakena piye. Pika Waꞌegawamantanaga napima miyiyo.
32 Piya, mampabisa uwaenaenama napiyenari paibusanaga kampa nabiye. Pigoya, waya kampa maenta mono yagaramaba Waꞌegawamati uwaena agi napima, Waꞌegawama nkabemintana pukena piye.
33 Piya, mono yagarama waya maentanaba, mampabisaenaga napima wayaꞌwampa nkabemintana piye.
34 Piya puntana, tara agi napegina napiyenawampaba pako piye. Piya, age waeꞌmiwo, age aragawaeꞌmiwo, igeba monoka napima Waꞌegawama nkabemintana puma igewai nkigupe ipe aota mikenaga kabiyewe. Piya, mono waeꞌma wa maentanaba, mampabisaenaga napima awaewampa nkabemintanaba piye.
35 Pigoya, kampa igaꞌnaba kiritakena puma, naeba pi kamanapa tiyoꞌmaekenaga yuwe. Piya, tigu napiyenaripa arupu puritama, tonagaba kampa napima Waꞌegawamati atokaeyiyoma, yuwe.
36 Pigoya, ka yagarama aeba aragawaeꞌwapa ata potama kampa wara atantakanaba, aeba anosakana awaeba karuꞌena maekena pekanaba, ae abintana aegaꞌma karuꞌena aeta atano. Pikaba aguntaenaba kampaye.
37 Pigoya, to kaꞌwaina aeba napiyenawapa aogima kabima mima agutasa esegi pumagina, aragawaeꞌwampa kamana abima ata potakenaena kampa waintakanaba: Uwa mikiye, untanaba, kanara pukiye.
38 Piya, pika ka yagaramaba aeba aragawapa wara atakibipa, aogiyena pukiye. Piya, to kaꞌwaina aeba aragawapa kampa wara atakibipa, aogiyenaba asugaikiye.
39 Pigoya, wayaꞌma nkawaewampa uwa mintakanaba, awaege atokaema miyeno. Awae purekanaba, to ka waba maekena puntanaba kanara maeyano. Maekena puntanaba, Waꞌega aegaranta yagara maeyano.
40 Pigoya, nae napiyopa aeba age wae uwa mikibipa, aꞌmuntanawapa asugaikiye. Pabi kamana yopa, Koti Nkawamusa naeti waintika yuwe.
1 Pigoya, ama kotiti kaema agunta pasaꞌataka naeba kamana ukena puwe. Piya, taeba tonarona napiyenaba abiwaentune, yewe. Piya: Aogi napiyena pune, yompepa, wasanami nkiyobi tauꞌmaete iyune. Taeba agu kaoꞌena pukubompepa, Koti esegi purataka aogima mikune.
2 Eya, kaꞌwaina aeba: Abiwaentuwe, yipa, abikenaenawampa nkauꞌwapa kampa aborama esegi piye.
3 Pigoya, to kaꞌwaina aeba Kotiti agu kaoꞌena potaipa, Koti aepa agama aba piye.
4 Pigoya, ama kotiti kaema agunta pasaꞌatama nakena maema na kamana yuwe: Piya, taeba ago abune. Ama kotiba auꞌwantagapa kampaye. Koti ae ka auꞌwantagane.
5 Piya, mantabintibe mabintibe uwaenaenaraka kotiwe, yewe. Eya, igetiba amanipe waꞌegawaipe uwaena waiyegina,
6 taetiba Koti tabarempa kaꞌanto miratagina, Waꞌega, Isu Karaisiti, kaꞌanto mirataye. Piya, Koti aeba aꞌyaꞌmaenaba aborawaentegi, taeba aeti miwaeyune. Piya, aeba Waꞌegare nkayatasa aꞌyaꞌmaena aborawaentegi, taeba ae yugarasa eꞌwasaba maema miyune.
7 Pigoya, kaꞌisa kinaꞌmiba igeba pi nkagowapa kampa kanara abibebe pewe. Pi kinaꞌmiba igeba paipa ama kotiti kaema agunta pasaꞌatamagini tagantana pune, uma nantawe. Igeba nantasa pumagini iba nantiniba, igeba paisaenaga napiyegana magimagi napiyenawaipa ata puwaitaye.
8 Tagane. Nanintawamaba Koti nkaobipa kampa asiratakana aogiba pukiye. Piya, nakanaba tagegaꞌewamaba kampa asugaikiye. Kampa nakanaba kampa tumiwakiye. Kampaye.
9 We, tigeba aogima kabiyiyo. Aꞌyugu abikenaenaripa magimagi kinaꞌmi nkigisa aimisa kaisa pekiri monoka wareꞌnakibewe.
10 Piya, monoka esegima ntapiye kinaꞌmitaba, tigeba ama koti mpono namapinti wama maraꞌmima naninta nagana, kampa esegi puma napiyenawantaga yagarama tigama kampa pami punta, aeba ama kotiti agunta pasaꞌata ntakenaba naya, a.
11 Piya, aꞌyugu tige napiyenaritasa pi magimagi mono yagarama ntapiyenawapa ata potawe. We, pi tiyoꞌyagarama auꞌikenaga Karaisiti puꞌmagina aba potagiri, tigeba ata potawa, a.
12 Eya, tigeba piyama tiyoꞌmi magimagi napiyenawaipa ata puwaitapa, aguntaena puwaitamagiri, Karaisitikeba aguntaena potawe.
13 Piya, naeba piyama nakena nakanaba naoꞌyagaraba aguntaenabi wareꞌnasanaga, naeba to kakema pi nkawaseba kampa nanta aꞌyaꞌma yaga uwa mima nagarikuwe. Eya, aꞌyugu naeba piya pekana naoꞌyagara aguntaenabi wareꞌnasanagawe.
1 Pigoya, kaꞌenama narakuꞌma keꞌnepa akuniya, a. Naeba aposoroba kampa mintuwa, a. Naeba Waꞌegare Isupa kampa agantuwa, a. Waꞌegama ntuganempa nkauꞌwapa tigeba kampaya, a.
2 We, Waꞌegama nkaposoro mintogiri, tigeba aꞌne mpintawe. Piya, naeka: Aposoro kampa mintiyema, kaꞌisa kinaꞌmi yepa, pipa aerawane. Tigeba ago abintawe. Naeba tige aposoronawe.
3 Pigoya, kamana unata kinaꞌmika mayama antota uwaimuwe:
4 Piya, taeba tigetisa: Naninta wani a-mpaeyiyoma, uratantiye, a.
5 Piya, to kaꞌisa aposorobe, Waꞌegawama nkaꞌnatabarabe, Pitabe, igeba wayaꞌwaipa mono yugara iba purite wantasa puma: A-piyoma, uratantiya, a.
6 Piya, naebe Panabasibe tasibintoga: Tisiyatasa yuga a-kasima, mono yugabisa naninta a-mpaeyisoma, urasitantiya, a.
7 Pigoya, ae nkirebu yagaramabaya aeꞌwa mponerasaba ikantana pukiye, a. Kebaya aintana pegina auꞌwapa aboraginaba, kampa maema naye, a. Kebaya purumaka kabintana, kampa nonoꞌwa maema naye, a.
8 Pi yo kamanapa wasanami kamanataka yubera, Koti nkago kamanaꞌamaba pika kaga iye.
9 Eya, Mosese ago kamana kapa mayama kaemarantipa waintiye: Purumakankama witi nakena aerapaꞌma nakiriba, a-nkakunkagasiyo, Koti iyema, kaemarantiye. We, Koti aeba purumakankama ibiga napima untipera, wasana taeka untiye.
10 Pipa taeka untine. Piya, oꞌena pe kinaꞌmibe, naninta nagaregini maeya kinaꞌmibe, igeba kaga yugawaitasa maekenaga agawa pukenaba kanarane.
11 Piya, taeba tigeti ampa inatisaenaba tigupinti aintana puntompeka, antota tigetisa arirasaena maeyanema napiyegana, kunta piya, a.
12 Eya, to kaꞌisa kinaꞌmiba tigetisa naninta kota maeyaga, tae pi ntuga agobintompeꞌnagitaba maeyompesinta, kanara posine. Pigoya, taeba kampa piyaba pune. Piya, Karaisiti mpono yugawa akunkatasanaga tigetisa naninta kota maekenaenaba kasimagi, uwa tumima pugara miyune.
13 Pigoya, tabe mono namapi yoga peꞌnagiba igeba mono namapisa nanintaba nawe. Piya, aratara kaema agunta pasakena yuga peꞌnagiba igeba aratarasaena maema nawe. Pipa tigeba kampa abintawa, a.
14 Pabiyamaba, aogi mono kamana yompe kina taeba pi mpono yugarasa mikena arirasaena maeyiyoma, Waꞌegawama uratantine.
15 Piya, pi uratantintanaba naeba kampa maeyuwe. Kampaye. Tigeba ibaba kabirataiyoma, kampa napinta kaeyuwe. Kampaye. We, aꞌyugu tigeꞌena maeyakana, naꞌmuntananepa maete tumisanaga kampa nabiye. Iꞌmima purukubopa kanarane.
16 Piya, mono kamana uwaimokaba, nae nageba kampa maete ikiye. Kampaye. Naeba pi mpono yugaba kampa posinta, ata maru mpiyosine. Naetiba to kipa kampa waintiye.
17 Eya, naeꞌne ntapiyenarasa pi ntugaba posinta, ikapa maeyosine. Piya, naeꞌne ntapiyenarasa kampa maentoka, kiyaenara punatantegi,
18 nana ika mpaeyuwe, a. Ikantepa mayamawe: Naeba mono yuga puma antota arirasaena kampa maenta, naꞌmuntanabisa pi kamana wasana uwa uwaimopa, pi ntaꞌmuntananepa nae ikantene. Poro aeba wasanami kayokaya puwaitantiye
19 Pigoya, aꞌyaꞌma kinaꞌmiti iretanepa kampa waintipa, aꞌyaꞌma kinaꞌmita kayokayaꞌenaba uwa pumagi, mono uwaimima uwaena kina iba pusanaga nabiye.
20 Piya, Yuta kina iba pukenaga, ige iyobi Yuta kina kanta puntone. Piya, naeba paisa mono kamanaꞌama nkigaꞌna yagara kampa minta, pi paisa ago kamana wasiye kina iba pukenaga, ige iyobi wasiye kina kanta puntone.
21 Piya, ago kamana kampa abinta abeꞌisa kina iba pukenaga, ige iyobi abeꞌisa kina kanta puntone. Naeba Koti nkago kamana kampa ataopa, Karaisiti nkago kamanapa aegaꞌma piya puntone.
22 Piya, magimagi napiyena pe kina iba pukenaga, ige iyobi magimagi kina kanta puntone. Eya, kaꞌisamipa toma toma kiꞌisa iꞌikenaga, naeba toma toma kina miyesa puma ige iyobi toma toma puntone.
23 Piya, mono kamana maema aborakenaga pabiya pumagi, mono aꞌmuntanabi kaga mikenaga puwe. Esegima a imarantata uma irosao
24 Tigeba ankagasi agasi pukenaba agawa, a. Piya, aꞌyaꞌma yagaramiba karuꞌena wama ankagasi agasi puma, kaꞌwaina igasima aꞌmuntana maeyamipa, kampa agawa, a. We, tigegeba pabiyama mara esegima wama aꞌmuntanaba maeyiyo.
25 Pigoya, piya yagarami igaikena aꞌmuntana maekenaga, ibemintanaba maete tumima ipa kabiwaitawe. Piya pepa, awasawakenaena maeyawe. We, taeba mantarisa agora waiyaba taꞌmuntanaba maekune.
26 Pigoya, naeba keꞌi karuꞌena waopa, kampa uwa mari aganta arupu puma agaurite wauwe. Piya, maꞌena puma asugaikena puntapa, uwa mariba kampa nayapa maebuwe.
27 Piya, naeba wasana mono uwaimigaitegi, togana wareꞌnasanagaba maꞌena kinaꞌmi pesa puma naeꞌne ntaupa esegi potamagi kabiyuwe.
1 Naoꞌmitaba, aꞌyugu pintanamaka kampa napisanaga ma kamanapa urimukuwa, abiyo: Pai Koti nkibinankama tayabamagipa aꞌyaꞌma airarikaewaitaogini wama tabe wani taꞌentawe.
2 Piya puguna, Moseseti atokaekenaga ibinatasabe wani taꞌentantanarasabe Koti aꞌyaꞌma paitawaitantiye.
3 Piya, Awamusaꞌamaba naninta aborawaimogini, igeba kaga aꞌyaꞌma nata wantawe.
4 Piya, Awamusaꞌama wani aborawaimoginiba, pike kaga nata wantawe. Eya, Awamusaꞌama imintemi ntabapisa wanipa maema nantawe. We, pi ntabapa Karaisitiwe.
5 Pigoya, pi kinaꞌmiba kamparaga puguna, Kotiba uwoma pi kinaꞌmikaba kampa aꞌmu puwaitama, kaꞌme mpari iyeguyogini puꞌwantawe.
6 Pigoya, ataena ige puntasa tae pusanaga, Koti ige puwaitantintanaba purayakintiye.
7 Piya, igetisa kaꞌisamiba ama koti kayokaya puntasa puma, tigeba a-piyo. Pika mono isapipa mayama kaentine: Wasana igeba maraꞌmima kaoꞌena puma nantini, asima yagawamata waꞌena puntawema, kaentiye.
8 Piya, igetisa kaꞌisamiba kumiyena puntasa puma, a-piyo. Igeba piya puntini, ka yaga wasana 23,000 pikaba purintawe.
9 Piya, igetisa kaꞌisamiba Waꞌegawama nkamiyo puntasa puma, a-piyo. Igeba piya puguna, maꞌama ibanaogini puꞌwaewantawe.
10 Piya, igetisa kaꞌisamiba Kotika imoꞌena puntasa puma, a-piyo. Igeba piya puguna, wasana iyegukena enisore otaogana iyeguyogini puꞌwaewantawe.
11 Pigoya, pintana igeti aborantemintanaba wasanamite aꞌyugu ige puntasa pusanaga, Koti purayakintiye. Piya, ibasa yaga aꞌya wakenabipa, tae miyompeꞌnagiteka otaogini pi kamanapa mono isapi kaemarantane.
12 Pintanaraka: Naene esegima asima miyuwema napiyemiꞌnaba, wareꞌnasanaga kabima miyeno.
13 Tigeti timiyoꞌena aborata kanantemipa, pipa wasanami nkesegiyenawaitaka kaꞌmasa puma aboraye. Pigoya, Koti aeba tagantana puma, kabiyekana timiyoꞌenamaba esegiyenaripa kampa aparikiye. Eya, Koti aeba tiyoꞌmaema aguntaenamaba kampa maema tipasikena kiꞌi kaga aborarimekiri, pi kiꞌi aegaꞌma asima esegima miyiyo. Waꞌegawamape kewamape kaga isiyegarakenaenaba kampa waintiye
14 Nabugai kinaꞌnempitaba, nae yo kamana abima, ama koti tikabitama wagasiyo.
15 Piya, tigeba aogi napiyenayaga kina mintawe. Piya pegi, ma kamana yopa, aogima pako puma abiyo:
16 Piya, waini kankabebisa wanika Kotiti taꞌmu potama naompepa, Karaisiti kora paitaratakenagaba kampa napiyewa, a. Pareti apako puma naompepa, Karaisiti nkaukeba kabo puratakenagaba kampa napiyewa, a.
17 We, paretiba kaꞌantowe. Piya, uwaena kinaꞌmitaba taeba ka pareti namagi, ka auꞌena puma miyune.
18 Pigoya, Isureyo kinaꞌmi pentanaga napiyiyo: Yaga kaema Kotiti agunta pasaꞌatapa, pi ntagawama nkau na kinaꞌmiba aratara kaeya kinaꞌmiti airokaema kaga Kotiti iꞌmu pewe. Pipa kampa napiyewa, a.
19 Piya yo kamanakaba ayama napiyewe: Ama koti aeba auꞌwantagana, a. Ama kotiti kaema agunta pasaꞌatapa tiyoꞌmaekiya, a. Pipa kampaye.
20 Piya, abeꞌisa kinaꞌmiba kaema agunta pasaꞌatapa, Kotitiba kampaye. Ke kinaꞌmiti agunta pasaꞌatawe. We, tige ke kinaꞌmiti uma atokaesanaga kampa nabegi, yuwe.
21 Piya, Waꞌegawama kankabebisa nate, ke kinaꞌmi kankabebisa nate pukenaenaba, pipa kanarapa kampa pukiye. Piya, Waꞌegawamati atokaema ara nanintaba nate, ke kinaꞌmiti atokaema nate pukenaenaba, pipa kampa kanara pukiye. Pipa kampaye.
22 We, taeba ataena pekanaba Waꞌegawama nkantawamaba agobi puratakiya, a. Tae esegiyenamaba ae esegiyenaba asugaikiya, a. Tigetintanaba a-ntapima Waꞌegawamati napiyiyo
23 Pigoya, aꞌyaꞌmaena pukenaenagaba kanarane, yewe. We, kaꞌisaena pukubompentanamaba kampa taoꞌmaekiye. Eya, aꞌyaꞌmaena pukenaenagaba kanarane, yewe. We, kaꞌisaena pukubompentanamaba kampa esegi puratakiye.
24 Tigeba tigetikaba a-ntapima, tigege miye kinaꞌmikaba aogima kabiwaitama iyoꞌmaeyiyo.
25 Pigoya, tigeba ika kumatasa awase ika puntiripa: Aetasawemaba, a-nkibigama, uwa maema naiyo. Aꞌyugu ibigaigina napiyenarimpa ata pusanaga, uwa maema naiyo.
26 Pika mono isaꞌamaba maya iye: Mampabe aꞌyaꞌmaena waintintanabe, pipa Waꞌegawamantanawe, iye.
27 Piya, kaꞌwaina kampa amatiti punta yagarama kaoꞌena puritantana kegaꞌe yekiri wakena puntiripa, kanara wama naninta timikibintanaba uwa maema naiyo. Aetasawema ibigaigina napiyenarimpa ata pusanaga, uwa maema naiyo.
28 Piyama nama miyiginaba, kaꞌwaina aeba: Ma ntanintaba ama kotiti kaema agunta pasaꞌatantintanawe, yekiripa, urimikibi ntagaragaba napima pipa a-ntaiyo.
29 Piya, tigeti ntapiyena ata pusanagaba kampaye. Urimikibi ntagarama ntapiyena ata pusanaga yuwe. Piya, taeba Koti nkaobi aꞌyaꞌmaenaba pune. We, nae pukubontanaba ayamabaya to yagarama napiyenawapipa aꞌyigimpa nagakiye.
30 Piya, naeba Kotiti naninta nama naꞌmu potakubokaba, nana piyema kaꞌwainaba abima ata punatakiye, a.
31 Pigoya, tigeba naninta nantiripe, wani ntantiripe, to kaꞌisaena puntiripe, aꞌyaꞌwaemaena pukibentanagaba Koti nkagegaꞌe uma asagayuma piyo.
32 Piya, Yuta kinaꞌmi nkiyobipe, Kariki kinaꞌmi nkiyobipe, Koti mpono aiꞌaru pe kinaꞌmi nkiyobipe, paebuma miyiyo. Aꞌyugu pami puma wareꞌnasanaga iyobi paebuma miyiyo.
33 Piya, aꞌyaꞌma kinaꞌmi nkiyobi nae pukubontana agaigina kanara penemawe. Naeꞌnentanaba kampa aogima puwe. Kampaye. Naeba uwaena kina iꞌiyekana Kotiba iba penemawe. Piya, nae posa puma, paebuma miyiyo.
1 Eya, naeba Karaisiti ki aegaraosa puma, tigeba pabiyama nae ki naegaraiyo.
2 Pigoya, tigeba aꞌyaꞌma yagaba nae unto kamana napimagiri, mono urimintoka aogima wasiyewe. Pika abogana kanarasaye.
3 Pigoya, nae nabemika ma kamanapa aogima abiyo: Aꞌyaꞌma wami nkaiꞌneba Karaisitiwe. Wayaꞌmi nkaiꞌneba iwaegiwe. Karaisiti nkaiꞌneba Kotiwe.
4 Piya, kaꞌwaina aeba kai maema aꞌnontaga atikaetanta mima nunamu ukibino, Koti nkawamutasa kamana uma aborakibino, aeba aiꞌnewapa nkageba ata potakiye.
5 Piya, ka waeꞌmaba kampa kai maema aꞌnontaga atikaetama mima nunamu ukibino, Koti nkawamutasa kamana uma aborakibino, aegeba kaꞌmasa puma aiꞌnewapa ata potakiye. Eya, wayaꞌma aꞌno nkabiya aiyagaiba kasisa puma kasaisinta, kaꞌmasa puma aiꞌnewapa ata potasine.
6 Piya, ka waeꞌmaba kampa kai atikaetama mintanaba, abiyapa kasagasano. Piya, aeba kasama aiyagaiba kaekibika ani puntanaba, kai maema aꞌnoti atokaetama miyeno.
7 Pigoya, wamaba Koti nkauga puma mima, ae age asagayukenawe. Pika wamaba aꞌnopa a-nkatikaeyano. Pigoya, wayaꞌmaba aeba wama nkage asagayukenawe.
8 Piya, marupa Kotiba wayaꞌma nkautasaba waba kampa aborantine. Kampaye. Wayapa wama nkautasa aborantine.
9 Piya, wayaꞌma nkaoꞌmaeyanemaba, waba kampa aboratantine. Kampaye. Wayapa wama nkaoꞌmaeyanema aboratantine.
10 Piya, wama amentanti mintika wayaꞌmaba aꞌnota atikaema araꞌena potama mimagina, enisore kinakaba piyaba puma miyeno.
11 Piya, Waꞌegawama nkaobipa wayaꞌamanapa kampaye. Wamanapa kampaye.
12 Piya, maru wayapa wama nkautasa aboratantegina, ibaba wayaꞌmi nkitasa waba aborawe. Piya, aꞌyaꞌmaena Kotipisawe.
13 Pigoya, tigeripa napima aꞌyigimpa agaiyo: Waya kaꞌwainaba kampa kai maema aꞌnontaga atikaenta mima Kotiti nunamu ukibipa, kanarasakiya, a.
14 Piya, wa kaꞌwainaba wayaꞌma pisa puma aꞌno nkabiya eꞌero atama miyekanaba, pabiyama agaiginaba kampa aogi puma auꞌama mpaema ata potaye.
15 Piya, ka waeꞌmaba aꞌno nkabiyapa eꞌero atama mikibemipa, aogi awaꞌenawane. Eya, Koti eꞌero nkabiyatasa atikaetanema atantine.
16 Pigoya, kaꞌwaina aeba ma kamana akayukena pekiripa, mayama napiyiyo: Pi yo kamanapa taebe aꞌyaꞌma Koti mponota aiꞌaru pe kinaꞌmibe aegaꞌma, to kakeba kampa punema, napiyiyo. Monoka aki puma mintini nanintaraka ata puntawe
17 Pigoya, to kaꞌisa kamana urimintapa tigegaꞌeba kampa asagayukuwe. Piya, tigeba aki puma aogiyena kantaba kampa punta ataena pewe.
18 Piya, monoka aki peganaba, tikapipa atataraena aboraye. Piyama unamega aboganaba, uwaenanto tagantana kanta piye.
19 Atataraenaba pipa uwaba kampaye. Piya, tikapi monoꞌama nkago tagantana maenta kinapa aboraigiri agakibeka atataraenaba aboraye.
20 We, tigeba Waꞌegawama nkara naninta nakenaga aki puma anagiꞌena pewe.
21 Piya, tigeti ntaninta maete ampa irosaꞌma kampa akiyena punta, uwa tige ka ka nawe. Eya, kaꞌwainaba aeba agaꞌena abegina, to kaꞌwainaba waini wani uwaena namagina agaꞌe pagina aiboꞌena piye.
22 We, tigeba naninta wani ntakena puntiripa, namatipintiba kampa nawa, a. Tigeba Koti mponota aiꞌaru pe kinaꞌmikaba anagiyena pewema, napima, kusi pe kinaꞌmi nkige maete tumewa, a. Pikaba nanawe urimukuwe. Tige tigeba maete isuwa, a. We, piyaenaba kampaye. Tigeba ata pewe. Ara nanintawama kamanane
23 Pigoya, pi kamana urimintopa Waꞌegawamatisa maentone. Pipa mayamawe: Waꞌega Isupa Yutasi aeba minagaꞌena potanti nkase marupa pareti maema,
24 Kotiti aꞌmu potama, apako puma maya untiye: Mapa nauꞌnepa tiyoꞌmaekenawa, naeka napima nama miyiyo, untiye.
25 Pigoya, igeba naninta nauguna, waini kankabe pabiyama maema maya untiye: Ma kankabebisa korantetasa kasa araꞌena aborama puritauwe. Pabiyama nantiripa, naeka napima nama miyiyo, untiye.
26 Piya, tigeba pi paretibe wainibe nantiripa, Waꞌega purinti kamanapa uma aborama mimagiri mirite wama, tumikibi ntaga uma nagarikiye.
27 Pigoya, pika kaꞌwaina aeba Waꞌegawama paretibe wainibe anagiꞌena potama namiꞌnaba, aeba Waꞌegawama nkaupe korankape iꞌnintana potama maete tumiye.
28 Piya, kaꞌwaina aeba paretibe wainibe nakena puntanaba, maruꞌenaba aeꞌwa nkagowapa aꞌyigimpa aogi pugaite napima nano.
29 Piya, kaꞌwaina aeba Waꞌegawama nkaukaba kampa aogima napima paretibe wainibe uwa namiꞌnaba, aeꞌwa nkaiboꞌenawampa aboramegina kamana aepi waiye.
30 Eya, pintanama nkagowama tigepisa kaꞌisamiba yonintana ibegini magimagi pegana, kaꞌisamiba puꞌwawe.
31 Piya, taere nkagorepa aꞌyigimpa agama aogima pompesinta, kampa kamanatepa waiyesine.
32 Eya, Waꞌegawamaba agorepa aborama aꞌyigitatamitasa arupu purataye. Piya pumagina, mampabisa kinaꞌmikeba kampa mintakana aꞌyigimpa tagarubakaisanaga, arupu purataye.
33 Piya naoꞌmitaba, tigeba naninta nakena aki puntiripa, kaꞌisamika iyobi puntigini kanaigirino.
34 Eya, kaꞌwaina aeba agaꞌena abekanaba aeꞌwa ntamapi nano. Aꞌyugu aki pukibepi kamana maerimisanagawe. Pigoya, toganaba tigeti naene wamagi, to kaꞌisa kamanapa arupu puma urimukuwe.
1 Naoꞌmitaba, Awamusaꞌama aboraramintintanaga aibosabo pusanaga urimukuwa, abiyo:
2 Tigeba ago abintawe. Paipa tigeba abeꞌisa kina mintiripa, kamana kampa unta ama kotiti tiba puritauguri aegaꞌma wagana kana puntawe.
3 Piya, nae nabemika aogima abiyo: Kaꞌwaina nkagupipa Koti Nkawamusaꞌama mintakanaba, pi ntagaramaba: Isupa pumireri potauwema, kampa ukiye. Piya, to kaꞌwaina nkagupipa Aota Awamusaꞌamaba kampa mintakanaba, pi ntagaramaba: Isu aeba Waꞌegawema, tagapa kampa ukiye.
4 Pigoya, Awamusaꞌama toma toma aboraramemipa, Awamusapa kaꞌantowe.
5 Waꞌegawama toma toma yogaba aboraramemipa, Waꞌegaba kaꞌantowe.
6 Kotiba esegiyenawapa toma toma aboraramemipa, Kotiba kaꞌanto mima, esegiyenawapa aꞌyaꞌma yugawa pukenaenaba aꞌyaꞌma kinaꞌmiteti aborama tamiwaeye.
7 Pigoya, Kotiba Awamusapa aborama ka ka puma aꞌyaꞌma kinaꞌmite taoꞌmaekenaga tamiwaeye.
8 Eya, Awamusaꞌama otagina kaꞌwainaba monoka aogima ntapima iye. Piya pegina, pabi Nkawamusaꞌama otagina to kaꞌwainaba monoꞌama nkagoba aogima abima iye.
9 Piya, pabi Nkawamusaꞌama otagina to kaꞌwainaba amatitiꞌenaba tabera puma miye. Pi ka Awamusaꞌama otagina to kaꞌwainaba yoni kina kaba itakena esegiyenaba maeye.
10 Piya, Awamusaꞌama otagina, kaꞌwainaba esegiyena aboragina, to kaꞌwainaba Koti nkawamutasa kamana aogima aboragina, to kaꞌwainaba toma toma awamusa aꞌyikikenaena maema aboragina, to kaꞌwainaba amiyo namiyo sukena kamana iyegina, to kaꞌwainaba pi kamana abima aꞌwae piye.
11 Piya, aꞌyaꞌma pi tamintintanaba pabi Aota Awamusaꞌama aewa aborama tamiye. Aewa nkabemika ka ka kinaꞌmiteti aborama tamiye. Ka auꞌama nkatunka uwainkai pune
12 Pigoya, wasanama nkaupa kaꞌanto waiyegina, agisa ayapa uwaenaenawe. Piya, uwaenaenawa waiyegina aupa kaꞌantowe. Piya pisa puma Karaisiti nkagisa aya mpintune.
13 Eya, ka Awamusatasa paitaratagi, ka au mintune. Piya, Yuta kinape Kariki kinape kayokaya kinape uwa kinape, aꞌyaꞌma aegaraompe kinaꞌmitaba ka Awamusapa maemagita, ka tuntana pune.
14 Piya, auꞌamaba kaꞌantoba kampaye. Uwaenaena wantagaꞌenawe.
15 Piya, agisamaba: Naeba aya kampa mima auꞌamantanaba kampaye, ukibipa, ayama aupa kaite abiwapa mikiye, a.
16 Piya, agemaba: Naeba aoba kampa mima auꞌamantanaba kampaye, ukibipa, ayama aupa kaite abiwapa mikiye, a.
17 We, aupa aomana waiyesinta, ayama abompesine. Aupa agemana waiyesinta, ayama agunta pigaompesine.
18 Pigoya, Koti aeba napimagina auꞌama nkagisa ayapa aborama aewa nkabomeka ka ka antantine.
19 We, aꞌyaꞌma auꞌamaba kaꞌanto waiyesinta, autakayapa ayama miyesine.
20 Pipa kampaye. Agisa ayapa uwaena waiyegina aupa kaꞌantowe.
21 Piya, nana piyema aowamaba ayankamapa: Kae kampa mintagapa kanara mikuwemaba, omikiye, a. Piya, nana piyema aꞌnonkamaba agisawamapa: Kampa mintisigipa kanara mikuwemaba, uwaisimikiye, a.
22 Kampaye. Tauꞌama nkatuka anuntanawema napiyompe, kampa waiyesinta, tauꞌamaba kampa aogima miyesine.
23 Piya, tauꞌama nkatunkamaka tumiyema napiyompe, pipa aogima kabiyune. Eya, tauꞌama nkatu kakantatapa aogi awaꞌenarasa airarikaeyune.
24 Piya, aogi tauꞌama nkatupa igeba kanarane. Pabiyamagina, Koti aeba aꞌyaꞌma tauꞌama nkatupa atokaetamagina, tuminti nkatunkama nkageba maete iye.
25 Piya, tauꞌama nkatunkamaba kampa atatara punta, kaꞌena puma ka ka iyoꞌmaeye.
26 Pabiyamagina, ka atunkamaba kuntaena abipa kaga kuntaenaba ibiye. Eya, to ka atunkama nkageba maete iyipa, aꞌyaꞌmaba kaga iꞌmu puwaekibewe.
27 Pigoya, tigepa kaga aki puritama Karaisiti nkauꞌena puritagiri atunkapa ka ka mintawe.
28 Pigoya, Koti aeba ae tuntana punta taetisa wasanaba mayama utawaitantine: Maruꞌenaba aposoro kinana, pikaꞌisa poropete kinana, pikaꞌisa tisa kinana, pikaꞌisa esegiyena aborakena kinape, yoni kaba itakena kinape, wasana iyoꞌmaekena kinape, yogara kabiratakena kinape, tonarona kamana amiyo sukena kinape, sumagina, taetisa utawaitantine.
29 Pigoya, aꞌyaꞌma taepa aposoro utaratantina, a. Poropete aꞌyaꞌma utaratantina, a. Tisa aꞌyaꞌma utaratantina, a. Esegiyena aborakena kina aꞌyaꞌma utaratantina, a.
30 Yoni kaba itakena kina aꞌyaꞌma utaratantina, a. Tonarona kamana amiyo sukena kina aꞌyaꞌma utaratatina, a. Pi kamana aꞌwae pukena kina aꞌyaꞌma utaratatina, a.
31 Pigoya, Awamusaꞌama asugasima yuga tamintika tigeba ebi ebi piyo. We, to ka aogi kipa tiyakikubopa, asu igaikiye.
1 Pi tiyakikubo kipa mayamawe: Piya, naeba agu kaoꞌena kampa punta, tonarona wasanami kamanapisabe enisore kinaꞌmi kamanapisabe mono yosinta, pero aga yabeꞌya aga yemisa puma naeba Koti nkaobi uwa kamana yosine.
2 Piya, naeba agu kaoꞌena kampa punta, Koti mpono kamana aborakenaenama nkesegiyena maema aꞌyaꞌma kakanti kamanape aꞌyaꞌma napiyenabe abosinta, naeba Koti nkaobi uwa yagara miyosine. Piya, naeba agu kaoꞌena kampa punta, amu pugabarakaikena namatitiꞌena wainatantemisinta, naeba Koti nkaobi uwa yagara miyosine.
3 Piya, naeba agu kaoꞌena kampa punta, aꞌyaꞌma kutantepa kusi kina menkimima iyoꞌmaeyosinta, Koti nkaobi aogi ikantana kampa maeyosine. Eya, agu kaoꞌena kampa punta, monotaka nauꞌnepa ataogana yaku tamisinta, Koti nkaobi aogi ikantana kampa maeyosine.
4 Piya, agu kaoꞌena pemi kinaꞌmaba amoꞌena kampa punta pasema mima, kayonena piye. Agu kaoꞌena pemi kinaꞌmaba kampa agobi pegina ankagasigasi puma, aeꞌwa nkaupa kampa maete iye.
5 Agu kaoꞌena pemi kinaꞌmaba wasanami kamanapa kampa akayunta, agebigoꞌena kampa punta, aeꞌwantanaga kampa napinta, amoꞌena kampa karuꞌena punta, ata antotaꞌena amikenagaba kampa napiye.
6 Ataena aboraginaba, agu kaoꞌena pemi kinaꞌmaba antara pumagina, tagantana aboraginaba, aꞌmu piye.
7 Piya, agu kaoꞌena pemi kinaꞌmaba aꞌyaꞌma kuntaenaba aesagaꞌma, aꞌyaꞌma yaga amatitiꞌena puma, aꞌyaꞌma yaga Kotiti atokaekenaga napima, aꞌyaꞌma kuntuyenabipa esegima asiye.
8 Pigoya, mono kamana uma aborakenaenaba aꞌya wakana, tonarona kamana ukenaenaba aꞌya wakana, napiyenarepa aꞌya wakanaba, agu kaoꞌenaba kampaye. Uwa waikiye.
9 Pipa mayamawe: Napiyenarepa pipa atunkane. Aboraompe mono kamanatepa pipa atunkane.
10 Piya, agowapa aborakanaba atunkapa aꞌya wakiye.
11 Piya, paipa inamu mintapa, inamu kamana uma, inamu ntantabarima, inamuntana puntone. Pi pumagi, naeba anosantapa inamuntanaba kaintone.
12 We, ibaba taowa agakena karasibisaba kampa aogima agaompeka, ainti pi ntagaba Koti nkaowaba agabebe puma agakune. Piya, ibaba atunkapa agaoka, aeba agone aogima agamisa puma aintiba naeba agowa aogima agakuwe.
13 Pigoya, tamatiti pukenaenabe, Kotiti atokaekena napiyenabe, agu kaoꞌena pukenaenaba, pi kakagaenama waiyaba miyegina, agu kaoꞌenamaba asugasaye.
1 Tigeba agu kaoꞌenayaga mikenaga ebi ebi pumagiri, Awamusaꞌama aboraramemi ntuga pukenaga napiyiyo. Eya, Koti nkawamutasa kamana uma aborakenaga abigina asugasimaena peno.
2 Piya, kaꞌwaina aeba tonarona amiyo sukena kamana yemipa, aeba wasanamipa kampa uwaiminta Koti omiye. Eya, wasanamiba pi nkagoba kampa abegana, aeba Awamusaꞌama kakanti kamana Koti nkaobi uwa iye.
3 Piya, to kaꞌwaina Koti nkawamutasa kamana uma aborawaeyamipa, aeba wasanami nkigupa esegi puwaitama asiwaitamagina, paruyena puwaitaye.
4 Pabiyamagina, amiyo kamanapisa yemiꞌnaba aeꞌwa nkagupa esegi potagina, to kaꞌwaina Koti nkawamutasa kamana uma aborawaeyamiꞌna aeba aꞌyaꞌma monota aiꞌaru pe kinaꞌmi nkigupa esegi puwaitaye.
5 Pigoya, tigeba amiyo sukena kamanapisa uwaeyigipa abekanaba aogi pikiye. We, Koti nkawamutasa kamana uma aboraigipa, pipa abekana aogiyenarakaꞌya pukiye. Piya, Koti nkawamutasa kamana uma aborawaeyami ntagaramaba amiyo sukena kamana ukena kinapa asu igaintiye. Pigoya, kaꞌwaina aeba amiyo sukena kamanapisa yekana, to kaꞌwaina aꞌwae puma yekanaba, pipa kanarane. Piya pemipa, aꞌyaꞌma monota aiꞌaru pe kinaꞌmi nkigupa esegi puwaitakiye.
6 We naoꞌmitaba, naeba tigeti wama amiyo sukena kamanaꞌamana yosinta, ayama tiyoꞌmaeyosine. Naeba tigeti wama kakanti kamanano, abikena kamanano, Koti nkawamutasa kamanano, tiyakikena kamanano, uma ararimikubopa kanara tiyoꞌmaekenaenawe. Mono kamanaꞌama nkagoba aogima aboraiyo
7 Pigoya, yabeꞌyawama nkagabe kabu waeꞌama nkagabe kampa aogima ukibipa, ayama wasanamiba aogima abikibewe, a.
8 Pikuriwama kampa aogima aga yekiniba, ayama irebu kinaꞌmiba abitegini wama maꞌenaba pukibewe, a.
9 Piya, tigeba pabiyama to kamanapisa kamana yiginaba, ayamabaya tiyoꞌmiba abikibewe, a. Pipa kampaye. Kamanatipa ugasigina uwa mari wagaikiye.
10 Pigoya, aꞌyaꞌma maga maga kamanapa toma toma waita wantipa, uwaba kampaye. Aꞌyaꞌma kamanapa agowantagane.
11 Piya, kaꞌwaina aeba kampa ago abukubo kamanapisa untanaba, naeka napima to marisa yagarawe yeka, aekaba pabiyama napima to marisawe ukuwe.
12 We, tigetiba agowapa pabiyama waintiye. Piya, Awamusaꞌama nkesegiyena tigeti aborakenaga yepa, pipa kanarane. Pigoya, to marisa kina kanta puma misanaga, tigeba monota aiꞌaru pe kina esegi puwaitakena esegiyena maekenaga ebi ebi piyo.
13 Pigoya, kaꞌwaina amiyo sukena kamanapisa ikibiꞌnaba, aeba agowapa abima aꞌwae pukena esegiyenaga nunamu otagana aborano.
14 Piya, naeba amiyo sukena kamanapisa nunamu yopa, pipa naumanempaba yegina, napiyenanempaba uwa aꞌyugu piye.
15 Pika ayama pukuwe. Piya, naeba naumanetasa nunamu umagi, napiyenanetasa kaga ukuwe. Naeba naumanetasa ini umagi, napiyenanetasa kaga ukuwe.
16 Piya, tigeba kampa pabiya puma timamanatasa Kotiti tiꞌmu potaiginaba, ka kampa abintakibemi ntagaramaba kamanatika aibosabo pute, ayamabaya tiyoꞌmaema: Tagane, ukiye, a. Pipa kampaye.
17 We, tigeba tiꞌmu kamana aogima yepa, aya pegiri tiyoꞌyagarapa kampa esegi potawe, a.
18 Pigoya, naeba Kotiti naꞌmu potauwe. Pi amiyo sukena kamanaꞌnempaba tigepa asurigasaye.
19 We, pipa aerawane. Naeba akiyenabi amiyo sukena kamanapisa eꞌero kamana ukenaba aerawane. Piya, nae nabemika, akiyenabi napiyenanepisa tara kamanaꞌanto uwaimekini abiyema puwe.
20 We naoꞌmitaba, napiyenarimpaba inamu kantaba a-peno. Kaintanaripa inamu kanta puma mimagiri, napiyenarimpaba anasa kina kanta puma aborano.
21 Pigoya, mono ago kamanapipa Waꞌegawamaba maya untiye:
To kinaꞌmi kamanapisabe namuꞌisa kinaꞌmi nkiwamutasabe naeba ma kinapa kamanaꞌne uwaimekini, igeba ikabinatama kampa abikibewe, Waꞌegawama piya untiye, iye.22 Piya, amiyo sukena kamanapa mono kinaꞌmintana wanane. Yigina, pipa kampa imatiti pe kinaꞌmi pami pukenaenawe. Eya, Koti kamana uma aborakenaenaba abeꞌisa kinaꞌmintanaba kampaye. Pipa mono kinaꞌmintanawe.
23 Piya, monota aiꞌaru pe kinaꞌmiba ampa aki puma to kamana to kamanapisa ampa amiyo siginiba, abeꞌisa kinaꞌmibe kampa imatiti pe kinaꞌmibe ampa tigantiniba: Aiboꞌnabo pewe, ukibewe.
24 Piya, tigeba aki puma Koti nkawamutasa kamana uma aborama mintigina, kampa amatiti pemi kinano, abeꞌisa kinano, tigeti ampima mono kamanatipa abekiniba, pi kamanaꞌamaba ae aupi pima agowapa uma ae aobi aborakibewe.
25 Piya, kamanaꞌwapa agupi kakantipa aborama arawaekiye. Arawaeyakanaba, aowamaba mabinti maete tumimagina Koti nkagegaꞌe uma asagayumagina: Taga, taga, Koti aeba tigege mintiye, ukiye. Monota aki pikenaenaba arupu puma aborano
26 We, naoꞌmitaba, pikaba aya pewe. Tigeba aki puntiripa kaꞌwainaba mono ini yegina, to kaꞌwaina mono kamana urimegina, to kaꞌwaina Koti nkawamutasa kamana uma aboragina, to kaꞌwaina amiyo sukena kamana yegina, to kaꞌwainaba pi kamana aꞌwae piye. Pintanaba pepa, mono kina esegi puwaitakenaga napima piyo.
27 Piya, amiyo sukena kamanapisaba kamana ukena puntiripa, uwaenamiba kampaye. Tara kakagami ukibewe. Piya, ka ka yigina, kaꞌwainaba agowapa aꞌwae puma urimeno.
28 Pigoya, kamana aꞌwae pukena kina aisakateba, amiyo sukena kamanapa a-suma, paibuma mima Kotiti uwa yeno.
29 Pigoya, Koti nkawamutasa kamana untiripa, pabiyama tara kakagami yigiri, to kaꞌisamiba pi kamanapa aꞌyikiyo.
30 Pigoya, kaꞌwainaba aeba mintegina Awamusaꞌama agupi mono atagina ukena puntanaba, maru kamana yemiꞌnaba nagariyekanaba yeno.
31 Piya, aꞌyaꞌma kinaꞌmiba mono abima esegiyena maekenaga, tigeba Koti nkawamutasa kamana ka ka uma kanara aboraiyo.
32 Eya, Koti kamana uma abora kinaꞌmiba igewai nkaborantanarapa kabiyewe.
33 Eya, Koti aeba napiyenarepa kampa aꞌyugu puratama, aeba agoya Kotiwe. Pigoya, to kaꞌisa Kotiti atokaeya kinaꞌmi nkakiyenabi pesa puma,
34 tige akiyenabi wayaꞌiyaba kamanapa paka puma miyiyo. Piya puma, paisa ago kamana wasima wayaꞌiyaba kamana kampa untiri wami nkimentanti miyiyo.
35 Piya, wayaꞌmiba mono akiyenabi kamana uma inintana aborasanaga, igeba kaꞌisaena abikena puntiniba, namankaipi iwaegipa ibigaiyo.
36 We, ayama napiyewe. Koti kamanaꞌamaba tigetisa aborantina, a. Tibinto abegana kaꞌisamiba kampaya, a.
37 Pigoya, tigetisa kaꞌwainaba aeꞌwaka Koti kamana unta poropetewo, Awamusaꞌwantagano, napiyintanaba, kamana kaema timo kamanapa Waꞌegawama nkuntemika, aewa abibebe peno.
38 Piya, kaꞌwaina aeba ma kamanaꞌnekaba kampa owe yekanaba, aeꞌwa kamanakaba owe a-seno.
39 Piya, naoꞌmitaba, tigeba Koti nkawamutasa kamana uma aborakenaga ebi ebi pumagiri, amiyo sukena kamana ukena kipa aꞌnkakuniyo.
40 Eya, aꞌyaꞌma yugaba arabama pigina aborama arupu peno.
1 Pigoya, naoꞌmitaba, aogi kamana urimuwagiri abintaka, to kake tiyogaritakena puwe. Pi aogi kamana urimuwagiri, tigeba maemagiri asima atokaema esegi puntawe.
2 Piya, aogi kamana uriminto kamanapa kampa uwaba abima kainta, arakuꞌma upebe punta, pi kamanatasa Kotiba tiꞌikenaba piye.
3 Piya, mono aiꞌne kamana nae maema urimintopa, pipa mayamawe: Karaisiti aeba mono isaꞌama untisa puma aguntaenareka antota purintiye.
4 Aeba purogini arubi kaitauguna kakaga yaga aꞌya pogana, mono isaꞌama untisa puma purintapisa asitantiye.
5 Aepa asitaogana Pita nkaobi uma aboramagina, pitasa tonagisarisa tara tumpaema kinaꞌwampi nkiyobi aborantiye.
6 Pitasa mono kina 500 kinaꞌmi nkiyobi aboraogini kaga agawaentawe. Piya, igepisa kaꞌisamiba ago puꞌwagana uwaenami iyogama mintawe.
7 Pitasa Yemisi nkaobi aboramagina, pitasa aꞌyaꞌma aposoro kinaꞌmi nkiyobi aborantiye.
8 Pigoya, aꞌyaꞌma kinaꞌmi nkikaꞌi inare ntagara kanta puma aposoro aborauwagana, nae naobi aboraoga agantuwe.
9 Piya, naeba aposoro kinaꞌmi nkikapi uwaenantora miyuwe. Naeba Koti mponota aiꞌaru pume kinaꞌmipa karana puwaitantoka, wasanamiba aposorowe unamikenaenaba kampa kanara piye.
10 Pigoya, naeba Koti nkawagaenawatasa aposoronaba puntone. Piya, awagaenawampa naeti ataenaba kampa poga, naeba yoga puntoꞌnaba pipa igekeba igasaye. Nae naguꞌama kampa pogana, Koti nkawagaenawampa naeti wainti, piꞌna puntiye.
11 Piya, naebe, igebaya, mono kamana urimintompepa, tigeba kanara abima aegarantawe. Aꞌyaꞌma kinaꞌmita asikena kamanane
12 Pigoya, Karaisitiba purintapisa asinti kamana taeba aꞌyaꞌma yompepa, nana piyema tigetisa kaꞌisamiba: Purinta kinaꞌmi asikenaenaba kampa waintiyema, yewe, a.
13 Piya, purintapisa asikenaenaba kampa waiyesinta, Karaisitiba kaga kampa asintesine.
14 Piya puma, Kotiba Karaisitipa kampa asitantesinta, mono ukenaenarepe timatitiꞌenaripe kaga aꞌyugu pemisine. Pi nkamanapa kampaye.
15 Piya, purintapisa asikenaenaba kampa taga waiyesinta, Kotiba Karaisitipa kampa asitantesine. We, taeba pi asitanti kamanapa umagi, kampa piya asitantesinta, taeba Koti kamanapa taga kampa aboraompesine.
16 Piya, purintapisa asikenaenaba kampa waiyesinta, Karaisitiba kaga kampa asintesine.
17 Eya, Karaisiti aepa purintapisa kampa asitantesinta, timatitiꞌenaripa aꞌyugu pegina aguntaenaripa wairitasine.
18 Piya, kampa asitantesinta, Karaisiti atokaema mima pure kinapa igeba kaga uwa puꞌma ata puwasine.
19 Eya, taeba ma mpabinkamana Karaisititi atokaeyompentana waiyesinta, igaikena tantaraꞌena taeti waiyesine.
20 Pigoya piyamaba kampaye. Karaisiti aepa taga purintapisa asitaogana, purinta kinaꞌmipa paitawaitama asima mintiye.
21 Piya, purikenaenaba kaꞌwaina agobiyogana, pabiyama purinta kina asikenaenaba to kaꞌwaina agobintiye.
22 Eya, aꞌyaꞌma kinaꞌmiteti Antamuge atokaekenaenare waintika, purune. Pabiyama Karaisitige atokaekenaenare waintika, taogama mikune.
23 Pigoya, mayama arabama asikune. Karaisiti aeba paitama asintika, taeba Karaisititi atokaeyompe kinaꞌmitaba ae aborakibi ntagaba asiyekana,
24 tae takaꞌi nagarikiye. Piya, Karaisitiba asugasima aꞌyaꞌma to esegiyenaba paitantaꞌenabe kabikenaenabe maegasima, kabiratakenaenara tabarempa Koti nkayata menkatakana nagarikiye.
25 Piya, Karaisiti kabiratakenaenaba mirite kanama, aꞌyaꞌma kama kinaꞌwapa agisa amentapinti atama aerapakana nagarikiye.
26 Eya, aꞌyaꞌma kama kinaꞌwapa maegasimagina, ikaꞌi purikenaenaba kaga maegaikiye.
27 Piya, Kotiba aꞌyaꞌwaemaena puma agisabi aki potantiyema, mono isaꞌama piya iye. Pigoya, aꞌyaꞌwaemaena puma agisabi aki potanti kamanaꞌama nkagoba taeba abokana, Koti taegeba agisabi kampa mintiye. Kampaye. Aeba aki puratagi, Karaisiti nkagisabi mintune.
28 Pigoya, ainti Koti aeba aꞌyaꞌwaemaenaba agisabi aki puratakanaba, yagarawampa ae agisabi aꞌyaꞌmaena aki puratakibi ntagarama nkagisabi aeꞌwa nkaupa menkatakiye. Piya pekanaba, Kotiba aꞌyaꞌwaemaenama nkaiꞌne mikiye.
29 Pigoya, tigetisa kaꞌisamiba purinta kinaꞌmi nkiyoꞌmaekenaba mono wanipa to kakema maeyawe. We, purintapisa asikenaenaba kampa waintiye, yepa, pipa nana piyema piyamaba maeyawe.
30 Piya, purintapisa asikenaenaba kampa waintiye, yepa, nana piyema taeba taupa ata puratakena kiꞌi asi nasi nasune.
31 We, naoꞌmitaba, Karaisiti Isu Waꞌegarempati naeba tigekaba naꞌmu potamagi, mayama tagaka urimuwe: Naepa aꞌyaꞌma yaga purikenaenamaba agarosanatagi miyuwe.
32 Piya, Epesasi kumata kabu kara kanta pe kinaꞌmi kamaena punatatakaba mabisa ikapa nana maekuwe. Pipa kampaye. We, purintapisa asikenaenaba kampa waintakapa: Aiba agora puꞌwakubompeka ibaba iga nanintabe wanipe nama aogima miyeno, a.
33 Pigoya, aꞌyugu timiyo puritakiri abiyo: Ata pe kinaꞌmige nasigini, aogiyenaripa ata puritakibewe.
34 Eya, tigeba tiguꞌama pami puma arupu puma mima, aguntaenaba toba a-piyo. We tigetisa kaꞌisamiba Kotika aibosabo peka, pipa abima tini piyoma, yuwe. Tauꞌama asikibipa toma pukiye
35 Pigoya, kaꞌisamiba maya yewe: Purinta kina igeba aya pumabaya asikibewe. Aya iga puma asikibewe, piya yewe.
36 Pipa aibo kamanane. We, aintana potaganaba mabinti puꞌwasu pumagina iraye.
37 Piya, aintana puntiripa, tigeba witi aorasawo, to ka aorasawo, maema aintana potaganaba, ayampuwampa iraye. Pipa tonawe. Pi nkaempurasaba kampa aintanaba pewe.
38 Piya, Kotiba aewa otagina aorasa aeꞌwa nkayampuwapa iraye. Piya, ka ka aintanamaba aeꞌwantana aboraye.
39 Piya, arirasaenama nkagoba pabiyama kaꞌantoba kampa waintiye. Wasanamite taupa pipa tomane. Yagawama nkaupa tomane. Kabarankama nkaupa tomane. Inoyantama nkaupa tomane.
40 Piya, mantabinti miye kinaꞌmi nkipa tomane. Mabinti miye kinaꞌmi nkipa tomane. Piya, mantara waita wantemintanama nkawaꞌenawapa tomane. Mara waita wantemintanama nkawaꞌenawapa tomane.
41 Piya, pankama nkeꞌwasaenawapa tomane. Oꞌama nkeꞌwasaenawapa tomane. Norimi nkeꞌwasaenawaipa tomane. We, norimi nkeꞌwasaenawaipa kaꞌmapa kampaye. Toma toma waintiye.
42 Pigoya, purintapisa asikenaenama nkagowapa pabiyaenawe. Piya, mamparasa taupa kaikenaena waintegina, asiratakibi tauꞌamaba kampa abararakenaenawe.
43 Piya, kaikena tauꞌama nkageba maete tumegina, asikibemi tauꞌama nkageba maete ikiye. Kaikena tauꞌamaba magimagi puma waintegina, asikibemi tauꞌamaba esegima aborakiye.
44 Kaikena tauꞌamaba ma auꞌyagane. Asikibemi tauꞌamaba manta auꞌyagane. Piya, mabisa tau waintikaba pabiyama manta tau aborakiye.
45 Pikaba mono isaꞌama maya iye: Marusa yagara aboranti, Antamu, aeba aguꞌamantaga asintiye, iye. Pigoya, aintisa Antamu, pipa Karaisiti, aeba eꞌwasaena tamikena yagara aborantiye.
46 Piya, mantarasaenamaba kampa paitantiye. Mabisa tauꞌama paitagina mantarasaenarepa ainti aboraye.
47 Piya, marusa yagaraba marasa pumarantikana mabisa kinaꞌena puntiye. Aintisa yagaraba aeba pipa mantabintisawe.
48 Piya, mabisa kinaꞌmitaba pi mabisa yagara kanta pune. Mantari tage wainti kinaꞌmitaba pi mantarasa yagara kanta pune.
49 Piya, mabisa yagarama nkaoga puntompeka, pabiyama mantarisa yagarama nkaoga pukune.
50 Naoꞌmitaba, ma kamana yopa abiyo: Mabisa tautempaba Koti kabiratakenaenabi kampa ubasikiye. Eya, awasakenaenamaba waiyabaꞌenabipa kampa ubasikiye.
51 Abiyo. Kakanta kamana kapa aborarimukuwe: Aꞌyaꞌmaba kampa puꞌwaekubompeka, pikuriyama aga yekapa aꞌyaꞌmaba aꞌwae puma to tauga aborakune.
52 Piya, pikuriyama aga yekapa aorumo pisa puma karuꞌena purinta mono kinaꞌmiba asima to kampa abararakibewe. Piya, aꞌyaꞌma kina taeba aꞌwae puma to tauga aborakune.
53 Piya, abararanta tauꞌamaba aꞌwae puma miyabaꞌena maeyano. Eya, puriyaba tauꞌamaba aꞌwae puma miyaba eꞌwasaena maeyano.
54 Pigoya, abararanta tauꞌamaba aꞌwae puma miyabaꞌena maentini, pi puriyaba tauꞌamaba aꞌwae puma miyaba eꞌwasaena maeyigina, pabi ntagaba mono isapisa kamanaꞌama nkauꞌwapa aborakiye. Pipa mayamawe:
Aogantaꞌenamaba purikenaena atarayegina nagariye, iye.55 Purikenaenama nkesegiyenaba aempaye, iye.
Purikenaenama nkire wantawapa aempa waintiye, iye.56 Piya, aguntaenamaba purikenaenama nkwantapa waintegina, mono ago kamanaꞌamaba piyama aguntaenama nkesegiyenaba taeti aboraye.
57 Pigoya, Koti aeba Waꞌegare Isu Karaisiti otaogana, purikenaenama nkesegiyena atarama taoꞌmaentika, Kotiti taꞌmu potano.
58 We, nabugai ntaoꞌmitaba, pika tigeba esegima asima aebebe puma miyiyo. Tigeba ago abintawe. Waꞌegawamati araga ntuga piginaba, aeba uwaba kampa tigaikiye. Piya, Waꞌegawama ntugagaba a-tiyekita piyo.
1 Pigoya, mono kina iyoꞌmaekena mone aki puntiripa, Karesiya marasa monota aiꞌaru pe kina piyama ke iꞌma iyakosa puma aki piyo.
2 Piya, aꞌyaꞌma sontara marusa yagaba mone maema menkatantata ka kaꞌmita tigetintanabisa timata timata maema menkaki piyo. Piyama tipipigarusanaga aiꞌaru pugaka pigi kanano.
3 Tigeti irosakubopa, wasana uwaitakibeꞌnagiba igepa esa imima uwaitakini, tiꞌmuntanaripa Yerusaremi kumati maete wakibewe.
4 Piya, pika naeba wamagi, naege kaga ibabute wakune. Korinti kina uma igakenaga Poropa abuntiye
5 Pigoya, naeba Masetoniya maba akapi uwaesamagi tigeti wakena puwe. Piya, pi kiꞌi wakuwe.
6 Pigoya, naeba tigeti wamagi kaꞌisa yagaba ampikuwe. We, eꞌero ntagabaya ampimagi, tabe esibaba aꞌya waka, wakiri tigeba keꞌi wakena naoꞌmaeyigi piti matiba wakuwe.
7 Naeba ibaba uwa uma aronkanto tigata wakenaba pipa kampa nabiye. Piya, Waꞌegawamaba abintaka tigetiba eꞌerota ampikuboka yuwe.
8 Naeba mata Epesasi kumata mintakana, Pentikositira naninta nakena yaga arosakapa tigeti kanakuwe.
9 Piya, mataꞌi Waꞌegawamaba mono ki aogima iregina tabe yugaba aboranamiye. Piya, mataꞌi monoꞌama kama kinapa uwaena mintawe.
10 Pigoya, Timotiba tigeti wakiripa, tiyoꞌena potaigina aekuruyena kampa punta miyeno. Eya, naeba Waꞌegawama ntuga posa puma aeba piye.
11 Pika aepa a-tikabitamagiri, naeti ataigina pasema kanano. Eya, naebe to kaꞌisa mono kinaꞌmibe aobi puma miyune.
12 Pigoya, taoꞌyagara Aporopa, aepa to kaꞌisa mono kina igege tigeti wanema, esegima otaopa, pikaba ibaba kampa abiye. To ka yagaba kepa kanara agamaba, tigeti wakiye. To kaꞌisa kamanane
13 Pigoya, tigeba tigupa aogima kabima mima, timatitiꞌenabi esegima asima, warakaꞌya mpima esegi piyo.
14 Aꞌyaꞌmaena pentanaba agu kaoꞌenayaga piyo.
15 Pigoya, naoꞌmitaba, tigeba ago abintawe: Setepana tupa igeba Akaiya mari marupa mono kamanatapa aborantane. Piya, igeꞌwai ntapiyenabisa Kotiti atokaeya kina iyoꞌmaekena puntane.
16 Eya, piya pe kinape to kaꞌisa araga mono yuga puma monoka tiyoꞌmaeya kinape, paebuma igeti paitakena kinaꞌwaintana piyo.
17 Pigoya, Setepanabe Potunatobe Akaikobe, igeba naeti irosauguna nantawama aogi puntiye. Igeba tige marupa nae nagupinti pumaewamagini,
18 naepe tigepe kaga tanta paru puratantawe. Tigeba piya kinaꞌmi nkige abigina aogi peno.
19 Pigoya, Esiya aukaꞌisa monota aiꞌaru pe kinaꞌmiba: Aya pewe, yewe. Akurabe Pirisikabe isige namapi monota aiꞌaru pe kinaꞌmibe, igeba Waꞌegawamaka uma tabera iꞌmu puritama: Aya pewe, yewe.
20 Aꞌyaꞌma mono kinaꞌmiba kaga: Aya pewe, yewe. Tigeba mono kinapa ka ka ankayankamimi piyo.
21 Naeba Poronawe. Naeba: Aya pewema, naeꞌne ntayapisa kaeyuwe.
22 Pigoya, kaꞌwaina aeba Waꞌegawamaka aekita potakibemipa, ataigina Kotiba agarubakaikiye. We, Waꞌegarepa, kaeba ampa aborao.
23 Waꞌega Isu nkawagaenawapa tigeti waima waiyeno.
24 Karaisiti Isuka agu kaoꞌenanepa tigeti puritauwe. Tagane.
Poro piya isa kaentiye.