1

¹ Naeba Porona, Isu Karaisiti kayokaya yagaranawe. Aeba naepa aposoro unatama: Kotitisa aogi kamana uwaimoma, naba punatantiye.

² Paipa Koti aewa poropete kinaꞌwampi uwaitaogini, auꞌwa aborakibi kamanapa paisa mono isapi kaemarantawe.

³ Pi aogi kamanapa yagarawampaka kaemarantawe. Piya puguna, auꞌwapa Tebiti ae tupi ampa aborantiye.

⁴ Aota aguꞌwapa Koti ntagara mintantiye. Pika agoba purintapisa asintika, Isu Karaisiti aeba Waꞌegare esegima aboraramintiye.

⁵ Piya pogana, awagaenawaka uma aposoro yugaba taepa tamintiye. Piya, Karaisitika maga maga kina mono uwaimigini abima timatiti puma wasiyoma, uratantiye.

⁶ Piya, tigeke kaga Isu Karaisiti ae tu uritantina, pabiyama abimagiri wasiyiyo.

⁷ Pigoya, Aroma kina, Koti nkabugai kina mintawe. Aeti atokaenta kinaꞌwapa, aꞌyaꞌma tigeti ma nkisapa kaeyuwe. Tabarempa Kotibe Isu Karaisitibe, isigetisa awagaena puma paruyena tigeti waima waiyeno. Poroba Aroma kina igakena puntiye

⁸ Maru mayama ukena puwe: Tigeba mono maema aegaraka, aꞌyaꞌma maga maga kinaꞌmi abegana aogi pemika, aꞌyaꞌma tigeka naꞌmu puma, Isu Karaisiti nkagegaꞌeraka Kotinempa naꞌmu potauwe.

⁹ Pigoya, naeba Koti kayokayaꞌena punta, yagarawampa nkaogi kamana uma aborakenaba aꞌyaꞌma esegiyenanetasa pogana, agonepa Koti abemika aꞌyaꞌma yagaba nunamu yopa, tigekega esuritauwe.

¹⁰ Naeba esotaokana abekana kanarasakanaba, aro ntaganto kepa aboranameka tigetiba wakuwemagi omuwe.

¹¹ Piya, naeba tige ampa tigamagi, Aota Awamusaꞌama aꞌmuntana timekana, tigu tonkiya puritasanaga nabiye.

¹² Pipa mayamawe: Timatitiꞌenarimpaba naoꞌmaeyakana, nae namatitiꞌenanempaba tige tiyoꞌmaeyakana, aꞌyaꞌma esegi puratasanaga nabiye.

¹³ Pigoya naoꞌmitaba nae nabemika abiyo. Naeba to marisa kinaꞌmiti posa puma, pabiyama tigeti mono yuga uma puma kaꞌisa aꞌaema aborakenaga, uwoma ntaga tigeti wakena kamana yuwe. Pigoya, wakena yoganaba kaꞌisaenama keꞌne akuntatagi, atate miyuwe.

¹⁴ Pigoya, Kariki kinaꞌmitibe to kinaꞌmitibe uma mono aborawaimoma unatantegi, pabiyama abikenaena wainta kinapa kampa wainta kinape, igeka mono iretanepa waintiye.

¹⁵ Piya waintegina, pabiyama Aroma kina tigekeba aogi kamana urimikenagaba, naguꞌamaba aseyo piye. Aogi kamanapa Koti nkesegiyenawe

¹⁶ Pigoya, naeba aogi kamanakaba nanipa kampa pokana, pipa Kotitisa esegiyenama tauꞌikiye. Piya, marupa Yuta kinaꞌmiti aborantikana, to marisa kinaꞌmitibe kaga aborama, tamatiti pompe kinapa aꞌyaꞌma tauꞌikiye.

¹⁷ Piya, tamatiti pokana, aogi kamanaꞌwatasa Koti arupu puratakenaenaba maema aborawaeyagi to tamatiti puyaba miyune. Pika Koti kamana ka maya iye: Kaꞌwaina amatiti pukibiꞌnapa, Koti arupu potakana eꞌwasaenabi miyaba mikiyema, iye. Aꞌyaꞌma kinaꞌmiba Kotipa ikabitawe

¹⁸ Pigoya, Koti amoꞌenawapa mantarisa ampa aborama, aꞌyaꞌma kamparagaena puma ataena pe kinapa antotaꞌena imikiye. Piya, pi kinaꞌmiba ataenawaitasa tagantanaba maema kakakinapa, antotaꞌena imikiye.

¹⁹ Koti nkagoba kampa kakamaba waiye. Koti aewa maema aborawaeyagini agantanaba agawe.

²⁰ Pigoya, Koti nkesegiyenawape waꞌegawamantanabe waiyaba miyogana, paitakaꞌya aꞌyaꞌmaena mampabisaena pumarantine. Piya, Kotipa kampa agapa, aꞌyaꞌma yaga pumarantemintanaba aogima agawe. Agagana, Kotiba mintika wasana abikena kipa kampa akuniye. Kampa akunegina, aiboꞌenawai kakakena kipa kampa waintiye.

²¹ Piya nanagawanane: Igeba Kotikaba abintapa, taga Kotikaba kampa napima, ageba kampa maema asagayuma, iꞌmupa kampa potawe. Kampaye. Napiyenawaimpaba aibonabo pegina, iguꞌamaba aꞌyugu puma tununtanama asaewaitaye.

²² Piya, igeba: Taeba abinta kinatawe utegini, Koti nkaobi aiboꞌena pewe.

²³ Piya pumagini, kampa puꞌwakena Kotiba, ae eꞌwasaenaba ikabitamagini, ama koti iyapisa potama, puꞌwakena wasanabe kabarape yagabe kuyabe, ae aoga potamagini agisewe. Koti atate tonarona kamparaga pewe

²⁴ Piya pegana, Kotiba iꞌni ntapiyenawai aegaraka igasaye. Igasagini, iꞌnintana aegaꞌmagini igewai iꞌama maema ata potawe.

²⁵ Piya, igeba Koti taga agoba ikabitama, aꞌwae puma kumpari kamana maeyawe. Piya puntini, Koti pumarantintanamaka agisuma kayokayaꞌena potamagini, kampa napiyewe. Piya, pi aborantemi ntagarama nkage maema asagayuma miyaba miyeno. Tagane.

²⁶ Pigoya, wasana igeba Koti ikaꞌintaesi potagana, igasagini kamparaga iꞌnintana pewe. Piya, wayaꞌmiba wayaꞌwaena arupuyenaba kaite aꞌwae puma antageꞌenaba pewe.

²⁷ Piya, wamiba pabiyama wayaꞌwaena arupuyenaba kaitegini, aꞌwae puma kupiyonama intabaipintiba tabe yaku nkiragini, iyoꞌmige kamparagaena puma kaga kampa ini pewe. Aibegana, aiboꞌena pikenaenawaimpa antotapa igu iꞌamapa pipa aguya aikenaena maeyawe.

²⁸ Ige napiyenawaimpaba Kotikaba kampa ibegina, Kotiba igasagini, igeba kamparaga napiyenawaipa maema antageꞌena pewe.

²⁹ Piya pegina, aꞌyaꞌma aguntaenabe kaintanabe, to wainantanagaba abugaintanabe ataena pikenaenabe, igeti pumaewaye. Piya, to waina mparuta mikenaenabe, wasana aegukenaenabe, maꞌena pukenaenabe, amiyoꞌenabe, wasanamika kampari uwaigaikenaenabe, igeti pumaewaye. Igeba wasana ikaꞌi kamana uwaitantini,

³⁰ akaya suntini, Koti kama potantini, kamana kampa abintini, igebigoꞌena puntini, igewai maete intini, ataenaba kasaꞌena aborantini, inogi ibagi kamana akayuntini,

³¹ napiyenawai kampa aogima napintini, igewai kamanapa kampa wasintini, iyokina kampa agu kaoꞌena puntini, to kinapa pabiyama kampa intara puwaitawe.

³² Pigoya, igeka Koti nkarupu kamanaꞌamaba maya iye: Piyama aguntaena pukibiꞌnapa aeguyigina pureno, iye. Pabi kamana igeba abibebe puntiniba, kampa aegaꞌma: Aerawane, yewe. Piya umagini, aguntaena pumagini, to kinaꞌmi piya pentanaga: Kanarane yegana, aguntaenawaimpaba tabe piye.

2

¹ We, naoꞌyagara, nanaga to kinapa kamana uwaitane. Nanaga to waina nkaupipa pima yene. Kaegeba pabiya pene. Piya, to waina nkaupi pima yempepa, pipa kaeka kaupi pima yene. Amentanti kayokayo yagara miyempekana, aiboꞌenaga kakakena kipa kampa waintiye.

² Piya, piya pe kinapa kamparaga antotaꞌena Koti imekana kanarasama arupu pukiye. Pipa abune.

³ We, naoꞌyagara, piya pe kinaꞌmipa ipi pima yene. Kaegapa nanaga pintanaba pene. Napima Koti nkantotaꞌena agaite kaegaka wampena, a.

⁴ Piya, Koti anta paruyena pugatama, kampa karuꞌena ika pugatama, agoya pugatama, tabera aogima kabigataye. Kae napiyempepa uwaena kanta piya, a. Kaeba kagu aꞌwae poma, Koti anta paruyena pugatamipa, pipa kampa aogima napiyeno.

⁵ We, kantawamaba esegi pegina kagupa kampa aꞌwae punta, kamparaga ikapa tabera akibene. Piya, Koti nkamoꞌena aborakibi ntagaba arupu antotaꞌena aborakana, kamparaga ikapa aꞌyaꞌma maekibene.

⁶ Piya, Kotiba aꞌyaꞌma kina miyompentanarempa nkawameta ikantanaba etaꞌma airamikiye.

⁷ Pigoya, paebuma miye kina, eꞌwasaena maekena puma Koti nkaꞌmuntanabi mikena puma miyabaꞌenaga napima asi nasi aogiyena pe kina, igepa miyabaꞌenaba imikiye.

⁸ Pigoya, igeꞌenawaika napiye kina, tagantanaba ikabitama ataenaba wasiye kina, igetiba ka ibirakenaenabe amoꞌenabe aborawaekiye.

⁹ Piya, aꞌyaꞌma ataena pe kina, Yuta kina marupa pugaite to marisa kinape, igetiba iki nakiyenabe tabe iyekuruyenabe kaga aborawaimikiye.

¹⁰ Piya, aꞌyaꞌma aogima miye kina, Yuta kina marupa pugaite to marisa kinape, igetiba eꞌwasaenabe paruyenabe kaga aborawaimima aꞌmuntanaba imikiye.

¹¹ Kotiba tabe agi wainta kinape uwa kinape kaga aꞌyigi tatama antotaꞌenaba tamikiye.

¹³

¹² Pigoya, Yuta kinaꞌmiti Koti nkago kamana waintegini, aꞌyaꞌma aguntaena pe kina igepa ago kamanatasa Kotiba aꞌyigi nkitakiye. Piya, ago kamana uwa igerasa abikibe kina, igeba Koti nkaobi kampa arupu punta kina mintawe. Ago kamana wasikibe kinaꞌmi igemana aogima asoyaena pikibewe. Pigoya, to marisa kinaꞌmiti Koti nkago kamana kampa waintegini, aꞌyaꞌma aguntaena pe kina, igepa uwa igaikiye.

¹⁴ Piya, to marisa kinaꞌmiti ago kamana kampa waintegini, igeba napiyenawaitasa ago kamana kampa abinta kinaꞌmiba igewai ago kamana abinta kina kanta pewe.

¹⁵ Piya pegana, Koti igupi ago kamana kaemarantiꞌna aboraye. Piya pegina, napi napiyenawaimpa kaꞌisa yagaba: Ataena pewe, uwaitantana, to kaꞌisa yagaba: Aogiyena pewe, uwaita piye. Piya pegana, pi ago kamanapa uma aboraye.

¹⁶ Pigoya ainti ka yagaba Koti otakana, Karaisiti Isuba wasanami kakanta kamanapa uma aborama aꞌyikikiye. Pi ntagaga naeba aogi kamanapa yuwe. Pabi nkawameta aintiba aborakiye. Mono ariwa maema mikenaenaba kampaye

¹⁷ Pigoya, kaegakaba nanawe yene: Naeba Yuta yagara mimagi, Koti nkago kamana abima aogima aegaꞌma, Koti tuntana puma mintuwe, uma kau maete ima miyeno.

¹⁸ Kaeba Koti nkabugaintanagaba abintane. Piya, ago kamana ugamuguna abintampeka, arupuyenagaba owe yene.

²⁰

¹⁹ Piya puma, kaegakaba maya yene: Naeba Koti nkago kamanaꞌama agobe tagantanawape abintoka, kanara iyorika kinapa kepa iyakimagi, tununtanabi miye kinapa kanara eꞌwasa puwaitamagi, kampa abinta kina kanara uma arupu puwaitamagi, amaꞌmana ntagara iyakikena yagaranawe, yeno.

²¹ Kaeba piya kamana yempeꞌnaga, kaeba wasana kamana uwaimintanapa, kaegakeba kampa abena, a. Kaeba wasanamika: Kuntanaba a-piyoma uwaimintanapa, kaegakeba kuntanaba pena, a.

²² Kaeba: Kumiyenaba a-piyoma uwaimintanapa, kaegakeba kumiyenaba pena, a. Kaeba ama kotikaba kampa kabegina, ama koti ntamapisaenaba uwa maeyana, a.

²³ Kaeba: Naeba Koti nkago kamana abintuwe, uma kaukapa maete ima mintanapa, aguntaena puma ago kamanapa akayuma, Koti nkageba ata potana, a.

²⁴ Piya, Koti kamanaꞌamaba maya iye: Yuta kina, tigeꞌenaenaga to marisa kinaꞌmiba Koti nkagegaꞌeba akayasotawe, iye. Taga araꞌena taguꞌamantanawe

²⁵ Pigoya, kaeba Koti nkago kamana wasiyegana, kau kasakena araꞌena kanara peno. Aibegana, ago kamana akayuyeganaba, kauta araꞌena pumarantaꞌenaba pipa kumpariꞌenawe.

²⁶ Piya, to marisa yagara, araꞌena auta kampa wainta yagarama, Koti kamana agoba wasiyemipa, aeba au kasama araꞌena punta yagara kanta piye.

²⁷ Pigoya, Yuta kina, tigeti ago kamanaꞌama nkawaꞌena waintemika tipa kasantapa, nanaga kamana agoba akayuyewe. Piya, to marisa kampa i kasanta kinaꞌmi, kamana agoba aegaraꞌnagi, aintiba tipi pima kamanapa uritakibewe.

²⁹

²⁸ Pigoya, wasanama ari autasa Yuta kinaꞌmi nkaraꞌena maentiꞌna, aeba Koti nkaokina Yuta yagara kampaye. Aeba antabaipinti Koti nkaokina mintipa, pipa taga Yuta yagarawe. Piya, au kasakenaenaba pipa taga araꞌenaba kampaye. Koti taga araꞌenaba pipa aguꞌamantanawe. Pipa ago kamana ariwapa wasikenaba kampaye. Pipa agowa wasikenawe. Wasanama piya pemipa, mampabisa kinaꞌmi iyobinane. Koti nkaobi tabe agiba waiye.

3

¹ Pigoya, Yuta kinaꞌmiba aya puma to marisa kinapa igasawe. I kasama araꞌena pe kina aya puma igasawe.

² We, Yuta kinaꞌmiti uwomantana aogiyena aborantiye. Iba ka urimukuwa, abiyo: Yuta kinaꞌmipa Kotiba awaga kamanaꞌwa uwaimima: Aogima kabiyiyo, uwaimintiye.

³ Tagane. Kaꞌisa Yuta kinaꞌmiba kana kamanapa kampa aegaꞌmagini akayuntawe. Piya puntakana, Kotiba aewa nkuwaimintintanaba kampa akatikiye.

⁴ Pipa kampaye. We, aꞌyaꞌma kinaꞌmiba kumpari kamanapa yegana, Koti ae abintowapa aꞌyaꞌma yagaba taga kamanapa iye. Pika mono awaꞌena kapa Kotikaba maya iye: Kaeba aꞌyaꞌma kamanakampaba arupu puwaye. Wasanami kamana ugataiginapa asu igaikibene, piya iye.

⁵ Pigoya, wasanami ataenarepa agantiniba: Koti ae abiwapa arupuyenawe ukibewema, yewo. Pika ayama usune. Kotiba aguntaena pompentanama antotaꞌena tamekanaba kampa aogi pikiye, usuno. Pipa kampaye. Pipa wasanami ntapiyenawe.

⁶ Piya, Kotiba antotapa arupu kampa puratasinta, aya pesine. Aintiba aꞌyaꞌma maga maga kinaꞌmitentanaba aꞌyigi tatakiye.

⁷ Pigoya, wasanami kumpariyenanepa agantiniba, Kotintanaga aogi tagantanawe, umagini, agegaꞌe asagayukibewema, yewo. Pipa kumpariyenawe. We, naeba aguntaena pekanaba, kamparaga ikantepa namikiye.

⁸ Pigoya, kaꞌisa kinaꞌmiba tae yompe kamanaka akayasuratapa: Pipa aguntaena pekanaba aogiyenama nkauꞌwa aborakiyema yewema, yewe. Pipa kampaye. Piya ye kinaꞌmi ata ika mpaentini, pipa kanara maekibewe. Arupu yagaraba kapa kampa mintiye

⁹ Pigoya, ma Yuta kina tae agoba ayama waintiye. Taeba to marisa kinapa asu igasima, pipa to awameta miyuno. Piyaba kampaye. Taeba ago yune. Yuta kinape Kariki kinape taeba kaga aguntaenama tagasaye.

¹⁰ Pigoya, pika mono isaꞌama maya iye:

Ka aogi arupu yagaraba taga kampa mintiye. Kampaye, iye.

¹¹ Kaꞌwainaba mono ago abinta kina kapa kampa mintegina, Kotipa aguyosaꞌma atokaekenaba kapa toba kampa mintiye, iye.

¹² Igeba arupu kipa aꞌyaꞌma kaitegini, ata kinaꞌena pegana, igetisa kaꞌwaina aogiyenaba kampa puntine. Kampaye, iye.

¹³ Wasana iru kawama aka pisa puma, imemawama aguntaenaba pumagini, intebuwamaba aꞌwae puma kumpariꞌena pewe, iye.

Piya, maꞌama kiyoꞌena kanta puma, iwamu epewamaba kamanapa iye, iye.

¹⁴ Imo kamanape asa kamanape iwamupi pumae waintiye, iye.

¹⁵ Igeba karuꞌena wama wasana iyeguma kaikenaga aseyo puntini,

¹⁶ aꞌyaꞌma yagaba uwomantana aguyaꞌaimagini, tabe kuntuyena wasana imintini,

¹⁷ wasanamiba paruyenama kipa kampa agawe, iye.

¹⁸ Igeba Kotikaba kampa iyekuruba pewe, mono isaꞌamaba piye iye.

¹⁹ Pigoya, taeba mayama abune: Ago kamanaꞌamaba, pi kamana agora minta, Yuta kina, tae agorepa uma aboraye. Piya pekana, aꞌyaꞌma maga maga kinaꞌmite aguntaenaraka Kotiba kamanapa uratakanaba, kampa kaꞌwainaba kamanapa ukiye.

²⁰ Ago kamanaꞌamaba aguntaenarepa aboraramiye. Piya pikanaba, ago kamana aegarakibikaba, kaꞌwainaba Koti nkaobi arupu agiba kampa maekiye. Pipa ago abune. Isuti imatiti pe kinaꞌmiba arupu kinane

²¹ Pigoya, ibaba Koti arupu puratakena kipa ka maema aborantiye. Piya, Mosese ago kamanaꞌwa tayakikena arupu kipa kampa aboraye. Pinane. Mosesebe poropete kinaꞌmibe arupuyena aborakibi kiꞌamaka awaga kamana untawe.

²² Pi kipa mayamawe: Isu Karaisititi imatiti pe kinaꞌmiti Koti arupu puratakena kipa aboraye. Piya, aꞌyaꞌma mono aegaꞌma abibebe pe kina, taeti aboraye. Piya, agorepa kampa atarama waintegi,

²³ taeba aꞌyaꞌma kina aguntaena puntompeka, Koti nkeꞌwasaenarapa kampa kanarasamaba kampa miyune.

²⁴ Pigoya, Kotiba aewa awagaena puratama, Isu Karaisitipa aꞌmuntana tamogana, yogawatasa torebata ika puma arupu puratantiye.

²⁵ Piya, Koti otaogana, Isu puꞌmagina, korankatasa ika puratama, imatiti peꞌnagipa aguntaena asuꞌa puwaitakiye. Pigoya, aguntaenawaipa paipa Kotiba kampa karuꞌena ika punta, otaogana Isu tumpa puꞌma asuꞌa puratama, Koti nkarupuyenawapa aboraramintiye.

²⁶ Piya puntikana, Kotiba ibaba arupuyenawapa aboraramima, Isuti amatiti piꞌnakaba arupu potauwe, uma tayakiye.

²⁷ Pigoya, Yuta kinaꞌmita tagegaꞌe maete ikena kipa aempa waintiye. Kampaye. Pi kipa kampa waintiye. Ago kamanatakaba tagegaꞌe kampa maete ikibikana, Isuti tamatiti pukubompe, pabitaka taoꞌmaekiye.

²⁸ Pika maya kamana abekana waiyeno: Ago kamana wasikenaenarakaba kampaye. Amatitiꞌenaraka wasanaba arupu agiba maeye.

²⁹ Pigoya, Koti aeba Yuta kinaꞌmite tabi Kotiwanane. To marisa kinaꞌmi Kotibewe.

³⁰ Aeba Kotirepa kaꞌanto mintiꞌna, Yuta kinape to marisa kinape kaga tamatitiꞌenaretaka arupu tagiba tamiye.

³¹ Pigoya, taeba tamatitiꞌenareka uma ago kamanapa kasuno. Pipa kampaye. Taeba ago kamana maema ituru pune.

4

¹ Pigoya, Abaraꞌamu arirautasa Yuta kinaꞌmite tayabamawe. Aekaba ayawe ukune.

² Piya, Abaraꞌamu aeba aogi potantintanarasa arupu yagara Koti nkaobi miyemisinta, aewa age maete iyemisine. Pipa kampaye. Koti nkaobipa piya pukenaenaba kampa waintiye.

³ Piya, Abaraꞌamukaba mono isaꞌama maya iye: Abaraꞌamu aeba Koti aegaꞌma amatiti pogana, pika Koti: Arupu yagarawe otantiye, iye.

⁴ Pigoya, kaꞌwaina yoga puma ikantanaba maeyakapa, pi nkikakaba aꞌmuntanaweba kampa yune. Kampaye. Pipa yogawatasaenawe. Piya, tauꞌikenaena yogaretasaenaba kampaye.

⁵ Pigoya, kamparaga ika kina arupu puwaitakena yagara, pipa Kotiwe. Piya, kaꞌwaina Koti aegaꞌma amatiti pekanaba, yogawatakaba kampaye. Amatitiꞌenawataka arupu yagarawe otakiye.

⁶ Pigoya, yogawatakawanane. Kotiba arupu yagarawe otamiꞌnakaba, Tebiti paipa pabiya puma akayona potama, aeka mayama kaentiye:

⁷ Wasanami nkantageꞌenawaipa Koti maegasima, aguntaenawaipa airari kaegasakini iꞌmuntanabi mikibewe.

⁸ Piya, Waꞌegawama aguntaenawaka kampa kamana otakibiꞌnaba, aeba aꞌmu peno, Tebiti piya untiye.

⁹ Pigoya, ma aꞌmuntanaba pipa i kasanta kinaꞌminta, ibiyenawanane. Pipa i kampa kasanta kina igekenawe. Piya, taeba Abaraꞌamupa Kotiba amatitiꞌenawaka: Arupu yagarawe, otantiye. Pi kamanapa abune.

¹⁰ Abaraꞌamuba ayama mintogana, Kotiba: Arupu yagaraweba otantiye. Piya, aeba au kasagasima mintoganapera, uwa mintoganawe. Owe, aeba au kampa kasanta uwa mintogana, Kotiba: Arupu yagarawe, otantiye.

¹¹ Pigoya, paipa aupa kampa kasanta mintana, pi ntagaba Abaraꞌamu amatiti pogana, Kotiba: Arupu yagarawe, otantiye. Piyama otaogana, pika au kasama araꞌena puntiye. Aibuntika, i kampa kasanta kinaꞌmi Koti aegaꞌma imatiti pekaba, Kotiba: Arupu kinatawe, uwaitaye. Uwaitamikaba, Abaraꞌamu aeba marusa iyabamawe.

¹² Pigoya, Abaraꞌamu au kampa kasanta mima amatitiꞌenama ki aegarantemisa puma, i kasanta kinaꞌmi kaga imatiti pekaba, Abaraꞌamu taga taga iyabamawe. Kotiti imatiti pe kinaꞌmika kamana esegi puntiye

¹³ Pigoya, Kotiba Abaraꞌamuke agaꞌnubaramike aꞌyaꞌma maba maekibewema, utawaitantiye. Pipa ago kamana wasiyoganaba kampaye. Amatitiꞌenawaka Koti: Arupu yagarawe, otamagina: Maba maekibewema, utawaitantiye.

¹⁴ Pipa mayamawe: Ago kamanapa aegaraꞌnagiba maba maeyasinta, imatiti pikenaenaba uwa waiyegina, Koti utawaitantintanamaba aiboꞌena pegana uwa waiyesine.

¹⁵ Taeba abintune: Ago kamanaꞌamaba aguntaenaraka Koti nkamoꞌenawapa aboraye. Piya, ago kamana kampa waintemisinta, kamparagaenaba kampa aboramisine.

¹⁶ Pigoya, Abaraꞌamu nkagaꞌnubara miyompeka, taeba Kotipa aegaꞌma tamatiti pokana, awagaena puratama utaratantintanaba tamiye. Piya, ago kamana abeꞌnagi ige ibiyenawanane. Abaraꞌamu puntisa puma aegaꞌma imatiti peꞌnagikenawe. Piya, Abaraꞌamu aeba aꞌyaꞌma mono kinaꞌmite tayabamawe.

¹⁷ Pika mono isaꞌama maya iye: Naeba kaepa uwoma to kina to kinaꞌmi nkiyabamantana pugatauwe, Koti piya untiye, iye. Pigoya, Abaraꞌamu aegaranti Koti, aeba purinta kinaꞌmi imaba imima, kampa aborantaꞌenagaba kegaꞌe yegina aborawaeye. Piya pemi Koti nkaobi utaratantintanaba waima esegi piye.

¹⁸ Pigoya, pai Koti Abaraꞌamukaba maya omintiye: Kagaꞌnugiba igeba uwomatakaꞌya aborakibewema, omintiye. Piyama omogana, Abaraꞌamuba: Uwoma to kina to kinaꞌmi nkiyabama mikibene kamana abitegina: Ago anasanawema, kampa napinta, Koti kamanaka napi napi puma aꞌmu puntiye.

¹⁹ Piya, aeba 100 kabu pogana, auꞌamaba purinta kina kanta puntiye. Piya pogana, wayaꞌwapa Sera pabiyama ago aentarama yagaraenaba kampa pemakana puntiye. Piya pogana, Abaraꞌamu agantanaba, amatitiꞌenawapa kampa kainta uwa waintantiye.

²⁰ Koti otanti kamanapa abimagina, amatitiꞌenawapa kampa kasima, tara tara agiba kampa napintiye. Piya puntana, Koti nkageba asagayogana amatitiꞌenawapa esegi puntiye.

²¹ Piya, utamarantintanama nkauꞌwapa Koti aewa aborakiyema, esegima napintiye.

²² Abaraꞌamu aeba piya puntika, Kotiba amatitiꞌenawa agama: Arupu yagarawe, otantiye.

²³ Pigoya, mono isapi: Arupu yagarawe, otantipa, Abaraꞌamu ae abintogaba kampa untine.

²⁴ Taekega kaga untine. Piya, Waꞌegare Isu purintapisa asinti, pi Koti aeti tamatiti potakanaba, pabiyama aeba tagama: Arupu kinatawe, uratakiye.

²⁵ Piya, aiboꞌenare maeragasomeka Kotiba otaogana Isuba puꞌma, arupu puratakibika purintapisa asintiye.

5

¹ Piya, taeba tamatitiꞌenaretaka Kotiba: Arupu kinatawe uratagi, kaga Kotiti paruyenabi miyune. Pi paruyenaba Waꞌegare Isu Karaisiti aborama tamintiye.

² Piya, Isu aewa awagaena pukena kipa aꞌwairatagi, awagaenara miyune. Aibumagi, Koti nkeꞌwasaenabi mikenaga taꞌmu puma napi napi pune.

³ Piyama, kaga kuntaenabi miyompekega taꞌmu pune. Taeba ago abune. Kuntaenabi mikenaenamaba tantawamapa maema esegi potaka, kampa taekita pukune.

⁴ Tantawamaba esegima waimaginaba, tara tagiba kampa napikune. Tara tagiba kampa napinta mima, Koti tamikena utaratantintanaga napima agawa pukune.

⁵ Kotintanaga agawa pekanaba, tanintanaba kampa tabukiye. Piya, Kotiba Aota Awamusa tamintegina, aeba Koti nkagu kaoꞌena tagupi ariꞌatantika tanintanaba kampa tabukiye.

⁶ Pigoya, paipa taeba kampa esegi puntuwakana kanaꞌwa arosaogana, pabi ntaga Kotiti takabitauwampe kinaꞌmiteka Karaisiti asiratakenaga purintiye.

⁷ Pigoya, kebaya uwa arupu kinaꞌmitakaba puꞌmagina iꞌikiye. Pipa kampabayawe. Piya, kebaya aogi taoꞌyagara kaꞌwainatakaba purikiye. Tarawo kaꞌantoma puꞌmabaya auꞌikiye.

⁸ Pigoya, aguntaena puma miyuwakana, Koti yogana, Karaisitiba taetaka purogana, pabiyama Koti agu kaoꞌenawa maema taeti aborantiye.

⁹ Piyama korankatasa taekaba: Arupu kinatawe uratantana, piꞌna nkaboboriba Koti nkamoꞌenawatasa tauꞌima aogi puratakiye.

¹⁰ Eya, taeba Koti kama potama miyuwakana, yagarawapa purometasa Kotiba maema aeꞌwati atokaeratantiye. Piyama atokaeratamagina, piꞌna nkaboboriba miyabaꞌenawatasa tauꞌikiye.

¹¹ Pigoya, abiwakaba kampaye. Piya, Waꞌegare Isu Karaisiti ntugarasa atokaeratantika Kotiti taꞌmu puyaba mikune. Atamu purikenaena aborantegina, Isu miyabaꞌena aborantiye

¹² Pigoya, taeba ago abune: Marupa wasana kaꞌwaina aguntaena agobiyogana, mamparasa kinaꞌmiteti aborantiye. Pigoya, aguntaenamaka uma purikenaena aborantiye. Piya, aꞌyaꞌma kinaꞌmiba aguntaena puwaentaka, purikenaenamaba aꞌyaꞌwaema igetiba abae pumagina aborantiye.

¹³ Pigoya, mono ago kamanapa kampa aborantogana, maru aguntaenaba wasanamiti aborama waintantiye. Ago kamanapa kampa waintomeka, aguntaenaba uwa wairite kanama waintogana, Kotiba kamana kampa uwaitaogana wasanaba uwa purintawe.

¹⁴ Piya, Antamube, ae aguntaena puntisa kampa punta yakarakiꞌnunkampibe, kaga purita kanauguna, Mosese aborama ago kamana uramintiye. Pigoya, marusa Antamu aeba kaꞌena aborantemisa puma, to aintisa yagara Karaisiti, to ka aborantiye.

¹⁵ Pigoya, Koti aboraramintintanabe Antamu nkaiboꞌenawape isigeba ka awametapa kampaye. Piya, ka yagarama nkaiboꞌenaraka uwoma kinapa puꞌwaewantawe. Piya puguna, Koti nkawagaenawapa asugasima, uwoma kina maema paru puratantiye. Piya, Isu Karaisiti aeba kaꞌwaina, awagaenawatasa uwa taeti aboraramima paru puratantiye.

¹⁶ Pigoya, Antamu nkaguntaena aintanawape, Koti nkaboraramintintanabe, isigeba ka awametapa kampaye. Piya, kamana kaꞌanto aemita puma akayuyogana, Koti antotaꞌena puma ata ika aboraramintiye. Piya pogana, Koti paruyena aboraramintintanaba uwoma aiboꞌenarepa asuꞌa puma arupuyena purataye.

¹⁷ Eya, ka yagarama aiboꞌena pogana purikenaenamaba asuragaintika, kapa kampa uwaba mikiye. Aibogana, Koti nkawagaena anosama arupuyena purataoga, paruyenara arakurompe kina, taeba miyabaꞌena maemagi, Isu Karaisiti aeba kaꞌwainaka uma tabe kinaꞌena puma mikune.

¹⁸ Pigoya, ka yagarama nkaiboꞌenaraka aꞌyaꞌma kinaꞌmite ata ika aboraramintegina, pabiyama to ka yagarama nkarupu yugawataka aguntaenarepa asuꞌa puragasogana, miyabaꞌena aꞌyaꞌma kina aboraramintiye.

¹⁹ Eya, ka yagarama kamana aeguma akayuyometaka uwoma kinaꞌmiteti aguntaenaba aborantiye. Pabiyama to ka yagarama kamana wasiyometaka uwoma kinaꞌmitepa arupuyena aboraramiye.

²⁰ Pigoya, ago kamanapa tamogana aiboꞌenarepa aborawaentiye. Aguntaenamaba aboraurite iyogana, awagaenawampa asugasima pumaerataye.

²¹ Eya, aꞌyaꞌma kinaꞌmiti aguntaenamaba purikenaena maema aborantisa puma, pabiyama aꞌyaꞌma kinaꞌmiti Koti nkawagaenawampa nkarupuyenama mpiyaba eꞌwasaena maema aboraramegina kabirataye. Pipa Isu Karaisiti, Waꞌegarempa ntugarasawe.

6

¹ Pi kamanaꞌama nkagowakaba nanawe ukune. Aguntaenama ntuga pekanaba Koti nkawagaenamaba aborama asugaikiye, piya ukuna, a.

² Pipa kampaye. Taeba puꞌmagi aguntaenaba ago kasune. Piya, ayama to kake taogama aguntaenama ntuga puyaba mikune. Pipa kampaye.

³ Mono wani paiꞌma Karaisiti Isuti atokaentompeꞌnagita, purikenaenawapi paiꞌma atokaentune. Pikaba kampa napiyewo.

⁴ Pipa mayamawe: Purikenaenawapi paitatama, aeke kaga tarubinti kairatantiye. Piya, tabarempa aeba eꞌwasaenawatasa Karaisiti purintapisa asitaogana, mintisa puma, taeba pabiyama aososima to awameta miyaba mikubompeka asiratantiye. Taeba Karaisitige kaga eꞌwasaenayaga mikune

⁵ Taeba Karaisitige atokaema purintisa tauga puntompeka, pipa to aege atokaema asintemisa tauga pukune.

⁶ Taeba mayama abune: Paisa tagupa Isuke kaga maripora aeguntaka, tagu tauꞌama nkaguntaenama nkesegiyenaba iyoba atama, aguntaenama kayokayaꞌenaba to kake pusanaga iyoba atantiye.

⁷ Piya, kaꞌwaina puꞌwamiꞌnaba aguntaena pukenaenawapa kasaye.

⁸ Taeba mayama abibebe pune: Karaisitige purintompeka, piyama aege kaga miyaba mikune.

⁹ Karaisitikaba mayama abune: Aeba purintapisa asintemikana, to kakeba kampa purikiye. Piya, purikenaenama nkesegiyenawapa aeti kampa waintika, uwa igiga piye.

¹⁰ Piya, purintipa pipa ka yaga aguntaenamati puꞌwantiye. Ibaba mintipa, pipa Kotiti mintiye.

¹¹ Piya, tigeba pabiyama: Aguntaenamati ago puꞌwaunema, piya yiyo. Karaisiti Isuga atokaentompeka Kotiti taogama miyunema, yiyo.

¹² Piya yigina, aguntaenama tiꞌama nkwaꞌegaenaba a-puritano. Piya, tiꞌama iꞌni ntapiyenawapa a-nkaegaraiyo.

¹³ Tigeba tigisa tiyatipa aguntaenamapa a-nkamigina, ataenama kayokayaꞌenaba a-peno. Kampaye. Tigeba purintapisa asiritantika, tigupa Kotipa amintiri, tigisa tiyatipa Koti amigina arupuyenama kayokayaꞌena peno.

¹⁴ Piya, ago kamanapa kampa tigeba kabiritaye. Pipa kampaye. Ibaba Koti nkawagaenama kabiritaye. Pigoya, aguntaenamaba waꞌega kantaba to kakeba kampa puritakiye, untiye. Taeba arupuyenama ntuga kina mintune

¹⁵ Pigoya, pikaba taeba nanawe ukune. Ibaba ago kamanaꞌamaba kampa kabiratagi, Koti nkawagaenabi miyompeka aguntaenaba pukuna, a. Pipa kampaye.

¹⁶ Tigeba kampa abewo. Tigeba to wainati uma atokaemagiri awamu wasiyigina, kayokaya kinaꞌwa tibabekiri kabiritakiye. Piya, aguntaena wasikibepa kayokaya kinaꞌwa mima purikena ikantanaba maekibewe. Mono wasikibepa kayokaya kinaꞌwa mima arupu ikantanaba maekibewe.

¹⁷ Tigeba aguntaenama kayokayaꞌena purite kananta kanaba, ibaba aꞌya waye. Mono ago urimima tiyakinta, pabi nkawameta tigeba abima wasiyeka, Kotipa taꞌmu potaune.

¹⁸ Tigeba aguntaenabisa akariyobatitagiri arupuyenama kayokaya kinaꞌena puma miyeka, taꞌmu potaune.

¹⁹ Piya, napiyenarimpaba kampa aogi pegi, wasanami kamanata awame puma ago yone. Tigeba paipa tigisa tiyatipa uwa atauguna, iꞌnintanama kayokayaꞌena pogiri antageꞌena toma toma puta ima mintantawe. Pai mintantasa puma, ma kanabipa tigisa tiyatipa uwa ataigina arupuyenama kayokayaꞌena pekiri aota miyiyo.

²⁰ Pigoya, paipa aguntaenama kayokayaꞌena puntapa, arupuyena wasikenaenaba tigeti kampa aborantiye.

²¹ Piya, pai puntantanagaba ibaba tini pewe. Pipa nana auꞌwapa aboraogiri maentakawe. Pipa kampaye. Pintanama nkantota ikankapa purikenaenawe.

²² Pigoya, ma kanabipa aguntaenama nkigaꞌnaba akariyobatitantika, Koti kayokaya kinaꞌena puntawe. Piya puntaka aota mikena auꞌwapa maemagiri, antota ikankapa maema miyaba mikibewe.

²³ Piya, aguntaenama nkikantanaba purikenaenawe. Pigoya, Waꞌegare Isu Karaisititi atokaeyompeka Kotiba miyabaꞌena uwa tamiye.

7

¹ We, naoꞌmitaba, tigeba ago kamana abinta kinaꞌmititi ma kamanapa urimuwe: Ago kamana wasikenaenaba purekanaba aꞌya waye. Pipa kampa abewa, a.

² Piya, waya kaꞌwaina aeba awaewampa aogama mintakanaba, ago kamanaꞌamaba: Awaege airokaema miyeno, iye. Piya, awaewampa pureginaba, ago kamanaꞌamaba: Wa waya ka kina kanta puma miyementanaba aꞌya waye, iye.

³ Pigoya, ka waeꞌma aeba awaeba uwa aogama mintegina, atate wama to wa umaeyamipa, aeba kumi waene. Awae puꞌwakanaba ago kamanatapa kampa uma atokaeyakana, to wa maekibipa, kumi wae kampa mima kanara mikiye.

⁴ We, naoꞌnempitaba, pi kamanapa mayamawe: Karaisiti nkauke atokaema kaga ago kamanati puꞌwantagana, to kakemaba kampa tirakuriye. Piya, taeba Kotiti auꞌwapa aborakenaga to wainati atokaeratantiye. Pi purintapisa asinti ntagarari atokaeratantiye.

⁵ Pigoya, paipa paisaenabi mintantompe, pi kanabipa agunta napiyenarempaba yogawa puma tauti waiyogana, tagisa tayankamaba ago kamana akayuma, aupa purikenaenaba maema aborantine.

⁶ Piya, ibaba paisa isaꞌama kipa takabitama Awamusaꞌama kasa kita mikenaga, taeba ago kamanati puꞌwaokana tarakurintaꞌenaba iyoba tatantiye. Aguntaenama ata purataye

⁷ Pigoya, pikaba nanawe ukune. Ago kamanapa pipa aguntaenawe, ukuna, a. Pipa kampaye. Ago kamana kampa waintesinta aguntaenanempa agoba kampa abosine. Ago kamanaꞌama: To wainantanagaba a-kauka po, kampa yemisinta, nauka pukenagaba kampa napiyosine.

⁸ Piya, aguntaenama ke irogana, Koti unti kamanaꞌama nantabintiba ata tonaronaga nabikenaenaba aboragi, aguntaenaba puwe. Pigoya, ago kamana kampa waintesinta, aguntaenamaba purinta kina kanta puma kampa naupipa pima yesine.

⁹ Paipa ago kamana naeti kampa waintometa, kanara aogima mintantone. Piya puma Koti unti kamana abuwaganaba, aguntaenamaba naeti aboraogana nauma nagupa puꞌwantiye.

¹⁰ Piya, pi Koti unti kamanaꞌamaba: Eꞌwasaenaneta kanaoga agauwantanama utanataogana, nauma nagupa puꞌwantiye.

¹¹ We, Koti unti kamanapa abuwagana, pi kamanatasa aguntaenama ke iꞌma namiyo puma naeguntiye.

¹² Piya poga taeba agantune: Ago kamanaꞌamaba antageꞌenaba kampa puma aota waiye. Piya, Koti unti kamanaꞌamaba aota waima arupu puma aogiyena piye.

¹³ We, pipa aogi kamanaꞌama naeguntiya, a. Pipa kampaye. Aguntaenama naeguyoga purintone. Piya, aguntaenama aogi kamanataka uma naeguntika agowapa taga aborantiye. We, aguntaenama Koti unti kamanapa aꞌwae puma to tabe aguntaenaba piye. Aguntaenamabe aogiyenamabe kaga tae taupi yoga piye

¹⁴ Pigoya, taeba mayama abune: Ago kamanapa pipa inatisaenawe. We, naeba mampabisa yagara mima aguntaenama kayokaya kina miyuwe.

¹⁵ Piya, nabugaintanaba kampa punta, pi kampa nabugaintanaba puwe. We, nae pontanama nkagowapa kampa aogima abuntuwe.

¹⁶ Piya, kampa nabugaintanaba popa, naumanepipa ago kamanakaba kanarane, yuwe.

¹⁷ Piya, antageꞌena popa, pipa naene naumabisaba kampa pogana, aguntaenama nagupi waima tutusunatagi, puwe.

¹⁸ Naeba mayama abuwe: Naeꞌne ntaupintiba aogiyenaba kapa kampa waima aboraye. Piya, aogiyenagaba nabegi, pipa auꞌwa maema aborakenaenaba nayapisaba kampa puwe.

¹⁹ Naeba aogiyena pusanagaba nabegi kampa puwe. Piya, ataenaba kampa pukena pontanaba uwa puwe.

²⁰ Pabiyamagi, kampa nabemintanaba nayapisaba popa, naenepa kampaye. Aguntaena nagupi waintintanama tutusunatama piyaenaba piye.

²¹ Pigoya, mayama agoba agauwe: Naeba aogiyena pusanagaba nabegina, ataenamaba naeti aborama waiye.

²² We, nae nagupintiba Koti nkago kamanakaba nabugaye.

²³ Pigoya, nagisa nayati kaꞌenaba wainti, piꞌna napiyenanempapa kama potama igaꞌna ubuꞌnataye. Piya, nagisa nayapinti waintemi aguntaenama igaꞌna punatama miyegi, ae kayokayaꞌena puma miyuwe.

²⁵

²⁴ Piya pumagi, naeba napiyenanetasa Koti nkago kamana wasinta, nauꞌnetasaba aguntaenaba wasiyuwe. Piya, naeba aꞌyugu yagaranawe. Nauꞌne puꞌwakena antotaꞌenaba kebaya iyobaꞌnatakiye. We, Isu Karaisiti Waꞌegarempa aeba iyobaꞌnatakiye. Pika Kotiti naꞌmu potano.

8

¹ Pigoya, ibaba Karaisiti Isuti atokaentompe kina, taeti ata ikapa kapa kampa aboraramikiye.

² Piya, Karaisiti Isuti atokaeyuwakana, Awamusaꞌama, aeba miyabaꞌenama nkago, aeba aguntaena purikenaenama nkagobisa iyobatatantiye.

³ Pipa mayamawe: Taeba mampabisa kinaꞌmiteti esegiyenarepa kampa waiyegina, ago kamanaꞌama kampa tauꞌiye. Piya, ago kamanaꞌama kampa pemintanaba Koti aewa piye. Aeba yagarawa otaogana kanama ampa agunta kinaꞌmite nkawameta aborama, tae aguntaenama nkantota ika puratama asuꞌa puragaintiye.

⁴ Piya, ago kamanaꞌama nkarupuyenama nkauꞌwapa aboranema otaogana, taeti, paisa kipa kaite Awamusaꞌama kiꞌi waompe kinaꞌmiteti aborama ika puratantiye.

⁵ Pigoya, paisa ki aegara kinaꞌmiba napiyenawaipaba mampabisaenari atokaeyagina, pi Awamusaꞌama ki aegara kinaꞌmiba napiyenawaimpaba Awamusaꞌamantari uma atokaeye.

⁶ Piya, mampabisaenari atokaeya kinaꞌmitiba puꞌwakenaenaba aborakana, pi Awamusaꞌamati atokaeya kinaꞌmitiba miyaba eꞌwasaena waima paruyena waikiye.

⁷ Piya, wasanama napiyenawampaba mampabisaenari atokaeyiꞌnaba Kotipa kama potamipa, pipa nanagawe. Aeba Koti nkago kamanapa kampa wasima, pipa kampa piyaenaba kanara pemika, kama potaye.

⁸ Piya, paisa kiꞌi aegaꞌma nase kinaꞌmikaba Kotiba kampa aꞌmu puwaitakiye.

⁹ Pigoya, Koti Nkawamusaꞌama tigupi mintika, pipa mampabisaenamatiba kampa atokaenta, Awamusaꞌamati atokaema mintawe. Piya, kaꞌwaina aeba Karaisiti Nkawamusa kampa mintemiꞌnaba Karaisiti nkaokinapa kampa miye.

¹⁰ We, aguntaenama tipa aeguyegina Koti nkaobi ago puꞌwaye. Piya, Karaisitiba tigupi mintegiripa, tigeba Koti nkaobi arupu kinaꞌena puma, tigu timawamaba aogama miye.

¹¹ Piya, Isu purintapisa asintemi ntagarama Nkawamusaꞌama tigupi miyaba miyekana, Karaisiti Isu asintemiꞌnaba otakana, tigupi miyemi Awamusaꞌwapa tiꞌama purintapisa pabiyama asiritakiye. Awamusaꞌama Koti ntagaraena purataye

¹² We, naoꞌmitaba, iretare waintipa, pipa arirasaenama nkiretaba kampa waintika mampabisaenari uma atokaekenaba kampaye.

¹³ Piya, tigeba arirasaenamanati uma atokaekibepa purikibewe. Piya, tigeba Awamusaꞌamati atokaema mintiri, ae esegiyenawatasa arirasaena pentanaba aegugasimagiri, eꞌwasaenara miyaba mikibewe.

¹⁴ Pigoya, Koti Nkawamusaꞌama paitama keꞌi iregini wa kinapa, igeba aꞌyaꞌma Koti ntagaraena puma miyewe.

¹⁵ Eya, Koti aeba taekuru puma igaꞌna kina kanta kinapa kampa tababuma, ae yagaraena puma miyompe kinapa taba purataye. Piya puratagi, taeba aeka: Naba-o, naba-o, taga kegaꞌe yune.

¹⁶ Piya, taeba Koti ntagara araga kiꞌnu mintune. Pi kamanapa Aota Awamusaꞌamabe tae tagupe kaga aboraye.

¹⁷ Piya, Koti ntagara aragawa mintapa, aintiba Kotintanaba kanara maekune. Eya, Isuge kaga kapiꞌena maekune. Pigoya, taeba mataꞌi Isuge kaga tauki nakiyena aesaga pukubompepa, aintiba aege kaga eꞌwasaenaba maekune. Aintiba tabe eꞌwasaena maekune

¹⁸ Pigoya, naeba kamana aꞌyigimpa abopa, ibanto tauki naki puma kuntaena maeyompentanaba anagiyenawe. We, aintiba eꞌwasaena taeti aborakibintanaba asugasima tabera waikiye.

¹⁹ Piya, Koti ntagara kiꞌnupa taeti eꞌwasaena aborakibi ntagaga, aꞌyaꞌmaena Koti pumarantintanaba iyowa asagayuma agama aobi puma miyewe.

²⁰ Eya, aꞌyaꞌwaemaenaba kamparagama waintana ataenaba piye. Pipa ige napiyenawaipisaba kampaye. Koti aewa igaꞌna ubuꞌitagini piyama waiyewe. Pipa ainti aborakenaenamaka aobi puma miyewe.

²¹ Piya, pabi ntagaba Koti pumarantintanaba igaꞌnabisa abararakibintanaba akariyobakasima, Koti ntagara araga kiꞌnu nkeꞌwasaenayaga kaga tababeka mikune.

²² Piya, taeba abune. Wayaꞌma yagaraena pikena pegina: A-e, a-e, uma miyemisa puma, aꞌyaꞌwaemaena Koti pumarantintanamaba kaga ikegini miyewe.

²³ Pintanama wanane. Taepe kaga taukegi miyune. Piya, maru yawama aosa pagina agagana aintiba aꞌwapa aeyamisa puma, marupa Kotiba awamusapa piyama tamimagina: Yagaranene, uratantiye. Piya pegi, ibanto tauki nakiyena maema tagupi: A-e, a-e umagi, Koti taupa tumpaema ae yagara asiratakibi ntagaga taeba aobi puma miyune.

²⁴ Piya puma, Koti taba pukiyema aobi pompeka tauꞌintiye. Piya, auꞌwa aboramisinta kampa aobi pompesine. Aboramintanagaba wasanamaba kampa aobi piye.

²⁵ Piya, aobi pompentanama nkauꞌwapa kampa aboramika, taeba aobi puma mintapa tara tagiba kampa napikune.

²⁶ Pabiya puma, Awamusaꞌama amuntanareka uma taoꞌmaeyamika tara tagiba kampa napikune. Piya, nunamu aogima ukubompentanaga kampa abibebe pompeka Awamusaꞌama aewa taoꞌmaeyagi, wasanama kampa yisiya puma: O-o, yokana, Kotiti maete iye.

²⁷ Piya, Awamusaꞌama aeba Koti nkabugaintana aegaꞌma Kotiti atokaentompe kina taepa taoꞌmaema, kamanatepa maete iye. Piya pegana, taguꞌama agabasasa yagara, Koti, aeba Awamusaꞌama ntapiyenaba aogima abintiye.

²⁸ Pigoya, Kotiti tagu amompe kina, abugaintanaga untika aegaraompe kina, taeti aꞌyaꞌma aboraramintintanaba Koti ae aogi puma esegi purataye. Pipa ago abune.

²⁹ Piya, marupa taeba aegarakubompeka Koti abogana kanarasaogana, taepa yagarawa ae aoga kaꞌmasa piyema uratantiye. Piya poga, taeba aꞌnatabaraena uwoma pekana, aewapa pi tagantontana puma mikiye.

³⁰ Piya, Koti aeba uratanti nkawameta tababuntiye. Tababunti nkawameta arupu puratantiye. Arupu puratanti nkawameta eꞌwasa puratantiye. Koti nkantaraꞌenamaba kampa tatakiye

³¹ Pigoya, Koti piya pemintanaga maya ukune: Kotiba aoꞌena puratakanaba, kebaya asuragaikiye, a. Pipa kampaye.

³² Piya, Kotiba aeꞌwa ntagaraga kampa aemaranta taeti taoꞌmaeyanema, otantiye. Pi otanti ntagara aeba kaꞌisa aogiyenaba akutatakiya, a. Pipa kampaye.

³³ Pigoya, Koti tababemi kinapa kebaya kamanapa uratakiye. Pipa kampaye. Kotiba aewa: Arupu kinatawema, uramiye.

³⁴ Piya, ke taepa tapasanakiye, a. Kampaye. Karaisiti Isu aeba taeka purogana asitaogana, ima Koti nkayatakanti asu mimagina, nunamu uma taoꞌmaema miye. Aeba kampa taepa tapasanakiye.

³⁵ Pigoya, Karaisiti nkagu kaoꞌenabisa kebaya tagarubakaikiye, a. Tauki nakiyenareno, taekuruyenareno, karana puratakenaenawo, kabo pukenaenawo, tauka mikenaenareno, kamparaga puratakenaenawo, kaso taegukenaenawo, Karaisiti nkayapisaba ke tagarubakaikiye, a. Pipa kampaye.

³⁶ Pintanaga taeke mono isaꞌama maya iye:

We, Koti, kaetaka aꞌyaꞌma yagaba taeguyega purune, iye.

Piya, igeba tagaga, yaga aeguyesa kina mintokini taegukena pewe, iye.

³⁷ Pipa aerawane. Agu kaoꞌena puratanti ntagara, Karaisiti, ae esegiyenawatasa pi ata puratamintanamapa asugasima aborama miyune.

³⁸ Pika naeba mayama abibebe puwe: Kaꞌenamaba Koti nkagu kaeꞌenabisa kampa tagarubakaikiye. Purikenaenabera mikenaenawe. Kampaye. Enisorebera toma toma paitanta kinane. Ibanto waintintanabera ainti aborakibintanabera to ka esegiyenawe. Kampaye.

³⁹ Inatisaenabera mabintisaenawe. Pipa kampaye. Waꞌegare Isu Karaisititi atokaentompeka kaꞌena aboramintanaba Koti nkagu kaoꞌenabisaba kampa tagarubakaikiye.

9

¹ Pigoya, naeba kumparipa kampa uma, Karaisiti kinaꞌmana taga kamana yekiri abiyo: Aota Awamusaꞌama agonepa abegi, kamana ubebe puma urimuwe.

² Naeba Yuta naokinaꞌmikaba taga nantaraꞌenaba nantabaipintiba asi nasiba tabera puwe.

³ Igeba mono waintagaꞌena puma mantari ikenaenaba piyama uwa waintemisinta, igeka uma Karaisititisa nagarubaꞌma ata ikantanawaipa namemika, naeba nabiye, yosine.

⁴ Piya, igeba Isureyo kina, Koti ntagaraena pe kinane. Piya puma, eꞌwasaenaba igeti aboramagina uma esegi pukena kamanape, ago kamanape, monota mikenaenabe, ainti aborakenaenagaba umarantaꞌenaba igeti aborantiye.

⁵ Piya, iyabamagi igeba mono agona puma mintantawe. Piya puguna, ige tupisa Koti utaratanta yagara, Karaisiti, aborama wasanaenaba puma aꞌyaꞌwaemaenama nkaiꞌne Koti miyegi, agegaꞌe maema asagayuyaba miyeno. Tagane. Mono waintage kina igeba Koti nkaokinane

⁶ Pigoya, kaꞌisa Yuta kinapa kampa aegaragana: Koti kamanaꞌamaba uwaena kanta piyeba, a-siyo. Pipa kampaye. Piya, Isureyo tupisa aboranta kinapa kaꞌisa Isureyo kinatakaꞌyapa taga kampa mintawe.

⁷ Piya, Abaraꞌamu ae kuratasa aboranta kina igeba taga Koti nkaokinaꞌena kampa puwaentawe. Pika Koti Abaraꞌamupa maya omintiye: Ugamintontanama nkaꞌwapa Aisakiwe. Ae agaꞌnubara taga kaeꞌenaenamana pukibewema, omintiye.

⁸ Pi kamanaꞌama nkagoba mayama waintiye: Arirautasa aboranta kinaꞌmiba Koti ntagaraenaba kampa puwaentawe. Piya, Koti utaratanta kamana aegarantompe kina, taemana taga Abaraꞌamu tuntana puntune.

⁹ Piya, Koti otanti kamanapa mayamawe: Kaboba ka aꞌya puwaka naeba to aborakana, Seraba masi yagara yakari pukiye, piya untiye.

¹⁰ Pigoya, abiba kampaye. Piya, tayabama Aisaki ntagaraena agaꞌe pogana, Arebekapa Koti aeba kamana maya omintiye:

¹²

¹¹ Tara yagaraena puwaisitagana, agantowampa aꞌnanto akaꞌi mima kayokayaꞌena potanaoma, omintiye. Piya, isigeba kampa aborama aogiyenabe kaintanabe kampa puntusuguna Kotiba pi kamana untiye. Piya, Kotinta esegi kamanaꞌwatasa aeti atokaekenaga aboramagina, kana yagara tara isige puma mikenaenawaisikaba kampaye. Kotiba aewa ntapiyenaba aegaꞌma piya untiye.

¹³ Pika mono isaꞌama kapa maya iye: Naeba Yekobuka nabegi, Isopa kama potauwe, untiye, iye.

¹⁴ Pigoya, pikaba nanawe ukune. Kotiba arupuyenaba kaꞌisa kampa piye, ukuna, a. Pipa kampaye.

¹⁵ Koti aeba Mosesepa maya omintiye: Naeba ka yagaramaka nantara potakena puntapa nantara potakuwe. Piya, to ka yagara aoꞌmaekena puntapa aoꞌmaekuwe, untiye.

¹⁶ Pika wasanamita pukena pompentanagabe napiyompentanagabe kampa napinta, aeꞌwantanaga napima antaraꞌena purataye.

¹⁷ Piyama Koti Parao kamana ominti, pipa mono isapi mayama kaemarantane: Naeba kaeti esegiyenanepa maema aborakana nage nawaga kamanaꞌnempaba aꞌyaꞌma maga maga kinaꞌmiti aboranema uma asigatauwe, untiye, mono isaꞌama piya iye.

¹⁸ Piya, Kotikaba mayama abiyo: Koti aeba ka yagaraga antara potakena puntanaba, pipa antara potakiye. To ka yagaraga napiyenawa akunikena puntanaba, akunikiye. Mono ago kinaꞌmi ikaꞌintaesi potantawe

¹⁹ Pigoya, kaeba maya unamikibenema napiyuwe: Koti nkabugaintanaba wasanamaba kampa aibasanagina, nana pegina aguntaenarekaba kamanapa uratayema, nabigakibene.

²⁰ We, kaeba wasanagawe. Ayama antotapa Kotipa omikibene. Pipa kampaye. Aboragatanti ntagaramapa: Nanaga pi nkawametapa aboranatanema omikibena, a.

²¹ We, kabo pemi ntagara aeba aꞌmarasa akaeꞌma tara kabu puma, kapa naukaena puntana, to kapa uwa anagiyenaba piye. Piꞌnaba kamparaga piya, a. Kampaye. Pipa aeꞌenawane.

²² Pigoya, Koti aeba amoꞌenawapa maema aboraka, aꞌyaꞌma kinaꞌmitaba esegiyenawata agakubompeka, paebuma miye. Piya, aintiba amo ikantana imima kaitakibi kinaꞌmikaba, ibaba tabera agoya puwaitama paebuma uwa itamipa, aeꞌenawane.

²³ Piya, pi ntugarasa aꞌyaꞌma kinaꞌmite taobi ae antaraꞌena utaratanti kinapa tabera eꞌwasaenawa aboraramikiye.

²⁴ Piya, aeti atokaeyiyema tagegaꞌe yi kina, paipa eꞌwasaenaraka utaratantine. Yuta kina ibintogaba kampaye. To marisa kinape kaga atokaekibe kinakega utaratantine.

²⁵ Pigoya, pika Koti yogana poropete Oseya kaemaranti nkisapi maya iye:

Paipa to marisa kinakaba: Naokinaꞌnepa, kampa untoka, ibantoba: Naokinane, uwaimukuwe, iye.

Paipa kampa nabunti kinakaba ibantoba: Nabugai kinatawe, uwaimukuwe, iye.

²⁶ Piya: Nae naokinapa kampa mintawe uwaiminto kinakaba: miyaba Koti ntagarawe, uritakuwe, iye.

²⁷ Piya, Aisayaba Isureyo kinaꞌmika antaraꞌena pumagina maya untiye: Isureyo kina igeba wani nkawamori kepa kampa aisempesa puma, pi kanara mikibepisa Kotiba tara kinaꞌanto iꞌikiye, iye.

²⁸ Pi ntagaba Waꞌegawamaba kamanaꞌwaipa tumpa arisaꞌma aꞌya igasima, mampabisa kinaꞌmi ikankaipa imikiye, untiye.

²⁹ Pigoya, pikaba Aisayaba ainti aborakibintanaga to maya untiye: Mantarisa tabe Waꞌega Yagara aeba kampa antara puma uwaena Yuta tunkantonto uwa kampa itasinta, Sotomu kinape Komora kinape ige aꞌya wantasa nkawame pesine, untiye. Yuta kinaꞌmiba arupuyena maekenaga igiga puntawe

³⁰ Pigoya, pikaba nanawe ukune, a. Maya ukune: To marisa kinaꞌmiba arupuyena maekenagaba paipa kampa ebi ebi yuga puntakini, ibaba imatitiꞌenawaitasa arupuyenaba maeyawe.

³¹ Piya, Isureyo kinaꞌmiba ago kamanaꞌama nkaꞌwapa arupuyena maekenaga ebi ebi yuga puma ago kamana wasintapa, igewai ntugarasaba ago kamanaꞌama nkaꞌwapa kampa aborama maeyawe.

³² Nanagawe. Pipa mayamawe: Igeba imatitiꞌenarakaba kampaye. Uwa mikenaenawaitaka ebi ebi puma maekena puntawe. Pipa kampaye. Mikenaenarasaba arupuyenaba kampa maekenaenawe. Piya, keꞌisa yabankama igisa aimisa imegini wareꞌnasa puma, arupuyena maekena kipa kampa aogima agantawe.

³³ Pika mono isaꞌama maya iye:

Abiyo. Saiyoni kuma, Yuta kinaꞌmi kuma, pita atao ntabapa wasana igisa aimisaꞌma wareꞌnakena esegi yaba atauwe.

Pi ntabankama aegaꞌma amatiti pikibiꞌnaba anipa kampa pikiye, untiye, iye.

10

¹ Naoꞌmitaba, Yuta naokinaꞌmi nkiꞌikenaga nagupintiba tabera nabegi, pika Koti esotauwe.

² Naeba uma igabebe puma mayama igauwe: Igeba Koti ntuga pukenaba esegima puntiniba, agowapa kampa aogima agawe.

³ Piya, arupu puratakena kipa Kotitisa aboraogini, kampa napinta igewai pukena kika aguyosagantawe. Piya pumagini, Koti nkarupuyena kipa ikabitama atantawe.

⁴ Pigoya, aꞌyaꞌma tamatiti pompe kinaꞌmiteti Karaisitiba ago kamanaꞌama kiꞌwapa akutagasagi, arupu tagigaꞌe maeyune. Koti ae abemika aꞌyaꞌma kina ibabukena piye

⁵ Pigoya, Mosese aeba maya kamana kaentiye: Ago kamanaꞌama nkarupuyena wasiyaba miyemiꞌnaba, aeba eꞌwasaenara miyaba mikiye, untiye.

⁶ Pigoya, tamatitiꞌenama nkarupuyenawakaba ka kamana mayama waintiye: Piya, kebaya naoꞌmaeyanema mantari ima Karaisitipa ababute tumikiye kamanapa, kaega kaumabisaba a-so.

⁷ Piya: Kebaya naoꞌmaeyanema purinta kinaꞌmi kumati tumpa Karaisitipa purinta kinaꞌmitisaba ababute ikiye kamanapa, a-so.

⁸ Piyaba kampaye. Tamatitiꞌenama nkarupuyenawaka kamana mayama waintiye: Mono pipa pagasaꞌiba kampa waintiye. Pi kamatiti kamana ugamima kayakompentanaba kawamupipe kagupipe waintiye.

⁹ Piya, wasanami nkiyobi: Isu aeba Waꞌeganene, kawamupisa umagina, Koti aepa purintapisa asitama kamintika kagupinti aogima abegana, kaepa kauꞌiyeno.

¹⁰ Piya, kagutasa Isu nkaegaꞌma kamatiti puntana, Koti nkaobi arupu kina mikibene. Kawamutasa wasanami nkiyobi ae age asagayuyegana kauꞌikiye.

¹¹ Pika mono isaꞌama maya iye: Ae aegaꞌma amatiti pikibiꞌnaba kampa anipa pukiye, iye.

¹² Pigoya, Yuta kinape to marisa kinape Koti nkaobi pakoba kampa punta kaꞌmasa puma miyegana, Waꞌegaba aꞌyaꞌma kinaꞌmite Nkwaꞌegawe. Piya, aeka agisokana aꞌyaꞌma kina aogima kabirataye.

¹³ Piya: Waꞌegawama nkage uma agisikibiꞌnapa Kotiba auꞌikiye, iye.

¹⁴ Pigoya, aeti kampa aegaꞌma amatiti pemiꞌnaba, ayama agisikiye. Piya, monoꞌwapa kampa abemiꞌnaba, ayama aegaꞌma amatiti pikiye. Piya, monopa kampa uwaimekiniba, ayama abikibewe.

¹⁵ Piya, Kotiba mono uwaimikena yugarapa kampa uwaitantakiniba, ayama uwaimigini abikibewe. Pipa kampaye. Pigoya, pika mono isaꞌama maya iye: Aogi kamana maete wa kinaꞌmiba naukaena pewe, iye. Isureyo kinaꞌmiba aogi kamanapa kampa aegarantawe

¹⁶ Pigoya, aogi mono kamanapa kaꞌisa kinaꞌmiba kampa abewe. Pika Aisaya maya untiye: Waꞌega, kamana yoganaba taepisa ke abima aegarayema, abigantiye.

¹⁷ Pigoya, taeba mayama abune: Karaisitika awaga kamana yegini, pi aogi kamana marupa abimagini imatiti pewema, abune.

¹⁸ We, kaꞌisa kinaꞌmiba monopa kampa abintawema, napiyuwe. Pipa kampaye. Igeba ago abintawe. Pika mono isaꞌama maya iye:

Koti nkawaga kamana pumarantintanama nkawamusa agawamaba aꞌyaꞌma maba kanarasa waentine, iye.

Aogi awaga kamanaꞌamaba matuka matuka abae puwaentine, iye.

¹⁹ Pigoya, to kake mayama napiyuwe: Isureyo kinaꞌmiba igeba kampabaya agoba aogima abibebe puntawema, napiyuwe. Pipa kampaye. Igeba ago abintawe. Pika Moseseba kamana mayama kaenti, pipa maru ukuwe:

Naeba uwa kina ibabekini asurigasigiri, monotaka abima tintawama ata punatakibewe, Koti iyema, untiye.

Piya, to marisa aibo kina ibabekiripa timo pukibewe, iyema, untiye.

²⁰ Pigoya, Aisayageba kampa aekuru punta maya uma aborantiye:

Kampa naguyosaꞌma mintanta kinaꞌmi nabatantawe, Koti piya iyema, untiye.

Piya, naeka kampa nabigama mintanta kina igeti aborantone, iyema, untiye.

²¹ Pigoya, Isureyo kinaꞌmikaba to maya uma kaentiye:

Naeba eꞌero kanabi kamana akayuma iyekita punata kinaꞌmikaba nayakoga puwaitama mintantogini, aꞌa-o uma pumireri punatantane, iyema, kaentiye.

11

¹ Pigoya, pikaba naeba maya yuwe: Kotiba aokinapa igasima ataena puntina, a. Pipa kampaye. Naegeba Isureyo yagaranawe. Abaraꞌamu, pi nkigaꞌnabisa, Penisameni nkaruyenabisa aborauwe.

² Piya, Koti pai kibiꞌma ibabunti nkaokinapa kampa igaikiye. We, tigeba Iraiya kamana mono isapi kaemarantapa kampa aisumagiri abewo. Aeba Isureyo kinaꞌmikaba amo puma Kotiti kamana mayama uwaitantiye:

³ We, Waꞌega, igeba poropete kinakapa iyeguwaegaintini, kaeti arata yare pumaranta akusabakaintawe. Piya puntakini, naeba nabinto mintogini naegukena yewe, untiye.

⁴ Piya yoganaba, Kotiba aya kamana aꞌwae pomintiye. Aeba maya omintiye: Naeꞌneti ibabumaraoꞌnagiba 7,000 kina, abeꞌisa kinaꞌmi koti Peyaripa kampa irakabintane, Koti piya untiye.

⁵ Piya, ma kanabipa pabiyama kaꞌisa Isureyo kinaꞌmiba kampa ikabitagana Koti awagaenawatasa ibabiye.

⁶ Pipa ige yoga puma esegiyena petasaba kampaye. Koti awagaenawatasa puwaitaye. Piya, esegiyenawaitasa ibabesinta, awagaenaba awagaba kampa pesine.

⁷ Pigoya, pikaba nanawe ukune. We, Isureyo kinaꞌmi ibugaintanaba kampa aborantawe. Koti kibiꞌma ibabuwaitanta kinaꞌmiba ago maeyagini, aꞌyaꞌma to kinaꞌmiba iguꞌama akukasima esegi puma mintawe.

⁸ Pigoya, pika mono isaꞌama maya iye:

Koti aeba iguꞌamapa maema aꞌyugu puntana, iyoba aerikaewaitama, igeba akunkaitata kanaye, iye.

⁹ Piya, Tebiti aeba pikaba ka maya uma kaentiye:

Igeba iꞌmu ntanintawai nama: Koti nkaobi aogiyena punema napiyigina, kobakena igaꞌna kanta puwaitama, kukoꞌama pisa puma, yaga kaganta pekini, wareꞌnaigina antotaꞌena aborawaimikiye, iye.

¹⁰ Piya, iyo tunusuwagini kampa aogima agawa, kaeba ikaba aegayotagini miyaba miyiyo, untiyema, iye. Kotiba to marisa kina ibabuntiye

¹¹ Pigoya, pikaba naeba maya yuwe: Yuta kina igeba igisa aimisaꞌma wareꞌnasa puma, monota wareꞌnamagini agora ikabitantawe, a. Pipa kampaye. Igeba aiboꞌena puma mono kipa kasuguna, Kotiba iꞌikena kamanapa to marisa kinaꞌmiti aborantiye. Piya pogini, to kinaꞌmi abigini Isureyo kinaꞌmiba igamagini, intawama igobi pekini igege ankagasigasi piyemawe.

¹² Pigoya, mono aiboꞌena puma kasantenawaimpa maga maga kina igeti mono auꞌwa maema aborantiye. Piya, Kotintana kasima amuntanawaimpaba to marisa kina igeti mono auꞌwa maema aborantika, taeba mayama aogima abune: Aintiba Koti agowapa aꞌwaitama Isureyo kina aꞌyaꞌma ibabuwaitaika, tae taobi to awameta maema aborakiyema, abune.

¹³ Pigoya, ibaba to marisa mono kamana abinta kina tigeba ma kamana urimukuwa, abiyo: Naeba to marisa kinaꞌmi nkaposoro miyoꞌnana, pi ntuganepa asagayuyuwe.

¹⁴ Piya, Yuta naokinaꞌne abimagini igobi pekini ankagasigasi piyema pi ntugane asagayuyoka, igepisa kaꞌisa iꞌisanaga nabiye.

¹⁵ Eya, Isureyo kina igaintika, Kotiba maga maga kinapa aeꞌwati atokaewaitantine. We, ainti ibabukibipa, purinta kinaꞌmiba iyoganta kinaꞌmi pesa puma kasa kina kanta pewe, ukibewe.

¹⁶ Pigoya, Yuta kina paipa pareti kaoꞌena puntapa, marupa uwaena paretinto Kotipa amintapa, aꞌyaꞌwaemaena ae aobi kanara aota puntiye. Piya pesa puma, Yuta kinaꞌmi nkiyabama, ige igaꞌnubaraba Koti nkaokinane. Piya, ya abuwapa Koti nkaobi aota waimagina, pabiyama amawapa aotane.

¹⁷ Pigoya, Yuta kinaꞌmiba aogi oribi ya kanta puma mintagana, kaꞌisa amawapa aꞌwarikasima, tigeba kabubintisa ata oribi yawama nkamawa kanta puma minta, maemagina ampa amato puritagiri, oribi yawama nkabuꞌwatasa aogi apaba maeyawe.

¹⁸ Pikaba tipa a-mpaete iyiyo. Piya, tiꞌmu puntiripa, mayama aogima napiyiyo: Amawamaba abuꞌamapa kampa apaba amiye. Abuꞌamaba amawamapa apawapa amikaba aogima napiyiyo.

¹⁹ Pigoya, pikaba tigeba maya ukibewe: Kotiba tae maema amato puratakenaga kaꞌisa amawapa aꞌwariꞌma maebugasagina kanara piyema, ukibewe.

²⁰ Pipa tagaka ukibewe. Igeba monoti kampa imatiti puntaka, aꞌwarikaintiye. Piya, timatitiꞌena manataka asiritagiri aogima miyewe. Pika tigeba tipa a-mpaete intiri, tiyekuru piyo.

²¹ Pigoya, Koti aeba aogi yawama nkamawapa kampa uwa atanta aꞌwarikaintiye. Piya, ige puntasa puma kampa timatiti pukibepa, kaga aꞌwaritigaikiye.

²² Pigoya, tigeba Koti nkantaraꞌenawakaba agasiyaenawakabe aogima abiyo. Piya, ae ikaꞌintaesi pota kinaꞌmiti agasiyaena aborantana, kampa atate wanta Koti nkantaraꞌenawata mikibe kinaꞌmitiba, tigeti auꞌwapa aborarimikiye. Piya, tigeba aeti kampa atokaekibepa, kaga arisaꞌma maeburigaikiye.

²³ Pigoya, Yuta kina igegeba iyekitaenawaipa kaite igu aꞌwae piginaba, Kotiba to kake amato puma asaewaitakiye. Eya, pikaba kanara abintiye.

²⁴ Piya, paipa tigeba kabu oribi yawama nkamawa mintuguna, Kotiba arisaꞌma tibabuma usa oribi yamara amato puritantine. Tigeti nkagoba kampaye. Piya, Yuta kinaꞌmiba usa oribi ya kanta puma mintagana, igeꞌwai nkabuta amato pukibipa, pipa to awametane. Kotiba aꞌyaꞌma kinaꞌmite kaoꞌena purataye

²⁵ Naoꞌmitaba, tigeba napiyenari aegaꞌma aibo nabo pusanaga ma kakanta kamana aborarimukuwa, abiyo: Isureyo kina kaꞌisa igeba mono abikenaena igu akumpa esegi potama mirite wakini, to marisa ibabukibi kinapa paiꞌwaekibewe.

²⁶ Piya paiꞌwaewaigini, aꞌyaꞌma Isureyo kinaꞌmiba iꞌikiye. Pika mono isaꞌama maya iye:

Saiyoni kumatasa Aꞌyigitatama Tababikena Yagara ka aborama, Yekobu tupisa kamparagaenawai paga puma maebu igaikiye, iye.

²⁷ Pi ntagaba naeba aguntaenawaipa asuꞌa puwaigasimagi, utawaitantaꞌenaba igetiba aborawaimukuwe, Kotiba piya untiye, iye.

²⁸ Pigoya, Isureyo kina igeba mono kamanaka Koti kama potawe. Piya pegana to marisa kinaꞌmiti auꞌwapa aboraye. We, iyabamagika Kotiba agu kaoꞌenaba puwaitagini, Isureyo kina ae aokina mintawe.

²⁹ Piya, Koti aeba aꞌmuntana imintintanabe utawaitantintanabe aeba tonaba kampa pumagina, Yuta kinapa ibabiye.

³⁰ To marisa kina tigeba paipa Koti kamana akayuma mintantawe. Piyama mintuguni, Yuta kina igeba kamanaꞌwa akayuma ikaꞌintaesi potauguna, tigeti Koti aꞌwae puma antaraꞌenawapa aborarimintiye.

³¹ Pigoya, Yuta kina igeba kamana akayuma mintawe. Aintiba tige mintasa puma pabiya puma Koti nkantaraꞌenawapi mikibewe.

³² Piya, Koti aeba kamana akayukubompetaka aꞌyaꞌma kina utarataye. Utaratama, aꞌyaꞌma kinaꞌmiteti antaraꞌenawa aboraramikena, piya piye.

³³ We, Kotintanabe napiyenawape abikenaenawape eꞌerota pumaema waintiye. Piya, kamana otakenaenama nkagoba kebaya ukiye. Pipa kampaye. Napima pukenaenama nkagoba kebaya agakiye. Pipa kampaye.

³⁴ Pika mono isaꞌama maya iye:

Eya, Waꞌegawama ntapiyenaba ae ntagarama abiye. Pipa kampaye, iye.

Piya, kamana yeginaba ae ntagarama kapa aoꞌmaeye. Pipa kampaye, iye.

³⁵ Piya, ae ntagarama Kotipa maru kaꞌenaba amintitaka iretawapa amikiye. Pipa kampaye, iye.

³⁶ Piya, aꞌyaꞌwaemaenaba aepisa aboraye. Aꞌyaꞌmaenaba ae esegiyenarasa uwa waiye. Aꞌyaꞌwaemaenaba aeꞌenawane. We, ae agegaꞌe asagayuyaba miyeno. Tagane.

12

¹ Naoꞌmitaba, naeba Koti nkantaraꞌenawaka uma mayama esuritauwe: Tigeba titipa Kotiti aoganta muta atama, aota mima ae aobi aogima miyiyo. Piꞌna mono maema mikenaenama nkauꞌwantana peno.

² Piya, tigeba mampabisa kina nasisuba a-puma kaꞌmasapa a-piyo. Kampaye. Tigeba napiyenaripa maema aꞌwae pigina, to tiga kanara peno. Piya pikibepa, Koti nkabemintanaba aogima agakibewe. Piya, aogiyenawape aukaenawape aotaꞌenawape agama maekibewe. Taeba Koti nkuratanti ntuga peno

³ Pigoya, Koti nkawagaena namintika ka ka urimukuwe, abiyo: Tigepisa kaꞌwaina aewaka abekanaba taberapa a-nkiyeno. Koti aꞌyipimpa amatitiꞌena ka ka iminti, pabi nkawameta peno. Pikaga asu agaikenaba a-ntapima, aogima napiyiyo.

⁴ Taeba maya abune: Ka tautasa aꞌyaꞌma aukaꞌiba kaꞌmasa ntugaba kampa pune.

⁵ Piya pompepa, taeba aꞌyaꞌma kinaꞌmita Karaisititi atokaema ka tauꞌena puma miyokana, toma toma ntugarapa pako puratagi, ka kina kanta puma miyune.

⁶ Pigoya, Koti awagaenawa aboraramima toma toma ntugarapa utarataye. Utaratamika aꞌyuguba kampa pukune. Piya, kaꞌwainaba Koti nkesegiyenabisa mono uma aborantanaba, pipa amatitiꞌenawampa aseꞌyona waitanti nkawameta peno.

⁷ Piya, to kaꞌwaina aeba kayokaya puntanaba, pipa aogima peno. To kaꞌwaina aeba mono tisa yuga puntanaba, pabi ntuga aogima peno.

⁸ To kaꞌwaina wasana asitakena puntanaba, aogi yuga puma asitano. To kaꞌwaina aeba yabankatasa wasana iyoꞌmaentanaba, awaga yagara miyeno. To kaꞌwaina aeba paitawaitama miyintanaba, aumaba asagarare puma miyeno. Piya, to kaꞌwaina aeba wasanaga antara puntanaba, aꞌmuntanabisa aoꞌmaeyano. Paru kaoꞌenama kamanane

⁹ Pigoya, agu kaoꞌena puwaitakena puntiripa, agoꞌenaba a-piyo. Aguntaenaba tikabitama aogiyenamati uma atokaeyiyo.

¹⁰ Tigeba tiyoꞌmige atokaema kayonenabi miyiyo. Piya, tiyoꞌmi nkige tigeba ka ka maete iyiyo.

¹¹ Mono yugarikaba a-tiyekita puma asagarare puma miyiyo. Awamusaꞌamaba tintabaipinti aburakiri, Waꞌegawama kayokaya yuga piyo.

¹² Tigeba tiꞌmuntanabisa Waꞌegagaba kabiyiyo. Tiki nakiyena aborarimekiripa esegima mintiri, asi nasi nunamu uma miyiyo.

¹³ Kotiti atokaenta kinaꞌmiti kaꞌisaenawai kampa waiyekiripa, iyoꞌmaeyiyo. Namu kina kanaigiripa, tigeba aogima kabiwaitaiyo.

¹⁴ Pigoya, wasanami pumireri puritaigiripa, akayona puwaitaiyo. Pumireripa antotapa a-puwaitama, akayonamana puwaitaiyo.

¹⁵ Pigoya, wasanami inta asoyaena pigiripa, iyoꞌmaema tinta asoya piyo. Kubeꞌena pigiripa, iyoꞌmaema kubeꞌena piyo.

¹⁶ Pigoya, ka kinaꞌena puma paruyenabi miyiyo. Tiꞌamaba inatapa a-nkiyekiri, tumima minta kinaꞌmige ka awameta miyiyo. Nae nabintone aogi napiyena waintiyemaba, a-ntapiyiyo.

¹⁷ Pigoya, ataena puritaigiripa, antotapa ataenaba a-puwaitaiyo. Wasanami nkiyobi agoya puwaitamisa piyo.

¹⁸ Tigeripa maꞌena pukenagaba toma toma kinaꞌmige igege a-ntapiyiyo. Pipa kampaye. Ke waintakiripa, tigeba paru puma ka kinaꞌena puma miyiyo.

¹⁹ We, naoꞌmitaba, kaintana puritaigiripa antotaꞌenaba a-puwaitamagiri, uwa ataigina Koti nkamoꞌenawataka waiyeno. Pika mono isaꞌama maya iye: Kaintanama nkantota yugaba, pipa naene pukuwe, Waꞌega aeba piya untiye, iye.

²⁰ Pika mono isaꞌama maya iye: Kama kinakapa agaꞌena abekanapa, nanintaba amo. Wanika abekanapa, wanipa amo. Piya pikibempepa aꞌnota yaku irarataꞌena potagana ani pukiye, iye. Pipa aegaraiyo.

²¹ Piya, aꞌyugu ataenamaba tigepa tigaikiye. Tigeba aogiyena pumagiri ataenaba agasiyo.

13

¹ Pigoya, aꞌyaꞌma kinaꞌmitaba kiya kinaꞌmi nkimentanti miyiyo. Pipa kiyaenaba Koti maema imintemi ntuga pewe. Pipa uwa wasanami nkiwamutasaba kampaye. Igeba Koti nkawamutaka mirite kanawe.

² Piya, kaꞌwaina aeba kiya kinaꞌmi kamana akayuyemiꞌnaba, Koti otantiꞌnakeba kaga aibasanaye. Aibasanakibe kinaꞌmiba igeba Kotitisa ata ika maekibewe.

³ Piya, wasana kanara aogima miye kina igeba kiya kinaꞌmikaba kampa iyekuruba pewe. Ataena pe kina igeba iyekuru pewe. Piya, tigeba kiya kinaꞌmikaba kampa tiyekuru puntiripa, aogiyenamana piyo. Piya pigina, Tigewamaba ige iyobi aogi peno.

⁴ Piyama, kiya kinaka: Aogima kabiwaitaiyoma, Koti uwaitantiye. Piya, tigeba ataena pusanaga tiyekuru piyo. Igeba paroya ntoginkaipa uwaba kampa urintawe. Igekaba: Ataena pe kina naetisa antotaꞌena imiyoma, Koti uwaitantiye.

⁵ Piya pika, kiya kinaꞌmi nkimentanti miyiyo. Antota imuꞌenaga tiyekuru pikenaenaga wanane. Tintawama nkawamu aegaꞌma piya piyo.

⁶ Pigoya, igepa Koti kiya yugara uwaitantika kabiratawe. Pikaba takisi imewe.

⁷ Piya, tigeba utaritantintanaba aegaꞌma aogima piyo. Takisi maekena kinapa takisiripa imiyo. Kotataka takisi maekena kinapa takisiripa imiyo. Asugasima minta kinaꞌmi nkimentanti miyiyo. Tabe igiyaga kinaꞌmi nkigeba maete iyiyo. Agu kaoꞌenaba monoꞌama nkagowane

⁸ Pigoya, uwa auꞌwa kampa waintaꞌenama nkiretaenaba a-piyo. Iretaenari kaꞌanto waintipa, pipa tigeba wasana agu kaoꞌena puwaitakenaenawe. Agu kaoꞌena wantaga mikibiꞌnaba ago kamanaꞌama nkauꞌwa ago aboraye.

⁹ Pigoya, Koti paipa kaꞌisa kamanapa maya untine: Kumiyenaba a-piyo. Wasana a-nkaeguma kaiyiyo. Kuntanaba a-piyo. To wainantanagaba tikaba a-piyo. Pi kamanape to kaꞌisa unti kamanape, piꞌna agowaipa mayamawe: Tigeti tiꞌama kaoꞌena potasa puma tiyokinapa pabiyama puwaitaiyo.

¹⁰ Piya, agu kaoꞌena wantaga miyemiꞌnaba aeba aoꞌyagaraba ataenaba kampa potaye. Piya, agu kaoꞌena pemiꞌnaba ago kamanaꞌama nkauꞌwapa aboraye. Arupu kiꞌi waiyo

¹¹ We, tigeba mono abe kinaꞌmitaba, kanaꞌama nkagoba abewe. Tiwaibisa tiyogama asikena, pi kana aboragiri abewe. Tamatiti puntompe kanabipa Waꞌegawama tauꞌikenaenaga aobi puntompene. Piya, tauꞌikena kana ibaba agarosaye.

¹² Piya, ase uma aꞌya pekana agarosama marikiye. Pika tununtanaripa akubugasimagiri, iregu arakaebuma eꞌwasaenara miyiyo.

¹³ Taeba ara miye kina kanta puma aogima miyeno. Piya, esegi wani ntama aiboꞌena pikenaenabe maꞌena pikenaenabe a-piyo. Kupiyona pikenaenabe to iꞌnintana pikenaenabe a-piyo. Maka kamana ukenaenabe tigobintana pukenaenabe to kake a-piyo.

¹⁴ Tiꞌama ata napiyenagaba a-ntapima aegaraiyo. Tigeba Waꞌega Isu Karaisititi atokaema, aepa tiꞌama nkanapa maema piyo.

14

¹ Pigoya, mono aegaꞌma amatitiꞌenawa magimagi pemiꞌnapa ababuma tiyoꞌena potaiyo. Wasanama ntapiyenarasa monotakaba kamanatasa maꞌenaba a-puma, ababuma aogi potaiyo.

² Piya, kaꞌwaina aeba amatiti puma aꞌyaꞌmaena nantana: Pipa Kanarane yegina, to kaꞌwaina amatitiꞌenawapa magimagi pemiꞌnaba awaseba kampa naye.

³ Pigoya, naninta nami ntagarama kampa nami ntagaragaba abima ataba a-potano. Aꞌa-o uma kampa nami ntagaramaba aꞌyaꞌmaena nami ntagaraga abima kamanapa a-nkotano. Pi kinaꞌmipa Kotiba ibabiye.

⁴ Piya, tigeba ayama to kinaꞌmi ntuga pemi ntagaragaba kamanapa otawe. Pipa kampaye. Aeba aogi pikiyo, ata pukiyo. Pipa abagarima, aeꞌenawane. Piya, Waꞌega aeba aoꞌyagaraba kanara esegi potakibipa aogima mikiye.

⁵ Pigoya, ka yagarama mono kanabi ka yagagaba napima: Asugasima tabe yagawe, iye. Piya yegina, to ka yagaramaba napimagina: Aꞌyaꞌma yaga kaꞌmasa piyema, aeba iye. We, pi ntagaga napima ka ka kinaꞌmitaba tigeti ntapiyena aegaraiyo.

⁶ Piya, ka yagarama ka yagaga napima: Tabe yagawe yemi ntagaramaba, aeba Waꞌegawamaka napima piyaba iye. Naninta nami ntagara aeba Waꞌegawamaka napimagina piyama naye. Piya puntana Kotikaba: Naꞌmu pugatauwe, iye. Piya, aꞌa-o uma kampa nami ntagaramaba aeba pabiyama Waꞌegawamaka napima: Aꞌa-o, iye. Piya untana Kotikaba: Naꞌmu pugatauwe, iye.

⁷ Pigoya, taetekaba: Miyuneba, a-siyo. Puruneba, a-siyo. Pipa taeꞌenaenaba kampaye.

⁸ Miyompepa Waꞌegawamantana pune. Piya, mikubompepe purukubompepe taeba Waꞌegawamantanawe.

⁹ Pika Karaisitiba puꞌma aogamagina, purinta kinape aoganta kinape kaga Waꞌegarentana puratakena puntiye.

¹⁰ We, tigeba nanagabaya tiyokinaꞌmi ntasikenaenawaikaba kamanapa uwaitawe. Nanagabaya tiyokinaꞌmikaba abima ataba puwaitawe. Taeba aꞌyaꞌma Koti nkaora aborakana, agorepa uma aborakiyema kampa napiyewo.

¹¹ Pika mono isaꞌamaba maya iye:

Naeba taga kauwe. Aintiba aꞌyaꞌwaema kinapa irakabinatakibewema, Waꞌegawamaba piya iye. Aꞌyaꞌma kinaꞌmi nkiwamuꞌamaba Koti nkagisukibewe, iye.

¹² Piya puma taeba abune: Aꞌyaꞌma ka ka kinaꞌmitaba Kotiti agore uma aborakubompeka, uratantine. Taeba taoꞌmipa ataenaba a-puwaitano

¹³ Pigoya, pika taeba taoꞌmikaba ipi pima kamanapa a-nkuwaitano. Pipa kampaye. We, aogima napima taokinaꞌmikaba igisa aibasanakaikenaenabe iꞌwareꞌnakenaenabe taeba a-puwaitaigiro.

¹⁴ Naeba Waꞌega Isuti atokaema mima mayama abima esegi puwe: Kaꞌenaba iꞌnintana pikenaenaba kampa waintiye. Pigoya, kaꞌwaina aeba kaꞌmaenaba iꞌnintanawema napima pemipa, aewapa iꞌnintana piye.

¹⁵ We, tigeba kaꞌisa naninta namagiri tiyoꞌmi ntapiyena ata puwaitapa, tigeba agu kaoꞌenabipa kakema kampa wawe. Piya, aꞌyugu tigeba pi ntaninta naigina, tiyoꞌyagaramaba tigama ata pusanaga napima aogi kiꞌi iꞌataiyo. Ae asitakenaga Isuba purintiye.

¹⁶ Piya, tige aogi mikenaenaritaka aꞌyugu to kinaꞌmi tikayasuritasanaga aogima kabiyiyo.

¹⁷ Piya, naninta nakenaenamabe wani ntakenaenamabe monoꞌama nkagoba kampaye. Pipa Aota Awamusaꞌamati atokaema arupu puma mikenaenabe, paruyenabi mpikenaenabe, taꞌmuntanabi mpikenaenabe, pipa Koti kabirataiꞌna nkauꞌwane.

¹⁸ Piya, kaꞌwaina aeba Karaisititi kayokayaꞌena potakanaba, Kotiba agama aꞌmu potakini, wasanamiba agamaginiba: Aogi yagarawe, otawe.

¹⁹ Piya puma, taeba paruyena aborakibi kiꞌi aegaꞌma, taoꞌmi nkintaba esegi puwaitano.

²⁰ Pigoya, aꞌyaꞌma nanintaba aogi nakenaenawe. We, aꞌyugu taeba nanintaraka uma Koti ntugaba aguyaꞌaikune. Aꞌyugu taeba kaꞌisa naninta nakini, taoꞌmiba wareꞌnasanagawe. Pipa Koti nkaobi ataenawe.

²¹ Piya, tiyoꞌmi maema wareꞌnasanaga, igeka uma awasebe, waini wanipe, to nabe: Aꞌa-o yiginaba, pipa kanarasakiye.

²² We, pikaba napiyenaripa Koti nkaobi maema miyigina tigeti waiyeno. Kaꞌwaina aeba kaꞌenaga abekana kanarasakana, antabintiba abima ataba kampa puntana, asoya pekanaba aogi pikiye.

²³ Pigoya, to kaꞌwaina aeba abima tara tara agi napimagina nakibemipa, aewa aogi napiyenaba kampa aegarakiye. Piya, aeꞌwantanama kamanapa otakiye. Eya, aeꞌwa aogi napiyena akayuyiꞌnaba Koti nkaobi aguntaenaba piye.

15

¹ We, monota esegiyenarentaga kinaꞌmitaba anu kina igama iyoꞌmaema kuntaenawaipa aesagabeno. Taete ntapiyenaba a-nkaegarano.

² Taeba taokinaꞌmi igeka napimagi, aogimagi, monota esegi pikibeka iyoꞌmaeyano.

³ We, Karaisiti aeba aeꞌwa ntapiyenaba kampa aegaraye. Pika mono isaꞌamaba ae awamutasa kamana maya iye: We, Koti, iyekita pugata kinaꞌmiba iyekitaenawaipa naeti aborantine, piya untiye, iye.

⁴ Pigoya, pai mono kamana uma kaentapa, pipa taeka ago abibebe piyoma kaemarantane. Pi kamanaꞌama nkagoba esegi puratamika taeba paebuma mima Koti taba pukibitaka aobi puma mikune.

⁵ We, Koti aeba asiratama esegi puratakena agowe. Aeba Karaisiti Isuti atokaema tiyoꞌmige kaga mikenaga tiyoꞌmaeyano.

⁶ Piyama tiyoꞌmaeyagiri, tigeba ka tiwamuꞌena puma, Waꞌegare Isu Karaisiti nkabawampa, Koti, ae age asagayuyiyo. Karaisitiba Yuta kinape to marisa kinape kaga taoꞌmaentiye

⁷ Karaisiti aeba agu kaoꞌena puma tiba puntisa puma, pabiyama tiyoꞌmipa ibabiyo. Piya pukibepa, Koti nkageba asagayukibewe.

⁸ Naeba mayaga yuwe: Koti aeba tayabamagipa kaꞌisa kamana utawaitantiye. Pi kamanaꞌama nkauꞌwa aborakenaga Karaisiti aeba tumpa i kasanta kinaꞌmiti aborama kayokayaꞌena puntiye.

⁹ Ibintogaba kampa tumintine. To marisa kinaꞌmiba igegeba Koti nkantaraꞌenawapa agama ae age asagayuyiyema tumintiye. Pika mono isaꞌama maya iye:

Naeba to marisa kinaꞌmi nkikapi kamanakapa aborama, inibisaba kagegaꞌeba asagayukuwe, piya untiye, iye.

¹⁰ Pigoya, mono isaꞌama to ka maya iye:

To marisa kina, tigeba Koti nkaokinaꞌmige tiꞌmu piyo, untiye. iye.

¹¹ Pigoya, to kapa maya iye:

Aꞌyaꞌma to marisa kinaꞌmitaba, Waꞌegawama nkagegaꞌeba asagayuyiyo, iye.

Piya, aꞌyaꞌma toma toma kinaꞌmiba age asagayuyeno, piya untiye, iye.

¹² Pigoya, to ka kamana Aisaya mayama kaentiye:

Tayabama Yesinta aubutasa asaewaba pakiye, iye.

Pi ntagaramaba asima mima to marisa kinaꞌmita kabiwaitakiye, iye.

Piya pekini, to marisa kinaꞌmiba aeti uma atokaema iꞌmu pukibewe, iyema kaentiye.

¹³ Pigoya, Koti aeba tamatitiꞌenarempa nkagoba mintiye. Aeba timatitiꞌenarika tiꞌmuntanabe paruyenabe tabera aborama timekiri, Aota Awamusaꞌama nkesegiyenabi mima, aeti atokaekenaga aobi pigina, Kotiba pintanaba pumaeritano. Poroba aꞌmuntanabisa mono yugaba puntiye

¹⁴ We, naoꞌnempitaba, tigeka ago abibebe pogana kanarasaye. Piya, tigeti aogiyenaba pumae waintegiri, tigeba mono agoba kanara abibebe puma, ankaoꞌmae aoꞌmae pumagiri aogi napiyena tiyoꞌmipa imikena pewe.

¹⁵ Pigoya, Koti awagaena namintika, naeba naekuru kampa punta, tigeguꞌa pusanaga kaꞌisa kamanapa esegima tigeti kaeyuwe.

¹⁶ Piya, to marisa kinaꞌmiti Isu Karaisiti mpono kayokaya yagara mima Koti nkaogi kamana uwaimoma unatantika, Koti awagaenaba namintiye. Pipa namoga, aeti muta atama to marisa kina ibabute kanakena puwe. Piya pekana, Aota Awamusaꞌama aota puwaitakana Kotiba aꞌmu puwaitanema, yuwe.

¹⁷ Naeba Karaisiti Isuti atokaema mima Koti ntuga poka, kanara tabera Kotiti naꞌmu potauwe.

¹⁸ We, Karaisiti esegiyena namoga puwagana auꞌwapa aboranti, pika yuwe. Tonagaba kampa ukuwe. Piya, ae esegiyenarasa to marisa kinaꞌmiba iyakuwagini, mono kamanapa wasintane. Nawamutasabe nayatasabe yoga pumagi,

¹⁹ awameꞌenabe kasaꞌenabe aboramagi, Aota Awamusaꞌamatisa esegiyena mae uꞌma, to marisa kinaꞌmi mono abima wasiyiyema, yogaba puntone. Yerusaremi kumatasa agobima Karaisiti nkaogi monoꞌwapa uwaimirite wama Iririkamu mari uma irosantone.

²⁰ Piya, naeba to kinaꞌmi kimaranta abobora kisanagaba kampa nabuntine. Karaisiti nkage awaga kamana kampa uma irosanti kinaꞌmiti wama mono kamana uwaimikena puntone.

²¹ Pika mono isaꞌama maya iye:

Ae kampa agantaꞌnagiba agowapa agakibewe, iye.

Aeka kampa abintaꞌnagiba agowapa abikibewe, iye. Pi nkawameta uwaimintone. Poro aeba Aroma kinapa igasanaga abuntiye

²² Pigoya, pi mono uwaimikena yugaba uwoma waiyegini, uwaena yaga tigeti ikenaba pi ntugama keꞌnepa akuntatantiye.

²³ We, uwoma kabuba tigeti wama tigasanaga nabuntine. Pigoya, mapa kaꞌisa mariba yoganepa aꞌya pemika,

²⁴ Sipeni mari wakena punta tigetiba uma irosakuwe. Uma irosaꞌma, kaꞌisa yaga tigege umiyekana nantawamaba asoya pekiri, naoꞌmaeyigi naeba Sipeni mari kaga wakuwe.

²⁵ Pigoya, ma kanabipa Yerusaremi kumati ima, Kotiti atokaenta kinaꞌmintana iyoꞌmaekenaena maete iyuwe.

²⁶ Piya, Masetoniya kinaꞌmibe Akaiya kinaꞌmibe intawama aseyonabisa mone aki puma, Yerusaremi kumatasa Kotiti atokaenta kina kusi kinaꞌminta, igeꞌena aki potaga, maete iyuwe.

²⁷ Piya, igeba inta aseyonawaika piya pegana kanarasaye. Eya, to marisa kina igeba Yuta kinaꞌmitisa taga mpono kaga abintaka, iretaba igetiba waintiye. Pi ireta imeka kotankaitasa iyoꞌmaeyagana kanarasaye.

²⁸ Pigoya, pi kana iretawama nkauꞌwapa maete ima, mesu imekana aꞌya pekapa, tigeti wama tigata, Sipeni mari wakuwe.

²⁹ We, naeba abintuwe: Tigeti kanakubopa, Karaisiti nkaꞌmuntanaba pumaema wainatantaka, ima tigeti asu aborakuwe.

³⁰ We, naoꞌmitaba, tigeba Waꞌegare Isu Karaisitigabe, Awamusaꞌama nkagu kaoꞌenawakabe napima, naekega kaga Kotiti nunamu esegima yigina naoꞌmaeyano.

³¹ Nunamu yigini, Yutiya mari mima kamana kampa aegara kinaꞌmi nkiyapisa Kotiba akaruyobaꞌnatano. Piya, tigeba nunamu yigini, to marisa kinaꞌmi intawama aseyonabisa mone aki potaigi, pipa Yerusaremi kumatasa Kotiti atokaenta kina me imekanaba iga ibeno.

³² Piya pigi, ainti Koti abemika, naeba naꞌmuntanabisa tigeti ima migarakana paru nabeno.

³³ Pigoya Koti, paruyena agowamaba, aeba aꞌyaꞌma tigege miwaeyano. Tagane.

16

¹ Pigoya, tamanapa ka agewapa Pibi, aeba Senkeriya kumatasa monota aiꞌaru pe kina iyoꞌmaema miyemi,

² pi ae uma irosakiripa, nae nabemika, tigeba Kotiti atokaenta kina pesa puma, Waꞌegawamaka uma ababigina tikapi miyeno. Pi kana wae aeba naeꞌnepe uwoma kinaꞌmipe kaga kabiratakiri, aeba kaꞌenaga kunta pekiripa aoꞌmaeyiyo.

³ Pigoya, Pirisikage Akurageba Karaisiti Isu ntugara naoꞌmaeyame ntagara taragaba: Aya pese iyema, uwaisimiyo.

⁴ Pi isigeba purikenaenagaba kampa napinta naeka umaginisi naoꞌmaeyaga, naꞌmu puwaisitauwe. Pipa nabiwanane. Aꞌyaꞌma to marisa monota aiꞌaru pe kinaꞌmibe kaga taꞌmu puwaisitaune.

⁵ Pigoya, isige namapi monota akibe kinaꞌmikaba kaga: Aya pewe iyema, uwaimiyo. Nabugami ntagara Epinitasi, aeba Karaisititi atokaema Esiya mari paitawaitami ntagaraga: Aya pene iyema, omiyo.

⁶ Mariya, aeba araga ntuga puma tiyoꞌmaeyami nkwaekaba: Aya pene iyema, omiyo.

⁷ Antoronaikasige Yuniyasige, isigeba Yuta naoꞌyagara taragaba: Aya pese iyema, uwaisimiyo. Isigepe naepe igaꞌna namapipa kaga taba puratantane. Piya, isigeba naepa isikaꞌi natamaginisi paitama Karaisititi atokaema aposoro kinaꞌmi nkiyobi kanara puntamene.

⁸ Nabugai ntagara Ampiriyetasi, aeba Waꞌegawamati atokaenta yagaragaba: Aya pene iyema, omiyo.

⁹ Ebani, Karaisiti ntugara taoꞌmaenta yagara, aebe nabugai ntagara Sitakisibe, isigekaba: Aya pese iyema, uwaisimiyo.

¹⁰ Aperisi, aeba Karaisiti nkaobi kanaraꞌena puma againti ntagaragaba: Aya pene iyema, omiyo. Arisitoburasi ae tunkampikaba: Aya pewe iyema, uwaimiyo.

¹¹ Erotiyoni, aeba Yuta naoꞌyagaragaba: Aya pene iyema, omiyo. Nasisasi ae tupisa Waꞌegawamati atokaenta kinaꞌmikaba: Aya pewe iyema, uwaimiyo.

¹² Tarapinage Taraposage, isigeba Waꞌegawama ntuga peme wae taragaba: Aya pese iyema, uwaisimiyo. Tabugai ntagara Pesisi, aeba pabiyama Waꞌegawamati araga ntuga pemi ntagaragaba: Aya pene iyema, omiyo.

¹³ Arupasi, aeba Waꞌegawama nkaegaꞌma tabe puma miyemi ntagara, aebe anowampabe, pi nkwaepa nanontana punatami, isigekaba: Aya pese iyema, uwaisimiyo.

¹⁴ Asinkiritasibe, Pirigonibe, Emisibe, Patorobasibe, Emasibe, igege miye taokinape, igekaba: Aya pewe iyema, uwaimiyo.

¹⁵ Pirorogasibe, Yuriyabe, Neriyasibe, ae amanape, Orimpasibe, aꞌyaꞌma Kotiti atokaenta igege miye kinape, igekaba: Aya pewe iyema, uwaimiyo.

¹⁶ Tegeba tiyoꞌmipa monotaka tiyapa imiyo. Pigoya, aꞌyaꞌma kumatasa Karaisiti mponota aiꞌaru pe kinaꞌmiba tigeka: Aya pewe, uritawe. Kaꞌisa kinaꞌmiba monopa akayuyewe

¹⁷ We naoꞌmitaba, esuritakiri abiyo: Kaꞌisa kinaꞌmiba atataraena maema aborama tigeti wasana wareꞌnakenaena aborawe. Piyama tige abinta mpono akayuye kina, igeka aogima kiya kabimagiri tikabiwaitaiyo.

¹⁸ Piya kinaꞌmiba igeba Waꞌegare Karaisititi kampa yogaba pewe. Kampaye. Igeba igeꞌwai nkiꞌama ntapiyenawai aegaꞌma, iga kamanape igebi nkaobi kamanape uma imiyo puma, ari itasa aegara kinaꞌmi nkiyobi airarikaeyawe. Pi kinaꞌmipa tikabiwaitaiyo.

¹⁹ We, mono abima wasiye tiwaga kamanatipa, pipa aꞌyaꞌma kumati wagana pegi, naeba pika naꞌmu puritauwe. Piya, nae nabemika, aogiyenamaka abikenaenarintaga kina mimagiri, ataenamakaba a-ntapiyiyo.

²⁰ Piya piginabe, Koti, aeba paruyenama nkagowama, aro ntaganto Satanipa tigisa amentapinti aebasakaikiye. Pigoya, Waꞌegare Isu nkawagaenawa tigeti waima waiyeno. To kaꞌisa kinaꞌmiti: Aya pewe uma, kamana atauguna wantiye

²¹ Naoꞌmaenta yagara Timotibe, Yuta naokina Arusiyasibe, Yesonibe, Sosipatabe, igeba tigekaba: Aya pewe, yewe.

²² Naeba Tetiyasina, Poro nkawamupisa kamana mae uꞌma ma nkisapa kaemagi, pabiyama Waꞌegawama nkagegaꞌe uma: Aya pewe, yuwe.

²³ Kaiyasi, aeba naepe aꞌyaꞌma monota aiꞌaru pe kinape namankatapa aogima kabima miyemi ntagarama: Aya pewe, iye. Erasitasiba aeba ma kumatasa kamani kinaꞌmi ntaba nkaesukena yagara, aebe taoꞌyagara Kowotasibe, isigeba pabiyama: Aya pewe, yese.

²⁴ (Pigoya, Waꞌegare Isu Karaisiti nkawagaena aꞌyaꞌma tigeti waima waiyeno.)

²⁵ Pigoya, Koti esegi puritakenaenama nkagowe. Pika aogi mono kamana uma aborarimintopa, pipa Isu Karaisiti ae awaga kamanane. Pi mpono kamana eꞌero ntaga kakama wairite kananti,

²⁶ pi kamanaꞌama nkagoba ibaba aborawaeye. Piya, miyaba Koti nkawamuta poropete kinaꞌmiba kamana awaꞌena kaemarauguna, Koti yogana, pi kamanapa aꞌyaꞌma marisa kinaꞌmiti wagana puntine. Igeba abima wasima imatiti piyiyema wagana puwaentine.

²⁷ Pigoya, Koti ae abiwapa abikenaenama nkagowe. Eya, Isu Karaisitika napima Koti nkagegaꞌe asaguyaba miyeno. Tagane.

Poro piya isa kaentiye.