1 Nae Yuta, Isu Karaisiti kayokaya yagara mima, Yemisi nkaꞌnantowe. Piya, taba Kotiba agu kaoꞌena puma utaritama Isu Karaisiti atokaentaka kabiritai kinaꞌmititi, ma nkisapa kaeyuwe.
2 Pigoya, Koti nkantaraꞌenabe, paruyenabe, agu kaoꞌenabe tigeti waima waiyekana anosano. Akayukena kinaꞌmi kamanane
3 We, nabugai ntaokinaꞌmitaba, maruꞌenaba naeba esa kaema aꞌyaꞌma kinaꞌmite tauꞌikenaenama nkagowapa urimisanaga nabugantiye. Pigoya, ibaba pika wanane. Naeba tonaraka ma kamanapa kaeyuwe. Piya, ka yaganto Kotiba aeti atokaeyompe kinaꞌmiteti tamatitiꞌenaba aboraramintegi, pi tamatitiꞌenaretapa tigeba aogima kabima mima, akaya kamanapa aebasanaiyoma, urimuwe.
4 Piya, kaꞌisa kamparagaena pe kinaꞌmiba agowaipa kakaurite kanamagini aiꞌaruyenatipintiba ubasintawe. Pi kinaꞌmiba igeba Koti nkawagaenawapa maema aꞌwae puma, iꞌni ntapiyenawaipa aegaꞌmagini kumiyena puma, ka tabe yagarare, Waꞌega Isu Karaisitipa ikabitawe. Igeka paitakaꞌya Kotiba: Kamana uwaitakuwema, untine.
5 Pigoya, tige ago abiwaenta kamanapa to kakema urimekiri abiyo: Piya, paipa Waꞌegawamaba Isureyo kinaꞌmi nkiꞌima Isipi marisa ibabute me itamagina, aintiba kampa aeti imatiti pume kinapa iyeguntiye.
6 Piya, paipa kaꞌisa enisore kinaꞌmiba kabiyume mparuta kampa agora mima taga waꞌewaipa kaintane. Piya puguna, Kotiba waiyaba igaꞌnarasa kirokaewaitantegini igeba aꞌabibisa tununtanabinti miyigina, Kotiba aeꞌwa tabe yagaba kamanapa uwaitakiye.
7 Piya, paipa Sotomu kinaꞌmibe Komora kinaꞌmibe pi kumaꞌama nkawarisa kinaꞌmibe, igeba ata enisore kinaꞌmiba keꞌwai kaintasa puma atate kumiyena puma waba to wa uma paibogana to wae ampa paibogana puta wantawe. Piya puguna, Kotiba: Agate tiyekuru piyema, esegi yakutasa agora iyegugaintine.
8 Pigoya, tigeti abora kinaꞌmiba pabiya pewe. Igeba amontabi mpikena kanta puma mima iꞌwaipa iꞌnintana potamagini kiya kinaꞌmi kamanapa ikabitamagini, inatisa eꞌwasaenayaga kinakaba ikayasuwaitawe.
9 Piya, paipa kewamaba Mosese nkau maekenaga yogana, marusa enisore yagara Maikoro aeba: Aꞌa-o, umagina maka untase. Piya puntamepa, Maikoroba kampa ataenaba puma, antotapa kampa akayapa otantine. Kampaye. Aeba: Antotapa Waꞌegawamaba ugatakiye, omintiye.
10 We, ma kinaꞌmiba kampa agantanagaba karuꞌena akayasewe. We, kabu yagama ntapiyena waintisa puma, igeti wasanama ntapiyenaba waintegini, pi kipa atagana aintiba napiyenawaimpa nkagomaba ipi pima antotapa iyegukiye.
11 We, igeba ataenabi mpikibewe. Piya, Keni wasana aeguntisa puma, igeba piya puta nasewe. Piya, Peramu puntisa puma, igeba tabe ikankai maekenaga napiyaba miyewe. Piya, Kora aeba Koti kamana akayuntisa puma, igeba piya pekana aintiba antotaꞌenaba kaga imima iyegukiye.
12 Piya, agu kaoꞌenaritasa tigeba aki puma nakena pigini, igeba iꞌnintana tamakaema araꞌena puma abuyasa pisa puntini, igeꞌwai ntapima nama igaꞌe paga paga puma kampa inipa pewe. Igeba ka kampa aeyami ibina mpanta kanta puma miyegana, esibawama agarubagina nasisa pewe. Eya, igeba yawama kampa a aenta asa wagina wasanama ikasamisa pewe.
13 Piya, tabe kayo waninkama tabera aigayoꞌya pegina akagawa irisa puma, igeba pami pukenaenawaipa aborawe. Piya, igeba noriwama ogasi ankagasi pemisa puma igeba ata aꞌabibisa tununtanabinti agora mikenaba igeti uwaitantine. Kamparaga ikantanawaine
14 Pigoya, Antamu aeba paitama aborama kanama tonaentisa tarumaema pogana Inoki aboramagina, aeba poropete kamanapa maya uma aborawaimintiye: Abo. Waꞌegawamaba aeba uwoma aota kinaꞌwantaga tumimagina,
15 aꞌyaꞌma kina antota ika nkimikena tumegi agauwe, untiye. Eya, aꞌyaꞌma Koti ikabita kamparaga kinapa aꞌyaꞌma kamparagaena punta kamparaga yugawaika kamanapa uwaitamagina, pi kamparaga agunta kinaꞌmiba ata otanta kamanatakaba antotaꞌenaba imikena tumegi agauwe, untiye.
16 We, pi kinaꞌmiba wasana ikaꞌi obisobi suma, imo puyaba mima, igu iꞌnintanawai aegaꞌma, tabe aꞌyugu kamana uma igebigoꞌena puma, kota paibukenaraka ikaragara kamanapa yewe. Tigeba timatitiꞌenaba upebe piyo
17 We, nabugai ntaoꞌmitaba, Waꞌegare Isu Karaisiti nkaposoro kinaꞌmiba aborakibintanaga kamanapa untane. Tigeba pika to kakema aogima napiyiyo.
18 Igeba mayama urimewe: Ainti agogo yaga agarosakanaba, monota karana pukibe kinaꞌmiba aborama Kotipa ikabitama igu iꞌnintanawaipa puta nasikibewe, untawe.
19 We, piya pukibe kinaꞌmiba apako pikenaenaba aborakibewe. Eya, igeba mabisa kinaꞌmi ntapiyena aegaraigina, Aota Awamusaꞌama igupipa kampa mikiye.
20 Pigoya, nabugai ntaoꞌmitaba, tigeba esegi puma aota timatitiꞌenaripa puyaba mita iyigina anosano. Tigeba Aota Awamusaꞌama nkesegiyenarasa nunamu yiyo.
21 Tigeba Koti nkagu kaoꞌenabi ubasiyaba miyiyo. Piya, Waꞌegare Isu Karaisiti nkantaraꞌenama nkauꞌwapa aboragiri, tigeba miyaba aumaba maekibewe. Pika yokege piyo.
22 Tara igi napiye kinaꞌmipa kaꞌisaba ibawage piyo.
23 Piya, yakupisa iso itasa puma, to kaꞌisa kinapa iꞌiyiyo. Tigeba tiyekuru puma to kaꞌisa kinapa tintara puwaitama iyoꞌmaemagiri, arirasa iꞌnintanawaika tiyekuru puma apasanaiyo. Kotiti taꞌmu potakena kamanane
24 Pigoya, Kotiba wareꞌnasanaga aogima kabiritakena yagarawe. Eya, aeba abuyasa kampa punta kina aboraritaigiri tiꞌmu pigina, eꞌwasaenawapi tiba puritakena piye.
25 Piya, Koti aeba kaꞌanto mima, Waꞌegare Isu Karaisiti ntugarasa tauꞌiye. Pigoya, asagayukenaenabe, eꞌwasaenabe, kabiratakenaenabe, esegiyenabe, paipe ibabe aꞌyaꞌma to yagabe, aeti waima waiyeno. Tagane.
Yuta piya isa kaentiye.