1 Pigoya, agorasa wairite kanama waintintanaga taeba ago abimagi, taobisaba agamagi, eya taeba agama tayatasaba aigaya puntompene. Pi nkeꞌwasaenama kamana agoba uma aboraune.
2 Piya, pi nkeꞌwasaenamaba ampa aborawaeyoga, taeba agantompene. Pi nkeꞌwasaenama nkagowamaba tabage mirite kanaogana aboraramoga agantompene. Ibaba pikaba taeba awaga kamanapa uma aborarimune.
3 Piya, taeba ago abima agantompentanaga tigekeba urimompepa, taege kaꞌena puma miyenemawe. We, taeba kaga tabati ampa airokaema, aege yagarawapa Isu Karaisitige kaꞌena puma miyune.
4 Piya, tigepe taepe taꞌmuntanarepa pumaewakibika, ma nkisapa kaema urimune. Taeba eꞌwasaenara nasikune
5 Pigoya, Isupisa taeba abitegi, uma aborarimompepa, pi kamanapa mayamawe: Piya, Kotiba aeba eꞌwasaenama nkagowe. Aetiba tununtana uwaenantoba kampa waintiye.
6 We, taeba tununtanabi mita nasima: Kotige kaꞌena puma miyune, yompepa, taeba kumpari uma taga kamanapa kampa aegaꞌma miyune.
7 Piya, aeba eꞌwasaenara miyisa puma taeba eꞌwasaenara mita nasompepa, taeba taoꞌmige kaꞌena puma miyokana, Koti ntagara Isu kurankama aꞌyaꞌma aguntaenarepa asuꞌa puragasaye.
8 We, aguntaenarepa kampa waintiye, yompepa, taga kamanaꞌamaba tantabaipi kampa waiyegi, taeba tantawamapa amiyoꞌena potaune.
9 Piya, Kotiba tagantana puma arupuyena puyaba miyegi, taeba aguntaenareka ae aobi uma aborakubompepa, aeba aguntaenarepa maeragasima, aꞌyaꞌma ataenarepa asuꞌa puragaikiye.
10 We, aguntaenaba kampa pune, yompepa, taeba Kotikaba kumpari yagarawe, otaokana, taga kamanaꞌwampaba tantabaipi kampa waiye.
1 We, uwaena yakarantontonempitaba, aꞌyugu aguntaena pusanaga tigeti ma kamanapa kaeyuwe. Piya, kaꞌwainaba aguntaena pukibemipa tabarempa Koti nkaobi aoꞌmaema akaꞌi pukena yagaraba aeti mikiye. Pi aoꞌmaenta yagara aeba arupu yagara Isu Karaisitiwe.
2 Aeba tae aguntaenare maeragaikena yugaba aesagabintiye. We, tabintoreka wanane. Aeba aꞌyaꞌma maga maga kinaꞌmikegaba kaga aesagabintine.
3 Pigoya, Koti unti kamanapa wasiyompe kinaꞌmitaba, taeba: Taga taoꞌena potaune, yokana, tagantana piye.
4 We, kaꞌwainaba: Naeba Kotipa naoꞌena potauwe, umagina Koti unti kamanapa kampa wasiyipa, pi ntagaraba aeba kumpari yagara miyegina, taga kamanaꞌamaba kampa antabaipintiba waiye.
5 Piya, Koti kamana wasiyiꞌnaba aeba Kotiti agu kaoꞌena potagina anosaye. Taeba piya pokana anosagi, taeba: Kotiti atokaema miyune, yokana, tagantana piye.
6 Eya: Aeti atokaema mima nasuwe yemiꞌnaba Karaisiti nasisa puma naseno. Eꞌwasaenama nkauꞌwapa aborama kayonenabi mpiyiyo
7 We, nabugai ntaoꞌmitaba, ma kamana ago tigeti kaeyopa, kasa kamanapa kampaye. Marusa kamana pai maenta, pi kamana kaeyuwe. Pi kamanapa ago abita kananta kamanane.
8 We, ma kamana ago iba tigeti kaeyopa, pipa kasaꞌena kanta piye. Piya, Karaisiti ntugarasabe tige yugarasabe pi kamanaꞌama nkauꞌwapa aogima aboraye. Eya, tununtanaba aꞌya wakena pegina, taga eꞌwasawamaba aborama taye.
9 Piya, kaꞌwaina aeba: Eꞌwasaenabi mpiyuwe, umagina aoꞌyagaraba ata anta paritamipa, aeba tununtanabi mpiyi ntagarawe.
10 Piya, to kaꞌwaina aeba aoꞌma agu kaoꞌena potamiꞌnaba aeba eꞌwasaenabi mpimagina, agisa aimisaꞌma wareꞌnakenaenaba kampa aboraye.
11 We, aoꞌmaka ata anta paritamiꞌnaba, aeba tununtanabi mpima tununtanabinti nasimagina, tununtanamaba aotikaetagina aeba kekaba aiboꞌnabo piye.
12 We, uwaena yakarantontonempitaba, Karaisiti ntugarasa Kotiba aguntaenaripa maerigasagi, tiyoꞌmaekenaga naeba ma kamanapa tigeti kaeyuwe.
13 Nabagitaba, pai uwa mita kananti ntagaraba tiyoꞌena potaga, tiyoꞌmaekenaga ma kamanapa tigeti kaeyuwe. Masimabi kinaꞌmitaba, tigeba ataenama nkagowamapa asugasaga, tiyoꞌmaekenaga ma kamanapa tigeti kaeyuwe. Araga yagaramitaba, tigeba tabapa tiyoꞌena potaga, tiyoꞌmaekenaga ma kamanapa tigeti kaeyuwe.
14 We, nabagitaba, pai uwa mita kananti ntagaraba tiyoꞌena potaga, tiyoꞌmaekenaga ma kamanapa tigeti kaeyuwe. Masimabi kinaꞌmitaba, tigeba esegima asima mintagana, Koti kamanaꞌamaba tintabaipinti ago uwaiyegini, tigeba ataenama nkagowamapa asugasaga, tiyoꞌmaekenaga ma kamanapa tigeti kaeyuwe. Mampabisaenamapa taeba tagupa a-nkameno
15 Pigoya, magabe mampabisaenagabe a-tibugano. Piya, kaꞌwaina aeba magaba abugamipa, aeba tabapa kampa abugaye.
16 Piya, aꞌyaꞌma mampara aboraintanaba pipa mampabisaenawe. Eya, tantabaipisa kupiyona tabugaintanabe, tao iyeꞌena puma tabugaintanabe, tau maete ima tagebigoꞌena pompentanabe, pintanaba tabatisaba kampa aboraye. Kampaye. Pipa mampabisaenawe.
17 Piya, mampabisaenaba aꞌya wakana, aeꞌwa abugaintanabe kaga aꞌya wakiye. We, Koti nkabemintana wasiye kinaꞌmiba miyaba mikibewe. Karaisiti kama kinapa ago aborawaye
18 We, araga yagaramitaba, ma kanapa pabigo aꞌya wakena piye. Piya, Karaisiti kama kinaꞌwaka pai abintapa, pabigo aborakena piye. We, ibaba uwaena Karaisiti kama pota kinaꞌmiba aboraga, pika napima ma kanapa aꞌya wakena piyema, abune.
19 Piya, pi kinaꞌmiba ago tagasawe. Paipa taege ka kinapa igeba kampa mintantane. Eya, igeba ka kina taege mintantasinta, taege mimagini kampa tagasasine. Piya, igeba ago tagasaga, taeba agowaipa agaompepa, aꞌyaꞌma pi kinapa taege ka kinapa kampaye.
20 We, tigeba aotane. Aota Awamusaꞌamaba paititantika, aꞌyaꞌma napiyenarintaga kina mintawe.
21 Piya, tigeba taga kamanakaba aiboꞌena pe wanane. Tigeba aogima abeka tiyoꞌmaekenaga ma kamanapa tigeti kaeyuwe. Eya, taga kamanaꞌamaba kumpariꞌenaba kampa piyema, abeka, tigeti kaeyuwe.
22 We, kumpari yagaraba kewe, a. Piya, kaꞌwaina aeba Isuka: Pipa taga Karaisitiba kampaye yemi ntagaramaba, aeba kumpariꞌenaba piye. Eya, tabape yagarawape akabiwaisitaiꞌnaba, pipa Karaisiti kama kina mintiye.
23 Piya, kaꞌwainaba yagarawa akabitamiꞌnaba, aeba abawampati kampa atokaeye. Piya, to kaꞌwaina aeba yagarawampati amatiti potamiꞌnaba, aeba pabiyama abati kaga atokaeye. Aota Awamusaꞌama taga kamana uramiye
24 Pai abinta mono kamanapa a-tigeguꞌa puma upebe piyo. Piya, pai abinta kamanapa upebe pukibepa, tigeba yagarawampatibe abatibe aogima atokaema miyaba mikibewe.
25 Eya, aeba eꞌwasaenabi miyaba mikenaga utaratantiye.
26 Piya, timiyo puritakena kinaꞌmikaba naeba ma kamanapa tigeti kaeyuwe.
27 We, paipa tigepa Aota Awamusaꞌama esegiyenawapa tigeti uwa waiye. Piya, tigeba wasanami mono ago tiyakikenaenagaba a-nkaguyosagaiyo. Kampaye. Aota Awamusaꞌama paititantintanawapa aꞌyaꞌmaenaba puriyakikiye. Pi nkawamusaꞌama kamanapa tagane. Kumparipa kampaye. Piya, Awamusaꞌamaba puriyakigiri abima Karaisititi atokaema miyaba miyiyo.
28 We, uwaena yakarantontomitaba, tigeba piyama aeti atokaema miyaba miyiyo. Taeba piya pekanaba, ainti ampa aboraka, taeba asima taꞌmu pumagi kampa taekuru puma tanipa kampa peno.
29 Pigoya, Karaisiti aepa arupuyenama nkagoba agamagiri, pika mayama napiyiyo: Wasanama arupuyena pemiꞌnaba pipa Kotitisa aborayema, napiyiyo.
1 Abewo. Tabarempaba tabera agu kaoꞌena puratama, ae araga yagararawe, urataye. Pipa taga mintune. Piya, mampabisa kinaꞌmiba Koti nkagoba kampa agantaka, tae agoba kaga kampa tagawe.
2 We, nabugai ntaoꞌmitaba, taeba ibaba Koti nkaraga yagara mintune. Piya, aintiba ayamabaya aborakune. Pipa kampa abintune. We, aintiba Karaisiti ampa aboraka, taeba ae agoba aogima agamagi, pika ae kanta puma mikune. Pipa abune.
3 Piya, Karaisiti nare ntare puma miyisa puma, aeti atokaema aobi pi kinaꞌmiba igeꞌwai nkigupa nare ntare puma miyewe.
4 Pigoya, aguntaena pemiꞌnaba aeba Koti nkago kamanapa akayuye. Eya, Koti kamana akayukenaenamaba aguntaenama nkauꞌwane.
5 Piya, tigeba abintawe. Karaisitiba aguntaena maegaikena aborantegina, aetiba aguntaenaba kapa kampa waintiye.
6 Piya, kaꞌwaina aeti atokaema miyemiꞌnaba aeba aguntaenaba kampa aegaraye. Eya, to kaꞌwaina aguntaena aegaramiꞌnaba aeba Karaisiti nkagoba kampa agamagina, aekaba kampa abibebe piye.
7 We, uwaena yakarantontomitaba, tigeba kaꞌwaina timiyo puritasanaga kabima mima abiyo. Piya, arupuyena pemiꞌnaba aeba Karaisitiba arupu yagara miyisa puma arupu yagara miye.
8 We, paitakaꞌya kewamaba aguntaena puta kanantegina, wasanama aguntaena pemipa aeba kewama ae tupisawe. Pigoya, kewama ntugaba aguya ima agarubakaikenaga Koti ntagaramaba ampa aborantiye.
9 Pigoya, Kotitisa aboraiꞌnaba aeba kampa aguntaena aegaꞌma piye. Piya, aeba Kotitisa aboragina, Koti ntapiyenaba agupinti waiye. Piya pegina, aeba agunta kiꞌi kampa aegarakena piye. Kampaye.
10 Pigoya, wasanamiba Koti ntagaraena puma miyewo, kewama ntagaraena puma miyewoma, agowaipa mayama agakune: Piya, kaꞌwaina arupuyena kampa pemiꞌnaba, aeba Koti tupisa kampa aboragina, to kaꞌwaina aeba aoꞌmapa kampa agu kaoꞌena potamiꞌnaba, aegeba kaga Koti tupisaba kampa aboraye. Taeba taoꞌmipa agu kaoꞌena puwaitano
11 Pigoya, maya kamanapa paitakaꞌya abita kanantompene: Taoꞌmipa agu kaoꞌena puwaitanomaba, abintompene.
12 Piya, Keni aeba kewama tupisa, ae aꞌnantopa aeguntisapa a-puma miyeno, iye. We, nanaraka aeguyogana purintiye. Piya, Keniba kamparaga yuga pogana, aꞌnantowampaba arupu yuga pomeka amo waiyogana aeguntiye.
13 We, naoꞌmitaba, mampabisa kinaꞌmiba kama puritaigiripa, pikaba pamiba a-piyo.
14 Piya, taeba taoꞌmipa agu kaoꞌena puwaitaompeka mayama abune: Taeba paisaenaba kaite purintapisa asima eꞌwasaenabi ubasintunema, abintuwe. Piya, agu kaoꞌena kampa potamiꞌnaba, aeba purikenaenara uwa miye.
15 Piya, kaꞌwaina aoꞌmaka ata anta paritamiꞌnaba aeba wasana aeguma kaiyisa piye. We, tigeba ago abintawe. Wasana aeguma kaiyiꞌnaba, ae antabipa eꞌwasaenaba kampa waiye.
16 Piya, Isu aeba taoꞌmaekenaga aeꞌwa nkaumawapa kasoga, taeba agu kaoꞌenama nkagoba taga agantompene. Piya, taeba pabiyama taoꞌmiti taumaba kasakanaba, kanarasakiye.
17 Piya, kaꞌwaina aeba mampabisaenaba uwaena waintakanaba, ka aoꞌyagarama kusi miyegina agama akaꞌintaesi potakanaba, ayama Koti nkagu kaoꞌenaba ae antabaipipa waikiye, a. Pipa kampaye.
18 We, uwaena yakarantontomitaba, taeba kamanatasabe tawamutasabe uwaba agu kaoꞌenaba a-puwaitano. Kampaye. Taeba taga tantara puwaitama tayapisa agu kaoꞌena puwaitano. Amatiti kinaꞌmaba Koti nkaogaba kampa aekuru pukiye
19 Piya pukubompeka, taeba tagantanabi ubasunema, abekana, Koti nkaobi taguꞌamaba paebuma waikiye.
20 We, taguꞌamaba taupi piyeka, taeba paebuma paruyenabi mikune. Eya, Kotiba taguꞌamaba taupi piyeka, taeba paebuma paruyenabi mikune. Eya, Kotiba taguꞌamapa asugasima, aeba aꞌyaꞌmaenama nkagoba agantiye.
21 We, nabugai ntaoꞌmitaba, taguꞌamaba kamanapa kampa uratakibipa, Koti nkaobipa asima kampa taekuru pukune.
22 Piya, taeba unti kamanaꞌwapa wasimagi, abemintanawapa tayapisa pompeka, taeba kaꞌenaga abigaokanaba, aeba aboraramiye.
23 We, unti kamanaꞌwapa mayamawe: Taeba yagarawapa Isu Karaisiti nkagera tamatiti potamagi, taoꞌmipa agu kaoꞌena puwaitano, untiye. Piya unti kamanapa uratantine.
24 Piya, aꞌyaꞌma Koti unti kamana wasiye kinaꞌmiba igeba Kotige kaꞌena puma miyegana, Kotiba igupi miyaba miye. Piya, ae tamemi Nkawamusaꞌama ntugaba tagupi aboragi, taeba agama, Kotiba taege miyema, napiyune.
1 We, nabugai ntaoꞌmitaba, uwaena kumpari poropete kinaꞌmiba mampabintiba nasima kamana yepa, tigeba karuꞌenaba a-nkiyegaraiyo. Piya, awamusapa toma toma mintiya, pipa Kotipisa kanayo, to aukaꞌisa kanayoma napima, agowaipa aogima agaiyo.
2 Piya, Koti Nkawamusano, to awamusanoma tigeba mayama abikibewe: Isu Karaisitiba wasana aborantine ye, pi kinaꞌmiba Koti Nkawamusa yagane.
3 Piya, to kaꞌisa kina Isukaba: Kampa wasana aborantiye, ye kinaꞌmiba, igeba Koti Nkawamusa yagaba kampaye. Pi nkawamusaꞌama Karaisiti kama kinaꞌma nkawamusane. Piya, paipa aeka: Mampara aborakiye, yogiri abintagana, ibanto mampabi ago aboraye.
4 We, uwaena yakarantontomitaba, tigeba Kotintana mimagiri, kumpari poropete kina asu igasawe. Eya, ma nkawamusaꞌama tigupinti waintemiꞌna, aeba mampabi wainti nkawamusapa asugasaye.
5 Piya, pi kumpari poropete kinaꞌmiba igeba mampabisa kinane. Piya pegana, kamanaꞌwaimpaba mampabisaena kanta pegini, mampabisa kinaꞌmiba abewe.
6 We, taeba Kotitisawe. Piya, Kotiti atokaeya kinaꞌmiba kamanatepa abewe. Pigoya, Kotitisa kampa aborantaꞌnagiba kamanatepa kampa abewe. Pintanaraka taga awamusape kumpari awamusape isige agoba pako pikenaga napiyune. Koti aeba agu kaoꞌenama nkagowe
7 We, nabugai ntaoꞌmitaba, taeba agu kaoꞌena peno. Piya, agu kaoꞌena pukenaenaba pipa Kotitisawe. Piya, taga agu kaoꞌena pemiꞌnaba aeba Kotitisa aboramagina, aeba Kotiti atokaentine.
8 We, wasanama kampa agu kaoꞌena potamiꞌnaba, aeba Kotiti kampa atokaema, agowapa kampa agaye. Kampaye. Piya, Kotiba agu kaoꞌenama nkagowe.
9 Pigoya, Kotiba yagarawapa kaꞌanto mintogana otaogana mampabipa tumintiye. Piya, taeba: Aeti atokaema eꞌwasaena maeyiyema, otaogana tumintiye. Piya pumagina, pi ntugarasa Kotiba agu kaoꞌenawapa taetiba aboraramintiye.
10 Eya, agu kaoꞌenama nkagoba mayama aborantiye: Piya, taeba agu kaoꞌena kampa potantokana, Koti aewa agu kaoꞌena puratamagina, yagarawapa otaogana, aguntaenarepa asuꞌa puragaikenaga mampabipa tumintiye.
11 We, nabugai ntaoꞌmitaba, Koti agu kaoꞌena puratamika, taegeba pabiyama taoꞌmipa agu kaoꞌena puwaitakanaba kanarasakiye.
12 Pigoya, ka yagaramaba aobisaba Kotipa kampa agantiye. We, taeba taoꞌmipa agu kaoꞌena puwaitakubompepa, Kotiba taege miyeka, abekana, agu kaoꞌenawapa tantabaipinti anosama waikiye.
13 Piya, Koti aeba Awamusaꞌwapa pako puratamika, taeba mayama abune: Taeba aege kaꞌena puma miyokana, aeba tagupi miyaba miyema, abune.
14 Piya, tababa yagarawapa otaogana maga maga kina iꞌikenaga tumintegi, taeba agamagi, pi nkawaga kamanapa uma aborama miyune.
15 Piya, kaꞌwaina aeba Isuka: Koti ntagarawe, yiꞌnapa Kotiba aege miyegina, pi ntagaramaba Kotiti atokaema miye.
16 Piya, Kotiba agu kaoꞌena puratamikaba agamagi tamatiti pune. Piya, Kotiba agu kaoꞌenama nkagowe. Eya, kaꞌwaina aeba agu kaoꞌena wantaga miyiꞌnaba aeba Kotige miyegina, Kotiba aege miye.
17 Piya, agu kaoꞌenawapa tantabaipinti anosagina auꞌwapa mayama aboraye: Taeba Koti antotaꞌena tamikibi ntagagaba kampa taekuru pune. Eya, ibantoba Karaisiti ae kanta puma taeba mampabi mintune.
18 Pigoya, kaꞌwaina agu kaoꞌena potamiꞌnaba kampa aekuruba piye. Eya, taga agu kaoꞌenamaba taekuruyenarepa agarubakasaye. Piya, ata ika mpaekenaga taekuruyenaba aboraye. Aibegina, kaꞌwainaba aekuru piꞌnapa, ae antabaipintiba Koti nkagu kaoꞌenaba kampa anosama waiye.
19 Pigoya, Kotiba marupa agu kaoꞌena puratantika taeba agu kaoꞌena yaga miyune.
20 Piya, kaꞌwaina aeba aoꞌmipa ata anta pariwaitamagina: Kotipa agu kaoꞌena potauwe, yipa, aeba kumpari iye. We, aeba aganta nkaoꞌmipa kampa agu kaoꞌena potamipa, ayamabaya kampa aganta Kotipa agu kaoꞌena potakiye. Pipa kampaye.
21 We, Kotiba maya kamanapa uratantiye: Piya, kaꞌwainaba Kotipa agu kaoꞌena potamiꞌnaba, aeba aoꞌmakeba pabiyama agu kaoꞌena potakana kanarasano, untiye.
1 Pigoya, aꞌyaꞌma kinaꞌmiba: Isu aeba taga Karaisitiwema, abima yeꞌnagiba, igeba Koti ntagaraena puma miyewe. Piya, abawampa agu kaoꞌena potaꞌnagiba, igeba kaga aꞌyaꞌma yagarawake agu kaoꞌena puwaitawe.
2 Eya, taeba Kotiti agu kaoꞌena potama, unti kamanaꞌwapa wasiyompeka taeba mayama abune: Taeba Koti ntagaramipa kaga agu kaoꞌena puwaitaunema, abune.
3 Piya, taeba Koti unti kamanapa wasiyompepa, taeba Kotiti agu kaoꞌena taga potaune. We, ae kamanaꞌamaba kampa kuntaba tabiye.
4 Piya, Kotitisa aborantaꞌnagiba igeba mabisaenaba asugasawe. Piya, taeba Kotiti tamatiti potaompepa, pi tamatitiꞌenarempaba mabisaenaba aeguma maema metama asugasaye.
5 We, ke esegi puma mabisaenaba maema megasi piye. Piye: Isu aeba Koti ntagarawema, abima yeminaba, aeba asugasi piye. Kotiba yagarawampa kamanapa uma arantiye
6 Piya, Isu Karaisiti aeba aborama yogawa agobikenaba wani mpaemagina, nagarikenaba korankapa airigintiye. Piya, wanitasa abiwanane. Wanitasabe koratasabe agowapa aborantine.
7 Pigoya, Awamusapa tagantanama nkago mintana, pi Nkawamusaꞌamaba Karaisiti nkawaga kamanapa uma taga aboraramegi abune.
8 Piya, pintanaba kakagami uma aborawe. Eya, Awamusana, wanina, korana suma, pi kakagaba igeba ka awaga aborawe.
9 Piya, wasanami nkiwaga kamanapa taeba abune. We, Koti yemi kamanaꞌamaba wasanami kamanapa igasaye. Piya, Kotiba Isukaba: Yagaranene, yoga abuntune.
10 Pigoya, kaꞌwainaba Koti ntagaramati amatiti potamiꞌnaba, aeꞌwa nkagupipa Koti uma aborami kamanaꞌama nkauꞌwapa aboraye. Kampa Kotiti amatiti potamiꞌnaba, aeba Koti yagarawakaba awaga kamana untipa kampa abibebe piye. We, pika aeba Kotikaba: Kumpari yagarawe, uma ata potaye.
11 Pigoya, taga awaga kamanapa mayamawe: Kotiba eꞌwasaenaba tamika miyaba mikune. Pi nkeꞌwasaenamaba yagarawampapisa aboraye.
12 Piya, Koti ntagarari uma kabo pemiꞌnaba, aeba pi nkeꞌwasaena wantagane. We, Koti ntagarari kampa kabo pemiꞌnaba, aetiba pi nkeꞌwasaenaba kampa waiye. Eꞌwasaenaba taeti waiyaba miyema napiyeno
13 We, Koti ntagaramati timatiti pe kinaꞌmitaba, ma kamanapa tigeti kaeyuwe. Piya, tigeba pi waiyaba eꞌwasaenaba ago maeyawema napiyiyoma, kaeyuwe.
14 Piya, taeba Kotikaba kampa taekuru punta taꞌmuntanabisa ae agori wano. Piya, taeba kampa taekuru punta, kaꞌenaga ae abukibintanaga abigakubompepa, kamanatepa aogima abikiye.
15 Eya, abigakenaenarepa abiyema, abintompeka, taoꞌmaeyaka abigakenaenarempa nkauꞌwapa ago maekunema abima tagantanagaba yune.
16 Pigoya, kaꞌwaina aeba agupa aꞌabibi agora kaikena aguntaena wanane. To aguntaena pekanaba, to ka yagaramaba agantanaba, aeba aoꞌyagaraga Kotipa abigakana, Kotiba eꞌwasaenaba pi nkaoꞌyagaraba ameno. We, agupa agora kaikena aguntaenaba ka waintiye. Piya pemi ntagaragaba abigaoma naeba kampa yuwe. Kampaye.
17 We, aꞌyaꞌma kampa arupu pemintanaba pipa aguntaenama nkauꞌwane. Piya, aguntaenama nkauꞌwapa kampa wasanama nkagupa agorapa kaikiye.
18 Piya, Kotitisa aboraꞌnagiba agunta kiꞌi kampa aegaraga, agaune. Eya, Kotitisa aboranti ntagaramaba kabiwaitagina, ataenama nkagowamaba kampa ata puwaitaye.
19 We, taeba Kotitisa aborantokana, aꞌyaꞌma mampabisa kinaꞌmiba ataenama nkagowama nkamentanti miyewema, abune.
20 Piya, Koti ntagaraba aboramagina aogi napiyenaba tamiye. Eya, aeba taga ntagarama nkagowaka abibebe pukena napiyenaba tamiye. Pikaba abimagi, taeba tagantanama nkagoripa atokaemagi, yagarawa Isu Karaisitige kaga aeti atokaeyune. We, aeba Koti mima, waiyaba eꞌwasaenama nkagowe.
21 We, uwaena yakarantontompitaba, tigeba ama kotipa tikabiwaitaiyo.
Yoni piya isa kaentiye.