1 Nae Saimoni Pita, Isu Karaisiti nkaposoro, kayokaya yagarawa ntawe. Piya, taege kaꞌmasa puma timatitiꞌena aogima maeya kinaꞌmititi ma nkisapa kaeyuwe. Piya, Kotirepe, tauꞌikena yagara Isu Karaisitibe, isigetisa arupuyenama tamatitiꞌenaba tabe ikatasa kaga maentompene.
2 Piya, Kotike Waꞌegare Isuke, tigeba agowaisipa aogima abigina, awagaenabe paruyenabe tigeti anosama aborarimeno. Monoꞌama nkauꞌwa aboratawama miyiyo
3 Pigoya, Kotiba aeꞌwa nkeꞌwasaenabipe aogiyenawapipe: Ubasiyoma, tagegaꞌe yoga, abima ubasintompeka aeba mantarasa esegiyenawatasa aꞌyaꞌma Koti kanta puma mikenaenarepa tamiye.
4 Piya, utaratanti ntanaba asugasima tabe ika kanta pegina agowapisaba tamiye. We, wasanami nkiꞌni ntapiyenabisa mampabisa uwoma kamparagaena waintipisa tiyegaka kanamagiri mantarasa eꞌwasabi ubasiyoma, utaratama agowapisaba taoꞌmaeye.
5 We, tigeba pika napiyiyo. Tigeba timatitiꞌenarita aogi yugaba puma amato piyo. Aogi yugarita taga nkabibebe puma amato piyo.
6 Taga nkabikenaenarita titipa kabima mima amato piyo. Titipa kabima mikenaenarita esegima asima amato piyo. Esegima asikenaenarita Koti kanta puma aota mima amato piyo.
7 Koti kanta puma aota mikenaenarita tiyoꞌena puma amato piyo. Tiyoꞌena puma mikenaenarita agu kaoꞌena puma amato piyo.
8 Piya, pintanaba tigeti waima aborawaeyakanaba, anagiyena wanane. Tigeba Waꞌegare Isu Karaisiti nkagoba aogima abima, mono yugaba taga pumagiri auꞌwapa aogima aborakibewe.
9 Pigoya, kaꞌwaina piyaena kampa aeti waintiꞌnaba aeba pagasari kampa agama aorika kina kanta piye. Tagane. Aeba Koti paisa aguntaenawapa kaintikaba ago ageguꞌa puntiye.
10 We, naoꞌmitaba, Koti utaritama tiba puntintana esegi potakenaraka mono auꞌwapa aogima aboraiyo. Tibega piya pukibepa, kampa wareꞌnakibewe.
11 Piya, tigeba pintana aegarakibepa, waiyaba kumati ubasikena kabiba tigeti aꞌwaiyekiri, tigeba tiꞌmuntanayaga ubasikibewe. Eya, Waꞌegare tauꞌikena yagara Isu Karaisiti kabiratakena kumati ubasikibewe.
12 Pigoya, tigeba taga kamanapa ago maema esegi puma asimagiri, pintanama nkagoba abintawe. Kanarane. Asi nasiba to ka urimekiri, pika napiyiyomawe.
13 Piya, naeba ma ntauꞌyaga mima asi nasi ma kamanapa urimekiri napiyiomawema napiyopa kanaraꞌenawe.
14 Piya, naeba uwaena yaganto nauꞌnepa kaikuwema, Waꞌegare Isu Karaisiti unamintegi abintone. Pika napima asi nasiba kamana urimuwe.
15 Toganaba naeba mampa kaikubopa, tigeba pi kamanapa aꞌyaꞌma yagaba aogima napiyiyoma, esa kaerimukuwe. Pita aeba Karaisiti nkagoba agantiye
16 Pigoya, taeba paisa kinaꞌmi napinta nkamani kamana nane. Taeba Waꞌegare Isu Karaisiti nkeꞌwasaenawapa taorepisa agantompeka esegiyenawatasa aborakibi kamana urimintogiri abintane.
17 Eya, amuta Koti tababa tabe agigaꞌe amima asagayumagina, pi asugasima eꞌwasa Kotiba yegina maya kamanapa Isuti tumintiye: Pi ntagara aeba nabugai ntagaranene. Aekaba tabera naꞌmu potauwe, untiye.
18 Piya yoga, taeba aege aota amuta mintuwakana, pi kamana mantabintisa tumoga abintompene.
19 Piya, taeba poropete kinaꞌmi kamanaꞌama nkauꞌwapa aogima agaune. Pika tigeba aogima upebe pigina kanarasano. Piya, eꞌama tununtanabinti araisa puma, poropete kinaꞌmi kamanapa kaꞌisaenaba aogima aboraye. We, tintabaipinti abayasa noriwamaba asiyekana taga marekiripa, kamanaꞌama nkagowapa aogima agakibewe.
20 Pigoya, tigeba maruꞌenaba pika abiyo: Poropete kinaꞌmi kamana mono isapi wainti, piꞌna nkagowapa kaꞌwainaba aeꞌwa ntapiyenabisaba kampa aboraye. Kampaye.
21 Piya, poropete kinaꞌmi kamanaꞌamaba wasanami ntapiyenabisa wanane. Aota Awamusaꞌama uwaitantegini wasanamiba Koti nkawamupa uma aborantane.
1 We, paipa kumpari poropete kinaꞌmiba Isureyo kinaꞌmi nkikapi asintasa puma, kumpari mono tisa kinaꞌmiba tige tikapipa asikibewe. Asimagini, igeba kakama toma toma kumpari mono kamana tikapinti maete kanama atararitakena pewe. We, ika puma ibabunti Waꞌegawamapa igeba ikabitamagini igewai nkigupa ata puwaitaigina igaikiye.
2 Igeba piya pigini, uwaena kinaꞌmiba iꞌni mpikenaenawaipa aegaꞌma ataena pukibewe. Piya pigini, wasanamiba agama taga kiꞌamakaba akayasotakibewe.
3 Pigoya, pi kumpari kinaꞌmiba mampabisaena ibugai kina mimagini, kumpari kamana uma kotatipa paibikibewe. We, paitakaꞌya Kotiba kamanapa uritakuwe, untemipa, kampa kaintiye. Eya, igaikibemi ntagaramaba kampa auwaita mintantiye. Pipa kampaye.
4 We, Koti nkagoba agaune. Piya, paipa kaꞌisa enisore kinaꞌmiba aguntaena pugunaba, Kotiba uwaba kampa itantine. Kampaye. Aeba igaꞌna puwaitantegini igeba tunusuwanta kabinti miyegana, antotaꞌena imikena yagaga igaꞌna puwaitantine.
5 Piya, paipa mampabi miyume kinaꞌmiba igeba ikabitauguna, aeba uwaba kampa itantine. Kampaye. Aeba tabe wanitasa ipaikaintegini puꞌwaewantane. Piya, Nowa aeba arupuyenama nkago uma aboranti ntagarabe tonaentisa tarumaema aokinape Kotiba kabiyogini aogima miyuguni aꞌyaꞌma to kaꞌisa puꞌwaewantane.
6 Piya, Sotomu kumatasa kinaꞌmibe Komora kumatasa kinaꞌmibe ataena puguna, Kotiba igama antotapa pi tabe kuma taraba taraba yakutasa kaegasogana kaguꞌamana waitantine. Eya, aintiba pika ikabitakibe kinaꞌmiba abima igeꞌwai nkantotaꞌena maekibeka napikibewema, Kotiba piya puntine.
7 Piya, Kotiba arupu yagara Arotipa aba purogana, aeba kampa tabatintiye. Piya, Arotiba kumiyena pumekaba tabera kunta abuntiye.
8 Eya, pi arupu yagara ikapi mpima, ige puntantana agama kamanaꞌwaipa abintiye. Piya, igeba akakaꞌyoꞌnaꞌnaenawaipa aborauguna asi nasiba igaogana, arupu antawamaba tabera pami puntiye.
9 We, Waꞌegawamaba abintiye. Ae aegara kinaꞌmipa imiyoꞌenabisa iba pukenaba aeba agantiye. Ata pe kinaꞌmipa antotaꞌena imikena yagaga iki naki igaꞌna puwaitakenaba agantiye.
10 We, aeba agasiyaena iꞌnintana potakena kumiyena puma kamana akayuye kinaꞌmipa igaꞌna puwaitakenaba aogima agantiye. Piya pe kinaꞌmiba igebigoꞌena puma igeꞌwaintana aegaꞌma kampa iyekuruba puma inatisa eꞌwasaenayaga kinakaba ikayasuwaitawe.
11 Aibegini, enisore kinaꞌmiba pi kinaꞌmi nkesegiyenaba igaintini, pigoyemagini igeba kampa ikayasuwaitama Waꞌegawama nkaobipa kamanapa kampa uwaitawe.
12 Piya, pi kinaꞌmiba igeba kabu yaga kanta puma aborawe. Pi ata yaga irakuꞌma iyegukenaba maꞌataisa puma, igeba ago kampa agantantanagaba akayasekana kaga iyeguma kaikiye.
13 Eya, igeba tonarona ataena pegini, igepa antota ataena puwaitawe. We, igeba arantita tikapi kamparagaena puma pika iꞌmu pewe. Igeba iꞌnintana tamakaema araꞌena puma abuyasa pisa puntini, tigege kaga tiꞌmuntana namagini timiyo pukenaga iꞌmupa pewe.
14 Iyobintiba kumiyena pumaeyagina, aguntaena pikenaenamaba kampa igaꞌe paye. Kampaye. Igeba tara igi napiye kinaꞌmipa ibaibumagini, mabisaena ibugaintanama nkagowapa agawaeyawe. We, igeba aꞌabibi nkaesakena kinane.
15 Igeba arupu kipa ikabitategini, antageꞌenaba pewe. Aibegana, Peyo ntagara Peramu aeba ataena pometasa ika mpaekenaga abugantisa puma, pi kiꞌi aegarawe.
16 Piya, Peramu aeba aiboꞌena pogana, tonki yaga, kamana kampa unta kinaꞌmaba wasanama usu pumagina: Aꞌa-o, uma kabiꞌma, pi poropete yagarama nkaiboꞌena potakena pomentanaba akunkatantiye.
17 Pigoya, pi kumpari mono kinaꞌmiba igeba mabintisa nabai nami wani tagankwamisa puma miyewe. Igeba esibawama ibina mpanta agarubagina, wagasa pisa puma miyewe. We, aꞌabibisa tununtanaba igeti itaye.
18 Piya, igeba igebigoꞌena puma aiboꞌenawaipa tabera aborama kampa inipa pewe. Piya pumagini, igeba iꞌamantana puma iꞌni kumiyena pukenarasa wasanaba imiyoꞌena puwaitama, ataena pe kinaꞌmi nkaiꞌaruyenabisa iyegaka wama monota inamu kanta pe kinapa, igeba paibuma miyewe.
19 Piya, igeba: Igaꞌna kampa punta tae kanta puma uwa miyiyo, uwaimewe. Uwaimimagini, igewaipa kamparagaenara igaꞌnabi mpiyewe. Piyama, kaꞌenama wasana asugasaginaba, pi ntagaramaba amentapinti igaꞌnabi miye.
20 Tagane. Igeba tauꞌikena yagara Waꞌegare Isu Karaisiti nkagoba aogima abima aegaꞌmagini, mampabisa iꞌnintanabisa iyegaka wantawe. We, igeba to aꞌwae puma iꞌnintanabi ubasegina, to irakuꞌma igaꞌna puwaitaginaba, mikenaenawaipa tabera ata puwaitaye. Eya, maru iꞌni kina mintantapa ata maru mpintantane. We, igeba aꞌwae pepa, ainti mikenaenawaipa tabera asugasima ata marunkaipa to awametane.
21 Piya, piya pe kinaꞌmiba arupuyenama kikaba aiboꞌena puma kampa aegarantasinta, igeba ataba puntasine. We, pi kita aegarantaꞌnagiba to aꞌwae puma Koti nkaota uwaiminti kamanapa ikabitapa, ige ataenaba to awametane.
22 Piya kinaꞌmitiba maya kamana umarantapa esegi piye: Karawamaba naninta nagaitegina muyena pumagina, to aꞌwae puma naye, iye. Piya, yagaba wani paiꞌataginaba, pabiyama to aꞌwae puma auba pasiye, iye.
1 We, nabugai ntaoꞌmitaba, ma nkisa kaeyogana taraena piye. Naeba tigutipa abage pekana to kanara abibebe pukibeka, tara isa kaema timuwe.
2 Piya, aota poropete kinaꞌmiba ainti aborakibi kamanapa untana, aogima abiyo. Pigoya, tauꞌikena yagara Waꞌegawamaba uwaitaogini, aposororimpiba ae awamu wasimagini ae kamanapa untana, aogima abiyo.
3 Pigoya, aꞌyaꞌma kinaꞌmitaba, tigeba maruꞌenaba abiyo: Agogo yaga karana pukena kinaꞌmiba aborama iꞌni ntapiyenawaipa aegaꞌma amiyo kamana uma,
4 maya ukibewe: Waꞌega kanakiye, untapa, auꞌwapa aempaye, umagini: Tayabamagi Waꞌegawama kanama arupu pukena kamana untapa, puꞌwauguna, pai Koti pumarantintanaba antota kampa tonarona punta uwa mirite kanantiye, ukibewe.
5 We, igeba maya kamanapa abitegini kaiyawe: Paitakaꞌya Koti yogana mantaba aborama waintogana, waninkama meki menkaki puma maba wanitasa aborama waintantine.
6 Piya, Koti yogana, tabe wanitasa aboranti mpaba aerari kaeyogini aꞌyaꞌma kinapa puꞌwaewantawe.
7 Eya, Koti aeꞌwa kamana yogana, aboranti mpantabe mabe yaku kaekenaga uwaisitantine. Piya, ibaba Kotiba mantabe mabe kabima mima aobi pumagina, ae ikabita kinaꞌmi kamana uwaitama kaikena yagaba kaegaikiye. Pika aiboꞌena puma kasawe.
8 We, nabugai ntaoꞌmitaba, tigeba ma kamanapa abima aibopa a-piyo. Waꞌegawama nkaobipa uwaena kabuwamaba ka yaga kanta pegina, to ka yagaba uwaena kabu kanta piye.
9 Piya, kaꞌisa kinaꞌmiba: Waꞌegawama pase puma migarayema, napiyewe. Pipa kumparine. Waꞌegawamaba aeba kampa pase pase puma mima, utaratanti kamanaꞌwapa kampa uwa ataye. Kampaye. Aeba tigeka napimagina, kaꞌwaina kakasanagaba kampa abegina, aꞌyaꞌma kinapa: Tigupa aꞌwae piyo, umagina, tigeka ibaba paebuma miye. Mabe mantabe aꞌya wakana kasaꞌena aborakiye
10 Pigoya, Waꞌegawama kanapa ku kinaꞌmi pesa puma aborakiye. Pi ntagaba mantawamaba tapo uma aꞌya wakana, aꞌyaꞌwaemaenama nkagoba yaku tawakana kaguꞌena pekana, mabe aꞌyaꞌma mara pumarantaꞌenabeba kaga yaku tawaewakiye.
11 We, pintanaba piyama aꞌya wakiripa, tigeba to awameta mima, aota kina mima Koti kanta puma miyiyo.
12 Eya, tigeba Koti kanaka tibugakiri kabima miyiyo. Piya, pi ntaga mantaba yaku tama aꞌya wakana, aꞌyaꞌwaemaenama nkagoba tawaewakana kaguꞌena pekiri, pika to awameta miyiyo.
13 We, Kotiba kasa mantabe kasa mabe aborakana, pita arupuyenawampaba pumaewakiye. Pika utaratantegi, kabima mima aobi pune. Taeba Waꞌegawamati anosano
14 We, nabugai ntaoꞌmitaba, pintanagaba aogima kabima mima aobi peka, esegima yogaba puma mima kaꞌena ataenabe kamparagaenabe a-puma, paruyenabi miyigina, aeba tigakiri aogima miyiyo.
15 Piya, Waꞌegawamaba taeti pasema miye. We, aeba tauꞌikenaga pasema miyema napiyiyo. Pika tabugai taoꞌyagararakaꞌya Poroba aogi napiyena maemagina, aegeba pi kamanapa tigetiba kaentine.
16 Eya, aꞌyaꞌma esaꞌwapipa pika kaentine. We, ae isapipa kaꞌisa kamanapa esegima waiyegini, wasanamiba kampa aogima napiyewe. Aibegini, kampa abinta kinaꞌmibe tara agi napiye kinaꞌmibe pi kamanapa uma pai ampa paibumagini keꞌwaipa kasawe. Eya, pi kinaꞌmiba to kaꞌisa mono kamanapa kaga paibuma ata pewe.
17 We, nabugai ntaoꞌmitaba, tigeba pika napima esegima kabiyiyo. Piya, ainti kamana akayuye kinaꞌmiba aiboꞌenawaitasa tibaibigiri, monota esegima asikenaenaripa kaisanaga kabiyiyo.
18 Piya, tigeba Waꞌegare tauꞌikena yagara Isu Karaisiti nkawagaenabi mimagiri, agowapa aogima abigina anosano. Ibabe aꞌyaꞌma yagabe, ae agegaꞌeba asagayuyeno. Tagane.
Pita piya isa kaentiye.