1 Nae Pita, Isu Karaisiti nkaposoro yagarawa ntawe. Piya, tigepa kamaena puritama tigarubauguri maripa kaitegiri, Pontasi maribe, Karesiya maribe, Kapatosiya maribe, Esiya maribe, Pitiniya maribe uminta kinaꞌmititi, ma nkisapa kaeyuwe.
2 Piya, taba Koti utaritaogiri aeꞌwantana aborantane. Aeba yogana Awamusaꞌamaba: Isu Karaisiti kamana wasima korankatasa aeguse puma paititaiyoma, utaritama aota puritantine. Piya, tigetiba awagaenabe paruyenabe waiyabaꞌmita iyeno. Koti nkeꞌwasaenamaba mantabinti taobi piye
3 Pigoya, Isu Karaisiti Waꞌegarempa nkaba Koti, ae agegaꞌe asagayuyeno. Piya, aeba tabera antara puratama, Isu Karaisiti purintapisa asitanti ntugarasa waiyaba kumaka aobi piyoma, taumarepa kasaꞌena yakari puratantiye.
4 Piya, pi maekubompe kumapa kampa abararama, kampa ataena puma, paisa kantaba kampa pukiye. Piya, Kotiba pi kumapa taeꞌena taobi puma kabirataye.
5 Piya, taeba Kotiti tamatiti pompeka esegiyenawatasa kabirataye. Eya, agogo yaga wasanami nkiyobi tauꞌikibika kabirataye.
6 Tigeba pika tiꞌmu piyo. We, mampara tonarona makaga makaga pekana tikinaki pukibintanaba uwaena yaganto aꞌya wakiye.
7 Piya, kori yabapa mampabisaenawe. Pipa wasanama yakupi kaema iꞌninkapa aeyobaꞌma agowapa aboramisa puma, kuntaenaripa timatitiꞌenama nkagoripa aborarimiye. We, timatitiꞌenarimpaba koriba asugasaye. Piya, Isu Karaisiti aborakibi ntagaba pika tigegaꞌe maete ima asagayuma aꞌmu puritakiye. Pika ibanto kuntaenaripa aboraye.
8 Piya, tigeba Isu nkaowarapa kampa aganta, agu kaoꞌena potawe. Kampa aganta, timatiti potamagiri agasiyama tiꞌmu potawe. Pi tiꞌmuntanamaba tiwamupisaba kampa asugasawe. Kampaye. Aeba tabera asugaintiye.
9 Piya, timatitiꞌenarimpa nkauꞌwapa pipa timankama nkiꞌikenaenawe.
10 Pigoya, paipa poropete kinaꞌmiba awagaena aborarimikibi ntanagaba uma aborantane. Pi nkagoba napimagini: Ayamabaya iꞌikiyema, napima mare-u me-u puntane.
11 Piya, Karaisiti Nkawamusaꞌama intabaipinti mintogini, igeba Karaisiti kuntaena aesaga pukenaenawakabe ainti age asagayukenaenagabe uma aborantane. Aboramagini, pi poropete kinaꞌmiba: Aya yagarabaya, ayantagabaya pi nkauꞌwapa aborakiyema, napima mare-u me-u puntane.
12 Pigoya, igeti wanane. Tigeti kayokayaꞌena puntaka Kotiba tayakikiye, piya uma Kotiba aborawaimintiye. Piya, ainti Kotiba otaogana Aota Awamusaꞌama mantabintisa tumintika, wasanamiba ae esegiyenawatasa aogi kamanaꞌama nkagoba uma aborarimewe. We, pi kamanaꞌama nkagoba enisore kinaꞌmiba kaga abisanaga ibiye. Kotiba aota miyiyoma tagegaꞌe iye
13 Pigoya, pika tigeba napiyenarimpapa tibamu kantiba kimagiri paebuma mima aogima kabiyiyo. Eya, Isu Karaisiti irosakibi ntagaba awagaena aborarimikibi ntanaga napima tabarababa a-puma aogima kabiyiyo.
14 Tigeba inamu ntagarama aba kamana wasiyisa puma, Koti kamanapa wasiyiyo. Paipa kampa napiyenaba waintogiri, tigu iꞌnintana puntasa puma, ibaba pi kipa toba a-nkaꞌwae puma aegaraiyo. Kampaye.
15 Tigeba tigegaꞌe uma tiba punti Ntagarama aota miyisa puma, pabiyama aꞌyaꞌma nasikenaenarintaga aota miyiyo.
16 Pika mono isaꞌamaba maya iye: Naeba aota miyoka, tigeba pabiyama aota miyiyo, piya untiye, iye. Tabe ikankatasa taba puratantiye
17 Pigoya, Kotiba intakabe tumintakabe kampa napinta yogaretaka taga aꞌyigitatagiri, tigeba aeka: Tabarempawe, yewe. We, tigeba ae agoga aogima napima, aekaba tiyekuru puma mima mampara arupu kita nasiyiyo. Piya, tige ma agoba kampaye.
18 We, tigeba ago abintawe. Tiyabamagiba ata ki uwa aegaꞌma mintuguri, tigegeba kaga pabiya puntawe. Pigoya, pi kitasa Kotiba ika puritantine. Aeba mampabisaena, kori, siribarasa wanane.
19 Aeba Karaisiti kurapa inta ikatasa ika puritantine. Eya, Karaisitipa sipisipi awaro kanta puma aegugasuguna, ka ataena au airisaꞌenawapa kampa waintaꞌyaga, tigeka puꞌwantiye.
20 Piya, paipa Koti maba kampa punta, Karaisitipa pi ntugaraka otantine. Ainti kana nagarikena pekana, tige tiyoꞌmaekena mabipa aborantine.
21 Piya, aeꞌwa ntugarasa tigeba Kotitiba timatiti pewe. Eya, Kotiba Karaisitipa purintapisa asitama tabe agigaꞌeba amintika, tigeba Kotitiba timatiti puntiri, aeti atokaekenaga aobi pewe. Monoꞌama tabage puntiye
22 Piya, tigeba taga kamanapa wasikenaenarasa tiguꞌamapa narentare puma, mono kinaꞌmipa taga agu kaoꞌena puwaitawe. Pigoya, tigeba tintabaipisa tiyoꞌmipa agu kaoꞌenaba esegima puwaitaiyo.
23 Tigeba mampabisa abara yamankatasa wanane. Waiyabaꞌenarasa kasa kina aboraritantine. Eya, Koti kamana, aoso sima waiyaba kamanatasa aboraritantine.
24 Pika mono isaꞌamaba maya iye:
Aꞌyaꞌma wasanamiba kabuyena kanta pegana, iwaꞌenawaimpaba kabuyenama nkaosa kanta piye, iye.Piya, kabuyenaba asa wagina, aosawampaba aibarara puwaye, iye.25 Pigoya, Waꞌegawama kamanapa waiyabane, iye. Piya, pi kamanapa uriminta aogi mono kamanane.
1 Piya, tigeba aꞌyaꞌma ata puwaitakenaenabe, aꞌyaꞌma agoꞌenabe kumpariꞌenabe to waina mparuta mikenaenabe, aꞌyaꞌma akaya kamanape kasiyo.
3
2 Tigeba kasa inamumpi nonoka ibisa puma, tigu tiyoꞌmaekena taga ntunukaba tibeno. Eya, tigeba Waꞌegawama kayonenawapa nabigama tima kagagana iga piya, tiꞌikenaena anosasanaga tibeno.
4 We, tigeba Waꞌegawamati ampiyiyo. Aeba aogaso sima waiyabaꞌena wantaga yabane. Piya, wasanamiba ataena piyema napima kasapa, Koti otaogana ae aobipa aogi puma inta ika mpintiye. Aeti ampima atokaeyiyo.
5 Piya, tigeba aogaso sima waiyaba yaba kanta puma mimagiri, amato puma Awamusaꞌama ntamantana puma miyiyo. Eya, tigeba aota tabe mono kina kanta puma mima, tigupa muta atasu piyo. Tigeba piya pigina, Kotiba Isu Karaisitika napekana pi mputaꞌenagaba kanarasakiye.
6 Pikaba mono isaꞌamaba maya iye:
Abiyo. Naeba ka inta ikantaga yabaka otauwe, iye.Pi ntabantama esegi potakena yabapa, Saiyoni kumantepintiba arabama arupu pukena puwe, iye.Piya pekana, wasanama aeti amatiti pukibemipa, anintanaba kampa waikiye, untiye, iye.7 Piya, timatiti pe kinaꞌmititiba, Karaisitiba inta ikane. We, kampa imatiti pe kinaꞌmitiba Karaisitikaba maya iye:
Pi ntabapa yoga kinaꞌmi maegasa ntabapa, ibaba arupu pukena aiꞌne yabapa aboraye, iye.8 Eya, wasanami nkigisa aimisagakena yabantana pukiye, iye.
Tabe yabankamaba ipasanakini wareꞌnakibewe, iye. Piya, igeba Koti kamanapa akayuyiginaba, pi kamanaꞌamaba igisaba aimisagakini wareꞌnakibewema, Kotiba paipa piya uwaitantine. Taeba Koti tuntanamana puma miyune9 Pigoya, Kotiba ago uritantegiri, tigeba ae taga tunka mpiyewe. Tigeba Waꞌegawama mpono kiye kinaꞌwa mpiyewe. Tigeba ka kinaꞌena puma aota kina miyewe. Tigeba Koti nkaokinatakaꞌya mpiyewe. Piya, tununtanabisa tiba puma aogi eꞌwasaenawapi apaititanti ntagarama nkaogi yugawaka awaga yiyoma, aokina tiba puntine.
10 Piya, paipa tigeba uwa kina mintantapa, ibaba Koti tuntana puma mintawe. Paipa tigeba Koti nkantaraꞌenawapi kampa mintantapa, ibaba antaraꞌenabi ago ampintawe. Tigeba Koti ntuga kina miyiyo
11 We, nabugai kinaꞌmitaba, tigeba to marisa kina kanta puma mima, mampabipa uwaena yaganto mikena kinatawe. Piya, naeba mayama urimekiri abiyo: Arirasa iꞌnintanamaba timawamapa maꞌena potamipa, tigeba tikabitaiyo.
12 Tigeba to marisa kinaꞌmi nkikapinti aogima ntasiyo. Piya, igeba kamparaga kamana uritapa, aogi yugaripa agama, aintiba Koti nkago igeti aborakibi ntagaba ae agegaꞌeba asagayukibewe.
13 Tigeba Waꞌegawamaka napi napi puma aꞌyaꞌma ima minta kinaꞌmi imentapinti miyiyo. Eya, wasana waꞌega yagara asugasima mintiꞌna aepa,
14 ae uwaitanti kabirata kamani kinaꞌmipeba imentapinti miyiyo. Piya, igeba ataena pe kinaꞌmipa ika nkimintini, arupuyena pe kinaꞌmi nkigegaꞌe asagayukena yuga pewe.
15 Piya, Kotiba piya pusanaga abiye: Tigeba arupu yugaritasa kampa abima aibo kinaꞌmi nkiwamupa akunisanaga abiye.
16 Pigoya, Kotiba igaꞌnabisa akariyobatitantisa puma pabiya puma miyiyo. We, tigeba: Uwa kina miyune, umagiripa, karuꞌena aꞌwae puma ataenaba a-piyo. Kampaye. Tigeba Koti kayokaya kinaꞌena puma miyiyo.
17 Tigeba aꞌyaꞌma kinaꞌmi nkigegaꞌeba asagayuyiyo. Mono tiyoꞌmipa agu kaoꞌena puwaitaiyo. Kotikaba tiyekuru piyo. Wasana waꞌegawama nkagegaꞌe asagayuyiyo. Taeba Karaisiti kisagaꞌma tauki nakiyena maekune
18 We, kayokaya kinaꞌmitaba, tigeba kabiritaꞌnagikaba tiyekuru puma imentanti aogima miyiyo. Kayonena puma paebuma miye kinaꞌmi ibiwanane. Tigeba atama kabirita kinake kaga imentanti miyiyo.
19 Piya, igeba tiki nakiyenaba uwa timigiripa, tigeba Kotitiba napimagiri pi tiki nakiyenaba aesagabikibepa, Kotiba aꞌmu puritakiye.
20 Piya, tigeba aguntaena pigini tiyeguyigiripa, uwa itaiginaba, ke abekana kanarasakiye, a. We, tigeba arupuyena pigini, pika tiki nakiyena puma ata puritaigiripa, uwa itaiginaba, Kotiba pikaba aꞌmu puritakiye.
21 Piya pukibeka Kotiba utaritantine. Eya, Karaisitiba tigeka auki naki puma paitaritantine. Pika tigeba aekisa aegaraiyo.
22 Aeba aguntaenaba kapa kampa pogana, agoꞌenaba ae awamupisa kapa kampa aborantine.
23 Igeba akayasotaugunaba, antotapa kampa akaya puwaitantine. Auki nakiyena maentanaba, antotapa kampa kaba ibirantine. Kampaye. Aeba inatisa taga aꞌyigitatakena yagaramati arupuyenawaka ayapa atantine.
24 Piya, aeꞌwa nkautasa aguntaenarepa aesagaꞌma maripo yarapa puꞌwantine. Eya, taeba aguntaenareti puꞌwama arupuyenara taogakubompeka puꞌwantine. Piya, auꞌarisantaꞌenawampa kamparagaenarepa maeragasima kaba tatantiye.
25 Eya, paipa tigeba sipisipi yaga kanta puma asorisari puma mintantawe. We, ibaba sipisipira kabikena yagara, timata kabiyemiꞌnati, aꞌwae puma ampintawe.
1 We, wayaꞌmitaba, tigeba pabiyama tiwaegi imentanti miyiyo. Piya, igetisa kaꞌisa Koti kamana kampa wasiyeꞌnagiba wayaꞌwaimpiti kamana nane. Mikenaenaripa agama pami pumagini, igeba igu aꞌwae piyo.
2 Eya, Kotikaba tiyekuru puma nare ntare mikenaenaripa agamagini, igeba igupa aꞌwae piyo.
3 Piya, tigeba tiꞌno nkitakenaenarasawo, kori tiwaꞌenarasawo, toma toma titasaenarasawo, igebi nkiyobi arirasaenarasa a-piyo. Kampaye.
4 Tigeba tintabisaba tigu tiwaꞌenaba aboraiyo. Eya, timawamaba paebuma paru puma waiyegina, Kotiba aꞌmu pegina ikankampaba intaꞌena puma waiyaba miye. Pipa aboraiyo.
5 Piya, paipa kaꞌisa wayaꞌmiba Kotiti atokaekenaga napima aota mintini, pabiyama imarasa iwaꞌena puma iwaegi imentapinti mintantawe.
6 Eya, Seraba piyaena puma Abaraꞌamu nkawamu wasima: Waꞌeganene, untine. Tigeba piyama arupuyena puma tonaga kampa tiyekuru pukibepa, Sera ntagara kanta pukibewe.
7 We, iwaegitaba, tigeba pabiyama kayone puma wayatimpige aogima miyiyo. Piya, wayaꞌmi nkiꞌama nkesegiyenaba tumintiye. We, igeba Kotitisa eꞌwasaenaba tigege kaga maekibeka, igegaꞌeba asagayuyiyo. Piya, nunamuripa akunisanaga piya piyo. Taeba kaga miyeno
8 Pigoya, kamanaꞌnepa aꞌya wakena piya, abiyo: Tigeba aꞌyaꞌma kinaꞌmitaba, ka tintabarima miyiyo. Tigeba tintaraꞌena puma, tiyoꞌmipa agu kaoꞌena puwaitama, kayonena puma, aogima ntapima tigeripa aꞌmpaete iyiyo.
9 Wasanamiba ataena puritaigiripa, tigeba antotapa ataba a-puwaitaiyo. Piya, igeba kamana akayasuritaigiripa, antotapa a-nkakayasuwaitaiyo. Kampaye. Tigeba akayona puwaitaiyoma, Kotiba tiba puntiꞌna, antotapa piya piyo. Piya pukibepa, Kotiba antotapa akayona puritakiye.
10 Pika mono isaꞌamaba maya iye:
Piya, ka yagarama, eꞌwasaenabi mpikenagabe aogi yaga agakenagabe abugai ntagaramaba, ata kamana usanagaba anteburapa aogima kabima mima, awamu eperasa anagi kamana usanagaba aogima kabiyeno, iye.11 Aeba ataenaba akabitama, arupuyena peno, iye.
Aeba paruyena aguyosaꞌma maema arakureno, iye.12 Piya, Waꞌegawama nkaomaba arupu kinaꞌmiti waiyegina iyoꞌmaeye, iye.
Waꞌegawama nunamuwaitiga age atakae piye, iye.We, ataena pe kinaꞌmipa Waꞌegawamaba amo puwaitama ata ika nkimikiye, iye. Yogarasa tauki nakiyenaba maekubompepa pipa kanarane13 Pigoya, tigeba arupuyena puma miyiginaba, kebaya karuꞌena ataenaba puritakiye. Pipa kampaye.
14 We, tigeba arupuyena pumagiri pintanaraka kuntaena maekibepa, tiꞌmu tiꞌmuntanabi uwa mikibewe. Piya, igekaba a-tiyekuru puma tabarababa a-piyo. Kampaye.
15 Tintabaipi Karaisitiba Waꞌegari asitaiyo. Piya pumagiri, tigeba aꞌyaꞌma yaga kabima mima, wasanamiba Kotiti atokaema aobi pikena agorika tibigaigiripa, karuꞌena aꞌwae puma uwaimiyo. Piya, tigeba Kotika tiyekuru puma paebuma mima aogima uwaimiyo.
16 Eya, napiyenaripa ataenaba a-potaiyo. Piya pukibepa, wasanamiba ata puritakibepa, Karaisitika aogiyena pentanaga akayasota kinaꞌmiba ini pukibewe.
17 Pigoya, taeba ataena pukubompetaka kuntaena maekubompepa, pipa ka awamene. We, Koti nkabemika taeba arupuyena pukubompetaka kuntaena maekubompepa, pipa Koti nkaobi aogiyenawe. Nowa potantisa puma Kotiti wani paitatantiye
18 Pigoya, Karaisiti aeba ka yaga puꞌma aguntaenaba agora maegaintine. Eya, aeba arupu yagara kana, aeba ata kinaꞌmite mparu mpaema, Kotiti taba puratakena puntine. Piya, aeba wasana mintogini igeba auꞌwapa aeguyuguna purogana, aumawatasa asitaogana aogantine.
19 Pigoya, pi ntagaba ae amankampa wama igaꞌnabi mpintume nkimawamapa kamanaꞌwapa uwaimintiye.
20 Piya, paipa Nowa wanipisa kare punti ntagaba Kotiba paebuma mintogini pi kinaꞌmiba kamanaꞌwapa akayumagini puꞌwantawe. Piya, pi ntagaba tara kinaꞌantomi, tonaentisa kakaga umaema kinaꞌmi, wanipinti iꞌiyogini mintantawe.
21 We, aeba wanipisa iba puntisa puma, ibaba wanitasa paitaritamagina tiꞌiye. Pi nkwanipa titasaba kampa maebugaintane. Kampaye. Isu Karaisiti purintapisa asintika paititakibipa, antotapa Kotipisaba aota napiyenaba maekibewe.
22 Eya, Isu aeba mantabinti ima, Koti nkayatakanti asu mintegini, enisore kinape kabikena kinape to esegi kinape ae amentanti mintawe.
1 Pigoya, Karaisitiba aeꞌwa nkauꞌwata auki nakiyena maentika, pika napiyisa puma tigeba napiyiyo. Piya, wasanamaba auꞌwata auki nakiyena maeyamipa, aguntaena pusanagaba kampa napiye.
2 Piya pumagina, aeꞌwa nkau mampabi waikena pekanaba, aeba wasanami nkiꞌni ntapiyenaba kampa aegaꞌma, aeba Koti nkabemintanaba wasima miyeno.
3 We, paipa tigeba to marisa kinaꞌmi nkibugaintanara nasisu pumagiri, kumiyena puma, tiguꞌamapa iꞌnintana potamagiri, esegi wani ntama aiboꞌnabo pumagiri, ata patiyena puma, aiboꞌena pumagiri, kamana akayuma ama kotintana aegarantapa, ibaba aꞌya wakiripa ataiyo.
4 Piya, tigeba pi nkagasiya kamparagaena pukenagaba kampa igetiba uma atokaeyaginiba, pika igeba ata pami puma kamparaga puritawe.
5 We, aintiba puꞌwanta kinape taogantompe kinape kamanatepa uma aꞌyigitatakena yagaramati igeba igeꞌwai nkagowaipa aborakibewe.
6 We, paipa puꞌwanta kinaꞌmi nkaꞌyigitakenaraka puꞌwanta kinaꞌmitiba uma aogi kamanapa aborantine. Eya, igeba aꞌyaꞌma kina pesa puma igeꞌwai nkitasa antotaꞌenaba maema puꞌwantapa, Koti miyisa puma misanaga imawaimpaba kamanapa aborantine. Koti nkesegiyenarasa aogi yuga puma tiyoꞌena piyo
7 Pigoya, aꞌyaꞌmaena nagarikena kanapa pabigo arosaye. Piyama, tigeba aogima ntapima, nunamu ukenaraka asoyaena piyo.
8 Tigeba tiyoꞌmi agu kaoꞌena puwaitakenaenaba aogima upebe puyaba miyiyo. Pintanamaba tonaba agasaye. Piya, agu kaoꞌena potakenaenamaba agasima uwoma aguntaenaba airari kaeye.
9 Tigeba tiyekitaenaba a-pumagiri, tiyoꞌmipa aogima maruntana puma kabiwaitaiyo.
10 Kotiba awagaenawapisa tonarona aꞌmuntanaba ka ka kinaꞌmiti timegiripa, a-kakatama, pitasa aogi mono yuga puma tiyoꞌmipa iyoꞌmaeyiyo.
11 Piya, kaꞌwainaba kamana uma aborakibipa, pipa Koti nkawaga kamana uma aborano. To kaꞌwainaba wasana aoꞌmaekibipa, pipa Koti nkamemi nkesegiyenarasa aoꞌmaeyano. Eya, aꞌyaꞌmaenagaba Isu Karaisiti ntugarasa Koti nkagigaꞌe asagayukenagaba aogi yuga piyo. We, eꞌwasaenabe esegiyenabe aꞌyaꞌma yaga aeti waiyabane. Tagane. Karaisitikaba tauki nakiyena maekune
12 We, nabugai ntaoꞌmitaba, tigetiba yaku tasu puma timiyoꞌena pukenaenaba aborakiye. Piya, kasaꞌena wanane. Pipa tige agoripa aogima aborakena piye. A-pami piyo.
13 Piya, tigeba Karaisiti nkauki nakiyenaba kaga maema aesaga peka tiꞌmu piyo. Eya, aintiba eꞌwasaenawapa aborakiripa, tigeba to ka tinta asoyaena puma tiꞌmu pukibewe.
14 Tigeba Karaisiti nkagera iyekita puritaigiripa, Koti akayona puritakiye. We, eꞌwasaenama Nkawamusa, Koti Nkawamusaꞌama tigeti ago miya, tiꞌmu piyo.
15 Pigoya, tige tikapisa kaꞌwainati auki nakiyena aborakibipa, aꞌyugu wasanama aeguntaꞌenarasawo, kuntanarasawo, ataenawatasawo, to waina ntanari ara agata nasikibi ntanarasawoma aborakiye. Piya puta nasekiniba igeba antotaꞌenawapa taga aboramikibewe.
16 We, ka yagarama Karaisiti nkaegarakenaga auki nakiyena maentanaba, aeba anipa a-peno. Aeba Karaisiti nkaegarakenagaba napima Koti nkage asagayuyeno.
17 Pigoya, Koti utaratakena yagaba agarosagina, marupa Koti nkaokinaꞌmiteti kamanapa aborakiye. We, taete nkagoba marupa aboragaitegina, Koti kamana akayuye kinaꞌmitiba ayabaya puma aꞌya pukiye.
18 Pika mono isaꞌamaba maya iye:
Arupu kina iꞌikenaba kunta pikana, Koti ikabitate aguntaena pe kinaꞌmiba ae nkaukaꞌibaya mikibewe, a, piya iye.19 Piya pegini, wasamiba Koti nkabemika iki nakiyenaba maeyapa, aogiyena puma aꞌyaꞌmaena aboratanti ntagarama nkayapi imawaipa ataigina, aeba tagantana puma kabiritano.
1 We, tigetisa mono kiye kinaꞌmika esegi kamana uwaimikena puwe. Piya, naegeba tige pesa puma monota kabinta ntagaranawe. Naeba naonepisaba Karaisiti auki nakiyena maeyoga agantone. We, naene kaga aborakibi nkeꞌwasaenabi ubasikune. Pigoya, kabinta kinaꞌmitaba, kamanapa urimukuwa, abiyo:
2 Koti nkaegara kinaꞌmiba igeba sipisipi kanta puma miyigiri, tige timentapinti miye kinapa aogima kabiwaitaiyo. Pipa kuntaenabisa wanane. Peronabisa kabiwaitaiyo. Pipa ika mpaekena napi napi piyoma wanane. Tintawama aseyonabisa piyo.
3 Tigeba kabiwaita kinaꞌmipa igaikena wanane. Tigeba aogima mikenaenaritasa pi sipisipi kanta puma miye kinapa mono kita paitawaitaiyo.
4 Piya pukibepa, paitaratanta sipisipi kiye yagara ampa aborakiripa, pi ntagaba tigeba eꞌwasa ika nkantota maeyigina kampa abararakiye. Imentanti miye mpono kinaꞌmi kamanane
5 We, masimabi kanta puma miye kinaꞌmitaba, tigeba pabiya puma mima paitanta mono kinaꞌmi nkimentanti miyiyo. Piya, tigeba ti maete tumikenaenaba maema tipa airarikaema tiyoꞌmipa iyoꞌmaeyiyo. Pika mono isaꞌamaba maya iye: Kotiba igebigo kinapa kama puwaitamagina, i maete tume kinaꞌmipa awagaenawapa aborawaimiye, iye.
6 Pika tigeti ntapiyenaba maete tumima, Koti nkesegi ae nkamentanti miyigina kanaꞌwa arosakanaba tisagayuyeno.
7 Piya, aeba aogima kabiritagiri, aꞌyaꞌma kuntuyenaripa aeti ataiyo.
8 Tigeba aiboꞌnabopa a-puma, aogima kabiyiyo. Kama kinati kewamaba araiyoni yagama pisa puma amo kasa uma tiba nakenagaba uma igasaga ampa igasaga piye.
9 Tigeba timatitiꞌenayaga esegima mimagiri aepa aebasanakasiyo. We, tigeba abintawe. Aꞌyaꞌma tiyoꞌmiba aꞌyaꞌma mari mintaꞌnagiba, igeti kuntaenaba pabiyama aborawaimewa, esegima miyiyo.
10 Pigoya, Kotiba aꞌyaꞌma awagaenama nkagoba mimagina: Karaisititi atokaema waiyaba eꞌwasaenane mpaeyanema, utaritantegiri, aro ntaganto tigeba kuntaenaba maeyakana, aewa aꞌwae puma aogi puritama, asima esegi puritakiye.
11 Aetiba aꞌyaꞌma kabiratakena esegiyenaba waiyaba miyeno. Tagane. Kaꞌisa nagarikena kamanane
12 Pigoya, ma nkisapa Sairasi nkayapisaba aro nkisaꞌanto kaema urimuwe. Naeba aekaba taga naonemaba napiyuwe. Piya, ma nkisapipa Kotitisa taga awagaenaraka esegima asiritakenaga urimuwe. Pika tigeba napima asiyiyo.
13 Pigoya, Pebironi ma kumatasa kinake kaga tigeke tiba punti kinaꞌmitika: Aya pewe, uritawe. Maka yagaranempageba: Aya pewe, iye.
14 Tigeba tiyoꞌmipa tiyapa imima, agu kaoꞌena puwaitaiyo. We, aꞌyaꞌma Karaisititi atokaeya kinaꞌmitaba, tigeti paruyenaba waima waiyeno.
Pita piya isa kaentiye.