1 Nae Yemisina, Kotike Waꞌega Isu Karaisitike isige kayokaya yagara mimagi, nagisarisa tara tumpaema Yuta tupisa to mari uminta kinaꞌmititi, ma nkisapa tigeti kaema: Aya pewe, yuwe. Amiyoꞌenaga esegi purataye
2 We, naoꞌmitaba, toma toma nkamiyoꞌenaba tigeti aborakiri, abigina tintaba asoya puma tiꞌmu peno.
3 Piya, tigeba abintawe. Kaꞌenama aborama timatitiꞌenarika ampa timiyo pekiri asugaikibepa, kuntaena aesaga pikena esegiyenaba maekibewe.
4 Piya, kuntaena aesaga pikena esegiyenama nkauꞌwapa aborano. Auꞌwapa piyama aborakibepa, tigeti kaꞌisaenamaba kampa kakama waiyekiri tigeba monota kanarasawaema aota kina mikibewe. Tigupa aisaꞌma Waꞌegamati nunamu otaiyo
5 Pigoya, tige tikapisa kaꞌwaina aogi napiyena kampa wainta, Kotiti abigakana ameno. Eya, Kotiba kaba kampa abiꞌma, kampa aꞌyikinta aogi napiyenaba paga uwa amikiye.
6 We, pi ntagaramaba tara agi napisanaga aogima amatiti puma Kotiti abigano. Piya, tara agi napi ntagara aeba kayo wani esiba pegina aigaꞌyoꞌya puma maete nasisu piye.
8
7 Piya kinaꞌmaba tara agiba napiyekanaba, aunkama igarumiga pekana: Waꞌegawamapisa maekuwemaba, a-ntapiyeno. Aeba kaꞌenaba kampa maekiye. Kampaye. Kotantaga mikenaena pipa auꞌwa kampaye
9 Pigoya, kota kampa wainta mono kinaꞌmaba Koti auꞌikibika aꞌmu peno.
10 Tabe kuta wainta kinaꞌmaba: Tumima mintuwe uma abima aꞌmu peno. Piya, yao aosawama aebira puma puꞌwaisa puma puꞌwakiye.
11 Eya, pankamaba irosaꞌma tama muꞌmu pegina, kabuyena asa wagina, aosawampaba takuma tumima awaꞌenawapa ata puwaisa puma, tabe kuta wainta kinaꞌmaba yogawapa kampa aꞌya wantakana akapi puꞌwakiye. Wasana amiyo pukena kamanane
12 Pigoya, kuntaena aesaga pemiꞌnaba aꞌmuntanabi mpikiye. Piya, aꞌyaꞌma amiyoꞌenawapa agasimaginaba Kotitisa eꞌwasa antota maekiye. Eya, Koti aogi utamaranti antotaꞌena aꞌyaꞌma agu kaoꞌena pota kinaꞌmipa imikiye.
13 Pigoya, aguntaena pukena amiyoꞌenamaba ka yagara abaibekanaba, piyama: Koti nabaibegi puweba, a-seno. Pipa kampaye. Aguntaenamaba Kotipa kampa abaibegina, Kotiba to wasanaba kampa abaibuma aguntaenarapa ataye. Kampaye.
14 We, taeba ka ka kinaꞌmitaba taete ntapiyena aegarakanaba inoyanta aesuma tabaibukiye.
15 Piya, taete ntapiyena agaꞌe pusu puma, toma toma nkaguntaena aboragina, aguntaenamaba anosantanaba taguꞌamapa purikenaena aboramikiye.
16 We, nabugai ntaoꞌmitaba, kumpariꞌena tiyobi airarikaisanaga kabiyiyo.
17 Piya, aꞌyaꞌma aogiyenabe aotaꞌenabe tumemintanaba inatisaena manane. Eya, tabarempa eꞌwasa agowama otagina taetiba tumiye. Piya, aeti aꞌwae pikenaenaba kampa waintegina, ama nkaite eꞌwasa pute pukenaenaba aetiba kampa waintiye. Pipa kampaye.
18 Aeba aeꞌwa ntapiyena aegaꞌma taga kamanaꞌwapa aborarameka, taeba marusa kina kanta puma mima ae aobi aꞌyaꞌma aboranta kina asu igasima aota miyeno. Kamanaꞌama nkagoba wasikenaenawe
19 We, naoꞌnempitaba, aogima abiyo: Aꞌyaꞌma kinaꞌmitaba kamana abikenaenaga aseyo puma, kamana ukenaenagabe kabirakenaenagabe kunta peno.
20 Piya, wasanama nkamoꞌenamaba Koti nkarupuyenaba kampa aboraye.
21 Piya, aꞌyaꞌma iꞌnintanabe aꞌyaꞌma to ataenabe kasimagiri, Koti tintabaipi kutitami kamanapa aogima kabiyiyo. Pi kamanaꞌamaba timaꞌama auꞌikenaenawe.
22 Pigoya, mono kamanataka wasima auꞌwapa aboraiyo. We, tigeba uwa abima kampa wasikibepa, amiyoꞌena puma tiyobi airarikaekibewe.
23 Piya, kaꞌwaina aeba mono kamana uwa abima kampa wasikibiꞌnaba, aeba pemontabisa taowa agaompesa pukiye.
24 Piya, aeꞌwa aowa agama, aꞌwae puma wakibipa, aogawakaba karuꞌena ageguꞌa pukiye.
25 We, aota ago kamanaꞌama aguntaenama nkigaꞌnabisaba aꞌyoba tatagina, kaꞌwaina pi kamanaꞌama nkagobi agama kampa uwa atama, aeba aogima wasima auꞌwa aborakibipa, wasikenaga aꞌmuntanabi mpikiye.
26 Pigoya, kaꞌwaina aeba: Monota mintuwe, yiꞌnaba, antebuwamapa kampa kiya puntapa, aeba ae agu aowawapa airarikaeyagina, monoꞌwampaba anagiyena kanta piye.
27 We, tabarempa Koti nkaobipa iꞌnintana kampa punta aota mono aegarakenaenaba mayamawe: Taeba kinta yagarabe abeya waepe kuntaenabi mpiyeka wama igama iyoꞌmaemagi, mampabisa iꞌnintanaba taekita puma miyeno. Piya pukubompepa, taga mponota mikune.
1 We, naoꞌmitaba, tigeba eꞌwasa Waꞌegare Isu Karaisititi timatiti potaꞌnagitaba, wasana intapera tumintapera ka kana puwaitaiyo.
2 Piya, tigeba monota aiꞌaru piginaba, ka yagarama aeba kasaꞌena autasaenabe awaꞌenawape purite pasekana, to ka kusi yagaramaba abaraena autasaena purite asu pasekiripa,
3 tigeba aogi autasaena purintaꞌnagipa: Mataꞌi kanama aogi yabaera ampiyo, omintiri, to ka kusi yagarakaba: Kaeba pagasara asima miyo, omikibewo: Tagisabi mpara miyo, omikibewo. Piya ukibepa ataenawe.
4 Tigeba piyaena puntiripa, tiyotimpipa pako puwaitawe. We, piyaena puntiripa, tigeba agunta napiyena waintaga kina mima, kamana abima atama aꞌyiki kina kanta puma miyewe.
5 We, nabugai ntaoꞌnempitaba, abiyo. Koti untegini, mamparasaenaga kusi pe kinaꞌmiba imatitiꞌenawaimpaba kota wainta kina kanta pumagini kabiratakenaenabi ubasikibewe. Eya, Kotiba pi kinapa uwaitantikini, igeba agu kaoꞌena potaompe kinaꞌmite nkutaratantaꞌenabi ubasikibewe.
6 We, tigeba kusi kinaꞌmi nkigeba maete tumima ataenaba pewe. Pigoya, ae kinaꞌmi kuntaena timewe. Ae kinaꞌmi tibabuma kamana uritawe. Kota wainta kina igeba piyaba puritawe. Kusi kinapa kampaye.
7 Piya, kota wainta kinaꞌmi igeba tiba puritanti nkagiba akayasotawe. Eya, igeba Karaisiti nkaota agiba maete tumewe.
8 Pigoya, kabiratakenaenama nkago kamanaꞌamaba mono isapipa maya iye: Kaeka kau kabitampesa puma kagorasa kinapa agu kaoꞌena potao, iye. Pi kamana agoba wasiyigina kanarasano.
9 Piya, tigeba wasana pako puma tabe kinaꞌamana aogi potantiripa, tigeba aguntaenaba pewe. Piya piginaba, ago kamanaꞌamaba tiguꞌamapi piyekiri, tigeba kamana akayukena kinatawe.
10 Piya, kaꞌwaina aeba ka kamana aemita pipa, aꞌyaꞌma to kamana agoba aegaraginaba, Koti nkaobipa aꞌyaꞌma kamanaꞌama nkagoba aemita piye.
11 Piya, kumiyenaba a-po unti ntagaramaba: Wasanaba a-nkaeguyegana pureno, untiye. We, kaꞌwaina kumiyenaba kampa punta, wasana aeguma kaiyipa, aeba ago kamana akayukena yagara miye.
12 Pigoya, aguntaenabisa akariyoba titami kamanakaba Kotiba napima aꞌyigititakiye. Pika tigeba napima aogi kamana uma aogiyena peno.
13 Piya, antaraꞌena kampa pukibiꞌnapa Kotiba kampa antaraꞌena potama kamana otakiye. We, antaraꞌenamaba kamana otakenaenaba agaikiye. Tamatitiꞌenama nkauꞌwampantanawe
14 We, naoꞌnempitaba, kaꞌwaina aeba kampa aogi yugaba puma: Namatitiꞌenayaga mintuwe, ukibipa, ayama aoꞌmaekiye, a. Amatitiꞌenawapa ayama auꞌikiye, a.
15 Piya, tiyoꞌyagaramaba autasaenabe nakenabe aisaꞌma mintakanaba,
16 tigepisa kaꞌwainaba: Aogima mima agoya pegana kagaꞌe pano, omintana, iꞌanape nanintabe kampa ameganaba, auꞌamaba ayamabaya aborama aoꞌmaekiye. Pipa kampaye.
17 Piya puma, amatitiꞌena abiwapa waima auꞌwantaga yuga kampa aboraginaba, pi nkamatitiꞌenamaba puꞌwasu piye.
18 We, ka yagarama: Kaeba kamatiti peka, naeba aogi yuga puwe, unamikiyema napiyuwe. Pigoya, naeba maya omukuwe: Kaeba ayama kamatitiꞌenamana nayakega, pabiyama aogi yuganetasa namatitiꞌenaba kayakikuwe, omukuwe.
19 We, tigeba: Ka Koti mintiye, uma abegana kanarasaye. Abiyo. Kewamabeba kaga pi kamanapa abima, igeba tabaraba pewe.
20 We, tigeba aiboꞌena pewe. Timatitiꞌenamana puntiri auꞌwampa ntugaba kampa aborakibepa, timatitiꞌenarimpaba anamo wae kanta pukibewe. Piꞌna nkagoba tiyakisuwa, a.
21 Piya, paipa tayabama Abaraꞌamuba aeba Koti nkawamu wasima, yagarawapa Aisakipa muta atakena arata yareri atantine. Piya pogana Kotiba yogawata agategina: Arupu yagarawe, otantine.
22 Piya, tigeba ago abewe. Amatitiꞌenabe aogi yugabe kaga puntine. Eya, amatitiꞌenawampa nkaupa yogawane.
23 Piya, paipa Abaraꞌamuba Kotiti amatiti pogana, Kotiba agama arupu potantiyema, mono isaꞌama uramiye. Pi kamanapa Abaraꞌamu yogawatasa esegi potantiye. Aibogini, wasanamiba: Aeba Koti nkaoꞌyagarawe, otantawe.
24 Piya, ibaba tigeba abewe. Amatitiꞌenamana nane. Amatitiꞌenama nkauꞌwapa pipa aogi yugarasa wasana arupu yagara aboraye.
25 Piya pumagina, kumi wae Areyabu aeba ma agakena kinapa kabiwaisitama to kiꞌi uwaisitaoginisi wantase. Piya pometaka: Arupu waene, otantiye.
26 Piya, auꞌama nkaumawapa kampa waintipa puꞌwaisa puma, amatitiꞌenama ntuga kampa aboraipa puꞌwasu piye.
1 We, naoꞌnempitaba, tigepisa mono tisa kina uwaena aborakenaga a-tibeno. Piya, tigeba ago abintawe. Aintiba Koti aeba tisa kinaꞌmitepa yogaretakaba esegima aꞌyigi tatakiye.
2 Piya, aꞌyaꞌma kinaꞌmitaba kaꞌisaena antageꞌena pune. Piya, kaꞌwainaba antage kamanaꞌwapa kaꞌanto kampa yipa, aeba aota yagara mima aꞌyaꞌma auꞌwapa ubuꞌatama aogima kabiye.
3 Piya, taeba osiwama nkawamupipa igaꞌna ubuꞌatama paibokana, auꞌwampaba taete ntapiyenaba wasiye.
4 Piya, wanipisa karegegaba napiyiyo. Pipa tabena waintegina pontawama pukagina, tabe kayo wani nkakapinti waye. Piya wagina, pubasanami ntagaramaba uwaena asantora pubasanagina aewa nkwaeti aegaꞌma waye.
5 We, pabiyamagina wasana antebuwama uwaenanto waimagina tabe kigaꞌe uma maro-u mo-u pegina anosaye. Abiyo. Uwaena yakunkantoma anosama tabe kabuba tawaeye.
6 We, wasana antebu pipa yakune. Piya, tantebuwamaba tonarona ataenaba aborama, aꞌyaꞌma taupintiba iꞌnintana aborawaye. Piya, aꞌabibintisa yakutasa kaema aogima mpikenaenarepa tababiꞌwaye.
7 Pigoya, wasanamiba igeba tonarona umugababe kabarape kuyape wanipintisa kinape kabima mima kayone puwaitakena puntiniba, kayone puwaitama imentapinti me nkitawe.
8 Piya, ka yagaramaba antebuwamapa kampa kabima mima mabi atakana, amentapintiba kampa waikiye. Kampaye. We, wasana aeguma kaikena tusaena pumaema waintegina, tantebuwamaba aꞌyaꞌma yaga aogama ata piye.
9 Piya, tanteburasaba Waꞌega tabarempa nkageba uma asagayumagi, aꞌwae puma wasanaba pumirere puwaitaune. We, wasanaba Koti nkaoga kanta puma aborantiye.
10 Piya, ka tawamupisa taꞌmu kamanape tamo kamanape irosase. We, naoꞌmitaba, aꞌyugu piyaena pusanagawe.
11 Eya, ka aukaꞌisa aogi nakena wanipe asa wanipe kaga irosasa, a.
12 We, naoꞌmitaba, piki yawamaba kanara oripi yamankapa aekiya, a. Waini igaꞌnawamaba piki yamankapa aekiya, a. Pipa kampaye. Piyama asa wanipisaba aogi wanipa kampa maekune. Piyama, aꞌyugu tantebuwama tara aborasanagawe. Aogi napiyenaba Kotitisa tumiye
13 Pigoya, tigetiba kebaya aogi napiyenaba abintiye. Piya, aogima abemi ntagarama aogi napiyenawatasa agoya puma aogima mpikenaenawampa nkauꞌwapa aborano.
14 Piya, tigeba to kinakaba tintawamaba tikintaꞌyaga mima, tigeri mpaete asu igaikenaga napimagiripa: Naeba monota aogima mpiyuweba, a-siyo. Aꞌyugu tagantanaga untiri, mikenaenaripa kumpariyena pukibewe.
15 Piya, pi ntapiyenaba mantabintisaba kampa tumiye. Kampaye. Pipa mampabisa, paisaenabisa, kewamapisawe.
16 Piya, wasanamiba intawamaba ikintaꞌyaga mima igewai maete asu igaikena pepa, ige pako pikenaena aboragini tonarona ataenaba pewe.
17 We, inatisa napiyenaba aotane. Piya, kaꞌwaina inatisa napiyena maentanaba, maruꞌenaba napiyenawampaba narentare pegina, aintiba wasanage kayone puma pasema mima, to kinaꞌmi kamanapa abima, antaraꞌena puma, monoꞌamaka kampa tara agiba napima agoꞌenaba kampa puma auꞌwapa aogima aboraye.
18 Piya, paru kinaꞌmiba paruyenabisa ainkapa kurigina arupu nakena aborakiye.
1 Pigoya, nanaraka maka puma kamaenaba tige tikapipa pewe, a. Piya, titipipa tigu iꞌnintana waintegiri, maꞌena yugaba pewe.
2 Piya, tigeba tonaronaga tibugagiri, kampa maentiripa, wasana iyeguma kaiyewe. Tigeba tika puma kampa maentiripa, kamaena puma maꞌenaba pewe. We, tigeba Kotipa kampa esotamagiripa, kampa maeyawe.
3 Piya, tigeba nunamu uwa yepa, kampa maeyawe. Tigeba kampa arupu puma tigu iꞌnintanaraka abigamagiri kampa maeyawe.
4 We, tigeba atokaekenaenabisa atarakena kina mintawe. Piya, wasanamiba mampabisaenaga iyoꞌena peꞌnagiba Kotipa kama potawe. Pikaba kampa napiywea, a. Piya pumagina, wasanama mabisaenaga aoꞌena pukibipa, aeba Kotipa kama potakiye.
5 We, mono isaꞌama maya iye: Koti tagupipa Awamusa atagina waiyemiꞌna, aeba: Tigeba naeꞌenarawe, uma tarakuꞌma kabirataye, iyegiri, tigeba anagiyenawema napiyewa, a.
6 We, Kotiba iꞌnintanare nkasugaikena awagaenawapa tamegina, pika mono isaꞌamaba maya iye: Kotiba ipa maete iye kinapa kama puwaitama, ipa maete tume kinapa awagaenawapa imiye, iye.
7 Piya, tigeba tintaba Koti nkamentapinti atama miyiyo. Tigeba keba aibasanaigina titate aegaka wano.
8 Piya, tigeba Kotiti atokaeyigina, aegeba tigeti atokaeyano. Agunta kinaꞌmitaba, tiyantana puma iꞌnintanaripa agarubaiyo. Tara tigi napiyenarintaga kinaꞌmitaba, tigupa narentare piyo.
9 Tigeba pai punta ntanagaba kunta puma iꞌnintanarika maegasima tintara pumagiri kubeꞌena puma kaite aogima miyiyo. Piya, paisa kagiyenarika kubeꞌena puma agarubakasiyo. Paisa tiꞌmuntanarika kuntaena puma agarubakasiyo.
10 Eya, Waꞌegawama nkaobipa tipa maete tumigina, ae asiritano. Aꞌyugu kamana tiyoꞌmikaba a-nkuwaitaiyo
11 We, naoꞌmitaba, tigeba tiyoꞌmikaba ata kamanapa a-nkuwaitaiyo. Piya, kaꞌwaina aoꞌmakaba aupi pima ata kamana otaipa, aeba Koti nkago kamanakaba aupi pima ata kamana otaye. We, aeba pabiyama ago kamanakaba otaipa, kamana aegaranta yagara kampa miye. Kampaye. Aeba sasi yagara kanta puma miye. Pipa ataenawe.
12 Piya, kaꞌwainanto taga sasi yagara mima ago kamanapa aborantipa, aewe. Eya, kaꞌisa iꞌintana to kaꞌisa igaikibipa, aewe. Piya pegina, kegabaya kaoꞌmakaba kamanapa otane, a. Kotika napima aꞌyaꞌma yugaba peno
13 We: Ibabe aibe to ka kumati wama mone kutataka ka kabu ampima yogaba aꞌya peka uwaena mone maete kanakune, ye kinaꞌmitaba, urimekiri abiyo:
14 Aikaba tigeba kampa abintawe. We, mikenaenaripa ayama miyewe. Piya, tigeba kunkawama pisa puma kiyaya puwakiye.
15 Pika tigeba maya yigina kanarasano: Waꞌegawama nkabikaba, taeba taogama ma ntugawo, pi ntugawo, uma pukune, yiyo.
16 We, nanagabaya tigeba paebuta nasima tipa maete iyewe. Wasana aeꞌwa nkau maete iyipa, pipa ataena piye.
17 Eya, kaꞌwainaka aogiyena pukibintanaba kaiteginaba, aeba aguntaenaba piye.
1 We, uwaena kutantaga kinaꞌmitaba, kamanapa urimekiri abiyo: Kuntaena aborarimekiri, pika napima tigeba: A-e, a-e, uma tabe kubeꞌena piyo.
2 Piya, aꞌyaꞌma kutatipa abaraena kanta piye. Kabaginaꞌama titasaenaba agukuri puwaegasu piye.
3 Kori yabatipe siribaripe ago agarirasu pegina, pi nkagariyenawampaba kamana uritama yakunkama pisa puma titipa nawaegaikiye. We, tigeba nagarikena yagaga antotaꞌenaba uwaena aki pewe.
4 Abiyo: Yoga kinaꞌmiba yogaripi yogaba pegiri, tigeba ikankaipa kaꞌisa kakantiri kaꞌisa imewe. Piya, kakantanamaba kamanapa uritaye. Piya pumagina, pi ntuga kinaꞌmi kamanapa mantarisa tabe Waꞌega Yagarama nkagebi irosaye.
5 We, tigeba mabi mpintiripa, aogiyenamana mpaema uwa tiꞌmu puma miyewe. Eya, tiyegukenagaba tiguꞌamaba uwaena naninta nama anosawe.
6 Piya, tigeba arupu yagaraba kamanapa otamagiri aeguyegana puriye. We, piya potapa, aeba aꞌa-o ukena esegiyenawapa kampa waintiye. Kuntaenaba aesagaꞌma Waꞌegawamaka aobi peno
7 We, naoꞌmitaba, Waꞌega irosakiri paebuma mima aobi piyo. Piya, yogawama nkababa aogi nakena aborasanaga kabima mima, pape kabe aobi pegina nakenaba aogima aboraye.
8 Aeba aobi pemisa puma, tige paebuma mima Waꞌegamaka aobi piyo. Eya, Waꞌega arosaika tintawamapa esegi potaiyo.
9 We, naoꞌmitaba, kamana uritasanaga tigeba tiyoꞌmipa kaba a-nkibiriyo. Agaiyo. Tabe sasi yagaraba kabera ampintiye.
10 Pigoya, naoꞌmitaba, pai poropete kinaꞌmiba Waꞌegawama nkawamutasa kamanapa yuguni, ata puwaitauguni kuntaenawaipa aogima aesagabintawe. Igeka napima, ige puntasa puma paebuma mima aesaga piyo.
11 Abiyo: Kuntaena aesagabinta kinaꞌmikaba: Kanara pewe, yune. Piya, tigeba Yobu kamanapa ago abintawe. Aeba kuntaenawapa esegima aesaga pogana, Waꞌegawamaba abomentanama nkauꞌwapa aeti aogima aborantiyema, abintawe. Eya, Waꞌegawamaba antara puma kayonena tabera puratagi, agaune. Uma esegi pikena kamanane
12 We, naoꞌmitaba, marupa aogima abiyo: Tigeba mantawama nkagerape marape tonaronarape a-nkumagiri kamanatipa esegi piyo. Kampaye. Tigeba kamana uritasanaga: Owe, untiripa, piya piyo. Kampaye, untiripa, a-piyo. Arupu kinaꞌmi ntunamuwamapa esegi piye
13 Pigoya, tikapisaba ka yagarama kuntaenaba aesagibipa, aeba Kotiti nunamu yeno. To ka yagarama nkantawamaba aꞌmu pipa, aeba inibisa Koti nkagegaꞌe uma asagayuyeno.
14 Tigepisa to ka yagara yonintana abipa, aeba monota kabinta kinaꞌmika kegaꞌe yeno. Yegini, igeba Waꞌegawama nkagegaꞌeraka autiba masawae aetamagini, Kotiti nunamu yigina aoꞌmaeyano.
15 Piya, imatitiꞌenabisa Kotiti nunamu yiginaba, Waꞌegawamaba kana yoni ntagaraba kaba atakana asikiye. Piya, aeba aguntaena puntika, Waꞌegawamaba asuꞌa pugaikiye.
16 Pika tiyoꞌmige aguntaenaripa uma aboramagiri, Kotiti nunamu yigina tiyoꞌmaeyakana tita wano. Piya, arupu yagarama nunamu yekanaba, auꞌwapa esegima aborakiye.
17 Piya, Iraiya aeba wasana tae kanta yagara mima: Ka kampa aeyanema, esegima nunamu yogana, kakaga kabube tonaentisa kaꞌumaema upe kaba marapa kampa tumintiye.
18 Piya, ainti to ka nunamu yogana, mantabintisa kaba tumogana aintanaba airapoma irantiye. Kepa kasa kinapa to ibabu maete kanano
19 Naoꞌnempitaba, tikapisa ka yagara aeba taga kamanapa atate wakana to ka yagarama ababute kanantanaba,
20 pi ntagaramaba piyama abeno: Piya, ka yagarama agunta yagara aoꞌmaeyakana aiboꞌena pukibi ki kaite aꞌwae puma kanakibipa, aeba agunta yagarama nkagupa purinta kiꞌisa ababotama, uwaena aguntaenawapa aerarikaetakiye.
Yemisi piya isa kaentiye.