1

¹ Teyopiro, tabe yagarane, paipa ka esa kaema kamintopa, pi Isu aꞌyaꞌma yoga punti, aogi kamana uwaiminti, pi kamana ugamintuwe.

² Piya, aeba yogawapa agobima purite waogana, ikena kanaꞌwapa aboraogana, Aota Awamusaꞌama otaogana, Isu pai uwaitantemi aposoro kina to kake kamanapa uwaimogana, Koti ababogana mantari intiye. Pi kamanapa kaewaentuwe.

³ Pigoya, aeba tabera aukima puꞌmagina, to kake aogama mima, pi aposoro igeba agowa agakibeka aeba 40 yaga mima kakate aborate puwaimima, Koti kabiratakenaenaga uwaiminti, pi kamanape kaga kaentuwe.

⁴ Piya, ainti igege ampima maya kamana uwaimintiye: Tigeba Yerusaremi kumapa a-kasiyo. Nabanempatisa aogi kamana, pai abinta kamana, to kake naeba urimintogiri abinta, pi auꞌwa aborasanaga pita agawa puma miyiyo.

⁵ Yoniba aeba uwa wanitakaꞌya paititantiye. Piya, nae kanapa kampa eꞌero puntaka, Aota Awamusatasa paititakuwe. Pitaꞌi pika agawa puma miyiyo, Isu piya uwaimintiye.

⁶ Pigoya, aki punta kinaꞌmiba maya uma abigantawe: Pigoya, Isureyo kina pai mintantasa puma, kaeba kaga aki purataga tabe kina mikunoma, abigauguna,

⁷ Isu maya uwaimintiye: Pipa tigeꞌenaba kampaye. Nabanempa, aewa napima kanapa atagina waintiye.

⁸ Piya, tigekaba maya urimuwe: Tigeti Aota Awamusa tumima esegiyena aborarimekiri, nae nawaga kamana ukena kinaꞌena pikibewe. Piya, Yerusaremi kumatibe, Yutiya maribe, Sameriya maribe, urite waigina ma nkatuti uma kanarasakiye, untiye. Isu mantabinti intiye

⁹ Isu piya kamana ute, iyora aseꞌyo puma ikena pogana ababuntiye. Ababogana, ibinankama atikaewaogini aguyosagantawe.

¹⁰ Pigoya, igasoginiba mantari iyogini agagaite mintugunisi, tara yagarara wae kaiyaga, igeti ampa aborama mintinisi,

¹¹ maya uwaimintase: Karariya kina, tigeba nanaga mantariba tiyomaꞌma miyewe. Isupa tigeba ago agantagana, titate iyegina ababute mantari iye. Pi aeba iyegiri, agasa puma, aintiba to kake aꞌwae puma tumekiri agakibewe, piya untase. Yutasi ae antota wasana ka ababuntawe

¹² Pigoya, aposoro kina igeba ka amutisa, agewapa Oribesi, pi Yerusaremi agora amutisaba, aꞌwae puma tumima Yerusaremi kuma waintometi wantawe. Pi eꞌeropa Yuta kinaꞌmiba sabatirapa wabumekini,

¹³ pitaꞌi wama kumati ima, ige mibume ntamapi asu mintantawe. Pi yare puma, inata kimaranta namapi asu mintantapa, mayamawe: Pitawa, Yoniwa, Yemisiwa, Enturuwa, Piripiwa, Tomasiwa, Patoromayowa, Matiyuwa, Aopayesi ntagara Yemisiwa, namuꞌisa kiya kina igarubakaikena abugai ntagara Saimoniwa, to Yemisi ntagara Yutasiwa, suma mintantawe.

¹⁴ Pi kinaꞌmi ka iyuma pumagini, Isu nkanowampa Mariyabe, to kaꞌisa waepe, Isu nkaꞌnatabaramibe, kaga mima nunamu uma mimi puntawe.

¹⁵ Pi kanabipa ka yaga, Isu nkaegaranta mono kina, 120 kina irosaꞌma mintuguna, Pita asima maya kamana untiye:

¹⁶ Naoꞌmitaba, pai Aota Awamusaꞌama Tebiti nkawamu aseyo potaogana, Koti nkesapi kaemaranti piꞌna Yutasika auꞌwa aboraneme, untiye. Pi Yutasi aeba Isu arakurikena kina iyakinti ntagarawe.

¹⁷ Pi ntagara aeba taetisa, mono yugarapa aeke kaga otantine, Pita piya untiye.

¹⁸ Pigoya, pi ntagara aeba ataenawatasa mone maema kasuguna, maba maema aeti atauguna, pita aibagobama abararamagina, akapisa muruꞌmagina antaba kurima unu kaewantiye.

¹⁹ Aibogini, Yerusaremi kumatasa aꞌyaꞌma kinaꞌmiba abitegini, kana mawama nkageba Aketama, piya kamanatepipa Kora mpawe, untawe.

²⁰ Pigoya, Pita Yutasika maya untiye: Paisa mono ini Samu isapi, awaꞌena mayama kaemaranta waintiye: Nama kumaꞌwapa uwa waiyeno. Piya to kaꞌwaina a-mpiyeno, untiye. Pigoya Samu isaꞌamaba to ka maya untiye: To kaꞌwaina aborama, ae antotapa yogawapa maeyano, untiye.

²²

²¹ Pigoya, Yoni mono wani paiꞌataogana, Isu yogawa agobinti, pi kanabipa aeti uma airokaema, aegaꞌma miyuwakana mantabinti intiye. Piya, Isuba abakatepi miyogini, kaꞌisa kinaꞌmiba taege nasinta kinaꞌmipisa ka asitakana, taege kanarasakiye. Pai kaemaranta kamanaka napiyigi, ka aboratama miyeno. Piya yagaraba, ke aboramagina taoꞌmaeyaka Isu purintapisa asintemi, pi awaga kamanapa yekana kanara pisiye, untiye.

²³ Pita piyama yogini abite, tara yagarara isigama aborantawe. Kaꞌwaina nkagewapa Yosepe Yasitasi, to agewapa Pasabasiwe. Piya to kaꞌwaina nkagewapa Matayasiwe.

²⁴ Isigama aborawaisitantiniba, maya uma nunamu untawe: Waꞌega, kaeba aꞌyaꞌma kinaꞌmi nkiguꞌama agawaekena yagaragawe. Pika kaeba ma tara yagarara, isigetisa kaꞌwaina tayakega otakana,

²⁵ Yutasi mono yugawape aposoro agibe atate purikena kiꞌwati tuminti, ae maruta miyeno, untawe.

²⁶ Piya nunamu umagini, iya nkatauguna Matayasi aboraogini, aposoro nagisarisa ka tumpaema kinaꞌmige mima yoga penema, otantawe.

2

¹ Isu kaitate mintuguna, tonaentisa tara umaema sonta aꞌya puwaogana, Pentikositi naninta nakena yaga aboraogini, Isu nkabagi kina igeba ka namapi aki puma aꞌyaꞌma mintantawe.

² Mintuguna, pontaba aga yemisa puma, mantarisa tabera puma aga urite tumintiye. Tumimagina mintume ntamapi paiꞌmagina pumaewantiye.

³ Piya pumagina, yaku nkantebugantaena aboraurite, wa waya nkiꞌnota aibariyate purite wagana puntiye.

⁴ Piya pogana, Aota Awamusaꞌamaba igupi tumima pumaewamagina, intebuba aꞌwae puwaigasogini, to kamana to kamana urite wagana puntawe.

⁵ Pigoya, pi ntagaba Yerusaremi kumata aꞌyaꞌma marisa Yuta kina, mono waintaga kinaꞌmi, ampa mintantawe.

⁶ Pigoya, igeba iwamupisa aga abite, tabera irosaꞌma ampa aki puma pami puntawe. Piya puguni, pi aꞌyaꞌma kina kamanaꞌwaipisa kamana yuguni abitegini,

⁷ pami ntami puma uwoma nkigi napimagini maya untawe: Ma kamana ye kina, igeba Karariya kina amanane.

⁸ Igeba ayamagina to kamana to kamanapisaba yega kamana, agomitaba abune.

⁹ Taeba Patiya kinana, Mita kinana, Iramu kinana, Mesopotemiya marisa kinana, Yutiya marisa kinana, Kapatosiya marisa kinana, Pontasi marisa kinana, Esiya marisa kinana,

¹⁰ Pirisiya marisa kinana, Pampiriya marisa kinana, Isipi marisa kinana, Sairini ma agora Aribiya marisa kinana, aꞌyo ampintanta kina Aroma Yuta kinana, Aromapisa Yuta ibabunta kinana,

¹¹ Kariti kinana, Arebiya kinana, sumagi, taeba aꞌyaꞌma mima, kamanatepisa Koti nkesegi puma aogi pumaranti kamana yega, abokanaba iga piye, untawe.

¹² Piya, aꞌyaꞌma kinaꞌmiba piya umagini, pami ntami puma uwoma nkigi napima, mare-u me-u puma maya untawe: We, mapa nanaenabaya aboraye, yuguni,

¹³ pigo to kaꞌisa kinaꞌmiba pika akaya sumagini, maya untawe: Igeba waini wani kampa igaꞌe pasuma nagaitegini, aibo kamana yewe, untawe. Pita kamana uwaimintiye

¹⁴ Pigoya, Pitaba to aposoro kina nagisarisa ka tumpaema kinaꞌmi abakapi asima mima, aꞌyaꞌma kinapa tabe kamana maya uma aborama uwaimintiye: Yutiya kinape Yerusaremi aꞌyaꞌma kina ampintapa, naeba urimekiri aogima abiyo:

¹⁵ Tigeba taekaba maya yewe: Igeba waini wani nagaitegini aiboꞌena pewe, yepa, pipa ibanto kasa maregi, waini wanipa kampa nantune.

¹⁶ Pigoya, poropete yagara Yoweri awaꞌena mayama kaenti, piꞌna esegi piye:

¹⁷ Koti aeba maya iye: Aintisa kana agarosakapa Aota Awamusaꞌnepa aꞌyaꞌma wa wayapa ariꞌma imekini, yagara aragarimpi ainti aborakena kamana, poropete kinaꞌmi yesa puma ukibewe. Piya, aoso kinaꞌmiba kasaꞌenaba agaigini, anasa kinaꞌmiba aogi amunta agakibewe, iye.

¹⁸ Pigoya, pi kanabipa nae kayokaya kina, wa waya, Awamusaꞌnepa ariꞌma kanarasama imekini, poropete kinaꞌmi yesa kamana ukibewe, iye.

¹⁹ Pigoya, naeba yekana, inati mantariba tona kasaꞌena aborakiye. Piya, abetisa mariba awameꞌena aborakiye. Korape yakupe kunka ibinape tiye kuruyenamana aborakiye, iye.

²⁰ Pa nkaoba tuꞌma wakiye. Piya, oꞌaowamaba kora ki wakana, pi ainti Waꞌega Yagarama kanaba agasiyaena aborakiye, iye.

²¹ Aibekini, Waꞌegawama agisigina, pi kinaꞌmi nkiꞌima aogi pikiye, poropete Yoweri piya untiyema, Pita piya uwaimintiye. Isu nkago uwaimintiye

²² Uwaimintana, Pita to maya untiye: Isureyo kina, naeba urimekiri abiyo: Isu, Nasareti kumatasa yagara aeba tiyobi Koti esegi potaogana, abakatipi esegiyenabe awameꞌenabe kasaꞌenamana Kotitisa ago pogana, pintana agoba aboraogiri agantawe.

²³ Pi aeka Kotiba paitakaꞌya napiyogana waintantika, uma aꞌya ataogiri, pabi nkawameta tigeba pintana potama, kama kina imuguni, maripora aeguyuguna purintiye.

²⁴ Pigoya, kana yagaraba Koti aeba purintapisa asitantiye. Piya, aukima purikenaena agaruba agasogana, pi purikenaenamaba aepa kampa to arakurikiye.

²⁵ Pigoya, Tebitiba Koti nkomome kamanaka maya untiye:

Naeba Waꞌega Yagara, kagabebe pumagi kampa natane. Kaeba naori asima mimagina naoꞌmaeyakanaba, kaꞌenamaba kampa napasanakiye, iye.

²⁶ Pigoya, pika nantawama aogi pegi, nawamupisa naꞌmu pugatauwe. Piya, nauꞌamaba aogiyenaneka napi napi puma miye, iye.

²⁷ Kaeba naumanepa kampa atagana, purinta kina ige kumatiba waikiye. Piya, Aota Yagarapa kampa atagana abararakiye. Pika naꞌmu pugatauwe, iye.

²⁸ Kaeba aogima miyaba ki nayakima, naege kaga mikibempeka naeba naꞌmupa tabera puwe, Tebiti piya untiye.

²⁹ Piya, naoꞌmitaba, naeba tayabama Tebiti, aeka taga urimuwe. Aeba purogini, kaitanta aruwapa ma mpara agama abima miyune.

³⁰ Aeba poropete mintana mayama napintiye: Ainti Koti aeba aintisa ayabama nae kabima mintanto mparuta mirite waiyemagina, uma esegi punatantiye.

³¹ Piya pipa napimagina, Koti ataogana, utaratanta yagara Karaisitika meto kamana maya untiye: Aeba purinta kinaꞌmi kumatiba asayapa kampa atagana umikiye. Piya, auꞌwapa kampa abararakiye. Aeba to kake aogama asiwakiye, untiye.

³² Pigoya, Isupa Koti purintapisa asitaoga, taeba taorepisa agabebe puma agantompene.

³³ Pigoya, abawampa nkayatakanti asitama tabe potaogana, Aota Awamusaꞌwapa abawampa utatantemipa amogana, ataogana tumintemintana, tabera ampa aboraogini agawe.

³⁴ Pigoya, Tebiti aewapa mantabintiba kampa intipa, maya kamana ka untiye:

Waꞌega Yagara aeba nae Waꞌegane piyama omintiye: Kanama nayatakanti ampiyegina,

³⁵ kama kinakapa kagisabi aki puwaitakini, kagisara aebabiyo, piya omintiye.

³⁶ Pika Isureyo kinapa aꞌyaꞌma mayama abima esegi piyo: Isu maripora aegunta, Koti aepa Waꞌega, aepa Karaisiti, asitantegina mintiye, Pita piya uwaimintiye. Uwoma kinaꞌmi igu aꞌwae puma mono wani pasintawe

³⁷ Pigoya, Pitaba inta paibuꞌma kamana piyama uwaimogini, iyekuru puma, aeꞌwape to kaꞌisa aposoro kinape mayama ibigantawe: Naoꞌmitaba, taeba aya pekana aogi pikiye, untawe.

³⁸ Piya yuguna, Pita maya uwaimintiye: Aꞌyaꞌma tigeba tigu aꞌwae puma, Isu Karaisiti ae ageraka mono wani pasiginaba, aguntaenaripa asuꞌa puwakana, Koti Aota Awamusapa timikiye.

³⁹ Tigetipe tigaꞌnugipe, aꞌyaꞌma ainti aborakibe kinape, Waꞌegare Kotiba aeti uma atokaekenaga tigegaꞌe ukibi kina, pi tige Aota Awamusapa utaritantiye, Pita piya untiye.

⁴⁰ Piya umagina, Pita to kaꞌisa kamana amato puma, igeꞌma kamana maya uwaimintiye: Iba ataena pe kina, ige aruyenabisa aꞌwae puma ataigina-o, tibabikiye, untiye.

⁴¹ Pigoya, pabi ntaga 3,000 kina igeba Pita mono kamana yome abibebe puguni, mono wani paiꞌitauguni, Isu nkaokinaꞌmiti uma airokaentawe. Isu nkaegaranta kina kaga mintantawe

⁴² Pigoya, aposoro kinaꞌmiba mono abikenabe, Isu nkau nakenabe, nunamurape asi nasi aki puma mintantawe.

⁴³ Piya, Koti nkawameꞌena aposoro kinaꞌmi pumeka, aꞌyaꞌma uwa kinaꞌmiba iyekuru puguni, pi aposoro kinaꞌmiba kasaꞌenabe awameꞌenabe uwoma tonarona puntawe.

⁴⁴ Pigoya, aꞌyaꞌma pi aegaranta kinaꞌmi kaga mintini, aꞌyaꞌwaemaenaba pipa wabantanarene, untawe.

⁴⁵ Pigoya, kaꞌisa kinaꞌmiba igeꞌenawaipa to kina imimagini, mone maema, iyokina kusi puma miyume kina, pako puma imintawe.

⁴⁶ Pigoya, asi nasi tabe mono namapi aki puma, imaba kata atama mimagini, au nakenaba igewai ntamapi aki puma nama mintantawe. Pigoya, nanintagaba aogima pako puntini, intawama asoyaenabi nama mimagini, Koti nkage asagaꞌyuma mintantawe.

⁴⁷ Piya puguni, kaꞌisa kinaꞌmiba igama iꞌmu puwaitantawe. Pigoya, Waꞌega aeba wasana imaba yoga pogini, monoka ibogini, asi nasi ae aruyenabi ibabuma atokae itantiye.

3

¹ Pigoya, ka yagaba Pitage Yonige isigeba atamaita nunamu ukena kana aboraoginisi, tabe mono namapi intase.

² Pigoya, pi tabe mono nama kabera ka yagara, ano nkantabaipintisa agisa puꞌwanta yagara aboranti mintantiye. Pigoya, kana kabewama nkageba Nauka kabiwe, untawe. Pigoya, pi ntagarama nkaokinaꞌmi asi nasi ababute wama, tabe mono namankama kabera metauguna mima, wasana mono nama pasikena ite tumite pugunaba, mone kutaka esuwaitama mintantiye.

³ Pigoya, Pitage Yonigeba tabe mono namapi ikena iyusuguna, isigategina pabiyama esuwaisitantiye.

⁴ Esuwaisitaoginisi, isigeba aepa agabebe puntinisi, Pita maya omintiye: Kaeba tasige tasigao, untiye.

⁵ Piya yogana, pi agisa puꞌwanta yagara aeba: Kaꞌena namikenaga yese, uma esegima isigabebe puntiye.

⁶ Piya pogana, Pita maya omintiye: Mone kuta naeba kampa wainatantiye. Piya, kaꞌena wainatanti, pipa kamukuwa, maeyo. Isu Karaisiti, Nasareti kumatasa, ae awamuta ugamekana, asima ke nasi nasi po, untiye.

⁷ Piya umagina, ayatakantisa uꞌma asitantiye. Aibotaogana, pabigo agisa agaꞌnaba aibarutaogana, paꞌyo puma asintiye.

⁸ Piya pogana, ke nasikenaenawaka aꞌmu pumagina, paꞌyo paꞌyo pumagina, Koti nkage asagaꞌyuma isigege kaga tabe mono namapi intawe.

⁹ Piya puguni, aꞌyaꞌma kinaꞌmiba agategini maya untawe:

¹⁰ Mono nama, Nauka kabera, mone kutaka esuratama miyemi ntagara pimpaye, untawe. Piya, aogi pomeka agawaemagini tabera pami ntami puntawe. Pita pi mono namapinti kamana uwaimintiye

¹¹ Piya puguni, Pitake Yonikeri kana yagara uma atokaeyogini, aꞌyaꞌma kina tabe mono namankama nkawari, ka maruta agewapa Soromoni nkagu namantana pumaranta aukaꞌi, pitaꞌi isigeti karuꞌena uma aki puma mintantawe.

¹² Piya puguna, Pitaba igantana wasana maya kamana uwaimintiye: Isureyo kina, tigeba nanaga ma ntagaraga pami puma, tabera tasigabebe puma miyewe. Mantanaba tasige monotesikabera, esegiyenaresimpa ke nasi nasi pikenaenaba aboramuse. Pipa kampaye.

¹³ Piya, Abaraꞌamu, Aisaki, Yekobu, tayabamage, ige Koti, aeba yagarawa Isu ae asu againtika, ma ntagarama nkauta aogi pegiri agawe. Tigeba pi aepa tigobi potama, kama kinaꞌmi nkiyapi atauguna, Pairatiba uwa atakenaga yogiripa, tigeba asu againta ntagaraga: Aꞌa-o, untawe.

¹⁴ Piya, aota arupuyena wantaga aogiyenama nkagowa, aepa kiyaba: Aꞌa-o, otauguna, wasana aeguti ntagarari uwa atanema uma paru potantawe.

¹⁵ Piya puguna, mikenaenama nkagowapa aeguntawe. Aeguyuguna, Koti purintapisa asitaoga, taorepisa agabebe puma agantompene.

¹⁶ Pigoya, tigeba agama abiyo. Isu aegaꞌmagira agega napiyogana, ma ntagara Isu nkawamutaka esegiyena aboramegina kabaꞌma mintiye. Piya, Isuti tasimatiti pogana, Koti abimagina tiyora aogi potaye.

¹⁷ Pigoya, naoꞌmitaba, naeba abintuwe. Tigebe kiya kinatimpibe kampa napinta, aiboꞌenarimpa ata potantawe.

¹⁸ Piyama ata potauguna, Kotiba utaratanta yagara auki naki puma purikibika, pi kamana poropete kinaꞌmi nkiwamupi ataogini, uma kaemaranta, piꞌna esegi puntiye.

¹⁹ Pika tigeba tigu aꞌwae pumagiri, paisa mikenaenaripa tikabitaiginaba, aguntaenaripa aebago purigasakanaba, Waꞌegawamatisa aoso esegiyena tigupi aborakiye.

²⁰ Pigoya, tigu aꞌwae piginaba, Kotiba Isu, utaritanta yagarawa Karaisiti, otakana tumimagina mikenaganapa aborarimikiye.

²¹ Piya, pi Isupa mantawama kakataogana mintogana, Koti aeba paitakaꞌya aꞌyaꞌma aota poropete kinaꞌwampi nkiwamupi ataogini, untasa puma aꞌyaꞌwaemaenaba aborakiye.

²² Pigoya, Moseseba kamana maya untiye: Waꞌega Kotiba, aeba tige aruyenabisa ka poropete nae piyama aborarimekana, kamana urimikibi abiyo.

²³ Pigoya, pi poropete kamanaꞌwa kampa abikibe kinapa Kotiba kamana abikena kinaꞌmi nkaruyenabisa igarubaꞌmagina, iyeguma kaikiye, Mosese piya untiye.

²⁴ Pigoya, poropete kaꞌisa Samuweri miyogini mirite kananta, igeba pabiyama ma kanabisa kamana uma kaentawe.

²⁵ Pigoya, poropete mintanta, pi ige igaꞌnugita tigeba, piya Koti tiyabamagige paibuꞌma atokaemaranti, pi paibutikenaenama nkagoba, pi tigewe. Koti aeba Abaraꞌamuge paibuꞌma atokaentana, maya omintiye: Naeba kagaꞌnugipa akayona puwaitakana, pi akayonamaba aꞌyaꞌma maga maga kina kanarasa waitakiye.

²⁶ Tigeka Kotiba yagarawapa asitama otaogana, maru Yuta kina tigeti ampa aborantiye. Piya, tigeba aguntaenaripa tikabitaiginaba, akayonaba puritakiye, Pita piya uwaimintiye.

4

¹ Pigoya, Pitage Yonige isigeba wasana kamana uwaimima mintusuguni, mono kiye kinape, mono nama irebu kinaꞌmi tabe yagarabe, Sarusi kina igebe, kaga isigeti irosantawe.

² Piya, isigeba wasana mono kamana uwaimintinisiba: Isu aeba purintapisa aoganti kamana uwaimintase. Pi aogaome kamana uma aborausuguni, abugunaba ataena puntiye.

³ Igeba isirakuꞌmagini, ago atamaisa waogini, igaꞌna namapi isitaugunisi waimarausuguna, piya aiba marekini kamana uwaisitakena puntawe.

⁴ Pigoya, Pita mono yogini, abinta kina igetisa uwoma kinaꞌmi abibebe puma, Isu ae aokinaꞌmiti uma atokaeyuguna, waba 5,000 puntiye. Pitake Yonike isibabute wama kamana uwaisitantawe

⁶

⁵ Piya maroginiba, Yuta monota kiye kinape, kabiyume kinape, tisa kinape, monota paitanta kiye yagara agewapa Anasibe, Kayapasibe, ka Yonibe, Aresantabe, to kaꞌisa tabe kiye yagarama nkaokinape, Yerusaremi kumata aki puma miyuguni,

⁷ aposoro yagara taraba isibabute iyugunisi, iyobi asima mintusuguni, isibigama maya untawe: Nana esegiyenara, ke nkawamutasa kamanataka pi esegiyenaba pese, piya uma isibigantawe.

⁸ Piyama isibigauguna, Aota Awamusaꞌama Pita nkagupipa pumaeyogana, kamana mayama uwaimintiye: Tigeba tabe Isureyo kinape, monota kabiye kinape, aꞌyaꞌma yekiri abiyo.

⁹ Tasigeba ma nkagisa puꞌwanta yagara aoꞌmaema kaba ataogiripa, pika tigeba: Ayama kaba atasema, urasitawe.

¹⁰ Pika naeba uma aborakiri, tigebe Isureyo kinape aꞌyaꞌma abiyo: Isu Karaisiti, Nasareti kumatasa, tige maripora aeguyuguna purogana, Koti purinta kina igetisa abage puma aogatantegina asima mintiye. Ae esegiyenara ma ntagaraba kabaꞌma auꞌamaba aogi pegina mintiye.

¹¹ Pigoya, Waꞌega Isugaba paisa kamana maya waintiye: Nama kikena kina, tigeba mapa ata yabanema kaintagana, pi ntabankamaba ibaba aogi waꞌega yaba kanta esegi puma mintiye, piya untiye.

¹² Piya, tauꞌikenaenaba wasanamiti kapa kampa waintiye. Piya, ka yagarama nkageraka uma atokaema aogi pikenarapa, pipa mabipa kampa waintiye. Isu ae abiwa tauꞌikena yagarawe, Pita piya untiye. Waꞌegawama kamanaka kampa aꞌa-oba ukuse, untase

¹³ Pigoya, Pitage Yonige isigeba abikena namapipa kampa wanta, uwa yagara taraginisi, igeka kampa karuba punta kamana esegima yusuguni, abima pami puntawe. Piya, isigeba Isuge mintantame, pipa ago isigabebe puntawe.

¹⁴ Pigoya, pi kaba atantame ntagara, aeba isigege kaga mintogini, aepe agamagini pi kamana aꞌwae puma uwaisimikena aguyosagantawe.

¹⁵ Aguyosagategini uwaisitaugunisi abeꞌi irosaꞌma tumpintusuguni, pi mono kanisore kina igewai maya uma, mare-u me-u puntawe:

¹⁶ Taeba ma ntagara taraba ayaena puwaisitakune. Isigeba awameꞌena puma aboraginisi, Yerusaremi kumatasa kinaꞌmiba isiwaga kamanapa ago abiwaegasawe. Pika ayama airari kaekune. Pipa kampaye.

¹⁷ Pigoya, pi kamanaꞌama aꞌyaꞌma kumati wagana puma abae pekini, wasanami abisanaga, kamana esegima uma isiyekuru pugasakinisi: Pi ntagaragaba to kake wasanaba a-nkuwaimiso uma akunkaisitakune, untawe.

¹⁸ Piya ute, isigegaꞌe uma maya uwaisimintawe: Tisigeba Isu nkagebe wasanaba kamanaꞌwape to kake a-nkuwaimiso, uma akunkaisitantawe.

¹⁹ Aiyugunisi, Pitage Yonige isigeba pi kamana antotapa mayama aꞌwae puma uwaimintase: Tige tigeri napimagiri abiyo. Tige kamana wasite Koti kamana aꞌa-o yiginaba, Koti nkaobi agowamaba abekanaba aogi pikiyo, piyama ibigantinisi,

²⁰ to maya untase: Piya, pi agama abintompentanaba kakatama mikenaenaba kampaye, untase.

²¹ Piya yugunisi, to kake isiyekuru kamana uwaisimima isitaugunisi wantase. Piya, pi kumatasa aꞌyaꞌma uwa kinaꞌmiba, pi ntagara kaba atausume, pintana agama abite Koti iꞌmu potaomeka, igeti kunta puma, aposoro isigepa kaꞌenaba kampa puwaisitantawe.

²² Pigoya, pi nkagisa puꞌwanta yagara aeba nankitama miyogana, kaboba 40 poginisi aogi potantase. Aibusuguni agantaka yewe, untawe. Kamana esegima ukibeka nunamu untawe

²³ Pigoya, Pitake Yonike uwa isitaugunisi, isigeba wasana akiyenabisaba irosaꞌma isiyoꞌmiti wama, tabe mono kiye kinake monota kabiyume kinake kamana uwaisiminta, pi kamana uwaimiwaentase.

²⁴ Piya, pi kamana igeba abite, kaga kamana uma, Kotiti nunamu uma maya untawe: Waꞌega, kaeba mantabe mabe wanipe aꞌyaꞌma pipisa kinape atawaentampeka,

²⁵ Aota Awamusa otaukuna, aeba tayabama Tebiti, kayokaya kinaka, awamu aseyo pogana, kae kamana maya untiye:

To marisa kinaꞌmiba nanaga igobipa taberapa punatagini, nana pegina naekaba mamparasa kinaꞌmi uwa kaba tabera kanabirawe, iye.

²⁶ Waꞌega Yagara naepe, Karaisitinepe, mabisa waꞌega kina igeba kama purasitakena iyakana urewe, iye. Piya, kiya kina igeba aki puma kama purasitakenaꞌnaga nikewe, kae kamanakapa Tebiti piya kaentiye.

²⁷ Piya pika, ma kumatapa taga aota yagaraga Isu, Waꞌega asitampe, aepa kama potakena, Erotibe, Pontiyasi Pairatibe, to marisa kinape, Isureyo kina igege wanaga nikintawe.

²⁸ Pigoya, pai kaega tonkiya kamana uma asaemarantampe, pi nkawameta pewe.

²⁹ Pigoya, Waꞌega, ma iyekuru kamanaꞌwaipa asuꞌa pugasima, kayokaya yagaragapa esegiyenaga tamega, monokapa karu kampa punta uwaimeno.

³⁰ Piya pekana, kayapa asabuma yoni kinapa kaba itama, tonarona awameꞌenabe kasaꞌenabe puwaiyakegini, aota yagaraga Isu, aeka uma aboraurite wano, nunamu piya untawe.

³¹ Piya nunamu yuguna, aki puma mintume ntamankama kurukuru puntiye. Aibogana, Aota Awamusaꞌamaba igupi pumaeyogini, kampa iyekuru punta, iwamu asoyaenabisa Koti kamanaꞌwa wasanaba uwaimintawe. Isu nkaegaranta kinaꞌmi intabarima mintantawe

³² Pigoya, Isu nkaegaranta kinaꞌmiba igupa kata atama paibuꞌma mintantawe. Piya, aꞌyaꞌwaemaena waintomekaba: Kaeꞌenawe, naeꞌenaweba, kampa untawe. Pipa kapiꞌenarene, uma mintantawe.

³³ Pigoya, aposoro kinaꞌmiba Waꞌega Isu purintapisa asintemi, pi nkawaga kamanapa esegima uma mintantawe.

³⁴ Piya, paruyena apaena aboraogini, pi kina aogimagini iyoꞌena puntawe. Ige abakapipa kaꞌwaina kusiba kampa mintantiye. Mawaipe iyotasaenawaipe to kina imima mone maemagini,

³⁵ aposoro kinati atantawe. Piya puguni, igeba kaꞌisaenaga aguyosagaume kina pakobuma imibuntawe.

³⁶ Pigoya, ka yagara, ka agewapa Yosepewema waintometa, aposoro kina igeba to ka agi Panabasiwe omintawe. Pi kana agiba tae kamanapisa Esegima aurikena yagarawe, omintawe. Pi ntagara aeba Aribai tupisa, Saiparasi marisa yagarawe.

³⁷ Aeba mawapa to kina imimagina, mone maema aposoro kina igeti aꞌyaꞌma atawaentiye.

5

¹ Pigoya, to ka yagara agewapa Ananayasi, aeba wayaꞌwa Sapaira, aege uma abiriteginisi, ma kumaꞌwapa wasana imima mone maema,

² pika napi napima, kaꞌisaba kakatantinisi, to kaꞌisaba maete wama aposoro kina igeti atamagina: Aꞌyaꞌma maete kanauwe, untiye.

³ Piya yogana, Pita maya omintiye: Ananayasi, kaeba nanaga Sataniba kantabaipinti pumaewagina, napimagina Aota Awamusa amiyo kamanapa uma, kuma magampa ikantanaba kaꞌisaba maema kakane.

⁴ Ma kumakapa uwa kaeꞌenaga atagana waisanawe. Piya, uwa ikantana mone maema, piya mayaena pikenaba pipa piya pusanawe. Kaeba kantabaipintiba ayama napiyene. Kaeba amiyoꞌenaba pene, untiye.

⁵ Piya yogana, Ananayasiba pabigo abintana, wareꞌnama purintiye. Pigoya, agama abinta kina igepa iyekuruyenaba tabera aborawaintiye.

⁶ Piya pogini agate, masimabimiba asima, kairasa asagakokima wasirite uma kaintawe.

⁷ Piya, pi ntaga ainti anarimpa kampa abinti, uwa mintiyemagina, kanama ampa irosantiye.

⁸ Ampa irosaogana, Pitaba mayama abigantiye: Ma kumatisimpa nkikantanaba pabi nkasaꞌanto kanayoma, abigaogana, pigo aeba: Pabiyaki antowe, untiye.

⁹ Piya yogana Pita maya omintiye: Tisigeba nana piyema kaꞌmasa tisigiba Waꞌegawama Nkawamusapa amiyo pikenagaba napiyese. Kawaepa ago kaiyewe. Pi kina igeba kabe akanti mintawe. Igeba kaepa pabiyama kaigatakibewe, untiye.

¹⁰ Piya yogana, kana waepa abite, pabigo agisabi wareꞌnama purintiye. Aibogini, masimabi igeba namapinti ima agaumepa puꞌwaintogini, wasirite wama awae kaitaumeti uma kaitantawe.

¹¹ Pigoya, aꞌyaꞌma Isu mponota aiꞌaru pume kinaꞌmiba aꞌyaꞌma isiwaga kamana abinta kinaꞌmige, igeba tabera iyekuruba puntawe. Toma toma awameꞌena puma aborantawe

¹² Pigoya, aposoro kinaꞌmiba toma toma awameꞌenabe kasaꞌenabe wasanamiti uwoma puntawe. Piya puguni, Isu nkaegaranta kina igeba imaba kata atamagini, tabe mono nama marupa ka agewapa Soromoni, pitaꞌi aki puma mintantawe.

¹³ Pigoya, aꞌyaꞌma uwa kinaꞌmiba iyekuru pumagini, igegeba kampa ampa aki puntawe. Aibumagini, pi Isu nkaegaranta kinaꞌmi nkige asagaꞌyuntawe.

¹⁴ Pigoya, wabe wayape uwoma to kinaꞌmi mono abima, Waꞌegawamati uma amato puma mintantawe.

¹⁵ Piya, kaꞌisa iyokina yoninta ibome kinapa, wasabe amaꞌwaipe wasirite, keꞌi me-ita menkita puntini, maya untawe: Pita aeba nasi nasi pekana, amankapa ampa ama nkaiwaitakini kabarikibewe, ute piya puntawe.

¹⁶ Piya, Yerusaremi kumaꞌama nkagora kaꞌisa kumatisaba uwoma kinaꞌmi irosaꞌmagini, yoni kinape kegina intabaipinti minta kinape ibabute kana kana puguni, aꞌyaꞌma iyoꞌmaema aogi puwaitantawe. Enisorewama igaꞌna namapisa aposoro iyoba itantiye

¹⁷ Pigoya, pintana aboraogana, monota paitanta yagara aebe, aꞌyaꞌma aege miyume Sarusi tupisa kinape, igeba igobipa tabera puntawe.

¹⁸ Aibumagini, aposoro kina ata puwaitamagini, irakuꞌma ibabuma igaꞌna namapi itantawe.

¹⁹ Piya puguni, pitaꞌi waita mintuguna, aseka Waꞌegawamatisa enisorewama kabe aiꞌitama, ibaburite tumima maya uwaimintiye:

²⁰ Tigeba tabe mono namapi ima, aꞌyaꞌma kina aogaso asima miyaba mikena kamana uwaimima miyiyo, uwaimogini,

²¹ abitegini abayara tabe mono namapi ima mono untawe. Pigoya, monota paitanta yagarabe aege miyume kinape igeba aki pumagini, aꞌyaꞌma Isureyo mono kanisorege kiye kinape igegaꞌe yuguni irosantawe. Piya puntini: Kamana atauguna, igaꞌna namati wama aposoro kina ibabute kanaiyema, untawe.

²² Piya yuguni, irebu kina igeba igaꞌna namati waumepa, kana aposoro kinapa uma agaumepa, kampa mintuguni uma agagategini, igeba aꞌwae puma wama uma maya untawe:

²³ Taeba wama uma irosaꞌma agaompepa, kabeba tonkiya puma kimatantaꞌenayaga waintegini, kiya kabima mintaga uma igaune. Aibumagi, kana kabe aima ima iguyosagaompepa, kana kinape kampa igaune, untawe.

²⁴ Piya kamana yuguni, mono irebu kinaꞌmi tabe yagarabe, tabe mono kiye kinape, igeba kana kamanaka uwoma nkigi napimagini: Pipa nana aborakena piye, untawe.

²⁵ Piya yuguna, ka yagara ampa irosaꞌma maya uwaimintiye: Igaꞌna namapi itanta kinapa igeba tabe mono namapi wasana mono uwaimima mintawe, untiye.

²⁶ Piya yogini, irebu tabe yagara aeba irebu kina ibaburite wama, aposoro kina paruyenabisa uma ibaburite kanantawe. Pigoya: Iyeguyekiniba, aꞌyaꞌma kinaꞌmiba yaba kasutasa taegukibewe, umagini iyekuru puma, kampa kaso iyegunta uwa ibaburite kanantawe. Aposoro kina kampa karuba punta kamana untawe

²⁷ Pigoya, mono kanisore kinaꞌmi nkakiyenabi me itauguni mintuguna, monota paitanta yagarama maya kamana uwaimintiye:

²⁸ Taeba pi ntagarama nkageba wasanaba a-nkuwaimiyoma akunintompepa, kamanatimpaba Yerusaremi kumatiba to kake uma abae pegiri, nanagabaya tigeba kana yagarama kaintanaba tae taupi maema me nkatakena pewe, untiye.

²⁹ Piya yogini, Pitabe kaꞌisa aposoro kinaꞌmibe igeba kamana mayama aꞌwae pomintawe: Wasanama kamana wasintini, Koti kamana aꞌa-o ukenaenaba, pipa kampa waintiye.

³⁰ Tigeba Isu yara aeguma aibu atauguna, tayabamagi ige Koti, ae abage puma asintantiye.

³¹ Asitamagina, Koti aewa nkayatakanti ababute ima, tabe paitama yagara, tauꞌikena yagara asitantiye. Pigoya, ma Isureyo kina, taeba tagu aꞌwae piginaba, aguntaenarepa asuꞌa puragaikenaga iye.

³² Pigoya, pi nkawaga kamanaka Aota Awamusaꞌamabe taebe: Owe, yune. Pi Aota Awamusa aepa Koti awamu wasiye kinaꞌwa imiye, piya untiye. Kameriye: Uwa itaiyema, uma paru puwaitantiye

³³ Piya kamana uwaimogini, intawamaba asabama ata pogini, aposoro iyegukena untawe.

³⁴ Pigoya, kana akiyenabi Parasi yagara ka mintantiye, agewapa Kameriye, aeba mono tisa Yagara, aꞌyaꞌma kina ae age mesu asagayuye. Aeba asima yogini, aposoro kina igeba abeꞌi tumima aꞌyo mintuguna,

³⁵ aeba aokinapa maya kamanapa uwaimintiye: Isureyo kina, naoꞌmitaba, tigeba kaꞌena ma kina puwaitakena puntiripa, aogima napigate puwaitaiyo.

³⁶ Paipa ka yagara agewapa Tiyutasi, aeba: Nae wasana waꞌegari paitaritama miyuwe, piya yogini, 400 kina aeti uma atokaentawe. Pigoya, aewa aeguyuguniba, aokinaꞌmiba iyegaka aibarara pumagini, yogawaipa kaintawe.

³⁷ Pigoya, ainti Karariya mari ka yagara agewapa Yutasi, aeba tage aisuratanta pi kanabi, wasana imo atikebaꞌma paita itaogini, maꞌena agobima puntawe. Piya puguni, aewapa aeguntini, aokinapa iyeguma igarubantawe.

³⁸ Pika ma kamana urimekiri abiyo: Tigeba ma kinapa uwa itaigini miyiyo. Igeba kamanape yogabe igewai igutasa napima piginaba, aꞌyugu puma kampa waikiye.

³⁹ Piya, Koti nkesegiyenara kana yuga agobima pigiripa, uwa piya pugate itakibewe. Tigeba yogawai aguꞌya aimagiri, Koti aewapa kama potasanaga tigeꞌma kamana urimuwe, untiye. Aposoro kina Isu nkageraka iyeguntawe

⁴⁰ Piya uma uwaimogini, igeba abugunaba kanara pumagini, aposoro kina kegaꞌe yuguni akiyenabi iyuguni, eru kasutasa iyeguntawe. Iyegumagini: Wasana Isu nkage awaga kamana a-nkuwaimiyoma, akunkitama uwaitauguni uwa wantawe.

⁴¹ Uwaitauguna, Waꞌegawama nkageraka iyeguma ata puwaitaumeka, igeba intawamaba abima asoya puma iꞌmu puritegini, pi kanisore kinaꞌmi nkakiyenabisa irosaꞌma wantawe.

⁴² Piya, asi nasi tabe mono namapipe wasanami ntamapipe: Isu aeba utaratanta yagara Karaisitiwe, uwaimimagini, pi mpono kamana uwaimiyaba mima kampa kaintawe.

6

¹ Pigoya, pi kanabipa abagi kinapa uwoma puntini, asi nasi naninta pako puma imintiniba, Kariki kamana unta Yuta kinaꞌmi nkabeya waepa kampa aogima iyoꞌmaeyuguni, pika Yuta ma ago kina igeka abuguna, kampa aogi pogini kamana untawe.

² Piya puguni, nagisarisa tara tumpaema aposoro kina, igeba aꞌyaꞌma Isuti atokaenta kina ibabuma aki puwaitama maya uwaimintawe: Aꞌyugu taeba naninta pako puma imikena yuga wasinta, Koti kamana ukena yuga kasakanaba kampa aogi pikiye.

³ Pika naoꞌmitaba, tigeba tonaentisa tara umaema kina tigeti abakapi, aogi napiyena waintaga kina, Awamusaꞌama intabaipinti pumaenta kina, igaigina aogi pekiripa kibiꞌma ibabiyo. Piya pigi, taeba arirasa yuga pi uwaitakini piyo.

⁴ Piya pigi, taeba nunamurape mono kamana ukenaenarape esegima peno, untawe.

⁵ Kamana piya yuguni, aꞌyaꞌma pi aki punta kina igeba abuguna kanarasa waentiye. Aibogini, wasana mayaki kibiꞌma ibabuntawe: Sitibeni aeba agupipa amatitiꞌenabe Aota Awamusape awaitama wainta yagarawa, Piripiwa, Porokorasiwa, Nikanowa, Timoniwa, Pamenasiwa, Nikorasi aeba Antiyoki marisa paipa Yuta aruyenabi ampa pasinti ntagarawa, sumagini,

⁶ pi kina igeba aposoro kinaꞌmi igora asima arabama mintuguni, iyapa iꞌnota arakuꞌma, nunamu uma aꞌmu puwaitantawe.

⁷ Piya puguna, Koti kamanaꞌamaba tabera anosaurite wagana puntiye. Aibogini, uwoma Yerusaremirisa kina aegaranta kinaꞌmiti irosaꞌma to kake atokaema mintantawe. Pigoya, uwoma mono kiye kinaꞌmigeba aogi kamana abima, Isu aegaꞌma aogima mintantawe. Yuta kinaꞌmi Sitibeni kamana otantawe

⁸ Pigoya, Kotiba awagaenabe esegiyenabe Sitibenipa uwoma amogana waitantogana, wasanamiti kasaꞌenabe awameꞌenabe toma toma esegima puntiye.

⁹ Pigoya, to kaꞌisa Yuta kinaꞌmi, ka mono agewapa: Kampa irakurinta kina uwa kina, ige aruyenabisa kaꞌisa kinape, Sairini kinape, Aresanteriya kinape, Sirisiya kinape, Esiya kinape, igeba aki puma Sitibeni ka abiꞌma maka otantawe.

¹⁰ Pigoya, Awamusaꞌama aogi napiyena Sitibeni amogana, aogi kamana yogini, igeba ae kamanapa kampa akayuntawe.

¹¹ Piyama igiga pugate wasana kumpari uwaigasuguni, igeba Sitibeni uwa kampari kamana otama, maya untawe: Ma kana yagara, aeba Mosesege Kotike isige kamana uma akayasotagi abompene, untawe.

¹² Piya yuguni, uwa kinape, mono tisa kinape, monota kabiyume kinape, piya uma imo atikebakasuguni, minaꞌma Sitibeni arakuꞌurite mono kanisore kinaꞌmiti wantawe.

¹³ Piya, maru paitama iyokina igepa Sitibeni kampari kamana otakena kina kamana uma yokege puwaimuguni, pi kina igeba maya untawe: Ma ntagara aeba ago kamanatepe, ma tabe aota mono kumatepe, uma ataena potayaba miye.

¹⁴ Taeba maya yegi abompene: Isu, Nasareti kumatasa, aeba ma kumapa aguya aima, Mosese Koti nkago kamana uma aboraramintemi, pi kamanapa maema aꞌwae pukuwe, iye, piya kampari untawe.

¹⁵ Pigoya, pi mono kanisore kina igeba Sitibeni aobi nkara agaumepa, aowamaba enisorewama nkaoganta puwantiye.

7

¹ Pigoya igeba piya kampari yuguna, monota paitanta kiye aeba Sitibeni abigama maya untiye: Kamana yepa tagano, yogana,

² Sitibeni maya untiye: Tabe kinaꞌnepe, naoꞌmitabe, kamana yekiri abiyo: Tayabama Abaraꞌamu, aeba Arani kumatiba kampa wanta Mesopotemiya mari mintogana, Eꞌwasa Kotiwama aboramima,

³ maya omintiye: Kaeba magape kaope itaga, naeba maba ka kayakekana, pitaꞌi wama umiyo, untiye.

⁴ Piya yogana, aeba pi kamana abite Kaotiya mawapa atate, Arani kumati wama umintantiye. Pitaꞌi umintogana, abawampa purogana, pi kumapa atategina, Kotiba ka ma ayakogana, mampa ma tige maema minta mari ababute kanantiye.

⁵ Ababute kanama, maba kampa agorapa amima, uwa akitama toba kampa takaꞌya amintiye. Aeba agaꞌnugibe ainti maekibeka uwa iwaga uma utawaitantiye. Pipa yagarawa kampa mintomeka, uwa piya otantiye.

⁶ Piya untana, Koti to ka kamana maya untiye: Kagaꞌnugiba kaboba 400, to kinaꞌmi mpari aꞌyo umima kayokaya puma ataena mikibewe, pai untiye.

⁷ Pigoya, to kamana ka mayama amato puma untiye: Kayokaya kina ibabikibe kina, igepa antotaꞌena imekini, kagaꞌnugipa itaigini ma mpari kanama naeti mono punatama mikibewe, piya pai untiye.

⁸ Pigoya, Abaraꞌamu pi kamana abite, abagi kinaꞌwa ae utatantapa, i kasanema Koti otaogana, yagarawa Aisaki aborama mintogana, tonaentisa kakaga umaema yaga aꞌya pogana piya puntiye. Pigoya Aisaki aeba Yekobu aboratantiye. Piya pogana, Yekobu aeba tayabamagi nagisarisa tara tumpaema kina aborawaitantiye.

⁹ Pigoya, tayabamagi igeba iꞌnanto Yosepe igobi potama, moneraka imuguni Isipi mari ababute wantawe. Piya puguna, pitaꞌi wama umiyogana, Kotiba aege mima,

¹⁰ ataenabintisa ababumagina agu kaoꞌena potama mono aisa potaogana, Isipi wasana waꞌega yagara Parao, aeba agama aogi potamagina, aeꞌwa ntama kumatape aokinaꞌmitape kaga kabima miyenema, tabe kiye yagara asitantiye.

¹¹ Asitaogana mintogana, kaboba puma aꞌyaꞌma Isipibe Kenani maribe tabe kabu puntawe. Piya pogini, tayabamagi igeba igaꞌenaga puꞌma mintantawe.

¹² Piya puntini, Yekobu aeba: Isipi mari naninta waintiye, yuguna abite, tayabamagi uwaitaogini pitaꞌi wantawe.

¹³ Pigoya, to kake aꞌwae puma wauguna, Yosepeba agabarami agowapa uma aborawaimogana, Paraoba aborantemi, agowapa abintiye.

¹⁴ Pigoya, Yosepe yogini abawampa Yekobupe aꞌyaꞌma aokinape, to aꞌyaꞌma wabe wayape 75 kina, ibabute wantawe.

¹⁵ Pigoya, Yekobu aeba Isipi mari wama umima purintiye. Piya, yakarakiꞌnunka tayabamagiba igeba pabi mpari puꞌwaewantawe.

¹⁶ Puruguni, kana wasana iyampuwaipa akitaurite kanamagini, Sikemu kumata, Emo ae yakarakiꞌnu igetisa maba ka wasana iru ma, Abaraꞌamu monerase ika pumaranti, pitaꞌi kaiwaitantawe.

¹⁷ Pigoya, Koti Abaraꞌamu kamana ominti, pi kamanaꞌama aborama, esegi pikenagana agarosakena poganaba, igeba tabera Isipi mariba aborantawe.

¹⁸ Piya puma mintuguna, Isipi kinaꞌmi tabe kiye yagara aoso ka aborantiye. Aeba Yosepe puntintanaba kampa napintiye.

¹⁹ Pigoya, pi tabe kiye yagara, aeba tayabamagi minaga pogini ataena puntawe. Piya puma yogini, yagarawaipa abeꞌi itauguni aeguwaewantawe.

²⁰ Pi kanabi Mosese aborantiye. Pi kana yagaraba Koti nkaobi aogi eꞌwasa auwayaga yagarantowe. Pigoya, abawampa ntamapinti kakatama miyuguna, opa kakaga puntiye.

²¹ Aibogini, uwa mari kakatauguna, Parao nkaragama kana yagara abatama, ababuma aeꞌwa ntagaraganta puma kabitantiye.

²² Piya pogini, Parao nkaokina igeba kamana agoba omima ayakuguna, abima kamanaꞌwape yoga pomentanabe esegima aogiyenaꞌmana puntiye.

²³ Piyama mintogana, kabowapa 40 pogana, aokina Isureyo kina igama abikenagaba aguꞌamaba aseyo pogana wantiye.

²⁴ Wama Isipi yagara kaꞌwaina Isureyo yagara ka aeguyogana agate, pi aoꞌyagara aoꞌmaemagina, pi kana Isipi marisa yagaraba ara aeguntiye.

²⁵ Piya puntana maya untiye: Naeba naokina Parao nkayapisa iyoba itaoma, Kotiwama unatantemi, pipa abibebe pikibebe ayabayawe, yogini, igeba pipa kampa abibebe puntawe.

²⁶ Pigoya, maroganaba to kake wama, Isureyo yagara taramisi maꞌena pusuguna uma isibatama, isiꞌaima ataraisitama maya uwaisimintiye: Ma ntagara tara, tisigerisibe ka kina mintasa, nanaraka maꞌenaba pese, untiye.

²⁷ Piya yogana, pi maꞌena agobima aoꞌyagara aegunti, aeba Mosese aebasanaꞌma kamana mayama aꞌwae pomintiye: Kaeba tasige kiyabe waꞌegarepe kebaya ugatantiye.

²⁸ Aiba Isipi yagara aeguma kaitampese puma, nae naegukenaga yeno, untiye.

²⁹ Piya yogana, Mosese aeba pi kamana abite aegaka wama, Mitiya mari wama to kinaꞌmige umintantiye. Pitaꞌi umima, waya maeyogana yagarawapa tara aborantase.

³⁰ Piya, kaboba 40 to kake migaite, kaꞌme mpari wama Sainai amu ararabiri umintogana, Waꞌegawamatisa enisore kaꞌwaina akiyaontobisa yaku nkabu antabaipinti aboramintiye.

³¹ Piya pogana, Mosese aeba nanaenamabaya piyema, agabebema agakena waogana, Waꞌegawama kamana mayama aborantiye:

³² Naeba kayabamagi, Abaraꞌamu, Aisaki, Yekobu, ige Kotinawe, yogana, Mosese aeba pi kamana abima tabaraba puma parokaema mintantiye.

³³ Mintogana, Waꞌegawama maya omintiye: Mara aeyempepa, pipa aota mawe. Pika kagisa anapa akubo.

³⁴ Naokina Isipi mari karana itama miyegini, nagisuma kubeꞌena purite kanaga, abirite kanaogana aꞌya pegi, piya mampa iyoba itakena tumuwe. Pika kaepa Isipi mari ugatakana wama uma ibabikibene, Koti omintiye.

³⁵ Pigoya, wasanami igeba: Mosese, kaepa kebaya kiyabe waꞌegarepe miyoma ugatantiye, piya uma, aꞌa-o otauguna, Kotiba pi ntagara ae paitama iyoba itakiyema umagina, enisorewa otaogana, yaku nkabu antabaipinti aboramima yoga pipa otantiye.

³⁶ Piya pumagina otaogana, wama uma ibabute kanantiye. Piya, awameꞌenabe kasaꞌenabe puma miyogana, Isipi maribe, pi tete wani taꞌema wanti mparibe, kaꞌme mparibe, kaboba 40 piya puma nasi nasi puma ibabuma kanantiye.

³⁷ Pigoya, Mosese aewa tayabama Isureyo kina maya uwaimintiye: Koti aeba tiyokinaꞌmi abakapisa poropete nae kanta yagara ka aborarimikiye, piya untiye.

³⁸ Piya, kaꞌme mpari aki puguna, Sainai amuti ima enisorewama nkawamupisa waiyaba kamanapa abima, uwaimogini abintaꞌnagi uramintawe.

³⁹ Pigoya, tayabamagi igeba pi ntagarama kamanapa kaitegini, aewapa uma ata potate, Isipi mari aꞌwae puma wakenaga napimagini,

⁴⁰ Eronipa maya omintawe: Kaeba kotintana puma tamegana, piꞌna paitarataka aꞌwae puma wano. Mosese aeba Isipi marisa tababuta kanantiꞌna, aetapaya wagasagi, kampa agaune, untawe.

⁴¹ Piya umagini, purumakankama iyapisa potamagini, muta atama iya nkaeguma, pintana iꞌmu potantawe.

⁴² Piya puguna, Kotiba akabiwaitaogini, iguꞌamaba aꞌyugu pogini, pa, nori, oꞌama mpono untawe. Piya pika poropete kinaꞌmi nkisapa kamana mayama waintiye:

Isureyo agoba, tigeba kaboba 40 kaꞌme mpari mima, yagabe to kaꞌisaenabe aeguma kaema, naeti agunta kampa abasaꞌnatantane, iye.

⁴³ Tigeba amani Moroko ae mono nama kima wasintane, iye.

Piya, to amani Arepanika, nori ae pumarantintanawe, utegini, ae kamana wasintane, iye.

Pintanama waꞌegarintana puritaogiri, nunamu otakena aogima kampa puntane, iye.

Pi aguntaenaga naeba yekini, kama kinaꞌmiba tibabute Pebironi mari merigaikibewe, Koti unti kamana poropete kinaꞌmi kaentawe.

⁴⁴ Pigoya, tayabamagi igeba kaꞌme mpari kairasa Koti mpono nama kimaꞌma, aesagabite nasi nasi puntawe. Pipa Koti Mosese aowa ayakimagina uma aboraminti, pabi nkawameta kimaꞌma, aetisa mono wasintawe.

⁴⁵ Pigoya, pi kai nama tayabamagi igeba piyama kirite kanauguna, Yosuwa paitawaitaogini, mataꞌi to marisa kinapa igaruba igasogini, tayabamagi igeba maema kairasa mono kima, pita mintuguna Tebiti aborantiye.

⁴⁶ Piya, Yekobu ae Waꞌega Koti, aeba Tebitipa kaoꞌena potaogana, pi abimagina: Tabe mono nama kigatasuwoma, abigantiye.

⁴⁷ Piya aewanane. Soromoni Waꞌegawamanta tabe mono nama kitantiye.

⁴⁸ Pigoya, Inatisa Yagara aeba wasanami nkiyatasa kimaranta namapipa kampa miye. Pika poropete nkawamupi kamana mayama atantiye:

⁴⁹ Mantaba naemu yabaewe. Piya, maba pipa nagisanepa ae abobora aema mimagi, aꞌyaꞌwaemaenaba kabiyuwe, iye.

Namapa, aya namapaya ka kinataigina kanarasakiye. Piya, marupa ayamabaya ka abora namigina aogi pikiye, iye.

⁵⁰ Naeba nayantepisa mantabe mabe maema aborawaentuwe. Pipa kampa abewo, piya uma, Waꞌegawamaba poropete kinaꞌma nkawamupi ataogana, piyama kaentiye.

⁵¹ Pigoya, kamana kampa abima aibo kina tigega, tigu tige kampa waintantikiri, tiyabamagi puma mintantasa pumagiri, Aota Awamusakaba: Aꞌa-o, otamagiri ataena puma miyewe.

⁵² Tiyabamagiba ae poropete yagara uwaba aogima atantawe. Pipa kampaye. Arupuyenama Nkagowa aborakibi, meto kamana unta, pi kina igeke kaga iyeguntawe. Piya, ainti aewa aboraogiripa, minaga puma aegukenaenaba pi tige puntawe.

⁵³ Kamana ago enisore nkawamupisa unti, pipa tigeba maema aꞌyugu potamagiri aeguntawe, Sitibeni piya uwaimintiye. Sitibeni yaba kasutasa aeguntawe

⁵⁴ Pigoya, Sitibeni kamana piyama uwaimogini, intawamaba ataena pogini igobipa tabera puntawe.

⁵⁵ Pigoya, Sitibeniba Aota Awamusaꞌamaba agupipa pumaewaogana, mantari aomaraogana iyogana, agaomepa Koti nkeꞌwasaenabi Koti nkayatakanti Isu mintogana agantana, maya untiye:

⁵⁶ We, naeba manta aꞌwaiyegi, Wasanama Ntagara Koti nkagora mintegi agauwe, untiye.

⁵⁷ Piya yogini, imo kamana uma, ige akumpa aeguma apasana urite wama,

⁵⁸ kuma awamori uma irosaꞌma, yaba kasutasa aeguntawe. Piya puntini, kamana otanta kinaꞌmiba igeba eꞌero kaiwaipa atama, ka yagara, agewapa Soro, ae agisabi aki potama atamagini, Sitibeni aeguntawe.

⁵⁹ Pigoya, Sitibeni yaba kasutasa aeguyuguna purintana, nunamu maya untiye: We, Waꞌega Isu, kaeba naumanepa maerega pureno, untiye.

⁶⁰ Piya uma, araka pima to kake tabe kigaꞌe uma maya untiye: Waꞌega, kaeba ma aguntaenawaipa mae igaso, uma purintiye. Aeguyuguna purogana,

8

¹ Soroba agategina antawamaba aogi puntiye. Isu nkaegaranta kina igeti kamaena agobintawe Pigoya, pi ntagaba Yerusaremi kumatasa, monota aiꞌaru pume kina tabera karanaꞌena agobima puwaitauguni, igeba iyegaka paiꞌma aibarara puma, Yutiya, Sameriya mari wagana puwaewantawe. Aposoro kina ibiwai Yerusaremi kumatapa mintantawe.

² Piya, mono kina kaꞌisa igeba Sitibeni kaitategini, kubeꞌena puma intaraꞌena potantawe.

³ Piya puguna, Soro aeba pi monota aiꞌaru pume kina karana itama, namaka namaka aigupama, wa waya ibaisusu puma igaꞌna namapi itama mintantiye. Piripiba Sameriya kumata mono yuga puntiye

⁴ Pigoya, mono pasinta kina igarubagainta kina igeba aꞌyaꞌma kumati wagana puma, wasana mono kamana uwaimirite wantawe.

⁵ Piya puta, Piripiba Sameriya kinaꞌmi kuma aiꞌnera irosaꞌma, Karaisiti nkawaga kamana uwaimintiye.

⁶ Uwaimogini, aꞌyaꞌma wabe wayape uwoma kinaꞌmi kamanaꞌwaka ibogini abimagini, awameꞌenaba toma toma pogini agamagini, ka ima pumagini iꞌmu potantawe.

⁷ Piya, aeba keba uwoma igarubaogini, wasana intabaipintisa tabera: A-e, a-e, ute irosaꞌwauguna, nanki kinape igisa iya ataena ibunta kinape kaba itantiye.

⁸ Aibogini, pika kana kumatapa iꞌmuntanaba tabera aborantiye.

⁹ Pigoya, pi kumata kiyoꞌena pome ntagara, agewapa Saimoni mintantiye. Aeba maya uma mibutaye: Naeba naona kinaꞌnepa tagane, untiye. Piya uma, Sameriya marasa kinapa pami puwaigasogini,

¹⁰ ima minta kinake tumima minta kinake aeka abugunaba iyogini, maya uma mintantawe: Ma amani yagaraba Koti otanti ntagara esegiyena agowe, untawe.

¹¹ Piya yuguna, aona kinaꞌmaba eꞌero kanabi piya pogini, pami pumagini aeti uma airokaema mintantawe.

¹² Miyuguna, Piripiba Koti kabiratakena aogi kamanape, Isu Karaisiti nkawaga kamanape uwaimogini abibebe puma, wabe wayape aꞌyaꞌma mono wani paiꞌwaentawe.

¹³ Piya puguna, Saimoni aebe pabiyama pi mono abima wani paiꞌma, Piripige kabo puma nasi nasi pogana, awameꞌenabe tabe esegiyenabe pogana, agama uwoma nkagi napima mintantiye. Pitage Yonige Sameriya kumati wantase

¹⁴ Pigoya, Sameriya kumatasa kinaꞌmi Koti mpono abuguni, pi iwaga kamana Yerusaremi kumati aposoro kinaꞌmiti waogini abintawe. Piyama abitegini, Pitake Yonike uwaisitaugunisi tumintase.

¹⁵ Tumpa irosaꞌmaginisi: Aota Awamusa igeti tumenema, Waꞌega esotantase.

¹⁶ Piya, igeba Isu nkagera mono wanipa pasintaka, Aota Awamusapa igetiba kampa tumogini, uwa mintantawe.

¹⁷ Pigoya, aposoro tara isigeba isiya iꞌnota atausuguna, igetiba Aota Awamusa tumpintantiye.

¹⁸ Pigoya, kana Saimoni agaomepa, aposoro isigeba wasanami nkiꞌnota isiya atausuguna Aota Awamusa tumogana, isigategina mone maete isigeti uma irosaꞌma, ikapukena puwema, mayama isibigantiye:

¹⁹ Tisigeba naepa pabiyama pi nkesegiyenaba namisigi, to kaꞌisa kinaꞌmi nkiꞌnota nayantepa atakana, Aota Awamusaꞌwapa tumpiyeno, umagina isibigantiye.

²⁰ Piyama isibigaogana, Pita maya omintiye: Kaeba Koti nkaꞌmuntanaba monerasa ika pikena yempeꞌnagiba, monegantaga kaegapa ata puwakibese.

²¹ Piya, pipa kaeꞌenaba kampaye. Kantawamaba Koti nkaobi kampa aogima parutu piye.

²² Kaeba maema pi ata pikenaenagapa kaite, kagu aꞌwae puma Waꞌega esotagana, kagupi egaenaga waintemipa asuꞌa pugagasano.

²³ Naeba kagaopa, kaepa egaena ataena asaenagampa kagibe puntiye, Pita piya omintiye.

²⁴ Omogana, Saimoni maya aꞌwae puma omintiye: Tisigeba naeka uma Waꞌega esotaisigina, nauꞌimagina pi yementanaba kampa abora nameno, untiye.

²⁵ Pigoya, aposoro isigeba aꞌyaꞌma wabe wayape Waꞌegawama kamana esegima uwaimiteginisi, Yerusaremi kumati aꞌwae puma wantase. Aꞌwae puma wantinisi, Sameriya uwoma kumati aogi kamana uwaimita wantase. Piripi Aperika yagara ka mono omintiye

²⁶ Pigoya, Waꞌegawamatisa enisore kaꞌwaina Piripi maya uma omintiye: Kaeba aseyo puma kagi Yerusaremi kumatisa Kesa kumati tume kiꞌi tumo, piyama omintiye. Piya pi kiꞌi kaꞌme mpari waye.

²⁷ Piyama omogana, Piripiba aseyo puma wantiye. Piya, Itiyopiya maba piya tabe wae ka mintanti, agewapa Kantesi, ae tabe yagaraba, mone kuta tabe kiye yagaraba aeba Yerusaremi kumati mono kamana wama intiye.

²⁸ Piya, aꞌwae puma wakena osiwama paibute wakena karewapi wantana, poropete Aisaya ae kamana awaꞌena aisuntiye.

²⁹ Piya pogana, Awamusaꞌama Piripi maya omintiye: Keꞌi kaeba wama, maro kare uma abatao, untiye.

³⁰ Piya yogana, Piripiba wama uma abatama, pi ntagara aeba poropete Aisaya ae kamana awaꞌena aisogana, abima mayama abigantiye: Kamana aisempeꞌna, pi agowapa abeno, untiye.

³¹ Piya yogana, aeba maya untiye: Kaꞌwaina kampa unamintakapa, naenepa ayamagi kanarapa abukuwe, untiye. Piya umagina, Piripi omogana karebi ima kabobuma mintantase.

³² Kamana awaꞌena aisunti, pipa mayamawe:

Sipisipi aegukena ababesa pumagini, uma ababuma aegukibewe. Piya, to sipisipi aya kasa kinaꞌmi nkigora: Kae-gae, kampa unta waiyisa puma, kamana kampa unta mikiye.

³³ Igeba karana potama, parutu kamanapa kampa otakibewe. Mampabi aege mikibe kinapa kamanaꞌwapa kampa abikibewe. Igeba mabi miyabaꞌenawapa ago maegasigina ikiye, pi nkisapisa kamana aisuntiye.

³⁴ Piyama aisuntana, kana tabe yagara aeba Piripi maya uma abigantiye: Kaeba yega abeno. Poropete aeba kekabaya piyaba iya, aewakabe to kaꞌwainakabaya iye, untiye.

³⁵ Piya yogana, Piripi abite, poropete yagarama kamanapi aigima Isu nkaogi kamana omintiye.

³⁶ Piya uta wama, wanita uma irosantase. Piya puntana, tabe yagarama maya untiye: Agao. Wanipa mampa waintiye. Mono wanika yekanapa kanara paiꞌnatakibeno, uma abigantiye.

³⁷ (Pigoya, Piripi maya untiye: Taga abima, kagupa aeti amegapa kanarane, yogana, antota maya omintiye: Isu Karaisiti aeba Koti Ntagarawe. Pipa abibebe puwe, omintiye.)

³⁸ Pigoya, kareba pita atate, Piripibe kana tabe yagarabe waniti tumima, Piripiba kana yagara wani paiꞌatantiye.

³⁹ Piya wanipisa iyusuguna, Waꞌegawamatisa Awamusaꞌama Piripi ababute waogana, tabe yagara aeba to kake kampa agantana, antawama asoyaenabisa keꞌwati wantiye.

⁴⁰ Pigoya, Piripi aeba Asito kumati irosaogini agantawe. Uma irosaꞌmagina, pitasa agobima kumaka kumaka aogi kamana uwaimita wama, Sisariya kumata uma irosantiye.

9

¹ Soro aeba Waꞌegamati atokaenta kina kama puwaitama, karana itama iyegukena agi napintiye. Aibumagina, monota paitanta kiye yagaramati wama kamana yogana:

² Soro aoꞌmaeyiyema, esa kaema, Tamasiko kumata miyume Yuta kinaꞌmiti kaema amintiye. Amogana maete marotaꞌi wama, Waꞌegawamatisa kasa ki aegaꞌma miyume kina ibatama, wabe wayape iyakana uꞌma ibabute Yerusaremi kumati kanakena wantiye.

³ Piya wama Tamasiko kuma nkagora uma irosakena pogana, mantarisa apayaena tumima tumpa eꞌwasa potantiye.

⁴ Aibogana, mabi wareꞌnama mima, kamana ka mayama abintiye: Soro, Soro, kaeba nanaga karana punatama naeguyene, yogana,

⁵ Soroba mayama abigama untiye: Waꞌega, kaeba kegawe, yogana, aeba maya untiye: Karana punatama naeguyempe, Isu naewe.

⁶ Pigoya, kaeba asima mare kumati wagini, pitaꞌi piya pikena kamanapa ugamikibewe, omintiye.

⁷ Pigoya, wasana aege wanta kina igeba kamana kampa unta, uwa mintantawe. Piya, igeba kamanaꞌamaba abintawe. Piya, to kaꞌenaba kampa agantawe.

⁸ Piya, Soroba asima agaomepa, aoba tunusuwaogana kampa agantiye. Aibogini, aokinaꞌmi ayakana urite, Tamasiko kumati ababute wantawe.

⁹ Pigoya, pitaꞌi kakaga yagaba uwa aorikaema mima nanintabe wanipe kampa nanta, uwa aꞌa-o uma mintantiye.

¹⁰ Pigoya, Tamasiko kumata Isuti atokaenta yagara ka mintantiye. Agewapa Ananayasiwe. Aepa Waꞌegawama amonta patama: Ananayasi, piya agegaꞌe yogana, abite: Waꞌega, naeba maye, untiye.

¹¹ Piya yogana, Waꞌegawamaba amato puma maya untiye: Kaeba parutu kiꞌi wama, Yutasi ntamapi ima, ka Tasasi kumatasa yagara, agewapa Soro, ae uma abatao. Aeba ibanto nunamu uma miye.

¹² Aeba aguꞌamaba mayaena agantiye: Ka yagara, agewapa Ananayasi, aeti uma irosaꞌma ao agakena ayapa aꞌnota ataye, piya agantiye, untiye.

¹³ Waꞌega aeba kamana piya uma omogana, Ananayasi maya untiye: Waꞌega, pi ntagaraba tabera yega abuwe. Aeba kaege atokaenta kinaka Yerusaremi kumatapa karanaꞌenaba aseyonaba kampa puwaitaye.

¹⁴ Pigoya, mataꞌiba pabiyama kae kage kawaga kamana yompe kinapa igaꞌna taepa taubuꞌurite wanema, tabe mono kiye kinaꞌmi igeba otawe, untiye.

¹⁵ Piya yogana, Waꞌegawama maya omintiye: Kaeba uwa wao. Pi ntagaraba yoga kinaꞌne otauwe. Aeba nage nawaga kamanaꞌne namu kinape wasana waꞌega kinape Isureyo aruyena igeti, yogane purite wama mikiye.

¹⁶ Piya peka, naeba nage nawaga kamanaꞌneka uma awaenama nkagupi miyenema, otakana abikiye, piya untiye.

¹⁷ Pigoya, Waꞌega aeba piya yogana, Ananayasi aeba wama namaka yome, pitaꞌi ima Soro nkaꞌnota ayapa atama, maya untiye: Soro, naoꞌyagara, Waꞌega Isu keꞌi aboragamiti, ae unatagi kanauwe. Kaeba kao agagana, Aota Awamusaꞌamaba kae kagupi pumaeyanoma iye, untiye.

¹⁸ Piya uma omogana, pabigo aobi aobariyanta kinatomepa aigaga paogana, agamagina asima iyogana, mono wani paiꞌataogana,

¹⁹ naninta nama esegi puntiye. Soro mono yuga Tamasiko kumata agobintiye Pigoya, Soro aeba pi kumatasa Isuti atokaenta kina igege uwaenanto mima,

²⁰ pabigo karuꞌena Tamasiko kumata Yuta kinaꞌmi mpono namapi ima, Isu nkawaga kamana uma maya uwaimintiye: Isu aeba Koti Ntagarawe, untiye.

²¹ Piyama uwaimogini, abima pami pumagini maya untawe: Yerusaremi kumati pi nkagi yegana, pitaka karana itaurite, mataꞌiba pabiyama igaꞌna taubuꞌurite, tabe mono kiye kinaꞌmiti wakena kanantiꞌnaba, pipa ayama aꞌwae uyenaba piye, untawe.

²² Pigoya, Soro aeba esegiyena maemagina: Isu aeba taga Karaisitiwe, uma, pi kamana agoba uma aborama aogi pogini, Tamasiko kumata Yuta kina mintanta uwaimogini, abima uwoma nkigi napintawe.

²³ Piya, kaꞌisa yagaba pogini, Yuta kinaꞌmi Soro aegukena nagaꞌnikintawe.

²⁴ Piyama wa nagaꞌnigiꞌurite, kibira arape asekape minaena puma aegukena kabiyuguna abite,

²⁵ wakena pogini, aseka aokinaꞌmi ababute wama, yabatasa kibi kimarantati imagini, waꞌnu kupi iraꞌatama igaꞌna ubuꞌatama uꞌyobaso puguna, tumima wagaintiye. Soro Yerusaremi kumati umintantiye

²⁶ Piya puguna, Soro wama Yerusaremi kumata uma irosaꞌma, Isuti atokaenta kina igeti uma amato pikena yogini, aꞌyaꞌma kina igeba iyekuru pumagini, atokaenti ntagarawemaba, kampa napintawe.

²⁷ Piya puguna, Panabasi aoꞌena potama, ababute aposoro kinaꞌmiti wama, Isu Soro keꞌi aboramima kamana omogana, Tamasiko kumata Isu nkawaga kamana tabera uma aboranti, pi kamana uwaimintiye.

²⁸ Piya uwaimogini abuguna, igege Yerusaremi kumati nasi nasi puma mintantiye.

²⁹ Mima, Waꞌegama nkage awaga kamanapa kampa karu punta wasanaba uwaimintiye. Piya, Kariki kamana abinta Yuta kinaꞌmiba mono uma abigamaka puntiniba, kamana aꞌwaebu puntawe. Pi kinaꞌmi ige aegukena yuguni,

³⁰ aokinaꞌmiba abite Sisariya kumati ababute tumima metauguna, wama Tasasi kumata uma irosantiye.

³¹ Piya pomeka, aꞌyaꞌma Yuta mari, Karariya mari, Sameriya mariba, igeti paruyena aboraogini, monota aiꞌaru pume kinaꞌmi to kake esegi puma mintantawe. Igeba Waꞌegawamati uma airokaeyuguna, Aota Awamusaꞌamaba intabaipintiba esegi puwaitantiye. Piya pogini, to wabe wayape uwoma kinaꞌmi mono namapipa igege ampa paiꞌma tabe puwantawe. Pita Iniyasi kabaꞌatantiye

³² Pigoya, Pita aeba aꞌyaꞌma mari nasi nasi puta puta, Kotiti atokaenta kina Arita kumata mintume kina, igeti uma irosantiye.

³³ Irosaꞌmagina, pitaꞌi ka yagara agantiye. Agewapa Iniyasi, aeba agaꞌna asawaogana nankitama miyogana, kaboba tonaentisa kakaga umaema puwantiye.

³⁴ Pigoya, Pita mayama omintiye: Iniyasi, Isu Karaisiti aogi pugatama kabakataye. Asima amakapa akubuma akarakiyo, omintiye. Piyama omogana, pabigo asiwantiye.

³⁵ Piya pogini, aꞌyaꞌma Arita Saroni kumatasa kinaꞌmiba agamagini, igu aꞌwae puma, Waꞌegawama tuntana puma aegarantawe. Pita Tabita ao agatantiye

³⁶ Pigoya, Yopa kumata Isuti atokaenti nkwaepa ka mintantiye. Agewapa Tabita, piya Kariki kamanapipa Tokasiwe. Kamanatepipa Esawe. Aeba asi nasi aogiyenamana pumagina, aꞌyaꞌma wabe wayape kaꞌisaenaga aguyosagaume kinapa aogima iyoꞌmaema mibutaye.

³⁷ Pigoya, pabi ntagaba Tokasi aeba yonintana aboramogana purintiye. Purogini, autiba wani paiꞌatama nama ka marupi metauguna waintantiye.

³⁸ Pigoya, Arita kumapa pipa agarota waintomeka, atokaenta kina igeba Pita awaga kamana abite, wasana tara uwaisitaugunisi, aeti Yopa kumati wama maya omintase: Kae kababute, tae waꞌeri karuꞌena wanema kanause, untase.

³⁹ Piya yusuguna, Pitaba abima aseyo puma, isigege wama uma irosaꞌma, wasana yabae waintometi ababute intawe. Iyogini, abeya waeꞌiya aꞌyaꞌmagini kobe puma mimagini, intaraꞌena puma Tokasi aogama mintana kai pagumpa iminti, pipa ayakiwaentawe.

⁴⁰ Piya puguna, Pitaba uwaitaogini, abeꞌi irosaꞌma tumiwaegasuguna, arakabima nunamu untiye. Nunamu uma aꞌya atate, aowaba aꞌwae puma kana wasana yabae waintometi agauꞌma maya omintiye: Tabita, kaeba asiyo, untiye. Piya yogana, ao apinaꞌma Pita agama asima maraꞌmiyogana,

⁴¹ Pita ayata uꞌma asitantiye. Asitantana, Kotiti atokaenta kinape pi abeya waepe kegaꞌe yogini, iyuguna Tokasi aogatama aꞌwae puma imintiye.

⁴² Pigoya, pi awaga kamana Yopa kumatapa abae puma anosaogini, uwoma kinaꞌmi Waꞌegawama mpono aegarantawe.

⁴³ Pigoya, Pitaba uwoma ntaga Yopa kumata to ka Saimoni, purumaka ari pome ntagara, aege mintantiye.

10

¹ Pigoya, Sisariya kumata ka yagara, agewapa Koniriyasi, mintantiye. Aeba Itari marisa irebu kinaꞌmi kiye yagara mintantiye.

² Pigoya, aewape aege mintanta kinape aꞌyaꞌma igeba Kotika karu pumagini, monotapa aogima mintantawe. Pigoya, Yuta kinapa monebe kotape imima aogima iyoꞌmaentana, asi nasiba Kotiti esotama mintantiye.

³ Pigoya, Koniriyasi piya pogana, ka yagaba atamaita Kotitisa enisore kaꞌwaina ampa aboraogana, agegaꞌe: Koniriyasi, untiye.

⁴ Piya yogana, aekuru puma: Waꞌega, nanagawe, untiye. Piya yogana, aeba maya untiye: Nunamube kaoꞌenagape Kotiti iyegina, abima aogi pugataye.

⁵ Pika kaeba Yopa kumati wasana uwaitagini wama, ka yagara agewapa Saimoni, aoso agiba Pita, ae uma ababute kanaiyo, uwaitao.

⁶ Aeba auka Saimoni, purumaka ari pemi ntagara, ae namapi wani nkawamori aꞌyo umintakiya, uma ababute kanaiyo uwaitao, uma omintiye.

⁷ Enisorewamaba kamana piyama omite waogana, kayokaya yagara tarawa, irebu kinaꞌwampitisa mono waintaga yagara kana, suma, igegaꞌe uma,

⁸ pi kamanapa uwaimiwaetama, Yopa kumati uwaitaogini wantawe. Waꞌegawama Pita amonta kiꞌi kaꞌena ayakintiye

⁹ Pigoya, pi kina igeba wama keꞌi uma waimarategini, maroginiba to kake wama kuma agora uma irosakena puguna, kagi abebe pogana, Pitaba nama nkabobori ima nunamu asu untiye.

¹⁰ Nunamu asu yogana, agaꞌena abogana, yogini naninta kaoꞌena potauguna, aesaroꞌena puma ayampuga kampa abogana, amonta mayaena agantiye:

¹¹ Mantaba aꞌwaiyogana, kaꞌena kaiba taberakaꞌya atunkatapa igaꞌna ubuꞌatama atauguna, mabi tumintiye.

¹² Pigoya, kana antabaipintiba yaga kuya kabara uwoma toma toma kina atamagina pugasanaogana mintometa tumogana,

¹³ maya kamana aborantiye: Pita, kaeba asima aeguma nao, yogana,

¹⁴ Pita maya untiye: Waꞌega, naeba uwa aꞌyugu kinaꞌmi ntanintabe iꞌni ntanintabe kampa naontanawe, untiye.

¹⁵ Piya yogana, to kake maya kamana aborantiye: Kotiba uma aogi piya, pi ntanintagaba kaeba uma ataba a-po, untiye.

¹⁶ Pintana kakagara aboraogana, pabigo pi kaiba mantari aꞌwae puma intiye.

¹⁷ Pigoya, Pitaba pi kasaꞌena agaomeka, uwoma nkagi napiyogini, pabigo kana Koniriyasi nkaokina igeba waꞌeri uma irosaꞌma, Saimoni ntamaka ibigata wama uma abatamagini, kabera uma asima mima,

¹⁸ agegaꞌe uma aguyosaꞌma maya untawe: Saimoni, aoso agiwapa Pita, aeba ma ntamapi mintiyo, piya untawe.

¹⁹ Pigoya, Pita pi kasaꞌena agaomeka napi napima mintogana, Awamusaꞌama maya omintiye: Kaeba abo. Kakaga kina kanama ampa kaguyosagawe.

²⁰ Pika kaeba irosaꞌma timimagina, igege wakenagaba a-kuntaba po. Pi kinapa nae uwaitaogini kanawe, omintiye.

²¹ Piya omogana abite, Pitaba kana kinaꞌmiti irosaꞌma tumima, maya untiye: Naguyosagapa naeba maye. Nanaga kanawe, yogini,

²² pi kina igeba maya omintawe: Irebu kinaꞌmi kiye yagara Koniriyasi uratagi kanaune. Aeba Kotika karu puma aogiyenabi miyegini, aꞌyaꞌma Yuta kinaꞌmiba aeka abeganaba, aogi pemi, aeti aota enisore kaꞌwaina aboramima, kaeka namankapi kanama ampa kamana ugamekana aboma, omegina, tagarubagi kanaune, untawe.

²³ Piya yuguna, Pitaba namankapi ibabuwaitama, pi nkaseka aogima kabiwaitaogini waimarantawe. Waimarauguna, maroginiba, aeba Yopa kumatasa kaꞌisa Isu mpono abinta kinape, kaga wantawe. Pita Koniriyasi ntamapinti intiye

²⁴ Pigoya, igeba keꞌiba ka ase uma waitategini, wama Sisariya kumata uma irosantawe. Pigoya, pita Koniriyasi aeba ae tunkape to kaꞌisa aokinape igegaꞌe uma, igawa pumagini mintuguni uma irosantawe.

²⁵ Uma irosaꞌma, Pitaba namapinti iyogana, Koniriyasiba kanama agisabi ampa parokaema, aꞌmu potantiye.

²⁶ Aibogana, Pitaba ababuma asitama maya omintiye: Asiyo. Naeba wasananawe, omintiye.

²⁷ Piya kamana utaginisi, namapinti ima wasana aki puma mintuguna, asu igama maya uwaimintiye:

²⁸ Tigeba Yuta kina tae agoba abintawe. Taeba to marisa kina tigege taoꞌena puma umisanagaba akutatantane. Pigoya, naeba tigekaba aꞌyugu kina iꞌni kinaneba kampa uritakuwe. Kotiba agowapa unamima nayakintika,

²⁹ naeba kamanatipa kampa akayunta, uwa kamanati wasima kanauwe. Pika naeba ibaba tibigauwe: Tigeba nanaga nagegaꞌe yega kanauwema, ibigantiye.

³⁰ Piyama ibigaogana, Koniriyasiba maya omintiye: Naeba kasaꞌena agategi mirite kanaogana, tarawa tarawaki yaga aꞌya piye. Pi kamana ugamukuwe. Naeba atamaita nunamu yuwagana, ka yagara kaiwapa waeꞌwae puwanta naeti aborama,

³¹ maya unamitaye: Koniriyasi, Kotiba nunamugapa abima, wasana mone kotatasa iyoꞌmaeyampekaba abima aogi pugataye.

³² Pika kaeba Yopa kumati wasana uwaitagini, Saimoni, aoso agiba Pita, ababute kanaiyo. Aeba auka to Saimoni, purumaka ari pemi ntagara, ae namapi miyemi, kana namankapa wani nkawamori waintiye. Pi kana Pitaba mataꞌi kanama kaꞌisa kamana ugameno, yoga abituwe.

³³ Pigoya, naeba pika wasana uwaitaogini, kaetiba watagana, kaeba kamanaꞌnepa abima, kanampeka nantawama aogi piye. Pigoya, mapa Waꞌegawama kamana ugaminti, pi yega abenemagi Koti nkaobi aki puma mintune, piya untiye. Pita Koniriyasi ntamapi mono uwaimintiye

³⁴ Pigoya, Pitaba awamu aseyo puma maya uwaimintiye: Koti aeba wasana taukaba abeginaba iyegina tumeginaba kampa piye. Pipa abibebe puwe.

³⁵ Piya, toma toma kinaꞌmitisa kaꞌisa kinaꞌmiba aeka karu puma aegaꞌma, ae aobi aogima miyiginaba, igegaꞌe ukiye.

³⁶ Kotiba Isureyo kina taeti kamana auꞌwapa maema aboranti, pi nkawaga kamana tigeba abewe. Aeba Isu Karaisiti, aꞌyaꞌwaemaenama Nkwaꞌega otaogana, paru aogi kamanapa uramiwaentiye.

³⁸

³⁷ Pigoya, Yuta mari aboranti, pi nkawaga kamanapa mayama abewe: Yoni aeba wasana mono waninkama kamana uwaimogini abuguna, Isu, Nasareti kumatasa, ae Koti Aota Awamusape esegiyenawape amogana, Karariya mari mono yugawapa agobintiye. Piya, aꞌyaꞌma maba ainkima nasi nasi puma wasana iyoꞌmaentiye. Aibumagina, aꞌyaꞌma ke kinaꞌma intabaipinti minta kinapa aogi puwaitantiye. Kotiba aoꞌmaema, wage aetaogana pi ntugaba puntiye.

³⁹ Pigoya, Yuta kina tae maribe Yerusaremi kumatibe unti puntintanaba, pipa taeba agama abiwaentune. Pigoya, ainti maripora aeguyuguna purintiye.

⁴⁰ Puꞌma mintogana, kakaga yaga aꞌya pogana, Koti abage puntiye. Abage puma asitaogana, aborate kakate puntiye.

⁴¹ Pigoya, aꞌyaꞌma kinaꞌmitiwanane. Wasana aogi kamanaꞌwa ukena kina Koti pai ibabumaranti, taetimana aborantiye. Pi purintapisa asiyoga, aege naninta kaga nama, kamanapa uma abintompene.

⁴² Pigoya, Kotiba aepa aoso kina purinta kina tae tabe kiya yagara asitantiye. Pi nkawaga kamana aꞌyaꞌma kina uma aborama uwaimiyoma, uratantiye.

⁴³ Pigoya, aeka napima imatiti pikibe kina age awaga kamanaꞌwaka uma aguntaenawaipa Koti asuꞌa puwaigaikiye. Pipa aꞌyaꞌma poropete kina ige uma aborantawe, Pita piya untiye. To marisa kinaꞌmiti Aota Awamusa tumintiye

⁴⁴ Pigoya, Pita piya yogini, aꞌyaꞌma abima mintume kina igeti Aota Awamusa tumintiye.

⁴⁵ Pigoya, Koti to marisa kinaꞌmiti Aota Awamusapa tiꞌma imogini, kaꞌisa Yuta kina, Isu nkaegaranta Pita abagi punta kina, igeba agate pami puntawe.

⁴⁶ Piya, to marisa kinaꞌmiti Awamusa tumogini, to kamana to kamana umagini Koti uma tabe potauguni, abima pami puntawe. Piya puguna, Pita maya uwaimintiye:

⁴⁷ Taeti Aota Awamusa tuminti, pabiyama ma kinaꞌmiti tumemika, mono wanipa kampa akunkitakune, untiye.

⁴⁸ Piya uma yogini, aoꞌmiba ibabuwaitama Isu Karaisiti nkagera mono wani paiꞌitantawe. Piya puguni, igeba Pita arakuruguni, kaꞌisa yagaba igege mintantiye.

11

¹ Pigoya, aposoro kinape Isu nkaegaranta kina Yutiya mari mintume kinape, igeba namuꞌisa kinaꞌmi Koti kamana aegaranta, pi nkiwaga kamana abintawe.

² Piyama abuguna, Pitaba Yerusaremi kumati aꞌwae puma iyoginiba, Isu nkaegaranta i kasanta kinaꞌmiba aeka abugunaba kunta ibogini,

³ maya omintawe: Kaeba nana pikena to mari wama, i kampa kasanta kinaꞌmigeba nanintaba nane, untawe.

⁴ Piya yuguna, Pitaba pintana aboraminti, pi kamanapa agorasa agobimagina, maya uwaimintiye:

⁵ Naeba Yopa kumata nunamu uma mintuwagana, napiyenanempa aꞌwae poga, amontagantaena agauwapa, mayaena aboranamoga agantuwe: Piya kaꞌena tabe kaigantaena atupa maema kabobuma, igaꞌnarasa ubu maranta, pi mantabintisa pubasanauguna tumima, nagora tumpa irosantiye.

⁶ Tumoga, agabebe puma igama pakobuma mayama agantuwe: Antabaipintiba tonarona kina, yagabe kabubintisa kina kuya kabara aꞌyaꞌma kinapa pita agantuwe.

⁷ Pigoya, naeti kamana mayama aborantiye: Pita, kaeba asima aeguma nao, untiye.

⁸ Piya yoga naeba maya untuwe: Waꞌega, pipa kampaye. Naeba uwa aꞌyugu kinaꞌmi ntanintabe iꞌni ntanintabe kampa naontanawe.

⁹ Piya yuwagana, mantarisa ebi ebi kamana to kake maya untiye: Pipa Kotiba uma aogi pegina, kaeba uma ataba a-po, untiye.

¹⁰ Piyaena aboraoga, kakaga pogana, kana aꞌyaꞌwaemaena mantari aꞌwae puma intiye.

¹¹ Pigoya abiyo. Pintanaba kakawaogana, pabigo Sisariya kumatisa kakaga kina apa naeti wama nama mintuwampe, pitaꞌi uma irosantawe.

¹² Uma irosauguna Awamusaꞌama maya unamintiye: Kaeba igege wakenaga ata kagiba a-ntapima wao, unamintiye. Piya yoga, wauwagini ma taokina tonaentisa kaꞌumaema kinaꞌmiba nabagi pugu, wama uma irosaꞌma irebu kinaꞌmi kiye yagarama ntamapi iyuwakana,

¹³ maya kamana uramintiye: Nae namapi enisorewama aboranamima maya unamintiye: Kaeba Yopa kumati apa igarubagini, Saimoni, aoso agiba Pita, uma ababute kanaigina,

¹⁴ kamana urimekiri kaebe kaoꞌmibe tigeba abigina, Kotiba tiꞌima aogi puritakiye, piya unamiyema, kana kiye yagara unamintiye.

¹⁵ Pigoya, naeba mono uwaimuwagana, pai taeti Aota Awamusa tumintisa puma, pabiyama igetiba tumintiye.

¹⁶ Piya poga, naeba pi agategi, Waꞌegawama kamana maya unti, pipa napintuwe: Yoniba uwa wanitakaꞌya paititantiye. Piya naeba Aota Awamusatasa paititakuwe untika, napintuwe.

¹⁷ Pigoya, taeba Waꞌega Isu Karaisitika napima tamatiti puwakana, pintanaba tae-isa puntiye. Pabiyama to marisa namu kinape iꞌmuntanaba puwaitama, Aota Awamusa imintiye. Pipa naeba ayama Kotipa kepa akunkatakuwe. Pipa kampaye, Pita piya untiye.

¹⁸ Piyama uwaimogini, igeba abima intaba paru pogini, Koti iꞌmu potama maya untawe: We, Kotiba to marisa kina igu aꞌwae puma, miyaba mikenaenaga igegeba uwaitaye, piya untawe. Antiyoki kumata mono aborantiye

¹⁹ Paipa Sitibeni puꞌwaoganaba tabe kuntuyena aborantiye. Piya pogini, Isu nkaegaranta kinapa iyegaka paiꞌma wama, Pinisiya, Saiparasi, Antiyoki mari umima, Yuta kinaꞌamana mono kamanapa uwaimima mintantawe.

²⁰ Pigoya, ige abakapisa Saiparasi kinape Sairini kinape Antiyoki kumati irosaꞌma Kariki kina igege, pabiyama kamana uma abirite, Waꞌega Isu mpono kamana uwaimintawe.

²¹ Piya, Waꞌegawamaba esegiyena imogini uwaimuguni, uwoma kinaꞌmi abima igu aꞌwae puma Waꞌegawama tuntana puntawe.

²² Pigoya, pi kamana Yerusaremi kumati waogini, monota aiꞌaru pume kina igeba abite, Panabasi otauguna Antiyoki kumati wantiye.

²³ Wama uma irosaꞌma agaomepa, namuꞌisa uwoma kinaꞌmi Isu aegarauguna uma igama, Kotitisa awagaena igeti aboraome, agama antawama aogi pogana, Waꞌegawamati uma airokaema mikibeka igeꞌma kamana esegima uwaimintiye.

²⁴ Piya, Panabasi aeba aogi yagarawe. Agupipa Aota Awamusape amatitiꞌenawape pumaema waitantogana, pi namuꞌisa kina igaogana antawama aogi puntiye. Piya, kana kumatapa uwoma kinaꞌmi Waꞌegawama tuntana puntawe.

²⁵ Pigoya, Panabasi aeba Tasasi kumati wama, Soro uma abatakena wantiye.

²⁶ Wama uma ababoginisi, Antiyoki kumati kanantase. Kanama ampima monota aiꞌaru pume uwoma kinaꞌmige mima, ka kaboba mono uwaimintase. Pigoya, Antiyoki kumatasa wasanamiba Isuti atokaenta kina ige igewaipa Karisiteni kinaꞌnema uma aborantawe.

²⁷ Pi kanabipa, poropete kina Yerusaremi kumatisa Antiyoki kumati tumintawe.

²⁸ Pigoya, igetisa ka, agewapa Agabasi, aeba Awamusaꞌama otaogana aꞌyaꞌma mari nanintaga tabe kabo pikibe, pi kamanapa untiye. Piya, pi kana kaboba Aroma kinaꞌmi waꞌega yagara Korotiyasiba, aeba mintogana aborantiye.

²⁹ Pigoya, Antiyoki kumatasa Isuti atokaenta kina igeba pi kamana abite, mone iyotasaenawai waintomepa aki puma, Yutiya mari iyoꞌmiti ataigina wakibika, uma esegi puntawe.

³⁰ Pigoya, mone maema aborama aki puntapa, Panabasike Soroke isimugunisi, maete wama aegaranta kinata kabiyume kinaꞌwai me imintase.

12

¹ Pi kanabipa, wasana waꞌega yagara Erotiba monota aiꞌaru pume kina kaꞌisa, karana itama agasiyaena puwaitantiye.

² Piya puntana, yogini Yoni nkaganto Yemisipa kasotasa aegugasuguna purintiye.

³ Piya pogini, uwa Yuta kinaꞌmipa iga ibogana igama, Pitapa pabiyama yogini, yisiti kampa wainta pareti nakena yaga arosaogini, arakuꞌma igaꞌna utintawe.

⁴ Pi Pasoba yaga, iꞌikena yaga, aꞌya pekanaba, Yuta kina iyakima aegukenaga napima yogini, igaꞌna namapi atama, irebu kinapa tonagisarisa kaꞌumaema kinaꞌmi kiya kabintawe.

⁵ Pigoya, Pitaba igaꞌna namapi mintogini, monota aiꞌaru pume kina igeba asi nasi aeka napima Kotiti nunamu uma mintantawe. Enisorewama igaꞌna namapisa Pita iyobaꞌatantiye

⁶ Pigoya, Eroti aeba marekanaba wasana iyakikena yaga aboranti, pi nkasekapa irebu yagara taramisi isigeba isibakapi Pita igaꞌna tara ubuꞌatama waimarantiye. Piya, to irebu yagara taramisi nama kaberi kiya kabima mintantase.

⁷ Pigoya, Waꞌegawamatisa enisore kaꞌwaina pabigo aborama asiyogana, namapa eꞌwasa puwantiye. Piya pogana, enisorewamaba Pita abekintata aukayama abage puma: Ke karuꞌena asiyo, yogana, Pita nkayapisa igaꞌnaba iyobantiye.

⁸ Piya pogana, enisorewama maya omintiye: Kautasaenaba maema pu uꞌma, kagisa anapa maema igiyo, untiye. Piya pogana, enisorewama to kake omintiye: Muꞌmu kaigapa maema pu uꞌma naegarao, yogana,

⁹ aegaꞌma wantana, enisorewama pomentanaga aboganaba amonta kiꞌi pusuyena puntiye.

¹⁰ Pigoya isigeba to ka kabira piyama mintugunaba igasima uma pasite puta, kumati tabe kabi kimaranta, pita uma irosausuguna aewa uwa aꞌwaiwaoginisi tumintase. Tumima keꞌi wantinisi, karuꞌena enisorewama Pita megaite wagaintiye.

¹¹ Piya pogana, Pita ageꞌmagina maya untiye: Mapa napiyuwe. Waꞌega aeba enisorewa otagina, Eroti nkigaꞌnabisabe Yuta kinaꞌmi nkigobintanabisabe iyoba nataye, piyama napintiye.

¹² Pita aeba piyama napigaite age urite wantiye. Wama Yoni Maka ae ano, agewapa Mariya, ae namata uma irosantiye. Pitaꞌi uwoma kinaꞌmi aki puma nunamu uma mintantawe.

¹³ Pigoya, Pitaba komari umima kabera aiwakarusogana, kayokaya araga ka, agewapa Arota, aeba: Kebaya aiwakarusiye, ute tumima,

¹⁴ Pita kamanaꞌwata abite, kabe kampa aiginta uwa aꞌmu purite, nama nkantabaipinti ima: Pita kanama kabera ampintiye, uma uwaimintiye.

¹⁵ Uwaimogini, igeba abite maya untawe: We, kaeba aibo kamana yene, yuguna, aeba aꞌno pako puma esegima untiye: Me, ae asima mintiye, untiye. Piya yogini igeba: Pipa amankapa pemintanaga yene, untawe.

¹⁶ Pigoya, Pita aeba to kake aiwakarusuma miyogini, kabe aiꞌma aewa nkagamagini pami puntawe.

¹⁷ Piya puguna Pitaba aya tugupa pumagina: Kamanapa pakama miyiyoma, uwaimintana, Waꞌegawama igaꞌna namapisa iyoba atama ababunti, pi nkawaga kamanapa uwaimimagina, to ka maya untiye: Tigeba ma kamanapa Yemisipe to kaꞌisa taokinape uwaimiyo, untiye. Piya ute, aeba tori iroꞌma wagaintiye.

¹⁸ Piya marogini, irebu kina igeba Pitaka aisakate: Nana puwaye, ute, iyekuru puma pami puntawe.

¹⁹ Piya puguna, Erotiba Pitaka aguyosakategina igaꞌna namapi kampa aganta, irebu kina uwaitaogini, aseka kabima mintume kinapa iyeguntawe. Piya pugaite, Eroti aeba Yutiya maba kaite Sisariya kumati tumima mintantiye. Eroti nkantotaꞌena aboramintiye

²⁰ Pigoya, pi kanabi, Taya Saironi kumatasa kinapa Eroti tabera ka ibirantiye. Piya, pi kuma ago kina igeba irosaꞌwaema: Paru puratanema, wasana waꞌega yagarama kiya yagarawa, ka agewapa Parasitasi, ae omuguna, antawamaba aogi pogana, kana wasana waꞌega yagaramati wama kamanaꞌwaipa omintiye. Piya, igeba kaꞌisaenawai ankima ankimayena kampa puma mintantasinta, kamparagaenabi mpintantasine. Piya, ankami ankamiyenawaipa tisaꞌwaogini, pi to kake kabo puma airokaekena irosantawe.

²¹ Pigoya, Eroti aeba kamana aꞌwae puma uwaimikena kana iminti, pi ntaga aboraogana, wasana waꞌega awaꞌena pu uꞌma, kamana ukena yabaera ima mima, pi kinaꞌmi aki puma mintuguna kamana uwaimintiye.

²² Uwaimogini aꞌyaꞌma kinaꞌmiba aomana suma maya untawe: Kamana pipa wasanama kamanapa kampaye. Pipa Koti kausu kamana yene, untawe.

²³ Pigoya, Erotiba pi kamanaka abima aogi puntana, Koti nkageba kampa maema asagaꞌyuyogana, Waꞌegawama enisorewa otaogana aeguyogana, aupinti kimparaogana puꞌwantiye.

²⁴ Piya, pabi ntaga Waꞌegawama mponoꞌamaba anosama abae purite wagana puntiye.

²⁵ Pigoya, Panabasibe Sorobe isigeba Yerusaremi kumata pi uwaisitantasa puma pugaite, pabe nkawameta Antiyoki kumati aꞌwae puma wakenaba, Yoni Maka ababusuguni kaga wantawe.

13

¹ Pigoya, Antiyoki kumata monota aruyenabi poropetebe tisabe mintantawe. Piyama: Panabasiwa, Simiyoni aeba to ka ominta nkagiwapa Tunu Ntagarawa, Arusiyasi aeba Sairini kumatasawa, Maneyeni aeba wasana waꞌega yagara Eroti aege kaga agayagaya puma mima anosantina, Sorowa, sumagini aruyenabi mintantawe.

² Pigoya, ka yagaba Waꞌegawama nkagisuma nakenaba aꞌa-o uma aki puma mintuguna, Aota Awamusaꞌama kamana maya untiye: Panabasike Soroke yoga uwaisitantopa, pi pikibemeka maema aseyo puwaisitaiyo, untiye.

³ Piya yogini, pika nanintaba aꞌa-o uma nunamu uma mima, iyapa isiꞌnota atama akayona puwaisitama, mono yugara uwaisitaugunisi wantase. Saiparasi mari wama mono kamana untase

⁴ Pigoya, Aota Awamusaꞌama piyama uwaisitaoginisi, isigeba wama Serusiya kumata tumpa irosaꞌma, wanipisa karebi ima wama Saiparasi uma irosantase.

⁵ Pigoya, pi mpari irosaꞌma, Saramisi kumati uma pitaꞌi Yuta kinaꞌmi ige mono namapi ima Koti kamana uwaimintase. Yoni Maka aeba isigege kaga wama isiyoꞌmaentiye.

⁶ Pigoya, aꞌyaꞌma pi mpari nasima, Peposi kumata uma irosantawe. Pitaꞌi uma irosaꞌma, Yuta yagara, ka kiyoꞌena pikena yagara, kampari poropete mintanti, agewapa Pa-isu, ae uma abatantawe.

⁷ Pi ntagara aeba kiya ka, agewapa Sesiyasi Porasi, ae aoꞌyagara mintantiye. Pi kiya yagara aeba aogi napi napiyena wantaga yagara, aeba Koti kamana abikenaga abogana, Panabasike Soroke isigegaꞌe yoginisi kanantase.

⁸ Kanausuguna, pi kana kiyoꞌena pome ntagara, Kariki kamanapipa agewapa Erimasi, aeba kiya yagarapa Isu mpono aꞌa-o otama akunkisitantiye.

⁹ Pigoya, pi ntaga Sorokaba, aoso agiba Poro, aepa Aota Awamusaꞌama antabi pumaemagina aseyo pogana, Erimasi aragamagina maya omintiye:

¹⁰ Kaeba kewama ntagarawe. Kaeba arupuyenama kama potane. Aꞌyaꞌma kumpariꞌena kamparagaenagampaba kagupipa pumaentiye. Kaeba Waꞌegawama nkaogi ki maema aꞌyugu puma, ataena pumagina akunene.

¹¹ Pika Waꞌegawama nkesegiyenawampa nkagowapa agao. Kaeba kao karu karumpaꞌwakana, kaꞌisa yagaba arapa kampa agama mikibene, untiye. Piya yogana, pabigo ibinankama ata potaogana, aoba tikaeyogana aya nkurupa nkurupa pogini, ayata urikena puntawe.

¹² Pintana aboraogana, kiya yagaraba Waꞌegawama nkesegiyenawata agategina, monokaba pami puma abogana, aogi pogana aogima abibebe puntiye. Poroba Pisiriya Antiyoki kumata mono uwaimintiye

¹³ Pigoya, Porobe aokinape igeba Peposi kumapa atate, wanipisa karebi ima to kake wama, Pampiriya mari Pega kumata uma irosantawe. Pitasa Yoni Maka aeba itate Yerusaremi kumati aꞌwae puma kanatiye.

¹⁴ Pigoya, igeba Pega kumatasaba wama, Pisiriya mari Antiyoki to auka pita uma irosantawe. Pita uma irosaꞌma, Yuta kinaꞌmi sabatiba kaga mono namankaipi ima mintantawe.

¹⁵ Pigoya, pi monota tabe kina igeba Mosese kamanake, poropete kinaꞌmi kamana awaꞌenake, kaꞌisa aisuma aꞌya atate, mayama uwaimintawe: Taoꞌmitaba, mono kamana ka napintiripa yigi abeno, untawe.

¹⁶ Piya yuguna, Poroba asima aya nkasa puma paru puwaitama, maya uwaimintiye: Isureyo naoꞌmitabe Kotika karu pe kinape, kamana urimekiri abiyo.

¹⁷ Isureyo kina taete Koti, aeba tayabamagi ibabuma kibi itama, Isipi mari mimagini tabe kina aborantawe. Piya puguna esegiyenawatasa pitaꞌisa ibabute kanama,

¹⁸ kaꞌme mpari nanintaba imima iyoꞌmaema miyogana, kaboba 40 puntiye.

¹⁹ Pigoya, Kenani mariba tonaentisa tara umaema kina igarubakasima yogini, tayabamagiba igeba pi mpaba pakobuma, iyota iyota puma maema mintantawe. Piya puguna, kaboba 450 aꞌya puntiye.

²⁰ Pigoya, Kenani mari mintuguna kiya aborawaimogini mirite wauguna, poropete Samuweri aborantiye.

²¹ Pigoya Samuweri mintogini, wasana waꞌegawaika yuguna, Kotiba Penisameni nkagaꞌnubara igetisa Kisi ntagara Soro asitaogana, kaboba 40 kabiwaitama mintantiye.

²² Pigoya, aeba atate, Tebiti wasana waꞌegawai asitantiye. Pigoya, aeka maya kamana uwaimintiye: Naeba Yesi ntagara Tebiti agama, aeka naumawamaba aogi pegi, aeka yekana nae yuga aꞌyaꞌma wasikena yagarane mikiye, Koti piya untiye.

²³ Pigoya, Tebiti nkagaꞌnubara igetisa Isureyo kina tae aogi tauꞌikena yagara ka aborakibi, awaga kamana unti, piꞌna auꞌwantagaꞌena penema, Koti yogana, Isu aborantiye.

²⁴ Pigoya, wasana abakapi aboranema, maru Yoniba aꞌyaꞌma Isureyo kinaꞌmi igu aꞌwae piyemagina, mono wanipa paiꞌitakena kamana uwaimintiye.

²⁵ Pigoya, aeba ke otanta aꞌya wakena puntipa, pita aeta wama wasana maya uwaimintiye: Aewa uma unatapa, pi ntagaraba aeba naeba kampaye. Aeba ainti kanakiye. Naeba uwa yagara kanaoka, agisa anapa akubotakena ayabaya pukuwe. Aeba Waꞌega yagarawe, Yoni piya untiyemagina, Poro uwaimintiye.

²⁶ Piya untana, to maya untiye: We, naokinaꞌne, Abaraꞌamu nkagaꞌnu, tigebe to kaꞌisa Koti karu pota kina, yekiri abiyo: Tauꞌikenaga aogi kamana pi taeti otantiye.

²⁷ Yerusaremi kina, ima minta tumima minta kinaꞌmiba Isupa kayoneba kampa potantawe. Piya kampa puguna, poropete kinaꞌmi meto kamana aꞌyaꞌma sabatirapa aisuma abompe, pipa esegi puntiye. Piya, aeka ata kamana otama uma aꞌya atantawe.

²⁸ Igeba Isu kaintanawakaba aguyosakate, Pairatika uwa yuguna aeguntiye.

²⁹ Pigoya, mono kamanapi umaranta, pabi nkawameta puma, mariporasa iyobaꞌma aru kabi kaitantawe.

³⁰ Piya puguna, Kotiba purintapisa asitantiye.

³¹ Aibogini, aege Karariya marisaba Yerusaremi kumati kaga kananta kinapa uwoma ntaga aborawaimintiye. Aborawaimogini, aganta kina igeba pi nkawaga kamanaꞌwa uwaimikena kinaꞌena puma, mampa mintawe.

³³

³² Pigoya, Koti tayabamagi pi utawaitanta, pipa Kotiba Isu asitaogana, iyabamagi taeti auꞌwa aboranti, pika tintawama asoya kamana urimuse. Pika mono ini Samu tara, Koti umaranti kamana mayama kaemarantiye:

Yagaranekawe. Kaepa iba aboragatauwe, yogana, kaemarantiye.

³⁴ Pigoya, Isu purintapisa asitantikana, aeba aintiba to kake puꞌma abararakenaenaba kampa maema aborakiye. Pika Kotiba kamana maya untiye:

Naeba Tebiti aogiyenaba utatantokana, piꞌna auꞌwapa waiyaba waiyabaꞌena timukuwe, untiye.

³⁵ Pika mono ini Samubi to ka mayama waintiye:

Kaeba aota yagaragapa naepa a-ntataga abararano, piyama kaentiye.

³⁶ Pigoya, Tebiti aekaba kampa kaentiye. Ae agowapa abintune. Aeba Koti yoga kamana otanti, pipa aokina igeti puma aꞌya atate purintiye. Purogini, ayabamagi ige kabi kaitauguna, auꞌariwapa abararantiye.

³⁷ Pigoya, Koti asitanti ntagara, aeba kampa abararantiye.

³⁸ Pigoya, naokina, naeba urimekiri abiyo. Aguntaenaripa Isu kaꞌwaina maema asuꞌa purigaikenaga yune.

³⁹ Mosese kamana ago kamanaꞌamaba kaintanaripa asuꞌa purigaikenaba pugagate atantiye. Pika Isuti uma airokaeyiginaba, kanara maema aꞌyaꞌwaemaenaripa asuꞌa purigaikiye.

⁴⁰ Poropete kaꞌwaina kamana unti, piꞌna tigeti esegi pusanaga aꞌwae piyoma, tigeꞌma kamana urimuwe. Kamana mayamawe:

⁴¹ We, monoꞌama akaya se kina, tigeba agabebe puma uwoma tigi napiyigina ataena puritakiye, iye.

Naeba tige kanabipa, ka aota yuga pukuwe, iye.

Pigoya, ka yagarama pi ntuga kamana urimekiripa, pipa tigeba kampa aogima abima wasikibewemagina, poropete yagarama kaemarantiyema, Poro piya untiye.

⁴² Pigoya, Poroge Panabasige isigeba mono namapisa irosaꞌma tumusuguni, wasanamiba to ka sabatira pabi kamana uwaimikibemeka untawe.

⁴³ Pigoya aruyenabisa tumima, uwoma Yuta kinape to marisa kina Yuta kina iyegaranta kaꞌisa pi mpono kinape, Poroke Panabasike isiyegarauginisi, Koti awagaenabi pasema mikibeka, igeꞌma esegima tabe kamana uwaimintase.

⁴⁴ Pigoya to sabati aboraoginiba, pi kumatasa kina igeba Koti kamana abikenaba, aꞌyaꞌma tabera irosantawe.

⁴⁵ Irosauguni, Yuta kinaꞌmiba igate abima, igobipa tabera puwaisitama, Poro kamana akayuma karana potantawe.

⁴⁶ Piya pugunisi, Poroge Panabasige isigeba esegi kamanapisa maya uwaimintase: Yuta kina, tigeba Koti kamana maru uwaimiyoma untapa, ma tigeri aꞌa-o uma miyabaꞌenamakaba kampa tabiyema, yegana, agoripa aboraika titate to marisa kinaꞌmiti wama pi aogi kamana igepa uwaimukuse.

⁴⁷ Piya, Waꞌega aeba pika napima maya uramintiye:

Naeba tigepa namuꞌisa kinaꞌmi eꞌwasaena amikena uritantoka, iꞌikena kamana mirite wama, ma tuti uma mima aꞌya piyo, Waꞌegawama untiye, isigeba piya untase.

⁴⁸ Piya yusuguni, pi to marisa kina igeba abuguna intawamaba asoya pogini, Waꞌegawama kamanaꞌwapa aseyo puma iꞌmuntanabisa abima maentawe. Pigoya, igeba miyabaꞌena utawaitanta, pabi nkawameta igeba pi kamanapa wasintawe.

⁴⁹ Aibuguna, kana marapa Waꞌegawama kamanaꞌamaba abae puma anosaurite wagana puntiye.

⁵⁰ Pi kumatasa kiya kinaꞌmige kaꞌisa mono abume tabe wayaꞌiyabe, igepa Yuta kinaꞌmi kumpari kamana uma imo atikebaꞌmagini, iyoꞌmaema Poroke Panabasike maꞌena puwaisitama, nama kumaꞌwaipa akunkisigasima isigarubaugunisi wantase.

⁵¹ Wantinisi, isigisarisa iꞌnipa aiwaka pusuguna tumoginisi: Aguntaenaripa wairitano, otate, Aikoniyamu kumati wantase.

⁵² Wausuguna, aꞌyaꞌma Isuti atokaenta kina ige igupipa iꞌmuntana Aota Awamusa pumaerite wagana puntiye.

14

¹ Pigoya, Poroge Panabasige isigeba Aikoniyamu kumata uma irosaꞌma, pabiyama Yuta kinaꞌmi mpono namapi ima mono yusuguna, auꞌwa aborantiye. Piya pogini, Yuta kinape Kariki kinape uwoma kinaꞌmi Isu aegarantawe.

² Aibuguni, Yuta kina kaꞌisa igeba pi mpono kamana aꞌa-o uma, pabi namuꞌisa kina imo atikebauguni, aposoro igobi puwaisitantawe.

³ Pigoya, isigeba uwoma ntaga pabi kumata mima, Waꞌegawama mponowapa karu kampa punta uwaimima mintantase. Piya pusuguna, Waꞌegawama kayone kamanaꞌwapa aborawaisimima, esegiyena isimoginisi awameꞌenabe kasaꞌenabe toma toma puntase.

⁴ Pigoya, kana pi kumatasa kinaꞌmiba pakobuma, kaꞌisa Yuta kinaꞌmiti uma atokaeyuguni, kaꞌisa kinaꞌmiba aposoro yagara tara isigeti uma airokaentawe.

⁵ Pigoya, ainti kaꞌisa namuꞌisa kinape, Yuta kinape, kiya kinaꞌwai igeba aposoro ata puwaisitama, yaba kasutasa isiyegukena pugunisi,

⁶ abite isiyegaka paiꞌma, Arikiyoniya mari wantase. Pigoya, pitaꞌi Arisitera, Tebi, kuma tara waintusumetibe, to kaꞌisa isigorasa kumatibe,

⁷ wama pitaꞌi aogi kamana uwaimima mintantase. Arisitera kumata mono yuga puntase

⁸ Pigoya, Arisitera kumata agisa taraba puꞌwanta yagara ka mintantiye. Aeba ano nkantabaipintisa pabiya yagara aboranta, ke nasi nasipa kampa puma uwa awaitami puntiye.

⁹ Pigoya, Poroba mono yogana abima mintogana, aeti agabebe puma, agowa mayama abintiye: Ma ntagara aeba aogi pikena amatitiꞌena waintiyema, napintiye.

¹⁰ Piyama napimagina, obina kamanapisa maya omintiye: Kaeba kagisagapa aema asima turu puma miyo, omintiye. Piya yogana, kana yagara aeba pabigo asima nasi nasi puntiye.

¹¹ Pigoya, aꞌyaꞌma uwoma kinaꞌmiba Poro pomentana agate, kegaꞌe uma Arikiyoniya kamanaꞌwaipisa maya untawe: Amani kina isigeba wasana i maerite, abakatepi aboranta mintase, untawe.

¹² Piya untini, Panabasikaba aeba amani ka, agewapa Susi, ae aukantana puntawe. Piya, Poro aeba tabe kamanaꞌyaga yagaragini, Emisiwe untawe.

¹³ Pigoya, Susi ae mono namapa kana kumaꞌama nkawamori waintantiye. Piya, pi mpono nama kiye yagara aeba yogini, pi kumatasa kinaꞌmi nkiꞌmuntana isimimagini purumaka kaema muta isitama, agunta pasaisitakena puma, kana aposoro yagara tara puntawe.

¹⁴ Aibugunisi, Panabasibe Porobe isigeba pi abite, tabera pami puma isitasaenaba atutu puntinisi, wasana ipasara puta wama maya untase:

¹⁵ We, ma kina, tigeba nana pewe. Tasigeba tige miyesa puma wasanawe. Tigeba kumpari monopa tikabitate, miyaba Koti aeti uma airokaekibeka, aogi kamanaꞌwapa urimuse. Ae mantabe mabe wanipe aꞌyaꞌma tonaronaba maema aborawaetantiye.

¹⁶ Pigoya, ago mirite kananta, pi kanabi namuꞌisa kina abiwaimogini, iguꞌama miyaba kipa toma toma aborama mintantawe.

¹⁷ Pigoya, aꞌyuguba kampa puritaikana, agowa abiyema, agu kaoꞌena puritamagina, yegina kabe pape ka awameta aemagina, aꞌyaꞌma nanintaba aboragiri, nama tiꞌmu puma miyewe, piya untase.

¹⁸ Pigoya, aposoro isigeba eꞌero ntaga esegi kamana piya uma, paru puwaitama akaꞌyuwaitausuguni, taena puma muta isitakena pumepa uwe atantawe. Poro yaba kasutasa aeguntawe

¹⁹ Pigoya, pitaꞌi mintusuguni, Yuta kinaꞌmi Antiyoki kumatisabe Aikoniyamu kumatisabe irosaꞌmagini, wasana imo atikebauguni, iyoꞌmaema Poro yaba kasutasa aeguntawe. Aegumagini: Ago puriye, umagini kuma nkawamori paibumaete wantawe.

²⁰ Piya puguna, pitaꞌi waintogini, Isuti atokaenta kina irosaꞌma, aeti uma karare puma agauguna, aogama asima kumati intiye. Pigoya maroganaba, Panabasige Tebi kumati wantase.

²¹ Wama pitaꞌi aogi mono kamana yusuguni, wasanaba uwoma kinaꞌmi abibebe pugunisi, Isu tu ibabuntase. Piya pumaginisi, to kake aꞌwae puma wama, Arisitera, Aikoniyamu, Antiyoki kumati ampa irosa irosa puta puta kanantase.

²² Aꞌyaꞌma kumati irosaꞌma kamana uwaimusuguni, Isuti atokaenta kina igeba abite esegima imatiti pugunisi, igeꞌma Waꞌegawama atokaema mikibeka kamana uwaimima maya untase: Taeba ataena puratama, tauki nakiyenama abobori mima, Koti kabiratakena kumati ikena ki uma aogi puratantine, untase.

²³ Pigoya, aꞌyaꞌma kumati monota aiꞌaru pume kinaꞌmibisa kiya kinaꞌwai ibabuma uwaitama aboramaginisi, naninta aꞌa-o uma mima nunamu uma akayona puwaitama, imatiti punta mono yugaga Waꞌegawamati itantase. Isigeba aꞌwae puma to Antiyoki kumati wantase

²⁴ Aibumaginisi, Pisiriya maba agaite wama, Pampiriya mara uma irosantase.

²⁵ Pitaꞌi uma irosaꞌma, Pega kumata mono uwaimite, Ateriya kumati tumintase.

²⁶ Pitaꞌi tumima, wanipisa karebi ima wama, to Antiyoki kumata uma irosantase. Pi kumatasa monota aꞌaru pume kina igeba Waꞌegawama nkawagaenabi isitama, yoga uwaisitaugunisi agobima purite wantase.

²⁷ Pabigo kanama irosaꞌma, monota aiꞌaru pume kina igegaꞌe uma aki puwaitama, Koti esegi puwaisitaoginisi yoga pusuguna, to marisa kinaꞌmi monoꞌama agupi uma pasinta, pi kamana uwaimiwaentase.

²⁸ Pigoya, isigeba pi kumata Isuti atokaenta kina ige abakapi uwoma ntagaba mintantase.

15

¹ Pigoya, Yuta marisa kina kaꞌisa Antiyoki kumati tumima, Isu mpono abinta kina maya uwaimintawe: Tigeba Mosese kamana uma tipa kampa kasaiginaba, Waꞌegawamaba kanara kampa tibabikiye, untawe.

² Piya yugunisi, Poroge Panabasige ka ibiꞌma, tabera maka yusuguni, pi kumatasa mono kinaꞌmi maya untawe: Porobe Panabasibe to kaꞌisa kina, tigeba aposorobe monota kabiyume kinape Yerusaremi kumati minta, igeti pi kamana maete wakibewe, piya uma uwaitantawe.

³ Pi kumatasa monota aiꞌaru pume kinaꞌmi piya uma uwaitauguni wantini, wama Pinisiya, Sameriya ma againtiniba, pitaꞌi Isu mpono abinta kinapa maya uwaimita wantawe: To marisa uwoma kinaꞌmi mono abewe, uwaimuguni, abima tabera iꞌmuntanaba igetiba aborantiye.

⁴ Aibogini, wama Yerusaremi kumata uma irosauguni, monota aiꞌaru pume kinape aposorobe monota kabiyume kinape, igepa ibabuma aogi puwaitauguni, igeba Waꞌega esegi puma iyoꞌmaeyogini, to marisa kinaꞌmiti mono yuga puguna auꞌwa aboranti, pi nkawaga kamana uwaimintawe.

⁵ Pi kamana uma aꞌya puguni, kaꞌisa Isu nkaegaranta Parasi kina maya untawe: To marisa kinaꞌmiba mono abikena puntiniba, itapa aꞌaitama, Mosese kamana agoba wasiwaeyiginaba kanarasakiye, untawe.

⁶ Piya yuguni aposorobe monota kabiyume kinape pi kamana umagina, aogi pukena to aki puntawe.

⁷ Aki pumagini, uwoma kamana yuguna, Pita asima maya uwaimintiye: Naoꞌmitaba, to marisa kinaꞌmiti nasima aogi kamana uwaimikenaenaba, pipa Kotiba tige aruyenabisa nae naba punatantegi, pai agobima uwaimuwagini abima Isu nkaegarantawe. Pipa ago abintawe.

⁸ Pigoya, Koti aeba taguꞌama agabebe puma Yuta kina tae Aota Awamusa taminti, pabiyama to marisa kina imima agoba tayakiye.

⁹ Igeba aeka napima imatiti piginaba, iguꞌamaba waeꞌwae pekana, tae puratantisa puma, pabi nkawameta igepa puwaitantiye.

¹⁰ Pika tigeba nanaga Kotipa agasima, tigeba kuntuyenaba asaema, to marisa Isu nkaegaranta kinaꞌmi ibotapa itakenagaba yewe. Pi kuntuyenaba taebe tayabamabe kampa abaebune. Pipa kampaye.

¹¹ Taeba mayama abune: Aogi pikenaenaba pipa Yuta kina taebe, to marisa kinape, kaga Waꞌega Isu tauꞌikena yagara, ae awagaenawaka uma aogi pune, Pita piya untiye.

¹² Pitaba kamana piya uwaimogini, aꞌyaꞌma aki punta kina uwa pasema mintantawe. Mintuguna, Porobe Panabasibe isigeba Koti to marisa kinaꞌmiti awameꞌenabe kasaꞌenabe isiyakoginisi puntame, pi kamana uwaimintase.

¹³ Pigoya, uwaimima aꞌya atausuguna, Yemisiba kamana maya uwaimintiye: Naoꞌmitaba, kamana yekiri abiyo:

¹⁴ Koti aeba to marisa ige aruyenabisa wasana ibabekini, aewa mpono abikena kinaꞌena pikena ki to mari aboranti, pi kamana Saimoni yegi abune.

¹⁵ Pigoya, ae kamanaꞌamaba kamana ago kamanapi uma paibuntiye. Poropete kaꞌwaina Waꞌegawama yome kamana mayama kaentiye:

¹⁶ Naeba aꞌwae puma, Tebiti ae nama abararami, pi aoga aogasosima aogi pukuwe, iye.

¹⁷ Piya pekini, wasana igeba Waꞌega naeka kegaꞌe uma naguyosaꞌmagini nabatakibewe, iye.

Pigoya, to marisa kina igeba nage nawaga kamana ukena kinaꞌnentana pikibewe, iye.

¹⁸ Waꞌega naeba kamana piyama uma aboraurite ima mintantoꞌnana, pipa yuwe, poropete yagara piyama kaentiyema, Yemisi untiye.

¹⁹ Pigoya, Yemisiba poropete kamana napima mayama amato puma uwaimintiye: Taeba to marisa kina Kotiti aꞌwae puma igu ame kinaꞌmipa, kuntuyenaba kampa imenema yuwe.

²⁰ Igeka kampari kotintana a-mpaemagini, ankagaba ankagabaenaba aꞌa-o umagini, kobama kampa ima maema puꞌwami kinape korape aꞌa-o umagini, a-ntaiyema esegi puma, pi kamanaꞌanto esa kaema imukunema, uwaimintana,

²¹ to ka maya untiye: Mosese kamana pi iyabamagibe igaꞌnugibe paitakaꞌya agobima, aꞌyaꞌma kumaka kumaka aisurite kanama mintantane. Piya, ibaba pabiyama aꞌyaꞌma sabatirapa mono namapipa aisuma, aꞌyaꞌma kinaꞌmiba abewe. Pika pi aꞌyugu pusanaga taguꞌamaba tara taraba a-peno, Yemisi piya untiye. To marisa kinaꞌmi nkisa kaema atauguna wantiye

²² Pigoya, uwaimogini aposorobe monota kabiyume kinape aꞌyaꞌma pi monota aiꞌaru pume kinape, abuguna aogi puma asoya pogini, igetisa tara yagara uwaisitaugunisi, Poroke Panabasike isibabuntase. Ka yagarama, agewapa Yutasi, to ka agiwapa Pasabasiwa, Sairasiwa sumaginisi, monota paitakena yagara tara isibagi puma, kaga Antiyoki kumati waiyema, uwaitantawe.

²³ Piya puntini, esa ka maya uma kaema imuguni maete wantawe: Aposorobe monota kabiyompe kinape, taeba taokina to marisa Antiyoki kumatasabe, Siriya marasabe, Sirisiya mari minta kinape, tige taꞌmu puritama, ma nkisapa ataritaune.

²⁴ Taeba kampa abintokini, mataꞌisa kaꞌisa kinaꞌmi tigeti ima kamana urimima, tiguꞌama aꞌyugu purigasuguri, tigeti atatara kamana aborantiye.

²⁵ Pigoya, taeba pi abite aki puma, taetisa tara uwaisitaokinisi, tabugai ntagara tara, Panabasike Poroke, isibagi puma iyewe.

²⁶ Pi ntagara tara, Waꞌega Isu Karaisiti aeka uma isiꞌwaisipa kaintase.

²⁷ Pigoya, pi wasana isibabumaraumpe, Yutasige Sairasige isigeba ima isiwamupisa kamana urimisigiri, abiyo.

²⁸ Aota Awamusa taeti waintegi, taeba maya kamana yune: Taeba to kaꞌisa kuntuyenaba kampa tige tikabapipa atakune. Pintanamana piyo:

²⁹ Tigeba kampari kotintana amikenaenabe, yaga korape, kobama kampa imu maema puꞌwami kinape, pi ntanintaga a-ntaiyoma ankagaba ankagabaenaba aꞌa-o uma kaitegiri, aogima miyiyo. Pintana tikabitakibepa, aogima mikibewema, esapa kaema imintawe.

³⁰ Pigoya, pi nkisa isimima isigarubauguni, igeba pi nkisa maete tumima, Antiyoki kumata uma irosaꞌma, monota aiꞌaru pume kina igegaꞌe uma aki puwaitama, kana esapa imintawe.

³¹ Imuguni aisuma abite, paru kamana kaema imume, pika intawamaba asoya puntiye.

³² Pigoya, Yutasige Sairasige isigeba poropete puntase. Piya pumaginisi, uwoma aogi kamana Isu mpono abinta kinapa uwaimima esegi puwaitantase.

³³ Pigoya, igege miyusume kanaba aꞌya pogini, pi isiyokinaꞌmiba intawama paruyenabisa isitaugunisi, uwaisitaugunisi, wausume kina igeti aꞌwae puma kanantase.

³⁴ (Sairasiba aewa aumawampa aegaꞌma, Antiyoki kumata umintantiye.)

³⁵ Aibusugunisi, Poroge Panabasige isigeba Antiyoki kumata to kake amato puma mima, Isu nkaegaranta ige iyoꞌmaema, mono uma Waꞌegawama kamana wasana uwaimima iyakintase. Poroge Panabasige isigeba pako puntase

³⁶ Pigoya, aintiba Poroba Panabasi maya omintiye: Tasigeba mono kayokayaꞌenara wama yuwagini, aꞌyaꞌma kumatisa tasiyokina aboranta, igeba ayamabaya miyewe. Pika wama abukuse, untiye.

³⁷ Piya ute, Panabasiba Yoni Maka aege kaga wakenaga untiye.

³⁸ Pigoya, Maka aeba paipa isigege wama Pampiriya mari kasa yugari uma irosaꞌma, isitate aꞌwae puma kanantika, Poro aeba piya yagaraga aboganaba kampa aogi puntiye.

³⁹ Piya pumaginisi, isimawamaba tabera tara tara puma pako puntase. Pako puma, Panabasiba Maka ababoginisi wama wanipisa karebi ima, Saiparasi mari wantase.

⁴⁰ Pigoya, Poro aeba aoꞌmaeyanta kinaꞌwapa Sairasi ababogini, pi Isu mpono abinta kinaꞌmiba: Waisiginaba, Waꞌegawama kabirisitakiye, uma uwaisitaugunisi wantase.

⁴¹ Wamaginisi, Siriya mabe Sirisiya mabe againtinisiba, monota aiꞌaru pume kina iyoꞌmaema esegi puwaitata wantase.

16

¹ Pigoya, Poroba Sairasi ababute wama, Tebi kumati wamaginisi, Arisitera kumata uma irosantase. Pigoya, Arisitera kuma pitapa Isuti atokaenta yagara ka uma abatantase. Agewapa Timoti, aeba anowampaba Isu nkaegaranta Yuta wae, piya abawampa Kariki yagarawe.

² Piya, Arisiteraꞌisa kinape, Aikoniyamu kumatisa kinape, pi Isu nkaegaranta kina igeba Timoti ae agoba aseyo puma, Poro omintawe.

³ Omuguna, Poro aeba aekaba abogana, aege kaga wanema, omintiye. Pigoya, pi mpariba Yuta kina mirite wanta, igeba kana yagarama nkabawampaba Kariki yagarakini abiwaentaka, pika Poroba igeka napima, kana yagarama nkau kasama, Waꞌegawamatisa araꞌenaba potantiye.

⁴ Pigoya, kumaka kumaka nasi nasi puma, aposorobe monota kabiyume kinaꞌmibe, Yerusaremi kumata tonkiya kamana uma atantapa, monota aiꞌaru pume kina wasiyoma, uwaimite wantase.

⁵ Piyama yoga puguna, monota aiꞌaru pume kinaꞌmi imatitiꞌenaba aborama esegi pigini, aꞌyaꞌma yagaba to kaꞌisa kina abima igege atokaentawe. Poro aeba Masetoniya yagara agantiye

⁶ Pigoya, Pirisiya mabe Karesiya mabe agaite, Esiya manto abeti wama mono kamana ukena yuguna, Aota Awamusaꞌama pi kiꞌi a-nkwaiyoma, akunkaitantiye.

⁷ Aibogini, wama Misiya ma awamori uma irosaꞌma, ka aukaꞌi aigigi paꞌma, Pitiniya mari wakena yuguna, Isu Nkawamusaꞌamaba pabiyama kampa owe uwaitantiye.

⁸ Piya pogini, Misiya maba agaite wama, kayo wani nkawamori Torowasi kumata uma irosantawe.

⁹ Pitaꞌi uma irosaꞌma, Poro aseka amonta mayaena agantiye: Masetoniya yagara kaꞌwaina aeti aborama mima, agisuma maya omintiye: Kaeba Masetoniya mari ima taoꞌmaeyo, omintiye.

¹⁰ Pigoya, Poro pintana agaogapa, aege aokinaꞌmitabe maya untune: Koti aeba: Masetoniya mari wama aogi mono kamana uwaimiyoma uramiye, untune. Piya ute, pabigo wakena aseyo puntune. Tete kai pome wae Aritiya Isu kamana aegarantiye

¹¹ Pigoya, aseyo puma wanipisa karebi ima, Torowasi kumapa atate agasi agasima wama, Samotaresi uma irosantune. Pigoya marogapa, pitasa wama Niyaporisi kumata uma irosantune.

¹² Pigoya, pitasa wanipisa karebisa tumima, wama Piripai kumata uma irosantune. Pipa Masetoniya mari tabe kuma ka, Aroma kinaꞌmi kuma agona puma mintantawe. Pi kumata kaꞌisa yagaba mintuwakana,

¹³ sabati aboraoga maya umagi, pi kuma nkagora waniti tumintune: Kuma nkawamori waniti tumima, Yuta kinaꞌmi nunamu ye kuma ka waintika, tumpa agakune, untune. Piya ute, tumima waya aki puma mintugu, tumpa ibatama, maraꞌmima kamana uwaimintune.

¹⁴ Pigoya, ige aruyenabisa to marisa wae kaꞌwaina, aeba Kotitisa aogi kamana abima mintantiye. Agewapa Aritiya, ae yuga aogi tete kai pome wae, Tiyatira kumatasa, pi kana wae Waꞌegawama agu aumawamaba aseyo pogana, Poro kamana yoganaba aogima abintiye.

¹⁵ Pigoya, aewape aokinape mono wani pasintini, maya uramintiye: Tigeba nagantaga Waꞌega ae tuntana poka, nae namapi kanama miyiyo, ute, tonkiya poga, awamu wasima intune. Poroke Sairasike igaꞌna namapi isiba puwaisitantawe

¹⁶ Pigoya, maroga nunamu ukena kumati tumuwakana, kayokaya araga kaꞌwaina tabatantiye. Kana araga aeba kegina wantaga mima, kakantaꞌenaba uma abora putamagina, aeba igetisa ikantana uwoma maemagina, kabitaome kinaꞌmipa imibutaye.

¹⁷ Pi ae tabatama, Porope taepe taegaꞌmagina, kegaꞌe maya untiye: Ma kinapa Koti ima minti tabe yagara, ae kayokaya kina mima, tauꞌikena kiꞌamaka urimima tiyakiyewe, untiye.

¹⁸ Piya kegaꞌe asi nasima uyabaꞌmiyogana, Poro aeba pika aekita puma, kana kegina aꞌwae puma maya omintiye: Naeba Isu Karaisiti ae awamuta ugamekana, aragawaeꞌma nkantabisa irosaꞌma wao, yogana, pabigo irosaꞌma wagaintiye.

¹⁹ Aibogini, kana aragawaeꞌma kabitaome kinaꞌmiba mone kuta aborama, imomentana pabigo kampa to kake aboraogini agate, Poroke Sairasike ka isibiꞌma, isibabute kuma akanti kiya kinaꞌmi nkauꞌi isibabute wama,

²⁰ kiya yagaramiti uma kamana uwaisitama, maya untawe: Isigeba Yuta yagara taramisi, ma kumateti kanama ataena puratase.

²¹ Piya pumaginisi, awameꞌenaba kasaꞌena pese. Aroma kinaꞌmitaba aꞌyugu pompentana, aꞌyugu maema miyompentana, piya ampa aborase, untawe.

²² Pigoya, uwoma kina mintume kinaꞌmiba igobipa tabera puwaisitama isiyegukena puguna, kiya yagara aeba kaiwaisipa atisa puwaisigasima, yogini eru kasutasa isiyeguntawe.

²³ Eru kasutasa tabera isiyegumugasima, igaꞌna namapi isibabuwaisitama, kiya yagara aepa: Kabeba esegima kigasima pasema kabiwaisitanema, omintawe.

²⁴ Omuguna, igaꞌna namapa abakapisa marupi isitama, isigisaba ya atuta kirokae isitama, isitaoginisi waintase.

²⁵ Pigoya, aseka nkabubu Poroge Sairasige isigeba ini nunamu uma Koti isiꞌmu potantase. Piya pusuguni, igaꞌna namapisa kaꞌisa kinaꞌmiba isiwamusa aga abintawe.

²⁶ Piya pusuguna, pabigo imimapa tabera pogana, kana igaꞌna namankamaba kurukuru pogana, aꞌyaꞌma kabeba aꞌwaiwaogana, aꞌyaꞌma kinaꞌmi nkigisa iyapisa igaꞌnaba iyoba wantiye.

²⁷ Piya pogana, igaꞌna nama kiye yagara aeba awaibintisa pami puma asima, kabeba aꞌwaiwaentogana agama: Igaꞌna kina ago paiꞌma wawaegasawe, ute, yoginka abamu kantabintisa aꞌyubuma, aewa auꞌwa aerisakena puntiye.

²⁸ Piya pikena pogana, Poro tabera maya kegaꞌe uma untiye: Kaukapa a-nkaguya aiyo. Taeba aꞌyaꞌma uwa kanara mintune, untiye.

²⁹ Piya yuguna, kana kiya yagara aeba aoꞌmika eka yogini, igiꞌma amuguna, nama nkantabaipinti karuꞌena wama aekuru puma, tabaraba purite ima, Poroke Sairasike isigisabi asu parokaentiye.

³⁰ Aibuntana, nama nkantabaipintisa isibabute tumima isibigama maya untiye: Tabe yagara tarane, nauꞌikenaga ayama aogi puma misuwema, isibigaoginisi,

³¹ isigeba maya omintase: Waꞌega Isuka kamatiti puma aegarakibempepa aogi pugatakini, kaoꞌmiba pabiyamagini aogima mpikibewe, untase.

³² Piya ute, aepe aokinape Waꞌegawama mpono kamana uwaimintase.

³³ Uwaimusuguna, kana kiya yagara aeba pabi aseka isibabuma, eru kasutasa isiyeguntaꞌenaba wani paiꞌma aeyoba isigasimagina, yoginisi aeꞌwape aokinape mono wani paiꞌitantase.

³⁴ Piya pusuguna, aeꞌwa ntamapi isibabuwaisitama yogini, kaoꞌena puma isimintawe. Pigoya aewape aokinaꞌmiba Koti ae tuntana pumeka, intawamaba aogi puntiye. Poroge Sairasige irosaꞌwantase

³⁵ Pigoya maroginiba, kamana umarisakena kinaꞌmi igeba irebu kinapa kaꞌisa uwaitauguni, wama igaꞌna namatasa kiye yagara maya omintawe: Kaeba tara yagarara uwaisitaginisi waiso, yuguna,

³⁶ pi kana kiya yagarama Poro maya omintiye: Naeka uwaisitaginisi waisoma, kiya yagarama kamana atagina kanaya, pika tisigeba kanara wama umiyiso, yogana,

³⁷ Poro irebu kinapa maya uwaimintiye: Igeba agoresipa kampa abinta wasana aruyenabi tasiyeguma, tasu airisa purasitama, igaꞌna namapi tasibaburasitawe. Tasigeba Aroma yagara tara mintuse. Pabiyama tasigepa kampa kotiyena purasitanta, tasiyeguma uwa ataena purasitawe. Pigoya mapa nanaga waisomaba, kakamaba urasitawe. Pipa kampaye. Igewai kanama ampa tasibabigiraba wakuse, untiye.

³⁸ Poro kamana piya yogana, irebu kinaꞌmi aꞌwae puma wama, kiya yagarape to tabe kinape uwaimuguni igeba kana yagara tara isigeba Aroma aruyenabi aborantame, pi kamana abite iyekuru puntawe.

³⁹ Iyekuru pumagini, kana yagara taramisiti kanama intara kamana uwaisitama, igaꞌna namapisa isibabute tumima, kumaꞌwaipa atate waisema, uwaisimintawe.

⁴⁰ Piya pugunisi, isigeba igaꞌna namapisa irosaꞌma tumima, Aritiya ntamati wama, Isu mpono abume kinapa igama iꞌnana kamana uwaimite wantase.

17

¹ Pigoya, Poroge Sairasige isigeba Ampiporisi kumape Aporoniya kumape isigaite, Tesaronaika kumata uma irosantase. Pitaꞌi Yuta kinaꞌmi mpono nama ka waintantiye.

² Pigoya, Poro aeba pubomesa puma kakaga sabatirapa mono namankaipi ima, igege paisa mono isapisa kamana uma abintawe.

³ Piya puntana, mono kamana awaꞌena kaꞌisa piꞌna agowapa aborama uwaimintana, maya untiye: Koti nkutaratanta yagara auki naki pumagina, puꞌwantitisa asikiyema, mono kamanapi untane. Pigoya, Isu age awaga kamana urimuwe. Aeba taga Karaisitiwe, untiye.

⁴ Pigoya, kaꞌisa kinaꞌmiba pi kamana abibebe pumagini, Poroke Sairasikeri uma atokaentawe. Pigoya, Kariki kina igeba Kotika iyekuru puma aegaraume kinaꞌmiba uwoma igeti uma amato puntawe. Pigoya, tabe kinaꞌmi ige wayaꞌiyabe aꞌyaꞌma kaꞌisaba kaga abintawe.

⁵ Pigoya, wasana uwoma kinaꞌmi mono abuguni, Yuta kina igeba abima intawamapa ikimagini, kaꞌisa kama kina uwaitauguni, igeba aꞌyaꞌma wabe wayape imo kamana yuguni, pi kumatasa kinaꞌmi agasiya puguni, isiguyosaꞌma, Yasoni ntamapinti karuꞌena ima Poroke Sairasike isiguyosantawe. Aibuntini, kana yagarara isibabuma wasana iyobi isitakena untawe.

⁶ Pigoya, isiguyosaꞌma Yasonibe Isu mpono abinta kina kaꞌisabe ibabute, kuma kiye kinaꞌmiti ibabute wantawe. Piya puntini, maya uta wantawe: Maga maga kina iguꞌama maema kamparaga puwaitata kanama taeke ata puratakena ampintawe.

⁷ Aibegana, Yasoniba ibabuma aogi puwaitaye. Piya, igeba wasana waꞌega yagararempa Sisa kamanaꞌwa maema aꞌyugu potama, aogaso waꞌega Isu ae awaga kamana yegana, anosama abae piye, untawe.

⁸ Kamana piya umagini, kana kumatasa kinape kiya kinape imo atikebauguni,

⁹ pi kiya kina igeba Yasonibe aokinape uwaitauguni, i ikantanaba mone imuguni, uwa itauguni wantawe. Poroge Sairasige Periya kumata yoga puntase

¹⁰ Pigoya, Isu mpono abinta kinaꞌmiba Poroke Sairasikeba aseka uwaisitaugunisi, Periya kumati wantase. Pitaꞌi uma irosaꞌma, Yuta kinaꞌmi mpono namapi ima mono untase.

¹¹ Pigoya, pi kumatasa Yuta kina igeba paru kinane. Tesaronaika kumatasa kina ige kanta kinapa kampaye. Pika monopa igu aseyo puma abintawe. Piya puntini, kamanaꞌwaisi nkagowa abibebe pikenaba asi nasima iyekita kampa punta, mono esapa aisuma abintawe.

¹² Pigoya, igetisa uwoma kinaꞌmi Isu aegarantawe. Piya, Kariki kiye kinaꞌmi nkwayape to kaꞌisa kinake igeti uma amato puntawe.

¹³ Pigoya, Poro mono uwaimogini abuguna, pi awaga kamanaꞌama Tesaronaika kumati waogini, pika Yuta kinaꞌmi abintawe. Abite, Periya kumati kanama kuma ago kinaꞌmi imo atikebaꞌma, iguꞌama maema aꞌyugu puwaigaintawe.

¹⁴ Piya puguni, Isu mpono abinta kina igeba Poro otauguna, pi kumapa atate wama kayo wanita uma irosantiye. Sairasige Timotigeba isigeba pabita mintantase.

¹⁵ Pigoya, Poropa wasanami igeba mabi ababute wama, Atenisi kumata metauguna maya uwaimintiye: Tigeba aꞌwae puma wama ima yiginisi, Sairasige Timotigeba karuꞌena kanaiso, uwaisimiyo, yogini igeba wama uma uwaisitantawe. Poro Atenisi kumata kamana uwaimintiye

¹⁶ Pigoya, Poroba Atenisi kumata isigeka isiwaga puma mintana, kumpari kotiba tabera wairite waogana, agama aguꞌamaba tabera yaku tantiye.

¹⁷ Pigoya Yuta kinaꞌmi mpono namapi ima, Yuta kina igewaipe Kariki kina kaꞌisa Yuta kina iyegaꞌma mintanta kina igege kaga mono kamana uma abintawe. Pigoya, asi nasi kumati wasana ibatamaba, pabiyama mono uwaimintiye.

¹⁸ Pigoya, pi kumatasa mono kina igewaipa Epikuriyani kinape Sitowiki kinape, pi kinaꞌmi ige Poroge maka untawe. Aibuntini, kaꞌisa kinaꞌmiba Poroka: Ma kamana yagara aeba nana kamanapaya uramiye, untawe. Pigoya, to kaꞌisa kinaꞌmiba: Aeba aoso amaniꞌama awaga kamana uramiye, untawe. Pigoya, Poro aeba Isu awaga aogi kamanape purintapisa asikena pi kamanape yoginiba piya untawe.

¹⁹ Piya umagini, maba ka agewapa Ariyopagasi, pitaꞌi ababute ima, maya untawe: Kaeba aoso kamana yempepa, pipa nanawe yene.

²⁰ Pipa aoso kamana abune. Pika agowa yega abeno, untawe.

²¹ Pigoya, aꞌyaꞌma Atenisi kumatasa kinape to marisa aꞌyo ampintume kinape, igeba asi nasi kasa kamana abite, pabi kamana mare-u me-u puntawe.

²² Pigoya, Poroba aeba Ariyopagasi kanisore kinaꞌmi nkiyobi asima mima, wasana maya uwaimintiye: Atenisi kumatasa kina, naeba agoripa mayama agauwe. Tigeba asi nasi amaniꞌamaka napi napi puma miyewe.

²³ Piya, naeba waꞌeriti nasi nasi puma amaniꞌenaripa agakena nasimagi, ima ka aratara pi awaꞌena mayama waintegi aisuwe: Mapa kampa agantompe kasa waꞌega, aeꞌenawe, aisuwe. Pigoya, kana kasa waꞌegaba kampagiri abinta, aeti monoꞌena pota, ae ago urimekiri abiyo.

²⁴ Koti ma aboratama piꞌna abobori aꞌyaꞌwaemaena toma tomantana atawaentiye. Pi ae mantawamage mawamage agoba mintiye. Pigoya, aeba wasana ayapisa kimaranta namapipa kampa miyabapa miye.

²⁵ Piya, kaꞌenaga aguyosagagina wasanama aborama amikenaenaba kampa waintiye. Pipa kampaye. Aewa maga maga kina tae mikenaenabe taumabe aꞌyaꞌwaemaenabe tamiwaeye.

²⁶ Pigoya, wasana aipa kaꞌanto aboratama yogana, aepisa aꞌyaꞌma marisa kinapa aboraurite wagana puntawe. Pigoya, aborama mirite wakubompeka, kanape ape aima aewa uratantiye.

²⁷ Pigoya, pi tagutasa aguyosagate wama, aewa uma abatakubompeka napima, Waꞌega Koti piya puntiye. Pigoya, aeba pagasaꞌiba kampaye. Abakatepi wasana aiꞌniratama miye.

²⁸ Piya pegi: Taeba miyemintanama nkaiꞌniratatagi mima aꞌyaꞌmaenaba pune. Tigetisa abinta kina kaꞌisamiba pabiyama: Taeba Waꞌegawamapisa aborantompene, untawe.

²⁹ Pigoya, wasana taeba Koti ntagara mintunemaba, aꞌyugu napima, korirasabe siribarasabe yabatasabe, Koti amankapa pumagini aogi awaꞌena pewe. Pika Kotitisa aborantompe taeba Kotika abekanaba, pi nkawametapa a-peno.

³⁰ Paipa abikenaena kampa abima mirite waugunaba, Koti tigama, ataba kampa puritanti, pi kanaba ago aꞌya puwantiye. Pigoya ibaba aꞌyaꞌma maga maga kina tigu aꞌwae piyomagina, urataye.

³¹ Pigoya, kana ka atantegina waintiye. Pi ntagaba maga maga kina agorepa maema aborama, tagu antotapa ka awameta tamikiye. Pigoya, wasana kaꞌwaina pi ntuga penema, purintapisa abage puma, Waꞌega asitama, agowapa purayakintiye, Poro piya uwaimintiye.

³² Pigoya, Poro aeba purintapisa asikena kamana yogini, kaꞌisa kinaꞌmiba uma ata potauguni, piya to kaꞌisamiba: Pi kamanapa to ka yagaba yega abeno, untawe.

³³ Piya yuguna, Poroba itate wantiye.

³⁴ Pigoya, tarantomi Poroti uma atokaema Isu aegarantawe. Igetisa ka Ariyopagasi kanisore yagara, agewapa Taiyonisiyasi, piya waya ka agewapa Tamarisibe, to kaꞌisabe kagane.

18

¹ Pigoya, Poro aeba Atenisi kumapa atate, Korinti kumati wantiye.

² Pitaꞌi Yuta yagara ka abatantiye. Agewapa Akura, aeba Pontasi mari aboranti, pigoya wayaꞌwapa Pirisira, aege Itariya mari mintusuguna, wasana waꞌega yagara Korotiyasiba, Yuta kina Aroma kuma akunkitama igarubantiye. Pigoya, isigeba pi kumapa atate, aoso Korinti kumata wama mintusuguna, pitaꞌi Poroba isige uma isibatantiye.

³ Pigoya, Poro aeba seri nama pome ntagaragana, Akura aeba pabiyama pabi ntuga pomeka, namankapi mima aoꞌmaeyoginisi kaga puntase.

⁴ Pigoya, Poroba aꞌyaꞌma sabatirapa Yuta kinaꞌmi mpono namapi ima, Yuta kinape mono uwaimima, aegarakena kamana uwaimintiye.

⁵ Pigoya, Sairasige Timotigeba isigeba Masetoniya marisaba aꞌwae puma kanausuguna, Poroba mono yugaba esegima puntiye. Piya puntana, Isu aeba taga utaratanta yagara, pi agoba Yuta kina aborama uwaimintiye.

⁶ Piya uwaimogini, igeba kamanaꞌwapa uma kamparaga puma, aeka ata potauguna kaiwatisa iꞌnipa asari pogana tumogana, Yuta kinapa maya uwaimintiye: Ataena pikibe, pi kaintanaba naeꞌenaba kampaye. Tigeꞌenaenawe. Pika mampa nakabiritate to marisa kinaꞌmiti yoga pukuwe, untiye.

⁷ Piya ute, ka yagara agewapa Titiyasi Yasitasi, aeba Kariki yagarama Koti mpono aegaꞌma mintanti, ae namapi ima mintantiye. Kana yagarama ntamapa Yuta kinaꞌmi mpono namankama agora waintantiye.

⁸ Pigoya, pi Yuta kinaꞌmi mpono nama kiye yagara, agewapa Karisipasi, aeba aokinape igeba mono abima Waꞌega aegarantawe. Aibuguni, Korinti kina igetisa uwoma kinaꞌmi mono abima mono wani pasintawe.

⁹ Pigoya, ka aseka Waꞌegawama aboramima Poro maya omintiye: Kaeba karuba a-puntana, monopa umaba a-kaso.

¹⁰ Piya, ma kumatapa nae naokinapa uwoma kina mintaka, uma miyo. Naeba kaege kaga miyokini, wasanamiba ataenaba kampa pugatama kampa kaegukibewe, piya untiye.

¹¹ Piya uma omogana, Poro aeba Korinti kumata Koti kamana uwaimima mintogana, opa tonagisarisa kakaga umaema aꞌya puntiye.

¹² Pigoya, ainti Kariyo aeba Akaiya mari tabe kiye yagara puma mintogini, Yuta kina igeba kaga asima Poro kama potamagini, ababute pi kiya yagaramati wama kamana otantawe.

¹³ Ababute wama kampari uma maya untawe: Ma ntagara aeba aꞌyaꞌma wa waya imiyo kamana uma, Kotitisa kasa mono wasiyoma uwaigasima miyema, kampari otantawe. Piya yuguna,

¹⁴ Poroba kamana ukena pogana, Kariyoba akayotama, Yuta kina maya uwaimintiye: We, Yuta kina, ma ntagara aeba kaintana kuntaꞌena aboramisinta, kamanatipa abosine.

¹⁵ Pigoya, tigeba uwa kamanatitake kamana agoritake monotitakeraka uma otawe. Pika tigeri kamanaꞌwapa uma aꞌya ataiyo. Pipa nae yugaba kampaye, untiye.

¹⁶ Piya uma otanti ntamatasa igarubaogini,

¹⁷ wasana igeba to ka Yuta kinaꞌmi nkini namatasa kiye yagarawai, agewapa Sositenisi, aepa arakuꞌma kiya yagarama ntama kabe awara tabera aeguma, ataena potantawe. Piya puguna, kiya yagaraba igama uwasuwa puwaitantiye. Poro aꞌwae puma Siriya Antiyoki kumati wantiye

¹⁸ Pigoya, Poro aeba Korinti kumata mimagina, ainti aꞌwae puma wakena puntanaba, mono abinta kina igeka: Aogima miyiyo, uwaitate, wanipisa karebi ima, iyoginisi Pirisirabe Akurabe isigeba aegaꞌma kaga wantawe. Pigoya, Poro aeba Koti nkaobi uma esegi potama, Senkeriya kumata uma irosaꞌma mima, aꞌnopa agabu pukaintiye.

¹⁹ Pigoya, igeba Siriya mari wakenaraka wanipisa karebi ima, pitasa kaga wama Epesasi kumata uma irosaꞌma, aokina tara isitategina, Poroba Yuta kinaꞌmi mpono namapi ima, Yuta kinaꞌmige mono kamana uma abintawe.

²⁰ Pigoya, Yuta kinaꞌmiba: Taege mikune, uma arakurikena yuguna, maya uwaimintiye:

²¹ Aꞌa, kampaya, Koti abi namekapa to kake tigeti aꞌwae puma kanakuwe, uwaitate, igeka: Aogima miyiyo, uwaitate, Epesasi kumati wanipisa karebi to kake ima wama,

²² Sisariya kumata uma irosantiye. Pitasa wanipisa karebintisa tumima, Yerusaremi kumati ima, monota aiꞌaru pume kinaꞌmi: Aogima miyiyo, uwaimite, Antiyoki kumati to kake aꞌwae puma wantiye. Poro to yugara waogana kakaga agobintiye

²³ Pigoya, Poro aeba Antiyoki kumata uwaenanto migate, mono kayokayaꞌenara to kake wantiye. Piya puma, Karesiya, Pirisiya maba isigaite to kumati to kumati wantana, Isu nkaegaranta kina kamana uwaimima esegi puwaitantiye.

²⁴ Piya pogana, Epesasi kumati Yuta yagara ka irosantiye. Agewapa Aporo, aeba Aresanteriya kumata aboranti, pi kana yagaraba tabe abikenaena wantaga, paisa mono isapi aisuma abibebe puwaentiye.

²⁵ Piya pogini, Waꞌegawama ominta monopa aogima abintiye. Pigoya, to kaꞌisa kinaꞌmi Yoni mono wani paiꞌitanti awaga kamanape, Isu nkawaga kamanape, omuguna abimagina, Isu nkagogaba kampa napintiye. Pigoya, pi ntagara Karaisiti aborakibi kamanapa esegima aogima uwaimintana, aborantiyemaba kampa napintiye.

²⁶ Pigoya, ka yagaba Yuta kinaꞌmi ige mono namapi ima pabiyama monopa kampa aekuru punta, agowapa aogima untiye. Pitaꞌi pi mpono yoginisi, Akurage Pirisira isigeba abite kayone puma agoya potamaginisi, Koti nkagoba aogi uma arupu pomintase.

²⁷ Piya pusuguna, Akaiya mari wakena pomepa, Isu nkaegaranta kina igeba ae napiyenawapa esegi potamagini, marotaꞌisa Isu nkaegaranta kina igeꞌena esa mayama kaentawe: Ma ntagara aeba tigeti wakiripa, kayone potaiyoma, kaentawe. Esa piyama kaema amuguna, wama Korinti kumata uma irosaꞌma, Koti kayonena puwaitantemi mono kinapa mono yugarapa tabera iyoꞌmaentiye.

²⁸ Pigoya, paisa mono kamana awaꞌena agowapa kuꞌmagina: Isu aeba taga utaratanta yagara Karaisitiwema, pi agowapa wasana iyobi uma aborama uwaimima, Yuta kinaꞌmi kamanapa maema aꞌwa puma maba atantiye.

19

¹ Pigoya, Aporo aeba Korinti kumata mono yuga piyama puma mintogana, Poro aeba kaꞌisa mari ainkima nasi nasi puta, Epesasi kumata uma irosaꞌma Isu nkaegaranta kina kaꞌisa uma ibatama,

² ibigama maya untiye: Tigeba mono abima, Aota Awamusa maentabe ayabayawe, yogini, igeba maya untawe: Kampaye. Aota Awamusa minti, pi awaga kamanaꞌwapa kampa abintune, untawe.

³ Piya yuguna, to kake ibigantiye: Tigeba ke nkagera mono wanipa pasintawe, yogini, maya omintawe: Taeba Yoni mpono waninkamana pasintompene, untawe.

⁴ Piya yuguna Poroba maya uwaimintiye: Yoni aeba wasanami ige igu aꞌwae pikibeka wani paiꞌitama maya uwaimintiye: Nakaꞌi kanama miyemiꞌna, aeka abima napima aegaraiyo, untiye. Pi kamana Isuka untiye, Poro piya untiye.

⁵ Piya yogini, wasanamiba kana kamana abite, mono wanika yuguna, Waꞌega Isu nkagera paiꞌitantawe.

⁶ Wani pasuguna, Poroba iꞌnota ayapa ataogana, Aota Awamusaꞌama igeti tumpima, intebu aꞌwae pugasogini to kamana to kamana uma poropete kinaꞌmi usuma agowapa untawe.

⁷ Pigoya pi kana wabe wayape aꞌyaꞌma nagisarisa tara tumpaema puntawe.

⁸ Pigoya, Poro aeba Yuta kinaꞌmi mpono namapi asi nasi imagina, monopa karu kampa punta, opa kakaga mima uwaimima mintantiye. Piya puntana, Koti kabiratakena kamanaꞌama nkagoba uma aborawaimintiye.

⁹ Piya pogini, kaꞌisa kinaꞌmiba iguꞌama esegi pumagini, Isu mpono ikabitama, monota akiyenabi kasa mono kika uma ata puguna, Poroba uwa itantiye. Piya pumagina, Isu nkaegaranta kina ibabuma aki puwaitama, asi nasima ka yagara Tiranasi ae awaꞌena namapi mono uwaimima iyakima mintantiye.

¹⁰ Piya puma, kaboba tara mima pogini, ainkima Esiya mari Yuta kinape Kariki kinape mintume kina igeba aꞌyaꞌma Waꞌegawama mpono awaga kamanapa abiwaentawe. Siwa ae yakarakiꞌnumpi kamanane

¹¹ Piya puguna, Kotiba Poropa esegi potaogana, awameꞌenaba agasiya toma tomantana ayapisa puntiye.

¹² Pigoya pika wasanamiba Poronta autasaenaba maeritegini wama, yonintana ibome kinaꞌmi ita uꞌma aukaya puguni, yonintanawaipa itawaogini kabaꞌma aogi puguna, intabaipintisa ke kinaꞌmiba irosaꞌma iyegaka wantawe.

¹³ Pigoya, Yuta kina tonarona tusa kina aꞌyaꞌma maba ainkima nasi nasi pumagini, kaꞌisa Waꞌega Isu nkagera atama ke kinaka maya uwaimintawe: Isu nkage awaga kamana Poro yemi, ae awamuta esegima ugamekana atate wao, untawe.

¹⁴ Pigoya, tabe mono kiye yagarama ntagara ka, agewapa Siwa, ae yakarakiꞌnu tonaentisa tara umaema kinaꞌmi piya puntawe.

¹⁵ Piya puguna, ka kewama kamana mayama aꞌwae puwaimintiye: Isupa abibebe puntawe. Piya, Poro nkageba abintuwe. Tigeba aetasa kinatawe, untiye.

¹⁶ Kewama piya umagina, kana yagara aisepaogana esegi puma, kana yakarakiꞌnu iyeguma kaiwaipa aerutu puwaigasima kora kasu iyeguyogini, ika namapintisa irosaꞌma iyegaka wagaintawe.

¹⁷ Piya pogini, ainti Epesasi kumata mintanta kina, Yuta kinaꞌmibe Kariki kinaꞌmibe abite tabera iyekuru pumagini, Waꞌega Isu nkagegaꞌeba asagaꞌyuntawe.

¹⁸ Pigoya, Isu nkaegaranta kina uwoma kina irosaꞌmagini, pai ataena punta pi kamana intawama aseyonabisa uma aborawaentawe.

¹⁹ Pigoya, uwoma kinaꞌmi kiyoꞌena asebena puma esa uꞌma miyume, pi isapa maete kanama wasanami nkiyobi ampa yaku kaentawe. Piya isaꞌama nkikantanawapa maema aki puntasinta, 50,000 tora puntesine.

²⁰ Pigoya, wasanamiba piya puguna, Waꞌegawama mponoꞌamaba aborama anosaurite wagana puma esegi puntiye. Epesasi kumata amani waetaka maka untawe

²¹ Pigoya, Poro aeba piyama yoga puma aꞌya ataogana, Awamusa otaogana Masetoniya mabe Akaiya mabe agaite, Yerusaremi kumati wakenaga untiye. Piya puntana maya untiye: Naeba Yerusaremi kumata uma irosaꞌmagipa, to kake kanama wama Aroma kumata uma irosakuwe, untiye.

²² Pigoya, wakena puntanaba, abagi yagara tara Timotike Irasitasike uwaisitaoginisi, Masetoniya mari paitama wantase. Piya pusuguna, aewapa Esiya mara to kake amato puma uwaenanto mintantiye.

²³ Pigoya, pi ntagaba Epesasi kumatapa monoꞌama kama potama, kasa mono ki akunintawe.

²⁴ Monerase konariyena pome ntagara ka mintantiye. Agewapa Timiteriyasi, aeba Atemisi amani waeꞌwampa amankapa aogiyena uwaenantontoba siribarasa puma ataogini, wasanamiba monerasa ika puguna, aewape aokinaꞌmipe moneba uwoma aborawaimogini, aꞌya wakiyemagini kama potantawe.

²⁵ Pigoya, Timiteriyasi aeba aokina igegaꞌe uma aki puwaitama maya uwaimintiye: Naoꞌmitaba, tigeba yogarepa piꞌna moneba aborama tamemi, pipa abintawe.

²⁶ Pigoya, ka yagara kanama ampintiye. Poro ae, tigeba ae agoba agama abewe. Aeba Epesasi kumatasabe Esiya marisa kaꞌisa kinapa tabera iguꞌamapa maema aꞌyugu puwaigasima maya uwaimiye: Wasana iyapisa pumaranta koti pipa kumpariꞌena, auꞌwa kampa waintaꞌenawe, uma uwaimiye.

²⁷ Aeba piya pekana, yogarempaba auꞌwapa kampa waikiye. Tabe kotire Atemisi ae waꞌeba kasipama ataena pikiye. Piya, Atemisi aeꞌwa nkage awaga kamanaꞌwapa tumima ataena pikiye. Piya pekini, Esiya marisabe to kaꞌisa marisa kinaꞌmibe aꞌyaꞌma ae kamana abima aegaraompeꞌna, age awaga kamanapa aꞌyaꞌma kaka wakiye, piya untiye.

²⁸ Pigoya, Timiteriyasi aeba aokina piya uwaimogini abite, igupipa igobintanamaba awaitaogini, kegaꞌe uma maya untawe: Epesasi kumatasa Atemisi aeba amani tabewe, piya untawe.

²⁹ Piya umagini, kana kumapipa tabe kigaꞌe umagini, tabe kamana aꞌyaꞌma kinaꞌmi untawe. Piya ute, aꞌyaꞌma asima wama akiyena pubume kumati uma aki pikena wantini, igeba Kaiyasike Arisitakasikeba kaga isirakuꞌma isibabute wantawe. Kana yagara taraba Masetoniya yagararaginisi, Poro aegaꞌma kaga nasi nasi puntawe.

³⁰ Pigoya, Poroba abite kana wasana aki pumeti wakena pogini, Isuti atokaenta kinaꞌmi akayotantawe.

³¹ Piya, kaꞌisa Esiya marisa kamani kina Poro aokinaꞌmiba, Poroti kamana atauguna waogini, uma esegi puma kampa wasana aruyenabipa wanema akunkatantawe.

³² Pi kana kinaꞌmipa napi napiyenawaipa aꞌyugu puwaogini, kaꞌisamiba ka kamana uma kegaꞌe yuguna, to kaꞌisa kinaꞌmiba to kamana uma kegaꞌe untawe. Piya yuguni, uwaena kinaꞌmiba kana aki pume kamanaꞌama agowapa kampa aogima abintawe.

³³ Kana wasanamiba piya puguni, Yuta kinaꞌmiba Arekisanta abubasanauguna, kana kinaꞌmi abakapi wantiye. Aibogini, kaꞌisa kinaꞌmiba kamana agoba omuguna, Arekisanta aeba aya tugupa puwaitama, kamana antotapa wa waya aꞌyaꞌma uwaimikena puntiye.

³⁴ Pigoya, wasanamiba kamana abima, aepa Yuta yagara agabebe pumagini, aꞌyaꞌma kegaꞌe umagini, maya untawe: Atemisi aeba Epesasi kumatasa waꞌega tabewe, piya uma eꞌerota tu awa kegaꞌe untawe.

³⁵ Piya yuguna, pi kumatasa kusikusi yagara aeba kamanaꞌwaipa uma paru puma, kayone puwaitama maya uwaimintiye: Ma kumatasa Epesasi kina, tigeba ago abintawe. Ma kumapa tae waꞌega Atemisi ae ago kumane. Piya, akuninta yabapa mantarisa tupuma mataꞌi tumintine.

³⁶ Pigoya, wasanama kana kamanapa kampa akayukiye. Pika tigeba uwa paka puma, aꞌyuguyenaba a-piyo.

³⁷ Tigeba tara yagarara isibabute kanantapa, pipa isigeba mono namapisa kaꞌena maema aꞌyugu puma kuntana pikena kampa kanantase. Piya, waꞌega waete Atemisi, ae akayasotakenaba kampaye.

³⁸ Pigoya, Timiteriyasibe yoga kinaꞌwampibe kaga ka yagaramage kamanaꞌwai waintakiniba, kamana ukena yaga aborakini, kiya kina mintati igeti uma yiyo.

³⁹ Tigeba kaꞌisa kamanati waintakiripa, kiya kinaꞌmi akiyenabi maete waiyo.

⁴⁰ Piya, taeba ibasa yagaba maka uma maꞌena puma ataena pikena pune. Piya pompekini, wasana waꞌega kinaꞌmi abite tagegaꞌe uma tabigaigipa, kamana antotapa nana kamana uwaimukune, untiye.

⁴¹ Kana kusikusi yagarama piya ute igarubaogini, kana akiyena pumepa atate wantawe.

20

¹ Pigoya, kamana uma maka yumepa pabigo paka puwauguna, Poroba Isu nkaegaranta kina igegaꞌe uma, iꞌnana kamana esegima uwaimite, Masetoniya mari wantiye.

² Maba pi againtanaba, monota aiꞌaru pume kina mirite wanta, ige to kake igeꞌma kamana uwaimita, wama Kariki mari uma irosantiye.

³ Irosaꞌmagina, pitaꞌi opa kakaga migaite, kayo waniti tumima, wanipisa karebi ima Siriya mari wakenaga yogini, Yuta kina igeba aegukena kamana yuguna abitegina, atate Masetoniya mari mabi wantiye.

⁴ Pigoya, mayaki kinaꞌmi keꞌiba abagi puntawe: Periya kumatasa Sopata, aeba Pirasi ntagarawa, Tesaronaika kumatasa Arisitakasige Sekantasigewa, Tebi kumatasaba Kaiyasige Timotigewa, Esiya marisaba Tikikasige Toropimasigewa sumagini,

⁵ piyaki kinaꞌmi paitamagini, Torowasi kumata tagawa puma mintantawe.

⁶ Tauꞌikena yaga, yisiti kampa wainta pareti nakena yagaba aꞌya poga, Piripai kumati wanipisa karebi ima, nayakaꞌmu yaga wama Torowasi kumata uma irosantune. Pitaꞌi irosaꞌma, tonaentisa tara umaema yaga mintantune. Poro Torowasi kumata ka yagara asitantiye

⁷ Pigoya, taeba sontara ara naninta nakena aki puntune. Piya puwakana, Poro aeba marekanaba wakena uma mono kamana uma miyogana, aseka nkabubu puntiye.

⁸ Pigoya, kana mintuwampe aboborasa marupipa kanepa uwoma nkigi atauguna tantiye.

⁹ Piya puguna, ka yagara agewapa Yutikasi, aeba Poroba monopa eꞌerota yogana, abaku kabira mima awai pegu pumagina awaintiye. Awaita mintometisa abaku kabirisa wareꞌnama, mabi tumpa aeguwaiyogini, asitaumepa ago araginaka yogini, inatisa kakaga maru pumarantatisa tumima aeguyomeka ara aeguntiye.

¹⁰ Piya pogana, Poroba tumima aepaꞌma asitama wasana maya uwaimintiye: Tigeba aꞌtiyekuruba piyo. Aumaba uwa waintegina aogaye, piya untiye.

¹¹ Piya utegina, namapinti ima pareti akobuma imite nate puntiye. Nagaite, igege to eꞌerota mono uwaimogini abima mintuguna marintiye. Marogana itate wantiye.

¹² Kana wasanamiba kana yagaraba aogaogini namankapinti ababute wamagini, intawamaba tabera paru puma aogima asoya puntawe. Poro Mairitasi kumati wantiye

¹³ Pigoya Poro yoga, taeba wanipisa karebi ima Asosi kumati paitama, pitasa aba pikena wauwakana, aewapa uwa mari pi kumati wantiye.

¹⁴ Pigoya, Asosi kumati wama uma tabataoga, wanipisa karebi ima arupu puma wantune. Wama Mitirini kumata uma irosantune.

¹⁵ Pitasa wama marogapa Kayosi uma irosaꞌma agaitegi, pabigo pitasa wama to ka yagaba Semosi uma irosaꞌmagi, pitasa wama marogapa Mairitasi kumata uma irosantune.

¹⁶ Piyama, Poro aeba Pentikositi yagaba Yerusaremi kumata uma irosakena yomekana, pika wanipisa karebi wama Epesasi kumapa agaite, Esiya mintakana kanaꞌwa aꞌya puwasanaga agaite, wama Mairitasi kumata uma irosantiye. Epesasi kinapa iꞌnana kamana uwaimintiye

¹⁷ Pigoya, Mairitasi kumata uma irosantana, kamana ataogini wama Epesasi kumatasa monota kabiyume kina ibabute kanantawe.

¹⁸ Kanama irosauguna, Poroba kamana maya uwaimintiye: Naeba Esiya mari irosaꞌma, pabigo tigeti yogane agobima puma mintanto, pipa agorasa abintawe.

¹⁹ Naeba nagegaꞌenepa maete tumima mimagi, nantaraꞌenabi mpima Waꞌegawama kayokayaꞌenaba puma mintantone. Piya, Yuta kina igeba karana natama ataena punataugu, maꞌenabi mpintantone.

²⁰ Pigoya, kamana tige urimikenaba kapa kampa airari kaeyuwagana waintantine. Tige aogi piyema, mono kamanapa uwoma akiyenabipe tigeti ntamapipe urimima tiyakima mintantone.

²¹ Piya puma, taeba Kotiti tagu aꞌwae puma, Waꞌegare Isu Karaisititi tamatiti puma mikubompeka, Yuta kinape Kariki kinape esegima urimima mintantone.

²² Pigoya, mapa Aota Awamusaꞌama nabaibemika, Yerusaremi kumati wakuwe. Pigoya, wama maroti uma irosakana, piya mayaena abora namikibipa, pipa kampa abintuwe.

²³ Uwa igaꞌna natakenaenage nanta naukikenaenage maroti nagawa puma waintiye. Pipa aꞌyaꞌma kumati uma irosa ampa irosa poganaba, Aota Awamusaꞌama piyama uma aboranamegi abuwe.

²⁴ Pigoya, naeba nauꞌneka aboganaba uwaenaganta pemika kampa naekuruba puwe. Naeba nanta aseyonabisa nagisa aeta aeta wama nayakikibi kiꞌi aꞌya pukuboka nabiye. Pigoya, Koti kaoꞌena agoya kamana uma arakuboka, Waꞌega Isu unatantiye. Yoga, pipa puma aogi pusanaga naumawamaba tabera waiye.

²⁵ Pigoya, ma ka yekiri abiyo. Naeba Koti kabiratakena urimima, abakatipi miyogiri, nagapa pipa aintiba to kake naorapa kampa nagakibewe.

²⁷

²⁶ Naeba Koti mpono kamana atantipa, pipa aꞌyaꞌma urimiwaentuwe. Kapa kampa kakauwagana waintantiye. Tige aruyenabisa kaꞌwaina pi kamana kampa abikibipa, kaintanawampa naeꞌenaba kampaye. Aeꞌenawane.

²⁸ Tige tigeri kiya pumagiri, monoka yagarutipa pabiyama kiya kabiwaitaiyo. Aota Awamusaꞌama ige kiyewema uritantika, tigeba Waꞌegawama mponota aiꞌaru pe kinapa kuratasa ika puwaitantika, igepa igama kiya puwaitaigini pasema miyiyo.

²⁹ Naeba abintuwe. Naeba titakanaba, kabu kara awamana tige tibakapi irosaꞌma, yagarupa kampa uwaba itakiye.

³⁰ Piya, tigeti tibakapisa wasana asima monoꞌama maema aꞌyugu puma, Isu nkaegaranta kina igewaiti tiba puritakena tutusuritakibewe.

³¹ Pika tigeba aꞌyaꞌwaema yaga aogima kabiyiyo. Piya, kaboba kakaga asekape arape nantaraꞌenabisa tiꞌnana kamana tiyota tiyota urimikenaenaba kapa kampa kasuwagana tumintiye. Pika tigeba napima miyiyo.

³² Pigoya, mapa Kotiti titama awagaena agoya kamanaꞌwata aki puritauwe. Aeba esegiyenama nkagowampa aꞌyaꞌma aeti atokaenta kina Koti aogiyena imemisa puma, tigepa aintiba mantarisa aogiyenaba to kaꞌisa kinake kaga Koti timekiri maekibewe.

³³ Naeba mone kotatikaba kampa esuritantuwe.

³⁴ Naenentabe naoꞌmintabe taeꞌena iseꞌena naya tararasa yoga puwagana aboraoga maentompe, tigeba pipa abintawe.

³⁵ Naeba aꞌyaꞌma yuganepa ago tiyakintuwe. Pipa esegima puma kampa esegi pe kina iyoꞌmaeyano. Piya punta, maya kamana Waꞌega Isu aewa untika, napiyeno: Amemi ntagaramaba to ka maeyami ntagarama nkaꞌmuntanawapa asugasaye, iyema, Poro piya untiye.

³⁶ Pi kamana ugaite, Poro araka pimagina, kaga pi kana kiya kinaꞌmige nunamu untiye.

³⁷ Nunamu yogini, aepaꞌma kubeꞌena potama amo nantawe.

³⁸ Piya puguna, aeba kamana maya uwaimintiye: Tigeba naorapa kampa to kake nagakibewe, yomeka, tabera intaba ikintiye. Aibogini, ababute wama wanipisa karebi metauguna wantiye.

21

¹ Pigoya, taeba igepa itate, ka wanipisa karebi aobibi puma wama Kosi uma irosaꞌmagi, pitasa to yagaba marogapa Arosi wamagi, Patara kumata wama uma irosantune.

² Pitasa to ka wanipisa kareba, Pinisiya mari wakena poga, uma abatama pabipi ima wantune.

³ Wama Saiparasiba tayakeꞌmasi waintoga uma agate uwa agasimagi, Siriya marisa aukaꞌi wama Taya kumata uma irosantune. Pita wanipisa karebisa kotapa metaoga,

⁴ taeba kumati ima, Isuti atokaenta kinapa asu ibatama, tonaentisa tara umaema yaga igege mintantune. Piya, Awamusaꞌama: Poro ata potakibeka, uwaimogini, igeba: Poroba Yerusaremi kumatiba aꞌyugu wasanaga, a-nkwaoma omintawe.

⁵ Pita mintuwakana, wakena yaga aboraoginiba, wa wayape araga yagarabe pi kumatasa arosaꞌma, aꞌyaꞌma kina tababugu kepari tumintune. Pigoya, pi kepariba tarakabima nunamu uma: Pigo miyiyo uwaitategi,

⁶ wanipisa karebi ima wauwakini, igeba aꞌwae puma kumati intawe. Poropete Agabasi Poroka meto kamana untiye

⁷ Pigoya, Taya kumatasaba wama Toromesi kumata uma irosauwakana, wanipisa karebi wakenaenaba aꞌya puntiye. Pigoya, pitaꞌi mono kina uma ibatama, ka aseka igege waintune.

⁸ Marogapa wama Sisariya kumata uma irosaꞌma, mono kamana uwaiminta nasume ntagara Piripi, uma abatantune. Piripi aeba aposoro yuga iyoꞌmaenta kina, tonaentisa tara umaema kina, ige aruyenabisawe. Ae namapi intune.

⁹ Ae aratagawaepa tarawa tarawaki mintantawe. Igeba poropete kinaꞌmi kamana uma mintantawe.

¹⁰ Pigoya, pitaꞌi mintuwakana, Yuta marisa poropete yagara ka kanantiye. Agewapa Agabasi, aeba taeti ampa irosantiye.

¹¹ Irosaꞌma, pabigo Poronta abamu kanti maema, aewa nkagisa aya kirokaentana maya untiye: Aota Awamusaꞌama aeba mayawe iye: Ma kantiwama nkababa, aeba Yerusaremi kumata wama uma irosakini, Yuta kinaꞌmiba maya potama, to marisa kinaꞌmi nkiyapi atakibewe, iyema untiye.

¹² Kamana piya yoga, taebe kana kumatasa kinaꞌmibe: Poroba Yerusaremi kumatiba a-nkwanema, ubesuma omintune.

¹³ Omuwakana maya untiye: Nanaga taberapa kubeꞌenaba punatamagiri, nae nantawamapa maema ataena punatakenaga yewe. Naeba Yerusaremi kumati igaꞌna namapi nkamana ikenagabe, Waꞌega Isu nkageraka purikenagabe, kaga aseyo puwe, untiye.

¹⁴ Piya yoga, to kamana omuwakanaba kampa aboga, atate maya untune: Waꞌegawama nkabikibika aborakibemipa taꞌmu pukune, untune. Yerusaremi mono kiye kinapa kamana uwaimintiye

¹⁵ Pigoya, kaꞌisa yaga aꞌya puwaoga, Yerusaremi kumati ikena aseyo puntune.

¹⁶ Pigoya, Sisariya kumatisa Isuti atokaenta kina kaꞌisa tababugu, ka Saiparasi yagara, agewapa Nesoni, aeba pai Isu nkaegaranti, ae namapi tababute meratantawe.

¹⁷ Pigo ampintuwakini, Yerusaremi kumatasa mono kinaꞌmiba agoya puma kaoꞌena puratantawe.

¹⁸ Piya maroganaba, Poroba Yemisi ntamapi tababoga intune. Ima mintuwakini, monota kabiyume kinaꞌmi aꞌyaꞌma irosaꞌwaentawe.

¹⁹ Irosauguna, Poroba iyata uꞌma, Koti aoꞌmaema esegi potaogana to marisa kinaꞌmiti mono yuga pogana, auꞌwa aboranti, pi kamanapa aꞌyaꞌma uwaimintiye. Poro kamana abite tabe mono namapi intiye

²⁰ Poro aeba kamana uwaimima aꞌya ataoginiba, Koti nkage asagaꞌyuma maya omintawe: Taoꞌyagara Poro, kaeba abo. Yuta kinapa uwoma kinaꞌmi Isu nkaegaꞌma ae tuntana puma mintawe. Pigoya, igeba aꞌyaꞌma Mosese kamana ago tumisanaga esegima wasiyewe.

²¹ Piya puntini, kae kamana mayama kanagini abewe: Yuta kina, to marisa kinaꞌmi abakapi miye kina, igeba Mosese kamanapa a-nkuma uwa kasiyoma, uwaimene. Piya untana, yagarawaimpigi itapa araꞌenaba a-puwaitaiyema, Yuta kina taetentanaba a-mpaema miyiyoma, uma akunkitanegini yewe.

²² Pigoya, Yerusaremi kumati kanampe, ma kumatasa kina igeba kae kawaga kamana abiwaeyaka, pipa aya pukune.

²³ Pika taeba kamana ka ugamukubompentana po. Taeti tarawa tarawaki kina mintawe. Igeba Kotiti uma esegi potama, iꞌno nkabiya kampa agagupanta uwa mintawe.

²⁴ Pigoya, taeba igeti ugatakana, ige awameta piyaena puma, kaema agunta abasakena ikantana puwaitagini, kaema iꞌnopa agagupakibewe. Kaeba piya pegini, kagamagini kaeka mayama abikibewe: Kamanaꞌwa kanaoga abintompe, pipa kumparine. Aeba Mosese kamana ago aogima wasima miye, ukibewe.

²⁵ Pigoya, to marisa Isu nkaegaranta kina igepa pai kamana untompe, pi kamana esa kaema imintompene: Wasanami yaga aeguma kumpari koti kaema agunta abasaꞌatape, korape amema abaema puremi kinape a-ntaiyoma, agabama kamparagaena pikenaenabe kaite aogima miyiyome, pi kamana uma esegima esa kaema imintompene, untawe.

²⁶ Piya yuguna, Poro aeba kamanaꞌwai abima, tarawa tarawaki kina igeti uma iyegaraogini, maroginiba i awaena purite tabe mono namapinti intawe. Ima Poroba kamana uma esegi pumaraome kanapa aꞌya kaikena puguna, kaema agunta abasakena aborakibi kanaka, kiya kina igepa uwaimintiye. Poro tabe mono namapi mintogini arakurintawe

²⁷ Piya uwaimogini, tonaentisa tara umaema yaga uwa mikenaga unta, pipa aꞌya pikena pogana, Poroba tabe mono namapi mintogini, Esiya marisa Yuta kina igeba aepa agate tabera imo kamana yuguni, wasanaba aꞌyaꞌma wabe wayape asimagini Poropa arakurintawe.

²⁸ Piya puntini tutusuwaitama untawe: We, Isureyo kina, kanama ampa taoꞌmaeyiyo. Ma ntagara aeba maga maga nasi nasi puma Yuta kina taepa kama puratama, kamana agorepe tabe mono namatepe ma uma ata potama miye. Piya pumagina, kaꞌisa Kariki kina ibabute tabe mono namatepi ampa pasegini, ma aota nama iꞌnintana potawe, piya untawe.

²⁹ Pigoya, Poro aeba Epesasi kumatasa yagara Toropimasi aege kumati nasi nasi pogini, agantaka: Poroba ababute tabe mono namapi iyema napintawe.

³⁰ Piyama napima yuguni, aꞌyaꞌma Yerusaremi kinapa pami pumagini, aꞌyaꞌma kinapa karuꞌena kanama aki pumagini, Poro arakuꞌurite tabe mono namapisaba irosaꞌma, abeꞌi tumintini, karuꞌena kabe akunintawe. Aroma kumatasa kiye aeba Poro ababuntiye

³¹ Pigoya, wasanami Poro ababuma aegukena puguna, awaga kamana Aroma irebu kinaꞌmi tabe kiye yagara aeti waogana: Aꞌyaꞌma Yerusaremi kinaꞌmiba maꞌena pikena pewema, abintiye.

³² Kamana piyama abite, pabigo irebu kinape irebu kinaꞌmi kiye kinape ibabogini, karuꞌena kana kinaꞌmiti wantawe. Piya puguni, Yuta kinaꞌmi Poro aegu miyumetisaba pi tabe kiye yagarabe irebu kinaꞌwape uma irosauguni, igate uwa atantawe.

³³ Piya atauguna, kiya yagara aeba agora kanama, irebu kinaꞌwa uwaitaogini Poro ampa arakuruguna, kana kiya yagarama maya uwaimintiye: Igaꞌna tara maete kanama ampa kirokaeyiyo, untana: Mapa kewe. Aeba nanaena piyema, ibigantiye.

³⁴ Ibigaogini, uwoma kina wabe wayape abite mintuguni, kaꞌisa kina igeba ka imo kamana uma tabera yuguni, to kaꞌisa kinaꞌmiba to kamana imo kamana tabera untawe. Piya puguna, tabe kiye yagara aeba kana kamanaꞌama nkagoba kampa aogima abintana, yogini irebu kina igeba Poro ababute igewai ntamapinti wantawe.

³⁵ Pigoya, Poroba kana namata uma irosaꞌma namapinti ikena pogini, wasanamiba kobe puma ke akukasuguni, irebu kina igeba Poro aepaꞌma wasirite intawe.

³⁶ Piya puguni, aꞌyaꞌma kina igeba iyegaꞌma wantini, maya untawe: Pi ntagaraba aeguma kaiyiyo, piya untawe. Poro aewa nkagowa Yuta kinapa uwaimintiye

³⁷ Pigoya, Poropa ababute nama nkantabaipinti ikena puguna, irebu kinaꞌmi tabe kiye yagara aepa abigama maya untiye: Abo. Kamana ka ugamukuwe, yogana, kana kiya yagarama pami puma maya untiye: Kaeba Kariki kamanapa ayama abintane.

³⁸ Naeba napiyopa pai Isipi yagara kaꞌwaina kama tukabikena irebu kinapa 4,000 kina ibabute kaꞌme mpari wantemi, kae pi ntagaragabera, to yagaragawema, abigantiye.

³⁹ Abigaogana Poro maya omintiye: Naeba Yuta yagaranawe. Piya, Sirisiya marisa Tasasi tabe kuma wainti, pitasawe. Kaeba abinamega, kamana uwaenanto wasana uwaimeno, yogana,

⁴⁰ abimogana, Poro aeba kabera asima aya nkatamagina, pakama mintuguna, Yuta kamanaꞌwaipisa kamana uwaimintiye.

22

¹ Pigoya, Poroba maya uwaimintiye: Naoꞌmitabe tabe kinaꞌnempitabe, naeꞌne ago urimekiri abiyo, agobima uwaimintiye.

² Piya uwaimogini, Yuta kina igewai kamanapisa abitegini, kamanapa to asabaꞌmagini mintantawe.

³ Piya mintuguna, Poro amato puma maya uwaimintiye: Naeba Yuta yagara, Sirisiya mari Tasasi kumata aboranto ntagaranawe. Pigoya, ma kumata ampima anosantone. Tisa yagara Kameriya aeba mono unamoga, tayabamagi ago kamanaꞌwaipa esegima abiwaentuwe. Pigoya, tige ibaba pesa puma, naeba pabiyamagi Koti aegaꞌma esegi puntuwe.

⁴ Pigoya, kasa mono kiꞌi wa kina igepa wabe wayape tabera karana puwaitama, ubuꞌmagi igaꞌna namapi itabumagi, kaꞌisaga otaogini iyeguntawe.

⁵ Monota paitanta kiye yagaramabe, aꞌyaꞌma monota kabiyume kanisore kinape, igeba nae agoba abintawe. Piya, igeba naokinaꞌmi naoꞌmaekena isa kaema namugu, Tamasiko kumati maete wama, marotaꞌi mono kina uma ibatama, igaꞌna ibuꞌurite Yerusaremi kumati ibabute antotaꞌena maekenaenara kanaiyema ibabukena wantuwe, untiye. Poro aeba Isu nkaegaranti kamana uwaimintiye

⁶ Pigoya, Poro to maya untiye: Piya, naeba keꞌi wama kagi abebe Tamasiko kumata uma irosakena puwagana, mantabintisa eꞌwasaena pabigo tumima tabera eꞌwasa punatantiye.

⁷ Piya pumagina, napasanaoga mabi wareꞌnama mima, maya kamana yoga abintuwe: Soro, Soro, kaeba nanaraka karana punatata nasene, untiye.

⁸ Piya yoga, naeba: Waꞌega, kaeba kegawe, yuwagana, maya unamintiye: Naeba karana punatata nasempe, Isu, Nasareti kumatasa yagaranawe, untiye.

⁹ Aiyogini, wasana naege wanta kina igeba eꞌwasaenamana agantini, kamana unamintipa pipa kampa abintawe.

¹⁰ Pigoya, naeba: Waꞌega, nana poma unatane, untuwe. Piya yuwagana, Waꞌegawama maya unamintiye: Kaeba asima Tamasiko kumati wagana, ka yagarama aꞌyaꞌwaemaena utagatantopa kayakima ugameno, untiye.

¹¹ Pigoya, yaku eꞌwasaenama naoba aeri kaegasogana tunusuwaogini, naoꞌmi ige nayata urite Tamasiko kumati nababugu wantuwe.

¹² Pigoya, pi kumata ka mono waintaga yagara mintantiye. Agewapa Ananayasi, aeba mono ago kamana wasima miyogini, Yuta kina pabi kumata mintume kina igeba aeka abugunaba aogi puntiye.

¹³ Pi ntagara aeba naeti asu irosaꞌma maya unamintiye: Naoꞌyagara Soro, kaeba kao agao, untiye. Piya yoga, pabigo nao apinaꞌma ae agantuwe.

¹⁴ Naeba agauwagana kamana maya unamintiye: Tayabamagi ige Koti ae kababumagina, abugaintanaga ugamima, arupu yagarawa agama, awamupisa kamanaꞌwa aboma, ugataye.

¹⁵ Pigoya, kaeba pi agama abempentanama nkawaga kamanapa aꞌyaꞌma maga maga kina uwaimirite waoma, ugataye.

¹⁶ Pigoya, mapa ayama uwa miyegana eꞌero pikiye. Kaeba asima, Isuka: Naoꞌmaeyo, omegana, mono wani paikatakana aguntaenagapa asuꞌa peno, unamintiye. Poro piya untiye. Kotiba Poropa to marisa kinaꞌmiti wanema otantiye

¹⁷ Pigoya, Poro to amato puma maya untiye: Pigoya naeba aꞌwae puma Yerusaremi kumati wama, tabe mono namapi ima nunamu asu uma,

¹⁸ amonta agauwapa Waꞌega aboranamoga agantuwe. Agauwagana maya unamintiye: Ma kumatasa kinaꞌmiba kae kawamupisa nawaga kamana abimaginiba: Aꞌa-o, ukibewe. Pika kaeba karuꞌena Yerusaremi kumapa atate paiꞌma wao, untiye.

²⁰

¹⁹ Piya yoga, naeba kamana mayama aꞌwae pomintuwe: Waꞌega, naeba kaegaranta kinapa igaꞌna ibuꞌmagi aꞌyaꞌma mono namapintisa ibabumagi, eru kasutasa iyeguntone. Piya, kawaga kamana unti ntagara Sitibeni aegukena puntini, kaiwai atama aki potaugu kiya kabintuwagini, aeguyugu agamagi naꞌmu puntuwe. Pipa ma kumatasa kinaꞌmiba abiwaentaka, kae kawaga kamanapa kanara uwaimusuwo, untuwe.

²¹ Piya yuwagana, Waꞌegawama maya unamintiye: Kaeba aseyo pega, pagasa mari to kinaꞌmiti naeba ugatakana wao, unamintiye, Poro piya untiye. Aroma kumatasa kiya yagarama Poro kabitantiye

²² Pigoya Poro piya yogini, igeba ige takae puma mintantawe. Aibuguna, Poroba to kinaꞌmiti wakenaga yogini, tabera imo kamana uma maya untawe: Piya yagaraba aeguma kaiyo. Aꞌyugu aeba mara uwa mikiye, untawe.

²³ Piya uma imo kamana tabera umagini, kaiwaipa atama pare pare pumagini, iꞌni akaeꞌma abobori mayo maebuntawe.

²⁴ Piyama maebuguna iyogana, tabe kiye yagarama yogini, irebu kina namankaipinti Poropa ababute intawe. Ababute iyuguna: Nanaraka imo kamanapa taberapa yewe, uma: Agowapa maema aboratama eru kasutasa aeguyiyema, uwaitantiye.

²⁵ Pigoya, igeba igaꞌna agisa ayata kirokaitauguna mimagina, Poroba kiya yagarawai maya uma abigantiye: Tigeba Aroma kina aeꞌwa nkagoba kampa abiganta, eru kasutasa aeguyiginaba pipa kampa kanarasakiye, untiye.

²⁶ Piya yogana, irebu kiye yagarawa abite, aeba tabe kiye yagaramati wama maya omintiye: Aya pikibene. Aeba taga Aroma yagaranawe iyema, omintiye.

²⁷ Piyama omogana, tabe kiye yagara aeba Poroti wama abigama maya untiye: Kaeba yo. Kaeba taga Aroma yagaragawo, yogana, Poroba: Pipa tagane, untiye.

²⁸ Piya yogana, tabe kiye yagara aeba maya untiye: Naeba uwoma mpone kasima Aroma kinaꞌena puntuwe, yogana, Poroba maya aꞌwae pomintiye: We, naeba piyaba kampa puntuwe. Ampa yakari punatantemi, Aroma ago yagaranawe, untiye.

²⁹ Piya yogini abite pami pumagini, Poro aegukena kinaꞌmi pabigo uwa atantawe. Pigoya, irebu kinaꞌmi tabe kiye yagara aeba: Poro taga Aroma yagarawema abite: Nanaraka piya potauwema, aekuru puntiye.

³⁰ Pigoya marogana, Aroma kumatasa kiye yagara aeba Yuta kina igeba nanaraka Poropa kampari otawema, pi agowa abikena yogini, tabe Yuta mono kiye kinape aꞌyaꞌma mono kanisore kinape aki puntawe. Aki puguna yogini, irebu kina igeba Poro iyobaꞌatauguni ababute tumimagini, akiyenawaipi iyobi asitantawe.

23

¹ Pigoya, Poro aeba Yuta kanisore kina igabebe puma kamana maya uwaimintiye: Naoꞌmitaba, naeba Koti nkaobi kayokayaꞌenaba kamparagaenaba kampa punta, purite kanama mintantoka puma miyuwe, untiye.

² Piya yogana, monota paitanta kiye yagara Ananayasi aeba wasana Poro agora mintume kina ige: Awamu airisaiyo, uwaimintiye.

³ Piya uwaimogana Poro maya omintiye: Arigautapa aogi pegina, kagukauꞌamaba ago abararaye. Kotiba kaepa kaegukiye. Kaeba nana piyema ago kamanaꞌama maema parutu pikena yuga puntana, pi ago kamana akayuma naeguyiyema uwaimenema, omintiye.

⁴ Piyama omogini, wasana agora mintume kinaꞌmi maya untawe: Ayama kaeba Koti mponota paitanta kiye yagarawaka uma ata potane, untawe.

⁵ Piya yuguna Poroba maya untiye: Naoꞌmitaba, naeba paitanta kiye yagaraba aepa kampa aogima agabebe puntuwe. Mono isaꞌama maya iye: Kaeba kiya kinakapa a-nkuma ataba potao, iye. Naeba pi kamanapa abintuwe, untiye.

⁶ Pigoya, kiya kina kaꞌisa Sarusi kina mintumepe to kaꞌisa Parasi kina mintumepe, pipa Poroba napimagina, pi akiyenabi kamanapa tabe puma maya uwaimintiye: Naoꞌmitaba, naeba Parasi yagaranawe. Piya, Parasi kinaꞌmi tupisa aborantuwe. Purintapisa asikenaena wainti, pi kamana wasiyoka kaꞌisa kinaꞌmiba kamana unatawe, untiye.

⁷ Kamana piya yogini, Parasi kinaꞌmibe Sarusi kinaꞌmibe igeba akakayoꞌna puguna, kiya kinaꞌmitiba atataraꞌena aborantiye.

⁸ Piya, Sarusi kina igeba purintapisa asikenabe, enisore kinape, amani kinape, pika abugunaba tagantanaba kampa puntiye. Parasi kinaꞌmiba aꞌyaꞌma pika taga untawe.

⁹ Pigoya, pika akiyenawaipipa tabe kamana maka untawe. Piya untini, Parasi kinaꞌmi ige iyoꞌmaeyume mono tisa kina kaꞌisa asima esegi kamana uma maya untawe: Taeba ma ntagarama ataenaga abompepa kampaye. Enisorepera amani kinaꞌma kamana omintakapa ayawe kamana otakune, untawe.

¹⁰ Pigoya tabera maka yuguna, kana tabe kiye yagara aeba Poro uma paibu puma akisebasanaga aekuru pumagina, yogini irebu kinaꞌmi kanama, wasana abakapintisa Poro ampa ayakana uma paibute namankaipinti ababute intawe.

¹¹ Pigoya, pabi aseka Waꞌegawama Poro agora aboramima maya omintiye: Kaeba mata Yerusaremi kumata kamanaꞌne uma aborampesa puma, pabiyama Aroma kumati uma aborao. Pika napima esegima miyoma, omintiye. Yuta kinaꞌmi Poro aeguma kaikena kamana untawe

¹² Pigoya marogini, kaꞌisa Yuta kinaꞌmi aki puma kamana uma esegi pumagini maya untawe: Taeba Poro aeguma kaikune. Kampa aeguntapa nanintabe wanipe kampa nakune, uma esegi puntawe.

¹³ Wasanaba 40-wa kinaꞌmi ige atokaemagini piya untawe.

¹⁴ Pigoya, pi kinaꞌmi tabe mono kiye kinaꞌmitibe monota kabiyume kinaꞌmitibe wama umagini aborawaimima maya uwaimintawe: Taeba nakenaba aꞌa-o uma mima, Poro aegugaite pintanaba nakunema uma esegi pune.

¹⁵ Pika tigebe to kaꞌisa kanisore kinape, Aroma kiye yagaramati kamana mayama ataigina wano: Kaeba Poro tae akiyenabi otagana kanaka, kamanaꞌwapa to kake uma aogi penoma, omiyo. Piya, kamanati abima piya pekapa taeba Poropa keꞌi aegukune, piya untawe.

¹⁶ Pigoya, Poro nkamagantawampa kana aegukena kamanapa abitegina, irebu kinaꞌmi ntamapi ima Poropa uma omintiye.

¹⁷ Omogana, Poroba irebu kinaꞌmi kiye yagara ka kegaꞌe uma maya omintiye: Kaeba ma ntagaranto ababute Aroma kiye yagaramati wagana kamana ka omeno, untiye.

¹⁸ Piya yogana, pi ntagara aeba kana yagaranto ababute tabe kiye yagaramati wama maya omintiye: Igaꞌna namapisa yagara Poro, aeba nagegaꞌe uma unamegi: Ma ntagaranto kamana ugamenema aba pogara kanause, untiye.

¹⁹ Piya uma omogana, tabe kiye yagara aeba kana yagaranto ayakana urite abiri metamagina: Aya kamana unamikibenema, abigantiye.

²⁰ Piyama abigaogana, kana yagarantoma maya omintiye: Yuta kinaꞌmiba aiba kaeti kamana atagatakena uma abewe. Igeba kaeka Poro kanisore akiyenawaipi ababute wama agowa maema aboraoma, kumpari ugamikibewe.

²¹ Ugamiginapa, kamanaꞌwaipa a-nkabo. Wasanaba 40-wa kinaꞌmi Poro aeguma kaikenaga umagini, keꞌi minaena puma mintawe. Igeba nanintabe wanipe aꞌa-o uma mimagini, Poro aegugaite pintanaba nakenaga uma esegi pewe. Piya puntini ago aseyo puma, kae kamanaka agawa puma mintawe, omintiye.

²² Piyama omogana, tabe kiye yagara maya uma otantiye: Kaeba kamana aborama unamempepa, pipa wasana kapa a-nkuwaimo, piya omimagina agarubantiye. Igeba Poro ababute Sisariya kumati wantawe

²³ Pigoya, Aroma kiye yagara aeba irebu kinaꞌmi kiye yagara tara isigegaꞌe uma maya uwaisimintiye: Tisigeba yisigini, irebu kina igisarasa wakena kinapa 200-wa, osi akabata wakena kinapa 70-wa, wanta ire urikena kinapa 200-wa sumagini, piꞌnagiba aseyo puma, aseka naeni kirokira Sisariya kumati waiyo.

²⁴ Poronta osi yaga, mara mikenaena potaiyo. Piya potamagiri, pasema kabimagiri kiya yagara Pirikisi aeti ababute waiyo, untiye.

²⁵ Piya umagina, pi kiya yagarama nkisapa ka maya uma kaentiye:

²⁶ Naeba Korotiyasi Arisiyasinawe. Kaeba pi mparisa kiya yagarane Pirikisi, kaeꞌena esa mampa kaeyuwe.

²⁷ Piya, Yuta kina igeba wasana ma ka arakuꞌma aegukena pugu: Aeba taga Aroma yagarawema, piyama abite, naebe irebu kinape wama iyapisa iyobatompene.

²⁸ Pigoya, kamana otanta pi ago abikenaga, Yuta kanisore kinaꞌmi nkakiyenabi ababute watone.

²⁹ Ababute wamagi ago kamanaꞌwaitaka otaugu mayama abitone: Pi kaꞌena mono igeꞌena maema aꞌyugu puwaitayema, otatawe. Piya, kampa ataena pogana igaꞌna namapi mikena ikape aegukena ikape kampa waintiye.

³⁰ Pigoya, igeba minaena puma Poro aegukena yega abite, kaeti otaogana iye. Piya, kamana ota kina igepa pabiyama uwaitakini kaeti ima kamanaꞌwaipa ugamikibewe, piyama kaema omintiye.

³¹ Pigoya, irebu kina igeba kiyawaimpa nkawamu wasimagini, Poropa aseka ababute wama Antipatirisi kumata uma irosantawe.

³² Pigoya marogini, irebu kina igeba namankaiti aꞌwae puma kanauguni, osi akabata mima waume kina ibiwai Poropa ababute wantawe.

³³ Wama Sisariya kumata uma irosaꞌmagini, pi kumata kiya yagaraba esapa memimagini, Poropa ae aora ababute ampa asitantawe.

³⁴ Pigoya, kiya yagarama esa aisuntana, Poro ma agowaka abigaogana: Naeba Sirisiya marisawe, untiye.

³⁵ Piya yogana abite maya omintiye: Kamana ugata kina kanama ampa irosaigi, kae kamanapa ukune, untiye. Piya uma irebu kina uwaimogini, tabe yagara Eroti kimaraome aki pukena namapi ababute mesutamagini kabintawe.

24

¹ Pigoya, ainti nayakaꞌmu yaga aꞌya pogana, monota paitanta kiye yagara Ananayasibe, to kaꞌisa monota kabiyume kinape, to ka kamana unta yagara agewapa Tetarasibe, igeba Sisariya kumati tumima, Poro kamana pi kiya yagarari uma ukena aborantawe.

² Pigoya, kiya yagaraba Poroka kegaꞌe yogana ampa irosaogana, Tetarasi aeba kamana otama maya omintiye: Aogi kiya yagarare Pirikisi, kaeba kanarama kabirataka aogi paruyenabi miyune. Piya, kaokina taeka abima tara puma taoꞌmaeyakana,

³ taetiba aꞌyaꞌma kumatiba aꞌyaꞌwaemaenamaba aogi puwaeyamika kaeka abokanaba aogima asoya piye.

⁴ Piya kamana yekana, eꞌero pusanaga kaeba paru puma abiramega kamana aronkanto ugameno.

⁵ Ma ntagaraga abokanaba aeba maka uma kaniꞌena wantaga, aꞌyaꞌma mari miye Yuta kina igepa iguꞌama maema aꞌyugu puwaigasaye. Piya pumagina, Nasareti yagarama tupi tabe yagara miye.

⁶ Pigoya, tabe mono namatepa iꞌnintana potakena pegi, abatama arakuritune. (Piya putompeka, taeba ago kamanatetaka kotiyena potauwakana,

⁷ pigo irebu kinaꞌmi tabe yagara Arisiyasi aeba kanama ampa esegi pumagina, tayapisa tapaꞌma agarubakasima,

⁸ kamana yoga, otaompe kinapa kaeti ampa aborama ugamune.) Pika kaega aepa abigama, ae agoba abima aꞌyaꞌma otaompe kamanapa aogima abo, Tetarasi piya untiye.

⁹ Piya yogini, Yuta kinaꞌmiba aoꞌmaema kana kamanapa uma esegi puntawe. Poro aeba Pirikisi kamana omintiye

¹⁰ Pigoya, kiya yagara aeba Poro ayatasa awame poyakogana, kamana maya untiye: Kaeba mampara uwoma kaboba kabima miyempe, pipa napimagi kamanaꞌnepa nantawama aogiyenabisa ukuwe.

¹¹ Naeba Yerusaremi kumati mono nama pasikena asu mintogana, nagisarisa tara tumpaema yaga aꞌya piye. Pi kamanaka wasana ibigagini ugamikibewe.

¹² Tabe mono namapipe, to kaꞌisa mono namapipe, kumatibe, kaꞌwainageba maka uma uwoma kinaꞌmigeba maꞌena puwaginiba kampa kapa nagantawe.

¹³ Ma kinaꞌmi kumpari unatama kamana ugame, pi auꞌwapa ayama kayakikibewe. Pipa kampaye.

¹⁴ Pigoya, to ka uma aboramekana abo. Kasa kiꞌama pako piyemagini yepa, pipa taga pabiya pone. Piya, aꞌyaꞌma mono ago kamanape poropete kinaꞌmi kamanape abima aegaꞌmagi, tayabamagi ige Koti kayokayaꞌena potauwe.

¹⁵ Piya, ainti arupu kinape antage kinape purintapisa asikena kana aborakibika, ma Yuta kinaꞌmibe naeba kaga napi napi puma agawa puma miyune.

¹⁶ Piya pumagi, Koti nkaobipe wasanami nkiyobipe kamparagaena pusanaga kiya kabima miyuwe.

¹⁷ Pigoya, naeba kaboba kaꞌisa to mari mima, monotaka kaꞌisa kusi kina iyoꞌmaekena monebe, Koti amitompentanabe, maema aki pumagi, Yerusaremi kumati wasana taokina igeti maete kanantone.

¹⁸ Piya, nauꞌnempa aogi penema puma kunka kaema agunta abasakena aseyo puma tabe mono namapi ima mintuwagini nabatantawe. Pitaꞌi wasanaba kampa aki puma, kampa maka kamanapa untuwe.

¹⁹ Esiya marisa kaꞌisa Yuta kinaꞌmi igege pitaꞌi mintantone. Piya, igeti nae kamana waintakiniba, mataꞌi kanama kae kaobi ampa unataiyo.

²⁰ We, pi kanisore kinaꞌmi nkakiyenabi aya ata kamanaꞌne aborakiniba, ma minta kinaꞌmiba ugamikibewe.

²¹ Piya, naeba ige abakapi mima ka kamanaꞌanto kegaꞌe yuwagana kampa aogi puntiye. Pipa mayamawe: Purintapisa asikenaena waintika, pi kamana wasiyoka kamana unataga abakatipi mampa mintuwe, untuwe, Poroba piya untiye.

²² Pigoya, kiya yagara Pirikisi aeba kasa monoꞌama ki awaga kamana abibebe puntika, aeba Poro kamanapa kampa uma uwa atategina, maya uwaimintiye: Irebu kinaꞌmi tabe kiye yagara Arisiyasi aeba Yerusaremi kumatisa tumeka, kamanatipa uma aꞌya pukuwe, untiye.

²³ Piya ute, irebu kinaꞌmi kiye yagara maya omintiye: Tigeba Poro kiya kabitama esegimaba igaꞌna namapipa a-nkataiyo. Piya, aoꞌmi aꞌmuntana amikena pigiripa, a-nkakuno, piya omintiye. Poro aeba tara kabu igaꞌna namapi mintantiye

²⁴ Pigoya, kaꞌisa yaga aꞌya puwaogana, Pirikisi aeba Yuta waeꞌwa Turusirage kaga mima, Poropa kegaꞌe uma omogana, Karaisiti Isu mponopa aegarakena kamana uwaisimintiye.

²⁵ Pigoya, Poroba arupu puma mikenaenabe, auꞌama kabima mikenaenabe, antotaꞌena aborakibi kamanape yogana, Pirikisiba aekuru puma Poro maya omintiye: Kanarana, wao. Ainti to kake yega abukuwe, yogini, toba igaꞌnabi menkatantawe.

²⁶ Pigoya, pi kiya yagaraba: Poroka uwa mone ika puma namikibayawe, umagina, asi nasi agegaꞌe uma aege kamana uma abintase.

²⁷ Piya pogana, kaboba tara aꞌya pogana, kiyaba to ka, agewapa Posiyasi Pesitasi, aeba Pirikisi mparu maeyogana, Pirikisiba Yuta kina apa kamana uwaimite, Poroba igaꞌna namapi mintogana, atate wantiye.

25

¹ Pigoya, Pesitasiba kabikibi mpari ampimagina, kakaga yaga migaite Sisariya-isa wama Yerusaremi kumati intiye.

² Ima asu irosaogini, Yuta kinaꞌmi tabe mono kinape to kaꞌisa kiye kinape aeti uma irosaꞌmagini, Poroka kamana omintawe.

³ Piya omimagini, igeba: Poro otagana Yerusaremi kumati kananoma, esegima abigantawe. Igeba keꞌi mina aꞌma Poro aegukenaga napimagini, kiya yagarapa piya omintawe.

⁴ Piya yuguna, Pesitasiba maya uwaimintiye: Poro aeba Sisariya kumati igaꞌna namapi mintegi, naeba aro ntaganto pabitaꞌi aꞌwae puma tumukuwe. Pitaꞌi tumpa agakuwe.

⁵ Tigeba Poro kamana otakena puntiripa, tigetisa kiya kina naege kaga tumima, igeba kamanapa otaiyo, untiye.

⁶ Piya ute, tonaentisa kakaga umaema yagawo, naya taraꞌmu yagawo, Yerusaremi kumati migaite, Sisariya kumati wama tumintiye. Piya maroganaba, kamana ukena namapi ima maraꞌmintana, yogini Poro ababute intawe.

⁷ Namapinti iyogini, Yerusaremi kumatisa Yuta kinaꞌmiba kobe pumagini esegima kamana otantawe. Piya kamana otaumeꞌna auꞌwapa kampa aborantiye.

⁸ Piya yuguna, Poroba kamanaꞌwai aegumagina maya untiye: Naeba Yuta kinaꞌmiti ago kamanatipe, tabe mono namatipe, Aroma tabe waꞌegari Sisape, kapa kampa aguntaba potauwe, untiye.

⁹ Piya yogana, Pesitasi Yuta kinapa uma paru puwaitama Poropa abigama maya untiye: Kaeba abega, Yerusaremi kumati kababute ima pitaꞌi kamanakapa uma aꞌya penoma, abigantiye.

¹⁰ Piyama abigaogana, Poroba maya omintiye: Tabe wasana waꞌega yagara Sisa ae kamana namapi mintogana, nae kamanapa mata uma aꞌya pegana, pipa kanarane. Kaega agonepa abintane. Naeba Yuta kina ataenaba kapa kampa puwaitantuwe.

¹¹ Naeba ataenaba kapa maema aboraosinta, naegukena yekapa naukaba kampa karuba posine. Pi igeba kumpari kamana unataka, uwa intawama paru puma aogi penema, unataganaba, kampa aogi pikiye. Pika tabe waꞌega Sisa kamanaꞌnepa uma aꞌya penema yuwe, Poro piya untiye.

¹² Piya yogana, Pesitasi aeba kanisore kinaꞌmige kamana uma abirite, Poro maya omintiye: Tabe waꞌega yagara Sisaka yempeka, kaeba Sisati wagana kamanakapa abenoma, omintiye. Pesitasi Poroka Agaripa abigantiye

¹³ Pigoya, kaꞌisa yaga aꞌya puwaogana, waꞌega yagara Agaripabe anonanto Penisibe isigeba Sisariya kumati tumima Pesitasi isiyoꞌena puntase.

¹⁴ Pigoya uwoma ntagaba isigeba aege mintusuguna, Pesitasi Poro kamana pi waꞌega yagara omintana, maya omintiye: Pirikisiba igaꞌna yagara ka atate wagina mintiye.

¹⁵ Piya, naeba uma irosaꞌma Yerusaremi kumati iyuwagana, tabe mono kiyebe monota kabiye Yuta kinaꞌmibe igeba naeti ampa aki puma: Kana yagara aeguyegana purenoma, unamugu,

¹⁶ naeba kamana antotapa maya uwaimintuwe: Aroma kina taeba uwa kamanatakaba ka yagaraba kampa uwa aegukune. Marupa taeba kana yagarabe ota kinape kaga igegaꞌe uma, torisa kamanape torisa kamanape kaga abimagita antotaꞌena otakune, uwaimintuwe.

¹⁷ Piya uwaimuwagini, Yuta kinaꞌmiba naeti kanauguna, pabigo maroga igepe aepe kamana abikena namapi ampa maraꞌmimagi aki puwaitantone.

¹⁸ Pigoya, kamana ota kinaꞌmi asimagini, ae aguntaenawapa uma aborakibewe, yuwagini, kampagini uma aborantawe.

¹⁹ Piya, igeba, wasana purinta ka agewapa Isu, aeba asima mintiye, Poro iye. Pi yi kamanape monoꞌwaika imo kamanape untawe.

²⁰ Pigoya, naeba piya kamanaka kunta pumagi, Porokaba: Yerusaremi kumati iyega, kamanakapa pitaꞌi uma aꞌya penoma, omintuwe.

²¹ Omuwagana, Poro aeba: Waꞌega yagara Sisa kamanaꞌnepa uma aꞌya natakiye, untiye. Pigoya Poro aeba Sisati wakena yaga aborakapa, naeba yekana igaꞌna namapi ataogana agawa puma mintiye, Pesitasi piya omintiye.

²² Piya uma omogana, Agaripaba maya untiye: Naeba pi ntagara ae kamana ka yeka abisanaga nabiye, untiye. Piya yogana, Pesitasiba: Kanarakana aiba abikibene, untiye.

²³ Pigoya marogana, Agaripabe Penisibe isigeba isiwaꞌenaba aogiyena purite akiyena namapi iyusuguni, irebu kinaꞌmi tabe kiyebe pabi kumatasa tabe kinape kaga intawe. Iwaeyuguna, Pesitasi yogini Poro ababute intawe.

²⁴ Ababute iyuguna, Pesitasiba kamana maya uwaimintiye: Wasana waꞌega yagara Agaripabe, wasana kaꞌisa naokinape, kamanaꞌnepa abiyo. Ma minti ntagara aekaba aꞌyaꞌma Yuta kinaꞌmiba Yerusaremi kumatibe mataꞌibe tabera imo kamana uma: Aeba a-mpiyeno, untawe.

²⁵ Piya yugu, naeba agauwapa aeba aeguma kaiyemantanaba kampa puntiye. Pigoya, tabe waꞌega yagaramaka yemika aeti otakana wakiye.

²⁶ Pigoya, kamana auꞌwapa aguyosaꞌmagi, tabe kiye yagarane mpanta esa kaekenagaba kunta pumagi, ma ntagaraba waꞌega Agaripa kaeti ababuma, aꞌyaꞌma ma kinaꞌmiti tiyobi ataogana mintiye. Pigoya, tigeba agowapa maema aboraigipa kamanaꞌwapa kaeyakana wakiye.

²⁷ Piya, naeba igaꞌna yagara kaꞌwaina kaintanawampa kamana kampa kaenta Sisati uwa otakana wasanaga, aboganaba kampa aogi pikiye, piya untiye.

26

¹ Pigoya, Agaripaba Poro maya omintiye: Kaega agogapa yega abeno, omogana, Poroba aya nkasa puma kamanaꞌwa maya omintiye:

² Yuta kinaꞌmiba asi nasiba kamanaꞌamana unatama miyewe. Pika kaꞌisa waꞌega yagara Agaripa, kae kaobi ibaba usanaga nantawama aogi piye.

³ Pi kae Yuta kina monotaka maka yompentanaba to kaꞌisaena pompentanarempa nkagoba abintana, pika kaeba abima paru puntaga, kamanaꞌnepa yeno.

⁴ Pigoya, naeba inamu ntagaranto maneta anosama Yerusaremi kumata ampimagi, naeba kamana aogima abima anosauwagini, ago nagana abintawe.

⁵ Pika Yuta kina pai nagantaꞌnagiba mikenaenanempa nkagoba agantawe. Naeba Parasi yagara monoꞌama nkanontana punta kina, ige aruyenabi mintantone. Piya, agone agama abinta kinaꞌmi ampa yegana kanarasa misine.

⁶ We, Koti tayabamagi utawaitantintanaga agawa puma miyuwe. Pika naepa kamana unatawe.

⁷ Piya, pi kamanaꞌama nkauꞌwa aboranema, Isureyo aruyena nagisarisa tara tumpaema kina igebe naebe Kotiti mono uma asekape arape agawa puma miyune. We, waꞌega yagara, agoba pitaka Yuta kinaꞌmiba kamana unatawe.

⁸ Koti aeba purintapisa asiratakiye. Pipa tigeba abeganaba, nanaga kampa pusuba piye.

⁹ Pigoya, naeba Isu, Nasareti kumatasa, ae age awaga kamana aguya aiyekana aꞌyugu penema yoganepa uwomantana puntone.

¹⁰ Yerusaremi kumata piya puntone. Piya, tabe mono kiye kina igeka yuwagini esa namugu, Kotiti atokaenta kina tabera karana itamagi, iyeguma igaꞌna namapi ibabuwaitamagi, puriyemagi piya puwaitama naege owe uwaitantone.

¹¹ Yuta kinaꞌmi ige mono namaka namaka nasi nasi puma, pi kina iyeguyuwagini, Isu nkage uma ata potayema uwaitantone. Pigoya, naeba esegima karana puwaitama, pagasa kumati wama iyeguma igarukarebaꞌma mintantone, Poro piya untiye. Poro aewa Isu nkaegaranti kamana uwaimintiye

¹² Piya untana, Poro to maya untiye: Piya puwagini, tabe mono kiye kinaꞌmi igeba esa namima unataugu, Tamasiko kumati wakena wantone.

¹³ Wauwagana kagi abebe pogana, mantarisa yaku eꞌwasaena ka tumima naeꞌnepe naokinaꞌmipe eꞌwasa puratantiye. We, waꞌega yagarane, pankama nkeꞌwasaenaba asugasima to awameta agantuwe.

¹⁴ Pigoya taeba mabi wareꞌna mima, kamana ka Yuta kamanapisa naeba mayama abintone: Soro, Soro, kaeba nanaraka karana punata nasima miyene. Kaeba akenanaenara aeguma erutakaꞌya puma kaeka kauka kauki nakiyena pene, unamintiye.

¹⁵ Piya unamoga, naeba: Waꞌega, kaeba kegawe, yuwagana, maya unamintiye: Karana punata nasima miyempe Isu naewe.

¹⁶ Piya, kaeba asima kagisa aema miyo. Naeba ma kayokaya kinaꞌne kababikena aboragamuwa, pika kaeba ma agampentanaba pipa ainti kayakekana agakibena, pika nae nawaga kamana ukena kinaꞌnentana puma miyo.

¹⁷ Naeba Yuta kinaꞌmike to marisa kinaꞌmikega uma kauꞌima kaoꞌmaekuwe. Piya, to marisa kinaꞌmiti ugatakana,

¹⁸ uma iyo agawaitagini, tununtanaba agama ikabitate eꞌwasaena maekibewe. Piya, Satani esegi yugaba kaite Kotintana pikibewe. Piya, aguntaenawaipa asuꞌa puwagini, naeti imatiti puma aota minta kinaꞌmi nkaruyenabi uma pasikibewe. Pikaga ugatauwe, unamintiye, Poro piya untiye. Mono yuga punti kamana Agaripa omintiye

¹⁹ Poro kamana piya untana, to amato puma maya untiye: We Agaripa, waꞌega yagaraneka, naeba pi mantarisa kamana abima wasiyuꞌma,

²⁰ pika maru Tamasiko kumatasa kinape, Yerusaremi kumatasa kinape, Yutiya ma ago kinape, aꞌyaꞌma to marisa kinape, igeba aꞌyaꞌma igu aꞌwae pumagini Kotika uma igu aꞌwae pikenaenama nkauꞌwa maema aboraiyema, pika mono uwaimima mintantone.

²¹ Piya puwagini, Yuta kinaꞌmiba tabe mono namapisa narakuꞌma naegukena puntawe.

²² Pigoya, Koti aewa naoꞌmaerite kanagi, mono kamana untopa uma miyuwe. Piya puma mata mimagi, wasana ima minta kinape tumima minta kinape aꞌyaꞌma urimuwe. Pipa aoso kamanaꞌnane. Poropete kinaꞌmibe Mosesebe Koti aborakibintanaga kaemaranta, pi kamana yuwe.

²³ Pi Koti utaratanti ntagara Karaisiti, aeba tabera aukima purenema otanta, pipa ago purinta kina igetisa paitamagina asima, Yuta kinape to marisa kinape eꞌwasa kamanaꞌwa maema aborawaimenema otanta, pi kamana wasiyuwe, piya untiye. Poro Agaripa Isu nkaegarakena kamana omintiye

²⁴ Pigoya, Poro aeba agowapa uma arupu pumagina kamana piya uwaimogana, Pesitasiba tabera kegaꞌe uma maya untiye: Poro kaeba aibo yagaragawe. Esapa uwoma aisekana abikenaenagampaba aꞌyugu piye, untiye.

²⁵ Piya yogana, Poroba maya omintiye: We Pesitasi, kaeba tabe yagarane, naeba aibo yagara kampa mintuwe. Naeba arupu kamana taga suwe.

²⁶ Piya, kamana yoꞌna agowapa waꞌega yagaramaba kanara abintiye. Aeta aseyo puma yuwe. Pi yontanaba kakantanabi kampa aborantiye. Pikaba waꞌega yagaramaba agewama aowamaba agama abiwaentiye.

²⁷ We, waꞌega yagara Agaripa, kaeba poropete kinaꞌmi kamanapa abibebe puntano. Naeba ago abintuwe. Kaeba abibebe puntane, untiye.

²⁸ Piya yogana, Agaripaba Poropa maya omintiye: Kaeba agaro ntaganto naeba aegaꞌma Karisiteni yagara mikuwoma, napiyempene, untiye.

²⁹ Piya yogana, Poroba maya untiye: Aro ntagantowo, eꞌero ntagawo, kaebe, aꞌyaꞌma nae kamana ibanto abe kinape, kaga nae nabemika tigeba nae posa puma aegaraiyoma, yuwe. Igaꞌna kina mintokaba kampa yuwe. Monoka yuwe, untiye.

³⁰ Piya yogini, waꞌega yagarabe, pi kiya yagarabe, Penisibe, aꞌyaꞌma to kaꞌisa kinape, asima wagana puntawe.

³¹ Wagana puntini, mare-u me-u pumagini maya untawe: Ma ntagara aeba aeguma igaꞌna pemintanaba kampa piye, piya untawe.

³² Pigoya, Agaripaba Pesitasi maya omintiye: Kana yagara aeba Sisaka kamanaꞌwapa uma aꞌya atanemaba kampa yemisinta, kaeba kanara iyoba atakana wama uwa miyemisine, untiye.

27

¹ Pigoya, Aroma kinaꞌmi mpari wakena yaga agarosaogini, igeba yuguna, Aroma irebu kinaꞌmi kiye yagara, agewapa Yuriyasi, aeba Sisa ae aruyenabisa, aeba Porope to kaꞌisa igaꞌna kinape ibaboga, taeba wanipisa karebi intune.

² Pigoya, pi wanipisa kareba Ataramitiyamu kumatasawe. Pipa Esiya mawama awamorisa kumati nasi nasi pikena wanipisa karewe. Pigoya, pi kana wanipisa karebi ima, Masetoniya yagara ka, agewapa Arisitakasi, Tesaronaika kumatasa yagara, aege kaga wantune.

³ Pigoya, maroganaba Saironi kumati waogana, Yuriyasiba Poropa kayone potama abimogana, kumati ima aokina igaogini keꞌi nakena nanintaba amintawe.

⁴ Pigoya, pi kuma atate kayo wanita to wauwagana, ponta kanama tamo akase poga, atate wauwampetisa purite kanama tababute Saiparasi ma agori aegago puma wantune.

⁵ Wamagi, Sirisiyabe Pampiriya mabe isigaite wama, Arisiya mari Maira kumata uma irosantune.

⁶ Pitaꞌi uma irosauwakana, irebu kiye yagarama to ka Aroma wakena wanipisa kareba aguyosagantiye. Aguyosaꞌma ka Aresanteriya kumatisaba ka agantiye. Agategina, tababoga pitaꞌi intune.

⁷ Ima wanipisa kareba uwoma ntaga pase pasema waoga, wama Naitasi kuma waintome agora uma pasema uma irosantune. Piya puwakana, pontawama tamota aima tarakukasoga, atate to ka kiꞌi wantune. Wamagi, Kariti ma agori aegago puma wama Sarimoni kuma agaite wamagi,

⁸ to pasema wama, Aresiya kuma agora wamagi, ka kuma agewapa Aogi Migarakena Kuma, pitaꞌi uma irosantune.

⁹ Pigoya, uwoma ntaga aꞌya puwaogana, Yuta kinaꞌmi naninta aꞌa-o ukena yaga wagasogana, ponta pumagina wani aigaꞌyoꞌya pukena yaga aboraogana, pika Poroba kamana maya uwaimintiye:

¹⁰ Naoꞌmitaba, ma to kake wakubompe, pika aboganaba kanara ima wamapa kampa piye. Wanipisa kareba ataena puma, wasanabe kotape kaga kayo wanipinti tumisanaga abima tara pumagi yuwe, untiye.

¹¹ Piya yogana, irebu kinaꞌmi kiye yagara aeba Poro kamana aꞌa-o uma, kana pubasanaome ntagarage aba karige isige kamana abintiye.

¹² Pigoya, kana kayo wani agaumepa, kana wanipisa kareba pitaꞌiba ponta pomepinti kampa aogima miyemapa puntiye. Aibogini Kariti mari amana wani waintometi, agewapa Pinikisi, pitaꞌi wama umintakanagaba pontaba puwaka wakune, untawe. Pigoya, kana Pinikisira ka wanipisa kare metakenaenaba aogiyenagana pontaba aogima aiꞌnima kakakune, untawe. Waninkama aigaꞌyoꞌya puma ipirintakena puntiye

¹³ Pigoya, takaꞌisa pontaba uwaenanto pogini, kana wanipisa kare kiye kinaꞌmiba wakena untini, wanipinti asaekenaena, agewapa anka, paibuguna iyoga, Kariti kayo wani aegaꞌma awamori wantune.

¹⁴ Wauwakana, kana ma agobisa tabera iguguya pumagina, kana iguguyankama nkagewapa Tareyo,

¹⁵ piꞌna pumagina wanipisa kareba aꞌwareꞌnagasogini aogi pikena pugagate atantawe.

¹⁶ Piya poga, taeba karuꞌena to manto akaꞌi wama, agewapa Kota, pitaꞌi wauwakana, wanipisa karewama nkamana karento kayo wanipinti tumikena poga,

¹⁷ esegima paibuwakana abobori iyoga, wanipisa kare aigurisanaga igaꞌna kima asaema esegi puntune. Pigoya, yabapa Aperika agora ima asu airukisanaga, seriba paibuguna tumogana, uwa iguguyankama aꞌwae poga wantune.

¹⁸ Pigoya, iguguyapa esegima pumiyogana, maroga kotapa kaꞌisaba kayo wanipinti kasuwakana tumintiye.

¹⁹ Piya, to kake marogini wanipisa karebintisaena iyora waintomentana maema pabiyamagini maebuguna tumintiye.

²⁰ Asekape kagipe kaꞌisa yagaba tabera aiguguyapa puma miyogana, pape noribe kapa kampa aboraoga aꞌyugu wamagi, agate abikenaenarempaba aꞌyugu puma akunkaoga, taeba toba mapa kampa mikunema, untune.

²¹ Pigoya, wasanamiba aꞌyaꞌma kina uwoma ntaga nanintaba kampa nanta mintuguna, Poroba wama abakankaipi uma asima mima maya uwaimintiye: Naoꞌmitaba, tigeba kamanaꞌne abitasinta, pipa Kariti mari mintokana, esegiyenaba kampa aboraramima kotatepa ataenaba kampa pesine.

²² Pigoya, ibaba tinta paru piyo. Wasanaba kampa puꞌwaokana, wanipisa kareba abiwapa ataena pikiye.

²³ Piya, iba aseka agonempa Koti, ae age asagaꞌyuyo ntagara, aeba otagana naeti tumpa aborama,

²⁴ maya unamiye: Poro kaeba a-kaekuruba po. Kaeba waꞌega yagarama Sisati uma irosakana, ibaba Kotiba aꞌyaꞌma kaege wa kinapa kaga tiyoꞌmaeyakiri ataenaba kampa purikibewe, unamiye.

²⁵ Piya, naoꞌmitaba, tige tintawamaba paru peno. Naeba Kotikaba naguꞌama tara taraba kampa puwa, kamana unamemi pipa esegi pikiye.

²⁶ Pigoya, wanipisa kareba to marisa wanipi ima aigasabakiye, piya uwaimintiye.

²⁷ Pigoya, Etiriya kayo wanipinti uwa nasi nasi puma mintuwakana, nagisarisa tarawa tarawaki tumpaema yaga aꞌya pogini, asekapa wanipisa karebisa kinaꞌmiba igeba maba pabigo agarosakena kanta pune, piya uma,

²⁸ wanipinti motama makagakena igaꞌna atauguna tumogini, maema agaumepa 120-piti puntiye. Aibogini, iseꞌanto wama to kake motama agaumepa 90-piti puntiye.

²⁹ Piya, yabati uma taegusanagawema iyekuru pumagini, kana akaꞌisa anka tarawa tarawakipa wanipa atauguna tumogini, agarosama marima pankao iyenema, nunamu uma mintantawe.

³⁰ Mintini, pubasanaume kina igeba kana wanipisa kareba atate paiꞌma wakena napimagini, amana karento atauguna tumogini, kumpari uma maya untawe: Taeba amoti anka ka atakana tumikiye, untawe.

³¹ Piya yuguna, Poroba irebu kinaꞌmi kiye yagarabe aokinape maya uwaimintiye: Pubasana kinaꞌmiba paiꞌma iyegaka waigiri, tigeba kayo wanipi tumima naisuwaewakibewe, untiye.

³² Piyama uwaimogini, irebu kinaꞌmi ubuꞌmaranta igaꞌna arisagasuguna, kayo wanipinti tumogini uwa atantawe.

³³ Pigoya marisanaga agawa puma mintana, Poroba aꞌyaꞌma kina maya uwaimintiye: Tigeba tiꞌamaka tiyekuru pumagiri nanintaba kampa nanta aꞌa-o uma uwa mirite kanagana, nagisarisa tarawa tarawaki tumpaema yaga aꞌya piye.

³⁴ Pika ibantoba naninta naiyo. Naninta nama esegi pumagiri, uwa mariba kanara ima mikibewe. Piya, tiꞌno nkabiyapa kapa kampa tumima aꞌyuguba puma kaka wakiye, untiye.

³⁵ Piya ute, aꞌyaꞌma agantuguna, pareti ka maema Koti aꞌmu potama apako puma nantiye.

³⁶ Naogini agate, intawamaba paru pogini pabiyama nawaentawe.

³⁷ Pigoya, kana wanipisa karebi wasana mintantompepa 276-wa kinane.

³⁸ Piya, naninta nama igaꞌe paurite, kana wanipisa karebintisa witi naninta kupa maema kayo wanipinti maebuguna, wanipisa kareba aseꞌyo puma intiye. Wanipisa kare ataena puntiye

³⁹ Pigoya marima pankao iyogini, kampa aganta kuma agantawe. Piya pumagini, ka auꞌi yaba kampa waintometi agategini, wanipisa kareba pitaꞌi wama kepari ikena puntini,

⁴⁰ igeba aꞌyaꞌma anka igaꞌnaba arisauguna kayo wanipinti tumogini, seriba paibuguna iyogini, aebasanakenaena iyobaꞌmagini, kepari aobibi pumagini wantawe.

⁴¹ Aebasanakenagaba esegima igiga puguna, kana wanipisa kareba mara tamakaema esegi puma waintantiye. Aibogana, kayo waninkamaba aigaꞌyoꞌya purite ainti kanama kana wanipisa kareba aeguma ataena puntiye.

⁴² Ataena pogini, igaꞌna namapisa kinapa nagosa aima iyegaka wasanaga, irebu kinaꞌmiba iyeguma kaikena untawe.

⁴³ Piya yuguna, kana irebu kinaꞌmi kiyawaimpa Poroka uma akayuwaitama, yogini nagosa airite wakena kinaꞌmiba paitama kayo wanipinti paꞌyo puma, nagosa airite kepari intawe.

⁴⁴ Pigoya, kaꞌisa igeba ya aboborape wanipisa karewama nkatunkatape maema airite wantawe. Piya pumagini, aꞌyaꞌma kepari uwa iwaegaintawe.

28

¹ Pigoya uwa mari iwaeyuwakini, wani nkagoba ka agewapa Morota yugu abintune.

² Piya puwakini, pimparasa kinaꞌmiba tabera kayone puratantawe. Piya, ka aema esiba tabogini yakupa kaerataugu tapiwaentune.

³ Pigoya, Poroba yaku nkibisa kibiꞌma kaeyomepa, kana ibisapinti ma mintomentaga maema kaeyogana muꞌmu pogana, irosaꞌma Poro nkayata okaꞌma agigi puntiye.

⁴ Aibogini, pimparasa kinaꞌmiba kana maꞌama ayapi aba naogini agate, mare-u me-u pumagini maya untawe: Ma ntagara aeba kiyo yagaragana, kayo wanipinti kampa tumima puremitisa mataꞌi uwa mari iyegina, arupuyenama nkantotaꞌena aboramiye, untawe.

⁵ Piya yuguna, Poroba kana mapa ayapisa airubuma yakupi maebotate, kampa abanasuma mintantiye.

⁶ Piyama mintogini, igeba pabigo arogu pekanaba karuꞌena wareꞌnama purekini agakena agawa puma mintantawe. Eꞌeropa mintumepa to kaꞌenaba kampa aboramogini agategini: We, ma ntagara aeba amanine, untawe.

⁷ Pigoya, mintantompe pi agora tabe yagarawai agewapa Pabiriyasi ae ma kuma waintantiye. Pigoya pi ntagarama ntamankapi taba puratama aogima taoꞌmaeyoga, kakaga yaga mintantune.

⁸ Mintuwakana Pabiriyasi nkabawampapa yonintana aentabaenabe au yakupe taogana mintantiye. Piyama mintogana, Poroba abite namankapinti ima, ayapa aꞌnota atama nunamu uma aogi potantiye.

⁹ Piya pogini, pi awaga kamana abite, pi kana marasa kinaꞌmi kaꞌisa yoni kinapa kana kana puguna, pabiyama kaba itantiye.

¹⁰ Aibogini, piꞌna antotapa wasanamiba uwoma aꞌmuntanaba tamintawe. Piya puguna, wakena yaga aboraoginiba, keꞌi nakena nanintabe to kaꞌisaenabe wanipisa karebi ataratantawe. Poro Aroma kumata uma irosantiye

¹¹ Pigoya, pi kana mara mintuwakana opa kakaga aꞌya poga, to ka wanipisa karebi ima wantune. Pi wanipisa kareba Aresanteriya kumatisa, amotapa amani agayagaya yagara taramisi isima pumaranta, pi ntagaba tae mintuwampeta ankwaintogana, iguguyapa aꞌya puwaoga, pitaꞌi ima wantune.

¹² Wama Sairakusi kumata uma irosaꞌma, kakaga yaga pita mintantune.

¹³ Pitasa wama Arisiyamu mari ainkima mintuwakana, marogana takaꞌisa ponta pumagina tapasanakasoga, ka yagawa, to ka asekana, suma wama Putiyori kumata uma irosantune.

¹⁴ Irosauwakini, pi kumatasa mono kinaꞌmiba tagegaꞌe yugu, tonaentisa tara umaema yaga igege mintantune. Piyama migaite, pitasa to kake wama Aroma kumata uma irosakena wantune.

¹⁵ Pigoya, pi kumatasa mono kinaꞌmiba: Piyama kanawe, kamana abite, karuꞌena kaꞌisamiba kanama Apiyasi maketi kumata ampa tabatantawe. Piya to kaꞌisamiba kakaga situwa wainta kumata ampa tabatantawe. Piya puguna, Poroba igategina Koti aꞌmu potamagina, antabinti abima asoya puntiye.

¹⁶ Pigoya, Aroma kumata uma irosauwakana, kiya yagaraba yogini igaꞌna namapipa Poroba kampa aba potantawe. Irebu yagara kaꞌwaina kiya kabitaogana uwa namapi mintantiye. Poro Aroma kumata aogi mono kamana untiye

¹⁷ Mintogana kakaga yaga aꞌya puwaogana, Yuta kinaꞌmi kiye kina igegaꞌe yogini, irosauguna kamana maya uwaimintiye: Naoꞌmitaba, naeba Yuta taokinapa ataena kampa puwaitanta, tayabamagi ige kamanapa kampa maema aꞌyuguba puntone. Piyama kampa puwagini, uwa aꞌyugu igeba pitaꞌi Aroma kumatasa kinaꞌmiti unatauguni, Yerusaremi kumata igaꞌna nautintane.

¹⁸ Piya, Aroma kina igeba nae kamana ago uma aborakenagaba kaintananekaba aguyosagantawe.

¹⁹ Aguyosakate iyoba natakena yuguni, Yuta kinaꞌmiba esegima akaꞌyuyugu: Tabe kiye yagara Sisa, aeba kamanaꞌnepa uma aꞌya penema, untone. Piya, Yuta kina taoꞌmi ige kamana mataꞌi maete kanama uwaitakenaba kampa kanatone.

²⁰ Pigoya, pika naeba tigama tigege kamana uma abenema tigegaꞌe yogiri irosawe. Piya, naeba napima Isureyo kina aꞌyaꞌma agawa puma miyompe, aetaka uma naya kuꞌnataga mintuwe, untiye.

²¹ Piya uma uwaimogini maya untawe: Marotaꞌi Yuta kina magoreti miye kinaꞌmiba kae kamanapa kampa kaema tamintawe. Piya, ka yagaraba kampa otauguna, kanama kae antage kamanapa kampa yegi abintune.

²² Pi kamana maema miyempepa, pipa kaega yega abenema yune. Piya, pi ntagarama tupisa kina igekaba: Maga maga kinaꞌmi uma kamparaga puwaitaga abune, untawe.

²³ Kamana piya ute kana atantawe. Pigoya, pi ntaga aboraogini uwoma Yuta kinapa Poro ntamapi aki puntawe. Aibuguna, abayabisa agobima Koti kabiratakena kamana uwaimima mintogana ase untiye. Aibuntana, Mosesebe poropetebe aogi awaga kamana uma kaemaranta, Isuti auꞌwa aboranti, pi kamana agoba uma wasana imatitiꞌenawaipa aborama esegi penemagina uwaimintiye.

²⁴ Piya uwaimogini, kaꞌisa kinaꞌmiba kamanaꞌwapa abima abuguni, to kaꞌisa kinaꞌmiba kampa abima aogi puntawe.

²⁵ Piya pumagini, to kamana to kamana yuguna, Poroba ka amato puma uwaimogini aꞌwae puma wantawe. Pi uwaiminti kamanapa mayamawe: Aota Awamusaꞌama poropete yagara Aisaya otaogana, tayabamagi aogi kamana maya uwaimima tigeka taga kamana maya untiye:

²⁶ Kaeba mamparasa kinaꞌmiti wama Kotitisa kamanapa maya uwaimo:

Kamanapa abikibepa, tigeba kampa aogima agowapa abibebe pukibewe, iye.

Piya, to kaꞌisaenaba agakibepa, tiyowamaba agowapa kampa aogima napikibewe, iye.

²⁷ Pabiyamagini, mamparasa kina igu igeba akunkatama iyorika mintawe, iye.

Aibeka, iyo agakenaba pugagate, pipa kampaye.

Igeba abima napikena pugagate, pipa kampaye.

Igupa aꞌwae pigi, aogi puwaitasanagaba kampa ibiye, iye. Pika uwaimoma, omintiye.

²⁸ Piya, naeba urimekiri abiyo. Koti aogi tauꞌikenaenaba aborantemipa, pipa to marisa kinaꞌmintana piye. Igeba kanara abima iꞌmu pikibewe, untiye.

²⁹ (Kamana piya uwaimogini, igeba aꞌwae puma mare-u me-u puta wantawe.)

³⁰ Pigoya, Poroba kaboba tara Aroma kumata aewa ntamapi miyogini, wasanamiba pitaꞌi umagini agabuntawe.

³¹ Uma agauguna, Koti kabiratakena kamanape, Waꞌega Isu Karaisiti kamana agobe, kampa aekuru punta aogima uwaimima mintantiye.