1

¹ Pigoya, paitakaꞌya kamana agoba mintantiye. Pi kamana agoba Kotige kaga mintantiye. Pi kamana agoba aewa Kotiwe.

² Paitakaꞌya aeba Kotige kaga mintantiye.

³ Pigoya Koti otaogana, aewa aꞌyaꞌwaemaenaba aborawaentiye. Kaꞌenaba to kiꞌisa kampaye. Aꞌyaꞌwaemaena aborantipa, pipa aewa pogana aborantiye.

⁴ Pigoya, aeba miyabaꞌenama nkagoba mintantiye. Pi miyabaꞌenaba wasanamiti eꞌwasa puratantiye.

⁵ Pi eꞌwasaenama tununtanabi arawaogana, tununtanama nkagoba kampa airarikaentiye.

⁶ Pigoya, Koti otaogana ka yagara ampa aborantiye. Agewapa Yoniwe.

⁷ Aeba Koti nkomintemi kamana uramikenaga ampa aborantiye. Piya, aeba pi kana eꞌwasaenama nkagowaka aꞌyaꞌma kina urameka, abima tamatiti pukubompeka Koti otaogana ampa aborantiye.

⁸ Pi Yoni aeba eꞌwasaenama nkagoba kampaye. Aeba kanama eꞌwasaenama nkagowaka awaga kamana ukenaga kanantiye.

⁹ Kanaogana, ae akaꞌi pi eꞌwasaenama nkagowampa mabi aborantiye. Aborama aꞌyaꞌma maga maga kinaꞌmi kipa ara puratantiye.

¹⁰ Pigoya, mabi ampiyogini, mabisa kinaꞌmiba pi mpaba aboranti ntagaraga kampa aogima abimagini agantawe.

¹¹ Piya, aeba mawata aboraoginiba, pi Yuta aokinaꞌmiba aepa kampa agoya potantawe.

¹² Pigoya, aꞌyaꞌma agoya pota kina igeba Koti ntagara aragaena pikena ki aborawaimintiye. Pipa ae agega napima aegara kina piya puwaitaye.

¹³ Piya, pi Koti ntagara araga wasanami kurapisabe napiyenabisabe kampagini aborawe. Wasana kaꞌwainatisaba kampaye. Pi Koti ntagara araga Koti aumawapa imegini aborawe.

¹⁴ Pigoya, kamana agoba aeba wasana aboramagina, awagaenawape tagantanawape pumaema waitantogana mintoga, eꞌwasaenawapa agantompene. Piya, Koti ntagarawa kaꞌanto mintogana, otaogana tumpintoga eꞌwasaenawapa agantompene.

¹⁵ Pigoya, Yoniba ae kamana aborama kegaꞌe uma aeka maya untiye: Nakaꞌi ampa aborami ntagara maru mintantine. Aeba pabiyama asu nagasima mintiyema, pai urimintone, untiye.

¹⁶ Pigoya, aꞌyaꞌma aogiyenaba pumaema aeti waintoga, awagaenawapa toma toma maemagi mintantompene.

¹⁷ Kotiba Mosese ke iꞌma, ago kamanaꞌwapa omogana uramintiye. Piya, Isu Karaisitipa otaogana, aeba pi nkawagaenawape tagantanawape aboraramintiye.

¹⁸ Wasana kaꞌwaina Kotipa kampa agantine. Pipa kampaye. Koti ntagara, abawampa nkagora miyemiꞌna, ae abiwapa agantana, awaga kamanaꞌwapa uma aboraramintiye. Yoni mono wani paiꞌitanti ntagarama kamanane

¹⁹ Pigoya, Yerusaremi kumatasa Yuta kinaꞌmi kaꞌisa mono kiye kinape iyoꞌmaeyume kinape uwaitauguni, Yoniti wamagini: Kaeba kegawema, abigauguna, agowapa uwaimintiye.

²⁰ Aeba agowapa kampa kakanta aborama: Naeba Koti utaratantegiri agawa pe ntagara Karaisitiba kampaye, uwaimintiye.

²¹ Piya uwaimogini, igeba to kake atesumagini mayama abigantawe: Aya yagaragawe. Kaeba Iraiyakawo, yuguna: Naeba aeba kampaye, yogini: Kaeba agawa pompe poropete yagaragawo, yuguna, aeba toba: Kampaye, untiye.

²² Piya yogini, igeba to mayama abigantawe: Kaeba kegawe. Urataga, kanaompe kinati wama uwaimikena pune. Kaekakaba nanawe yenema, abigantawe.

²³ Piyama abigauguna maya uwaimintiye: Poropete Aisaya awaꞌena uma kaentipa, pipa naeti esegi piye. Pipa mayamawe: Pigoya, naeba awaga kamana ikena yagara, kaꞌme mpari mima kegaꞌe umagi, Waꞌegawamanta keꞌi arupu puma amuyena piyo, yuwe, untiye.

²⁴ Pigoya, Yoniti ampa irosanta kina igeba Parasi kinaꞌmi nkaruyenabisawe.

²⁵ Pigoya, pika to kake abigama maya untawe: Kaeba Karaisiti yagaraba kampaye. Iraiyaba kampaye. Pi utaratanta poropeteba kampaye, piya yempene. Pipa nanaraka wasanaba mono wanipa paiꞌitane, untawe.

²⁶ Piya yuguna, Yoniba maya uwaimintiye: Naeba wanitasa paiꞌitauwa, pigoya abakatipi ka aborama mintipa, tigeba aepa kampa aogima agabebe pewe.

²⁷ Pi aeba nakaꞌi kanaye. Agewapa asunagasima waintika, naeba mayamanaba agisa anapa kampa akubo agaikuwe, untiye.

²⁸ Pigoya, pintanaba Petani kumata Yontani waninkama maroteri aborantiye. Pigoya, pitaꞌi Yoniba mima wasanaba mono wanipa paiꞌitantiye. Yoniba Isu nkagowa uwaimintiye

²⁹ Pigoya, marogana Isuba Yoniti kanaogana, agate wasana maya uwaimintiye: Agaiyo. Maropa Koti sipisipi awaro kanaye. Aeba aꞌyaꞌma kinaꞌmi nkaguntaenare maema asuꞌa puragaikibi ntagarawe.

³⁰ Pigoya, pi aeka maya urimintone: Nakaꞌi ampa aborami ntagara maru mintantine. Aeba pabiyama asu nagasima mintiyema, piya urimintone.

³¹ Naenepa paipa aepa kampa agabebe puntone. Isureyo kina tige ae awaga kamana urimekiri agowapa abintigi, ampa irosaꞌma wanitasa paititauwe, untiye.

³² Piya untana, Yoniba aeka to maya untiye: Aota Awamusaꞌama mantarisa atate, pupunta kanta purite aeti tumpintoga agantone.

³³ Pigoya, naenepa paipa kampa agabebe puntuwagana, wani paiꞌitao unatantiꞌna maya unamintiye: Awamusa aꞌnota tumpintakana agakibempe ntagara, aeba wasana Aota Awamusatasa paiꞌitakiyema, unamintiye.

³⁴ Pigoya, naeba pi agantoka agowapa abima, aeba Koti ntagarawe, untone. Isuba tarawatarawaki abagi kina iba puntiye

³⁵ Pigoya marogana, Yonibe abagi yagarawa tarabe pabi mpara asimagini mintantawe.

³⁶ Mintuguna, Isuba pabitaꞌi waogana Yoniba agate: Agaiyo. Koti sipisipi awaroba marompaye, untiye.

³⁷ Piya yoginisi, isigeba abite Isu aegaꞌma akaꞌi wantase.

³⁸ Akaꞌi wausuguna, Isuba aꞌwae pumagina isigate, maya untiye: Tisigeba nanaga aguyosagakena kanasema, isibigaoginisi isigeba maya untase: Arabai, kaeba aenkauꞌi mintane, untase. Pi Arabaiwe untame kamana tae kamanapisa Tisawe yune.

³⁹ Piya yusuguna: Kanama ampa agaiso, untiye. Piya yoginisi, isigeba aege wamaginisi minti ntamanka agausuguna, ago atamaisaoginisi pi ntagaba pabi miyometa mintantase.

⁴⁰ Pigoya, Yoni kamana abima Isu nkaegarantame, kapa agewapa Enturu, aeba Saimoni Pita nkaꞌnanto,

⁴¹ aeba marupa agantowampa Saimoni abatama maya omintiye: Tasigeba Mesaya yagara abatause, omintiye. Pigoya, Mesayawe unta kamana tae kamanapisa Utaratanta yagara Karaisitiwe yune.

⁴² Piya omima, Enturuba ababute Isuti wantiye. Piya pogana, Isuba agate maya untiye: Kaeba Saimoni, Yoni ntagaragawe. Kae kageba Sipawe ugamuwe, untiye. Pi kana agiba aꞌwae puma Pitawe, pipa yabane, yune. Isuba Piripike Nataniyerike isiba puntiye

⁴³ Pigoya marogana, Isu aeba Karariya mari wakena aseyo puntana, Piripi abatama: Kaeba naegaraoma, omintiye.

⁴⁴ Pigoya, Piripi aeba Petisaita kumatasawe. Enturube Pitabe isigeba pabi kumatasawe.

⁴⁵ Pigoya, Piripiba Nataniyeri abatama maya omintiye: Mono isapi utaratanta yagaraka meto kamanapa Mosese ago kamana kaemaraogini, poropete kinaꞌmi kaemaranta, aepa abataune. Aeba Yosepe ntagara Isu, Nasareti kumatasawe, untiye.

⁴⁶ Piya yogana, Nataniyeriba mayama aꞌwae pomintiye: Nasareti kumatasaba ayabaya puma aogiyenaba aborakiye, yogana: Kanama ampa agao, Piripiba piya omintiye.

⁴⁷ Pigoya, Nataniyeriba Isuti wama uma irosaogana, agantana aeka maya untiye: Agaiyo. Taga Isureyo yagarawe. Antabaipintiba kumpariyenawapa kampa waintiye, untiye.

⁴⁸ Piya yogana, Nataniyeriba: Kaeba aeta mintuwagana nagantampene, untiye. Piya yogana, Isu maya aꞌwae pomintiye: Piripiba kampa kagegaꞌe untegina, piki ya agobi mintaka kagaone, untiye.

⁴⁹ Piya yogana, Nataniyeriba abima to maya omintiye: Tisa, kaeba taga Koti ntagara, Isureyo kinaꞌmi Nkwaꞌegarekawe, untiye.

⁵⁰ Piya yogana, Isuba maya untiye: Piki ya agobi mintaka pi uma aboragamogana, abimagina naegarampepa abeno. Agama abempepa pipa agasawane. Pigoya, to tabenawapa agama abikibene, untiye.

⁵¹ Piya untana to maya untiye: Naeba tagaka urimukuwa, abiyo. Aintiba mantaba aꞌwaiyekana, Koti nkenisore kinaꞌmiba Wasanama Ntagara naeti ite tumite pigiri igakibewe, Isu piya untiye.

2

²

¹ Pigoya kakaga yaga aꞌya puwaogana, Kena kumata Karariya mari waya ibaꞌena pikena nanintaena puma aki puntawe. Aibuntini, Isupe anowampape abagi kinaꞌwape kaga igegaꞌe yuguni ampa irosantawe.

³ Piyama aꞌyaꞌma kinaꞌmi aki puma nantini, wainiba nauguna tagankaogana, Isu nkanowampa: Wainiwaipa aꞌya wayema, omintiye.

⁴ Piyama omogana Isuba maya omintiye: Ma nkwae, nanaga naepa unamene. Naekana aborakena yagaba ibaba kampaye, untiye.

⁵ Piya yogana, kana anowampaba kayokaya kinapa: Kaꞌenaga urimekiripa piyo, uwaimintiye.

⁶ Pigoya, pi ntamapipa wani kankabeba tonaentisa kaꞌumaema yaba kankabeba waintantiye. Piya, Yuta kinaꞌmiba monoka napimagini iyapa wani nkaema miyumekana, pi ntamapintiba waintantiye. Pi kana kankabeba uwaenantoba kampaye. Abaenarakaꞌyane.

⁷ Pigoya, Isuba kayokaya kinapa maya uwaimintiye: Tigeba wani iruꞌma pi kankabebi tigiyo, yogini, igeba abite wanipa iruꞌma kankabebi tiguguna awaitawaentiye.

⁸ Piya puguna maya uwaimintiye: Tigeba ibaba kaꞌisaba ariꞌurite nanintara kabiyome ntagaramati waiyo, untiye. Piya yogini igeba irurite wauguna,

⁹ kana wainiba pi ntanintara kabiyome ntagara aeba nabigategina, aetasabaya irurite kanawemaba kampa napintiye. Piya pogini, kayokaya kina wani iruꞌma tabe kankabebi tiginta kina, igemana wainiwama nkagoba abibebe puntawe. Pigoya, kana nanintara kabiyome ntagara aeba kana waya iba kasamume ntagarapa kegaꞌe uma,

¹⁰ maya omintiye: Maru iga wainiba imegini, namagini igaꞌe pagasigina ainti kampa aogi wainiba imisanawe. Kaeba ayagabaya iga wainiba kakatakana waintegina ainti imene, untiye.

¹¹ Pigoya, Isu aeba Kena kumata Karariya mari awameꞌena pikena esegiyenaba agobima aboraogana, eꞌwasaenawapa aborantiye. Aibogini, abagi kinaꞌwampiba pintana agategini, aepa aegaꞌmagini imatiti puntawe.

¹² Pigoya, pintanaba aꞌya puwaogana, Isuba pi kumatisaba Kapaniyamu kumati tumogini, anobe aꞌnatabarabe abagi kinaꞌwape aege kaga tumiwaentawe. Pigoya, pitapa uwaena yaganto mintantawe. Ikantana pume kinapa Isu igarubantiye

¹³ Pigoya, Yuta kinaꞌmi Pasoba iꞌmuntanawai agarosaogana, Isuba Yerusaremi kumati ima mintantiye.

¹⁴ Aibuntana, tabe mono namankama nkantabaipintiba asu agaomepa, kaꞌisa kinaꞌmi purumakape sipisipibe kabarape maete wama ikantana puguni, to kaꞌisa kinaꞌmiba mone antota ankami ankami puma mintantawe.

¹⁵ Piya puguna Isuba igategina, igaꞌna maema kibaruꞌmagina, aꞌyaꞌma wasanabe sipisipibe purumakape iyeguma igarubaogini, pi ntamapisa iyegaka wauguna, kana mone yabaeba apasanaꞌma monewaipa asunukaentiye.

¹⁶ Piya puntana, kabara ikantana pume kinapa maya uwaimintiye: Mantanaba maete waiyo. Aꞌyugu piya peganaba, nabanempa ntamankamaba ikantana namantana piye, untiye.

¹⁷ Isu piya pogini, abagi kinaꞌwampiba mono isapi kamana awaꞌena waintanti, pika napintawe: Kae namataka nantabaipintiba yaku nkabusa iye, piya kamanaka napintawe.

¹⁸ Pigoya, Yuta kinaꞌmiba abigama maya untawe: Kaeba piya pempeka, esegiyenagampa nkagoba aborama awameꞌena kapa tayakega agano, untawe.

¹⁹ Piya yuguna, iwamuta uꞌmagina maya uwaimintiye: Tigeba ma tabe mono nama akasabaigipa naeba kakaga yaga aꞌya peka, to kake kima aꞌya pukuwe, piya untiye.

²⁰ Piya yogini, pi Yuta kinaꞌmi maya untawe: Anasa kinatempiba kaboba 46 kima aꞌya puntawe. Pigo kaeba kakaga yaga kimagina aꞌya pikenaga yeno, untawe.

²¹ Pigoya, Isu mono namankamaka untipa, pipa aeꞌwa nkauꞌamaka meto kamana untiye.

²² Pigoya, ainti purintapisa asiyogini, abagi kinaꞌmiba pi kamanaꞌwapa to ka napimagini, pipa mono isapisa, ae unti kamana, abugunaba tagantana puwaentiye. Isu aeba aꞌyaꞌma kinaꞌmi nkagowaipa igawaentiye

²³ Pigoya, Isu aeba Pasoba nakena yagaba Yerusaremi kumata mimagina, awameꞌena pogini, uwoma kinaꞌmiba agategini ae ageraka imatiti puntawe.

²⁴ Piya puguna, Isu aeba wasanaba igabebe puwaentika, ige iyapipa aeꞌwantanaba kampa atantiye.

²⁵ Pigoya, aeba aꞌyaꞌma wasanami nkago abikenaba wasanapa kampa ibigantiye. Uwaba aewa wasanami nkintabaipintiba igabebemagina agawaentiye.

3

¹ Pigoya, Parasi yagara ka mintantiye. Agewapa Nikotimasi, aeba Yuta kiye yagara mintantiye.

² Pi ntagara aeba aseka Isuti wama maya omintiye: Tisa, taeba agogapa abune. Kaeba Kotitisa taga tisa yagara aborantane. Piya, wasana kaꞌwaina Kotiba antabaipi kampa mintegina, awameꞌena pempesapa kampa piye, untiye.

³ Piya yogana, Isu maya omintiye: Naeba tagaka ugamukuwa, abo. Kaꞌwaina aeba to kake kampa yakari potakanaba, aeba Koti kabiratakenaenaba kampa asu agakiye, untiye.

⁴ Piya yogana, Nikotimasiba to maya omintiye: Kaꞌwaina aeba ago anasa puwantiꞌnaba, ayamagina kasapa aborakiye. Ayamagina anowampa nkantabaipintiba uma pasekanaba to kake yakari potakiye, untiye.

⁵ Piya yogana Isu maya omintiye: Tagaka ugamukuwa, abo. Kaꞌwaina aeba wanitasabe Awamusatasabe kasaꞌena kampa aborantiꞌnaba, Koti kabiratakenaenabipa kampa asu mikiye.

⁶ Piya, wasanama agaꞌe puma yakari potaipa, pipa wasana aogane. Aota Awamusaꞌama yakari potaipa, pipa Awamusaꞌama nkaogane.

⁷ Tigeba yakari pikenaena kasa aboraiyoma, yopa, kaeba abimaginapa kuntaba a-po.

⁸ Pigoya, pontaba aeꞌwantanaba piye. Aetasabaya kanate wate piye. Pipa kampa abintane. Agasankapa abepa, pipa pontawe yewe. Piya yemisa puma, kaꞌwaina aeba Awamusaꞌama yakari potantiꞌna, agowapa pabiyama agawe, untiye.

⁹ Piya yogana, Nikotimasiba maya omintiye: Pipa ayamagina piyaba pikiye, untiye.

¹⁰ Piya yogana, Isu mayama aꞌwae pomintiye: We, kaeba Isureyo tisa yagara mimagina, pipa kampa aogima abeno.

¹¹ Naeba tagaka ugamukuwa, abo. Taeba agama abompentanaba aborama urimokiripa, pipa tigeba kamanatepa aꞌa-o yewe.

¹² Pigoya, naeba mabisaenaga urimogiripa kampa napiyewa, pipa mantari kakama waintintanaga urimekiripa, ayama abimagiri napikibewe.

¹³ Pigoya, wasana mantariba kampa ima uwa asu agaye. Kampaye. Wasanama Ntagara nae kaꞌanto mantara mintantotisa tumpa pika urimuwe.

¹⁴ Pigoya, Moseseba paipa kaꞌme mpari kuyapa yara itagintisa puma, Wasanama Ntagara naepa yara ita natakibewe.

¹⁵ Piya pigina, naeti imatiti pikibeꞌnagiba miyabaꞌena aboramagini mikibewe, piya untiye.

¹⁶ Pigoya, Koti aeba aꞌyaꞌma kinaꞌmikaba tabera abugaogana, yagarawapa kaꞌantowa mintogana, aepa taeti otantiye. Aepa aegaꞌma imatiti pikibeꞌnagiba ataenabipa kampa tumpintini, eꞌwasa maema miyaba mikibewe.

¹⁷ Piya, Kotiba yagarawapa mabisa kinapa kamana uma uratanemaba kampaye. Wasana iꞌima iba piyoma otaogana tumintiye.

¹⁸ Pigoya, kaꞌwaina aeba aegaꞌma amatiti pikibiꞌnaba, aguntaenama nkantotaꞌenaba kampa maekiye. To kaꞌwaina kampa aegaꞌma amatiti pikibiꞌnaba aguntaenama nkantotaꞌenawapa waitakiye. Piya, Koti Ntagara kaꞌantowa nkagegaba kampa napima amatiti pikibika aguntaenawapa waitakiye.

¹⁹ Pigoya, pi antotaꞌenama nkagowapa mayamawe: Mabi eꞌwasaena maete tumintogini, mabisa kinaꞌmiba tununtanaga ibugantana, eꞌwasaenagaba kampa ibiye. Pigoya, pipa nanagawanane. Ataenawai waintika piya puntawe.

²⁰ Pigoya, aꞌyaꞌma kamparagaena pe kinaꞌmiba pipa eꞌwasaenama kama potawe. Igeba kamparagaenawai aborasanagaba kampa ibegini, eꞌwasaenariba kampa kanawe.

²¹ Piya, kaꞌwaina tagantana piꞌnaba, aeba eꞌwasaenabi uma aboraye. Aeba yogawapa Koti nkesegiyenara puntika, uma aboramegini aogima agawe. Yoniba Isu nkago aborama uwaimintiye

²² Pigoya, Isuba kamana uma aꞌya atate, abagi kinaꞌwa ibabogini, Yuta mari ka auꞌi wama umintantawe. Pitaꞌi umimagina, Isuba mono wanipa paiꞌitantiye.

²³ Pigoya, Yoni aeba Inoni kumata mima, Serimi agora mima, pabiyama wani paiꞌitantiye. Piya, pitapa wanipa tabe waintogini, pitaꞌi wasanaba ampa irosauguna mono wani paiꞌitantiye.

²⁴ Pi ntagaba Yonipa igaꞌna namapipa kampa aba potantawe. Pipa asawe.

²⁵ Pigoya, Yuta yagara kaꞌwainage Yoni nkabagi kinaꞌwampige wani pasikenaenaga kamana umagini akayuntawe.

²⁶ Piya pumagini, igeba Yoniti wamagini maya omintawe: Tisa, kaeba Yontani wani maroteri mintukuna, ka yagara ampa irosaogana, agowapa aboramagina uramintampepa, aeba ma kanabipa pabiyamagina wasana mono wani paiꞌitagini aeti wawaeyewe, untawe.

²⁷ Piya yuguna, Yoniba maya uwaimintiye: Kaꞌwaina Kotiba ka yugawaka kampa otakanaba, aewapa kampa uwaba maekiye.

²⁸ Naeba Koti utaratanta yagara Karaisitiba kampaye. Naeba ae awaga kamana uma aborakena yagara Kotiba unatantegi, paitama kanantone. Piyama urimuwagiri tigeri abintawe.

²⁹ Piya, ibaꞌwaeꞌma nkawaewampa aewa maeyagina, aoꞌyagaramaba aoꞌmaemagina aeka aꞌmu potaye. Piya, aoꞌyagaramaba aꞌmu potaisa puma, aneba naꞌmu potauwe, Isuka piya untiye.

³⁰ Piya, ae agewamaba anosama tabe pekana, nae nagewamaba tumikiye, Yoni piya untiye.

³¹ Pigoya, inatisa tumintiꞌnaba asuragasiwaeye. Mabisa aborantiꞌnaba mabisaena puntana, mabisaenaga iye. Piya, mantarisa tumintiꞌnaba pipa asuragasiwaeye.

³² Pi ntagarawama aꞌyaꞌwaemaena agama abinti, pi awaga kamana yeginiba, wasanamiba iyekita puma kamanaꞌwapa aꞌa-o yewe.

³³ Pigoya, wasanama pi kamanapa abemiꞌnaba, Kotiba taga semi ntagaraga: Owe, iye.

³⁴ Piya, Koti otamiꞌnaba, aeba Koti kamanaꞌamana siye. Piya yagaraba aepa Kotiba Awamusapa atunkapa kampa amikana uwa amiyaba miye.

³⁵ Piya, abawampaba pi yagarawakaba abugagina, aꞌyaꞌwaemaenaba ae ayapi atawaentiye.

³⁶ Pika kaꞌwaina aeba Koti ntagarawapa aegaꞌma amatitiꞌena pemiꞌna, aepa miyabaꞌenaba ago aboramiye. Piya, to kaꞌwaina aeba Koti ntagarawampa kamana kampa wasiyemiꞌnaba, miyabaꞌenaba kampa aboramekana, Koti nkamoꞌenawapa aeti waiyaba mikiye.

4

¹ Pigoya, Parasi kina igeba Isuka mayama abintawe: Aeba abagi kina uwoma ibabumagina wani paiꞌitamagina Yonipa asugasayema, abuguna Isu abintiye.

² Piya, Isu aewapa kampa wanipa paiꞌitantiye, abagi kinaꞌwampika yogini paiꞌitantawe.

³ Piya, Isuba Parasi kinaꞌmi pi kamana abuguna abitegina, aeba Yutiya maba atate Karariya mari aꞌwae puma to kakema wantiye.

⁴ Wamagina, pi kiꞌi aegaꞌurite wama Sameriya maba akata wantiye.

⁵ Pitaꞌi wamagina Sameriya kumapa ka, agewapa Saika, pitaꞌi uma irosantiye. Pi kumapa Yekobu yagarawa Yosepe aminti mpawama nkagora waintantiye.

⁶ Pabita Yekobunta wani kaba waiyogana Isu aeba kagi abebe uma irosaꞌma, ayampu kampa pogana wani ka awara maraꞌmimagina migarantiye.

⁷ Mintogana, pi kumatasa wae kaꞌwaina wani itikena ampa irosantiye. Irosaogana Isuba: Kaeba wanipa namega nano, omintiye.

⁸ Piya, abagi kinaꞌwapa igeba naninta ika pikena kumati igasuguna, Isuba abintowa mintana kana waepa wanikaba omintiye.

⁹ Omogana, kana Sameriya wae aeba maya untiye: Kaeba Yuta yagaramagaba nanaga Sameriya waeꞌmantekaba wanikaba nabigane, untiye. Piya, Yuta kinape Sameriya kinape atokaema kampa miyumekana kana wae aeba piya untiye.

¹⁰ Piya yogana Isuba maya omintiye: We, kaeba Koti kaoꞌenama nkagobe pi wanika ugamo nkagonepe kaga kampa aogima abempesinta esunataka eꞌwasa maekena wanipa kamosine, untiye.

¹¹ Piya yogana, kana waeꞌma maya omintiye: Tabe yagara, wani kaba pipa eꞌerona, kaeba wani itikenaenagapa kampa waintiye, kaeba eꞌwasa maekena wanika yempepa aetasa itikibene.

¹² Tayabama Yekobu ae ma nkwani kaba kuꞌmagina, aewape yagara purumakawampibe igeba to wanitasa wanane. Pabi matasa namagini mintantane. We, kaeba ayamagina Yekobupa agasimagina wanipa kapa maema aborakibene, untiye.

¹³ Piya yogana Isuba maya omintiye: Piya, ma nkwanipa kampa agora tigaꞌe pakena wanikiri aꞌyaꞌma yagaba nayabaꞌmiyewe.

¹⁴ Pi nae wanipa kaꞌwaina amekana aeba pi nakibipa, aepa wanikaba to kakema kampa abekana uwa miyabaꞌmikiye. Naeba pi nkwani amekana agupi wani nkaru aboramekana miyabaꞌmikiye, untiye.

¹⁵ Piya yogana, kana waeꞌma maya untiye: Tabe yagara, kaeba pi kana wanipa namegana to kakema wanikaba kampa nabeka, mataꞌi asi nasi kanamagi itiyabaꞌmiyopa kasano, untiye.

¹⁶ Piya yogana Isuba maya omintiye: Kaeba wamagina kawaegampa ababute kanaiso, untiye.

¹⁷ Piya yogana, kana wae aeba: Naeba nawaenempaba kampaye, untiye. Piya yogana Isu maya untiye: Kaeba kawaegampaba kampaye, pipa kanara sene.

¹⁸ Kaeba waba nayakaꞌmu maegate itate puntampekana, pigo ma mintemi nkwaba pipa aeba kae kawaeba kampaye. Pika kaeba taga kamana yene, omintiye.

¹⁹ Piya omogana, kana wae aeba maya omintiye: Yabe yagarane, naeba ibanto ago abuwe. Kaeba poropete yagaragawe.

²⁰ Pika yega abeno: Tae tayabamagiba ma nkamuta Koti nkaobi aki puma kamanaꞌwa abeno, yegiri, piya Yuta kina tigeba: Kampaya, Yerusaremi kumata aki puma Koti kamanapa abiyo, yewe, untiye.

²¹ Piya yogana Isu maya untiye: Waya, naeba ugamukuwa, abo. Nabanempa aeba ma nkamutapa kampaye. Yerusaremi kumatapa kampaye. Uwa aꞌyaꞌma mari Koti nkawaga kamana ikena kana agarosakena piye.

²² Tigeba kampa abintiri kampa agantanama kamanapa yega, taeba pipa abibebe pumagi pune. Mono pipa Yuta kina taeti aboraye.

²³ Pigoya kana ka aborakiya, pipa mampa ago aboraye. Pitaꞌi taga mono kinaꞌmiba monota mima igu imawamaba naba nkawaga kamana taga sikibewe. Naba aeba piya mono kinaꞌmika abiye.

²⁴ Piya, Koti aeba amanine. Pika ae awaga kamana ikena monota mima tigu timarasaba tagaka yiyo, untiye.

²⁵ Piya yogana, kana wae aeba maya untiye: Naeba ago abuwa, utaratanta Mesaya aborakiye untapa, aboramagina kamana uma aogi puma arupu puramikiye, untiye. Piya, pi Mesayaba aeba Karaisitiwe.

²⁶ Piya yogana Isu aeba maya untiye: Kamana ugamopa, pipa naewe, omintiye.

²⁷ Pabigo piya yogini abagi kinaꞌwa ampa irosantawe. Ampa irosaꞌmagini kana waeꞌmage kamana yusumeka uwoma nkigi napintawe. Piya puntini, nana kamana nanaga omenema abigakena abumepa kunta pogini atantawe.

²⁸ Pigoya, kana wae aeba wani kankabewapa pabita atate kumati karuꞌena wamagina wasana maya uwaimintiye:

²⁹ Tigeba kanamagiri ka yagara agaiyo. Aeba aꞌyaꞌwaemaena punto, pi kamanapa aborama unamiwaeye. Aeba Karaisitibayawe, untiye.

³⁰ Pigoya, igeba pi kamana abite kumatisaba Isuti wawaentawe.

³¹ Pigoya, pi ntagaba abagi kinaꞌwampiba: Tisa, kaeba naninta nao, untawe.

³² Piya yuguna maya uwaimintiye: Naeba kaꞌisa naninta waintipa tigeba kampa abintawe, untiye.

³³ Piya yogini, abagi kinaꞌwa igewai mare-u me-u pumagini maya untawe: Ke kapa nanintaba maetegina menkaiye, untawe.

³⁴ Piya yuguna aeba maya untiye: Unatanti, ae awamu wasima yogawa puma aꞌya pikenaena piꞌna nanintanentana piye.

³⁵ Tigeripa mayawe yewe: Opa tarawa tarawaki to aꞌya puwakana mataꞌi nakenaba aborakiye, yewe. We, naeba urimekiri abiyo: Tigeba asagaꞌyuma tiyo maꞌma yoga agaiyo. Nakena aborakena kanapa mampa agarosaye.

³⁶ Naninta nakena yogarisa maema miyabaꞌenabi aki pikibiꞌnaba ikantana maekiye. Psya, aintana yoga puntiꞌnabe kana nakena maentiꞌnabe isigeba kaga isiꞌmu pikibese.

³⁷ Piya, ma kamanapa tagane: Kaꞌwaina aintana pegina to kaꞌwaina nakenaba maeye. Tara yaga isigeba ka yuga pese, pipa tagane.

³⁸ Naeba tige aintana kampa puntati nakena aki punataiyoma, uritauwe. Yoga pipa kaꞌisa kinaꞌmi pumarantagana aboranti, pipa tigeba uwa aꞌna puma maeyawe, Isu piya untiye.

³⁹ Pigoya, Sameriya wae aeba: Aꞌyaꞌwaemaena punto kamanapa pipa aboramagina unamiwaeye, unti kamanaka uwoma pi kumatasa kinaꞌmi abitegini, Isu aegarantawe.

⁴⁰ Pika Isuti ampa irosaꞌmagini igege miyenema esotantawe. Piya puguna, aeba owe uma tara yaga ige kumata mintantiye.

⁴¹ Piya puntana, mono uwaimogini to uwoma kinaꞌmi abibebe puma aegarantawe.

⁴² Piya puntini, kana waepa maya omintawe: Marupa kae yeka monoꞌwapa abune. Pigoya mapa taerepa agowapa agama abimagi maya yune: Aeba taga aꞌyaꞌma marisa kina tauꞌikena yagarawe, yune, untawe. Isu aeba kiya yagarama ntagaranto kaba atantiye

⁴³ Pigoya, Isu aeba igege tara yaga migaite Karariya mari wantiye.

⁴⁴ Wantana aewaka mayamagina abintiye: Koti unti kamana yemi poropete yagarama kaꞌwaina aeba aewa kuma agorapa ageba kampa waintiye, ute,

⁴⁵ pi mpaba atategina Karariya mari uma irosantiye. Piya, Karariya kinaꞌmiba kaga Yerusaremi kumati wama aota naninta nakena yagaba yoga pogini agantakini, aꞌwae pumagina uma irosaoginiba kayone potantawe.

⁴⁶ Pigoya, Kena kumata Karariya mari paipa yogana waninkama wainiyena punti, pitaꞌi to kake aꞌwae puma wantiye. Pi ntagaba Kapaniyamu kumata tabe yagara ka mintantiye. Pi ae yagara tabe inuntana abogana mintantiye.

⁴⁷ Pigoya, Isu aeba Yutiya maba atate aꞌwae puma Karariya mari to kake ampa irosaye, piya yuguna abite tabe yagara aeba Kena kumati Isuti wama yagarawa purikena pogana ampa kaba atanema, uma ababute kanakenaga omintiye.

⁴⁸ Omogana, Isuba maya omintiye: Tigeba awameꞌenabe kasaꞌenabe agantiri kamanaꞌnepa abima naegarasanaga napiyewe, untiye.

⁴⁹ Piya yogana, kana yagara aeba: Waꞌega yagarane purisanagawa, karuꞌena tumo, untiye.

⁵⁰ Piya yogana, Isuba maya omintiye: Kaeba uwa tumo. Yagaragapa ago kabariye, omintiye. Piya omogana kana yagara aeba Isu kamana abibebe puritegina aꞌwae puma tumintiye.

⁵¹ Tumogini kayokaya kinaꞌwa keꞌi kanamagini igeba: Yagaragapa ago kabaꞌma mintiye, omintawe.

⁵² Piya yuguna, kabarome kanaka ibigaogini maya untawe: Aiba papa kagi abebe pogana pi kanabi yoninkapa atawaye, untawe.

⁵³ Piya yuguna, kana yagara aeba agowapa mayama napintiye: Aiba pi kanabi Waꞌega aeba Yagaragapa ago kabariyeba unatama utamine, untiye. Piya yogini aewape aokinape Isuti aegaꞌma imatiti puntawe.

⁵⁴ Piya puguna Isu aeba Yutiya marisa Karariya mari aꞌwae pumagina wama Kena kumata umima awameꞌena puntita to kake uma pogana tara puntiye.

5

¹ Pigoya, Yuta kinaꞌmi aota naninta nakena yaga ka aboraogana, Isu aeba Yerusaremi kumati wamagina intiye.

² Piya, Yerusaremi kuma agora sipisipiwama kabera kotupa ka waintantiye. Agewapa Yuta kinaꞌmi kamanapisa: Petesitawe, yewe. Pi awamoriba ka kampa punta nama nayakaꞌmu kimaranta waintantiye.

³ Pi ntamapipa yoni kinape iyorika kinape igisa ataena punta kinape migugu kinape uwoma waintawe.

⁴ (Piya puguna kaꞌisa yagaba Waꞌegawamatisa enisore kaꞌwaina kana kotupinti tumima airapa pogana kana waninkamaba aigaꞌyoꞌya pogini agate, kaꞌwaina karuꞌena paitama tumpa pasomenapa yonintanawapa atawa puntiye.)

⁵ Pigoya, pitaꞌi ka yagara nankitama miyogana kaboba 38 aꞌya puwantiye.

⁶ Aibogana, Isu aeba uma agaomepa: Kana yagaraba eꞌero kanabi waita miyabaꞌmiye, yuguna abitegina, abigama: Kaeba kabarisanaga kabiyoma, abigantiye.

⁷ Piyama abigaogana, kana yoni ntagarama maya untiye: Waꞌega, waninkama aigaꞌyoꞌya peginaba, ke naba pumagina mo nataka tumusuwe. Uwa naene uware ampa ware putagi, waogana pabigo kaꞌisa kina unagasima kotupintiba tumewe, untiye.

⁸ Piya yogana, Isuba maya omintiye: Kaeba asimagina wasagapa maerite wao, untiye.

⁹ Piya yogana, pabigo auꞌamaba aogi pogana asimagina wasaꞌwapa aesagabite wantiye. Aibogini, pi ntagaba Yuta kinaꞌmiba sabatira aogi potantawe.

¹⁰ Piya, aogi potaogini pi Yuta kinaꞌmi kana yoni ntagara maya omintawe: Ibaba sabati akuninta yagawa, wasagapa a-mpaete wao, untawe.

¹¹ Piya yuguna maya uwaimintiye: Kabaꞌma aogi punatai ntagarama: Wasagapa aesagabite wao, unamima nagarubaye, untiye.

¹² Piya yogini, igeba: Wasagapa aesagabite wao yemi ntagara, agewapa kewema, abigama untawe.

¹³ Piya yuguna, kana kabarome ntagaramaba kampa napintiye. Isu aeba aꞌyaꞌma uwoma kinaꞌmi nkibakapinti aigigipaꞌma wagasogana, kampa aekaba napintiye.

¹⁴ Pigoya, ainti Isuba tabe mono namapinti kana yagaraba abatamagina maya omintiye: Kaeba kaukapa aogi puwaya, pi to kake aguntaenaba a-po. Pegana tabe kuntuyena aboragamisanaga pasemagina miyo, omintiye.

¹⁵ Pigo kana yagara aeba Isupa agabebe potate wama Yuta kina maya uwaimintiye: Kaba natami ntagara agewapa Isuwe, uwaimintiye.

¹⁶ Pigoya, Isu aeba sabatira piya yuga puntitaka Yuta kinaꞌmiba igobi pumagini kama potantawe.

¹⁷ Piya puguna, Isuba maya uwaimintiye: Nabanempaba yogaba aꞌyaꞌma yagaba asi nasimagina piye. Piya, naeba pabiyamagi puwe, untiye.

¹⁸ Pigoya, Isu aeba sabatiwai mpaema aꞌyugu puntana, Kotiti meto pumagina: Aeba nabanempawe, yomeka Yuta kinaꞌmiba abima kamparaga potamagini aegukena untawe. Isu aeba tabage pumagina antota kamana uma aꞌya tatakiye

¹⁹ Pigoya, Isuba maya kamana uwaimintiye: Naeba tagaka urimukuwa abiyo: Naeba yagarawa naene naumabisaba aꞌyaꞌwaemaenaba kampa puwe. Nabanempa pegi yagarawampa naba agamagi ae pemisa pumagi puwe.

²⁰ Naba aeba yagarawampanteka abugagina aꞌyaꞌwaemaena pemintanaba nayakiwaeye. Piya, ibanto tabe yuga nayakeka pekiri, tigeba agama uwoma tigi napikibewe.

²¹ Naba aeba purinta kina ibage pumagina iyogawaitama miyabaꞌena imika, yagarawa naene napima wasana miyabaꞌena imuwe.

²² Pigoya, naba aeba wasana antota kamanapa kampa uwaitaye. Pi ntugaba yagarawa nae unatantikini,

²³ wasanamiba nabanempa nkage maema asagayuyesa pumagini pabiyama yagarawa nae nageba maemagini asagayukibewe. Piya, kaꞌwaina yagarawa nae nage maemagina kampa asagayukibiꞌnaba aeba naba unatantiꞌna pabiyama age kampa asagayukiye.

²⁴ Naeba tagaka urimukuwa abiyo: Kaꞌwaina nae kamana wasintana, unatantiꞌnaka amatiti pikibi ntagara, aepa miyabaꞌena aboramekana kaintanama nkantotapa kampa maekiye. Piya yagaramaba purintaꞌenabisa aogamagina miyabaꞌena ago maema amiye.

²⁵ Naeba tagaka urimukuwa abiyo: Kanapa ka aborakiye. Pipa ibaba ago aboraye. Pi ntaga purinta kinapa Koti ntagara nae kamana abe kina iyogama asima miyabaꞌmikibewe.

²⁶ Naba aeba miyabaꞌenama nkago aiꞌnewane. Piya, yagarawa naepa pabiyama miyabaꞌenama nkago aiꞌnewa unatantiye.

²⁷ Pigoya, Wasanama Ntagara mintoka, wasana antota kamana uwaitaoma unatantiye.

²⁸ Pi kamana abiginaba kuntaba a-piyo. Kanapa ka atantipa waintiya, pi aborakiniba wasana irubinti waitamiye kinapa nae kigaꞌe abitegini irosaꞌma ikibewe.

²⁹ Piya puntini, aogima mintanta kinaꞌmiba miyabaꞌmikena iyogakibewe. Piya, kamparagama mintanta kinaꞌmiba kaintanama nkantotaꞌena maekena iyogamagini asikibewe, Isu piya untiye. Kotiba yagarawampa nkagoba maema aborantiye

³⁰ Piya untana Isu to maya untiye: Naeꞌne ntaumabisa yoga pikenaenaba kampa waintiye. Nabanempa nkawamuta antota kamanapa uma aꞌya itauwe. Piya pumagi, antota yuga pekana ka awameta pikiye. Pipa naeꞌne kamanapa kampaye. Unatantiꞌna ae kamana wasimagi tagaka uritauwe.

³¹ Piya, nae nabine agone umagi aborakanaba kampa aogi pikiye.

³² Nabanempa pi agonepa uma aborakiye. Piya, naeba abima pipa tagane. Aeba agonepa uma aborakini auꞌwapa agakibewe.

³³ Tigeba Yoni abigauguna agonepa tagaka aborama urimintiye.

³⁴ Pigoya, wasanami agone uma aboraiyemaba pipa kampa yuwe. Ma kamana yopa abimagiri, miyaba kita aema miyigina Kotiba tibabenoma, yuwe.

³⁵ Pi Yoni aeba kane kanta pumagina wasana eꞌwasa puwaitantiye. Pigoya, tintabaipintiba tiꞌmuntanaba uwaenantora ae eꞌwasaenagaba puntawe.

³⁶ Pigoya, nae ago uma aborami, aeba Yoni piyamaba kampaye. Aeba to awametane. Naba yogara unatanti, pi ntugawama nkauꞌwa maema aboraoma, nabanempaba unatantegi tuminto, pi ntuga pogana unatanti agonepa aboraye.

³⁷ Piya, naba unatantiꞌna pi aewa agonepa uma aborantiye. Tigeba pi aeꞌwa nkawamupisa kamanapa kampa abintiri, aowarapa kampa agantiri,

³⁸ unatantiꞌnante kamana aꞌa-o umagiri, kamanaꞌwapa tigeba tigutapa kampa atagana waiye.

³⁹ Piya, tigeba mono esapa aisumagiri: Miyabaꞌena aboraramikenaga iyema, yewe. Pigoya pi paisa monoꞌamaba taga nae agoba uma aboraye.

⁴⁰ Piya, tigeba naeti kanama miyabaꞌena maeyiyoma, yogiripa uwa aꞌa-o yewe, Isu piya untiye.

⁴¹ Piya, naeba wasanami iꞌmuntana punataiyemaba kampa yuwe.

⁴² Tige agoba pipa taga abuwe. Tiguꞌamaba Kotiti abemintanaba kampa waiye.

⁴³ Naeba nabanempa nkawamuta tigetiba tumintogiripa, pipa tigeba uwa kayoneba kampa punatawe. Pigoya, ainti to kinaꞌmi nkigeꞌwai imabisa tigeti ampa irosaigiripa, pi kina igepa kayone puwaitakibewe.

⁴⁴ Tigeba tiꞌamaka tiꞌmu puma tabera maete iye kinaꞌmitaba, ayama monotapa mikibewe. Pipa kampaye. Pigoya, Koti abiwa mpima aꞌyaꞌwaemaenama tabe aeti aꞌmuntana waintikaba pipa aeta tibiye, a. Pipa kampaye.

⁴⁵ Tigeba naekaba: Aeba abawampati kamana uratakiyeba, a-siyo. Pipa kampaye. Tigeba taoꞌmaekiyema napinta ntagara Mosese, ae kamanapa uritakiye.

⁴⁶ Mosese kamana kaentipa pipa naeka kaemarantine. Pigoya, tigeba ae kamana aogima abibebe pesinta, naekaba kaga abibebe pesine.

⁴⁷ Piya, Mosese kamana awaꞌena tigeba: Aꞌa-o untiri, nae kamanapa ayama abibebe pikibewe, Isu piya untiye.

6

¹ Isuba kamanapa uma aꞌya atate, Karariya kotupa to ka agewapa Taibiriyasi taꞌema maroteri wamagina,

³

² abagi kinaꞌwa iba purite wama amuti imagini mintantawe. Asu mintuguni uwoma kina yonintana kaba itaogini agantaka, aegaꞌmagini wantawe.

⁴ Pigoya, pi ntagaba Yuta kinaꞌmi Pasoba naninta nakena yagaba agarosantiye.

⁵ Pigoya, Isuba ao maꞌma igaomepa pi wasana uwoma kina ampa irosauguna igate, Piripi mayama abigama untiye: Nanintaba aetasa ika pumagi pi kinapa imekana kanara sakiye, untiye.

⁶ Aeba kaꞌena pikenaga napimagina uwa amiyo kamana untiye.

⁷ Piya yogana Piripiba maya untiye: Taeba 200 torarasa naninta ika pumagi imekanaba kampa kanarasawaetakiye, untiye.

⁸ Piya yogana, Saimoni Pita nkaꞌnanto Enturu aeba maya untiye:

⁹ Mataꞌi ka yagarama aeba paretintoba nayakaꞌmuna, inoyantaba tarawa sumagina urintiya, pipa ma uwoma kinaꞌmiba ayama kanarasawaetakiye, untiye.

¹⁰ Piya yuguna Isuba maya untiye: Tigeba wasana uwaitaigini aki pumagini maraꞌmiyiyo, untiye. Yogini, uwaimuguni, kabu aebaruꞌmagini 5,000 waba maraꞌya puma mintantawe.

¹¹ Maraꞌmintuguna, Isuba kana pareti maemagina Kotiti aꞌmu potama abagi kina imogini wasana pako pumagini aꞌyaꞌma imintawe. Pigoya, inoyantaba pabiyama nakune igewai yume nkawameta imintiye.

¹² Namagini igaꞌe pauguna Isuba abagi kinaꞌwa maya uwaimintiye: Aritapa waima ataena pusanaga kitabiyo, untiye.

¹³ Piya yogini igeba waꞌnu kupa nagisarisa tara tumpaema ku kana naninta aritapa iraguguna awaitantiye.

¹⁴ Pigoya, wasanamiba pi awameꞌena puwaiyakomentana agategini maya untawe: Tabe poropete yagara mabi aborakiyema untapa, mampaye, untawe.

¹⁵ Piya ute, igeba Isu kobe pumagini iyatasa arakuꞌma tabe yagarawai asitakena puguna, igabebe potategina itate ae abiwa amuti intiye. Isu kotu nkabobori wantiye

¹⁶ Pigoya atamaisaogini abagi kina igeba kotu nkawamori tumimagini,

¹⁷ Kapaniyamu kumati aꞌwae pumagini wakenaraka wanipisa karebi intawe. Pigoya ago ase yogana, Isuba pabita mintogini ibiwai wantawe.

¹⁸ Aibuguna, esegi punta pumagina tabera wanipa aigaꞌyoꞌya pogini wantawe.

¹⁹ Piya, nayakaꞌmuno, tonaentisa kaꞌumaema kiromita pubasanauguna, Isuba wani nkaꞌeti aeta aeta wamagina kana wanipisa kare agora waogini agate pami puntawe.

²⁰ Piya puguna igegaꞌe umagina: Naene kanauwa, tiyekuruba a-piyo, untiye.

²¹ Piya yogini igeba iꞌmu pumagini, wanipisa karebi ababuguna iyogini wakena pume mpari agaro wantawe. Aꞌyaꞌma kinaꞌmi Isuka aguyosagantawe

²² Pigoya, marogini aꞌyaꞌma kina kotu mparoteri mimagini maya untawe: Ai asekapa wanipisa kareba kaꞌwaintoga agatompe, pipipa abagi kinaꞌwapa Isupa atategini ibiwai imagini watawe, untawe.

²³ Piya ute mintuguna, Taibiriyasi kumatisa wanipisa karebi kanama Waꞌegawama naninta aꞌmu potama imintita ae aguyosagata ampa irosantawe.

²⁴ Pigoya, pi kinaꞌmiba Isu aeꞌwakabe abagi kinaꞌwakabe iguyosakate wanipisa karebi ima Kapaniyamu kumati aꞌwae puma wama pitaꞌi uma aguyosagantawe. Mantarisa nanintawama kamanane

²⁵ Pigoya, Kotu ma nkaukaꞌi aguyosaꞌma abatamagini: Tisa, kaeba ayantaga kanampenema, abigantawe.

²⁶ Piyamagini abigauguna maya uwaimintiye: Naeba tagaka ukuwa, abiyo. Tigeba awameꞌena pogiri agakaba pipa kampaye. Naninta timogiri namagiri tigaꞌe paka, naguyosagawe.

²⁷ Tigeba yogapepa, abararakena nanintawama ntuga wanane. Miyaba nanintawama ntuga piyo. Nabanempa Koti aeba Wasanama Ntagara naepa tigeti unatantika yigipa miyaba nanintaba timukuwe, untiye.

²⁸ Piya yogini maya kamana aꞌwae pomintawe: Taeba ayamagi Koti ntugaba pusunema, abigauguna,

²⁹ maya uwaimintiye: Unatanti naeti timatiti puma naegaraigina, piꞌna Koti ntugarintanaba peno, untiye.

³⁰ Piya yogini maya kamana omintawe: Nana kukantana pega, agamagi kaegaꞌma tamatiti pugatakune. Nana aosoꞌenaba pikibene.

³¹ Piya, tayabamagiba kaꞌme mpari mana namagini mintantane. Pigoya pi kamana awaꞌenaba mayama waintiye: Mantabintisa naninta imogini namagini mintantawe, untawe.

³² Piya yuguna Isu maya uwaimintiye: Tagaka ukuwa abiyo. Moseseba mantarisa nanintaba kampa maema aborama imintiya, Koti imintiye. Piya, nabanempa mantarisa taga ntanintaba timiye.

³³ Piya, Kotitisa tumintiꞌna taga ntanintaba mabisa kinaꞌmiti mikenaenaba maema aboraye, untiye.

³⁴ Piya yogini: Waꞌega, kaeba yempe ntanintaba asi nasi pipa tamo, untawe.

³⁵ Piya yuguna Isu maya uwaimintiye: Eꞌwasa maekena nanintaba pipa naewe. Kaꞌwaina aeba naeti ampa atokaekibiꞌnaba, aepa nanintagaba agaꞌenaba kampa abukiye. Piya, kaꞌwaina aeba naeti amatiti pikibiꞌnaba wanikaba kampa abukiye.

³⁶ Piya, naeba ago urimone. Awameꞌena pogiripa agantiripa uwa kampa napimagiri aegarawe, ago yuwe.

³⁷ Pigoya, nabanempa namemi kina pi ige naetiba ampa irosakibewe. Pigoya, kaꞌwaina aeba naeti ampa irosakapa aepa kampa agaikuwe.

³⁸ Piya, mantarisa tumintopa pipa naeꞌne nawamupisa kamana wasikenaba kampaye. Unatantiꞌna nkawamupisa kamana wasimagi aegarakena tumintone.

³⁹ Piya, unatantiꞌna ae awamupisa kamanapa naeka mayamawe: Aeba naeti ibabuwaitanti kinaꞌmi aꞌyugu pusanaga kabiwaitamagi, ainti tabe kanabipa ibage pekini iyogakibewe, unatantiꞌna ae awamupisa kamanapa piyama waintiye.

⁴⁰ Pigoya kaꞌwaina aeba yagarawa nae nagama amatiti punatakibipa, aeba aꞌyaꞌma yagaba eꞌwasaenabi miyaba miyeka, ainti tabe kanabipa abage puma asitakuwe, nabanempa awamupisa kamanapa piyama waintegi wasiyuwe, untiye.

⁴¹ Pigoya Isu aeba: Mantarisa nanintaba naewe, yomeka, Yuta kinaꞌmiba abimagini ata potantawe.

⁴² Piya puntini maya untawe: Ma ntagaraba aeba Isu, Yosepe ntagarawe. Anoke abakeba pipa taeba isigaompene. Pipa nanaga: Naeba mantarisa tumintuweba, iye, untawe.

⁴³ Piya yuguna Isuba maya uwaimima untiye: Tigeba uwoma kamanapa a-mpare-u me-u puta nasiyo.

⁴⁴ Piya, wasana kaꞌwaina aeꞌwa nkaumarasa naeti ampa irosakenaenaba pipa kampa waintiye. Naba unatantina paibekana ampa irosakenaenaga waintiye. Pigoya naeba piya yagara aepa ainti tabe kanabipa abage puma asitakuwe.

⁴⁵ Pigoya, poropete kinaꞌmi kamana awaꞌenaba mayama waintiye: Koti aewa wasana mono uwaimikiye, untawe. Pika kaꞌwaina aepa nabanempa mono omima ayakekana abikibiꞌnaba, aeba naeti ampa irosakiye.

⁴⁶ Pigoya, wasanama nkaobisa nabapa kampa agantipa, mantarisa tuminto, nae kaꞌwainana nabapa agama mintantone.

⁴⁷ Naeba tagaka urimukuwa abiyo: Kaꞌwaina aeba naeka amatiti puma naegarakibiꞌnaba eꞌwasaena maema miyaba mikiye.

⁴⁸ Pigoya miyaba nanintaba pipa naewe.

⁴⁹ Tiyabamagiba kaꞌme mpari mana namagini kampa miyaba mintantane.

⁵⁰ Pigoya, mantarisa naninta namagini kampa purikenaenaba pipa mampa naeti waintiye.

⁵¹ Piya, miyaba naninta mantarisa tumintipa pipa naenene. Pika kaꞌwaina aeba naetisa naninta namaginaba asi nasi miyaba mikiye. Piya, nauꞌnempaba nanintarintana piye. Pipa mabisa kina tigeti miyaba mikena nauꞌnepa atakuwe, Isu piya untiye.

⁵² Piya yogini, Yuta kinaꞌmiba maka kamana umagini mare-u me-u puma maya untawe: Aeba ayamagina auꞌwapa tameka nakubompeka iye, untawe.

⁵³ Piya yuguna Isuba maya uwaimintiye: Naeba tagaka urimukuwa, abiyo. Tigeba Wasanama Ntagara nae nauke korake kampa nakibepa, pipa tigupipa miyaba mikenaenaba kampa aborakiye.

⁵⁴ Kaꞌwaina aeba nae nauke korake nakibiꞌnaba asi nasi miyaba mikiye. Piya peka naeba aepa ainti tabe kanabipa abage puma asitakuwe.

⁵⁵ Piya, nae naupa pipa taga ntanintawe. Piya, korantepa pipa taga wanine.

⁵⁶ Pigoya nae nauke korake nakibiꞌnaba aeba nae nagora atokaema miyeka naeba pabiyama aege atokaema mikuwe.

⁵⁷ Naba aeba miyabaꞌenama nkagowampa unataoga tumintoka, aeka umagi miyaba miyokana aeba nae nakibiꞌnaba pabiyamagina naeka uma miyaba mikiye.

⁵⁸ Pigoya, tiyabamagi igeba mana nagaiteginiba ago purintasa puma wanane. We, nae naninta nakibiꞌnaba pipa asi nasima esegima miyaba mikiye. Piya, mantarisa nanintawama nkagoba piyama mintuwe, untiye.

⁵⁹ Isu aeba pi kamanapa Kapaniyamu kumata mono namapi ampimagina uwaimiwaentiye. Miyaba mikena kamanataka Isu ikabitantawe

⁶⁰ Pigoya, abagi kina igetisa uwoma kinaꞌmi pi kamana abite maya untawe: Ma kamana abokanaba kunta piya, pipa kebaya abikiye, a, untawe.

⁶¹ Piya umagini, iyekita kamana yuguna antabaipinti Isuba abite maya uwaimintiye: Kamana pipa abeganaba nanaga kuntaba piye.

⁶² Wasanama Ntagara naeba pai mintantoti aꞌwae pumagi iyekiripa agaiginaba aꞌya pikiye.

⁶³ Pigoya, tauꞌama wanane. Awamusaꞌama mikenaenaba wasanaba aboromagina tamiye. Pi nae urimo kamanapa pipa auma wantaga miyabaꞌena wantagane.

⁶⁴ Pigoya tigetisa kaꞌisa kinaꞌmiba pika kampa aogimagini abewe, untiye. Pigoya, Isu aeba monowa aꞌa-o ikibe kina igekaba ago pai abiwaentiye. Piya, kuna pikibi aepe kaga abibebe punti, pika uwaimintiye.

⁶⁵ Pigoya, kamana ka mayama amato puma untiye: Naeba pika maya ago urimuwe: Kaꞌwaina aeba nabanempa kampa aseꞌyo potantakana, naeti ampa irosaꞌma mikenaenaba kampa waintiye, ago urimuwe, untiye.

⁶⁶ Pigoya, pi ntaga abagi kinaꞌwampitisa uwoma kinaꞌmiba Isupa iyekita puma atate aꞌwae puma wantini, to kake kampa nasi nasi puntawe.

⁶⁷ Pigoya, Isuba agorasa nagisarisa tara tumpaema kinaꞌwa ibigama maya untiye: Tigeba pabiyama tikabinatakenaga yewo, untiye.

⁶⁸ Piya yogana Saimoni Pita maya omintiye: Waꞌega, kae katateba kapa keti wakune. Kae kaꞌwainaga aꞌyaꞌma yaga miyaba kamana urintane.

⁶⁹ Taeba kaeti tamatiti pumagi: Kaeba Kotitisa aota yagaragawema, abuwe, untiye.

⁷⁰ Piya yogana Isuba maya uwaimintiye: Naeba nagisarisa tara tumpaema kina tibabunto, tigetisa kaꞌwainaba nanaga ke kinaꞌenaba piye, untiye.

⁷¹ Piya, aeba Yutasi, Saimoni ntagara Isikeriyoti kumatasa, aeka napimagina piya untiye: Aeba abagi kina, nagisarisa tara tumpaema kina, ige aruyenabisa mintana aintiba Isu kuna puntiye.

7

¹ Pigoya, Yerusaremi kumatasa Yuta kinaꞌmiba Isu aegukena kamana yuguna Yutiya mawaipa atategina Karariya marimana nasi nasi puma mintantiye.

² Piyama mintogana, Yuta kinaꞌmi seri nama kimaꞌma naninta nanta aota yaga agarosantiye.

³ Aibogini, aꞌnatabaramiba maya omintawe: Kaeba aseꞌyo pumagina mampa atate Yutiya mari wama mataꞌi kukantana pempesa puma maroti uma pegini kaokinaꞌmiba agaiyo.

⁴ Piya, kaꞌwaina aborakena untanaba aeba kampa kakama mima yogaba pikiye. Pipa kampaye. Kaeba piya yuga pikenaga yempeka wama aꞌyaꞌma kinaꞌmi nkaruyenabi aborama pegini agaiyo, untawe.

⁵ Piya, aꞌnatabara igeba aetiba kampa abima imatiti puntini piya untawe.

⁶ Piya yuguna Isuba maya uwaimintiye: Tigeba aꞌyaꞌma yaga pikena puntiripa kanara pikibewe. We, naeba pipa kanaꞌnepa ibaba kampa aborantiye.

⁷ Mampabisa kinaꞌmiba tigepa kampa karana puritakibekini, nae karana punatakibewe. Naeba pipa mikenaenawai kamparagaena wainti, pika uma aboraogini igobipa punatawe.

⁸ Tigeba aota yagaba waiyo. Naeba pipa kanaꞌnepa kampa aborantika, ma aota yagaba kampa wakuwe, untiye.

⁹ Aeba piya ute, Karariya mariba mintantiye. Isuba seri nama kinta aota yagaba uma agantiye

¹⁰ Pigoya, aꞌnatabara igeba aota yaga uma agakena paitama wagasuguna, aeba ainti pasemagina wantiye.

¹¹ Pigoya, aota yaga aboraoginiba, Yuta kina paitawaitamagini miyume kinaꞌmiba aguyosagantini ibigama maya untawe: Pi ntagaraba aeba aeta mintiye, untawe.

¹² Piya, aꞌyaꞌma kinaꞌmiba aekaba uwoma kamana uma mare-u me-u puntawe. Piya puntini kaꞌisa kinaꞌmiba: Aeba aogi yagarawe, yuguni to kaꞌisa kinaꞌmiba akayuwaitamagini: Kampaye. Aeba wasanami nkimawama maema aꞌyugu puwaigasaye, untawe.

¹³ Pigoya, pipa Yuta kinaꞌmika iyekuru pumagini aboramaba kamanapa kampa untawe.

¹⁴ Pigoya, aota yagaba abakapi Isuba tabe mono namapipa imagina wasanaba kamanapa uwaimintiye.

¹⁵ Mono yogini, Yuta kinaꞌmiba uwoma nkigi napimagini maya untawe: Ma ntagaraba ayamagina awaꞌena aisiye: Aeba awaꞌena namapipa kampa mintantiꞌnawe, untawe.

¹⁶ Piya yuguna Isuba maya uwaimintiye: Naeba mono urimopa, pipa naeꞌnentaba kampaye. Pipa unatantiꞌna, ae mono urimuwe.

¹⁷ Piya, ma yo mponopa Kotitisabe naeꞌnetisabayaya, pipa Koti nkawamu wasikena ibugai kinaꞌmi abibebe pikibewe.

¹⁸ Piya, kaꞌwaina aeba aewaka napimagina ikibipa, aeba au maete ima kamana ikiye. Piya, kaꞌwaina aeba yoga agowama nkage maete ima aꞌmu potakibi, pi aeba kampari yagaraba kampaye. Aeba taga ntagarawe, yiyo.

¹⁹ Pigoya, Mosese ago kamana uma aborarimintipa, pipa tigetisa ke kapa wasiwaeye. Kampaye. We, ayagabaya naepa naegukenaba yewe, untiye.

²⁰ Piya yogini, uwa kinaꞌmiba maya untawe: Ke kina kaꞌwaina kaege mintegina aꞌyugu kamana yena, kae kaegukena kinapa kapa kampa mintawe, piya untawe:

²¹ Piya yuguna Isuba maya uwaimintiye: Naeba mataꞌi kukantanaba kaꞌanto puntone. Pikaba tigeba nanaga urite taberapa wagana pewe, a.

²² Naeba yekiri abiyo: Moseseba: Yagarari ita araꞌena piyoma, uritantine. We, Moseseba pipa kampa agobintine. Tiyabamagi pai agobintane. Pigoya, i kasakena yuga yagaba sabatira aboragiripa pi ntagageba pewe.

²³ Pigoya pimpa Mosese ago kamana aemita pigina, auꞌwa kampa aborasanaga yagararimpigi ipa kasakena yugaba pipa pewe. We, naeba pipa ka yagara aogima auꞌama kaba atanto, pikaba nanaga abima ataba punatawe, a.

²⁴ Tigeba nanaga agarompa kamana ariwapa yewe, a. Agowapa napibebe pumagiri kamana auꞌwapa yigina aogi pusanawe, Isu piya untiye. Igeba ma ntagaraba Karaisitiwe untawe

²⁵ Pigoya, Yerusaremi kuma ago kina kaꞌisa igeba Isuka maya untawe: Aegukena ye ntagaraba pipa mampaya, agaiyo.

²⁶ Aeba kamana aboraginiba igeba kamanapa kapa kampa otawe. Kiya kinaꞌmiba igeba ma kanabipa: Utaratanti ntagara Karaisitiwema, abintini uwa atawa, a.

²⁷ We, taeba kuma agowapa abintune. Pigoya pi ntaga Karaisiti ampa aborakibipa, pipa ka yagaramaba kuma agowapa kampa napikiye. Pipa ayabayawe, untawe.

²⁸ Pigoya, Isu aeba tabe mono namapi mono uma mintogini, piya yuguna kegaꞌe uma maya untiye: We tigeba abibebe pumagiri aborantona, agonepa ago abewe. Tumintopa pipa napiyenanepisaba kampa tumintone. Unatanti ntagara aeba taga ntagaragana unataoga tumintone. Tigeba aekaba kampa napima abewe.

²⁹ Piya, naeba ae agorasa unataoga tumintoka aeka abibebe puntuwe, untiye.

³⁰ Piya yogini, igana namapi ababotakena untawe. Pigoya kanaꞌwapa kampa puntogini iyankamaba kunta pogini atantawe.

³¹ Pigoya, wabe wayape uwoma kinaꞌmi aegaꞌma imatiti puntini maya untawe: Karaisiti ampa aborakibi ntagaba, pipa uwoma kukantanaba pumagina ma ntagarama kukantanaba kampa asugasima pikibayawe. We, pi ntagaraba Karaisitibayawema, napiyune, untawe. Isu igaꞌna utiyema kaꞌisa irebu kina uwaitantawe

³² Pigoya, aꞌyaꞌma kinaꞌmiba Isukaba toma toma kamana yuguni, Parasi kinaꞌmiba abitegini tabe mono kiye kina Parasi kinaꞌmiba kaꞌisa monota kabinta kina uwaitauguni kanama igaꞌna ampa utikena kanantawe.

³³ Piya puguna Isuba maya uwaimintiye: Naeba uwaena yaganto tigege migaite, unataoga kananto ntagara aeti aꞌwae pumagi wakuwe.

³⁴ Piya, tigeba naguyosakagate kampa nabatakibewe. Wama umikubotiba pipa kampa, wakibewe, untiye.

³⁵ Piya yogini, Yuta kinaꞌmi igeba maya uma mare-u me-u puntawe: Aeba aeta waka aguyosakubompeka iye. Yuta taokina to mari mirite wa kina, igeti wakenaga ibera, to marisa kina mono uwaimikena napintana iye.

³⁶ We: naguyosaꞌma kampa nabatakibewe, piya uma umikubotiba, pitaꞌiba kanara kampa wakibewe, piya kamanapa ayaga iye, untawe. Isu miyaba wanika untiye

³⁷ Pigoya, Yuta kinaꞌmi aota naninta nakena yaga mima aꞌya pikena puntini tabe aruyena pumagini mintuguna, Isuba asima mima kegaꞌe uma maya uwaimintiye: Kaꞌwaina wanika abekanaba naeti kanama ampa nano.

³⁸ Piya: Kaꞌwaina aeba naeti amatiti pumagina mikibipa, ae agupisaba wani nkaba aiyese pemisa puma eꞌwasa wani pagi kiye, mono isapapa piya kamana kaemarantane, Isu piya untiye.

³⁹ Pigoya, Awamusaꞌamaka Isuti imatiti punta kinaꞌmi maekibeka Isu untiye: Piya, aeba pi ntagaba manta eꞌwasaenawampa agupintiba kampa intika, Awamusapa kampa tumintiye. Aꞌyaꞌma kinaꞌmi aꞌyigimpagini tara aruyena puntawe

⁴⁰ Pigoya, wasanamiba pi kamana abitegini Isuka maya untawe: Aeba taga tabe poropete yagararene, untawe.

⁴¹ Piya yuguni kaꞌisa kinaꞌmiba: Aeba taga Karaisitiwe, untawe. Piya yuguni to kaꞌisa kinaꞌmiba akayuma maya untawe: Pipa Karaisiti aeba ayama Karariya marisaba aborakiye. Pipa kampaye.

⁴² Mono isapipa kamana maya untane: Karaisiti aeba Tebiti kuma ago Petariyamu, pitaꞌi ae aokinaꞌmi ige abakapisa aborakiyema, iye, untawe.

⁴³ Wasanamiba Isukaba piya umagini atatara puma tara aruyena puntawe.

⁴⁴ Pigoya kaꞌisa kinaꞌmiba igaꞌna utikena pumepa iyankama kunta pogini atantawe. Kiya kinaꞌmiba Isuti kampa imatiti puntawe

⁴⁵ Pigoya, monota kabiyume kinaꞌmiba tabe mono kiye kina Parasi kina igeti aꞌwae puma wauguni ibiyama maya untawe: Tigeba nanaga kampa arakuꞌma ababute kanawema ibigauguni,

⁴⁶ irebu kina igeba: Aeba kamana yemipa, kaꞌisa kinaꞌmi yesapa kampa iye, untawe.

⁴⁷ Piya yuguni Parasi kina igeba maya uwaimintawe: Pi tigepa pabiyama timaba aꞌyugu purigasaye, a.

⁴⁸ Tabe Yuta kiye kina Parasi kina taetisaba kaꞌwaina aegaꞌma atokaeya, a. Pipa kampaye.

⁴⁹ Uwa kina ago kamana kampa abima miye kina, pi ige Koti nkaobi ataenaba pewe untawe.

⁵⁰ Piya yuguna, iyoꞌyagara ka, agewapa Nikotimasi, pai Isu uma aganti ntagara, aeba maya uwaimintiye:

⁵¹ Tigeba yiyo, Ka yagarama nkagowa kampa abinta kaintanawa kampa aganta, antota kamana uma aꞌya atakenaba, ago kamanatepipa kapa waintiya, a. Pipa kampaye, untiye.

⁵³

⁵² Piya yogini, aokinaꞌmiba maya untawe: Pigoya kaeba uwa marisa, Karariya marisawa, a. Pipa kaeba ago kamanapa aisuma aogima agao. Karariya marisa poropete aborakenaena kampa waintiye, untawe.

8

¹ (Pigoya, igeba atate namankaiti wagana puwaeyuguna, Isu aeba Oribesi amuti intiye.

² Marogana pitaꞌisa aꞌwae pumagina tabe mono namapinti iyogini wasanaba uwoma kinaꞌmi aeti tabera ampa aki puntawe. Piya puguna pitaꞌi maraꞌmima mono uwaimintiye.

³ Piya pogini mono tisa kinape Parasi kinaꞌmibe igeba ka wae kupiyona pogini abatamagini Isuti ababute wama wasana ibakapi me atama,

⁴ Isupa maya omima untawe: Ma nkwaepa kupiyona pegi agama ababute kanaune.

⁵ Pigoya, Moseseba piya waepa yaba kasutasa aeguma kaiyiyoma, ago kamanapipa uratantiye. Kaeba aekaba ayama napiyene, untawe.

⁶ Pipa uwa amiyo pumagini ka kamana aborama yekiniba kamana otakena untawe. Pigoya, piya yuguna Isu aeba mabi parokaema ayatasa awaꞌena kaentiye.

⁷ Kaeyogini to abiga abiga puguna asagayuma maya uwaimintiye: Tigetisa kaꞌwaina aguntaenawa kampa wainta miyemiꞌna agobimagina yaba kasupa aeguyekiri aeguyiyo, untiye.

⁸ Piya utegina to kake parokaemagina mara kaentiye.

⁹ Piya pogini igeba kamanaꞌwa abitegini kiya kina maru paitama wagasuguni to kaꞌisa kinapa wama wama aꞌya wantawe. Piya puguna kana wae aeba abintowa mintantiye.

¹⁰ Aibogana, Isuba asagayuma agama abigama untiye: Kamana ugata kinapa igeba aetane. Igeba antota kamanapa kapa kampa ugatawa, a, untiye. Piya yogana kana waeꞌmaba: Waꞌega pipa kampaye, untiye.

¹¹ Piya yogana Isu maya omintiye: Pigoya, naegeba antota kamanapa kampa ugatauwa, kaeba uwa wama mimagina aguntaenaba to kake a-po, piyama omintiye.) Isu aeba agowa uma aborawaimintiye

¹² Pigoya, Isuba wasana kamana to kake amato pumagina maya uwaimintiye: Naeba aꞌyaꞌma mabisa kinaꞌmiti eꞌwasaenawe. Piya, kaꞌwaina aeba nae naegarakibiꞌnaba tununtanabipa kampa wama mikiye. Aeba miyaba eꞌwasaenawa waitantakana mikiye, untiye.

¹³ Piya yogini Parasi kinaꞌmi maya omintawe: Mapa kaeka nkago umagina aborane. Pipa abokanaba tagantanaba kampa piye, untawe.

¹⁴ Piya yuguna Isuba maya uwaimintiye: We, naeꞌne kamana, kanara suwe. Kamanaꞌnepa pipa tagane. Piya, naeba asima kananto kumapa abinta, wakena kumapa abinta puntuwe. Pigoya tigeba kuma agonepa kampa abintawe. Aetapaya wakubo, pipa pabiyama tigeba kampa abintawe.

¹⁵ Tigeba aꞌyiginkitakena yuga pepa, uwa mampabisaenaga napima pewe. Naeba piya yugaba kampa puwe.

¹⁶ We, aꞌyiginkitakena puntapa, naeba tagantanaba puwe. Naeba pi ntugaba nabintone pikenaenaba kampa waintiye. Naba unatantiꞌna ae naoꞌmaeyaka pikenaenara waintiye.

¹⁷ Pigoya, ago kamanatipipa mayama waintiye: Tara yagararamisi ka kamana yisigiripa, tagane yiyo, iye.

¹⁸ Pigoya naeba agone uma aboraoganaba, naba unatanti aebe pabiyama uma aboraye, Isu piya uwaimintiye.

¹⁹ Kamana piya uwaimogini: Kabagampaba aempa mintiyema, abigauguna maya uwaimintiye: Tigeba naeka kampa abibebe puntiripa nabanempakaba pabiyama kampa abibebe pikibewe. Naekaba abima napibebe pesinta, nabanempakaba pabiyama napibebe pesine, untiye.

²⁰ Pigoya Isu aeba tabe mono nama mone ataume ntabaewama nkagora mima kana kamanapa untiye. Pigoya kanaꞌwapa kampa aborantogini kampa igaꞌna utintawe. Nae wakubo kumatiba kampa wakibewe, uwaimintiye

²¹ Pigoya Isuba to kake maya uwaimintiye: Titate wakiripa tigeba naguyosakate aguntaenarintaga mima purikibewe. Nae wama umikubotiba ayama wakibewe. Pipa kampaye, untiye.

²² Piya yogini Yuta kinaꞌmiba igeba maya untawe: Naeba wama umikubotiba ayamagiri wakibeweba, piyaba nanaga iye. Aeꞌwa aeguma kaikenaga yibera nanaga iye, untawe.

²³ Piya yuguna Isuba maya uwaimintiye: Tigeba abetisawa naeba atisawe. Tigeba mabisawa, naeba mampabisaba kampaye.

²⁴ Pika naeba urimuwe: Tigeba aguntaenarintaga mima purikibewe. Nagawa pe ntagara naeka kampa napibebe puntiri, aguntaenarintaga mima purikibewe, untiye.

²⁵ Piya yogini: Kaeba taga kegawema, abigantawe. Abigauguna. Isu maya uwaimintiye: Ma nae pabi ntagaramana, paipa urimintone.

²⁶ Naeba tige aguntaena kaintana kamanatipa uwoma maema miyuwe. Unatantiꞌna aeba taga kamana siye, pigoya naeba awamupisa abintoka pabiyama mataꞌi mabipa uma aborauwe, untiye.

²⁷ Piya, abawampaka piya uwaimogini igeba kampa aogimagini abibebe puntawe.

²⁸ Pika Isuba amato puma maya uwaimintiye: Ainti Wasanama Ntagara naepa naegumagiri nasagayukibe ntagaba abibebe pikibewe. Pigoya nae naumanepisaba aꞌyaꞌwaemaenaba kampa puwe. Nabanempa unaminti, pabi kamana yuwe.

²⁹ Unatantiꞌnaba aeba naege miye. Naeba aꞌyaꞌma yagaba aꞌyaꞌwaemaena poganaba abegina aogi pegini naepa kampa nagasawe, untiye.

³⁰ Piya yogini, uwoma kinaꞌmi imatiti pumagini aegarantawe. Taga kamana aegarakibeꞌnagiba nare ntare puma mikibewe

³¹ Pigoya aeti imatiti pumagini aegaranta Yuta kina maya uwaimintiye: Tigeba nae nawamu wasima mimagiri nabagi kinaꞌnentana pikibewe.

³² Pigoya, nae taga kamanaꞌama nkigaꞌnaba iyobatitakiri kanara uwa mikibewe, untiye.

³³ Piya yogini igeba maya kamana aꞌwae pomintawe: Taeba Abaraꞌamu nkagaꞌnura mima uwa mintune. Ke kapa kayokaya kinaꞌwapa tababuma igaꞌnaba ubutatantika kaeba: Igaꞌnara kampa mikibeweba, yene, untawe.

³⁴ Piya yuguna Isuba maya uwaimintiye: Naeba tagaka urimukuwa abiyo. Kaꞌwaina aeba aguntaena piꞌnaba aguntaenama kayokayaꞌena piye.

³⁵ Piya, kayokaya yagaramaba tabe yagarawampa ntama kumatiba asi nasimaba kampa miye. Aeꞌwa ntagara tubama abawampa ntama kumatiba asi nasimaba uwa miyabapa miye.

³⁶ Pika tigepa Koti ntagara tuba nae kanara igaꞌna iyobatitakiri uwa mikibewe, yuwe.

³⁷ Piya, Tigeba Abaraꞌamu agaꞌnurawa, pipa naeba abintuwe. Pigoya, tigeba pipa kamanaꞌnempaba tigetiba asesepagiri naegukenaga yewe.

³⁸ Naeba nabanempatisa kamana abinto pabi suwe. Piya, tigeba tibarimpatisa abintasa suma yewe, untiye. Tibarimpaba kewe, uwaimintiye

³⁹ Piya yogini igeba: Tae tabarempaba Abaraꞌamuwe, untawe. Piya yuguna Isuba maya uwaimintiye: Tigeba Abaraꞌamu nkagaꞌnubara taga mintasinta, ae puntemisa pesine.

⁴⁰ Piya, Kotitisa taga kamana abinto pi urimuwe. Piya yogiripa tigeba naegukenaga yewe. Pintanaba Abaraꞌamuba kampa puntine.

⁴¹ Pika tigeba tibarimpa pemisantana pewe, untiye. Piya yogini igeba maya untawe: Taeba keꞌisa kampa aborantompene. Koti aeba tabarempa kaꞌantowe, untawe.

⁴² Piya yuguna Isu maya uwaimintiye: Koti nkagaꞌnubara mintasinta naepa kayone punatasine. Naeba Kotitisa tumintone. We, naeꞌne ntaumabisaba kampa tumintone. Ae unataoga tumintone.

⁴³ Ayamagiri miyegana kamanaꞌnempaba tigutapa kampa waiye, a. Nae kamana yogiripa, nae kamanaka kampa tibegiri: Kampa abukune, yewe.

⁴⁴ Tige tibarimpaba kewamawe. Piya, ae abugaintana tige pikenagaba napiyewe. Aeba pai wasana iyeguma ataena puwaitama mintantiꞌna mirite kanaye. Aeba taga kamanapa akabitantika agupipa taga kamanapa kapa kampa waintiye. Aeba kumpari kamanaꞌwampaba nakenawantana piye. Aeba kumpari yagaragana kumpariyenama nkaba mintiye.

⁴⁵ Piya, naeba kumpari kamana urimosinta abesine. We, taga kamana urimogiripa aꞌa-o uma kampa abewe.

⁴⁶ Tigeba nae kaintanaga ka unatakibewa, a. Pipa kampaye. Pigoya naeba pi nkawameta taga kamana aiꞌnewa urimogiripa nanaga kampa abibebe pewe.

⁴⁷ Pigoya kaꞌwaina aeba Kotitiga aborantiꞌnaba kamanaꞌwapa abiwaeye. Tigeba Koti ntagaraba kampa mintiri, kamanaꞌwapa kampa abimagiri aegarawe, Isu untiye. Abaraꞌamuba kampa aborantoga mintantone, untiye

⁴⁸ Piya yogini, Yuta kinaꞌmiba maya kamana aꞌwae pomintawe: Taeba kaekaba mayawe yune: Kaeba Sameriya yagaragagana, ke kina kantabaipi mintiye. Pipa taeba napiyompepa tagane, untawe.

⁴⁹ Piya yuguna Isu maya uwaimintiye: Ke kinapa nae nantabaipintiba kampa mintiye. Naeba nabanempa nkage maema asagaꞌyuyogiri, tigeba pipa nae nageba maemagiri meru nkaba pewe.

⁵⁰ Naeba nagene maema asagaꞌyukena yugaba kampa puwe. Ka yagara mintikana ae nagenepa uma asagaꞌyuyiꞌna, pipa Koti, aeba antotaꞌenaba pikiye.

⁵¹ Naeba tagaka urimukuwa abiyo: Kaꞌwaina aeba nae kamana wasikibiꞌnapa purikenaenaba kapa kampa aboramikiye, untiye.

⁵² Piya yogini Yuta kinaꞌmiba maya untawe: We, ibaba abune. Ke kinapa kae kantabaipi mintiye. Piya, Abaraꞌamuba puꞌwantegini, poropete kina igeba kaga puꞌwantane. Aibuntagana kaeba mayawe yene: Kaꞌwaina aeba nae kamana maema mikibiꞌnapa purikenaenaba kapa kampa aboramikiye, yene.

⁵³ We, tayabama Abaraꞌamuba aeba tabe yagara puꞌwanti, ae asugaikenaga yeno. Pigoya, poropete kinapa igeba pabiyama puꞌwantana, kaeba ayama taberapa kaupa maete iyene, a, untawe.

⁵⁴ Piya yuguna Isuba maya uwaimintiye: Naeba nau maete iyekanaba kampa kanarasakiye. Nabanempa minti aeba Kotirene omena, pi ae nagenepa maema asagaꞌyuye.

⁵⁵ Tigeba aekaba kampa napimagiri aegarawe. Naeba pi napima abibebe puntuwe. Piya, naeba ayama: Kampa agama abintuweba, ukuwe. Piya ukubopa tige awameta kumpari yagara kanta pukuwe. Kampaya, naeba aepa agama abibebe pumagi kamanaꞌwapa wasiyuwe.

⁵⁶ Tiyabama Abaraꞌamu aeba kanaꞌne aborakana agakenagaba tabera aꞌmu puma mintogana, ainti aboraogana agama aꞌmu puntine, untiye.

⁵⁷ Piya yogini, Yuta kinaꞌmiba maya omintawe: Kaeba kabogapa 50-ba kampa puntampeꞌnagaba, ayamagina Abaraꞌamupa agampesine, untawe.

⁵⁸ Piya yuguna Isuba maya uwaimintiye: Naeba tagaka urimuwa, abiyo: Abaraꞌamuba kampa aborantoga mintantone, untiye.

⁵⁹ Piya yogini yaba kasu mpaemagini aegukena puguna, Isu aeba iyora kakamagina tabe mono namapintisa iroꞌwantiye.

9

¹ Pigoya, Isu aeba keꞌi wantana ano nkantabaipintisa aorika yagara aboranta, ae uma abatanitye.

² Piya pogini, abagi kinaꞌmiba igeba abigama maya untawe: Tisa, ke aguntaenaba pogana aorikapa aboranti, aewapera anoge abage isigewema, abigantawe.

³ Piyama abigauguna Isuba maya uwaimintiye: Pipa kampaye. Aewa kaintanarakabe anoke abake kaintanarakabe kampaye. Koti nkesegiyenama ago aeti aborakibika pabiya yagara aborantine.

⁴ Taeba unatantiꞌna ntugaba ara pumagi miyeno. Ase yekanaba pabigo aꞌya puwakiye.

⁵ Naeba mabi miyo kanabipa naeba mampabi eꞌwasa puritauwe, untiye.

⁶ Piya ute, mabi kaisa puma maꞌmagi pumagina, kana aorika yagarama nkaora paiꞌatantana,

⁷ maya omima otantiye: Kaeba wamagina Sairomu kotupi uma kaukapa wani nkaeyo, untiye. Pigoya Sairomu pi nkageba kamanatepisaba: Otanti mpariwe, yune. Piyama omogana pigo kana yagara aebawamagina autisa uma wani nkaeyogana aoba apinaꞌmagina agantiye. Piya purite aꞌwae puma kanaogini,

⁸ aokinaꞌmibe nanintaga esuwaitama mintanti kinaꞌmibe igeba kaga agategini maya untawe: Pipa maraꞌmima nanintaga esurata pemi ntagara aebayaye, untawe.

⁹ Piya yuguni, kaꞌisa kinaꞌmiba: Aeba pimpaye, yuguni, to kaꞌisa kinaꞌmiba: Kampaya, pipa ae kanta yagara yagarawe, untawe. Aiyuguna, aewapa: Mapa naewe, untiye.

¹⁰ Piya yogini igeba abigamagini maya untawe: Ayamagina kaoba aganema, abigauguna,

¹¹ aeba maya uwaimintiye: Ka yagara agewapa Isu, ae ma maemagina au akaeꞌmagina naora paiꞌnatama maya unamintiye: Kaeba Sairomu kotuti wamagina paso, unamegi naeba wama uma paiꞌma naoba agauwe, untiye.

¹² Piya yogini igeba: Kana yagara aeba aeta mintiye, untawe. Piya yuguna aeba: Naeba kampa abintuwe, untiye.

¹³ Aiyogini, kana aorika yagara Parasi kinaꞌmiti ababute wantawe.

¹⁴ Pigoya kana aorika yagara Isu au kaeꞌmagina aora paiꞌataogana aogatantipa, sabatira puntiye.

¹⁵ Piya, Parasi kina igeba to kakema abigama maya untawe: Kaeba aya pumagina kaoba agane, yuguna, aeba: Naonepa marasa paiꞌatagi naeba wama wani paiꞌmagi nao agauwe, untiye.

¹⁶ Piya yogini Parasi kinaꞌmitisa kaꞌisa kinaꞌmi maya untawe: Kana yagara aeba Kotiba kampa otagina kanantana sabatiwamapa kampa aegaraye, untawe. Piya yuguni to kaꞌisa kinaꞌmiba maya untawe: Aeba agunta yagara mintanaba maya awameꞌenaba ayamagina pemisine, untawe. Piya utegini atatara pumagini tara aruyena puntawe.

¹⁷ Piya puntini kana aorika yagara to abigama maya untawe: Kao agagatami, aekaba kaeba ayawe yenema, abigauguna, maya untiye: Aeba poropete yagarawe, untiye.

¹⁸ Pigoya: kana yagara aeba taga aorika mimagina aogaye, yuguni, kaꞌisa Yuta kinaꞌmiba iguꞌama tara tara pumagini anoke abakega isigegaꞌe umagini,

¹⁹ mayama isibigama untawe: Yagararisi aorika aborantiye yemepa mampayo. Aeba ayamagina aoba agayema, isibigaugunisi,

²⁰ anoge abage isigeba maya untase: Aeba yagararesikara, pipa abintuse. Piya aorika aboranti, pikeba abintuse.

²¹ Pipa ayamabaya aoba agaya, pigo kebaya aoba agataya, pipa kampa abintuse. Aeba anasa kinana, pi aeꞌwa abigaigina agowapa urimeno, untase.

²² Pipa Yuta kinaꞌmika isiyekuru pumaginisi piya untase. Pigoya Yuta kinaꞌmiba maya kamana umagini nikintawe: Ka yagarama Isuka taga Karaisitiwe yekiripa mono namapisaba agarubaiyo, untawe.

²³ Pika anoge abageba isiyekuru pumaginisi: Aeba anasa kinana, aeꞌwa abigaiyo, untase.

²⁴ Piya yusuguni kana aorika yagara to kake agegaꞌe umagini maya omintawe: Kaeba Koti nkage maema asagaꞌyuma yo. Taeba yompepa, ma kana yagaraba aeba agunta yagarawa, ae age a-nkasagaꞌyuyo, untawe.

²⁵ Piya yuguna aeba maya uwaimintiye: Aeba agunta yagarawo, pipa kampa abintuwe. Pigoya naeba naorika mintantoꞌnana nao agaopa, pipa abibebe puntuwe, untiye.

²⁶ Piya yogini to kake atesuma abigantawe: Nana pugataye. Aya pumagina kaoba agagatayema, abigantawe.

²⁷ Piya yuguna aeba maya uwaimintiye: Naeba ago urimopa, tigeba pipa kampa abewe. Nanaga abara kamanapa urimekiri abikenaga yewe. Tigeba ae abagi kinaꞌena pikenaga yewa, a, untiye.

²⁸ Piya yogini aomana sumagini maya untawe: Pi abagi yagaraba kaewe. Taeba Mosese nkabagi kinatawe.

²⁹ Mosese Koti kamana ominti, pi abune. Pigoya pi ntagaraba aetasabaya aborama kananti, pipa kampa abintune, untawe.

³⁰ Piya yuguna kana yagaramaba maya kamana aꞌwae puwaimintiye: We, pipa pami puntanawe. Nao aganatai ntagaraga aeba aetasabaya aborantiye ye ntagarama naoba aganataye.

³¹ Taeba mayama abune, Kotiba agunta kinaꞌmi kamanapa kampa abiye. Piya, kaꞌwaina aeba Koti kamana abima aegaꞌma awamu wasiyiꞌna Kotiba abima aoꞌmaeye.

³² We, paipa ka yagarama aorika yagara aogatanti kamanapa, ma aborantistasaba kapa kampa abirite kanantompene.

³³ Piya, ma kana yagara aeba Kotitisa kampa tumintemisinta, piya yugaba ayamagina pemisine, uwaimintiye.

³⁴ Piya uwaimogini kana aorika yagara maya omintawe: Kanogampaba taga agunta yagara yakari pugatantiꞌnaga, tae mono uramikenaga yeno, ute apasanaꞌma agarubantawe. Aguꞌama aorika kamanane

³⁵ Pigoya, apasanaꞌma agarubauguna Isuba abintiye. Piya puntana kana yagara abatama mayama, abigama untiye: Kaeba Wasanama Ntagaraba aegaꞌma kamatiti penoma, abigantiye.

³⁶ Abigaogana kana yagara aeba maya untiye: Waꞌega, kaeba yempepa aeba kewe. Nayakega agabebe pumagi aegaꞌma namatiti peno, untiye.

³⁷ Piya yogana Isu maya omintiye: Pigoya kaeba agao. Kamana ugamopa, pipa naewe, omintiye.

³⁸ Piya omogana kana yagarama maya untiye: Waꞌega, naeba kaegaꞌmagi namatiti pugatauwe, utegina agisabi uma parokaentiye.

³⁹ Piya pogana Isuba maya omintiye: Naeba mabi wasana aꞌyiginkitakena tumintone. Pika iyorika kinaꞌmiba iyo agaigini, iyoyaga kinaꞌmipa iyorikaekibe, pi ntuga pukena tumintone, untiye.

⁴⁰ Piya yogini Parasi kina agora mintume kinaꞌmiba abitegini: We, taeba taorikano, untawe.

⁴¹ Piya yuguna Isuba maya uwaimintiye: Tigeba tiyorika mintasinta aguntaenaripa kampa tigeti waiyesine. We, tigeripa: Taeba taoyagane yeka, aguntaenaripa uwa wairitakiye, Isu piya untiye.

10

¹ Pigoya, Isuba kamana maya untiye: Naeba tagaka urimukuwa abiyo: Kaꞌwaina aeba sipisipiwama kagisa kagopinti uma pasikena kabera kampa uma pasinta, tori kagisa aemita puma wakibiꞌnakaba, aeba ku ntagara mima, toꞌwainantana aꞌyugu maekena yagarawe, yewe.

² Pigoya, to kaꞌwaina aeba kaberisa iyegiripa, aekaba pipa sipisipi kiꞌnumpi nkibawaimpawe, yewe.

³ Aeba ampa irosaginaba kiya yagaramaba agate kabe aiꞌatagini sipisipiwampiba awamupisa kamana abewe. Piya pegina yaga kiꞌnunkapa ige uma igegaꞌe yegini kagisa kagopintisa aeti kana pegana ibabute irosaye.

⁴ Ibabute paitawaitama tumegini kamanaꞌwapa ago abima aegarawe.

⁵ Pigoya, to yagaraba kampa aegarakibewe. Piya, ae agaba kampa abintaka karu potama iyegaka wakibewe, untiye.

⁶ Pigoya, Isu aeba piya meto kamana uwaimogini igeba ayaga kamanapa iye umagini, kana kamanaꞌama nkagoba kampa abintawe. Isu aeba aogi sipisipi kiye yagarawe

⁷ Pigoya, Isu aeba to kake uwaimintiye: Naeba tagaka urimukuwa abiyo. Sipisipi ige ikena pi kabeba naewe, untiye.

⁸ Pigoya naeba kampa aborantuwagini, aboranta kina igeba pipa ku kina, to wainanta uwa aꞌyugu maekena kinakini, pika sipisipi igeba iwamupisa kamanaꞌwaipa kampa abintawe.

⁹ Pigoya, sipisipi kabewaipa pipa naewe. Piya, kaꞌwaina aeba naeti kanamagina kagisa kagopinti uma pasekanaba, Koti ababikiye. Piya pekana, uma pasite irosate puma nanintaba maekiye, untiye.

¹⁰ Pigoya, ku kina kanaipa tonagaba kampa kanaye. Aeba sipisipi kuntana puma iyeguma ataena puwaitakena kanaye. We, nae pi kanaopa, miyaba eꞌwasaena aborama imekini aogima asoyaenabi pumaeyekini miyiyema, tumintone.

¹¹ Naeba sipisipirape aogi kiyenawe. Aogi kiye yagaramaba aeꞌwa nkauꞌwakaba kampa napinta, kasima sipisipi igeka napima iyoꞌmaeye, untiye.

¹² Pigoya kaꞌwaina aeba ikantana yuga pikibiꞌnaba, aeba taga yaga kiyeba kampaye. Piya, aeba kana sipisipi kiꞌnumpi nkibaba kampaye. Aeba agakana kabu kara kanakanaba itate aegaka wagaikiye. Piya pekana kabu karama ampa sipisipi iba nama igarugarebakiye.

¹³ Pigoya aeba uwa ikantana yuga pemika, aeba sipisipigaba abekana uwaena kanta pekana kampa igekaba napikiye, untiye.

¹⁵

¹⁴ Naeba sipisipirapa aogi kiye nagini, naeba naopa igaogini igeba naekaba napiyewe. Piya, nababe naebe agama abima miyuse. Pi nkawameta naebe naokinaꞌmibe agama abima miyune. Pika naeba sipisipi igeka napima iyoꞌmaekenaga miyabaꞌenanepa kaikuwe, untiye.

¹⁶ Pigoya, to auꞌi kaꞌisa sipisipinepa mintawe. Igeba ma kagisa kagopisaba kampaye. Piya naeba igepa ibabute kanakini kamanaꞌnepa abikibewe. Pigoya sipisipi aruba kana kiyaba pabiyama kanasuma aborakiye.

¹⁷ Naeba mikenaenanepa to kake maekuboka kaekuwe. Pika nabanempapa naeka abiye.

¹⁸ Mikenaenanepa kaꞌwainaba kampa naparikiye. Pipa naeꞌne naumanepisa kaikuwe. Naeba mikenaenane kaikenagabe maekenabe pi esegiyenaba wainatantiye. Piya pukuboka nabanempa unatantiye, untiye.

¹⁹ Isu aeba kamana piya yogini, Yuta kinaꞌmiba igeba abite maka umagini atatara puma tara aruyena puntawe.

²⁰ Piya puntini igetisa uwoma kinaꞌmi maya untawe: Ke kina antabaipinti mintegina aiboꞌena piya. Nanaga tigeba kamanaꞌwapa abima miyewe, untawe.

²¹ Piya yuguni to kaꞌisa kinaꞌmiba maya untawe: Kewamaba piya kamanapa kampa untana, pi kewama kaꞌwainaba iyorika kinaꞌmi nkiyoba kanara agawaitakiya, a. Pipa kampaye, untawe. Yuta kinaꞌmiba Isu ikabitama kama potantawe

²² Pigoya Yerusaremiba aota yaga aborantiye. Pipa pai tabe mono nama kabe aiginta kana aborantiye.

²³ Pigoya, pi ntaga esiba yaga aboraogana, Isu aeba tabe mono namapinti ka maru agewapa Soromoninta, pitaꞌi waogini,

²⁴ Yuta kinaꞌmiba ampa kobe pumagini maya omintawe: kaeba nanaga taguꞌama tara taraba puratane. Karaisiti yagara mintanapa agogapa aborama uramo, untawe.

²⁵ Piya yuguna Isuba maya uwaimintiye: Naeba urimogiripa kampa abibebe pewe. Nabanempa nkawamuta yoga poꞌna nkagonepa uma aboraye, untiye.

²⁶ Pigoya tigeba pipa sipisipinentanaba kampa puntiri kamanaꞌnepa kampa aegaꞌma napiyewe.

²⁷ Sipisipinentana puma miye kinaꞌmiba kamanaꞌnepa abewe. Piya, naeba igabebe puma abiwaemogini naegarawe.

²⁸ Piya, miyabaꞌena aborawaimekini kampa purinta, miyaba mikibewe. Igepa nae nayapisa kaꞌwaina iyoba itakenaenaba kampa waintiye.

²⁹ Nabanempa naeti ibabuwaitanti kina igeka aboganaba aꞌyaꞌwaema nkesegiyenapa igasaye. Eya, kaꞌwainaba nabanempa nkayapisaba kampa igarubakiye.

³⁰ We, naebe nababe tasigeba kaꞌantowe, Isu untiye.

³¹ Piya yogini, Yuta kinaꞌmiba yaba kasu mpaema aegukena puntawe.

³² Piya puguna Isuba maya uwaimintiye: Aogi yugaba toma toma nabanempa nkayapisa puriyakogiripa, tigeba nana ata pogiri yaba kasupa maema naegukena pewe, untiye.

³³ Piya yogini, Yuta kinaꞌmiba pabigo awamuta uꞌmagini maya omintawe: Aogi yuga pempekaba kampaye. Kaeba wasanaraka miyempeꞌnaga Koti akayasotama, kaegaka: Kotinawe, yempeka kaegukenagaba yune, untawe.

³⁴ Piya yuguna Isu maya uwaimintiye: Ago kamanatipipa: Tigeba Koti kanta pewema, untiye.

³⁵ Piya, Koti kamana maru aboranti kina igeka Koti kanta puma miyewe. Eya, monoꞌamaba kampa paga pakiye.

³⁶ Pigoya, nabanempa utanatama, aewa unataoga mabi tuminto, pika naeba Koti Ntagaranawe, yuwe. Pipa tigeba nanaga: Koti akayasotaneba, naekaba yewe, a.

³⁷ Piya, naeba yoga popa, pi agaigina nabanempa ae awameta kampa pekiripa, kamanaꞌnepa aꞌa-o yigina kanarasaisine.

³⁸ Pigoya, naeba ae yuga puwe. Piya, tigeba kamanaꞌne kampa tibegiripa, kanara yoga poka napima aogima abibebe piyo. Piya puntiri tigeba mayaga aogima napibebe puma piyo: Nabanempaba naege miyegi, naeba pabiyamagi aege miyuwe yo kamanapa aogima abiyo, untiye.

³⁹ Piya yogini igaꞌna utukena puguna igaitegina wagaintiye.

⁴⁰ Aibuntana, Isu aeba Yontani wanipa taꞌema maroteri wama pai Yoni wani paiꞌitama mintanti, pitaꞌi wama umintantiye.

⁴¹ Pitaꞌi umintogini, aꞌyaꞌma uwoma kina aeti ampa irosaꞌma mare-u me-u puma maya untawe: Yoniba awameꞌenaba pipa kampa puntine. We, aꞌyaꞌwaema kamana ma ntagaraga Yoni untemipa, pipa tagane, untawe.

⁴² Piya utegini uwoma kinaꞌmiba Isu aegaꞌma imatiti puntawe.

11

¹ Pigoya Petani kumata ka yagara mintanti, agewapa Arasarusi, aeba yonintana abogana mintantiye. Pigoya, Mariyage Matage isigeba aꞌnantoge anonantoge pabi kumatasawe.

² Piya, Mariya pi ae Waꞌega agunta wani paiꞌatama aꞌno nkabiyatasa agisaba aebago pogaintiye. Pi ae aoꞌmanto Arasarusi yonintana abogana waitamintantiye.

³ Piya poginisi, anonantoge aꞌnantoge isigeba Isuti kamana maya uma atausuguna wantiye: Waꞌega, kaeba abo. Kaoꞌyagara aeba yonintana abegini waitamintiye, uma atausuguna wantiye.

⁴ Piya pogana Isuba pi kamana abite maya untiye: Pi nkinuntana wasana uwa purikenaba kampaye. Koti aꞌmuntana aborakiyema untine. Koti Ntagarawa nae iꞌmu punatakenaenaga pi yonintanaba aboraye, untiye.

⁵ Pigoya, Matakabe aꞌnantokabe Arasarusikabe Isupa igekaba tabera abuntiye.

⁶ Pigoya, yonintana abiye kamana abitegina, mintantita tara yaga to kake mintantiye.

⁷ Piyama mintana, abagi kinaꞌwa maya uwaimintiye: Maeyigi, Yutiya mari aꞌwae pumagi wano, untiye.

⁸ Piya yogini abagi kinaꞌwampiba maya omintawe: Tisa, Yuta kinaꞌmiba maganto yaba kasutasa kaegukena untana, pipa nanaga mapa igetiba to kake aꞌwae puma wakenaga yene, untawe.

⁹ Piya yuguna Isuba maya aꞌwae puwaimintiye: Aseba kampa unta, papa uwa tantiye. Piya, kaꞌwaina aeba ara keꞌi nasemipa kampa uma aesama aeguye. Aeba eꞌwasa pekana aꞌyaꞌwaemaenaba kanara agakiye, untiye.

¹⁰ Piya, kaꞌwaina aeba aseka keꞌi wagina uma aesama aegukiye. Aeba tununtanabinti wama ayama aꞌyaꞌwaemaenaba agakiye, a. Pipa eꞌwasaenaba kampaye, untiye.

¹¹ Piya untana kamana ka mayama amato puntiye: Abiyo, taoꞌyagara Arasarusiba awaitamintika, pi naeba wama uma abage pukuwe, untiye.

¹² Piya yogini abagi kinaꞌmiba maya untawe: Waꞌega, awaitamitipisa to agama asikiye, untawe.

¹³ Isu aeba ago purome meto kamana yogini, igeba uwa awaitamintegina iyemagini kampa abibebe puntawe.

¹⁴ Piya puguna Isuba uma aborama uwaimintiye: Arasarusi ago puꞌwaye.

¹⁵ Naeba pitaꞌi kampa wama umintogana puꞌwaika tigekaba nantawamaba aogi piye. Tigeba aogima timatiti pikibeka pintanaba aboraya, maeyigi aeti wano, untiye.

¹⁶ Piya yogana Tomasi, to ka agiwapa Agaiyawe unta, aeba abagi aokinapa maya uwaimintiye: Taeba wama tisage kaga uma purukune, untiye. Isu aeba abage pikena miyabaꞌenama nkagowe

¹⁷ Pigoya, Arasarusiba arubinti waintogana, tarawa tarawaki yaga aꞌya puwaogana Isuba uma irosantiye.

¹⁸ Pigoya, Petani kumapa pi Yerusaremi kumaꞌama nkagora tumairira waintantiye.

¹⁹ Pitasa Yuta kinapa aꞌyaꞌma Matake Mariyake isiꞌnanto puꞌwaomeka tugu nkisigakena wantawe.

²⁰ Piya puguna, Mataba: Isu ampa irosaye yuguna, abitegina, Mariyaba namapinti mintogana, keꞌi wama uma abatantiye.

²¹ Uma abatama maya omintiye: Waꞌega, kaeba mataꞌi mintampesinta, naꞌnantoba kampa puremisine.

²² Piya, ibantoba naeba kaekaba abuwe. Piya mayaenagaba Kotiti esotaganaba abigamikiye, untiye.

²³ Piya yogana Isuba: Kaꞌnantoba aogama asikiye, untiye.

²⁴ Piya yogana Mataba maya untiye: Ainti tabe kanabi aogama asikibi, pipa abintuwe, untiye.

²⁵ Piya yogana Isuba maya omintiye: Abage puma asitakena miyabaꞌenama nkagoba naewe. Pika kaꞌwaina naeba naegaꞌma amatiti pikibiꞌnaba purikibipa aumawapa awa waiyaba mikiye, untiye.

²⁶ Piya, kaꞌwaina aeba aogama mintana amatiti puma naegararakibiꞌnaba kampa purinta miyaba mima esegi pikiye. Kaeba pi kamanapa abibebe peno untiye.

²⁷ Piya yogana Mataba maya untiye: Waꞌega, owe. Koti Ntagara, Karaisiti pai mabi aborakiye unta, pipa kaewema, nagutasa abibebe puwe, untiye. Isu kubeꞌena puntiye

²⁸ Piya kamana untana aꞌnanto Mariyaka kegaꞌe uma obina suma maya omintiye: Tisa kanantana kagegaꞌe iyema, omintiye.

²⁹ Omogana, Mariyaba abite pabigo asima Isuti wantiye.

³⁰ Pigoya, Isu aeba kuma awamori Mata kamana omometi mintantiye.

³¹ Piya pogana Mariya aeba karuꞌena asima waogini, Yuta kina namankapi tugu nkampintume kinaꞌmiba: Wasana aruri kubeꞌena pikena waye, ute aegaꞌmagini wantawe.

³² Pigoya Mariyaba kuma awamori tumima Isu mintometi wama agama agisabi tumpa parokaema maya omintiye: Waꞌega, kaeba mataꞌi mintampesinta naꞌnantoba kampa puremisine, untiye.

³³ Piya uma kubeꞌena pogini, Yuta kina aegaꞌma waume kinaꞌmiba ae aoꞌmaemagini kaga kubeꞌena puguna, Isuba igate abima antarapa tabera puntiye.

³⁴ Piya puntana: Aeta kaitawema ibigaogini igeba: Waꞌega, kanama ampa agao, untawe.

³⁵ Piya yuguna Isu aeba kubeꞌena puntiye.

³⁶ Piya pogini Yuta kinaꞌmiba agate maya untawe: Agaiyo. Aguꞌamaba tabera aeti waintiye, untawe.

³⁷ Piya yuguni kaꞌisa kinaꞌmiba maya untawe: Aorika yagara ka aogatantikana Arasarusi kaba atakenaba igiga pegina puripera ayabiye, untawe. Arasarusi abage puma aogatantiye

³⁸ Piya yuguna, Isu tabera antara pumagina kana arura uma irosantiye. Kana wasana yabaeba yaba nkagepinti waintogana awaba tabe yabantamatasa aigunkatauguna waintantiye.

³⁹ Pika Isuba: Yabapa aꞌwaiyiyo, yogana, kana puꞌwaome ntagarama nkamanaꞌma Mata aeba maya untiye: Waꞌega, ago tarawa tarawaki waimagina ago agunta iye, untiye.

⁴⁰ Piya yogana Isu maya omintiye: Kamana ugamopa kampa abibebe pena, a. We, kaeba naegaꞌma kamatiti punatagana, Koti nkesegiyenawampa nkeꞌwasaenaba aborakana agao, ugamone, untiye.

⁴¹ Piya yogini yabapa aꞌwaiyuguna Isuba inati aoma urintana mayama nunamu untiye: Naba, kaeba nunamunepa abempeka naꞌmu pugatauwe.

⁴² Kaeba nunamunepa aꞌyaꞌwaema yagaba abempepa pipa abintuwe. Naeba uwa ma wasana minta kinaꞌmi kae unatauku tuminto, pi igutasa abibebe piyema kamana piya ugamuwe, untiye.

⁴³ Piya untana taberasa kegaꞌe umagina: Arasarusi, kaeba irosaꞌma iyo, untiye.

⁴⁴ Piya yogana purinta yabaewama intiye. Agisa ayapa kairasa kibarugintini, aowaba pabiyama kairasa asaemaraume, pikaba Isuba maya uwaimintiye: Kaiba iyobakasigina wano, yogini piya puntawe. Isuba purikiyema uma esegi puntawe

⁴⁵ Pigoya Yuta kina, Mariya kananta kina, igetisa uwoma kinaꞌmiba Isu pintana pome agate: Aeba Karaisitiwe, uma imatiti puma aegarantawe.

⁴⁶ Piya puguni, kaꞌisa kinaꞌmiba Parasi kinaꞌmiti wama Isu pome pi kamana uma uwaimintawe.

⁴⁷ Piya puguni tabe mono kiye kinaꞌmibe Parasi kinaꞌmibe pi kamana abite mono kanisore kina igegaꞌe uwaema maya untawe: Kana yagara aeba awameꞌenaba uwomantana piya, aya pusune.

⁴⁸ Taeba uwasuwa potamagi mintakini aꞌyaꞌma kinaꞌmiba ae kamana abima aegaraigini Aroma kinaꞌmiba kama puratama tabe mono namatepe wasanabe aꞌyaꞌma tapawaerikibewe, untawe.

⁴⁹ Piya yuguna, ige iyoꞌyagara ka, agewapa Kayapasi, aeba pi kabubipa monota paitanta kiye yagara mintantiye. Aeba maya untiye: Tigeba tigu napi napiyenari kampa wainta mintawe.

⁵⁰ Wasana ige ataena pusanaga, ae kaꞌwainanto aꞌyaꞌma kinaꞌmika uma puꞌmagina iyoꞌmaeyakana aꞌya penoma, kampa abintawa, a, untiye.

⁵¹ Pi kamanapa napiyenawapisaba kampa untiye. Koti otaogana meto kamana maya untiye: Aeba pi kabubipa monota paitanta kiye yagara mintomeka: Isu aeba aꞌyaꞌma kinaꞌmika purenema, taga otantika meto kamana untiye.

⁵² Piya, Yuta kina ige ibiba kampaye. Koti ntagara araga aꞌyaꞌma maga maga mirite wa kina, ige aꞌyaꞌma ibabuma aki puwaitakini ka aruyena puma miyiyema, otantika, piya untiye.

⁵³ Pigoya pintaga kiya kinaꞌmiba Isu aegukenaenagaba agobima nikintawe.

⁵⁴ Pika Isuba Yuta kinaꞌmi nkiyoriba to kake kampa nasintiye. Aeba kaꞌme mpari agora kumapa ka, agewapa Eparaimi, pitaꞌi abagi kinaꞌwapa ibabute wama umintantawe.

⁵⁵ Pigoya, Yuta kinaꞌmi Pasoba yaga agarosaogini, aꞌyaꞌma uwaena kumaꞌantontorisaba aꞌyaꞌma uwoma kina agunta kamanaꞌwai uma aogi pikena karuꞌena paitama Yerusaremi kumati intawe.

⁵⁶ Piya puntini tabe mono namapinti Isuka aguyosakate maya uma mare-u me-u puntawe: Tigeba ayawe yewe. Aeba aota yagaba kanakipera kampaye, untawe.

⁵⁷ Piya, tabe mono kiye kinaꞌmibe Parasi kinaꞌmibe igeba maya kamana uma esegi puntawe: Kaꞌwaina aeba mikibiti agantanaba kanama ampa urameka igaꞌna uteno, untawe.

12

¹ Pigoya, tonaentisa kaꞌumaema yaga waintogana, ainti Pasoba naninta nakena yaga aborantiye. Piya, pi ntaga Isuba Petani kumati uma irosantiye. Aeba pi kumata Arasarusi purintapisa aogatantita uma irosantiye.

² Uma irosaogini, Isupa naninta kaoꞌena potauguna Mataba isoꞌma imogini Arasarusige kaga mimagini nantawe.

³ Piyama mintuguna Mariyaba tabe masawae kankabe aogi agunta wani, agewapa nati, pi tabe ikantaga, pi maema Isu nkagisari paiꞌatama aꞌno nkabiyatasa aebago pogaintiye. Piya pogana kana namapintiba aogi agunta uwaentiye.

⁴ Pigoya, abagi yagara ka, Yutasi Isikeriyoti, aeba kuna yagara, ae maya untiye:

⁵ Agunta wani pitasa 300 tora maema kusi kina imekana aogi pusanawe, untiye.

⁶ Aeba pi kamanapa kusi kinaꞌmika napimaginaba kampa untiye. Aeba waba mponera kabimagina mima moneba maema kaka pome ku ntagaragana, pika untiye.

⁷ Piya yogana Isuba maya untiye: Tigeba ma kana waepa kaba a-nkabiraiyo. Aeba agunta wanipa nauti paiꞌataka purekini kainatakena, pika utanatama maema atama miyine.

⁸ Piya, kusi kinapa tigege asi nasi miyaba mikibewe. Pigoya, naeba tigegeba eꞌerotapa kampa mikuwe, untiye. Mono kiye kinaꞌmi Arasarusi aeguma kaikena kamana untawe

⁹ Pigoya, Yuta kinaꞌmiba pi kumati mintiye kamana abite, aꞌyaꞌma uwoma kina pabitaꞌi uma irosantawe. Pigoya, Isu ae abintogaba kampaye. Arasarusi purintapisa aogatanti, aeke kaga agakena ampa irosantawe.

¹⁰ Pigoya, pipa tabe mono kiye kinaꞌmiba Arasarusike kaga aegukena kamana untawe.

¹¹ Piya, Yuta kina aꞌyaꞌma uwoma kinaꞌmi aeka uma wama Isuti uma atokaentaka piya puntawe. Isu Yerusaremi kumati iyogini iꞌmu potama ababuntawe

¹² Pigoya, marogini uwoma kina aota yagagini karuꞌena Yerusaremi kumati ampa irosanta kina, igeba Isu kanaye kamana abintawe.

¹³ Piya kamana abite yanta aerisa maete keꞌisa uma kabima ababikena wantawe. Wama uma ababuntini maya uma iꞌmu potama untawe:

We, Waꞌegawama nkawamuta taeti kanaika taꞌmu potano.

Aeba Isureyo kinaꞌmi tabe yagarawe, untawe.

¹⁴ Pigoya, Isu aeba tonki aikeri aborama amuguna akabata maraꞌmima wantiye. Pipa ago kamana mayama waintanti pabi nkawameta puntiye:

¹⁵ We, Saiyoni kumatasa kina, tigeba a-tiyekuruba piyo. Agao. Tabe Waꞌega Yagarari tonki aikeri akabata mima tigeti kanaye, piya untiye.

¹⁶ Pi kamanapa abagi kinaꞌwampiba pi ntagaba kampa napima abibebe puntawe. Ainti Isuba inati eꞌwasaenawati aꞌwae puma iyogini, pi kamanakaba napima mayama abibebe puntawe: Pipa aeka mono isapi kaemaranta, pabinkawameta pintanaba potantawema, napintawe.

¹⁷ Piya, aeba Arasarusi kegaꞌe yogana arubintisa irosaꞌma iyogini aganta, pi uwoma kinaꞌmi ige pi kamanapa uwaimintawe.

¹⁸ Pigoya, pi awameꞌena punti nkawaga kamana abinta, uwoma kinaꞌmi keꞌi wama uma abatantawe.

¹⁹ Piya puguni, Parasi kinaꞌmiba maya uma igewai mayama mare-u me-u puntawe: Abewo. Aꞌyaꞌma kinaꞌmiba aeti wama pabigo aegaraka taeba kaꞌenaba kanara kampa potakune, untawe. Kaꞌisa Kariki kinaꞌmi Isu agakenaga ibuntiye

²⁰ Pigoya, Yuta kina Yerusaremi kumati aota yagaba Koti mpono abikena iyume kinaꞌmi ige abakapintiba to marisa Kariki kina ka kaꞌmiba kaga umima abintawe.

²¹ Piya puntini, igeba Piripi aeba Karariya marisa Petisaita kumatasa yagara, aeti wama maya omintawe: We naba-o, taeba Isu agakenaga yunema, omintawe.

²² Piya omuguna, Piripiba wama Enturu omoginisi, kaga Isuti wama pi kamanapa omintase.

²³ Omusuguna Isu maya untiye: Wasanama Ntagara mana eꞌwasaena maekena yaga pabigo ampa agarosama aboraye, untiye.

²⁴ Piya untana to maya untiye: Tagaka urimukuwa abiyo. Witi aipa mabi kampa antaganaba kampa iranta uwa waiyikana, mabi amaraganaba iꞌma nakenaba toma toma uwoma aboraye.

²⁵ Pabiyamagina, kaꞌwaina aeba mikenaenawa abugakibipa aꞌyugu potakiye. Piya, to kaꞌwaina aeba mabi mima mikenaenawa kampa abikibemiꞌnaba esegima miyabaꞌena aboramikiye.

²⁶ Kaꞌwaina aeba nae kayokayaꞌena pikena untanaba, naegarano. Piya, nae mikubo nagora kayokaya kinaꞌnepa miyeno. Kaꞌwaina aeba nae kayokayaꞌena punatakanaba, aepa nabanempaba tabe agi omikiye, Isu piya untiye. Igeba Wasanama Ntagara asagaꞌyukibewe, untiye

²⁷ Pigoya Isu to maya untiye: Mapa naguꞌnempaba pami puma tabaraba piye. Pika nanawe ukuwe. Naeba: Naba, pintana aboranamemipa nauꞌima maenagaso, piyaba kampa ukuwe. Kampaye. Pi ntaga aboranamenema unatantampene.

²⁸ Pika naba, kaeba yegana kagegapa tabe puma aborano, untiye. Piya yogana mantarisa maya kamana tumintiye: Pi nageba ago tabe puma aborantikana to kake pabiyama aboraurite wakiye, untiye.

²⁹ Pigoya, agora mintume kinaꞌmiba abite: Antaru iye, untawe. Piya yuguni, kaꞌisa kinaꞌmiba: Enisore kaꞌwaina kamana omiye untawe.

³⁰ Piya yuguna, Isuba pabigo iwamuta uꞌma maya uwaimintiye: Kamana pipa nae naoꞌmaekena kamanapa kampaye. Tige tiyoꞌmaekena kamana uma aboraye, untiye.

³¹ Pigoya, mapa mabi atatara pikena kana aboramikana mampabisa tabe yagara aepa aebasanakiye.

³² Ibaba mabi mintokini, aintiba igeba yara naeguma asagaꞌyunataigipa, pi ntagaba aꞌyaꞌma kina igegaꞌe uma ibaibekini naeti kanakibewe, untiye.

³³ Pipa purikena meto kamanaꞌwa piya untiye.

³⁴ Piya yogini, wasana aki puma mintume kinaꞌmi igeba maya omintawe: Taeba mono isapipa maya kamana aisuma abune: Karaisiti aeba kampa purinta uwa miyaba mikiyema abuna, kaeba nanaga: Wasanama Ntagara aepa aeguma asagaꞌyukibewe, yene. We, Wasanama Ntagara aeba kewe, untawe.

³⁵ Piya yuguna, Isuba maya kamana aꞌwae puwaimintiye: Kane eꞌwasaena aeba abakatipipa uwaena yaganto eꞌwasa pikiye. Pika tununtanama titikaesanaga yaku eꞌwasaena wairitantakiri aeti aborama miyiyo. Kaꞌwaina aeba tununtanabi wantanaba kepa kampa agabebe piye.

³⁶ Pi kane eꞌwasaena wairitantika tigutasa pi eꞌwasaena aegaꞌma ae tuntana piyo, uwaimintiye. Isu aeba piya kamana uwaimite wama kakama umintantiye. Uwoma Yuta kinaꞌmiba Isukaba kampa imatiti puntawe

³⁷ Pigoya Isu aeba awameꞌenaba toma toma uwomantana iyora pogini agantiniba, uwa aetiba kampa aegaꞌma imatiti potantawe.

³⁸ Pipa poropete yagara Aisaya ae kamanaꞌama esegi penema piya puntawe: Aeba kamana mayama kaentiye:

Waꞌega, kawaga kamanaka yokanaba, ke abibebeba piye, iye.

Pipa Waꞌegawamatisa esegiyena ke ayakegana napiyema, kaentiye.

³⁹ Piya, igeba iyorika pumagini, Isu kamanapa kampa aogima abibebe puntawe. Pipa Aisaya kamana mono isapi ka waintomeka puntane. Pipa mayamawe:

⁴⁰ Kotiba iyo atikaewaigasima iguꞌamapa akumpa yaba kanta puwaitantine, iye.

Piya pogini, igeba aꞌyaꞌwaemaenaba kampa agama napibebe puntane, iye.

⁴¹ Igupa aꞌwae pigi aogi pusanaga akumpa puwaitantine, untiye. Aisaya pi kamana Isuka untipa ae eꞌwasaenawa agantana untiye.

⁴² Pigoya kaꞌisa monota paitanta kinaꞌmiba Isupa igu kayone potantini, pigo: Parasi kinaꞌmiba mono aꞌa-o uratama tagarubakibewe, uma iyekuru puma kakantawe.

⁴³ Piya, Igeba Kotiba igeꞌwai maema asagaꞌyusanagaba kampa ibuntiye. Igeba wasanami igeꞌwai maema asagaꞌyuwaitasanaga tabera ibugaogini iyekuru puma kakantawe. Isu wasanaba pako pikibi kamanane

⁴⁴ Pigoya, Isuba kegaꞌe uma maya untiye: Kaꞌwaina aeba naegaꞌma amatiti punatakibipa, aeba nae nabiba kampaye. Unatantiꞌna aeke kaga aegaꞌma amatiti potakiye, untiye.

⁴⁵ Piya, kaꞌwaina aeba nae ka nagaiꞌnaba unatantiꞌna aepe kaga agaye.

⁴⁶ Piya, eꞌwasaena naeba mampabi tumintone. Kaꞌwaina aeba naegaꞌma amatiti pikibiꞌnaba tununtanabipa kampa miyaba mikiye, untiye.

⁴⁷ To kaꞌwaina aeba kamanaꞌne abimagina aꞌa-o uma kasakapa, antotaꞌenaba ibaba kampa amukuwe. Piya, naeba wasana antotaꞌena imikenaba kampaye. Naeba aogi puwaitakena mabi tumintone untiye.

⁴⁸ Piya, kaꞌwaina aeba nae aꞌa-o unatama kamanaꞌne kaikibiꞌna, kamana uma aꞌya pikena kanapa aepa aboramikiye. Eya, kamana yopa pipa ainti tabe kanabi, kamana uma aꞌya pikenaenaba aepa aboramikiye, untiye.

⁴⁹ Naeba kamana yopa naeꞌne naumanepisaba kampa yuwa, naba unatantiꞌna aꞌyaꞌma kamanapa piya yoma unamintegi uma aborauwe, untiye.

⁵⁰ Pigoya naeba abintuwe. Awamupisa kamanaꞌama aꞌyaꞌma yaga aogima miyabaꞌenaba maema aboraye. Aꞌyaꞌma kamana uma aboraopa nabanempa yoma unamintisa puma yuwe, Isu piya untiye.

13

¹ Aota yaga Pasoba aboraogana, Isuba aeꞌwaka mayama napima abintiye: Naeba maba atate nabati aꞌwae puma ikena kana agarosayema, napintiye. Piyama napintana, mabi aꞌyaꞌwaema aokinaꞌwa agu kaoꞌena puwaitata kanantiye:

² Pigoya, aseka naninta nakena aki puma mintuguna, ka mayaena aborantiye: Saimoni ntagara Yutasi Isikeriyoti aeba Isu kuna penema Sataniba ae antabaipinti napi napiyena atantiye.

³ Piya pogana Isuba aeba mayama abintiye: Naba aeba aꞌyaꞌwaemaenaba nayapi atawaeye. Piya, naeba Kotitisa tumintoka to kake Kotiti aꞌwae puma ikuwema, napintiye.

⁴ Piyama napintana, naninta mintumetisa asima eꞌero kaiwapa aboborasaba atagasima to ka kai maema amintiye.

⁵ Piya pu uꞌma wani tuꞌnapi tiꞌatama, pabigo agobima abagi kinaꞌwa nkigisa paiꞌitantiye. Piya puwaitama, akapi kirintome kairasa aebago puwaigaintiye.

⁶ Piya puwaitata Saimoni Pitati uma irosaogana, maya omintiye: Kaeba Waꞌegawamaga, nagisanepa wani nkaekenaga yeno, untiye.

⁷ Piya yogana Isuba maya omintiye: Ma pontanama, pi nkagoba ibaba kampa abempekana, mintana aintiba abikibene, untiye.

⁸ Piya yogana Pitaba maya untiye: Ibabe asabe nagisanepa taga kampa pasikibene, untiye. Piya yogana Isu maya omintiye: Naeba kampa paikatakanapa, naegeba kampa atokaema mikibene, untiye.

⁹ Piya yogana Pitaba maya untiye: We, Waꞌega, piya untanapa nagisari manapa kampaye. Nayatipe naꞌnotipe kaga paso, untiye.

¹⁰ Piya omogana Isuba maya ominitye: Kaꞌwaina auti wani pasikibiꞌnaba ainti agisa mana pasekanaba aꞌyaꞌma autisa nare ntare puwaewakiye. Pigoya tigeba aꞌyaꞌwaemaba kampa nare ntare puwaentawe, untiye.

¹¹ Aeba kunaenawapa abibebe pu uꞌma maya uwaimintiye: Tigeba aꞌyaꞌwaemaba kampa nare ntare puwaentawe, Isu untiye.

¹² Igisaba waninkama aꞌya itate, eꞌero kaiwapa to kake maema pu uꞌma maraꞌmima maya uwaimintiye: Naeba pi puritaontanama nkagoba abewo.

¹³ Tigeba: Tisa, Waꞌegawe, unamewe. We, piya kinati mpintogiri pipa kanara unamewe untiye.

¹⁴ Piya, naeba Tisa, Waꞌegarimpana tigisaba paiꞌtitauwa, tige tigeri pabiyama tigisariba wani nkaeta wama kayokaya kina miyigina kanarasano.

¹⁵ Naeba pintanaba puriyakuwa, tigeba iba tiyakontanaba pabiyama puma miyiyo.

¹⁶ Naeba tagaka ukuwa abiyo: Kayokaya yagara kaꞌwaina aeba tabe yagarawampa nkawameta agasimagina, mikenaenaba pipa kampa waintiye. Piya, yoga kina kaꞌwaina yogawama nkabawampa ae awameta asugasima mikenaenaba pipa kampa waintiye, untiye.

¹⁷ Pigoya pi kamanapa aogima abibebe pumagiri pabi nkawameta miyiginaba aogi pikiye, untiye.

¹⁸ Naeba aꞌyaꞌma tigekaba kampa yuwe. Kibiꞌma ibabuwaitanto igeka abibebe puntuwe. Pigoya, mono kamana awaꞌenama nkauꞌwapa mayama aborakiye:

Naege naninta kaga nai ntagarama aeba agisa wanta naekiye unti, pi kamanaꞌama nkauꞌwapa aborakiye, untiye.

¹⁹ Piya, pintanaba kampa aborantegi, ibaba pika urimuwe. Piya, ainti pintana aborakiripa, kanara tigeba abimagiri: Aeba pi aobi pompe ntagarawema, naegaꞌma timatiti punatakibewe.

²⁰ Piya, naeba tagaka urimukuwa, abiyo. Kaꞌwaina aeba yogara otantaꞌnaba ababuma kayone potakibiꞌnaba, yoga ago nae nababumagina aogi punatakiye. Piya, kaꞌwaina aeba nae nababuma aogi punatakibiꞌnaba, unatantiꞌna ae aogi potakiye, Isu untiye. Isuba Yutasika uma aborantiye

²¹ Isu aeba pi kamana untana, aumawamaba tabera kunta abuntiye. Aibogana aborama maya uwaimintiye: Naeba tagaka ukuwa abiyo. Tigetisa kaꞌwaina naepa kuna punatakiye, untiye.

²² Piya yogini, abagi kina igeba ankaobi aobi puwaentini: Pipa kekabaya iye, uma kampa napintawe.

²³ Pigoya, abagi yagara ka Isu nkagora mintanto, aeba naekaba tabera abugaome ntagara,

²⁴ naeka Pitaba ayatasa awame puma maya untiye: Abigagana ugameno. Kekabaya iye, untiye.

²⁵ Piya yoga naeba Isu nkagora parokaema maya untuwe: Waꞌega kaeba keka yene. Yuwagana,

²⁶ Isuba maya untiye: Pareti wanipi nkaema amekana maekibi ntagara, pi aeka yuwe, untiye. Piya ute pareti wanipi nkaema Saimoni ntagara Yutasi Isikeriyoti, ae amogana maentiye.

²⁷ Piya maema naogana Sataniba antabaipinti uma pasintiye. Piya pogana Isuba maya omintiye: Pikena yempentanaba pipa karuꞌena po, untiye.

²⁸ Piya kamana omogini pi kaga mintume kinaꞌmiba pi kamana agoba kampa abibebe puntawe.

²⁹ Piya puntini kaꞌisamiba maya untawe: Yutasi aeba mone pokisire maema kabima miyikana aota yagasaena ika penema otabera, kusi kina mone imenema iyema, napintawe.

³⁰ Piyama napiyuguna, Yutasiba pareti nagaite pabigo irosaꞌma aseka wagaintiye. Isu aeba kasa kamana ago untiye

³¹ Yutasiba wagasogana Isuba abagi kinaꞌwa maya uwaimintiye: Mapa Wasanama Ntagara nae eꞌwasaenane aborakiye. Piya, naeka uma Kotitisa eꞌwasaenaba kaga aborakiye.

³² Naeba Kotitisa eꞌwasaena maema aborantoka Koti aewa nae eꞌwasaenaba pabiyama maema aborakiye. Pi kanapa agaro ntaganto pabigo aborakiye, untiye.

³³ Piya untana, to maya untiye: We, yakarakiꞌnuntepa, naeba agaro ntaganto tigege mikuwe. Piya, aintiba naguyosagakibewe. Yuta kina uwaimintosa puma, tigepa pabiyama urimukuwe: Nae wakuboti pabiyama kampa wakibewe.

³⁴ Pigoya, ma kasa ago kamana urimukuwe: Wasana agu kaoꞌena puwaitama kayone puwaitaiyoma, yuwe. Naeba agu kaoꞌena puma kayone puritama miyosa puma, pabiyama tigeba agu kaoꞌena puma kayone puwaitama miyiyo, yuwe.

³⁵ Agu kaoꞌena puma kayone pigini, wasanamiba tigaiginaba nae naokinaꞌne kanta piyo, Isu piya untiye. Pita Isu akabitakena kamana untiye

³⁶ Piya yogana, Saimoni Pita abigama maya untiye: Waꞌega, kaeba aeta wakibenema, abigaogana Isuba maya untiye: Nae wakubotiba pipa ma ntagaba kampa wakibene. Ainti mintana pitaꞌiba wakibene, untiye.

³⁷ Piya yogana Pitaba maya untiye: Waꞌega, naeba nanaga kakaꞌiba kampa kaegaꞌma wakuwe. Naeba kaeka uma mikenaenanepa kanara kaikuwe, untiye.

³⁸ Piya yogana Isuba maya omintiye: Kaeba naeka uma mikenaenagapa kaikenaga yeno. We, naeba tagaka ugamukuwa abo: Kokorewamaba kampa aga untakana, kaeba kakagara uwame unatakibene, Isu untiye.

14

¹ Pigoya, Isu to kamana maya untiye: Tigeba tiguꞌamaba tabaraba puma pamiba a-piyo. Tigeba Koti aegaꞌma timatiti puntiri, naepa pabiyama naegaꞌma timatiti piyo, untiye.

² Nabanempa kumatiba namapa uwoma wairite wantiye. Pi kapa kampa waintemisinta kampa urimosine. Piya, naeba maruntakiꞌena puritakena wakuwe, untiye.

³ Piya, wama maruntakiꞌenari puritate, to kake aꞌwae puma kanama tibabute wakiri, nae mikuboti kaga umikibewe, untiye.

⁴ Piya, wakubo pi kipa ago agawe, untiye.

⁵ Piya yogana Tomasi maya omintiye: Waꞌega, kaeba aeta wakibene. Pipa taeba kampa abintune. Pi kipa ayama agakune, untiye.

⁶ Piya yogana Isuba maya omintiye: Kepe taga ntanamape miyabaꞌenamape agowapa naewe. Nae nagaite nabati uma irosakenaenaba kampa waintiye.

⁷ Tigeba naepa nagabebe puma yesinta, nabanempapa pabiyama agabebe pesine. Pigoya mapa nabanempapa agobimagiri agantiri, naepa nagama aeka abibebe pewe, untiye.

⁸ Piya yogana Piripiba maya untiye: Waꞌega, kaeba kabapa tayakega agama abekana aꞌya peno, untiye.

⁹ Piya yogana Isuba maya omintiye: Piripi, naeba eꞌero ntaga tigege miyoganapa, kaeba kampa nagabebe pena, a. We, kaꞌwaina aeba nae nagaiꞌnaba nabapa agaye. Piya, kaeba nanaga: Waꞌega, kaeba kabapa tayakega agano, yene, a.

¹⁰ Kaeba mayamaba kampa abeno: Nababa naege miyegi, naeba pabiyama nabanempage minta, kamana urimopa pipa naeꞌne ntaumanepisaba kampa urimuwa, nabanempa nagupi mpima esegiyena aboranamegi, aꞌyaꞌma yugaba puwe, untiye.

¹¹ Naeba nabage miyogana, nababa pabiyama naege miyeba, abibebe piyo. Pi kamanapa abigina tagantana peno. Piya, kamanaꞌnempa kampa kanarasaritakiripa, aꞌyaꞌwaema yuga pontananempa abima timatiti pigina kanarasaritano, untiye.

¹² Naeba tagake urimukuwa abiyo: Nae naegaꞌma amatiti pikibiꞌnaba, yoga posa puma pabiyama pikiye. Pigoya pabinkantoba kampaye. Naepa asunagasima pikiye, untiye. Pipa nanagawe. We, naeba nabati ikuwe.

¹³ Iyekiri tigeba nae nagegaꞌe uma esikibe nkawameta timukuwe. Pipa nabanempa eꞌwasaena yagarawa naeka uma aborakibika umagi piya pukuwe.

¹⁴ Pigoya, nae nagegaꞌe uma esunataigipa, owe uma aborarimukuwe, untiye. Isu: Aota Awamusa otakana tumikiye, untiye

¹⁵ Pigoya, Isu to maya untiye: Tigu napi napiyenaripa naeti atama naegarantiripa, nawamu wasiyiyo.

¹⁶ Piya pigipa naba esotakana to tiyoꞌmaema esegi puritakena otakana tumima tigege asi nasi mayabaꞌmikiye.

¹⁷ Pipa taga kamanaꞌama Nkawamusane. Mampabisa kinaꞌmiba igeba kampa agabebe puntini, kampa abibebe puntini pepa, kanara kampa maekibewe. Pipa tigeba aeka abintawe. Aeba tigege kaga mintiya, aintiba tintabaipinti ampikiye, Isu piya untiye.

¹⁸ Pigoya, naeba titate wakiri, kintarama misanaga tigeti to kake aꞌwae puma kanakuwe.

¹⁹ Agaro ntaganto ka waintikana, pi aꞌya pekiniba mampabisa kinaꞌmiba to kake kampa nagakibewe. We, tigeba nagakibewe. Naeba aososima miyaba miyekiri tigeba pabiyama aososima miyaba mikibewe, untiye.

²⁰ Pigoya, pi kanabipa nabanempaba naege kaga miyeka, naeba tigege kaga mikuwe. Pipa tigeba naege atokaema miyekiri agabebe pikibewe, untiye.

²¹ Kaꞌwaina aeba ago kamanaꞌne aogima mpaema mima aegarakibiꞌnaba, aeba agu kaoꞌena punatakiye. Piya, kaꞌwaina aeba nae agu kaoꞌena punatakanaba, aepa nabanempaba pabiyama agu kaoꞌena potakiye. Piya, naeꞌnepa agu kaoꞌena potamagi agonepa uma aborakana aeba nagakiye, Isu untiye.

²² Piya yogana Isikeriyoti yagara wanane. To ka Yutasi, ae aukaba, abigama maya untiye: Kaeba ayama agogapa taetimanapa maema aborantana to kaꞌisa mampabisa kinaꞌmipa kaka waitakenaga yenema, abigantiye.

²³ Piyama abigaogana Isuba maya kamana aꞌwae pomintiye: Kaꞌwaina aeba agu kaoꞌena punatakibiꞌnaba, kamanaꞌne abima aegaꞌma wasikiye. Piya pekana nabanempaba aepa pabiyama agu kaoꞌena potakiye. Aibekara kaga aeti ampa irosaꞌma miyabaꞌmikuse, untiye.

²⁴ Piya, to kaꞌwaina aeba agu kaoꞌena kampa punatakibiꞌnaba, kamanaꞌnepa ayabaya aeba abima aegaꞌma wasikiye. Pipa kampaye. Pigoya, ma kamana abepa naeꞌnetisaba kampaye. Naba unatanti, aetisawe, Isu untiye.

²⁵ Pigoya naene tigege mintapa, piya kamanapa urimone, untiye.

²⁶ Pigoya ainti esegima asiritakena Aota Awamusa, aepa nabanempaba nae nawamuta otakana tumima aꞌyaꞌma kamanapa urimikiye. Piya puntana, nae urimo kamana pipa uma to aososirimikiye, untiye.

²⁷ Naeba nanta paruyenane tigeti ataritauwe. Mampabisa kinaꞌma nkanta paruyena wanane. Naeꞌne paruyena timuwe. Pika tiguꞌamaba tabaraba puma tiyekuruba a-peno.

²⁸ Naeba wama uminta, ainti to kake aꞌwae puma kanakuwe, urimogiri ago abewe. Piya, Tigeba tigupa naeti atama yesinta, pipa nabati ikubo pi abimaba, tinta wamaba asoya pemisine. Nababa aeba naepa asunagasima mintika napima piya pusanawe, untiye.

²⁹ Pintanaba kampa aborantegi, maru paitama urimuwe. Pintana aborakiripa maya yiyo: Kamana uramintiꞌna nkauꞌwapa aboraye, yiyo.

³⁰ Naeba mapa uwoma kamanapa kampa amato puma urimukuwe. Mampabisa tabe kumpari yagara kanakena aseꞌyo pikana, kanama naeta ampa asesepaꞌurikiye.

³¹ Piya, naeba naba agu kaoꞌena potauwa, pika mampabisa aꞌyaꞌma kinaꞌmi agabebema abikibeka yoga unatanti puwe. Pigoya, tigeba asiyigi wano, Isu uwaimintiye.

15

¹ Pigoya, naeba taga waini igaꞌna agowe. Piya, nabanempaba waini yuga wama nkabawe.

² Piya, ka amawama naeti aꞌwa kampa aentana uwa waiyeginaba, agayugasaye. Piya, to ka amawama aꞌwantaga wainteginaba, kasama arosagina anosama to uwoma a aeyanema kabitaye.

³ Piya pemisa puma naeba mono urimogiri abima asoya puma mintawe.

⁴ Piya puma, tigeba naege miyigi, naeba pabiyama tigege mikuwe. Waini amawamaba agowamati kampa atokaema waintakanaba aꞌwapa kampa aekiye. Kampa aeyemisa puma tigeba naetiba kampa atokaema mintiripa, auꞌwapa kampa maema aborakibewe.

⁵ Pigoya, waini igaꞌna agoba naewe. Amanepa tigewe. Kaꞌwaina aeba naege atokaema miyekapa naeba aegeba pabiyama atokaema mikuwe. Pigoya, piꞌnaba anopa tabenama aborakiye. Tigeba naetiba kampa atokaema mintiri, aꞌyaꞌwaemaena pikenaenaba kampa waikiye, untiye.

⁶ Piya, kaꞌwaina aeba naeti kampa atokaema miyekapa agaikuwe. Eya, waini amawamapa kasagana asaginiba, kibiꞌma yakupi kasagana tamisa pabi nkawameta potakiye, untiye.

⁷ Pigoya, tigeba naeti atokaema mima kamanaꞌnempa aegaꞌmagiri, esunatakibe nkawameta timukuwe untiye.

⁸ Tigeba auꞌwapa uwomantana maema aborama, nae naokinaꞌnentana puma miyiginaba, nabanempaba tabe aꞌmuntana aborakiye.

⁹ Pigoya, nababa naepa agu kaoꞌena punatagi, naeba pabiyama tigepa kaoꞌena puritauwe. Pika tigeba agu kaoꞌenanapi miyiyo.

¹⁰ Naeba nabanempa nkawamupisa kamana wasiyuꞌma, ae agu kaoꞌenabi miyuwe. Tigeba pabiyama nawamupisa kamanaꞌne wasimagiripa, nae agu kaoꞌenanepi mikibewe, untiye.

¹¹ Pigoya, naꞌmuntananempaba tigeti taꞌema waiyenema, ma kamanapa urimiwaeyuwe, pika tiꞌmuntanaripa aborama anosama abae peno, untiye.

¹² Pigoya, nawamupisa kamanapa mayama urimuwe: Naeba agu kaoꞌena puritaosa puma, tigeba agu kaoꞌena puma miyiyo.

¹³ Pigoya, kaꞌwaina aeba aoꞌmika uma mikenaenawa kasima iyoꞌmaekibiꞌnaba, pipa aꞌyaꞌma to agu kaoꞌena pikenaenapa asugaikiye.

¹⁴ Piya, yoga uritao pipa pigipa, tigeba naokinaꞌnene urimukuwe, untiye.

¹⁵ Naeba tigaopa kayokaya kina kantaba kampa pewe. Kayokaya yagaramaba tabe yagarawampa untabaipinti kamana waintipa, pipa kampa abiye. Naeba pipa nabanempatisa kamana abinto, pabi nkawameta uma aborama urimiwaentoka tigama naokinaꞌnene urimuwe, untiye.

¹⁶ Pigoya, tigeba naepa kampa naba punatantane. Naeba tige tiba puritantone. Pika tigeba wama yogara umima auꞌwa maema aboraiyema, uritantone. Pigoya, maema auꞌwa aboraigina waiyaba waiyeno. Piya puntiri nae nagera naba esotakibe nkawameta timikiye.

¹⁷ Piya, naeba ago kamanapa maya urimuwe: Tigeba tiyokina agu kaoꞌena puwaitaiyo, Isu untiye. Igobi Isupa potantasa puma abagikinapa puwaitakibewe

¹⁸ Pigoya, mampabisa kinaꞌmi igobi puritaigiripa, mayama abiyo: Waꞌega Yagara aepa paipa pabiyama agobima igobi potantakini pewe, yiyo.

¹⁹ Pigoya mampabisa kinaꞌmi ige aruyenabi uma pasesinta, kayone puritasine. Naeba pipa ige aruyenabisa kibiꞌma tiba puntogiri to awameta puma miyegini igobi puritawe.

²⁰ Naeba kamana ka maya urimintona, pika napiyiyo: Kayokaya yagarama tabe yagarawa asugasima mikenaenaba kampa waintiye: Piya, igeba naepa igobi punatama maꞌena punatantakini, tigepa igobi puritama maꞌena puritakibewe. Igeba nae kamanapa aꞌa-o untakini, tigepa pabiyama aꞌa-o uritakibewe.

²¹ Naba unatantiꞌnama nkagegaba kampa napiyekini naeka uma pabiya igobi puritakibewe.

²² Naeba igetiba kampa tumima agoba kampa uwaimintosinta, aguntaena kampa wainta miyesine. Pigoya ago aborama awaimintone. Ibaba aguntaenawai kakakena kipa kampa waiye, untiye.

²³ Piya, kaꞌwaina aeba agobi punatakibiꞌnaba, nabanempa pabiyama agobi potakiye.

²⁴ Naeba abakawaipipa toma toma ntugaba kaꞌisa kinaꞌmiba pesa puma yogaba kampa asugasima puntosinta, aguntaenawai kampa wainta miyesine. Piya, mapa kana yugaba ago pogini agawaentiniba uwa naepa igobi punatantini, nabanempapa pabiyama kaga igobi potawe.

²⁵ Piya pegana mono isapipa kamana ka mayama wainti, piꞌna esegi piye: Igeba uwarakaꞌya igobi punatantawe, iye. Pipa iba esegi piye, untiye.

²⁶ Pigoya, esegi puritakena taga kamanaꞌama Nkawamusa, nabati mintika, aepa otakana nabatisa tumima agonepa uma aborakiye, untiye.

²⁷ Piya, tigeba yoga agobintotasa naege mirite kanantasa puma, pabiyama agonepa uma aboraiyo, Isu untiye.

16

¹ Piya untana to maya untiye: Timatitiꞌenari kaisanagaba kampa nabegi, ma kamanapa urimuwe, untiye.

² Piya, mono namapisaba tigarubantini, agaro ntaganto tiyeguma kaintini puma: Kotinta aogi yuga pune, uma piya pikibewe.

³ Nabake naeke agoresipa kampa abekini, tigepa pabiya puritakibewe.

⁴ Naeba kamana maru aborama urimopa, pi ainti aborakiripa: Aeba pika pai uramintine, yiyo. Piya, paipa tigege uwa minta, karuꞌenaba kampa urimintone. Titate wakena punta, piya urimuwe, piya untiye. Aota Awamusaꞌama nkagowapa aborantiye

⁵ Piya untana Isu to maya untiye: Mapa unatantiꞌna aeti wakena poganaba, nana pegina tigepisa kaꞌwainaba: Kaeba aeta wakibenema, kampa nabigaye, a.

⁶ Piya kamana urimoꞌna, uwa tintabaipintiba tintaraꞌenamaba pumaeyagiri kampa nabigawe, untiye.

⁷ Naeba taga kamana ukuwa abiyo: Aꞌwae puma ikubopa, pipa tigeti auꞌwa aboranema ikuwe. Piya kampa iyosinta, pipa tige tiyoꞌmaekenaenaba kampa tumisine. Imaba, naeba otakana tigetiba tumikiye.

⁸ Tumekini, wasanami nkagowai maema mayama abikibewe: Aguntaena waintiya, arupuyena waintiya, aꞌyaꞌwaemaenama nkagowa maema aborakenaena waintiye, ukibewe.

⁹ Aguntaenama nkagoba mayama waintiye: Nae kampa naegaꞌma imatiti pemiꞌnaba aguntaenaba piye, untiye.

¹⁰ Arupuyenama nkagoba mayama waintiye: Naeba titate nabati arupu puritakenaga iyekiri, tigeba to kake kampa nagakibewe, untiye.

¹¹ Ago maema aborakenaenaba pipa mayama aborakiye: Mampabisa tabe yagara ae aebasanakana, piꞌna nkagoba aborakiye, Isu untiye.

¹² Naeba uwoma kamana waintemipa, pipa ma kanabi urimekiripa ayama maewaekibewe. Pipa kampaye.

¹³ Taga kamanaꞌama Nkawamusaꞌamaba, aeba pipa tumimagina asi nasi tagantanaba puriyakikiye. Piyama aeꞌwa nkaumabisaba kamanapa kampa urimikiye. Uma abintemisa suma aborama urimikiye. Piya, ainti pi aborakibintanagaba pipa uma aborarimikiye.

¹⁴ Pipa naetisa kamanapa mae uꞌma aborama urimikiye. Pintanamaba nae tabe nagi aborakiye.

¹⁵ Nabati aꞌyaꞌwaemaena waintemi, piꞌna nkagoba naewe. Pika: Aeba nae kamana maema aborama urimikiyema, urimuwe, Isu piya untiye. Antaraꞌenamaba aꞌwae puma aꞌmuntana aborakiye

¹⁶ Piya untana Isu to maya untiye: Uwaena yaganto waintika, pi aꞌya peka wakiri naguyosagakibewe. Piya, piꞌna nkaboboriba kanapa agaronkanto waintika, aꞌya peka kanakiri nagakibewe untiye.

¹⁷ Piya yogini, kaꞌisa abagi kinaꞌmiba mare-u me-u puma maya untawe: Aya kamanaka mayaba iye: Uwaena yaganto wainti, pipa aꞌya peka wakiri naguyosagakibewe, iye. Piꞌna nkaboboriba kanapa uwaenanto waintika, pipa aꞌya peka kanakiri nagakibewe, iye. Piya, to kapa: Nabati ikuwe, yipa, ayagabaya iye, untawe.

¹⁸ Piya untini to kake maya untawe: Kanapa agaro ntaganto wainti, pipa nanaga iye. Ae yemi kamanaꞌama nkagoba taeba kampa napiyune, untawe.

¹⁹ Piya untini abigakena puguna, Isuba igabebe puntana maya uwaimintiye: Kamana maya urimoka uma abewe: Agaro ntaganto waintika, pi aꞌya peka wakiri naguyosagakibewe. Pigoya piꞌna nkaboboriba pabiyama agaro ntaganto waintika, pipa aꞌya pekapa kanakiri nagakibewe yo kamana mare-u me-uba pewe, a.

²⁰ We, naeba tagaka urimukuwa abiyo: Tigeba tabe kubeꞌena puma tintaraꞌena pigini, mampabisa kinaꞌmiba iꞌmu pikibewe. Piya pigina tige tintawamaba iba kunta pumagiri, aintiba aꞌwae puma tabera tiꞌmuntana pikibewe, untiye.

²¹ Pigoya, waya kaꞌwaina aeba yagara yakari pikena kana aboraginaba tabera aukiye. Pabigo yagara yakari potagina, aukemintanagaba toba kampa napiyikana, yagara aboramika anta asoya puma aꞌmu piye, untiye.

²² Piya pemisa puma tigeba ma kanabipa tintaraꞌenabi mikibewe. Mintigi, to kake aꞌwae puma ampa tigakiripa, tinta asoyaena aborakiye. Pigoya, pi tinta asoyaenaba kaꞌwainaba kampa tipatikiye, untiye.

²³ Piya, pi ntagaba kaꞌenagaba kampa nabigakibewe. Kampaye. Naeba tagaka urimukuwa abiyo: Tigeba nae naba aꞌyaꞌwaemaenaga esotaiginaba nae nageraka uma aborarimikiye.

²⁴ Paipa tigeba nae nage umaba kampa aisuma maentane. Pigoya mapa nunamu uma maeyigina, tinta asoyaenarimpaba aborama abae peno, Isu piya untiye. Isu aeba mampabisaenaba asugaintiye

²⁵ Pigoya, Isuba to maya untiye: Kamana urimita kanama mintantopa, pipa meto kamana urimintone. Piya, aintiba meto kamanapa to kake kampa urimukuwe. Naeba nabanempa nkago uwa aborama urimukuwe.

²⁶ Pigoya, pi ntagaba tigekaba naene kampa nunamu yekiri, tigeba nae nageraka nunamu ukibepa nababa aewa napima tiyoꞌmaekiye, untiye.

²⁷ Naeba Kotitisa tuminto, pi kamanapa abibebe pu uꞌma, agu kaoꞌena punataka naba aeba pabiyama agu kaoꞌena puritama tiyoꞌmaekiye, untiye.

²⁸ Pigoya, naeba nabapa atate mabi tumintone. Pika mampaba atate nabati to kake ikuwe, untiye.

²⁹ Piya yogini abagi kinaꞌmiba igeba maya omintawe: Mapa meto kamanapa kampa yempekana uwa aborama uramene, untawe.

³⁰ Piya, kaekaba mayama abune: Wasanamiba kabigasanaga kampa iyobi pempene. Kaeba aꞌyaꞌwaemaenaba abiwaeyene. Piya peka kaeba Kotige kaga miyempetisa kanantampenema abima kaegaꞌma tamatiti pune, untawe.

³¹ Piya yuguna Isuba maya uwaimintiye: Ibaba taga naegaꞌma timatiti punatawo.

³² Abiyo. Kanapa ka waintikana pi agaro aborakiniba, naepa natate aibarara puma kumaꞌwaiti wagana puwaewakibewe. Pigoya, nataigipa nabinepa kampa mikubokana, nababa naege mikiye, untiye.

³³ Tigeti paruyena waiyenema, pi kamanapa urimuwe. Piya, tigeba mabipa kuntaenabi mikibewe. Pigoya, naeba mampabisaenaba ago asugasuwe. Pika napima tiguꞌamaba esegi puma waiyeno, Isu piya untiye.

17

¹ Pigoya, Isu aeba pi kamanapa uma aꞌya atate, mantari aoma urintana, maya uma nunamu untiye: Naba, kanaꞌnepa ago aborawaya, kaeba yagaraga nae nageba maema asagaꞌyuyega, naeba pabiyama kae kage maema asagaꞌyuyeno, untiye.

² Piya, kaeba maga maga aꞌyaꞌma kinaꞌmi tabe agowai unatantampene. Piya puntana wasana naeti iba puwaitantampe nkawameta igepa miyabaꞌena aborama imoma unatantampene, untiye.

³ Pigoya miyabaꞌenama nkagoba pipa maya ki waintiye: Wasanami Koti taga kaꞌantowema kaekaba napintini, piya naekaba unatantampe. Isu Karaisitiwema piyama napiyiginaba, miyabaꞌena aborawaimeno, untiye.

⁴ Yoga unatantampepa, pipa puma aꞌya pumagi mabi kageba asagaꞌyuyuwe.

⁵ Pigoya, maba kampa aborantoga, manta eꞌwasaenanentaga mintantona, pabiyama to kake aꞌwae puma namega maema kaora miyeno, untiye.

⁶ Piya untana to maya untiye: Mampabisa kina ibabuma namintampe kinaꞌmi, kae agogapa aborama uwaimeno. Igeba kae kaokina mintuguna igepa nae namintampena. Pika igeba kae kamanapa aogima aegarantane.

⁷ Piya, aꞌyaꞌwaemaena wainatantipa pipa kaetisaena manane. Igeba pipa abibebe pewe.

⁸ Kaeba aꞌyaꞌma kamana unamintampepa, pipa naeba ago uwaimintogini, igeba abima maentane. Piya, paipa kaege kaga minta kanantokaba igeba taga abibebe pewe. Piya, kae unataugu naeba kanantokaba igeba abima imatiti pugatawe.

⁹ Naeba igeku uma nunamu ugatauwe. Namuꞌisa kinaꞌmika umaba kampa esugatauwa, namintampe kinaꞌmika uma esugatauwe. Igeba kae kaokinane.

¹⁰ Piya, aꞌyaꞌma kinaꞌnepa pipa kaeꞌenawe. Piya, aꞌyaꞌwaema kinakapa pipa naeꞌenawe. Pika igeba nae nageba maema asagaꞌyukenaena aborama waintiye, untiye.

¹¹ Pigoya, naeba mabi mikenaenane pabigo aꞌya piye. Igeba pipa mabi amato puma mintigi, naeba kaeti ikena puwe. Aota naba, kaeba aogima kabiwaitagini, igeba kae kagera miyiyo. Pi kagiba ago nae namintampene. Piya tasigeba kaꞌena pumagira miyomesa puma, kaeba kabiwaitagini, igeba ka awameta mikibewe, untiye.

¹² Pigoya, igege minta, kae kageraka kayone puwaitantone. Pi kagiba ago nae namintampene. Piya puma kiya kabiwaitauwagini kapa kampa itama ataenaba puntane. Piya, mono isaꞌama nkauꞌwa aborasanaga, aꞌabibisa yagara, kaꞌwainanto ataena puntiye.

¹³ Pigoya, ibaba kaeti ikena punta, mataꞌi kamanaꞌne piya uwaimekana nae naꞌmuntananepa igeti taꞌema wama pumaewakiye, untiye.

¹⁴ Piya, naeba kamanaka uwaꞌimogini maema miyeginiba, namuꞌisa kinaꞌmiba igobi puwaitawe. Naeba mampabisaba kampa mintuwe. Igeba pabiyama mampabisaba kampa mintagini piya igobi puwaitawe.

¹⁵ Piya, kaeba mabisa ibabomaba kampaye. Aguntaenaraka iyoꞌmaeyoma ugamuwe, unti untiye.

¹⁶ Piya, nabupa mabipa kampa pantiye, piya pabiyama igepa mabipa ibupa kampa pantiye, untiye.

¹⁷ Pigoya, kae taga kamana agoba ige igupi aota atagana waiyeno. Kamanakapa pipa taga kamanane.

¹⁸ Paipa kaeba unatauku, kanama mampabisa kinaꞌmi ige abakapi ampa mintantosa puma, pabiyama naeba uwaitakini igeba wama mampabisa kinaꞌmi ibakapinti umikibewe, untiye.

¹⁹ Piya, naeba naguꞌnaumaba kaeti utawaitama igepa iyoꞌmaeyuwe. Igeba tagantana puma iguꞌimaba kaeti ataiyema, piya puwe, untiye.

²⁰ Pigoya, naeba igeꞌamanakaba kampa esugatauwe. Mono uwaimekini abima naegaꞌma imatiti punatakibe kina, igeka kaga esugatauwe, untiye.

²¹ Piya, igeba igupa kata atama atokaema miyiyema, ugamuwe. Naba, kaeba naege miyeka, naeba pabiyama kaege miyuwe. Pabiyamagini igeba tasigege kaga misanaga nabiye. Piya pigini, mampabisa aꞌyaꞌma kinaꞌmiba ige agowai igama, kae unatauku kananto, pipa abima kaegaꞌma imatiti piyo, untiye.

²² Tasigeba kaꞌanto mintuse. Pabiyama igeba igupa kata atamagini miyiyo. Piyama miyiyema eꞌwasaenaba namintampe, pipa imintone, untiye.

²³ Naeba igege miyekana kaeba naege miyegini, igeba igutasa paibuꞌma atokaema pagaꞌena puma miyiyo. Piyama miyigini, namuꞌisa kinaꞌmiba ige agowai igama, kae unatauku tuminto pipa abibebe piyo. Piya, naepa agu kaoꞌena punatantana, igepa kaga puwaitampe, pipe kaga abima esegi piyo, untiye.

²⁴ Naba, namintampe kina igeba nae mikubota kaga misanaga nabegi, ugamuwe. Pigoya pai maba kampa aborantogana agu kaoꞌena punatamagina eꞌwasaena namintampe, pi naege mima agama iꞌmu piyo, untiye.

²⁵ Naba, aogiyenama nkagogawe. Mampabisa kinaꞌmiba kaekaba kampa abibebe puntawe. Piya, naeba kaekaba abibebe pogini, naokinaꞌmiba kaega unatauku tuminto, pipa abima esegi pewe, untiye.

²⁶ Naeba kage kawaga kamanaka uma aborawaimintosa puma, to kake aborama uwaimima mikuwe. Piya, agu kaoꞌena nae punatantampesa puma, pabiyama igeti waiyeka kata mikubompeka, kamanakapa to kake pabiyama uwaimima mikuwe, Isu untiye.

18

¹ Pigoya Isu aeba pi kamanapa uma aꞌya atate abagi kinaꞌwa ibabute kumatisa tumima, Kitoroni wani taꞌema, to mari yoga waintometi pitaꞌi wantawe.

² Pigoya Isube abagi kinaꞌwape pitaꞌiba asi nasi aki puma mimi pumekana, Yutasi kuna yagara, aeba pi kana yugaba agantiye.

³ Pigoya pitaꞌi mintuguna, Yutasiba Parasi aruyenabisabe tabe mono kiye kinaꞌmitisabe irebu kinape ibabogini kaneꞌwaipe maꞌena kasupe maete ampa irosantawe.

⁴ Irosauguna, Isu aeba pintana potakenaenaba pipa abintanaba, igori wama: Tigeba keka aguyosagawema, ibigantiye.

⁵ Piyama ibigaogini igeba: Isu Nasareti kumatasa yagaragawe, untawe. Piya yuguna: Naeba pipa maye, untiye. Pigoya, Yutasi kuna yagara aeba igege kanama ibakapinti ampintantiye.

⁶ Pigoya Isuba: Naeba pipa maye, uwaimoginiba igeba ikaꞌisa wama wareꞌnantawe.

⁷ Piya puguna to kake: Tigeba keka aguyosagawema, ibigantiye. Piyama ibigaogini igeba: Isu Nasareti yagaragawe, untawe.

⁸ Piya yuguna Isuba maya uwaimintiye: Naeba ago urimuwe. Naeba maye. Naeka naguyosagantiripa ma kinapa itaigini waiyo, untiye.

⁹ Piya yogana kamana maya unti, pi nkauꞌwa aborantiye: Namintampe kina igepa kapa kampa itakuwe unti, pi nkauꞌwa aborantiye.

¹⁰ Pigoya, Saimoni Pita aeba kasopa urintome, pi abamu kantibisa aꞌyubumagina tabe mono kiye yagarama kayokaya yagarawapa aeguma ayatakantisa agiba arisakaintiye. Kana yagarama nkagewapa Maokasiwe.

¹¹ Piya pogana Isuba maya omintiye: Kasokapa kabamu kantibinti maema paka puro. Nabanempa nauki nakiyena atanatantintanaba pipa aꞌa-oba kampa ukuwe, Isu untiye. Igeba Isu ababute Anasiti wantawe

¹² Piya puntini, irebu kinape kiyawaipe Yuta kinaꞌmi nkirebu kinape, igeba Isupa arakuꞌma igaꞌnarasa kirokaemagini,

¹³ Anasi ntamapinti ababute wantawe. Piya, pi kabubi Yuta kinaꞌmi paitama mono kiyewaimpa, agewapa Kayapasi, aeba Anasi nkaraga maentiye.

¹⁴ Pigoya, Kayapasi aeba Yuta kina Isuka maru maya uwaimintiye: Ka yagarama puꞌmagina aꞌyaꞌma kina iyoꞌmaeyakana kanarasano, untiye. Pitaba Isuka kampa agantuwema uwame untiye

¹⁵ Pigoya Isu ababute waugunisi, Saimoni Pitabe to aoꞌyagara kaꞌwainage aegaꞌma ikaꞌi wantase. Piya, aoꞌyagaramaba tabe mono kiye yagaraba agantika, aeba Isu aegaꞌma nama nkantabaipinti kaga uma pasintawe.

¹⁶ Pigoya, Pita aewa pi kagisa awari asima mintantiye. Piya pogana, aoꞌyagaraba tabe mono kiye yagarama ntamapinti mintometisa tumima, kagisa kabe kiye araga aeba omogana, kabe aiꞌataogana kagisa kagopinti ababogana. Pita uma pasintiye.

¹⁷ Piya pogana kabe kiye araga aeba Pita agama maya omintiye: Kaeba pipa mare ntagarama nkabagi kinaꞌmi nkaruyenabisawe, untiye. Piya yogana aeba: Naeba kampaye, untiye.

¹⁸ Piya, kayokaya kinape irebu kinape igeba esiba ibogini, yaku kaema tapimagini mintuguna, Pita aeba ige ibakapinti wama pabiyama yakuta tapintiye. Tabe mono kiye yagarama Isu abigantiye

¹⁹ Pigoya, monota paitanta kiye yagaramaba Isupa abagi kinaꞌwakabe kamana uwaimintana punti, pika abigantiye.

²⁰ Abigaogana, Isuba maya kamana aꞌwae pomintiye: Naeba kamanapa aꞌyaꞌma kinapa aborawaimone. Naeba kakamaba kampa yoka, Yuta kinaꞌmi uwa mono namapipe tabe mono namapipe aki pumagini mintagapa kamanapa uwaimi puntuwe.

²¹ Pipa nanaga naepa nabigane. Kamana uwaimogini abe kina, igeka yegini yosa puma ugamigina abo. Igeba kamanaꞌne uwaimogini ago abintawe, untiye.

²² Piya yogini, irebu kina mintume igetisa kaꞌwaina Isu nkgemiti aema maya untiye: Kaeba paitanta mono kiye yagaraba nanaga piya kamanapa omene, a, untiye.

²³ Piya yogana Isuba maya kamana untiye: Antage kamana yekanapa agoba yega abeno. Piya, aogi kamana yoganapa nanaga naeguyene, untiye.

²⁴ Piya yogana, Anasiba yogini Isupa aya kirokaetama monota paitanta kiye yagara Kayapasi aeti ababute wantawe. Pitaba Isupa kampa agantuwema tokake uwame untiye

²⁵ Pigoya, Saimoni Pitaba aeba pi ntakuta tapima mintogini, abigama maya untawe: Abagi kinaꞌwampi ige aruyenabisa kapa kaewoma, abigantawe.

²⁶ Abigauguna uwame uma: Naeba kampaye, untiye. Piya yogana, paitanta kiye yagarama kayokaya yagara ka, Pita age arisakainti ae agaya aeba maya untiye: We, kaeba yogabinti aege kaga mintaka kagaone, untiye.

²⁷ Piya yogana, Pitaba to kake aꞌa-o uma esegima uwame yogana, pabigo kokore aga untiye. Igeba Isu Pairatiti ababute wantawe

²⁸ Pigoya marogini, Isupa Kayapasi ntamapintisaba ababute paitanta kiye yagarama ntamapi intawe. Igeba Yuta kinaꞌmi nkakumparantaꞌena akayayekini Pasoba naninta aꞌa-o uragaisanagawemaba wasanami kiye Pairati ntamapintiba kampa intawe.

²⁹ Piyamagini igeba abeꞌi mintuguna, Pairatiba irosaꞌma igeti tumima ibigama maya untiye: Ma ntagaraba nana aguntaena pegiri ababute kanawema, ibigantiye.

³⁰ Ibigaogini igeba maya untawe: Aeba agunta yagara kampa mintemisinta, kaetiba kampa ababute kanaompesine, untawe.

³¹ Piya yuguna Pairatiba maya uwaimintiye: Tigeripa ababute wama ago kamanati wainti nkawameta kamanapa otaiyo, untiye. Piya yogini Yuta kinaꞌmiba maya omintawe: Pipa ka yagara aeguma kaikenaenaba taepa akutatantane, untawe.

³² Yuta kina igeba piya yuguna Isu aewa purikena kamana unti, pi kiꞌama nkauꞌwapa aborantiye.

³³ Pigoya, Pairatiba nama nkantabaipinti ima Isu nkagegaꞌe uma maya untiye: Kaeba taga Yuta kinaꞌmi Nkwaꞌega yagaragawoma, abigaogana,

³⁴ Isuba maya untiye: Pi kamanapa kaega kaumagapisa yepera kaꞌisa kinaꞌmi ugamegana unatane, untiye.

³⁵ Piya yogana Pairatiba maya untiye: Pipa naeba Yuta yagaraba kampaye. Kaeka kaokampibe tabe mono kiye kinakampibe igeba kababute naeti mekatawa, kaeba nana pekiniwe, untiye.

³⁶ Piya uma abigaogana Isuba maya untiye: Naeba mampabisa tabe yagaraba kampaye. Piya, mampabisa tabe yagara mintosinta irebu kinaꞌnempiba akentana pumagini naoꞌmaeyagini Yuta kinaꞌmiba ayamagini nayakuresine. Naeba mabisa tabe yagaraba kampaye. Naeba tonaraka kabiyone, untiye.

³⁷ Piya yogana Pairatiba maya untiye: Pigoya kaeba aota Waꞌega yagaragawo, yogana, Isuba maya untiye: Pabigo yene. Naeba taga kamana mabi uma aborakena tumima Waꞌega yagara mikena aborantone. Piya, aꞌyaꞌma kinaꞌmi taga kamana wasiye kinaꞌmi nawamupisa kamanaꞌne abewe, untiye.

³⁸ Piya yogana Pairatiba maya untiye: Pipa nana taga kamanane, untiye. Pairatiba Isu maripora aeguyiyo untiye

³⁹ Pika ka yekiri abiyo: Tigeba Pasoba yaga yega, taeba igaꞌna kina kapa iyoba timi pompene. Piya, mapa abigini kanarasakapa Yuta kinaꞌmiti tabe yagararipa iyobaꞌatakana uwa miritanoma, ibigantiye.

⁴⁰ Piyama ibigaogini, igeba tabe kamana uma maya untawe: Kampaye, aeꞌnane. Parabasi iyoba tamo, untawe. Pigoya Parabasi aeba to kinaꞌmintanaba uwa aꞌyugu maentana pome kamparaga yagarawe.

19

¹ Pigoya Pairati piya yogini, irebu kinaꞌmiba Isu eru kasutasa aeguntini,

² ake igaꞌna maema antarage ima aꞌnota taminokuꞌena potantawe. Piya puntini, waꞌega kinaꞌma tete kai kaga maema potantawe.

³ Piya potamagini agora arabama mima amiyo puma: Yuta kinaꞌmi Waꞌega, aya pene, untawe. Piya untini aowabi aeguntawe.

⁴ Piya puguna Pairatiba Yuta kinaꞌmiti to kake irosaꞌma maya untiye: Naeba otaogana tigeti tumemipa, naeba kaintanawakaba aguyosagauwa, tigeri agowapa agaiyo, untiye.

⁵ Pigoya, Isuba ake taminokupe tete kaibe potaumentaga irosaꞌma abeta tumpintogana Pairatiba iyakima: Ma ntagaraga agama aogima napiyiyo, untiye.

⁶ Pigoya tabe mono kiye kinaꞌmibe irebu kinaꞌmibe igeba agategini, esegi kamana uma: Maripora aeguyo, maripora aeguyo, untawe. Piya yuguna, Pairatiba iwamuta uꞌma maya untiye: Naeba kaintanawakaba aguyosagauwa, tige tigeri ababuma mariporapa aeguyiyo, untiye.

⁷ Piya yogini Yuta kina igeba maya untawe: Aewaka naeba Koti Ntagaranawe yemiꞌna, pipa piya kinapa puꞌwaiyoma, ago kamanatepipa untaka, purekana esegi peno, untawe.

⁸ Piya yuguna, Pairati aeba pi kamana abima to tabera aekuru puntiye.

⁹ Piya puntana, to kake nama nkantabaipinti ababute, abigama maya untiye: Kaeba aetasa aboratampene, untiye. Piya yogana Isuba kampa aꞌwae pomintiye.

¹⁰ Piya pogana Pairatiba maya omintiye: Kaeba kamanapa kampa unameno. We, naeba yekana mikenaenabe purikenaenabe esegiyenaba pipa namintapa, kaeba kampa abeno, untiye.

¹¹ Piya yogana Isuba maya omintiye: Inatisa yagara Koti kampa owe ugatantemisinta, naepa kaꞌena kampa punatampesine. Piya, kaeti unata kinaꞌmi kaintanawaimpaba kaepa asugagasaye, untiye.

¹² Piya yogana, Pairatiba pi kamana abite Isu uwa atakena yogini, Yuta kinaꞌmiba imo kamana umagini maya untawe: Kaeba kana yagara ae uwa atateginapa, to kake Sisa nkaoꞌyagaraba kampa mikibene. We, aewaka tabe yagara mintuwe yemipa, tabe yagara Sisa agobi potaye, untawe.

¹³ Pairatiba pi kamanapa abite karu pumagina, yogini Isupa ababute tumuguna kamana uma aꞌya pikena yabaewata maraꞌmintantiye. Pi kana yabaeba yabatasa yarage pumarantane. Pi kana yaragewama nkageba Iburu kamanapipa Kabatawe, untawe.

¹⁴ Pigoya, Yuta kinaꞌmiba igeba marekiniba Pasoba mikenagini aseꞌyo puma wantawe. Piya puguna kagi abebe pogana Pairatiba Yuta kina maya uwaimintiye: Tabe yagararipa mampaya agaiyo, untiye:

¹⁵ Piya yogini igeba tabe kamana uma maya untawe: Aeba kampa miyeno, kampa miyeno, maripora aepa aeguyo, untawe. Piya yuguna Pairatiba: We, tabe yagarari yekana maripora purenema yewo, untiye. Piya yogini, tabe kiye kinaꞌmi igeba maya kamana aꞌwae pomintawe: Aeba tae tabe yagaraba kampaye. Aroma kumatasa Sisa kaꞌanto ae miratantiye, untawe.

¹⁶ Piya yuguna Pairatiba abima paru puwaitamagina, Isu maripora purenema owe uwaitantiye. Igeba Isu maripora aeguntawe

¹⁷ Pigoya, irebu kinaꞌmiba igeba maripo maema Isu amuguna aesagaꞌurogini, maba ka agewapa Aꞌno nkayampu, Iburu kamanapipa Korikota, pitaꞌi ababute wantawe.

¹⁸ Ababute wama maripora pitaꞌi aeguntawe. Piya, agunta yagara taraba kaga isiyeguma to aukaꞌi to aukaꞌi puwaisitantini Isupa isibakapi atama arabawaitantawe.

¹⁹ Pigoya, Pairati yogini Isu nkaꞌnota maripora mayama awaꞌena kaema atantawe: Isu Nasareti kumatasa, Yuta kinaꞌmi Nkwaꞌega Yagarawema, kaema atantawe.

²⁰ Pigoya, Isu aegunta mpaba pipa tabe kuma agora waintomeka Yuta uwoma kinaꞌmi pitaꞌi wagana puntiniba, pi kana awaꞌenaba aisuntawe. Pigoya kana awaꞌena kaentapa Iburu kamanapisabe Aroma kamanapisabe Kariki kamanapisabe kaemarantawe.

²¹ Piya puguni, Yuta tabe mono kiye kinaꞌmiba igeba Pairati maya omintawe: Kaeba Yuta kinaꞌmi Waꞌega yagarawemaba, a-kaeyo. Piyama: Naeba Yuta kinaꞌmi Waꞌega Yagaranawe, aeꞌwaka untineba, kaeyo, untawe.

²² Piya yuguna, Pairatiba: Ago kaegasoka uwa waikiye, untiye.

²³ Pigoya, irebu kinaꞌmiba Isu maripora aeguntini, autasaena maema aꞌyigimpagini tarawa tarawakiꞌena puma urintawe. Piya, tabe kaiwapa pugunintaꞌenaba kampa waintogini,

²⁴ maya untawe: Pipa paga waintika atugekanaba ataena pusanaga, teteꞌena puma ka yagarama maeyano, untawe. Piya puguna mono isapisa kamana ka mayama wainti, piꞌna esegi puntiye: Igeba nautasaena pako purintini, kainetapa teteꞌena pukibewema, unti, pipa esegi puntiye.

²⁵ Piya, irebu kinaꞌmi piya puntawe. Piya puguna, Isu maripo agobipa mayama mintantawe: Anowampawa, anowampa nkaꞌnanto Mariya aeba Keropasi nkwaena, to Mariya Matara kumatasawa, sumagini mintantawe.

²⁶ Pigoya Isu anobe abagi yagara abugaome naeba mintuwaguna tasigategina, anowampa maya omintiye: Waya, mapa yagaragane, untiye.

²⁷ Piya untana, abagi yagaranapa maya unamintiye: Mapa kanogampawe, untiye. Piya unamoga naeba pi ntaga Isu nkanopa agamagi ababuma aogi potantuwe. Isu puꞌwantiye

²⁸ Pigoya Isu aeba yogawapa aꞌya pogana abite mono kamanaꞌama esegi penema maya untiye: Naeba wanika nabiye, untiye.

²⁹ Pigoya, kankabe ka asa wanipa awaitama waintogini, kai atuta maema ae uꞌmagini asara kitama awamuta mayotauguna nantiye.

³⁰ Pi asa wani nantana kegaꞌe uma: Pabigo ibanto yoganepa aꞌya waye, untiye. Piya yogana aꞌnopa kirosaogana aumawapa mesugaintiye. Irebu yagaramaba Isu irerasa ayatabi aerasibantiye

³¹ Pigoya, pipa Pasobarasaena maema aogi pikena yagagini, pi ntagaba tabe sabatigini, Yuta kinaꞌmipa kana wasana maripora iyegunta kina sabatira waisanagaba kampa ibuntiye. Piya pogini, igeba Pairatiti wama igisaba aegaꞌyuma akitama kaikenaga uma abigantawe.

³² Abigauguna, owe yogini, irebu kina igeba agunta yagara tara Isuke isiyegunta kaꞌwaina ayampuba aegaꞌyuntini, to kaꞌwainapa pabiyama aegaꞌyuntini puntawe.

³³ Piya puta Isuti ampa irosaꞌma agaumepa: Aeba ago puꞌwantiye, umagini agisaba kampa aegaꞌyuntawe.

³⁴ Piya puguna, irebu yagara kaꞌwaina ayatabi irerasa aerasiba ataogana, pabigo korape antipe pagintiye.

³⁵ Pigoya, naeba pipa naonepisa agabebe puntoka, ma kamanapa taga suwe. Eya, naeba abintuwe. Pi taga kamana yopa, pipa tigeba abibebe puma timatiti puma aegaraiyo, untiye.

³⁶ Piya, mono kamana ka mayama wainti, piꞌna nkauꞌwapa aborama esegi penema pintanaba aborantiye: Igeba ayampuba kampa aegaꞌyukibewe, untiye.

³⁷ Piya, mono kamana to kapa mayama waintiye: Igeba ayata aerasabantanati iyomarakibewe, pi unti kamanaꞌama nkauꞌwapa aborantiye. Isu kaintawe

³⁸ Pigoya, Yosepe Arimatiya kumatasa yagara aeba Isu aoꞌyagara mintantiye. Pigoya, Yuta kinaꞌmika aekuru puma amatitiꞌenawapa kampa aborama kakama mintantiye. Pigoya, aꞌya puwaogana pi ntagara aeba Pairatiti wama Isu ntabaewa akitakena uma aborama omintiye. Omogana, Pairatiba owe otaogana wama iyobantiye.

³⁹ Pigoya Nikotimasi, aseka Isuti wanti ntagara, aeba aogi agunta masawaepa kuntaenawapa 50 kirogaramurasa maete wama uma aoꞌmaema,

⁴⁰ Isu nkauti paiꞌatama wae kairasa asagakokintase. Piya, Yuta kinaꞌmiba wasana yabaeba pabiya puwaitabuntawe.

⁴¹ Pigoya Isu, aegunta mpa nkawamoriba yogaba ka waintantiye. Pitaꞌi yabapinti ka wasana aruwema kuꞌmaranta waintantiye. Pitaꞌiba wasanaba kampa kaiwaitantane. Pipa uwa kasaꞌena waintantiye.

⁴² Pigoya, Yuta kinapa Pasoba yaga agarosaogini, pikana wasana aruba agarota waintoginisi, isigeba, Isu nkaupa maete pitaꞌi metantase.

20

¹ Pigoya, marusa yaga sontara, Mariya Matara kumatasa wae aeba aruri agakena abaya aseka irosaꞌma wantiye. Wama uma irosaꞌma agaomepa, yabapa aꞌwaiwaogana uwa waintantiye.

² Piya pogana, agate karuꞌena wama Saimoni Pitape to ka Isu abugaome ntagara naepe uma urasimima maya untiye: Waꞌega yabaewapa ago isuꞌurewe. Piya pega taeba aguyosaꞌma kunta pune, untiye.

³ Piya yogira, Pitabe pi to aoꞌyagaranabe tasigeba wasana aruri wantuse.

⁴ Keꞌiba karuꞌena wama naeba Pitapa ogaite karuꞌena wama uma irosantuwe.

⁵ Uma irosaꞌmaba agepintiba kampa uma pasinta uwa uma ibikama agauwapa, wae kai asagakokimarantaꞌenamana waintoga agantuwe.

⁶ Piya pogana, Pitaba ainti kanama uma irosama, antabaipinti uma paiꞌma wae kai asagakokimarantaꞌena mana agantiye.

⁷ Pigoya, Isu nkaꞌnota asaetaume kaiba to kaꞌisa kaigeba kampa waintogana, abiwa akarakima ataogana to ka aukaꞌi waintogana agantiye.

⁸ Piya pogana aoꞌyagara naeba maru arura uma irosauwapa, uma paiꞌma pabiyama agawaemagi abibebe puntuwe.

⁹ Pigoya, Isu purintapisa aogama asikiyema, mono isapisa kamana ka wainti, pipa kampa napintuse.

¹⁰ Piya pumagira, tasigeba to kake aꞌwae pumagira kumati wantuse. Matara kumatasa Mariya aeba Isu agantiye

¹¹ Pigoya, Mariya aeba wasana aru agora mima kubeꞌena puntiye. Kubeꞌena puntana wama awara uma ibikama agaomepa,

¹² enisore tara wae kaiwaisintaga mintusuguna isigantiye. Kaꞌwainaba Isu nkaꞌno ataumeti miyogana, to kaꞌwaina agisa ataumeti mintantiye.

¹³ Pigoya, isigeba mayama untase: Waya, kaeba nanaga kubeꞌenaba penema, abigausuguna, aeba maya untiye: Waꞌegane isuꞌurite tori wagasaga aguyosagauwe, untiye.

¹⁴ Piya ute aꞌwae puma Isu aewa agantiye. Agantanaba Isu aowarapa aogimaba kampa agabebe puma agantiye.

¹⁵ Piya pogana, Isuba abigama maya untiye: Waya, kaeba keka aguyosaꞌma kubeꞌenaba pene, untiye. Piya yogana, aeba kana yogawama nkaba mintiyema, napima maya omintiye: Tabe yagara, kaeba wasana isuꞌma tori maete metantanapa yega abite wama umaeyano, untiye.

¹⁶ Piya yogana Isuba: Mariya, untiye. Yogana aeba aꞌwae puma Yuta kamanapisa: Arabonai, untiye. Pipa tae kamanapisa: Tisawe, untiye.

¹⁷ Piya yogana Isuba maya omintiye: Nabanempatiba kampa intuwa, nautapa a-ntaukaya po. Kaeba wama naokina maya uwaimo: Nae nababa pipa tige tibawe. Piya, nae Kotiba pipa tige Kotiwe. Pika aeti ikuwe, iyema uwaimo, untiye.

¹⁸ Piya omogana, Mariya Matara kumatasa wae aeba aꞌwae puma wama, abagi kinaꞌwa maya uwaimintiye: Naeba Waꞌegapa agauwe, utegina kamana omome kamanapa uwaimintiye. Abagi kinaꞌmi Isu agantawe

¹⁹ Pigoya sontara aseyogini, abagi kina igeba Yuta kinaꞌmika iyekuru puma, aki puma nama kabe kitama mintantawe. Mintuguna Isuba ige ibakapi ampa aborama mima maya uwaimintiye: Paruyenaba tigeti waiyeno, untiye.

²⁰ Piya ute ayatarabe ayatabe iyakintiye. Piya pogini, abagi kinaꞌmiba igeba Waꞌega agamagini intawamaba aogi puntiye.

²¹ Piya puguna to kake uwaimintiye: Paruyenaba tigeti waiyeno, untiye. Piya untana to maya untiye: Naba nae unatantemisa puma, pabiyama naeba tigepa uritauwe, untiye.

²² Piya untana pukawaitamagina: Tigeba Aota Awamusa maeyiyo, untiye.

²³ Piya untana to maya untiye: Tigeba wasanami nkaguntaenawai uma asuꞌa puwaigasiginaba asuꞌa puwakiye. Kampa uma asuꞌa piginaba waewaitakiye, Isu untiye. Tomasiba Isu agantiye

²⁴ Pigoya, Isu abagi kinaꞌwa aborawaiminti ntagaba, ka abagi yagara nagisarisa tara tumpaema ige aruyenabisa, kampa mintantiye. Ae agiwapa Tomasiwe. To ka agiwapa Agayawe, omintawe.

²⁵ Piya, kaꞌisa abagi kina aoꞌmiba igeba awaga kamana omima: Taeba Waꞌega agaune, untawe. Piya yuguna maya uwaimintiye: Naeba kamanatipa abogana taga kantaba kampa piya. Naeꞌne ntaonepisa ayapi antotasa aegunta, pi abura agama nayatasa abura aukaya puma, nayatasa ayatara aukaya puntapa, tagane ukuwe, untiye.

²⁶ Pigoya, to kake sonta aboraogini abagi kina igebe Tomasige kaga namapinti aki puma kabe kitama mintantawe. Mintuguna Isuba abakankaipi to kake ampa aborama mintana maya uwaimintiye: Paruyenaba tigeti waiyeno, untiye.

²⁷ Piya untana aꞌwae puma Tomasi maya omintiye: Kaeba kaya nkamarasa nayata aukaya puma agao. Piya, kayakatasa nayatara aukaya puma agama to kake kaguꞌama tara taraba a-puma, naegaꞌma kamatiti po, untiye.

²⁸ Piya yogana Tomasi maya untiye: Kaeba Waꞌegane, Kotinekawe, untiye.

²⁹ Piya yogana Isuba maya omintiye: Kaeba nagamagina kamatiti puma naegarana, a. We, kampa nagama naegaꞌma imatiti pe kina, igeba iꞌmuntanabi mikibewe, untiye. Yoni ma nkisapisa ago kamana kaentiye

³⁰ Pigoya, Isuba to uwoma awameꞌenaba abagi kinaꞌmi nkiyora punti, pipa ma nkisapipa kampa kaewaentuwe.

³¹ Kaemaranto mapa pipa mayaga kaemarantone: Tigeba aisuma abima Isu aeba Karaisiti, aeba Koti Ntagara minti, pi kamana abibebe puma aeꞌwa aegaꞌma timatiti pikibepa, ae awamuta miyabaꞌena maema mikibewe, untiye.

21

¹ Pigoya, ainti Isu nkabagi kinaꞌwa Taibiriyasi kotu nkawamora mintuguna aborawaimintiye: Aeba ampa aborawaimintipa pipa mayamawe:

² Saimoni Pitawa, Tomasi to ka agiwapa Agaiyawa, Nataniyeri aeba Karariya mari Kena kumatasawa Sebeti ntagara tarawa, to Isu nkabagi yagara tarawa sumagini, piya kinaꞌmi kaga mintantune.

³ Piya mimagi, Saimoni Pita aoꞌmipa maya wamintiye: Naeba inoyanta aekena wauwe, untiye. Piya yogi taeba: Taegeba kaga wakune, untune. Piya ute wanipisa karebi ima wantune. Wama umima pi nkasekapa inoyantaba kampa aentune.

⁴ Piya puma mintuwakana marogana, Isuba kepari ampintantiye. Ampintogira Isu nkaowarapa kampa aogima agabebema agantune.

⁵ Piya puwakana tabigama maya untiye: Yakarakiꞌnupa, inoyantaripa kapa waintiyoma, tabigantiye. Tabigaogira taeba: Kampaye, untune.

⁶ Piya yuwakana mayama kegaꞌe uma uramintiye: Wanipisa karewama nkayatakanti kukopa motama inoyantaba aeyiyo, untiye. Yogi kukopa motauwakana inoyantaba uwoma iraꞌwaiyogira, taeba kanara kampa paibu maete intune.

⁷ Piya pumagira, Isu nkabugaome nkabagi yagara naeba Pita maya omintuwe: Waꞌegarepa piye, untuwe. Yuwagana Saimoni Pitaba kaiwapa akubotama inoyanta aeyometisa, pi Waꞌegawe kamana abite autasaenaba maema purite wanipinti paꞌyo puma tumima wantiye.

⁸ Pigoya, abagi kina to kaꞌisa taeba pi kepari awamori mintumetisa wanipisa kareba pubasanaurite kukopa inoyantage paiburite wantune.

⁹ Pigoya, kepari ima uwa mari mayena agantune: Yaku eꞌnora inoyantabe paretibe kaemaranta tama miyogira agantune.

¹⁰ Wama uma irosaꞌma Isu maya uramintiye: Inoyanta aeyepa ka ka maete kanaiyo, untiye.

¹¹ Piya yogana, Saimoni Pita aeba wanipisa karebi ima kukopa uwa mari paibogana intiye. Piya pomepa kuko antabaipintiba tabe inoyantaba 153 waintantiye, piya pomepa kukopa kampa airisaꞌwantiye.

¹² Piya pogana Isuba maya uramintiye: Tigeba ampa naninta nabisugaito yiyo, untiye. Yoginiba, aꞌyaꞌma abagi kinaꞌmiba: Kaeba kegawemaba, kampa abigantune. Piya, taeba: Aeba Waꞌega yagarawema, ago napintune.

¹³ Pigoya, Isu ampima kana inoyantabe paretibe maema pako puma imintiye.

¹⁴ Piya, purintapisa aogama abagi kinaꞌwa aborawaimogana kakaga puntiye. Isu Pitaka sipisipine naninta imo, omintiye

¹⁵ Pigoya, taeba naninta nagasuwakana, Isuba Saimoni Pita maya omintiye: Saimoni, Yoni ntagara, kaeba ma kinapa asugasima tabera kagupa nameno, untiye. Piya yogana Pitaba maya omintiye. Owe, Waꞌega, kaeba abene. Naeba kaekaba nabiye, untiye. Piya yogana Isu maya omintiye: Kaeba sipisipi awaro kinunte kabiwaitama naninta imo, untiye.

¹⁶ Piya untana to kake maya omintiye: Saimoni, Yoni ntagara, kaeba kagupa nameno, untiye. Piya yogana Pita maya omintiye: Owe, Waꞌega, kaeba abintane. Naeba kaekaba nabiye untiye. Piya yogana Isu maya omintiye: Kaeba Sipisipi kinunteta kiya kabiyo untiye.

¹⁷ Piya untana to kake kakagara omima maya untiye: Saimoni, Yoni ntagara, kaeba naekaba taga kabiyoma, abigantiye. Abigaogana Pita: Naekaba taga kabiyoma yome kamana abite, antawamaba ata pogana maya untiye: Waꞌega, kaeba aꞌyaꞌwaemaenaba abiwaentane. Naeba nagu kaeti atama paibutopa, pipa abintane, untiye. Piya yogana Isu maya omintiye: Kaeba sipisipi kinunteta kiya kabiyo, untiye.

¹⁸ Piya untana to maya untiye: Tagaka ugamukuwa abo: Kaeba aoso yagara mintanapa, kaega iraꞌna kukapa arakae pu uꞌma, keꞌiba pitaꞌi mataꞌiba nasikenaga kabeginapa wama nasi nasi pene. Pigoya ainti karenarantanapa, kaya tara aebara pegana, to yagarama kaegapa maema amigatama, kampa wakena napikibempe kiꞌi kababute wakiye, untiye.

¹⁹ Piya, Isu aeba Pita ainti purikena ki aborama omintiye. Purikenaenawampaba Koti nkage asagaꞌyuyenema, untiye. Kamana piya untana Pitakaba: Ampa naegarao, omintiye.

²⁰ Piya yogana, Pitaba aeba aꞌwae puma Isu nkabugaome nkabagi yagara naeba akaꞌi wauwagana nagantiye. Piya, naeba paipa Pasoba naninta nanta ntagaba naꞌnopa Isu nkaibira aisage puma abigama maya untuwe: Waꞌega, kaepa ke kunapa pugatakiyema abiganto,

²¹ pi ntagarana akaꞌi wauwagana Pitaba nagantana Isupa abigama maya untiye: Waꞌega, ma ntagaraba pipa aya pikiyema, abigantiye.

²² Abigaogana Isuba maya omintiye: Aeba uwa mintaka naeba aꞌwae puma kanakena abimogana wainteginapa, ae kaba nanaga yene. Kaega uwa kanama ampa naegarao, untiye.

²³ Pigoya, kaꞌisa mono kinaꞌmiba igeba naekaba maya uma kamparaga puntawe: Ma nkabagi yagara aeba kampa purikiye, untawe. Pigoya, Isu aeba pipa naekaba: Kampa purikiye kamana kampa untine. Kampaye. Aeba maya kamanaꞌamana untine: Aeba uwa mintaka naeba aꞌwae puma kanakena abimogana wainteginapa, ae kaba nanaga yene, untine.

²⁴ Piya, abagi yagara mana nae ma kamanapa abibebe pumagi, ma esapa kaentuwe. Pigoya, mono kinaꞌmiba naekaba kamanaꞌwapa taganema abune, untawe.

²⁵ Pigoya, Isuba toma toma puntipa esaꞌnepinti kampa kaeyuwe. Pipa esaꞌamana waewaeyemisinta, naeba abopa wasanamiba kampa aisuma aꞌya pesine, Yoniba piyama kaentine.