<h4>1</h4>
<p><sup>1</sup> Teyopiro, tabe yagarare, abakatepi Koti kaoꞌena puratama mono yuga punti kamanapa uwoma kinaꞌmi aogima arabama kaentawe.
<p><sup>2</sup> Pi kamanapa Isu nkagora mintanta kinaꞌmi agama abintini, piya mayaenama nkagowapa abinta kinaꞌmi nkuraminta kamana kaentawe. 
<p><sup>3</sup> Pigoya, naeba pabiyama nabegi, agorasa aꞌyaꞌwaemaena aboraurite kananti, pika pasema aisuma aꞌya uritegi, kauꞌnana kamana uma kaeyuwe. 
<p><sup>4</sup> Pigoya, pipa aisuma mayama abibebe po. Mono ugamintapa taga auꞌwantagaꞌena, kaꞌisa kinaꞌmi nkugaminta kamanapa kaeba aogima aisumagina, abibebe po. Yoniba aborakiyema, enisorewama Sekaraya omintiye 
<p><sup>5</sup> Pigoya, Erotiba Yuta kinaꞌmi nkwaꞌega yagara mintome kanabi, mono kiye yagara ka mintantiye. Agewapa Sekaraya, aeba Abaisa ae mono yuga aruyenabisa yagarawe. Wayaꞌwapa Eroni mpono yuga aruyenabisa pi nkatutasa, agewapa Erisabeti mintantiye. 
<p><sup>6</sup> Pigoya, isigeba Koti nkaobi isigupa aogima atamaginisi mima, aꞌyaꞌma Waꞌegawama unti kamanape arupu kamanaꞌwape aogima wasima mintantase. 
<p><sup>7</sup> Piya, Erisabeti anamo wae mintika, isigeba yagarawaisi kampa minta mima, karena aenta tantase. 
<p><sup>8</sup> Pigoya, Sekarayage aokinaꞌmige Koti mpono yugawai pikenagana aboraogini, 
<p><sup>9</sup> irosaꞌmagini Koti ntuga uwaitantemi ntuga iyota iyota puma maentini, Sekarayapa kunka aguntaena kaeyanema otauguna, Koti ntamankama nkagupinti uma pasintiye. 
<p><sup>10</sup> Piya pogini, wa waya uwa kinapa abeꞌi kumati aki puma mima, Waꞌega esotama mintuguna, 
<p><sup>11</sup> kunka aguntaena kaeyogana, Waꞌegawamatisa enisore aboramagina, kunka aguntaena kaekenaenara ayatakantisa aukaꞌi asima mintantiye. 
<p><sup>12</sup> Asima mintogana, Sekaraya agate pami pumagina aekuru puntiye. 
<p><sup>13</sup> Piya pogana, enisorewama maya omintiye: Sekaraya, kaeba a-kaekuru po. Waꞌegawamaba esotakanaba abintika, wayakampaba agaꞌe puma, yagara ka yakari pekanaba, kaeba ae ageba Yoniwe omo. 
<p><sup>14</sup> Pigoya, kae kantawamaba aogi puma, asoya pekana kaꞌmu pikibene. Piyama aborakiniba, uwoma kinaꞌmi abigina iga pukiye. 
<p><sup>15</sup> Pi ntagara Waꞌegawama nkaobi tabe kinaꞌena puma mikiye. 
<p><sup>16</sup> Aeba esegi wanipa aꞌa-o uma miyekana, Aota Awamusaꞌamaba inamugantora agupi tumima pumaekiye. Pumaeyakana, Isureyo kina uwoma kina igu aꞌwae pekini, Waꞌegawama, tabe Kotiwaimpa agorasaena pikibewe. 
<p><sup>17</sup> Piya, poropete yagara Iraiyati aumabe esegiyenabe waintanti, pabiyama waintantakana paitamagina, wama Waꞌegawama nkawaga kamana ikena kinaꞌena puma mikiye. Pigoya, abawampabe yagarawampabe ige igu maema paru puma kayone puwaitakini, kaꞌmasa puma mikiye. Piya, ikeri pakibe kinapa uwaitakini, to aꞌwae puma aegaranta kinaꞌmi nkaruyenaba uma mikibewe. Piya pekini, wasanamiba aꞌyaꞌwaema Waꞌegawamaka aseyo puma mikibewe, untiye. 
<p><sup>18</sup> Pigoya, enisorewama piya yogana abintana, Sekarayaba kamana mayama aꞌwae pomintiye: Naebe wayaꞌnepe tasigeba ago karena aenta tause. Pikaga kamanakapa ayama abibebe pukuwe, yogana, 
<p><sup>19</sup> enisorewama maya omintiye: Abeno. Nagenepa Kebariyo, naeba Koti nkaobi miyoꞌnana, nagarubagi kaeti tumima aogi awaga kamana ugamoganapa, 
<p><sup>20</sup> kampa abibebe pene. Piꞌna antotapa aiboꞌena puma, kamana kampa unta kinaꞌena puma mintagana, kamana ugamo kamanaꞌamaba auꞌwantagaꞌena pikiye, piya omintiye. 
<p><sup>21</sup> Pigoya, Sekaraya aeba tabe mono namapinti eꞌerota mintogini, wa wayapa igeba agawa puma mimagini, uwoma nkigi napintawe. 
<p><sup>22</sup> Piya puguna, ainti igeti tumimagina, kamana uwaimikena igiga puntiye. Aibogini igeba maya untawe: Aeba tabe mono namapinti to ka aosoꞌena agaiꞌnawe, yuguna, pigo aeba ayatasa awame puwaiyakintiye. Awamupisa kamanapa kampa untiye. 
<p><sup>23</sup> Piyama mintogana, yoga pikena kanaꞌwapa aꞌya pogana, atate kumati wantiye. 
<p><sup>24</sup> Pigoya, ainti wayaꞌwampa Erisabeti agaꞌe puntana, opa nayakaꞌmu kakama mintantiye. Piya puntana maya untiye: 
<p><sup>25</sup> Waꞌegawama aeba kana atanti, pipa aborakanaba aogi punatamagina anamo nanintanaba asuꞌa punagaintiye, untiye. Enisorewama: Isu aborakiye, Mariya omintiye 
<p><sup>26</sup> Pigoya, tonaentisa kaꞌumaema upa Erisabeti agaꞌe pogana, Koti nkenisore yagara Kebariyo agarubaogana, Karariya mari Nasareti kumati tumimagina, 
<p><sup>27</sup> aragawaeꞌmati tumintiye. Kana aragawaeꞌma nkagewapa Mariyawe. Pigoya, kiya yagara Tebiti nkayabama, agewapa Yosepe mintana, kana aragawaepa maekiyema ika potantiye. 
<p><sup>28</sup> Aibuguna, kana enisorewama Mariyati wama maya omintiye: Aya pene. Waꞌega Yagara kagora mima, kaeka aꞌmu pugatama abegina aogi piye, yogana, 
<p><sup>29</sup> Mariya kana enisore yagarama yome kamana abite aekuru pumagina: Kamana agowapa ayabayawema, napintiye. 
<p><sup>30</sup> Piyama napiyogana, enisore yagarama maya omintiye: Mariya, kaeba a-kaekuruba po. Koti antawamaba kaeka abegina aogi piye. 
<p><sup>31</sup> Kaeba kagaꞌe puma masinto yakari potamagina, agewapa Isuwe omo, untiye. 
<p><sup>32</sup> Piya untana to maya untiye: Aeba ae age Inatisa Waꞌega Yagarama Ntagarawe omikibewe. Piya puma, ayabama Tebiti kabintemisa puma tabe yagara mima, 
<p><sup>33</sup> aꞌyaꞌma yaga Yekobu nkaokinatapa kabiwaitama, aꞌyaꞌma yaga Tabe Yagara miyaba miyaba mikiye, piya omintiye. 
<p><sup>34</sup> Piya yogana, Mariya enisore yagaraga maya omintiye: Naeba kampa nawaeba mintiye. Yempe kamanapa aya pikiye, untiye. 
<p><sup>35</sup> Piya yogana, enisore yagarama maya omintiye: Aota Awamusaꞌama kantabaipinti tumekana, Inatisa Yagarama esegiyenawampa aogi pugatakana, yagaragampa aota yagara, age Koti Ntagarawe ukibewe. 
<p><sup>36</sup> Kaeba abo. Kanogae Erisabetigaba, aeba anamo aentawe ye waeꞌma agaꞌe pumagina, togana kakaga u migaitegina, masinto yakari potakiye. 
<p><sup>37</sup> Piya, Koti kaꞌena pikenaba kampa igiga pukiye, untiye. 
<p><sup>38</sup> Piya yogana Mariya maya omintiye: Abo. Naeba Waꞌega Yagarama kayokaya araganagana, pabi yempesa punatakiye, untiye. Yogana, enisore yagaraba atate wagaintiye. Mariya Erisabeti uma agantiye 
<p><sup>39</sup> Enisorewama kamana omigaite wagasogana, pabi ntaga Mariya kaꞌisaenawapa aogi purite, Yutiya mari karuꞌena wamagina, amu wainti mari ima, kuma ka waintiti imagina, 
<p><sup>40</sup> Sekaraya ntamapinti ima Erisabetika: Aya pene, asu untiye. 
<p><sup>41</sup> Aya pene asu yogana, Erisabeti ntagara antabaipinti patagi pogana, Aota Awamusaꞌama Erisabeti nkantabinti pumaeyogana, 
<p><sup>42</sup> Erisabeti Mariyaka maya omintiye: Koti aꞌmu pugataye. Kaeba aogi waekagana, taberasa Kotiba aogi pugatakana, kantabaipinti aborama mintemi ntagara aogi yagara aborama miye. 
<p><sup>44</sup> 
<p><sup>43</sup> Pigoya abo. Kae kamana yeka aboganaba, nantabaipintisa yagaranempa ago aꞌmu puma patagi piye. Naeba naꞌmu pugatauwe. Kaeba nae Waꞌega Yagarama nkanogawe. Ayabaya naeti kanama ampa nagane. 
<p><sup>45</sup> Pipa Waꞌega Yagarama kamana ugaminta, kaeba abekana tagantana pemika, tabera kaꞌmu potane, piya omintiye. Mariya aꞌmu kamana untiye 
<p><sup>46</sup> Piya omogana, Mariyaba abite aꞌmu kamana maya untiye:<p/>Naeba nagu namankamaba Waꞌegaga naꞌmu potauwe, iye.<p/> 
<p><sup>47</sup> Piya, naumawamaba Koti aogi punatakenaenanempa naꞌmu potauwe, iye.<p/> 
<p><sup>48</sup> Abo. Ae kayokaya araga nae uwa miyogana nababuma aogi punatakini, ibabe aintibe Koti aꞌmu punatami kamana aꞌyaꞌma kinaꞌmi abimagini, naeka iꞌmu punatakibewe, iye.<p/> 
<p><sup>49</sup> Piya, Koti tabera aogi punatami, esegi yagara miye, iye.<p/>Piya, agewapa aota puma waintiye, iye.<p/> 
<p><sup>50</sup> Aeka abemi kinapa igepa agu kaoꞌena puwaitamagina, ago paipe ibabe abemi kinapa igepa aogi puwaitaye, iye.<p/> 
<p><sup>51</sup> Aeba esegiyenawampa nkagowapa aboramagina, i maete iye kina igepa igarubantiye, iye.<p/> 
<p><sup>52</sup> Aeba kiya kinapa maema merunkaba puwaitaogini tumi wantawe, iye.<p/>Piya, tumima mintanta kina ababuma mesuba puwaitantiye, iye.<p/> 
<p><sup>53</sup> Aeba kusi kina ige piyamaenaba asaema imintana, pi tabe kutantaga kinapa igasogini, imu kampa wainta kinaꞌena puma mintantawe, iye.<p/> 
<p><sup>55</sup> 
<p><sup>54</sup> Piya, tayabamagi Abaraꞌamupe agaꞌnugipe utawaitantiye. Pabi nkawameta piya purataika, kamanaꞌwapa uwa waita ikiye, iye.<p/>Pi kamanaꞌwaka napimagina, Isureyo kina, Koti kayokaya kinaꞌwa, agu kaoꞌenaga uma tabaibuntiye, Mariya piya untiye. 
<p><sup>56</sup> Piya ugaite, Mariya aeba Erisabetige kakaga u migaitegina, kumaꞌwati aꞌwae puma wantiye. Erisabeti Yoni yakari potantiye 
<p><sup>57</sup> Pigoya, Erisabeti yakari pikena yaga aboraogana masinto yakari potantiye. 
<p><sup>58</sup> Piya, Erisabeti nkaotumpibe waꞌewatasa kinaꞌmibe abite, Waꞌegawama aogima aoꞌmaeyogini ampa agate, igeba aꞌyaꞌma iꞌmu potantawe. 
<p><sup>59</sup> Pigoya, Yoniba ka sonta migasogini, paisa mono kamanapi waintome kamana wasiyuꞌma au kasantawe. Au kasagasimagini, agewapa abawampa aukantana Sekarayawe omikena puntini, 
<p><sup>60</sup> abigauguna anowampa: Kampaye. Agewapa Yoniwe omiyo, untiye. 
<p><sup>61</sup> Piya yogini: We, kae kaokinaꞌmi piya igiba piyamaba kampa waintiya, aya pukune, ugategini, 
<p><sup>62</sup> aꞌwae pumagini abawampaka iyatasa posenta pumagini: Agewapa kewe omusune, untawe. 
<p><sup>63</sup> Piya yuguna, Sekaraya esaka ibigaogini me nkamuguna: Agewapa Yoniwema, kaentiye. Piyama kaeyogini, wasanamiba agate pami pumagini: I-e, a-e, untawe. 
<p><sup>64</sup> Piya puguna, Sekarayaba pi ntaga kamana iroꞌma untana, Kotigaba tabera aꞌmupa puntiye. 
<p><sup>65</sup> Piya pogini, waꞌewatasa kinaꞌmiba pintanaga agate iyekuru puntawe. Piya pumagini, Yutiya amu waintome mpari nasima mare-u me-u puta nasintawe. 
<p><sup>66</sup> Piya umagini, abume kinaꞌmi: Aya yagarantobaya mikiyema, napimagini: Waꞌegawama nkesegiyenawampa aepipa waintiye, uma: Ayabaya pukiye, untawe. Sekaraya aꞌmu kamana untiye 
<p><sup>67</sup> Piya yuguna, abawampa Sekaraya Aota Awamusaꞌama pumaeyogana, maya untiye:<p/> 
<p><sup>68</sup> Isureyo kina, tae Waꞌegare Kotika taꞌmu potaune, iye.<p/>Ataenabisa aokinaꞌwa ampa taba puma aogi purataye, iye.<p/> 
<p><sup>69</sup> Piya, kayokaya yagaraꞌwa Tebiti nkayabamapisa ka esegi yagara asitakana aogi puratakiye, iye.<p/> 
<p><sup>70</sup> Pai poropete kinaꞌwa uwaitaogini, waiyaba mikena kamana umarantapa, iba aboraye, iye.<p/> 
<p><sup>71</sup> Pigoya, kama kinatempi nkiyapisa tababumagina, aeba abima ata purata kinaꞌmi nkiyapisa iyoba tatakiye, iye.<p/> 
<p><sup>72</sup> Piya, tayabamagi kaoꞌena puwaitama iyoꞌmaekuwe, Koti piya untiye, iye.<p/>Pika maema ka agaꞌnaena puratama, agu kaoꞌena ibaba purataye, iye.<p/> 
<p><sup>73</sup> Piyaba Koti tayabama Abaraꞌamupa uma esegi potantika, 
<p><sup>74</sup> kama kinatempi igetisa iyoba tataka, aogima mpima kayokaya kinaꞌwa mpimagina, 
<p><sup>75</sup> aꞌyaꞌma yaga taeba ae aobi aota puma mima, aogi kiꞌi aegarakubompeka Kotiba ka esegi yagara asitakana aogi puratakiye, Sekaraya piya untiye. 
<p><sup>76</sup> Piya untana, Sekaraya aꞌwae puma yagarawaka maya omintiye:<p/>Pigoya, ma ntagaranto, kaeba Inatisa Waꞌega Yagarama poropete yagaragawe, ugamikibewe, iye.<p/>Piya, kaeba paitama Waꞌegawama kiꞌi atakibene, iye.<p/> 
<p><sup>77</sup> Piya, kaeba aogi puratakena kamana uwaimegini, aꞌyaꞌma aokinapa abikibewe, iye.<p/>Piya, aeba aruꞌenawaipa agaruba igasima ibabuntiye, iye.<p/> 
<p><sup>78</sup> Pigoya, tabe kaoꞌena Kotiba puratama, piya aogi puratamika, pi aeba mantarisa eꞌwasaena otakana taeti arakiye, iye.<p/> 
<p><sup>79</sup> Tununtanabi purikena kanta puma miye kina eꞌwasaena tamima aogi puratakiye, iye.<p/>Piya, paruyenama ki aboraka agama, kanara tanta paruyenabisa aegarakune, Sekaraya Yonika piya untiye. 
<p><sup>80</sup> Aiyogana, ainti kana yagarantoba anosama tabe pogana, aumawampaba esegi potantiye. Piya, aeba kaꞌme mpari umintogana, kanaꞌwapa aboraogana, Isureyo kinaꞌmi nkiyobipa aborantiye.<p/>
<h4>2</h4>
<p><sup>1</sup> Pigoya, Aroma tabe kiye yagara Ogasita aeba kamana ataogana wagana pogini, aꞌyaꞌma kinaꞌmi nkigewai kaemagini aogi pikena puguni, 
<p><sup>2</sup> pi ntagaba igewai kaekena maruꞌena puguna, Kariniyasi aeba Siriya kumata kiya yagara mintantiye. 
<p><sup>3</sup> Mintogini, aꞌyaꞌma kina mawaita ige kaekena umaki ampaki puntawe. 
<p><sup>4</sup> Piya puguna, Yosepeba Tebiti ayabamagana, Tebiti kumati wakena pumagina, Karariya-i Nasareti kumatasa atategina, Yutiya maru wama Petariyamu kumati wantiye. 
<p><sup>5</sup> Pigoya, Yosepeba wama, maekena pome nkaragawaepa Mariyapa agaꞌentaga, ababute Petariyamu wama mintusuguna, 
<p><sup>6</sup> pi ntaga yakari potakenakana aboraogana, 
<p><sup>7</sup> masinto amaru yagara yakari potantiye. Yakari potamagina, kairasa asagakokima, purumakankama ntamapi naninta amume tuꞌnapi ataogana mintantiye. Pigoyema, kana wasana waikena namapa pumaewaogana, ae mikena maru kampa waintogana, piya puntiye. Enisore kinaꞌmi yaga kiye kinaꞌmiti tumintawe 
<p><sup>8</sup> Pigoya, pi nkaukaꞌiba kaꞌisa sipisipi kabiyume kina pitaꞌi mimagini, sipisipira aseka kaburi kabima mintuguna, 
<p><sup>9</sup> Waꞌegawama nkenisorewama igeti tumpa aboraogana, Waꞌegawama nkeꞌwasaenawampa ke iꞌma iyakogini, agategini iyekuru puntawe. 
<p><sup>10</sup> Aibuguna, kana enisore yagarama maya uwaimintiye: Tigeba a-tiyekuru puma abiyo. Naeba aogi kamana maete tigeti tumuwe. Kana maete tumo kamanaꞌamaba aꞌyaꞌma kinati wakini, abima tabera iꞌmu pikibewe. 
<p><sup>11</sup> Pigoya, Tebiti kumata iba asenabinti, tiꞌima aogi puritakena yagara yakari potagina, Karaisiti, Waꞌega Yagara, aeba ago aboraye. 
<p><sup>12</sup> Piya, kana inamugantoba taberaberasa akarakimagini, purumakankama ntaninta tuꞌnapi atama mintakiya, tigeba wama agantiripa urimo kamanapa napiyiyo, uwaimintiye. 
<p><sup>13</sup> Piya yogana, mantabintisa uwoma enisore kinaꞌmi aege aboramagini igeba inirasa Koti nkage maya uma asagayuntawe: 
<p><sup>14</sup> Inati mantari Koti taꞌmu potano. Aeba mabisa kina aꞌmu puwaitamagina, paruyena aborama imiye, piya untawe. Yaga kiye kinaꞌmi Isu uma agantawe 
<p><sup>15</sup> Enisore kinaꞌmi ini piya utegini, pabita itate mantari intawe. Igasuguni, kana sipisipira kabiyume kinaꞌmiba maya untawe: Karuꞌena maeyigi, Petariyamu-i wama Waꞌega Yagarama nkuramemintana uma agano, untawe. 
<p><sup>16</sup> Piya utegini, igeba karuꞌena wamagini, Mariyake Yosepeke uma isigaumepa, kana inamugantoba purumaka ntaninta tuꞌnapi waita mintogini uma agantawe. 
<p><sup>17</sup> Uma agategini, igeba kana enisore yagarama yagarantoga yome kamanaka uwaisimuguni, 
<p><sup>18</sup> kaꞌisa kinaꞌmiba kabiyume kinaꞌmi yume kamanaka abite, uwoma nkigi napintawe. 
<p><sup>19</sup> Napiyuguna, pigoyema Mariyaba kana kamana kampa ageguꞌa punta, aeba napi napi puntiye. 
<p><sup>20</sup> Piya pogini, sipisipira kabiyume kinaꞌmiba aꞌwae puma wamagini, aꞌyaꞌwaemaena abima aganta kamana napimagini, Kotika iꞌmu potama age asagayuntawe. Isu nkage omintawe 
<p><sup>21</sup> Pigoya, tonaentisa kakaga umaema yaga aꞌya puwaogini, au kasagasima agewapa Isuwe omintawe. Kana agewapa, kampa agaꞌe puntogana enisore yagarama pai omome nkagi, omintawe. Simiyonige Anage Isu agate isiꞌmu potantase 
<p><sup>22</sup> Pigoya, togana Isuke anoke isibabuma maꞌataome ntagaba aboraoginisi, Mosese kamana ago kamana wasiyuꞌmaginisi, ano aba Isu ababute Yerusaremi kumati imaginisi Waꞌegawama nkaora atakena puntase. 
<p><sup>23</sup> Piya, Waꞌegawama nkawamupisa ago kamana mayama waintantiye: Pipa kamaru masi aborakanapa Waꞌegawama nkaora atao, iye. Piya unti kamana abi uꞌma piya puntase. 
<p><sup>24</sup> Piya pumaginisi, pi nkago kamana wasiyuꞌma Waꞌegawama mpono awaꞌena, pipa tara pupunta tarawo, intanuma awararawo, kaema agunta abasa atakena maete wantase. 
<p><sup>25</sup> Pigoya, Yerusaremi kumata ka yagara mintantiye. Agewapa Simiyoni, aeba miyomentanawapa aogima mima Kotiti agupa amintiye. Piyama, Isureyo kina igeti aogi puwaitakenaena aborakibika, kana yagara aobi puma mintogana, Aota Awamusaꞌama agupi pumaema mintantiye. 
<p><sup>26</sup> Pigoya, ago pai Awamusaꞌama maya omintiye: Kaeba toganaba Waꞌegawamatisa Karaisiti aborakana, agate purikibene, piya omintiye. 
<p><sup>27</sup> Pigoya, pi ntaga Awamusaꞌama Simiyoni: Tabe mono namapi iyo, omintiye. Omogana abite iyoginisi, anoge abage kamana ago wasiyuꞌma Isupa ababurite kana namapinti ima Koti nkaora atakena pusuguna, 
<p><sup>28</sup> Simiyoni Isu uma ababurintana, Koti nkage asagayuma aꞌmu puntiye. 
<p><sup>30</sup> 
<p><sup>29</sup> Aꞌmu pumagina, aeba maya untiye:<p/>Waꞌegawo, naeba kayokaya yagaragapa, naonepisa kaetisa aogi puratakena yagara agaogana, mampabi mikenaenanepa aꞌya piye, iye.<p/>Pai utampe kamanakaga napima agaogana, nantawama paru piye, iye.<p/> 
<p><sup>31</sup> Kaeba mono maga maga kinaꞌmi igeꞌena iba aborane, iye.<p/> 
<p><sup>32</sup> Isureyo kinakaba taetiba eꞌwasaena aboragi taꞌmu pune, Simiyoni piya untiye. 
<p><sup>33</sup> Isuka piya yoginisi, anoge abage isigeba uwoma nkisigi napintase. 
<p><sup>35</sup> 
<p><sup>34</sup> Piya, Simiyoniba igepa akayona puwaitamagina, kana yagarantowampaka Mariya mayama omintiye:<p/>Abeno. Ma ntagara aepisa Isureyo kina pako pikibeka Koti ago untine, iye.<p/>Uwoma Isureyo kinapa aetasa asesepaꞌma wareꞌnakibewe, iye.<p/>Piya, kaꞌisa kina igeba aeti uma atokaema asikibewe, iye.<p/>Pi ntagaraba uwoma kinaꞌmi ntapikenaenawaipa aborakiye, iye.<p/>Piya, aeba Kotipisa aboragini, aeka uwoma kinaꞌmiba imo kamana otaigina, pigo kaegapa tabera kantara pikibene, Simiyoni piya omintiye. 
<p><sup>36</sup> Pigoya, ka Koti kamana uwaimi punti nkwae, aeba Panuwero nkaraga, Asa pi nkigaꞌnabisa aboranta wae, agewapa Ana, ago aenta tantiye. Pigoya, aeba ibaꞌena kasatauguna, tonaentisa tara umaema kabo awaege mintogana puꞌwaogana, 
<p><sup>37</sup> aeba uwa mimagina 84-wa kabu aentarama mimagina, aꞌyaꞌma yaga tabe mono namapi ampima, asenabintibe arape nanintagaba kampa napinta, Kotiti napi napi puma mintantiye. 
<p><sup>38</sup> Pigoya pabi ntaga mintogini, Yerusaremi aogi pukena yagaraga kaꞌisa kinaꞌmi aobi puma mintantawe. Mintuguna, pabi ntaga kana aentaba ampimagina, Koti aꞌmu potama, aobi punta kinapa: Aobi pompe ntagaraba ago aboraye, uwaimintiye. Nasareti kumati aꞌwae puma wantawe 
<p><sup>39</sup> Pigoya, Waꞌega Yagarama nkago kamanaka aꞌyaꞌma pugaitegini, Karariya Nasareti kumati waꞌewaiti wantawe. 
<p><sup>40</sup> Wama umiyuguna, kana yagarantoba pita anosama, esegi pogana, Koti aꞌmuntana potamagina tabera aogi napiyena amintiye. Isu ababute Yerusaremi kumati wantase 
<p><sup>41</sup> Pigoya, aꞌyaꞌma kabo yagaba anoge abage Yerusaremi wama, Isureyo kina iyoꞌmaenti kana aboraoginisi wantase. Pi iꞌmu punta ntaga nkagewapa Pasoba naninta nakena yagawe. 
<p><sup>42</sup> Pigoya, Isuba nagisarisa tara tumpaema kabo miyomekana, kana iꞌmu pumeti ababute wantase. 
<p><sup>43</sup> Wama mintusuguni, pigo iꞌmu taenaba isoꞌma nagaitegini, waꞌewaiti wauguna kana yagaranto Isuba pabi Yerusaremi mintantiye. Aeba mintoginisi anoge abageba: Aokinake wagasayema, napima wantase. 
<p><sup>44</sup> Wausuguna, ka yaga aꞌya waoginisi aguyosakate, to kaꞌisa aokina ibigausuguni: Kampaye, untawe. 
<p><sup>45</sup> Piya yugunisi to aꞌwae puma Yerusaremi kumati to wama aguyosagantase. 
<p><sup>46</sup> Aguyosagausuguna, kakaga yaga aꞌya waoginisi mono namapinti asu agama abatantase. Pigoya, aeba kaꞌisa mono tisa kinake mintogini, kaꞌisa kamana abigauguna aeba yume kamanapa aogima aꞌwae puma uwaimintiye. 
<p><sup>47</sup> Piya uwaimogini abite aꞌyaꞌma pi kinaꞌmiba pami puntawe. 
<p><sup>48</sup> Piya pugunisi, anoge abageba kana kamana abite pami puntase. Pigoya, anowampa maya omintiye: Yagarawo, nanaga piya pekara tasigeba kaguyosaꞌma tasu nkairaporuse, piya untiye. 
<p><sup>49</sup> Piya yogana Isu maya omintiye: Nanaga naguyosagase. Aꞌyugu naeba nabanempa ntamapinti kampa misanaga mintuwe, untiye. 
<p><sup>50</sup> Piya yogana, anoge abage kana yome kamanapa isigeba kampa aogima abintase. 
<p><sup>51</sup> Pigoya, Isu aeba isigege irosaꞌma Nasareti kumati wama isige kamana abibebe puntiye. Piya pogana, anowampaba kanaenaga napi napi puntiye. 
<p><sup>52</sup> Aibogana, Isuba aupe napiyenawape anosaogini, wasanamibe Kotibe agauguna aogi puntiye.<p/>
<h4>3</h4>
<p><sup>1</sup> Pigoya, Aroma kinaꞌmi kiye yagara, agewapa Taebiriyasi, aeba nagisa kaꞌamu kabu kabiwaitama miyogana, Pontiyasi Pairati Yutiya mara kabiyogana, Erotiba Karariya mara kabiyogana, aꞌnantowampa Piripiba Ituriya mabe Tarakonaitisi mabe kabiyogana, Arisaniyasiba Abirini mara kabima mintoginisi, 
<p><sup>2</sup> pigo Anasige Kayapasigeba mono kiye yagarara mintantase. Pigoya, pi kanabi Koti kamanapa Yoniti tumintiye. Kana yagaraba Sekaraya ntagaragana kaꞌme mpari mima, pi kamana abintiye. 
<p><sup>3</sup> Abigaite, aꞌyaꞌma Yontani waninkama maroteri materi nasima maya uwaimintiye: Aguntaenaripa kaitegiripa aꞌwae puma wani pasigina, Kotiba aguntaenaripa maerigaikiye, uwaimintiye. 
<p><sup>4</sup> Pigoya, poropete Aisaya pika kamana agoba pai maya uma kaemarantiye:<p/>Awaga kamana ukena yagara kaꞌme mpari mima kegaꞌe uma mayama aboraye: Waꞌegawamanta ke iꞌma, arupu puma amuyena piyo, iye.<p/> 
<p><sup>5</sup> Aigubuntaꞌenaba kuꞌma amuyena pumagiri, aꞌyaꞌma tabe amupe amara nkamupe akusamagiri, antage nantage kipa maema asoya puma, arupu pumagiri, atumite asite punti kipa parakabaꞌmagiri, aꞌyaꞌma aogi piyo, iye.<p/> 
<p><sup>6</sup> Piya, aꞌyaꞌma kinapa Koti tababuma aogi puratakena yugawapa agakibewe, piya uma kaemarantiye. 
<p><sup>7</sup> Pigoya, uwoma kina Yoniti mono wani pasikena kanauguna maya uwaimintiye: Tigeba kuya awarorawe. Koti tisa amoꞌena aborarimekiri kakagaisanaga kebaya urimegiri mataꞌiba kanawe. 
<p><sup>8</sup> Tigeba aguntaenaripa kaitegiri tigu aꞌwae pigina mono auꞌwapa aborakiripa, wani kanara maekibewe. We, tigeba: Abaraꞌamu nkagaꞌnuraga aogima mikunemagiripa, a-ntapima yiyo. Pabigo urimekiri abiyo: Kotiba ma ntabatasa Abaraꞌamu nkaoso agaꞌnugi iba pikenaba agantiye. 
<p><sup>9</sup> Piya, ya agayukena tupa ya agobi atantiye. Pi ntawama nka kampa aogima aekanaba, agaiyuma yakupi kaekiye, Yoniba meto kamana piya untiye. 
<p><sup>10</sup> Piya yogini, kana wasanamiba mayama abigantawe: Taeba aya pukunema, abigauguna, 
<p><sup>11</sup> aeba maya untiye: Kai tara waintakanaba, ka yagara kaiba kampa waintakanaba ameno. Nanina waintakanaba, kampa waintakibi ntagara kaꞌisa ameno, piya untiye. 
<p><sup>12</sup> Pigoya, kaꞌisa takisi maeyume kinapa kanama mono wani pasikenaga abigamagini maya untawe: Tisawo, taeba aya pusune, untawe. 
<p><sup>13</sup> Piya yuguna, aeba: Tigeba takisiba maekibe nkawa maeyiyo. Toba a-nkagasima maeyiyo, uwaimintiye. 
<p><sup>14</sup> Piya uwaimogini irebu kinapa kanama: Taeba aya pusunema, abigantawe. Abigauguna, aeba maya uwaimintiye: Tigeba to kinapa imiyoꞌenaba a-puma, yabankaipa a-mpaemagiri, kampari kotiyenaba a-puma, yabankaipa a-mpaeyiyo. Pabi ikantanari maemagiri uwa miyiyo, piya uwaimintiye. 
<p><sup>15</sup> Piya yogini, kana wasanamiba Yoni yome kamanaka abimagini aꞌyaꞌma pi kinaꞌmi mayama napintawe: Aeba aobi pompe ntagara Karaisitiwema, Yonika untawe. 
<p><sup>16</sup> Piya yuguna, Yoni aꞌyaꞌma kinapa maya uwaimintiye: Pigoya, ka yagara nakaꞌi kanakibi ntagaramaba, agewapa asunagasima waintika, naeba mayamanaba agisa anapa kampa akubo agaikuwe. Piya, naeba wanitasa paititauwe. Aeba Aota Awamusatasage yakutasage paititakiye. 
<p><sup>17</sup> Aeba aka maete kanama, witi naninta ampa aigaga pumagina anonkapa namapi atantana ariwapa tayaba yakupi kaegaikiye, uwaimintiye. 
<p><sup>18</sup> Piya uwaimintana, Yoni to mono to mono aogi kamana uwaimintiye. Eroti Yonipa arakurintiye 
<p><sup>19</sup> Pigoya, tabe kiye yagara Eroti, ae aꞌnantowampa nkwae Erotiyasi maeyogana, Yoniba: Mantanabe to kaꞌisa ataenagape a-po, omintiye. 
<p><sup>20</sup> Omogana aeba to tabera ata agi napintiye. Piya, piya yomeka Erotiba abitegina, Yonipa arakuꞌmagina igaꞌna namapi atantiye. Yoni Isu wani paiꞌatantiye 
<p><sup>21</sup> Pigoya, aꞌyaꞌma pi kina wani paiꞌitantana, Isuge paiꞌatantiye. Piya pogana aeba nunamu yogana, manta aꞌwaiyogana, 
<p><sup>22</sup> Aota Awamusaꞌama pupunta kanta purite aeti tumintiye. Tumogana pi mantabintisa maya kamana tumintiye: Kaeba nae nabugami ntagaranekawe. Tabera naꞌmu pugatauwe, untiye. Isu nkayabamagi kamanane 
<p><sup>23</sup> Pigoya, Isu 30 kabu mimagina, yogawapa agobintiye. Pigoya, wasanamiba aekaba abugunaba Yosepe ntagara kanta puntiye.<p/>Piya, Yosepe aeba Irai ntagarawe.<p/> 
<p><sup>24</sup> Piya, Irai aeba Matati ntagarawe. Matati aeba Aribai ntagarawe. Aribai aeba Merikai ntagarawe. Merikai aeba Yanai ntagarawe. Yanai aeba to Yosepe ntagarawe.<p/> 
<p><sup>25</sup> Piya, pi Yosepe aeba Matatayasi ntagarawe. Matatayasi aeba Emosi ntagarawe. Emosi aeba Neyamu ntagarawe. Neyamu aeba Esirai ntagarawe. Esirai aeba Nagai ntagarawe.<p/> 
<p><sup>26</sup> Piya, Nagai aeba Meyati ntagarawe. Meyati aeba to Matatayasi ntagarawe. Pi Matatayasi aeba Semeni ntagarawe. Semeni aeba Yoseki ntagarawe. Yoseki aeba Yota ntagarawe.<p/> 
<p><sup>27</sup> Piya, Yota aeba Yowanani ntagarawe. Yowanani aeba Aresa ntagarawe. Aresa aeba Serababeri ntagarawe. Serababeri aeba Siyatiyeri ntagarawe. Siyatiyeri aeba Nerai ntagarawe.<p/> 
<p><sup>28</sup> Piya, Nerai aeba to Merikai ntagarawe. Pi Merikai aeba Erai ntagarawe. Erai aeba Kosamu ntagarawe. Kosamu aeba Erimetamu ntagarawe. Erimetamu aeba Eya ntagarawe.<p/> 
<p><sup>29</sup> Piya, Eya aeba Yosuwa ntagarawe. Yosuwa aeba Eriyesa ntagarawe. Eriyesa aeba Yorimu ntagarawe. Yorimu aeba to Matati ntagarawe. Pi Matati aeba to Aribai ntagarawe.<p/> 
<p><sup>30</sup> Piya, pi Aribai aeba Simiyoni ntagarawe. Simiyoni aeba Yuta ntagarawe. Yuta aeba to ka Yosepe ntagarawe. Pi Yosepe aeba Yonamu ntagarawe. Yonamu aeba Eriyakimu ntagarawe.<p/> 
<p><sup>31</sup> Piya, Eriyakimu aeba Mereya ntagarawe. Mereya aeba Mena ntagarawe. Mena aeba Matata ntagarawe. Matata aeba Netani ntagarawe. Netani aeba Tebiti ntagarawe.<p/> 
<p><sup>32</sup> Piya, Tebiti aeba Yesi ntagarawe. Yesi aeba Obete ntagarawe. Obete aeba Powasi ntagarawe. Powasi aeba Samoni ntagarawe. Samoni aeba Nasoni ntagarawe.<p/> 
<p><sup>33</sup> Piya, Nasoni aeba Aminatabu ntagarawe. Aminatabu aeba Atimini ntagarawe. Atimini aeba Anai ntagarawe. Anai aeba Esironi ntagarawe. Esironi aeba Perese ntagarawe. Perese aeba to Yuta ntagarawe.<p/> 
<p><sup>34</sup> Piya, pi Yuta aeba Yekobu ntagarawe. Yekobu aeba Aisaki ntagarawe. Aisaki aeba Abaraꞌamu ntagarawe. Abaraꞌamu aeba Tera ntagarawe. Tera aeba Neyo ntagarawe.<p/> 
<p><sup>35</sup> Piya, Neyo aeba Seraki ntagarawe. Seraki aeba Ariyu ntagarawe. Ariyu aeba Pereki ntagarawe. Pereki aeba Iba ntagarawe. Iba aeba Sira ntagarawe.<p/> 
<p><sup>36</sup> Piya, Sira aeba Kenani ntagarawe. Kenani aeba Apakisati ntagarawe. Apakisati aeba Semi ntagarawe. Semi aeba Nowa ntagarawe. Nowa aeba Arameki ntagarawe.<p/> 
<p><sup>37</sup> Piya, Arameki aeba Metusara ntagarawe. Metusara aeba Inoku ntagarawe. Inoku aeba Yereti ntagarawe. Yereti aeba Maꞌarariyo ntagarawe. Maꞌarariyo aeba to Kenani ntagarawe.<p/> 
<p><sup>38</sup> Piya, pi Kenani aeba Inosi ntagarawe. Inosi aeba Seti ntagarawe. Seti aeba Antamu ntagarawe. Piya, Antamu aeba Koti ntagarawe.<p/>
<h4>4</h4>
<p><sup>1</sup> Pigoya, Yontani wanipi Yoni Isu wani paiꞌataogana, Awamusaꞌama agupinti pumaewama, kaꞌme mpari ababute wantiye. 
<p><sup>2</sup> Wama 40 yagaba umintogana, kewama pi ntagaba amiyo potantiye. Aibogana, naninta kampa nanta iꞌmintogana, agaꞌena abugaogana, 
<p><sup>3</sup> kewama aeti aborama maya omintiye: Kaeba Koti Ntagara mintanapa, yegana ma ntabaka paretiyena pekana nao, untiye. 
<p><sup>4</sup> Piya yogana, Isu antota maya omintiye: Koti kamanaꞌama maya iye: Wasanamaba nanintarasaba kampa aꞌyaꞌma esegiyenawapa maekiye, iyema, omintiye. 
<p><sup>5</sup> Piya omogana, kewamaba ababurite inati imagina, aꞌyaꞌma mampabisa kinapa asu aro ntaganto ayakimagina, 
<p><sup>6</sup> maya omintiye: Aꞌyaꞌma ma nkesegiyenabe igaenabe nae namiwaentine. Pigoya nae napima kaꞌwaina amikenaba amukuwe. Piya, kaepa kamukuwe. 
<p><sup>7</sup> Kaeba nae nageba asagayuyegapa pi aꞌyaꞌwaemaena waintintanaba kaeꞌenaena puwaewakiye, untiye. 
<p><sup>8</sup> Piya yogana, Isu antota uma maya omintiye: Koti kamanaꞌama maya iye: Waꞌega Kotigapa, ae age asagayuma, ae abiwa kayokayaꞌena potao, iyema, omintiye. 
<p><sup>9</sup> Piya omogana, kewama Isu Yerusaremi kumati ababute ima, tabe mono nama nkagari mesutama maya omintiye: Kaeba Koti Ntagara mintanapa, matasa paꞌyo puma tumo. 
<p><sup>10</sup> Piya, Koti kamanaꞌama mayama iye: Kotiba aeba enisore kinaꞌwa uwaitakana kabigatama kaoꞌmaekibewe, iye. 
<p><sup>11</sup> Piya, kaegukena pukibipa, iyatasa kababute tumigina, yabankamaba kagisaba kampa arisakiye, iyema, untiye. 
<p><sup>12</sup> Piya yogana, Isu antota uma maya omintiye: Koti kamanaꞌamaba to ka maya iye: Kaeba Waꞌega Kotigapa amiyo puma agakenaenaba a-po, iyema, untiye. 
<p><sup>13</sup> Piya yogana kana amiyoꞌena aꞌya waogana, kewama Isupa atate migarakena wantiye. Isu Karariya mari yogawa agobintiye 
<p><sup>14</sup> Pigoya, Aota Awamusaꞌama Isu esegiyena amogana, Karariya-i to wama yogawa pogini, aꞌyaꞌma pi nkaukaꞌisa kinaꞌmi ae awaga kamanapa abintawe. 
<p><sup>15</sup> Aibuguna, aeba mono namapinti imagina, kamana uwaimogini iꞌmu potantawe. Nasareti kinaꞌmi Isupa ikabitantawe 
<p><sup>16</sup> Piya puguna, uwaena yagaranto Isu mima anosanti mpari Nasareti wantiye. Pitaꞌi aꞌyaꞌma sabati yaga mono namapi ibomeka, ka yagaba ima Koti kamana aisikena asiyogini, 
<p><sup>17</sup> aepa poropete Aisaya kaemaranti nkisa amintawe. Amuguna maema aparotama, maya kamana waintogana uwaimintiye:<p/> 
<p><sup>18</sup> Pigoya, Waꞌegawamatisa Awamusaꞌama nae nantabinti tumegina, aogi kamana uwa kina uwaimo unatantiye, iye.<p/>Piya, to wainaga arakuꞌma upebe punta kinapa atagana wanoma, iyorikaenta kinapa iyogawai taoma, atabi mpiye kinapa aogima mikibewe, uwaimomagina, naisagagi tumuwe, iye.<p/> 
<p><sup>19</sup> Piya, Waꞌegawama aokina aogi puwaitakibe ntagagaba, awaga kamana yoma unatagi tumuwe, iyema, Isu esapisa kamana piya untiye. 
<p><sup>20</sup> Piya ugaitegina, aeba kana esa akarakima amome ntagara amite maraꞌmiyogini, kana mono namapi mintume kinaꞌmiba: Ae kamanaꞌwa ukena piye, utegina, iyoba araga aragama agauguna, 
<p><sup>21</sup> aeba mayama agobima uwaimintiye: Ago uriminta kamanapa auꞌwapa ibanto aboragiri abewe, untiye. 
<p><sup>22</sup> Piya yogini, igeba awamupisa iga kamanaꞌwapa abima pami pumagini: We, aeba Yosepe ntagarawe. Ayamabaya aogi kamanapa iye, untawe. 
<p><sup>23</sup> Piya yuguna, Isu maya uwaimintiye: Tigeba obisobi kamana naeka maya yepa: Tusa yagara kae kauka aogi pega kagano. Piya, Kapaniyamu kumata yoga puntampe nkawaga kamana abune. Pabiyama magata pega agano, piyama nabigakibewe, uwaimintiye. 
<p><sup>24</sup> Piya uwaimintana Isu to maya untiye: Naeba taga kauwe. Koti unti kamana yemi poropete yagarama kamanaꞌwapa mawatasa kinaꞌmiba kampa abima aegarakibewe. 
<p><sup>25</sup> Pigoya, naeba tagaka urimuwe. Iraiya mintome kanabi, kaboba kakaga pumagina opa tonaentisa kaꞌumaema u, kampa ka aemagina, pa tawaogana kaboba tabera pumagina, aꞌyaꞌma kina igaꞌenaba tabera ibuntiye. 
<p><sup>26</sup> Ibogini, pi ntaga Isureyo abeya waepa uwoma mintuguna, igetiba Koti Iraiyapa kampa agarubantiye. Aeꞌwa nkaokinatiba kampa agarubantiye. Aepa Saironi mara Sarepata kumati ka namuꞌisa abeya waeti agarubaogana, wama naninta nantiye. 
<p><sup>27</sup> Piya Iraisa mintome kanabipa, Isureyo mara uwaena karu kina mintuguna, kampa ita wantiye. Piya, ka Siriya marisa yagara, agewapa Naemani, abiwapa Iraisati waogana kaba ataogana anamopa ata wantiye, Isu piya uwaimintiye. 
<p><sup>28</sup> Piya uwaimogini, aꞌyaꞌma mono namapinti mintume kinaꞌmi ka abiꞌma, 
<p><sup>29</sup> pi kinaꞌmiba kumawaitisa agarubakena pumepa irosaꞌma ige kumati amuti ababute ima auꞌyari apasanakaikena puguna, 
<p><sup>30</sup> aeba abakapinti uwigasi ankigasi putagina wagaintiye. Isu ka yagarama nkantabintisa ke kina agarubantiye 
<p><sup>31</sup> Pigoya, Isu Karariya mari tumima, Kapaniyamu kumata wantiye. Wamagina sabati yagaba wayaꞌwa kamana uwaimintiye. 
<p><sup>32</sup> Kana kamana uwaimomepa kiya kinaꞌmi yumesa kamana yogini abite pami puntawe. 
<p><sup>33</sup> Pigoya, pi mpono namapinti ka yagara, ke kina antabaipinti minta yagara, aege mintuguna, aeba tabera kegaꞌe uma maya untiye: 
<p><sup>34</sup> We Isugaba, Nasaretirisa yagaragawe. Taegukena kanapaya, nana puratakena kanane. Piya, naeba ago abopa, kaeba Kotitisa aota yagaragawe, piya untiye. 
<p><sup>35</sup> Piya yogana, Isu ka abiꞌma maya omintiye: Paka pumagina, atate irosaꞌma wagaso, omintiye. Omogana, ke kinaꞌmaba kana yagara apasara pomepa, kampa aupa airisanta uwa irosaꞌma wagaintiye. 
<p><sup>36</sup> Piya pogini, kana pi kumata mintume kinaꞌmiba pami pumagini, mare-u me-u puma maya untawe: We, aeba nana kamana iye. Aeba esegiyenawapisa kiya kinaꞌmi usu kamana uma ke kina uwaitagini atate wagasawe, piya untawe. 
<p><sup>37</sup> Aibogini, pintana pome kamanapa urite, aꞌyaꞌma pi mari wagana kana puntawe. Isu Pita aentawampa aogi potantiye 
<p><sup>38</sup> Piya puguna, mono namapisa iroꞌma, Saimoni ntamapinti iyomepa Saimoni aentawampa nkau yaku taogana mintogana, Isu yoninkapa: Kaba ataoma, abigantawe. 
<p><sup>39</sup> Abigauguna, aeba agora ampagina yoninkapa: Ata wao, yogana ata wantiye. Ata waogana, kana waeꞌmaba asima naninta maema imogini nantawe. Isu uwoma kina aogi puwaitantiye 
<p><sup>40</sup> Pigo papa tupasikena pogana, kaꞌisa iyokinaꞌmiba tonarona inu ibome kinapa ibabute kanagana puguna, Isuba aꞌyaꞌma iꞌnota ayapa ataogana, ita wantiye. 
<p><sup>41</sup> Piya pogana ke kina wasanami nkintabaipintisa igarubakasogini, igeba irosaꞌma kegaꞌe uma: Kaeba Koti Ntagaragawe, untawe. Pigoya igeba: Isu aeba Karaisiti yagarawema, napiyuguna, to mare-u me-u pusanaga akunkitantiye. Isu Yutiya mari nasima kamana uwaimintiye 
<p><sup>42</sup> Pigoya, Isu abayara itate kaꞌme mpari waogini, kaꞌisa kinaꞌmiba aguyosaꞌma aeti wamagini: Taege mikibene, uma arakuruguna, 
<p><sup>43</sup> aeba maya uwaimintiye: To kaꞌisa kumatiba naeba Koti kabiratakena aogi kamanapa uwaimoma unatagi kanauwe, uwaimintiye. 
<p><sup>44</sup> Piya uwaimite Yutiya mari mima, aꞌyaꞌma aukaꞌi mono namapinti kamana uwaimita nasintiye.<p/>
<h4>5</h4>
<p><sup>1</sup> Pigoya, ka yagaba Isuba Kenesareti kotu nkawamori umima Koti kamana yogini, wasanamiba ampa aki puma airakiraki puma ampa abintawe. 
<p><sup>2</sup> Piya puguna Isu agaomepa, wanipisa kare tara kotu nkawamori waintusuguni, kana inoyanta aeyume kinaꞌmiba iroꞌma tumima kuko wanipi aemiyuguna, 
<p><sup>3</sup> aeba Saimonintana wanipisa karebi ima asu mintana, Saimoni maya omintiye: Awamorisaba paibumanto pubasa naigina wano, yogini pubasanaꞌma metauguna, aeba kana wanipisa karebi maraꞌmima pipisa aꞌyaꞌma awamori mintume kinapa mono kamana uwaimintiye. 
<p><sup>4</sup> Piyama kamanapa uwaimitegina, Saimonika maya omintiye: Tigeba wani nkakanti wamagiri, kana kukotipa metama inoyanta aeyiyo, untiye. 
<p><sup>5</sup> Piya yogana, Saimoni maya untiye: Tabe Yagaramawo, taeba asekapa tabe yuga pumiyompepa, kana inoyantaba kampagi aeyune. Piya pompeka, kae yempekaba kukopa atama agakune, untiye. 
<p><sup>6</sup> Utegina, kopa wanipinti motantawe. Piya pumepa, uwoma inoyanta iraꞌwaiyogini, kana kupa kunta puma aeꞌmutikena pogana, 
<p><sup>7</sup> igeba iyokinaka to ka wanipisa karebi mintuguna, kegaꞌe yuguni, kanama ampa iyoꞌmaema, tarayaga wanipisa karebi uwaena atauguna, kana wanipisa kareba kunta puma ipirintakena puntase. 
<p><sup>8</sup> Piya pogana, Saimoni Pitaba pintanaba agategina pami pumagina, Isu nkagisabi arakabima parokaema maya untiye: Naeba uwa agunta yagara mintuwe. Waꞌega Yagara, kaeba uwa natate wao, untiye. 
<p><sup>9</sup> Pipa nanagawanane. Inoyanta maeyumeka aekuru pogini, pi aokinaꞌmibe pabiyama iyekuru puntawe. 
<p><sup>10</sup> Piya pogana, tara yagarara Yemisige Yonigeba, Sepeti ntagara tara, isigegeba isiyekuru pusuguna, Isu mayama Saimoni omintiye: Kaeba a-kaekuruba po. Aintiba inoyanta aeyempesa puma wasana iba pikibene, piya omintiye. 
<p><sup>11</sup> Piya omogini, igeba wanipisa kareba pubasanama kepiyati me nkatama, aꞌyaꞌwaemaenawaipa kaite Isu nkaegarantawe. Isu karu yagara kaba atantiye 
<p><sup>12</sup> Pigoya, Isuba ka kumata mintogana, ka yagaraba aꞌyaꞌma aupintiba karuyena abome ntagarama Isu agate, aowarisa mabi parokaema maya untiye: Waꞌegawo, kaeba kabemika kaba natakena puntanapa aogi punatao, untiye. 
<p><sup>13</sup> Piya yogana, Isu aya parosuma auta uꞌma maya untiye: Piyaenaga nabiye, untiye. Piya umagina: Pabigo kata wakana aogima miyo, untiye. Piya yogana, pabi ntaga kana karuyenawapa atawantiye. 
<p><sup>14</sup> Atawaogana Isu esegima maya omintiye: Kaeba uwa kinapa a-nkuwaimima, marupa wama kaupa mono kiye yagara uma ayakegana agano. Piya, kata wamikaba pai Mosese uramintintanaba Kotiti amegini, wasanamiba kagate: Aoso yagara miyema napikibewe, piya omintiye. 
<p><sup>15</sup> Aibogini, aꞌyaꞌma Isu pomentanaga wasanamiba mare-u me-u puta nasuguna, uwoma kina ampa kamana abekana yonintanaba kaba atagaikiye, piya uma aeti kanantawe. 
<p><sup>16</sup> Aibuguna, pabigo itategina kaꞌme mpari wama nunamu untiye. Isu agisa aya puꞌwanta yagara kaba atantiye 
<p><sup>17</sup> Pigoya, ka yagaba Isu mono kamana uwaimima yogini, Karariya marisabe Yuta marisabe Yerusaremi kumatasabe, kaꞌisa Parasi kinake kamana ago abinta kinake, igeba pitisa kanama wasana abakapi ampintantawe. Ampintuguna, Waꞌega Yagaramapisa yoni kaba itakena esegiyenawapa Isu ago maentiye. 
<p><sup>18</sup> Piya maeyogana, ka yagaraba agisa aya puꞌwanta yagara, kaꞌisa kinaꞌmi wasa yara wasirite kanamagini, Isu nkagora me nkatakena kanaumepa, 
<p><sup>19</sup> namapa pumaewauguni, kupa kampa tantiye. Aibogini, kana yagara wasirite nama nkabobori imagini, asu akuritama, pitaꞌisa motauguna tumima Isu nkagora tumintiye. 
<p><sup>20</sup> Tumogana, Isu imatitiꞌenawai aeti ataume igantana maya untiye: Naoꞌanto, naeba aguntaenagapa maegagasuwe, omintiye. 
<p><sup>21</sup> Omogini, kaꞌisa mono tisa kinaꞌmibe Parasi kinaꞌmibe pi kamana abintini, mare-u me-u puma maya untawe: Ma ntagaraba Kotika anagiyenaba usuyenaba, aeba nana yagarawe. Koti ae abi aguntaenarepa maeragaikiye, untawe. 
<p><sup>22</sup> Piya yuguna, Isu kana napiyenawai nkigate maya untiye: Tigeba nanaga tigebipa napiyewe. 
<p><sup>23</sup> Nanaenama kunta piye. Pigoya, naeba: Aguntaenaga maegagasuwe, yokabera: Asima wao, yokawe. Asima wao, yekana, kampa asima nasekiripa kagi punatakibewe. 
<p><sup>24</sup> Pigoya, tigeba abiyo. Wasanama Ntagara naeba ma mpabi aguntaena maerigaikena esegiyenanepa waintiye. Pi nkinuntana naeba agarubakiri agamagiri, aguntaena maerigaikena esegiyenanekaba napiyiyo, uwaimintiye. Piya uwaimintana, aꞌwae puma agisa aya puꞌwanta yagaragaba maya omintiye: Naeba ugamota, kaeba asima wasagapa aesagabite waꞌegati waoma, omintiye. 
<p><sup>25</sup> Piya omogana, karuꞌena asima waitamiyome wasawapa aesagabite waꞌewati wantana, Kotiti aꞌmu potantiye. 
<p><sup>26</sup> Piya pogini, uwoma kinaꞌmiba agate pami puma, Koti nkage asagayuma: Ibasa yagaba nanabaya agaune, untawe. Isu Aribaika kegaꞌe untiye 
<p><sup>27</sup> Pigoya, pabi ntaga togana Isuba waomepa, takisi maeyome ntagara, agewapa Aribai, takisi opisibi mintogana, isu: Ampa naegarao, omintiye. 
<p><sup>28</sup> Piya omogana, asima aꞌyaꞌwaemaenawapa atategina wama Isu nkaegaꞌma wantiye. 
<p><sup>29</sup> Aegaꞌma wama, Aribaiba namankapi tabe naninta Isupa kaema amintiye. Piya pogini, uwoma takisi maeyume kinape to uwa kinape isigege ampa maraꞌmima naninta nantawe. 
<p><sup>30</sup> Piya puguni, Parasi kinaꞌmibe mono tisa kinaꞌmibe Isu abagi kinaka uwoma kamana maya untawe: Nanaga takisi maeya kinaꞌmige to aguntaena pe kinaꞌmigeba igebe nanintaba nawema, abigantawe. 
<p><sup>31</sup> Piyama abigauguna, Isu maya untiye: Wasanami kampa yoni nkibemi kinaꞌmiba tusa yagaramati kampa wawe. Yonintana ibemi kinaꞌmi mana igeba wawe. 
<p><sup>32</sup> Piya pemisa puma: Aogi kinatawe, ye kinapa aogi puwaitakenaba kampa tumintuwe. Naeba agunta kina igu aꞌwae pikibeka uwaimikena tumuwe, piya untiye. Naninta aꞌa-o uma iꞌmikena kamana abigantawe 
<p><sup>33</sup> Piya yogini, kana wasanamiba Isuka maya omintawe: Yoni nkabagi kinaꞌmiba uwoma ntaga nanintaba kampa nanta, aꞌa-o uma nunamu yewa, Parasi nkaokinaꞌmigeba pabiya pewe. Pigoya kae kabagi kinaꞌmiba nanintabe wanipe asi nasi aꞌyugu nawe, piya omintawe. 
<p><sup>34</sup> Omuguna, Isu maya uwaimintiye: Pigoya, wasanami ibaꞌena puntiniba, aꞌyaꞌma kinaꞌmiba nanintaba kampa aꞌa-o ukibewe. Igeba naninta naiginaba, ibaꞌwaeꞌma nkawaewampa uwa mikibipa, pipa kanarane. 
<p><sup>35</sup> Pigoya, ainti ibaꞌwaeꞌma nkawae ampa arakurite ababute to mari wagasiginiba, pi ntagaba aoꞌmiba intara puma kampa naninta nanta uma mima aeka napikibewe, untiye. 
<p><sup>36</sup> Piya untana, Isu meto kamana pika maya uwaimintiye: Wasanama abara kai atugekanaba, to aoso kairasaba kampa kasama pitapa motama pugunikiye. Piya pukibipa pi abara kai to atuꞌwakanaba, ka aogi kai kampa waikiye, untiye. 
<p><sup>37</sup> Piya untana to maya untiye: Piya, wasanamaba kasa waini wanipa paisa yaga auꞌaribi kampa arigikiye. Piyama paisa yaga auꞌaribi arigikibemipa, namagima aiguriwakiye. 
<p><sup>38</sup> Piya, wasanamaba kasa wainina pabi kasa yaga auꞌaribi arigiye. 
<p><sup>39</sup> Pigoya, wasanama paisa waini nagaiteginaba, toba kasa wainigaba kampa abiye. Aeba: Paisaenarepa aogiyenawe, iyema, Isu piya uwaimintiye.<p/>
<h4>6</h4>
<p><sup>1</sup> Pigoya, ka sabatirapa Isu witi yugabinti waogini, abagi kinaꞌwampi kana witiba maema iyasama nantawe. 
<p><sup>2</sup> Piya puguna, kaꞌisa Parasi kinaꞌmiba igate maya untawe: Tigeba sabatirapa akumparantaꞌenaba nanaga piyaba pewe, untawe. 
<p><sup>3</sup> Piya yuguna Isu maya uwaimintiye: Tigeba kampa napiyewo. Tayabama Tebitige aege miyume kinaꞌmige igaꞌena ibogana puntikaba aisumagiri kampa abewo. 
<p><sup>4</sup> Aeba Koti mpono namapinti ima, Kotika napima ataume pareti asu maentiye. Pigoya, pi paretiba uwa kinaꞌmiba kampa nakenawe. Mono kiye kinaꞌmi ibiwai nakena atanta pareti asu maema akobuma, aꞌyaꞌma uwa aokinapa imogini nantapa kanarane, piya untiye. 
<p><sup>5</sup> Piya untana, Isu to maya untiye: Wasanama Ntagara naeba pabiyama sabatirapa kabima miyuwe, piya uwaimintiye. Isu aya puꞌwanta yagara sabatira kaba atantiye 
<p><sup>6</sup> Pigoya, to ka sabatirapa Isu mono namapinti ima kamana uwaimogana, ka yagaraba ayatakantisa puꞌwanta yagara mintogini, 
<p><sup>7</sup> kaꞌisa mono tisa kinaꞌmige Parasi kinaꞌmige, Isu sabatira yoni kina kaba itasanaga kamana otakena apasa puntawe. 
<p><sup>8</sup> Piya puguna, Isuba ago napiyenawaipi igategina, kana aya puꞌwanta yagara: Asitaigina mataꞌi iyeno, yogana, aeba asima ikapi intiye. 
<p><sup>9</sup> Iyogana Isu maya uwaimintiye: Naeba tibigauwe. Sabatira ago kamanapa nanawe iye. Wasana sabatira aogi potakupera ataena potakune. Aoꞌmaekupera aegukunema, ibigantiye. 
<p><sup>10</sup> Piya untana, aꞌyaꞌma kinapa mare-iga me-iga puntana, kana yagaramaka maya omintiye: Kayapa aparotano, omogana, karuꞌena kana ayapa aparotaogana atawantiye. 
<p><sup>11</sup> Piya pogini, kana kinaꞌmiba agate intabi ikimagini: Isupa nana potakunema, napintawe. Isu nagisarisa tara tumpaema kina ibabuntiye 
<p><sup>12</sup> Pigoya, pabi ntaga Isuba nunamu ukena amuti iyogana, ase yogana, pabi nkasenabinti Kotiti nunamu untiye. 
<p><sup>13</sup> Piya yogana marogana, aeba abagi kinaka igegaꞌe yogini kanauguna, nagisarisa tara tumpaema aisuwaitama, igewaipa aposorowe uwaitantiye. 
<p><sup>14</sup> Piya, igewaipa mayamawe: Saimoni aoso ominti nkagiwapa Pitawa, ae aꞌnanto Enturuwa, Yemisiwa, Yoniwa, Piripiwa, Patoromayowa, 
<p><sup>15</sup> Matiyuwa, Tomasiwa, Aopayesi ntagara Yemisiwa, namuꞌisa kiya kina igarubakaikena abugai ntagara Saimoniwa, 
<p><sup>16</sup> Yemisa ntagara Yutasiwa, ainti Isu minagaꞌena punti ntagara Yutasi Isikeriyotiwa, sumagini, abagi puntawe. Isu uwoma kina aogi puwaitantiye 
<p><sup>17</sup> Pigoya, ibaburite igege amutisaba tumima, amura tumpa irosaꞌma mintuguni, tabe uwoma abagi kinape tabe uwoma Yuta kinape Yerusaremi kinape, wani nkagorasa Taya kinape Saironi kinape, me nkaki puma kamanaꞌwa abima yonintanawai mae igaikenaga uma aeti aki puntawe. 
<p><sup>18</sup> Aibuntini, ke kina intabinti mintome kinapa kanauguna, agaruba igaintiye. 
<p><sup>19</sup> Piyamaba esegiyenawampa iyoꞌmaeyogini, aꞌyaꞌma kinaꞌmiba: Yonintanarepa tatawakiyemanapimagini auta ukaya puntawe. Isu aꞌmu kamanape antara kamanape untiye 
<p><sup>20</sup> Piya puguna, Isu abagi kinaꞌwa igauꞌma maya uwaimintiye: We, kusi miye kina, tigeba Koti kabiritakiri, tiꞌmuntanabi mikibewe. 
<p><sup>21</sup> Tigeba tigaꞌena tibemi kinaꞌmitaba, aintiba tigaꞌe pakiri, tiꞌmuntanabi mikibewe. Tigeba ibaba kubeꞌena puma miye kinaꞌmitaba, aintiba kagi pumagiri tiꞌmuntanabi mikibewe. 
<p><sup>22</sup> Piya, Wasanama Ntagara naeka wasanami kama puritama aruyenabisa tigarubaꞌmagini karibiꞌma agunta kamana tigeka uritaigiripa, tigeba tiꞌmu piyo. Tiꞌmuntanabi mikibewe. 
<p><sup>23</sup> Piya, aintiba aogi ikantanaripa mantariba taberakaꞌyane. Pika pi ntagaba tiꞌmu puma tinta asoya puma miyiyo. Paipa iyabamagipa pabiyama poropete mintanta kinapa karana puwaitantawe. 
<p><sup>24</sup> Mone tabe kuta ntaga kina, tigeba ikantanaripa ago maeyawe. Aintiba toba kampaye. Tigeba ataenabi mikibewe. Pika tintara piyo. 
<p><sup>25</sup> Pigoya, ibasa yaga tabe nakena nata nase kinapa, tigeba aintiba tigaꞌena tibikiye. Tigeba ataenabi mikibewe. Pika tintara piyo. Pigoya, ibasa yaga kagi pe kinapa, aintiba tigeba kubeꞌena pigina tiyoꞌnu tumikiye. Tigeba ataenabi mikibewe. Pika tintara piyo. 
<p><sup>26</sup> Pigoya, tige maete ima iꞌmu puritaigiri, tigeba kampa aogima mikibewe. Paipa pi kinaꞌmi nkiyabamagi kumpari poropete kinapa pabiyama iꞌmu puwaitantawe. Isu kama kina aogi puwaitakena kamana untiye 
<p><sup>27</sup> Pigoya, naeba kamanaꞌne abe kina mayama urimuwa, abiyo: Tigeba kama kinatipa agu kaoꞌena puwaitantiri, imo purita kina aogi puwaitaiyo. 
<p><sup>28</sup> Karibiꞌma ata purita kinapa tiꞌmuntanaba puwaitaiyo. Karana purita kina igeka napima nunamu yiyo. 
<p><sup>29</sup> Pigoya, wasanama amo pugatama, ka katamara kaeguyekanapa, to ka aukaꞌi aꞌwae puma amo. Piyamaba wasanama muꞌmu kaiga maeyakanapa, a-kamopa puma, uwa atamagina to ka kai maekenaba a-nkakuno. 
<p><sup>30</sup> Pigoya, wasanama kaꞌenaga esugatakanapa, amo. To wasanama kaꞌisaenaga maeyakanapa, to namomaba a-nkabigao. 
<p><sup>31</sup> Pigoya, tigeba wasanami purataiyema tibikibintanaba, pabi nkawameta igepa puwaitaiyo. 
<p><sup>32</sup> Piya, tigeba agu kaoꞌena purita kina igeꞌamana agu kaoꞌena puwaitaiginaba, aintiba aya iretaripa Kotiba timikiye. Pipa kampaye. We, agunta kinaꞌmiba iyokinapa antota agu kaoꞌena puwaitawe. 
<p><sup>33</sup> Pigoya, wasanami aogi puritaigiripa, tigeba piyama aogi puwaitakibepa, nana tiꞌmuntana maekibewe. Pipa kampaye. Pabi ata kinaꞌmige pabiya puwaitawe. 
<p><sup>34</sup> Pigoya, iretari antota timikibe kinapa ireta imikibepa, tiꞌmuntanaba nana maekibewe. Pipa kampaye. Piya pesa puma, ata kinaꞌmiba to aꞌwae puma ata kinapisa ireta maekena pewe. 
<p><sup>35</sup> We, tigeba kama kinati kayone pumagiri, aogi puwaitamagiri, aogi puwaitakibentanabe imikibentanagabe antota maekenaba a-ntapiyiyo. Piya puntiripa, inatisa Tabe Yagarama ntagaraena piginaba, aintiba tabe ikantanaba timikiye. Piya, aeba wasanaba igama aekita kampa puwaitikana, uwa aꞌyugu kinape kampa iꞌmu pe kinape uwa iyoꞌmaema, aogi puwaitaye. 
<p><sup>36</sup> Pigoya, inatisa tibarimpaba antara puritamisa puma, wasanaga tintara puma iyoꞌmaeyiyo, Isu piya untiye. Antota kamana a-nkuwaitaiyo, untiye 
<p><sup>37</sup> Piya untana Isu to maya untiye: Tigeba to wasana aupi pima kamana a-nkuwaitaiyo. Kampa uwaitakibepa Koti tigepa pabiyama antota kamana kampa uritakiye. Pigoya, tigeba wasana aguntaenabipa a-nkitaiyo. Kampa itakibepa, Koti tigepa pabiyama aguntaenabipa kampa titakiye. Pigoya, tigeba aguntaenawai mae igasiginaba, pabiyama Koti aguntaenaripa maerigaikiye. 
<p><sup>38</sup> Pigoya, to kina kaꞌisaena imiginaba, Kotiba pabiyama aogiyenaba timikiye. Wasana kopa aigire pumagina awaitawamisa puma, Koti tabe puma agasiya timikiye. Piya, pabi imikibe nkawameta Kotiba aꞌwae puma timikiye, Isu piya untiye. 
<p><sup>39</sup> Piya untana, Isu amato puma meto kamana maya untiye: Aorikaenta yagaramaba to aorikaenta kinapa ayama kepa ayakikiye. Pipa kampaye. Kampa ayakekinisi, isigeba kaga aꞌabibintiba aesama isiyegukiye. 
<p><sup>40</sup> Piyama, abikena namapisa kinaꞌmiba kampa tisa kinaꞌwapa asugasaye. Kampaye. Aeba urintanaba togana pabi tisawama pemisa pukiye. 
<p><sup>41</sup> Pigoya, kaoꞌyagarama nkaobipa iꞌnintana waintakanapa, ayama agantana, kaeka kaobi ya atu waintakanapa, nanaga ae aogi potakenaga napiyene. 
<p><sup>42</sup> We, kumpari kina, kaeka kaobi ya atu waintemipa, kaeba ayama kaoꞌyagaragaba mayaba omegana aogi pikiye: Naoꞌyagara, kaeba abintaga, kaobisa iꞌnintanaba maegagasanoma, omegana aogi pikiye. We, kaeka kaobi ya atu waintemi, pipa marupa maegaite aogima agantana, kaoꞌyagarama nkaobisa iꞌni maegasagana aogi pikiye, Isu piya untiye. Ata yage aogi yawama kamana untiye 
<p><sup>43</sup> Piya uwaimintana Isu to maya untiye: Aogi yawamaba kampa ata yamankapa aeye. Piya, ata yawamaba aogi yamankapa kampa aeye. 
<p><sup>44</sup> Pigoya, aꞌyaꞌma yamankaꞌama aboragiripa, agowapa abewe. Piya, wasanamiba akenanaenabintisa kampa piki yamanka asikewe. Kabuyenarasaba kampa waini yamanka asikewe. 
<p><sup>45</sup> Pabiyamaba aogi yagaramaba agupintiba aogi napiyenawapisa aogiyenaba piye. Piya, ata yagaramaba agupipa ata napiyenawapisa aeba ataenaba piye. Piya, agupi awaitantiꞌnaba awamupisa irosaye, Isu piya untiye. Tara namaka meto kamana untiye 
<p><sup>46</sup> Pigoya, to kamana Isu maya uwaimintiye: Tigeba naeka: Waꞌegarekawe, Waꞌegarekawe, untiripa, nanaga nae yo kamanapa kampa abima wasiyewe. 
<p><sup>47</sup> Piya, naeti kanakibemi kinaꞌmaba kamanaꞌne abima wasikibipa, aepa nanara awame pusuwe. Mayama waintiye: 
<p><sup>48</sup> Ka yagarama nama kikena puntanaba, maruntana puma, tako aemaꞌma mabinti aibirintama aegasima, u takaitasa nama kimaragina, wani paꞌma akasabakena pugagategina, esegi puwagina kuruyenaba kampa punta uwa waiye. Piya, aeba tonkiya puma kimarantiye. 
<p><sup>49</sup> Pigoya, wasanama nae kamana abintana kampa wasiyemipa, aeba piyama wasanama amunta yarasa nama kimaraogana, wani paꞌma ata pogana karuꞌena kana namapa akasakasu paꞌwantiye, Isu piya untiye.<p/>
<h4>7</h4>
<p><sup>1</sup> Isu aeba wasana mono kamana aꞌya uwaimitategina Kapaniyamu kumati wantiye. 
<p><sup>2</sup> Pitaꞌi namuꞌisa irebu kinaꞌmi kiya yagarama, ae kayokaya yagara purikena puma mintantiye. Pigoya, kana tabe yagara pi ntagaraka abogana aogi puntiye. 
<p><sup>3</sup> Piya pogana, kana irebu kiye yagara Isu nkawaga kamana abite, Yuta kinaꞌmi paitakena kinaꞌmi igarubaꞌmagina: Isuti wama kayokaya yagarane yonintanawapa atawanema, uma omiyo, uwaimima igarubantiye. 
<p><sup>4</sup> Pigoya igeba Isuti wama esegi kamana maya uma omintiye: Taeba kiya yagara aeka abokana aogi piye. Pika kamanaꞌwapa abo. 
<p><sup>5</sup> Aeba aguꞌwapa Yuta kina taeti waiye. Pigoya, mono nama aboranemaba, aewa monepa ataogana kanarasaogana abora tamintiye, omintawe. 
<p><sup>6</sup> Piya uma omuguna Isu abite igege wantiye. Wama kiya yagarama ntamata irosakena pogana pitaꞌisa aokina uwaitaogini, kanama Isu mayama omintawe: Waꞌega, naeba tumima mintakina mintogana, pegina kaeba aꞌyugu puma namantepintiba ubasikibene. 
<p><sup>7</sup> Piya, naene abogana kampa aogi pegi, kaeti ikenakaba kunta puwe. Piya, kaeba pitaꞌi uwa mima kamana yegana kayokaya yagaranepa kabareno. 
<p><sup>8</sup> Piya, naeba ima minta kinaꞌmi nkiwamu wasimagi, to kaꞌisa tumima minta irebu kinaꞌnepa kabiyuwe. Piya, igetisa kaꞌwainapa: Wao uma omekanaba wakiye. To ka pa: Kanao, yekanaba kanakiye. Kayokaya yagarane: Pi ntuga po, yekanaba pikiye. Piya, kiya kinaꞌmi yosa puma yeganaba atawano, untiye. 
<p><sup>9</sup> Piya yogana, Isu pi kamana abima kiya yagaraga napi napi puntana, aꞌwae pumagina aꞌyaꞌma aegaꞌma kanaume kinaꞌmipa mayama uwaimintiye: Naeba urimekiri abiyo. Isureyo kina, tigetiba ma ntagarama nkamatitiꞌena piya awametapa kampagi agauwe, uwaimintiye. 
<p><sup>10</sup> Piya uwaimogini, kiya yagarama aokinaꞌmiba aꞌwae purite namapinti ima, kayokaya yagara yoninka ata waogini agantawe. Isu ka yagara purintapisa asitantiye 
<p><sup>11</sup> Pigoya, to ka yagaba Isu to ka kumapa agewapa Neni, pitaꞌi waogini, abagi kinaꞌwape wasana uwoma to kinape aege wantawe. 
<p><sup>12</sup> Pigoya, waꞌe ikibi kabera uma irosaogini, purinta kina ka wasi maete tumintawe. Kiya waeꞌma ntagara kaꞌanto mima purintiye. Piya, ae kumatisa uwoma wa wayapa kaikena tumi puntawe. 
<p><sup>13</sup> Tumi puguna Isuba pi kiya wae agama antara potama: A-kubeꞌenaba po, omintiye. 
<p><sup>14</sup> Piya omogini, wasana wasaba wasi uꞌma mintuguna, Isu wama wasa aukaya puma maya untiye: Masimabiwo, naeba ugamota kaogama asiyo, untiye. 
<p><sup>15</sup> Piya yogana, purintapisa asimagina kamana untiye. Pigoya Isuba anowampage miyenema amintiye. 
<p><sup>16</sup> Piya pogini, wasanamiba agate iyekuru pumagini, Kotiti iꞌmu puma maya untawe: Poropete tabe yagara abakatepi aboranti mintiye, untawe. Pigoya kaꞌisamiba to maya untawe: Kotiba aokina tae taoꞌmaekena kanaye, untawe. 
<p><sup>17</sup> Piya, awaga kamana Yutiya maribe to kaꞌisa maribe wagana kana puntiye. Isu Yoni nkabagi yagarara kamana uwaisimintiye 
<p><sup>18</sup> Aibogana, Yoni mintogini, ae abagi kinaꞌmi: Isu piya mayaena pome, pi kamana omintawe. 
<p><sup>19</sup> Pigoya pi kamana abite, tara yagara: Waꞌega maya uma abigaisema, isigarubantiye: Karaisitiba kanakiye untapa, kaebera, to kaꞌwainaka agawa pukupayawe, uwaisitaoginisi, 
<p><sup>20</sup> Isuti wamaginisi irosaꞌma maya untase: Yoni mono wani paitakena yagarama maya uma tasigarubaye: Karaisitiba kanakiye untapa kaebera, to kaꞌwainaka agawa puma mikune, iyema, abigantase. 
<p><sup>21</sup> Pigoya, Isu aeba pi ntaga to yoni kinapa kaba itantana, keba igaruba igaintana, iyorika kinapa iyo agaitantana puntiye. 
<p><sup>22</sup> Piya poginisi isigeba uma irosaꞌma abigausuguna mayama uwaisimintiye: Tisigeba wamagirisi agama abeme kamana Yonipa maya omiso: Iyorika kinaꞌmiba iyo agawe. Ka miyaba kinaꞌmiba keꞌi nasewe. Karu kinaꞌmiba kabarewe. Aibo kinaꞌmiba kamana abewe. Purinta kinaꞌmiba iyo agama asiyewe. Kota kampa wainta kinaꞌmiba aogi mono kamana abewe, omiso. 
<p><sup>23</sup> Piya, kaꞌwaina naeka abima aekita kampa pikibiꞌnaba, aꞌmuntanabi mikiye, uwaisimite isigarubantiye. 
<p><sup>24</sup> Pigoya, Yoni nkaoꞌyagara taraba aꞌwae puma wausuguna, Isu aeba wasana mintume kinaꞌmi igepa Yonika maya uwaimintiye: Tigeba kaꞌme mpari nana agakena wantawe, a. Misa kaꞌwaina pontawama maete wate kanate pogiri agakena wantawe, a. Piyaba kampaye. 
<p><sup>25</sup> Piya, ka yagara aotasaena aogiyena wantaga mintogiri agakena wantawa, a. Piyaba kampaye. Wasana aotasaena aogiyena maema miye kinaꞌmiba igeba kiye yagarama nkaogi namapi mima pita uwa miyewe. 
<p><sup>26</sup> Pigoya, poropete ka agakena wantawe. Owe, piya naeba urimekiri abiyo. Wasana aganta, aeba poropete kaꞌisa kinaꞌmi awametapa kampaye. Aeba to awametane. 
<p><sup>27</sup> Aeka kamana awaꞌena Koti yagarawapa maya omintiye: Naeba kayokaya yagarane otagana, ae paitagatama ke iꞌma aogi pugatakiye, piya untiye. 
<p><sup>28</sup> Pigoya, naeba urimukuwa, abiyo: Wayaꞌmatisa aborantiꞌna kaꞌwainaba Yonipa kampagina againtiye. Pigoya Koti kabiratakibi kanabipa tumima minta kinaꞌnempiba Yonipa agaikibewe, Isu piya untiye. 
<p><sup>29</sup> Piya, aeba piya yogini aꞌyaꞌma uwa kinaꞌmibe takisi maeyume kinaꞌmibe abimagini: Koti pikibemintanaba aogiyenawe, untawe. Pigoya pi kinaꞌmi Yoniti pai wamagini, mono wani maenta kina mintantawe. 
<p><sup>30</sup> Piya, Parasi kinake kamana ago abinta kinake igeba Koti uwaimomentanaba: Aꞌa-o, untawe. Pigoya, pi kinaꞌmi Yoniti wama, mono wani kampa pasume kinaꞌmiba igeba Koti kamanapa: Aꞌa-o, otantawe. 
<p><sup>31</sup> Pigoya Isu to maya untiye: Mamparasa kina tigekaba kegita awame pusuwe. Nanarane. 
<p><sup>32</sup> Tigeba yagara araga piyamawe. Igeba kumati mimagini iyoꞌmi mayama uwaimewe: Ini yokiripa, nana piyema kampa waꞌenaba pewe. Tantaraꞌena puma kubeꞌena pokiripa, nana piyema kampa taoꞌmaeyawe. Tigeba pi nkawametane. 
<p><sup>33</sup> Yoniba mono wani pai itanti ntagara yogawa agobintanaba, kaꞌisa nanintabe waini wanipe kampa nanta, uwa aꞌa-o uma miyogiri agantiripa: Aguꞌama aꞌyugu piye, tigeba untawe. 
<p><sup>34</sup> Pigoya, Wasanama Ntagara naeba kanama nanintabe wanipe naogiripa, nagantiri nanagabaya maya yewe: Aeba uwoma nanintabe wanipe nai ntagarawe. Takisi maeya kinake aru kinake ige iyoꞌyagarawe, tigeba naeka yewe. 
<p><sup>35</sup> Pigoya abiyo. Mono agowapa iguꞌama kintarama miye kinaꞌmi, ige aogima aegaragiri agawe, Isu piya untiye. Waya kaꞌwaina Isu nkagisari wani paiꞌatantiye 
<p><sup>36</sup> Pigoya, Parasi kaꞌwaina Isu nanintaga agegaꞌe yogana, nankapinti ima naninta nantiye. 
<p><sup>37</sup> Pigoya, pi kumatasa aruꞌwae kaꞌwaina, Isu aeba Parasi ntamapi ima naninta naogana abitegina, aogi agunta masawae yaba kankabe wantaga ka maete, 
<p><sup>38</sup> akaꞌi asima mimagina, kubeꞌena pogana, aoꞌnuwama agisari pasogana aꞌno nkabiyatasa aebago puntiye. Pumagina agisaba amoꞌnantana, agunta wanipa paiꞌatantiye. 
<p><sup>39</sup> Wayaꞌma piya pogana, Parasi yagara Isuka agegaꞌe unti ntagara aeba antabaipinti mayama napintiye: Ma nkaepa ataena pemi waene. Piya, Isu aeba poropete miyemisinta, agowapa abibebe pemisinema, napintiye. 
<p><sup>40</sup> Pigoya, napiyogana Isuba abite mayama omintiye: Saimoni, naeba kamana ka ugamekana abo, omogana: Tisa, yega abeno, omintiye. 
<p><sup>41</sup> Omogana Isu meto kamana maya untiye: Mone kina kaꞌwaina tara yagara moneba uwa isimintiye. Kaꞌwainapa wanantareti tora amintiye. Pigoya to kaꞌwaina nayataraꞌmu tora amintiye. 
<p><sup>42</sup> Pigoya, isigeba antota amikena monega aguyosagantase. Aibusuguna, atunkisipa uwa aerawane utegina, isitantiye. Pigoya, isigetisa kaꞌwaina mone isimintemi ntagaragaba aꞌmupa taberapa potakiye. Kaeba keka yenema, abigantiye. 
<p><sup>43</sup> Piyama abigaogana, Saimoni maya untiye: Mone uwoma aꞌa-o otantemi, aeka yuwe. Piya yogana Isuba: Kaeba kanara yenema, omintiye. 
<p><sup>44</sup> Piya ute, wayaꞌmati aꞌwaebuma Saimoni maya omintiye: Ma nkaepa agano. Naeba namakapinti iyoganapa, kaeba nagisari pasikena wanipa kampa atanatampene. Pigoya ma nkae aeba nagisaba aoꞌnurasa paiꞌnatama aꞌno nkabiyatasa aebago punagasaye. 
<p><sup>45</sup> Kaeba kampa namo nampene. Piya, ma nkae aeba nagisanepa ebi ebima namo naye. 
<p><sup>46</sup> Kaeba naꞌnotiba uwa masawaepa kampa paiꞌnatampene. Piya, ma nkae aeba nagisanepa aogi agunta masawaetasa paiꞌnataye. 
<p><sup>47</sup> Pika ugamekana abo: Waya aeba kaoꞌenaba uwoma punatamika, aruꞌenawapa uwoma asuꞌa pogasuwe. Pigoya, kaꞌwaina aeba aruꞌenaba iseꞌanto asuꞌa potakibi naba, kaoꞌenaba uwaenanto piye, omintiye. 
<p><sup>48</sup> Piya umagina, waya maya omintiye: Aruꞌenagapa asuꞌa pugagasuwe, omintiye. 
<p><sup>49</sup> Piya omogini, wasana naninta kaga nama mintanta kina igeba mayama mare-u me-u puntawe: Aeba nana yagara kana aruꞌenaba asuꞌa piye, untawe. 
<p><sup>50</sup> Piya yuguna, Isuba pi nkwaekaba maya omintiye: Kamatitiꞌenagampaba aogi pugataye. Kaeba wamagina paruyenabi miyo, omintiye.<p/>
<h4>8</h4>
<p><sup>1</sup> Pigoya, to kaꞌisa yagaba Isuba tabe kumatibe uwaena kumaꞌantontoribe nasi nasi puma mima, wasana aogi mono uwaimima Koti kabiratakena kamana uwaimintiye. Wama uwaimogini nagisarisa tara tumpaema abagi kinaꞌwampibe wauguni, 
<p><sup>2</sup> to kaꞌisa wayapa pai yoni kinape ke kina intabaipi minta kinape mintuguna, igetisa agaruba igasogini, igege wantawe. Igetisa kapa Mariya, Matara kumatasa waene, aepa keba tonaentisa tara umaema agaruba againti nkwaene. 
<p><sup>3</sup> Piya, to kapa agewapa Yowana, Eroti ntama kiye yagara Kusa, ae waene. Piya, to ka waepe, agewapa Susana, to kaꞌisa waepe igege wantawe. Pi waeꞌmiba Isuge abagi kinaꞌwake igeꞌwai kutatasa iyoꞌmaema kaoꞌena puwaitantawe. Aintana asigikena kamana Isu untiye 
<p><sup>4</sup> Kumaka kumaka aꞌyaꞌwaema kina Isuti kanagana puma pumaeyuguna, igantana meto kamana ka mayama uwaimintiye: 
<p><sup>5</sup> Wasana kaꞌwaina aeba aintana pikena wantiye. Wama aibarase pogana, kaꞌisa aowapa kepi tumpa waiyogana, wasanami igeba nasi nasi puma aerapauguni, kabarankama irosaꞌma ampa nawaegaintiye. 
<p><sup>6</sup> To kaꞌisa aowapa asigiyogana yabankama nkabobori tumpa waiyogini, pipa maba kampa waintomeka iꞌmagina iyomepa asama puꞌwantiye. 
<p><sup>7</sup> To kaꞌisa aowapa kabubinti tunkwaima iraogana, kabuyenama pabiyama iꞌmagina aibarusa pogana asa wantiye. 
<p><sup>8</sup> Piya to kaꞌisa aowapa apa mabi tumpa waima, anonkapa uwoma aborama aosa pama 100-wa aboraogana uwoma ntaninta waintantiye, untiye. Pi kamanapa uma aꞌya atate, kegaꞌe uma maya uwaimintiye: Ageyaga kinaꞌmaba ma kamanapa abibebe peno, Isu piya untiye. Isu aintana kamanaꞌama nkagowapa uwaimintiye 
<p><sup>9</sup> Pigoya, abagi kinaꞌwampiba igeba pi kamanaꞌama nkagowaka abigauguna maya uwaimintiye: 
<p><sup>10</sup> Koti kabiratakena kamana kakama waintipa, tigemana abiyoma untine. Kaꞌisa kinaꞌmiba igeba meto kamana agowa kampa abikibewe. Piya pumagini iyoma kagagate, kaꞌenaba kampagini agabebe pikibewe. Piya, igerasaba kamana abikena pugagate agowapa kampagini abibebe pikibewe, untiye. 
<p><sup>11</sup> Piya untana ago maya untiye: Meto kamana yopa, piꞌna nkagowapa mayama waintiye: Aintanaba Koti kamanane. 
<p><sup>12</sup> Pigoya, kepi aintana tunkwaintogana, kabarankama ampaema nantisa puma miye kinaꞌmiba igeba mono kamana abigina iguta waiyekana, pabigo kewamaba irosaꞌma maerite paiꞌwagini, monoꞌwai kampa wainta uwa mima ataenabi miyewe. 
<p><sup>13</sup> Pigoya, to kaꞌisa aintana yaba nkabobori tumpa tagantisa puma miye kina igeba maruꞌenaba mono abima iga pewe. Piya ibigakenaena aboraginiba anuntana pewe. 
<p><sup>14</sup> Pigoya, to kabubinti tumintisa puma miye kina igeba arirasaenama iguꞌamapa maema aꞌyugu puwaitakini, uwoma napiyenawampa mone kutankama nkigaenawampa monoꞌama aeguyegina, auꞌwapa kampa waiye. 
<p><sup>15</sup> Aintana aogi mabi tumintisa puma miye kina igeba mono kamana abima iguꞌamapa kiya kabima, pasema aogima miyewe. Piya pumagini auꞌwapa aborawe, piya untiye. Kane igiꞌma kampa kakakena kamana untiye 
<p><sup>16</sup> Pigoya, Isu to maya untiye: Ae kinaꞌma kane igiꞌma tusuparirasa atikaekiyebera, asipawama nkamentapinti atakana waikiye, a. Pipa kampaye. Kanepa igiꞌma abora atagana waima, nama nkagupintiba eꞌwasa puma arakini wasanamiba ima agakibewe. 
<p><sup>17</sup> Pigoya, aꞌyaꞌwaemaena kakama waintintanaba, pipa waima kampa waikiye. Pipa mimaba ainti aborakiye. Piya, kaꞌisaena wasanama atikae kaintaꞌena wainti, pipa waimaba kampa waikiye. Pipa mimaba aꞌwaitakiye. Piya pegana agowapa pita arakiye. 
<p><sup>18</sup> Pigoya, kaꞌwaina amintaꞌena kanara maema miyekanaba, to kake tabe puma amikiye. Piya, to kaꞌwaina amintaꞌena kampa aogima kabima miyekanaba, aparikiye. Pika tageba aogima abibebe puma napi napi puma miyiyo, Isu piya untiye. Isu ano aꞌnatabaraga kamana untiye 
<p><sup>19</sup> Pigoya, uwoma kina Isu ainkima asima mintuguni, anobe aꞌnatabarabe kanama wasanabi igiga puma pagasara mintantawe. 
<p><sup>20</sup> Piya puguna, ka yagarama igategina Isupa maya omintiye: Kanobe kaꞌnatabarabe takaꞌi kagakena ampintawe, untiye. 
<p><sup>21</sup> Piya yogana Isu abite maya untiye: Koti kamana abima wasiye kina mampa nanobe naꞌnatabarabe mintawe, piya untiye. Pontawamage waninkamage Isu nkawamu wasintase 
<p><sup>22</sup> Pigoya, ka yagaba Isube abagi kinaꞌwape wanipisa karebi intana, maya uwaimintiye: Taeba kotupa taꞌema maroteri wane, yogini abuguni wantawe. 
<p><sup>23</sup> Waumepa Isupa awaiga abogana waintiye. Waitamintogana pontaba tabera puma, kotunkamaba ataena purite, waninkamaba wanipisa karewama nkantabaipinti tumima awaitama ipirintakena puntiye. 
<p><sup>24</sup> Aibogini, igeba wama Isu abage pumagini: Tabe yagara, tabe yagara, taeba naisukena pune, untawe. Piya yuguna, aeba asima pontawamake tabe waninkamake tabe kamana uwaisimoginisi uwasuwa puwantase. 
<p><sup>25</sup> Aibusuguna Isu maya uwaimintiye: Tigeba timatitiꞌenaripa aeta waintegiri yewe, antiye. Piya yogini, igeba aꞌyaꞌma iyekuru pumagini tabe igi napintawe: We, aeba nana yagaragana, pontawamake waninkamake kamana uwaisimeginisiba awamu wasiyese, uma mare-u me-u puntawe. Isu ke kina igarubaogini yagama nkantabaipinti pasintawe 
<p><sup>26</sup> Pigoya, igeba kotupa taꞌerite wama Kerasa kinaꞌmi auꞌi irosantawe. Pigoya pi auꞌi Karari kotunkama maroteri irosantawe. 
<p><sup>27</sup> Pitaꞌi uma irosaꞌma wauguna, kumatisa ka yagara aeti kanantiye. Pi ntagara aeba antabaipinti ke kinapa uwoma miyuguna, eꞌero ntagaba aotasaena kampa maema punta auka mimagina, piya namapinti kampa mima, aeba wasana irubintimana umi mpi puta nasintiye. 
<p><sup>28</sup> Pigoya, aeba Isuti kanamagina agama, tabera kegaꞌe uma mabi wareꞌnama agisabi mima tabe kamanatasa maya untiye: Isu, kaeba inatisa tabe Koti Ntagaragawe. Kaeba nana punatakena kanane. Kaeba a-nkata punatao, untiye. 
<p><sup>29</sup> Pigoya pai asi nasi kewama aeba eꞌero ntagaba pi ntagaraba aguꞌamapa ataena potaogana, esegi puma miyogini, wasanamiba agisa ayatapa esegi igaꞌnarasa kirokaetama kiya kabima mibuntawe. Aibuguna, igaꞌnaba arisa narisa potate, paiꞌma kaꞌme mpari uma mibuntiye. Pigoya, Isu kana yagarama nkantabaipisa ke agarubakena pogana, agama piyama: A-nkata punatao, untiye. 
<p><sup>30</sup> Piya yogana Isu: Kagegapa kegawema, abigaogana: Nagenepa Uwomane, untiye. Piya, keba uwoma pi ntagarama nkagupi paiꞌma mintaka, untiye. 
<p><sup>31</sup> Piya, igeba Isu uwa uwaitakini, aꞌabibinti tumisanaga kampa ibogini agisuntawe. 
<p><sup>32</sup> Pigoya, pi mpariba uwoma ntagamiba amu ararabinti mima naninta nama mintuguna, pika ke kina igeba abirataga yaga intabaipi tumeno, piyama abigauguna: Kanarane, owe, uwaitantiye. 
<p><sup>33</sup> Piya uwaitogini, igeba wasana antabaipisa irosaꞌmagini, yaga intabaipinti ubasintawe. Ubasuguni, pi ntagamiba karuꞌena ausari tumima, tumpa wani naisuwaewantawe. 
<p><sup>34</sup> Piya puguni, yaga kiye kinaꞌmiba agate karuꞌena wama wasana waꞌeribe yogaribe wama uwaimintawe. 
<p><sup>35</sup> Uwaimuguni igeba pintana aborantika agakena irosaꞌma kanama, Isuti ampa agantawe. Pigoya, pi uwoma ke kina antabaipisa irosaꞌwaume ntagaramaba aotasaena wantaga kamana wantaga Isu nkagora mintantiye. Piya pogini, wa wayaꞌmiba agate iyekuru puntawe. 
<p><sup>36</sup> Piyama mintuguni, pintana agama abinta kinaꞌmiba pi ntagara aogi potaome kamana uwaimintawe. 
<p><sup>37</sup> Piya, pi Kerasa marasa kinaꞌmiba tabera iyekuru pogini, Isu aeba mawaipa kaite wanema omintawe. Omuguna, aꞌwae puma itate wanipisa karebi iyogana, 
<p><sup>38</sup> ke wantaga miyome ntagaramaba aegaꞌma aege wakena esotantiye. Esotaogana Isuba agarubaꞌma maya omintiye: 
<p><sup>39</sup> Kaeba waꞌegati wama, Koti kaeti piyaena pugatami, pi awaga kamana uwaimo, untiye. Piya yogana, pi ntagara aeba aꞌwae puma, Isu maema aogi potanti pi awaga kamana kumaꞌwatisa kina uwaimiwaentiye. Isu puꞌwanta aragage yoni waeke kaba isitantiye 
<p><sup>40</sup> Pigoya, wasanami igeba Isuka agawa puma mintuguna, irosaogini agama iꞌmuntana potantawe. 
<p><sup>41</sup> Aibuguna, mono nama kiye yagara ka, agewapa Yairasi, aeba kanama Isu nkagisabi parokaema aragawaka abigantiye. 
<p><sup>42</sup> Pigoya, aragawapa kaꞌanto kabowapa nagisarisa tara tumpaema kabu pugasomekana, purikena puma mintogana, Isuka: Nae namati kanao uma, agegaꞌe untiye. Piya yogana Isuba abite waogini, uwoma kinaꞌmi pumaewauguna, 
<p><sup>43</sup> pi kinaꞌmi nkabakapi waya ka mintanti, aeba iyegari tumiyaba miyogana, kabowapa nagisarisa tara tumpaema kabu pabiya mintantiye. Mintogini, tusa kinaꞌmiba aoꞌmaekenaba pugagate uwa atantawe. 
<p><sup>44</sup> Piya, kana waeꞌmaba aeba Isu akaꞌi wama kaiwampa atuta aukaya puntiye. Aukaya pogana, pabigo korankapa tabago puntiye. 
<p><sup>45</sup> Piya pogana, Isu: Ke naukaya piye yogini, wasanamiba uwamega yuguna, Pita maya untiye: We, Tabe Yagara, uwoma kinaꞌmi kobe puma mintini kaukaya pewe, untiye. 
<p><sup>46</sup> Piya yogana, Isu maya untiye: Kampaya, kaꞌwaina naukaya pegina esegiyenanepa wagi agauwe, untiye. 
<p><sup>47</sup> Aibogana: Aeba agonepa pabigo aboraye, wayapa ute, tabaraba purite Isu nkagora uma parokaema, yoninkampa kamanape aukaya pogana koranka tabago punti kamanape, kaga uma aboraogini abiwaentawe. 
<p><sup>48</sup> Pigoya, Isuba maya omintiye: Araganepa, kamatiti punatampeka aogi kabiye. Pika wama aogima miyo, omintiye. 
<p><sup>49</sup> Pigoya, Isu piya uma mono nama kiye yagarama ntamati wakena pogana, pi ntagarama ntamatisa ka yagara kanama maya ampa omintiye: Aragagapa ago puriye. Pika tisa yagaraba uwampapa a-nkotagana kanano, untiye. 
<p><sup>50</sup> Piya yogana, Isu pi kamanapa abima mono nama kiye yagarapa mayama omintiye: A-kaekuruba po. Kamatiti punataganaba, aragagapa aogama asikiye, untiye. 
<p><sup>51</sup> Piya ute, napinti ima kaꞌisaba waitaogini abeꞌi mintuguna, Pitake Yonike Yemisike kana aragama nkanoge abage isigege igeꞌmana ibabogini, wama napi uma pasintawe. 
<p><sup>52</sup> Uma pasuguni, wa waya igeba kubeꞌena puma mintuguna, Isu maya uwaimintiye: Kubeꞌenaba a-piyo. Aragaba kampa purintiye. Aeba uwa awaitamintiye, untiye. 
<p><sup>53</sup> Piya yogini, igeba agora puꞌwantika agaume kinaꞌmi kagi potantawe. 
<p><sup>54</sup> Piya puguna Isuba kana aragama nkayata uꞌma kegaꞌye uma: Araga, kaeba asiyo, omintiye. 
<p><sup>55</sup> Piya omogana, amankampaba aꞌwae puma kanaogana asintiye. Asiyogana: Naninta amigina nano, uwaimintiye. 
<p><sup>56</sup> Piya yoginisi, anoge abage isigeba tabera pami puntase. Aibusuguna Isuba: Pi kamana wasana a-nkuwaimiyo, uma akunkaitantiye.<p/>
<h4>9</h4>
<p><sup>1</sup> Isu aeba nagisarisa tara tumpaema kinaꞌwa igegaꞌe yogini irosauguna, keba agaruba igaintana, yoni kinapa kaba itakibeka esegiyena imima yoga kamana uwaitantiye. 
<p><sup>2</sup> Pigoya, wasana Koti kabiratakena kamana uwaimima, yoni kina kaba itakibeka maya uwaimima 
<p><sup>3</sup> igarubantiye: Tigeba keꞌiba wantape titasaena ampaete wantiri iraꞌna kupe, nanintabe monebe kai tarabe, a-nkurite waiyo. 
<p><sup>4</sup> Pigoya, ka kumata irosaꞌmaba namapi pasikibepa, pabipi miyiyo. Mima irosaꞌma waiyo. 
<p><sup>5</sup> Piya, tori uma irosaigini, aꞌa-o uma uritaigiripa, iroꞌma tigisarisa iꞌni pugaitegiri waigini, ataenabi miyentanaga abima napiyiyo, Isu piya uwaimima igarubantiye. 
<p><sup>6</sup> Piya uwaimima igarubaogini, igeba aseꞌyo puma wantawe. Piya puma kumaka kumaka nasi nasi puma, wasana aogi mono kamana uwaimintini, yonintanabe iki naki pomentanabe kaba itantawe. Eroti Isu nkawaga kamana abintiye 
<p><sup>7</sup> Wasana kiye yagara Eroti aeba Isu piya mayaena pome, pi nkawaga kamana aboganaba kunta abuntiye. Pipa kaꞌisa wasanamiba maya yumeka puntiye: Yoni aeba purintapisa asima mima, pintanaba piye, yuguna, 
<p><sup>8</sup> kaꞌisamiba akayotama maya untawe: Kampaye. Iraiya to kake aborama mintiye, yuguni, piya kaꞌisamiba maya untawe: Kampaye. Poropete tayabama kaꞌwaina aogama mintiye, untawe. 
<p><sup>9</sup> Piya yuguna, abogana Eroti kunta abogana maya untiye: Yonipa naeba ago yuwagini aeguntawe. Pigoya, ke piya pemi nkawaga kamanapa abuwe. Piya uma, kaꞌenaga umaba Isu agakena puwe, untiye. Isu 5,000 kina naninta imintiye 
<p><sup>10</sup> Pigoya, aposoro kina igeba yogawaitisa aꞌwae purite kanama, pi punta kamana Isu omintawe. Omuguna Isuba ibabute Petisaita kuma mari ibiwai umikena wantiye. 
<p><sup>11</sup> Waogini, wasanami agate aegaꞌma wantawe. Piya Isuti irosauguna, aoꞌena puwaitaogini mintuguna, Koti kabiratakena kamana uwaimimagina, yoni kinapa kaba itantiye. 
<p><sup>12</sup> Piya puma mintuguna, pankaoba pasikena pogini, nagisarisa tara tumpaema kinaꞌwa aeti wama maya omintawe: Mapa kabubinti mintompeka, kaeba wasana itagini kuma wairite wanti, pitaꞌi wama namape nanintabe aguyosaꞌma aboraiyo, uwaimo untawe. 
<p><sup>13</sup> Piya yuguna Isu: Tigeri kapa nanintaba imiyo, uwaimintiye. Uwaimogini igeba maya omintawe: Amana paretintontoba nayakaꞌmuna, inoyanta tarawa suma, piyakiꞌanto waintiye. Pika aya pukune. Kumati wama ma uwoma kinaꞌminta ige nanintaba wama ika pukuno, untawe. 
<p><sup>14</sup> Pigoya, pi waba 5,000 kina mintumeka, abagi kinaꞌwampiba piya untawe. Yugana: Wasana uwaitaigini arabamagini, 50 kina aki puma mirite waiyo, uwaimintiye. 
<p><sup>15</sup> Piya uwaimimagini, igeba wasana uwaitauguni, arabama maraꞌmintantawe. 
<p><sup>16</sup> Aibuguna, pareti nayakaꞌmupe inoyanta tarape maema mantari ao maꞌmagina Kotiti aꞌmu potamagina, apako puma abagi kinaꞌwa imogini igeba pako puma wasana imintawe. 
<p><sup>17</sup> Pigoya, igeba aꞌyaꞌwaema nama igaꞌe pantawe. Piya nauguna, aritapa kibiꞌmagini, waꞌnu kupa nagisarisa tara tumpaema ku iraguguna awaitantiye. Pitaba Isu nkagowa uma aborantiye 
<p><sup>18</sup> Pigoya, ka yaga Isu aeba abagi kinaꞌwa ibabute tori umima, Isu aewa nunamu untiye. Piya puntana: Wasanami naekaba kewe yewema, ibigama untiye. 
<p><sup>19</sup> Ibigaogini mayama omintawe: Kaꞌisa kinaꞌmiba Yoni mono wani paiꞌatakena yagarawe ugatawa, piya kaꞌisamiba Iraiyawe ugatawa, piya kaꞌisami igeba Poropete tayabama kaꞌwaina aogama asima mintiye, piya ugatawe, omintawe. 
<p><sup>20</sup> Piya yuguna, igewai ibigama maya untiye: Piya, tige tigeripa napiyepa naekaba kewe yewema, ibigaogana, Pita: Kaeba Kotitisa utaratanti ntagara Karaisitigawe, untiye. 
<p><sup>21</sup> Piya yogana, wasana to kina kampa uma abora uwaimikibeka, uwame uma esegi puwaitantiye. 
<p><sup>22</sup> Piya mayama amato puma uwaimintiye: Wasanama Ntagaramantepa tabe kuntaenabi punataigini, mono kabiye kinape tabe mono kiye kinape kamana ago abinta kinape, igeba karana natama naeguyigi, papa kakaga mima purintapisa asikuwe, untiye. 
<p><sup>23</sup> Piya untana, wasana aꞌyaꞌwaema toba maya uwaimintiye: Kaꞌwaina nae naegarakena puntanaba, auꞌwama kamana akabitate, wasanami igobi potakibikaba a-nkaekuru puma maripowa aesagabite naegarano, ute, 
<p><sup>24</sup> piya, kaꞌwaina mikenaenawaka owe yekanaba aꞌyugu potakiye. Naeka napima, mikenaenawaka aꞌa-o yekanaba, aboramikiye, untiye. 
<p><sup>25</sup> Piya untana maya untiye: Pigoya, kaꞌwaina aeba mabi aꞌyaꞌwaemaena maemagina, aguꞌamankapa aeguma kaiyekanaba, aya pikiye, a. 
<p><sup>26</sup> Piya, ka yagarama kamanaꞌneka ani punatakibipa, Wasanama Ntagaramanageba pabiyama nani potakuwe. Pigoya, tumukubopa, nabanempa nkeꞌwasaenabe enisore kinaꞌmi nkeꞌwasaenayaga naeba eꞌwasa puma tumukubopa, pi ntagaba ani potakuwe. 
<p><sup>27</sup> Naeba taga tagaꞌya urimekiri abiyo: Ma minta tigetisa kaꞌisamiba purikenaenaba kampa aborantigina, Koti kabiratakenaenaba aborakiri agakibewe, piya untiye. Isu manta auga puntiye 
<p><sup>28</sup> Isu aeba pi kamana uma mintogana, tonaentisa kakaga umaema yaga aꞌya pogana, Pitake Yonike Yemisike ibabute amuti nunamu ukena intiye. 
<p><sup>29</sup> Ima nunamu asu yogana, aowawamaba to auga pumagina, kaiwampaba waentana puma eꞌwasa puwantiye. 
<p><sup>30</sup> Piya poginisi, wasana tara aborama aege kamana untase. Pi isige isigewaisipa Mosesege Iraiyage, 
<p><sup>31</sup> isigeba manta eꞌwasaenawaisintaga irosaꞌmaginisi, Isu Yerusaremi kumati mampa atate ikena kamanapa tumpa Isuge untase. 
<p><sup>32</sup> Piya pusuguni, Pitabe ao taramisibe iwaigaba tabera ibogini waintawe. Pigoya, ibegu pumiyumetisa agantapa, Isube eꞌwasaenawape tara yagararamisibe igantawe. 
<p><sup>33</sup> Pigoya isigeba wakena pusuguna Pita maya omintiye: Kiya yagarama-o, taeba mataꞌi miyokanaba igabiye. Pika namapa kakaga kiyeno. Kaeꞌena kane. Mosesenta kane. Iraiyanta kane, untiye. Pigoya, aeba kamana kampa aogima napinta, uwa untiye. 
<p><sup>34</sup> Piya yogana, ibina kaꞌwaina tumima airari kae igaintiye. Ibina kima itikaewaogini, igeba iyekuru puma mintuguna, 
<p><sup>35</sup> ibinankama antabaipintisa kamana mayama aborantiye: Mepa utatanta yagaranene. Tigeba kamanaꞌwapa abiyo, untiye. 
<p><sup>36</sup> Piya kamana yogini abintini, agaumepa Isu abintowa mintogini agantawe. Piya, pi abagi kinaꞌwapa pintana agantapa, pi kanabipa kampa wasanaba uwaiminta, uwa igupi napima mintantawe. Abagi kina ke agarubakena pugagate atantawe 
<p><sup>37</sup> Pigoya marogini, amutisa tumima wasana uwoma kina ibatantawe. 
<p><sup>38</sup> Piya puguna, ige abakapintisa kaꞌwaina maya uma Isu agisuntiye: Tisa, kaeba kamanaꞌnepa abima, yagaranepa aoꞌmaeyo, aeba kaꞌantowe. 
<p><sup>39</sup> Abeno. Kewama aepagina pamintami puma, a-e a-e uma miye. Piya paisusu pegina akagawaba iꞌwaegasaye. Piya, kewamaba kampa agarosamaba atatewaikana, tabera amiyo amayo puma anuntana potaye. 
<p><sup>40</sup> Pigoya, kabagi kinaka uwaimogini, igeba ke agarubakena pugagate atawe, untiye. 
<p><sup>41</sup> Piya yogana, Isu maya untiye: We, timatitiꞌena kampa wainta, aibo kina mintigi, naeba ayaki yaga tigege mintakiri, napiyenaripa kaitegiri nae kamana abikibewe, untana: Pigoya, kana yagaraga ababute kanao, omintiye. 
<p><sup>42</sup> Piya omogana kana yagara ababute Isuti wakena pogana, kewamaba abai pogana, agisa ayapa paropara puwantiye. Piya pogana, Isu kewama kabiraogana, aegaka waogana, pi ntagaraba aogi potamagina abawampa amintiye. 
<p><sup>43</sup> Piya pogini, wasanami agamagini, Koti esegiyenawampa agowapa agamagini pami puntawe. Isu purikena kamanaꞌwa uwaimintiye 
<p><sup>44</sup> Pigoya, ma kamana urimekiri abibebe piyo. Wasanama Ntagara naepa to kinaꞌmi iyapi natakena unatantemi kanaꞌnepa ago agarosaye, untiye. 
<p><sup>45</sup> Piya uma uwaimogini, igeba kamana kampa aogima napima abuguna, kakawaogini kampa abima aogi puntawe. Pigoya abigakenaba iye kuru puma atantawe. Tabe mikena kamana untiye 
<p><sup>46</sup> Pigoya, abagi kina igeba: Taetisa ke tabeba mikiye, uma maka untawe. 
<p><sup>47</sup> Piya yuguna Isuba imabinti agowai abimagina, uwaena yagaranto ka ababuma, agora atama 
<p><sup>48</sup> maya uwaimintiye: Kaꞌwaina naeka napima, ma uwaena yagaranto aoꞌmaekibipa, pipa nae naoꞌmaekiye. Pigoya, naoꞌmaekibipa nae Inatisa nagarubanti Ntagara aoꞌmaekiye. Piya, tigetisa kaꞌwaina aeba tumima mikibiꞌnakaba, aeba naobi tabeba mikiye, piya untiye. Kampa karibirakibe kinapa tigeti tiyone, untiye 
<p><sup>49</sup> Pigoya, Yoni maya omintiye: Tabe yagara, taeba wasana aogaso kaꞌwaina kae kage uma, ke agarubagi agaompepa, aeba taepa kampa taegaramika akunka ataune, untiye. 
<p><sup>50</sup> Piya yogana, Isu maya omintiye: Tigeba a-nkakunka ataiyo. Piya, yogari kampa aguya aikibiꞌnapa tiyoꞌena potaiyo, untiye. Sameriya kinaꞌmi Isu a-kanaoma akunkatantawe 
<p><sup>51</sup> Pigoya, Isu aeba yogawapa aꞌya kaite iyekana, Koti ababikenagana agarosakena pogana, Yerusaremi kumati wakena uma esegi puntiye. 
<p><sup>52</sup> Umagina, tonkiya potate apa igarubaogini paitama wantawe. Paitama wama, Sameriya kinaꞌmi ka kumata irosaꞌma Isunta uwaikena nama ka aboraiyema uwaimintawe. 
<p><sup>53</sup> Pigoya Isu aeba Yerusaremi kumati wakena piye kamana abitegini, nama akunintawe. 
<p><sup>54</sup> Akunuguna, abagi yagarawa tara Yemisige Yonige isigeba abiteginisi, Isu abigama maya untase: Waꞌega, kaeba abegarao. Kae kabukibika, kegaꞌe yekana, mantarisa yaku tumima ma kina irabateno, untase. 
<p><sup>55</sup> Piya yusuguna, aꞌwae puma ka isibiꞌatate, 
<p><sup>56</sup> igeba to kumati wantawe. Isu aegarakena kamena untiye 
<p><sup>57</sup> Pigoya, igeba keꞌi wauguna, wasana kaꞌwaina ibatama Isu mayama omintiye: Kaeba pitaꞌi mataꞌi wakena yegapa naeba kaegarakuwe, untiye. 
<p><sup>58</sup> Piya yogana, Isu maya omintiye: Kabu kara igeba ageꞌwaintaga waintiye. Piya, inatisa kabara igeba inaꞌwaintaga waintiye. We, Wasanama Ntagara nawaikena maruntepa kampa waintiye, omintiye. 
<p><sup>59</sup> Pigoya Isu to wasana ka abatama: Kaeba kanama naegarao, omintiye. Omogana aꞌwae pomintiye: Waꞌega, abintaga marupa wama nabanempapa puꞌwaka uma kaitate kaegarano, untiye. 
<p><sup>60</sup> Piya yogana Isu maya omintiye: Monota puꞌwasu puma miye kinapa purikibe kinapa kanara kaiwaitakibewe. Kaeba kanama naegaꞌma, Koti kabiratakena kamana aborawaimo, omintiye. 
<p><sup>61</sup> Pigoya, to kaꞌwaina maya omintiye: Waꞌega, nae kaegarasanaga nabiye. Piya abega, paitama aꞌwae puma wama, naoꞌmipa: Pigo miyiyoma, naya imite kaegarano, untiye. 
<p><sup>62</sup> Yogana Isu maya omintiye: Kaꞌwaina aeba kaꞌena pubasanantana akaꞌi aomarakibi kinaꞌmaba pemisa puma, Koti kabiratakena yugaba kampa pikiye, Isu piya untiye.<p/>
<h4>10</h4>
<p><sup>1</sup> Pigoya, Isuba to sebentiwa ntagara aki puwaitama, yoga kamana uwaitantiye. Piya, aewa wakena pome kumatiba tara tara uwaitama maya untiye: 
<p><sup>2</sup> Yogaba tabe waintegina piya naninta aꞌna pukena kinapa tarantowe. Pika tigeba yoga agowamaka esotaigina naninta aꞌna pukena kinapa aboraigiri yogawatapa waiyo, Isu piya untana, 
<p><sup>3</sup> Tigeba wantiripa mayama abiyo: Tigeba sipisipi awarowama kabu yagama abakapinti wamisa puma, tigarubaogiri wawe. 
<p><sup>4</sup> Pigoya, tigeba mone asabe iraꞌna kupe, to kaꞌisa tigisa anape a-mpaete waiyo. Keꞌi waigini, wasanami tigigaigiripa uwoma kamana asiyo. 
<p><sup>5</sup> Pigoya, ka namapi uma pasikena puntiripa, pi namapi miye kinapa mayama uwaimiyo: Paruyenabi miyiyo uwaimigina, 
<p><sup>6</sup> pigo pi ntamapi aogi paru yagara ka mintakiripa, paruyenaba aeti waiyeno. Kampa yekanaba pi paruyenaba tigetiti to aꞌwaebuma kanano, untana, 
<p><sup>7</sup> namapa pasikibe pabi ntamapi miyigini, nanintabe wanipe timigiri naiyo. Tigeba nama toyaba antasima, ka namapi mima naninta timigiri naiyo. Piya, yoga kinapa yogawaitasa ikantanaba imegini maeyasa puma timigiri maeyiyo. 
<p><sup>8</sup> Pigoya, ka kumata irosaigini aogi puritama naninta timigiripa nantiripa, 
<p><sup>9</sup> itantiripa maya uwaimiyo: Koti kabiratakenagana mampa agarosaye, uwaimiyo. 
<p><sup>10</sup> Pigoya to ka kumata irosaigini nankaipi kampa tiba puritaigiripa, abeꞌi irosaꞌmagiri maya uwaimiyo: 
<p><sup>11</sup> Matasa tagisarisa iꞌni pugasokana tigetiti waye. Piya, kapa mayama napiyiyo: Koti kabiratakenagana agarosaye uwaimintiye. 
<p><sup>12</sup> Isu pi kamanapa uma, kapa mayama amato puntiye: Naeba urimekiri abiyo. Aintisa kanabipa Sotomu kumatasa kinapa tumimaena aborawaimikibikana, maya kumatasa kinapa tabe kuntaenaba aborawaimikiye, Isu piya untiye. Kamana abintana kampa aegarami kinaꞌmi kamanane 
<p><sup>13</sup> Pigoya, Isu to kinaka maya kamana uwaimintiye: We, Korasini kina, nantarane. We, Pesaita kina, nantarane. Mebi tige mari kukantana tabera aboranti, pipa Taya Saironi kinaꞌmi kumata mayaenaba aborantosinta, igeba intara puma karuꞌena augaꞌmagini igu aꞌwae puntasine. 
<p><sup>14</sup> Piya, aintisa Koti pakobikibi kanabipa, Taya Saironi kumatasa kinapa tumimaena aborawaimikibikana, tige kuntaenaripa mesuba puma aborarimikiye. 
<p><sup>15</sup> We Kapaniyamu kina, tige mari uwomantana poka, mantari ikibewa, a. Kampaye. Aintiba aꞌabibinti tumikibewe, uwaimintiye. 
<p><sup>16</sup> Uwaimintana igepa to maya uwaimintiye: Tige kamana abikibiꞌnaba nae kamana abikiye. Piya, tige aꞌa-o uritakibiꞌnaba pabiyama naepa aꞌa-o unatakiye. Piya, nae aꞌa-o unatakibiꞌnaba pipa unatantiꞌna ae aꞌa-o otakiye, piya uwaimima yogawaiti igarubantiye. Igarubanti kina igeba aꞌwae puma kanantawe 
<p><sup>17</sup> Pigoya, pi sebentiwa ntagaramiba igeba aꞌwae puma kanama, iꞌmu purintini Isu awaga kamana maya omintawe: Waꞌegare kae kage uma kegina igarubaokiniba, tawamupa wasiyewe, untawe. 
<p><sup>18</sup> Piya yuguna maya uwaimintiye: Pigoya pabiyama Sataniba aeba mantarisa amonta tumemisa puma wareꞌware purite tumoga agantuwe. 
<p><sup>19</sup> Abeno. Esegiyenaba ago timintokana, piya pi kama kinaꞌma aꞌyaꞌwaemaenawampaba ataenaba kampa puritakibewe. Tigeba kuyabe ontabenipe iyebasaiginiba kampa ataenaba puritakibewe. Esegiyenaba ago timintuwe. 
<p><sup>20</sup> Pigoya, tigeba kewama tiwamu wasinta, pikaba tiꞌmupa piyo. Piya, tigeripa mantarisa esapi Koti kaemaranta wainti, pika tabera tiꞌmu piginiba aogi pikiye, untiye. 
<p><sup>21</sup> Pigoya, pi ntaga Aota Awamusaꞌama anta aseyo pogana, Isu aꞌmu kamana maya untiye: Naba, mantage mage agowane. Kaeba abikenaenawaika abegana tabe pe kinapa kakawaigasane. Piya, iguꞌamaka abegana inamu kanta pe kinapa uma aborawaimene. Piya, naeba pika naꞌmu pugatauwe. Naba, kaega napimagina piyama abora urite wanema uma esegi puntampene, untana, 
<p><sup>22</sup> Pigoya, aꞌyaꞌmaena wainatantipa nabanempa nayapi atawaentiye. Pika wasana kaꞌwaina yagarawa naeka agoneka kampa abibebe piye. Nabanempa ae abiwapa abibebe piye. Piya, kaꞌwaina nabanempa ae agowaka kampa abibebe pega, yagarawa nae nabinto abibebe pumagi, nae napima wasanaba uma aboramekana aegeba pabiyama abibebe pikiye, piya untiye. 
<p><sup>23</sup> Piya umagina, aꞌwaebuma abagi kina igewaipa maya uwaimintiye: Tigeba kasaꞌena agaka tiꞌmupiyo. 
<p><sup>24</sup> Piya, naeba urimekiri abiyo. Pai aꞌyaꞌma poropete kinape kiya kinape uwomampi igeba tige pi agama abentanaba, pipa agowa agama abikenagaba ibugagate itantiye. Igeba kampa agama abintawe, piya untiye. Sameriya yagara tupu kinaꞌwa aoꞌmaenti kamana untiye 
<p><sup>25</sup> Pigoya, kamana ago abinta yagarama ka asima, Isu amiyo kamana mayama abigantiye: Tisa, naeba ayabuma eꞌwasaena maemagi asi nasi aogima mikuwema, abigaogana, 
<p><sup>26</sup> Isuba maya omintiye: Mono ago kamana awaꞌena kamanapipa ayama waintegina aisene, omogana, 
<p><sup>27</sup> kamana ago abinta yagarama maya untiye: Kaeba aꞌyaꞌma kagu kaumakape esegiyenagape napiyenagape, Waꞌega Kotigapa aꞌyaꞌma amegana waiyeno, piya kaegaka kabemisa puma, pabiyama kae kaokinaka kabeno. Kamanapa piyama waintiye, untiye. 
<p><sup>28</sup> Aiyogana, Isu maya omintiye: Kaeba kamanapa kanara yene. Pipa wasima mima aogima mikibene, omintiye. 
<p><sup>29</sup> Pigoya, pi ntagara kamanapa abintanaba aewa age maema aogi puma to kake: Wasana naopa kewema, abigantiye. 
<p><sup>30</sup> Aiyogana pika Isu kamana kapa maya omintiye: Wasana kaꞌwaina waꞌewapa Yerusaremi kumatisa Yeriko kumati tumikena tumogini, kama kinaꞌmi minaena puma mintuguna, pipi uma pasintiye. Piya, igeba aegumagini, kaiwape kotankape apawaeritegini, atauguna purikena puma mintantiye. 
<p><sup>31</sup> Mintogana, mono kiye yagara kaꞌwaina pabi kiꞌi wama agamagina, auꞌakana naerite maroteri wama againtiye. 
<p><sup>32</sup> Aeba waogana, Aribai yagara kaꞌwaina irosaꞌmagina pabiyama agama auꞌakana naerite maroteri wama againtiye. 
<p><sup>33</sup> Piya pusuguna, Sameriya marisa yagara kaꞌwaina pabi kiꞌi wama uma abatantiye. Uma agamagina antara potama 
<p><sup>34</sup> agora wama masawaetasabe waini wanitasabe anamopipa paiꞌatama asaetantiye. Piya potama, ababuma yagawampa akabata atama ababute wama, wami ntamapinti metama aogima kabitantiye. 
<p><sup>35</sup> Pigoya, maroganaba wakena puntanaba, waba ntama kiye yagaraba tu tora amintana maya omintiye: Kaeba ma ntagara aogima kabiyo. Piya, to kaꞌisa ae auta kaikibempepatakaba, to kake kanamagi amato puma kamukuwe, untiye. 
<p><sup>36</sup> Pigoya, wasana tarawa kanaki kina igetisaba ku kinaꞌmi aegunta ntagaraba mapa aoꞌenaba ke potantiyema, napiyenema abigantiye. 
<p><sup>37</sup> Piyama abigaogana, kamana ago abinta yagara aeba maya untiye: Antara potama aoꞌmaenti ntagara, aewe, yogana Isu abite: Kaeba wama pabiya puma miyo, omintiye. Mariyake Matake isige kamanane 
<p><sup>38</sup> Isube abagi kinaꞌwampibe igeba wama to kumata uma irosaumepa, ka wae agewapa Mata aeba nankapi Isu ababotama maruntakiꞌena potantiye. 
<p><sup>39</sup> Pigoya, aꞌnantoba ka mintantiye, agewapa Mariya, aeba Waꞌega yagarama agisabi mima monoꞌwa abintiye. 
<p><sup>40</sup> Piya pogana Mata aeba naninta kaoꞌena puntana uwoma agi napima mima, kaoꞌenaba pugategina Isuti wama maya untiye: Waꞌega, nana pegina naꞌnantoba natagi, nae nabi kaoꞌenaba pumiyoganapa, kaeba agantanapa kampa napiyeno. Kaeba omegana naoꞌmaeyano, omintiye. 
<p><sup>41</sup> Piya omogana Isu maya omintiye: Mata, Mata, kaeba uwomantanamaka abima, uwoma kagi napima kauki nakiyena puma miyene. 
<p><sup>42</sup> Abeno, kaꞌena aogiyena tabera waintiye. Mariya aeba pi aogi auꞌwantagaꞌena ago maeye. Pipa a-nkapareno, Isu omintiye.<p/>
<h4>11</h4>
<p><sup>1</sup> Pigoya, Isu aeba ka auꞌi ampima nunamu untiye. Nunamu aꞌya pogana, abagi kinaꞌwatisa kaꞌwaina maya untiye: Yoniba abagi kinaꞌwapa nunamu ukena kamanapa uwaimintisa puma, kaeba kapa uramo, untiye. 
<p><sup>2</sup> Piya yogana Isu maya uwaimintiye: Tigeba nunamu ukena puntiripa, maya yiyo: Taba, kae kage aota waiyeno. Kabiratakenaenagapa aborawaeyano tabiye. 
<p><sup>3</sup> Aꞌyaꞌma yagaba kaeba nanintarepa tamo. 
<p><sup>4</sup> Kaintanarepa taeba kaintana purata kinaꞌmi nkatupa mae igasompe nkawameta kaeba aguntaenarepa maeragaso. Tamiyo pusanagaba aogima kabiratao, yiyo untiye. 
<p><sup>6</sup> 
<p><sup>5</sup> Piya yiyo uwaimitegina, to kapa mayama amato puma uwaimintiye: Tigetisa kaꞌwaina aseka nkabubu eꞌero mparisa kanakana, amikena nakenaba kampa waintakana irosakanaba, wama to aoꞌyagaramaka uma abage puma maya omikiye: Naoꞌyagara, ka nao kanamagina eꞌero mparisa kanamipa, nakena kampa waintegi, kaoti kabigama nakena tarawa kanaki namega amenoma, abigakiye. 
<p><sup>7</sup> Piya yekana aoꞌyagaramaba napintisa maya ikiye: Kaeba nanaga ampa tabage pene. Na kabe akugasima, wayaꞌyagara iwaigasapintiba, ayama asima maema kamusuwe, piya ukiye. 
<p><sup>8</sup> Pigoya, naeba yekiri abiyo. Aeba naoꞌyagaraga aoꞌmaekuwemaba kampa napikiye. Aeba ebi ebi kamana yekana, abima uwa asima ikibintanaba maema amikiye. 
<p><sup>9</sup> Piya, naeba pabiyama kapa urimekiri abiyo: Tigeba Koti abigaiginaba timikiye. Aguyosagaiginaba auꞌwapa maema tigeti aborakiye. Kabera aiwakarusiginaba Kotiba aititakiye. 
<p><sup>10</sup> Pigoya, aꞌyaꞌma kinaꞌmiba Kotiti esota kinaꞌmiba maeyawe. Aguyosaga kinaꞌmiba agawe. Kabera aiwakaruse kinaꞌmitiba Kotiba aiꞌitaye. 
<p><sup>11</sup> Pigoya, tigetisaba ae ntagarama yagarawampa inoyantaga yekanaba, antotapa kuya amikiya, a. 
<p><sup>12</sup> Kokore amuka yekana ontabeni amikiya, a. Aeba kampaye. 
<p><sup>13</sup> We, tigeba antage kinaꞌmitaba yagara aragaripa aogiyena imewe. Piya, mantarisa tibarimpa aeba asagasima esota kina tigepa Aota Awamusapa timikiye, Isu piya untiye. Igeba Isuka kewama esegiyena amegina yoga piye, untawe 
<p><sup>14</sup> Pigoya wasana kaꞌwaina kewama awamu akugasogana kamana kampa yogana, Isuba pi ntagara antabaipisa ke agaruba agasogana, to kake kamana untiye. Piya yogini, wasana igeba agate pami puntawe. 
<p><sup>15</sup> Pigoya, kaꞌisamiba Isuka maya untawe: Ke kinaꞌmi waꞌegawai Piyesiburu, ae esegiyena amegina keba agaruba igasaye, yuguna, 
<p><sup>16</sup> to kaꞌisa kinaꞌmiba amiyo kamana maya omintawe: Kaeba yegana, mantarisa awameꞌena aboraka agano, untawe. 
<p><sup>17</sup> Piya yuguna, aeba napiyenawaimpa abibebe purintana, maya kamana uwaimintiye: Ka marisa kina igeba kamaena piginiba, aꞌyaꞌwaemaenawaipa aguya ayigigasigini, igeba atama mikibewe. Pigoya, ka tunkama maꞌena pukibemipa, aokinaꞌmiba asorisari puma kampa aogima mikibewe. 
<p><sup>18</sup> Piya, Satani aokinaꞌmiba pako puma maꞌena pesinta, ayama esegima miyesine. Pigoya, tigeba naekaba Piyesiburu esegiyena amegina keba igarubaye ye kauwe. 
<p><sup>19</sup> Pigoya, naeba kewama Piyesiburutisa esegiyena maema ke agarubaosinta, tiyokinapa aetasa esegiyenaba maema agarubasine. Pika abimagiri, tiyokinaꞌmi kamanatipa etaꞌmaema, piya kampaye ikibewe. 
<p><sup>20</sup> Piya, Koti esegiyena namegi keba agaruba igasoganaba Koti kabiratakenaenaba tigetiba ago aboraye, untiye. 
<p><sup>21</sup> Untana Isu to ka amato puma maya uwaimintiye: Ka akentana yagarama ireguwape wantaꞌwape pumagina, na kumaꞌwapa kabiyekana, aꞌyaꞌmaenawapa aogima waikiye. 
<p><sup>22</sup> Pigoya, tabera esegiyena waitantakibi ntagara irosaꞌmaba, aepaꞌurintana iregu wantaꞌwapa apauꞌma, yaga kotankapa pako purikiye. 
<p><sup>23</sup> Pigoya, kaꞌwaina aeba kayone kampa punataiꞌnaba, pipa kama punataye. Piya, kaꞌwaina aeba yagarunte kampa ibabuma aki piꞌnaba, aeba igarubaye, Isu piya untiye. Ke kinaꞌma aꞌwae puma kanakiye, untiye 
<p><sup>24</sup> Pigoya, Isu toba maya untiye: Kewamaba wasanama antabaipisa irosaꞌma wama kaꞌme mpari maruka aguyosakate, kampa waintakana maya ukiye: Namantepa atate kanantoka, pitaꞌi to kake aꞌwae pumagi wama umikuwe, ukiye. 
<p><sup>25</sup> Otate aꞌwae puma wama agaomepa, kana namapa paga puma aogi nama uma agakiye. 
<p><sup>26</sup> Piyaena agatategina aeba wama ke aokinapa tonaentisa tara umaema kina to kake kamparagaena pe kina ibabekini, kanama pi ntamapi ampikibewe. Aibigina, pi ntagaraba aeba paipa aogi yagara mintantiꞌnaba aintiba kampa aogimagina tabera ata puwakiye, piya untiye. Aogima mikena kamana untiye 
<p><sup>27</sup> Kamana piya uma mintogana, wasana abakapintisa waya kaꞌwaina kegaꞌye uma maya omintiye: Yakari pugatama nono kaminti waepa, aeba aꞌmuntanabi miyeno, yogana, 
<p><sup>28</sup> Isu maya untiye: Pi yempepa, pipa Koti kamana abima maema miye kina ige iꞌmuntanabi mikibewe, piya untiye. Kukantana kamana untiye 
<p><sup>29</sup> Pigoya, wasana uwoma kina aeti kanama pumaeyuguna, agobima kamana maya untiye: Mamparasa antage kina tigeba kukantanaga ebi ebi punatawe. Pigoya, tigeba kukantanaba tonawanane. Yonati aboranti, pabintana aborakiri agakibewe. 
<p><sup>30</sup> Pigoya, pai Ninibe kumatasa kinaꞌmi igeba Yona puntintana agama napintasa puma, ibasa yaga mamparasa kina tigeba Wasanama Ntagaramana pukubontanaba agama napikibewe. 
<p><sup>31</sup> Pigoya abiyo. Mare takaerisa tabe wae aeba pabiyamagina aꞌyaꞌma kina pako pikena yagaba mampabisa kinaꞌmiti kamparaga kamanati abora uritakiye. Pipa uwaba kampaye. Pi kana waepa aeba eꞌero mparisa kanama Soromoni aetisa mono abintiye. Piya, ma minto naeba Soromoni ae awametapa kampaye, pipa asugasima mintuwe. 
<p><sup>32</sup> Piya, toba abiyo. Ainti Koti aꞌyaꞌma kina pako pikibi ntagaba Niniba kumatisa kina aborama mamparisa kinaꞌmi kamparaga kamanati uma abora uritakibewe. Pipa uwaba kampaye. Niniba kumatasa kina igepa Yona aeba wasanarakaꞌyankama igeꞌma kamana uwaimogini abima igu aꞌwae puntaka, piya ma minto naeba Yona ae awametapa kampaye. Pipa asugasima mintogiri, pabi ntaga tigeba kampa piyama aꞌwae pigina, pi Niniba kina uritakibewe, Isu piya untiye. Eꞌwasa wasana ita aborakena kamana untiye 
<p><sup>33</sup> Pigoya, Isu to maya untiye: Tigeba kane igiꞌmaba kampa kakantiri, kaborasaba kampa akunewe, pipa kampaye. Tigeba kanepa igiꞌma marunkata atagana, na antabaipintiba eꞌwasa pekana wasanaba asu agakibewe. 
<p><sup>34</sup> Piya, kauꞌama kaneꞌwapa kaowe. Kaogapa aogima waintanaba, kauꞌamapa kanara eꞌwasa potakiye. Tikaeyakanaba kauꞌamaba pabiyama tunusu wakiye. 
<p><sup>35</sup> Pigoya, kaguꞌama kaneꞌwa tuꞌmakana tunususanaga aogima kiya kabima miyo. 
<p><sup>36</sup> Kiya kabiyegana, kaetiba tununtanaba kapa kampa aborano. Kagu kauꞌamaba eꞌwasaenamana waikiye. Pigoya, kane uwaenama eꞌwasa pemisa puma, kagu kaneꞌamaba eꞌwasa pugatakana mikibene, Isu piya untiye. Parasi kinake mono tisa kinakega: Ataena pewe, Isu untiye 
<p><sup>37</sup> Pigoya, kamana uma miyogana, Parasi kaꞌwaina Isu nanintaga nankapi agegaꞌe untiye. Agegaꞌe yogana, nankapinti ima pabi naninta asu nantiye. 
<p><sup>38</sup> Asu naomeka, ayapa kampa wani nkaema aeyobanta naogana, Parasi yagara agategina, uwoma agi napima: Nanabaya pemika monoka kampa napiye, untiye. 
<p><sup>39</sup> Piya yogana, Waꞌega aeba abite maya omintiye: We, Parasi kina tigeba, tuꞌnatipa kankabepe aririsamana aeyobawe. Pigoya, tigupipa kuntanaripe ataenaripe pumaema waintiye. 
<p><sup>40</sup> We, aibo kina tigeba, kampa napiyewo. Koti ariribe antabaipintibe pumarantine. 
<p><sup>41</sup> Pika tigeba antabaipinti waintintana kusi kina imigina tigeti iꞌnintana kampa waikiye. 
<p><sup>42</sup> We, Parasi kina tigeba atama mikibewe. Tigeba aꞌyaꞌwaemaenaripa aisurite wagana, naya taraꞌmu pegiripa, agentoba Koti amintiri, kaipe marababe aꞌyaꞌwaema anintabe pabiyama kampa tigeguꞌa pekiri amintiripa, Kotige atokaema mikenaenagaba nanaga kampa napiyekiri, aogima arupu puma mikenaenaba nanaga agasawe. Pi ariwape aguꞌwape tarayaga aogimakiri wasiyesinta, aogiyenabi miyesine. 
<p><sup>43</sup> We, Parasi kina tigeba atama mikibewe. Nanagabaya mono namapi waꞌega kinaꞌmi yabaera paitama mikenaga yewe. Piya keꞌi wa waya uwa kinaꞌmi tigamagini uma iꞌmuntana puritasanaga pintanaga tiguꞌamaba waiye. 
<p><sup>44</sup> We, tigeba atama mikibewe. Tigeba wasana iru kaigainta piyama, pitaꞌi wasana igeba kampagini napinta abobori nasi nasi pewe, Isu piya untiye. Pai poropete kina iyeguma karana itanta kamanane 
<p><sup>45</sup> Isu aeba kamana piya yogana, kamana ago abinta yagara kaꞌwaina abima maya omintiye: Tisa, kaeba kamana piya yekanaba, kamana ago abinta kina tae uma tarakuriye, untiye. 
<p><sup>46</sup> Yogana Isuba maya aꞌwae pomintiye: We, kamana ago abinta kina tigege tiyekuru piyo. Tigeba kuntaenaba wasana ibobori aesaga itategiri, tigeripa uwa mima, aesagabikena tigiba kampa napiyewe. 
<p><sup>47</sup> We, atama mikibewe. Tiyabamagiba poropete kina iyeguma kaintakiri, tigeba ibaba iyeguma kaisubewe. 
<p><sup>48</sup> Piya puma, tiyabamagi iyoꞌmaemagiri, maꞌenawaika abegana aogi piye. Igeba iyeguma karana itantawe. Pigoya tigeba kamana agowai aeguma kaiyewe. 
<p><sup>49</sup> Pigoya, pika Kotiba aogima napima kapa maya untiye: Naeba igeti poropetebe aposorobe uwaitauwagini wauguripa, kaꞌisaba iyeguma ata puwaitakibewe, untiye. 
<p><sup>50</sup> Pigoya, pipa pai wasana aboranta kanabi, agobima poropete kina iyeguma koranka airigita kananta, pi kaintanaba pipa tigeti kanakiri kamana maekibewe. 
<p><sup>51</sup> Pi maꞌenaba pai Eboropisa agobima aboraurite kanama, Sekaraya aepa tabe mono nama antabaipinti aeguma aꞌya puntane. Naeba taga yekiri abiyo. Pi kamaena piꞌna kaintawapa mampa ago tigeti ampa aborakana kamana maekibewe. 
<p><sup>52</sup> We, kamana ago abinta kina, tigeba atama mikibewe. Tigeba monoꞌama agowapa kakatamagiri miyewe. Tigeripa kabe aiꞌma kampa uma paiꞌma abewe. Piya, wa waya pasikena yegiripa, kabeba akunkigasawe, piya uwaimintiye. 
<p><sup>53</sup> Pigoya, Isu kamana piya uma aꞌya atate abeꞌi irosaogini, kamana ago abinta kinape Parasi kinape Isuka ataena otama, igeba to kamana to kamanaꞌwa abigategini, ige atakae puma mintantawe. Piya puma mintogini tabera uma abigantawe. 
<p><sup>54</sup> Pipa maya uma puntawe: Ka kamana awamupisa irugekapa abima kamana otakune, untawe.<p/>
<h4>12</h4>
<p><sup>1</sup> Isu aeba kamana uwaimima mintogini, uwoma kinaꞌmi aeti irosaꞌma mimagini, kabokabo puma igisa aebabuma mintantawe. Piya puma mintuguna, aꞌwaebuma abagi kinaꞌwampiba maya uwaimintiye: Wasanama pareti kaintanaba isiti atakanaba anosamisa puma, Parasi kinaꞌmi ata kamanaꞌwai piyama anosasanaga kabiyiyo. Naeba pi kumpari kamanaꞌwaika uma, obina kamana urimuwe. 
<p><sup>2</sup> Pigoya, aꞌyaꞌma airarikaentaꞌenaba aꞌwaigaikiye. Kakama waintintanaba aꞌyaꞌma aborakini abikibewe. 
<p><sup>3</sup> Tigeba tununtanabinti ye kamanapa uma yepa, pipa nama nkaboborisa kegaꞌe uma aborakiye, Isu piya untiye. Kaꞌwaina aeba kaꞌenaga aekuru peno, Isu untiye 
<p><sup>4</sup> Isu piya untana to maya untiye: Naoꞌmitaba, maya urimuwe: Tauꞌama aegukena pikibe kinakaba a-tiyekuruba piyo. Igeba aintiba tonaba kampa puritakibewe. 
<p><sup>5</sup> Pigoya, to kaꞌenaga tiyekuruba peno. Pika urimekiri abiyo: Agagabinti tipasanakena esegiyenawa waitantemi ntagara, aeka taga tiyekuru pikibeka yuwe. Owe, piya urimuwe. Piya aeka tiyekuru piyo. 
<p><sup>6</sup> Piya, kisabentontoba wasana uwaena monentorasa ika pewe. Pigoya Kotiba igekaba kampa aꞌyuguba puwaitaye. 
<p><sup>7</sup> Pigoya, wasana tige tiꞌno nkabiyapa aeba aisiye. Pikaga tiyekuruba apuntiri uwa miyiyo. Tigeba wasanarawe. Inati paꞌma nasi nasi pemi kabarankama ikantanaba tigeba agasawe, piya untiye. Naegarakibempepa a-kani po, Isu untiye 
<p><sup>8</sup> Isu untana to maya untiye: Pigoya, to ka urimekiri abiyo: Kaꞌwaina aeba wasana iyobi uma aboranatakibipa, Wasanama Ntagara naeba pabiyama Koti enisorewampi ige iyobi aepa uma aboratakuwe. 
<p><sup>9</sup> Pigoya, kaꞌwaina wasanami ige iyobi kakanatakibiꞌnaba, aepa Koti enisorewampi iyobi kakatakuwe. 
<p><sup>10</sup> Pigoya, kaꞌwaina aeba Wasanama Ntagaramanteka ata kasa unatakibipa, aepa aguntaenawapa asuꞌa pugaikenaena waintiye. Piya, kaꞌwaina aeba Aota Awamusaꞌama yogawaka uma ataena potakibipa, aepa aguntaenawapa kampa asuꞌa pugaikiye. 
<p><sup>11</sup> Pigoya, mima mono namapipera, kamanipe kanisorebe igeti tibabute waigiripa, aya kamana ukunemaba abima tara taraba a-piyo. 
<p><sup>12</sup> Pi kanabipa kamana ikibepa, pi Aota Awamusaꞌama uma abora timikiye, piya untiye. Aꞌyaꞌwaema kutankamaka awame kamana untiye 
<p><sup>13</sup> Pigoya, wasana abakapisa ka yagarama Isupa maya omintiye: Tisa, nagantoba tasibaresimpa kutapa ae maema miye. Pika kaeba omegana pako buma kaꞌisaba nae nameno, untiye. 
<p><sup>14</sup> Piya yogana, Isu maya omintiye: Ma ntagara, naepa kiyabe kamana abikena yagarabe miyomaba kampa unatantawe, untiye. 
<p><sup>15</sup> Piya uma kamana ka amato puma maya uwaimintiye: Tigeba aogima napiyiyo. Mone kutankamaka tintawama napi napi pusanaga antapiyiyo, uma urimuwe. Mone kuta abuwakenaenama wasana mikenaenari arakuꞌma esegi pekiri kampa mikibewe, piya untiye. 
<p><sup>16</sup> Piya uma awame kamana ka maya uwaimintiye: Wasana tabe kota wainta kaꞌwaina aeba yogawapipa nanintaba uwomantana aborantiye. 
<p><sup>17</sup> Pigoya, aumabipa mayama napintiye: Aya pukuwe. Ago tabe namapa aeta waintaka aki pukuwema napintiye. 
<p><sup>18</sup> Piya uma maya untiye: Ibaba ago abuwe. Naeba aintana namapa akusabaꞌma kasa nama tabe puma kikuwe. Kima aintananepe aꞌyaꞌwaemaenanepe pipi atakana waikiye. 
<p><sup>19</sup> Pigoya piya pugaite maya ukuwe: Uwoma ntaninta wainatantika, migaramagi eꞌero kanara uwa mimagi, nakenabe wanipe namagi naꞌmuntanabi mikuwe, untiye. 
<p><sup>20</sup> Piya yogana, Kotiba maya omintiye: Kaeba aibo yagaragawe. Ma nkase kaumagampa maegasakana puꞌwakibene. Pigoya aꞌyaꞌmaena maema aki pempentanagapa kebaya maekiye, untiye. 
<p><sup>21</sup> Isu piya untana to maya untiye: Pigoya, ma kinaꞌmiba arirasaenamana napi napi puma aki puntini, Koti nkaobi kusiyena pewe, untiye. Arirasaenaga taberapa a-ntapi napi piyo, Isu untiye 
<p><sup>22</sup> Isu aeba abagi kinapa maya uwaimintiye: Naeba urimekiri abiyo: Tigeba mikenaenarikaba: Nana maema nakune. Tiꞌamakaba: Nana tautasaenaba purukunema, uwoma tigiba a-ntapiyiyo. 
<p><sup>23</sup> Piya, naninta wanane. Mikenaenarimpa auꞌwantagaꞌenawe. Titasaena wanane. Tiꞌama auꞌwantagaꞌenawe. 
<p><sup>24</sup> Tigeba kabarakaba napiyiyo. Igeba aintanaba kampa puma nanintaba kampa kubewe. Igeꞌwai nkaintana namankaipa kampa waintegꞌina Koti nanintawaipa uwa aborama imiye. We, tigeba kabarapa kampaye. Ae aobipa tigeba wasanarawe. 
<p><sup>25</sup> Piya, tigeba napiyenaripa waintakiripa mampara to kake amato puma to kaꞌisa yaga mirite wakibewa, a. Pipa kampaye. 
<p><sup>26</sup> Tigeba piyaenaga igiga puntiripa, nana piyema mikenaenagaba uwoma tigiba napiyewe. 
<p><sup>27</sup> We, tigeba ya aosa pamika agoba abiyo. Aeba aotasaenawampa ntugaba kampa piye. Pika urimukuwa abiyo. Paipa tabe yagara Soromoni aeba konariyenawantaga yagaramaba aogiyenaba purintomepa, ya aosawamapa kampa againtiye. Kampaye. 
<p><sup>28</sup> Piya, yaobintisa aꞌno mparamintana ibanto piyama aogima aborama, aiba pari pekana yaku kaiyamipa, pipa Koti yegina aꞌnopa aogiyena maraye. We, tigeba kampa agama napiyegana timatitiꞌenaripa uwaenantowe. Piya, Kotiba titasaenarikaba kabiritaye. 
<p><sup>29</sup> Pigoya, tiguꞌamaba naninta wani ntakenaenagaba taberapa a-ntapimagiri, tigeba uwoma tigi a-ntapiyiyo. 
<p><sup>30</sup> We, aꞌyaꞌma maga maga kinaꞌmiba nae yontanaga napi napi yewe. Piya, pintanarikaba tibarimpa abintegiri uwoma tigi a-ntapiyiyo. 
<p><sup>31</sup> Pigoya, tigeba Koti kabiratakena monoꞌama nkauꞌwa aborasanaga tigupa paitama ataigina waiyeno. Piya pigina aeba mampara tigeꞌenaba kaga aborarimikiye, piya untiye. Mantabinti aꞌyaꞌwaemaena abuwakena kamana untiye 
<p><sup>32</sup> Pigoya Isu to maya untiye: Uwaena tunkantontoba, atiyekuruba puma miyiyo. Tibarimpa tabe aꞌmu puma kabiritakiye. 
<p><sup>33</sup> Pigoya tigeba aogimagiri piyaena waintemipa kusigina imiyo. Piya piginiba aogiyenaripa mantabinti uwa waiyekana kopa kampa abararamaba kukuri kampa pikiye. Piya, pitaꞌi antota waima esegi pikena waikiye. Piya, ku kinaꞌmiba kampa kuntanaba puma maerigasiginaba, umuwamaba kampa narigaikiye. 
<p><sup>34</sup> Piya, aogiyenaripa waintemi, pi kumaka asi nasi napiyewe, piya uwaimintiye. Asu aososima mikena kamana untiye 
<p><sup>35</sup> Isu to kamana maya untiye: Tigeba kairipa arosama amimagiri, e ikigina eꞌwasa peno. 
<p><sup>36</sup> Piya kayokaya yagaramiba wasana waꞌega ibaꞌenarisa aꞌwae puma kanama uma kabera aiwakarusekini, karuꞌena aiꞌatakena agawa pesa puma miyiyo. 
<p><sup>37</sup> Pigoya, wasana waꞌega aeba aꞌwae puma kanama kayokaya yagara igeba iyogaba puma mintiginaba ampa igate aꞌmu puwaitakiye. Naeba taga tagaꞌya urimekiri abiyo. Aeba eriꞌya kaiwapa amirintana naninta yabaera itama naninta imikena kayokayaꞌena puwaitakiye. 
<p><sup>38</sup> Pi aseka abubuno, marikiyo, kana yagaraba kanama ampa igakibipa iyogaba puma kabima mintigina ampa igategina, tabera aꞌmu puwaitakiye. 
<p><sup>39</sup> Pigoya tigeba agowapa mayama abiyo: Ka kumatasa kina ku kina ma aseka irosakiyema napiyisinta, iyogabama mima nama kumaꞌwaipa kabiyiginaba kuntanaba kampa maeyisine. 
<p><sup>40</sup> Pigoya Wasanama Ntagara naekaba pabiyama kampa napikibe kanabi, kanakuboka aseyo puma miyiyo, piya untiye. Kayokaya yagararamisi kamana untiye 
<p><sup>41</sup> Isu aeba kamana piya yogana, Pita abigama maya untiye: Kaeba awame kamana mapa tae tabireka yepera, aꞌyaꞌmaga yenema abigaogana, 
<p><sup>42</sup> Waꞌega kamana mayama amato puma untiye: Waꞌega kaꞌwaina kayokaya kinaꞌwampi ige kiyawaika otamagina maya omikiye: Naeba wama umintakanapa, kaeba kiya kabiwaitama asi nasiba naninta ka awameta imima miyo, ukiye. Pigoya, aeba ayama miyekanapa kayaba mono wantaga awamu wasikenaena wantagane otaiyo. 
<p><sup>43</sup> Piya, aeba yoga otanta pipa aogima puma miyekanaba, waꞌega yagarawapa irosaꞌmagina abekanaba aꞌmu potakiye. 
<p><sup>44</sup> Naeba taga tagaꞌya yekiri abiyo: Aeba pi ntagaraba pipa kiya tabe otama aꞌyaꞌmaenawatapa kabiyenoma otakiye. 
<p><sup>45</sup> Pigoya, pi kayokaya yagara aeba waꞌeganepa agaropa kampa kanakiyema, antabaipintiba napimagina, karana itamagina, kayokaya kina wabe wayape iyegumagina, nanintabe esegi wanipe nama aibo aboꞌena puma, karana itakanaba, 
<p><sup>46</sup> togana waꞌega yagarawa aꞌwae puma kanakena kanapa, pi kampa napinta mintakana, agaronkanto irosaꞌma agarubaꞌma aꞌyugu pikena kina aiꞌaruyenabi atakana ata maru mikiye. 
<p><sup>47</sup> Piya, kayokaya yagara kaꞌwaina aeba waꞌegawampa awamupisa kamana abintana akayukenaena aborakanaba, aepa tabera aegukiye. 
<p><sup>48</sup> Pigoya kaꞌwaina aeba tabe yagarawampa awamupisa kamana kampa aogima abinta, akayukenaena aborakibi, aepa iseꞌantora aegukiye. Pigoya, kaꞌwaina aepa piya uwomantana antotapa maekibewe. Pigoya, kaꞌwaina aeba tabe yuga otanta yagaramaba pipa esegi puma to kake aisuma maekiye, Isu uwaimintiye. Isu yoga puma aꞌyikikena piye 
<p><sup>49</sup> Pigoya Isu to maya untiye: Naeba mabi esegi yaku kaekena tumintuwe. Piya, ago yakunkama aburama tasanaga nabiye. 
<p><sup>50</sup> Naeba ka pasoma unatantine. Pigoya ibaba abikenaenanempaba kunta nabiye. Aꞌyaꞌma paitikenaenaba aseyonaba kampa punataka asaba punatakibewe. 
<p><sup>51</sup> Tigeba naekaba ayama napiyewe. Aeba mampabi paruyena aborakena tumintiyema napiyewe. Kampaye, Abiyo: Naeba atataraena aborakena tumintuwe. 
<p><sup>52</sup> Pika ma kanabipa mayama aborakiye: Ka namapi nayakaꞌmu kina mikibeꞌnagiba igeba maꞌena puma, atatara purite wagana pikibewe. Pitaꞌi taramisi naegaraisiginiba kakagamiba imo kamana ukibewo, kakagami naegaraiginisiba taramisiba isimo kamana ukibeso. 
<p><sup>53</sup> Pigoya atatara mikibewe. Abage yagarawampage isigeba maꞌena puma, atatara purite wagana pisigina, pabiyama anoge aragawampage isigeba maꞌena puma atatara purite wagana pikibese. Pigoya, aentawampage anatuge isigeba pabiyama maꞌena purite atatara pikibese, Isu piya untiye. Kamanaꞌwa abikibe ntagaga untiye 
<p><sup>54</sup> Piya uma, wa wayaka maya untiye: Tigeba ma tunusegiripa agamaba yewe: Ka aekena piye yegana aeye. 
<p><sup>55</sup> Ma arawagiri agantiripa yewe: Esegi patakiye yegana pata waye. 
<p><sup>56</sup> We, kumpari kina mintawe. Tigeba mawamake ibinankamake agowapa abewe. Pigoya ma kamanaꞌama agowapa nana piyema kampa abibebe pewema, ibigantiye. 
<p><sup>57</sup> Tigeba nana piyema aogi kipe ata kipe kampa agabebe pewe. 
<p><sup>58</sup> Pigoya, tigetisa kaꞌwaina kamana ugatakanaba, kamana abikena yagaramati kampa uma keꞌi wantirisi, kamanatisipa uma aogi puma aebarota urite waiso. Piya kampa pikibemepa, pi ntagaramaba karuꞌena abikena yagaramati uma kamanakapa yekana, irebu kinaꞌwa otakana, kababuma igaꞌna namapi katakiye. 
<p><sup>59</sup> Naeba ugamukuwa, abo: Kaeba pi nkigaꞌna namapi mintanapa uwaba kampa irosa wakibene. Aintiba iretaba amima aꞌya kaite wakibene, Isu piya untiye.<p/>
<h4>13</h4>
<p><sup>1</sup> Pi kanabi, kaꞌisa Karariya marisa kinaꞌmi waꞌega yagaramanta kaoꞌena puma, muta atakena yagaba ibabute kanama aeguyuguna, Pairati yogini, irebu kinaꞌwampi kana kinapa iyeguyuguni, pi wasana kurape yaga kurape aꞌyugu puwantiye. Pigoya wasana igeba irosaꞌma Isu pabiya awaga kamana omuguna, 
<p><sup>2</sup> maya uwaimintiye: Tigeba Karariya kinakaba ayama napiyewe. Ige aguntaenamaba to aꞌyaꞌma Karariya kinapa igaintomeka piya puwaitantawema napiyewa, a. 
<p><sup>3</sup> Piya wanane. Abiyo. Tigege ataenaripa kampa kaite tigu kampa aꞌwae pikibepa, pabiyama ata maru mpima puꞌwaewakibewe. 
<p><sup>4</sup> Piya, paipa Sairomu namapa eꞌero namapa takumagina, tonagisarisa kakaga umaema kina iyeguntiye. Pigoya, igeka ayama napiyewe. Ige ataenawaipa to aꞌyaꞌma Yerusaremi minta kinapa igaintomeka, piya puwaitantiyema napiyewa, a. 
<p><sup>5</sup> Piya wanane. Abiyo. Tigege ataenaripa kampa kaite tigu kampa aꞌwae pikibepa, pabiyama ata maru mpima puꞌwaewakibewe, piya untiye. A kampa aenta yawamaka meto kamana untiye 
<p><sup>6</sup> Kamana piya uma, Isu meto kamana ka maya untiye: Wasana kaꞌwaina yogawapi yamankapa ka kuꞌmaraogana iꞌma intiye. Pigoya to yaga wamagina agauka, uma agiyosa agaomepa kampa agantiye. 
<p><sup>7</sup> Piya puntana, kayokaya yagarawa maya omintiye: Naeba ma ntawama nka aesanaga kabimaete kanaogana, kaboba kakaga agasaye. Ya aeba nanaga nae yugabinti uwaba taberapa wairite wakiya, a. Aerawane agaiyugaso, omintiye. 
<p><sup>8</sup> Piya yogana maya omintiye: Naba, kaeba uwa atanto, ma kabuba miyeno. Piya, naeba agobintisa yonintana puma imupaena peno. 
<p><sup>9</sup> Pigoya, toganaba a aesanaga agaiyo. Aeyakaraba uwa atakuse. Kampa aeyakaraba agaiꞌyugaikuse, untiye, piya kamana Isu untiye. Isu waya ka sabatira aogi potantiye 
<p><sup>10</sup> Pigoya Isu aeba ka sabatira mono namapi ima mono uwaimintiye. 
<p><sup>11</sup> Pigoya, pi ntamapi waya ka mintantiye. Aeba kewama kaꞌwaina antabaipinti mintogana, kaboba tonagisarisa kakaga umaema kabuwa aꞌya pogana mintantiye. Piya, ayamagina ituru puma misuwe, uma parokaema nasi nasi puntiye. 
<p><sup>12</sup> Pigoya, Isuba waya pipa agamagina kegaꞌe uma maya omintiye: Waya, kaeba ituru pogana, yonikapa kata wano, untiye. 
<p><sup>13</sup> Piya uma ayapa aꞌnota atama yogana, pabigo ituru pumagina Koti aꞌmu potantiye. 
<p><sup>14</sup> Pigoya, Isu aeba waya pi sabatira aogi puma kaba atantika, pi mpono nama kiye yagarama agama abogana ataena abogana, wa waya maya kamana uwaimintiye: Yogaena pikena kanaba tonaentisa kaꞌumaema yaga waintiye. Pita kanaigina aogi puritano. Sabatirapa kampaye, untiye. 
<p><sup>15</sup> Piya yogana, Isu kamana mayama aꞌwae pomintiye: We, kumpari kina tigeba, sabatirapa purumakatino, osirino, namatipisaba iyoba urite wanitiba ibabute wawo. Ago pabiya pewe. 
<p><sup>16</sup> Pigoya, waya mapa aeba Abaraꞌamu nkagaꞌnuwe. Piya, Satani igaꞌna ubu atagina kaboba tonagisarisa kakaga umaema kabuwa mima mintantiye. Pigoya naeba ma sabatira ataogiripa aogi tigi napiyewo. Pipa kanarane, uwaimintiye. 
<p><sup>17</sup> Piya uwaimogini, igeba abima inintana ibogini, kamana kampa untawe. Piya, wa waya uwoma kinaꞌmiba pintana aogiyena pomeka iꞌmu puntawe. Koti kabiratakenaenaga meto kamana Isu untiye 
<p><sup>18</sup> Isu aeba kamana kapa mayama amato puma untiye: Koti kabiratakenaenaba ayaenabayaka, nanarapaya meto puma abukune. 
<p><sup>19</sup> Aeba masiteti aꞌwa piyamawe. Wasana kaꞌwaina yogawati ainka asikitaogana, iꞌma yaena peganaba, kabarankamaba kanama ayampuwatapa ampima anapa kiye, piya untiye. 
<p><sup>20</sup> Pigoya, to ka amato puma maya untiye: Koti kabiratakenaenaba ayama to meto puriyakikuwe. 
<p><sup>21</sup> Aeba paretibi atama kaekenaena agewapa yisiti piyamawe: Piya, waya kaꞌwaina pi yisiti maemagina uwoma parawabinti atama, paegu potama ataogana, kana paretiba anosakiye. Aeba piyama waintiye, untiye. Uwaena kabintobinti pasikena kamana Isu untiye 
<p><sup>22</sup> Pigoya, Isu Yerusaremi kumati wakena tabe kumatibe uwaena kumaꞌantontoribe nasi nasi puma mono uwaimintiye. 
<p><sup>23</sup> Pigoya wasana kaꞌwaina mayama abigantiye: Waꞌega, wasanaba tarantomibaya iba pekini ikibebe, ayabaya pikibewema, abigaogana, Isuba maya omintiye: 
<p><sup>24</sup> Uwaena kabintori uma pasikenaba iyampuba pabi pabi puma uma pasiyo. Wasana uwomampi uma pasikena ikibepa, umaba uwa kampa pasikibewe. 
<p><sup>25</sup> Piyama na nkagowamaba aeba asima kabe akunkatama mintakiripa tigeba na komari uma, asima mima aiwakaru suma maya ikibewe: Waꞌega kabe aꞌwairatao, yiginaba maya urimikiye: Tigeba kegitawe. Kampa tigao kinatawe, urimikiye. 
<p><sup>26</sup> Urimekiripa, antotapa maya omikibewe: Taeba kaege kaga mima nanintabe wanipe nantompene. Pigoya kumatetiba monopa yuku abintompene, yiginaba, 
<p><sup>27</sup> abintanaba maya urimikiye: Piya urimuwe. Tigeba kegitawe. Kampa tigao kinatawe. Tige aguntaena pe kinatawa natate waiyo, urimikiye. 
<p><sup>28</sup> Pigoya, Abaraꞌamuwa, Aisakiwa, Yekobuwa, to aꞌyaꞌma poropete kinana, suma, Koti kabiratakena kumati mintikiri igaigina, tigeba tigarubaigiripa mima, tiwara upaba puma, kubeꞌena puma mikibewe. 
<p><sup>29</sup> Pigoya, pa nkirosamitisabe tupasemitisabe marenkauꞌisabe menkauꞌisabe, pitaꞌisa wasanaba irosaꞌma Koti kabiratakena kumati ima naninta nama iꞌmu pikibewe. 
<p><sup>30</sup> Piya, abiyo. Pitaꞌi kaꞌisa kayokaya kinaꞌmi kiya mikibewe. Piya, kaꞌisa kiya kinaꞌmiba kayokaya kina mikibewe, Isu piya untiye. Yerusaremi kinaka antara kamana Isu untiye 
<p><sup>31</sup> Pigoya, Isu aeba kamana piya yogana, pabi kanabi Parasi kina kaꞌisa irosaꞌma maya uma omintawe: Eroti kaegukenaga iye. Pika ma mpaba kaite karuꞌena wao, untawe. 
<p><sup>32</sup> Piya yuguna maya uwaimintiye: Tigeba aꞌwae puma wama, kana kabu karamapa maya omiyo: Abeno. Naeba ibabe aibe wasana ke kina agaruba igasima kaba itakuboka, magaba yoganepa aꞌya wakuwe iye, omo. 
<p><sup>33</sup> Pigoya ibabe aibe magabe naeba keꞌi wakuwe. Aꞌyugu uwa mari wakini poropete aegusanaga, Yerusaremi kumati wakini aeguyigina purikibipa kanarane, Isu aeꞌwaka piya untiye. 
<p><sup>34</sup> Piya untana to maya untiye: We, Yerusaremi kinane, Yerusaremi kinane, tigeba nana pewema poropete kamaena puwaitama, mono kina tigeti uwaitanta kinapa yaba kasutasa iyeguyewe, a. We, kokorewama awa kiꞌnunka ibabuma agagapinti itama isamu pemisa puma, naeba tibabuma aki puritakena pogiri, aꞌa-o urite kanantawe. 
<p><sup>35</sup> Abiyo. Pika nama kumatipa atakana agamaena puma kabu isubikiye. Piya, naeba to yekiri abiyo. Naeba titakiri to kake kampa nagamagiri mirite wamagiri, ainti naeka: Waꞌegawama nkagera kanaya, aeka taꞌmu potano, ukibepa to kake nagakibewe, Isu piya untiye.<p/>
<h4>14</h4>
<p><sup>1</sup> Pigoya, to ka sabatira Parasi kinaꞌmi kiye kaꞌwaina Isu nanintaga kegaꞌe yogana, namankapinti iyogini, Parasi kinaꞌmiba pabipi kaga mima kamanaꞌwaka kabima mintantawe. 
<p><sup>2</sup> Piya yamoruyena abome kina ka iyogana, Isu agantana, 
<p><sup>3</sup> kamana ago abinta kinape Parasi kinape mayama ibigantiye: Tigeba yiyo. Sabatirapa ma ntagaraba aogi potakupera aya pukune, yogini, 
<p><sup>4</sup> asabaꞌwantawe. Piya puguna, kana yagara ayata taku uꞌma aogi potama agarubaogana wantiye. 
<p><sup>5</sup> Piya aogi potamagina, pi mintume kina igepa mayama ibigantiye: Yagaripe purumakatipera kabinti, sabati yaga tumekiripa uwa ataigina waikibera, pabi sabatira uwa paibigina ikiyema, ibigaogini, 
<p><sup>6</sup> kamana aꞌwae puma omikenaga aguyosakate atantawe. Kaupa a-mpaete iyo, Isu untiye 
<p><sup>7</sup> Pigoya wasana kaꞌisa nanintaga kaga igegaꞌe unta kina igeba napiyenawaipisa tabe yagarama yabaeba maema miyuguna igama maya meto kamana uwaimintiye: 
<p><sup>8</sup> Kaeba kaꞌwaina ibaꞌena pikena kagegaꞌe yekanapa, napiyenagapisaba marusa yabaeba maemaba a-mpiyo. Piya pegana tigegaꞌe untatisa kaꞌisa kina igetisa kae kagasima minta kaꞌwaina irosakana, 
<p><sup>9</sup> kaoꞌena agowamaba kaepa maya ampa ugamikiye: Pipa ae yabaewe. Aeꞌwatao, yekanapa, kaeba aꞌwae puma aintisa yabaera tumpima kani pikibene. 
<p><sup>10</sup> Piya wanane. Kaꞌwaina kagegaꞌe yekanapa kaeba aintisa yabaera miyo. Mintagana kaoꞌena agowamaba kagama maya ugamikiye: Naoꞌanto, kaeba ima marusa yabaera paitama asu miyo, piya ugamekana, pi naninta nakibe kinaꞌmi nkiyobi kantawamaba aogi pikiye. 
<p><sup>11</sup> Pabiyama, kaꞌwaina aeba au maete ikibiꞌnapa tumikiye. Piya, kaꞌwaina aeꞌwa nkau maete tumikibiꞌnapa maema mesuba potakiye, piya untiye. 
<p><sup>12</sup> Piya untana, wasana igegaꞌe yome ntagara aepa toba maya omintiye: Kaeba naninta kaoꞌena puntanapa, kao kinape kaganto kaꞌnantobe tigerupe, kumakatasa uwoma kuta wainta kinape, a-nkigegaꞌeba yo. Piya, igeba nanintaga igegaꞌe yeginiba, kaepa pabiyama antota kagegaꞌe uma atukapa kamigina aꞌya pikiye. 
<p><sup>13</sup> Pibiya kampaye. Naninta kaoꞌena puntanapa, kusi kinape karaena nagainta kinape agisa antage miru kinape aorika kinape, piyama igegaꞌe yegini naigina, 
<p><sup>14</sup> antota kampa maenta uwa aogima mintagana, aintiba taga mono kina asikibe kanabi, Koti antota kamekana kaꞌmu pikibene, Isu piya untiye. Tabe nanintama mpeto kamana untiye 
<p><sup>15</sup> Isu aeba piya kamana yogana naninta naume kina igetisa kaꞌwaina abite maya omintiye: Koti kabiratakena kumapi naninta nakibe kina iꞌmu pikibewe, untiye. 
<p><sup>16</sup> Piya yogana, Isu kamana ka maya omintiye: Wasana kaꞌwaina tabe nanintaena puma aki puntana, wasana uwoma kina igegaꞌe untiye. 
<p><sup>17</sup> Piya puma yokege potate, wasana kana iminti kinati kayokaya yagarawa otaogana wama: Ago kaoꞌenaba puma aꞌya atauna kanaiyo, uma uwaimintiye. 
<p><sup>18</sup> Uwaimogini, igeba aꞌyaꞌma uwa aꞌyugu kamana uma: Aꞌa-o untawe. Piya, kaꞌwaina aeba maya untiye: Naeba kasa ma ika pumaratoka, pitaꞌi wama yogaenane pukuwe. Pika kaeba tabe yagaragapa uma omegana abima ataba a-punatano, untiye. 
<p><sup>19</sup> Piya yogana to kaꞌwaina maya untiye: Naeba purumaka nayataraꞌmu ika pumaratoka pitaꞌi wama uma yoga pukuwe. Pika kaeba wama tabe yagaragapa uma omegana abima ataba a-punatano, untiye. 
<p><sup>20</sup> Pigoya to kaꞌwaina maya untiye: Naeba waya maetoka, ayama wakuwe, untiye. 
<p><sup>21</sup> Piya yuguna, kayokaya yagara aeba abite aꞌwae puma kanama, tabe yagara pi kamana omogana abima ata puntiye. Ata potamagina kayokaya yagarawa maya omima agarubantiye: Kaeba karuꞌena waꞌega waꞌega nasi nasi puma aꞌyaꞌma kiꞌi wama kusi kinape karaena nanta kinape igisa antage miru kinape, ibaburite kanagini nanintanepa ampa naiyo, untiye. 
<p><sup>22</sup> Piya yogana, kayokaya yagara wagaite kanamagina, aeba tabe yagarawa to maya omintiye: Tabe yagara, kaeba kamana yempesa puwe. Piya popa namapa marupa uwa waiye, untiye. 
<p><sup>23</sup> Piya yogana kana yagarama kayokaya yagarawa maya omintiye: Pigoya, kaeba to kiꞌi wama yogari mintakibe kinape kakama kumati wasana mintakibe kinape, tutusuwaitagini kanawaema namantepa ampa pumaeyiyoma uwaimo, untiye. 
<p><sup>24</sup> Piya, ka kamana yekiri abiyo. Paitama maru igegaꞌe unta kina, igeba nanintanepa kampa nakibewe, Isu piya untiye. Isu aegarakena kamanane 
<p><sup>25</sup> Pigoya, uwoma kina Isu aegarauguna aꞌwae puma maya uwaimintiye: 
<p><sup>26</sup> Kaꞌwaina aeba naege mikena puntanaba, ano abape waya yagarawape, aganto aꞌnanto amanaꞌmape, igepa aekita puwaitantana, aeꞌwa nkauꞌwapa pabiyama aekita potakibiꞌna, aeba kayokaya yagarane mikiye. 
<p><sup>27</sup> Kaꞌwaina aeba kampa maripowa aesagaꞌurite, kampa naegarakibiꞌnaba nae kayokaya yagaranepa kampa mikiye, Isu piyama meto kamana untiye. 
<p><sup>28</sup> Piya untana to maya untiye: Pigoya, tigetisa kaꞌwaina tabe nama amato puma kirite ikena puntanaba, marupa ikantanamaka napima, yabankapa maema aisumagina kanara kikube kampabayawema, piꞌna nkagowapa abima napikiye. 
<p><sup>29</sup> Piya kampa punta, namanka kuꞌma kaitantanaba yabaka aguyosagate kasakini, wasanamiba kampa kimaranta namapa agama, kagi potama, 
<p><sup>30</sup> maya ikibewe: Ma ntagaraba kampa napimagina aganta namapa kuꞌma kaitate kasagina kasipama waintiye, piya ikibewe. 
<p><sup>31</sup> Pigoya, ka marisa waꞌega yagarama to ka marisa waꞌega yagarama aokinaꞌmige kamaena pikena puntini, uwa aꞌyuguba kampa uma iyegukibekana, aeba paitama maya ikiye: Taeba 10,000 kina mintokini, igeba 20,000 kina mintawe. Pigoya igepaya igasima iyeguwaegaikupe, taepaya tagasima taeguwaegaikibewema, napigaitegini kana kamaena pikibewe. 
<p><sup>32</sup> Kampa igaintini uwa atate, ayaki kuta timima uwa aiyekana uwa aema paru pukuwe. Piyama wasana agarubakana apa nkakiye, untiye. 
<p><sup>33</sup> Piya untana, amato puma maya untiye: Pigoya tigetisa kaꞌwainaba aeba ayama aꞌyaꞌwaemaenawapa kampa kasiwaentapa, aya puma yagaranentanaba puma mikiye. Pipa kampaye, Isu piya untiye. Kampa iga wainta kayowe 
<p><sup>34</sup> Pigoya to urimuwe: Kayoba aogi igaenawe. Piya, iꞌnisama kasigabekapa, aya pekana to kake asabama iga pikiye, a. Pipa kampaye. 
<p><sup>35</sup> Pipa piyaena pikenaba kampa waintegini, uwa mariba asunu kaekasawe. Ageyaga kinaꞌmaba ma kamanapa abibebe peno, Isu piya untiye.<p/>
<h4>15</h4>
<p><sup>1</sup> Pigoya, takisi mone maekena kinape kamparaga kinape Isuti monowa abikena tabera irosaꞌma mintantawe. 
<p><sup>2</sup> Piya puguni, Parasi kinape mono tisa kinape igeba pika abimagini, Isu ata potama aeka maya untawe: Ma ntagaraba kamparaga kina aoꞌena puma naninta kapisa naye, piya untawe. 
<p><sup>3</sup> Pigoya, pika Isuba meto kamana maya uwaimintiye: 
<p><sup>4</sup> Tigetisa kaꞌwaina aeba 100-wa sipisipi atama mintakana, kaꞌanto kaka wakanaba uwa kaikiya, a. Kampaye. Aeba kaꞌisaba 99 kumaꞌwaipinti itakini, kabuyena nama mintigina kakawaiꞌnaka aguyosagakiye. 
<p><sup>5</sup> Aguyosama aboratama aꞌmu puma aesaga uritegina, 
<p><sup>6</sup> kumati uma irosaꞌma aokinaka kegaꞌe uma maya ikiye: Sipisipine kabubi kaka wantipe ago abatamagi ababute kanauwe. Pika taꞌmu peno, ukiye. 
<p><sup>7</sup> Pabiyama naeba urimekiri abiyo. Wasana 99-wa monota mintiginaba, igekaba pi mantariba aꞌmuntana waikiye. Pigoya, agunta yagara kaꞌwaina agu aꞌwae pekanaba, aeka mantariba aꞌmuntanaba ima tabera aborama to aꞌmuntanaba igaikiye, Isu piya untiye. Mone kaka wanti meto kamanane 
<p><sup>8</sup> Pigoya, Isu to meto kamana maya untiye: Waya kaꞌwaina nayataraꞌmu mone uꞌma mintakana, kaꞌanto tumiwakanaba kaikiya, a. Kampaye. Aeba kane igiꞌma nama paga puma aogima aguyosagakiye. 
<p><sup>9</sup> Aguyosama aborama waya aokina kegaꞌe uma maya uwaimikiye: Monene kakaꞌwaipa pi ago abatama maeyuwe. Pika taꞌmu peno, ukiye. 
<p><sup>10</sup> Pabiyama yekiri abiyo: Mantari Koti nkenisori kina igeba pabiyama agunta yagara ka waina agu aꞌwae pekiniba iꞌmu pikibewe, Isu piya untiye. Yagaranto ka kaka wanti meto kamanane 
<p><sup>11</sup> Pigoya, to meto kamana maya untiye: Ka yagarama ntagarawapa tara mintantase. 
<p><sup>12</sup> Mintana aintisa yagarama abawampa mayama omintiye: Kaeba mone kuntaka pako puma naepa nameganto, yogana, pako puwaisitantiye. 
<p><sup>13</sup> Piya pogana, aintisa yagarawampaba ise yaganto mima kotanka aꞌyaꞌwaemaena aisaꞌurite eꞌero mpari maete wantiye. Pigoya pitaꞌi kupiyona puta nasima mone kutankapa nanintari kasima pusiya puwaegaintiye. 
<p><sup>14</sup> Pusiya puwaegaite mintogana, pi mpariba tabe kabu pogana aeba kaꞌenawapa kampa waintiye. 
<p><sup>15</sup> Aibogana, ma ago yagara kaꞌwainati wama uma atokaeyogana, aeba yogana kumaꞌwati yaga kiye kabintiye. 
<p><sup>16</sup> Piya puntana, aeba yagama ntaninta nakena poginiba aꞌa-o otantawe. 
<p><sup>17</sup> Piyama mintana maya aogima napintiye: Nabanempa kayokaya kinaꞌmitiba uwoma ntaninta waiyegini nama igaꞌe pama miyega, naeba yagarawampanaba mataꞌi ampima nagaꞌenaga purikena puwe. 
<p><sup>18</sup> Pika naeba kumaꞌneti wama nabanempati irosaꞌma maya uma omukuwe: Naba, naeba aguntaena pogana kaintananempaba kaetibe Kotitibe kunta piya. 
<p><sup>19</sup> Pipa ayama to kake kagorasa yagaragapa mikuwe. Kaeba uwa kayokaya yagaraga nababega mikuwe ukuwema, napintiye. 
<p><sup>20</sup> Piyama napima, aseꞌyo puma abawampati kanantiye. Kanamagina kuma awamori uma irosaogana abawampa ago agate antara puma karuꞌena uma aepama amo nantiye. 
<p><sup>21</sup> Aibogana kana yagaramaba mayama omintiye: Naba, naeba aguntaena pogana kaintananempaba Koti nkaobipe kae kaobipe kunta piye. Pika kaeꞌyagaranawe to kampa ukuwe, untiye. 
<p><sup>22</sup> Piya yogana, abawampa: Pigoya aerawane, otate, kayokaya maya uwaimintiye: Tigeba karuꞌena wama aogi kai maete kanama ampa amitaiyo. Ayapipa tusapa potantiri, agisa anapa amintiri piyo. 
<p><sup>23</sup> Piya, purumaka nkawaroba apa yaga aeguma kaeyigi nama taꞌmu potano. 
<p><sup>24</sup> Yagaranepa aeba puꞌwantitisa to kake aogaya, pigoya aeba kaka wantitisa to kake aboraya, pika taꞌmu peno, untiye. Piya yogini kaema iꞌmu puntawe. 
<p><sup>25</sup> Pigoya, amaru yagara aeba yogari mintogini piya puntawe: Piya yogarisa aꞌwae puma nama nkakaꞌi ampima inibe waꞌenabe abintiye. 
<p><sup>26</sup> Piyama abimagina kayokaya yagara ka kegaꞌe uma: Maipa nana pewema, abigantiye. 
<p><sup>27</sup> Aeba maya aꞌwae pomintiye: Kaꞌnantogampa kanama irosaꞌma, ataenaba kampa pikana aogima mintiye. Pigo irosagina tisibarisimpaba yegi purumaka nkawaro apa yaga aeguma kaeyunema, omintiye. 
<p><sup>28</sup> Piyama omogana, amaru yagara aeba amoꞌena puma namapinti ikenagaba aꞌa-o untiye. Piya pogana abawampaba kuma awamori tumima aurintiye. 
<p><sup>29</sup> Piya pogana kampa abinta, abawampapa maya omintiye: Abeno. Naeba ayaki kabubaya mima kamanakapa kampa akaꞌyuma kayokayaꞌenaba pugatauwe. Pugataoganapa, pi kaeba uwa meme awaroba kapa kampa nameka aeguma yaga namaegigeba nama taꞌmuntanaba kampa pompene. 
<p><sup>30</sup> We, aintisa yagaragapa kupiyona puta nasima mone kutankapa pusiya puma asorisari pugaite kanagina, yekini purumaka nkawaro apa yaga aeguma kaetawe, untiye. 
<p><sup>31</sup> Piya yogana, abawampa mayama omintiye: Yagarane, kaeba asi nasi miyempeka piya mayaenagaba kampa aguyosagane, aꞌyaꞌmaenaba kapiyenaresi waintiye. 
<p><sup>32</sup> Piya kaꞌnantoba aeba puꞌwantitisa to kake aogaye. Piya, aeba kaka wantitisa to kake aboraye. Pika tantawama asoꞌya peka taꞌmu potakana aogi pikiye, untiyema, Isu piya untiye.<p/>
<h4>16</h4>
<p><sup>1</sup> Isu abagi kinaꞌwa kamana to ka maya uwaimintiye: Tabe kutantaga yagara kaꞌwaina kiya yagarawa ababuntiye. Pigoya, kaꞌisa kinaꞌmi aeka maya yuguna aba kari abintiye: Kiya aeba kota maema aꞌyugu piyema, yuguna abintiye. 
<p><sup>2</sup> Piya kamana abitegina kegaꞌe uma maya omintiye: Kae kamana maya yega abuwe. Kae piyamagaba kiyeba to kake kampa mikibenema yuwa, esagapa maete kanagara mone kutankama nkagowa aogi peso, untiye. 
<p><sup>3</sup> Piya yogana, kana kiya aeba antabinti mayama napima untiye: Ma tabe yagaranempaba yogane nagarubakenaga iye. Aya pukuwe. Yogaena pusagaba naekita piye. Nauꞌama iga tumiga peka, wasanamiti nanintaga esuwaitasanagaba nani piye. 
<p><sup>4</sup> Piya, tabe yagarama yogarasa nagarubakibi kanabipa, aꞌyugu wasanami ka nabiꞌma, namankaipi kampa nababuntanagaba ka nagi napiyoka, pintana pukuwe, untiye. 
<p><sup>5</sup> Piya utegina, tabe yagarawampa nkireta wainta kinaka kegaꞌe umagina, kaꞌwaina mayama abigama untiye: Kaeba tabe yagaranempa ireta kaetiba ayaki waintiye, untiye. 
<p><sup>6</sup> Piya yogana aeba maya untiye: Apa tabe tiniba 100-we yogana, mayama omintiye: Pigoya, ma ireta esa maema maraꞌmima 100 aegugasima 50 kaeyo, untiye. 
<p><sup>7</sup> Piya untana to kaꞌwaina ampa irosaogana: Tabe yagaranempa ireta kaetiba ayaki waintiyema abigantiye. Abigaogana, 100 witi kune, untiye. Piya yogana maya omintiye: Pigoya, ma ireta esa maema 100 aegugasima 80 kaeyo, untiye. 
<p><sup>8</sup> Pigoya, piya pogana, tabe yagara ata kiya yagaramaka abimagina: Aogi napiyena napima piyema, abima aogi potantiye, Isu untiye. Piya untana pi kamanaka to maya untiye: Mampabisa kinaꞌmiba mampabisaenaga tabera napi napi pewe. Piya pumagini eꞌwasaena maenta kinaꞌmipa igasima napi napi pewe. 
<p><sup>9</sup> Piya yekiri abiyo. Moneba mampabisaenawe. Tigeba pika aogima napima pitasa tiyoꞌenaba puma maema miyigina, mampabi mikena kanati aꞌya pikibi ntagaba, aꞌyaꞌwaema kutatipa kampa maete Kotiti ikibewe. Pabi ntagaba miyaba mikena kumati asu aogima mikibewe, piya untiye. 
<p><sup>10</sup> Pigoya, Isu to maya untiye: Kaꞌwaina aeba auꞌwa kampa waintaꞌena aogima kanara kabibikiꞌnaba, aeba pabiyama auꞌwantagaꞌenaba aogima kanara kabikiye. Piya kaꞌwaina aeba auꞌwa kampa waintaꞌena maema ataena pikibiꞌnaba, aeba pabiyama auꞌwa waintaꞌenaba maema aꞌyugu pikiye. 
<p><sup>11</sup> Pigoya tigeba mampabisa kuta aogima kanara kampa maema miyiginaba, mantarisa taga auꞌwantagaꞌenaba Koti kapa ayama timikiye, a. Pipa kampaye. 
<p><sup>12</sup> Pigoya, aꞌyo timintaꞌena pi aogima kanara kampa uꞌma miyiginaba, tigeꞌenaripa pi Koti ayama timikiye, a. Pipa kampaye. 
<p><sup>13</sup> Pigoya, ka yagarama tabe yagara taramisi kayokayaꞌena kampa kanara pikiye. Aeba kaꞌwainapa kayone potantana, to kaꞌwainapa agama aekita potakiye. Piya pumagina aeba kaꞌwainati uma atokaentana to kaꞌwainapa akabitakiye. We tigeba pabiyama Koti ntugabe mone kutankama ntugabe ka awameta kanara kampa maekibewe, Isu piya untiye. Isu aeba Parasi kinaꞌmi kamana untiye 
<p><sup>14</sup> Pigoya Isu aeba pi kamana yogini, Parasi kina igeba mone kutaka ibugai kina abima kamanaꞌwa akayuma kagi potantawe. 
<p><sup>15</sup> Aibuguna maya uwaimintiye: Pi tige wasanami nkiyobi aogi tiyuwa kanta piye. Kotiba tiguꞌama nkagoba agama abiye. Wasana ige iyobi iꞌmaete ima mikenaenagaba pi Koti nkaobi ata aguntaena piya. 
<p><sup>16</sup> Piya, paipa Mosese ominti ago kamanape poropete kinaꞌmi kamanape kaeta kanantagana Yoniba aborantiye. Aboramagina Koti kabiratakena aogi awaga kamana untika, ibaba aboraye. Piya ebi ebi peꞌnagiba agasiya puma uma pasawe. 
<p><sup>17</sup> We, mage mantage isigeba aꞌya pikenaba untanaba aꞌya pikiye. Piya, Koti kamana kapa kampa kakakibikana aꞌyaꞌma uwa waiyaba mikiye, Isu piya untiye. Waya kaikena kamanane 
<p><sup>18</sup> Pigoya, kaꞌwaina wayaꞌwa kaite to wae maekibiꞌnaba, kupiyonaba pikiye. Piya, to kaꞌwaina aeba pi kainta wae maekibiꞌnaba, aeba pabiyama kupiyonaba pikiye, Isu piya untiye. Tabe yagaramage Arasarusige kamana untiye 
<p><sup>19</sup> Pigoya Isu to ka kamana maya untiye: Tabe kutantaga yagara ka mintantiye. Aeba kaiwapa waepe teteba aogiyenamana puꞌma mintana, asi nasi aogi nanintamana namagina igaenabi mintantiye. 
<p><sup>20</sup> Pigoya, kusi yagara ka mintantiye. Agewapa Arasarusiwe. Aeba autiba anamosura yagarawe. Pigoya, aeba tabe yagarama ntama kabera waibomekana, 
<p><sup>21</sup> tabe yagarama ntamapintisa ariyena atuntana tumogana: Pabipa maema nakuwema, napintiye. Waitamintogana karamiba irosaꞌma anamopa inteburasa kiꞌma nantawe. 
<p><sup>22</sup> Pigoya, mima pi kusi yagaraba purogini enisore kina igeba ababute ima abaraꞌamu nkagora atauguna mintantiye. Pigoya ainti pi tabe yagara aeba purogini kaitauguna, 
<p><sup>23</sup> aeba aꞌabibinti tumima tabera auki naki puma mintantiye. Piya puntana, inati aomaraomepa Abaraꞌamu nkagora Arasarusi pa agantiye. 
<p><sup>24</sup> Agantana Abaraꞌamu nkagisuma maya untiye: Abaraꞌamu nabanempagawo, naeba mataꞌi yakupi nauki naki puma mintuwa, kaeba naeka kantara puma Arasarusi otagana aya nkawarasa wanipi aerite kanama nantebura atakana paru peno, untiye. 
<p><sup>25</sup> Piya yogana Abaraꞌamu maya untiye: Yagarane, abeno. Kaeba mara igaenabinti mintanti pipa pabiyama aꞌya puwantiye. Pigoya Arasarusi antaraꞌenabinti mintanti, pipa pabiyama aꞌya puwantiye. Pigoya pika aeba anta asoyaenabi mpintiya, piya kaeba kauki nakiyenabi mpiyene. 
<p><sup>26</sup> Pigoya abakatepi tabe aꞌabi waintiye. Pika matisamiba tigetiba ayama tumikibewe, a. Piya tigetisamiba matiba ayama ikibewe, a. Pipa kampaye, untiye. 
<p><sup>28</sup> 
<p><sup>27</sup> Aiyogana, kana tabe yagarama maya untiye: Nabanempa kanarana, kamanakapa ago abuwe. Piya, ka yekana abo. Maroti nae kumati naꞌnatabarantonto nayakaꞌmu mintawe. Igeba mataꞌi auki naki kumati tumisanaga Arasarusi otagana wama tonkiya kamana uwaimeno, untiye. 
<p><sup>29</sup> Piya yogana Abaraꞌamuba maya untiye: Kampaye. Mosesebe poropete kina ige mono kamana wainti, pi igeba abiyo, untiye. 
<p><sup>30</sup> Piya yogana aeba to maya untiye: Abaraꞌamu nabanempa, pipa kampaye. Purinta kina kaꞌwaina wama uwaimekini kanara igu aꞌwae pikibewe, untiye. 
<p><sup>31</sup> Piya yogana maya omintiye: Igeba Mosesebe poropete kinaꞌmibe kamanapa aꞌa-o yekini, piya purinta kina kaꞌwaina asima wama uwaimemisinta, pabiyama aꞌa-o iyesine, Abaraꞌamu untiyema, Isu piya kamana untiye.<p/>
<h4>17</h4>
<p><sup>1</sup> Pigoya, Isuba abagi kinaꞌwa kamana maya uwaimintiye: Aguntaena pukena amiyoꞌena asi nasi aborakiye. Aibekana aguntaena aborakibi ntagarama ataenabi mikiye. 
<p><sup>2</sup> Pipa aeba maya yagaranto ayakekana kamparagaena pukibemipa, kana ayakikibi ntagara arakuꞌma tabe yabantama anaꞌmubi ubaꞌatama tabe wanipi apasanakasasinta: Pipa kanara pewe, yesine. 
<p><sup>3</sup> Tigeba kiya kabima miyiyo. Kaoꞌyagara ataena pekanapa ka abirao. Piya pegana aeba agu aꞌwae peno. Piya yegana antara kamana ugasakana asuꞌa pugaso. 
<p><sup>4</sup> Piya, ka yagaba tonaentisa tara umaema aguntaena pugatantana, to kake kaeti irosaꞌma tonaentisa tara umaema yaga: Naeba nantara puma nagu aꞌwae puwe, ikibipa, kaeba aguntaenawapa uwa asuꞌa pugaso, Isu piya untiye. Amatitiꞌenaga Isu untiye 
<p><sup>5</sup> Pigoya, aposoro kinaꞌmi igeba Waꞌega Yagara maya esotantawe: Kaeba tamatitiꞌenarepa maema tabe puratao, untawe. 
<p><sup>6</sup> Piya yuguna Waꞌega Yagarama maya uwaimintiye: Taga timatitiꞌena uwaenanto waintesinta, maro ntawamaka: Kaeba igiritegina tabe wanipi tumpa waiyeno, yeganaba, tiwamu wasima pabiya pemisine, Isu piya untiye. Waꞌegawama ntuga kamana Isu untiye 
<p><sup>7</sup> Pigoya, Isu to maya untiye: Tabe yagara kaꞌwaina aeba kayokaya yagarawa yogaenaba puntana yaga kiye kabintana puma mintakibitisa atamaita kanakanaba, mayaba kanara omikiyo: Kaeba namapinti iyega naninta kaoꞌena pugameno, omikiya, a. 
<p><sup>8</sup> Pipa kampaye. Aeba maya omikiye: Piya, aogi kai maema amirintana asekasa naninta kaenataga nagasakana, ainti uma kaeꞌenagapa kaema nao, ukiye. 
<p><sup>9</sup> Pigoya kayokaya yagara aeba yoga otanta pipa pekana, tabe yagarawampaba uwa abekana aya pikiye. Pika kampa aꞌmupa potakiye. Kampaye. 
<p><sup>10</sup> Piya, tige agoba pabiyama waintiye. Tigeba uritantaꞌena pi puwaegaitekiripa maya yiyo: Taeba uwa kayokaya yagararawe. Pintana pompepa tae yugare pune, to naumabisa napima to kaꞌisaenaba ae yugaba kampa pune, yiyo, Isu uwaimintiye. Isu nayataramu karu kina aogi puwaitantiye 
<p><sup>11</sup> Pigoya, Isu aeba Yerusaremi kumati wakena Karariya maba agaite Sameriya ma awamori uma irosantiye. 
<p><sup>12</sup> Irosaꞌma ka kumati iyogini karu kina nayataraꞌmu igeba pagasari mima agategini, 
<p><sup>13</sup> kegaꞌe uma agisuma maya untawe: We, kiya yagara Isu, kaeba taeka kantara po, untawe. 
<p><sup>14</sup> Piya yuguna igama: Tigeba wama tipa mono kiye kina iyakiyo, uwaimintiye. Piya yogini, wauguna iꞌamaba aogi puwantiye. 
<p><sup>15</sup> Piya puwaogana agate igetisa kaꞌwaina aꞌwae puma tabera uma Koti aꞌmu potama, 
<p><sup>16</sup> Isu nkagisabi parokaema aꞌmu potantiye. Piya, pi ntagaraba Sameriya marisa yagarawe. 
<p><sup>17</sup> Pigoya Isuba maya untiye: Wasanaba nayataraꞌmu aogi pene. Kaꞌisa tonaentisa ka megasima kinapa aempaye. 
<p><sup>18</sup> Igeba aꞌwae puma Kotika: Taꞌmu pugatauneba, kampa otanta uwa wagana, to marisa yagarama abinto kanamagina ampa aꞌmu potaya, a, piya untiye. 
<p><sup>19</sup> Piya umagina aꞌwae puma pi ntagarapa: Kamatitiꞌenagampa aogi pugataya, kaeba asima waoma, omintiye. Koti kabiratakena yaga aborakibika Isu untiye 
<p><sup>20</sup> Pigoya Parasi kinaꞌmi: Koti kabiratakena yaga ayantaga aborakiyema, Isu abigantawe. Abigauguna Isu maya uwaimintiye: Koti kabiratakena yaga aborapa kampagina aborakiye. 
<p><sup>21</sup> Pintaga mayama kampa ukibewe: Agaiyo. Mataꞌi aboraye. We, marotaꞌi aboraye, piyaba kampa ukibewe. Abiyo, Koti kabiratakenaenaba tigupi ago aboraye, untiye. 
<p><sup>22</sup> Piya umagina, abagi kina to maya uwaimintiye: Tigeba toganaba ka yagaba Wasanama Ntagara nagakenagaba tibugagate kampa nagakibewe. 
<p><sup>23</sup> Pi kanabipa naekaba maya urimikibewe: Mataꞌi taeti aboraye. We, marotaꞌi igeti aboraye, igiripa a-nkwaiyo. Piya abigiripa a-nkuma iyegaraiyo. 
<p><sup>24</sup> Wasanama Ntagaraba naeba kakamaba kampa irosakuwe. Apayaenaba aeba manta ka aukaꞌi apaya pegina to aukaꞌi eꞌwasa purite wagana pemi, pabi nkawameta naeba aborakuwe. 
<p><sup>25</sup> Marupa mamparasa kinaꞌmiba ikabinataigini nauki nakiyena tabera punataigina, asaba pi yontana aborakiye. 
<p><sup>26</sup> Piya, Nowa mintanti kanabi wasana igeba puntasa puma Wasanama Ntagara nae irosakena kanaꞌnepa aborakiniba, pabiya pikibewe. 
<p><sup>27</sup> Igeba nanintaba nantini, wanipa nantini, wayapa ika pumagini, ibaꞌenaba puntini, puma kampa aogima napima mintuguna, Nowa aeba wanipisa karebi ima paiwaogana wanipa tabera paꞌma ipirinta waegasogini, wabe wayape aꞌyaꞌma puꞌwaewantawe. 
<p><sup>28</sup> Pigoya to Aroti mintanti kanabipa pabiya puntawe. Nanintaba nantini, wanipa nantini, ikantanaba puntini, to kinapa kaꞌisaenaba imuguni, ika puntini, yoga aintanaba puntini, namapa kintini, puma kampa aogima napima mintuguna, 
<p><sup>29</sup> ka yaga Aroti aeba Sotomu kumapa akabitate waogana yakupe yakupisa kagupe mantarisa tumima aꞌyaꞌma kinapa wabe wayape iyeguma aꞌya kaintiye. 
<p><sup>30</sup> Piya pi ntaga igeba pika kampa napintasa puma, Wasanama Ntagara nae aborakena kanaꞌnekaba kampa napikibewe. 
<p><sup>31</sup> Pigoya, pi ntagaba kaꞌwaina aeba namankampa nkabobori mintakibitisaba tumima nama nkantabaipintisaba kotankapa a-mpaeyano. Pigoya, to kaꞌwainaba pabiyama yogari mintakibitisaba aꞌwae puma namankatiba a-nkwano. 
<p><sup>32</sup> Piya, tigeba Aroti nkanarimpa yabantana puwantemika napima kabiyiyo. 
<p><sup>33</sup> Kaꞌwaina aeba mikenaenawa ka abugakibemiꞌnaba pipa aguꞌamankapa kaikiye. Mikenaenawampa aꞌa-o otakanaba, aguꞌamaba aogima waikiye. 
<p><sup>34</sup> Naeba yekiri abiyo: Pi nkagogo yaga maruta tara yagara waitamintisiginaba Kotiba kaꞌwainapa ababurintana to kaꞌwainapa atakiye. 
<p><sup>35</sup> Piya, tara wae taramisi naninta kaoꞌena puma mintisiginaba kaꞌwainapa Kotiba ababurintana to kaꞌwainapa uwa atakiye. 
<p><sup>36</sup> (Piya, yogari tara yagara taramisi mintisiginaba Kotiba kaꞌwainapa ababurintana to kaꞌwainapa uwa atakiye, Isu piya untiye.) 
<p><sup>37</sup> Piya yegini abagi kinaꞌmiba: Tabe yagara, pintanaba aeta aborakiyema, abigantawe. Piyama abigauguna Isu meto kamana maya uwaimintiye: Purinta kinaꞌmi nkau waintiti kegeba aki pesa pumawe, untiye.<p/>
<h4>18</h4>
<p><sup>1</sup> Pigoya, abagi kinapa iyekita kampa punta asi nasima igeba esotakibeka, Isu meto kamana ka maya uwaimintiye: 
<p><sup>2</sup> Piya, ka kumata ka kamana abikena yagara mintantiye. Pi ntagara aeba Kotikaba kampa aekuruba puntana, aꞌyaꞌma kinakaba kampa aogima napintiye. 
<p><sup>3</sup> Piya, pabi kumata kiya wae ka mintantiye. Aeba asi nasima pi kamana abikena yagaramati kanama: Kama kinaꞌnempi ata punatasanaga, naoꞌmaeyoma, ampa omi puntiye. 
<p><sup>4</sup> Pigoya, marupa pi kamana abikena yagaramaba aekita potama kampa aoꞌmaentana, aintiba aeba mayama antabintiba napima untiye: Naeba Kotikaba kampa naekuruba puma, wasanamikaba pabiyama kampa napiyuwe. 
<p><sup>5</sup> Pigoya, ma nkawae puꞌwanta waepa aeba asi nasi kanama ampa nabigayaba miyekanaba nauꞌamaba aekita pusanaga iba kamanaꞌwa abima aoꞌmaekuwe, untiyema, untiye. 
<p><sup>6</sup> Piya umagina, Tabe yagara amato puma maya untiye: Ata kamana abikena yagarama unti kamanapa ago abewo. Pipa ayabayawe. 
<p><sup>7</sup> Kotika kagipe asekape asi nasima aegarakibe kinaꞌmi agisaiginaba Kotiba kanara kampa tiyoꞌmaekiya, a. Aeba agawa puma miyabaꞌmiyigina karuꞌenaba kampa iyoꞌmaekiya, a. 
<p><sup>8</sup> We, urimuwe: Pipa kampaye. Aeba agaro ntaganto tiyoꞌmaekiye. Piya, aintiba Wasanama Ntagara naeba to kake aborama mabi tumukubopa, igeba imatitiꞌena pe kinapa taranto aogima mikibewe, piya untiye. Parasi yagaramake takisi maekena yagaramake meto kamanane 
<p><sup>9</sup> Pigoya, kaꞌisa kinaꞌmiba igeꞌwaikaba: Aogi kinatawema napintini, to kinaꞌmikaba: Pipa ata kina takaꞌyanema napinta, pi igi napiye kinakaba Isuba mono kamana maya umintiye: 
<p><sup>10</sup> Tara yagararamisi nunamu ikena tabe mono namapinti intase. Pigoya, kapa Parasiwa, to kapa takisi maekena yagarawa sumawe. 
<p><sup>11</sup> Parasi yagara aeba asima mima aeꞌwaka mayama napima nunamu untiye: Koti, wasana kaꞌisa kinaꞌmiba kuntana maꞌenaba pewe. Kamana kampa aogima abewe. Wayaꞌwa taramisiba atataraenaba puma ata aguntaena pewe. Naeba piya kinapa kampaye. Piya takisi maeyi ntagara mare, ae piyamaba kampa mintuwe. Pika naeba naꞌmu pugatauwe. 
<p><sup>12</sup> Piya, aꞌyaꞌma sontarapa tara yagaba naeba monoka napima nanintaba aꞌa-o uma miyuwe. Piya, aꞌyaꞌwaemaena maeyopa, naeba pipa pako puma nayataraꞌmupisa agento kamuwe, piya untiye. 
<p><sup>13</sup> Aiyogana, takisi maenta yagara aeba pagasara asima mintana mantari aomarakenagaba ani puma kampa piya puntiye. Aeba aibira aima maya untiye: Koti, naeba agunta kina miyoka, kaeba kantara punatama naoꞌmaeyo, untiyema, Isu piya untiye. 
<p><sup>14</sup> Pigoya naeba urimekiri abiyo: Pi takisi maenta yagaragaba Kotiba aguntaena maegasogana waꞌewati uwa wantiye. Piya pi to ka yagaraba kampaye. Abiyo. Kaꞌwainaba aeꞌwa nkau maete iyekanaba, Kotiba merunkaba potakiye. Piya, to kaꞌwaina aeꞌwa nkage au maete tumekanaba, Kotiba ababuma mesuba potakiye, Isu piya untiye. Isu inamu ntakarantonto akayona puwaintiye 
<p><sup>15</sup> Pigoya igeba inamu ntakarantontowai Isuti ibabute kanantawe. Igeba: Ayapa ita aukaya pikiyema, napima kanauguni abagi kinamiba igate ka ibirantawe. 
<p><sup>16</sup> Piya yuguna, Isuba igegaꞌe uma igeka maya untiye: Tigeba uwa itaigini yakarantonto igeba naeti kanaiyo. Tigeba a-nkakunkitaiyo. Piya miye kinaꞌmikaba Koti kabiratakenaenaba utawaitantine. 
<p><sup>17</sup> Naeba taga urimuwa abiyo. Kaꞌwaina aeba yakarantonto miyesa nkawameta kampa Koti aegarakibiꞌnaba Koti kabiratakenaenama nkagupi kampa uma pasikiye, Isu untiye. Kutantaga kiye yagarama Isu aegarakenaga kunta puntiye 
<p><sup>18</sup> Pigoya kiya kaꞌwaina Isu mayama abigantiye: Aogi tisa, naeba aya pukubotisa Koti nkeꞌwasaenaba maekuwema, abigantiye. 
<p><sup>19</sup> Abigaogana Isu piya omintiye: Nana piyema naeba aogi tisaweba yene. Aogiyenama nkagoba Koti kaꞌantowe. 
<p><sup>20</sup> Pigoya kaeba nayataraꞌmu kamana agoba mayama abene: Kumiyenaba a-poma, wasanaba a-nkaeguma kaiyoma, kuntanaba a-poma, kumpari kamanapa to wainapa a-sotaoma, kano kaba kamana wasiyo. Pipa abintanema, omintiye. 
<p><sup>21</sup> Piyama omogana kiya yagarama maya untiye: Pipa uwaena yagarantomana pi kamana agoba abima wasita kanantone, untiye. 
<p><sup>22</sup> Aiyogana Isuba pi kamana abintana, maya omintiye: Kaꞌenaba kampa puntana, pintanaba po. Kaeba wama kotakapa to kina imima mone maemagina kusi kina imegana, mantari aogiyena ainta abora kamikiye. Kaeba piya potate kanama ampa naegarao, piya omintiye. 
<p><sup>23</sup> Pigoya, piya omogana kana kiye yagaraba tabe kutankapa uwoma waintomeka, pi kamana abogana kunta abuntiye. 
<p><sup>24</sup> Piya pogana Isu agantana pika maya untiye: Tabe kutantaga kinaꞌmiba Koti kabiratakena kumati ikenagaba igigaba tabera pewe. 
<p><sup>25</sup> Pigoya tabe kamoro yagamaba naꞌama agepinti uma pasikenaba pipa esegiyenawe, piya tabe kutantaga kanaꞌmi Koti kabiratena kumati ikenaenaba pipa to awameta, tabe kuntaenawe, Isu piya untiye. 
<p><sup>26</sup> Piya yogini abume kinaꞌmiba maya untawe: We, pipa kepaya Kotiba auꞌima aba pikiye untawe. 
<p><sup>27</sup> Piya yuguna Isu maya uwaimintiye: Wasana piya pikenaba kampaye. Koti kaꞌwaina piya pikenaenaba waintiye, piye untiye. 
<p><sup>28</sup> Piya yogana Pita maya omintiye: Abo. Taeba waꞌerepe aꞌyaꞌwaemaenarepe kasima takabitate kaegaraune, untiye. 
<p><sup>29</sup> Piya yogana, Isu aꞌyaꞌma kinapa maya uwaimintiye: Naeba taga urimekiri abiyo. Aꞌyaꞌma kina Koti kabiratakenaenaga aegaꞌmagini, pika waꞌewaipe, waya yagarawaipe, igagabagipe, ino ibagipe, uma itakibeꞌnagiba 
<p><sup>30</sup> igeba piꞌnakaba mamparasaenaba agasimagina antotapa mesuba puma Kotiba imikiye. Piya, aintiba mantarisa aogi eꞌwasaena asu maekiye, Isu piya untiye. Purintapisa asima mikena kamana kakagara uwaimintiye 
<p><sup>31</sup> Pigoya, Isu aeba nagisarisa tara tumpaema kinaꞌwa igegaꞌe uma ibabute wama maya uwaimintiye: Abiyo. Taeba iba Yerusaremi kumati ikune. Iyekana aꞌyaꞌwaema kamana pai poropete kinaꞌmi Wasanama Ntagara naeka uma mono isapi kaemaranta, pi kamanaꞌama nkauꞌwapa aborakiye. 
<p><sup>32</sup> Nabanempaba namuꞌisa kinaꞌmiti unatakini, naeguma ata punatama, karana natama, kaisa punatakibewe. 
<p><sup>33</sup> Piya pumagini kasotasa naeguma naiburikibewe. Piya piginaba papa kakaga yaga aꞌya peka, purintapisa to kake naogama asikuwe, piya untiye. 
<p><sup>34</sup> Aiyogini abagi kina igeba pi kamana kampa abintawe. Kana kamanaꞌama nkagobe kakawaogini igeba aogimaba pi yome kamanapa kampa napintawe. Isu aorika yagara aogatantiye 
<p><sup>35</sup> Pigoya Isu aeba Yeriko kuma agora waogana, ke awamori aorika yagara ka mima aꞌyaꞌma kina wagana pugunaba mone kutaka esuwaitama mintantiye. 
<p><sup>36</sup> Piya, aeba abomepa uwoma kina kanagana puguna, aeba kaꞌisa kina ibigama: Maepa nana pewe, untiye. 
<p><sup>37</sup> Piya yogini igeba maya omintawe: Isu aeba Nasaretirisa yagara tagora kanama nasiyema, omintawe. 
<p><sup>38</sup> Piya omuguna aeba tabera kegaꞌe uma maya untiye: Isu, kaeba Tebiti nkagaꞌnu, kaeba naeka kantara punatao, untiye. 
<p><sup>39</sup> Piya yogini paitanta kinaꞌmiba: Paka po, uma kabiraugunaba, aeba ige kamana kampa abinta ebi ebima kegaꞌe uma: Kaeba Tebiti nkagaꞌnu, naeka kantara punatao, untiye. 
<p><sup>40</sup> Piya yogana Isuba abite, keta asima mintana: Tigeba naeti ababute kanaiyo, untiye. Yogini aorika yagara aeti ampa aboragana, Isu mayama abigantiye: 
<p><sup>41</sup> Naeba nana pugatasanaga kabiyema, abigantiye. Abigaogana, pigo aorika yagarama: Waꞌega, naeba nao agasanaga nabiye, untiye. 
<p><sup>42</sup> Piya yogana Isu maya omintiye: Kaoba agano. Kamatitiꞌenagampa aogi pugataye, omintiye. 
<p><sup>43</sup> Piya omogana aowamaba aogi pogana agate Isu aegarantana Koti aꞌmu potaogini, aꞌyaꞌma kinaꞌmiba pintana agategini pabiyama Kotiti iꞌmu potantawe.<p/>
<h4>19</h4>
<p><sup>1</sup> Pigoya, Isu aeba wama Yeriko kumati wama agaikena puntiye. 
<p><sup>2</sup> Pigoya, pi kumata ka yagara mintantiye. Agewapa Sakiyasi, aeba takisi maeyume kinaꞌmi paitakena yagara, piya tabe mone kutantaga yagara mintantiye. 
<p><sup>3</sup> Pigoya, pi ntagara aeba Isu agakenagaba abugantiye. Piya aeba arogu yagaragana wasanami ainigasuguna Isupa kampa agantiye. 
<p><sup>4</sup> Aibuntana, karuꞌena wasana igaite wamagina yabinti asu mima: Isuba ma kiꞌi atawaka agakuwema, napintiye. 
<p><sup>5</sup> Piya pogana, Isu aeba pitaꞌi wantana, aomaraogana iyogana agate maya omintiye: Sakiyasi, kaeba karuꞌena tumo. Naeba ibantoba namakapi ampikuwe, untiye. 
<p><sup>6</sup> Piya yogana, karuꞌena tumima aꞌmu purite Isu aba poginisi namankapinti wantase. 
<p><sup>7</sup> Piya pusuguni aꞌyaꞌma kinaꞌmiba agate ka abiꞌma mare-u me-u puma maya untawe: Aeba nanagabaya agunta yagarama ntamapintiba uma pasiye, untawe. 
<p><sup>8</sup> Piyoga, Sakiyasiba asima mintana tabe yagara maya omintiye: We Waꞌega abo, kaꞌisa mone kotantepa pako puma kusi kina imukuwe. Piya, kaꞌisa kinaꞌmi mpone iparinto pi aisarapa to tarawa tarawaki kanabi mesuba puma imukuwe, untiye. 
<p><sup>9</sup> Piya yogana Isu maya omintiye: Ma ntagaraba Abaraꞌamu nkagaꞌnuwe. Pika iba ae namapi Koti aogi potakenaena ago aboragina aogi piye. 
<p><sup>10</sup> Pigoya, Wasanama Ntagara naeba atama kaka wanto kina iguyosagaꞌma ibabuma aogi puwaitakena tumintone, untiye. Monera kabinta kinaꞌmi mpeto kamanane 
<p><sup>11</sup> Pigoya, Isu aeba Yerusaremi kuma agora ampa irosaogini, kamanaꞌwa abinta kinaꞌmi igeba: Ibanto Koti kabiratakenagana aborakiyema, napintawe. Piyama napiyuguna, pika Isu meto kamana ka maya uwaimintiye: 
<p><sup>12</sup> Ka kiye yagarama to ka tabe yagaramati wama: Ma kiye asinataka aꞌwae puma kanakuwe, ute pagaso mari wantiye. 
<p><sup>13</sup> Wakena puntana, kayokaya kinaꞌwa nayataraꞌmu igegaꞌe uma mone asa ka ka puma imima maya uwaimintiye: Tigeba ma moneba maema yoga pugaka pigi, naeba aintiba aꞌwae puma kanano, uwaimintiye. 
<p><sup>14</sup> Piya uwaimite waogini, waꞌewatisa kinaꞌmiba aekaba iyekita potamagini wasana apa igarubauguni ainti wama tabe yagara mayama omintawe: Kaeba ma kiyerepa kampa miyenema napiyunema, omintawe. 
<p><sup>15</sup> Piya yuguniba, eꞌero mparisa yagara kampa abitegina, kana yagaraba kiyaena asitantiye. Aibuguna, kana kiye yagara aꞌwae puma kanama otategina, kayokaya kinaꞌwa mone iminti, igeka ampa igegaꞌe uma maya untiye: Mone timintopa ago yoga pegana tabe pibera kampayema, ibigantiye. 
<p><sup>16</sup> Piyama ibigaogana, kayokaya yagara kaꞌwaina aeti kanama maya untiye: We naba-o, mone asaba ka namintampetasa yoga pogana to nayataraꞌmu asa aborama waintiye. 
<p><sup>17</sup> Piya yogana aeba maya omintiye: Kanarane. Kaeba aogi kayokaya yagaragawe. Kaeba uwaenarapa aogima kabiyempeka ibanto naeba nayataraꞌmu kuma kiye ugatakana kabikibene, omintiye. 
<p><sup>18</sup> Pigoya, piya yogana kayokaya yagara to kaꞌwaina kanama maya omintiye: We naba-o, kaeba ka asa namintampetasaba yoga pogana to nayakaꞌmu mone aborama waintiye, untiye. 
<p><sup>19</sup> Piya yogana aeba maya omintiye: Kanarana, nayakaꞌmu kumatasa kinaꞌmi kiye mikibene, omintiye. 
<p><sup>20</sup> Pigoya kayokaya yagara to kaꞌwaina kanama maya untiye: Naba-o, mone asagapa maye, maeyo. Naeba kairasa asaema pasema ataogana waintiye. 
<p><sup>21</sup> Piyama, naeba kagaopa kaeba kamo yagaraga kana kaꞌisa kinaꞌmi atantanaba kaeba uwa maeyane. To kinaꞌmi ntugabisaba pipa uwa kubene. Piya pempeka naeba kaeka naekuru pumagi uwa atantogana waintiye, piya omintiye. 
<p><sup>22</sup> Piya omogana kiya yagarama maya untiye: Kaeba ata kayokaya yagarawe. Pi kaeka kamanakata koti pugatakuwe. Piya, kaeba taga ago abene, naeba namo yagaranaga, naenepa yoga pumaba kampa maeyoka, kaꞌisa kinaꞌmi puma abora maraga maekena kaga yuwe. Piya naenepa yoga kampa punta uwa miyogini kaꞌisa pegana ano nkaboragi nakena kaga yuwe. 
<p><sup>23</sup> Kaeba aya pemika monenepa pisinisi kinapa kampa imekini yoga puma aꞌmu mponenepa maenataga ampa maeyuwo, untiye. 
<p><sup>24</sup> Piya umagina, agorasa kinapa maya uwaimintiye: Tigeba mone asaba apama nayataraꞌmu urinti ntagara amiyo, untiye. 
<p><sup>25</sup> Piya yogini igeba: We naba-o, aeba nayataraꞌmu asa ago urintiye, untawe. 
<p><sup>26</sup> Pigoya naeba aꞌyaꞌma kinaka urimekiri abiyo: Wasanama urintantana aogima maema mintigipa, to kake maekibewe. Piya, kaꞌisa kampa aogima maema mintigipa, ipaꞌma kaikiye. 
<p><sup>27</sup> Pigoya kama kinaꞌnempiba kiyarepa ampiyoma unata kinapa ibabute kanama naora iyeguyigini puꞌwae waiyo, untiye, Isu meto kamana piya untiye. Isu yaga akabata Yerusaremi kumati intiye 
<p><sup>28</sup> Pigoya, Isu aeba pi kamanapa uma aꞌya potate, Yerusaremi kumati irosakena wantiye. 
<p><sup>29</sup> Wama Oribesi amupa amentapinti wama Petipaesi kumake Petani kumake agora wantana, tara abagi yagararamisi uwaisitaoginisi paitama wantase. 
<p><sup>30</sup> Aeba mayama uwaisimoginisi wantase: Wamagirisi maro kumati wama, tonki aikeri wasanami kampa mima nasi nasi aogaso aikeri uma abatama, iyobaꞌurite kanaiso. 
<p><sup>31</sup> Iyobaisigina wasana kaꞌwaina kamana uma: Nana pikena iyobase yekirisiba, maya omiso: Waꞌega yogawa waintegina yegira ampa ababuse yiso, uwaisimintiye. 
<p><sup>32</sup> Piya yoginisi kayokaya yagara tara isigeba wama yomesa puntase. 
<p><sup>33</sup> Pigoya, pi tonki yaga aikeri uma iyobausuguni, kana yagama nkababa: Nana pikena iyobase, untawe. 
<p><sup>34</sup> Piya yugunisi isigeba: Waꞌega yagarama yogawa waintegina yegira ababuse, untase. 
<p><sup>35</sup> Piya uteginisi ababurite Isuti wama, akabatiba kaiwaipa atama ama agutama Isu ababuma mayotauguna mima wantiye. 
<p><sup>36</sup> Piya pogini, aꞌyaꞌma kinaꞌmiba kaiwaipa akubuma keꞌi ama agurite wauguna piꞌna nkabobori wantiye. 
<p><sup>37</sup> Aeba wamagina Oribesi amu ararabira kanama keꞌi waogini, aꞌyaꞌma aokinaꞌmiba iꞌmu puma, aꞌyaꞌwaemaena aogiyena pogini agaumeka Koti tabera uma iꞌmu potantawe. 
<p><sup>38</sup> Piya tabera uma maya untawe:<p/>We, Waꞌegare Koti nkawamuta taeti kanaika, aeka taꞌmu potano.<p/>Mantari anta paruyena waiyekana, inatisa kumati asagayukenaena waiyeno, untawe. 
<p><sup>39</sup> Piya uma iꞌmu puguni, Parasi kina kaꞌisa igeba wasana abakapinti mintanta kinaꞌmiba maya omintawe: Tisa, kaeba kabagi kina uwaimegini kamanapa pakama miyiyo, untawe. 
<p><sup>40</sup> Piya yuguna ige kamana antota maya uwaimintiye: Naeba urimekiri abiyo. Igeba paka puma miyesinta, yabankamaba kamanapa piyama tabera yesine, Isu piya untiye. Isu aeba Yerusaremi kinaka kubeꞌena puntiye 
<p><sup>41</sup> Pigoya, Isu aeba Yerusaremi kuma agora irosaꞌma agate pi kinaka antara puma kubeꞌena puntana 
<p><sup>42</sup> maya untiye: Tigeba ma kanabipa asoyama mikena kiꞌamapa aogima agasanawe. Tigeba pipa tiyorikatagiri aꞌyaꞌwaemaenaba kampa aogima agawo. 
<p><sup>43</sup> Pigoya tigeba abiyo. Aintiba kanaka aꞌya pekini, kama kinaꞌmi irosaꞌma minaena puma ke akukasigiri igiga pikibewe. 
<p><sup>44</sup> Piya pigina, nama kumatipe aꞌyaꞌwaemaenaripe, tigege yagararipe iyeguma karana titama aguya aema ataena puritaigiri Koti kanama tiyoꞌmaentintanagaba kampa napiyigini ata puritakibewe, Isu piya untiye. Tabe mono namapi ikantana puguna Isu igarubantiye 
<p><sup>45</sup> Pigoya, Isu aeba wama tabe mono namapinti iyomepa, kota ikantana puma mintuguna igarubaꞌmagina, 
<p><sup>46</sup> maya uwaimintiye: Mono isaꞌama maya iye: Mono namantepa nunamu ukena namantana peno, iye. We, tigeba piya pegana kuntana pe kinaꞌmi ntamantana piye, uma igarubantiye. 
<p><sup>47</sup> Pigoya, pi ntagaba tabe mono namapi asi nasima mono kamana uwaimima mintantiye. Piya pogini, tabe mono kiye kinaꞌmibe, mono tisa kinaꞌmibe, to kaꞌisa kiye kinaꞌmibe, igeba Isu aeguyigina purikibi kamana untawe. 
<p><sup>48</sup> Aiyuguna, kamanaꞌwa yogini aꞌyaꞌma uwa kinaꞌmiba abima aeka tabera ibuntika, aegukena kipa kapa kampa aborantawe.<p/>
<h4>20</h4>
<p><sup>1</sup> Pigoya, ka yaga Isu tabe mono namapi ima wasana aogi mono kamana uwaimima mintogini, tabe mono kiye kinape mono tisa kinape kabiyume kinape aeti kanama, 
<p><sup>2</sup> mayama abigantiye: Kaeba uramo. Mataꞌi aꞌyaꞌwaemaena pempepa, ke ugamegina esegiyenaba pene. Kebaya: Piya poma, ugatagina penema, abigantawe. 
<p><sup>3</sup> Piyama abigauguna maya uwaimintiye: Naegeba natantigi, ka kamana tibigakiri unamiyo: 
<p><sup>4</sup> Yoni mono wanipa mantarisaenabera wasanamintanawema, ibigantiye. 
<p><sup>5</sup> Piyama ibigaogini, igeba: Ayawe ukune, untini: Mantarisaenawe yekanaba, aeba nana piyema kamanaꞌwapa kampa abima napiyewe, ikiye. 
<p><sup>6</sup> Piya: Wasanamintanawe yekiniba, aꞌyaꞌma kinaꞌmiba igeba Yonikaba ka taga poropete yagarawema napintaka, yaba kasutasa taegukibewema, napintawe. 
<p><sup>7</sup> Aibumagini igeba maya kamana antotapa omintawe: Taeba kampa abintune. Yoni mono wanipa aetasabaya aborantiye, untawe. 
<p><sup>8</sup> Piya yuguna Isu maya uwaimintiye: Piya, naegeba antotapa kampa urimukuwe. Kenkawamutasa kamanapaya unamegi esegiyenaba puweba kampa urimukuwe, Isu piya untiye. Waini yugara kabinta kinaꞌmi meto kamanane 
<p><sup>9</sup> Pigoya, Isu wa waya meto kamana ka maya uwaimintiye: Ka yagarama waini igaꞌna kurintiye. Kuꞌatate kana yuga wasanamiba: Kiye kabiyiyo, otate eꞌero mpari wama eꞌero kanabi umintantiye. 
<p><sup>10</sup> Pigoya, kana waini agutaogana asikikena kana aboraogana, kayokaya yagara: Kaꞌisa asigi kamigina maete kanaoma, otantiye. Otaogana uma irosaogini, pi waini yuga kiye kinaꞌmiba aeguma agarubauguna, kana yogarisaena kampa maenta auka aꞌwae puma kanantiye. 
<p><sup>11</sup> Piya pogana, yoga ababa to ka kayokaya yagara otaugana waogini, pabiyama pi kinaꞌmi aeguma ata potama agarubauguna, kana yogarisaena pabiyama kampa maenta uwa auka kanantiye. 
<p><sup>12</sup> Pigoya, to kakagara ka kayokaya yagarawa otaogana waogini, tabera aeguma awamori maebugaintawe. 
<p><sup>13</sup> Piya puguna, kana waini yogawama nkababa abite maya untiye: Aya pusuwe, otantana: Piya ago napiyuwe, untiye. Ma nabugai ntagarane otakana wakiniba agama agoya potama awamu wasikibewema, napintiye. 
<p><sup>14</sup> Piyama napimagina otaogana waogini agate, kana yoga kiye kinaꞌmi aegukena naga nikintini maya untawe: Ae ma ntuga maesanaga aegugasakana puꞌwaka, ma ntugaba taeꞌenaena puwakiye, untawe. 
<p><sup>15</sup> Piya ute apasanaꞌurite kabubinti wama kana waini yuga awamori aeguma kaitantawe, untiye. Isu aeba piya untana pi kamanaka wasana mayama ibigantiye: Yoga agowamaba pi kiye kinapa aya puwaitakiye, a. 
<p><sup>16</sup> Abewo, aeba kanamaba piya kiye kinapa iyegugasima, yogawatapa aogi kiye kina ibabuma itakiye, piya untiye. Piya yogini, igeba: We, igeba kampa piya pikibewe, untawe. 
<p><sup>17</sup> Piya yuguna, Isuba igabebe puma maya untiye: Mono isapisa kamana kapa mayama waintiya, agowapa ayamawe, untiye:<p/>Nama kikena kinaꞌmiba ka ya ago kainta yawama iba waꞌega ya asima waintiye, untiye. 
<p><sup>18</sup> To ka mayama amato puma untiye:<p/>Piya, wasana kaꞌwaina pi waꞌega yara aeguma au airisa puma aikiye, iye.<p/>Piya, kana waꞌega yaba abobora takuma tumima aeguma ata puwaikiyema, untiye, Isu untiye. 
<p><sup>19</sup> Piya yogini, mono tisa kinaꞌmibe tabe mono kiye kinaꞌmibe, meto kawanaꞌwapa igeka yomepa abibebe puguna intawamaba ata pogini, pabi ntaga arakurikena pumepa aꞌyaꞌma kinaka iyogaru puma atantawe. Takisi monega Isu abigantawe 
<p><sup>20</sup> Pigoya, Isu kamana abite imoꞌena purite, pi mono kiye kinaꞌmiba Isuka kabintawe. Piya, pi kinaꞌmiba kampari otakena kina uwaitauguni wamagini, iyogaꞌwapa mono iga pumagini kabima mintuguna, awamupisa ka ata kamana aborakiniba abite arakurikena puma kamana abikena kinaꞌmi nkiyapi ataigina kamana otaiyema, untawe. 
<p><sup>21</sup> Pigoya, igeba ampa Isu mayama abigantawe: Tisa, kamanakampaba aogima parutu pegi abune. Kaeba aꞌyaꞌma kinapa aogi kamana uwaimene. Piya, tabe igi wainta kinaꞌmikaba kaekuruba kampa pempekana, taga Kotitisa aogi kamanapa uwaimene. 
<p><sup>22</sup> Piya, kaeba ayama napiye ne: Mono kinaꞌmite taeba Aroma waꞌega yagara Sisa takisi mone amusupera kampaye, untawe. 
<p><sup>23</sup> Piya yuguna, Isuba pi meto kamanaꞌwaipa ago abite maya uwaimintiye: 
<p><sup>24</sup> Mone ka nayakiyo. Amankape awaꞌenabe mapa kewema, ibigaogini igeba: Sisantawe, untawe. 
<p><sup>25</sup> Piya yuguna aeba maya uwaimintiye: Pigo yewa, Sisantanaba Sisa amiyo. Piya, Kotintanaba Koti amiyo, untiye. 
<p><sup>26</sup> Piya yogini, wa wayaꞌmi nkiyobipa kamanaꞌwatakaba kampa arakurinta uwa pami ntami puma asabaꞌwantawe. Purintapisa asikenaenaga Isu abigantawe 
<p><sup>27</sup> Pigoya, kaꞌisa Sarusi kinaꞌmi Isuti kanantawe. Pi kina igeba: Purintapisa asikenaenaba kampa waintiye, uma miyume kinakini, 
<p><sup>28</sup> igeba Isuti irosaꞌma kamana mayama abigantawe: Tisa, Moseseba kamana awaꞌena taeka mayama ka kaentiye: Wasana kaꞌwaina waya maema yagarawa kampa aboratanta puꞌwakanaba, to aꞌnanto kiya maetama aganto antotapa yagara aborano, iye. 
<p><sup>29</sup> Pigoya, ka meto kamana ugamukune. Piya, tonaentisa tara umaema agaꞌna mintantawe. Ige iganto waya maema yagara kampa aboranta, mima puꞌwantiye. 
<p><sup>30</sup> Puꞌwaogana, ka aꞌnanto kiyawapa pabiyama maetate uwa puꞌwantiye. 
<p><sup>31</sup> Puꞌwaogana, to aꞌnanto kaꞌwaina pi kiyawapa pabiyama maetate puꞌwantiye. Pigoya, pi nkagaꞌna aꞌyaꞌma tonaentisa tara umaema kinaꞌmi pabi ka wae maeta kanamagini, yagara kampa aboratanta puꞌwaewantawe. 
<p><sup>32</sup> Aitiba pi kiya waeꞌwaipa pabiyama puꞌwantiye. 
<p><sup>33</sup> Pigoya, igeba aꞌyaꞌmagini pabi ka waeꞌamana maentawe. Piya ainti asikena kanabipa ke nkwaeꞌena pikiyema, abigantawe. 
<p><sup>34</sup> Piya yuguna Isu maya uwaimintiye: Ma kanara mampabi wa wayapa maema miyewe. 
<p><sup>35</sup> Piya, ainti tabe kanabipa asikena kana aborakibipa, Koti kegaꞌe yekini aborakibi kinaꞌmiba wa wayapa kampa maekibewe. Kampaye. 
<p><sup>36</sup> Igeba enisore kina miyesa puma mimagini, to kake kampa purikibewe. Piya, Kotiba irubintisa ibage pekini ae araga yagaraena puma mikibewe. 
<p><sup>37</sup> Pigoya, paipa Mosese irubisa asima mikena kamana untiye. Aeba yabi yaku nkabusa aboranti, pi kamana kaentana Koti nkageba mayama kaentiye: Naeba Abaraꞌamu, Aisaki, Yekobu ige Koti mintuwe, untiyema, kaentiye. 
<p><sup>38</sup> Piya, puꞌwantatisa iyogama asikibewema, Mosese aeba pika napima Koti nkageba piyama kaentiye. Piya, Kotiba puꞌwanta kinaꞌnane. Aeba iyoganta kinaꞌmi Koti mintegini, esegiyenarasa iyoganta kina uwa miyewe, Isu piya untiye. 
<p><sup>39</sup> Piya uwaimogana, mono tisa kiye kina kaꞌisami pi kamana antota maya untawe: Tisa, kaeba aogi kamana yene, untini, 
<p><sup>40</sup> igeba to kake abigakenaba iyekuru puma atantawe. Isu Parasi kinapa Karaisiti yagaraga ibigantiye 
<p><sup>41</sup> Pigoya, Isu maya uwaimintiye: Nana piyema Karaisitikaba aeba Tebiti nkagaꞌnuweba yewe. 
<p><sup>42</sup> Piya, mono isapi Samu isapipa Tebiti aewapa mayama kaentiye:<p/>Inatisa Tabe Yagaramaba Waꞌega yagaranepa: Kaeba nayatakanti miyo omintiye, iye.<p/> 
<p><sup>43</sup> Piya, aintiba kama kinakapa uwaitakini kae kagisa amentapinti wama mikibewe, omintiyema, piyama Tebiti kaemarantiye. 
<p><sup>44</sup> Pigoya, Tebiti aewapa Waꞌeganene otantiye. Aeba aya piyema agaꞌuwakaba: Waꞌeganeneba, untiyemagina Isu ibigantiye. Mono tisa kina igeꞌma kamana Isu untiye 
<p><sup>45</sup> Pigoya, aꞌyaꞌma wabe wayape mima Isu kamana abima mintuguna, abagi kinaꞌwa maya uwaimintiye: 
<p><sup>46</sup> Tigeba mono tisa kina miyesa nkawametapa a-mpima, uwa aogima miyiyo. Igeba eꞌero kai amirite keꞌi paebuta nasigini, wasana akiyenabinti wama wa waya igama iꞌmu puwaitasanaga iguꞌamaba tabera waiye. Piya puntini mono namapipe taenabikenabipe tabe kinaꞌmi ntabae maema paitama mikenaga yewe. 
<p><sup>47</sup> Piya untini igeba kiya waeꞌmi namankaipe kotankaipe uwa paibuntini, kampari nunamuba eꞌerota yewe. Pigoya, pi kinaꞌmipa aintiba Kotiba antotaꞌenaba tabera ka ibiꞌma kuntaenaba imikiye, Isu piya untiye.<p/>
<h4>21</h4>
<p><sup>1</sup> Pigoya, Isu aeba tabe mono namapi ampima agaomepa mone kutantaga kinaꞌmiba Kotika iꞌmu mpone kankabebi atauguna, agantiye. 
<p><sup>2</sup> Piya, yaba kampa wainta abeya wae kaꞌwaina irosaꞌma tete monento tara kankabebi atantiye. 
<p><sup>3</sup> Piya pogana Isuba agate maya uwaimintiye: Naeba taga urimekiri abiyo, ma nkabeya kusi waeꞌmaba kaꞌisa kinaꞌmipa igasima moneba ataye. 
<p><sup>4</sup> Kaꞌisa kinaꞌmiba uwoma mponewai waintegini Kotika iꞌmu moneba atagana, ma kusi abeya wae aeba monewapa naninta ika puma nakena kampa atanta, aꞌyaꞌma kasiwaegaite uwarakaꞌya mintiye, Isu piya untiye. Mampabisaena aꞌya wakena kamanane 
<p><sup>5</sup> Pigoya, kaꞌisa kinaꞌmiba tabe mono namankamaka maya untawe: Mono awaꞌenaba aogiyena potama tauka pugaye, untawe. Piya yuguna, pika Isu maya untiye: 
<p><sup>6</sup> Nama agama, tiꞌmu pentana aintiba kampa waikiye. Ka kana aborakiniba kama kinaꞌmi irosaꞌma nama kumatipa akasagasuba kasaigina ka yabankamaba to ka yabankama nkabobora wareꞌnaigina nama tubo aborama waikiye, untiye. 
<p><sup>7</sup> Piya yogini, igeba mayama abigantawe: Tisa pintanaba ayantaga aborakiye. Nana kukantana aboraka agapa kana arosakena piyeba, ukune, untawe. 
<p><sup>8</sup> Piya yuguna Isu maya uwaimintiye, tigeba tiguꞌama aꞌyugu purigaisanaga aogima kiya kabima miyiyo. Wasana uwoma aborama nae nage uma naeba Karaisiti nawe, yigini, to kaꞌisamiba kanapa ago arosawaye, ukibewe. Pigoya tigeba piya ukibe kinaꞌmipa a-nkiyegaraiyo. 
<p><sup>9</sup> Piya, aintiba maꞌena puma esiba kamana abintiripa, a-pami puma tiyekuruba a-piyo. Pintanaba paitama aborawakana, aintisa kanaba agaropa kampa aborama ainti aborakiye, Isu piya untiye. 
<p><sup>10</sup> Piya untana Isu to maya uwaimintiye: Maga maga kinaꞌmiba kamaena pigini to kaꞌisa kinaꞌmiba to ka marisa kina uma iyeguyigini kamaena purite wagana pikibewe. 
<p><sup>11</sup> Pigoya, imimapa tabera pekana, kaꞌisa aukaꞌi tabe kabu aborakana, yonintana tabera aboraurite wagana kana pikiye. Piya, mantariba ku kantanaba toma toma aborakiri agate tiyekuru puma tabaraba pikibewe. 
<p><sup>12</sup> Pi aꞌyaꞌwaemaenaba kampa aborantakini, igeba tirakuꞌma karana titama ataena puritama, mono namapipe igaꞌna namapipe tibabuma kamana uritama ata puritakibewe. Pigoya nae nage uma ata punatamagini kiya kinake kamana abikena kinake ige iyobi tibaburite wama kamana uritakibewe. 
<p><sup>13</sup> Pigoya piya pigiri, pi ntaga aogi kamanaꞌnepa uwaimikibewe. 
<p><sup>14</sup> Pigoya ibaba aogima abiyo: Pi ntagaba tigeba ige iyobi uma asimaba: Ayama kamana antota ukunemaba, a-ntapiyiyo. 
<p><sup>15</sup> Naene tigu timabi tiwamupi kamanaꞌnepa atakana aogi napi napiyenabe aborarimekiri ukibewe. Aibigini kama kinatimpiba kamanatipa kampa aeguma akaꞌyukibewe, untiye. 
<p><sup>16</sup> Pigoya, pabi ntaga tino tibakibe, tiganto tiꞌnanto, kaꞌkura tiyoꞌmibe kama puritama, iyekita puritama, ataena puritama, tige aruyenabisa kaꞌisaba tiyegukibewe. 
<p><sup>17</sup> Pigoya, aꞌyaꞌma kinaꞌmiba abima intabipa nae nageraka ata puma kama puritakibewe. 
<p><sup>18</sup> Pigoya, tiꞌno nkabiyapa kaꞌantoba kampa kaka wakiye. 
<p><sup>19</sup> Piya, tigeba esegima mima tigu timapa to kake maekibewe, Isu piya untiye. Yerusaremi kuma ainti ataena pikibi kamanane 
<p><sup>20</sup> Pigoya, aintiba tigeba agakibepa irebu kina kanama Yerusaremi kuma kobe pigiripa agamagiripa: Kuma aiꞌnere aguya aikena kana agarosaye, yiyo. 
<p><sup>21</sup> Pigoya Yutiya mari mikibe kinaꞌmiba tiyegaka wama amu mari iyiyo. Piya Yerusaremi kumati mikibe kinaꞌmiba pabiyama karuꞌena paiꞌma wakibewe. Piya uwaena kumati kampa wakibewe. 
<p><sup>22</sup> Pigoya pi ataga Koti wasana aꞌyikiki pemi ntaga aborakiniba, mono kamanapa untaꞌenamaba esegi puma aborawaekiye. 
<p><sup>23</sup> We, igaꞌentaga waeꞌmibe yagaranto nono aꞌmikibe waeꞌmibe kamparagama mikibewe. Mampara mikibe kinaꞌmiti kuntaena aborakanaba, Koti agobintanaba mampara aꞌyaꞌma mikibe kinaꞌmipa pabiyama aborawaimikiye. 
<p><sup>24</sup> Piya, kasotasa irisakibewe. Aibumagini, igaꞌna ubuꞌurite wama uwoma to kinaꞌmi nkibakapi metaigini kayokayaꞌena puwaitama mikibewe. Piya, namuꞌisa kinaꞌmiba Yerusaremi kumapa aguya aima mima ataena puyabaꞌmiyigina, ainti namuꞌisa kinaꞌmi igeꞌwaipa aꞌya puwaitakiye, Isu piya untiye. Wasanama Ntagara aborakena kamanane 
<p><sup>25</sup> Pigoya, pi ntagaba pape, ope, noribe awameꞌenawa tonarona aborakiye. Piya mabipa kayo waninkama aigaꞌyoꞌya puma tapo uma agayemisa pekini, aꞌyaꞌma mampabisa kinaꞌmiba karu puma iyekuru pikibewe. 
<p><sup>26</sup> Pigoya, pi ntagaba mantaba kuru pekana esegiyenawapa iyobaꞌma kareko pigini, mara aꞌyaꞌma kinaꞌmiba uwoma nkigi napikibewe. Eya, kaꞌena mabi aborakenaenaga napima karu puma iyekuru pigina iyonantaꞌena pikiye. 
<p><sup>27</sup> Pintana aborakapa, Wasanama Ntagara naeba ibinankama nkagupinti tabe esegiyenanentaga eꞌwasaenanentaga aborakini nagakibewe. 
<p><sup>28</sup> Piya, ainti pintana agobima aborakiri, asimagiri tiyowa aisesama agate: Koti tababikena kana agarosaye, yiyo. 
<p><sup>29</sup> Pigoya piya untana, Isu meto kamana ka amato puma maya uwaimintiye: Tigeba piki yage, to kaꞌisa yawamake agoga napiyiyo. 
<p><sup>30</sup> Piya, aꞌno mparagiri agantiripa: Kabo yagawe, yewe. 
<p><sup>31</sup> Piya yesa puma, pi yontana aborakiri agateba: Koti kabiratakena kana agarosaye, yiyo. 
<p><sup>32</sup> Naeba taga urimekiri abiyo: Mamparasa kinapa kampa purintigina pi yontanaba aꞌyaꞌma aborakiye. 
<p><sup>33</sup> Pigoya mage mantageba aꞌya wakana, kamanaꞌnepa waiyaba waima kampa kakakiye, Isu piya untiye. Abagi kinaꞌmiba aogima kabiyiyo, Isu untiye 
<p><sup>34</sup> Pigoya, Isu to maya untiye: Asi nasi esegi wani ntama aiboꞌena puma mampabisaenaga napi napi puma Kotika tigeguꞌa pusanaga, tigeba aogima napima kabima miyiyo. Aꞌyugu uwasuwa puma mintigina aborasanaga kabima miyiyo. 
<p><sup>35</sup> Piya, mampabisa kina aꞌyaꞌma kinati pintanaba aborakiye. 
<p><sup>36</sup> Piya, asi nasi aogima kabima miyiyo. Asi nasi Koti esotaigina esegiyenaba timeno. Piya pigina, pi aꞌyaꞌma ataenamaba uwa tigasakiri, Wasanama Ntagaramante naobi aogima asikibewe, Isu piye untiye. 
<p><sup>37</sup> Pigoya Isu aeba aꞌyaꞌwaema yagaba tabe mono namapi mima aꞌyaꞌma kina Kotitisa aogi kamana uwaimima mintantiye. Pigoya, ase yoganaba Oribesi amuti ima waibutaye. 
<p><sup>38</sup> Piya pogini, abaya aseka aꞌyaꞌma wabe wayape irosaꞌma Isuti kanama tabe mono namapi ampima aetisa aogi kamana abi puntawe.<p/>
<h4>22</h4>
<p><sup>1</sup> Pigoya, yisiti kampa wainta pareti nakena yaga aborakina puntiye. Piya, nakenagana ataome ntagama nkagewapa Pasobawe. 
<p><sup>2</sup> Aborakena pogini tabe mono kiye kinake mono tisa kinake igeba aꞌyaꞌma kinaka iyekuru pumagini: Isu ayama aegukune, untawe. 
<p><sup>3</sup> Piya umagini mintuguna, Sataniba Isu abagi yagara ka agewapa Yutasi Isikeriyoti, aeba nagisarisa tara tumpaema kina ige arayenabisa yagara, ae antabi pasintiye. 
<p><sup>4</sup> Piyama pasogana, tabe mono kiye kinake mono irebu kinake igeti aruyenabi wama Isu minaga pekini arakurikibe kamana uwaimintiye. 
<p><sup>5</sup> Piya uwaimogini igeba abimagini iꞌmu pumagini, Isu nkaegukena kutaru mone amikena kamana uma aogi puntawe. 
<p><sup>6</sup> Piya yuguna kamanaꞌwai wasiyuꞌma, wasanamiba kampa agama abuguna kakama minaga pikena apasa puma mintantiye. Isu abagi kinaꞌwake Pasoba naninta nantawe 
<p><sup>7</sup> Pigoya, yisiti kampa wainta pareti nakena kana aborantiye. Pi ntaga sipisipi kaemagini Pasoba naninta nantawe. 
<p><sup>8</sup> Pigoya, pi ntaga Isu Pitake Yonike maya uma uwaisitantiye: Tisigeba wamagirisi, Pasoba naninta maema aiꞌaru pisigi uma nano, untiye. 
<p><sup>9</sup> Piya yoginisi isigeba: Ae ntamapi nanintaba maema aiꞌaru pususe, yusuguna, maya uwaisimintiye: 
<p><sup>10</sup> Abiso. Tisigeba waꞌeri ima wasana ka wani kankabe maete wakibi ntagara pabuma aegaꞌurite waꞌeri iyisigina, namapinti uma pasekirisiba pabi ntamapi tisigeba uma pasiso. 
<p><sup>11</sup> Piya, namapi ima pi namankama nkabapa mayama omiso: Tisa yagara kaeka maya iye: Ae mparunta nabagi kinaꞌmige taeba Pasoba nanintaba nakune, iye, omiso. 
<p><sup>12</sup> Piya omisigina nama mparupa inati tabe maru ka ama agumagina aogi pumaranta tisiyakekirisi, pitaꞌi maema asu aiꞌaru piso, uwaisimintiye. 
<p><sup>13</sup> Piya uwaisimoginisi, isigeba wama pi yomesa pumaginisi abatama Pasoba naninta maema aeꞌarubantase. Naninta nantini Isu aeꞌwa nkaraꞌena puwaiyakintiye 
<p><sup>14</sup> Pigoya nakena kana aboraogini, Isuge abagi kinaꞌwampige namapi ampima nantawe. 
<p><sup>15</sup> Piya nantini maya uwaimintiye: Naukikena kanaꞌnepa agarosagi, Pasoba naninta ma tigege nakenagaba tabera nabiye. 
<p><sup>16</sup> Naeba yekiri abiyo. Naeba Pasoba nanintaba to kake kampa nanta Koti kabiratakenaena aborakini piꞌna nkantota waikiye, untiye. 
<p><sup>17</sup> Piya umagina, aeba wani kankabe maema, Koti aꞌmu potama, maya uma imintiye: Tigeba maema marona mona puma naiyo. 
<p><sup>18</sup> Naeba yekiri abiyo: Waini wani to kake kampa nanta mintakana Koti kabiratakenaena aborakiye, piya untiye. 
<p><sup>19</sup> Pi kamana umagina pareti maema, aꞌmu potama, ako puma, maya uma imintiye: Mapa nauna, tigeka uma atauwe. (Naeka napima pipa nama miyiyo, untiye. 
<p><sup>20</sup> Pi naninta nauguna waini kankabe maema pabiyama imima untiye: Ma kankabebipa Kotiti aogaso atokaekena kurante waintiye.) 
<p><sup>21</sup> Piya, abewo. Nae minaga pikibiꞌnaba aeba naege ka yabaera mima naninta maema nama mintuse. 
<p><sup>22</sup> Wasanama Ntagara naeba wasanami nkiwamuta purikenaenaba kampa waintiye. Naeba Koti keꞌi namintemiti wakuwe. We, minaga punatakibiꞌnaba aeba antotapa atama mikiye, piya untiye. 
<p><sup>23</sup> Kamana piya yogini, abagi kinaꞌmi: Kebaya pikibe kina iyewa, marebiga mebiga puntawe. Abagi kinaꞌmi tabe yagaraba kebaya mikiye, untiye 
<p><sup>24</sup> Pigoya, abagi kina igeba: Taetisa kebaya tabe yagararepa mintiye, umagini maka untawe. 
<p><sup>25</sup> Piya puguna Isu maya uwaimintiye: Mabisa waꞌega kinaꞌmiba ige esegi puma uwa wasanaba aogima kabiwaitagini, uwa kinaꞌmiba iꞌmu puma kayokayaꞌena puwaitawe. 
<p><sup>26</sup> Pigoya, tigetiba piyaenaba a-nkaborano. Tigetisa tabe kinaꞌmiba uwa kina miyesa, pi nkawameta miyeno. Piya, tabe yagara aeba kayokaya kina miyesa, pabi awameta miyeno. 
<p><sup>27</sup> Pigoya tigeba napiyiyo. Aeꞌna asugaintaꞌenawe. Wasanami nakibepa maraꞌmima naninta nakibiꞌna asugaintaꞌenabera, kaoꞌena pikibiꞌna asugaintaꞌenawe. Uwa maraꞌmimagina nakibiꞌna pipa asugaintaꞌenawema, ago abintawe. Piya, naeba tige tibakapi kayokaya kina miyesa puma miyuwe. 
<p><sup>28</sup> Pigoya, kuntaenama nkagupi miyogiri kampa natate wanta naegaꞌma nasima miyewe. 
<p><sup>29</sup> Pipa nabanempa naepa kabikenaenama nkagowampa unatagi, naeba pabiyama tigepa paitakena kina uritauwe. 
<p><sup>30</sup> Piya, tigeba aintiba kabiritakena kumata naege naninta wani ntantiri tiꞌmu pikibewe. Pigoya, pi ntaga kiya puma mikena yabaera mima Isureyo kina ige nagisarisa tara tumpaema kinaꞌmi kamanata kabikibewe, Isu piya uwaimintiye. Pita auꞌnana kamana omintiye 
<p><sup>31</sup> Piya uwaimintana toba Pitapa maya omintiye: Saimoni, Saimoni, witi ao asari pegina iꞌnintanawapa paꞌwamisa puma, Sataniba tigepa maema timiyoꞌena puritakenaga Kotipa abigaoga, 
<p><sup>32</sup> pigo naeba kamatitiꞌenaga aꞌyugu pusanaga kaeka uma nunamu yuwe. Pika kaeba mono kita to kake aꞌwae puma aogi mimagina, kaokinapa iyoꞌmaema esegi puwaitao, omintiye. 
<p><sup>33</sup> Piya yogana Pita maya omintiye: Waꞌega, kaeba igaꞌna namapipera purikenaenaripera wagapa, kaegaꞌma wakuwe, untiye. 
<p><sup>34</sup> Piya yegana, Isu maya untiye: Pita, naeba ugamekana abo: Kokorewamaba iba asekapa kampa aga untakana, kaeba kakagara kampa agao ntagarawe unatagana aga ukiye, Isu piya untiye. 
<p><sup>35</sup> Piya untana, abagi kinaꞌwapa to ka maya uwaimintiye: Naeba monebe iraꞌna kutipe tigisanape kampa wainta urita wagiri, wama uma aguyosagantawoma, ibigantiye. Ibigaogini: Piyaba kampaye, untawe. 
<p><sup>36</sup> Piya yuguna, maya meto kamana amato puma untiye: Piya, ma kanabipa ibaba tigetisa kaꞌwaina aeba mone waintakanaba, maemagina miyeno. Piya, to kaꞌwaina aeba iraꞌna ku waintakanaba, arakae puma miyeno. Pigoya, kaꞌwaina aeba maꞌena kasupa aguyosagantanaba, kaiwa ka kasakana, ika puma piꞌnaba ka kaso mae ameno. 
<p><sup>37</sup> Naeba yekiri abiyo: Naeka meto kamana ka mayama pai kaemarantine: Aeba antage kinaꞌmi nkaruyenabi atakibewema, kaemarantiye. Pigoya pipa nae kamana untakana mampa aboraye, untiye. 
<p><sup>38</sup> Piya yegini abagi kina igeba maya omintawe: Waꞌega, agao, Mampa kasopa tara waintiyema, omuguna Isu: Pabigoye, otantiye. Isu Kesemani yugabi nunamu untiye 
<p><sup>39</sup> Pigoya, Isu aeba asi nasi kumapa atategina Oribesi amuti ibomekini, pi nkaseba abagi kina aepa aegaꞌma intawe. 
<p><sup>40</sup> Umibometi uma irosaꞌma abagi kina maya uwaimintiye: Tigeti timiyoꞌena aborakiri wareꞌnasanaga nunamu uma esegi piyo, piya untiye. 
<p><sup>41</sup> Piya utegina, arompari umimagina uma arakabima maya uma nunamu untiye: 
<p><sup>42</sup> Naba, kaeba ukenaba kanara yegana ma nauki nakiyenaba naparo. Piya, nae napiyenakaba kampaye. Kaeka ntapiyena uma esegi penemawe, piya untiye. 
<p><sup>43</sup> (Piya yegana mantabintisa enisore ka tumima tumpa esegi potantiye. 
<p><sup>44</sup> Piya, napiyenawapa to kunta puwaogana to kake esegima nunamu untiye. Piya pogana, tete aiseba paꞌuritegina tipe puma mabi tumintiye.) 
<p><sup>45</sup> Nunamu ugaite, asima abagi kinaꞌmiti wama igaomepa, igeba intaraꞌena puma iwaita mintantawe. 
<p><sup>46</sup> Iwaita mintuguna maya uwaimintiye: Tigeba nana piyema tiwaiba waitamintawe. We, tigeti timiyoꞌena aborakiri wareꞌnasanaga asima tiyogama mima nunamu iyiyo, Isu piya untiye. Isu arakurintawe 
<p><sup>47</sup> Piya umagina mintogini kama kina igeba kanantawe. Pigoya, nagisarisa tara tumpaema kina ige aruyenabisa ka yagara, agewapa Yutasi, aeba paitama ibabute Isuti wama uma amo nantiye. 
<p><sup>48</sup> Amo naogana Isu maya omintiye: Yutasi, kaeba nana piyema Wasanama Ntagara naepa namo nama minaga pene, untiye. 
<p><sup>49</sup> Pigoya, Isu nkaokina igeba pintana aborakena pogini agate, maya untawe: Waꞌega kaeba abega, kasotasa iyeguyeno, untawe. 
<p><sup>50</sup> Piya yuguna, igetisa kaꞌwaina monota paitanta kiye yagarama kayokaya yagara kasotasa aegumagina ageba ayatakantisa arisakaentiye. 
<p><sup>51</sup> Piya pogana Isu agate: Uwa miyiyo, untiye. Aibumagina, pi ntagarama nkagiba maemagina mayo atama asuꞌa potantiye. 
<p><sup>52</sup> Pigoya, mono namapisa tabe kiye kinape irebu kiye kinape kabiyume kinape, ae arakurikena kananta kina, igepa Isu maya uwaimintiye: Tigeba naeka abeganaba ku kina kanta pogiri, tigeba maꞌena pikena irebu kasutintaga kanama naegukena pewo. 
<p><sup>53</sup> We, naeba asi nasi tabe mono namapi mima mono urimone. Piya, pi ntagaba nana piyema kampa narakurintane. We, ibaba tige kanapa aboragina, tununtanama nkesegiyenaba aboraye, Isu piya untiye. Pita Isuka kampa agantuwe untiye 
<p><sup>54</sup> Pigoya, igeba Isu arakuꞌma ababute wama monota paitanta kiye yagarama ntamapi ababute intawe. Piya puguna, Pita aeba ainti ikaꞌi wantiye. 
<p><sup>55</sup> Pigoya, pi kama kinaꞌmi kagisa kagopi uma paiꞌma yaku kaima tapima mintantawe. Umintuguna Pita aeba pabiti wamagini ige ibakapi umintantiye. 
<p><sup>56</sup> Umintogana kayokaya araga kaꞌwaina kanama yaku nkabura agabebe puma maya untiye: Ma ntagaraba aege miyemi ntagarawe, yogana, 
<p><sup>57</sup> Pita awamu abarisaꞌma: Waya, naeba aepa kampa agantuwe, untiye. 
<p><sup>58</sup> Piya otate mintogana, kampagina eꞌero kanaba kampa mintogana, to kaꞌwaina agate maya untiye: Pi kaeba ige aruyenabisawe, yogana, Pita: Ma ntagara, naeba kampaye, untiye. 
<p><sup>59</sup> Pigoya ainti to kaꞌwaina irosaꞌma uma esegi puma maya untiye: We, ma ntagara taga aege mibemine. Aeba Karariya marisawe, yogana, 
<p><sup>60</sup> Pita maya untiye: Ma ntagara, kaeba kamana yempe kamanapa kampa abintuwe, untiye. Piya yogana kokore ka aga untiye: 
<p><sup>61</sup> Pigoya, Waꞌega aeba aꞌwae pumagina Pitati aomaraogana, Pita aeba Waꞌegama ominti kamana napintiye. Piya: Kokore aga kampa untakana, kaeba kakagara naeba aepa kampa agao ntagarawe ukibene ominti, 
<p><sup>62</sup> pi kamana napimagina antara purite abeꞌi irosaꞌma wama tabera kubeꞌena puntiye. Mono kanisore akiyenabi kamana otantawe 
<p><sup>63</sup> Pigoya, Isuta kiya kabima minta kina igeba pumireri potama aegumagini, 
<p><sup>64</sup> aowaba airari kaetama aeguntini: Kaeba poropete mintanapa ma kaeguyemi ntagarama nkagewapa yo, untawe. 
<p><sup>65</sup> Pigoya, igeba to pumireri puma uwoma ata kamana otantawe. 
<p><sup>66</sup> Piya puguna marogini, tabe mono kiye kinape mono tisa kinape to kaisa kabiyume kinape aꞌyaꞌma aki puma kamana otakena yuguni, Isu ige aruyenabi ababute wantawe. Piya puguni kamana mayama omintawe: 
<p><sup>67</sup> Kaeba Koti utaratanta yagara Karaisiti mintanapa, uma aboraramo, untawe. Piya yuguna aeba maya uwaimintiye: We naeba urimosinta tigu kampa namesine. 
<p><sup>68</sup> Piya, tibigakiripa antotapa kampa unamikibewe. 
<p><sup>69</sup> We, Wasanama Ntagara naeba ibasa yaga tabe esegi yagara Koti nkayatakanti mikuwe. Pi kanaꞌne ago aboraye, untiye. 
<p><sup>70</sup> Piya yogini, aꞌyaꞌma abite: Kaeba Koti Ntagaragawoma, abigantawe. Abigauguma: Tigeba ago yewe. Pipa naewe, untiye. 
<p><sup>71</sup> Piya yogini maya untawe: Nana piyema to kake kamana ukune. Aeꞌwa nkawamupisa pabigo yegi abune, untawe.<p/>
<h4>23</h4>
<p><sup>1</sup> Pigoya, aꞌyaꞌma pi kinaꞌmi Isu Pairatiti ababute wantawe. 
<p><sup>2</sup> Aeti wamagini agobima kamana maya uma otantawe: Ma ntagarama nkagoba mayama waintiye. Aeba aꞌyaꞌwaema mampabisa kinaꞌmite kamana akayaratama: Wasana waꞌega yagara Sisa aepa mone a-nkamiyo untana, aeꞌwakaba: Naeba Karaisiti, wasana waꞌega yagara nawe iye, piya untiye. 
<p><sup>3</sup> Piya yuguna Pairati: Kaeba Yuta kinaꞌmi Nkaꞌega yagaragawoma, abigaogana: Pi pabigo yene, Isu untiye. 
<p><sup>4</sup> Piya yogana, Pairati tabe mono kiye kinape to uwoma uwa kinape maya uwaimintiye: Naeba ma ntagarama nkaguntaenawakaba aguyosagaopa kampa agauwe, untiye. 
<p><sup>5</sup> Piya yogana igeba esegimagini maya untawe: Aeba waya wa esegi kamana uwaimegini igeba pami ntami puma mare-u me-u pegana, kana maꞌena kamanaꞌama mampabi tabe puma anosawaye. Aeba Karariya marisa agobima pintana purite mataꞌi aꞌyaꞌma Yutiya mari pabiyaena piye, piya otantawe. Isu to kake ababute Erotiti wama kamana otantawe 
<p><sup>6</sup> Pigoya piya yuguna Pairati abite: Ma ntagara aeba Karariya marisawoma, ibigantiye. 
<p><sup>7</sup> Piyama ibigaogini igeba owe yuguna: Pipa Eroti kabitemi mpawe, untiye. Piya umagini: Erotiti ababute waiyo, yogini ababute wantawe. Pigoya, Eroti aeba pi kanabipa Yerusaremi kumata aꞌyo umintantiye. 
<p><sup>8</sup> Piya ababute wauguna, Eroti aeba Isu agama antawamaba asoya puntiye. Aeba Isu nkawaga kamana abima eꞌero ntaga aepa agakenagaba abuma mintomekanawe. Pigoya, aeba maya untiye: Naeba yekana awameꞌena ka peka agakuwe, untiye. 
<p><sup>9</sup> Piya umagina Isupa to kamana to kamana abigaoganaba, antotapa kapa kampa aꞌwae puma omintiye. 
<p><sup>10</sup> Aibogini, tabe mono kiye kinape mono tisa kinape mima kamanapa aeka esegima otantawe. 
<p><sup>11</sup> Piya, Erotibe irebu kinaꞌwape igeba Isu to kake karana atama ata kamana otamagini, waꞌega kai ka maema amitamagini, Pairatiti to kake aꞌwae puma agarubuguni ababute wantawe. 
<p><sup>12</sup> Pigoya Pairatibe Erotibe isigeba paipa isimoꞌenabi mintantamekinisi, pi ntaga isiyoꞌena puma paru puntase. Pairati maripora aegukena kamana untiye 
<p><sup>13</sup> Pigoya Pairatiba tabe mono kiye kinape to kaꞌisa kiye kinape wa wayape igegaꞌe yogini kanama aki puntawe. 
<p><sup>14</sup> Piya puguna aeba maya uwaimintiye: Tigeba ma ntagaraba naeti ababute kanamagiri maya yewe: Aeba wa waya akayuma kamana uwaimiye, yega, naeba pi kamanaka tige tiyobi abigaopa, kapa tige ota nkaiboꞌenawapa kampagi aborauwe. 
<p><sup>15</sup> Piya, Eroti pabiyama aguyosakate, to kake umagina agarubagiri aꞌwae puma to naeti ababute kanawe. Abewo. Purikena awametapa kaꞌenaba kampa puntiye. 
<p><sup>16</sup> Pika naeba yekini, irebu kinaꞌmi eru kasutasa aeguma airisa kasaigina pi kamanaꞌwapa aꞌya wakiye, piya untiye. 
<p><sup>17</sup> (Piya, pi ntaninta nakena yagaba aeba igaꞌnabisa ka yagara iyoba atami puntiye.) 
<p><sup>18</sup> Piya yogini, aꞌyaꞌma pi kina igeba tabe kamana kaga umagini maya untawe: Aeguyegana pureno. Parabasi aepa igaꞌnabisa iyoba tamo untawe. 
<p><sup>19</sup> Pigoya, Parabasi aeba kaꞌisa kinaꞌmige kamana akayuma maꞌena pumagina wasana ka aeguma kaiyogini igaꞌna namapi atantaka, piya untawe. 
<p><sup>20</sup> Pigoya, Pairati aeba to kake maya uwaimintiye: Isu uwa atakana wasanaga nabiye untiye. 
<p><sup>21</sup> Piya yogini igeba to kake esegimagini: Maripora aeguyegana pureno. Aeguyegana pureno, untawe. 
<p><sup>22</sup> Piya yuguna Pairati kamanaꞌwai akaꞌi yogana kakagaena pogana, maya uwaimintiye: Aeba nana kamparagaenaba pegiri aegukena pewe. Naeba aboganaba ataenawaka purikena awametapa kampa piye. Aibegi, yekini eru kasutasa aegugasigina uwa mikiye, piya untiye. 
<p><sup>23</sup> Pigoya, igeba esegima to kake tabe kamana umagini imo kamana uma maya untawe: Maripora aeguyegana pureno, untawe. Piya aꞌyugu kamana umagini kiya yagarama kamana aeguntawe. 
<p><sup>24</sup> Piya puguna pi kamana abiwaemima Isu purenema uma aꞌya atantiye. 
<p><sup>25</sup> Piya, kamanaꞌwai wasimagina wasana aeguma kaiyogini igaꞌna namapi atanta ntagara, aepa iyoba imintana, Isupa ige yumesa puma irebu kina imintiye. Isu maripora aeguyuguna purintiye 
<p><sup>26</sup> Pigoya, igeba Isu ababute keꞌi wama wasana ka uma abatantawe. Kana yagarama nkagewapa Saimoni, aeba Sairini kumatasa yagarawe. Aeba torisa kanaogini arakuꞌma Isunta maripo maema aesaga atauguna aesagabite Isu nkakaꞌi wantiye. 
<p><sup>27</sup> Pigoya wasana wabe wayape uwoma kina kaga iyegaꞌma wantawe. Pigoya, uwoma waeꞌmiba intara puma kubeꞌena puma potantawe. 
<p><sup>28</sup> Piya puguna, Isu aꞌwae puma maya uwaimintiye: Yerusaremi kumatasa wae, tigeba naeka kubeꞌenaba a-piyo. Tigeba yagararike tigerikeka kubeꞌenaba piyo. 
<p><sup>29</sup> Abewo. Ainti ka kana aborakiripa maya ukibewe: We, anamo waepe ibaꞌwaepe yagara nono kampa iminta waepe igeba iꞌmu piyo, ukibewe. 
<p><sup>30</sup> Piya, pi ata yagaba amuꞌwamakaba: Tigabaꞌma tumima tatikaeyo, untiri, Aꞌabiwamakaba kuya mpaema tapaso, ukibewe. 
<p><sup>31</sup> We, aoso ya airakuyesa puma naepa naeguntiri, asa yaba aya puwaitakibewe, Isu piya untiye. 
<p><sup>32</sup> Pigoya ata pusume yagara tara aeke kaga iyegukena ibabute wantawe. 
<p><sup>33</sup> Piya wama, maba ka agawapa Aꞌno nkayampu, pitaꞌi irosaꞌma Isu maripora aeguntawe. Pigoya ata pusume ntagara ayatakanti kapa aeguntini to kapa ayakeꞌmasi aeguntini puntawe. 
<p><sup>34</sup> Pigoya, Isu mayama nunamu untiye: Nabanempa, igeba nae agoga kampagini abintini maya pewe. Pika ataena punatantanawaipa mae igaso, untiye. Pigoya, irebu kinaꞌmi kaiwapa atuguguna abakapisa ataꞌurite teteꞌena puma amaeri ampaeri puntawe. 
<p><sup>35</sup> Pigoya, wasanaba uwoma kina mimagini pintanaba agawaeyuguni, kiya kina igeba ka abiꞌma ata potama maya untawe: Wasanami kaꞌisa kina iyoꞌmaeyamisa puma aeꞌwa nkaupa aoꞌmaeyano. Piya, aeba Karaisiti, Koti utaratanti ntagara mintanaba piya peno, untawe. 
<p><sup>36</sup> Piya yuguni, irebu kina igeba pabiyamagini aeguma, karana atamagini, asa wani amikena puntini maya untawe: 
<p><sup>37</sup> Kaeba Yutiya kinaꞌmi Nkwaꞌega yagara mintanapa, kaeka kaupa auꞌiyo, untawe. 
<p><sup>38</sup> Pigoya, aꞌnotapa kamana awaꞌena mayama kaentawe: Ma ntagara aeba Yutiya kinaꞌmi Nkwaꞌega yagarawema kaentawe. 
<p><sup>39</sup> Pigoya, ataena punti agunta yagara kaꞌwaina maripora mintana iyoꞌmaemagina ka abiꞌma maya untiye: Kaeba piyamagaba Karaisitigawo. Kaeka kaukapa iyobaꞌatantana tasigepa pabiyama kaga iyoba tasitao, untiye. 
<p><sup>40</sup> Piya yogana, to ka ataena punti ntagarama aepa ka abiꞌma maya untiye. Kotigaba kampa kaekuru pegina piyaba yeno: Aege kuntaenaba ka awameta ago maeyune. 
<p><sup>41</sup> We, tasigeba aguntaenaresika umagini kanara mantanaba purasitawe. Aepa aguntaenawa kampa wainta yagara uwa yagara aeguyewe, untiye. 
<p><sup>42</sup> Piya untana, to Isuka maya untiye: Isu, kaeba Waꞌega yagara aintiba irosaꞌma naeka napiyo, untiye. 
<p><sup>43</sup> Piya yogana Isu maya omintiye: Naeba taga ugamekana abo: Ibanto naege Paratisibi nauka yugabi ampikibene, untiye. Isu purintiye 
<p><sup>44</sup> Pigoya, kagi abebe papa ibimagina aꞌyaꞌma maba tunusuma waintogana atamaisantiye. 
<p><sup>45</sup> Pigoya, tabe mono namapi Koti aukaꞌi tabe kairasa akumparanta pipa abakapisa atuꞌwantiye. 
<p><sup>46</sup> Atuꞌwaogana Isu aeba esegima kegaꞌe umagina: Naba, naumanepa kae kayapi atauwe, untiye. Piya utegina purintiye. 
<p><sup>47</sup> Pigoya, irebu kinaꞌmi kiya kaꞌwaina aeba pintana agama abitegina, Koti aꞌmu potama maya untiye: Ma ntagara aeba taga aguntaenawa kampa waima aogi yagarawe, untiye. 
<p><sup>48</sup> Pigoya, wasana aꞌyaꞌma pintana agakena kanama ampaki punta kinaꞌmiba agama abitegini, intara purite aꞌwae puma waꞌewaiti wantawe. 
<p><sup>49</sup> Pigoya, aꞌyaꞌma Isu nkaokinape Karariya marisa aegaꞌma kananta wayape igeba pagasara mimagini pintana pumepa agantawe. Isu kaitantawe 
<p><sup>50</sup> Pigoya, Yutiya marasa Arimatiya kumatasa yagara ka mintantiye. Agewapa Yosepe, aeba mono kanisore akiyenabisa yagara mintanta, arupu agu yagara mintantiye. 
<p><sup>51</sup> Pigoya, aokinaꞌmi igeba Isu kamana otama aeguyugunaba, aeba aboganaba kampa aogi puntiye. Kampaye. Pi ntagara aeba Koti kabiratakenaena aborakana agakena agawa puma mintantiye. 
<p><sup>52</sup> Pi ntagara aeba Pairatiti wama Isu au maekena wantiye. 
<p><sup>53</sup> Pigoya aeba wama abigaogana, owe otaogana wama mariporasa uma akita urite wae kairasa asaentiye. Asaerite wama yaba mpabi wasana aru ka kuꞌmaranta, pitaꞌi Isu metantiye. Pi kana yaba nkaru kaba kasaꞌena waintantiye. Pitaꞌiba paipa wasanaba kampa kaintati uma kaintawe. 
<p><sup>54</sup> Pigoya pi ntagaba sabatira nakena naninta maema aiꞌaru pikena kana aꞌya wakena pemikana: Sabati aborakiye, utegini Isu karuꞌena maema kaintawe. 
<p><sup>55</sup> Piya pogini kaꞌisa wae Isuge Karariya marisa kananta waeꞌmi Yosepe aegaꞌma wauguna Isu kabinti metaogini agantawe. 
<p><sup>56</sup> Pigoya pintanaba agategini, waꞌeri aꞌwae puma kanama aogi agunta masawae Isu paiꞌatakena ampa maema yokege puntawe. Piya pumagini, pi sabati tonaentisa kaꞌumaema yagaba, mono ago kamana aegaꞌma abimagini uwa atate mintantawe.<p/>
<h4>24</h4>
<p><sup>1</sup> Pigoya, sontara abaya ase marogini, waya igeba aogi agunta masawae maerite wasana aruri wantawe. 
<p><sup>2</sup> Wama irosaꞌma agaomepa, yaba kabiba aꞌwaewaogana uwa waintantiye. 
<p><sup>3</sup> Pigoya, pi kana wasana arubinti uma paiꞌmagini Waꞌegawama nkauꞌwaka aguyosaꞌma kampa agantawe. 
<p><sup>4</sup> Aguyosakategini pami puma mintuguna, tara yagarara kaiwaisipa waentana puwama pa kasa puwanta yagara tara igora ampa aborama mintantase. 
<p><sup>5</sup> Aibusuguni, waya igeba iyekuru puma parokaema mintugunisi pi ntagarara isigeba mayama uwaimintase: Tigeba nana piyemagiri aoganta kinakaba purinta kinaꞌmitiba aguyosagawe. 
<p><sup>6</sup> Aeba mataꞌiba kampa mintiye. Ago aogama asiwaye. Karariya mari mintana kamana mayama urimintemi, pika napiyiyo: 
<p><sup>7</sup> Nabanempaba Wasanama Ntagara naepa aru kinaꞌmiti unatakini maripora naeguyigi, papa kakaga peka naogama asikuwe, Isu untiye. Pika napiyiyo, uwaimintase. 
<p><sup>8</sup> Piya yusuguni, waya igeba pi kamanawapa napintini, 
<p><sup>9</sup> wasana arurisa aꞌwae puma waꞌeri wama abagi kinaꞌwa nagisarisa ka tumpaema kinape to kaꞌisa wabe wayape kana kamana uwaimintawe. 
<p><sup>10</sup> Pigoya, pi kana waeꞌmi nkigewaipa Mariya Matara kumatasa waena, Yowanawa, to Mariya aeba Yemisi anowampawa, to kaꞌisa igege kaga miyume waena sumagini, igeba aposoro awaga kamana uwaimintawe. 
<p><sup>11</sup> Uwaimuguna pi kamana abugunaba, kampari kamana kanta pogini kampa aogima abibebe puntawe. 
<p><sup>12</sup> Pi kamanaꞌama yuguna, Pita aeba abitegina karuꞌena wasana aruri wama ama irosaꞌmagina kana ka awara ibikamagina agabinti agaumepa, kai ae amana pipi waintogana agategina uwoma agi napiritegina waꞌeri aꞌwae puma kanantiye. Tara yagararami Emaosi kiꞌi wama Isu agantase 
<p><sup>13</sup> Pigoya, pabi ntaga Isu nkaokina igetisa tara yagararamisi Emaosi kumati wakena wantase. Pi kumati Yerusaremi kumatasaba wamagini nayataraꞌmu kiromita uma irosa puntawe. 
<p><sup>14</sup> Pigoya isigeba keꞌi wantinisi pintana aborantika kamana uma abigamaka puntase. 
<p><sup>15</sup> Piya utaginisi wausuguna, Isu aewapa isikaꞌi aboraogini kaga wantawe. 
<p><sup>16</sup> Pigoya isiyoba airari kaegasoginisi kampa aepa aogima agama napintase. 
<p><sup>17</sup> Piya pusuguna isibigama maya untiye: Tisigeba nana kamana uma abita kanase, untiye. Yoginisi, isintara pumaginisi isiyowawamaba murise puma mintantase. 
<p><sup>18</sup> Piya puntirisi isigetisa ka yagara agewapa Kiriyopasi aeba mayama Isu kamana antota aꞌwae puma maya omintiye: Kaeba kampa abeno. Yerusaremi kumati ibasa yaga uwoma kina irosaꞌmagini kana kinaꞌmi tabe kamana aboragini abiwaemagini mintagana, kae kaꞌwainaga ayama kampa abinta mintanema, abigantiye. 
<p><sup>19</sup> Piya yogana aeba: Nanaena aborayema, isibigaoginisi isigeba maya omintase: Pi Isu Nasareti kumatasa, ae kamanane. Aeba tabe poropete yagara mima Koti nkaobipe aꞌyaꞌma wasanama nkiyobipe esegiyena puma miyi ntagarawe. 
<p><sup>20</sup> Pigoya, tabe mono kiye kinatepe kabiye kinatempibe uma kiya yagarama nkayapi aegukena atagana, maripora aeguma kitauguna purintiye. 
<p><sup>21</sup> Piya, taeba aeka napi napi puma: Aeba Isureyo kina taeba ataenabisa tauꞌima taba puratakiyema ago napintompene. Piyama napiyokini aeguyegana puꞌwagi, mintokana kakaga yaga aꞌya puwaye. Pipa ayabayawe. 
<p><sup>22</sup> Pigoya, ibaba taetisa kaꞌisa wae igeba taekuru kamana uramewe. Igeba abaya aseka wasana aruri wama uma agapa, 
<p><sup>23</sup> Isu nkauꞌwa kampa waintegini uma aguyosakate aꞌwae puma kanama maya yewe: Enisore tara aboraramima: Isu aogama ago asiwaye, piyama uramese. 
<p><sup>24</sup> Piya, pi kamanapa abima taetisa kaꞌisa taokina igeba wama wayaꞌmi yesa pumagini uma agapa, aeꞌwapa kampagini agawe, piya omintase. 
<p><sup>25</sup> Piya omusuguna aeba maya uwaisimintiye: We, tisigeba kampa abeso. Poropete kinaꞌmi kamana kaemarantapa, tigeba nana piyema aiboꞌenaba puma kampa aogima abibebe pewe, a. 
<p><sup>26</sup> Piya, Karaisiti aeba ayamagina kampa puremisinta manta eꞌwasaenama nkagupipa uma pasisine. Pipa aeba tagane, uwaimintiye. 
<p><sup>27</sup> Piya umagina, Mosese kamanape poropete kinaꞌmi kamanape aꞌyaꞌma aeka uma kaemaranta kamana amato pumagina kana kamana agoba kaga uwaisimiwaentiye. 
<p><sup>28</sup> Pigoya, igeba wama wakena pume kumati irosantawe. Pigoya, Isu aeba kumapa agaitegina wakena poginisi, 
<p><sup>29</sup> isigeba arakuꞌma maya untase: Ago pankaoba pasikena puma ase ikena piye. Kaeba tasigege mata miyo, untase. Pigoya, isigege mikenaga owe yoginisi, namapinti kaga intawe. 
<p><sup>30</sup> Pigoya naninta nakena maraꞌmimagina pareti maema aꞌmu potama ako puma isimintiye. 
<p><sup>31</sup> Piya pogana, isiyowamaba araoginisi Isu agabebe pusuguna, pabigo Isu kaka wantiye. 
<p><sup>32</sup> Aiboginisi, isigeba pi kamanapa uma abigamaka puma maya untase: Keꞌi kamana urasimintana mono ago urasimeginaba tasintama abarutama aogi pemi kamana iye. 
<p><sup>33</sup> Piya umaginisi, pabi ntaga asima to kake Yerusaremi kumati aꞌwae puma wantase. Wama uma irosaꞌma aeꞌwa nkabagi kina nagisarisa ka tumpaema kinape to kaꞌisa iyokinape aki puma mintuguna uma ibatantase. 
<p><sup>34</sup> Piya pusugini igeba to kamana mayama uwaisimintawe: Waꞌega aeba taga asiwagina Saimoni agaye, untawe. 
<p><sup>35</sup> Piya yugunisi, isigeba: Pabiyama Waꞌegawama keꞌi aborarasimima wama namapinti pareti maema aꞌmu potama apako pegira tasigeba ago agause, piya uma uwaimintase. Abagi kinaꞌmi Isu agantawe 
<p><sup>36</sup> Pigoya, abagi kina igeba pi kamana uma mintuguna, Isu aewa abakankaipi aborantiye. 
<p><sup>37</sup> Piyama aboraogini, igeba agamagini pami puma iyekura puma: Kewama aboraye, untawe. 
<p><sup>38</sup> Piya yuguna Isu maya uwaimintiye: Tigeba nanaga tiyekuru puma tiguꞌamaba tara tara piye, a. 
<p><sup>40</sup> 
<p><sup>39</sup> Mapa naene mintuwe. Tigeba nagisa nayapa agaiyo. Piya pumagiri kanama nauta aukaya puma nagaiyo. Naeꞌne ntauꞌnentagane. Nae nagasa piyo. Piya, ke kinaꞌma awasebe ayampube kampa waintiye, umagina agisa ayapa uma iyakintiye. 
<p><sup>41</sup> Piya pogana, igeba intawama aogi pogini kamanaꞌwapa kampa abinta, uwa napi napi puma iꞌmu puma mintuguna: Nanintaripa kaꞌisa waintiyo, untiye. 
<p><sup>42</sup> Piya yogini igeba inoyanta kaemaranta amuguna, 
<p><sup>43</sup> aeba maema naogini agantawe. 
<p><sup>44</sup> Pigoya, to ka maya uwaimintiye: Naeba tigege mima maya uma uwaimima mibuntone: Mosese kamanapipe poropete kinaꞌmi kamanapipe Samu ini isapipe aꞌyaꞌma naeka meto kamana kaemaranta, pipa tagantana puwaikiye, urimintone, untiye. 
<p><sup>45</sup> Piya uma pi mono agowapa uma aborawaimogini abintawe. 
<p><sup>46</sup> Aibuguna to maya uwaimintiye: Karaisiti naekaba mayama kaemarantane: Aeba auki nakiyena puma puꞌma, puꞌwakibipisa papa kakaga pekana aogama asiwakiye. 
<p><sup>47</sup> Piya pekini aokinaꞌmi awaga kamana uma aꞌyaꞌwaema marisa kina mono uwaimima, igu aꞌwae puma aguntaenawaipa uma asuꞌa pikenaena aborano, uwaimikena wakibewe, mayama kaemarantane. Piya, pi kamana uwaimikena yugaba Yerusaremi kumatasa agobiritegiri wagana kana pubewe. 
<p><sup>48</sup> Piya tigeba aogi kamanaꞌne uwaimikena kinaꞌnepa tigewe. 
<p><sup>49</sup> Pigoya abewo. Nabanempa kaꞌena timikenaga untemika otaꞌkana tumikiye. Pika tigeba ma kumapa a-nkatantiri uwa agawa puma mintigina inatisa esegiyena tigeta tumekiri wama aogi piyo, piya uwaimintiye. Isu mantari intiye 
<p><sup>50</sup> Pigoya pi kamana ugaitegina, waꞌerisa ibabute wama Petani kuma agora uma irosaꞌma aya nkasabuma: Aogima miyiyo, uma aꞌmu puwaitantiye. 
<p><sup>51</sup> Piyama aꞌmu puwaitategina itate intiye. 
<p><sup>52</sup> Piya pogini, igeba tabera iꞌmuntana purite Yerusaremi kumati aꞌwae puma wama, 
<p><sup>53</sup> tabe mono namapi asi nasi uma mima Koti iꞌmu potantawe.<p/>